𑀓𑀫𑁆𑀫𑀯𑀺𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁩𑁦𑁧𑁪. 𑀓𑀫𑁆𑀫𑀸𑀦𑀁 𑀯𑀺𑀧𑀢𑁆𑀢𑀺𑀬𑀸 𑀤𑀲𑁆𑀲𑀺𑀢𑀸𑀬 𑀲𑀫𑁆𑀧𑀢𑁆𑀢𑀺𑀧𑀺 𑀩𑁆𑀬𑀢𑀺𑀭𑁂𑀓𑀢𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀓𑀫𑁆𑀫𑀯𑀺𑀧𑀢𑁆𑀢𑀺𑀁 𑀢𑀸𑀯 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀯𑀢𑁆𑀣𑀼𑀢𑁄’’𑀢𑀺𑀆𑀤𑀺. 𑀯𑀲𑀢𑀺 𑀏𑀢𑁆𑀣 𑀓𑀫𑁆𑀫𑀲𑀗𑁆𑀔𑀸𑀢𑀁 𑀨𑀮𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀯𑀢𑁆𑀣𑀼, 𑀓𑀫𑁆𑀫𑀲𑁆𑀲 𑀧𑀥𑀸𑀦𑀓𑀸𑀭𑀡𑀁, 𑀢𑀢𑁄 𑀯𑀢𑁆𑀣𑀼𑀢𑁄 𑀘. 𑀅𑀦𑀼𑀲𑁆𑀲𑀸𑀯𑀦𑀲𑀻𑀫𑀢𑁄𑀢𑀺 𑀅𑀦𑀼𑀲𑁆𑀲𑀸𑀯𑀦𑀢𑁄, 𑀲𑀻𑀫𑀢𑁄 𑀘. 𑀧𑀜𑁆𑀘𑁂𑀯𑀸𑀢𑀺 𑀏𑀯𑀓𑀸𑀭𑁂𑀦 𑀓𑀫𑁆𑀫𑀤𑁄𑀲𑀸𑀦𑀁 𑀏𑀢𑀁𑀧𑀭𑀫𑀢𑀁 𑀤𑀲𑁆𑀲𑁂𑀢𑀺.

𑁩𑁦𑁧𑁫. 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑀓𑀫𑁆𑀫𑀤𑁄𑀲𑀫𑀸𑀢𑀺𑀓𑀸𑀦𑀼𑀓𑁆𑀓𑀫𑁂 𑀓𑀫𑁆𑀫𑀯𑀺𑀧𑀢𑁆𑀢𑀺𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀫𑁆𑀫𑀼𑀔𑀸’’𑀢𑀺𑀆𑀤𑀺. 𑀲𑀗𑁆𑀖𑀥𑀫𑁆𑀫𑀯𑀺𑀦𑀬𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀸𑀲𑀗𑁆𑀔𑀸𑀢𑀁 𑀘𑀢𑀼𑀩𑁆𑀩𑀺𑀥𑀁 𑀲𑀫𑁆𑀫𑀼𑀔𑀸𑀯𑀺𑀦𑀬𑀁 𑀉𑀧𑀦𑁂𑀢𑁆𑀯𑀸 𑀓𑀸𑀢𑀩𑁆𑀩𑀁 𑀓𑀫𑁆𑀫𑀁 𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀁 𑀦𑀸𑀫.

𑀢𑀢𑁆𑀣 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑀢𑁆𑀢𑀸, 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀦 𑀧𑀝𑀺𑀓𑁆𑀓𑁄𑀲𑀦𑁆𑀢𑀺, 𑀅𑀬𑀁 𑀲𑀗𑁆𑀖𑀲𑀫𑁆𑀫𑀼𑀔𑀢𑀸. 𑀬𑁂𑀦 𑀥𑀫𑁆𑀫𑁂𑀦 𑀬𑁂𑀦 𑀯𑀺𑀦𑀬𑁂𑀦 𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀲𑀗𑁆𑀖𑁄 𑀢𑀁 𑀓𑀫𑁆𑀫𑀁 𑀓𑀭𑁄𑀢𑀺, 𑀅𑀬𑀁 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸. 𑀢𑀢𑁆𑀣 𑀥𑀫𑁆𑀫𑁄𑀢𑀺 𑀪𑀽𑀢𑀁 𑀯𑀢𑁆𑀣𑀼. 𑀯𑀺𑀦𑀬𑁄𑀢𑀺 𑀘𑁄𑀤𑀦𑀸 𑀘𑁂𑀯 𑀲𑀸𑀭𑀡𑀸 𑀘. 𑀲𑀢𑁆𑀣𑀼𑀲𑀸𑀲𑀦𑀁 𑀦𑀸𑀫 𑀜𑀢𑁆𑀢𑀺𑀲𑀫𑁆𑀧𑀤𑀸 𑀘𑁂𑀯 𑀅𑀦𑀼𑀲𑁆𑀲𑀸𑀯𑀦𑀲𑀫𑁆𑀧𑀤𑀸 𑀘. 𑀬𑀲𑁆𑀲 𑀲𑀗𑁆𑀖𑁄 𑀢𑀁 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀲𑀫𑁆𑀫𑀼𑀔𑀪𑀸𑀯𑁄 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸. 𑀏𑀯𑀁 𑀘𑀢𑀼𑀩𑁆𑀩𑀺𑀥𑁂𑀦 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀬𑀁 𑀲𑀗𑁆𑀖𑀓𑀫𑁆𑀫𑀁 ‘‘𑀓𑀭𑀡𑀻𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀲𑀫𑁆𑀫𑀼𑀔𑀸 𑀓𑀭𑁄𑀢𑀺 𑀘𑀢𑀼𑀩𑁆𑀩𑀺𑀥𑀮𑀓𑁆𑀔𑀡𑀢𑁄 𑀏𑀓𑀫𑁆𑀧𑀺 𑀧𑀭𑀺𑀳𑀸𑀧𑁂𑀢𑁆𑀯𑀸 𑀓𑀭𑁄𑀢𑀺, 𑀢𑀁 𑀓𑀫𑁆𑀫𑀁 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑀗𑁆𑀔𑀸𑀢𑁂𑀦 𑀯𑀢𑁆𑀣𑀼𑀦𑀸 𑀯𑁂𑀓𑀮𑁆𑀮𑀁 ‘‘𑀅𑀥𑀫𑁆𑀫𑀓𑀫𑁆𑀫’’𑀦𑁆𑀢𑀺 𑀧𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸.

𑁩𑁦𑁧𑁬-𑁮. 𑀏𑀯𑀁 𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑁂 𑀯𑀢𑁆𑀣𑀼𑀢𑁄 𑀓𑀫𑁆𑀫𑀯𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀅𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀲𑀫𑁆𑀫𑀼𑀔𑀸’’𑀢𑀺𑀆𑀤𑀺.

