𑀘𑀢𑀼𑀩𑁆𑀩𑀺𑀥𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑁨𑁯𑁮𑁩. 𑀅𑀧𑀮𑁄𑀓𑀦𑀲𑀜𑁆𑀜𑀺𑀢𑀁 𑀓𑀫𑁆𑀫𑀁, 𑀜𑀢𑁆𑀢𑀺𑀓𑀫𑁆𑀫𑀁, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀦𑁆𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀘𑀢𑁆𑀢𑀸𑀭𑀻𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀇𑀫𑀸𑀦𑀻𑀢𑀺 𑀅𑀦𑀦𑁆𑀢𑀭𑀫𑁂𑀯 𑀯𑀓𑁆𑀔𑀫𑀸𑀦𑀢𑁆𑀢𑀸 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀯𑀘𑀦𑀁. 𑀓𑀫𑁆𑀫𑀸𑀦𑀻𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀓𑀫𑁆𑀫𑀦𑀺𑀤𑀲𑁆𑀲𑀦𑀁. ‘‘𑀅𑀧𑀮𑁄𑀓𑀦𑀲𑀅𑀜𑀢’’𑀦𑁆𑀢𑀺𑀆𑀤𑀺 𑀢𑁂𑀲𑀁 𑀲𑀭𑀽𑀧𑀤𑀲𑁆𑀲𑀦𑀁.

𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁄 𑀯𑀺𑀦𑀺𑀘𑁆𑀙𑀬𑁄 (𑀘𑀽𑀴𑀯. 𑀅𑀝𑁆𑀞. 𑁨𑁧𑁫; 𑀧𑀭𑀺. 𑀅𑀝𑁆𑀞. 𑁪𑁮𑁨) 𑁋 𑀅𑀧𑀮𑁄𑀓𑀦𑀓𑀫𑁆𑀫𑀁 𑀦𑀸𑀫 𑀲𑀻𑀫𑀝𑁆𑀞𑀓𑀲𑀗𑁆𑀖𑀁 𑀲𑁄𑀥𑁂𑀢𑁆𑀯𑀸 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀁 𑀆𑀳𑀭𑀺𑀢𑁆𑀯𑀸 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀢𑀁 𑀢𑀁 𑀯𑀢𑁆𑀣𑀼𑀁 𑀓𑀺𑀢𑁆𑀢𑁂𑀢𑁆𑀯𑀸 ‘‘𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲𑀸’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀯𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀯𑀼𑀘𑁆𑀘𑀢𑀺. 𑀜𑀢𑁆𑀢𑀺𑀓𑀫𑁆𑀫𑀁 𑀦𑀸𑀫 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀏𑀓𑀸𑀬 𑀜𑀢𑁆𑀢𑀺𑀬𑀸 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁. 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀦𑀸𑀫 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀏𑀓𑀸𑀬 𑀜𑀢𑁆𑀢𑀺𑀬𑀸, 𑀏𑀓𑀸𑀬 𑀘 𑀅𑀦𑀼𑀲𑁆𑀲𑀸𑀯𑀦𑀸𑀬𑀸𑀢𑀺 𑀏𑀯𑀁 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀅𑀦𑀼𑀲𑁆𑀲𑀸𑀯𑀦𑀸𑀬 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁. 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑀦𑀸𑀫 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀏𑀓𑀸𑀬 𑀜𑀢𑁆𑀢𑀺𑀬𑀸, 𑀢𑀻𑀳𑀺 𑀘 𑀅𑀦𑀼𑀲𑁆𑀲𑀸𑀯𑀦𑀸𑀳𑀻𑀢𑀺 𑀏𑀯𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀸𑀳𑀺 𑀢𑀻𑀳𑀺 𑀅𑀦𑀼𑀲𑁆𑀲𑀸𑀯𑀦𑀸𑀳𑀺 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁. 𑀜𑀢𑁆𑀢𑀺 𑀤𑀼𑀢𑀺𑀬𑀸 𑀬𑀲𑁆𑀲 𑀅𑀦𑀼𑀲𑁆𑀲𑀸𑀯𑀦𑀲𑁆𑀲 𑀢𑀁 𑀜𑀢𑁆𑀢𑀺𑀤𑀼𑀢𑀺𑀬𑀁, 𑀢𑁂𑀦 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁. 𑀜𑀢𑁆𑀢𑀺 𑀘𑀢𑀼𑀢𑁆𑀣𑀸 𑀬𑀲𑁆𑀲 𑀅𑀦𑀼𑀲𑁆𑀲𑀸𑀯𑀦𑀢𑁆𑀢𑀬𑀲𑁆𑀲 𑀢𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀁, 𑀢𑁂𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁.

𑁨𑁯𑁮𑁪-𑁭. 𑀢𑁂𑀲𑀁 𑀞𑀸𑀦𑀯𑀲𑁂𑀦 𑀪𑁂𑀤𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀧𑀮𑁄𑀓𑀦𑀓𑀫𑁆𑀫’’𑀦𑁆𑀢𑀺𑀆𑀤𑀺. 𑀦𑀯𑀦𑁆𑀦𑀁 𑀞𑀸𑀦𑀸𑀦𑀁 𑀲𑀫𑀸𑀳𑀸𑀭𑁄 𑀦𑀯𑀝𑁆𑀞𑀸𑀦𑀁, ‘‘𑀕𑀘𑁆𑀙𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀜𑀢𑁆𑀢𑀺𑀓𑀫𑁆𑀫𑀦𑁆𑀢𑀺 𑀕𑀫𑀦𑀓𑀺𑀭𑀺𑀬𑀸𑀓𑀢𑁆𑀢𑀼𑀦𑀺𑀤𑀲𑁆𑀲𑀦𑀁. 𑀦𑀯𑀝𑁆𑀞𑀸𑀦𑀦𑁆𑀢𑀺 𑀓𑀫𑁆𑀫𑀦𑀺𑀤𑀲𑁆𑀲𑀦𑀁. 𑀤𑀼𑀢𑀺𑀬𑀦𑁆𑀢𑀺 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁. 𑀲𑀢𑁆𑀢 𑀞𑀸𑀦𑀸𑀦𑀺 𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸.

𑀇𑀤𑀸𑀦𑀺 𑀢𑀁 𑀞𑀸𑀦𑀪𑁂𑀤𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦𑀺𑀲𑁆𑀲𑀸𑀭𑀡𑀜𑁆𑀘𑀸’’𑀢𑀺𑀆𑀤𑀺. 𑀦𑀺𑀲𑁆𑀲𑀸𑀭𑀡𑀸𑀤𑀺 𑀓𑀫𑁆𑀫𑀯𑀺𑀲𑁂𑀲𑀸𑀦𑀁 𑀲𑀜𑁆𑀜𑀸. 𑀅𑀧𑀮𑁄𑀓𑀦𑀓𑀫𑁆𑀫𑀜𑁆𑀳𑀺 𑀦𑀺𑀲𑁆𑀲𑀸𑀭𑀡𑀁…𑀧𑁂… 𑀧𑀜𑁆𑀘𑀫𑀁 𑀓𑀫𑁆𑀫𑀮𑀓𑁆𑀔𑀡𑀦𑁆𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀞𑀸𑀦𑀸𑀦𑀺 𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸.

