𑀫𑀳𑀸𑀯𑀺𑀪𑀗𑁆𑀕𑀲𑀗𑁆𑀕𑀳𑀓𑀣𑀸𑀯𑀡𑁆𑀡𑀦𑀸

𑁪. 𑀏𑀯𑀁 𑀲𑁄𑀢𑀼𑀚𑀦𑀁 𑀲𑀯𑀦𑁂 𑀦𑀺𑀬𑁄𑀚𑁂𑀢𑁆𑀯𑀸 𑀬𑀣𑀸𑀧𑀝𑀺𑀜𑁆𑀜𑀸𑀢𑀁 𑀉𑀢𑁆𑀢𑀭𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀫𑁂𑀣𑀼𑀦’’𑀦𑁆𑀢𑀺𑀆𑀤𑀺. ‘‘𑀓𑀢𑀺 𑀆𑀧𑀢𑁆𑀢𑀺𑀬𑁄’’𑀢𑀺 𑀅𑀬𑀁 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸, 𑀅𑀤𑀺𑀝𑁆𑀞𑀚𑁄𑀢𑀦𑀸, 𑀯𑀺𑀫𑀢𑀺𑀘𑁆𑀙𑁂𑀤𑀦𑀸, 𑀅𑀦𑀼𑀫𑀢𑀺, 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀢𑀺 𑀧𑀜𑁆𑀘𑀦𑁆𑀦𑀁 𑀧𑀼𑀘𑁆𑀙𑀸𑀦𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂𑀢𑀺 𑀢𑀲𑁆𑀲𑀸 𑀲𑀗𑁆𑀔𑁂𑀧𑀢𑁄 𑀯𑀺𑀲𑁆𑀲𑀚𑁆𑀚𑀦𑀁.

𑁫. 𑀏𑀯𑀁 𑀕𑀡𑀦𑀸𑀯𑀲𑁂𑀦 𑀤𑀲𑁆𑀲𑀺𑀢𑀸𑀦𑀁 ‘‘𑀪𑀯𑁂’’𑀢𑀺𑀆𑀤𑀺 𑀲𑀭𑀽𑀧𑀢𑁄 𑀤𑀲𑁆𑀲𑀦𑀁. 𑀔𑁂𑀢𑁆𑀢𑁂𑀢𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀮𑁆𑀮𑁄𑀓𑀸𑀲𑁂 𑀢𑀺𑀮𑀩𑀻𑀚𑀫𑀢𑁆𑀢𑁂𑀧𑀺 𑀧𑀤𑁂𑀲𑁂. 𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀪𑀯𑁂𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. ‘‘𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑁂’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀉𑀧𑀟𑁆𑀠𑀓𑁆𑀔𑀸𑀬𑀺𑀢𑁂𑀧𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀢𑀸. 𑀯𑀝𑁆𑀝𑀓𑀢𑁂 𑀫𑀼𑀔𑁂 𑀅𑀨𑀼𑀲𑀦𑁆𑀢𑀁 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑁬. ‘‘𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑁄’’𑀢𑀺𑀆𑀤𑀬𑁄𑀧𑀺 𑀯𑀼𑀢𑁆𑀢𑀦𑀬𑀸𑀬𑁂𑀯.

𑁭. 𑀧𑀜𑁆𑀘𑀫𑀸𑀲𑀕𑁆𑀖𑀦𑁂 𑀯𑀸𑀧𑀻𑀢𑀺 𑀧𑁄𑀭𑀸𑀡𑀓𑀲𑁆𑀲 𑀦𑀻𑀮𑀓𑀳𑀸𑀧𑀡𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀲𑀗𑁆𑀔𑀸𑀢𑁂 𑀧𑀜𑁆𑀘𑀫𑀸𑀲𑁂, 𑀢𑀤𑀕𑁆𑀖𑀦𑀓𑁂 𑀯𑀸. 𑀅𑀥𑀺𑀓𑁂 𑀯𑀸𑀢𑀺 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑁂 𑀯𑀸 𑀢𑀤𑀕𑁆𑀖𑀦𑀓𑁂 𑀯𑀸. 𑀅𑀤𑀺𑀦𑁆𑀦𑁂 𑀧𑀜𑁆𑀘𑀯𑀻𑀲𑀢𑀺𑀬𑀸 𑀅𑀯𑀳𑀸𑀭𑀸𑀦𑀁 𑀅𑀜𑁆𑀜𑀢𑀭𑁂𑀦 𑀅𑀯𑀳𑀝𑁂 𑀧𑀭𑀸𑀚𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀫𑀸𑀲𑁂 𑀯𑀸 𑀊𑀦𑀫𑀸𑀲𑁂 𑀯𑀸 𑀢𑀤𑀕𑁆𑀖𑀦𑀓𑁂 𑀯𑀸 𑀤𑀼𑀓𑁆𑀓𑀝𑀁. 𑀢𑀢𑁄 𑀫𑀚𑁆𑀛𑁂𑀢𑀺 𑀧𑀜𑁆𑀘𑀫𑀸𑀲𑀓𑀢𑁄 𑀫𑀚𑁆𑀛𑁂. 𑀧𑀜𑁆𑀘 𑀫𑀸𑀲𑀸 𑀲𑀫𑀸𑀳𑀝𑀸, 𑀧𑀜𑁆𑀘𑀦𑁆𑀦𑀁 𑀫𑀸𑀲𑀸𑀦𑀁 𑀲𑀫𑀸𑀳𑀸𑀭𑁄𑀢𑀺 𑀯𑀸 𑀧𑀜𑁆𑀘𑀫𑀸𑀲𑀁, 𑀧𑀜𑁆𑀘𑀫𑀸𑀲𑀁 𑀅𑀕𑁆𑀖𑀢𑀻𑀢𑀺 𑀧𑀜𑁆𑀘𑀫𑀸𑀲𑀕𑁆𑀖𑀦𑀁, 𑀧𑀜𑁆𑀘𑀫𑀸𑀲𑀜𑁆𑀘 𑀧𑀜𑁆𑀘𑀫𑀸𑀲𑀕𑁆𑀖𑀦𑀜𑁆𑀘 𑀧𑀜𑁆𑀘𑀫𑀸𑀲𑀕𑁆𑀖𑀦𑀁, 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄𑀬𑀁, 𑀢𑀲𑁆𑀫𑀺𑀁. 𑀫𑀸𑀲𑁂 𑀯𑀸𑀢𑀺 𑀏𑀢𑁆𑀣𑀸𑀧𑀺 𑀫𑀸𑀲𑁄 𑀘 𑀫𑀸𑀲𑀕𑁆𑀖𑀦𑀓𑀜𑁆𑀘 𑀫𑀸𑀲𑀫𑀸𑀲𑀕𑁆𑀖𑀦𑀓𑁄𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀫𑀸𑀲𑁂’’𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄, 𑀉𑀢𑁆𑀢𑀭𑀧𑀤𑀮𑁄𑀧𑁄 𑀘 𑀤𑀝𑁆𑀞𑀩𑁆𑀩𑁄.

‘‘𑀧𑀜𑁆𑀘𑀫𑀸𑀲𑀕𑁆𑀖𑀦𑁂’’𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑁂𑀧𑀺 𑀧𑁄𑀭𑀸𑀡𑀓𑀲𑁆𑀲 𑀦𑀻𑀮𑀓𑀳𑀸𑀧𑀡𑀲𑁆𑀲𑁂𑀯 𑀘𑀢𑀼𑀢𑁆𑀣𑀪𑀸𑀕𑀯𑀲𑁂𑀦 𑀧𑀜𑁆𑀘𑀫𑀸𑀲𑀦𑀺𑀬𑀫𑁄 𑀓𑀸𑀢𑀩𑁆𑀩𑁄. 𑀢𑀣𑀸 𑀳𑀺 𑀪𑀕𑀯𑀢𑀸 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀸𑀧𑁂𑀦𑁆𑀢𑁂𑀦 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑀁 𑀧𑀼𑀭𑀸𑀡𑀯𑁄𑀳𑀸𑀭𑀺𑀓𑀫𑀳𑀸𑀫𑀢𑁆𑀢𑀁 𑀪𑀺𑀓𑁆𑀔𑀼𑀁 ‘‘𑀓𑀺𑀢𑁆𑀢𑀓𑁂𑀦 𑀯𑀢𑁆𑀣𑀼𑀦𑀸 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀘𑁄𑀭𑀁 𑀕𑀳𑁂𑀢𑁆𑀯𑀸 𑀳𑀦𑀢𑀺 𑀯𑀸 𑀩𑀦𑁆𑀥𑀢𑀺 𑀯𑀸 𑀧𑀩𑁆𑀩𑀸𑀚𑁂𑀢𑀺 𑀯𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 ‘‘𑀧𑀸𑀤𑁂𑀦 𑀯𑀸 𑀧𑀸𑀤𑀸𑀭𑀳𑁂𑀦 𑀯𑀸’’𑀢𑀺 𑀯𑀼𑀢𑁆𑀢𑁂 𑀢𑁂𑀦𑁂𑀯 𑀧𑀫𑀸𑀡𑁂𑀦 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑀲𑁆𑀲 𑀧𑀜𑁆𑀜𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀜𑁆𑀘 𑁋

‘‘𑀧𑀜𑁆𑀘𑀫𑀸𑀲𑀓𑁄 𑀧𑀸𑀤𑁄𑀢𑀺 𑀧𑀸𑀴𑀺𑀁 𑀉𑀮𑁆𑀮𑀺𑀗𑁆𑀕𑀺𑀢𑁆𑀯𑀸 ‘𑀢𑀤𑀸 𑀭𑀸𑀚𑀕𑀳𑁂 𑀯𑀻𑀲𑀢𑀺𑀫𑀸𑀲𑀓𑁄 𑀓𑀳𑀸𑀧𑀡𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀜𑁆𑀘𑀫𑀸𑀲𑀓𑁄 𑀧𑀸𑀤𑁄’. 𑀏𑀢𑁂𑀦 𑀮𑀓𑁆𑀔𑀡𑁂𑀦 𑀲𑀩𑁆𑀩𑀚𑀦𑀧𑀤𑁂𑀲𑀼 𑀓𑀳𑀸𑀧𑀡𑀲𑁆𑀲 𑀘𑀢𑀼𑀢𑁆𑀣𑁄 𑀪𑀸𑀕𑁄 ‘𑀧𑀸𑀤𑁄’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀔𑁄 𑀧𑁄𑀭𑀸𑀡𑀓𑀲𑁆𑀲 𑀦𑀻𑀮𑀓𑀳𑀸𑀧𑀡𑀲𑁆𑀲 𑀯𑀲𑁂𑀦, 𑀦 𑀇𑀢𑀭𑁂𑀲𑀁 𑀤𑀼𑀤𑁆𑀭𑀤𑀸𑀫𑀓𑀸𑀤𑀻𑀦𑀁. 𑀢𑁂𑀦 𑀳𑀺 𑀧𑀸𑀤𑁂𑀦 𑀅𑀢𑀻𑀢𑀸 𑀩𑀼𑀤𑁆𑀥𑀸𑀧𑀺 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀲𑀼𑀁, 𑀅𑀦𑀸𑀕𑀢𑀸𑀧𑀺 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺. 𑀲𑀩𑁆𑀩𑀩𑀼𑀤𑁆𑀥𑀸𑀦𑀜𑁆𑀳𑀺 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀫𑁆𑀳𑀺 𑀯𑀸 𑀧𑀸𑀭𑀸𑀚𑀺𑀓𑁂 𑀯𑀸 𑀦𑀸𑀦𑀢𑁆𑀢𑀁 𑀦𑀢𑁆𑀣𑀺, 𑀇𑀫𑀸𑀦𑁂𑀯 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀯𑀢𑁆𑀣𑀽𑀦𑀺, 𑀇𑀫𑀸𑀦𑁂𑀯 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺, 𑀇𑀢𑁄 𑀊𑀦𑀁 𑀯𑀸 𑀅𑀢𑀺𑀭𑁂𑀓𑀁 𑀯𑀸 𑀦𑀢𑁆𑀣𑀺. 𑀢𑀲𑁆𑀫𑀸 𑀪𑀕𑀯𑀸𑀧𑀺 𑀥𑀦𑀺𑀬𑀁 𑀯𑀺𑀕𑀭𑀳𑀺𑀢𑁆𑀯𑀸 𑀧𑀸𑀤𑁂𑀦𑁂𑀯 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀦𑁆𑀢𑁄 ‘𑀬𑁄 𑀧𑀦 𑀪𑀺𑀓𑁆𑀔𑀼 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢’𑀦𑁆𑀢𑀺𑀆𑀤𑀺𑀫𑀸𑀳𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁮𑁮) 𑀯𑀼𑀢𑁆𑀢𑀁.

𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀜𑁆𑀘 𑁋

‘‘𑀘𑀢𑀼𑀢𑁆𑀣𑁄 𑀪𑀸𑀕𑁄 𑀧𑀸𑀤𑁄𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀇𑀫𑀺𑀦𑀸𑀯 𑀲𑀩𑁆𑀩𑀚𑀦𑀧𑀤𑁂𑀲𑀼 𑀓𑀳𑀸𑀧𑀡𑀲𑁆𑀲𑁂𑀯 𑀯𑀻𑀲𑀢𑀺𑀫𑁄 𑀪𑀸𑀕𑁄𑀫𑀸𑀲𑀓𑁄𑀢𑀺 𑀇𑀤𑀜𑁆𑀘 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀧𑁄𑀭𑀸𑀡𑀲𑀢𑁆𑀣𑀸𑀦𑀼𑀭𑀽𑀧𑀁 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀸 𑀉𑀧𑁆𑀧𑀸𑀤𑀺𑀢𑀸 𑀦𑀻𑀮𑀓𑀳𑀸𑀧𑀡𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑀼𑀤𑁆𑀭𑀤𑀸𑀫𑁂𑀦 𑀉𑀧𑁆𑀧𑀸𑀤𑀺𑀢𑁄 𑀤𑀼𑀤𑁆𑀭𑀤𑀸𑀫𑀓𑁄. 𑀲𑁄 𑀓𑀺𑀭 𑀦𑀻𑀮𑀓𑀳𑀸𑀧𑀡𑀲𑁆𑀲 𑀢𑀺𑀪𑀸𑀕𑀁 𑀅𑀕𑁆𑀖𑀢𑀻’𑀢𑀺 𑀯𑀢𑁆𑀯𑀸 ‘𑀬𑀲𑁆𑀫𑀺𑀁 𑀧𑀤𑁂𑀲𑁂 𑀦𑀻𑀮𑀓𑀳𑀸𑀧𑀡𑀸 𑀦 𑀲𑀦𑁆𑀢𑀺, 𑀢𑀢𑁆𑀣𑀸𑀧𑀺 𑀦𑀻𑀮𑀓𑀳𑀸𑀧𑀡𑀯𑀲𑁂𑀦𑁂𑀯 𑀧𑀭𑀺𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄. 𑀓𑀣𑀁? 𑀦𑀻𑀮𑀓𑀳𑀸𑀧𑀡𑀸𑀦𑀁 𑀯𑀴𑀜𑁆𑀚𑀦𑀝𑁆𑀞𑀸𑀦𑁂 𑀘 𑀅𑀯𑀴𑀜𑁆𑀚𑀦𑀝𑁆𑀞𑀸𑀦𑁂 𑀘 𑀲𑀫𑀸𑀦𑀅𑀕𑁆𑀖𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀪𑀡𑁆𑀟𑀁 𑀦𑀻𑀮𑀓𑀳𑀸𑀧𑀡𑁂𑀦 𑀲𑀫𑀸𑀦𑀕𑁆𑀖𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀕𑁆𑀖𑀦𑀓𑀁 𑀦𑀻𑀮𑀓𑀳𑀸𑀧𑀡𑀲𑁆𑀲 𑀧𑀸𑀤𑀕𑁆𑀖𑀦𑀓𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑁄 𑀓𑀸𑀢𑀩𑁆𑀩𑁄’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁮𑁮) 𑀅𑀬𑀫𑀢𑁆𑀣𑁄𑀯 𑀯𑀼𑀢𑁆𑀢𑁄.

𑀏𑀢𑁆𑀣 𑀓𑀳𑀸𑀧𑀡𑀁 𑀦𑀸𑀫 𑀓𑀭𑁄𑀦𑁆𑀢𑀸 𑀲𑀼𑀯𑀡𑁆𑀡𑁂𑀦𑀧𑀺 𑀓𑀭𑁄𑀦𑁆𑀢𑀺 𑀭𑀚𑀢𑁂𑀦𑀧𑀺 𑀢𑀫𑁆𑀩𑁂𑀦𑀧𑀺 𑀲𑀼𑀯𑀡𑁆𑀡𑀭𑀚𑀢𑀢𑀫𑁆𑀩𑀫𑀺𑀲𑁆𑀲𑀓𑁂𑀦𑀧𑀺. 𑀢𑁂𑀲𑀼 𑀓𑀢𑀭𑀁 𑀓𑀳𑀸𑀧𑀡𑀁 𑀦𑀻𑀮𑀓𑀳𑀸𑀧𑀡𑀦𑁆𑀢𑀺? 𑀓𑁂𑀘𑀺 𑀢𑀸𑀯 ‘‘𑀲𑀼𑀯𑀡𑁆𑀡𑀓𑀳𑀸𑀧𑀡’’𑀦𑁆𑀢𑀺. 𑀓𑁂𑀘𑀺 ‘‘𑀫𑀺𑀲𑁆𑀲𑀓𑀓𑀳𑀸𑀧𑀡’’𑀦𑁆𑀢𑀺. 𑀢𑀢𑁆𑀣 ‘‘𑀲𑀼𑀯𑀡𑁆𑀡𑀓𑀳𑀸𑀧𑀡’’𑀦𑁆𑀢𑀺 𑀯𑀤𑀦𑁆𑀢𑀸𑀦𑀁 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀦𑀸 𑀧𑀸𑀤𑁂𑀦 𑀲𑀩𑁆𑀩𑀢𑁆𑀣 𑀏𑀓𑀮𑀓𑁆𑀔𑀡𑁂𑀦 𑀪𑀯𑀺𑀢𑀩𑁆𑀩𑀁, 𑀓𑀸𑀮𑀤𑁂𑀲𑀧𑀭𑀺𑀪𑁄𑀕𑀸𑀤𑀺𑀯𑀲𑁂𑀦 𑀅𑀕𑁆𑀖𑀦𑀸𑀦𑀢𑁆𑀢𑀁 𑀧𑀸𑀤𑀲𑁆𑀲𑁂𑀯 𑀪𑀯𑀺𑀢𑀩𑁆𑀩𑀁. 𑀪𑀕𑀯𑀢𑀸 𑀳𑀺 𑀥𑀫𑁆𑀫𑀺𑀓𑀭𑀸𑀚𑀽𑀳𑀺 𑀳𑀦𑀦𑀩𑀦𑁆𑀥𑀦𑀧𑀩𑁆𑀩𑀸𑀚𑀦𑀸𑀦𑀼𑀭𑀽𑀧𑁂𑀦𑁂𑀯 𑀅𑀤𑀺𑀦𑁆𑀦𑀸𑀤𑀸𑀦𑁂 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀢𑁆𑀢𑀁, 𑀦 𑀇𑀢𑀭𑀣𑀸. 𑀢𑀲𑁆𑀫𑀸 𑀏𑀲𑀸 𑀲𑀩𑁆𑀩𑀤𑀸 𑀲𑀩𑁆𑀩𑀢𑁆𑀣 𑀅𑀩𑁆𑀬𑀪𑀺𑀘𑀸𑀭𑀻𑀢𑀺 𑀲𑀼𑀯𑀡𑁆𑀡𑀫𑀬𑀲𑁆𑀲 𑀓𑀳𑀸𑀧𑀡𑀲𑁆𑀲 𑀘𑀢𑀼𑀢𑁆𑀣𑁂𑀦 𑀧𑀸𑀤𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺.

‘‘𑀫𑀺𑀲𑁆𑀲𑀓𑀓𑀳𑀸𑀧𑀡’’𑀦𑁆𑀢𑀺 𑀯𑀤𑀦𑁆𑀢𑀸𑀦𑀁 𑀧𑀦 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋

𑀅𑀝𑁆𑀞𑀓𑀣𑀸𑀬𑀁 𑁋

‘‘𑀢𑀤𑀸 𑀭𑀸𑀚𑀕𑀳𑁂 𑀯𑀻𑀲𑀢𑀺𑀫𑀸𑀲𑀓𑁄 𑀓𑀳𑀸𑀧𑀡𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀜𑁆𑀘𑀫𑀸𑀲𑀓𑁄 𑀧𑀸𑀤𑁄. 𑀏𑀢𑁂𑀦 𑀮𑀓𑁆𑀔𑀡𑁂𑀦 𑀲𑀩𑁆𑀩𑀚𑀦𑀧𑀤𑁂𑀲𑀼 𑀓𑀳𑀸𑀧𑀡𑀲𑁆𑀲 𑀘𑀢𑀼𑀢𑁆𑀣𑁄 𑀪𑀸𑀕𑁄 ‘𑀧𑀸𑀤𑁄’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀔𑁄 𑀧𑁄𑀭𑀸𑀡𑀓𑀲𑁆𑀲 𑀦𑀻𑀮𑀓𑀳𑀸𑀧𑀡𑀲𑁆𑀲 𑀯𑀲𑁂𑀦, 𑀦 𑀇𑀢𑀭𑁂𑀲𑀁 𑀤𑀼𑀤𑁆𑀭𑀤𑀸𑀫𑀓𑀸𑀤𑀻𑀦’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁮𑁮) 𑁋

𑀯𑀼𑀢𑁆𑀢𑀢𑁆𑀢𑀸, 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀜𑁆𑀘 𑁋

‘‘𑀧𑁄𑀭𑀸𑀡𑀲𑀢𑁆𑀣𑀸𑀦𑀼𑀭𑀽𑀧𑀁 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀸 𑀉𑀧𑁆𑀧𑀸𑀤𑀺𑀢𑀸 𑀦𑀻𑀮𑀓𑀳𑀸𑀧𑀡𑀸𑀢𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁮𑁮) 𑁋

𑀯𑀼𑀢𑁆𑀢𑀢𑁆𑀢𑀸 𑀘 ‘‘𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀁 𑀧𑀢𑁆𑀯𑀸 𑀕𑀭𑀼𑀓𑁂 𑀞𑀸𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀢𑁄 𑀘 𑀫𑀺𑀲𑁆𑀲𑀓𑀓𑀳𑀸𑀧𑀡𑁄𑀬𑁂𑀯 𑀦𑀻𑀮𑀓𑀳𑀸𑀧𑀡𑁄. 𑀢𑀢𑁆𑀣𑁂𑀯 𑀳𑀺 𑀧𑁄𑀭𑀸𑀡𑀲𑀢𑁆𑀣𑀯𑀺𑀳𑀺𑀢𑀁 𑀮𑀓𑁆𑀔𑀡𑀁 𑀤𑀺𑀲𑁆𑀲𑀢𑀺. 𑀓𑀣𑀁? 𑀧𑀜𑁆𑀘 𑀫𑀸𑀲𑀸 𑀲𑀼𑀯𑀡𑁆𑀡𑀲𑁆𑀲, 𑀢𑀣𑀸 𑀭𑀚𑀢𑀲𑁆𑀲, 𑀤𑀲 𑀫𑀸𑀲𑀸 𑀢𑀫𑁆𑀩𑀲𑁆𑀲𑀸𑀢𑀺 𑀏𑀢𑁂 𑀯𑀻𑀲𑀢𑀺 𑀫𑀸𑀲𑁂 𑀫𑀺𑀲𑁆𑀲𑁂𑀢𑁆𑀯𑀸 𑀩𑀦𑁆𑀥𑀦𑀢𑁆𑀣𑀸𑀬 𑀯𑀻𑀳𑀺𑀫𑀢𑁆𑀢𑀁 𑀮𑁄𑀳𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀓𑁆𑀔𑀭𑀸𑀦𑀺 𑀘 𑀳𑀢𑁆𑀣𑀺𑀆𑀤𑀻𑀦𑀫𑀜𑁆𑀜𑀢𑀭𑀜𑁆𑀘 𑀭𑀽𑀧𑀁 𑀤𑀲𑁆𑀲𑁂𑀢𑁆𑀯𑀸 𑀓𑀢𑁄 𑀦𑀺𑀤𑁆𑀤𑁄𑀲𑀢𑁆𑀢𑀸 𑀦𑀻𑀮𑀓𑀳𑀸𑀧𑀡𑁄 𑀦𑀸𑀫 𑀳𑁄𑀢𑀻𑀢𑀺.

𑀲𑀺𑀓𑁆𑀔𑀸𑀪𑀸𑀚𑀦𑀯𑀺𑀦𑀺𑀘𑁆𑀙𑀬𑁂 𑀘 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 ‘‘𑀧𑀸𑀤𑁄 𑀦𑀸𑀫 𑀧𑀜𑁆𑀘 𑀫𑀸𑀲𑀸 𑀲𑀼𑀯𑀡𑁆𑀡𑀲𑁆𑀲𑀸’’𑀢𑀺 𑀧𑀼𑀭𑀺𑀫𑀧𑀓𑁆𑀔𑀯𑀸𑀤𑀻𑀦𑀁 𑀫𑀢𑁂𑀦 𑀧𑀸𑀞𑁄 𑀮𑀺𑀔𑀺𑀢𑁄. 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀤𑀼𑀢𑀺𑀬𑀧𑀓𑁆𑀔𑀯𑀸𑀤𑀻𑀦𑀁 𑀫𑀢𑁂𑀦 ‘‘𑀧𑀜𑁆𑀘 𑀫𑀸𑀲𑀸 𑀳𑀺𑀭𑀜𑁆𑀜𑀲𑁆𑀲𑀸’’𑀢𑀺 𑀧𑀸𑀞𑁄 𑀮𑀺𑀔𑀺𑀢𑁄. 𑀲𑀻𑀳𑀴𑀪𑀸𑀲𑀸𑀬 𑀧𑁄𑀭𑀸𑀡𑀓𑁂𑀳𑀺 𑀮𑀺𑀔𑀺𑀢𑀸𑀬 𑀲𑀸𑀫𑀡𑁂𑀭𑀲𑀺𑀓𑁆𑀔𑀸𑀬 𑀧𑀦 𑁋

‘‘𑀧𑁄𑀭𑀸𑀡𑀓𑀲𑁆𑀲 𑀦𑀻𑀮𑀓𑀳𑀸𑀧𑀡𑀲𑁆𑀲𑀸𑀢𑀺 𑀯𑀼𑀢𑁆𑀢𑀅𑀝𑁆𑀞𑀓𑀣𑀸𑀯𑀘𑀦𑀲𑁆𑀲, 𑀧𑁄𑀭𑀸𑀡𑀓𑁂 𑀭𑀢𑀦𑀲𑀼𑀢𑁆𑀢𑀸𑀪𑀺𑀥𑀸𑀦𑀓𑀲𑀼𑀢𑁆𑀢𑁂 𑀯𑀼𑀢𑁆𑀢𑀓𑀳𑀸𑀧𑀡𑀮𑀓𑁆𑀔𑀡𑀲𑁆𑀲 𑀘 𑀅𑀦𑀼𑀭𑀽𑀧𑀢𑁄 ‘𑀲𑀼𑀯𑀡𑁆𑀡𑀭𑀚𑀢𑀢𑀫𑁆𑀩𑀸𑀦𑀺 𑀫𑀺𑀲𑁆𑀲𑁂𑀢𑁆𑀯𑀸 𑀉𑀝𑁆𑀞𑀸𑀧𑁂𑀢𑁆𑀯𑀸 𑀓𑀢𑀓𑀳𑀸𑀧𑀡𑀁 𑀓𑀳𑀸𑀧𑀡𑀁 𑀦𑀸𑀫𑀸’𑀢𑀺 𑀘 ‘𑀲𑀸𑀫𑀡𑁂𑀭𑀸𑀦𑀫𑀼𑀧𑀲𑀫𑁆𑀧𑀦𑁆𑀦𑀸𑀦𑀜𑁆𑀘 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀫𑁆𑀳𑀺 𑀓𑁄 𑀯𑀺𑀲𑁂𑀲𑁄’𑀢𑀺 𑀧𑀼𑀘𑁆𑀙𑀁 𑀓𑀢𑁆𑀯𑀸 ‘𑀲𑀸𑀫𑀡𑁂𑀭𑀸𑀦𑀁 𑀤𑀲𑀺𑀓𑀲𑀼𑀢𑁆𑀢𑁂𑀦𑀸𑀧𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺, 𑀉𑀧𑀲𑀫𑁆𑀧𑀦𑁆𑀦𑀸𑀦𑀁 𑀧𑀦 𑀲𑀼𑀯𑀡𑁆𑀡𑀲𑁆𑀲 𑀯𑀻𑀲𑀢𑀺𑀯𑀻𑀳𑀺𑀫𑀢𑁆𑀢𑁂𑀦𑀸’’𑀢𑀺 𑁋

𑀘 𑀯𑀺𑀲𑁂𑀲𑁄 𑀤𑀲𑁆𑀲𑀺𑀢𑁄.

