𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑀓𑀣𑀸𑀯𑀡𑁆𑀡𑀦𑀸

𑁩𑁦𑁨𑁯. 𑀙𑀢𑁆𑀢𑀁 𑀧𑀡𑁆𑀡𑀫𑀬𑀁 𑀓𑀺𑀜𑁆𑀘𑀻𑀢𑀺 𑀢𑀸𑀮𑀧𑀡𑁆𑀡𑀸𑀤𑀺𑀧𑀡𑁆𑀡𑀘𑁆𑀙𑀤𑀦𑀁 𑀬𑀁 𑀓𑀺𑀜𑁆𑀘𑀺 𑀙𑀢𑁆𑀢𑀁. 𑀩𑀳𑀻𑀢𑀺 𑀉𑀧𑀭𑀺. 𑀅𑀦𑁆𑀢𑁄𑀢𑀺 𑀳𑁂𑀝𑁆𑀞𑀸. 𑀲𑀺𑀩𑁆𑀩𑀺𑀢𑀼𑀦𑁆𑀢𑀺 𑀭𑀽𑀧𑀁 𑀤𑀲𑁆𑀲𑁂𑀢𑁆𑀯𑀸 𑀲𑀽𑀘𑀺𑀓𑀫𑁆𑀫𑀁 𑀓𑀸𑀢𑀼𑀁.

𑁩𑁦𑁩𑁦. 𑀧𑀡𑁆𑀡𑁂𑀢𑀺 𑀙𑀤𑀦𑀧𑀡𑁆𑀡𑁂. 𑀅𑀟𑁆𑀠𑀘𑀦𑁆𑀤𑀦𑁆𑀢𑀺 𑀅𑀟𑁆𑀠𑀘𑀦𑁆𑀤𑀸𑀓𑀸𑀭𑀁. 𑀫𑀓𑀭𑀤𑀦𑁆𑀢𑀓𑀦𑁆𑀢𑀺 𑀫𑀓𑀭𑀤𑀦𑁆𑀢𑀸𑀓𑀸𑀭𑀁, 𑀬𑀁 ‘‘𑀕𑀺𑀭𑀺𑀓𑀽𑀝’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀙𑀺𑀦𑁆𑀤𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀼𑀔𑀯𑀝𑁆𑀝𑀺𑀬𑀸 𑀦𑀸𑀫𑁂𑀢𑁆𑀯𑀸 𑀩𑀤𑁆𑀥𑀧𑀡𑁆𑀡𑀓𑁄𑀝𑀺𑀬𑀸 𑀯𑀸 𑀫𑀢𑁆𑀣𑀓𑀺𑀫𑀡𑁆𑀟𑀮𑀓𑁄𑀝𑀺𑀬𑀸 𑀯𑀸 𑀕𑀺𑀭𑀺𑀓𑀽𑀝𑀸𑀤𑀺𑀁 𑀓𑀭𑁄𑀦𑁆𑀢𑀺, 𑀇𑀫𑀺𑀦𑀸 𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀤𑀡𑁆𑀟𑁂𑀢𑀺 𑀙𑀢𑁆𑀢𑀤𑀡𑁆𑀟𑁂. 𑀖𑀝𑀓𑀦𑁆𑀢𑀺 𑀖𑀝𑀸𑀓𑀸𑀭𑁄. 𑀯𑀸𑀴𑀭𑀽𑀧𑀁 𑀯𑀸𑀢𑀺 𑀩𑁆𑀬𑀕𑁆𑀖𑀸𑀤𑀺𑀯𑀸𑀴𑀸𑀦𑀁 𑀭𑀽𑀧𑀓𑀁 𑀯𑀸. 𑀮𑁂𑀔𑀸𑀢𑀺 𑀉𑀓𑁆𑀓𑀺𑀭𑀺𑀢𑁆𑀯𑀸 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀘𑀺𑀢𑁆𑀢𑀓𑀫𑁆𑀫𑀯𑀲𑁂𑀦 𑀯𑀸 𑀓𑀢𑀭𑀸𑀚𑀺.

𑁩𑁦𑁩𑁧. 𑀧𑀜𑁆𑀘𑀯𑀡𑁆𑀡𑀸𑀦𑀁 𑀲𑀼𑀢𑁆𑀢𑀸𑀦𑀁 𑀅𑀦𑁆𑀢𑀭𑁂 𑀦𑀻𑀮𑀸𑀤𑀺𑀏𑀓𑀯𑀡𑁆𑀡𑁂𑀦 𑀲𑀼𑀢𑁆𑀢𑁂𑀦 𑀣𑀺𑀭𑀢𑁆𑀣𑀁 𑀙𑀢𑁆𑀢𑀁 𑀅𑀦𑁆𑀢𑁄 𑀘 𑀩𑀳𑀺 𑀘 𑀲𑀺𑀩𑁆𑀩𑀺𑀢𑀼𑀁 𑀯𑀸 𑀙𑀢𑁆𑀢𑀤𑀡𑁆𑀟𑀕𑁆𑀕𑀸𑀳𑀓𑀲𑀮𑀸𑀓𑀧𑀜𑁆𑀚𑀭𑀁 𑀣𑀺𑀭𑀢𑁆𑀣𑀁 𑀯𑀺𑀦𑀦𑁆𑀥𑀺𑀢𑀼𑀁 𑀯𑀸 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. ‘‘𑀧𑀜𑁆𑀘𑀯𑀡𑁆𑀡𑀸𑀦𑀁 𑀏𑀓𑀯𑀡𑁆𑀡𑁂𑀦 𑀣𑀺𑀭𑀢𑁆𑀣’’𑀦𑁆𑀢𑀺 𑀇𑀫𑀺𑀦𑀸 𑀅𑀦𑁂𑀓𑀯𑀡𑁆𑀡𑁂𑀳𑀺 𑀲𑀼𑀢𑁆𑀢𑁂𑀳𑀺 𑀯𑀡𑁆𑀡𑀫𑀝𑁆𑀞𑀢𑁆𑀣𑀸𑀬 𑀲𑀺𑀩𑁆𑀩𑀺𑀢𑀼𑀜𑁆𑀘 𑀯𑀺𑀦𑀦𑁆𑀥𑀺𑀢𑀼𑀜𑁆𑀘 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺.

𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀧𑀜𑁆𑀘𑀯𑀡𑁆𑀡𑁂𑀦𑀸’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀢𑀲𑁆𑀲 𑀏𑀓𑀯𑀡𑁆𑀡𑁂𑀦, 𑀧𑀜𑁆𑀘𑀯𑀡𑁆𑀡𑁂𑀦 𑀯𑀸 𑀲𑀼𑀢𑁆𑀢𑁂𑀦 𑀣𑀺𑀭𑀢𑁆𑀣𑀁 𑀲𑀺𑀩𑁆𑀩𑀺𑀢𑀼𑀁, 𑀯𑀺𑀦𑀦𑁆𑀥𑀺𑀢𑀼𑀁 𑀯𑀸 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸 𑀳𑁄𑀢𑀺, 𑀲𑁄 𑀏𑀢𑁆𑀣𑁂𑀯 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀦 𑁋

‘‘𑀧𑀜𑁆𑀘𑀯𑀡𑁆𑀡𑁂𑀦 𑀲𑀼𑀢𑁆𑀢𑁂𑀦, 𑀲𑀺𑀩𑁆𑀩𑀺𑀢𑀼𑀁 𑀦 𑀘 𑀯𑀝𑁆𑀝𑀢𑀻’’𑀢𑀺 𑁋

𑀧𑀸𑀞𑁂𑀦 𑀘 ‘‘𑀓𑁂𑀘𑀺 𑀢𑀸𑀮𑀧𑀡𑁆𑀡𑀘𑁆𑀙𑀢𑁆𑀢𑀁 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸 𑀧𑀜𑁆𑀘𑀯𑀡𑁆𑀡𑁂𑀦 𑀲𑀼𑀢𑁆𑀢𑁂𑀦 𑀲𑀺𑀩𑁆𑀩𑀦𑁆𑀢𑀸 𑀯𑀡𑁆𑀡𑀫𑀝𑁆𑀞𑀁 𑀓𑀭𑁄𑀦𑁆𑀢𑀺, 𑀢𑀁 𑀦 𑀯𑀝𑁆𑀝𑀢𑀺. 𑀏𑀓𑀯𑀡𑁆𑀡𑁂𑀦 𑀧𑀦 𑀦𑀻𑀮𑁂𑀦 𑀯𑀸 𑀧𑀻𑀢𑀓𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀲𑀼𑀢𑁆𑀢𑁂𑀦 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸 𑀲𑀺𑀩𑁆𑀩𑀺𑀢𑀼𑀁 𑀙𑀢𑁆𑀢𑀤𑀡𑁆𑀟𑀕𑁆𑀕𑀸𑀳𑀓𑀁 𑀲𑀮𑀸𑀓𑀧𑀜𑁆𑀚𑀭𑀁 𑀯𑀸 𑀯𑀺𑀦𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺, 𑀢𑀜𑁆𑀘 𑀔𑁄 𑀣𑀺𑀭𑀓𑀭𑀡𑀢𑁆𑀣𑀁, 𑀦 𑀯𑀡𑁆𑀡𑀫𑀝𑁆𑀞𑀢𑁆𑀣𑀸𑀬𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁮𑁫 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬) 𑀅𑀝𑁆𑀞𑀓𑀣𑀸𑀧𑀸𑀞𑁂𑀦 𑀘 𑀯𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀲𑁄 𑀦 𑀕𑀳𑁂𑀢𑀩𑁆𑀩𑁄.

𑁩𑁦𑁩𑁨. 𑀮𑁂𑀔𑀸 𑀯𑀸 𑀧𑀦 𑀓𑁂𑀯𑀮𑀸𑀢𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀲𑀮𑀸𑀓𑀮𑁂𑀔𑀸 𑀯𑀸. 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀉𑀓𑁆𑀓𑀺𑀭𑀺𑀢𑁆𑀯𑀸 𑀓𑀢𑀁 𑀙𑀺𑀦𑁆𑀤𑀺𑀢𑁆𑀯𑀸. 𑀖𑀁𑀲𑀺𑀢𑁆𑀯𑀸𑀢𑀺 𑀘𑀺𑀢𑁆𑀢𑀓𑀫𑁆𑀫𑀸𑀤𑀺𑀯𑀲𑁂𑀦 𑀓𑀢𑀁 𑀖𑀁𑀲𑀺𑀢𑁆𑀯𑀸.

𑁩𑁦𑁩𑁩. 𑀤𑀡𑁆𑀟𑀩𑀼𑀦𑁆𑀤𑀫𑁆𑀳𑀻𑀢𑀺 𑀙𑀢𑁆𑀢𑀤𑀡𑁆𑀟𑀲𑁆𑀲 𑀧𑀜𑁆𑀚𑀭𑁂 𑀕𑀸𑀳𑀡𑀢𑁆𑀣𑀸𑀬 𑀨𑀸𑀮𑀺𑀢𑀩𑀼𑀦𑁆𑀤𑀫𑁆𑀳𑀺, 𑀫𑀽𑀮𑁂𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀢𑁆𑀣 𑀦𑀺𑀲𑁆𑀲𑀦𑁆𑀤𑁂𑀳𑁂 𑀯𑀼𑀢𑁆𑀢𑀦𑀬𑁄. 𑀔𑀼𑀤𑁆𑀤𑀲𑀺𑀓𑁆𑀔𑀸𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀙𑀢𑁆𑀢𑀧𑀺𑀡𑁆𑀟𑀺𑀬𑀸 𑀫𑀽𑀮𑁂’’𑀢𑀺 𑀯𑀼𑀢𑁆𑀢𑀁. 𑀅𑀳𑀺𑀙𑀢𑁆𑀢𑀓𑀲𑀡𑁆𑀞𑀸𑀦𑀦𑁆𑀢𑀺 𑀨𑀼𑀮𑁆𑀮𑀅𑀳𑀺𑀙𑀢𑁆𑀢𑀸𑀓𑀸𑀭𑀁. 𑀭𑀚𑁆𑀚𑀼𑀓𑁂𑀳𑀺 𑀕𑀸𑀳𑀸𑀧𑁂𑀢𑁆𑀯𑀸 𑀤𑀡𑁆𑀟𑁂 𑀩𑀦𑁆𑀥𑀦𑁆𑀢𑀺, 𑀢𑀲𑁆𑀫𑀺𑀁 𑀩𑀦𑁆𑀥𑀝𑁆𑀞𑀸𑀦𑁂 𑀯𑀮𑀬𑀫𑀺𑀯 𑀉𑀓𑁆𑀓𑀺𑀭𑀺𑀢𑁆𑀯𑀸 𑀉𑀝𑁆𑀞𑀸𑀧𑁂𑀢𑁆𑀯𑀸. 𑀩𑀦𑁆𑀥𑀦𑀢𑁆𑀣𑀸𑀬𑀸𑀢𑀺 𑀯𑀸𑀢𑁂𑀦 𑀬𑀣𑀸 𑀦 𑀘𑀮𑀢𑀺, 𑀏𑀯𑀁 𑀭𑀚𑁆𑀚𑀽𑀳𑀺 𑀤𑀡𑁆𑀟𑁂 𑀧𑀜𑁆𑀚𑀭𑀲𑁆𑀲 𑀩𑀦𑁆𑀥𑀦𑀢𑁆𑀣𑀸𑀬. 𑀉𑀓𑁆𑀓𑀺𑀭𑀺𑀢𑁆𑀯𑀸 𑀓𑀢𑀸 𑀮𑁂𑀔𑀸 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀬𑀣𑀸𑀳 𑁋 ‘‘𑀯𑀸𑀢𑀧𑁆𑀧𑀳𑀸𑀭𑁂𑀦 𑀅𑀘𑀮𑀦𑀢𑁆𑀣𑀁 𑀙𑀢𑁆𑀢𑀫𑀡𑁆𑀟𑀮𑀺𑀓𑀁 𑀭𑀚𑁆𑀚𑀼𑀓𑁂𑀳𑀺 𑀕𑀸𑀳𑀸𑀧𑁂𑀢𑁆𑀯𑀸 𑀤𑀡𑁆𑀟𑁂 𑀩𑀦𑁆𑀥𑀦𑁆𑀢𑀺, 𑀢𑀲𑁆𑀫𑀺𑀁 𑀩𑀦𑁆𑀥𑀦𑀝𑁆𑀞𑀸𑀦𑁂 𑀯𑀮𑀬𑀫𑀺𑀯 𑀉𑀓𑁆𑀓𑀺𑀭𑀺𑀢𑁆𑀯𑀸 𑀮𑁂𑀔𑀁 𑀞𑀧𑁂𑀦𑁆𑀢𑀺, 𑀲𑀸 𑀯𑀝𑁆𑀝𑀢𑀻’’𑀢𑀺. ‘‘𑀲𑀘𑁂𑀧𑀺 𑀦 𑀩𑀦𑁆𑀥𑀦𑁆𑀢𑀺, 𑀩𑀦𑁆𑀥𑀦𑀸𑀭𑀳𑀝𑁆𑀞𑀸𑀦𑀢𑁆𑀢𑀸 𑀯𑀮𑀬𑀁 𑀉𑀓𑁆𑀓𑀺𑀭𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁.

𑁩𑁦𑁩𑁪. 𑀲𑀫𑀁 𑀲𑀢𑀧𑀤𑀸𑀤𑀻𑀦𑀦𑁆𑀢𑀺 𑀲𑀢𑀧𑀤𑀸𑀤𑀻𑀳𑀺 𑀲𑀤𑀺𑀲𑀁, 𑀢𑀼𑀮𑁆𑀬𑀢𑁆𑀣𑁂 𑀓𑀭𑀡𑀯𑀘𑀦𑀧𑁆𑀧𑀲𑀗𑁆𑀕𑁂 𑀲𑀸𑀫𑀺𑀯𑀘𑀦𑀁.

𑁩𑁦𑁩𑁫. 𑀧𑀢𑁆𑀢𑀲𑁆𑀲 𑀧𑀭𑀺𑀬𑀦𑁆𑀢𑁂 𑀯𑀸𑀢𑀺 𑀅𑀦𑀼𑀯𑀸𑀢𑀲𑁆𑀲 𑀉𑀪𑀬𑀧𑀭𑀺𑀬𑀦𑁆𑀢𑁂 𑀯𑀸. 𑀧𑀢𑁆𑀢𑀫𑀼𑀔𑁂𑀧𑀺 𑀯𑀸𑀢𑀺 𑀤𑁆𑀯𑀺𑀦𑁆𑀦𑀁 𑀆𑀭𑀸𑀫𑀯𑀺𑀢𑁆𑀣𑀸𑀭𑀧𑀢𑁆𑀢𑀸𑀦𑀁 𑀲𑀗𑁆𑀖𑀝𑀺𑀢𑀝𑁆𑀞𑀸𑀦𑁂 𑀓𑀡𑁆𑀡𑁂𑀧𑀺 𑀯𑀸, 𑀏𑀓𑀲𑁆𑀲𑁂𑀯 𑀯𑀸 𑀧𑀢𑁆𑀢𑀲𑁆𑀲 𑀊𑀦𑀧𑀽𑀭𑀡𑀢𑁆𑀣𑀁 𑀲𑀗𑁆𑀖𑀝𑀺𑀢𑀝𑁆𑀞𑀸𑀦𑁂𑀧𑀺 𑀯𑀸. 𑀯𑁂𑀡𑀺𑀦𑁆𑀢𑀺 𑀓𑀼𑀤𑁆𑀭𑀽𑀲𑀲𑀻𑀲𑀸𑀓𑀸𑀭𑁂𑀦 𑀲𑀺𑀩𑁆𑀩𑀦𑀁. 𑀓𑁂𑀘𑀺 ‘‘𑀯𑀭𑀓𑀲𑀻𑀲𑀸𑀓𑀸𑀭𑁂𑀦𑀸’’𑀢𑀺 𑀯𑀤𑀦𑁆𑀢𑀺. 𑀲𑀗𑁆𑀔𑀮𑀺𑀓𑀦𑁆𑀢𑀺 𑀩𑀺𑀴𑀸𑀮𑀤𑀸𑀫𑀲𑀤𑀺𑀲𑀁 𑀲𑀺𑀩𑁆𑀩𑀦𑀁. 𑀓𑁂𑀘𑀺 ‘‘𑀲𑀢𑀧𑀤𑀺𑀲𑀫’’𑀦𑁆𑀢𑀺 𑀯𑀤𑀦𑁆𑀢𑀺.

𑁩𑁦𑁩𑁬. 𑀧𑀝𑁆𑀝𑀦𑁆𑀢𑀺 𑀧𑀝𑁆𑀝𑀫𑁆𑀧𑀺. 𑀅𑀝𑁆𑀞𑀓𑁄𑀡𑀸𑀤𑀺𑀓𑁄 𑀯𑀺𑀥𑀺 𑀧𑀓𑀸𑀭𑁄 𑀏𑀢𑀲𑁆𑀲𑀸𑀢𑀺 𑀅𑀝𑁆𑀞𑀓𑁄𑀡𑀸𑀤𑀺𑀓𑀯𑀺𑀥𑀺, 𑀢𑀁. ‘‘𑀅𑀝𑁆𑀞𑀓𑁄𑀡𑀸𑀤𑀺𑀓’’𑀦𑁆𑀢𑀺 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀦𑀺𑀕𑁆𑀕𑀳𑀺𑀢𑀸𑀕𑀫𑁄. ‘‘𑀅𑀝𑁆𑀞𑀓𑁄𑀡𑀸𑀤𑀺𑀓𑀁 𑀯𑀺𑀥𑀺’’𑀦𑁆𑀢𑀺 𑀏𑀢𑀁 ‘‘𑀧𑀝𑁆𑀝’’𑀦𑁆𑀢𑀺 𑀏𑀢𑀲𑁆𑀲 𑀲𑀫𑀸𑀦𑀸𑀥𑀺𑀓𑀭𑀡𑀯𑀺𑀲𑁂𑀲𑀦𑀁, 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁 𑀯𑀸, ‘‘𑀓𑀭𑁄𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀅𑀣 𑀯𑀸 𑀧𑀝𑁆𑀝𑀦𑁆𑀢𑀺 𑀏𑀢𑁆𑀣 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀧𑀝𑁆𑀝𑁂𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 ‘‘𑀅𑀝𑁆𑀞𑀓𑁄𑀡𑀸𑀤𑀺𑀓’’𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀁. ‘‘𑀯𑀺𑀥𑀺’’𑀦𑁆𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁. 𑀇𑀥 𑀯𑀓𑁆𑀔𑀫𑀸𑀦𑀘𑀢𑀼𑀓𑁄𑀡𑀲𑀡𑁆𑀞𑀸𑀦𑀢𑁄 𑀅𑀜𑁆𑀜𑀁 𑀅𑀝𑁆𑀞𑀓𑁄𑀡𑀸𑀤𑀺𑀓𑀁 𑀦𑀸𑀫𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀝𑁆𑀝𑀤𑁆𑀯𑀬𑁂. 𑀅𑀕𑁆𑀖𑀺𑀬𑀕𑀤𑀸𑀭𑀽𑀧𑀦𑁆𑀢𑀺 𑀅𑀕𑁆𑀖𑀺𑀬𑀲𑀡𑁆𑀞𑀸𑀦𑀜𑁆𑀘𑁂𑀯 𑀕𑀤𑀸𑀲𑀡𑁆𑀞𑀸𑀦𑀜𑁆𑀘 𑀲𑀺𑀩𑁆𑀩𑀦𑀁. 𑀫𑀼𑀕𑁆𑀕𑀭𑀦𑁆𑀢𑀺 𑀮𑀕𑀼𑀴𑀲𑀡𑁆𑀞𑀸𑀦𑀲𑀺𑀩𑁆𑀩𑀦𑀁. 𑀆𑀤𑀺-𑀲𑀤𑁆𑀤𑁂𑀦 𑀘𑁂𑀢𑀺𑀬𑀸𑀤𑀺𑀲𑀡𑁆𑀞𑀸𑀦𑀸𑀦𑀁 𑀕𑀳𑀡𑀁.

𑁩𑁦𑁩𑁭. 𑀢𑀢𑁆𑀣𑀸𑀢𑀺 𑀧𑀝𑁆𑀝𑀤𑁆𑀯𑀬𑁂 𑀢𑀲𑁆𑀫𑀺𑀁 𑀞𑀸𑀦𑁂. 𑀓𑀓𑁆𑀓𑀝𑀓𑀓𑁆𑀔𑀻𑀦𑀻𑀢𑀺 𑀓𑀼𑀴𑀻𑀭𑀅𑀘𑁆𑀙𑀺𑀲𑀤𑀺𑀲𑀸𑀦𑀺 𑀲𑀺𑀩𑁆𑀩𑀦𑀯𑀺𑀓𑀸𑀭𑀸𑀦𑀺. 𑀉𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀓𑀭𑁄𑀦𑁆𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀕𑀡𑁆𑀞𑀺𑀓𑀧𑀸𑀲𑀓𑀧𑀝𑁆𑀝𑀓𑁂. 𑀲𑀼𑀢𑁆𑀢𑀸𑀢𑀺 𑀓𑁄𑀡𑀢𑁄 𑀓𑁄𑀡𑀁 𑀲𑀺𑀩𑁆𑀩𑀺𑀢𑀲𑀼𑀢𑁆𑀢𑀸 𑀘𑁂𑀯 𑀘𑀢𑀼𑀭𑀲𑁆𑀲𑁂 𑀲𑀺𑀩𑁆𑀩𑀺𑀢𑀲𑀼𑀢𑁆𑀢𑀸 𑀘. 𑀧𑀺𑀴𑀓𑀸𑀢𑀺 𑀢𑁂𑀲𑀫𑁂𑀯 𑀲𑀼𑀢𑁆𑀢𑀸𑀦𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀲𑀺𑀩𑁆𑀩𑀺𑀢𑀓𑁄𑀝𑀺𑀬𑁄 𑀘. 𑀤𑀼𑀯𑀺𑀜𑁆𑀜𑁂𑀬𑁆𑀬𑀸𑀯𑀸𑀢𑀺 𑀭𑀚𑀦𑀓𑀸𑀮𑁂 𑀤𑀼𑀯𑀺𑀜𑁆𑀜𑁂𑀬𑁆𑀬𑀭𑀽𑀧𑀸 𑀅𑀦𑁄𑀴𑀸𑀭𑀺𑀓𑀸 𑀤𑀻𑀧𑀺𑀢𑀸 𑀯𑀝𑁆𑀝𑀦𑁆𑀢𑀻𑀢𑀺. 𑀬𑀣𑀸𑀳 𑁋 ‘‘𑀓𑁄𑀡𑀲𑀼𑀢𑁆𑀢𑀧𑀺𑀴𑀓𑀸 𑀘 𑀘𑀻𑀯𑀭𑁂 𑀭𑀢𑁆𑀢𑁂 𑀤𑀼𑀯𑀺𑀜𑁆𑀜𑁂𑀬𑁆𑀬𑀭𑀽𑀧𑀸 𑀯𑀝𑁆𑀝𑀦𑁆𑀢𑀻’’𑀢𑀺.