𑀤𑁂𑀯𑀤𑀢𑁆𑀢𑀲𑁆𑀲 𑀓𑀢𑀁 𑀧𑀓𑀸𑀲𑀦𑀻𑀬𑀓𑀫𑁆𑀫𑀜𑁆𑀘. 𑀲𑁂𑀓𑁆𑀔𑀲𑀫𑁆𑀫𑀼𑀢𑀺 𑀉𑀫𑁆𑀫𑀢𑁆𑀢𑀓𑀲𑀫𑁆𑀫𑀼𑀢𑀻𑀢𑀺 𑀬𑁄𑀚𑀦𑀸. 𑀅𑀯𑀦𑁆𑀤𑀺𑀬𑀓𑀫𑁆𑀫𑀁 𑀧𑀼𑀕𑁆𑀕𑀮𑀲𑀻𑀲𑁂𑀦 ‘‘𑀅𑀯𑀦𑁆𑀤𑀺𑀬𑁄’’𑀢𑀺 𑀯𑀼𑀢𑁆𑀢𑀁. 𑀅𑀟𑁆𑀠𑀓𑀸𑀲𑀺𑀬𑀸 𑀕𑀡𑀺𑀓𑀸𑀬 𑀅𑀦𑀼𑀜𑁆𑀜𑀸𑀢𑀸 𑀤𑀽𑀢𑁂𑀦 𑀉𑀧𑀲𑀫𑁆𑀧𑀤𑀸 𑀤𑀽𑀢𑀽𑀧𑀲𑀫𑁆𑀧𑀤𑀸. 𑀇𑀢𑀺 𑀇𑀫𑀸𑀦𑀺 𑀅𑀝𑁆𑀞 𑀓𑀫𑁆𑀫𑀸𑀦𑀺 𑀞𑀧𑁂𑀢𑁆𑀯𑀸𑀦 𑀲𑁂𑀲𑀸𑀦𑀺 𑀧𑀦 𑀲𑀩𑁆𑀩𑀲𑁄 𑀲𑀩𑁆𑀩𑀸𑀦𑀺 𑀓𑀫𑁆𑀫𑀸𑀦𑀺 ‘‘𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀸𑀦𑀻’’𑀢𑀺 𑀲𑁄𑀪𑀦𑀕𑀫𑀦𑀸𑀤𑀻𑀳𑀺 𑀲𑀼𑀕𑀢𑁄 𑀲𑀢𑁆𑀣𑀸 𑀅𑀩𑁆𑀭𑁆𑀯𑀺 𑀓𑀣𑁂𑀲𑀻𑀢𑀺 𑀬𑁄𑀚𑀦𑀸.

𑁩𑁦𑁧𑁯-𑁨𑁦. 𑀏𑀯𑀁 𑀯𑀢𑁆𑀣𑀼𑀢𑁄 𑀓𑀫𑁆𑀫𑀯𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀜𑀢𑁆𑀢𑀺𑀢𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀜𑀢𑁆𑀢𑀺𑀢𑁄’’𑀢𑀺𑀆𑀤𑀺. 𑀯𑀺𑀧𑀚𑁆𑀚𑀦𑀦𑀬𑀸𑀢𑀺 𑀯𑀺𑀦𑀬𑀯𑀺𑀧𑀚𑁆𑀚𑀦𑀓𑁆𑀓𑀫𑀸. 𑀯𑀢𑁆𑀣𑀼𑀁 𑀦 𑀧𑀭𑀸𑀫𑀲𑀢𑀻𑀢𑀺 𑀬𑀲𑁆𑀲 𑀉𑀧𑀲𑀫𑁆𑀧𑀤𑀸𑀤𑀺𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀁 𑀦 𑀧𑀭𑀸𑀫𑀲𑀢𑀺 𑀢𑀲𑁆𑀲 𑀦𑀸𑀫𑀁 𑀦 𑀕𑀡𑁆𑀳𑀸𑀢𑀺. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄 𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀯𑀤𑀢𑀺. 𑀏𑀯𑀁 𑀯𑀢𑁆𑀣𑀼𑀁 𑀦 𑀧𑀭𑀸𑀫𑀲𑀢𑀺.

𑀲𑀗𑁆𑀖𑀁 𑀦 𑀧𑀭𑀸𑀫𑀲𑀢𑀻𑀢𑀺 𑀲𑀗𑁆𑀖𑀲𑁆𑀲 𑀦𑀸𑀫𑀁 𑀦 𑀧𑀭𑀸𑀫𑀲𑀢𑀺 𑀢𑀲𑁆𑀲 𑀦𑀸𑀫𑀁 𑀦 𑀕𑀡𑁆𑀳𑀸𑀢𑀺. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄’’𑀢𑀺 𑀯𑀤𑀢𑀺. 𑀏𑀯𑀁 𑀲𑀗𑁆𑀖𑀁 𑀦 𑀧𑀭𑀸𑀫𑀲𑀢𑀺.

𑀧𑀼𑀕𑁆𑀕𑀮𑀁 𑀦 𑀧𑀭𑀸𑀫𑀲𑀢𑀻𑀢𑀺 𑀬𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲 𑀉𑀧𑀚𑁆𑀛𑀸𑀬𑁄, 𑀢𑀁 𑀦 𑀧𑀭𑀸𑀫𑀲𑀢𑀺 𑀢𑀲𑁆𑀲 𑀦𑀸𑀫𑀁 𑀦 𑀕𑀡𑁆𑀳𑀸𑀢𑀺. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄 𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀯𑀤𑀢𑀺. 𑀏𑀯𑀁 𑀧𑀼𑀕𑁆𑀕𑀮𑀁 𑀦 𑀧𑀭𑀸𑀫𑀲𑀢𑀺.

𑀜𑀢𑁆𑀢𑀺𑀁 𑀦 𑀧𑀭𑀸𑀫𑀲𑀢𑀻𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀜𑀢𑁆𑀢𑀺𑀁 𑀦 𑀧𑀭𑀸𑀫𑀲𑀢𑀺, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂 𑀜𑀢𑁆𑀢𑀺𑀁 𑀅𑀝𑁆𑀞𑀧𑁂𑀢𑁆𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀓𑀫𑁆𑀫𑀯𑀸𑀘𑀸𑀬 𑀏𑀯 𑀅𑀦𑀼𑀲𑁆𑀲𑀸𑀯𑀦𑀓𑀫𑁆𑀫𑀁 𑀓𑀭𑁄𑀢𑀺, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑁂𑀧𑀺 𑀜𑀢𑁆𑀢𑀺𑀁 𑀅𑀝𑁆𑀞𑀧𑁂𑀢𑁆𑀯𑀸 𑀘𑀢𑀼𑀓𑁆𑀔𑀢𑁆𑀢𑀼𑀁 𑀓𑀫𑁆𑀫𑀯𑀸𑀘𑀸𑀬 𑀏𑀯 𑀅𑀦𑀼𑀲𑁆𑀲𑀸𑀯𑀦𑀓𑀫𑁆𑀫𑀁 𑀓𑀭𑁄𑀢𑀺. 𑀏𑀯𑀁 𑀜𑀢𑁆𑀢𑀺𑀁 𑀦 𑀧𑀭𑀸𑀫𑀲𑀢𑀺.