𑀢𑀁 𑀧𑀦 𑀲𑀼𑀯𑀡𑁆𑀡𑀫𑀸𑀲𑀓𑀯𑀲𑁂𑀦 𑀅𑀟𑁆𑀠𑀢𑀺𑀬𑀫𑀸𑀲𑀓𑀁 𑀳𑁄𑀢𑀺, 𑀧𑀜𑁆𑀘𑀫𑀸𑀲𑀓𑁂𑀦 𑀘 𑀪𑀕𑀯𑀢𑀸 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀢𑁆𑀢𑀁. 𑀢𑀲𑁆𑀫𑀸 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀲𑁆𑀲 𑀓𑀳𑀸𑀧𑀡𑀲𑁆𑀲 𑀲𑀩𑁆𑀩𑀤𑁂𑀲𑁂𑀲𑀼 𑀅𑀮𑀩𑁆𑀪𑀫𑀸𑀦𑀢𑁆𑀢𑀸 𑀲𑀩𑁆𑀩𑀤𑁂𑀲𑀲𑀸𑀥𑀸𑀭𑀡𑁂𑀦 𑀢𑀲𑁆𑀲 𑀫𑀺𑀲𑁆𑀲𑀓𑀓𑀳𑀸𑀧𑀡𑀲𑁆𑀲 𑀧𑀜𑁆𑀘𑀫𑀸𑀲𑀧𑀸𑀤𑀕𑁆𑀖𑀦𑀓𑁂𑀦 𑀲𑀼𑀯𑀡𑁆𑀡𑁂𑀦𑁂𑀯 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀫𑁆𑀳𑀺 𑀦𑀺𑀬𑀫𑀺𑀢𑁂 𑀲𑀩𑁆𑀩𑀤𑁂𑀲𑀯𑀸𑀲𑀻𑀦𑀁 𑀉𑀧𑀓𑀸𑀭𑀸𑀬 𑀳𑁄𑀢𑀻𑀢𑀺 𑀏𑀯𑀁 𑀲𑀼𑀯𑀡𑁆𑀡𑁂𑀦𑁂𑀯 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀧𑀭𑀺𑀘𑁆𑀙𑁂𑀤𑁄 𑀓𑀢𑁄. 𑀅𑀬𑀫𑁂𑀯 𑀦𑀺𑀬𑀫𑁄 𑀲𑀻𑀳𑀴𑀸𑀘𑀭𑀺𑀬𑀯𑀸𑀤𑁂𑀳𑀺 𑀲𑀸𑀭𑁄𑀢𑀺 𑀕𑀳𑀺𑀢𑁄. 𑀢𑀲𑁆𑀫𑀸 𑀲𑀺𑀓𑁆𑀔𑀸𑀕𑀭𑀼𑀓𑁂𑀳𑀺 𑀲𑀩𑁆𑀩𑀢𑁆𑀣 𑀧𑁂𑀲𑀮𑁂𑀳𑀺 𑀯𑀺𑀦𑀬𑀥𑀭𑁂𑀳𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑁄. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀳𑁂𑀫𑀭𑀚𑀢𑀢𑀫𑁆𑀩𑁂𑀳𑀺, 𑀲𑀢𑁆𑀣𑁂 𑀦𑀺𑀤𑁆𑀤𑀺𑀝𑁆𑀞𑀮𑀓𑁆𑀔𑀡𑀁;

𑀅𑀳𑀸𑀧𑁂𑀢𑁆𑀯𑀸 𑀓𑀢𑁄 𑀯𑀻𑀲-𑀫𑀸𑀲𑁄 𑀦𑀻𑀮𑀓𑀳𑀸𑀧𑀡𑁄.

𑀳𑁂𑀫𑀧𑀸𑀤𑀁 𑀲𑀚𑁆𑀛𑀼𑀧𑀸𑀤𑀁, 𑀢𑀫𑁆𑀩𑀧𑀸𑀤𑀤𑁆𑀯𑀬𑀜𑁆𑀳𑀺 𑀲𑁄;

𑀫𑀺𑀲𑁆𑀲𑁂𑀢𑁆𑀯𑀸 𑀭𑀽𑀧𑀫𑀧𑁆𑀧𑁂𑀢𑁆𑀯𑀸, 𑀓𑀸𑀢𑀼𑀁 𑀲𑀢𑁆𑀣𑁂𑀲𑀼 𑀤𑀲𑁆𑀲𑀺𑀢𑁄.

‘𑀏𑀮𑀸’𑀢𑀺 𑀯𑀼𑀘𑁆𑀘𑀢𑁂 𑀤𑁄𑀲𑁄, 𑀦𑀺𑀤𑁆𑀤𑁄𑀲𑀢𑁆𑀢𑀸 𑀢𑀣𑀻𑀭𑀺𑀢𑁄;

𑀢𑀲𑁆𑀲 𑀧𑀸𑀤𑁄 𑀲𑀼𑀯𑀡𑁆𑀡𑀲𑁆𑀲, 𑀯𑀻𑀲𑀯𑀻𑀳𑀕𑁆𑀖𑀦𑁄 𑀫𑀢𑁄.

𑀬𑀲𑁆𑀫𑀺𑀁 𑀧𑀦 𑀧𑀤𑁂𑀲𑁂 𑀲𑁄, 𑀦 𑀯𑀢𑁆𑀢𑀢𑀺 𑀓𑀳𑀸𑀧𑀡𑁄;

𑀯𑀻𑀲𑀲𑁄𑀯𑀡𑁆𑀡𑀯𑀻𑀳𑀕𑁆𑀖𑀁, 𑀢𑀧𑁆𑀧𑀸𑀤𑀕𑁆𑀖𑀦𑁆𑀢𑀺 𑀯𑁂𑀤𑀺𑀬𑀁.

𑀯𑀻𑀲𑀲𑁄𑀯𑀡𑁆𑀡𑀯𑀻𑀳𑀕𑁆𑀖𑀁, 𑀣𑁂𑀦𑁂𑀦𑁆𑀢𑀸 𑀪𑀺𑀓𑁆𑀔𑀯𑁄 𑀢𑀢𑁄;

𑀘𑀯𑀦𑁆𑀢𑀺 𑀲𑀸𑀫𑀜𑁆𑀜𑀕𑀼𑀡𑀸, 𑀇𑀘𑁆𑀘𑀸𑀳𑀼 𑀯𑀺𑀦𑀬𑀜𑁆𑀜𑀼𑀦𑁄’’𑀢𑀺.

𑁯. 𑀑𑀧𑀸𑀢𑀦𑁆𑀢𑀺 𑀆𑀯𑀸𑀝𑀁. 𑀤𑀼𑀓𑁆𑀔𑁂 𑀚𑀸𑀢𑁂𑀢𑀺 𑀬𑁄𑀚𑀦𑀸.

𑁧𑁦. 𑀉𑀢𑁆𑀢𑀭𑀺𑀁 𑀥𑀫𑁆𑀫𑀦𑁆𑀢𑀺 𑀏𑀢𑁆𑀣 ‘‘𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀫𑀚𑁆𑀛𑀧𑀤𑀮𑁄𑀧𑀁, 𑀦𑀺𑀕𑁆𑀕𑀳𑀻𑀢𑀸𑀕𑀫𑀜𑁆𑀘 𑀓𑀢𑁆𑀯𑀸 ‘‘𑀉𑀢𑁆𑀢𑀭𑀺𑀁 𑀥𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀸𑀦𑀁 𑀛𑀸𑀬𑀻𑀦𑀜𑁆𑀘𑁂𑀯 𑀅𑀭𑀺𑀬𑀸𑀦𑀜𑁆𑀘 𑀥𑀫𑁆𑀫𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁. 𑀅𑀢𑁆𑀢𑀼𑀧𑀦𑀸𑀬𑀺𑀓𑀦𑁆𑀢𑀺 𑀅𑀢𑁆𑀢𑀦𑀺 𑀢𑀁 𑀉𑀧𑀦𑁂𑀢𑀺 ‘‘𑀫𑀬𑀺 𑀅𑀢𑁆𑀣𑀻’’𑀢𑀺 𑀲𑀫𑀼𑀤𑀸𑀘𑀭𑀦𑁆𑀢𑁄, 𑀅𑀢𑁆𑀢𑀸𑀦𑀁 𑀯𑀸 𑀢𑀢𑁆𑀣 𑀉𑀧𑀦𑁂𑀢𑀺 ‘‘𑀅𑀳𑀁 𑀏𑀢𑁆𑀣 𑀲𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀲𑀫𑀼𑀤𑀸𑀘𑀭𑀦𑁆𑀢𑁄𑀢𑀺 𑀅𑀢𑁆𑀢𑀼𑀧𑀦𑀸𑀬𑀺𑀓𑁄, 𑀢𑀁 𑀅𑀢𑁆𑀢𑀼𑀧𑀦𑀸𑀬𑀺𑀓𑀁, 𑀏𑀯𑀁 𑀓𑀢𑁆𑀯𑀸 𑀯𑀤𑀦𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁧. 𑀧𑀭𑀺𑀬𑀸𑀬𑁂𑀢𑀺 ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀸’’𑀢𑀺𑀆𑀤𑀺𑀦𑀸 (𑀧𑀭𑀺. 𑁨𑁮𑁭) 𑀧𑀭𑀺𑀬𑀸𑀬𑀪𑀡𑀦𑁂. 𑀜𑀸𑀢𑁂𑀢𑀺 𑀬𑀁 𑀉𑀤𑁆𑀤𑀺𑀲𑁆𑀲 𑀪𑀡𑀢𑀺, 𑀢𑀲𑁆𑀫𑀺𑀁 𑀯𑀺𑀜𑁆𑀜𑀼𑀫𑁆𑀳𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑁂 𑀅𑀘𑀺𑀭𑁂𑀦 𑀜𑀸𑀢𑁂. 𑀦𑁄 𑀘𑁂𑀢𑀺 𑀦𑁄 𑀘𑁂 𑀚𑀸𑀦𑀸𑀢𑀺.

𑀇𑀢𑀺 𑀉𑀢𑁆𑀢𑀭𑁂 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸

𑀧𑀸𑀭𑀸𑀚𑀺𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀘𑁂𑀢𑁂𑀢𑀺, 𑀉𑀧𑀓𑁆𑀓𑀫𑀢𑀺, 𑀫𑀼𑀘𑁆𑀘𑀢𑀺, 𑀏𑀯𑀁 𑀅𑀗𑁆𑀕𑀢𑁆𑀢𑀬𑁂 𑀧𑀼𑀡𑁆𑀡𑁂 𑀕𑀭𑀼𑀓𑀁 𑀯𑀼𑀢𑁆𑀢𑀁. 𑀤𑁆𑀯𑀗𑁆𑀕𑁂 𑀘𑁂𑀢𑁂𑀢𑀺, 𑀉𑀧𑀓𑁆𑀓𑀫𑀢𑀺 𑀬𑀤𑀺 𑀦 𑀫𑀼𑀘𑁆𑀘𑀢𑀺, 𑀏𑀯𑀁 𑀅𑀗𑁆𑀕𑀤𑁆𑀯𑀬𑁂 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀬𑁄𑀚𑀦𑀸. 𑀧𑀬𑁄𑀕𑁂𑀢𑀺 𑀧𑀬𑁄𑀚𑁂𑀢𑁆𑀯𑀸 𑀉𑀧𑀓𑁆𑀓𑀫𑀺𑀢𑀼𑀁 𑀅𑀗𑁆𑀕𑀚𑀸𑀢𑀸𑀫𑀲𑀦𑀁, 𑀧𑀭𑀲𑁆𑀲 𑀆𑀡𑀸𑀧𑀦𑀦𑁆𑀢𑀺 𑀏𑀯𑀭𑀽𑀧𑁂 𑀲𑀸𑀳𑀢𑁆𑀣𑀺𑀓𑀸𑀡𑀢𑁆𑀢𑀺𑀓𑀧𑀬𑁄𑀕𑁂.

𑁧𑁪. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀧𑀭𑀽𑀧𑀭𑀺 𑀧𑀜𑁆𑀳𑀸𑀧𑀼𑀘𑁆𑀙𑀦𑀁 𑀜𑀸𑀢𑀼𑀁 𑀲𑀓𑁆𑀓𑀸𑀢𑀺 𑀢𑀁 𑀅𑀯𑀢𑁆𑀢𑀼𑀓𑀸𑀫𑁄 𑀆𑀳 ‘‘𑀇𑀢𑁄 𑀧𑀝𑁆𑀞𑀸𑀬𑀸’’𑀢𑀺𑀆𑀤𑀺. 𑀫𑀬𑀫𑁆𑀧𑀺 𑀬𑀤𑁂𑀢𑁆𑀣 𑀧𑀼𑀩𑁆𑀩𑁂 𑀅𑀯𑀼𑀢𑁆𑀢𑀫𑀦𑀼𑀢𑁆𑀢𑀸𑀦𑀢𑁆𑀣𑀜𑁆𑀘, 𑀢𑀤𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑁧𑁫. 𑀓𑀸𑀬𑁂𑀦𑀸𑀢𑀺 𑀅𑀢𑁆𑀢𑀦𑁄 𑀓𑀸𑀬𑁂𑀦. 𑀓𑀸𑀬𑀦𑁆𑀢𑀺 𑀇𑀢𑁆𑀣𑀺𑀬𑀸 𑀓𑀸𑀬𑀁. 𑀏𑀲 𑀦𑀬𑁄 ‘‘𑀓𑀸𑀬𑀩𑀤𑁆𑀥’’𑀦𑁆𑀢𑀺 𑀏𑀢𑁆𑀣𑀸𑀧𑀺.

𑁧𑁬. 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀧𑀝𑀺𑀩𑀤𑁆𑀥𑁂𑀦 𑀇𑀢𑁆𑀣𑀺𑀬𑀸 𑀓𑀸𑀬𑀧𑀝𑀺𑀩𑀤𑁆𑀥𑁂 𑀨𑀼𑀝𑁆𑀞𑁂 𑀢𑀼 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸.

𑁧𑁭. 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀲𑀺𑀬𑀼𑀦𑁆𑀢𑀺 𑀬𑁄𑀚𑀦𑀸. 𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀸𑀦𑀦𑁆𑀢𑀺 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀸𑀦𑀁.

𑁧𑁮. 𑀯𑀡𑁆𑀡𑀸𑀤𑀺𑀪𑀜𑁆𑀜𑁂𑀢𑀺 𑀯𑀡𑁆𑀡𑀸𑀤𑀺𑀦𑀸 𑀪𑀡𑀦𑁂. 𑀓𑀸𑀬𑀧𑀝𑀺𑀩𑀤𑁆𑀥𑁂 𑀯𑀡𑁆𑀡𑀸𑀤𑀺𑀦𑀸 𑀪𑀜𑁆𑀜𑁂 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸.

𑁧𑁯. 𑀅𑀢𑁆𑀢𑀓𑀸𑀫𑀘𑀭𑀺𑀬𑀸𑀬𑀸𑀢𑀺 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬.