𑁩𑁦𑁩𑁮. 𑀕𑀡𑁆𑀞𑀺𑀧𑀸𑀲𑀓𑀧𑀝𑁆𑀝𑀓𑀸𑀢𑀺 𑀕𑀡𑁆𑀞𑀺𑀓𑀧𑀝𑁆𑀝𑀓𑀧𑀸𑀲𑀓𑀧𑀝𑁆𑀝𑀓𑀸𑀢𑀺 𑀬𑁄𑀚𑀦𑀸. 𑀓𑀡𑁆𑀡𑀓𑁄𑀡𑁂𑀲𑀼 𑀲𑀼𑀢𑁆𑀢𑀸𑀦𑀻𑀢𑀺 𑀘𑀻𑀯𑀭𑀓𑀡𑁆𑀡𑁂𑀲𑀼 𑀲𑀼𑀢𑁆𑀢𑀸𑀦𑀺 𑀘𑁂𑀯 𑀕𑀡𑁆𑀞𑀺𑀓𑀧𑀸𑀲𑀓𑀧𑀝𑁆𑀝𑀸𑀦𑀁 𑀓𑁄𑀡𑁂𑀲𑀼 𑀲𑀼𑀢𑁆𑀢𑀸𑀦𑀺 𑀘 𑀙𑀺𑀦𑁆𑀤𑁂𑀬𑁆𑀬. 𑀏𑀢𑁆𑀣 𑀘 𑀘𑀻𑀯𑀭𑁂 𑀆𑀬𑀸𑀫𑀢𑁄, 𑀯𑀺𑀢𑁆𑀣𑀸𑀭𑀢𑁄 𑀘 𑀲𑀺𑀩𑁆𑀩𑀺𑀢𑁆𑀯𑀸 𑀅𑀦𑀼𑀯𑀸𑀢𑀢𑁄 𑀩𑀳𑀺 𑀦𑀺𑀓𑁆𑀔𑀦𑁆𑀢𑀲𑀼𑀢𑁆𑀢𑀁 𑀘𑀻𑀯𑀭𑀁 𑀭𑀚𑀺𑀢𑁆𑀯𑀸 𑀲𑀼𑀓𑁆𑀔𑀸𑀧𑀦𑀓𑀸𑀮𑁂 𑀭𑀚𑁆𑀚𑀼𑀬𑀸 𑀯𑀸 𑀘𑀻𑀯𑀭𑀯𑀁𑀲𑁂 𑀯𑀸 𑀩𑀦𑁆𑀥𑀺𑀢𑁆𑀯𑀸 𑀑𑀮𑀫𑁆𑀩𑀺𑀢𑀼𑀁 𑀅𑀦𑀼𑀯𑀸𑀢𑁂 𑀩𑀤𑁆𑀥𑀲𑀼𑀢𑁆𑀢𑀸𑀦𑀺 𑀘 𑀓𑀡𑁆𑀡𑀲𑀼𑀢𑁆𑀢𑀸𑀦𑀺 𑀦𑀸𑀫. 𑀬𑀣𑀸𑀳 𑁋 ‘‘𑀘𑀻𑀯𑀭𑀲𑁆𑀲 𑀓𑀡𑁆𑀡𑀲𑀼𑀢𑁆𑀢𑀓𑀁 𑀦 𑀯𑀝𑁆𑀝𑀢𑀺, 𑀭𑀚𑀺𑀢𑀓𑀸𑀮𑁂 𑀙𑀺𑀦𑁆𑀤𑀺𑀢𑀩𑁆𑀩𑀁. 𑀬𑀁 𑀧𑀦 ‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀡𑁆𑀡𑀲𑀼𑀢𑁆𑀢𑀓’𑀦𑁆𑀢𑀺 (𑀫𑀳𑀸𑀯. 𑁩𑁪𑁪) 𑀏𑀯𑀁 𑀅𑀦𑀼𑀜𑁆𑀜𑀸𑀢𑀁, 𑀢𑀁 𑀅𑀦𑀼𑀯𑀸𑀢𑁂 𑀧𑀸𑀲𑀓𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑀩𑁆𑀩𑀁, 𑀭𑀚𑀦𑀓𑀸𑀮𑁂 𑀮𑀕𑁆𑀕𑀦𑀢𑁆𑀣𑀸𑀬𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁮𑁫 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬).

𑁩𑁦𑁩𑁯. 𑀲𑀽𑀘𑀺𑀓𑀫𑁆𑀫𑀯𑀺𑀓𑀸𑀭𑀁 𑀯𑀸𑀢𑀺 𑀘𑀻𑀯𑀭𑀫𑀡𑁆𑀟𑀦𑀢𑁆𑀣𑀸𑀬 𑀦𑀸𑀦𑀸𑀲𑀼𑀢𑁆𑀢𑀓𑁂𑀳𑀺 𑀲𑀢𑀧𑀤𑀺𑀲𑀤𑀺𑀲𑀁 𑀲𑀺𑀩𑁆𑀩𑀦𑁆𑀢𑀸 𑀆𑀕𑀦𑁆𑀢𑀼𑀓𑀧𑀝𑁆𑀝𑀁 𑀞𑀧𑁂𑀦𑁆𑀢𑀺, 𑀏𑀯𑀭𑀽𑀧𑀁 𑀲𑀽𑀘𑀺𑀓𑀫𑁆𑀫𑀯𑀺𑀓𑀸𑀭𑀁 𑀯𑀸. 𑀅𑀜𑁆𑀜𑀁 𑀯𑀸 𑀧𑀦 𑀓𑀺𑀜𑁆𑀘𑀺𑀧𑀻𑀢𑀺 𑀅𑀜𑁆𑀜𑀫𑁆𑀧𑀺 𑀬𑀁 𑀓𑀺𑀜𑁆𑀘𑀺 𑀫𑀸𑀮𑀸𑀓𑀫𑁆𑀫𑀫𑀺𑀕𑀧𑀓𑁆𑀔𑀺𑀧𑀸𑀤𑀸𑀤𑀺𑀓𑀁 𑀲𑀺𑀩𑁆𑀩𑀦𑀯𑀺𑀓𑀸𑀭𑀁. 𑀓𑀸𑀢𑀼𑀦𑁆𑀢𑀺 𑀲𑀬𑀁 𑀓𑀸𑀢𑀼𑀁. 𑀓𑀸𑀭𑀸𑀧𑁂𑀢𑀼𑀦𑁆𑀢𑀺 𑀅𑀜𑁆𑀜𑁂𑀦 𑀯𑀸 𑀓𑀸𑀭𑀸𑀧𑁂𑀢𑀼𑀁.

𑁩𑁦𑁪𑁦. 𑀬𑁄 𑀪𑀺𑀓𑁆𑀔𑀼 𑀧𑀭𑀁 𑀉𑀢𑁆𑀢𑀫𑀁 𑀯𑀡𑁆𑀡𑀫𑀝𑁆𑀞𑀁 𑀅𑀪𑀺𑀧𑀢𑁆𑀣𑀬𑀁 𑀧𑀢𑁆𑀣𑀬𑀦𑁆𑀢𑁄 𑀓𑀜𑁆𑀚𑀺𑀧𑀺𑀝𑁆𑀞𑀔𑀮𑀺𑀅𑀮𑁆𑀮𑀺𑀓𑀸𑀤𑀻𑀲𑀼 𑀘𑀻𑀯𑀭𑀁 𑀧𑀓𑁆𑀔𑀺𑀧𑀢𑀺, 𑀢𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀸 𑀫𑁄𑀓𑁆𑀔𑁄 𑀦 𑀯𑀺𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀓𑀜𑁆𑀚𑀻𑀢𑀺 𑀯𑀸𑀬𑀦𑀢𑀦𑁆𑀢𑀫𑀓𑁆𑀔𑀦𑀓𑀜𑁆𑀚𑀺𑀲𑀤𑀺𑀲𑀸 𑀣𑀽𑀮𑀸𑀓𑀜𑁆𑀚𑀺. 𑀧𑀺𑀝𑁆𑀞𑀦𑁆𑀢𑀺 𑀢𑀡𑁆𑀟𑀼𑀮𑀧𑀺𑀝𑁆𑀞𑀁. 𑀢𑀡𑁆𑀟𑀼𑀮𑀧𑀺𑀝𑁆𑀞𑁂𑀳𑀺 𑀧𑀓𑁆𑀓𑀸 𑀔𑀮𑀺. 𑀅𑀮𑁆𑀮𑀺𑀓𑀸𑀢𑀺 𑀦𑀺𑀬𑁆𑀬𑀸𑀲𑁄. 𑀆𑀤𑀺-𑀲𑀤𑁆𑀤𑁂𑀦 𑀮𑀸𑀔𑀸𑀤𑀻𑀦𑀁 𑀕𑀳𑀡𑀁.

𑁩𑁦𑁪𑁧. 𑀘𑀻𑀯𑀭𑀲𑁆𑀲 𑀓𑀭𑀡𑁂 𑀓𑀭𑀡𑀓𑀸𑀮𑁂 𑀲𑀫𑀼𑀝𑁆𑀞𑀺𑀢𑀸𑀦𑀁 𑀲𑀽𑀘𑀺𑀳𑀢𑁆𑀣𑀫𑀮𑀸𑀤𑀻𑀦𑀁 𑀥𑁄𑀯𑀦𑀢𑁆𑀣𑀁, 𑀓𑀺𑀮𑀺𑀝𑁆𑀞𑀓𑀸𑀮𑁂 𑀘 𑀥𑁄𑀯𑀦𑀢𑁆𑀣𑀁 𑀓𑀜𑁆𑀚𑀺𑀧𑀺𑀝𑁆𑀞𑀺𑀔𑀮𑀺𑀅𑀮𑁆𑀮𑀺𑀓𑀸𑀤𑀻𑀲𑀼 𑀧𑀓𑁆𑀔𑀺𑀧𑀢𑀺, 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁩𑁦𑁪𑁨. 𑀢𑀢𑁆𑀣𑀸𑀢𑀺 𑀬𑁂𑀦 𑀓𑀲𑀸𑀯𑁂𑀦 𑀘𑀻𑀯𑀭𑀁 𑀭𑀚𑀢𑀺, 𑀢𑀲𑁆𑀫𑀺𑀁 𑀭𑀚𑀦𑁂 𑀘𑀻𑀯𑀭𑀲𑁆𑀲 𑀲𑀼𑀕𑀦𑁆𑀥𑀪𑀸𑀯𑀢𑁆𑀣𑀸𑀬 𑀕𑀦𑁆𑀥𑀁 𑀯𑀸 𑀉𑀚𑁆𑀚𑀮𑀪𑀸𑀯𑀢𑁆𑀣𑀸𑀬 𑀢𑁂𑀮𑀁 𑀯𑀸 𑀯𑀡𑁆𑀡𑀢𑁆𑀣𑀸𑀬 𑀮𑀸𑀔𑀁 𑀯𑀸. 𑀓𑀺𑀜𑁆𑀘𑀻𑀢𑀺 𑀏𑀯𑀭𑀽𑀧𑀁 𑀬𑀁 𑀓𑀺𑀜𑁆𑀘𑀺.

𑁩𑁦𑁪𑁩. 𑀫𑀡𑀺𑀦𑀸𑀢𑀺 𑀧𑀸𑀲𑀸𑀡𑁂𑀦. 𑀅𑀜𑁆𑀜𑁂𑀦𑀧𑀺 𑀘 𑀓𑁂𑀦𑀘𑀻𑀢𑀺 𑀬𑁂𑀦 𑀉𑀚𑁆𑀚𑀮𑀁 𑀳𑁄𑀢𑀺, 𑀏𑀯𑀭𑀽𑀧𑁂𑀦 𑀫𑀼𑀕𑁆𑀕𑀭𑀸𑀤𑀺𑀦𑀸 𑀅𑀜𑁆𑀜𑁂𑀦𑀸𑀧𑀺 𑀓𑁂𑀦𑀘𑀺 𑀯𑀢𑁆𑀣𑀼𑀦𑀸. 𑀤𑁄𑀡𑀺𑀬𑀸𑀢𑀺 𑀭𑀚𑀦𑀫𑁆𑀩𑀡𑁂. 𑀦 𑀖𑀁𑀲𑀺𑀢𑀩𑁆𑀩𑀁 𑀳𑀢𑁆𑀣𑁂𑀦 𑀕𑀸𑀳𑁂𑀢𑁆𑀯𑀸 𑀦 𑀖𑀝𑁆𑀝𑁂𑀢𑀩𑁆𑀩𑀁.

𑁩𑁦𑁪𑁪. 𑀭𑀢𑁆𑀢𑀁 𑀘𑀻𑀯𑀭𑀁 𑀳𑀢𑁆𑀣𑁂𑀳𑀺 𑀓𑀺𑀜𑁆𑀘𑀺 𑀣𑁄𑀓𑀁 𑀧𑀳𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. ‘‘𑀬𑀢𑁆𑀣 𑀧𑀓𑁆𑀓𑀭𑀚𑀦𑀁 𑀧𑀓𑁆𑀔𑀺𑀧𑀦𑁆𑀢𑀺, 𑀲𑀸 𑀭𑀚𑀦𑀤𑁄𑀡𑀺, 𑀢𑀢𑁆𑀣 𑀅𑀁𑀲𑀩𑀤𑁆𑀥𑀓𑀓𑀸𑀬𑀩𑀦𑁆𑀥𑀦𑀸𑀤𑀺𑀁 𑀖𑀝𑁆𑀝𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁.

𑁩𑁦𑁪𑁫. 𑀕𑀡𑁆𑀞𑀺𑀓𑁂𑀢𑀺 𑀯𑁂𑀴𑀼𑀤𑀦𑁆𑀢𑀯𑀺𑀲𑀸𑀡𑀸𑀤𑀺𑀫𑀬𑀕𑀡𑁆𑀞𑀺𑀓𑁂. 𑀮𑁂𑀔𑀸 𑀯𑀸𑀢𑀺 𑀯𑀝𑁆𑀝𑀸𑀤𑀺𑀪𑁂𑀤𑀸 𑀮𑁂𑀔𑀸 𑀯𑀸. 𑀧𑀺𑀴𑀓𑀸 𑀯𑀸𑀢𑀺 𑀲𑀸𑀲𑀧𑀩𑀻𑀚𑀲𑀤𑀺𑀲𑀸 𑀔𑀼𑀤𑁆𑀤𑀓𑀧𑀼𑀩𑁆𑀩𑀼𑀴𑀸 𑀯𑀸. 𑀧𑀸𑀴𑀺𑀓𑀡𑁆𑀡𑀺𑀓𑀪𑁂𑀤𑀓𑁄𑀢𑀺 𑀫𑀡𑀺𑀓𑀸𑀯𑀴𑀺𑀭𑀽𑀧𑀧𑀼𑀧𑁆𑀨𑀓𑀡𑁆𑀡𑀺𑀓𑀭𑀽𑀧𑀪𑁂𑀤𑀓𑁄. 𑀓𑀧𑁆𑀧𑀩𑀺𑀦𑁆𑀤𑀼𑀯𑀺𑀓𑀸𑀭𑁄 𑀯𑀸 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁩𑁦𑁪𑁬. 𑀆𑀭𑀕𑁆𑀕𑁂𑀦𑀸𑀢𑀺 𑀆𑀭𑀓𑀡𑁆𑀝𑀓𑀕𑁆𑀕𑁂𑀦, 𑀲𑀽𑀘𑀺𑀫𑀼𑀔𑁂𑀦 𑀯𑀸. 𑀓𑀸𑀘𑀺𑀧𑀺 𑀮𑁂𑀔𑀸𑀢𑀺 𑀯𑀝𑁆𑀝𑀓𑀕𑁄𑀫𑀼𑀢𑁆𑀢𑀸𑀤𑀺𑀲𑀡𑁆𑀞𑀸𑀦𑀸 𑀬𑀸 𑀓𑀸𑀘𑀺𑀧𑀺 𑀭𑀸𑀚𑀺.

𑁩𑁦𑁪𑁭. 𑀪𑀫𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 𑀪𑀫𑁂 𑀅𑀮𑁆𑀮𑀺𑀬𑀸𑀧𑁂𑀢𑁆𑀯𑀸.

𑁩𑁦𑁪𑁮. 𑀧𑀢𑁆𑀢𑀫𑀡𑁆𑀟𑀮𑀓𑁂𑀢𑀺 𑀧𑀢𑁆𑀢𑁂 𑀙𑀯𑀺𑀭𑀓𑁆𑀔𑀦𑀢𑁆𑀣𑀸𑀬 𑀢𑀺𑀧𑀼𑀲𑀻𑀲𑀸𑀤𑀻𑀳𑀺 𑀓𑀢𑁂 𑀧𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀆𑀥𑀸𑀭𑀸𑀤𑀻𑀦𑀁 𑀉𑀧𑀭𑀺 𑀓𑀸𑀢𑀩𑁆𑀩𑁂 𑀧𑀢𑁆𑀢𑀫𑀡𑁆𑀟𑀮𑀓𑁂. 𑀪𑀺𑀢𑁆𑀢𑀺𑀓𑀫𑁆𑀫𑀦𑁆𑀢𑀺 𑀯𑀺𑀪𑀢𑁆𑀢𑀁 𑀓𑀢𑁆𑀯𑀸 𑀦𑀸𑀦𑀸𑀓𑀸𑀭𑀭𑀽𑀧𑀓𑀓𑀫𑁆𑀫𑀘𑀺𑀢𑁆𑀢𑀁. 𑀬𑀣𑀸𑀳 ‘‘𑀦 𑀪𑀺𑀓𑁆𑀔𑀯𑁂 𑀘𑀺𑀢𑁆𑀭𑀸𑀦𑀺 𑀧𑀢𑁆𑀢𑀫𑀡𑁆𑀟𑀮𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺 𑀭𑀽𑀧𑀓𑀸𑀓𑀺𑀡𑁆𑀡𑀸𑀦𑀺 𑀪𑀺𑀢𑁆𑀢𑀺𑀓𑀫𑁆𑀫𑀓𑀢𑀸𑀦𑀻’’𑀢𑀺 (𑀘𑀽𑀴𑀯. 𑁨𑁫𑁩). 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀢𑁆𑀢𑀫𑀡𑁆𑀟𑀮𑁂. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀫𑀓𑀭𑀤𑀦𑁆𑀢𑀓𑀦𑁆𑀢𑀺 𑀕𑀺𑀭𑀺𑀓𑀽𑀝𑀸𑀓𑀸𑀭𑀁.

𑁩𑁦𑁪𑁯. 𑀫𑀼𑀔𑀯𑀝𑁆𑀝𑀺𑀬𑀁 𑀬𑀸 𑀮𑁂𑀔𑀸 𑀧𑀭𑀺𑀲𑁆𑀲𑀸𑀯𑀦𑀩𑀦𑁆𑀥𑀦𑀢𑁆𑀣𑀸𑀬 𑀅𑀦𑀼𑀜𑁆𑀜𑀸𑀢𑀸, 𑀢𑀁 𑀮𑁂𑀔𑀁 𑀞𑀧𑁂𑀢𑁆𑀯𑀸 𑀥𑀫𑁆𑀫𑀓𑀭𑀡𑀘𑁆𑀙𑀢𑁆𑀢𑁂 𑀯𑀸 𑀓𑀼𑀘𑁆𑀙𑀺𑀬𑀁 𑀯𑀸 𑀓𑀸𑀘𑀺𑀧𑀺 𑀮𑁂𑀔𑀸 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁩𑁦𑁫𑁦. 𑀢𑀳𑀺𑀁 𑀢𑀳𑀺𑀦𑁆𑀢𑀺 𑀫𑀢𑁆𑀢𑀺𑀓𑀸𑀬 𑀢𑀢𑁆𑀣 𑀢𑀢𑁆𑀣. 𑀢𑀦𑁆𑀢𑀺 𑀢𑀣𑀸𑀓𑁄𑀝𑁆𑀝𑀺𑀢𑀤𑀺𑀕𑀼𑀡𑀲𑀼𑀢𑁆𑀢𑀓𑀸𑀬𑀩𑀦𑁆𑀥𑀦𑀁.

𑁩𑁦𑁫𑁧. 𑀅𑀦𑁆𑀢𑁂𑀲𑀼 𑀤𑀴𑁆𑀳𑀢𑁆𑀣𑀸𑀬 𑀤𑀲𑀸𑀫𑀼𑀔𑁂 𑀤𑀺𑀕𑀼𑀡𑀁 𑀓𑀢𑁆𑀯𑀸 𑀓𑁄𑀝𑁆𑀝𑁂𑀦𑁆𑀢𑀺, 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀘𑀺𑀢𑁆𑀢𑀺𑀓𑀫𑁆𑀧𑀻𑀢𑀺 𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀘𑀺𑀢𑁆𑀢𑀬𑀼𑀢𑁆𑀢𑀫𑁆𑀧𑀺 𑀓𑀸𑀬𑀩𑀦𑁆𑀥𑀦𑀁.

𑁩𑁦𑁫𑁨. 𑀅𑀓𑁆𑀔𑀻𑀦𑀻𑀢𑀺 𑀓𑀼𑀜𑁆𑀚𑀭𑀓𑁆𑀔𑀻𑀦𑀺. 𑀢𑀢𑁆𑀣𑀸𑀢𑀺 𑀓𑀸𑀬𑀩𑀦𑁆𑀥𑀦𑁂 𑀯𑀝𑁆𑀝𑀢𑀻𑀢𑀺 𑀓𑀸 𑀓𑀣𑀸. 𑀉𑀝𑁆𑀞𑀸𑀧𑁂𑀢𑀼𑀦𑁆𑀢𑀺 𑀉𑀓𑁆𑀓𑀺𑀭𑀺𑀢𑀼𑀁.

