𑀧𑀸𑀘𑀺𑀢𑁆𑀢𑀺𑀬𑀓𑀣𑀸𑀯𑀡𑁆𑀡𑀦𑀸

𑁮𑁮𑁯. 𑀏𑀯𑀁 𑀦𑀸𑀢𑀺𑀯𑀺𑀢𑁆𑀣𑀸𑀭𑀲𑀗𑁆𑀔𑁂𑀧𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀤𑀦𑀦𑁆𑀢𑀭𑀁 𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀓𑀡𑁆𑀟𑀲𑁆𑀲 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂𑀢𑀺 𑀅𑀢𑁆𑀢𑀦𑁄 𑀯𑀘𑀦𑀲𑁆𑀲 𑀫𑀼𑀲𑀸𑀪𑀸𑀯𑀁 𑀜𑀢𑁆𑀯𑀸, 𑀅𑀤𑀺𑀝𑁆𑀞𑀁 ‘‘𑀤𑀺𑀝𑁆𑀞’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀼𑀲𑀸𑀯𑀸𑀤𑁂 𑀲𑀫𑁆𑀧𑀚𑀸𑀦𑀦𑁆𑀢𑀲𑁆𑀲 𑀫𑀼𑀲𑀸𑀪𑀡𑀦𑁂𑀢𑀺𑀧𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀚𑀸𑀦𑀺𑀢𑁆𑀯𑀸 𑀚𑀸𑀦𑀦𑁆𑀢𑀲𑁆𑀲 𑀘 𑀫𑀼𑀲𑀸𑀪𑀡𑀦𑁂’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨). ‘‘𑀫𑀼𑀲𑀸𑀯𑀸𑀤𑁂’’𑀢𑀺 𑀳𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁, 𑀫𑀼𑀲𑀸𑀯𑀸𑀤𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀤𑀯𑀸 𑀪𑀡𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀯𑁂𑀕𑁂𑀦 𑀤𑀺𑀝𑁆𑀞𑀫𑁆𑀧𑀺 ‘‘𑀅𑀤𑀺𑀝𑁆𑀞𑀁 𑀫𑁂’’𑀢𑀺 𑀯𑀤𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀳 ‘‘𑀤𑀯𑀸 𑀪𑀡𑀢𑀺 𑀦𑀸𑀫 𑀲𑀳𑀲𑀸 𑀪𑀡𑀢𑀻’’𑀢𑀺 𑀧𑀤𑀪𑀸𑀚𑀦𑀻𑀅𑀝𑁆𑀞𑀓𑀣𑀸𑀬𑀁 ‘‘𑀲𑀳𑀲𑀸 𑀪𑀡𑀢𑀻𑀢𑀺 𑀅𑀯𑀻𑀫𑀁𑀲𑀺𑀢𑁆𑀯𑀸 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀯𑁂𑀕𑁂𑀦 𑀤𑀺𑀝𑁆𑀞𑀫𑁆𑀧𑀺 ‘𑀅𑀤𑀺𑀝𑁆𑀞𑀁 𑀫𑁂’𑀢𑀺 𑀪𑀡𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁧𑁧). 𑀭𑀯𑀸 𑀪𑀡𑀦𑁆𑀢𑀲𑁆𑀲𑀸𑀢𑀺 ‘‘𑀘𑀻𑀯𑀭’’𑀦𑁆𑀢𑀺 𑀯𑀢𑁆𑀢𑀼𑀓𑀸𑀫𑀲𑁆𑀲 ‘‘𑀘𑀻𑀭’’𑀦𑁆𑀢𑀺 𑀯𑀘𑀦𑀁 𑀯𑀺𑀬 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸 ‘‘𑀅𑀜𑁆𑀜𑀁 𑀪𑀡𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀁 𑀪𑀡𑀦𑁆𑀢𑀲𑁆𑀲. 𑀬𑀣𑀸𑀳 ‘‘𑀭𑀯𑀸 𑀪𑀡𑀢𑀺 𑀦𑀸𑀫 ‘𑀅𑀜𑁆𑀜𑀁 𑀪𑀡𑀺𑀲𑁆𑀲𑀸𑀫𑀻’𑀢𑀺 𑀅𑀜𑁆𑀜𑀁 𑀪𑀡𑀢𑀻’’𑀢𑀺.

𑁮𑁯𑁦. 𑀅𑀜𑁆𑀜𑀢𑁆𑀣𑀸𑀢𑀺 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀸𑀤𑀻𑀲𑀼. 𑀅𑀢𑁆𑀢𑀦𑀸 𑀅𑀮𑀤𑁆𑀥𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 ‘‘𑀮𑀤𑁆𑀥𑀁 𑀫𑀬𑀸’’𑀢𑀺 𑀫𑀼𑀲𑀸 𑀬𑀲𑁆𑀲 𑀪𑀡𑀢𑀺, 𑀢𑁂𑀦 𑀢𑀗𑁆𑀔𑀡𑀫𑁂𑀯 𑀲𑀼𑀢𑁆𑀯𑀸 𑀢𑀤𑀢𑁆𑀣𑁂 𑀜𑀸𑀢𑁂 𑀧𑀸𑀭𑀸𑀚𑀺𑀓𑀲𑁆𑀲, 𑀅𑀜𑁆𑀜𑀸𑀢𑁂 𑀓𑀸𑀮𑀦𑁆𑀢𑀭𑁂𑀦 𑀜𑀸𑀢𑁂 𑀘 𑀧𑀭𑀺𑀬𑀸𑀬𑀯𑀘𑀦𑁂 𑀘 𑀜𑀸𑀢𑁂 𑀣𑀼𑀮𑁆𑀮𑀘𑁆𑀘𑀬𑀲𑁆𑀲, 𑀧𑀭𑀺𑀬𑀸𑀬𑀯𑀘𑀦𑁂 𑀅𑀯𑀺𑀜𑁆𑀜𑀸𑀢𑁂 𑀤𑀼𑀓𑁆𑀓𑀝𑀲𑁆𑀲, 𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑁂 𑀧𑀸𑀭𑀸𑀚𑀺𑀓𑀁 𑀅𑀦𑀸𑀧𑀦𑁆𑀦𑀲𑁆𑀲 ‘‘𑀆𑀧𑀦𑁆𑀦𑁄’’𑀢𑀺 𑀫𑀼𑀲𑀸𑀪𑀡𑀦𑁂 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲, 𑀑𑀫𑀲𑀯𑀸𑀤𑀲𑀺𑀓𑁆𑀔𑀸𑀧𑀤𑁂 𑀤𑀼𑀩𑁆𑀪𑀸𑀲𑀺𑀢𑀲𑁆𑀲 𑀘 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀫𑀼𑀲𑀸𑀯𑀸𑀤𑀲𑁆𑀲 𑀓𑀸𑀭𑀡𑀸 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄’’𑀢𑀺. 𑀇𑀫𑀸𑀬 𑀧𑀸𑀘𑀺𑀢𑁆𑀢𑀺𑀬𑀸 𑀲𑀤𑁆𑀥𑀺𑀁 𑀙 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀳𑁄𑀦𑁆𑀢𑀺.

𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀓𑀣𑀸𑀯𑀡𑁆𑀡𑀦𑀸.

𑁮𑁯𑁧-𑁩. 𑀯𑀼𑀢𑁆𑀢𑁂𑀲𑀼 𑀚𑀸𑀢𑀺𑀆𑀤𑀻𑀲𑀼 𑀤𑀲𑀲𑀼 𑀅𑀓𑁆𑀓𑁄𑀲𑀯𑀢𑁆𑀣𑀽𑀲𑀽𑀢𑀺 𑀬𑁄𑀚𑀦𑀸, 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑁂𑀲𑀼 𑀚𑀸𑀢𑀺𑀦𑀸𑀫𑀕𑁄𑀢𑁆𑀢𑀓𑀫𑁆𑀫𑀲𑀺𑀧𑁆𑀧𑀆𑀩𑀸𑀥𑀮𑀺𑀗𑁆𑀕𑀓𑀺𑀮𑁂𑀲𑀆𑀧𑀢𑁆𑀢𑀺𑀅𑀓𑁆𑀓𑁄𑀲𑀸𑀦𑀁 𑀯𑀲𑁂𑀦 𑀤𑀲𑀲𑀼 𑀅𑀓𑁆𑀓𑁄𑀲𑀯𑀢𑁆𑀣𑀽𑀲𑀽𑀢𑀺 𑀅𑀢𑁆𑀣𑁄. 𑀢𑁂𑀲𑀼 𑀓𑀺𑀮𑁂𑀲𑀁 𑀯𑀺𑀦𑀸 𑀲𑀩𑁆𑀩𑁂𑀢𑁂 𑀳𑀻𑀦𑀼𑀓𑁆𑀓𑀝𑁆𑀞𑀯𑀲𑁂𑀦 𑀤𑁆𑀯𑀺𑀧𑁆𑀧𑀓𑀸𑀭𑀸 𑀳𑁄𑀦𑁆𑀢𑀺. 𑀬𑀣𑀸𑀳 𑀧𑀤𑀪𑀸𑀚𑀦𑁂 ‘‘𑀚𑀸𑀢𑀺 𑀦𑀸𑀫 𑀤𑁆𑀯𑁂 𑀚𑀸𑀢𑀺𑀬𑁄 𑀳𑀻𑀦𑀸 𑀘 𑀚𑀸𑀢𑀺 𑀉𑀓𑁆𑀓𑀝𑁆𑀞𑀸 𑀘 𑀚𑀸𑀢𑀻’’𑀢𑀺𑀆𑀤𑀺.

𑀢𑀢𑁆𑀣 𑀘𑀡𑁆𑀟𑀸𑀮𑀸𑀤𑀺𑀚𑀸𑀢𑀺 𑀳𑀻𑀦𑀸, 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀬𑁄 𑀉𑀓𑁆𑀓𑀝𑁆𑀞𑀸. 𑀦𑀸𑀫𑁂𑀲𑀼 𑀅𑀯𑀓𑀡𑁆𑀡𑀓𑀚𑀯𑀓𑀡𑁆𑀡𑀓𑀸𑀤𑀺𑀦𑀸𑀫𑀸𑀦𑀺 𑀤𑀸𑀲𑀦𑀸𑀫𑀢𑁆𑀢𑀸 𑀳𑀻𑀦𑀸𑀦𑀺, 𑀩𑀼𑀤𑁆𑀥𑀭𑀓𑁆𑀔𑀺𑀢𑀸𑀤𑀺𑀦𑀸𑀫𑀸𑀦𑀺 𑀉𑀓𑁆𑀓𑀝𑁆𑀞𑀸𑀦𑀺. 𑀓𑁄𑀲𑀺𑀬𑀸𑀤𑀺𑀕𑁄𑀢𑁆𑀢𑀁 𑀳𑀻𑀦𑀁, 𑀕𑁄𑀢𑀫𑀸𑀤𑀺𑀕𑁄𑀢𑁆𑀢𑀁 𑀉𑀓𑁆𑀓𑀝𑁆𑀞𑀁. 𑀓𑀫𑁆𑀫𑁂𑀲𑀼 𑀯𑀟𑁆𑀠𑀓𑀺𑀫𑀡𑀺𑀓𑀸𑀭𑀸𑀤𑀺𑀓𑀫𑁆𑀫𑀸𑀦𑀺 𑀳𑀻𑀦𑀸𑀦𑀺, 𑀓𑀲𑀺𑀯𑀸𑀡𑀺𑀚𑁆𑀚𑀸𑀕𑁄𑀭𑀓𑁆𑀔𑀓𑀫𑁆𑀫𑀸𑀦𑀺 𑀉𑀓𑁆𑀓𑀝𑁆𑀞𑀸𑀦𑀺. 𑀲𑀺𑀧𑁆𑀧𑁂𑀲𑀼 𑀦𑀴𑀓𑀸𑀭𑀓𑀼𑀫𑁆𑀪𑀓𑀸𑀭𑀸𑀤𑀺𑀲𑀺𑀧𑁆𑀧𑀁 𑀳𑀻𑀦𑀁, 𑀫𑀼𑀤𑁆𑀤𑀸𑀕𑀡𑀦𑀸𑀤𑀺𑀲𑀺𑀧𑁆𑀧𑀁 𑀉𑀓𑁆𑀓𑀝𑁆𑀞𑀁. 𑀆𑀩𑀸𑀥𑁂𑀲𑀼 𑀲𑀩𑁆𑀩𑁂𑀧𑀺 𑀆𑀩𑀸𑀥𑀸 𑀳𑀻𑀦𑀸, 𑀅𑀧𑀺𑀘 𑀫𑀥𑀼𑀫𑁂𑀳𑁄 𑀧𑀻𑀴𑀸𑀚𑀦𑀓𑀢𑁆𑀢𑀸𑀪𑀸𑀯𑀸 𑀉𑀓𑁆𑀓𑀝𑁆𑀞𑁄. 𑀮𑀺𑀗𑁆𑀕𑁂𑀲𑀼 𑀅𑀢𑀺𑀤𑀻𑀖𑀢𑀸𑀤𑀬𑁄 𑀳𑀻𑀦𑀸, 𑀦𑀸𑀢𑀺𑀤𑀻𑀖𑀢𑀸𑀤𑀬𑁄 𑀉𑀓𑁆𑀓𑀝𑁆𑀞𑀸. 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑀸 𑀳𑀻𑀦𑀸. 𑀲𑀩𑁆𑀩𑀸𑀧𑀢𑁆𑀢𑀺𑀬𑁄𑀧𑀺 𑀳𑀻𑀦𑀸, 𑀅𑀧𑀺𑀘 𑀲𑁄𑀢𑀸𑀧𑀢𑁆𑀢𑀺𑀲𑀫𑀸𑀧𑀢𑁆𑀢𑀺 𑀉𑀓𑁆𑀓𑀝𑁆𑀞𑀸. 𑀅𑀓𑁆𑀓𑁄𑀲𑁂𑀲𑀼 ‘‘𑀑𑀝𑁆𑀞𑁄𑀲𑀺 𑀫𑁂𑀡𑁆𑀟𑁄𑀲𑀺 𑀕𑁄𑀡𑁄𑀲𑀻’’𑀢𑀺𑀆𑀤𑀺𑀓𑁄 𑀳𑀻𑀦𑁄, ‘‘𑀧𑀡𑁆𑀟𑀺𑀢𑁄𑀲𑀺 𑀩𑁆𑀬𑀢𑁆𑀢𑁄𑀲𑀻’’𑀢𑀺𑀆𑀤𑀺𑀓𑁄 𑀉𑀓𑁆𑀓𑀝𑁆𑀞𑁄.

𑀅𑀜𑁆𑀜𑀢𑁆𑀭𑀜𑁆𑀜𑀸𑀧𑀤𑁂𑀲𑁂𑀦𑀸𑀢𑀺 𑀧𑀭𑀺𑀬𑀸𑀬𑀓𑀣𑀦𑁂𑀦 𑀯𑀺𑀦𑀸. 𑀑𑀫𑀲𑀦𑁆𑀢𑀲𑁆𑀲𑀸𑀢𑀺 𑀯𑀘𑀦𑀧𑀢𑁄𑀤𑁂𑀦 𑀑𑀯𑀺𑀚𑁆𑀛𑀦𑁆𑀢𑀲𑁆𑀲. 𑀲𑀫𑁆𑀩𑀼𑀤𑁆𑀥𑁂𑀦 𑀧𑀓𑀸𑀲𑀺𑀢𑀸𑀢𑀺 ‘‘𑀘𑀡𑁆𑀟𑀸𑀮𑁄𑀲𑀺 𑀯𑁂𑀦𑁄𑀲𑀺 𑀦𑁂𑀲𑀸𑀤𑁄𑀲𑀺 𑀭𑀣𑀓𑀸𑀭𑁄𑀲𑀺 𑀧𑀼𑀓𑁆𑀓𑀼𑀲𑁄𑀲𑀻’𑀢𑀺 𑀪𑀡𑀢𑀺, 𑀆𑀧𑀢𑁆𑀢𑀺 𑀯𑀸𑀘𑀸𑀬 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀲𑀸𑀫𑀁 𑀲𑀩𑁆𑀩𑀥𑀫𑁆𑀫𑀸𑀯𑀩𑁄𑀥𑀢𑁄 ‘‘𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀧𑀜𑁆𑀜𑀸𑀢𑁂𑀦 𑀪𑀕𑀯𑀢𑀸 𑀤𑁂𑀲𑀺𑀢𑀸.

𑁮𑁯𑁪. 𑀢𑁂𑀳𑁂𑀯𑀸𑀢𑀺 𑀚𑀸𑀢𑀺𑀆𑀤𑀻𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑁂𑀯. 𑀅𑀜𑁆𑀜𑀸𑀧𑀤𑁂𑀲𑁂𑀦 𑀪𑀽𑀢𑁂𑀦 𑀯𑀸…𑀧𑁂… 𑀆𑀧𑀦𑁆𑀦𑀫𑁂𑀯 𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀅𑀓𑁆𑀓𑁄𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀫𑁆𑀩𑀼𑀤𑁆𑀥𑁂𑀦 𑀧𑀓𑀸𑀲𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀥 𑀪𑀽𑀢𑀸𑀪𑀽𑀢𑀧𑀤𑀸𑀦𑀺 𑀢𑁂𑀳𑀻𑀢𑀺 𑀅𑀧𑁂𑀓𑁆𑀔𑀺𑀢𑁆𑀯𑀸 𑀩𑀳𑀼𑀯𑀘𑀦𑀦𑁆𑀢𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀏𑀢𑁂𑀦 ‘‘𑀲𑀦𑁆𑀢𑀺 𑀇𑀥𑁂𑀓𑀘𑁆𑀘𑁂’’𑀢𑀺𑀆𑀤𑀺𑀤𑀼𑀢𑀺𑀬𑀯𑀸𑀭𑀢𑁆𑀣𑀁 (𑀧𑀸𑀘𑀺. 𑁨𑁬) 𑀤𑀲𑁆𑀲𑁂𑀦𑁆𑀢𑁂𑀦 𑀤𑀼𑀓𑁆𑀓𑀝𑀲𑀸𑀥𑀦𑀢𑁆𑀣𑁂𑀦 𑀢𑀤𑁂𑀓𑀓𑀸𑀭𑀺𑀬𑀁 𑀢𑀢𑀺𑀬𑀁 𑀬𑁂𑀦𑀽𑀦𑀯𑀸𑀭𑀜𑁆𑀘 𑀘𑀢𑀼𑀢𑁆𑀣𑀁 𑀦 𑀫𑀬𑀦𑁆𑀢𑀺𑀆𑀤𑀺𑀯𑀸𑀭𑀜𑁆𑀘 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀦𑁆𑀢𑀺 𑀇𑀥𑁂𑀓𑀘𑁆𑀘𑁂’𑀢𑀺 𑀯𑀸𑀭𑁂 𑀧𑀦 𑀧𑀭𑀺𑀳𑀭𑀺𑀢𑁆𑀯𑀸 𑀯𑀼𑀢𑁆𑀢𑀪𑀸𑀯𑁂𑀦 𑀤𑀼𑀓𑁆𑀓𑀝𑀁. 𑀏𑀲𑁂𑀯 𑀦𑀬𑁄 ‘𑀬𑁂𑀦𑀽𑀦…𑀧𑁂… 𑀦 𑀫𑀬’𑀦𑁆𑀢𑀺 𑀯𑀸𑀭𑁂𑀲𑀼𑀧𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨𑁬).

𑀧𑀸𑀴𑀺𑀫𑀼𑀢𑁆𑀢𑀧𑀤𑁂𑀳𑀺𑀧𑀻𑀢𑀺 𑀏𑀢𑁆𑀣𑀸𑀧𑀺 𑀢𑀣𑁂𑀯 ‘‘𑀪𑀽𑀢𑁂𑀦 𑀯𑀸’’𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀸𑀦𑀺. ‘‘𑀘𑁄𑀭𑁄𑀲𑀺, 𑀕𑀡𑁆𑀞𑀺𑀪𑁂𑀤𑀓𑁄𑀲𑀻’’𑀢𑀺𑀆𑀤𑀺 𑀧𑀸𑀴𑀺𑀫𑀼𑀢𑁆𑀢𑀧𑀤𑀁 𑀦𑀸𑀫. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀘𑀢𑀽𑀲𑀼 𑀯𑀸𑀭𑁂𑀲𑀼, 𑀧𑀸𑀴𑀺𑀫𑀼𑀢𑁆𑀢𑀧𑀤𑁂𑀲𑀼 𑀘. 𑀯𑀼𑀢𑁆𑀢𑀜𑁆𑀳𑀺 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀧𑀦 𑀘𑀢𑀽𑀲𑀼𑀧𑀺 𑀯𑀸𑀭𑁂𑀲𑀼 𑀤𑀼𑀓𑁆𑀓𑀝𑀫𑁂𑀯. ‘𑀘𑁄𑀭𑁄𑀲𑀺, 𑀕𑀡𑁆𑀞𑀺𑀪𑁂𑀤𑀓𑁄𑀲𑀻’𑀢𑀺𑀆𑀤𑀺𑀯𑀘𑀦𑁂𑀳𑀺 𑀧𑀦 𑀉𑀧𑀲𑀫𑁆𑀧𑀦𑁆𑀦𑁂𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀧𑀺 𑀲𑀩𑁆𑀩𑀯𑀸𑀭𑁂𑀲𑀼 𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨𑁬). ‘‘𑀅𑀦𑀼𑀧𑀲𑀫𑁆𑀧𑀦𑁆𑀦’’𑀦𑁆𑀢𑀺 𑀇𑀫𑀺𑀦𑀸 ‘‘𑀇𑀫𑀲𑁆𑀫𑀺𑀜𑁆𑀘 𑀲𑀺𑀓𑁆𑀔𑀸𑀧𑀤𑁂 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀁 𑀪𑀺𑀓𑁆𑀔𑀼𑀦𑀺𑀆𑀤𑀬𑁄 𑀲𑀩𑁆𑀩𑁂 𑀲𑀢𑁆𑀢𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀝𑁆𑀞𑀸𑀦𑁂 𑀞𑀺𑀢𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨𑁬) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀸 𑀲𑀗𑁆𑀕𑀳𑀺𑀢𑀸. 𑀢𑁂𑀦𑁂𑀯𑁂𑀢𑁆𑀣𑀸𑀧𑀺 𑀯𑀓𑁆𑀔𑀢𑀺 ‘‘𑀧𑀯𑀺𑀝𑁆𑀞𑀸𑀦𑀼𑀧𑀲𑀫𑁆𑀧𑀦𑁆𑀦𑀝𑁆𑀞𑀸𑀦𑁂 𑀇𑀥 𑀘 𑀪𑀺𑀓𑁆𑀔𑀼𑀦𑀻’’𑀢𑀺.

𑁮𑁯𑁫. 𑀤𑀯𑀓𑀫𑁆𑀬𑀢𑀸𑀢𑀺 𑀏𑀢𑁆𑀣 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁨, 𑁨𑁩, 𑁪𑁨𑁨; 𑀅. 𑀦𑀺. 𑁬.𑁫𑁮; 𑁯.𑁯; 𑀫𑀳𑀸𑀦𑀺. 𑁨𑁦𑁬; 𑀯𑀺𑀪. 𑁫𑁧𑁮) 𑀯𑀺𑀬 𑀬-𑀓𑀸𑀭𑀮𑁄𑀧𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀯𑀼𑀢𑁆𑀢𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀽𑀲𑀼 𑀘 𑀤𑀼𑀓𑁆𑀓𑀝𑀯𑀢𑁆𑀣𑀽𑀲𑀼 𑀘𑀸𑀢𑀺 𑀲𑀩𑁆𑀩𑀢𑁆𑀣𑁂𑀯. 𑀤𑀼𑀩𑁆𑀪𑀸𑀲𑀺𑀢𑀫𑀼𑀤𑀻𑀭𑀺𑀢𑀦𑁆𑀢𑀺 ‘‘𑀘𑀡𑁆𑀟𑀸𑀮𑁄𑀲𑀺…𑀧𑁂… 𑀧𑀼𑀓𑁆𑀓𑀼𑀲𑁄𑀲𑀻’𑀢𑀺 𑀪𑀡𑀢𑀺, 𑀆𑀧𑀢𑁆𑀢𑀺 𑀯𑀸𑀘𑀸𑀬 𑀯𑀸𑀘𑀸𑀬 𑀤𑀼𑀩𑁆𑀪𑀸𑀲𑀺𑀢𑀲𑁆𑀲𑀸’’𑀢𑀺 (𑀧𑀸𑀘𑀺. 𑁩𑁨) 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀫𑁆𑀫𑀼𑀔𑀸 𑀧𑀦 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀽𑀳𑀺 𑀘 𑀤𑀼𑀓𑁆𑀓𑀝𑀯𑀢𑁆𑀣𑀽𑀳𑀺 𑀘 𑀅𑀓𑁆𑀓𑁄𑀲𑀦𑁂 𑀤𑀼𑀓𑁆𑀓𑀝𑀫𑁂𑀯. 𑀢𑀣𑀸 𑀤𑀯𑀓𑀫𑁆𑀬𑀢𑀸𑀬 𑀧𑀭𑀫𑁆𑀫𑀼𑀔𑀸 𑀯𑀤𑀦𑁆𑀢𑀲𑁆𑀲𑀸𑀧𑀺 𑀤𑀼𑀩𑁆𑀪𑀸𑀲𑀺𑀢𑀫𑁂𑀯𑀸𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺.

𑁮𑁯𑁬-𑁭. 𑀅𑀢𑁆𑀣𑀁 𑀧𑀼𑀭𑀓𑁆𑀔𑀢𑁆𑀯𑀸 𑀯𑀤𑀢𑁄 𑀪𑀺𑀓𑁆𑀔𑀼𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀥𑀫𑁆𑀫𑁄 𑀦𑀸𑀫 ‘‘𑀘𑀡𑁆𑀟𑀸𑀮𑁄𑀲𑀻’’𑀢𑀺𑀆𑀤𑀺𑀧𑀸𑀴𑀺𑀬𑁂𑀯. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀸𑀴𑀺𑀁 𑀯𑀸𑀘𑁂𑀦𑁆𑀢𑁄 𑀥𑀫𑁆𑀫𑀧𑀼𑀭𑁂𑀓𑁆𑀔𑀸𑀭𑁄’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁩𑁫). 𑀅𑀦𑀼𑀲𑀸𑀲𑀦𑀻 𑀦𑀸𑀫 ‘‘𑀇𑀤𑀸𑀦𑀺𑀧𑀺 𑀘𑀡𑁆𑀟𑀸𑀮𑁄𑀲𑀺, 𑀫𑀸 𑀧𑀸𑀧𑀥𑀫𑁆𑀫𑀁 𑀅𑀓𑀸𑀲𑀺, 𑀫𑀸 𑀢𑀫𑁄 𑀢𑀫𑀧𑀭𑀸𑀬𑀦𑁄 𑀅𑀳𑁄𑀲𑀻’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑀅𑀝𑁆𑀞. 𑁩𑁫) 𑀦𑀬𑁂𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀲𑀭𑀽𑀧𑀸𑀬𑁂𑀯 𑀅𑀦𑀼𑀲𑀸𑀲𑀦𑀻𑀧𑀼𑀭𑁂𑀓𑁆𑀔𑀢𑀸𑀬 𑀞𑀢𑁆𑀯𑀸 𑀯𑀤𑀦𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀪𑀸𑀯𑀢𑁄 𑀅𑀦𑁆𑀢𑀭𑀸 𑀓𑁄𑀥𑁂 𑀉𑀧𑁆𑀧𑀦𑁆𑀦𑁂𑀧𑀺 𑀅𑀦𑀸𑀧𑀢𑁆𑀢𑀺.

𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀑𑀫𑀲𑀯𑀸𑀤𑀲𑀺𑀓𑁆𑀔𑀸𑀧𑀤𑁂. 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦𑁂𑀯 𑀆𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀫𑀸𑀦𑀲𑀺𑀓𑀤𑀼𑀓𑁆𑀔𑀯𑁂𑀤𑀦𑀸𑀯 𑀳𑁄𑀢𑀺.

𑀑𑀫𑀲𑀯𑀸𑀤𑀓𑀣𑀸𑀯𑀡𑁆𑀡𑀦𑀸.

𑁮𑁯𑁮. 𑀤𑀼𑀯𑀺𑀥𑀸𑀓𑀸𑀭𑀢𑁄 𑀪𑀺𑀓𑁆𑀔𑀼𑀧𑁂𑀲𑀼𑀜𑁆𑀜𑁂 𑀆𑀧𑀢𑁆𑀢𑀺 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀧𑀺𑀲𑀢𑀻𑀢𑀺 𑀧𑀺𑀲𑀼𑀡𑀸, 𑀯𑀸𑀘𑀸, 𑀲𑀫𑀕𑁆𑀕𑁂 𑀲𑀢𑁆𑀢𑁂 𑀅𑀯𑀬𑀯𑀪𑀽𑀢𑁂 𑀯𑀕𑁆𑀕𑁂 𑀪𑀺𑀦𑁆𑀦𑁂 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀧𑀺𑀲𑀼𑀡𑀸 𑀏𑀯 𑀧𑁂𑀲𑀼𑀜𑁆𑀜𑀁, 𑀢𑀸𑀬 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀲𑀳𑀘𑀭𑀺𑀬𑀦𑀬𑁂𑀦 𑀧𑀺𑀲𑀼𑀡𑁄, 𑀢𑀲𑁆𑀲 𑀓𑀫𑁆𑀫𑀁 𑀧𑁂𑀲𑀼𑀜𑁆𑀜𑀁, 𑀪𑀺𑀓𑁆𑀔𑀽𑀦𑀁 𑀧𑁂𑀲𑀼𑀜𑁆𑀜𑀁 𑀪𑀺𑀓𑁆𑀔𑀼𑀧𑁂𑀲𑀼𑀜𑁆𑀜𑀁, 𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀧𑁂𑀲𑀼𑀜𑁆𑀜𑁂. 𑀧𑀤𑀪𑀸𑀚𑀦𑁂 ‘‘𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 ‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀘𑀡𑁆𑀟𑀸𑀮𑁄…𑀧𑁂… 𑀧𑀼𑀓𑁆𑀓𑀼𑀲𑁄’𑀢𑀺 𑀪𑀡𑀢𑀻’𑀢𑀺 𑀆𑀧𑀢𑁆𑀢𑀺…𑀧𑁂… 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁩𑁯) 𑀯𑀼𑀢𑁆𑀢𑀢𑁆𑀢𑀸 𑀲𑀬𑀁 𑀉𑀧𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀚𑀸𑀢𑀺𑀆𑀤𑀻𑀲𑀼 𑀤𑀲𑀲𑀼 𑀅𑀓𑁆𑀓𑁄𑀲𑀯𑀢𑁆𑀣𑀽𑀲𑀼 𑀅𑀜𑁆𑀜𑀢𑀭𑁂𑀦 𑀅𑀜𑁆𑀜𑀁 𑀉𑀧𑀲𑀫𑁆𑀧𑀦𑁆𑀦𑀁 𑀧𑀭𑀫𑁆𑀫𑀼𑀔𑀸 𑀅𑀓𑁆𑀓𑁄𑀲𑀦𑁆𑀢𑀲𑁆𑀲 𑀲𑀼𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀓𑁆𑀔𑀫𑀸𑀦𑀲𑀭𑀽𑀧𑁂𑀲𑀼 𑀅𑀢𑁆𑀢𑀦𑁄 𑀧𑀺𑀬𑀓𑀸𑀫𑀢𑀸𑀪𑁂𑀤𑀸𑀥𑀺𑀧𑁆𑀧𑀸𑀬𑀲𑀗𑁆𑀔𑀸𑀢𑁂𑀲𑀼 𑀤𑁆𑀯𑀻𑀲𑀼 𑀓𑀸𑀭𑀡𑁂𑀲𑀼 𑀅𑀜𑁆𑀜𑀢𑀭𑀓𑀸𑀭𑀡𑀁 𑀧𑀝𑀺𑀘𑁆𑀘 ‘‘𑀅𑀲𑀼𑀓𑁄 𑀢𑀼𑀬𑁆𑀳𑀁 𑀏𑀯𑀁 𑀯𑀤𑀢𑀻’’𑀢𑀺 𑀧𑁂𑀲𑀼𑀜𑁆𑀜𑀁 𑀳𑀭𑀢𑀺, 𑀢𑀲𑁆𑀲 𑀧𑁂𑀲𑀼𑀜𑁆𑀜𑀓𑀣𑀦𑀦𑀺𑀫𑀺𑀢𑁆𑀢𑀁 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀤𑀼𑀯𑀺𑀥𑀸𑀓𑀸𑀭𑀢𑁄𑀢𑀺 𑀏𑀢𑁆𑀣 𑀆𑀓𑀸𑀭-𑀲𑀤𑁆𑀤𑁄 𑀓𑀸𑀭𑀡𑀧𑀭𑀺𑀬𑀸𑀬𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀤𑁆𑀯𑀻𑀳𑀸𑀓𑀸𑀭𑁂𑀳𑀻𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁩𑁮). 𑀏𑀢𑁆𑀣 𑀓𑀸𑀭𑀡𑀁 𑀦𑀸𑀫 𑀅𑀥𑀺𑀧𑁆𑀧𑀸𑀬𑀯𑀺𑀲𑁂𑀲𑁄. 𑀢𑀁 𑀓𑀸𑀭𑀡𑀁 𑀅𑀥𑀺𑀧𑁆𑀧𑀸𑀬𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀢𑁆𑀢𑀦𑁄’’𑀢𑀺𑀆𑀤𑀺. 𑀅𑀢𑁆𑀢𑀦𑁄 𑀧𑀺𑀬𑀓𑀸𑀫𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀧𑀺𑀬𑀪𑀸𑀯𑀓𑀸𑀫𑀲𑁆𑀲 𑀧𑁂𑀲𑀼𑀜𑁆𑀜𑀁 𑀪𑀡𑀦𑁆𑀢𑀲𑁆𑀲, 𑀅𑀢𑁆𑀢𑀦𑁄 𑀧𑀺𑀬𑀪𑀸𑀯𑀁 𑀓𑀸𑀫𑀬𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄, 𑀢𑀸𑀤𑀺𑀲𑁂𑀦 𑀅𑀥𑀺𑀧𑁆𑀧𑀸𑀬𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀏𑀯𑀁 𑀅𑀳𑀁 𑀏𑀢𑀲𑁆𑀲 𑀧𑀺𑀬𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀧𑀺𑀬𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑀲𑁆𑀲𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁩𑁮). 𑀧𑀭𑀪𑁂𑀤𑀢𑁆𑀣𑀺𑀦𑁄𑀧𑀺 𑀯𑀸𑀢𑀺 𑀅𑀓𑁆𑀓𑁄𑀲𑀓𑀲𑁆𑀲 𑀘 𑀅𑀢𑁆𑀢𑀦𑁄 𑀧𑁂𑀲𑀼𑀜𑁆𑀜𑀯𑀘𑀦𑀁 𑀲𑀼𑀡𑀦𑁆𑀢𑀲𑁆𑀲 𑀘𑀸𑀢𑀺 𑀉𑀪𑀺𑀦𑁆𑀦𑀁 𑀪𑁂𑀤𑀁 𑀇𑀘𑁆𑀙𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄, 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀭𑀲𑁆𑀲 𑀧𑀭𑁂𑀦 𑀪𑁂𑀤𑀁 𑀇𑀘𑁆𑀙𑀦𑁆𑀢𑀲𑁆𑀲𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁩𑁮).

𑁮𑁯𑁯. 𑀧𑀭𑀺𑀬𑀸𑀬𑀦𑀬𑁂𑀦 𑀅𑀓𑁆𑀓𑁄𑀲𑀦𑁆𑀢𑀲𑁆𑀲 𑀯𑀘𑀦𑀲𑁆𑀲…𑀧𑁂… 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸, 𑀧𑀭𑀺𑀬𑀸𑀬𑀅𑀓𑁆𑀓𑁄𑀲𑀯𑀘𑀦𑀁 𑀲𑀼𑀢𑁆𑀯𑀸 𑀧𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀤𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸𑀳 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀲𑀦𑁆𑀢𑀺 𑀇𑀥𑁂𑀓𑀘𑁆𑀘𑁂 𑀘𑀡𑁆𑀟𑀸𑀮𑀸…𑀧𑁂… 𑀪𑀡𑀢𑀺, 𑀦 𑀲𑁄 𑀅𑀜𑁆𑀜𑀁 𑀪𑀡𑀢𑀺, 𑀢𑀁𑀬𑁂𑀯 𑀪𑀡𑀢𑀻𑀢𑀺 𑀆𑀧𑀢𑁆𑀢𑀺 𑀯𑀸𑀘𑀸𑀬 𑀯𑀸𑀘𑀸𑀬 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀆𑀤𑀺 (𑀧𑀸𑀘𑀺. 𑁪𑁧). 𑀧𑀸𑀴𑀺𑀫𑀼𑀢𑁆𑀢𑀦𑀬𑁂𑀦 𑀅𑀓𑁆𑀓𑁄𑀲𑀦𑁆𑀢𑀲𑁆𑀲 𑀯𑀘𑀦𑀲𑁆𑀲…𑀧𑁂… 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀏𑀢𑁆𑀣 ‘‘𑀘𑁄𑀭𑁄𑀲𑀺, 𑀕𑀡𑁆𑀞𑀺𑀪𑁂𑀤𑀓𑁄𑀲𑀻’’𑀢𑀺𑀆𑀤𑀺𑀦𑀸 𑀤𑀲𑁆𑀲𑀺𑀢𑁄 𑀧𑀸𑀴𑀺𑀫𑀼𑀢𑁆𑀢𑀦𑀬𑁄 𑀦𑀸𑀫.

𑁯𑁦𑁦. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀓𑁆𑀓𑁄𑀲𑀁 𑀉𑀧𑀲𑀫𑁆𑀧𑀦𑁆𑀦𑀁 𑀳𑀭𑀢𑁄𑀧𑀺 𑀘 𑀢𑀣𑀸 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀘-𑀲𑀤𑁆𑀤𑁂𑀦 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀓𑁆𑀓𑁄𑀲𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀳𑀭𑀢𑁄𑀧𑀺 𑀘, 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀓𑁆𑀓𑁄𑀲𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀳𑀭𑀢𑁄𑀧𑀺 𑀘 𑀢𑀣𑀸 𑀤𑀼𑀓𑁆𑀓𑀝𑀦𑁆𑀢𑀺 𑀯𑀺𑀓𑀧𑁆𑀧𑀤𑁆𑀯𑀬𑀜𑁆𑀘 𑀲𑀫𑀼𑀘𑁆𑀘𑀺𑀦𑁄𑀢𑀺. ‘‘𑀇𑀥𑀸𑀧𑀺 𑀪𑀺𑀓𑁆𑀔𑀼𑀦𑀺𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀸 𑀦𑀸𑀫𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁩𑁮) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 ‘‘𑀪𑀺𑀓𑁆𑀔𑀼𑀦𑀻’’𑀢𑀺 𑀉𑀧𑀮𑀓𑁆𑀔𑀡𑀁.

𑁯𑁦𑁧. 𑀦 𑀘𑁂𑀯 𑀧𑀺𑀬𑀓𑀸𑀫𑀲𑁆𑀲𑀸𑀢𑀺 𑀧𑀺𑀬𑀪𑀸𑀯𑀁 𑀅𑀓𑀸𑀫𑀬𑀦𑁆𑀢𑀲𑁆𑀲 𑀘. 𑀦 𑀪𑁂𑀤𑀢𑁆𑀣𑀺𑀦𑁄𑀧𑀺 𑀘𑀸𑀢𑀺 𑀪𑁂𑀤𑀁 𑀅𑀦𑀺𑀘𑁆𑀙𑀦𑁆𑀢𑀲𑁆𑀲 𑀘. 𑀧𑀸𑀧𑀸𑀦𑀁 𑀕𑀭𑀳𑀢𑁆𑀣𑀸𑀬𑀸𑀢𑀺 𑀏𑀢𑁆𑀣 ‘‘𑀓𑁂𑀯𑀮’’𑀦𑁆𑀢𑀺 𑀲𑁂𑀲𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀏𑀓𑀁 𑀅𑀓𑁆𑀓𑁄𑀲𑀦𑁆𑀢𑀁, 𑀏𑀓𑀜𑁆𑀘 𑀔𑀫𑀦𑁆𑀢𑀁 𑀤𑀺𑀲𑁆𑀯𑀸 ‘𑀅𑀳𑁄 𑀦𑀺𑀮𑁆𑀮𑀚𑁆𑀚𑁄, 𑀈𑀤𑀺𑀲𑀫𑁆𑀧𑀺 𑀦𑀸𑀫 𑀆𑀬𑀲𑁆𑀫𑀦𑁆𑀢𑀁 𑀧𑀼𑀦 𑀯𑀢𑁆𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀢𑀻’𑀢𑀺 𑀏𑀯𑀁 𑀓𑁂𑀯𑀮𑀁 𑀧𑀸𑀧𑀕𑀭𑀳𑀺𑀢𑀸𑀬 𑀪𑀡𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁩𑁮).

𑀧𑁂𑀲𑀼𑀜𑁆𑀜𑀓𑀣𑀸𑀯𑀡𑁆𑀡𑀦𑀸.

𑁯𑁦𑁩. 𑀅𑀜𑁆𑀜𑁂𑀦𑀸𑀢𑀺 𑀲𑀸𑀫𑀡𑁂𑀭𑀸𑀤𑀺𑀦𑀸. ‘‘𑀬𑀜𑁆𑀘 𑀧𑀤𑀁 𑀬𑀜𑁆𑀘 𑀅𑀦𑀼𑀧𑀤𑀁 𑀬𑀜𑁆𑀘 𑀅𑀦𑁆𑀯𑀓𑁆𑀔𑀭𑀁 𑀬𑀜𑁆𑀘 𑀅𑀦𑀼𑀩𑁆𑀬𑀜𑁆𑀚𑀦𑀁, 𑀲𑀩𑁆𑀩𑀫𑁂𑀢𑀁 𑀧𑀤𑀲𑁄 𑀦𑀸𑀫𑀸’’𑀢𑀺 (𑀧𑀸𑀘𑀺. 𑁪𑁬) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀢𑁆𑀢𑀸 𑀅𑀯𑀬𑀯𑁂 𑀲𑀫𑀼𑀤𑀸𑀬𑁄𑀧𑀘𑀸𑀭𑀯𑀲𑁂𑀦 ‘‘𑀧𑀺𑀝𑀓𑀢𑁆𑀢𑀬’’𑀦𑁆𑀢𑀺 𑀢𑀤𑁂𑀓𑀤𑁂𑀲𑀧𑀤𑀸𑀤𑀺 𑀏𑀯 𑀯𑀼𑀢𑁆𑀢𑁄𑀢𑀺 𑀕𑀳𑁂𑀢𑀩𑁆𑀩𑁄. 𑀏𑀢𑁆𑀣 𑀧𑀤𑀸𑀤𑀺𑀲𑀭𑀽𑀧𑀁 𑀅𑀝𑁆𑀞𑀓𑀣𑀸𑀬 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀧𑀤𑀦𑁆𑀢𑀺 𑀏𑀓𑁄 𑀕𑀸𑀣𑀸𑀧𑀸𑀤𑁄 𑀅𑀥𑀺𑀧𑁆𑀧𑁂𑀢𑁄. 𑀅𑀦𑀼𑀧𑀤𑀦𑁆𑀢𑀺 𑀤𑀼𑀢𑀺𑀬𑁄 𑀧𑀸𑀤𑁄. 𑀅𑀦𑁆𑀯𑀓𑁆𑀔𑀭𑀦𑁆𑀢𑀺 𑀏𑀓𑁂𑀓𑀫𑀓𑁆𑀔𑀭𑀁. 𑀅𑀦𑀼𑀩𑁆𑀬𑀜𑁆𑀚𑀦𑀦𑁆𑀢𑀺 𑀧𑀼𑀭𑀺𑀫𑀩𑁆𑀬𑀜𑁆𑀚𑀦𑁂𑀦 𑀲𑀤𑀺𑀲𑀁 𑀧𑀘𑁆𑀙𑀸𑀩𑁆𑀬𑀜𑁆𑀚𑀦’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁪𑁫). 𑀇𑀤𑀁 𑀕𑀸𑀣𑀸𑀫𑀬𑀤𑁂𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀬𑀁 𑀓𑀺𑀜𑁆𑀘𑀺 𑀯𑀸 𑀏𑀓𑀫𑀓𑁆𑀔𑀭𑀁 𑀅𑀦𑁆𑀯𑀓𑁆𑀔𑀭𑀁, 𑀅𑀓𑁆𑀔𑀭𑀲𑀫𑀽𑀳𑁄 𑀅𑀦𑀼𑀩𑁆𑀬𑀜𑁆𑀚𑀦𑀁, 𑀅𑀓𑁆𑀔𑀭𑀸𑀦𑀼𑀩𑁆𑀬𑀜𑁆𑀚𑀦𑀲𑀫𑀽𑀳𑁄 𑀧𑀤𑀁, 𑀧𑀞𑀫𑀧𑀤𑀁 𑀧𑀤𑀫𑁂𑀯, 𑀤𑀼𑀢𑀺𑀬𑀁 𑀅𑀦𑀼𑀧𑀤𑀦𑁆𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀸𑀓𑀭𑀡𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺𑀧𑀺 (𑀧𑀸𑀘𑀺. 𑀅𑀝𑁆𑀞. 𑁪𑁫) 𑀯𑀼𑀢𑁆𑀢𑀁. 𑀇𑀤𑀁 𑀘𑀼𑀡𑁆𑀡𑀺𑀬𑀤𑁂𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀥𑀫𑁆𑀫𑀦𑁆𑀢𑀺 𑀩𑀼𑀤𑁆𑀥𑀪𑀸𑀲𑀺𑀢𑀸𑀤𑀺𑀧𑀸𑀴𑀺𑀥𑀫𑁆𑀫𑀁. 𑀧𑀝𑀺𑀲𑀫𑁆𑀪𑀺𑀤𑀸𑀬𑀜𑁆𑀳𑀺 𑀥𑀫𑁆𑀫𑀧𑀜𑁆𑀘𑀓𑁂 𑀧𑀸𑀴𑀺𑀧𑀺 𑀥𑀫𑁆𑀫𑁄𑀢𑀺 𑀯𑀼𑀢𑁆𑀢𑀸. 𑀥𑀫𑁆𑀫𑀧𑀜𑁆𑀘𑀓𑀁 𑀦𑀸𑀫 𑀨𑀮𑀦𑀺𑀩𑁆𑀩𑀢𑁆𑀢𑀓𑁄 𑀳𑁂𑀢𑀼, 𑀅𑀭𑀺𑀬𑀫𑀕𑁆𑀕𑁄, 𑀪𑀸𑀲𑀺𑀢𑀁, 𑀓𑀼𑀲𑀮𑀸𑀓𑀼𑀲𑀮𑀁 𑀘𑁂𑀢𑀺 𑀏𑀢𑁂 𑀥𑀫𑁆𑀫𑀲𑀜𑁆𑀜𑀺𑀢𑀸𑀢𑀺 𑀦𑀺𑀤𑁆𑀤𑀺𑀝𑁆𑀞𑀁. 𑀏𑀢𑁆𑀣 𑀳𑀺 𑀪𑀸𑀲𑀺𑀢𑀦𑁆𑀢𑀺 𑀧𑀸𑀴𑀺 𑀯𑀼𑀢𑁆𑀢𑀸. 𑀅𑀝𑁆𑀞𑀓𑀣𑀸𑀦𑀺𑀲𑁆𑀲𑀺𑀢𑁄𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀲𑁄 𑀘 𑀧𑀼𑀩𑁆𑀩𑁂 𑀫𑀕𑀥𑀪𑀸𑀲𑀸𑀬 𑀞𑀺𑀢𑁄 𑀲𑀗𑁆𑀕𑀻𑀢𑀺𑀢𑁆𑀢𑀬𑀸𑀭𑀼𑀴𑁆𑀳𑁄 𑀕𑀳𑁂𑀢𑀩𑁆𑀩𑁄.

‘‘𑀲𑀳 𑀪𑀡𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸’’𑀢𑀺 𑀇𑀫𑀺𑀦𑀸 ‘‘𑀏𑀓𑀢𑁄 𑀧𑀝𑁆𑀞𑀧𑁂𑀢𑁆𑀯𑀸 𑀏𑀓𑀢𑁄 𑀑𑀲𑀸𑀧𑁂𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁪𑁬) 𑀧𑀤𑀪𑀸𑀚𑀦𑀸𑀕𑀢𑀦𑀬𑁂𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀤𑁆𑀥𑀺𑀁 𑀆𑀭𑀪𑀺𑀢𑁆𑀯𑀸 𑀏𑀓𑀢𑁄 𑀉𑀘𑁆𑀘𑀸𑀭𑀡𑀯𑀲𑁂𑀦 𑀧𑀤𑀁 𑀯𑀸 𑀅𑀦𑀼𑀧𑀤𑀁 𑀯𑀸 𑀅𑀦𑁆𑀯𑀓𑁆𑀔𑀭𑀁 𑀯𑀸 𑀅𑀦𑀼𑀩𑁆𑀬𑀜𑁆𑀚𑀦𑀁 𑀯𑀸 𑀯𑀤𑀢𑁄 𑀧𑀤𑀸𑀤𑀺𑀕𑀡𑀦𑀸𑀯𑀲𑁂𑀦 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁯𑁦𑁪. 𑀲𑀗𑁆𑀕𑀻𑀢𑀺𑀁 𑀅𑀦𑀸𑀭𑀼𑀴𑁆𑀳𑁂𑀲𑀼 𑀥𑀫𑁆𑀫𑁂𑀲𑀼 𑀭𑀸𑀚𑁄𑀯𑀸𑀤𑀸𑀤𑀬𑁄 𑀲𑀼𑀢𑁆𑀢𑀦𑁆𑀢𑀸 𑀆𑀧𑀢𑁆𑀢𑀺𑀚𑀦𑀓𑀸𑀬𑁂𑀯𑀸𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀺𑀲𑀼 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀭𑀸𑀚𑁄𑀯𑀸𑀤𑁄 𑀦𑀸𑀫 𑀏𑀓𑁄 𑀲𑀼𑀢𑁆𑀢𑀦𑁆𑀢𑁄. 𑀆𑀤𑀺-𑀲𑀤𑁆𑀤𑁂𑀦 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀤𑀺𑀲𑀼𑀢𑁆𑀢𑀦𑁆𑀢𑀸 𑀕𑀳𑀺𑀢𑀸.

𑁯𑁦𑁫. 𑀪𑀺𑀓𑁆𑀔𑀼𑀲𑁆𑀫𑀺𑀫𑁆𑀧𑀺 𑀪𑀺𑀓𑁆𑀔𑀼𑀦𑀺𑀬𑀸𑀧𑀺 𑀘 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀺𑀦𑁄, 𑀯𑀺𑀫𑀢𑀺𑀲𑁆𑀲 𑀯𑀸 𑀪𑀺𑀓𑁆𑀔𑀼𑀲𑁆𑀲 𑀢𑀣𑀸 𑀧𑀤𑀲𑁄𑀥𑀫𑁆𑀫𑁂 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁯𑁦𑁬-𑁭. 𑀏𑀓𑀢𑁄 𑀉𑀤𑁆𑀤𑀺𑀲𑀸𑀧𑁂𑀢𑀻𑀢𑀺 𑀏𑀓𑀢𑁄 𑀉𑀤𑁆𑀤𑁂𑀲𑀁 𑀕𑀡𑁆𑀳𑀦𑁆𑀢𑁂𑀳𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀲𑀤𑁆𑀥𑀺𑀁 𑀉𑀘𑁆𑀘𑀸𑀭𑀡𑀯𑀲𑁂𑀦 𑀉𑀤𑁆𑀤𑀺𑀲𑀸𑀧𑁂𑀢𑀺. 𑀲𑀚𑁆𑀛𑀸𑀬𑀁 𑀯𑀸 𑀓𑀭𑁄𑀢𑀻𑀢𑀺 𑀢𑀣𑀸 𑀏𑀓𑀢𑁄 𑀲𑀚𑁆𑀛𑀸𑀬𑀢𑀺.

‘‘𑀲𑀘𑁂 𑀏𑀓𑀕𑀸𑀣𑀸𑀬 𑀏𑀓𑁄 𑀧𑀸𑀤𑁄 𑀦 𑀆𑀕𑀘𑁆𑀙𑀢𑀺, 𑀲𑁂𑀲𑀁 𑀆𑀕𑀘𑁆𑀙𑀢𑀺, 𑀅𑀬𑀁 𑀬𑁂𑀪𑀼𑀬𑁆𑀬𑁂𑀦 𑀧𑀕𑀼𑀡𑀕𑀦𑁆𑀣𑁄 𑀦𑀸𑀫. 𑀏𑀲 𑀦𑀬𑁄 𑀲𑀼𑀢𑁆𑀢𑁂𑀧𑀺 𑀯𑁂𑀤𑀺𑀢𑀩𑁆𑀩𑁄𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁪𑁮) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀧𑀕𑀼𑀡𑀕𑀦𑁆𑀣𑀦𑁆𑀢𑀺 𑀏𑀢𑁆𑀣 ‘‘𑀬𑁂𑀪𑀼𑀬𑁆𑀬𑁂𑀦𑀸’’𑀢𑀺 𑀲𑁂𑀲𑁄. 𑀑𑀧𑀸𑀢𑁂𑀢𑀻𑀢𑀺 ‘‘𑀏𑀯𑀁 𑀪𑀡𑀸𑀳𑀻’’𑀢𑀺 𑀏𑀓𑀢𑁄 𑀪𑀡𑀢𑀺. 𑀉𑀤𑁆𑀤𑁂𑀲𑀦𑁆𑀢𑀺 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀢𑁂𑀦𑀸𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦.

𑁯𑁦𑁮. 𑀬𑀲𑁆𑀫𑀸 𑀇𑀤𑀁 𑀧𑀤𑀲𑁄𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀁 𑀯𑀸𑀘𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀯𑀸𑀘𑀸𑀘𑀺𑀢𑁆𑀢𑀤𑁆𑀯𑀬𑀸𑀧𑀺 𑀘 𑀲𑀫𑀼𑀝𑁆𑀞𑀸𑀢𑀺, 𑀢𑀲𑁆𑀫𑀸 𑀇𑀤𑀁 𑀲𑀫𑀼𑀝𑁆𑀞𑀸𑀦𑀁 𑀧𑀤𑀲𑁄𑀥𑀫𑁆𑀫𑀲𑀜𑁆𑀜𑀺𑀢𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑀧𑀤𑀲𑁄𑀥𑀫𑁆𑀫𑀓𑀣𑀸𑀯𑀡𑁆𑀡𑀦𑀸.

𑁯𑁦𑁯-𑁧𑁦. 𑀲𑀩𑁆𑀩𑀘𑁆𑀙𑀦𑁆𑀦𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁂 𑀲𑁂𑀦𑀸𑀲𑀦𑁂 𑀢𑀺𑀲𑁆𑀲𑀦𑁆𑀦𑀁 𑀧𑀦 𑀭𑀢𑁆𑀢𑀻𑀦𑀁 𑀬𑁄 𑀧𑀦 𑀪𑀺𑀓𑁆𑀔𑀼 𑀭𑀢𑁆𑀢𑀺𑀬𑀁 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀁 𑀅𑀜𑁆𑀜𑁂𑀦 𑀲𑀘𑁂 𑀦𑀺𑀧𑀚𑁆𑀚𑁂𑀬𑁆𑀬, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸. ‘‘𑀬𑀁 𑀓𑀺𑀜𑁆𑀘𑀺 𑀧𑀝𑀺𑀘𑁆𑀙𑀸𑀤𑀦𑀲𑀫𑀢𑁆𑀣𑀁 𑀇𑀥 𑀙𑀤𑀦𑀜𑁆𑀘 𑀧𑀭𑀺𑀘𑁆𑀙𑀦𑁆𑀦𑀜𑁆𑀘 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁧) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀙𑀤𑀦𑀸𑀭𑀳𑀁 𑀇𑀝𑁆𑀞𑀓𑀸𑀲𑀺𑀮𑀸𑀲𑀼𑀥𑀸𑀢𑀺𑀡𑀧𑀡𑁆𑀡𑀸𑀤𑀻𑀦𑀁 𑀬𑁂𑀦 𑀓𑁂𑀦𑀘𑀺 𑀲𑀩𑁆𑀩𑀲𑁄 𑀙𑀸𑀤𑀺𑀢𑀁 𑀲𑁂𑀦𑀸𑀲𑀦𑀁 𑀲𑀩𑁆𑀩𑀘𑁆𑀙𑀦𑁆𑀦𑀁. ‘‘𑀪𑀽𑀫𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀙𑀤𑀦𑀁 𑀆𑀳𑀘𑁆𑀘 𑀧𑀸𑀓𑀸𑀭𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀅𑀦𑁆𑀢𑀫𑀲𑁄 𑀯𑀢𑁆𑀣𑁂𑀦𑀧𑀺 𑀧𑀭𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁧) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀬𑁂𑀦 𑀓𑁂𑀦𑀘𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑀺𑀢𑀲𑁂𑀦𑀸𑀲𑀦𑀁 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀁. ‘‘𑀙𑀤𑀦𑀁 𑀅𑀦𑀸𑀳𑀘𑁆𑀘 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀬𑀸𑀬𑁂𑀦 𑀤𑀺𑀬𑀟𑁆𑀠𑀳𑀢𑁆𑀣𑀼𑀩𑁆𑀩𑁂𑀥𑁂𑀦 𑀧𑀸𑀓𑀸𑀭𑀸𑀤𑀺𑀦𑀸 𑀧𑀭𑀺𑀓𑁆𑀔𑀺𑀢𑁆𑀢𑀸𑀧𑀺 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀸𑀬𑁂𑀯𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁧) 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀁 ‘‘𑀤𑀺𑀬𑀟𑁆𑀠𑀸’’𑀢𑀺𑀆𑀤𑀺𑀦𑀸 𑀯𑀓𑁆𑀔𑀢𑀺.

𑀏𑀯𑀁 𑀲𑀩𑁆𑀩𑀘𑁆𑀙𑀦𑁆𑀦𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁂 𑀏𑀓𑀲𑁆𑀫𑀺𑀁 𑀲𑁂𑀦𑀸𑀲𑀦𑁂 𑀬𑁄 𑀪𑀺𑀓𑁆𑀔𑀼 𑀉𑀧𑀲𑀫𑁆𑀧𑀦𑁆𑀦𑀢𑁄 𑀅𑀜𑁆𑀜𑁂𑀦 𑀏𑀓𑁂𑀦 𑀯𑀸 𑀅𑀦𑁂𑀓𑁂𑀳𑀺 𑀯𑀸 𑀢𑀺𑀭𑀢𑁆𑀢𑀁 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑁆𑀯𑀸 𑀘𑀢𑀼𑀢𑁆𑀣𑀭𑀢𑁆𑀢𑀺𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀻𑀲𑀼 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀢𑁄 𑀧𑀝𑁆𑀞𑀸𑀬 𑀲𑀓𑀮𑀭𑀢𑁆𑀢𑀺𑀬𑀁 𑀧𑀞𑀫𑀁 𑀯𑀸 𑀧𑀘𑁆𑀙𑀸 𑀯𑀸 𑀅𑀧𑀼𑀩𑁆𑀩𑀸𑀘𑀭𑀺𑀫𑀁 𑀯𑀸 𑀧𑀺𑀝𑁆𑀞𑀺𑀁 𑀧𑀲𑀸𑀭𑁂𑀢𑁆𑀯𑀸 𑀲𑀘𑁂 𑀏𑀓𑀲𑁂𑀦𑀸𑀲𑀦𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀢𑀲𑁆𑀲 𑀤𑁂𑀯𑀲𑀺𑀓𑀁 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀇𑀤𑀁 𑀯𑀺𑀥𑀸𑀦𑀁 ‘‘𑀅𑀧𑀺𑀘𑁂𑀢𑁆𑀣 𑀏𑀓𑀸𑀯𑀸𑀲𑀸𑀤𑀺𑀓𑀫𑁆𑀧𑀺 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑀅𑀝𑁆𑀞. 𑁫𑁧) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

‘‘𑀬𑁂𑀪𑀼𑀬𑁆𑀬𑁂𑀦 𑀧𑀭𑀺𑀘𑁆𑀙𑀦𑁆𑀦𑁂 𑀙𑀦𑁆𑀦𑁂’’𑀢𑀺 𑀇𑀫𑀺𑀦𑀸𑀧𑀺 𑀏𑀯𑀫𑁂𑀯 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀬𑀲𑁆𑀲𑀸 𑀧𑀦 𑀉𑀧𑀭𑀺 𑀩𑀳𑀼𑀢𑀭𑀁 𑀞𑀸𑀦𑀁 𑀙𑀦𑁆𑀦𑀁, 𑀅𑀧𑁆𑀧𑀁 𑀅𑀘𑁆𑀙𑀦𑁆𑀦𑀁, 𑀲𑀫𑀦𑁆𑀢𑀢𑁄 𑀘 𑀩𑀳𑀼𑀢𑀭𑀁 𑀧𑀭𑀺𑀓𑁆𑀔𑀺𑀢𑁆𑀢𑀁, 𑀅𑀧𑁆𑀧𑀁 𑀅𑀧𑀭𑀺𑀓𑁆𑀔𑀺𑀢𑁆𑀢𑀁, 𑀅𑀬𑀁 𑀬𑁂𑀪𑀼𑀬𑁆𑀬𑁂𑀦𑀙𑀦𑁆𑀦𑀸 𑀬𑁂𑀪𑀼𑀬𑁆𑀬𑁂𑀦𑀧𑀭𑀺𑀘𑁆𑀙𑀦𑁆𑀦𑀸 𑀦𑀸𑀫𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁧) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀬𑁂𑀪𑀼𑀬𑁆𑀬𑁂𑀦 𑀙𑀦𑁆𑀦𑀧𑀭𑀺𑀘𑁆𑀙𑀦𑁆𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀣𑁄 𑀯𑀼𑀢𑁆𑀢𑀦𑀬𑁄𑀬𑁂𑀯. ‘‘𑀬𑁂𑀪𑀼𑀬𑁆𑀬𑁂𑀦 𑀧𑀁𑀲𑀼𑀓𑀸’’𑀢𑀺 𑀏𑀢𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁮𑁬) 𑀢𑀻𑀲𑀼 𑀤𑁆𑀯𑁂 𑀬𑁂𑀪𑀼𑀬𑁆𑀬𑀁 𑀦𑀸𑀫, 𑀇𑀥 𑀧𑀦 𑀧𑀤𑀲𑁄𑀥𑀫𑁆𑀫𑁂 ‘‘𑀬𑁂𑀪𑀼𑀬𑁆𑀬𑁂𑀦 𑀧𑀕𑀼𑀡𑀁 𑀕𑀦𑁆𑀣’’𑀦𑁆𑀢𑀺 𑀏𑀢𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁪𑁮) ‘‘𑀏𑀓𑀕𑀸𑀣𑀸𑀬𑀸’’𑀢𑀺𑀆𑀤𑀺𑀯𑀺𑀯𑀭𑀡𑁂 𑀯𑀺𑀬 𑀘𑀢𑀽𑀲𑀼 𑀢𑀬𑁄𑀧𑀺 𑀪𑀸𑀕𑀸 𑀬𑁂𑀪𑀼𑀬𑁆𑀬𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁯𑁧𑁧. 𑀫𑁂𑀣𑀼𑀦𑀲𑁆𑀲 𑀧𑀳𑁄𑀦𑀓𑀁 𑀬𑀁 𑀧𑀦 𑀯𑀢𑁆𑀣𑀼 𑀧𑀞𑀫𑀧𑀸𑀭𑀸𑀚𑀺𑀓𑀸𑀬 𑀦𑀺𑀤𑁆𑀤𑀺𑀝𑁆𑀞𑀁 𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑁂𑀦𑀧𑀺, 𑀢𑁂𑀦 𑀧𑀞𑀫𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀦𑀸 𑀧𑀼𑀕𑁆𑀕𑀮𑁂𑀦 𑀲𑀳 𑀦𑀺𑀧𑀚𑁆𑀚𑀺𑀢𑁆𑀯𑀸 𑀆𑀧𑀢𑁆𑀢𑀺 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁯𑁧𑁨-𑁩. ‘‘𑀉𑀪𑁄 𑀯𑀸 𑀦𑀺𑀧𑀚𑁆𑀚𑀦𑁆𑀢𑀻’’𑀢𑀺 𑀯𑀺𑀓𑀧𑁆𑀧𑀲𑁆𑀲 𑀧𑀞𑀫𑀕𑀸𑀣𑀸𑀤𑁆𑀯𑀬𑁂𑀦𑁂𑀯 𑀅𑀢𑁆𑀣𑀢𑁄 𑀤𑀲𑁆𑀲𑀺𑀢𑀢𑁆𑀢𑀸 𑀧𑀼𑀩𑁆𑀩𑀸𑀧𑀭𑀺𑀬𑀯𑀲𑁂𑀦𑀧𑀺 𑀲𑀫𑁆𑀪𑀯𑀦𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑁂’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁫𑁨-𑁫𑁪) 𑀦𑀬𑁂𑀦 𑀤𑀲𑁆𑀲𑀺𑀢𑀧𑀓𑁆𑀔𑀤𑁆𑀯𑀬𑀁 𑀦𑀺𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦𑀺𑀧𑀦𑁆𑀦𑁂’’𑀢𑀺𑀆𑀤𑀺. ‘‘𑀉𑀝𑁆𑀞𑀳𑀺𑀢𑁆𑀯𑀸’’𑀢𑀺 𑀇𑀤𑀁 𑀯𑀺𑀘𑁆𑀙𑀸𑀯𑀲𑁂𑀦 𑀕𑀳𑁂𑀢𑀩𑁆𑀩𑀁. 𑀅𑀦𑀼𑀧𑀲𑀫𑁆𑀧𑀦𑁆𑀦𑀕𑀡𑀦𑀸𑀬𑀧𑀺 𑀯𑀸𑀢𑀺 𑀩𑀳𑀽𑀲𑀼 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀲𑀼 𑀢𑁂𑀲𑀁 𑀕𑀡𑀦𑀸𑀬 𑀘. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀲𑀼 𑀩𑀳𑀽𑀲𑀼 𑀢𑁂𑀲𑀁 𑀕𑀡𑀦𑀸𑀬 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑀳𑀽 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀤𑀲𑁆𑀲𑀦𑁂𑀦 𑀉𑀧𑀲𑀫𑁆𑀧𑀦𑁆𑀦𑁂𑀲𑀼 𑀩𑀳𑀽𑀲𑀼 𑀏𑀓𑀲𑁆𑀫𑀺𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀲𑀢𑀺 𑀢𑁂𑀲𑀜𑁆𑀘 𑀢𑀲𑁆𑀲 𑀧𑀬𑁄𑀕𑀕𑀡𑀦𑀸𑀬 𑀆𑀧𑀚𑁆𑀚𑀺𑀢𑀩𑁆𑀩𑀸 𑀩𑀳𑀽 𑀆𑀧𑀢𑁆𑀢𑀺𑀬𑁄 𑀘 𑀉𑀪𑁄𑀲𑀼𑀧𑀺 𑀩𑀳𑀽𑀲𑀼 𑀏𑀓𑁂𑀓𑀲𑁆𑀲𑁂𑀯 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀦𑀼𑀧𑀲𑀫𑁆𑀧𑀦𑁆𑀦𑀕𑀡𑀦𑀸𑀬 𑀩𑀳𑀽 𑀆𑀧𑀢𑁆𑀢𑀺𑀬𑁄 𑀘 𑀳𑁄𑀦𑁆𑀢𑀻𑀢𑀺𑀧𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑁯𑁧𑁪. 𑀏𑀓𑁂𑀦𑁂𑀯 𑀤𑁆𑀯𑀸𑀭𑁂𑀦 𑀯𑀴𑀜𑁆𑀚𑀺𑀢𑀩𑁆𑀩𑀢𑁄 𑀏𑀓𑀽𑀧𑀘𑀸𑀭𑁂 𑀲𑀢𑀕𑀩𑁆𑀪𑁂𑀧𑀺 𑀲𑁂𑀦𑀸𑀲𑀦𑁂 𑀉𑀧𑀲𑀫𑁆𑀧𑀦𑁆𑀦𑁄 𑀏𑀓𑀲𑁆𑀫𑀺𑀁 𑀕𑀩𑁆𑀪𑁂 𑀯𑀲𑀦𑁆𑀢𑁄 𑀅𑀢𑁆𑀢𑀦𑀸 𑀲𑀬𑀦𑀕𑀩𑁆𑀪𑁂 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀯𑀸 𑀅𑀧𑀺𑀤𑀳𑀺𑀢𑁆𑀯𑀸 𑀯𑀸 𑀘𑀢𑀼𑀢𑁆𑀣𑀭𑀢𑁆𑀢𑀺𑀬𑀁 𑀲𑀬𑀢𑀺 𑀘𑁂, 𑀉𑀧𑀭𑀺𑀫𑀢𑀮𑁂, 𑀅𑀯𑀲𑁂𑀲𑀕𑀩𑁆𑀪𑁂𑀲𑀼 𑀘 𑀲𑀬𑀦𑁆𑀢𑁂𑀳𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀆𑀧𑀢𑁆𑀢𑀺𑀦𑀺𑀬𑀫𑁄𑀬𑁂𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀫𑀸𑀳 ‘‘𑀲𑀘𑁂 𑀧𑀺𑀥𑀸𑀬𑀸’’𑀢𑀺𑀆𑀤𑀺. 𑀕𑀩𑁆𑀪𑀤𑁆𑀯𑀸𑀭𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀕𑀩𑁆𑀪’’𑀦𑁆𑀢𑀺 𑀯𑀼𑀢𑁆𑀢𑀁. 𑀘𑀢𑀼𑀢𑁆𑀣𑀤𑀺𑀯𑀲𑁂 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀦𑀺𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀲𑀺𑀬𑀸𑀢𑀺 𑀬𑁄𑀚𑀦𑀸. ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀳𑀸’’𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺. 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀁.

𑁯𑁧𑁫. 𑀤𑀺𑀬𑀟𑁆𑀠𑀳𑀢𑁆𑀣𑀼𑀩𑁆𑀩𑁂𑀥𑁂𑀦𑀸𑀢𑀺 𑀯𑀟𑁆𑀠𑀓𑀺𑀭𑀢𑀦𑁂𑀦 𑀤𑀺𑀬𑀟𑁆𑀠𑀭𑀢𑀦𑀼𑀩𑁆𑀩𑁂𑀥𑁂𑀦. 𑀧𑀸𑀓𑀸𑀭𑁄 𑀦𑀸𑀫 𑀦𑀺𑀝𑁆𑀞𑀺𑀢𑁄. 𑀘𑀬𑀦𑀁 𑀦𑀸𑀫 𑀯𑀺𑀧𑁆𑀧𑀓𑀢𑀧𑀸𑀓𑀸𑀭𑁄𑀢𑀺𑀧𑀺 𑀯𑀤𑀦𑁆𑀢𑀺. 𑀇𑀫𑀺𑀦𑀸 𑀘 𑀆𑀴𑀺𑀦𑁆𑀤𑀲𑁆𑀲 𑀅𑀕𑁆𑀕𑀳𑀡𑀢𑁆𑀣𑀁 ‘‘𑀤𑀲𑀳𑀢𑁆𑀣𑀼𑀩𑁆𑀩𑁂𑀥𑀸𑀧𑀺 𑀚𑀕𑀢𑀺 𑀧𑀭𑀺𑀓𑁆𑀔𑁂𑀧𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁧) 𑀅𑀝𑁆𑀞𑀓𑀣𑀸 𑀧𑀫𑀸𑀡𑀦𑁆𑀢𑀺 𑀯𑀤𑀦𑁆𑀢𑀺. 𑀚𑀕𑀢𑀻𑀢𑀺 𑀆𑀴𑀺𑀦𑁆𑀤𑀁. 𑀆𑀤𑀺-𑀲𑀤𑁆𑀤𑁂𑀦 𑀪𑀺𑀢𑁆𑀢𑀺𑀧𑀡𑁆𑀡𑀸𑀯𑀭𑀡𑀸𑀤𑀺𑀕𑀳𑀡𑀁.

𑁯𑁧𑁬. 𑀤𑀼𑀲𑁆𑀲𑀓𑀼𑀝𑀺𑀬𑀦𑁆𑀢𑀺 𑀯𑀢𑁆𑀣𑀓𑀼𑀝𑀺𑀬𑀁.

𑁯𑁧𑁭. ‘‘𑀲𑀩𑁆𑀩𑀘𑁆𑀙𑀦𑁆𑀦𑀧𑀭𑀺𑀘𑁆𑀙𑀦𑁆𑀦𑀸𑀤𑀺𑀧𑁆𑀧𑀪𑁂𑀤𑀢𑁄 𑀬𑁂𑀪𑀼𑀬𑁆𑀬𑀸𑀤𑀺𑀧𑁆𑀧𑀪𑁂𑀤𑀢𑁄’’𑀢𑀺 𑀆𑀤𑀺-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀧𑀞𑀫𑁂𑀦 𑀆𑀤𑀺-𑀲𑀤𑁆𑀤𑁂𑀦 𑀲𑀩𑁆𑀩𑀘𑁆𑀙𑀦𑁆𑀦𑀬𑁂𑀪𑀼𑀬𑁆𑀬𑀧𑀭𑀺𑀘𑁆𑀙𑀦𑁆𑀦𑀲𑀩𑁆𑀩𑀘𑁆𑀙𑀦𑁆𑀦𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀬𑁂𑀪𑀼𑀬𑁆𑀬𑀘𑁆𑀙𑀦𑁆𑀦- 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀉𑀧𑀟𑁆𑀠𑀘𑁆𑀙𑀦𑁆𑀦𑀲𑀗𑁆𑀔𑀸𑀢𑀸𑀦𑀺 𑀘𑀢𑁆𑀢𑀸𑀭𑀺 𑀲𑁂𑀦𑀸𑀲𑀦𑀸𑀦𑀺 𑀕𑀳𑀺𑀢𑀸𑀦𑀺. 𑀕𑀸𑀣𑀸𑀬 𑀲𑀭𑀽𑀧𑁂𑀦 𑀯𑀼𑀢𑁆𑀢𑀲𑀩𑁆𑀩𑀘𑁆𑀙𑀦𑁆𑀦𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘 𑀲𑁂𑀦𑀸𑀲𑀦𑀸𑀦𑀺 𑀤𑀲𑁆𑀲𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀤𑀼𑀢𑀺𑀬𑁂𑀦 𑀆𑀤𑀺-𑀲𑀤𑁆𑀤𑁂𑀦 𑀬𑁂𑀪𑀼𑀬𑁆𑀬𑀘𑁆𑀙𑀦𑁆𑀦𑀬𑁂𑀪𑀼𑀬𑁆𑀬𑀧𑀭𑀺𑀘𑁆𑀙𑀦𑁆𑀦 𑀬𑁂𑀪𑀼𑀬𑁆𑀬𑀘𑁆𑀙𑀦𑁆𑀦𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦 𑀬𑁂𑀪𑀼𑀬𑁆𑀬𑀧𑀭𑀺𑀘𑁆𑀙𑀦𑁆𑀦𑀉𑀧𑀟𑁆𑀠𑀘𑁆𑀙𑀦𑁆𑀦𑀲𑀗𑁆𑀔𑀸𑀢𑀸𑀦𑀺 𑀢𑀻𑀡𑀺 𑀲𑁂𑀦𑀸𑀲𑀦𑀸𑀦𑀺 𑀕𑀳𑀺𑀢𑀸𑀦𑀺. 𑀇𑀫𑁂 𑀅𑀝𑁆𑀞 𑀯𑀺𑀓𑀧𑁆𑀧𑀸 𑀮𑀩𑁆𑀪𑀦𑁆𑀢𑀺. 𑀓𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀢𑁆𑀢 𑀧𑀸𑀘𑀺𑀢𑁆𑀢𑀺𑀬𑀸𑀦𑀻’’𑀢𑀺? 𑀫𑀳𑀸𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀢𑁆𑀢𑀸. 𑀬𑀣𑀸𑀳 ‘‘𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘𑀲𑀩𑁆𑀩𑀘𑁆𑀙𑀦𑁆𑀦𑁂 𑀬𑁂𑀪𑀼𑀬𑁆𑀬𑁂𑀦𑀧𑀭𑀺𑀘𑁆𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀲𑀩𑁆𑀩𑀘𑁆𑀙𑀦𑁆𑀦𑁂 𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀬𑁂𑀪𑀼𑀬𑁆𑀬𑁂𑀦𑀘𑁆𑀙𑀦𑁆𑀦𑁂 𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁂 𑀬𑁂𑀪𑀼𑀬𑁆𑀬𑁂𑀦𑀘𑁆𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁂 𑀉𑀧𑀟𑁆𑀠𑀘𑁆𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀬𑁂𑀪𑀼𑀬𑁆𑀬𑁂𑀦𑀧𑀭𑀺𑀘𑁆𑀙𑀦𑁆𑀦𑁂 𑀉𑀧𑀟𑁆𑀠𑀘𑁆𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀧𑀸𑀴𑀺𑀬𑀁 𑀯𑀼𑀢𑁆𑀢𑀧𑀸𑀘𑀺𑀢𑁆𑀢𑀺𑀬𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢 𑀧𑀸𑀘𑀺𑀢𑁆𑀢𑀺𑀬𑀸𑀦𑀻’𑀢𑀺 𑀯𑀼𑀢𑁆𑀢’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁩).

𑀓𑀲𑁆𑀫𑀸 𑀧𑀦 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀝𑁆𑀞 𑀧𑀸𑀘𑀺𑀢𑁆𑀢𑀺𑀬𑀸𑀦𑀻’’𑀢𑀺 𑀯𑀢𑁆𑀯𑀸 ‘‘𑀲𑀢𑁆𑀢𑀸’’𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄 𑀓𑀢𑁄𑀢𑀺? 𑀦𑀺𑀲𑁆𑀲𑀦𑁆𑀤𑁂𑀳𑁂 𑀢𑀸𑀯 ‘‘𑀲𑁂𑀬𑁆𑀬𑀸 𑀦𑀸𑀫 𑀲𑀩𑁆𑀩𑀘𑁆𑀙𑀦𑁆𑀦𑀸 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀸, 𑀬𑁂𑀪𑀼𑀬𑁆𑀬𑁂𑀦𑀘𑁆𑀙𑀦𑁆𑀦𑀸 𑀬𑁂𑀪𑀼𑀬𑁆𑀬𑁂𑀦𑀧𑀭𑀺𑀘𑁆𑀙𑀦𑁆𑀦𑀸’𑀢𑀺 (𑀧𑀸𑀘𑀺. 𑁫𑁨) 𑀧𑀸𑀴𑀺𑀬𑀁 𑀆𑀕𑀢𑁂𑀲𑀼 𑀤𑁆𑀯𑀻𑀲𑀼 𑀯𑀺𑀓𑀧𑁆𑀧𑁂𑀲𑀼 𑀏𑀓𑀲𑁆𑀫𑀺𑀁 𑀯𑀼𑀢𑁆𑀢𑀧𑀸𑀘𑀺𑀢𑁆𑀢𑀺𑀬𑀁 𑀕𑀳𑁂𑀢𑁆𑀯𑀸 𑀧𑀸𑀴𑀺𑀬𑀁 𑀯𑀼𑀢𑁆𑀢𑁂𑀦 𑀧𑀸𑀘𑀺𑀢𑁆𑀢𑀺𑀬𑁂𑀦 ‘𑀲𑀢𑁆𑀢𑀸’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀧𑀭𑀺𑀳𑀸𑀭𑁄 𑀤𑀲𑁆𑀲𑀺𑀢𑁄. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀜𑁆𑀘 ‘‘𑀲𑀢𑁆𑀢 𑀧𑀸𑀘𑀺𑀢𑁆𑀢𑀺𑀬𑀸𑀦𑀻’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀧𑀸𑀘𑀺𑀢𑁆𑀢𑀺𑀬𑀤𑁆𑀯𑀬𑀁 𑀲𑀸𑀫𑀜𑁆𑀜𑀢𑁄 𑀏𑀓𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀺𑀲𑀼𑀁 𑀧𑀦 𑀕𑀬𑁆𑀳𑀫𑀸𑀦𑁂 𑀲𑀩𑁆𑀩𑀘𑁆𑀙𑀦𑁆𑀦𑁂 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀬𑁂𑀪𑀼𑀬𑁆𑀬𑁂𑀦𑀘𑁆𑀙𑀦𑁆𑀦𑁂 𑀬𑁂𑀪𑀼𑀬𑁆𑀬𑁂𑀦𑀧𑀭𑀺𑀘𑁆𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀝𑁆𑀞𑁂𑀯 𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀳𑁄𑀦𑁆𑀢𑀻’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁫𑁩) 𑀧𑀭𑀺𑀳𑀸𑀭𑁄 𑀯𑀼𑀢𑁆𑀢𑁄.

𑀲𑀩𑁆𑀩𑀬𑁂𑀪𑀼𑀬𑁆𑀬𑀉𑀧𑀟𑁆𑀠𑀧𑀤𑁂𑀲𑀼 𑀙𑀦𑁆𑀦𑀧𑀭𑀺𑀘𑁆𑀙𑀦𑁆𑀦𑀧𑀤𑁂𑀳𑀺 𑀬𑁄𑀚𑀺𑀢𑁂𑀲𑀼 𑀦𑀯 𑀯𑀺𑀓𑀧𑁆𑀧𑀸 𑀲𑀫𑁆𑀪𑀯𑀦𑁆𑀢𑀺, 𑀢𑁂𑀲𑀼 𑀦𑀯𑀫𑁂 𑀉𑀧𑀟𑁆𑀠𑀘𑁆𑀙𑀦𑁆𑀦𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑀯𑀺𑀓𑀧𑁆𑀧𑁂 𑀤𑀼𑀓𑁆𑀓𑀝𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀧𑀸𑀭𑀺𑀲𑁂𑀲𑀢𑁄 𑀇𑀢𑀭𑁂𑀲𑀼 𑀅𑀝𑁆𑀞𑀲𑀼 𑀅𑀝𑁆𑀞 𑀧𑀸𑀘𑀺𑀢𑁆𑀢𑀺𑀬𑀸𑀦𑁂𑀯 𑀲𑀫𑁆𑀪𑀯𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀧𑁆𑀧𑀓𑀁 𑀊𑀦𑀫𑀥𑀺𑀓𑀁 𑀯𑀸 𑀕𑀼𑀡𑀦𑀽𑀧𑀕𑀁 𑀦 𑀳𑁄𑀢𑀻𑀢𑀺 𑀓𑀢𑁆𑀯𑀸 ‘‘𑀲𑀢𑁆𑀢𑀸‘‘𑀢𑀺 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂.

𑁯𑁧𑁮. ‘‘𑀅𑀟𑁆𑀠𑀘𑁆𑀙𑀦𑁆𑀦𑁂 𑀅𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑁂’’𑀢𑀺 𑀬𑁄𑀚𑀦𑀸. ‘‘𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁂 𑀘𑀽𑀴𑀘𑁆𑀙𑀦𑁆𑀦𑁂’’𑀢𑀺 𑀬𑀣𑀸𑀓𑁆𑀓𑀫𑁂𑀦 𑀬𑁄𑀚𑀦𑀸. 𑀇𑀫𑀺𑀦𑀸 𑀅𑀝𑁆𑀞𑀓𑀣𑀸𑀕𑀢𑁂𑀲𑀼 𑀧𑀜𑁆𑀘𑀲𑀼 𑀯𑀺𑀓𑀧𑁆𑀧𑁂𑀲𑀼 𑀢𑀢𑀺𑀬𑀯𑀺𑀓𑀧𑁆𑀧𑀁 𑀤𑀲𑁆𑀲𑁂𑀢𑁆𑀯𑀸 𑀆𑀤𑀺-𑀲𑀤𑁆𑀤𑁂𑀦 𑀲𑀩𑁆𑀩𑀘𑁆𑀙𑀦𑁆𑀦𑀸𑀤𑀬𑁄 𑀲𑁂𑀲𑀯𑀺𑀓𑀧𑁆𑀧𑀸 𑀕𑀳𑀺𑀢𑀸. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀩𑁆𑀩𑀘𑁆𑀙𑀦𑁆𑀦𑁂 𑀘𑀽𑀴𑀓𑀧𑀭𑀺𑀘𑁆𑀙𑀦𑁆𑀦𑁂 𑀤𑀼𑀓𑁆𑀓𑀝𑀁, 𑀬𑁂𑀪𑀼𑀬𑁆𑀬𑁂𑀦𑀘𑁆𑀙𑀦𑁆𑀦𑁂 𑀘𑀽𑀴𑀓𑀧𑀭𑀺𑀘𑁆𑀙𑀦𑁆𑀦𑁂 𑀤𑀼𑀓𑁆𑀓𑀝𑀁, 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁂 𑀘𑀽𑀴𑀓𑀘𑁆𑀙𑀦𑁆𑀦𑁂 𑀤𑀼𑀓𑁆𑀓𑀝𑀁, 𑀬𑁂𑀪𑀼𑀬𑁆𑀬𑁂𑀦𑀧𑀭𑀺𑀘𑁆𑀙𑀦𑁆𑀦𑁂 𑀘𑀽𑀴𑀓𑀘𑁆𑀙𑀦𑁆𑀦𑁂 𑀤𑀼𑀓𑁆𑀓𑀝𑀁, 𑀧𑀸𑀴𑀺𑀬𑀁 𑀆𑀕𑀢𑀤𑀼𑀓𑁆𑀓𑀝𑁂𑀦 𑀲𑀳 𑀧𑀜𑁆𑀘 𑀤𑀼𑀓𑁆𑀓𑀝𑀸𑀦𑀻𑀳𑀺 𑀯𑀼𑀢𑁆𑀢’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁩). 𑀧𑀸𑀴𑀺𑀬𑀁 𑀆𑀕𑀢𑀤𑀼𑀓𑁆𑀓𑀝𑀁 𑀦𑀸𑀫 𑀇𑀫𑀺𑀲𑁆𑀲𑀸𑀬𑁂𑀯 𑀕𑀸𑀣𑀸𑀬 𑀆𑀤𑀺𑀫𑁆𑀳𑀺𑀬𑁂𑀯 𑀯𑀼𑀢𑁆𑀢𑀤𑀼𑀓𑁆𑀓𑀝𑀁. 𑀬𑀣𑀸𑀳 ‘‘𑀉𑀧𑀟𑁆𑀠𑀘𑁆𑀙𑀦𑁆𑀦𑁂 𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑁂 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀘𑀺. 𑁫𑁩).

𑀘𑀽𑀴𑀘𑁆𑀙𑀦𑁆𑀦𑀸𑀤𑀻𑀦𑀺 𑀘𑁂𑀢𑁆𑀣 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸𑀦𑀺 𑁋 𑀬𑀲𑁆𑀲 𑀘𑀢𑀽𑀲𑀼 𑀪𑀸𑀕𑁂𑀲𑀼 𑀏𑀓𑁄 𑀙𑀦𑁆𑀦𑁄, 𑀲𑁂𑀲𑀸 𑀅𑀘𑁆𑀙𑀦𑁆𑀦𑀸, 𑀇𑀤𑀁 𑀘𑀽𑀴𑀓𑀘𑁆𑀙𑀦𑁆𑀦𑀁. 𑀬𑀲𑁆𑀲 𑀢𑀻𑀲𑀼 𑀪𑀸𑀕𑁂𑀲𑀼 𑀤𑁆𑀯𑁂 𑀙𑀦𑁆𑀦𑀸, 𑀏𑀓𑁄 𑀅𑀘𑁆𑀙𑀦𑁆𑀦𑁄, 𑀇𑀤𑀁 𑀬𑁂𑀪𑀼𑀬𑁆𑀬𑁂𑀦𑀘𑁆𑀙𑀦𑁆𑀦𑀁. 𑀬𑀲𑁆𑀲 𑀤𑁆𑀯𑀻𑀲𑀼 𑀪𑀸𑀕𑁂𑀲𑀼 𑀏𑀓𑁄 𑀙𑀦𑁆𑀦𑁄, 𑀏𑀓𑁄 𑀅𑀘𑁆𑀙𑀦𑁆𑀦𑁄, 𑀇𑀤𑀁 𑀉𑀧𑀟𑁆𑀠𑀘𑁆𑀙𑀦𑁆𑀦𑀁 𑀦𑀸𑀫 𑀲𑁂𑀦𑀸𑀲𑀦𑀁. 𑀘𑀽𑀴𑀧𑀭𑀺𑀘𑁆𑀙𑀦𑁆𑀦𑀸𑀤𑀻𑀦𑀺 𑀇𑀫𑀺𑀦𑀸 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀙𑀦𑁆𑀦𑀸𑀤𑀻𑀳𑀺𑀧𑀻𑀢𑀺 𑀲𑀳𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀧𑀺-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀲𑀩𑁆𑀩𑀘𑀽𑀴𑀧𑀭𑀺𑀘𑁆𑀙𑀦𑁆𑀦𑀙𑀦𑁆𑀦𑀸𑀤𑀻𑀳𑀺 𑀘𑀢𑀽𑀳𑀺𑀧𑀺 𑀲𑀳 𑀅𑀟𑁆𑀠𑀘𑁆𑀙𑀦𑁆𑀦𑀧𑀭𑀺𑀘𑁆𑀙𑀦𑁆𑀦𑁂 𑀧𑀜𑁆𑀘𑀥𑀸 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀦𑁆𑀢𑀺 𑀬𑁄𑀚𑀦𑀸.

𑁯𑁨𑁦. 𑀲𑀩𑁆𑀩𑀘𑁆𑀙𑀦𑁆𑀦𑀸𑀤𑀺𑀓𑁂𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 ‘‘𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁂 𑀲𑀩𑁆𑀩𑀅𑀘𑁆𑀙𑀦𑁆𑀦𑁂 𑀬𑁂𑀪𑀼𑀬𑁆𑀬𑁂𑀦𑀅𑀘𑁆𑀙𑀦𑁆𑀦𑁂 𑀬𑁂𑀪𑀼𑀬𑁆𑀬𑁂𑀦𑀅𑀧𑀭𑀺𑀘𑁆𑀙𑀦𑁆𑀦𑁂’’𑀢𑀺 (𑀧𑀸𑀘𑀺. 𑁫𑁪) 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸 𑀅𑀦𑀸𑀧𑀢𑁆𑀢𑀺𑀯𑀸𑀭𑀲𑁂𑀲𑀸 𑀘 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸 ‘‘𑀉𑀧𑀟𑁆𑀠𑀘𑁆𑀙𑀦𑁆𑀦𑁂 𑀘𑀽𑀴𑀓𑀧𑀭𑀺𑀘𑁆𑀙𑀦𑁆𑀦𑁂, 𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑁂 𑀘𑀽𑀴𑀓𑀘𑁆𑀙𑀦𑁆𑀦𑁂, 𑀘𑀽𑀴𑀓𑀘𑁆𑀙𑀦𑁆𑀦𑁂 𑀘𑀽𑀴𑀓𑀧𑀭𑀺𑀘𑁆𑀙𑀦𑁆𑀦𑁂’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁩) 𑀢𑀬𑁄 𑀅𑀦𑀸𑀧𑀢𑁆𑀢𑀺𑀯𑀸𑀭𑀸 𑀘 𑀕𑀳𑀺𑀢𑀸.

𑁯𑁨𑁧. 𑀦𑀺𑀧𑀦𑁆𑀦𑁂𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁂𑀦 ‘‘𑀪𑀺𑀓𑁆𑀔𑀼 𑀦𑀺𑀧𑀦𑁆𑀦𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦𑀺𑀲𑀻𑀤𑀢𑀺, 𑀉𑀪𑁄 𑀯𑀸 𑀦𑀺𑀲𑀻𑀤𑀦𑁆𑀢𑀻’’𑀢𑀺 (𑀧𑀸𑀘𑀺. 𑁫𑁪) 𑀧𑀸𑀴𑀺𑀬𑀁 𑀯𑀼𑀢𑁆𑀢𑀧𑀓𑀸𑀭𑀦𑁆𑀢𑀭𑁂 𑀲𑀫𑀼𑀘𑁆𑀘𑀺𑀦𑁄𑀢𑀺.

𑀲𑀳𑀲𑁂𑀬𑁆𑀬𑀓𑀣𑀸𑀯𑀡𑁆𑀡𑀦𑀸.

𑁯𑁨𑁨. 𑀅𑀧𑀺-𑀲𑀤𑁆𑀤𑁂𑀦 𑀧𑀕𑁂𑀯 𑀫𑀳𑀢𑁆𑀢𑀭𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀳𑀲𑁂𑀬𑁆𑀬𑀁 𑀧𑀓𑀧𑁆𑀧𑁂𑀬𑁆𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀁 𑀲𑀩𑁆𑀩𑀘𑁆𑀙𑀦𑁆𑀦𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀸𑀤𑀺𑀲𑁂𑀦𑀸𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀢𑁄 𑀧𑀝𑁆𑀞𑀸𑀬 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑁂𑀯 𑀧𑀺𑀝𑁆𑀞𑀺𑀧𑁆𑀧𑀲𑀸𑀭𑀡𑀮𑀓𑁆𑀔𑀡𑀁 𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬.

𑁯𑁨𑁩-𑁪. 𑀤𑁂𑀯𑀺𑀬𑀸𑀢𑀺 𑀤𑁂𑀯𑀺𑀢𑁆𑀣𑀺𑀬𑀸. 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸𑀢𑀺 𑀕𑁄𑀥𑀸𑀤𑀺𑀓𑀸𑀬. ‘‘𑀫𑁂𑀣𑀼𑀦𑀯𑀢𑁆𑀣𑀼𑀪𑀽𑀢𑀸𑀬𑀸’’𑀢𑀺 𑀇𑀫𑀺𑀦𑀸 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀅𑀯𑀢𑁆𑀣𑀼𑀪𑀽𑀢𑀸𑀬 𑀲𑀳𑀲𑁂𑀬𑁆𑀬𑀸𑀬 𑀤𑁄𑀲𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀯𑀢𑁆𑀣𑀽𑀦𑀁 𑀕𑀡𑀦𑀸𑀬𑀸𑀢𑀺 𑀫𑀸𑀢𑀼𑀕𑀸𑀫𑀲𑁆𑀲 𑀕𑀡𑀦𑀸𑀬 𑀘 𑀢𑀸𑀲𑀜𑁆𑀘 𑀅𑀢𑁆𑀢𑀦𑁄 𑀘 𑀧𑀬𑁄𑀕𑀕𑀡𑀦𑀸𑀬 𑀘. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀫𑀸𑀢𑀼𑀕𑀸𑀫𑁂𑀦 𑀢𑀬𑁄 𑀤𑀺𑀯𑀲𑁂 𑀲𑀳𑀲𑁂𑀬𑁆𑀬𑀸𑀬 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀘𑀢𑀼𑀢𑁆𑀣𑀤𑀺𑀯𑀲𑁂 𑀲𑀳𑀲𑁂𑀬𑁆𑀬𑀸𑀬 𑀤𑁆𑀯𑀻𑀳𑀺𑀧𑀺 𑀲𑀺𑀓𑁆𑀔𑀸𑀧𑀤𑁂𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀏𑀢𑁆𑀣 𑀤𑀼𑀓𑁆𑀓𑀝𑀯𑀢𑁆𑀣𑀼𑀪𑀽𑀢𑀸𑀬 𑀇𑀢𑁆𑀣𑀺𑀬𑀸 𑀢𑀢𑁆𑀣𑁂𑀯 𑀲𑀳𑀲𑁂𑀬𑁆𑀬𑀸𑀬 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀺𑀢𑁆𑀯𑀸 𑀘𑀢𑀼𑀢𑁆𑀣𑀤𑀺𑀯𑀲𑁂 𑀭𑀢𑁆𑀢𑀺𑀬𑀁 𑀲𑀳𑀲𑁂𑀬𑁆𑀬𑀸𑀬 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀤𑀼𑀓𑁆𑀓𑀝𑁂𑀦 𑀲𑀳 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂𑀦 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀤𑀼𑀢𑀺𑀬𑀲𑀳𑀲𑁂𑀬𑁆𑀬𑀓𑀣𑀸𑀯𑀡𑁆𑀡𑀦𑀸.

𑁯𑁨𑁬. 𑀙𑀧𑁆𑀧𑀜𑁆𑀘𑀯𑀸𑀘𑀸𑀳𑀺 𑀉𑀤𑁆𑀥𑀁 𑀇𑀢𑁆𑀣𑀺𑀬𑀸 𑀥𑀫𑁆𑀫𑀁 𑀪𑀡𑀦𑁆𑀢𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑁆𑀣𑀺𑀬𑀸𑀢𑀺 ‘‘𑀫𑀸𑀢𑀼𑀕𑀸𑀫𑁄 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀦 𑀬𑀓𑁆𑀔𑀻, 𑀦 𑀧𑁂𑀢𑀻, 𑀦 𑀢𑀺𑀭𑀘𑁆𑀙𑀸𑀦𑀕𑀢𑀸, 𑀯𑀺𑀜𑁆𑀜𑀽 𑀧𑀝𑀺𑀩𑀮𑀸 𑀳𑁄𑀢𑀺 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀚𑀸𑀦𑀺𑀢𑀼’’𑀦𑁆𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸. 𑀪𑀡𑀦𑁆𑀢𑀲𑁆𑀲𑀸𑀢𑀺 𑀯𑀓𑁆𑀔𑀫𑀸𑀦𑀮𑀓𑁆𑀔𑀡𑀁 𑀥𑀫𑁆𑀫𑀁 𑀙𑀳𑀺 𑀧𑀤𑁂𑀳𑀺 𑀉𑀢𑁆𑀢𑀭𑀺 𑀪𑀡𑀦𑁆𑀢𑀲𑁆𑀲. 𑀯𑀺𑀜𑁆𑀜𑀼𑀁 𑀧𑀼𑀭𑀺𑀲𑀯𑀺𑀕𑁆𑀕𑀳𑀁 𑀯𑀺𑀦𑀸𑀢𑀺 ‘‘𑀯𑀺𑀜𑁆𑀜𑀽 𑀦𑀸𑀫 𑀧𑀼𑀭𑀺𑀲𑀯𑀺𑀕𑁆𑀕𑀳𑁄 𑀧𑀝𑀺𑀩𑀮𑁄 𑀳𑁄𑀢𑀺 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀚𑀸𑀦𑀺𑀢𑀼’’𑀦𑁆𑀢𑀺 (𑀧𑀸𑀘𑀺. 𑁬𑁪) 𑀧𑀸𑀴𑀺𑀬𑀁 𑀯𑀼𑀢𑁆𑀢𑀲𑀯𑀦𑀽𑀧𑀘𑀸𑀭𑀕𑀢𑀫𑀦𑀼𑀲𑁆𑀲𑀧𑀼𑀭𑀺𑀲𑀁 𑀯𑀺𑀦𑀸. 𑀥𑀫𑁆𑀫𑀦𑁆𑀢𑀺 𑀯𑀓𑁆𑀔𑀫𑀸𑀦𑀧𑁆𑀧𑀓𑀸𑀭𑀲𑀭𑀽𑀧𑀁 𑀤𑁂𑀲𑀦𑀸𑀥𑀫𑁆𑀫𑀁.

𑁯𑁨𑁭. 𑀕𑀸𑀣𑀸𑀫𑀬𑀸, 𑀘𑀼𑀡𑁆𑀡𑀺𑀬𑀕𑀦𑁆𑀣𑀫𑀬𑀸𑀢𑀺 𑀤𑀼𑀯𑀺𑀥𑀸 𑀤𑁂𑀲𑀦𑀸, 𑀢𑀢𑁆𑀣 𑀕𑀸𑀣𑀸𑀫𑀬𑀤𑁂𑀲𑀦𑀸𑀬 𑀯𑀸𑀘𑀸 𑀦𑀸𑀫 𑀕𑀸𑀣𑀸𑀧𑀸𑀤𑀮𑀓𑁆𑀔𑀡𑀸𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀕𑀸𑀣𑀸𑀧𑀸𑀤𑁄’’𑀢𑀺𑀆𑀤𑀺. 𑀘𑀼𑀡𑁆𑀡𑀺𑀬𑀤𑁂𑀲𑀦𑀸𑀬𑀁 𑀧𑀦 𑀯𑀸𑀘𑀸𑀧𑀭𑀺𑀘𑁆𑀙𑁂𑀤𑁄 𑀯𑀺𑀪𑀢𑁆𑀬𑀦𑁆𑀢𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 𑀕𑀡𑁆𑀞𑀺𑀧𑀤𑁂 ‘‘𑀏𑀓𑁄 𑀕𑀸𑀣𑀸𑀧𑀸𑀤𑁄’𑀢𑀺 𑀇𑀤𑀁 𑀕𑀸𑀣𑀸𑀩𑀦𑁆𑀥𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀜𑁆𑀜𑀢𑁆𑀣 𑀧𑀦 𑀯𑀺𑀪𑀢𑁆𑀢𑀺𑀅𑀦𑁆𑀢𑀧𑀤𑀫𑁂𑀯 𑀕𑀳𑁂𑀢𑀩𑁆𑀩’’𑀦𑁆𑀢𑀺. 𑀧𑀤𑀲𑁄𑀥𑀫𑁆𑀫𑀁 𑀦𑀺𑀤𑁆𑀤𑀺𑀝𑁆𑀞𑀁 𑀥𑀫𑁆𑀫𑀦𑁆𑀢𑀺 𑀧𑀺𑀝𑀓𑀢𑁆𑀢𑀬𑀁. ‘‘𑀅𑀝𑁆𑀞𑀓𑀣’’𑀦𑁆𑀢𑀺 𑀇𑀫𑀺𑀦𑀸 𑀲𑀗𑁆𑀕𑀻𑀢𑀺𑀢𑁆𑀢𑀬𑀸𑀭𑀼𑀴𑁆𑀳𑀁 𑀧𑁄𑀭𑀸𑀡𑀝𑁆𑀞𑀓𑀣𑀁 𑀕𑀳𑁂𑀢𑀩𑁆𑀩𑀁. 𑀢𑁂𑀦𑁂𑀯 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁 ‘‘𑀅𑀝𑁆𑀞𑀓𑀣𑀁 𑀥𑀫𑁆𑀫𑀧𑀤𑀚𑀸𑀢𑀓𑀸𑀤𑀺𑀯𑀢𑁆𑀣𑀼𑀜𑁆𑀘𑀸’’𑀢𑀺. 𑀇𑀫𑀺𑀦𑀸𑀧𑀺 𑀧𑁄𑀭𑀸𑀡𑀓𑀁 𑀲𑀗𑁆𑀕𑀻𑀢𑀺𑀆𑀭𑀼𑀴𑁆𑀳𑀫𑁂𑀯 𑀅𑀝𑁆𑀞𑀓𑀣𑀁 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀝𑁆𑀞𑀓𑀣𑀸𑀤𑀺𑀧𑀸𑀞𑀁 𑀞𑀧𑁂𑀢𑁆𑀯𑀸 𑀤𑀫𑀺𑀴𑀸𑀤𑀺𑀪𑀸𑀲𑀦𑁆𑀢𑀭𑁂𑀦 𑀬𑀣𑀸𑀭𑀼𑀘𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻𑀢𑀺.

𑁯𑁨𑁮. 𑀧𑀤𑀸𑀤𑀻𑀦𑀁 𑀯𑀲𑀸 𑀙𑀦𑁆𑀦𑀁 𑀯𑀸𑀘𑀸𑀦𑀁 𑀉𑀧𑀭𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀤𑁂𑀲𑁂𑀦𑁆𑀢𑀲𑁆𑀲𑀸𑀢𑀺 𑀧𑀤𑀲𑁄𑀥𑀫𑁆𑀫𑁂 𑀯𑀼𑀢𑁆𑀢𑀮𑀓𑁆𑀔𑀡𑀧𑀤𑀸𑀤𑀺𑀲𑀭𑀽𑀧𑀸𑀳𑀺 𑀙𑀳𑀺 𑀯𑀸𑀘𑀸𑀳𑀺 𑀉𑀢𑁆𑀢𑀭𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲. 𑀧𑀤𑀸𑀤𑀺𑀕𑀡𑀦𑀸𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀧𑀤𑀅𑀦𑀼𑀧𑀤𑀅𑀦𑁆𑀯𑀓𑁆𑀔𑀭𑀅𑀦𑀼𑀩𑁆𑀬𑀜𑁆𑀚𑀦𑀕𑀡𑀦𑀸𑀬.

𑁯𑁨𑁯. 𑀧𑀼𑀭𑀺𑀲𑀯𑀺𑀕𑁆𑀕𑀳𑀦𑁆𑀢𑀺 𑀫𑀦𑀼𑀲𑁆𑀲𑀧𑀼𑀭𑀺𑀲𑀯𑁂𑀲𑀁. 𑀏𑀢𑁆𑀣 𑀢𑀺𑀭𑀘𑁆𑀙𑀸𑀦𑀕𑀢𑀸 𑀦𑀸𑀫 𑀯𑁂𑀲𑀦𑀺𑀫𑁆𑀫𑀸𑀦𑀸𑀭𑀳𑀸 𑀇𑀤𑁆𑀥𑀺𑀫𑀦𑁆𑀢𑀸 𑀦𑀸𑀕𑀲𑀼𑀧𑀡𑁆𑀡𑀸.

𑁯𑁩𑁧. 𑀯𑀤𑀢𑁄𑀢𑀺 𑀅𑀥𑀺𑀓𑀁 𑀥𑀫𑁆𑀫𑀁 𑀪𑀸𑀲𑀢𑁄.

𑁯𑁩𑁨. 𑀇𑀢𑁆𑀣𑀺𑀭𑀽𑀧𑀦𑁆𑀢𑀺 𑀫𑀦𑀼𑀲𑁆𑀲𑀺𑀢𑁆𑀣𑀺𑀯𑁂𑀲𑀁. 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸𑀢𑀺 𑀯𑀼𑀢𑁆𑀢𑀲𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸.

𑁯𑁩𑁩. 𑀲𑀬𑀁 𑀉𑀝𑁆𑀞𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀧𑀼𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀸𑀢𑀼𑀕𑀸𑀫𑀲𑁆𑀲 𑀯𑀸 𑀢𑀣𑀸𑀢𑀺 𑀏𑀢𑁆𑀣 ‘‘𑀢𑀣𑀸’’𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀕𑀳𑀺𑀢𑀢𑁆𑀢𑀸 𑀉𑀝𑁆𑀞𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀫𑀸𑀢𑀼𑀕𑀸𑀫𑀲𑁆𑀲 𑀧𑀼𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀉𑀝𑁆𑀞𑀸𑀬𑀸’’𑀢𑀺𑀆𑀤𑀺𑀦𑀸 𑀇𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀦𑀤𑀲𑁆𑀲𑀦𑁂𑀦 𑀦𑀸𑀦𑀸𑀇𑀭𑀺𑀬𑀸𑀧𑀣𑁂𑀧𑀺 𑀅𑀦𑀸𑀧𑀢𑁆𑀢𑀺𑀁 𑀤𑀻𑀧𑁂𑀢𑀺.

𑁯𑁩𑁪. 𑀅𑀜𑁆𑀜𑀺𑀲𑁆𑀲𑀸 𑀧𑀼𑀦 𑀅𑀜𑁆𑀜𑀺𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀆𑀕𑀢𑀸𑀕𑀢𑀸𑀬𑀸’’𑀢𑀺 𑀲𑁂𑀲𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀜𑁆𑀜𑀲𑁆𑀲 𑀫𑀸𑀢𑀼𑀕𑀸𑀫𑀲𑁆𑀲𑀸𑀢𑀺 𑀏𑀓𑀺𑀲𑁆𑀲𑀸 𑀤𑁂𑀲𑁂𑀢𑁆𑀯𑀸 𑀧𑀼𑀦 𑀆𑀕𑀢𑀸𑀕𑀢𑀸𑀬 𑀅𑀜𑁆𑀜𑀺𑀲𑁆𑀲𑀸𑀧𑀺 𑀤𑁂𑀲𑁂𑀢𑀻𑀢𑀺 𑀏𑀯𑀁 𑀏𑀓𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀫𑀸𑀢𑀼𑀕𑀸𑀫𑀲𑀢𑀲𑀳𑀲𑁆𑀲𑀦𑁆𑀦𑀫𑁆𑀧𑀺 𑀤𑁂𑀲𑁂𑀢𑀻𑀢𑀺 𑀅𑀢𑁆𑀣𑁄’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁬𑁬). 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁂𑀦 𑀘-𑀲𑀤𑁆𑀤𑁂𑀦 ‘‘𑀧𑀜𑁆𑀳𑀁 𑀧𑀼𑀝𑁆𑀞𑁄 𑀓𑀣𑁂𑀢𑀻’’𑀢𑀺 (𑀧𑀸𑀘𑀺. 𑁬𑁬) 𑀇𑀤𑀁 𑀲𑀫𑀼𑀘𑁆𑀘𑀺𑀦𑁄𑀢𑀺. ‘‘𑀤𑀻𑀖𑀦𑀺𑀓𑀸𑀬𑁄 𑀓𑀺𑀫𑀢𑁆𑀣𑀺𑀬𑁄 𑀪𑀦𑁆𑀢𑁂’’𑀢𑀺 𑀧𑀜𑁆𑀳𑀁 𑀧𑀼𑀘𑁆𑀙𑀢𑁄 𑀫𑀸𑀢𑀼𑀕𑀸𑀫𑀲𑁆𑀲 𑀲𑀩𑁆𑀩𑀁 𑀤𑀻𑀖𑀦𑀺𑀓𑀸𑀬𑀁 𑀯𑀤𑀢𑁄𑀧𑀺 𑀅𑀦𑀸𑀧𑀢𑁆𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀓𑀣𑁂𑀢𑀻𑀢𑀺 𑀫𑀸𑀢𑀼𑀕𑀸𑀫𑁄 ‘𑀤𑀻𑀖𑀦𑀺𑀓𑀸𑀬𑁄 𑀦𑀸𑀫 𑀪𑀦𑁆𑀢𑁂 𑀓𑀺𑀫𑀢𑁆𑀣𑀁 𑀤𑀻𑀧𑁂𑀢𑀻’𑀢𑀺 𑀧𑀼𑀘𑁆𑀙𑀢𑀺, 𑀏𑀯𑀁 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀪𑀺𑀓𑁆𑀔𑀼 𑀲𑀩𑁆𑀩𑀁 𑀘𑁂𑀧𑀺 𑀤𑀻𑀖𑀦𑀺𑀓𑀸𑀬𑀁 𑀓𑀣𑁂𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁬𑁬). 𑀏𑀢𑁆𑀣 𑀘 𑀲𑀩𑁆𑀩𑀁 𑀘𑁂𑀧𑀺 𑀤𑀻𑀖𑀦𑀺𑀓𑀸𑀬𑀁 𑀓𑀣𑁂𑀢𑀻𑀢𑀺 𑀬𑀸𑀯 𑀦 𑀦𑀺𑀝𑁆𑀞𑀸𑀢𑀺, 𑀢𑀸𑀯 𑀧𑀼𑀦𑀤𑀺𑀯𑀲𑁂𑀧𑀺 𑀓𑀣𑁂𑀢𑀺.

𑁯𑁩𑁫. 𑀥𑀫𑁆𑀫𑀲𑁆𑀲 𑀤𑁂𑀲𑀦𑀸𑀬, 𑀯𑀺𑀜𑁆𑀜𑀼𑀫𑀦𑀼𑀲𑁆𑀲𑀧𑀼𑀭𑀺𑀲𑀲𑁆𑀲 𑀅𑀲𑀦𑁆𑀦𑀺𑀳𑀺𑀢𑀓𑀭𑀡𑁂𑀦 𑀘 𑀆𑀧𑀚𑁆𑀚𑀺𑀢𑀩𑁆𑀩𑀢𑁄 𑀓𑁆𑀭𑀺𑀬𑀸𑀓𑁆𑀭𑀺𑀬𑀁.

𑀥𑀫𑁆𑀫𑀤𑁂𑀲𑀦𑀸𑀓𑀣𑀸𑀯𑀡𑁆𑀡𑀦𑀸.

𑁯𑁩𑁬. 𑀫𑀳𑀕𑁆𑀕𑀢𑀁 𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑀁. 𑀧𑀡𑀻𑀢𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁. 𑀧𑀥𑀸𑀦𑀪𑀸𑀯𑀁 𑀦𑀻𑀢𑀦𑁆𑀢𑀺 𑀧𑀡𑀻𑀢𑀁. 𑀆𑀭𑁄𑀘𑁂𑀦𑁆𑀢𑀲𑁆𑀲𑀸𑀢𑀺 ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁨𑁦𑁧) 𑀦𑀬𑁂𑀦 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑁂 𑀯𑀼𑀢𑁆𑀢𑀦𑀬𑁂𑀦 𑀯𑀤𑀦𑁆𑀢𑀲𑁆𑀲. 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀘 𑀧𑀼𑀝𑁆𑀞𑀓𑀸𑀮𑁂 𑀘 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁 𑀅𑀢𑁆𑀢𑀦𑀸 𑀮𑀤𑁆𑀥𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀆𑀭𑁄𑀘𑁂𑀢𑀩𑁆𑀩𑀢𑁆𑀢𑀸 ‘‘𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀁 𑀪𑀺𑀓𑁆𑀔𑀼’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀅𑀜𑁆𑀜𑀲𑁆𑀲𑀸’’𑀢𑀺 𑀲𑁂𑀲𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀪𑀽𑀢𑀁 𑀆𑀭𑁄𑀘𑁂𑀢𑀻𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂, 𑀳𑀺 𑀅𑀦𑁆𑀢𑀭𑀸 𑀯𑀸 𑀅𑀢𑀺𑀓𑀟𑁆𑀠𑀺𑀬𑀫𑀸𑀦𑁂𑀦 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀪𑀽𑀢𑀁 𑀆𑀭𑁄𑀘𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁭𑁭). 𑀪𑀽𑀢𑁂𑀢𑀺 𑀏𑀢𑁆𑀣 ‘‘𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀆𑀭𑁄𑀘𑀺𑀢𑁂’’𑀢𑀺 𑀯𑀢𑁆𑀢𑀩𑁆𑀩𑀁, 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁, 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀲𑀺𑀤𑁆𑀥𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀆𑀭𑁄𑀘𑀦𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁯𑁩𑁭. 𑀦𑁄 𑀘𑁂 𑀚𑀸𑀦𑀸𑀢𑀺 𑀲𑁄 𑀯𑀼𑀢𑁆𑀢𑀦𑁆𑀢𑀺 𑀬𑀲𑁆𑀲 𑀆𑀭𑁄𑀘𑁂𑀢𑀺, 𑀲𑁄 𑀲𑀘𑁂 𑀲𑀼𑀢𑀓𑁆𑀔𑀡𑁂𑀬𑁂𑀯 𑀯𑀼𑀢𑁆𑀢𑀦𑀬𑁂𑀦𑁂𑀯 ‘‘𑀏𑀲 𑀧𑀞𑀫𑀚𑁆𑀛𑀸𑀦𑀲𑁆𑀲 𑀮𑀸𑀪𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀦𑁄 𑀚𑀸𑀦𑀸𑀢𑀺. 𑀧𑀭𑀺𑀬𑀸𑀬𑀯𑀘𑀦𑁂𑀢𑀺 ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀲𑁄 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻’’𑀢𑀺 𑀏𑀯𑀫𑀸𑀤𑀺𑀧𑀭𑀺𑀬𑀸𑀬𑀯𑀘𑀦𑁂. 𑀬𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀆𑀭𑁄𑀘𑁂𑀢𑀺, 𑀲𑁄 𑀲𑀘𑁂 𑀲𑀼𑀢𑀲𑀫𑀦𑀦𑁆𑀢𑀭𑀁 ‘‘𑀏𑀲 𑀏𑀯𑀁 𑀯𑀤𑀢𑀻’’𑀢𑀺 𑀯𑀼𑀢𑁆𑀢𑀁 𑀦𑁄 𑀚𑀸𑀦𑀸𑀢𑀺, 𑀢𑀸𑀤𑀺𑀲𑀲𑁆𑀲 𑀆𑀭𑁄𑀘𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑁆𑀲 𑀪𑀽𑀢𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑁂 𑀘 𑀪𑀺𑀓𑁆𑀔𑀼𑀦𑁄 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁯𑁩𑁮. 𑀢𑀣𑀸𑀭𑀽𑀧𑁂 𑀓𑀸𑀭𑀡𑁂 𑀲𑀢𑀻𑀢𑀺 𑀧𑀭𑀲𑁆𑀲 𑀓𑀸𑀭𑀡𑀪𑀸𑀯𑀁 𑀜𑀢𑁆𑀯𑀸𑀧𑀺 𑀧𑀝𑀺𑀧𑀢𑁆𑀢𑀺𑀬𑀸 𑀅𑀫𑁄𑀖𑀪𑀸𑀯𑀤𑀲𑁆𑀲𑀦𑀲𑀫𑀼𑀢𑁆𑀢𑁂𑀚𑀦𑀲𑀫𑁆𑀧𑀳𑀁𑀲𑀦𑀸𑀤𑀺𑀓𑀭𑀲𑀗𑁆𑀔𑀸𑀢𑁂 𑀓𑀸𑀭𑀡𑁂 𑀲𑀢𑀺. 𑀲𑀩𑁆𑀩𑀲𑁆𑀲𑀸𑀧𑀻𑀢𑀺 𑀉𑀧𑀲𑀫𑁆𑀧𑀦𑁆𑀦𑀸𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀩𑁆𑀩𑀲𑁆𑀲. 𑀲𑀻𑀮𑀸𑀤𑀺𑀦𑁆𑀢𑀺 𑀲𑀻𑀮𑀲𑀼𑀢𑀧𑀭𑀺𑀬𑀢𑁆𑀢𑀺𑀕𑀼𑀡𑀁. 𑀯𑀤𑀢𑁄𑀢𑀺 𑀏𑀢𑁆𑀣 ‘‘𑀪𑀺𑀓𑁆𑀔𑀼𑀦𑁄’’𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺.

𑁯𑁩𑁯. 𑀢𑀤𑀲𑀫𑁆𑀪𑀯𑀸𑀢𑀺 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀲𑁆𑀲 𑀉𑀫𑁆𑀫𑀸𑀤𑀸𑀤𑀻𑀦𑀁 𑀅𑀲𑀫𑁆𑀪𑀯𑀸. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀸𑀦𑀁 𑀉𑀫𑁆𑀫𑀸𑀤𑀲𑁆𑀲 𑀯𑀸 𑀘𑀺𑀢𑁆𑀢𑀓𑁆𑀔𑁂𑀧𑀲𑁆𑀲 𑀯𑀸 𑀅𑀪𑀸𑀯𑀸𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀫𑁆𑀧𑀺 𑀳𑀺 𑀯𑀺𑀘𑀸𑀭𑀺𑀢’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁭𑁭). 𑀉𑀫𑁆𑀫𑀢𑁆𑀢𑀓𑀧𑀤𑀲𑁆𑀲 𑀅𑀯𑀘𑀦𑁂 𑀓𑀸𑀭𑀡𑀁 𑀯𑀤𑀦𑁆𑀢𑁂𑀦𑁂𑀯 𑀔𑀺𑀢𑁆𑀢𑀘𑀺𑀢𑁆𑀢𑀸𑀤𑀺𑀧𑀤𑀸𑀦𑀁 𑀅𑀯𑀘𑀦𑁂 𑀓𑀸𑀭𑀡𑀜𑁆𑀘 𑀉𑀧𑀮𑀓𑁆𑀔𑀡𑀢𑁄 𑀤𑀲𑁆𑀲𑀺𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀫𑀕𑁆𑀕𑀨𑀮𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑀸𑀦𑀁 𑀅𑀭𑀺𑀬𑀸𑀦𑀫𑁂𑀯 𑀳𑀺 𑀉𑀫𑁆𑀫𑀢𑁆𑀢𑀓𑀸𑀤𑀺𑀪𑀸𑀯𑁄 𑀦𑀢𑁆𑀣𑀺. 𑀛𑀸𑀦𑀮𑀸𑀪𑀺𑀦𑁄 𑀧𑀦 𑀢𑀲𑁆𑀫𑀺𑀁 𑀲𑀢𑀺 𑀛𑀸𑀦𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀅𑀪𑀽𑀢𑀸𑀭𑁄𑀘𑀦𑀧𑀘𑁆𑀘𑀬𑀸 𑀅𑀦𑀸𑀧𑀢𑁆𑀢𑀺 𑀯𑀢𑁆𑀢𑀩𑁆𑀩𑀸, 𑀦 𑀪𑀽𑀢𑀸𑀭𑁄𑀘𑀦𑀧𑀘𑁆𑀘𑀬𑀸.

𑁯𑁪𑁦. 𑀇𑀫𑀺𑀲𑁆𑀲𑀸𑀧𑀢𑁆𑀢𑀺𑀬𑀸 𑀅𑀜𑁆𑀜𑀢𑁆𑀭 𑀛𑀸𑀦𑀫𑀕𑁆𑀕𑀸𑀤𑀺𑀮𑀸𑀪𑀻𑀦𑀁 𑀅𑀜𑁆𑀜𑀲𑁆𑀲 𑀅𑀲𑀫𑁆𑀪𑀯𑀸 ‘‘𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀳𑁂𑀯 𑀤𑁆𑀯𑀺𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀜𑁆𑀘 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀅𑀭𑀺𑀬𑀧𑀼𑀕𑁆𑀕𑀮𑁂𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀡𑁆𑀡𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑀸 𑀧𑀦 𑀛𑀸𑀦𑀮𑀸𑀪𑀻 𑀧𑀼𑀣𑀼𑀚𑁆𑀚𑀦𑀸 𑀦𑀸𑀦𑀸𑀯𑀢𑁆𑀣𑀼𑀫𑁆𑀳𑀺 𑀮𑁄𑀪𑀯𑀲𑁂𑀦 𑀅𑀓𑀼𑀲𑀮𑀘𑀺𑀢𑁆𑀢𑁂𑀦𑀸𑀧𑀺 𑀦 𑀆𑀭𑁄𑀘𑁂𑀦𑁆𑀢𑀻𑀢𑀺 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀢𑀺𑀘𑀺𑀢𑁆𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀣𑀸𑀧𑀺 𑀩𑀳𑀼𑀮𑁂𑀦 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀫𑁂𑀯 𑀲𑀫𑁆𑀪𑀯𑁄𑀢𑀺 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀤𑁆𑀯𑀺𑀯𑁂𑀤𑀦𑀁 𑀲𑀼𑀔𑁄𑀧𑁂𑀓𑁆𑀔𑀸𑀯𑀲𑁂𑀦. 𑀇𑀤𑀜𑁆𑀘 𑀲𑀺𑀓𑁆𑀔𑀸𑀧𑀤𑀁 𑀧𑀡𑁆𑀡𑀢𑁆𑀢𑀺𑀅𑀚𑀸𑀦𑀦𑀯𑀲𑁂𑀦 𑀅𑀘𑀺𑀢𑁆𑀢𑀓𑀲𑀫𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀅𑀭𑀺𑀬𑀸 𑀘𑁂𑀢𑁆𑀣 𑀧𑀡𑁆𑀡𑀢𑁆𑀢𑀺𑀁 𑀚𑀸𑀦𑀦𑁆𑀢𑀸 𑀯𑀻𑀢𑀺𑀓𑁆𑀓𑀫𑀁 𑀦 𑀓𑀭𑁄𑀦𑁆𑀢𑀺, 𑀧𑀼𑀣𑀼𑀚𑁆𑀚𑀦𑀸 𑀧𑀦 𑀧𑀡𑁆𑀡𑀢𑁆𑀢𑀺𑀁 𑀚𑀸𑀦𑀺𑀢𑁆𑀯𑀸𑀧𑀺 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀦𑁆𑀢𑀺. 𑀢𑁂 𑀘 𑀲𑀢𑁆𑀣𑀼𑀦𑁄 𑀆𑀡𑀸𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸𑀬 𑀩𑀮𑀯𑀅𑀓𑀼𑀲𑀮𑀪𑀸𑀯𑀢𑁄 𑀛𑀸𑀦𑀸 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀪𑀽𑀢𑀸𑀭𑁄𑀘𑀦𑀓𑀣𑀸𑀯𑀡𑁆𑀡𑀦𑀸.

𑁯𑁪𑁧. 𑀪𑀺𑀓𑁆𑀔𑀼𑀦𑁄 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀁 𑀞𑀧𑁂𑀢𑁆𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀆𑀭𑁄𑀘𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀦𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀦𑀦𑀼 𑀘 ‘‘𑀤𑀼𑀝𑁆𑀞𑀼𑀮𑁆𑀮𑀸 𑀦𑀸𑀫 𑀆𑀧𑀢𑁆𑀢𑀺 𑀘𑀢𑁆𑀢𑀸𑀭𑀺 𑀘 𑀧𑀸𑀭𑀸𑀚𑀺𑀓𑀸𑀦𑀺 𑀢𑁂𑀭𑀲 𑀘 𑀲𑀗𑁆𑀖𑀸𑀤𑀺𑀲𑁂𑀲𑀸’’𑀢𑀺 (𑀧𑀸𑀘𑀺. 𑁭𑁯) 𑀧𑀤𑀪𑀸𑀚𑀦𑁂 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀸 𑀤𑀲𑁆𑀲𑀺𑀢𑀸, 𑀓𑀲𑁆𑀫𑀸 𑀇𑀥 𑀲𑀗𑁆𑀖𑀸𑀤𑀺𑀲𑁂𑀲𑁄𑀯 𑀕𑀳𑀺𑀢𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀧𑀸𑀭𑀸𑀚𑀺𑀓𑀁 𑀤𑀼𑀝𑁆𑀞𑀼𑀮𑁆𑀮𑀲𑀤𑁆𑀤𑀢𑁆𑀣𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀇𑀥 𑀧𑀦 𑀲𑀗𑁆𑀖𑀸𑀤𑀺𑀲𑁂𑀲𑁄𑀬𑁂𑀯 𑀪𑀕𑀯𑀢𑀸 𑀅𑀥𑀺𑀧𑁆𑀧𑁂𑀢𑁄𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀺𑀘𑀸𑀭𑀺𑀢𑀫𑁂𑀢𑀁. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀧𑀸𑀭𑀸𑀚𑀺𑀓𑀸𑀦𑀺 𑀤𑀼𑀝𑁆𑀞𑀼𑀮𑁆𑀮𑀲𑀤𑁆𑀤𑀢𑁆𑀣𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀦 𑀇𑀥 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁭𑁮). 𑀯𑀓𑁆𑀔𑀢𑀺 𑀘 ‘‘𑀇𑀥 𑀲𑀗𑁆𑀖𑀸𑀤𑀺𑀲𑁂𑀲𑀸𑀯, 𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺𑀬𑁄 𑀫𑀢𑀸’’𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀢𑀺 ‘‘𑀪𑀺𑀓𑁆𑀔𑀼𑀜𑁆𑀘 𑀪𑀺𑀓𑁆𑀔𑀼𑀦𑀺𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄’’𑀢𑀺 (𑀧𑀸𑀘𑀺. 𑁮𑁦) 𑀧𑀤𑀪𑀸𑀚𑀦𑁂 𑀦𑀺𑀤𑁆𑀤𑀺𑀝𑁆𑀞𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀆𑀭𑁄𑀘𑁂𑀦𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀦𑁆𑀢𑀺 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀸 𑀦 𑀓𑀼𑀮𑀧𑀭𑀺𑀬𑀦𑁆𑀢𑀸’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁮𑁦) 𑀧𑀤𑀪𑀸𑀚𑀦𑁂 𑀤𑀲𑁆𑀲𑀺𑀢𑀁 𑀅𑀪𑀺𑀡𑁆𑀳𑀸𑀧𑀢𑁆𑀢𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀬𑀢𑀺𑀁 𑀲𑀁𑀯𑀭𑀢𑁆𑀣𑀁 𑀳𑀺𑀭𑁄𑀢𑁆𑀢𑀧𑁆𑀧𑀚𑀦𑀦𑀢𑁆𑀣𑀁 𑀆𑀧𑀢𑁆𑀢𑀺𑀬𑁄 𑀯𑀸 𑀉𑀧𑀸𑀲𑀓𑀓𑀼𑀮𑀸𑀦𑀺 𑀯𑀸 𑀉𑀪𑀬𑀫𑁂𑀯 𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀅𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀆𑀧𑀢𑁆𑀢𑀺𑀬𑁄 𑀆𑀭𑁄𑀘𑁂𑀢𑀼𑀁 𑀲𑀗𑁆𑀖𑁂𑀦 𑀲𑀗𑁆𑀖𑀫𑀚𑁆𑀛𑁂 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀯𑁂𑀢𑁆𑀯𑀸 𑀓𑀢𑀲𑀫𑁆𑀫𑀼𑀢𑀺𑀁 𑀞𑀧𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀪𑀺𑀡𑁆𑀳𑀸𑀧𑀢𑁆𑀢𑀺𑀓𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 ‘𑀏𑀯𑀫𑁂𑀲 𑀧𑀭𑁂𑀲𑀼 𑀳𑀺𑀭𑁄𑀢𑁆𑀢𑀧𑁆𑀧𑁂𑀦𑀸𑀧𑀺 𑀆𑀬𑀢𑀺𑀁 𑀲𑀁𑀯𑀭𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀳𑀺𑀢𑁂𑀲𑀺𑀢𑀸𑀬 𑀢𑀺𑀓𑁆𑀔𑀢𑁆𑀢𑀼𑀁 𑀅𑀧𑀮𑁄𑀓𑁂𑀢𑁆𑀯𑀸 𑀲𑀗𑁆𑀖𑁂𑀦 𑀓𑀸𑀢𑀩𑁆𑀩𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁦).

𑁯𑁪𑁨. 𑀖𑀝𑁂𑀢𑁆𑀯𑀸 𑀯𑀤𑀦𑁆𑀢𑀲𑁆𑀲𑁂𑀯𑀸𑀢𑀺 𑀏𑀯𑀓𑀸𑀭𑁄 𑀬𑀣𑀸𑀞𑀸𑀦𑁂 𑀬𑁄𑀚𑁂𑀢𑀩𑁆𑀩𑁄. 𑀏𑀯𑀓𑀸𑀭𑁂𑀦 𑀩𑁆𑀬𑀯𑀘𑁆𑀙𑀺𑀦𑁆𑀦𑀫𑀢𑁆𑀣𑀁 𑀯𑀓𑁆𑀔𑀢𑀺 ‘‘𑀯𑀢𑁆𑀣𑀼’’𑀦𑁆𑀢𑀺𑀆𑀤𑀺𑀦𑀸. ‘‘𑀅𑀲𑀼𑀘𑀺𑀁 𑀫𑁄𑀘𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀯𑀢𑁆𑀣𑀼𑀫𑀸𑀳, ‘‘𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺 𑀇𑀫𑀺𑀦𑀸 𑀆𑀧𑀢𑁆𑀢𑀺𑀁. 𑀯𑀚𑁆𑀚𑀫𑁂𑀯 𑀯𑀚𑁆𑀚𑀢𑀸. ‘‘𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀻’’𑀢𑀺 𑀇𑀫𑀲𑁆𑀲𑀸𑀬𑀁 𑀧𑀭𑀺𑀬𑀸𑀬𑁄. ‘‘𑀅𑀬𑀁 𑀅𑀲𑀼𑀘𑀺𑀁 𑀫𑁄𑀘𑁂𑀢𑁆𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀦𑁆𑀦𑁄’’𑀢𑀺 𑀯𑀢𑁆𑀣𑀼𑀦𑀸 𑀲𑀤𑁆𑀥𑀺𑀁 𑀖𑀝𑁂𑀢𑁆𑀯𑀸 𑀆𑀧𑀢𑁆𑀢𑀺𑀁 𑀯𑀤𑀦𑁆𑀢𑀲𑁆𑀲 𑀯𑀚𑁆𑀚𑀢𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁯𑁪𑁩. 𑀲𑀼𑀤𑁆𑀥𑀲𑁆𑀲𑀸𑀢𑀺 𑀧𑀸𑀭𑀸𑀚𑀺𑀓𑀫𑀦𑀸𑀧𑀦𑁆𑀦𑀲𑁆𑀲. 𑀯𑀤𑀦𑁆𑀢𑀺 𑀯𑀤𑀦𑀳𑁂𑀢𑀼, 𑀯𑀢𑁆𑀣𑀼𑀦𑀸 𑀲𑀤𑁆𑀥𑀺𑀁 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲 𑀓𑀣𑀦𑀢𑁄𑀢𑀺 𑀅𑀢𑁆𑀣𑁄.

𑁯𑁪𑁪. 𑀅𑀤𑀼𑀝𑁆𑀞𑀼𑀮𑁆𑀮𑀸𑀬𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀢𑁄 𑀅𑀜𑁆𑀜𑀸𑀬 𑀆𑀧𑀢𑁆𑀢𑀺𑀬𑀸. 𑀤𑀼𑀝𑁆𑀞𑀼𑀮𑁆𑀮𑀲𑀜𑁆𑀜𑀺𑀦𑁄𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑀜𑁆𑀜𑀺𑀦𑁄. 𑀲𑁂𑀲𑀸 𑀆𑀧𑀢𑁆𑀢𑀺𑀬𑁄𑀧𑀺 𑀯𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀁 𑀯𑀺𑀦𑀸 𑀲𑁂𑀲𑁂 𑀙𑀴𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂.

𑁯𑁪𑁫. 𑀢𑀣𑀸𑀢𑀺 𑀤𑀼𑀓𑁆𑀓𑀝𑀁 𑀅𑀢𑀺𑀤𑀺𑀲𑀢𑀺. 𑀧𑀜𑁆𑀘𑀥𑀸 𑀫𑀢𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀼𑀝𑁆𑀞𑀼𑀮𑁆𑀮𑀁 𑀅𑀚𑁆𑀛𑀸𑀘𑀸𑀭𑀁 𑀆𑀭𑁄𑀘𑁂𑀦𑁆𑀢𑀲𑁆𑀲 𑀢𑀣𑀸 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑀜𑁆𑀘𑀥𑀸 𑀫𑀢𑀁 𑀤𑀼𑀝𑁆𑀞𑀼𑀮𑁆𑀮𑀁 𑀅𑀚𑁆𑀛𑀸𑀘𑀸𑀭𑀦𑁆𑀢𑀺 𑀘 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑀸 𑀕𑀳𑀺𑀢𑀸. 𑀓𑁂𑀘𑀺 𑀧𑀦 ‘‘𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀆𑀤𑀬𑁄 𑀧𑀜𑁆𑀘𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀳𑀺 𑀤𑀲𑁂𑀯 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀸𑀫𑀡𑁂𑀭𑀸𑀦𑀁 𑀧𑀜𑁆𑀜𑀢𑁆𑀢𑀸𑀦𑀺. 𑀢𑁂𑀲𑀁 𑀧𑀜𑁆𑀜𑀢𑁆𑀢𑁂𑀲𑀼𑀬𑁂𑀯 𑀘 𑀲𑀺𑀓𑁆𑀔𑀸𑀧𑀤𑁂𑀲𑀼 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀯𑀺𑀘𑀸𑀭𑀡𑀸 𑀓𑀸𑀢𑀩𑁆𑀩𑀸, 𑀦 𑀘 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀆𑀤𑀻𑀦𑀺 𑀯𑀺𑀲𑀼𑀁 𑀢𑁂𑀲𑀁 𑀧𑀜𑁆𑀜𑀢𑁆𑀢𑀸𑀦𑀺 𑀅𑀢𑁆𑀣𑀻𑀢𑀺.

𑀅𑀣 𑀪𑀺𑀓𑁆𑀔𑀼𑀦𑁄 𑀤𑀼𑀝𑁆𑀞𑀼𑀮𑁆𑀮𑀲𑀗𑁆𑀔𑀸𑀢𑀸𑀦𑀺 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀆𑀤𑀻𑀦𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀓𑀺𑀁 𑀦𑀸𑀫 𑀳𑁄𑀦𑁆𑀢𑀻𑀢𑀺? 𑀅𑀚𑁆𑀛𑀸𑀘𑀸𑀭𑁄 𑀦𑀸𑀫 𑀳𑁄𑀦𑁆𑀢𑀻𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺…𑀧𑁂… 𑀅𑀚𑁆𑀛𑀸𑀘𑀸𑀭𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁨). 𑀇𑀫𑀺𑀦𑀸𑀧𑀺 𑀘𑁂𑀢𑀁 𑀲𑀺𑀤𑁆𑀥𑀁 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀆𑀤𑀺 𑀤𑀼𑀝𑁆𑀞𑀼𑀮𑁆𑀮𑀁 𑀦𑀸𑀫 𑀦 𑀳𑁄𑀢𑀻’’𑀢𑀺. ‘‘𑀅𑀚𑁆𑀛𑀸𑀘𑀸𑀭𑁄 𑀦𑀸𑀫𑀸’’𑀢𑀺 𑀳𑀺 𑀯𑀤𑀦𑁆𑀢𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀆𑀤𑀺 𑀓𑁂𑀯𑀮𑀁 𑀅𑀚𑁆𑀛𑀸𑀘𑀸𑀭𑁄 𑀦𑀸𑀫 𑀳𑁄𑀢𑀺, 𑀦 𑀧𑀦 𑀤𑀼𑀝𑁆𑀞𑀼𑀮𑁆𑀮𑁄 𑀦𑀸𑀫 𑀅𑀚𑁆𑀛𑀸𑀘𑀸𑀭𑁄𑀢𑀺 𑀤𑀻𑀧𑁂𑀢𑀺. ‘‘𑀅𑀚𑁆𑀛𑀸𑀘𑀸𑀭𑁄 𑀦𑀸𑀫𑀸’’𑀢𑀺 𑀘 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸, 𑀅𑀓𑀢𑁆𑀢𑀩𑁆𑀩𑀭𑀽𑀧𑀢𑁆𑀢𑀸 𑀘 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀆𑀤𑀻𑀦𑀺 𑀤𑀡𑁆𑀟𑀓𑀫𑁆𑀫𑀯𑀢𑁆𑀣𑀼𑀧𑀓𑁆𑀔𑀁 𑀪𑀚𑀦𑁆𑀢𑀺. 𑀢𑀸𑀦𑀺 𑀘 𑀅𑀜𑁆𑀜𑀲𑁆𑀲 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀯𑀡𑁆𑀡𑀓𑀸𑀫𑀢𑀸𑀬 𑀆𑀭𑁄𑀘𑁂𑀦𑁆𑀢𑁄 𑀪𑀺𑀓𑁆𑀔𑀼 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀻𑀢𑀺 𑀯𑀤𑀦𑁆𑀢𑀺. 𑀇𑀥 𑀧𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑀕𑁆𑀕𑀳𑀡𑁂𑀦 𑀲𑀸𑀫𑀡𑁂𑀭𑀲𑀸𑀫𑀡𑁂𑀭𑀺𑀲𑀺𑀓𑁆𑀔𑀫𑀸𑀦𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀤𑀼𑀝𑁆𑀞𑀼𑀮𑁆𑀮𑀁 𑀅𑀚𑁆𑀛𑀸𑀘𑀸𑀭𑀦𑁆𑀢𑀺 𑀬𑁄𑀚𑀦𑀸. ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲𑀸’’𑀢𑀺 𑀘 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀸𑀦𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀬𑀣𑀸𑀯𑀼𑀢𑁆𑀢𑁂𑀳𑀺 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑁂𑀳𑀺 𑀅𑀜𑁆𑀜𑀁 𑀯𑀺𑀓𑀸𑀮𑀪𑁄𑀚𑀦𑀸𑀤𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀁 𑀅𑀚𑁆𑀛𑀸𑀘𑀸𑀭𑀁 𑀯𑀸. 𑀬𑀣𑀸𑀳 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀼𑀝𑁆𑀞𑀼𑀮𑁆𑀮𑀁 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑀁 𑀯𑀸 𑀅𑀚𑁆𑀛𑀸𑀘𑀸𑀭’’𑀦𑁆𑀢𑀺𑀆𑀤𑀺 (𑀧𑀸𑀘𑀺. 𑁮𑁨).

𑁯𑁪𑁬. 𑀓𑁂𑀯𑀮𑀁 𑀯𑀢𑁆𑀣𑀼𑀁 𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲𑀸𑀢𑀺 ‘‘𑀅𑀬𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀢𑁆𑀣𑀼𑀫𑀢𑁆𑀢𑀁 𑀆𑀭𑁄𑀘𑁂𑀦𑁆𑀢𑀲𑁆𑀲. 𑀓𑁂𑀯𑀮𑀁 𑀆𑀧𑀢𑁆𑀢𑀺𑀁 𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲𑀸𑀢𑀺 ‘‘𑀅𑀬𑀁 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄, 𑀅𑀬𑀁 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀧𑀢𑁆𑀢𑀺𑀫𑀢𑁆𑀢𑀁 𑀆𑀭𑁄𑀘𑁂𑀦𑁆𑀢𑀲𑁆𑀲 𑀘. 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸𑀢𑀺 𑀏𑀢𑁆𑀣 𑀯𑀢𑁆𑀣𑀼𑀦𑀸 𑀖𑀝𑁂𑀢𑁆𑀯𑀸 𑀆𑀧𑀢𑁆𑀢𑀺𑀁 𑀆𑀭𑁄𑀘𑁂𑀦𑁆𑀢𑀲𑁆𑀲𑀸𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀏𑀢𑀁 𑀧𑀭𑀸𑀫𑀲𑀢𑀺.

𑀤𑀼𑀝𑁆𑀞𑀼𑀮𑁆𑀮𑀸𑀭𑁄𑀘𑀦𑀓𑀣𑀸𑀯𑀡𑁆𑀡𑀦𑀸.

𑁯𑁪𑁮. 𑀅𑀓𑀧𑁆𑀧𑀺𑀬𑀁 𑀧𑀣𑀯𑀺𑀦𑁆𑀢𑀺 𑀧𑀤𑀪𑀸𑀚𑀦𑁂 ‘‘𑀤𑁆𑀯𑁂 𑀧𑀣𑀯𑀺𑀬𑁄 𑀚𑀸𑀢𑀸 𑀘 𑀧𑀣𑀯𑀻 𑀅𑀚𑀸𑀢𑀸 𑀘 𑀧𑀣𑀯𑀻’’𑀢𑀺 (𑀧𑀸𑀘𑀺. 𑁮𑁬) 𑀉𑀤𑁆𑀤𑀺𑀲𑀺𑀢𑁆𑀯𑀸 𑁋

‘‘𑀚𑀸𑀢𑀸 𑀦𑀸𑀫 𑀧𑀣𑀯𑀻 𑀲𑀼𑀤𑁆𑀥𑀧𑀁𑀲𑀼 𑀲𑀼𑀤𑁆𑀥𑀫𑀢𑁆𑀢𑀺𑀓𑀸 𑀅𑀧𑁆𑀧𑀧𑀸𑀲𑀸𑀡𑀸 𑀅𑀧𑁆𑀧𑀲𑀓𑁆𑀔𑀭𑀸 𑀅𑀧𑁆𑀧𑀓𑀣𑀮𑀸 𑀅𑀧𑁆𑀧𑀫𑀭𑀼𑀫𑁆𑀩𑀸 𑀅𑀧𑁆𑀧𑀯𑀸𑀮𑀺𑀓𑀸 𑀬𑁂𑀪𑀼𑀬𑁆𑀬𑁂𑀦𑀧𑀁𑀲𑀼𑀓𑀸 𑀬𑁂𑀪𑀼𑀬𑁆𑀬𑁂𑀦𑀫𑀢𑁆𑀢𑀺𑀓𑀸, 𑀅𑀤𑀟𑁆𑀠𑀸𑀧𑀺 𑀯𑀼𑀘𑁆𑀘𑀢𑀺 𑀚𑀸𑀢𑀸 𑀧𑀣𑀯𑀻. 𑀬𑁄𑀧𑀺 𑀧𑀁𑀲𑀼𑀧𑀼𑀜𑁆𑀚𑁄 𑀯𑀸 𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑁄 𑀯𑀸 𑀅𑀢𑀺𑀭𑁂𑀓𑀘𑀸𑀢𑀼𑀫𑀸𑀲𑀁 𑀑𑀯𑀝𑁆𑀞𑁄, 𑀅𑀬𑀫𑁆𑀧𑀺 𑀯𑀼𑀘𑁆𑀘𑀢𑀺 𑀚𑀸𑀢𑀸 𑀧𑀣𑀯𑀻’’𑀢𑀺 (𑀧𑀸𑀘𑀺. 𑁮𑁬) 𑀘,

‘‘𑀅𑀚𑀸𑀢𑀸 𑀦𑀸𑀫 𑀧𑀣𑀯𑀻 𑀲𑀼𑀤𑁆𑀥𑀧𑀸𑀲𑀸𑀡𑀸 𑀲𑀼𑀤𑁆𑀥𑀲𑀓𑁆𑀔𑀭𑀸 𑀲𑀼𑀤𑁆𑀥𑀓𑀣𑀮𑀸 𑀲𑀼𑀤𑁆𑀥𑀫𑀭𑀼𑀫𑁆𑀩𑀸 𑀲𑀼𑀤𑁆𑀥𑀯𑀸𑀮𑀺𑀓𑀸 𑀅𑀧𑁆𑀧𑀧𑀁𑀲𑀼 𑀅𑀧𑁆𑀧𑀫𑀢𑁆𑀢𑀺𑀓𑀸 𑀬𑁂𑀪𑀼𑀬𑁆𑀬𑁂𑀦𑀧𑀸𑀲𑀸𑀡𑀸 𑀬𑁂𑀪𑀼𑀬𑁆𑀬𑁂𑀦𑀲𑀓𑁆𑀔𑀭𑀸 𑀬𑁂𑀪𑀼𑀬𑁆𑀬𑁂𑀦𑀓𑀣𑀮𑀸 𑀬𑁂𑀪𑀼𑀬𑁆𑀬𑁂𑀦𑀫𑀭𑀼𑀫𑁆𑀩𑀸 𑀬𑁂𑀪𑀼𑀬𑁆𑀬𑁂𑀦𑀯𑀸𑀮𑀺𑀓𑀸, 𑀤𑀟𑁆𑀠𑀸𑀧𑀺 𑀯𑀼𑀘𑁆𑀘𑀢𑀺 𑀅𑀚𑀸𑀢𑀸 𑀧𑀣𑀯𑀻. 𑀬𑁄𑀧𑀺 𑀧𑀁𑀲𑀼𑀧𑀼𑀜𑁆𑀚𑁄 𑀯𑀸 𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑁄 𑀯𑀸 𑀊𑀦𑀘𑀸𑀢𑀼𑀫𑀸𑀲𑀁 𑀑𑀯𑀝𑁆𑀞𑁄, 𑀅𑀬𑀫𑁆𑀧𑀺 𑀯𑀼𑀘𑁆𑀘𑀢𑀺 𑀅𑀚𑀸𑀢𑀸 𑀧𑀣𑀯𑀻’’𑀢𑀺 (𑀧𑀸𑀘𑀺. 𑁮𑁬) 𑀘 𑁋

𑀦𑀺𑀤𑁆𑀤𑀺𑀝𑁆𑀞𑀸𑀲𑀼 𑀤𑁆𑀯𑀻𑀲𑀼 𑀧𑀣𑀯𑀻𑀲𑀼 𑀚𑀸𑀢𑀧𑀣𑀯𑀺𑀲𑀗𑁆𑀔𑀸𑀢𑀁 𑀅𑀓𑀧𑁆𑀧𑀺𑀬𑀧𑀣𑀯𑀺𑀁.

𑀏𑀢𑁆𑀣 𑀧𑀸𑀲𑀸𑀡𑀸𑀤𑀻𑀦𑀁 𑀮𑀓𑁆𑀔𑀡𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀫𑀼𑀝𑁆𑀞𑀺𑀧𑁆𑀧𑀫𑀸𑀡𑀢𑁄 𑀉𑀧𑀭𑀺 𑀧𑀸𑀲𑀸𑀡𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀫𑀼𑀝𑁆𑀞𑀺𑀧𑁆𑀧𑀫𑀸𑀡𑀸 𑀲𑀓𑁆𑀔𑀭𑀸. 𑀓𑀣𑀮𑀸𑀢𑀺 𑀓𑀧𑀸𑀮𑀔𑀡𑁆𑀟𑀸𑀦𑀺. 𑀫𑀭𑀼𑀫𑁆𑀩𑀸𑀢𑀺 𑀓𑀝𑀲𑀓𑁆𑀔𑀭𑀸. 𑀯𑀸𑀮𑀺𑀓𑀸𑀢𑀺 𑀯𑀸𑀮𑀼𑀓𑀸𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑁂𑀪𑀼𑀬𑁆𑀬𑁂𑀦𑀧𑀁𑀲𑀼𑀓𑀸𑀤𑀻𑀦𑀁 𑀮𑀓𑁆𑀔𑀡𑀁 ‘‘𑀬𑁂𑀪𑀼𑀬𑁆𑀬𑁂𑀦𑀧𑀁𑀲𑀼𑀓𑀸𑀢𑀺 𑀢𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀧𑀁𑀲𑀼, 𑀏𑀓𑁄 𑀧𑀸𑀲𑀸𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑁄 𑀓𑁄𑀝𑁆𑀞𑀸𑀲𑁄’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁬) 𑀘 ‘‘𑀅𑀤𑀟𑁆𑀠𑀸𑀧𑀻𑀢𑀺 𑀉𑀤𑁆𑀥𑀦𑀧𑀢𑁆𑀢𑀧𑀘𑀦𑀓𑀼𑀫𑁆𑀪𑀓𑀸𑀭𑀸𑀯𑀸𑀧𑀸𑀤𑀺𑀯𑀲𑁂𑀦 𑀢𑀣𑀸 𑀢𑀣𑀸 𑀅𑀤𑀟𑁆𑀠𑀸’’𑀢𑀺𑀆𑀤𑀺 𑀅𑀝𑁆𑀞𑀓𑀣𑀸𑀢𑁄 𑀘 𑀯𑁂𑀤𑀺𑀢𑀩𑁆𑀩𑀁. ‘‘𑀅𑀧𑁆𑀧𑀧𑀁𑀲𑀼𑀅𑀧𑁆𑀧𑀫𑀢𑁆𑀢𑀺𑀓𑀸’’𑀢𑀺 𑀤𑁆𑀯𑀻𑀲𑀼𑀧𑀺 𑀧𑀤𑁂𑀲𑀼 𑀦𑀺𑀤𑁆𑀤𑁂𑀲𑀭𑀽𑀧𑁂𑀦 𑀬𑁂𑀪𑀼𑀬𑁆𑀬𑁂𑀦𑀧𑀸𑀲𑀸𑀡𑀸𑀤𑀺𑀧𑀤𑀧𑀜𑁆𑀘𑀓𑀁 𑀯𑀼𑀢𑁆𑀢𑀁, 𑀢𑀢𑁆𑀣𑀸𑀧𑀺 𑀅𑀢𑁆𑀣𑁄 𑀬𑁂𑀪𑀼𑀬𑁆𑀬𑁂𑀦𑀧𑀁𑀲𑀼𑀧𑀤𑀸𑀤𑀻𑀲𑀼 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀢𑁂𑀲𑀁𑀬𑁂𑀯 𑀳𑀺 𑀤𑁆𑀯𑀺𑀦𑁆𑀦𑀁 𑀧𑀪𑁂𑀤𑀤𑀲𑁆𑀲𑀦𑀫𑁂𑀢’’𑀦𑁆𑀢𑀺 (𑀧𑀸𑀘𑀺. 𑁮𑁬).

𑀔𑀡𑁂𑀬𑁆𑀬 𑀯𑀸𑀢𑀺 𑀏𑀯𑀭𑀽𑀧𑀁 𑀅𑀓𑀧𑁆𑀧𑀺𑀬𑀧𑀣𑀯𑀺𑀧𑀤𑁂𑀲𑀁 𑀅𑀦𑁆𑀢𑀫𑀲𑁄 𑀧𑀸𑀤𑀗𑁆𑀕𑀼𑀝𑁆𑀞𑁂𑀦𑀸𑀧𑀺 𑀲𑀫𑁆𑀫𑀼𑀜𑁆𑀚𑀦𑀺𑀲𑀮𑀸𑀓𑀸𑀬𑀧𑀺 𑀲𑀬𑀁 𑀯𑀸 𑀔𑀡𑀢𑀺. 𑀔𑀡𑀸𑀧𑁂𑀬𑁆𑀬 𑀯𑀸𑀢𑀺 𑀅𑀜𑁆𑀜𑁂𑀦 𑀯𑀸 ‘‘𑀇𑀤𑀁 𑀔𑀡𑀸𑀳𑀻’’𑀢𑀺𑀆𑀤𑀺𑀦𑀸 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀔𑀡𑀸𑀧𑁂𑀬𑁆𑀬. 𑀪𑁂𑀤𑀸𑀧𑁂𑀬𑁆𑀬𑀸𑀢𑀺 𑀢𑀣𑁂𑀯 𑀪𑁂𑀤𑀸𑀧𑁂𑀬𑁆𑀬. 𑀪𑀺𑀦𑁆𑀤𑁂𑀬𑁆𑀬 𑀯𑀸𑀢𑀺 𑀧𑀲𑁆𑀲𑀸𑀯𑀥𑀸𑀭𑀸𑀤𑀻𑀳𑀺𑀧𑀺 𑀪𑀺𑀦𑁆𑀤𑁂𑀬𑁆𑀬. 𑀅𑀥𑀺𑀓𑀸𑀭𑀯𑀲𑁂𑀦 𑀯𑀸-𑀲𑀤𑁆𑀤𑀲𑁆𑀲 𑀲𑀩𑁆𑀩𑀓𑀺𑀭𑀺𑀬𑀸𑀧𑀤𑁂𑀳𑀺 𑀲𑀫𑁆𑀩𑀦𑁆𑀥𑁄 𑀮𑀩𑁆𑀪𑀢𑀻𑀢𑀺 𑀪𑁂𑀤𑀸𑀧𑁂𑀬𑁆𑀬 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀇𑀥 𑀅𑀯𑀼𑀢𑁆𑀢𑀲𑁆𑀲 ‘‘𑀤𑀳𑀢𑀺 𑀯𑀸, 𑀤𑀳𑀸𑀧𑁂𑀢𑀺 𑀯𑀸’’𑀢𑀺 𑀧𑀤𑀤𑁆𑀯𑀬𑀲𑁆𑀲 𑀲𑀫𑀼𑀘𑁆𑀘𑀬𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀦𑁆𑀢𑀫𑀲𑁄 𑀧𑀢𑁆𑀢𑀫𑁆𑀧𑀺 𑀧𑀘𑀦𑁆𑀢𑁄 𑀲𑀬𑀁 𑀯𑀸 𑀤𑀳𑀢𑀺, 𑀅𑀜𑁆𑀜𑁂𑀦 𑀯𑀸 𑀤𑀳𑀸𑀧𑁂𑀢𑀻𑀢𑀺𑀆𑀤𑀺 𑀇𑀫𑁂𑀲𑀁 𑀧𑀤𑀸𑀦𑀁 𑀅𑀝𑁆𑀞𑀓𑀣𑀸𑀯𑀲𑁂𑀦 (𑀧𑀸𑀘𑀺. 𑀅𑀝𑁆𑀞. 𑁮𑁭) 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀔𑀡𑀦𑁆𑀢𑀲𑁆𑀲, 𑀪𑀺𑀦𑁆𑀤𑀦𑁆𑀢𑀲𑁆𑀲 𑀘 𑀧𑀳𑀸𑀭𑁂 𑀧𑀳𑀸𑀭𑁂 𑀧𑀸𑀘𑀺𑀢𑁆𑀢𑀺𑀬𑀁.

𑁯𑁪𑁯. 𑀆𑀡𑀸𑀧𑁂𑀦𑁆𑀢𑀲𑁆𑀲 𑀆𑀡𑀢𑁆𑀢𑀺𑀕𑀡𑀦𑀸𑀬, 𑀤𑀳𑀦𑁆𑀢𑀲𑁆𑀲 𑀅𑀕𑁆𑀕𑀺𑀧𑀸𑀢𑀕𑀡𑀦𑀸𑀬 𑀳𑁄𑀢𑀻𑀢𑀺 𑀇𑀤𑀁 ‘‘𑀧𑀳𑀸𑀭𑁂 𑀧𑀳𑀸𑀭𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺𑀆𑀤𑀺𑀅𑀝𑁆𑀞𑀓𑀣𑀸𑀯𑀘𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀇𑀫𑀫𑁂𑀯 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀬𑀫𑁂𑀯𑀸’’𑀢𑀺𑀆𑀤𑀺.

𑁯𑁫𑁦. 𑀆𑀡𑀸𑀧𑁂𑀦𑁆𑀢𑀲𑁆𑀲𑀸𑀢𑀺 𑀲𑀓𑀺𑀁 𑀆𑀡𑀸𑀧𑁂𑀦𑁆𑀢𑀲𑁆𑀲.

𑁯𑁫𑁧. ‘‘𑀔𑀡𑀸𑀧𑁂𑀬𑁆𑀬𑀸’’𑀢𑀺 𑀲𑀸𑀫𑀜𑁆𑀜𑀯𑀘𑀦𑀲𑁆𑀲 𑀅𑀧𑀯𑀸𑀤𑀤𑀲𑁆𑀲𑀦𑀢𑁆𑀣𑀁 ‘‘𑀔𑀡 𑀧𑁄𑀓𑁆𑀔𑀭𑀡𑀺’’𑀦𑁆𑀢𑀺𑀆𑀤𑀺𑀫𑀸𑀳. 𑀓𑁄𑀘𑀺 𑀤𑁄𑀲𑁄 𑀦 𑀯𑀺𑀚𑁆𑀚𑀢𑀻𑀢𑀺 𑀏𑀢𑁆𑀣 𑀧𑁄𑀓𑁆𑀔𑀭𑀡𑀺𑀆𑀯𑀸𑀝𑀸𑀤𑀺𑀲𑀤𑁆𑀤𑀸𑀦𑀁 𑀧𑀣𑀯𑀺𑀧𑀭𑀺𑀬𑀸𑀬𑀢𑁆𑀢𑀸𑀪𑀸𑀯𑀢𑁄 𑀏𑀯𑀁𑀯𑀘𑀦𑁂𑀦 𑀅𑀦𑀸𑀧𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁯𑁫𑁨. ‘‘𑀇𑀫𑀁 𑀇𑀥𑀸’’𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀧𑀘𑁆𑀘𑀓𑁆𑀔𑀪𑀽𑀢𑀸𑀥𑀺𑀧𑁆𑀧𑁂𑀢𑀪𑀽𑀫𑀺𑀯𑀸𑀘𑀓𑀢𑁆𑀢𑀸 𑀢𑁂𑀳𑀺 𑀬𑁄𑀚𑁂𑀢𑁆𑀯𑀸 𑀯𑀼𑀢𑁆𑀢𑀲𑁆𑀲 𑀢𑀲𑁆𑀲𑁂𑀯 𑀧𑀬𑁄𑀕𑀲𑁆𑀲 𑀆𑀧𑀢𑁆𑀢𑀺𑀓𑀭𑀪𑀸𑀯𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀇𑀫’’𑀦𑁆𑀢𑀺𑀆𑀤𑀺.

𑁯𑁫𑁩. 𑀓𑀦𑁆𑀤𑀦𑁆𑀢𑀺 𑀢𑀸𑀮𑀸𑀤𑀺𑀓𑀦𑁆𑀤𑀁. 𑀓𑀼𑀭𑀼𑀦𑁆𑀤𑀦𑁆𑀢𑀺 𑀓𑀼𑀮𑀘𑁄𑀘𑀭𑀼𑀓𑁆𑀔𑀁. 𑀣𑀽𑀡𑀦𑁆𑀢𑀺 𑀣𑀫𑁆𑀪𑀁. 𑀔𑀸𑀡𑀼𑀓𑀦𑁆𑀢𑀺 𑀲𑀸𑀔𑀸𑀯𑀺𑀝𑀧𑀭𑀳𑀺𑀢𑀁 𑀭𑀼𑀓𑁆𑀔𑀸𑀯𑀬𑀯𑀁. 𑀫𑀽𑀮𑀦𑁆𑀢𑀺 𑀧𑀣𑀯𑀺𑀬𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀓𑀭𑀁 𑀭𑀼𑀓𑁆𑀔𑀸𑀯𑀬𑀯𑀁. 𑀯𑀝𑁆𑀝𑀢𑀻𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 𑀯𑀘𑀦𑁂𑀦 𑀅𑀦𑀸𑀧𑀢𑁆𑀢𑀺𑀪𑀸𑀯𑀢𑁄 𑀯𑀝𑁆𑀝𑀢𑀺.

𑁯𑁫𑁪. 𑀇𑀫𑀦𑁆𑀢𑀺 𑀧𑀘𑁆𑀘𑀓𑁆𑀔𑀧𑀭𑀸𑀫𑀸𑀲𑀧𑀤𑁂𑀦 𑀦𑀺𑀬𑀫𑁂𑀢𑁆𑀯𑀸 𑀯𑀘𑀦𑀢𑁄 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀆𑀳 ‘‘𑀦𑀺𑀬𑀫𑁂𑀢𑁆𑀯𑀸𑀦 𑀯𑀢𑁆𑀢𑀼𑀁 𑀧𑀦 𑀦 𑀯𑀝𑁆𑀝𑀢𑀻’’𑀢𑀺.

𑁯𑁫𑁫. 𑀖𑀝𑁂𑀳𑀺 𑀉𑀲𑁆𑀲𑀺𑀜𑁆𑀘𑀺𑀢𑀼𑀦𑁆𑀢𑀺 𑀖𑀝𑁂𑀳𑀺 𑀕𑀳𑁂𑀢𑁆𑀯𑀸 𑀅𑀯𑀲𑀺𑀜𑁆𑀘𑀺𑀢𑀼𑀁. 𑀢𑀦𑀼𑀓𑀤𑁆𑀤𑀫𑁄𑀢𑀺 𑀚𑀫𑁆𑀩𑀸𑀮𑁄. 𑀩𑀳𑀮𑀁 𑀓𑀤𑁆𑀤𑀫𑀁 𑀪𑀺𑀓𑁆𑀔𑀼𑀦𑀸 𑀅𑀧𑀦𑁂𑀢𑀼𑀁 𑀦 𑀘 𑀯𑀝𑁆𑀝𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

𑁯𑁫𑁬. 𑀦𑀤𑀺𑀬𑀸𑀤𑀻𑀦𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀕𑀗𑁆𑀕𑀸𑀓𑀦𑁆𑀤𑀭𑀸𑀤𑀻𑀦𑀁 𑀕𑀳𑀡𑀁. ‘‘𑀢𑀝’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀯𑀝𑁆𑀞𑀦𑁆𑀢𑀺 𑀯𑀼𑀝𑁆𑀞𑀻𑀳𑀺 𑀑𑀯𑀝𑁆𑀞𑀜𑁆𑀘. 𑀘𑀸𑀢𑀼𑀫𑀸𑀲𑀦𑁆𑀢𑀺 𑀯𑀺𑀓𑁄𑀧𑀦𑀓𑀺𑀭𑀺𑀬𑀸𑀬 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁, 𑀘𑀸𑀢𑀼𑀫𑀸𑀲𑀩𑁆𑀪𑀦𑁆𑀢𑀭𑁂 𑀯𑀺𑀓𑁄𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄.

𑁯𑁫𑁭. 𑀲𑀘𑁂 𑀢𑁄𑀬𑀲𑁆𑀫𑀺𑀁 𑀧𑀢𑀢𑀺 𑀢𑀝𑀦𑁆𑀢𑀺 𑀬𑁄𑀚𑀦𑀸, 𑀲𑀘𑁂 𑀓𑀽𑀮𑀁 𑀪𑀺𑀚𑁆𑀚𑀺𑀢𑁆𑀯𑀸 𑀅𑀦𑁆𑀢𑁄𑀉𑀤𑀓𑁂 𑀧𑀢𑀢𑀻𑀢𑀺. 𑀤𑁂𑀯𑁂 𑀯𑀼𑀝𑁆𑀞𑁂𑀧𑀻𑀢𑀺 𑀧𑀚𑁆𑀚𑀼𑀦𑁆𑀦𑀤𑁂𑀯𑁂 𑀯𑀼𑀝𑁆𑀞𑁂𑀧𑀺. 𑀯𑀼𑀝𑁆𑀞-𑀲𑀤𑁆𑀤𑁄 𑀓𑀢𑁆𑀢𑀼𑀲𑀸𑀥𑀦𑁄. 𑀘𑀸𑀢𑀼𑀫𑀸𑀲𑀫𑀢𑀺𑀓𑁆𑀓𑀦𑁆𑀢𑁂𑀧𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀳𑁂𑀢𑀼𑀤𑀲𑁆𑀲𑀦𑀢𑁆𑀣𑀫𑀸𑀳 ‘‘𑀢𑁄𑀬𑁂 𑀤𑁂𑀯𑁄 𑀳𑀺 𑀯𑀲𑁆𑀲𑀢𑀻’’𑀢𑀺.

𑁯𑁫𑁮. 𑀲𑁄𑀡𑁆𑀟𑀺𑀦𑁆𑀢𑀺 𑀧𑀸𑀲𑀸𑀡𑀧𑁄𑀓𑁆𑀔𑀭𑀡𑀺𑀁. 𑀢𑀢𑁆𑀣 𑀢𑀽𑀢𑀺 𑀉𑀤𑀓𑀭𑀳𑀺𑀢𑁂 𑀢𑀲𑁆𑀫𑀺𑀁 𑀲𑁄𑀡𑁆𑀟𑀺𑀆𑀯𑀸𑀝𑁂.

𑁯𑁫𑁯. 𑀅𑀦𑁆𑀢𑁄𑀘𑀸𑀢𑀼𑀫𑀸𑀲𑀁 𑀲𑁄𑀥𑁂𑀢𑀼𑀁 𑀪𑀺𑀦𑁆𑀤𑀺𑀢𑀼𑀦𑁆𑀢𑀺 𑀬𑁄𑀚𑀦𑀸. ‘‘𑀲𑁄𑀥𑁂𑀢𑀼𑀁 𑀪𑀺𑀦𑁆𑀤𑀺𑀢𑀼𑀁 𑀯𑀺𑀓𑁄𑀧𑁂𑀢𑀼’’𑀦𑁆𑀢𑀺 𑀓𑀺𑀭𑀺𑀬𑀸𑀧𑀤𑁂𑀳𑀺 ‘‘𑀭𑀚’’𑀦𑁆𑀢𑀺 𑀓𑀫𑁆𑀫𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀁 𑀭𑀚𑁄𑀭𑀸𑀲𑀺𑀁 𑀤𑁂𑀯𑁂 𑀯𑀼𑀝𑁆𑀞𑁂 𑀧𑀘𑁆𑀙𑀸 𑀉𑀤𑀓𑀲𑁆𑀲 𑀙𑀺𑀦𑁆𑀦𑀢𑁆𑀢𑀸 𑀩𑀳𑀮𑀪𑀽𑀫𑀺𑀲𑀼𑀓𑁆𑀔𑀫𑁆𑀧𑀺 𑀯𑀼𑀝𑁆𑀞𑀺𑀧𑀸𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑁄𑀘𑀸𑀢𑀼𑀫𑀸𑀲𑁂 𑀓𑁄𑀧𑁂𑀢𑀼𑀁 𑀪𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄.

𑁯𑁬𑁦. 𑀧𑀼𑀡𑁆𑀡𑁂 𑀲𑁄𑀡𑁆𑀟𑀺𑀫𑁆𑀳𑀺 𑀢𑀁 𑀭𑀚𑀁 𑀯𑀺𑀓𑁄𑀧𑁂𑀢𑀼𑀁 𑀯𑀝𑁆𑀝𑀢𑀺 𑀘𑀸𑀢𑀼𑀫𑀸𑀲𑀢𑁄 𑀉𑀤𑁆𑀥𑀦𑁆𑀢𑀺 𑀬𑁄𑀚𑀦𑀸.

𑁯𑁬𑁧. ‘‘𑀨𑀼𑀲𑀸𑀬𑀦𑁆𑀢𑁂’’𑀢𑀺 𑀏𑀢𑁂𑀦 ‘‘𑀤𑁂𑀯𑁄’’𑀢𑀺 𑀇𑀤𑀁 𑀪𑀼𑀫𑁆𑀫𑀯𑀲𑁂𑀦 𑀯𑀺𑀧𑀭𑀺𑀡𑀸𑀫𑁂𑀢𑁆𑀯𑀸 ‘‘𑀤𑁂𑀯𑁂 𑀨𑀼𑀲𑀸𑀬𑀦𑁆𑀢𑁂’’𑀢𑀺 𑀬𑁄𑀚𑁂𑀢𑀩𑁆𑀩𑀁, 𑀧𑀚𑁆𑀚𑀼𑀦𑁆𑀦𑀤𑁂𑀯𑁂 𑀯𑀼𑀝𑁆𑀞𑀺𑀧𑀸𑀢𑀁 𑀓𑀭𑁄𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀧𑀺𑀝𑁆𑀞𑀺𑀧𑀸𑀲𑀸𑀡𑀓𑁂𑀢𑀺 𑀧𑀸𑀲𑀸𑀡𑀧𑀺𑀝𑁆𑀞𑁂. 𑀢𑀫𑁆𑀧𑀻𑀢𑀺 𑀢𑀣𑀸 𑀧𑀸𑀲𑀸𑀡𑀧𑀺𑀝𑁆𑀞𑁂 𑀮𑀕𑁆𑀕𑀁 𑀢𑀫𑁆𑀧𑀺 𑀭𑀚𑀁.

𑁯𑁬𑁨. 𑀅𑀓𑀢𑀧𑀩𑁆𑀪𑀸𑀭𑁄 𑀦𑀸𑀫 𑀬𑀣𑀸 𑀳𑁂𑀝𑁆𑀞𑀸𑀪𑀸𑀕𑁄 𑀯𑀼𑀝𑁆𑀞𑀺𑀨𑀼𑀲𑀺𑀢𑁂𑀳𑀺 𑀦 𑀢𑁂𑀫𑀻𑀬𑀢𑀺, 𑀢𑀣𑀸 𑀦𑀫𑀺𑀢𑁆𑀯𑀸 𑀞𑀺𑀢𑀧𑀩𑁆𑀩𑀢𑀧𑁆𑀧𑀤𑁂𑀲𑁄. 𑀇𑀤𑀁 𑀅𑀦𑁄𑀯𑀲𑁆𑀲𑀓𑀝𑁆𑀞𑀸𑀦𑁂 𑀉𑀝𑁆𑀞𑀺𑀢𑀯𑀫𑁆𑀫𑀺𑀓𑀸𑀦𑀁 𑀉𑀧𑀮𑀓𑁆𑀔𑀡𑀁.

𑁯𑁬𑁩. 𑀅𑀩𑁆𑀪𑁄𑀓𑀸𑀲𑁂 𑀯𑀼𑀝𑁆𑀞𑀺𑀢𑁄 𑀯𑀫𑁆𑀫𑀺𑀓𑁄 𑀲𑀘𑁂 𑀑𑀯𑀝𑁆𑀞𑁄, 𑀓𑀁 𑀘𑀸𑀢𑀼𑀫𑀸𑀲𑀁 𑀯𑀺𑀓𑁄𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀸𑀢𑀼𑀫𑀸𑀲𑀦𑁆𑀢𑀺 𑀯𑀺𑀓𑁄𑀧𑀦𑀓𑀺𑀭𑀺𑀬𑀸𑀬 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀭𑀼𑀓𑁆𑀔𑁂𑀢𑀺 𑀘 𑀣𑀫𑁆𑀪𑀧𑀸𑀲𑀸𑀡𑀸𑀤𑀻𑀦𑀁 𑀉𑀧𑀮𑀓𑁆𑀔𑀡𑀁. 𑀉𑀧𑀘𑀺𑀓𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀸𑀴𑀓𑀺𑀧𑀺𑀮𑁆𑀮𑀺𑀓𑀸𑀤𑀻𑀦𑀁 𑀕𑀳𑀡𑀁. 𑀲𑁄 𑀦𑀬𑁄𑀢𑀺 ‘‘𑀑𑀯𑀝𑁆𑀞𑀤𑀺𑀯𑀲𑀢𑁄 𑀉𑀢𑁆𑀢𑀭𑀺 𑀘𑀸𑀢𑀼𑀫𑀸𑀲𑀩𑁆𑀪𑀦𑁆𑀢𑀭𑁂 𑀓𑁄𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀬𑀣𑀸𑀯𑀼𑀢𑁆𑀢𑁄 𑀦𑀬𑁄.

𑁯𑁬𑁪. 𑀫𑀽𑀲𑀺𑀓𑀼𑀓𑁆𑀓𑀺𑀭𑀁 𑀦𑀸𑀫 𑀫𑀽𑀲𑀺𑀓𑀸𑀳𑀺 𑀉𑀤𑁆𑀥𑀝𑀧𑀁𑀲𑀼. 𑀫𑀽𑀲𑀺𑀓𑀸𑀦𑀁 𑀉𑀓𑁆𑀓𑀺𑀭𑁄 𑀫𑀽𑀲𑀺𑀓𑀼𑀓𑁆𑀓𑀺𑀭𑁄𑀢𑀺 𑀯𑀺𑀕𑁆𑀕𑀳𑁄. 𑀕𑁄𑀓𑀡𑁆𑀝𑀓𑀁 𑀦𑀸𑀫 𑀕𑀼𑀦𑁆𑀦𑀁 𑀔𑀼𑀭𑀸𑀦𑀁 𑀉𑀝𑁆𑀞𑀺𑀢𑀫𑀢𑁆𑀢𑀺𑀓𑀸. 𑀕𑀡𑁆𑀟𑀼𑀧𑁆𑀧𑀸𑀤𑀫𑀮𑀁 𑀦𑀸𑀫 𑀪𑀽𑀮𑀢𑀸𑀬 𑀫𑀮𑀫𑀢𑁆𑀢𑀺𑀓𑀸. 𑀲𑀫𑁆𑀩𑀦𑁆𑀥𑀁 𑀧𑀦 𑀧𑀓𑀢𑀺𑀪𑀽𑀫𑀺𑀁 𑀅𑀓𑁄𑀧𑁂𑀦𑁆𑀢𑁂𑀦 𑀫𑀢𑁆𑀣𑀓𑀢𑁄 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺.

𑁯𑁬𑁫. 𑀓𑀲𑀻𑀢𑀺 𑀓𑀲𑀺𑀢𑀝𑁆𑀞𑀸𑀦𑀁, 𑀢𑀢𑁆𑀣 𑀦𑀗𑁆𑀕𑀮𑁂𑀦 𑀉𑀤𑁆𑀥𑀝𑀫𑀢𑁆𑀢𑀺𑀓𑀸 𑀓𑀲𑀺𑀦𑀗𑁆𑀕𑀮𑀫𑀢𑁆𑀢𑀺𑀓𑀸. ‘‘𑀅𑀘𑁆𑀙𑀺𑀦𑁆𑀦𑀸’’𑀢𑀺𑀇𑀫𑀺𑀦𑀸 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀓𑀢𑁆𑀯𑀸 𑀆𑀬𑀢𑀁 𑀳𑀼𑀢𑁆𑀯𑀸 𑀞𑀺𑀢𑀫𑀢𑁆𑀢𑀺𑀓𑀸𑀧𑀝𑀮𑀫𑁆𑀧𑀺 𑀅𑀚𑀸𑀢𑀧𑀣𑀯𑀻 𑀲𑀺𑀬𑀸𑀢𑀺 𑀆𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀫𑀸𑀳 ‘‘𑀪𑀽𑀫𑀺𑀲𑀫𑁆𑀩𑀦𑁆𑀥𑀸’’𑀢𑀺. 𑀲𑀸𑀢𑀺 𑀓𑀲𑀺𑀦𑀗𑁆𑀕𑀮𑀫𑀢𑁆𑀢𑀺𑀓𑀸.

𑁯𑁬𑁬. 𑀲𑁂𑀦𑀸𑀲𑀦𑀦𑁆𑀢𑀺 𑀏𑀢𑁆𑀣 ‘‘𑀧𑀼𑀭𑀸𑀡’’𑀦𑁆𑀢𑀺 𑀧𑀸𑀞𑀲𑁂𑀲𑁄 𑀕𑀳𑁂𑀢𑀩𑁆𑀩𑁄. 𑀑𑀯𑀝𑁆𑀞𑀁 𑀘𑀸𑀢𑀼𑀫𑀸𑀲𑀢𑁄 𑀉𑀤𑁆𑀥𑀁 𑀦 𑀯𑀺𑀓𑁄𑀧𑀬𑁂𑀢𑀺 𑀬𑁄𑀚𑀦𑀸.

𑁯𑁬𑁭. 𑀢𑀢𑁄𑀢𑀺 𑀑𑀯𑀝𑁆𑀞𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀘𑀸𑀢𑀼𑀫𑀸𑀲𑀸𑀢𑀺𑀓𑁆𑀓𑀦𑁆𑀢𑀕𑁂𑀳𑀢𑁄. ‘‘𑀕𑁄𑀧𑀸𑀦𑀲𑀺’’𑀦𑁆𑀢𑀺 𑀇𑀫𑀺𑀦𑀸 𑀕𑁄𑀧𑀸𑀦𑀲𑀺𑀫𑀢𑁆𑀣𑀓𑁂 𑀞𑀺𑀢𑀉𑀧𑀘𑀺𑀓𑀸𑀧𑀁𑀲𑀼𑀫𑁆𑀳𑀺 𑀪𑀺𑀚𑁆𑀚𑀦𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀺𑀪𑀸𑀯𑀁 𑀤𑀻𑀧𑁂𑀢𑀺. ‘‘𑀪𑀺𑀢𑁆𑀢𑀺’’𑀦𑁆𑀢𑀺 𑀇𑀫𑀺𑀦𑀸 𑀢𑀤𑁂𑀓𑀤𑁂𑀲𑀁 𑀪𑀺𑀢𑁆𑀢𑀺𑀧𑀸𑀤𑀸𑀤𑀺𑀤𑀸𑀭𑀼𑀫𑀸𑀳. 𑀇𑀤𑀫𑁆𑀧𑀺 𑀪𑀺𑀢𑁆𑀢𑀺𑀫𑀢𑁆𑀢𑀺𑀓𑀁 𑀉𑀧𑀘𑀺𑀓𑀸𑀫𑀢𑁆𑀢𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀣𑀫𑁆𑀪’’𑀦𑁆𑀢𑀺 𑀇𑀤𑀫𑁆𑀧𑀺 𑀢𑀁𑀲𑀫𑁆𑀩𑀦𑁆𑀥𑀧𑀸𑀓𑀸𑀭𑀪𑀽𑀫𑀺𑀫𑀢𑁆𑀢𑀺𑀓𑀸𑀉𑀧𑀘𑀺𑀓𑀸𑀤𑀺𑀧𑀁𑀲𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀤𑀭𑀢𑁆𑀣𑀭𑀦𑁆𑀢𑀺 𑀅𑀢𑁆𑀣𑀢𑀧𑀤𑀭𑀁. 𑀇𑀤𑀫𑁆𑀧𑀺 𑀧𑀤𑀭𑀸𑀦𑀁 𑀉𑀧𑀭𑀺 𑀫𑀢𑁆𑀢𑀺𑀓𑀸𑀉𑀧𑀘𑀺𑀓𑀸𑀧𑀁𑀲𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀕𑁄𑀧𑀸𑀦𑀲𑀺’’𑀦𑁆𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 ‘‘𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀘𑁆𑀘𑁂𑀓𑀁 𑀬𑁄𑀚𑀦𑀻𑀬𑀁. ‘‘𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀺𑀦𑀸 𑀯𑀺𑀓𑁄𑀧𑀦𑀸𑀥𑀺𑀧𑁆𑀧𑀸𑀬𑀸𑀪𑀸𑀯𑀁 𑀤𑀻𑀧𑁂𑀢𑀺.

𑁯𑁬𑁮. 𑀕𑀡𑁆𑀳𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁, ‘‘𑀲𑀼𑀤𑁆𑀥𑀘𑀺𑀢𑁆𑀢𑁂𑀦𑀸’’𑀢𑀺 𑀧𑀸𑀞𑀲𑁂𑀲𑁄. 𑀇𑀝𑁆𑀞𑀓𑀸𑀢𑀺 𑀙𑀤𑀦𑀺𑀝𑁆𑀞𑀓𑀸. 𑀆𑀤𑀺-𑀲𑀤𑁆𑀤𑁂𑀦 𑀧𑀸𑀲𑀸𑀡𑀲𑀫𑀼𑀤𑁆𑀤𑀨𑁂𑀡𑀸𑀤𑀻𑀦𑀁 𑀕𑀳𑀡𑀁. 𑀧𑀢𑀢𑀻𑀢𑀺 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑁂 𑀲𑀘𑁂 𑀫𑀢𑁆𑀢𑀺𑀓𑀸 𑀙𑀺𑀚𑁆𑀚𑀺𑀢𑁆𑀯𑀸 𑀧𑀢𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀫𑀢𑁆𑀢𑀺𑀓𑀦𑁆𑀢𑀺 𑀪𑀺𑀢𑁆𑀢𑀺𑀬𑀁, 𑀙𑀤𑀦𑁂 𑀘 𑀘𑀸𑀢𑀼𑀫𑀸𑀲𑀸𑀥𑀺𑀓𑁄𑀯𑀝𑁆𑀞𑀫𑀢𑁆𑀢𑀺𑀓𑀁, 𑀅𑀦𑁄𑀯𑀝𑁆𑀞𑀁 𑀘𑁂, 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀘𑁂 𑀬𑀸 𑀬𑀸 𑀅𑀢𑀺𑀦𑁆𑀢𑀸, 𑀢𑀁 𑀢𑀁 𑀕𑀡𑁆𑀳𑀸𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁬). 𑀬𑀤𑀺 𑀕𑀡𑁆𑀳𑀢𑀺, 𑀆𑀧𑀢𑁆𑀢𑀺 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁯𑁬𑁯. 𑀅𑀢𑀺𑀦𑁆𑀢𑁄𑀢𑀺 𑀯𑀲𑁆𑀲𑁄𑀤𑀓𑁂𑀦 𑀅𑀢𑀺𑀦𑁆𑀢𑁄, 𑀇𑀫𑀺𑀦𑀸 𑀯𑀺𑀦𑀺𑀘𑁆𑀙𑀺𑀢𑀩𑁆𑀩𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀲 𑀅𑀦𑁆𑀢𑁄𑀕𑁂𑀳𑁂 𑀘 𑀩𑀳𑀺 𑀘 𑀲𑀫𑁆𑀪𑀯𑀢𑁄 𑀅𑀦𑁆𑀢𑁄𑀕𑁂𑀳𑁂 𑀞𑀺𑀢𑀲𑁆𑀲 𑀢𑀸𑀯 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀦𑁆𑀢𑁄𑀕𑁂𑀳𑁂 𑀲𑀘𑁂 𑀲𑀺𑀬𑀸’’𑀢𑀺. 𑀯𑀲𑁆𑀲𑁄𑀤𑀓𑁂𑀦 𑀢𑀺𑀦𑁆𑀢𑀸𑀢𑀺𑀦𑁆𑀢𑁂𑀲𑀼 𑀤𑁆𑀯𑀻𑀲𑀼 𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑁂𑀲𑀼 𑀅𑀢𑀺𑀦𑁆𑀢𑀁 𑀢𑀸𑀯 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀦𑁄𑀯𑀝𑁆𑀞𑁄 𑀘𑀸’’𑀢𑀺.

𑁯𑁭𑁦. 𑀯𑀲𑁆𑀲𑁄𑀤𑀓𑁂𑀦 𑀢𑀺𑀦𑁆𑀢𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀯𑀼𑀝𑁆𑀞𑁂 𑀧𑀼𑀦 𑀘𑀸’’𑀢𑀺𑀆𑀤𑀺. ‘‘𑀯𑀼𑀝𑁆𑀞𑁂’’𑀢𑀺 𑀇𑀫𑀺𑀦𑀸 ‘‘𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑁄’’𑀢𑀺 𑀧𑀤𑀁 𑀪𑀼𑀫𑁆𑀫𑀯𑀲𑁂𑀦 𑀯𑀺𑀧𑀭𑀺𑀡𑀸𑀫𑁂𑀢𑁆𑀯𑀸 𑀯𑀼𑀝𑁆𑀞𑁂 𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑁂𑀢𑀺 𑀬𑁄𑀚𑁂𑀢𑀩𑁆𑀩𑀁, ‘‘𑀏𑀓𑀤𑀺𑀯𑀲𑀫𑁆𑀧𑀻’’𑀢𑀺 𑀲𑁂𑀲𑁄, 𑀕𑁂𑀳𑀲𑁆𑀫𑀺𑀦𑁆𑀢𑀺 𑀏𑀢𑁆𑀣 ‘‘𑀞𑀺𑀢𑁂’’𑀢𑀺 𑀯𑀢𑁆𑀢𑀩𑁆𑀩𑀁, 𑀕𑁂𑀳𑀲𑁆𑀫𑀺𑀁 𑀞𑀺𑀢𑁂 𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑁂 𑀯𑀲𑁆𑀲𑁄𑀤𑀓𑁂𑀦 𑀏𑀓𑀤𑀺𑀯𑀲𑀫𑁆𑀧𑀺 𑀢𑀺𑀦𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀓𑁆𑀔𑀫𑀸𑀦𑀦𑀬𑁂𑀦 𑀅𑀜𑁆𑀜𑀢𑁆𑀣 𑀧𑀳𑀭𑀺𑀢𑁆𑀯𑀸 𑀉𑀝𑁆𑀞𑀺𑀢𑁂𑀦 𑀢𑁂𑀦 𑀅𑀢𑁂𑀫𑀺𑀢𑁆𑀯𑀸 𑀉𑀚𑀼𑀓𑀁 𑀧𑀢𑀺𑀢𑁂𑀳𑀺 𑀯𑀲𑁆𑀲𑀨𑀼𑀲𑀺𑀢𑁂𑀳𑀺 𑀢𑀺𑀦𑁆𑀢𑁂𑀢𑀺 𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀲𑀩𑁆𑀩𑁄 𑀢𑀺𑀦𑁆𑀢𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄.

𑁯𑁭𑁧. ‘‘𑀲𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀯𑀺𑀲𑁂𑀲𑀦𑁂𑀦 𑀩𑁆𑀬𑀯𑀘𑁆𑀙𑀺𑀦𑁆𑀦𑀁 𑀏𑀓𑀤𑁂𑀲𑀢𑀺𑀦𑁆𑀢𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀬𑀢𑁆𑀢𑀓’’𑀦𑁆𑀢𑀺𑀆𑀤𑀺. 𑀢𑀼-𑀲𑀤𑁆𑀤𑁄 𑀇𑀫𑀫𑁂𑀯 𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀬𑀢𑁆𑀢𑀓𑀦𑁆𑀢𑀺 𑀳𑁂𑀝𑁆𑀞𑀸 𑀅𑀦𑁄𑀢𑀭𑀺𑀢𑁆𑀯𑀸 𑀫𑀢𑁆𑀣𑀓𑀢𑁄, 𑀧𑀭𑀺𑀬𑀦𑁆𑀢𑀓𑀢𑁄 𑀘 𑀬𑀢𑁆𑀢𑀓𑀧𑁆𑀧𑀫𑀸𑀡𑀁. 𑀢𑀢𑁆𑀣𑀸𑀢𑀺 𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑁂. ‘‘𑀅𑀓𑀧𑁆𑀧𑀺𑀬’’𑀦𑁆𑀢𑀺 𑀏𑀢𑀲𑁆𑀲 ‘‘𑀘𑀸𑀢𑀼𑀫𑀸𑀲𑀘𑁆𑀘𑀬𑁂𑀦𑀸’’𑀢𑀺 𑀅𑀦𑀼𑀯𑀢𑁆𑀢𑀢𑀺. ‘‘𑀅𑀢𑀺𑀦𑁆𑀢𑀁…𑀧𑁂… 𑀓𑀧𑁆𑀧𑀺𑀬’’𑀦𑁆𑀢𑀺 𑀇𑀫𑀺𑀦𑀸 𑀅𑀓𑀧𑁆𑀧𑀺𑀬𑀝𑁆𑀞𑀸𑀦𑀁 𑀧𑀭𑀺𑀳𑀭𑀺𑀢𑁆𑀯𑀸 𑀯𑀸 𑀓𑀧𑁆𑀧𑀺𑀬𑀓𑀸𑀭𑀓𑁂𑀳𑀺 𑀓𑀧𑁆𑀧𑀺𑀬𑀯𑀘𑀦𑁂𑀦 𑀳𑀭𑀸𑀧𑁂𑀢𑁆𑀯𑀸 𑀯𑀸 𑀅𑀢𑀺𑀦𑁆𑀢𑀁 𑀞𑀸𑀦𑀁 𑀬𑀣𑀸𑀓𑀸𑀫𑀁 𑀯𑀴𑀜𑁆𑀚𑁂𑀢𑀩𑁆𑀩𑀦𑁆𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀧𑁆𑀧𑀺𑀬𑀓𑀸𑀭𑀓𑁂𑀳𑀻’’𑀢𑀺𑀆𑀤𑀺 (𑀧𑀸𑀘𑀺. 𑀅𑀝𑁆𑀞. 𑁮𑁬).

𑁯𑁭𑁨. 𑀯𑀸𑀭𑀺𑀦𑀸𑀢𑀺 𑀉𑀚𑀼𑀓𑀁 𑀆𑀓𑀸𑀲𑀢𑁄 𑀧𑀢𑀺𑀢𑀯𑀲𑁆𑀲𑁄𑀤𑀓𑁂𑀦. 𑀅𑀜𑁆𑀜𑀢𑁆𑀣 𑀧𑀳𑀭𑀺𑀢𑁆𑀯𑀸 𑀢𑀢𑁆𑀣 𑀧𑀢𑀺𑀢𑁆𑀯𑀸 𑀢𑁂𑀫𑀺𑀢𑁂 𑀯𑀝𑁆𑀝𑀢𑀺. 𑀲𑁄 𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑁄. 𑀢𑀢𑁄 𑀧𑀭𑀦𑁆𑀢𑀺 𑀏𑀓𑀸𑀩𑀤𑁆𑀥𑀓𑀸𑀮𑀢𑁄 𑀉𑀢𑁆𑀢𑀭𑀺𑀁 𑀲𑁄 𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑁄 𑀯𑀸𑀭𑀺𑀦𑀸 𑀢𑁂𑀫𑀺𑀢𑁄 𑀪𑀽𑀫𑀺𑀬𑀸 𑀏𑀓𑀸𑀩𑀤𑁆𑀥𑁄 𑀘𑁂 𑀳𑁄𑀢𑀺, 𑀢𑀢𑁄 𑀧𑀭𑀁 𑀲𑀸 𑀚𑀸𑀢𑀸 𑀧𑀣𑀯𑀻 𑀏𑀯, 𑀓𑁄𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁯𑁭𑁩. ‘‘𑀑𑀯𑀝𑁆𑀞𑁄’’𑀢𑀺 𑀇𑀫𑀺𑀦𑀸 𑀅𑀦𑁄𑀯𑀝𑁆𑀞𑀧𑀸𑀓𑀸𑀭𑁄 𑀓𑀧𑁆𑀧𑀺𑀬𑁄𑀢𑀺 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀤𑀲𑁆𑀲𑁂𑀢𑀺. ‘‘𑀫𑀢𑁆𑀢𑀺𑀓𑀸𑀫𑀬𑁄’’𑀢𑀺 𑀯𑀺𑀲𑁂𑀲𑀦𑁂𑀦 𑀇𑀝𑁆𑀞𑀓𑀧𑀸𑀓𑀸𑀭𑀸𑀤𑀺𑀁 𑀩𑁆𑀬𑀯𑀘𑁆𑀙𑀺𑀦𑁆𑀤𑀢𑀺. 𑀢𑀲𑁆𑀲 𑀧𑀦 𑀓𑀧𑁆𑀧𑀺𑀬𑀪𑀸𑀯𑀁 𑀯𑀓𑁆𑀔𑀢𑀺 ‘‘𑀲𑀘𑁂 𑀇𑀝𑁆𑀞𑀓𑀧𑀸𑀓𑀸𑀭𑁄’’𑀢𑀺𑀆𑀤𑀺𑀦𑀸. ‘‘𑀘𑀸𑀢𑀼𑀫𑀸𑀲𑀘𑁆𑀘𑀬𑁂’’𑀢𑀺 𑀇𑀫𑀺𑀦𑀸 𑀢𑀢𑁄 𑀅𑀦𑁆𑀢𑁄 𑀯𑀺𑀓𑁄𑀧𑀦𑀻𑀬𑀪𑀸𑀯𑀁 𑀤𑀲𑁆𑀲𑁂𑀢𑀺.

𑁯𑁭𑁪. 𑀢𑀢𑁆𑀣𑀸𑀢𑀺 𑀑𑀯𑀝𑁆𑀞𑁂 𑀫𑀢𑁆𑀢𑀺𑀓𑀧𑀸𑀓𑀸𑀭𑁂. 𑀅𑀖𑀁𑀲𑀦𑁆𑀢𑁄𑀯𑀸𑀢𑀺 𑀧𑀸𑀓𑀸𑀭𑀫𑀢𑁆𑀢𑀺𑀓𑀁 𑀅𑀓𑁄𑀧𑁂𑀦𑁆𑀢𑁄. 𑀫𑀢𑁆𑀢𑀲𑁄 𑀙𑀼𑀧𑀺𑀢𑁆𑀯𑀸𑀢𑀺 𑀧𑀫𑀸𑀡𑀢𑁄 𑀫𑀼𑀤𑀼𑀓𑀁 𑀓𑀢𑁆𑀯𑀸 𑀳𑀢𑁆𑀣𑀢𑀮𑀁 𑀞𑀧𑁂𑀢𑁆𑀯𑀸. 𑀅𑀮𑁆𑀮𑀳𑀢𑁆𑀣𑁂𑀦𑀸𑀢𑀺 𑀉𑀤𑀓𑀢𑀺𑀦𑁆𑀢𑁂𑀦 𑀳𑀢𑁆𑀣𑀢𑀮𑁂𑀦. 𑀳𑀢𑁆𑀣𑁂𑀓𑀤𑁂𑀲𑁄 𑀳𑀢𑁆𑀣𑁄 𑀦𑀸𑀫.

𑁯𑁭𑁫. 𑀬𑁂𑀪𑀼𑀬𑁆𑀬𑀓𑀣𑀮𑁂 𑀞𑀸𑀦𑁂𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀬𑀲𑁆𑀲𑀸 𑀢𑀻𑀲𑀼 𑀪𑀸𑀕𑁂𑀲𑀼 𑀤𑁆𑀯𑁂 𑀪𑀸𑀕𑀸 𑀓𑀣𑀮𑀸 𑀳𑁄𑀦𑁆𑀢𑀺, 𑀢𑀸𑀤𑀺𑀲𑁂 𑀓𑀧𑁆𑀧𑀺𑀬𑀧𑀣𑀯𑀺𑀝𑁆𑀞𑀸𑀦𑁂.

𑁯𑁭𑁬. 𑀅𑀩𑁆𑀪𑁄𑀓𑀸𑀲𑁂𑀢𑀺 𑀉𑀧𑀮𑀓𑁆𑀔𑀡𑀢𑁆𑀢𑀸 𑀅𑀦𑁆𑀢𑁄𑀕𑁂𑀳𑁂𑀧𑀺 𑀣𑀫𑁆𑀪𑀁 𑀘𑀸𑀮𑁂𑀢𑁆𑀯𑀸 𑀚𑀸𑀢𑀧𑀣𑀯𑀺𑀁 𑀯𑀺𑀓𑁄𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀤𑁆𑀯𑀻𑀲𑀼𑀧𑀺 𑀞𑀸𑀦𑁂𑀲𑀼 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀦𑀺𑀤𑁆𑀤𑁄𑀲𑀪𑀸𑀯𑀁 𑀬𑀣𑀸𑀯𑀼𑀢𑁆𑀢𑁂𑀦 ‘‘𑀣𑀫𑁆𑀪𑀁 𑀯𑀸 𑀧𑀤𑀭𑀢𑁆𑀣𑀭𑀁. 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀲𑀜𑁆𑀜𑀸𑀬, 𑀕𑀳𑁂𑀢𑀼𑀁 𑀧𑀦 𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀦𑀸 𑀦𑀬𑁂𑀦𑀸𑀳. 𑀧𑀣𑀯𑀺𑀦𑁆𑀢𑀺 𑀅𑀓𑀧𑁆𑀧𑀺𑀬𑀧𑀣𑀯𑀺𑀁.

𑁯𑁭𑁭. 𑀉𑀚𑀼𑀫𑀼𑀤𑁆𑀥𑀭𑀢𑁄 𑀦 𑀤𑁄𑀲𑁄𑀢𑀺 𑀬𑁄𑀚𑀦𑀸.

𑁯𑁭𑁮. 𑀉𑀘𑁆𑀘𑀸𑀮𑁂𑀢𑁆𑀯𑀸𑀢𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀘𑀸𑀮𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸. 𑀧𑀯𑀝𑁆𑀝𑀢𑀻𑀢𑀺 𑀧𑀯𑀝𑁆𑀝𑁂𑀢𑁆𑀯𑀸 𑀧𑀯𑀝𑁆𑀝𑁂𑀢𑁆𑀯𑀸 𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲𑀸𑀢𑀺 ‘‘𑀪𑀽𑀫𑀺 𑀪𑀺𑀚𑁆𑀚𑀢𑀻’’𑀢𑀺 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀧𑀸𑀲𑀸𑀡𑀁 𑀧𑀯𑀝𑁆𑀝𑁂𑀢𑁆𑀯𑀸 𑀧𑀯𑀝𑁆𑀝𑁂𑀢𑁆𑀯𑀸 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀼𑀤𑁆𑀥𑀘𑀺𑀢𑁆𑀢𑀯𑀢𑁄.

𑁯𑁭𑁯. 𑀪𑀽𑀫𑀺𑀬𑀁 𑀤𑀸𑀭𑀽𑀦𑀺 𑀨𑀸𑀮𑁂𑀦𑁆𑀢𑀸𑀦𑀫𑁆𑀧𑀺 𑀪𑀽𑀫𑀺𑀬𑀁 𑀲𑀸𑀔𑀸𑀤𑀻𑀦𑀺 𑀓𑀟𑁆𑀠𑀢𑁄 𑀘𑀸𑀢𑀺 𑀬𑁄𑀚𑀦𑀸.

𑁯𑁮𑁦. 𑀓𑀡𑁆𑀝𑀓𑀦𑁆𑀢𑀺 𑀭𑀼𑀓𑁆𑀔𑀓𑀡𑁆𑀝𑀓𑀁, 𑀫𑀘𑁆𑀙𑀓𑀡𑁆𑀝𑀓𑀜𑁆𑀘. 𑀲𑀽𑀘𑀺 𑀦𑀸𑀫 𑀅𑀬𑁄𑀫𑀬𑀤𑀦𑁆𑀢𑀫𑀬𑀢𑀫𑁆𑀩𑀫𑀬𑀓𑀝𑁆𑀞𑀫𑀬𑀸𑀤𑀺𑀲𑀽𑀘𑀻𑀦𑀁 𑀅𑀜𑁆𑀜𑀢𑀭𑀸. 𑀅𑀝𑁆𑀞𑀺𑀁 𑀯𑀸𑀢𑀺 𑀕𑁄𑀫𑀳𑀺𑀁𑀲𑀸𑀤𑀻𑀦𑀁 𑀅𑀝𑁆𑀞𑀺𑀁 𑀯𑀸. 𑀳𑀻𑀭𑀁 𑀯𑀸𑀢𑀺 𑀦𑀸𑀴𑀺𑀓𑁂𑀭𑀸𑀤𑀺𑀳𑀻𑀭𑀁 𑀯𑀸. 𑀆𑀓𑁄𑀝𑁂𑀢𑀼𑀦𑁆𑀢𑀺 𑀬𑀣𑀸 𑀏𑀓𑀓𑁄𑀝𑀺 𑀪𑀽𑀫𑀺𑀁 𑀧𑀯𑀺𑀲𑀢𑀺, 𑀢𑀣𑀸 𑀢𑀸𑀴𑁂𑀢𑀼𑀁. 𑀧𑀯𑁂𑀲𑁂𑀢𑀼𑀦𑁆𑀢𑀺 𑀪𑀽𑀫𑀺𑀁 𑀕𑀫𑀬𑀺𑀢𑀼𑀁.

𑁯𑁮𑁧. 𑀧𑀲𑁆𑀲𑀸𑀯𑀁 𑀫𑀼𑀢𑁆𑀢𑀁. 𑀫𑁂𑀤𑀦𑀺𑀦𑁆𑀢𑀺 𑀏𑀢𑁆𑀣 𑀅𑀓𑀧𑁆𑀧𑀺𑀬𑀧𑀣𑀯𑀺𑀫𑀸𑀳. 𑀪𑀺𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀏𑀢𑁆𑀣 ‘‘𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸’’𑀢𑀺 𑀲𑁂𑀲𑁄.

𑁯𑁮𑁨. 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀧𑀲𑁆𑀲𑀸𑀯𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺𑀬𑁄𑀚𑁂𑀢𑀩𑁆𑀩𑀁. ‘‘𑀲𑀫𑁆𑀫𑀚𑁆𑀚𑀢𑁄’’𑀢𑀺 𑀇𑀤𑀁 ‘‘𑀲𑀫𑁆𑀫𑀚𑁆𑀚𑀦𑁆𑀢𑁂𑀦𑀸’’𑀢𑀺 𑀕𑀳𑁂𑀢𑀩𑁆𑀩𑀁, ‘‘𑀲𑀫𑁆𑀫𑀚𑁆𑀚𑀦𑀺𑀬𑀸’’𑀢𑀺 𑀲𑁂𑀲𑁄, 𑀅𑀦𑀦𑁆𑀢𑀭𑀁 𑀫𑁂𑀤𑀦𑀻𑀧𑀤𑀁 𑀉𑀧𑀬𑁄𑀕𑀯𑀲𑁂𑀦 ‘‘𑀫𑁂𑀤𑀦𑀺’’𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, ‘‘𑀯𑀺𑀲𑀫’’𑀦𑁆𑀢𑀺 𑀲𑁂𑀲𑁄, ‘‘𑀲𑀫𑀁 𑀓𑀸𑀢𑀼’’𑀦𑁆𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀁, 𑀲𑀫𑁆𑀫𑀚𑁆𑀚𑀦𑁆𑀢𑁂𑀦 𑀉𑀘𑁆𑀘𑀝𑁆𑀞𑀸𑀦𑀁 𑀫𑀤𑁆𑀤𑀺𑀢𑁆𑀯𑀸, 𑀆𑀯𑀸𑀝𑀝𑁆𑀞𑀸𑀦𑀁 𑀧𑀯𑁂𑀲𑁂𑀢𑁆𑀯𑀸 𑀲𑀫𑀁 𑀓𑀸𑀢𑀼𑀁 𑀲𑀫𑁆𑀫𑀚𑁆𑀚𑀦𑀺𑀬𑀸 𑀖𑀁𑀲𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀯𑀺𑀲𑀫𑀁 𑀪𑀽𑀫𑀺𑀁 𑀲𑀫𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀲𑀫𑁆𑀫𑀚𑁆𑀚𑀦𑀺𑀬𑀸 𑀖𑀁𑀲𑀺𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁬).

𑁯𑁮𑁩. 𑀧𑀸𑀤𑀗𑁆𑀕𑀼𑀝𑁆𑀞𑁂𑀦 𑀯𑀸𑀢𑀺 𑀏𑀢𑁆𑀣 𑀲𑀫𑀼𑀘𑁆𑀘𑀬𑀢𑁆𑀣𑁂𑀦 𑀯𑀸-𑀲𑀤𑁆𑀤𑁂𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀓𑀢𑁆𑀢𑀭𑀬𑀝𑁆𑀞𑀺𑀬𑀸 𑀪𑀽𑀫𑀺𑀁 𑀓𑁄𑀝𑁆𑀝𑁂𑀦𑁆𑀢𑀻’’𑀢𑀺 𑀇𑀤𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀮𑀺𑀔𑀺𑀢𑀼𑀫𑁆𑀧𑀻𑀢𑀺 𑀭𑀸𑀚𑀺𑀁 𑀓𑀸𑀢𑀼𑀫𑁆𑀧𑀺 𑀪𑀽𑀫𑀺𑀁 𑀪𑀺𑀦𑁆𑀤𑀦𑁆𑀢𑁂𑀦𑀸𑀢𑀺 𑀬𑁄𑀚𑀦𑀸. 𑀧𑀸𑀤𑁂𑀳𑀻𑀢𑀺 𑀧𑀸𑀤𑀢𑀮𑁂𑀳𑀺.

𑁯𑁮𑁫. 𑀪𑀽𑀫𑀺𑀦𑁆𑀢𑀺 𑀅𑀓𑀧𑁆𑀧𑀺𑀬𑀪𑀽𑀫𑀺𑀁. 𑀤𑀳𑀢𑀺 𑀤𑀳𑀸𑀧𑁂𑀢𑀻𑀢𑀺 𑀏𑀢𑁆𑀣 ‘‘𑀬𑁄’’𑀢𑀺 𑀘 ‘‘𑀢𑀲𑁆𑀲𑀸’’𑀢𑀺 𑀘 𑀲𑀫𑁆𑀩𑀦𑁆𑀥𑀯𑀲𑁂𑀦 𑀮𑀩𑁆𑀪𑀢𑀺. 𑀧𑀢𑁆𑀢𑀁 𑀤𑀳𑀦𑁆𑀢𑀲𑁆𑀲𑀸𑀢𑀺 𑀙𑀯𑀺𑀬𑀸 𑀣𑀺𑀭𑀪𑀸𑀯𑀢𑁆𑀣𑀁 𑀥𑀽𑀫𑀁 𑀕𑀸𑀳𑀸𑀧𑁂𑀢𑁆𑀯𑀸 𑀢𑀺𑀡𑀼𑀓𑁆𑀓𑀸𑀤𑀻𑀳𑀺 𑀧𑀢𑁆𑀢𑀁 𑀕𑀡𑁆𑀳𑀦𑁆𑀢𑀲𑁆𑀲.

𑁯𑁮𑁬. 𑀢𑀢𑁆𑀢𑀓𑀸𑀦𑁂𑀯𑀸𑀢𑀺 𑀞𑀸𑀦𑀧𑁆𑀧𑀫𑀸𑀡𑀸𑀦𑁂𑀯. 𑀇𑀥𑀸𑀧𑀺 ‘‘𑀬𑁄’’𑀢𑀺 𑀘 ‘‘𑀢𑀲𑁆𑀲𑀸’’𑀢𑀺 𑀘 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺.

𑁯𑁮𑁭. 𑀪𑀽𑀫𑀺𑀬𑀦𑁆𑀢𑀺 𑀅𑀓𑀧𑁆𑀧𑀺𑀬𑀪𑀽𑀫𑀺𑀬𑀁. 𑀧𑀢𑁆𑀢𑀁 𑀧𑀘𑀻𑀬𑀢𑀺 𑀏𑀢𑁆𑀣𑀸𑀢𑀺 𑀧𑀢𑁆𑀢𑀧𑀘𑀦𑀁, 𑀓𑀧𑀸𑀮𑀁, 𑀢𑀲𑁆𑀫𑀺𑀁 𑀓𑀧𑀸𑀮𑁂.

𑁯𑁮𑁮. 𑀲𑁄 𑀅𑀕𑁆𑀕𑀺 𑀢𑀸𑀦𑀺 𑀤𑀸𑀭𑀽𑀦𑀺 𑀤𑀳𑀦𑁆𑀢𑁄 𑀕𑀦𑁆𑀢𑁆𑀯𑀸 𑀘𑁂 𑀏𑀓𑀁𑀲𑁂𑀦 𑀪𑀽𑀫𑀺𑀁 𑀤𑀳𑀢𑀺, 𑀢𑀲𑁆𑀫𑀸 𑀤𑀸𑀭𑀽𑀦𑀁 𑀉𑀧𑀭𑀺 𑀅𑀕𑁆𑀕𑀺𑀁 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁯𑁮𑁯. 𑀇𑀝𑁆𑀞𑀓𑀸 𑀆𑀯𑀧𑀻𑀬𑀦𑁆𑀢𑀺 𑀧𑀘𑁆𑀘𑀦𑁆𑀢𑀺 𑀏𑀢𑁆𑀣𑀸𑀢𑀺 𑀇𑀝𑁆𑀞𑀓𑀸𑀯𑀸𑀧𑁄, 𑀲𑁄 𑀏𑀯 𑀇𑀝𑁆𑀞𑀓𑀸𑀯𑀸𑀧𑀓𑁄, 𑀇𑀝𑁆𑀞𑀓𑀸𑀧𑀘𑀦𑀝𑁆𑀞𑀸𑀦𑀁. 𑀆𑀤𑀺-𑀲𑀤𑁆𑀤𑁂𑀦 𑀓𑀼𑀫𑁆𑀪𑀓𑀸𑀭𑀸𑀯𑀸𑀧𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁯𑁯𑁦. 𑀉𑀧𑀸𑀤𑀻𑀬𑀢𑀻𑀢𑀺 𑀉𑀧𑀸𑀤𑀸𑀦𑀁, 𑀇𑀦𑁆𑀥𑀦𑀁, 𑀦 𑀉𑀧𑀸𑀤𑀸𑀦𑀁 𑀅𑀦𑀼𑀧𑀸𑀤𑀸𑀦𑀁, 𑀇𑀦𑁆𑀥𑀦𑀢𑁄 𑀅𑀜𑁆𑀜𑀁, 𑀢𑀢𑁄 𑀅𑀦𑀼𑀧𑀸𑀤𑀸𑀦𑀢𑁄𑀢𑀺 𑀅𑀢𑁆𑀣𑁄. 𑀔𑀸𑀡𑀼𑀓𑁂𑀢𑀺 𑀫𑀢𑀔𑀸𑀡𑀼𑀓𑁂 𑀘 𑀲𑀼𑀓𑁆𑀔𑀭𑀼𑀓𑁆𑀔𑁂 𑀘 𑀪𑀽𑀫𑀺𑀕𑀢𑀁 𑀅𑀤𑀢𑁆𑀯𑀸 ‘‘𑀦𑀺𑀩𑁆𑀩𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀅𑀕𑁆𑀕𑀺𑀤𑀸𑀦𑀁 𑀯𑀝𑁆𑀝𑀢𑀺. 𑀧𑀘𑁆𑀙𑀸 𑀉𑀲𑁆𑀲𑀸𑀳𑁂 𑀓𑀢𑁂𑀧𑀺 𑀦 𑀦𑀺𑀩𑁆𑀩𑀸𑀬𑀢𑀺, 𑀦 𑀤𑁄𑀲𑁄𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀘𑁂 𑀧𑀦 𑀪𑀽𑀫𑀺𑀁 𑀅𑀧𑁆𑀧𑀢𑁆𑀢𑀫𑁂𑀯𑀸’’𑀢𑀺𑀆𑀤𑀺 (𑀧𑀸𑀘𑀺. 𑀅𑀝𑁆𑀞. 𑁮𑁭).

𑁯𑁯𑁧. 𑀢𑀺𑀡𑀼𑀓𑁆𑀓𑀦𑁆𑀢𑀺 𑀢𑀺𑀡𑁂𑀦 𑀩𑀤𑁆𑀥𑀉𑀓𑁆𑀓𑀁. 𑀢𑀺𑀡𑀼𑀓𑁆𑀓𑀦𑁆𑀢𑀺 𑀉𑀧𑀮𑀓𑁆𑀔𑀡𑀁. 𑀦𑀸𑀴𑀺𑀓𑁂𑀭𑀧𑀡𑁆𑀡𑀸𑀤𑀻𑀳𑀺 𑀩𑀤𑁆𑀥𑀸𑀧𑀺 𑀲𑀗𑁆𑀕𑀬𑁆𑀳𑀦𑁆𑀢𑀺.

𑁯𑁯𑁨. 𑀢𑀲𑁆𑀲 𑀅𑀕𑁆𑀕𑀺𑀲𑁆𑀲 𑀧𑀢𑀺𑀢𑀝𑁆𑀞𑀸𑀦𑁂 𑀇𑀦𑁆𑀥𑀦𑀁 𑀤𑀢𑁆𑀯𑀸 𑀧𑀼𑀦 𑀢𑀁 𑀅𑀕𑁆𑀕𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀭𑀼𑀢𑀁 𑀓𑀣𑀺𑀢𑀦𑁆𑀢𑀺 𑀬𑁄𑀚𑀦𑀸.

𑁯𑁯𑁩. ‘‘𑀢𑀲𑁆𑀲 𑀅𑀧𑀣𑀯𑀺𑀬’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀯𑀺𑀫𑀢𑀺𑀲𑁆𑀲𑀼𑀪𑀬𑀢𑁆𑀣𑀸𑀧𑀻𑀢𑀺 𑀧𑀣𑀯𑀺𑀅𑀧𑀣𑀯𑀺𑀤𑁆𑀯𑀬𑁂𑀧𑀺 𑀯𑁂𑀫𑀢𑀺𑀓𑀲𑁆𑀲. 𑀢𑀢𑁆𑀣 𑀚𑀸𑀢𑀸 𑀧𑀣𑀯𑀻, 𑀇𑀢𑀭𑀸 𑀅𑀧𑀣𑀯𑀻.

𑁯𑁯𑁪. 𑀇𑀫𑀦𑁆𑀢𑀺 𑀆𑀯𑀸𑀝𑀁, 𑀫𑀢𑁆𑀢𑀺𑀓𑀁, 𑀧𑀁𑀲𑀼𑀁 𑀯𑀸.

𑀧𑀣𑀯𑀻𑀔𑀡𑀦𑀓𑀣𑀸𑀯𑀡𑁆𑀡𑀦𑀸.

𑀫𑀼𑀲𑀸𑀯𑀸𑀤𑀯𑀕𑁆𑀕𑁄 𑀧𑀞𑀫𑁄.

𑁯𑁯𑁫. 𑀪𑀯𑀦𑁆𑀢𑀲𑁆𑀲𑀸𑀢𑀺 𑀚𑀸𑀬𑀦𑁆𑀢𑀲𑁆𑀲, 𑀯𑀟𑁆𑀠𑀫𑀸𑀦𑀲𑁆𑀲 𑀘. 𑀪𑀽𑀢𑀲𑁆𑀲𑀸𑀢𑀺 𑀚𑀸𑀢𑀲𑁆𑀲, 𑀯𑀟𑁆𑀠𑀺𑀢𑀲𑁆𑀲 𑀘𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀪𑀯𑀦𑁆𑀢𑀺 𑀅𑀳𑀼𑀯𑀼𑀜𑁆𑀘𑀸𑀢𑀺 𑀪𑀽𑀢𑀸, 𑀚𑀸𑀬𑀦𑁆𑀢𑀺 𑀯𑀟𑁆𑀠𑀦𑁆𑀢𑀺, 𑀚𑀸𑀢𑀸 𑀯𑀟𑁆𑀠𑀺𑀢𑀸 𑀘𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁯𑁦). 𑀏𑀢𑁆𑀣 𑀘 ‘‘𑀪𑀯𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀯𑀺𑀭𑀼𑀴𑁆𑀳𑀫𑀽𑀮𑁂 𑀦𑀻𑀮𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀯𑀟𑁆𑀠𑀫𑀸𑀦𑀓𑁂 𑀢𑀭𑀼𑀡𑀕𑀘𑁆𑀙𑁂 𑀤𑀲𑁆𑀲𑁂𑀢𑀺. ‘‘𑀅𑀳𑀼𑀯𑀼’’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀯𑀟𑁆𑀠𑀺𑀢𑁆𑀯𑀸 𑀞𑀺𑀢𑁂 𑀫𑀳𑀦𑁆𑀢𑁂 𑀭𑀼𑀓𑁆𑀔𑀕𑀘𑁆𑀙𑀸𑀤𑀺𑀓𑁂 𑀤𑀲𑁆𑀲𑁂𑀢𑀺. ‘‘𑀪𑀯𑀦𑁆𑀢𑀻’’𑀢𑀺 𑀇𑀫𑀲𑁆𑀲 𑀯𑀺𑀯𑀭𑀡𑀁 ‘‘𑀚𑀬𑀦𑁆𑀢𑀺 𑀯𑀟𑁆𑀠𑀦𑁆𑀢𑀻’’𑀢𑀺, ‘‘𑀅𑀳𑀼𑀯𑀼’’𑀦𑁆𑀢𑀺 𑀇𑀫𑀲𑁆𑀲 ‘‘𑀚𑀸𑀢𑀸 𑀯𑀟𑁆𑀠𑀺𑀢𑀸’’𑀢𑀺. 𑀏𑀯𑀁 𑀪𑀽𑀢-𑀲𑀤𑁆𑀤𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀯𑀺𑀲𑀬𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀪𑀯𑀦𑁆𑀢𑀲𑁆𑀲 𑀪𑀽𑀢𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀧𑀤𑀤𑁆𑀯𑀬𑁂𑀦 ‘‘𑀪𑀽𑀢𑀕𑀸𑀫𑀲𑁆𑀲𑀸’’𑀢𑀺 𑀧𑀤𑀲𑁆𑀲 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑀸𑀤𑀲𑁆𑀲𑀦𑁂𑀦 𑀕𑀸𑀫-𑀲𑀤𑁆𑀤𑀲𑁆𑀲 𑀤𑀺𑀝𑁆𑀞𑀺𑀕𑀢𑀯𑀦𑀦𑁆𑀢𑀸𑀤𑀺𑀲𑀤𑁆𑀤𑀸𑀦𑀁 𑀤𑀺𑀝𑁆𑀞𑀺𑀯𑀦𑀸𑀤𑀺𑀲𑀤𑁆𑀤𑀢𑁆𑀣𑁂 𑀯𑀺𑀬 𑀪𑀽𑀢𑀲𑀤𑁆𑀤𑀢𑁆𑀣𑁂 𑀯𑀼𑀢𑁆𑀢𑀺𑀧𑀓𑁆𑀔𑀫𑀸𑀳. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁯𑁦) ‘‘𑀪𑀽𑀢𑀸 𑀏𑀯 𑀯𑀸 𑀕𑀸𑀫𑁄 𑀪𑀽𑀢𑀕𑀸𑀫𑁄, 𑀧𑀢𑀺𑀝𑁆𑀞𑀺𑀢𑀳𑀭𑀺𑀢𑀢𑀺𑀡𑀭𑀼𑀓𑁆𑀔𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀪𑀽𑀢𑀸𑀦𑀁 𑀤𑁂𑀯𑀢𑀸𑀦𑀁 𑀕𑀸𑀫𑁄 𑀦𑀺𑀯𑀸𑀲𑁄𑀢𑀺 𑀯𑀸 𑀪𑀽𑀢𑀕𑀸𑀫𑁄. 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀳𑀺 𑀳𑀭𑀺𑀢𑀪𑀸𑀯𑀫𑀸𑀧𑀦𑁆𑀦𑀸 𑀢𑀺𑀡𑀭𑀼𑀓𑁆𑀔𑀕𑀘𑁆𑀙𑀸𑀤𑀬𑁄 𑀤𑁂𑀯𑀢𑀸𑀳𑀺 𑀧𑀭𑀺𑀕𑀬𑁆𑀳𑀦𑁆𑀢𑀻𑀢𑀺. 𑀚𑀸𑀬𑀦𑁆𑀢𑀲𑁆𑀲 𑀯𑀟𑁆𑀠𑀦𑁆𑀢𑀲𑁆𑀲 𑀯𑀸 𑀲𑀫𑁆𑀧𑀢𑁆𑀢𑀯𑀼𑀤𑁆𑀥𑀺𑀫𑀭𑀺𑀬𑀸𑀤𑀲𑁆𑀲 𑀯𑀸 𑀭𑀼𑀓𑁆𑀔𑀸𑀤𑀺𑀦𑁄𑀢𑀺 𑀅𑀢𑁆𑀣𑁄.

𑀧𑀸𑀢𑀩𑁆𑀬𑀢𑀸𑀦𑀺𑀫𑀺𑀢𑁆𑀢𑀦𑁆𑀢𑀺 𑀏𑀢𑁆𑀣 𑀧𑀸𑀢𑀩𑁆𑀬𑀪𑀸𑀯𑁄 𑀧𑀸𑀢𑀩𑁆𑀬𑀢𑀸, ‘‘𑀙𑁂𑀤𑀦𑀪𑁂𑀤𑀦𑀸𑀤𑀻𑀳𑀺 𑀬𑀣𑀸𑀭𑀼𑀘𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑀸𑀢𑀺 𑀅𑀢𑁆𑀣𑁄’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀧𑀸𑀢𑀩𑁆𑀬𑀢𑀸-𑀲𑀤𑁆𑀤𑀲𑁆𑀲 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑀸𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀲𑀸 𑀦𑀺𑀫𑀺𑀢𑁆𑀢𑀁 𑀳𑁂𑀢𑀼 𑀬𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑀢𑀁 𑀧𑀸𑀢𑀩𑁆𑀬𑀢𑀸𑀦𑀺𑀫𑀺𑀢𑁆𑀢𑀁. 𑀭𑀼𑀓𑁆𑀔𑀸𑀤𑀻𑀦𑀁 𑀙𑁂𑀤𑀦𑀨𑀸𑀮𑀦𑀸𑀤𑀺𑀯𑀲𑁂𑀦 𑀯𑀺𑀓𑁄𑀧𑀦𑀻𑀬𑀢𑀸𑀲𑀗𑁆𑀔𑀸𑀢𑀧𑀸𑀢𑀩𑁆𑀬𑀢𑀸𑀦𑀺𑀫𑀺𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑀸𑀳𑁂𑀢𑀼 𑀧𑀸𑀘𑀺𑀢𑁆𑀢𑀺𑀬𑀁 𑀉𑀤𑀻𑀭𑀺𑀢𑀁 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁯𑁯𑁬-𑁭. 𑀲𑁄𑀢𑀺 𑀪𑀽𑀢𑀕𑀸𑀫𑁄. 𑀢𑀺𑀮𑀩𑀻𑀚𑀸𑀤𑀺𑀓𑁄𑀢𑀺 𑀢𑀺𑀮𑀩𑀻𑀚𑀫𑁂𑀢𑁆𑀣 𑀲𑀼𑀔𑀼𑀫𑀧𑀡𑁆𑀡𑀲𑁂𑀯𑀸𑀮𑀸𑀤𑀺𑀓𑁄. 𑀆𑀤𑀺-𑀲𑀤𑁆𑀤𑁂𑀦 𑀘 𑀢𑀸𑀤𑀺𑀲𑀸 𑀇𑀢𑀭𑀸 𑀲𑁂𑀯𑀸𑀮𑀚𑀸𑀢𑀺 𑀕𑀳𑀺𑀢𑀸. ‘‘𑀉𑀧𑀭𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀧𑀡𑁆𑀡𑀗𑁆𑀓𑀼𑀭𑁄, 𑀳𑁂𑀝𑁆𑀞𑀸 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀫𑀽𑀮𑀗𑁆𑀓𑀼𑀭𑁄 𑀲𑁂𑀯𑀸𑀮𑁄 𑀢𑀺𑀮𑀩𑀻𑀚𑀁 𑀦𑀸𑀫𑀸’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀦𑁆𑀢𑀺. 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀢𑀁 𑀲𑀩𑁆𑀩𑀦𑁆𑀢𑀺 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀬 𑀉𑀤𑀓𑁂 𑀚𑀸𑀬𑀫𑀸𑀦𑀓𑀲𑁂𑀯𑀸𑀮𑀸𑀤𑀺𑀁 𑀪𑀽𑀫𑀺𑀬𑀸 𑀉𑀧𑁆𑀧𑀸𑀝𑀦𑀘𑁆𑀙𑁂𑀤𑀦𑀯𑀲𑁂𑀦 𑀚𑀮𑁂 𑀏𑀯 𑀧𑀢𑀺𑀝𑁆𑀞𑀺𑀢𑀁 𑀲𑀼𑀔𑀼𑀫𑀧𑀡𑁆𑀡𑀦𑀻𑀮𑀺𑀓𑀸𑀤𑀺𑀁 𑀉𑀤𑀓𑀢𑁄 𑀉𑀤𑁆𑀥𑀭𑀡𑀘𑁆𑀙𑁂𑀤𑀦𑀯𑀲𑁂𑀦 𑀢𑀁 𑀲𑀩𑁆𑀩𑀁 𑀲𑁂𑀯𑀸𑀮𑀁 𑀯𑀺𑀓𑁄𑀧𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄.

𑁯𑁯𑁮. 𑀳𑀢𑁆𑀣𑁂𑀦 𑀯𑀺𑀬𑀽𑀳𑀺𑀢𑁆𑀯𑀸𑀢𑀺 𑀚𑀮𑀢𑁄 𑀅𑀫𑁄𑀘𑁂𑀢𑁆𑀯𑀸 𑀳𑀢𑁆𑀣𑁂𑀦 𑀤𑀽𑀭𑀢𑁄 𑀅𑀧𑀦𑁂𑀢𑁆𑀯𑀸. ‘‘𑀳𑁄𑀢𑀻’’𑀢𑀺𑀆𑀤𑀺 𑀢𑀲𑁆𑀲 𑀳𑁂𑀢𑀼𑀲𑀦𑁆𑀤𑀲𑁆𑀲𑀦𑀢𑁆𑀣𑀁. 𑀲𑀓𑀮𑀁 𑀅𑀦𑀯𑀲𑁂𑀲𑀁 𑀲𑀩𑁆𑀩𑀁 𑀚𑀮𑀁 𑀢𑀲𑁆𑀲 𑀬𑀲𑁆𑀫𑀸 𑀞𑀸𑀦𑀁 𑀳𑁄𑀢𑀺, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄.

𑁯𑁯𑁯. 𑀘𑁂𑀘𑁆𑀘𑀸𑀢𑀺 𑀚𑀸𑀦𑀦𑁆𑀢𑁄. 𑀢𑀁 𑀲𑁂𑀯𑀸𑀮𑀚𑀸𑀢𑀺𑀓𑀁 𑀚𑀮𑀸 𑀉𑀤𑁆𑀥𑀭𑀺𑀢𑀼𑀁 𑀉𑀤𑀓𑁂𑀦 𑀯𑀺𑀦𑀸 𑀪𑀺𑀓𑁆𑀔𑀼𑀲𑁆𑀲 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀞𑀸𑀦𑀲𑀗𑁆𑀓𑀫𑀦𑀜𑁆𑀳𑀺 𑀢𑀦𑁆𑀢𑀺 𑀳𑁂𑀢𑀼𑀤𑀲𑁆𑀲𑀦𑀁. 𑀢𑀁 𑀢𑀣𑀸𑀓𑀭𑀡𑀁 𑀬𑀲𑁆𑀫𑀸 𑀞𑀸𑀦𑀲𑀗𑁆𑀓𑀫𑀦𑀁 𑀞𑀸𑀦𑀢𑁄 𑀘𑀸𑀯𑀦𑀁, 𑀢𑀲𑁆𑀫𑀸 𑀢𑀁 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁧𑁦𑁦𑁦. 𑀬𑀣𑀸𑀯𑀼𑀢𑁆𑀢𑀲𑁆𑀲 𑀩𑁆𑀬𑀢𑀺𑀭𑁂𑀓𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀉𑀤𑀓𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀉𑀤𑀓𑁂𑀦𑀸𑀢𑀺 𑀲𑀳𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀢𑀁 𑀲𑁂𑀯𑀸𑀮𑀚𑀸𑀢𑀺𑀓𑀁. 𑀯𑀸𑀭𑀺𑀲𑀽𑀢𑀺 𑀏𑀢𑁆𑀣 𑀯𑀸𑀲𑀁 𑀯𑀸𑀭𑀬𑀦𑁆𑀢𑀻𑀢𑀺 𑀯𑀸𑀭𑀻, 𑀢𑁂𑀲𑀼.

𑁧𑁦𑁦𑁧. 𑀚𑀮𑁂 𑀯𑀮𑁆𑀮𑀺𑀢𑀺𑀡𑀸𑀤𑀻𑀦𑀻𑀢𑀺 𑀚𑀮𑀫𑀢𑁆𑀣𑀓𑁂 𑀯𑀮𑁆𑀮𑀺𑀜𑁆𑀘 𑀚𑀸𑀬𑀫𑀸𑀦𑀓𑀭𑀯𑀮𑁆𑀮𑀺𑀢𑀺𑀡𑀸𑀤𑀻𑀦𑀺 𑀘. 𑀉𑀤𑁆𑀥𑀭𑀦𑁆𑀢𑀲𑁆𑀲𑀸𑀢𑀺 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀺𑀢𑀁 𑀪𑀽𑀫𑀺𑀢𑁄, 𑀉𑀤𑀓𑁂 𑀧𑀢𑀺𑀝𑁆𑀞𑀺𑀢𑀁 𑀉𑀤𑀓𑀢𑁄 𑀘 𑀉𑀤𑁆𑀥𑀭𑀦𑁆𑀢𑀲𑁆𑀲. 𑀢𑀢𑁆𑀣 𑀅𑀦𑁆𑀢𑀧𑀓𑁆𑀔𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑁄𑀬𑀢𑁄’’𑀢𑀺. 𑀯𑀺𑀓𑁄𑀧𑁂𑀦𑁆𑀢𑀲𑁆𑀲𑀸𑀢𑀺 𑀔𑀡𑁆𑀟𑀦𑀸𑀤𑀺𑀯𑀲𑁂𑀦 𑀓𑁄𑀧𑁂𑀦𑁆𑀢𑀲𑁆𑀲. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀉𑀤𑀓𑁂, 𑀏𑀯-𑀓𑀸𑀭𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄 ‘‘𑀢𑀢𑁆𑀣𑁂𑀯𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁯𑁨) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄.

𑁧𑁦𑁦𑁨. 𑀏𑀢𑁆𑀣𑀸𑀢𑀺 𑀉𑀤𑀓𑁂 𑀏𑀯. 𑀯𑀺𑀓𑁄𑀧𑁂𑀦𑁆𑀢𑀲𑁆𑀲𑀸𑀢𑀺 𑀓𑀧𑁆𑀧𑀺𑀬𑀁 𑀅𑀓𑀸𑀭𑀸𑀧𑁂𑀢𑁆𑀯𑀸 𑀙𑁂𑀤𑀦𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲. 𑀢𑀸𑀦𑀻𑀢𑀺 𑀢𑀣𑀸 𑀧𑀭𑁂𑀳𑀺 𑀉𑀧𑁆𑀧𑀸𑀝𑀺𑀢𑀢𑁆𑀢𑀸 𑀪𑀽𑀢𑀕𑀸𑀫𑀪𑀸𑀯𑀢𑁄 𑀫𑀼𑀢𑁆𑀢𑀸𑀦𑀺 𑀯𑀮𑁆𑀮𑀺𑀢𑀺𑀡𑀸𑀤𑀻𑀦𑀺. 𑀩𑀻𑀚𑀕𑀸𑀫𑁂𑀦𑀸𑀢𑀺 𑀫𑀽𑀮𑀩𑀻𑀚𑀕𑀸𑀫𑀸𑀤𑀺𑀯𑀲𑁂𑀦.

𑁧𑁦𑁦𑁩. 𑀏𑀯𑀁 𑀉𑀤𑀓𑀝𑁆𑀞𑁂 𑀲𑀗𑁆𑀔𑁂𑀧𑀢𑁄 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀇𑀢𑀭𑀢𑁆𑀭𑀸𑀧𑀺 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀣𑀮𑀝𑁆𑀞𑁂’’𑀢𑀺𑀆𑀤𑀺. 𑀳𑀭𑀺𑀢𑀔𑀸𑀡𑀼𑀓𑁄𑀢𑀺 𑀏𑀢𑁆𑀣 ‘‘𑀬𑁄’’𑀢𑀺 𑀲𑁂𑀲𑁄. ‘‘𑀢𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄, 𑀓𑀓𑀼𑀥𑀓𑀭𑀜𑁆𑀚𑀸𑀤𑀻𑀦𑀁 𑀙𑀺𑀦𑁆𑀦𑀸𑀯𑀲𑀺𑀝𑁆𑀞𑀔𑀸𑀡𑀼𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀪𑀽𑀢𑀕𑀸𑀫𑁂𑀦 𑀲𑀗𑁆𑀕𑀳𑁄’’𑀢𑀺 𑀇𑀫𑀺𑀦𑀸 𑀢𑀁𑀯𑀺𑀓𑁄𑀧𑀦𑁂 𑀧𑀸𑀘𑀺𑀢𑁆𑀢𑀺𑀬𑀪𑀸𑀯𑀁 𑀤𑀻𑀧𑁂𑀢𑀺. 𑀏𑀯𑀫𑀼𑀧𑀭𑀺𑀧𑀺.

𑁧𑁦𑁦𑁪. 𑀦𑀸𑀴𑀺𑀓𑁂𑀭𑀸𑀤𑀺𑀓𑀸𑀦𑀁 𑀔𑀸𑀡𑀽𑀢𑀺 𑀏𑀢𑁆𑀣𑀸𑀧𑀺 ‘‘𑀉𑀧𑀭𑀺𑀳𑀭𑀺𑀢𑁄’’𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺. ‘‘𑀩𑀻𑀚𑀕𑀸𑀫𑁂𑀦 𑀲𑀗𑁆𑀕𑀳𑁄’’𑀢𑀺 𑀇𑀫𑀺𑀦𑀸 𑀤𑀼𑀓𑁆𑀓𑀝𑀯𑀢𑁆𑀣𑀼𑀢𑀫𑀸𑀳. 𑀏𑀯𑀫𑀼𑀧𑀭𑀺𑀧𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀻𑀦𑀁 𑀔𑀸𑀡𑀼 𑀉𑀤𑁆𑀥𑀁 𑀅𑀯𑀟𑁆𑀠𑀦𑀓𑁄 𑀪𑀽𑀢𑀕𑀸𑀫𑀲𑁆𑀲 𑀓𑀸𑀭𑀡𑀁 𑀦 𑀳𑁄𑀢𑀺, 𑀢𑀣𑀸𑀧𑀺 𑀪𑀽𑀢𑀕𑀸𑀫𑀲𑀗𑁆𑀔𑀸𑀢𑀦𑀺𑀩𑁆𑀩𑀢𑁆𑀢𑀧𑀡𑁆𑀡𑀫𑀽𑀮𑀩𑀻𑀚𑀢𑁄 𑀲𑀫𑁆𑀪𑀽𑀢𑀢𑁆𑀢𑀸 𑀪𑀽𑀢𑀕𑀸𑀫𑀢𑁄 𑀉𑀧𑁆𑀧𑀦𑁆𑀦𑁄 𑀦𑀸𑀫 𑀳𑁄𑀢𑀻𑀢𑀺 𑀩𑀻𑀚𑀕𑀸𑀫𑁂𑀦 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺.

𑁧𑁦𑁦𑁫. 𑀢𑀣𑀸𑀧𑀓𑀸𑀲𑀺𑀢𑁄𑀢𑀺 ‘‘𑀩𑀻𑀚𑀕𑀸𑀫𑁄’’𑀢𑀺 𑀯𑀼𑀢𑁆𑀢𑁄.

𑁧𑁦𑁦𑁬. 𑀨𑀮𑀺𑀢𑀸 𑀓𑀤𑀮𑀻 𑀬𑀸𑀯 𑀦𑀻𑀮𑀧𑀡𑁆𑀡𑀸, 𑀢𑀸𑀯 𑀲𑀸 𑀘 𑀪𑀽𑀢𑀕𑀸𑀫𑁄𑀢𑀺 𑀧𑀓𑀸𑀲𑀺𑀢𑀸𑀢𑀺 𑀬𑁄𑀚𑀦𑀸. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀤𑀮𑀻 𑀧𑀦 𑀨𑀮𑀺𑀢𑀸 𑀬𑀸𑀯 𑀦𑀻𑀮𑀧𑀡𑁆𑀡𑀸, 𑀢𑀸𑀯 𑀪𑀽𑀢𑀕𑀸𑀫𑁂𑀦𑁂𑀯 𑀲𑀗𑁆𑀕𑀳𑀺𑀢𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁯𑁨). 𑀦𑀴𑀦𑁆𑀢𑀺 𑀔𑀼𑀤𑁆𑀤𑀓𑀯𑁂𑀴𑀼. 𑀯𑁂𑀴𑀽𑀢𑀺 𑀫𑀳𑀸𑀯𑁂𑀴𑀼. 𑀢𑀺𑀡𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀲𑁆𑀲𑀸𑀤𑀬𑁄 𑀕𑀳𑀺𑀢𑀸.

𑁧𑁦𑁦𑁭. 𑀬𑁄 𑀅𑀬𑀁 𑀧𑀦 𑀯𑁂𑀴𑀼 𑀅𑀕𑁆𑀕𑀢𑁄 𑀧𑀝𑁆𑀞𑀸𑀬 𑀬𑀤𑀸 𑀲𑀼𑀲𑁆𑀲𑀢𑀺, 𑀢𑀤𑀸 𑀲𑁄 𑀩𑀻𑀚𑀕𑀸𑀫𑁂𑀦 𑀲𑀗𑁆𑀕𑀳𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀩𑀻𑀚𑀕𑀸𑀫𑁂𑀦𑀸𑀢𑀺 𑀨𑀴𑀼𑀩𑀻𑀚𑀕𑀸𑀫𑁂𑀦. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀢𑀭𑀩𑀻𑀚𑀕𑀸𑀫𑁂𑀦? 𑀨𑀴𑀼𑀩𑀻𑀚𑀕𑀸𑀫𑁂𑀦𑀸’’𑀢𑀺.

𑁧𑁦𑁦𑁮. 𑀇𑀦𑁆𑀤𑀲𑀸𑀮𑁄 𑀲𑀮𑁆𑀮𑀓𑀻. 𑀆𑀤𑀺-𑀲𑀤𑁆𑀤𑁂𑀦 𑀲𑁄𑀪𑀜𑁆𑀚𑀦𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀢𑀼-𑀲𑀤𑁆𑀤𑁂𑀦 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀺𑀜𑁆𑀘𑀸𑀧𑀺 𑀭𑀸𑀲𑀺𑀓𑀢𑀤𑀡𑁆𑀟𑀓𑁂𑀳𑀺 𑀭𑀢𑀦𑀧𑁆𑀧𑀫𑀸𑀡𑀸𑀧𑀺 𑀲𑀸𑀔𑀸 𑀦𑀺𑀓𑁆𑀔𑀫𑀦𑁆𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁯𑁨) 𑀯𑀼𑀢𑁆𑀢𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑀺𑀢𑀤𑀡𑁆𑀟𑀓𑁂𑀲𑀼 𑀭𑀢𑀦𑀫𑀢𑁆𑀢𑀸𑀲𑀼𑀧𑀺 𑀲𑀸𑀔𑀸𑀲𑀼 𑀉𑀝𑁆𑀞𑀺𑀢𑀸𑀲𑀼 𑀪𑀽𑀢𑀕𑀸𑀫𑀁 𑀅𑀳𑀼𑀢𑁆𑀯𑀸 𑀩𑀻𑀚𑀕𑀸𑀫𑀫𑁂𑀯 𑀳𑁄𑀢𑀺 𑀅𑀯𑀺𑀭𑀼𑀴𑁆𑀳𑀫𑀽𑀮𑀓𑀢𑁆𑀢𑀸𑀢𑀺 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑀯𑀺𑀦𑀬𑀜𑁆𑀜𑀼𑀦𑀸 𑀜𑀸𑀢𑁄 𑀓𑀼𑀓𑁆𑀓𑀼𑀘𑁆𑀘𑀓𑀸𑀦𑀫𑀼𑀧𑀓𑀸𑀭𑀸𑀬 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀜𑁆𑀜𑁂𑀬𑁆𑀬𑁄 𑀯𑀺𑀦𑀬𑀜𑁆𑀜𑀼𑀦𑀸’’𑀢𑀺. 𑀇𑀫𑀫𑁂𑀯𑀢𑁆𑀣𑀁 ‘‘𑀫𑀽𑀮𑀫𑀢𑁆𑀢𑁂𑀧𑀺 𑀯𑀸’’𑀢𑀺𑀆𑀤𑀺𑀦𑀸 𑀯𑀓𑁆𑀔𑀢𑀺.

𑁧𑁦𑁦𑁯. 𑀫𑀡𑁆𑀟𑀧𑀸𑀤𑀻𑀦𑀫𑀢𑁆𑀣𑀸𑀬𑀸𑀢𑀺 𑀫𑀡𑁆𑀟𑀧𑀯𑀢𑀺𑀧𑀸𑀓𑀸𑀭𑀸𑀤𑀻𑀦𑀫𑀢𑁆𑀣𑀸𑀬. 𑀲𑀘𑁂 𑀢𑁂 𑀦𑀺𑀓𑁆𑀔𑀡𑀦𑁆𑀢𑀻𑀢𑀺 𑀬𑀤𑀺 𑀢𑁂 𑀇𑀦𑁆𑀤𑀲𑀸𑀮𑀸𑀤𑀺𑀤𑀡𑁆𑀟𑀓𑁂 𑀪𑀽𑀫𑀺𑀬𑀁 𑀦𑀺𑀔𑀡𑀦𑁆𑀢𑀺. 𑀦𑀺𑀕𑁆𑀕𑀢𑁂 𑀫𑀽𑀮𑀧𑀡𑁆𑀡𑀲𑁆𑀫𑀺𑀦𑁆𑀢𑀺 𑀢𑀣𑀸 𑀦𑀺𑀔𑀸𑀢𑀤𑀡𑁆𑀟𑀢𑁄 𑀫𑀽𑀮𑁂 𑀘 𑀧𑀡𑁆𑀡𑁂 𑀘 𑀚𑀸𑀢𑁂. 𑀪𑀽𑀢𑀕𑀸𑀫𑁂𑀦 𑀲𑀗𑁆𑀕𑀳𑁄𑀢𑀺 𑀏𑀢𑁆𑀣 ‘‘𑀢𑁂𑀲’’𑀦𑁆𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺, ‘‘𑀯𑀺𑀜𑁆𑀜𑁂𑀬𑁆𑀬𑁄’’𑀢𑀺 𑀅𑀥𑀺𑀓𑀸𑀭𑁄.

𑁧𑁦𑁧𑁦. 𑀦𑀺𑀕𑁆𑀕𑀢𑁂𑀧𑀻𑀢𑀺 𑀢𑀢𑀺𑀬𑁂𑀦 𑀧𑀺-𑀲𑀤𑁆𑀤𑁂𑀦 𑀅𑀢𑀺𑀔𑀼𑀤𑁆𑀤𑀓𑀢𑀁 𑀲𑀽𑀘𑁂𑀢𑀺.

𑁧𑁦𑁧𑁧. 𑀲𑀓𑀦𑁆𑀤𑀸 𑀢𑀸𑀮𑀝𑁆𑀞𑀻𑀢𑀺 𑀲𑀓𑀦𑁆𑀤𑀢𑀸𑀮𑀩𑀻𑀚𑀁. 𑀧𑀢𑁆𑀢𑀯𑀝𑁆𑀝𑀻𑀢𑀺 𑀲𑀽𑀘𑀺𑀲𑀡𑁆𑀞𑀸𑀦𑀸 𑀅𑀗𑁆𑀓𑀼𑀭𑀧𑀢𑁆𑀢𑀯𑀝𑁆𑀝𑀺. 𑀦 𑀘 𑀩𑀻𑀚𑀕𑀸𑀫𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. ‘‘𑀪𑀽𑀢𑀕𑀸𑀫𑁄’’𑀢𑀺 𑀇𑀤𑀁 𑀬𑀣𑀸𑀯𑀼𑀢𑁆𑀢𑀲𑁆𑀲 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀤𑀲𑁆𑀲𑁂𑀢𑀺.

𑁧𑁦𑁧𑁨. 𑀦𑀸𑀴𑀺𑀓𑁂𑀭𑀢𑀘𑀦𑁆𑀢𑀺 𑀦𑀸𑀴𑀺𑀓𑁂𑀭𑀨𑀮𑀙𑀮𑁆𑀮𑀺𑀁. 𑀤𑀦𑁆𑀢𑀲𑀽𑀘𑀻𑀯𑀸𑀢𑀺 𑀤𑀦𑁆𑀢𑀫𑀬𑀲𑀽𑀘𑀺 𑀇𑀯. 𑀲𑁄𑀧𑀻𑀢𑀺 𑀦𑀸𑀴𑀺𑀓𑁂𑀭𑁄𑀧𑀺. 𑀭𑀼𑀓𑁆𑀔𑀢𑀘𑀲𑀤𑁆𑀤𑀸𑀦𑀁 𑀨𑀮𑁂𑀲𑀼 𑀯𑀢𑁆𑀢𑀫𑀸𑀦𑀓𑀸𑀮𑁂𑀲𑀼𑀧𑀺 𑀢𑀁𑀮𑀺𑀗𑁆𑀕𑀢𑀸 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 ‘‘𑀲𑁄’’𑀢𑀺 𑀆𑀳𑀸𑀢𑀺 𑀯𑀺𑀜𑁆𑀜𑀸𑀬𑀢𑀺.

𑁧𑁦𑁧𑁩. 𑀫𑀺𑀕𑀲𑀺𑀗𑁆𑀕𑀲𑀫𑀸𑀦𑀸𑀬𑀸𑀢𑀺 𑀳𑀭𑀺𑀢𑀯𑀺𑀲𑀸𑀡𑀲𑀤𑀺𑀲𑀸𑀬. 𑀧𑀢𑁆𑀢𑀯𑀝𑁆𑀝𑀺𑀬𑀸𑀢𑀺 𑀅𑀗𑁆𑀓𑀼𑀭𑀧𑀢𑁆𑀢𑀯𑀝𑁆𑀝𑀺𑀬𑀸. 𑀲𑀢𑀺𑀬𑀸𑀢𑀺 𑀯𑀺𑀚𑁆𑀚𑀫𑀸𑀦𑀸𑀬. 𑀪𑀽𑀢𑀕𑀸𑀫𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀫𑀽𑀮𑀓𑀪𑀽𑀢𑀕𑀸𑀫𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀁 𑀦𑀸𑀴𑀺𑀓𑁂𑀭𑀲𑁆𑀲 𑀆𑀯𑁂𑀡𑀺𑀓𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀘𑀢𑀼𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦𑁧𑁫-𑁬. 𑀅𑀫𑁆𑀩𑀝𑁆𑀞𑀻𑀢𑀺 𑀅𑀫𑁆𑀩𑀩𑀻𑀚𑀁. 𑀚𑀫𑁆𑀩𑀼𑀝𑁆𑀞𑀻𑀢𑀺 𑀚𑀫𑁆𑀩𑀼𑀩𑀻𑀚𑀁. 𑀆𑀤𑀺-𑀲𑀤𑁆𑀤𑁂𑀦 𑀫𑀥𑀼𑀓𑀧𑀦𑀲𑀸𑀤𑀺𑀩𑀻𑀚𑀸𑀦𑀁 𑀕𑀳𑀡𑀁. 𑀯𑀦𑁆𑀤𑀸𑀓𑀸𑀢𑀺 𑀭𑀼𑀓𑁆𑀔𑀸𑀤𑀦𑀻. 𑀅𑀜𑁆𑀜𑀁 𑀯𑀸𑀢𑀺 𑀪𑀡𑁆𑀟𑀓𑀤𑀮𑀺𑀫𑀦𑁄𑀭𑀳𑀁 𑀯𑀸. 𑀅𑀲𑁆𑀲𑀸𑀢𑀺 𑀯𑀦𑁆𑀤𑀸𑀓𑀸𑀤𑀺𑀦𑁄. 𑀅𑀫𑀽𑀮𑀯𑀮𑁆𑀮𑀻𑀢𑀺 𑀏𑀯𑀁𑀦𑀸𑀫𑀺𑀓𑀸 𑀯𑀮𑁆𑀮𑀺.

𑁧𑁦𑁧𑁭. 𑀲𑁄 𑀲𑁂𑀯𑀸𑀮𑁄𑀢𑀺 𑀬𑁄𑀚𑀦𑀸.

𑁧𑁦𑁧𑁮. 𑀖𑀁𑀲𑀺𑀢𑁆𑀯𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀖𑀁𑀲𑀺𑀢𑁆𑀯𑀸. 𑀢𑀁 𑀲𑁂𑀯𑀸𑀮𑀁. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀧𑀸𑀓𑀸𑀭𑀸.