𑁨𑁦. 𑀧𑀡𑁆𑀟𑀓𑀲𑁆𑀲 𑀲𑀦𑁆𑀢𑀺𑀓𑁂𑀧𑀺 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀯𑀤𑀢𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀬𑁄𑀚𑀦𑀸. 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲𑀸𑀧𑀺 𑀲𑀦𑁆𑀢𑀺𑀓𑁂𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑁨𑁧. 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀫𑀦𑁆𑀢𑀭𑁂 𑀲𑀜𑁆𑀘𑀭𑀺𑀢𑁆𑀢𑀁 𑀲𑀜𑁆𑀘𑀭𑀡𑀪𑀸𑀯𑀁 𑀲𑀫𑀸𑀧𑀦𑁆𑀦𑁂 𑀪𑀺𑀓𑁆𑀔𑀼𑀫𑁆𑀳𑀺 𑀧𑀝𑀺𑀕𑁆𑀕𑀡𑁆𑀳𑀦𑀯𑀻𑀫𑀁𑀲𑀸𑀧𑀘𑁆𑀘𑀸𑀳𑀭𑀡𑀓𑀢𑁆𑀢𑀺𑀓𑁂 𑀲𑀫𑁆𑀧𑀦𑁆𑀦𑁂 𑀢𑀲𑁆𑀲 𑀩𑀼𑀥𑁄 𑀕𑀭𑀼𑀓𑀁 𑀦𑀺𑀤𑁆𑀤𑀺𑀲𑁂𑀢𑀺 𑀬𑁄𑀚𑀦𑀸.

𑁨𑁨. 𑀤𑁆𑀯𑀗𑁆𑀕𑀲𑀫𑀸𑀬𑁄𑀕𑁂𑀢𑀺 𑀢𑀻𑀲𑁆𑀯𑁂𑀢𑁂𑀲𑀼 𑀤𑁆𑀯𑀺𑀦𑁆𑀦𑀁 𑀅𑀗𑁆𑀕𑀸𑀦𑀁 𑀬𑀣𑀸𑀓𑀣𑀜𑁆𑀘𑀺 𑀲𑀫𑀸𑀬𑁄𑀕𑁂. 𑀅𑀗𑁆𑀕𑁂 𑀲𑀢𑀺 𑀧𑀦𑁂𑀓𑀲𑁆𑀫𑀺𑀦𑁆𑀢𑀺 𑀢𑀺𑀡𑁆𑀡𑀫𑁂𑀓𑀲𑁆𑀫𑀺𑀁 𑀧𑀦 𑀅𑀗𑁆𑀕𑁂 𑀲𑀢𑀺.

𑁨𑁪. 𑀧𑀬𑁄𑀕𑁂𑀢𑀺 ‘‘𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀓𑀼𑀝𑀺𑀁, 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀫𑀳𑀮𑁆𑀮𑀓𑀯𑀺𑀳𑀸𑀭𑀜𑁆𑀘 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀉𑀧𑀓𑀭𑀡𑀢𑁆𑀣𑀁 𑀅𑀭𑀜𑁆𑀜𑀕𑀫𑀦𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀧𑀬𑁄𑀕𑁂. 𑀏𑀓𑀧𑀺𑀡𑁆𑀟𑁂 𑀅𑀦𑀸𑀕𑀢𑁂𑀢𑀺 𑀲𑀩𑁆𑀩𑀧𑀭𑀺𑀬𑀦𑁆𑀢𑀺𑀫𑀁 𑀧𑀺𑀡𑁆𑀟𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁨𑁫. 𑀇𑀥 𑀬𑁄 𑀪𑀺𑀓𑁆𑀔𑀼 𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦 𑀅𑀦𑀼𑀤𑁆𑀥𑀁𑀲𑁂𑀢𑀻𑀢𑀺 𑀬𑁄𑀚𑀦𑀸.

𑁨𑁬. 𑀑𑀓𑀸𑀲𑀁 𑀦 𑀘 𑀓𑀸𑀭𑁂𑀢𑁆𑀯𑀸𑀢𑀺 ‘‘𑀓𑀭𑁄𑀢𑀼 𑀫𑁂, 𑀆𑀬𑀲𑁆𑀫𑀸, 𑀑𑀓𑀸𑀲𑀁, 𑀅𑀳𑀁 𑀢𑁂 𑀯𑀢𑁆𑀢𑀼𑀓𑀸𑀫𑁄’’𑀢𑀺 𑀏𑀯𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀑𑀓𑀸𑀲𑀁 𑀅𑀓𑀸𑀭𑀸𑀧𑁂𑀢𑁆𑀯𑀸.

𑁨𑁮. 𑀅𑀜𑁆𑀜𑀪𑀸𑀕𑀺𑀬𑁂𑀢𑀺 𑀅𑀜𑁆𑀜𑀪𑀸𑀕𑀺𑀬𑀧𑀤𑁂𑀦 𑀉𑀧𑀮𑀓𑁆𑀔𑀺𑀢𑀲𑀺𑀓𑁆𑀔𑀸𑀧𑀤𑁂. 𑀏𑀯𑀁 𑀅𑀜𑁆𑀜𑀢𑁆𑀭𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁯. ‘‘𑀲𑀫𑀦𑀼𑀪𑀸𑀲𑀦𑀸𑀬 𑀏𑀯𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀦 𑀧𑀝𑀺𑀦𑀺𑀲𑁆𑀲𑀚𑀦𑁆𑀢𑀺 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑀦𑁆𑀢𑁄.

𑁩𑁦. 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁 𑀆𑀧𑀦𑁆𑀦𑁄 𑀲𑀺𑀬𑀸, 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀢𑀁 𑀆𑀧𑀦𑁆𑀦𑁄 𑀲𑀺𑀬𑀸, 𑀓𑀫𑁆𑀫𑀯𑀸𑀘𑀸𑀬 𑀑𑀲𑀸𑀦𑁂 𑀕𑀭𑀼𑀓𑀁 𑀆𑀧𑀦𑁆𑀦𑁄 𑀲𑀺𑀬𑀸𑀢𑀺 𑀬𑁄𑀚𑀦𑀸. ‘‘𑀣𑀼𑀮𑁆𑀮𑀢’’𑀦𑁆𑀢𑀺 𑀇𑀤𑀁 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀉𑀧𑀮𑀓𑁆𑀔𑀡𑀯𑀘𑀦𑀁.

𑁩𑁧. 𑀘𑀢𑀽𑀲𑀼 𑀬𑀸𑀯𑀢𑀢𑀺𑀬𑀓𑁂𑀲𑀼 𑀧𑀞𑀫𑁂 𑀆𑀧𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀢𑀭𑁂𑀲𑀁 𑀢𑀺𑀡𑁆𑀡𑀁 𑀢𑁂𑀦𑀧𑀺 𑀏𑀓𑀧𑀭𑀺𑀘𑁆𑀙𑁂𑀤𑀢𑁆𑀢𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯 𑀢𑁂𑀲𑀼 𑀅𑀢𑀺𑀤𑀺𑀲𑀦𑁆𑀢𑁄 𑀆𑀳 ‘‘𑀪𑁂𑀤𑀸𑀦𑀼𑀯𑀢𑁆𑀢𑀓𑁂’’𑀢𑀺𑀆𑀤𑀺.

𑀇𑀢𑀺 𑀉𑀢𑁆𑀢𑀭𑁂 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸

𑀲𑀗𑁆𑀖𑀸𑀤𑀺𑀲𑁂𑀲𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩𑁨. 𑀅𑀢𑀺𑀭𑁂𑀓𑀘𑀻𑀯𑀭𑀦𑁆𑀢𑀺 𑀅𑀦𑀥𑀺𑀝𑁆𑀞𑀺𑀢𑀁, 𑀅𑀯𑀺𑀓𑀧𑁆𑀧𑀺𑀢𑀁 𑀯𑀺𑀓𑀧𑁆𑀧𑀦𑀼𑀧𑀕𑀧𑀫𑀸𑀡𑀁 𑀘𑀻𑀯𑀭𑀁 𑀮𑀤𑁆𑀥𑀸 𑀤𑀲𑀸𑀳𑀁 𑀅𑀢𑀺𑀓𑁆𑀓𑀫𑀦𑁆𑀢𑁄 𑀏𑀓𑀫𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑀢𑀺. 𑀢𑀺𑀘𑀻𑀯𑀭𑁂𑀦 𑀏𑀓𑀭𑀢𑁆𑀢𑀺𑀫𑁆𑀧𑀺 𑀯𑀺𑀦𑀸 𑀯𑀲𑀦𑁆𑀢𑁄 𑀏𑀓𑀫𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑀢𑀺. 𑀇𑀤𑀜𑁆𑀘 𑀚𑀸𑀢𑀺𑀯𑀲𑁂𑀦 𑀏𑀓𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀯𑀢𑁆𑀣𑀼𑀕𑀡𑀦𑀸𑀬 𑀆𑀧𑀢𑁆𑀢𑀻𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀢𑁆𑀢𑀸.

𑁩𑁩. 𑀕𑀳𑁂𑀢𑁆𑀯𑀸𑀓𑀸𑀮𑀘𑀻𑀯𑀭𑀦𑁆𑀢𑀺 𑀅𑀓𑀸𑀮𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸. 𑀫𑀸𑀲𑀦𑁆𑀢𑀺 𑀲𑀢𑀺𑀬𑀸 𑀧𑀘𑁆𑀘𑀸𑀲𑀸𑀬 𑀦𑀺𑀓𑁆𑀔𑀺𑀧𑀺𑀢𑀼𑀁 𑀅𑀦𑀼𑀜𑁆𑀜𑀸𑀢𑀁 𑀫𑀸𑀲𑀁. 𑀅𑀢𑀺𑀓𑁆𑀓𑀫𑀦𑁆𑀢𑁄𑀢𑀺 𑀲𑀢𑀺𑀬𑀸𑀧𑀺 𑀧𑀘𑁆𑀘𑀸𑀲𑀸𑀬 𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀅𑀦𑁆𑀢𑁄𑀫𑀸𑀲𑁂 𑀅𑀦𑀥𑀺𑀝𑁆𑀞𑀳𑀺𑀢𑁆𑀯𑀸, 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀸 𑀢𑀺𑀁𑀲𑀤𑀺𑀯𑀲𑀸𑀦𑀺 𑀅𑀢𑀺𑀓𑁆𑀓𑀫𑀦𑁆𑀢𑁄, 𑀘𑀻𑀯𑀭𑀼𑀧𑁆𑀧𑀸𑀤𑀤𑀺𑀯𑀲𑀁 𑀅𑀭𑀼𑀡𑀁 𑀆𑀤𑀺𑀁 𑀓𑀢𑁆𑀯𑀸 𑀏𑀓𑀢𑀺𑀁𑀲𑀫𑀁 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀏𑀓𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀉𑀤𑀻𑀭𑀺𑀢𑀦𑁆𑀢𑀺 𑀬𑁄𑀚𑀦𑀸.

𑁩𑁪. 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸. 𑀬𑀁𑀓𑀺𑀜𑁆𑀘𑀺 𑀧𑀼𑀭𑀸𑀡𑀘𑀻𑀯𑀭𑀦𑁆𑀢𑀺 𑀏𑀓𑀯𑀸𑀭𑀫𑁆𑀧𑀺 𑀧𑀭𑀺𑀪𑀼𑀢𑁆𑀢𑀁 𑀲𑀗𑁆𑀖𑀸𑀝𑀺𑀆𑀤𑀻𑀦𑀫𑀜𑁆𑀜𑀢𑀭𑀁 𑀘𑀻𑀯𑀭𑀁.

𑁩𑁫. 𑀧𑀬𑁄𑀕𑀲𑁆𑀫𑀺𑀦𑁆𑀢𑀺 ‘‘𑀥𑁄𑀯𑀸’’𑀢𑀺𑀆𑀤𑀺𑀓𑁂 𑀪𑀺𑀓𑁆𑀔𑀼𑀦𑁄 𑀆𑀡𑀢𑁆𑀢𑀺𑀓𑀧𑀬𑁄𑀕𑁂, 𑀏𑀯𑀁 𑀆𑀡𑀢𑁆𑀢𑀸𑀬 𑀘 𑀪𑀺𑀓𑁆𑀔𑀼𑀦𑀺𑀬𑀸 𑀉𑀤𑁆𑀥𑀦𑀸𑀤𑀺𑀓𑁂 𑀲𑀩𑁆𑀩𑀲𑁆𑀫𑀺𑀁 𑀧𑀬𑁄𑀕𑁂 𑀘. ‘‘𑀦𑀺𑀲𑁆𑀲𑀕𑁆𑀕𑀺𑀬𑀸𑀯 𑀧𑀸𑀘𑀺𑀢𑁆𑀢𑀺 𑀳𑁄𑀢𑀻𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀸 𑀧𑀸𑀘𑀺𑀢𑁆𑀢𑀺 𑀘 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁩𑁬. 𑀧𑀝𑀺𑀕𑀡𑁆𑀳𑀢𑁄𑀢𑀺 𑀏𑀢𑁆𑀣 ‘‘𑀅𑀜𑁆𑀜𑀢𑁆𑀭 𑀧𑀸𑀭𑀺𑀯𑀢𑁆𑀢𑀓𑀸’’𑀢𑀺 𑀬𑁄𑀚𑀦𑀸.

𑁩𑁮. 𑀧𑀬𑁄𑀕𑀲𑁆𑀫𑀺𑀦𑁆𑀢𑀺 𑀯𑀺𑀜𑁆𑀜𑀸𑀧𑀦𑀧𑀬𑁄𑀕𑁂. 𑀯𑀺𑀜𑁆𑀜𑀸𑀧𑀺𑀢𑁂𑀢𑀺 𑀯𑀺𑀜𑁆𑀜𑀸𑀧𑀺𑀢𑀘𑀻𑀯𑀭𑁂 𑀧𑀝𑀺𑀮𑀤𑁆𑀥𑁂.

𑁩𑁯. 𑀪𑀺𑀓𑁆𑀔𑀽𑀢𑀺 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁄 𑀯𑀸 𑀦𑀝𑁆𑀞𑀘𑀻𑀯𑀭𑁄 𑀯𑀸 𑀪𑀺𑀓𑁆𑀔𑀼. 𑀢𑀤𑀼𑀢𑁆𑀢𑀭𑀺𑀦𑁆𑀢𑀺 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀢𑁄 𑀉𑀢𑁆𑀢𑀭𑀺𑀁.

𑁪𑁧. 𑀧𑀬𑁄𑀕𑁂𑀢𑀺 𑀯𑀺𑀓𑀧𑁆𑀧𑀦𑀸𑀧𑀚𑁆𑀚𑀦𑀧𑀬𑁄𑀕𑁂.

𑁪𑁨. 𑀤𑀼𑀯𑁂𑀢𑀺 𑀤𑀼𑀓𑁆𑀓𑀝𑀧𑀸𑀘𑀺𑀢𑁆𑀢𑀺𑀬𑀯𑀲𑁂𑀦 𑀤𑀼𑀯𑁂 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂𑀢𑀺 𑀬𑁄𑀚𑁂𑀢𑀩𑁆𑀩𑀁.

𑁪𑁪. 𑀧𑀬𑁄𑀕𑁂𑀢𑀺 𑀅𑀦𑀼𑀜𑁆𑀜𑀸𑀢𑀧𑀬𑁄𑀕𑀢𑁄 𑀅𑀢𑀺𑀭𑁂𑀓𑀸𑀪𑀺𑀦𑀺𑀧𑁆𑀨𑀸𑀤𑀦𑀧𑀬𑁄𑀕𑁂. 𑀮𑀸𑀪𑁂𑀢𑀺 𑀘𑀻𑀯𑀭𑀲𑁆𑀲 𑀧𑀝𑀺𑀮𑀸𑀪𑁂.

𑀓𑀣𑀺𑀦𑀯𑀕𑁆𑀕𑀯𑀡𑁆𑀡𑀦𑀸 𑀧𑀞𑀫𑀸.

𑁪𑁫. 𑀓𑁄𑀲𑀺𑀬𑀯𑀕𑁆𑀕𑀲𑁆𑀲 𑀆𑀤𑀻𑀲𑀼 𑀧𑀜𑁆𑀘𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀤𑁆𑀯𑁂 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄𑀢𑀺 𑀬𑁄𑀚𑀦𑀸. 𑀧𑀬𑁄𑀕𑁂𑀢𑀺 𑀓𑀭𑀡𑀓𑀸𑀭𑀸𑀧𑀦𑀧𑀬𑁄𑀕𑁂. 𑀮𑀸𑀪𑁂𑀢𑀺 𑀓𑀢𑁆𑀯𑀸 𑀯𑀸 𑀓𑀸𑀭𑁂𑀢𑁆𑀯𑀸 𑀯𑀸 𑀧𑀭𑀺𑀦𑀺𑀝𑁆𑀞𑀸𑀧𑀦𑁂.

𑁪𑁬. ‘‘𑀕𑀳𑁂𑀢𑁆𑀯𑀸 𑀏𑀴𑀓𑀮𑁄𑀫𑀸𑀦𑀻’’𑀢𑀺 𑀧𑀤𑀘𑁆𑀙𑁂𑀤𑁄. 𑀅𑀢𑀺𑀓𑁆𑀓𑀫𑀦𑁆𑀢𑀺 𑀅𑀢𑀺𑀓𑁆𑀓𑀫𑀦𑁆𑀢𑁄.

𑁪𑁭. 𑀅𑀜𑁆𑀜𑀸𑀬𑀸𑀢𑀺 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸. ‘‘𑀥𑁄𑀯𑀸𑀧𑁂𑀢𑀺 𑀏𑀴𑀮𑁄𑀫𑀓’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀏𑀴𑀮𑁄𑀫𑀓𑀦𑁆𑀢𑀺 𑀏𑀴𑀓𑀮𑁄𑀫𑀸𑀦𑀺. 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀓-𑀓𑀸𑀭𑀲𑁆𑀲 𑀯𑀺𑀧𑀭𑀺𑀬𑀸𑀬𑁄. 𑀧𑀬𑁄𑀕𑁂𑀢𑀺 𑀥𑁄𑀯𑀸𑀧𑀦𑀧𑀬𑁄𑀕𑁂.

𑁪𑁮. 𑀧𑀬𑁄𑀕𑁂𑀢𑀺 𑀧𑀝𑀺𑀕𑁆𑀕𑀡𑁆𑀳𑀦𑀧𑀬𑁄𑀕𑁂.

𑁪𑁯. 𑀦𑀸𑀦𑀸𑀓𑀸𑀭𑀦𑁆𑀢𑀺 𑀦𑀸𑀦𑀧𑁆𑀧𑀓𑀸𑀭𑀁. 𑀲𑀫𑀸𑀧𑀚𑁆𑀚𑀦𑁆𑀢𑀺 𑀲𑀫𑀸𑀧𑀚𑁆𑀚𑀦𑁆𑀢𑁄 𑀪𑀺𑀓𑁆𑀔𑀼. 𑀲𑀫𑀸𑀧𑀦𑁆𑀦𑁂𑀢𑀺 𑀲𑀁𑀯𑁄𑀳𑀸𑀭𑁂 𑀲𑀫𑀸𑀧𑀦𑁆𑀦𑁂 𑀲𑀢𑀺. 𑀧𑀬𑁄𑀕𑁂𑀢𑀺 𑀲𑀫𑀸𑀧𑀚𑁆𑀚𑀦𑀧𑀬𑁄𑀕𑁂.

𑁫𑁦. 𑀧𑀬𑁄𑀕𑁂𑀢𑀺 𑀓𑀬𑀯𑀺𑀓𑁆𑀓𑀬𑀸𑀧𑀚𑁆𑀚𑀦𑀧𑀬𑁄𑀕𑁂. 𑀢𑀲𑁆𑀫𑀺𑀁 𑀓𑀢𑁂𑀢𑀺 𑀢𑀲𑁆𑀫𑀺𑀁 𑀪𑀡𑁆𑀟𑁂 𑀅𑀢𑁆𑀢𑀦𑁄 𑀲𑀦𑁆𑀢𑀓𑀪𑀸𑀯𑀁 𑀦𑀻𑀢𑁂.

𑀓𑁄𑀲𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

𑁫𑁧. 𑀅𑀢𑀺𑀭𑁂𑀓𑀓𑀦𑁆𑀢𑀺 𑀅𑀦𑀥𑀺𑀝𑁆𑀞𑀺𑀢𑀁, 𑀅𑀯𑀺𑀓𑀧𑁆𑀧𑀺𑀢𑀁 𑀯𑀸 𑀧𑀢𑁆𑀢𑀁. 𑀤𑀲𑀸𑀳𑀁 𑀅𑀢𑀺𑀓𑁆𑀓𑀫𑁂𑀦𑁆𑀢𑀲𑁆𑀲 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀸𑀯 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁫𑁨-𑁩. 𑀦𑀢𑁆𑀣𑀺 𑀏𑀢𑀲𑁆𑀲 𑀧𑀜𑁆𑀘 𑀩𑀦𑁆𑀥𑀦𑀸𑀦𑀻𑀢𑀺 𑀅𑀧𑀜𑁆𑀘𑀩𑀦𑁆𑀥𑀦𑁄, 𑀢𑀲𑁆𑀫𑀺𑀁, 𑀊𑀦𑀧𑀜𑁆𑀘𑀩𑀦𑁆𑀥𑀦𑁂 𑀧𑀢𑁆𑀢𑁂𑀢𑀺 𑀅𑀢𑁆𑀣𑁄. 𑀧𑀬𑁄𑀕𑁂𑀢𑀺 𑀯𑀺𑀜𑁆𑀜𑀸𑀧𑀦𑀧𑀬𑁄𑀕𑁂. 𑀢𑀲𑁆𑀲 𑀧𑀢𑁆𑀢𑀲𑁆𑀲 𑀮𑀸𑀪𑁂 𑀧𑀝𑀺𑀮𑀸𑀪𑁂.

𑁫𑁪. 𑀪𑁂𑀲𑀚𑁆𑀚𑀦𑁆𑀢𑀺 𑀲𑀧𑁆𑀧𑀺𑀆𑀤𑀺𑀓𑀁.

𑁫𑁫. 𑀧𑀬𑁄𑀕𑁂𑀢𑀺 𑀧𑀭𑀺𑀬𑁂𑀲𑀦𑀧𑀬𑁄𑀕𑁂.

𑁫𑁬. 𑀧𑀬𑁄𑀕𑁂𑀢𑀺 𑀅𑀘𑁆𑀙𑀺𑀦𑁆𑀤𑀦𑀅𑀘𑁆𑀙𑀺𑀦𑁆𑀤𑀸𑀧𑀦𑀧𑀬𑁄𑀕𑁂. 𑀳𑀝𑁂𑀢𑀺 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑁂.

𑁫𑁭. 𑀤𑁆𑀯𑁂 𑀧𑀦𑀸𑀧𑀢𑁆𑀢𑀺𑀬𑁄 𑀨𑀼𑀲𑁂𑀢𑀺 𑀯𑀸𑀬𑀸𑀧𑀦𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀘𑀻𑀯𑀭𑀧𑀫𑀸𑀡𑁂𑀦 𑀯𑀻𑀢𑁂 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑁫𑁮-𑁯. 𑀬𑁄 𑀧𑀦 𑀪𑀺𑀓𑁆𑀔𑀼 𑀅𑀧𑁆𑀧𑀯𑀸𑀭𑀺𑀢𑁄 𑀅𑀜𑁆𑀜𑀸𑀢𑀓𑀲𑁆𑀲𑁂𑀯 𑀢𑀦𑁆𑀢𑀯𑀸𑀬𑁂 𑀲𑀫𑁂𑀘𑁆𑀘 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀻𑀯𑀭𑁂 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑀦𑁆𑀢𑁄 𑀳𑁄𑀢𑀺. 𑀲𑁄𑀢𑀺 𑀲𑁄 𑀪𑀺𑀓𑁆𑀔𑀼. 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺, 𑀦 𑀲𑀁𑀲𑀬𑁄𑀢𑀺 𑀬𑁄𑀚𑀦𑀸. 𑀧𑀬𑁄𑀕𑁂𑀢𑀺 𑀯𑀺𑀓𑀧𑁆𑀧𑀸𑀧𑀚𑁆𑀚𑀦𑀧𑀬𑁄𑀕𑁂.

𑁬𑁦. 𑀅𑀘𑁆𑀘𑁂𑀓𑀲𑀜𑁆𑀜𑀺𑀢𑀁 𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀓𑀸𑀮𑀦𑁆𑀢𑀺 𑀘𑀻𑀯𑀭𑀓𑀸𑀮𑀁.

𑁬𑁧. 𑀢𑀺𑀡𑁆𑀡𑀫𑀜𑁆𑀜𑀢𑀭𑀁 𑀯𑀢𑁆𑀣𑀦𑁆𑀢𑀺 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀁 𑀘𑀻𑀯𑀭𑀁. 𑀖𑀭𑁂𑀢𑀺 𑀅𑀦𑁆𑀢𑀭𑀖𑀭𑁂. 𑀦𑀺𑀤𑀳𑀺𑀢𑁆𑀯𑀸𑀢𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸. 𑀢𑁂𑀦 𑀘𑀻𑀯𑀭𑁂𑀦 𑀯𑀺𑀦𑀸 𑀙𑀸𑀭𑀢𑁆𑀢𑀢𑁄 𑀅𑀥𑀺𑀓𑀁 𑀤𑀺𑀯𑀲𑀁 𑀬𑀲𑁆𑀲 𑀆𑀭𑀜𑁆𑀜𑀓𑀲𑁆𑀲 𑀯𑀺𑀳𑀸𑀭𑀲𑁆𑀲 𑀕𑁄𑀘𑀭𑀕𑀸𑀫𑁂 𑀢𑀁 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀫𑁆𑀳𑀸 𑀯𑀺𑀳𑀸𑀭𑀸 𑀅𑀜𑁆𑀜𑀢𑁆𑀭 𑀯𑀲𑀦𑁆𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀨𑀼𑀲𑁂𑀢𑀺 𑀬𑁄𑀚𑀦𑀸.

𑁬𑁨. 𑀲𑀗𑁆𑀖𑀺𑀓𑀁 𑀮𑀸𑀪𑀁 𑀧𑀭𑀺𑀡𑀢𑀁 𑀚𑀸𑀦𑀁 𑀚𑀸𑀦𑀦𑁆𑀢𑁄.

𑁬𑁩. 𑀧𑀬𑁄𑀕𑁂𑀢𑀺 𑀧𑀭𑀺𑀡𑀸𑀫𑀦𑀧𑀬𑁄𑀕𑁂. 𑀲𑀩𑁆𑀩𑀢𑁆𑀣𑀸𑀢𑀺 𑀧𑀸𑀭𑀸𑀚𑀺𑀓𑀸𑀤𑀻𑀲𑀼 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑁂𑀲𑀼. 𑀅𑀧𑁆𑀧𑀦𑀸𑀯𑀸𑀭𑀧𑀭𑀺𑀳𑀸𑀦𑀻𑀢𑀺 𑀧𑀭𑀺𑀯𑀸𑀭𑁂 𑀧𑀞𑀫𑀁 𑀯𑀼𑀢𑁆𑀢𑀓𑀢𑁆𑀣𑀧𑀜𑁆𑀜𑀢𑁆𑀢𑀺𑀯𑀸𑀭𑀲𑁆𑀲 𑀧𑀭𑀺𑀳𑀸𑀧𑀦𑀁, 𑀇𑀥 𑀅𑀯𑀘𑀦𑀦𑁆𑀢𑀺 𑀅𑀢𑁆𑀣𑁄, 𑀢𑀲𑁆𑀲 𑀯𑀸𑀭𑀲𑁆𑀲 𑀧𑀭𑀺𑀯𑀸𑀭𑁂 𑀲𑀩𑁆𑀩𑀧𑀞𑀫𑀢𑁆𑀢𑀸 𑀧𑀞𑀫𑀁 𑀯𑀢𑁆𑀢𑀩𑁆𑀩𑀪𑀸𑀯𑁂𑀧𑀺 𑀢𑀢𑁆𑀣 𑀯𑀢𑁆𑀢𑀩𑁆𑀩𑀁 𑀧𑀘𑁆𑀙𑀸 𑀕𑀡𑁆𑀳𑀺𑀢𑀼𑀓𑀸𑀫𑁂𑀦 𑀫𑀬𑀸 𑀢𑀁 𑀞𑀧𑁂𑀢𑁆𑀯𑀸 𑀧𑀞𑀫𑀁 𑀆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀢𑀤𑀦𑀦𑁆𑀢𑀭𑁄 𑀓𑀢𑀸𑀧𑀢𑁆𑀢𑀺𑀯𑀸𑀭𑁄 𑀧𑀞𑀫𑀁 𑀯𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀢𑁆𑀢𑀯𑀕𑁆𑀕𑀯𑀡𑁆𑀡𑀦𑀸 𑀢𑀢𑀺𑀬𑀸.

𑀇𑀢𑀺 𑀉𑀢𑁆𑀢𑀭𑁂 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸

𑀢𑀺𑀁𑀲𑀦𑀺𑀲𑁆𑀲𑀕𑁆𑀕𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬𑁪. 𑀫𑀦𑀼𑀲𑁆𑀲𑀼𑀢𑁆𑀢𑀭𑀺𑀥𑀫𑁆𑀫𑁂𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂. 𑀅𑀪𑀽𑀢𑀲𑁆𑀫𑀺𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀲𑀫𑀼𑀮𑁆𑀮𑀧𑀺𑀢𑁂 𑀧𑀭𑀸𑀚𑀬𑁄 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺.

𑁬𑁫. 𑀅𑀫𑀽𑀮𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦 𑀪𑀺𑀓𑁆𑀔𑀼𑀁 𑀘𑁄𑀤𑀦𑀸𑀬 𑀕𑀭𑀼 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀧𑀭𑀺𑀬𑀸𑀬𑀯𑀘𑀦𑁂𑀢𑀺 ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀻’’𑀢𑀺𑀆𑀤𑀺𑀦𑀸 (𑀧𑀭𑀺. 𑁨𑁮𑁭) 𑀧𑀭𑀺𑀬𑀸𑀬𑁂𑀦 𑀓𑀣𑀦𑁂. 𑀜𑀸𑀢𑁂𑀢𑀺 𑀬𑀲𑁆𑀲 𑀓𑀣𑁂𑀢𑀺, 𑀢𑀲𑁆𑀫𑀺𑀁 𑀯𑀘𑀦𑀸𑀦𑀦𑁆𑀢𑀭𑀫𑁂𑀯 𑀜𑀸𑀢𑁂.

𑁬𑁬. 𑀦𑁄 𑀘𑁂 𑀧𑀦 𑀯𑀺𑀚𑀸𑀦𑀸𑀢𑀻𑀢𑀺 𑀅𑀣 𑀢𑀁 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁 𑀯𑀘𑀦𑀸𑀦𑀦𑁆𑀢𑀭𑀫𑁂𑀯 𑀲𑀘𑁂 𑀦 𑀚𑀸𑀦𑀸𑀢𑀺. 𑀲𑀫𑀼𑀤𑀸𑀳𑀝𑀦𑁆𑀢𑀺 𑀓𑀣𑀺𑀢𑀁.

𑁬𑁭. 𑀑𑀫𑀲𑀢𑁄 𑀪𑀺𑀓𑁆𑀔𑀼𑀲𑁆𑀲 𑀤𑀼𑀯𑁂 𑀆𑀧𑀢𑁆𑀢𑀺𑀬𑁄 𑀯𑀼𑀢𑁆𑀢𑀸. 𑀉𑀧𑀲𑀫𑁆𑀧𑀦𑁆𑀦𑀁 𑀑𑀫𑀲𑀢𑁄 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸. 𑀇𑀢𑀭𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀑𑀫𑀲𑀢𑁄 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁬𑁮. 𑀧𑁂𑀲𑀼𑀜𑁆𑀜𑀳𑀭𑀡𑁂𑀧𑀺 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀺.

𑁬𑁯. 𑀧𑀬𑁄𑀕𑁂𑀢𑀺 𑀧𑀤𑀲𑁄 𑀥𑀫𑁆𑀫𑀁 𑀯𑀸𑀘𑁂𑀦𑁆𑀢𑀲𑁆𑀲 𑀯𑀘𑀦𑀓𑀺𑀭𑀺𑀬𑀸𑀭𑀫𑁆𑀪𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀤𑀸𑀤𑀻𑀦𑀁 𑀧𑀭𑀺𑀲𑀫𑀸𑀧𑀦𑀁, 𑀏𑀢𑁆𑀣𑀦𑁆𑀢𑀭𑁂 𑀅𑀓𑁆𑀔𑀭𑀼𑀘𑁆𑀘𑀸𑀭𑀡𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀧𑀤𑀸𑀦𑀁 𑀧𑀭𑀺𑀲𑀫𑀢𑁆𑀢𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁.

𑁭𑁦. ‘‘𑀢𑀺𑀭𑀢𑁆𑀢𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀳𑀲𑁂𑀬𑁆𑀬𑀸𑀬𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀳𑀲𑁂𑀬𑁆𑀬𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀳𑀲𑁂𑀬𑁆𑀬𑀸, 𑀢𑀸𑀬. 𑀢𑀺𑀭𑀢𑁆𑀢𑀸 𑀉𑀢𑁆𑀢𑀭𑀺𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀳𑀲𑁂𑀬𑁆𑀬𑀸𑀬𑀸𑀢𑀺 𑀬𑁄𑀚𑀦𑀸. 𑀧𑀬𑁄𑀕𑁂𑀢𑀺 𑀲𑀬𑀦𑀢𑁆𑀣𑀸𑀬 𑀲𑁂𑀬𑁆𑀬𑀸𑀧𑀜𑁆𑀜𑀸𑀧𑀦𑀓𑀸𑀬𑀸𑀯𑀚𑁆𑀚𑀦𑀸𑀤𑀺𑀧𑀼𑀩𑁆𑀩𑀧𑀬𑁄𑀕𑁂. 𑀧𑀦𑁆𑀦𑁂𑀢𑀺 𑀓𑀸𑀬𑀧𑀲𑀸𑀭𑀡𑀮𑀓𑁆𑀔𑀡𑁂𑀦 𑀲𑀬𑀦𑁂𑀦 𑀦𑀺𑀧𑀦𑁆𑀦𑁂.

𑁭𑁧. 𑀬𑁄 𑀧𑀦 𑀪𑀺𑀓𑁆𑀔𑀼 𑀏𑀓𑀭𑀢𑁆𑀢𑀺𑀬𑀁 𑀫𑀸𑀢𑀼𑀕𑀸𑀫𑁂𑀦 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀤𑀼𑀓𑁆𑀓𑀝𑀸𑀤𑀬𑁄𑀢𑀺 ‘‘𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀦𑀺𑀧𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀤𑁆𑀯𑁂𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸.

𑁭𑁨. 𑀧𑀬𑁄𑀕𑁂𑀢𑀺 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀧𑀬𑁄𑀕𑁂.

𑁭𑁩. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀢𑀺 𑀲𑀫𑀻𑀧𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀦𑁆𑀢𑀺𑀓𑁂 𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀬𑁄 𑀲𑀘𑁂 𑀆𑀭𑁄𑀘𑁂𑀢𑀻𑀢𑀺 𑀬𑁄𑀚𑀦𑀸. 𑀤𑀼𑀓𑁆𑀓𑀝𑀸𑀤𑀬𑁄𑀢𑀺 𑀬𑀲𑁆𑀲 𑀆𑀭𑁄𑀘𑁂𑀢𑀺, 𑀲𑁄 𑀦𑀧𑁆𑀧𑀝𑀺𑀯𑀺𑀚𑀸𑀦𑀸𑀢𑀺, 𑀤𑀼𑀓𑁆𑀓𑀝𑀁, 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀏𑀯𑀁 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀢𑀲𑁆𑀲 𑀳𑁄𑀦𑁆𑀢𑀺.

𑁭𑁪. 𑀅𑀜𑁆𑀜𑀢𑁄 𑀅𑀜𑁆𑀜𑀲𑁆𑀲 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀼𑀝𑁆𑀞𑀼𑀮𑁆𑀮𑀲𑁆𑀲 𑀆𑀧𑀢𑁆𑀢𑀺𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀦𑁆𑀢𑀺𑀓𑁂 𑀯𑀤𑀁 𑀯𑀤𑀦𑁆𑀢𑁄𑀢𑀺 𑀬𑁄𑀚𑀦𑀸. 𑀧𑀬𑁄𑀕𑁂𑀢𑀺 𑀆𑀭𑀫𑁆𑀪𑀢𑁄 𑀧𑀝𑁆𑀞𑀸𑀬 𑀧𑀼𑀩𑁆𑀩𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀆𑀕𑀘𑁆𑀙𑀢𑀺 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀆𑀭𑁄𑀘𑀺𑀢𑁂 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁭𑁫. 𑀧𑀬𑁄𑀕𑁂𑀢𑀺 ‘‘𑀅𑀓𑀧𑁆𑀧𑀺𑀬𑀧𑀣𑀯𑀺𑀁 𑀔𑀡𑀺𑀲𑁆𑀲𑀸𑀫𑀻’’𑀢𑀺 𑀓𑀼𑀤𑀸𑀮 𑀧𑀭𑀺𑀬𑁂𑀲𑀦𑀸𑀤𑀺𑀲𑀩𑁆𑀩𑀧𑀬𑁄𑀕𑁂𑀢𑀺.

𑀫𑀼𑀲𑀸𑀯𑀸𑀤𑀯𑀕𑁆𑀕𑀯𑀡𑁆𑀡𑀦𑀸 𑀧𑀞𑀫𑀸.

𑁭𑁬. 𑀧𑀸𑀢𑁂𑀦𑁆𑀢𑁄𑀢𑀺 𑀯𑀺𑀓𑁄𑀧𑁂𑀦𑁆𑀢𑁄. 𑀢𑀲𑁆𑀲𑀸𑀢𑀺 𑀪𑀽𑀢𑀕𑀸𑀫𑀲𑁆𑀲. 𑀧𑀸𑀢𑁂𑀢𑀺 𑀯𑀺𑀓𑁄𑀧𑀦𑁂.

𑁭𑁭. 𑀅𑀜𑁆𑀜𑀯𑀸𑀤𑀓𑀯𑀺𑀳𑁂𑀲𑀓𑀸𑀦𑀁 𑀏𑀓𑀬𑁄𑀕𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀳𑁂𑀲𑀓𑁂 𑀘 𑀜𑀸𑀢𑀼𑀁 𑀲𑀓𑁆𑀓𑀸𑀢𑀺 𑀢𑀢𑁆𑀣 𑀯𑀺𑀲𑀼𑀁 𑀆𑀧𑀢𑁆𑀢𑀺𑀪𑁂𑀤𑁄 𑀦 𑀯𑀼𑀢𑁆𑀢𑁄.

𑁭𑁮. 𑀧𑀭𑀦𑁆𑀢𑀺 𑀅𑀜𑁆𑀜𑀁 𑀲𑀗𑁆𑀖𑁂𑀦 𑀲𑀫𑁆𑀫𑀢𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀸𑀤𑀺𑀓𑀁 𑀉𑀧𑀲𑀫𑁆𑀧𑀦𑁆𑀦𑀁. 𑀉𑀚𑁆𑀛𑀸𑀧𑁂𑀦𑁆𑀢𑁄𑀢𑀺 𑀢𑀲𑁆𑀲 𑀅𑀬𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑀢𑀸𑀬 𑀪𑀺𑀓𑁆𑀔𑀽𑀳𑀺 𑀅𑀯𑀚𑀸𑀦𑀸𑀧𑁂𑀢𑀼𑀁 ‘‘𑀙𑀦𑁆𑀤𑀸𑀬 𑀇𑀢𑁆𑀣𑀦𑁆𑀦𑀸𑀫𑁄 𑀇𑀤𑀁 𑀦𑀸𑀫 𑀓𑀭𑁄𑀢𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀅𑀯𑀜𑁆𑀜𑀸𑀬 𑀑𑀮𑁄𑀓𑀸𑀧𑁂𑀦𑁆𑀢𑁄, 𑀮𑀸𑀫𑀓𑀢𑁄 𑀯𑀸 𑀘𑀺𑀦𑁆𑀢𑀸𑀧𑁂𑀦𑁆𑀢𑁄. 𑀧𑀬𑁄𑀕𑁂𑀢𑀺 𑀉𑀚𑁆𑀛𑀸𑀧𑀦𑀢𑁆𑀣𑀸𑀬 𑀢𑀲𑁆𑀲 𑀅𑀯𑀡𑁆𑀡𑀪𑀡𑀦𑀸𑀤𑀺𑀓𑁂 𑀧𑀼𑀩𑁆𑀩𑀧𑀬𑁄𑀕𑁂.

𑁮𑁩. 𑀲𑀗𑁆𑀖𑀺𑀓𑁂 𑀯𑀺𑀳𑀸𑀭𑁂 𑀧𑀼𑀩𑁆𑀩𑀽𑀧𑀕𑀢𑀁 𑀪𑀺𑀓𑁆𑀔𑀼𑀁 𑀚𑀸𑀦𑀁 𑀚𑀸𑀦𑀦𑁆𑀢𑁄 𑀅𑀦𑀼𑀧𑀔𑀚𑁆𑀚 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀢𑀲𑁆𑀲𑁂𑀯𑀁 𑀲𑁂𑀬𑁆𑀬𑀁 𑀓𑀧𑁆𑀧𑀬𑀢𑁄𑀢𑀺 𑀬𑁄𑀚𑀦𑀸. 𑀧𑀬𑁄𑀕𑁂𑀤𑀼𑀓𑁆𑀓𑀝𑀸𑀤𑀬𑁄𑀢𑀺 𑀏𑀢𑁆𑀣 𑀅𑀮𑀼𑀢𑁆𑀢𑀲𑀫𑀸𑀲𑁄. 𑀆𑀤𑀺-𑀲𑀤𑁆𑀤𑁂𑀦 𑀲𑁂𑀬𑁆𑀬𑀸𑀓𑀧𑁆𑀧𑀦𑁂 𑀧𑀸𑀘𑀺𑀢𑁆𑀢𑀺𑀬𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁮𑁪. 𑀧𑀬𑁄𑀕𑁂𑀢𑀺 ‘‘𑀦𑀺𑀓𑁆𑀓𑀟𑁆𑀠𑀣 𑀇𑀫’’𑀦𑁆𑀢𑀺𑀆𑀤𑀺𑀓𑁂 𑀆𑀡𑀢𑁆𑀢𑀺𑀓𑁂 𑀯𑀸 ‘‘𑀬𑀸𑀳𑀺 𑀬𑀸𑀳𑀻’’𑀢𑀺𑀆𑀤𑀺𑀓𑁂 𑀯𑀸𑀘𑀲𑀺𑀓𑁂 𑀯𑀸 𑀳𑀢𑁆𑀣𑁂𑀦 𑀢𑀲𑁆𑀲 𑀅𑀗𑁆𑀕𑀧𑀭𑀸𑀫𑀲𑀦𑀸𑀤𑀺𑀯𑀲𑁂𑀦 𑀓𑀢𑁂 𑀓𑀸𑀬𑀺𑀓𑁂 𑀯𑀸 𑀦𑀺𑀓𑁆𑀓𑀟𑁆𑀠𑀦𑀧𑀬𑁄𑀕𑁂. 𑀲𑁂𑀲𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀁.

𑁮𑁫. ‘‘𑀯𑁂𑀳𑀸𑀲𑀓𑀼𑀝𑀺𑀬𑀸 𑀉𑀧𑀭𑀻’’𑀢𑀺 𑀧𑀤𑀘𑁆𑀙𑁂𑀤𑁄. 𑀆𑀳𑀘𑁆𑀘𑀧𑀸𑀤𑀓𑁂𑀢𑀺 𑀏𑀢𑁆𑀣 ‘‘𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸’’𑀢𑀺 𑀲𑁂𑀲𑁄. 𑀲𑀻𑀤𑀦𑁆𑀢𑀺 𑀦𑀺𑀲𑀻𑀤𑀦𑁆𑀢𑁄. 𑀤𑀼𑀓𑁆𑀓𑀝𑀸𑀤𑀬𑁄𑀢𑀺 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀦𑀺𑀧𑀚𑁆𑀚𑀸𑀬 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀇𑀫𑀸 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂𑀢𑀺 𑀅𑀢𑁆𑀣𑁄.

𑁮𑁬. 𑀅𑀲𑁆𑀲 𑀧𑀚𑁆𑀚𑀲𑁆𑀲 𑀧𑀞𑀫𑀧𑀸𑀤𑀁 𑀤𑀲𑀓𑁆𑀔𑀭𑀧𑀸𑀤𑀓𑀁 𑀙𑀦𑁆𑀤𑁄𑀯𑀺𑀘𑀺𑀢𑀺𑀬𑀁 𑀯𑀼𑀢𑁆𑀢𑀕𑀸𑀣𑀸, ‘‘𑀕𑀸𑀣𑀸𑀙𑀦𑁆𑀤𑁄 𑀅𑀢𑀻𑀢𑀤𑁆𑀯𑀬’’𑀦𑁆𑀢𑀺 𑀇𑀫𑀺𑀦𑀸 𑀙𑀦𑁆𑀤𑁄𑀯𑀺𑀘𑀺𑀢𑀺𑀮𑀓𑁆𑀔𑀡𑁂𑀦 𑀕𑀸𑀣𑀸𑀙𑀦𑁆𑀤𑀢𑁆𑀢𑀸 𑀅𑀥𑀺𑀝𑁆𑀞𑀺𑀢𑁆𑀯𑀸 𑀤𑁆𑀯𑀢𑁆𑀢𑀺𑀧𑀭𑀺𑀬𑀸𑀬𑁂𑀢𑀺 𑀏𑀢𑁆𑀣 𑀅𑀓𑁆𑀔𑀭𑀤𑁆𑀯𑀬𑀁 𑀅𑀥𑀺𑀓𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀬𑁄𑀕𑁂𑀢𑀺 𑀅𑀥𑀺𑀝𑁆𑀞𑀸𑀦𑀧𑀬𑁄𑀕𑁂. 𑀅𑀥𑀺𑀝𑁆𑀞𑀺𑀢𑁂𑀢𑀺 𑀤𑁆𑀯𑀢𑁆𑀢𑀺𑀧𑀭𑀺𑀬𑀸𑀬𑀸𑀦𑀁 𑀉𑀧𑀭𑀺 𑀅𑀥𑀺𑀝𑁆𑀞𑀸𑀦𑁂 𑀓𑀢𑁂.

𑁮𑁭. 𑀧𑀬𑁄𑀕𑁂𑀢𑀺 𑀲𑀺𑀜𑁆𑀘𑀦𑀲𑀺𑀜𑁆𑀘𑀸𑀧𑀦𑀧𑀬𑁄𑀕𑁂. 𑀲𑀺𑀢𑁆𑀢𑁂𑀢𑀺 𑀲𑀺𑀜𑁆𑀘𑀦𑀓𑀺𑀭𑀺𑀬𑀧𑀭𑀺𑀬𑁄𑀲𑀸𑀦𑁂.

𑀪𑀽𑀢𑀕𑀸𑀫𑀯𑀕𑁆𑀕𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

𑁮𑁮. 𑀤𑀼𑀓𑁆𑀓𑀝𑀁 𑀨𑀼𑀲𑁂𑀢𑀺 𑀬𑁄𑀚𑀦𑀸. 𑀑𑀯𑀤𑀺𑀢𑁂 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁮𑁯. 𑀯𑀺𑀪𑀸𑀕𑁄𑀬𑁂𑀯 𑀯𑀺𑀪𑀸𑀕𑀢𑀸.

𑁯𑁦. 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀜𑁆𑀜𑀢𑁆𑀭 𑀧𑀸𑀭𑀺𑀯𑀢𑁆𑀢𑀓𑀸 𑀘𑀻𑀯𑀭𑀁 𑀤𑁂𑀦𑁆𑀢𑁄 𑀪𑀺𑀓𑁆𑀔𑀼 𑀤𑀼𑀯𑁂 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂𑀢𑀺 𑀬𑁄𑀚𑀦𑀸. 𑀧𑀬𑁄𑀕𑁂𑀢𑀺 𑀤𑀸𑀦𑀧𑀬𑁄𑀕𑁂.

𑁯𑁩. ‘‘𑀦𑀸𑀯𑀁 𑀏𑀓’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀧𑀬𑁄𑀕𑁂𑀢𑀺 𑀅𑀪𑀺𑀭𑀼𑀳𑀡𑀧𑀬𑁄𑀕𑁂. 𑀤𑀼𑀓𑁆𑀓𑀝𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀪𑀺𑀭𑀼𑀴𑁆𑀳𑁂 𑀧𑀸𑀘𑀺𑀢𑁆𑀢𑀺𑀬𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁯𑁪. ‘‘𑀤𑀼𑀯𑀺𑀥𑀁 𑀆𑀧𑀢𑁆𑀢𑀺’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄.

𑁯𑁬. 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀦𑁆𑀢𑁄 𑀪𑀺𑀓𑁆𑀔𑀼 𑀧𑀬𑁄𑀕𑁂𑀤𑀼𑀓𑁆𑀓𑀝𑀸𑀤𑀬𑁄 𑀤𑁆𑀯𑁂𑀧𑀺 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂𑀢𑀺 𑀬𑁄𑀚𑀦𑀸.

𑀑𑀯𑀸𑀤𑀯𑀕𑁆𑀕𑀯𑀡𑁆𑀡𑀦𑀸 𑀢𑀢𑀺𑀬𑀸.

𑁯𑁭. 𑀢𑀤𑀼𑀢𑁆𑀢𑀭𑀺𑀦𑁆𑀢𑀺 𑀢𑀢𑁄 𑀪𑀼𑀜𑁆𑀚𑀺𑀢𑀼𑀁 𑀅𑀦𑀼𑀜𑁆𑀜𑀸𑀢𑀏𑀓𑀤𑀺𑀯𑀲𑀢𑁄 𑀉𑀢𑁆𑀢𑀭𑀺𑀁 𑀤𑀼𑀢𑀺𑀬𑀤𑀺𑀯𑀲𑀢𑁄 𑀧𑀝𑁆𑀞𑀸𑀬. 𑀅𑀦𑀦𑁆𑀢𑀭𑀲𑁆𑀲 𑀯𑀕𑁆𑀕𑀲𑁆𑀲𑀸𑀢𑀺 𑀑𑀯𑀸𑀤𑀯𑀕𑁆𑀕𑀲𑁆𑀲. 𑀦𑀯𑀫𑁂𑀦𑀸𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀧𑀭𑀺𑀧𑀸𑀘𑀺𑀢𑀧𑀺𑀡𑁆𑀟𑀧𑀸𑀢𑀲𑀺𑀓𑁆𑀔𑀸𑀧𑀤𑁂𑀦.

𑁯𑁯. 𑀤𑁆𑀯𑀢𑁆𑀢𑀺𑀧𑀢𑁆𑀢𑁂𑀢𑀺 𑀤𑁆𑀯𑀢𑁆𑀢𑀺𑀧𑀢𑁆𑀢𑀧𑀽𑀭𑁂. 𑀢𑀤𑀼𑀢𑁆𑀢𑀭𑀺𑀦𑁆𑀢𑀺 𑀤𑁆𑀯𑀢𑁆𑀢𑀺𑀧𑀢𑁆𑀢𑀧𑀽𑀭𑀢𑁄 𑀉𑀢𑁆𑀢𑀭𑀺𑀁. 𑀧𑀬𑁄𑀕𑁂𑀢𑀺 𑀧𑀝𑀺𑀕𑁆𑀕𑀳𑀡𑀧𑀬𑁄𑀕𑁂.

𑁧𑁦𑁧. 𑀅𑀪𑀺𑀳𑀝𑁆𑀞𑀼𑀦𑁆𑀢𑀺 𑀅𑀪𑀺𑀳𑀭𑀺𑀢𑁆𑀯𑀸.

𑁧𑁦𑁨. 𑀢𑀲𑁆𑀲𑀸𑀢𑀺 𑀅𑀪𑀺𑀳𑀭𑀦𑁆𑀢𑀲𑁆𑀲. 𑀧𑀺𑀝𑀓𑁂𑀢𑀺 𑀯𑀺𑀦𑀬𑀧𑀺𑀝𑀓𑁂.

𑁧𑁦𑁩. 𑀤𑀲𑀫𑁂𑀧𑀻𑀢𑀺 𑀏𑀢𑁆𑀣 ‘‘𑀤𑀲𑀫𑁂 𑀅𑀧𑀻’’𑀢𑀺 𑀧𑀤𑀘𑁆𑀙𑁂𑀤𑁄.

𑀪𑁄𑀚𑀦𑀯𑀕𑁆𑀕𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

𑁧𑁦𑁪. 𑀅𑀘𑁂𑀮𑀓𑀸𑀤𑀺𑀦𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀯𑀸’’𑀢𑀺 (𑀧𑀸𑀘𑀺. 𑁨𑁭𑁦) 𑀯𑀼𑀢𑁆𑀢𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀪𑁄𑀚𑀦𑀸𑀤𑀺𑀓𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀔𑀸𑀤𑀦𑀻𑀬𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀬𑁄𑀕𑁂𑀢𑀺 𑀲𑀳𑀢𑁆𑀣𑀸 𑀤𑀸𑀦𑀧𑀬𑁄𑀕𑁂.

𑁧𑁦𑁫. 𑀤𑀸𑀧𑁂𑀢𑁆𑀯𑀸 𑀯𑀸 𑀅𑀤𑀸𑀧𑁂𑀢𑁆𑀯𑀸 𑀯𑀸 𑀓𑀺𑀜𑁆𑀘𑀺 𑀆𑀫𑀺𑀲𑀁. 𑀧𑀬𑁄𑀕𑁂𑀢𑀺 𑀉𑀬𑁆𑀬𑁄𑀚𑀦𑀧𑀬𑁄𑀕𑁂. 𑀢𑀲𑁆𑀫𑀺𑀦𑁆𑀢𑀺 𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀫𑁆𑀳𑀺. 𑀉𑀬𑁆𑀬𑁄𑀚𑀺𑀢𑁂 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁧𑁦𑁯. 𑀉𑀫𑁆𑀫𑀸𑀭𑀸𑀢𑀺𑀓𑁆𑀓𑀫𑁂𑀢𑀺 𑀇𑀦𑁆𑀤𑀔𑀻𑀮𑀸𑀢𑀺𑀓𑁆𑀓𑀫𑁂.

𑁧𑁧𑁦. 𑀢𑀤𑀼𑀢𑁆𑀢𑀭𑀺𑀦𑁆𑀢𑀺 𑀢𑀢𑁄 𑀧𑀭𑀺𑀘𑁆𑀙𑀺𑀦𑁆𑀦𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀢𑁄 𑀯𑀸 𑀧𑀭𑀺𑀘𑁆𑀙𑀺𑀦𑁆𑀦𑀪𑁂𑀲𑀚𑁆𑀚𑀧𑀭𑀺𑀬𑀦𑁆𑀢𑀢𑁄 𑀯𑀸 𑀉𑀢𑁆𑀢𑀭𑀺𑀁.

𑁧𑁧𑁧. 𑀉𑀬𑁆𑀬𑀼𑀢𑁆𑀢𑀁 𑀤𑀲𑁆𑀲𑀦𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑁄 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀨𑀼𑀲𑁂𑀢𑀺 𑀬𑁄𑀚𑀦𑀸.

𑀅𑀘𑁂𑀮𑀓𑀯𑀕𑁆𑀕𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

𑁧𑁧𑁪. 𑀫𑁂𑀭𑁂𑀬𑁆𑀬𑀦𑁆𑀢𑀺 𑀫𑁂𑀭𑀬𑀁. 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀅-𑀓𑀸𑀭𑀲𑁆𑀲 𑀏-𑀓𑀸𑀭𑁄, 𑀬-𑀓𑀸𑀭𑀲𑁆𑀲 𑀘 𑀤𑁆𑀯𑀺𑀢𑁆𑀢𑀁. 𑀫𑁂𑀭𑀬-𑀲𑀤𑁆𑀤𑀧𑀭𑀺𑀬𑀸𑀬𑁄 𑀯𑀸 𑀫𑁂𑀭𑁂𑀬𑁆𑀬-𑀲𑀤𑁆𑀤𑁄. 𑀫𑀼𑀦𑀻𑀢𑀺 𑀪𑀺𑀓𑁆𑀔𑀼.

𑁧𑁧𑁫. ‘‘𑀪𑀺𑀓𑁆𑀔𑀼 𑀅𑀗𑁆𑀕𑀼𑀮𑀺𑀧𑀢𑁄𑀤𑁂𑀦𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀧𑀬𑁄𑀕𑁂𑀢𑀺 𑀳𑀸𑀲𑀸𑀧𑀦𑀧𑀬𑁄𑀕𑁂. 𑀢𑀲𑁆𑀲𑀸𑀢𑀺 𑀳𑀸𑀲𑀸𑀧𑁂𑀦𑁆𑀢𑀲𑁆𑀲.

𑁧𑁧𑁬. 𑀕𑁄𑀧𑁆𑀨𑀓𑀸 𑀳𑁂𑀝𑁆𑀞𑀸 𑀉𑀤𑀓𑁂 𑀤𑀼𑀓𑁆𑀓𑀝𑀁. 𑀕𑁄𑀧𑁆𑀨𑀓𑀢𑁄 𑀉𑀧𑀭𑀺 𑀉𑀧𑀭𑀺𑀕𑁄𑀧𑁆𑀨𑀓𑀁, 𑀉𑀤𑀓𑀁, 𑀢𑀲𑁆𑀫𑀺𑀁, 𑀕𑁄𑀧𑁆𑀨𑀓𑀢𑁄 𑀅𑀥𑀺𑀓𑀧𑁆𑀧𑀫𑀸𑀡𑁂 𑀉𑀤𑀓𑁂𑀢𑀺 𑀅𑀢𑁆𑀣𑁄.

𑁧𑁧𑁭. 𑀅𑀦𑀸𑀤𑀭𑀺𑀬𑀦𑁆𑀢𑀺 𑀧𑀼𑀕𑁆𑀕𑀮𑀸𑀦𑀸𑀤𑀭𑀺𑀬𑀁, 𑀥𑀫𑁆𑀫𑀸𑀦𑀸𑀤𑀭𑀺𑀬𑀁 𑀯𑀸. 𑀧𑀬𑁄𑀕𑁂𑀢𑀺 𑀅𑀦𑀸𑀤𑀭𑀺𑀬𑀯𑀲𑁂𑀦 𑀧𑀯𑀢𑁆𑀢𑁂 𑀓𑀸𑀬𑀧𑀬𑁄𑀕𑁂 𑀯𑀸 𑀯𑀘𑀻𑀧𑀬𑁄𑀕𑁂 𑀯𑀸. 𑀓𑀢𑁂 𑀅𑀦𑀸𑀤𑀭𑀺𑀬𑁂.

𑁧𑁧𑁮. 𑀧𑀬𑁄𑀕𑁂𑀢𑀺 𑀪𑀺𑀁𑀲𑀸𑀧𑀦𑀧𑀬𑁄𑀕𑁂.

𑁧𑁧𑁯. 𑀚𑁄𑀢𑀺𑀦𑁆𑀢𑀺 𑀅𑀕𑁆𑀕𑀺𑀁. 𑀲𑀫𑀸𑀤𑀳𑀺𑀢𑁆𑀯𑀸𑀦𑀸𑀢𑀺 𑀚𑀸𑀮𑁂𑀢𑁆𑀯𑀸. ‘‘𑀯𑀺𑀲𑀺𑀩𑁆𑀩𑁂𑀦𑁆𑀢𑁄’’𑀢𑀺 𑀇𑀫𑀺𑀦𑀸 𑀨𑀮𑀽𑀧𑀘𑀸𑀭𑁂𑀦 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀯𑀺𑀲𑀺𑀩𑁆𑀩𑀦𑀓𑀺𑀭𑀺𑀬𑀸 𑀳𑀺 𑀲𑀫𑀸𑀤𑀳𑀦𑀓𑀺𑀭𑀺𑀬𑀸𑀬 𑀨𑀮𑀦𑁆𑀢𑀺 𑀯𑀺𑀲𑀺𑀩𑁆𑀩𑀦𑀓𑀺𑀭𑀺𑀬𑀸𑀯𑁄𑀳𑀸𑀭𑁂𑀦 𑀲𑀫𑀸𑀤𑀳𑀦𑀓𑀺𑀭𑀺𑀬𑀸𑀯. 𑀢𑀲𑁆𑀫𑀸 𑀯𑀺𑀲𑀺𑀩𑁆𑀩𑁂𑀦𑁆𑀢𑁄𑀢𑀺 𑀏𑀢𑁆𑀣 𑀲𑀫𑀸𑀤𑀳𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀧𑀬𑁄𑀕𑁂𑀢𑀺 𑀲𑀫𑀸𑀤𑀳𑀦𑀲𑀫𑀸𑀤𑀳𑀸𑀧𑀦𑀧𑀬𑁄𑀕𑁂. 𑀯𑀺𑀲𑀻𑀯𑀺𑀢𑁂𑀢𑀺 𑀯𑀼𑀢𑁆𑀢𑀦𑀬𑁂𑀦 𑀲𑀫𑀸𑀤𑀳𑀺𑀢𑁂𑀢𑀺 𑀅𑀢𑁆𑀣𑁄.

𑁧𑁨𑁦. 𑀧𑀬𑁄𑀕𑁂𑀢𑀺 𑀘𑀼𑀡𑁆𑀡𑀫𑀢𑁆𑀢𑀺𑀓𑀸𑀪𑀺𑀲𑀗𑁆𑀔𑀭𑀡𑀸𑀤𑀺𑀲𑀩𑁆𑀩𑀧𑀬𑁄𑀕𑁂. 𑀇𑀢𑀭𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀁.

𑁧𑁨𑁧. 𑀢𑀺𑀡𑁆𑀡𑀁 𑀤𑀼𑀩𑁆𑀩𑀡𑁆𑀡𑀓𑀭𑀡𑀸𑀦𑀦𑁆𑀢𑀺 𑀓𑀁𑀲𑀦𑀻𑀮𑀧𑀢𑁆𑀢𑀦𑀻𑀮𑀓𑀤𑁆𑀤𑀫𑀲𑀗𑁆𑀔𑀸𑀢𑀸𑀦𑀁 𑀢𑀺𑀡𑁆𑀡𑀁 𑀤𑀼𑀩𑁆𑀩𑀡𑁆𑀡𑀓𑀭𑀡𑀸𑀦𑀁. 𑀏𑀓𑀁 𑀅𑀜𑁆𑀜𑀢𑀭𑀁 𑀅𑀦𑀸𑀤𑀺𑀬 𑀅𑀤𑀢𑁆𑀯𑀸. 𑀘𑀻𑀯𑀭𑀦𑁆𑀢𑀺 𑀦𑀯𑀘𑀻𑀯𑀭𑀁.

𑁧𑁨𑁨. 𑀦𑀢𑁆𑀣𑀺 𑀏𑀢𑀲𑁆𑀲 𑀉𑀤𑁆𑀥𑀸𑀭𑀦𑁆𑀢𑀺 𑀅𑀦𑀼𑀤𑁆𑀥𑀸𑀭𑁄, 𑀢𑀁 𑀅𑀦𑀼𑀤𑁆𑀥𑀸𑀭𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀭𑀲𑁆𑀲𑀢𑁆𑀢𑀁, 𑀅𑀓𑀢𑀧𑀘𑁆𑀘𑀼𑀤𑁆𑀥𑀸𑀭𑀦𑁆𑀢𑀺 𑀅𑀢𑁆𑀣𑁄.

𑁧𑁨𑁩. 𑀅𑀧𑀦𑀺𑀥𑁂𑀦𑁆𑀢𑁄𑀢𑀺 𑀅𑀧𑀦𑁂𑀢𑁆𑀯𑀸 𑀦𑀺𑀥𑁂𑀦𑁆𑀢𑁄 𑀦𑀺𑀓𑁆𑀔𑀺𑀧𑁂𑀦𑁆𑀢𑁄. 𑀧𑀢𑁆𑀢𑀸𑀤𑀺𑀓𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀘𑀻𑀯𑀭𑀦𑀺𑀲𑀻𑀤𑀦𑀲𑀽𑀘𑀺𑀖𑀭𑀓𑀸𑀬𑀩𑀦𑁆𑀥𑀦𑀸𑀦𑀁 𑀕𑀳𑀡𑀁. 𑀧𑀬𑁄𑀕𑁂𑀢𑀺 𑀅𑀧𑀦𑀺𑀥𑀸𑀦𑀧𑀬𑁄𑀕𑁂. 𑀢𑀲𑁆𑀫𑀺𑀁 𑀧𑀢𑁆𑀢𑀸𑀤𑀺𑀓𑁂 𑀧𑀜𑁆𑀘𑀯𑀺𑀥𑁂 𑀧𑀭𑀺𑀓𑁆𑀔𑀸𑀭𑁂. 𑀅𑀧𑀦𑀺𑀳𑀺𑀢𑁂 𑀲𑁂𑀲𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑀲𑀼𑀭𑀸𑀧𑀸𑀦𑀯𑀕𑁆𑀕𑀯𑀡𑁆𑀡𑀦𑀸 𑀙𑀝𑁆𑀞𑀸.

𑁧𑁨𑁪. 𑀢𑀧𑁄𑀥𑀦𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀲𑀗𑁆𑀔𑀸𑀢𑀁 𑀢𑀧𑁄𑀥𑀦𑀫𑀲𑁆𑀲𑀸𑀢𑀺 𑀢𑀧𑁄𑀥𑀦𑁄, 𑀪𑀺𑀓𑁆𑀔𑀼.

𑁧𑁨𑁫. 𑀢𑀲𑁆𑀫𑀺𑀁 𑀑𑀧𑀸𑀢𑁂.

𑁧𑁨𑁬. 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀫𑀦𑀼𑀲𑁆𑀲𑀲𑀭𑀻𑀭𑁄. 𑀢𑀺𑀭𑀘𑁆𑀙𑀸𑀦𑀕𑀢𑁄 𑀦𑀸𑀕𑁄 𑀯𑀸 𑀲𑀼𑀧𑀡𑁆𑀡𑁄 𑀯𑀸. 𑀢𑀲𑁆𑀲 𑀑𑀧𑀸𑀢𑀔𑀡𑀓𑀲𑁆𑀲.

𑁧𑁨𑁭. 𑀧𑀝𑀼𑀩𑀼𑀤𑁆𑀥𑀺𑀦𑀸𑀢𑀺 𑀲𑀩𑁆𑀩𑁂𑀲𑀼 𑀜𑁂𑀬𑁆𑀬𑀥𑀫𑁆𑀫𑁂𑀲𑀼 𑀦𑀺𑀧𑀼𑀦𑀜𑀸𑀡𑁂𑀦 𑀪𑀕𑀯𑀢𑀸.

𑁧𑁨𑁮. 𑀧𑀬𑁄𑀕𑁂𑀢𑀺 𑀧𑀭𑀺𑀪𑁄𑀕𑀢𑁆𑀣𑀸𑀬 𑀕𑀳𑀡𑀸𑀤𑀺𑀓𑁂 𑀧𑀬𑁄𑀕𑁂. 𑀢𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲.

𑁧𑁨𑁯. 𑀉𑀓𑁆𑀓𑁄𑀝𑁂𑀦𑁆𑀢𑁄𑀢𑀺 𑀉𑀘𑁆𑀘𑀸𑀮𑁂𑀦𑁆𑀢𑁄 𑀬𑀣𑀸𑀞𑀸𑀦𑁂 𑀞𑀸𑀢𑀼𑀁 𑀅𑀤𑁂𑀦𑁆𑀢𑁄. 𑀧𑀬𑁄𑀕𑁂𑀢𑀺 𑀉𑀓𑁆𑀓𑁄𑀝𑀦𑀧𑀬𑁄𑀕𑁂. 𑀉𑀓𑁆𑀓𑁄𑀝𑀺𑀢𑁂 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁧𑁩𑁦. 𑀤𑀼𑀝𑁆𑀞𑀼𑀮𑁆𑀮𑀁 𑀯𑀚𑁆𑀚𑀓𑀦𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀸𑀤𑀺𑀓𑁂. 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑀇𑀢𑀺 𑀤𑀻𑀧𑀺𑀢𑀦𑁆𑀢𑀺 𑀬𑁄𑀚𑀦𑀸.

𑁧𑁩𑁧. 𑀧𑀬𑁄𑀕𑁂𑀢𑀺 𑀕𑀡𑀧𑀭𑀺𑀬𑁂𑀲𑀦𑀸𑀤𑀺𑀧𑀬𑁄𑀕𑁂. 𑀤𑀼𑀓𑁆𑀓𑀝𑀁 𑀧𑀢𑁆𑀢𑁄 𑀲𑀺𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀸𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀉𑀧𑀲𑀫𑁆𑀧𑀸𑀤𑀺𑀢𑁂 𑀲𑀺𑀬𑀸. 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀉𑀧𑀲𑀕𑁆𑀕𑀮𑁄𑀧𑁄.

𑁧𑁩𑁨-𑁩. 𑀚𑀸𑀦𑀁 𑀣𑁂𑀬𑁆𑀬𑀲𑀢𑁆𑀣𑁂𑀦 𑀲𑀳 𑀲𑀁𑀯𑀺𑀥𑀸𑀬 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀢𑁄 𑀘 𑀢𑀣𑁂𑀯 𑀫𑀸𑀢𑀼𑀕𑀸𑀫𑁂𑀦 𑀲𑀳 𑀲𑀁𑀯𑀺𑀥𑀸𑀬 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀢𑁄 𑀘𑀸𑀢𑀺 𑀬𑁄𑀚𑀦𑀸. 𑀧𑀬𑁄𑀕𑁂𑀢𑀺 𑀲𑀁𑀯𑀺𑀥𑀸𑀬 𑀕𑀦𑁆𑀢𑀼𑀁 𑀧𑀝𑀺𑀧𑀼𑀘𑁆𑀙𑀸𑀤𑀺𑀓𑀭𑀡𑀧𑀬𑁄𑀕𑁂. 𑀧𑀝𑀺𑀧𑀦𑁆𑀦𑁂𑀢𑀺 𑀫𑀕𑁆𑀕𑀧𑀝𑀺𑀧𑀦𑁆𑀦𑁂. 𑀅𑀦𑀦𑁆𑀢𑀭𑀦𑁆𑀢𑀺 𑀅𑀤𑁆𑀥𑀬𑁄𑀚𑀦𑀕𑀸𑀫𑀦𑁆𑀢𑀭𑀸𑀢𑀺𑀓𑁆𑀓𑀫𑀦𑀸𑀦𑀦𑁆𑀢𑀭𑀁.

𑁧𑁩𑁪. 𑀜𑀢𑁆𑀢𑀺𑀬𑀸 𑀑𑀲𑀸𑀦𑁂 𑀤𑀼𑀓𑁆𑀓𑀝𑀁 𑀨𑀼𑀲𑁂𑀢𑀺 𑀬𑁄𑀚𑀦𑀸.

𑁧𑁩𑁫. 𑀅𑀓𑀢𑀸𑀦𑀼𑀥𑀫𑁆𑀫𑁂𑀦𑀸𑀢𑀺 𑀅𑀦𑀼𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀯𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀯𑀸 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀯𑀸 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀉𑀓𑁆𑀔𑀺𑀢𑁆𑀢𑀓𑀲𑁆𑀲 𑀅𑀦𑀼𑀮𑁄𑀫𑀯𑀢𑁆𑀢𑀁 𑀤𑀺𑀲𑁆𑀯𑀸 𑀓𑀢𑁆𑀯𑀸 𑀑𑀲𑀸𑀭𑀡𑀸, 𑀲𑁄 𑀑𑀲𑀸𑀭𑀡𑀲𑀗𑁆𑀔𑀸𑀢𑁄 𑀅𑀦𑀼𑀥𑀫𑁆𑀫𑁄 𑀬𑀲𑁆𑀲 𑀦 𑀓𑀢𑁄, 𑀅𑀬𑀁 𑀅𑀓𑀢𑀸𑀦𑀼𑀥𑀫𑁆𑀫𑁄 𑀦𑀸𑀫, 𑀢𑀸𑀤𑀺𑀲𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀪𑀼𑀜𑁆𑀚𑀦𑁆𑀢𑁄𑀢𑀺 𑀆𑀫𑀺𑀲𑀲𑀫𑁆𑀪𑁄𑀕𑀁 𑀓𑀭𑁄𑀦𑁆𑀢𑁄 𑀪𑀺𑀓𑁆𑀔𑀼. 𑀧𑀬𑁄𑀕𑁂𑀢𑀺 𑀪𑀼𑀜𑁆𑀚𑀺𑀢𑀼𑀁 𑀆𑀫𑀺𑀲𑀧𑀝𑀺𑀕𑁆𑀕𑀳𑀡𑀸𑀤𑀺𑀧𑀬𑁄𑀕𑁂. 𑀪𑀼𑀢𑁆𑀢𑁂𑀢𑀺 𑀲𑀫𑁆𑀪𑀼𑀢𑁆𑀢𑁂, 𑀉𑀪𑀬𑀲𑀫𑁆𑀪𑁄𑀕𑁂, 𑀢𑀤𑀜𑁆𑀜𑀢𑀭𑁂 𑀯𑀸 𑀓𑀢𑁂𑀢𑀺 𑀅𑀢𑁆𑀣𑁄.

𑁧𑁩𑁬. 𑀉𑀧𑀮𑀸𑀧𑁂𑀦𑁆𑀢𑁄𑀢𑀺 𑀧𑀢𑁆𑀢𑀘𑀻𑀯𑀭𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀦𑀸𑀤𑀺𑀯𑀲𑁂𑀦 𑀲𑀗𑁆𑀕𑀡𑁆𑀳𑀦𑁆𑀢𑁄. 𑀧𑀬𑁄𑀕𑁂𑀢𑀺 𑀉𑀧𑀮𑀸𑀧𑀦𑀧𑀬𑁄𑀕𑁂.