𑀅𑀦𑀺𑀬𑀢𑀓𑀣𑀸𑀯𑀡𑁆𑀡𑀦𑀸

𑁫𑁪𑁨-𑁩. 𑀇𑀤𑀸𑀦𑀺 𑀲𑀗𑁆𑀖𑀸𑀤𑀺𑀲𑁂𑀲𑀓𑀣𑀸𑀦𑀦𑁆𑀢𑀭𑀁 𑀅𑀦𑀺𑀬𑀢𑀓𑀣𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀭𑀳𑁄𑀦𑀺𑀲𑀚𑁆𑀚𑀲𑁆𑀲𑀸𑀤𑁂𑀦𑀸’’𑀢𑀺𑀆𑀤𑀺. 𑀭𑀳𑀲𑀺 𑀦𑀺𑀲𑀚𑁆𑀚𑀸 𑀭𑀳𑁄𑀦𑀺𑀲𑀚𑁆𑀚𑀸, 𑀢𑀲𑁆𑀲𑀸 𑀅𑀲𑁆𑀲𑀸𑀤𑁄 𑀭𑀳𑁄𑀦𑀺𑀲𑀚𑁆𑀚𑀲𑁆𑀲𑀸𑀤𑁄, 𑀢𑁂𑀦 𑀭𑀳𑁄𑀦𑀺𑀲𑀚𑁆𑀚𑀲𑁆𑀲𑀸𑀤𑁂𑀦, 𑀫𑁂𑀣𑀼𑀦𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑁂𑀦 𑀓𑀺𑀮𑁂𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀭𑀳𑁄𑀦𑀺𑀲𑀚𑁆𑀚𑀲𑁆𑀲𑀸𑀤𑁄𑀢𑀺 𑀫𑁂𑀣𑀼𑀦𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀓𑀺𑀮𑁂𑀲𑁄 𑀯𑀼𑀘𑁆𑀘𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁫𑁧). ‘‘𑀭𑀳𑁄 𑀦𑀸𑀫 𑀘𑀓𑁆𑀔𑀼𑀲𑁆𑀲 𑀭𑀳𑁄 𑀲𑁄𑀢𑀲𑁆𑀲 𑀭𑀳𑁄. 𑀘𑀓𑁆𑀔𑀼𑀲𑁆𑀲 𑀭𑀳𑁄 𑀦𑀸𑀫 𑀦 𑀲𑀓𑁆𑀓𑀸 𑀳𑁄𑀢𑀺 𑀅𑀓𑁆𑀔𑀺𑀁 𑀯𑀸 𑀦𑀺𑀔𑀡𑀺𑀬𑀫𑀸𑀦𑁂 𑀪𑀫𑀼𑀓𑀁 𑀯𑀸 𑀉𑀓𑁆𑀔𑀺𑀧𑀺𑀬𑀫𑀸𑀦𑁂 𑀲𑀻𑀲𑀁 𑀯𑀸 𑀉𑀓𑁆𑀔𑀺𑀧𑀺𑀬𑀫𑀸𑀦𑁂 𑀧𑀲𑁆𑀲𑀺𑀢𑀼𑀁. 𑀲𑁄𑀢𑀲𑁆𑀲 𑀭𑀳𑁄 𑀦𑀸𑀫 𑀦 𑀲𑀓𑁆𑀓𑀸 𑀳𑁄𑀢𑀺 𑀧𑀓𑀢𑀺𑀓𑀣𑀸 𑀲𑁄𑀢𑀼’’𑀦𑁆𑀢𑀺 (𑀧𑀸𑀭𑀸. 𑁪𑁪𑁫) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀭𑀳𑁂𑀲𑀼 𑀘𑀓𑁆𑀔𑀼𑀲𑁆𑀲 𑀭𑀳𑁄 𑀏𑀯 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 ‘𑀲𑁄𑀢𑀲𑁆𑀲 𑀭𑀳𑁄’𑀢𑀺 𑀆𑀕𑀢𑀁, 𑀘𑀓𑁆𑀔𑀼𑀲𑁆𑀲 𑀭𑀳𑁂𑀦𑁂𑀯 𑀧𑀦 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁪𑁪-𑁪𑁪𑁫).