𑀏𑀯𑀁 𑀦𑀸𑀫𑀯𑀲𑁂𑀦 𑀤𑀲𑁆𑀲𑀺𑀢𑀸𑀦𑀺 𑀦𑀺𑀲𑁆𑀲𑀸𑀭𑀡𑀸𑀤𑀻𑀦𑀺 𑀅𑀢𑁆𑀣𑀢𑁄 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦𑀺𑀲𑁆𑀲𑀸𑀭𑀡𑀜𑁆𑀘𑀸’’𑀢𑀺𑀆𑀤𑀺. 𑀲𑀫𑀡𑀼𑀤𑁆𑀤𑁂𑀲𑀢𑁄𑀢𑀺 𑀓𑀡𑁆𑀝𑀓𑀲𑀸𑀫𑀡𑁂𑀭𑀢𑁄 𑀦𑀺𑀲𑁆𑀲𑀸𑀭𑀡𑀜𑁆𑀘 𑀑𑀲𑀸𑀭𑀡𑀜𑁆𑀘 𑀯𑀤𑁂𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀓𑀡𑁆𑀝𑀓𑀲𑀸𑀫𑀡𑁂𑀭𑀲𑁆𑀲 𑀦𑀺𑀲𑁆𑀲𑀸𑀭𑀡𑀸 𑀢𑀸𑀤𑀺𑀲𑀸𑀦𑀁𑀬𑁂𑀯 𑀲𑀫𑁆𑀫𑀸𑀯𑀢𑁆𑀢𑀁 𑀤𑀺𑀲𑁆𑀯𑀸 𑀧𑀯𑁂𑀲𑀦𑀸 ‘‘𑀑𑀲𑀸𑀭𑀡𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀧𑀩𑁆𑀩𑀚𑀦𑁆𑀢𑁂𑀦 𑀳𑁂𑀢𑀼𑀪𑀽𑀢𑁂𑀦 𑀪𑀡𑁆𑀟𑀼𑀓𑀁 𑀪𑀡𑁆𑀟𑀼𑀓𑀫𑁆𑀫𑀧𑀼𑀘𑁆𑀙𑀦𑀁 𑀯𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀲𑁆𑀲 𑀓𑁂𑀲𑀘𑁆𑀙𑁂𑀤𑀦𑀧𑀼𑀘𑁆𑀙𑀦𑀁 𑀪𑀡𑁆𑀟𑀼𑀓𑀫𑁆𑀫𑀁 𑀦𑀸𑀫. 𑀙𑀦𑁆𑀦𑁂𑀦 𑀳𑁂𑀢𑀼𑀪𑀽𑀢𑁂𑀦 𑀩𑁆𑀭𑀳𑁆𑀫𑀤𑀡𑁆𑀟𑀓𑀁 𑀓𑀫𑁆𑀫𑀁 𑀯𑀤𑁂𑀢𑀺 𑀬𑁄𑀚𑀦𑀸. 𑀢𑀣𑀸𑀭𑀽𑀧𑀲𑁆𑀲𑀸𑀢𑀺 𑀙𑀦𑁆𑀦𑀲𑀤𑀺𑀲𑀲𑁆𑀲 𑀫𑀼𑀔𑀭𑀲𑁆𑀲 𑀪𑀺𑀓𑁆𑀔𑀽 𑀤𑀼𑀭𑀼𑀢𑁆𑀢𑀯𑀘𑀦𑁂𑀦 𑀖𑀝𑁆𑀝𑁂𑀦𑁆𑀢𑀲𑁆𑀲. 𑀓𑀸𑀢𑀩𑁆𑀩𑁄𑀢𑀺 ‘‘𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀫𑀼𑀔𑀭𑁄 𑀪𑀺𑀓𑁆𑀔𑀽 𑀤𑀼𑀭𑀼𑀢𑁆𑀢𑀯𑀘𑀦𑁂𑀳𑀺 𑀖𑀝𑁆𑀝𑁂𑀦𑁆𑀢𑁄 𑀯𑀺𑀳𑀭𑀢𑀺, 𑀲𑁄 𑀪𑀺𑀓𑁆𑀔𑀼 𑀬𑀁 𑀇𑀘𑁆𑀙𑁂𑀬𑁆𑀬, 𑀢𑀁 𑀯𑀤𑁂𑀬𑁆𑀬. 𑀪𑀺𑀓𑁆𑀔𑀽𑀳𑀺 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀦𑁂𑀯 𑀯𑀢𑁆𑀢𑀩𑁆𑀩𑁄, 𑀦 𑀑𑀯𑀤𑀺𑀢𑀩𑁆𑀩𑁄, 𑀦 𑀅𑀦𑀼𑀲𑀸𑀲𑀺𑀢𑀩𑁆𑀩𑁄. 𑀲𑀗𑁆𑀖𑀁, 𑀪𑀦𑁆𑀢𑁂, 𑀧𑀼𑀘𑁆𑀙𑀸𑀫𑀺 ‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑁆𑀭𑀳𑁆𑀫𑀤𑀡𑁆𑀟𑀲𑁆𑀲 𑀤𑀸𑀦𑀁 𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲𑀸’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀧𑀼𑀘𑁆𑀙𑀸𑀫𑀺… 𑀢𑀢𑀺𑀬𑀫𑁆𑀧𑀺 𑀧𑀼𑀘𑁆𑀙𑀸𑀫𑀺 ‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑁄 𑀩𑁆𑀭𑀳𑁆𑀫𑀤𑀡𑁆𑀟𑀲𑁆𑀲 𑀤𑀸𑀦𑀁 𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲𑀸’’𑀢𑀺 (𑀧𑀭𑀺. 𑀅𑀝𑁆𑀞. 𑁪𑁯𑁫-𑁪𑁯𑁬) 𑀏𑀯𑀁 𑀩𑁆𑀭𑀳𑁆𑀫𑀤𑀡𑁆𑀟𑁄 𑀓𑀸𑀢𑀩𑁆𑀩𑁄.