𑀧𑀘𑁆𑀙𑀸 𑀯𑀸 𑀜𑀢𑁆𑀢𑀺𑀁 𑀞𑀧𑁂𑀢𑀻𑀢𑀺 𑀧𑀞𑀫𑀁 𑀓𑀫𑁆𑀫𑀯𑀸𑀘𑀸𑀬 𑀅𑀦𑀼𑀲𑁆𑀲𑀸𑀯𑀦𑀓𑀫𑁆𑀫𑀁 𑀓𑀢𑁆𑀯𑀸 ‘‘𑀏𑀲𑀸 𑀜𑀢𑁆𑀢𑀻’’𑀢𑀺 𑀯𑀢𑁆𑀯𑀸 ‘‘𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 𑀯𑀤𑀢𑀺. 𑀏𑀯𑀁 𑀧𑀘𑁆𑀙𑀸 𑀜𑀢𑁆𑀢𑀺𑀁 𑀞𑀧𑁂𑀢𑀺. 𑀧𑀜𑁆𑀘𑀳𑁂𑀢𑁂𑀳𑀻𑀢𑀺 𑀏𑀢𑁂𑀳𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺.

𑁩𑁦𑁨𑁧-𑁨. 𑀏𑀯𑀁 𑀜𑀢𑁆𑀢𑀺𑀢𑁄 𑀓𑀫𑁆𑀫𑀯𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑀼𑀲𑁆𑀲𑀸𑀯𑀦𑀢𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀦𑀼𑀲𑁆𑀲𑀸𑀯𑀦𑀢𑁄’’𑀢𑀺𑀆𑀤𑀺. 𑀅𑀦𑀼𑀲𑁆𑀲𑀸𑀯𑀦𑀢𑁄 𑀓𑀫𑁆𑀫𑀤𑁄𑀲𑀸 𑀧𑀜𑁆𑀘 𑀧𑀓𑀸𑀲𑀺𑀢𑀸𑀢𑀺 𑀬𑁄𑀚𑀦𑀸. ‘‘𑀦 𑀧𑀭𑀸𑀫𑀲𑀢𑀺 𑀯𑀢𑁆𑀣𑀼𑀁 𑀯𑀸’’𑀢𑀺𑀆𑀤𑀻𑀲𑀼 𑀯𑀢𑁆𑀣𑀼𑀆𑀤𑀻𑀦𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀯𑀁 𑀧𑀦 𑀦𑁂𑀲𑀁 𑀅𑀧𑀭𑀸𑀫𑀲𑀦𑀁 𑀳𑁄𑀢𑀺 (𑀧𑀭𑀺. 𑀅𑀝𑁆𑀞. 𑁪𑁮𑁫) 𑁋 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄’’𑀢𑀺 𑀧𑀞𑀫𑀸𑀦𑀼𑀲𑁆𑀲𑀸𑀯𑀦𑁂 𑀯𑀸 ‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺, ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄’’𑀢𑀺 𑀤𑀼𑀢𑀺𑀬𑀢𑀢𑀺𑀬𑀸𑀦𑀼𑀲𑁆𑀲𑀸𑀯𑀦𑁂𑀲𑀼 𑀯𑀸 ‘‘𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄 𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲𑀸’’𑀢𑀺 𑀯𑀤𑀦𑁆𑀢𑁄 𑀯𑀢𑁆𑀣𑀼𑀁 𑀦 𑀧𑀭𑀸𑀫𑀲𑀢𑀺 𑀦𑀸𑀫.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄’’𑀢𑀺 𑀯𑀤𑀦𑁆𑀢𑁄 𑀲𑀗𑁆𑀖𑀁 𑀦 𑀧𑀭𑀸𑀫𑀲𑀢𑀺 𑀦𑀸𑀫.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄 𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀯𑀤𑀦𑁆𑀢𑁄 𑀧𑀼𑀕𑁆𑀕𑀮𑀁 𑀦 𑀧𑀭𑀸𑀫𑀲𑀢𑀺 𑀦𑀸𑀫.

𑀲𑀸𑀯𑀦𑀁 𑀳𑀸𑀧𑁂𑀢𑀻𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀓𑀫𑁆𑀫𑀯𑀸𑀘𑀸𑀬 𑀅𑀦𑀼𑀲𑁆𑀲𑀸𑀯𑀦𑀁 𑀦 𑀓𑀭𑁄𑀢𑀺, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀜𑀢𑁆𑀢𑀺𑀫𑁂𑀯 𑀞𑀧𑁂𑀢𑀺, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑁂 𑀘𑀢𑀼𑀓𑁆𑀔𑀢𑁆𑀢𑀼𑀁 𑀜𑀢𑁆𑀢𑀺𑀫𑁂𑀯 𑀞𑀧𑁂𑀢𑀺. 𑀏𑀯𑀁 𑀅𑀦𑀼𑀲𑁆𑀲𑀸𑀯𑀦𑀁 𑀳𑀸𑀧𑁂𑀢𑀺. 𑀬𑁄𑀧𑀺 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂 𑀏𑀓𑀁 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀏𑀓𑀁 𑀓𑀫𑁆𑀫𑀯𑀸𑀘𑀁 𑀅𑀦𑀼𑀲𑁆𑀲𑀸𑀯𑁂𑀦𑁆𑀢𑁄 𑀅𑀓𑁆𑀔𑀭𑀁 𑀯𑀸 𑀙𑀟𑁆𑀟𑁂𑀢𑀺, 𑀧𑀤𑀁 𑀯𑀸 𑀤𑀼𑀭𑀼𑀢𑁆𑀢𑀁 𑀓𑀭𑁄𑀢𑀺, 𑀅𑀬𑀫𑁆𑀧𑀺 𑀅𑀦𑀼𑀲𑁆𑀲𑀸𑀯𑀦𑀁 𑀳𑀸𑀧𑁂𑀢𑀺𑀬𑁂𑀯. 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑁂 𑀧𑀦 𑀏𑀓𑀁 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀲𑀓𑀺𑀫𑁂𑀯 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀓𑀫𑁆𑀫𑀯𑀸𑀘𑀸𑀬 𑀅𑀦𑀼𑀲𑁆𑀲𑀸𑀯𑀦𑀁 𑀓𑀭𑁄𑀦𑁆𑀢𑁄𑀧𑀺 𑀅𑀓𑁆𑀔𑀭𑀁 𑀯𑀸 𑀧𑀤𑀁 𑀯𑀸 𑀙𑀟𑁆𑀟𑁂𑀦𑁆𑀢𑁄𑀧𑀺 𑀤𑀼𑀭𑀼𑀢𑁆𑀢𑀁 𑀓𑀭𑁄𑀦𑁆𑀢𑁄𑀧𑀺 𑀅𑀦𑀼𑀲𑁆𑀲𑀸𑀯𑀦𑀁 𑀳𑀸𑀧𑁂𑀢𑀺𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀤𑀼𑀭𑀼𑀢𑁆𑀢𑀁 𑀓𑀭𑁄𑀢𑀻𑀢𑀺 𑀏𑀢𑁆𑀣 𑀧𑀦 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 (𑀧𑀭𑀺. 𑀅𑀝𑁆𑀞. 𑁪𑁮𑁫) 𑁋 𑀬𑁄 𑀳𑀺 𑀅𑀜𑁆𑀜𑀲𑁆𑀫𑀺𑀁 𑀅𑀓𑁆𑀔𑀭𑁂 𑀯𑀢𑁆𑀢𑀩𑁆𑀩𑁂 𑀅𑀜𑁆𑀜𑀁 𑀯𑀤𑀢𑀺, 𑀅𑀬𑀁 𑀤𑀼𑀭𑀼𑀢𑁆𑀢𑀁 𑀓𑀭𑁄𑀢𑀺 𑀦𑀸𑀫. 𑀢𑀲𑁆𑀫𑀸 𑀓𑀫𑁆𑀫𑀯𑀸𑀘𑀁 𑀓𑀭𑁄𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀬𑁆𑀯𑀸𑀬𑀁 𑁋

‘‘𑀲𑀺𑀣𑀺𑀮𑀁 𑀥𑀦𑀺𑀢𑀜𑁆𑀘 𑀤𑀻𑀖𑀭𑀲𑁆𑀲𑀁;

𑀕𑀭𑀼𑀓𑀁 𑀮𑀳𑀼𑀓𑀜𑁆𑀘 𑀦𑀺𑀕𑁆𑀕𑀳𑀺𑀢𑀁;

𑀲𑀫𑁆𑀩𑀦𑁆𑀥𑀁 𑀯𑀯𑀢𑁆𑀣𑀺𑀢𑀁 𑀯𑀺𑀫𑀼𑀢𑁆𑀢𑀁;

𑀤𑀲𑀥𑀸 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀧𑀪𑁂𑀤𑁄’’𑀢𑀺. (𑀧𑀭𑀺. 𑀅𑀝𑁆𑀞. 𑁪𑁮𑁫) 𑁋

𑀯𑀼𑀢𑁆𑀢𑁄, 𑀅𑀬𑀁 𑀲𑀼𑀝𑁆𑀞𑀼 𑀉𑀧𑀮𑀓𑁆𑀔𑁂𑀢𑀩𑁆𑀩𑁄.

𑀏𑀢𑁆𑀣 𑀳𑀺 𑀲𑀺𑀣𑀺𑀮𑀁 𑀦𑀸𑀫 𑀧𑀜𑁆𑀘𑀲𑀼 𑀯𑀕𑁆𑀕𑁂𑀲𑀼 𑀧𑀞𑀫𑀢𑀢𑀺𑀬𑀁. 𑀥𑀦𑀺𑀢𑀁 𑀦𑀸𑀫 𑀢𑁂𑀲𑁆𑀯𑁂𑀯 𑀤𑀼𑀢𑀺𑀬𑀘𑀢𑀼𑀢𑁆𑀣𑀁. 𑀤𑀻𑀖𑀦𑁆𑀢𑀺 𑀤𑀻𑀖𑁂𑀦 𑀓𑀸𑀮𑁂𑀦 𑀯𑀢𑁆𑀢𑀩𑁆𑀩𑀁 𑀆𑀓𑀸𑀭𑀸𑀤𑀺. 𑀭𑀲𑁆𑀲𑀦𑁆𑀢𑀺 𑀢𑀢𑁄 𑀉𑀧𑀟𑁆𑀠𑀓𑀸𑀮𑁂𑀦 𑀯𑀢𑁆𑀢𑀩𑁆𑀩𑀁 𑀅𑀓𑀸𑀭𑀸𑀤𑀺. 𑀕𑀭𑀼𑀓𑀦𑁆𑀢𑀺 𑀤𑀻𑀖𑀫𑁂𑀯, 𑀬𑀁 𑀯𑀸 ‘‘𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲, 𑀬𑀲𑁆𑀲 𑀦𑀓𑁆𑀔𑀫𑀢𑀻’’𑀢𑀺 𑀏𑀯𑀁 𑀲𑀁𑀬𑁄𑀕𑀧𑀭𑀁 𑀓𑀢𑁆𑀯𑀸 𑀯𑀼𑀘𑁆𑀘𑀢𑀺. 𑀮𑀳𑀼𑀓𑀦𑁆𑀢𑀺 𑀭𑀲𑁆𑀲𑀫𑁂𑀯, 𑀬𑀁 𑀯𑀸 ‘‘𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀣𑁂𑀭𑀲𑁆𑀲, 𑀬𑀲𑁆𑀲 𑀦 𑀔𑀫𑀢𑀻’’𑀢𑀺 𑀏𑀯𑀁 𑀅𑀲𑀁𑀬𑁄𑀕𑀧𑀭𑀁 𑀓𑀢𑁆𑀯𑀸 𑀯𑀼𑀘𑁆𑀘𑀢𑀺. 𑀦𑀺𑀕𑁆𑀕𑀳𑀺𑀢𑀦𑁆𑀢𑀺 𑀬𑀁 𑀓𑀭𑀡𑀸𑀦𑀺 𑀦𑀺𑀕𑁆𑀕𑀳𑁂𑀢𑁆𑀯𑀸 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀯𑀺𑀯𑀝𑁂𑀦 𑀫𑀼𑀔𑁂𑀦 𑀅𑀦𑀼𑀦𑀸𑀲𑀺𑀓𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀁. 𑀲𑀫𑁆𑀩𑀦𑁆𑀥𑀦𑁆𑀢𑀺 𑀬𑀁 𑀧𑀭𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 ‘‘𑀢𑀼𑀡𑁆𑀳𑀲𑁆𑀲𑀸’’𑀢𑀺 𑀯𑀸 ‘‘𑀢𑀼𑀡𑁆𑀳𑀺𑀲𑁆𑀲𑀸’’𑀢𑀺 𑀯𑀸 𑀯𑀼𑀘𑁆𑀘𑀢𑀺. 𑀯𑀯𑀢𑁆𑀣𑀺𑀢𑀦𑁆𑀢𑀺 𑀬𑀁 𑀧𑀭𑀧𑀤𑁂𑀦 𑀅𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀢𑀼𑀡𑁆𑀳𑀻 𑀅𑀲𑁆𑀲𑀸’’𑀢𑀺 𑀯𑀸 ‘‘𑀢𑀼𑀡𑁆𑀳 𑀅𑀲𑁆𑀲𑀸’’𑀢𑀺 𑀯𑀸 𑀯𑀼𑀘𑁆𑀘𑀢𑀺. 𑀯𑀺𑀫𑀼𑀢𑁆𑀢𑀦𑁆𑀢𑀺 𑀬𑀁 𑀓𑀭𑀡𑀸𑀦𑀺 𑀅𑀦𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀯𑀝𑁂𑀦 𑀫𑀼𑀔𑁂𑀦 𑀅𑀦𑀼𑀦𑀸𑀲𑀺𑀓𑀁 𑀅𑀓𑀢𑁆𑀯𑀸 𑀯𑀼𑀘𑁆𑀘𑀢𑀺.