𑀘𑀓𑁆𑀔𑀼𑀲𑁆𑀲 𑀭𑀳𑀢𑁆𑀢𑀸 ‘‘𑀧𑀝𑀺𑀘𑁆𑀙𑀦𑁆𑀦’’𑀦𑁆𑀢𑀺 𑀇𑀫𑀫𑁆𑀧𑀺 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀏𑀯 ‘‘𑀅𑀮𑀁𑀓𑀫𑁆𑀫𑀦𑀺𑀬’’𑀦𑁆𑀢𑀺 𑀇𑀫𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀦𑀺𑀲𑀚𑁆𑀚𑀲𑀤𑁆𑀤𑁄𑀧𑀸𑀤𑀸𑀦𑁂𑀦 ‘‘𑀆𑀲𑀦𑁂’’𑀢𑀺 𑀇𑀤𑀫𑁆𑀧𑀺 𑀕𑀳𑀺𑀢𑀫𑁂𑀯. ‘‘𑀫𑀸𑀢𑀼𑀕𑀸𑀫𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑁄’’𑀢𑀺 𑀇𑀫𑀺𑀦𑀸 ‘‘𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺’’𑀦𑁆𑀢𑀺 𑀇𑀤𑀫𑁆𑀧𑀺 𑀕𑀳𑀺𑀢𑀫𑁂𑀯. 𑀏𑀯𑀁 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀫𑀸𑀦𑀧𑀤𑁄𑀧𑀸𑀤𑀸𑀦𑁂𑀦 𑀬𑁄 𑀧𑀦 𑀪𑀺𑀓𑁆𑀔𑀼 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀅𑀮𑀁𑀓𑀫𑁆𑀫𑀦𑀺𑀬𑁂 𑀦𑀺𑀲𑀚𑁆𑀚𑀲𑁆𑀲𑀸𑀤𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀓𑁆𑀔𑀼𑀲𑁆𑀲 𑀭𑀳𑀪𑀸𑀯𑁂𑀦 𑀓𑀼𑀝𑁆𑀝𑀸𑀤𑀺𑀧𑀝𑀺𑀘𑁆𑀙𑀦𑁆𑀦𑁂 𑀢𑁂𑀦𑁂𑀯 𑀫𑁂𑀣𑀼𑀦𑀲𑁂𑀯𑀦𑀓𑀫𑁆𑀫𑀲𑁆𑀲 𑀅𑀦𑀼𑀭𑀽𑀧𑁂 𑀆𑀲𑀦𑁂 𑀢𑀤𑀳𑀼𑀚𑀸𑀢𑀸𑀬𑀧𑀺 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀲𑀳 𑀦𑀺𑀲𑀚𑁆𑀚𑀲𑁆𑀲𑀸𑀤𑀭𑀸𑀕𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 ‘‘𑀫𑀸𑀢𑀼𑀕𑀸𑀫𑀲𑁆𑀲𑀸’’𑀢𑀺 𑀢𑀤𑀳𑀼𑀚𑀸𑀢𑀫𑁆𑀧𑀺 𑀇𑀢𑁆𑀣𑀺𑀁 𑀕𑀡𑁆𑀳𑀸𑀢𑀻𑀢𑀺 𑀓𑀼𑀢𑁄 𑀮𑀩𑁆𑀪𑀢𑀻𑀢𑀺? ‘‘𑀫𑀸𑀢𑀼𑀕𑀸𑀫𑁄 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀦 𑀬𑀓𑁆𑀔𑀻, 𑀦 𑀧𑁂𑀢𑀻, 𑀦 𑀢𑀺𑀭𑀘𑁆𑀙𑀸𑀦𑀕𑀢𑀸, 𑀅𑀦𑁆𑀢𑀫𑀲𑁄 𑀢𑀤𑀳𑀼𑀚𑀸𑀢𑀸𑀧𑀺 𑀤𑀸𑀭𑀺𑀓𑀸, 𑀧𑀕𑁂𑀯 𑀫𑀳𑀢𑁆𑀢𑀭𑀻’’𑀢𑀺 (𑀧𑀸𑀭𑀸. 𑁪𑁪𑁫) 𑀧𑀤𑀪𑀸𑀚𑀦𑀢𑁄 𑀮𑀩𑁆𑀪𑀢𑀺.

‘‘𑀦𑀺𑀯𑀸𑀲𑁂𑀢𑀻’’𑀢𑀺 𑀇𑀫𑀺𑀦𑀸 ‘‘𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀢𑀺, 𑀘𑀻𑀯𑀭𑀁 𑀧𑀸𑀭𑀼𑀧𑀢𑀻’’𑀢𑀺 𑀇𑀤𑀁 𑀮𑀓𑁆𑀔𑀻𑀬𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀬𑀣𑀸𑀯𑀼𑀢𑁆𑀢𑀁 𑀧𑀬𑁄𑀕𑀢𑁄 𑀧𑀼𑀩𑁆𑀩𑀸𑀧𑀭𑀧𑀬𑁄𑀕𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦𑁂𑀯 ‘‘𑀧𑀬𑁄𑀕𑁂 𑀘 𑀧𑀬𑁄𑀕𑁂 𑀘𑀸’’𑀢𑀺 𑀯𑀺𑀘𑁆𑀙𑀸𑀧𑀬𑁄𑀕𑁄 𑀓𑀢𑁄. 𑀦𑀺𑀲𑀻𑀤𑀢𑁄 𑀘𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. ‘‘𑀉𑀪𑀺𑀦𑁆𑀦𑀫𑁆𑀧𑀺 𑀦𑀺𑀲𑀚𑁆𑀚𑀸𑀬 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀤𑀼𑀓𑁆𑀓𑀝𑀁 𑀲𑀦𑁆𑀥𑀸𑀬 𑀏𑀓𑀓𑀲𑁆𑀲 𑀦𑀺𑀲𑀻𑀤𑀢𑁄𑀢𑀺 𑀕𑀳𑁂𑀢𑀩𑁆𑀩𑀁.

𑁫𑁪𑁪. 𑀦𑀺𑀲𑀚𑁆𑀚𑀸𑀬 𑀉𑀪𑀺𑀦𑁆𑀦𑀫𑁆𑀧𑀻𑀢𑀺 𑀏𑀢𑁆𑀣 ‘‘𑀲𑀓𑀺’’𑀦𑁆𑀢𑀺 𑀲𑁂𑀲𑁄, 𑀉𑀪𑀺𑀦𑁆𑀦𑀁 𑀦𑀺𑀲𑀚𑁆𑀚𑀸𑀧𑀽𑀭𑀡𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸 𑀏𑀓𑀓𑁆𑀔𑀡𑁂 𑀯𑀸 𑀫𑀸𑀢𑀼𑀕𑀸𑀫𑀲𑁆𑀲 𑀯𑀸 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀏𑀓𑀯𑀸𑀭𑀁 𑀦𑀺𑀲𑀚𑁆𑀚𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀸𑀴𑀺𑀬𑀁 ‘‘𑀫𑀸𑀢𑀼𑀕𑀸𑀫𑁂 𑀦𑀺𑀲𑀺𑀦𑁆𑀦𑁂 𑀪𑀺𑀓𑁆𑀔𑀼 𑀉𑀧𑀦𑀺𑀲𑀺𑀦𑁆𑀦𑁄 𑀯𑀸 𑀳𑁄𑀢𑀻’’𑀢𑀺𑀆𑀤𑀺 (𑀧𑀸𑀭𑀸. 𑁪𑁪𑁫). 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀬𑁄𑀚𑀦𑀸. 𑀧𑀬𑁄𑀕𑀕𑀡𑀦𑀸𑀬 𑀘 𑀳𑁄𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀻𑀢𑀺 𑀕𑀳𑁂𑀢𑀩𑁆𑀩𑀁, 𑀫𑀸𑀢𑀼𑀕𑀸𑀫𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑁄 𑀯𑀸 𑀉𑀪𑀺𑀦𑁆𑀦𑀁 𑀯𑀸 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀧𑀼𑀦𑀧𑁆𑀧𑀼𑀦𑀁 𑀉𑀧𑀦𑀺𑀲𑀻𑀤𑀦𑀧𑀬𑁄𑀕𑀕𑀡𑀦𑀸𑀬 𑀘𑀸𑀢𑀺 𑀅𑀢𑁆𑀣𑁄. ‘‘𑀆𑀧𑀢𑁆𑀢𑀻𑀳𑀺𑀧𑀺 𑀢𑀻𑀳𑀺𑀧𑀻’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀧𑀸𑀘𑀺𑀢𑁆𑀢𑀺𑀬𑀕𑁆𑀕𑀳𑀡𑀁 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀁 𑀉𑀧𑀮𑀓𑁆𑀔𑀡𑀁 𑀳𑁄𑀢𑀺, 𑀢𑀻𑀲𑀼 𑀏𑀓𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 ‘‘𑀧𑀬𑁄𑀕𑀕𑀡𑀦𑀸𑀬𑀸’’𑀢𑀺 𑀇𑀤𑀁 𑀧𑀸𑀭𑀸𑀚𑀺𑀓𑀸𑀬 𑀦 𑀮𑀩𑁆𑀪𑀢𑀺 𑀏𑀓𑀧𑀬𑁄𑀕𑁂𑀦𑁂𑀯 𑀲𑀺𑀚𑁆𑀛𑀦𑀢𑁄. 𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀖𑀸𑀤𑀺𑀲𑁂𑀲𑁄, 𑀧𑀦 𑀲𑀭𑀻𑀭𑀢𑁄 𑀧𑀼𑀦𑀧𑁆𑀧𑀼𑀦𑀁 𑀯𑀺𑀬𑀼𑀚𑁆𑀚𑀺𑀢𑁆𑀯𑀸 𑀨𑀼𑀲𑀦𑁂𑀦 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯 𑀮𑀩𑁆𑀪𑀢𑀺.

𑀩𑀳𑀽𑀲𑀼𑀧𑀺 𑀫𑀸𑀢𑀼𑀕𑀸𑀫𑁂𑀲𑀼 𑀩𑀳𑀼𑀓𑀸𑀦𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀩𑀳𑀽𑀲𑀼 𑀫𑀸𑀢𑀼𑀕𑀸𑀫𑁂𑀲𑀼 𑀦𑀺𑀲𑀺𑀦𑁆𑀦𑁂𑀲𑀼 𑀦𑀺𑀲𑀺𑀦𑁆𑀦𑀸𑀦𑀁 𑀕𑀡𑀦𑀸𑀬 𑀏𑀓𑁂𑀦𑁂𑀯 𑀧𑀬𑁄𑀕𑁂𑀦 𑀩𑀳𑀽𑀦𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀘 𑀲𑀗𑁆𑀖𑀸𑀤𑀺𑀲𑁂𑀲𑀸 𑀘 𑀳𑁄𑀦𑁆𑀢𑀺. ‘‘𑀧𑀬𑁄𑀕𑀕𑀡𑀦𑀸𑀬 𑀘𑀸’’𑀢𑀺 𑀇𑀫𑀲𑁆𑀲 𑀏𑀢𑁆𑀣𑀸𑀧𑀺 𑀬𑀼𑀚𑁆𑀚𑀫𑀸𑀦𑀢𑁆𑀢𑀸 𑀢𑀸𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀧𑀼𑀦𑀧𑁆𑀧𑀼𑀦𑀁 𑀦𑀺𑀲𑀻𑀤𑀦𑁆𑀢𑀻𑀲𑀼, 𑀲𑀬𑀜𑁆𑀘 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀧𑀼𑀦𑀧𑁆𑀧𑀼𑀦𑀁 𑀦𑀺𑀲𑀻𑀤𑀢𑁄 𑀢𑀸𑀲𑀁 𑀕𑀡𑀦𑀸𑀬 𑀆𑀧𑀚𑁆𑀚𑀺𑀢𑀩𑁆𑀩𑀸𑀧𑀢𑁆𑀢𑀺𑀬𑁄 𑀧𑀬𑁄𑀕𑀕𑀡𑀦𑀸𑀬 𑀘 𑀩𑀳𑀽 𑀳𑁄𑀦𑁆𑀢𑀻𑀢𑀺 𑀇𑀤𑀁 𑀮𑀩𑁆𑀪𑀢𑀺. 𑀏𑀢𑁆𑀣𑀸𑀧𑀺 𑀧𑀦 𑀧𑀸𑀭𑀸𑀚𑀺𑀓𑀁 𑀦 𑀮𑀩𑁆𑀪𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀮𑀩𑁆𑀪𑀢𑀺.

𑁫𑁪𑁫. 𑀲𑀫𑀻𑀧𑁂 𑀞𑀺𑀢𑁄𑀧𑀺 𑀅𑀦𑁆𑀥𑁄 𑀅𑀦𑀸𑀧𑀢𑁆𑀢𑀺𑀁 𑀦 𑀓𑀭𑁄𑀢𑀻𑀢𑀺 𑀲𑁄𑀢𑀲𑁆𑀲 𑀭𑀳𑀪𑀸𑀯𑁂 𑀅𑀲𑀢𑀺𑀧𑀺 𑀧𑀥𑀸𑀦𑀪𑀽𑀢𑀲𑁆𑀲 ‘‘𑀘𑀓𑁆𑀔𑀼𑀲𑁆𑀲 𑀭𑀳𑁄’’𑀢𑀺 𑀇𑀫𑀲𑁆𑀲 𑀅𑀗𑁆𑀕𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑀓𑁂’’𑀢𑀺, 𑀇𑀫𑀺𑀦𑀸 𑀲𑀯𑀦𑀽𑀧𑀘𑀸𑀭𑁂 𑀯𑀺𑀚𑁆𑀚𑀫𑀸𑀦𑁂𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀢𑁆𑀣𑀻𑀦𑀁 𑀢𑀼 𑀲𑀢𑀫𑁆𑀧𑀺 𑀘 𑀦 𑀓𑀭𑁄𑀢𑀺 𑀅𑀦𑀸𑀧𑀢𑁆𑀢𑀺𑀦𑁆𑀢𑀺 𑀬𑁄𑀚𑀦𑀸, 𑀯𑀺𑀜𑁆𑀜𑀼𑀦𑁄 𑀧𑀼𑀭𑀺𑀲𑀲𑁆𑀲 𑀅𑀲𑀦𑁆𑀦𑀺𑀳𑀺𑀢𑀪𑀸𑀯𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀇𑀢𑁆𑀣𑀻𑀦𑀫𑁆𑀧𑀺 𑀲𑀢𑀫𑁆𑀧𑀺 𑀘𑀸’’𑀢𑀺 𑀮𑀺𑀔𑀦𑁆𑀢𑀺, 𑀢𑀢𑁄𑀧𑀺 𑀅𑀬𑀫𑁂𑀯 𑀧𑀸𑀞𑁄 𑀲𑀼𑀦𑁆𑀤𑀭𑁄. 𑀧𑀺-𑀲𑀤𑁆𑀤𑁄 𑀯𑀸 𑀢𑀼-𑀲𑀤𑁆𑀤𑀢𑁆𑀣𑁂 𑀤𑀝𑁆𑀞𑀩𑁆𑀩𑁄.

𑁫𑁪𑁬. 𑀦𑀺𑀧𑀚𑁆𑀚𑀺𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀲𑀫𑀻𑀧𑁂’’𑀢𑀺 𑀲𑁂𑀲𑁄, ‘‘𑀦𑀺𑀤𑁆𑀤𑀸𑀬𑀦𑁆𑀢𑁄𑀧𑀻’’𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀓𑁂𑀦 ‘‘𑀦𑀺𑀧𑀚𑁆𑀚𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁄𑀢𑀺 𑀇𑀫𑀲𑁆𑀲 𑀦𑀺𑀯𑀢𑁆𑀢𑀺𑀢𑀢𑁆𑀢𑀸 𑀲𑀫𑀻𑀧𑁂 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁄𑀧𑀺 𑀅𑀦𑀦𑁆𑀥𑁄 𑀫𑀦𑀼𑀲𑁆𑀲𑀧𑀼𑀭𑀺𑀲𑁄 𑀅𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀻𑀢𑀺 𑀮𑀩𑁆𑀪𑀢𑀺. ‘‘𑀓𑁂𑀯𑀮’’𑀦𑁆𑀢𑀺 𑀯𑀺𑀲𑁂𑀲𑀦𑁂𑀦 𑀩𑀮𑀯𑀦𑀺𑀤𑁆𑀤𑀽𑀧𑀕𑀢𑁄 𑀕𑀳𑀺𑀢𑁄𑀢𑀺 𑀢𑀣𑀸 𑀅𑀳𑀼𑀢𑁆𑀯𑀸 𑀅𑀦𑁆𑀢𑀭𑀦𑁆𑀢𑀭𑀸 𑀆𑀧𑀦𑁆𑀦𑀸𑀧𑀦𑁆𑀦𑁂 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀸𑀬 𑀓𑀧𑀺𑀦𑀺𑀤𑁆𑀤𑀸𑀬 𑀦𑀺𑀤𑁆𑀤𑀸𑀬𑀦𑁆𑀢𑁄𑀧𑀺 𑀅𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀺. ‘‘𑀧𑀺𑀳𑀺𑀢𑀤𑁆𑀯𑀸𑀭𑀕𑀩𑁆𑀪𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀫𑀚𑁆𑀛𑀧𑀤𑀮𑁄𑀧𑀻𑀲𑀫𑀸𑀲𑀯𑀲𑁂𑀦 ‘‘𑀧𑀺𑀳𑀺𑀢𑀕𑀩𑁆𑀪𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. ‘‘𑀤𑁆𑀯𑀸𑀭𑁂’’𑀢𑀺 𑀇𑀫𑀺𑀦𑀸 𑀤𑁆𑀯𑀸𑀭𑁂𑀓𑀤𑁂𑀲𑀪𑀽𑀢𑀁 𑀉𑀫𑁆𑀫𑀸𑀭𑀁 𑀯𑀸 𑀢𑀁𑀲𑀫𑀻𑀧𑀁 𑀯𑀸 𑀉𑀧𑀘𑀸𑀭𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀘𑁂 𑀕𑀩𑁆𑀪𑁄 𑀧𑀺𑀳𑀺𑀢𑀤𑁆𑀯𑀸𑀭𑁄 𑀦 𑀳𑁄𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀩𑁆𑀬𑀢𑀺𑀭𑁂𑀓𑀢𑁄 𑀤𑀲𑁆𑀲𑀺𑀢𑀁.

𑁫𑁪𑁭. 𑀇𑀫𑀲𑁆𑀫𑀺𑀁 𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑁂 𑀧𑀸𑀴𑀺𑀬𑀁 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀅𑀲𑀢𑀺𑀧𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁨𑁮𑁫) 𑀧𑀜𑁆𑀘𑀫𑀲𑁆𑀲 𑀅𑀘𑁂𑀮𑀓𑀯𑀕𑁆𑀕𑀲𑁆𑀲 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑁂 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀅𑀦𑀸𑀧𑀢𑁆𑀢𑀺 𑀬𑁄 𑀓𑁄𑀘𑀺 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀤𑀼𑀢𑀺𑀬𑁄 𑀳𑁄𑀢𑀺, 𑀢𑀺𑀝𑁆𑀞𑀢𑀺 𑀦 𑀦𑀺𑀲𑀻𑀤𑀢𑀺, 𑀅𑀭𑀳𑁄𑀧𑁂𑀓𑁆𑀔𑁄, 𑀅𑀜𑁆𑀜𑀯𑀺𑀳𑀺𑀢𑁄 𑀦𑀺𑀲𑀻𑀤𑀢𑀺, 𑀉𑀫𑁆𑀫𑀢𑁆𑀢𑀓𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸’’𑀢𑀺 (𑀧𑀸𑀘𑀺. 𑁨𑁮𑁮) 𑀯𑀼𑀢𑁆𑀢𑁂 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀲𑀗𑁆𑀕𑀳𑁂𑀢𑀼𑀫𑀸𑀳 ‘‘𑀅𑀦𑀦𑁆𑀥𑁂 𑀲𑀢𑀻’’𑀢𑀺𑀆𑀤𑀺. ‘‘𑀏𑀢𑀲𑁆𑀲 𑀲𑀫𑀻𑀧𑁂’’𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺. 𑀇𑀥 𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁂𑀦 𑀧𑀼𑀭𑀺𑀲𑁄 𑀮𑀩𑁆𑀪𑀢𑀺, ‘‘𑀢𑁂𑀦𑀸𑀧𑀺 𑀅𑀩𑀸𑀮𑁂𑀦 𑀪𑀯𑀺𑀢𑀩𑁆𑀩𑀁, 𑀫𑀦𑀼𑀲𑁆𑀲𑀚𑀸𑀢𑀺𑀓𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀇𑀤𑀜𑁆𑀘 ‘‘𑀯𑀺𑀜𑁆𑀜𑀼𑀲𑁆𑀫𑀺’’𑀦𑁆𑀢𑀺 𑀇𑀫𑀺𑀦𑀸 𑀮𑀩𑁆𑀪𑀢𑀺. 𑀅𑀦𑁆𑀥𑀲𑀤𑀺𑀲𑀦𑀺𑀤𑁆𑀤𑀽𑀧𑀕𑀢𑀧𑀝𑀺𑀧𑀓𑁆𑀔𑀯𑀸𑀘𑀺𑀅𑀦𑀦𑁆𑀥𑀧𑀤𑁂𑀦 ‘‘𑀅𑀦𑀺𑀤𑁆𑀤𑀸𑀬𑀦𑁆𑀢𑁂’’𑀢𑀺 𑀮𑀩𑁆𑀪𑀢𑀺, 𑀫𑀦𑀸𑀧𑀸𑀫𑀦𑀸𑀧𑀁 𑀚𑀸𑀦𑀦𑁆𑀢𑁂 𑀅𑀦𑀺𑀤𑁆𑀤𑀸𑀬𑀦𑁆𑀢𑁂 𑀫𑀦𑀼𑀲𑁆𑀲𑀧𑀼𑀭𑀺𑀲𑁂 𑀤𑀲𑁆𑀲𑀦𑀽𑀧𑀘𑀸𑀭𑀲𑁆𑀲 𑀅𑀦𑁆𑀢𑁄 𑀯𑀺𑀚𑁆𑀚𑀫𑀸𑀦𑁂𑀢𑀺 𑀅𑀢𑁆𑀣𑁄.

‘‘𑀦𑀺𑀲𑀚𑁆𑀚𑀧𑀘𑁆𑀘𑀬𑀸 𑀤𑁄𑀲𑁄 𑀦𑀢𑁆𑀣𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄, 𑀏𑀯𑀭𑀽𑀧𑁂 𑀭𑀳𑁄 𑀆𑀲𑀦𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀦𑀺𑀲𑀺𑀦𑁆𑀦𑀧𑀘𑁆𑀘𑀬𑀸 𑀆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. ‘‘𑀞𑀺𑀢𑀲𑁆𑀲𑀸’’𑀢𑀺 𑀇𑀫𑀺𑀦𑀸𑀧𑀺 𑀢𑀤𑁂𑀯 𑀧𑀤𑀁 𑀬𑁄𑀚𑁂𑀢𑀩𑁆𑀩𑀁. 𑀯𑀺𑀜𑁆𑀜𑀼𑀫𑁆𑀳𑀺 𑀧𑀝𑀺𑀩𑀮𑁂 𑀫𑀦𑀼𑀲𑁆𑀲𑀧𑀼𑀭𑀺𑀲𑁂 𑀅𑀲𑀦𑁆𑀦𑀺𑀳𑀺𑀢𑁂𑀧𑀺 𑀢𑀣𑀸𑀯𑀺𑀥𑁂 𑀭𑀳𑁄 𑀆𑀲𑀦𑁂 𑀫𑀸𑀢𑀼𑀕𑀸𑀫𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑁂𑀧𑀺 𑀲𑀬𑀸𑀦𑁂𑀧𑀺 𑀞𑀺𑀢𑁂𑀧𑀺 𑀲𑀬𑀁 𑀞𑀺𑀢𑀲𑁆𑀲 𑀦𑀺𑀲𑀚𑁆𑀚𑀸𑀬 𑀅𑀪𑀸𑀯𑀸 𑀢𑀧𑁆𑀧𑀘𑁆𑀘𑀬𑀸 𑀆𑀧𑀢𑁆𑀢𑀺 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀭𑀳𑀲𑀜𑁆𑀜𑀺𑀦𑁄 𑀦𑀺𑀲𑀚𑁆𑀚𑀧𑀘𑁆𑀘𑀬𑀸 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀭𑀳𑁄 𑀆𑀲𑀦𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀦𑀺𑀲𑀚𑁆𑀚𑀦𑁆𑀢𑀲𑁆𑀲𑀸𑀧𑀺 ‘‘𑀭𑀳𑁄’’𑀢𑀺 𑀲𑀜𑁆𑀜𑀸𑀭𑀳𑀺𑀢𑀲𑁆𑀲 𑀦𑀺𑀲𑀻𑀤𑀢𑁄 𑀦𑀺𑀲𑀚𑁆𑀚𑀧𑀘𑁆𑀘𑀬𑀸 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀓𑁆𑀔𑀺𑀢𑁆𑀢𑀘𑁂𑀢𑀲𑁄 𑀦𑀺𑀲𑀚𑁆𑀚𑀧𑀘𑁆𑀘𑀬𑀸 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸.

𑁫𑁪𑁮. 𑀏𑀢𑁆𑀢𑀸𑀯𑀢𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀫𑀢𑁆𑀢𑀢𑁄 𑀅𑀦𑀸𑀧𑀢𑁆𑀢𑀺𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀦𑀺𑀬𑀢𑀯𑁄𑀳𑀸𑀭𑀳𑁂𑀢𑀼𑀪𑀽𑀢𑀸𑀳𑀺 𑀢𑀻𑀳𑀺 𑀆𑀧𑀢𑁆𑀢𑀻𑀳𑀺 𑀅𑀦𑀸𑀧𑀢𑁆𑀢𑀺𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦 𑀤𑁄𑀲𑁄’’𑀢𑀺𑀆𑀤𑀺. 𑀆𑀧𑀢𑁆𑀢𑀻𑀳𑀺𑀧𑀺 𑀢𑀻𑀳𑀺𑀧𑀻𑀢𑀺 ‘‘𑀦𑀺𑀲𑀚𑁆𑀚𑀁 𑀪𑀺𑀓𑁆𑀔𑀼 𑀧𑀝𑀺𑀚𑀸𑀦𑀫𑀸𑀦𑁄 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑁂𑀦 𑀓𑀸𑀭𑁂𑀢𑀩𑁆𑀩𑁄 𑀧𑀸𑀭𑀸𑀚𑀺𑀓𑁂𑀦 𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀯𑀸 𑀧𑀸𑀘𑀺𑀢𑁆𑀢𑀺𑀬𑁂𑀦 𑀯𑀸’’𑀢𑀺 (𑀧𑀸𑀭𑀸. 𑁪𑁪𑁪) 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸𑀳𑀺 ‘‘𑀧𑀞𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀻’’𑀢𑀺 𑀇𑀫𑀸𑀳𑀺 𑀢𑀻𑀳𑀺𑀧𑀺 𑀆𑀧𑀢𑁆𑀢𑀻𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺.

𑀧𑀞𑀫𑀸𑀦𑀺𑀬𑀢𑀓𑀣𑀸𑀯𑀡𑁆𑀡𑀦𑀸.

𑁫𑁪𑁯. 𑀯𑀢𑁆𑀢𑀩𑁆𑀩𑀪𑀸𑀯𑁂𑀦𑀸𑀥𑀺𑀓𑀢𑀤𑀼𑀢𑀺𑀬𑀸𑀦𑀺𑀬𑀢𑀯𑀺𑀦𑀺𑀘𑁆𑀙𑀬𑀢𑁄 𑀧𑀞𑀫𑀸𑀦𑀺𑀬𑀢𑁂 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁂𑀳𑀺 𑀲𑀫𑀁 𑀯𑀺𑀦𑀺𑀘𑁆𑀙𑀬𑀁 𑀧𑀳𑀸𑀬 𑀢𑀢𑁆𑀣 𑀅𑀯𑀼𑀢𑁆𑀢𑀁 𑀇𑀫𑀲𑁆𑀲𑁂𑀯 𑀯𑀺𑀦𑀺𑀘𑁆𑀙𑀬𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀦𑀦𑁆𑀥𑀸’’𑀢𑀺𑀆𑀤𑀺. 𑀇𑀥 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸𑀧𑀺 𑀕𑀳𑀺𑀢𑀢𑁆𑀢𑀸 𑀢𑀢𑁄 𑀅𑀦𑀸𑀧𑀢𑁆𑀢𑀺𑀓𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀩𑀥𑀺𑀭𑁄’’𑀢𑀺 𑀯𑀼𑀢𑁆𑀢𑀁. 𑀅𑀦𑀦𑁆𑀥𑁄 𑀅𑀩𑀥𑀺𑀭𑁄𑀢𑀺 ‘‘𑀧𑀼𑀭𑀺𑀲𑁄’’𑀢𑀺 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀇𑀢𑁆𑀣𑀻’’𑀢𑀺 𑀇𑀤𑀁 𑀲𑀦𑁆𑀥𑀸𑀬 ‘‘𑀅𑀦𑀦𑁆𑀥𑀸𑀩𑀥𑀺𑀭𑀸’’𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀯𑀫𑀼𑀧𑀭𑀺𑀧𑀺. 𑀢𑁂𑀦𑀸𑀧𑀺 𑀲𑀯𑀦𑀽𑀧𑀘𑀸𑀭𑀦𑁆𑀢𑁄𑀕𑀥𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑀝𑁆𑀞𑁄’’𑀢𑀺 𑀯𑀼𑀢𑁆𑀢𑀁.

𑁫𑁫𑁦. ‘‘𑀅𑀦𑁆𑀥𑁄 𑀅𑀩𑀥𑀺𑀭𑁄 𑀅𑀦𑀸𑀧𑀢𑁆𑀢𑀺𑀁 𑀦 𑀓𑀭𑁄𑀢𑀻’’𑀢𑀺 𑀇𑀤𑀁 𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀖𑀸𑀤𑀺𑀲𑁂𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀩𑀥𑀺𑀭𑁄 𑀯𑀸𑀧𑀺 𑀘𑀓𑁆𑀔𑀼𑀫𑀸, 𑀦 𑀓𑀭𑁄𑀢𑀺 𑀅𑀦𑀸𑀧𑀢𑁆𑀢𑀺’’𑀦𑁆𑀢𑀺 𑀇𑀤𑀁 𑀧𑀦 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀗𑁆𑀖𑀸𑀤𑀺𑀲𑁂𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀲𑀦𑁆𑀥𑀸𑀬 𑀪𑀸𑀲𑀺𑀢𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀼𑀭𑀺𑀫𑀸𑀦𑀺𑀬𑀢𑀓𑀣𑀸𑀬 𑀅𑀯𑀼𑀢𑁆𑀢𑀯𑀺𑀲𑁂𑀲𑀲𑁆𑀲 𑀤𑀼𑀢𑀺𑀬𑀸𑀦𑀺𑀬𑀢𑀓𑀣𑀸𑀬 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀢𑁆𑀢𑀸 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀇𑀥 𑀯𑀢𑁆𑀢𑀩𑁆𑀩𑁄. 𑀓𑁄𑀬𑀁 𑀯𑀺𑀲𑁂𑀲𑁄, 𑀬𑁄 𑀇𑀥 𑀯𑀢𑁆𑀢𑀩𑁆𑀩𑁄𑀢𑀺 𑀘𑁂? 𑀢𑀢𑁆𑀣 ‘‘𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀅𑀮𑀁𑀓𑀫𑁆𑀫𑀦𑀺𑀬𑁂’’𑀢𑀺 (𑀧𑀸𑀭𑀸. 𑁪𑁪𑁪) 𑀯𑀼𑀢𑁆𑀢𑀁 𑀆𑀲𑀦𑀗𑁆𑀕𑀤𑁆𑀯𑀬𑀁 𑀇𑀥 ‘‘𑀦 𑀳𑁂𑀯 𑀔𑁄 𑀧𑀦 𑀧𑀝𑀺𑀘𑁆𑀙𑀦𑁆𑀦𑀁 𑀆𑀲𑀦𑀁 𑀳𑁄𑀢𑀺 𑀦𑀸𑀮𑀁𑀓𑀫𑁆𑀫𑀦𑀺𑀬’’𑀦𑁆𑀢𑀺 (𑀧𑀸𑀭𑀸. 𑁪𑁫𑁩) 𑀦𑀺𑀲𑁂𑀥𑁂𑀢𑁆𑀯𑀸 ‘‘𑀅𑀮𑀜𑁆𑀘 𑀔𑁄 𑀳𑁄𑀢𑀺 𑀫𑀸𑀢𑀼𑀕𑀸𑀫𑀁 𑀤𑀼𑀝𑁆𑀞𑀼𑀮𑁆𑀮𑀸𑀳𑀺 𑀯𑀸𑀘𑀸𑀳𑀺 𑀑𑀪𑀸𑀲𑀺𑀢𑀼’’𑀦𑁆𑀢𑀺 (𑀧𑀸𑀭𑀸. 𑁪𑁫𑁩) 𑀇𑀤𑀁 𑀅𑀧𑀼𑀩𑁆𑀩𑀗𑁆𑀕𑀁 𑀯𑀼𑀢𑁆𑀢𑀁. 𑀢𑀢𑁆𑀭 𑀫𑀸𑀢𑀼𑀕𑀸𑀫𑁄𑀢𑀺 𑀅𑀦𑁆𑀢𑀫𑀲𑁄 𑀢𑀤𑀳𑀼𑀚𑀸𑀢𑀸𑀧𑀺 𑀤𑀸𑀭𑀺𑀓𑀸 𑀕𑀳𑀺𑀢𑀸, 𑀇𑀥 ‘‘𑀫𑀸𑀢𑀼𑀕𑀸𑀫𑁄 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀦 𑀬𑀓𑁆𑀔𑀻, 𑀦 𑀧𑁂𑀢𑀻, 𑀦 𑀢𑀺𑀭𑀘𑁆𑀙𑀸𑀦𑀕𑀢𑀸, 𑀯𑀺𑀜𑁆𑀜𑀽 𑀧𑀝𑀺𑀩𑀮𑀸 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀚𑀸𑀦𑀺𑀢𑀼’’𑀦𑁆𑀢𑀺 (𑀧𑀸𑀭𑀸. 𑁪𑁫𑁪) 𑀯𑀺𑀜𑁆𑀜𑀽 𑀧𑀝𑀺𑀩𑀮𑁄 𑀫𑀸𑀢𑀼𑀕𑀸𑀫𑁄𑀯 𑀯𑀼𑀢𑁆𑀢𑁄. 𑀢𑀢𑁆𑀣 ‘‘𑀧𑀸𑀭𑀸𑀚𑀺𑀓𑁂𑀦 𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀯𑀸 𑀧𑀸𑀘𑀺𑀢𑁆𑀢𑀺𑀬𑁂𑀦 𑀯𑀸’’𑀢𑀺 (𑀧𑀸𑀭𑀸. 𑁪𑁪𑁪) 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀯𑀼𑀢𑁆𑀢𑀸, 𑀇𑀥 ‘‘𑀦𑀺𑀲𑀚𑁆𑀚𑀁 𑀪𑀺𑀓𑁆𑀔𑀼 𑀧𑀝𑀺𑀚𑀸𑀦𑀫𑀸𑀦𑁄 𑀤𑁆𑀯𑀺𑀦𑁆𑀦𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑁂𑀦 𑀓𑀸𑀭𑁂𑀢𑀩𑁆𑀩𑁄 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀯𑀸 𑀧𑀸𑀘𑀺𑀢𑁆𑀢𑀺𑀬𑁂𑀦 𑀯𑀸’’𑀢𑀺 (𑀧𑀸𑀭𑀸. 𑁪𑁫𑁩) 𑀤𑁆𑀯𑁂𑀬𑁂𑀯 𑀆𑀧𑀢𑁆𑀢𑀺𑀬𑁄 𑀯𑀼𑀢𑁆𑀢𑀸. 𑀲𑀗𑁆𑀖𑀸𑀤𑀺𑀲𑁂𑀲𑁂𑀲𑀼 𑀘 𑀢𑀢𑁆𑀣 ‘‘𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 ‘𑀅𑀬𑁆𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀦𑀺𑀲𑀺𑀦𑁆𑀦𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀦𑁆𑀢𑁄’𑀢𑀺, 𑀲𑁄 𑀘 𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄’’𑀢𑀺 (𑀧𑀸𑀭𑀸. 𑁪𑁪𑁮) 𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀖𑀸𑀤𑀺𑀲𑁂𑀲𑁄𑀯 𑀯𑀼𑀢𑁆𑀢𑁄, 𑀇𑀥 𑀲𑁄 𑀘 𑀯𑀼𑀢𑁆𑀢𑁄, ‘‘𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 ‘𑀅𑀬𑁆𑀬𑀲𑁆𑀲 𑀫𑀬𑀸 𑀲𑀼𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀫𑀸𑀢𑀼𑀕𑀸𑀫𑀁 𑀤𑀼𑀝𑁆𑀞𑀼𑀮𑁆𑀮𑀸𑀳𑀺 𑀯𑀸𑀘𑀸𑀳𑀺 𑀑𑀪𑀸𑀲𑁂𑀦𑁆𑀢𑀲𑁆𑀲𑀸’𑀢𑀺, 𑀲𑁄 𑀘 𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄’’𑀢𑀺 (𑀧𑀸𑀭𑀸. 𑁪𑁫𑁫) 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀗𑁆𑀖𑀸𑀤𑀺𑀲𑁂𑀲𑁄 𑀘 𑀯𑀼𑀢𑁆𑀢𑁄. 𑀏𑀢𑁆𑀢𑀓𑁄 𑀉𑀪𑀺𑀦𑁆𑀦𑀫𑀦𑀺𑀬𑀢𑀸𑀦𑀁 𑀯𑀺𑀲𑁂𑀲𑁄.

𑀅𑀬𑀁 𑀓𑀲𑁆𑀫𑀸 𑀦 𑀯𑀼𑀢𑁆𑀢𑁄𑀢𑀺? 𑀅𑀬𑀁 𑀲𑀫𑁆𑀩𑁄𑀥𑀯𑀢𑁆𑀣𑀼𑀯𑀺𑀲𑁂𑀲𑁄 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑁄 𑀧𑀦 𑀅𑀝𑁆𑀞𑀓𑀣𑀸𑀕𑀢𑀯𑀺𑀦𑀺𑀘𑁆𑀙𑀬𑀯𑀺𑀲𑁂𑀲𑀢𑁄𑀢𑀺 𑀢𑀲𑁆𑀫𑀸 𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀢𑀺𑀲𑀫𑀼𑀝𑁆𑀞𑀸𑀦𑀫𑁂𑀯𑀺𑀤𑀁 𑀓𑀸𑀬𑀘𑀺𑀢𑁆𑀢𑀯𑀸𑀘𑀸𑀘𑀺𑀢𑁆𑀢𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀯𑀲𑁂𑀦 𑀢𑀻𑀡𑀺 𑀲𑀫𑀼𑀝𑁆𑀞𑀸𑀦𑀸𑀦𑀺 𑀏𑀢𑀲𑁆𑀲𑀸𑀢𑀺 𑀓𑀢𑁆𑀯𑀸.

𑀇𑀫𑁂𑀳𑀺𑀧𑀺 𑀤𑁆𑀯𑀻𑀳𑀺 𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑁂𑀳𑀺 𑀲𑀺𑀓𑁆𑀔𑀸𑀧𑀤𑀦𑁆𑀢𑀭𑁂𑀲𑀼 𑀧𑀜𑁆𑀜𑀢𑁆𑀢𑀸𑀬𑁂𑀯 𑀆𑀧𑀢𑁆𑀢𑀺𑀬𑁄, 𑀅𑀦𑀸𑀧𑀢𑁆𑀢𑀺𑀬𑁄 𑀘 𑀤𑀲𑁆𑀲𑀺𑀢𑀸, 𑀦 𑀓𑁄𑀘𑀺 𑀆𑀧𑀢𑁆𑀢𑀺𑀯𑀺𑀲𑁂𑀲𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀓𑀺𑀫𑁂𑀢𑁂𑀲𑀁 𑀯𑀘𑀦𑁂𑀦𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀮𑀓𑁆𑀔𑀡𑀁 𑀞𑀧𑁂𑀢𑀼𑀁 𑀪𑀕𑀯𑀢𑀸 𑀉𑀧𑁆𑀧𑀦𑁆𑀦𑁂 𑀯𑀢𑁆𑀣𑀼𑀫𑁆𑀳𑀺 𑀤𑁆𑀯𑁂 𑀅𑀦𑀺𑀬𑀢𑀸 𑀧𑀜𑁆𑀜𑀢𑁆𑀢𑀸. 𑀓𑀣𑀁? 𑀏𑀯𑀭𑀽𑀧𑀸𑀬𑀧𑀺 𑀲𑀤𑁆𑀥𑁂𑀬𑁆𑀬𑀯𑀘𑀦𑀸𑀬 𑀉𑀧𑀸𑀲𑀺𑀓𑀸𑀬 𑀯𑀼𑀘𑁆𑀘𑀫𑀸𑀦𑁄 𑀧𑀝𑀺𑀚𑀸𑀦𑀫𑀸𑀦𑁄𑀯 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄, 𑀦 𑀅𑀧𑁆𑀧𑀝𑀺𑀚𑀸𑀦𑀫𑀸𑀦𑁄, 𑀢𑀲𑁆𑀫𑀸 ‘‘𑀬𑀸𑀬 𑀓𑀸𑀬𑀘𑀺 𑀆𑀧𑀢𑁆𑀢𑀺𑀬𑀸 𑀬𑁂𑀦 𑀓𑁂𑀦𑀘𑀺 𑀘𑁄𑀤𑀺𑀢𑁂 𑀧𑀝𑀺𑀜𑁆𑀜𑀸𑀢𑀓𑀭𑀡𑀁𑀬𑁂𑀯𑀗𑁆𑀕𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀇𑀫𑁂𑀳𑀺 𑀲𑀺𑀓𑁆𑀔𑀸𑀧𑀤𑁂𑀳𑀺 𑀯𑀺𑀦𑀺𑀘𑁆𑀙𑀬𑀮𑀓𑁆𑀔𑀡𑀁 𑀞𑀧𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀓𑀲𑁆𑀫𑀸 𑀪𑀺𑀓𑁆𑀔𑀼𑀦𑀻𑀦𑀁 𑀅𑀦𑀺𑀬𑀢𑀁 𑀦 𑀯𑀼𑀢𑁆𑀢𑀦𑁆𑀢𑀺? 𑀇𑀤𑀫𑁂𑀯 𑀮𑀓𑁆𑀔𑀡𑀁 𑀲𑀩𑁆𑀩𑀢𑁆𑀣 𑀅𑀦𑀼𑀕𑀢𑀦𑁆𑀢𑀺 𑀦 𑀯𑀼𑀢𑁆𑀢𑀁.

𑀤𑀼𑀢𑀺𑀬𑀸𑀦𑀺𑀬𑀢𑀓𑀣𑀸𑀯𑀡𑁆𑀡𑀦𑀸.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀅𑀦𑀺𑀬𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.