𑀧𑀸𑀭𑀸𑀚𑀺𑀓𑀓𑀣𑀸

𑀧𑀞𑀫𑀧𑀸𑀭𑀸𑀚𑀺𑀓𑀓𑀣𑀸𑀯𑀡𑁆𑀡𑀦𑀸

𑁬. 𑀏𑀯𑀁 𑀧𑀜𑁆𑀘𑀳𑀺 𑀕𑀸𑀣𑀸𑀳𑀺 𑀭𑀢𑀦𑀢𑁆𑀢𑀬𑀧𑀡𑀸𑀫𑀸𑀤𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀣𑀸𑀧𑀝𑀺𑀜𑁆𑀜𑀸𑀢𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑀺𑀯𑀺𑀥𑁂’’𑀢𑀺𑀆𑀤𑀺. 𑀢𑀢𑁆𑀣 ‘‘𑀢𑀺𑀯𑀺𑀥𑁂’’𑀢𑀺𑀆𑀤𑀺𑀦𑀸 𑀧𑀞𑀫𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀺. 𑀢𑀺𑀯𑀺𑀥𑁂𑀢𑀺 𑀯𑀘𑁆𑀘𑀧𑀲𑁆𑀲𑀸𑀯𑀫𑀼𑀔𑀫𑀕𑁆𑀕𑀸𑀦𑀁 𑀯𑀲𑁂𑀦 𑀢𑀺𑀧𑁆𑀧𑀓𑀸𑀭𑁂 𑀫𑀕𑁆𑀕𑁂𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀢𑀺𑀮𑀫𑀢𑁆𑀢𑀫𑁆𑀧𑀻𑀢𑀺 𑀢𑀺𑀮𑀩𑀻𑀚𑀫𑀢𑁆𑀢𑀫𑁆𑀧𑀺 𑀅𑀗𑁆𑀕𑀚𑀸𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀕𑁆𑀕𑁂𑀢𑀺 𑀯𑀘𑁆𑀘𑀧𑀲𑁆𑀲𑀸𑀯𑀸𑀦𑀁 𑀦𑀺𑀓𑁆𑀔𑀫𑀦𑀤𑁆𑀯𑀸𑀭𑀢𑀸𑀬, 𑀅𑀦𑁆𑀦𑀧𑀸𑀦𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀻𑀦𑀁 𑀧𑀯𑁂𑀲𑀦𑀦𑀺𑀓𑁆𑀔𑀫𑀦𑀤𑁆𑀯𑀸𑀭𑀢𑀸𑀬 𑀘 𑀫𑀕𑁆𑀕𑀯𑁄𑀳𑀸𑀭𑀕𑀢𑁂 𑀲𑀭𑀻𑀭𑀧𑁆𑀧𑀤𑁂𑀲𑁂, 𑀅𑀮𑁆𑀮𑁄𑀓𑀸𑀲𑁂𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀫𑀕𑁆𑀕𑁂𑀲𑀼 𑀢𑀺𑀮𑀫𑀢𑁆𑀢𑀫𑁆𑀧𑀺, 𑀢𑀻𑀲𑀼 𑀲𑁂𑀯𑀦𑀘𑁂𑀢𑀦𑁄’’𑀢𑀺 𑀯𑀢𑁆𑀢𑀩𑁆𑀩𑁂𑀧𑀺 ‘‘𑀢𑀺𑀯𑀺𑀥𑁂’’𑀢𑀺 𑀧𑀓𑀸𑀭𑀯𑀸𑀘𑀺𑀯𑀺𑀥𑀲𑀤𑁆𑀤𑁄𑀧𑀸𑀤𑀸𑀦𑁂𑀦 𑀲𑀚𑀸𑀢𑀺𑀲𑀗𑁆𑀕𑀳𑀯𑀲𑁂𑀦 𑀢𑀻𑀳𑀺 𑀭𑀸𑀲𑀻𑀳𑀺 𑀲𑀗𑁆𑀕𑀳𑁂𑀢𑁆𑀯𑀸 𑀧𑀪𑁂𑀤𑀯𑀲𑁂𑀦 𑀢𑀺𑀁𑀲𑀯𑀺𑀥𑁄 𑀫𑀕𑁆𑀕𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺.

𑀲𑁂𑀬𑁆𑀬𑀣𑀺𑀤𑀁? 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑀫𑀼𑀔𑀸𑀤𑀺𑀫𑀕𑁆𑀕𑀸𑀦𑀁 𑀦𑀺𑀲𑁆𑀲𑀬𑀪𑀽𑀢𑁂 𑀲𑀢𑁆𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀲𑁆𑀲𑁄 𑀇𑀢𑁆𑀣𑀺𑀬𑁄 𑀫𑀦𑀼𑀲𑁆𑀲𑀺𑀢𑁆𑀣𑀻 𑀅𑀫𑀦𑀼𑀲𑁆𑀲𑀺𑀢𑁆𑀣𑀻 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁬) 𑀦𑀬𑁂𑀦 𑀧𑀸𑀴𑀺𑀬𑀁 𑀤𑀲𑁆𑀲𑀺𑀢𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻𑀦𑀁 𑀧𑀘𑁆𑀘𑁂𑀓𑀁 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀲𑁂𑀦 𑀦𑀯 𑀫𑀕𑁆𑀕𑀸, 𑀢𑀣𑁂𑀯 𑀤𑀲𑁆𑀲𑀺𑀢𑀸𑀦𑀁 𑀢𑀺𑀡𑁆𑀡𑀁 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀦𑀁 𑀯𑀲𑁂𑀦 𑀦𑀯 𑀫𑀕𑁆𑀕𑀸, 𑀢𑀺𑀡𑁆𑀡𑀁 𑀧𑀦 𑀧𑀡𑁆𑀟𑀓𑀸𑀦𑀁 𑀫𑀼𑀔𑀫𑀕𑁆𑀕𑀯𑀘𑁆𑀘𑀫𑀕𑁆𑀕𑀸𑀦𑀁 𑀯𑀲𑁂𑀦 𑀧𑀘𑁆𑀘𑁂𑀓𑀁 𑀤𑁆𑀯𑁂 𑀤𑁆𑀯𑁂 𑀫𑀕𑁆𑀕𑀸𑀢𑀺 𑀙 𑀫𑀕𑁆𑀕𑀸, 𑀢𑀣𑀸 𑀢𑀺𑀡𑁆𑀡𑀁 𑀧𑀦 𑀧𑀼𑀭𑀺𑀲𑀸𑀦𑀦𑁆𑀢𑀺 𑀏𑀯𑀁 𑀢𑀺𑀁𑀲𑀯𑀺𑀥𑁄 𑀳𑁄𑀢𑀺.

𑀲𑁂𑀯𑀦𑀘𑁂𑀢𑀦𑁄𑀢𑀺 𑀲𑁂𑀯𑀦𑁂 𑀫𑁂𑀣𑀼𑀦𑀧𑀬𑁄𑀕𑁂 𑀘𑁂𑀢𑀦𑀸 𑀅𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄, 𑀫𑁂𑀣𑀼𑀦𑀭𑀸𑀕𑀽𑀧𑀲𑀁𑀳𑀺𑀢𑀸𑀬 𑀘𑁂𑀢𑀦𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀅𑀮𑁆𑀮𑁄𑀓𑀸𑀲𑁂𑀢𑀺 𑀢𑀺𑀁𑀲𑀫𑀕𑁆𑀕𑀸𑀦𑀫𑀜𑁆𑀜𑀢𑀭𑁂 𑀫𑀕𑁆𑀕𑁂 𑀧𑀓𑀢𑀺𑀯𑀸𑀢𑁂𑀦 𑀅𑀲𑀁𑀨𑀼𑀝𑁆𑀞𑁂 𑀅𑀮𑁆𑀮𑀧𑀤𑁂𑀲𑁂, 𑀇𑀫𑀺𑀦𑀸 𑀩𑀸𑀳𑀺𑀭𑀁 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑀁 𑀦 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺. 𑀯𑀺𑀲𑁂𑀲𑀦𑀲𑁆𑀲 𑀯𑀺𑀲𑁂𑀲𑀸𑀧𑁂𑀓𑁆𑀔𑀢𑁆𑀢𑀸 𑀤𑀼𑀢𑀺𑀬𑀕𑀸𑀣𑀸𑀬 ‘‘𑀲𑀲𑀺𑀓𑁆𑀔𑁄 𑀲𑁄’’𑀢𑀺 𑀧𑀤𑀤𑁆𑀯𑀬𑀁 𑀆𑀳𑀭𑀺𑀢𑁆𑀯𑀸 ‘‘𑀲𑁂𑀯𑀦𑀘𑁂𑀢𑀦𑁄 𑀲𑀲𑀺𑀓𑁆𑀔𑁄 𑀲𑁄 𑀪𑀺𑀓𑁆𑀔𑀽’’𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀅𑀗𑁆𑀕𑁂 𑀲𑀭𑀻𑀭𑁂 𑀚𑀸𑀢𑀦𑁆𑀢𑀺 𑀅𑀗𑁆𑀕𑀚𑀸𑀢𑀁, 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁. 𑀲𑀢𑀺𑀧𑀺 𑀅𑀯𑀲𑁂𑀲𑀲𑀭𑀻𑀭𑀸𑀯𑀬𑀯𑀸𑀦𑀁 𑀢𑀣𑀸𑀪𑀸𑀯𑁂 𑀭𑀼𑀴𑁆𑀳𑀺𑀯𑀲𑁂𑀦 𑀢𑀤𑁂𑀯 𑀢𑀣𑀸 𑀯𑀼𑀢𑁆𑀢𑀁. 𑀧𑀯𑁂𑀲𑁂𑀦𑁆𑀢𑁄𑀢𑀺 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑀓𑀸𑀬𑀺𑀓𑀓𑀺𑀭𑀺𑀬𑀁 𑀦𑀺𑀧𑁆𑀨𑀸𑀤𑁂𑀦𑁆𑀢𑁄. 𑀧𑀭𑀸𑀚𑀺𑀢𑁄𑀢𑀺 𑀤𑀼𑀮𑁆𑀮𑀪𑀸𑀬 𑀔𑀡𑀲𑀫𑁆𑀧𑀢𑁆𑀢𑀺𑀬𑀸 𑀮𑀤𑁆𑀥𑀩𑁆𑀩𑀢𑁄 𑀤𑀼𑀮𑁆𑀮𑀪𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀲𑀫𑁆𑀧𑀢𑁆𑀢𑀺𑀲𑀼𑀔𑀢𑁄 𑀧𑀭𑀺𑀳𑀸𑀧𑁂𑀢𑁆𑀯𑀸 𑀓𑀺𑀮𑁂𑀲𑀲𑀧𑀢𑁆𑀢𑁂𑀳𑀺 𑀧𑀭𑀸𑀚𑀬𑀫𑀸𑀧𑀸𑀤𑀺𑀢𑁄𑀢𑀺 𑀅𑀢𑁆𑀣𑁄.

𑀅𑀬𑀫𑁂𑀢𑁆𑀣 𑀬𑁄𑀚𑀦𑀸 𑁋 𑀲𑀲𑀺𑀓𑁆𑀔𑁄 𑀲𑁂𑀯𑀦𑀘𑁂𑀢𑀦𑁄 𑀢𑀺𑀯𑀺𑀥𑁂 𑀫𑀕𑁆𑀕𑁂 𑀅𑀮𑁆𑀮𑁄𑀓𑀸𑀲𑁂 𑀅𑀗𑁆𑀕𑀚𑀸𑀢𑀁 𑀢𑀺𑀮𑀫𑀢𑁆𑀢𑀫𑁆𑀧𑀺 𑀧𑀯𑁂𑀲𑁂𑀦𑁆𑀢𑁄 𑀲𑁄 𑀪𑀺𑀓𑁆𑀔𑀼 𑀧𑀭𑀸𑀚𑀺𑀢𑁄 𑀳𑁄𑀢𑀻𑀢𑀺. 𑀏𑀢𑁆𑀢𑀸𑀯𑀢𑀸 𑁋

‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬, 𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀧𑀺, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄’’𑀢𑀺 (𑀧𑀸𑀭𑀸. 𑁪𑁪) 𑁋

𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀁 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁭. 𑀏𑀯𑀁 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀢𑀽𑀧𑀓𑁆𑀓𑀫𑀫𑀽𑀮𑀓𑀁 𑀧𑀸𑀭𑀸𑀚𑀺𑀓𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦 (𑀧𑀸𑀭𑀸. 𑁫𑁮) 𑀅𑀗𑁆𑀕𑀚𑀸𑀢𑁂 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀧𑀭𑁄𑀧𑀓𑁆𑀓𑀫𑀫𑀽𑀮𑀓𑀁 𑀧𑀸𑀭𑀸𑀚𑀺𑀓𑀜𑁆𑀘 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀯𑁂𑀲𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀧𑀯𑁂𑀲𑀦𑀦𑁆𑀢𑀺 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀲𑀼𑀢𑁆𑀢𑀧𑀫𑀢𑁆𑀢𑀸𑀤𑀺𑀫𑀦𑀼𑀲𑁆𑀲𑀺𑀢𑁆𑀣𑀺𑀆𑀤𑀻𑀦𑀫𑀜𑁆𑀜𑀢𑀭𑀁 𑀆𑀦𑁂𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀫𑀕𑁆𑀕𑀸𑀦𑀫𑀜𑁆𑀜𑀢𑀭𑀁 𑀫𑀕𑁆𑀕𑀁 𑀬𑀣𑀸 𑀧𑀯𑀺𑀲𑀢𑀺, 𑀢𑀣𑀸 𑀪𑀺𑀓𑁆𑀔𑀼𑀦𑁄 𑀅𑀗𑁆𑀕𑀚𑀸𑀢𑁂 𑀅𑀪𑀺𑀦𑀺𑀲𑀻𑀤𑀸𑀧𑀦𑁂 𑀲𑀫𑁆𑀪𑀯𑀦𑁆𑀢𑀁 𑀫𑀕𑁆𑀕𑀧𑁆𑀧𑀯𑁂𑀲𑀦𑀫𑀸𑀳. 𑀧𑀯𑁂𑀲𑀦𑀁 𑀲𑀸𑀤𑀺𑀬𑀦𑁆𑀢𑁄 𑀲𑀲𑀺𑀓𑁆𑀔𑁄 𑀲𑁄𑀢𑀺 𑀬𑁄𑀚𑀦𑀸. 𑀏𑀢𑁆𑀣 ‘‘𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺 𑀅𑀥𑀺𑀯𑀸𑀲𑁂𑀢𑀺, 𑀢𑀲𑁆𑀫𑀺𑀁 𑀔𑀡𑁂 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁫𑁮) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀅𑀕𑁆𑀕𑀢𑁄 𑀬𑀸𑀯 𑀫𑀽𑀮𑀁 𑀧𑀯𑁂𑀲𑁂𑀦𑁆𑀢𑁂𑀲𑀼 𑀅𑀲𑁆𑀲𑀸𑀤𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑁄 𑀢𑀗𑁆𑀔𑀡𑁂𑀬𑁂𑀯 𑀲𑀸𑀲𑀦𑀢𑁄 𑀘𑀼𑀢𑁄𑀢𑀺 𑀅𑀢𑁆𑀣𑁄. 𑀧𑀯𑀺𑀝𑁆𑀞𑀦𑁆𑀢𑀺𑀆𑀤𑀻𑀲𑀼 𑀧𑀤𑁂𑀲𑀼𑀧𑀺 𑀏𑀯𑀫𑁂𑀯 𑀬𑁄𑀚𑀦𑀸.

𑀧𑀯𑀺𑀝𑁆𑀞𑀦𑁆𑀢𑀺 𑀧𑀯𑀺𑀝𑁆𑀞𑀓𑁆𑀔𑀡𑁄. ‘‘𑀧𑀯𑀺𑀝𑁆𑀞’’𑀦𑁆𑀢𑀺𑀆𑀤𑀺𑀦𑀸 𑀢𑀸𑀬 𑀢𑀸𑀬 𑀓𑀺𑀭𑀺𑀬𑀸𑀬 𑀉𑀧𑀮𑀓𑁆𑀔𑀺𑀢𑁄 𑀔𑀡𑁄 𑀕𑀳𑁂𑀢𑀩𑁆𑀩𑁄. 𑀢𑁂𑀦𑁂𑀯𑁂𑀢𑁆𑀣 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁 𑀓𑀢𑀁. 𑀞𑀺𑀢𑀦𑁆𑀢𑀺 𑀏𑀢𑁆𑀣 ‘‘𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀫𑀬𑁂’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀲𑁆𑀲 𑀲𑀩𑁆𑀩𑀣𑀸 𑀩𑁆𑀬𑀸𑀧𑀸𑀭𑀭𑀳𑀺𑀢𑀁 𑀓𑀸𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀫𑀬𑁄𑀧𑀺 𑀕𑀳𑁂𑀢𑀩𑁆𑀩𑁄. 𑀢𑁂𑀦𑁂𑀯 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀦𑀬𑁂𑀦 𑀧𑀯𑀺𑀝𑁆𑀞𑀲𑁆𑀲 𑀘 𑀬𑀸𑀯 𑀉𑀤𑁆𑀥𑀭𑀡𑀸𑀭𑀫𑁆𑀪𑁄, 𑀢𑀸𑀯 𑀲𑀫𑁆𑀪𑀯𑀦𑁆𑀢𑁄 𑀞𑀺𑀢𑀓𑀸𑀮𑁄𑀧𑀺 𑀕𑀳𑁂𑀢𑀩𑁆𑀩𑁄. 𑀉𑀤𑁆𑀥𑀭𑀡𑀦𑁆𑀢𑀺 𑀦𑀻𑀳𑀭𑀡𑀓𑀸𑀮𑁄.

𑀯𑀸𑀢𑀺 𑀯𑀺𑀓𑀧𑁆𑀧𑁂, 𑀅𑀧𑀻𑀢𑀺 𑀲𑀫𑀼𑀘𑁆𑀘𑀬𑁂, 𑀲𑁄 𑀯𑀸-𑀲𑀤𑁆𑀤𑁂𑀦 𑀯𑀺𑀓𑀧𑁆𑀧𑀺𑀢𑀸𑀦𑀁 𑀧𑀓𑁆𑀔𑀸𑀦𑀁 𑀢𑀼𑀮𑁆𑀬𑀩𑀮𑀢𑀁 𑀚𑁄𑀢𑁂𑀢𑀺. 𑀇𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺𑀧𑀺 ‘‘𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁮) 𑀧𑀸𑀴𑀺𑀬𑀁 𑀆𑀕𑀢𑀦𑀬𑁂𑀦 𑀮𑀩𑁆𑀪𑀫𑀸𑀦𑀁 𑀧𑀯𑁂𑀲𑀦𑀸𑀤𑀺𑀏𑀓𑀓𑁆𑀔𑀡𑀫𑁆𑀧𑀺 𑀲𑀸𑀤𑀺𑀬𑀦𑀧𑀘𑁆𑀘𑀬𑀸 𑀆𑀧𑀚𑁆𑀚𑀫𑀸𑀦𑀁 𑀧𑀸𑀭𑀸𑀚𑀺𑀓𑀁 𑀤𑀲𑁆𑀲𑁂𑀢𑀺. 𑀲𑀲𑀺𑀓𑁆𑀔𑁄𑀢𑀺 𑀲𑀺𑀓𑁆𑀔𑀸𑀬 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀲𑀺𑀓𑁆𑀔𑁄, 𑀅𑀧𑀘𑁆𑀘𑀓𑁆𑀔𑀸𑀢𑀲𑀺𑀓𑁆𑀔𑁄𑀢𑀺 𑀅𑀢𑁆𑀣𑁄. 𑀲𑀸𑀤𑀺𑀬𑀦𑁆𑀢𑁄𑀢𑀺 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑁄. 𑀲𑁄 𑀪𑀺𑀓𑁆𑀔𑀼. 𑀞𑀧𑁂𑀢𑁆𑀯𑀸 𑀓𑀺𑀭𑀺𑀬𑀦𑁆𑀢𑀺 𑀅𑀢𑁆𑀢𑀽𑀧𑀓𑁆𑀓𑀫𑀦𑀁 𑀯𑀺𑀦𑀸. 𑀘𑀼𑀢𑁄𑀢𑀺 ‘‘𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀓𑀢𑀫𑀺𑀤𑀁, 𑀦 𑀫𑀬𑀸’’𑀢𑀺 𑀮𑁂𑀲𑁂𑀦 𑀦 𑀫𑀼𑀘𑁆𑀘𑀢𑀺, 𑀲𑀸𑀤𑀺𑀬𑀦𑀘𑀺𑀢𑁆𑀢𑁂 𑀲𑀢𑀺 𑀲𑀸𑀲𑀦𑀢𑁄 𑀘𑀼𑀢𑁄𑀬𑁂𑀯 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀢𑁆𑀣 𑀘 𑀲𑀲𑀺𑀓𑁆𑀔𑁄𑀢𑀺 𑀇𑀤𑀁 ‘‘𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸’’𑀢𑀺 (𑀧𑀸𑀭𑀸. 𑁪𑁪) 𑀲𑀺𑀓𑁆𑀔𑀸𑀧𑀤𑀧𑀸𑀞𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀁. 𑀢𑀲𑁆𑀲 𑀧𑀤𑀪𑀸𑀚𑀦𑁂 (𑀧𑀸𑀭𑀸. 𑁪𑁫), 𑀢𑀤𑀝𑁆𑀞𑀓𑀣𑀸𑀬 𑀘 𑀯𑀺𑀪𑀢𑁆𑀢𑀁 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀲𑀗𑁆𑀔𑁂𑀧𑀢𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀘𑀺𑀢𑁆𑀢𑀔𑁂𑀢𑁆𑀢𑀓𑀸𑀮𑀧𑀬𑁄𑀕𑀧𑀼𑀕𑁆𑀕𑀮𑀯𑀺𑀚𑀸𑀦𑀦𑀯𑀲𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦. 𑀉𑀧𑀲𑀫𑁆𑀧𑀦𑁆𑀦𑀪𑀸𑀯𑀢𑁄 𑀘𑀯𑀺𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑁂𑀦𑁂𑀯 𑀳𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀤𑀯𑀸 𑀯𑀸 𑀭𑀯𑀸 𑀯𑀸 𑀯𑀤𑀦𑁆𑀢𑀲𑁆𑀲. 𑀏𑀯𑀁 𑀘𑀺𑀢𑁆𑀢𑀯𑀲𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦.

