𑀓𑀫𑁆𑀫𑀝𑁆𑀞𑀸𑀦𑀯𑀺𑀪𑀸𑀯𑀦𑀸𑀯𑀺𑀥𑀸𑀦𑀓𑀣𑀸𑀯𑀡𑁆𑀡𑀦𑀸

𑁩𑁧𑁨𑁫. ‘‘𑀆𑀤𑀺𑀫𑁆𑀳𑀺 𑀲𑀻𑀮𑀁 𑀤𑀲𑁆𑀲𑁂𑀬𑁆𑀬.

𑀫𑀚𑁆𑀛𑁂 𑀫𑀕𑁆𑀕𑀁 𑀯𑀺𑀪𑀸𑀯𑀬𑁂;

𑀧𑀭𑀺𑀬𑁄𑀲𑀸𑀦𑁂 𑀘 𑀦𑀺𑀩𑁆𑀩𑀸𑀦𑀁;

𑀏𑀲𑀸 𑀓𑀣𑀺𑀓𑀲𑀡𑁆𑀞𑀺𑀢𑀻’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁯𑁦; 𑀫. 𑀦𑀺. 𑀅𑀝𑁆𑀞. 𑁧.𑁨𑁯𑁧; 𑀅. 𑀦𑀺. 𑀅𑀝𑁆𑀞. 𑁨.𑁩.𑁬𑁪) 𑁋

𑀯𑀼𑀢𑁆𑀢𑀁 𑀥𑀫𑁆𑀫𑀓𑀣𑀺𑀓𑀮𑀓𑁆𑀔𑀡𑀁 𑀲𑀫𑀦𑀼𑀲𑁆𑀲𑀭𑀦𑁆𑀢𑁄𑀬𑀫𑀸𑀘𑀭𑀺𑀬𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀧𑀭𑀺𑀤𑀻𑀧𑀓𑀁 𑀯𑀺𑀦𑀺𑀘𑁆𑀙𑀬𑀁 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀫𑀼𑀔𑁂𑀦 𑀤𑀲𑁆𑀲𑁂𑀢𑁆𑀯𑀸 𑀢𑀁𑀫𑀽𑀮𑀓𑀸𑀦𑀁 𑀇𑀢𑀭𑁂𑀲𑀜𑁆𑀘 𑀢𑀺𑀡𑁆𑀡𑀁 𑀲𑀻𑀮𑀸𑀦𑀁 𑀢𑀁𑀤𑀲𑁆𑀲𑀦𑁂𑀦𑁂𑀯 𑀤𑀲𑁆𑀲𑀺𑀢𑀪𑀸𑀯𑀜𑁆𑀘 𑀲𑀻𑀮𑀯𑀺𑀲𑀼𑀤𑁆𑀥𑀺𑀫𑀽𑀮𑀺𑀓𑀸 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀆𑀤𑀺𑀬𑁄 𑀧𑀜𑁆𑀘𑀯𑀺𑀲𑀼𑀤𑁆𑀥𑀺𑀬𑁄 𑀘 𑀢𑀁𑀫𑀽𑀮𑀺𑀓𑀜𑁆𑀘 𑀅𑀭𑀺𑀬𑀫𑀕𑁆𑀕𑀲𑀗𑁆𑀔𑀸𑀢𑀁 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀁 𑀢𑀤𑀥𑀺𑀕𑀫𑀦𑀻𑀬𑀁 𑀦𑀺𑀩𑁆𑀩𑀸𑀦𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀬𑀣𑀸𑀭𑀤𑁆𑀥𑀁 𑀯𑀺𑀦𑀬𑀓𑀣𑀁 𑀧𑀭𑀺𑀬𑁄𑀲𑀸𑀧𑁂𑀢𑀼𑀓𑀸𑀫𑁄 𑀆𑀳 ‘‘𑀧𑀸𑀫𑁄𑀓𑁆𑀔𑁂’’𑀢𑀺𑀆𑀤𑀺. 𑀢𑀢𑁆𑀣 𑀧𑀸𑀫𑁄𑀓𑁆𑀔𑁂𑀢𑀺 𑀲𑀫𑀸𑀥𑀺𑀆𑀤𑀻𑀦𑀁 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁 𑀧𑀢𑀺𑀝𑁆𑀞𑀸𑀪𑀸𑀯𑁂𑀦 𑀉𑀢𑁆𑀢𑀫𑁂. 𑀫𑁄𑀓𑁆𑀔𑀧𑁆𑀧𑀯𑁂𑀲𑀦𑁂𑀢𑀺 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀦𑀕𑀭𑀲𑁆𑀲 𑀧𑀯𑁂𑀲𑀦𑀦𑀺𑀫𑀺𑀢𑁆𑀢𑁂. 𑀫𑀼𑀔𑁂 𑀅𑀲𑀳𑀸𑀬𑀤𑁆𑀯𑀸𑀭𑀪𑀽𑀢𑁂. 𑀬𑀣𑀸𑀳 𑁋

‘‘𑀲𑀕𑁆𑀕𑀸𑀭𑁄𑀳𑀡𑀲𑁄𑀧𑀸𑀦𑀁, 𑀅𑀜𑁆𑀜𑀁 𑀲𑀻𑀮𑀲𑀫𑀁 𑀓𑀼𑀢𑁄;

𑀤𑁆𑀯𑀸𑀭𑀁 𑀯𑀸 𑀧𑀦 𑀦𑀺𑀩𑁆𑀩𑀸𑀦-𑀦𑀕𑀭𑀲𑁆𑀲 𑀧𑀯𑁂𑀲𑀦𑁂’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁯; 𑀩𑀼. 𑀩𑀁. 𑀅𑀝𑁆𑀞. 𑁩.𑀤𑀻𑀧𑀗𑁆𑀓𑀭𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸);

𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑁂𑀢𑀺 𑀚𑀸𑀢𑀺𑀤𑀼𑀓𑁆𑀔𑀸𑀤𑀺𑀲𑀩𑁆𑀩𑀤𑀼𑀓𑁆𑀔𑀸𑀦𑀁 𑀔𑀬𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀥𑀺𑀕𑀫𑀽𑀧𑀸𑀬𑀢𑁆𑀢𑀸 𑀨𑀮𑀽𑀧𑀘𑀸𑀭𑁂𑀦 𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑀲𑀗𑁆𑀔𑀸𑀢𑁂. ‘‘𑀧𑀸𑀫𑁄𑀓𑁆𑀔𑁂’’𑀢𑀺 𑀘 ‘‘𑀫𑁄𑀓𑁆𑀔𑀧𑁆𑀧𑀯𑁂𑀲𑀦𑁂 𑀫𑀼𑀔𑁂’’𑀢𑀺 𑀘 ‘‘𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑁂’’𑀢𑀺 𑀘 ‘‘𑀧𑀸𑀢𑀺𑀫𑁄𑀓𑁆𑀔𑀲𑁆𑀫𑀺’’𑀦𑁆𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁. 𑀯𑀼𑀢𑁆𑀢𑁂𑀢𑀺 𑀧𑀸𑀭𑀸𑀚𑀺𑀓𑀢𑁄 𑀧𑀝𑁆𑀞𑀸𑀬 𑀦𑀸𑀦𑀧𑁆𑀧𑀓𑀸𑀭𑀢𑁄 𑀦𑀺𑀤𑁆𑀤𑀺𑀝𑁆𑀞𑁂 𑀲𑀢𑀺. 𑀇𑀢𑀭𑀢𑁆𑀢𑀬𑀁 𑀯𑀼𑀢𑁆𑀢𑀫𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀲𑀗𑁆𑀔𑀸𑀢𑀁 𑀇𑀢𑀭𑀁 𑀲𑀻𑀮𑀢𑁆𑀢𑀬𑀁 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺 ‘‘𑀭𑀸𑀚𑀸 𑀆𑀕𑀢𑁄’’𑀢𑀺 𑀯𑀼𑀢𑁆𑀢𑁂 𑀧𑀭𑀺𑀲𑀸𑀬 𑀆𑀕𑀫𑀦𑀁 𑀯𑀺𑀬, 𑀢𑀲𑁆𑀫𑀸 𑀢𑀁 𑀦 𑀯𑀓𑁆𑀔𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁧𑁨𑁬. 𑀇𑀤𑀁 𑀘𑀢𑀼𑀩𑁆𑀩𑀺𑀥𑀁 𑀲𑀻𑀮𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀸𑀤𑀺𑀁 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀜𑀢𑁆𑀯𑀸𑀢𑀺 𑀮𑀓𑁆𑀔𑀡𑀸𑀤𑀺𑀢𑁄, 𑀯𑁄𑀤𑀸𑀦𑀢𑁄, 𑀳𑀸𑀦𑀪𑀸𑀕𑀺𑀬𑀝𑁆𑀞𑀺𑀢𑀺𑀪𑀸𑀕𑀺𑀬𑀯𑀺𑀲𑁂𑀲𑀪𑀸𑀕𑀺𑀬𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸𑀤𑀺𑀧𑁆𑀧𑀓𑀸𑀭𑀢𑁄 𑀘 𑀚𑀸𑀦𑀺𑀢𑁆𑀯𑀸. 𑀢𑀢𑁆𑀣𑀸𑀢𑀺 𑀘𑀢𑀼𑀩𑁆𑀩𑀺𑀥𑀲𑀻𑀮𑁂. 𑀧𑀢𑀺𑀝𑁆𑀞𑀺𑀢𑁄𑀢𑀺 𑀅𑀘𑁆𑀙𑀺𑀤𑁆𑀤𑀸𑀤𑀺𑀅𑀗𑁆𑀕𑀲𑀫𑀦𑁆𑀦𑀸𑀕𑀢𑀪𑀸𑀯𑀫𑀸𑀧𑀸𑀤𑀦𑁂𑀦 𑀧𑀢𑀺𑀝𑁆𑀞𑀺𑀢𑁄. 𑀲𑀫𑀸𑀥𑀺𑀦𑁆𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑀮𑁄𑀓𑀺𑀬𑀲𑀫𑀸𑀥𑀺𑀁. 𑀪𑀸𑀯𑁂𑀢𑁆𑀯𑀸𑀢𑀺 𑀲𑀫𑀘𑀢𑁆𑀢𑀸𑀮𑀻𑀲𑀸𑀬 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀧𑀼𑀦𑀧𑁆𑀧𑀼𑀦𑀁 𑀅𑀦𑀼𑀬𑁄𑀕𑀯𑀲𑁂𑀦 𑀯𑀟𑁆𑀠𑁂𑀢𑁆𑀯𑀸. 𑀧𑀜𑁆𑀜𑀸𑀬𑀸𑀢𑀺 𑀢𑀺𑀮𑀓𑁆𑀔𑀡𑀸𑀓𑀸𑀭𑀸𑀤𑀺𑀧𑀭𑀺𑀘𑁆𑀙𑁂𑀤𑀺𑀓𑀸𑀬 𑀮𑁄𑀓𑀼𑀢𑁆𑀢𑀭𑀸𑀬 𑀧𑀜𑁆𑀜𑀸𑀬 𑀳𑁂𑀢𑀼𑀪𑀽𑀢𑀸𑀬, 𑀓𑀭𑀡𑀪𑀽𑀢𑀸𑀬 𑀘. 𑀧𑀭𑀺𑀫𑀼𑀘𑁆𑀘𑀢𑀻𑀢𑀺 𑀲𑀩𑁆𑀩𑀓𑀺𑀮𑁂𑀲𑀩𑀦𑁆𑀥𑀦𑀁 𑀙𑁂𑀢𑁆𑀯𑀸 𑀲𑀁𑀲𑀸𑀭𑀘𑀸𑀭𑀓𑀸 𑀲𑀫𑀦𑁆𑀢𑀢𑁄 𑀫𑀼𑀘𑁆𑀘𑀢𑀺, 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁧𑁨𑁭. 𑀏𑀯𑀁 𑀲𑀫𑀸𑀲𑀢𑁄 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀦𑀺𑀤𑁆𑀤𑀺𑀲𑀦𑁆𑀢𑁄 𑀆𑀳 ‘‘𑀤𑀲𑀸𑀦𑀼𑀲𑁆𑀲𑀢𑀺𑀬𑁄’’𑀢𑀺𑀆𑀤𑀺. 𑀤𑀲 𑀅𑀦𑀼𑀲𑁆𑀲𑀢𑀺𑀬𑁄 𑀘 𑀤𑀲 𑀓𑀲𑀺𑀡𑀸 𑀘 𑀤𑀲 𑀅𑀲𑀼𑀪𑀸 𑀘 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑀘 𑀢𑀣𑀸 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸 𑀘 𑀯𑀼𑀢𑁆𑀢𑀸. 𑀅𑀧𑀭𑀁 𑀓𑀫𑁆𑀫𑀝𑁆𑀞𑀸𑀦𑀤𑁆𑀯𑀬𑀜𑁆𑀘 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀣 𑀤𑀲𑀸𑀦𑀼𑀲𑁆𑀲𑀢𑀺𑀬𑁄 𑀦𑀸𑀫 ‘‘𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺, 𑀥𑀫𑁆𑀫𑀸𑀦𑀼𑀲𑁆𑀲𑀢𑀺, 𑀲𑀗𑁆𑀖𑀸𑀦𑀼𑀲𑁆𑀲𑀢𑀺, 𑀲𑀻𑀮𑀸𑀦𑀼𑀲𑁆𑀲𑀢𑀺, 𑀘𑀸𑀕𑀸𑀦𑀼𑀲𑁆𑀲𑀢𑀺, 𑀤𑁂𑀯𑀢𑀸𑀦𑀼𑀲𑁆𑀲𑀢𑀺, 𑀓𑀸𑀬𑀕𑀢𑀸𑀲𑀢𑀺, 𑀫𑀭𑀡𑀸𑀦𑀼𑀲𑁆𑀲𑀢𑀺, 𑀆𑀦𑀸𑀧𑀸𑀦𑀲𑀢𑀺, 𑀉𑀧𑀲𑀫𑀸𑀦𑀼𑀲𑁆𑀲𑀢𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁪𑁭) 𑀏𑀯𑀁 𑀯𑀼𑀢𑁆𑀢𑀸 𑀤𑀲 𑀅𑀦𑀼𑀲𑁆𑀲𑀢𑀺𑀬𑁄.

𑀤𑀲 𑀓𑀲𑀺𑀡𑀸 𑀦𑀸𑀫 ‘‘𑀧𑀣𑀯𑀻𑀓𑀲𑀺𑀡𑀁, 𑀆𑀧𑁄𑀓𑀲𑀺𑀡𑀁, 𑀢𑁂𑀚𑁄𑀓𑀲𑀺𑀡𑀁, 𑀯𑀸𑀬𑁄𑀓𑀲𑀺𑀡𑀁, 𑀦𑀻𑀮𑀓𑀲𑀺𑀡𑀁, 𑀧𑀻𑀢𑀓𑀲𑀺𑀡𑀁, 𑀮𑁄𑀳𑀺𑀢𑀓𑀲𑀺𑀡𑀁, 𑀑𑀤𑀸𑀢𑀓𑀲𑀺𑀡𑀁, 𑀆𑀮𑁄𑀓𑀓𑀲𑀺𑀡𑀁, 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀓𑀲𑀺𑀡’’𑀦𑁆𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁪𑁭) 𑀯𑀼𑀢𑁆𑀢𑀸 𑀇𑀫𑁂 𑀤𑀲 𑀓𑀲𑀺𑀡𑀸.

𑀤𑀲 𑀅𑀲𑀼𑀪𑀸 𑀦𑀸𑀫 ‘‘𑀉𑀤𑁆𑀥𑀼𑀫𑀸𑀢𑀓𑀁, 𑀯𑀺𑀦𑀻𑀮𑀓𑀁, 𑀯𑀺𑀧𑀼𑀩𑁆𑀩𑀓𑀁, 𑀯𑀺𑀘𑁆𑀙𑀺𑀤𑁆𑀤𑀓𑀁, 𑀯𑀺𑀓𑁆𑀔𑀸𑀬𑀺𑀢𑀓𑀁, 𑀯𑀺𑀓𑁆𑀔𑀺𑀢𑁆𑀢𑀓𑀁, 𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀁, 𑀮𑁄𑀳𑀺𑀢𑀓𑀁, 𑀧𑀼𑀴𑀼𑀯𑀓𑀁, 𑀅𑀝𑁆𑀞𑀺𑀓’’𑀦𑁆𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁪𑁭) 𑀯𑀼𑀢𑁆𑀢𑀸 𑀇𑀫𑁂 𑀤𑀲 𑀅𑀲𑀼𑀪𑀸.

𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑀦𑀸𑀫 ‘‘𑀫𑁂𑀢𑁆𑀢𑀸, 𑀓𑀭𑀼𑀡𑀸, 𑀫𑀼𑀤𑀺𑀢𑀸, 𑀉𑀧𑁂𑀓𑁆𑀔𑀸’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁪𑁭) 𑀯𑀼𑀢𑁆𑀢𑀸 𑀇𑀫𑁂 𑀅𑀧𑁆𑀧𑀫𑀜𑁆𑀜𑀸𑀬𑁄.

𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸 𑀦𑀸𑀫 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦’’𑀦𑁆𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁪𑁭) 𑀯𑀼𑀢𑁆𑀢𑀸 𑀇𑀫𑁂 𑀆𑀭𑀼𑀧𑁆𑀧𑀸. 𑀅𑀧𑀭𑀁 𑀓𑀫𑁆𑀫𑀝𑁆𑀞𑀸𑀦𑀤𑁆𑀯𑀬𑀁 𑀦𑀸𑀫 ‘‘𑀆𑀳𑀸𑀭𑁂𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸, 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁 𑀝𑁆𑀞𑀸𑀦𑀉𑀪𑀬𑀁.

𑁩𑁧𑁨𑁮. 𑀇𑀘𑁆𑀘𑁂𑀯𑀁 𑀘𑀢𑁆𑀢𑀸𑀮𑀻𑀲𑀯𑀺𑀥𑀁 𑀫𑀦𑁄𑀪𑀼𑀦𑁄 𑀓𑀫𑁆𑀫𑀝𑁆𑀞𑀸𑀦𑀁 𑀲𑀩𑁆𑀩𑀫𑁆𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀲𑀫𑀼𑀤𑁆𑀤𑀺𑀝𑁆𑀞𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀓𑀫𑁆𑀫𑀲𑁆𑀲 𑀬𑁄𑀕𑀲𑀗𑁆𑀔𑀸𑀢𑀲𑁆𑀲 𑀞𑀸𑀦𑀁 𑀆𑀭𑀫𑁆𑀫𑀡𑀪𑀸𑀯𑁂𑀦 𑀧𑀯𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀁. 𑀢𑀺𑀝𑁆𑀞𑀢𑀺 𑀏𑀢𑁆𑀣 𑀨𑀮𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀞𑀸𑀦𑀁, 𑀓𑀸𑀭𑀡𑀁, 𑀓𑀫𑁆𑀫𑀲𑁆𑀲 𑀯𑀺𑀧𑀲𑁆𑀲𑀦𑀸𑀬 𑀞𑀸𑀦𑀁 𑀓𑀸𑀭𑀡𑀁 𑀓𑀫𑁆𑀫𑀝𑁆𑀞𑀸𑀦𑀁, 𑀓𑀲𑁆𑀲𑀸𑀢𑀺 𑀆𑀳 ‘‘𑀫𑀦𑁄𑀪𑀼𑀦𑁄’’𑀢𑀺. 𑀫𑀦𑁄 𑀅𑀪𑀺𑀪𑀯𑀢𑀻𑀢𑀺 𑀫𑀦𑁄𑀪𑀽, 𑀢𑀲𑁆𑀲 𑀫𑀦𑁄𑀪𑀼𑀦𑁄, 𑀓𑀼𑀲𑀮𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀦𑀺𑀯𑀸𑀭𑀡𑁂𑀦 𑀢𑀣𑀸𑀮𑀤𑁆𑀥𑀦𑀸𑀫𑀲𑁆𑀲 𑀓𑀸𑀫𑀤𑁂𑀯𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀓𑀫𑁆𑀫𑀝𑁆𑀞𑀸𑀦𑀕𑀡𑀦𑀸𑀧𑀭𑀺𑀘𑁆𑀙𑁂𑀤𑁄 𑀤𑀲𑁆𑀲𑀺𑀢𑁄.

𑁩𑁧𑁨𑁯-𑁩𑁦. 𑀇𑀫𑁂𑀲𑀁 𑀓𑀫𑁆𑀫𑀝𑁆𑀞𑀸𑀦𑀸𑀦𑀁 𑀪𑀸𑀯𑀦𑀸𑀫𑀬𑀁 𑀪𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀫𑀸𑀢𑀺𑀓𑀁 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑀘𑀸𑀭𑀧𑁆𑀧𑀦𑀸𑀢𑁄’’𑀢𑀺𑀆𑀤𑀺. 𑀢𑀢𑁆𑀣 𑀉𑀧𑀘𑀸𑀭𑀧𑁆𑀧𑀦𑀸𑀢𑁄𑀢𑀺 ‘‘𑀏𑀢𑁆𑀢𑀓𑀸𑀦𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀉𑀧𑀘𑀸𑀭𑀸𑀯𑀳𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀅𑀧𑁆𑀧𑀦𑀸𑀯𑀳𑀸𑀦𑀻’’𑀢𑀺 𑀏𑀯𑀁 𑀉𑀧𑀘𑀸𑀭𑀧𑁆𑀧𑀦𑀸𑀯𑀲𑁂𑀦 𑀘. 𑀛𑀸𑀦𑀪𑁂𑀤𑀸𑀢𑀺 ‘‘𑀏𑀢𑁆𑀢𑀓𑀸𑀦𑀺 𑀧𑀞𑀫𑀚𑁆𑀛𑀸𑀦𑀺𑀓𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀧𑀜𑁆𑀘𑀓𑀚𑁆𑀛𑀸𑀦𑀺𑀓𑀸𑀦𑀻’’𑀢𑀺𑀆𑀤𑀺𑀦𑀸 𑀛𑀸𑀦𑀪𑁂𑀤𑀸 𑀘. 𑀅𑀢𑀺𑀓𑁆𑀓𑀫𑀸𑀢𑀺 𑀅𑀗𑁆𑀕𑀸𑀦𑀁, 𑀆𑀭𑀫𑁆𑀫𑀡𑀸𑀦𑀜𑁆𑀘 𑀅𑀢𑀺𑀓𑁆𑀓𑀫𑀢𑁄. 𑀯𑀟𑁆𑀠𑀦𑀸𑀯𑀟𑁆𑀠𑀦𑀸 𑀘𑀸𑀧𑀻𑀢𑀺 𑀅𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀸𑀤𑀺𑀯𑀲𑁂𑀦 𑀯𑀟𑁆𑀠𑁂𑀢𑀩𑁆𑀩𑀸, 𑀅𑀯𑀟𑁆𑀠𑁂𑀢𑀩𑁆𑀩𑀸 𑀘. 𑀆𑀭𑀫𑁆𑀫𑀡𑀪𑀽𑀫𑀺𑀢𑁄𑀢𑀺 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀆𑀭𑀫𑁆𑀫𑀡𑀢𑁄 𑀘𑁂𑀯 𑀮𑀩𑁆𑀪𑀫𑀸𑀦𑀸𑀮𑀩𑁆𑀪𑀫𑀸𑀦𑀪𑀽𑀫𑀺𑀢𑁄 𑀘.

𑀕𑀳𑀡𑀸𑀢𑀺 𑀤𑀺𑀝𑁆𑀞𑀸𑀤𑀺𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑁄. 𑀧𑀘𑁆𑀘𑀬𑀸𑀢𑀺 𑀢𑀁𑀢𑀁𑀞𑀸𑀦𑀸𑀦𑀁 𑀧𑀘𑁆𑀘𑀬𑀪𑀸𑀯𑀢𑁄 𑀘. 𑀪𑀺𑀬𑁆𑀬𑁄𑀢𑀺 𑀧𑀼𑀦-𑀲𑀤𑁆𑀤𑀢𑁆𑀣𑀦𑀻𑀳𑀸𑀭𑀢𑁆𑀣𑁄. 𑀘𑀭𑀺𑀬𑀸𑀦𑀼𑀓𑀽𑀮𑀢𑁄𑀢𑀺 𑀭𑀸𑀕𑀘𑀭𑀺𑀬𑀸𑀤𑀻𑀦𑀁 𑀅𑀦𑀼𑀓𑀽𑀮𑀪𑀸𑀯𑀢𑁄𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀅𑀬𑀁 𑀪𑁂𑀤𑁄. 𑀏𑀢𑁂𑀲𑀼 𑀘𑀢𑁆𑀢𑀸𑀮𑀻𑀲𑀸𑀬 𑀓𑀫𑁆𑀫𑀝𑁆𑀞𑀸𑀦𑁂𑀲𑀼.

𑁩𑁧𑁩𑁧. 𑀏𑀯𑀁 𑀫𑀸𑀢𑀺𑀓𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀬𑀣𑀸𑀓𑁆𑀓𑀫𑀁 𑀦𑀺𑀤𑁆𑀤𑀺𑀲𑀦𑁆𑀢𑁄 𑀧𑀞𑀫𑀁 𑀢𑀸𑀯 𑀉𑀧𑀘𑀸𑀭𑀸𑀯𑀳𑀸𑀤𑀬𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀝𑁆𑀞𑀸𑀦𑀼𑀲𑁆𑀲𑀢𑀺𑀬𑁄’’𑀢𑀺𑀆𑀤𑀺. 𑀢𑀢𑁆𑀣𑀸𑀢𑀺 𑀢𑀺𑀲𑁆𑀲𑀁 𑀫𑀸𑀢𑀺𑀓𑀸𑀬𑀁, 𑀢𑁂𑀲𑀼 𑀯𑀸 𑀘𑀢𑁆𑀢𑀸𑀮𑀻𑀲𑀸𑀬 𑀓𑀫𑁆𑀫𑀝𑁆𑀞𑀸𑀦𑁂𑀲𑀼. 𑀅𑀝𑁆𑀞𑀸𑀦𑀼𑀲𑁆𑀲𑀢𑀺𑀬𑁄𑀢𑀺 𑀓𑀸𑀬𑀕𑀢𑀸𑀲𑀢𑀺𑀆𑀦𑀸𑀧𑀸𑀦𑀲𑀢𑀺𑀤𑁆𑀯𑀬𑀯𑀚𑁆𑀚𑀺𑀢𑀸 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀺𑀓𑀸 𑀅𑀝𑁆𑀞 𑀅𑀦𑀼𑀲𑁆𑀲𑀢𑀺𑀬𑁄 𑀘. 𑀲𑀜𑁆𑀜𑀸 𑀆𑀳𑀸𑀭𑁂𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸 𑀘. 𑀯𑀯𑀢𑁆𑀣𑀸𑀦𑀜𑁆𑀘 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀜𑁆𑀘𑀸𑀢𑀺 𑀇𑀫𑁂 𑀤𑀲. 𑀉𑀧𑀘𑀸𑀭𑀸𑀯𑀳𑀸𑀢𑀺 𑀩𑀼𑀤𑁆𑀥𑀕𑀼𑀡𑀸𑀤𑀻𑀦𑀁 𑀧𑀭𑀫𑀢𑁆𑀣𑀪𑀸𑀯𑀢𑁄, 𑀅𑀦𑁂𑀓𑀯𑀺𑀥𑀢𑁆𑀢𑀸, 𑀏𑀓𑀲𑁆𑀲𑀸𑀧𑀺 𑀕𑀫𑁆𑀪𑀻𑀭𑀪𑀸𑀯𑀢𑁄 𑀘 𑀏𑀢𑁂𑀲𑀼 𑀤𑀲𑀲𑀼 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀅𑀧𑁆𑀧𑀦𑀸𑀯𑀲𑁂𑀦 𑀲𑀫𑀸𑀥𑀺𑀲𑁆𑀲 𑀧𑀢𑀺𑀝𑁆𑀞𑀸𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀅𑀧𑁆𑀧𑀦𑀸𑀪𑀸𑀯𑀦𑀸𑀧𑁆𑀧𑀢𑁆𑀢𑁄 𑀲𑀫𑀸𑀥𑀺 𑀉𑀧𑀘𑀸𑀭𑀪𑀸𑀯𑁂𑀬𑁂𑀯 𑀧𑀢𑀺𑀝𑁆𑀞𑀸𑀢𑀺, 𑀢𑀲𑁆𑀫𑀸 𑀏𑀢𑁂 𑀉𑀧𑀘𑀸𑀭𑀸𑀯𑀳𑀸.

𑀦𑀦𑀼 𑀘𑁂𑀢𑁆𑀣 𑀤𑀼𑀢𑀺𑀬𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀲𑀫𑀸𑀥𑀺, 𑀮𑁄𑀓𑀼𑀢𑁆𑀢𑀭𑁄 𑀘 𑀲𑀫𑀸𑀥𑀺 𑀧𑀭𑀫𑀢𑁆𑀣𑀥𑀫𑁆𑀫𑁂 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸 ‘‘𑀧𑀭𑀫𑀢𑁆𑀣𑀪𑀸𑀯𑀢𑁄’’𑀢𑀺 𑀳𑁂𑀢𑀼 𑀅𑀧𑁆𑀧𑀦𑀫𑀧𑀸𑀧𑀼𑀡𑀦𑁂 𑀓𑀸𑀭𑀡𑀪𑀸𑀯𑁂𑀦 𑀦 𑀯𑀼𑀘𑁆𑀘𑀢𑀻𑀢𑀺? 𑀦, 𑀢𑀲𑁆𑀲 𑀪𑀸𑀯𑀦𑀸𑀯𑀺𑀲𑁂𑀲𑁂𑀦 𑀧𑀭𑀫𑀢𑁆𑀣𑀥𑀫𑁆𑀫𑁂 𑀧𑀯𑀢𑁆𑀢𑀺𑀲𑀫𑁆𑀪𑀯𑀢𑁄, 𑀇𑀫𑀲𑁆𑀲 𑀘 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀪𑀸𑀯𑀦𑀸𑀯𑀺𑀲𑁂𑀲𑀲𑀫𑁆𑀪𑀯𑀢𑁄 𑀘. 𑀢𑀣𑀸 𑀳𑀺 𑀤𑀼𑀢𑀺𑀬𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀲𑀫𑀸𑀥𑀺 𑀅𑀧𑁆𑀧𑀦𑀸𑀧𑀢𑁆𑀢𑀲𑁆𑀲 𑀅𑀭𑀽𑀧𑀸𑀯𑀘𑀭𑀲𑀫𑀸𑀥𑀺𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑀫𑀢𑁆𑀢𑀪𑀸𑀯𑀦𑀸𑀯𑀲𑁂𑀦 𑀲𑀪𑀸𑀯𑀸𑀭𑀫𑁆𑀫𑀡𑁂𑀧𑀺 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺. 𑀯𑀺𑀲𑀼𑀤𑁆𑀥𑀺𑀪𑀸𑀯𑀦𑀸𑀦𑀼𑀓𑁆𑀓𑀫𑀩𑀮𑁂𑀦 𑀮𑁄𑀓𑀼𑀢𑁆𑀢𑀭𑁄 𑀲𑀫𑀸𑀥𑀺 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀻𑀢𑀺.

𑁩𑁧𑁩𑁨. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀛𑀸𑀦𑀸𑀯𑀳𑁂𑀲𑀼 𑀢𑀺𑀁𑀲𑀓𑀫𑁆𑀫𑀝𑁆𑀞𑀸𑀦𑁂𑀲𑀼. 𑀅𑀲𑀼𑀪𑀸𑀢𑀺 𑀉𑀤𑁆𑀥𑀼𑀫𑀸𑀢𑀓𑀸𑀤𑀬𑁄 𑀤𑀲 𑀅𑀲𑀼𑀪𑀸. 𑀓𑀸𑀬𑀕𑀢𑀸𑀲𑀢𑀻𑀢𑀺 𑀓𑀸𑀬𑀕𑀢𑀸𑀲𑀢𑀺 𑀘𑀸𑀢𑀺 𑀇𑀫𑁂 𑀏𑀓𑀸𑀤𑀲. 𑀧𑀞𑀫𑀚𑁆𑀛𑀸𑀦𑀺𑀓𑀸𑀢𑀺 𑀇𑀫𑁂𑀲𑀁 𑀧𑀝𑀺𑀓𑁆𑀓𑀽𑀮𑀸𑀭𑀫𑁆𑀫𑀡𑀢𑁆𑀢𑀸, 𑀧𑀝𑀺𑀓𑁆𑀓𑀽𑀮𑀸𑀭𑀫𑁆𑀫𑀡𑁂 𑀘 𑀘𑀺𑀢𑁆𑀢𑀲𑁆𑀲 𑀘𑀡𑁆𑀟𑀲𑁄𑀢𑀸𑀬 𑀦𑀤𑀺𑀬𑀸 𑀅𑀭𑀺𑀢𑁆𑀢𑀩𑀮𑁂𑀦 𑀦𑀸𑀯𑀸𑀝𑁆𑀞𑀸𑀦𑀁 𑀯𑀺𑀬 𑀯𑀺𑀢𑀓𑁆𑀓𑀩𑀮𑁂𑀦𑁂𑀯 𑀧𑀯𑀢𑁆𑀢𑀺𑀲𑀫𑁆𑀪𑀯𑀢𑁄 𑀅𑀯𑀺𑀢𑀓𑁆𑀓𑀸𑀦𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀁 𑀅𑀲𑀫𑁆𑀪𑀯𑁄𑀢𑀺 𑀲𑀯𑀺𑀢𑀓𑁆𑀓𑀲𑁆𑀲 𑀧𑀞𑀫𑀚𑁆𑀛𑀸𑀦𑀲𑁆𑀲𑁂𑀯 𑀲𑀫𑁆𑀪𑀯𑀢𑁄 𑀧𑀞𑀫𑀚𑁆𑀛𑀸𑀦𑀺𑀓𑀸. 𑀆𑀦𑀸𑀧𑀸𑀦𑀜𑁆𑀘 𑀓𑀲𑀺𑀡𑀸 𑀘𑀸𑀢𑀺 𑀇𑀫𑁂 𑀏𑀓𑀸𑀤𑀲 𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸 𑀭𑀽𑀧𑀸𑀯𑀘𑀭𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸 𑀘 𑀘𑀢𑀼𑀓𑁆𑀓𑀦𑀬𑁂𑀦, 𑀧𑀜𑁆𑀘𑀓𑀚𑁆𑀛𑀸𑀦𑀺𑀓𑀸 𑀘.

𑁩𑁧𑁩𑁩. 𑀢𑀺𑀲𑁆𑀲𑁄𑀯 𑀅𑀧𑁆𑀧𑀫𑀜𑁆𑀜𑀸𑀢𑀺 𑀫𑁂𑀢𑁆𑀢𑀸, 𑀓𑀭𑀼𑀡𑀸, 𑀫𑀼𑀤𑀺𑀢𑀸𑀢𑀺 𑀅𑀧𑁆𑀧𑀫𑀜𑁆𑀜𑀸 𑀢𑀺𑀲𑁆𑀲𑁄𑀯. 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂 𑀏𑀢𑀸𑀲𑀫𑁂𑀯 𑀕𑀳𑀡𑀁 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺? ‘‘𑀅𑀣 𑀧𑀘𑁆𑀙𑀺𑀫𑀸’’𑀢𑀺𑀆𑀤𑀺𑀦𑀸 𑀘𑀢𑀼𑀢𑁆𑀣𑀸𑀬 𑀅𑀧𑁆𑀧𑀫𑀜𑁆𑀜𑀸𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀪𑀸𑀯𑀲𑁆𑀲 𑀯𑀓𑁆𑀔𑀫𑀸𑀦𑀢𑁆𑀢𑀸 𑀧𑀸𑀭𑀺𑀲𑁂𑀲𑀢𑁄 𑀢𑀁 𑀯𑀺𑀜𑁆𑀜𑀸𑀬𑀢𑀺. 𑀢𑀺𑀓𑀚𑁆𑀛𑀸𑀦𑀸𑀦𑀻𑀢𑀺 𑀢𑀺𑀓𑀚𑁆𑀛𑀸𑀦𑀺𑀓𑀸. ‘‘𑀢𑀺𑀓𑀚𑁆𑀛𑀸𑀦𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀫𑁂𑀢𑁆𑀢𑀸𑀤𑀻𑀦𑀁 𑀤𑁄𑀫𑀦𑀲𑁆𑀲𑀲𑀳𑀕𑀢𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀦𑀪𑀺𑀭𑀢𑀻𑀦𑀁 𑀧𑀳𑀸𑀬𑀓𑀢𑁆𑀢𑀸 𑀤𑁄𑀫𑀦𑀲𑁆𑀲𑀧𑀝𑀺𑀧𑀓𑁆𑀔𑁂𑀦 𑀲𑁄𑀫𑀦𑀲𑁆𑀲𑁂𑀦𑁂𑀯 𑀲𑀳𑀕𑀢𑀢𑀸 𑀯𑀼𑀢𑁆𑀢𑀸𑀢𑀺 𑀘𑀢𑀼𑀓𑁆𑀓𑀦𑀬𑁂𑀦 𑀢𑀺𑀓𑀚𑁆𑀛𑀸𑀦𑀺𑀓𑀢𑀸 𑀯𑀼𑀢𑁆𑀢𑀸, 𑀧𑀜𑁆𑀘𑀓𑀦𑀬𑁂𑀦 𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀢𑀸 𑀘.

‘‘𑀅𑀣𑀸’’𑀢𑀺 𑀇𑀤𑀁 ‘‘𑀧𑀘𑁆𑀙𑀺𑀫𑀸’’𑀢𑀺 𑀧𑀤𑀲𑁆𑀲 ‘‘𑀢𑀺𑀲𑁆𑀲𑁄’’𑀢𑀺 𑀇𑀫𑀺𑀦𑀸 𑀧𑀼𑀭𑀺𑀫𑀧𑀤𑁂𑀦 𑀲𑀫𑁆𑀩𑀦𑁆𑀥𑀦𑀺𑀯𑀢𑁆𑀢𑀦𑀢𑁆𑀣𑀁. 𑀧𑀘𑁆𑀙𑀺𑀫𑀸 𑀅𑀧𑁆𑀧𑀫𑀜𑁆𑀜𑀸, 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸 𑀘 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸 𑀫𑀢𑀸 𑀘𑀢𑀼𑀓𑁆𑀓𑀦𑀬𑁂𑀦, 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸 𑀘. ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼, 𑀤𑀼𑀓𑁆𑀔𑀸 𑀫𑀼𑀘𑁆𑀘𑀦𑁆𑀢𑀼, 𑀮𑀤𑁆𑀥𑀲𑀼𑀔𑀲𑀫𑁆𑀧𑀢𑁆𑀢𑀺𑀢𑁄 𑀫𑀸 𑀯𑀺𑀕𑀘𑁆𑀙𑀦𑁆𑀢𑀽’’𑀢𑀺 𑀫𑁂𑀢𑁆𑀢𑀸𑀤𑀺𑀢𑀺𑀯𑀺𑀥𑀯𑀲𑀧𑁆𑀧𑀯𑀢𑁆𑀢𑀁 𑀩𑁆𑀬𑀸𑀧𑀸𑀭𑀢𑁆𑀢𑀬𑀁 𑀧𑀳𑀸𑀬 𑀓𑀫𑁆𑀫𑀲𑁆𑀲𑀓𑀢𑀸𑀤𑀲𑁆𑀲𑀦𑁂𑀦 𑀲𑀢𑁆𑀢𑁂𑀲𑀼 𑀫𑀚𑁆𑀛𑀢𑁆𑀢𑀸𑀓𑀸𑀭𑀧𑁆𑀧𑀢𑁆𑀢𑀪𑀸𑀯𑀦𑀸𑀦𑀺𑀩𑁆𑀩𑀢𑁆𑀢𑀸𑀬 𑀢𑀢𑁆𑀭𑀫𑀚𑁆𑀛𑀢𑁆𑀢𑁄𑀧𑁂𑀓𑁆𑀔𑀸𑀬 𑀩𑀮𑀯𑀢𑀭𑀢𑁆𑀢𑀸 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀲𑁆𑀲 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑁆𑀲 𑀲𑀼𑀔𑀲𑀳𑀕𑀢𑀢𑀸𑀲𑀫𑁆𑀪𑀯𑀢𑁄 𑀉𑀧𑁂𑀓𑁆𑀔𑀸𑀲𑀳𑀕𑀢𑀢𑀸 𑀯𑀼𑀢𑁆𑀢𑀸.

𑁩𑁧𑁩𑁪. 𑀅𑀗𑁆𑀕𑀸𑀭𑀫𑁆𑀫𑀡𑀢𑁄 𑀅𑀢𑀺𑀓𑁆𑀓𑀫𑁄 𑀤𑁆𑀯𑀺𑀥𑀸 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀘𑀢𑀼𑀓𑁆𑀓𑀢𑀺𑀓𑀚𑁆𑀛𑀸𑀦𑁂𑀲𑀽𑀢𑀺 𑀤𑀲𑀓𑀲𑀺𑀡𑀸, 𑀆𑀦𑀸𑀧𑀸𑀦𑀲𑀢𑀻𑀢𑀺 𑀏𑀓𑀸𑀤𑀲𑀲𑀼 𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑁂𑀲𑀼 𑀘𑁂𑀯 𑀫𑁂𑀢𑁆𑀢𑀸𑀤𑀺𑀧𑀼𑀭𑀺𑀫𑀩𑁆𑀭𑀳𑁆𑀫𑀯𑀺𑀳𑀸𑀭𑀢𑁆𑀢𑀬𑀲𑀗𑁆𑀔𑀸𑀢𑁂𑀲𑀼 𑀢𑀺𑀓𑀚𑁆𑀛𑀸𑀦𑀺𑀓𑁂𑀲𑀼 𑀘 𑀓𑀫𑁆𑀫𑀝𑁆𑀞𑀸𑀦𑁂𑀲𑀼. 𑀅𑀗𑁆𑀕𑀸𑀢𑀺𑀓𑁆𑀓𑀫𑀢𑀸𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀯𑀺𑀢𑀓𑁆𑀓𑀸𑀤𑀺𑀛𑀸𑀦𑀗𑁆𑀕 𑀲𑀫𑀢𑀺𑀓𑁆𑀓𑀫𑁂𑀦 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀆𑀭𑀫𑁆𑀫𑀡𑁂𑀬𑁂𑀯 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀢𑁄 𑀅𑀗𑁆𑀕𑀸𑀢𑀺𑀓𑁆𑀓𑀫𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀅𑀢𑁆𑀣𑁄. 𑀅𑀗𑁆𑀕𑀸𑀢𑀺𑀓𑁆𑀓𑀫𑁄𑀬𑁂𑀯 𑀅𑀗𑁆𑀕𑀸𑀢𑀺𑀓𑁆𑀓𑀫𑀢𑀸.

𑁩𑁧𑁩𑁫. 𑀅𑀗𑁆𑀕𑀸𑀢𑀺𑀓𑁆𑀓𑀫𑀢𑁄𑀢𑀺 𑀢𑀢𑀺𑀬𑀚𑁆𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀲𑁄𑀫𑀦𑀲𑁆𑀲𑀸𑀢𑀺𑀓𑁆𑀓𑀫𑀦𑀢𑁄. 𑀆𑀭𑀫𑁆𑀫𑀡𑀫𑀢𑀺𑀓𑁆𑀓𑀫𑁆𑀫𑀸𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀢𑀩𑁆𑀩𑀺𑀲𑀬𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀢𑀤𑀪𑀸𑀯𑀲𑀗𑁆𑀔𑀸𑀢𑀸𑀦𑀺 𑀘𑀢𑁆𑀢𑀸𑀭𑀺 𑀆𑀭𑀫𑁆𑀫𑀡𑀸𑀦𑀺 𑀬𑀣𑀸𑀓𑁆𑀓𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀢𑀩𑁆𑀩𑀺𑀲𑀬𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀢𑀤𑀪𑀸𑀯𑀢𑀩𑁆𑀩𑀺𑀲𑀬𑀢𑀢𑀺𑀬𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑁂𑀲𑀼 𑀘𑀢𑀽𑀲𑀼 𑀆𑀭𑀫𑁆𑀫𑀡𑁂𑀲𑀼 𑀆𑀭𑀼𑀧𑁆𑀧𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀚𑀸𑀬𑀭𑁂 𑀉𑀧𑁆𑀧𑀚𑁆𑀚𑀦𑁆𑀢𑀺.

𑁩𑁧𑁩𑁬. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼. 𑀯𑀟𑁆𑀠𑁂𑀢𑀩𑁆𑀩𑀸𑀦𑀻𑀢𑀺 ‘‘𑀬𑀢𑁆𑀢𑀓𑀁 𑀑𑀓𑀸𑀲𑀁 𑀓𑀲𑀺𑀡𑁂𑀦 𑀨𑀭𑀢𑀺, 𑀢𑀤𑀩𑁆𑀪𑀦𑁆𑀢𑀭𑁂 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀲𑀤𑁆𑀤𑀁 𑀲𑁄𑀢𑀼𑀁, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀺𑀢𑀼𑀁, 𑀧𑀭𑀲𑀢𑁆𑀢𑀸𑀦𑀜𑁆𑀘 𑀘𑁂𑀢𑀲𑀸 𑀘𑀺𑀢𑁆𑀢𑀁 𑀅𑀜𑁆𑀜𑀸𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀧𑁆𑀧𑀬𑁄𑀚𑀦𑀁 𑀲𑀦𑁆𑀥𑀸𑀬 𑀅𑀗𑁆𑀕𑀕𑀡𑀦𑀸𑀤𑀺𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀬𑀢𑁆𑀢𑀓𑀁 𑀇𑀘𑁆𑀙𑀢𑀺, 𑀢𑀢𑁆𑀢𑀓𑀁 𑀯𑀟𑁆𑀠𑁂𑀢𑀩𑁆𑀩𑀸𑀦𑀺. 𑀲𑁂𑀲𑀁 𑀅𑀲𑀼𑀪𑀸𑀤𑀺 𑀲𑀩𑁆𑀩𑀁 𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀧𑀬𑁄𑀚𑀦𑀸𑀪𑀸𑀯𑀸 𑀦 𑀯𑀟𑁆𑀠𑁂𑀢𑀩𑁆𑀩𑀫𑁂𑀯𑀸𑀢𑀺 𑀬𑁄𑀚𑀦𑀸.

𑁩𑁧𑁩𑁭. 𑀢𑀢𑁆𑀣 𑀢𑁂𑀲𑀼 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀤𑀲 𑀓𑀲𑀺𑀡𑀸 𑀘 𑀤𑀲 𑀅𑀲𑀼𑀪𑀸 𑀘 𑀓𑀸𑀬𑀕𑀢𑀸𑀲𑀢𑀺, 𑀆𑀦𑀸𑀧𑀸𑀦𑀲𑀢𑀻𑀢𑀺 𑀇𑀫𑁂 𑀩𑀸𑀯𑀻𑀲𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀧𑀝𑀺𑀪𑀸𑀕𑀸𑀭𑀫𑁆𑀫𑀡𑀸𑀦𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣 ‘‘𑀓𑀲𑀺𑀡𑀸’’𑀢𑀺𑀆𑀤𑀺𑀦𑀸 𑀢𑀤𑀸𑀭𑀫𑁆𑀫𑀡𑀸𑀦𑀺 𑀛𑀸𑀦𑀸𑀦𑀺 𑀕𑀳𑀺𑀢𑀸𑀦𑀺.

𑁩𑁧𑁩𑁮. 𑀥𑀸𑀢𑀼𑀯𑀯𑀢𑁆𑀣𑀦𑀦𑁆𑀢𑀺 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁, 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀭𑀲𑁆𑀲𑀢𑁆𑀢𑀁. 𑀯𑀺𑀜𑁆𑀜𑀸𑀡𑀜𑁆𑀘𑀸𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁. 𑀦𑁂𑀯𑀲𑀜𑁆𑀜𑀸𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁. 𑀤𑀲 𑀤𑁆𑀯𑁂𑀢𑀺 𑀤𑁆𑀯𑀸𑀤𑀲. 𑀪𑀸𑀯𑀕𑁄𑀘𑀭𑀸𑀢𑀺 𑀲𑀪𑀸𑀯𑀥𑀫𑁆𑀫𑀕𑁄𑀘𑀭𑀸, 𑀧𑀭𑀫𑀢𑁆𑀣𑀥𑀫𑁆𑀫𑀸𑀮𑀫𑁆𑀩𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁧𑁩𑁯. 𑀤𑁆𑀯𑁂 𑀘 𑀆𑀭𑀼𑀧𑁆𑀧𑀫𑀸𑀦𑀲𑀸𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀗𑁆𑀔𑀸𑀢𑀸 𑀅𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀤𑁆𑀯𑁂 𑀘. 𑀙 𑀇𑀫𑁂 𑀥𑀫𑁆𑀫𑀸 𑀦𑀯𑀢𑁆𑀢𑀩𑁆𑀩𑀕𑁄𑀘𑀭𑀸 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀬𑁄𑀚𑀦𑀸 𑀘𑀢𑀼𑀦𑁆𑀦𑀁 𑀅𑀧𑁆𑀧𑀫𑀜𑁆𑀜𑀸𑀦𑀁 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑀸, 𑀧𑀞𑀫𑀸𑀭𑀼𑀧𑁆𑀧𑀲𑁆𑀲 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀧𑀜𑁆𑀜𑀢𑁆𑀢𑀺𑀬𑀸, 𑀢𑀢𑀺𑀬𑀸𑀭𑀼𑀧𑁆𑀧𑀲𑁆𑀲 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀸𑀪𑀸𑀯𑀧𑀜𑁆𑀜𑀢𑁆𑀢𑀺𑀬𑀸 𑀘 𑀆𑀭𑀫𑁆𑀫𑀡𑀢𑁆𑀢𑀸.

𑁩𑁧𑁪𑁦. 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸𑀢𑀺 𑀆𑀳𑀸𑀭𑁂𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸. 𑀓𑀸𑀬𑀕𑀢𑀸𑀲𑀢𑀻𑀢𑀺 𑀤𑁆𑀯𑀸𑀤𑀲𑁂𑀯 𑀪𑀽𑀫𑀺𑀢𑁄 𑀤𑁂𑀯𑁂𑀲𑀼 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 𑀓𑀼𑀡𑀧𑀸𑀦𑀁, 𑀧𑀝𑀺𑀓𑁆𑀓𑀽𑀮𑀸𑀭𑀳𑀲𑁆𑀲 𑀘 𑀅𑀲𑀫𑁆𑀪𑀯𑀸 𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁩𑁧𑁪𑁧. 𑀢𑀸𑀦𑀺 𑀤𑁆𑀯𑀸𑀤𑀲 𑀘. 𑀪𑀺𑀬𑁆𑀬𑁄𑀢𑀺 𑀅𑀥𑀺𑀓𑀢𑁆𑀣𑁂 𑀦𑀺𑀧𑀸𑀢𑁄, 𑀢𑀢𑁄 𑀅𑀥𑀺𑀓𑀁 𑀆𑀦𑀸𑀧𑀸𑀦𑀲𑀢𑀺 𑀘𑀸𑀢𑀺 𑀢𑁂𑀭𑀲 𑀭𑀽𑀧𑀸𑀭𑀽𑀧𑀮𑁄𑀓𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀜𑁆𑀘 𑀅𑀪𑀸𑀯𑀸 𑀲𑀩𑁆𑀩𑀲𑁄 𑀦 𑀚𑀸𑀬𑀭𑁂𑀢𑀺 𑀬𑁄𑀚𑀦𑀸.

𑁩𑁧𑁪𑁨. 𑀅𑀭𑀽𑀧𑀸𑀯𑀘𑀭𑁂 𑀅𑀭𑀽𑀧𑀪𑀯𑁂 𑀘𑀢𑀼𑀭𑁄 𑀆𑀭𑀼𑀧𑁆𑀧𑁂 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂 𑀙𑀢𑁆𑀢𑀺𑀁𑀲 𑀥𑀫𑁆𑀫𑀸 𑀭𑀽𑀧𑀲𑀫𑀢𑀺𑀓𑁆𑀓𑀫𑀸𑀪𑀸𑀯𑀸 𑀦 𑀚𑀸𑀬𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀲𑀩𑁆𑀩𑁂 𑀲𑀫𑀘𑀢𑁆𑀢𑀸𑀮𑀻𑀲 𑀥𑀫𑁆𑀫𑀸 𑀫𑀸𑀦𑀼𑀲𑁂 𑀫𑀦𑀼𑀲𑁆𑀲𑀮𑁄𑀓𑁂 𑀲𑀩𑁆𑀩𑁂𑀲𑀫𑁂𑀯 𑀮𑀩𑁆𑀪𑀫𑀸𑀦𑀢𑁆𑀢𑀸 𑀚𑀸𑀬𑀦𑁆𑀢𑀺.

𑁩𑁧𑁪𑁩. 𑀘𑀢𑀼𑀢𑁆𑀣𑀓𑀲𑀺𑀡𑀁 𑀳𑀺𑀢𑁆𑀯𑀸𑀢𑀺 𑀯𑀸𑀬𑁄𑀓𑀲𑀺𑀡𑀁 𑀤𑀺𑀝𑁆𑀞𑀨𑀼𑀝𑁆𑀞𑁂𑀦 𑀕𑀳𑁂𑀢𑀩𑁆𑀩𑀢𑁆𑀢𑀸 𑀢𑀁 𑀯𑀚𑁆𑀚𑁂𑀢𑁆𑀯𑀸 𑀦𑀯 𑀓𑀲𑀺𑀡𑀸 𑀘 𑀤𑀲 𑀅𑀲𑀼𑀪𑀸 𑀘𑀸𑀢𑀺 𑀢𑁂 𑀏𑀓𑀽𑀦𑀯𑀻𑀲𑀢𑀺 𑀥𑀫𑁆𑀫𑀸 𑀤𑀺𑀝𑁆𑀞𑁂𑀦𑁂𑀯 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀧𑀼𑀩𑁆𑀩𑀪𑀸𑀕𑁂 𑀧𑀭𑀺𑀓𑀫𑁆𑀫𑀓𑀸𑀮𑁂 𑀕𑀳𑁂𑀢𑀩𑁆𑀩𑀸 𑀪𑀯𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀧𑀼𑀩𑁆𑀩𑀪𑀸𑀕𑁂 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑁆𑀯𑀸 𑀧𑀭𑀺𑀓𑀫𑁆𑀫𑀁 𑀓𑀢𑀁, 𑀢𑁂𑀦 𑀉𑀕𑁆𑀕𑀳𑀺𑀢𑀦𑀺𑀫𑀺𑀢𑁆𑀢𑀁 𑀢𑁂𑀲𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁧𑁪𑁪. 𑀨𑀼𑀝𑁆𑀞𑁂𑀦𑀸𑀢𑀺 𑀦𑀸𑀲𑀺𑀓𑀕𑁆𑀕𑁂, 𑀉𑀢𑁆𑀢𑀭𑁄𑀝𑁆𑀞𑁂 𑀯𑀸 𑀨𑀼𑀝𑁆𑀞𑀯𑀲𑁂𑀦. 𑀓𑀸𑀬𑀕𑀢𑀸𑀲𑀢𑀺𑀬𑀁 𑀢𑀘𑀧𑀜𑁆𑀘𑀓𑀁 𑀤𑀺𑀝𑁆𑀞𑁂𑀦 𑀕𑀳𑁂𑀢𑀩𑁆𑀩𑀁. 𑀫𑀸𑀮𑀼𑀢𑁄𑀢𑀺 𑀯𑀸𑀬𑁄𑀓𑀲𑀺𑀡𑀁 𑀤𑀺𑀝𑁆𑀞𑀨𑀼𑀝𑁆𑀞𑁂𑀦 𑀕𑀳𑁂𑀢𑀩𑁆𑀩𑀁 𑀉𑀘𑁆𑀙𑀼𑀲𑀲𑁆𑀲𑀸𑀤𑀻𑀦𑀁 𑀧𑀢𑁆𑀢𑁂𑀲𑀼 𑀘𑀮𑀫𑀸𑀦𑀯𑀡𑁆𑀡𑀕𑁆𑀕𑀳𑀡𑀫𑀼𑀔𑁂𑀦, 𑀓𑀸𑀬𑀧𑁆𑀧𑀲𑀸𑀤𑀖𑀝𑁆𑀝𑀦𑁂𑀦 𑀘 𑀕𑀳𑁂𑀢𑀩𑁆𑀩𑀢𑁆𑀢𑀸. 𑀏𑀢𑁆𑀣 𑀏𑀢𑁂𑀲𑀼 𑀓𑀫𑁆𑀫𑀝𑁆𑀞𑀸𑀦𑁂𑀲𑀼. 𑀲𑁂𑀲𑀓𑀦𑁆𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀁. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀺𑀓𑀸 𑀅𑀝𑁆𑀞𑀸𑀦𑀼𑀲𑁆𑀲𑀢𑀺𑀬𑁄, 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸, 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸, 𑀆𑀳𑀸𑀭𑁂𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸, 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁, 𑀓𑀸𑀬𑀕𑀢𑀸𑀲𑀢𑀺𑀬𑀁 𑀯𑀓𑁆𑀓𑀧𑀜𑁆𑀘𑀓𑀸𑀤𑀻𑀦𑀺 𑀘𑀸𑀢𑀺 𑀲𑀩𑁆𑀩𑀫𑁂𑀢𑀁 𑀧𑀭𑀢𑁄 𑀲𑀼𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑁆𑀢𑀸 𑀲𑀼𑀢𑁂𑀦𑁂𑀯 𑀕𑀳𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁.

𑁩𑁧𑁪𑁫. 𑀏𑀢𑁆𑀣 𑀏𑀢𑁂𑀲𑀼 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀆𑀓𑀸𑀲𑀓𑀲𑀺𑀡𑀁 𑀞𑀧𑁂𑀢𑁆𑀯𑀸 𑀦𑀯 𑀓𑀲𑀺𑀡𑀸 𑀧𑀞𑀫𑀸𑀭𑀼𑀧𑁆𑀧𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀲𑁆𑀲 𑀳𑁂𑀢𑀼𑀪𑀸𑀯𑀢𑁄 𑀧𑀘𑁆𑀘𑀬𑀸 𑀚𑀸𑀬𑀭𑁂 𑀧𑀘𑁆𑀘𑀬𑀸 𑀪𑀯𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁩𑁧𑁪𑁬. 𑀤𑀲𑀧𑀺 𑀓𑀲𑀺𑀡𑀸 𑀅𑀪𑀺𑀜𑁆𑀜𑀸𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀤𑀻𑀦𑀁 𑀧𑀘𑁆𑀘𑀬𑀸 𑀪𑀯𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀘𑀢𑀼𑀢𑁆𑀣𑀲𑁆𑀲𑀸𑀢𑀺 𑀘𑀢𑀼𑀢𑁆𑀣𑀲𑁆𑀲 𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑁆𑀲.

𑁩𑁧𑁪𑁭. 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀸𑀭𑀼𑀧𑁆𑀧𑀦𑁆𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀺𑀓𑀁. 𑀧𑀭𑀲𑁆𑀲 𑀘 𑀧𑀭𑀲𑁆𑀲 𑀘𑀸𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀸𑀤𑀺𑀉𑀢𑁆𑀢𑀭𑀚𑁆𑀛𑀸𑀦𑀲𑁆𑀲 𑀧𑀘𑁆𑀘𑀬𑁄𑀢𑀺 𑀧𑀓𑀸𑀲𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀦𑁂𑀯𑀲𑀜𑁆𑀜𑀸𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁. 𑀦𑀺𑀭𑁄𑀥𑀲𑁆𑀲𑀸𑀢𑀺 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑁆𑀲, 𑀢𑀸𑀬 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸.

𑁩𑁧𑁪𑁮. 𑀲𑀩𑁆𑀩𑁂𑀢𑀺 𑀲𑀫𑀘𑀢𑁆𑀢𑀸𑀮𑀻𑀲𑀓𑀫𑁆𑀫𑀝𑁆𑀞𑀸𑀦𑀥𑀫𑁆𑀫𑀸. 𑀲𑀼𑀔𑀯𑀺𑀳𑀸𑀭𑀲𑁆𑀲𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑁆𑀲. 𑀪𑀯𑀦𑀺𑀲𑁆𑀲𑀭𑀡𑀲𑁆𑀲 𑀘𑀸𑀢𑀺 𑀯𑀺𑀪𑀯𑀽𑀧𑀦𑀺𑀲𑁆𑀲𑀬𑀢𑀸𑀬 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀢𑁆𑀢𑁂𑀦 𑀆𑀲𑀯𑀓𑁆𑀔𑀬𑀜𑀸𑀡𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀘. 𑀪𑀯𑀲𑀼𑀔𑀸𑀦𑀜𑁆𑀘𑀸𑀢𑀺 𑀧𑀭𑀺𑀓𑀫𑁆𑀫𑁄𑀧𑀘𑀸𑀭𑀪𑀸𑀯𑀦𑀸𑀯𑀲𑀧𑁆𑀧𑀯𑀢𑁆𑀢𑀸𑀦𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀓𑀸𑀫𑀲𑀼𑀕𑀢𑀺𑀪𑀯𑀲𑀼𑀔𑀸𑀦𑀁, 𑀭𑀽𑀧𑀸𑀯𑀘𑀭𑀧𑁆𑀧𑀦𑀸𑀯𑀲𑀧𑀯𑀢𑁆𑀢𑀸𑀦𑀺 𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀸𑀦𑀺 𑀭𑀽𑀧𑀸𑀯𑀘𑀭𑀪𑀯𑀲𑀼𑀔𑀸𑀦𑀁, 𑀇𑀢𑀭𑀸𑀦𑀺 𑀅𑀭𑀽𑀧𑀸𑀯𑀘𑀭𑀪𑀽𑀢𑀸𑀦𑀺 𑀅𑀭𑀽𑀧𑀸𑀯𑀘𑀭𑀪𑀯𑀲𑀼𑀔𑀸𑀦𑀜𑁆𑀘 𑀧𑀘𑁆𑀘𑀬𑀸𑀢𑀺 𑀤𑀻𑀧𑀺𑀢𑀸.

𑁩𑁧𑁪𑁯. 𑀤𑀲 𑀅𑀲𑀼𑀪𑀸, 𑀓𑀸𑀬𑀕𑀢𑀸𑀲𑀢𑀻𑀢𑀺 𑀇𑀫𑁂 𑀏𑀓𑀸𑀤𑀲 𑀭𑀸𑀕𑀘𑀭𑀺𑀢𑀲𑁆𑀲 𑀯𑀺𑀲𑁂𑀲𑀢𑁄 𑀅𑀦𑀼𑀓𑀽𑀮𑀸 𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. ‘‘𑀯𑀺𑀲𑁂𑀲𑀢𑁄’’𑀢𑀺 𑀇𑀫𑀺𑀦𑀸 𑀭𑀸𑀕𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀸𑀯𑁂𑀦 𑀘 𑀅𑀢𑀺𑀲𑀧𑁆𑀧𑀸𑀬𑀢𑁄 𑀘 𑀯𑀼𑀢𑁆𑀢𑁄, 𑀇𑀢𑀭𑁂 𑀘 𑀅𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀤𑀻𑀧𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 ‘‘𑀲𑀩𑁆𑀩𑀜𑁆𑀘𑁂𑀢𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀯𑀲𑁂𑀦 𑀘 𑀅𑀢𑀺𑀲𑀧𑁆𑀧𑀸𑀬𑀯𑀲𑁂𑀦 𑀘 𑀯𑀼𑀢𑁆𑀢𑀁, 𑀭𑀸𑀕𑀸𑀤𑀻𑀦𑀁 𑀧𑀦 𑀅𑀯𑀺𑀓𑁆𑀔𑀫𑁆𑀪𑀺𑀓𑀸, 𑀲𑀤𑁆𑀥𑀸𑀤𑀻𑀦𑀁 𑀯𑀸 𑀅𑀦𑀼𑀧𑀓𑀸𑀭𑀸 𑀓𑀼𑀲𑀮𑀪𑀸𑀯𑀦𑀸 𑀦𑀸𑀫 𑀦𑀢𑁆𑀣𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁪𑁭).

𑁩𑁧𑁫𑁦. 𑀲𑀯𑀡𑁆𑀡𑀓𑀲𑀺𑀡𑀸𑀢𑀺 𑀘𑀢𑀽𑀳𑀺 𑀯𑀡𑁆𑀡𑀓𑁂𑀳𑀺 𑀓𑀲𑀺𑀡𑁂𑀳𑀺 𑀲𑀳𑀺𑀢𑀸. 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄𑀢𑀺 𑀇𑀫𑁂 𑀅𑀝𑁆𑀞 𑀤𑁄𑀲𑀘𑀭𑀺𑀢𑀲𑁆𑀲 𑀅𑀦𑀼𑀓𑀽𑀮𑀸𑀢𑀺 𑀧𑀓𑀸𑀲𑀺𑀢𑀸𑀢𑀺 𑀬𑁄𑀚𑀦𑀸.

𑁩𑁧𑁫𑁧. 𑀫𑁄𑀳𑀧𑁆𑀧𑀓𑀢𑀺𑀦𑁄𑀢𑀺 𑀫𑁄𑀳𑀘𑀭𑀺𑀢𑀲𑁆𑀲. ‘‘𑀆𑀦𑀸𑀧𑀸𑀦𑀲𑀢𑀺 𑀏𑀓𑀸𑀯𑀸’’𑀢𑀺 𑀧𑀤𑀘𑁆𑀙𑁂𑀤𑁄.

𑁩𑁧𑁫𑁨. 𑀫𑀭𑀡𑀽𑀧𑀲𑀫𑁂𑀢𑀺 𑀫𑀭𑀡𑀜𑁆𑀘 𑀉𑀧𑀲𑀫𑁄 𑀘 𑀫𑀭𑀡𑀽𑀧𑀲𑀫𑀁, 𑀢𑀲𑁆𑀫𑀺𑀁 𑀫𑀭𑀡𑀽𑀧𑀲𑀫𑁂. 𑀲𑀢𑀻𑀢𑀺 𑀫𑀭𑀡𑀸𑀦𑀼𑀲𑁆𑀲𑀢𑀺, 𑀉𑀧𑀲𑀫𑀸𑀦𑀼𑀲𑁆𑀲𑀢𑀺 𑀘𑀸𑀢𑀺 𑀏𑀢𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸. 𑀧𑀜𑁆𑀜𑀸𑀧𑀓𑀢𑀺𑀦𑁄𑀢𑀺 𑀩𑀼𑀤𑁆𑀥𑀺𑀘𑀭𑀺𑀢𑀲𑁆𑀲.

𑁩𑁧𑁫𑁩. 𑀆𑀤𑀺𑀅𑀦𑀼𑀲𑁆𑀲𑀢𑀺𑀘𑁆𑀙𑀓𑁆𑀓𑀦𑁆𑀢𑀺 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀲𑀻𑀮𑀘𑀸𑀕𑀤𑁂𑀯𑀢𑀸𑀦𑀼𑀲𑁆𑀲𑀢𑀺𑀲𑀗𑁆𑀔𑀸𑀢𑀁 𑀙𑀓𑁆𑀓𑀁. 𑀲𑀤𑁆𑀥𑀸𑀘𑀭𑀺𑀢𑀯𑀡𑁆𑀡𑀺𑀢𑀦𑁆𑀢𑀺 𑀲𑀤𑁆𑀥𑀸𑀘𑀭𑀺𑀢𑀲𑁆𑀲 𑀅𑀦𑀼𑀓𑀽𑀮𑀦𑁆𑀢𑀺 𑀓𑀣𑀺𑀢𑀁. 𑀆𑀭𑀼𑀧𑁆𑀧𑀸𑀢𑀺 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸. 𑀲𑁂𑀲𑀸 𑀓𑀲𑀺𑀡𑀸𑀢𑀺 𑀪𑀽𑀢𑀓𑀲𑀺𑀡𑀆𑀮𑁄𑀓𑀸𑀓𑀸𑀲𑀓𑀲𑀺𑀡𑀸𑀦𑀁 𑀯𑀲𑁂𑀦 𑀙 𑀓𑀲𑀺𑀡𑀸𑀢𑀺 𑀲𑁂𑀲𑀸 𑀤𑀲 𑀥𑀫𑁆𑀫𑀸. 𑀲𑀩𑁆𑀩𑀸𑀦𑀼𑀭𑀽𑀧𑀓𑀸𑀢𑀺 𑀲𑀩𑁆𑀩𑁂𑀲𑀁 𑀙𑀦𑁆𑀦𑀁 𑀘𑀭𑀺𑀬𑀸𑀦𑀁 𑀅𑀦𑀼𑀓𑀽𑀮𑀸𑀢𑀺 𑀅𑀢𑁆𑀣𑁄.

𑁩𑁧𑁫𑁪-𑁮. 𑀏𑀯𑀁 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑀫𑀸𑀢𑀺𑀓𑀸𑀦𑀼𑀓𑁆𑀓𑀫𑁂𑀦 𑀓𑀫𑁆𑀫𑀝𑁆𑀞𑀸𑀦𑀧𑁆𑀧𑀪𑁂𑀤𑀁 𑀯𑀺𑀪𑀸𑀯𑁂𑀢𑁆𑀯𑀸 𑀇𑀤𑀸𑀦𑀺 𑀪𑀸𑀯𑀦𑀸𑀦𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀏𑀯’’𑀦𑁆𑀢𑀺𑀆𑀤𑀺. 𑀏𑀯𑀁 𑀧𑀪𑁂𑀤𑀢𑁄 𑀜𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀸𑀦𑀻𑀢𑀺 𑀬𑀣𑀸𑀯𑀼𑀢𑁆𑀢𑀪𑁂𑀤𑀦𑀬𑀫𑀼𑀔𑁂𑀦 𑀪𑀸𑀯𑀦𑀸𑀫𑀬𑀸𑀭𑀫𑁆𑀪𑀤𑀲𑁆𑀲𑀦𑀁. 𑀧𑀡𑁆𑀟𑀺𑀢𑁄𑀢𑀺 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀧𑀜𑁆𑀜𑀸𑀬 𑀧𑀜𑁆𑀜𑀯𑀸 𑀪𑀩𑁆𑀩𑀧𑀼𑀕𑁆𑀕𑀮𑁄. 𑀢𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀫𑁂𑀥𑀸𑀯𑀻𑀢𑀺 𑀧𑀸𑀭𑀺𑀳𑀸𑀭𑀺𑀬𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸𑀦𑀸𑀢𑀺𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂 𑀲𑀼𑀝𑁆𑀞𑀼 𑀲𑀮𑁆𑀮𑀓𑁆𑀔𑀦𑁆𑀢𑁂𑀦 𑀤𑀴𑁆𑀳𑀁 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀉𑀕𑁆𑀕𑀳𑁂𑀢𑁆𑀯𑀸. 𑀓𑀮𑁆𑀬𑀸𑀡𑀫𑀺𑀢𑁆𑀢𑀓𑁄𑀢𑀺 𑁋

‘‘𑀧𑀺𑀬𑁄 𑀕𑀭𑀼 𑀪𑀸𑀯𑀦𑀻𑀬𑁄;

𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄;

𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸;

𑀦𑁄 𑀘𑀝𑁆𑀞𑀸𑀦𑁂 𑀦𑀺𑀬𑁄𑀚𑀓𑁄’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁩𑁭; 𑀦𑁂𑀢𑁆𑀢𑀺. 𑁧𑁧𑁩) 𑁋

𑀯𑀼𑀢𑁆𑀢𑀮𑀓𑁆𑀔𑀡𑀓𑁄 𑀲𑀻𑀮𑀲𑀼𑀢𑀧𑀜𑁆𑀜𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑀓𑀮𑁆𑀬𑀸𑀡𑀫𑀺𑀢𑁆𑀢𑀓𑁄.

𑀧𑀞𑀫𑀫𑁂𑀯 𑀧𑀮𑀺𑀩𑁄𑀥𑀸𑀦𑀁 𑀉𑀘𑁆𑀙𑁂𑀤𑀁 𑀓𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀧𑀞𑀫𑀦𑁆𑀢𑀺 𑀪𑀸𑀯𑀦𑀸𑀭𑀫𑁆𑀪𑀢𑁄 𑀧𑀞𑀫𑀫𑁂𑀯. 𑀧𑀮𑀺𑀩𑁄𑀥𑀸𑀦𑀁 𑀉𑀘𑁆𑀙𑁂𑀤𑀁 𑀓𑀢𑁆𑀯𑀸𑀢𑀺 𑁋

‘‘𑀆𑀯𑀸𑀲𑁄 𑀘 𑀓𑀼𑀮𑀁 𑀮𑀸𑀪𑁄;

𑀕𑀡𑁄 𑀓𑀫𑁆𑀫𑀜𑁆𑀘 𑀧𑀜𑁆𑀘𑀫𑀁;

𑀅𑀤𑁆𑀥𑀸𑀦𑀁 𑀜𑀸𑀢𑀺 𑀆𑀩𑀸𑀥𑁄;

𑀕𑀦𑁆𑀣𑁄 𑀇𑀤𑁆𑀥𑀻𑀢𑀺 𑀢𑁂 𑀤𑀲𑀸’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁪𑁧) 𑁋

𑀯𑀼𑀢𑁆𑀢𑀸𑀦𑀁 𑀤𑀲𑀫𑀳𑀸𑀧𑀮𑀺𑀩𑁄𑀥𑀸𑀦𑀁, 𑀤𑀻𑀖𑀓𑁂𑀲𑀦𑀔𑀮𑁄𑀫𑀘𑁆𑀙𑁂𑀤𑀦𑀘𑀻𑀯𑀭𑀭𑀚𑀦𑀧𑀢𑁆𑀢𑀧𑀘𑀦𑀸𑀤𑀻𑀦𑀁 𑀔𑀼𑀤𑁆𑀤𑀓𑀧𑀅𑀩𑁄𑀥𑀸𑀦𑀜𑁆𑀘𑀸𑀢𑀺 𑀉𑀪𑀬𑁂𑀲𑀁 𑀧𑀮𑀺𑀩𑁄𑀥𑀸𑀦𑀁 𑀉𑀘𑁆𑀙𑁂𑀤𑀁 𑀓𑀢𑁆𑀯𑀸 𑀦𑀺𑀝𑁆𑀞𑀸𑀧𑀦𑁂𑀦 𑀯𑀸 𑀆𑀮𑀬𑀧𑀭𑀺𑀘𑁆𑀘𑀸𑀕𑁂𑀦 𑀯𑀸 𑀉𑀘𑁆𑀙𑁂𑀤𑀁 𑀓𑀢𑁆𑀯𑀸. 𑀇𑀤𑁆𑀥𑀺 𑀧𑀦𑁂𑀢𑁆𑀣 𑀯𑀺𑀧𑀲𑁆𑀲𑀦𑀸𑀬 𑀧𑀮𑀺𑀩𑁄𑀥𑁄 𑀳𑁄𑀢𑀺, 𑀦 𑀲𑀫𑀸𑀥𑀺𑀪𑀸𑀯𑀦𑀸𑀬. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 ‘‘𑀇𑀤𑁆𑀥𑀻𑀢𑀺 𑀧𑁄𑀣𑀼𑀚𑁆𑀚𑀦𑀺𑀓𑀸 𑀇𑀤𑁆𑀥𑀺. 𑀲𑀸 𑀳𑀺 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑀤𑀸𑀭𑀓𑁄 𑀯𑀺𑀬, 𑀢𑀭𑀼𑀡𑀲𑀲𑁆𑀲𑀁 𑀯𑀺𑀬 𑀘 𑀤𑀼𑀧𑁆𑀧𑀭𑀺𑀳𑀸𑀭𑀸 𑀳𑁄𑀢𑀺, 𑀅𑀧𑁆𑀧𑀫𑀢𑁆𑀢𑀓𑁂𑀦𑁂𑀯 𑀪𑀺𑀚𑁆𑀚𑀢𑀺. 𑀲𑀸 𑀧𑀦 𑀯𑀺𑀧𑀲𑁆𑀲𑀦𑀸𑀬 𑀧𑀮𑀺𑀩𑁄𑀥𑁄 𑀳𑁄𑀢𑀺, 𑀦 𑀲𑀫𑀸𑀥𑀺𑀲𑁆𑀲 𑀲𑀫𑀸𑀥𑀺𑀁 𑀧𑀢𑁆𑀯𑀸 𑀧𑀢𑁆𑀢𑀩𑁆𑀩𑀢𑁆𑀢𑀸’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁪𑁧).

𑀤𑁄𑀲𑀯𑀚𑁆𑀚𑀺𑀢𑁂, 𑀅𑀦𑀼𑀭𑀽𑀧𑁂 𑀘 𑀯𑀺𑀳𑀸𑀭𑁂 𑀯𑀲𑀦𑁆𑀢𑁂𑀦𑀸𑀢𑀺 𑀬𑁄𑀚𑀦𑀸. 𑀤𑁄𑀲𑀯𑀚𑁆𑀚𑀺𑀢𑁂𑀢𑀺 𑁋

‘‘𑀫𑀳𑀸𑀯𑀸𑀲𑀁 𑀦𑀯𑀸𑀯𑀸𑀲𑀁, 𑀚𑀭𑀸𑀯𑀸𑀲𑀜𑁆𑀘 𑀧𑀦𑁆𑀣𑀦𑀺𑀁;

𑀲𑁄𑀡𑁆𑀟𑀺𑀁 𑀧𑀡𑁆𑀡𑀜𑁆𑀘 𑀧𑀼𑀧𑁆𑀨𑀜𑁆𑀘, 𑀨𑀮𑀁 𑀧𑀢𑁆𑀣𑀺𑀢𑀫𑁂𑀯 𑀘.

‘‘𑀦𑀕𑀭𑀁 𑀤𑀸𑀭𑀼𑀦𑀸 𑀔𑁂𑀢𑁆𑀢𑀁, 𑀯𑀺𑀲𑀪𑀸𑀕𑁂𑀦 𑀧𑀝𑁆𑀝𑀦𑀁;

𑀧𑀘𑁆𑀘𑀦𑁆𑀢𑀲𑀻𑀫𑀸𑀲𑀧𑁆𑀧𑀸𑀬𑀁, 𑀬𑀢𑁆𑀣 𑀫𑀺𑀢𑁆𑀢𑁄 𑀦 𑀮𑀩𑁆𑀪𑀢𑀺.

‘‘𑀅𑀝𑁆𑀞𑀸𑀭𑀲𑁂𑀢𑀸𑀦𑀺 𑀞𑀸𑀦𑀸𑀦𑀺, 𑀇𑀢𑀺 𑀯𑀺𑀜𑁆𑀜𑀸𑀬 𑀧𑀡𑁆𑀟𑀺𑀢𑁄;

𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀬𑁆𑀬, 𑀫𑀕𑁆𑀕𑀁 𑀧𑀝𑀺𑀪𑀬𑀁 𑀬𑀣𑀸’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁫𑁨) 𑁋

𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑁂𑀳𑀺 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀤𑁄𑀲𑁂𑀳𑀺 𑀕𑀚𑁆𑀚𑀺𑀢𑁂.

𑀅𑀦𑀼𑀭𑀽𑀧𑁂 𑀯𑀲𑀦𑁆𑀢𑁂𑀦𑀸𑀢𑀺 𑁋

‘‘𑀇𑀥, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀦𑀸𑀢𑀺𑀤𑀽𑀭𑀁 𑀳𑁄𑀢𑀺 𑀦𑀘𑁆𑀘𑀸𑀲𑀦𑁆𑀦𑀁 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁, 𑀤𑀺𑀯𑀸 𑀅𑀧𑁆𑀧𑀸𑀓𑀺𑀡𑁆𑀡𑀁, 𑀭𑀢𑁆𑀢𑀺𑀁 𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁, 𑀅𑀧𑁆𑀧𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀁, 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀯𑀺𑀳𑀭𑀦𑁆𑀢𑀲𑁆𑀲 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸, 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀬𑁂 𑀢𑁂 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀥𑀭𑀸 𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸, 𑀢𑁂 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀭𑀺𑀧𑀼𑀘𑁆𑀙𑀢𑀺 𑀧𑀭𑀺𑀧𑀜𑁆𑀳𑀢𑀺 ‘𑀇𑀤𑀁, 𑀪𑀦𑁆𑀢𑁂, 𑀓𑀣𑀁, 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄’𑀢𑀺, 𑀢𑀲𑁆𑀲 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀅𑀯𑀺𑀯𑀝𑀜𑁆𑀘𑁂𑀯 𑀯𑀺𑀯𑀭𑀦𑁆𑀢𑀺, 𑀅𑀦𑀼𑀢𑁆𑀢𑀸𑀦𑀻𑀓𑀢𑀜𑁆𑀘 𑀉𑀢𑁆𑀢𑀸𑀦𑀺𑀁 𑀓𑀭𑁄𑀦𑁆𑀢𑀺, 𑀅𑀦𑁂𑀓𑀯𑀺𑀳𑀺𑀢𑁂𑀲𑀼 𑀘 𑀓𑀗𑁆𑀔𑀝𑁆𑀞𑀸𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀁 𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀳𑁄𑀢𑀻’’𑀢𑀺 (𑀅. 𑀦𑀺. 𑁧𑁦.𑁧𑁧) 𑁋

𑀏𑀯𑀁 𑀪𑀕𑀯𑀢𑀸 𑀯𑀡𑁆𑀡𑀺𑀢𑁂𑀳𑀺 𑀧𑀜𑁆𑀘𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀅𑀦𑀼𑀭𑀽𑀧𑁂 𑀪𑀸𑀯𑀦𑀸𑀓𑀫𑁆𑀫𑀸𑀦𑀼𑀕𑀼𑀡𑁂 𑀯𑀺𑀳𑀸𑀭𑁂 𑀯𑀺𑀳𑀭𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀞𑀫𑀸𑀤𑀻𑀦𑀻𑀢𑀺 𑀧𑀞𑀫𑀤𑀼𑀢𑀺𑀬𑀸𑀤𑀻𑀦𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺. 𑀲𑀩𑁆𑀩𑀲𑁄 𑀪𑀸𑀯𑁂𑀢𑁆𑀯𑀸𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 ‘‘𑀲𑀩𑁆𑀩𑀁 𑀪𑀸𑀯𑀦𑀸𑀯𑀺𑀥𑀸𑀦𑀁 𑀅𑀧𑀭𑀺𑀳𑀸𑀧𑁂𑀦𑁆𑀢𑁂𑀦 𑀪𑀸𑀯𑁂𑀢𑀩𑁆𑀩𑁄’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁪𑁧) 𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀫𑀸𑀢𑀺𑀓𑀸𑀧𑀤𑀲𑁆𑀲 𑀯𑀺𑀢𑁆𑀣𑀸𑀭𑀓𑁆𑀓𑀫𑁂𑀦 𑀪𑀸𑀯𑁂𑀢𑁆𑀯𑀸, 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀁 𑀲𑀫𑁆𑀧𑀸𑀤𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀧𑁆𑀧𑀜𑁆𑀜𑁄𑀢𑀺 𑀓𑀫𑁆𑀫𑀚𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀧𑀜𑁆𑀜𑀸𑀬 𑀘𑁂𑀯 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀲𑀧𑁆𑀧𑀸𑀬𑀸𑀦𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀲𑀧𑁆𑀧𑀸𑀬𑀁 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑀲𑀧𑁆𑀧𑀸𑀬𑀲𑁂𑀯𑀦𑁄𑀧𑀓𑀸𑀭𑀸𑀬 𑀧𑀸𑀭𑀺𑀳𑀸𑀭𑀺𑀬𑀧𑀜𑁆𑀜𑀸𑀬 𑀘 𑀲𑀫𑀦𑁆𑀦𑀸𑀕𑀢𑁄 𑀬𑁄𑀕𑀸𑀯𑀘𑀭𑁄. 𑀢𑀢𑁄𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀯𑀚𑁆𑀚𑀺𑀢𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑀁 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀪𑀸𑀯𑁂𑀦 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀅𑀝𑁆𑀞𑀦𑁆𑀦𑀁 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀚𑁆𑀛𑀸𑀦𑀸𑀦𑀫𑀜𑁆𑀜𑀢𑀭𑀢𑁄 𑀛𑀸𑀦𑀸 𑀯𑀼𑀝𑁆𑀞𑀸𑀬. 𑀢𑁂𑀦𑀸𑀳 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 ‘‘𑀞𑀧𑁂𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀅𑀯𑀲𑁂𑀲𑀭𑀽𑀧𑀸𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀅𑀜𑁆𑀜𑀢𑀭𑀢𑁄 𑀯𑀼𑀝𑁆𑀞𑀸𑀬𑀸’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁬𑁬𑁩).

𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑀁 𑀓𑀢𑁆𑀯𑀸𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑀸𑀤𑀺𑀫𑀼𑀔𑁂𑀲𑀼 𑀬𑀣𑀺𑀘𑁆𑀙𑀺𑀢𑁂𑀦 𑀫𑀼𑀔𑁂𑀦 𑀧𑀯𑀺𑀲𑀺𑀢𑁆𑀯𑀸 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 ‘‘𑀇𑀤𑀁 𑀦𑀸𑀫𑀁, 𑀇𑀤𑀁 𑀭𑀽𑀧𑀁, 𑀇𑀫𑀫𑁆𑀳𑀸 𑀦𑀸𑀫𑀭𑀽𑀧𑀢𑁄 𑀩𑁆𑀬𑀢𑀺𑀭𑀺𑀢𑁆𑀢𑀁 𑀅𑀢𑁆𑀢𑀸𑀤𑀺 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀻’’𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸, 𑀇𑀫𑀺𑀦𑀸 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀤𑀲𑁆𑀲𑀺𑀢𑀸.

𑀓𑀗𑁆𑀔𑀁 𑀯𑀺𑀢𑀻𑀭𑀺𑀬𑀸𑀢𑀺 𑀬𑀣𑀸𑀤𑀺𑀝𑁆𑀞𑀦𑀸𑀫𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁂 (𑀯𑀺𑀲𑀼𑀤𑁆𑀥𑀺. 𑁨.𑁬𑁭𑁮 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦 𑀧𑀜𑁆𑀘𑀥𑀸 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 ‘‘𑀦 𑀢𑀸𑀯𑀺𑀤𑀁 𑀦𑀸𑀫𑀭𑀽𑀧𑀁 𑀅𑀳𑁂𑀢𑀼𑀓𑀁, 𑀦 𑀅𑀢𑁆𑀢𑀸𑀤𑀺𑀳𑁂𑀢𑀼𑀓’’𑀦𑁆𑀢𑀺 𑀬𑀸𑀣𑀸𑀯𑀢𑁄 𑀦𑀸𑀫𑀭𑀽𑀧𑀲𑁆𑀲 𑀧𑀜𑁆𑀘𑀥𑀸 𑀤𑀲𑁆𑀲𑀦𑁂𑀦 𑀅𑀤𑁆𑀥𑀢𑁆𑀢𑀬𑀕𑀢𑀁 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦; 𑀫𑀳𑀸𑀦𑀺. 𑁧𑁭𑁪) 𑀲𑁄𑀴𑀲𑀯𑀺𑀥𑀁 𑀓𑀗𑁆𑀔𑀁, ‘‘𑀲𑀢𑁆𑀣𑀭𑀺 𑀓𑀗𑁆𑀔𑀢𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 (𑀥. 𑀲. 𑁧𑁦𑁦𑁮) 𑀅𑀝𑁆𑀞𑀯𑀺𑀥𑀜𑁆𑀘 𑀓𑀗𑁆𑀔𑀁 𑀯𑀻𑀭𑀺𑀬𑁂𑀦 𑀢𑀭𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸, 𑀇𑀫𑀺𑀦𑀸 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺 𑀤𑀲𑁆𑀲𑀺𑀢𑀸 𑀳𑁄𑀢𑀺.

𑀏𑀯𑀁 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀦𑀺𑀧𑁆𑀨𑀸𑀤𑀦𑁂𑀦 𑀜𑀸𑀢𑀧𑀭𑀺𑀜𑁆𑀜𑀸𑀬 𑀞𑀺𑀢𑁄 𑀬𑁄𑀕𑀸𑀯𑀘𑀭𑁄 𑀲𑀧𑁆𑀧𑀸𑀬𑀁 𑀦𑀸𑀫𑀭𑀽𑀧𑀁 𑀮𑀓𑁆𑀔𑀡𑀢𑁆𑀢𑀬𑀁 𑀆𑀭𑁄𑀧𑁂𑀢𑁆𑀯𑀸 𑀓𑀗𑁆𑀔𑀸𑀯𑀽𑀧𑀲𑀫𑀜𑀸𑀡𑁂𑀦 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁂 (𑀯𑀺𑀲𑀼𑀤𑁆𑀥𑀺. 𑁨.𑁬𑁯𑁨 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀑𑀪𑀸𑀲𑁄, 𑀜𑀸𑀡𑀁, 𑀧𑀻𑀢𑀺, 𑀧𑀲𑁆𑀲𑀤𑁆𑀥𑀺, 𑀲𑀼𑀔𑀁, 𑀅𑀥𑀺𑀫𑁄𑀓𑁆𑀔𑁄, 𑀧𑀕𑁆𑀕𑀳𑁄, 𑀉𑀧𑀝𑁆𑀞𑀸𑀦𑀁, 𑀉𑀧𑁂𑀓𑁆𑀔𑀸, 𑀦𑀺𑀓𑀦𑁆𑀢𑀻𑀢𑀺 𑀤𑀲𑀲𑀼 𑀉𑀧𑀓𑁆𑀓𑀺𑀮𑁂𑀲𑁂𑀲𑀼 𑀧𑀸𑀢𑀼𑀪𑀽𑀢𑁂𑀲𑀼 𑀢𑀣𑀸 𑀧𑀸𑀢𑀼𑀪𑀽𑀢𑁂 𑀑𑀪𑀸𑀲𑀸𑀤𑀬𑁄 𑀤𑀲 𑀉𑀧𑀓𑁆𑀓𑀺𑀮𑁂𑀲𑁂 ‘‘𑀅𑀫𑀕𑁆𑀕𑁄’’𑀢𑀺 𑀫𑀕𑁆𑀕𑀯𑀻𑀣𑀺𑀧𑀝𑀺𑀧𑀦𑁆𑀦𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀫𑁂𑀯 ‘‘𑀫𑀕𑁆𑀕𑁄’’𑀢𑀺 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀬𑁄𑀕𑀸𑀯𑀘𑀭𑁄 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄, 𑀇𑀫𑀺𑀦𑀸 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑀺𑀢𑀸 𑀳𑁄𑀢𑀺.

𑁩𑁧𑁫𑁯. 𑀏𑀢𑁆𑀢𑀸𑀯𑀢𑀸 𑀢𑁂𑀲𑀁 𑀢𑀺𑀡𑁆𑀡𑀁 𑀯𑀯𑀢𑁆𑀣𑀸𑀦𑁂𑀢𑀺 𑀬𑁄𑀚𑀦𑀸. 𑀏𑀢𑁆𑀢𑀸𑀯𑀢𑀸𑀢𑀺 ‘‘𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑀁 𑀓𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑀺𑀢𑀦𑀬𑁂𑀦. 𑀢𑁂𑀲𑀁 𑀢𑀺𑀡𑁆𑀡𑀦𑁆𑀢𑀺 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺, 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺, 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀢𑀺 𑀢𑀻𑀳𑀺 𑀯𑀺𑀲𑀼𑀤𑁆𑀥𑀻𑀳𑀺 𑀲𑀓𑀲𑀓𑀯𑀺𑀧𑀲𑁆𑀲𑀦𑀸𑀦𑀁 𑀦𑀸𑀫𑀭𑀽𑀧𑀢𑀧𑁆𑀧𑀘𑁆𑀘𑀬𑀫𑀕𑁆𑀕𑀸𑀫𑀕𑁆𑀕𑀸𑀦𑀁 𑀢𑀺𑀡𑁆𑀡𑀁. 𑀯𑀯𑀢𑁆𑀣𑀸𑀦𑁂 𑀓𑀢𑁂 𑀦𑀺𑀬𑀫𑁂 𑀓𑀢𑁂. 𑀢𑀺𑀡𑁆𑀡𑀁 𑀲𑀘𑁆𑀘𑀸𑀦𑀦𑁆𑀢𑀺 𑀤𑀼𑀓𑁆𑀔𑀲𑀫𑀼𑀤𑀬𑀫𑀕𑁆𑀕𑀲𑀗𑁆𑀔𑀆𑀢𑀸𑀦𑀁 𑀢𑀺𑀡𑁆𑀡𑀁 𑀲𑀘𑁆𑀘𑀸𑀦𑀁. 𑀯𑀯𑀢𑁆𑀣𑀸𑀦𑀁 𑀓𑀢𑀁 𑀲𑀺𑀬𑀸𑀢𑀺 𑀜𑀸𑀢𑀢𑀻𑀭𑀡𑀧𑀭𑀺𑀜𑁆𑀜𑀸𑀲𑀗𑁆𑀔𑀸𑀢𑁂𑀦 𑀮𑁄𑀓𑀺𑀬𑁂𑀦𑁂𑀯 𑀜𑀸𑀡𑁂𑀦 𑀅𑀦𑀼𑀩𑁄𑀥𑀯𑀲𑁂𑀦 𑀦𑀺𑀘𑁆𑀙𑀬𑁄 𑀓𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀣𑀁? 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑀲𑀗𑁆𑀔𑀸𑀢𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀜𑀸𑀡𑁂𑀦 𑀤𑀼𑀓𑁆𑀔𑀲𑀘𑁆𑀘𑀯𑀯𑀢𑁆𑀣𑀸𑀦𑀁 𑀓𑀢𑀁 𑀳𑁄𑀢𑀺, 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀲𑀗𑁆𑀔𑀸𑀢𑁂𑀦 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀜𑀸𑀡𑁂𑀦 𑀲𑀫𑀼𑀤𑀬𑀲𑀘𑁆𑀘𑀯𑀯𑀢𑁆𑀣𑀸𑀦𑀁, 𑀫𑀕𑁆𑀕𑀸𑀫𑀕𑁆𑀕𑀯𑀯𑀢𑁆𑀣𑀸𑀦𑀲𑀗𑁆𑀔𑀸𑀢𑁂𑀦 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑁂𑀦 𑀫𑀕𑁆𑀕𑀲𑀘𑁆𑀘𑀯𑀯𑀢𑁆𑀣𑀸𑀦𑀁.

𑁩𑁧𑁬𑁦-𑁧. 𑀏𑀯𑀁 𑀜𑀸𑀢𑀢𑀻𑀭𑀡𑀧𑀭𑀺𑀜𑁆𑀜𑀸𑀤𑁆𑀯𑀬𑀁 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀢𑁆𑀯𑀸 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀲𑀭𑀻𑀭𑀪𑀽𑀢𑀸𑀦𑀺 𑀦𑀯 𑀜𑀸𑀡𑀸𑀦𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀉𑀤𑀬𑀩𑁆𑀩𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀉𑀤𑀬𑀩𑁆𑀩𑀬𑀸𑀢𑀺 𑀉𑀧𑁆𑀧𑀸𑀤𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀯𑀲𑀧𑁆𑀧𑀯𑀢𑁆𑀢𑀸 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀉𑀤𑀬𑀩𑁆𑀩𑀬𑀸’’𑀢𑀺 𑀯𑀼𑀢𑁆𑀢𑀸. 𑀢𑀢𑁆𑀣 𑀉𑀤𑀬𑀁 𑀫𑀼𑀜𑁆𑀘𑀺𑀢𑁆𑀯𑀸 𑀯𑀬𑁂 𑀯𑀸 𑀧𑀯𑀢𑁆𑀢𑀸 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸 ‘‘𑀪𑀗𑁆𑀕𑀸’’𑀢𑀺 𑀯𑀼𑀢𑁆𑀢𑀸. 𑀪𑀬𑀜𑁆𑀘 𑀆𑀤𑀻𑀦𑀯𑁄 𑀘 𑀦𑀺𑀩𑁆𑀩𑀺𑀤𑀸 𑀘 𑀪𑀬𑀸𑀤𑀻𑀦𑀯𑀦𑀺𑀩𑁆𑀩𑀺𑀤𑀸, 𑀲𑀗𑁆𑀔𑀸𑀭𑀸𑀦𑀁 𑀪𑀬𑀢𑁄 𑀅𑀦𑀼𑀧𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀸 𑀪𑀬𑀸𑀦𑀼𑀧𑀲𑁆𑀲𑀦𑀸 𑀘 𑀤𑀺𑀝𑁆𑀞𑀪𑀬𑀸𑀦𑀁 𑀆𑀤𑀻𑀦𑀯𑀢𑁄 𑀧𑁂𑀓𑁆𑀔𑀦𑀯𑀲𑁂𑀦 𑀧𑀯𑀢𑁆𑀢𑀸 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸 𑀘 𑀤𑀺𑀝𑁆𑀞𑀸𑀤𑀻𑀦𑀯𑁂𑀲𑀼 𑀦𑀺𑀩𑁆𑀩𑁂𑀤𑀯𑀲𑁂𑀦 𑀧𑀯𑀢𑁆𑀢𑀸 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸 𑀘 𑀢𑀣𑀸 𑀯𑀼𑀢𑁆𑀢𑀸. 𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀲𑀗𑁆𑀔𑀸𑀭𑁂𑀳𑀺 𑀫𑀼𑀘𑁆𑀘𑀺𑀢𑀼𑀓𑀸𑀫𑀢𑀸𑀯𑀲𑁂𑀦𑁂𑀯 𑀧𑀯𑀢𑁆𑀢𑀁 𑀜𑀸𑀡𑀁 𑀫𑀼𑀘𑁆𑀘𑀺𑀢𑀼𑀓𑀸𑀫𑀢𑀸𑀜𑀸𑀡𑀁. 𑀫𑀼𑀘𑁆𑀘𑀦𑀲𑁆𑀲 𑀉𑀧𑀸𑀬𑀲𑀫𑁆𑀧𑀝𑀺𑀧𑀸𑀤𑀦𑀢𑁆𑀣𑀁 𑀧𑀼𑀦 𑀲𑀗𑁆𑀔𑀸𑀭𑀢𑁆𑀢𑀬𑀧𑀝𑀺𑀕𑁆𑀕𑀳𑀯𑀲𑀧𑀯𑀢𑁆𑀢𑀁 𑀜𑀸𑀡𑀁 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸.

𑀲𑀗𑁆𑀔𑀸𑀭𑀥𑀫𑁆𑀫𑁂 𑀪𑀬𑀦𑀦𑁆𑀤𑀺𑀯𑀺𑀯𑀚𑁆𑀚𑀦𑀯𑀲𑁂𑀦 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀧𑀯𑀢𑁆𑀢𑀜𑀸𑀡𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁, 𑀲𑀘𑁆𑀘𑀸𑀦𑀼𑀮𑁄𑀫𑁄 𑀢𑀤𑀥𑀺𑀕𑀫𑀸𑀬 𑀏𑀓𑀦𑁆𑀢𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 ‘‘𑀲𑀘𑁆𑀘𑀸𑀦𑀼𑀮𑁄𑀫𑀺𑀓’’𑀦𑁆𑀢𑀺 𑀘 𑀓𑀮𑀸𑀧𑀲𑀫𑁆𑀫𑀲𑀦𑀜𑀸𑀡𑀸𑀤𑀻𑀦𑀁 𑀧𑀼𑀭𑀺𑀫𑀸𑀦𑀁 𑀦𑀯𑀦𑁆𑀦𑀁 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀬𑀸, 𑀉𑀧𑀭𑀺 𑀘 𑀲𑀢𑁆𑀢𑀢𑀺𑀁𑀲𑀸𑀬 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀜𑁆𑀘 𑀅𑀦𑀼𑀮𑁄𑀫𑀦𑀢𑁄 ‘‘𑀅𑀦𑀼𑀮𑁄𑀫𑀜𑀸𑀡’’𑀦𑁆𑀢𑀺 𑀘 𑀯𑀼𑀢𑁆𑀢𑀁 𑀦𑀯𑀫𑀁 𑀜𑀸𑀡𑀜𑁆𑀘𑀸𑀢𑀺 𑀬𑀸 𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸 𑀧𑀳𑀸𑀦𑀧𑀭𑀺𑀜𑁆𑀜𑀸 𑀤𑀲𑁆𑀲𑀺𑀢𑀸, 𑀅𑀬𑀁 ‘‘𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦’’𑀦𑁆𑀢𑀺 𑀧𑀓𑀸𑀲𑀺𑀢𑀸𑀢𑀺 𑀬𑁄𑀚𑀦𑀸.

𑁩𑁧𑁬𑁨. 𑀢𑀢𑁄 𑀅𑀦𑀼𑀮𑁄𑀫𑀜𑀸𑀡𑀢𑁄 𑀧𑀭𑀁 𑀫𑀕𑁆𑀕𑀲𑁆𑀲 𑀆𑀯𑀚𑁆𑀚𑀦𑀝𑁆𑀞𑀸𑀦𑀺𑀬𑀁 𑀳𑀼𑀢𑁆𑀯𑀸 𑀦𑀺𑀩𑁆𑀩𑀸𑀦𑀫𑀸𑀮𑀫𑁆𑀩𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀲𑁆𑀲 𑀧𑀼𑀣𑀼𑀚𑁆𑀚𑀦𑀕𑁄𑀢𑁆𑀢𑀲𑁆𑀲 𑀅𑀪𑀺𑀪𑀯𑀦𑀢𑁄, 𑀅𑀭𑀺𑀬𑀕𑁄𑀢𑁆𑀢𑀲𑁆𑀲 𑀪𑀸𑀯𑀦𑀢𑁄 𑀯𑀟𑁆𑀠𑀦𑀢𑁄 𑀘 ‘‘𑀕𑁄𑀢𑁆𑀭𑀪𑀽’’𑀢𑀺 𑀲𑀗𑁆𑀔𑀁 𑀕𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀲𑀫𑀦𑀦𑁆𑀢𑀭𑀫𑁂𑀯 𑀘. 𑀲𑀦𑁆𑀢𑀺𑀫𑀸𑀭𑀫𑁆𑀫𑀡𑀁 𑀓𑀢𑁆𑀯𑀸𑀢𑀺 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀸𑀦𑀜𑁆𑀘 𑀲𑀗𑁆𑀔𑀸𑀭𑀤𑀼𑀓𑁆𑀔𑀕𑁆𑀕𑀺𑀦𑁄 𑀘 𑀯𑀽𑀧𑀲𑀫𑀦𑀺𑀫𑀺𑀢𑁆𑀢𑀢𑁆𑀢𑀸 ‘‘𑀲𑀦𑁆𑀢𑀺’’𑀦𑁆𑀢𑀺 𑀲𑀗𑁆𑀔𑀸𑀢𑀁 𑀦𑀺𑀭𑁄𑀥𑀫𑀸𑀮𑀫𑁆𑀩𑀺𑀢𑁆𑀯𑀸. 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀚𑀸𑀦𑀦𑀝𑁆𑀞𑁂𑀦 𑀜𑀸𑀡𑀁, 𑀘𑀓𑁆𑀔𑀼𑀦𑀸 𑀯𑀺𑀬 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀝𑁆𑀞𑁂𑀦 𑀤𑀲𑁆𑀲𑀦𑀦𑁆𑀢𑀺 𑀲𑀗𑁆𑀔𑀁 𑀕𑀢𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀁 𑀲𑀢𑁆𑀢𑀫𑀯𑀺𑀲𑀼𑀤𑁆𑀥𑀺𑀜𑀸𑀡𑀁 𑀚𑀸𑀬𑀢𑁂 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑁩𑁧𑁬𑁩. 𑀧𑀘𑁆𑀘𑀯𑁂𑀓𑁆𑀔𑀡𑀧𑀭𑀺𑀬𑀦𑁆𑀢𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀚𑀯𑀦𑀧𑀭𑀺𑀬𑁄𑀲𑀸𑀦𑀁. 𑀢𑀲𑁆𑀲𑀸𑀢𑀺 𑀜𑀸𑀡𑀤𑀲𑁆𑀲𑀦𑀲𑀗𑁆𑀔𑀸𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲. 𑀨𑀮𑀦𑁆𑀢𑀺 𑀨𑀮𑀘𑀺𑀢𑁆𑀢𑀁 𑀅𑀦𑀼 𑀧𑀘𑁆𑀙𑀸 𑀫𑀕𑁆𑀕𑀸𑀦𑀦𑁆𑀢𑀭𑀁 𑀳𑀼𑀢𑁆𑀯𑀸 𑀚𑀸𑀬𑀢𑁂.

𑀏𑀢𑁆𑀣 ‘‘𑀧𑀘𑁆𑀘𑀯𑁂𑀓𑁆𑀔𑀡𑀧𑀭𑀺𑀬𑀦𑁆𑀢’’𑀦𑁆𑀢𑀺 𑀇𑀤𑀁 ‘‘𑀨𑀮’’𑀦𑁆𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁, 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁 𑀯𑀸, 𑀧𑀘𑁆𑀘𑀯𑁂𑀓𑁆𑀔𑀡𑀚𑀯𑀦𑀁 𑀫𑀭𑀺𑀬𑀸𑀤𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀫𑀕𑁆𑀕𑀸𑀦𑀦𑁆𑀢𑀭𑀁 𑀨𑀮𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁, 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑁂 𑀢𑀤𑀦𑀦𑁆𑀢𑀭𑀫𑁂𑀯 𑀪𑀯𑀗𑁆𑀕𑀁 𑀳𑁄𑀢𑀺, 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑀫𑀕𑁆𑀕𑀫𑀸𑀮𑀫𑁆𑀩𑀺𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄 𑀧𑀘𑁆𑀘𑀯𑁂𑀓𑁆𑀔𑀡𑀚𑀯𑀦𑀸𑀦𑀺. 𑀏𑀯𑀁 𑀨𑀮𑀘𑀺𑀢𑁆𑀢𑀁 𑀪𑀯𑀗𑁆𑀕𑀧𑀭𑀺𑀬𑀦𑁆𑀢𑀫𑁂𑀯 𑀳𑁄𑀢𑀺, 𑀦 𑀧𑀘𑁆𑀘𑀯𑁂𑀓𑁆𑀔𑀡𑀧𑀭𑀺𑀬𑀦𑁆𑀢𑀁. 𑀢𑀣𑀸𑀧𑀺 𑀅𑀜𑁆𑀜𑁂𑀦 𑀚𑀯𑀦𑁂𑀦 𑀅𑀦𑀦𑁆𑀢𑀭𑀺𑀓𑀁 𑀳𑀼𑀢𑁆𑀯𑀸 𑀨𑀮𑀚𑀯𑀦𑀸𑀦𑀫𑀦𑀦𑁆𑀢𑀭𑀁 𑀧𑀘𑁆𑀘𑀯𑁂𑀓𑁆𑀔𑀡𑀚𑀯𑀦𑀫𑁂𑀯 𑀧𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀚𑀯𑀦𑀸𑀦𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀸𑀦𑀺 𑀪𑀯𑀗𑁆𑀕𑀸𑀯𑀚𑁆𑀚𑀦𑀸𑀦𑀺 𑀅𑀩𑁆𑀩𑁄𑀳𑀸𑀭𑀺𑀓𑀸𑀦𑀺 𑀓𑀢𑁆𑀯𑀸 ‘‘𑀧𑀘𑁆𑀘𑀯𑁂𑀓𑁆𑀔𑀡𑀧𑀭𑀺𑀬𑀦𑁆𑀢𑀁, 𑀨𑀮𑀁 𑀢𑀲𑁆𑀲𑀸𑀦𑀼𑀚𑀸𑀬𑀢𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀧𑀘𑁆𑀘𑀯𑁂𑀓𑁆𑀔𑀡𑀜𑁆𑀘 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀳𑀻𑀦𑀓𑀺𑀮𑁂𑀲𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀧𑀜𑁆𑀘𑀯𑀺𑀥𑀁 𑀳𑁄𑀢𑀺. 𑀢𑁂𑀲𑀼 𑀏𑀓𑁂𑀓𑀁 𑀏𑀓𑁂𑀓𑁂𑀦 𑀚𑀯𑀦𑀯𑀸𑀭𑁂𑀦 𑀧𑀘𑁆𑀘𑀯𑁂𑀓𑁆𑀔𑀢𑀻𑀢𑀺 𑀧𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀡𑀚𑀯𑀦𑀯𑀸𑀭𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀡𑀕𑁆𑀕𑀳𑀡𑁂𑀦 𑀲𑀸𑀫𑀜𑁆𑀜𑀢𑁄 𑀤𑀲𑁆𑀲𑀺𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺.

𑁩𑁧𑁬𑁪. 𑀢𑁂𑀦𑁂𑀯 𑀘 𑀉𑀧𑀸𑀬𑁂𑀦𑀸𑀢𑀺 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀺𑀧𑀲𑁆𑀲𑀦𑀸𑀦𑀁 𑀧𑀞𑀫𑀁 𑀫𑀕𑁆𑀕𑁄 𑀅𑀥𑀺𑀕𑀢𑁄, 𑀢𑁂𑀦𑁂𑀯 𑀉𑀧𑀸𑀬𑁂𑀦. 𑀲𑁄 𑀪𑀺𑀓𑁆𑀔𑀽𑀢𑀺 𑀲𑁄 𑀬𑁄𑀕𑀸𑀯𑀘𑀭𑁄 𑀪𑀺𑀓𑁆𑀔𑀼. 𑀧𑀼𑀦𑀧𑁆𑀧𑀼𑀦𑀁 𑀪𑀸𑀯𑁂𑀦𑁆𑀢𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸. 𑀬𑀣𑀸 𑀧𑀞𑀫𑀫𑀕𑁆𑀕𑀨𑀮𑀸𑀦𑀺 𑀧𑀢𑁆𑀢𑁄, 𑀢𑀣𑀸. 𑀲𑁂𑀲𑀫𑀕𑁆𑀕𑀨𑀮𑀸𑀦𑀺 𑀘𑀸𑀢𑀺 𑀤𑀼𑀢𑀺𑀬𑀸𑀤𑀺𑀫𑀕𑁆𑀕𑀨𑀮𑀸𑀦𑀺 𑀘 𑀧𑀸𑀧𑀼𑀡𑀸𑀢𑀺.

𑁩𑁧𑁬𑁫. 𑀇𑀘𑁆𑀘𑁂𑀯𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀉𑀧𑁆𑀧𑀸𑀤𑀯𑀬𑀦𑁆𑀢𑀸𑀢𑀻𑀢𑀓𑀢𑁆𑀢𑀸 𑀅𑀘𑁆𑀘𑀦𑁆𑀢𑀁 𑀅𑀫𑀢𑀁 𑀥𑀫𑁆𑀫𑀁 𑀅𑀯𑁂𑀘𑁆𑀘 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀅𑀲𑁂𑀲𑀁 𑀅𑀓𑀼𑀲𑀮𑀁 𑀯𑀺𑀤𑁆𑀥𑀁𑀲𑀬𑀺𑀢𑁆𑀯𑀸 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂𑀦 𑀧𑀚𑀳𑀺𑀢𑁆𑀯𑀸 𑀢𑀬𑁄 𑀪𑀯𑁂 𑀓𑀸𑀫𑀪𑀯𑀸𑀤𑀻𑀲𑀼 𑀢𑀻𑀲𑀼 𑀪𑀯𑁂𑀲𑀼 𑀦𑀺𑀓𑀦𑁆𑀢𑀺𑀬𑀸 𑀲𑁄𑀲𑀦𑀯𑀲𑁂𑀦 𑀢𑀬𑁄 𑀪𑀯𑁂 𑀯𑀺𑀲𑁂𑀲𑁂𑀦 𑀲𑁄𑀲𑀬𑀺𑀢𑁆𑀯𑀸 𑀲𑁄 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀧𑀞𑀫𑀁 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂 𑀲𑁄𑀲𑀺𑀢𑀯𑀺𑀧𑀸𑀓𑀓𑁆𑀔𑀦𑁆𑀥𑀓𑀝𑀢𑁆𑀢𑀸𑀭𑀽𑀧𑀲𑀗𑁆𑀔𑀸𑀢𑀉𑀧𑀸𑀤𑀺𑀲𑁂𑀲𑀭𑀳𑀺𑀢𑀢𑁆𑀢𑀸 𑀦𑀺𑀭𑀼𑀧𑀸𑀤𑀺𑀲𑁂𑀲𑀁 𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀉𑀧𑁂𑀢𑀺 𑀅𑀥𑀺𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸.

𑀇𑀘𑁆𑀘𑁂𑀯𑀁 𑀲𑀗𑁆𑀔𑁂𑀧𑀢𑁄 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀦𑀬𑁄 𑀆𑀘𑀭𑀺𑀬𑁂𑀦 𑀤𑀲𑁆𑀲𑀺𑀢𑁄𑀢𑀺 𑀕𑀦𑁆𑀣𑀪𑀻𑀭𑀼𑀚𑀦𑀸𑀦𑀼𑀕𑁆𑀕𑀳𑀯𑀲𑁂𑀦 𑀯𑀺𑀢𑁆𑀣𑀸𑀭𑀯𑀡𑁆𑀡𑀦𑀁 𑀅𑀦𑀸𑀫𑀲𑀺𑀢𑁆𑀯𑀸 𑀅𑀦𑀼𑀧𑀤𑀯𑀡𑁆𑀡𑀦𑀸𑀫𑀢𑁆𑀢𑀫𑁂𑀯𑁂𑀢𑁆𑀣 𑀓𑀢𑀁. 𑀯𑀺𑀢𑁆𑀣𑀸𑀭𑀯𑀡𑁆𑀡𑀦𑀸 𑀧𑀦𑀲𑁆𑀲 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄, 𑀢𑀩𑁆𑀩𑀡𑁆𑀡𑀦𑀢𑁄 𑀘 𑀕𑀳𑁂𑀢𑀩𑁆𑀩𑀸.

𑁩𑁧𑁬𑁬-𑁭. 𑀯𑀺𑀜𑁆𑀜𑀸𑀲𑀓𑁆𑀓𑀫𑀢𑁄 𑀯𑀸𑀧𑀻𑀢𑀺 𑀅𑀓𑁆𑀔𑀭𑀧𑀤𑀯𑀸𑀓𑁆𑀬𑀲𑀗𑁆𑀔𑀸𑀢𑀕𑀦𑁆𑀣𑀭𑀘𑀦𑀓𑁆𑀓𑀫𑀢𑁄 𑀯𑀸. 𑀧𑀼𑀩𑁆𑀩𑀸𑀧𑀭𑀯𑀲𑁂𑀦 𑀯𑀸𑀢𑀺 𑀯𑀢𑁆𑀢𑀩𑁆𑀩𑀸𑀦𑀫𑀢𑁆𑀣𑀯𑀺𑀲𑁂𑀲𑀸𑀦𑀁 𑀧𑀝𑀺𑀧𑀸𑀝𑀺𑀯𑀲𑁂𑀦 𑀯𑀸. 𑀅𑀓𑁆𑀔𑀭𑀩𑀦𑁆𑀥𑁂 𑀯𑀸𑀢𑀺 𑀲𑀤𑁆𑀤𑀲𑀢𑁆𑀣𑀅𑀮𑀗𑁆𑀓𑀸𑀭𑀲𑀢𑁆𑀣𑀙𑀦𑁆𑀤𑁄𑀯𑀺𑀘𑀺𑀢𑀺𑀲𑀢𑁆𑀣𑀸𑀦𑀼𑀧𑀸𑀢𑁂𑀦 𑀓𑀸𑀢𑀩𑁆𑀩𑀸𑀬 𑀅𑀓𑁆𑀔𑀭𑀧𑀤𑀭𑀘𑀦𑀸𑀬, 𑀕𑀸𑀣𑀸𑀩𑀦𑁆𑀥𑁂𑀢𑀺 𑀅𑀢𑁆𑀣𑁄. 𑀅𑀬𑀼𑀢𑁆𑀢𑀁 𑀯𑀺𑀬 𑀬𑀤𑀺 𑀤𑀺𑀲𑁆𑀲𑀢𑀻𑀢𑀺 𑀬𑁄𑀚𑀦𑀸.

𑀢𑀦𑁆𑀢𑀺 𑀢𑀁 ‘‘𑀅𑀬𑀼𑀢𑁆𑀢’’𑀦𑁆𑀢𑀺 𑀤𑀺𑀲𑁆𑀲𑀫𑀸𑀦𑀝𑁆𑀞𑀸𑀦𑀁. 𑀢𑀣𑀸 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀺𑀲𑁆𑀲𑀫𑀸𑀦𑀸𑀓𑀸𑀭𑁂𑀦𑁂𑀯 𑀅𑀬𑀼𑀢𑁆𑀢𑀦𑁆𑀢𑀺 𑀦 𑀕𑀳𑁂𑀢𑀩𑁆𑀩𑀁. 𑀓𑀣𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀕𑀳𑁂𑀢𑀩𑁆𑀩𑀫𑀤𑁄𑀲𑀢𑁄’’𑀢𑀺. 𑀢𑀲𑁆𑀲 𑀓𑀸𑀭𑀡𑀫𑀸𑀳 ‘‘𑀫𑀬𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸, 𑀓𑀢𑀢𑁆𑀢𑀸 𑀧𑀦 𑀲𑀩𑁆𑀩𑀲𑁄’’𑀢𑀺. 𑀬𑁄 𑀬𑁄 𑀧𑀦𑁂𑀢𑁆𑀣 𑀤𑁄𑀲𑁄 𑀤𑀺𑀲𑁆𑀲𑀢𑀺 𑀔𑀺𑀢𑁆𑀢𑀤𑁄𑀲𑁄 𑀯𑀸 𑀳𑁄𑀢𑀼 𑀯𑀺𑀧𑀮𑁆𑀮𑀸𑀲𑀕𑁆𑀕𑀳𑀡𑀤𑁄𑀲𑁄 𑀯𑀸, 𑀦𑀸𑀧𑀭𑀁 𑀤𑁄𑀲𑁄𑀢𑀺 𑀤𑀻𑀧𑁂𑀢𑀺. 𑀢𑁂𑀦𑁂𑀢𑀁 𑀧𑀓𑀭𑀡𑀁 𑀲𑀩𑁆𑀩𑁂𑀲𑀁 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑀸𑀬𑀢𑀦𑀩𑀳𑀼𑀲𑁆𑀲𑀼𑀢𑀸𑀦𑀁 𑀲𑀺𑀓𑁆𑀔𑀸𑀓𑀸𑀫𑀸𑀦𑀁 𑀣𑁂𑀭𑀸𑀦𑀁 𑀅𑀢𑁆𑀢𑀦𑁄 𑀧𑀫𑀸𑀡𑀪𑀽𑀢𑀢𑀁 𑀲𑀽𑀘𑁂𑀢𑀺. 𑀅𑀢𑁆𑀢𑀦𑁄 𑀧𑀫𑀸𑀡𑀲𑀽𑀘𑀦𑁂𑀦 𑀅𑀢𑁆𑀢𑀦𑀸 𑀯𑀺𑀭𑀘𑀺𑀢𑀲𑁆𑀲 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀲𑁆𑀲𑀸𑀧𑀺 𑀧𑀫𑀸𑀡𑀢𑀁 𑀯𑀺𑀪𑀸𑀯𑁂𑀦𑁆𑀢𑁄 𑀢𑀲𑁆𑀲 𑀲𑀯𑀦𑀼𑀕𑁆𑀕𑀳𑀥𑀸𑀭𑀡𑀸𑀤𑀻𑀲𑀼 𑀲𑁄𑀢𑀼𑀚𑀦𑀁 𑀦𑀺𑀬𑁄𑀚𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀯𑀺𑀥𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑁩𑁧𑁬𑁮-𑁭𑁮. 𑀏𑀯𑀁 ‘‘𑀯𑀺𑀦𑀬𑁄 𑀲𑀁𑀯𑀭𑀢𑁆𑀣𑀸𑀬, 𑀲𑀁𑀯𑀭𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀬, 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀸𑀫𑁄𑀚𑁆𑀚𑀢𑁆𑀣𑀸𑀬, 𑀧𑀸𑀫𑁄𑀚𑁆𑀚𑀁 𑀧𑀻𑀢𑀢𑁆𑀣𑀸𑀬, 𑀧𑀻𑀢𑀺 𑀧𑀲𑁆𑀲𑀤𑁆𑀥𑀢𑁆𑀣𑀸𑀬, 𑀧𑀲𑁆𑀲𑀤𑁆𑀥𑀺 𑀲𑀼𑀔𑀢𑁆𑀣𑀸𑀬, 𑀲𑀼𑀔𑀁 𑀲𑀫𑀸𑀥𑀢𑁆𑀣𑀸𑀬, 𑀲𑀫𑀸𑀥𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀢𑁆𑀣𑀸𑀬, 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀦𑀺𑀩𑁆𑀩𑀺𑀤𑀢𑁆𑀣𑀸𑀬, 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀢𑁆𑀣𑀸𑀬, 𑀯𑀺𑀭𑀸𑀕𑁄 𑀯𑀺𑀫𑀼𑀢𑁆𑀢𑀢𑁆𑀣𑀸𑀬, 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀢𑁆𑀣𑀸𑀬, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀅𑀦𑀼𑀧𑀸𑀤𑀸𑀧𑀅𑀦𑀺𑀩𑁆𑀩𑀸𑀦𑀢𑁆𑀣𑀸𑀬𑀸’’𑀢𑀺 (𑀧𑀭𑀺. 𑁩𑁬𑁫) 𑀤𑀲𑁆𑀲𑀺𑀢𑀸𑀦𑀺𑀲𑀁𑀲𑀧𑀭𑀫𑁆𑀧𑀭𑀸𑀦𑀺𑀤𑁆𑀥𑀸𑀭𑀡𑀫𑀼𑀔𑁂𑀦 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀧𑀭𑀺𑀬𑀦𑁆𑀢𑀁 𑀲𑀸𑀦𑀺𑀲𑀁𑀲𑀁 𑀯𑀺𑀦𑀬𑀓𑀣𑀁 𑀓𑀣𑁂𑀢𑁆𑀯𑀸 𑀢𑀲𑁆𑀲𑀸 𑀧𑀫𑀸𑀡𑀢𑀜𑁆𑀘 𑀯𑀺𑀪𑀸𑀯𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀼𑀢𑀩𑀼𑀤𑁆𑀥𑀢𑁆𑀢𑀸 ‘‘𑀲𑀦𑀺𑀤𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀫𑀻’’𑀢𑀺 (𑀅. 𑀦𑀺. 𑁩.𑁧𑁨𑁬; 𑀓𑀣𑀸. 𑁮𑁦𑁬) 𑀯𑀘𑀦𑀢𑁄 𑀪𑀕𑀯𑀢𑁄 𑀘𑀭𑀺𑀢𑀫𑀦𑀼𑀯𑀢𑁆𑀢𑀦𑁆𑀢𑁄 𑀢𑀲𑁆𑀲 𑀤𑁂𑀲𑀓𑀸𑀮𑀸𑀤𑀺𑀯𑀲𑁂𑀦 𑀦𑀺𑀤𑀸𑀦𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑁂𑀝𑁆𑀞𑀲𑁆𑀲𑀸’’𑀢𑀺𑀆𑀤𑀺.

𑀢𑀢𑁆𑀣 𑀲𑁂𑀝𑁆𑀞𑀲𑁆𑀲𑀸𑀢𑀺 𑀥𑀦𑀥𑀜𑁆𑀜𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀺𑀉𑀧𑀪𑁄𑀕𑀧𑀭𑀺𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀘𑁂𑀯 𑀕𑀸𑀫𑀭𑀸𑀚𑀥𑀸𑀦𑀺𑀔𑁂𑀢𑁆𑀢𑀯𑀢𑁆𑀣𑀼𑀦𑀤𑀺𑀢𑀴𑀸𑀓𑀸𑀭𑀸𑀫𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀘 𑀧𑀲𑀢𑁆𑀣𑀢𑀭𑀲𑁆𑀲. 𑀦𑀸𑀪𑀺𑀪𑀽𑀢𑁂𑀢𑀺 𑀫𑀚𑁆𑀛𑀯𑀢𑁆𑀢𑀺𑀢𑀸𑀬 𑀦𑀸𑀪𑀺𑀲𑀤𑀺𑀲𑁂. 𑀦𑀺𑀭𑀸𑀓𑀼𑀮𑁂𑀢𑀺 𑀫𑀚𑁆𑀛𑀯𑀢𑁆𑀢𑀺𑀢𑀸𑀬𑁂𑀯 𑀧𑀭𑀺𑀫𑀡𑁆𑀟𑀮𑀸𑀤𑀺𑀲𑀫𑁆𑀪𑀯𑀢𑁄 𑀯𑀺𑀮𑁄𑀧𑀸𑀤𑀺𑀆𑀓𑀼𑀮𑀭𑀳𑀺𑀢𑁂. 𑀲𑀩𑁆𑀩𑀲𑁆𑀲 𑀧𑀦 𑀮𑁄𑀓𑀲𑁆𑀲 𑀭𑀸𑀫𑀡𑀻𑀬𑀓𑁂 𑀲𑀫𑁆𑀧𑀺𑀡𑁆𑀟𑀺𑀢𑁂 𑀯𑀺𑀬 𑀭𑀫𑀡𑀻𑀬𑀢𑀭𑁂 𑀪𑀽𑀢𑀫𑀗𑁆𑀕𑀮𑁂 𑀕𑀸𑀫𑁂𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀼𑀦𑀧𑀺 𑀓𑀺𑀁𑀯𑀺𑀲𑀺𑀝𑁆𑀞𑁂𑀢𑀺 𑀆𑀳 ‘‘𑀓𑀤𑀮𑀻’’𑀢𑀺𑀆𑀤𑀺. 𑀓𑀤𑀮𑀻 𑀘 𑀲𑀸𑀮𑀜𑁆𑀘 𑀢𑀸𑀮𑀜𑁆𑀘 𑀉𑀘𑁆𑀙𑀼 𑀘 𑀦𑀸𑀴𑀺𑀓𑁂𑀭𑀸 𑀘 𑀓𑀤𑀮𑀻…𑀧𑁂… 𑀦𑀸𑀴𑀺𑀓𑁂𑀭𑀸, 𑀢𑁂𑀲𑀁 𑀯𑀦𑀸𑀦𑀺 𑀓𑀤𑀮𑀻…𑀧𑁂… 𑀦𑀸𑀴𑀺𑀓𑁂𑀭𑀯𑀦𑀸𑀦𑀺, 𑀢𑁂𑀳𑀺 𑀆𑀓𑀼𑀮𑁂 𑀆𑀓𑀺𑀡𑁆𑀡𑁂𑀢𑀺 𑀅𑀢𑁆𑀣𑁄. 𑀓𑀫𑀮𑀸𑀦𑀺 𑀘 𑀉𑀧𑁆𑀧𑀮𑀸𑀦𑀺 𑀘 𑀓𑀫𑀮𑀼𑀧𑁆𑀧𑀮𑀸𑀦𑀺, 𑀢𑁂𑀳𑀺 𑀲𑀜𑁆𑀙𑀦𑁆𑀦𑀸 𑀓𑀫𑀮𑀼𑀧𑁆𑀧𑀮𑀲𑀜𑁆𑀙𑀦𑁆𑀦𑀸, 𑀲𑀮𑀺𑀮𑀲𑁆𑀲 𑀆𑀲𑀬𑀸 𑀲𑀮𑀺𑀮𑀸𑀲𑀬𑀸, 𑀓𑀫𑀮𑀼𑀧𑁆𑀧𑀮𑀲𑀜𑁆𑀙𑀦𑁆𑀦𑀸 𑀘 𑀢𑁂 𑀲𑀮𑀺𑀮𑀸𑀲𑀬𑀸 𑀘𑀸𑀢𑀺 𑀓𑀫𑀮…𑀧𑁂… 𑀲𑀮𑀺𑀮𑀸𑀲𑀬𑀸, 𑀢𑁂𑀳𑀺 𑀲𑁄𑀪𑀺𑀢𑁄 𑀓𑀫𑀮𑀼𑀧𑁆𑀧𑀮𑀲𑀜𑁆𑀙𑀦𑁆𑀦𑀲𑀮𑀺𑀮𑀸𑀲𑀬𑀲𑁄𑀪𑀺𑀢𑁄, 𑀢𑀲𑁆𑀫𑀺𑀁.

𑀓𑀸𑀯𑁂𑀭𑀺𑀬𑀸 𑀚𑀮𑀁 𑀓𑀸𑀯𑁂𑀭𑀺𑀚𑀮𑀁, 𑀓𑀸𑀯𑁂𑀭𑀺𑀚𑀮𑀲𑁆𑀲 𑀲𑀫𑁆𑀧𑀸𑀢𑁄 𑀧𑀯𑀢𑁆𑀢𑀦𑀁 𑀓𑀸𑀯𑁂𑀭𑀺𑀚𑀮𑀲𑀫𑁆𑀧𑀸𑀢𑁄, 𑀢𑁂𑀦 𑀧𑀭𑀺 𑀲𑀫𑀦𑁆𑀢𑀢𑁄 𑀪𑀽𑀢𑀁 𑀧𑀯𑀢𑁆𑀢𑀺𑀢𑀁 𑀫𑀳𑀻𑀢𑀮𑀁 𑀏𑀢𑀲𑁆𑀲𑀸𑀢𑀺 𑀓𑀸𑀯𑁂𑀭𑀺𑀚𑀮𑀲𑀫𑁆𑀧𑀸𑀢𑀧𑀭𑀺𑀪𑀽𑀢𑀫𑀳𑀻𑀢𑀮𑁄, 𑀢𑀲𑁆𑀫𑀺𑀁. 𑀇𑀤𑁆𑀥𑁂𑀢𑀺 𑀦𑀸𑀦𑀸𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀺𑀤𑁆𑀥𑁂. 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑁂𑀢𑀺 𑀲𑀩𑁆𑀩𑀲𑀼𑀔𑁄𑀧𑀓𑀭𑀡𑀲𑀫𑁆𑀧𑀦𑁆𑀦𑁂. 𑀫𑀗𑁆𑀕𑀮𑁂𑀢𑀺 𑀚𑀦𑀸𑀦𑀁 𑀇𑀤𑁆𑀥𑀺𑀯𑀼𑀤𑁆𑀥𑀺𑀓𑀸𑀭𑀡𑀪𑀽𑀢𑁂. 𑀪𑀽𑀢𑀫𑀗𑁆𑀕𑀮𑁂𑀢𑀺 𑀏𑀯𑀁𑀦𑀸𑀫𑀓𑁂 𑀕𑀸𑀫𑁂.

𑀧𑀯𑀭𑁄 𑀢𑀺𑀭𑀢𑀸𑀭𑀻𑀡𑀢𑀮𑀸𑀤𑀺𑀕𑀡𑁂𑀳𑀺 𑀓𑀼𑀮𑀸𑀘𑀮𑀘𑀓𑁆𑀓𑀪𑁄𑀕𑀺𑀦𑀸 𑀪𑁄𑀕𑀯𑀮𑀬𑀲𑀻𑀤𑀦𑁆𑀢𑀭𑀲𑀸𑀕𑀭𑀸𑀤𑀺 𑀆𑀓𑀸𑀭𑁄 𑀏𑀢𑀸𑀲𑀦𑁆𑀢𑀺 𑀧𑀯𑀭𑀸𑀓𑀸𑀭𑀸, 𑀧𑀸𑀓𑀸𑀭𑀸 𑀘 𑀧𑀭𑀺𑀔𑀸 𑀘 𑀧𑀸𑀓𑀸𑀭𑀧𑀭𑀺𑀔𑀸, 𑀧𑀯𑀭𑀸𑀓𑀸𑀭𑀸 𑀘 𑀢𑀸 𑀧𑀸𑀓𑀸𑀭𑀧𑀭𑀺𑀔𑀸 𑀘𑀸𑀢𑀺 𑀧𑀯𑀭𑀸𑀓𑀸𑀭𑀧𑀸𑀓𑀸𑀭𑀧𑀭𑀺𑀔𑀸, 𑀢𑀸𑀳𑀺 𑀧𑀭𑀺𑀯𑀸𑀭𑀺𑀢𑁄 𑀧𑀯𑀭𑀸𑀓𑀸𑀭𑀧𑀸𑀓𑀸𑀭𑀧𑀭𑀺𑀔𑀸𑀧𑀭𑀺𑀯𑀸𑀭𑀺𑀢𑁄, 𑀢𑀲𑁆𑀫𑀺𑀁. 𑀤𑀲𑁆𑀲𑀦𑀻𑀬𑁂𑀢𑀺 𑀤𑀲𑁆𑀲𑀦𑀸𑀭𑀳𑁂. 𑀫𑀦𑁄 𑀭𑀫𑀢𑀺 𑀏𑀢𑁆𑀣𑀸𑀢𑀺 𑀫𑀦𑁄𑀭𑀫𑁄, 𑀢𑀲𑁆𑀫𑀺𑀁.

𑀢𑀻𑀭𑀲𑁆𑀲 𑀅𑀦𑁆𑀢𑁄 𑀢𑀻𑀭𑀦𑁆𑀢𑁄, 𑀢𑀻𑀭𑀫𑁂𑀯 𑀯𑀸 𑀅𑀦𑁆𑀢𑁄 𑀢𑀻𑀭𑀦𑁆𑀢𑁄, 𑀧𑁄𑀓𑁆𑀔𑀭𑀡𑀺𑀲𑁄𑀩𑁆𑀪𑀉𑀤𑀓𑀯𑀸𑀳𑀓𑀧𑀭𑀺𑀔𑀸𑀤𑀻𑀦𑀁 𑀓𑀽𑀮𑀧𑁆𑀧𑀤𑁂𑀲𑁄, 𑀢𑀻𑀭𑀦𑁆𑀢𑁂 𑀭𑀼𑀳𑀺𑀁𑀲𑀼 𑀚𑀸𑀬𑀺𑀁𑀲𑀽𑀢𑀺 𑀢𑀻𑀭𑀦𑁆𑀢𑀭𑀼𑀳𑀸, 𑀢𑀻𑀭𑀦𑁆𑀢𑀭𑀼𑀳𑀸 𑀘 𑀢𑁂 𑀩𑀳𑀼𑀢𑁆𑀢𑀸 𑀅𑀢𑀻𑀭𑀸 𑀅𑀧𑀭𑀺𑀘𑁆𑀙𑁂𑀤𑀸 𑀘𑀸𑀢𑀺 𑀢𑀻𑀭𑀦𑁆𑀢𑀭𑀼𑀳𑀯𑀸𑀢𑀻𑀭𑀸. 𑀯-𑀓𑀸𑀭𑁄 𑀲𑀦𑁆𑀥𑀺𑀚𑁄, 𑀢𑀭𑀽𑀦𑀁 𑀭𑀸𑀚𑀸𑀦𑁄 𑀢𑀭𑀼𑀭𑀸𑀚𑀸𑀦𑁄, 𑀢𑀻𑀭𑀦𑁆𑀢𑀭𑀼𑀳𑀯𑀸𑀢𑀻𑀭𑀸 𑀘 𑀢𑁂 𑀢𑀭𑀼𑀭𑀸𑀚𑀸𑀦𑁄 𑀘𑀸𑀢𑀺 𑀢𑀻𑀭𑀦𑁆𑀢𑀭𑀼𑀳𑀯𑀸𑀢𑀻𑀭𑀢𑀭𑀼𑀭𑀸𑀚𑀸𑀦𑁄, 𑀢𑁂𑀳𑀺 𑀯𑀺𑀭𑀸𑀚𑀺𑀢𑁄 𑀢𑀻𑀭𑀦𑁆𑀢…𑀧𑁂… 𑀯𑀺𑀭𑀸𑀚𑀺𑀢𑁄, 𑀢𑀲𑁆𑀫𑀺𑀁, 𑀧𑀼𑀧𑁆𑀨𑀽𑀧𑀕𑀨𑀮𑀽𑀧𑀕𑀙𑀸𑀬𑀽𑀧𑀕𑁂𑀳𑀺 𑀫𑀳𑀸𑀭𑀼𑀓𑁆𑀔𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁂𑀢𑀺 𑀅𑀢𑁆𑀣𑁄. ‘‘𑀢𑀻𑀭𑀦𑁆𑀢𑀭𑀼𑀳𑀯𑀸𑀦𑀢𑀭𑀼𑀭𑀸𑀚𑀺𑀯𑀺𑀭𑀸𑀚𑀺𑀢𑁂’’𑀢𑀺 𑀯𑀸 𑀧𑀸𑀞𑁄, 𑀢𑀻𑀭𑀦𑁆𑀢𑀭𑀼𑀳𑀸𑀦𑀁 𑀯𑀸𑀦𑀢𑀭𑀽𑀦𑀁 𑀯𑁂𑀢𑀭𑀽𑀧𑀭𑀼𑀓𑁆𑀔𑀸𑀦𑀁 𑀭𑀸𑀚𑀻𑀳𑀺 𑀧𑀦𑁆𑀢𑀻𑀳𑀺 𑀧𑀝𑀺𑀫𑀡𑁆𑀟𑀺𑀢𑁂𑀢𑀺 𑀅𑀢𑁆𑀣𑁄. 𑀤𑀺𑀚𑀸𑀦𑀁 𑀕𑀡𑀸 𑀤𑀺𑀚𑀕𑀡𑀸, 𑀦𑀸𑀦𑀸 𑀘 𑀢𑁂 𑀤𑀺𑀚𑀕𑀡𑀸 𑀘𑀸𑀢𑀺 𑀦𑀸𑀦𑀸𑀤𑀺𑀚𑀕𑀡𑀸, 𑀢𑁂 𑀢𑀢𑁄 𑀢𑀢𑁄 𑀆𑀕𑀦𑁆𑀢𑁆𑀯𑀸 𑀭𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀦𑀸𑀦𑀸𑀤𑀺𑀚𑀕𑀡𑀸𑀭𑀸𑀫𑁄, 𑀢𑀲𑁆𑀫𑀺𑀁, 𑀲𑀼𑀓𑀓𑁄𑀓𑀺𑀮𑀫𑀬𑀽𑀭𑀸𑀤𑀺𑀲𑀓𑀼𑀡𑀸𑀦𑀁 𑀆𑀕𑀦𑁆𑀢𑁆𑀯𑀸 𑀭𑀫𑀦𑀝𑁆𑀞𑀸𑀦𑀪𑀽𑀢𑁂𑀢𑀺 𑀅𑀢𑁆𑀣𑁄. 𑀦𑀸𑀦𑀸𑀭𑀸𑀫𑀫𑀦𑁄𑀭𑀫𑁂𑀢𑀺 𑀦𑀸𑀦𑀸 𑀅𑀦𑁂𑀓𑁂 𑀆𑀭𑀸𑀫𑀸 𑀧𑀼𑀧𑁆𑀨𑀨𑀮𑀸𑀭𑀸𑀫𑀸 𑀦𑀸𑀦𑀸𑀭𑀸𑀫𑀸, 𑀢𑁂𑀳𑀺 𑀫𑀦𑁄𑀭𑀫𑁄𑀢𑀺 𑀦𑀸𑀦𑀸𑀭𑀸𑀫𑀫𑀦𑁄𑀭𑀫𑁄, 𑀢𑀲𑁆𑀫𑀺𑀁.

𑀘𑀸𑀭𑀽 𑀘 𑀢𑁂 𑀧𑀗𑁆𑀓𑀚𑀸 𑀘𑀸𑀢𑀺 𑀘𑀸𑀭𑀼𑀧𑀗𑁆𑀓𑀚𑀸, 𑀓𑀫𑀮𑀼𑀧𑁆𑀧𑀮𑀓𑀼𑀫𑀼𑀤𑀸𑀤𑀬𑁄, 𑀘𑀸𑀭𑀼𑀧𑀗𑁆𑀓𑀚𑁂𑀳𑀺 𑀲𑀁𑀓𑀺𑀡𑁆𑀡𑀸 𑀲𑀜𑁆𑀙𑀦𑁆𑀦𑀸 𑀘𑀸𑀭𑀼𑀧𑀗𑁆𑀓𑀚𑀲𑀁𑀓𑀺𑀡𑁆𑀡𑀸, 𑀘𑀸𑀭𑀼𑀧𑀗𑁆𑀓𑀚𑀲𑀁𑀓𑀺𑀡𑁆𑀡𑀸 𑀘 𑀢𑁂 𑀢𑀴𑀸𑀓𑀸 𑀘𑁂𑀢𑀺 𑀘𑀸𑀭𑀼𑀧𑀗𑁆𑀓𑀚𑀲𑀁𑀓𑀺𑀡𑁆𑀡𑀢𑀴𑀸𑀓𑀸, 𑀢𑁂𑀳𑀺 𑀲𑀫𑀮𑀗𑁆𑀓𑀢𑁄 𑀯𑀺𑀪𑀽𑀲𑀺𑀢𑁄 𑀘𑀸𑀭𑀼…𑀧𑁂… 𑀲𑀫𑀮𑀗𑁆𑀓𑀢𑁄, 𑀢𑀲𑁆𑀫𑀺𑀁. 𑀲𑀼𑀦𑁆𑀤𑀭𑁄 𑀫𑀥𑀼𑀭𑁄 𑀭𑀲𑁄 𑀅𑀲𑁆𑀲𑀸𑀢𑀺 𑀲𑀼𑀭𑀲𑀁, 𑀲𑀼𑀭𑀲𑀜𑁆𑀘 𑀢𑀁 𑀉𑀤𑀓𑀜𑁆𑀘𑀸𑀢𑀺 𑀲𑀼𑀭𑀲𑁄𑀤𑀓𑀁, 𑀲𑀼𑀭𑀲𑁄𑀤𑀓𑁂𑀦 𑀲𑀫𑁆𑀧𑀼𑀡𑁆𑀡𑀸 𑀲𑀼𑀭𑀲𑁄𑀤𑀓𑀲𑀫𑁆𑀧𑀼𑀡𑁆𑀡𑀸, 𑀯𑀭𑀸 𑀘 𑀢𑁂 𑀓𑀽𑀧𑀸 𑀘𑀸𑀢𑀺 𑀯𑀭𑀓𑀽𑀧𑀸, 𑀲𑀼𑀭𑀲𑁄𑀤𑀓𑀲𑀫𑁆𑀧𑀼𑀡𑁆𑀡𑀸 𑀘 𑀢𑁂 𑀯𑀭𑀓𑀽𑀧𑀸 𑀘𑁂𑀢𑀺 𑀲𑀼𑀭𑀲𑁄𑀤𑀓𑀲𑀫𑁆𑀧𑀼𑀡𑁆𑀡𑀯𑀭𑀓𑀽𑀧𑀸, 𑀢𑁂𑀳𑀺 𑀉𑀧𑀲𑁄𑀪𑀺𑀢𑁄 𑀲𑀼𑀭𑀲𑁄…𑀧𑁂… 𑀓𑀽𑀧𑀲𑁄𑀪𑀺𑀢𑁄, 𑀢𑀲𑁆𑀫𑀺𑀁.

𑀯𑀺𑀲𑁂𑀲𑁂𑀦 𑀘𑀺𑀢𑁆𑀭𑀸𑀢𑀺 𑀯𑀺𑀘𑀺𑀢𑁆𑀭𑀸, 𑀯𑀺𑀘𑀺𑀢𑁆𑀭𑀸 𑀘 𑀢𑁂 𑀯𑀺𑀧𑀼𑀮𑀸 𑀘𑀸𑀢𑀺 𑀯𑀺𑀘𑀺𑀢𑁆𑀭𑀯𑀺𑀧𑀼𑀮𑀸, 𑀯𑀺𑀘𑀺𑀢𑁆𑀭𑀯𑀺𑀧𑀼𑀮𑀸 𑀘 𑀢𑁂 𑀫𑀡𑁆𑀟𑀧𑀸 𑀘𑀸𑀢𑀺…𑀧𑁂… 𑀫𑀡𑁆𑀟𑀧𑀸, 𑀅𑀢𑀺𑀲𑀬𑁂𑀦 𑀉𑀕𑁆𑀕𑀢𑀸 𑀅𑀘𑁆𑀘𑀼𑀕𑁆𑀕𑀢𑀸, 𑀅𑀘𑁆𑀘𑀼𑀕𑁆𑀕𑀢𑀸 𑀘 𑀢𑁂 𑀯𑀭𑀫𑀡𑁆𑀟𑀧𑀸 𑀘𑀸𑀢𑀺 𑀅𑀘𑁆𑀘𑀼𑀕𑁆𑀕𑀯𑀭𑀫𑀡𑁆𑀟𑀧𑀸, 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀯𑀡𑁆𑀡𑀮𑁄𑀧𑁄, 𑀯𑀺𑀘𑀺𑀢𑁆𑀭𑀯𑀺𑀧𑀼𑀮𑀸 𑀘 𑀢𑁂 𑀅𑀘𑁆𑀘𑀼𑀕𑁆𑀕𑀯𑀭𑀫𑀡𑁆𑀟𑀧𑀸 𑀘𑀸𑀢𑀺 𑀯𑀺𑀘𑀺𑀢𑁆𑀭𑀯𑀺𑀧𑀼𑀮𑀅𑀘𑁆𑀘𑀼𑀕𑁆𑀕𑀯𑀭𑀫𑀡𑁆𑀟𑀧𑀸, 𑀢𑁂𑀳𑀺 𑀫𑀡𑁆𑀟𑀺𑀢𑁄 𑀯𑀺𑀪𑀽𑀲𑀺𑀢𑁄 𑀯𑀺𑀘𑀺𑀢𑁆𑀭…𑀧𑁂… 𑀫𑀡𑁆𑀟𑀺𑀢𑁄, 𑀢𑀲𑁆𑀫𑀺𑀁. 𑀫𑀡𑁆𑀟𑀁 𑀲𑀽𑀭𑀺𑀬𑀭𑀲𑁆𑀫𑀺𑀁 𑀧𑀸𑀢𑀺 𑀭𑀓𑁆𑀔𑀢𑀻𑀢𑀺 𑀫𑀡𑁆𑀟𑀧𑁄. 𑀢𑀢𑁄 𑀢𑀢𑁄 𑀆𑀕𑀫𑁆𑀫 𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀯𑀸𑀲𑁄, 𑀧𑀸𑀲𑀸𑀤𑀳𑀫𑁆𑀫𑀺𑀬𑀫𑀸𑀴𑀸𑀤𑀬𑁄. 𑀅𑀦𑁂𑀓𑁂𑀳𑀻𑀢𑀺 𑀩𑀳𑀽𑀳𑀺. 𑀅𑀘𑁆𑀘𑀦𑁆𑀢𑀦𑁆𑀢𑀺 𑀅𑀢𑀺𑀲𑀬𑁂𑀦.

𑀥𑀭𑀡𑀻𑀢𑀮𑀁 𑀪𑁂𑀢𑁆𑀯𑀸 𑀉𑀕𑁆𑀕𑀢𑁂𑀦 𑀯𑀺𑀬, 𑀔𑀭𑀁 𑀨𑀭𑀼𑀲𑀁 𑀓𑁂𑀮𑀸𑀲𑀲𑀺𑀔𑀭𑀁 𑀚𑀺𑀢𑁆𑀯𑀸 𑀅𑀯𑀳𑀲𑀦𑁆𑀢𑁂𑀦 𑀯𑀺𑀬 𑀣𑀽𑀧𑁂𑀦 𑀘 𑀉𑀧𑀲𑁄𑀪𑀺𑀢𑁂 𑀯𑀺𑀳𑀸𑀭𑁂𑀢𑀺 𑀬𑁄𑀚𑀦𑀸.

𑀅𑀫𑁆𑀩𑀼𑀁 𑀤𑀤𑀸𑀢𑀻𑀢𑀺 𑀅𑀫𑁆𑀩𑀼𑀤𑁄, 𑀲𑀭𑀤𑁂 𑀅𑀫𑁆𑀩𑀼𑀤𑁄 𑀲𑀭𑀤𑀫𑁆𑀩𑀼𑀤𑁄, 𑀣𑀼𑀮𑁆𑀮𑀦𑀢𑀫𑀳𑀦𑁆𑀢𑀪𑀸𑀯𑀲𑀸𑀫𑀜𑁆𑀜𑁂𑀦 𑀲𑀭𑀤𑀫𑁆𑀩𑀼𑀤𑁂𑀦 𑀲𑀗𑁆𑀓𑀸𑀲𑁄 𑀲𑀭𑀤𑀫𑁆𑀩𑀼𑀤𑀲𑀗𑁆𑀓𑀸𑀲𑁄, 𑀢𑀲𑁆𑀫𑀺𑀁. 𑀲𑀫𑁆𑀫𑀸 𑀉𑀲𑁆𑀲𑀺𑀢𑁄 𑀉𑀕𑁆𑀕𑀢𑁄𑀢𑀺 𑀲𑀫𑀼𑀲𑁆𑀲𑀺𑀢𑁄, 𑀢𑀲𑁆𑀫𑀺𑀁. 𑀑𑀮𑁄𑀓𑁂𑀦𑁆𑀢𑀸𑀦𑀁, 𑀯𑀲𑀦𑁆𑀢𑀸𑀦𑀜𑁆𑀘 𑀧𑀲𑀸𑀤𑀁 𑀘𑀺𑀢𑁆𑀢𑀲𑁆𑀲 𑀢𑁄𑀲𑀁 𑀚𑀦𑁂𑀢𑀻𑀢𑀺 𑀧𑀲𑀸𑀤𑀚𑀦𑀦𑀁, 𑀢𑀲𑁆𑀫𑀺𑀁. 𑀏𑀢𑁆𑀢𑀸𑀯𑀢𑀸 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀓𑀣𑀸𑀬 𑀧𑀯𑀢𑁆𑀢𑀺𑀢𑀤𑁂𑀲𑀁 𑀤𑀲𑁆𑀲𑁂𑀢𑀺, ‘‘𑀯𑀲𑀢𑀸 𑀫𑀬𑀸’’𑀢𑀺 𑀓𑀢𑁆𑀢𑀸𑀭𑀁.

𑀤𑁂𑀯𑀤𑀢𑁆𑀢𑀘𑀺𑀜𑁆𑀘𑀫𑀸𑀡𑀯𑀺𑀓𑀸𑀤𑀻𑀳𑀺 𑀓𑀢𑀸𑀧𑀭𑀸𑀥𑀲𑁆𑀲, 𑀲𑀻𑀢𑀼𑀡𑁆𑀳𑀸𑀤𑀺𑀧𑀭𑀺𑀲𑁆𑀲𑀬𑀲𑁆𑀲 𑀘 𑀲𑀳𑀦𑀢𑁄, 𑀲𑀲𑀦𑁆𑀢𑀸𑀦𑀕𑀢𑀓𑀺𑀮𑁂𑀲𑀸𑀤𑀻𑀦𑀁 𑀳𑀦𑀦𑀢𑁄 𑀘 𑀲𑀻𑀳𑁄 𑀯𑀺𑀬𑀸𑀢𑀺 𑀲𑀻𑀳𑁄, 𑀩𑀼𑀤𑁆𑀥𑁄 𑀘 𑀲𑁄 𑀲𑀻𑀳𑁄 𑀘𑀸𑀢𑀺 𑀩𑀼𑀤𑁆𑀥𑀲𑀻𑀳𑁄. 𑀲𑁂𑀝𑁆𑀞𑀧𑀭𑀺𑀬𑀸𑀬𑁄 𑀯𑀸 𑀲𑀻𑀳-𑀲𑀤𑁆𑀤𑁄, 𑀩𑀼𑀤𑁆𑀥𑀲𑁂𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀲𑁆𑀲𑀸𑀢𑀺 𑀤𑁂𑀲𑀺𑀢𑀲𑁆𑀲. 𑀯𑀺𑀦𑀬𑀲𑁆𑀲 𑀯𑀺𑀦𑀬𑀧𑀺𑀝𑀓𑀲𑁆𑀲. 𑀯𑀺𑀦𑀺𑀘𑁆𑀙𑀬𑁄𑀢𑀺 𑀧𑀸𑀞𑀸𑀕𑀢𑁄 𑀘𑁂𑀯 𑀅𑀝𑁆𑀞𑀓𑀣𑀸𑀕𑀢𑁄 𑀘 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀪𑀢𑁄 𑀘 𑀯𑀺𑀦𑀺𑀘𑁆𑀙𑀬𑁄. 𑀩𑀼𑀤𑁆𑀥𑀲𑀻𑀳𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀫𑀳𑀸𑀣𑁂𑀭𑀁. 𑀲𑀫𑀼𑀤𑁆𑀤𑀺𑀲𑁆𑀲𑀸𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸, 𑀢𑁂𑀦 𑀓𑀢𑀆𑀬𑀸𑀘𑀦𑀁 𑀧𑀝𑀺𑀘𑁆𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀺𑀦𑀸 𑀩𑀸𑀳𑀺𑀭𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑀺𑀢𑀁.

𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑀫𑀫 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀩𑀼𑀤𑁆𑀥𑀲𑀻𑀳𑀁 𑀲𑀫𑀼𑀤𑁆𑀤𑀺𑀲𑁆𑀲 𑀪𑀺𑀓𑁆𑀔𑀽𑀦𑀁 𑀳𑀺𑀢𑀢𑁆𑀣𑀸𑀬 𑀲𑀫𑀸𑀲𑀢𑁄 𑀯𑀭𑀧𑀸𑀲𑀸𑀤𑁂 𑀯𑀲𑀢𑀸 𑀫𑀬𑀸 𑀓𑀢𑁄𑀢𑀺 𑀬𑁄𑀚𑀦𑀸.

𑀓𑀺𑀫𑀢𑁆𑀣𑀸𑀬𑀸𑀢𑀺 𑀆𑀳 ‘‘𑀯𑀺𑀦𑀬𑀲𑁆𑀲𑀸𑀯𑀩𑁄𑀥𑀢𑁆𑀣𑀁, 𑀲𑀼𑀔𑁂𑀦𑁂𑀯𑀸𑀘𑀺𑀭𑁂𑀦 𑀘𑀸’’𑀢𑀺, 𑀅𑀦𑀼𑀧𑀸𑀤𑀺𑀲𑁂𑀲𑁂𑀦 𑀦𑀺𑀩𑁆𑀩𑀸𑀦𑀧𑀭𑀺𑀬𑀦𑁆𑀢𑀸𑀦𑀺𑀲𑀁𑀲𑀲𑁆𑀲 𑀯𑀺𑀦𑀬𑀧𑀺𑀝𑀓𑀲𑁆𑀲 𑀧𑀓𑀭𑀡𑀲𑁆𑀲 𑀕𑀦𑁆𑀣𑀯𑀲𑁂𑀦 𑀲𑀫𑀸𑀲𑁂𑀢𑁆𑀯𑀸 𑀅𑀢𑁆𑀣𑀯𑀲𑁂𑀦 𑀲𑀼𑀝𑁆𑀞𑀼 𑀯𑀺𑀦𑀺𑀘𑁆𑀙𑀺𑀢𑀢𑁆𑀢𑀸 𑀲𑀼𑀔𑁂𑀦 𑀘𑁂𑀯 𑀅𑀘𑀺𑀭𑁂𑀦 𑀘 𑀅𑀯𑀩𑁄𑀥𑀦𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀺𑀓𑁆𑀔𑀽𑀦𑀦𑁆𑀢𑀺 𑀧𑀥𑀸𑀦𑀦𑀺𑀤𑀲𑁆𑀲𑀦𑀁, 𑀏𑀓𑀲𑁂𑀲𑀦𑀺𑀤𑁆𑀤𑁂𑀲𑁄 𑀯𑀸 𑀳𑁂𑀝𑁆𑀞𑀸 𑁋

‘‘𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀳𑀺𑀢𑀢𑁆𑀣𑀸𑀬 𑀲𑀫𑀸𑀳𑀺𑀢𑁄. 𑀧𑀯𑀓𑁆𑀔𑀸𑀫𑀻’’𑀢𑀺 (𑀯𑀺. 𑀯𑀺. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸 𑁨) 𑁋

𑀆𑀭𑀤𑁆𑀥𑀢𑁆𑀢𑀸. 𑀇𑀫𑀺𑀦𑀸 𑀧𑀬𑁄𑀚𑀦𑀁 𑀤𑀲𑁆𑀲𑀺𑀢𑀁.

𑁩𑁧𑁭𑁯. 𑀏𑀯𑀁 𑀤𑁂𑀲𑀓𑀢𑁆𑀢𑀼𑀦𑀺𑀫𑀺𑀢𑁆𑀢𑀧𑀬𑁄𑀚𑀦𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀓𑀸𑀮𑀦𑀺𑀬𑀫𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀘𑁆𑀘𑀼𑀢𑀸’’𑀢𑀺𑀆𑀤𑀺. 𑀯𑀺𑀓𑁆𑀓𑀫𑀦𑀁 𑀯𑀺𑀓𑁆𑀓𑀦𑁆𑀢𑁄, 𑀯𑀺𑀓𑁆𑀓𑀫𑁄𑀢𑀺 𑀅𑀢𑁆𑀣𑁄. 𑀅𑀘𑁆𑀘𑀼𑀢𑀁 𑀓𑁂𑀦𑀘𑀺 𑀅𑀦𑀪𑀺𑀪𑀽𑀢𑀁, 𑀢𑀜𑁆𑀘 𑀢𑀁 𑀯𑀺𑀓𑁆𑀓𑀦𑁆𑀢𑀜𑁆𑀘𑀸𑀢𑀺 𑀅𑀘𑁆𑀘𑀼𑀢𑀯𑀺𑀓𑁆𑀓𑀦𑁆𑀢𑀁, 𑀅𑀘𑁆𑀘𑀼𑀢𑀲𑁆𑀲 𑀦𑀸𑀭𑀸𑀬𑀦𑀲𑁆𑀲 𑀯𑀺𑀬 𑀅𑀘𑁆𑀘𑀼𑀢𑀯𑀺𑀓𑁆𑀓𑀦𑁆𑀢𑀁 𑀏𑀢𑀲𑁆𑀲𑀸𑀢𑀺 𑀅𑀘𑁆𑀘𑀼𑀢𑀘𑁆𑀘𑀼𑀢𑀯𑀺𑀓𑁆𑀓𑀦𑁆𑀢𑁄. 𑀓𑁄 𑀲𑁄? 𑀭𑀸𑀚𑀸, 𑀢𑀲𑁆𑀫𑀺𑀁. 𑀓𑀮𑀫𑁆𑀪𑀓𑀼𑀮𑀁 𑀦𑀦𑁆𑀤𑀬𑀢𑀻𑀢𑀺 𑀓𑀮𑀫𑁆𑀪𑀓𑀼𑀮𑀦𑀦𑁆𑀤𑀦𑁄, 𑀢𑀲𑁆𑀫𑀺𑀁. 𑀇𑀫𑀺𑀦𑀸 𑀢𑀲𑁆𑀲 𑀓𑀼𑀮𑀯𑀁𑀲𑁄 𑀦𑀺𑀤𑀲𑁆𑀲𑀺𑀢𑁄. 𑀓𑀮𑀫𑁆𑀪𑀓𑀼𑀮𑀯𑀁𑀲𑀚𑀸𑀢𑁂 𑀅𑀘𑁆𑀘𑀼𑀢𑀘𑁆𑀘𑀼𑀢𑀯𑀺𑀓𑁆𑀓𑀦𑁆𑀢𑀦𑀸𑀫𑁂 𑀘𑁄𑀴𑀭𑀸𑀚𑀺𑀦𑀺 𑀫𑀳𑀺𑀁 𑀘𑁄𑀴𑀭𑀝𑁆𑀞𑀁 𑀲𑀫𑀦𑀼𑀲𑀸𑀲𑀦𑁆𑀢𑁂 𑀲𑀫𑁆𑀫𑀸 𑀅𑀦𑀼𑀲𑀸𑀲𑀦𑁆𑀢𑁂 𑀲𑀢𑀺 𑀢𑀲𑁆𑀫𑀺𑀁 𑀘𑁄𑀴𑀭𑀸𑀚𑀺𑀦𑀺 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀲𑀢𑀺 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑀫𑀬𑀸 𑀆𑀭𑀤𑁆𑀥𑁄 𑀘𑁂𑀯 𑀲𑀫𑀸𑀧𑀺𑀢𑁄 𑀘𑀸𑀢𑀺. 𑀇𑀫𑀺𑀦𑀸 𑀓𑀸𑀮𑀁 𑀦𑀺𑀤𑀲𑁆𑀲𑁂𑀢𑀺.

𑁩𑁧𑁮𑁦. 𑀇𑀤𑀸𑀦𑀺 𑀇𑀫𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀧𑁆𑀧𑀓𑀭𑀡𑀁 𑀓𑀭𑁄𑀦𑁆𑀢𑁂𑀦 𑀅𑀢𑁆𑀢𑀦𑁄 𑀧𑀼𑀜𑁆𑀜𑀲𑀫𑁆𑀧𑀤𑀁 𑀲𑀓𑀮𑀮𑁄𑀓𑀳𑀺𑀢𑀢𑁆𑀣𑀸𑀬 𑀧𑀭𑀺𑀡𑀸𑀫𑁂𑀦𑁆𑀢𑁄 𑀆𑀳 ‘‘𑀬𑀣𑀸’’𑀢𑀺𑀆𑀤𑀺. 𑀅𑀬𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁄 𑀅𑀦𑁆𑀢𑀭𑀸𑀬𑀁 𑀯𑀺𑀦𑀸 𑀬𑀣𑀸 𑀲𑀺𑀤𑁆𑀥𑀺𑀁 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄, 𑀢𑀣𑀸 𑀲𑀢𑁆𑀢𑀸𑀦𑀁 𑀥𑀫𑁆𑀫𑀲𑀁𑀬𑀼𑀢𑀸 𑀓𑀼𑀲𑀮𑀦𑀺𑀲𑁆𑀲𑀺𑀢𑀸 𑀲𑀗𑁆𑀓𑀧𑁆𑀧𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀸, 𑀅𑀥𑀺𑀧𑁆𑀧𑁂𑀢𑀢𑁆𑀣𑀸 𑀯𑀸 𑀲𑀩𑁆𑀩𑁂 𑀅𑀦𑁆𑀢𑀭𑀸𑀬𑀁 𑀯𑀺𑀦𑀸 𑀲𑀺𑀚𑁆𑀛𑀦𑁆𑀢𑀼 𑀦𑀺𑀧𑁆𑀧𑀚𑁆𑀚𑀦𑁆𑀢𑀽𑀢𑀺 𑀬𑁄𑀚𑀦𑀸.

𑁩𑁧𑁮𑁧. 𑀢𑁂𑀦𑁂𑀯 𑀧𑀼𑀜𑁆𑀜𑀧𑁆𑀨𑀮𑀪𑀸𑀯𑁂𑀦 𑀲𑀓𑀮𑀮𑁄𑀓𑀳𑀺𑀢𑁂𑀓𑀳𑁂𑀢𑀼𑀦𑁄 𑀪𑀕𑀯𑀢𑁄 𑀲𑀸𑀲𑀦𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀫𑀸𑀲𑀻𑀲𑀦𑁆𑀢𑁄 𑀆𑀳 ‘‘𑀬𑀸𑀯 𑀢𑀺𑀝𑁆𑀞𑀢𑀻’’𑀢𑀺𑀆𑀤𑀺. ‘‘𑀫𑀦𑁆𑀤𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀺 𑀲𑀻𑀢𑀲𑀺𑀦𑀺𑀤𑁆𑀥𑀏𑀓𑀧𑀩𑁆𑀩𑀢𑀭𑀸𑀚𑀸. 𑀓𑀁 𑀯𑀼𑀘𑁆𑀘𑀢𑀺 𑀉𑀤𑀓𑀁, 𑀢𑁂𑀦 𑀤𑀸𑀭𑀺𑀢𑁄 𑀦𑀺𑀕𑁆𑀕𑀫𑀧𑁆𑀧𑀤𑁂𑀲𑁄 ‘‘𑀓𑀦𑁆𑀤𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀻𑀢𑀲𑀺𑀦𑀺𑀤𑁆𑀥𑀯𑀺𑀧𑀼𑀮𑀧𑀼𑀮𑀺𑀦𑀢𑀮𑁂𑀳𑀺, 𑀲𑀦𑁆𑀤𑀫𑀸𑀦𑀲𑀸𑀢𑀲𑀻𑀢𑀮𑀧𑀲𑀦𑁆𑀦𑀲𑀮𑀺𑀮𑁂𑀳𑀺, 𑀓𑀻𑀴𑀫𑀸𑀦𑀦𑀸𑀦𑀧𑁆𑀧𑀓𑀸𑀭𑀫𑀘𑁆𑀙𑀕𑀼𑀫𑁆𑀩𑁂𑀳𑀺, 𑀉𑀪𑀬𑀢𑀻𑀭𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀮𑀗𑁆𑀓𑀢𑀢𑀭𑀼𑀮𑀢𑀸𑀯𑀦𑁂𑀳𑀺, 𑀓𑀽𑀚𑀫𑀸𑀦𑀲𑀼𑀓𑀲𑀸𑀮𑀺𑀓𑀓𑀑𑀓𑀺𑀮𑀫𑀬𑀽𑀭𑀳𑀁𑀲𑀸𑀤𑀺𑀲𑀓𑀼𑀦𑁆𑀢𑀸𑀪𑀺𑀭𑀼𑀢𑁂𑀳𑀺, 𑀢𑀢𑁆𑀣 𑀢𑀢𑁆𑀣 𑀧𑀭𑀺𑀪𑀫𑀦𑁆𑀢𑀪𑀫𑀭𑀸𑀫𑀯𑀚𑁆𑀚𑀸𑀳𑀺 𑀘 𑀘𑀸𑀭𑀼 𑀫𑀦𑀼𑀜𑁆𑀜𑀸 𑀓𑀦𑁆𑀤𑀭𑀸 𑀏𑀢𑀲𑁆𑀲𑀸𑀢𑀺 𑀘𑀸𑀭𑀼𑀓𑀦𑁆𑀤𑀭𑁄. 𑀓𑀮𑀺 𑀯𑀼𑀘𑁆𑀘𑀢𑀺 𑀅𑀧𑀭𑀸𑀥𑁄, 𑀢𑀁 𑀲𑀸𑀲𑀢𑀺 𑀳𑀺𑀁𑀲𑀢𑀺 𑀅𑀧𑀦𑁂𑀢𑀻𑀢𑀺 𑀓𑀮𑀺𑀲𑀸𑀲𑀦𑀁. ‘‘𑀓𑀮𑀼𑀲𑀸𑀲𑀦’’𑀦𑁆𑀢𑀺 𑀯𑀸 𑀧𑀸𑀞𑁄. 𑀓𑀮𑀼𑀲𑀁 𑀯𑀼𑀘𑁆𑀘𑀢𑀺 𑀧𑀸𑀧𑀁, 𑀢𑀁 𑀅𑀲𑀢𑀺 𑀯𑀺𑀓𑁆𑀔𑀺𑀧𑀢𑀺 𑀤𑀽𑀭𑀫𑀼𑀲𑁆𑀲𑀸𑀭𑀬𑀢𑀻𑀢𑀺 𑀓𑀮𑀼𑀲𑀸𑀲𑀦𑀁, 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀲𑀗𑁆𑀔𑀸𑀢𑀁 𑀢𑀺𑀯𑀺𑀥𑀲𑀸𑀲𑀦𑀁.

𑁩𑁧𑁮𑁨. 𑀏𑀯𑀁 𑀑𑀓𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀳𑀺𑀢𑀲𑀸𑀥𑀓𑀲𑁆𑀲 𑀲𑀸𑀲𑀦𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀁 𑀧𑀢𑁆𑀣𑁂𑀢𑁆𑀯𑀸 𑀢𑁂𑀦𑁂𑀯 𑀧𑀼𑀜𑁆𑀜𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀮𑁄𑀓𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀺𑀓𑀢𑁆𑀣𑀳𑁂𑀢𑀼𑀫𑀸𑀲𑀻𑀲𑀦𑁆𑀢𑁄 𑀆𑀳 ‘‘𑀓𑀸𑀮𑁂’’𑀢𑀺𑀆𑀤𑀺. 𑀓𑀸𑀮𑁂𑀢𑀺 𑀲𑀲𑁆𑀲𑀲𑀫𑀺𑀤𑁆𑀥𑀻𑀦𑀁 𑀅𑀦𑀼𑀭𑀽𑀧𑁂 𑀓𑀸𑀮𑁂. 𑀲𑀫𑁆𑀫𑀸 𑀧𑀯𑀲𑁆𑀲𑀦𑁆𑀢𑀽𑀢𑀺 𑀅𑀯𑀼𑀝𑁆𑀞𑀺𑀅𑀢𑀺𑀯𑀼𑀝𑁆𑀞𑀺𑀤𑁄𑀲𑀭𑀳𑀺𑀢𑀸 𑀬𑀣𑀸 𑀲𑀲𑁆𑀲𑀸𑀤𑀻𑀦𑀺 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀢𑀣𑀸 𑀯𑀲𑁆𑀲𑀁 𑀯𑀼𑀝𑁆𑀞𑀺𑀥𑀸𑀭𑀁 𑀧𑀯𑀲𑁆𑀲𑀦𑁆𑀢𑀽𑀢𑀺 𑀅𑀢𑁆𑀣𑁄. 𑀯𑀲𑁆𑀲𑀯𑀮𑀸𑀳𑀓𑀸𑀢𑀺 𑀯𑀲𑁆𑀲𑀯𑀮𑀸𑀳𑀓𑀸𑀥𑀺𑀝𑁆𑀞𑀺𑀢𑀸 𑀧𑀚𑁆𑀚𑀼𑀦𑁆𑀦𑀤𑁂𑀯𑀧𑀼𑀢𑁆𑀢𑀸. 𑀫𑀳𑀻𑀧𑀸𑀮𑀸𑀢𑀺 𑀭𑀸𑀚𑀸𑀦𑁄. 𑀥𑀫𑁆𑀫𑀢𑁄𑀢𑀺 𑀤𑀲𑀭𑀸𑀚𑀥𑀫𑁆𑀫𑀢𑁄. 𑀲𑀓𑀮𑀁 𑀫𑀳𑀺𑀦𑁆𑀢𑀺 𑀧𑀣𑀯𑀺𑀦𑀺𑀲𑁆𑀲𑀺𑀢𑀲𑀩𑁆𑀩𑀚𑀦𑀓𑀸𑀬𑀁.

𑁩𑁧𑁮𑁩. 𑀏𑀯𑀁 𑀲𑀩𑁆𑀩𑀮𑁄𑀓𑀲𑁆𑀲 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀺𑀲𑀸𑀥𑀦𑀢𑁆𑀣𑀸𑀬 𑀅𑀢𑁆𑀢𑀦𑁄 𑀧𑀼𑀜𑁆𑀜𑀧𑀭𑀺𑀡𑀸𑀫𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀯𑀺𑀤𑀺𑀢𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀯𑀲𑁂𑀦𑁂𑀯 𑀧𑀼𑀜𑁆𑀜𑀧𑀭𑀺𑀡𑀸𑀫𑀁 𑀓𑀭𑁄𑀦𑁆𑀢𑁄 𑀆𑀳 ‘‘𑀇𑀫’’𑀦𑁆𑀢𑀺𑀆𑀤𑀺. 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀯𑀺𑀭𑀘𑀺𑀢𑀁 𑀧𑀘𑁆𑀘𑀓𑁆𑀔𑀁 𑀯𑀺𑀦𑀺𑀘𑁆𑀙𑀬𑀫𑀸𑀳. 𑀲𑀸𑀭𑀪𑀽𑀢𑀦𑁆𑀢𑀺 𑀲𑀻𑀮𑀲𑀸𑀭𑀸𑀤𑀺𑀢𑀺𑀯𑀺𑀥𑀲𑀺𑀓𑁆𑀔𑀸𑀲𑀸𑀭𑀲𑁆𑀲 𑀧𑀓𑀸𑀲𑀦𑀢𑁄 𑀳𑀢𑁆𑀣𑀲𑀸𑀭𑀫𑀺𑀯 𑀪𑀽𑀢𑀁. 𑀳𑀺𑀢𑀦𑁆𑀢𑀺 𑀢𑀤𑀢𑁆𑀣𑁂 𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀁 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀸𑀯𑀲𑀸𑀦𑀲𑁆𑀲 𑀳𑀺𑀢𑀲𑁆𑀲 𑀆𑀯𑀳𑀦𑀢𑁄, 𑀲𑀁𑀲𑀸𑀭𑀤𑀼𑀓𑁆𑀔𑀲𑁆𑀲 𑀘 𑀯𑀽𑀧𑀲𑀫𑀦𑀢𑁄 𑀅𑀫𑀢𑁄𑀲𑀥𑀁 𑀯𑀺𑀬 𑀳𑀺𑀢𑀁. 𑀅𑀢𑁆𑀣𑀬𑀼𑀢𑁆𑀢𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀸𑀦𑀁 𑀯𑀺𑀦𑀬𑀦𑀸𑀤𑀻𑀳𑀺 𑀬𑀼𑀢𑁆𑀢𑀢𑁆𑀢𑀸 𑀅𑀢𑁆𑀣𑀬𑀼𑀢𑁆𑀢𑀁. 𑀓𑀭𑁄𑀦𑁆𑀢𑁂𑀦𑀸𑀢𑀺 𑀭𑀘𑀬𑀦𑁆𑀢𑁂𑀦 𑀫𑀬𑀸. 𑀬𑀁 𑀧𑀼𑀜𑁆𑀜𑀁 𑀧𑀢𑁆𑀢𑀦𑁆𑀢𑀺 𑀓𑀸𑀭𑀓𑀁 𑀧𑀼𑀦𑀸𑀢𑀻𑀢𑀺 𑀧𑀼𑀜𑁆𑀜𑀁, 𑀧𑀼𑀚𑁆𑀚𑀪𑀯𑀨𑀮𑀦𑀺𑀧𑁆𑀨𑀸𑀤𑀦𑀢𑁄 𑀯𑀸 ‘‘𑀧𑀼𑀜𑁆𑀜’’𑀦𑁆𑀢𑀺 𑀲𑀗𑁆𑀔𑀁 𑀕𑀢𑀁 𑀬𑀁 𑀓𑀼𑀲𑀮𑀓𑀫𑁆𑀫𑀁 𑀅𑀧𑀭𑀺𑀫𑁂𑀬𑁆𑀬𑀪𑀯𑀧𑀭𑀺𑀬𑀦𑁆𑀢𑀁 𑀧𑀲𑀼𑀢𑀁 𑀅𑀥𑀺𑀕𑀢𑀁. 𑀢𑁂𑀦 𑀧𑀼𑀜𑁆𑀜𑁂𑀦 𑀳𑁂𑀢𑀼𑀪𑀽𑀢𑁂𑀦. 𑀅𑀬𑀁 𑀮𑁄𑀓𑁄𑀢𑀺 𑀅𑀬𑀁 𑀲𑀓𑀮𑁄𑀧𑀺 𑀲𑀢𑁆𑀢𑀮𑁄𑀓𑁄. 𑀫𑀼𑀦𑀺𑀦𑁆𑀤𑀧𑁆𑀧𑀬𑀸𑀢𑀦𑁆𑀢𑀺 𑀫𑀼𑀦𑀺𑀦𑁆𑀤𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀫𑁆𑀧𑀢𑁆𑀢𑀁. 𑀯𑀻𑀢𑀲𑁄𑀓𑀦𑁆𑀢𑀺 𑀯𑀺𑀕𑀢𑀲𑁄𑀓𑀁. 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀉𑀧𑀸𑀬𑀸𑀲𑀸𑀤𑀻𑀳𑀺 𑀯𑀺𑀕𑀢𑀢𑁆𑀢𑀸, 𑀢𑁂𑀲𑀁 𑀦𑀺𑀓𑁆𑀓𑀫𑀦𑀦𑀺𑀫𑀺𑀢𑁆𑀢𑀢𑁆𑀢𑀸 𑀘 𑀅𑀧𑀕𑀢𑀲𑁄𑀓𑀸𑀤𑀺𑀲𑀁𑀲𑀸𑀭𑀤𑀼𑀓𑁆𑀔𑀁. 𑀲𑀺𑀯𑀁 𑀧𑀼𑀭𑀁 𑀦𑀺𑀩𑁆𑀩𑀸𑀦𑀧𑀼𑀭𑀁 𑀧𑀸𑀧𑀼𑀡𑀸𑀢𑀼 𑀲𑀘𑁆𑀙𑀺𑀓𑀭𑁄𑀢𑀼, 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦, 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀘 𑀧𑀭𑀺𑀦𑀺𑀩𑁆𑀩𑀸𑀢𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀢𑀺 𑀢𑀫𑁆𑀩𑀧𑀡𑁆𑀡𑀺𑀬𑁂𑀦𑀸𑀢𑀺𑀆𑀤𑀺 𑀧𑀓𑀭𑀡𑀓𑀸𑀭𑀓𑀲𑁆𑀲 𑀧𑀪𑀯𑀲𑀼𑀤𑁆𑀥𑀺𑀩𑀸𑀳𑀼𑀲𑀘𑁆𑀘𑀸𑀤𑀺𑀕𑀼𑀡𑀫𑀼𑀔𑁂𑀦 𑀧𑀓𑀭𑀡𑁂 𑀕𑀸𑀭𑀯𑀁 𑀚𑀦𑁂𑀢𑀼𑀓𑀸𑀫𑁂𑀦 𑀏𑀢𑀲𑁆𑀲 𑀲𑀺𑀲𑁆𑀲𑁂𑀦 𑀞𑀧𑀺𑀢𑀁 𑀯𑀸𑀓𑁆𑀬𑀁.

𑀢𑀢𑁆𑀣 𑀢𑀫𑁆𑀩𑀧𑀡𑁆𑀡𑀺𑀬𑁂𑀦𑀸𑀢𑀺 𑀢𑀫𑁆𑀩𑀧𑀡𑁆𑀡𑀺𑀫𑁆𑀳𑀺 𑀚𑀸𑀢𑁄, 𑀢𑀢𑁆𑀣 𑀯𑀺𑀤𑀺𑀢𑁄, 𑀢𑀢𑁄 𑀆𑀕𑀢𑁄𑀢𑀺 𑀯𑀸 𑀢𑀫𑁆𑀩𑀧𑀡𑁆𑀡𑀺𑀬𑁄, 𑀢𑁂𑀦. 𑀩𑁆𑀬𑀸𑀓𑀭𑀡𑀫𑀯𑁂𑀘𑁆𑀘 𑀅𑀥𑀻𑀢𑀯𑀸𑀢𑀺 𑀯𑁂𑀬𑁆𑀬𑀸𑀓𑀭𑀡𑁄, 𑀧𑀭𑀫𑁄 𑀘 𑀉𑀢𑁆𑀢𑀫𑁄 𑀘 𑀲𑁄 𑀯𑁂𑀬𑁆𑀬𑀸𑀓𑀭𑀡𑁄 𑀘𑀸𑀢𑀺 𑀧𑀭𑀫𑀯𑁂𑀬𑁆𑀬𑀸𑀓𑀭𑀡𑁄, 𑀢𑁂𑀦. 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀫𑀸𑀳𑀝𑀸𑀦𑀺, 𑀢𑀺𑀡𑁆𑀡𑀁 𑀧𑀺𑀝𑀓𑀸𑀦𑀁 𑀲𑀫𑀸𑀳𑀸𑀭𑁄 𑀯𑀸 𑀢𑀺𑀧𑀺𑀝𑀓𑀁, 𑀦𑀻𑀬𑀦𑁆𑀢𑀺 𑀩𑀼𑀚𑁆𑀛𑀻𑀬𑀦𑁆𑀢𑀺 𑀲𑁂𑀬𑁆𑀬𑀢𑁆𑀣𑀺𑀓𑁂𑀳𑀻𑀢𑀺 𑀦𑀬𑀸, 𑀦𑀬𑀦𑁆𑀢𑀺 𑀯𑀸 𑀏𑀢𑁂𑀳𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀺𑀁 𑀯𑀺𑀲𑁂𑀲𑁂𑀦𑀸𑀢𑀺 𑀦𑀬𑀸, 𑀧𑀸𑀴𑀺𑀦𑀬𑀅𑀢𑁆𑀣𑀦𑀬𑀏𑀓𑀢𑁆𑀢𑀦𑀬𑀸𑀤𑀬𑁄𑀯, 𑀢𑀺𑀧𑀺𑀝𑀓𑁂 𑀆𑀕𑀢𑀸 𑀦𑀬𑀸 𑀢𑀺𑀧𑀺𑀝𑀓𑀦𑀬𑀸, 𑀯𑀺𑀥𑀸𑀦𑀁 𑀧𑀲𑀸𑀲𑀦𑀁, 𑀧𑀯𑀢𑁆𑀢𑀦𑀁 𑀯𑀸 𑀯𑀺𑀥𑀺, 𑀢𑀺𑀧𑀺𑀝𑀓𑀦𑀬𑀸𑀦𑀁 𑀯𑀺𑀥𑀺 𑀢𑀺𑀧𑀺𑀝𑀓𑀦𑀬𑀯𑀺𑀥𑀺, 𑀢𑀺𑀧𑀺𑀝𑀓𑀦𑀬𑀯𑀺𑀥𑀺𑀫𑁆𑀳𑀺 𑀓𑀼𑀲𑀮𑁄 𑀢𑀺𑀧𑀺𑀝𑀓𑀦𑀬𑀯𑀺𑀥𑀺𑀓𑀼𑀲𑀮𑁄, 𑀢𑁂𑀦.

𑀧𑀭𑀫𑀸 𑀘 𑀢𑁂 𑀓𑀯𑀺𑀚𑀦𑀸 𑀘𑀸𑀢𑀺 𑀧𑀭𑀫𑀓𑀯𑀺𑀚𑀦𑀸, 𑀧𑀭𑀫𑀓𑀯𑀺𑀚𑀦𑀸𑀦𑀁 𑀳𑀤𑀬𑀸𑀦𑀺 𑀧𑀭𑀫𑀓𑀯𑀺𑀚𑀦𑀳𑀤𑀬𑀸𑀦𑀺, 𑀧𑀤𑀼𑀫𑀸𑀦𑀁 𑀯𑀦𑀸𑀦𑀺 𑀧𑀤𑀼𑀫𑀯𑀦𑀸𑀦𑀺, 𑀧𑀭𑀫𑀓𑀯𑀺𑀚𑀦𑀳𑀤𑀬𑀸𑀦𑀺 𑀘 𑀢𑀸𑀦𑀺 𑀧𑀤𑀼𑀫𑀯𑀦𑀸𑀦𑀺 𑀘𑀸𑀢𑀺 𑀧𑀭𑀫𑀓𑀯𑀺𑀚𑀦𑀳𑀤𑀬𑀧𑀤𑀼𑀫𑀯𑀦𑀸𑀦𑀺, 𑀢𑁂𑀲𑀁 𑀯𑀺𑀓𑀲𑀦𑀁 𑀩𑁄𑀥𑀁 𑀲𑀽𑀭𑀺𑀬𑁄 𑀯𑀺𑀬 𑀓𑀭𑁄𑀢𑀻𑀢𑀺 𑀧𑀭𑀫𑀓𑀯𑀺𑀚𑀦𑀳𑀤𑀬𑀧𑀤𑀼𑀫𑀯𑀦𑀯𑀺𑀓𑀲𑀦𑀓𑀭𑁄, 𑀢𑁂𑀦. 𑀓𑀯𑀻 𑀘 𑀢𑁂 𑀯𑀭𑀸 𑀘𑀸𑀢𑀺 𑀓𑀯𑀺𑀯𑀭𑀸, 𑀓𑀯𑀻𑀦𑀁 𑀯𑀭𑀸𑀢𑀺 𑀯𑀸 𑀓𑀯𑀺𑀯𑀭𑀸, 𑀓𑀯𑀺𑀯𑀭𑀸𑀦𑀁 𑀯𑀲𑀪𑁄 𑀉𑀢𑁆𑀢𑀫𑁄 𑀓𑀯𑀺𑀯𑀭𑀯𑀲𑀪𑁄, 𑀢𑁂𑀦, 𑀓𑀯𑀺𑀭𑀸𑀚𑀭𑀸𑀚𑁂𑀦𑀸𑀢𑀺 𑀅𑀢𑁆𑀣𑁄.

𑀧𑀭𑀫𑀸 𑀘 𑀲𑀸 𑀭𑀢𑀺 𑀘𑀸𑀢𑀺 𑀧𑀭𑀫𑀭𑀢𑀺, 𑀧𑀭𑀫𑀭𑀢𑀺𑀁 𑀓𑀭𑁄𑀦𑁆𑀢𑀻𑀢𑀺 𑀧𑀭𑀫𑀭𑀢𑀺𑀓𑀭𑀸𑀦𑀺, 𑀯𑀭𑀸𑀦𑀺 𑀘 𑀢𑀸𑀦𑀺 𑀫𑀥𑀼𑀭𑀸𑀦𑀺 𑀘𑀸𑀢𑀺 𑀯𑀭𑀫𑀥𑀼𑀭𑀸𑀦𑀺, 𑀯𑀭𑀫𑀥𑀼𑀭𑀸𑀦𑀺 𑀘 𑀢𑀸𑀦𑀺 𑀯𑀘𑀦𑀸𑀦𑀺 𑀘𑀸𑀢𑀺 𑀯𑀭𑀫𑀥𑀼𑀭𑀯𑀘𑀦𑀸𑀦𑀺, 𑀧𑀭𑀫𑀭𑀢𑀺𑀓𑀭𑀸𑀦𑀺 𑀘 𑀢𑀸𑀦𑀺 𑀯𑀭𑀫𑀥𑀼𑀭𑀯𑀘𑀦𑀸𑀦𑀺 𑀘𑀸𑀢𑀺 𑀧𑀭𑀫𑀭𑀢𑀺𑀓𑀭𑀯𑀭𑀫𑀥𑀼𑀭𑀯𑀘𑀦𑀸𑀦𑀺, 𑀉𑀕𑁆𑀕𑀺𑀭𑀡𑀁 𑀓𑀣𑀦𑀁 𑀉𑀕𑁆𑀕𑀸𑀭𑁄, 𑀧𑀭𑀫𑀭𑀢𑀺𑀓𑀭𑀯𑀭𑀫𑀥𑀼𑀭𑀯𑀘𑀦𑀸𑀦𑀁 𑀉𑀕𑁆𑀕𑀸𑀭𑁄 𑀏𑀢𑀲𑁆𑀲𑀸𑀢𑀺 𑀧𑀭𑀫…𑀧𑁂… 𑀯𑀘𑀦𑀼𑀕𑁆𑀕𑀸𑀭𑁄, 𑀢𑁂𑀦. 𑀉𑀭𑀕𑀧𑀼𑀭𑀁 𑀧𑀭𑀫𑀧𑀯𑁂𑀡𑀺𑀕𑀸𑀫𑁄 𑀅𑀲𑁆𑀲 𑀦𑀺𑀯𑀸𑀲𑁄𑀢𑀺 𑀉𑀭𑀕𑀧𑀼𑀭𑁄, 𑀢𑁂𑀦. 𑀩𑀼𑀤𑁆𑀥𑀤𑀢𑁆𑀢𑁂𑀦𑀸𑀢𑀺 𑀏𑀯𑀁𑀦𑀸𑀫𑀓𑁂𑀦 𑀣𑁂𑀭𑁂𑀦, 𑀆𑀘𑀭𑀺𑀬𑀩𑀼𑀤𑁆𑀥𑀤𑀢𑁆𑀢𑀢𑁆𑀣𑁂𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁄 𑀭𑀘𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀦𑀺𑀝𑁆𑀞𑀺𑀢𑀸 𑀘𑀸𑀬𑀁 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀻 𑀦𑀸𑀫

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸.

𑀯𑀺𑀦𑀬𑀯𑀺𑀦𑀺𑀘𑁆𑀙𑀬-𑀝𑀻𑀓𑀸 𑀲𑀫𑀢𑁆𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