𑀢𑀢𑁆𑀣 ‘‘𑀲𑀼𑀡𑀸𑀢𑀼 𑀫𑁂’’𑀢𑀺 𑀯𑀢𑁆𑀢𑀩𑁆𑀩𑁂 𑀢-𑀓𑀸𑀭𑀲𑁆𑀲 𑀣-𑀓𑀸𑀭𑀁 𑀓𑀢𑁆𑀯𑀸 ‘‘𑀲𑀼𑀡𑀸𑀣𑀼 𑀫𑁂’’𑀢𑀺 𑀯𑀘𑀦𑀁 𑀲𑀺𑀣𑀺𑀮𑀲𑁆𑀲 𑀥𑀦𑀺𑀢𑀓𑀭𑀡𑀁 𑀦𑀸𑀫, 𑀢𑀣𑀸 ‘‘𑀧𑀢𑁆𑀢𑀓𑀮𑁆𑀮𑀁, 𑀏𑀲𑀸 𑀜𑀢𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀧𑀢𑁆𑀣𑀓𑀮𑁆𑀮𑀁, 𑀏𑀲𑀸 𑀜𑀢𑁆𑀣𑀻’’𑀢𑀺𑀆𑀤𑀺𑀯𑀘𑀦𑀜𑁆𑀘. ‘‘𑀪𑀦𑁆𑀢𑁂 𑀲𑀗𑁆𑀖𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀪𑀓𑀸𑀭𑀖𑀓𑀸𑀭𑀸𑀦𑀁 𑀩𑀓𑀸𑀭𑀕𑀓𑀸𑀭𑁂 𑀓𑀢𑁆𑀯𑀸 ‘‘𑀩𑀦𑁆𑀢𑁂 𑀲𑀁𑀕𑁄’’𑀢𑀺 𑀯𑀘𑀦𑀁 𑀥𑀦𑀺𑀢𑀲𑁆𑀲 𑀲𑀺𑀣𑀺𑀮𑀓𑀭𑀡𑀁 𑀦𑀸𑀫. ‘‘𑀲𑀼𑀡𑀸𑀢𑀼 𑀫𑁂’’𑀢𑀺 𑀯𑀺𑀯𑀝𑁂𑀦 𑀫𑀼𑀔𑁂𑀦 𑀯𑀢𑁆𑀢𑀩𑁆𑀩𑁂 𑀧𑀦 ‘‘𑀲𑀼𑀡𑀁𑀢𑀼 𑀫𑁂’’𑀢𑀺 𑀯𑀸 ‘‘𑀏𑀲𑀸 𑀜𑀢𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀏𑀲𑀁 𑀜𑀢𑁆𑀢𑀻’’𑀢𑀺 𑀯𑀸 𑀅𑀯𑀺𑀯𑀝𑁂𑀦 𑀫𑀼𑀔𑁂𑀦 𑀅𑀦𑀼𑀦𑀸𑀲𑀺𑀓𑀁 𑀓𑀢𑁆𑀯𑀸 𑀯𑀘𑀦𑀁 𑀯𑀺𑀫𑀼𑀢𑁆𑀢𑀲𑁆𑀲 𑀦𑀺𑀕𑁆𑀕𑀳𑀺𑀢𑀯𑀘𑀦𑀁 𑀦𑀸𑀫. ‘‘𑀧𑀢𑁆𑀢𑀓𑀮𑁆𑀮’’𑀦𑁆𑀢𑀺 𑀅𑀯𑀺𑀯𑀝𑁂𑀦 𑀫𑀼𑀔𑁂𑀦 𑀅𑀦𑀼𑀦𑀸𑀲𑀺𑀓𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑁂 ‘‘𑀧𑀢𑁆𑀢𑀓𑀮𑁆𑀮𑀸’’𑀢𑀺 𑀯𑀺𑀯𑀝𑁂𑀦 𑀫𑀼𑀔𑁂𑀦 𑀅𑀦𑀼𑀦𑀸𑀲𑀺𑀓𑀁 𑀅𑀓𑀢𑁆𑀯𑀸 𑀯𑀘𑀦𑀁 𑀦𑀺𑀕𑁆𑀕𑀳𑀺𑀢𑀲𑁆𑀲 𑀯𑀺𑀫𑀼𑀢𑁆𑀢𑀯𑀘𑀦𑀁 𑀦𑀸𑀫. 𑀇𑀢𑀺 𑀲𑀺𑀣𑀺𑀮𑁂 𑀓𑀢𑁆𑀢𑀩𑁆𑀩𑁂 𑀥𑀦𑀺𑀢𑀁, 𑀥𑀦𑀺𑀢𑁂 𑀓𑀢𑁆𑀢𑀩𑁆𑀩𑁂 𑀲𑀺𑀣𑀺𑀮𑀁, 𑀯𑀺𑀫𑀼𑀢𑁆𑀢𑁂 𑀓𑀢𑁆𑀢𑀩𑁆𑀩𑁂 𑀦𑀺𑀕𑁆𑀕𑀳𑀺𑀢𑀁, 𑀦𑀺𑀕𑁆𑀕𑀳𑀺𑀢𑁂 𑀓𑀢𑁆𑀢𑀩𑁆𑀩𑁂 𑀯𑀺𑀫𑀼𑀢𑁆𑀢𑀦𑁆𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀩𑁆𑀬𑀜𑁆𑀚𑀦𑀸𑀦𑀺 𑀅𑀦𑁆𑀢𑁄𑀓𑀫𑁆𑀫𑀯𑀸𑀘𑀸𑀬 𑀓𑀫𑁆𑀫𑀁 𑀤𑀽𑀲𑁂𑀦𑁆𑀢𑀺. 𑀏𑀯𑀁 𑀯𑀤𑀦𑁆𑀢𑁄 𑀳𑀺 𑀅𑀜𑁆𑀜𑀲𑁆𑀫𑀺𑀁 𑀅𑀓𑁆𑀔𑀭𑁂 𑀯𑀢𑁆𑀢𑀩𑁆𑀩𑁂 𑀅𑀜𑁆𑀜𑀁 𑀯𑀤𑀢𑀺, 𑀤𑀼𑀭𑀼𑀢𑁆𑀢𑀁 𑀓𑀭𑁄𑀢𑀻𑀢𑀺 𑀯𑀼𑀘𑁆𑀘𑀢𑀺.

𑀇𑀢𑀭𑁂𑀲𑀼 𑀧𑀦 𑀤𑀻𑀖𑀭𑀲𑁆𑀲𑀸𑀤𑀻𑀲𑀼 𑀙𑀲𑀼 𑀩𑁆𑀬𑀜𑁆𑀚𑀦𑁂𑀲𑀼 𑀤𑀻𑀖𑀝𑁆𑀞𑀸𑀦𑁂 𑀤𑀻𑀖𑀫𑁂𑀯, 𑀭𑀲𑁆𑀲𑀝𑁆𑀞𑀸𑀦𑁂 𑀘 𑀭𑀲𑁆𑀲𑀫𑁂𑀯𑀸𑀢𑀺 𑀏𑀯𑀁 𑀬𑀣𑀸𑀞𑀸𑀦𑁂 𑀢𑀁 𑀢𑀤𑁂𑀯 𑀅𑀓𑁆𑀔𑀭𑀁 𑀪𑀸𑀲𑀦𑁆𑀢𑁂𑀦 𑀅𑀦𑀼𑀓𑁆𑀓𑀫𑀸𑀕𑀢𑀁 𑀧𑀯𑁂𑀡𑀺𑀁 𑀅𑀯𑀺𑀦𑀸𑀲𑁂𑀦𑁆𑀢𑁂𑀦 𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸. 𑀲𑀘𑁂 𑀧𑀦 𑀏𑀯𑀁 𑀅𑀓𑀢𑁆𑀯𑀸 𑀤𑀻𑀖𑁂 𑀯𑀢𑁆𑀢𑀩𑁆𑀩𑁂 𑀭𑀲𑁆𑀲𑀁, 𑀭𑀲𑁆𑀲𑁂 𑀯𑀸 𑀯𑀢𑁆𑀢𑀩𑁆𑀩𑁂 𑀤𑀻𑀖𑀁 𑀯𑀤𑀢𑀺, 𑀢𑀣𑀸 𑀕𑀭𑀼𑀓𑁂 𑀯𑀢𑁆𑀢𑀩𑁆𑀩𑁂 𑀮𑀳𑀼𑀓𑀁, 𑀮𑀳𑀼𑀓𑁂 𑀯𑀸 𑀯𑀢𑁆𑀢𑀩𑁆𑀩𑁂 𑀕𑀭𑀼𑀓𑀁 𑀯𑀤𑀢𑀺, 𑀲𑀫𑁆𑀩𑀦𑁆𑀥𑁂 𑀯𑀸 𑀧𑀦 𑀯𑀢𑁆𑀢𑀩𑁆𑀩𑁂 𑀯𑀯𑀢𑁆𑀣𑀺𑀢𑀁, 𑀯𑀯𑀢𑁆𑀣𑀺𑀢𑁂 𑀯𑀸 𑀯𑀢𑁆𑀢𑀩𑁆𑀩𑁂 𑀲𑀫𑁆𑀩𑀦𑁆𑀥𑀁 𑀯𑀤𑀢𑀺, 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀓𑀫𑁆𑀫𑀯𑀸𑀘𑀸 𑀦 𑀓𑀼𑀧𑁆𑀧𑀢𑀺. 𑀇𑀫𑀸𑀦𑀺 𑀳𑀺 𑀙 𑀩𑁆𑀬𑀜𑁆𑀚𑀦𑀸𑀦𑀺 𑀓𑀫𑁆𑀫𑀁 𑀦 𑀓𑁄𑀧𑁂𑀦𑁆𑀢𑀺.