𑁨𑁯𑁮𑁮-𑁯. ‘‘𑀆𑀧𑀼𑀘𑁆𑀙𑀺𑀢𑁆𑀯𑀸𑀦𑀸’’𑀢𑀺 𑀧𑀼𑀩𑁆𑀩𑀓𑀺𑀭𑀺𑀬𑀸𑀬 ‘‘𑀕𑀳𑀺𑀢𑀸𑀬𑀸’’𑀢𑀺 𑀅𑀧𑀭𑀓𑀺𑀭𑀺𑀬𑀸 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀸, ‘‘𑀭𑀼𑀘𑀺𑀬𑀸’’𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁. 𑀤𑁂𑀢𑀻𑀢𑀺 𑀏𑀢𑁆𑀣 ‘‘𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀸𑀤𑀻𑀦’’𑀦𑁆𑀢𑀺 𑀲𑁂𑀲𑁄. 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸𑀦 𑀲𑀩𑁆𑀩𑀲𑁄 𑀲𑀩𑁆𑀩𑁂 𑀲𑀻𑀫𑀝𑁆𑀞𑁂 𑀆𑀕𑀢𑀸𑀕𑀢𑁂 𑀪𑀺𑀓𑁆𑀔𑀽 𑀆𑀧𑀼𑀘𑁆𑀙𑀺𑀢𑁆𑀯𑀸𑀦 ‘‘𑀇𑀢𑁆𑀣𑀦𑁆𑀦𑀸𑀫𑁂𑀦 𑀧𑀭𑀺𑀓𑁆𑀔𑀸𑀭𑁂𑀦 𑀪𑀯𑀺𑀢𑀩𑁆𑀩𑀁, 𑀭𑀼𑀘𑁆𑀘𑀢𑀺 𑀢𑀲𑁆𑀲 𑀤𑀸𑀦’’𑀦𑁆𑀢𑀺 𑀯𑀺𑀲𑀼𑀁 𑀧𑀼𑀘𑁆𑀙𑀺𑀢𑁆𑀯𑀸 𑀕𑀳𑀺𑀢𑀸𑀬 𑀪𑀺𑀓𑁆𑀔𑀽𑀦𑀁 𑀭𑀼𑀘𑀺𑀬𑀸 𑀢𑀺𑀓𑁆𑀔𑀢𑁆𑀢𑀼𑀁 𑀅𑀧𑀮𑁄𑀓𑁂𑀢𑁆𑀯𑀸 𑀘𑀻𑀯𑀭𑀸𑀤𑀺𑀧𑀭𑀺𑀓𑁆𑀔𑀸𑀭𑀁 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀸𑀤𑀻𑀦𑀁 𑀤𑁂𑀢𑀺, 𑀬𑀁 𑀏𑀯𑀁𑀪𑀽𑀢𑀁 𑀲𑀗𑁆𑀖𑀲𑁆𑀲 𑀤𑀸𑀦𑀁, 𑀢𑀁 𑀢𑀲𑁆𑀲 𑀅𑀧𑀮𑁄𑀓𑀦𑀓𑀫𑁆𑀫𑀲𑁆𑀲 𑀓𑀫𑁆𑀫𑀮𑀓𑁆𑀔𑀡𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀮𑀓𑁆𑀔𑀻𑀬𑀢𑀻𑀢𑀺 𑀮𑀓𑁆𑀔𑀡𑀁, 𑀓𑀫𑁆𑀫𑀫𑁂𑀯 𑀮𑀓𑁆𑀔𑀡𑀁, 𑀦 𑀦𑀺𑀲𑁆𑀲𑀸𑀭𑀡𑀸𑀤𑀻𑀦𑀻𑀢𑀺 𑀓𑀫𑁆𑀫𑀮𑀓𑁆𑀔𑀡𑀁.

𑁨𑁯𑁯𑁦-𑁧. 𑀏𑀯𑀁 𑀅𑀧𑀮𑁄𑀓𑀦𑀓𑀫𑁆𑀫𑀲𑁆𑀲 𑀧𑀜𑁆𑀘 𑀞𑀸𑀦𑀸𑀦𑀺 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀯𑀲𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀜𑀢𑁆𑀢𑀺𑀓𑀫𑁆𑀫𑀲𑁆𑀲 𑀓𑀫𑁆𑀫𑀮𑀓𑁆𑀔𑀡𑀁 𑀢𑀸𑀯 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦𑀺𑀲𑁆𑀲𑀸𑀭𑀡’’𑀦𑁆𑀢𑀺𑀆𑀤𑀺. 𑀇𑀢𑀺 ‘‘𑀜𑀢𑁆𑀢𑀺𑀬𑀸 𑀦𑀯 𑀞𑀸𑀦𑀸𑀦𑀻’’𑀢𑀺 𑀅𑀬𑀫𑀼𑀤𑁆𑀤𑁂𑀲𑁄 𑀯𑀓𑁆𑀔𑀫𑀸𑀦𑁂𑀦 ‘‘𑀯𑀺𑀦𑀺𑀘𑁆𑀙𑀬𑁂’’𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑁂𑀦𑁂𑀯 𑀯𑀺𑀪𑀸𑀯𑀻𑀬𑀢𑀺.

𑁨𑁯𑁯𑁨. 𑀯𑀺𑀦𑀺𑀘𑁆𑀙𑀬𑁂𑀢𑀺 𑀉𑀩𑁆𑀩𑀸𑀳𑀺𑀓𑀯𑀺𑀦𑀺𑀘𑁆𑀙𑀬𑁂. 𑀅𑀲𑀫𑁆𑀧𑀢𑁆𑀢𑁂𑀢𑀺 𑀦𑀺𑀝𑁆𑀞𑀁 𑀅𑀕𑀢𑁂. 𑀣𑁂𑀭𑀲𑁆𑀲𑀸𑀢𑀺 𑀥𑀫𑁆𑀫𑀓𑀣𑀺𑀓𑀲𑁆𑀲. 𑀢𑁂𑀦𑁂𑀯𑀸𑀳 ‘‘𑀅𑀯𑀺𑀦𑀬𑀜𑁆𑀜𑀼𑀦𑁄’’𑀢𑀺. 𑀢𑀲𑁆𑀲 ‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑀸, 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀥𑀫𑁆𑀫𑀓𑀣𑀺𑀓𑁄, 𑀇𑀫𑀲𑁆𑀲 𑀦𑁂𑀯 𑀲𑀼𑀢𑁆𑀢𑀁 𑀆𑀕𑀘𑁆𑀙𑀢𑀺, 𑀦𑁄 𑀲𑀼𑀢𑁆𑀢𑀯𑀺𑀪𑀗𑁆𑀕𑁄, 𑀲𑁄 𑀅𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀅𑀢𑁆𑀣𑀁 𑀧𑀝𑀺𑀩𑀸𑀳𑀢𑀺, 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀬𑁆𑀬𑀸𑀫𑀸’’𑀢𑀺 (𑀘𑀽𑀴𑀯. 𑁨𑁩𑁩) 𑀏𑀯𑀁 𑀉𑀩𑁆𑀩𑀸𑀳𑀺𑀓𑀯𑀺𑀦𑀺𑀘𑁆𑀙𑀬𑁂 𑀥𑀫𑁆𑀫𑀓𑀣𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸 𑀦𑀺𑀲𑁆𑀲𑀭𑀡𑀸 𑀯𑀼𑀢𑁆𑀢𑀸, 𑀲𑀸 𑀜𑀢𑁆𑀢𑀺𑀓𑀫𑁆𑀫𑁂 ‘‘𑀦𑀺𑀲𑁆𑀲𑀸𑀭𑀡𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸.

𑁨𑁯𑁯𑁩-𑁪. 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄, 𑀅𑀦𑀼𑀲𑀺𑀝𑁆𑀞𑁄 𑀲𑁄 𑀫𑀬𑀸, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑁄 𑀆𑀕𑀘𑁆𑀙𑁂𑀬𑁆𑀬𑀸𑀢𑀺. 𑀆𑀕𑀘𑁆𑀙𑀸𑀳𑀻’’𑀢𑀺 (𑀫𑀳𑀸𑀯. 𑁧𑁨𑁬) 𑀯𑀘𑀦𑀧𑀝𑀺𑀲𑀁𑀬𑀼𑀢𑁆𑀢𑀲𑁆𑀲 𑀲𑀗𑁆𑀖𑀲𑁆𑀲 𑀲𑀫𑁆𑀫𑀼𑀔𑀸𑀦𑀬𑀦𑀁, 𑀲𑀸 𑀑𑀲𑀸𑀭𑀡𑀸 𑀦𑀸𑀫. ‘‘𑀆𑀕𑀘𑁆𑀙 𑀑𑀲𑀸𑀭𑀡𑀸’’𑀢𑀺 𑀧𑀤𑀘𑁆𑀙𑁂𑀤𑁄.

𑀉𑀧𑁄𑀲𑀣𑀯𑀲𑁂𑀦𑀸𑀧𑀺, 𑀧𑀯𑀸𑀭𑀡𑀸𑀯𑀲𑁂𑀦𑀸𑀧𑀺. 𑀜𑀢𑁆𑀢𑀺𑀬𑀸 𑀞𑀧𑀺𑀢𑀢𑁆𑀢𑀸𑀢𑀺 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀚𑁆𑀚𑀼𑀧𑁄𑀲𑀣𑁄 𑀧𑀦𑁆𑀦𑀭𑀲𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬’’ (𑀫𑀳𑀸𑀯. 𑁧𑁩𑁪), ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀚𑁆𑀚 𑀧𑀯𑀸𑀭𑀡𑀸 𑀧𑀦𑁆𑀦𑀭𑀲𑀻, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀧𑀯𑀸𑀭𑁂𑀬𑁆𑀬𑀸’’𑀢𑀺 (𑀫𑀳𑀸𑀯. 𑁨𑁧𑁦) 𑀉𑀧𑁄𑀲𑀣𑀧𑀯𑀸𑀭𑀡𑀸𑀯𑀲𑁂𑀦 𑀜𑀢𑁆𑀢𑀺𑀬𑀸 𑀞𑀧𑀺𑀢𑀢𑁆𑀢𑀸 𑀉𑀧𑁄𑀲𑀣𑁄, 𑀧𑀯𑀸𑀭𑀡𑀸 𑀯𑀸𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀜𑀢𑁆𑀢𑀺𑀓𑀫𑁆𑀫𑀸𑀦𑀺.

‘‘𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀜𑁆𑀳𑀺, 𑀅𑀦𑀼𑀲𑀸𑀲𑁂𑀬𑁆𑀬𑀳𑀦𑁆𑀢𑀺 𑀘𑀸’’𑀢𑀺 𑀇𑀫𑀺𑀦𑀸 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀁 𑀅𑀦𑀼𑀲𑀸𑀲𑁂𑀬𑁆𑀬’’𑀦𑁆𑀢𑀺 (𑀫𑀳𑀸𑀯. 𑁧𑁨𑁬) 𑀅𑀬𑀁 𑀏𑀓𑀸 𑀜𑀢𑁆𑀢𑀺 𑀕𑀳𑀺𑀢𑀸.

𑁨𑁯𑁯𑁫. ‘‘𑀇𑀢𑁆𑀣𑀦𑁆𑀦𑀸𑀫𑀫𑀳𑀁 𑀪𑀺𑀓𑁆𑀔𑀼𑀁, 𑀧𑀼𑀘𑁆𑀙𑁂𑀬𑁆𑀬𑀁 𑀯𑀺𑀦𑀬𑀦𑁆𑀢𑀺 𑀘𑀸’’𑀢𑀺 𑀇𑀫𑀺𑀦𑀸 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀁 𑀯𑀺𑀦𑀬𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺 (𑀫𑀳𑀸𑀯. 𑁧𑁫𑁧) 𑀅𑀬𑀁 𑀏𑀓𑀸 𑀜𑀢𑁆𑀢𑀺 𑀕𑀳𑀺𑀢𑀸. 𑀏𑀯𑀫𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀁 𑀅𑀦𑀼𑀲𑀸𑀲𑁂𑀬𑁆𑀬𑀸’’𑀢𑀺, ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀁 𑀅𑀦𑁆𑀢𑀭𑀸𑀬𑀺𑀓𑁂 𑀥𑀫𑁆𑀫𑁂 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺 (𑀫𑀳𑀸𑀯. 𑁧𑁨𑁬), ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀁 𑀅𑀦𑁆𑀢𑀭𑀸𑀬𑀺𑀓𑁂 𑀥𑀫𑁆𑀫𑁂 𑀧𑀼𑀘𑁆𑀙𑁂𑀬𑁆𑀬𑀸’’𑀢𑀺, ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀁 𑀯𑀺𑀦𑀬𑀁 𑀧𑀼𑀘𑁆𑀙𑁂𑀬𑁆𑀬𑀸’’𑀢𑀺 (𑀫𑀳𑀸𑀯. 𑁧𑁫𑁧), ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑁂𑀦 𑀯𑀺𑀦𑀬𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺 (𑀫𑀳𑀸𑀯. 𑁧𑁫𑁨), ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑁂𑀦 𑀯𑀺𑀦𑀬𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀸’’𑀢𑀺 𑁋 (𑀫𑀳𑀸𑀯. 𑁧𑁫𑁨) 𑀇𑀫𑀸 𑀙 𑀜𑀢𑁆𑀢𑀺𑀬𑁄 𑀕𑀳𑀺𑀢𑀸. 𑀏𑀯𑀁 𑀧𑀼𑀭𑀺𑀫𑀸 𑀤𑁆𑀯𑁂, 𑀇𑀫𑀸 𑀘 𑀙𑀸𑀢𑀺 𑀏𑀤𑀺𑀲𑀸 𑀇𑀫𑀸 𑀅𑀝𑁆𑀞 𑀜𑀢𑁆𑀢𑀺𑀬𑁄 ‘‘𑀲𑀫𑁆𑀫𑀼𑀢𑀻’’𑀢𑀺 𑀯𑀼𑀢𑁆𑀢𑀸.

𑁨𑁯𑁯𑁬. 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀸𑀤𑀻𑀦𑀁 𑀤𑀸𑀦𑀦𑁆𑀢𑀺 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀇𑀤𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀝𑁆𑀞𑀁, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀤𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁪𑁬𑁪) 𑀏𑀯𑀁 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀧𑀢𑁆𑀢𑀸𑀤𑀻𑀦𑀁 𑀤𑀸𑀦𑀁 ‘‘𑀤𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀧𑀢𑁆𑀢𑀻𑀦𑀁 𑀧𑀝𑀺𑀕𑁆𑀕𑀸𑀳𑁄𑀢𑀺 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀲𑀭𑀢𑀺 𑀯𑀺𑀯𑀭𑀢𑀺 𑀉𑀢𑁆𑀢𑀸𑀦𑀺𑀁 𑀓𑀭𑁄𑀢𑀺 𑀤𑁂𑀲𑁂𑀢𑀺, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬’’𑀦𑁆𑀢𑀺 (𑀘𑀽𑀴𑀯. 𑁨𑁩𑁯), ‘‘𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬’’𑀦𑁆𑀢𑀺 (𑀘𑀽𑀴𑀯. 𑁨𑁩𑁯). 𑀢𑁂𑀦 𑀯𑀢𑁆𑀢𑀩𑁆𑀩𑁄 ‘‘𑀧𑀲𑁆𑀲𑀲𑀻’’𑀢𑀺. ‘‘𑀆𑀫 𑀧𑀲𑁆𑀲𑀸𑀫𑀻’’𑀢𑀺. ‘‘𑀆𑀬𑀢𑀺𑀁 𑀲𑀁𑀯𑀭𑁂𑀬𑁆𑀬𑀸𑀲𑀻’’𑀢𑀺. 𑀏𑀯𑀁 𑀆𑀧𑀢𑁆𑀢𑀻𑀦𑀁 𑀧𑀝𑀺𑀕𑁆𑀕𑀸𑀳𑁄 ‘‘𑀧𑀝𑀺𑀕𑁆𑀕𑀸𑀳𑁄’’𑀢𑀺 𑀯𑀼𑀘𑁆𑀘𑀢𑀺.

𑁨𑁯𑁯𑁭. 𑀧𑀯𑀸𑀭𑀼𑀓𑁆𑀓𑀟𑁆𑀠𑀦𑀸𑀢𑀺 𑀧𑀯𑀸𑀭𑀡𑀼𑀓𑁆𑀓𑀟𑁆𑀠𑀦𑀸. 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀡-𑀓𑀸𑀭𑀮𑁄𑀧𑁄. 𑀅𑀣 𑀯𑀸 𑀧𑀯𑀸𑀭𑀡𑀁 𑀧𑀯𑀸𑀭𑁄𑀢𑀺 𑀧𑀯𑀸𑀭𑀡-𑀲𑀤𑁆𑀤𑀧𑀭𑀺𑀬𑀸𑀬𑁄 𑀧𑀯𑀸𑀭-𑀲𑀤𑁆𑀤𑁄. ‘‘𑀇𑀫𑀁 𑀉𑀧𑁄𑀲𑀣𑀁 𑀓𑀢𑁆𑀯𑀸, 𑀓𑀸𑀴𑁂 𑀧𑀯𑀸𑀭𑀬𑀸𑀫𑀻’’𑀢𑀺 𑀇𑀫𑀺𑀦𑀸 ‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑀸 𑀆𑀯𑀸𑀲𑀺𑀓𑀸, 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀇𑀤𑀸𑀦𑀺 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀫, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀫, 𑀆𑀕𑀫𑁂 𑀓𑀸𑀴𑁂 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺 (𑀫𑀳𑀸𑀯. 𑁨𑁪𑁦) 𑀅𑀬𑀁 𑀜𑀢𑁆𑀢𑀺 𑀉𑀧𑀮𑀓𑁆𑀔𑀡𑀢𑁄 𑀤𑀲𑁆𑀲𑀺𑀢𑀸. 𑀏𑀯𑀁 𑀓𑀢𑀧𑀯𑀸𑀭𑀡𑀸 ‘‘𑀧𑀘𑁆𑀘𑀼𑀓𑁆𑀓𑀟𑁆𑀠𑀦𑀸’’𑀢𑀺 𑀫𑀢𑀸. 𑀏𑀢𑁆𑀣 𑀘 𑀓𑀸𑀴𑁂𑀢𑀺 𑀧𑀼𑀩𑁆𑀩𑀓𑀢𑁆𑀢𑀺𑀓𑀫𑀸𑀲𑀲𑁆𑀲 𑀓𑀸𑀴𑀧𑀓𑁆𑀔𑀼𑀧𑁄𑀲𑀣𑁂. 𑀇𑀫𑀺𑀦𑀸 𑀘 ‘‘𑀆𑀕𑀫𑁂 𑀚𑀼𑀡𑁆𑀳𑁂 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺 𑀅𑀬𑀁 𑀜𑀢𑁆𑀢𑀺 𑀘 𑀉𑀧𑀮𑀓𑁆𑀔𑀺𑀢𑀸. 𑀚𑀼𑀡𑁆𑀳𑁂𑀢𑀺 𑀅𑀧𑀭𑀓𑀢𑁆𑀢𑀺𑀓𑀚𑀼𑀡𑁆𑀳𑀧𑀓𑁆𑀔𑀉𑀧𑁄𑀲𑀣𑁂.

𑁨𑁯𑁯𑁮. 𑀢𑀺𑀡𑀯𑀢𑁆𑀣𑀸𑀭𑀓𑁂𑀢𑀺 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑁂. 𑀲𑀩𑁆𑀩𑀧𑀞𑀫𑀸 𑀜𑀢𑁆𑀢𑀻𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀸 𑀜𑀢𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀭𑀸 𑀘𑀸𑀢𑀺 𑀉𑀪𑀬𑀧𑀓𑁆𑀔𑁂 𑀧𑀘𑁆𑀘𑁂𑀓𑀁 𑀞𑀧𑀺𑀢𑀸 𑀤𑁆𑀯𑁂 𑀜𑀢𑁆𑀢𑀺𑀬𑁄 𑀘𑀸𑀢𑀺 𑀏𑀯𑀁 𑀢𑀺𑀥𑀸 𑀧𑀯𑀢𑁆𑀢𑀁 𑀏𑀢𑀁 𑀜𑀢𑁆𑀢𑀺𑀓𑀫𑁆𑀫𑀁 𑀓𑀫𑁆𑀫𑀮𑀓𑁆𑀔𑀡𑀁 𑀇𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 ‘‘𑀯𑀺𑀦𑀺𑀘𑁆𑀙𑀬𑁂’’𑀢𑀺𑀆𑀤𑀺𑀦𑀸 𑀜𑀢𑁆𑀢𑀺𑀬𑀸 𑀦𑀯 𑀞𑀸𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀬𑁄𑀚𑀦𑀸.

𑁨𑁯𑁯𑁯-𑁩𑁦𑁦𑁦. 𑀏𑀯𑀁 𑀜𑀢𑁆𑀢𑀺𑀓𑀫𑁆𑀫𑁂 𑀦𑀯 𑀞𑀸𑀦𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂 𑀲𑀢𑁆𑀢 𑀞𑀸𑀦𑀸𑀦𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀫𑁆𑀧𑀻’’𑀢𑀺𑀆𑀤𑀺. ‘‘𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫’’𑀦𑁆𑀢𑀺𑀆𑀤𑀺𑀓𑀸 𑀉𑀤𑁆𑀤𑁂𑀲𑀕𑀸𑀣𑀸 𑀉𑀢𑁆𑀢𑀸𑀦𑀢𑁆𑀣𑀸𑀯.

𑀦𑀺𑀤𑁆𑀤𑁂𑀲𑁂 𑀧𑀢𑁆𑀢𑀦𑀺𑀓𑁆𑀓𑀼𑀚𑁆𑀚𑀦𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀢𑁆𑀢𑀼𑀓𑁆𑀓𑀼𑀚𑁆𑀚𑀦𑀁 𑀕𑀳𑀺𑀢𑀁. 𑀦𑀺𑀲𑁆𑀲𑀸𑀭𑁄𑀲𑀸𑀭𑀡𑀸 𑀫𑀢𑀸𑀢𑀺 ‘‘𑀦𑀺𑀲𑁆𑀲𑀸𑀭𑀡𑀸, 𑀑𑀲𑀸𑀭𑀡𑀸’’𑀢𑀺 𑀘 𑀫𑀢𑀸. 𑀢𑀢𑁆𑀣 𑀪𑀺𑀓𑁆𑀔𑀽𑀦𑀁 𑀅𑀮𑀸𑀪𑀸𑀬 𑀧𑀭𑀺𑀲𑀓𑁆𑀓𑀦𑀸𑀤𑀺𑀓𑁂𑀳𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀲𑀗𑁆𑀖𑁂𑀦 𑀅𑀲𑀫𑁆𑀪𑁄𑀕𑀓𑀭𑀡𑀢𑁆𑀣𑀁 𑀧𑀢𑁆𑀢𑀦𑀺𑀓𑁆𑀓𑀼𑀚𑁆𑀚𑀦𑀯𑀲𑁂𑀦 𑀦𑀺𑀲𑁆𑀲𑀸𑀭𑀡𑀸 𑀘 𑀢𑀲𑁆𑀲𑁂𑀯 𑀲𑀫𑁆𑀫𑀸 𑀯𑀢𑁆𑀢𑀦𑁆𑀢𑀲𑁆𑀲 𑀧𑀢𑁆𑀢𑀼𑀓𑁆𑀓𑀼𑀚𑁆𑀚𑀦𑀯𑀲𑁂𑀦 𑀑𑀲𑀸𑀭𑀡𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑁂 𑀯𑀟𑁆𑀠𑀮𑀺𑀘𑁆𑀙𑀯𑀺𑀯𑀢𑁆𑀣𑀼𑀲𑁆𑀫𑀺𑀁 (𑀘𑀽𑀴𑀯. 𑁨𑁬𑁫) 𑀯𑀼𑀢𑁆𑀢𑀸.

𑁩𑁦𑁦𑁧. 𑀲𑀻𑀫𑀸𑀤𑀺𑀲𑀫𑁆𑀫𑀼𑀢𑀺 𑀲𑀫𑁆𑀫𑀼𑀢𑀺 𑀦𑀸𑀫. 𑀲𑀸 𑀧𑀜𑁆𑀘𑀤𑀲𑀥𑀸 𑀫𑀢𑀸𑀢𑀺 𑀲𑀻𑀫𑀸𑀲𑀫𑁆𑀫𑀼𑀢𑀺 𑀢𑀺𑀘𑀻𑀯𑀭𑁂𑀦𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺 𑀲𑀦𑁆𑀣𑀢𑀲𑀫𑁆𑀫𑀼𑀢𑀺 𑀪𑀢𑁆𑀢𑀼𑀤𑁆𑀤𑁂𑀲𑀓 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓 𑀪𑀡𑁆𑀟𑀸𑀕𑀸𑀭𑀺𑀓 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓 𑀬𑀸𑀕𑀼𑀪𑀸𑀚𑀓 𑀨𑀮𑀪𑀸𑀚𑀓 𑀔𑀚𑁆𑀚𑀪𑀸𑀚𑀓 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓 𑀲𑀸𑀝𑀺𑀬𑀕𑁆𑀕𑀸𑀳𑀸𑀧𑀓 𑀧𑀢𑁆𑀢𑀕𑁆𑀕𑀸𑀳𑀸𑀧𑀓 𑀆𑀭𑀸𑀫𑀺𑀓𑀧𑁂𑀲𑀓 𑀲𑀸𑀫𑀡𑁂𑀭𑀧𑁂𑀲𑀓𑀲𑀫𑁆𑀫𑀼𑀢𑀻𑀢𑀺 𑀏𑀯𑀁 𑀲𑀸 𑀲𑀫𑁆𑀫𑀼𑀢𑀺 𑀧𑀜𑁆𑀘𑀤𑀲𑀯𑀺𑀥𑀸 𑀫𑀢𑀸𑀢𑀺 𑀅𑀢𑁆𑀣𑁄. 𑀓𑀣𑀺𑀦𑀲𑁆𑀲 𑀯𑀢𑁆𑀣𑀁, 𑀢𑀲𑁆𑀲. 𑀫𑀢𑁄𑀬𑁂𑀯 𑀫𑀢𑀓𑁄, 𑀫𑀢𑀓𑀲𑁆𑀲 𑀯𑀸𑀲𑁄 𑀫𑀢𑀓𑀯𑀸𑀲𑁄, 𑀢𑀲𑁆𑀲 𑀫𑀢𑀓𑀯𑀸𑀲𑀲𑁄, 𑀫𑀢𑀓𑀘𑀻𑀯𑀭𑀲𑁆𑀲.

𑁩𑁦𑁦𑁨. 𑀆𑀦𑀺𑀲𑀁𑀲𑀔𑁂𑀢𑁆𑀢𑀪𑀽𑀢𑀧𑀜𑁆𑀘𑀫𑀸𑀲𑀩𑁆𑀪𑀦𑁆𑀢𑀭𑁂𑀬𑁂𑀯 𑀉𑀩𑁆𑀪𑀸𑀭𑁄 𑀅𑀦𑁆𑀢𑀭𑀼𑀩𑁆𑀪𑀸𑀭𑁄. 𑀓𑀼𑀝𑀺𑀯𑀢𑁆𑀣𑀼𑀲𑁆𑀲, 𑀯𑀺𑀳𑀸𑀭𑀲𑁆𑀲 𑀯𑀢𑁆𑀣𑀼𑀦𑁄 𑀘 𑀤𑁂𑀲𑀦𑀸 𑀤𑁂𑀲𑀦𑀸 𑀦𑀸𑀫𑀸𑀢𑀺 𑀬𑁄𑀚𑀦𑀸.

𑁩𑁦𑁦𑁩. 𑀢𑀺𑀡𑀯𑀢𑁆𑀣𑀸𑀭𑀓𑁂 𑀤𑁆𑀯𑀺𑀦𑁆𑀦𑀁 𑀧𑀓𑁆𑀔𑀸𑀦𑀁 𑀲𑀸𑀥𑀸𑀭𑀡𑀯𑀲𑁂𑀦 𑀞𑀧𑁂𑀢𑀩𑁆𑀩𑀜𑀢𑁆𑀢𑀺 𑀘 𑀧𑀘𑁆𑀙𑀸 𑀧𑀓𑁆𑀔𑀤𑁆𑀯𑀬𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀞𑀧𑁂𑀢𑀩𑁆𑀩𑀸 𑀤𑁆𑀯𑁂 𑀜𑀢𑁆𑀢𑀺𑀬𑁄 𑀘𑀸𑀢𑀺 𑀢𑀺𑀲𑁆𑀲𑁄 𑀜𑀢𑁆𑀢𑀺𑀬𑁄 𑀓𑀫𑁆𑀫𑀯𑀸𑀘𑀸𑀬 𑀅𑀪𑀸𑀯𑁂𑀦 𑀜𑀢𑁆𑀢𑀺𑀓𑀫𑁆𑀫𑁂 ‘‘𑀓𑀫𑁆𑀫𑀮𑀓𑁆𑀔𑀡’’𑀦𑁆𑀢𑀺 𑀤𑀲𑁆𑀲𑀺𑀢𑀸, 𑀧𑀘𑁆𑀙𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀤𑁆𑀯𑀻𑀲𑀼 𑀧𑀓𑁆𑀔𑁂𑀲𑀼 𑀯𑀢𑁆𑀢𑀩𑁆𑀩𑀸 𑀤𑁆𑀯𑁂 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂 ‘‘𑀓𑀫𑁆𑀫𑀮𑀓𑁆𑀔𑀡’’𑀦𑁆𑀢𑀺 𑀤𑀲𑁆𑀲𑀺𑀢𑀸𑀢𑀺 𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑀺𑀡𑀯𑀢𑁆𑀣𑀸𑀭𑀓𑁂 𑀓𑀫𑁆𑀫𑁂’’𑀢𑀺. ‘‘𑀫𑁄𑀳𑀸𑀭𑁄𑀧𑀦𑀢𑀸𑀤𑀺𑀲𑀽’’𑀢𑀺 𑀇𑀫𑀺𑀦𑀸 𑀧𑀸𑀘𑀺𑀢𑁆𑀢𑀺𑀬𑁂𑀲𑀼 𑀤𑀲𑁆𑀲𑀺𑀢𑀫𑁄𑀳𑀸𑀭𑁄𑀧𑀦𑀓𑀫𑁆𑀫𑀜𑁆𑀘 𑀅𑀜𑁆𑀜𑀯𑀸𑀤𑀓𑀯𑀺𑀳𑁂𑀲𑀓𑀸𑀭𑁄𑀧𑀦𑀓𑀫𑁆𑀫𑀸𑀤𑀺𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂. 𑀓𑀫𑁆𑀫𑀮𑀓𑁆𑀔𑀡𑀫𑁂𑀯 𑀓𑀫𑁆𑀫𑀮𑀓𑁆𑀔𑀡𑀢𑀸.

𑁩𑁦𑁦𑁪-𑁫. 𑀇𑀢𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀇𑀫𑁂 𑀲𑀢𑁆𑀢 𑀞𑀸𑀦𑀪𑁂𑀤𑀸 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀲𑁆𑀲. 𑀏𑀯𑀁 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂 𑀲𑀢𑁆𑀢 𑀞𑀸𑀦𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑁂 𑀞𑀸𑀦𑀪𑁂𑀤𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑀣𑀸’’𑀢𑀺𑀆𑀤𑀺.

𑁩𑁦𑁦𑁬. 𑀢𑀚𑁆𑀚𑀦𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀦𑀺𑀬𑀲𑁆𑀲𑀸𑀤𑀻𑀦𑀁 𑀕𑀳𑀡𑀁. 𑀢𑁂𑀲𑀁 𑀲𑀢𑁆𑀢𑀦𑁆𑀦𑀁 𑀓𑀫𑁆𑀫𑀸𑀦𑀁. 𑀧𑀲𑁆𑀲𑀤𑁆𑀥𑀺 𑀯𑀽𑀧𑀲𑀫𑁄.

𑁩𑁦𑁦𑁭. ‘‘𑀪𑀺𑀓𑁆𑀔𑀼𑀦𑀻𑀦𑀁 𑀑𑀯𑀸𑀤𑁄’’𑀢𑀺 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺 𑀨𑀮𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑀸.

𑁩𑁦𑁦𑁮-𑁯. 𑀫𑀽𑀮𑀧𑀝𑀺𑀓𑁆𑀓𑀲𑁆𑀲𑁄 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀸, 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀓-𑀓𑀸𑀭𑀲𑁆𑀲 𑀤𑁆𑀯𑁂𑀪𑀸𑀯𑁄. 𑀉𑀓𑁆𑀔𑀺𑀢𑁆𑀢𑀲𑁆𑀲𑀸𑀦𑀼𑀯𑀢𑁆𑀢𑀺𑀓𑀸𑀢𑀺 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸 𑀏𑀓𑀸 𑀬𑀸𑀯𑀢𑀢𑀺𑀬𑀓𑀸, 𑀅𑀝𑁆𑀞 𑀲𑀗𑁆𑀖𑀸𑀤𑀺𑀲𑁂𑀲𑀸, 𑀅𑀭𑀺𑀝𑁆𑀞𑁄 𑀘𑀡𑁆𑀟𑀓𑀸𑀴𑀻 𑀘 𑀤𑁆𑀯𑁂, 𑀇𑀫𑁂 𑀏𑀓𑀸𑀤𑀲 𑀬𑀸𑀯𑀢𑀢𑀺𑀬𑀓𑀸 𑀪𑀯𑀦𑁆𑀢𑀺. 𑀇𑀫𑁂𑀲𑀁 𑀯𑀲𑀸𑀢𑀺 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸𑀤𑀻𑀦𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀯𑀼𑀢𑁆𑀢𑀸𑀦𑀺, 𑀇𑀫𑁂𑀲𑀁 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀸𑀦𑀁 𑀯𑀲𑁂𑀦. 𑀤𑀲𑁂𑀓𑀸𑀢𑀺 𑀏𑀓𑀸𑀤𑀲.

𑁩𑁦𑁧𑁧. 𑀏𑀯𑀁 𑀘𑀢𑀼𑀦𑁆𑀦𑀫𑁆𑀧𑀺 𑀓𑀫𑁆𑀫𑀸𑀦𑀁 𑀞𑀸𑀦𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀅𑀦𑁆𑀯𑀬𑀢𑁄, 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀓𑀸𑀢𑀩𑁆𑀩𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀧𑀮𑁄𑀓𑀦𑀓𑀫𑁆𑀫𑀜𑁆𑀘𑀸’’𑀢𑀺𑀆𑀤𑀺. 𑀜𑀢𑁆𑀢𑀺𑀬𑀸𑀧𑀺 𑀦 𑀓𑀸𑀭𑀬𑁂, 𑀜𑀢𑁆𑀢𑀺𑀤𑀼𑀢𑀺𑀬𑁂𑀦𑀧𑀺 𑀦 𑀓𑀸𑀭𑀬𑁂𑀢𑀺 𑀬𑁄𑀚𑀦𑀸.

𑁩𑁦𑁧𑁨. 𑀅𑀧𑀮𑁄𑀓𑀦𑀓𑀫𑁆𑀫𑁂 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀜𑀢𑁆𑀢𑀺𑀓𑀫𑁆𑀫𑀸𑀤𑀻𑀦𑀫𑁆𑀧𑀺 𑀓𑀸𑀢𑀩𑁆𑀩𑀧𑁆𑀧𑀓𑀸𑀭𑁄 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀢𑀁 𑀅𑀤𑀲𑁆𑀲𑁂𑀢𑁆𑀯𑀸 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂 𑀮𑀩𑁆𑀪𑀫𑀸𑀦𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀸𑀦𑀻’’𑀢𑀺𑀆𑀤𑀺. 𑀅𑀧𑀮𑁄𑀓𑁂𑀢𑁆𑀯𑀸 𑀓𑀸𑀢𑀩𑁆𑀩𑀸𑀦𑀺 𑀮𑀳𑀼𑀓𑀸𑀦𑀺𑀧𑀺 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀸𑀦𑀺 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀢𑀸𑀦𑀺 𑀧𑀦 𑀓𑀢𑀫𑀸𑀦𑀻𑀢𑀺 𑀆𑀳 ‘‘𑀲𑀩𑁆𑀩𑀸 𑀲𑀫𑁆𑀫𑀼𑀢𑀺𑀬𑁄 𑀲𑀺𑀬𑀼’’𑀦𑁆𑀢𑀺. 𑀏𑀢𑁆𑀣 𑀲𑀻𑀫𑀸𑀲𑀫𑁆𑀫𑀼𑀢𑀺𑀁 𑀯𑀺𑀦𑀸 𑀲𑁂𑀲𑀸 𑀢𑀺𑀘𑀻𑀯𑀭𑁂𑀦𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺𑀆𑀤𑀬𑁄 𑀲𑀩𑁆𑀩𑀸𑀧𑀺 𑀲𑀫𑁆𑀫𑀼𑀢𑀺𑀬𑁄𑀢𑀺 𑀅𑀢𑁆𑀣𑁄.

𑁩𑁦𑁧𑁩. 𑀲𑁂𑀲𑀸𑀦𑀻𑀢𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀲𑁂𑀲𑀸𑀦𑀺 𑀲𑀻𑀫𑀸𑀲𑀫𑁆𑀫𑀼𑀢𑀺𑀆𑀤𑀻𑀦𑀺 𑀙 𑀓𑀫𑁆𑀫𑀸𑀦𑀺. 𑀦 𑀯𑀝𑁆𑀝𑀢𑀻𑀢𑀺 𑀦 𑀯𑀝𑁆𑀝𑀦𑁆𑀢𑀺, 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀦-𑀓𑀸𑀭𑀮𑁄𑀧𑁄. 𑀬𑀣𑀸𑀳 ‘‘𑀲𑀻𑀫𑀸𑀲𑀫𑁆𑀫𑀼𑀢𑀺, 𑀲𑀻𑀫𑀸𑀲𑀫𑀽𑀳𑀦𑀦𑀁, 𑀓𑀣𑀺𑀦𑀤𑀸𑀦𑀁, 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀓𑀼𑀝𑀺𑀯𑀢𑁆𑀣𑀼𑀤𑁂𑀲𑀦𑀸, 𑀯𑀺𑀳𑀸𑀭𑀯𑀢𑁆𑀣𑀼𑀤𑁂𑀲𑀦𑀸𑀢𑀺 𑀇𑀫𑀸𑀦𑀺 𑀙 𑀓𑀫𑁆𑀫𑀸𑀦𑀺 𑀕𑀭𑀼𑀓𑀸𑀦𑀺 𑀅𑀧𑀮𑁄𑀓𑁂𑀢𑁆𑀯𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀸𑀦𑀻’’𑀢𑀺 (𑀧𑀭𑀺. 𑀅𑀝𑁆𑀞. 𑁪𑁮𑁨). ‘‘𑀅𑀧𑀮𑁄𑀓𑁂𑀢𑁆𑀯𑀸 𑀓𑀸𑀢𑀼𑀁 𑀧𑀦 𑀦 𑀯𑀝𑁆𑀝𑀢𑀻’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀯𑀲𑁂𑀦𑀸𑀧𑀺 𑀓𑀸𑀢𑀼𑀁 𑀦 𑀯𑀝𑁆𑀝𑀦𑁆𑀢𑁂𑀯. 𑀢𑁂𑀦𑁂𑀯𑀸𑀳 ‘‘𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯, 𑀢𑁂𑀦 𑀢𑁂𑀦𑁂𑀯 𑀓𑀸𑀭𑀬𑁂’’𑀢𑀺, 𑀬𑁄 𑀬𑁄 𑀦𑀬𑁄 𑀢𑀁 𑀢𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀼𑀢𑁆𑀢𑁄, 𑀢𑁂𑀦𑁂𑀯 𑀢𑁂𑀦𑁂𑀯 𑀦𑀬𑁂𑀦𑀸𑀢𑀺 𑀅𑀢𑁆𑀣𑁄.

𑀘𑀢𑀼𑀩𑁆𑀩𑀺𑀥𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸.