𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁄

𑁧𑁭𑁦. 𑀯𑀺𑀦𑀬𑀲𑁆𑀲 𑀯𑀺𑀦𑀺𑀘𑁆𑀙𑀬𑁂 𑀪𑀺𑀓𑁆𑀔𑀽𑀦𑀁 𑀧𑀸𑀝𑀯𑀢𑁆𑀣𑀸𑀬𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀝𑀯𑀲𑁆𑀲𑀸𑀧𑀺 𑀢𑀤𑀥𑀻𑀦𑀢𑁆𑀢𑀸 𑀧𑀥𑀸𑀦𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀣 𑀯𑀸 𑀤𑀲𑁆𑀲𑀦𑀮𑀺𑀗𑁆𑀕𑀦𑁆𑀢𑀭𑀲𑀸𑀥𑀸𑀭𑀡𑀢𑁆𑀢𑁂 𑀇𑀘𑁆𑀙𑀺𑀢𑁂 𑀧𑀼𑀮𑁆𑀮𑀺𑀗𑁆𑀕𑁂𑀦, 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀯𑀸 𑀦𑀺𑀤𑁆𑀤𑁂𑀲𑁄 𑀲𑀤𑁆𑀤𑀲𑀢𑁆𑀣𑀸𑀦𑀼𑀬𑁄𑀕𑀢𑁄𑀢𑀺 ‘‘𑀪𑀺𑀓𑁆𑀔𑀽𑀦’’𑀦𑁆𑀢𑀺 𑀧𑀼𑀮𑁆𑀮𑀺𑀗𑁆𑀕𑁂𑀦 𑀯𑀼𑀢𑁆𑀢𑀁.

𑁧𑁭𑁧. 𑀦𑀦𑁆𑀤𑀦𑁆𑀢𑀻 𑀲𑀸𑀤𑀺𑀬𑀦𑁆𑀢𑀻.

𑁧𑁭𑁨. 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂𑀢𑀺 𑀬𑁄𑀚𑀦𑀸. 𑀚𑀸𑀡𑀼𑀲𑁆𑀲 𑀉𑀤𑁆𑀥𑀁, 𑀅𑀓𑁆𑀔𑀓𑀲𑁆𑀲 𑀅𑀥𑁄 𑀕𑀳𑀡𑀁 𑀲𑀸𑀤𑀺𑀬𑀦𑁆𑀢𑀺𑀬𑀸 𑀢𑀲𑁆𑀲𑀸 𑀧𑀸𑀭𑀸𑀚𑀺𑀓𑀦𑁆𑀢𑀺 𑀬𑁄𑀚𑀦𑀸.

𑁧𑁭𑁩. 𑀓𑀸𑀬𑀧𑀝𑀺𑀩𑀤𑁆𑀥𑁂 𑀯𑀸 𑀕𑀳𑀡𑀁 𑀲𑀸𑀤𑀺𑀬𑀦𑁆𑀢𑀺𑀬𑀸 𑀤𑀼𑀓𑁆𑀓𑀝𑀁.

𑁧𑁭𑁪. 𑀯𑀚𑁆𑀚𑀦𑁆𑀢𑀺 𑀅𑀜𑁆𑀜𑀺𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀁.

𑁧𑁭𑁬. 𑀢𑀁 𑀮𑀤𑁆𑀥𑀺𑀦𑁆𑀢𑀺 𑀉𑀓𑁆𑀔𑀺𑀢𑁆𑀢𑀲𑁆𑀲 𑀬𑀁 𑀮𑀤𑁆𑀥𑀺𑀁 𑀅𑀢𑁆𑀢𑀦𑁄 𑀭𑁄𑀘𑁂𑀲𑀺, 𑀢𑀁 𑀮𑀤𑁆𑀥𑀺𑀁 𑀦 𑀦𑀺𑀲𑁆𑀲𑀚𑁆𑀚𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁧𑁭𑁮. ‘‘𑀇𑀥 𑀆𑀕𑀘𑁆𑀙𑀸’’𑀢𑀺 𑀧𑀤𑀘𑁆𑀙𑁂𑀤𑁄. ‘‘𑀯𑀼𑀢𑁆𑀢𑀸 𑀆𑀕𑀘𑁆𑀙𑀢𑀻’’𑀢𑀺 𑀧𑀤𑀘𑁆𑀙𑁂𑀤𑁄.

𑁧𑁭𑁯. 𑀳𑀢𑁆𑀣𑀧𑀸𑀲𑀧𑁆𑀧𑀯𑁂𑀲𑀦𑁂𑀢𑀺 𑀳𑀢𑁆𑀣𑀧𑀸𑀲𑀽𑀧𑀕𑀫𑀦𑁂. ‘‘𑀳𑀢𑁆𑀣𑀕𑀢𑀧𑁆𑀧𑀯𑁂𑀲𑀦𑁂’’𑀢𑀺 𑀯𑀸 𑀧𑀸𑀞𑁄, 𑀲𑁄𑀬𑁂𑀯 𑀅𑀢𑁆𑀣𑁄.

𑀇𑀢𑀺 𑀉𑀢𑁆𑀢𑀭𑁂 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂

𑀧𑀸𑀭𑀸𑀚𑀺𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁮𑁦. 𑀏𑀓𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀝𑁆𑀝𑀓𑀸𑀭𑀲𑁆𑀲 𑀯𑀸. 𑀆𑀭𑁄𑀘𑀦𑁂𑀢𑀺 𑀯𑀢𑁆𑀢𑀩𑁆𑀩𑀲𑁆𑀲 𑀯𑁄𑀳𑀸𑀭𑀺𑀓𑀸𑀦𑀁 𑀦𑀺𑀯𑁂𑀤𑀦𑁂.

𑁧𑁮𑁧. 𑀤𑀼𑀢𑀺𑀬𑀸𑀭𑁄𑀘𑀦𑁂𑀢𑀺 𑀤𑀼𑀢𑀺𑀬𑀲𑁆𑀲, 𑀤𑀼𑀢𑀺𑀬𑀁 𑀏𑀯𑀁 𑀆𑀭𑁄𑀘𑀦𑁂.

𑁧𑁮𑁨. 𑀤𑁆𑀯𑀻𑀳𑀻𑀢𑀺 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺. 𑀓𑀫𑁆𑀫𑀯𑀸𑀘𑁄𑀲𑀸𑀦𑁂𑀢𑀺 𑀓𑀫𑁆𑀫𑀯𑀸𑀘𑀸𑀑𑀲𑀸𑀦𑁂.

𑁧𑁮𑁩. 𑀧𑀭𑀺𑀓𑁆𑀔𑁂𑀧𑁂 𑀅𑀢𑀺𑀓𑁆𑀓𑀦𑁆𑀢𑁂𑀢𑀺 𑀅𑀢𑁆𑀢𑀦𑁄 𑀕𑀸𑀫𑀢𑁄 𑀕𑀦𑁆𑀢𑁆𑀯𑀸 𑀇𑀢𑀭𑀁 𑀕𑀸𑀫𑀁 𑀧𑀯𑀺𑀲𑀦𑁆𑀢𑀺𑀬𑀸 𑀧𑀞𑀫𑁂𑀦 𑀧𑀸𑀤𑁂𑀦 𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑁂 𑀅𑀢𑀺𑀓𑁆𑀓𑀦𑁆𑀢𑁂, 𑀧𑀞𑀫𑀧𑀸𑀤𑁂 𑀧𑀭𑀺𑀓𑁆𑀔𑁂𑀧𑀁 𑀅𑀢𑀺𑀓𑁆𑀓𑀫𑁂𑀢𑁆𑀯𑀸 𑀅𑀦𑁆𑀢𑁄𑀕𑀸𑀫𑀲𑀗𑁆𑀔𑁂𑀧𑀁 𑀕𑀢𑁂𑀢𑀺 𑀅𑀢𑁆𑀣𑁄.

𑁧𑁮𑁪. 𑀤𑀼𑀢𑀺𑀬𑁂𑀦𑀸𑀢𑀺 𑀕𑀸𑀫𑀧𑀭𑀺𑀓𑁆𑀔𑁂𑀧𑀢𑁄 𑀩𑀳𑀺 𑀞𑀺𑀢𑁂𑀦 𑀤𑀼𑀢𑀺𑀬𑀧𑀸𑀤𑁂𑀦. 𑀅𑀢𑀺𑀓𑁆𑀓𑀦𑁆𑀢𑁂𑀢𑀺 𑀢𑀲𑁆𑀫𑀺𑀁 𑀕𑀸𑀫𑀧𑀭𑀺𑀓𑁆𑀔𑁂𑀧𑁂 𑀅𑀢𑀺𑀓𑁆𑀓𑀦𑁆𑀢𑁂, 𑀢𑀲𑁆𑀫𑀺𑀁 𑀧𑀸𑀤𑁂 𑀅𑀦𑁆𑀢𑁄𑀕𑀸𑀫𑀁 𑀧𑀯𑁂𑀲𑀺𑀢𑁂𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀇𑀢𑀺 𑀉𑀢𑁆𑀢𑀭𑁂 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂

𑀲𑀗𑁆𑀖𑀸𑀤𑀺𑀲𑁂𑀲𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁯𑁩. 𑀇𑀳 𑀪𑀺𑀓𑁆𑀔𑀼𑀦𑀻 𑀧𑀢𑁆𑀢𑀲𑀦𑁆𑀦𑀺𑀘𑀬𑀁 𑀓𑀭𑁄𑀦𑁆𑀢𑀻 𑀳𑁄𑀢𑀺, 𑀲𑀸 𑀏𑀓𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁𑀬𑁂𑀯 𑀨𑀼𑀲𑁂𑀢𑀺 𑀬𑁄𑀚𑀦𑀸.

𑁧𑁯𑁪. 𑀅𑀓𑀸𑀮𑀘𑀻𑀯𑀭𑀁 𑀓𑀸𑀮𑀘𑀻𑀯𑀭𑀁 𑀓𑀢𑁆𑀯𑀸 𑀪𑀸𑀚𑀸𑀧𑁂𑀦𑁆𑀢𑀺𑀬𑀸𑀢𑀺 𑀬𑁄𑀚𑀦𑀸. 𑀧𑀬𑁄𑀕𑁂𑀢𑀺 𑀪𑀸𑀚𑀦𑀧𑀬𑁄𑀕𑁂.

𑁧𑁯𑁫. 𑀙𑀺𑀦𑁆𑀦𑁂𑀢𑀺 𑀅𑀘𑁆𑀙𑀺𑀦𑁆𑀦𑁂.

𑁧𑁯𑁬. 𑀢𑀢𑁄 𑀧𑀭𑀦𑁆𑀢𑀺 𑀢𑀢𑁄 𑀧𑀞𑀫𑀢𑁄 𑀅𑀜𑁆𑀜𑀁.

𑀇𑀢𑀺 𑀉𑀢𑁆𑀢𑀭𑁂 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂

𑀦𑀺𑀲𑁆𑀲𑀕𑁆𑀕𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁯𑁯. 𑀮𑀲𑀼𑀡𑀁 𑀔𑀸𑀤𑀢𑀺 𑀘𑁂, 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀨𑀼𑀝𑀸𑀢𑀺 𑀬𑁄𑀚𑀦𑀸.

𑁨𑁦𑁦. 𑀧𑀬𑁄𑀕𑁂𑀢𑀺 𑀲𑀁𑀳𑀸𑀭𑀸𑀧𑀦𑀧𑀬𑁄𑀕𑁂. 𑀲𑀁𑀳𑀝𑁂𑀢𑀺 𑀅𑀢𑁆𑀢𑀦𑀸 𑀲𑀁𑀳𑀝𑁂, 𑀧𑀭𑁂𑀦 𑀲𑀁𑀳𑀭𑀸𑀧𑀺𑀢𑁂 𑀘 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺 𑀳𑁄𑀢𑀺.

𑁨𑁦𑁧. 𑀓𑀢𑁂𑀢𑀺 𑀢𑀮𑀖𑀸𑀢𑁂 𑀓𑀢𑁂.

𑁨𑁦𑁨. 𑀚𑀢𑀼𑀦𑀸 𑀫𑀝𑁆𑀞𑀓𑀦𑁆𑀢𑀺 𑀚𑀢𑀼𑀦𑀸 𑀓𑀢𑀁 𑀫𑀝𑁆𑀞𑀤𑀡𑁆𑀟𑀓𑀁. ‘‘𑀤𑀼𑀓𑁆𑀓𑀝𑀁 𑀆𑀤𑀺𑀦𑁆𑀦𑁂’’𑀢𑀺 𑀧𑀤𑀘𑁆𑀙𑁂𑀤𑁄.

𑁨𑁦𑁪. 𑀪𑀼𑀜𑁆𑀚𑀫𑀸𑀦𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑀧𑀸𑀲𑁂𑀢𑀺 𑀬𑁄𑀚𑀦𑀸. 𑀳𑀺𑀢𑁆𑀯𑀸 𑀳𑀢𑁆𑀣𑀧𑀸𑀲𑀁.

𑁨𑁦𑁫. 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀅𑀦𑁆𑀢𑀫𑀲𑁄 𑀫𑀸𑀢𑀭𑀫𑁆𑀧𑀺 𑀬𑀸𑀘𑀺𑀢𑁆𑀯𑀸. 𑀅𑀚𑁆𑀛𑁄𑀳𑀸𑀭𑁂 𑀧𑀸𑀘𑀺𑀢𑁆𑀢𑀺𑀁 𑀤𑀻𑀧𑀬𑁂𑀢𑀺 𑀬𑁄𑀚𑀦𑀸.

𑁨𑁦𑁬. 𑀉𑀘𑁆𑀘𑀸𑀭𑀸𑀤𑀺𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀺𑀖𑀸𑀲𑀲𑀗𑁆𑀓𑀸𑀭𑀫𑀼𑀢𑁆𑀢𑀸𑀦𑀁 𑀕𑀳𑀡𑀁.

𑀮𑀲𑀼𑀡𑀯𑀕𑁆𑀕𑀯𑀡𑁆𑀡𑀦𑀸 𑀧𑀞𑀫𑀸.

𑁨𑁦𑁯. 𑀇𑀥 𑀇𑀫𑀲𑁆𑀫𑀺𑀁 𑀭𑀢𑁆𑀢𑀦𑁆𑀥𑀓𑀸𑀭𑀯𑀕𑁆𑀕𑁂. 𑀧𑀞𑀫𑁂, 𑀤𑀼𑀢𑀺𑀬𑁂, 𑀢𑀢𑀺𑀬𑁂, 𑀘𑀢𑀼𑀢𑁆𑀣𑁂𑀧𑀺 𑀯𑀺𑀦𑀺𑀘𑁆𑀙𑀬𑁄 𑀮𑀲𑀼𑀡𑀯𑀕𑁆𑀕𑀲𑁆𑀲 𑀙𑀝𑁆𑀞𑁂𑀦 𑀲𑀺𑀓𑁆𑀔𑀸𑀧𑀤𑁂𑀦 𑀢𑀼𑀮𑁆𑀬𑁄 𑀲𑀤𑀺𑀲𑁄𑀢𑀺 𑀬𑁄𑀚𑀦𑀸.

𑁨𑁧𑁦. 𑀆𑀲𑀦𑁂𑀢𑀺 𑀧𑀮𑁆𑀮𑀗𑁆𑀓𑁂 𑀢𑀲𑁆𑀲𑁄𑀓𑀸𑀲𑀪𑀽𑀢𑁂. 𑀲𑀸𑀫𑀺𑀓𑁂 𑀅𑀦𑀸𑀧𑀼𑀘𑁆𑀙𑀸𑀢𑀺 𑀢𑀲𑁆𑀫𑀺𑀁 𑀓𑀼𑀮𑁂 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀼𑀫𑀦𑀼𑀲𑁆𑀲𑀁 𑀅𑀦𑀸𑀧𑀼𑀘𑁆𑀙𑀸.

𑁨𑁧𑁧. 𑀅𑀦𑁄𑀯𑀲𑁆𑀲𑀦𑁆𑀢𑀺 𑀪𑀺𑀢𑁆𑀢𑀺𑀬𑀸 𑀩𑀳𑀺 𑀦𑀺𑀩𑁆𑀩𑀓𑁄𑀲𑀩𑁆𑀪𑀦𑁆𑀢𑀭𑀁. 𑀤𑀼𑀢𑀺𑀬𑀸𑀢𑀺𑀓𑁆𑀓𑀫𑁂𑀢𑀺 𑀤𑀼𑀢𑀺𑀬𑁂𑀦 𑀧𑀸𑀤𑁂𑀦 𑀦𑀺𑀩𑁆𑀩𑀓𑁄𑀲𑀲𑁆𑀲 𑀉𑀤𑀓𑀧𑀸𑀢𑀝𑁆𑀞𑀸𑀦𑀸𑀢𑀺𑀓𑁆𑀓𑀫𑁂.

𑁨𑁧𑁨. 𑀦𑀺𑀲𑀻𑀤𑀺𑀢𑁂𑀢𑀺 𑀦𑀺𑀲𑀺𑀦𑁆𑀦𑁂.

𑁨𑁧𑁩. 𑀧𑀬𑁄𑀕𑁂𑀢𑀺 𑀉𑀚𑁆𑀛𑀸𑀧𑀦𑀧𑀬𑁄𑀕𑁂.

𑁨𑁧𑁪. 𑀦𑀺𑀭𑀬𑀸𑀤𑀺𑀦𑀸 𑀅𑀢𑁆𑀢𑀸𑀦𑀁 𑀯𑀸 𑀧𑀭𑀁 𑀯𑀸 𑀅𑀪𑀺𑀲𑀧𑁆𑀧𑁂𑀦𑁆𑀢𑀻 𑀲𑀧𑀣𑀁 𑀓𑀭𑁄𑀦𑁆𑀢𑀻 𑀤𑁆𑀯𑁂 𑀨𑀼𑀲𑁂𑀢𑀺 𑀬𑁄𑀚𑀦𑀸. 𑀅𑀪𑀺𑀲𑀧𑁆𑀧𑀺𑀢𑁂𑀢𑀺 𑀅𑀪𑀺𑀲𑀧𑀺𑀢𑁂.

𑁨𑁧𑁫. 𑀯𑀥𑀺𑀢𑁆𑀯𑀸𑀢𑀺 𑀳𑀢𑁆𑀣𑀸𑀤𑀻𑀳𑀺 𑀧𑀳𑀭𑀺𑀢𑁆𑀯𑀸. ‘‘𑀓𑀭𑁄𑀢𑀺 𑀏𑀓’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄.

𑀭𑀢𑁆𑀢𑀦𑁆𑀥𑀓𑀸𑀭𑀯𑀕𑁆𑀕𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

𑁨𑁧𑁬. 𑀦𑀕𑁆𑀕𑀸𑀢𑀺 𑀅𑀦𑀺𑀯𑀢𑁆𑀣𑀸 𑀯𑀸 𑀅𑀧𑀸𑀭𑀼𑀢𑀸 𑀯𑀸. 𑀧𑀬𑁄𑀕𑁂𑀢𑀺 𑀘𑀼𑀡𑁆𑀡𑀫𑀢𑁆𑀢𑀺𑀓𑀸𑀅𑀪𑀺𑀲𑀗𑁆𑀔𑀭𑀡𑀸𑀤𑀺𑀧𑀬𑁄𑀕𑁂.

𑁨𑁧𑁭. 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀦𑁆𑀢𑀺 ‘‘𑀤𑀻𑀖𑀲𑁄𑀘𑀢𑀲𑁆𑀲𑁄 𑀯𑀺𑀤𑀢𑁆𑀣𑀺𑀬𑁄 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸, 𑀢𑀺𑀭𑀺𑀬𑀁 𑀤𑁆𑀯𑁂 𑀯𑀺𑀤𑀢𑁆𑀣𑀺𑀬𑁄’’𑀢𑀺 (𑀧𑀸𑀘𑀺. 𑁮𑁮𑁮) 𑀯𑀼𑀢𑁆𑀢𑀧𑀫𑀸𑀡𑀫𑀢𑀺𑀓𑁆𑀓𑀦𑁆𑀢𑀁. 𑀧𑀬𑁄𑀕𑁂𑀢𑀺 𑀓𑀸𑀭𑀸𑀧𑀦𑀧𑀬𑁄𑀕𑁂.

𑁨𑁧𑁮. 𑀯𑀺𑀲𑀺𑀩𑁆𑀩𑁂𑀢𑁆𑀯𑀸𑀢𑀺 𑀤𑀼𑀲𑁆𑀲𑀺𑀩𑁆𑀩𑀺𑀢𑀁 𑀧𑀼𑀦 𑀲𑀺𑀩𑁆𑀩𑀦𑀢𑁆𑀣𑀸𑀬 𑀯𑀺𑀲𑀺𑀩𑁆𑀩𑁂𑀢𑁆𑀯𑀸.

𑁨𑁧𑁯. 𑀧𑀜𑁆𑀘 𑀅𑀳𑀸𑀦𑀺 𑀧𑀜𑁆𑀘𑀸𑀳𑀁, 𑀧𑀜𑁆𑀘𑀸𑀳𑀫𑁂𑀯 𑀧𑀜𑁆𑀘𑀸𑀳𑀺𑀓𑀁. 𑀲𑀗𑁆𑀖𑀸𑀝𑀻𑀦𑀁 𑀘𑀸𑀭𑁄 𑀲𑀗𑁆𑀖𑀸𑀝𑀺𑀘𑀸𑀭𑁄, 𑀧𑀭𑀺𑀪𑁄𑀕𑀯𑀲𑁂𑀦 𑀯𑀸 𑀑𑀢𑀸𑀧𑀦𑀯𑀲𑁂𑀦 𑀯𑀸 𑀲𑀗𑁆𑀖𑀝𑀺𑀢𑀝𑁆𑀞𑁂𑀦 ‘‘𑀲𑀗𑁆𑀖𑀸𑀝𑀻’’𑀢𑀺 𑀮𑀤𑁆𑀥𑀦𑀸𑀫𑀸𑀦𑀁 ‘‘𑀢𑀺𑀘𑀻𑀯𑀭𑀁, 𑀉𑀤𑀓𑀲𑀸𑀝𑀺𑀓𑀸, 𑀲𑀁𑀓𑀘𑁆𑀘𑀺𑀓𑀸’’𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀘𑀻𑀯𑀭𑀸𑀦𑀁 𑀧𑀭𑀺𑀯𑀢𑁆𑀢𑀦𑀁. 𑀅𑀢𑀺𑀓𑁆𑀓𑀫𑁂𑀢𑀺 𑀪𑀺𑀓𑁆𑀔𑀼𑀦𑀻 𑀅𑀢𑀺𑀓𑁆𑀓𑀫𑁂𑀬𑁆𑀬. 𑀅𑀲𑁆𑀲𑀸 𑀧𑀦 𑀏𑀓𑀸𑀯 𑀧𑀸𑀘𑀺𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸𑀢𑀺 𑀬𑁄𑀚𑀦𑀸.

𑁨𑁨𑁦. 𑀲𑀗𑁆𑀓𑀫𑀦𑀻𑀬𑀦𑁆𑀢𑀺 𑀲𑀗𑁆𑀓𑀫𑁂𑀢𑀩𑁆𑀩𑀁. 𑀅𑀜𑁆𑀜𑀺𑀲𑁆𑀲𑀸 𑀲𑀦𑁆𑀢𑀓𑀁 𑀅𑀦𑀸𑀧𑀼𑀘𑁆𑀙𑀸 𑀕𑀳𑀺𑀢𑀁 𑀧𑀼𑀦 𑀤𑀸𑀢𑀩𑁆𑀩𑀁 𑀧𑀜𑁆𑀘𑀦𑁆𑀦𑀁 𑀅𑀜𑁆𑀜𑀢𑀭𑀁.

𑁨𑁨𑁧. 𑀕𑀡𑀘𑀻𑀯𑀭𑀮𑀸𑀪𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂𑀦 𑀮𑀪𑀺𑀢𑀩𑁆𑀩𑀘𑀻𑀯𑀭𑀲𑁆𑀲. 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀻𑀢𑀺 𑀬𑀣𑀸 𑀢𑁂 𑀤𑀸𑀢𑀼𑀓𑀸𑀫𑀸 𑀦 𑀤𑁂𑀦𑁆𑀢𑀺, 𑀏𑀯𑀁 𑀧𑀭𑀓𑁆𑀓𑀫𑀢𑀺.

𑁨𑁨𑁨. 𑀥𑀫𑁆𑀫𑀺𑀓𑀦𑁆𑀢𑀺 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀓𑀭𑀺𑀬𑀫𑀸𑀦𑀁. 𑀧𑀝𑀺𑀩𑀸𑀳𑀦𑁆𑀢𑀻𑀢𑀺 𑀧𑀝𑀺𑀲𑁂𑀥𑁂𑀦𑁆𑀢𑀻. 𑀧𑀝𑀺𑀩𑀸𑀳𑀺𑀢𑁂 𑀧𑀝𑀺𑀲𑁂𑀥𑀺𑀢𑁂.

𑁨𑁨𑁩. 𑀅𑀕𑀸𑀭𑀺𑀓𑀸𑀤𑀺𑀦𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀯𑀸’’𑀢𑀺 (𑀧𑀸𑀭𑀸. 𑁯𑁧𑁭) 𑀯𑀼𑀢𑁆𑀢𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀫𑀡𑀘𑀻𑀯𑀭𑀦𑁆𑀢𑀺 𑀓𑀧𑁆𑀧𑀓𑀢𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀼𑀧𑀕𑀁. 𑀧𑀬𑁄𑀕𑁂𑀢𑀺 𑀤𑀸𑀦𑀧𑀬𑁄𑀕𑁂.

𑁨𑁨𑁪. 𑀘𑀻𑀯𑀭𑁂 𑀤𑀼𑀩𑁆𑀩𑀮𑀸𑀲𑀸𑀬𑀸𑀢𑀺 𑀤𑀼𑀩𑁆𑀩𑀮𑀘𑀻𑀯𑀭𑀧𑀘𑁆𑀘𑀸𑀲𑀸𑀬 ‘‘𑀲𑀘𑁂 𑀲𑀓𑁆𑀓𑁄𑀫, 𑀤𑀲𑁆𑀲𑀸𑀫𑀸’’𑀢𑀺 𑀏𑀢𑁆𑀢𑀓𑀫𑀢𑁆𑀢𑀁 𑀲𑀼𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀸𑀬 𑀆𑀲𑀸𑀬𑀸𑀢𑀺 𑀅𑀢𑁆𑀣𑁄. 𑀓𑀸𑀮𑀦𑁆𑀢𑀺 𑀘𑀻𑀯𑀭𑀓𑀸𑀮𑀲𑀫𑀬𑀁. 𑀲𑀫𑀢𑀺𑀓𑁆𑀓𑀫𑁂𑀢𑀺 𑀪𑀺𑀓𑁆𑀔𑀼𑀦𑀻𑀳𑀺 𑀓𑀸𑀮𑀘𑀻𑀯𑀭𑁂 𑀪𑀸𑀚𑀺𑀬𑀫𑀸𑀦𑁂 ‘‘𑀆𑀕𑀫𑁂𑀣, 𑀅𑀬𑁆𑀬𑁂, 𑀅𑀢𑁆𑀣𑀺 𑀲𑀗𑁆𑀖𑀲𑁆𑀲 𑀘𑀻𑀯𑀭𑀧𑀘𑁆𑀘𑀸𑀲𑀸’’𑀢𑀺 𑀯𑀢𑁆𑀯𑀸 𑀢𑀁 𑀘𑀻𑀯𑀭𑀯𑀺𑀪𑀗𑁆𑀕𑀁 𑀲𑀫𑀢𑀺𑀓𑁆𑀓𑀫𑁂𑀬𑁆𑀬.

𑁨𑁨𑁫. 𑀥𑀫𑁆𑀫𑀺𑀓𑀁 𑀓𑀣𑀺𑀦𑀼𑀤𑁆𑀥𑀸𑀭𑀦𑁆𑀢𑀺 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀓𑀭𑀺𑀬𑀫𑀸𑀦𑀁 𑀓𑀣𑀺𑀦𑀲𑁆𑀲 𑀅𑀦𑁆𑀢𑀭𑀼𑀩𑁆𑀪𑀸𑀭𑀁. 𑀧𑀝𑀺𑀩𑀸𑀳𑀦𑁆𑀢𑀺𑀬𑀸𑀢𑀺 𑀦𑀺𑀯𑀸𑀭𑁂𑀦𑁆𑀢𑀺𑀬𑀸.

𑀦𑁆𑀳𑀸𑀦𑀯𑀕𑁆𑀕𑀯𑀡𑁆𑀡𑀦𑀸 𑀢𑀢𑀺𑀬𑀸.

𑁨𑁨𑁬. 𑀢𑀼𑀯𑀝𑁆𑀝𑁂𑀬𑁆𑀬𑀼𑀦𑁆𑀢𑀺 𑀦𑀺𑀧𑀚𑁆𑀚𑁂𑀬𑁆𑀬𑀼𑀁. 𑀇𑀢𑀭𑀁 𑀧𑀸𑀘𑀺𑀢𑁆𑀢𑀺𑀬𑀁.

𑁨𑁨𑁭. 𑀧𑀬𑁄𑀕𑁂𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀅𑀨𑀸𑀲𑀼𑀓𑀓𑀭𑀡𑀧𑀬𑁄𑀕𑁂 𑀓𑀭𑀺𑀬𑀫𑀸𑀦𑁂.

𑁨𑁨𑁮. 𑀤𑀼𑀓𑁆𑀔𑀺𑀢𑀦𑁆𑀢𑀺 𑀕𑀺𑀮𑀸𑀦𑀁. 𑀦𑀼𑀧𑀝𑁆𑀞𑀸𑀧𑁂𑀦𑁆𑀢𑀺𑀬𑀸 𑀯𑀸𑀧𑀻𑀢𑀺 𑀢𑀲𑁆𑀲𑀸 𑀉𑀧𑀝𑁆𑀞𑀸𑀦𑀁 𑀧𑀭𑁂𑀳𑀺 𑀅𑀓𑀸𑀭𑀸𑀧𑁂𑀦𑁆𑀢𑀺𑀬𑀸, 𑀲𑀬𑀁 𑀯𑀸 𑀅𑀓𑀭𑁄𑀦𑁆𑀢𑀺𑀬𑀸.

𑁨𑁨𑁯. 𑀉𑀧𑀲𑁆𑀲𑀬𑀁 𑀤𑀢𑁆𑀯𑀸𑀢𑀺 𑀓𑀯𑀸𑀝𑀩𑀦𑁆𑀥𑀁 𑀅𑀢𑁆𑀢𑀦𑁄 𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑀁 𑀤𑀢𑁆𑀯𑀸. 𑀓𑀟𑁆𑀠𑀺𑀢𑁂𑀢𑀺 𑀦𑀺𑀓𑁆𑀓𑀟𑁆𑀠𑀺𑀢𑁂.

𑁨𑁩𑁦. 𑀲𑀁𑀲𑀝𑁆𑀞𑀸𑀢𑀺 𑀕𑀳𑀧𑀢𑀺𑀦𑀸 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁂𑀦 𑀯𑀸 𑀲𑀁𑀲𑀝𑁆𑀞𑀯𑀺𑀳𑀸𑀭𑀻 𑀪𑀺𑀓𑁆𑀔𑀼𑀦𑀻 𑀲𑀗𑁆𑀖𑁂𑀦 𑀲𑀁𑀲𑀝𑁆𑀞𑀯𑀺𑀳𑀸𑀭𑀢𑁄 𑀦𑀺𑀯𑀢𑁆𑀢𑀺𑀬𑀫𑀸𑀦𑀸. 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁 𑀨𑀼𑀲𑁂𑀢𑀺 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑁂𑀬𑁆𑀬.

𑁨𑁩𑁧. 𑀅𑀦𑁆𑀢𑁄𑀭𑀝𑁆𑀞𑁂𑀢𑀺 𑀬𑀲𑁆𑀲 𑀯𑀺𑀚𑀺𑀢𑁂 𑀯𑀺𑀳𑀭𑀢𑀺, 𑀢𑀲𑁆𑀲 𑀭𑀝𑁆𑀞𑁂. 𑀧𑀝𑀺𑀧𑀦𑁆𑀦𑀸𑀬𑀸𑀢𑀺 𑀘𑀸𑀭𑀺𑀓𑀁 𑀓𑀧𑁆𑀧𑁂𑀦𑁆𑀢𑀺𑀬𑀸. 𑀲𑁂𑀲𑀓𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀁.

𑀢𑀼𑀯𑀝𑁆𑀝𑀯𑀕𑁆𑀕𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

𑁨𑁩𑁩. 𑀭𑀸𑀚𑀸𑀕𑀸𑀭𑀸𑀤𑀺𑀓𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀘𑀺𑀢𑁆𑀢𑀸𑀕𑀸𑀭𑀸𑀤𑀻𑀦𑀁 𑀕𑀳𑀡𑀁.

𑁨𑁩𑁫. 𑀧𑀬𑁄𑀕𑁂𑀢𑀺 𑀓𑀧𑁆𑀧𑀸𑀲𑀯𑀺𑀘𑀸𑀭𑀡𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀧𑀬𑁄𑀕𑁂. 𑀉𑀚𑁆𑀚𑀯𑀼𑀚𑁆𑀚𑀯𑀦𑁂𑀢𑀺 𑀬𑀢𑁆𑀢𑀓𑀁 𑀳𑀢𑁆𑀣𑁂𑀦 𑀅𑀜𑁆𑀙𑀺𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀢𑀓𑁆𑀓𑀫𑁆𑀳𑀺 𑀯𑁂𑀞𑀺𑀢𑁂.

𑁨𑁩𑁭. 𑀧𑀬𑁄𑀕𑁂𑀢𑀺 𑀅𑀕𑀸𑀭𑀺𑀓𑀲𑁆𑀲 𑀯𑀸 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀯𑀸 𑀲𑀳𑀢𑁆𑀣𑀸 𑀔𑀸𑀤𑀦𑀻𑀬𑀸𑀤𑀻𑀦𑀁 𑀤𑀸𑀦𑀧𑀬𑁄𑀕𑁂.

𑁨𑁩𑁮. ‘‘𑀲𑀫𑀁 𑀆𑀧𑀢𑁆𑀢𑀺𑀧𑀪𑁂𑀤𑀢𑁄’’𑀢𑀺 𑀧𑀤𑀘𑁆𑀙𑁂𑀤𑁄.

𑁨𑁩𑁯. 𑀢𑀺𑀭𑀘𑁆𑀙𑀸𑀦𑀕𑀢𑀁 𑀯𑀺𑀚𑁆𑀚𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀩𑀸𑀳𑀺𑀭𑀓𑀁 𑀅𑀦𑀢𑁆𑀣𑀲𑀁𑀳𑀺𑀢𑀁 𑀧𑀭𑀽𑀧𑀖𑀸𑀢𑀓𑀭𑀁 𑀳𑀢𑁆𑀣𑀺𑀲𑀺𑀓𑁆𑀔𑀸𑀤𑀺𑀲𑀺𑀧𑁆𑀧𑀁. 𑀧𑀞𑀦𑁆𑀢𑀺𑀬𑀸𑀢𑀺 𑀲𑀺𑀓𑁆𑀔𑀦𑁆𑀢𑀺𑀬𑀸. 𑀧𑀬𑁄𑀕𑁂𑀢𑀺 𑀤𑀼𑀭𑀼𑀧𑀲𑀗𑁆𑀓𑀫𑀦𑀸𑀤𑀺𑀧𑀬𑁄𑀕𑁂. 𑀧𑀤𑁂 𑀧𑀤𑁂𑀢𑀺 𑀧𑀤𑀸𑀤𑀺𑀯𑀲𑁂𑀦 𑀧𑀭𑀺𑀬𑀸𑀧𑀼𑀡𑀦𑁆𑀢𑀺𑀬𑀸 𑀧𑀤𑁂 𑀧𑀤𑁂 𑀅𑀓𑁆𑀔𑀭𑀧𑀤𑀸𑀦𑀁 𑀯𑀲𑁂𑀦.

𑁨𑁪𑁦. 𑀦𑀯𑀫𑁂 ‘‘𑀧𑀭𑀺𑀬𑀸𑀧𑀼𑀡𑀸𑀢𑀻’’𑀢𑀺 𑀧𑀤𑀁, 𑀤𑀲𑀫𑁂 ‘‘𑀯𑀸𑀘𑁂𑀢𑀻’’𑀢𑀺 𑀧𑀤𑀦𑁆𑀢𑀺 𑀏𑀯𑀁 𑀧𑀤𑀫𑀢𑁆𑀢𑀫𑁂𑀯 𑀉𑀪𑀺𑀦𑁆𑀦𑀁 𑀯𑀺𑀲𑁂𑀲𑀓𑀁 𑀪𑁂𑀤𑀓𑀁.

𑀘𑀺𑀢𑁆𑀢𑀸𑀕𑀸𑀭𑀯𑀕𑁆𑀕𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

𑁨𑁪𑁧. 𑀢𑀫𑀸𑀭𑀸𑀫𑀦𑁆𑀢𑀺 𑀬𑀢𑁆𑀣 𑀪𑀺𑀓𑁆𑀔𑀽 𑀭𑀼𑀓𑁆𑀔𑀫𑀽𑀮𑁂𑀧𑀺 𑀯𑀲𑀦𑁆𑀢𑀺, 𑀢𑀁 𑀲𑀪𑀺𑀓𑁆𑀔𑀼𑀓𑀁 𑀧𑀤𑁂𑀲𑀁.

𑁨𑁪𑁩. 𑀅𑀓𑁆𑀓𑁄𑀲𑀢𑀻𑀢𑀺 𑀤𑀲𑀦𑁆𑀦𑀁 𑀅𑀓𑁆𑀓𑁄𑀲𑀯𑀢𑁆𑀣𑀽𑀦𑀁 𑀅𑀜𑁆𑀜𑀢𑀭𑁂𑀦 𑀲𑀫𑁆𑀫𑀼𑀔𑀸 𑀯𑀸 𑀧𑀭𑀫𑁆𑀫𑀼𑀔𑀸 𑀯𑀸 𑀅𑀓𑁆𑀓𑁄𑀲𑀢𑀺. 𑀧𑀭𑀺𑀪𑀸𑀲𑀢𑀻𑀢𑀺 𑀪𑀬𑀤𑀲𑁆𑀲𑀦𑁂𑀦 𑀢𑀚𑁆𑀚𑁂𑀢𑀺. ‘‘𑀧𑀸𑀘𑀺𑀢𑁆𑀢𑀺 𑀅𑀓𑁆𑀓𑁄𑀲𑀺𑀢𑁂’’𑀢𑀺 𑀧𑀤𑀘𑁆𑀙𑁂𑀤𑁄.

𑁨𑁪𑁪. 𑀘𑀡𑁆𑀟𑀺𑀓𑀪𑀸𑀯𑁂𑀦𑀸𑀢𑀺 𑀓𑁄𑀥𑁂𑀦. 𑀕𑀡𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁. 𑀧𑀭𑀺𑀪𑀸𑀲𑀢𑀻𑀢𑀺 ‘‘𑀩𑀸𑀮𑀸 𑀏𑀢𑀸’’𑀢𑀺𑀆𑀤𑀻𑀳𑀺 𑀯𑀘𑀦𑁂𑀳𑀺 𑀅𑀓𑁆𑀓𑁄𑀲𑀢𑀺. 𑀧𑀬𑁄𑀕𑁂𑀢𑀺 𑀧𑀭𑀺𑀪𑀸𑀲𑀦𑀧𑀬𑁄𑀕𑁂. 𑀧𑀭𑀺𑀪𑀝𑁆𑀞𑁂𑀢𑀺 𑀅𑀓𑁆𑀓𑁄𑀲𑀺𑀢𑁂. 𑀇𑀢𑀭𑀁 𑀧𑀸𑀘𑀺𑀢𑁆𑀢𑀺𑀬𑀁.

𑁨𑁪𑁫. 𑀦𑀺𑀫𑀦𑁆𑀢𑀺𑀢𑀸𑀢𑀺 𑀕𑀡𑀪𑁄𑀚𑀦𑁂 𑀯𑀼𑀢𑁆𑀢𑀦𑀬𑁂𑀦 𑀦𑀺𑀫𑀦𑁆𑀢𑀺𑀢𑀸. 𑀧𑀯𑀸𑀭𑀺𑀢𑀸𑀢𑀺 𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦 𑀯𑀸𑀭𑀺𑀢𑀸. 𑀔𑀸𑀤𑀦𑀁 𑀪𑁄𑀚𑀦𑀫𑁆𑀧𑀺 𑀯𑀸𑀢𑀺 𑀬𑀸𑀕𑀼𑀧𑀽𑀯𑀔𑀚𑁆𑀚𑀓𑀁, 𑀬𑀸𑀯𑀓𑀸𑀮𑀺𑀓𑀁 𑀫𑀽𑀮𑀔𑀸𑀤𑀦𑀻𑀬𑀸𑀤𑀺𑀔𑀸𑀤𑀦𑀻𑀬𑀁, 𑀑𑀤𑀦𑀸𑀤𑀺𑀪𑁄𑀚𑀦𑀫𑁆𑀧𑀺 𑀯𑀸 𑀬𑀸 𑀪𑀺𑀓𑁆𑀔𑀼𑀦𑀻 𑀪𑀼𑀜𑁆𑀚𑀦𑁆𑀢𑀻 𑀳𑁄𑀢𑀺, 𑀲𑀸 𑀧𑀦 𑀤𑁆𑀯𑁂𑀬𑁂𑀯 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂𑀢𑀺 𑀬𑁄𑀚𑀦𑀸.

𑁨𑁪𑁭. 𑀫𑀘𑁆𑀙𑀭𑀸𑀬𑀦𑁆𑀢𑀻𑀢𑀺 𑀫𑀘𑁆𑀙𑀭𑀁 𑀓𑀭𑁄𑀦𑁆𑀢𑀻, 𑀅𑀢𑁆𑀢𑀦𑁄 𑀧𑀘𑁆𑀘𑀬𑀤𑀸𑀬𑀓𑀓𑀼𑀮𑀲𑁆𑀲 𑀅𑀜𑁆𑀜𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀁 𑀅𑀲𑀳𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀬𑁄𑀕𑁂𑀢𑀺 𑀢𑀤𑀦𑀼𑀭𑀽𑀧𑁂 𑀓𑀸𑀬𑀯𑀘𑀻𑀧𑀬𑁄𑀕𑁂. 𑀫𑀘𑁆𑀙𑀭𑀺𑀢𑁂𑀢𑀺 𑀫𑀘𑁆𑀙𑀭𑀯𑀲𑁂𑀦 𑀓𑀢𑀧𑀬𑁄𑀕𑁂 𑀦𑀺𑀧𑁆𑀨𑀦𑁆𑀦𑁂.

𑁨𑁪𑁮. 𑀅𑀪𑀺𑀓𑁆𑀔𑀼𑀓𑁂 𑀧𑀦𑀸𑀯𑀸𑀲𑁂𑀢𑀺 𑀬𑀢𑁄 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀢𑁄 𑀅𑀤𑁆𑀥𑀬𑁄𑀚𑀦𑀩𑁆𑀪𑀦𑁆𑀢𑀭𑁂 𑀑𑀯𑀸𑀤𑀤𑀸𑀬𑀓𑀸 𑀪𑀺𑀓𑁆𑀔𑀽 𑀦 𑀯𑀲𑀦𑁆𑀢𑀺, 𑀫𑀕𑁆𑀕𑁄 𑀯𑀸 𑀅𑀔𑁂𑀫𑁄 𑀳𑁄𑀢𑀺, 𑀦 𑀲𑀓𑁆𑀓𑀸 𑀅𑀦𑀦𑁆𑀢𑀭𑀸𑀬𑁂𑀦 𑀕𑀦𑁆𑀢𑀼𑀁, 𑀏𑀯𑀭𑀽𑀧𑁂 𑀆𑀯𑀸𑀲𑁂. 𑀧𑀼𑀩𑁆𑀩𑀓𑀺𑀘𑁆𑀘𑁂𑀲𑀽𑀢𑀺 ‘‘𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀦𑀧𑀸𑀦𑀻𑀬𑀉𑀧𑀝𑁆𑀞𑀸𑀧𑀦𑀸𑀤𑀺𑀧𑀼𑀩𑁆𑀩𑀓𑀺𑀘𑁆𑀘𑁂 𑀧𑀦 𑀓𑀭𑀺𑀬𑀫𑀸𑀦𑁂 𑀤𑀼𑀓𑁆𑀓𑀝𑀁 𑀪𑀯𑁂𑀢𑀺 𑀬𑁄𑀚𑀦𑀸.

𑁨𑁪𑁯. 𑀯𑀲𑁆𑀲𑀁𑀯𑀼𑀢𑁆𑀣𑀸𑀢𑀺 𑀧𑀼𑀭𑀺𑀫𑀁 𑀯𑀸 𑀧𑀘𑁆𑀙𑀺𑀫𑀁 𑀯𑀸 𑀢𑁂𑀫𑀸𑀲𑀁 𑀯𑀼𑀢𑁆𑀣𑀸. 𑀉𑀪𑀢𑁄𑀲𑀗𑁆𑀖𑁂𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂, 𑀪𑀺𑀓𑁆𑀔𑀼𑀲𑀗𑁆𑀖𑁂 𑀘. 𑀢𑀻𑀳𑀺𑀧𑀺 𑀞𑀸𑀦𑁂𑀳𑀻𑀢𑀺 ‘‘𑀤𑀺𑀝𑁆𑀞𑁂𑀦 𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀳𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺.

𑁨𑁫𑁦. 𑀑𑀯𑀸𑀤𑀢𑁆𑀣𑀸𑀬𑀸𑀢𑀺 𑀕𑀭𑀼𑀥𑀫𑁆𑀫𑁄𑀯𑀸𑀤𑀦𑀢𑁆𑀣𑀸𑀬. 𑀲𑀁𑀯𑀸𑀲𑀢𑁆𑀣𑀸𑀬𑀸𑀢𑀺 𑀉𑀧𑁄𑀲𑀣𑀧𑀼𑀘𑁆𑀙𑀦𑀢𑁆𑀣𑀸𑀬 𑀘𑁂𑀯 𑀧𑀯𑀸𑀭𑀡𑀢𑁆𑀣𑀸𑀬 𑀘. 𑀦 𑀕𑀘𑁆𑀙𑀢𑀻𑀢𑀺 𑀪𑀺𑀓𑁆𑀔𑀼𑀁 𑀦 𑀉𑀧𑀕𑀘𑁆𑀙𑀢𑀺.

𑁨𑁫𑁧. 𑀑𑀯𑀸𑀤𑀫𑁆𑀧𑀺 𑀦 𑀬𑀸𑀘𑀦𑁆𑀢𑀻𑀢𑀺 𑀉𑀧𑁄𑀲𑀣𑀸𑀤𑀺𑀯𑀲𑁂𑀦 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀁 𑀪𑀺𑀓𑁆𑀔𑀼𑀁 𑀦 𑀬𑀸𑀘𑀦𑁆𑀢𑀻 𑀦 𑀧𑀼𑀘𑁆𑀙𑀦𑁆𑀢𑀻. 𑀉𑀧𑁄𑀲𑀣𑀦𑁆𑀢𑀺 𑀉𑀧𑁄𑀲𑀣𑀤𑀺𑀯𑀲𑀢𑁄 𑀧𑀼𑀭𑀺𑀫𑀤𑀺𑀯𑀲𑁂 𑀢𑁂𑀭𑀲𑀺𑀬𑀁 𑀯𑀸 𑀘𑀸𑀢𑀼𑀤𑁆𑀤𑀲𑀺𑀬𑀁 𑀯𑀸 𑀉𑀧𑁄𑀲𑀣𑀁 𑀦 𑀧𑀼𑀘𑁆𑀙𑀦𑁆𑀢𑀻.

𑁨𑁫𑁨. 𑀅𑀧𑀼𑀘𑁆𑀙𑀺𑀢𑁆𑀯𑀸𑀯 𑀲𑀗𑁆𑀖𑀁 𑀯𑀸𑀢𑀺 𑀲𑀗𑁆𑀖𑀁 𑀯𑀸 𑀕𑀡𑀁 𑀯𑀸 𑀅𑀦𑀧𑀮𑁄𑀓𑁂𑀢𑁆𑀯𑀸𑀯. ‘‘𑀪𑁂𑀤𑀸𑀧𑁂𑀢𑀻’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 ‘‘𑀨𑀸𑀮𑀸𑀧𑁂𑀬𑁆𑀬 𑀯𑀸 𑀥𑁄𑀯𑀸𑀧𑁂𑀬𑁆𑀬 𑀯𑀸 𑀆𑀮𑀺𑀫𑁆𑀧𑀸𑀧𑁂𑀬𑁆𑀬 𑀯𑀸 𑀩𑀦𑁆𑀥𑀸𑀧𑁂𑀬𑁆𑀬 𑀯𑀸 𑀫𑁄𑀘𑀸𑀧𑁂𑀬𑁆𑀬 𑀯𑀸’’𑀢𑀺 𑀇𑀫𑁂𑀲𑀫𑁆𑀧𑀺 𑀓𑀺𑀭𑀺𑀬𑀸𑀯𑀺𑀓𑀧𑁆𑀧𑀸𑀦𑀁 𑀲𑀗𑁆𑀕𑀳𑁂𑀢𑀩𑁆𑀩𑀢𑁆𑀢𑀸. 𑀧𑀲𑀸𑀔𑀚𑀦𑁆𑀢𑀺 𑀦𑀸𑀪𑀺𑀬𑀸 𑀳𑁂𑀝𑁆𑀞𑀸, 𑀚𑀸𑀡𑀼𑀫𑀡𑁆𑀟𑀮𑀸𑀦𑀁 𑀉𑀧𑀭𑀺 𑀧𑀤𑁂𑀲𑁂 𑀚𑀸𑀢𑀁 𑀕𑀡𑁆𑀟𑀁 𑀯𑀸 𑀭𑀼𑀥𑀺𑀢𑀁 𑀯𑀸. 𑀧𑀬𑁄𑀕𑁂𑀢𑀺 𑀪𑁂𑀤𑀸𑀧𑀦𑀸𑀤𑀺𑀧𑀬𑁄𑀕𑁂.

𑀆𑀭𑀸𑀫𑀯𑀕𑁆𑀕𑀯𑀡𑁆𑀡𑀦𑀸 𑀙𑀝𑁆𑀞𑀸.

𑁨𑁫𑁩. 𑀕𑀩𑁆𑀪𑀺𑀦𑀺𑀦𑁆𑀢𑀺 𑀆𑀧𑀦𑁆𑀦𑀲𑀢𑁆𑀢𑀁 𑀲𑀺𑀓𑁆𑀔𑀫𑀸𑀦𑀁. 𑀯𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀉𑀧𑀚𑁆𑀛𑀸𑀬𑀸 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀻. 𑀧𑀬𑁄𑀕𑁂𑀢𑀺 𑀕𑀡𑀧𑀭𑀺𑀬𑁂𑀲𑀦𑀸𑀤𑀺𑀧𑀬𑁄𑀕𑁂. 𑀯𑀼𑀝𑁆𑀞𑀸𑀧𑀺𑀢𑁂𑀢𑀺 𑀉𑀧𑀲𑀫𑁆𑀧𑀸𑀤𑀺𑀢𑁂, 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂𑀢𑀺 𑀅𑀢𑁆𑀣𑁄.

𑁨𑁫𑁫. 𑀲𑀳𑀚𑀻𑀯𑀺𑀦𑀺𑀦𑁆𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑀺𑀁. 𑀦𑀸𑀦𑀼𑀕𑁆𑀕𑀡𑁆𑀳𑀦𑁆𑀢𑀻𑀢𑀺 𑀉𑀤𑁆𑀤𑁂𑀲𑀤𑀸𑀦𑀸𑀤𑀻𑀳𑀺 𑀦 𑀲𑀗𑁆𑀕𑀡𑁆𑀳𑀦𑁆𑀢𑀻.

𑀕𑀩𑁆𑀪𑀺𑀦𑀺𑀯𑀕𑁆𑀕𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

𑁨𑁫𑁮. ‘‘𑀅𑀮𑀁 𑀯𑀼𑀝𑁆𑀞𑀸𑀧𑀺𑀢𑁂𑀦𑀸’’𑀢𑀺 𑀯𑀼𑀘𑁆𑀘𑀫𑀸𑀦𑀸 𑀪𑀺𑀓𑁆𑀔𑀼𑀦𑀻𑀳𑀺 𑀦𑀺𑀯𑀸𑀭𑀺𑀬𑀫𑀸𑀦𑀸. 𑀔𑀻𑀬𑀢𑀻𑀢𑀺 𑀅𑀜𑁆𑀜𑀸𑀲𑀁 𑀩𑁆𑀬𑀢𑁆𑀢𑀸𑀦𑀁 𑀮𑀚𑁆𑀚𑀻𑀦𑀁 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀁 𑀤𑀻𑀬𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀅𑀳𑀫𑁂𑀯 𑀦𑀽𑀦 𑀩𑀸𑀮𑀸’’𑀢𑀺𑀆𑀤𑀺𑀦𑀸 𑀪𑀡𑀫𑀸𑀦𑀸 𑀔𑀻𑀬𑀢𑀺. 𑀧𑀬𑁄𑀕𑁂𑀢𑀺 𑀔𑀻𑀬𑀫𑀸𑀦𑀧𑀬𑁄𑀕𑁂. 𑀔𑀻𑀬𑀺𑀢𑁂𑀢𑀺 𑀔𑀻𑀬𑀦𑀧𑀬𑁄𑀕𑁂 𑀦𑀺𑀝𑁆𑀞𑀺𑀢𑁂.

𑀓𑀼𑀫𑀸𑀭𑀺𑀪𑀽𑀢𑀯𑀕𑁆𑀕𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

𑁨𑁬𑁦. 𑀙𑀢𑁆𑀢𑀼𑀧𑀸𑀳𑀦𑀦𑁆𑀢𑀺 𑀯𑀼𑀢𑁆𑀢𑀮𑀓𑁆𑀔𑀡𑀁 𑀙𑀢𑁆𑀢𑀜𑁆𑀘 𑀉𑀧𑀸𑀳𑀦𑀸𑀬𑁄 𑀘. 𑀧𑀬𑁄𑀕𑁂𑀢𑀺 𑀥𑀸𑀭𑀡𑀧𑀬𑁄𑀕𑁂.

𑁨𑁬𑁧. 𑀬𑀸𑀦𑁂𑀦𑀸𑀢𑀺 𑀯𑀬𑁆𑀳𑀸𑀤𑀺𑀦𑀸. 𑀬𑀸𑀬𑀦𑁆𑀢𑀻𑀢𑀺 𑀲𑀘𑁂 𑀬𑀸𑀦𑁂𑀦 𑀕𑀢𑀸 𑀳𑁄𑀢𑀺.

𑁨𑁬𑁨. 𑀲𑀗𑁆𑀖𑀸𑀡𑀺𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀓𑀝𑀽𑀧𑀕𑀁. 𑀥𑀸𑀭𑁂𑀦𑁆𑀢𑀺𑀬𑀸𑀢𑀺 𑀓𑀝𑀺𑀬𑀁 𑀧𑀝𑀺𑀫𑀼𑀘𑁆𑀘𑀦𑁆𑀢𑀺𑀬𑀸.

𑁨𑁬𑁩. 𑀕𑀦𑁆𑀥𑀯𑀡𑁆𑀡𑁂𑀦𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀯𑀡𑁆𑀡𑁂𑀦 𑀘 𑀬𑁂𑀦 𑀓𑁂𑀦𑀘𑀺 𑀕𑀦𑁆𑀥𑁂𑀦 𑀘. 𑀕𑀦𑁆𑀥𑁄 𑀦𑀸𑀫 𑀘𑀦𑁆𑀤𑀦𑀸𑀮𑁂𑀧𑀸𑀤𑀺. 𑀯𑀡𑁆𑀡𑁄 𑀦𑀸𑀫 𑀓𑀼𑀗𑁆𑀓𑀼𑀫𑀳𑀮𑀺𑀤𑁆𑀤𑀸𑀤𑀺. 𑀧𑀬𑁄𑀕𑁂𑀢𑀺 𑀕𑀦𑁆𑀥𑀸𑀤𑀺𑀧𑀬𑁄𑀕𑁂 𑀭𑀘𑀦𑀢𑁄 𑀧𑀝𑁆𑀞𑀸𑀬 𑀧𑀼𑀩𑁆𑀩𑀧𑀬𑁄𑀕𑁂.

𑁨𑁬𑁬. 𑀅𑀦𑀸𑀧𑀼𑀘𑁆𑀙𑀸𑀢𑀺 ‘‘𑀦𑀺𑀲𑀻𑀤𑀸𑀫𑀺, 𑀅𑀬𑁆𑀬𑀸’’𑀢𑀺 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸. 𑀦𑀺𑀲𑀻𑀤𑀺𑀢𑁂 𑀪𑀺𑀓𑁆𑀔𑀼𑀲𑁆𑀲 𑀉𑀧𑀘𑀸𑀭𑁂 𑀅𑀦𑁆𑀢𑀫𑀲𑁄 𑀙𑀫𑀸𑀬 𑀦𑀺𑀲𑀺𑀦𑁆𑀦𑁂.

𑁨𑁬𑁭. 𑀅𑀦𑁄𑀓𑀸𑀲𑀓𑀢𑀦𑁆𑀢𑀺 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀅𑀓𑀢𑀑𑀓𑀸𑀲𑀁.

𑁨𑁬𑁮. 𑀧𑀯𑀺𑀲𑀦𑁆𑀢𑀺𑀬𑀸𑀢𑀺 𑀯𑀺𑀦𑀺𑀘𑁆𑀙𑀬𑀁 𑀆𑀭𑀸𑀫𑀯𑀕𑁆𑀕𑀲𑁆𑀲 𑀧𑀞𑀫𑁂𑀦𑁂𑀯 𑀲𑀺𑀓𑁆𑀔𑀸𑀧𑀤𑁂𑀦 𑀲𑀤𑀺𑀲𑀁 𑀓𑀢𑁆𑀯𑀸 𑀯𑀤𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑀙𑀢𑁆𑀢𑀼𑀧𑀸𑀳𑀦𑀯𑀕𑁆𑀕𑀯𑀡𑁆𑀡𑀦𑀸 𑀦𑀯𑀫𑀸.

𑀇𑀢𑀺 𑀉𑀢𑁆𑀢𑀭𑁂 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂

𑀧𑀸𑀘𑀺𑀢𑁆𑀢𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁬𑁯-𑁭𑁦. 𑀅𑀝𑁆𑀞𑀲𑀼 𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑁂𑀲𑀼𑀧𑀺 𑀤𑁆𑀯𑀺𑀥𑀸 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁄𑀢𑀺 𑀕𑀳𑀡𑀳𑁂𑀢𑀼. 𑀲𑀩𑁆𑀩𑁂𑀲𑀽𑀢𑀺 𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑁂𑀲𑀼.

𑀧𑀸𑀝𑀺𑀤𑁂𑀲𑀦𑀻𑀬𑀓𑀣𑀸𑀯𑀡𑁆𑀡𑀦𑀸.

𑁨𑁭𑁧-𑁨. 𑀇𑀫𑀁 𑀧𑀭𑀫𑀁 𑀉𑀢𑁆𑀢𑀫𑀁 𑀦𑀺𑀭𑀼𑀢𑁆𑀢𑀭𑀁 𑀓𑁂𑀦𑀘𑀺 𑀯𑀸 𑀯𑀢𑁆𑀢𑀩𑁆𑀩𑁂𑀦 𑀉𑀢𑁆𑀢𑀭𑁂𑀦 𑀭𑀳𑀺𑀢𑀁 𑀦𑀺𑀤𑁆𑀤𑁄𑀲𑀁 𑀉𑀢𑁆𑀢𑀭𑀁 𑀏𑀯𑀁𑀦𑀸𑀫𑀓𑀁 𑀥𑀻𑀭𑁄 𑀧𑀜𑁆𑀜𑀯𑀸 𑀪𑀺𑀓𑁆𑀔𑀼 𑀅𑀢𑁆𑀣𑀯𑀲𑁂𑀦 𑀯𑀺𑀤𑀺𑀢𑁆𑀯𑀸 𑀤𑀼𑀭𑀼𑀢𑁆𑀢𑀭𑀁 𑀓𑀺𑀘𑁆𑀙𑁂𑀦 𑀉𑀢𑁆𑀢𑀭𑀺𑀢𑀩𑁆𑀩𑀁 𑀧𑀜𑁆𑀜𑀢𑁆𑀢𑀫𑀳𑀸𑀲𑀫𑀼𑀤𑁆𑀤𑀁 𑀯𑀺𑀦𑀬𑀫𑀳𑀸𑀲𑀸𑀕𑀭𑀁 𑀲𑀼𑀔𑁂𑀦𑁂𑀯 𑀬𑀲𑁆𑀫𑀸 𑀉𑀢𑁆𑀢𑀭𑀢𑀺, 𑀢𑀲𑁆𑀫𑀸 𑀓𑀗𑁆𑀔𑀘𑁆𑀙𑁂𑀤𑁂 𑀯𑀺𑀦𑀬𑀯𑀺𑀘𑀺𑀓𑀺𑀘𑁆𑀙𑀸𑀬 𑀙𑀺𑀦𑁆𑀤𑀦𑁂 𑀲𑀢𑁆𑀣𑁂 𑀲𑀢𑁆𑀣𑀲𑀤𑀺𑀲𑁂 𑀅𑀲𑁆𑀫𑀺𑀁 𑀲𑀢𑁆𑀣𑁂 𑀇𑀫𑀲𑁆𑀫𑀺𑀁 𑀉𑀢𑁆𑀢𑀭𑀧𑀓𑀭𑀡𑁂 𑀉𑀲𑁆𑀫𑀸𑀬𑀼𑀢𑁆𑀢𑁄 𑀓𑀫𑁆𑀫𑀚𑀢𑁂𑀚𑁄𑀥𑀸𑀢𑀼𑀬𑀸 𑀲𑀫𑀦𑁆𑀦𑀸𑀕𑀢𑁄 𑀚𑀻𑀯𑀫𑀸𑀦𑁄 𑀪𑀺𑀓𑁆𑀔𑀼 𑀦𑀺𑀘𑁆𑀘𑀁 𑀦𑀺𑀭𑀦𑁆𑀢𑀭𑀁 𑀲𑀢𑁆𑀢𑁄 𑀅𑀪𑀺𑀭𑀢𑁄 𑀦𑀺𑀘𑁆𑀘𑀁 𑀬𑁄𑀕𑀁 𑀲𑀢𑀢𑀸𑀪𑀺𑀬𑁄𑀕𑀁 𑀓𑀸𑀢𑀼𑀁 𑀬𑀼𑀢𑁆𑀢𑁄 𑀅𑀦𑀼𑀭𑀽𑀧𑁄𑀢𑀺 𑀬𑁄𑀚𑀦𑀸.

𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁄 𑀦𑀺𑀝𑁆𑀞𑀺𑀢𑁄𑀢𑀺 𑀏𑀢𑁆𑀣𑀸𑀧𑀺 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀇𑀢𑀺 𑀉𑀢𑁆𑀢𑀭𑁂 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸

𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.