𑀔𑀦𑁆𑀥𑀓𑀧𑀼𑀘𑁆𑀙𑀸𑀓𑀣𑀸𑀯𑀡𑁆𑀡𑀦𑀸

𑁩𑁦𑁦. 𑀲𑁂𑀲𑁂𑀲𑀽𑀢𑀺 𑀅𑀪𑀩𑁆𑀩𑀧𑀼𑀕𑁆𑀕𑀮𑀧𑀭𑀺𑀤𑀻𑀧𑀓𑁂𑀲𑀼 𑀲𑀩𑁆𑀩𑀧𑀤𑁂𑀲𑀼.

𑁩𑁦𑁨. ‘‘𑀦𑀲𑁆𑀲𑀦𑁆𑀢𑀼 𑀏𑀢𑁂’’𑀢𑀺 𑀧𑀤𑀘𑁆𑀙𑁂𑀤𑁄. 𑀧𑀼𑀭𑀓𑁆𑀔𑀓𑀸𑀢𑀺 𑀏𑀢𑁆𑀣 𑀲𑀸𑀫𑀺𑀅𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀪𑁂𑀤𑀧𑀼𑀭𑁂𑀓𑁆𑀔𑀓𑀲𑁆𑀲, 𑀪𑁂𑀤𑀧𑀼𑀭𑁂𑀓𑁆𑀔𑀓𑀸𑀬𑀸𑀢𑀺 𑀅𑀢𑁆𑀣𑁄.

𑁩𑁦𑁩. 𑀲𑁂𑀲𑁂𑀲𑀽𑀢𑀺 𑀅𑀯𑀲𑁂𑀲𑁂𑀲𑀼 𑀅𑀲𑀁𑀯𑀸𑀲𑀓𑀸𑀤𑀺𑀤𑀻𑀧𑀓𑁂𑀲𑀼 𑀧𑀝𑀺𑀓𑁆𑀔𑁂𑀧𑀧𑀤𑁂𑀲𑀼.

𑁩𑁦𑁪. 𑀏𑀓𑀸𑀯 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀯𑀼𑀢𑁆𑀢𑀸𑀢𑀺 𑀯𑀲𑁆𑀲𑀁 𑀅𑀦𑀼𑀧𑀕𑀫𑀦𑀸𑀤𑀺𑀧𑀘𑁆𑀘𑀬𑀸 𑀚𑀸𑀢𑀺𑀢𑁄 𑀏𑀓𑀸𑀯 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀯𑀼𑀢𑁆𑀢𑀸.

𑁩𑁦𑁫. 𑀉𑀧𑁄𑀲𑀣𑀲𑀫𑀸 𑀫𑀢𑀸𑀢𑀺 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀲𑀤𑀺𑀲𑀸 𑀚𑀸𑀢𑀸 𑀆𑀧𑀢𑁆𑀢𑀺𑀬𑁄 𑀫𑀢𑀸 𑀅𑀥𑀺𑀧𑁆𑀧𑁂𑀢𑀸.

𑁩𑁦𑁬. 𑀘𑀫𑁆𑀫𑁂𑀢𑀺 𑀘𑀫𑁆𑀫𑀓𑁆𑀔𑀦𑁆𑀥𑀓𑁂. 𑀯𑀘𑁆𑀙𑀢𑀭𑀺𑀁 𑀕𑀳𑁂𑀢𑁆𑀯𑀸 𑀫𑀸𑀭𑁂𑀦𑁆𑀢𑀸𑀦𑀁 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀧𑀸𑀘𑀺𑀢𑁆𑀢𑀺 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀘𑁆𑀙𑀢𑀭𑀺𑀦𑁆𑀢𑀺 𑀩𑀮𑀲𑀫𑁆𑀧𑀦𑁆𑀦𑀁 𑀢𑀭𑀼𑀡𑀕𑀸𑀯𑀺𑀁. 𑀲𑀸 𑀳𑀺 𑀯𑀘𑁆𑀙𑀓𑀪𑀸𑀯𑀁 𑀢𑀭𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 ‘‘𑀯𑀘𑁆𑀙𑀢𑀭𑀻’’𑀢𑀺 𑀯𑀼𑀘𑁆𑀘𑀢𑀺.

𑁩𑁦𑁭. 𑀅𑀗𑁆𑀕𑀚𑀸𑀢𑀁 𑀙𑀼𑀧𑀦𑁆𑀢𑀲𑁆𑀲𑀸𑀢𑀺 𑀕𑀸𑀯𑀻𑀦𑀁 𑀅𑀗𑁆𑀕𑀚𑀸𑀢𑀁 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑁂𑀦 𑀩𑀳𑀺 𑀙𑀼𑀧𑀦𑁆𑀢𑀲𑁆𑀲. 𑀲𑁂𑀲𑁂𑀲𑀽𑀢𑀺 𑀕𑀸𑀯𑀻𑀦𑀁 𑀯𑀺𑀲𑀸𑀡𑀸𑀤𑀻𑀲𑀼 𑀕𑀳𑀡𑁂, 𑀧𑀺𑀝𑁆𑀞𑀺𑀅𑀪𑀺𑀭𑀼𑀳𑀡𑁂 𑀘. 𑀬𑀣𑀸𑀳 ‘‘𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀘𑀺𑀭𑀯𑀢𑀺𑀬𑀸 𑀦𑀤𑀺𑀬𑀸 𑀕𑀸𑀯𑀻𑀦𑀁 𑀢𑀭𑀦𑁆𑀢𑀻𑀦𑀁 𑀯𑀺𑀲𑀸𑀡𑁂𑀲𑀼𑀧𑀺 𑀕𑀡𑁆𑀳𑀦𑁆𑀢𑀻’’𑀢𑀺𑀆𑀤𑀺 (𑀫𑀳𑀸𑀯. 𑁨𑁫𑁨).

𑁩𑁦𑁯. 𑀢𑀢𑁆𑀣 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁂. 𑀲𑀸𑀫𑀦𑁆𑀢𑀸 𑀤𑁆𑀯𑀗𑁆𑀕𑀼𑀮𑁂𑀢𑀺 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀸𑀦𑀁 𑀲𑀸𑀫𑀦𑁆𑀢𑀸 𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑁂 𑀧𑀤𑁂𑀲𑁂. 𑀲𑀢𑁆𑀣𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀫𑀼𑀤𑀻𑀭𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀬𑀣𑀸𑀳 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑀸𑀥𑀲𑁆𑀲 𑀲𑀸𑀫𑀦𑁆𑀢𑀸 𑀤𑁆𑀯𑀗𑁆𑀕𑀼𑀮𑁂 𑀲𑀢𑁆𑀣𑀓𑀫𑁆𑀫𑀁 𑀯𑀸 𑀯𑀢𑁆𑀣𑀺𑀓𑀫𑁆𑀫𑀁 𑀯𑀸 𑀓𑀸𑀭𑁂𑀢𑀩𑁆𑀩𑀁, 𑀬𑁄 𑀓𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁭𑁯). 𑀏𑀢𑁆𑀣 𑀘 ‘‘𑀲𑀸𑀫𑀦𑁆𑀢𑀸 𑀤𑁆𑀯𑀗𑁆𑀕𑀼𑀮𑁂’’𑀢𑀺 𑀇𑀤𑀁 𑀲𑀢𑁆𑀣𑀓𑀫𑁆𑀫𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀢𑁆𑀣𑀺𑀓𑀫𑁆𑀫𑀁 𑀧𑀦 𑀲𑀫𑁆𑀩𑀸𑀥𑁂𑀬𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀁.

