𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸

𑁨𑁯𑁫𑁨. 𑀯𑀺𑀯𑀭𑀺𑀢𑁆𑀯𑀸𑀦 𑀘𑀻𑀯𑀭𑀁 𑀅𑀧𑀦𑁂𑀢𑁆𑀯𑀸.

𑁨𑁯𑁫𑁩. 𑀬𑀁 𑀓𑀺𑀜𑁆𑀘𑀺 𑀲𑀫𑁆𑀧𑀬𑁄𑀚𑁂𑀦𑁆𑀢𑀺𑀬𑀸𑀢𑀺 𑀬𑀁 𑀓𑀺𑀜𑁆𑀘𑀺 𑀅𑀦𑀸𑀘𑀸𑀭𑀁 𑀓𑀭𑁄𑀦𑁆𑀢𑀺𑀬𑀸. 𑀢𑀢𑁄𑀢𑀺 𑀢𑁂𑀦 𑀅𑀦𑀸𑀘𑀸𑀭𑀲𑀗𑁆𑀔𑀸𑀢𑁂𑀦 𑀅𑀲𑀤𑁆𑀥𑀫𑁆𑀫𑁂𑀦. 𑀪𑀸𑀲𑀦𑁆𑀢𑀺𑀬𑀸𑀢𑀺 𑀯𑀸𑀘𑀸𑀬 𑀪𑀸𑀲𑀦𑁆𑀢𑀺𑀬𑀸.

𑁨𑁯𑁫𑁪-𑁬. 𑀤𑀻𑀖𑀦𑁆𑀢𑀺 𑀏𑀓𑀧𑀭𑀺𑀓𑁆𑀔𑁂𑀧𑀢𑁄 𑀤𑀻𑀖𑀁. 𑀯𑀺𑀮𑀻𑀯𑁂𑀦 𑀘 𑀧𑀝𑁆𑀝𑁂𑀦𑀸𑀢𑀺 𑀲𑀡𑁆𑀳𑁂𑀳𑀺𑀧𑀺 𑀯𑀺𑀮𑀻𑀯𑁂𑀳𑀺 𑀓𑀢𑀧𑀝𑁆𑀝𑁂𑀦. 𑀘𑀫𑁆𑀫𑀧𑀝𑁆𑀝𑁂𑀦𑀸𑀢𑀺 𑀘𑀫𑁆𑀫𑀫𑀬𑀧𑀝𑁆𑀝𑁂𑀦. 𑀤𑀼𑀲𑁆𑀲𑀧𑀝𑁆𑀝𑁂𑀦𑀸𑀢𑀺 𑀲𑁂𑀢𑀯𑀢𑁆𑀣𑁂𑀦. 𑀤𑀼𑀲𑁆𑀲𑀯𑁂𑀡𑀺𑀬𑀸𑀢𑀺 𑀤𑀼𑀲𑁆𑀲𑁂𑀦 𑀕𑀡𑁆𑀞𑀺𑀢𑀯𑁂𑀡𑀺𑀬𑀸. 𑀤𑀼𑀲𑁆𑀲𑀯𑀝𑁆𑀝𑀺𑀬𑀸𑀢𑀺 𑀤𑀼𑀲𑁆𑀲𑁂𑀦 𑀓𑀢𑀯𑀝𑁆𑀝𑀺𑀬𑀸. 𑀦 𑀨𑀸𑀲𑀼𑀓𑀸 𑀦𑀫𑁂𑀢𑀩𑁆𑀩𑀸𑀢𑀺 𑀫𑀚𑁆𑀛𑀺𑀫𑀲𑁆𑀲 𑀢𑀦𑀼𑀪𑀸𑀯𑀢𑁆𑀣𑀸𑀬 𑀕𑀸𑀫𑀤𑀸𑀭𑀺𑀓𑀸 𑀯𑀺𑀬 𑀨𑀸𑀲𑀼𑀮𑀺𑀓𑀸 𑀦 𑀦𑀸𑀫𑁂𑀢𑀩𑁆𑀩𑀸. 𑀚𑀖𑀦𑀦𑁆𑀢𑀺 𑀫𑀼𑀢𑁆𑀢𑀓𑀭𑀡𑀧𑁆𑀧𑀤𑁂𑀲𑀁. 𑀅𑀝𑁆𑀞𑀺𑀓𑀸𑀤𑀺𑀦𑀸𑀢𑀺 𑀕𑁄𑀚𑀸𑀡𑀼𑀝𑁆𑀞𑀺𑀓𑀸𑀤𑀺𑀦𑀸. 𑀦 𑀖𑀁𑀲𑀸𑀧𑁂𑀬𑁆𑀬𑀸𑀢𑀺 𑀦 𑀖𑀝𑁆𑀝𑀸𑀧𑁂𑀬𑁆𑀬. ‘‘𑀅𑀝𑁆𑀞𑀺𑀓𑀸𑀤𑀺𑀦𑀸’’𑀢𑀺 𑀇𑀤𑀁 ‘‘𑀦 𑀖𑀁𑀲𑀸𑀧𑁂𑀬𑁆𑀬𑀸’’𑀢𑀺 𑀇𑀫𑀺𑀦𑀸 𑀘 ‘‘𑀓𑁄𑀝𑁆𑀝𑀸𑀧𑁂𑀢𑀻’’𑀢𑀺 𑀇𑀫𑀺𑀦𑀸 𑀓𑀺𑀭𑀺𑀬𑀸𑀧𑀤𑁂𑀦 𑀘 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑁨𑁯𑁫𑁭. ‘‘𑀓𑁄𑀝𑁆𑀝𑀸𑀧𑁂𑀢𑀻’’𑀢𑀺 𑀇𑀤𑀁 ‘‘𑀳𑀢𑁆𑀣𑀁 𑀯𑀸’’𑀢𑀺𑀆𑀤𑀻𑀳𑀺 𑀉𑀧𑀬𑁄𑀕𑀦𑁆𑀢𑀧𑀤𑁂𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀳𑀢𑁆𑀣𑀦𑁆𑀢𑀺 𑀅𑀕𑁆𑀕𑀩𑀸𑀳𑀁. 𑀳𑀢𑁆𑀣𑀓𑁄𑀘𑁆𑀙𑀦𑁆𑀢𑀺 𑀧𑀺𑀝𑁆𑀞𑀺𑀳𑀢𑁆𑀣𑀁. 𑀧𑀸𑀤𑀦𑁆𑀢𑀺 𑀚𑀗𑁆𑀖𑀁.

𑁨𑁯𑁫𑁮. 𑀦 𑀫𑀼𑀔𑀁 𑀮𑀺𑀫𑁆𑀧𑀺𑀢𑀩𑁆𑀩𑀦𑁆𑀢𑀺 𑀙𑀯𑀺𑀧𑀲𑀸𑀤𑀓𑀭𑁂𑀦 𑀢𑀺𑀮𑀲𑀸𑀲𑀧𑀓𑀓𑁆𑀓𑀸𑀤𑀺𑀦𑀸 𑀅𑀦𑁂𑀓𑀯𑀺𑀥𑁂𑀦 𑀮𑀺𑀫𑁆𑀧𑀦𑁂𑀦 𑀦 𑀮𑀺𑀫𑁆𑀧𑀺𑀢𑀩𑁆𑀩𑀁. 𑀦 𑀘𑀼𑀡𑁆𑀡𑁂𑀢𑀩𑁆𑀩𑀦𑁆𑀢𑀺 𑀫𑀼𑀔𑀘𑀼𑀡𑁆𑀡𑀮𑁂𑀧𑀦𑀁 𑀦 𑀓𑀸𑀢𑀩𑁆𑀩𑀁. 𑀫𑀦𑁄𑀲𑀺𑀮𑀸𑀬 𑀫𑀼𑀔𑀁 𑀮𑀜𑁆𑀚𑀦𑁆𑀢𑀺𑀬𑀸 𑀆𑀧𑀢𑁆𑀢𑀺 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁨𑁯𑁫𑁯. 𑀅𑀗𑁆𑀕𑀭𑀸𑀕𑁄 𑀦 𑀓𑀸𑀢𑀩𑁆𑀩𑁄𑀢𑀺 𑀳𑀮𑀺𑀤𑁆𑀤𑀺𑀓𑀼𑀗𑁆𑀓𑀼𑀫𑀸𑀤𑀻𑀳𑀺 𑀲𑀭𑀻𑀭𑀘𑁆𑀙𑀯𑀺𑀭𑀸𑀕𑁄 𑀦 𑀓𑀸𑀢𑀩𑁆𑀩𑁄. 𑀅𑀯𑀗𑁆𑀕𑀁 𑀦 𑀘 𑀓𑀸𑀢𑀩𑁆𑀩𑀦𑁆𑀢𑀺 𑀅𑀜𑁆𑀚𑀦𑀁 𑀩𑀳𑀺 𑀅𑀓𑁆𑀔𑀺𑀓𑁄𑀝𑀺𑀬𑀸 𑀮𑁂𑀔𑀁 𑀞𑀧𑁂𑀢𑁆𑀯𑀸 𑀦 𑀅𑀜𑁆𑀚𑀺𑀢𑀩𑁆𑀩𑀁. 𑀦 𑀓𑀸𑀢𑀩𑁆𑀩𑀁 𑀯𑀺𑀲𑁂𑀲𑀓𑀦𑁆𑀢𑀺 𑀕𑀡𑁆𑀟𑀧𑀤𑁂𑀲𑁂 𑀯𑀺𑀘𑀺𑀢𑁆𑀭𑀲𑀡𑁆𑀞𑀸𑀦𑀁 𑀯𑀺𑀲𑁂𑀲𑀓𑀁 𑀯𑀢𑁆𑀢𑀪𑀗𑁆𑀕𑀁 𑀦 𑀓𑀸𑀢𑀩𑁆𑀩𑀁.

𑁨𑁯𑁬𑁦. 𑀑𑀮𑁄𑀓𑀦𑀓𑀢𑁄𑀢𑀺 𑀯𑀸𑀢𑀧𑀸𑀦𑀢𑁄. 𑀭𑀸𑀕𑀸𑀢𑀺 𑀓𑀸𑀫𑀭𑀸𑀕𑁂𑀦. 𑀑𑀮𑁄𑀓𑁂𑀢𑀼𑀦𑁆𑀢𑀺 𑀅𑀦𑁆𑀢𑀭𑀯𑀻𑀣𑀺𑀁 𑀯𑀺𑀮𑁄𑀓𑁂𑀢𑀼𑀁, 𑀲𑀸𑀮𑁄𑀓𑁂 𑀦 𑀘 𑀞𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀲𑀸𑀮𑁄𑀓𑁂 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀉𑀧𑀟𑁆𑀠𑀓𑀸𑀬𑀁 𑀤𑀲𑁆𑀲𑁂𑀦𑁆𑀢𑀻𑀳𑀺 𑀦 𑀞𑀸𑀢𑀩𑁆𑀩𑀁. 𑀲𑀦𑀘𑁆𑀘𑀦𑁆𑀢𑀺 𑀦𑀝𑀲𑀫𑀚𑁆𑀚𑀁.

𑁨𑁯𑁬𑁧. 𑀕𑀡𑀺𑀓𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸 𑀯𑁂𑀲𑀺𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸. ‘‘𑀯𑀺𑀓𑁆𑀓𑀺𑀡𑀦𑁆𑀢𑀺𑀬𑀸’’𑀢𑀺 𑀇𑀤𑀁 ‘‘𑀲𑀼𑀭’’𑀦𑁆𑀢𑀺𑀆𑀤𑀻𑀳𑀺 𑀉𑀧𑀬𑁄𑀕𑀦𑁆𑀢𑀧𑀤𑁂𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁.

𑁨𑁯𑁬𑁩. 𑀦 𑀘𑁂𑀯𑀼𑀧𑀝𑁆𑀞𑀸𑀧𑁂𑀢𑀩𑁆𑀩𑁄𑀢𑀺 𑀅𑀢𑁆𑀢𑀦𑁄 𑀯𑁂𑀬𑁆𑀬𑀸𑀯𑀘𑁆𑀘𑀁 𑀦𑁂𑀯 𑀓𑀸𑀭𑀸𑀧𑁂𑀢𑀩𑁆𑀩𑁄. 𑀢𑀺𑀭𑀘𑁆𑀙𑀸𑀦𑀕𑀢𑁄𑀧𑀺 𑀤𑀸𑀲𑁄 𑀯𑀸 𑀤𑀸𑀲𑀻 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑁄𑀧𑀺 𑀓𑀫𑁆𑀫𑀓𑀭𑁄 𑀯𑀸 𑀦 𑀘𑁂𑀯 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄 𑀦𑁂𑀯 𑀅𑀢𑁆𑀢𑀦𑁄 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀸𑀭𑀸𑀧𑁂𑀢𑀩𑁆𑀩𑁄. 𑀅𑀧𑀺-𑀲𑀤𑁆𑀤𑁂𑀦 𑀧𑀕𑁂𑀯 𑀫𑀦𑀼𑀲𑁆𑀲𑀪𑀽𑀢𑁄𑀢𑀺 𑀤𑀻𑀧𑁂𑀢𑀺.

𑁨𑁯𑁬𑁪. ‘‘𑀲𑀩𑁆𑀩𑀦𑀻𑀮𑀸𑀤𑀺’’𑀦𑁆𑀢𑀺 𑀇𑀫𑀺𑀦𑀸 𑁋

‘‘𑀲𑀩𑁆𑀩𑀦𑀻𑀮𑀓𑀫𑀜𑁆𑀚𑁂𑀝𑁆𑀞-𑀓𑀡𑁆𑀳𑀮𑁄𑀳𑀺𑀢𑀧𑀻𑀢𑀓𑁂;

𑀫𑀳𑀸𑀦𑀸𑀫𑀫𑀳𑀸𑀭𑀗𑁆𑀕-𑀭𑀢𑁆𑀢𑁂𑀲𑀽’’𑀢𑀺. (𑀯𑀺. 𑀯𑀺. 𑁫𑁯𑁮) 𑁋

𑀯𑀼𑀢𑁆𑀢𑀸𑀦𑀺 𑀅𑀓𑀧𑁆𑀧𑀺𑀬𑀘𑀻𑀯𑀭𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀺. ‘‘𑀦𑀫𑀢𑀓𑀁 𑀦𑀸𑀫 𑀏𑀴𑀓𑀮𑁄𑀫𑁂𑀳𑀺 𑀓𑀢𑀁 𑀅𑀯𑀸𑀬𑀺𑀫𑀁 𑀘𑀫𑁆𑀫𑀔𑀡𑁆𑀟𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁨𑁬𑁪) 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀢𑁆𑀢𑀸, 𑀕𑀡𑁆𑀞𑀺𑀧𑀤𑁂 𑀘 ‘‘𑀲𑀦𑁆𑀣𑀭𑀡𑀲𑀤𑀺𑀲𑁄 𑀧𑀺𑀮𑁄𑀢𑀺𑀓𑀸𑀳𑀺 𑀓𑀢𑁄 𑀧𑀭𑀺𑀓𑁆𑀔𑀸𑀭𑀯𑀺𑀲𑁂𑀲𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘 𑀦𑀺𑀧𑀚𑁆𑀚𑀸𑀬 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄 𑀧𑀭𑀺𑀓𑁆𑀔𑀸𑀭𑀯𑀺𑀲𑁂𑀲𑁄 𑀦𑀫𑀢𑀓𑀁 𑀦𑀸𑀫.

𑁨𑁯𑁬𑁫. 𑀙𑀦𑁆𑀦𑀫𑁆𑀧𑀺 𑀧𑀼𑀭𑀺𑀲𑀩𑁆𑀬𑀜𑁆𑀚𑀦𑀁 ‘‘𑀏𑀢𑁆𑀣𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑀸𑀕𑀘𑀺𑀢𑁆𑀢𑁂𑀦 𑀑𑀮𑁄𑀓𑁂𑀦𑁆𑀢𑀺𑀬𑀸 𑀤𑀼𑀓𑁆𑀓𑀝𑀁 𑀳𑁄𑀢𑀺. 𑀲𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀩𑁆𑀩𑀁.

𑁨𑁯𑁬𑁬. 𑀪𑀺𑀓𑁆𑀔𑀼𑀁 𑀤𑀽𑀭𑀢𑁄𑀯 𑀧𑀲𑁆𑀲𑀺𑀢𑁆𑀯𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀽𑀭𑀢𑁄 𑀑𑀓𑁆𑀓𑀫𑀺𑀢𑁆𑀯𑀸𑀦 𑀫𑀕𑁆𑀕𑁄 𑀤𑀸𑀢𑀩𑁆𑀩𑁄𑀢𑀺 𑀬𑁄𑀚𑀦𑀸.

𑁨𑁯𑁬𑁭. 𑀪𑀺𑀓𑁆𑀔𑀁 𑀘𑀭𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀪𑀺𑀓𑁆𑀔𑀼𑀁 𑀧𑀲𑁆𑀲𑀺𑀢𑁆𑀯𑀸 𑀧𑀦 𑀬𑁂𑀦 𑀪𑀺𑀓𑁆𑀔𑀸𑀬 𑀘𑀭𑀢𑀺, 𑀢𑀁 𑀧𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸 𑀉𑀧𑀭𑀺 𑀙𑀸𑀤𑁂𑀢𑁆𑀯𑀸 𑀞𑀺𑀢𑀁 𑀲𑀗𑁆𑀖𑀸𑀝𑀺𑀘𑀻𑀯𑀭𑀁 𑀅𑀧𑀦𑁂𑀢𑁆𑀯𑀸 𑀉𑀓𑁆𑀓𑀼𑀚𑁆𑀚𑀁 𑀉𑀤𑁆𑀥𑀁𑀫𑀼𑀔𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑁨𑁯𑁬𑁮. 𑀉𑀢𑀼𑀦𑀻𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀢𑀼𑀓𑀸𑀮𑁂 𑀲𑀜𑁆𑀚𑀸𑀢𑀧𑀼𑀧𑁆𑀨𑁂 𑀓𑀸𑀮𑁂 𑀲𑀁𑀯𑁂𑀮𑁆𑀮𑀺𑀓𑀁 𑀓𑀸𑀢𑀼𑀁 𑀓𑀘𑁆𑀙𑀁 𑀩𑀦𑁆𑀥𑀺𑀢𑀼𑀁 𑀫𑀳𑁂𑀲𑀺𑀦𑀸 𑀓𑀝𑀺𑀲𑀼𑀢𑁆𑀢𑀓𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀬𑁄𑀚𑀦𑀸, 𑀇𑀫𑀺𑀦𑀸 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀓𑀝𑀺𑀲𑀼𑀢𑁆𑀢𑀓𑀁 𑀩𑀦𑁆𑀥𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀬𑀣𑀸𑀳 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑀸 𑀲𑀩𑁆𑀩𑀓𑀸𑀮𑀁 𑀓𑀝𑀺𑀲𑀼𑀢𑁆𑀢𑀓𑀁 𑀥𑀸𑀭𑁂𑀢𑀩𑁆𑀩𑀁, 𑀬𑀸 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀢𑀼𑀦𑀺𑀬𑀸 𑀓𑀝𑀺𑀲𑀼𑀢𑁆𑀢𑀓’’𑀦𑁆𑀢𑀺 (𑀘𑀽𑀴𑀯. 𑁪𑁨𑁨).

𑁨𑁯𑁬𑁯. 𑀇𑀢𑁆𑀣𑀺𑀧𑁄𑀲𑀬𑀼𑀢𑀦𑁆𑀢𑀺 𑀇𑀢𑁆𑀣𑀻𑀳𑀺 𑀯𑀸 𑀧𑀼𑀭𑀺𑀲𑁂𑀳𑀺 𑀯𑀸 𑀇𑀢𑁆𑀣𑀺𑀧𑀼𑀭𑀺𑀲𑁂𑀳𑀺 𑀯𑀸 𑀬𑀼𑀢𑁆𑀢𑀁. 𑀇𑀢𑁆𑀣𑀺𑀧𑁄𑀲𑀬𑀼𑀢𑁆𑀢𑀁 𑀳𑀢𑁆𑀣𑀯𑀝𑁆𑀝𑀓𑀫𑁂𑀯 𑀯𑀸. 𑀧𑀸𑀝𑀗𑁆𑀓𑀻𑀢𑀺 𑀧𑀝𑀧𑁄𑀝𑁆𑀝𑀮𑀺𑀓𑀁.

𑁨𑁯𑁭𑁦. 𑀕𑀭𑀼𑀥𑀫𑁆𑀫𑁂𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂. 𑀫𑀸𑀦𑀢𑁆𑀢𑀦𑁆𑀢𑀺 𑀧𑀓𑁆𑀔𑀫𑀸𑀦𑀢𑁆𑀢𑀁. 𑀲𑀫𑁆𑀫𑀦𑁆𑀦𑀺𑀢𑁆𑀯𑀸𑀢𑀺 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀲𑀫𑁆𑀫𑀦𑁆𑀦𑀺𑀢𑁆𑀯𑀸.

𑁨𑁯𑁭𑁧. 𑀬𑀲𑁆𑀲𑀸 𑀇𑀢𑁆𑀣𑀺𑀬𑀸 𑀧𑀩𑁆𑀩𑀚𑀺𑀢𑀓𑀸𑀮𑁂 𑀕𑀩𑁆𑀪𑁄 𑀯𑀼𑀝𑁆𑀞𑀸𑀢𑀺 𑀯𑀺𑀚𑀸𑀬𑀢𑀺 𑀬𑀤𑀺, 𑀧𑀼𑀢𑁆𑀢𑁄 𑀘𑁂, 𑀢𑀲𑁆𑀲𑀸𑀧𑀺 𑀤𑀸𑀭𑀓𑀫𑀸𑀢𑀼 𑀬𑀸𑀯 𑀲𑁄 𑀤𑀸𑀭𑀓𑁄 𑀯𑀺𑀜𑁆𑀜𑀼𑀢𑀁 𑀧𑀸𑀧𑀼𑀡𑀸𑀢𑀺, 𑀬𑀸𑀯 𑀔𑀸𑀤𑀺𑀢𑀼𑀁, 𑀪𑀼𑀜𑁆𑀚𑀺𑀢𑀼𑀁, 𑀦𑀳𑀸𑀬𑀺𑀢𑀼𑀜𑁆𑀘 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀲𑀓𑁆𑀓𑁄𑀢𑀺, 𑀢𑀸𑀯 𑀤𑀼𑀢𑀺𑀬𑀸 𑀪𑀺𑀓𑁆𑀔𑀼𑀦𑀻 𑀢𑀣𑀸 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀤𑀸𑀢𑀩𑁆𑀩𑀸𑀢𑀺 𑀬𑁄𑀚𑀦𑀸.

𑁨𑁯𑁭𑁨. 𑀲𑀸 𑀧𑀦 𑀫𑀸𑀢𑀸 𑀪𑀺𑀓𑁆𑀔𑀼𑀦𑀻 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀧𑀸𑀬𑁂𑀢𑀼𑀁, 𑀪𑁄𑀚𑁂𑀢𑀼𑀁, 𑀫𑀡𑁆𑀟𑁂𑀢𑀼𑀁, 𑀉𑀭𑁂 𑀓𑀢𑁆𑀯𑀸 𑀲𑀬𑀺𑀢𑀼𑀜𑁆𑀘 𑀮𑀪𑀢𑀻𑀢𑀺 𑀬𑁄𑀚𑀦𑀸.

𑁨𑁯𑁭𑁩. 𑀤𑀼𑀢𑀺𑀬𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀤𑀸𑀭𑀓𑁂𑀦 𑀲𑀳𑀲𑁂𑀬𑁆𑀬𑀁 𑀞𑀧𑁂𑀢𑁆𑀯𑀸 𑀬𑀣𑀸 𑀅𑀜𑁆𑀜𑁂𑀲𑀼 𑀧𑀼𑀭𑀺𑀲𑁂𑀲𑀼 𑀯𑀢𑁆𑀢𑀺𑀢𑀩𑁆𑀩𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀢𑀣𑀸 𑀏𑀯 𑀢𑀲𑁆𑀫𑀺𑀁 𑀤𑀸𑀭𑀓𑁂 𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑁨𑁯𑁭𑁪. 𑀯𑀺𑀩𑁆𑀪𑀫𑁂𑀦𑁂𑀯𑀸𑀢𑀺 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀲𑁂𑀢𑀯𑀢𑁆𑀣𑀸𑀦𑀁 𑀕𑀳𑀡𑁂𑀦𑁂𑀯. 𑀬𑀣𑀸𑀳 𑁋 ‘‘𑀬𑀲𑁆𑀫𑀸 𑀲𑀸 𑀯𑀺𑀩𑁆𑀪𑀦𑁆𑀢𑀸 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀔𑀦𑁆𑀢𑀺𑀬𑀸 𑀑𑀤𑀸𑀢𑀸𑀦𑀺 𑀯𑀢𑁆𑀣𑀸𑀦𑀺 𑀦𑀺𑀯𑀢𑁆𑀣𑀸, 𑀢𑀲𑁆𑀫𑀸𑀬𑁂𑀯 𑀲𑀸 𑀅𑀪𑀺𑀓𑁆𑀔𑀼𑀦𑀻, 𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦𑀸’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁪𑁩𑁪). 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂.

𑁨𑁯𑁭𑁫. 𑀕𑀢𑀸𑀬𑀸𑀢𑀺 𑀏𑀢𑁆𑀣 ‘‘𑀲𑀓𑀸𑀯𑀸𑀲𑀸’’𑀢𑀺 𑀲𑁂𑀲𑁄. 𑀬𑀣𑀸𑀳 𑁋 ‘‘𑀬𑀸 𑀲𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀲𑀓𑀸𑀯𑀸𑀲𑀸 𑀢𑀺𑀢𑁆𑀣𑀸𑀬𑀢𑀦𑀁 𑀲𑀗𑁆𑀓𑀦𑁆𑀢𑀸, 𑀲𑀸 𑀆𑀕𑀢𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸’’𑀢𑀺. 𑀦 𑀓𑁂𑀯𑀮𑀁 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸, 𑀧𑀩𑁆𑀩𑀚𑁆𑀚𑀫𑁆𑀧𑀺 𑀦 𑀮𑀪𑀢𑀺. 𑀑𑀤𑀸𑀢𑀸𑀦𑀺 𑀕𑀳𑁂𑀢𑁆𑀯𑀸 𑀯𑀺𑀩𑁆𑀪𑀦𑁆𑀢𑀸 𑀧𑀦 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑀁 𑀮𑀪𑀢𑀺.

𑁨𑁯𑁭𑁬. 𑀯𑀦𑁆𑀤𑀦𑀦𑁆𑀢𑀺 𑀧𑀸𑀤𑁂 𑀲𑀫𑁆𑀩𑀸𑀳𑁂𑀢𑁆𑀯𑀸 𑀯𑀦𑁆𑀤𑀦𑀁. 𑀲𑀸𑀤𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀸𑀤𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁪𑁩𑁪) 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀯𑀝𑁆𑀝𑀢𑀺. 𑀢𑀢𑁆𑀭𑁂𑀓𑁂 𑀆𑀘𑀭𑀺𑀬𑀸 ‘‘𑀲𑀘𑁂 𑀏𑀓𑀢𑁄 𑀯𑀸 𑀉𑀪𑀢𑁄 𑀯𑀸 𑀅𑀯𑀲𑁆𑀲𑀼𑀢𑀸 𑀳𑁄𑀦𑁆𑀢𑀺 𑀲𑀸𑀭𑀢𑁆𑀢𑀸, 𑀬𑀣𑀸𑀯𑀢𑁆𑀣𑀼𑀓𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀏𑀓𑁂 𑀆𑀘𑀭𑀺𑀬𑀸 ‘‘𑀦𑀢𑁆𑀣𑀺 𑀏𑀢𑁆𑀣 𑀆𑀧𑀢𑁆𑀢𑀻’’𑀢𑀺 𑀯𑀤𑀦𑁆𑀢𑀻𑀢𑀺 𑀏𑀯𑀁 𑀆𑀘𑀭𑀺𑀬𑀯𑀸𑀤𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀇𑀤𑀁 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀁 𑀯𑀝𑁆𑀝𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁, 𑀢𑀁 𑀧𑀫𑀸𑀡𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀸𑀤𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁪𑁩𑁪) 𑀳𑀺 𑀯𑀘𑀦𑁂𑀦𑁂𑀯 𑀓𑀧𑁆𑀧𑀺𑀬𑀁.

𑁨𑁯𑁭𑁭. 𑀬𑀸𑀬 𑀓𑀸𑀬𑀘𑀺 𑀯𑀘𑁆𑀘𑀓𑀼𑀝𑀺𑀬𑀸 𑀯𑀘𑁆𑀘𑁄 𑀦 𑀓𑀸𑀢𑀩𑁆𑀩𑁄, 𑀳𑁂𑀝𑁆𑀞𑀸 𑀯𑀺𑀯𑀝𑁂 𑀉𑀤𑁆𑀥𑀁 𑀧𑀝𑀺𑀘𑁆𑀙𑀦𑁆𑀦𑁂 𑀧𑀦 𑀯𑀘𑁆𑀘𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀳𑁂𑀝𑁆𑀞𑀸 𑀯𑀺𑀯𑀝𑁂 𑀉𑀧𑀭𑀺 𑀧𑀝𑀺𑀘𑁆𑀙𑀦𑁆𑀦𑁂𑀢𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀘𑁂 𑀓𑀽𑀧𑁄 𑀔𑀢𑁄 𑀳𑁄𑀢𑀺, 𑀉𑀧𑀭𑀺 𑀧𑀦 𑀧𑀤𑀭𑀫𑀢𑁆𑀢𑀫𑁂𑀯 𑀲𑀩𑁆𑀩𑀤𑀺𑀲𑀸𑀲𑀼 𑀧𑀜𑁆𑀜𑀸𑀬𑀢𑀺, 𑀏𑀯𑀭𑀽𑀧𑁂𑀧𑀺 𑀯𑀝𑁆𑀝𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁪𑁩𑁫) 𑀯𑀼𑀢𑁆𑀢𑀁.

𑁨𑁯𑁭𑁮. 𑀲𑀩𑁆𑀩𑀢𑁆𑀣𑀸𑀢𑀺 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀅𑀦𑁆𑀢𑀭𑀖𑀭𑀸𑀤𑀺𑀲𑀩𑁆𑀩𑀝𑁆𑀞𑀸𑀦𑁂𑀲𑀼. 𑀕𑀺𑀮𑀸𑀦𑀸𑀬𑀸𑀢𑀺 𑀬𑀲𑁆𑀲𑀸 𑀯𑀺𑀦𑀸 𑀧𑀮𑁆𑀮𑀗𑁆𑀓𑀁 𑀦 𑀨𑀸𑀲𑀼 𑀳𑁄𑀢𑀺. 𑀅𑀟𑁆𑀠𑀧𑀮𑁆𑀮𑀗𑁆𑀓𑀦𑁆𑀢𑀺 𑀏𑀓𑀧𑀸𑀤𑀁 𑀆𑀪𑀼𑀚𑀺𑀢𑁆𑀯𑀸 𑀓𑀢𑀧𑀮𑁆𑀮𑀗𑁆𑀓𑀁. 𑀲𑁄 𑀏𑀓𑀁 𑀧𑀡𑁆𑀳𑀺𑀁 𑀊𑀭𑀼𑀫𑀽𑀮𑀸𑀲𑀦𑁆𑀦𑀁 𑀓𑀢𑁆𑀯𑀸 𑀇𑀢𑀭𑀁 𑀤𑀽𑀭𑁂 𑀓𑀢𑁆𑀯𑀸 𑀆𑀪𑀼𑀚𑀺𑀢𑀧𑀮𑁆𑀮𑀗𑁆𑀓𑁄 𑀦𑀸𑀫.

𑁨𑁯𑁭𑁯. 𑀦𑀭𑀢𑀺𑀢𑁆𑀣𑁂𑀢𑀺 𑀧𑀼𑀭𑀺𑀲𑀸𑀦𑀁 𑀦𑀳𑀸𑀦𑀢𑀺𑀢𑁆𑀣𑁂. 𑀬𑀣𑀸𑀳 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑀸 𑀧𑀼𑀭𑀺𑀲𑀢𑀺𑀢𑁆𑀣𑁂 𑀦𑀳𑀸𑀬𑀺𑀢𑀩𑁆𑀩𑀁, 𑀬𑀸 𑀦𑀳𑀸𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀳𑀺𑀮𑀸𑀢𑀺𑀢𑁆𑀣𑁂 𑀦𑀳𑀸𑀬𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁪𑁩𑁬).

𑁨𑁯𑁮𑁦. 𑀬𑀸 𑀲𑀫𑀡𑀻 𑀕𑀦𑁆𑀥𑀘𑀼𑀡𑁆𑀡𑁂𑀦 𑀯𑀸 𑀯𑀸𑀲𑀺𑀢𑀫𑀢𑁆𑀢𑀺𑀬𑀸 𑀯𑀸𑀲𑀺𑀢𑀓𑀸𑀬 𑀫𑀢𑁆𑀢𑀺𑀓𑀸𑀬 𑀯𑀸 𑀧𑀝𑀺𑀲𑁄𑀢𑁂 𑀯𑀸 𑀦𑁆𑀳𑀸𑀬𑁂𑀬𑁆𑀬, 𑀢𑀲𑁆𑀲𑀸 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀯𑀸𑀲𑀺𑀢𑀯𑀺𑀲𑁂𑀲𑀦𑁂𑀦 𑀅𑀯𑀸𑀲𑀺𑀢𑀸 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀬𑀣𑀸𑀳 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀓𑀢𑀺𑀫𑀢𑁆𑀢𑀺𑀓’’𑀦𑁆𑀢𑀺 (𑀘𑀽𑀴𑀯. 𑁪𑁩𑁬).

𑁨𑁯𑁮𑁧. 𑀅𑀪𑀼𑀢𑁆𑀯𑀸𑀢𑀺 𑀏𑀢𑁆𑀣 𑀆𑀫𑀺𑀲𑀅𑀕𑁆𑀕𑀁 𑀕𑀳𑀡𑀫𑀢𑁆𑀢𑀫𑁆𑀧𑀺 𑀅𑀓𑀢𑁆𑀯𑀸, 𑀧𑀢𑁆𑀢𑀘𑀻𑀯𑀭𑀁 𑀓𑀢𑀺𑀧𑀬𑀤𑀺𑀯𑀲𑀸𑀦𑀺𑀧𑀺 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀘𑁂 𑀅𑀲𑀧𑁆𑀧𑀸𑀬𑀁, 𑀲𑀩𑁆𑀩𑀫𑁆𑀧𑀺 𑀅𑀧𑀦𑁂𑀢𑀼𑀁 𑀯𑀝𑁆𑀝𑀢𑀺.

𑁨𑁯𑁮𑁨. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀅𑀲𑀦𑁆𑀢𑁂 𑀲𑀩𑁆𑀩𑀁 𑀪𑀺𑀓𑁆𑀔𑀽𑀳𑀺 𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀲𑀦𑁆𑀦𑀺𑀥𑀺𑀓𑀢𑀁 𑀯𑀸 𑀲𑀩𑁆𑀩𑀁 𑀅𑀚𑁆𑀛𑁄𑀳𑀭𑀡𑀻𑀬𑀁 𑀪𑀺𑀓𑁆𑀔𑀽𑀳𑀺 𑀧𑀝𑀺𑀕𑁆𑀕𑀳𑀸𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀪𑀺𑀓𑁆𑀔𑀼𑀦𑀻𑀦𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. ‘‘𑀪𑀺𑀓𑁆𑀔𑀼𑀦𑀻𑀦𑀁 𑀯𑀝𑁆𑀝𑀢𑀻’’𑀢𑀺 𑀇𑀤𑀁 𑀧𑀓𑀭𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀼𑀦𑀻𑀳𑀺𑀧𑀺 𑀧𑀝𑀺𑀕𑁆𑀕𑀳𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀫𑁆𑀧𑀺 𑀢𑀣𑀸𑀯𑀺𑀥𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀣𑀸𑀳 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀲𑀦𑁆𑀦𑀺𑀥𑀺𑀁 𑀪𑀺𑀓𑁆𑀔𑀼𑀦𑀻𑀳𑀺 𑀧𑀝𑀺𑀕𑁆𑀕𑀸𑀳𑀸𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁪𑁨𑁧).

𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.