𑀉𑀢𑁆𑀢𑀭𑀯𑀺𑀦𑀺𑀘𑁆𑀙𑀬-𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸

(𑀓)

𑀤𑁂𑀯𑀸𑀢𑀺𑀤𑁂𑀯𑀁 𑀲𑀼𑀕𑀢𑀁, 𑀤𑁂𑀯𑀩𑁆𑀭𑀳𑁆𑀫𑀺𑀦𑁆𑀤𑀯𑀦𑁆𑀤𑀺𑀢𑀁;

𑀥𑀫𑁆𑀫𑀜𑁆𑀘 𑀯𑀝𑁆𑀝𑀼𑀧𑀘𑁆𑀙𑁂𑀤𑀁, 𑀦𑀢𑁆𑀯𑀸 𑀯𑀝𑁆𑀝𑀸𑀢𑀺𑀢𑀁 𑀕𑀡𑀁.

(𑀔)

𑀯𑀦𑁆𑀤𑀦𑀸𑀫𑀬𑀧𑀼𑀜𑁆𑀜𑁂𑀦, 𑀓𑀫𑁆𑀫𑁂𑀦 𑀭𑀢𑀦𑀢𑁆𑀢𑀬𑁂;

𑀙𑁂𑀢𑁆𑀯𑀸 𑀉𑀧𑀤𑁆𑀤𑀯𑁂 𑀲𑀩𑁆𑀩𑁂, 𑀆𑀭𑀪𑀺𑀲𑁆𑀲𑀁 𑀲𑀫𑀸𑀳𑀺𑀢𑁄.

(𑀕)

𑀣𑁂𑀭𑁂𑀦 𑀩𑀼𑀤𑁆𑀥𑀤𑀢𑁆𑀢𑁂𑀦, 𑀭𑀘𑀺𑀢𑀲𑁆𑀲 𑀲𑀫𑀸𑀲𑀢𑁄;

𑀲𑀁𑀯𑀡𑁆𑀡𑀦𑀫𑀲𑀁𑀓𑀺𑀡𑁆𑀡𑀁, 𑀉𑀢𑁆𑀢𑀭𑀲𑁆𑀲 𑀬𑀣𑀸𑀩𑀮𑀁.

𑁧. 𑀅𑀣𑀸𑀬𑀫𑀸𑀘𑀭𑀺𑀬𑁄 𑀅𑀢𑁆𑀢𑀦𑁄 𑀯𑀺𑀭𑀘𑀺𑀢𑁂 𑀯𑀺𑀦𑀬𑁂 𑀢𑀲𑁆𑀲𑀼𑀧𑀦𑀺𑀲𑁆𑀲𑀬𑁂 𑀯𑀺𑀦𑀬𑀧𑀺𑀝𑀓𑁂 𑀘 𑀪𑀺𑀓𑁆𑀔𑀽𑀦𑀁 𑀦𑀸𑀦𑀧𑁆𑀧𑀓𑀸𑀭𑀓𑁄𑀲𑀮𑁆𑀮𑀚𑀦𑀦𑀢𑁆𑀣𑀁 𑀧𑀭𑀺𑀯𑀸𑀭𑀝𑁆𑀞𑀓𑀣𑀸𑀬𑀜𑁆𑀘 𑀆𑀕𑀢𑀯𑀺𑀦𑀺𑀘𑁆𑀙𑀬𑀁 𑀲𑀗𑁆𑀕𑀳𑁂𑀢𑁆𑀯𑀸 𑀉𑀢𑁆𑀢𑀭𑀧𑀓𑀭𑀡𑀁 𑀯𑀡𑁆𑀡𑀬𑀺𑀢𑀼𑀓𑀸𑀫𑁄 𑀧𑀞𑀫𑀁 𑀢𑀸𑀯 𑀅𑀦𑁆𑀢𑀭𑀸𑀬𑀦𑀺𑀯𑀸𑀭𑀡𑁂𑀦 𑀬𑀣𑀸𑀥𑀺𑀧𑁆𑀧𑁂𑀢𑀲𑀸𑀥𑀦𑀢𑁆𑀣𑀁 𑀭𑀢𑀦𑀢𑁆𑀢𑀬𑀁 𑀯𑀦𑁆𑀤𑀦𑁆𑀢𑁄 𑀆𑀳 ‘‘𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫’’𑀦𑁆𑀢𑀺𑀆𑀤𑀺.

