𑀘𑀢𑀼𑀯𑀺𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁨𑁭𑁩. 𑀇𑀤𑀸𑀦𑀺 𑀉𑀪𑀬𑀲𑀸𑀥𑀸𑀭𑀡𑀁 𑀓𑀢𑁆𑀯𑀸 𑀯𑀺𑀧𑀢𑁆𑀢𑀺𑀯𑀸𑀭𑀸𑀤𑀻𑀦𑀁 𑀯𑀺𑀲𑀺𑀝𑁆𑀞𑀯𑀸𑀭𑀸𑀦𑀁 𑀲𑀗𑁆𑀕𑀳𑀁 𑀓𑀸𑀢𑀼𑀫𑀸𑀳 ‘‘𑀓𑀢𑀺 𑀆𑀧𑀢𑁆𑀢𑀺𑀬𑁄’’𑀢𑀺𑀆𑀤𑀺.

𑁨𑁭𑁪. 𑀪𑀺𑀓𑁆𑀔𑀼𑀦𑀻 𑀲𑀘𑁂 𑀙𑀸𑀤𑁂𑀢𑀺, 𑀘𑀼𑀢𑀸 𑀳𑁄𑀢𑀺. 𑀲𑀘𑁂 𑀯𑁂𑀫𑀢𑀺𑀓𑀸 𑀙𑀸𑀤𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁨𑁭𑁫. 𑀲𑀗𑁆𑀖𑀸𑀤𑀺𑀲𑁂𑀲𑀦𑁆𑀢𑀺 𑀧𑀭𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑀁.

𑁨𑁭𑁬. ‘‘𑀓𑀢𑀺 𑀆𑀘𑀸𑀭𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸’’𑀢𑀺 𑀧𑀤𑀘𑁆𑀙𑁂𑀤𑁄.

𑁨𑁭𑁭. 𑀆𑀘𑀸𑀭𑀯𑀺𑀧𑀢𑁆𑀢𑀺𑀦𑁆𑀢𑀺 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀁.

𑁨𑁭𑁯. 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺𑀦𑁆𑀢𑀺 𑀅𑀳𑁂𑀢𑀼𑀓𑀅𑀓𑀺𑀭𑀺𑀬𑀦𑀢𑁆𑀣𑀺𑀓𑀤𑀺𑀝𑁆𑀞𑀺𑀆𑀤𑀺𑀁 𑀮𑀸𑀫𑀺𑀓𑀁 𑀤𑀺𑀝𑁆𑀞𑀺𑀁.

𑁨𑁮𑁧. 𑀫𑀦𑀼𑀲𑁆𑀲𑀼𑀢𑁆𑀢𑀭𑀺𑀥𑀫𑁆𑀫𑀦𑁆𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁.

𑁨𑁮𑁨. 𑀆𑀚𑀻𑀯𑀳𑁂𑀢𑀼 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀦𑁆𑀦𑁄𑀢𑀺 𑀬𑁄𑀚𑀦𑀸. 𑀧𑀭𑀺𑀬𑀸𑀬𑀯𑀘𑀦𑁂𑀢𑀺 ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀸’’𑀢𑀺𑀆𑀤𑀺𑀓𑁂 𑀮𑁂𑀲𑀯𑀘𑀦𑁂. 𑀜𑀸𑀢𑁂𑀢𑀺 𑀬𑀁 𑀉𑀤𑁆𑀤𑀺𑀲𑁆𑀲 𑀯𑀤𑀢𑀺, 𑀢𑀲𑁆𑀫𑀺𑀁 𑀫𑀦𑀼𑀲𑁆𑀲𑀚𑀸𑀢𑀺𑀓𑁂 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 𑀜𑀸𑀢𑁂.

𑁨𑁮𑁩. 𑀯𑀢𑁆𑀯𑀸𑀢𑀺 𑀅𑀕𑀺𑀮𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸. 𑀪𑀺𑀓𑁆𑀔𑀼𑀦𑀻 𑀧𑀦 𑀲𑀘𑁂 𑀏𑀯𑀁 𑀳𑁄𑀢𑀺, 𑀪𑀺𑀓𑁆𑀔𑀼𑀦𑀻 𑀅𑀕𑀺𑀮𑀸𑀦𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀧𑀡𑀻𑀢𑀪𑁄𑀚𑀦𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀢𑁆𑀢𑀸𑀯𑀺𑀦𑀻 𑀲𑀘𑁂 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀲𑀸 𑀧𑀸𑀝𑀺𑀤𑁂𑀲𑀦𑀻𑀬𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁨𑁮𑁪. ‘‘𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀦𑀸’’𑀢𑀺 𑀇𑀫𑀺𑀦𑀸 𑀧𑀭𑀲𑁆𑀲 𑀜𑀸𑀢𑀓𑀧𑀯𑀸𑀭𑀺𑀢𑁂 𑀢𑀲𑁆𑀲𑁂𑀯𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀢𑁂𑀦 𑀤𑀺𑀦𑁆𑀦𑀁 𑀯𑀸 𑀢𑀲𑁆𑀲 𑀯𑀺𑀲𑁆𑀲𑀸𑀲𑁂𑀦 𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀢𑁂𑀲𑀁 𑀅𑀢𑁆𑀢𑀦𑁄 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂 𑀲𑀼𑀤𑁆𑀥𑀘𑀺𑀢𑁆𑀢𑀢𑀸𑀬 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺.

𑀇𑀢𑀺 𑀉𑀢𑁆𑀢𑀭𑁂 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸

𑀘𑀢𑀼𑀯𑀺𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.