𑁩𑁦𑁫𑁩. 𑀖𑀝𑀦𑁆𑀢𑀺 𑀖𑀝𑀲𑀡𑁆𑀞𑀸𑀦𑀁. 𑀤𑁂𑀟𑁆𑀟𑀼𑀪𑀲𑀻𑀲𑀁 𑀯𑀸𑀢𑀺 𑀉𑀤𑀓𑀲𑀧𑁆𑀧𑀲𑀻𑀲𑀫𑀼𑀔𑀲𑀡𑁆𑀞𑀸𑀦𑀁 𑀯𑀸. 𑀬𑀁 𑀓𑀺𑀜𑁆𑀘𑀺 𑀯𑀺𑀓𑀸𑀭𑀭𑀽𑀧𑀁 𑀤𑀲𑀸𑀫𑀼𑀔𑁂 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁩𑁦𑁫𑁪. 𑀫𑀘𑁆𑀙𑀓𑀡𑁆𑀝𑀦𑁆𑀢𑀺 𑀫𑀘𑁆𑀙𑀓𑀡𑁆𑀝𑀓𑀸𑀓𑀸𑀭𑀁. 𑀔𑀚𑁆𑀚𑀽𑀭𑀺𑀧𑀢𑁆𑀢𑀓𑀸𑀓𑀸𑀭𑀦𑁆𑀢𑀺 𑀔𑀚𑁆𑀚𑀽𑀭𑀺𑀧𑀢𑁆𑀢𑀲𑀡𑁆𑀞𑀸𑀦𑀁. 𑀫𑀘𑁆𑀙𑀓𑀡𑁆𑀝𑀁 𑀯𑀸 𑀫𑀝𑁆𑀞𑀁 𑀧𑀝𑁆𑀝𑀺𑀓𑀁 𑀯𑀸 𑀔𑀚𑁆𑀚𑀽𑀭𑀺𑀧𑀢𑁆𑀢𑀓𑀸𑀓𑀸𑀭𑀁 𑀯𑀸 𑀉𑀚𑀼𑀓𑀁 𑀓𑀢𑁆𑀯𑀸 𑀓𑁄𑀝𑁆𑀝𑀺𑀢𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 𑀉𑀪𑀬𑀧𑀲𑁆𑀲𑁂𑀲𑀼 𑀫𑀘𑁆𑀙𑀓𑀡𑁆𑀝𑀓𑀬𑀼𑀢𑁆𑀢𑀁 𑀫𑀘𑁆𑀙𑀲𑁆𑀲 𑀧𑀺𑀝𑁆𑀞𑀺𑀓𑀡𑁆𑀝𑀓𑀁 𑀯𑀺𑀬 𑀬𑀲𑁆𑀲 𑀧𑀝𑁆𑀝𑀺𑀓𑀸𑀬 𑀯𑀸𑀬𑀦𑀁 𑀳𑁄𑀢𑀺, 𑀇𑀤𑀁 𑀓𑀸𑀬𑀩𑀦𑁆𑀥𑀦𑀁 𑀫𑀘𑁆𑀙𑀓𑀡𑁆𑀝𑀓𑀁 𑀦𑀸𑀫. 𑀬𑀲𑁆𑀲 𑀔𑀚𑁆𑀚𑀽𑀭𑀺𑀧𑀢𑁆𑀢𑀲𑀡𑁆𑀞𑀸𑀦𑀫𑀺𑀯 𑀯𑀸𑀬𑀦𑀁 𑀳𑁄𑀢𑀺, 𑀢𑀁 𑀔𑀚𑁆𑀚𑀽𑀭𑀺𑀧𑀢𑁆𑀢𑀓𑀸𑀓𑀸𑀭𑀁 𑀦𑀸𑀫.

𑁩𑁦𑁫𑁫. 𑀧𑀓𑀢𑀺𑀯𑀻𑀢𑀸 𑀧𑀝𑁆𑀝𑀺𑀓𑀸. 𑀲𑀽𑀓𑀭𑀦𑁆𑀢𑀁𑀦𑀸𑀫 𑀓𑀼𑀜𑁆𑀘𑀺𑀓𑀸𑀓𑁄𑀲𑀓𑀲𑀡𑁆𑀞𑀸𑀦𑀁. 𑀢𑀲𑁆𑀲 𑀤𑀼𑀯𑀺𑀥𑀲𑁆𑀲 𑀓𑀸𑀬𑀩𑀦𑁆𑀥𑀦𑀲𑁆𑀲. 𑀢𑀢𑁆𑀣 𑀭𑀚𑁆𑀚𑀼𑀓𑀸 𑀲𑀽𑀓𑀭𑀦𑁆𑀢𑀸𑀦𑀼𑀮𑁄𑀫𑀺𑀓𑀸, 𑀤𑀼𑀲𑁆𑀲𑀧𑀝𑁆𑀝𑀁 𑀧𑀝𑁆𑀝𑀺𑀓𑀸𑀦𑀼𑀮𑁄𑀫𑀺𑀓𑀁. 𑀆𑀤𑀺-𑀲𑀤𑁆𑀤𑁂𑀦 𑀫𑀼𑀤𑁆𑀤𑀺𑀓𑀓𑀸𑀬𑀩𑀦𑁆𑀥𑀦𑀁 𑀕𑀳𑀺𑀢𑀁, 𑀢𑀜𑁆𑀘 𑀲𑀽𑀓𑀭𑀦𑁆𑀢𑀸𑀦𑀼𑀮𑁄𑀫𑀺𑀓𑀁. 𑀬𑀣𑀸𑀳 𑁋 ‘‘𑀏𑀓𑀭𑀚𑁆𑀚𑀼𑀓𑀁, 𑀧𑀦 𑀫𑀼𑀤𑁆𑀤𑀺𑀓𑀓𑀸𑀬𑀩𑀦𑁆𑀥𑀦𑀜𑁆𑀘 𑀲𑀽𑀓𑀭𑀦𑁆𑀢𑀓𑀁 𑀅𑀦𑀼𑀮𑁄𑀫𑁂𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁨𑁭𑁮). 𑀢𑀢𑁆𑀣 𑀏𑀓𑀭𑀚𑁆𑀚𑀼𑀓𑀸 𑀦𑀸𑀫 𑀏𑀓𑀯𑀝𑁆𑀝𑀸. 𑀩𑀳𑀼𑀭𑀚𑁆𑀚𑀼𑀓𑀲𑁆𑀲 𑀅𑀓𑀧𑁆𑀧𑀺𑀬𑀪𑀸𑀯𑀁 𑀯𑀓𑁆𑀔𑀢𑀺. ‘‘𑀫𑀼𑀤𑁆𑀤𑀺𑀓𑀓𑀸𑀬𑀩𑀦𑁆𑀥𑀦𑀁 𑀦𑀸𑀫 𑀘𑀢𑀼𑀭𑀲𑁆𑀲𑀁 𑀅𑀓𑀢𑁆𑀯𑀸 𑀲𑀚𑁆𑀚𑀺𑀢’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁.

𑁩𑁦𑁫𑁬. 𑀫𑀼𑀭𑀚𑀁 𑀦𑀸𑀫 𑀫𑀼𑀭𑀚𑀯𑀝𑁆𑀝𑀺𑀲𑀡𑁆𑀞𑀸𑀦𑀁 𑀯𑁂𑀞𑁂𑀢𑁆𑀯𑀸 𑀓𑀢𑀁. 𑀯𑁂𑀞𑁂𑀢𑁆𑀯𑀸𑀢𑀺 𑀦𑀸𑀦𑀸𑀲𑀼𑀢𑁆𑀢𑁂𑀳𑀺 𑀯𑁂𑀞𑁂𑀢𑁆𑀯𑀸. 𑀲𑀺𑀓𑁆𑀔𑀸𑀪𑀸𑀚𑀦𑀯𑀺𑀦𑀺𑀘𑁆𑀙𑀬𑁂 𑀧𑀦 ‘‘𑀩𑀳𑀼𑀓𑀸 𑀭𑀚𑁆𑀚𑀼𑀬𑁄 𑀏𑀓𑀢𑁄 𑀓𑀢𑁆𑀯𑀸 𑀏𑀓𑀸𑀬 𑀭𑀚𑁆𑀚𑀼𑀬𑀸 𑀯𑁂𑀞𑀺𑀢𑀁 𑀫𑀼𑀭𑀚𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀫𑀤𑁆𑀤𑀯𑀻𑀡𑀁 𑀦𑀸𑀫 𑀧𑀸𑀫𑀗𑁆𑀕𑀲𑀡𑁆𑀞𑀸𑀦𑀁. 𑀤𑁂𑀟𑁆𑀟𑀼𑀪𑀓𑀁 𑀦𑀸𑀫 𑀉𑀤𑀓𑀲𑀧𑁆𑀧𑀲𑀻𑀲𑀲𑀤𑀺𑀲𑀁. 𑀓𑀮𑀸𑀩𑀼𑀓𑀁 𑀦𑀸𑀫 𑀩𑀳𑀼𑀭𑀚𑁆𑀚𑀼𑀓𑀁. 𑀭𑀚𑁆𑀚𑀼𑀬𑁄𑀢𑀺 𑀉𑀪𑀬𑀓𑁄𑀝𑀺𑀬𑀁 𑀏𑀓𑀢𑁄 𑀅𑀩𑀤𑁆𑀥𑀸 𑀩𑀳𑀽 𑀭𑀚𑁆𑀚𑀼𑀬𑁄, 𑀢𑀣𑀸 𑀩𑀤𑁆𑀥𑀸 𑀓𑀮𑀸𑀩𑀼𑀓𑀁 𑀦𑀸𑀫 𑀳𑁄𑀢𑀻𑀢𑀺. 𑀦 𑀯𑀝𑁆𑀝𑀦𑁆𑀢𑀻𑀢𑀺 𑀫𑀼𑀭𑀚𑀸𑀤𑀻𑀦𑀺 𑀇𑀫𑀸𑀦𑀺 𑀲𑀩𑁆𑀩𑀸𑀦𑀺 𑀓𑀸𑀬𑀩𑀦𑁆𑀥𑀦𑀸𑀦𑀺 𑀦 𑀯𑀝𑁆𑀝𑀦𑁆𑀢𑀺. 𑀧𑀼𑀭𑀺𑀫𑀸 𑀤𑁆𑀯𑁂𑀢𑀺 𑀫𑀼𑀭𑀚𑀁, 𑀫𑀤𑁆𑀤𑀯𑀻𑀡𑀜𑁆𑀘𑀸𑀢𑀺 𑀤𑁆𑀯𑁂. ‘‘𑀤𑀲𑀸𑀲𑀼 𑀲𑀺𑀬𑀼’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀯𑀡𑁆𑀡𑀮𑁄𑀧𑁂𑀦 ‘‘𑀤𑀲𑀸 𑀲𑀺𑀬𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀣𑀸𑀳 𑁋 ‘‘𑀫𑀼𑀭𑀚𑀁 𑀫𑀤𑁆𑀤𑀯𑀻𑀡’𑀦𑁆𑀢𑀺 𑀇𑀤𑀁 𑀤𑀲𑀸𑀲𑀼𑀬𑁂𑀯 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁨𑁭𑁮).

𑁩𑁦𑁫𑁭. 𑀧𑀸𑀫𑀗𑁆𑀕𑀲𑀡𑁆𑀞𑀸𑀦𑀸𑀢𑀺 𑀧𑀸𑀫𑀗𑁆𑀕𑀤𑀸𑀫𑀁 𑀯𑀺𑀬 𑀘𑀢𑀼𑀭𑀲𑁆𑀲𑀲𑀡𑁆𑀞𑀸𑀦𑀸.

𑁩𑁦𑁫𑁮. 𑀏𑀓𑀭𑀚𑁆𑀚𑀼𑀫𑀬𑀦𑁆𑀢𑀺 𑀦𑀸𑀦𑀸𑀯𑀝𑁆𑀝𑁂 𑀏𑀓𑀢𑁄 𑀯𑀝𑁆𑀝𑁂𑀢𑁆𑀯𑀸 𑀓𑀢𑀭𑀚𑁆𑀚𑀼𑀫𑀬𑀁 𑀓𑀸𑀬𑀩𑀦𑁆𑀥𑀦𑀁. 𑀯𑀝𑁆𑀝𑀁 𑀯𑀝𑁆𑀝𑀢𑀻𑀢𑀺 ‘‘𑀭𑀚𑁆𑀚𑀼𑀓𑀸 𑀤𑀼𑀲𑁆𑀲𑀧𑀝𑁆𑀝𑀸𑀤𑀻’’𑀢𑀺 𑀏𑀢𑁆𑀣 𑀏𑀓𑀯𑀝𑁆𑀝𑀭𑀚𑁆𑀚𑀼𑀓𑀸 𑀕𑀳𑀺𑀢𑀸, 𑀇𑀥 𑀧𑀦 𑀦𑀸𑀦𑀸𑀯𑀝𑁆𑀝𑁂 𑀏𑀓𑀢𑁄 𑀯𑀝𑁆𑀝𑁂𑀢𑁆𑀯𑀸 𑀓𑀢𑀸𑀯 𑀏𑀓𑀭𑀚𑁆𑀚𑀼𑀓𑀸 𑀕𑀳𑀺𑀢𑀸. 𑀢𑀜𑁆𑀘𑀸𑀢𑀺 𑀢𑀫𑁆𑀧𑀺 𑀏𑀓𑀭𑀚𑁆𑀚𑀼𑀓𑀓𑀸𑀬𑀩𑀦𑁆𑀥𑀦𑀁. 𑀧𑀸𑀫𑀗𑁆𑀕𑀲𑀡𑁆𑀞𑀸𑀦𑀁 𑀏𑀓𑀫𑁆𑀧𑀺 𑀦 𑀘 𑀯𑀝𑁆𑀝𑀢𑀻𑀢𑀺 𑀓𑁂𑀯𑀮𑀫𑁆𑀧𑀺 𑀦 𑀯𑀝𑁆𑀝𑀢𑀺.

𑁩𑁦𑁫𑁯. 𑀩𑀳𑀽 𑀭𑀚𑁆𑀚𑀼𑀓𑁂 𑀏𑀓𑀢𑁄 𑀓𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀯𑀝𑁆𑀝𑀢𑀺 𑀩𑀦𑁆𑀥𑀺𑀢𑀼𑀦𑁆𑀢𑀺 𑀫𑀼𑀭𑀚𑀁, 𑀓𑀮𑀸𑀩𑀼𑀓𑀁 𑀯𑀸 𑀦 𑀳𑁄𑀢𑀺, 𑀭𑀚𑁆𑀚𑀼𑀓𑀓𑀸𑀬𑀩𑀦𑁆𑀥𑀦𑀫𑁂𑀯 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀬𑀁 𑀧𑀦 𑀯𑀺𑀦𑀺𑀘𑁆𑀙𑀬𑁄 ‘‘𑀩𑀳𑀽 𑀭𑀚𑁆𑀚𑀼𑀓𑁂 𑀏𑀓𑀢𑁄 𑀓𑀢𑁆𑀯𑀸 𑀏𑀓𑁂𑀦 𑀦𑀺𑀭𑀦𑁆𑀢𑀭𑀁 𑀯𑁂𑀞𑁂𑀢𑁆𑀯𑀸 𑀓𑀢𑀁 ‘𑀩𑀳𑀼𑀭𑀚𑁆𑀚𑀼𑀓’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁮𑁫 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬) 𑀅𑀝𑁆𑀞𑀓𑀣𑀸𑀕𑀢𑁄𑀯 𑀇𑀥 𑀯𑀼𑀢𑁆𑀢𑁄. 𑀲𑀺𑀓𑁆𑀔𑀸𑀪𑀸𑀚𑀦𑀯𑀺𑀦𑀺𑀘𑁆𑀙𑀬𑁂 ‘‘𑀩𑀳𑀼𑀓𑀸 𑀭𑀚𑁆𑀚𑀼𑀬𑁄 𑀏𑀓𑀢𑁄 𑀓𑀢𑁆𑀯𑀸 𑀏𑀓𑀸𑀬 𑀭𑀚𑁆𑀚𑀼𑀬𑀸 𑀯𑁂𑀞𑀺𑀢𑀁 𑀫𑀼𑀭𑀚𑀁 𑀦𑀸𑀫𑀸’’𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀇𑀫𑀺𑀦𑀸 𑀯𑀺𑀭𑀼𑀚𑁆𑀛𑀦𑀢𑁄 𑀦 𑀕𑀳𑁂𑀢𑀩𑁆𑀩𑀁.

𑁩𑁦𑁬𑁦. 𑀤𑀦𑁆𑀢-𑀲𑀤𑁆𑀤𑁂𑀦 𑀳𑀢𑁆𑀣𑀺𑀤𑀦𑁆𑀢𑀸 𑀯𑀼𑀢𑁆𑀢𑀸. 𑀚𑀢𑀽𑀢𑀺 𑀮𑀸𑀔𑀸. 𑀲𑀗𑁆𑀔𑀫𑀬𑀦𑁆𑀢𑀺 𑀲𑀗𑁆𑀔𑀦𑀸𑀪𑀺𑀫𑀬𑀁. 𑀯𑀺𑀥𑀓𑀸 𑀫𑀢𑀸𑀢𑀺 𑀏𑀢𑁆𑀣 ‘‘𑀯𑁂𑀞𑀓𑀸’’𑀢𑀺𑀧𑀺 𑀧𑀸𑀞𑁄 𑀯𑀺𑀥𑀧𑀭𑀺𑀬𑀸𑀬𑁄.

𑁩𑁦𑁬𑁧. 𑀓𑀸𑀬𑀩𑀦𑁆𑀥𑀦𑀯𑀺𑀥𑁂𑀢𑀺 𑀓𑀸𑀬𑀩𑀦𑁆𑀥𑀦𑀲𑁆𑀲 𑀤𑀲𑀸𑀬 𑀣𑀺𑀭𑀪𑀸𑀯𑀢𑁆𑀣𑀁 𑀓𑀝𑁆𑀞𑀤𑀦𑁆𑀢𑀸𑀤𑀻𑀳𑀺 𑀓𑀢𑁂 𑀯𑀺𑀥𑁂. 𑀯𑀺𑀓𑀸𑀭𑁄 𑀅𑀝𑁆𑀞𑀫𑀗𑁆𑀕𑀮𑀸𑀤𑀺𑀓𑁄. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂, 𑀉𑀪𑀬𑀓𑁄𑀝𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀢𑀼-𑀲𑀤𑁆𑀤𑁂𑀦 𑀖𑀝𑀸𑀓𑀸𑀭𑁄𑀧𑀺 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺.

𑁩𑁦𑁬𑁨. 𑀫𑀸𑀮𑀸 …𑀧𑁂… 𑀯𑀺𑀘𑀺𑀢𑁆𑀢𑀺𑀢𑀸𑀢𑀺 𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑁂𑀳𑀺 𑀘 𑀫𑀺𑀕𑀧𑀓𑁆𑀔𑀺𑀭𑀽𑀧𑀸𑀤𑀺𑀦𑀸𑀦𑀸𑀭𑀽𑀧𑁂𑀳𑀺 𑀘 𑀯𑀺𑀘𑀺𑀢𑁆𑀢𑀺𑀢𑀸. 𑀚𑀦𑀭𑀜𑁆𑀚𑀦𑀻𑀢𑀺 𑀩𑀸𑀮𑀚𑀦𑀧𑀮𑁄𑀪𑀺𑀦𑀻.

𑁩𑁦𑁬𑁪. 𑀅𑀝𑁆𑀞𑀁𑀲𑀸 𑀯𑀸𑀧𑀻𑀢𑀺 𑀏𑀢𑁆𑀣 𑀅𑀧𑀺-𑀲𑀤𑁆𑀤𑁂𑀦 𑀲𑁄𑀴𑀲𑀁𑀲𑀸𑀤𑀻𑀦𑀁 𑀕𑀳𑀡𑀁. 𑀯𑀡𑁆𑀡𑀫𑀝𑁆𑀞𑀸𑀢𑀺 𑀫𑀸𑀮𑀸𑀓𑀫𑁆𑀫𑀸𑀤𑀺𑀯𑀡𑁆𑀡𑀫𑀝𑁆𑀞𑀸.

𑁩𑁦𑁬𑁫. 𑀅𑀜𑁆𑀚𑀦𑀺𑀲𑀮𑀸𑀓𑀸𑀧𑀺 𑀢𑀣𑀸 𑀯𑀡𑁆𑀡𑀫𑀝𑁆𑀞𑀸 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. ‘‘𑀅𑀜𑁆𑀚𑀦𑀺𑀢𑁆𑀣𑀯𑀺𑀓𑀸𑀬 𑀘, 𑀦𑀸𑀦𑀸𑀯𑀡𑁆𑀡𑁂𑀳𑀺 𑀲𑀼𑀢𑁆𑀢𑁂𑀳𑀺, 𑀘𑀺𑀢𑁆𑀢𑀓𑀫𑁆𑀫𑀁 𑀦 𑀯𑀝𑁆𑀝𑀢𑀻’’𑀢𑀺 𑀧𑀸𑀞𑁄 𑀬𑀼𑀚𑁆𑀚𑀢𑀺. ‘‘𑀣𑀯𑀺𑀓𑀸𑀧𑀺 𑀘𑀸’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀲𑁄 𑀦 𑀕𑀳𑁂𑀢𑀩𑁆𑀩𑁄.

𑁩𑁦𑁬𑁬. 𑀭𑀢𑁆𑀢𑀸𑀤𑀺𑀦𑀸 𑀬𑁂𑀦 𑀓𑁂𑀦𑀘𑀺 𑀏𑀓𑀯𑀡𑁆𑀡𑁂𑀦 𑀲𑀼𑀢𑁆𑀢𑁂𑀦 𑀧𑀺𑀮𑁄𑀢𑀺𑀓𑀸𑀤𑀺𑀫𑀬𑀁 𑀬𑀁 𑀓𑀺𑀜𑁆𑀘𑀺 𑀲𑀺𑀧𑀸𑀝𑀺𑀓𑀁 𑀲𑀺𑀩𑁆𑀩𑁂𑀢𑁆𑀯𑀸 𑀯𑀴𑀜𑁆𑀚𑀦𑁆𑀢𑀲𑁆𑀲 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁩𑁦𑁬𑁭. 𑀫𑀡𑀺𑀓𑀦𑁆𑀢𑀺 𑀣𑀽𑀮𑀧𑀼𑀩𑁆𑀩𑀼𑀴𑀁. 𑀧𑀺𑀴𑀓𑀦𑁆𑀢𑀺 𑀲𑀼𑀔𑀼𑀫𑀧𑀼𑀩𑁆𑀩𑀼𑀴𑀁. 𑀧𑀺𑀧𑁆𑀨𑀮𑁂𑀢𑀺 𑀯𑀢𑁆𑀣𑀘𑁆𑀙𑁂𑀤𑀦𑀲𑀢𑁆𑀣𑁂. 𑀆𑀭𑀓𑀡𑁆𑀝𑀓𑁂𑀢𑀺 𑀧𑀢𑁆𑀢𑀸𑀥𑀸𑀭𑀯𑀮𑀬𑀸𑀦𑀁 𑀯𑀺𑀚𑁆𑀛𑀦𑀓𑀡𑁆𑀝𑀓𑁂. 𑀞𑀧𑁂𑀢𑀼𑀦𑁆𑀢𑀺 𑀉𑀝𑁆𑀞𑀸𑀧𑁂𑀢𑀼𑀁. 𑀬𑀁 𑀓𑀺𑀜𑁆𑀘𑀻𑀢𑀺 𑀲𑁂𑀲𑀁 𑀯𑀡𑁆𑀡𑀫𑀝𑁆𑀞𑀫𑁆𑀧𑀺 𑀘.

𑁩𑁦𑁬𑁮. 𑀤𑀡𑁆𑀟𑀓𑁂𑀢𑀺 𑀧𑀺𑀧𑁆𑀨𑀮𑀤𑀡𑁆𑀟𑀓𑁂. 𑀬𑀣𑀸𑀳 𑁋 ‘‘𑀧𑀺𑀧𑁆𑀨𑀮𑀓𑁂𑀧𑀺 𑀫𑀡𑀺𑀓𑀁 𑀯𑀸 𑀧𑀺𑀴𑀓𑀁 𑀯𑀸 𑀬𑀁 𑀓𑀺𑀜𑁆𑀘𑀺 𑀉𑀝𑁆𑀞𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀤𑀡𑁆𑀟𑀓𑁂 𑀧𑀦 𑀧𑀭𑀺𑀘𑁆𑀙𑁂𑀤𑀮𑁂𑀔𑀸 𑀯𑀝𑁆𑀝𑀢𑀻’’𑀢𑀺. 𑀧𑀭𑀺𑀘𑁆𑀙𑁂𑀤𑀮𑁂𑀔𑀸𑀫𑀢𑁆𑀢𑀦𑁆𑀢𑀺 𑀆𑀡𑀺𑀩𑀦𑁆𑀥𑀦𑀝𑁆𑀞𑀸𑀦𑀁 𑀧𑀢𑁆𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀦𑀢𑁆𑀣𑀁 𑀏𑀓𑀸𑀯 𑀮𑁂𑀔𑀸 𑀯𑀝𑁆𑀝𑀢𑀺. 𑀯𑀮𑀺𑀢𑁆𑀯𑀸𑀢𑀺 𑀉𑀪𑀬𑀓𑁄𑀝𑀺𑀬𑀸 𑀫𑀼𑀔𑀁 𑀓𑀢𑁆𑀯𑀸 𑀫𑀚𑁆𑀛𑁂 𑀯𑀮𑀺𑀬𑁄 𑀕𑀸𑀳𑁂𑀢𑁆𑀯𑀸. 𑀦𑀔𑀘𑁆𑀙𑁂𑀤𑀦𑀁 𑀬𑀲𑁆𑀫𑀸 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁩𑁦𑁬𑁯. 𑀅𑀭𑀡𑀺𑀲𑀳𑀺𑀢𑁂 𑀓𑀦𑁆𑀢𑀓𑀺𑀘𑁆𑀘𑀓𑀭𑁄 𑀤𑀡𑁆𑀟𑁄 𑀉𑀢𑁆𑀢𑀭𑀸𑀭𑀡𑀻 𑀦𑀸𑀫. 𑀯𑀸𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀅𑀥𑀭𑀸𑀭𑀡𑀺𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀉𑀤𑀼𑀓𑁆𑀔𑀮𑀤𑀡𑁆𑀟𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀜𑁆𑀙𑀦𑀓𑀬𑀦𑁆𑀢𑀥𑀦𑀼 𑀥𑀦𑀼𑀓𑀁 𑀦𑀸𑀫. 𑀫𑀼𑀲𑀮𑀫𑀢𑁆𑀣𑀓𑀧𑀻𑀴𑀦𑀤𑀡𑁆𑀟𑀓𑁄 𑀧𑁂𑀮𑁆𑀮𑀤𑀡𑁆𑀟𑀓𑁄 𑀦𑀸𑀫.

𑁩𑁦𑁭𑁦. 𑀲𑀡𑁆𑀟𑀸𑀲𑁂𑀢𑀺 𑀅𑀕𑁆𑀕𑀺𑀲𑀡𑁆𑀟𑀸𑀲𑀁 𑀯𑀤𑀦𑁆𑀢𑀺. 𑀓𑀝𑁆𑀞𑀘𑁆𑀙𑁂𑀤𑀦𑀯𑀸𑀲𑀺𑀬𑀸 𑀢𑀣𑀸 𑀬𑀁 𑀓𑀺𑀜𑁆𑀘𑀺 𑀯𑀡𑁆𑀡𑀫𑀝𑁆𑀞𑀁 𑀦 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀽𑀢𑀺 𑀯𑀸𑀲𑀺𑀬𑀸 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼. 𑀮𑁄𑀳𑁂𑀦𑀸𑀢𑀺 𑀓𑀧𑁆𑀧𑀺𑀬𑀮𑁄𑀳𑁂𑀦. 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀉𑀚𑀼𑀓𑀫𑁂𑀯 𑀘𑀢𑀼𑀭𑀲𑁆𑀲𑀁 𑀯𑀸 𑀅𑀝𑁆𑀞𑀁𑀲𑀁 𑀯𑀸 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀲𑀡𑁆𑀟𑀸𑀲𑁂𑀢𑀺 𑀅𑀕𑁆𑀕𑀺𑀲𑀡𑁆𑀟𑀸𑀲𑁂’’𑀢𑀺 𑀦𑀺𑀲𑁆𑀲𑀦𑁆𑀤𑁂𑀳𑁂 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦𑁂𑀢𑁆𑀣 𑀲𑀽𑀘𑀺𑀲𑀡𑁆𑀟𑀸𑀲𑁄 𑀤𑀲𑁆𑀲𑀺𑀢𑁄.

𑁩𑁦𑁭𑁧. 𑀳𑁂𑀝𑁆𑀞𑀢𑁄𑀢𑀺 𑀳𑁂𑀝𑁆𑀞𑀸 𑀅𑀬𑁄𑀧𑀝𑁆𑀝𑀯𑀮𑀬𑀲𑁆𑀲. ‘‘𑀉𑀧𑀭𑀺 𑀅𑀳𑀺𑀘𑁆𑀙𑀢𑁆𑀢𑀫𑀓𑀼𑀮𑀫𑀢𑁆𑀢’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑁩𑁦𑁭𑁨. 𑀯𑀺𑀲𑀸𑀡𑁂𑀢𑀺 𑀢𑁂𑀮𑀸𑀲𑀺𑀜𑁆𑀘𑀦𑀓𑀕𑀯𑀬𑀫𑀳𑀺𑀁𑀲𑀸𑀤𑀺𑀲𑀺𑀗𑁆𑀕𑁂. 𑀦𑀸𑀴𑀺𑀬𑀁 𑀯𑀸𑀧𑀻𑀢𑀺 𑀯𑁂𑀴𑀼𑀦𑀸𑀴𑀺𑀓𑀸𑀤𑀺𑀦𑀸𑀴𑀺𑀬𑀁. 𑀅𑀧𑀺-𑀲𑀤𑁆𑀤𑁂𑀦 𑀅𑀮𑀸𑀩𑀼𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀆𑀫𑀡𑁆𑀟𑀲𑀸𑀭𑀓𑁂𑀢𑀺 𑀆𑀫𑀮𑀓𑀘𑀼𑀡𑁆𑀡𑀫𑀬𑀢𑁂𑀮𑀖𑀝𑁂. 𑀢𑁂𑀮𑀪𑀸𑀚𑀦𑀓𑁂𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀬𑁂𑀯 𑀢𑁂𑀮𑀪𑀸𑀚𑀦𑁂. 𑀲𑀩𑁆𑀩𑀁 𑀯𑀡𑁆𑀡𑀫𑀝𑁆𑀞𑀁 𑀯𑀝𑁆𑀝𑀢𑀻𑀢𑀺 𑀧𑀼𑀫𑀺𑀢𑁆𑀣𑀺𑀭𑀽𑀧𑀭𑀳𑀺𑀢𑀁 𑀫𑀸𑀮𑀸𑀓𑀫𑁆𑀫𑀸𑀤𑀺 𑀲𑀩𑁆𑀩𑀁 𑀯𑀡𑁆𑀡𑀫𑀝𑁆𑀞𑀁 𑀯𑀝𑁆𑀝𑀢𑀺.

𑁩𑁦𑁭𑁩-𑁫. 𑀧𑀸𑀦𑀻𑀬𑀲𑁆𑀲 𑀉𑀴𑀼𑀗𑁆𑀓𑁂𑀢𑀺 𑀧𑀸𑀦𑀻𑀬𑀉𑀴𑀼𑀗𑁆𑀓𑁂. 𑀤𑁄𑀡𑀺𑀬𑀁 𑀭𑀚𑀦𑀲𑁆𑀲𑀧𑀻𑀢𑀺 𑀭𑀚𑀦𑀤𑁄𑀡𑀺𑀬𑀫𑁆𑀧𑀺. 𑀨𑀮𑀓𑀧𑀻𑀞𑁂𑀢𑀺 𑀨𑀮𑀓𑀫𑀬𑁂 𑀧𑀻𑀞𑁂. 𑀯𑀮𑀬𑀸𑀥𑀸𑀭𑀓𑀸𑀤𑀺𑀓𑁂𑀢𑀺 𑀤𑀦𑁆𑀢𑀯𑀮𑀬𑀸𑀤𑀺𑀆𑀥𑀸𑀭𑀓𑁂. 𑀆𑀤𑀺-𑀲𑀤𑁆𑀤𑁂𑀦 𑀤𑀡𑁆𑀟𑀸𑀥𑀸𑀭𑀓𑁄 𑀲𑀗𑁆𑀕𑀳𑀺𑀢𑁄. 𑀧𑀸𑀤𑀧𑀼𑀜𑁆𑀙𑀦𑀺𑀬𑀦𑁆𑀢𑀺 𑀘𑁄𑀴𑀸𑀤𑀺𑀫𑀬𑀧𑀸𑀤𑀧𑀼𑀜𑁆𑀙𑀦𑀺𑀬𑀁. 𑀧𑀻𑀞𑁂𑀢𑀺 𑀧𑀸𑀤𑀧𑀻𑀞𑁂. 𑀲𑀳𑀘𑀭𑀺𑀬𑁂𑀦 𑀧𑀸𑀤𑀓𑀣𑀮𑀺𑀓𑀸𑀬𑀜𑁆𑀘. 𑀘𑀺𑀢𑁆𑀢𑀁 𑀲𑀩𑁆𑀩𑀫𑁂𑀯 𑀘 𑀯𑀝𑁆𑀝𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑁂 𑀪𑀺𑀓𑁆𑀔𑀼𑀧𑀭𑀺𑀓𑁆𑀔𑀸𑀭𑁂 𑀫𑀸𑀢𑀼𑀕𑀸𑀫𑀭𑀽𑀧𑀭𑀳𑀺𑀢𑀁, 𑀪𑀺𑀓𑁆𑀔𑀼𑀦𑀺𑀧𑀭𑀺𑀓𑁆𑀔𑀸𑀭𑁂 𑀧𑀼𑀭𑀺𑀲𑀭𑀽𑀧𑀭𑀳𑀺𑀢𑀁 𑀅𑀯𑀲𑁂𑀲𑀁 𑀲𑀩𑁆𑀩𑀁 𑀘𑀺𑀢𑁆𑀢𑀓𑀫𑁆𑀫𑀁.

𑁩𑁦𑁭𑁬. 𑀦𑀸𑀦𑀸 𑀘 𑀢𑁂 𑀫𑀡𑀬𑁄 𑀘𑀸𑀢𑀺 𑀦𑀸𑀦𑀸𑀫𑀡𑀻, 𑀇𑀦𑁆𑀤𑀦𑀻𑀮𑀸𑀤𑀬𑁄, 𑀦𑀸𑀦𑀸𑀫𑀡𑀻𑀳𑀺 𑀓𑀢𑀸 𑀦𑀸𑀦𑀸𑀫𑀡𑀺𑀫𑀬𑀸, 𑀣𑀫𑁆𑀪𑀸 𑀘 𑀓𑀯𑀸𑀝𑀸 𑀘 𑀤𑁆𑀯𑀸𑀭𑀸 𑀘 𑀪𑀺𑀢𑁆𑀢𑀺𑀬𑁄 𑀘 𑀣𑀫𑁆𑀪𑀓𑀯𑀸𑀝𑀤𑁆𑀯𑀸𑀭𑀪𑀺𑀢𑁆𑀢𑀺𑀬𑁄, 𑀦𑀸𑀦𑀸𑀫𑀡𑀺𑀫𑀬𑀸 𑀣𑀫𑁆𑀪𑀓𑀯𑀸𑀝𑀤𑁆𑀯𑀸𑀭𑀪𑀺𑀢𑁆𑀢𑀺𑀬𑁄 𑀬𑀲𑁆𑀫𑀺𑀁 𑀢𑀁 𑀢𑀣𑀸 𑀯𑀼𑀢𑁆𑀢𑀁. 𑀓𑀸 𑀓𑀣𑀸 𑀯𑀡𑁆𑀡𑀫𑀝𑁆𑀞𑀓𑁂𑀢𑀺 𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀘𑀺𑀢𑁆𑀢𑀓𑀫𑁆𑀫𑀸𑀤𑀺𑀯𑀡𑁆𑀡𑀫𑀝𑁆𑀞𑀓𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑁩𑁦𑁭𑁭. 𑀣𑀸𑀯𑀭𑀲𑁆𑀲 𑀭𑀢𑀦𑀫𑀬𑀧𑀸𑀲𑀸𑀤𑀲𑁆𑀲 𑀓𑀧𑁆𑀧𑀺𑀬𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀲𑀼𑀯𑀡𑁆𑀡𑀸𑀤𑀺𑀫𑀬𑀲𑁆𑀲𑀸𑀧𑀺 𑀲𑀩𑁆𑀩𑀧𑀸𑀲𑀸𑀤𑀧𑀭𑀺𑀪𑁄𑀕𑀲𑁆𑀲 𑀓𑀧𑁆𑀧𑀺𑀬𑀪𑀸𑀯𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑁄𑀯𑀡𑁆𑀡𑀬’’𑀦𑁆𑀢𑀺𑀆𑀤𑀺. 𑀲𑁄𑀯𑀡𑁆𑀡𑀬𑀦𑁆𑀢𑀺 𑀲𑀼𑀯𑀡𑁆𑀡𑀫𑀬𑀁. 𑀤𑁆𑀯𑀸𑀭𑀓𑀯𑀸𑀝𑀸𑀦𑀁 𑀅𑀦𑀦𑁆𑀢𑀭𑀕𑀸𑀣𑀸𑀬 𑀤𑀲𑁆𑀲𑀺𑀢𑀢𑁆𑀢𑀸 ‘‘𑀤𑁆𑀯𑀸𑀭𑀓𑀯𑀸𑀝𑀩𑀦𑁆𑀥’’𑀦𑁆𑀢𑀺 𑀇𑀫𑀺𑀦𑀸 𑀤𑁆𑀯𑀸𑀭𑀓𑀯𑀸𑀝𑀩𑀸𑀳𑀸𑀲𑀗𑁆𑀔𑀸𑀢𑀁 𑀧𑀺𑀝𑁆𑀞𑀲𑀗𑁆𑀖𑀸𑀝𑀁 𑀕𑀳𑀺𑀢𑀁. 𑀤𑁆𑀯𑀸𑀭𑀜𑁆𑀘 𑀓𑀯𑀸𑀝𑀜𑁆𑀘 𑀤𑁆𑀯𑀸𑀭𑀓𑀯𑀸𑀝𑀸𑀦𑀺, 𑀤𑁆𑀯𑀸𑀭𑀓𑀯𑀸𑀝𑀸𑀦𑀁 𑀩𑀦𑁆𑀥𑀁 𑀤𑁆𑀯𑀸𑀭𑀓𑀯𑀸𑀝𑀩𑀦𑁆𑀥𑀁, 𑀉𑀢𑁆𑀢𑀭𑀧𑀸𑀲𑀓𑀼𑀫𑁆𑀫𑀸𑀭𑀲𑀗𑁆𑀔𑀸𑀢𑀁 𑀧𑀺𑀝𑁆𑀞𑀲𑀗𑁆𑀖𑀸𑀝𑀦𑁆𑀢𑀺 𑀅𑀢𑁆𑀣𑁄. 𑀦𑀸𑀦𑀸 𑀘 𑀢𑁂 𑀫𑀡𑀬𑁄 𑀘𑀸𑀢𑀺 𑀦𑀸𑀦𑀸𑀫𑀡𑀻, 𑀲𑀼𑀯𑀡𑁆𑀡𑀜𑁆𑀘 𑀦𑀸𑀦𑀸𑀫𑀡𑀻 𑀘 𑀲𑀼𑀯𑀡𑁆𑀡𑀦𑀸𑀦𑀸𑀫𑀡𑀻, 𑀪𑀺𑀢𑁆𑀢𑀺 𑀘 𑀪𑀽𑀫𑀺 𑀘 𑀪𑀺𑀢𑁆𑀢𑀺𑀪𑀽𑀫𑀺 𑀲𑀼𑀯𑀡𑁆𑀡𑀦𑀸𑀦𑀸𑀫𑀡𑀻𑀳𑀺 𑀓𑀢𑀸 𑀪𑀺𑀢𑁆𑀢𑀺𑀪𑀽𑀫𑀺 𑀲𑀼𑀯𑀡𑁆𑀡𑀦𑀸𑀦𑀸𑀫𑀡𑀺𑀪𑀺𑀢𑁆𑀢𑀺𑀪𑀽𑀫𑀺. 𑀇𑀢𑀺 𑀇𑀫𑁂𑀲𑀼 𑀲𑁂𑀦𑀸𑀲𑀦𑀸𑀯𑀬𑀯𑁂𑀲𑀼. 𑀦 𑀓𑀺𑀜𑁆𑀘𑀺 𑀏𑀓𑀫𑁆𑀧𑀺 𑀦𑀺𑀲𑁂𑀥𑀦𑀻𑀬𑀦𑁆𑀢𑀺 𑀏𑀓𑀫𑁆𑀧𑀺 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀁 𑀓𑀺𑀜𑁆𑀘𑀺 𑀦 𑀦𑀺𑀲𑁂𑀥𑀦𑀻𑀬𑀁, 𑀲𑁂𑀦𑀸𑀲𑀦𑀫𑁆𑀧𑀺 𑀦 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀦𑀸𑀲𑀦𑀁 𑀯𑀝𑁆𑀝𑀢𑀺 𑀲𑀩𑁆𑀩𑀫𑁂𑀯𑀸𑀢𑀺 𑀲𑀩𑁆𑀩𑀫𑁂𑀯 𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑀁 𑀯𑀝𑁆𑀝𑀢𑀺. 𑀬𑀣𑀸𑀳 𑁋

‘‘𑀲𑀩𑁆𑀩𑀁 𑀧𑀸𑀲𑀸𑀤𑀧𑀭𑀺𑀪𑁄𑀕𑀦𑁆𑀢𑀺 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀯𑀺𑀘𑀺𑀢𑁆𑀭𑀸𑀦𑀺 𑀓𑀯𑀸𑀝𑀸𑀦𑀺 𑀫𑀜𑁆𑀘𑀧𑀻𑀞𑀸𑀦𑀺 𑀢𑀸𑀮𑀯𑀡𑁆𑀝𑀸𑀦𑀺 𑀲𑀼𑀯𑀡𑁆𑀡𑀭𑀚𑀢𑀫𑀬𑀸𑀦𑀺 𑀧𑀸𑀦𑀻𑀬𑀖𑀝𑀧𑀸𑀦𑀻𑀬𑀲𑀭𑀸𑀯𑀸𑀦𑀺 𑀬𑀁 𑀓𑀺𑀜𑁆𑀘𑀺 𑀘𑀺𑀢𑁆𑀢𑀓𑀫𑁆𑀫𑀓𑀢𑀁, 𑀲𑀩𑁆𑀩𑀁 𑀯𑀝𑁆𑀝𑀢𑀺. ‘𑀧𑀸𑀲𑀸𑀤𑀲𑁆𑀲 𑀤𑀸𑀲𑀺𑀤𑀸𑀲𑀁 𑀔𑁂𑀢𑁆𑀢𑀯𑀢𑁆𑀣𑀼𑀁 𑀕𑁄𑀫𑀳𑀺𑀁𑀲𑀁 𑀤𑁂𑀫𑀸’𑀢𑀺 𑀯𑀤𑀦𑁆𑀢𑀺, 𑀧𑀸𑀝𑁂𑀓𑁆𑀓𑀁 𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀧𑀸𑀲𑀸𑀤𑁂 𑀧𑀝𑀺𑀕𑁆𑀕𑀳𑀺𑀢𑁂 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀕𑁄𑀦𑀓𑀸𑀤𑀻𑀦𑀺 𑀲𑀗𑁆𑀖𑀺𑀓𑀯𑀺𑀳𑀸𑀭𑁂 𑀯𑀸 𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑁂 𑀯𑀸 𑀫𑀜𑁆𑀘𑀧𑀻𑀞𑀓𑁂𑀲𑀼 𑀅𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺. 𑀥𑀫𑁆𑀫𑀸𑀲𑀦𑁂 𑀧𑀦 𑀕𑀺𑀳𑀺𑀯𑀺𑀓𑀢𑀦𑀻𑀳𑀸𑀭𑁂𑀦 𑀮𑀩𑁆𑀪𑀦𑁆𑀢𑀺, 𑀢𑀢𑁆𑀭𑀸𑀧𑀺 𑀦𑀺𑀧𑀚𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁦).

‘‘𑀲𑁄𑀯𑀡𑁆𑀡𑀤𑁆𑀯𑀸𑀭𑀓𑀯𑀸𑀝𑀩𑀦𑁆𑀥’’𑀦𑁆𑀢𑀺 𑀯𑀸 𑀧𑀸𑀞𑁄, 𑀩𑀳𑀼𑀩𑁆𑀩𑀻𑀳𑀺𑀲𑀫𑀸𑀲𑁄. 𑀇𑀫𑀺𑀦𑀸 𑀘 𑀤𑀼𑀢𑀺𑀬𑀧𑀤𑁂𑀦 𑀘 𑀲𑁂𑀦𑀸𑀲𑀦𑀁 𑀯𑀺𑀲𑁂𑀲𑀻𑀬𑀢𑀺.

𑁩𑁦𑁭𑁮. 𑀦 𑀤𑀯𑀁 𑀓𑀭𑁂𑀢𑀺 ‘‘𑀓𑀺𑀁 𑀩𑀼𑀤𑁆𑀥𑁄 𑀲𑀺𑀮𑀓𑀩𑀼𑀤𑁆𑀥𑁄? 𑀓𑀺𑀁 𑀥𑀫𑁆𑀫𑁄 𑀕𑁄𑀥𑀫𑁆𑀫𑁄 𑀅𑀚𑀥𑀫𑁆𑀫𑁄? 𑀓𑀺𑀁 𑀲𑀗𑁆𑀖𑁄 𑀕𑁄𑀲𑀗𑁆𑀖𑁄 𑀅𑀚𑀲𑀗𑁆𑀖𑁄 𑀫𑀺𑀕𑀲𑀗𑁆𑀖𑁄’’𑀢𑀺 𑀧𑀭𑀺𑀳𑀸𑀲𑀁 𑀦 𑀓𑀭𑁂𑀬𑁆𑀬. 𑀢𑀺𑀢𑁆𑀣𑀺𑀬𑀩𑁆𑀩𑀢𑀁 𑀫𑀽𑀕𑀩𑁆𑀩𑀢𑀸𑀤𑀺𑀓𑀁 𑀦𑁂𑀯 𑀕𑀡𑁆𑀳𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑁩𑁦𑁭𑁯. 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀉𑀤𑀓𑀸𑀤𑀺𑀦𑀸 𑀯𑀸𑀧𑀺 𑀦 𑀲𑀺𑀜𑁆𑀘𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑁩𑁦𑁮𑁦. 𑀅𑀜𑁆𑀜𑀢𑁆𑀣 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑁆𑀲𑀁𑀯𑀼𑀢𑁆𑀣𑁄 𑀅𑀜𑁆𑀜𑀢𑁆𑀣 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀸𑀕𑀁 𑀯𑀲𑁆𑀲𑀸𑀯𑀸𑀲𑀺𑀓𑀪𑀸𑀕𑀁 𑀕𑀡𑁆𑀳𑀸𑀢𑀺 𑀘𑁂, 𑀤𑀼𑀓𑁆𑀓𑀝𑀁. 𑀢𑀲𑁆𑀫𑀺𑀁 𑀘𑀻𑀯𑀭𑁂 𑀦𑀝𑁆𑀞𑁂 𑀯𑀸 𑀚𑀚𑁆𑀚𑀭𑁂 𑀚𑀺𑀡𑁆𑀡𑁂 𑀯𑀸 𑀕𑀻𑀯𑀸 𑀧𑀼𑀦 𑀤𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑁩𑁦𑁮𑁧. 𑀲𑁄𑀢𑀺 𑀅𑀜𑁆𑀜𑀢𑁆𑀣 𑀪𑀸𑀕𑀁 𑀕𑀡𑁆𑀳𑀦𑀓𑁄 𑀪𑀺𑀓𑁆𑀔𑀼. 𑀢𑁂𑀳𑀻𑀢𑀺 𑀘𑀻𑀯𑀭𑀲𑀸𑀫𑀺𑀓𑁂𑀳𑀺. 𑀢𑀦𑁆𑀢𑀺 𑀢𑀣𑀸 𑀕𑀳𑀺𑀢𑀁 𑀯𑀲𑁆𑀲𑀸𑀯𑀸𑀲𑀺𑀓𑀪𑀸𑀕𑀁. 𑀢𑁂𑀲𑀦𑁆𑀢𑀺 𑀘𑀻𑀯𑀭𑀲𑀸𑀫𑀺𑀓𑀸𑀦𑀁.

𑁩𑁦𑁮𑁨. 𑀓𑀭𑁄𑀢𑁄𑀢𑀺 𑀓𑀸𑀭𑀸𑀧𑀬𑀢𑁄. 𑀤𑀯𑀸 𑀲𑀺𑀮𑀁 𑀧𑀯𑀺𑀚𑁆𑀛𑀦𑁆𑀢𑁄𑀢𑀺 𑀧𑀦𑁆𑀢𑀺𑀓𑀻𑀴𑀸𑀬 𑀓𑀻𑀴𑀢𑁆𑀣𑀺𑀓𑀸𑀦𑀁 𑀲𑀺𑀧𑁆𑀧𑀤𑀲𑁆𑀲𑀦𑀯𑀲𑁂𑀦 𑀲𑀓𑁆𑀔𑀭𑀁 𑀯𑀸 𑀦𑀺𑀦𑁆𑀦𑀝𑁆𑀞𑀸𑀦𑀁 𑀧𑀯𑀝𑁆𑀝𑀦𑀯𑀲𑁂𑀦 𑀧𑀸𑀲𑀸𑀡𑀁 𑀯𑀸 𑀧𑀯𑀺𑀚𑁆𑀛𑀦𑁆𑀢𑁄. 𑀦 𑀓𑁂𑀯𑀮𑀜𑁆𑀘 𑀧𑀸𑀲𑀸𑀡𑀁, 𑀅𑀜𑁆𑀜𑀫𑁆𑀧𑀺 𑀬𑀁 𑀓𑀺𑀜𑁆𑀘𑀺 𑀤𑀸𑀭𑀼𑀔𑀡𑁆𑀟𑀁 𑀯𑀸 𑀇𑀝𑁆𑀞𑀓𑀔𑀡𑁆𑀟𑀁 𑀯𑀸 𑀳𑀢𑁆𑀣𑁂𑀦 𑀯𑀸 𑀬𑀦𑁆𑀢𑁂𑀦 𑀯𑀸 𑀧𑀯𑀺𑀚𑁆𑀛𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀘𑁂𑀢𑀺𑀬𑀸𑀤𑀻𑀦𑀁 𑀅𑀢𑁆𑀣𑀸𑀬 𑀧𑀸𑀲𑀸𑀡𑀸𑀤𑀬𑁄 𑀳𑀲𑀦𑁆𑀢𑀸 𑀳𑀲𑀦𑁆𑀢𑀸 𑀧𑀯𑀝𑁆𑀝𑁂𑀦𑁆𑀢𑀺𑀧𑀺 𑀔𑀺𑀧𑀦𑁆𑀢𑀺𑀧𑀺 𑀉𑀓𑁆𑀔𑀺𑀧𑀦𑁆𑀢𑀺𑀧𑀺, 𑀓𑀫𑁆𑀫𑀲𑀫𑀬𑁄𑀢𑀺 𑀯𑀝𑁆𑀝𑀢𑀺.

𑁩𑁦𑁮𑁩. 𑀕𑀺𑀳𑀺𑀕𑁄𑀧𑀓𑀤𑀸𑀦𑀲𑁆𑀫𑀺𑀦𑁆𑀢𑀺 𑀕𑀺𑀳𑀻𑀦𑀁 𑀉𑀬𑁆𑀬𑀸𑀦𑀕𑁄𑀧𑀓𑀸𑀤𑀻𑀳𑀺 𑀅𑀢𑁆𑀢𑀦𑀸 𑀕𑁄𑀧𑀺𑀢𑀉𑀬𑁆𑀬𑀸𑀦𑀸𑀤𑀺𑀢𑁄 𑀨𑀮𑀸𑀤𑀻𑀦𑀁 𑀤𑀸𑀦𑁂 𑀬𑀸𑀯𑀤𑀢𑁆𑀣𑀁 𑀤𑀺𑀬𑁆𑀬𑀫𑀸𑀦𑁂𑀧𑀺. 𑀦 𑀤𑁄𑀲𑁄 𑀓𑁄𑀘𑀺 𑀕𑀡𑁆𑀳𑀢𑁄𑀢𑀺 𑀧𑀝𑀺𑀕𑁆𑀕𑀡𑁆𑀳𑀢𑁄 𑀪𑀺𑀓𑁆𑀔𑀼𑀦𑁄 𑀓𑁄𑀘𑀺 𑀤𑁄𑀲𑁄 𑀦𑀢𑁆𑀣𑀺. 𑀲𑀗𑁆𑀖𑀘𑁂𑀢𑀺𑀬𑀲𑀦𑁆𑀢𑀓𑁂 𑀢𑀸𑀮𑀨𑀮𑀸𑀤𑀺𑀫𑁆𑀳𑀺 𑀉𑀬𑁆𑀬𑀸𑀦𑀕𑁄𑀧𑀓𑀸𑀤𑀻𑀳𑀺 𑀤𑀺𑀬𑁆𑀬𑀫𑀸𑀦𑁂 𑀧𑀭𑀺𑀘𑁆𑀙𑁂𑀤𑀦𑀬𑁄 𑀢𑁂𑀲𑀁 𑀯𑁂𑀢𑀦𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀦𑀁𑀬𑁂𑀯 𑀕𑀳𑀡𑁂 𑀅𑀦𑀸𑀧𑀢𑁆𑀢𑀺𑀦𑀬𑁄 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸.

𑁩𑁦𑁮𑁪. 𑀧𑀼𑀭𑀺𑀲𑀲𑀁𑀬𑀼𑀢𑁆𑀢𑀦𑁆𑀢𑀺 𑀧𑀭𑀺𑀯𑀺𑀲𑀓𑁂𑀳𑀺 𑀧𑀼𑀭𑀺𑀲𑁂𑀳𑀺 𑀯𑀼𑀬𑁆𑀳𑀫𑀸𑀦𑀁. 𑀳𑀢𑁆𑀣𑀯𑀝𑁆𑀝𑀓𑀦𑁆𑀢𑀺 𑀳𑀢𑁆𑀣𑁂𑀦𑁂𑀯 𑀧𑀯𑀝𑁆𑀝𑁂𑀢𑀩𑁆𑀩𑀲𑀓𑀝𑀁.

𑁩𑁦𑁮𑁫. 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀓𑀺𑀜𑁆𑀘𑀺𑀧𑀺 𑀅𑀦𑀸𑀘𑀸𑀭𑀁 𑀦 𑀲𑀫𑁆𑀧𑀬𑁄𑀚𑁂𑀬𑁆𑀬 𑀦 𑀓𑀸𑀭𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. ‘‘𑀓𑀺𑀜𑁆𑀘𑀻’’𑀢𑀺𑀧𑀺 𑀧𑀸𑀞𑁄, 𑀕𑀳𑀝𑁆𑀞𑀁 𑀯𑀸 𑀧𑀩𑁆𑀩𑀚𑀺𑀢𑀁 𑀯𑀸 𑀓𑀺𑀜𑁆𑀘𑀺 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀅𑀦𑀸𑀘𑀸𑀭𑀯𑀲𑁂𑀦 𑀦 𑀲𑀫𑁆𑀧𑀬𑁄𑀚𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀑𑀪𑀸𑀲𑁂𑀦𑁆𑀢𑀲𑁆𑀲𑀸𑀢𑀺 𑀓𑀸𑀫𑀸𑀥𑀺𑀧𑁆𑀧𑀸𑀬𑀁 𑀧𑀓𑀸𑀲𑁂𑀦𑁆𑀢𑀲𑁆𑀲.

𑁩𑁦𑁮𑁬. 𑀳𑀯𑁂𑀢𑀺 𑀏𑀓𑀁𑀲𑀢𑁆𑀣𑁂 𑀦𑀺𑀧𑀸𑀢𑁄.

𑁩𑁦𑁮𑁭. 𑀅𑀢𑁆𑀢𑀦𑁄 𑀧𑀭𑀺𑀪𑁄𑀕𑀢𑁆𑀣𑀁 𑀤𑀺𑀦𑁆𑀦𑀦𑁆𑀢𑀺 ‘‘𑀢𑀼𑀫𑁆𑀳𑁂𑀬𑁂𑀯 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀯𑀢𑁆𑀯𑀸 𑀤𑀺𑀦𑁆𑀦𑀁 𑀢𑀺𑀘𑀻𑀯𑀭𑀸𑀤𑀺𑀁.

𑁩𑁦𑁮𑁮. 𑀅𑀲𑀧𑁆𑀧𑀸𑀬𑀦𑁆𑀢𑀺 𑀧𑀺𑀢𑁆𑀢𑀸𑀤𑀺𑀤𑁄𑀲𑀸𑀦𑀁 𑀓𑁄𑀧𑀦𑀯𑀲𑁂𑀦 𑀅𑀨𑀸𑀲𑀼𑀓𑀸𑀭𑀡𑀁. 𑀅𑀧𑀦𑁂𑀢𑀼𑀫𑁆𑀧𑀺 𑀚𑀳𑀺𑀢𑀼𑀫𑁆𑀧𑀺, 𑀧𑀕𑁂𑀯 𑀤𑀸𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀕𑁆𑀕𑀁 𑀕𑀳𑁂𑀢𑁆𑀯𑀸 𑀤𑀸𑀢𑀼𑀁 𑀯𑀸𑀢𑀺 𑀢𑀣𑀸 𑀕𑀳𑀡𑀸𑀭𑀳𑀁 𑀅𑀦𑁆𑀦𑀸𑀤𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀓𑀢𑀺𑀧𑀸𑀳𑀁 𑀪𑀼𑀢𑁆𑀯𑀸’’𑀢𑀺 𑀲𑁂𑀲𑁄. 𑀧𑀺𑀡𑁆𑀟𑀧𑀸𑀢𑀸𑀤𑀺𑀢𑁄 𑀅𑀕𑁆𑀕𑀁 𑀕𑀳𑁂𑀢𑁆𑀯𑀸 𑀧𑀢𑁆𑀢𑀸𑀤𑀺𑀁 𑀓𑀢𑀺𑀧𑀸𑀳𑀁 𑀪𑀼𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄.

𑁩𑁦𑁮𑁯. 𑀧𑀜𑁆𑀘𑀯𑀕𑁆𑀕𑀽𑀧𑀲𑀫𑁆𑀧𑀤𑀸𑀢𑀺 𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦 𑀲𑀗𑁆𑀖𑁂𑀦 𑀓𑀸𑀢𑀩𑁆𑀩𑀉𑀧𑀲𑀫𑁆𑀧𑀤𑀸. 𑀦𑀯𑀸𑀢𑀺 𑀅𑀜𑁆𑀜𑁂𑀳𑀺 𑀏𑀓𑀯𑀸𑀭𑀫𑁆𑀧𑀺 𑀅𑀧𑀭𑀺𑀪𑀼𑀢𑁆𑀢𑀸. 𑀕𑀼𑀡𑀗𑁆𑀕𑀼𑀡𑀉𑀧𑀸𑀳𑀦𑀸 𑀘𑀢𑀼𑀧𑀝𑀮𑀢𑁄 𑀧𑀝𑁆𑀞𑀸𑀬 𑀩𑀳𑀼𑀧𑀝𑀮𑀉𑀧𑀸𑀳𑀦𑀸. 𑀘𑀫𑁆𑀫𑀢𑁆𑀣𑀸𑀭𑁄𑀢𑀺 𑀓𑀧𑁆𑀧𑀺𑀬𑀘𑀫𑁆𑀫𑀢𑁆𑀣𑀭𑀡𑀜𑁆𑀘. 𑀥𑀼𑀯𑀦𑁆𑀳𑀸𑀦𑀦𑁆𑀢𑀺 𑀧𑀓𑀢𑀺𑀦𑀳𑀸𑀦𑀁.

𑁩𑁦𑁯𑁦. 𑀲𑀫𑁆𑀩𑀸𑀥𑀲𑁆𑀲𑀸𑀢𑀺 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀤𑁆𑀯𑀬𑀲𑁆𑀲 𑀲𑀸𑀫𑀦𑁆𑀢𑀸 𑀤𑁆𑀯𑀗𑁆𑀕𑀼𑀮𑀸 𑀅𑀦𑁆𑀢𑁄 𑀲𑀢𑁆𑀣𑀯𑀢𑁆𑀣𑀺𑀓𑀫𑁆𑀫𑀁 𑀯𑀸𑀭𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀲𑀢𑁆𑀣𑁂𑀦 𑀅𑀦𑁆𑀢𑀫𑀲𑁄 𑀦𑀔𑁂𑀦𑀸𑀧𑀺 𑀙𑁂𑀤𑀦𑀨𑀸𑀮𑀦𑀸𑀤𑀺𑀯𑀲𑁂𑀦 𑀲𑀢𑁆𑀣𑀓𑀫𑁆𑀫𑀜𑁆𑀘 𑀯𑀢𑁆𑀣𑀻𑀳𑀺 𑀪𑁂𑀲𑀚𑁆𑀚𑀢𑁂𑀮𑀲𑁆𑀲 𑀅𑀦𑁆𑀢𑁄 𑀧𑀯𑀺𑀲𑀦𑀯𑀲𑁂𑀦 𑀓𑀸𑀢𑀩𑁆𑀩𑀁 𑀯𑀢𑁆𑀣𑀺𑀓𑀫𑁆𑀫𑀜𑁆𑀘 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀯𑀺𑀥𑀸𑀦𑁂𑀦 𑀯𑀸𑀭𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀲𑁆𑀲𑀸𑀯𑀫𑀕𑁆𑀕𑀲𑁆𑀲 𑀲𑀸𑀫𑀦𑁆𑀢𑀸 𑀤𑁆𑀯𑀗𑁆𑀕𑀼𑀮𑀁 𑀅𑀗𑁆𑀕𑀚𑀸𑀢𑀲𑁆𑀲 𑀅𑀕𑁆𑀕𑀢𑁄 𑀧𑀝𑁆𑀞𑀸𑀬 𑀕𑀳𑁂𑀢𑀩𑁆𑀩𑀁.

𑁩𑁦𑁯𑁧. ‘‘𑀧𑀸𑀓𑀢𑁆𑀣’’𑀦𑁆𑀢𑀺 𑀇𑀫𑀺𑀦𑀸 𑀦𑀺𑀩𑁆𑀩𑀸𑀧𑁂𑀢𑀼𑀁 𑀘𑀮𑀦𑁂 𑀦𑀺𑀤𑁆𑀤𑁄𑀲𑀪𑀸𑀯𑀁 𑀤𑀻𑀧𑁂𑀢𑀺.

𑁩𑁦𑁯𑁨. 𑀉𑀧𑀴𑀸𑀮𑁂𑀢𑀻𑀢𑀺 ‘‘𑀧𑀢𑁆𑀢𑀘𑀻𑀯𑀭𑀸𑀤𑀺𑀧𑀭𑀺𑀓𑁆𑀔𑀸𑀭𑀁 𑀢𑁂 𑀤𑀫𑁆𑀫𑀻’’𑀢𑀺 𑀯𑀢𑁆𑀯𑀸 𑀧𑀮𑁄𑀪𑁂𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂. 𑀆𑀤𑀻𑀦𑀯𑀦𑁆𑀢𑀺 𑀅𑀮𑀚𑁆𑀚𑀺𑀢𑀸𑀤𑀺𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂𑀦 𑀲𑀳 𑀲𑀫𑁆𑀪𑁄𑀕𑀸𑀤𑀺𑀓𑀭𑀡𑁂 𑀅𑀮𑀚𑁆𑀚𑀺𑀪𑀸𑀯𑀸𑀧𑀚𑁆𑀚𑀦𑀸𑀤𑀺𑀆𑀤𑀻𑀦𑀯𑀁. 𑀢𑀲𑁆𑀲𑀸𑀢𑀺 𑀢𑀢𑁄 𑀯𑀺𑀬𑁄𑀚𑁂𑀢𑀩𑁆𑀩𑀲𑁆𑀲 𑀢𑀲𑁆𑀲.

𑁩𑁦𑁯𑁩. 𑀆𑀤𑀻𑀦𑀯𑀤𑀲𑁆𑀲𑀦𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀫𑀓𑁆𑀔𑀦’’𑀦𑁆𑀢𑀺𑀆𑀤𑀺. ‘‘𑀦𑀳𑀸𑀬𑀺𑀢𑀼𑀁 𑀕𑀢𑁂𑀦 𑀕𑀽𑀣𑀫𑀼𑀢𑁆𑀢𑁂𑀳𑀺 𑀫𑀓𑁆𑀔𑀦𑀁 𑀯𑀺𑀬 𑀤𑀼𑀲𑁆𑀲𑀻𑀮𑀁 𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀸 𑀢𑀬𑀸 𑀓𑀢’’𑀦𑁆𑀢𑀺 𑀏𑀯𑀁 𑀢𑀢𑁆𑀣 𑀆𑀤𑀻𑀦𑀯𑀁 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁩𑁦𑁯𑁪-𑁫. 𑀪𑀢𑁆𑀢𑀕𑁆𑀕𑁂 𑀪𑁄𑀚𑀦𑀲𑀸𑀮𑀸𑀬 𑀪𑀼𑀜𑁆𑀚𑀫𑀸𑀦𑁄. 𑀬𑀸𑀕𑀼𑀧𑀸𑀦𑁂𑀢𑀺 𑀬𑀸𑀕𑀼𑀁 𑀧𑀺𑀯𑀦𑀓𑀸𑀮𑁂. 𑀅𑀦𑁆𑀢𑁄𑀕𑀸𑀫𑁂𑀢𑀺 𑀅𑀦𑁆𑀢𑀭𑀖𑀭𑁂. 𑀯𑀻𑀣𑀺𑀬𑀦𑁆𑀢𑀺 𑀦𑀺𑀕𑀫𑀦𑀕𑀭𑀕𑀸𑀫𑀸𑀤𑀻𑀦𑀁 𑀭𑀣𑀺𑀓𑀸𑀬. 𑀅𑀦𑁆𑀥𑀓𑀸𑀭𑁂𑀢𑀺 𑀅𑀦𑁆𑀥𑀓𑀸𑀭𑁂 𑀯𑀢𑁆𑀢𑀫𑀸𑀦𑁂, 𑀅𑀦𑁆𑀥𑀓𑀸𑀭𑀕𑀢𑁄𑀢𑀺 𑀅𑀢𑁆𑀣𑁄. 𑀢𑀜𑁆𑀳𑀺 𑀯𑀦𑁆𑀤𑀦𑁆𑀢𑀲𑁆𑀲 𑀫𑀜𑁆𑀘𑀧𑀸𑀤𑀸𑀤𑀻𑀲𑀼𑀧𑀺 𑀦𑀮𑀸𑀝𑀁 𑀧𑀝𑀺𑀳𑀜𑁆𑀜𑁂𑀬𑁆𑀬. 𑀅𑀦𑀸𑀯𑀚𑁆𑀚𑁄𑀢𑀺 𑀓𑀺𑀘𑁆𑀘𑀧𑀲𑀼𑀢𑀢𑁆𑀢𑀸 𑀯𑀦𑁆𑀤𑀦𑀁 𑀅𑀲𑀫𑀦𑁆𑀦𑀸𑀳𑀭𑀦𑁆𑀢𑁄. 𑀏𑀓𑀸𑀯𑀢𑁆𑀢𑁄𑀢𑀺 𑀏𑀓𑀢𑁄 𑀆𑀯𑀢𑁆𑀢𑁄 𑀲𑀧𑀢𑁆𑀢𑀧𑀓𑁆𑀔𑁂 𑀞𑀺𑀢𑁄 𑀯𑁂𑀭𑀻 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑁄. 𑀅𑀬𑀜𑁆𑀳𑀺 𑀯𑀦𑁆𑀤𑀺𑀬𑀫𑀸𑀦𑁄 𑀧𑀸𑀤𑁂𑀦𑀧𑀺 𑀧𑀳𑀭𑁂𑀬𑁆𑀬. 𑀯𑀸𑀯𑀝𑁄𑀢𑀺 𑀲𑀺𑀩𑁆𑀩𑀦𑀓𑀫𑁆𑀫𑀸𑀤𑀺𑀓𑀺𑀘𑁆𑀘𑀦𑁆𑀢𑀭𑀧𑀲𑀼𑀢𑁄.

𑀲𑀼𑀢𑁆𑀢𑁄𑀢𑀺 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑁄. 𑀔𑀸𑀤𑀦𑁆𑀢𑀺 𑀧𑀺𑀝𑁆𑀞𑀓𑀔𑀚𑁆𑀚𑀓𑀸𑀤𑀻𑀦𑀺 𑀔𑀸𑀤𑀦𑁆𑀢𑁄. 𑀪𑀼𑀜𑁆𑀚𑀦𑁆𑀢𑁄𑀢𑀺 𑀑𑀤𑀦𑀸𑀤𑀻𑀦𑀺 𑀪𑀼𑀜𑁆𑀚𑀦𑁆𑀢𑁄. 𑀯𑀘𑁆𑀘𑀁 𑀫𑀼𑀢𑁆𑀢𑀫𑁆𑀧𑀺 𑀯𑀸 𑀓𑀭𑀦𑁆𑀢𑀺 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀓𑀭𑁄𑀦𑁆𑀢𑁄 𑀇𑀢𑀺 𑀇𑀫𑁂𑀲𑀁 𑀢𑁂𑀭𑀲𑀦𑁆𑀦𑀁 𑀯𑀦𑁆𑀤𑀦𑀸 𑀅𑀬𑀼𑀢𑁆𑀢𑀢𑁆𑀣𑁂𑀦 𑀯𑀸𑀭𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁦𑁯𑁬-𑁭. 𑀓𑀫𑁆𑀫𑀮𑀤𑁆𑀥𑀺𑀲𑀻𑀫𑀸𑀯𑀲𑁂𑀦 𑀢𑀻𑀲𑀼 𑀦𑀸𑀦𑀸𑀲𑀁𑀯𑀸𑀲𑀓𑁂𑀲𑀼 𑀓𑀫𑁆𑀫𑀦𑀸𑀦𑀸𑀲𑀁𑀯𑀸𑀲𑀓𑀲𑁆𑀲 𑀉𑀓𑁆𑀔𑀺𑀢𑁆𑀢𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸, 𑀲𑀻𑀫𑀸𑀦𑀸𑀦𑀸𑀲𑀁𑀯𑀸𑀲𑀓𑀯𑀼𑀟𑁆𑀠𑀢𑀭𑀧𑀓𑀢𑀢𑁆𑀢𑀲𑁆𑀲 𑀯𑀦𑁆𑀤𑀺𑀬𑀢𑁆𑀢𑀸, 𑀧𑀸𑀭𑀺𑀲𑁂𑀲𑀜𑀸𑀬𑁂𑀦 ‘‘𑀦𑀸𑀦𑀸𑀲𑀁𑀯𑀸𑀲𑀓𑁄 𑀯𑀼𑀟𑁆𑀠𑀢𑀭𑁄 𑀅𑀥𑀫𑁆𑀫𑀯𑀸𑀤𑀻 𑀅𑀯𑀦𑁆𑀤𑀺𑀬𑁄’’𑀢𑀺 (𑀧𑀭𑀺. 𑁪𑁬𑁭) 𑀯𑀘𑀦𑀢𑁄 𑀘 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑁄 𑀇𑀥 ‘‘𑀦𑀸𑀦𑀸𑀲𑀁𑀯𑀸𑀲𑀓𑁄’’𑀢𑀺 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀉𑀓𑁆𑀔𑀺𑀢𑁆𑀢𑁄𑀢𑀺 𑀢𑀺𑀯𑀺𑀥𑁂𑀦𑀸𑀧𑀺 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑀓𑁄. 𑀕𑀭𑀼𑀓𑀝𑁆𑀞𑀸 𑀘 𑀧𑀜𑁆𑀘𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀫𑀸𑀦𑀢𑁆𑀢𑀸𑀭𑀳𑀫𑀸𑀦𑀢𑁆𑀢𑀘𑀸𑀭𑀺𑀓𑀅𑀩𑁆𑀪𑀸𑀦𑀸𑀭𑀳𑀲𑀗𑁆𑀔𑀸𑀢𑀸 𑀧𑀜𑁆𑀘 𑀕𑀭𑀼𑀓𑀝𑁆𑀞𑀸 𑀘. 𑀇𑀫𑁂 𑀧𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀬𑀣𑀸𑀯𑀼𑀟𑁆𑀠𑀁 𑀯𑀦𑁆𑀤𑀦𑀸𑀤𑀻𑀦𑀺 𑀮𑀪𑀦𑁆𑀢𑀺, 𑀧𑀓𑀢𑀢𑁆𑀢𑁂𑀦 𑀅𑀯𑀦𑁆𑀤𑀺𑀬𑀢𑁆𑀢𑀸𑀯 𑀅𑀯𑀦𑁆𑀤𑀺𑀬𑁂𑀲𑀼 𑀕𑀳𑀺𑀢𑀸. 𑀇𑀫𑁂 𑀩𑀸𑀯𑀻𑀲𑀢𑀺 𑀧𑀼𑀕𑁆𑀕𑀮𑁂𑀢𑀺 𑀦𑀕𑁆𑀕𑀸𑀤𑀬𑁄 𑀬𑀣𑀸𑀯𑀼𑀢𑁆𑀢𑁂.

𑁩𑁦𑁯𑁮. ‘‘𑀥𑀫𑁆𑀫𑀯𑀸𑀤𑀻’’𑀢𑀺 𑀇𑀤𑀁 ‘‘𑀦𑀸𑀦𑀸𑀲𑀁𑀯𑀸𑀲𑀯𑀼𑀟𑁆𑀠𑀓𑁄’’𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁. 𑀬𑀣𑀸𑀳 ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀯𑀦𑁆𑀤𑀺𑀬𑀸. 𑀧𑀘𑁆𑀙𑀸 𑀉𑀧𑀲𑀫𑁆𑀧𑀦𑁆𑀦𑁂𑀦 𑀧𑀼𑀭𑁂𑀉𑀧𑀲𑀫𑁆𑀧𑀦𑁆𑀦𑁄 𑀯𑀦𑁆𑀤𑀺𑀬𑁄, 𑀦𑀸𑀦𑀸𑀲𑀁𑀯𑀸𑀲𑀓𑁄 𑀯𑀼𑀟𑁆𑀠𑀢𑀭𑁄 𑀥𑀫𑁆𑀫𑀯𑀸𑀤𑀻 𑀯𑀦𑁆𑀤𑀺𑀬𑁄, 𑀲𑀤𑁂𑀯𑀓𑁂 𑀮𑁄𑀓𑁂, 𑀪𑀺𑀓𑁆𑀔𑀯𑁂, 𑀲𑀫𑀸𑀭𑀓𑁂…𑀧𑁂… 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀦𑁆𑀤𑀺𑀬𑁄’’𑀢𑀺 (𑀘𑀽𑀴𑀯. 𑁩𑁧𑁨).

𑁩𑁦𑁯𑁯. ‘‘𑀏𑀢𑁂𑀬𑁂𑀯 𑀯𑀦𑁆𑀤𑀺𑀬𑀸, 𑀦 𑀅𑀜𑁆𑀜𑁂’’𑀢𑀺 𑀦𑀺𑀬𑀸𑀫𑀲𑁆𑀲 𑀅𑀓𑀢𑀢𑁆𑀢𑀸 𑀅𑀜𑁆𑀜𑁂𑀲𑀫𑁆𑀧𑀺 𑀯𑀦𑁆𑀤𑀺𑀬𑀸𑀦𑀁 𑀲𑀩𑁆𑀪𑀸𑀯𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑀚𑁆𑀚𑀦𑀸𑀤𑀻’’𑀢𑀺𑀆𑀤𑀺. 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀦𑀺𑀬𑀲𑁆𑀲𑀧𑀩𑁆𑀩𑀸𑀚𑀦𑀻𑀬𑀧𑀅𑀲𑀸𑀭𑀡𑀻𑀬𑀓𑀫𑁆𑀫𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀯𑀦𑁆𑀤𑀦𑀻𑀬𑀸𑀥𑀺𑀓𑀸𑀭𑁂. 𑀓𑀫𑁆𑀫𑀦𑁆𑀢𑀺 𑀅𑀧𑀮𑁄𑀓𑀦𑀸𑀤𑀺 𑀘𑀢𑀼𑀩𑁆𑀩𑀺𑀥𑀁 𑀓𑀫𑁆𑀫𑀁.

𑁩𑁧𑁦𑁦. 𑀲𑀗𑁆𑀖𑁂𑀦 𑀅𑀥𑀫𑁆𑀫𑀓𑀫𑁆𑀫𑁂 𑀓𑀭𑀺𑀬𑀫𑀸𑀦𑁂 𑀢𑀁 𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦, 𑀅𑀲𑀓𑁆𑀓𑁄𑀦𑁆𑀢𑁂𑀳𑀺 𑀘 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀥𑀺𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺. 𑀅𑀥𑀺𑀝𑁆𑀞𑀸𑀦𑀁 𑀧𑀦𑁂𑀓𑀲𑁆𑀲 𑀉𑀤𑁆𑀤𑀺𑀝𑁆𑀞𑀦𑁆𑀢𑀺 𑀬𑁄𑀚𑀦𑀸, 𑀅𑀥𑀫𑁆𑀫𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀫𑀦𑁆𑀢𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀁 ‘‘𑀅𑀥𑀫𑁆𑀫’’𑀦𑁆𑀢𑀺 𑀚𑀸𑀦𑀺𑀢𑁆𑀯𑀸𑀧𑀺 𑀢𑀁 𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀏𑀓𑀲𑁆𑀲 ‘‘𑀦 𑀫𑁂𑀢𑀁 𑀔𑀫𑀢𑀻’’𑀢𑀺 𑀘𑀺𑀢𑁆𑀢𑁂𑀦 𑀅𑀥𑀺𑀝𑁆𑀞𑀸𑀦𑀫𑀼𑀤𑁆𑀤𑀺𑀝𑁆𑀞𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑁆𑀯𑀺𑀦𑁆𑀦𑀁 𑀯𑀸 𑀢𑀺𑀡𑁆𑀡𑀫𑁂𑀯 𑀘𑀸𑀢𑀺 𑀢𑀫𑁂𑀯 𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀯𑀸 𑀢𑀺𑀡𑁆𑀡𑀁 𑀯𑀸 𑀪𑀺𑀓𑁆𑀔𑀽𑀦𑀁 𑀅𑀜𑁆𑀜𑀫𑀜𑁆𑀜𑀁 ‘‘𑀦 𑀫𑁂𑀢𑀁 𑀔𑀫𑀢𑀻’’𑀢𑀺 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀁 𑀲𑀓𑀲𑀓𑀤𑀺𑀝𑁆𑀞𑀺𑀬𑀸 𑀧𑀓𑀸𑀲𑀦𑀁 𑀉𑀤𑁆𑀤𑀺𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁄 𑀉𑀤𑁆𑀥𑀁 𑀢𑀻𑀳𑀺 𑀉𑀤𑁆𑀥𑀁 𑀘𑀢𑀼𑀦𑁆𑀦𑀁 𑀓𑀫𑁆𑀫𑀲𑁆𑀲 𑀧𑀝𑀺𑀓𑁆𑀓𑁄𑀲𑀦𑀁 ‘‘𑀇𑀤𑀁 𑀅𑀥𑀫𑁆𑀫𑀓𑀫𑁆𑀫𑀁 𑀫𑀸 𑀓𑀭𑁄𑀣𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀦𑀁 𑀉𑀤𑁆𑀤𑀺𑀝𑁆𑀞𑀦𑁆𑀢𑀺 𑀅𑀢𑁆𑀣𑁄.

𑁩𑁧𑁦𑁧. 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀮𑀓𑁆𑀔𑀡𑀁 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀜𑁆𑀘𑀯𑀺𑀥𑀦𑁆𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀦𑁆𑀤𑀺𑀝𑁆𑀞𑁄’’𑀢𑀺𑀆𑀤𑀺. 𑀬𑁄𑀚𑀦𑀸 𑀧𑀦𑁂𑀢𑁆𑀣 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀲𑀦𑁆𑀤𑀺𑀝𑁆𑀞𑁄 𑀘 𑀳𑁄𑀢𑀺, 𑀚𑀻𑀯𑀢𑀺 𑀘, 𑀕𑀳𑀺𑀢𑁂 𑀘 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀲𑀫𑁆𑀪𑀢𑁆𑀢𑁄 𑀘 𑀳𑁄𑀢𑀺, 𑀚𑀻𑀯𑀢𑀺 𑀘, 𑀕𑀳𑀺𑀢𑁂 𑀘 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀆𑀮𑀧𑀺𑀢𑁄 𑀘 𑀳𑁄𑀢𑀺, 𑀚𑀻𑀯𑀢𑀺 𑀘, 𑀕𑀳𑀺𑀢𑁂 𑀘 𑀅𑀢𑁆𑀢𑀫𑀦𑁄 𑀳𑁄𑀢𑀻𑀢𑀺 𑀏𑀯𑀁 𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑀆𑀮𑀧𑀺𑀢𑀸𑀦𑀁 𑀢𑀺𑀡𑁆𑀡𑀫𑁂𑀓𑁂𑀓𑀲𑁆𑀲 𑀢𑀻𑀡𑀺 𑀢𑀻𑀡𑀺 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀮𑀓𑁆𑀔𑀡𑀸𑀦𑀺 𑀓𑀢𑁆𑀯𑀸 𑀦𑀯𑀯𑀺𑀥𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀘𑀦𑀢𑁆𑀣𑁄, 𑀧𑀦𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯.

𑁩𑁧𑁦𑁨. 𑀲𑀻𑀮𑀯𑀺𑀧𑀢𑁆𑀢𑀺, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺 𑀘 𑀆𑀘𑀸𑀭𑀸𑀚𑀻𑀯𑀲𑀫𑁆𑀪𑀯𑀸 𑀤𑁆𑀯𑁂 𑀯𑀺𑀧𑀢𑁆𑀢𑀺𑀬𑁄 𑀘𑀸𑀢𑀺 𑀬𑁄𑀚𑀦𑀸, 𑀆𑀘𑀸𑀭𑀯𑀺𑀧𑀢𑁆𑀢𑀺, 𑀆𑀚𑀻𑀯𑀯𑀺𑀧𑀢𑁆𑀢𑀺 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁧𑁦𑁩. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀘𑀢𑀽𑀲𑀼 𑀯𑀺𑀧𑀢𑁆𑀢𑀻𑀲𑀼. 𑀅𑀧𑁆𑀧𑀝𑀺𑀓𑀫𑁆𑀫𑀸 𑀧𑀸𑀭𑀸𑀚𑀺𑀓𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀓𑀸 𑀤𑀼𑀯𑁂 𑀆𑀧𑀢𑁆𑀢𑀺𑀬𑁄 𑀲𑀻𑀮𑀯𑀺𑀧𑀢𑁆𑀢𑀻𑀢𑀺 𑀧𑀓𑀸𑀲𑀺𑀢𑀸𑀢𑀺 𑀬𑁄𑀚𑀦𑀸.

𑁩𑁧𑁦𑁪. 𑀬𑀸 𑀘 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺, 𑀬𑀸 𑀤𑀲𑀯𑀢𑁆𑀣𑀼𑀓𑀸 𑀤𑀺𑀝𑁆𑀞𑀺, 𑀅𑀬𑀁 𑀤𑀼𑀯𑀺𑀥𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀻𑀢𑀺 𑀤𑀻𑀧𑀺𑀢𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀅𑀦𑁆𑀢𑀕𑁆𑀕𑀸𑀳𑀺𑀓𑀤𑀺𑀝𑁆𑀞𑀺 𑀦𑀸𑀫 𑀉𑀘𑁆𑀙𑁂𑀤𑀦𑁆𑀢𑀲𑀲𑁆𑀲𑀢𑀦𑁆𑀢𑀕𑀸𑀳𑀯𑀲𑁂𑀦 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺. ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀤𑀲𑀯𑀢𑁆𑀣𑀼𑀓𑀸 𑀤𑀺𑀝𑁆𑀞𑀺.

𑁩𑁧𑁦𑁫. 𑀣𑀼𑀮𑁆𑀮𑀘𑁆𑀘𑀬𑀸𑀤𑀺𑀓𑀸 𑀤𑁂𑀲𑀦𑀸𑀕𑀸𑀫𑀺𑀦𑀺𑀓𑀸 𑀬𑀸 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄, 𑀆𑀘𑀸𑀭𑀓𑀼𑀲𑀮𑁂𑀦 𑀪𑀕𑀯𑀢𑀸 𑀲𑀸 𑀆𑀘𑀸𑀭𑀯𑀺𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀆𑀤𑀺-𑀲𑀤𑁆𑀤𑁂𑀦 𑀧𑀸𑀘𑀺𑀢𑁆𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀸𑀦𑀁 𑀕𑀳𑀡𑀁. 𑀬𑀸𑀢𑀺 𑀧𑀜𑁆𑀘𑀸𑀧𑀢𑁆𑀢𑀺𑀬𑁄 𑀅𑀧𑁂𑀓𑁆𑀔𑀺𑀢𑁆𑀯𑀸 𑀩𑀳𑀼𑀢𑁆𑀢𑀁. 𑀲𑀸𑀢𑀺 𑀆𑀘𑀸𑀭𑀯𑀺𑀧𑀢𑁆𑀢𑀺 𑀲𑀸𑀫𑀜𑁆𑀜𑀫𑀧𑁂𑀓𑁆𑀔𑀺𑀢𑁆𑀯𑀸 𑀏𑀓𑀢𑁆𑀢𑀁.

𑁩𑁧𑁦𑁬. 𑀓𑀼𑀳𑀦𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀮𑀧𑀦𑀸 𑀦𑁂𑀫𑀺𑀢𑁆𑀢𑀺𑀓𑀢𑀸 𑀦𑀺𑀧𑁆𑀧𑁂𑀲𑀺𑀓𑀢𑀸 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸 𑀕𑀳𑀺𑀢𑀸, 𑀓𑀼𑀳𑀦𑀸𑀤𑀻𑀦𑀁 𑀯𑀺𑀢𑁆𑀣𑀸𑀭𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁬) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀆𑀚𑀻𑀯𑁄 𑀧𑀘𑁆𑀘𑀬𑁄 𑀳𑁂𑀢𑀼 𑀬𑀲𑁆𑀲𑀸 𑀆𑀧𑀢𑁆𑀢𑀺𑀬𑀸𑀢𑀺 𑀯𑀺𑀕𑁆𑀕𑀳𑁄. 𑀙𑀩𑁆𑀩𑀺𑀥𑀸𑀢𑀺 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀲𑀜𑁆𑀘𑀭𑀺𑀢𑁆𑀢𑀣𑀼𑀮𑁆𑀮𑀘𑁆𑀘𑀬𑀧𑀸𑀘𑀺𑀢𑁆𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀤𑀼𑀓𑁆𑀓𑀝𑀸𑀧𑀢𑁆𑀢𑀻𑀦𑀁 𑀯𑀲𑁂𑀦 𑀙𑀩𑁆𑀩𑀺𑀥𑀸. 𑀧𑀓𑀸𑀲𑀺𑀢𑀸 𑁋

‘‘𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀆𑀚𑀻𑀯𑀳𑁂𑀢𑀼…𑀧𑁂… 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀆𑀚𑀻𑀯𑀳𑁂𑀢𑀼…𑀧𑁂… ‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀸’𑀢𑀺 𑀪𑀡𑀢𑀺, 𑀧𑀝𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀆𑀚𑀻𑀯𑀳𑁂𑀢𑀼…𑀧𑁂… 𑀪𑀺𑀓𑁆𑀔𑀼 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀕𑀺𑀮𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀆𑀚𑀻𑀯𑀳𑁂𑀢𑀼…𑀧𑁂… 𑀪𑀺𑀓𑁆𑀔𑀼𑀦𑀻 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀕𑀺𑀮𑀸𑀦𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀝𑀺𑀤𑁂𑀲𑀦𑀻𑀬𑀲𑁆𑀲. 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀲𑀽𑀧𑀁 𑀯𑀸 𑀑𑀤𑀦𑀁 𑀯𑀸 𑀅𑀕𑀺𑀮𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀭𑀺. 𑁨𑁮𑁭) 𑁋

𑀤𑁂𑀲𑀺𑀢𑀸. 𑀇𑀫𑀺𑀦𑀸 𑀆𑀚𑀻𑀯𑀯𑀺𑀧𑀢𑁆𑀢𑀺 𑀤𑀻𑀧𑀺𑀢𑀸.

𑁩𑁧𑁦𑁭. ‘‘𑀉𑀓𑁆𑀔𑀺𑀢𑁆𑀢𑁄’’𑀢𑀺𑀆𑀤𑀺 𑀬𑀣𑀸𑀓𑁆𑀓𑀫𑁂𑀦 𑀢𑁂𑀲𑀁 𑀢𑀺𑀡𑁆𑀡𑀁 𑀦𑀸𑀦𑀸𑀲𑀁𑀯𑀸𑀲𑀓𑀸𑀦𑀁 𑀲𑀭𑀽𑀧𑀤𑀲𑁆𑀲𑀦𑀁. 𑀢𑀢𑁆𑀣 𑀢𑀬𑁄 𑀉𑀓𑁆𑀔𑀺𑀢𑁆𑀢𑀓𑀸 𑀯𑀼𑀢𑁆𑀢𑀸𑀬𑁂𑀯.

𑁩𑁧𑁦𑁮-𑁯. ‘‘𑀬𑁄 𑀲𑀗𑁆𑀖𑁂𑀦 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑀸𑀦𑀁 𑀅𑀥𑀫𑁆𑀫𑀯𑀸𑀤𑀻𑀦𑀁 𑀧𑀓𑁆𑀔𑁂 𑀦𑀺𑀲𑀺𑀦𑁆𑀦𑁄 ‘𑀢𑀼𑀫𑁆𑀳𑁂 𑀓𑀺𑀁 𑀪𑀡𑀣𑀸’𑀢𑀺 𑀢𑁂𑀲𑀜𑁆𑀘 𑀇𑀢𑀭𑁂𑀲𑀜𑁆𑀘 𑀮𑀤𑁆𑀥𑀺𑀁 𑀲𑀼𑀢𑁆𑀯𑀸 ‘𑀇𑀫𑁂 𑀅𑀥𑀫𑁆𑀫𑀯𑀸𑀤𑀺𑀦𑁄, 𑀇𑀢𑀭𑁂 𑀥𑀫𑁆𑀫𑀯𑀸𑀤𑀺𑀦𑁄’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀺, 𑀅𑀬𑀁 𑀢𑁂𑀲𑀁 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄𑀯 𑀢𑁂𑀲𑀁 𑀦𑀸𑀦𑀸𑀲𑀁𑀯𑀸𑀲𑀓𑁄 𑀳𑁄𑀢𑀺, 𑀓𑀫𑁆𑀫𑀁 𑀓𑁄𑀧𑁂𑀢𑀺. 𑀇𑀢𑀭𑁂𑀲𑀫𑁆𑀧𑀺 𑀳𑀢𑁆𑀣𑀧𑀸𑀲𑀁 𑀅𑀦𑀸𑀕𑀢𑀢𑁆𑀢𑀸 𑀓𑁄𑀧𑁂𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁪𑁫𑁫) 𑀆𑀕𑀢 𑀅𑀝𑁆𑀞𑀓𑀣𑀸𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀥𑀫𑁆𑀫𑀯𑀸𑀤𑀺𑀧𑀓𑁆𑀔𑀲𑁆𑀫𑀺’’𑀦𑁆𑀢𑀺𑀆𑀤𑀺.

𑀅𑀥𑀫𑁆𑀫𑀯𑀸𑀤𑀺𑀧𑀓𑁆𑀔𑀲𑁆𑀫𑀺𑀦𑁆𑀢𑀺 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂𑀦 𑀦𑀺𑀲𑁆𑀲𑀸𑀭𑀺𑀢𑀸𑀦𑀁 𑀅𑀥𑀫𑁆𑀫𑀯𑀸𑀤𑀻𑀦𑀁 𑀧𑀓𑁆𑀔𑀲𑁆𑀫𑀺𑀁. 𑀦𑀺𑀲𑀺𑀦𑁆𑀦𑁄𑀯𑀸𑀢𑀺 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀕𑀡𑀧𑀽𑀭𑀓𑁄 𑀳𑀼𑀢𑁆𑀯𑀸 𑀦𑀺𑀲𑀺𑀦𑁆𑀦𑁄𑀯. 𑀯𑀺𑀘𑀺𑀦𑁆𑀢𑀬𑀦𑁆𑀢𑀺 ‘‘𑀇𑀫𑁂 𑀦𑀼 𑀔𑁄 𑀥𑀫𑁆𑀫𑀯𑀸𑀤𑀺𑀦𑁄, 𑀉𑀤𑀸𑀳𑀼 𑀏𑀢𑁂’’𑀢𑀺 𑀯𑀺𑀯𑀺𑀥𑁂𑀦𑀸𑀓𑀸𑀭𑁂𑀦 𑀘𑀺𑀦𑁆𑀢𑀬𑀦𑁆𑀢𑁄. ‘‘𑀏𑀢𑁂 𑀧𑀦 𑀥𑀫𑁆𑀫𑀯𑀸𑀤𑀻’’𑀢𑀺 𑀫𑀸𑀦𑀲𑀁 𑀉𑀧𑁆𑀧𑀸𑀤𑁂𑀢𑀺, 𑀏𑀯𑀁 𑀉𑀧𑁆𑀧𑀦𑁆𑀦𑁂 𑀧𑀦 𑀫𑀸𑀦𑀲𑁂. 𑀅𑀥𑀫𑁆𑀫𑀯𑀸𑀤𑀺𑀧𑀓𑁆𑀔𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑁄𑀯 𑀏𑀯𑀁 𑀫𑀸𑀦𑀲𑀁 𑀉𑀧𑁆𑀧𑀸𑀤𑁂𑀦𑁆𑀢𑁄 𑀅𑀬𑀁 𑀪𑀺𑀓𑁆𑀔𑀼. 𑀮𑀤𑁆𑀥𑀺𑀬𑀸𑀢𑀺 𑀏𑀯𑀁 𑀉𑀧𑁆𑀧𑀸𑀤𑀺𑀢𑀫𑀸𑀦𑀲𑀲𑀗𑁆𑀔𑀸𑀢𑀸𑀬 𑀮𑀤𑁆𑀥𑀺𑀬𑀸. 𑀢𑁂𑀲𑀁 𑀅𑀥𑀫𑁆𑀫𑀯𑀸𑀤𑀻𑀦𑀁 𑀦𑀸𑀦𑀸𑀲𑀁𑀯𑀸𑀲𑀓𑁄 𑀦𑀸𑀫 𑀳𑁄𑀢𑀻𑀢𑀺 𑀧𑀓𑀸𑀲𑀺𑀢𑁄.

𑀢𑀢𑁆𑀭𑀝𑁆𑀞𑁄 𑀧𑀦 𑀲𑁄𑀢𑀺 𑀢𑀲𑁆𑀫𑀺𑀁 𑀅𑀥𑀫𑁆𑀫𑀯𑀸𑀤𑀺𑀧𑀓𑁆𑀔𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑁄𑀯 𑀲𑁄. 𑀲𑀤-𑀥𑀸𑀢𑀼𑀬𑀸 𑀕𑀢𑀺𑀦𑀺𑀯𑀸𑀭𑀡𑀢𑁆𑀣𑀢𑁆𑀢𑀸 𑀢𑀢𑁆𑀭 𑀦𑀺𑀲𑀺𑀦𑁆𑀦𑁄 ‘‘𑀢𑀢𑁆𑀭𑀝𑁆𑀞𑁄’’𑀢𑀺 𑀯𑀼𑀘𑁆𑀘𑀢𑀺. 𑀤𑁆𑀯𑀺𑀦𑁆𑀦𑀦𑁆𑀢𑀺 𑀥𑀫𑁆𑀫𑀯𑀸𑀤𑀺𑀅𑀥𑀫𑁆𑀫𑀯𑀸𑀤𑀺𑀧𑀓𑁆𑀔𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀦𑀁. 𑀓𑀫𑁆𑀫𑀦𑁆𑀢𑀺 𑀘𑀢𑀼𑀯𑀕𑁆𑀕𑀸𑀤𑀺𑀲𑀗𑁆𑀖𑁂𑀦 𑀓𑀭𑀡𑀻𑀬𑀓𑀫𑁆𑀫𑀁. 𑀓𑁄𑀧𑁂𑀢𑀻𑀢𑀺 𑀅𑀥𑀫𑁆𑀫𑀯𑀸𑀤𑀻𑀦𑀁 𑀅𑀲𑀁𑀯𑀸𑀲𑀪𑀸𑀯𑀁 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀕𑀡𑀧𑀽𑀭𑀡𑀢𑁆𑀢𑀸, 𑀇𑀢𑀭𑁂𑀲𑀁 𑀏𑀓𑀲𑀻𑀫𑀸𑀬𑀁 𑀞𑀢𑁆𑀯𑀸 𑀳𑀢𑁆𑀣𑀧𑀸𑀲𑀁 𑀅𑀦𑀼𑀧𑀕𑀢𑀢𑁆𑀢𑀸, 𑀙𑀦𑁆𑀤𑀲𑁆𑀲 𑀘 𑀅𑀤𑀺𑀦𑁆𑀦𑀢𑁆𑀢𑀸 𑀓𑀫𑁆𑀫𑀁 𑀓𑁄𑀧𑁂𑀢𑀺. 𑀬𑁄 𑀧𑀦 𑀅𑀥𑀫𑁆𑀫𑀯𑀸𑀤𑀻𑀦𑀁 𑀧𑀓𑁆𑀔𑁂 𑀦𑀺𑀲𑀺𑀦𑁆𑀦𑁄 ‘‘𑀅𑀥𑀫𑁆𑀫𑀯𑀸𑀤𑀺𑀦𑁄 𑀇𑀫𑁂, 𑀇𑀢𑀭𑁂 𑀥𑀫𑁆𑀫𑀯𑀸𑀤𑀺𑀦𑁄’’𑀢𑀺 𑀢𑁂𑀲𑀁 𑀫𑀚𑁆𑀛𑁂 𑀧𑀯𑀺𑀲𑀢𑀺, 𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀧𑀓𑁆𑀔𑁂 𑀦𑀺𑀲𑀺𑀦𑁆𑀦𑁄 ‘‘𑀇𑀫𑁂 𑀥𑀫𑁆𑀫𑀯𑀸𑀤𑀺𑀦𑁄’’𑀢𑀺 𑀕𑀡𑁆𑀳𑀸𑀢𑀺, 𑀅𑀬𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀫𑀸𑀦𑀲𑀁𑀯𑀸𑀲𑀓𑀁 𑀓𑀭𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩𑁧𑁧𑁦. 𑀩𑀳𑀺𑀲𑀻𑀫𑀸𑀕𑀢𑁄 𑀧𑀓𑀢𑀢𑁆𑀢𑁄 𑀪𑀺𑀓𑁆𑀔𑀼 𑀲𑀘𑁂 𑀳𑀢𑁆𑀣𑀧𑀸𑀲𑁂 𑀞𑀺𑀢𑁄 𑀳𑁄𑀢𑀺, 𑀲𑁄 𑀲𑀻𑀫𑀸𑀬 𑀦𑀸𑀦𑀸𑀲𑀁𑀯𑀸𑀲𑀓𑁄 𑀫𑀢𑁄𑀢𑀺 𑀬𑁄𑀚𑀦𑀸. 𑀢𑀁 𑀕𑀡𑀧𑀽𑀭𑀡𑀁 𑀓𑀢𑁆𑀯𑀸 𑀓𑀢𑀓𑀫𑁆𑀫𑀫𑁆𑀧𑀺 𑀓𑀼𑀧𑁆𑀧𑀢𑀺. 𑀏𑀯𑀁 𑀬𑀣𑀸𑀯𑀼𑀢𑁆𑀢𑀦𑀺𑀬𑀸𑀫𑁂𑀦 𑀢𑀬𑁄 𑀦𑀸𑀦𑀸𑀲𑀁𑀯𑀸𑀲𑀓𑀸 𑀫𑀳𑁂𑀲𑀺𑀦𑀸 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸.

𑁩𑁧𑁧𑁧. 𑀘𑀼𑀢𑁄𑀢𑀺 𑀧𑀸𑀭𑀸𑀚𑀺𑀓𑀸𑀧𑀦𑁆𑀦𑁄 𑀲𑀸𑀲𑀦𑀢𑁄 𑀘𑀼𑀢𑀢𑁆𑀢𑀸 ‘‘𑀘𑀼𑀢𑁄’’𑀢𑀺 𑀕𑀳𑀺𑀢𑁄. ‘‘𑀪𑀺𑀓𑁆𑀔𑀼𑀦𑀻 𑀏𑀓𑀸𑀤𑀲 𑀅𑀪𑀩𑁆𑀩𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀇𑀫𑁂𑀢𑀺 𑀪𑁂𑀤𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀲𑀸𑀫𑀜𑁆𑀜𑁂𑀦 𑀲𑀢𑁆𑀢𑀭𑀲 𑀚𑀦𑀸. 𑀅𑀲𑀁𑀯𑀸𑀲𑀸𑀢𑀺 𑀦 𑀲𑀁𑀯𑀲𑀺𑀢𑀩𑁆𑀩𑀸, 𑀦𑀢𑁆𑀣𑀺 𑀯𑀸 𑀏𑀢𑁂𑀳𑀺 𑀧𑀓𑀢𑀢𑁆𑀢𑀸𑀦𑀁 𑀏𑀓𑀓𑀫𑁆𑀫𑀸𑀤𑀺𑀓𑁄 𑀲𑀁𑀯𑀸𑀲𑁄𑀢𑀺 𑀅𑀲𑀁𑀯𑀸𑀲𑀸 𑀦𑀸𑀫 𑀲𑀺𑀬𑀼𑀁.

𑁩𑁧𑁧𑁨. 𑀅𑀲𑀁𑀯𑀸𑀲𑀲𑁆𑀲 𑀲𑀩𑁆𑀩𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀲𑀢𑁆𑀢𑀭𑀲𑀯𑀺𑀥𑀲𑁆𑀲 𑀲𑀩𑁆𑀩𑀲𑁆𑀲 𑀅𑀲𑀁𑀯𑀸𑀲𑀲𑁆𑀲. 𑀢𑀣𑀸 𑀓𑀫𑁆𑀫𑀸𑀭𑀳𑀲𑁆𑀲 𑀘𑀸𑀢𑀺 ‘‘𑀬𑀲𑁆𑀲 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀲𑁄 𑀦𑁂𑀯 𑀓𑀫𑁆𑀫𑀧𑀢𑁆𑀢𑁄, 𑀦𑀸𑀧𑀺 𑀙𑀦𑁆𑀤𑀸𑀭𑀳𑁄, 𑀅𑀧𑀺𑀘 𑀓𑀫𑁆𑀫𑀸𑀭𑀳𑁄’’𑀢𑀺 (𑀧𑀭𑀺. 𑁪𑁮𑁮) 𑀏𑀯𑀁 𑀧𑀭𑀺𑀯𑀸𑀭𑁂 𑀯𑀼𑀢𑁆𑀢𑀓𑀫𑁆𑀫𑀸𑀭𑀳𑀲𑁆𑀲 𑀘. 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀔𑀺𑀢𑁆𑀢𑀘𑀺𑀢𑁆𑀢𑀸𑀤𑀻𑀦𑀁 𑀕𑀳𑀡𑀁. 𑀲𑀗𑁆𑀖𑁂 𑀢𑀚𑁆𑀚𑀦𑀻𑀬𑀸𑀤𑀻𑀦𑀺 𑀓𑀭𑁄𑀦𑁆𑀢𑁂. 𑀧𑀝𑀺𑀓𑁆𑀔𑁂𑀧𑁄𑀢𑀺 𑀧𑀝𑀺𑀓𑁆𑀓𑁄𑀲𑀦𑀸. 𑀦 𑀭𑀽𑀳𑀢𑀻𑀢𑀺 𑀧𑀝𑀺𑀓𑁆𑀓𑁄𑀲𑀝𑁆𑀞𑀸𑀦𑁂 𑀦 𑀢𑀺𑀝𑁆𑀞𑀢𑀺, 𑀓𑀫𑁆𑀫𑀁 𑀦 𑀓𑁄𑀧𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁧𑁧𑁩. 𑀲𑀲𑀁𑀯𑀸𑀲𑁂𑀓…𑀧𑁂… 𑀪𑀺𑀓𑁆𑀔𑀼𑀦𑁄𑀢𑀺 𑀯𑀼𑀢𑁆𑀢𑀦𑀬𑁂𑀦 𑀓𑀫𑁆𑀫𑁂𑀦 𑀯𑀸 𑀮𑀤𑁆𑀥𑀺𑀬𑀸 𑀯𑀸 𑀅𑀲𑀁𑀯𑀸𑀲𑀺𑀓𑀪𑀸𑀯𑀁 𑀅𑀦𑀼𑀧𑀕𑀢𑀢𑁆𑀢𑀸 𑀲𑀫𑀸𑀦𑀲𑀁𑀯𑀸𑀲𑀓𑀲𑁆𑀲 𑀲𑀻𑀫𑀸𑀬 𑀅𑀲𑀁𑀯𑀸𑀲𑀺𑀓𑀪𑀸𑀯𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀏𑀓𑀲𑀻𑀫𑀸𑀬 𑀞𑀺𑀢𑀲𑁆𑀲 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀦𑀚𑁆𑀛𑀸𑀧𑀦𑁆𑀦𑀢𑁆𑀢𑀸 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀅𑀦𑀦𑁆𑀢𑀭𑀲𑁆𑀲𑀧𑀺 𑀳𑀢𑁆𑀣𑀧𑀸𑀲𑁂 𑀯𑀘𑀦𑁂𑀦 𑀯𑀘𑀻𑀪𑁂𑀤𑀓𑀭𑀡𑁂𑀦 𑀧𑀝𑀺𑀓𑁆𑀔𑁂𑀧𑁄 𑀧𑀝𑀺𑀓𑁆𑀓𑁄𑀲𑁄 𑀭𑀼𑀳𑀢𑀺 𑀧𑀝𑀺𑀓𑁆𑀓𑁄𑀲𑀦𑀝𑁆𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀢𑀺, 𑀓𑀫𑁆𑀫𑀁 𑀓𑁄𑀧𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁧𑁧𑁪. 𑀙𑀳𑀺 𑀆𑀓𑀸𑀭𑁂𑀳𑀻𑀢𑀺 (𑀧𑀸𑀘𑀺. 𑀅𑀝𑁆𑀞. 𑁪𑁩𑁮; 𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀮𑀚𑁆𑀚𑀺𑀢𑀸𑀬, 𑀅𑀜𑁆𑀜𑀸𑀡𑀢𑀸𑀬, 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀢𑀸𑀬, 𑀲𑀢𑀺𑀲𑀫𑁆𑀫𑁄𑀲𑀸𑀬, 𑀅𑀓𑀧𑁆𑀧𑀺𑀬𑁂𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀬, 𑀓𑀧𑁆𑀧𑀺𑀬𑁂𑀅𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀬𑀸𑀢𑀺 𑀇𑀫𑁂𑀳𑀺 𑀙𑀳𑀺 𑀆𑀓𑀸𑀭𑁂𑀳𑀺. 𑀧𑀜𑁆𑀘 𑀲𑀫𑀡𑀓𑀧𑁆𑀧𑀸 𑀘 𑀯𑀼𑀢𑁆𑀢𑀸, 𑀧𑀜𑁆𑀘 𑀯𑀺𑀲𑀼𑀤𑁆𑀥𑀺𑀬𑁄 𑀘 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀅𑀕𑁆𑀕𑀺𑀧𑀭𑀺𑀚𑀺𑀢𑀁 𑀲𑀢𑁆𑀣𑀧𑀭𑀺𑀚𑀺𑀢𑀁 𑀦𑀔𑀧𑀭𑀺𑀚𑀺𑀢𑀁 𑀅𑀩𑀻𑀚𑀁 𑀦𑀺𑀩𑁆𑀩𑀝𑁆𑀝𑀩𑀻𑀚𑀜𑁆𑀜𑁂𑀯 𑀧𑀜𑁆𑀘𑀫’’𑀦𑁆𑀢𑀺 (𑀘𑀽𑀴𑀯. 𑁨𑁫𑁦) 𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁂 𑀅𑀦𑀼𑀜𑁆𑀜𑀸𑀢𑀸 𑀧𑀜𑁆𑀘 𑀲𑀫𑀡𑀓𑀧𑁆𑀧𑀸 𑀦𑀸𑀫. 𑀧𑀜𑁆𑀘 𑀯𑀺𑀲𑀼𑀤𑁆𑀥𑀺𑀬𑁄𑀢𑀺 𑀧𑀭𑀺𑀯𑀸𑀭𑁂 𑀏𑀓𑀼𑀢𑁆𑀢𑀭𑁂 ‘‘𑀧𑀜𑁆𑀘 𑀯𑀺𑀲𑀼𑀤𑁆𑀥𑀺𑀬𑁄’’𑀢𑀺 𑀇𑀫𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁, 𑀅𑀬𑀁 𑀧𑀞𑀫𑀸 𑀯𑀺𑀲𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 (𑀧𑀭𑀺. 𑁩𑁨𑁫) 𑀦𑀬𑁂𑀦 𑀤𑀲𑁆𑀲𑀺𑀢𑀸 𑀧𑀜𑁆𑀘 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀲𑀗𑁆𑀔𑀸𑀢𑀸 𑀧𑀜𑁆𑀘 𑀯𑀺𑀲𑀼𑀤𑁆𑀥𑀺𑀬𑁄 𑀘 ‘‘𑀲𑀼𑀢𑁆𑀢𑀼𑀤𑁆𑀤𑁂𑀲𑁄 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑁄 𑀧𑀯𑀸𑀭𑀡𑀸 𑀲𑀸𑀫𑀕𑁆𑀕𑀺𑀉𑀧𑁄𑀲𑀣𑁄𑀬𑁂𑀯 𑀧𑀜𑁆𑀘𑀫𑁄’’𑀢𑀺 (𑀧𑀭𑀺. 𑁩𑁨𑁫) 𑀏𑀯𑀁 𑀯𑀼𑀢𑁆𑀢𑀸 𑀧𑀜𑁆𑀘 𑀯𑀺𑀲𑀼𑀤𑁆𑀥𑀺𑀬𑁄 𑀘𑀸𑀢𑀺 𑀤𑁆𑀯𑁂𑀧𑀜𑁆𑀘𑀯𑀺𑀲𑀼𑀤𑁆𑀥𑀺𑀬𑁄 ‘‘𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀲𑀸𑀫𑀜𑁆𑀜𑀯𑀘𑀦𑁂𑀦 𑀲𑀗𑁆𑀕𑀳𑀺𑀢𑀸.

𑁩𑁧𑁧𑁫-𑁭. 𑀦𑀺𑀲𑁆𑀲𑁂𑀲𑁂𑀦 𑀤𑀻𑀬𑀢𑀺 𑀧𑀜𑁆𑀜𑀧𑀻𑀬𑀢𑀺 𑀏𑀢𑁆𑀣 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀦𑀺𑀤𑀸𑀦𑀁, 𑀢𑁂𑀲𑀁 𑀢𑁂𑀲𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀜𑁆𑀜𑀢𑁆𑀢𑀺𑀬𑀸 𑀞𑀸𑀦𑀪𑀽𑀢𑀁 𑀯𑁂𑀲𑀸𑀮𑀻𑀆𑀤𑀺. 𑀧𑀼𑀁 𑀯𑀼𑀘𑁆𑀘𑀢𑀺 𑀦𑀺𑀭𑀬𑁄, 𑀢𑀁 𑀕𑀮𑀢𑀺 𑀫𑀤𑁆𑀤𑀢𑀺 𑀦𑁂𑀭𑀬𑀺𑀓𑀤𑀼𑀓𑁆𑀔𑀁 𑀅𑀦𑀼𑀪𑀯𑀢𑀻𑀢𑀺 𑀧𑀼𑀕𑁆𑀕𑀮𑁄, 𑀲𑀢𑁆𑀢𑁄. 𑀅𑀭𑀺𑀬𑀧𑀼𑀕𑁆𑀕𑀮𑀸 𑀢𑀁𑀲𑀤𑀺𑀲𑀢𑁆𑀢𑀸, 𑀪𑀽𑀢𑀧𑀼𑀩𑁆𑀩𑀕𑀢𑀺𑀬𑀸 𑀯𑀸 ‘‘𑀧𑀼𑀕𑁆𑀕𑀮𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀥 𑀧𑀦𑁂𑀢𑁂 𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑀸 𑀅𑀥𑀺𑀧𑁆𑀧𑁂𑀢𑀸. 𑀇𑀤𑀸𑀦𑀺 𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺. 𑀯𑀲𑀢𑀺 𑀏𑀢𑁆𑀣 𑀪𑀕𑀯𑀢𑁄 𑀆𑀡𑀸𑀲𑀗𑁆𑀔𑀸𑀢𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺 𑀢𑀁 𑀧𑀝𑀺𑀘𑁆𑀘 𑀧𑀯𑀢𑁆𑀢𑀢𑀻𑀢𑀺 𑀯𑀢𑁆𑀣𑀼, 𑀢𑀲𑁆𑀲 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀪𑀽𑀢𑁄 𑀅𑀚𑁆𑀛𑀸𑀘𑀸𑀭𑁄.

𑀯𑀺𑀥𑀸𑀦𑀁 𑀯𑀺𑀪𑀚𑀦𑀁 𑀯𑀺𑀥𑀺, 𑀧𑀪𑁂𑀤𑁄. 𑀧𑀜𑁆𑀜𑀸𑀧𑀻𑀬𑀢𑀺 𑀪𑀕𑀯𑀢𑁄 𑀆𑀡𑀸 𑀧𑀓𑀸𑀭𑁂𑀦 𑀜𑀸𑀧𑀻𑀬𑀢𑀺 𑀏𑀢𑀸𑀬𑀸𑀢𑀺 𑀧𑀜𑁆𑀜𑀢𑁆𑀢𑀺, 𑀧𑀜𑁆𑀜𑀢𑁆𑀢𑀺𑀬𑀸 𑀯𑀺𑀥𑀺 𑀧𑀪𑁂𑀤𑁄 ‘‘𑀧𑀜𑁆𑀜𑀢𑁆𑀢𑀺𑀯𑀺𑀥𑀺’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀯𑀺𑀥𑀺𑀁 𑀧𑀜𑁆𑀜𑀢𑁆𑀢𑀺𑀬𑀸’’𑀢𑀺 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀅𑀲𑀫𑀢𑁆𑀣𑀦𑀺𑀤𑁆𑀤𑁂𑀲𑁄. 𑀲𑀸 𑀧𑀦 𑀧𑀜𑁆𑀜𑀢𑁆𑀢𑀺𑀯𑀺𑀥𑀺 𑀧𑀜𑁆𑀜𑀢𑁆𑀢𑀺𑀅𑀦𑀼𑀧𑀜𑁆𑀜𑀢𑁆𑀢𑀺 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺 𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀺 𑀧𑀤𑁂𑀲𑀧𑀜𑁆𑀜𑀢𑁆𑀢𑀺 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺 𑀏𑀓𑀢𑁄𑀧𑀜𑁆𑀜𑀢𑁆𑀢𑀺 𑀉𑀪𑀢𑁄𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀦𑀯𑀯𑀺𑀥𑀸 𑀳𑁄𑀢𑀺.

‘‘𑀯𑀺𑀧𑀢𑁆𑀢𑀺 𑀆𑀧𑀢𑁆𑀢𑀺 𑀅𑀦𑀸𑀧𑀢𑁆𑀢𑀻’’𑀢𑀺 𑀧𑀤𑀘𑁆𑀙𑁂𑀤𑁄, 𑀯𑀺𑀧𑀚𑁆𑀚𑀦𑁆𑀢𑀺 𑀏𑀢𑀸𑀬 𑀲𑀻𑀮𑀸𑀤𑀬𑁄𑀢𑀺 𑀯𑀺𑀧𑀢𑁆𑀢𑀺. 𑀲𑀸 𑀧𑀦 𑀲𑀻𑀮𑀆𑀘𑀸𑀭𑀤𑀺𑀝𑁆𑀞𑀺𑀆𑀚𑀻𑀯𑀸𑀦𑀁 𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸. 𑀲𑀸 𑀧𑀦 𑀉𑀤𑁆𑀤𑁂𑀲𑀯𑀲𑁂𑀦 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀸𑀯. 𑀆𑀧𑀚𑁆𑀚𑀦𑁆𑀢𑀺 𑀏𑀢𑀸𑀬 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀪𑀽𑀢𑀸𑀬 𑀪𑀕𑀯𑀢𑁄 𑀆𑀡𑀸𑀯𑀻𑀢𑀺𑀓𑁆𑀓𑀫𑀦𑁆𑀢𑀺 𑀆𑀧𑀢𑁆𑀢𑀺. 𑀲𑀸 𑀧𑀼𑀩𑁆𑀩𑀧𑀬𑁄𑀕𑀸𑀤𑀺𑀯𑀲𑁂𑀦 𑀅𑀦𑁂𑀓𑀧𑁆𑀧𑀪𑁂𑀤𑀸 𑀆𑀧𑀢𑁆𑀢𑀺. 𑀅𑀦𑀸𑀧𑀢𑁆𑀢𑀺 𑀅𑀚𑀸𑀦𑀦𑀸𑀤𑀺𑀯𑀲𑁂𑀦 𑀆𑀡𑀸𑀬 𑀅𑀦𑀢𑀺𑀓𑁆𑀓𑀫𑀦𑀁. 𑀲𑀫𑀼𑀝𑁆𑀞𑀸𑀢𑀺 𑀏𑀢𑁂𑀳𑀺 𑀆𑀧𑀢𑁆𑀢𑀻𑀢𑀺 𑀲𑀫𑀼𑀝𑁆𑀞𑀸𑀦𑀸𑀦𑀺, 𑀓𑀸𑀬𑀸𑀤𑀺𑀯𑀲𑁂𑀦 𑀙𑀩𑁆𑀩𑀺𑀥𑀸𑀦𑀺 𑀆𑀧𑀢𑁆𑀢𑀺𑀓𑀸𑀭𑀡𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀦𑀁 𑀦𑀬𑁄 𑀲𑀫𑀼𑀝𑁆𑀞𑀸𑀦𑀦𑀬𑁄, 𑀢𑀁.

𑀯𑀚𑁆𑀚𑀜𑁆𑀘 𑀓𑀫𑁆𑀫𑀜𑁆𑀘 𑀓𑀺𑀭𑀺𑀬𑀸 𑀘 𑀲𑀜𑁆𑀜𑀸 𑀘 𑀘𑀺𑀢𑁆𑀢𑀜𑁆𑀘 𑀆𑀡𑀢𑁆𑀢𑀺 𑀘 𑀯𑀚𑁆𑀚𑀓𑀫𑁆𑀫𑀓𑁆𑀭𑀺𑀬𑀸𑀲𑀜𑁆𑀜𑀸𑀘𑀺𑀢𑁆𑀢𑀸𑀡𑀢𑁆𑀢𑀺𑀬𑁄, 𑀢𑀸𑀲𑀁 𑀯𑀺𑀥𑀺 𑀢𑀣𑀸 𑀯𑀼𑀘𑁆𑀘𑀢𑀺, 𑀢𑀁. 𑀯𑀚𑁆𑀚𑀯𑀺𑀥𑀺𑀦𑁆𑀢𑀺 ‘‘𑀬𑀲𑁆𑀲𑀸 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀅𑀬𑀁 𑀮𑁄𑀓𑀯𑀚𑁆𑀚𑀸, 𑀲𑁂𑀲𑀸 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁 𑀯𑀚𑁆𑀚𑀯𑀺𑀥𑀺𑀁. 𑀓𑀫𑁆𑀫𑀯𑀺𑀥𑀺𑀦𑁆𑀢𑀺 ‘‘𑀲𑀩𑁆𑀩𑀸 𑀘 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀢𑀤𑀼𑀪𑀬𑀯𑀲𑁂𑀦 𑀢𑀺𑀯𑀺𑀥𑀸 𑀳𑁄𑀦𑁆𑀢𑀻’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑀤𑀲𑁆𑀲𑀺𑀢𑀁 𑀓𑀫𑁆𑀫𑀯𑀺𑀥𑀺𑀁. 𑀓𑁆𑀭𑀺𑀬𑀸𑀯𑀺𑀥𑀺𑀦𑁆𑀢𑀺 ‘‘𑀅𑀢𑁆𑀣𑀸𑀧𑀢𑁆𑀢𑀺 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀅𑀢𑁆𑀣𑀺 𑀅𑀓𑀺𑀭𑀺𑀬𑀢𑁄, 𑀅𑀢𑁆𑀣𑀺 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄, 𑀅𑀢𑁆𑀣𑀺 𑀲𑀺𑀬𑀸 𑀓𑀺𑀭𑀺𑀬𑀢𑁄 𑀲𑀺𑀬𑀸 𑀅𑀓𑀺𑀭𑀺𑀬𑀢𑁄’’𑀢𑀺𑀆𑀤𑀺𑀦𑀸 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑀦𑀬𑁂𑀦 𑀤𑀲𑁆𑀲𑀺𑀢𑀁 𑀓𑀺𑀭𑀺𑀬𑀸𑀯𑀺𑀥𑀺𑀁. 𑀲𑀜𑁆𑀜𑀸𑀯𑀺𑀥𑀺𑀦𑁆𑀢𑀺 ‘‘𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸’’𑀢𑀺𑀆𑀤𑀺𑀦𑀸 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑀦𑀬𑁂𑀦 𑀤𑀲𑁆𑀲𑀺𑀢𑀁 𑀲𑀜𑁆𑀜𑀸𑀯𑀺𑀥𑀺𑀁.

𑀘𑀺𑀢𑁆𑀢𑀯𑀺𑀥𑀺𑀦𑁆𑀢𑀺 ‘‘𑀲𑀩𑁆𑀩𑀸𑀧𑀺 𑀘𑀺𑀢𑁆𑀢𑀯𑀲𑁂𑀦 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺 𑀲𑀘𑀺𑀢𑁆𑀢𑀓𑀸, 𑀅𑀘𑀺𑀢𑁆𑀢𑀓𑀸 𑀘𑀸’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁 𑀘𑀺𑀢𑁆𑀢𑀯𑀺𑀥𑀺𑀁. 𑀆𑀡𑀢𑁆𑀢𑀺𑀯𑀺𑀥𑀺𑀦𑁆𑀢𑀺 ‘‘𑀲𑀸𑀡𑀢𑁆𑀢𑀺𑀓𑀁 𑀅𑀦𑀸𑀡𑀢𑁆𑀢𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁 𑀆𑀡𑀢𑁆𑀢𑀺𑀯𑀺𑀥𑀺𑀁. 𑀅𑀗𑁆𑀕𑀯𑀺𑀥𑀸𑀦𑀦𑁆𑀢𑀺 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑁂𑀲𑀼 𑀆𑀧𑀢𑁆𑀢𑀻𑀦𑀁 𑀯𑀼𑀢𑁆𑀢𑀁 𑀅𑀗𑁆𑀕𑀯𑀺𑀥𑀸𑀦𑀜𑁆𑀘. 𑀯𑁂𑀤𑀦𑀸𑀢𑁆𑀢𑀺𑀓𑀁, 𑀓𑀼𑀲𑀮𑀢𑁆𑀢𑀺𑀓𑀜𑁆𑀘𑀸𑀢𑀺 𑀬𑁄𑀚𑀦𑀸. 𑀢𑀁 𑀧𑀦 ‘‘𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑁆𑀯𑀺𑀘𑀺𑀢𑁆𑀢𑀁, 𑀢𑀺𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀁, 𑀤𑁆𑀯𑀺𑀯𑁂𑀤𑀦𑀁, 𑀢𑀺𑀯𑁂𑀤𑀦’’𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀤𑀲𑁆𑀲𑀺𑀢𑀫𑁂𑀯.

𑀲𑀢𑁆𑀢𑀭𑀲𑀯𑀺𑀥𑀁 𑀏𑀢𑀁 𑀮𑀓𑁆𑀔𑀡𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀦𑀺𑀤𑀸𑀦𑀸𑀤𑀺𑀲𑀢𑁆𑀢𑀭𑀲𑀧𑁆𑀧𑀪𑁂𑀤𑀁 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀁 𑀲𑀸𑀥𑀸𑀭𑀡𑀮𑀓𑁆𑀔𑀡𑀁. 𑀤𑀲𑁆𑀲𑁂𑀢𑁆𑀯𑀸𑀢𑀺 𑀧𑀓𑀸𑀲𑁂𑀢𑁆𑀯𑀸. 𑀩𑀼𑀥𑁄 𑀯𑀺𑀦𑀬𑀓𑀼𑀲𑀮𑁄. 𑀢𑀢𑁆𑀣 𑀢𑀢𑁆𑀣 𑀲𑀺𑀓𑁆𑀔𑀸𑀧𑀤𑁂𑀲𑀼 𑀬𑀣𑀸𑀭𑀳𑀁 𑀬𑁄𑀚𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁧𑁧𑁮. 𑀇𑀫𑁂𑀲𑀼 𑀲𑀢𑁆𑀢𑀭𑀲𑀲𑀼 𑀮𑀓𑁆𑀔𑀡𑁂𑀲𑀼 𑀦𑀺𑀤𑀸𑀦𑀧𑀼𑀕𑁆𑀕𑀮𑁂 𑀢𑀸𑀯 𑀦𑀺𑀤𑁆𑀤𑀺𑀲𑀺𑀢𑀼𑀫𑀸𑀳 ‘‘𑀦𑀺𑀤𑀸𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀲𑀢𑁆𑀢𑀭𑀲𑀲𑀼 𑀲𑀸𑀥𑀸𑀭𑀡𑀮𑀓𑁆𑀔𑀡𑁂𑀲𑀼, 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀦𑀺𑀤𑀸𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀺𑀢𑀩𑁆𑀩𑀤𑀲𑁆𑀲𑀦𑀁. ‘‘𑀧𑀼𑀭’’𑀦𑁆𑀢𑀺 𑀇𑀤𑀁 ‘‘𑀯𑁂𑀲𑀸𑀮𑀻’’𑀢𑀺𑀆𑀤𑀺𑀧𑀤𑁂𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀲𑀓𑁆𑀓𑀪𑀕𑁆𑀕𑀸𑀢𑀺 𑀏𑀢𑁂𑀳𑀺 𑀚𑀦𑀧𑀤𑀯𑀸𑀘𑀻𑀳𑀺 𑀲𑀤𑁆𑀤𑁂𑀳𑀺 𑀞𑀸𑀦𑀦𑀺𑀲𑁆𑀲𑀺𑀢𑀸 𑀦𑀸𑀕𑀭𑀸𑀯 𑀕𑀳𑁂𑀢𑀩𑁆𑀩𑀸. 𑀢𑀸𑀦𑀺 𑀘 ‘‘𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁, 𑀪𑀕𑁆𑀕𑁂𑀲𑀼 𑀯𑀺𑀳𑀭𑀢𑀺 𑀲𑀼𑀲𑀼𑀫𑀸𑀭𑀕𑀺𑀭𑁂’’𑀢𑀺 𑀢𑀢𑁆𑀣 𑀢𑀢𑁆𑀣 𑀲𑀺𑀓𑁆𑀔𑀸𑀧𑀤𑀦𑀺𑀤𑀸𑀦𑁂 𑀦𑀺𑀤𑀲𑁆𑀲𑀺𑀢𑀸𑀦𑁂𑀯.

𑁩𑁧𑁧𑁯. ‘‘𑀤𑀲 𑀯𑁂𑀲𑀸𑀮𑀺𑀬𑀸’’𑀢𑀺𑀆𑀤𑀻𑀦𑀁 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀉𑀢𑁆𑀢𑀭𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀕𑀺𑀭𑀺𑀩𑁆𑀩𑀚𑁂𑀢𑀺 𑀭𑀸𑀚𑀕𑀳𑀦𑀕𑀭𑁂. 𑀢𑀜𑁆𑀳𑀺 𑀲𑀫𑀦𑁆𑀢𑀸 𑀞𑀺𑀢𑁂𑀳𑀺 𑀇𑀲𑀺𑀕𑀺𑀮𑀺𑀆𑀤𑀻𑀳𑀺 𑀧𑀜𑁆𑀘𑀳𑀺 𑀧𑀩𑁆𑀩𑀢𑁂𑀳𑀺 𑀯𑀚𑀲𑀤𑀺𑀲𑀦𑁆𑀢𑀺 ‘‘𑀕𑀺𑀭𑀺𑀩𑁆𑀩𑀚’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁩𑁧𑁨𑁧. 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔𑀲𑁆𑀫𑀺𑀁 𑀲𑀼𑀤𑀺𑀦𑁆𑀦𑀥𑀦𑀺𑀬𑀸𑀤𑀬𑁄 𑀢𑁂𑀯𑀻𑀲𑀢𑀺𑀯𑀺𑀥𑀸 𑀆𑀤𑀺𑀓𑀫𑁆𑀫𑀺𑀓𑀧𑀼𑀕𑁆𑀕𑀮𑀸 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸.

𑁩𑁧𑁨𑁨. 𑀉𑀪𑀬𑀧𑀸𑀢𑀺𑀫𑁄𑀓𑁆𑀔𑁂 𑀆𑀕𑀢𑀸 𑀢𑁂 𑀲𑀩𑁆𑀩𑁂 𑀆𑀤𑀺𑀓𑀫𑁆𑀫𑀺𑀓𑀧𑀼𑀕𑁆𑀕𑀮𑀸 𑀧𑀭𑀺𑀧𑀺𑀡𑁆𑀟𑀺𑀢𑀸 𑀢𑀺𑀁𑀲 𑀪𑀯𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀯𑀢𑁆𑀣𑀼𑀆𑀤𑀻𑀦𑀁 𑀯𑀺𑀦𑀺𑀘𑁆𑀙𑀬𑁄 𑀉𑀢𑁆𑀢𑀭𑁂 𑀯𑀓𑁆𑀔𑀫𑀸𑀦𑀢𑁆𑀢𑀸 𑀇𑀥 𑀦 𑀯𑀼𑀢𑁆𑀢𑁄. 𑀦𑀦𑀼 𑀘 𑀦𑀺𑀤𑀸𑀦𑀧𑀼𑀕𑁆𑀕𑀮𑀯𑀺𑀦𑀺𑀘𑁆𑀙𑀬𑀫𑁆𑀧𑀺 𑀢𑀢𑁆𑀣 𑀯𑀓𑁆𑀔𑀢𑀻𑀢𑀺 𑀲𑁄 𑀇𑀥 𑀓𑀲𑁆𑀫𑀸 𑀯𑀼𑀢𑁆𑀢𑁄𑀢𑀺? 𑀦𑀸𑀬𑀁 𑀤𑁄𑀲𑁄, 𑀇𑀫𑀲𑁆𑀲 𑀧𑀓𑀭𑀡𑀢𑁆𑀢𑀸 𑀇𑀥𑀸𑀧𑀺 𑀯𑀢𑁆𑀢𑀩𑁆𑀩𑁄𑀢𑀺. 𑀬𑀤𑀺 𑀏𑀯𑀁 𑀯𑀢𑁆𑀣𑀼𑀆𑀤𑀺𑀯𑀺𑀦𑀺𑀘𑁆𑀙𑀬𑁄𑀧𑀺 𑀇𑀥 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸, 𑀲𑁄 𑀓𑀲𑁆𑀫𑀸 𑀦 𑀯𑀼𑀢𑁆𑀢𑁄𑀢𑀺? 𑀏𑀓𑀬𑁄𑀕𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀇𑀫𑀲𑁆𑀲 𑀯𑀘𑀦𑁂𑀦 𑀲𑁄𑀧𑀺 𑀯𑀼𑀢𑁆𑀢𑁄𑀬𑁂𑀯 𑀳𑁄𑀢𑀻𑀢𑀺 𑀏𑀓𑀤𑁂𑀲𑀤𑀲𑁆𑀲𑀦𑀯𑀲𑁂𑀦 𑀲𑀁𑀔𑀺𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑁩𑁧𑁨𑁩. 𑀬𑁄 𑀏𑀦𑀁 𑀢𑀭𑀼𑀁 𑀚𑀸𑀦𑀸𑀢𑀺, 𑀲𑁄 𑀧𑀜𑁆𑀜𑀢𑁆𑀢𑀺𑀁 𑀅𑀲𑁂𑀲𑀢𑁄 𑀚𑀸𑀦𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 ‘‘𑀏𑀦𑀁 𑀢𑀭𑀼’’𑀦𑁆𑀢𑀺 𑀇𑀫𑀺𑀦𑀸 𑀦𑀺𑀤𑀸𑀦𑀸𑀤𑀺𑀲𑀢𑁆𑀢𑀭𑀲𑀧𑁆𑀧𑀓𑀸𑀭𑀁 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀲𑀸𑀥𑀸𑀭𑀡𑀮𑀓𑁆𑀔𑀡𑀲𑀫𑀼𑀤𑀸𑀬𑀁 𑀭𑀽𑀧𑀓𑁂𑀦 𑀤𑀲𑁆𑀲𑁂𑀢𑀺. 𑀓𑀺𑀁 𑀯𑀺𑀲𑀺𑀝𑁆𑀞𑀁 𑀢𑀭𑀼𑀦𑁆𑀢𑀺 𑀆𑀳 ‘‘𑀢𑀺𑀫𑀽𑀮’’𑀦𑁆𑀢𑀺𑀆𑀤𑀺.

𑀢𑀢𑁆𑀣 𑀢𑀺𑀫𑀽𑀮𑀦𑁆𑀢𑀺 𑀦𑀺𑀤𑀸𑀦𑀧𑀼𑀕𑁆𑀕𑀮𑀯𑀢𑁆𑀣𑀼𑀲𑀗𑁆𑀔𑀸𑀢𑀸𑀦𑀺 𑀢𑀻𑀡𑀺 𑀫𑀽𑀮𑀸𑀦𑀺 𑀏𑀢𑀲𑁆𑀲𑀸𑀢𑀺 𑀢𑀺𑀫𑀽𑀮𑀁. 𑀦𑀯𑀧𑀢𑁆𑀢𑀦𑁆𑀢𑀺 𑀦𑀯𑀯𑀺𑀥𑀧𑀡𑁆𑀡𑀢𑁆𑀢𑀺𑀲𑀗𑁆𑀔𑀸𑀢𑀸𑀦𑀺 𑀧𑀢𑁆𑀢𑀸𑀦𑀺 𑀏𑀢𑀲𑁆𑀲𑀸𑀢𑀺 𑀦𑀯𑀧𑀢𑁆𑀢𑀁. 𑀤𑁆𑀯𑀬𑀗𑁆𑀓𑀼𑀭𑀦𑁆𑀢𑀺 𑀮𑁄𑀓𑀯𑀚𑁆𑀚𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀲𑀗𑁆𑀔𑀸𑀢𑀸 𑀤𑁆𑀯𑁂 𑀅𑀗𑁆𑀓𑀼𑀭𑀸 𑀏𑀢𑀲𑁆𑀲𑀸𑀢𑀺 𑀤𑁆𑀯𑀬𑀗𑁆𑀓𑀼𑀭𑀁. ‘‘𑀤𑁆𑀯𑀺𑀅𑀗𑁆𑀓𑀼𑀭’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀇-𑀓𑀸𑀭𑀲𑁆𑀲 𑀅𑀬𑀸𑀤𑁂𑀲𑀁 𑀓𑀢𑁆𑀯𑀸 ‘‘𑀤𑁆𑀯𑀬𑀗𑁆𑀓𑀼𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀢𑁆𑀢𑀨𑀮𑀦𑁆𑀢𑀺 𑀆𑀡𑀢𑁆𑀢𑀺𑀆𑀧𑀢𑁆𑀢𑀺𑀅𑀦𑀸𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀲𑀜𑁆𑀜𑀸𑀯𑁂𑀤𑀦𑀸𑀓𑀼𑀲𑀮𑀢𑁆𑀢𑀺𑀓𑀲𑀗𑁆𑀔𑀸𑀢𑀸𑀦𑀺 𑀲𑀢𑁆𑀢 𑀨𑀮𑀸𑀦𑀺 𑀏𑀢𑀲𑁆𑀲𑀸𑀢𑀺 𑀲𑀢𑁆𑀢𑀨𑀮𑀁. 𑀙𑀧𑀼𑀧𑁆𑀨𑀦𑁆𑀢𑀺 𑀙𑀲𑀫𑀼𑀝𑁆𑀞𑀸𑀦𑀲𑀗𑁆𑀔𑀸𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀏𑀢𑀲𑁆𑀲𑀸𑀢𑀺 𑀙𑀧𑀼𑀧𑁆𑀨𑀁. 𑀤𑁆𑀯𑀺𑀧𑁆𑀧𑀪𑀯𑀦𑁆𑀢𑀺 𑀘𑀺𑀢𑁆𑀢𑀓𑀫𑁆𑀫𑀲𑀗𑁆𑀔𑀸𑀢𑀸 𑀤𑁆𑀯𑁂 𑀧𑀪𑀯𑀸 𑀏𑀢𑀲𑁆𑀲𑀸𑀢𑀺 𑀤𑁆𑀯𑀺𑀧𑁆𑀧𑀪𑀯𑀁. 𑀤𑁆𑀯𑀺𑀲𑀸𑀔𑀦𑁆𑀢𑀺 𑀓𑀺𑀭𑀺𑀬𑀅𑀗𑁆𑀕𑀲𑀗𑁆𑀔𑀸𑀢𑀸 𑀤𑁆𑀯𑁂 𑀲𑀸𑀔𑀸 𑀏𑀢𑀲𑁆𑀲𑀸𑀢𑀺 𑀤𑁆𑀯𑀺𑀲𑀸𑀔𑀁. 𑀏𑀦𑀁 𑀢𑀭𑀼𑀁 𑀬𑁄 𑀚𑀸𑀦𑀸𑀢𑀻𑀢𑀺 𑀬𑁄 𑀯𑀼𑀢𑁆𑀢𑁄 𑀪𑀺𑀓𑁆𑀔𑀼 𑀯𑀼𑀢𑁆𑀢𑀲𑀭𑀽𑀧𑀲𑀸𑀥𑀸𑀭𑀡𑀲𑀢𑁆𑀢𑀭𑀲𑀮𑀓𑁆𑀔𑀡𑀭𑀸𑀲𑀺𑀯𑀺𑀦𑀺𑀘𑁆𑀙𑀬𑀲𑀗𑁆𑀔𑀸𑀢𑀢𑀭𑀼𑀁 𑀚𑀸𑀦𑀸𑀢𑀺. 𑀲𑁄𑀢𑀺 𑀲𑁄 𑀪𑀺𑀓𑁆𑀔𑀼. 𑀧𑀜𑁆𑀜𑀢𑁆𑀢𑀺𑀦𑁆𑀢𑀺 𑀯𑀺𑀦𑀬𑀧𑀺𑀝𑀓𑀁. 𑀅𑀲𑁂𑀲𑀢𑁄𑀢𑀺 𑀲𑀩𑁆𑀩𑀲𑁄.

𑁩𑁧𑁨𑁪. 𑀇𑀢𑀺 𑀏𑀯𑀁 𑀫𑀥𑀼𑀭𑀧𑀤𑀢𑁆𑀣𑀁 𑀅𑀦𑀸𑀓𑀼𑀮𑀁 𑀧𑀭𑀫𑀁 𑀉𑀢𑁆𑀢𑀫𑀁 𑀇𑀫𑀁 𑀯𑀺𑀦𑀺𑀘𑁆𑀙𑀬𑀁 𑀬𑁄 𑀧𑀞𑀢𑀺 𑀯𑀸𑀘𑀼𑀕𑁆𑀕𑀢𑀁 𑀓𑀭𑁄𑀦𑁆𑀢𑁄 𑀧𑀭𑀺𑀬𑀸𑀧𑀼𑀡𑀸𑀢𑀺, 𑀕𑀭𑀼𑀲𑀦𑁆𑀢𑀺𑀓𑁂 𑀲𑀸𑀥𑀼𑀓𑀁 𑀲𑀼𑀡𑀸𑀢𑀺, 𑀧𑀭𑀺𑀧𑀼𑀘𑁆𑀙𑀢𑁂 𑀘 𑀅𑀢𑁆𑀣𑀁 𑀧𑀭𑀺𑀧𑀼𑀘𑁆𑀙𑀢𑀺 𑀘, 𑀲𑁄 𑀪𑀺𑀓𑁆𑀔𑀼 𑀯𑀺𑀦𑀬 𑀯𑀺𑀦𑀺𑀘𑁆𑀙𑀬𑁂 𑀉𑀧𑀸𑀮𑀺𑀲𑀫𑁄 𑀪𑀯𑀢𑀺 𑀯𑀺𑀦𑀬𑀥𑀭𑀸𑀦𑀁 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀦𑀺𑀓𑁆𑀔𑀺𑀢𑁆𑀢𑁂𑀦 𑀉𑀧𑀸𑀮𑀺𑀫𑀳𑀸𑀣𑁂𑀭𑁂𑀦 𑀲𑀤𑀺𑀲𑁄 𑀪𑀯𑀢𑀻𑀢𑀺 𑀬𑁄𑀚𑀦𑀸.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.