𑀬𑀁 𑀧𑀦 𑀲𑀼𑀢𑁆𑀢𑀦𑁆𑀢𑀺𑀓𑀢𑁆𑀣𑁂𑀭𑀸 ‘‘𑀤-𑀓𑀸𑀭𑁄 𑀢-𑀓𑀸𑀭𑀫𑀸𑀧𑀚𑁆𑀚𑀢𑀺, 𑀢-𑀓𑀸𑀭𑁄 𑀤-𑀓𑀸𑀭𑀫𑀸𑀧𑀚𑁆𑀚𑀢𑀺, 𑀘-𑀓𑀸𑀭𑁄 𑀚-𑀓𑀸𑀭𑀫𑀸𑀧𑀚𑁆𑀚𑀢𑀺, 𑀚-𑀓𑀸𑀭𑁄 𑀘-𑀓𑀸𑀭𑀫𑀸𑀧𑀚𑁆𑀚𑀢𑀺, 𑀬-𑀓𑀸𑀭𑁄 𑀓-𑀓𑀸𑀭𑀫𑀸𑀧𑀚𑁆𑀚𑀢𑀺, 𑀓-𑀓𑀸𑀭𑁄 𑀬-𑀓𑀸𑀭𑀫𑀸𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀤-𑀓𑀸𑀭𑀸𑀤𑀻𑀲𑀼 𑀯𑀢𑁆𑀢𑀩𑁆𑀩𑁂𑀲𑀼 𑀢-𑀓𑀸𑀭𑀸𑀤𑀺𑀯𑀘𑀦𑀁 𑀦 𑀯𑀺𑀭𑀼𑀚𑁆𑀛𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀓𑀫𑁆𑀫𑀯𑀸𑀘𑀁 𑀧𑀢𑁆𑀯𑀸 𑀦 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀯𑀺𑀦𑀬𑀥𑀭𑁂𑀦 𑀦𑁂𑀯 𑀤-𑀓𑀸𑀭𑁄 𑀢-𑀓𑀸𑀭𑁄 𑀓𑀸𑀢𑀩𑁆𑀩𑁄…𑀧𑁂… 𑀦 𑀓-𑀓𑀸𑀭𑁄 𑀬-𑀓𑀸𑀭𑁄. 𑀬𑀣𑀸𑀧𑀸𑀴𑀺𑀬𑀸 𑀦𑀺𑀭𑀼𑀢𑁆𑀢𑀺𑀁 𑀲𑁄𑀥𑁂𑀢𑁆𑀯𑀸 𑀤𑀲𑀯𑀺𑀥𑀸𑀬 𑀩𑁆𑀬𑀜𑁆𑀚𑀦𑀦𑀺𑀭𑀼𑀢𑁆𑀢𑀺𑀬𑀸 𑀯𑀼𑀢𑁆𑀢𑀤𑁄𑀲𑁂 𑀧𑀭𑀺𑀳𑀭𑀦𑁆𑀢𑁂𑀦 𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸. 𑀇𑀢𑀭𑀣𑀸 𑀳𑀺 𑀲𑀸𑀯𑀦𑀁 𑀳𑀸𑀧𑁂𑀢𑀺 𑀦𑀸𑀫.

𑀅𑀲𑀫𑀬𑁂 𑀲𑀸𑀯𑁂𑀢𑀻𑀢𑀺 𑀲𑀸𑀯𑀦𑀸𑀬 𑀅𑀓𑀸𑀮𑁂 𑀅𑀦𑀯𑀓𑀸𑀲𑁂 𑀜𑀢𑁆𑀢𑀺𑀁 𑀅𑀝𑁆𑀞𑀧𑁂𑀢𑁆𑀯𑀸 𑀧𑀞𑀫𑀁𑀬𑁂𑀯 𑀅𑀦𑀼𑀲𑁆𑀲𑀸𑀯𑀦𑀓𑀫𑁆𑀫𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀜𑀢𑁆𑀢𑀺𑀁 𑀞𑀧𑁂𑀢𑀺. 𑀇𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀦𑀼𑀲𑁆𑀲𑀸𑀯𑀦𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀏𑀯𑀁 𑀧𑀦 𑀯𑀺𑀧𑀚𑁆𑀚𑀦𑁆𑀢𑀺, 𑀅𑀦𑀼𑀲𑁆𑀲𑀸𑀯𑀦𑀢𑁄𑀧𑀺 𑀘𑀸’’𑀢𑀺.

𑁩𑁦𑁨𑁩. 𑀏𑀯𑀁 𑀅𑀦𑀼𑀲𑁆𑀲𑀸𑀯𑀦𑀢𑁄 𑀓𑀫𑁆𑀫𑀯𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀲𑀻𑀫𑀢𑁄 𑀓𑀫𑁆𑀫𑀯𑀺𑀧𑀢𑁆𑀢𑀺 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀓𑀣𑀸𑀬 𑀯𑀼𑀢𑁆𑀢𑀦𑀬𑀸 𑀏𑀯𑀸𑀢𑀺 𑀢𑀫𑁂𑀯 𑀅𑀢𑀺𑀤𑀺𑀲𑀦𑁆𑀢𑁄 𑀆𑀳 ‘‘𑀏𑀓𑀸𑀤𑀲𑀳𑀺…𑀧𑁂… 𑀫𑀬𑀸’’𑀢𑀺. 𑀓𑀫𑁆𑀫𑀤𑁄𑀲𑁄𑀬𑁂𑀯 𑀓𑀫𑁆𑀫𑀤𑁄𑀲𑀢𑀸. 𑀢𑀸𑀯 𑀧𑀞𑀫𑀁.