‘‘𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑁆𑀭 𑀦𑀺𑀫𑀦𑁆𑀢𑀺𑀢𑁂𑀦 𑀅𑀜𑁆𑀜𑀲𑁆𑀲 𑀪𑁄𑀚𑁆𑀚𑀬𑀸𑀕𑀼 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸, 𑀬𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁨𑁮𑁩) 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀪𑁄𑀚𑁆𑀚𑀬𑀸𑀕𑀽𑀲𑀼 𑀧𑀸𑀘𑀺𑀢𑁆𑀢𑀻’’𑀢𑀺. 𑀏𑀢𑁆𑀣 𑀘 𑀪𑁄𑀚𑁆𑀚𑀬𑀸𑀕𑀼 𑀦𑀸𑀫 𑀩𑀳𑀮𑀬𑀸𑀕𑀼. ‘‘𑀧𑀺𑀡𑁆𑀟𑀁 𑀯𑀝𑁆𑀝𑁂𑀢𑁆𑀯𑀸 𑀧𑀸𑀢𑀩𑁆𑀩𑀬𑀸𑀕𑀽’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀧𑀸𑀘𑀺𑀢𑁆𑀢𑀻𑀢𑀺 𑀧𑀭𑀫𑁆𑀧𑀭𑀪𑁄𑀚𑀦𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑁂𑀳𑀺 𑀧𑀸𑀘𑀺𑀢𑁆𑀢𑀺. 𑀲𑁂𑀲𑁂𑀲𑀽𑀢𑀺 𑀅𑀦𑁆𑀢𑁄𑀯𑀼𑀢𑁆𑀣𑀅𑀦𑁆𑀢𑁄𑀧𑀓𑁆𑀓𑀲𑀬𑀁𑀧𑀓𑁆𑀓𑀧𑀭𑀺𑀪𑁄𑀕𑀸𑀤𑀻𑀲𑀼. 𑀬𑀣𑀸𑀳 ‘‘𑀦, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑁄𑀯𑀼𑀢𑁆𑀣𑀁 𑀅𑀦𑁆𑀢𑁄𑀧𑀓𑁆𑀓𑀁 𑀲𑀸𑀫𑀁𑀧𑀓𑁆𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁, 𑀬𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀆𑀤𑀺 (𑀫𑀳𑀸𑀯. 𑁨𑁭𑁪).

𑁩𑁧𑁦. 𑀘𑀻𑀯𑀭𑀲𑀁𑀬𑀼𑀢𑁆𑀢𑁂𑀢𑀺 𑀘𑀻𑀯𑀭𑀓𑁆𑀔𑀦𑁆𑀥𑀓𑁂.

𑁩𑁧𑁩. 𑀘𑀫𑁆𑀧𑁂𑀬𑁆𑀬𑀓𑁂 𑀘 𑀓𑁄𑀲𑀫𑁆𑀩𑁂𑀢𑀺 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁂 𑀘𑁂𑀯 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁂 𑀘. ‘‘𑀓𑀫𑁆𑀫𑀲𑁆𑀫𑀺’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁩𑁧𑁭. 𑀭𑁄𑀫𑀦𑁆𑀣𑁂𑀢𑀺 𑀪𑀼𑀢𑁆𑀢𑀲𑁆𑀲 𑀮𑀳𑀼𑀁 𑀧𑀸𑀓𑀢𑁆𑀢𑀸𑀬 𑀓𑀼𑀘𑁆𑀙𑀺𑀕𑀢𑀁 𑀫𑀼𑀔𑀁 𑀆𑀭𑁄𑀧𑁂𑀢𑁆𑀯𑀸 𑀲𑀡𑁆𑀳𑀓𑀭𑀡𑀯𑀲𑁂𑀦 𑀅𑀦𑀼𑀘𑀸𑀮𑀦𑁂.

𑁩𑁧𑁮. 𑀲𑁂𑀦𑀸𑀲𑀦𑀲𑁆𑀫𑀺𑀦𑁆𑀢𑀺 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂. 𑀕𑀭𑀼𑀦𑁄𑀢𑀺 𑀕𑀭𑀼𑀪𑀡𑁆𑀟𑀲𑁆𑀲.

𑁩𑁨𑁦. 𑀲𑀗𑁆𑀖𑀪𑁂𑀤𑁂𑀢𑀺 𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑁂.

𑁩𑁨𑁧. 𑀪𑁂𑀤𑀸𑀦𑀼𑀯𑀢𑁆𑀢𑀓𑀸𑀦𑀦𑁆𑀢𑀺 𑀲𑀗𑁆𑀖𑀪𑁂𑀤𑀸𑀦𑀼𑀯𑀢𑁆𑀢𑀓𑀸𑀦𑀁. 𑀕𑀡𑀪𑁄𑀕𑁂𑀢𑀺 𑀕𑀡𑀪𑁄𑀚𑀦𑁂.

𑁩𑁨𑁨. 𑀲𑀸𑀢𑀺 𑀏𑀢𑁆𑀣 𑀲𑀩𑁆𑀩𑀯𑀢𑁆𑀢𑁂𑀲𑀼 𑀅𑀦𑀸𑀤𑀭𑀺𑀬𑁂𑀦 𑀳𑁄𑀢𑀻𑀢𑀺 𑀲𑁂𑀲𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀇𑀢𑀺 𑀉𑀢𑁆𑀢𑀭𑁂 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸

𑀔𑀦𑁆𑀥𑀓𑀧𑀼𑀘𑁆𑀙𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.