𑀧𑀓𑀭𑀡𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸𑀧𑀬𑁄𑀚𑀦𑀁 𑀢𑀢𑁆𑀣 𑀢𑀢𑁆𑀣𑀸𑀘𑀭𑀺𑀬𑁂𑀳𑀺 𑀩𑀳𑀼𑀥𑀸 𑀧𑀧𑀜𑁆𑀘𑀺𑀢𑀁, 𑀅𑀫𑁆𑀳𑁂𑀳𑀺 𑀘 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬𑀁 𑀲𑀫𑀸𑀲𑀢𑁄 𑀤𑀲𑁆𑀲𑀺𑀢𑀦𑁆𑀢𑀺 𑀦 𑀢𑀁 𑀇𑀥 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀧𑀓𑀭𑀡𑀸𑀪𑀺𑀥𑁂𑀬𑁆𑀬 𑀓𑀭𑀡𑀧𑁆𑀧𑀓𑀸𑀭𑀧𑀬𑁄𑀚𑀦𑀸𑀦𑀺𑀧𑀺 𑀢𑀢𑁆𑀣 𑀤𑀲𑁆𑀲𑀺𑀢𑀦𑀬𑀸𑀦𑀼𑀲𑀸𑀭𑁂𑀦 𑀇𑀥𑀸𑀧𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀫𑁆𑀩𑀦𑁆𑀥𑀸𑀤𑀺𑀤𑀲𑁆𑀲𑀦𑀫𑀼𑀔𑁂𑀦 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀫𑁂𑀯𑁂𑀢𑁆𑀣 𑀓𑀭𑀺𑀲𑁆𑀲𑀸𑀫𑀺.

𑀚𑀺𑀦𑀁, 𑀥𑀫𑁆𑀫𑀜𑁆𑀘, 𑀕𑀡𑀜𑁆𑀘 𑀯𑀦𑁆𑀤𑀺𑀢𑁆𑀯𑀸 𑀉𑀢𑁆𑀢𑀭𑀁 𑀤𑀸𑀦𑀺 𑀓𑀭𑀺𑀲𑁆𑀲𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀁𑀯𑀺𑀲𑀺𑀝𑁆𑀞𑀁 𑀚𑀺𑀦𑀁, 𑀥𑀫𑁆𑀫𑀁, 𑀕𑀡𑀜𑁆𑀘 𑀯𑀦𑁆𑀤𑀺𑀢𑁆𑀯𑀸𑀢𑀺 𑀆𑀳 ‘‘𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀦𑁆𑀢𑀺 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀲𑀢𑁆𑀢𑀸 𑀆𑀲𑀢𑁆𑀢𑀸 𑀯𑀺𑀲𑀢𑁆𑀢𑀸 𑀮𑀕𑁆𑀕𑀺𑀢𑀸𑀢𑀺 𑀲𑀢𑁆𑀢𑀸, 𑀧𑀭𑀫𑀢𑁆𑀣𑀢𑁄 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀦𑀪𑀽𑀢𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀯𑁄𑀳𑀸𑀭𑀢𑁄 𑀔𑀦𑁆𑀥𑀲𑀦𑁆𑀢𑀢𑀺𑀁 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀸 𑀲𑀫𑁆𑀫𑀼𑀢𑀺 ‘‘𑀲𑀢𑁆𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀧𑀦 𑀓𑀸𑀫𑀸𑀯𑀘𑀭𑀸𑀤𑀺𑀪𑀽𑀫𑀺𑀯𑀲𑁂𑀦, 𑀦𑀺𑀭𑀬𑀸𑀤𑀺𑀧𑀤𑁂𑀲𑀯𑀲𑁂𑀦, 𑀅𑀳𑁂𑀢𑀼𑀓𑀸𑀤𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑀸𑀢𑀺 𑀏𑀯𑀫𑀸𑀤𑀻𑀳𑀺 𑀅𑀦𑀦𑁆𑀢𑀧𑀪𑁂𑀤𑀸. 𑀢𑁂𑀲𑀼 𑀔𑀻𑀡𑀸𑀲𑀯𑀸𑀦𑀁 𑀬𑀣𑀸𑀯𑀼𑀢𑁆𑀢𑀦𑀺𑀩𑁆𑀩𑀘𑀦𑀢𑁆𑀣𑁂𑀦 𑀲𑀢𑁆𑀢𑀯𑁄𑀳𑀸𑀭𑁄 𑀦 𑀮𑀩𑁆𑀪𑀢𑀺. 𑀢𑀣𑀸𑀧𑀺 𑀢𑁂 𑀪𑀽𑀢𑀧𑀼𑀩𑁆𑀩𑀕𑀢𑀺𑀬𑀸 𑀯𑀸 𑀢𑀁𑀲𑀤𑀺𑀲𑀢𑁆𑀢𑀸 𑀯𑀸 ‘‘𑀲𑀢𑁆𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀩𑁆𑀩𑁂 𑀘 𑀢𑁂 𑀲𑀢𑁆𑀢𑀸 𑀘𑀸 𑀢𑀺 𑀲𑀩𑁆𑀩𑀲𑀢𑁆𑀢𑀸. 𑀉𑀤𑁆𑀥𑀝𑀢𑀫𑀢𑁆𑀢𑀸, 𑀉𑀕𑁆𑀕𑀢𑀢𑀫𑀢𑁆𑀢𑀸, 𑀲𑁂𑀝𑁆𑀞𑀢𑁆𑀢𑀸 𑀘 𑀉𑀢𑁆𑀢𑀫𑁄, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂𑀳𑀺 𑀭𑀽𑀧𑀸𑀭𑀽𑀧𑀕𑀼𑀡𑁂𑀳𑀺 𑀉𑀢𑁆𑀢𑀫𑁄, 𑀲𑀩𑁆𑀩𑀲𑀢𑁆𑀢𑁂𑀲𑀼 𑀯𑀸 𑀉𑀢𑁆𑀢𑀫𑁄 𑀧𑀯𑀭𑁄 𑀲𑁂𑀝𑁆𑀞𑁄𑀢𑀺 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑁄. ‘‘𑀚𑀺𑀦’’𑀦𑁆𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁.