𑁩𑁦𑁨𑁪-𑁭. 𑀏𑀯𑀁 𑀲𑀻𑀫𑀢𑁄 𑀓𑀫𑁆𑀫𑀯𑀺𑀧𑀢𑁆𑀢𑀺𑀁 𑀅𑀢𑀺𑀤𑁂𑀲𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀭𑀺𑀲𑀯𑀲𑁂𑀦 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀘𑀢𑀼𑀯𑀕𑁆𑀕𑁂𑀦𑀸’’𑀢𑀺𑀆𑀤𑀺. 𑀓𑀫𑁆𑀫𑀧𑀢𑁆𑀢𑀸𑀢𑀺 𑀏𑀢𑁆𑀣 ‘‘𑀘𑀢𑁆𑀢𑀸𑀭𑁄 𑀧𑀓𑀢𑀢𑁆𑀢𑀸’’𑀢𑀺 𑀲𑁂𑀲𑁄. 𑀬𑀣𑀸𑀳 𑁋 ‘‘𑀘𑀢𑀼𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀧𑀓𑀢𑀢𑁆𑀢𑀸 𑀓𑀫𑁆𑀫𑀧𑀢𑁆𑀢𑀸’’𑀢𑀺 (𑀧𑀭𑀺. 𑁪𑁯𑁭). 𑀏𑀢𑁆𑀣 𑀘 𑀧𑀓𑀢𑀢𑁆𑀢𑀸 𑀦𑀸𑀫 𑀅𑀦𑀼𑀓𑁆𑀔𑀺𑀢𑁆𑀢𑀸 𑀅𑀦𑀺𑀲𑁆𑀲𑀸𑀭𑀺𑀢𑀸 𑀧𑀭𑀺𑀲𑀼𑀤𑁆𑀥𑀲𑀻𑀮𑀸 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽. 𑀓𑀫𑁆𑀫𑀧𑀢𑁆𑀢𑀸 𑀓𑀫𑁆𑀫𑀲𑁆𑀲 𑀅𑀭𑀳𑀸 𑀅𑀦𑀼𑀘𑁆𑀙𑀯𑀺𑀓𑀸 𑀲𑀸𑀫𑀺𑀦𑁄. 𑀦 𑀢𑁂𑀳𑀺 𑀯𑀺𑀦𑀸 𑀢𑀁 𑀓𑀫𑁆𑀫𑀁 𑀓𑀭𑀻𑀬𑀢𑀺, 𑀦 𑀢𑁂𑀲𑀁 𑀙𑀦𑁆𑀤𑁄 𑀯𑀸 𑀧𑀸𑀭𑀺𑀲𑀼𑀤𑁆𑀥𑀺 𑀯𑀸 𑀏𑀢𑀺. 𑀅𑀦𑀸𑀕𑀢𑀸𑀢𑀺 𑀧𑀭𑀺𑀲𑀸𑀬 𑀳𑀢𑁆𑀣𑀧𑀸𑀲𑀁 𑀅𑀦𑀸𑀕𑀢𑀸. 𑀙𑀦𑁆𑀤𑁄𑀢𑀺 𑀏𑀢𑁆𑀣 ‘‘𑀙𑀦𑁆𑀤𑀸𑀭𑀳𑀸𑀦’’𑀦𑁆𑀢𑀺 𑀲𑁂𑀲𑁄. 𑀬𑀣𑀸𑀳 ‘‘𑀅𑀯𑀲𑁂𑀲𑀸 𑀧𑀓𑀢𑀢𑁆𑀢𑀸 𑀙𑀦𑁆𑀤𑀸𑀭𑀳𑀸’’𑀢𑀺. 𑀇𑀫𑀺𑀦𑀸 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄 𑀳𑁄𑀢𑀺 𑁋 ‘‘𑀅𑀯𑀲𑁂𑀲𑀸 𑀧𑀦 𑀲𑀘𑁂𑀧𑀺 𑀲𑀳𑀲𑁆𑀲𑀫𑀢𑁆𑀢𑀸 𑀳𑁄𑀦𑁆𑀢𑀺, 𑀲𑀘𑁂 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀲𑀩𑁆𑀩𑁂 𑀙𑀦𑁆𑀤𑀸𑀭𑀳𑀸𑀯 𑀳𑁄𑀦𑁆𑀢𑀺, 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀼 𑀯𑀸 𑀫𑀸 𑀯𑀸, 𑀓𑀫𑁆𑀫𑀁 𑀧𑀦 𑀢𑀺𑀝𑁆𑀞𑀢𑀻’’𑀢𑀺. 𑀲𑀫𑁆𑀫𑀼𑀔𑀸𑀢𑀺 𑀲𑀫𑁆𑀫𑀼𑀔𑀻𑀪𑀽𑀢𑀸.

𑀢𑀺𑀯𑀗𑁆𑀕𑀺𑀓𑁄𑀢𑀺 𑀓𑀫𑁆𑀫𑀧𑀢𑁆𑀢𑀸𑀦𑀸𑀕𑀫𑀦𑀙𑀦𑁆𑀤𑀸𑀦𑀸𑀳𑀭𑀡𑀧𑀝𑀺𑀓𑁆𑀓𑁄𑀲𑀦𑀲𑀗𑁆𑀔𑀸𑀢𑀅𑀗𑁆𑀕𑀢𑁆𑀢𑀬𑀬𑀼𑀢𑁆𑀢𑁄. 𑀤𑁄𑀲𑁄 𑀓𑀫𑁆𑀫𑀯𑀺𑀧𑀢𑁆𑀢𑀺𑀮𑀓𑁆𑀔𑀡𑁄. 𑀧𑀭𑀺𑀲𑀸𑀬 𑀯𑀲𑀸 𑀲𑀺𑀬𑀸𑀢𑀺 𑀧𑀭𑀺𑀲𑀯𑀲𑁂𑀦 𑀳𑁄𑀢𑀺.

𑀧𑀝𑀺𑀲𑁂𑀥𑁂𑀦𑁆𑀢𑀻𑀢𑀺 𑀧𑀝𑀺𑀓𑁆𑀓𑁄𑀲𑀦𑁆𑀢𑀺. 𑀤𑀼𑀢𑀺𑀬𑁂 𑀘𑀢𑀼𑀯𑀕𑁆𑀕𑀺𑀓𑁂 𑀓𑀫𑁆𑀫𑁂 𑀤𑀼𑀯𑀗𑁆𑀕𑀺𑀓𑁄 𑀤𑁄𑀲𑁄 𑀧𑀭𑀺𑀲𑀸𑀬 𑀯𑀲𑀸 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑀏𑀢𑁆𑀣 𑀏𑀢𑀲𑁆𑀫𑀺𑀁 𑀢𑀢𑀺𑀬𑁂 𑀘𑀢𑀼𑀯𑀕𑁆𑀕𑀺𑀓𑁂 𑀧𑀝𑀺𑀓𑁆𑀓𑁄𑀲𑁄𑀯 𑀅𑀢𑁆𑀣𑀺, 𑀦 𑀇𑀢𑀭𑁂 𑀧𑀭𑀺𑀲𑀤𑁄𑀲𑀸𑀢𑀺 𑀏𑀓𑀗𑁆𑀕𑀺𑀓𑁄 𑀤𑁄𑀲𑁄 𑀧𑀭𑀺𑀲𑀸𑀬 𑀯𑀲𑀸 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀤𑀼𑀯𑀗𑁆𑀕 𑀬𑀼𑀢𑁆𑀢𑀧𑀭𑀺𑀲𑀸𑀤𑁄𑀲𑀲𑁆𑀲 𑀤𑀼𑀢𑀺𑀬𑀁 𑀤𑁂𑀲𑀺𑀢𑀢𑁆𑀢𑀸 𑀤𑀼𑀯𑀗𑁆𑀕 𑀬𑀼𑀢𑁆𑀢𑀧𑀭𑀺𑀲𑀸𑀤𑁄𑀲𑁄 ‘‘𑀤𑀼𑀢𑀺𑀬𑁄’’𑀢𑀺 𑀯𑀼𑀢𑁆𑀢𑁄. 𑀢𑀣𑀸 𑀢𑀢𑀺𑀬𑀁 𑀤𑁂𑀲𑀺𑀢𑀢𑁆𑀢𑀸 𑀏𑀓𑀗𑁆𑀕𑀬𑀼𑀢𑁆𑀢𑁄 𑀢𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀫𑁂𑀯 𑀦𑀬𑀁 𑀧𑀜𑁆𑀘𑀯𑀕𑁆𑀕𑀸𑀤𑀺𑀲𑀗𑁆𑀖𑀢𑁆𑀢𑀬𑀲𑁆𑀲 𑀅𑀢𑀺𑀤𑀺𑀲𑀦𑁆𑀢𑁄 𑀆𑀳 ‘‘𑀏𑀯𑀁…𑀧𑁂… 𑀢𑀺𑀯𑀺𑀥𑁂𑀲𑀼𑀧𑀻’’𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀤𑀲𑀯𑀕𑁆𑀕𑀯𑀻𑀲𑀢𑀺𑀯𑀕𑁆𑀕𑀲𑀗𑁆𑀖𑀸𑀦𑀁 𑀕𑀳𑀡𑀁.

𑁩𑁦𑁨𑁮. 𑀏𑀯𑀁 𑀘𑀢𑀽𑀲𑀼 𑀲𑀗𑁆𑀖𑁂𑀲𑀼 𑀘𑀢𑀼𑀦𑁆𑀦𑀁 𑀢𑀺𑀓𑀸𑀦𑀁 𑀯𑀲𑁂𑀦 𑀧𑀭𑀺𑀲𑀢𑁄 𑀓𑀫𑁆𑀫𑀯𑀺𑀧𑀢𑁆𑀢𑀺𑀬𑀸 𑀤𑁆𑀯𑀸𑀤𑀲𑀯𑀺𑀥𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀘𑀢𑀼𑀢𑁆𑀣𑀺𑀓𑀸’’𑀢𑀺. 𑀅𑀦𑀼𑀯𑀸𑀤𑁂𑀦 ‘‘𑀤𑀲 𑀤𑁆𑀯𑁂 𑀲𑀺𑀬𑀼’’𑀦𑁆𑀢𑀺 𑀯𑀺𑀥𑀻𑀬𑀢𑀺. 𑀧𑀭𑀺𑀲𑀸𑀯𑀲𑀸 𑀘𑀢𑀼𑀢𑁆𑀣𑀺𑀓𑀸 𑀤𑁄𑀲𑀸 𑀤𑀲 𑀤𑁆𑀯𑁂 𑀤𑁆𑀯𑀸𑀤𑀲 𑀲𑀺𑀬𑀼𑀦𑁆𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 ‘‘𑀯𑀢𑁆𑀣𑀼𑀢𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀲𑀼 𑀧𑀜𑁆𑀘𑀲𑀼 𑀓𑀫𑁆𑀫𑀤𑁄𑀲𑁂𑀲𑀼, 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. ‘‘𑀧𑀭𑀺𑀲𑀸𑀯𑀲𑀸’’𑀢𑀺 𑀇𑀤𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀁. 𑀓𑀫𑁆𑀫𑀸𑀦𑀻𑀢𑀺 𑀅𑀧𑀮𑁄𑀓𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺. 𑀏𑀢𑁆𑀣 𑀘 𑀘𑀢𑀼𑀯𑀕𑁆𑀕𑀸𑀤𑀺𑀓𑀭𑀡𑀻𑀬𑁂𑀲𑀼 𑀓𑀫𑁆𑀫𑁂𑀲𑀼 𑀧𑀓𑀢𑀢𑁆𑀢𑁂𑀦 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑁆𑀯𑀸 𑀓𑀢𑀫𑁂𑀯 𑀓𑀫𑁆𑀫𑀁 𑀓𑀫𑁆𑀫𑀧𑀢𑁆𑀢𑁂𑀦 𑀓𑀢𑀁 𑀳𑁄𑀢𑀺. 𑀓𑀫𑁆𑀫𑀧𑀢𑁆𑀢𑁂 𑀧𑀓𑀢𑀢𑁆𑀢𑁂 𑀞𑀧𑁂𑀢𑁆𑀯𑀸 𑀅𑀧𑀓𑀢𑀢𑁆𑀢𑁂𑀦 𑀓𑁂𑀦𑀘𑀺, 𑀓𑁂𑀯𑀮𑁂𑀦𑁂𑀯 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑁆𑀯𑀸 𑀓𑀢𑀁 𑀅𑀧𑀓𑀢𑀢𑁆𑀢𑀓𑀫𑁆𑀫𑀧𑀢𑁆𑀢𑀮𑀓𑁆𑀔𑀡𑀸𑀪𑀸𑀯𑀸, 𑀓𑀫𑁆𑀫𑀧𑀢𑁆𑀢𑁂𑀦 𑀘 𑀓𑀫𑁆𑀫𑀯𑀸𑀘𑀸𑀬 𑀅𑀲𑁆𑀲𑀸𑀯𑀺𑀢𑀢𑁆𑀢𑀸 𑀅𑀦𑀼𑀲𑁆𑀲𑀸𑀯𑀦𑀤𑁄𑀲𑁂𑀦 𑀯𑀺𑀧𑀦𑁆𑀦𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯 𑀧𑁄𑀭𑀸𑀡𑀓𑀯𑀺𑀦𑀬𑀥𑀭𑀢𑁆𑀣𑁂𑀭𑀸 𑀓𑀫𑁆𑀫𑀯𑀺𑀧𑀢𑁆𑀢𑀺𑀲𑀗𑁆𑀓𑀸𑀧𑀭𑀺𑀳𑀸𑀭𑀢𑁆𑀣𑀁 𑀤𑁆𑀯𑀻𑀳𑀺 𑀢𑀻𑀳𑀺 𑀏𑀓𑀢𑁄 𑀓𑀫𑁆𑀫𑀯𑀸𑀘𑀁 𑀲𑀸𑀯𑀬𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀭𑀺𑀯𑀸𑀭𑀸𑀯𑀲𑀸𑀦𑁂 𑀧𑀸𑀴𑀺𑀬𑀸 (𑀧𑀭𑀺. 𑁪𑁮𑁨 𑀆𑀤𑀬𑁄) 𑀯𑀸 𑀅𑀝𑁆𑀞𑀓𑀣𑀸𑀬 (𑀧𑀭𑀺. 𑀅𑀝𑁆𑀞. 𑁪𑁮𑁨 𑀆𑀤𑀬𑁄) 𑀘 𑀕𑀳𑁂𑀢𑀩𑁆𑀩𑁄.

𑀓𑀫𑁆𑀫𑀯𑀺𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸.