𑀦𑀺𑀲𑁆𑀲𑀕𑁆𑀕𑀺𑀬𑀓𑀣𑀸𑀯𑀡𑁆𑀡𑀦𑀸

𑁫𑁫𑁧. 𑀏𑀯𑀁 𑀅𑀦𑀺𑀬𑀢𑀓𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀓𑀣𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀔𑁄𑀫’’𑀦𑁆𑀢𑀺𑀆𑀤𑀺. 𑀔𑁄𑀫𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀘𑀻𑀯𑀭𑀁. 𑀔𑁄𑀫𑀦𑁆𑀢𑀺 𑀕𑀘𑁆𑀙𑀯𑀺𑀲𑁂𑀲𑀲𑁆𑀲 𑀦𑀸𑀫𑀁, 𑀢𑀲𑁆𑀲 𑀯𑀸𑀓𑁂𑀳𑀺 𑀓𑀢𑀘𑀻𑀯𑀭𑀁 𑀓𑀸𑀭𑀡𑁄𑀧𑀘𑀸𑀭𑀯𑁄𑀳𑀸𑀭𑀯𑀲𑁂𑀦 ‘‘𑀔𑁄𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀧𑁆𑀧𑀸𑀲𑀦𑁆𑀢𑀺 𑀓𑀧𑁆𑀧𑀸𑀲𑀲𑀼𑀢𑁆𑀢𑀫𑀬𑀁 𑀘𑀻𑀯𑀭𑀁, 𑀇𑀤𑀫𑁆𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 ‘‘𑀓𑀧𑁆𑀧𑀸𑀲’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑁄𑀲𑁂𑀬𑁆𑀬𑀁 𑀦𑀸𑀫 𑀓𑁄𑀲𑀓𑀸𑀭𑀓𑀺𑀫𑀺𑀓𑁄𑀲𑀁, 𑀓𑁄𑀲𑁂𑀦 𑀦𑀺𑀩𑁆𑀩𑀢𑁆𑀢𑀁 𑀲𑀼𑀢𑁆𑀢𑀁 𑀓𑁄𑀲𑁂𑀬𑁆𑀬𑀁. 𑀇𑀥 𑀧𑀦 𑀢𑁂𑀦 𑀓𑁄𑀲𑁂𑀬𑁆𑀬𑀲𑀼𑀢𑁆𑀢𑁂𑀦 𑀦𑀺𑀩𑁆𑀩𑀢𑁆𑀢𑀁 𑀘𑀻𑀯𑀭𑀁 ‘‘𑀓𑁄𑀲𑁂𑀬𑁆𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀸𑀡𑀦𑁆𑀢𑀺 𑀲𑀸𑀡𑀯𑀸𑀓𑀲𑀼𑀢𑁆𑀢𑁂𑀳𑀺 𑀯𑀸𑀬𑀺𑀢𑁆𑀯𑀸 𑀓𑀢𑀘𑀻𑀯𑀭𑀁. 𑀇𑀤𑀜𑁆𑀘 𑀔𑁄𑀫𑀁 𑀯𑀺𑀬 𑀤𑀝𑁆𑀞𑀩𑁆𑀩𑀁. 𑀪𑀗𑁆𑀕𑀦𑁆𑀢𑀺 𑀔𑁄𑀫𑀲𑀼𑀢𑁆𑀢𑀸𑀤𑀻𑀦𑀺 𑀲𑀩𑁆𑀩𑀸𑀦𑀺, 𑀏𑀓𑀘𑁆𑀘𑀸𑀦𑀺 𑀯𑀸 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀘𑀻𑀯𑀭𑀁. 𑀇𑀤𑀫𑁆𑀧𑀺 𑀓𑀭𑀡𑀧𑁆𑀧𑀓𑀸𑀭𑁂𑀦 𑀮𑀤𑁆𑀥𑀦𑀸𑀫𑀓𑀁. ‘‘𑀪𑀗𑁆𑀕𑀁 𑀦𑀸𑀫 𑀏𑀓𑀸 𑀕𑀘𑁆𑀙𑀚𑀸𑀢𑀺, 𑀢𑀲𑁆𑀲𑀸 𑀯𑀸𑀓𑀫𑀬𑀲𑀼𑀢𑁆𑀢𑁂𑀳𑀺 𑀯𑀸𑀬𑀺𑀢𑁆𑀯𑀸 𑀓𑀢𑀘𑀻𑀯𑀭’’𑀦𑁆𑀢𑀺 𑀓𑁂𑀘𑀺. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀔𑁄𑀫𑀁 𑀯𑀺𑀬 𑀕𑀳𑁂𑀢𑀩𑁆𑀩𑀁. 𑀓𑀫𑁆𑀩𑀮𑀦𑁆𑀢𑀺 𑀫𑀦𑀼𑀲𑁆𑀲𑀮𑁄𑀫𑀯𑀸𑀴𑀮𑁄𑀫𑀁 𑀯𑀺𑀦𑀸 𑀲𑁂𑀲𑀮𑁄𑀫𑁂𑀳𑀺 𑀯𑀸𑀬𑀺𑀢𑁆𑀯𑀸 𑀓𑀢𑀘𑀻𑀯𑀭𑀁 𑀯𑀼𑀢𑁆𑀢𑀦𑁆𑀢𑀺. 𑀇𑀤𑀁 ‘‘𑀘𑀻𑀯𑀭𑀁 𑀦𑀸𑀫 𑀙𑀦𑁆𑀦𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀁 𑀘𑀻𑀯𑀭’’𑀦𑁆𑀢𑀺 (𑀧𑀸𑀭𑀸. 𑁪𑁬𑁩) 𑀧𑀤𑀪𑀸𑀚𑀦𑁂 𑀘 ‘‘𑀔𑁄𑀫𑀁 𑀓𑀧𑁆𑀧𑀸𑀲𑀺𑀓𑀁 𑀓𑁄𑀲𑁂𑀬𑁆𑀬𑀁 𑀓𑀫𑁆𑀩𑀮𑀁 𑀲𑀸𑀡𑀁 𑀪𑀗𑁆𑀕’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁨-𑁪𑁬𑁩) 𑀅𑀝𑁆𑀞𑀓𑀣𑀸𑀬 𑀘 𑀯𑀼𑀢𑁆𑀢𑀁 𑀲𑀦𑁆𑀥𑀸𑀬𑀸𑀳. ‘‘𑀚𑀸𑀢𑀺𑀢𑁄’’𑀢𑀺 𑀇𑀤𑀁 𑀧𑀫𑀸𑀡𑀸𑀤𑀺𑀪𑁂𑀤𑀲𑁆𑀲 𑀯𑀓𑁆𑀔𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀚𑀸𑀢𑀺𑀢𑁄𑀢𑀺 𑀔𑁄𑀫𑀸𑀤𑀺𑀲𑀸𑀫𑀜𑁆𑀜𑀢𑁄. 𑀲𑀸𑀫𑀜𑁆𑀜𑀜𑁆𑀳𑀺 ‘‘𑀚𑀸𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀤𑀻𑀖𑀭𑀲𑁆𑀲𑀣𑀽𑀮𑀲𑀼𑀔𑀼𑀫𑀦𑀻𑀮𑀧𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀁 𑀲𑀩𑁆𑀩𑁂𑀲𑀁 𑀯𑀢𑁆𑀣𑀸𑀯𑀬𑀯𑀸𑀦𑀁 𑀲𑀗𑁆𑀕𑀸𑀳𑀺𑀓𑀔𑁄𑀫𑀲𑀼𑀢𑁆𑀢𑀫𑀬𑀢𑀸𑀲𑀸𑀫𑀜𑁆𑀜𑀁 𑀚𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑁫𑁫𑁨. 𑀤𑀼𑀓𑀽𑀮𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀭𑀼𑀓𑁆𑀔𑀯𑀸𑀓𑀫𑀬𑀘𑀻𑀯𑀭𑀁. 𑀧𑀢𑁆𑀢𑀼𑀡𑁆𑀡𑀦𑁆𑀢𑀺 𑀧𑀢𑁆𑀢𑀼𑀡𑁆𑀡𑀤𑁂𑀲𑁂 𑀲𑀜𑁆𑀚𑀸𑀢𑀯𑀢𑁆𑀣𑀁. ‘‘𑀧𑀢𑁆𑀢𑀼𑀡𑁆𑀡𑀁 𑀓𑁄𑀲𑁂𑀬𑁆𑀬𑀯𑀺𑀲𑁂𑀲𑁄’’𑀢𑀺 𑀅𑀪𑀺𑀥𑀸𑀦𑀓𑁄𑀲𑁂 𑀯𑀼𑀢𑁆𑀢𑀁. 𑀘𑀺𑀦𑀦𑁆𑀢𑀺 𑀘𑀺𑀦𑀤𑁂𑀲𑁂 𑀉𑀧𑁆𑀧𑀦𑁆𑀦𑀯𑀢𑁆𑀣𑀁. 𑀲𑁄𑀫𑀸𑀭𑀧𑀝𑁆𑀝𑀓𑀦𑁆𑀢𑀺 𑀲𑁄𑀫𑀸𑀭𑀤𑁂𑀲𑁂 𑀉𑀧𑁆𑀧𑀦𑁆𑀦𑀯𑀢𑁆𑀣𑀁. ‘‘𑀲𑁄𑀫𑀸𑀭𑀘𑀺𑀦𑀧𑀝𑀓’’𑀦𑁆𑀢𑀺𑀧𑀺 𑀮𑀺𑀔𑀦𑁆𑀢𑀺, 𑀲𑁄𑀬𑁂𑀯𑀢𑁆𑀣𑁄. 𑀇𑀤𑁆𑀥𑀺𑀚𑀦𑁆𑀢𑀺 𑀏𑀳𑀺𑀪𑀺𑀓𑁆𑀔𑀽𑀦𑀁 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀦𑀺𑀩𑁆𑀩𑀢𑁆𑀢𑀁 𑀘𑀻𑀯𑀭𑀁. 𑀤𑁂𑀯𑀤𑀺𑀦𑁆𑀦𑀦𑁆𑀢𑀺 𑀤𑁂𑀯𑀢𑀸𑀳𑀺 𑀤𑀺𑀦𑁆𑀦𑀁 𑀘𑀻𑀯𑀭𑀁. 𑀢𑀜𑁆𑀳𑀺 𑀓𑀧𑁆𑀧𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑀁, 𑀚𑀸𑀮𑀺𑀦𑀺𑀬𑀸 𑀤𑁂𑀯𑀓𑀜𑁆𑀜𑀸𑀬 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀤𑀺𑀦𑁆𑀦𑀯𑀢𑁆𑀣𑀲𑀤𑀺𑀲𑀁. 𑀢𑀲𑁆𑀲𑀸𑀢𑀺 𑀚𑀸𑀢𑀺𑀢𑁄 𑀙𑀩𑁆𑀩𑀺𑀥𑀲𑁆𑀲 𑀓𑀧𑁆𑀧𑀺𑀬𑀘𑀻𑀯𑀭𑀲𑁆𑀲. 𑀇𑀤𑀁 𑀙𑀩𑁆𑀩𑀺𑀥𑀘𑀻𑀯𑀭𑀁 𑀬𑀣𑀸𑀭𑀳𑀁 𑀅𑀦𑀼𑀮𑁄𑀫𑀺𑀓𑀁 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀓𑀽𑀮𑀜𑁆𑀳𑀺 𑀲𑀸𑀡𑀲𑁆𑀲 𑀅𑀦𑀼𑀮𑁄𑀫𑀁 𑀯𑀸𑀓𑀫𑀬𑀢𑁆𑀢𑀸, 𑀧𑀢𑁆𑀢𑀼𑀡𑁆𑀡𑀸𑀤𑀻𑀦𑀺 𑀓𑁄𑀲𑁂𑀬𑁆𑀬𑀲𑁆𑀲 𑀅𑀦𑀼𑀮𑁄𑀫𑀸𑀦𑀺 𑀧𑀸𑀡𑀓𑁂𑀳𑀺 𑀓𑀢𑀲𑀼𑀢𑁆𑀢𑀫𑀬𑀢𑁆𑀢𑀸, 𑀇𑀤𑁆𑀥𑀺𑀚𑀫𑁆𑀧𑀺 𑀔𑁄𑀫𑀸𑀤𑀻𑀦𑀁𑀬𑁂𑀯 𑀅𑀜𑁆𑀜𑀢𑀭𑀁 𑀳𑁄𑀢𑀻𑀢𑀺 𑀢𑁂𑀲𑀁 𑀅𑀦𑀼𑀮𑁄𑀫𑀁, 𑀤𑁂𑀯𑀤𑀺𑀦𑁆𑀦𑀫𑁆𑀧𑀺 𑀔𑁄𑀫𑀸𑀤𑀻𑀦𑀁𑀬𑁂𑀯 𑀅𑀦𑀼𑀮𑁄𑀫𑀁 𑀳𑁄𑀢𑀺 𑀢𑁂𑀲𑀁 𑀅𑀜𑁆𑀜𑀢𑀭𑀪𑀸𑀯𑀢𑁄. 𑀬𑀣𑀸𑀳 𑁋

‘‘𑀲𑀸𑀡𑀲𑁆𑀲 𑀢𑀼 𑀤𑀼𑀓𑀽𑀮𑀜𑁆𑀳𑀺, 𑀇𑀤𑁆𑀥𑀺𑀚𑀁 𑀤𑁂𑀯𑀤𑀺𑀦𑁆𑀦𑀓𑀁;

𑀔𑁄𑀫𑀸𑀤𑀻𑀦𑀁𑀯𑀲𑀺𑀝𑁆𑀞𑀁𑀢𑀼, 𑀓𑁄𑀲𑁂𑀬𑁆𑀬𑀲𑁆𑀲𑀸𑀦𑀼𑀮𑁄𑀫𑀺𑀓’’𑀦𑁆𑀢𑀺.

𑁫𑁫𑁩. 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀲𑀫𑀸𑀳𑀸𑀭𑁄 𑀢𑀺𑀘𑀻𑀯𑀭𑀦𑁆𑀢𑀺 𑀧𑀫𑀸𑀡𑀬𑀼𑀢𑁆𑀢𑀁 𑀲𑀗𑁆𑀖𑀸𑀝𑀺𑀆𑀤𑀺𑀦𑀸𑀫𑁂𑀦 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀲𑁂𑀯 𑀦𑀸𑀫𑀢𑁆𑀢𑀸 𑀢𑀤𑁂𑀯 𑀯𑀼𑀘𑁆𑀘𑀢𑀺. 𑀕𑀡𑀦𑀯𑀲𑁂𑀦 𑀬𑀁 𑀓𑀺𑀜𑁆𑀘𑀺 𑀘𑀻𑀯𑀭𑀢𑁆𑀢𑀬𑀁 𑀦 𑀯𑀢𑁆𑀢𑀩𑁆𑀩𑀁. 𑀲𑀫𑀼𑀤𑁆𑀤𑁂𑀓𑀤𑁂𑀲𑁄𑀧𑀺 𑀬𑀣𑀸 ‘‘𑀲𑀫𑀼𑀤𑁆𑀤𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀅𑀥𑀺𑀝𑁆𑀞𑀺𑀢𑁂𑀲𑀼 𑀢𑀻𑀲𑀼 𑀘𑀻𑀯𑀭𑁂𑀲𑀼 𑀅𑀜𑁆𑀜𑀢𑀭𑀁 ‘‘𑀢𑀺𑀘𑀻𑀯𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑁆𑀢𑀺 𑀲𑀗𑁆𑀖𑀸𑀝𑀺𑀆𑀤𑀺𑀯𑀺𑀲𑀺𑀝𑁆𑀞𑀦𑀸𑀫𑁂𑀳𑀺 𑀅𑀦𑀥𑀺𑀝𑁆𑀞𑀺𑀢𑀁 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀆𑀬𑀸𑀫𑁂𑀦 𑀅𑀝𑁆𑀞𑀗𑁆𑀕𑀼𑀮𑀁 𑀲𑀼𑀕𑀢𑀗𑁆𑀕𑀼𑀮𑁂𑀦 𑀘𑀢𑀼𑀭𑀗𑁆𑀕𑀼𑀮𑀯𑀺𑀢𑁆𑀣𑀢𑀁 𑀧𑀘𑁆𑀙𑀺𑀫𑀁 𑀘𑀻𑀯𑀭’’𑀦𑁆𑀢𑀺 (𑀧𑀸𑀭𑀸. 𑁩𑁫𑁮) 𑀅𑀦𑀼𑀜𑁆𑀜𑀸𑀢𑀁 𑀧𑀘𑁆𑀙𑀺𑀫𑀘𑀻𑀯𑀭𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀓𑀢𑀸𑀓𑀢𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀘𑀻𑀯𑀭𑀲𑁆𑀲 𑀭𑀼𑀴𑁆𑀳𑀺𑀲𑀜𑁆𑀜𑀸.

𑀫𑀼𑀔𑀁 𑀲𑀦𑁆𑀤𑀫𑀸𑀦𑀮𑀸𑀮𑀁 𑀧𑀼𑀜𑁆𑀙𑀢𑀺 𑀏𑀢𑁂𑀦𑀸𑀢𑀺 𑀫𑀼𑀔𑀧𑀼𑀜𑁆𑀙𑀦𑀦𑁆𑀢𑀺 𑀓𑀧𑁄𑀮𑀢𑁄 𑀦𑀺𑀘𑁆𑀘𑀁 𑀲𑀦𑁆𑀤𑀫𑀸𑀦𑀮𑀸𑀮𑀸𑀦𑀁 𑀧𑀼𑀜𑁆𑀙𑀦𑀢𑁆𑀣𑀸𑀬 𑀅𑀦𑀼𑀜𑁆𑀜𑀸𑀢𑀲𑁆𑀲 𑀘𑀻𑀯𑀭𑀯𑀺𑀲𑁂𑀲𑀲𑁆𑀲 𑀦𑀸𑀫𑀁. 𑀦𑀺𑀲𑀻𑀤𑀦𑁆𑀢𑀺 𑀏𑀢𑁆𑀣𑀸𑀢𑀺 𑀦𑀺𑀲𑀻𑀤𑀦𑀦𑁆𑀢𑀺 𑀘 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀭𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀅𑀦𑀼𑀜𑁆𑀜𑀸𑀢𑀲𑁆𑀲 𑀘𑀻𑀯𑀭𑀲𑁆𑀲 𑀦𑀸𑀫𑀁. 𑀅𑀥𑀺𑀝𑁆𑀞𑁂𑀬𑁆𑀬𑀸𑀢𑀺 ‘‘𑀇𑀫𑀁 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺’’𑀦𑁆𑀢𑀺𑀆𑀤𑀺𑀦𑀸 (𑀯𑀺. 𑀯𑀺. 𑁫𑁮𑁫) 𑀯𑀓𑁆𑀔𑀫𑀸𑀦𑀦𑀬𑁂𑀦 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀅𑀥𑀺𑀝𑁆𑀞𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀢𑁆𑀣𑀭𑀡𑀫𑁂𑀯 𑀘𑀸𑀢𑀺 𑀲𑀗𑁆𑀖𑀺𑀓𑁂 𑀫𑀜𑁆𑀘𑀧𑀻𑀞𑁂 𑀲𑀭𑀻𑀭𑀲𑀫𑁆𑀨𑀼𑀲𑀦𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀸𑀬 𑀆𑀧𑀢𑁆𑀢𑀺𑀬𑀸 𑀫𑁄𑀘𑀦𑀢𑁆𑀣𑀸𑀬 𑀢𑀢𑁆𑀣 𑀅𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀪𑁄𑀕𑀢𑁆𑀣𑀸𑀬 𑀅𑀦𑀼𑀜𑁆𑀜𑀸𑀢𑀁 𑀧𑀘𑁆𑀘𑀢𑁆𑀣𑀭𑀡𑀘𑀻𑀯𑀭𑀜𑁆𑀘.

𑁫𑁫𑁪. 𑀏𑀓𑀸𑀳𑀦𑁆𑀢𑀺 𑀯𑀲𑀦𑀓𑀺𑀭𑀺𑀬𑀸𑀬 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀢𑀺𑀘𑀻𑀯𑀭𑀦𑁆𑀢𑀺 𑀢𑀺𑀘𑀻𑀯𑀭𑁂𑀦. 𑀯𑀺𑀧𑁆𑀧𑀯𑀲𑁂𑀬𑁆𑀬𑀸𑀢𑀺 ‘‘𑀲𑀗𑁆𑀖𑀸𑀝𑀺𑀬𑀸 𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀯𑀸 𑀅𑀦𑁆𑀢𑀭𑀯𑀸𑀲𑀓𑁂𑀦 𑀯𑀸’’𑀢𑀺 (𑀧𑀸𑀭𑀸. 𑁪𑁭𑁬) 𑀯𑀼𑀢𑁆𑀢𑀢𑁆𑀢𑀸 𑀏𑀓𑀤𑁂𑀲𑁂 𑀲𑀫𑀼𑀤𑀸𑀬𑁄𑀧𑀘𑀸𑀭𑀯𑀲𑁂𑀦 𑀅𑀯𑀬𑀯𑀲𑁆𑀲 𑀯𑀘𑀦𑀢𑁄 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑁂𑀦𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀯𑀺𑀦𑀸’’𑀢𑀺 𑀇𑀤𑀁 𑀧𑀘𑁆𑀘𑀸𑀫𑀲𑀢𑀺. 𑀅𑀥𑀺𑀝𑁆𑀞𑀸𑀢𑀺 𑀅𑀥𑀺𑀝𑁆𑀞𑀸𑀬𑀸𑀢𑀺 𑀕𑀳𑁂𑀢𑀩𑁆𑀩𑀁 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄’’𑀢𑀺 (𑀫. 𑀦𑀺. 𑁧.𑁨𑁨, 𑁨𑁩; 𑀅. 𑀦𑀺. 𑁬.𑁫𑁮) 𑀬𑀣𑀸, 𑀏𑀢𑁆𑀣 ‘‘𑀯𑀴𑀜𑁆𑀚𑀺𑀬𑀫𑀸𑀦’’𑀦𑁆𑀢𑀺 𑀲𑁂𑀲𑁄, 𑀅𑀥𑀺𑀝𑁆𑀞𑀸𑀬 𑀯𑀴𑀜𑁆𑀚𑀺𑀬𑀫𑀸𑀦𑀁 𑀦𑀺𑀲𑀻𑀤𑀦𑀁 𑀢𑀣𑀸 𑀯𑀺𑀦𑀸 𑀘𑀢𑀼𑀫𑀸𑀲𑀁 𑀦 𑀯𑀲𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑁫𑁫𑁫. 𑀓𑀧𑁆𑀧𑀺𑀬𑀦𑁆𑀢𑀺 𑀓𑀧𑁆𑀧𑀺𑀬𑀓𑀸𑀭𑀡𑀁 𑀦𑀻𑀮𑀸𑀤𑀺𑀯𑀡𑁆𑀡𑀪𑁂𑀤𑀓𑀭𑀡𑀁. 𑀓𑀧𑁆𑀧𑀺𑀬𑀦𑁆𑀢𑀺 𑀘 𑀓𑀸𑀭𑀡𑁂 𑀓𑀸𑀭𑀺𑀬𑀽𑀧𑀘𑀸𑀭𑁂𑀦 𑀕𑀳𑁂𑀢𑀩𑁆𑀩𑀁. 𑀩𑀺𑀦𑁆𑀤𑀼𑀁 𑀤𑀢𑁆𑀯𑀸𑀢𑀺 ‘‘𑀦𑀻𑀮𑀁 𑀯𑀸 𑀓𑀤𑁆𑀤𑀫𑀁 𑀯𑀸 𑀓𑀸𑀴𑀲𑀸𑀫𑀁 𑀯𑀸’’𑀢𑀺 (𑀧𑀸𑀘𑀺. 𑁩𑁬𑁮) 𑀯𑀼𑀢𑁆𑀢𑀮𑁄𑀳𑀫𑀮𑀸𑀤𑀺𑀦𑀸 𑀬𑁂𑀦 𑀓𑁂𑀦𑀘𑀺𑀧𑀺 𑀫𑀗𑁆𑀕𑀼𑀮𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀸𑀤𑀺𑀓𑀁 𑀩𑀺𑀦𑁆𑀤𑀼𑀁 𑀤𑀢𑁆𑀯𑀸. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀅𑀥𑀺𑀝𑁆𑀞𑀸𑀢𑀩𑁆𑀩𑁂𑀲𑀼 𑀢𑀺𑀘𑀻𑀯𑀭𑀸𑀤𑀻𑀲𑀼, 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀢𑀺𑀘𑀻𑀯𑀭𑀦𑁆𑀢𑀺 𑀦𑀺𑀤𑁆𑀥𑀸𑀭𑀺𑀢𑀩𑁆𑀩𑀁. 𑀉𑀧𑀧𑀦𑁆𑀦𑀦𑁆𑀢𑀺 𑀬𑀼𑀢𑁆𑀢𑀁. 𑀧𑀫𑀸𑀡𑁂𑀦𑀸𑀢𑀺 𑀅𑀦𑀦𑁆𑀢𑀭𑀁 𑀯𑀓𑁆𑀔𑀫𑀸𑀦𑁂𑀦 𑀧𑀫𑀸𑀡𑁂𑀦. 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀓𑁆𑀔𑀫𑀸𑀦𑀦𑀬𑁂𑀦 𑀦𑀸𑀫𑀁 𑀯𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀏𑀯𑀓𑀸𑀭𑁂𑀦 𑀧𑀦 𑀦𑀸𑀫𑀁 𑀯𑀢𑁆𑀯𑀸 𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄 𑀲𑁂𑀲𑀘𑀻𑀯𑀭𑁂𑀲𑀼𑀧𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀁, 𑀦 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺𑀆𑀤𑀺 (𑀫𑀳𑀸𑀯. 𑁩𑁫𑁮). 𑀢𑀲𑁆𑀫𑀸 𑀢𑀺𑀘𑀻𑀯𑀭𑀸𑀤𑀻𑀦𑀺 𑀅𑀥𑀺𑀝𑁆𑀞𑀳𑀦𑁆𑀢𑁂𑀦 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀸𑀫𑀁 𑀯𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀯𑀺𑀓𑀧𑁆𑀧𑁂𑀦𑁆𑀢𑁂𑀦 𑀧𑀦 ‘‘𑀇𑀫𑀁 𑀲𑀗𑁆𑀖𑀸𑀝𑀺’’𑀦𑁆𑀢𑀺𑀆𑀤𑀺𑀦𑀸 𑀢𑀲𑁆𑀲 𑀘𑀻𑀯𑀭𑀲𑁆𑀲 𑀦𑀸𑀫𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀇𑀫𑀁 𑀘𑀻𑀯𑀭𑀁 𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀺𑀓𑀧𑁆𑀧𑁂𑀢𑀩𑁆𑀩𑀁. 𑀢𑀺𑀘𑀻𑀯𑀭𑀁 𑀯𑀸 𑀳𑁄𑀢𑀼 𑀅𑀜𑁆𑀜𑀁 𑀯𑀸, 𑀬𑀤𑀺 𑀢𑀁 𑀢𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀺, 𑀅𑀯𑀺𑀓𑀧𑁆𑀧𑀺𑀢𑀁 𑀳𑁄𑀢𑀺 𑀅𑀢𑀺𑀭𑁂𑀓𑀘𑀻𑀯𑀭𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀢𑀁 𑀘𑀻𑀯𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁫𑁬-𑁭. ‘‘𑀉𑀧𑀧𑀦𑁆𑀦𑀁 𑀧𑀫𑀸𑀡𑁂𑀦𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑁆𑀧𑀫𑀸𑀡𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀘𑁆𑀙𑀺𑀫𑀦𑁆𑀢𑁂𑀦𑀸’’𑀢𑀺𑀆𑀤𑀺. 𑀲𑀗𑁆𑀖𑀝𑀺𑀢𑀝𑁆𑀞𑁂𑀦 𑀲𑀗𑁆𑀖𑀸𑀝𑀺. 𑀯𑀢𑁆𑀣𑀔𑀡𑁆𑀟𑀸𑀦𑀺 𑀲𑀺𑀩𑁆𑀩𑀦𑀓𑀫𑁆𑀫𑁂𑀦 𑀲𑀗𑁆𑀖𑀝𑁂𑀢𑁆𑀯𑀸 𑀓𑀢𑀢𑁆𑀢𑀸 ‘‘𑀲𑀗𑁆𑀖𑀸𑀝𑀻’’𑀢𑀺 𑀘𑀻𑀯𑀭𑀸𑀦𑀁 𑀲𑀸𑀫𑀜𑁆𑀜𑀦𑀸𑀫𑀁. 𑀇𑀥 𑀧𑀦 𑀭𑀼𑀴𑁆𑀳𑀺𑀬𑀸 𑀅𑀦𑁆𑀢𑀭𑀯𑀸𑀲𑀓𑀸𑀤𑀺𑀯𑀺𑀲𑁂𑀲𑀦𑀸𑀫𑀩𑁆𑀬𑀢𑀺𑀭𑀺𑀢𑁆𑀢𑁂 𑀘𑀻𑀯𑀭𑀯𑀺𑀲𑁂𑀲𑁂 𑀯𑀢𑁆𑀢𑀢𑀺. 𑀫𑀼𑀝𑁆𑀞𑀺𑀧𑀜𑁆𑀘𑀓𑀸𑀢𑀺 𑀏𑀢𑁆𑀣 𑀏𑀓𑀸𑀤𑀻𑀦𑀫𑀝𑁆𑀞𑀸𑀭𑀲𑀦𑁆𑀢𑀸𑀦𑀁 𑀲𑀗𑁆𑀔𑁆𑀬𑀸𑀲𑀤𑁆𑀤𑀸𑀦𑀁 𑀲𑀗𑁆𑀔𑁆𑀬𑁂𑀬𑁆𑀬𑁂 𑀯𑀢𑁆𑀢𑀫𑀸𑀦𑀢𑁆𑀢𑀸 𑀧𑀜𑁆𑀘𑀲𑀤𑁆𑀤𑁄 𑀘𑀻𑀯𑀭𑀧𑁆𑀧𑀫𑀸𑀡𑀧𑁆𑀧𑀓𑀭𑀡𑀢𑁄 𑀮𑀩𑁆𑀪𑀫𑀸𑀦𑀳𑀢𑁆𑀣𑀲𑀗𑁆𑀔𑀸𑀢𑀭𑀢𑀦𑁂𑀬𑁂𑀯 𑀧𑀯𑀢𑁆𑀢𑀢𑀺, 𑀢𑁂𑀦𑁂𑀯 𑀫𑀼𑀝𑁆𑀞𑀺𑀲𑀤𑁆𑀤𑁄𑀧𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀫𑀼𑀝𑁆𑀞𑀺𑀭𑀢𑀦𑁂 𑀯𑀢𑁆𑀢𑀢𑀺. 𑀧𑀜𑁆𑀘𑀦𑁆𑀦𑀁 𑀧𑀽𑀭𑀡𑁄 𑀧𑀜𑁆𑀘𑀫𑁄, 𑀫𑀼𑀝𑁆𑀞𑀺𑀬𑀸 𑀧𑀜𑁆𑀘𑀫𑁄 𑀫𑀼𑀝𑁆𑀞𑀺𑀧𑀜𑁆𑀘𑀫𑁄. 𑀫𑀼𑀝𑁆𑀞𑀺𑀧𑀜𑁆𑀘𑀫𑁄 𑀧𑀭𑀺𑀫𑀸𑀡𑀫𑁂𑀢𑀺𑀲𑁆𑀲𑀸𑀢𑀺 ‘‘𑀫𑀼𑀝𑁆𑀞𑀺𑀧𑀜𑁆𑀘𑀫𑀓𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀫-𑀓𑀸𑀭𑀮𑁄𑀧𑁂𑀦 ‘‘𑀫𑀼𑀝𑁆𑀞𑀺𑀧𑀜𑁆𑀘𑀓𑀸’’𑀢𑀺 𑀲𑀗𑁆𑀖𑀸𑀝𑀺 𑀯𑀼𑀢𑁆𑀢𑀸.

𑀫𑀼𑀝𑁆𑀞𑀺𑀢𑁆𑀢𑀺𑀓𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀲𑀗𑁆𑀔𑁆𑀬𑁂𑀬𑁆𑀬𑁂 𑀯𑀢𑁆𑀢𑀫𑀸𑀦𑁄 𑀢𑀺-𑀲𑀤𑁆𑀤𑁄 𑀘𑀻𑀯𑀭𑀧𑁆𑀧𑀫𑀸𑀡𑀧𑁆𑀧𑀓𑀭𑀡𑀢𑁄 𑀮𑀩𑁆𑀪𑀫𑀸𑀦𑀳𑀢𑁆𑀣𑀲𑀗𑁆𑀔𑀸𑀢𑀭𑀢𑀦𑁂𑀬𑁂𑀯 𑀯𑀢𑁆𑀢𑀢𑀺, 𑀢𑁂𑀦𑁂𑀯 𑀫𑀼𑀝𑁆𑀞𑀺𑀲𑀤𑁆𑀤𑁄𑀧𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀫𑀼𑀝𑁆𑀞𑀺𑀭𑀢𑀦𑁂 𑀯𑀢𑁆𑀢𑀢𑀺. 𑀢𑀺𑀡𑁆𑀡𑀁 𑀧𑀽𑀭𑀡𑁄 𑀢𑀢𑀺𑀬𑁄, 𑀫𑀼𑀝𑁆𑀞𑀺𑀬𑀸 𑀢𑀢𑀺𑀬𑁄 𑀫𑀼𑀝𑁆𑀞𑀺𑀢𑀢𑀺𑀬𑁄, 𑀫𑀼𑀝𑁆𑀞𑀺𑀢𑀢𑀺𑀬𑁄 𑀧𑀭𑀺𑀫𑀸𑀡𑀫𑁂𑀢𑀺𑀲𑁆𑀲𑀸𑀢𑀺 ‘‘𑀫𑀼𑀝𑁆𑀞𑀺𑀢𑀢𑀺𑀬𑀓𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀢𑀺𑀬-𑀧𑀘𑁆𑀘𑀬𑀮𑁄𑀧𑁂𑀦 ‘‘𑀫𑀼𑀝𑁆𑀞𑀺𑀢𑁆𑀢𑀺𑀓𑀸’’𑀢𑀺 𑀲𑀗𑁆𑀖𑀸𑀝𑀺𑀬𑁂𑀯 𑀯𑀼𑀘𑁆𑀘𑀢𑀺. 𑀏𑀯𑀫𑀼𑀧𑀭𑀺𑀧𑀺. 𑀢𑀺𑀭𑀺𑀬𑀦𑁆𑀢𑀺 𑀢𑀺𑀭𑀺𑀬𑀢𑁄.

𑀉𑀢𑁆𑀢𑀫𑀦𑁆𑀢𑁂𑀦𑀸𑀢𑀺 𑀉𑀓𑁆𑀓𑀝𑁆𑀞𑀧𑀭𑀺𑀫𑀸𑀡𑀦𑁆𑀢𑁂𑀦. 𑀲𑀢𑁆𑀣𑀼𑀦𑁄 𑀘𑀻𑀯𑀭𑀽𑀦𑀸𑀧𑀻𑀢𑀺 ‘‘𑀢𑀢𑁆𑀭𑀺𑀤𑀁 𑀲𑀼𑀕𑀢𑀲𑁆𑀲 𑀲𑀼𑀕𑀢𑀘𑀻𑀯𑀭𑀧𑁆𑀧𑀫𑀸𑀡𑀁, 𑀤𑀻𑀖𑀲𑁄 𑀦𑀯 𑀯𑀺𑀤𑀢𑁆𑀣𑀺𑀬𑁄 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸, 𑀢𑀺𑀭𑀺𑀬𑀁 𑀙 𑀯𑀺𑀤𑀢𑁆𑀣𑀺𑀬𑁄’’𑀢𑀺 (𑀧𑀸𑀘𑀺. 𑁫𑁪𑁮) 𑀯𑀼𑀢𑁆𑀢𑀧𑁆𑀧𑀫𑀸𑀡𑀲𑀼𑀕𑀢𑀘𑀻𑀯𑀭𑀢𑁄 𑀊𑀦𑀸𑀧𑀺. 𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂, 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀢𑀢𑁆𑀢𑀓𑀫𑁆𑀧𑀺 𑀯𑀝𑁆𑀝𑀢𑀺, 𑀢𑀢𑁄 𑀘𑁂 𑀊𑀦𑀁 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀤𑁆𑀯𑀬𑀲𑀦𑁆𑀤𑀲𑁆𑀲𑀦𑁂𑀦 𑀉𑀪𑀬𑀫𑀚𑁆𑀛𑁂 𑀬𑀁 𑀧𑀳𑁄𑀦𑀓𑀭𑀼𑀘𑁆𑀘𑀦𑀓𑀧𑁆𑀧𑀫𑀸𑀡𑀁, 𑀢𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁫𑁫𑁮. 𑀫𑀼𑀝𑁆𑀞𑀺𑀧𑀜𑁆𑀘𑀓𑀲𑀤𑁆𑀤𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑀺𑀥 𑀤𑀻𑀖𑀦𑁆𑀢𑁂 𑀯𑀢𑁆𑀢𑀢𑀺. 𑀫𑀼𑀝𑁆𑀞𑀺𑀧𑀜𑁆𑀘𑀓𑁄 𑀤𑀻𑀖𑀦𑁆𑀢𑁄 𑀬𑀲𑁆𑀲, 𑀬𑀲𑁆𑀫𑀺𑀁 𑀯𑀸 𑀧𑀫𑀸𑀡𑁂𑀢𑀺 𑀯𑀺𑀕𑁆𑀕𑀳𑁄, 𑀤𑀻𑀖𑀦𑁆𑀢𑀢𑁄 𑀫𑀼𑀝𑁆𑀞𑀺𑀧𑀜𑁆𑀘𑀓𑀧𑁆𑀧𑀫𑀸𑀡𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀫𑀼𑀝𑁆𑀞𑀺𑀧𑀜𑁆𑀘𑀫’’𑀦𑁆𑀢𑀺𑀧𑀺 𑀮𑀺𑀔𑀦𑁆𑀢𑀺. 𑀢𑀺𑀭𑀺𑀬𑀦𑁆𑀢𑀢𑁄𑀢𑀺 𑀯𑀺𑀢𑁆𑀣𑀸𑀭𑀦𑁆𑀢𑀢𑁄. 𑀅𑀟𑁆𑀠𑀳𑀢𑁆𑀣𑁄 𑀅𑀟𑁆𑀠𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀲𑁄 𑀢𑁂𑀬𑁆𑀬𑁄 𑀢𑀢𑀺𑀬𑁄 𑀬𑀲𑁆𑀲 𑀧𑀫𑀸𑀡𑀲𑁆𑀲𑀸𑀢𑀺 𑀕𑀳𑁂𑀢𑀩𑁆𑀩𑀁, 𑀢𑀁, 𑀅𑀟𑁆𑀠𑀢𑁂𑀬𑁆𑀬𑀭𑀢𑀦𑀧𑁆𑀧𑀫𑀸𑀡𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀤𑁆𑀯𑀺𑀳𑀢𑁆𑀣𑀁 𑀯𑀸𑀢𑀺 𑀤𑁆𑀯𑁂 𑀳𑀢𑁆𑀣𑀸 𑀬𑀲𑁆𑀲 𑀧𑀫𑀸𑀡𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄, 𑀤𑁆𑀯𑀺𑀭𑀢𑀦𑀧𑁆𑀧𑀫𑀸𑀡𑀁 𑀯𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 ‘‘𑀢𑀺𑀭𑀺𑀬𑀁 𑀤𑁆𑀯𑀺𑀳𑀢𑁆𑀣𑁄𑀧𑀺 𑀯𑀝𑁆𑀝𑀢𑀺. 𑀧𑀸𑀭𑀼𑀧𑀦𑁂𑀦𑀧𑀺 𑀳𑀺 𑀲𑀓𑁆𑀓𑀸 𑀦𑀸𑀪𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑀼’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) 𑀅𑀝𑁆𑀞𑀓𑀣𑀸𑀕𑀢𑀢𑁆𑀢𑀸 𑀯𑀼𑀢𑁆𑀢𑀁. ‘‘𑀲𑁂𑀲𑁂 𑀅𑀦𑁆𑀢𑀭𑀯𑀸𑀲𑀓𑁂’’𑀢𑀺 𑀇𑀤𑀁 𑀬𑀣𑀸𑀯𑀼𑀢𑁆𑀢𑀧𑀭𑀺𑀫𑀸𑀡𑁂𑀦 𑀧𑀭𑀺𑀫𑀺𑀢𑀘𑀻𑀯𑀭𑀦𑀺𑀤𑀲𑁆𑀲𑀦𑀁.

𑁫𑁫𑁯. 𑀅𑀳𑀢𑀸𑀳𑀢𑀓𑀧𑁆𑀧𑀸𑀦𑀦𑁆𑀢𑀺 𑀏𑀢𑁆𑀣 ‘‘𑀯𑀢𑁆𑀣𑀸𑀦’’𑀦𑁆𑀢𑀺 𑀲𑁂𑀲𑁄. 𑀅𑀳𑀢𑀸𑀦𑀁 𑀯𑀢𑁆𑀣𑀸𑀦𑀦𑁆𑀢𑀺 𑀦𑀯𑀯𑀢𑁆𑀣𑀸𑀦𑀁. 𑀅𑀳𑀢𑀢𑁄 𑀓𑀺𑀜𑁆𑀘𑀺 𑀊𑀦𑀸𑀦𑀺 𑀅𑀳𑀢𑀓𑀧𑁆𑀧𑀸𑀦𑀺, 𑀢𑁂𑀲𑀁 𑀦𑀯𑀯𑁄𑀳𑀸𑀭𑀽𑀧𑀕𑀸𑀦𑀁 𑀓𑀢𑀺𑀧𑀬𑀥𑁄𑀢𑀸𑀦𑀁 𑀯𑀢𑁆𑀣𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀗𑁆𑀖𑀸𑀝𑀻𑀢𑀺 𑀲𑀗𑁆𑀖𑀸𑀝𑀺𑀦𑀸𑀫𑀓𑀘𑀻𑀯𑀭𑀁. 𑀤𑀺𑀕𑀼𑀡𑀸𑀢𑀺 𑀤𑀼𑀧𑀝𑁆𑀝𑀓𑀢𑀸.

𑁫𑁬𑁦. 𑀉𑀢𑀼𑀤𑁆𑀥𑀝𑀸𑀦𑀦𑁆𑀢𑀺 𑀅𑀢𑀺𑀓𑁆𑀓𑀦𑁆𑀢𑀤𑀺𑀯𑀲𑀸𑀦𑀁, 𑀩𑀳𑀼𑀓𑀸𑀮𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀭𑀺𑀘𑁆𑀘𑀢𑁆𑀢𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀬𑀸𑀦𑀺 𑀉𑀢𑀼𑀢𑁄 𑀉𑀤𑁆𑀥𑀝𑀸𑀦𑀺, 𑀢𑁂𑀲𑀁 𑀯𑀢𑁆𑀣𑀸𑀦𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀢𑀺𑀡𑁆𑀡𑀁 𑀉𑀢𑀽𑀦𑀫𑀜𑁆𑀜𑀢𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀸𑀦𑀁 𑀧𑀼𑀭𑀸𑀡𑀯𑀢𑁆𑀣𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀻𑀯𑀭𑀸𑀦𑀦𑁆𑀢𑀺 𑀘𑀻𑀯𑀭𑀢𑁆𑀣𑀸𑀦𑀺 𑀯𑀢𑁆𑀣𑀸𑀦𑁂𑀯 𑀕𑀳𑀺𑀢𑀸𑀦𑀺. 𑀘𑀢𑀼𑀕𑁆𑀕𑀼𑀡𑀸𑀢𑀺 𑀘𑀢𑀼𑀧𑀝𑁆𑀝𑀸. 𑀲𑁂𑀲𑀸 𑀤𑀼𑀯𑁂𑀢𑀺 𑀅𑀦𑁆𑀢𑀭𑀯𑀸𑀲𑀓𑀉𑀢𑁆𑀢𑀭𑀸𑀲𑀗𑁆𑀕𑀸 𑀤𑁆𑀯𑁂. 𑀬𑀣𑀸𑀲𑀼𑀔𑀦𑁆𑀢𑀺 𑀬𑀣𑀸𑀭𑀼𑀘𑀺. 𑀧𑀁𑀲𑀼𑀓𑀽𑀮𑀦𑁆𑀢𑀺 𑀲𑀼𑀲𑀸𑀦𑀸𑀤𑀻𑀲𑀼 𑀧𑀢𑀺𑀢𑀧𑀺𑀮𑁄𑀢𑀺𑀓𑀘𑀻𑀯𑀭𑀁.

𑁫𑁬𑁧. ‘‘𑀢𑀻𑀡𑀺𑀧𑀻’’𑀢𑀺𑀆𑀤𑀻𑀲𑀼 ‘‘𑀢𑀺𑀘𑀻𑀯𑀭𑁂 𑀓𑀬𑀺𑀭𑀫𑀸𑀦𑁂 𑀲𑀩𑁆𑀩𑀁 𑀙𑀺𑀦𑁆𑀦𑀓𑀁 𑀦𑀧𑁆𑀧𑀳𑁄𑀢𑀻’’𑀢𑀺 𑀧𑀸𑀴𑀺𑀬𑀁 𑀆𑀕𑀢𑀯𑀢𑁆𑀣𑀼𑀫𑁆𑀳𑀺 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀤𑁆𑀯𑁂 𑀙𑀺𑀦𑁆𑀦𑀓𑀸𑀦𑀺 𑀏𑀓𑀁 𑀅𑀙𑀺𑀦𑁆𑀦𑀓’’𑀦𑁆𑀢𑀺 (𑀫𑀳𑀸𑀯. 𑁩𑁬𑁦) 𑀆𑀤𑀺𑀯𑀘𑀦𑀢𑁄 ‘‘𑀘𑀻𑀯𑀭’’𑀦𑁆𑀢𑀺 𑀲𑁂𑀲𑁄. 𑀙𑀺𑀦𑁆𑀤𑀺𑀢𑀩𑁆𑀩𑀦𑁆𑀢𑀺 𑀯𑀢𑁆𑀣𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀲𑀺𑀩𑁆𑀩𑁂𑀢𑁆𑀯𑀸 𑀓𑀸𑀢𑀩𑁆𑀩𑀁. 𑀧𑀳𑁄𑀢𑀺 𑀘𑁂𑀢𑀺 𑀯𑀢𑁆𑀣𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀓𑀭𑀡𑁂 𑀬𑀤𑀺 𑀘𑀻𑀯𑀭𑀲𑁆𑀲 𑀧𑀳𑁄𑀢𑀺. 𑀲𑀩𑁆𑀩𑁂𑀲𑀽𑀢𑀺 𑀢𑀻𑀲𑀼 𑀘𑀻𑀯𑀭𑁂𑀲𑀼. 𑀅𑀧𑁆𑀧𑀳𑁄𑀦𑁆𑀢𑁂𑀲𑀽𑀢𑀺 𑀯𑀢𑁆𑀣𑀸𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀺𑀩𑁆𑀩𑀦𑁂𑀦 𑀅𑀧𑁆𑀧𑀳𑁄𑀦𑁆𑀢𑁂𑀲𑀼. 𑀅𑀦𑁆𑀯𑀸𑀥𑀺𑀓𑀦𑁆𑀢𑀺 𑀯𑀢𑁆𑀣𑁂 𑀊𑀦𑀸𑀢𑀺𑀭𑁂𑀓𑀁 𑀅𑀧𑀦𑁂𑀢𑁆𑀯𑀸 𑀆𑀕𑀦𑁆𑀢𑀼𑀓𑀧𑀢𑁆𑀢𑀲𑀗𑁆𑀔𑀸𑀢𑀁 𑀅𑀦𑀼𑀯𑀸𑀢𑀁 𑀘𑀻𑀯𑀭𑀲𑁆𑀲 𑀧𑀭𑀺𑀬𑀦𑁆𑀢𑁂, 𑀫𑀚𑁆𑀛𑁂 𑀘 𑀬𑀣𑀸𑀭𑀳𑀁 𑀤𑀻𑀖𑀭𑀲𑁆𑀲𑀧𑀭𑀺𑀫𑀸𑀡𑀬𑀼𑀢𑁆𑀢𑀁 𑀅𑀮𑁆𑀮𑀺𑀬𑀸𑀧𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁫𑁬𑁨. 𑀅𑀘𑁆𑀙𑀺𑀦𑁆𑀦𑀁 𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀅𑀘𑁆𑀙𑀺𑀦𑁆𑀦𑀁 𑀯𑀸. 𑀅𑀦𑀸𑀤𑀺𑀦𑁆𑀦𑀦𑁆𑀢𑀺 𑀅𑀦𑀸𑀤𑀺𑀦𑁆𑀦𑀆𑀕𑀦𑁆𑀢𑀼𑀓𑀧𑀢𑁆𑀢𑀁. 𑀢𑀺𑀘𑀻𑀯𑀭𑀦𑁆𑀢𑀺 𑀢𑀻𑀲𑀼 𑀘𑀻𑀯𑀭𑁂𑀲𑀼 𑀏𑀓𑁂𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀼𑀩𑁆𑀪𑁄𑀕𑁂𑀦𑀸𑀢𑀺 𑀤𑀼𑀝𑁆𑀞𑀼 𑀧𑀭𑀺𑀪𑁄𑀕𑁂𑀦. 𑀬𑀣𑀸 𑀧𑀭𑀺𑀪𑀼𑀢𑁆𑀢𑀁 𑀦𑀲𑁆𑀲𑀢𑀺, 𑀢𑀣𑀸 𑀓𑀺𑀮𑀺𑀝𑁆𑀞𑀸𑀦𑀁 𑀥𑁄𑀯𑀦𑀸𑀤𑀺𑀫𑀓𑀢𑁆𑀯𑀸 𑀦𑀺𑀯𑀸𑀲𑀦𑀸𑀤𑀺𑀦𑀸 𑀧𑀭𑀺𑀪𑁄𑀕𑁂𑀦.

𑁫𑁬𑁩-𑁪. 𑀓𑀼𑀲𑀺𑀦𑁆𑀢𑀺 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀅𑀦𑀼𑀯𑀸𑀢𑀁 𑀘𑀻𑀯𑀭𑀫𑀚𑁆𑀛𑁂 𑀢𑀸𑀤𑀺𑀲𑀫𑁂𑀯 𑀤𑀻𑀖𑀧𑀢𑁆𑀢𑀜𑁆𑀘. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀘𑀻𑀯𑀭𑀓𑁆𑀔𑀦𑁆𑀥𑀅𑀝𑁆𑀞𑀓𑀣𑀸𑀬𑀁 ‘‘𑀓𑀼𑀲𑀻𑀢𑀺 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀅𑀦𑀼𑀯𑀸𑀢𑀸𑀤𑀻𑀦𑀁 𑀤𑀻𑀖𑀧𑀢𑁆𑀢𑀸𑀦𑀫𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪𑁫). 𑀅𑀟𑁆𑀠𑀓𑀼𑀲𑀺𑀦𑁆𑀢𑀺 𑀅𑀦𑀼𑀯𑀸𑀢𑀲𑀤𑀺𑀲𑀁 𑀘𑀻𑀯𑀭𑀫𑀚𑁆𑀛𑁂 𑀢𑀢𑁆𑀣 𑀢𑀢𑁆𑀣 𑀭𑀲𑁆𑀲𑀧𑀢𑁆𑀢𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀅𑀟𑁆𑀠𑀓𑀼𑀲𑀻𑀢𑀺 𑀅𑀦𑁆𑀢𑀭𑀦𑁆𑀢𑀭𑀸 𑀭𑀲𑁆𑀲𑀧𑀢𑁆𑀢𑀸𑀦𑀁 𑀦𑀸𑀫’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪𑁫). 𑀫𑀡𑁆𑀟𑀮𑀦𑁆𑀢𑀺 𑀏𑀓𑁂𑀓𑀲𑁆𑀫𑀺𑀁 𑀔𑀡𑁆𑀟𑁂 𑀫𑀳𑀸𑀫𑀡𑁆𑀟𑀮𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀫𑀡𑁆𑀟𑀮𑀦𑁆𑀢𑀺 𑀧𑀜𑁆𑀘𑀔𑀡𑁆𑀟𑀺𑀓𑀘𑀻𑀯𑀭𑀲𑁆𑀲 𑀏𑀓𑁂𑀓𑀲𑁆𑀫𑀺𑀁 𑀔𑀡𑁆𑀟𑁂 𑀫𑀳𑀸𑀫𑀡𑁆𑀟𑀮’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪𑁫). 𑀅𑀟𑁆𑀠𑀫𑀡𑁆𑀟𑀮𑀦𑁆𑀢𑀺 𑀫𑀡𑁆𑀟𑀮𑀲𑁆𑀲 𑀅𑀦𑁆𑀢𑁄 𑀦𑀺𑀯𑁂𑀲𑀺𑀬𑀫𑀸𑀦𑀁 𑀔𑀼𑀤𑁆𑀤𑀓𑀫𑀡𑁆𑀟𑀮𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀅𑀟𑁆𑀠𑀫𑀡𑁆𑀟𑀮𑀦𑁆𑀢𑀺 𑀔𑀼𑀤𑁆𑀤𑀓𑀫𑀡𑁆𑀟𑀮’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪𑁫). 𑀯𑀺𑀯𑀝𑁆𑀝𑀦𑁆𑀢𑀺 𑀫𑀡𑁆𑀟𑀮𑀁, 𑀅𑀟𑁆𑀠𑀫𑀡𑁆𑀟𑀮𑀜𑁆𑀘𑀸𑀢𑀺 𑀤𑁆𑀯𑁂 𑀏𑀓𑀢𑁄 𑀓𑀢𑁆𑀯𑀸 𑀲𑀺𑀩𑁆𑀩𑀺𑀢𑀁 𑀯𑁂𑀫𑀚𑁆𑀛𑁂 𑀔𑀡𑁆𑀟𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀯𑀺𑀯𑀝𑁆𑀝𑀦𑁆𑀢𑀺 𑀫𑀡𑁆𑀟𑀮𑀜𑁆𑀘 𑀅𑀟𑁆𑀠𑀫𑀡𑁆𑀟𑀮𑀜𑁆𑀘 𑀏𑀓𑀢𑁄 𑀓𑀢𑁆𑀯𑀸 𑀲𑀺𑀩𑁆𑀩𑀺𑀢𑀁 𑀫𑀚𑁆𑀛𑀺𑀫𑀔𑀡𑁆𑀟’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪𑁫). 𑀅𑀦𑀼𑀯𑀺𑀯𑀝𑁆𑀝𑀦𑁆𑀢𑀺 𑀫𑀚𑁆𑀛𑀺𑀫𑀔𑀡𑁆𑀟𑀲𑁆𑀲 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀲𑀺𑀩𑁆𑀩𑀺𑀢𑀁 𑀢𑀣𑁂𑀯 𑀤𑁆𑀯𑀺𑀫𑀡𑁆𑀟𑀮𑀧𑀢𑁆𑀢𑀁 𑀔𑀡𑁆𑀟𑀤𑁆𑀯𑀬𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀅𑀦𑀼𑀯𑀺𑀯𑀝𑁆𑀝𑀦𑁆𑀢𑀺 𑀢𑀲𑁆𑀲 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀤𑁆𑀯𑁂 𑀔𑀡𑁆𑀟𑀸𑀦𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪𑁫). 𑀩𑀸𑀳𑀦𑁆𑀢𑀦𑁆𑀢𑀺 𑀢𑁂𑀲𑀁 𑀅𑀦𑀼𑀯𑀺𑀯𑀝𑁆𑀝𑀸𑀦𑀁 𑀩𑀸𑀳𑀺𑀭𑀧𑀲𑁆𑀲𑁂 𑀲𑀺𑀩𑁆𑀩𑀺𑀢𑀁 𑀩𑀸𑀳𑀺𑀭𑀔𑀡𑁆𑀟𑀤𑁆𑀯𑀬𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀩𑀸𑀳𑀦𑁆𑀢𑀦𑁆𑀢𑀺 𑀢𑁂𑀲𑀁 𑀅𑀦𑀼𑀯𑀺𑀯𑀝𑁆𑀝𑀸𑀦𑀁 𑀩𑀳𑀺 𑀏𑀓𑁂𑀓𑀁 𑀔𑀡𑁆𑀟’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪𑁫).

𑀧𑀜𑁆𑀘𑀦𑁆𑀦𑀁 𑀲𑀫𑀸𑀳𑀸𑀭𑁄 𑀧𑀜𑁆𑀘𑀓𑀁, 𑀤𑀲𑁆𑀲𑀺𑀢𑀧𑁆𑀧𑀓𑀸𑀭𑀧𑀜𑁆𑀘𑀔𑀡𑁆𑀟𑁂𑀳𑀺 𑀲𑀺𑀩𑁆𑀩𑀺𑀢𑀘𑀻𑀯𑀭𑀁 𑀧𑀜𑁆𑀘𑀓𑀁 𑀦𑀸𑀫. 𑀆𑀤𑀺-𑀲𑀤𑁆𑀤𑁂𑀦 𑀲𑀢𑁆𑀢𑀔𑀡𑁆𑀟𑀸𑀤𑀻𑀳𑀺 𑀲𑀺𑀩𑁆𑀩𑀺𑀢𑀘𑀻𑀯𑀭𑀸𑀦𑀁 𑀕𑀳𑀡𑀁. 𑀢𑁂𑀦𑁂𑀯𑁂𑀢𑁆𑀣𑀸𑀳 ‘‘𑀓𑀢𑁆𑀢𑀩𑁆𑀩𑀁 𑀢𑀼 𑀢𑀺𑀘𑀻𑀯𑀭’’𑀦𑁆𑀢𑀺. 𑀲𑀢𑁆𑀢𑀔𑀡𑁆𑀟𑀲𑁆𑀲 𑀘𑀻𑀯𑀭𑀲𑁆𑀲 𑀏𑀓𑀁 𑀫𑀚𑁆𑀛𑀺𑀫𑀔𑀡𑁆𑀟𑀁 𑀯𑀺𑀯𑀝𑁆𑀝𑀦𑀸𑀫𑀫𑁂𑀯 𑀳𑁄𑀢𑀺, 𑀢𑀲𑁆𑀲 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀤𑁆𑀯𑁂 𑀤𑁆𑀯𑁂 𑀔𑀡𑁆𑀟𑀸𑀦𑀺 𑀘𑀽𑀴𑀸𑀦𑀼𑀯𑀺𑀯𑀝𑁆𑀝𑀫𑀳𑀸𑀦𑀼𑀯𑀺𑀯𑀝𑁆𑀝𑀲𑀗𑁆𑀔𑀸𑀢𑀸𑀦𑀺 𑀅𑀦𑀼𑀯𑀺𑀯𑀝𑁆𑀝𑀦𑀸𑀫𑀸𑀦𑁂𑀯 𑀳𑁄𑀦𑁆𑀢𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀣 𑀯𑀸 𑀅𑀦𑀼𑀯𑀺𑀯𑀝𑁆𑀝𑀦𑁆𑀢𑀺 𑀯𑀺𑀯𑀝𑁆𑀝𑀲𑁆𑀲 𑀏𑀓𑀧𑀲𑁆𑀲𑀢𑁄 𑀤𑁆𑀯𑀺𑀦𑁆𑀦𑀁, 𑀏𑀓𑀧𑀲𑁆𑀲𑀢𑁄 𑀤𑁆𑀯𑀺𑀦𑁆𑀦𑀦𑁆𑀢𑀺 𑀘𑀢𑀼𑀦𑁆𑀦𑀫𑁆𑀧𑀺 𑀔𑀡𑁆𑀟𑀸𑀦𑀫𑁂𑀢𑀁 𑀦𑀸𑀫’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪𑁫). 𑀩𑀸𑀳𑀦𑁆𑀢𑀦𑁆𑀢𑀺 𑀤𑁆𑀯𑀻𑀲𑀼 𑀧𑀭𑀺𑀬𑀦𑁆𑀢𑁂𑀲𑀼 𑀲𑀺𑀩𑁆𑀩𑀦𑀻𑀬𑀁 𑀩𑀸𑀳𑀺𑀭𑀔𑀡𑁆𑀟𑀤𑁆𑀯𑀬𑀁, 𑀢𑀜𑁆𑀘 𑀲𑀗𑁆𑀖𑀝𑁂𑀢𑁆𑀯𑀸 𑀩𑀸𑀳𑀫𑀢𑁆𑀣𑀓𑁂 𑀞𑀧𑀺𑀬𑀫𑀸𑀦𑀢𑁆𑀢𑀸 ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀆𑀥𑁂𑀬𑁆𑀬𑁂 𑀆𑀥𑀸𑀭𑁄𑀧𑀘𑀸𑀭𑀯𑀲𑁂𑀦 𑀩𑀸𑀳𑀸𑀢𑀺 𑀘 𑀘𑀻𑀯𑀭𑀲𑁆𑀲 𑀧𑀭𑀺𑀬𑀦𑁆𑀢𑀸𑀯𑀬𑀯𑀢𑁆𑀢𑀸 ‘‘𑀅𑀦𑁆𑀢’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀩𑀸𑀳𑀦𑁆𑀢𑀦𑁆𑀢𑀺 𑀲𑀼𑀧𑁆𑀧𑀫𑀸𑀡𑀁 𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑁂𑀦 𑀲𑀁𑀳𑀭𑀺𑀢𑁆𑀯𑀸 𑀩𑀸𑀳𑀸𑀬 𑀉𑀧𑀭𑀺 𑀞𑀧𑀺𑀢𑀸 𑀉𑀪𑁄 𑀅𑀦𑁆𑀢𑀸 𑀩𑀳𑀺𑀫𑀼𑀔𑀸 𑀢𑀺𑀝𑁆𑀞𑀦𑁆𑀢𑀺, 𑀢𑁂𑀲𑀁 𑀏𑀢𑀁 𑀦𑀸𑀫’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪𑁫). 𑀇𑀤𑀁 𑀲𑀢𑁆𑀢𑀔𑀡𑁆𑀟𑀘𑀻𑀯𑀭𑀫𑁂𑀯 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀺𑀳𑀺𑀢𑀦𑁆𑀢𑀺 𑀇𑀤𑀸𑀦𑀺𑀧𑀺 𑀢𑀤𑁂𑀯 𑀯𑀝𑁆𑀝𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀅𑀬𑀫𑁂𑀯 𑀳𑀺 𑀦𑀬𑁄 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄’’𑀢𑀺. 𑀪𑀺𑀓𑁆𑀔𑀼𑀦𑀸 𑀓𑀼𑀲𑀺𑀁…𑀧𑁂… 𑀩𑀸𑀳𑀦𑁆𑀢𑀫𑁆𑀧𑀺𑀘𑀸𑀢𑀺 𑀲𑀩𑁆𑀩𑀁 𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸𑀯 𑀙𑀺𑀦𑁆𑀦𑀁 𑀧𑀜𑁆𑀘𑀓𑀸𑀤𑀺𑀧𑁆𑀧𑀪𑁂𑀤𑀓𑀁 𑀲𑀫𑀡𑀲𑀸𑀭𑀼𑀧𑁆𑀧𑀁 𑀢𑀺𑀘𑀻𑀯𑀭𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑁫𑁬𑁫-𑁬. 𑀬𑀣𑀸𑀯𑀼𑀢𑁆𑀢𑀯𑀺𑀥𑀺𑀁 𑀅𑀯𑀺𑀭𑀸𑀥𑁂𑀢𑁆𑀯𑀸 𑀘𑀻𑀯𑀭𑀁 𑀓𑀧𑁆𑀧𑀩𑀺𑀦𑁆𑀤𑀼𑀁 𑀤𑀢𑁆𑀯𑀸 𑀲𑀗𑁆𑀖𑀸𑀝𑀺𑀆𑀤𑀺𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀬 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀁 𑀓𑀣𑀁 𑀪𑀺𑀚𑁆𑀚𑀢𑀻𑀢𑀺 𑀆𑀳 ‘‘𑀤𑀸𑀦𑁂𑀦𑀸’’𑀢𑀺𑀆𑀤𑀺. 𑀤𑀸𑀦𑁂𑀦𑀸𑀢𑀺 𑀅𑀜𑁆𑀜𑀲𑁆𑀲 𑀤𑀸𑀦𑁂𑀦. 𑀅𑀘𑁆𑀙𑀺𑀚𑁆𑀚𑀕𑀸𑀳𑁂𑀦𑀸𑀢𑀺 𑀅𑀜𑁆𑀜𑁂𑀦 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑁂𑀦. 𑀯𑀺𑀲𑁆𑀲𑀸𑀲𑀕𑁆𑀕𑀳𑀡𑁂𑀦 𑀘𑀸𑀢𑀺 𑀅𑀢𑁆𑀢𑀦𑀺 𑀯𑀺𑀲𑁆𑀲𑀸𑀲𑁂𑀦 𑀅𑀜𑁆𑀜𑀲𑁆𑀲 𑀕𑀳𑀡𑁂𑀦. 𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦𑀸𑀢𑀺 𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑁂𑀦 𑀅𑀜𑁆𑀜𑀲𑁆𑀲 𑀤𑀸𑀦𑁂 𑀯𑀺𑀬 𑀘𑀻𑀯𑀭𑁂 𑀦𑀺𑀭𑀸𑀮𑀬𑀪𑀸𑀯𑁂𑀦𑁂𑀯 𑀧𑀭𑀺𑀘𑁆𑀘𑀢𑁆𑀢𑀸.

𑀓𑁂𑀘𑀺 𑀧𑀦 ‘‘𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦𑀸𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑁂𑀦𑀸𑀢𑀺 𑀏𑀯𑀫𑀢𑁆𑀣𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀼 𑀧𑀦 𑀯𑀺𑀩𑁆𑀪𑀦𑁆𑀢𑁄𑀧𑀺 𑀬𑀸𑀯 𑀲𑀺𑀓𑁆𑀔𑀁 𑀦 𑀧𑀘𑁆𑀘𑀓𑁆𑀔𑀸𑀢𑀺, 𑀢𑀸𑀯 𑀪𑀺𑀓𑁆𑀔𑀼𑀬𑁂𑀯𑀸𑀢𑀺 𑀅𑀥𑀺𑀝𑁆𑀞𑀸𑀦𑀁 𑀦 𑀯𑀺𑀚𑀳𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁 ‘‘𑀪𑀺𑀓𑁆𑀔𑀼𑀦𑀺𑀬𑀸 𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦𑀸’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀅𑀯𑀼𑀢𑁆𑀢𑀢𑁆𑀢𑀸, 𑀪𑀺𑀓𑁆𑀔𑀼𑀦𑀺𑀬𑀸 𑀘 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑁂 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀁 𑀯𑀺𑀲𑀼𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀦𑀢𑁆𑀣𑀺 𑀢𑀲𑁆𑀲𑀸 𑀯𑀺𑀩𑁆𑀪𑀫𑀦𑁂𑀦𑁂𑀯 𑀅𑀲𑁆𑀲𑀫𑀡𑀺𑀪𑀸𑀯𑀢𑁄.

𑀲𑀺𑀓𑁆𑀔𑀸𑀬𑀸𑀢𑀺 𑀪𑀺𑀓𑁆𑀔𑀼𑀲𑀺𑀓𑁆𑀔𑀸𑀬. 𑀧𑀳𑀸𑀦𑁂𑀦𑀸𑀢𑀺 𑀧𑀘𑁆𑀘𑀓𑁆𑀔𑀸𑀦𑁂𑀦. 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀧𑀦𑁂𑀢𑁆𑀣 𑀲𑀘𑁂 𑀪𑀺𑀓𑁆𑀔𑀼𑀮𑀺𑀗𑁆𑀕𑁂 𑀞𑀺𑀢𑁄 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀢𑀲𑁆𑀲 𑀓𑀸𑀬𑀮𑀕𑁆𑀕𑀫𑁆𑀧𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀕𑀳𑀺𑀢𑀁. ‘‘𑀲𑀺𑀓𑁆𑀔𑀸𑀬 𑀘 𑀧𑀳𑀸𑀦𑀢𑁄’’𑀢𑀺 𑀘 𑀮𑀺𑀔𑀦𑁆𑀢𑀺, 𑀢𑀁 ‘‘𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦𑀸𑀧𑀺, 𑀲𑀺𑀓𑁆𑀔𑀸𑀬 𑀘 𑀧𑀳𑀸𑀦𑀢𑁄’’𑀢𑀺 𑀧𑀸𑀞𑀓𑁆𑀓𑀫𑁂 𑀲𑀢𑀺 𑀬𑀼𑀚𑁆𑀚𑀢𑀺. 𑀬𑀣𑀸𑀯𑀼𑀢𑁆𑀢𑁄 𑀧𑀦 𑀧𑀸𑀞𑁄 ‘‘𑀲𑀺𑀓𑁆𑀔𑀸𑀬 𑀘 𑀧𑀳𑀸𑀦𑁂𑀦, 𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦𑀧𑀻’’𑀢𑀺 𑀧𑀸𑀞𑀓𑁆𑀓𑀫𑁂 𑀬𑀼𑀚𑁆𑀚𑀢𑀺. 𑀬𑀣𑀸 𑀢𑀣𑀸 𑀯𑀸 𑀳𑁄𑀢𑀼, 𑀦 𑀓𑁄𑀘𑀺 𑀯𑀺𑀭𑁄𑀥𑁄.

𑀧𑀘𑁆𑀘𑀼𑀤𑁆𑀥𑀸𑀭𑁂𑀦𑀸𑀢𑀺 𑀘𑀻𑀯𑀭𑀲𑁆𑀲 𑀧𑀘𑁆𑀘𑀼𑀤𑁆𑀥𑀭𑀡𑁂𑀦. ‘‘𑀓𑀸𑀮𑀓𑀺𑀭𑀺𑀬𑀸𑀬𑀸’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀯𑀺𑀦𑀸𑀲𑁂𑀦𑀸𑀢𑀺 𑀘𑀻𑀯𑀭𑀲𑀸𑀫𑀺𑀓𑀲𑁆𑀲 𑀚𑀻𑀯𑀺𑀢𑀯𑀺𑀦𑀸𑀲𑁄𑀯 𑀯𑀼𑀘𑁆𑀘𑀢𑀻𑀢𑀺. 𑀮𑀺𑀗𑁆𑀕𑀲𑁆𑀲 𑀧𑀭𑀺𑀯𑀢𑁆𑀢𑀦𑀸𑀢𑀺 𑀪𑀺𑀓𑁆𑀔𑀼𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑀸, 𑀪𑀺𑀓𑁆𑀔𑀼𑀦𑀺𑀬𑀸 𑀧𑀼𑀭𑀺𑀲𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑀸𑀢𑀺 𑀏𑀯𑀁 𑀉𑀪𑀬𑀣𑀸 𑀮𑀺𑀗𑁆𑀕𑀲𑁆𑀲 𑀧𑀭𑀺𑀯𑀢𑁆𑀢𑀦𑁂𑀦. 𑀲𑀩𑁆𑀩𑀁 𑀦𑀯𑀯𑀺𑀥𑀫𑁆𑀧𑀺 𑀘𑀻𑀯𑀭𑀁. 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀏𑀢𑁆𑀣 ‘‘𑀇𑀫𑁂𑀳𑀺 𑀅𑀝𑁆𑀞𑀳𑀻’’𑀢𑀺 𑀲𑁂𑀲𑁄. 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀢𑁆𑀣 𑀧𑀼𑀭𑀺𑀫𑁂𑀳𑀺 𑀅𑀝𑁆𑀞𑀳𑀺 𑀲𑀩𑁆𑀩𑀘𑀻𑀯𑀭𑀸𑀦𑀺 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀦𑁆𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯). 𑀪𑀺𑀚𑁆𑀚𑀢𑀻𑀢𑀺 𑀧𑀚𑀳𑀢𑀺. 𑀙𑀺𑀤𑁆𑀤𑀲𑁆𑀲 𑀪𑀸𑀯𑁄 𑀙𑀺𑀤𑁆𑀤𑀪𑀸𑀯𑁄, 𑀢𑀲𑁆𑀫𑀺𑀁, 𑀙𑀺𑀤𑁆𑀤𑁂 𑀲𑀢𑀺 𑀙𑀺𑀤𑁆𑀤𑁂 𑀚𑀸𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀺𑀘𑀻𑀯𑀭𑀦𑁆𑀢𑀺 𑀢𑀻𑀲𑀼 𑀘𑀻𑀯𑀭𑁂𑀲𑀼 𑀅𑀜𑁆𑀜𑀢𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀺𑀘𑀻𑀯𑀭𑀫𑁂𑀯 𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀘 ‘‘𑀙𑀺𑀤𑁆𑀤𑀪𑀸𑀯𑁂𑀦 𑀧𑀦 𑀢𑀺𑀘𑀻𑀯𑀭𑀲𑁆𑀲𑁂𑀯𑀸’’𑀢𑀺.

𑁫𑁬𑁭. 𑀓𑀻𑀯𑀧𑁆𑀧𑀫𑀸𑀡𑁂 𑀙𑀺𑀤𑁆𑀤𑁂 𑀚𑀸𑀢𑁂𑀢𑀺 𑀆𑀳 ‘‘𑀓𑀦𑀺𑀝𑁆𑀞𑀲𑁆𑀲𑀸’’𑀢𑀺𑀆𑀤𑀺. ‘‘𑀓𑀦𑀺𑀝𑁆𑀞…𑀧𑁂… 𑀫𑀸𑀡𑀓’’𑀦𑁆𑀢𑀺 𑀇𑀫𑀺𑀦𑀸 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀺.

𑁫𑁬𑁮. 𑀏𑀓𑁄 𑀢𑀦𑁆𑀢𑀼𑀧𑀻𑀢𑀺 𑀤𑀻𑀖𑀢𑁄 𑀯𑀸 𑀢𑀺𑀭𑀺𑀬𑀢𑁄 𑀯𑀸 𑀏𑀓𑀫𑁆𑀧𑀺 𑀲𑀼𑀢𑁆𑀢𑀁.

𑁫𑁬𑁯. 𑀚𑀺𑀡𑁆𑀡𑀝𑁆𑀞𑀸𑀦𑁂 𑀅𑀕𑁆𑀕𑀴𑀁 𑀤𑁂𑀦𑁆𑀢𑁂𑀦 𑀢𑁂𑀘𑀻𑀯𑀭𑀺𑀓𑁂𑀦 𑀯𑀢𑁆𑀢𑀺𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀞𑀫’’𑀦𑁆𑀢𑀺𑀆𑀤𑀺. 𑀧𑀞𑀫𑀦𑁆𑀢𑀺 𑀙𑀺𑀦𑁆𑀦𑀝𑁆𑀞𑀸𑀦𑀲𑁆𑀲 𑀙𑀺𑀦𑁆𑀤𑀦𑀢𑁄 𑀧𑀼𑀩𑁆𑀩𑁂𑀬𑁂𑀯. 𑀅𑀕𑁆𑀕𑀴𑀁 𑀤𑀢𑁆𑀯𑀸𑀢𑀺 𑀯𑀢𑁆𑀣𑀔𑀡𑁆𑀟𑀁 𑀅𑀮𑁆𑀮𑀺𑀬𑀸𑀧𑁂𑀢𑁆𑀯𑀸. 𑀭𑀓𑁆𑀔𑀢𑀻𑀢𑀺 𑀏𑀢𑁆𑀣 ‘‘𑀅𑀥𑀺𑀝𑁆𑀞𑀸𑀦’’𑀦𑁆𑀢𑀺 𑀅𑀦𑀼𑀯𑀢𑁆𑀢𑀢𑁂, ‘‘𑀢𑁂𑀘𑀻𑀯𑀭𑀺𑀓𑁄 𑀪𑀺𑀓𑁆𑀔𑀽’’𑀢𑀺 𑀮𑀩𑁆𑀪𑀢𑀺, 𑀏𑀯𑀁 𑀯𑀢𑁆𑀣𑀔𑀡𑁆𑀟𑀁 𑀅𑀮𑁆𑀮𑀺𑀬𑀸𑀧𑁂𑀦𑁆𑀢𑁄 𑀢𑁂𑀘𑀻𑀯𑀭𑀺𑀓𑁄 𑀪𑀺𑀓𑁆𑀔𑀼 𑀅𑀥𑀺𑀝𑁆𑀞𑀸𑀦𑀁 𑀭𑀓𑁆𑀔𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀧𑀭𑀺𑀬𑀸𑀬𑁂𑀦 𑀅𑀥𑀺𑀝𑁆𑀞𑀸𑀦𑀁 𑀪𑀺𑀦𑁆𑀤𑀢𑀻𑀢𑀺 𑀮𑀩𑁆𑀪𑀢𑀺. 𑀧𑀞𑀫𑀁 𑀤𑁆𑀯𑁂 𑀓𑁄𑀝𑀺𑀬𑁄 𑀖𑀝𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀫𑀚𑁆𑀛𑁂 𑀚𑀺𑀡𑁆𑀡𑀁 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀁 𑀫𑀚𑁆𑀛𑁂 𑀙𑀺𑀦𑁆𑀤𑀦𑁆𑀢𑁄 𑀢𑀢𑁄 𑀧𑀼𑀩𑁆𑀩𑁂𑀬𑁂𑀯 𑀤𑁆𑀯𑁂 𑀓𑁄𑀝𑀺𑀬𑁄 𑀏𑀓𑀢𑁄 𑀖𑀝𑁂𑀢𑁆𑀯𑀸 𑀲𑀺𑀩𑁆𑀩𑀺𑀢𑁆𑀯𑀸. 𑀧𑀘𑁆𑀙𑀸𑀢𑀺 𑀓𑁄𑀝𑀺𑀖𑀝𑀦𑀢𑁄 𑀧𑀘𑁆𑀙𑀸. 𑀙𑀺𑀦𑁆𑀤𑀢𑀻𑀢𑀺 𑀫𑀚𑁆𑀛𑀁 𑀉𑀪𑀬𑀓𑁄𑀝𑀺𑀁 𑀓𑀸𑀢𑀼𑀁 𑀙𑀺𑀦𑁆𑀤𑀢𑀺. 𑀭𑀓𑁆𑀔𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯.

𑁫𑁭𑁦. 𑀢𑀺𑀘𑀻𑀯𑀭𑁂 𑀓𑀢𑁆𑀣 𑀚𑀸𑀢𑀁 𑀙𑀺𑀤𑁆𑀤𑀫𑀥𑀺𑀝𑁆𑀞𑀸𑀦𑀁 𑀪𑀺𑀦𑁆𑀤𑀢𑀻𑀢𑀺 𑀆𑀳 ‘‘𑀘𑀢𑀼𑀭𑀗𑁆𑀕𑀼𑀮𑀸’’𑀢𑀺𑀆𑀤𑀺. 𑀘𑀢𑁆𑀢𑀸𑀭𑀺 𑀘 𑀅𑀝𑁆𑀞 𑀘 𑀘𑀢𑀼𑀭𑀝𑁆𑀞𑀁, 𑀘𑀢𑀼𑀦𑁆𑀦𑀁 𑀅𑀝𑁆𑀞𑀦𑁆𑀦𑀁 𑀯𑀸 𑀅𑀗𑁆𑀕𑀼𑀮𑀸𑀦𑀁 𑀲𑀫𑀸𑀳𑀸𑀭𑁄 𑀘𑀢𑀼𑀭𑀝𑁆𑀞𑀗𑁆𑀕𑀼𑀮𑀁, 𑀢𑀲𑁆𑀫𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀘𑀢𑀼𑀭𑀗𑁆𑀕𑀼𑀮𑀸 𑀅𑀝𑁆𑀞𑀗𑁆𑀕𑀼𑀮𑀸𑀢𑀺 𑀬𑁄𑀚𑀦𑀸. 𑀑𑀭𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑀁. 𑀏𑀓𑀜𑁆𑀘 𑀤𑁆𑀯𑁂 𑀘 𑀏𑀓𑀤𑁆𑀯𑁂, 𑀢𑁂𑀲𑀁 𑀏𑀓𑀤𑁆𑀯𑀺𑀦𑁆𑀦𑀁, ‘‘𑀘𑀻𑀯𑀭𑀸𑀦’’𑀦𑁆𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺, 𑀏𑀓𑀲𑁆𑀲 𑀘𑀻𑀯𑀭𑀲𑁆𑀲, 𑀤𑁆𑀯𑀺𑀦𑁆𑀦𑀜𑁆𑀘 𑀘𑀻𑀯𑀭𑀸𑀦𑀦𑁆𑀢𑀺 𑀬𑁄𑀚𑀦𑀸. 𑀬𑀣𑀸𑀲𑀗𑁆𑀔𑁆𑀬𑀸𑀦𑀼𑀤𑁆𑀤𑁂𑀲𑀯𑀲𑁂𑀦 𑀏𑀓𑀲𑁆𑀲 𑀢𑀺𑀭𑀺𑀬𑀢𑁄 𑀘𑀢𑀼𑀭𑀗𑁆𑀕𑀼𑀮𑀢𑁄 𑀑𑀭𑀁, 𑀤𑁆𑀯𑀺𑀦𑁆𑀦𑀁 𑀢𑀺𑀭𑀺𑀬𑀢𑁄 𑀅𑀝𑁆𑀞𑀗𑁆𑀕𑀼𑀮𑀢𑁄 𑀑𑀭𑀦𑁆𑀢𑀺 𑀬𑁄𑀚𑀦𑀸. 𑀯𑀸𑀓𑁆𑀬𑀤𑁆𑀯𑀬𑁂𑀧𑀺 ‘‘𑀙𑀺𑀤𑁆𑀤𑀁 𑀪𑀺𑀦𑁆𑀤𑀢𑁂𑀯𑀸’’𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀏𑀓𑀲𑁆𑀲 𑀘𑀻𑀯𑀭𑀲𑁆𑀲𑀸𑀢𑀺 𑀅𑀦𑁆𑀢𑀭𑀯𑀸𑀲𑀓𑀘𑀻𑀯𑀭𑀲𑁆𑀲. 𑀢𑀺𑀭𑀺𑀬𑀢𑁄𑀢𑀺 𑀯𑀺𑀢𑁆𑀣𑀸𑀭𑀢𑁄. 𑀘𑀢𑀼𑀭𑀗𑁆𑀕𑀼𑀮𑀁 𑀑𑀭𑀦𑁆𑀢𑀺 𑀘𑀢𑀼𑀭𑀗𑁆𑀕𑀼𑀮𑀢𑁄 𑀅𑀩𑁆𑀪𑀦𑁆𑀢𑀭𑁂 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀪𑀺𑀦𑁆𑀤𑀢𑀺. 𑀤𑁆𑀯𑀺𑀦𑁆𑀦𑀦𑁆𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑀲𑀗𑁆𑀖𑀸𑀝𑀻𑀦𑀁. 𑀢𑀺𑀭𑀺𑀬𑀢𑁄𑀢𑀺 𑀯𑀺𑀢𑁆𑀣𑀸𑀭𑀢𑁄. 𑀅𑀝𑁆𑀞𑀗𑁆𑀕𑀼𑀮𑀢𑁄 𑀑𑀭𑀦𑁆𑀢𑀺 𑀅𑀝𑁆𑀞𑀗𑁆𑀕𑀼𑀮𑀢𑁄 𑀅𑀩𑁆𑀪𑀦𑁆𑀢𑀭𑁂. 𑀢𑀺𑀡𑁆𑀡𑀫𑁆𑀧𑀺 𑀤𑀻𑀖𑀢𑁄 𑀯𑀺𑀤𑀢𑁆𑀣𑀺𑀬𑀸 𑀑𑀭𑀁 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀪𑀺𑀦𑁆𑀤𑀢𑁂𑀯𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀯𑀺𑀤𑀢𑁆𑀣𑀺 𑀯𑀟𑁆𑀠𑀓𑀺𑀯𑀺𑀤𑀢𑁆𑀣𑀺 𑀕𑀳𑁂𑀢𑀩𑁆𑀩𑀸. 𑀏𑀯𑀁 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑁂 𑀙𑀺𑀤𑁆𑀤𑁂 𑀚𑀸𑀢𑁂 𑀢𑀲𑁆𑀲 𑀘𑀻𑀯𑀭𑀲𑁆𑀲 𑀅𑀢𑀺𑀭𑁂𑀓𑀘𑀻𑀯𑀭𑀢𑁆𑀢𑀸 𑀤𑀲𑀸𑀳𑀫𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀽𑀘𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀢𑀣𑀸 𑀅𑀓𑀭𑁄𑀦𑁆𑀢𑁂𑀦 𑀧𑀦 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀁.

𑁫𑁭𑁧. ‘‘𑀦𑀺𑀲𑀻𑀤𑀦𑀲𑁆𑀲𑀸’’𑀢𑀺 ‘‘𑀦𑀺𑀲𑀻𑀤𑀦𑀘𑀻𑀯𑀭𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀤𑀺𑀬𑀟𑁆𑀠𑀸𑀢𑀺 𑀏𑀢𑁆𑀣 𑀯𑀺𑀲𑁂𑀲𑀺𑀢𑀩𑁆𑀩𑀸 𑀯𑀺𑀤𑀢𑁆𑀣𑀺 ‘‘𑀤𑁆𑀯𑁂 𑀯𑀺𑀤𑀢𑁆𑀣𑀺𑀬𑁄’’𑀢𑀺 𑀘 ‘‘𑀲𑀼𑀕𑀢𑀲𑁆𑀲 𑀯𑀺𑀤𑀢𑁆𑀣𑀺𑀬𑀸’’𑀢𑀺 𑀘 𑀯𑀼𑀢𑁆𑀢𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺. 𑀅𑀟𑁆𑀠𑁂𑀦 𑀤𑀼𑀢𑀺𑀬𑀸 𑀤𑀺𑀬𑀟𑁆𑀠𑀸, 𑀤𑀼𑀢𑀺𑀬𑀁 𑀅𑀟𑁆𑀠𑀫𑁂𑀢𑀲𑁆𑀲𑀸𑀢𑀺 ‘‘𑀤𑀼𑀢𑀺𑀬𑀟𑁆𑀠𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀢𑀺𑀬-𑀧𑀘𑁆𑀘𑀬𑀮𑁄𑀧𑁂𑀦 ‘‘𑀤𑀺𑀬𑀟𑁆𑀠𑀸’’𑀢𑀺 𑀯𑀼𑀢𑁆𑀢𑀁, 𑀅𑀟𑁆𑀠𑀤𑀼𑀢𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑀼𑀕𑀢𑀲𑁆𑀲 𑀯𑀺𑀤𑀢𑁆𑀣𑀺𑀬𑀸’’𑀢𑀺 𑀧𑀫𑀸𑀡𑀦𑀺𑀬𑀫𑀲𑁆𑀲 𑀓𑀢𑀢𑁆𑀢𑀸 𑀯𑀟𑁆𑀠𑀓𑀺𑀯𑀺𑀤𑀢𑁆𑀣𑀺𑀬𑀸 𑀢𑀺𑀲𑁆𑀲𑁄 𑀯𑀺𑀤𑀢𑁆𑀣𑀺𑀬𑁄 𑀏𑀓𑀸 𑀲𑀼𑀕𑀢𑀯𑀺𑀤𑀢𑁆𑀣𑀺 𑀳𑁄𑀢𑀺. 𑀇𑀤𑀁 𑀦𑀺𑀲𑀻𑀤𑀦𑀘𑀻𑀯𑀭𑀁 𑀤𑀻𑀖𑀢𑁄 𑀯𑀟𑁆𑀠𑀓𑀺𑀳𑀢𑁆𑀣𑁂𑀦 𑀢𑀺𑀳𑀢𑁆𑀣𑀁, 𑀯𑀺𑀢𑁆𑀣𑀸𑀭𑀢𑁄 𑀙𑀴𑀗𑁆𑀕𑀼𑀮𑀸𑀥𑀺𑀓𑀤𑁆𑀯𑀺𑀳𑀢𑁆𑀣𑀧𑁆𑀧𑀫𑀸𑀡𑀁 𑀳𑁄𑀢𑀺. ‘‘𑀤𑀲𑀸 𑀯𑀺𑀤𑀢𑁆𑀣𑀻’’𑀢𑀺 (𑀧𑀸𑀘𑀺. 𑁫𑁩𑁩) 𑀯𑀼𑀢𑁆𑀢𑀢𑁆𑀢𑀸 𑀤𑀺𑀬𑀟𑁆𑀠𑀳𑀢𑁆𑀣𑀸 𑀤𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁫𑁭𑁨. 𑀘𑀢𑀲𑁆𑀲𑁄𑀢𑀺 𑀏𑀢𑁆𑀣𑀸𑀧𑀺 ‘‘𑀯𑀺𑀤𑀢𑁆𑀣𑀺𑀬𑁄’’𑀢𑀺 𑀲𑀸𑀫𑀢𑁆𑀣𑀺𑀬𑀸𑀯 𑀮𑀩𑁆𑀪𑀢𑀺. ‘‘𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀬𑀸’’𑀢𑀺 𑀯𑀺𑀪𑀢𑁆𑀢𑀺𑀧𑀭𑀺𑀡𑀸𑀫𑁂𑀦 𑀤𑀻𑀖𑀢𑁄𑀢𑀺 𑀬𑁄𑀚𑀦𑀸.

𑁫𑁭𑁩. 𑀅𑀟𑁆𑀠𑀁 𑀢𑁂𑀬𑁆𑀬𑀁 𑀢𑀢𑀺𑀬𑀁 𑀬𑀲𑁆𑀲𑀸 𑀲𑀸 𑀅𑀟𑁆𑀠𑀢𑁂𑀬𑁆𑀬𑀸, 𑀅𑀟𑁆𑀠𑀢𑀢𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁫𑁭𑁪. 𑀢𑀢𑁄 𑀉𑀢𑁆𑀢𑀭𑀺𑀁 𑀢𑀤𑀼𑀢𑁆𑀢𑀭𑀺𑀁, 𑀢𑀲𑁆𑀲 𑀢𑀲𑁆𑀲 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄 𑀅𑀢𑀺𑀭𑁂𑀓𑀁. 𑀅𑀥𑀺𑀓𑀘𑁆𑀙𑁂𑀤𑀦𑀦𑁆𑀢𑀺 𑀅𑀥𑀺𑀓𑀲𑁆𑀲 𑀧𑀫𑀸𑀡𑀸𑀢𑀺𑀭𑀺𑀢𑁆𑀢𑀝𑁆𑀞𑀸𑀦𑀲𑁆𑀲 𑀙𑁂𑀤𑀦𑀁 𑀅𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑀤𑁂𑀲𑀦𑀸𑀬𑀸𑀢𑀺 𑀅𑀥𑀺𑀓𑀘𑁆𑀙𑁂𑀤𑀦𑀁, 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄 𑀅𑀥𑀺𑀓𑀝𑁆𑀞𑀸𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀤𑁂𑀲𑁂𑀢𑀩𑁆𑀩𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀉𑀤𑀻𑀭𑀺𑀢𑀁 𑀯𑀼𑀢𑁆𑀢𑀁 𑀧𑀸𑀴𑀺𑀬𑀸𑀢𑀺 𑀅𑀢𑁆𑀣𑁄.

𑁫𑁭𑁫. 𑀅𑀧𑁆𑀧𑀫𑀸𑀡𑁂𑀦𑀸𑀢𑀺 𑀕𑀼𑀡𑀯𑀲𑁂𑀦 𑀅𑀧𑁆𑀧𑀫𑀸𑀡𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦.

𑁫𑁭𑁬. 𑀲𑀩𑁆𑀩𑀁 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀅𑀝𑁆𑀞𑀓𑀣𑀸𑀬 𑀆𑀕𑀢𑀁 𑀦𑀻𑀮𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀫𑀳𑀦𑁆𑀢𑀸𑀤𑀺𑀪𑁂𑀤𑀁 𑀲𑀩𑁆𑀩𑀁 𑀧𑀘𑁆𑀘𑀢𑁆𑀣𑀭𑀡𑀘𑀻𑀯𑀭𑀁 𑀯𑀝𑁆𑀝𑀢𑀺.

𑁫𑁭𑁭. ‘‘𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀁 𑀏𑀓’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀏𑀓𑀁 𑀥𑁄𑀯𑀺𑀢𑁆𑀯𑀸 𑀬𑀸𑀯 𑀲𑀼𑀓𑁆𑀔𑀸𑀧𑀻𑀬𑀢𑀺, 𑀢𑀸𑀯 𑀅𑀜𑁆𑀜𑁂𑀦 𑀫𑀼𑀔𑀧𑀼𑀜𑁆𑀙𑀦𑁂𑀦 𑀪𑀯𑀺𑀢𑀩𑁆𑀩𑀢𑁆𑀢𑀸 𑀆𑀳 ‘‘𑀤𑁆𑀯𑁂𑀧𑀺 𑀯𑀝𑁆𑀝𑀦𑁆𑀢𑀺 𑀲𑀩𑁆𑀩𑀣𑀸’’𑀢𑀺.

𑁫𑁭𑁯. 𑀧𑀫𑀸𑀡𑀢𑁄, 𑀕𑀡𑀦𑀢𑁄 𑀘 𑀅𑀢𑀻𑀢𑀸𑀢𑀺 𑀧𑀫𑀸𑀡𑀕𑀡𑀦𑀸𑀢𑀻𑀢𑀸. ‘‘𑀧𑀫𑀸𑀡𑀸𑀢𑀻𑀢𑀸’’𑀢𑀺 𑀯𑀘𑀦𑁂𑀦 𑀯𑀺𑀦𑀬𑀥𑀭𑀸𑀦𑀁 𑀅𑀧𑁆𑀧𑀫𑀸𑀡𑀕𑀼𑀡𑀢𑀁 𑀤𑀲𑁆𑀲𑁂𑀢𑀺, ‘‘𑀕𑀡𑀦𑀸𑀢𑀻𑀢𑀸’’𑀢𑀺 𑀇𑀫𑀺𑀦𑀸 𑀅𑀢𑀺𑀓𑁆𑀓𑀦𑁆𑀢𑀕𑀡𑀦𑀢𑀁. 𑀧𑀓𑀢𑀁 𑀯𑀺𑀦𑀬𑁂 𑀧𑀞𑀫𑀁 𑀓𑀢𑀁 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 𑀚𑀸𑀦𑀦𑁆𑀢𑀻𑀢𑀺 𑀧𑀓𑀢𑀜𑁆𑀜𑀽, 𑀯𑀺𑀦𑀬𑀥𑀭𑀸, 𑀢𑁂 𑀧𑀓𑀢𑀜𑁆𑀜𑀼𑀦𑁄. 𑀅𑀧𑀭𑀺𑀫𑀸𑀡𑀕𑀼𑀡𑀫𑀡𑀺𑀕𑀡𑀪𑀽𑀲𑀺𑀢𑀉𑀧𑀸𑀮𑀺𑀤𑀸𑀲𑀓𑀸𑀤𑀺𑀫𑀳𑀸𑀣𑁂𑀭𑀸𑀘𑀭𑀺𑀬𑀧𑀭𑀫𑁆𑀧𑀭𑀸𑀕𑀢𑀸 𑀲𑀗𑁆𑀔𑁆𑀬𑀸𑀧𑀣𑀸𑀢𑀻𑀢𑀸 𑀯𑀺𑀦𑀬𑀥𑀭𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁫𑁮𑁦. 𑀲𑀼𑀕𑀢𑀝𑁆𑀞𑀗𑁆𑀕𑀼𑀮𑀸𑀬𑀸𑀫𑀦𑁆𑀢𑀺 𑀯𑀟𑁆𑀠𑀓𑀺𑀭𑀢𑀦𑀧𑁆𑀧𑀫𑀸𑀡𑀤𑀻𑀖𑀁. 𑀘𑀢𑀼𑀭𑀗𑁆𑀕𑀼𑀮𑀯𑀺𑀢𑁆𑀣𑀢𑀦𑁆𑀢𑀺 𑀯𑀟𑁆𑀠𑀓𑀺𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀯𑀺𑀢𑁆𑀣𑀸𑀭𑀁. 𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫𑀁 𑀘𑀻𑀯𑀭𑀁 𑀦𑀸𑀫 𑀳𑁄𑀢𑀺. 𑀧𑀘𑁆𑀙𑀺𑀫𑀁 𑀘𑀻𑀯𑀭𑀦𑁆𑀢𑀺 𑀧𑀭𑀺𑀲𑁆𑀲𑀸𑀯𑀦𑀧𑀝𑀸𑀤𑀻𑀦𑀁 𑀯𑀺𑀲𑁂𑀲𑀦𑀁, 𑀧𑀘𑁆𑀙𑀺𑀫𑀘𑀻𑀯𑀭𑀧𑁆𑀧𑀫𑀸𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁫𑁮𑁧. 𑀧𑀭𑀺𑀲𑁆𑀲𑀸𑀯𑀧𑀝𑀦𑁆𑀢𑀺 𑀉𑀤𑀓𑀧𑀭𑀺𑀲𑁆𑀲𑀸𑀯𑀦𑀢𑁆𑀣𑀁 𑀧𑀝𑀁. 𑀧𑀢𑁆𑀢𑀢𑁆𑀣𑀯𑀺𑀓𑀦𑁆𑀢𑀺 𑀧𑀢𑁆𑀢𑀓𑀜𑁆𑀘𑀼𑀓𑀁. 𑀧𑁄𑀢𑁆𑀣𑀓𑀢𑁆𑀣𑀯𑀺𑀓𑀦𑁆𑀢𑀺 𑀧𑁄𑀢𑁆𑀣𑀓𑀓𑀜𑁆𑀘𑀼𑀓𑀁. 𑀆𑀤𑀺𑀕𑁆𑀕𑀳𑀡𑁂𑀦 𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀸𑀤𑀺𑀁 𑀬𑀁 𑀓𑀺𑀜𑁆𑀘𑀺 𑀧𑀝𑀁, 𑀤𑀡𑁆𑀟𑀧𑀝𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺.

𑁫𑁮𑁨. 𑀅𑀥𑀺𑀝𑁆𑀞𑀸𑀢𑀼𑀦𑁆𑀢𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀼𑀁. 𑀞𑀧𑀺𑀢𑁂𑀢𑀺 𑀅𑀦𑀥𑀺𑀝𑁆𑀞𑀸𑀬 𑀞𑀧𑀺𑀢𑁂. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) 𑀆𑀳. 𑀦𑀢𑁆𑀣𑀺 𑀤𑁄𑀲𑀢𑀸𑀢𑀺 𑀤𑁄𑀲𑁄 𑀏𑀯 𑀤𑁄𑀲𑀢𑀸. ‘‘𑀅𑀢𑁆𑀢𑀦𑁄 𑀲𑀦𑁆𑀢𑀓𑀪𑀸𑀯𑀢𑁄 𑀫𑁄𑀘𑁂𑀢𑁆𑀯𑀸 𑀞𑀧𑀺𑀢𑀁 𑀲𑀦𑁆𑀥𑀸𑀬 𑀫𑀳𑀸𑀧𑀘𑁆𑀘𑀭𑀺𑀬𑀁 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺. ‘‘𑀇𑀫𑀺𑀦𑀸 𑀪𑁂𑀲𑀚𑁆𑀚𑀁 𑀘𑁂𑀢𑀸𑀧𑁂𑀲𑁆𑀲𑀸𑀫𑀺, 𑀇𑀤𑀁 𑀫𑀸𑀢𑀼𑀬𑀸 𑀤𑀲𑁆𑀲𑀸𑀫𑀻’’𑀢𑀺 𑀞𑀧𑁂𑀦𑁆𑀢𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. ‘‘𑀇𑀤𑀁 𑀪𑁂𑀲𑀚𑁆𑀚𑀲𑁆𑀲, 𑀫𑀸𑀢𑀼𑀬𑀸’’𑀢𑀺 𑀯𑀺𑀪𑀚𑀺𑀢𑁆𑀯𑀸 𑀲𑀲𑀦𑁆𑀢𑀓𑀪𑀸𑀯𑀢𑁄 𑀫𑁄𑀘𑀺𑀢𑁂 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀬𑀁 𑀯𑀢𑁆𑀣𑀁 𑀪𑀺𑀓𑁆𑀔𑀼𑀦𑀸 𑀮𑀤𑁆𑀥𑀁, 𑀓𑀢𑀁 𑀫𑀸𑀢𑀸𑀤𑀺𑀲𑀦𑁆𑀢𑀓𑀁;

𑀦𑀺𑀲𑁆𑀲𑀕𑁆𑀕𑀺𑀬𑀁 𑀦 𑀳𑁄𑀢𑀻𑀢𑀺, 𑀢𑀫𑀸𑀳𑀼 𑀯𑀺𑀦𑀬𑀜𑁆𑀜𑀼𑀦𑁄’’𑀢𑀺.

𑁫𑁮𑁩. 𑀯𑀲𑁆𑀲𑀫𑀸𑀲𑁂 𑀘𑀢𑀼𑀭𑁄𑀢𑀺 𑀯𑀲𑁆𑀲𑀸𑀦𑁂 𑀘𑀢𑀼𑀭𑁄 𑀫𑀸𑀲𑁂, 𑀅𑀥𑀺𑀝𑁆𑀞𑀸𑀦𑀓𑀺𑀭𑀺𑀬𑀸𑀬 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀅𑀯𑀺𑀘𑁆𑀙𑁂𑀤𑁄𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀦𑀺𑀯𑀸𑀲𑁂𑀢𑀩𑁆𑀩𑀸 𑀲𑀸𑀝𑀺𑀓𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸.

𑁫𑁮𑁪. 𑀓𑀡𑁆𑀟𑀼𑀁 𑀧𑀝𑀺𑀘𑁆𑀙𑀸𑀤𑁂𑀢𑀻𑀢𑀺 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺, 𑀓𑀡𑁆𑀟𑀼𑀭𑁄𑀕𑀸𑀢𑀼𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀧𑁆𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀫𑀦𑀼𑀜𑁆𑀜𑀸𑀢𑀘𑀻𑀯𑀭𑀲𑁆𑀲𑁂𑀢𑀫𑀥𑀺𑀯𑀘𑀦𑀁. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀫𑀸𑀢𑀺𑀓𑀝𑁆𑀞𑀓𑀣𑀸𑀬𑀲𑁆𑀲𑀸, 𑀓𑀡𑁆𑀟𑀼𑀘𑁆𑀙𑀸𑀤𑀺𑀓𑀲𑀸𑀝𑀺𑀬𑀸;

𑀦 𑀓𑀸𑀮𑀸𑀢𑀺𑀓𑁆𑀓𑀫𑁂 𑀯𑀼𑀢𑁆𑀢𑀁, 𑀅𑀥𑀺𑀝𑁆𑀞𑀸𑀦𑀯𑀺𑀯𑀝𑁆𑀝𑀦𑀁.

𑀅𑀥𑀺𑀝𑁆𑀞𑀸𑀦𑀧𑀳𑀸𑀦𑀗𑁆𑀕𑁂-𑀲𑀼 𑀯𑀼𑀢𑁆𑀢𑀢𑁆𑀢𑀸 𑀯𑀺𑀲𑁂𑀲𑀢𑁄;

𑀯𑀻𑀫𑀁𑀲𑀺𑀢𑀩𑁆𑀩𑀁 𑀯𑀺𑀜𑁆𑀜𑀽𑀳𑀺, 𑀢𑀢𑁆𑀣 𑀬𑀁 𑀓𑀸𑀭𑀡𑀁 𑀲𑀺𑀬𑀸’’𑀢𑀺.

𑁫𑁮𑁬. ‘‘𑀅𑀲𑀫𑁆𑀫𑀼𑀔𑁂 𑀏𑀢𑀦𑁆𑀢𑀺 𑀘𑀸’’𑀢𑀺 𑀯𑀘𑀦𑁂𑀦𑁂𑀯 𑀲𑀫𑁆𑀫𑀼𑀔𑁂 ‘‘𑀇𑀫’’𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀯𑀺𑀘𑀓𑁆𑀔𑀡𑁄 𑀧𑀘𑁆𑀘𑀼𑀤𑁆𑀥𑀭𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑁫𑁮𑁭. 𑀅𑀥𑀺𑀝𑁆𑀞𑀺𑀢𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑀁.

𑁫𑁮𑁮. 𑀇𑀢𑀺 𑀲𑀩𑁆𑀩𑀫𑀺𑀤𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀇𑀤𑀁 𑀢𑀺𑀘𑀻𑀯𑀭𑀸𑀤𑀻𑀦𑀁 𑀧𑀫𑀸𑀡𑀸𑀤𑀺𑀲𑀩𑁆𑀩𑀯𑀺𑀥𑀸𑀦𑀁. 𑀢𑁂𑀘𑀻𑀯𑀭𑀺𑀓𑀪𑀺𑀓𑁆𑀔𑀼𑀦𑁄𑀢𑀺 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀺𑀢𑀢𑁂𑀘𑀻𑀯𑀭𑀺𑀓𑀲𑁆𑀲 𑀯𑀺𑀦𑀬𑀢𑁂𑀘𑀻𑀯𑀭𑀺𑀓𑀲𑁆𑀲. 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀲𑀫𑀸𑀳𑀸𑀭𑁄 𑀢𑀺𑀘𑀻𑀯𑀭𑀁, 𑀢𑀺𑀡𑁆𑀡𑀁 𑀢𑀺𑀘𑀻𑀯𑀭𑀸𑀦𑀁 𑀲𑀫𑀸𑀳𑀸𑀭𑁄𑀢𑀺 ‘‘𑀢𑀺𑀢𑀺𑀘𑀻𑀯𑀭’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀦𑀬𑁂𑀦 ‘‘𑀢𑀺𑀘𑀻𑀯𑀭’’𑀦𑁆𑀢𑀺 𑀦𑀯𑀘𑀻𑀯𑀭𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀺, 𑀢𑀺𑀘𑀻𑀯𑀭𑁂 𑀦𑀺𑀬𑀼𑀢𑁆𑀢𑁄 𑀢𑁂𑀘𑀻𑀯𑀭𑀺𑀓𑁄𑀢𑀺 𑀯𑀺𑀦𑀬𑀢𑁂𑀘𑀻𑀯𑀭𑀺𑀓𑁄 𑀯𑀼𑀘𑁆𑀘𑀢𑀺. 𑀥𑀼𑀢𑀗𑁆𑀕𑀢𑁂𑀘𑀻𑀯𑀭𑀺𑀓𑀲𑁆𑀲𑀸𑀧𑀺 𑀢𑀺𑀘𑀻𑀯𑀭𑁂 𑀇𑀤𑀫𑁂𑀯 𑀯𑀺𑀥𑀸𑀦𑀦𑁆𑀢𑀺 𑀲𑁄𑀧𑀺 𑀲𑀗𑁆𑀕𑀬𑁆𑀳𑀢𑀺. 𑀅𑀜𑁆𑀜𑁂𑀲𑀼 𑀯𑀸 𑀧𑀦 𑀙𑀲𑀼 𑀘𑀻𑀯𑀭𑁂𑀲𑀼 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀏𑀓𑀁 𑀅𑀁𑀲𑀓𑀸𑀲𑀸𑀯𑀫𑁂𑀯 𑀯𑀝𑁆𑀝𑀢𑀺. 𑀢𑀣𑀸 𑀯𑀢𑁆𑀯𑀸𑀯𑀸𑀢𑀺 ‘‘𑀇𑀫𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀢𑁆𑀯𑀸. 𑀢𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀁. 𑀧𑀭𑀺𑀓𑁆𑀔𑀸𑀭𑀘𑁄𑀴𑀫𑀲𑁆𑀲 𑀅𑀢𑁆𑀣𑀺, 𑀢𑀢𑁆𑀣 𑀯𑀸 𑀦𑀺𑀬𑀼𑀢𑁆𑀢𑁄𑀢𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀺𑀓𑁄.

𑁫𑁮𑁯. ‘‘𑀢𑀺𑀘𑀻𑀯𑀭𑀁 𑀧𑀦 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀺, 𑀦 𑀯𑀝𑁆𑀝𑀢𑀻’’𑀢𑀺 𑀅𑀦𑀼𑀬𑁄𑀕𑀁 𑀓𑀢𑁆𑀯𑀸 ‘‘𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀢𑁆𑀢𑀸 𑀇𑀥 ‘‘𑀢𑀺𑀘𑀻𑀯𑀭’’𑀦𑁆𑀢𑀺 𑀘𑀻𑀯𑀭𑀢𑁆𑀢𑀬𑀫𑁂𑀯 𑀯𑀼𑀢𑁆𑀢𑀁. ‘‘𑀲𑀼𑀔𑀧𑀭𑀺𑀳𑀸𑀭𑀢𑁆𑀣𑀁 𑀏𑀓𑀫𑁆𑀧𑀺 𑀯𑀺𑀓𑀧𑁆𑀧𑁂𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀢𑁄 𑀏𑀓𑀤𑁂𑀲𑁂 𑀲𑀫𑀼𑀤𑀸𑀬𑁄𑀧𑀘𑀸𑀭𑀯𑀲𑁂𑀦 𑀏𑀓𑀫𑁆𑀧𑀺 𑀯𑀺𑀓𑀧𑁆𑀧𑁂𑀢𑀩𑁆𑀩𑀫𑁂𑀯 𑀳𑁄𑀢𑀺.

𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀓𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀩𑀤𑁆𑀥𑀲𑀻𑀫𑀢𑁄 𑀩𑀳𑀺 𑀯𑀲𑀦𑁆𑀢𑁂𑀦 𑀏𑀓𑀓𑁂𑀦 𑀢𑁂𑀘𑀻𑀯𑀭𑀺𑀓𑁂𑀦 𑀅𑀦𑁆𑀢𑁄𑀅𑀭𑀼𑀡𑁂 𑀅𑀲𑀢𑀺𑀬𑀸 𑀢𑀻𑀲𑀼 𑀘𑀻𑀯𑀭𑁂𑀲𑀼 𑀳𑀢𑁆𑀣𑀧𑀸𑀲𑁂 𑀅𑀓𑀢𑁂𑀲𑀼 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺, 𑀯𑀺𑀦𑀬𑀓𑀫𑁆𑀫𑀁 𑀓𑀸𑀢𑀼𑀁 𑀲𑀪𑀸𑀕𑀧𑀼𑀕𑁆𑀕𑀮𑀸𑀦𑀁 𑀤𑀼𑀮𑁆𑀮𑀪𑀢𑁆𑀢𑀸 𑀘 𑀲𑀼𑀔𑀧𑀭𑀺𑀳𑀸𑀭𑀢𑁆𑀣𑀁 𑀢𑀻𑀲𑀼 𑀏𑀓𑀁 𑀯𑀸 𑀲𑀩𑁆𑀩𑀸𑀦𑀺 𑀏𑀯 𑀯𑀸 𑀢𑀺𑀘𑀻𑀯𑀭𑀦𑀸𑀫𑁂𑀦 𑀓𑀢𑀸𑀥𑀺𑀝𑁆𑀞𑀸𑀦𑀸𑀦𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀲𑀘𑁂 𑀢𑀺𑀘𑀻𑀯𑀭𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀥𑀺𑀝𑁆𑀞𑀸𑀦𑀁 𑀮𑀪𑁂𑀬𑁆𑀬, 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑁂 𑀧𑀭𑀺𑀳𑀸𑀭𑁄 𑀦𑀺𑀭𑀢𑁆𑀣𑀓𑁄 𑀪𑀯𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) 𑀯𑀼𑀢𑁆𑀢𑀁 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑀲𑁆𑀲 𑀫𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀏𑀯𑀁 𑀘𑀼𑀤𑁄𑀲𑀺𑀢𑁂’’𑀢𑀺𑀆𑀤𑀺. 𑀏𑀯𑀁 𑀘𑁂𑀢𑀺 𑀏𑀯𑀁 𑀢𑀺𑀘𑀻𑀯𑀭𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀳𑀭𑀺𑀢𑀼𑀁 𑀯𑀝𑁆𑀝𑀢𑀺 𑀘𑁂. 𑀉𑀤𑁄𑀲𑀺𑀢𑁂𑀢𑀺 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀦𑀦𑁆𑀢𑀭𑁂 𑀤𑀼𑀢𑀺𑀬𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑁂. 𑀯𑀼𑀢𑁆𑀢𑁄 𑀧𑀭𑀺𑀳𑀸𑀭𑁄𑀢𑀺 ‘‘𑀏𑀓𑀓𑀼𑀮𑀲𑁆𑀲 𑀕𑀸𑀫𑁄 𑀳𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀘. 𑀅𑀦𑁆𑀢𑁄𑀕𑀸𑀫𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄𑀕𑀸𑀫𑁂 𑀯𑀢𑁆𑀣𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁭𑁮) 𑀦𑀬𑁂𑀦 𑀧𑀤𑀪𑀸𑀚𑀦𑀸𑀯𑀲𑀸𑀦𑁂 𑀯𑀼𑀢𑁆𑀢𑁄, 𑀇𑀥 𑀘 ‘‘𑀕𑀸𑀫𑀸𑀤𑀻𑀲𑀼 𑀧𑀤𑁂𑀲𑁂𑀲𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀦𑁆𑀢𑀭𑀁 𑀯𑀓𑁆𑀔𑀫𑀸𑀦𑁄 𑀢𑀺𑀘𑀻𑀯𑀭𑀲𑁆𑀲 𑀧𑀭𑀺𑀳𑀭𑀡𑀯𑀺𑀥𑀺. 𑀦𑀺𑀭𑀢𑁆𑀣𑀓𑁄𑀢𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀲 𑀢𑁂𑀦 𑀯𑀺𑀥𑀺𑀦𑀸 𑀢𑀺𑀘𑀻𑀯𑀭𑀁 𑀅𑀧𑀭𑀺𑀳𑀭𑀦𑁆𑀢𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀦𑁄 𑀅𑀦𑀸𑀧𑀢𑁆𑀢𑀺𑀪𑀸𑀯𑀢𑁄 𑀦𑀺𑀧𑁆𑀧𑀬𑁄𑀚𑀦𑁄𑀢𑀺 𑀅𑀢𑁆𑀣𑁄.

𑁫𑁯𑁦. 𑀢𑀧𑁆𑀧𑀭𑀺𑀳𑀭𑀺𑀢𑀼𑀫𑀸𑀳 ‘‘𑀦’’𑀇𑀘𑁆𑀘𑀸𑀤𑀺. 𑀦 𑀦𑀺𑀭𑀢𑁆𑀣𑀓𑁄𑀢𑀺 𑀬𑁄𑀚𑀦𑀸. 𑀳𑁂𑀢𑀼𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑁂𑀘𑀻𑀯𑀭𑀺𑀓𑀲𑁆𑀲𑁂𑀯𑀸’’𑀢𑀺𑀆𑀤𑀺. 𑀬𑁄 𑀢𑀺𑀘𑀻𑀯𑀭𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀦𑀁 𑀅𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀅𑀦𑁆𑀢𑁄𑀅𑀭𑀼𑀡𑁂 𑀘𑀻𑀯𑀭𑀁 𑀳𑀢𑁆𑀣𑀧𑀸𑀲𑀢𑁄 𑀅𑀫𑁄𑀘𑁂𑀢𑁆𑀯𑀸 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀺, 𑀢𑀸𑀤𑀺𑀲𑀲𑁆𑀲 𑀢𑁂𑀘𑀻𑀯𑀭𑀺𑀓𑀲𑁆𑀲𑁂𑀯 𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀉𑀤𑁄𑀲𑀺𑀢𑀧𑀭𑀺𑀳𑀸𑀭𑀲𑁆𑀲 𑀪𑀕𑀯𑀢𑀸 𑀤𑁂𑀲𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀢𑀸𑀤𑀺𑀲𑀲𑁆𑀲𑁂𑀯 𑀢𑁂𑀘𑀻𑀯𑀭𑀺𑀓𑀲𑁆𑀲 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑁂 𑀧𑀭𑀺𑀳𑀸𑀭𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸. 𑀢𑀁 𑀲𑀩𑁆𑀩𑀫𑁆𑀧𑀻𑀢𑀺 𑀢𑀁 𑀦𑀯𑀯𑀺𑀥𑀁 𑀲𑀩𑁆𑀩𑀫𑁆𑀧𑀺 𑀘𑀻𑀯𑀭𑀁. 𑀧𑀭𑀺𑀓𑁆𑀔𑀸𑀭𑀘𑁄𑀴𑀲𑁆𑀲𑀸𑀢𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑀲𑁆𑀲 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀺.

𑁫𑁯𑁧. 𑀇𑀫𑀺𑀦𑀸 𑀉𑀤𑁄𑀲𑀺𑀢𑀧𑀭𑀺𑀳𑀸𑀭𑀲𑁆𑀲 𑀅𑀦𑀺𑀭𑀢𑁆𑀣𑀓𑀪𑀸𑀯𑀁 𑀲𑀸𑀥𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀢𑀺𑀘𑀻𑀯𑀭𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦𑀸𑀧𑀺 𑀅𑀥𑀺𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀇𑀫𑀲𑁆𑀲 𑀅𑀥𑀺𑀓𑀢𑁆𑀣𑀲𑁆𑀲 𑀫𑀳𑀸𑀓𑀸𑀭𑀼𑀡𑀺𑀓𑁂𑀦 𑀅𑀦𑀼𑀜𑁆𑀜𑀸𑀢𑀪𑀸𑀯𑁂 𑀓𑀺𑀭𑀺𑀬𑀦𑁆𑀢𑀭𑀸𑀦𑀼𑀚𑀸𑀦𑀦𑀲𑀗𑁆𑀔𑀸𑀢𑀅𑀥𑀺𑀓𑀯𑀘𑀦𑀲𑁆𑀲 𑀜𑀸𑀧𑀓𑀳𑁂𑀢𑀼𑀪𑀸𑀯𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀥𑀺𑀝𑁆𑀞𑁂𑀢𑀻’’𑀢𑀺𑀆𑀤𑀺. 𑀇𑀫𑀲𑁆𑀫𑀺𑀁𑀬𑁂𑀯 𑀲𑀺𑀓𑁆𑀔𑀸𑀧𑀤𑁂 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀅𑀦𑀸𑀧𑀢𑁆𑀢𑀺 𑀅𑀦𑁆𑀢𑁄𑀤𑀲𑀸𑀳𑀁 𑀅𑀥𑀺𑀝𑁆𑀞𑁂𑀢𑀺, 𑀯𑀺𑀓𑀧𑁆𑀧𑁂𑀢𑀻’’𑀢𑀺 𑀧𑀸𑀞𑁂 𑀅𑀦𑀸𑀧𑀢𑁆𑀢𑀺𑀪𑀸𑀯𑁂 ‘‘𑀅𑀥𑀺𑀝𑁆𑀞𑁂𑀢𑀻’’𑀢𑀺 𑀏𑀢𑁆𑀢𑀓𑁂𑀦𑁂𑀯 𑀧𑀭𑀺𑀬𑀢𑁆𑀢𑁂 (𑀧𑀸𑀭𑀸. 𑁪𑁬𑁯) ‘‘𑀯𑀺𑀓𑀧𑁆𑀧𑁂𑀢𑀻’’𑀢𑀺 𑀓𑀺𑀭𑀺𑀬𑀦𑁆𑀢𑀭𑀸𑀦𑀼𑀚𑀸𑀦𑀦𑁂𑀦 𑀧𑀓𑀸𑀭𑀦𑁆𑀢𑀭𑁂𑀦𑀸𑀧𑀺 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑀲𑁆𑀲 𑀯𑀺𑀜𑁆𑀜𑀸𑀧𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄.

𑁫𑁯𑁨. 𑀏𑀯𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀢𑀺𑀘𑀻𑀯𑀭𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀦𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲. 𑀇𑀤𑀸𑀦𑀺 𑀅𑀢𑀺𑀧𑁆𑀧𑀲𑀗𑁆𑀕𑀁 𑀤𑀲𑁆𑀲𑁂𑀢𑀼𑀓𑀸𑀫𑀲𑁆𑀲 𑀘𑁄𑀤𑀓𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀏𑀯’’𑀦𑁆𑀢𑀺𑀆𑀤𑀺. 𑀫𑀽𑀮𑀸𑀥𑀺𑀝𑁆𑀞𑀸𑀦𑀁 𑀧𑀳𑀸𑀬 𑀓𑀸𑀢𑀩𑁆𑀩𑀧𑁆𑀧𑀓𑀸𑀭𑀦𑁆𑀢𑀭𑀲𑁆𑀲𑀸𑀧𑀺 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀢𑀺𑀘𑀻𑀯𑀭𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀫𑀼𑀔𑀧𑀼𑀜𑁆𑀙𑀦𑀸𑀤𑀺𑀓𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀳𑀢𑁄𑀧𑀺 𑀤𑁄𑀲𑁄 𑀦 𑀲𑀺𑀬𑀸𑀢𑀺 𑀓𑀲𑁆𑀫𑀸 𑀦𑀸𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀦𑀇𑀢𑀺 𑀅𑀢𑀺𑀧𑁆𑀧𑀲𑀗𑁆𑀕𑀦𑀺𑀯𑀸𑀭𑀡𑁂.

𑁫𑁯𑁩. 𑀓𑀺𑀘𑁆𑀘𑀯𑀺𑀥𑀸𑀦𑀢𑁄𑀢𑀺 𑀢𑁂𑀲𑀁 𑀫𑀼𑀔𑀧𑀼𑀜𑁆𑀙𑀦𑀸𑀤𑀻𑀦𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑀲𑁆𑀲 𑀲𑀸𑀥𑀦𑀢𑁄, 𑀢𑀸𑀤𑀺𑀲𑀁 𑀓𑀺𑀘𑁆𑀘𑀯𑀺𑀲𑁂𑀲𑀸𑀧𑁂𑀓𑁆𑀔𑀁 𑀯𑀺𑀦𑀸 𑀢𑀁𑀢𑀁𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀬𑀼𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀓𑀺𑀘𑁆𑀘𑀲𑁆𑀲𑀸𑀢𑀺 𑀫𑀼𑀔𑀧𑀼𑀜𑁆𑀙𑀦𑀸𑀤𑀺𑀓𑀺𑀘𑁆𑀘𑀭𑀳𑀺𑀢𑀲𑁆𑀲. 𑀅𑀥𑀺𑀓𑀲𑁆𑀲𑀸𑀢𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀧𑀞𑀫𑀁 𑀅𑀥𑀺𑀝𑁆𑀞𑀸𑀦𑀲𑁆𑀲 𑀯𑀺𑀚𑀳𑀺𑀢𑀢𑁆𑀢𑀸 𑀅𑀢𑀺𑀭𑁂𑀓𑀲𑁆𑀲. 𑀅𑀲𑁆𑀲𑀸𑀢𑀺 𑀢𑀺𑀘𑀻𑀯𑀭𑀲𑁆𑀲. 𑀅𑀥𑀺𑀝𑁆𑀞𑀸𑀦𑀁 𑀢𑀼 𑀬𑀼𑀚𑁆𑀚𑀢𑀻𑀢𑀺 𑀤𑀲𑀸𑀳𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀦𑀁 𑀧𑀦 𑀬𑀼𑀚𑁆𑀚𑀢𑀺.

𑁫𑁯𑁪. 𑀦𑀺𑀥𑀸𑀦𑀲𑁆𑀲 𑀫𑀼𑀔𑀁 𑀉𑀧𑀸𑀬𑁄𑀢𑀺 𑀦𑀺𑀥𑀸𑀦𑀫𑀼𑀔𑀁, 𑀅𑀦𑁆𑀢𑀭𑀯𑀸𑀲𑀓𑀸𑀤𑀺𑀢𑀁𑀢𑀁𑀘𑀻𑀯𑀭𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀦𑀢𑁄 𑀅𑀢𑀺𑀭𑁂𑀓𑀁 𑀬𑀁 𑀓𑀺𑀜𑁆𑀘𑀺 𑀘𑀻𑀯𑀭𑀁 𑀬𑀣𑀸 𑀞𑀧𑀺𑀢𑀁 𑀆𑀧𑀢𑁆𑀢𑀺𑀁 𑀦 𑀓𑀭𑁄𑀢𑀺, 𑀢𑀣𑀸 𑀦𑀺𑀥𑀸𑀦𑀲𑁆𑀲 𑀉𑀧𑀸𑀬𑁄𑀢𑀺 𑀅𑀢𑁆𑀣𑁄. 𑀏𑀢𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀥𑀺𑀝𑁆𑀞𑀸𑀦𑀁. 𑀫𑀳𑀸𑀧𑀘𑁆𑀘𑀭𑀺𑀬𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀢𑀺𑀲𑁆𑀲𑀪𑀬𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀚𑀫𑁆𑀩𑀼𑀤𑀻𑀧𑀁 𑀦𑁂𑀢𑀼𑀁 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀆𑀡𑀢𑁆𑀢𑀺𑀬𑀸 𑀯𑀺𑀲𑀼𑀓𑀫𑁆𑀫𑁂𑀦 𑀦𑀺𑀫𑁆𑀫𑀺𑀢𑀫𑀳𑀸𑀧𑀘𑁆𑀘𑀭𑀺𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀮𑀺𑀔𑀺𑀢𑀢𑁆𑀢𑀸 𑀢𑀁𑀦𑀸𑀫𑀓𑀸𑀬𑀁 𑀯𑀺𑀦𑀬𑀝𑁆𑀞𑀓𑀣𑀸𑀬𑀁, ‘‘𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀺𑀲𑀽’’𑀢𑀺𑀧𑀺 𑀮𑀺𑀔𑀦𑁆𑀢𑀺.

𑁫𑁯𑁫. 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀦𑀯𑀺𑀥𑀸𑀦𑀲𑁆𑀲 𑀯𑀼𑀢𑁆𑀢𑀧𑁆𑀧𑀫𑀸𑀡𑀁 𑀓𑀢𑀫𑀦𑁆𑀢𑀺 𑀆𑀳 ‘‘𑀘𑀻𑀯𑀭’’𑀦𑁆𑀢𑀺𑀆𑀤𑀺. ‘‘𑀦𑀺𑀤𑀸𑀦𑁂 𑀉𑀧𑁆𑀧𑀢𑁆𑀢𑀺𑀢𑁄’’𑀢𑀺 𑀧𑀤𑀘𑁆𑀙𑁂𑀤𑁄. ‘‘𑀘𑀻𑀯𑀭𑀁 𑀧𑀭𑀺𑀧𑀼𑀡𑁆𑀡’’𑀦𑁆𑀢𑀺 𑀦𑀺𑀤𑀸𑀦𑁂 ‘‘𑀢𑀺𑀘𑀻𑀯𑀭𑀁 𑀲𑀫𑁆𑀧𑀼𑀡𑁆𑀡𑀁 𑀯𑀺𑀚𑁆𑀚𑀢𑀺, 𑀇𑀤𑀫𑀢𑀺𑀭𑁂𑀓𑀘𑀻𑀯𑀭𑀁 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀪𑀺𑀓𑁆𑀔𑀽𑀳𑀺 𑀪𑀕𑀯𑀢𑁄 𑀆𑀭𑁄𑀘𑀺𑀢𑀯𑀢𑁆𑀣𑀼𑀫𑁆𑀳𑀺. 𑀉𑀧𑁆𑀧𑀢𑁆𑀢𑀺𑀢𑁄𑀢𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀥𑀺𑀝𑁆𑀞𑀸𑀦𑀲𑁆𑀲 𑀉𑀧𑁆𑀧𑀦𑁆𑀦𑀢𑁆𑀢𑀸, 𑀅𑀦𑀼𑀜𑁆𑀜𑀸𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽𑀦𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺 𑀢𑀺𑀘𑀻𑀯𑀭𑀁, 𑀅𑀢𑁆𑀣𑁄 𑀘 𑀳𑁄𑀢𑀺 𑀧𑀭𑀺𑀲𑁆𑀲𑀸𑀯𑀦𑁂𑀳𑀺𑀧𑀺 𑀣𑀯𑀺𑀓𑀸𑀳𑀺𑀧𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀧𑀭𑀺𑀓𑁆𑀔𑀸𑀭𑀘𑁄𑀴𑀓’’𑀦𑁆𑀢𑀺 (𑀫𑀳𑀸𑀯. 𑁩𑁫𑁭) 𑀏𑀢𑁆𑀣 𑀧𑀸𑀴𑀺𑀬𑀁 𑀏𑀯𑀁 𑀯𑀺𑀧𑁆𑀧𑀯𑀸𑀲𑀲𑀼𑀔𑀢𑁆𑀣𑀁 𑀦𑀸𑀫𑁂𑀦𑀸𑀥𑀺𑀝𑁆𑀞𑀺𑀢𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀦𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀸𑀥𑀦𑁂𑀦 𑀢𑀤𑁂𑀓𑀲𑀸𑀥𑀦𑀢𑁆𑀢𑀸 𑀏𑀯 𑀏𑀓𑀫𑁆𑀧𑀺 𑀘𑀻𑀯𑀭𑀁 𑀯𑀺𑀓𑀧𑁆𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺. 𑀢𑁂𑀦𑁂𑀯𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀏𑀯𑀜𑁆𑀘 𑀲𑀢𑀺 𑀬𑁄 𑀢𑀺𑀘𑀻𑀯𑀭𑁂 𑀏𑀓𑁂𑀦 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀲𑁆𑀲 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀧𑁆𑀧𑀯𑀸𑀲𑀲𑀼𑀔𑀢𑁆𑀣𑀁 𑀯𑀺𑀓𑀧𑁆𑀧𑀦𑀸𑀬 𑀑𑀓𑀸𑀲𑁄 𑀤𑀺𑀦𑁆𑀦𑁄 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯).

𑁫𑁯𑁬-𑁮. 𑀏𑀢𑁆𑀢𑀸𑀯𑀢𑀸 𑀓𑀧𑁆𑀧𑀺𑀬𑀘𑀻𑀯𑀭𑀜𑁆𑀘 𑀢𑀢𑁆𑀣 𑀓𑀢𑁆𑀢𑀩𑁆𑀩𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀓𑀧𑁆𑀧𑀺𑀬𑀘𑀻𑀯𑀭𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀓𑀼𑀲𑀯𑀸𑀓𑀸𑀤𑀻’’𑀢𑀺𑀆𑀤𑀺. 𑀓𑀼𑀲𑀦𑁆𑀢𑀺 𑀤𑀩𑁆𑀩𑀢𑀺𑀡𑀁. 𑀯𑀸𑀓𑀦𑁆𑀢𑀺 𑀭𑀼𑀓𑁆𑀔𑀸𑀤𑀻𑀦𑀁 𑀯𑀸𑀓𑀁. 𑀆𑀤𑀺-𑀲𑀤𑁆𑀤𑁂𑀦 𑀨𑀮𑀓𑀁 𑀕𑀳𑀺𑀢𑀁, 𑀘𑀻𑀭-𑀲𑀤𑁆𑀤𑁄 𑀘𑀻𑀯𑀭𑀧𑀭𑀺𑀬𑀸𑀬𑁄, 𑀇𑀫𑀲𑁆𑀫𑀺𑀁 𑀓𑀼𑀲𑀸𑀤𑀬𑁄 𑀕𑀦𑁆𑀣𑁂𑀢𑁆𑀯𑀸 𑀓𑀢𑁂 𑀘𑀻𑀯𑀭𑁂𑀬𑁂𑀯 𑀯𑀢𑁆𑀢𑀢𑀺. 𑀓𑁂𑀲𑀚𑀁 𑀓𑀫𑁆𑀩𑀮𑀦𑁆𑀢𑀺 𑀫𑀦𑀼𑀲𑁆𑀲𑀓𑁂𑀲𑁂𑀳𑀺 𑀯𑀻𑀢𑀓𑀫𑁆𑀩𑀮𑀜𑁆𑀘. 𑀯𑀸𑀮𑀚𑀁 𑀓𑀫𑁆𑀩𑀮𑀦𑁆𑀢𑀺 𑀅𑀲𑁆𑀲𑀯𑀸𑀮𑀘𑀫𑀭𑀯𑀸𑀮𑁂𑀳𑀺 𑀯𑀻𑀢𑀓𑀫𑁆𑀩𑀮𑀜𑁆𑀘. 𑀉𑀮𑀽𑀓𑀧𑀓𑁆𑀔𑀦𑁆𑀢𑀺 𑀓𑁄𑀲𑀺𑀬𑀲𑀓𑀼𑀡𑀧𑀢𑁆𑀢𑀁. 𑀇𑀥 𑀧𑀦 𑀢𑀁 𑀕𑀦𑁆𑀣𑁂𑀢𑁆𑀯𑀸 𑀓𑀢𑀘𑀻𑀯𑀭𑀫𑁂𑀯 𑀕𑀳𑁂𑀢𑀩𑁆𑀩𑀁. 𑀅𑀚𑀺𑀦𑀓𑁆𑀔𑀺𑀧𑁂𑀢𑀺 𑀅𑀚𑀺𑀦𑀤𑀻𑀧𑀺𑀘𑀫𑁆𑀫𑁂. ‘‘𑀥𑀸𑀭𑀬𑀢𑁄 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑀧𑀘𑁆𑀘𑁂𑀓𑀁 𑀲𑀫𑁆𑀩𑀦𑁆𑀥𑁄.

𑀓𑀤𑀮𑀺𑀤𑀼𑀲𑁆𑀲𑁂𑀢𑀺 𑀓𑀤𑀮𑀺𑀯𑀸𑀓𑀫𑀬𑀯𑀢𑁆𑀣𑁂. 𑀏𑀭𑀓𑀤𑀼𑀲𑁆𑀲𑁂𑀢𑀺 𑀏𑀭𑀓𑀫𑀬𑀯𑀢𑁆𑀣𑁂. 𑀅𑀓𑁆𑀓𑀤𑀼𑀲𑁆𑀲𑁂𑀢𑀺 𑀅𑀓𑁆𑀓𑀤𑀡𑁆𑀟𑁂 𑀯𑀸 𑀢𑁂𑀲𑀁 𑀲𑀼𑀢𑁆𑀢𑀸𑀦𑀺 𑀯𑀸 𑀕𑀳𑁂𑀢𑁆𑀯𑀸 𑀓𑀢𑀯𑀢𑁆𑀣𑁂. 𑀧𑁄𑀢𑁆𑀣𑀓𑁂𑀢𑀺 𑀫𑀓𑀘𑀺𑀯𑀸𑀓𑀫𑀬𑀯𑀢𑁆𑀣𑁂. 𑀢𑀺𑀭𑀻𑀝𑁂 𑀯𑀸𑀢𑀺 𑀏𑀯𑀁𑀦𑀸𑀫𑀓𑁂 𑀭𑀼𑀓𑁆𑀔𑀢𑀘𑁂. 𑀯𑁂𑀞𑀦𑁂𑀢𑀺 𑀲𑀻𑀲𑀯𑁂𑀞𑀦𑁂. 𑀓𑀜𑁆𑀘𑀼𑀓𑁂𑀢𑀺 𑀓𑀯𑀘𑁂.

𑀲𑀩𑁆𑀩𑀦𑀻𑀮𑀓𑁂𑀢𑀺 𑀓𑁂𑀯𑀮𑀦𑀻𑀮𑀓𑁂. 𑀏𑀲 𑀦𑀬𑁄 𑀫𑀜𑁆𑀚𑁂𑀝𑁆𑀞𑀸𑀤𑀻𑀲𑀼. 𑀫𑀳𑀸𑀦𑀸𑀫𑀭𑀢𑁆𑀢𑁂𑀢𑀺 𑀢𑀦𑀼𑀧𑀤𑀼𑀫𑀤𑀮𑀯𑀡𑁆𑀡𑀭𑀢𑁆𑀢𑁂. 𑀫𑀳𑀸𑀭𑀗𑁆𑀕𑀭𑀢𑁆𑀢𑁂𑀢𑀺 𑀲𑀢𑀧𑀤𑀺𑀯𑀡𑁆𑀡𑀭𑀢𑁆𑀢𑁂.

𑁫𑁯𑁯. 𑀅𑀘𑁆𑀙𑀺𑀦𑁆𑀦𑀤𑀲𑀓𑁂𑀢𑀺 𑀅𑀘𑁆𑀙𑀺𑀦𑁆𑀦𑀸 𑀤𑀲𑀸 𑀬𑀲𑁆𑀲, 𑀢𑀲𑁆𑀫𑀺𑀁 𑀘𑀻𑀯𑀭𑁂. 𑀏𑀲 𑀦𑀬𑁄 𑀤𑀻𑀖𑀤𑀲𑁂𑀧𑀺. 𑀨𑀮𑀤𑀲𑁂𑀢𑀺 𑀨𑀮𑀲𑀤𑀺𑀲𑀕𑀦𑁆𑀣𑀺𑀢𑀸 𑀤𑀲𑀸 𑀬𑀲𑁆𑀲, 𑀢𑀲𑁆𑀫𑀺𑀁. 𑀧𑀼𑀧𑁆𑀨𑀤𑀲𑁂𑀢𑀺 𑀓𑀡𑁆𑀡𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 𑀯𑀺𑀓𑀸𑀲𑁂𑀢𑁆𑀯𑀸 𑀓𑀢𑀸 𑀤𑀲𑀸 𑀬𑀲𑁆𑀲, 𑀢𑀲𑁆𑀫𑀺𑀁 𑀘𑀻𑀯𑀭𑁂𑀢𑀺 𑀅𑀢𑁆𑀣𑁄. 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀲𑁆𑀲𑀸𑀢𑀺 𑀦𑀕𑁆𑀕𑀁 𑀓𑀢𑁆𑀯𑀸 𑀘𑁄𑀭𑁂𑀳𑀺 𑀯𑀺𑀮𑀼𑀢𑁆𑀢𑀘𑀻𑀯𑀭𑀲𑁆𑀲. 𑀏𑀢𑁆𑀣𑀸𑀢𑀺 𑀓𑀼𑀲𑀯𑀸𑀓𑀸𑀤𑀻𑀲𑀼, 𑀲𑀩𑁆𑀩𑀦𑀻𑀮𑀸𑀤𑀻𑀲𑀼 𑀘. 𑀓𑀺𑀜𑁆𑀘𑀻𑀢𑀺 𑀏𑀓𑀫𑁆𑀧𑀺 𑀅𑀓𑀧𑁆𑀧𑀺𑀬𑀁 𑀦𑀢𑁆𑀣𑀺 𑀅𑀦𑀦𑀼𑀮𑁄𑀫𑀺𑀓𑀁 𑀦𑀢𑁆𑀣𑀺. ‘‘𑀦𑀕𑁆𑀕𑁂𑀦 𑀏𑀢𑁂𑀲𑀼 𑀅𑀓𑀧𑁆𑀧𑀺𑀬𑀘𑀻𑀯𑀭𑁂𑀲𑀼 𑀬𑀁𑀓𑀺𑀜𑁆𑀘𑀺 𑀮𑀤𑁆𑀥𑀁, 𑀢𑁂𑀦 𑀳𑀺𑀭𑀺𑀓𑁄𑀧𑀺𑀦𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀘𑁆𑀙𑀸 𑀓𑀧𑁆𑀧𑀺𑀬𑀘𑀻𑀯𑀭𑁂 𑀮𑀤𑁆𑀥𑁂 𑀢𑀁 𑀅𑀥𑀺𑀯𑀸𑀲𑁂𑀢𑁆𑀯𑀸 𑀇𑀤𑀁 𑀅𑀓𑀧𑁆𑀧𑀺𑀬𑀘𑀻𑀯𑀭𑀁 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀁. 𑀲𑀩𑁆𑀩𑀦𑀻𑀮𑀓𑀸𑀤𑀺𑀯𑀢𑁆𑀣𑁂𑀲𑀼 𑀮𑀤𑁆𑀥𑁂𑀲𑀼 𑀓𑀧𑁆𑀧𑀺𑀬𑀭𑀚𑀦𑁂𑀦 𑀭𑀚𑀺𑀢𑁆𑀯𑀸, 𑀢𑀁 𑀯𑀡𑁆𑀡𑀁 𑀦𑀸𑀲𑁂𑀢𑁆𑀯𑀸 𑀯𑀸 𑀓𑀧𑁆𑀧𑀺𑀬𑀯𑀢𑁆𑀣𑀸𑀦𑀺 𑀉𑀪𑀬𑀧𑀲𑁆𑀲𑁂𑀲𑀼 𑀅𑀮𑁆𑀮𑀺𑀬𑀸𑀧𑁂𑀢𑁆𑀯𑀸, 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀸 𑀦𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑁬𑁦𑁦. ‘‘𑀅𑀦𑁆𑀢𑁄𑀤𑀲𑀸𑀳’’𑀦𑁆𑀢𑀺 𑀇𑀤𑀁 ‘‘𑀅𑀥𑀺𑀝𑁆𑀞𑁂𑀢𑀻’’𑀢𑀺𑀆𑀤𑀻𑀳𑀺 𑀲𑀩𑁆𑀩𑀧𑀤𑁂𑀳𑀺𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀅𑀜𑁆𑀜𑀲𑁆𑀲 𑀤𑁂𑀢𑀺. 𑀇𑀥 𑀤𑀸𑀦𑀁 𑀤𑀼𑀯𑀺𑀥𑀁 𑀲𑀫𑁆𑀫𑀼𑀔𑀸𑀤𑀸𑀦𑀁, 𑀧𑀭𑀫𑁆𑀫𑀼𑀔𑀸𑀤𑀸𑀦𑀦𑁆𑀢𑀺. 𑀧𑀝𑀺𑀕𑁆𑀕𑀸𑀳𑀓𑀁 𑀤𑀺𑀲𑁆𑀯𑀸 ‘‘𑀇𑀤𑀁 𑀢𑀼𑀬𑁆𑀳𑀁 𑀤𑀫𑁆𑀫𑀻’’𑀢𑀺 𑀤𑀸𑀦𑀁 𑀲𑀫𑁆𑀫𑀼𑀔𑀸𑀤𑀸𑀦𑀁 𑀦𑀸𑀫. 𑀧𑀭𑀫𑁆𑀫𑀼𑀔𑀸 ‘‘𑀇𑀤𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀁 𑀧𑀭𑀫𑁆𑀫𑀼𑀔𑀸𑀤𑀸𑀦𑀁. ‘‘𑀇𑀤𑀁 𑀢𑁆𑀯𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀸 ‘‘𑀢𑀼𑀬𑁆𑀳𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀸 𑀯𑀼𑀢𑁆𑀢𑁂 ‘‘𑀫𑀬𑁆𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀲𑀘𑁂 𑀯𑀤𑀢𑀺, 𑀤𑀸𑀦𑀕𑀳𑀡𑀤𑁆𑀯𑀬𑀫𑁆𑀧𑀺 𑀲𑀼𑀤𑁆𑀥𑀁. ‘‘𑀇𑀤𑀁 𑀢𑀯 𑀲𑀦𑁆𑀢𑀓𑀁 𑀓𑀭𑁄𑀳𑀺, 𑀢𑀯 𑀲𑀦𑁆𑀢𑀓𑀁 𑀳𑁄𑀢𑀼, 𑀢𑀯 𑀲𑀦𑁆𑀢𑀓𑀁 𑀳𑁄𑀢𑀻’’𑀢𑀺 𑀤𑀸𑀬𑀓𑁂𑀦 𑀯𑀼𑀢𑁆𑀢𑁂 𑀕𑀡𑁆𑀳𑀦𑁆𑀢𑁄𑀧𑀺 ‘‘𑀫𑀫 𑀲𑀦𑁆𑀢𑀓𑀁 𑀓𑀭𑁄𑀫𑀺, 𑀫𑀫 𑀲𑀦𑁆𑀢𑀓𑀁 𑀳𑁄𑀢𑀼, 𑀫𑀫 𑀲𑀦𑁆𑀢𑀓𑀁 𑀳𑁄𑀢𑀻’’𑀢𑀺 𑀯𑀤𑀢𑀺 𑀘𑁂, 𑀤𑀸𑀦𑀁, 𑀕𑀳𑀡𑀜𑁆𑀘 𑀅𑀲𑀼𑀤𑁆𑀥𑀁 𑀳𑁄𑀢𑀺. ‘‘𑀢𑀯 𑀲𑀦𑁆𑀢𑀓𑀁 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 𑀧𑀦 ‘‘𑀲𑀸𑀥𑀼 𑀪𑀦𑁆𑀢𑁂 𑀫𑀬𑁆𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀯𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀕𑀳𑀡𑀁 𑀲𑀼𑀤𑁆𑀥𑀁. ‘‘𑀇𑀤𑀁 𑀢𑀼𑀬𑁆𑀳𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀁 𑀦 𑀕𑀡𑁆𑀳𑀸𑀫𑀻’’𑀢𑀺 𑀯𑀤𑀢𑀺, 𑀧𑀼𑀦 ‘‘𑀤𑀺𑀦𑁆𑀦𑀁 𑀫𑀬𑀸, 𑀢𑀼𑀬𑁆𑀳𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀼𑀢𑁆𑀢𑁂 𑀇𑀢𑀭𑁄𑀧𑀺 𑀧𑀼𑀦 𑀧𑀝𑀺𑀓𑁆𑀔𑀺𑀧𑀢𑀺, 𑀢𑀁 𑀘𑀻𑀯𑀭𑀁 𑀓𑀲𑁆𑀲𑀘𑀺 𑀅𑀲𑀦𑁆𑀢𑀓𑀢𑁆𑀢𑀸 𑀤𑀲𑀸𑀳𑀸𑀢𑀺𑀓𑁆𑀓𑀫𑁂𑀦𑀸𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀦 𑀳𑁄𑀢𑀻𑀢𑀺 𑀧𑀘𑁆𑀙𑀸 𑀢𑁂𑀲𑀼 𑀤𑁆𑀯𑀻𑀲𑀼 𑀬𑁄 𑀇𑀘𑁆𑀙𑀢𑀺, 𑀢𑁂𑀦 𑀅𑀥𑀺𑀝𑁆𑀞𑀸𑀬 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀲𑀩𑁆𑀩𑀫𑀺𑀤𑀁 𑀅𑀝𑁆𑀞𑀓𑀣𑀸𑀬 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀯𑀼𑀢𑁆𑀢𑀁.

𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑁂 𑀅𑀥𑀺𑀝𑁆𑀞𑀸𑀦𑁂 𑀯𑁂𑀫𑀢𑀺𑀓𑁂𑀦 𑀅𑀢𑁆𑀢𑀦𑁄 𑀯𑀺𑀫𑀢𑀺𑀁 𑀧𑀞𑀫𑀁 𑀆𑀯𑀺 𑀓𑀢𑁆𑀯𑀸 ‘‘𑀲𑀘𑁂 𑀅𑀦𑀥𑀺𑀝𑁆𑀞𑀺𑀢𑀁, 𑀏𑀯𑀁 𑀓𑀢𑁂 𑀓𑀧𑁆𑀧𑀺𑀬𑀁 𑀳𑁄𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀦𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀫𑀼𑀲𑀸𑀯𑀸𑀤𑀤𑁄𑀲𑁄 𑀦𑀸𑀧𑀚𑁆𑀚𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀦 𑀳𑀺 𑀏𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀯𑀺𑀦𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀫𑀼𑀲𑀸𑀯𑀸𑀤𑁄 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯). ‘‘𑀓𑁂𑀘𑀺 ‘𑀢𑀣𑀸 𑀯𑁂𑀫𑀢𑀺𑀓𑀘𑀻𑀯𑀭𑀁 𑀅𑀜𑁆𑀜𑁂𑀦 𑀯𑀺𑀲𑁆𑀲𑀸𑀲𑁂𑀦 𑀕𑀳𑁂𑀢𑁆𑀯𑀸 𑀧𑀼𑀦 𑀤𑀸𑀢𑀩𑁆𑀩’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯 𑀣𑁄𑀓𑀁 𑀯𑀺𑀲𑀤𑀺𑀲𑀁) 𑀢𑀢𑁆𑀣𑁂𑀯 𑀯𑀼𑀢𑁆𑀢𑀁.

𑀯𑀺𑀦𑀲𑁆𑀲𑀢𑀻𑀢𑀺 𑀘𑁄𑀭𑀸𑀤𑀻𑀳𑀺 𑀯𑀺𑀦𑀲𑁆𑀲𑀢𑀺. ‘‘𑀦𑀲𑁆𑀲𑀢𑀺, 𑀟𑀬𑁆𑀳𑀢𑀺, 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀻’’𑀢𑀺 𑀇𑀫𑀸𑀦𑀺𑀧𑀺 𑀯𑀺𑀦𑀸𑀲𑀧𑁆𑀧𑀓𑀸𑀭𑀢𑁆𑀢𑀸 ‘‘𑀯𑀺𑀦𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸𑀯 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀢𑀢𑁆𑀣 ‘‘𑀦𑀲𑁆𑀲𑀢𑀻’’𑀢𑀺 𑀇𑀤𑀁 𑀘𑁄𑀭𑀸𑀤𑀻𑀳𑀺 𑀳𑀝𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, ‘‘𑀯𑀺𑀦𑀲𑁆𑀲𑀢𑀻’’𑀢𑀺 𑀇𑀤𑀁 𑀉𑀦𑁆𑀤𑀽𑀭𑀔𑀸𑀬𑀺𑀢𑀸𑀤𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, ‘‘𑀟𑀬𑁆𑀳𑀢𑀻’’𑀢𑀺 𑀅𑀕𑁆𑀕𑀺𑀦𑀸 𑀤𑀟𑁆𑀠𑀁 𑀲𑀦𑁆𑀥𑀸𑀬. 𑀯𑀺𑀲𑁆𑀲𑀸𑀲𑁂𑀢𑀺 𑀏𑀢𑁆𑀣 𑀲𑀦𑁆𑀤𑀺𑀝𑁆𑀞𑁄 𑀘 𑀲𑀫𑁆𑀪𑀢𑁆𑀢𑁄 𑀘 𑀆𑀮𑀧𑀺𑀢𑁄 𑀘 𑀚𑀻𑀯𑀢𑀺 𑀘 𑀕𑀳𑀺𑀢𑁂 𑀘𑀢𑁆𑀢𑀫𑀦𑁄 𑀳𑁄𑀢𑀻𑀢𑀺 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀅𑀢𑁆𑀢𑀦𑀺 𑀯𑀺𑀲𑁆𑀲𑀸𑀲𑁂𑀦 𑀅𑀜𑁆𑀜𑁂𑀦 𑀕𑀳𑀺𑀢𑁂𑀢𑀺 𑀅𑀢𑁆𑀣𑁄. 𑀧𑀓𑀸𑀲𑀺𑀢𑀸𑀢𑀺 ‘‘𑀅𑀦𑀸𑀧𑀢𑁆𑀢𑀺 𑀅𑀦𑁆𑀢𑁄𑀤𑀲𑀸𑀳𑀁 𑀅𑀥𑀺𑀝𑁆𑀞𑁂𑀢𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁬𑁯) 𑀦𑀬𑁂𑀦 𑀯𑀼𑀢𑁆𑀢𑀸.

𑁬𑁦𑁧. 𑀇𑀤𑀁 𑀧𑀦 𑀲𑀫𑀼𑀝𑁆𑀞𑀸𑀦𑀁 𑀦𑀸𑀫𑁂𑀦 𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀓𑀸𑀬𑀯𑀸𑀘𑀢𑁄 𑀘 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀅𑀢𑀺𑀭𑁂𑀓𑀘𑀻𑀯𑀭𑀪𑀸𑀯𑀲𑁆𑀲 𑀚𑀸𑀦𑀦𑀘𑀺𑀢𑁆𑀢𑁂𑀦 𑀧𑀡𑁆𑀡𑀢𑁆𑀢𑀺𑀚𑀸𑀦𑀦𑀘𑀺𑀢𑁆𑀢𑁂 𑀅𑀲𑀢𑀺𑀧𑀺 𑀆𑀧𑀢𑁆𑀢𑀺𑀲𑀫𑁆𑀪𑀯𑀢𑁄 𑀅𑀘𑀺𑀢𑁆𑀢𑀁. 𑀅𑀦𑀥𑀺𑀝𑁆𑀞𑀸𑀦𑀢𑁄, 𑀅𑀯𑀺𑀓𑀧𑁆𑀧𑀦𑀢𑁄 𑀘 𑀅𑀓𑁆𑀭𑀺𑀬𑀁. 𑀓𑀫𑁆𑀫𑀝𑁆𑀞𑀸𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑁄 𑀯𑀸 𑀘𑁂𑀢𑀺𑀬𑀸𑀤𑀺𑀁 𑀯𑀦𑁆𑀤𑀦𑁆𑀢𑁄 𑀯𑀸 𑀏𑀓𑀸𑀤𑀲𑀫𑀁 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀺, 𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺, 𑀓𑀮𑀳𑀸𑀤𑀺𑀧𑀲𑀼𑀢𑁄 𑀯𑀸 𑀯𑀻𑀢𑀺𑀓𑁆𑀓𑀫𑀁 𑀚𑀸𑀦𑀦𑁆𑀢𑁄 𑀯𑀸 𑀉𑀝𑁆𑀞𑀸𑀧𑁂𑀢𑀺, 𑀅𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺, 𑀔𑀻𑀡𑀸𑀲𑀯𑁄 𑀧𑀦 𑀅𑀲𑀢𑀺𑀬𑀸 𑀯𑀸 𑀧𑀡𑁆𑀡𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑁄 𑀯𑀸 𑀢𑀣𑀸 𑀓𑀭𑁄𑀦𑁆𑀢𑁄 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀻𑀢𑀺 𑀢𑀺𑀘𑀺𑀢𑁆𑀢𑀁. 𑀯𑀼𑀢𑁆𑀢𑀦𑀬𑁂𑀦 𑀓𑀫𑁆𑀫𑀝𑁆𑀞𑀸𑀦𑀸𑀤𑀺𑀫𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀲𑁄𑀫𑀦𑀲𑁆𑀲𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑁄 𑀲𑀼𑀔𑀯𑁂𑀤𑀦𑀸, 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑁄 𑀉𑀧𑁂𑀓𑁆𑀔𑀸𑀯𑁂𑀤𑀦𑀸, 𑀓𑀮𑀳𑀸𑀤𑀺𑀧𑀲𑀼𑀢𑀲𑁆𑀲 𑀤𑁄𑀫𑀦𑀲𑁆𑀲𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑁄 𑀤𑀼𑀓𑁆𑀔𑀯𑁂𑀤𑀦𑀸 𑀳𑁄𑀢𑀻𑀢𑀺 𑀢𑀺𑀯𑁂𑀤𑀦𑀁. 𑀏𑀲 𑀦𑀬𑁄 𑀉𑀧𑀭𑀺𑀧𑀺 𑀏𑀯𑀭𑀽𑀧𑁂 𑀞𑀸𑀦𑁂 𑀬𑁄𑀚𑁂𑀢𑀩𑁆𑀩𑁄.

𑀧𑀞𑀫𑀓𑀣𑀺𑀦𑀓𑀣𑀸𑀯𑀡𑁆𑀡𑀦𑀸.

𑁬𑁦𑁨. 𑀕𑀸𑀫𑀸𑀤𑀻𑀲𑀼 𑀧𑀤𑁂𑀲𑁂𑀲𑀼 𑀢𑀺𑀧𑀜𑁆𑀘𑀲𑀽𑀢𑀺 𑀢𑀺𑀘𑀻𑀯𑀭𑀸𑀦𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀧𑁆𑀧𑀯𑀸𑀲𑁂𑀦 𑀤𑁄𑀲𑀁, 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀕𑀸𑀫𑁄 𑀏𑀓𑀽𑀧𑀘𑀸𑀭𑁄’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁭𑁭) 𑀦𑀬𑁂𑀦 𑀧𑀸𑀴𑀺𑀬𑀁 𑀯𑀼𑀢𑁆𑀢𑀕𑀸𑀫𑀦𑀺𑀯𑁂𑀲𑀦𑀉𑀤𑁄𑀲𑀺𑀢𑀅𑀝𑁆𑀝𑀫𑀸𑀴𑀧𑀸𑀲𑀸𑀤𑀳𑀫𑁆𑀫𑀺𑀬𑀦𑀸𑀯𑀸𑀲𑀢𑁆𑀣𑀔𑁂𑀢𑁆𑀢𑀥𑀜𑁆𑀜𑀓𑀭- 𑀡𑀆𑀭𑀸𑀫𑀯𑀺𑀳𑀸𑀭𑀭𑀼𑀓𑁆𑀔𑀫𑀽𑀮𑀅𑀚𑁆𑀛𑁄𑀓𑀸𑀲𑀲𑀗𑁆𑀔𑀸𑀢𑁂𑀲𑀼 𑀧𑀦𑁆𑀦𑀭𑀲𑀲𑀼 𑀘𑀻𑀯𑀭𑀦𑀺𑀓𑁆𑀔𑁂𑀧𑀝𑁆𑀞𑀸𑀦𑁂𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 𑀕𑀸𑀫𑁄 𑀦𑀸𑀫 𑀏𑀓𑀓𑀼𑀝𑀺𑀓𑀸𑀤𑀺𑀕𑀸𑀫𑁄.

𑀦𑀺𑀯𑁂𑀲𑀦𑀁 𑀦𑀸𑀫 𑀕𑀸𑀫𑀢𑁄 𑀩𑀳𑀺 𑀘𑀢𑀼𑀲𑀸𑀮𑀸𑀤𑀺𑀓𑁄 𑀕𑁂𑀳𑁄. 𑀢𑁂𑀦𑀸𑀳 𑀕𑀡𑁆𑀞𑀺𑀧𑀤𑁂 ‘‘𑀕𑀸𑀫𑀦𑀺𑀯𑁂𑀲𑀦𑀸𑀦𑀁 𑀯𑀺𑀲𑁂𑀲𑀁 𑀯𑀤𑀦𑁆𑀢𑀸 ‘𑀧𑀼𑀦 𑀏𑀓𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀦𑀺𑀯𑁂𑀲𑀺𑀢𑀸 𑀩𑀳𑀼𑀕𑁂𑀳𑀸 𑀦𑀺𑀯𑁂𑀲𑀦𑀁 𑀦𑀸𑀫 𑀳𑁄𑀦𑁆𑀢𑀻’𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀇𑀤𑀁 𑀦𑀺𑀯𑁂𑀲𑀦𑀸𑀤𑀺 𑀲𑀩𑁆𑀩𑀁 ‘𑀕𑀸𑀫𑀢𑁄 𑀩𑀳𑀻’𑀢𑀺 𑀕𑀳𑁂𑀢𑀩𑁆𑀩’’𑀦𑁆𑀢𑀺. 𑀇𑀤𑀜𑁆𑀘 𑀢𑀢𑁆𑀣𑁂𑀯 𑀯𑀼𑀢𑁆𑀢𑀁 ‘‘𑀦𑀺𑀯𑁂𑀲𑀦𑀸𑀤𑀺𑀓𑀁 𑀅𑀦𑁆𑀢𑁄𑀕𑀸𑀫𑁂 𑀘𑁂 𑀳𑁄𑀢𑀺, 𑀕𑀸𑀫𑁂 𑀯𑀼𑀢𑁆𑀢𑀧𑀭𑀺𑀳𑀸𑀭𑀲𑁆𑀲𑁂𑀯 𑀮𑀩𑁆𑀪𑀦𑀢𑁄 𑀅𑀦𑁆𑀢𑁄𑀕𑀸𑀫𑀢𑁄 𑀩𑀳𑀻’𑀢𑀺 𑀕𑀳𑁂𑀢𑀩𑁆𑀩’’𑀦𑁆𑀢𑀺.

𑀅𑀝𑁆𑀞𑀓𑀣𑀸𑀬𑀁 ‘‘𑀉𑀤𑁄𑀲𑀺𑀢𑁄𑀢𑀺 𑀬𑀸𑀦𑀸𑀤𑀻𑀦𑀁 𑀪𑀡𑁆𑀟𑀸𑀦𑀁 𑀲𑀸𑀮𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁮𑁨-𑁪𑁮𑁭) 𑀯𑀼𑀢𑁆𑀢𑀲𑀭𑀽𑀧𑀁 𑀉𑀤𑁄𑀲𑀺𑀢𑀁 𑀦𑀸𑀫. ‘‘𑀅𑀝𑁆𑀝𑁄𑀢𑀺 𑀧𑀝𑀺𑀭𑀸𑀚𑀸𑀤𑀺𑀧𑀝𑀺𑀩𑀸𑀳𑀦𑀢𑁆𑀣𑀁 𑀇𑀝𑁆𑀞𑀓𑀸𑀳𑀺 𑀓𑀢𑁄 𑀩𑀳𑀮𑀪𑀺𑀢𑁆𑀢𑀺𑀓𑁄 𑀘𑀢𑀼𑀧𑀜𑁆𑀘𑀪𑀽𑀫𑀺𑀓𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁮𑁨-𑁪𑁮𑁭) 𑀯𑀼𑀢𑁆𑀢𑀲𑀭𑀽𑀧𑁄 𑀅𑀝𑁆𑀝𑁄 𑀦𑀸𑀫. ‘‘𑀫𑀸𑀴𑁄𑀢𑀺 𑀏𑀓𑀓𑀽𑀝𑀲𑀗𑁆𑀕𑀳𑀺𑀢𑁄 𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁪𑁮𑁨-𑁪𑁮𑁭) 𑀯𑀼𑀢𑁆𑀢𑁄 𑀏𑀓𑀓𑀡𑁆𑀡𑀺𑀓𑀲𑀗𑁆𑀕𑀳𑀺𑀢𑁄 𑀘𑀢𑀼𑀭𑀲𑁆𑀲𑀕𑁂𑀳𑁄 𑀫𑀸𑀴𑁄 𑀦𑀸𑀫. 𑀧𑀸𑀲𑀸𑀤𑁄𑀢𑀺 𑀤𑀻𑀖𑀧𑀸𑀲𑀸𑀤𑁄. 𑀳𑀫𑁆𑀫𑀺𑀬𑀦𑁆𑀢𑀺 𑀫𑀼𑀡𑁆𑀟𑀘𑁆𑀙𑀤𑀦𑀧𑀸𑀲𑀸𑀤𑁄. 𑀦𑀸𑀯𑀸𑀢𑀺 𑀬𑀸𑀦𑀧𑁆𑀧𑀢𑁆𑀢𑀺. 𑀲𑀢𑁆𑀣𑀦𑁆𑀢𑀺 𑀚𑀗𑁆𑀖𑀲𑀢𑁆𑀣𑀲𑀓𑀝𑀲𑀢𑁆𑀣𑀯𑀲𑁂𑀦 𑀤𑀼𑀯𑀺𑀥𑁄 𑀚𑀦𑀲𑀫𑀽𑀳𑁄, 𑀲𑁄 𑀘 𑀦𑀺𑀯𑀺𑀝𑁆𑀞𑀸𑀦𑀺𑀯𑀺𑀝𑁆𑀞𑀯𑀲𑁂𑀦 𑀧𑀘𑁆𑀘𑁂𑀓𑀁 𑀤𑀼𑀯𑀺𑀥𑁄. 𑀢𑀢𑁆𑀣 𑀦𑀺𑀯𑀺𑀝𑁆𑀞𑁂 𑀯𑀢𑀺𑀆𑀤𑀺𑀧𑀭𑀺𑀓𑁆𑀔𑁂𑀧𑁄𑀧𑀺 𑀳𑁄𑀢𑁂𑀯.

𑀔𑁂𑀢𑁆𑀢𑀦𑁆𑀢𑀺 𑀬𑀯𑀔𑁂𑀢𑁆𑀢𑀸𑀤𑀺𑀔𑁂𑀢𑁆𑀢𑀁. 𑀥𑀜𑁆𑀜𑀓𑀭𑀡𑀁 𑀔𑀮𑀁. 𑀆𑀭𑀸𑀫𑁄 𑀧𑀼𑀧𑁆𑀨𑀸𑀭𑀸𑀫𑁄, 𑀨𑀮𑀸𑀭𑀸𑀫𑁄 𑀘. 𑀯𑀺𑀳𑀸𑀭𑁄𑀢𑀺 𑀏𑀓𑀫𑁆𑀧𑀺 𑀲𑁂𑀦𑀸𑀲𑀦𑀁 𑀯𑀼𑀘𑁆𑀘𑀢𑀺. ‘‘𑀭𑀼𑀓𑁆𑀔𑁄 𑀦𑀸𑀫 𑀬𑀁 𑀫𑀚𑁆𑀛𑀦𑁆𑀢𑀺𑀓𑁂 𑀓𑀸𑀮𑁂 𑀲𑀫𑀦𑁆𑀢𑀸 𑀙𑀸𑀬𑀸 𑀨𑀭𑀢𑀻’’𑀢𑀺 (𑀧𑀸𑀭𑀸. 𑁪𑁯𑁪) 𑀯𑀼𑀢𑁆𑀢𑀧𑁆𑀧𑀫𑀸𑀡𑀧𑀭𑀺𑀘𑁆𑀙𑀦𑁆𑀦𑁄 𑀭𑀼𑀓𑁆𑀔𑁄. 𑀅𑀚𑁆𑀛𑁄𑀓𑀸𑀲𑁄 𑀦𑀸𑀫 𑀲𑀢𑁆𑀢𑀩𑁆𑀪𑀦𑁆𑀢𑀭𑁄, 𑀲𑁄 𑀯𑀺𑀜𑁆𑀘𑀸𑀝𑀯𑀺𑀆𑀤𑀺𑀅𑀕𑀸𑀫𑀓𑀸𑀭𑀜𑁆𑀜𑁂 𑀘 𑀫𑀘𑁆𑀙𑀩𑀦𑁆𑀥𑀸𑀦𑀁 𑀅𑀕𑀫𑀦𑀧𑀣𑁂 𑀲𑀫𑀼𑀤𑁆𑀤𑀤𑀻𑀧𑁂 𑀘 𑀮𑀩𑁆𑀪𑀢𑀺. 𑀫𑀘𑁆𑀙𑀩𑀦𑁆𑀥𑀸𑀦𑀁 𑀅𑀕𑀫𑀦𑀧𑀣𑁄 𑀦𑀸𑀫 𑀉𑀤𑀓𑀧𑀺𑀝𑁆𑀞𑀺𑀬𑀸 𑀕𑀦𑁆𑀢𑁆𑀯𑀸 𑀧𑀼𑀦 𑀢𑀤𑀳𑁂𑀯 𑀕𑁂𑀳𑀁 𑀆𑀕𑀦𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀤𑀽𑀭𑁄 𑀲𑀫𑀼𑀤𑁆𑀤𑀧𑁆𑀧𑀤𑁂𑀲𑁄 𑀯𑀼𑀘𑁆𑀘𑀢𑀺.

𑀅𑀬𑀁 𑀕𑀸𑀫𑀸𑀤𑀺𑀓𑁄 𑀧𑀘𑁆𑀘𑁂𑀓𑀁 𑀏𑀓𑀽𑀧𑀘𑀸𑀭𑁄, 𑀦𑀸𑀦𑀽𑀧𑀘𑀸𑀭𑁄𑀢𑀺 𑀤𑀼𑀯𑀺𑀥𑁄. 𑀢𑀢𑁆𑀣 𑀅𑀚𑁆𑀛𑁄𑀓𑀸𑀲𑀁 𑀯𑀺𑀦𑀸 𑀕𑀸𑀫𑀸𑀤𑀺𑀓𑁄 𑀢𑀁𑀢𑀁𑀭𑀸𑀚𑀸𑀤𑀺𑀲𑀸𑀫𑀺𑀓𑀓𑀼𑀮𑀸𑀦𑀁 𑀏𑀓𑀢𑁆𑀣𑀦𑀸𑀦𑀢𑁆𑀣𑀯𑀲𑁂𑀦 𑀏𑀓𑀓𑀼𑀮𑀲𑀦𑁆𑀢𑀓𑁄 𑀘𑁂 𑀳𑁄𑀢𑀺, 𑀏𑀓𑀽𑀧𑀘𑀸𑀭𑁄. 𑀦𑀸𑀦𑀸𑀓𑀼𑀮𑀲𑀦𑁆𑀢𑀓𑁄 𑀘𑁂, 𑀦𑀸𑀦𑀽𑀧𑀘𑀸𑀭𑁄 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀕𑀸𑀫𑁄 𑀏𑀓𑀽𑀧𑀘𑀸𑀭𑁄 𑀦𑀸𑀫 𑀏𑀓𑀓𑀼𑀮𑀲𑁆𑀲 𑀕𑀸𑀫𑁄 𑀳𑁄𑀢𑀻’’𑀢𑀺𑀆𑀤𑀺 (𑀧𑀸𑀭𑀸. 𑁪𑁭𑁮). 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀏𑀓𑀓𑀼𑀮𑀲𑁆𑀲 𑀕𑀸𑀫𑁄𑀢𑀺 𑀏𑀓𑀲𑁆𑀲 𑀭𑀜𑁆𑀜𑁄 𑀯𑀸 𑀪𑁄𑀚𑀓𑀲𑁆𑀲 𑀯𑀸 𑀕𑀸𑀫𑁄’’𑀢𑀺 𑀘 ‘‘𑀦𑀸𑀦𑀸𑀓𑀼𑀮𑀲𑁆𑀲 𑀕𑀸𑀫𑁄𑀢𑀺 𑀦𑀸𑀦𑀸𑀭𑀸𑀚𑀽𑀦𑀁 𑀯𑀸 𑀪𑁄𑀚𑀓𑀸𑀦𑀁 𑀯𑀸 𑀕𑀸𑀫𑁄 𑀯𑁂𑀲𑀸𑀮𑀻𑀓𑀼𑀲𑀺𑀦𑀸𑀭𑀸𑀤𑀺𑀲𑀤𑀺𑀲𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁭𑁯) 𑀘.

𑀏𑀓𑀓𑀼𑀮𑁂𑀦 𑀓𑀸𑀭𑀸𑀧𑀺𑀢𑁄 𑀯𑀺𑀳𑀸𑀭𑁄 𑀏𑀓𑀽𑀧𑀘𑀸𑀭𑁄, 𑀦𑀸𑀦𑀸𑀓𑀼𑀮𑁂𑀳𑀺 𑀓𑀸𑀭𑀸𑀧𑀺𑀢𑁄 𑀦𑀸𑀦𑀽𑀧𑀘𑀸𑀭𑁄 𑀳𑁄𑀢𑀺. 𑀬𑀣𑀸𑀳 𑀕𑀡𑁆𑀞𑀺𑀧𑀤𑁂 ‘‘𑀯𑀺𑀳𑀸𑀭𑁂 𑀏𑀓𑀓𑀼𑀮𑀦𑀸𑀦𑀸𑀓𑀼𑀮𑀯𑁄𑀳𑀸𑀭𑁄 𑀓𑀸𑀭𑀸𑀧𑀓𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑁄’’𑀢𑀺. 𑀅𑀚𑁆𑀛𑁄𑀓𑀸𑀲𑁂 𑀧𑀦 𑀉𑀧𑀘𑀸𑀭𑀪𑁂𑀤𑁄 𑀅𑀩𑁆𑀪𑀦𑁆𑀢𑀭𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀧𑀸𑀴𑀺𑀬𑀁 ‘‘𑀅𑀚𑁆𑀛𑁄𑀓𑀸𑀲𑁄 𑀏𑀓𑀽𑀧𑀘𑀸𑀭𑁄 𑀦𑀸𑀫 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸 𑀏𑀓𑀽𑀧𑀘𑀸𑀭𑁄. 𑀢𑀢𑁄 𑀧𑀭𑀁 𑀦𑀸𑀦𑀽𑀧𑀘𑀸𑀭𑁄’’𑀢𑀺. 𑀇𑀥 𑀏𑀓𑀁 𑀅𑀩𑁆𑀪𑀦𑁆𑀢𑀭𑀁 𑀅𑀝𑁆𑀞𑀯𑀻𑀲𑀢𑀺𑀭𑀢𑀦𑀁 𑀳𑁄𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀏𑀓𑀁 𑀅𑀩𑁆𑀪𑀦𑁆𑀢𑀭𑀁 𑀅𑀝𑁆𑀞𑀯𑀻𑀲𑀢𑀺𑀳𑀢𑁆𑀣’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁮𑁯). 𑀏𑀯𑀁 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀲𑀭𑀽𑀧𑀧𑁆𑀧𑀪𑁂𑀤𑀸𑀦𑀺 𑀧𑀦𑁆𑀦𑀭𑀲 𑀞𑀸𑀦𑀸𑀦𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀕𑀸𑀫𑀸𑀤𑀻𑀲𑀼 𑀧𑀤𑁂𑀲𑁂𑀲𑀼 𑀢𑀺𑀧𑀜𑁆𑀘𑀲𑀽’’𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀸𑀴𑀺𑀅𑀝𑁆𑀞𑀓𑀣𑀸𑀯𑀡𑁆𑀡𑀦𑀢𑁄 𑀯𑁂𑀤𑀺𑀢𑀩𑁆𑀩𑁄.

‘‘𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀸𑀲𑁂𑀬𑁆𑀬𑀸𑀢𑀺 𑀲𑀗𑁆𑀖𑀸𑀝𑀺𑀬𑀸 𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀯𑀸 𑀅𑀦𑁆𑀢𑀭𑀯𑀸𑀲𑀓𑁂𑀦 𑀯𑀸. 𑀅𑀦𑁆𑀢𑁄𑀕𑀸𑀫𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺 (𑀧𑀸𑀭𑀸. 𑁪𑁭𑁬, 𑁪𑁭𑁮) 𑀯𑀘𑀦𑀢𑁄 𑀏𑀢𑁆𑀣 𑀢𑀺𑀘𑀻𑀯𑀭𑀦𑁆𑀢𑀺 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀫𑀜𑁆𑀜𑀢𑀭𑀫𑁂𑀯 𑀘𑀻𑀯𑀭𑀁 𑀯𑀢𑁆𑀢𑀩𑁆𑀩𑀁. 𑀏𑀓𑀭𑀢𑁆𑀢𑀦𑁆𑀢𑀺 𑀯𑀺𑀧𑁆𑀧𑀯𑀸𑀲𑀓𑀺𑀭𑀺𑀬𑀸𑀬 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀅𑀧𑀺-𑀲𑀤𑁆𑀤𑁂𑀦 𑀓𑀺𑀁 𑀧𑀦 𑀤𑀺𑀭𑀢𑁆𑀢𑀸𑀤𑀺𑀓𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀲𑀗𑁆𑀖𑀲𑀫𑁆𑀫𑀼𑀢𑀺𑀬𑀸 𑀯𑀺𑀦𑀸𑀢𑀺 𑀢𑀺𑀘𑀻𑀯𑀭𑀁 𑀧𑀭𑀺𑀳𑀭𑀺𑀢𑀼𑀁 𑀅𑀲𑀫𑀢𑁆𑀣𑁂𑀦 𑀕𑀺𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 ‘‘𑀅𑀳𑀁 𑀪𑀦𑁆𑀢𑁂 𑀕𑀺𑀮𑀸𑀦𑁄, 𑀦 𑀲𑀓𑁆𑀓𑁄𑀫𑀺 𑀢𑀺𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀺𑀢𑀼𑀁, 𑀲𑁄𑀳𑀁 𑀪𑀦𑁆𑀢𑁂 𑀲𑀗𑁆𑀖𑀁 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺𑀁 𑀬𑀸𑀘𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀬𑀸𑀘𑀺𑀢𑁂𑀦 𑀲𑀗𑁆𑀖𑁂𑀦 𑀢𑀲𑁆𑀲 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀤𑀺𑀦𑁆𑀦𑀁 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺𑀁 𑀯𑀺𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑀲𑁆𑀲 𑀕𑀺𑀮𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀲𑁆𑀫𑀺𑀁 𑀕𑁂𑀮𑀜𑁆𑀜𑁂 𑀅𑀯𑀽𑀧𑀲𑀦𑁆𑀢𑁂 𑀯𑀸 𑀯𑀽𑀧𑀲𑀦𑁆𑀢𑁂𑀧𑀺 𑀘𑀻𑀯𑀭𑀦𑀺𑀓𑁆𑀔𑁂𑀧𑀝𑁆𑀞𑀸𑀦𑀁 𑀆𑀕𑀫𑀦𑀓𑀸𑀮𑁂 𑀯𑀸 𑀉𑀧𑁆𑀧𑀦𑁆𑀦𑁂 𑀅𑀜𑁆𑀜𑁂𑀧𑀺 𑀭𑁄𑀕𑁂 𑀅𑀯𑀽𑀧𑀲𑀦𑁆𑀢𑁂 𑀢𑀸𑀬𑀬𑁂𑀯 𑀲𑀫𑁆𑀫𑀼𑀢𑀺𑀬𑀸 𑀦 𑀤𑁄𑀲𑁄.

𑁬𑁦𑁩. 𑀪𑀺𑀓𑁆𑀔𑀼𑀦𑁄𑀢𑀺 𑀅𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀢𑁂𑀦 𑀘𑀻𑀯𑀭𑁂𑀦. 𑀯𑀺𑀧𑁆𑀧𑀯𑀢𑁆𑀣𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀺𑀦𑀸 𑀯𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? ‘‘𑀏𑀓𑀓𑀼𑀮𑀲𑁆𑀲 𑀕𑀸𑀫𑁄 𑀳𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀘, 𑀅𑀦𑁆𑀢𑁄𑀕𑀸𑀫𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄𑀕𑀸𑀫𑁂 𑀯𑀢𑁆𑀣𑀩𑁆𑀩𑀁. 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺, 𑀬𑀲𑁆𑀫𑀺𑀁 𑀖𑀭𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀖𑀭𑁂 𑀯𑀢𑁆𑀣𑀩𑁆𑀩𑀁, 𑀳𑀢𑁆𑀣𑀧𑀸𑀲𑀸 𑀯𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁. 𑀦𑀸𑀦𑀸𑀓𑀼𑀮𑀲𑁆𑀲 𑀕𑀸𑀫𑁄 𑀳𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀘, 𑀬𑀲𑁆𑀫𑀺𑀁 𑀖𑀭𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀖𑀭𑁂 𑀯𑀢𑁆𑀣𑀩𑁆𑀩𑀁 𑀲𑀪𑀸𑀬𑁂 𑀯𑀸 𑀤𑁆𑀯𑀸𑀭𑀫𑀽𑀮𑁂 𑀯𑀸, 𑀳𑀢𑁆𑀣𑀧𑀸𑀲𑀸 𑀯𑀸 𑀦 𑀯𑀺𑀚𑀳𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁭𑁮) 𑀦𑀬𑁂𑀦 𑀧𑀸𑀴𑀺𑀬𑀸 𑀯𑀼𑀢𑁆𑀢𑀝𑁆𑀞𑀸𑀦𑀢𑁄 𑀩𑀳𑀺 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀫𑀲𑁆𑀫𑀺𑀁 𑀧𑀸𑀞𑁂 ‘‘𑀧𑀭𑀺𑀓𑁆𑀔𑀺𑀢𑁆𑀢𑁄’’𑀢𑀺 𑀇𑀤𑀁 𑀧𑀸𑀓𑀸𑀭𑁂𑀦 𑀯𑀸 𑀯𑀢𑀺𑀬𑀸 𑀯𑀸 𑀧𑀭𑀺𑀔𑀸𑀬 𑀯𑀸 𑀧𑀭𑀺𑀓𑁆𑀔𑀺𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀳𑀢𑁆𑀣𑀧𑀸𑀲𑀸 𑀯𑀸𑀢𑀺 𑀏𑀢𑁆𑀣 𑀳𑀢𑁆𑀣𑀧𑀸𑀲𑀸 𑀦𑀸𑀫 𑀅𑀟𑁆𑀠𑀢𑀺𑀬𑀭𑀢𑀦𑀁 𑀳𑁄𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀁 𑀖𑀭𑀁 𑀲𑀫𑀦𑁆𑀢𑀢𑁄 𑀳𑀢𑁆𑀣𑀧𑀸𑀲𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁, 𑀅𑀟𑁆𑀠𑀢𑁂𑀬𑁆𑀬𑀭𑀢𑀦𑀧𑁆𑀧𑀫𑀸𑀡𑀸 𑀧𑀤𑁂𑀲𑀸 𑀉𑀤𑁆𑀥𑀁 𑀦 𑀯𑀺𑀚𑀳𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁭𑁭-𑁪𑁭𑁮).

𑀯𑀺𑀧𑁆𑀧𑀯𑀲𑀦𑁆𑀢𑀲𑁆𑀲 𑀓𑁄 𑀤𑁄𑀲𑁄𑀢𑀺 𑀆𑀳 ‘‘𑀳𑁄𑀢𑀺…𑀧𑁂… 𑀅𑀭𑀼𑀡𑀼𑀕𑁆𑀕𑀫𑁂’’𑀢𑀺. 𑀅𑀦𑀼𑀜𑁆𑀜𑀸𑀢𑀝𑁆𑀞𑀸𑀦𑀢𑁄 𑀳𑀺 𑀩𑀳𑀺 𑀘𑀻𑀯𑀭𑁂𑀦 𑀯𑀺𑀦𑀸 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀦𑁆𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑀳𑁄𑀢𑀺, 𑀢𑀁𑀳𑁂𑀢𑀼𑀓𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀧𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸…𑀧𑁂… 𑀯𑀺𑀜𑁆𑀜𑀼𑀦𑀸’’𑀢𑀺.

𑁬𑁦𑁪. 𑀦𑁆𑀳𑀸𑀬𑀦𑁆𑀢𑀲𑁆𑀲𑁂𑀯𑀸𑀢𑀺 𑀘𑀻𑀯𑀭𑀲𑁆𑀲 𑀳𑀢𑁆𑀣𑀧𑀸𑀲𑀢𑁄 𑀤𑀽𑀭𑁂 𑀦𑀳𑀸𑀬𑀦𑁆𑀢𑀲𑁆𑀲𑁂𑀯, 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁.

𑁬𑁦𑁬. 𑀅𑀘𑁆𑀙𑀺𑀦𑁆𑀦𑀁 𑀯𑀺𑀮𑀼𑀢𑁆𑀢𑀁 𑀘𑀻𑀯𑀭𑀁 𑀬𑀲𑁆𑀲 𑀲𑁄 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁄, 𑀪𑀺𑀓𑁆𑀔𑀼, 𑀢𑀲𑁆𑀲 𑀞𑀸𑀦𑀁 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀝𑁆𑀞𑀸𑀦𑀁, 𑀢𑀲𑁆𑀫𑀺𑀁.

𑁬𑁦𑁭. 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀅𑀦𑁆𑀢𑀭𑀯𑀸𑀲𑀓’’𑀦𑁆𑀢𑀺 𑀘 𑀕𑀳𑁂𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀇𑀢𑀭𑀸𑀦𑀻’’𑀢𑀺 𑀘 𑀲𑁂𑀲𑁄. 𑀇𑀤𑀜𑁆𑀘 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑁂, 𑀆𑀲𑀦𑁆𑀦𑁂 𑀫𑀕𑁆𑀕𑁂 𑀘 𑀫𑀦𑀼𑀲𑁆𑀲𑀲𑀫𑁆𑀩𑀸𑀥𑁂 𑀅𑀲𑀢𑀺 𑀓𑀢𑁆𑀢𑀩𑁆𑀩𑀤𑀲𑁆𑀲𑀦𑀁. 𑀇𑀢𑀭𑀢𑁆𑀣 𑀦𑀺𑀯𑀸𑀲𑁂𑀢𑁆𑀯𑀸, 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀲𑀗𑁆𑀖𑀸𑀝𑀺𑀁 𑀅𑀁𑀲𑁂 𑀓𑀢𑁆𑀯𑀸𑀯 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺. 𑀯𑀺𑀳𑀸𑀭𑁂 𑀲𑀪𑀸𑀕𑁂𑀲𑀼 𑀅𑀮𑀩𑁆𑀪𑀫𑀸𑀦𑁂𑀲𑀼 𑀆𑀲𑀦𑀲𑀸𑀮𑀫𑁆𑀧𑀺 𑀕𑀦𑁆𑀢𑁆𑀯𑀸 𑀲𑀪𑀸𑀕𑀲𑁆𑀲 𑀲𑀦𑁆𑀢𑀺𑀓𑁂 𑀯𑀺𑀦𑀬𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁯𑁫 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀯𑀼𑀢𑁆𑀢𑀁. ‘‘𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 ‘‘𑀇𑀤𑀁 𑀫𑁂 𑀪𑀦𑁆𑀢𑁂 𑀘𑀻𑀯𑀭𑀁 𑀭𑀢𑁆𑀢𑀺𑀯𑀺𑀧𑁆𑀧𑀯𑀼𑀢𑁆𑀣𑀁 𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀇𑀫𑀸𑀳𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀲𑀗𑁆𑀖𑁂 𑀯𑀸 ‘‘𑀇𑀤𑀁 𑀫𑁂 𑀪𑀦𑁆𑀢𑁂 𑀘𑀻𑀯𑀭𑀁…𑀧𑁂… 𑀅𑀳𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀢𑀺𑀡𑁆𑀡𑀁, 𑀤𑁆𑀯𑀺𑀦𑁆𑀦𑀁 𑀯𑀸 𑀲𑀦𑁆𑀢𑀺𑀓𑁂 𑀯𑀸 ‘‘𑀇𑀤𑀁 𑀫𑁂 𑀆𑀯𑀼𑀲𑁄…𑀧𑁂… 𑀇𑀫𑀸𑀳𑀁 𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀯𑀸 𑀯𑀢𑁆𑀯𑀸 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀜𑁆𑀜𑀼𑀦𑀸𑀢𑀺 𑀏𑀯𑀁 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀦𑀺𑀲𑁆𑀲𑀚𑁆𑀚𑀦𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀯𑀺𑀥𑀺𑀚𑀸𑀦𑀦𑀓𑁂𑀦 𑀜𑀸𑀡𑀯𑀢𑀸𑀢𑀺 𑀅𑀢𑁆𑀣𑁄.

𑁬𑁦𑁮. 𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀘𑀻𑀯𑀭𑀁.

𑁬𑁦𑁯. ‘‘𑀅𑀤𑁂𑀦𑁆𑀢𑀲𑁆𑀲 𑀘 𑀦𑀺𑀲𑁆𑀲𑀝𑁆𑀞𑀁 𑀤𑀼𑀓𑁆𑀓𑀝’’𑀦𑁆𑀢𑀺 𑀇𑀫𑀺𑀦𑀸 ‘‘𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀆𑀧𑀢𑁆𑀢𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸, 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀇𑀫𑀁 𑀯𑀺𑀥𑀺𑀁 𑀚𑀸𑀦𑀦𑀢𑀸𑀬 𑀩𑁆𑀬𑀢𑁆𑀢𑁂𑀦 𑀬𑀣𑀸𑀯𑀺𑀥𑀺𑀁 𑀓𑀸𑀢𑀼𑀁 𑀲𑀫𑀢𑁆𑀣𑀢𑀸𑀬 𑀧𑀝𑀺𑀩𑀮𑁂𑀦 𑀔𑀦𑁆𑀥𑀓𑁂 (𑀘𑀽𑀴𑀯. 𑁨𑁩𑁯) 𑀆𑀕𑀢𑀦𑀬𑁂𑀦 𑀆𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀘𑁂 𑀲𑀗𑁆𑀖𑁄 𑀳𑁄𑀢𑀺, ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀇𑀤𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀝𑁆𑀞𑀁, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀤𑁂𑀬𑁆𑀬𑀸’’𑀢𑀺, 𑀲𑀘𑁂 𑀢𑀬𑁄 𑀳𑁄𑀦𑁆𑀢𑀺, ‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑀸, 𑀇𑀤𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀦𑀺𑀲𑁆𑀲𑀝𑁆𑀞𑀁, 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀆𑀬𑀲𑁆𑀫𑀦𑁆𑀢𑀸 𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀤𑁂𑀬𑁆𑀬𑀼’’𑀦𑁆𑀢𑀺, 𑀲𑀘𑁂 𑀏𑀓𑀓𑁄 𑀳𑁄𑀢𑀺, ‘‘𑀇𑀫𑀁 𑀘𑀻𑀯𑀭𑀁 𑀆𑀬𑀲𑁆𑀫𑀢𑁄 𑀤𑀫𑁆𑀫𑀻’’𑀢𑀺 𑀤𑀸𑀢𑀩𑁆𑀩𑀁, 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀁 ‘‘𑀅𑀢𑁆𑀢𑀦𑁄𑀬𑁂𑀯 𑀤𑀺𑀦𑁆𑀦’’𑀦𑁆𑀢𑀺 𑀲𑀼𑀤𑁆𑀥𑀲𑀜𑁆𑀜𑀸𑀬 𑀕𑀳𑁂𑀢𑁆𑀯𑀸 𑀅𑀤𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀲𑁆𑀲 𑀲𑀦𑁆𑀢𑀓𑀪𑀸𑀯𑀁 𑀜𑀢𑁆𑀯𑀸 𑀮𑁂𑀲𑁂𑀦 𑀯𑀺𑀮𑀼𑀫𑁆𑀧𑀦𑁆𑀢𑀲𑁆𑀲 𑀧𑀦 𑀪𑀡𑁆𑀟𑀕𑁆𑀖𑀯𑀲𑁂𑀦 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀲𑁆𑀲 𑀲𑀦𑁆𑀢𑀓𑀪𑀸𑀯𑀁 𑀧𑀦 𑀜𑀢𑁆𑀯𑀸 𑀮𑁂𑀲𑁂𑀦 𑀅𑀘𑁆𑀙𑀺𑀦𑁆𑀤𑀦𑁆𑀢𑁄 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯). 𑀧𑀭𑀺𑀬𑀸𑀧𑀼𑀢𑀦𑁆𑀢𑀺 ‘‘𑀦 𑀪𑀺𑀓𑁆𑀔𑀯𑁂 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀁 𑀦 𑀤𑀸𑀢𑀩𑁆𑀩𑀁, 𑀬𑁄 𑀦 𑀤𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁪𑁭𑁦) 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁬𑁧𑁦-𑁧. 𑀣𑁂𑀭𑁂 𑀤𑀳𑀭𑁂 𑀘𑀸𑀢𑀺 𑀏𑀢𑁂𑀲𑀼 𑀉𑀪𑁄𑀲𑀼𑀧𑀺 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁂𑀲𑀽𑀢𑀺 𑀬𑁄𑀚𑀦𑀸. ‘‘𑀣𑁂𑀭𑁂’’𑀢𑀺 𑀇𑀫𑀺𑀦𑀸 𑀅𑀦𑀺𑀲𑁆𑀲𑀺𑀢𑀪𑀸𑀯𑀫𑀸𑀳, ‘‘𑀤𑀳𑀭𑁂 𑀘𑀸’’𑀢𑀺 𑀇𑀫𑀺𑀦𑀸 𑀦𑀺𑀲𑁆𑀲𑀺𑀢𑀪𑀸𑀯𑀁. 𑀑𑀳𑀻𑀦𑁂𑀢𑀺 𑀑𑀲𑀓𑁆𑀓𑀺𑀢𑁂. 𑀲𑀘𑁂 𑀲𑁄 𑀣𑁂𑀭𑁄 𑀦𑀺𑀲𑁆𑀲𑀬𑀸𑀘𑀭𑀺𑀬𑁄 𑀪𑀯𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀕𑀭𑀼’’𑀦𑁆𑀢𑀺. 𑀢𑀲𑁆𑀫𑀺𑀁 𑀤𑀳𑀭𑁂. 𑀯𑀢𑁆𑀣𑀦𑁆𑀢𑀺 𑀢𑀲𑁆𑀲 𑀳𑀢𑁆𑀣𑁂 𑀞𑀺𑀢𑀘𑀻𑀯𑀭𑀁. 𑀦 𑀧𑀲𑁆𑀲𑀫𑁆𑀪𑀢𑀻𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸 𑀕𑀫𑀦𑁂 𑀲𑀉𑀲𑁆𑀲𑀸𑀳𑀢𑁆𑀢𑀸 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯 ‘‘𑀫𑀼𑀳𑀼𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳.

𑁬𑁧𑁪. 𑀧𑀘𑁆𑀘𑀼𑀤𑁆𑀥𑀸𑀭𑁂 𑀅𑀦𑁆𑀢𑁄𑀬𑁂𑀯𑀸𑀭𑀼𑀡𑁂𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄, 𑀤𑀳𑀭𑀪𑀺𑀓𑁆𑀔𑀼𑀦𑁄 𑀤𑀽𑀭𑀪𑀸𑀯𑀜𑁆𑀘 𑀅𑀭𑀼𑀡𑀼𑀕𑁆𑀕𑀫𑀦𑀜𑁆𑀘 𑀜𑀢𑁆𑀯𑀸 𑀘𑀻𑀯𑀭𑀲𑁆𑀲 𑀅𑀦𑀺𑀲𑁆𑀲𑀕𑁆𑀕𑀺𑀬𑀢𑁆𑀣𑀁 𑀢𑀲𑁆𑀲 𑀳𑀢𑁆𑀣𑁂 𑀞𑀺𑀢𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀼𑀭𑀸𑀭𑀼𑀡𑀸 𑀧𑀘𑁆𑀘𑀼𑀤𑁆𑀥𑀭𑁂𑀢𑀺 𑀅𑀢𑁆𑀣𑁄. 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀅𑀜𑁆𑀜𑀲𑁆𑀲 𑀤𑁂𑀢𑀺. 𑀯𑀺𑀦𑀲𑁆𑀲𑀢𑀻𑀢𑀺 𑀘𑁄𑀭𑀸𑀤𑀻𑀳𑀺 𑀦𑀲𑁆𑀲𑀢𑀺.

𑀤𑀼𑀢𑀺𑀬𑀓𑀣𑀺𑀦𑀓𑀣𑀸𑀯𑀡𑁆𑀡𑀦𑀸.

𑁬𑁧𑁬. 𑀅𑀓𑀸𑀮𑀘𑀻𑀯𑀭𑀦𑁆𑀢𑀺 ‘‘𑀅𑀓𑀸𑀮𑀘𑀻𑀯𑀭𑀁 𑀦𑀸𑀫 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀫𑀸𑀲𑁂 𑀉𑀧𑁆𑀧𑀦𑁆𑀦𑀁, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀲𑀢𑁆𑀢𑀫𑀸𑀲𑁂 𑀉𑀧𑁆𑀧𑀦𑁆𑀦𑀁, 𑀓𑀸𑀮𑁂𑀧𑀺 𑀆𑀤𑀺𑀲𑁆𑀲 𑀤𑀺𑀦𑁆𑀦’’𑀦𑁆𑀢𑀺 (𑀧𑀸𑀭𑀸. 𑁫𑁦𑁦) 𑀯𑀘𑀦𑀢𑁄 𑀅𑀦𑀢𑁆𑀣𑀢𑀓𑀣𑀺𑀦𑁂 𑀯𑀺𑀳𑀸𑀭𑁂 ‘‘𑀘𑀻𑀯𑀭𑀫𑀸𑀲𑁄’’𑀢𑀺 𑀬𑁄 𑀧𑀼𑀩𑁆𑀩𑀓𑀢𑁆𑀢𑀺𑀓𑀓𑀸𑀴𑀧𑀓𑁆𑀔𑀧𑀸𑀝𑀺𑀧𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀧𑀭𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀻, 𑀢𑀸𑀯 𑀫𑀸𑀲𑁄 𑀯𑀼𑀘𑁆𑀘𑀢𑀺, 𑀢𑀢𑁄 𑀧𑀭𑁂𑀲𑀼 𑀏𑀓𑀸𑀤𑀲𑀲𑀼 𑀫𑀸𑀲𑁂𑀲𑀼 𑀉𑀧𑁆𑀧𑀦𑁆𑀦𑀜𑁆𑀘 𑀅𑀢𑁆𑀣𑀢𑀓𑀣𑀺𑀦𑁂 𑀯𑀺𑀳𑀸𑀭𑁂 𑀬𑁄 𑀘𑀻𑀯𑀭𑀫𑀸𑀲𑁄, 𑀳𑁂𑀫𑀦𑁆𑀢𑀸 𑀘 𑀘𑀢𑁆𑀢𑀸𑀭𑁄 𑀫𑀸𑀲𑀸𑀢𑀺 𑀧𑀜𑁆𑀘𑀫𑀸𑀲𑀢𑁄 𑀩𑀳𑀺 𑀲𑀢𑁆𑀢𑀲𑀼 𑀫𑀸𑀲𑁂𑀲𑀼 𑀉𑀧𑁆𑀧𑀦𑁆𑀦𑀜𑁆𑀘 𑀅𑀢𑁆𑀣𑀢𑀓𑀣𑀺𑀦𑁂 𑀧𑀜𑁆𑀘 𑀫𑀸𑀲𑀸 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑁂 𑀲𑀗𑁆𑀖𑀲𑁆𑀲 𑀘 ‘‘𑀇𑀤𑀁 𑀅𑀓𑀸𑀮𑀘𑀻𑀯𑀭𑀁 𑀤𑀫𑁆𑀫𑀻’’𑀢𑀺 𑀧𑀼𑀕𑁆𑀕𑀮𑀲𑁆𑀲 𑀘 ‘‘𑀇𑀤𑀁 𑀢𑀼𑀬𑁆𑀳𑀁 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀜𑁆𑀘𑁂𑀢𑀺 𑀇𑀤𑀁 𑀅𑀓𑀸𑀮𑀘𑀻𑀯𑀭𑀦𑁆𑀢𑀺 𑀅𑀢𑁆𑀣𑁄. ‘‘𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀲𑁂𑀲𑁄, ‘‘𑀉𑀧𑁆𑀧𑀚𑁆𑀚𑁂𑀬𑁆𑀬 𑀲𑀗𑁆𑀖𑀢𑁄 𑀯𑀸 𑀕𑀡𑀢𑁄 𑀯𑀸 𑀜𑀸𑀢𑀺𑀢𑁄 𑀯𑀸 𑀫𑀺𑀢𑁆𑀢𑀢𑁄 𑀯𑀸 𑀧𑀁𑀲𑀼𑀓𑀽𑀮𑀢𑁄 𑀯𑀸 𑀅𑀢𑁆𑀢𑀦𑁄 𑀯𑀸 𑀥𑀦𑁂𑀦𑀸’’𑀢𑀺 (𑀧𑀸𑀭𑀸. 𑁫𑁦𑁦) 𑀯𑀘𑀦𑀢𑁄 𑀲𑀗𑁆𑀖𑀲𑁆𑀲 𑀯𑀸 ‘‘𑀇𑀤𑀁 𑀲𑀼𑀢𑁆𑀢𑀦𑁆𑀢𑀺𑀓𑀕𑀡𑀲𑁆𑀲 𑀤𑁂𑀫, 𑀇𑀤𑀁 𑀆𑀪𑀺𑀥𑀫𑁆𑀫𑀺𑀓𑀕𑀡𑀲𑁆𑀲 𑀤𑁂𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀕𑀡𑀲𑁆𑀲 𑀯𑀸 𑀤𑀺𑀦𑁆𑀦𑀢𑁄 𑀅𑀢𑁆𑀢𑀦𑁄 𑀯𑀲𑁆𑀲𑀕𑁆𑀕𑁂𑀦 𑀯𑀸 𑀜𑀸𑀢𑀺𑀆𑀤𑀺𑀢𑁄 𑀯𑀸 𑀲𑀼𑀲𑀸𑀦𑀸𑀤𑀺𑀧𑀁𑀲𑀼𑀓𑀽𑀮𑀔𑁂𑀢𑁆𑀢𑀢𑁄 𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀲𑀼𑀢𑁆𑀢𑀓𑀧𑁆𑀧𑀸𑀲𑀸𑀤𑀺𑀓𑀧𑁆𑀧𑀺𑀬𑀯𑀢𑁆𑀣𑀼𑀢𑁄 𑀯𑀸 𑀉𑀧𑁆𑀧𑀦𑁆𑀦𑀘𑀻𑀯𑀭𑀦𑁆𑀢𑀺 𑀅𑀢𑁆𑀣𑁄.

𑀫𑀸𑀲𑀧𑀭𑀫𑀁 𑀦𑀺𑀓𑁆𑀔𑀺𑀧𑁂𑀢𑀺 𑀫𑀸𑀲𑁄 𑀧𑀭𑀫𑀁 𑀧𑀫𑀸𑀡𑀁 𑀏𑀢𑀲𑁆𑀲 𑀦𑀺𑀓𑁆𑀔𑀺𑀧𑀦𑀲𑁆𑀲𑀸𑀢𑀺 𑀫𑀸𑀲𑀧𑀭𑀫𑀁, 𑀦𑀺𑀓𑁆𑀔𑀺𑀧𑀦𑀦𑁆𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁 𑀓𑀸𑀢𑀩𑁆𑀩𑀁, 𑀫𑀸𑀲𑀧𑀭𑀫𑀁 𑀦𑀺𑀓𑁆𑀔𑀺𑀧𑀦𑀁 𑀓𑀭𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀆𑀓𑀗𑁆𑀔𑀫𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀔𑀺𑀧𑁆𑀧𑀫𑁂𑀯 𑀓𑀸𑀭𑁂𑀢𑀩𑁆𑀩𑀁, 𑀦𑁄 𑀘𑀲𑁆𑀲 𑀧𑀸𑀭𑀺𑀧𑀽𑀭𑀻, 𑀫𑀸𑀲𑀧𑀭𑀫𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑀁 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁 𑀊𑀦𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸’’𑀢𑀺 (𑀧𑀸𑀭𑀸. 𑁫𑁦𑁦) 𑀯𑀘𑀦𑀢𑁄 𑀏𑀯𑀁 𑀉𑀧𑁆𑀧𑀦𑁆𑀦𑀁 𑀘𑀻𑀯𑀭𑀁 𑀇𑀘𑁆𑀙𑀦𑁆𑀢𑁂𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀘𑁂 𑀧𑀳𑁄𑀢𑀺, 𑀤𑀲𑀸𑀳𑀫𑀦𑀢𑀺𑀓𑁆𑀓𑀸𑀫𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀦𑀧𑁆𑀧𑀳𑁄𑀢𑀺, 𑀊𑀦𑀲𑁆𑀲 𑀧𑀭𑀺𑀧𑀽𑀭𑀡𑀢𑁆𑀣𑀁 𑀫𑀸𑀲𑀧𑀭𑀫𑀁 𑀞𑀧𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀓𑀤𑀸 𑀏𑀯𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀢𑀺 𑀧𑀘𑁆𑀘𑀸𑀲𑀸𑀬𑀸’’𑀢𑀺, ‘‘𑀧𑀘𑁆𑀘𑀸𑀲𑀸 𑀳𑁄𑀢𑀺 𑀲𑀗𑁆𑀖𑀢𑁄 𑀯𑀸 𑀕𑀡𑀢𑁄 𑀯𑀸 𑀜𑀸𑀢𑀺𑀢𑁄 𑀯𑀸 𑀫𑀺𑀢𑁆𑀢𑀢𑁄 𑀯𑀸 𑀧𑀁𑀲𑀼𑀓𑀽𑀮𑀢𑁄 𑀯𑀸 𑀅𑀢𑁆𑀢𑀦𑁄 𑀯𑀸 𑀥𑀦𑁂𑀦𑀸’’𑀢𑀺 (𑀧𑀸𑀭𑀸. 𑁫𑁦𑁦) 𑀯𑀼𑀢𑁆𑀢𑀲𑀗𑁆𑀖𑀸𑀤𑀺𑀢𑁄 𑀅𑀢𑁆𑀢𑀦𑁄 𑀯𑀲𑁆𑀲𑀕𑁆𑀕𑀸𑀤𑀺𑀢𑁄 𑀮𑀪𑁂𑀬𑁆𑀬, 𑀢𑁂𑀦 ‘‘𑀇𑀫𑀲𑁆𑀲 𑀊𑀦𑁂 𑀧𑀭𑀺𑀧𑀼𑀡𑁆𑀡𑁂 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀧𑀘𑁆𑀘𑀸𑀲𑀸𑀬 𑀲𑀢𑀺 𑀏𑀯𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁄 𑀉𑀤𑁆𑀥𑀁𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀫𑀸𑀲𑀢𑁄 𑀅𑀢𑀺𑀭𑁂𑀓𑀓𑀸𑀮𑀁 𑀦𑀺𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀬𑀤𑀺 𑀏𑀯𑀁 ‘‘𑀢𑀤𑀳𑀼𑀧𑁆𑀧𑀦𑁆𑀦𑁂 𑀫𑀽𑀮𑀘𑀻𑀯𑀭𑁂 𑀧𑀘𑁆𑀘𑀸𑀲𑀸𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀢𑀺, 𑀤𑀲𑀸𑀳𑀸 𑀓𑀸𑀭𑁂𑀢𑀩𑁆𑀩𑀁…𑀧𑁂… 𑀯𑀻𑀲𑁂 𑀉𑀧𑁆𑀧𑀦𑁆𑀦𑁂 𑀫𑀽𑀮𑀘𑀻𑀯𑀭𑁂 𑀧𑀘𑁆𑀘𑀸𑀲𑀸𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀢𑀺, 𑀤𑀲𑀸𑀳𑀸 𑀓𑀸𑀭𑁂𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁫𑁦𑁦) 𑀓𑀲𑁆𑀫𑀸 𑀆𑀳𑀸𑀢𑀺? 𑀧𑀘𑁆𑀘𑀸𑀲𑀸𑀘𑀻𑀯𑀭𑀲𑁆𑀲 𑀤𑀲𑀤𑀺𑀯𑀲𑁂 𑀅𑀢𑀺𑀓𑁆𑀓𑀫𑁆𑀫 𑀞𑀧𑁂𑀢𑀼𑀁 𑀅𑀬𑀼𑀢𑁆𑀢𑀢𑁆𑀢𑀸, 𑀫𑀽𑀮𑀘𑀻𑀯𑀭𑀲𑁆𑀲 𑀢𑀕𑁆𑀕𑀢𑀺𑀓𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀫𑀽𑀮𑀘𑀻𑀯𑀭𑀲𑁆𑀲 𑀉𑀧𑁆𑀧𑀦𑁆𑀦𑀤𑀺𑀯𑀲𑀢𑁄 𑀬𑀸𑀯 𑀯𑀻𑀲𑀢𑀺𑀫𑁄 𑀤𑀺𑀯𑀲𑁄, 𑀢𑀸𑀯 𑀉𑀧𑁆𑀧𑀦𑁆𑀦𑀁 𑀧𑀘𑁆𑀘𑀸𑀲𑀸𑀘𑀻𑀯𑀭𑀁 𑀫𑀽𑀮𑀘𑀻𑀯𑀭𑀁 𑀅𑀢𑁆𑀢𑀦𑁄 𑀕𑀢𑀺𑀓𑀁 𑀓𑀭𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁦𑁦).

𑀢𑀢𑀺𑀬𑀓𑀣𑀺𑀦𑀓𑀣𑀸𑀯𑀡𑁆𑀡𑀦𑀸.

𑁬𑁧𑁮-𑁯. 𑀪𑀺𑀓𑁆𑀔𑀼𑀦𑀺𑀬𑀸 𑀬𑁄 𑀥𑁄𑀯𑀸𑀧𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀪𑀺𑀓𑁆𑀔𑀼𑀦𑀻 𑀦𑀸𑀫 𑀉𑀪𑀢𑁄𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀸’’𑀢𑀺 (𑀧𑀸𑀭𑀸. 𑁫𑁦𑁦) 𑀯𑀘𑀦𑀢𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀜𑀢𑁆𑀢𑀺𑀘𑀢𑀼𑀢𑁆𑀣𑀸𑀬 𑀓𑀫𑁆𑀫𑀯𑀸𑀘𑀸𑀬, 𑀪𑀺𑀓𑁆𑀔𑀼𑀲𑀗𑁆𑀖𑁂 𑀜𑀢𑁆𑀢𑀺𑀘𑀢𑀼𑀢𑁆𑀣𑀸𑀬 𑀓𑀫𑁆𑀫𑀯𑀸𑀘𑀸𑀬𑀸𑀢𑀺 𑀅𑀝𑁆𑀞𑀯𑀸𑀘𑀺𑀓𑀸𑀬 𑀉𑀧𑀲𑀫𑁆𑀧𑀦𑁆𑀦𑀸 𑀪𑀺𑀓𑁆𑀔𑀼𑀦𑀻 𑀦𑀸𑀫. 𑀪𑀼𑀢𑁆𑀢𑀦𑁆𑀢𑀺 𑀪𑀺𑀓𑁆𑀔𑀼𑀦𑀸 𑀅𑀢𑁆𑀢𑀦𑀸 𑀧𑀭𑀺𑀪𑀼𑀢𑁆𑀢𑀁 𑀭𑀚𑀺𑀢𑀁 𑀆𑀤𑀺𑀦𑁆𑀦𑀓𑀧𑁆𑀧𑀁, ‘‘𑀧𑀭𑀺𑀪𑁄𑀕𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀦𑁆𑀢𑀫𑀲𑁄 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀲𑀬𑀦𑀫𑀢𑁆𑀢𑁂𑀦𑀸𑀧𑀺 𑀧𑀼𑀭𑀸𑀡𑀪𑀽𑀢𑀁 𑀘𑀻𑀯𑀭𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀭𑀚𑀺𑀢𑁆𑀯𑀸 𑀓𑀧𑁆𑀧𑀁 𑀓𑀢𑁆𑀯𑀸 𑀏𑀓𑀯𑀸𑀭𑀫𑁆𑀧𑀺 𑀦𑀺𑀯𑀢𑁆𑀣𑀁 𑀯𑀸 𑀧𑀸𑀭𑀼𑀢𑀁 𑀯𑀸 𑀅𑀦𑁆𑀢𑀫𑀲𑁄 𑀧𑀭𑀺𑀪𑁄𑀕𑀲𑀻𑀲𑁂𑀦 𑀅𑀁𑀲𑁂 𑀯𑀸 𑀫𑀢𑁆𑀣𑀓𑁂 𑀯𑀸 𑀓𑀢𑁆𑀯𑀸 𑀫𑀕𑁆𑀕𑀁 𑀕𑀢𑁄 𑀳𑁄𑀢𑀺, 𑀉𑀲𑁆𑀲𑀻𑀲𑀓𑀁 𑀯𑀸 𑀓𑀢𑁆𑀯𑀸 𑀦𑀺𑀧𑀦𑁆𑀦𑁄 𑀳𑁄𑀢𑀺, 𑀏𑀢𑀫𑁆𑀧𑀺 𑀧𑀼𑀭𑀸𑀡𑀘𑀻𑀯𑀭𑀫𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁦𑁩-𑁫𑁦𑁫). 𑀯𑀢𑁆𑀣𑀦𑁆𑀢𑀺 𑀓𑀸𑀭𑀺𑀬𑁂 𑀓𑀸𑀭𑀡𑁄𑀧𑀘𑀸𑀭𑀯𑀲𑁂𑀦 𑀘𑀻𑀯𑀭𑀫𑁂𑀯 𑀆𑀳.

𑀅𑀜𑁆𑀜𑀸𑀢𑀺𑀓𑀸𑀬𑀸𑀢𑀺 ‘‘𑀅𑀜𑁆𑀜𑀸𑀢𑀺𑀓𑀸 𑀦𑀸𑀫 𑀫𑀸𑀢𑀺𑀢𑁄 𑀯𑀸 𑀧𑀺𑀢𑀺𑀢𑁄 𑀯𑀸 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀲𑀫𑁆𑀩𑀤𑁆𑀥𑀸’’𑀢𑀺 𑀯𑀘𑀦𑀢𑁄 𑀅𑀢𑁆𑀢𑀦𑁄 𑀯𑀸 𑀢𑀲𑁆𑀲𑀸 𑀯𑀸 𑀫𑀸𑀢𑀼 𑀯𑀸 𑀧𑀺𑀢𑀼 𑀯𑀸 𑀧𑀭𑀫𑁆𑀧𑀭𑀸𑀬 𑀬𑀸𑀯 𑀲𑀢𑁆𑀢𑀫𑀸 𑀬𑀼𑀕𑀸, 𑀏𑀢𑁆𑀣𑀦𑁆𑀢𑀭𑁂 𑀬𑁂𑀦 𑀓𑁂𑀦𑀘𑀺 𑀜𑀸𑀢𑀓𑁂𑀦 𑀅𑀲𑀫𑁆𑀩𑀤𑁆𑀥𑀪𑀸𑀯𑁂𑀦 𑀅𑀜𑁆𑀜𑀸𑀢𑀺𑀓𑀸𑀬𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀘𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀺𑀢𑀸𑀫𑀳𑁄𑀬𑁂𑀯 𑀧𑀺𑀢𑀸𑀫𑀳𑀬𑀼𑀕𑀁. 𑀢𑀢𑁄 𑀉𑀤𑁆𑀥𑀁 𑀲𑀩𑁆𑀩𑁂𑀧𑀺 𑀧𑀼𑀩𑁆𑀩𑀧𑀼𑀭𑀺𑀲𑀸 𑀧𑀺𑀢𑀸𑀫𑀳𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸. 𑀏𑀯𑀁 𑀬𑀸𑀯 𑀲𑀢𑁆𑀢𑀫𑁄 𑀧𑀼𑀭𑀺𑀲𑁄, 𑀢𑀸𑀯 𑀬𑀸 𑀅𑀲𑀫𑁆𑀩𑀤𑁆𑀥𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁦𑁩-𑁫𑁦𑁫). 𑀆𑀓𑁄𑀝𑀸𑀧𑁂𑀢𑀻𑀢𑀺 𑀧𑀳𑀭𑀸𑀧𑁂𑀢𑀺.

𑀢𑀢𑁄 𑀥𑁄𑀯𑀸𑀧𑀦𑀸𑀤𑀺𑀢𑁄. 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀻𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀲𑁆𑀲 𑀆𑀧𑀢𑁆𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀲𑁆𑀲 𑀘𑀻𑀯𑀭𑀲𑁆𑀲 𑀦𑀸𑀫𑁂𑀦 𑀯𑀺𑀲𑀺𑀝𑁆𑀞𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 𑀢𑀺𑀡𑁆𑀡𑀁 𑀧𑀬𑁄𑀕𑀸𑀦𑀁 𑀅𑀦𑁆𑀢𑁂 𑀆𑀧𑀚𑁆𑀚𑀺𑀢𑀩𑁆𑀩𑀸𑀬 𑀆𑀧𑀢𑁆𑀢𑀺𑀬𑀸 𑀤𑀲𑁆𑀲𑀦𑀁. 𑀢𑀲𑁆𑀲 𑀦𑀺𑀬𑁄𑀕𑁂𑀦 𑀥𑁄𑀯𑀦𑀸𑀤𑀺𑀁 𑀓𑀭𑁄𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀢𑀤𑀢𑁆𑀣𑀁 𑀲𑀩𑁆𑀩𑀧𑀼𑀩𑁆𑀩𑀧𑀬𑁄𑀕𑀕𑀡𑀦𑀸𑀬 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀕𑀳𑁂𑀢𑀩𑁆𑀩𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀸𑀯 𑀦𑀁 𑀥𑁄𑀯𑀺𑀢𑁆𑀯𑀸 𑀉𑀓𑁆𑀔𑀺𑀧𑀢𑀺, 𑀢𑀸𑀯 𑀪𑀺𑀓𑁆𑀔𑀼𑀦𑀺𑀬𑀸 𑀧𑀬𑁄𑀕𑁂 𑀧𑀬𑁄𑀕𑁂 𑀪𑀺𑀓𑁆𑀔𑀼𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁦𑁩-𑁫𑁦𑁫). 𑀧𑀞𑀫𑁂𑀦𑀸𑀢𑀺 𑀢𑀻𑀡𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀬𑀁 𑀧𑀞𑀫𑀁 𑀓𑀸𑀭𑀸𑀧𑁂𑀢𑀺, 𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀤𑀻𑀧𑀺𑀢𑀦𑁆𑀢𑀺 ‘‘𑀅𑀜𑁆𑀜𑀸𑀢𑀺𑀓𑀸𑀬 𑀅𑀜𑁆𑀜𑀸𑀢𑀺𑀓𑀲𑀜𑁆𑀜𑀻 𑀧𑀼𑀭𑀸𑀡𑀘𑀻𑀯𑀭𑀁 𑀥𑁄𑀯𑀸𑀧𑁂𑀢𑀺 𑀭𑀚𑀸𑀧𑁂𑀢𑀺 𑀆𑀓𑁄𑀝𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁦𑁬) 𑀤𑁂𑀲𑀺𑀢𑀁. 𑀇𑀫𑀺𑀦𑀸 𑀦𑀬𑁂𑀦 𑀤𑁆𑀯𑁂 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀧𑀞𑀫𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀺, 𑀤𑀼𑀢𑀺𑀬𑁂𑀦 𑀤𑀼𑀓𑁆𑀓𑀝𑀦𑁆𑀢𑀺 𑀅𑀬𑀫𑀢𑁆𑀣𑁄 𑀲𑀗𑁆𑀕𑀬𑁆𑀳𑀢𑀺.

𑁬𑁨𑁦. ‘‘𑀥𑁄𑀯𑀦𑀢𑁆𑀣𑀸𑀬 𑀤𑁂𑀢𑀻’’𑀢𑀺 𑀇𑀫𑀺𑀦𑀸 ‘‘𑀪𑀼𑀢𑁆𑀢𑀁 𑀯𑀢𑁆𑀣’’𑀦𑁆𑀢𑀺 𑀅𑀥𑀺𑀓𑀸𑀭𑀢𑁄 𑀮𑀩𑁆𑀪𑀢𑀺.

𑁬𑁨𑁧. 𑀲𑀸𑀫𑀡𑁂𑀭𑀦𑀺𑀤𑁆𑀤𑁂𑀲𑁂𑀧𑀻𑀢𑀺 ‘‘𑀲𑀸𑀫𑀡𑁂𑀭𑀸’’𑀢𑀺 𑀦𑀺𑀤𑁆𑀤𑁂𑀲𑁄 𑀦𑀸𑀫 𑀬𑀲𑁆𑀲, 𑀢𑀲𑁆𑀫𑀺𑀫𑁆𑀧𑀺, 𑀅𑀢𑁆𑀢𑀦𑀸 𑀧𑀭𑀺𑀪𑀼𑀢𑁆𑀢𑀁 𑀯𑀢𑁆𑀣𑀁 𑀥𑁄𑀯𑀦𑀢𑁆𑀣𑀸𑀬 𑀤𑁂𑀢𑀻𑀢𑀺 𑀬𑁄𑀚𑀦𑀸, 𑀅𑀢𑁆𑀢𑀦𑁄 𑀧𑀭𑀺𑀪𑀼𑀢𑁆𑀢𑀁 𑀘𑀻𑀯𑀭𑀁 𑀥𑁄𑀯𑀦𑀢𑁆𑀣𑀸𑀬 𑀲𑀸𑀫𑀡𑁂𑀭𑀲𑁆𑀲 𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀧𑀺-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀉𑀧𑀲𑀫𑁆𑀧𑀚𑁆𑀚𑀸𑀢𑀺 𑀧𑀼𑀩𑁆𑀩𑀓𑀺𑀭𑀺𑀬𑀸𑀬 ‘‘𑀥𑁄𑀯𑀢𑀻’’𑀢𑀺 𑀅𑀧𑀭𑀓𑀺𑀭𑀺𑀬𑀸 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺.

𑁬𑁨𑁨. 𑀤𑀳𑀭𑀸𑀦𑀜𑁆𑀘 𑀪𑀺𑀓𑁆𑀔𑀽𑀦𑀦𑁆𑀢𑀺 𑀅𑀢𑁆𑀢𑀦𑁄 𑀦𑀯𑀓𑀢𑀭𑀸𑀦𑀁 𑀪𑀺𑀓𑁆𑀔𑀽𑀦𑀁. 𑀦𑀺𑀬𑁆𑀬𑀸𑀤𑀺𑀢𑁂 𑀤𑀺𑀦𑁆𑀦𑁂. 𑀏𑀲 𑀦𑀬𑁄𑀢𑀺 ‘‘𑀏𑀓𑁂𑀦 𑀧𑀸𑀘𑀺𑀢𑁆𑀢𑀺𑀬𑀁, 𑀅𑀯𑀲𑀺𑀝𑁆𑀞𑁂𑀳𑀺 𑀤𑁆𑀯𑀻𑀳𑀺 𑀯𑀸 𑀏𑀓𑁂𑀦 𑀯𑀸 𑀲𑀩𑁆𑀩𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀁 𑀳𑁄𑀢𑀻’’𑀢𑀺 𑀦𑀬𑁄.

𑁬𑁨𑁩. 𑀘𑀻𑀯𑀭𑁂𑀢𑀺 𑀧𑀭𑀺𑀪𑀼𑀢𑁆𑀢𑀘𑀻𑀯𑀭𑁂.

𑁬𑁨𑁪. ‘‘𑀥𑁄𑀯𑀦𑀧𑁆𑀧𑀘𑁆𑀘𑀬𑀸𑀬𑁂𑀯𑀸’’𑀢𑀺 𑀇𑀫𑀺𑀦𑀸 𑀇𑀢𑀭𑀤𑁆𑀯𑀬𑀲𑁆𑀲 𑀢𑀲𑁆𑀲 𑀅𑀦𑀸𑀡𑀢𑁆𑀢𑀺𑀬𑀸 𑀓𑀢𑀢𑁆𑀢𑀸 𑀢𑀢𑁄 𑀅𑀦𑀸𑀧𑀢𑁆𑀢𑀺𑀪𑀸𑀯𑀫𑀸𑀳.

𑁬𑁨𑁬. 𑀜𑀸𑀢𑀺𑀓𑀸𑀢𑀺 𑀏𑀢𑁆𑀣 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁨-𑁨𑁩, 𑁪𑁨𑁨; 𑀅. 𑀦𑀺. 𑁬.𑁫𑁮; 𑁮.𑁯; 𑀫𑀳𑀸𑀦𑀺. 𑁨𑁦𑁬; 𑀥. 𑀲. 𑁧𑁩𑁫𑁫; 𑀯𑀺𑀪. 𑁫𑁧𑁮) 𑀯𑀺𑀬 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀬-𑀓𑀸𑀭𑀮𑁄𑀧𑁄, 𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸𑀢𑀺 𑀅𑀢𑁆𑀣𑁄. ‘‘𑀜𑀸𑀢𑀺𑀓𑀸 𑀅𑀜𑁆𑀜𑀸𑀢𑀺𑀲𑀜𑁆𑀜𑀺𑀲𑁆𑀲𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀧𑀘𑁆𑀘𑀢𑁆𑀣𑀭𑀡𑀦𑁆𑀢𑀺 𑀫𑀜𑁆𑀘𑀧𑀻𑀞𑁂 𑀅𑀢𑁆𑀣𑀭𑀺𑀢𑀩𑁆𑀩𑀁 𑀧𑀘𑁆𑀘𑀢𑁆𑀣𑀭𑀡𑀘𑀻𑀯𑀭𑀜𑁆𑀘.

𑁬𑁨𑁭. ‘‘𑀪𑀺𑀓𑁆𑀔𑀼𑀦𑀻𑀦𑀁 𑀯𑀲𑁂𑀦𑀸’’𑀢𑀺 𑀇𑀤𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀧𑀺 𑀉𑀧𑀲𑀫𑁆𑀧𑀦𑁆𑀦𑀸 𑀘𑁂, 𑀧𑀸𑀘𑀺𑀢𑁆𑀢𑀺𑀬𑀲𑀫𑁆𑀪𑀯𑀸 𑀯𑀼𑀢𑁆𑀢𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸𑀬 𑀧𑀦 𑀬𑀣𑀸𑀯𑀢𑁆𑀣𑀼𑀓𑀫𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁦𑁬). 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀧𑀞𑀫𑀁 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀪𑀺𑀓𑁆𑀔𑀼𑀲𑀗𑁆𑀖𑁂 𑀘𑁂 𑀉𑀧𑀲𑀫𑁆𑀧𑀚𑁆𑀚𑀢𑀺, 𑀓𑁂𑀯𑀮𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀸𑀢𑀺 𑀦 𑀯𑀼𑀘𑁆𑀘𑀢𑀻𑀢𑀺 𑀢𑀸 𑀪𑀕𑀯𑀢𑀺 𑀥𑀭𑀫𑀸𑀦𑁂 𑀧𑀞𑀫𑀁 𑀧𑀩𑁆𑀩𑀚𑀺𑀢𑀸 𑀧𑀜𑁆𑀘𑀲𑀢𑀸 𑀲𑀸𑀓𑀺𑀬𑀸𑀦𑀺𑀬𑁄 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸 𑀦𑀸𑀫 𑀧𑀜𑁆𑀘𑀲𑀢𑀸 𑀲𑀸𑀓𑀺𑀬𑀸𑀦𑀺𑀬𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁦𑁬). 𑀪𑀺𑀓𑁆𑀔𑀼𑀦𑁄 𑀮𑀺𑀗𑁆𑀕𑁂 𑀧𑀭𑀺𑀯𑀢𑁆𑀢𑁂 𑀢𑀲𑁆𑀲𑁂𑀯 𑀉𑀧𑀲𑀫𑁆𑀧𑀦𑁆𑀦𑀓𑀫𑁆𑀫𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀲𑁄𑀧𑀺 𑀕𑀳𑁂𑀢𑀩𑁆𑀩𑁄𑀬𑁂𑀯.

𑁬𑁨𑁮. 𑀅𑀯𑀼𑀢𑁆𑀢𑀸 𑀥𑁄𑀯𑀢𑀻𑀢𑀺 ‘‘𑀇𑀫𑀁 𑀘𑀻𑀯𑀭𑀁 𑀥𑁄𑀯𑀸’’𑀢𑀺 𑀅𑀯𑀼𑀢𑁆𑀢𑀸 𑀘𑀻𑀯𑀭𑀁 𑀓𑀺𑀮𑀺𑀝𑁆𑀞𑀁 𑀤𑀺𑀲𑁆𑀯𑀸 𑀅𑀯𑀢𑁆𑀯𑀸 𑀞𑀧𑀺𑀢𑀝𑁆𑀞𑀸𑀦𑀢𑁄 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀯𑀸 𑀲𑀬𑀫𑁂𑀯 𑀯𑀢𑁆𑀯𑀸 𑀬𑀸𑀘𑀦𑀸𑀤𑀺𑀦𑀬𑁂𑀦 𑀯𑀸 𑀅𑀦𑀸𑀡𑀢𑁆𑀢𑀺𑀬𑀸 𑀘 𑀕𑀳𑁂𑀢𑁆𑀯𑀸 𑀘𑀻𑀯𑀭𑀥𑁄𑀯𑀦𑀸𑀤𑀺𑀁 𑀓𑀭𑁂𑀬𑁆𑀬 𑀘𑁂. 𑀅𑀧𑀭𑀺𑀪𑀼𑀢𑁆𑀢𑀁 𑀯𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀅𑀧𑀭𑀺𑀪𑀼𑀢𑁆𑀢𑀁 𑀘𑀻𑀯𑀭𑀁. 𑀅𑀜𑁆𑀜𑀁 𑀯𑀸𑀢𑀺 𑀉𑀧𑀸𑀳𑀦𑀢𑁆𑀣𑀯𑀺𑀓𑀧𑀢𑁆𑀢𑀢𑁆𑀣𑀯𑀺𑀓𑀧𑁄𑀢𑁆𑀣𑀓𑀢𑁆𑀣𑀯𑀺𑀓𑀫𑀜𑁆𑀘𑀧𑀻𑀞𑀸𑀤𑀺𑀁 𑀬𑀁 𑀓𑀺𑀜𑁆𑀘𑀺 𑀧𑀭𑀺𑀓𑁆𑀔𑀸𑀭𑀁.

𑀧𑀼𑀭𑀸𑀡𑀘𑀻𑀯𑀭𑀥𑁄𑀯𑀸𑀧𑀦𑀓𑀣𑀸𑀯𑀡𑁆𑀡𑀦𑀸.

𑁬𑁨𑁯. 𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫𑀁 𑀉𑀧𑀸𑀤𑀸𑀬 𑀓𑀺𑀜𑁆𑀘𑀺 𑀘𑀻𑀯𑀭𑀁 𑀕𑀡𑁆𑀳𑀢𑁄𑀢𑀺 𑀬𑁄𑀚𑀦𑀸, 𑀏𑀢𑁆𑀣 ‘‘𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀳𑀢𑁆𑀣𑀢𑁄’’𑀢𑀺 𑀘 ‘‘𑀜𑀸𑀢𑀺𑀓𑀸𑀬 𑀅𑀜𑁆𑀜𑀸𑀢𑀺𑀓𑀲𑀜𑁆𑀜𑀺𑀲𑁆𑀲𑀸’’𑀢𑀺 𑀘 ‘‘𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀬 𑀳𑀢𑁆𑀣𑀢𑁄 𑀕𑀡𑁆𑀳𑀸𑀢𑀻’’𑀢𑀺 𑀘 𑀯𑀓𑁆𑀔𑀫𑀸𑀦𑀯𑀘𑀦𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀫𑀸𑀦𑀢𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀅𑀜𑁆𑀜𑀸𑀢𑀺𑀓𑀸𑀬 𑀉𑀪𑀢𑁄𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀳𑀢𑁆𑀣𑀢𑁄 𑀯𑀺𑀓𑀧𑁆𑀧𑀦𑀼𑀧𑀕𑀭𑀢𑀦𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀯𑀢𑁆𑀣𑀢𑁄 𑀧𑀝𑁆𑀞𑀸𑀬 𑀬𑀁 𑀓𑀺𑀜𑁆𑀘𑀺 𑀘𑀻𑀯𑀭𑀁 𑀕𑀡𑁆𑀳𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀆𑀧𑀢𑁆𑀢𑀻’’𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑁂𑀧𑀺 ‘‘𑀦𑀺𑀲𑁆𑀲𑀕𑁆𑀕𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀻’’𑀢𑀺 𑀧𑀓𑀭𑀡𑀢𑁄 𑀘 ‘‘𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀻’’𑀢𑀺 𑀯𑀓𑁆𑀔𑀫𑀸𑀦𑀢𑁄 𑀘 𑀮𑀩𑁆𑀪𑀢𑀺. 𑀞𑀧𑁂𑀢𑁆𑀯𑀸 𑀧𑀸𑀭𑀺𑀯𑀢𑁆𑀢𑀓𑀦𑁆𑀢𑀺 ‘‘𑀧𑀸𑀭𑀺𑀯𑀢𑁆𑀢𑀓𑀁 𑀧𑀭𑀺𑀢𑁆𑀢𑁂𑀦 𑀯𑀸 𑀯𑀺𑀧𑀼𑀮𑀁, 𑀯𑀺𑀧𑀼𑀮𑁂𑀦 𑀯𑀸 𑀧𑀭𑀺𑀢𑁆𑀢’’𑀦𑁆𑀢𑀺 (𑀧𑀸𑀭𑀸. 𑁫𑁧𑁪) 𑀯𑀘𑀦𑀢𑁄 𑀫𑀳𑀸𑀧𑀘𑁆𑀘𑀭𑀺𑀬𑀁 ‘‘𑀅𑀦𑁆𑀢𑀫𑀲𑁄 𑀳𑀭𑀻𑀢𑀓𑀔𑀡𑁆𑀟𑁂𑀦𑀸𑀧𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁧𑁪) 𑀯𑀼𑀢𑁆𑀢𑀢𑁆𑀢𑀸 𑀘 𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀳𑀭𑀻𑀢𑀓𑀔𑀡𑁆𑀟𑀫𑁆𑀧𑀺 𑀤𑀢𑁆𑀯𑀸 𑀕𑀳𑁂𑀢𑀩𑁆𑀩𑀁 𑀢𑀺𑀘𑀻𑀯𑀭𑀜𑁆𑀘 𑀧𑀸𑀭𑀺𑀯𑀢𑁆𑀢𑀓𑀁 𑀦𑀸𑀫 𑀳𑁄𑀢𑀺, 𑀢𑀁 𑀞𑀧𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀺𑀯𑀢𑁆𑀢𑀦𑀁 𑀧𑀭𑀺𑀯𑀢𑁆𑀢𑀁, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀧𑀸𑀭𑀺𑀯𑀢𑁆𑀢𑀓𑀁, 𑀓𑀬𑀯𑀺𑀓𑁆𑀓𑀬𑁂𑀦 𑀕𑀳𑁂𑀢𑀩𑁆𑀩𑀁 𑀘𑀻𑀯𑀭𑀦𑁆𑀢𑀺 𑀅𑀢𑁆𑀣𑁄.

𑁬𑁩𑁦. 𑀕𑀳𑀡𑀢𑁆𑀣𑀸𑀬 𑀧𑀬𑁄𑀕𑁂𑀢𑀺 𑀕𑀡𑁆𑀳𑀺𑀢𑀼𑀁 𑀳𑀢𑁆𑀣𑀧𑀲𑀸𑀭𑀡𑀸𑀤𑀺𑀧𑁆𑀧𑀬𑁄𑀕𑁂. 𑀧𑀭𑀺𑀬𑀸𑀧𑀼𑀢𑀦𑁆𑀢𑀺 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀧𑀬𑁄𑀕𑁂 𑀤𑀼𑀓𑁆𑀓𑀝’’𑀦𑁆𑀢𑀺 (𑀧𑀸𑀭𑀸. 𑁫𑁧𑁨) 𑀤𑁂𑀲𑀺𑀢𑀁.

𑁬𑁩𑁧. 𑀅𑀦𑀼𑀧𑀲𑀫𑁆𑀧𑀦𑁆𑀦𑀳𑀢𑁆𑀣𑁂𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀺𑀢𑁄 𑀅𑀜𑁆𑀜𑁂 𑀲𑀩𑁆𑀩𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀸 𑀕𑀳𑀺𑀢𑀸. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀘𑁂 𑀧𑀦 𑀲𑀺𑀓𑁆𑀔𑀫𑀸𑀦𑀸𑀲𑀸𑀫𑀡𑁂𑀭𑀲𑀸𑀫𑀡𑁂𑀭𑀺𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀦𑀁 𑀳𑀢𑁆𑀣𑁂 𑀧𑁂𑀲𑀺𑀢𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁧𑁨).

𑁬𑁩𑁨. 𑀏𑀓𑀢𑁄𑀢𑀺 𑀏𑀢𑁆𑀣 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀢𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀜𑁆𑀜𑀲𑁆𑀫𑀺𑀁 𑀧𑀓𑁆𑀔𑁂 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸𑀬 𑀧𑀦 𑀧𑀸𑀘𑀺𑀢𑁆𑀢𑀺𑀬𑀫𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁧𑁩).

𑁬𑁩𑁩. ‘‘𑀧𑀸𑀭𑀺𑀯𑀢𑁆𑀢𑀓𑀁 𑀤𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀤𑁄𑀲𑁄 𑀦 𑀯𑀺𑀚𑁆𑀚𑀢𑀻𑀢𑀺 𑀬𑁄𑀚𑀦𑀸.

𑁬𑁩𑁪. 𑀅𑀜𑁆𑀜𑀁 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀣𑀯𑀺𑀓𑀓𑀸𑀬𑀩𑀦𑁆𑀥𑀦𑀸𑀤𑀺 𑀅𑀯𑀺𑀓𑀧𑁆𑀧𑀺𑀬𑀁 𑀯𑀸 𑀅𑀯𑀺𑀓𑀧𑁆𑀧𑀦𑀼𑀧𑀕𑀁 𑀯𑀸 𑀧𑀭𑀺𑀓𑁆𑀔𑀸𑀭𑀫𑁂𑀯 𑀕𑀳𑁂𑀢𑀩𑁆𑀩𑀁. 𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀦 𑀦 𑀯𑀝𑁆𑀝𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫𑀘𑀻𑀯𑀭𑀧𑁆𑀧𑀫𑀸𑀡𑀁 𑀧𑀦 𑀧𑀝𑀧𑀭𑀺𑀲𑁆𑀲𑀸𑀯𑀦𑀫𑁆𑀧𑀺 𑀦 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁧𑁪). 𑀘𑀻𑀯𑀭𑀧𑀝𑀺𑀕𑁆𑀕𑀡𑁆𑀳𑀦𑀁 𑀓𑀺𑀭𑀺𑀬𑀸, 𑀧𑀸𑀭𑀺𑀯𑀢𑁆𑀢𑀓𑀲𑁆𑀲 𑀅𑀤𑀸𑀦𑀁 𑀅𑀓𑀺𑀭𑀺𑀬𑀸𑀢𑀺 𑀓𑀺𑀭𑀺𑀬𑀸𑀬 𑀘 𑀅𑀓𑀺𑀭𑀺𑀬𑀸𑀬 𑀘 𑀆𑀧𑀚𑁆𑀚𑀺𑀢𑀩𑁆𑀩𑀢𑁄 𑀓𑁆𑀭𑀺𑀬𑀸𑀓𑁆𑀭𑀺𑀬𑀁.

𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀓𑀣𑀸𑀯𑀡𑁆𑀡𑀦𑀸.

𑁬𑁩𑁫. ‘‘𑀅𑀜𑁆𑀜𑀸𑀢𑀓𑀁 𑀅𑀧𑁆𑀧𑀯𑀸𑀭𑀺𑀢’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. ‘‘𑀕𑀳𑀧𑀢𑀺𑀁 𑀯𑀸 𑀕𑀳𑀧𑀢𑀸𑀦𑀺𑀁 𑀯𑀸’’𑀢𑀺 𑀧𑀸𑀞𑀲𑁂𑀲𑁄. 𑀯𑀼𑀢𑁆𑀢𑀜𑁆𑀳𑀺 𑀪𑀕𑀯𑀢𑀸 ‘‘𑀅𑀜𑁆𑀜𑀸𑀢𑀓𑀁 𑀕𑀳𑀧𑀢𑀺𑀁 𑀯𑀸 𑀕𑀳𑀧𑀢𑀸𑀦𑀺𑀁 𑀯𑀸’’𑀢𑀺 (𑀧𑀸𑀭𑀸. 𑁫𑁧𑁬, 𑁫𑁧𑁮). 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀲𑀫𑁆𑀩𑀤𑁆𑀥𑀜𑁆𑀜𑀸𑀢𑀺𑀓𑀢𑀸𑀬 𑀅𑀪𑀸𑀯𑀢𑁄 𑀅𑀜𑁆𑀜𑀸𑀢𑀓𑀁. ‘‘𑀬𑀁 𑀫𑀬𑁆𑀳𑀁 𑀕𑁂𑀳𑁂 𑀅𑀢𑁆𑀣𑀺, 𑀢𑀁 𑀧𑀯𑀸𑀭𑁂𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀧𑁆𑀧𑀯𑀸𑀭𑀺𑀢𑀁. ‘‘𑀕𑀳𑀧𑀢𑀺 𑀦𑀸𑀫 𑀬𑁄 𑀓𑁄𑀘𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀻’’𑀢𑀺 (𑀧𑀸𑀭𑀸. 𑁫𑁧𑁯) 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁 𑀕𑀳𑀧𑀢𑀺𑀁 𑀯𑀸. ‘‘𑀕𑀳𑀧𑀢𑀸𑀦𑀻 𑀦𑀸𑀫 𑀬𑀸 𑀓𑀸𑀘𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀻’’𑀢𑀺 (𑀧𑀸𑀭𑀸. 𑁫𑁧𑁯) 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁 𑀖𑀭𑀡𑀺𑀁 𑀯𑀸𑀢𑀺 𑀅𑀢𑁆𑀣𑁄.

𑀳𑁄𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀻𑀢𑀺 ‘‘𑀅𑀜𑁆𑀜𑀢𑁆𑀭 𑀲𑀫𑀬𑀸 𑀯𑀺𑀜𑁆𑀜𑀸𑀧𑁂𑀢𑀺, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀻’’𑀢𑀺 (𑀧𑀸𑀭𑀸. 𑁫𑁧𑁯) 𑀧𑀸𑀴𑀺𑀬𑀁 𑀯𑀼𑀢𑁆𑀢𑁂𑀲𑀼 𑀲𑀩𑁆𑀩𑁂𑀲𑀼 𑀧𑀼𑀩𑁆𑀩𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀜𑁆𑀜𑀢𑁆𑀭 𑀲𑀫𑀬𑀸𑀢𑀺 ‘‘𑀢𑀢𑁆𑀣𑀸𑀬𑀁 𑀲𑀫𑀬𑁄, 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁄 𑀯𑀸 𑀳𑁄𑀢𑀺 𑀪𑀺𑀓𑁆𑀔𑀼 𑀦𑀝𑁆𑀞𑀘𑀻𑀯𑀭𑁄 𑀯𑀸’’𑀢𑀺 (𑀧𑀸𑀭𑀸. 𑁫𑁧𑁮) 𑀫𑀸𑀢𑀺𑀓𑀸𑀬, ‘‘𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁄 𑀦𑀸𑀫 𑀪𑀺𑀓𑁆𑀔𑀼𑀲𑁆𑀲 𑀘𑀻𑀯𑀭𑀁 𑀅𑀘𑁆𑀙𑀺𑀦𑁆𑀦𑀁 𑀳𑁄𑀢𑀺 𑀭𑀸𑀚𑀽𑀳𑀺 𑀯𑀸 𑀘𑁄𑀭𑁂𑀳𑀺 𑀯𑀸 𑀥𑀼𑀢𑁆𑀢𑁂𑀳𑀺 𑀯𑀸 𑀬𑁂𑀳𑀺 𑀓𑁂𑀳𑀺𑀘𑀺 𑀯𑀸 𑀅𑀘𑁆𑀙𑀺𑀦𑁆𑀦𑀁 𑀳𑁄𑀢𑀺. 𑀦𑀝𑁆𑀞𑀘𑀻𑀯𑀭𑁄 𑀦𑀸𑀫 𑀪𑀺𑀓𑁆𑀔𑀼𑀲𑁆𑀲 𑀘𑀻𑀯𑀭𑀁 𑀅𑀕𑁆𑀕𑀺𑀦𑀸 𑀯𑀸 𑀤𑀟𑁆𑀠𑀁 𑀳𑁄𑀢𑀺, 𑀉𑀤𑀓𑁂𑀦 𑀯𑀸 𑀯𑀽𑀴𑁆𑀳𑀁 𑀳𑁄𑀢𑀺, 𑀉𑀦𑁆𑀤𑀽𑀭𑁂𑀳𑀺 𑀯𑀸 𑀉𑀧𑀘𑀺𑀓𑀸𑀳𑀺 𑀯𑀸 𑀔𑀸𑀬𑀺𑀢𑀁 𑀳𑁄𑀢𑀻’’𑀢𑀺 (𑀧𑀸𑀭𑀸. 𑁫𑁧𑁯) 𑀧𑀤𑀪𑀸𑀚𑀦𑁂 𑀘 𑀦𑀺𑀤𑁆𑀤𑀺𑀝𑁆𑀞𑀲𑀭𑀽𑀧𑀓𑀸𑀮𑀢𑁄 𑀅𑀜𑁆𑀜𑀢𑁆𑀭𑀸𑀢𑀺 𑀅𑀢𑁆𑀣𑁄.

𑁬𑁩𑁬. 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 ‘‘𑀅𑀜𑁆𑀜𑀸𑀢𑀓𑁂 𑀅𑀜𑁆𑀜𑀸𑀢𑀓𑀲𑀜𑁆𑀜𑀻, 𑀯𑁂𑀫𑀢𑀺𑀓𑁄, 𑀜𑀸𑀢𑀓𑀲𑀜𑁆𑀜𑀻 𑀅𑀜𑁆𑀜𑀢𑁆𑀭 𑀲𑀫𑀬𑀸 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀭𑀸. 𑁫𑁨𑁦) 𑀧𑀸𑀘𑀺𑀢𑁆𑀢𑀺𑀬𑀢𑁆𑀢𑀬𑀁 𑀪𑀕𑀯𑀢𑀸 𑀯𑀼𑀢𑁆𑀢𑀁. ‘‘𑀜𑀸𑀢𑀓𑁂 𑀅𑀜𑁆𑀜𑀸𑀢𑀺𑀲𑀜𑁆𑀜𑀺𑀲𑁆𑀲𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀜𑀸𑀢𑀓𑁂. 𑀯𑁂𑀫𑀢𑀺𑀓𑀲𑁆𑀲𑀸𑀢𑀺 ‘‘𑀜𑀸𑀢𑀓𑁄 𑀦𑀼 𑀔𑁄, 𑀅𑀜𑁆𑀜𑀸𑀢𑀓𑁄’’𑀢𑀺 𑀯𑁂𑀫𑀢𑀺𑀓𑀲𑁆𑀲. 𑀤𑁆𑀯𑀺𑀓𑀤𑀼𑀓𑁆𑀓𑀝𑀁 𑀢𑀣𑁂𑀯𑀸𑀢𑀺 𑀬𑁄𑀚𑀦𑀸. ‘‘𑀢𑀣𑁂𑀯𑀸’’𑀢𑀺 ‘‘𑀯𑀼𑀢𑁆𑀢’’𑀦𑁆𑀢𑀺 𑀇𑀤𑀁 𑀆𑀓𑀟𑁆𑀠𑀢𑀺, ‘‘𑀜𑀸𑀢𑀓𑁂 𑀅𑀜𑁆𑀜𑀸𑀢𑀓𑀲𑀜𑁆𑀜𑀻, 𑀯𑁂𑀫𑀢𑀺𑀓𑁄 𑀅𑀜𑁆𑀜𑀢𑁆𑀭 𑀲𑀫𑀬𑀸 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁫𑁨𑁦) 𑀤𑁂𑀲𑀺𑀢𑀦𑁆𑀢𑀺 𑀅𑀢𑁆𑀣𑁄.

𑁬𑁩𑁭-𑁮. 𑀲𑀫𑀬𑁂 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣 ‘‘𑀘𑀻𑀯𑀭𑀁 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢’’𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀤𑁆𑀯𑀬𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀸𑀮𑁂 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑀁 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀜𑀸𑀢𑀓𑁂 𑀯𑀸 𑀧𑀯𑀸𑀭𑀺𑀢𑁂𑀢𑀺 𑀏𑀢𑁆𑀣𑀸𑀧𑀺 ‘‘𑀅𑀢𑁆𑀢𑀦𑁄’’𑀢𑀺 𑀅𑀚𑁆𑀛𑀸𑀳𑀸𑀭𑁄, ‘‘𑀲𑀫𑀬𑁂’’𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀁, 𑀅𑀢𑁆𑀢𑀦𑁄 𑀜𑀸𑀢𑀓𑀧𑀯𑀸𑀭𑀺𑀢𑁂 𑀅𑀲𑀫𑀬𑁂𑀧𑀺 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸𑀢𑀺 𑀏𑀢𑁆𑀣 ‘‘𑀅𑀢𑁆𑀢𑀦𑁄’’𑀢𑀺 𑀲𑁂𑀲𑁄, 𑀅𑀢𑁆𑀢𑀦𑁄 𑀜𑀸𑀢𑀓𑁂, 𑀧𑀯𑀸𑀭𑀺𑀢𑁂 𑀯𑀸 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸, 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀦𑀺𑀲𑁆𑀲𑀸𑀬 𑀅𑀢𑁆𑀢𑀦𑁄 𑀜𑀸𑀢𑀓𑁂 𑀯𑀸 𑀧𑀯𑀸𑀭𑀺𑀢𑁂 𑀯𑀸 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀢𑀭𑀁 𑀧𑀓𑁆𑀔𑀁 𑀤𑀲𑁆𑀲𑁂𑀢𑀺 ‘‘𑀢𑀲𑁆𑀲 𑀜𑀸𑀢𑀓𑁂 𑀯𑀸 𑀧𑀯𑀸𑀭𑀺𑀢𑁂 𑀯𑀸’’𑀢𑀺. 𑀢𑀲𑁆𑀲𑀸𑀢𑀺 ‘‘𑀅𑀜𑁆𑀜𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀲𑁆𑀲, ‘‘𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀯𑀸𑀢𑀺 𑀧𑀼𑀭𑀺𑀫𑀯𑀺𑀓𑀧𑁆𑀧𑀸𑀧𑁂𑀓𑁆𑀔𑀁. 𑀬𑀁 𑀲𑀦𑁆𑀥𑀸𑀬 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀢𑀲𑁆𑀲 𑀜𑀸𑀢𑀓𑁂 𑀯𑀸 𑀧𑀯𑀸𑀭𑀺𑀢𑁂 𑀯𑀸 𑀢𑀁𑀬𑁂𑀯 𑀲𑀦𑁆𑀥𑀸𑀬 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀅𑀢𑁆𑀢𑀦𑁄 𑀯𑀸 𑀥𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀁 𑀅𑀦𑀸𑀧𑀢𑁆𑀢𑀺𑀅𑀗𑁆𑀕𑀁 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀬𑁆𑀳𑀢𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀲𑀼𑀢𑁆𑀢𑀓𑀧𑁆𑀧𑀸𑀲𑀸𑀤𑀺𑀓𑀁 𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀤𑀢𑁆𑀯𑀸 𑀕𑀡𑁆𑀳𑀺𑀢𑀼𑀓𑀸𑀫𑀢𑀸𑀬 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀬𑀸𑀘𑀦𑁆𑀢𑀲𑁆𑀲 𑀘 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄.

𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁬𑁩𑁯. 𑀅𑀧𑁆𑀧𑀯𑀸𑀭𑀺𑀢𑀫𑀜𑁆𑀜𑀸𑀢𑀺𑀦𑁆𑀢𑀺 𑀏𑀢𑁆𑀣 ‘‘𑀕𑀳𑀧𑀢𑀺𑀁 𑀯𑀸 𑀕𑀳𑀧𑀢𑀸𑀦𑀺𑀁 𑀯𑀸’’𑀢𑀺 𑀇𑀤𑀁 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺. 𑀢𑀢𑀼𑀢𑁆𑀢𑀭𑀺𑀦𑁆𑀢𑀺 𑀢𑀢𑁄 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀢𑁄 𑀉𑀢𑁆𑀢𑀭𑀺𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, ‘‘𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑀢𑁄 𑀘𑀻𑀯𑀭𑀁 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁫𑁨𑁩) 𑀯𑀼𑀢𑁆𑀢𑀢𑁆𑀢𑀸 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁂𑀦 𑀲𑀸𑀤𑀺𑀢𑀩𑁆𑀩𑀅𑀦𑁆𑀢𑀭𑀯𑀸𑀲𑀓𑀉𑀢𑁆𑀢𑀭𑀸𑀲𑀗𑁆𑀕𑀫𑀢𑁆𑀢𑁂𑀦 𑀅𑀥𑀺𑀓𑀦𑁆𑀢𑀺 𑀅𑀢𑁆𑀣𑁄.

‘‘𑀢𑀢𑁄 𑀘𑁂 𑀉𑀢𑁆𑀢𑀭𑀺 𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁫𑁨𑁩) 𑀯𑀘𑀦𑀢𑁄 ‘‘𑀲𑀸𑀤𑀺𑀬𑀦𑁆𑀢𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑀁, 𑀏𑀯𑀁 𑀯𑀢𑁆𑀢𑀩𑁆𑀩𑁂 ‘‘𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀙𑀩𑁆𑀩𑀕𑁆𑀕𑀺𑀬𑁂𑀳𑀺 𑀪𑀺𑀓𑁆𑀔𑀽𑀳𑀺 𑀘𑀻𑀯𑀭𑀯𑀺𑀜𑁆𑀜𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 ‘‘𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂 𑀫𑁄𑀖𑀧𑀼𑀭𑀺𑀲𑀸 𑀦 𑀫𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀩𑀳𑀼𑀁 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀲𑁆𑀲𑀣𑀸’’𑀢𑀺 (𑀧𑀸𑀭𑀸. 𑁫𑁨𑁨) 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀕𑀭𑀳𑀺𑀢𑁆𑀯𑀸 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀜𑁆𑀜𑀢𑁆𑀢𑀢𑁆𑀢𑀸 ‘‘𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 𑀏𑀢𑁆𑀣 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄 𑀳𑁄𑀢𑀺, 𑀢𑁂𑀦𑁂𑀯 𑀇𑀫𑀲𑁆𑀫𑀺𑀁 𑀧𑀤𑀪𑀸𑀚𑀦𑁂 ‘‘𑀢𑀢𑁄 𑀘𑁂 𑀉𑀢𑁆𑀢𑀭𑀺 𑀲𑀸𑀤𑀺𑀬𑁂𑀬𑁆𑀬𑀸𑀢𑀺 𑀢𑀢𑀼𑀢𑁆𑀢𑀭𑀺 𑀯𑀺𑀜𑁆𑀜𑀸𑀧𑁂𑀢𑀻’’𑀢𑀺 (𑀧𑀸𑀭𑀸. 𑁫𑁨𑁪) 𑀘 𑀆𑀧𑀢𑁆𑀢𑀺𑀪𑁂𑀤𑀲𑀦𑁆𑀤𑀲𑁆𑀲𑀦𑀝𑁆𑀞𑀸𑀦𑁂 ‘‘𑀅𑀜𑁆𑀜𑀸𑀢𑀓𑁂 𑀅𑀜𑁆𑀜𑀸𑀢𑀓𑀲𑀜𑁆𑀜𑀻 𑀢𑀢𑀼𑀢𑁆𑀢𑀭𑀺 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀧𑀸𑀭𑀸. 𑁫𑁨𑁫) 𑀘 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 𑀲𑀺𑀓𑁆𑀔𑀸𑀧𑀤𑁂𑀬𑁂𑀯 ‘‘𑀲𑀸𑀤𑀺𑀢𑀩𑁆𑀩𑀁, 𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺 𑀘 𑀉𑀪𑀬𑀢𑁆𑀣 ‘‘𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀁, 𑀯𑀺𑀜𑁆𑀜𑀸𑀧𑁂𑀬𑁆𑀬𑀸’’𑀢𑀺 𑀘 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺? 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀪𑀸𑀯𑀁 𑀜𑀢𑁆𑀯𑀸 𑀅𑀯𑀺𑀜𑁆𑀜𑀸𑀧𑀺𑀢𑁂𑀧𑀺 𑀅𑀪𑀺𑀳𑀭𑀺𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑀫𑁆𑀧𑀺 𑀅𑀥𑀺𑀯𑀸𑀲𑁂𑀦𑁆𑀢𑁂𑀦 𑀏𑀯𑀫𑁂𑀯 𑀲𑀸𑀤𑀺𑀢𑀩𑁆𑀩𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀇𑀫𑀲𑁆𑀲𑁂𑀯 𑀘 𑀅𑀥𑀺𑀓𑀯𑀺𑀜𑁆𑀜𑀸𑀧𑀦𑀦𑀺𑀲𑁂𑀥𑀦𑀢𑁆𑀣𑀁 𑀯𑀤𑀦𑁆𑀢𑁂𑀦𑀸𑀧𑀺 ‘‘𑀢𑀜𑁆𑀘𑁂 𑀅𑀜𑁆𑀜𑀸𑀢𑀓𑁄 𑀕𑀳𑀧𑀢𑀺 𑀯𑀸 𑀕𑀳𑀧𑀢𑀸𑀦𑀻 𑀯𑀸 𑀩𑀳𑀽𑀳𑀺 𑀘𑀻𑀯𑀭𑁂𑀳𑀺 𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑁂𑀬𑁆𑀬, 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑀢𑁄 𑀘𑀻𑀯𑀭𑀁 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 𑀲𑀸𑀤𑀺𑀢𑀩𑁆𑀩𑀦𑀺𑀬𑀫𑀧𑁆𑀧𑀥𑀸𑀦𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁂𑀦 𑀅𑀢𑁆𑀢𑀦𑀸 𑀯𑀸 𑀢𑀁 𑀲𑀦𑁆𑀥𑀸𑀬 𑀅𑀜𑁆𑀜𑁂𑀦 𑀯𑀸 𑀯𑀺𑀜𑁆𑀜𑀸𑀧𑁂𑀦𑁆𑀢𑁂𑀦𑀧𑀺 𑀅𑀯𑀺𑀜𑁆𑀜𑀸𑀧𑁂𑀦𑁆𑀢𑁂𑀧𑀺 𑀤𑀺𑀬𑁆𑀬𑀫𑀸𑀦𑀁 𑀲𑀸𑀤𑀺𑀬𑀦𑁆𑀢𑁂𑀦𑀸𑀧𑀺 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀢𑀁 𑀦𑀸𑀢𑀺𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀲𑀦𑁆𑀥𑀸𑀬 𑀪𑀸𑀲𑀺𑀢𑀢𑁆𑀣𑁄𑀢𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀢𑀓𑀁 𑀜𑀸𑀧𑁂𑀢𑀼𑀁 ‘‘𑀲𑀸𑀤𑀺𑀬𑀦𑁆𑀢𑀲𑁆𑀲𑀸’’𑀢𑀺 𑀅𑀯𑀢𑁆𑀯𑀸 ‘‘𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀘𑀭𑀺𑀬𑀸𑀪𑀺𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑁬𑁪𑁦. 𑀇𑀤𑀸𑀦𑀺 𑀯𑀺𑀜𑁆𑀜𑀸𑀧𑀦𑁂 𑀘 𑀅𑀥𑀺𑀯𑀸𑀲𑀦𑁂 𑀘 𑀉𑀪𑀬𑀢𑁆𑀣𑁂𑀯 𑀦𑀺𑀬𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀢𑀻𑀡𑀺 𑀦𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀺. 𑀤𑁆𑀯𑁂 𑀦𑀝𑁆𑀞𑀸𑀦𑀺, 𑀏𑀓𑀁 𑀲𑀸𑀤𑀺𑀢𑀩𑁆𑀩𑀁. 𑀏𑀓𑀁 𑀦𑀝𑁆𑀞𑀁, 𑀦 𑀓𑀺𑀜𑁆𑀘𑀺 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁫𑁨𑁪) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀬𑀲𑁆𑀲𑀸’’𑀢𑀺𑀆𑀤𑀺. ‘‘𑀬𑀲𑁆𑀲 𑀢𑀻𑀡𑀺𑀧𑀺 𑀦𑀝𑁆𑀞𑀸𑀦𑀺, 𑀤𑁆𑀯𑁂 𑀯𑀸 𑀦𑀝𑁆𑀞𑀸𑀦𑀺, 𑀏𑀓𑀁 𑀯𑀸 𑀦𑀝𑁆𑀞’’𑀦𑁆𑀢𑀺 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀬𑀣𑀸𑀓𑁆𑀓𑀫𑀁 ‘‘𑀢𑁂𑀦 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀺, 𑀏𑀓𑀁 𑀲𑀸𑀤𑀺𑀢𑀩𑁆𑀩𑀁, 𑀦 𑀓𑀺𑀜𑁆𑀘𑀺𑀧𑀺 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀬𑀲𑁆𑀲 𑀢𑀻𑀡𑀺𑀧𑀺 𑀘𑀻𑀯𑀭𑀸𑀦𑀺 𑀦𑀝𑁆𑀞𑀸𑀦𑀺, 𑀩𑀳𑀼 𑀘 𑀤𑀺𑀬𑁆𑀬𑀢𑀺, 𑀢𑁂𑀦 𑀤𑁆𑀯𑁂𑀬𑁂𑀯 𑀘𑀻𑀯𑀭𑀸𑀦𑀺 𑀲𑀸𑀤𑀺𑀢𑀩𑁆𑀩𑀸𑀦𑀺. 𑀤𑁆𑀯𑁂 𑀘𑀻𑀯𑀭𑀸𑀦𑀺 𑀦𑀝𑁆𑀞𑀸𑀦𑀺, 𑀏𑀓𑀁 𑀲𑀸𑀤𑀺𑀢𑀩𑁆𑀩𑀁. 𑀏𑀓𑀜𑁆𑀘𑁂 𑀦𑀝𑁆𑀞𑀁, 𑀦 𑀲𑀸𑀤𑀺𑀢𑀩𑁆𑀩𑀁, 𑀅𑀯𑀲𑀺𑀝𑁆𑀞𑀁 𑀧𑀘𑁆𑀙𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀮𑀤𑁆𑀥𑀦𑀻𑀳𑀸𑀭𑁂𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑁂𑀲𑀁 𑀲𑀪𑀸𑀕𑀝𑁆𑀞𑀸𑀦𑀢𑁄 𑀧𑀭𑀺𑀬𑁂𑀲𑀺𑀲𑁆𑀲𑀢𑀻’’𑀢𑀺. ‘‘𑀪𑀺𑀓𑁆𑀔𑀼𑀦𑀺𑀬𑀸 𑀧𑀦 𑀧𑀜𑁆𑀘𑀲𑀼𑀧𑀺 𑀦𑀝𑁆𑀞𑁂𑀲𑀼 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀺, 𑀘𑀢𑀽𑀲𑀼 𑀦𑀝𑁆𑀞𑁂𑀲𑀼 𑀏𑀓𑀁 𑀲𑀸𑀤𑀺𑀢𑀩𑁆𑀩𑀁, 𑀢𑀻𑀲𑀼 𑀦𑀝𑁆𑀞𑁂𑀲𑀼 𑀓𑀺𑀜𑁆𑀘𑀺 𑀦 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁨𑁨-𑁫𑁨𑁪) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑁬𑁪𑁧-𑁨. 𑀲𑁂𑀲𑀓𑀁 𑀆𑀳𑀭𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀜𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀏𑀯𑀫𑀼𑀧𑀭𑀺𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀘𑀻𑀯𑀭𑀁 𑀬𑁄𑀚𑁂𑀢𑁆𑀯𑀸 𑀅𑀢𑀺𑀭𑁂𑀓𑀁 𑀯𑀢𑁆𑀣𑀁 𑀧𑀘𑁆𑀘𑀸𑀳𑀭𑀺𑀢𑁆𑀯𑀸 ‘‘𑀤𑀲𑁆𑀲𑀸𑀫𑀻’’𑀢𑀺 𑀩𑀳𑀼𑀫𑁆𑀧𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀢𑀺𑀭𑁂𑀓𑀫𑁆𑀧𑀺 𑀢𑀼𑀫𑁆𑀳𑁂𑀬𑁂𑀯 𑀕𑀡𑁆𑀳𑀣𑀸𑀢𑀺 𑀤𑀺𑀦𑁆𑀦𑀁 𑀕𑀡𑁆𑀳𑀢𑁄𑀧𑀺 𑀅𑀦𑀸𑀧𑀢𑁆𑀢𑀺. 𑀦 𑀅𑀘𑁆𑀙𑀺𑀦𑁆𑀦𑀓𑀸𑀭𑀡𑀸 𑀤𑀺𑀦𑁆𑀦𑁂𑀢𑀺 𑀬𑁄𑀚𑀦𑀸, 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀪𑀸𑀯𑀁 𑀅𑀦𑀼𑀤𑁆𑀤𑀺𑀲𑁆𑀲 𑀩𑀳𑀽𑀦𑀁 𑀘𑀻𑀯𑀭𑀸𑀦𑀁 𑀕𑀳𑀡𑀦𑀺𑀫𑀺𑀢𑁆𑀢𑁂𑀦𑀸𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀯 ‘‘𑀦 𑀦𑀝𑁆𑀞𑀓𑀸𑀭𑀡𑀸 𑀤𑁂𑀦𑁆𑀢𑀻’’𑀢𑀺 𑀇𑀤𑀫𑁆𑀧𑀺 𑀤𑀲𑁆𑀲𑀺𑀢𑀫𑁂𑀯. 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁂 𑀦𑀺𑀲𑁆𑀲𑀸𑀬 𑀢𑀢𑀼𑀢𑁆𑀢𑀭𑀺𑀘𑀻𑀯𑀭𑀯𑀺𑀜𑁆𑀜𑀸𑀧𑀦𑀯𑀢𑁆𑀣𑀼𑀫𑁆𑀳𑀺 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀜𑁆𑀜𑀢𑁆𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’’𑀢𑀺 𑀦 𑀕𑀳𑀺𑀢𑀁.

𑀢𑀢𑀼𑀢𑁆𑀢𑀭𑀺𑀓𑀣𑀸𑀯𑀡𑁆𑀡𑀦𑀸.

𑁬𑁪𑁩. 𑀓𑀮𑁆𑀬𑀸𑀡𑀓𑀫𑁆𑀬𑀢𑀸𑀳𑁂𑀢𑀽𑀢𑀺 𑀲𑀼𑀦𑁆𑀤𑀭𑀲𑁆𑀲 𑀫𑀳𑀕𑁆𑀖𑀲𑁆𑀲 𑀓𑀸𑀫𑀢𑀁 𑀧𑀝𑀺𑀘𑁆𑀘 𑀘𑀻𑀯𑀭𑁂 𑀯𑀺𑀓𑀧𑁆𑀧𑀦𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀬𑁄𑀚𑀦𑀸, ‘‘𑀓𑀻𑀤𑀺𑀲𑁂𑀦 𑀢𑁂 𑀪𑀦𑁆𑀢𑁂 𑀘𑀻𑀯𑀭𑁂𑀦 𑀅𑀢𑁆𑀣𑁄’’𑀢𑀺 𑀧𑀼𑀩𑁆𑀩𑁂 𑀅𑀧𑁆𑀧𑀯𑀸𑀭𑀺𑀢𑁄 ‘‘𑀆𑀬𑀢𑀁 𑀯𑀸 𑀳𑁄𑀢𑀼 𑀯𑀺𑀢𑁆𑀣𑀢𑀁 𑀯𑀸 𑀅𑀧𑁆𑀧𑀺𑀢𑀁 𑀯𑀸 𑀲𑀡𑁆𑀳𑀁 𑀯𑀸’’𑀢𑀺 (𑀧𑀸𑀭𑀸. 𑁫𑁨𑁯) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀯𑀺𑀲𑀺𑀝𑁆𑀞𑀓𑀧𑁆𑀧𑀁 𑀅𑀥𑀺𑀓𑀯𑀺𑀥𑀸𑀦𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀮𑀸𑀪𑀸 𑀦𑀺𑀲𑁆𑀲𑀕𑁆𑀕𑀺𑀬𑀁 𑀪𑀯𑁂𑀢𑀺 𑀢𑀣𑀸 𑀅𑀧𑁆𑀧𑀯𑀸𑀭𑀺𑀢𑁂𑀦 𑀳𑀼𑀢𑁆𑀯𑀸 𑀓𑀢𑁂𑀦 𑀅𑀥𑀺𑀓𑀯𑀺𑀥𑀸𑀦𑁂𑀦 𑀦𑀺𑀧𑁆𑀨𑀦𑁆𑀦𑀘𑀻𑀯𑀭𑀲𑁆𑀲 𑀮𑀸𑀪𑀧𑁆𑀧𑀬𑁄𑀕𑁂𑀦 𑀤𑀼𑀓𑁆𑀓𑀝𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀸 𑀳𑁄𑀦𑁆𑀢𑀺.

𑁬𑁪𑁪. 𑀫𑀳𑀕𑁆𑀖𑀁 …𑀧𑁂… 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀯𑀻𑀲𑀢𑀺𑀅𑀕𑁆𑀖𑀦𑀓𑀁 𑀘𑀻𑀯𑀭𑀁 𑀤𑀸𑀢𑀼𑀓𑀸𑀫𑀫𑁆𑀳𑀺 𑀉𑀧𑀸𑀲𑀓𑁂, ‘‘𑀅𑀮𑀁 𑀫𑀬𑁆𑀳𑀁 𑀏𑀢𑁂𑀦, 𑀤𑀲𑀕𑁆𑀖𑀦𑀓𑀁 𑀯𑀸 𑀅𑀧𑁆𑀧𑀕𑁆𑀖𑀦𑀓𑀁 𑀯𑀸 𑀤𑁂𑀳𑀻’’𑀢𑀺 𑀯𑀤𑀢𑀺.

𑁬𑁪𑁫. ‘‘𑀜𑀸𑀢𑀓𑁂 𑀅𑀜𑁆𑀜𑀸𑀢𑀺𑀲𑀜𑁆𑀜𑀺𑀲𑁆𑀲𑀸’’𑀢𑀺 𑀧𑀤𑀘𑁆𑀙𑁂𑀤𑁄.

𑀧𑀞𑀫𑁄𑀧𑀓𑁆𑀔𑀝𑀓𑀣𑀸𑀯𑀡𑁆𑀡𑀦𑀸.

𑁬𑁪𑁬. 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀏𑀓𑁂𑀦 𑀉𑀧𑀸𑀲𑀓𑁂𑀦 𑀧𑀻𑀴𑀸 𑀮𑀤𑁆𑀥𑀸, 𑀇𑀥 𑀤𑁆𑀯𑀻𑀳𑀻𑀢𑀺 𑀏𑀢𑁆𑀢𑀓𑀁 𑀦𑀸𑀦𑀸𑀓𑀭𑀡𑀁. 𑀲𑁂𑀲𑀁 𑀧𑀞𑀫𑀲𑀺𑀓𑁆𑀔𑀸𑀧𑀤𑀲𑀤𑀺𑀲𑀫𑁂𑀯𑀸𑀢𑀺 𑀆𑀳 ‘‘𑀤𑀼𑀢𑀺𑀬𑁄…𑀧𑁂… 𑀯𑀺𑀦𑀺𑀘𑁆𑀙𑀬𑁄’’𑀢𑀺. 𑀉𑀧𑀓𑁆𑀔𑀝𑀧𑀤𑁂𑀦 𑀮𑀓𑁆𑀔𑀺𑀢𑀁 𑀲𑀺𑀓𑁆𑀔𑀸𑀧𑀤𑀁 𑀉𑀧𑀓𑁆𑀔𑀝𑀁, 𑀤𑀼𑀢𑀺𑀬𑀜𑁆𑀘 𑀢𑀁 𑀉𑀧𑀓𑁆𑀔𑀝𑀜𑁆𑀘𑀸𑀢𑀺 𑀤𑀼𑀢𑀺𑀬𑁄𑀧𑀓𑁆𑀔𑀝𑀁, 𑀢𑀲𑁆𑀫𑀺𑀁 𑀤𑀼𑀢𑀺𑀬𑁄𑀧𑀓𑁆𑀔𑀝𑁂. 𑀅𑀲𑁆𑀲𑀸𑀢𑀺 𑀤𑀼𑀢𑀺𑀬𑁄𑀧𑀓𑁆𑀔𑀝𑀲𑁆𑀲.

𑀤𑀼𑀢𑀺𑀬𑁄𑀧𑀓𑁆𑀔𑀝𑀓𑀣𑀸𑀯𑀡𑁆𑀡𑀦𑀸.

𑁬𑁪𑁭. 𑀭𑀜𑁆𑀜𑀸 𑀯𑀸𑀢𑀺 𑀭𑀸𑀚𑀢𑁄 𑀯𑀸. 𑀭𑀸𑀚𑀢𑁄 𑀪𑁄𑀕𑁆𑀕𑀁 𑀪𑀼𑀜𑁆𑀚𑀺𑀢𑀩𑁆𑀩𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 ‘‘𑀭𑀸𑀚𑀪𑁄𑀕𑁆𑀕𑁄’’𑀢𑀺 𑀯𑀼𑀢𑁆𑀢𑁄, 𑀭𑀸𑀚𑀢𑁄 𑀪𑀢𑁆𑀢𑀯𑁂𑀢𑁆𑀢𑀦𑀮𑀸𑀪𑀺𑀢𑁄 𑀬𑀢𑁄 𑀓𑀼𑀢𑁄𑀘𑀺 𑀤𑀸𑀬𑀓𑀸 𑀆𑀪𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀘 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 ‘‘𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀪𑀸𑀯𑀢𑁄’’𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀇𑀥 𑀉𑀢𑁆𑀢𑀭𑀺𑀓𑀭𑀡𑀻𑀬𑀁 ‘‘𑀢𑀺𑀓𑁆𑀔𑀢𑁆𑀢𑀼’’𑀦𑁆𑀢𑀺𑀆𑀤𑀺𑀕𑀸𑀣𑀸𑀬 (𑀯𑀺. 𑀯𑀺. 𑁬𑁭𑁧) 𑀯𑀓𑁆𑀔𑀢𑀺.

𑁬𑁪𑁮. 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀯𑀲𑁂𑀦 𑀅𑀥𑀺𑀕𑀢𑀭𑀚𑀢𑀸𑀤𑀺 𑀬𑁂𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦𑀸𑀧𑀺 𑀦 𑀲𑀸𑀤𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀭𑀚𑀢𑀁 𑀯𑀸’’𑀢𑀺𑀆𑀤𑀺. 𑀥𑀯𑀮𑀲𑀪𑀸𑀯𑀢𑀸𑀬 𑀭𑀸𑀚𑀢𑀻𑀢𑀺 𑀭𑀚𑀢𑀁, 𑀲𑀚𑁆𑀛𑀼. 𑀚𑀸𑀢𑀁 𑀭𑀽𑀧𑀁 𑀯𑀡𑁆𑀡𑀸𑀬𑀢𑀦𑀫𑁂𑀢𑀲𑁆𑀲𑀸𑀢𑀺 𑀚𑀸𑀢𑀭𑀽𑀧𑀁, 𑀲𑀼𑀯𑀡𑁆𑀡𑀁. 𑀓𑀺𑀜𑁆𑀘𑀻𑀢𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺. 𑀅𑀢𑁆𑀢𑀦𑁄 𑀯𑀸 𑀅𑀢𑁆𑀣𑀸𑀬 𑀧𑀭𑀲𑁆𑀲 𑀯𑀸 𑀅𑀢𑁆𑀣𑀸𑀬 𑀤𑀺𑀬𑁆𑀬𑀫𑀸𑀦𑀁 𑀓𑀺𑀜𑁆𑀘𑀺 𑀕𑀡𑁆𑀳𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁬𑁪𑁯. 𑀅𑀢𑁆𑀢𑀦𑁄 𑀧𑀝𑀺𑀕𑁆𑀕𑀳𑀡𑁂 𑀆𑀧𑀢𑁆𑀢𑀺𑀬𑀸 𑀭𑀽𑀧𑀺𑀬𑀕𑀳𑀡𑀲𑀺𑀓𑁆𑀔𑀸𑀧𑀤𑁂 𑀯𑀓𑁆𑀔𑀫𑀸𑀦𑀢𑁆𑀢𑀸 𑀅𑀜𑁆𑀜𑀲𑁆𑀲 𑀅𑀢𑁆𑀣𑀸𑀬 𑀕𑀳𑀡𑁂 𑀆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀫𑀸𑀳 ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸𑀢𑀺 𑀅𑀜𑁆𑀜𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀕𑀡𑀲𑁆𑀲, 𑀲𑀗𑁆𑀖𑀲𑁆𑀲, 𑀘𑁂𑀢𑀺𑀬𑀲𑁆𑀲, 𑀦𑀯𑀓𑀫𑁆𑀫𑀲𑁆𑀲 𑀯𑀸 𑀅𑀢𑁆𑀣𑀸𑀬. 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀆𑀳𑀭𑀺𑀢𑁆𑀯𑀸 ‘‘𑀇𑀫𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑀁 𑀭𑀚𑀢𑀁, 𑀚𑀸𑀢𑀭𑀽𑀧𑀁 𑀯𑀸 𑀅𑀜𑁆𑀜𑀁 𑀯𑀸 𑀬𑀁 𑀓𑀺𑀜𑁆𑀘𑀺 𑀦𑀺𑀲𑁆𑀲𑀕𑁆𑀕𑀺𑀬𑀤𑀼𑀓𑁆𑀓𑀝𑀯𑀢𑁆𑀣𑀼𑀁 𑀧𑀝𑀺𑀕𑁆𑀕𑀡𑁆𑀳𑀢𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑁬𑁫𑁦-𑁧. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀭𑀽𑀧𑀢𑁄 𑀯𑀺𑀪𑀸𑀯𑁂𑀢𑀼𑀫𑀸𑀳 ‘‘𑀦𑁂𑀢𑁆𑀯𑀸’’𑀢𑀺𑀆𑀤𑀺. 𑀦𑁂𑀢𑁆𑀯𑀸𑀢𑀺 𑀆𑀦𑁂𑀢𑁆𑀯𑀸. 𑀅𑀓𑀧𑁆𑀧𑀺𑀬𑀁 𑀪𑀡𑁆𑀟𑀦𑁆𑀢𑀺 ‘‘𑀭𑀚𑀢𑀁 𑀚𑀸𑀢𑀭𑀽𑀧𑀁 𑀯𑀸’’𑀢𑀺 𑀬𑀣𑀸𑀯𑀼𑀢𑁆𑀢𑀫𑁂𑀯 𑀅𑀓𑀧𑁆𑀧𑀺𑀬𑀪𑀡𑁆𑀟𑀁. 𑀇𑀢𑁆𑀣𑀦𑁆𑀢𑀺 𑀯𑀓𑁆𑀔𑀫𑀸𑀦𑀧𑁆𑀧𑀓𑀸𑀭𑁂𑀦. 𑀦 𑀘 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀘-𑀓𑀸𑀭𑁂𑀦 𑀯𑀝𑁆𑀝𑀢𑀺 𑀘𑀸𑀢𑀺 𑀅𑀦𑀼𑀜𑁆𑀜𑀸𑀢𑀁 𑀓𑀢𑀦𑁆𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀲𑀘𑁂 𑀧𑀦 ‘𑀦𑀬𑀺𑀤𑀁 𑀪𑀺𑀓𑁆𑀔𑀽𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑁂 ‘𑀯𑀟𑁆𑀠𑀓𑀻𑀦𑀁 𑀯𑀸 𑀓𑀫𑁆𑀫𑀓𑀭𑀸𑀦𑀁 𑀯𑀸 𑀳𑀢𑁆𑀣𑁂 𑀪𑀯𑀺𑀲𑁆𑀲𑀢𑀺, 𑀓𑁂𑀯𑀮𑀁 𑀢𑀼𑀫𑁆𑀳𑁂 𑀲𑀼𑀓𑀢𑀤𑀼𑀓𑁆𑀓𑀝𑀁 𑀚𑀸𑀦𑀸𑀣𑀸’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀳𑀢𑁆𑀣𑁂 𑀤𑀢𑁆𑀯𑀸 𑀧𑀓𑁆𑀓𑀫𑀢𑀺, 𑀯𑀝𑁆𑀝𑀢𑀺. 𑀅𑀣𑀸𑀧𑀺 ‘𑀫𑀫 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑁂 𑀪𑀯𑀺𑀲𑁆𑀲𑀢𑀺, 𑀫𑀬𑁆𑀳𑀫𑁂𑀯 𑀯𑀸 𑀳𑀢𑁆𑀣𑁂 𑀪𑀯𑀺𑀲𑁆𑀲𑀢𑀺, 𑀓𑁂𑀯𑀮𑀁 𑀢𑀼𑀫𑁆𑀳𑁂 𑀬𑀁 𑀬𑀲𑁆𑀲 𑀤𑀸𑀢𑀩𑁆𑀩𑀁, 𑀢𑀤𑀢𑁆𑀣𑀸𑀬 𑀧𑁂𑀲𑁂𑀬𑁆𑀬𑀸𑀣𑀸’𑀢𑀺 𑀯𑀤𑀢𑀺, 𑀏𑀯𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯).

𑁬𑁫𑁨. 𑀯𑀺𑀳𑀸𑀭𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀦𑀯𑀓𑀫𑁆𑀫𑀲𑁆𑀲𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀯𑀢𑁆𑀢𑀩𑁆𑀩𑀁 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀦 𑀯𑀼𑀢𑁆𑀢𑀁.

𑁬𑁫𑁪. 𑀭𑀚𑀢𑀁 𑀚𑀸𑀢𑀭𑀽𑀧𑀁 𑀯𑀸 𑀲𑀗𑁆𑀖𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀣𑀸𑀢𑀺 𑀤𑀺𑀦𑁆𑀦’’𑀦𑁆𑀢𑀺 𑀲𑁂𑀲𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀘𑁂 𑀧𑀦 𑀓𑁄𑀘𑀺 𑀩𑀳𑀼𑀫𑁆𑀧𑀺 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀆𑀦𑁂𑀢𑁆𑀯𑀸 ‘𑀇𑀤𑀁 𑀲𑀗𑁆𑀖𑀲𑁆𑀲 𑀤𑀫𑁆𑀫𑀺, 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀣𑀸’𑀢𑀺 𑀯𑀤𑀢𑀺, 𑀢𑀁 𑀘𑁂 𑀲𑀗𑁆𑀖𑁄 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀧𑀝𑀺𑀕𑁆𑀕𑀳𑀡𑁂𑀧𑀺 𑀧𑀭𑀺𑀪𑁄𑀕𑁂𑀧𑀺 𑀆𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯). 𑀏𑀯𑀁 𑀆𑀪𑀢𑀁 𑀢𑀲𑁆𑀫𑀺𑀁 𑀲𑀗𑁆𑀖𑁂 𑀬𑁄 𑀓𑁄𑀘𑀺 𑀪𑀺𑀓𑁆𑀔𑀼 ‘‘𑀦𑀬𑀺𑀤𑀁 𑀓𑀧𑁆𑀧𑀢𑀻’’𑀢𑀺 𑀲𑀘𑁂 𑀧𑀝𑀺𑀓𑁆𑀔𑀺𑀧𑀢𑀺, ‘‘𑀅𑀬𑀁 𑀲𑀗𑁆𑀖𑀲𑁆𑀲 𑀮𑀸𑀪𑀦𑁆𑀢𑀭𑀸𑀬𑀁 𑀓𑀭𑁄𑀢𑀻’’𑀢𑀺 𑀯𑀤𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀺 𑀳𑁄𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀬𑁄 𑀳𑀺 𑀢𑀁 𑀘𑁄𑀤𑁂𑀢𑀺, 𑀲𑁆𑀯𑁂𑀯 𑀲𑀸𑀧𑀢𑁆𑀢𑀺𑀓𑁄 𑀳𑁄𑀢𑀺, 𑀢𑁂𑀦 𑀧𑀦 𑀏𑀓𑁂𑀦 𑀩𑀳𑀽 𑀅𑀦𑀸𑀧𑀢𑁆𑀢𑀺𑀓𑀸 𑀓𑀢𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯). 𑀇𑀥 𑀲𑁆𑀯𑁂𑀯 𑀲𑀸𑀧𑀢𑁆𑀢𑀺𑀓𑁄𑀢𑀺 𑀏𑀢𑁆𑀣 ‘‘𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 ‘‘𑀲𑀗𑁆𑀖𑀲𑁆𑀲𑀸’’𑀢𑀺 𑀅𑀮𑀺𑀔𑀺𑀢𑁆𑀯𑀸 ‘‘𑀪𑀺𑀓𑁆𑀔𑀼𑀦𑁄’’𑀢𑀺 𑀘 𑀮𑀺𑀔𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀇𑀤𑀸𑀦𑀺 𑀤𑀲𑁆𑀲𑀺𑀢𑀅𑀝𑁆𑀞𑀓𑀣𑀸𑀧𑀸𑀞𑁂 ‘‘𑀲𑀗𑁆𑀖𑁄 𑀲𑀫𑁆𑀧𑀝𑀺𑀘𑁆𑀙𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯) 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀗𑁆𑀖𑀲𑁆𑀲𑀸’’𑀢𑀺 𑀧𑀸𑀞𑁄 𑀲𑀼𑀦𑁆𑀤𑀭𑁄.

𑁬𑁫𑁫. 𑀢𑀴𑀸𑀓𑀲𑁆𑀲𑀸𑀢𑀺 𑀯𑀸𑀧𑀺𑀬𑀸. 𑀲𑀲𑁆𑀲𑀼𑀧𑁆𑀧𑀢𑁆𑀢𑀺𑀦𑀺𑀤𑀸𑀦𑀢𑁄 𑀢𑀴𑀸𑀓𑀁 𑀔𑁂𑀢𑁆𑀢𑀁, 𑀢𑀢𑁄 𑀢𑀲𑁆𑀲 𑀕𑀳𑀡𑀁 𑀯𑀸 𑀧𑀭𑀺𑀪𑁄𑀕𑁄 𑀯𑀸 𑀦 𑀘 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀢𑀴𑀸𑀓𑀲𑁆𑀲 𑀘𑀸𑀢𑀺 𑀏𑀢𑁆𑀣 𑀘-𑀓𑀸𑀭𑁂𑀦 𑀔𑁂𑀢𑁆𑀢𑀯𑀢𑁆𑀣𑀼 𑀲𑀗𑁆𑀕𑀳𑀺𑀢𑀁. 𑀦 𑀘 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀘𑀓𑀸𑀭𑁂𑀦 𑀯𑀝𑁆𑀝𑀢𑀺 𑀘𑀸𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑁬𑁫𑁬. 𑀢𑀁 𑀓𑀢𑀫𑀦𑁆𑀢𑀺 𑀆𑀳 ‘‘𑀘𑀢𑁆𑀢𑀸𑀭𑁄’’𑀢𑀺𑀆𑀤𑀺. 𑀲𑀩𑁆𑀩𑀫𑁆𑀧𑀻𑀢𑀺 𑀢𑀴𑀸𑀓𑀧𑁄𑀓𑁆𑀔𑀭𑀡𑀺𑀔𑁂𑀢𑁆𑀢𑀸𑀤𑀺 𑀲𑀩𑁆𑀩𑀫𑁆𑀧𑀺.

𑁬𑁫𑁮-𑁯. 𑀅𑀧𑀭𑀺𑀘𑁆𑀙𑀺𑀦𑁆𑀦𑀪𑀸𑀕𑀲𑁆𑀫𑀺𑀦𑁆𑀢𑀺 ‘‘𑀇𑀫𑀲𑁆𑀫𑀺𑀁 𑀪𑀽𑀫𑀺𑀪𑀸𑀕𑁂 𑀓𑀢𑀲𑁆𑀲 𑀓𑀫𑁆𑀫𑁂𑀳𑀺 𑀏𑀢𑁆𑀢𑀓𑁄 𑀪𑀸𑀕𑁄 𑀤𑁂𑀬𑁆𑀬𑁄’’𑀢𑀺 𑀏𑀯𑀁 𑀧𑀼𑀩𑁆𑀩𑁂 𑀅𑀦𑀺𑀬𑀫𑀺𑀢𑀆𑀬𑁂 𑀪𑀽𑀫𑀺𑀪𑀸𑀕𑁂. 𑀅𑀓𑀢𑀧𑀼𑀩𑁆𑀩𑀁 𑀦𑀯𑀲𑀲𑁆𑀲𑀁 𑀦𑀸𑀫. 𑀏𑀢𑁆𑀢𑀓𑀁 𑀪𑀸𑀕𑀁 𑀤𑁂𑀣𑀸𑀢𑀺 𑀏𑀢𑁆𑀢𑀓𑀁 𑀓𑀳𑀸𑀧𑀡𑀪𑀸𑀕𑀁 𑀤𑁂𑀣. 𑀉𑀝𑁆𑀞𑀸𑀧𑁂𑀢𑀻𑀢𑀺 𑀉𑀧𑁆𑀧𑀸𑀤𑁂𑀢𑀺.

‘‘𑀓𑀲𑀣 𑀯𑀧𑀣𑀸’’𑀢𑀺 𑀅𑀓𑀧𑁆𑀧𑀺𑀬𑀁 𑀯𑀸𑀘𑀁 𑀯𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀯𑀧𑀣𑀸𑀢𑀺 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀇𑀥 𑀅𑀯𑀼𑀢𑁆𑀢𑀁 𑀢𑀁𑀓𑀢𑁆𑀢𑀼𑀬𑁄𑀕𑀓𑀸𑀮𑁂 𑀯𑀼𑀘𑁆𑀘𑀫𑀸𑀦𑀁 𑀅𑀓𑀧𑁆𑀧𑀺𑀬𑀯𑀘𑀦𑀦𑁆𑀢𑀭𑀁 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀉𑀧𑁆𑀧𑀸𑀤𑀺𑀢𑀜𑁆𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀓𑀳𑀸𑀧𑀡𑀁 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀲𑀩𑁆𑀩𑀦𑁆𑀢𑀺 𑀢𑀣𑀸 𑀉𑀧𑁆𑀧𑀸𑀤𑀺𑀢𑀓𑀳𑀸𑀧𑀡𑀜𑁆𑀘 𑀏𑀯𑀁 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀉𑀧𑁆𑀧𑀸𑀤𑀺𑀢𑀜𑁆𑀘𑀸𑀢𑀺 𑀲𑀩𑁆𑀩𑀁.

𑁬𑁬𑁦. 𑀓𑀲𑀣𑀸𑀤𑀺𑀓𑀁 𑀯𑀘𑀦𑀁 𑀅𑀯𑀢𑁆𑀯𑀸 ‘‘𑀏𑀢𑁆𑀢𑀺𑀓𑀸𑀬 𑀪𑀽𑀫𑀺𑀬𑀸 𑀏𑀢𑁆𑀢𑀓𑁄 𑀦𑀸𑀫 𑀪𑀸𑀕𑁄’’𑀢𑀺 𑀪𑀽𑀫𑀺𑀁 𑀬𑁄 𑀘 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀢𑀲𑁆𑀲𑁂𑀯𑁂𑀢𑀫𑀓𑀧𑁆𑀧𑀺𑀬𑀦𑁆𑀢𑀺 𑀯𑀓𑁆𑀔𑀫𑀸𑀦𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀘-𑀲𑀤𑁆𑀤𑁄 ‘‘𑀬𑁄 𑀧𑀦𑀸’’𑀢𑀺 𑀯𑀓𑁆𑀔𑀫𑀸𑀦𑀧𑀼𑀕𑁆𑀕𑀮𑀦𑁆𑀢𑀭𑀸𑀧𑁂𑀓𑁆𑀔𑁄.

𑁬𑁬𑁧-𑁨. 𑀪𑀽𑀫𑀺𑀬𑀸 𑀲𑀬𑀫𑁂𑀯 𑀧𑀫𑀸𑀡𑀲𑁆𑀲 𑀚𑀸𑀦𑀦𑀢𑁆𑀣𑀁 𑀢𑀽𑀢𑀺 𑀬𑁄𑀚𑀦𑀸, ‘‘𑀏𑀢𑁆𑀢𑀓𑁂 𑀪𑀽𑀫𑀺𑀪𑀸𑀕𑁂 𑀅𑀫𑁆𑀳𑁂𑀳𑀺 𑀲𑀲𑁆𑀲𑀁 𑀓𑀢𑀁, 𑀏𑀢𑁆𑀢𑀓𑀁 𑀦𑀸𑀫 𑀪𑀸𑀕𑀁 𑀕𑀡𑁆𑀳𑀣𑀸’’𑀢𑀺 𑀓𑀲𑀓𑁂𑀳𑀺 𑀯𑀼𑀢𑁆𑀢𑁂 𑀢𑁂𑀲𑀁 𑀯𑀘𑀦𑀁 𑀅𑀲𑀤𑁆𑀤𑀳𑀺𑀢𑁆𑀯𑀸 𑀲𑀬𑀫𑁂𑀯 𑀔𑁂𑀢𑁆𑀢𑀪𑀽𑀫𑀺𑀬𑀸 𑀧𑀫𑀸𑀡𑀁 𑀜𑀸𑀢𑀼𑀓𑀸𑀫𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀢𑀼-𑀲𑀤𑁆𑀤𑁄 𑀇𑀫𑀫𑁂𑀯 𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀬𑁄 𑀧𑀦 𑀫𑀺𑀦𑀸𑀢𑀺, 𑀢𑀲𑁆𑀲𑁂𑀯𑁂𑀢𑀫𑀓𑀧𑁆𑀧𑀺𑀬𑀦𑁆𑀢𑀺 𑀯𑀓𑁆𑀔𑀫𑀸𑀦𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀭𑀚𑁆𑀚𑀼𑀬𑀸𑀧𑀺 𑀘 𑀤𑀡𑁆𑀟𑁂𑀦𑀸𑀢𑀺 𑀏𑀢𑁆𑀣 𑀧𑀸𑀤𑁂𑀦𑀸𑀧𑀺 𑀫𑀺𑀦𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. ‘‘𑀭𑀓𑁆𑀔𑀢𑀻’’𑀢𑀺𑀆𑀤𑀺𑀓𑀺𑀭𑀺𑀬𑀸𑀧𑀤𑁂𑀳𑀺𑀧𑀺 𑀏𑀯𑀫𑁂𑀯 𑀬𑁄𑀚𑁂𑀢𑀩𑁆𑀩𑀁.

𑀔𑀮𑁂 𑀞𑀢𑁆𑀯𑀸 𑀭𑀓𑁆𑀔𑀢𑀻𑀢𑀺 𑀥𑀜𑁆𑀜𑀓𑀭𑀡𑁂 𑀞𑀢𑁆𑀯𑀸 𑀅𑀜𑁆𑀜𑁂 𑀕𑀡𑁆𑀳𑀺𑀢𑀼𑀁 𑀅𑀤𑀢𑁆𑀯𑀸 𑀧𑀸𑀮𑁂𑀢𑀺. 𑀓𑀣𑀁 𑀭𑀓𑁆𑀔𑀺𑀢𑀼𑀁 𑀯𑀝𑁆𑀝𑀢𑀺, 𑀓𑀣𑀁 𑀭𑀓𑁆𑀔𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺? 𑀢𑀁 𑀧𑀦 𑀯𑀻𑀳𑀺𑀁 ‘‘𑀇𑀤𑀁 𑀯𑀸 𑀏𑀢𑁆𑀢𑀓𑀁 𑀯𑀸 𑀫𑀸 𑀕𑀡𑁆𑀳, 𑀇𑀤𑀁 𑀕𑀳𑁂𑀢𑀼𑀁 𑀦 𑀮𑀩𑁆𑀪𑀢𑀻’’𑀢𑀺 𑀯𑀸 ‘‘𑀇𑀢𑁄 𑀅𑀧𑀦𑁂𑀳𑀺, 𑀇𑀥 𑀧𑀼𑀜𑁆𑀚𑀁 𑀓𑀭𑁄𑀳𑀻’’𑀢𑀺 𑀯𑀸 𑀏𑀯𑀫𑀸𑀤𑀺𑀦𑀸 𑀧𑀬𑁄𑀕𑁂𑀦 𑀘𑁂 𑀭𑀓𑁆𑀔𑀢𑀺, 𑀢𑀁 𑀅𑀓𑀧𑁆𑀧𑀺𑀬𑀁. 𑀲𑀘𑁂 ‘‘𑀫𑀬𑀺 𑀞𑀺𑀢𑁂 𑀭𑀓𑁆𑀔𑀺𑀢𑀁 𑀳𑁄𑀢𑀻’’𑀢𑀺 𑀭𑀓𑁆𑀔𑀢𑀺, 𑀕𑀡𑁆𑀳𑀦𑁆𑀢𑁂 𑀯𑀸 𑀧𑀲𑁆𑀲𑀺𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀣𑀸’’𑀢𑀺 𑀪𑀡𑀢𑀺, 𑀯𑀝𑁆𑀝𑀢𑀺. 𑀭𑀽𑀧𑀺𑀬𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑁂 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀭𑀓𑁆𑀔𑀦𑁆𑀢𑁂𑀦 𑀯𑀲𑀺𑀢𑀩𑁆𑀩𑀦𑁆𑀢𑀺 𑀳𑀺 𑀯𑀼𑀢𑁆𑀢𑀦𑁆𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁 ‘‘𑀣𑁂𑀦𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁂 𑀲𑀢𑀺 𑀏𑀢𑀁 𑀪𑁄 𑀧𑀯𑀢𑁆𑀢𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀓𑀺𑀁 𑀆𑀭𑁄𑀘𑁂𑀲𑁆𑀲𑀸𑀫𑀻𑀢𑀺 𑀧𑀝𑀺𑀧𑀼𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀻’’𑀢𑀺. 𑀦𑀻𑀳𑀭𑀸𑀧𑁂𑀢𑀻𑀢𑀺 𑀏𑀢𑁆𑀣𑀸𑀧𑀺 𑀲𑀘𑁂 𑀧𑀭𑀺𑀬𑀸𑀬𑁂𑀦 𑀯𑀤𑀢𑀺, 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀲𑁂𑀯𑁂𑀢𑀫𑀓𑀧𑁆𑀧𑀺𑀬𑀦𑁆𑀢𑀺 𑀇𑀤𑀁 𑀔𑁂𑀢𑁆𑀢𑀫𑀺𑀦𑀦𑀸𑀤𑀺𑀁 𑀓𑀭𑁄𑀦𑁆𑀢𑁂𑀦 𑀮𑀤𑁆𑀥𑀩𑁆𑀩𑀢𑁄 𑀅𑀜𑁆𑀜𑀲𑁆𑀲 𑀅𑀪𑀺𑀦𑀯𑀼𑀧𑁆𑀧𑀸𑀤𑀺𑀢𑀲𑁆𑀲 𑀅𑀪𑀸𑀯𑀸 𑀅𑀜𑁆𑀜𑁂𑀲𑀁 𑀯𑀝𑁆𑀝𑀢𑀻𑀢𑀺 𑀤𑁆𑀯𑀻𑀲𑀼 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁.

𑁬𑁬𑁩. ‘‘𑀏𑀢𑁆𑀢𑀓𑁂𑀳𑀺 𑀯𑀻𑀳𑀻𑀳𑀺 𑀇𑀤𑀁 𑀆𑀳𑀭𑀣𑀸’’𑀢𑀺 𑀯𑀼𑀢𑁆𑀢𑀸 𑀲𑀘𑁂 𑀆𑀳𑀭𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣 ‘‘𑀢𑀲𑁆𑀲𑁂𑀯𑁂𑀢𑀫𑀓𑀧𑁆𑀧𑀺𑀬’’𑀦𑁆𑀢𑀺 𑀇𑀤𑀁 𑀥𑀜𑁆𑀜𑀲𑁆𑀲 𑀯𑀺𑀘𑀸𑀭𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀲𑁆𑀲𑁂𑀯 𑀅𑀓𑀧𑁆𑀧𑀺𑀬𑀁. 𑀓𑀲𑁆𑀫𑀸? 𑀥𑀜𑁆𑀜𑀲𑁆𑀲 𑀯𑀺𑀘𑀸𑀭𑀺𑀢𑀢𑁆𑀢𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯).

𑁬𑁬𑁪. 𑀳𑀺𑀭𑀜𑁆𑀜𑁂𑀦𑀸𑀢𑀺 𑀓𑀳𑀸𑀧𑀡𑁂𑀦. ‘‘𑀢𑀫𑀓𑀧𑁆𑀧𑀺𑀬’’𑀦𑁆𑀢𑀺 𑀇𑀤𑀁 𑀓𑀳𑀸𑀧𑀡𑀸𑀦𑀁 𑀯𑀺𑀘𑀸𑀭𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀩𑁆𑀩𑁂𑀲𑀁 𑀅𑀓𑀧𑁆𑀧𑀺𑀬𑀁. 𑀓𑀲𑁆𑀫𑀸? 𑀓𑀳𑀸𑀧𑀡𑀸𑀦𑀁 𑀯𑀺𑀘𑀸𑀭𑀺𑀢𑀢𑁆𑀢𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯).

𑁬𑁬𑁫. 𑀧𑁂𑀲𑀓𑀸𑀭𑀓𑀤𑀸𑀲𑀁 𑀯𑀸𑀢𑀺 𑀧𑁂𑀲𑀓𑀸𑀭𑀓𑀲𑀗𑁆𑀔𑀸𑀢𑀁 𑀤𑀸𑀲𑀁 𑀯𑀸, 𑀧𑁂𑀲𑀓𑀸𑀭𑁄 𑀢𑀦𑁆𑀢𑀯𑀸𑀬𑁄. 𑀆𑀭𑀸𑀫𑀺𑀓𑀸𑀦𑀁 𑀦𑀸𑀫𑁂𑀦 𑀤𑁂𑀦𑁆𑀢𑁂𑀢𑀺 ‘‘𑀆𑀭𑀸𑀫𑀺𑀓𑀁 𑀤𑀫𑁆𑀫𑀺, 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀁 𑀤𑀫𑁆𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑁂𑀦𑁆𑀢𑁂.

𑁬𑁬𑁬. 𑀔𑀻𑀭𑀁 𑀤𑀥𑀺 𑀢𑀓𑁆𑀓𑀁 𑀲𑀧𑁆𑀧𑀺 𑀦𑀯𑀦𑀻𑀢𑀦𑁆𑀢𑀺 𑀧𑀜𑁆𑀘𑀕𑁄𑀭𑀲𑀸.

𑁬𑁬𑁭. 𑀅𑀚𑀺𑀓𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀳𑀺𑀲𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁬𑁬𑁯. 𑀧𑀝𑀺𑀲𑀺𑀤𑁆𑀥𑁂𑀧𑀻𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑁂𑀧𑀺. 𑀫𑀽𑀮𑀁 𑀤𑀢𑁆𑀯𑀸𑀢𑀺 𑀓𑀧𑁆𑀧𑀺𑀬𑀪𑀡𑁆𑀟𑀫𑀽𑀮𑀁 𑀤𑀢𑁆𑀯𑀸. 𑀓𑀼𑀓𑁆𑀓𑀼𑀝𑀸𑀤𑀬𑁄 𑀧𑀦 ‘‘𑀲𑀼𑀔𑁂𑀦 𑀯𑀲𑀦𑁆𑀢𑀽’’𑀢𑀺 𑀅𑀭𑀜𑁆𑀜𑁂𑀬𑁂𑀯 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀼𑀓𑁆𑀓𑀼𑀝𑀲𑀽𑀓𑀭𑁂 ‘𑀲𑀼𑀔𑀁 𑀚𑀻𑀯𑀦𑁆𑀢𑀽’𑀢𑀺 𑀅𑀭𑀜𑁆𑀜𑁂 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯). 𑀲𑀽𑀓𑀭𑀫𑀬𑀽𑀭𑀸𑀤𑀻𑀲𑀼𑀧𑀺 𑀮𑀤𑁆𑀥𑁂𑀲𑀼 𑀢𑁂𑀲𑀁 𑀅𑀦𑀼𑀭𑀽𑀧𑁂𑀬𑁂𑀯 𑀯𑀺𑀲𑀬𑁂 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸.

𑁬𑁭𑁧. ‘‘𑀢𑀺𑀓𑁆𑀔𑀢𑁆𑀢𑀼’’𑀦𑁆𑀢𑀺𑀆𑀤𑀺𑀕𑀸𑀣𑀸𑀬 𑀓𑁄 𑀲𑀫𑁆𑀩𑀦𑁆𑀥𑁄? ‘‘𑀭𑀜𑁆𑀜𑀸 𑀯𑀸 𑀭𑀸𑀚𑀪𑁄𑀕𑁆𑀕𑁂𑀦𑀸’’𑀢𑀺𑀆𑀤𑀺𑀕𑀸𑀣𑀸𑀬 𑀲𑀗𑁆𑀕𑀳𑀺𑀢𑀦𑀬𑁂𑀦 𑀭𑀸𑀚𑀭𑀸𑀚𑀸𑀫𑀘𑁆𑀘𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀅𑀢𑁆𑀢𑀦𑀸 𑀯𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑁂𑀦 𑀘𑀻𑀯𑀭𑀁 𑀘𑁂𑀢𑀸𑀧𑁂𑀢𑁆𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀢𑀁 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀲𑀗𑁆𑀔𑀸𑀢𑀁 𑀘𑀻𑀯𑀭𑀫𑀽𑀮𑀁 𑀤𑀢𑁆𑀯𑀸 𑀧𑀳𑀺𑀢𑀤𑀽𑀢𑁂𑀦 𑀯𑀸 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀇𑀤𑀁 𑀔𑁄 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀆𑀪𑀢𑀁, 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀆𑀬𑀲𑁆𑀫𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦’’𑀦𑁆𑀢𑀺 𑀬𑀤𑀺 𑀯𑀼𑀘𑁆𑀘𑁂𑀬𑁆𑀬, 𑀪𑀺𑀓𑁆𑀔𑀼𑀦𑀸 ‘‘𑀦 𑀔𑁄 𑀫𑀬𑀁 𑀆𑀯𑀼𑀲𑁄 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀧𑀝𑀺𑀕𑁆𑀕𑀡𑁆𑀳𑀸𑀫, 𑀘𑀻𑀯𑀭𑀜𑁆𑀘 𑀔𑁄 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫 𑀓𑀸𑀮𑁂𑀦 𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀘𑁂 𑀢𑁂𑀦 ‘‘𑀅𑀢𑁆𑀣𑀺 𑀧𑀦𑀸𑀬𑀲𑁆𑀫𑀢𑁄 𑀓𑁄𑀘𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄’’𑀢𑀺 𑀯𑀼𑀢𑁆𑀢𑁂 𑀘𑀻𑀯𑀭𑀢𑁆𑀣𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀏𑀲𑁄 𑀔𑁄 𑀆𑀯𑀼𑀲𑁄 𑀪𑀺𑀓𑁆𑀔𑀽𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄’’𑀢𑀺 𑀆𑀭𑀸𑀫𑀺𑀓𑁂 𑀯𑀸 𑀉𑀧𑀸𑀲𑀓𑁂 𑀯𑀸 𑀤𑀲𑁆𑀲𑀺𑀢𑁂 𑀬𑀤𑀺 𑀲𑁄 𑀢𑀲𑁆𑀲 𑀅𑀢𑁆𑀢𑀦𑀸 𑀆𑀳𑀭𑀺𑀢𑁆𑀯𑀸 ‘‘𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑁂𑀦 𑀅𑀢𑁆𑀣𑁂 𑀲𑀢𑀺 𑀇𑀫𑀺𑀦𑀸 𑀘𑀻𑀯𑀭𑀁 𑀘𑁂𑀢𑀸𑀧𑁂𑀢𑁆𑀯𑀸 𑀅𑀘𑁆𑀙𑀸𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀬𑀁 𑀔𑁄 𑀪𑀦𑁆𑀢𑁂 𑀆𑀬𑀲𑁆𑀫𑀸 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀁 𑀦𑀺𑀤𑁆𑀤𑀺𑀲𑀺, 𑀲𑀜𑁆𑀜𑀢𑁆𑀢𑁄 𑀲𑁄 𑀫𑀬𑀸, 𑀉𑀧𑀲𑀗𑁆𑀓𑀫𑀢𑀼 𑀆𑀬𑀲𑁆𑀫𑀸 𑀓𑀸𑀮𑁂𑀦, 𑀘𑀻𑀯𑀭𑁂𑀦 𑀢𑀁 𑀅𑀘𑁆𑀙𑀸𑀤𑁂𑀲𑁆𑀲𑀢𑀻’’𑀢𑀺 𑀬𑀤𑀺 𑀯𑀤𑁂𑀬𑁆𑀬, 𑀢𑁂𑀦 𑀘𑀻𑀯𑀭𑀢𑁆𑀣𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳𑀸𑀢𑀺 𑀅𑀬𑀫𑀺𑀫𑀺𑀲𑁆𑀲𑀸 𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄.