𑀲𑀗𑁆𑀖𑀸𑀤𑀺𑀲𑁂𑀲𑀓𑀣𑀸𑀯𑀡𑁆𑀡𑀦𑀸

𑁩𑁨𑁫. 𑀏𑀯𑀁 𑀦𑀸𑀦𑀸𑀦𑀬𑀧𑀝𑀺𑀫𑀡𑁆𑀟𑀺𑀢𑀲𑁆𑀲 𑀧𑀸𑀭𑀸𑀚𑀺𑀓𑀓𑀡𑁆𑀟𑀲𑁆𑀲 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀤𑀦𑀦𑁆𑀢𑀭𑀫𑀼𑀤𑁆𑀤𑀺𑀝𑁆𑀞𑀲𑁆𑀲 𑀢𑁂𑀭𑀲𑀓𑀡𑁆𑀟𑀲𑁆𑀲 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀫𑁄𑀘𑁂𑀢𑀼𑀓𑀸𑀫𑀢𑀸’’𑀢𑀺𑀆𑀤𑀺. 𑀫𑁄𑀘𑁂𑀢𑀼𑀁 𑀓𑀸𑀫𑁂𑀢𑀻𑀢𑀺 𑀫𑁄𑀘𑁂𑀢𑀼𑀓𑀸𑀫𑁄, 𑀢𑀲𑁆𑀲 𑀪𑀸𑀯𑁄 𑀫𑁄𑀘𑁂𑀢𑀼𑀓𑀸𑀫𑀢𑀸, 𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀫𑁄𑀘𑁂𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑀁. 𑀏𑀢𑁆𑀣 ‘‘𑀫𑁄𑀘𑁂𑀢𑀼𑀓𑀸𑀫𑀢𑀸’’𑀢𑀺 𑀇𑀫𑀺𑀦𑀸 𑀏𑀓𑀸𑀤𑀲𑀲𑀼 𑀭𑀸𑀕𑁂𑀲𑀼 ‘‘𑀫𑁄𑀘𑀦𑀲𑁆𑀲𑀸𑀤𑁄’’𑀢𑀺 𑀯𑀼𑀢𑁆𑀢𑀁 𑀇𑀫𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲 𑀫𑀽𑀮𑀓𑀸𑀭𑀡𑀁 𑀲𑀼𑀓𑁆𑀓𑀫𑁄𑀘𑀦𑀯𑀺𑀲𑀬𑀁 𑀭𑀸𑀕𑀫𑀸𑀳.

𑀏𑀓𑀸𑀤𑀲 𑀭𑀸𑀕𑀸 𑀦𑀸𑀫 ‘‘𑀫𑁄𑀘𑀦𑀲𑁆𑀲𑀸𑀤𑁄, 𑀫𑀼𑀘𑁆𑀘𑀦𑀲𑁆𑀲𑀸𑀤𑁄, 𑀫𑀼𑀢𑁆𑀢𑀲𑁆𑀲𑀸𑀤𑁄, 𑀫𑁂𑀣𑀼𑀦𑀲𑁆𑀲𑀸𑀤𑁄, 𑀨𑀲𑁆𑀲𑀲𑁆𑀲𑀸𑀤𑁄, 𑀓𑀡𑁆𑀟𑀼𑀯𑀦𑀲𑁆𑀲𑀸𑀤𑁄, 𑀤𑀲𑁆𑀲𑀦𑀲𑁆𑀲𑀸𑀤𑁄, 𑀦𑀺𑀲𑀚𑁆𑀚𑀲𑁆𑀲𑀸𑀤𑁄, 𑀯𑀸𑀘𑀲𑁆𑀲𑀸𑀤𑁄, 𑀕𑁂𑀳𑀲𑁆𑀲𑀺𑀢𑀧𑁂𑀫𑀁, 𑀯𑀦𑀪𑀗𑁆𑀕𑀺𑀬’’𑀦𑁆𑀢𑀺 𑀏𑀯𑀫𑀸𑀕𑀢𑀸. 𑀇𑀥 𑀫𑁄𑀘𑀦𑀁 𑀦𑀸𑀫 𑀲𑀫𑁆𑀪𑀯𑀥𑀸𑀢𑀼𑀫𑁄𑀘𑀦𑀁, 𑀢𑀤𑀢𑁆𑀣𑀸𑀬 𑀢𑀩𑁆𑀩𑀺𑀲𑀬𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑀯𑁂𑀤𑀦𑀸 𑀫𑁄𑀘𑀦𑀲𑁆𑀲𑀸𑀤𑁄 𑀦𑀸𑀫. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀫𑁄𑀘𑁂𑀢𑀼𑀁 𑀅𑀲𑁆𑀲𑀸𑀤𑁄 𑀫𑁄𑀘𑀦𑀲𑁆𑀲𑀸𑀤𑁄’’𑀢𑀺. 𑀫𑀼𑀘𑁆𑀘𑀫𑀸𑀦𑁂 𑀅𑀲𑁆𑀲𑀸𑀤𑁄 𑀫𑀼𑀘𑁆𑀘𑀦𑀲𑁆𑀲𑀸𑀤𑁄, 𑀲𑀫𑁆𑀪𑀯𑀥𑀸𑀢𑀼𑀫𑁆𑀳𑀺 𑀫𑀼𑀘𑁆𑀘𑀫𑀸𑀦𑁂 𑀢𑀁𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀫𑀼𑀘𑁆𑀘𑀦𑀲𑁆𑀲𑀸𑀤𑁄 𑀦𑀸𑀫. 𑀏𑀢𑁂𑀦𑁂𑀯 𑀦𑀬𑁂𑀦 𑀫𑀼𑀢𑁆𑀢𑀲𑁆𑀲𑀸𑀤𑀸𑀤𑀺𑀯𑀸𑀘𑀲𑁆𑀲𑀸𑀤𑀸𑀯𑀲𑀸𑀦𑁂𑀲𑀼 𑀧𑀤𑁂𑀲𑀼 𑀅𑀢𑁆𑀣𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑁂𑀳𑀺 𑀦𑀯𑀳𑀺 𑀧𑀤𑁂𑀳𑀺 𑀅𑀲𑁆𑀲𑀸𑀤𑀲𑀻𑀲𑁂𑀦 𑀓𑀼𑀦𑁆𑀢𑀬𑀝𑁆𑀞𑀺𑀜𑀸𑀬𑁂𑀦 𑀢𑀁𑀲𑀳𑀘𑀭𑀺𑀢𑁄 𑀭𑀸𑀕𑁄 𑀤𑀲𑁆𑀲𑀺𑀢𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀦𑀯𑀳𑀺 𑀧𑀤𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀅𑀲𑁆𑀲𑀸𑀤𑀲𑀻𑀲𑁂𑀦 𑀭𑀸𑀕𑁄 𑀯𑀼𑀢𑁆𑀢𑁄’’𑀢𑀺.

𑀕𑁂𑀳𑀲𑁆𑀲𑀺𑀢𑀧𑁂𑀫𑀦𑁆𑀢𑀺 𑀏𑀢𑁆𑀣 𑀕𑁂𑀳𑀝𑁆𑀞𑀸 𑀫𑀸𑀢𑀼𑀆𑀤𑀬𑁄 𑀆𑀥𑁂𑀬𑁆𑀬𑀆𑀥𑀸𑀭𑀯𑁄𑀳𑀸𑀭𑁂𑀦 ‘‘𑀕𑁂𑀳𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀢𑀦𑁆𑀦𑀺𑀲𑁆𑀲𑀺𑀢𑁄 𑀲𑀺𑀦𑁂𑀳𑀧𑀭𑀺𑀬𑀸𑀬𑁄 𑀭𑀸𑀕𑁄 ‘‘𑀕𑁂𑀳𑀲𑁆𑀲𑀺𑀢𑀧𑁂𑀫’’𑀦𑁆𑀢𑀺 𑀯𑀼𑀢𑁆𑀢𑁄. 𑀇𑀫𑀺𑀦𑀸 𑀧𑀤𑁂𑀦 𑀭𑀸𑀕𑀲𑁆𑀲 𑀲𑀪𑀸𑀯𑁄 𑀲𑀦𑁆𑀤𑀲𑁆𑀲𑀺𑀢𑁄. 𑀯𑀦𑀢𑁄 𑀪𑀜𑁆𑀚𑀺𑀢𑁆𑀯𑀸 𑀆𑀪𑀢𑀁 𑀬𑀁 𑀓𑀺𑀜𑁆𑀘𑀺 𑀨𑀮𑀧𑀼𑀧𑁆𑀨𑀸𑀤𑀺 𑀯𑀦𑀪𑀗𑁆𑀕𑀺𑀬𑀁 𑀦𑀸𑀫. 𑀇𑀥 𑀧𑀦 𑀭𑀸𑀕𑀯𑀲𑁂𑀦 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀁 𑀫𑀸𑀢𑀼𑀕𑀸𑀫𑁂𑀳𑀺 𑀯𑀺𑀭𑀳𑀤𑀼𑀓𑁆𑀔𑀸𑀧𑀦𑀬𑀦𑀢𑁆𑀣𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁪𑁦) 𑀢𑁂𑀲𑀁 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀤𑀲𑁆𑀲𑀦𑀨𑀼𑀲𑀦𑀯𑀲𑁂𑀦 𑀯𑀺𑀦𑁆𑀤𑀺𑀢𑀼𑀁 𑀭𑀸𑀕𑀻𑀳𑀺 𑀕𑀳𑁂𑀢𑀩𑁆𑀩𑀢𑁄 𑀢𑁂𑀳𑀺 𑀧𑀺𑀴𑀦𑁆𑀥𑀺𑀢𑀫𑀸𑀮𑀲𑀳𑀺𑀢𑀁 𑀢𑀫𑁆𑀩𑀽𑀮𑀦𑁆𑀢𑀺 𑀏𑀯𑀫𑀸𑀤𑀺 ‘‘𑀯𑀦𑀪𑀗𑁆𑀕𑀺𑀬’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀇𑀫𑀺𑀦𑀸 𑀧𑀢𑁆𑀣𑀺𑀢𑀯𑀺𑀲𑀬𑀕𑁄𑀘𑀭𑁄 𑀭𑀸𑀕𑁄 𑀢𑀤𑀸𑀬𑀢𑁆𑀢𑀯𑀢𑁆𑀣𑀼𑀯𑀲𑁂𑀦 𑀲𑀦𑁆𑀤𑀲𑁆𑀲𑀺𑀢𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀏𑀓𑁂𑀦 𑀧𑀤𑁂𑀦 𑀲𑀭𑀽𑀧𑁂𑀦𑁂𑀯 𑀭𑀸𑀕𑁄, 𑀏𑀓𑁂𑀦 𑀧𑀤𑁂𑀦 𑀯𑀢𑁆𑀣𑀼𑀦𑀸 𑀯𑀼𑀢𑁆𑀢𑁄. 𑀯𑀦𑀪𑀗𑁆𑀕𑁄 𑀳𑀺 𑀭𑀸𑀕𑀲𑁆𑀲 𑀯𑀢𑁆𑀣𑀼, 𑀦 𑀭𑀸𑀕𑁄𑀬𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁪𑁦).

‘‘𑀫𑁄𑀘𑁂𑀢𑀼𑀓𑀸𑀫𑀢𑀸’’𑀢𑀺 𑀇𑀤𑀫𑁂𑀯 𑀅𑀯𑀢𑁆𑀯𑀸 ‘‘𑀘𑀺𑀢𑁆𑀢’’𑀦𑁆𑀢𑀺 𑀯𑀘𑀦𑁂𑀦 𑀯𑀻𑀢𑀺𑀓𑁆𑀓𑀫𑀲𑀸𑀥𑀺𑀓𑀸𑀬 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀫𑀼𑀝𑁆𑀞𑀸𑀧𑀓𑀁 𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀢𑁂𑀦 𑀘𑀺𑀢𑁆𑀢𑁂𑀦 𑀲𑀫𑀼𑀝𑁆𑀞𑀸𑀧𑀺𑀬𑀫𑀸𑀦𑀁 𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀁 𑀯𑀻𑀢𑀺𑀓𑁆𑀓𑀫𑀁 ‘‘𑀯𑀸𑀬𑀸𑀫𑁄’’𑀢𑀺 𑀇𑀫𑀺𑀦𑀸 𑀤𑀲𑁆𑀲𑁂𑀢𑀺. 𑀯𑀸𑀬𑀸𑀫𑁄 𑀦𑀸𑀫 𑀢𑀁𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀯𑀻𑀭𑀺𑀬𑀁. 𑀏𑀢𑁆𑀣 𑀧𑀦 ‘‘𑀲𑁂𑀫𑁆𑀳𑁄 𑀕𑀼𑀴𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀨𑀮𑁂 𑀳𑁂𑀢𑀽𑀧𑀘𑀸𑀭𑀜𑀸𑀬𑁂𑀦 𑀯𑀻𑀢𑀺𑀓𑁆𑀓𑀫𑀲𑁆𑀲 𑀯𑀺𑀲𑁂𑀲𑀳𑁂𑀢𑀼𑀪𑀽𑀢𑀯𑀻𑀭𑀺𑀬𑀯𑀸𑀘𑀓𑁂𑀦 𑀘 𑀧𑀤𑁂𑀦 𑀯𑀻𑀢𑀺𑀓𑁆𑀓𑀫𑁄𑀯 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀚𑁆𑀛𑀢𑁆𑀢𑀩𑀸𑀳𑀺𑀭𑀯𑀢𑁆𑀣𑀼𑀖𑀝𑁆𑀝𑀦𑀁, 𑀆𑀓𑀸𑀲𑁂 𑀓𑀝𑀺𑀓𑀫𑁆𑀧𑀦𑀦𑁆𑀢𑀺 𑀲𑀼𑀓𑁆𑀓𑀫𑁄𑀘𑀦𑀢𑁆𑀣𑁄 𑀯𑀸𑀬𑀸𑀫𑁄𑀢𑀺 𑀅𑀢𑁆𑀣𑁄. 𑀲𑀼𑀓𑁆𑀓𑀲𑁆𑀲 𑀫𑁄𑀘𑀦𑀁 𑀲𑀼𑀓𑁆𑀓𑀫𑁄𑀘𑀦𑀁.

𑀏𑀢𑁆𑀣 𑀘 𑀲𑀼𑀓𑁆𑀓𑀲𑁆𑀲𑀸𑀢𑀺 ‘‘𑀲𑀼𑀓𑁆𑀓𑀦𑁆𑀢𑀺 𑀤𑀲 𑀲𑀼𑀓𑁆𑀓𑀸𑀦𑀺 𑀦𑀻𑀮𑀁 𑀧𑀻𑀢𑀓𑀁 𑀮𑁄𑀳𑀺𑀢𑀓𑀁 𑀑𑀤𑀸𑀢𑀁 𑀢𑀓𑁆𑀓𑀯𑀡𑁆𑀡𑀁 𑀤𑀓𑀯𑀡𑁆𑀡𑀁 𑀢𑁂𑀮𑀯𑀡𑁆𑀡𑀁 𑀔𑀻𑀭𑀯𑀡𑁆𑀡𑀁 𑀤𑀥𑀺𑀯𑀡𑁆𑀡𑀁 𑀲𑀧𑁆𑀧𑀺𑀯𑀡𑁆𑀡’’𑀦𑁆𑀢𑀺 (𑀧𑀸𑀭𑀸. 𑁨𑁩𑁭) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀸𑀦𑀺 𑀲𑀢𑁆𑀢𑀸𑀦𑀁 𑀧𑀺𑀢𑁆𑀢𑀸𑀤𑀺𑀆𑀲𑀬𑀪𑁂𑀤𑁂𑀦, 𑀧𑀣𑀯𑀺𑀥𑀸𑀢𑀼𑀆𑀤𑀻𑀦𑀁 𑀘𑀢𑀼𑀦𑁆𑀦𑀁 𑀯𑀸 𑀭𑀲𑀲𑁄𑀡𑀺𑀢𑀫𑀁𑀲𑀫𑁂𑀤𑀅𑀝𑁆𑀞𑀺𑀅𑀝𑁆𑀞𑀺𑀫𑀺𑀜𑁆𑀚𑀸𑀦𑀁 𑀙𑀦𑁆𑀦𑀁 𑀤𑁂𑀳𑀥𑀸𑀢𑀽𑀦𑀁 𑀯𑀸 𑀪𑁂𑀤𑁂𑀦 𑀅𑀦𑁂𑀓𑀥𑀸 𑀪𑀺𑀦𑁆𑀦𑁂 𑀤𑀲𑀯𑀺𑀥𑁂 𑀲𑀼𑀓𑁆𑀓𑁂 𑀅𑀜𑁆𑀜𑀢𑀭𑀲𑁆𑀲 𑀲𑀼𑀓𑁆𑀓𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀫𑁄𑀘𑀦𑀁 𑀯𑀺𑀲𑁆𑀲𑀝𑁆𑀞𑀻𑀢𑀺 𑀧𑀭𑀺𑀬𑀸𑀬𑀁, 𑀧𑀓𑀢𑀺𑀬𑀸 𑀞𑀺𑀢𑀲𑀓𑀝𑁆𑀞𑀸𑀦𑀢𑁄 𑀫𑁄𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑀧𑀤𑀪𑀸𑀚𑀦𑁂 ‘‘𑀯𑀺𑀲𑁆𑀲𑀝𑁆𑀞𑀻𑀢𑀺 𑀞𑀸𑀦𑀢𑁄 𑀘𑀸𑀯𑀦𑀸 𑀯𑀼𑀘𑁆𑀘𑀢𑀻’’𑀢𑀺 (𑀧𑀸𑀭𑀸. 𑁨𑁩𑁭). 𑀇𑀳 ‘‘𑀞𑀸𑀦𑀁 𑀦𑀸𑀫 𑀯𑀢𑁆𑀣𑀺𑀲𑀻𑀲𑀲𑀗𑁆𑀔𑀸𑀢𑀁 𑀫𑀼𑀢𑁆𑀢𑀓𑀭𑀡𑀫𑀽𑀮’’𑀦𑁆𑀢𑀺 𑀓𑁂𑀘𑀺. ‘‘𑀓𑀝𑀻’’𑀢𑀺 𑀅𑀧𑀭𑁂. ‘‘𑀲𑀓𑀮𑀓𑀸𑀬𑁄’’𑀢𑀺 𑀅𑀜𑁆𑀜𑁂. 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀯𑀘𑀦𑁂𑀲𑀼 ‘‘𑀢𑀢𑀺𑀬𑀲𑁆𑀲 𑀪𑀸𑀲𑀺𑀢𑀁 𑀲𑀼𑀪𑀸𑀲𑀺𑀢’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁩𑁭) 𑀅𑀝𑁆𑀞𑀓𑀣𑀸𑀬𑀁 𑀢𑀢𑀺𑀬𑀯𑀸𑀤𑀲𑁆𑀲 𑀓𑀢𑀧𑀸𑀲𑀁𑀲𑀢𑁆𑀢𑀸 𑀓𑁂𑀲𑀮𑁄𑀫𑀦𑀔𑀤𑀦𑁆𑀢𑀸𑀦𑀁 𑀫𑀁𑀲𑀯𑀺𑀦𑀺𑀫𑀼𑀢𑁆𑀢𑀝𑁆𑀞𑀸𑀦𑀜𑁆𑀘 𑀫𑀼𑀢𑁆𑀢𑀓𑀭𑀻𑀲𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀣𑀤𑁆𑀥𑀲𑀼𑀓𑁆𑀔𑀘𑀫𑁆𑀫𑀜𑁆𑀘 𑀯𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑀁 𑀲𑀓𑀮𑀲𑀭𑀻𑀭𑀁 𑀓𑀸𑀬𑀧𑁆𑀧𑀲𑀸𑀤𑀪𑀸𑀯𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀅𑀩𑀤𑁆𑀥𑀧𑀺𑀢𑁆𑀢𑀸𑀦𑀁 𑀯𑀺𑀬 𑀲𑀫𑁆𑀪𑀯𑀥𑀸𑀢𑀼𑀬𑀸 𑀘 𑀞𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀲𑀼𑀓𑁆𑀓𑀫𑁄𑀘𑀦’’𑀦𑁆𑀢𑀺 𑀇𑀫𑀺𑀦𑀸𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺? ‘‘𑀆𑀭𑁄𑀕𑁆𑀬𑀢𑁆𑀣𑀸𑀬, 𑀲𑀼𑀔𑀢𑁆𑀣𑀸𑀬, 𑀪𑁂𑀲𑀚𑁆𑀚𑀢𑁆𑀣𑀸𑀬, 𑀤𑀸𑀦𑀢𑁆𑀣𑀸𑀬, 𑀧𑀼𑀜𑁆𑀜𑀢𑁆𑀣𑀸𑀬, 𑀬𑀜𑁆𑀜𑀢𑁆𑀣𑀸𑀬, 𑀲𑀕𑁆𑀕𑀢𑁆𑀣𑀸𑀬, 𑀩𑀻𑀚𑀢𑁆𑀣𑀸𑀬, 𑀯𑀻𑀫𑀁𑀲𑀢𑁆𑀣𑀸𑀬, 𑀤𑀯𑀢𑁆𑀣𑀸𑀬 𑀫𑁄𑀘𑁂𑀢𑀻’’𑀢𑀺 (𑀧𑀸𑀭𑀸. 𑁨𑁩𑁭) 𑀯𑀼𑀢𑁆𑀢𑀤𑀲𑀯𑀺𑀥𑀅𑀥𑀺𑀧𑁆𑀧𑀸𑀬𑀦𑁆𑀢𑁄𑀕𑀥𑀅𑀜𑁆𑀜𑀢𑀭𑀅𑀥𑀺𑀧𑁆𑀧𑀸𑀬𑁄 𑀳𑀼𑀢𑁆𑀯𑀸 ‘‘𑀭𑀸𑀕𑀽𑀧𑀢𑁆𑀣𑀫𑁆𑀪𑁂, 𑀯𑀘𑁆𑀘𑀽𑀧𑀢𑁆𑀣𑀫𑁆𑀪𑁂, 𑀧𑀲𑁆𑀲𑀸𑀯𑀽𑀧𑀢𑁆𑀣𑀫𑁆𑀪𑁂, 𑀯𑀸𑀢𑀽𑀧𑀢𑁆𑀣𑀫𑁆𑀪𑁂, 𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀤𑀝𑁆𑀞𑀽𑀧𑀢𑁆𑀣𑀫𑁆𑀪𑁂 𑀫𑁄𑀘𑁂𑀢𑀻’’𑀢𑀺 (𑀧𑀸𑀭𑀸. 𑁨𑁩𑁭) 𑀯𑀼𑀢𑁆𑀢𑀧𑀜𑁆𑀘𑀯𑀺𑀥𑀓𑀸𑀮𑀸𑀦𑀫𑀜𑁆𑀜𑀢𑀭𑀓𑀸𑀮𑁂 ‘‘𑀅𑀚𑁆𑀛𑀢𑁆𑀢𑀭𑀽𑀧𑁂, 𑀩𑀳𑀺𑀤𑁆𑀥𑀸𑀭𑀽𑀧𑁂, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀽𑀧𑁂, 𑀆𑀓𑀸𑀲𑁂 𑀓𑀝𑀺𑀁 𑀓𑀫𑁆𑀧𑁂𑀦𑁆𑀢𑁄 𑀫𑁄𑀘𑁂𑀢𑀻’’𑀢𑀺 (𑀧𑀸𑀭𑀸. 𑁨𑁩𑁭) 𑀯𑀼𑀢𑁆𑀢𑀘𑀢𑀼𑀭𑀼𑀧𑀸𑀬𑀸𑀦𑀫𑀜𑁆𑀜𑀢𑀭𑁂𑀦 𑀉𑀧𑀸𑀬𑁂𑀦 𑀬𑀣𑀸𑀯𑀼𑀢𑁆𑀢𑀭𑀸𑀕𑀧𑀺𑀲𑀸𑀘𑀯𑀲𑁂𑀦 𑀯𑀺𑀯𑀲𑁄 𑀳𑀼𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀦𑀻𑀮𑀸𑀤𑀺𑀤𑀲𑀯𑀺𑀥𑀲𑀫𑁆𑀪𑀯𑀥𑀸𑀢𑀽𑀦𑀫𑀜𑁆𑀜𑀢𑀭𑀁 𑀬𑀣𑀸𑀯𑀼𑀢𑁆𑀢𑀝𑁆𑀞𑀸𑀦𑀢𑁄 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀬 𑀧𑀺𑀯𑀦𑀫𑀢𑁆𑀢𑀫𑁆𑀧𑀺 𑀲𑀘𑁂 𑀫𑁄𑀘𑁂𑀢𑀻𑀢𑀺 𑀲𑀗𑁆𑀔𑁂𑀧𑀢𑁄 𑀕𑀳𑁂𑀢𑀩𑁆𑀩𑀁. 𑀏𑀢𑁆𑀣 𑀘 𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀸 𑀦𑀸𑀫 𑀮𑁄𑀫𑀲𑀧𑀸𑀡𑀸, 𑀬𑁂𑀲𑀁 𑀮𑁄𑀫𑁂 𑀅𑀮𑁆𑀮𑀺𑀦𑁂 𑀅𑀗𑁆𑀕𑀚𑀸𑀢𑀁 𑀓𑀫𑁆𑀫𑀦𑀺𑀬𑀁 𑀳𑁄𑀢𑀺.

𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑁂𑀦𑀸𑀢𑀺 𑀲𑀼𑀧𑀺𑀦𑁄 𑀏𑀯 𑀲𑀼𑀧𑀺𑀦𑀦𑁆𑀢𑁄, 𑀦𑀺𑀲𑁆𑀲𑀓𑁆𑀓𑀯𑀘𑀦𑀧𑁆𑀧𑀲𑀗𑁆𑀕𑁂 𑀓𑀭𑀡𑀯𑀘𑀦𑀢𑁄 𑀲𑀼𑀧𑀺𑀦𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀼𑀧𑀺𑀦𑀸 𑀦𑀸𑀫 ‘‘𑀯𑀸𑀢𑀸𑀤𑀺𑀥𑀸𑀢𑀼𑀓𑁆𑀔𑁄𑀪𑀯𑀲𑁂𑀦 𑀯𑀸 𑀧𑀼𑀩𑁆𑀩𑀸𑀦𑀼𑀪𑀽𑀢𑀇𑀢𑁆𑀣𑀺𑀭𑀽𑀧𑀸𑀤𑀺𑀯𑀺𑀲𑀬𑀯𑀲𑁂𑀦 𑀯𑀸 𑀇𑀝𑁆𑀞𑀸𑀦𑀺𑀝𑁆𑀞𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀯𑀸 𑀧𑀼𑀜𑁆𑀜𑁂𑀦 𑀧𑀝𑀺𑀮𑀪𑀺𑀢𑀩𑁆𑀩𑀅𑀢𑁆𑀣𑀲𑁆𑀲, 𑀅𑀧𑀼𑀜𑁆𑀜𑁂𑀦 𑀧𑀢𑁆𑀢𑀩𑁆𑀩𑀸𑀦𑀢𑁆𑀣𑀲𑁆𑀲 𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀯𑀲𑁂𑀦 𑀯𑀸 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁩𑁭) 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀓𑀸𑀭𑀡𑁂𑀲𑀼 𑀏𑀓𑁂𑀦 𑀓𑀸𑀭𑀡𑁂𑀦 𑀓𑀧𑀺𑀦𑀺𑀤𑁆𑀤𑀸𑀬 𑀲𑀼𑀧𑀺𑀦𑁂 𑀤𑀺𑀲𑁆𑀲𑀫𑀸𑀦𑀸𑀭𑀫𑁆𑀫𑀡𑀢𑁄 𑀬𑀁 𑀲𑀼𑀓𑁆𑀓𑀫𑁄𑀘𑀦𑀁 𑀳𑁄𑀢𑀺, 𑀢𑀁 𑀅𑀯𑀺𑀲𑀬𑀁 𑀲𑀼𑀓𑁆𑀓𑀫𑁄𑀘𑀦𑀁 𑀯𑀺𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀗𑁆𑀖𑀸𑀤𑀺𑀲𑁂𑀲𑁄𑀯 𑀲𑀗𑁆𑀖𑀸𑀤𑀺𑀲𑁂𑀲𑀢𑀸. 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀢𑀼𑀓𑀸𑀫𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀆𑀤𑀺𑀫𑁆𑀳𑀺 𑀧𑀭𑀺𑀯𑀸𑀲𑀤𑀸𑀦𑀢𑁆𑀣𑀁, 𑀫𑀚𑁆𑀛𑁂 𑀘 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑁂𑀦 𑀯𑀺𑀦𑀸 𑀯𑀸 𑀲𑀳 𑀯𑀸 𑀫𑀸𑀦𑀢𑁆𑀢𑀤𑀸𑀦𑀢𑁆𑀣𑀁, 𑀅𑀯𑀲𑀸𑀦𑁂 𑀅𑀩𑁆𑀪𑀸𑀦𑀢𑁆𑀣𑀜𑁆𑀘 𑀲𑀗𑁆𑀖𑁄 𑀏𑀲𑀺𑀢𑀩𑁆𑀩𑁄𑀢𑀺 ‘‘𑀲𑀗𑁆𑀖𑁄 𑀆𑀤𑀺𑀫𑁆𑀳𑀺 𑀘𑁂𑀯 𑀲𑁂𑀲𑁂 𑀘 𑀇𑀘𑁆𑀙𑀺𑀢𑀩𑁆𑀩𑁄 𑀅𑀲𑁆𑀲𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁩𑁭; 𑀓𑀗𑁆𑀔𑀸. 𑀅𑀝𑁆𑀞. 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀢𑁆𑀢𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀦𑀸𑀫, 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑀧𑀤𑀪𑀸𑀚𑀦𑁂 ‘‘𑀲𑀗𑁆𑀖𑁄𑀯 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀧𑀭𑀺𑀯𑀸𑀲𑀁 𑀤𑁂𑀢𑀺, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺, 𑀫𑀸𑀦𑀢𑁆𑀢𑀁 𑀤𑁂𑀢𑀺, 𑀅𑀩𑁆𑀪𑁂𑀢𑀺, 𑀦 𑀲𑀫𑁆𑀩𑀳𑀼𑀮𑀸, 𑀦 𑀏𑀓𑀧𑀼𑀕𑁆𑀕𑀮𑁄, 𑀢𑁂𑀦 𑀯𑀼𑀘𑁆𑀘𑀢𑀺 ‘𑀲𑀗𑁆𑀖𑀸𑀤𑀺𑀲𑁂𑀲𑁄’𑀢𑀺. 𑀢𑀲𑁆𑀲𑁂𑀯 𑀆𑀧𑀢𑁆𑀢𑀺𑀦𑀺𑀓𑀸𑀬𑀲𑁆𑀲 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀅𑀥𑀺𑀯𑀘𑀦𑀁, 𑀢𑁂𑀦𑀧𑀺 𑀯𑀼𑀘𑁆𑀘𑀢𑀺 ‘𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 (𑀧𑀸𑀭𑀸. 𑁨𑁩𑁭). 𑀏𑀢𑁆𑀣 𑀘 𑀧𑀭𑀺𑀯𑀸𑀲𑀸𑀤𑀺𑀓𑀣𑀸 𑀲𑀗𑁆𑀖𑀸𑀤𑀺𑀲𑁂𑀲𑀸𑀯𑀲𑀸𑀦𑁂 𑀆𑀕𑀢𑀝𑁆𑀞𑀸𑀦𑁂𑀬𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑁩𑁨𑁬. 𑀏𑀢𑁆𑀢𑀸𑀯𑀢𑀸 𑀫𑀽𑀮𑀲𑀺𑀓𑁆𑀔𑀸𑀧𑀤𑀸𑀕𑀢𑀁 𑀅𑀢𑁆𑀢𑀽𑀧𑀓𑁆𑀓𑀫𑀫𑀽𑀮𑀓𑀁 𑀆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀇𑀫𑀺𑀲𑁆𑀲𑀸 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀬𑀸 𑀧𑀭𑀽𑀧𑀓𑁆𑀓𑀫𑁂𑀦𑀧𑀺 𑀆𑀧𑀚𑁆𑀚𑀦𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀭𑁂𑀦𑀸’’𑀢𑀺𑀆𑀤𑀺. 𑀉𑀧𑀓𑁆𑀓𑀫𑀸𑀧𑁂𑀢𑁆𑀯𑀸𑀢𑀺 𑀅𑀗𑁆𑀕𑀚𑀸𑀢𑀲𑁆𑀲 𑀕𑀳𑀡𑀁 𑀯𑀸 𑀖𑀝𑁆𑀝𑀦𑀁 𑀯𑀸 𑀓𑀸𑀭𑁂𑀢𑁆𑀯𑀸.

𑁩𑁨𑁭. 𑀲𑀜𑁆𑀘𑀺𑀘𑁆𑀘𑀸𑀢𑀺 ‘‘𑀉𑀧𑀓𑁆𑀓𑀫𑀸𑀫𑀺 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀘𑁂𑀢𑁂𑀢𑁆𑀯𑀸 𑀧𑀓𑀧𑁆𑀧𑁂𑀢𑁆𑀯𑀸. 𑀉𑀧𑀓𑁆𑀓𑀫𑀦𑁆𑀢𑀲𑁆𑀲𑀸𑀢𑀺 𑀅𑀚𑁆𑀛𑀢𑁆𑀢𑀭𑀽𑀧𑀸𑀤𑀻𑀲𑀼 𑀢𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀖𑀝𑁆𑀝𑁂𑀦𑁆𑀢𑀲𑁆𑀲. 𑀲𑀫𑀼𑀤𑁆𑀤𑀺𑀝𑁆𑀞𑀦𑁆𑀢𑀺 ‘‘𑀘𑁂𑀢𑁂𑀢𑀺 𑀉𑀧𑀓𑁆𑀓𑀫𑀢𑀺 𑀦 𑀫𑀼𑀘𑁆𑀘𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀧𑀸𑀭𑀸. 𑁨𑁬𑁨) 𑀧𑀤𑀪𑀸𑀚𑀦𑁂 𑀪𑀕𑀯𑀢𑀸 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁨𑁮. 𑀇𑀫𑀺𑀲𑁆𑀲𑀁 𑀕𑀸𑀣𑀸𑀬𑀁 ‘‘𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀉𑀧𑀓𑁆𑀓𑀫𑀦𑁆𑀢𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀅𑀚𑁆𑀛𑀢𑁆𑀢𑀭𑀽𑀧𑁂 𑀯𑀸 𑀩𑀳𑀺𑀤𑁆𑀥𑀸𑀭𑀽𑀧𑁂 𑀯𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀽𑀧𑁂 𑀯𑀸 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀖𑀝𑁆𑀝𑁂𑀦𑁆𑀢𑀲𑁆𑀲𑀸𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀅𑀗𑁆𑀕𑀚𑀸𑀢𑀖𑀝𑁆𑀝𑀦𑁂𑀦 𑀯𑀺𑀦𑀸𑀪𑀸𑀯𑀢𑁄 𑀇𑀫𑀺𑀦𑀸 𑀅𑀲𑀗𑁆𑀕𑀬𑁆𑀳𑀫𑀸𑀦𑀲𑁆𑀲𑀸𑀧𑀺 𑀆𑀓𑀸𑀲𑁂 𑀓𑀝𑀺𑀓𑀫𑁆𑀧𑀦𑁂𑀦 𑀲𑀼𑀓𑁆𑀓𑀫𑁄𑀘𑀦𑁂 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲 𑀧𑀞𑀫𑀕𑀸𑀣𑀸𑀬𑀁 ‘‘𑀯𑀸𑀬𑀸𑀫𑁄’’𑀢𑀺 𑀲𑀸𑀫𑀜𑁆𑀜𑀯𑀘𑀦𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸 𑀢𑀁 𑀞𑀧𑁂𑀢𑁆𑀯𑀸 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲 𑀆𑀓𑀸𑀲𑁂 𑀓𑀝𑀺𑀁 𑀓𑀫𑁆𑀧𑁂𑀦𑁆𑀢𑀲𑁆𑀲 𑀅𑀲𑀼𑀘𑀺 𑀫𑀼𑀘𑁆𑀘𑀺…𑀧𑁂… 𑀅𑀲𑀼𑀘𑀺 𑀦 𑀫𑀼𑀘𑁆𑀘𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… 𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀆𑀓𑀸𑀲𑁂𑀓𑀝𑀺𑀓𑀫𑁆𑀧𑀦𑀯𑀢𑁆𑀣𑀼𑀫𑁆𑀳𑀺 𑀯𑀼𑀢𑁆𑀢𑀢𑁆𑀢𑀸 𑀅𑀫𑀼𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀁 𑀲𑀗𑁆𑀕𑀳𑁂𑀢𑀼𑀫𑀸𑀳 ‘‘𑀲𑀜𑁆𑀘𑀺𑀘𑁆𑀘𑀸’’𑀢𑀺𑀆𑀤𑀺.

𑀢𑀢𑁆𑀣 𑀲𑀜𑁆𑀘𑀺𑀘𑁆𑀘𑀸𑀢𑀺 ‘‘𑀉𑀧𑀓𑁆𑀓𑀫𑀸𑀫𑀺 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀚𑀸𑀦𑀺𑀢𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀉𑀧𑀓𑁆𑀓𑀫𑀦𑁆𑀢𑀲𑁆𑀲𑀸’’𑀢𑀺 𑀲𑀸𑀫𑀜𑁆𑀜𑀢𑁄 𑀢𑀁 𑀯𑀺𑀲𑁂𑀲𑁂𑀢𑀼𑀁 ‘‘𑀆𑀓𑀸𑀲𑁂 𑀓𑀫𑁆𑀧𑀦𑁂𑀦𑀧𑀻’’𑀢𑀺 𑀆𑀳, 𑀓𑀝𑀺𑀓𑀫𑁆𑀧𑀦𑁂𑀦𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀓𑀣𑀫𑀺𑀤𑀁 𑀮𑀩𑁆𑀪𑀢𑀻𑀢𑀺 𑀘𑁂? 𑀇𑀫𑀸𑀬 𑀓𑀣𑀸𑀬 𑀲𑀗𑁆𑀕𑀳𑁂𑀢𑀩𑁆𑀩𑀯𑀢𑁆𑀣𑀼𑀫𑁆𑀳𑀺 ‘‘𑀆𑀓𑀸𑀲𑁂 𑀓𑀝𑀺𑀁 𑀓𑀫𑁆𑀧𑁂𑀦𑁆𑀢𑀲𑁆𑀲𑀸’’𑀢𑀺 (𑀧𑀸𑀭𑀸. 𑁨𑁬𑁬) 𑀧𑀸𑀞𑁂 ‘‘𑀓𑀝𑀺𑀁 𑀓𑀫𑁆𑀧𑁂𑀦𑁆𑀢𑀲𑁆𑀲𑀸’’𑀢𑀺 𑀯𑀘𑀦𑀲𑀳𑀘𑀭𑀲𑁆𑀲 ‘‘𑀆𑀓𑀸𑀲𑁂’’𑀢𑀺 𑀯𑀘𑀦𑀲𑁆𑀲 𑀲𑀦𑁆𑀦𑀺𑀥𑀸𑀦𑀩𑀮𑁂𑀦 𑀮𑀩𑁆𑀪𑀢𑀺 𑀅𑀢𑁆𑀣𑀧𑁆𑀧𑀓𑀭𑀡𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀸 𑀲𑀤𑁆𑀤𑀸𑀦𑀁 𑀯𑀺𑀲𑁂𑀲𑀢𑁆𑀣𑀤𑀻𑀧𑀦𑀢𑁄.

𑁩𑁨𑁯. 𑀯𑀢𑁆𑀣𑀺𑀦𑁆𑀢𑀺 𑀫𑀼𑀢𑁆𑀢𑀯𑀢𑁆𑀣𑀺𑀁, 𑀫𑀼𑀢𑁆𑀢𑀓𑀭𑀡𑀲𑁆𑀲 𑀯𑀢𑁆𑀣𑀺𑀦𑁆𑀢𑀺 𑀅𑀢𑁆𑀣𑁄. 𑀓𑀻𑀴𑀸𑀬 𑀧𑀽𑀭𑁂𑀢𑁆𑀯𑀸𑀢𑀺 𑀕𑀸𑀫𑀤𑀸𑀭𑀓𑁄 𑀯𑀺𑀬 𑀓𑀻𑀴𑀺𑀢𑀼𑀓𑀸𑀫𑀢𑀸𑀬 𑀫𑀼𑀢𑁆𑀢𑀯𑀢𑁆𑀣𑀺𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑀯𑀢𑁆𑀣𑀺𑀯𑀢𑁆𑀣𑀼𑀫𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀢𑁂 𑀪𑀺𑀓𑁆𑀔𑀽 𑀯𑀢𑁆𑀣𑀺𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀸 𑀕𑀸𑀫𑀤𑀸𑀭𑀓𑀸𑀯𑀺𑀬 𑀧𑀲𑁆𑀲𑀸𑀯𑀫𑀓𑀁𑀲𑀽’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁬𑁪). ‘‘𑀦 𑀯𑀝𑁆𑀝𑀢𑀻’’𑀢𑀺 𑀲𑀸𑀫𑀜𑁆𑀜𑁂𑀦 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀯𑀼𑀢𑁆𑀢𑀦𑀬𑁂𑀦 𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑁂𑀦 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀲𑁆𑀲 𑀲𑀼𑀓𑁆𑀓𑁂 𑀫𑀼𑀢𑁆𑀢𑁂 𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑁄 𑀘𑁂𑀢𑁂𑀢𑀺, 𑀉𑀧𑀓𑁆𑀓𑀫𑀢𑀺, 𑀫𑀼𑀘𑁆𑀘𑀢𑀻𑀢𑀺 𑀅𑀗𑁆𑀕𑀸𑀦𑀁 𑀲𑀫𑁆𑀧𑀦𑁆𑀦𑀢𑁆𑀢𑀸 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲, 𑀅𑀫𑀼𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀲𑁆𑀲 𑀲𑀫𑁆𑀪𑀯𑀢𑁄 𑀉𑀪𑀬𑀲𑀗𑁆𑀕𑀳𑀢𑁆𑀣𑀫𑀸𑀳.

𑁩𑁩𑁦. 𑀉𑀧𑀦𑀺𑀚𑁆𑀛𑀸𑀬𑀦𑀯𑀢𑁆𑀣𑀼𑀫𑁆𑀳𑀺 ‘‘𑀦 𑀘 𑀪𑀺𑀓𑁆𑀔𑀯𑁂 𑀲𑀸𑀭𑀢𑁆𑀢𑁂𑀦 𑀫𑀸𑀢𑀼𑀕𑀸𑀫𑀲𑁆𑀲 𑀅𑀗𑁆𑀕𑀚𑀸𑀢𑀁 𑀉𑀧𑀦𑀺𑀚𑁆𑀛𑀸𑀬𑀺𑀢𑀩𑁆𑀩𑀁, 𑀬𑁄 𑀉𑀧𑀦𑀺𑀚𑁆𑀛𑀸𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁨𑁬𑁬) 𑀧𑀸𑀴𑀺𑀬𑀁 ‘‘𑀫𑀸𑀢𑀼𑀕𑀸𑀫𑀲𑁆𑀲𑀸’’𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀢𑁆𑀢𑀸 ‘‘𑀢𑀺𑀲𑁆𑀲𑀦𑁆𑀦’’𑀦𑁆𑀢𑀺 𑀯𑀤𑀢𑀺. 𑀢𑀺𑀲𑁆𑀲𑀦𑁆𑀦𑀁 𑀧𑀦 𑀇𑀢𑁆𑀣𑀻𑀦𑀦𑁆𑀢𑀺 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀕𑀢𑀯𑀲𑁂𑀦 𑀢𑀺𑀲𑁆𑀲𑀦𑁆𑀦𑀁 𑀇𑀢𑁆𑀣𑀻𑀦𑀁. ‘‘𑀅𑀗𑁆𑀕𑀚𑀸𑀢’’𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 ‘‘𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀫𑀼𑀢𑁆𑀢𑀓𑀭𑀡𑀫𑁂𑀯 𑀯𑀼𑀘𑁆𑀘𑀢𑀺, 𑀧𑀝𑀲𑀢𑁂𑀦𑀸𑀧𑀺 𑀧𑀝𑀺𑀘𑁆𑀙𑀸𑀤𑀺𑀢𑀁 𑀯𑀸 𑀅𑀧𑁆𑀧𑀝𑀺𑀘𑁆𑀙𑀸𑀤𑀺𑀢𑀁 𑀯𑀸 𑀬𑁄𑀦𑀺𑀫𑀕𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀘𑁂𑀧𑀺 𑀧𑀝𑀲𑀢𑀁 𑀦𑀺𑀯𑀢𑁆𑀣𑀸 𑀳𑁄𑀢𑀺, 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀞𑀢𑁆𑀯𑀸 ‘𑀇𑀫𑀲𑁆𑀫𑀺𑀁 𑀦𑀸𑀫 𑀑𑀓𑀸𑀲𑁂 𑀦𑀺𑀫𑀺𑀢𑁆𑀢’𑀦𑁆𑀢𑀺 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯. 𑀅𑀦𑀺𑀯𑀢𑁆𑀣𑀸𑀦𑀁 𑀕𑀸𑀫𑀤𑀸𑀭𑀺𑀓𑀸𑀦𑀁 𑀦𑀺𑀫𑀺𑀢𑁆𑀢𑀁 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲 𑀧𑀦 𑀓𑀺𑀫𑁂𑀯 𑀯𑀢𑁆𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁬𑁬). 𑀧𑀼𑀭𑀢𑁄 𑀯𑀸𑀢𑀺 𑀏𑀢𑁆𑀣 ‘‘𑀞𑀢𑁆𑀯𑀸’’𑀢𑀺 𑀧𑀸𑀞𑀲𑁂𑀲𑁄.

𑁩𑁩𑁧. 𑀏𑀓𑁂𑀦…𑀧𑁂… 𑀧𑀲𑁆𑀲𑀢𑁄 𑀏𑀓𑀁 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀏𑀓𑁂𑀦 𑀧𑀬𑁄𑀕𑁂𑀦 𑀏𑀓𑀁 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀘𑀦𑀢𑁄 𑀅𑀦𑁂𑀓𑁂𑀳𑀺 𑀧𑀬𑁄𑀕𑁂𑀳𑀺 𑀅𑀦𑁂𑀓𑀸𑀦𑀺 𑀤𑀼𑀓𑁆𑀓𑀝𑀸𑀦𑀻𑀢𑀺 𑀩𑁆𑀬𑀢𑀺𑀭𑁂𑀓𑀢𑁄 𑀮𑀩𑁆𑀪𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀇𑀢𑁄 𑀘𑀺𑀢𑁄 𑀘 𑀯𑀺𑀮𑁄𑀓𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁬𑁬). 𑀇𑀫𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬 ‘‘𑀇𑀢𑁄 𑀘𑀺𑀢𑁄 𑀘𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀉𑀫𑁆𑀫𑀻𑀮𑀦𑀦𑀺𑀫𑀻𑀮𑀦𑀦𑁆𑀢𑀺 𑀏𑀢𑁆𑀣 ‘‘𑀯𑀺𑀯𑀺𑀥𑀸 𑀢𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀢𑀫𑁂𑀯 𑀑𑀮𑁄𑀓𑁂𑀦𑁆𑀢𑀲𑁆𑀲𑀸’’𑀢𑀺 𑀮𑀩𑁆𑀪𑀢𑀺.

𑁩𑁩𑁨. 𑀅𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲 𑀫𑀼𑀢𑁆𑀢𑀲𑁆𑀫𑀺𑀁 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸𑀢𑀺 𑀬𑁄𑀚𑀦𑀸. 𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀁 𑀯𑀺𑀦𑀸 𑀪𑁂𑀲𑀚𑁆𑀚𑀓𑀭𑀡𑀢𑁆𑀣𑀁 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀅𑀗𑁆𑀕𑀚𑀸𑀢𑁂 𑀪𑁂𑀲𑀚𑁆𑀚𑀮𑁂𑀧𑀁 𑀓𑀭𑁄𑀦𑁆𑀢𑀲𑁆𑀲 𑀯𑀸 𑀲𑀼𑀤𑁆𑀥𑀘𑀺𑀢𑁆𑀢𑁂𑀦𑁂𑀯 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲 𑀯𑀸 𑀫𑀼𑀢𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀇𑀤𑀁 ‘‘𑀅𑀦𑀸𑀧𑀢𑁆𑀢𑀺 𑀲𑀼𑀧𑀺𑀦𑀦𑁆𑀢𑁂𑀦 𑀦𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁨𑁬𑁩) 𑀦𑀬𑁂𑀦 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀯𑀼𑀢𑁆𑀢𑀫𑁂𑀯𑀸𑀢𑀺 𑀅𑀢𑁆𑀣𑁄.

𑀇𑀫𑀲𑁆𑀫𑀺𑀁 𑀧𑀸𑀞𑁂 ‘‘𑀅𑀦𑀼𑀧𑀓𑁆𑀓𑀫𑀦𑁆𑀢𑀲𑁆𑀲𑀸’’𑀢𑀺 𑀅𑀯𑀼𑀢𑁆𑀢𑁂𑀧𑀺 𑀇𑀫𑀲𑁆𑀲 𑀧𑀸𑀞𑀲𑁆𑀲 𑀧𑀼𑀭𑀢𑁄 ‘‘𑀘𑁂𑀢𑁂𑀢𑀺 𑀦 𑀉𑀧𑀓𑁆𑀓𑀫𑀢𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑁨𑁬𑁨) 𑀘 ‘‘𑀦 𑀘𑁂𑀢𑁂𑀢𑀺 𑀦 𑀉𑀧𑀓𑁆𑀓𑀫𑀢𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑁨𑁬𑁨) 𑀘 𑀯𑀘𑀦𑀢𑁄 𑀢𑀁 𑀲𑀗𑁆𑀕𑀳𑁂𑀢𑀼𑀫𑀸𑀳 ‘‘𑀅𑀦𑀼𑀧𑀓𑁆𑀓𑀫𑀢𑁄𑀧𑀺 𑀘 𑀫𑀼𑀢𑁆𑀢𑀲𑁆𑀫𑀺𑀁 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸’’𑀢𑀺. 𑀫𑁄𑀘𑀦𑀲𑁆𑀲𑀸𑀤𑀭𑀸𑀕𑁂𑀦 𑀧𑀻𑀴𑀺𑀢𑁄 𑀳𑀼𑀢𑁆𑀯𑀸 ‘‘𑀅𑀳𑁄 𑀯𑀢 𑀫𑁂 𑀫𑀼𑀘𑁆𑀘𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑀸 𑀏𑀯𑀭𑀽𑀧𑀫𑁄𑀘𑀦𑀲𑁆𑀲𑀸𑀤𑀭𑀸𑀕𑀧𑀻𑀴𑀸𑀧𑀼𑀩𑁆𑀩𑀗𑁆𑀕𑀫𑀘𑀺𑀢𑁆𑀢𑁂 𑀅𑀲𑀢𑀺𑀧𑀺 𑀓𑁂𑀯𑀮𑀁 𑀓𑀸𑀫𑀯𑀺𑀢𑀓𑁆𑀓𑀫𑀢𑁆𑀢𑁂𑀦 𑀉𑀧𑀳𑀢𑁄 𑀳𑀼𑀢𑁆𑀯𑀸 𑀢𑀸𑀤𑀺𑀲𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀢𑁆𑀣𑀽𑀲𑀼 𑀖𑀝𑁆𑀝𑀦𑀯𑀲𑁂𑀦 𑀯𑀸 𑀆𑀓𑀸𑀲𑁂 𑀓𑀝𑀺𑀓𑀫𑁆𑀧𑀦𑀯𑀲𑁂𑀦 𑀯𑀸 𑀉𑀧𑀓𑁆𑀓𑀫𑀁 𑀅𑀓𑀭𑁄𑀦𑁆𑀢𑀲𑁆𑀲 𑀢𑀸𑀤𑀺𑀲𑀘𑀺𑀦𑁆𑀢𑀸𑀩𑀮𑁂𑀦 𑀯𑀸 𑀓𑀸𑀫𑀯𑀺𑀢𑀓𑁆𑀓𑀩𑀮𑁂𑀦 𑀯𑀸 𑀲𑀼𑀓𑁆𑀓𑁂 𑀫𑀼𑀢𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀇𑀤𑀁 𑀬𑀣𑀸𑀯𑀼𑀢𑁆𑀢𑀧𑀸𑀞𑀯𑀲𑁂𑀦 𑀧𑀓𑀸𑀲𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀲𑀼𑀧𑀺𑀦𑀦𑁆𑀢𑁂𑀦 𑀫𑀼𑀢𑁆𑀢𑀲𑁆𑀫𑀺𑀁, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸𑀢𑀺 𑀏𑀢𑁆𑀣 𑀅𑀦𑁆𑀢𑀲𑀤𑁆𑀤𑀢𑁆𑀣𑀸𑀪𑀸𑀯𑀢𑁄 𑀲𑀼𑀧𑀺𑀦𑁂𑀢𑀺 𑀅𑀢𑁆𑀣𑁄. 𑀲𑀼𑀧𑀺𑀦𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀯𑀸 𑀫𑀸𑀢𑀼𑀕𑀸𑀫𑁂𑀳𑀺 𑀓𑀸𑀬𑀲𑀁𑀲𑀕𑁆𑀕𑀁 𑀆𑀧𑀚𑁆𑀚𑀦𑁆𑀢𑀲𑁆𑀲 𑀯𑀸 𑀲𑀼𑀓𑁆𑀓𑁂 𑀫𑀼𑀢𑁆𑀢𑁂𑀧𑀺 𑀅𑀯𑀺𑀲𑀬𑀢𑁆𑀢𑀸 𑀅𑀦𑀸𑀧𑀢𑁆𑀢𑀺 𑀧𑀸𑀴𑀺𑀬𑀁 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀲𑀼𑀧𑀺𑀦𑀦𑁆𑀢𑁂𑀦𑀸’’𑀢𑀺 (𑀧𑀸𑀭𑀸. 𑁨𑁬𑁩) 𑀇𑀫𑀺𑀦𑀸 𑀧𑀓𑀸𑀲𑀺𑀢𑀸𑀢𑀺 𑀅𑀢𑁆𑀣𑁄.

𑀏𑀢𑁆𑀣 𑀞𑀢𑁆𑀯𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀼𑀧𑀺𑀦𑁂 𑀧𑀦 𑀉𑀧𑁆𑀧𑀦𑁆𑀦𑀸𑀬 𑀅𑀲𑁆𑀲𑀸𑀤𑀘𑁂𑀢𑀦𑀸𑀬 𑀲𑀘𑀲𑁆𑀲 𑀯𑀺𑀲𑀬𑁄 𑀳𑁄𑀢𑀺, 𑀦𑀺𑀘𑁆𑀘𑀮𑁂𑀦 𑀪𑀯𑀺𑀢𑀩𑁆𑀩𑀁. 𑀦 𑀳𑀢𑁆𑀣𑁂𑀦 𑀦𑀺𑀫𑀺𑀢𑁆𑀢𑀁 𑀓𑀻𑀴𑀸𑀧𑁂𑀢𑀩𑁆𑀩𑀁. 𑀓𑀸𑀲𑀸𑀯𑀧𑀘𑁆𑀘𑀢𑁆𑀣𑀭𑀡𑀭𑀓𑁆𑀔𑀦𑀢𑁆𑀣𑀁 𑀧𑀦 𑀳𑀢𑁆𑀣𑀧𑀼𑀝𑁂𑀦 𑀕𑀳𑁂𑀢𑁆𑀯𑀸 𑀚𑀕𑁆𑀕𑀦𑀢𑁆𑀣𑀸𑀬 𑀉𑀤𑀓𑀝𑁆𑀞𑀸𑀦𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁬𑁨) 𑀯𑀼𑀢𑁆𑀢𑀢𑁆𑀢𑀸 𑀅𑀡𑁆𑀟𑀧𑀸𑀮𑀺𑀓𑀸 𑀓𑀺𑀓𑀻𑀲𑀓𑀼𑀡𑀸 𑀯𑀺𑀬, 𑀯𑀸𑀮𑀧𑀸𑀮𑀺𑀓𑀸 𑀘𑀫𑀭𑀻 𑀯𑀺𑀬, 𑀏𑀓𑀦𑁂𑀢𑁆𑀢𑀧𑀸𑀮𑀓𑁄 𑀧𑀼𑀭𑀺𑀲𑁄 𑀯𑀺𑀬 𑀘 𑀓𑀸𑀬𑀚𑀻𑀯𑀺𑀢𑁂𑀧𑀺 𑀅𑀧𑁂𑀓𑁆𑀔𑀁 𑀧𑀳𑀸𑀬 𑀲𑀻𑀮𑀁 𑀭𑀓𑁆𑀔𑀺𑀢𑀼𑀓𑀸𑀫𑁂𑀦 𑀲𑀺𑀓𑁆𑀔𑀸𑀓𑀸𑀫𑁂𑀦 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀢𑀼𑀓𑀸𑀫𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 ‘‘𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸’’𑀢𑀺 (𑀧𑀸𑀭𑀸. 𑁨𑁩𑁭) 𑀯𑀤𑀢𑁄 𑀢𑀣𑀸𑀕𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀸𑀦𑀼𑀓𑀽𑀮𑀁 𑀅𑀝𑁆𑀞𑀓𑀣𑀸𑀢𑁄 𑀜𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑁂𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀬𑀫𑀢𑁆𑀭𑀸𑀦𑀼𑀲𑀸𑀲𑀦𑀻.

𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀓𑀣𑀸𑀯𑀡𑁆𑀡𑀦𑀸.

𑁩𑁩𑁩. 𑀫𑀦𑀼𑀲𑁆𑀲𑀺𑀢𑁆𑀣𑀺𑀦𑁆𑀢𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑀁 𑀇𑀢𑁆𑀣𑀺𑀁, ‘‘𑀫𑀸𑀢𑀼𑀕𑀸𑀫𑁄 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀦 𑀬𑀓𑁆𑀔𑀻, 𑀦 𑀧𑁂𑀢𑀻, 𑀦 𑀢𑀺𑀭𑀘𑁆𑀙𑀸𑀦𑀕𑀢𑀸, 𑀅𑀦𑁆𑀢𑀫𑀲𑁄 𑀢𑀤𑀳𑀼𑀚𑀸𑀢𑀸𑀧𑀺 𑀤𑀸𑀭𑀺𑀓𑀸, 𑀧𑀕𑁂𑀯 𑀫𑀳𑀢𑁆𑀢𑀭𑀻’’𑀢𑀺 (𑀧𑀸𑀭𑀸. 𑁨𑁭𑁧) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀢𑁆𑀢𑀸 𑀢𑀤𑀳𑀼𑀚𑀸𑀢𑀓𑀼𑀫𑀸𑀭𑀺𑀓𑀸𑀪𑀸𑀯𑁂𑀦𑀧𑀺 𑀞𑀺𑀢𑀁 𑀚𑀻𑀯𑀫𑀸𑀦𑀓𑀫𑀦𑀼𑀲𑁆𑀲𑀫𑀸𑀢𑀼𑀕𑀸𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀫𑀦𑀼𑀲𑁆𑀲𑀺𑀢𑁆𑀣𑀺’’𑀦𑁆𑀢𑀺 𑀲𑀸𑀫𑀜𑁆𑀜𑀯𑀘𑀦𑁂𑀦 𑀚𑀻𑀯𑀫𑀸𑀦𑀓𑀫𑀦𑀼𑀲𑁆𑀲𑀺𑀢𑁆𑀣𑀺𑀦𑁆𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀓𑀼𑀢𑁄 𑀮𑀩𑁆𑀪𑀢𑀻𑀢𑀺? 𑀯𑀺𑀦𑀻𑀢𑀯𑀢𑁆𑀣𑀼𑀫𑁆𑀳𑀺 (𑀧𑀸𑀭𑀸. 𑁨𑁮𑁧 𑀆𑀤𑀬𑁄) 𑀫𑀢𑀺𑀢𑁆𑀣𑀺𑀬𑀸 𑀓𑀸𑀬𑀁 𑀨𑀼𑀲𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀯𑀘𑀦𑀢𑁄 𑀧𑀸𑀭𑀺𑀲𑁂𑀲𑀢𑁄 𑀮𑀩𑁆𑀪𑀢𑀺. 𑀆𑀫𑀲𑀦𑁆𑀢𑁄𑀢𑀺 ‘‘𑀳𑀢𑁆𑀣𑀕𑁆𑀕𑀸𑀳𑀁 𑀯𑀸 𑀯𑁂𑀡𑀺𑀕𑁆𑀕𑀸𑀳𑀁 𑀯𑀸 𑀅𑀜𑁆𑀜𑀢𑀭𑀲𑁆𑀲 𑀯𑀸 𑀅𑀜𑁆𑀜𑀢𑀭𑀲𑁆𑀲 𑀯𑀸 𑀅𑀗𑁆𑀕𑀲𑁆𑀲 𑀧𑀭𑀸𑀫𑀲𑀦’’𑀦𑁆𑀢𑀺 (𑀧𑀸𑀭𑀸. 𑁨𑁭𑁦) 𑀯𑀼𑀢𑁆𑀢𑀢𑁆𑀢𑀸 𑀳𑀢𑁆𑀣𑀸𑀤𑀺𑀅𑀗𑁆𑀕𑀧𑀘𑁆𑀘𑀗𑁆𑀕𑀨𑀼𑀲𑀦𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀅𑀜𑁆𑀜𑀢𑀭𑁂𑀦 𑀧𑀓𑀸𑀭𑁂𑀦 𑀆𑀫𑀲𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀇𑀢𑁆𑀣𑀺𑀬𑀸 𑀓𑀸𑀬𑀲𑁆𑀲 𑀲𑀁𑀲𑀕𑁆𑀕𑁂 𑀫𑀺𑀲𑁆𑀲𑀻𑀪𑀸𑀯𑁂 𑀭𑀸𑀕𑁄 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁄. 𑀲𑀗𑁆𑀖𑀸𑀤𑀺𑀲𑁂𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀺𑀓𑁄, 𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀖𑀸𑀤𑀺𑀲𑁂𑀲𑁄 𑀆𑀧𑀦𑁆𑀦𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁩𑁪. 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀇𑀢𑁆𑀣𑀺𑀬𑀸 𑀅𑀦𑁆𑀢𑀫𑀲𑁄 𑀮𑁄𑀫𑀫𑁆𑀧𑀺 𑀅𑀢𑁆𑀢𑀦𑁄 𑀲𑀭𑀻𑀭𑁂 𑀮𑁄𑀫𑁂𑀦 𑀨𑀼𑀲𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁭𑁪) ‘‘𑀮𑁄𑀫𑀕𑀡𑀦𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀸 𑀳𑁄𑀦𑁆𑀢𑀻’’𑀢𑀺 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀫𑀢𑀲𑁆𑀲 𑀅𑀝𑁆𑀞𑀺𑀢𑀢𑁆𑀢𑀸, ‘‘𑀓𑁄𑀝𑁆𑀞𑀸𑀲𑀕𑀡𑀦𑀸𑀬 𑀦 𑀳𑁄𑀢𑀺, 𑀇𑀢𑁆𑀣𑀺𑀕𑀡𑀦𑀸𑀬 𑀳𑁄𑀢𑀻’’𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀫𑀢𑀲𑁆𑀲 𑀞𑀺𑀢𑀢𑁆𑀢𑀸 𑀲𑀗𑁆𑀖𑀲𑀦𑁆𑀢𑀓𑁂 𑀫𑀜𑁆𑀘𑀧𑀻𑀞𑁂 𑀧𑀘𑁆𑀘𑀢𑁆𑀣𑀭𑀡𑀸𑀤𑀺𑀦𑀸 𑀓𑁂𑀦𑀘𑀺 𑀅𑀧𑁆𑀧𑀝𑀺𑀘𑁆𑀙𑀸𑀤𑀺𑀢𑁂 𑀨𑀼𑀲𑀦𑁆𑀢𑀲𑁆𑀲 𑀯𑀺𑀬 𑀮𑁄𑀫𑀕𑀡𑀦𑀸𑀬 𑀅𑀳𑀼𑀢𑁆𑀯𑀸 𑀨𑀼𑀝𑁆𑀞𑀮𑁄𑀫𑀸𑀦𑀁 𑀩𑀳𑀼𑀢𑁆𑀢𑁂𑀧𑀺 𑀏𑀓𑀲𑁆𑀫𑀺𑀁 𑀧𑀬𑁄𑀕𑁂 𑀏𑀓𑀸 𑀏𑀯 𑀆𑀧𑀢𑁆𑀢𑀺, 𑀩𑀳𑀽𑀲𑀼 𑀧𑀬𑁄𑀕𑁂𑀲𑀼 𑀧𑀬𑁄𑀕𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁.

𑁩𑁩𑁫. 𑀇𑀢𑁆𑀣𑀺𑀬𑀸𑀢𑀺 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸. 𑀲𑀫𑁆𑀨𑀼𑀝𑁆𑀞𑁄𑀢𑀺 𑀳𑀢𑁆𑀣𑀸𑀤𑀺𑀲𑀭𑀻𑀭𑀸𑀯𑀬𑀯𑁂 𑀲𑀁𑀲𑀕𑁆𑀕𑀁 𑀲𑀫𑀸𑀧𑀦𑁆𑀦𑁄. 𑀲𑁂𑀯𑀦𑀘𑁂𑀢𑀦𑁄 𑀯𑀸𑀬𑀫𑀺𑀢𑁆𑀯𑀸 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀅𑀢𑁆𑀢𑀦𑁄 𑀓𑀸𑀬𑀁 𑀘𑀸𑀮𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀗𑁆𑀖𑀸𑀤𑀺𑀲𑁂𑀲𑀢𑀸𑀢𑀺 𑀏𑀢𑁆𑀣 𑀲𑀓𑀢𑁆𑀣𑁂 𑀢𑀤𑁆𑀥𑀺𑀢𑀧𑁆𑀧𑀘𑁆𑀘𑀬𑁄. ‘‘𑀲𑀗𑁆𑀖𑀸𑀤𑀺𑀲𑁂𑀲𑀺𑀢𑀸’’𑀢𑀺 𑀧𑀦 𑀧𑀸𑀞𑁄 𑀲𑀼𑀦𑁆𑀤𑀭𑁄, 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲 𑀅𑀢𑁆𑀣𑀺𑀢𑀸 𑀯𑀺𑀚𑁆𑀚𑀫𑀸𑀦𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀬𑀸 𑀲𑀩𑁆𑀪𑀸𑀯𑀲𑀗𑁆𑀔𑀸𑀢𑀸 𑀅𑀢𑁆𑀣𑀺𑀢𑀸 𑀈𑀧𑀘𑁆𑀘𑀬𑀢𑁆𑀣𑁂 𑀧𑀼𑀕𑁆𑀕𑀮𑁂 𑀲𑀗𑁆𑀖𑀸𑀤𑀺𑀲𑁂𑀲𑀻𑀲𑀤𑁆𑀤𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀳𑁄𑀢𑀻𑀢𑀺 𑀪𑀸𑀯𑀧𑀘𑁆𑀘𑀬𑁄 𑀢𑀁𑀅𑀢𑁆𑀣𑀯𑀲𑁂𑀦 𑀮𑀩𑁆𑀪𑀢𑀺. 𑀬𑀣𑀸𑀳𑀼 ‘‘𑀬𑀲𑁆𑀲 𑀕𑀼𑀡𑀲𑁆𑀲 𑀳𑀺 𑀪𑀸𑀯𑀸 𑀤𑀩𑁆𑀩𑁂 𑀲𑀤𑁆𑀤𑀲𑀦𑁆𑀦𑀺𑀯𑁂𑀲𑁄, 𑀢𑀤𑀪𑀺𑀥𑀸𑀦𑁂 𑀢𑁆𑀢𑀢𑀸𑀤𑀬𑁄’’𑀢𑀺.

𑁩𑁩𑁬. 𑀏𑀓𑁂𑀦 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀏𑀢𑁆𑀣 ‘‘𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦𑀸’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. ‘‘𑀫𑀦𑀼𑀲𑁆𑀲𑀺𑀢𑁆𑀣𑀺’’𑀦𑁆𑀢𑀺 𑀅𑀚𑁆𑀛𑀸𑀳𑀸𑀭𑁄. 𑀢𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀇𑀢𑁆𑀣𑀺𑀬𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀭𑀻𑀭𑀸𑀯𑀬𑀯𑁂. ‘‘𑀏𑀓𑀸𑀯𑀸𑀧𑀢𑁆𑀢𑀻’’𑀢𑀺 𑀧𑀞𑀫𑀁 𑀕𑀳𑀺𑀢𑀳𑀢𑁆𑀣𑀲𑁆𑀲 𑀅𑀦𑀧𑀦𑀻𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀕𑀳𑀺𑀢𑀳𑀢𑁆𑀣𑀁 𑀧𑀦 𑀫𑁄𑀘𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀨𑀼𑀲𑀦𑁆𑀢𑀲𑁆𑀲 𑀧𑀬𑁄𑀕𑀕𑀡𑀦𑀸𑀬 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀩𑁆𑀬𑀢𑀺𑀭𑁂𑀓𑀢𑁄 𑀮𑀩𑁆𑀪𑀢𑀺.

𑁩𑁩𑁭. 𑀏𑀓𑁂𑀦 𑀳𑀢𑁆𑀣𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀲𑀻𑀲𑀢𑁄 𑀬𑀸𑀯 𑀧𑀸𑀤𑀁, 𑀧𑀸𑀤𑀢𑁄 𑀬𑀸𑀯 𑀲𑀻𑀲𑀜𑁆𑀘 𑀓𑀸𑀬𑀸 𑀳𑀢𑁆𑀣𑀁 𑀅𑀫𑁄𑀘𑁂𑀢𑁆𑀯𑀸 𑀤𑀺𑀯𑀲𑀫𑁆𑀧𑀺 𑀢𑀁 𑀇𑀢𑁆𑀣𑀺𑀁 𑀨𑀼𑀲𑀦𑁆𑀢𑀲𑁆𑀲 𑀏𑀓𑀸𑀯𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀧𑀺 ‘‘𑀅𑀫𑁄𑀘𑁂𑀢𑁆𑀯𑀸’’𑀢𑀺 𑀩𑁆𑀬𑀢𑀺𑀭𑁂𑀓𑀢𑁄 𑀫𑁄𑀘𑁂𑀢𑁆𑀯𑀸 𑀨𑀼𑀲𑀦𑁆𑀢𑀲𑁆𑀲 𑀧𑀬𑁄𑀕𑀕𑀡𑀦𑀸𑀬 𑀅𑀦𑁂𑀓𑀸𑀧𑀢𑁆𑀢𑀺𑀬𑁄𑀢𑀺 𑀮𑀩𑁆𑀪𑀢𑀺.

𑁩𑁩𑁮. 𑀏𑀓𑀢𑁄 𑀕𑀳𑀺𑀢𑀧𑀜𑁆𑀘𑀗𑁆𑀕𑀼𑀮𑀻𑀦𑀁 𑀕𑀡𑀦𑀸𑀬 𑀲𑀘𑁂 𑀆𑀧𑀢𑁆𑀢𑀺 𑀲𑀺𑀬𑀸, 𑀏𑀓𑀲𑁆𑀲 𑀫𑀸𑀢𑀼𑀕𑀸𑀫𑀲𑁆𑀲 𑀲𑀭𑀻𑀭𑀁 𑀭𑀸𑀕𑀘𑀺𑀢𑁆𑀢𑁂𑀦 𑀨𑀼𑀲𑀦𑁆𑀢𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀓𑀮𑀸𑀧𑀓𑁄𑀝𑁆𑀞𑀸𑀲𑀢𑁄 𑀩𑁆𑀬𑀢𑀺𑀭𑁂𑀓𑀲𑁆𑀲 𑀲𑀭𑀻𑀭𑀲𑁆𑀲𑀸𑀪𑀸𑀯𑀸 𑀤𑁆𑀯𑀢𑁆𑀢𑀺𑀁𑀲𑀓𑀮𑀸𑀧𑀓𑁄𑀝𑁆𑀞𑀸𑀲𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑀸 𑀪𑀯𑀺𑀢𑀩𑁆𑀩𑀁, 𑀢𑀣𑀸 𑀅𑀪𑀸𑀯𑀢𑁄 𑀇𑀤𑀫𑁆𑀧𑀺 𑀦 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀦 𑀳𑀺 𑀓𑁄𑀝𑁆𑀞𑀸𑀲𑀢𑁄 𑀲𑀺𑀬𑀸’’𑀢𑀺 𑀆𑀳.

𑁩𑁪𑁦-𑁧. 𑀇𑀢𑁆𑀣𑀺𑀬𑀸 𑀯𑀺𑀫𑀢𑀺𑀲𑁆𑀲𑀸𑀧𑀺 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀇𑀢𑁆𑀣𑀺𑀬𑀸 𑀓𑀸𑀬𑀁 𑀨𑀼𑀲𑀢𑁄 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸, 𑀇𑀢𑁆𑀣𑀺𑀬𑀸 𑀧𑀡𑁆𑀟𑀓𑀸𑀤𑀺𑀲𑀜𑁆𑀜𑀺𑀦𑁄𑀧𑀺 𑀅𑀢𑁆𑀢𑀦𑁄𑀧𑀺 𑀓𑀸𑀬𑁂𑀦 𑀇𑀢𑁆𑀣𑀺𑀬𑀸 𑀓𑀸𑀬𑀁 𑀨𑀼𑀲𑀢𑁄 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸. 𑀆𑀤𑀺-𑀲𑀤𑁆𑀤𑁂𑀦 𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀲𑀗𑁆𑀕𑀳𑁄. 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀺𑀦𑁄 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀇𑀢𑁆𑀣𑀺𑀬𑀸 𑀓𑀸𑀬𑀲𑀫𑁆𑀩𑀤𑁆𑀥𑀁 𑀨𑀼𑀲𑀢𑁄 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸. 𑀧𑀡𑁆𑀟𑀓𑁂 𑀧𑀡𑁆𑀟𑀓𑀲𑀜𑁆𑀜𑀺𑀦𑁄 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀧𑀡𑁆𑀟𑀓𑀲𑁆𑀲 𑀓𑀸𑀬𑀁 𑀨𑀼𑀲𑀢𑁄 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸. 𑀬𑀓𑁆𑀔𑀺𑀧𑁂𑀢𑀻𑀲𑀼 𑀬𑀓𑁆𑀔𑀺𑀧𑁂𑀢𑀺𑀲𑀜𑁆𑀜𑀺𑀦𑁄 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀢𑀸𑀲𑀁 𑀓𑀸𑀬𑀁 𑀨𑀼𑀲𑀢𑁄 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣 ‘‘𑀧𑀡𑁆𑀟𑀓𑀕𑁆𑀕𑀳𑀡𑁂𑀦 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄𑀧𑀺 𑀕𑀬𑁆𑀳𑀢𑀻’’𑀢𑀺 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 𑀯𑀼𑀢𑁆𑀢𑀁. ‘‘𑀇𑀢𑁆𑀣𑀺𑀬𑀸 𑀯𑁂𑀫𑀢𑀺𑀓𑀲𑁆𑀲𑀸𑀧𑀺 𑀧𑀡𑁆𑀟𑀓𑀸𑀤𑀺𑀲𑀜𑁆𑀜𑀺𑀦𑁄𑀧𑀺 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀇𑀢𑁆𑀣𑀺𑀬𑀸 𑀓𑀸𑀬𑀲𑀫𑁆𑀩𑀤𑁆𑀥𑀁 𑀨𑀼𑀲𑀢𑁄 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸’’𑀢𑀺 𑀦 𑀬𑁄𑀚𑁂𑀢𑀩𑁆𑀩𑀁. 𑀓𑀲𑁆𑀫𑀸? 𑀢𑀣𑀸 𑀬𑁄𑀚𑀦𑀸𑀬𑀁 𑀧𑀸𑀴𑀺𑀬𑀁 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀦 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄.

‘‘𑀤𑀼𑀓𑁆𑀓𑀝𑀁 𑀓𑀸𑀬𑀲𑀁𑀲𑀕𑁆𑀕𑁂, 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸’’𑀢𑀺 𑀇𑀫𑀺𑀦𑀸 𑀯𑀺𑀦𑀻𑀢𑀯𑀢𑁆𑀣𑀼𑀫𑁆𑀳𑀺 𑀆𑀕𑀢𑀦𑀬𑁂 𑀲𑀗𑁆𑀕𑀳𑀺𑀢𑁂𑀧𑀺 𑀢𑁂𑀦𑁂𑀯 𑀦𑀬𑁂𑀦 𑀧𑀡𑁆𑀟𑀓𑁂 𑀯𑀺𑀫𑀢𑀺𑀇𑀢𑁆𑀣𑀺𑀲𑀜𑁆𑀜𑀺𑀢𑀸𑀤𑀺𑀅𑀜𑁆𑀜𑀫𑀢𑀺𑀧𑀓𑁆𑀔𑁂 𑀘 𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑁂𑀲𑀼 𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀲𑀜𑁆𑀜𑀺𑀯𑀺𑀫𑀢𑀺𑀧𑀡𑁆𑀟𑀓𑀸𑀤𑀺𑀅𑀜𑁆𑀜𑀫𑀢𑀺𑀧𑀓𑁆𑀔𑁂 𑀘 𑀇𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀓𑀸𑀬𑀧𑀝𑀺𑀩𑀤𑁆𑀥𑀸𑀫𑀲𑀦𑀸𑀤𑀻𑀲𑀼 𑀘 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀲𑀩𑁆𑀩𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑁄 𑀉𑀧𑀮𑀓𑁆𑀔𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁩𑁪𑁨. 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀧𑀝𑀺𑀩𑀤𑁆𑀥𑁂𑀦 𑀇𑀢𑁆𑀣𑀺𑀬𑀸 𑀓𑀸𑀬𑁂𑀦 𑀧𑀝𑀺𑀩𑀤𑁆𑀥𑀁 𑀨𑀼𑀲𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀦 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀯𑀼𑀢𑁆𑀢𑀤𑀼𑀓𑁆𑀓𑀝𑀸𑀦𑀁 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀘-𑀲𑀤𑁆𑀤𑁂𑀦 𑀧𑀦 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁂𑀦 ‘‘𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀓𑀸𑀬𑀁 𑀆𑀫𑀲𑀢𑀺. 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀓𑀸𑀬𑀧𑀝𑀺𑀩𑀤𑁆𑀥𑀁 𑀆𑀫𑀲𑀢𑀺. 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀆𑀫𑀲𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁨𑁭𑁬) 𑀧𑀸𑀴𑀺𑀬𑀁 𑀆𑀕𑀢𑀤𑀼𑀓𑁆𑀓𑀝𑀸𑀦𑀁 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁪𑁩-𑁪. 𑀦 𑀓𑁂𑀯𑀮𑀁 𑀧𑀤𑀪𑀸𑀚𑀦𑀸𑀕𑀢𑀇𑀢𑁆𑀣𑀺𑀲𑀭𑀻𑀭𑀸𑀤𑀺𑀓𑀫𑁂𑀯 𑀅𑀦𑀸𑀫𑀸𑀲𑀁, 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑀤𑀸𑀭𑀼𑀥𑀻𑀢𑀮𑀺𑀓𑀯𑀢𑁆𑀣𑀼𑀅𑀦𑀼𑀮𑁄𑀫𑀢𑁄 𑀧𑁄𑀢𑁆𑀣𑀮𑀺𑀓𑀸𑀤𑀺𑀇𑀢𑁆𑀣𑀺𑀭𑀽𑀧𑀓𑀜𑁆𑀘 𑀦𑀺𑀲𑁆𑀲𑀕𑁆𑀕𑀺𑀬𑀯𑀸𑀭𑀸𑀦𑀼𑀮𑁄𑀫𑀢𑁄 𑀅𑀲𑀭𑀻𑀭𑀝𑁆𑀞𑀁 𑀫𑀸𑀢𑀼𑀕𑀸𑀫𑁂𑀳𑀺 𑀧𑀭𑀺𑀪𑀼𑀢𑁆𑀢𑀯𑀢𑁆𑀣𑀸𑀪𑀭𑀡𑀸𑀤𑀺𑀜𑁆𑀘 𑀯𑀺𑀪𑀗𑁆𑀕𑀓𑁆𑀔𑀦𑁆𑀥𑀓𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀝𑁆𑀞𑀓𑀣𑀸𑀕𑀢𑀁 𑀅𑀯𑀲𑁂𑀲𑀁 𑀅𑀦𑀸𑀫𑀸𑀲𑀯𑀢𑁆𑀣𑀼𑀜𑁆𑀘 𑀆𑀫𑀲𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀁 𑀲𑀗𑁆𑀕𑀳𑁂𑀢𑀼𑀫𑀸𑀳 ‘‘𑀇𑀢𑁆𑀣𑀻𑀦’’𑀦𑁆𑀢𑀺𑀆𑀤𑀺.

‘‘𑀇𑀢𑁆𑀣𑀻𑀦𑀁 𑀇𑀢𑁆𑀣𑀺𑀭𑀽𑀧𑀜𑁆𑀘𑀸’’𑀢𑀺 𑀇𑀤𑀁 ‘‘𑀇𑀢𑁆𑀣𑀺𑀓𑀸𑀬 𑀇𑀢𑁆𑀣𑀺𑀥𑀦𑀁 (𑀧𑀸𑀭𑀸. 𑁩𑁪), 𑀲𑀤𑁆𑀥𑀸𑀦𑀁 𑀲𑀤𑁆𑀥𑀸𑀧𑀭𑀸𑀬𑀦’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀮𑁄𑀓𑀯𑁄𑀳𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀇𑀢𑁆𑀣𑀻𑀦𑀁 𑀤𑀸𑀭𑀼𑀮𑁄𑀳𑀫𑀬𑀸𑀤𑀺𑀓𑀁 𑀇𑀢𑁆𑀣𑀺𑀭𑀽𑀧𑀜𑁆𑀘𑀸𑀢𑀺 𑀬𑁄𑀚𑀦𑀸. 𑀆𑀤𑀺-𑀲𑀤𑁆𑀤𑁂𑀦 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑀢𑁄 𑀫𑀢𑁆𑀢𑀺𑀓𑀸𑀬, 𑀧𑀺𑀝𑁆𑀞𑁂𑀦 𑀯𑀸 𑀓𑀢𑀁 𑀫𑀸𑀢𑀼𑀕𑀸𑀫𑀭𑀽𑀧𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀫𑀸𑀢𑀼𑀕𑀸𑀫𑀭𑀽𑀧𑀁 𑀬𑁂𑀦 𑀓𑁂𑀦𑀘𑀺 𑀤𑀺𑀦𑁆𑀦𑀁 𑀲𑀩𑁆𑀩𑀭𑀢𑀦𑀫𑀬𑀁 𑀯𑀺𑀦𑀸 𑀅𑀯𑀲𑁂𑀲𑀁 𑀲𑀸𑀤𑀺𑀬𑀺𑀢𑁆𑀯𑀸 𑀪𑀺𑀦𑁆𑀤𑀺𑀢𑁆𑀯𑀸 𑀲𑀫𑀡𑀲𑀸𑀭𑀼𑀧𑁆𑀧𑀧𑀭𑀺𑀓𑁆𑀔𑀸𑀭𑀁 𑀓𑀸𑀭𑀸𑀧𑁂𑀢𑀼𑀁, 𑀅𑀨𑀼𑀲𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁂 𑀯𑀸 𑀬𑁄𑀚𑁂𑀢𑀼𑀁 𑀯𑀝𑁆𑀝𑀢𑀺.

‘‘𑀯𑀢𑁆𑀣’’𑀦𑁆𑀢𑀺 𑀇𑀫𑀺𑀦𑀸 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀤𑁆𑀯𑀬𑀫𑁆𑀧𑀺 𑀲𑀸𑀫𑀜𑁆𑀜𑁂𑀦 𑀕𑀳𑀺𑀢𑀁. 𑀇𑀤𑀜𑁆𑀘 𑀫𑀸𑀢𑀼𑀕𑀸𑀫𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀞𑀧𑀺𑀢𑀫𑁆𑀧𑀺 𑀅𑀦𑀸𑀫𑀸𑀲𑀫𑁂𑀯, 𑀘𑀻𑀯𑀭𑀢𑁆𑀣𑀸𑀬 𑀤𑀺𑀦𑁆𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀢𑀺𑀡𑀘𑀼𑀫𑁆𑀩𑀝𑀓𑀁, 𑀅𑀗𑁆𑀕𑀼𑀮𑀺𑀬𑀸 𑀧𑀡𑁆𑀡𑀫𑀼𑀤𑁆𑀤𑀺𑀓𑀁 𑀉𑀧𑀸𑀤𑀸𑀬 𑀅𑀮𑀗𑁆𑀓𑀸𑀭𑀫𑁂𑀯. 𑀏𑀢𑁆𑀣 𑀘 𑀯𑀸𑀮𑀓𑁂𑀲𑀯𑀝𑁆𑀝𑀓𑁂𑀲𑁂𑀲𑀼 𑀧𑀯𑁂𑀲𑀦𑀓𑀤𑀦𑁆𑀢𑀲𑀽𑀘𑀺𑀆𑀤𑀺 𑀓𑀧𑁆𑀧𑀺𑀬𑀪𑀡𑁆𑀟𑀁 𑀤𑀺𑀬𑁆𑀬𑀫𑀸𑀦𑀁 𑀲𑀫𑀡𑀲𑀸𑀭𑀼𑀧𑁆𑀧𑀧𑀭𑀺𑀓𑁆𑀔𑀸𑀭𑀢𑁆𑀣𑀸𑀬 𑀕𑀳𑁂𑀢𑀩𑁆𑀩𑀁.

𑀢𑀢𑁆𑀣𑀚𑀸𑀢𑀨𑀮𑀁 𑀔𑀚𑁆𑀚𑀦𑁆𑀢𑀺 𑀭𑀼𑀓𑁆𑀔𑁂 𑀞𑀺𑀢𑀁 𑀔𑀸𑀤𑀺𑀢𑀩𑁆𑀩𑀁 𑀧𑀦𑀲𑀦𑀸𑀴𑀺𑀓𑁂𑀭𑀸𑀤𑀺𑀨𑀮𑀜𑁆𑀘 𑀫𑀦𑀼𑀲𑁆𑀲𑁂𑀳𑀺 𑀭𑀸𑀲𑀺𑀓𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀨𑀮𑀜𑁆𑀘 ‘‘𑀫𑀦𑀼𑀲𑁆𑀲𑁂𑀳𑀺 𑀭𑀸𑀲𑀺𑀓𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁧) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀅𑀦𑀸𑀫𑀸𑀲𑀦𑁆𑀢𑀺 𑀉𑀧𑀮𑀓𑁆𑀔𑀡𑀢𑁄 𑀇𑀫𑀺𑀦𑀸𑀯 𑀕𑀳𑁂𑀢𑀩𑁆𑀩𑀁. 𑀅𑀭𑀜𑁆𑀜𑁂 𑀭𑀼𑀓𑁆𑀔𑀢𑁄 𑀧𑀢𑀺𑀢𑀁 𑀨𑀮𑀁 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. ‘‘𑀫𑀼𑀕𑁆𑀕𑀸𑀤𑀺𑀁 𑀢𑀢𑁆𑀣𑀚𑀸𑀢𑀓’’𑀦𑁆𑀢𑀺 𑀉𑀧𑀮𑀓𑁆𑀔𑀡𑀧𑀤𑀢𑁆𑀢𑀸 𑀕𑀘𑁆𑀙𑀢𑁄 𑀯𑀺𑀬𑀼𑀢𑁆𑀢𑀫𑁆𑀧𑀺 𑀕𑀳𑁂𑀢𑀩𑁆𑀩𑀁. 𑀫𑀼𑀕𑁆𑀕𑀸𑀤𑀺𑀦𑁆𑀢𑀺 𑀏𑀢𑁆𑀣 ‘‘𑀅𑀧𑀭𑀡𑁆𑀡’’𑀦𑁆𑀢𑀺 𑀧𑀸𑀞𑀲𑁂𑀲𑁄.

𑀲𑀩𑁆𑀩𑀸𑀦𑀺 𑀥𑀜𑁆𑀜𑀸𑀦𑀻𑀢𑀺 ‘‘𑀲𑀸𑀮𑀺 𑀯𑀻𑀳𑀺 𑀬𑀯𑁄 𑀓𑀗𑁆𑀕𑀼, 𑀓𑀼𑀤𑁆𑀭𑀽𑀲𑀯𑀭𑀓𑀕𑁄𑀥𑀼𑀫𑀸’’𑀢𑀺 𑀯𑀼𑀢𑁆𑀢𑀸𑀦𑀺 𑀲𑀢𑁆𑀢 𑀥𑀜𑁆𑀜𑀸𑀦𑀺. 𑀔𑁂𑀢𑁆𑀢𑀫𑀕𑁆𑀕𑁂𑀦 𑀕𑀘𑁆𑀙𑀢𑀸 𑀲𑀸𑀮𑀺𑀲𑀻𑀲𑁂 𑀳𑀢𑁆𑀣𑁂𑀦 𑀅𑀨𑀼𑀲𑀦𑁆𑀢𑁂𑀦 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀫𑀕𑁆𑀕𑁄 𑀲𑀫𑁆𑀩𑀸𑀥𑁄 𑀳𑁄𑀢𑀺, 𑀲𑀭𑀻𑀭𑁂 𑀥𑀜𑁆𑀜𑀁 𑀨𑀼𑀲𑀦𑁆𑀢𑁂𑀧𑀺 𑀫𑀕𑁆𑀕𑀢𑁆𑀢𑀸 𑀦 𑀤𑁄𑀲𑁄. 𑀯𑀻𑀣𑀺𑀬𑀁, 𑀕𑁂𑀳𑀗𑁆𑀕𑀡𑁂 𑀯𑀸 𑀥𑀜𑁆𑀜𑁂𑀲𑀼 𑀧𑀲𑀸𑀭𑀺𑀢𑁂𑀲𑀼 𑀅𑀧𑀲𑀓𑁆𑀓𑀺𑀢𑁆𑀯𑀸 𑀘𑁂 𑀕𑀦𑁆𑀢𑀼𑀁 𑀦 𑀲𑀓𑁆𑀓𑀸, ‘‘𑀫𑀕𑁆𑀕𑀁 𑀅𑀥𑀺𑀝𑁆𑀞𑀸𑀬 𑀕𑀦𑁆𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁧) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 ‘‘𑀇𑀫𑀁 𑀫𑀕𑁆𑀕𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. ‘‘𑀓𑀼𑀮𑀕𑁂𑀳𑁂 𑀥𑀜𑁆𑀜𑀫𑀢𑁆𑀣𑀓𑁂 𑀘𑁂 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀤𑀺𑀦𑁆𑀦𑀁 𑀳𑁄𑀢𑀺, 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁧 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. ‘‘𑀆𑀲𑀦𑀲𑀸𑀮𑀸𑀬𑀁 𑀥𑀜𑁆𑀜𑁂 𑀯𑀺𑀧𑁆𑀧𑀓𑀺𑀡𑁆𑀡𑁂 𑀅𑀦𑀼𑀓𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀧𑀻𑀞𑀓𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀲𑀘𑁂 𑀫𑀦𑀼𑀲𑁆𑀲𑀸 𑀢𑀲𑁆𑀫𑀺𑀁 𑀥𑀜𑁆𑀜𑀫𑀢𑁆𑀣𑀓𑁂 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁧 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀢𑀦𑀸 𑀢𑀢𑁆𑀣 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀦 𑀯𑀝𑁆𑀝𑀢𑀺.

𑁩𑁪𑁫. 𑀥𑀫𑀦𑀲𑀗𑁆𑀔𑀸𑀤𑀺𑀁 𑀲𑀩𑁆𑀩𑀁 𑀧𑀜𑁆𑀘𑀗𑁆𑀕𑀢𑀼𑀭𑀺𑀬𑀫𑁆𑀧𑀺 𑀘𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀥𑀫𑀦𑀲𑀗𑁆𑀔𑁄 𑀦𑀸𑀫 𑀲𑀤𑁆𑀤𑀓𑀭𑀡𑀲𑀗𑁆𑀔𑁄. 𑀆𑀤𑀺-𑀲𑀤𑁆𑀤𑁂𑀦 𑀯𑀁𑀲𑀲𑀺𑀗𑁆𑀕𑀢𑀸𑀴𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀧𑀜𑁆𑀘𑀗𑁆𑀕𑀢𑀼𑀭𑀺𑀬𑀦𑁆𑀢𑀺 𑀆𑀢𑀢𑀁, 𑀯𑀺𑀢𑀢𑀁, 𑀆𑀢𑀢𑀯𑀺𑀢𑀢𑀁, 𑀖𑀦𑀁, 𑀲𑀼𑀲𑀺𑀭𑀦𑁆𑀢𑀺 𑀧𑀜𑁆𑀘𑀗𑁆𑀕𑀲𑀗𑁆𑀔𑀸𑀢𑀁 𑀢𑀼𑀭𑀺𑀬𑀁. 𑀢𑀢𑁆𑀣 𑀆𑀢𑀢𑀁 𑀦𑀸𑀫 𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑁂𑀲𑀼 𑀪𑁂𑀭𑀺𑀆𑀤𑀻𑀲𑀼 𑀏𑀓𑀢𑁄 𑀆𑀓𑀟𑁆𑀠𑀺𑀢𑁆𑀯𑀸 𑀑𑀦𑀤𑁆𑀥𑀁 𑀏𑀓𑀢𑀮𑀢𑀼𑀭𑀺𑀬𑀁. 𑀯𑀺𑀢𑀢𑀁 𑀦𑀸𑀫 𑀉𑀪𑀢𑁄 𑀆𑀓𑀟𑁆𑀠𑀺𑀢𑁆𑀯𑀸 𑀑𑀦𑀤𑁆𑀥𑀁 𑀉𑀪𑀬𑀢𑀮𑀢𑀼𑀭𑀺𑀬𑀁. 𑀆𑀢𑀢𑀯𑀺𑀢𑀢𑀁 𑀦𑀸𑀫 𑀉𑀪𑀬𑀢𑁄 𑀘 𑀫𑀚𑁆𑀛𑀢𑁄 𑀘 𑀲𑀩𑁆𑀩𑀢𑁄 𑀧𑀭𑀺𑀬𑁄𑀦𑀦𑁆𑀥𑀺𑀢𑀁. 𑀖𑀦𑀁 𑀲𑀫𑁆𑀫𑀸𑀤𑀺. 𑀲𑀫𑁆𑀫𑀦𑁆𑀢𑀺 𑀢𑀸𑀴𑀁, 𑀖𑀡𑁆𑀝𑀸𑀓𑀺𑀗𑁆𑀓𑀡𑀺𑀆𑀤𑀻𑀦𑀫𑁆𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑁄. 𑀲𑀼𑀲𑀺𑀭𑀦𑁆𑀢𑀺 𑀯𑀁𑀲𑀸𑀤𑀺.

𑀇𑀥 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁧) 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀪𑁂𑀭𑀺𑀧𑁄𑀓𑁆𑀔𑀭𑀜𑁆𑀘 𑀪𑁂𑀭𑀺𑀢𑀮𑀘𑀫𑁆𑀫𑀜𑁆𑀘 𑀯𑀻𑀡𑀸 𑀘 𑀯𑀻𑀡𑀸𑀧𑁄𑀓𑁆𑀔𑀭𑀘𑀫𑁆𑀫𑀜𑁆𑀘 𑀤𑀡𑁆𑀟𑁄 𑀘 𑀅𑀦𑀸𑀫𑀸𑀲𑀁. ‘‘𑀧𑀽𑀚𑀁 𑀓𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑀸𑀤𑀻𑀲𑀼 𑀞𑀧𑀺𑀢𑀪𑁂𑀭𑀺𑀬𑁄 𑀅𑀘𑀸𑀮𑁂𑀦𑁆𑀢𑁂𑀦 𑀅𑀯𑀲𑁂𑀲𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀓𑀘𑀯𑀭𑀙𑀟𑁆𑀟𑀦𑀓𑀸𑀮𑁂 𑀓𑀘𑀯𑀭𑀁 𑀯𑀺𑀬 𑀕𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀞𑀧𑁂𑀢𑀩𑁆𑀩’’𑀦𑁆𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀢𑀼𑀭𑀺𑀬𑀪𑀡𑁆𑀟𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀤𑀻𑀬𑀫𑀸𑀦𑀁 𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀓𑀧𑁆𑀧𑀺𑀬𑀧𑀭𑀺𑀓𑁆𑀔𑀸𑀭𑀁 𑀕𑀳𑁂𑀢𑀼𑀁 𑀅𑀥𑀺𑀯𑀸𑀲𑁂𑀢𑀩𑁆𑀩𑀁. 𑀤𑁄𑀡𑀺 𑀯𑀸 𑀧𑁄𑀓𑁆𑀔𑀭𑀁 𑀯𑀸 𑀤𑀦𑁆𑀢𑀓𑀝𑁆𑀞𑀦𑀺𑀓𑁆𑀔𑀺𑀧𑀦𑀢𑁆𑀣𑀸𑀬, 𑀘𑀫𑁆𑀫𑀜𑁆𑀘 𑀲𑀢𑁆𑀣𑀓𑁄𑀲𑀓𑀭𑀡𑀢𑁆𑀣𑀸𑀬 𑀕𑀳𑁂𑀢𑀩𑁆𑀩𑀁.

𑀭𑀢𑀦𑀸𑀦𑀺 𑀘 𑀲𑀩𑁆𑀩𑀸𑀦𑀻𑀢𑀺 𑀫𑀼𑀢𑁆𑀢𑀸 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀗𑁆𑀔𑁄 𑀲𑀺𑀮𑀸 𑀧𑀯𑀸𑀴𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁 𑀮𑁄𑀳𑀺𑀢𑀗𑁆𑀓𑁄 𑀫𑀲𑀸𑀭𑀕𑀮𑁆𑀮𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁧) 𑀯𑀼𑀢𑁆𑀢𑀸𑀦𑀺 𑀲𑀩𑁆𑀩𑀸𑀦𑀺 𑀭𑀢𑀦𑀸𑀦𑀺 𑀘. 𑀏𑀢𑁆𑀣 𑀘 𑀯𑀺𑀤𑁆𑀥𑀸, 𑀅𑀯𑀺𑀤𑁆𑀥𑀸 𑀯𑀸 𑀲𑀸𑀫𑀼𑀤𑁆𑀤𑀺𑀓𑀸𑀤𑀻 𑀲𑀩𑁆𑀩𑀸𑀧𑀺 𑀫𑀼𑀢𑁆𑀢𑀸 𑀅𑀦𑀸𑀫𑀸𑀲𑀸. 𑀪𑀡𑁆𑀟𑀫𑀽𑀮𑀢𑁆𑀣𑀜𑁆𑀘 𑀕𑀡𑁆𑀳𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀦𑁆𑀢𑀫𑀲𑁄 𑀚𑀸𑀢𑀺𑀨𑀮𑀺𑀓𑀁 𑀉𑀧𑀸𑀤𑀸𑀬 𑀦𑀻𑀮𑀧𑀻𑀢𑀸𑀤𑀺𑀪𑁂𑀤𑁄 𑀲𑀩𑁆𑀩𑁄𑀧𑀺 𑀫𑀡𑀺 𑀥𑁄𑀢𑀯𑀺𑀤𑁆𑀥𑁄 𑀅𑀦𑀸𑀫𑀸𑀲𑁄. 𑀆𑀳𑀢𑀸𑀓𑀸𑀭𑁂𑀦𑁂𑀯 𑀞𑀺𑀢𑁄 𑀅𑀯𑀺𑀤𑁆𑀥𑀸𑀥𑁄𑀢𑁄 𑀫𑀡𑀺 𑀧𑀢𑁆𑀢𑀸𑀤𑀺 𑀪𑀡𑁆𑀟𑀫𑀽𑀮𑀢𑁆𑀣𑀁 𑀅𑀥𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀧𑀘𑀺𑀢𑁆𑀯𑀸 𑀓𑀢𑁄 𑀓𑀸𑀘𑀫𑀡𑀺𑀬𑁂𑀯𑁂𑀓𑁄 𑀯𑀝𑁆𑀝𑀢𑀺. 𑀯𑁂𑀴𑀼𑀭𑀺𑀬𑁂 𑀘 𑀫𑀡𑀺𑀲𑀤𑀺𑀲𑁄𑀬𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀥𑀫𑀦𑀲𑀗𑁆𑀔𑁄 ‘‘𑀲𑀩𑁆𑀩𑀁 𑀥𑀫𑀦𑀲𑀗𑁆𑀔𑀸𑀤𑀺’’𑀦𑁆𑀢𑀺𑀆𑀤𑀺𑀕𑀸𑀣𑀸𑀬 𑀢𑀼𑀭𑀺𑀬𑁂𑀲𑀼 𑀕𑀳𑀺𑀢𑁄. 𑀭𑀢𑀦𑀔𑀘𑀺𑀢𑁄 𑀲𑀗𑁆𑀔𑁄 𑀅𑀦𑀸𑀫𑀸𑀲𑁄. 𑀧𑀸𑀦𑀻𑀬𑀲𑀗𑁆𑀔𑁄 𑀥𑁄𑀢𑁄𑀧𑀺 𑀅𑀥𑁄𑀢𑁄𑀧𑀺 𑀆𑀫𑀸𑀲𑁄. 𑀅𑀯𑀲𑁂𑀲𑀲𑀗𑁆𑀔𑁄 𑀧𑀦 𑀅𑀜𑁆𑀚𑀦𑀸𑀤𑀺𑀪𑁂𑀲𑀚𑁆𑀚𑀢𑁆𑀣𑀁, 𑀧𑀢𑁆𑀢𑀸𑀤𑀺𑀪𑀡𑁆𑀟𑀫𑀽𑀮𑀪𑀸𑀯𑁂𑀦 𑀘 𑀅𑀥𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀼𑀯𑀡𑁆𑀡𑁂𑀦 𑀏𑀓𑀢𑁄 𑀯𑀺𑀮𑀺𑀬𑀸𑀧𑁂𑀢𑁆𑀯𑀸 𑀓𑀢𑀸 𑀫𑀼𑀕𑁆𑀕𑀯𑀡𑁆𑀡𑀸 𑀲𑀺𑀮𑀸 𑀅𑀦𑀸𑀫𑀸𑀲𑀸. 𑀲𑁂𑀲𑀸 𑀲𑀺𑀮𑀸 𑀔𑀼𑀤𑁆𑀤𑀓𑀦𑀺𑀲𑀸𑀦𑀸𑀤𑀺𑀓𑀫𑁆𑀫𑀢𑁆𑀣𑀁 𑀅𑀥𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀢𑀺. ‘‘𑀧𑀯𑀸𑀴𑀁 𑀥𑁄𑀢𑀫𑀥𑁄𑀢𑀜𑁆𑀘 𑀯𑀺𑀤𑁆𑀥𑀫𑀯𑀺𑀤𑁆𑀥𑀜𑁆𑀘 𑀲𑀩𑁆𑀩𑀣𑀸 𑀅𑀦𑀸𑀫𑀸𑀲𑀁, 𑀦𑀸𑀧𑀺 𑀅𑀥𑀺𑀯𑀸𑀲𑁂𑀢𑀩𑁆𑀩’’𑀦𑁆𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀢𑁆𑀢𑀸 𑀧𑀯𑀸𑀴𑀧𑀝𑀺𑀫𑀸𑀘𑁂𑀢𑀺𑀬𑀸𑀦𑀺 𑀘𑁂𑀯 𑀧𑁄𑀢𑁆𑀣𑀓𑁂𑀲𑀼 𑀧𑀯𑁂𑀲𑁂𑀢𑀩𑁆𑀩𑀆𑀡𑀺𑀬𑀸 𑀫𑀽𑀮𑁂, 𑀅𑀕𑁆𑀕𑁂𑀘 𑀧𑀯𑁂𑀲𑁂𑀢𑀩𑁆𑀩𑀁 𑀧𑀤𑀼𑀫𑀸𑀤𑀺𑀆𑀓𑀸𑀭𑁂𑀦 𑀓𑀢𑀁 𑀯𑀝𑁆𑀝𑀜𑁆𑀘 𑀦 𑀕𑀳𑁂𑀢𑀩𑁆𑀩𑀁 𑀦 𑀨𑀼𑀲𑀺𑀢𑀩𑁆𑀩𑀁.

𑀩𑀻𑀚𑀢𑁄 𑀧𑀝𑁆𑀞𑀸𑀬 𑀭𑀚𑀢𑀁, 𑀚𑀸𑀢𑀭𑀽𑀧𑀜𑁆𑀘 𑀓𑀢𑀁 𑀯𑀸 𑀳𑁄𑀢𑀼 𑀅𑀓𑀢𑀁 𑀯𑀸, 𑀲𑀩𑁆𑀩𑀲𑁄 𑀅𑀦𑀸𑀫𑀸𑀲𑀁, 𑀦 𑀘 𑀲𑀸𑀤𑀺𑀢𑀩𑁆𑀩𑀁. 𑀇𑀫𑀺𑀦𑀸 𑀓𑀢𑀁 𑀧𑀝𑀺𑀫𑀸𑀤𑀺𑀓𑀜𑁆𑀘 𑀆𑀭𑀓𑀽𑀝𑀮𑁄𑀳𑀜𑁆𑀘 𑀅𑀦𑀸𑀫𑀸𑀲𑀦𑁆𑀢𑀺 𑀯𑀓𑁆𑀔𑀢𑀺. 𑀓𑀢𑀸𑀓𑀢𑀲𑀼𑀯𑀡𑁆𑀡𑀭𑀚𑀢𑀸𑀦𑀁 𑀅𑀲𑀸𑀤𑀺𑀬𑀺𑀢𑀩𑁆𑀩𑀢𑀸𑀬 𑀇𑀥 𑀅𑀝𑁆𑀞𑀓𑀣𑀸𑀬 𑀆𑀕𑀢𑀢𑁆𑀢𑀸 𑀉𑀢𑁆𑀢𑀭𑁂𑀦 𑀭𑀸𑀚𑀧𑀼𑀢𑁆𑀢𑁂𑀦 𑀓𑀸𑀭𑁂𑀢𑁆𑀯𑀸 𑀆𑀳𑀝𑀁 𑀲𑀼𑀯𑀡𑁆𑀡𑀘𑁂𑀢𑀺𑀬𑀁 𑀦 𑀯𑀝𑁆𑀝𑀢𑀻𑀢𑀺 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀲𑀼𑀯𑀡𑁆𑀡𑀧𑀝𑀺𑀫𑀸𑀘𑁂𑀢𑀺𑀬𑀧𑁄𑀢𑁆𑀣𑀓𑀸𑀯𑀘𑁆𑀙𑀸𑀤𑀓𑀫𑀡𑀺𑀧𑀤𑀼𑀫𑀯𑀝𑁆𑀝𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀦 𑀲𑀸𑀤𑀺𑀢𑀩𑁆𑀩𑀫𑁂𑀯, 𑀦 𑀘 𑀆𑀫𑀲𑀺𑀢𑀩𑁆𑀩𑀁. 𑀏𑀢𑁂𑀦 𑀓𑀢𑀁 𑀲𑁂𑀦𑀸𑀲𑀦𑁄𑀧𑀓𑀭𑀡𑀁 𑀧𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀥𑀫𑁆𑀫𑀫𑀡𑁆𑀟𑀧𑁂 𑀓𑀢𑀫𑁆𑀧𑀺 𑀧𑀝𑀺𑀚𑀕𑁆𑀕𑀺𑀢𑀼𑀁 𑀯𑀝𑁆𑀝𑀢𑀺. 𑀮𑁄𑀳𑀺𑀢𑀯𑀡𑁆𑀡𑁄 𑀫𑀡𑀺, 𑀫𑀲𑀸𑀭𑀕𑀮𑁆𑀮𑀫𑀡𑀺 𑀘 𑀲𑀩𑁆𑀩𑀣𑀸 𑀅𑀦𑀸𑀫𑀸𑀲𑁄, 𑀦 𑀘 𑀅𑀥𑀺𑀯𑀸𑀲𑁂𑀢𑀩𑁆𑀩𑁄𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁.

𑁩𑁪𑁬. 𑀲𑀩𑁆𑀩𑀫𑀸𑀯𑀼𑀥𑀪𑀡𑁆𑀟𑀦𑁆𑀢𑀺 𑀔𑀕𑁆𑀕𑀸𑀤𑀺 𑀲𑀩𑁆𑀩𑀁 𑀆𑀯𑀼𑀥𑁄𑀧𑀓𑀭𑀡𑀁 𑀧𑀢𑁆𑀢𑀸𑀤𑀺𑀓𑀧𑁆𑀧𑀺𑀬𑀧𑀭𑀺𑀓𑁆𑀔𑀸𑀭𑀫𑀽𑀮𑀢𑁆𑀣𑀸𑀬 𑀤𑀻𑀬𑀫𑀸𑀦𑀁 𑀲𑀢𑁆𑀣𑀯𑀸𑀡𑀺𑀚𑀸𑀬 𑀅𑀓𑀸𑀢𑀩𑁆𑀩𑀢𑁆𑀢𑀸 𑀦 𑀕𑀳𑁂𑀢𑀩𑁆𑀩𑀁, ‘‘𑀇𑀫𑀁 𑀕𑀡𑁆𑀳𑀣𑀸’’𑀢𑀺 𑀤𑀺𑀦𑁆𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀓𑀢𑁆𑀯𑀸 ‘‘𑀔𑀼𑀭𑀸𑀤𑀺𑀓𑀧𑁆𑀧𑀺𑀬𑀧𑀭𑀺𑀓𑁆𑀔𑀸𑀭𑀁 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀲𑀸𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀗𑁆𑀕𑀸𑀫𑀪𑀽𑀫𑀺𑀬𑀁 𑀫𑀕𑁆𑀕𑁂 𑀧𑀢𑀺𑀢𑀔𑀕𑁆𑀕𑀸𑀤𑀺𑀁 𑀤𑀺𑀲𑁆𑀯𑀸 𑀧𑀸𑀲𑀸𑀡𑁂𑀦 𑀪𑀺𑀦𑁆𑀤𑀺𑀢𑁆𑀯𑀸 ‘‘𑀔𑀼𑀭𑀸𑀤𑀺𑀓𑀧𑁆𑀧𑀺𑀬𑀪𑀡𑁆𑀟𑀸𑀦𑀺 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀉𑀲𑀼𑀲𑀢𑁆𑀢𑀺𑀆𑀤𑀺𑀓𑀁 𑀨𑀮𑀢𑁄 𑀤𑀡𑁆𑀟𑀁 𑀅𑀧𑀦𑁂𑀢𑁆𑀯𑀸 𑀓𑀧𑁆𑀧𑀺𑀬𑀧𑀭𑀺𑀓𑁆𑀔𑀸𑀭𑀓𑀸𑀭𑀸𑀧𑀦𑀢𑁆𑀣𑀸𑀬 𑀕𑀳𑁂𑀢𑀩𑁆𑀩𑀁.

𑀚𑀺𑀬𑀸𑀢𑀺 𑀥𑀦𑀼𑀕𑀼𑀡𑁄. 𑀘-𑀓𑀸𑀭𑁂𑀦 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀯𑀼𑀢𑁆𑀢𑀁 𑀅𑀗𑁆𑀓𑀼𑀲𑀢𑁄𑀫𑀭𑀸𑀤𑀺𑀁 𑀧𑀭𑀳𑀺𑀁 𑀲𑁄𑀧𑀓𑀭𑀡𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀥𑀦𑀼𑀤𑀡𑁆𑀟𑀓𑁄𑀢𑀺 𑀚𑀺𑀬𑀸𑀯𑀺𑀭𑀳𑀺𑀢𑁄 𑀥𑀦𑀼𑀤𑀡𑁆𑀟𑀓𑁄. 𑀇𑀤𑀁 𑀧𑀭𑀳𑀺𑀁𑀲𑁄𑀧𑀓𑀭𑀡𑀪𑀡𑁆𑀟𑀸𑀤𑀺𑀓𑀁 𑀯𑀺𑀳𑀸𑀭𑁂 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀝𑁆𑀞𑀸𑀦𑁂 𑀞𑀧𑀺𑀢𑀁 𑀘𑁂, 𑀲𑀸𑀫𑀺𑀓𑀸𑀦𑀁 𑀯𑀢𑁆𑀯𑀸 𑀢𑁂𑀳𑀺 𑀅𑀕𑁆𑀕𑀳𑀺𑀢𑀁 𑀘𑁂, 𑀅𑀘𑀸𑀮𑁂𑀦𑁆𑀢𑁂𑀦 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁.

𑀚𑀸𑀮𑀜𑁆𑀘𑀸𑀢𑀺 𑀫𑀘𑁆𑀙𑀚𑀸𑀮𑀧𑀓𑁆𑀔𑀺𑀚𑀸𑀮𑀸𑀤𑀺𑀚𑀸𑀮𑀜𑁆𑀘. 𑀚𑀸𑀮𑀁 𑀤𑀻𑀬𑀫𑀸𑀦𑀁 𑀙𑀢𑁆𑀢𑀯𑁂𑀞𑀦𑀢𑁆𑀣𑀁, 𑀆𑀲𑀦𑀘𑁂𑀢𑀺𑀬𑀸𑀤𑀺𑀫𑀢𑁆𑀣𑀓𑁂 𑀩𑀦𑁆𑀥𑀦𑀸𑀤𑀺𑀧𑀬𑁄𑀚𑀦𑁂 𑀲𑀢𑀺 𑀢𑀤𑀢𑁆𑀣𑀜𑁆𑀘 𑀕𑀳𑁂𑀢𑀩𑁆𑀩𑀁. 𑀲𑀭𑀯𑀸𑀭𑀡𑀁 𑀦𑀸𑀫 𑀨𑀮𑀓𑀸𑀤𑀺𑀓𑀁 𑀅𑀜𑁆𑀜𑁂𑀳𑀺 𑀅𑀢𑁆𑀢𑀦𑁄 𑀯𑀺𑀚𑁆𑀛𑀦𑀢𑁆𑀣𑀸𑀬 𑀯𑀺𑀲𑁆𑀲𑀝𑁆𑀞𑀲𑀭𑀦𑀺𑀯𑀸𑀭𑀡𑀁 𑀯𑀺𑀦𑀸𑀲𑀦𑁄𑀧𑀭𑁄𑀥𑀓𑀸𑀭𑀡𑀁 𑀳𑁄𑀢𑀻𑀢𑀺 𑀪𑀡𑁆𑀟𑀫𑀽𑀮𑀢𑁆𑀣𑀁 𑀲𑀸𑀤𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀤𑀦𑁆𑀢𑀓𑀝𑁆𑀞𑀸𑀥𑀸𑀭𑀨𑀮𑀓𑀸𑀤𑀺 𑀬𑀤𑀺𑀘𑁆𑀙𑀺𑀢𑀁 𑀓𑀭𑁄𑀫𑀻’’𑀢𑀺 𑀫𑀼𑀝𑁆𑀞𑀺𑀁 𑀅𑀧𑀦𑁂𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑁩𑁪𑁭. 𑀘𑁂𑀢𑀺𑀬𑀦𑁆𑀢𑀺 𑀏𑀢𑁆𑀣 ‘‘𑀲𑀼𑀯𑀡𑁆𑀡𑀘𑁂𑀢𑀺𑀬’’𑀦𑁆𑀢𑀺 𑀇𑀤𑀁 ‘‘𑀲𑀼𑀯𑀡𑁆𑀡𑀧𑀝𑀺𑀩𑀺𑀫𑁆𑀩𑀸𑀤𑀻’’𑀢𑀺 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀢𑁆𑀢𑀸 𑀮𑀩𑁆𑀪𑀢𑀺. 𑀲𑀼𑀯𑀡𑁆𑀡𑀕𑁆𑀕𑀳𑀡𑀜𑁆𑀘𑀼𑀧𑀮𑀓𑁆𑀔𑀡𑀦𑁆𑀢𑀺 𑀭𑀚𑀢𑀫𑀬𑀜𑁆𑀘 𑀕𑀳𑁂𑀢𑀩𑁆𑀩𑀁. 𑀆𑀭𑀓𑀽𑀝𑀓𑀦𑁆𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑀁 𑀮𑁄𑀳𑀯𑀺𑀲𑁂𑀲𑀫𑀸𑀳. ‘‘𑀅𑀦𑀸𑀫𑀸𑀲’’𑀦𑁆𑀢𑀺 𑀇𑀤𑀁 ‘‘𑀅𑀲𑀫𑁆𑀧𑀝𑀺𑀘𑁆𑀙𑀺𑀬𑀁 𑀯𑀸’’𑀢𑀺 𑀏𑀢𑀲𑁆𑀲 𑀉𑀧𑀮𑀓𑁆𑀔𑀡𑀁.

𑁩𑁪𑁮. 𑀲𑀩𑁆𑀩𑀁 𑀯𑀸𑀤𑀺𑀢𑀫𑀺𑀢𑀺 𑀲𑀫𑁆𑀩𑀦𑁆𑀥𑁄. 𑀑𑀦𑀳𑀺𑀢𑀼𑀦𑁆𑀢𑀺 𑀘𑀫𑁆𑀫𑀯𑀭𑀢𑁆𑀢𑀢𑀦𑁆𑀢𑀻𑀳𑀺 𑀩𑀦𑁆𑀥𑀺𑀢𑀼𑀁. 𑀑𑀦𑀳𑀸𑀧𑁂𑀢𑀼𑀦𑁆𑀢𑀺 𑀢𑀣𑁂𑀯 𑀅𑀜𑁆𑀜𑁂𑀳𑀺 𑀓𑀸𑀭𑀸𑀧𑁂𑀢𑀼𑀁. 𑀯𑀸𑀤𑀸𑀧𑁂𑀢𑀼𑀦𑁆𑀢𑀺 𑀅𑀜𑁆𑀜𑁂𑀳𑀺 𑀯𑀸𑀤𑀸𑀧𑁂𑀢𑀼𑀁. 𑀯𑀸𑀤𑁂𑀢𑀼𑀦𑁆𑀢𑀺 𑀅𑀢𑁆𑀢𑀦𑀸 𑀯𑀸𑀤𑁂𑀢𑀼𑀁. 𑀯𑀸𑀤𑀺𑀢𑀦𑁆𑀢𑀺 𑀯𑀸𑀤𑀦𑀻𑀬𑀁 𑀬𑀣𑀸 ‘‘𑀓𑀭𑀡𑀻𑀬𑀁 𑀓𑀸𑀭𑀺𑀢’’𑀦𑁆𑀢𑀺, 𑀯𑀸𑀤𑀦𑀸𑀭𑀳𑀁 𑀢𑀼𑀭𑀺𑀬𑀪𑀡𑁆𑀟𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 𑀑𑀦𑀳𑀦𑀸𑀤𑀺𑀓𑀺𑀭𑀺𑀬𑀸𑀬 𑀓𑀫𑁆𑀫𑀁.

𑁩𑁪𑁯. 𑀉𑀧𑀳𑀸𑀭𑀁 𑀓𑀭𑀺𑀲𑁆𑀲𑀸𑀫𑀸𑀢𑀺 𑀧𑀽𑀚𑀁 𑀓𑀭𑀺𑀲𑁆𑀲𑀸𑀫. 𑀇𑀢𑀺 𑀅𑀦𑀼𑀫𑀢𑀺𑀕𑁆𑀕𑀳𑀡𑀢𑁆𑀣𑀸𑀬. 𑀯𑀢𑁆𑀢𑀩𑁆𑀩𑀸𑀢𑀺 𑀢𑁂 𑀯𑀢𑁆𑀢𑀸𑀭𑁄 𑀯𑀢𑁆𑀢𑀩𑁆𑀩𑀸𑀢𑀺 𑀬𑁄𑀚𑀦𑀸.

𑁩𑁫𑁦-𑁧. 𑀥𑀼𑀢𑁆𑀢𑀺𑀬𑀸 𑀇𑀢𑁆𑀣𑀺𑀬𑀸𑀢𑀺 𑀯𑀺𑀧𑀦𑁆𑀦𑀸𑀘𑀸𑀭𑀸𑀬 𑀮𑁄𑀴𑀺𑀢𑁆𑀣𑀺𑀬𑀸. 𑀲𑀬𑀁 𑀨𑀼𑀲𑀺𑀬𑀫𑀸𑀦𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄 𑀧𑀬𑁄𑀕𑀁 𑀯𑀺𑀦𑀸 𑀇𑀢𑁆𑀣𑀺𑀬𑀸 𑀅𑀢𑁆𑀢𑀦𑀸𑀯 𑀨𑀼𑀲𑀺𑀬𑀫𑀸𑀦𑀲𑁆𑀲. 𑀓𑀸𑀬𑁂𑀦 𑀅𑀯𑀸𑀬𑀫𑀺𑀢𑁆𑀯𑀸𑀢𑀺 𑀢𑀲𑁆𑀲𑀸 𑀲𑀭𑀻𑀭𑀲𑀫𑁆𑀨𑀲𑁆𑀲𑀸𑀦𑀼𑀪𑀯𑀦𑀢𑁆𑀣𑀁 𑀅𑀢𑁆𑀢𑀦𑁄 𑀓𑀸𑀬𑀁 𑀅𑀘𑀸𑀮𑁂𑀢𑁆𑀯𑀸. 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀢𑁄𑀢𑀺 𑀨𑀲𑁆𑀲𑀁 𑀅𑀦𑀼𑀪𑀯𑀦𑁆𑀢𑀲𑁆𑀲.

𑀅𑀲𑀜𑁆𑀘𑀺𑀘𑁆𑀘𑀸𑀢𑀺 𑀏𑀢𑁆𑀣 ‘‘𑀨𑀼𑀲𑀦𑁂’’𑀢𑀺 𑀧𑀸𑀞𑀲𑁂𑀲𑁄, ‘‘𑀇𑀫𑀺𑀦𑀸 𑀉𑀧𑀸𑀬𑁂𑀦 𑀇𑀫𑀁 𑀨𑀼𑀲𑀸𑀫𑀻’’𑀢𑀺 𑀅𑀘𑁂𑀢𑁂𑀢𑁆𑀯𑀸. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? ‘‘𑀇𑀫𑀺𑀦𑀸 𑀧𑀢𑁆𑀢𑀧𑀝𑀺𑀕𑁆𑀕𑀳𑀡𑀸𑀤𑀺𑀦𑀸 𑀉𑀧𑀸𑀬𑁂𑀦 𑀏𑀢𑀺𑀲𑁆𑀲𑀸 𑀲𑀭𑀻𑀭𑀲𑀫𑁆𑀨𑀲𑁆𑀲𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀧𑀢𑁆𑀢𑀣𑀸𑀮𑀓𑀢𑀝𑁆𑀝𑀓𑀧𑀡𑁆𑀡𑀧𑀼𑀝𑀪𑁂𑀲𑀚𑁆𑀚𑀸𑀤𑀺𑀁 𑀧𑀝𑀺𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑀺𑀬𑀸 𑀳𑀢𑁆𑀣𑁂 𑀅𑀢𑁆𑀢𑀦𑁄 𑀳𑀢𑁆𑀣𑁂𑀦 𑀨𑀼𑀲𑀦𑀸𑀤𑀻𑀲𑀼 𑀅𑀦𑀸𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀲𑁆𑀲𑀢𑀺𑀬𑀸’’𑀢𑀺 𑀇𑀤𑀁 𑀧𑀦 𑀇𑀫𑀺𑀦𑀸𑀯 𑀲𑀗𑁆𑀕𑀳𑀺𑀢𑀢𑁆𑀢𑀸 𑀇𑀥 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀁, 𑀫𑀸𑀢𑀼𑀕𑀸𑀫𑀲𑁆𑀲 𑀲𑀭𑀻𑀭𑁂 𑀨𑀼𑀲𑀦𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸 𑀅𑀜𑁆𑀜𑀯𑀺𑀳𑀺𑀢𑁄 𑀳𑀼𑀢𑁆𑀯𑀸 𑀲𑀢𑀺𑀁 𑀅𑀦𑀼𑀧𑀝𑁆𑀞𑀧𑁂𑀢𑁆𑀯𑀸 𑀳𑀢𑁆𑀣𑀧𑀸𑀤𑀧𑀲𑀸𑀭𑀡𑀸𑀤𑀻𑀲𑀼 𑀨𑀼𑀲𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀤𑀸𑀭𑀓𑀸𑀓𑀸𑀭𑀁 𑀤𑀸𑀭𑀺𑀓𑀁 ‘‘𑀫𑀸𑀢𑀼𑀕𑀸𑀫𑁄’’𑀢𑀺 𑀅𑀚𑀸𑀦𑀺𑀢𑁆𑀯𑀸 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀨𑀼𑀲𑀦𑁆𑀢𑀲𑁆𑀲. 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑀺𑀦𑁄 𑀘𑀸𑀢𑀺 ‘‘𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑁄 𑀓𑀸𑀬𑁂𑀦 𑀯𑀸𑀬𑀫𑀢𑀺, 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺. 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑁄 𑀓𑀸𑀬𑁂𑀦 𑀯𑀸𑀬𑀫𑀢𑀺, 𑀦 𑀘 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺. 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑁄 𑀦 𑀘 𑀓𑀸𑀬𑁂𑀦 𑀯𑀸𑀬𑀫𑀢𑀺, 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺. 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑁄 𑀦 𑀘 𑀓𑀸𑀬𑁂𑀦 𑀯𑀸𑀬𑀫𑀢𑀺, 𑀦 𑀘 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑁨𑁭𑁯) 𑀯𑀼𑀢𑁆𑀢𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑀯𑀢𑁄 𑀘𑀢𑀼𑀩𑁆𑀩𑀺𑀥𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄.

𑀇𑀫𑁂𑀲𑀼 𑀬𑁄 𑀫𑀸𑀢𑀼𑀕𑀸𑀫𑁂𑀦 𑀆𑀮𑀺𑀗𑁆𑀕𑀦𑀸𑀤𑀺𑀧𑀬𑁄𑀕𑁂𑀦 𑀅𑀚𑁆𑀛𑁄𑀢𑁆𑀣𑀭𑀬𑀫𑀸𑀦𑁄 𑀢𑀁 𑀅𑀢𑁆𑀢𑀦𑁄 𑀲𑀭𑀻𑀭𑀢𑁄 𑀅𑀧𑀦𑁂𑀢𑁆𑀯𑀸 𑀫𑀼𑀜𑁆𑀘𑀺𑀢𑀼𑀓𑀸𑀫𑁄 𑀳𑀢𑁆𑀣𑀘𑀸𑀮𑁂𑀦, 𑀫𑀼𑀝𑁆𑀞𑀺𑀆𑀤𑀻𑀳𑀺 𑀯𑀸 𑀧𑀝𑀺𑀧𑀡𑀸𑀫𑀦𑀁, 𑀧𑀳𑀭𑀡𑀸𑀤𑀺𑀓𑀜𑁆𑀘 𑀧𑀬𑁄𑀕𑀁 𑀓𑀭𑁄𑀢𑀺, 𑀅𑀬𑀁 𑀧𑀞𑀫𑁄 𑀧𑀼𑀕𑁆𑀕𑀮𑁄. 𑀅𑀢𑁆𑀢𑀸𑀦𑀫𑀚𑁆𑀛𑁄𑀢𑁆𑀣𑀭𑀺𑀢𑀼𑀁 𑀆𑀕𑀘𑁆𑀙𑀦𑁆𑀢𑀺𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀧𑀳𑀭𑀡𑀸𑀓𑀸𑀭𑀸𑀤𑀺𑀲𑀩𑁆𑀩𑀧𑀬𑁄𑀕𑀁 𑀤𑀲𑁆𑀲𑁂𑀢𑁆𑀯𑀸 𑀢𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀭𑀻𑀭𑀁 𑀨𑀼𑀲𑀺𑀢𑀼𑀁 𑀅𑀤𑁂𑀦𑁆𑀢𑁄 𑀤𑀼𑀢𑀺𑀬𑁄. 𑀇𑀢𑁆𑀣𑀺𑀬𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀆𑀮𑀺𑀗𑁆𑀕𑀺𑀢𑁄 𑀘𑁄𑀧𑀦𑀭𑀳𑀺𑀢𑀁 𑀫𑀁 ‘‘𑀅𑀦𑀢𑁆𑀣𑀺𑀓𑁄’’𑀢𑀺 𑀫𑀦𑁆𑀢𑁆𑀯𑀸 ‘‘𑀲𑀬𑀫𑁂𑀯 𑀧𑀮𑀸𑀬𑀺𑀲𑁆𑀲𑀢𑀻’’𑀢𑀺, ‘‘𑀅𑀘𑁄𑀧𑀦𑀫𑁂𑀯 𑀫𑁄𑀓𑁆𑀔𑁄𑀧𑀸𑀬𑁄’’𑀢𑀺 𑀜𑀢𑁆𑀯𑀸 𑀦𑀺𑀘𑁆𑀘𑀮𑁄𑀯 𑀳𑀼𑀢𑁆𑀯𑀸 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀦𑁆𑀢𑁄 𑀢𑀢𑀺𑀬𑁄. 𑀅𑀢𑁆𑀢𑀸𑀦𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑀼𑀫𑀸𑀕𑀘𑁆𑀙𑀦𑁆𑀢𑀺𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀤𑀼𑀢𑀺𑀬𑁄 𑀯𑀺𑀬 𑀢𑀸𑀲𑁂𑀢𑀼𑀁 𑀓𑀸𑀬𑀧𑁆𑀧𑀬𑁄𑀕𑀁 𑀅𑀓𑀢𑁆𑀯𑀸 ‘‘𑀅𑀕𑀢𑁂 𑀧𑀸𑀢𑁂𑀲𑁆𑀲𑀸𑀫𑀺, 𑀧𑀳𑀭𑀺𑀢𑁆𑀯𑀸 𑀢𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀯𑀸 𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀘𑁆𑀘𑀮𑁄𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑁄 𑀘𑀢𑀼𑀢𑁆𑀣𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩𑁫𑁨. 𑀧𑀞𑀫𑁂𑀦𑀸𑀢𑀺 𑀏𑀢𑁆𑀣 ‘‘𑀧𑀸𑀭𑀸𑀚𑀺𑀓𑁂𑀦𑀸’’𑀢𑀺 𑀧𑀸𑀞𑀲𑁂𑀲𑁄, 𑀓𑀸𑀬𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀥 𑀘𑀺𑀢𑁆𑀢𑀁 𑀦𑀸𑀫 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁, 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀫𑁆𑀳𑀺 𑀫𑁄𑀘𑁂𑀢𑀼𑀓𑀸𑀫𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁.

𑀓𑀸𑀬𑀲𑀁𑀲𑀕𑁆𑀕𑀓𑀣𑀸𑀯𑀡𑁆𑀡𑀦𑀸.

𑁩𑁫𑁩-𑁪. 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑁂𑀦𑀸𑀢𑀺 𑀤𑀼𑀝𑁆𑀞𑀼 𑀓𑀼𑀘𑁆𑀙𑀺𑀢𑀪𑀸𑀯𑀁 𑀉𑀮𑀢𑀺 𑀕𑀘𑁆𑀙𑀢𑀻𑀢𑀺 𑀤𑀼𑀝𑁆𑀞𑀼𑀮𑁆𑀮𑀸, 𑀤𑀼𑀝𑁆𑀞𑀼𑀮𑁆𑀮𑀸 𑀘 𑀲𑀸 𑀯𑀸𑀘𑀸 𑀘𑀸𑀢𑀺 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸, 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑁂 𑀫𑁂𑀣𑀼𑀦𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀸 𑀯𑀸𑀘𑀸, 𑀬𑀣𑀸𑀳 ‘‘𑀤𑀼𑀝𑁆𑀞𑀼𑀮𑁆𑀮𑀸 𑀦𑀸𑀫 𑀯𑀸𑀘𑀸 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀫𑁂𑀣𑀼𑀦𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀸 𑀯𑀸𑀘𑀸’’𑀢𑀺 (𑀧𑀸𑀭𑀸. 𑁨𑁮𑁫), 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀬 𑀅𑀲𑁆𑀲𑀸𑀤𑁄 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑁄, 𑀢𑀣𑀸𑀧𑀯𑀢𑁆𑀢𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀢𑀦𑀸, 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀭𑀸𑀕𑁄 𑀇𑀥 𑀲𑀳𑀘𑀭𑀺𑀬𑁂𑀦 ‘‘𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑁄’’𑀢𑀺 𑀯𑀼𑀢𑁆𑀢𑁄, 𑀢𑁂𑀦, 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑀲𑀫𑁆𑀧𑀬𑀼𑀢𑁆𑀢𑁂𑀦 𑀭𑀸𑀕𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 ‘‘𑀑𑀪𑀸𑀲𑀦𑁆𑀢𑀲𑁆𑀲𑀸’’𑀢𑀺 𑀯𑀓𑁆𑀔𑀫𑀸𑀦𑀑𑀪𑀸𑀲𑀦𑀲𑁆𑀲 𑀳𑁂𑀢𑀼 𑀤𑀲𑁆𑀲𑀺𑀢𑁄.

𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀺𑀦𑁄 𑀪𑀺𑀓𑁆𑀔𑀼𑀦𑁄𑀢𑀺 𑀬𑁄𑀚𑀦𑀸. 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀺𑀦𑁄𑀢𑀺 ‘‘𑀫𑀸𑀢𑀼𑀕𑀸𑀫𑁄 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀦 𑀬𑀓𑁆𑀔𑀻, 𑀦 𑀧𑁂𑀢𑀻, 𑀦 𑀢𑀺𑀭𑀘𑁆𑀙𑀸𑀦𑀕𑀢𑀸, 𑀯𑀺𑀜𑁆𑀜𑀽 𑀧𑀝𑀺𑀩𑀮𑀸 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀚𑀸𑀦𑀺𑀢𑀼’’𑀦𑁆𑀢𑀺 𑀧𑀤𑀪𑀸𑀚𑀦𑁂 𑀦𑀺𑀤𑁆𑀤𑀺𑀝𑁆𑀞𑀲𑀭𑀽𑀧𑀸𑀬 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀚𑀸𑀦𑀦𑁆𑀢𑀺𑀬𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀺𑀦𑁄 𑀪𑀺𑀓𑁆𑀔𑀼𑀦𑁄𑀢𑀺 𑀅𑀢𑁆𑀣𑁄. ‘‘𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀸𑀦’’𑀦𑁆𑀢𑀺 𑀏𑀢𑀲𑁆𑀲 𑀲𑀫𑁆𑀩𑀦𑁆𑀥𑀻𑀯𑀲𑁂𑀦 ‘‘𑀇𑀢𑁆𑀣𑀺𑀬𑀸’’𑀢𑀺 𑀇𑀤𑀁 𑀲𑀸𑀫𑀺𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁, 𑀬𑀣𑀸𑀯𑀼𑀢𑁆𑀢𑀲𑀭𑀽𑀧𑀲𑁆𑀲 𑀫𑀸𑀢𑀼𑀕𑀸𑀫𑀲𑁆𑀲 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀯𑀡𑁆𑀡𑀸𑀯𑀡𑁆𑀡𑀯𑀲𑁂𑀦 𑀘𑀸𑀢𑀺 ‘‘𑀯𑀡𑁆𑀡𑀁 𑀪𑀡𑀢𑀺 𑀦𑀸𑀫 𑀤𑁆𑀯𑁂 𑀫𑀕𑁆𑀕𑁂 𑀣𑁄𑀫𑁂𑀢𑀺 𑀯𑀡𑁆𑀡𑁂𑀢𑀺 𑀧𑀲𑀁𑀲𑀢𑀺. 𑀅𑀯𑀡𑁆𑀡𑀁 𑀪𑀡𑀢𑀺 𑀦𑀸𑀫 𑀤𑁆𑀯𑁂 𑀫𑀕𑁆𑀕𑁂 𑀔𑀼𑀁𑀲𑁂𑀢𑀺 𑀯𑀫𑁆𑀪𑁂𑀢𑀺 𑀕𑀭𑀳𑀢𑀻’’𑀢𑀺 𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦 𑀉𑀪𑁄 𑀫𑀕𑁆𑀕𑁂 𑀉𑀤𑁆𑀤𑀺𑀲𑁆𑀲 𑀣𑁄𑀫𑀦𑀕𑀭𑀳𑀡𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀫𑁂𑀣𑀼𑀦𑀲𑁆𑀲 𑀬𑀸𑀘𑀦𑀸𑀤𑀬𑁄 𑀫𑁂𑀣𑀼𑀦𑀬𑀸𑀘𑀦𑀸𑀤𑀬𑁄, 𑀢𑁂𑀳𑀺 𑀫𑁂𑀣𑀼𑀦𑀬𑀸𑀘𑀦𑀸𑀤𑀻𑀳𑀺, ‘‘𑀬𑀸𑀘𑀢𑀺𑀧𑀺 𑀆𑀬𑀸𑀘𑀢𑀺𑀧𑀺 𑀧𑀼𑀘𑁆𑀙𑀢𑀺𑀧𑀺 𑀧𑀝𑀺𑀧𑀼𑀘𑁆𑀙𑀢𑀺𑀧𑀺 𑀆𑀘𑀺𑀓𑁆𑀔𑀢𑀺𑀧𑀺 𑀅𑀦𑀼𑀲𑀸𑀲𑀢𑀺𑀧𑀺 𑀅𑀓𑁆𑀓𑁄𑀲𑀢𑀺𑀧𑀻’’𑀢𑀺 (𑀧𑀸𑀭𑀸. 𑁨𑁮𑁫) 𑀉𑀤𑁆𑀤𑁂𑀲𑁂 𑀯𑀼𑀢𑁆𑀢𑀫𑁂𑀣𑀼𑀦𑀬𑀸𑀘𑀦𑀸𑀤𑀺𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑁂𑀳𑀺 𑀤𑁆𑀯𑀻𑀳𑀺 ‘‘𑀑𑀪𑀸𑀲𑀦𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀑𑀪𑀸𑀲𑀦𑀸 𑀤𑀲𑁆𑀲𑀺𑀢𑀸. 𑀑𑀪𑀸𑀲𑀦𑁆𑀢𑀲𑁆𑀲𑀸𑀢𑀺 𑀉𑀤𑁆𑀤𑁂𑀲𑀬𑀦𑁆𑀢𑀲𑁆𑀲, 𑀧𑀓𑀸𑀲𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀯𑀺𑀜𑁆𑀜𑀼’’𑀦𑁆𑀢𑀺 𑀇𑀫𑀺𑀦𑀸 𑀑𑀪𑀸𑀲𑀦𑀓𑀺𑀭𑀺𑀬𑀸𑀬 𑀓𑀫𑁆𑀫𑀫𑀸𑀳, 𑀇𑀫𑀺𑀦𑀸 𑀯𑀺𑀲𑁂𑀲𑀺𑀢𑀩𑁆𑀩𑀁 ‘‘𑀫𑀦𑀼𑀲𑁆𑀲𑀺𑀢𑁆𑀣𑀺’’𑀦𑁆𑀢𑀺 𑀇𑀤𑀁 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺, 𑀬𑀣𑀸𑀤𑀲𑁆𑀲𑀺𑀢𑀧𑀤𑀪𑀸𑀚𑀦𑀸𑀕𑀢𑀲𑀭𑀽𑀧𑀁 𑀯𑀺𑀜𑁆𑀜𑀼𑀁 𑀧𑀝𑀺𑀩𑀮𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑁆𑀢𑀫𑀲𑁄 𑀳𑀢𑁆𑀣𑀫𑀼𑀤𑁆𑀤𑀸𑀬𑀧𑀻𑀢𑀺 𑀑𑀪𑀸𑀲𑀦𑁂 𑀅𑀦𑁆𑀢𑀺𑀫𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀁. 𑀤𑀼𑀝𑁆𑀞𑀼𑀮𑁆𑀮𑀯𑀘𑀦𑀲𑁆𑀲𑀸𑀤𑀪𑀸𑀯𑁂 𑀲𑀢𑀺 𑀬𑁄 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀧𑀝𑀺𑀩𑀤𑁆𑀥𑀁 𑀕𑀼𑀡𑀤𑁄𑀲𑀁 𑀯𑀸 𑀫𑁂𑀣𑀼𑀦𑀥𑀫𑁆𑀫𑀬𑀸𑀘𑀦𑀸𑀤𑀺𑀯𑀲𑁂𑀦 𑀯𑀸 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀚𑀸𑀦𑀦𑁆𑀢𑀺𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀳𑀢𑁆𑀣𑀫𑀼𑀤𑁆𑀤𑀸𑀬𑀧𑀺 𑀯𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀇𑀫𑀲𑁆𑀫𑀺𑀁 𑀕𑀸𑀣𑀸𑀤𑁆𑀯𑀬𑁂 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑁂𑀦 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀺𑀦𑁄 𑀯𑀺𑀜𑁆𑀜𑀼𑀁 𑀢𑀁 𑀇𑀢𑁆𑀣𑀺𑀁 𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀸𑀦𑀁 𑀯𑀡𑁆𑀡𑀯𑀲𑁂𑀦 𑀅𑀦𑁆𑀢𑀫𑀲𑁄 𑀳𑀢𑁆𑀣𑀫𑀼𑀤𑁆𑀤𑀸𑀬𑀧𑀺 𑀑𑀪𑀸𑀲𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀭𑀼𑀓𑀁 𑀲𑀺𑀬𑀸𑀢𑀺 𑀏𑀓𑀁 𑀯𑀸𑀓𑁆𑀬𑀁, 𑀢𑀣𑀸 ‘‘𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀸𑀦𑀁 𑀅𑀯𑀡𑁆𑀡𑀯𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀘 ‘‘𑀫𑁂𑀣𑀼𑀦𑀬𑀸𑀘𑀦𑀸𑀤𑀻𑀳𑀻’’𑀢𑀺 𑀇𑀫𑀺𑀦𑀸 𑀘 𑀬𑁄𑀚𑀦𑀸𑀬 𑀯𑀸𑀓𑁆𑀬𑀤𑁆𑀯𑀬𑀦𑁆𑀢𑀺 𑀏𑀯𑀁 𑀬𑁄𑀚𑀦𑀸𑀯𑀲𑁂𑀦 𑀢𑀻𑀡𑀺 𑀯𑀸𑀓𑁆𑀬𑀸𑀦𑀺 𑀳𑁄𑀦𑁆𑀢𑀺.

𑀢𑀢𑁆𑀣 𑀧𑀞𑀫𑀯𑀸𑀓𑁆𑀬𑁂 𑀯𑀡𑁆𑀡𑀯𑀘𑀦𑁂𑀦 𑀲𑀗𑁆𑀕𑀳𑀺𑀢𑀁 𑀣𑁄𑀫𑀦𑀸𑀤𑀺𑀓𑀣𑀁 𑀓𑀣𑁂𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀺. ‘‘𑀇𑀢𑁆𑀣𑀺𑀮𑀓𑁆𑀔𑀡𑁂𑀦 𑀲𑀼𑀪𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀲𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀣𑁄𑀫𑀦𑀢𑁆𑀣𑀁 𑀯𑀤𑀢𑁄 𑀲𑀗𑁆𑀖𑀸𑀤𑀺𑀲𑁂𑀲𑁄 𑀦 𑀳𑁄𑀢𑀺, ‘‘𑀢𑀯 𑀯𑀘𑁆𑀘𑀫𑀕𑁆𑀕𑁄 𑀘 𑀧𑀲𑁆𑀲𑀸𑀯𑀫𑀕𑁆𑀕𑁄 𑀘 𑀈𑀤𑀺𑀲𑁄 𑀲𑀼𑀪𑁄 𑀲𑀼𑀲𑀡𑁆𑀞𑀸𑀦𑁄, 𑀢𑁂𑀦 𑀦𑀸𑀫 𑀈𑀤𑀺𑀲𑁂𑀦 𑀇𑀢𑁆𑀣𑀺𑀮𑀓𑁆𑀔𑀡𑁂𑀦 𑀲𑀼𑀪𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀲𑀻’’𑀢𑀺 𑀯𑀤𑀦𑁆𑀢𑀲𑁆𑀲 𑀳𑁄𑀢𑀺. ‘‘𑀯𑀡𑁆𑀡𑁂𑀢𑀺, 𑀧𑀲𑀁𑀲𑀢𑀻’’𑀢𑀺 𑀧𑀤𑀤𑁆𑀯𑀬𑀜𑁆𑀘 ‘‘𑀣𑁄𑀫𑁂𑀢𑀻’’𑀢𑀺 𑀧𑀤𑀲𑁆𑀲 𑀧𑀭𑀺𑀬𑀸𑀬𑁄.

𑀤𑀼𑀢𑀺𑀬𑀯𑀸𑀓𑁆𑀬𑁂 𑀅𑀯𑀡𑁆𑀡𑀧𑀤𑀲𑀗𑁆𑀕𑀳𑀺𑀢𑀁 𑀔𑀼𑀁𑀲𑀦𑀸𑀤𑀺𑀢𑁆𑀢𑀬𑁂 𑀔𑀼𑀁𑀲𑀦𑀁 𑀦𑀸𑀫 𑀧𑀢𑁄𑀤𑁄𑀧𑀫𑁂𑀳𑀺 𑀨𑀭𑀼𑀲𑀯𑀘𑀦𑁂𑀳𑀺 𑀢𑀼𑀤𑀦𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀔𑀼𑀁𑀲𑁂𑀢𑀻𑀢𑀺 𑀯𑀸𑀘𑀸𑀧𑀢𑁄𑀤𑁂𑀦 𑀖𑀝𑁆𑀝𑁂𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁫). 𑀧𑀢𑀼𑀚𑁆𑀚𑀢𑁂𑀦𑁂𑀦𑀸𑀢𑀺 ‘‘𑀧𑀢𑁄𑀤𑁄’’𑀢𑀺𑀅𑀕𑀘𑁆𑀙𑀦𑁆𑀢𑁂 𑀅𑀲𑁆𑀲𑀸𑀤𑀬𑁄 𑀧𑀯𑀢𑁆𑀢𑁂𑀢𑀼𑀁 𑀯𑀺𑀚𑁆𑀛𑀦𑀓𑀧𑀸𑀘𑀦𑀤𑀡𑁆𑀟𑁄 𑀯𑀼𑀘𑁆𑀘𑀢𑀺. 𑀯𑀫𑁆𑀪𑀦𑀁 𑀦𑀸𑀫 𑀅𑀧𑀲𑀸𑀤𑀦𑀁. 𑀅𑀧𑀲𑀸𑀤𑀦𑀁 𑀦𑀸𑀫 𑀕𑀼𑀡𑀢𑁄 𑀧𑀭𑀺𑀳𑀸𑀧𑀦𑀁. 𑀬𑀣𑀸𑀳 ‘‘𑀯𑀫𑁆𑀪𑁂𑀢𑀻𑀢𑀺 𑀅𑀧𑀲𑀸𑀤𑁂𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁫). 𑀕𑀭𑀳𑀸 𑀦𑀸𑀫 𑀤𑁄𑀲𑀸𑀭𑁄𑀧𑀦𑀁. 𑀬𑀣𑀸𑀳 ‘‘𑀕𑀭𑀳𑀢𑀻𑀢𑀺 𑀤𑁄𑀲𑀁 𑀤𑁂𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁫). 𑀇𑀫𑀁 𑀔𑀼𑀁𑀲𑀦𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀯𑀘𑀦𑀁 𑀯𑀓𑁆𑀔𑀫𑀸𑀦𑁂𑀲𑀼 ‘‘𑀲𑀺𑀔𑀭𑀡𑀻𑀲𑀺, 𑀲𑀫𑁆𑀪𑀺𑀦𑁆𑀦𑀸𑀲𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀲𑀻’’𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀧𑀤𑁂𑀲𑀼 𑀅𑀜𑁆𑀜𑀢𑀭𑁂𑀦 𑀬𑁄𑀚𑁂𑀢𑁆𑀯𑀸 𑀓𑀣𑁂𑀦𑁆𑀢𑀲𑁆𑀲𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀦 𑀇𑀢𑀭𑀲𑁆𑀲.

𑀢𑀢𑀺𑀬𑀯𑀸𑀓𑁆𑀬𑁂 𑀫𑁂𑀣𑀼𑀦𑀬𑀸𑀘𑀦𑀸𑀤𑀺𑀯𑀘𑀦𑁂𑀳𑀺 𑀲𑀗𑁆𑀕𑀳𑀺𑀢𑀁 𑀆𑀬𑀸𑀘𑀦𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲𑀸𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁄. ‘‘𑀬𑀸𑀘𑀢𑀺 𑀦𑀸𑀫 𑀤𑁂𑀳𑀺 𑀫𑁂 𑀅𑀭𑀳𑀲𑀺 𑀫𑁂 𑀤𑀸𑀢𑀼’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁨𑁮𑁫) 𑀦𑀬𑁂𑀦 𑀏𑀓𑁂𑀓𑀁 𑀧𑀤𑀁 ‘‘𑀤𑁂𑀳𑀺 𑀫𑁂 𑀫𑁂𑀣𑀼𑀦𑀁 𑀥𑀫𑁆𑀫’’𑀦𑁆𑀢𑀺𑀆𑀤𑀺𑀯𑀲𑁂𑀦 𑀫𑁂𑀣𑀼𑀦𑀥𑀫𑁆𑀫𑀧𑀤𑁂𑀦 𑀲𑀳 𑀖𑀝𑁂𑀢𑁆𑀯𑀸 𑀫𑁂𑀣𑀼𑀦𑀥𑀫𑁆𑀫𑀁 𑀬𑀸𑀘𑀦𑁆𑀢𑀲𑁆𑀲𑁂𑀯 𑀳𑁄𑀢𑀺.

‘‘𑀓𑀤𑀸 𑀢𑁂 𑀫𑀸𑀢𑀸 𑀧𑀲𑀻𑀤𑀺𑀲𑁆𑀲𑀢𑀺, 𑀓𑀤𑀸 𑀢𑁂 𑀧𑀺𑀢𑀸 𑀧𑀲𑀻𑀤𑀺𑀲𑁆𑀲𑀢𑀺, 𑀓𑀤𑀸 𑀢𑁂 𑀤𑁂𑀯𑀢𑀸𑀬𑁄 𑀧𑀲𑀻𑀤𑀺𑀲𑁆𑀲𑀦𑁆𑀢𑀺, 𑀓𑀤𑀸 𑀢𑁂 𑀲𑀼𑀔𑀡𑁄 𑀲𑀼𑀮𑀬𑁄 𑀲𑀼𑀫𑀼𑀳𑀼𑀢𑁆𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀆𑀬𑀸𑀘𑀦𑀧𑀤𑀦𑀺𑀤𑁆𑀤𑁂𑀲𑁂 𑀏𑀓𑁂𑀓𑀁 𑀧𑀤𑀁 𑀢𑀢𑁆𑀣𑁂𑀯 𑀑𑀲𑀸𑀦𑁂 𑀯𑀼𑀢𑁆𑀢𑁂𑀦 ‘‘𑀓𑀤𑀸 𑀢𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀧𑀤𑁂𑀦 𑀖𑀝𑁂𑀢𑁆𑀯𑀸 𑀫𑁂𑀣𑀼𑀦𑀁 𑀬𑀸𑀘𑀦𑁆𑀢𑀲𑁆𑀲𑁂𑀯 𑀳𑁄𑀢𑀺.

‘‘𑀓𑀣𑀁 𑀢𑁆𑀯𑀁 𑀲𑀸𑀫𑀺𑀓𑀲𑁆𑀲 𑀤𑁂𑀲𑀺, 𑀓𑀣𑀁 𑀚𑀸𑀭𑀲𑁆𑀲 𑀤𑁂𑀲𑀻’’𑀢𑀺 (𑀧𑀸𑀭𑀸. 𑁨𑁮𑁫) 𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑀯𑀘𑀦𑁂𑀲𑀼 𑀘 𑀅𑀜𑁆𑀜𑀢𑀭𑀁 𑀫𑁂𑀣𑀼𑀦𑀥𑀫𑁆𑀫𑀧𑀤𑁂𑀦 𑀖𑀝𑁂𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀲𑁆𑀲𑁂𑀯 𑀳𑁄𑀢𑀺.

‘‘𑀏𑀯𑀁 𑀓𑀺𑀭 𑀢𑁆𑀯𑀁 𑀲𑀸𑀫𑀺𑀓𑀲𑁆𑀲 𑀤𑁂𑀲𑀺, 𑀏𑀯𑀁 𑀚𑀸𑀭𑀲𑁆𑀲 𑀤𑁂𑀲𑀻’’𑀢𑀺 (𑀧𑀸𑀭𑀸. 𑁨𑁮𑁫) 𑀧𑀝𑀺𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑀯𑀘𑀦𑁂𑀲𑀼 𑀅𑀜𑁆𑀜𑀢𑀭𑀁 𑀫𑁂𑀣𑀼𑀦𑀥𑀫𑁆𑀫𑀧𑀤𑁂𑀦 𑀖𑀝𑁂𑀢𑁆𑀯𑀸 𑀯𑀺𑀲𑁂𑀲𑁂𑀢𑁆𑀯𑀸 𑀧𑀝𑀺𑀧𑀼𑀘𑁆𑀙𑀦𑁆𑀢𑀲𑁆𑀲𑁂𑀯 𑀳𑁄𑀢𑀺.

‘‘𑀓𑀣𑀁 𑀤𑀤𑀫𑀸𑀦𑀸 𑀲𑀸𑀫𑀺𑀓𑀲𑁆𑀲 𑀧𑀺𑀬𑀸 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀢𑁄 𑀫𑀸𑀢𑀼𑀕𑀸𑀫𑀲𑁆𑀲 ‘‘𑀏𑀯𑀁 𑀤𑁂𑀳𑀺, 𑀏𑀯𑀁 𑀤𑁂𑀦𑁆𑀢𑀻 𑀲𑀸𑀫𑀺𑀓𑀲𑁆𑀲 𑀧𑀺𑀬𑀸 𑀪𑀯𑀺𑀲𑁆𑀲𑀢𑀺 𑀫𑀦𑀸𑀧𑀸 𑀘𑀸’’𑀢𑀺 𑀆𑀡𑀢𑁆𑀢𑀺𑀯𑀘𑀦𑁂, 𑀅𑀦𑀼𑀲𑀸𑀲𑀦𑀺𑀯𑀘𑀦𑁂 𑀘 𑀏𑀲𑁂𑀯 𑀦𑀬𑁄.

𑁩𑁫𑁫. 𑀅𑀓𑁆𑀓𑁄𑀲𑀦𑀺𑀤𑁆𑀤𑁂𑀲𑀸𑀕𑀢𑁂𑀲𑀼 ‘‘𑀅𑀦𑀺𑀫𑀺𑀢𑁆𑀢𑀸𑀲𑀺 𑀦𑀺𑀫𑀺𑀢𑁆𑀢𑀫𑀢𑁆𑀢𑀸𑀲𑀺 𑀅𑀮𑁄𑀳𑀺𑀢𑀸𑀲𑀺 𑀥𑀼𑀯𑀮𑁄𑀳𑀺𑀢𑀸𑀲𑀺 𑀥𑀼𑀯𑀘𑁄𑀴𑀸𑀲𑀺 𑀧𑀕𑁆𑀖𑀭𑀦𑁆𑀢𑀻𑀲𑀺 𑀲𑀺𑀔𑀭𑀡𑀻𑀲𑀺 𑀇𑀢𑁆𑀣𑀺𑀧𑀡𑁆𑀟𑀓𑀸𑀲𑀺 𑀯𑁂𑀧𑀼𑀭𑀺𑀲𑀺𑀓𑀸𑀲𑀺 𑀲𑀫𑁆𑀪𑀺𑀦𑁆𑀦𑀸𑀲𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀲𑀻’’𑀢𑀺 𑀏𑀓𑀸𑀤𑀲𑀲𑀼 𑀧𑀤𑁂𑀲𑀼 ‘‘𑀲𑀺𑀔𑀭𑀡𑀻𑀲𑀺 𑀲𑀫𑁆𑀪𑀺𑀦𑁆𑀦𑀸𑀲𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀲𑀻’’𑀢𑀺 𑀧𑀤𑀢𑁆𑀢𑀬𑀁 𑀧𑀘𑁆𑀘𑁂𑀓𑀁 𑀆𑀧𑀢𑁆𑀢𑀺𑀓𑀭𑀁, 𑀇𑀫𑀺𑀦𑀸 𑀧𑀤𑀢𑁆𑀢𑀬𑁂𑀦 𑀲𑀳 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀺 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀫𑁂𑀣𑀼𑀦𑀥𑀫𑁆𑀫𑀧𑀤𑀸𑀦𑀺 𑀢𑀻𑀡𑀺 𑀘𑀸𑀢𑀺 𑀙𑀧𑁆𑀧𑀤𑀸𑀦𑀁 𑀧𑀘𑁆𑀘𑁂𑀓𑀁 𑀆𑀧𑀢𑁆𑀢𑀺𑀓𑀭𑀢𑁆𑀢𑀸 𑀇𑀢𑁄 𑀧𑀭𑀸𑀦𑀺 𑀅𑀦𑀺𑀫𑀺𑀢𑁆𑀢𑀸𑀤𑀻𑀦𑀺 𑀅𑀝𑁆𑀞 𑀧𑀤𑀸𑀦𑀺 ‘‘𑀅𑀦𑀺𑀫𑀺𑀢𑁆𑀢𑀸𑀲𑀺 𑀫𑁂𑀣𑀼𑀦𑀥𑀫𑁆𑀫𑀁 𑀤𑁂𑀳𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑁂𑀣𑀼𑀦𑀥𑀫𑁆𑀫𑀧𑀤𑁂𑀦 𑀲𑀳 𑀖𑀝𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑁂𑀯 𑀆𑀧𑀢𑁆𑀢𑀺𑀓𑀭𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺, ‘‘𑀫𑁂𑀣𑀼𑀦𑀬𑀸𑀘𑀦𑀸𑀤𑀻𑀳𑀻’’𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑀲𑀗𑁆𑀕𑀳𑀺𑀢𑁂𑀲𑀼 ‘‘𑀅𑀦𑀺𑀫𑀺𑀢𑁆𑀢𑀸𑀲𑀻’’𑀢𑀺𑀆𑀤𑀻𑀲𑀼 𑀏𑀓𑀸𑀤𑀲𑀲𑀼 𑀅𑀓𑁆𑀓𑁄𑀲𑀧𑀤𑁂𑀲𑀼 𑀅𑀦𑁆𑀢𑁄𑀕𑀥𑀢𑁆𑀢𑁂𑀧𑀺 𑀓𑁂𑀯𑀮𑀁 𑀆𑀧𑀢𑁆𑀢𑀺𑀓𑀭𑀢𑁆𑀢𑀸 𑀕𑀭𑀼𑀢𑀭𑀁 𑀧𑀤𑀢𑁆𑀢𑀬𑀁 𑀯𑀺𑀲𑀼𑀁 𑀲𑀗𑁆𑀕𑀳𑁂𑀢𑀩𑁆𑀩𑀦𑁆𑀢𑀺 𑀜𑀸𑀧𑁂𑀢𑀼𑀫𑀸𑀳 ‘‘𑀲𑀺𑀔𑀭𑀡𑀻𑀲𑀻’’𑀢𑀺𑀆𑀤𑀺.

𑀲𑀺𑀔𑀭𑀡𑀻𑀲𑀻𑀢𑀺 𑀏𑀢𑁆𑀣 ‘‘𑀲𑀺𑀔𑀭𑀡𑀻 𑀅𑀲𑀻’’𑀢𑀺 𑀧𑀤𑀘𑁆𑀙𑁂𑀤𑁄. ‘‘𑀅𑀲𑀻’’𑀢𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀢𑀼-𑀲𑀤𑁆𑀤𑁄 𑀓𑁂𑀯𑀮𑀬𑀼𑀢𑁆𑀢𑀫𑁆𑀧𑀺 𑀆𑀧𑀢𑁆𑀢𑀺𑀓𑀭𑀁 𑀳𑁄𑀢𑀻𑀢𑀺 𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀓𑁂𑀯𑀮𑁂𑀦𑀸𑀧𑀺 𑀅𑀓𑁆𑀓𑁄𑀲𑀯𑀘𑀦𑁂𑀦𑀸𑀢𑀺 𑀬𑁄𑀚𑀦𑀸. 𑀲𑀺𑀔𑀭𑀡𑀻𑀲𑀻𑀢𑀺 𑀩𑀳𑀺 𑀦𑀺𑀓𑁆𑀔𑀦𑁆𑀢𑀆𑀡𑀺𑀫𑀁𑀲𑀸 𑀪𑀯𑀲𑀺. 𑀲𑀫𑁆𑀪𑀺𑀦𑁆𑀦𑀸𑀲𑀻𑀢𑀺 𑀫𑀺𑀲𑁆𑀲𑀻𑀪𑀽𑀢𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀸. 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀲𑀻𑀢𑀺 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑁂𑀦, 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑁂𑀦 𑀘𑀸𑀢𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. ‘‘𑀅𑀬𑀁 𑀇𑀢𑁆𑀣𑀻, 𑀅𑀬𑀁 𑀧𑀼𑀭𑀺𑀲𑁄’’𑀢𑀺 𑀩𑁆𑀬𑀜𑁆𑀚𑀬𑀢𑀻𑀢𑀺 𑀩𑁆𑀬𑀜𑁆𑀚𑀦𑀁, 𑀫𑀼𑀢𑁆𑀢𑀓𑀭𑀡𑀸𑀦𑀺. 𑀲𑀼𑀡𑀦𑁆𑀢𑀺𑀬𑀸𑀢𑀺 𑀏𑀢𑁆𑀣 ‘‘𑀯𑀺𑀜𑁆𑀜𑀼𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸’’𑀢𑀺 𑀅𑀥𑀺𑀓𑀸𑀭𑀢𑁄 𑀮𑀩𑁆𑀪𑀢𑀺, 𑀇𑀫𑀺𑀦𑀸 𑀅𑀓𑁆𑀓𑁄𑀲𑀺𑀢𑀩𑁆𑀩𑀯𑀢𑁆𑀣𑀼 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀪𑀸𑀲𑀺𑀢𑀁 𑀲𑀼𑀡𑀦𑁆𑀢𑀺𑀬𑀸 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀚𑀸𑀦𑀦𑁆𑀢𑀺𑀬𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀯𑀺𑀲𑀬𑁂 𑀧𑀯𑀢𑁆𑀢𑀅𑀓𑁆𑀓𑁄𑀲𑀯𑀘𑀦𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁩𑁫𑁬. 𑀧𑀼𑀦𑀧𑁆𑀧𑀼𑀦𑀁 𑀑𑀪𑀸𑀲𑀦𑁆𑀢𑀲𑁆𑀲 𑀯𑀸𑀘𑀸𑀦𑀁 𑀕𑀡𑀦𑀸𑀬 𑀕𑀭𑀼𑀓𑀸 𑀲𑀺𑀬𑀼𑀦𑁆𑀢𑀺 𑀬𑁄𑀚𑀦𑀸. 𑀏𑀢𑁆𑀣 ‘‘𑀏𑀓𑀁 𑀇𑀢𑁆𑀣𑀺’’𑀦𑁆𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀏𑀓𑀯𑀸𑀘𑀸𑀬 𑀩𑀳𑀽 𑀑𑀪𑀸𑀲𑀦𑁆𑀢𑀲𑁆𑀲 𑀘 𑀇𑀢𑁆𑀣𑀻𑀦𑀁 𑀕𑀡𑀦𑀸𑀬 𑀕𑀭𑀼𑀓𑀸 𑀲𑀺𑀬𑀼𑀦𑁆𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀧𑀺 ‘‘𑀇𑀢𑁆𑀣𑀺𑀬𑁄𑀧𑀻’’𑀢𑀺 𑀮𑀩𑁆𑀪𑀢𑀺.

𑁩𑁫𑁭. 𑀲𑀸 𑀘𑁂 𑀦𑀧𑁆𑀧𑀝𑀺𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 ‘‘𑀬𑀁 𑀲𑀼𑀡𑀦𑁆𑀢𑀺𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀸𑀦𑀁 𑀯𑀡𑁆𑀡𑀸𑀯𑀡𑁆𑀡𑀯𑀲𑁂𑀦 𑀑𑀪𑀸𑀲𑀢𑀺, 𑀲𑀸 𑀘𑁂 𑀦 𑀧𑀝𑀺𑀚𑀸𑀦𑀸𑀢𑀻’’𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀫𑀸𑀦𑀁 𑀆𑀤𑀸𑀬 𑀬𑁄𑀚𑁂𑀢𑀩𑁆𑀩𑀁. 𑀅𑀢𑁆𑀢𑀦𑁄 𑀪𑀸𑀲𑀺𑀢𑀁 𑀤𑀼𑀝𑁆𑀞𑀼𑀮𑁆𑀮𑀁 𑀯𑀼𑀢𑁆𑀢𑀲𑀫𑀦𑀦𑁆𑀢𑀭𑀫𑁂𑀯 𑀅𑀢𑁆𑀣𑀯𑀲𑁂𑀦 𑀲𑀘𑁂 𑀦 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀤𑀼𑀝𑁆𑀞𑀼𑀮𑁆𑀮𑀪𑀸𑀲𑀺𑀢𑀪𑀺𑀓𑁆𑀔𑀼𑀲𑁆𑀲. 𑀉𑀩𑁆𑀪𑀚𑀸𑀡𑀼𑀁, 𑀅𑀥𑀓𑁆𑀔𑀓𑀁 𑀯𑀸 𑀆𑀤𑀺𑀲𑁆𑀲 𑀪𑀡𑀦𑁂 𑀘𑀸𑀧𑀺 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀪𑀡𑀦𑁂𑀢𑀺 𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀸𑀦𑀁 𑀯𑀡𑁆𑀡𑀸𑀤𑀺𑀓𑀣𑀦𑁂, ‘‘𑀪𑀡𑀢𑁄’’𑀢𑀺𑀧𑀺 𑀮𑀺𑀔𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲, 𑀪𑀡𑀦𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀳𑁂𑀢𑀼𑀫𑁆𑀳𑀺 𑀅𑀬𑀫𑀦𑁆𑀢𑀧𑀘𑁆𑀘𑀬𑁄 ‘‘𑀅𑀲𑀫𑁆𑀩𑀼𑀥’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀯𑀺𑀬. 𑀉𑀩𑁆𑀪𑀚𑀸𑀡𑀼𑀦𑁆𑀢𑀺 𑀚𑀸𑀡𑀼𑀢𑁄 𑀉𑀤𑁆𑀥𑀁. 𑀅𑀓𑁆𑀔𑁂𑀓𑀦𑁆𑀢𑀺 𑀅𑀓𑁆𑀔𑀓𑀢𑁄 𑀳𑁂𑀝𑁆𑀞𑀸.

𑁩𑁫𑁮. 𑀉𑀩𑁆𑀪𑀓𑁆𑀔𑀓𑀦𑁆𑀢𑀺 𑀅𑀓𑁆𑀔𑀓𑀢𑁄 𑀉𑀤𑁆𑀥𑀁. 𑀅𑀥𑁄𑀚𑀸𑀡𑀼𑀫𑀡𑁆𑀟𑀮𑀦𑁆𑀢𑀺 𑀚𑀸𑀡𑀼𑀫𑀡𑁆𑀟𑀮𑀢𑁄 𑀅𑀥𑁄. 𑀉𑀤𑁆𑀤𑀺𑀲𑀦𑁆𑀢𑀺 𑀉𑀤𑁆𑀤𑀺𑀲𑁆𑀲. ‘‘𑀉𑀤𑁆𑀤𑀺𑀲𑁆𑀲𑀼𑀩𑁆𑀪𑀓𑁆𑀔𑀁 𑀯𑀸 𑀢𑀣𑀸, 𑀅𑀥𑁄𑀚𑀸𑀡𑀼𑀫𑀡𑁆𑀟𑀮’’𑀦𑁆𑀢𑀺 𑀘 𑀮𑀺𑀔𑀦𑁆𑀢𑀺, 𑀲𑁄 𑀧𑀸𑀞𑁄 𑀲𑀼𑀦𑁆𑀤𑀭𑁄. 𑀯𑀡𑁆𑀡𑀸𑀤𑀺𑀪𑀡𑀦𑁂 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀯𑀺𑀜𑁆𑀜𑀼𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸’’𑀢𑀺 𑀅𑀥𑀺𑀓𑀸𑀭𑀢𑁄 𑀮𑀩𑁆𑀪𑀢𑀺. 𑀓𑀸𑀬𑀧𑀝𑀺𑀩𑀤𑁆𑀥𑁂 𑀯𑀡𑁆𑀡𑀸𑀤𑀺𑀪𑀡𑀦𑁂 𑀤𑀼𑀓𑁆𑀓𑀝𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀸 𑀲𑀗𑁆𑀖𑀸𑀤𑀺𑀲𑁂𑀲𑀓𑁆𑀔𑁂𑀢𑁆𑀢𑀁, 𑀅𑀥𑀓𑁆𑀔𑀓𑀁 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀁 𑀣𑀼𑀮𑁆𑀮𑀘𑁆𑀘𑀬𑀓𑁆𑀔𑁂𑀢𑁆𑀢𑀁, 𑀉𑀤𑁆𑀥𑀓𑁆𑀔𑀓𑀁 𑀅𑀥𑁄𑀚𑀸𑀡𑀼𑀫𑀡𑁆𑀟𑀮𑀁 𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑀦𑁆𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀔𑁂𑀢𑁆𑀢𑁂𑀲𑀼 𑀅𑀓𑁆𑀔𑀓𑀜𑁆𑀘𑁂𑀯 𑀚𑀸𑀡𑀼𑀫𑀡𑁆𑀟𑀮𑀜𑁆𑀘 𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀯𑀥𑀺𑀪𑀽𑀢𑀁 𑀓𑀢𑁆𑀣 𑀲𑀗𑁆𑀕𑀬𑁆𑀳𑀢𑀻𑀢𑀺? 𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂𑀬𑁂𑀯 𑀲𑀗𑁆𑀕𑀬𑁆𑀳𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀓𑁆𑀔𑀓𑀁, 𑀧𑀦 𑀚𑀸𑀡𑀼𑀫𑀡𑁆𑀟𑀮𑀜𑁆𑀘 𑀏𑀢𑁆𑀣𑁂𑀯 𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁬).

𑁩𑁫𑁯. 𑀧𑀡𑁆𑀟𑀓𑁂 𑀬𑀓𑁆𑀔𑀺𑀧𑁂𑀢𑀻𑀲𑀼 𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀸𑀦𑀁 𑀯𑀡𑁆𑀡𑀸𑀤𑀺𑀪𑀡𑀦𑁂 𑀢𑀲𑁆𑀲 𑀪𑀡𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀪𑀯𑁂𑀢𑀺 𑀅𑀥𑀺𑀓𑀸𑀭𑀯𑀲𑁂𑀦 𑀆𑀕𑀢𑀧𑀤𑁂𑀳𑀺 𑀲𑀳 𑀬𑁄𑀚𑁂𑀢𑀩𑁆𑀩𑀁. 𑀧𑀡𑁆𑀟𑀓𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀬𑀓𑁆𑀔𑀺𑀧𑁂𑀢𑀻𑀦𑀁 𑀕𑀳𑀡𑀁.

𑁩𑁬𑁦. 𑀉𑀩𑁆𑀪𑀓𑁆𑀔𑀓…𑀧𑁂… 𑀅𑀬𑀁 𑀦𑀬𑁄𑀢𑀺 ‘‘𑀧𑀡𑁆𑀟𑀓𑀸𑀤𑀻𑀲𑀽’’𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀅𑀬𑀁 𑀦𑀬𑁄𑀢𑀺 ‘‘𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑁄 𑀦𑀬𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑀯𑀲𑁂𑀦 𑀲𑀩𑁆𑀩𑁂𑀲𑀼 𑀔𑁂𑀢𑁆𑀢𑁂𑀲𑀼.

𑁩𑁬𑁧. 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑁄 𑀳𑀼𑀢𑁆𑀯𑀸 𑀑𑀪𑀸𑀲𑀢𑁄𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀫𑀸𑀢𑀼𑀕𑀸𑀫𑀸𑀦𑀁 ‘‘𑀅𑀦𑀺𑀫𑀺𑀢𑁆𑀢𑀸𑀲𑀻’’𑀢𑀺𑀆𑀤𑀻𑀲𑀼 𑀧𑀤𑁂𑀲𑀼 𑀅𑀢𑁆𑀣𑀓𑀣𑀦𑀁 𑀧𑀼𑀭𑁂𑀓𑁆𑀔𑀢𑁆𑀯𑀸 ‘‘𑀅𑀦𑀺𑀫𑀺𑀢𑁆𑀢𑀸𑀲𑀻’’𑀢𑀺𑀆𑀤𑀺𑀧𑀤𑀁 𑀪𑀡𑀦𑁆𑀢𑀲𑁆𑀲 𑀯𑀸 𑀫𑀸𑀢𑀼𑀕𑀸𑀫𑁂𑀳𑀺 𑀲𑀳 𑀅𑀝𑁆𑀞𑀓𑀣𑀁 𑀲𑀚𑁆𑀛𑀸𑀬𑀦𑁆𑀢𑀸𑀦𑀁 𑀯𑀸 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀧𑀼𑀭𑁂𑀓𑁆𑀔𑀸𑀭𑁄 𑀳𑀼𑀢𑁆𑀯𑀸 𑀑𑀪𑀸𑀲𑀢𑁄 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀧𑀸𑀴𑀺𑀥𑀫𑁆𑀫𑀁 𑀯𑀸𑀘𑁂𑀦𑁆𑀢𑀲𑁆𑀲 𑀯𑀸 𑀢𑀸𑀲𑀁 𑀲𑀼𑀡𑀦𑁆𑀢𑀻𑀦𑀁 𑀲𑀚𑁆𑀛𑀸𑀬𑀦𑀁 𑀯𑀸 𑀧𑀼𑀭𑁂𑀓𑁆𑀔𑀢𑁆𑀯𑀸 ‘‘𑀅𑀦𑀺𑀫𑀺𑀢𑁆𑀢𑀸𑀲𑀻’’𑀢𑀺𑀆𑀤𑀻𑀲𑀼 𑀧𑀤𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀇𑀢𑀭𑀲𑁆𑀲 𑀯𑀸 𑀫𑀸𑀢𑀼𑀕𑀸𑀫𑀲𑁆𑀲 𑀓𑀣𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺. 𑀧𑀼𑀭𑁂𑀓𑁆𑀔𑀢𑁆𑀯𑀸𑀦𑀼𑀲𑀸𑀲𑀦𑀺𑀦𑁆𑀢𑀺 ‘‘𑀇𑀤𑀸𑀦𑀺 𑀅𑀦𑀺𑀫𑀺𑀢𑁆𑀢𑀸𑀲𑀺…𑀧𑁂… 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀲𑀺, 𑀅𑀧𑁆𑀧𑀫𑀸𑀤𑀁 𑀤𑀸𑀦𑀺 𑀓𑀭𑁂𑀬𑁆𑀬𑀸𑀲𑀺, 𑀬𑀣𑀸 𑀆𑀬𑀢𑀺𑀫𑁆𑀧𑀺 𑀏𑀯𑀭𑀽𑀧𑀸 𑀦𑀸𑀳𑁄𑀲𑀻’’𑀢𑀺 𑀅𑀦𑀼𑀲𑀸𑀲𑀦𑀺𑀁 𑀧𑀼𑀭𑁂𑀓𑁆𑀔𑀢𑁆𑀯𑀸.

𑁩𑁬𑁨. 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀦𑁆𑀢𑀺 𑀧𑀺𑀢𑁆𑀢𑀼𑀫𑁆𑀫𑀢𑁆𑀢𑀓𑀬𑀓𑁆𑀔𑀼𑀫𑁆𑀫𑀢𑁆𑀢𑀓𑀯𑀲𑁂𑀦 𑀤𑁆𑀯𑀺𑀦𑁆𑀦𑀁 𑀉𑀫𑁆𑀫𑀢𑁆𑀢𑀓𑀸𑀦𑀜𑁆𑀘 𑀆𑀤𑀺-𑀲𑀤𑁆𑀤𑀲𑀗𑁆𑀕𑀳𑀺𑀢𑀲𑁆𑀲 𑀇𑀫𑀲𑁆𑀫𑀺𑀁 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀉𑀤𑀸𑀬𑀺𑀢𑁆𑀣𑁂𑀭𑀲𑁆𑀲 𑀘 𑀅𑀦𑀸𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀢𑀺𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀘𑀺𑀢𑁆𑀢𑀢𑁄 𑀘 𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁭) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀺 ‘‘𑀲𑀫𑀼𑀝𑁆𑀞𑀸𑀦𑀸𑀤𑀬𑁄…𑀧𑁂… 𑀢𑀼𑀮𑁆𑀬𑀸𑀯𑀸’’𑀢𑀺. 𑀯𑁂𑀤𑀦𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑁂𑀦 𑀅𑀲𑀫𑀢𑁆𑀢𑀸 ‘‘𑀯𑁂𑀤𑀦𑁂𑀢𑁆𑀣 𑀤𑁆𑀯𑀺𑀥𑀸 𑀫𑀢𑀸’’𑀢𑀺 𑀆𑀳, 𑀲𑀼𑀔𑁄𑀧𑁂𑀓𑁆𑀔𑀸𑀯𑁂𑀤𑀦𑀸𑀯𑀲𑁂𑀦 𑀤𑁆𑀯𑀺𑀥𑀸 𑀫𑀢𑀸𑀢𑀺 𑀅𑀢𑁆𑀣𑁄.

𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀓𑀣𑀸𑀯𑀡𑁆𑀡𑀦𑀸.

𑁩𑁬𑁩. 𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺 𑀫𑁂𑀣𑀼𑀦𑀥𑀫𑁆𑀫𑀲𑀗𑁆𑀔𑀸𑀢𑁂𑀦 𑀓𑀸𑀫𑁂𑀦 𑀧𑀸𑀭𑀺𑀘𑀭𑀺𑀬𑀸𑀬, 𑀫𑁂𑀣𑀼𑀦𑀥𑀫𑁆𑀫𑁂𑀦 𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀓𑀸𑀫𑀺𑀢𑀸 𑀧𑀢𑁆𑀣𑀺𑀢𑀸𑀢𑀺 𑀓𑀸𑀫𑀸, 𑀫𑁂𑀣𑀼𑀦𑀭𑀸𑀕𑀯𑀲𑁂𑀦 𑀧𑀢𑁆𑀣𑀺𑀢𑀸𑀢𑀺 𑀅𑀢𑁆𑀣𑁄, 𑀓𑀸𑀫𑀸 𑀘 𑀲𑀸 𑀧𑀸𑀭𑀺𑀘𑀭𑀺𑀬𑀸 𑀘𑀸𑀢𑀺 𑀓𑀸𑀫𑀧𑀸𑀭𑀺𑀘𑀭𑀺𑀬𑀸, 𑀢𑀲𑁆𑀲𑀸 𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺𑀧𑀺 𑀕𑀳𑁂𑀢𑀩𑁆𑀩𑀁, 𑀫𑁂𑀣𑀼𑀦𑀭𑀸𑀕𑀘𑀺𑀢𑁆𑀢𑁂𑀦 𑀅𑀪𑀺𑀧𑀢𑁆𑀣𑀺𑀢𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺𑀅𑀢𑁆𑀣𑁄. ‘‘𑀯𑀡𑁆𑀡𑀁 𑀪𑀸𑀲𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄, ‘‘𑀏𑀢𑀤𑀕𑁆𑀕𑀁 𑀪𑀕𑀺𑀦𑀺 𑀧𑀸𑀭𑀺𑀘𑀭𑀺𑀬𑀸𑀦𑀁 𑀬𑀸 𑀫𑀸𑀤𑀺𑀲𑀁 𑀲𑀻𑀮𑀯𑀦𑁆𑀢𑀁 𑀓𑀮𑁆𑀬𑀸𑀡𑀥𑀫𑁆𑀫𑀁 𑀩𑁆𑀭𑀳𑁆𑀫𑀘𑀸𑀭𑀺𑀁 𑀏𑀢𑁂𑀦 𑀥𑀫𑁆𑀫𑁂𑀦 𑀧𑀭𑀺𑀘𑀭𑁂𑀬𑁆𑀬𑀸’’𑀢𑀺 𑀅𑀢𑁆𑀢𑀦𑁄 𑀫𑁂𑀣𑀼𑀦𑀥𑀫𑁆𑀫𑁂𑀦 𑀧𑀸𑀭𑀺𑀘𑀭𑀺𑀬𑀸𑀬 𑀕𑀼𑀡𑀁 𑀆𑀦𑀺𑀲𑀁𑀲𑀁 𑀓𑀣𑁂𑀦𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂𑀢𑀺 𑀢𑀲𑁆𑀫𑀺𑀁 𑀪𑀡𑀺𑀢𑀓𑁆𑀔𑀡𑁂𑀬𑁂𑀯. 𑀲𑀸 𑀘𑁂 𑀚𑀸𑀦𑀸𑀢𑀻𑀢𑀺 𑀬𑀁 𑀉𑀤𑁆𑀤𑀺𑀲𑁆𑀲 𑀅𑀪𑀸𑀲𑀺, 𑀲𑀘𑁂 𑀲𑀸 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 𑀚𑀸𑀦𑀸𑀢𑀺.

𑁩𑁬𑁪. 𑀲𑀸 𑀫𑀦𑀼𑀲𑁆𑀲𑀺𑀢𑁆𑀣𑀻 𑀦𑁄 𑀚𑀸𑀦𑀸𑀢𑀺 𑀘𑁂, 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀓𑁆𑀔𑀺𑀧𑁂𑀢𑀺𑀤𑁂𑀯𑀻𑀲𑀼 𑀚𑀸𑀦𑀦𑁆𑀢𑀻𑀲𑀼, 𑀧𑀡𑁆𑀟𑀓𑁂 𑀘 𑀚𑀸𑀦𑀦𑁆𑀢𑁂 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀢𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀲𑁂𑀲𑁂𑀢𑀺 𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀯𑀺𑀲𑀬𑁂, 𑀬𑀓𑁆𑀔𑀺𑀆𑀤𑀻𑀦𑀁 𑀅𑀚𑀸𑀦𑀦𑀯𑀺𑀲𑀬𑁂 𑀘 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀢𑁄 𑀢𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁩𑁬𑁫. 𑀘𑀻𑀯𑀭𑀸𑀤𑀻𑀳𑀻𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀸𑀤𑀻𑀳𑀺. 𑀯𑀢𑁆𑀣𑀼𑀓𑀸𑀫𑁂𑀳𑀻𑀢𑀺 𑀢𑀡𑁆𑀳𑀸𑀬 𑀯𑀢𑁆𑀣𑀼𑀪𑀸𑀯𑁂𑀦 𑀯𑀢𑁆𑀣𑀽 𑀘 𑀓𑀸𑀫𑀺𑀢𑀢𑁆𑀢𑀸 𑀓𑀸𑀫𑀸𑀢𑀺 𑀘 𑀲𑀗𑁆𑀔𑀸𑀢𑁂𑀳𑀺 𑀧𑀘𑁆𑀘𑀬𑁂𑀳𑀺.

𑁩𑁬𑁬. 𑀭𑀸𑀕𑁄 𑀏𑀯 𑀭𑀸𑀕𑀢𑀸. ‘‘𑀭𑀸𑀕𑀺𑀢𑀸’’𑀢𑀺 𑀯𑀸 𑀧𑀸𑀞𑁄, 𑀭𑀸𑀕𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀭𑀸𑀕𑀻, 𑀢𑀲𑁆𑀲 𑀪𑀸𑀯𑁄 𑀭𑀸𑀕𑀺𑀢𑀸, 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀭𑀸𑀕𑁄𑀢𑀺 𑀅𑀢𑁆𑀣𑁄. 𑀑𑀪𑀸𑀲𑁄𑀢𑀺 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀕𑀼𑀡𑀪𑀡𑀦𑀁. 𑀢𑁂𑀦 𑀭𑀸𑀕𑁂𑀦𑀸𑀢𑀺 𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀭𑀸𑀕𑁂𑀦. 𑀔𑀡𑁂 𑀢𑀲𑁆𑀫𑀺𑀦𑁆𑀢𑀺 𑀪𑀡𑀺𑀢𑀓𑁆𑀔𑀡𑁂. 𑀯𑀺𑀚𑀸𑀦𑀦𑀦𑁆𑀢𑀺 𑀬𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀉𑀤𑁆𑀤𑀺𑀲𑁆𑀲 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀡𑀢𑀺, 𑀢𑀸𑀬 𑀢𑀲𑁆𑀲 𑀯𑀘𑀦𑀢𑁆𑀣𑀲𑁆𑀲 𑀯𑀺𑀚𑀸𑀦𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁬𑁭. 𑀧𑀜𑁆𑀘𑀗𑁆𑀕𑀸𑀦𑀻𑀢𑀺 𑀫𑀦𑀼𑀲𑁆𑀲𑀺𑀢𑁆𑀣𑀺𑀢𑀸, 𑀢𑀁𑀲𑀜𑁆𑀜𑀺𑀢𑀸, 𑀧𑀸𑀭𑀺𑀘𑀭𑀺𑀬𑀸𑀬 𑀭𑀸𑀕𑀺𑀢𑀸, 𑀢𑁂𑀦 𑀭𑀸𑀕𑁂𑀦 𑀑𑀪𑀸𑀲𑀦𑀁, 𑀔𑀡𑁂 𑀢𑀲𑁆𑀫𑀺𑀁 𑀯𑀺𑀚𑀸𑀦𑀦𑀦𑁆𑀢𑀺 𑀇𑀫𑀸𑀦𑀺 𑀏𑀢𑁆𑀣 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑁂 𑀧𑀜𑁆𑀘 𑀅𑀗𑁆𑀕𑀸𑀦𑀺, 𑀧𑀜𑁆𑀘 𑀆𑀧𑀢𑁆𑀢𑀺𑀓𑀸𑀭𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀸𑀢𑀺 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑀲𑁆𑀲.

𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸.

𑁩𑁬𑁮. ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺𑀆𑀤𑀺𑀓𑀺𑀭𑀺𑀬𑀸𑀢𑁆𑀢𑀬𑁄𑀧𑀸𑀤𑀸𑀦𑀲𑀸𑀫𑀢𑁆𑀣𑀺𑀬𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀧𑀸𑀤𑀦𑀓𑀁 ‘‘𑀬𑁄 𑀪𑀺𑀓𑁆𑀔𑀽’’𑀢𑀺 𑀘 ‘‘𑀕𑀭𑀼 𑀳𑁄𑀢𑀻’’𑀢𑀺 𑀧𑀤𑀲𑀸𑀫𑀢𑁆𑀣𑀺𑀬𑁂𑀦 ‘‘𑀢𑀲𑁆𑀲𑀸’’𑀢𑀺 𑀘 𑀮𑀩𑁆𑀪𑀫𑀸𑀦𑀢𑁆𑀢𑀸 𑀢𑀺𑀯𑀺𑀥𑁂𑀳𑀺 𑀲𑀳 ‘‘𑀬𑁄 𑀪𑀺𑀓𑁆𑀔𑀼 𑀧𑀼𑀭𑀺𑀲𑀲𑁆𑀲 𑀲𑀦𑁆𑀤𑁂𑀲𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺 𑀘𑁂, 𑀢𑀲𑁆𑀲 𑀕𑀭𑀼 𑀳𑁄𑀢𑀻’’𑀢𑀺 𑀏𑀓𑀁 𑀯𑀸𑀓𑁆𑀬𑀁 𑀳𑁄𑀢𑀺. 𑀏𑀯𑀁 ‘‘𑀇𑀢𑁆𑀣𑀺𑀬𑀸𑀧𑀺 𑀯𑀸’’𑀢𑀺 𑀇𑀫𑀺𑀦𑀸 𑀬𑁄𑀚𑀦𑀸𑀬𑀧𑀺 𑀏𑀓𑀁 𑀯𑀸𑀓𑁆𑀬𑀁 𑀳𑁄𑀢𑀻𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀯𑀸𑀓𑁆𑀬𑀤𑁆𑀯𑀬𑀁 𑀬𑀼𑀚𑁆𑀚𑀢𑀺.

𑀇𑀥 𑀲𑀦𑁆𑀤𑁂𑀲𑀓𑁆𑀓𑀫𑀜𑁆𑀘 𑀬𑁄𑀚𑀦𑀸𑀓𑁆𑀓𑀫𑀜𑁆𑀘 𑀚𑀸𑀦𑀦𑀢𑁆𑀣𑀁 𑀧𑀞𑀫𑀁 𑀢𑀸𑀯 𑀇𑀢𑁆𑀣𑀻𑀦𑀜𑁆𑀘 𑀪𑀭𑀺𑀬𑀸𑀦𑀜𑁆𑀘 𑀧𑀪𑁂𑀤𑁄 𑀘 𑀲𑀭𑀽𑀧𑀜𑁆𑀘 𑀯𑀺𑀪𑀸𑀯𑀻𑀬𑀢𑀺 𑁋 𑀢𑁂𑀲𑀼 𑀇𑀢𑁆𑀣𑀺𑀬𑁄 𑀤𑀲𑀯𑀺𑀥𑀸 𑀳𑁄𑀦𑁆𑀢𑀺. 𑀬𑀣𑀸𑀳 𑀧𑀤𑀪𑀸𑀚𑀦𑁂 ‘‘𑀤𑀲 𑀇𑀢𑁆𑀣𑀺𑀬𑁄 𑀫𑀸𑀢𑀼𑀭𑀓𑁆𑀔𑀺𑀢𑀸 𑀧𑀺𑀢𑀼𑀭𑀓𑁆𑀔𑀺𑀢𑀸 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀸 𑀪𑀸𑀢𑀼𑀭𑀓𑁆𑀔𑀺𑀢𑀸 𑀪𑀕𑀺𑀦𑀺𑀭𑀓𑁆𑀔𑀺𑀢𑀸 𑀜𑀸𑀢𑀺𑀭𑀓𑁆𑀔𑀺𑀢𑀸 𑀕𑁄𑀢𑁆𑀢𑀭𑀓𑁆𑀔𑀺𑀢𑀸 𑀥𑀫𑁆𑀫𑀭𑀓𑁆𑀔𑀺𑀢𑀸 𑀲𑀸𑀭𑀓𑁆𑀔𑀸 𑀲𑀧𑀭𑀺𑀤𑀡𑁆𑀟𑀸’’𑀢𑀺. 𑀪𑀭𑀺𑀬𑀸 𑀘 𑀤𑀲𑀯𑀺𑀥𑀸 𑀳𑁄𑀦𑁆𑀢𑀺. 𑀬𑀣𑀸𑀳 𑀧𑀤𑀪𑀸𑀚𑀦𑁂 ‘‘𑀤𑀲 𑀪𑀭𑀺𑀬𑀸𑀬𑁄 𑀥𑀦𑀓𑁆𑀓𑀻𑀢𑀸 𑀙𑀦𑁆𑀤𑀯𑀸𑀲𑀺𑀦𑀻 𑀪𑁄𑀕𑀯𑀸𑀲𑀺𑀦𑀻 𑀑𑀤𑀧𑀢𑁆𑀢𑀓𑀺𑀦𑀻 𑀑𑀪𑀝𑀘𑀼𑀫𑁆𑀩𑀝𑀸 𑀤𑀸𑀲𑀻 𑀘 𑀪𑀭𑀺𑀬𑀸 𑀘 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘 𑀥𑀚𑀸𑀳𑀝𑀸 𑀫𑀼𑀳𑀼𑀢𑁆𑀢𑀺𑀓𑀸’’𑀢𑀺 (𑀧𑀸𑀭𑀸. 𑁩𑁦𑁩). 𑀇𑀫𑀸𑀲𑀁 𑀧𑀪𑁂𑀤𑁄 𑀘 𑀲𑀭𑀽𑀧𑀸𑀦𑀺 𑀘 𑀲𑀗𑁆𑀔𑁂𑀧𑀢𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸𑀦𑀺 𑁋

𑀧𑀼𑀭𑀺𑀲𑁂𑀳𑀺 𑀲𑀳 𑀬𑀣𑀸 𑀲𑀁𑀯𑀸𑀲𑀁 𑀦 𑀓𑀭𑁄𑀢𑀺, 𑀏𑀯𑀁 𑀫𑀸𑀢𑀭𑀸 𑀭𑀓𑁆𑀔𑀺𑀢𑀸 𑀫𑀸𑀢𑀼𑀭𑀓𑁆𑀔𑀺𑀢𑀸. 𑀬𑀣𑀸𑀳 ‘‘𑀫𑀸𑀢𑀼𑀭𑀓𑁆𑀔𑀺𑀢𑀸 𑀦𑀸𑀫 𑀫𑀸𑀢𑀸 𑀭𑀓𑁆𑀔𑀢𑀺 𑀕𑁄𑀧𑁂𑀢𑀺 𑀇𑀲𑁆𑀲𑀭𑀺𑀬𑀁 𑀓𑀸𑀭𑁂𑀢𑀺 𑀯𑀲𑀁 𑀯𑀢𑁆𑀢𑁂𑀢𑀻’’𑀢𑀺. 𑀧𑀺𑀢𑀼𑀭𑀓𑁆𑀔𑀺𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀬𑀲𑁆𑀫𑀺𑀁 𑀓𑁄𑀡𑁆𑀟𑀜𑁆𑀜𑀸𑀤𑀺𑀕𑁄𑀢𑁆𑀢𑁂 𑀚𑀸𑀢𑀸, 𑀢𑀲𑁆𑀫𑀺𑀁𑀬𑁂𑀯 𑀕𑁄𑀢𑁆𑀢𑁂 𑀚𑀸𑀢𑁂𑀳𑀺 𑀭𑀓𑁆𑀔𑀺𑀢𑀸 𑀕𑁄𑀢𑁆𑀢𑀭𑀓𑁆𑀔𑀺𑀢𑀸. 𑀬𑀣𑀸𑀳 ‘‘𑀕𑁄𑀢𑁆𑀢𑀭𑀓𑁆𑀔𑀺𑀢𑀸 𑀦𑀸𑀫 𑀲𑀕𑁄𑀢𑁆𑀢𑀸 𑀭𑀓𑁆𑀔𑀦𑁆𑀢𑀻’’𑀢𑀺𑀆𑀤𑀺. 𑀏𑀓𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁂𑀳𑀺 𑀯𑀸 𑀏𑀓𑀕𑀡𑀧𑀭𑀺𑀬𑀸𑀧𑀦𑁆𑀦𑁂𑀳𑀺 𑀯𑀸 𑀭𑀓𑁆𑀔𑀺𑀢𑀸 𑀥𑀫𑁆𑀫𑀭𑀓𑁆𑀔𑀺𑀢𑀸 𑀦𑀸𑀫. 𑀬𑀣𑀸𑀳 ‘‘𑀥𑀫𑁆𑀫𑀭𑀓𑁆𑀔𑀺𑀢𑀸 𑀦𑀸𑀫 𑀲𑀳𑀥𑀫𑁆𑀫𑀺𑀓𑀸 𑀭𑀓𑁆𑀔𑀦𑁆𑀢𑀻’’𑀢𑀺𑀆𑀤𑀺 (𑀧𑀸𑀭𑀸. 𑁩𑁦𑁪). 𑀲𑀸𑀭𑀓𑁆𑀔𑀸 𑀦𑀸𑀫 ‘‘𑀕𑀩𑁆𑀪𑁂𑀧𑀺 𑀧𑀭𑀺𑀕𑁆𑀕𑀳𑀺𑀢𑀸 𑀳𑁄𑀢𑀺 ‘𑀫𑀬𑁆𑀳𑀁 𑀏𑀲𑀸’𑀢𑀺 𑀅𑀦𑁆𑀢𑀫𑀲𑁄 𑀫𑀸𑀮𑀸𑀕𑀼𑀴𑀧𑀭𑀺𑀓𑁆𑀔𑀺𑀢𑁆𑀢𑀸𑀧𑀻’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀲𑀭𑀽𑀧𑀸. 𑀲𑀧𑀭𑀺𑀤𑀡𑁆𑀟𑀸 𑀦𑀸𑀫 ‘‘𑀓𑁂𑀳𑀺𑀘𑀺 𑀤𑀡𑁆𑀟𑁄 𑀞𑀧𑀺𑀢𑁄 𑀳𑁄𑀢𑀺 ‘𑀬𑁄 𑀇𑀢𑁆𑀣𑀦𑁆𑀦𑀸𑀫𑀁 𑀇𑀢𑁆𑀣𑀺𑀁 𑀕𑀘𑁆𑀙𑀢𑀺, 𑀢𑀲𑁆𑀲 𑀏𑀢𑁆𑀢𑀓𑁄 𑀤𑀡𑁆𑀟𑁄’’𑀢𑀺 𑀯𑀼𑀢𑁆𑀢𑀲𑀭𑀽𑀧𑀸𑀢𑀺 𑀅𑀬𑀁 𑀤𑀲𑀦𑁆𑀦𑀁 𑀇𑀢𑁆𑀣𑀻𑀦𑀁 𑀲𑀭𑀽𑀧𑀲𑀗𑁆𑀔𑁂𑀧𑁄. 𑀇𑀫𑀸𑀲𑀼 𑀤𑀲𑀲𑀼 𑀲𑀸𑀭𑀓𑁆𑀔𑀲𑀧𑀭𑀺𑀤𑀡𑁆𑀟𑀸𑀦𑀁 𑀤𑁆𑀯𑀺𑀦𑁆𑀦𑀁 𑀧𑀭𑀧𑀼𑀭𑀺𑀲𑀲𑁂𑀯𑀸𑀬𑀁 𑀫𑀺𑀘𑁆𑀙𑀸𑀘𑀸𑀭𑁄 𑀳𑁄𑀢𑀺, 𑀇𑀢𑀭𑀸𑀲𑀁 𑀦 𑀳𑁄𑀢𑀺. 𑀇𑀫𑀸 𑀤𑀲𑀧𑀺 𑀧𑀜𑁆𑀘𑀲𑀻𑀮𑀁 𑀭𑀓𑁆𑀔𑀦𑁆𑀢𑁂𑀳𑀺 𑀅𑀕𑀫𑀦𑀻𑀬𑀸.

𑀤𑀲𑀲𑀼 𑀪𑀭𑀺𑀬𑀸𑀲𑀼 ‘‘𑀥𑀦𑀓𑁆𑀓𑀻𑀢𑀸 𑀦𑀸𑀫 𑀥𑀦𑁂𑀦 𑀓𑀺𑀡𑀺𑀢𑁆𑀯𑀸 𑀯𑀸𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀪𑀭𑀺𑀬𑀪𑀸𑀯𑀸𑀬 𑀅𑀧𑁆𑀧𑀓𑀁 𑀯𑀸 𑀩𑀳𑀼𑀁 𑀯𑀸 𑀥𑀦𑀁 𑀤𑀢𑁆𑀯𑀸 𑀕𑀳𑀺𑀢𑀸 𑀥𑀦𑀓𑁆𑀓𑀻𑀢𑀸 𑀦𑀸𑀫. ‘‘𑀙𑀦𑁆𑀤𑀯𑀸𑀲𑀺𑀦𑀻 𑀦𑀸𑀫 𑀧𑀺𑀬𑁄 𑀧𑀺𑀬𑀁 𑀯𑀸𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀢𑀭𑀼𑀘𑀺𑀬𑀸 𑀲𑀁𑀯𑀲𑀺𑀢𑁂𑀦 𑀧𑀼𑀭𑀺𑀲𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀸 𑀙𑀦𑁆𑀤𑀯𑀸𑀲𑀺𑀦𑀻 𑀦𑀸𑀫. ‘‘𑀪𑁄𑀕𑀯𑀸𑀲𑀺𑀦𑀻 𑀦𑀸𑀫 𑀪𑁄𑀕𑀁 𑀤𑀢𑁆𑀯𑀸 𑀯𑀸𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀉𑀤𑀼𑀓𑁆𑀔𑀮𑀫𑀼𑀲𑀮𑀸𑀤𑀺𑀕𑁂𑀳𑁄𑀧𑀓𑀭𑀡𑀁 𑀮𑀪𑀺𑀢𑁆𑀯𑀸 𑀪𑀭𑀺𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑀻 𑀚𑀦𑀧𑀤𑀺𑀢𑁆𑀣𑀻 𑀪𑁄𑀕𑀯𑀸𑀲𑀺𑀦𑀻 𑀦𑀸𑀫. ‘‘𑀧𑀝𑀯𑀸𑀲𑀺𑀦𑀻 𑀦𑀸𑀫 𑀧𑀝𑀁 𑀤𑀢𑁆𑀯𑀸 𑀯𑀸𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦𑀺𑀯𑀸𑀲𑀦𑀫𑀢𑁆𑀢𑀁 𑀯𑀸 𑀧𑀸𑀭𑀼𑀧𑀦𑀫𑀢𑁆𑀢𑀁 𑀯𑀸 𑀮𑀤𑁆𑀥𑀸 𑀪𑀭𑀺𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑀻 𑀤𑀮𑀺𑀤𑁆𑀤𑀺𑀢𑁆𑀣𑀻 𑀧𑀝𑀯𑀸𑀲𑀺𑀦𑀻 𑀦𑀸𑀫. 𑀑𑀤𑀧𑀢𑁆𑀢𑀓𑀺𑀦𑀻 𑀦𑀸𑀫 ‘‘𑀉𑀤𑀓𑀧𑀢𑁆𑀢𑀁 𑀆𑀫𑀲𑀺𑀢𑁆𑀯𑀸 𑀯𑀸𑀲𑁂𑀢𑀻’’𑀢𑀺 (𑀧𑀸𑀭𑀸. 𑁩𑁦𑁪) 𑀯𑀼𑀢𑁆𑀢𑀢𑁆𑀢𑀸 ‘‘𑀇𑀤𑀁 𑀉𑀤𑀓𑀁 𑀯𑀺𑀬 𑀲𑀁𑀲𑀝𑁆𑀞𑀸 𑀅𑀪𑁂𑀚𑁆𑀚𑀸 𑀳𑁄𑀣𑀸’’𑀢𑀺 𑀯𑀢𑁆𑀯𑀸 𑀏𑀓𑀲𑁆𑀫𑀺𑀁 𑀉𑀤𑀓𑀧𑀢𑁆𑀢𑁂 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀳𑀢𑁆𑀣𑀁 𑀑𑀢𑀸𑀭𑁂𑀢𑁆𑀯𑀸 𑀪𑀭𑀺𑀬𑀪𑀸𑀯𑀁 𑀦𑀻𑀢𑁄 𑀫𑀸𑀢𑀼𑀕𑀸𑀫𑁄 𑀯𑀼𑀘𑁆𑀘𑀢𑀺. ‘‘𑀑𑀪𑀝𑀘𑀼𑀫𑁆𑀩𑀝𑀸 𑀦𑀸𑀫 𑀘𑀼𑀫𑁆𑀩𑀝𑀁 𑀑𑀭𑁄𑀧𑁂𑀢𑁆𑀯𑀸 𑀯𑀸𑀲𑁂𑀢𑀻’’𑀢𑀺 (𑀧𑀸𑀭𑀸. 𑁩𑁦𑁪) 𑀯𑀼𑀢𑁆𑀢𑀢𑁆𑀢𑀸 𑀲𑀻𑀲𑀢𑁄 𑀘𑀼𑀫𑁆𑀩𑀝𑀁 𑀑𑀭𑁄𑀧𑁂𑀢𑁆𑀯𑀸 𑀪𑀭𑀺𑀬𑀪𑀸𑀯𑀫𑀼𑀧𑀦𑀻𑀢𑀸 𑀓𑀝𑁆𑀞𑀳𑀸𑀭𑀺𑀓𑀸𑀤𑀺𑀇𑀢𑁆𑀣𑀻 𑀑𑀪𑀝𑀘𑀼𑀫𑁆𑀩𑀝𑀸 𑀦𑀸𑀫. 𑀤𑀸𑀲𑀻 𑀘 𑀪𑀭𑀺𑀬𑀸 𑀘 𑀦𑀸𑀫 ‘‘𑀤𑀸𑀲𑀻 𑀘𑁂𑀯 𑀳𑁄𑀢𑀺 𑀪𑀭𑀺𑀬𑀸 𑀘𑀸’’𑀢𑀺 (𑀧𑀸𑀭𑀸. 𑁩𑁦𑁪) 𑀯𑀼𑀢𑁆𑀢𑀢𑁆𑀢𑀸 𑀪𑀭𑀺𑀬𑀁 𑀓𑀢𑁆𑀯𑀸 𑀯𑀸𑀲𑀺𑀢𑀸 ‘‘𑀢𑀲𑁆𑀲𑁂𑀯 𑀤𑀸𑀲𑀻 𑀘 𑀪𑀭𑀺𑀬𑀸 𑀘𑀸’’𑀢𑀺 𑀯𑀼𑀢𑁆𑀢𑀸. 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘 𑀦𑀸𑀫 ‘‘𑀓𑀫𑁆𑀫𑀓𑀸𑀭𑀻 𑀘𑁂𑀯 𑀳𑁄𑀢𑀺 𑀪𑀭𑀺𑀬𑀸 𑀘𑀸’’𑀢𑀺 (𑀧𑀸𑀭𑀸. 𑁩𑁦𑁪) 𑀯𑀼𑀢𑁆𑀢𑀢𑁆𑀢𑀸 𑀧𑀥𑀸𑀦𑀺𑀢𑁆𑀣𑀺𑀦𑀺𑀭𑀧𑁂𑀓𑁆𑀔𑁂𑀦 𑀓𑀼𑀝𑀼𑀫𑁆𑀩𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 𑀪𑀭𑀺𑀬𑀪𑀸𑀯𑀁 𑀦𑀻𑀢𑀸 𑀪𑀭𑀺𑀬𑀸 𑀓𑀢𑀓𑀫𑁆𑀫𑀸 ‘‘𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘𑀸’’𑀢𑀺 𑀯𑀼𑀢𑁆𑀢𑀸. ‘‘𑀥𑀚𑀸𑀳𑀝𑀸 𑀦𑀸𑀫 𑀓𑀭𑀫𑀭𑀸𑀦𑀻𑀢𑀸 𑀯𑀼𑀘𑁆𑀘𑀢𑀻’’𑀢𑀺 (𑀧𑀸𑀭𑀸. 𑁩𑁦𑁪) 𑀯𑀼𑀢𑁆𑀢𑀢𑁆𑀢𑀸 𑀥𑀚𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺𑀬𑀸 𑀫𑀳𑀸𑀲𑁂𑀦𑀸𑀬 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀧𑀭𑀯𑀺𑀲𑀬𑀁 𑀯𑀺𑀮𑀼𑀫𑁆𑀧𑀦𑁆𑀢𑁂𑀦 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀆𑀦𑁂𑀢𑁆𑀯𑀸 𑀪𑀭𑀺𑀬𑀪𑀸𑀯𑀫𑀼𑀧𑀦𑀻𑀢𑀸 𑀇𑀢𑁆𑀣𑀻 𑀥𑀚𑀸𑀳𑀝𑀸 𑀦𑀸𑀫. ‘‘𑀫𑀼𑀳𑀼𑀢𑁆𑀢𑀺𑀓𑀸 𑀦𑀸𑀫 𑀢𑀗𑁆𑀔𑀡𑀺𑀓𑀸 𑀯𑀼𑀘𑁆𑀘𑀢𑀻’’𑀢𑀺 (𑀧𑀸𑀭𑀸. 𑁩𑁦𑁪) 𑀯𑀼𑀢𑁆𑀢𑀢𑁆𑀢𑀸 𑀅𑀘𑀺𑀭𑀓𑀸𑀮𑀁 𑀲𑀁𑀯𑀸𑀲𑀢𑁆𑀣𑀸𑀬 𑀕𑀳𑀺𑀢𑀸 𑀇𑀢𑁆𑀣𑀻 𑀫𑀼𑀳𑀼𑀢𑁆𑀢𑀺𑀓𑀸 𑀦𑀸𑀫𑀸𑀢𑀺 𑀅𑀬𑀁 𑀤𑀲𑀦𑁆𑀦𑀁 𑀪𑀭𑀺𑀬𑀸𑀦𑀁 𑀲𑀭𑀽𑀧𑀲𑀗𑁆𑀔𑁂𑀧𑁄. 𑀬𑀣𑀸𑀯𑀼𑀢𑁆𑀢𑀸𑀲𑀼 𑀤𑀲𑀲𑀼 𑀇𑀢𑁆𑀣𑀻𑀲𑀼 𑀅𑀜𑁆𑀜𑀢𑀭𑀁 𑀤𑀲𑀦𑁆𑀦𑀁 𑀪𑀭𑀺𑀬𑀸𑀦𑀁 𑀅𑀜𑁆𑀜𑀢𑀭𑀝𑁆𑀞𑀸𑀦𑁂 𑀞𑀧𑀦𑀢𑁆𑀣𑀫𑀥𑀺𑀧𑁆𑀧𑁂𑀢𑀪𑀸𑀯𑀁 𑀯𑀢𑁆𑀢𑀼𑀁 𑀧𑀼𑀭𑀺𑀲𑁂𑀦 ‘‘𑀕𑀘𑁆𑀙 𑀪𑀦𑁆𑀢𑁂 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸’𑀢𑀺’’𑀆𑀤𑀺𑀦𑀸 𑀦𑀬𑁂𑀦 𑀤𑀺𑀦𑁆𑀦𑀲𑀦𑁆𑀤𑁂𑀲𑀁 ‘‘𑀲𑀸𑀥𑀼 𑀉𑀧𑀸𑀲𑀓𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀸 𑀲𑀻𑀲𑀓𑀫𑁆𑀧𑀦𑀸𑀤𑀺𑀯𑀲𑁂𑀦 𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀆𑀳 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀲𑀦𑁆𑀤𑁂𑀲𑀁 𑀧𑀼𑀭𑀺𑀲𑀲𑁆𑀲𑀸’’𑀢𑀺.

𑀏𑀢𑁆𑀣 𑀧𑀼𑀭𑀺𑀲𑀲𑁆𑀲𑀸𑀢𑀺 𑀉𑀧𑀮𑀓𑁆𑀔𑀡𑀢𑁆𑀢𑀸 ‘‘𑀧𑀼𑀭𑀺𑀲𑀲𑁆𑀲 𑀫𑀸𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁩𑁨𑁧) 𑀦𑀬𑁂𑀦 𑀧𑀸𑀴𑀺𑀬𑀁 𑀯𑀼𑀢𑁆𑀢𑀧𑀼𑀭𑀺𑀲𑀲𑁆𑀲 𑀫𑀸𑀢𑀸𑀧𑀺𑀢𑀼𑀆𑀤𑀬𑁄 𑀘 𑀕𑀳𑁂𑀢𑀩𑁆𑀩𑀸. 𑀯𑀻𑀫𑀁𑀲𑀢𑀻𑀢𑀺 𑀏𑀯𑀁 𑀧𑀝𑀺𑀕𑁆𑀕𑀳𑀺𑀢𑀲𑀸𑀲𑀦𑀁 𑀢𑀲𑁆𑀲𑀸𑀬𑁂𑀯 𑀏𑀓𑀁𑀲𑁂𑀦 𑀅𑀯𑀺𑀭𑀸𑀥𑁂𑀢𑁆𑀯𑀸 𑀯𑀤𑀦𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀼𑀆𑀤𑀻𑀦𑀫𑀜𑁆𑀜𑀢𑀭𑀲𑁆𑀲 𑀯𑀸 𑀆𑀭𑁄𑀘𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀧𑀺 𑀯𑀻𑀫𑀁𑀲𑀢𑀻𑀢𑀺 𑀉𑀧𑀮𑀓𑁆𑀔𑀡𑀢𑁆𑀢𑀸 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀅𑀦𑁆𑀢𑁂𑀯𑀸𑀲𑀺𑀁 𑀯𑀻𑀫𑀁𑀲𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁩𑁮) 𑀯𑀼𑀢𑁆𑀢𑀢𑁆𑀢𑀸 𑀯𑀻𑀫𑀁𑀲𑀸𑀧𑁂𑀢𑀻𑀢𑀺𑀧𑀺 𑀕𑀳𑁂𑀢𑀩𑁆𑀩𑀁. 𑀧𑀘𑁆𑀘𑀸𑀳𑀭𑀢𑀻𑀢𑀺 𑀢𑀣𑀸 𑀆𑀳𑀝𑀁 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀘 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀘 𑀮𑀚𑁆𑀚𑀸𑀬 𑀢𑀼𑀡𑁆𑀳𑀻𑀪𑀽𑀢𑀸𑀬 𑀘 𑀢𑀁 𑀧𑀯𑀢𑁆𑀢𑀺𑀁 𑀧𑀘𑁆𑀘𑀸𑀳𑀭𑀺𑀢𑁆𑀯𑀸 𑀆𑀘𑀺𑀓𑁆𑀔𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀥𑀸𑀧𑀺 𑀧𑀘𑁆𑀘𑀸𑀳𑀭𑀢𑀻𑀢𑀺 𑀉𑀧𑀮𑀓𑁆𑀔𑀡𑀢𑁆𑀢𑀸 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀅𑀦𑁆𑀢𑁂𑀯𑀸𑀲𑀺𑀁 𑀧𑀘𑁆𑀘𑀸𑀳𑀭𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁩𑁮) 𑀯𑀼𑀢𑁆𑀢𑀢𑁆𑀢𑀸 𑀧𑀘𑁆𑀘𑀸𑀳𑀭𑀸𑀧𑁂𑀢𑀻𑀢𑀺 𑀘 𑀕𑀳𑁂𑀢𑀩𑁆𑀩𑀁.

‘‘𑀇𑀢𑁆𑀣𑀺𑀬𑀸𑀧𑀺 𑀯𑀸’’𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑁆𑀯𑀸 𑀕𑀳𑀺𑀢𑀤𑀼𑀢𑀺𑀬𑀯𑀸𑀓𑁆𑀬𑁂 𑀘 𑀏𑀯𑀫𑁂𑀯 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀢𑀢𑁆𑀣 𑀲𑀦𑁆𑀤𑁂𑀲𑀓𑁆𑀓𑀫𑁄 𑀧𑀦 ‘‘𑀫𑀸𑀢𑀼𑀭𑀓𑁆𑀔𑀺𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 ‘𑀕𑀘𑁆𑀙 𑀪𑀦𑁆𑀢𑁂 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 ‘𑀳𑁄𑀫𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸’𑀢𑀺’’𑀆𑀤𑀺𑀧𑀸𑀴𑀺𑀦𑀬𑁂𑀦 (𑀧𑀸𑀭𑀸. 𑁩𑁩𑁦) 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀣𑀸𑀧𑀺 ‘‘𑀯𑀻𑀫𑀁𑀲𑀸𑀧𑁂𑀢𑀺 𑀧𑀘𑁆𑀘𑀸𑀳𑀭𑀸𑀧𑁂𑀢𑀻’’𑀢𑀺 𑀇𑀤𑀜𑁆𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀤𑀲𑀦𑁆𑀦𑀁 𑀇𑀢𑁆𑀣𑀻𑀦𑀁 𑀦𑀸𑀫𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀢𑁆𑀯𑀸 𑀤𑀲𑀦𑁆𑀦𑀁 𑀪𑀭𑀺𑀬𑀸𑀦𑀁 𑀅𑀜𑁆𑀜𑀢𑀭𑀢𑁆𑀣𑀸𑀬 𑀤𑀻𑀬𑀫𑀸𑀦𑀲𑀦𑁆𑀤𑁂𑀲𑀓𑁆𑀓𑀫𑁄 𑀬𑁄𑀚𑁂𑀢𑀩𑁆𑀩𑁄. 𑀇𑀥𑀸𑀧𑀺 𑀇𑀢𑁆𑀣𑀺𑀬𑀸𑀧𑀺 𑀯𑀸𑀢𑀺 𑀉𑀧𑀮𑀓𑁆𑀔𑀡𑀢𑁆𑀢𑀸 ‘‘𑀫𑀸𑀢𑀼𑀭𑀓𑁆𑀔𑀺𑀢𑀸𑀬 𑀫𑀸𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 ‘𑀕𑀘𑁆𑀙 𑀪𑀦𑁆𑀢𑁂 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 ‘𑀳𑁄𑀢𑀼 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸’’𑀢𑀺𑀆𑀤𑀺𑀧𑀸𑀴𑀺𑀯𑀲𑁂𑀦 (𑀧𑀸𑀭𑀸. 𑁩𑁨𑁪) 𑀇𑀢𑁆𑀣𑀺𑀬𑀸 𑀫𑀸𑀢𑀼𑀧𑀺𑀢𑀼𑀆𑀤𑀻𑀦𑀜𑁆𑀘 𑀲𑀦𑁆𑀤𑁂𑀲𑀓𑁆𑀓𑀫𑁄 𑀬𑁄𑀚𑁂𑀢𑀩𑁆𑀩𑁄.

𑁩𑁭𑁦. 𑀢𑀁 𑀧𑀯𑀢𑁆𑀢𑀺𑀁. 𑀲𑀜𑁆𑀘𑀭𑀺𑀢𑁆𑀢𑀸 𑀲𑀜𑁆𑀘𑀭𑀡𑀳𑁂𑀢𑀼. 𑀦 𑀫𑀼𑀘𑁆𑀘𑀢𑀻𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀅𑀦𑁆𑀢𑀭𑁂 𑀲𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀜𑁆𑀘𑀭𑀡𑀳𑁂𑀢𑀼 𑀆𑀧𑀚𑁆𑀚𑀺𑀢𑀩𑁆𑀩𑀲𑀗𑁆𑀖𑀸𑀤𑀺𑀲𑁂𑀲𑀢𑁄 𑀦 𑀫𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑁩𑁭𑁧. 𑀅𑀜𑁆𑀜𑀁 𑀯𑀸𑀢𑀺 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀯𑀸. ‘‘𑀪𑀸𑀲𑀢𑁄’’𑀢𑀺 𑀮𑀺𑀔𑀦𑁆𑀢𑀺. ‘‘𑀧𑁂𑀲𑀺𑀢𑁄’’𑀢𑀺 𑀇𑀫𑀺𑀦𑀸 𑀯𑀺𑀭𑀼𑀤𑁆𑀥𑀢𑁆𑀢𑀸 𑀢𑀁 𑀧𑀳𑀸𑀬 ‘‘𑀪𑀸𑀲𑀢𑀻’’𑀢𑀺 𑀧𑀸𑀞𑁄 𑀕𑀳𑁂𑀢𑀩𑁆𑀩𑁄. 𑀧𑀸𑀞𑀲𑁂𑀲𑁄 𑀯𑀸 𑀓𑀸𑀢𑀩𑁆𑀩𑁄. ‘‘𑀬𑁄 𑀅𑀜𑁆𑀜𑀁 𑀪𑀸𑀲𑀢𑀺 𑀘𑁂, 𑀢𑀲𑁆𑀲 𑀪𑀸𑀲𑀢𑁄𑀢𑀺 𑀬𑁄𑀚𑀦𑀸’’𑀢𑀺 𑀦𑀺𑀲𑁆𑀲𑀦𑁆𑀤𑁂𑀳𑁂 𑀯𑀼𑀢𑁆𑀢𑀁. ‘‘𑀫𑀸𑀢𑀭𑀸 𑀭𑀓𑁆𑀔𑀺𑀢𑀁 𑀇𑀢𑁆𑀣𑀺𑀁 ‘𑀕𑀘𑁆𑀙 𑀩𑁆𑀭𑀽𑀳𑀻’𑀢𑀺 𑀬𑁄 𑀧𑁂𑀲𑀺𑀢𑁄 𑀳𑁄𑀢𑀺, 𑀢𑀲𑁆𑀲 𑀧𑀺𑀢𑀼𑀭𑀓𑁆𑀔𑀺𑀢𑀁 𑀯𑀸 𑀅𑀜𑁆𑀜𑀁 𑀯𑀸 𑀪𑀸𑀲𑀢𑁄 𑀯𑀺𑀲𑀗𑁆𑀓𑁂𑀢𑁄𑀯𑀸’’𑀢𑀺, ‘‘𑀫𑀸𑀢𑀭𑀸…𑀧𑁂… 𑀩𑁆𑀭𑀽𑀳𑀻’𑀢𑀺 𑀧𑁂𑀲𑀺𑀢𑁄 𑀳𑀼𑀢𑁆𑀯𑀸 𑀧𑀺𑀢𑀼𑀭𑀓𑁆𑀔𑀺𑀢𑀁 𑀯𑀸 𑀅𑀜𑁆𑀜𑀁 𑀯𑀸 𑀪𑀸𑀲𑀢𑁄 𑀯𑀺𑀲𑀗𑁆𑀓𑁂𑀢𑁄𑀯𑀸’’𑀢𑀺 𑀬𑁄𑀚𑀦𑀸 𑀬𑀼𑀢𑁆𑀢𑀢𑀭𑀸𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺.

𑁩𑁭𑁨. 𑀧𑀝𑀺𑀕𑁆𑀕𑀡𑁆𑀳𑀦𑀢𑀸𑀤𑀻𑀳𑀻𑀢𑀺 𑀧𑀝𑀺𑀕𑁆𑀕𑀡𑁆𑀳𑀦𑀫𑁂𑀯 𑀧𑀝𑀺𑀕𑁆𑀕𑀡𑁆𑀳𑀦𑀢𑀸. 𑀆𑀤𑀺-𑀲𑀤𑁆𑀤𑁂𑀦 𑀯𑀻𑀫𑀁𑀲𑀦𑀧𑀘𑁆𑀘𑀸𑀳𑀭𑀡𑀸𑀦𑀺 𑀕𑀳𑀺𑀢𑀸𑀦𑀺. 𑀲𑀜𑁆𑀘𑀭𑀺𑀢𑁆𑀢𑁂𑀢𑀺 𑀲𑀜𑁆𑀘𑀭𑀡𑁂. 𑀲𑀫𑀸𑀧𑀦𑁆𑀦𑁂𑀢𑀺 𑀕𑀢𑁂 𑀲𑀢𑀺. 𑀕𑀭𑀼𑀓𑀸𑀧𑀢𑁆𑀢𑀺𑀫𑀸𑀤𑀺𑀲𑁂𑀢𑀺 𑀏𑀢𑁆𑀣 ‘‘𑀢𑀲𑁆𑀲𑀸’’𑀢𑀺 𑀲𑁂𑀲𑁄. 𑀆𑀤𑀺𑀲𑁂𑀢𑀺 𑀓𑀣𑁂𑀬𑁆𑀬.

𑁩𑁭𑁩. 𑀤𑁆𑀯𑀻𑀳𑀺 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀅𑀗𑁆𑀕𑁂𑀳𑀺 𑀲𑀜𑁆𑀘𑀭𑀺𑀢𑁆𑀢𑁂 𑀲𑀫𑀸𑀧𑀦𑁆𑀦𑁂 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀦 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀦 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁩𑁮) 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀅𑀗𑁆𑀕𑁂𑀳𑀺 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀡𑁆𑀟𑀓𑀸𑀤𑀻𑀲𑀽𑀢𑀺 𑀧𑀡𑁆𑀟𑀓𑀬𑀓𑁆𑀔𑀺𑀧𑁂𑀢𑀻𑀲𑀼. 𑀢𑀻𑀳𑀺𑀧𑀺 𑀅𑀗𑁆𑀕𑁂𑀳𑀺 𑀲𑀜𑁆𑀘𑀭𑀺𑀢𑁆𑀢𑁂 𑀲𑀫𑀸𑀧𑀦𑁆𑀦𑁂 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑀏𑀓𑁂𑀦𑁂𑀯𑀸𑀢𑀺 𑀏𑀓𑁂𑀦𑁂𑀯 𑀅𑀗𑁆𑀕𑁂𑀦. 𑀲𑀩𑁆𑀩𑀢𑁆𑀣𑀸𑀢𑀺 𑀫𑀸𑀢𑀼𑀭𑀓𑁆𑀔𑀺𑀢𑀸𑀤𑀻𑀲𑀼 𑀲𑀩𑁆𑀩𑀫𑀸𑀢𑀼𑀕𑀸𑀫𑁂𑀲𑀼 𑀘 𑀯𑀺𑀦𑀻𑀢𑀯𑀢𑁆𑀣𑀼𑀫𑁆𑀳𑀺 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀲𑀺 ‘𑀕𑀘𑁆𑀙 𑀪𑀦𑁆𑀢𑁂 𑀇𑀢𑁆𑀣𑀦𑁆𑀦𑀸𑀫𑀁 𑀇𑀢𑁆𑀣𑀺𑀁 𑀯𑀻𑀫𑀁𑀲𑀸’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 ‘𑀓𑀳𑀁 𑀇𑀢𑁆𑀣𑀦𑁆𑀦𑀸𑀫𑀸’𑀢𑀺. 𑀲𑀼𑀢𑁆𑀢𑀸 𑀪𑀦𑁆𑀢𑁂𑀢𑀺…𑀧𑁂… 𑀫𑀢𑀸 𑀪𑀦𑁆𑀢𑁂𑀢𑀺. 𑀦𑀺𑀓𑁆𑀔𑀦𑁆𑀢𑀸 𑀪𑀦𑁆𑀢𑁂𑀢𑀺. 𑀅𑀦𑀺𑀢𑁆𑀣𑀻 𑀪𑀦𑁆𑀢𑁂𑀢𑀺. 𑀇𑀢𑁆𑀣𑀺𑀧𑀡𑁆𑀟𑀓𑀸 𑀪𑀦𑁆𑀢𑁂𑀢𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺. 𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁪𑁧) 𑀆𑀕𑀢𑀸𑀲𑀼 𑀲𑀼𑀢𑁆𑀢𑀸𑀤𑀻𑀲𑀼 𑀧𑀜𑁆𑀘𑀲𑀼 𑀘.

𑁩𑁭𑁪. 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸𑀢𑀺 𑀘𑁂𑀢𑀺𑀬𑀸𑀤𑀻𑀲𑀼 𑀓𑀢𑁆𑀢𑀩𑁆𑀩𑀁 𑀦𑀺𑀲𑁆𑀲𑀸𑀬 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀲𑁆𑀲, 𑀧𑀼𑀭𑀺𑀲𑁂𑀦 𑀘 𑀇𑀢𑁆𑀣𑀺𑀬𑀸 𑀤𑀺𑀦𑁆𑀦𑀲𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀯𑀻𑀫𑀁𑀲𑀺𑀢𑁆𑀯𑀸 𑀧𑀘𑁆𑀘𑀸𑀳𑀭𑀺𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀪𑀸𑀯𑁄 ‘‘𑀅𑀦𑀸𑀧𑀢𑁆𑀢𑀺 𑀲𑀗𑁆𑀖𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀕𑀺𑀮𑀸𑀦𑀲𑁆𑀲 𑀯𑀸 𑀓𑀭𑀡𑀻𑀬𑁂𑀦 𑀕𑀘𑁆𑀙𑀢𑀺, 𑀉𑀫𑁆𑀫𑀢𑁆𑀢𑀓𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁪𑁦) 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸𑀢𑀺 𑀅𑀢𑁆𑀣𑁄.

𑁩𑁭𑁫. 𑀢𑀣𑀸 𑀢𑀲𑁆𑀲𑀸𑀢𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑀸𑀬 𑀢𑀲𑁆𑀲𑀸. 𑀦𑀦𑀸𑀮𑀁𑀯𑀘𑀦𑀻𑀬𑀢𑀸𑀢𑀺 ‘‘𑀫𑀫𑀸𑀬’’𑀦𑁆𑀢𑀺 𑀯𑀸 𑀦𑀺𑀕𑁆𑀕𑀳𑀧𑀕𑁆𑀕𑀳𑁂 𑀯𑀸 𑀦𑀺𑀭𑀸𑀲𑀗𑁆𑀓𑀁 𑀯𑀢𑁆𑀢𑀼𑀁 𑀦𑀸𑀳𑀭𑀢𑀻𑀢𑀺 𑀅𑀮𑀁𑀯𑀘𑀦𑀻𑀬𑀸, 𑀅𑀲𑁆𑀲𑀸𑀫𑀺𑀓𑀸, 𑀲𑀸 𑀳𑀺 𑀓𑁂𑀦𑀘𑀺 ‘‘𑀫𑀬𑁆𑀳𑀁 𑀏𑀲𑀸’’𑀢𑀺 𑀯𑀢𑁆𑀢𑀼𑀁 𑀯𑀸 𑀦𑀺𑀭𑀸𑀲𑀗𑁆𑀓𑁂𑀦 𑀦𑀺𑀕𑁆𑀕𑀳𑀧𑀕𑁆𑀕𑀳𑀯𑀘𑀦𑀁 𑀯𑀸 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸, 𑀅𑀮𑀁𑀯𑀘𑀦𑀻𑀬𑀸 𑀦 𑀪𑀯𑀢𑀻𑀢𑀺 𑀦𑀸𑀮𑀁𑀯𑀘𑀦𑀻𑀬𑀸, 𑀲𑀲𑁆𑀲𑀸𑀫𑀺𑀓𑀸, 𑀲𑀸 𑀳𑀺 𑀲𑀸𑀫𑀺𑀓𑁂𑀦 𑀢𑀣𑀸 𑀓𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺 𑀦𑀸𑀮𑀁𑀯𑀘𑀦𑀻𑀬𑀸, 𑀦𑀸𑀮𑀁𑀯𑀘𑀦𑀻𑀬𑀸 𑀦 𑀪𑀯𑀢𑀻𑀢𑀺 𑀦𑀦𑀸𑀮𑀁𑀯𑀘𑀦𑀻𑀬𑀸, 𑀅𑀮𑀁𑀯𑀘𑀦𑀻𑀬𑀧𑀤𑁂𑀦 𑀯𑀼𑀢𑁆𑀢𑀸 𑀅𑀲𑁆𑀲𑀸𑀫𑀺𑀓𑀸 𑀏𑀯, 𑀧𑀝𑀺𑀲𑁂𑀥𑀸 𑀤𑁆𑀯𑁂 𑀧𑀓𑀢𑀺𑀫𑀢𑁆𑀣𑀁 𑀕𑀫𑀬𑀦𑁆𑀢𑀻𑀢𑀺, 𑀦𑀦𑀸𑀮𑀁𑀯𑀘𑀦𑀻𑀬𑀸𑀬 𑀪𑀸𑀯𑁄 𑀦𑀦𑀸𑀮𑀁𑀯𑀘𑀦𑀻𑀬𑀢𑀸, 𑀦𑀺𑀭𑀸𑀲𑀗𑁆𑀓𑁂𑀦 𑀅𑀯𑀘𑀦𑀻𑀬𑀢𑀸 𑀅𑀲𑁆𑀲𑀸𑀫𑀺𑀓𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀜𑁆𑀘𑀭𑀺𑀢𑁆𑀢𑀯𑀲𑁂𑀦 𑀪𑀺𑀓𑁆𑀔𑀼𑀦𑀸 𑀯𑀘𑀦𑀻𑀬𑀸 𑀦 𑀳𑁄𑀢𑀻𑀢𑀺 𑀯𑀸 ‘‘𑀅𑀮𑀁𑀯𑀘𑀦𑀻𑀬𑀸’’𑀢𑀺𑀧𑀺 𑀕𑀳𑁂𑀢𑀩𑁆𑀩𑀫𑁂𑀯. 𑀧𑀝𑀺𑀕𑁆𑀕𑀡𑁆𑀳𑀦𑀢𑀸𑀤𑀻𑀦𑀁 𑀯𑀲𑀸𑀢𑀺 𑀏𑀢𑁆𑀣 𑀘𑀓𑀸𑀭𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀢𑀢𑁄 𑀧𑀝𑀺𑀕𑁆𑀕𑀡𑁆𑀳𑀦𑀯𑀻𑀫𑀁𑀲𑀦𑀧𑀘𑁆𑀘𑀸𑀳𑀭𑀡𑀲𑀗𑁆𑀔𑀸𑀢𑀸𑀦𑀁 𑀢𑀺𑀡𑁆𑀡𑀁 𑀅𑀗𑁆𑀕𑀸𑀦𑀁 𑀯𑀲𑁂𑀦 𑀘 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑀦𑀼𑀲𑁆𑀲𑀺𑀢𑁆𑀣𑀺𑀢𑀸 𑀦𑀦𑀸𑀮𑀁𑀯𑀘𑀦𑀻𑀬𑀢𑀸𑀢𑀺 𑀯𑀼𑀢𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀗𑁆𑀕𑀸𑀦𑀁 𑀯𑀲𑁂𑀦 𑀘 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀆𑀧𑀢𑁆𑀢𑀺𑀓𑀸𑀭𑀡𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁩𑁭𑁬. 𑀇𑀤𑀁 𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀁. 𑀅𑀣 𑀯𑀸 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀘 𑀅𑀬𑀁 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀕𑀳𑁂𑀢𑀩𑁆𑀩𑁄. 𑀓𑀸𑀬𑀢𑁄, 𑀯𑀸𑀘𑀢𑁄, 𑀓𑀸𑀬𑀯𑀸𑀘𑀢𑁄, 𑀓𑀸𑀬𑀘𑀺𑀢𑁆𑀢𑀢𑁄, 𑀯𑀸𑀘𑀸𑀘𑀺𑀢𑁆𑀢𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀯𑀸 𑀉𑀧𑁆𑀧𑀚𑁆𑀚𑀦𑀢𑁄 𑀙𑀲𑀫𑀼𑀝𑁆𑀞𑀸𑀦𑀁. 𑀢𑀢𑁄 𑀏𑀯 𑀅𑀘𑀺𑀢𑁆𑀢𑀓𑀫𑀼𑀤𑀻𑀭𑀺𑀢𑀁. 𑀫𑀺𑀲𑁆𑀲𑀓𑀲𑀫𑀼𑀝𑁆𑀞𑀸𑀦𑀜𑁆𑀳𑀺 𑀅𑀘𑀺𑀢𑁆𑀢𑀓𑀁. 𑀅𑀯𑀲𑁂𑀲𑀘𑀺𑀢𑁆𑀢𑁂𑀲𑀼𑀧𑀺 𑀬𑀲𑁆𑀫𑀺𑀁 𑀘𑀺𑀢𑁆𑀢𑁂 𑀅𑀲𑀢𑀺 𑀅𑀘𑀺𑀢𑁆𑀢𑀓𑀁 𑀦𑀸𑀫 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀮𑀁𑀯𑀘𑀦𑀺𑀬𑀢𑁆𑀢𑀁 𑀯𑀸’’𑀢𑀺𑀆𑀤𑀺. 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀭𑀲𑁆𑀲𑁄, ‘‘𑀅𑀮𑀁𑀯𑀘𑀦𑀻𑀬𑀢𑁆𑀢’’𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀬𑁄 𑀲𑀦𑁆𑀤𑁂𑀲𑀁 𑀧𑁂𑀲𑁂𑀢𑀺, 𑀢𑀲𑁆𑀫𑀺𑀁 𑀧𑀝𑀺𑀩𑀤𑁆𑀥𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. 𑀧𑀡𑁆𑀡𑀢𑁆𑀢𑀺𑀁 𑀯𑀸𑀢𑀺 𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀲𑀗𑁆𑀔𑀸𑀢𑀁 𑀧𑀡𑁆𑀡𑀢𑁆𑀢𑀺𑀁 𑀯𑀸 𑀅𑀚𑀸𑀦𑀢𑁄 𑀅𑀘𑀺𑀢𑁆𑀢𑀓𑀫𑀼𑀤𑀻𑀭𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁭𑁭. 𑀲𑀸𑀲𑀦𑀦𑁆𑀢𑀺 𑀫𑀸𑀢𑀼𑀕𑀸𑀫𑀲𑁆𑀲, 𑀧𑀼𑀭𑀺𑀲𑀲𑁆𑀲 𑀯𑀸 𑀲𑀸𑀲𑀦𑀁. 𑀓𑀸𑀬𑀯𑀺𑀓𑀸𑀭𑁂𑀦𑀸𑀢𑀺 𑀲𑀻𑀲𑀓𑀫𑁆𑀧𑀦𑀸𑀤𑀺𑀦𑀸 𑀓𑀸𑀬𑀯𑀺𑀓𑀸𑀭𑁂𑀦. 𑀕𑀳𑁂𑀢𑁆𑀯𑀸𑀢𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸. 𑀢𑀁 𑀉𑀧𑀕𑀫𑁆𑀫𑀸𑀢𑀺 𑀧𑀝𑀺𑀕𑁆𑀕𑀳𑀺𑀢𑀲𑀸𑀲𑀦𑀁 𑀬𑀲𑁆𑀲 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺, 𑀢𑀁 𑀫𑀸𑀢𑀼𑀕𑀸𑀫𑀁, 𑀧𑀼𑀭𑀺𑀲𑀁 𑀯𑀸 𑀉𑀧𑀕𑀫𑁆𑀫. 𑀯𑀻𑀫𑀁𑀲𑀺𑀢𑁆𑀯𑀸𑀢𑀺 𑀢𑀁 𑀓𑀺𑀘𑁆𑀘𑀁 𑀢𑀻𑀭𑁂𑀢𑁆𑀯𑀸. 𑀳𑀭𑀦𑁆𑀢𑀲𑁆𑀲𑀸𑀢𑀺 𑀧𑀘𑁆𑀘𑀸𑀳𑀭𑀦𑁆𑀢𑀲𑁆𑀲. 𑀓𑀸𑀬𑀢𑁄 𑀲𑀺𑀬𑀸𑀢𑀺 𑀯𑀘𑀻𑀪𑁂𑀤𑀁 𑀯𑀺𑀦𑀸 𑀧𑀝𑀺𑀕𑁆𑀕𑀳𑀡𑀸𑀤𑀻𑀦𑀁 𑀓𑀸𑀬𑁂𑀦𑁂𑀯 𑀓𑀢𑀢𑁆𑀢𑀸 𑀓𑀸𑀬𑀲𑀫𑀼𑀝𑁆𑀞𑀸𑀦𑀢𑁄𑀯 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁩𑁭𑁮. 𑀇𑀢𑁆𑀣𑀺𑀬𑀸 𑀯𑀘𑀦𑀁 𑀲𑀼𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀬𑀣𑀸 𑀦𑀺𑀲𑀺𑀦𑁆𑀦𑁄𑀯𑀸𑀢𑀺 𑀧𑀓𑀢𑀺𑀬𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂𑀬𑁂𑀯 𑀦𑀺𑀲𑀺𑀦𑁆𑀦𑁄. 𑀢𑀁 𑀯𑀘𑀦𑀁. 𑀢𑀢𑁆𑀣𑁂𑀯𑀸𑀕𑀢𑀲𑁆𑀲𑁂𑀯𑀸𑀢𑀺 𑀬𑀢𑁆𑀣 𑀦𑀺𑀲𑀺𑀦𑁆𑀦𑁄 𑀇𑀢𑁆𑀣𑀺𑀬𑀸 𑀲𑀸𑀲𑀦𑀁 𑀧𑀝𑀺𑀕𑁆𑀕𑀡𑁆𑀳𑀺, 𑀢𑀫𑁂𑀯 𑀆𑀲𑀦𑀁 𑀅𑀯𑀺𑀚𑀳𑀺𑀢𑁆𑀯𑀸 𑀅𑀢𑁆𑀢𑀦𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀫𑁂𑀯 𑀆𑀕𑀢𑀲𑁆𑀲 𑀲𑀦𑁆𑀦𑀺𑀲𑀺𑀢𑀩𑁆𑀩𑀧𑀼𑀭𑀺𑀲𑀲𑁆𑀲𑁂𑀯, 𑀏𑀢𑁆𑀣 ‘‘𑀆𑀭𑁄𑀘𑁂𑀢𑁆𑀯𑀸’’𑀢𑀺 𑀧𑀸𑀞𑀲𑁂𑀲𑁄. 𑀧𑀼𑀦 ‘‘𑀆𑀭𑁄𑀘𑁂𑀦𑁆𑀢𑀲𑁆𑀲𑀸’’𑀢𑀺 𑀇𑀤𑀁 𑀢𑀢𑁆𑀣𑁂𑀯𑀸𑀕𑀢𑀸𑀬 𑀢𑀲𑁆𑀲𑀸 𑀏𑀯 𑀇𑀢𑁆𑀣𑀺𑀬𑀸 𑀏𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀲𑀸𑀲𑀦𑀁 𑀤𑀢𑁆𑀯𑀸 𑀕𑀦𑁆𑀢𑁆𑀯𑀸 𑀧𑀼𑀦 𑀢𑀢𑁆𑀣𑁂𑀯 𑀆𑀕𑀢𑀲𑁆𑀲 𑀫𑀸𑀢𑀼𑀕𑀸𑀫𑀲𑁆𑀲𑁂𑀯 𑀜𑀸𑀢𑀫𑀦𑀦𑁆𑀢𑀭𑀁 𑀓𑀸𑀬𑀺𑀓𑀓𑀺𑀭𑀺𑀬𑀁 𑀯𑀺𑀦𑀸 𑀯𑀘𑀦𑁂𑀦𑁂𑀯 𑀆𑀭𑁄𑀘𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀇𑀢𑁆𑀣𑀺𑀬𑀸 𑀲𑀸𑀲𑀦𑀁 𑀧𑀝𑀺𑀕𑁆𑀕𑀳𑀡𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀁.

𑀅𑀣 𑀯𑀸 𑀧𑀼𑀭𑀺𑀲𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀢𑀁 𑀯𑀘𑀦𑀁 𑀇𑀢𑁆𑀣𑀺𑀬𑀸 𑀆𑀭𑁄𑀘𑁂𑀢𑁆𑀯𑀸 𑀧𑀼𑀦 𑀢𑀢𑁆𑀣𑁂𑀯𑀸𑀕𑀢𑀲𑁆𑀲𑁂𑀯 𑀧𑀼𑀭𑀺𑀲𑀲𑁆𑀲 𑀆𑀭𑁄𑀘𑁂𑀦𑁆𑀢𑀲𑁆𑀲𑀸𑀢𑀺 𑀏𑀯𑀁 𑀧𑀼𑀭𑀺𑀲𑀲𑀦𑁆𑀤𑁂𑀲𑀁 𑀧𑀝𑀺𑀕𑁆𑀕𑀳𑀡𑀸𑀤𑀺𑀯𑀲𑁂𑀦𑀸𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀏𑀢𑁆𑀣 𑀘 𑀢𑀢𑁆𑀣𑁂𑀯𑀸𑀕𑀢𑀲𑁆𑀲𑀸𑀢𑀺 𑀉𑀧𑀮𑀓𑁆𑀔𑀡𑀁. 𑀲𑀸𑀲𑀦𑀯𑀘𑀦𑀫𑀢𑁆𑀢𑁂𑀦𑁂𑀯 𑀧𑀝𑀺𑀕𑁆𑀕𑀳𑁂𑀢𑁆𑀯𑀸, 𑀓𑀺𑀘𑁆𑀘𑀦𑁆𑀢𑀭𑁂𑀦 𑀕𑀦𑁆𑀢𑁆𑀯𑀸 𑀯𑀸 𑀬𑀤𑀺𑀘𑁆𑀙𑀸𑀯𑀲𑁂𑀦 𑀤𑀺𑀝𑁆𑀞𑀝𑁆𑀞𑀸𑀦𑁂 𑀯𑀸 𑀯𑀢𑁆𑀯𑀸 𑀧𑀼𑀦𑀧𑀺 𑀢𑀢𑁆𑀣𑁂𑀯 𑀤𑀺𑀝𑁆𑀞𑀝𑁆𑀞𑀸𑀦𑁂 𑀧𑀼𑀦 𑀆𑀭𑁄𑀘𑁂𑀦𑁆𑀢𑀲𑁆𑀲 𑀘 𑀯𑀘𑀦𑁂𑀦𑁂𑀯 𑀲𑀫𑀼𑀝𑁆𑀞𑀸𑀦𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁭𑁯. ‘‘𑀅𑀮𑀁…𑀧𑁂… 𑀅𑀚𑀸𑀦𑀢𑁄’’𑀢𑀺 𑀅𑀘𑀺𑀢𑁆𑀢𑀓𑀢𑁆𑀢𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯, 𑀓𑀲𑁆𑀫𑀸 𑀧𑀼𑀦 ‘‘𑀅𑀚𑀸𑀦𑀦𑁆𑀢𑀲𑁆𑀲 𑀧𑀡𑁆𑀡𑀢𑁆𑀢𑀺’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀢𑀤𑀼𑀪𑀬𑀲𑁆𑀲𑀸𑀧𑀺 𑀯𑀺𑀲𑀼𑀁 𑀓𑀸𑀭𑀡𑀸𑀪𑀸𑀯𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀁 𑀯𑀺𑀥𑀺𑀦𑁆𑀢𑀺 𑀲𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀆𑀭𑁄𑀘𑁂𑀢𑁆𑀯𑀸 𑀧𑀘𑁆𑀘𑀸𑀳𑀭𑀺𑀢𑁆𑀯𑀸 𑀆𑀭𑁄𑀘𑀦𑀲𑀗𑁆𑀔𑀸𑀢𑀁 𑀯𑀺𑀥𑀸𑀦𑀁. 𑀅𑀭𑀳𑀢𑁄𑀧𑀻𑀢𑀺 𑀔𑀻𑀡𑀸𑀲𑀯𑀲𑁆𑀲𑀧𑀺, 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀕𑁂𑀯𑀸𑀢𑀺 𑀅𑀬𑀫𑀢𑁆𑀣𑁄 𑀲𑀫𑁆𑀪𑀸𑀯𑀦𑀢𑁆𑀣𑁂𑀦 𑀅𑀧𑀺-𑀲𑀤𑁆𑀤𑁂𑀦 𑀚𑁄𑀢𑀺𑀢𑁄.

𑁩𑁮𑁦. 𑀚𑀸𑀦𑀺𑀢𑁆𑀯𑀸𑀢𑀺 𑀅𑀮𑀁𑀯𑀘𑀦𑀻𑀬𑀪𑀸𑀯𑀁 𑀯𑀸 𑀧𑀡𑁆𑀡𑀢𑁆𑀢𑀺𑀁 𑀯𑀸 𑀉𑀪𑀬𑀫𑁂𑀯 𑀯𑀸 𑀚𑀸𑀦𑀺𑀢𑁆𑀯𑀸. 𑀢𑀣𑀸𑀢𑀺 𑀓𑀸𑀬𑀯𑀸𑀘𑀢𑁄 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀲𑀘𑀺𑀢𑁆𑀢𑀓𑁂𑀳𑀻𑀢𑀺 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑁂𑀦 𑀲𑀘𑀺𑀢𑁆𑀢𑀓𑁂𑀳𑀺. 𑀢𑁂𑀳𑁂𑀯𑀸𑀢𑀺 𑀓𑀸𑀬𑀸𑀤𑀻𑀳𑀺 𑀢𑁂𑀳𑀺 𑀏𑀯, ‘‘𑀢𑀻𑀳𑁂𑀯𑀸’’𑀢𑀺𑀧𑀺 𑀧𑀸𑀞𑁄.

𑀲𑀜𑁆𑀘𑀭𑀺𑀢𑁆𑀢𑀓𑀣𑀸𑀯𑀡𑁆𑀡𑀦𑀸.

𑁩𑁮𑁧-𑁨. 𑀲𑀬𑀁𑀬𑀸𑀘𑀺𑀢𑀓𑁂𑀳𑁂𑀯𑀸𑀢𑀺 𑀏𑀢𑁆𑀣 ‘‘𑀉𑀧𑀓𑀭𑀡𑁂𑀳𑀻’’𑀢𑀺 𑀧𑀸𑀞𑀲𑁂𑀲𑁄, ‘‘𑀧𑀼𑀭𑀺𑀲𑀁 𑀤𑁂𑀣𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀢𑁆𑀢𑀦𑀸𑀯 𑀬𑀸𑀘𑀺𑀢𑁆𑀯𑀸 𑀕𑀳𑀺𑀢𑁂𑀳𑀺 𑀉𑀧𑀓𑀭𑀡𑁂𑀳𑁂𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀳 ‘‘𑀲𑀜𑁆𑀜𑀸𑀘𑀺𑀓𑀸 𑀦𑀸𑀫 𑀲𑀬𑀁 𑀬𑀸𑀘𑀺𑀢𑁆𑀯𑀸 𑀧𑀼𑀭𑀺𑀲𑀫𑁆𑀧𑀺 𑀧𑀼𑀭𑀺𑀲𑀢𑁆𑀢𑀓𑀭𑀫𑁆𑀧𑀺 𑀕𑁄𑀡𑀫𑁆𑀧𑀺 𑀲𑀓𑀝𑀫𑁆𑀧𑀺 𑀯𑀸𑀲𑀺𑀫𑁆𑀧𑀺 𑀧𑀭𑀲𑀼𑀫𑁆𑀧𑀺 𑀓𑀼𑀞𑀸𑀭𑀺𑀫𑁆𑀧𑀺 𑀓𑀼𑀤𑀸𑀮𑀫𑁆𑀧𑀺 𑀦𑀺𑀔𑀸𑀤𑀦𑀫𑁆𑀧𑀻’’𑀢𑀺. 𑀏𑀢𑁆𑀣 𑀏𑀯-𑀓𑀸𑀭𑁂𑀦 𑀅𑀬𑀸𑀘𑀺𑀢𑀁 𑀦𑀺𑀯𑀢𑁆𑀢𑁂𑀢𑀺. 𑀢𑁂𑀦 𑀅𑀲𑁆𑀲𑀸𑀫𑀺𑀓𑀦𑁆𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. ‘‘𑀓𑀼𑀝𑀺𑀓’’𑀦𑁆𑀢𑀺 𑀇𑀫𑀺𑀦𑀸 ‘‘𑀓𑀼𑀝𑀺 𑀦𑀸𑀫 𑀉𑀮𑁆𑀮𑀺𑀢𑁆𑀢𑀸 𑀯𑀸 𑀳𑁄𑀢𑀺 𑀅𑀯𑀮𑀺𑀢𑁆𑀢𑀸 𑀯𑀸 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀸 𑀯𑀸’’𑀢𑀺 (𑀧𑀸𑀭𑀸. 𑁩𑁪𑁯) 𑀯𑀼𑀢𑁆𑀢𑀢𑁆𑀢𑀸 𑀪𑀽𑀫𑀺𑀢𑁄 𑀧𑀝𑁆𑀞𑀸𑀬 𑀪𑀺𑀢𑁆𑀢𑀺𑀘𑁆𑀙𑀤𑀦𑀸𑀦𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀫𑀢𑁆𑀢𑀺𑀓𑀸𑀬 𑀯𑀸 𑀲𑀼𑀥𑀸𑀬 𑀯𑀸 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀤𑀺𑀅𑀮𑁂𑀧𑁄𑀓𑀸𑀲𑀁 𑀞𑀧𑁂𑀢𑁆𑀯𑀸 𑀅𑀦𑁆𑀢𑁄 𑀮𑀺𑀢𑁆𑀢𑀪𑀸𑀯𑁂𑀦 𑀉𑀮𑁆𑀮𑀺𑀢𑁆𑀢𑀸𑀦𑀸𑀫𑀓𑀁 𑀯𑀸 𑀢𑀣𑀸 𑀩𑀳𑀺 𑀮𑀺𑀢𑁆𑀢𑀪𑀸𑀯𑁂𑀦 𑀅𑀯𑀮𑀺𑀢𑁆𑀢𑀸𑀦𑀸𑀫𑀓𑀁 𑀯𑀸 𑀅𑀦𑁆𑀢𑁄 𑀘 𑀩𑀳𑀺 𑀘 𑀮𑀺𑀢𑁆𑀢𑀪𑀸𑀯𑁂𑀦 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀸𑀦𑀸𑀫𑀓𑀁 𑀯𑀸 𑀓𑀼𑀝𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀧𑁆𑀧𑀫𑀸𑀡𑀺𑀓𑀦𑁆𑀢𑀺 ‘‘𑀢𑀢𑁆𑀭𑀺𑀤𑀁 𑀧𑀫𑀸𑀡𑀁, 𑀤𑀻𑀖𑀲𑁄 𑀤𑁆𑀯𑀸𑀤𑀲𑀯𑀺𑀤𑀢𑁆𑀣𑀺𑀬𑁄 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸, 𑀢𑀺𑀭𑀺𑀬𑀁 𑀲𑀢𑁆𑀢𑀦𑁆𑀢𑀭𑀸’’𑀢𑀺 (𑀧𑀸𑀭𑀸. 𑁩𑁪𑁮) 𑀤𑀻𑀖𑀧𑀼𑀣𑀼𑀮𑀸𑀦𑀁 𑀯𑀼𑀢𑁆𑀢𑀧𑁆𑀧𑀫𑀸𑀡𑁂𑀦 𑀅𑀢𑀺𑀭𑁂𑀓𑀢𑁆𑀢𑀸 𑀅𑀧𑁆𑀧𑀫𑀸𑀡𑀺𑀓𑀦𑁆𑀢𑀺 𑀅𑀢𑁆𑀣𑁄.

𑀏𑀢𑁆𑀣 𑀘 𑀢𑀺𑀮𑀓𑁆𑀔𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀢𑀻𑀡𑀺 𑀓𑀺𑀮𑁂𑀲𑀫𑀽𑀮𑀸𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀓𑀸𑀮𑀢𑁆𑀢𑀬𑀯𑀢𑁆𑀢 𑀲𑀩𑁆𑀩𑀥𑀫𑁆𑀫𑁂 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀢𑀺𑀪𑀼𑀯𑀦𑁂𑀓𑀧𑀝𑀺𑀲𑀭𑀡𑀪𑀽𑀢𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑀭𑀸𑀚𑀲𑁆𑀲 𑀅𑀗𑁆𑀕𑀼𑀮𑀁 𑀧𑀫𑀸𑀡𑀫𑀚𑁆𑀛𑀺𑀫𑀧𑀼𑀭𑀺𑀲𑀲𑁆𑀲 𑀅𑀗𑁆𑀕𑀼𑀮𑀢𑁄 𑀢𑀺𑀯𑀗𑁆𑀕𑀼𑀮𑀁 𑀳𑁄𑀢𑀺, 𑀏𑀓𑀸 𑀯𑀺𑀤𑀢𑁆𑀣𑀺 𑀢𑀺𑀲𑁆𑀲𑁄 𑀯𑀺𑀤𑀢𑁆𑀣𑀺𑀬𑁄 𑀳𑁄𑀦𑁆𑀢𑀺, 𑀏𑀓𑀁 𑀭𑀢𑀦𑀁 𑀢𑀻𑀡𑀺 𑀭𑀢𑀦𑀸𑀦𑀺 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀦𑀺𑀬𑀫𑀺𑀢𑀸 𑀲𑀼𑀕𑀢𑀯𑀺𑀤𑀢𑁆𑀣𑀺 𑀘 𑀯𑀟𑁆𑀠𑀓𑀺𑀭𑀢𑀦𑁂𑀦 𑀤𑀺𑀬𑀟𑁆𑀠𑀭𑀢𑀦𑀧𑁆𑀧𑀫𑀸𑀡𑀸 𑀳𑁄𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀼𑀕𑀢𑀯𑀺𑀤𑀢𑁆𑀣𑀺 𑀦𑀸𑀫 𑀇𑀤𑀸𑀦𑀺 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀺𑀲𑁆𑀲𑁄 𑀯𑀺𑀤𑀢𑁆𑀣𑀺𑀬𑁄 𑀯𑀟𑁆𑀠𑀓𑀺𑀳𑀢𑁆𑀣𑁂𑀦 𑀤𑀺𑀬𑀟𑁆𑀠𑁄 𑀳𑀢𑁆𑀣𑁄 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁮-𑁩𑁪𑁯). 𑀢𑀲𑁆𑀫𑀸 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸 𑀤𑁆𑀯𑀸𑀤𑀲 𑀯𑀟𑁆𑀠𑀓𑀺𑀳𑀢𑁆𑀣𑁂𑀦 𑀅𑀝𑁆𑀞𑀸𑀭𑀲 𑀳𑀢𑁆𑀣𑀸 𑀳𑁄𑀦𑁆𑀢𑀺. ‘‘𑀤𑀻𑀖𑀲𑁄 𑀤𑁆𑀯𑀸𑀤𑀲 𑀯𑀺𑀤𑀢𑁆𑀣𑀺𑀬𑁄 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸𑀢𑀺 𑀩𑀸𑀳𑀺𑀭𑀺𑀫𑁂𑀦 𑀫𑀸𑀦𑁂𑀦𑀸’’𑀢𑀺 (𑀧𑀸𑀭𑀸. 𑁩𑁪𑁯) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀢𑁆𑀢𑀸 𑀅𑀦𑁆𑀢𑀺𑀫𑀁 𑀲𑀼𑀥𑀸𑀮𑁂𑀧𑀁 𑀅𑀕𑁆𑀕𑀳𑁂𑀢𑁆𑀯𑀸 𑀣𑀼𑀲𑀫𑀢𑁆𑀢𑀺𑀓𑀧𑀭𑀺𑀬𑀦𑁆𑀢𑁂𑀦 𑀯𑀸 𑀫𑀳𑀸𑀫𑀢𑁆𑀢𑀺𑀓𑀧𑀭𑀺𑀬𑀦𑁆𑀢𑁂𑀦 𑀯𑀸 𑀩𑀸𑀳𑀺𑀭𑀦𑁆𑀢𑀢𑁄 𑀅𑀝𑁆𑀞𑀸𑀭𑀲𑀳𑀢𑁆𑀣𑀧𑁆𑀧𑀫𑀸𑀡𑀁, ‘‘𑀢𑀺𑀭𑀺𑀬𑀁 𑀲𑀢𑁆𑀢𑀦𑁆𑀢𑀭𑀸𑀢𑀺 𑀅𑀩𑁆𑀪𑀦𑁆𑀢𑀭𑀺𑀫𑁂𑀦 𑀫𑀸𑀦𑁂𑀦𑀸’’𑀢𑀺 (𑀧𑀸𑀭𑀸. 𑁩𑁪𑁯) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀢𑁆𑀢𑀸 𑀅𑀩𑁆𑀪𑀦𑁆𑀢𑀭𑀺𑀫𑁂𑀦 𑀧𑀼𑀣𑀼𑀮𑀢𑁄 𑀤𑁆𑀯𑀸𑀤𑀲𑀗𑁆𑀕𑀼𑀮𑀸𑀥𑀺𑀓𑀤𑀲𑀳𑀢𑁆𑀣𑀧𑁆𑀧𑀫𑀸𑀡𑀜𑁆𑀘 𑀓𑀼𑀝𑀺𑀬𑀸 𑀧𑀫𑀸𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀯𑀁 𑀞𑀺𑀢𑀧𑀫𑀸𑀡𑀢𑁄 𑀤𑀻𑀖𑀢𑁄 𑀧𑀼𑀣𑀼𑀮𑀢𑁄 𑀯𑀸 𑀉𑀪𑀢𑁄 𑀯𑀸 𑀓𑁂𑀲𑀕𑁆𑀕𑀫𑀢𑁆𑀢𑀸𑀥𑀺𑀓𑀸𑀧𑀺 𑀓𑀼𑀝𑀺 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑁆𑀧𑀫𑀸𑀡𑀺𑀓’’𑀦𑁆𑀢𑀺 𑀆𑀳𑀸𑀢𑀺 𑀲𑀗𑁆𑀔𑁂𑀧𑀢𑁄 𑀯𑁂𑀤𑀺𑀢𑀩𑁆𑀩𑀁.

𑀅𑀢𑁆𑀢𑀼𑀤𑁆𑀤𑁂𑀲𑀦𑁆𑀢𑀺 𑀉𑀤𑁆𑀤𑀺𑀲𑀺𑀢𑀩𑁆𑀩𑁄𑀢𑀺 𑀉𑀤𑁆𑀤𑁂𑀲𑁄, 𑀅𑀢𑁆𑀢𑀸 𑀉𑀤𑁆𑀤𑁂𑀲𑁄 𑀏𑀢𑀺𑀲𑁆𑀲𑀸𑀢𑀺 𑀅𑀢𑁆𑀢𑀼𑀤𑁆𑀤𑁂𑀲𑀸, 𑀓𑀼𑀝𑀺, 𑀢𑀁 𑀅𑀢𑁆𑀢𑀼𑀤𑁆𑀤𑁂𑀲𑀁. ‘‘𑀅𑀢𑁆𑀢𑀼𑀤𑁆𑀤𑁂𑀲𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬𑀸’’𑀢𑀺 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀢𑁆𑀢𑀸 ‘‘𑀫𑀬𑁆𑀳𑀁 𑀏𑀲𑀸 𑀯𑀸𑀲𑀢𑁆𑀣𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀓𑀭𑁄𑀦𑁆𑀢𑀲𑁆𑀲𑀸’’𑀢𑀺 𑀇𑀤𑀁 ‘‘𑀓𑀸𑀭𑀬𑀫𑀸𑀦𑁂𑀦𑀸𑀢𑀺 𑀓𑀭𑁄𑀦𑁆𑀢𑁄 𑀯𑀸 𑀓𑀸𑀭𑀸𑀧𑁂𑀦𑁆𑀢𑁄 𑀯𑀸’’𑀢𑀺 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀦𑀬𑁂𑀦 𑀧𑀬𑁄𑀚𑀓𑀓𑀢𑁆𑀢𑀼𑀦𑁄 𑀘 𑀕𑀳𑁂𑀢𑀩𑁆𑀩𑀢𑁆𑀢𑀸 𑀉𑀧𑀮𑀓𑁆𑀔𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀣𑀸𑀢𑀺 𑀢𑁂𑀦𑁂𑀯 𑀧𑀓𑀸𑀭𑁂𑀦, 𑀬𑁂𑀳𑀺 𑀅𑀲𑁆𑀲𑀸𑀫𑀺𑀓𑀢𑀸𑀤𑀻𑀳𑀺 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀓𑀼𑀝𑀺𑀁 𑀓𑀭𑁄𑀦𑁆𑀢𑀲𑁆𑀲 𑀆𑀧𑀢𑁆𑀢𑀺, 𑀢𑁂𑀳𑁂𑀯 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑀁 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀫𑁆𑀧𑀺 𑀓𑀼𑀝𑀺𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺. 𑀇𑀫𑀺𑀦𑀸 𑀅𑀧𑁆𑀧𑀫𑀸𑀡𑀺𑀓𑀁 𑀯𑀺𑀬 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀫𑁆𑀧𑀺 𑀯𑀺𑀲𑀼𑀁𑀬𑁂𑀯 𑀆𑀧𑀢𑁆𑀢𑀺𑀬𑀸 𑀧𑀥𑀸𑀦𑀗𑁆𑀕𑀦𑁆𑀢𑀺. 𑀯𑀲𑀢𑀺 𑀏𑀢𑁆𑀣𑀸𑀢𑀺 𑀯𑀢𑁆𑀣𑀼, 𑀪𑀽𑀫𑀺, 𑀲𑀸 𑀅𑀤𑁂𑀲𑀺𑀢𑀸 𑀏𑀢𑀺𑀲𑁆𑀲𑀸𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀸, 𑀓𑀼𑀝𑀺, 𑀢𑀁 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁.

𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀢𑁂𑀦 𑀓𑀼𑀝𑀺𑀓𑀸𑀭𑁂𑀦 𑀪𑀺𑀓𑁆𑀔𑀼𑀦𑀸 𑀓𑀼𑀝𑀺𑀯𑀢𑁆𑀣𑀼𑀁 𑀲𑁄𑀥𑁂𑀢𑁆𑀯𑀸 𑀲𑀫𑀢𑀮𑀁 𑀓𑀸𑀭𑁂𑀢𑁆𑀯𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀅𑀳𑀁 𑀪𑀦𑁆𑀢𑁂 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀢𑁆𑀢𑀼𑀓𑀸𑀫𑁄 𑀅𑀲𑁆𑀲𑀸𑀫𑀺𑀓𑀁 𑀅𑀢𑁆𑀢𑀼𑀤𑁆𑀤𑁂𑀲𑀁, 𑀲𑁄𑀳𑀁 𑀪𑀦𑁆𑀢𑁂 𑀲𑀗𑁆𑀖𑀁 𑀓𑀼𑀝𑀺𑀯𑀢𑁆𑀣𑀼𑀑𑀮𑁄𑀓𑀦𑀁 𑀬𑀸𑀘𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀬𑀸𑀘𑀺𑀢𑁂𑀦 𑀲𑀗𑁆𑀖𑁂𑀦 𑀯𑀸 𑀲𑀗𑁆𑀖𑁂𑀦 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀲𑀫𑁆𑀫𑀢𑁂𑀳𑀺 𑀩𑁆𑀬𑀢𑁆𑀢𑁂𑀳𑀺 𑀧𑀝𑀺𑀩𑀮𑁂𑀳𑀺 𑀤𑁆𑀯𑀻𑀳𑀺 𑀪𑀺𑀓𑁆𑀔𑀽𑀳𑀺 𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀓𑀼𑀝𑀺𑀯𑀢𑁆𑀣𑀼𑀁 𑀑𑀮𑁄𑀓𑁂𑀢𑁆𑀯𑀸 𑀲𑀸𑀭𑀫𑁆𑀪𑀪𑀸𑀯𑀁 𑀯𑀸 𑀅𑀧𑀭𑀺𑀓𑁆𑀓𑀫𑀦𑀪𑀸𑀯𑀁 𑀯𑀸 𑀉𑀪𑀬𑀫𑁂𑀯 𑀯𑀸 𑀧𑀲𑁆𑀲𑀦𑁆𑀢𑁂𑀳𑀺 ‘‘𑀫𑀸𑀬𑀺𑀥 𑀓𑀭𑀻’’𑀢𑀺 𑀦𑀺𑀯𑀸𑀭𑁂𑀢𑁆𑀯𑀸 𑀅𑀦𑀸𑀭𑀫𑁆𑀪𑀁 𑀘𑁂 𑀳𑁄𑀢𑀺 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑁆𑀲 𑀆𑀭𑁄𑀘𑀺𑀢𑁂 𑀓𑀼𑀝𑀺𑀓𑀸𑀭𑀓𑁂𑀦𑁂𑀯 𑀪𑀺𑀓𑁆𑀔𑀼𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀅𑀳𑀁 𑀪𑀦𑁆𑀢𑁂 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀢𑁆𑀢𑀼𑀓𑀸𑀫𑁄 𑀅𑀲𑁆𑀲𑀸𑀫𑀺𑀓𑀁 𑀅𑀢𑁆𑀢𑀼𑀤𑁆𑀤𑁂𑀲𑀁, 𑀲𑁄𑀳𑀁 𑀪𑀦𑁆𑀢𑁂 𑀲𑀗𑁆𑀖𑀁 𑀓𑀼𑀝𑀺𑀯𑀢𑁆𑀣𑀼𑀤𑁂𑀲𑀦𑀁 𑀬𑀸𑀘𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀬𑀸𑀘𑀺𑀢𑁂 𑀯𑀼𑀟𑁆𑀠𑀸𑀦𑀼𑀫𑀢𑁂𑀦 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀤𑁂𑀲𑁂𑀢𑁆𑀯𑀸 𑀦𑀺𑀬𑁆𑀬𑀸𑀤𑀺𑀢𑀓𑀼𑀝𑀺𑀯𑀢𑁆𑀣𑀼𑀲𑁆𑀲 𑀅𑀪𑀸𑀯𑀸 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁, 𑀢𑁂𑀦𑁂𑀯 𑀅𑀲𑁆𑀲𑀸𑀫𑀺𑀓𑀢𑀸𑀤𑀺𑀧𑀓𑀸𑀭𑁂𑀦 𑀬𑀼𑀢𑁆𑀢𑀁 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀓𑀼𑀝𑀺𑀓𑀁 𑀅𑀢𑁆𑀢𑀦𑀸 𑀬𑀸𑀘𑀺𑀢𑁂𑀳𑀺 𑀉𑀧𑀓𑀭𑀡𑁂𑀳𑀺 𑀓𑀭𑁄𑀦𑁆𑀢𑀲𑁆𑀲, 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀳𑁄𑀦𑁆𑀢𑀻𑀢𑀺 ‘‘𑀪𑀺𑀓𑁆𑀔𑀽 𑀯𑀸 𑀅𑀦𑀪𑀺𑀦𑁂𑀬𑁆𑀬 𑀯𑀢𑁆𑀣𑀼𑀤𑁂𑀲𑀦𑀸𑀬, 𑀧𑀫𑀸𑀡𑀁 𑀯𑀸 𑀅𑀢𑀺𑀓𑁆𑀓𑀸𑀫𑁂𑀬𑁆𑀬, 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 (𑀧𑀸𑀭𑀸. 𑁩𑁪𑁮) 𑀢𑀼𑀮𑁆𑀬𑀩𑀮𑀢𑀸𑀲𑀽𑀘𑀓𑁂𑀦 𑀯𑀸-𑀲𑀤𑁆𑀤𑁂𑀦 𑀲𑀫𑁆𑀧𑀺𑀡𑁆𑀟𑀺𑀢𑁆𑀯𑀸 𑀯𑀼𑀢𑁆𑀢𑀅𑀗𑁆𑀕𑀤𑁆𑀯𑀬𑀲𑀳𑀺𑀢𑀢𑁆𑀢𑀸 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸𑀳 ‘‘𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀦’’𑀦𑁆𑀢𑀺 (𑀧𑀸𑀭𑀸. 𑁩𑁫𑁫) 𑀘 ‘‘𑀪𑀺𑀓𑁆𑀔𑀼𑀓𑀼𑀝𑀺𑀁 𑀓𑀭𑁄𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁫𑁪) 𑀘 ‘‘𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁫𑁫) 𑀘 𑀯𑀼𑀢𑁆𑀢𑀢𑁆𑀢𑀸 𑀤𑁆𑀯𑀻𑀲𑀼 𑀅𑀗𑁆𑀕𑁂𑀲𑀼 𑀏𑀓𑀁 𑀘𑁂, 𑀏𑀓𑁄𑀯 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀻𑀢𑀺. 𑀢𑀁 𑀧𑀦 ‘‘𑀲𑀘𑁂 𑀏𑀓𑀯𑀺𑀧𑀦𑁆𑀦𑀸 𑀲𑀸, 𑀕𑀭𑀼𑀓𑀁 𑀏𑀓𑀓𑀁 𑀲𑀺𑀬𑀸’’𑀢𑀺 𑀯𑀓𑁆𑀔𑀢𑀺.

𑀲𑀸𑀭𑀫𑁆𑀪𑀸𑀤𑀻𑀲𑀽𑀢𑀺 𑀏𑀢𑁆𑀣 𑀲𑀸𑀭𑀫𑁆𑀪-𑀲𑀤𑁆𑀤𑁄 𑀲𑁄𑀧𑀤𑁆𑀤𑀯𑀧𑀭𑀺𑀬𑀸𑀬𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀸𑀭𑀫𑁆𑀪𑀁 𑀅𑀦𑀸𑀭𑀫𑁆𑀪𑀦𑁆𑀢𑀺 𑀲𑀉𑀧𑀤𑁆𑀤𑀯𑀁 𑀅𑀦𑀼𑀧𑀤𑁆𑀤𑀯’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁮-𑁩𑁪𑁯). 𑀏𑀢𑁆𑀣 ‘‘𑀲𑁂𑀢𑀁 𑀙𑀸𑀕𑀫𑀸𑀭𑀪𑁂𑀣 𑀬𑀚𑀫𑀸𑀦𑁄’’𑀢𑀺 𑀧𑀬𑁄𑀕𑁂 𑀯𑀺𑀬 𑀆-𑀧𑀼𑀩𑁆𑀩𑀲𑁆𑀲 𑀭𑀪𑀲𑁆𑀲 𑀳𑀺𑀁𑀲𑀢𑁆𑀣𑁂𑀧𑀺 𑀤𑀺𑀲𑁆𑀲𑀫𑀸𑀦𑀢𑁆𑀢𑀸 𑀓𑀢𑁆𑀢𑀼𑀲𑀸𑀥𑀦𑁄 𑀆𑀭𑀫𑁆𑀪-𑀲𑀤𑁆𑀤𑁄 𑀳𑀺𑀁𑀲𑀓𑀸𑀦𑀁 𑀓𑀺𑀧𑀺𑀮𑁆𑀮𑀺𑀓𑀸𑀤𑀺𑀲𑀢𑁆𑀢𑀸𑀦𑀁 𑀯𑀸𑀘𑀓𑁄 𑀪𑀯𑀢𑀻𑀢𑀺 𑀢𑀁𑀲𑀳𑀺𑀢𑀝𑁆𑀞𑀸𑀦𑀁 𑀲𑀸𑀭𑀫𑁆𑀪𑀁 𑀦𑀸𑀫 𑀳𑁄𑀢𑀺. 𑀢𑁂𑀦𑁂𑀯 𑀧𑀤𑀪𑀸𑀚𑀦𑁂𑀧𑀺 𑀯𑀼𑀢𑁆𑀢𑀁 ‘‘𑀲𑀸𑀭𑀫𑁆𑀪𑀁 𑀦𑀸𑀫 𑀓𑀺𑀧𑀺𑀮𑁆𑀮𑀺𑀓𑀸𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀉𑀧𑀘𑀺𑀓𑀸𑀦𑀁 𑀯𑀸, 𑀉𑀦𑁆𑀤𑀽𑀭𑀸𑀦𑀁 𑀯𑀸, 𑀅𑀳𑀻𑀦𑀁 𑀯𑀸, 𑀯𑀺𑀘𑁆𑀙𑀺𑀓𑀸𑀦𑀁 𑀯𑀸, 𑀲𑀢𑀧𑀤𑀻𑀦𑀁 𑀯𑀸, 𑀳𑀢𑁆𑀣𑀻𑀦𑀁 𑀯𑀸, 𑀅𑀲𑁆𑀲𑀸𑀦𑀁 𑀯𑀸, 𑀲𑀻𑀳𑀸𑀦𑀁 𑀯𑀸, 𑀩𑁆𑀬𑀕𑁆𑀖𑀸𑀦𑀁 𑀯𑀸…𑀧𑁂… 𑀆𑀲𑀬𑁄 𑀳𑁄𑀢𑀻’’𑀢𑀺 (𑀧𑀸𑀭𑀸. 𑁩𑁫𑁩).

𑀆𑀤𑀺-𑀲𑀤𑁆𑀤𑁂𑀦 𑀅𑀧𑀭𑀺𑀓𑁆𑀓𑀫𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀲𑀧𑀭𑀺𑀓𑁆𑀓𑀫𑀦𑀁 𑀦𑀸𑀫 𑀲𑀓𑁆𑀓𑀸 𑀳𑁄𑀢𑀺 𑀬𑀣𑀸𑀬𑀼𑀢𑁆𑀢𑁂𑀦 𑀲𑀓𑀝𑁂𑀦 𑀅𑀦𑀼𑀧𑀭𑀺𑀕𑀦𑁆𑀢𑀼𑀁, 𑀲𑀫𑀦𑁆𑀢𑀸 𑀦𑀺𑀲𑁆𑀲𑁂𑀡𑀺𑀬𑀸 𑀅𑀦𑀼𑀧𑀭𑀺𑀕𑀦𑁆𑀢𑀼𑀁, 𑀏𑀢𑀁 𑀲𑀧𑀭𑀺𑀓𑁆𑀓𑀫𑀦𑀁 𑀦𑀸𑀫𑀸’’𑀢𑀺 (𑀧𑀸𑀭𑀸. 𑁩𑁫𑁩) 𑀯𑀼𑀢𑁆𑀢𑀮𑀓𑁆𑀔𑀡𑀯𑀺𑀧𑀭𑀺𑀬𑀸𑀬𑀢𑁄 𑀦𑀺𑀩𑁆𑀩𑀓𑁄𑀲𑀲𑁆𑀲 𑀉𑀤𑀓𑀧𑀸𑀢𑀝𑁆𑀞𑀸𑀦𑁂 𑀏𑀓𑀁 𑀘𑀓𑁆𑀓𑀁 𑀞𑀧𑁂𑀢𑁆𑀯𑀸 𑀇𑀢𑀭𑀁 𑀘𑀓𑁆𑀓𑀁 𑀩𑀳𑀺 𑀞𑀧𑁂𑀢𑁆𑀯𑀸 𑀓𑀼𑀝𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀆𑀯𑀚𑁆𑀚𑀺𑀬𑀫𑀸𑀦𑀲𑁆𑀲 𑀕𑁄𑀬𑀼𑀢𑁆𑀢𑀲𑀓𑀝𑀲𑁆𑀲 𑀯𑀸 𑀦𑀺𑀲𑁆𑀲𑁂𑀡𑀺𑀬𑀁 𑀞𑀢𑁆𑀯𑀸 𑀓𑀼𑀝𑀺𑀁 𑀙𑀸𑀤𑀬𑀫𑀸𑀦𑀸𑀦𑀁 𑀦𑀺𑀲𑁆𑀲𑁂𑀡𑀺𑀬𑀸 𑀯𑀸 𑀧𑀭𑀢𑁄 𑀕𑀫𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀅𑀧𑀭𑀺𑀓𑁆𑀓𑀫𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁 𑀯𑀼𑀢𑁆𑀢𑀲𑀸𑀭𑀫𑁆𑀪𑀅𑀧𑀭𑀺𑀓𑁆𑀓𑀫𑀦𑀲𑀗𑁆𑀔𑀸𑀢𑀅𑀗𑁆𑀕𑀤𑁆𑀯𑀬𑁂𑀦 𑀬𑀼𑀢𑁆𑀢𑀁 𑀘𑁂, 𑀤𑁆𑀯𑁂 𑀤𑀼𑀓𑁆𑀓𑀝𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸𑀳 ‘‘𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀺𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦’’𑀦𑁆𑀢𑀺 (𑀧𑀸𑀭𑀸. 𑁩𑁫𑁫). 𑀏𑀓𑀁 𑀘𑁂, 𑀏𑀓𑀫𑁂𑀯 𑀳𑁄𑀢𑀺. 𑀬𑀣𑀸𑀳 ‘‘𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀺𑀓𑀁 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀺𑀓𑀁 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁫𑁫) 𑀏𑀢𑀁 𑀢𑀬𑀫𑁆𑀧𑀺 ‘‘𑀲𑀸𑀭𑀫𑁆𑀪𑀸𑀤𑀻𑀲𑀼 𑀤𑀼𑀓𑁆𑀓𑀝’’𑀦𑁆𑀢𑀺 𑀲𑀸𑀫𑀜𑁆𑀜𑁂𑀦 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀓𑀁 𑀅𑀗𑁆𑀕𑀁 𑀧𑀫𑀸𑀡𑀺𑀓𑀢𑁆𑀢𑀁 𑀯𑀸 𑀤𑁂𑀲𑀺𑀢𑀯𑀢𑁆𑀣𑀼𑀓𑀢𑁆𑀢𑀁 𑀯𑀸 𑀯𑀺𑀧𑀦𑁆𑀦𑀁 𑀏𑀢𑀺𑀲𑁆𑀲𑀸𑀢𑀺 𑀏𑀓𑀯𑀺𑀧𑀦𑁆𑀦𑀸. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁆𑀣𑀸𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀤𑀺𑀧𑀤𑀸𑀦𑀫𑀢𑁆𑀣𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀓𑀼𑀝𑀺.

𑁩𑁮𑁩. 𑀇𑀤𑀸𑀦𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 ‘‘𑀢𑁂 𑀬𑀸𑀘𑀦𑀩𑀳𑀼𑀮𑀸 𑀯𑀺𑀜𑁆𑀜𑀢𑁆𑀢𑀺𑀩𑀳𑀼𑀮𑀸 𑀯𑀺𑀳𑀭𑀦𑁆𑀢𑀺 ‘𑀧𑀼𑀭𑀺𑀲𑀁 𑀤𑁂𑀣 𑀧𑀼𑀭𑀺𑀲𑀢𑁆𑀢𑀓𑀭𑀁 𑀤𑁂𑀣𑀸’’𑀢𑀺𑀆𑀤𑀺𑀧𑀸𑀴𑀺𑀬𑀸 (𑀧𑀸𑀭𑀸. 𑁩𑁪𑁨) 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁨) 𑀆𑀕𑀢𑀁 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀯𑀺𑀦𑀺𑀘𑁆𑀙𑀬𑀁 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀼𑀭𑀺𑀲’’𑀦𑁆𑀢𑀺𑀆𑀤𑀺. 𑀓𑀫𑁆𑀫𑀲𑀳𑀸𑀬𑀢𑁆𑀣𑀸𑀬𑀸𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀓𑀫𑁆𑀫𑁂 𑀲𑀳𑀸𑀬𑀪𑀸𑀯𑀸𑀬, 𑀓𑀫𑁆𑀫𑀓𑀭𑀡𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀇𑀢𑁆𑀣𑀦𑁆𑀦𑀸𑀫𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀧𑀼𑀭𑀺𑀲𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀫𑁆𑀫𑀓𑀭𑀡𑀢𑁆𑀣𑀸𑀬 ‘𑀧𑀼𑀭𑀺𑀲𑀁 𑀤𑁂𑀣𑀸’𑀢𑀺 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁨). 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦𑀸𑀢𑀺 𑀲𑀸𑀫𑀺𑀓𑀸𑀦𑀁 𑀆𑀬𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀫𑀽𑀮𑀲𑁆𑀲 𑀙𑀺𑀦𑁆𑀤𑀦𑀯𑀲𑁂𑀦, 𑀅𑀢𑁆𑀢𑀦𑁄 𑀆𑀬𑀢𑁆𑀢𑀪𑀸𑀯𑀓𑀭𑀡𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁮𑁪. 𑀅𑀯𑀚𑁆𑀚𑀦𑁆𑀢𑀺 𑀯𑀚𑁆𑀚𑀭𑀳𑀺𑀢𑀁, 𑀦𑀺𑀤𑁆𑀤𑁄𑀲𑀦𑁆𑀢𑀺 𑀅𑀢𑁆𑀣𑁄. 𑀫𑀺𑀕𑀮𑀼𑀤𑁆𑀤𑀓𑀫𑀘𑁆𑀙𑀩𑀦𑁆𑀥𑀓𑀸𑀤𑀻𑀦𑀁 𑀲𑀓𑀓𑀫𑁆𑀫𑀁 𑀯𑀚𑁆𑀚𑀓𑀫𑁆𑀫𑀁 𑀦𑀸𑀫. 𑀢𑀲𑁆𑀫𑀸 𑀫𑀺𑀕𑀮𑀼𑀤𑁆𑀤𑀓𑀸𑀤𑀬𑁄 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀦𑁆𑀢𑁂𑀦 𑀧𑀦 ‘‘𑀢𑀼𑀫𑁆𑀳𑀸𑀓𑀁 𑀳𑀢𑁆𑀣𑀓𑀫𑁆𑀫𑀁 𑀤𑁂𑀣𑀸’’𑀢𑀺, ‘‘𑀳𑀢𑁆𑀣𑀓𑀫𑁆𑀫𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀲𑀸𑀫𑀜𑁆𑀜𑁂𑀦 𑀅𑀯𑀢𑁆𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀓𑀫𑁆𑀫𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸𑀬𑁂𑀯 𑀬𑀸𑀘𑀺𑀢𑀩𑁆𑀩𑀁. 𑀮𑀼𑀤𑁆𑀤𑀓𑁂 𑀯𑀸 𑀇𑀢𑀭𑁂 𑀯𑀸 𑀦𑀺𑀓𑁆𑀓𑀫𑁆𑀫𑁂 𑀅𑀬𑀸𑀘𑀺𑀢𑁆𑀯𑀸𑀧𑀺 𑀬𑀣𑀸𑀭𑀼𑀘𑀺 𑀓𑀫𑁆𑀫𑀁 𑀓𑀸𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀳𑀢𑁆𑀣𑀓𑀫𑁆𑀫𑀬𑀸𑀘𑀦𑀸𑀬 𑀲𑀩𑁆𑀩𑀣𑀸𑀧𑀺 𑀓𑀧𑁆𑀧𑀺𑀬𑀪𑀸𑀯𑀁 𑀤𑀻𑀧𑁂𑀢𑀼𑀁 𑀢𑀁𑀢𑀁𑀲𑀺𑀧𑁆𑀧𑀺𑀓𑁂 𑀬𑀸𑀘𑀺𑀢𑁆𑀯𑀸 𑀫𑀳𑀦𑁆𑀢𑀫𑁆𑀧𑀺 𑀧𑀸𑀲𑀸𑀤𑀁 𑀓𑀸𑀭𑀸𑀧𑁂𑀦𑁆𑀢𑁂𑀦 𑀳𑀢𑁆𑀣𑀓𑀫𑁆𑀫𑁂 𑀬𑀸𑀘𑀺𑀢𑁂 𑀅𑀢𑁆𑀢𑀦𑁄 𑀅𑀦𑁄𑀓𑀸𑀲𑀪𑀸𑀯𑀁 𑀜𑀢𑁆𑀯𑀸 𑀅𑀜𑁆𑀜𑁂𑀲𑀁 𑀓𑀭𑁄𑀦𑁆𑀢𑀸𑀦𑀁 𑀤𑀸𑀢𑀩𑁆𑀩𑀁 𑀫𑀽𑀮𑀁 𑀤𑀺𑀬𑁆𑀬𑀫𑀸𑀦𑀁 𑀅𑀥𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀺𑀢𑁆𑀣𑀸𑀭𑀢𑁄 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁨 𑀅𑀢𑁆𑀣𑀢𑁄𑀲𑀫𑀸𑀦𑀁) 𑀯𑀼𑀢𑁆𑀢𑀢𑁆𑀢𑀸 𑀓𑀼𑀲𑀮𑀸𑀦𑀁 𑀅𑀢𑁆𑀣𑀁 𑀅𑀧𑀭𑀺𑀳𑀸𑀧𑁂𑀦𑁆𑀢𑁂𑀦 𑀓𑀧𑁆𑀧𑀺𑀬𑁂𑀦 𑀲𑀸𑀭𑀼𑀧𑁆𑀧𑁂𑀦 𑀧𑀬𑁄𑀕𑁂𑀦 𑀬𑀸𑀘𑀺𑀢𑀩𑁆𑀩𑀁. 𑀬𑀸𑀘𑀺𑀢𑀓𑀫𑁆𑀫𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑁂𑀳𑀺 𑀓𑀭𑁄𑀦𑁆𑀢𑀸𑀦𑀁 𑀤𑀺𑀬𑁆𑀬𑀫𑀸𑀦𑀁 𑀳𑀢𑁆𑀣𑀓𑀫𑁆𑀫𑀫𑀽𑀮𑀁 𑀓𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀓𑀫𑁆𑀫𑀓𑀸𑀭𑀓𑁂 𑀤𑀲𑁆𑀲𑁂𑀢𑁆𑀯𑀸 𑀤𑀸𑀧𑁂𑀢𑀩𑁆𑀩𑀁. 𑀏𑀯𑀁 𑀬𑀸𑀘𑀦𑀸𑀬 𑀅𑀦𑀯𑀚𑁆𑀚𑀪𑀸𑀯𑁂 𑀅𑀝𑁆𑀞𑀓𑀣𑀸𑀕𑀢𑀁 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀳𑀢𑁆𑀣𑀓𑀫𑁆𑀫𑀫𑁆𑀧𑀻’’𑀢𑀺𑀆𑀤𑀺. 𑀧𑀺-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂, 𑀧𑀤𑀧𑀽𑀭𑀡𑁂 𑀯𑀸. 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀫𑁆𑀳𑀺. 𑀬𑀲𑁆𑀫𑀸 𑀇𑀤𑀁 𑀳𑀢𑁆𑀣𑀓𑀫𑁆𑀫𑀁 𑀓𑀺𑀜𑁆𑀘𑀺 𑀯𑀢𑁆𑀣𑀼 𑀦 𑀳𑁄𑀢𑀺, 𑀢𑀲𑁆𑀫𑀸 𑀅𑀦𑀯𑀚𑁆𑀚𑀫𑁂𑀯 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀺𑀢𑀼𑀁 𑀧𑀦 𑀯𑀝𑁆𑀝𑀢𑀻𑀢𑀺.

𑁩𑁮𑁫. 𑀜𑀸𑀢𑀓𑀸𑀤𑀺𑀓𑁂𑀢𑀺 𑀜𑀸𑀢𑀓𑀧𑀯𑀸𑀭𑀺𑀢𑁂. 𑀞𑀧𑁂𑀢𑁆𑀯𑀸𑀢𑀺 𑀯𑀚𑁆𑀚𑁂𑀢𑁆𑀯𑀸. 𑀕𑁄𑀡𑀫𑀸𑀬𑀸𑀘𑀫𑀸𑀦𑀲𑁆𑀲𑀸𑀢𑀺 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂 𑀢𑀸𑀯𑀓𑀸𑀮𑀺𑀓𑀁 𑀯𑀺𑀦𑀸 𑀓𑁂𑀯𑀮𑀁 𑀓𑀫𑁆𑀫𑀓𑀭𑀡𑀢𑁆𑀣𑀸𑀬 𑀕𑁄𑀡𑀁 𑀬𑀸𑀘𑀦𑁆𑀢𑀲𑁆𑀲. 𑀢𑁂𑀲𑀼𑀧𑀻𑀢𑀺 𑀜𑀸𑀢𑀓𑀸𑀤𑀻𑀲𑀼𑀧𑀺 𑀫𑀽𑀮𑀘𑁆𑀙𑁂𑀚𑁆𑀚𑁂𑀦 𑀕𑁄𑀡𑀫𑀸𑀬𑀸𑀘𑀦𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. ‘‘𑀢𑀸𑀯𑀓𑀸𑀮𑀺𑀓𑀦𑀬𑁂𑀦 𑀲𑀩𑁆𑀩𑀢𑁆𑀣 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁨) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀬𑀸𑀯 𑀓𑀫𑁆𑀫𑀓𑀭𑀡𑀓𑀸𑀮𑀁, 𑀢𑀸𑀯 𑀦𑀺𑀬𑀫𑁂𑀢𑁆𑀯𑀸 𑀜𑀸𑀢𑀓𑀅𑀜𑁆𑀜𑀸𑀢𑀓𑀧𑀯𑀸𑀭𑀺𑀢𑀅𑀧𑁆𑀧𑀯𑀸𑀭𑀺𑀢𑁂 𑀲𑀩𑁆𑀩𑁂𑀧𑀺 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀺. 𑀢𑀣𑀸 𑀬𑀸𑀘𑀺𑀢𑁆𑀯𑀸 𑀯𑀸 𑀅𑀬𑀸𑀘𑀺𑀢𑁆𑀯𑀸 𑀯𑀸 𑀕𑀳𑀺𑀢𑁄 𑀘𑁂, 𑀭𑀓𑁆𑀔𑀺𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀲𑀸𑀫𑀺𑀓𑀸𑀦𑀁 𑀦𑀺𑀬𑁆𑀬𑀸𑀤𑁂𑀢𑀩𑁆𑀩𑁄, 𑀕𑁄𑀡𑁂 𑀯𑀸 𑀦𑀝𑁆𑀞𑁂 𑀯𑀺𑀲𑀸𑀡𑁂 𑀯𑀸 𑀪𑀺𑀦𑁆𑀦𑁂 𑀲𑀸𑀫𑀺𑀓𑁂𑀲𑀼 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁂𑀲𑀼 𑀪𑀡𑁆𑀟𑀤𑁂𑀬𑁆𑀬𑀁.

𑁩𑁮𑁬. 𑀤𑁂𑀫𑀸𑀢𑀺 𑀏𑀢𑁆𑀣 ‘‘𑀢𑀼𑀫𑁆𑀳𑀸𑀓’’𑀦𑁆𑀢𑀺 𑀧𑀸𑀞𑀲𑁂𑀲𑁄. ‘‘𑀯𑀺𑀳𑀸𑀭𑀲𑁆𑀲 𑀤𑁂𑀫𑀸’𑀢𑀺 𑀯𑀼𑀢𑁆𑀢𑁂 𑀧𑀦 ‘𑀆𑀭𑀸𑀫𑀺𑀓𑀸𑀦𑀁 𑀆𑀘𑀺𑀓𑁆𑀔𑀣 𑀧𑀝𑀺𑀚𑀕𑁆𑀕𑀦𑀢𑁆𑀣𑀸𑀬𑀸’𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁨) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀲𑀓𑀝𑀯𑀺𑀦𑀺𑀘𑁆𑀙𑀬𑀲𑁆𑀲𑀸𑀧𑀺 𑀕𑁄𑀡𑀯𑀺𑀦𑀺𑀘𑁆𑀙𑀬𑁂𑀦 𑀲𑀫𑀸𑀦𑀢𑁆𑀢𑀸 𑀢𑀁 𑀅𑀯𑀢𑁆𑀯𑀸 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀓𑀝𑀁…𑀧𑁂… 𑀯𑀝𑁆𑀝𑀢𑀻’’𑀢𑀺. ‘‘𑀢𑀼𑀫𑁆𑀳𑀸𑀓𑀁 𑀤𑁂𑀫𑀸𑀢𑀺 𑀯𑀼𑀢𑁆𑀢𑁂’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀼𑀫𑁆𑀳𑀸𑀓𑀫𑁂𑀯 𑀤𑁂𑀫𑀸𑀢𑀺 𑀯𑀼𑀢𑁆𑀢𑁂 𑀤𑀸𑀭𑀼𑀪𑀡𑁆𑀟𑀁 𑀦𑀸𑀫 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁨).

𑁩𑁮𑁭. 𑀓𑀼𑀞𑀸𑀭𑀸𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀦𑀺𑀔𑀸𑀤𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀬𑀁 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀧𑀸𑀞𑀲𑁂𑀲𑁄. ‘‘𑀲𑀓𑀝𑀁 𑀕𑁄𑀡𑁄 𑀯𑀺𑀬 𑀢𑀸𑀯𑀓𑀸𑀮𑀺𑀓𑀁 𑀅𑀓𑀢𑁆𑀯𑀸 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂 𑀦 𑀬𑀸𑀘𑀺𑀢𑀩𑁆𑀩𑀁, 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂 𑀦 𑀬𑀸𑀘𑀺𑀢𑀩𑁆𑀩𑀁, 𑀢𑀸𑀯𑀓𑀸𑀮𑀺𑀓𑀁 𑀬𑀸𑀘𑀺𑀢𑀩𑁆𑀩’’𑀦𑁆𑀢𑀺 𑀯𑀺𑀦𑀺𑀘𑁆𑀙𑀬𑁄 𑀘 ‘‘𑀲𑀓𑀝𑀁…𑀧𑁂… 𑀯𑀝𑁆𑀝𑀢𑀻’’𑀢𑀺 𑀯𑀺𑀲𑁂𑀲𑀯𑀺𑀦𑀺𑀘𑁆𑀙𑀬𑁄 𑀘𑀸𑀢𑀺 𑀅𑀬𑀁 𑀦𑀬𑁄 𑀯𑀸𑀲𑀺𑀆𑀤𑀻𑀲𑀼 𑀘 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀦𑁆𑀢𑀺 𑀓𑁂𑀦𑀘𑀺 ‘‘𑀫𑀫𑁂𑀢’’𑀦𑁆𑀢𑀺 𑀅𑀧𑀭𑀺𑀕𑁆𑀕𑀳𑀺𑀢𑀁, ‘‘𑀭𑀓𑁆𑀔𑀺𑀢𑀕𑁄𑀧𑀺𑀢𑀝𑁆𑀞𑀸𑀦𑁂𑀬𑁂𑀯 𑀳𑀺 𑀯𑀺𑀜𑁆𑀜𑀢𑁆𑀢𑀺 𑀦𑀸𑀫 𑀯𑀼𑀘𑁆𑀘𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀅𑀭𑀓𑁆𑀔𑀺𑀢𑀸𑀕𑁄𑀧𑀺𑀢𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀝𑁆𑀞𑀓𑀣𑀸𑀬 𑀯𑀮𑁆𑀮𑀺𑀆𑀤𑀺𑀯𑀺𑀦𑀺𑀘𑁆𑀙𑀬𑀫𑁆𑀧𑀺 𑀯𑀢𑁆𑀯𑀸 ‘‘𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀁 𑀧𑀦 𑀬𑀁 𑀓𑀺𑀜𑁆𑀘𑀺 𑀆𑀳𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁨) 𑀯𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑀦𑁆𑀢𑀺 𑀇𑀥 𑀯𑀼𑀢𑁆𑀢𑀕𑁄𑀡𑀸𑀤𑀺𑀓𑀜𑁆𑀘 𑀯𑀓𑁆𑀔𑀫𑀸𑀦𑀯𑀮𑁆𑀮𑀺𑀆𑀤𑀺𑀓𑀜𑁆𑀘 𑀕𑀳𑁂𑀢𑀩𑁆𑀩𑀁. 𑀇𑀫𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀲𑁆𑀲 𑀭𑀓𑁆𑀔𑀺𑀢𑀕𑁄𑀧𑀺𑀢𑀯𑀺𑀲𑀬𑀢𑁆𑀢𑀁 𑀤𑀻𑀧𑀺𑀢𑀁 𑀳𑁄𑀢𑀺. 𑀳𑀭𑀸𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀅𑀧𑀺-𑀲𑀤𑁆𑀤𑁂𑀦 𑀧𑀕𑁂𑀯 𑀓𑁂𑀦𑀘𑀺 𑀳𑀭𑀺𑀢𑁆𑀯𑀸 𑀤𑀺𑀦𑁆𑀦𑀦𑁆𑀢𑀺 𑀤𑀻𑀧𑁂𑀢𑀺.

𑁩𑁮𑁮. 𑀯𑀮𑁆𑀮𑀺𑀆𑀤𑀺𑀫𑁆𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑁂𑀢𑁆𑀢𑀫𑀼𑀜𑁆𑀚𑀢𑀺𑀡𑀫𑀢𑁆𑀢𑀺𑀓𑀸 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑁆𑀣 𑀫𑀼𑀜𑁆𑀚𑀧𑀩𑁆𑀩𑀚𑀢𑀺𑀡𑀁 𑀯𑀺𑀦𑀸 𑀕𑁂𑀳𑀘𑁆𑀙𑀸𑀤𑀦𑀢𑀺𑀡𑀁 𑀢𑀺𑀡𑀁 𑀦𑀸𑀫. 𑀕𑀭𑀼𑀪𑀡𑁆𑀟𑀧𑁆𑀧𑀳𑁄𑀦𑀓𑁂𑀢𑀺 ‘‘𑀯𑀮𑁆𑀮𑀺 𑀅𑀟𑁆𑀠𑀩𑀸𑀳𑀼𑀫𑀢𑁆𑀢𑀸𑀧𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀮𑀓𑁆𑀔𑀡𑁂 𑀕𑀭𑀼𑀪𑀡𑁆𑀟𑀧𑁆𑀧𑀳𑁄𑀦𑀓𑁂. 𑀧𑀭𑁂𑀲𑀁 𑀲𑀦𑁆𑀢𑀓𑁂𑀬𑁂𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀦 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑁂 𑀤𑀼𑀓𑁆𑀓𑀝𑀦𑁆𑀢𑀺 𑀩𑁆𑀬𑀢𑀺𑀭𑁂𑀓𑀢𑁄 𑀤𑀻𑀧𑁂𑀢𑀺.

𑁩𑁮𑁯. 𑀧𑀘𑁆𑀘𑀬𑁂𑀲𑀽𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀲𑀗𑁆𑀔𑀸𑀢𑁂𑀲𑀼 𑀢𑀻𑀲𑀼 𑀧𑀘𑁆𑀘𑀬𑁂𑀲𑀼. 𑀏𑀯-𑀓𑀸𑀭𑁂𑀦 𑀕𑀺𑀮𑀸𑀦𑀧𑀘𑁆𑀘𑀬𑀲𑀗𑁆𑀔𑀸𑀢𑁂 𑀘𑀢𑀼𑀢𑁆𑀣𑀧𑀘𑁆𑀘𑀬𑁂 𑀯𑀺𑀜𑁆𑀜𑀢𑁆𑀢𑀺 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀯𑀺𑀜𑁆𑀜𑀢𑁆𑀢𑀺 𑀦𑀸𑀫 ‘‘𑀆𑀳𑀭, 𑀤𑁂𑀳𑀻’’𑀢𑀺 𑀇𑀘𑁆𑀙𑀺𑀢𑀧𑀘𑁆𑀘𑀬𑁂 𑀦𑀸𑀫𑀁 𑀯𑀢𑁆𑀯𑀸 𑀬𑀸𑀘𑀦𑀸. 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁨) 𑀲𑀸𑀯𑀥𑀸𑀭𑀡𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀘 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦𑁂𑀯 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀯𑀺𑀜𑁆𑀜𑀢𑁆𑀢𑀺𑀬𑀸 𑀅𑀮𑀩𑁆𑀪𑀫𑀸𑀦𑀪𑀸𑀯𑁂𑀦 𑀲𑀫𑀢𑁆𑀢𑀸 𑀧𑀘𑁆𑀘𑀬𑁂𑀲𑀼 𑀢𑀻𑀲𑀼 𑀅𑀦𑀦𑁆𑀢𑀭𑀁 𑀲𑀳𑀦𑀺𑀤𑁆𑀤𑀺𑀝𑁆𑀞𑀧𑀘𑁆𑀘𑀬𑀢𑁆𑀢𑀬𑀢𑁄 𑀢𑀢𑀺𑀬𑀧𑀘𑁆𑀘𑀬𑁂𑀬𑁂𑀯 𑀮𑀩𑁆𑀪𑀫𑀸𑀦𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑀺𑀬𑁂 𑀧𑀭𑀺𑀓𑀣𑁄𑀪𑀸𑀲𑀦𑀺𑀫𑀺𑀢𑁆𑀢𑀸𑀦𑀺 𑀘 𑀮𑀩𑁆𑀪𑀭𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀯𑀲𑀺𑀝𑁆𑀞𑀤𑁆𑀯𑀬𑁂 𑀧𑀦 𑀧𑀭𑀺𑀓𑀣𑀸𑀤𑀬𑁄 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀯𑀼𑀢𑁆𑀢𑁂 𑀘𑀢𑀼𑀢𑁆𑀣𑀧𑀘𑁆𑀘𑀬𑁂𑀧𑀺 𑀲𑀫𑀼𑀘𑁆𑀘𑀬𑀢𑁆𑀣𑁂𑀦 𑀘-𑀓𑀸𑀭𑁂𑀦 𑀧𑀭𑀺𑀓𑀣𑀸𑀤𑀺𑀢𑁆𑀢𑀬𑀁 𑀮𑀩𑁆𑀪𑀢𑀻𑀢𑀺 𑀲𑀺𑀤𑁆𑀥𑀢𑁆𑀢𑀸 ‘‘𑀢𑀻𑀲𑁆𑀯𑁂𑀯𑀸’’𑀢𑀺 𑀏𑀯-𑀓𑀸𑀭𑁂𑀦 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀯𑀺𑀜𑁆𑀜𑀢𑁆𑀢𑀺𑀬𑀸 𑀘 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀘𑀢𑀼𑀢𑁆𑀣𑁂 𑀕𑀺𑀮𑀸𑀦𑀧𑀘𑁆𑀘𑀬𑁂 𑀧𑀭𑀺𑀓𑀣𑁄𑀪𑀸𑀲𑀦𑀺𑀫𑀺𑀢𑁆𑀢𑀓𑀫𑁆𑀫𑀯𑀺𑀜𑁆𑀜𑀢𑁆𑀢𑀺𑀬𑁄 𑀯𑀝𑁆𑀝𑀦𑁆𑀢𑀻𑀢𑀺 𑀲𑀺𑀤𑁆𑀥𑀁. 𑀏𑀢𑁆𑀢𑀸𑀯𑀢𑀸 𑀘𑀢𑀼𑀢𑁆𑀣𑁂 𑀧𑀘𑁆𑀘𑀬𑁂 𑀧𑀭𑀺𑀓𑀣𑀸𑀤𑀬𑁄 𑀘𑀢𑁆𑀢𑀸𑀭𑁄𑀧𑀺 𑀯𑀝𑁆𑀝𑀦𑁆𑀢𑀺, 𑀢𑀢𑀺𑀬𑀧𑀘𑁆𑀘𑀬𑁂 𑀯𑀺𑀜𑁆𑀜𑀢𑁆𑀢𑀺𑀁 𑀯𑀺𑀦𑀸 𑀲𑁂𑀲𑀢𑁆𑀢𑀬𑀁 𑀯𑀝𑁆𑀝𑀢𑀺, 𑀧𑀼𑀭𑀺𑀫𑀧𑀘𑁆𑀘𑀬𑀤𑁆𑀯𑀬𑁂 𑀲𑀩𑁆𑀩𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀲𑁂𑀦𑀸𑀲𑀦𑀧𑀘𑁆𑀘𑀬𑁂 𑀧𑀭𑀺𑀓𑀣𑀸𑀤𑀺𑀓𑀦𑁆𑀢𑀺 𑀉𑀧𑁄𑀲𑀣𑀸𑀕𑀸𑀭𑀸𑀤𑀺𑀓𑀭𑀡𑀸𑀭𑀳𑀝𑁆𑀞𑀸𑀦𑀁 𑀑𑀮𑁄𑀓𑁂𑀢𑁆𑀯𑀸 𑀉𑀧𑀸𑀲𑀓𑀸𑀦𑀁 𑀲𑀼𑀡𑀦𑁆𑀢𑀸𑀦𑀁 ‘‘𑀇𑀫𑀲𑁆𑀫𑀺𑀁 𑀯𑀢 𑀑𑀓𑀸𑀲𑁂 𑀏𑀯𑀭𑀽𑀧𑀁 𑀲𑁂𑀦𑀸𑀲𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀸 ‘‘𑀬𑀼𑀢𑁆𑀢’’𑀦𑁆𑀢𑀺 𑀯𑀸 ‘‘𑀅𑀦𑀼𑀭𑀽𑀧’’𑀦𑁆𑀢𑀺 𑀯𑀸 𑀧𑀯𑀢𑁆𑀢𑀸 𑀓𑀣𑀸 𑀧𑀭𑀺𑀓𑀣𑀸 𑀦𑀸𑀫. ‘‘𑀉𑀧𑀸𑀲𑀓𑀸 𑀢𑀼𑀫𑁆𑀳𑁂 𑀓𑀢𑁆𑀣 𑀯𑀲𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀧𑀸𑀲𑀸𑀤𑁂 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀽𑀦𑀁 𑀧𑀦 𑀉𑀧𑀸𑀲𑀓𑀸 𑀧𑀸𑀲𑀸𑀤𑁄 𑀦 𑀯𑀝𑁆𑀝𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀸 𑀓𑀣𑀸 𑀑𑀪𑀸𑀲𑁄 𑀦𑀸𑀫. 𑀉𑀧𑀸𑀲𑀓𑁂𑀲𑀼 𑀧𑀲𑁆𑀲𑀫𑀸𑀦𑁂𑀲𑀼 𑀪𑀽𑀫𑀺𑀬𑀁 𑀭𑀚𑁆𑀚𑀼𑀁 𑀧𑀲𑀸𑀭𑁂𑀢𑁆𑀯𑀸 𑀪𑀽𑀫𑀺𑀁 𑀪𑀸𑀚𑁂𑀢𑁆𑀯𑀸 𑀔𑀸𑀡𑀼𑀓𑁂 𑀆𑀓𑁄𑀝𑁂𑀢𑁆𑀯𑀸 ‘‘𑀓𑀺𑀫𑀺𑀤𑀁 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀏𑀢𑁆𑀣 𑀆𑀯𑀸𑀲𑀁 𑀓𑀭𑁄𑀫 𑀉𑀧𑀸𑀲𑀓𑀸’’𑀢𑀺𑀆𑀤𑀺𑀓𑀸 𑀓𑀣𑀸 𑀦𑀺𑀫𑀺𑀢𑁆𑀢𑀓𑀣𑀸 𑀦𑀸𑀫. 𑀕𑀺𑀮𑀸𑀦𑀧𑀘𑁆𑀘𑀬𑁂 𑀘 𑀇𑀫𑀺𑀦𑀸 𑀦𑀬𑁂𑀦 𑀬𑀣𑀸𑀭𑀳𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑀫𑁂𑀢𑀁 𑀅𑀝𑁆𑀞𑀓𑀣𑀸𑀬 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁨) 𑀯𑀼𑀢𑁆𑀢𑀁.

𑁩𑁯𑁦-𑁩. 𑀇𑀤𑀸𑀦𑀺 𑀓𑀼𑀝𑀺𑀓𑀸𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀫𑀸𑀳 ‘‘𑀅𑀤𑁂𑀲𑀺𑀢𑁂’’𑀢𑀺𑀆𑀤𑀺. 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀦𑀺𑀲𑁂𑀦𑁆𑀢𑀲𑁆𑀲𑀸𑀢𑀺 𑀧𑀸𑀲𑀸𑀡𑁂 𑀖𑀁𑀲𑀺𑀢𑁆𑀯𑀸 𑀢𑀺𑀔𑀺𑀡𑀁 𑀓𑀭𑁄𑀦𑁆𑀢𑀲𑁆𑀲. 𑀧𑀸𑀘𑀺𑀢𑁆𑀢𑀺𑀬𑀸 𑀲𑀳𑀸𑀢𑀺 ‘‘𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁯𑁦) 𑀯𑀼𑀢𑁆𑀢𑀧𑀸𑀘𑀺𑀢𑁆𑀢𑀺𑀬𑁂𑀦 𑀲𑀤𑁆𑀥𑀺𑀁.

𑀆𑀧𑀢𑁆𑀢𑀺𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀧𑀸𑀘𑀺𑀢𑁆𑀢𑀺𑀬𑀜𑁆𑀘𑁂𑀯 𑀤𑀼𑀓𑁆𑀓𑀝𑀜𑁆𑀘 𑀇𑀢𑀭𑀢𑁆𑀭 𑀲𑀼𑀤𑁆𑀥𑀧𑀬𑁄𑀕𑀤𑀼𑀓𑁆𑀓𑀝𑀜𑁆𑀘𑀸𑀢𑀺 𑀆𑀧𑀢𑁆𑀢𑀺𑀁.

𑀬𑀸 𑀧𑀦𑀸𑀢𑀺 𑀬𑀸 𑀓𑀼𑀝𑀺. 𑀧𑀞𑀫𑁂 𑀤𑀼𑀢𑀺𑀬𑁂𑀢𑀺 𑀏𑀢𑁆𑀣 ‘‘𑀧𑀺𑀡𑁆𑀟𑁂𑀳𑀻’’𑀢𑀺 𑀓𑀭𑀡𑀩𑀳𑀼𑀯𑀘𑀦𑀁 𑀯𑀺𑀪𑀢𑁆𑀢𑀺𑀯𑀘𑀦𑀯𑀺𑀧𑀭𑀺𑀡𑀸𑀫𑀯𑀲𑁂𑀦 ‘‘𑀧𑀺𑀡𑁆𑀟𑁂’’𑀢𑀺 𑀪𑀼𑀫𑁆𑀫𑁂𑀓𑀯𑀘𑀦𑀦𑁆𑀢𑀁 𑀓𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁, ‘‘𑀦𑀺𑀓𑁆𑀔𑀺𑀢𑁆𑀢𑁂’’𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁, 𑀪𑀸𑀯𑀮𑀓𑁆𑀔𑀡𑁂 𑀪𑀼𑀫𑁆𑀫𑀁, 𑀦𑀺𑀓𑁆𑀔𑀺𑀢𑁆𑀢𑁂 𑀲𑀢𑀻𑀢𑀺 𑀅𑀢𑁆𑀣𑁄.

𑁩𑁯𑁪. ‘‘𑀲𑀘𑁂 𑀅𑀜𑁆𑀜𑀲𑁆𑀲𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀯𑀺𑀧𑁆𑀧𑀓𑀢𑀦𑁆𑀢𑀺 𑀆𑀭𑀤𑁆𑀥𑀫𑀦𑀺𑀝𑁆𑀞𑀺𑀢𑀁. ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀇𑀤𑀁 𑀦𑀺𑀝𑁆𑀞𑀺𑀢𑁂 𑀆𑀧𑀚𑁆𑀚𑀺𑀢𑀩𑁆𑀩𑀲𑀗𑁆𑀖𑀸𑀤𑀺𑀲𑁂𑀲𑀸𑀪𑀸𑀯𑀁 𑀲𑀦𑁆𑀥𑀸𑀬𑀸𑀳. 𑀧𑀼𑀩𑁆𑀩𑀧𑀬𑁄𑀕𑀫𑀢𑁆𑀢𑁂𑀦 𑀳𑀺 𑀧𑀸𑀘𑀺𑀢𑁆𑀢𑀺𑀬𑀤𑀼𑀓𑁆𑀓𑀝𑀸𑀦𑀺𑀧𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀧𑀦 𑀤𑁂𑀲𑁂𑀢𑀩𑁆𑀩𑀸𑀦𑀺. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀆𑀓𑀟𑁆𑀠𑀢𑀺, 𑀢𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀧𑀼𑀩𑁆𑀩𑀪𑀸𑀕𑁂 𑀆𑀧𑀦𑁆𑀦𑀸𑀦𑀁 𑀧𑀸𑀘𑀺𑀢𑁆𑀢𑀺𑀬𑀤𑀼𑀓𑁆𑀓𑀝𑀸𑀦𑀁 𑀤𑁂𑀲𑁂𑀢𑀩𑁆𑀩𑀢𑀸 𑀘 𑀤𑀻𑀧𑀺𑀢𑀸 𑀳𑁄𑀢𑀺. 𑀢𑀁 𑀓𑀼𑀝𑀺𑀦𑁆𑀢𑀺 𑀢𑀁 𑀯𑀺𑀧𑁆𑀧𑀓𑀢𑀓𑀼𑀝𑀺𑀁.

𑁩𑁯𑁫. 𑀅𑀜𑁆𑀜𑀁 𑀪𑁄𑀚𑀦𑀲𑀸𑀮𑀸𑀤𑀺𑀁. 𑀢𑀣𑀸𑀢𑀺 𑀅𑀦𑀸𑀧𑀢𑁆𑀢𑀺𑀫𑀸𑀳.

𑁩𑁯𑁬. ‘‘𑀓𑀭𑁄𑀢𑁄’’𑀢𑀺 𑀇𑀫𑀺𑀦𑀸 ‘‘𑀓𑀸𑀭𑀸𑀧𑀬𑀢𑁄’’𑀢𑀺𑀧𑀺 𑀮𑀩𑁆𑀪𑀢𑀺. 𑀉𑀪𑀬𑁂𑀦𑀸𑀧𑀺 ‘‘𑀓𑁆𑀭𑀺𑀬𑀢𑁄’’𑀢𑀺 𑀇𑀫𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. ‘‘𑀅𑀧𑁆𑀧𑀫𑀸𑀡𑀺𑀓’’𑀦𑁆𑀢𑀺 𑀇𑀫𑀺𑀦𑀸 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲 𑀅𑀗𑁆𑀕𑀁 𑀤𑀲𑁆𑀲𑁂𑀢𑀺.

𑁩𑁯𑁭. 𑀢𑀦𑁆𑀢𑀺 ‘‘𑀅𑀧𑁆𑀧𑀫𑀸𑀡𑀺𑀓’’𑀦𑁆𑀢𑀺 𑀏𑀯𑀁 𑀧𑀘𑁆𑀘𑀸𑀫𑀲𑀢𑀺. ‘‘𑀓𑁆𑀭𑀺𑀬𑀸𑀓𑁆𑀭𑀺𑀬𑀢𑁄’’𑀢𑀺 𑀇𑀤𑀁 𑀓𑀼𑀝𑀺𑀬𑀸 𑀓𑀭𑀡𑀜𑁆𑀘 𑀯𑀢𑁆𑀣𑀼𑀤𑁂𑀲𑀦𑀸𑀬 𑀅𑀓𑀭𑀡𑀜𑁆𑀘 𑀉𑀧𑀸𑀤𑀸𑀬 𑀯𑀼𑀢𑁆𑀢𑀁.

𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸.

𑁩𑁯𑁮. 𑀯𑀢𑁆𑀣𑀼𑀁 𑀅𑀤𑁂𑀲𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄, ‘‘𑀢𑁂𑀦 𑀯𑀺𑀳𑀸𑀭𑀓𑀸𑀭𑀓𑁂𑀦 𑀪𑀺𑀓𑁆𑀔𑀼𑀦𑀸 𑀯𑀺𑀳𑀸𑀭𑀯𑀢𑁆𑀣𑀼𑀁 𑀲𑁄𑀥𑁂𑀢𑁆𑀯𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁩𑁬𑁭) 𑀧𑀤𑀪𑀸𑀚𑀦𑁂 𑀆𑀕𑀢𑀦𑀬𑁂𑀦 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀺𑀳𑀸𑀭𑀯𑀢𑁆𑀣𑀼𑀁 𑀲𑁄𑀥𑁂𑀢𑁆𑀯𑀸 𑀲𑀫𑀢𑀮𑀁 𑀓𑀸𑀭𑁂𑀢𑁆𑀯𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑁆𑀫 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀅𑀳𑀁 𑀪𑀦𑁆𑀢𑁂 𑀫𑀳𑀮𑁆𑀮𑀓𑀁 𑀯𑀺𑀳𑀸𑀭𑀁 𑀓𑀢𑁆𑀢𑀼𑀓𑀸𑀫𑁄 𑀲𑀲𑁆𑀲𑀸𑀫𑀺𑀓𑀁 𑀅𑀢𑁆𑀢𑀼𑀤𑁆𑀤𑁂𑀲𑀁, 𑀲𑁄𑀳𑀁 𑀪𑀦𑁆𑀢𑁂 𑀲𑀗𑁆𑀖𑀁 𑀯𑀺𑀳𑀸𑀭𑀯𑀢𑁆𑀣𑀼𑀑𑀮𑁄𑀓𑀦𑀁 𑀬𑀸𑀘𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀬𑀸𑀘𑀺𑀢𑁆𑀯𑀸 𑀮𑀤𑁆𑀥𑁂 𑀯𑀼𑀟𑁆𑀠𑁂 𑀯𑀸 𑀪𑀺𑀓𑁆𑀔𑀽 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀲𑀗𑁆𑀖𑁂𑀦 𑀲𑀫𑁆𑀫𑀢𑁂 𑀯𑀸 𑀪𑀺𑀓𑁆𑀔𑀽 𑀦𑁂𑀢𑁆𑀯𑀸 𑀓𑀢𑀧𑀭𑀺𑀓𑀫𑁆𑀫𑀁 𑀯𑀺𑀳𑀸𑀭𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑁆𑀯𑀸 𑀓𑀼𑀝𑀺𑀯𑀢𑁆𑀣𑀼𑀑𑀮𑁄𑀓𑀦𑁂 𑀯𑀺𑀬 𑀕𑀢𑀪𑀺𑀓𑁆𑀔𑀽𑀳𑀺 𑀑𑀮𑁄𑀓𑁂𑀢𑁆𑀯𑀸 𑀲𑀸𑀭𑀫𑁆𑀪𑀸𑀤𑀺𑀪𑀸𑀯𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀅𑀦𑀸𑀭𑀫𑁆𑀪𑀲𑀧𑀭𑀺𑀓𑁆𑀓𑀫𑀦𑀪𑀸𑀯𑀁 𑀜𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑁆𑀲 𑀆𑀭𑁄𑀘𑀺𑀢𑁂 𑀧𑀼𑀦 𑀢𑁂𑀦 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀅𑀳𑀁 𑀪𑀦𑁆𑀢𑁂 𑀫𑀳𑀮𑁆𑀮𑀓𑀁 𑀯𑀺𑀳𑀸𑀭𑀁 𑀓𑀢𑁆𑀢𑀼𑀓𑀸𑀫𑁄 𑀲𑀲𑁆𑀲𑀸𑀫𑀺𑀓𑀁 𑀅𑀢𑁆𑀢𑀼𑀤𑁆𑀤𑁂𑀲𑀁, 𑀲𑁄𑀳𑀁 𑀪𑀦𑁆𑀢𑁂 𑀲𑀗𑁆𑀖𑀁 𑀯𑀺𑀳𑀸𑀭𑀯𑀢𑁆𑀣𑀼𑀤𑁂𑀲𑀦𑀁 𑀬𑀸𑀘𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀬𑀸𑀘𑀺𑀢𑁆𑀯𑀸 𑀲𑀗𑁆𑀖𑁂𑀦 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀯𑀺𑀳𑀸𑀭𑀯𑀢𑁆𑀣𑀼 𑀤𑁂𑀲𑁂𑀢𑀩𑁆𑀩𑀁, 𑀢𑀣𑀸 𑀅𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀳 𑀲𑀸𑀭𑀫𑁆𑀪𑀸𑀤𑀺 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀫𑀳𑀮𑁆𑀮𑀓𑀦𑁆𑀢𑀺 ‘‘𑀲𑀲𑁆𑀲𑀸𑀫𑀺𑀓𑀪𑀸𑀯𑁂𑀦 𑀲𑀜𑁆𑀜𑀸𑀘𑀺𑀓𑀓𑀼𑀝𑀺𑀢𑁄 𑀫𑀳𑀦𑁆𑀢𑀪𑀸𑀯𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑀳𑀮𑁆𑀮𑀓𑁄. 𑀬𑀲𑁆𑀫𑀸 𑀯𑀸 𑀯𑀢𑁆𑀣𑀼𑀁 𑀤𑁂𑀲𑀸𑀧𑁂𑀢𑁆𑀯𑀸 𑀧𑀫𑀸𑀡𑀸𑀢𑀺𑀓𑁆𑀓𑀫𑁂𑀦𑀸𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀧𑀫𑀸𑀡𑀫𑀳𑀦𑁆𑀢𑀢𑀸𑀬𑀧𑀺 𑀫𑀳𑀮𑁆𑀮𑀓𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁬𑁬) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀫𑀳𑀦𑁆𑀢𑀪𑀸𑀯𑁂𑀦 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀳𑀸𑀭𑀦𑁆𑀢𑀺 ‘‘𑀯𑀺𑀳𑀸𑀭𑁄 𑀦𑀸𑀫 𑀉𑀮𑁆𑀮𑀺𑀢𑁆𑀢𑁄 𑀯𑀸 𑀳𑁄𑀢𑀺 𑀅𑀯𑀮𑀺𑀢𑁆𑀢𑁄 𑀯𑀸 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑁄 𑀯𑀸’’𑀢𑀺 (𑀧𑀸𑀭𑀸. 𑁩𑁭𑁧) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑁂𑀦𑀸𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀳𑀭𑀦𑁆𑀢𑀺 𑀅𑀲𑁆𑀫𑀺𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀉𑀮𑁆𑀮𑀺𑀢𑁆𑀢𑀸𑀤𑀺𑀲𑀭𑀽𑀧𑀁 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀢𑀁 𑀯𑀺𑀳𑀸𑀭𑀁 𑀬𑁄 𑀓𑀭𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀓𑀭𑁂𑀬𑁆𑀬 𑀯𑀸 𑀓𑀸𑀭𑀸𑀧𑁂𑀬𑁆𑀬 𑀯𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀢𑁆𑀢𑀯𑀸𑀲𑀢𑁆𑀣𑀦𑁆𑀢𑀺 𑀅𑀢𑁆𑀢𑀦𑁄 𑀯𑀸𑀲𑀁 𑀧𑀝𑀺𑀘𑁆𑀘, 𑀇𑀫𑀺𑀦𑀸 𑀧𑀭𑀲𑁆𑀲 𑀯𑀸𑀲𑀢𑁆𑀣𑀸𑀬 𑀓𑀭𑁄𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀩𑁆𑀬𑀢𑀺𑀭𑁂𑀓𑀢𑁄 𑀯𑀺𑀜𑁆𑀜𑀸𑀬𑀢𑀺. ‘‘𑀕𑀭𑀼𑀓’’𑀦𑁆𑀢𑀺 𑀏𑀢𑁆𑀣 𑀯𑀢𑁆𑀣𑀼𑀤𑁂𑀲𑀦𑀸𑀬 𑀅𑀓𑀸𑀭𑀸𑀧𑀦𑁂𑀦 ‘‘𑀏𑀓𑁄𑀯 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀻’’𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀯𑀺𑀓𑀧𑁆𑀧𑀢𑁆𑀢𑀬𑀁 𑀦 𑀕𑀳𑁂𑀢𑀩𑁆𑀩𑀁. 𑀇𑀤𑀜𑁆𑀘 𑀯𑀓𑁆𑀔𑀢𑀺 ‘‘𑀧𑀫𑀸𑀡𑀸…𑀧𑁂… 𑀲𑀗𑁆𑀖𑀸𑀤𑀺𑀲𑁂𑀲𑀢𑀸’’𑀢𑀺 (𑀯𑀺. 𑀯𑀺. 𑁩𑁯𑁯 𑀆𑀤𑀬𑁄).

𑁩𑁯𑁯. 𑀓𑁆𑀭𑀺𑀬𑀸𑀲𑀫𑀼𑀝𑁆𑀞𑀸𑀦𑀸𑀪𑀸𑀯𑀦𑁆𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀫𑁂𑀧𑀺 𑀆𑀧𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑀢𑁄 𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀸𑀦𑀲𑁆𑀲 𑀇𑀥 𑀅𑀪𑀸𑀯𑁄 𑀜𑀸𑀢𑀩𑁆𑀩𑁄. 𑀓𑁆𑀭𑀺𑀬…𑀧𑁂… 𑀮𑀓𑁆𑀔𑀬𑁂𑀢𑀺 𑀏𑀢𑁆𑀣 𑀩𑁆𑀬𑀢𑀺𑀭𑁂𑀓𑀢𑁄 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀢𑀸𑀬 𑀅𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀸𑀦𑀢𑀸 𑀅𑀦𑀼𑀜𑁆𑀜𑀸𑀢𑀸.

𑀫𑀳𑀮𑁆𑀮𑀓𑀯𑀺𑀳𑀸𑀭𑀓𑀣𑀸𑀯𑀡𑁆𑀡𑀦𑀸.

𑁪𑁦𑁧-𑁩. 𑀢𑁂𑀲𑀽𑀢𑀺 𑀘𑀢𑀼𑀯𑀻𑀲𑀢𑀺𑀬𑀸 𑀧𑀸𑀭𑀸𑀚𑀺𑀓𑁂𑀲𑀼. 𑀪𑀺𑀓𑁆𑀔𑀼𑀦𑁄 𑀅𑀦𑀼𑀭𑀽𑀧𑀸𑀦𑀺 𑀏𑀓𑀽𑀦𑀯𑀻𑀲𑀢𑀻𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀧𑀝𑀺𑀦𑀺𑀬𑀢𑀸 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀺𑀓𑀸𑀤𑀬𑁄 𑀘𑀢𑁆𑀢𑀸𑀭𑁄 𑀢𑀤𑀦𑀼𑀮𑁄𑀫𑀸𑀬 𑀯𑀺𑀩𑁆𑀪𑀦𑁆𑀢𑀪𑀺𑀓𑁆𑀔𑀼𑀦𑀺𑀬𑀸 𑀲𑀳 𑀧𑀜𑁆𑀘 𑀧𑀸𑀭𑀸𑀚𑀺𑀓𑁂 𑀯𑀺𑀦𑀸 𑀪𑀺𑀓𑁆𑀔𑀼𑀦𑁄 𑀅𑀦𑀼𑀭𑀽𑀧𑀸 𑀲𑁂𑀲𑀸 𑀏𑀓𑀽𑀦𑀯𑀻𑀲𑀢𑀺 𑀧𑀸𑀭𑀸𑀚𑀺𑀓𑀸.

𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀧𑀤𑀪𑀸𑀚𑀦𑁂 ‘‘𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦𑀸𑀢𑀺 𑀘𑀢𑀼𑀦𑁆𑀦𑀁 𑀅𑀜𑁆𑀜𑀢𑀭𑁂𑀦𑀸’’𑀢𑀺 (𑀧𑀸𑀭𑀸. 𑁩𑁮𑁬) 𑀯𑀼𑀢𑁆𑀢𑀦𑀬𑀲𑁆𑀲 𑀇𑀥 ‘‘𑀏𑀓𑀽𑀦𑀯𑀻𑀲𑀢𑀻’’𑀢𑀺 𑀯𑀘𑀦𑀁 𑀯𑀺𑀭𑀼𑀚𑁆𑀛𑀢𑀻𑀢𑀺 𑀘𑁂? 𑀦 𑀯𑀺𑀭𑀼𑀚𑁆𑀛𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀧𑀤𑀪𑀸𑀚𑀦𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀕𑀢𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀁, 𑀇𑀤𑀁 𑀧𑀦 𑀩𑀼𑀤𑁆𑀥𑀸𑀦𑀼𑀫𑀢𑀺𑀁 𑀕𑀳𑁂𑀢𑁆𑀯𑀸 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀧𑀯𑀢𑁆𑀢𑀓𑀸𑀦𑀁 𑀆𑀘𑀭𑀺𑀬𑀸𑀦𑀁 𑀫𑀢𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀁, 𑀢𑀲𑁆𑀫𑀸 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀆𑀘𑀭𑀺𑀬𑁄 𑀲𑀩𑁆𑀩𑀧𑀸𑀭𑀸𑀚𑀺𑀓𑀸𑀦𑀁 ‘‘𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸𑀯𑁂𑀬𑁆𑀬’’𑀦𑁆𑀢𑀺 (𑀧𑀸𑀭𑀸. 𑁩𑁮𑁫) 𑀯𑀼𑀢𑁆𑀢𑀅𑀦𑀼𑀤𑁆𑀥𑀁𑀲𑀦𑀲𑁆𑀲 𑀏𑀓𑀦𑁆𑀢𑀲𑀸𑀥𑀦𑀢𑁆𑀢𑀸 𑀪𑀺𑀓𑁆𑀔𑀼𑀦𑀻𑀦𑀁 𑀧𑀝𑀺𑀦𑀺𑀬𑀢𑀲𑀸𑀦𑀼𑀮𑁄𑀫𑀧𑀸𑀭𑀸𑀚𑀺𑀓𑀧𑀜𑁆𑀘𑀓𑀁 𑀯𑀺𑀦𑀸 𑀅𑀯𑀲𑁂𑀲𑀁 𑀲𑀩𑁆𑀩𑀁 𑀲𑀗𑁆𑀕𑀡𑁆𑀳𑀺, 𑀢𑁂𑀦𑁂𑀯 𑀯𑀺𑀦𑀬𑀝𑁆𑀞𑀓𑀣𑀸𑀬 𑀕𑀡𑁆𑀞𑀺𑀧𑀤𑀯𑀺𑀯𑀭𑀡𑁂 ‘‘𑀘𑀢𑀼𑀦𑁆𑀦𑀁 𑀅𑀜𑁆𑀜𑀢𑀭𑁂𑀦𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂 𑀏𑀯 𑀆𑀕𑀢𑁂 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀇𑀢𑀭𑁂𑀲𑀁 𑀅𑀜𑁆𑀜𑀢𑀭𑁂𑀦𑀸𑀧𑀺 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 ‘‘𑀅𑀦𑀼𑀤𑁆𑀥𑀁𑀲𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁩𑁮𑁪) 𑀧𑀸𑀞𑁂 𑀅𑀥𑀺𑀧𑁆𑀧𑀸𑀬𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀢𑁆𑀢𑀸 𑀇𑀫𑁂𑀲𑀁 𑀆𑀘𑀭𑀺𑀬𑀸𑀦𑀁 𑀫𑀢𑀁 𑀧𑀫𑀸𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀢𑁂𑀲𑀼 𑀅𑀜𑁆𑀜𑀢𑀭𑁂𑀦𑀸’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀏𑀓𑀽𑀦𑀯𑀻𑀲𑀢𑀻’’𑀢𑀺 𑀏𑀢𑁆𑀣 ‘‘𑀬𑀸𑀦𑀻’’𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺.

𑀅𑀜𑁆𑀜𑀢𑀭𑁂𑀦 𑀅𑀫𑀽𑀮𑀓𑁂𑀦𑀸𑀢𑀺 𑀬𑁄𑀚𑀦𑀸. 𑀅𑀫𑀽𑀮𑀓𑁂𑀦𑀸𑀢𑀺 𑀘𑁄𑀤𑀓𑀲𑁆𑀲 𑀤𑀲𑁆𑀲𑀦𑀸𑀤𑀻𑀳𑀺 𑀘𑁄𑀤𑀦𑀸𑀫𑀽𑀮𑁂𑀳𑀺 𑀯𑀺𑀭𑀳𑀺𑀢𑀢𑁆𑀢𑀸 𑀅𑀫𑀽𑀮𑀓𑀁, 𑀧𑀸𑀭𑀸𑀚𑀺𑀓𑀁, 𑀢𑁂𑀦. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀁 𑀧𑀸𑀭𑀸𑀚𑀺𑀓𑀁 𑀘𑁄𑀤𑀓𑁂𑀦 𑀘𑀼𑀤𑀺𑀢𑀓𑀫𑁆𑀳𑀺 𑀧𑀼𑀕𑁆𑀕𑀮𑁂 𑀦𑁂𑀯 𑀤𑀺𑀝𑁆𑀞𑀁 𑀦 𑀲𑀼𑀢𑀁 𑀦 𑀧𑀭𑀺𑀲𑀗𑁆𑀓𑀺𑀢𑀁, 𑀇𑀤𑀁 𑀏𑀢𑁂𑀲𑀁 𑀤𑀲𑁆𑀲𑀦𑀲𑀯𑀦𑀧𑀭𑀺𑀲𑀗𑁆𑀓𑀸𑀲𑀗𑁆𑀔𑀸𑀢𑀸𑀦𑀁 𑀫𑀽𑀮𑀸𑀦𑀁 𑀅𑀪𑀸𑀯𑁂𑀦 𑀅𑀫𑀽𑀮𑀓𑀁 𑀦𑀸𑀫𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁮𑁫-𑁩𑁮𑁬). 𑀏𑀢𑁆𑀣 𑀘 𑀫𑀁𑀲𑀘𑀓𑁆𑀔𑀼𑀦𑀸 𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀸 𑀤𑀺𑀝𑁆𑀞𑀁 𑀤𑀺𑀝𑁆𑀞𑀁 𑀦𑀸𑀫. 𑀧𑀓𑀢𑀺𑀲𑁄𑀢𑁂𑀦 𑀯𑀸 𑀤𑀺𑀩𑁆𑀩𑀲𑁄𑀢𑁂𑀦 𑀯𑀸 𑀲𑀼𑀢𑀁 𑀲𑀼𑀢𑀁 𑀦𑀸𑀫. 𑀘𑀺𑀢𑁆𑀢𑁂𑀦 𑀧𑀭𑀺𑀲𑀗𑁆𑀓𑀺𑀢𑀁 𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫. 𑀢𑀁 𑀢𑀺𑀯𑀺𑀥𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑀧𑀭𑀺𑀲𑀗𑁆𑀓𑀺𑀢𑀯𑀲𑁂𑀦.

𑀢𑀢𑁆𑀣 𑀢𑀸𑀤𑀺𑀲𑁂 𑀓𑀫𑁆𑀫𑀦𑀺𑀬𑁂 𑀑𑀓𑀸𑀲𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀦𑁄 𑀅𑀜𑁆𑀜𑀣𑀺𑀬𑀁 𑀧𑀬𑁄𑀕𑀁 𑀤𑀺𑀲𑁆𑀯𑀸 𑀅𑀜𑁆𑀜𑀣𑀸 𑀕𑀳𑁂𑀢𑁆𑀯𑀸 ‘‘𑀯𑀻𑀢𑀺𑀓𑁆𑀓𑀫𑀦𑀁 𑀦𑀼 𑀔𑁄𑀬𑀫𑀓𑀸𑀲𑀻’’𑀢𑀺 𑀕𑀳𑀡𑀁 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫. 𑀓𑀼𑀝𑁆𑀝𑀢𑀺𑀭𑁄𑀳𑀺𑀢𑁂 𑀪𑀺𑀓𑁆𑀔𑀼𑀫𑁆𑀳𑀺 𑀫𑀸𑀢𑀼𑀕𑀸𑀫𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑀢𑁆𑀣 𑀅𑀜𑁆𑀜𑀲𑁆𑀲 𑀯𑀺𑀜𑁆𑀜𑀼𑀧𑀼𑀭𑀺𑀲𑀲𑁆𑀲 𑀲𑀩𑁆𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸 ‘‘𑀯𑀻𑀢𑀺𑀓𑁆𑀓𑀫𑀦𑀁 𑀦𑀼 𑀔𑁄𑀬𑀫𑀓𑀸𑀲𑀻’’𑀢𑀺 𑀏𑀯𑀁 𑀕𑀳𑀡𑀁 𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫. 𑀯𑀺𑀳𑀸𑀭𑀧𑀭𑀺𑀬𑀦𑁆𑀢𑁂 𑀢𑀭𑀼𑀡𑀫𑀸𑀢𑀼𑀕𑀸𑀫𑀧𑀼𑀭𑀺𑀲𑀸𑀦𑀁 𑀤𑀺𑀯𑀲𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀕𑀢𑀝𑁆𑀞𑀸𑀦𑁂 𑀯𑀺𑀧𑁆𑀧𑀓𑀺𑀡𑁆𑀡𑀧𑀼𑀧𑁆𑀨𑀸𑀦𑀺 𑀑𑀮𑁄𑀓𑁂𑀢𑁆𑀯𑀸, 𑀫𑀁𑀲𑀲𑀼𑀭𑀕𑀦𑁆𑀥𑀜𑁆𑀘 𑀖𑀸𑀬𑀺𑀢𑁆𑀯𑀸 ‘‘𑀇𑀤𑀁 𑀓𑀲𑁆𑀲 𑀓𑀫𑁆𑀫’’𑀦𑁆𑀢𑀺 𑀉𑀧𑀧𑀭𑀺𑀓𑁆𑀔𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑁄 𑀘𑁂𑀢𑀺𑀬𑀧𑀽𑀚𑀺𑀢𑀫𑀸𑀮𑀸𑀕𑀦𑁆𑀥𑀲𑁆𑀲 𑀧𑀻𑀢𑀸𑀭𑀺𑀝𑁆𑀞𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀭𑀻𑀭𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 ‘‘𑀢𑀁 𑀏𑀢𑀲𑁆𑀲 𑀓𑀫𑁆𑀫𑀁 𑀦𑀼 𑀔𑁄’’𑀢𑀺 𑀓𑀺𑀭𑀺𑀬𑀫𑀸𑀦𑀲𑀁𑀲𑀬𑁄 𑀫𑀼𑀢𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫. 𑀏𑀯𑀭𑀽𑀧𑀲𑁆𑀲 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀫𑀽𑀮𑀓𑀲𑁆𑀲 𑀅𑀪𑀸𑀯𑀢𑁄 𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦𑀸𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁮𑁫-𑁩𑁮𑁬) 𑀯𑀼𑀢𑁆𑀢𑀦𑀬𑁂𑀦 𑀤𑀝𑁆𑀞𑀩𑁆𑀩𑁄.

𑀘𑁄𑀤𑁂𑀢𑀻𑀢𑀺 ‘‘𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑁄𑀲𑀻’’𑀢𑀺𑀆𑀤𑀺𑀯𑀘𑀦𑁂𑀦 𑀲𑀬𑀁 𑀘𑁄𑀤𑁂𑀢𑀺. 𑀘𑁄𑀤𑀸𑀧𑀦𑀁 𑀧𑀦 𑀯𑀓𑁆𑀔𑀢𑀺. 𑀘𑀸𑀯𑀦𑀘𑁂𑀢𑀦𑁄 𑀳𑀼𑀢𑁆𑀯𑀸𑀢𑀺 ‘‘𑀅𑀧𑁆𑀧𑁂𑀯 𑀦𑀸𑀫 𑀦𑀁 𑀇𑀫𑀫𑁆𑀳𑀸 𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸𑀯𑁂𑀬𑁆𑀬’’𑀦𑁆𑀢𑀺 𑀉𑀧𑁆𑀧𑀦𑁆𑀦𑁂𑀦 𑀧𑀭𑀁 𑀲𑀸𑀲𑀦𑀸 𑀘𑀸𑀯𑁂𑀢𑀼𑀓𑀸𑀫𑁂𑀦 𑀘𑀺𑀢𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸. ‘‘𑀲𑀼𑀤𑁆𑀥𑀁 𑀯𑀸 𑀅𑀲𑀼𑀤𑁆𑀥𑀁 𑀯𑀸’’𑀢𑀺 𑀇𑀤𑀁 ‘‘𑀘𑁄𑀤𑁂𑀢𑀻’’𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀘𑁄𑀤𑀦𑀸𑀓𑀺𑀭𑀺𑀬𑀸𑀬 𑀓𑀫𑁆𑀫𑀦𑀺𑀤𑁆𑀤𑁂𑀲𑁄, ‘‘𑀅𑀜𑁆𑀜𑀁 𑀪𑀺𑀓𑁆𑀔𑀼’’𑀦𑁆𑀢𑀺 𑀲𑁂𑀲𑁄, 𑀧𑀸𑀭𑀸𑀚𑀺𑀓𑀫𑀦𑀸𑀧𑀦𑁆𑀦𑀁 𑀯𑀸 𑀆𑀧𑀦𑁆𑀦𑀁 𑀯𑀸 𑀅𑀜𑁆𑀜𑀁 𑀪𑀺𑀓𑁆𑀔𑀼𑀦𑁆𑀢𑀺 𑀅𑀢𑁆𑀣𑁄. 𑀬𑁄𑀢𑀺 𑀫𑀸𑀢𑀺𑀓𑀸𑀕𑀢𑀪𑀺𑀓𑁆𑀔𑀼, ‘‘𑀤𑀼𑀝𑁆𑀞𑁄 𑀤𑁄𑀲𑁄 𑀅𑀧𑁆𑀧𑀢𑀻𑀢𑁄’’𑀢𑀺 𑀇𑀤𑀁 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁, 𑀉𑀧𑁆𑀧𑀦𑁆𑀦𑁂𑀦 𑀤𑁄𑀲𑀮𑁂𑀲𑁂𑀦 𑀲𑀬𑀁 𑀤𑀽𑀲𑀺𑀢𑁄, 𑀧𑀭𑀜𑁆𑀘 𑀤𑀽𑀲𑁂𑀦𑁆𑀢𑁄 𑀧𑀻𑀢𑀺𑀲𑀼𑀔𑀸𑀤𑀻𑀳𑀺 𑀅𑀧𑀕𑀢𑁄 𑀬𑁄 𑀪𑀺𑀓𑁆𑀔𑀽𑀢𑀺 𑀅𑀢𑁆𑀣𑁄. 𑀯𑀓𑁆𑀔𑀫𑀸𑀦𑁂𑀦 ‘‘𑀢𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄.

‘‘𑀓𑀢𑁂 𑀑𑀓𑀸𑀲𑀫𑁆𑀳𑀻’’𑀢𑀺 𑀧𑀤𑀘𑁆𑀙𑁂𑀤𑁄, 𑀑𑀓𑀸𑀲𑀁 ‘‘𑀓𑀸𑀭𑀸𑀧𑁂𑀢𑁆𑀯𑀸’’𑀢𑀺 (𑀧𑀸𑀭𑀸. 𑁩𑁮𑁯) 𑀧𑀸𑀞𑀢𑁄 𑀅𑀦𑁆𑀢𑁄𑀦𑀻𑀢𑀳𑁂𑀢𑁆𑀯𑀢𑁆𑀣𑀢𑀸𑀬 ‘‘𑀓𑀢𑁂’’𑀢𑀺 ‘‘𑀓𑀸𑀭𑀺𑀢𑁂’’𑀢𑀺 𑀏𑀢𑀲𑁆𑀲 𑀧𑀭𑀺𑀬𑀸𑀬𑁄 𑀳𑁄𑀢𑀺, ‘‘𑀑𑀓𑀸𑀲𑀁 𑀫𑁂 𑀓𑀭𑁄𑀳𑀺, 𑀅𑀳𑀁 𑀢𑀁 𑀯𑀢𑁆𑀢𑀼𑀓𑀸𑀫𑁄’’𑀢𑀺 𑀑𑀓𑀸𑀲𑁂 𑀓𑀸𑀭𑀸𑀧𑀺𑀢𑁂𑀢𑀺 𑀅𑀢𑁆𑀣𑁄. ‘‘𑀅𑀓𑀢𑁂 𑀑𑀓𑀸𑀲𑁂’’𑀢𑀺 𑀧𑀤𑀘𑁆𑀙𑁂𑀤𑁄, 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄𑀬𑁂𑀯𑀢𑁆𑀣𑁄. 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑀸 𑀲𑀳𑀸𑀢𑀺 𑀑𑀓𑀸𑀲𑀲𑁆𑀲 𑀅𑀓𑀸𑀭𑀸𑀧𑀺𑀢𑀢𑁆𑀢𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑀸 𑀲𑀤𑁆𑀥𑀺𑀁.

𑁪𑁦𑁪-𑁫. 𑀓𑁄𑀡𑁆𑀞𑁄𑀲𑀻𑀢𑀺 𑀥𑀼𑀢𑁆𑀢𑁄𑀲𑀺. 𑀚𑁂𑀝𑁆𑀞𑀩𑁆𑀩𑀢𑀺𑀓𑁄𑀲𑀻𑀢𑀺 𑀓𑀸𑀮𑀻𑀤𑁂𑀯𑀻𑀯𑀢𑀦𑀺𑀬𑀼𑀢𑁆𑀢𑁄𑀲𑀺. 𑀓𑀸𑀮𑀻𑀤𑁂𑀯𑀻 𑀓𑀺𑀭 𑀲𑀺𑀭𑀺𑀤𑁂𑀯𑀺𑀬𑀸 𑀚𑁂𑀝𑁆𑀞𑀸, 𑀢𑀲𑁆𑀫𑀸 𑀢𑀲𑁆𑀲𑀸 𑀯𑀢𑀥𑀭𑁄 𑀚𑁂𑀝𑁆𑀞𑀩𑁆𑀩𑀢𑀺𑀓𑁄 𑀯𑀼𑀘𑁆𑀘𑀢𑀺. 𑀢𑀁 𑀧𑀦 𑀯𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀧𑀽𑀭𑁂𑀦𑁆𑀢𑁄 𑀲𑀓𑀮𑀲𑀭𑀻𑀭𑁂 𑀫𑀲𑀺𑀁 𑀫𑀓𑁆𑀔𑁂𑀢𑁆𑀯𑀸 𑀓𑀸𑀓𑀧𑀢𑁆𑀢𑀸𑀦𑀺 𑀫𑀼𑀝𑁆𑀞𑀺𑀬𑀁 𑀓𑀢𑁆𑀯𑀸 𑀓𑀸𑀮𑀻𑀤𑁂𑀯𑀺𑀁 𑀨𑀮𑀓𑁂 𑀮𑀺𑀔𑀸𑀧𑁂𑀢𑁆𑀯𑀸 𑀢𑀁 𑀓𑀸𑀚𑀓𑁄𑀝𑀺𑀬𑀁 𑀩𑀦𑁆𑀥𑀺𑀢𑁆𑀯𑀸 𑀉𑀘𑁆𑀙𑀺𑀝𑁆𑀞𑁄𑀤𑀓𑀸𑀤𑀺𑀅𑀲𑀼𑀘𑀺𑀲𑀦𑁆𑀦𑀺𑀘𑀺𑀢𑀑𑀮𑀺𑀕𑀮𑁆𑀮𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀤𑀼𑀲𑁆𑀲𑀻𑀮𑁄𑀲𑀺 𑀦𑀺𑀲𑁆𑀲𑀻𑀮𑁄𑀲𑀺 𑀲𑀻𑀮𑀯𑀺𑀭𑀳𑀺𑀢𑁄𑀲𑀻’’𑀢𑀺 𑀣𑁄𑀫𑁂𑀦𑁆𑀢𑁄 𑀯𑀺𑀘𑀭𑀢𑀻𑀢𑀺.

𑀤𑀼𑀲𑁆𑀲𑀻𑀮𑀢𑁆𑀢𑀸 𑀏𑀯 𑀳𑀻𑀦𑀚𑁆𑀛𑀸𑀲𑀬𑀢𑀸𑀬 𑀧𑀸𑀧𑀥𑀫𑁆𑀫𑁄 𑀮𑀸𑀫𑀓𑀲𑀪𑀸𑀯𑁄𑀲𑀺. 𑀧𑀽𑀢𑀺𑀦𑀸 𑀓𑀫𑁆𑀫𑁂𑀦 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑁆𑀢𑁄 𑀧𑀯𑀺𑀝𑁆𑀞𑀢𑁆𑀢𑀸 𑀅𑀦𑁆𑀢𑁄𑀧𑀽𑀢𑀺. 𑀙𑀳𑀺 𑀤𑁆𑀯𑀸𑀭𑁂𑀳𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀦𑀼𑀲𑁆𑀲𑀯𑀦𑁂𑀦 𑀢𑀺𑀦𑁆𑀢𑀢𑁆𑀢𑀸 𑀅𑀯𑀲𑁆𑀲𑀼𑀢𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀕𑀭𑀼𑀓𑀁 𑀦𑀺𑀤𑁆𑀤𑀺𑀲𑁂𑀢𑀺 𑀏𑀢𑁆𑀣 ‘‘𑀓𑀢𑁄𑀓𑀸𑀲𑀫𑁆𑀳𑀻’’𑀢𑀺 𑀘 ‘‘𑀢𑀣𑁂𑀯 𑀅𑀓𑀢𑁄𑀓𑀸𑀲𑁂, 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑀸 𑀲𑀳𑀸’’𑀢𑀺 𑀘 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀏𑀯𑀫𑀼𑀢𑁆𑀢𑀭𑀢𑁆𑀭𑀸𑀧𑀺.

𑁪𑁦𑁬. 𑀲𑀫𑁆𑀫𑀼𑀔𑀸𑀢𑀺 𑀘𑀼𑀤𑀺𑀢𑀓𑀲𑁆𑀲 𑀲𑀫𑁆𑀫𑀼𑀔𑀸, 𑀅𑀯𑀺𑀤𑀽𑀭𑁂𑀢𑀺 𑀅𑀢𑁆𑀣𑁄. 𑀳𑀢𑁆𑀣𑀫𑀼𑀤𑁆𑀤𑀸𑀬𑀸𑀢𑀺 𑀫𑀼𑀢𑁆𑀢𑀧𑀸𑀡𑀸𑀤𑀺𑀯𑀲𑁂𑀦. 𑀢𑀁 𑀳𑀢𑁆𑀣𑀫𑀼𑀤𑁆𑀤𑀸𑀬 𑀓𑀣𑀺𑀢𑀁. 𑀧𑀭𑁄𑀢𑀺 𑀬𑀁 𑀘𑁄𑀤𑁂𑀲𑀺, 𑀲𑁄 𑀘𑀼𑀤𑀺𑀢𑀓𑁄 𑀧𑀭𑁄. 𑀪𑀺𑀓𑁆𑀔𑀼𑀦𑁄𑀢𑀺 𑀘𑁄𑀤𑀓𑀲𑁆𑀲 𑀪𑀺𑀓𑁆𑀔𑀼𑀦𑁄.

𑁪𑁦𑁭. 𑀲𑀫𑁆𑀫𑀼𑀔𑁂 𑀞𑀢𑁆𑀯𑀸𑀢𑀺 𑀘𑀼𑀤𑀺𑀢𑀓𑀲𑁆𑀲 𑀆𑀲𑀦𑁆𑀦𑁂 𑀞𑀢𑁆𑀯𑀸. ‘‘𑀘𑁄𑀤𑀸𑀧𑁂𑀦𑁆𑀢𑀲𑁆𑀲𑀸’’𑀢𑀺 𑀏𑀢𑀲𑁆𑀲 𑀓𑀫𑁆𑀫𑀪𑀸𑀯𑀢𑁄 𑀧𑀭𑁄𑀢𑀺 𑀇𑀤𑀁 𑀉𑀧𑀬𑁄𑀕𑀦𑁆𑀢𑀯𑀲𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀏𑀯𑀫𑀼𑀢𑁆𑀢𑀭𑀢𑁆𑀭. 𑀓𑁂𑀦𑀘𑀻𑀢𑀺 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀧𑀼𑀕𑁆𑀕𑀮𑁂𑀦. 𑀢𑀲𑁆𑀲 𑀘𑁄𑀤𑀓𑀲𑁆𑀲. ‘‘𑀘𑁄𑀤𑀸𑀧𑁂𑀦𑁆𑀢𑀲𑁆𑀲𑀸’’𑀢𑀺 𑀧𑀼𑀦 𑀯𑀘𑀦𑀁 𑀦𑀺𑀬𑀫𑀢𑁆𑀣𑀁.

𑁪𑁦𑁮. 𑀲𑁄𑀧𑀻𑀢𑀺 𑀉𑀕𑁆𑀕𑀳𑀸𑀧𑀺𑀢𑀢𑁆𑀢𑀸 𑀘𑁄𑀤𑀦𑀁 𑀓𑀭𑁄𑀦𑁆𑀢𑁄 𑀇𑀢𑀭𑁄 𑀧𑀬𑁄𑀚𑁆𑀚𑀓𑀧𑀼𑀕𑁆𑀕𑀮𑁄𑀧𑀺. 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀻𑀢𑀺 𑀧𑀬𑁄𑀚𑀓𑀧𑀬𑁄𑀚𑁆𑀚𑀓𑀸𑀦𑀁 𑀤𑁆𑀯𑀺𑀦𑁆𑀦𑀫𑁆𑀧𑀺.

𑁪𑁦𑁯. 𑀯𑀼𑀢𑁆𑀢𑀝𑁆𑀞𑀸𑀦𑀁 𑀧𑀡𑁆𑀡𑀁 𑀯𑀸 𑀲𑀦𑁆𑀤𑁂𑀲𑀁 𑀯𑀸 𑀳𑀭𑀦𑁆𑀢𑁄 𑀤𑀽𑀢𑁄 𑀦𑀸𑀫, 𑀲𑁄 ‘‘𑀧𑀡𑁆𑀡𑀁 𑀯𑀸 𑀲𑀸𑀲𑀦𑀁 𑀯𑀸 𑀧𑁂𑀲𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀲𑀗𑁆𑀕𑀬𑁆𑀳𑀢𑀻𑀢𑀺 𑀢𑀲𑁆𑀫𑀺𑀁 𑀯𑀺𑀲𑀼𑀁 𑀅𑀯𑀢𑁆𑀢𑀩𑁆𑀩𑁂𑀧𑀺 ‘‘𑀤𑀼𑀢’’𑀦𑁆𑀢𑀺 𑀯𑀘𑀦𑁂𑀦 𑀦𑀺𑀲𑁆𑀲𑀝𑁆𑀞𑀤𑀽𑀢𑀫𑀸𑀳. 𑀧𑀡𑁆𑀡𑀁 𑀯𑀸 𑀅𑀤𑀢𑁆𑀯𑀸 ‘‘𑀏𑀯𑀜𑁆𑀘 𑀏𑀯𑀜𑁆𑀘 𑀯𑀤𑀸’’𑀢𑀺 𑀲𑀸𑀲𑀦𑀜𑁆𑀘 𑀅𑀤𑀢𑁆𑀯𑀸 ‘‘𑀢𑀁 𑀘𑁄𑀤𑁂𑀳𑀻’’𑀢𑀺 𑀅𑀢𑁆𑀣𑀫𑀢𑁆𑀢𑀫𑁂𑀯 𑀤𑀢𑁆𑀯𑀸 𑀦𑀺𑀲𑁆𑀲𑀝𑁆𑀞𑁄 𑀪𑀺𑀓𑁆𑀔𑀼 𑀇𑀥 ‘‘𑀦𑀺𑀲𑁆𑀲𑀝𑁆𑀞𑀤𑀽𑀢𑁄’’𑀢𑀺 𑀕𑀳𑁂𑀢𑀩𑁆𑀩𑁄.

𑀅𑀣 𑀯𑀸 ‘‘𑀤𑀽𑀢’’𑀦𑁆𑀢𑀺 𑀇𑀫𑀺𑀦𑀸 𑀘𑁄𑀤𑁂𑀢𑀼𑀁 𑀉𑀕𑁆𑀕𑀳𑀸𑀧𑁂𑀢𑁆𑀯𑀸, 𑀢𑀫𑀦𑀼𑀕𑁆𑀕𑀳𑀸𑀧𑁂𑀢𑁆𑀯𑀸 𑀯𑀸 𑀦𑀺𑀲𑁆𑀲𑀝𑁆𑀞𑁄 𑀪𑀺𑀓𑁆𑀔𑀼 𑀤𑀽𑀢𑁄𑀬𑁂𑀯 𑀕𑀳𑁂𑀢𑀩𑁆𑀩𑁄. ‘‘𑀧𑀡𑁆𑀡’’𑀦𑁆𑀢𑀺 𑀇𑀫𑀺𑀦𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀅𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀓𑀲𑁆𑀲𑀘𑀺 𑀳𑀢𑁆𑀣𑁂 𑀘𑁄𑀤𑀦𑀁 𑀮𑀺𑀔𑀺𑀢𑁆𑀯𑀸 𑀤𑀺𑀦𑁆𑀦𑀧𑀡𑁆𑀡𑀁 𑀕𑀳𑁂𑀢𑀩𑁆𑀩𑀁. 𑀲𑀸𑀲𑀦𑀦𑁆𑀢𑀺 ‘‘𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀢𑁆𑀯𑀸 𑀧𑁂𑀲𑀺𑀬𑀫𑀸𑀦𑀁 𑀲𑀸𑀲𑀦𑀁 𑀕𑀳𑁂𑀢𑀩𑁆𑀩𑀁. 𑀇𑀤𑀁 𑀢𑀬𑀫𑁆𑀧𑀺 𑀤𑀽𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀜𑁂𑀳𑀺 𑀓𑀸𑀭𑀸𑀧𑀦𑀢𑁄 ‘‘𑀘𑁄𑀤𑀸𑀧𑁂𑀦𑁆𑀢𑀲𑁆𑀲𑀸’’𑀢𑀺 𑀆𑀳. ‘‘𑀧𑀭’’𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀏𑀢𑁆𑀣 𑀑𑀓𑀸𑀲𑀓𑀸𑀭𑀸𑀧𑀦𑀁 𑀦𑀢𑁆𑀣𑀺.

𑁪𑁧𑁦. 𑀢𑀣𑀸𑀢𑀺 𑀬𑀣𑀸 𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀲𑀫𑁆𑀫𑀼𑀔𑀸 𑀑𑀓𑀸𑀲𑁂 𑀓𑀸𑀭𑀺𑀢𑁂, 𑀅𑀓𑀸𑀭𑀺𑀢𑁂 𑀘, 𑀢𑀣𑀸 𑀅𑀫𑀽𑀮𑀓𑁂𑀳𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀯𑀼𑀢𑁆𑀢𑁂 𑀲𑀫𑁆𑀫𑀼𑀔𑀸 𑀧𑀭𑁂’’𑀢𑀺 𑀪𑀼𑀫𑁆𑀫𑀯𑀲𑁂𑀦 𑀅𑀥𑀺𑀓𑀢𑁂𑀦 𑀬𑁄𑀚𑁂𑀢𑀩𑁆𑀩𑀁, 𑀘𑁄𑀤𑁂𑀢𑀺 𑀘𑁄𑀤𑀸𑀧𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺. 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀻𑀢𑀺 𑀑𑀓𑀸𑀲𑁂 𑀓𑀸𑀭𑀺𑀢𑁂 𑀓𑁂𑀯𑀮𑀸, 𑀅𑀓𑀸𑀭𑀺𑀢𑁂 𑀤𑀼𑀓𑁆𑀓𑀝𑁂𑀦 𑀲𑀳𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀲𑀫𑁆𑀫𑀼𑀔𑀸 𑀲𑁂𑀲𑀸𑀧𑀢𑁆𑀢𑀻𑀳𑀺 𑀧𑀭𑁂 𑀯𑀼𑀢𑁆𑀢𑁂 𑀘𑀸𑀯𑀦𑀲𑀜𑁆𑀜𑀺𑀦𑁄 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀑𑀓𑀸𑀲𑀸𑀓𑀸𑀭𑀸𑀧𑀦𑁂𑀦𑀧𑀺 𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀺.

𑁪𑁧𑁧. 𑀅𑀓𑁆𑀓𑁄𑀲𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀢𑀺 𑀔𑀼𑀁𑀲𑀦𑀸𑀥𑀺𑀧𑁆𑀧𑀸𑀬𑀲𑁆𑀲. 𑀅𑀓𑀢𑁄𑀓𑀸𑀲𑀦𑁆𑀢𑀺 𑀅𑀓𑀸𑀭𑀺𑀢𑁄𑀓𑀸𑀲𑀁, ‘‘𑀧𑀭’’𑀦𑁆𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀅𑀢𑁆𑀢𑀦𑀸𑀢𑀺 𑀘𑁄𑀤𑀓𑁂𑀦, ‘‘𑀲𑀬𑀁 𑀅𑀓𑀸𑀭𑀺𑀢𑁄𑀓𑀸𑀲’’𑀦𑁆𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀲𑀳 𑀧𑀸𑀘𑀺𑀢𑁆𑀢𑀺𑀬𑁂𑀦𑀸𑀢𑀺 ‘‘𑀑𑀫𑀲𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀭𑀸. 𑁧𑁪) 𑀯𑀼𑀢𑁆𑀢𑀧𑀸𑀘𑀺𑀢𑁆𑀢𑀺𑀬𑁂𑀦 𑀲𑀳. 𑀯𑀤𑀦𑁆𑀢𑀲𑁆𑀲𑀸𑀢𑀺 𑀘𑁄𑀤𑁂𑀦𑁆𑀢𑀲𑁆𑀲 𑀯𑀸 𑀘𑁄𑀤𑀸𑀧𑁂𑀦𑁆𑀢𑀲𑁆𑀲 𑀯𑀸, 𑀏𑀢𑁆𑀣 ‘‘𑀲𑀫𑁆𑀫𑀼𑀔𑀸’’𑀢𑀺 𑀇𑀤𑀁 𑀯𑀓𑁆𑀔𑀫𑀸𑀦𑀲𑁆𑀲 ‘‘𑀅𑀲𑀫𑁆𑀫𑀼𑀔𑀸’’𑀢𑀺 𑀏𑀢𑀲𑁆𑀲 𑀯𑀺𑀧𑀭𑀺𑀬𑀸𑀬𑀢𑁄 𑀮𑀩𑁆𑀪𑀢𑀺, 𑀘-𑀓𑀸𑀭𑁂𑀦 𑀓𑀸𑀭𑀺𑀢𑁄𑀓𑀸𑀲𑀧𑀓𑁆𑀔𑁂 𑀤𑀼𑀓𑁆𑀓𑀝𑁂𑀦 𑀧𑀸𑀘𑀺𑀢𑁆𑀢𑀺𑀬𑀲𑀫𑁆𑀩𑀦𑁆𑀥𑀻.

𑁪𑁧𑁨. 𑀅𑀲𑀫𑁆𑀫𑀼𑀔𑀸 𑀯𑀤𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀅𑀓𑁆𑀓𑁄𑀲𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. ‘‘𑀅𑀓𑀢𑁄𑀓𑀸𑀲𑀫𑀢𑁆𑀢𑀦𑀸’’𑀢𑀺 𑀦𑀸𑀦𑀼𑀯𑀢𑁆𑀢𑀢𑀺. 𑀲𑀢𑁆𑀢𑀳𑀺 𑀆𑀧𑀢𑁆𑀢𑀻𑀳𑀻𑀢𑀺 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀣𑀼𑀮𑁆𑀮𑀘𑁆𑀘𑀬𑀧𑀸𑀘𑀺𑀢𑁆𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀲𑀗𑁆𑀔𑀸𑀢𑁂𑀲𑀼 𑀲𑀢𑁆𑀢𑀲𑀼 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀲𑀼 𑀬𑁂𑀦 𑀓𑁂𑀦𑀘𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀅𑀲𑀫𑁆𑀫𑀼𑀔𑀸’’𑀢𑀺 𑀇𑀤𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀫𑁆𑀫𑀦𑁆𑀢𑀺 𑀢𑀚𑁆𑀚𑀦𑀻𑀬𑀸𑀤𑀺𑀲𑀢𑁆𑀢𑀯𑀺𑀥𑀁 𑀓𑀫𑁆𑀫𑀁.

𑁪𑁧𑁩. 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀅𑀦𑀸𑀧𑀢𑁆𑀢𑀺 𑀲𑀼𑀤𑁆𑀥𑁂 𑀅𑀲𑀼𑀤𑁆𑀥𑀤𑀺𑀝𑁆𑀞𑀺𑀲𑁆𑀲 𑀅𑀲𑀼𑀤𑁆𑀥𑁂 𑀅𑀲𑀼𑀤𑁆𑀥𑀤𑀺𑀝𑁆𑀞𑀺𑀲𑁆𑀲 𑀉𑀫𑁆𑀫𑀢𑁆𑀢𑀓𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁯𑁦) 𑀯𑀼𑀢𑁆𑀢𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀜𑁆𑀘𑀗𑁆𑀕𑀲𑀁𑀬𑀼𑀢𑀦𑁆𑀢𑀺 𑀬𑀁 𑀘𑁄𑀤𑁂𑀢𑀺, 𑀢𑀲𑁆𑀲 ‘‘𑀉𑀧𑀲𑀫𑁆𑀧𑀦𑁆𑀦𑁄’’𑀢𑀺 𑀲𑀗𑁆𑀔𑁆𑀬𑀽𑀧𑀕𑀫𑀦𑀁, 𑀢𑀲𑁆𑀫𑀺𑀁 𑀲𑀼𑀤𑁆𑀥𑀲𑀜𑁆𑀜𑀺𑀢𑀸, 𑀬𑁂𑀦 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑁂𑀢𑀺, 𑀢𑀲𑁆𑀲 𑀤𑀺𑀝𑁆𑀞𑀸𑀤𑀺𑀯𑀲𑁂𑀦 𑀅𑀫𑀽𑀮𑀓𑀢𑀸, 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁂𑀦 𑀲𑀫𑁆𑀫𑀼𑀔𑀸 𑀘𑁄𑀤𑀦𑀸, 𑀢𑀲𑁆𑀲 𑀢𑀗𑁆𑀔𑀡𑀯𑀺𑀚𑀸𑀦𑀦𑀦𑁆𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀬𑀼𑀢𑁆𑀢𑀁 𑀳𑁄𑀢𑀺.

𑁪𑁧𑁫. 𑀇𑀤𑀦𑁆𑀢𑀺 ‘‘𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀲𑁂𑀲𑁄, ‘‘𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀘 𑀇𑀫𑀺𑀦𑀸 𑀢𑀧𑁆𑀧𑀝𑀺𑀧𑀸𑀤𑀦𑀻𑀬𑀸 𑀆𑀧𑀢𑁆𑀢𑀺𑀬𑁂𑀯 𑀕𑀬𑁆𑀳𑀢𑀺. 𑀢𑀺𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀓𑀸𑀬𑀘𑀺𑀢𑁆𑀢𑀢𑁄, 𑀯𑀸𑀘𑀸𑀘𑀺𑀢𑁆𑀢𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄𑀢𑀺 𑀲𑀘𑀺𑀢𑁆𑀢𑀓𑁂𑀳𑀺 𑀢𑀻𑀳𑀺 𑀲𑀫𑀼𑀝𑁆𑀞𑀸𑀦𑀢𑁄 𑀢𑀺𑀲𑀫𑀼𑀝𑁆𑀞𑀸𑀦𑀁. 𑀢𑁂𑀦𑁂𑀯𑀸𑀳 ‘‘𑀲𑀘𑀺𑀢𑁆𑀢’’𑀦𑁆𑀢𑀺. 𑀧𑀝𑀺𑀖𑀘𑀺𑀢𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀜𑁆𑀜𑀢𑀭𑁂𑀦 𑀲𑀳𑀺𑀢𑀢𑁆𑀢𑀸 𑀲𑀘𑀺𑀢𑁆𑀢𑀓𑀁. 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀬 𑀤𑁄𑀫𑀦𑀲𑁆𑀲𑀯𑁂𑀤𑀦𑀸𑀬 𑀯𑀲𑁂𑀦 𑀤𑀼𑀓𑁆𑀔𑀯𑁂𑀤𑀦𑀁.

𑀤𑀼𑀝𑁆𑀞𑀤𑁄𑀲𑀓𑀣𑀸𑀯𑀡𑁆𑀡𑀦𑀸.

𑁪𑁧𑁬. 𑀮𑁂𑀲𑀫𑀢𑁆𑀢𑀦𑁆𑀢𑀺 ‘‘𑀅𑀜𑁆𑀜𑀫𑁆𑀧𑀺 𑀯𑀢𑁆𑀣𑀼𑀁 𑀮𑀺𑀲𑁆𑀲𑀢𑀺 𑀲𑀺𑀮𑀺𑀲𑁆𑀲𑀢𑀺 𑀯𑁄𑀳𑀸𑀭𑀫𑀢𑁆𑀢𑁂𑀦𑁂𑀯 𑀈𑀲𑀓𑀁 𑀅𑀮𑁆𑀮𑀻𑀬𑀢𑀻𑀢𑀺 𑀮𑁂𑀲𑁄, 𑀚𑀸𑀢𑀺𑀆𑀤𑀻𑀦𑀁𑀬𑁂𑀯 𑀅𑀜𑁆𑀜𑀢𑀭𑀓𑁄𑀝𑁆𑀞𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁯𑁧) 𑀅𑀝𑁆𑀞𑀓𑀣𑀸𑀬 𑀤𑀲𑁆𑀲𑀺𑀢𑀦𑀺𑀩𑁆𑀩𑀘𑀦𑁂𑀲𑀼 ‘‘𑀮𑁂𑀲𑁄 𑀦𑀸𑀫 𑀤𑀲 𑀮𑁂𑀲𑀸 𑀚𑀸𑀢𑀺𑀮𑁂𑀲𑁄 𑀦𑀸𑀫𑀮𑁂𑀲𑁄’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑀅𑀝𑁆𑀞. 𑁩𑁯𑁪) 𑀦𑀬𑁂𑀦 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑁂𑀲𑀼 𑀚𑀸𑀢𑀺𑀦𑀸𑀫𑀕𑁄𑀢𑁆𑀢𑀸𑀤𑀻𑀲𑀼 𑀤𑀲𑀲𑀼 𑀮𑁂𑀲𑁂𑀲𑀼 𑀅𑀜𑁆𑀜𑀢𑀭𑀮𑁂𑀲𑀫𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.