𑀧𑀼𑀦𑀧𑀺 𑀓𑀺𑀁𑀯𑀺𑀲𑀺𑀝𑁆𑀞𑀦𑁆𑀢𑀺 𑀆𑀳 ‘‘𑀥𑀻𑀭’’𑀦𑁆𑀢𑀺. 𑀥𑀻 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀢𑀸𑀬 𑀈𑀭𑀢𑀺 𑀯𑀢𑁆𑀢𑀢𑀻𑀢𑀺 𑀥𑀻𑀭𑁄, 𑀢𑀁. 𑀢𑀸𑀤𑀺𑀪𑀸𑀯𑁂𑀦 𑀇𑀦𑁆𑀤𑀔𑀻𑀮𑀲𑀺𑀦𑁂𑀭𑀼𑀆𑀤𑀬𑁄 𑀯𑀺𑀬 𑀅𑀝𑁆𑀞𑀮𑁄𑀓𑀥𑀫𑁆𑀫𑀲𑀗𑁆𑀔𑀸𑀢𑁂𑀦 𑀪𑀼𑀲𑀯𑀸𑀢𑁂𑀦 𑀅𑀓𑀫𑁆𑀧𑀺𑀬𑀝𑁆𑀞𑁂𑀦, 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀲𑁂𑀦 𑀲𑀤𑁂𑀯𑀓𑁂 𑀮𑁄𑀓𑁂 𑀓𑁂𑀦𑀘𑀺 𑀅𑀓𑀫𑁆𑀧𑀦𑀻𑀬𑀝𑁆𑀞𑁂𑀦 𑀘 𑀥𑀻𑀭𑀁, 𑀥𑀺𑀢𑀺𑀲𑀫𑁆𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀫𑁆𑀧𑀺 𑀢𑀲𑁆𑀲𑁂𑀯 𑀯𑀺𑀲𑁂𑀲𑀦𑀁.

𑀯𑀦𑁆𑀤𑀺𑀢𑁆𑀯𑀸𑀢𑀺 𑀓𑀸𑀬𑀯𑀘𑀻𑀫𑀦𑁄𑀤𑁆𑀯𑀸𑀭𑁂𑀳𑀺 𑀅𑀪𑀺𑀯𑀸𑀤𑁂𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀬𑀣𑀸𑀪𑀼𑀘𑁆𑀘𑀕𑀼𑀡𑀲𑀁𑀓𑀺𑀢𑁆𑀢𑀦𑁂𑀦 𑀣𑁄𑀫𑁂𑀢𑁆𑀯𑀸. 𑀲𑀺𑀭𑀲𑀸𑀢𑀺 𑀪𑀢𑁆𑀢𑀺𑀪𑀸𑀯𑀦𑀢𑀼𑀢𑁆𑀢𑀫𑀗𑁆𑀕𑁂𑀦 𑀓𑀭𑀡𑀪𑀽𑀢𑁂𑀦. 𑀇𑀫𑀺𑀦𑀸 𑀯𑀺𑀲𑁂𑀲𑀢𑁄 𑀓𑀸𑀬𑀧𑀡𑀸𑀫𑁄 𑀤𑀲𑁆𑀲𑀺𑀢𑁄, 𑀕𑀼𑀡𑀲𑀁𑀓𑀺𑀢𑁆𑀢𑀦𑁂𑀦 𑀯𑀘𑀻𑀧𑀡𑀸𑀫𑁄, 𑀉𑀪𑀬𑀧𑀡𑀸𑀫𑁂𑀳𑀺 𑀦𑀸𑀦𑀦𑁆𑀢𑀭𑀺𑀬𑀓𑀢𑀸𑀬 𑀫𑀦𑁄𑀧𑀡𑀸𑀫𑁄𑀧𑀺 𑀤𑀲𑁆𑀲𑀺𑀢𑁄 𑀘 𑀳𑁄𑀢𑀺.

𑀚𑀺𑀦𑀦𑁆𑀢𑀺 𑀤𑁂𑀯𑀧𑀼𑀢𑁆𑀢𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀫𑀘𑁆𑀘𑀼𑀔𑀦𑁆𑀥𑀫𑀸𑀭𑀲𑀗𑁆𑀔𑀸𑀢𑁂 𑀧𑀜𑁆𑀘𑀯𑀺𑀥𑁂 𑀫𑀸𑀭𑁂 𑀩𑀮𑀯𑀺𑀥𑀫𑀦𑀲𑀫𑀉𑀘𑁆𑀙𑁂𑀤𑀧𑀳𑀸𑀦𑀲𑀳𑀸𑀬𑀯𑁂𑀓𑀮𑁆𑀮𑀦𑀺𑀤𑀸𑀦𑁄𑀧𑀘𑁆𑀙𑁂𑀤𑀯𑀺𑀲𑀬𑀸𑀢𑀺𑀓𑁆𑀓𑀫𑀯𑀲𑁂𑀦 𑀧𑀜𑁆𑀘𑀳𑀺 𑀆𑀓𑀸𑀭𑁂𑀳𑀺 𑀚𑀺𑀢𑀯𑀸𑀢𑀺 𑀚𑀺𑀦𑁄, 𑀢𑀁.

‘‘𑀥𑀫𑁆𑀫’’𑀦𑁆𑀢𑀺 𑀏𑀢𑀲𑁆𑀲 𑀦𑀺𑀩𑁆𑀩𑀘𑀦𑀸𑀤𑀺𑀯𑀲𑁂𑀦 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑁄𑀯. 𑀅𑀥𑀫𑁆𑀫𑀯𑀺𑀤𑁆𑀥𑀁𑀲𑀦𑁆𑀢𑀺 𑀥𑀫𑁆𑀫𑀲𑀗𑁆𑀔𑀸𑀢𑀲𑁆𑀲 𑀓𑀼𑀲𑀮𑀲𑁆𑀲 𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀅𑀓𑀼𑀲𑀮𑀥𑀫𑁆𑀫𑁄, 𑀢𑀁 𑀅𑀓𑀼𑀲𑀮𑀲𑀗𑁆𑀔𑀸𑀢𑀁 𑀅𑀥𑀫𑁆𑀫𑀁 𑀯𑀺𑀤𑁆𑀥𑀁𑀲𑁂𑀢𑀺 𑀯𑀺𑀦𑀸𑀲𑁂𑀢𑀺 𑀧𑀚𑀳𑀢𑀺 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑁂𑀦𑀸𑀢𑀺 𑀅𑀥𑀫𑁆𑀫𑀯𑀺𑀤𑁆𑀥𑀁𑀲𑁄, 𑀲𑀧𑀭𑀺𑀬𑀢𑁆𑀢𑀺𑀓𑁄 𑀦𑀯𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄. 𑀧𑀭𑀺𑀬𑀢𑁆𑀢𑀺 𑀳𑀺 𑀧𑀜𑁆𑀘𑀦𑁆𑀦𑀁 𑀧𑀳𑀸𑀦𑀸𑀦𑀁 𑀫𑀽𑀮𑀓𑀸𑀭𑀡𑀢𑁆𑀢𑀸 𑀨𑀮𑀽𑀧𑀘𑀸𑀭𑁂𑀦 𑀢𑀣𑀸 𑀯𑀼𑀘𑁆𑀘𑀢𑀺, 𑀢𑀁 𑀅𑀥𑀫𑁆𑀫𑀯𑀺𑀤𑁆𑀥𑀁𑀲𑀁. ‘‘𑀥𑀫𑁆𑀫’’𑀦𑁆𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁.

𑀕𑀡𑀦𑁆𑀢𑀺 𑀅𑀝𑁆𑀞𑀦𑁆𑀦𑀁 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀲𑀫𑀽𑀳𑀁, 𑀲𑀗𑁆𑀖𑀦𑁆𑀢𑀺 𑀅𑀢𑁆𑀣𑁄. 𑀅𑀗𑁆𑀕𑀡𑀦𑀸𑀲𑀦𑀦𑁆𑀢𑀺 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀁 𑀅𑀗𑁆𑀕𑀦𑁆𑀢𑀺 𑀫𑀢𑁆𑀣𑁂𑀦𑁆𑀢𑀻𑀢𑀺 𑀅𑀗𑁆𑀕𑀡𑀸, 𑀓𑀺𑀮𑁂𑀲𑀸 𑀭𑀸𑀕𑀤𑁄𑀲𑀫𑁄𑀳𑀸, 𑀢𑁂 𑀅𑀗𑁆𑀕𑀡𑁂 𑀦𑀸𑀲𑁂𑀢𑀺 𑀬𑀣𑀸𑀬𑁄𑀕𑀁 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑁂𑀳𑀺 𑀧𑀚𑀳𑀢𑀻𑀢𑀺 𑀅𑀗𑁆𑀕𑀡𑀦𑀸𑀲𑀦𑁄, 𑀢𑀁. ‘‘𑀕𑀡’’𑀦𑁆𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁.

𑁨. 𑀫𑀬𑀸 𑀯𑀺𑀦𑀬𑀲𑁆𑀲 𑀬𑁄 𑀲𑀸𑀭𑁄 𑀯𑀺𑀦𑀺𑀘𑁆𑀙𑀬𑁄 𑀭𑀘𑀺𑀢𑁄, 𑀢𑀲𑁆𑀲 𑀯𑀺𑀦𑀺𑀘𑁆𑀙𑀬𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀦𑀢𑁆𑀣𑀺 𑀢𑀲𑁆𑀲 𑀉𑀢𑁆𑀢𑀭𑁄𑀢𑀺 𑀅𑀦𑀼𑀢𑁆𑀢𑀭𑁄, 𑀲𑀩𑁆𑀩𑁂𑀲𑀼 𑀯𑀺𑀦𑀺𑀘𑁆𑀙𑀬𑁂𑀲𑀼, 𑀲𑀩𑁆𑀩𑁂𑀲𑀁 𑀯𑀸 𑀯𑀺𑀦𑀺𑀘𑁆𑀙𑀬𑀸𑀦𑀁 𑀅𑀦𑀼𑀢𑁆𑀢𑀭𑁄 𑀉𑀢𑁆𑀢𑀫𑁄 𑀯𑀺𑀦𑀺𑀘𑁆𑀙𑀬𑁄𑀢𑀺 𑀲𑀩𑁆𑀩𑀸𑀦𑀼𑀢𑁆𑀢𑀭𑁄, 𑀢𑀁. 𑀉𑀢𑁆𑀢𑀭𑀁 𑀧𑀓𑀭𑀡𑀁 𑀇𑀤𑀸𑀦𑀺 𑀓𑀭𑀺𑀲𑁆𑀲𑀸𑀫𑀻𑀢𑀺 𑀬𑁄𑀚𑀦𑀸.

𑁩. 𑀪𑀡𑀢𑁄𑀢𑀺 𑀪𑀡𑀦𑁆𑀢𑀲𑁆𑀲 𑀧𑀕𑀼𑀡𑀁 𑀯𑀸𑀘𑀼𑀕𑁆𑀕𑀢𑀁 𑀓𑀭𑁄𑀦𑁆𑀢𑀲𑁆𑀲. 𑀧𑀞𑀢𑁄𑀢𑀺 𑀧𑀞𑀦𑁆𑀢𑀲𑁆𑀲 𑀯𑀸𑀘𑀼𑀕𑁆𑀕𑀢𑀁 𑀲𑀚𑁆𑀛𑀸𑀬𑀦𑁆𑀢𑀲𑁆𑀲. 𑀧𑀬𑀼𑀜𑁆𑀚𑀢𑁄𑀢𑀺 𑀢𑀢𑁆𑀣 𑀧𑀓𑀸𑀭𑁂𑀦 𑀬𑀼𑀜𑁆𑀚𑀦𑁆𑀢𑀲𑁆𑀲, 𑀢𑀁 𑀅𑀜𑁆𑀜𑁂𑀲𑀁 𑀯𑀸𑀘𑁂𑀦𑁆𑀢𑀲𑁆𑀲 𑀯𑀸. 𑀲𑀼𑀡𑀢𑁄𑀢𑀺 𑀧𑀭𑁂𑀳𑀺 𑀯𑀼𑀘𑁆𑀘𑀫𑀸𑀦𑀁 𑀲𑀼𑀡𑀦𑁆𑀢𑀲𑁆𑀲. 𑀘𑀺𑀦𑁆𑀢𑀬𑀢𑁄𑀢𑀺 𑀬𑀣𑀸𑀲𑀼𑀢𑀁 𑀅𑀢𑁆𑀣𑀢𑁄, 𑀲𑀤𑁆𑀤𑀢𑁄 𑀘 𑀘𑀺𑀦𑁆𑀢𑁂𑀦𑁆𑀢𑀲𑁆𑀲. ‘‘𑀅𑀩𑀼𑀤𑁆𑀥𑀲𑁆𑀲 𑀩𑀼𑀤𑁆𑀥𑀺𑀯𑀟𑁆𑀠𑀦’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀯𑀺𑀪𑀢𑁆𑀢𑀺𑀮𑁄𑀧𑁄. 𑀅𑀩𑀼𑀤𑁆𑀥𑀲𑁆𑀲 𑀩𑀸𑀮𑀲𑁆𑀲 𑀯𑀺𑀦𑀬𑁂 𑀅𑀧𑁆𑀧𑀓𑀢𑀜𑁆𑀜𑀼𑀦𑁄 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀺𑀚𑀦𑀲𑁆𑀲. 𑀩𑀼𑀤𑁆𑀥𑀺𑀯𑀟𑁆𑀠𑀦𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀧𑀜𑁆𑀜𑀸𑀯𑀼𑀤𑁆𑀥𑀺𑀦𑀺𑀧𑁆𑀨𑀸𑀤𑀓𑀁. 𑀅𑀣 𑀯𑀸 𑀩𑀼𑀤𑁆𑀥𑀲𑁆𑀲 𑀯𑀺𑀦𑀺𑀘𑁆𑀙𑀬𑁂 𑀓𑀢𑀧𑀭𑀺𑀘𑀬𑀢𑁆𑀢𑀸 𑀧𑀜𑁆𑀜𑀯𑀢𑁄 𑀚𑀦𑀲𑁆𑀲 𑀩𑀼𑀤𑁆𑀥𑀺𑀯𑀟𑁆𑀠𑀦𑀁 𑀩𑀼𑀤𑁆𑀥𑀺𑀬𑀸 𑀧𑀜𑁆𑀜𑀸𑀬 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀸𑀧𑀸𑀤𑀦𑁂𑀦 𑀪𑀺𑀬𑁆𑀬𑁄𑀪𑀸𑀯𑀲𑀸𑀥𑀓𑀁. 𑀧𑀭𑀫𑀁 𑀉𑀢𑁆𑀢𑀫𑀁 𑀉𑀢𑁆𑀢𑀭𑀁 𑀦𑀸𑀫 𑀧𑀓𑀭𑀡𑀁 𑀯𑀤𑀢𑁄 𑀓𑀣𑁂𑀦𑁆𑀢𑀲𑁆𑀲 𑀫𑁂 𑀫𑀫 𑀲𑀦𑁆𑀢𑀺𑀓𑀸 𑀦𑀺𑀭𑀢𑀸 𑀯𑀺𑀦𑀺𑀘𑁆𑀙𑀬𑁂, 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀯𑀸 𑀯𑀺𑀲𑁂𑀲𑁂𑀦 𑀭𑀢𑀸 𑀦𑀺𑀩𑁄𑀥𑀣 𑀚𑀸𑀦𑀸𑀣 𑀲𑀼𑀢𑀫𑀬𑀜𑀸𑀡𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀣𑀸𑀢𑀺 𑀲𑁄𑀢𑀼𑀚𑀦𑀁 𑀲𑀯𑀦𑁂 𑀦𑀺𑀬𑁄𑀚𑁂𑀢𑀺.