𑀢𑀣𑀸 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀺, 𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀸𑀫𑀺, 𑀲𑀗𑁆𑀖𑀁 𑀧𑀘𑁆𑀘𑀓𑁆𑀔𑀸𑀫𑀺, 𑀲𑀺𑀓𑁆𑀔𑀁, 𑀯𑀺𑀦𑀬𑀁, 𑀧𑀸𑀢𑀺𑀫𑁄𑀓𑁆𑀔𑀁, 𑀉𑀤𑁆𑀤𑁂𑀲𑀁, 𑀉𑀧𑀚𑁆𑀛𑀸𑀬𑀁, 𑀆𑀘𑀭𑀺𑀬𑀁, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁, 𑀅𑀦𑁆𑀢𑁂𑀯𑀸𑀲𑀺𑀓𑀁, 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀁, 𑀲𑀫𑀸𑀦𑀸𑀘𑀭𑀺𑀬𑀓𑀁, 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀘𑀢𑀼𑀤𑁆𑀤𑀲𑀦𑁆𑀦𑀁, ‘‘𑀕𑀺𑀳𑀻𑀢𑀺 𑀫𑀁 𑀥𑀸𑀭𑁂𑀳𑀺, 𑀉𑀧𑀸𑀲𑀓𑁄, 𑀆𑀭𑀸𑀫𑀺𑀓𑁄, 𑀲𑀸𑀫𑀡𑁂𑀭𑁄, 𑀢𑀺𑀢𑁆𑀣𑀺𑀬𑁄, 𑀢𑀺𑀢𑁆𑀣𑀺𑀬𑀲𑀸𑀯𑀓𑁄, 𑀅𑀲𑁆𑀲𑀫𑀡𑁄, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀢𑀺 𑀫𑀁 𑀥𑀸𑀭𑁂𑀳𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀕𑀺𑀳𑀺𑀆𑀤𑀻𑀦𑀁 𑀅𑀝𑁆𑀞𑀦𑁆𑀦𑀜𑁆𑀘𑀸𑀢𑀺 𑀇𑀫𑁂𑀲𑀁 𑀩𑀸𑀯𑀻𑀲𑀢𑀺𑀬𑀸 𑀔𑁂𑀢𑁆𑀢𑀧𑀤𑀸𑀦𑀁 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀯𑁂𑀯𑀘𑀦𑀲𑁆𑀲 𑀯𑀲𑁂𑀦 𑀢𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀯𑀢𑁆𑀢𑀼𑀓𑀸𑀫𑀲𑁆𑀲 𑀬𑀁 𑀓𑀺𑀜𑁆𑀘𑀺 𑀯𑀤𑀢𑁄 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀭𑀼𑀓𑁆𑀔𑀸𑀤𑀻𑀦𑀁 𑀅𑀜𑁆𑀜𑀢𑀭𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀦𑁆𑀢𑀲𑁆𑀲. 𑀏𑀯𑀁 𑀔𑁂𑀢𑁆𑀢𑀯𑀲𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦.

𑀢𑀢𑁆𑀣 𑀬𑀤𑁂𑀢𑀁 ‘‘𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀘 ‘‘𑀫𑀁 𑀥𑀸𑀭𑁂𑀳𑀻’’𑀢𑀺 𑀘𑀸𑀢𑀺 𑀯𑀼𑀢𑁆𑀢𑀁 𑀯𑀢𑁆𑀢𑀫𑀸𑀦𑀓𑀸𑀮𑀯𑀘𑀦𑀁, 𑀬𑀸𑀦𑀺 𑀘 ‘‘𑀅𑀮𑀁 𑀫𑁂 𑀩𑀼𑀤𑁆𑀥𑁂𑀦, 𑀓𑀺𑀁 𑀦𑀼 𑀫𑁂 𑀩𑀼𑀤𑁆𑀥𑁂𑀦, 𑀦 𑀫𑀫𑀢𑁆𑀣𑁄 𑀩𑀼𑀤𑁆𑀥𑁂𑀦, 𑀲𑀼𑀫𑀼𑀢𑁆𑀢𑀸𑀳𑀁 𑀩𑀼𑀤𑁆𑀥𑁂𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀔𑁆𑀬𑀸𑀢𑀯𑀲𑁂𑀦 𑀓𑀸𑀮𑀁 𑀅𑀦𑀸𑀫𑀲𑀺𑀢𑁆𑀯𑀸 𑀧𑀼𑀭𑀺𑀫𑁂𑀳𑀺 𑀘𑀼𑀤𑁆𑀤𑀲𑀳𑀺 𑀧𑀤𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺 ‘‘𑀅𑀮𑀁 𑀫𑁂’’𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺, 𑀢𑁂𑀲𑀁𑀬𑁂𑀯 𑀲𑀯𑁂𑀯𑀘𑀦𑀸𑀦𑀁 𑀯𑀲𑁂𑀦 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 ‘‘𑀧𑀘𑁆𑀘𑀓𑁆𑀔𑀸𑀲𑀺’’𑀦𑁆𑀢𑀺 𑀯𑀸 ‘‘𑀧𑀘𑁆𑀘𑀓𑁆𑀔𑀺𑀲𑁆𑀲’’𑀦𑁆𑀢𑀺 𑀯𑀸 ‘‘𑀫𑀁 𑀥𑀸𑀭𑁂𑀲𑀻’’𑀢𑀺 𑀯𑀸 ‘‘𑀫𑀁 𑀥𑀸𑀭𑁂𑀲𑁆𑀲𑀢𑀻’’𑀢𑀺 𑀯𑀸 ‘‘𑀬𑀁 𑀦𑀽𑀦𑀸𑀳𑀁 𑀧𑀘𑁆𑀘𑀓𑁆𑀔𑁂𑀬𑁆𑀬’’𑀦𑁆𑀢𑀺 𑀯𑀸𑀢𑀺𑀆𑀤𑀻𑀦𑀺 𑀅𑀢𑀻𑀢𑀸𑀦𑀸𑀕𑀢𑀧𑀭𑀺𑀓𑀧𑁆𑀧𑀯𑀘𑀦𑀸𑀦𑀺 𑀪𑀡𑀦𑁆𑀢𑀲𑁆𑀲. 𑀏𑀯𑀁 𑀯𑀢𑁆𑀢𑀫𑀸𑀦𑀓𑀸𑀮𑀯𑀲𑁂𑀦 𑀘𑁂𑀯 𑀅𑀦𑀸𑀫𑀝𑁆𑀞𑀓𑀸𑀮𑀯𑀲𑁂𑀦 𑀘 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦.

𑀧𑀬𑁄𑀕𑁄 𑀧𑀦 𑀤𑀼𑀯𑀺𑀥𑁄 𑀓𑀸𑀬𑀺𑀓𑁄 𑀘 𑀯𑀸𑀘𑀲𑀺𑀓𑁄 𑀘. 𑀢𑀢𑁆𑀣 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀸𑀘𑀲𑀺𑀓𑀧𑀬𑁄𑀕𑁂𑀦𑁂𑀯 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀅𑀓𑁆𑀔𑀭𑀮𑀺𑀔𑀦𑀁 𑀯𑀸 𑀳𑀢𑁆𑀣𑀫𑀼𑀤𑁆𑀤𑀸𑀤𑀺𑀤𑀲𑁆𑀲𑀦𑀁 𑀯𑀸 𑀓𑀸𑀬𑀧𑀬𑁄𑀕𑀁 𑀓𑀭𑁄𑀦𑁆𑀢𑀲𑁆𑀲. 𑀏𑀯𑀁 𑀯𑀸𑀘𑀲𑀺𑀓𑀧𑀬𑁄𑀕𑁂𑀦𑁂𑀯 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦.

𑀧𑀼𑀕𑁆𑀕𑀮𑁄 𑀧𑀦 𑀤𑀼𑀯𑀺𑀥𑁄 𑀬𑁄 𑀘 𑀧𑀘𑁆𑀘𑀓𑁆𑀔𑀸𑀢𑀺, 𑀬𑀲𑁆𑀲 𑀘 𑀧𑀘𑁆𑀘𑀓𑁆𑀔𑀸𑀢𑀺. 𑀢𑀢𑁆𑀣 𑀬𑁄 𑀧𑀘𑁆𑀘𑀓𑁆𑀔𑀸𑀢𑀺, 𑀲𑁄 𑀲𑀘𑁂 𑀉𑀫𑁆𑀫𑀢𑁆𑀢𑀓𑀔𑀺𑀢𑁆𑀢𑀘𑀺𑀢𑁆𑀢𑀯𑁂𑀤𑀦𑀝𑁆𑀝𑀸𑀦𑀁 𑀅𑀜𑁆𑀜𑀢𑀭𑁄 𑀦 𑀳𑁄𑀢𑀺. 𑀬𑀲𑁆𑀲 𑀧𑀦 𑀧𑀘𑁆𑀘𑀓𑁆𑀔𑀸𑀢𑀺, 𑀲𑁄 𑀲𑀘𑁂 𑀫𑀦𑀼𑀲𑁆𑀲𑀚𑀸𑀢𑀺𑀓𑁄 𑀳𑁄𑀢𑀺, 𑀦 𑀘 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀁 𑀅𑀜𑁆𑀜𑀢𑀭𑁄, 𑀲𑀫𑁆𑀫𑀼𑀔𑀻𑀪𑀽𑀢𑁄 𑀘 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺. 𑀦 𑀳𑀺 𑀅𑀲𑀫𑁆𑀫𑀼𑀔𑀻𑀪𑀽𑀢𑀲𑁆𑀲 𑀤𑀽𑀢𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀆𑀭𑁄𑀘𑀦𑀁 𑀭𑀼𑀳𑀢𑀺. 𑀏𑀯𑀁 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦.

𑀯𑀺𑀚𑀸𑀦𑀦𑀫𑁆𑀧𑀺 𑀦𑀺𑀬𑀫𑀺𑀢𑀸𑀦𑀺𑀬𑀫𑀺𑀢𑀯𑀲𑁂𑀦 𑀤𑀼𑀯𑀺𑀥𑀁. 𑀢𑀢𑁆𑀣 𑀬𑀲𑁆𑀲, 𑀬𑁂𑀲𑀁 𑀯𑀸 𑀦𑀺𑀬𑀫𑁂𑀢𑁆𑀯𑀸 ‘‘𑀇𑀫𑀲𑁆𑀲, 𑀇𑀫𑁂𑀲𑀁 𑀯𑀸 𑀆𑀭𑁄𑀘𑁂𑀫𑀻’’𑀢𑀺 𑀯𑀤𑀢𑀺. 𑀲𑀘𑁂 𑀢𑁂 𑀬𑀣𑀸 𑀧𑀓𑀢𑀺𑀬𑀸 𑀮𑁄𑀓𑁂 𑀫𑀦𑀼𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀆𑀯𑀚𑁆𑀚𑀦𑀲𑀫𑀬𑁂 𑀚𑀸𑀦𑀦𑁆𑀢𑀺, 𑀏𑀯𑀁 𑀢𑀲𑁆𑀲 𑀯𑀘𑀦𑀸𑀦𑀦𑁆𑀢𑀭𑀫𑁂𑀯 𑀢𑀲𑁆𑀲 ‘‘𑀅𑀬𑀁 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀯𑀸 ‘‘𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀢𑀻’’𑀢𑀺 𑀯𑀸 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀪𑀸𑀯𑀁 𑀚𑀸𑀦𑀦𑁆𑀢𑀺, 𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀅𑀣 𑀅𑀧𑀭𑀪𑀸𑀕𑁂 ‘‘𑀓𑀺𑀁 𑀇𑀫𑀺𑀦𑀸 𑀯𑀼𑀢𑁆𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀚𑀸𑀦𑀦𑁆𑀢𑀺, 𑀅𑀜𑁆𑀜𑁂 𑀯𑀸 𑀚𑀸𑀦𑀦𑁆𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀅𑀦𑀺𑀬𑀫𑁂𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲 𑀧𑀦 𑀲𑀘𑁂 𑀯𑀼𑀢𑁆𑀢𑀦𑀬𑁂𑀦 𑀬𑁄 𑀓𑁄𑀘𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑁄 𑀯𑀘𑀦𑀢𑁆𑀣𑀁 𑀚𑀸𑀦𑀸𑀢𑀺, 𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀏𑀯𑀁 𑀯𑀺𑀚𑀸𑀦𑀦𑀯𑀲𑁂𑀦 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦. 𑀬𑁄 𑀧𑀦 𑀅𑀦𑁆𑀢𑀫𑀲𑁄 𑀤𑀯𑀸𑀬𑀧𑀺 𑀧𑀘𑁆𑀘𑀓𑁆𑀔𑀸𑀢𑀺, 𑀢𑁂𑀦 𑀅𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸.

𑀇𑀢𑀺 𑀇𑀫𑁂𑀲𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀘𑀺𑀢𑁆𑀢𑀸𑀤𑀻𑀦𑀁 𑀯𑀲𑁂𑀦 𑀅𑀧𑀘𑁆𑀘𑀓𑁆𑀔𑀸𑀢𑀲𑀺𑀓𑁆𑀔𑁄 ‘‘𑀲𑀲𑀺𑀓𑁆𑀔𑁄’’𑀢𑀺 𑀯𑀼𑀢𑁆𑀢𑁄.

𑁮-𑁧𑁦. ‘‘𑀇𑀤𑀸𑀦𑀺 𑀲𑀦𑁆𑀣𑀢𑁂𑀦 𑀲𑀦𑁆𑀣𑀢𑀲𑁆𑀲 𑀖𑀝𑁆𑀝𑀦𑁂 𑀉𑀧𑀸𑀤𑀺𑀦𑁆𑀦𑀓𑀖𑀝𑁆𑀝𑀦𑀸𑀪𑀸𑀯𑀢𑁄 𑀤𑁄𑀲𑁄 𑀦𑀢𑁆𑀣𑀻’’𑀢𑀺 𑀧𑀸𑀧𑀪𑀺𑀓𑁆𑀔𑀽𑀦𑀁 𑀮𑁂𑀲𑀓𑀧𑁆𑀧𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 ‘‘𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦, 𑀧𑀲𑁆𑀲𑀸𑀯𑀫𑀕𑁆𑀕𑁂𑀦, 𑀫𑀼𑀔𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺 𑀲𑀦𑁆𑀣𑀢𑀸𑀬 𑀅𑀲𑀦𑁆𑀣𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁬𑁧) 𑀦𑀬𑁂𑀦 𑀧𑀸𑀴𑀺𑀬𑀁 𑀯𑀼𑀢𑁆𑀢𑀲𑀦𑁆𑀣𑀢𑀯𑀸𑀭𑀸𑀦𑀫𑀢𑁆𑀣𑀁 𑀲𑀗𑁆𑀕𑀡𑁆𑀳𑀦𑁆𑀢𑁄 𑀆𑀳 ‘‘𑀲𑀦𑁆𑀣𑀢𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀦𑁆𑀣𑀢𑁂𑀦𑀸𑀢𑀺 𑀘𑀫𑁆𑀫𑀘𑁄𑀴𑀢𑀺𑀧𑀼𑀧𑀝𑁆𑀝𑀸𑀤𑀻𑀳𑀺 𑀧𑀝𑀺𑀘𑁆𑀙𑀸𑀤𑀺𑀢𑁂𑀦. ‘‘𑀧𑀯𑁂𑀲𑁂𑀦𑁆𑀢𑁄’’𑀢𑀺 𑀇𑀫𑀺𑀦𑀸 𑀲𑀦𑁆𑀣𑀢𑀯𑀸𑀭𑀲𑁆𑀲 𑀧𑀭𑁄𑀧𑀓𑁆𑀓𑀫𑀁 𑀦𑀺𑀲𑁆𑀲𑀸𑀬 𑀤𑀲𑁆𑀲𑀦𑀫𑀼𑀧𑀮𑀓𑁆𑀔𑀡𑀦𑁆𑀢𑀺 𑀅𑀢𑁆𑀢𑀽𑀧𑀓𑁆𑀓𑀫𑁂𑀧𑀺 𑀬𑁄𑀚𑁂𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺, 𑀢𑀲𑁆𑀲 𑀯𑀓𑁆𑀔𑀫𑀸𑀦𑁂𑀦 ‘‘𑀧𑀭𑀸𑀚𑀺𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. ‘‘𑀢𑀣𑁂𑀯𑀸’’𑀢𑀺 𑀇𑀫𑀺𑀦𑀸 𑀧𑀯𑁂𑀲𑁂𑀦𑁆𑀢𑁄𑀢𑀺𑀆𑀤𑀺𑀧𑁆𑀧𑀓𑀸𑀭𑀁 𑀧𑀭𑀸𑀫𑀲𑀢𑀺.

𑀏𑀯𑀁 𑀧𑀯𑁂𑀲𑁂𑀦𑁆𑀢𑁄 𑀓𑀤𑀸 𑀧𑀭𑀸𑀚𑀺𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀉𑀧𑀸𑀤𑀺𑀦𑁆𑀦𑁂𑀦𑀸’’𑀢𑀺𑀆𑀤𑀺. 𑀏𑀢𑁆𑀣 𑀉𑀧𑀸𑀤𑀺𑀦𑁆𑀦𑁂𑀦𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀉𑀧𑁂𑀢𑁂𑀦 𑀓𑀫𑁆𑀫𑀼𑀦𑀸 𑀅𑀢𑁆𑀢𑀦𑁄 𑀨𑀮𑀪𑀸𑀯𑁂𑀦𑁂𑀯 𑀆𑀤𑀺𑀦𑁆𑀦𑀁 𑀕𑀳𑀺𑀢𑀦𑁆𑀢𑀺 𑀉𑀧𑀸𑀤𑀺𑀦𑁆𑀦𑀁, 𑀏𑀢𑁂𑀦 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀲𑁆𑀲, 𑀯𑀢𑁆𑀣𑀼𑀧𑀼𑀕𑁆𑀕𑀮𑀸𑀦𑀁 𑀫𑀕𑁆𑀕𑀲𑁆𑀲 𑀘 𑀖𑀝𑁆𑀝𑀦𑀝𑁆𑀞𑀸𑀦𑀕𑀢𑀁 𑀓𑀸𑀬𑀧𑁆𑀧𑀲𑀸𑀤𑀁 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸𑀯 𑀅𑀗𑁆𑀕𑀚𑀸𑀢𑀕𑀢𑀁 𑀅𑀦𑀝𑁆𑀞𑀓𑀸𑀬𑀧𑁆𑀧𑀲𑀸𑀤𑀁 𑀘𑀫𑁆𑀫𑀔𑀺𑀮𑀁, 𑀧𑀺𑀴𑀓𑀸𑀤𑀺 𑀘 𑀕𑀳𑁂𑀢𑀩𑁆𑀩𑀁. ‘‘𑀉𑀧𑀸𑀤𑀺𑀦𑁆𑀦𑀓𑀁 𑀦𑀸𑀫 𑀓𑀸𑀬𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 ‘‘𑀅𑀦𑀼𑀧𑀸𑀤𑀺𑀦𑁆𑀦𑀓’’𑀦𑁆𑀢𑀺 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀁 𑀘𑁄𑀴𑀸𑀤𑀺 𑀯𑀼𑀢𑁆𑀢𑀁. 𑀉𑀧𑀸𑀤𑀺𑀦𑁆𑀦𑁂𑀦 𑀉𑀧𑀸𑀤𑀺𑀦𑁆𑀦𑁂, 𑀅𑀦𑀼𑀧𑀸𑀤𑀺𑀦𑁆𑀦𑁂 𑀯𑀸 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂 𑀖𑀝𑁆𑀝𑀺𑀢𑁂, 𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀦 𑀯𑀸 𑀉𑀧𑀸𑀤𑀺𑀦𑁆𑀦𑁂 𑀅𑀦𑀼𑀧𑀸𑀤𑀺𑀦𑁆𑀦𑁂 𑀯𑀸 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂 𑀖𑀝𑁆𑀝𑀺𑀢𑁂𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 𑀓𑀭𑀡𑀯𑀘𑀦𑀦𑁆𑀢𑀸𑀦𑀺 𑀧𑀤𑀸𑀦𑀺 ‘‘𑀅𑀗𑁆𑀕𑀚𑀸𑀢𑁂𑀦𑀸’’𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀦𑀸𑀦𑀺.

𑀏𑀢𑁆𑀢𑀸𑀯𑀢𑀸 𑀲𑀦𑁆𑀣𑀢𑀘𑀢𑀼𑀓𑁆𑀓𑀯𑀲𑁂𑀦 𑀅𑀢𑁆𑀢𑀽𑀧𑀓𑁆𑀓𑀫𑁂 𑀲𑀢𑀺 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂 𑀧𑀸𑀭𑀸𑀚𑀺𑀓𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀭𑀽𑀧𑀓𑁆𑀓𑀫𑁂𑀧𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀘𑁂’’𑀢𑀺𑀆𑀤𑀺. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀘𑀢𑀽𑀲𑀼 𑀯𑀺𑀓𑀧𑁆𑀧𑁂𑀲𑀼. 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂 𑀧𑀯𑀺𑀝𑁆𑀞𑁂 𑀢𑀽𑀢𑀺 𑀏𑀢𑁆𑀣 𑀢𑀼-𑀲𑀤𑁆𑀤𑁂𑀦 𑀧𑀯𑁂𑀲𑀦𑀝𑁆𑀞𑀺𑀢𑀼𑀤𑁆𑀥𑀸𑀭𑀓𑁆𑀔𑀡𑀢𑁆𑀢𑀬𑀁 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀬𑀁𑀢𑀁-𑀲𑀤𑁆𑀤𑀸𑀦𑀁 𑀦𑀺𑀘𑁆𑀘𑀲𑀫𑁆𑀩𑀦𑁆𑀥𑀢𑁆𑀢𑀸 𑀳𑀺 ‘‘𑀲𑁄’’𑀢𑀺 𑀢𑀁-𑀲𑀤𑁆𑀤𑁄𑀧𑀸𑀤𑀸𑀦𑁂 ‘‘𑀬𑁄’’𑀢𑀺 𑀬𑀁-𑀲𑀤𑁆𑀤𑁄𑀧𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑁄, 𑀲𑀸𑀫𑀢𑁆𑀣𑀺𑀬𑁂𑀦 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀅𑀧𑀺𑀲𑀤𑁆𑀤𑁄 𑀘. 𑀅𑀬𑀫𑁂𑀢𑁆𑀣 𑀅𑀢𑁆𑀣𑀬𑁄𑀚𑀦𑀸 𑁋 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀆𑀦𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑁄 𑀅𑀗𑁆𑀕𑀚𑀸𑀢𑁂 𑀅𑀪𑀺𑀦𑀺𑀲𑀻𑀤𑀸𑀧𑀺𑀢𑀫𑀦𑀼𑀲𑁆𑀲𑀺𑀢𑁆𑀣𑀺𑀆𑀤𑀻𑀦𑀁 𑀢𑀻𑀲𑀼 𑀫𑀕𑁆𑀕𑁂𑀲𑀼 𑀅𑀜𑁆𑀜𑀢𑀭𑀫𑀕𑁆𑀕𑀲𑀗𑁆𑀔𑀸𑀢𑀁 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑀁 𑀧𑀯𑀺𑀝𑁆𑀞𑁂 𑀯𑀸 𑀢𑀼-𑀲𑀤𑁆𑀤𑁂𑀦 𑀲𑀫𑁆𑀧𑀺𑀡𑁆𑀟𑀺𑀢𑀧𑀯𑁂𑀲𑀦𑀝𑁆𑀞𑀺𑀢𑀼𑀤𑁆𑀥𑀸𑀭𑀸𑀦𑀫𑀜𑁆𑀜𑀢𑀭𑀓𑁆𑀔𑀡𑁂 𑀯𑀸 𑀲𑀘𑁂 𑀬𑁄 𑀲𑀸𑀤𑀺𑀬𑀢𑀺, 𑀲𑀧𑁆𑀧𑀫𑀼𑀔𑀸𑀤𑀺𑀧𑁆𑀧𑀯𑁂𑀲𑀦𑀓𑀸𑀮𑁂 𑀯𑀺𑀬 𑀅𑀦𑀼𑀢𑁆𑀢𑀲𑀺𑀢𑁆𑀯𑀸 𑀓𑀸𑀫𑀭𑀸𑀕𑀧𑀺𑀧𑀸𑀲𑀸𑀪𑀺𑀪𑀽𑀢𑁄 𑀬𑀤𑀺 𑀲𑀸𑀤𑀺𑀬𑀢𑀺, 𑀲𑁄𑀧𑀺 𑀪𑀺𑀓𑁆𑀔𑀼 𑀧𑀭𑀸𑀚𑀺𑀢𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀲𑀘𑁂 𑀲𑀸𑀤𑀺𑀬𑀢𑀻’’𑀢𑀺 𑀇𑀫𑀺𑀦𑀸 𑀲𑀸𑀲𑀗𑁆𑀓𑀯𑀘𑀦𑁂𑀦 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀲𑀽𑀘𑀺𑀢𑀁 𑀳𑁄𑀢𑀺.

‘‘𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂’’𑀢𑀺 𑀇𑀫𑀺𑀦𑀸 𑀩𑁆𑀬𑀯𑀘𑁆𑀙𑀺𑀦𑁆𑀦𑁂 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀇𑀫𑀲𑁆𑀫𑀺𑀁𑀬𑁂𑀯 𑀯𑀺𑀓𑀧𑁆𑀧𑁂 𑀲𑀫𑁆𑀪𑀯𑀦𑁆𑀢𑀺𑀬𑁄 𑀇𑀢𑀭𑀸𑀧𑀢𑁆𑀢𑀺𑀬𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀔𑁂𑀢𑁆𑀢𑁂’’𑀢𑀺𑀆𑀤𑀺. ‘‘𑀏𑀢𑁆𑀣𑀸’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀦𑀻𑀬𑀁. ‘‘𑀔𑁂𑀢𑁆𑀢𑁂’’𑀢𑀺 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀧𑀺 𑀳𑁂𑀝𑁆𑀞𑀸 ‘‘𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂’’𑀢𑀺 𑀯𑀺𑀲𑁂𑀲𑀺𑀢𑀢𑁆𑀢𑀸, 𑀉𑀧𑀭𑀺𑀣𑀼𑀮𑁆𑀮𑀘𑁆𑀘𑀬𑀸𑀤𑀻𑀦𑀜𑁆𑀘 𑀯𑀺𑀥𑀻𑀬𑀫𑀸𑀦𑀢𑁆𑀢𑀸 𑀅𑀜𑁆𑀜𑀣𑀸𑀦𑀼𑀧𑀧𑀢𑁆𑀢𑀺𑀮𑀓𑁆𑀔𑀡𑀸𑀬 𑀲𑀸𑀫𑀢𑁆𑀣𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀸𑀦𑀁 𑀔𑁂𑀢𑁆𑀢𑁂𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀺. ‘‘𑀓𑀡𑁆𑀡𑀘𑁆𑀙𑀺𑀤𑁆𑀤𑀓𑁆𑀔𑀺𑀦𑀸𑀲𑀸𑀲𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀓𑁆𑀔𑀫𑀸𑀦𑁂𑀲𑀼 𑀚𑀻𑀯𑀫𑀸𑀦𑀓𑀲𑀭𑀻𑀭𑀕𑀢𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀫𑁂𑀲𑀼 𑀤𑁆𑀯𑀻𑀲𑀼 𑀔𑁂𑀢𑁆𑀢𑁂𑀲𑀼 ‘‘𑀲𑀦𑁆𑀣𑀢𑀸𑀤𑀺𑀦𑀸 𑀲𑀦𑁆𑀣𑀢𑀸𑀤𑀺𑀁 𑀧𑀯𑁂𑀲𑁂𑀦𑁆𑀢𑀲𑁆𑀲 𑀉𑀧𑀸𑀤𑀺𑀦𑁆𑀦𑀸𑀤𑀻𑀳𑀺 𑀉𑀧𑀸𑀤𑀺𑀦𑁆𑀦𑀸𑀤𑀻𑀦𑀁 𑀖𑀝𑁆𑀝𑀦𑁂 𑀅𑀥𑀺𑀯𑀸𑀲𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀢𑁆𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂 𑀯𑀼𑀢𑁆𑀢𑀲𑀩𑁆𑀩𑀯𑀺𑀓𑀧𑁆𑀧𑁂 𑀏𑀢𑁆𑀣 𑀬𑁄𑀚𑁂𑀦𑁆𑀢𑁂𑀳𑀺 𑀏𑀯𑀁 𑀬𑁄𑀚𑁂𑀢𑀩𑁆𑀩𑀁 𑁋 𑀣𑀼𑀮𑁆𑀮𑀘𑁆𑀘𑀬𑀓𑁆𑀔𑁂𑀢𑁆𑀢𑁂 𑀲𑀦𑁆𑀣𑀢𑁂 𑀯𑀸 𑀅𑀲𑀦𑁆𑀣𑀢𑁂 𑀯𑀸 𑀲𑀦𑁆𑀣𑀢𑁂𑀦 𑀯𑀸 𑀅𑀲𑀦𑁆𑀣𑀢𑁂𑀦 𑀯𑀸 𑀅𑀗𑁆𑀕𑀚𑀸𑀢𑁂𑀦 𑀲𑁂𑀯𑀦𑁆𑀢𑀲𑁆𑀲 𑀉𑀧𑀸𑀤𑀺𑀦𑁆𑀦𑁂 𑀯𑀸 𑀅𑀦𑀼𑀧𑀸𑀤𑀺𑀦𑁆𑀦𑁂 𑀯𑀸 𑀉𑀧𑀸𑀤𑀺𑀦𑁆𑀦𑁂𑀦, 𑀢𑀣𑀸 𑀅𑀦𑀼𑀧𑀸𑀤𑀺𑀦𑁆𑀦𑁂𑀦 𑀯𑀸 𑀖𑀝𑁆𑀝𑀺𑀢𑁂 𑀣𑀼𑀮𑁆𑀮𑀘𑁆𑀘𑀬𑀁 𑀢𑀲𑁆𑀲 𑀯𑀺𑀦𑀺𑀤𑁆𑀤𑀺𑀲𑁂𑀢𑀺. 𑀏𑀯𑀁 𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂 𑀲𑀦𑁆𑀣𑀢𑁂 𑀯𑀸…𑀧𑁂… 𑀖𑀝𑁆𑀝𑀺𑀢𑁂 𑀤𑀼𑀓𑁆𑀓𑀝𑀜𑁆𑀘 𑀢𑀲𑁆𑀲 𑀯𑀺𑀦𑀺𑀤𑁆𑀤𑀺𑀲𑁂𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀇𑀳 𑀲𑀩𑁆𑀩𑀢𑁆𑀣 𑀢𑀻𑀲𑀼𑀧𑀺 𑀔𑁂𑀢𑁆𑀢𑁂𑀲𑀼 𑀉𑀧𑀸𑀤𑀺𑀦𑁆𑀦-𑀲𑀤𑁆𑀤𑁂𑀦 𑀅𑀦𑀝𑁆𑀞𑀓𑀸𑀬𑀧𑁆𑀧𑀲𑀸𑀤𑀁 𑀅𑀗𑁆𑀕𑀚𑀸𑀢𑀜𑁆𑀘 𑀢𑀢𑁆𑀣𑀚𑀸𑀢𑀘𑀫𑁆𑀫𑀔𑀺𑀮𑀧𑀺𑀴𑀓𑀸 𑀘 𑀕𑀬𑁆𑀳𑀦𑁆𑀢𑀺, 𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂 𑀧𑀦 𑀅𑀗𑁆𑀕𑀼𑀮𑀺𑀆𑀤𑀺𑀇𑀢𑀭𑀸𑀯𑀬𑀯𑀸𑀧𑀺. 𑀢𑀻𑀲𑀼𑀧𑀺 𑀔𑁂𑀢𑁆𑀢𑁂𑀲𑀼 𑀅𑀦𑀼𑀧𑀸𑀤𑀺𑀦𑁆𑀦-𑀲𑀤𑁆𑀤𑁂𑀦 𑀅𑀗𑁆𑀕𑀚𑀸𑀢𑀸𑀤𑀺𑀧𑀝𑀺𑀘𑁆𑀙𑀸𑀤𑀺𑀢𑀯𑀢𑁆𑀣𑀸𑀤𑀬𑁄 𑀘 𑀕𑀬𑁆𑀳𑀦𑁆𑀢𑀺, 𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂 𑀧𑀦 𑀦𑀺𑀫𑀺𑀢𑁆𑀢𑁂 𑀦𑀝𑁆𑀞𑀓𑀸𑀬𑀧𑁆𑀧𑀲𑀸𑀤𑀘𑀫𑁆𑀫𑀔𑀺𑀮𑀧𑀺𑀴𑀓𑀭𑁄𑀫𑀸𑀤𑀻𑀦𑀺. 𑀇𑀫𑀸𑀦𑀺 𑀘 𑀅𑀦𑀼𑀧𑀸𑀤𑀺𑀦𑁆𑀦𑀸𑀦𑀺. 𑀅𑀗𑁆𑀕𑀚𑀸𑀢𑁂𑀢𑀭𑁄𑀧𑀸𑀤𑀺𑀦𑁆𑀦𑀸𑀯𑀬𑀯𑁂 𑀘 𑀢𑀻𑀲𑀼𑀧𑀺 𑀔𑁂𑀢𑁆𑀢𑁂𑀲𑀼 𑀧𑀯𑁂𑀲𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯.

𑁧𑁧. 𑀏𑀢𑁆𑀢𑀸𑀯𑀢𑀸 𑀚𑀻𑀯𑀫𑀸𑀦𑀲𑀭𑀻𑀭𑁂 𑀲𑀦𑁆𑀣𑀢𑀸𑀲𑀦𑁆𑀣𑀢𑀯𑀲𑁂𑀦 𑀧𑀘𑁆𑀘𑁂𑀓𑀁 𑀢𑀺𑀯𑀺𑀥𑁂𑀲𑀼𑀧𑀺 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂𑀲𑀼 𑀲𑀦𑁆𑀣𑀢𑀸𑀲𑀦𑁆𑀣𑀢𑀯𑀲𑁂𑀦𑁂𑀯 𑀤𑀼𑀯𑀺𑀥𑁂𑀦 𑀦𑀺𑀫𑀺𑀢𑁆𑀢𑁂𑀦 𑀲𑁂𑀯𑀦𑁆𑀢𑀲𑁆𑀲 𑀧𑀭𑁄𑀧𑀓𑁆𑀓𑀫𑁂 𑀲𑀢𑀺 𑀲𑀸𑀤𑀺𑀬𑀦𑁆𑀢𑀲𑁆𑀲 𑀮𑀩𑁆𑀪𑀫𑀸𑀦𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑁄 𑀬𑀣𑀸𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀫𑀢𑀲𑀭𑀻𑀭𑁂 𑀧𑀦 𑀢𑀣𑀸 𑀢𑀣𑀸 𑀲𑁂𑀯𑀦𑁆𑀢𑀸𑀦𑀁 𑀤𑁄𑀲𑁄 𑀦𑀢𑁆𑀣𑀻’’𑀢𑀺 𑀧𑀸𑀧𑀪𑀺𑀓𑁆𑀔𑀽𑀦𑀁 𑀮𑁂𑀲𑁄𑀓𑀸𑀲𑀧𑀝𑀺𑀩𑀸𑀳𑀦𑀢𑁆𑀣𑀁 𑀧𑀸𑀴𑀺𑀬𑀁 𑀤𑀲𑁆𑀲𑀺𑀢𑁂𑀲𑀼 𑀬𑀣𑀸𑀯𑀼𑀢𑁆𑀢𑁂𑀲𑀼 𑀢𑀻𑀲𑀼 𑀔𑁂𑀢𑁆𑀢𑁂𑀲𑀼 𑀮𑀩𑁆𑀪𑀫𑀸𑀦𑀸 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀫𑀢𑁂’’𑀢𑀺𑀆𑀤𑀺.

𑀢𑀢𑁆𑀣 ‘‘𑀫𑀢𑁂’’𑀢𑀺 𑀏𑀢𑀲𑁆𑀲 ‘‘𑀫𑀦𑀼𑀲𑁆𑀲𑀺𑀢𑁆𑀣𑀺𑀆𑀤𑀻𑀦𑀁 𑀲𑀭𑀻𑀭𑁂’’𑀢𑀺 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀅𑀢𑁆𑀣𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀇𑀫𑀺𑀦𑀸 ‘‘𑀅𑀓𑁆𑀔𑀸𑀬𑀺𑀢𑁂’’𑀢𑀺𑀆𑀤𑀺𑀦𑀸 𑀤𑀲𑁆𑀲𑀺𑀢𑀸𑀦𑀁 𑀦𑀺𑀫𑀺𑀢𑁆𑀢𑀸𑀦𑀁 𑀦𑀺𑀲𑁆𑀲𑀬𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. ‘‘𑀦𑀺𑀫𑀺𑀢𑁆𑀢𑀫𑀢𑁆𑀢𑀁 𑀲𑁂𑀲𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀓𑁆𑀔𑀫𑀸𑀦𑀕𑀸𑀣𑀸𑀬𑀁 𑀯𑀺𑀬 𑀲𑀓𑀮𑀲𑀭𑀻𑀭𑁂 𑀔𑀸𑀤𑀺𑀢𑁂𑀧𑀺 𑀦𑀺𑀫𑀺𑀢𑁆𑀢𑀲𑁆𑀲 𑀯𑀺𑀚𑁆𑀚𑀫𑀸𑀦𑀸𑀯𑀺𑀚𑁆𑀚𑀫𑀸𑀦𑀪𑀸𑀯𑁄𑀬𑁂𑀯 𑀆𑀧𑀢𑁆𑀢𑀺𑀬𑀸𑀪𑀸𑀯𑀸𑀪𑀸𑀯𑀲𑁆𑀲 𑀧𑀫𑀸𑀡𑀦𑁆𑀢𑀺 ‘‘𑀅𑀓𑁆𑀔𑀸𑀬𑀺𑀢𑁂’’𑀢𑀺 𑀏𑀢𑁂𑀦 ‘‘𑀫𑀢𑁂’’𑀢𑀺 𑀏𑀢𑀁 𑀅𑀯𑀺𑀲𑁂𑀲𑁂𑀢𑁆𑀯𑀸 ‘‘𑀦𑀺𑀫𑀺𑀢𑁆𑀢𑁂’’𑀢𑀺 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀢𑀁 𑀢𑁂𑀦 𑀯𑀺𑀲𑁂𑀲𑀺𑀢𑀩𑁆𑀩𑀁. 𑀅𑀣 𑀯𑀸 ‘‘𑀦𑀺𑀫𑀺𑀢𑁆𑀢𑀫𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀓𑁆𑀔𑀫𑀸𑀦𑀕𑀸𑀣𑀸𑀬 ‘‘𑀦𑀺𑀫𑀺𑀢𑁆𑀢𑁂’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁.

𑀅𑀓𑁆𑀔𑀸𑀬𑀺𑀢𑁂𑀢𑀺 𑀲𑀩𑁆𑀩𑀣𑀸 𑀅𑀓𑁆𑀔𑀸𑀬𑀺𑀢𑁂 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑁂 𑀦𑀺𑀫𑀺𑀢𑁆𑀢𑁂. 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑁂𑀧𑀺 𑀘𑀸𑀢𑀺 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀔𑀸𑀤𑀺𑀢𑁆𑀯𑀸 𑀩𑀳𑀼𑀓𑀸𑀯𑀲𑀺𑀝𑁆𑀞𑁂 𑀦𑀺𑀫𑀺𑀢𑁆𑀢𑁂. ‘‘𑀬𑀲𑁆𑀲 𑀘𑀢𑀽𑀲𑀼 𑀪𑀸𑀕𑁂𑀲𑀼 𑀢𑀺𑀪𑀸𑀕𑀫𑀢𑁆𑀢𑀁 𑀔𑀸𑀤𑀺𑀢𑀁, 𑀢𑀁 𑀦𑀺𑀫𑀺𑀢𑁆𑀢𑀁 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑀁 𑀦𑀸𑀫𑀸’’𑀢𑀺 𑀯𑀤𑀦𑁆𑀢𑀺. 𑀫𑁂𑀣𑀼𑀦𑀦𑁆𑀢𑀺 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑁂𑀦 𑀲𑀤𑀺𑀲𑀪𑀸𑀯𑀸𑀧𑀢𑁆𑀢𑀺𑀬𑀸 𑀫𑀺𑀣𑀼𑀦𑀸𑀦𑀁 𑀇𑀤𑀁 𑀫𑁂𑀣𑀼𑀦𑀁, 𑀫𑀢𑀺𑀢𑁆𑀣𑀺𑀆𑀤𑀻𑀦𑀁 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑁂𑀦 𑀲𑀤𑀺𑀲𑀢𑁆𑀢𑀸𑀪𑀸𑀯𑁂𑀧𑀺 𑀢𑀢𑁆𑀣 𑀯𑀻𑀢𑀺𑀓𑁆𑀓𑀫𑁄 𑀭𑀼𑀴𑁆𑀳𑀺𑀬𑀸 ‘‘𑀫𑁂𑀣𑀼𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀧𑀸𑀭𑀸𑀚𑀺𑀓𑁄𑀢𑀺𑀧𑀭𑀸𑀚𑀺𑀢𑁄, 𑀧𑀭𑀸𑀚𑀬𑀫𑀸𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑀺 𑀧𑀸𑀭𑀸𑀚𑀺𑀓-𑀲𑀤𑁆𑀤𑁄 𑀲𑀺𑀓𑁆𑀔𑀸𑀧𑀤𑀸𑀧𑀢𑁆𑀢𑀺𑀧𑀼𑀕𑁆𑀕𑀮𑁂𑀲𑀼 𑀯𑀢𑁆𑀢𑀢𑀺. 𑀢𑀢𑁆𑀣 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀆𑀦𑀦𑁆𑀤 𑀅𑀦𑀯𑀓𑀸𑀲𑁄, 𑀬𑀁 𑀢𑀣𑀸𑀕𑀢𑁄 𑀯𑀚𑁆𑀚𑀻𑀦𑀁 𑀯𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀦𑀁 𑀯𑀸 𑀓𑀸𑀭𑀡𑀸 𑀲𑀸𑀯𑀓𑀸𑀦𑀁 𑀧𑀸𑀭𑀸𑀚𑀺𑀓𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀲𑀫𑀽𑀳𑀦𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁪𑁩) 𑀏𑀯𑀁 𑀲𑀺𑀓𑁆𑀔𑀸𑀧𑀤𑁂 𑀯𑀢𑁆𑀢𑀫𑀸𑀦𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀆𑀧𑀢𑁆𑀢𑀺 𑀢𑁆𑀯𑀁 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄 𑀧𑀸𑀭𑀸𑀚𑀺𑀓’’𑀦𑁆𑀢𑀺 (𑀧𑀸𑀭𑀸. 𑁬𑁭) 𑀆𑀧𑀢𑁆𑀢𑀺𑀬𑀸. ‘‘𑀦 𑀫𑀬𑀁 𑀧𑀸𑀭𑀸𑀚𑀺𑀓𑀸, 𑀬𑁄 𑀅𑀯𑀳𑀝𑁄, 𑀲𑁄 𑀧𑀸𑀭𑀸𑀚𑀺𑀓𑁄’’𑀢𑀺 (𑀧𑀸𑀭𑀸. 𑁧𑁫𑁫) 𑀏𑀯𑀁 𑀧𑀼𑀕𑁆𑀕𑀮𑁂. ‘‘𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦 𑀅𑀦𑀼𑀤𑁆𑀥𑀁𑀲𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁩𑁮𑁪) 𑀧𑀦 𑀥𑀫𑁆𑀫𑁂 𑀯𑀢𑁆𑀢𑀢𑀻𑀢𑀺 𑀯𑀤𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀢𑀢𑁆𑀣 𑀥𑀫𑁆𑀫𑁄𑀢𑀺 𑀓𑀢𑁆𑀣𑀘𑀺 𑀆𑀧𑀢𑁆𑀢𑀺, 𑀓𑀢𑁆𑀣𑀘𑀺 𑀲𑀺𑀓𑁆𑀔𑀸𑀧𑀤𑀫𑁂𑀯 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 𑀲𑁄 𑀯𑀺𑀲𑀼𑀁 𑀦 𑀯𑀢𑁆𑀢𑀩𑁆𑀩𑁄.

𑀢𑀢𑁆𑀣 𑀲𑀺𑀓𑁆𑀔𑀸𑀧𑀤𑀁 𑀬𑁄 𑀢𑀁 𑀅𑀢𑀺𑀓𑁆𑀓𑀫𑀢𑀺 𑀢𑀁 𑀧𑀭𑀸𑀚𑁂𑀢𑀺, 𑀢𑀲𑁆𑀫𑀸 ‘‘𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀧𑀢𑁆𑀢𑀺 𑀧𑀦 𑀬𑁄 𑀦𑀁 𑀅𑀚𑁆𑀛𑀸𑀧𑀚𑁆𑀚𑀢𑀺 𑀢𑀁 𑀧𑀭𑀸𑀚𑁂𑀢𑀺, 𑀢𑀲𑁆𑀫𑀸 ‘‘𑀧𑀸𑀭𑀸𑀚𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀧𑀼𑀕𑁆𑀕𑀮𑁄 𑀬𑀲𑁆𑀫𑀸 𑀧𑀭𑀸𑀚𑀺𑀢𑁄 𑀧𑀭𑀸𑀚𑀬𑀫𑀸𑀧𑀦𑁆𑀦𑁄, 𑀢𑀲𑁆𑀫𑀸 ‘‘𑀧𑀸𑀭𑀸𑀚𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀺𑀓𑁆𑀔𑀸𑀧𑀤𑀸𑀧𑀢𑁆𑀢𑀻𑀲𑀼 𑀧𑀸𑀭𑀸𑀚𑀺𑀓-𑀲𑀤𑁆𑀤𑁄 𑀧𑀭𑀸𑀚𑁂𑀢𑀻𑀢𑀺 ‘‘𑀧𑀸𑀭𑀸𑀚𑀺𑀓𑁄’’𑀢𑀺 𑀓𑀢𑁆𑀢𑀼𑀲𑀸𑀥𑀦𑁄, 𑀧𑀼𑀕𑁆𑀕𑀮𑁂 𑀧𑀦 𑀧𑀭𑀸𑀚𑀻𑀬𑀢𑀻𑀢𑀺 𑀓𑀫𑁆𑀫𑀲𑀸𑀥𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. ‘‘𑀦𑀭𑁄’’𑀢𑀺 𑀇𑀫𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀪𑀺𑀓𑁆𑀔𑀼𑀬𑁂𑀯 𑀅𑀥𑀺𑀧𑁆𑀧𑁂𑀢𑁄. 𑀲𑀸𑀫𑀜𑁆𑀜𑀚𑁄𑀢𑀦𑀸 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀻𑀢𑀺.

𑁧𑁨. 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑁂𑀢𑀺 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀏𑀓𑀓𑁄𑀝𑁆𑀞𑀸𑀲𑀸𑀯𑀲𑁂𑀲𑀁 𑀓𑀢𑁆𑀯𑀸 𑀔𑀸𑀤𑀺𑀢𑁂. 𑀉𑀧𑀟𑁆𑀠𑀓𑁆𑀔𑀸𑀬𑀺𑀢𑁂𑀢𑀺 𑀲𑀫𑀪𑀸𑀕𑀸𑀯𑀲𑁂𑀲𑀁 𑀔𑀸𑀤𑀺𑀢𑁂. 𑀣𑀽𑀮𑁄 𑀅𑀘𑁆𑀘𑀬𑁄 𑀣𑀼𑀮𑁆𑀮𑀘𑁆𑀘𑀬𑁄, 𑀲𑁄𑀬𑁂𑀯 𑀆𑀧𑀚𑁆𑀚𑀻𑀬𑀢𑀻𑀢𑀺 𑀆𑀧𑀢𑁆𑀢𑀻𑀢𑀺 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺. 𑀧𑀸𑀘𑀺𑀢𑁆𑀢𑀺𑀬𑀸𑀤𑀬𑁄 𑀲𑀦𑁆𑀥𑀸𑀬𑁂𑀢𑁆𑀣 𑀣𑀼𑀮𑁆𑀮𑀘𑁆𑀘𑀬𑀯𑁄𑀳𑀸𑀭𑁄, 𑀦 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑁂𑀢𑀺 𑀤𑀝𑁆𑀞𑀩𑁆𑀩𑀁. 𑀲𑁂𑀲𑁂𑀢𑀺 𑀅𑀯𑀲𑁂𑀲𑁂 𑀉𑀧𑀓𑀘𑁆𑀙𑀓𑀸𑀤𑀻𑀲𑀼. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀯𑀲𑁂𑀲𑀲𑀭𑀻𑀭𑁂 𑀉𑀧𑀓𑀘𑁆𑀙𑀓𑀸𑀤𑀻𑀲𑀼 𑀤𑀼𑀓𑁆𑀓𑀝’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁫𑁯-𑁬𑁦). 𑀤𑀼𑀝𑁆𑀞𑀼 𑀓𑀢𑀦𑁆𑀢𑀺 𑀤𑀼𑀓𑁆𑀓𑀝𑀁, 𑀤𑀼𑀓𑁆𑀓𑀝-𑀲𑀤𑁆𑀤𑁄 𑀦𑀺𑀬𑀢𑀦𑀧𑀼𑀁𑀲𑀓𑀢𑁆𑀢𑀸 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲𑀸𑀧𑀺 𑀆𑀧𑀢𑁆𑀢𑀺-𑀲𑀤𑁆𑀤𑀲𑁆𑀲 𑀲𑀮𑀺𑀗𑁆𑀕𑁂𑀦 𑀯𑀺𑀲𑁂𑀲𑀦𑀁 𑀳𑁄𑀢𑀺.

𑁧𑁩. 𑀦𑀺𑀫𑀺𑀢𑁆𑀢𑀫𑀢𑁆𑀢𑀁 𑀲𑁂𑀲𑁂𑀢𑁆𑀯𑀸 𑀔𑀸𑀬𑀺𑀢𑁂𑀧𑀻𑀢𑀺 𑀏𑀢𑁆𑀣 𑀢𑀺𑀡𑁆𑀡𑀫𑀜𑁆𑀜𑀢𑀭𑀁 𑀦𑀺𑀫𑀺𑀢𑁆𑀢𑀁 𑀲𑁂𑀲𑁂𑀢𑁆𑀯𑀸 𑀲𑀓𑀮𑀲𑀭𑀻𑀭𑁂 𑀔𑀸𑀤𑀺𑀢𑁂𑀧𑀺. 𑀧𑀺-𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑁂, 𑀧𑀕𑁂𑀯 𑀇𑀢𑀭𑁂𑀢𑀺 𑀤𑀻𑀧𑁂𑀢𑀺. 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀅𑀓𑁆𑀔𑀸𑀬𑀺𑀢𑁂 𑀯𑀸 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑁂 𑀯𑀸𑀢𑀺 𑀤𑁆𑀯𑀺𑀥𑀸 𑀯𑀼𑀢𑁆𑀢𑁂𑀲𑀼 𑀢𑀻𑀲𑀼 𑀦𑀺𑀫𑀺𑀢𑁆𑀢𑁂𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀫𑁂𑀣𑀼𑀦𑀁 𑀲𑁂𑀯𑀢𑁄𑀧𑀺 𑀧𑀭𑀸𑀚𑀬𑁄 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀯𑀢𑁄𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀅𑀧𑁂𑀓𑁆𑀔𑀸𑀬𑀁. 𑀢𑀲𑁆𑀫𑀸 𑀦 𑀓𑁂𑀯𑀮𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀫𑁂𑀯𑀸𑀢𑀺 𑀅𑀧𑁂𑀓𑁆𑀔𑀢𑀺. 𑀲𑀦𑁆𑀣𑀢𑀸𑀤𑀬𑁄 𑀯𑀺𑀓𑀧𑁆𑀧𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀏𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑀸.

𑁧𑁪. ‘‘𑀉𑀤𑁆𑀥𑀼𑀫𑀸𑀢𑀸𑀤𑀺𑀲𑀫𑁆𑀧𑀢𑁆𑀢𑁂’’𑀢𑀺 𑀏𑀢𑁆𑀣 ‘‘𑀬𑀤𑀸 𑀧𑀦 𑀲𑀭𑀻𑀭𑀁 𑀉𑀤𑁆𑀥𑀼𑀫𑀸𑀢𑀓𑀁 𑀳𑁄𑀢𑀺 𑀓𑀼𑀣𑀺𑀢𑀁 𑀦𑀻𑀮𑀫𑀓𑁆𑀔𑀺𑀓𑀸𑀲𑀫𑀸𑀓𑀺𑀡𑁆𑀡𑀁 𑀓𑀺𑀫𑀺𑀓𑀼𑀮𑀲𑀫𑀸𑀓𑀼𑀮𑀁 𑀦𑀯𑀳𑀺 𑀯𑀡𑀫𑀼𑀔𑁂𑀳𑀺 𑀧𑀕𑁆𑀖𑀭𑀺𑀢𑀧𑀼𑀩𑁆𑀩𑀓𑀼𑀡𑀧𑀪𑀸𑀯𑁂𑀦 𑀉𑀧𑀕𑀦𑁆𑀢𑀼𑀫𑁆𑀧𑀺 𑀅𑀲𑀓𑁆𑀓𑀼𑀡𑁂𑀬𑁆𑀬𑀁, 𑀢𑀤𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀜𑁆𑀘 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼𑀜𑁆𑀘 𑀚𑀳𑀢𑀺, 𑀢𑀸𑀤𑀺𑀲𑁂 𑀲𑀭𑀻𑀭𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀧𑀓𑁆𑀓𑀫𑀢𑁄 𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁫𑁯-𑁬𑁦) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀲𑀩𑁆𑀩𑀢𑁆𑀣𑀸𑀧𑀺 𑀘𑀸𑀢𑀺 𑀅𑀓𑁆𑀔𑀸𑀬𑀺𑀢𑀸𑀤𑀺𑀲𑀩𑁆𑀩𑀯𑀺𑀓𑀧𑁆𑀧𑁄𑀧𑀕𑀢𑀸𑀦𑀺 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑀸𑀦𑀺 𑀕𑀳𑀺𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣𑀸𑀧𑀺 𑀯𑀻𑀢𑀺𑀓𑁆𑀓𑀫𑁄 𑀅𑀦𑀸𑀧𑀢𑁆𑀢𑀺 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀤𑀼𑀓𑁆𑀓𑀝’’𑀦𑁆𑀢𑀺. ‘‘𑀔𑀸𑀬𑀺𑀢𑀓𑁆𑀔𑀸𑀬𑀺𑀢’’𑀦𑁆𑀢𑀺𑀆𑀤𑀻𑀲𑀼 𑀔𑀸𑀬𑀺𑀢𑀓𑁆𑀔𑀸𑀬𑀺𑀢𑀜𑁆𑀘 𑀦𑀸𑀫𑁂𑀢𑀁 𑀲𑀩𑁆𑀩𑀁 𑀫𑀢𑀲𑀭𑀻𑀭𑀓𑁂𑀬𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀦 𑀚𑀻𑀯𑀫𑀸𑀦𑁂𑀢𑀺 𑀬𑁄𑀚𑁂𑀢𑀩𑁆𑀩𑀁.

𑁧𑁫. 𑀚𑀻𑀯𑀫𑀸𑀦𑁂 𑀓𑀣𑀦𑁆𑀢𑀺 𑀆𑀳 ‘‘𑀙𑀺𑀦𑁆𑀤𑀺𑀢𑁆𑀯𑀸 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀯𑀡𑀲𑀗𑁆𑀔𑁂𑀧𑀢𑁄𑀢𑀺 𑀯𑀡𑀲𑀗𑁆𑀕𑀳𑀢𑁄. 𑀢𑀲𑁆𑀫𑀺𑀦𑁆𑀢𑀺 𑀬𑀢𑁆𑀣 𑀞𑀺𑀢𑀁 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀸𑀝𑀺𑀢𑀁, 𑀢𑀲𑁆𑀫𑀺𑀁 𑀧𑀤𑁂𑀲𑁂. 𑀏𑀢𑁆𑀣 𑀤𑀼𑀢𑀺𑀬𑁄 𑀧𑀦-𑀲𑀤𑁆𑀤𑁄 𑀇𑀥 𑀅𑀤𑀲𑁆𑀲𑀺𑀢𑀁 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀦𑀬𑁂𑀦 𑀯𑀺𑀜𑁆𑀜𑀸𑀬𑀫𑀸𑀦𑀁 𑀅𑀢𑁆𑀣𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀅𑀝𑁆𑀞𑀓𑀣𑀸𑀬𑀳𑀺 ‘‘𑀬𑀤𑀺𑀧𑀺 𑀦𑀺𑀫𑀺𑀢𑁆𑀢𑀁 𑀲𑀩𑁆𑀩𑀲𑁄 𑀔𑀸𑀬𑀺𑀢𑀁, 𑀙𑀯𑀺𑀘𑀫𑁆𑀫𑀫𑁆𑀧𑀺 𑀦𑀢𑁆𑀣𑀺, 𑀦𑀺𑀫𑀺𑀢𑁆𑀢𑀲𑀡𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀧𑀯𑁂𑀲𑀦𑀁 𑀚𑀸𑀬𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯𑀸’’𑀢𑀺 𑀏𑀯𑀁 𑀅𑀚𑀻𑀯𑀫𑀸𑀦𑁂 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀸𑀦𑀼𑀲𑀸𑀭𑁂𑀦 𑀚𑀻𑀯𑀫𑀸𑀦𑁂𑀧𑀺 𑀙𑀯𑀺𑀘𑀫𑁆𑀫𑀫𑀢𑁆𑀢𑀁 𑀘𑁂 𑀲𑀩𑁆𑀩𑀲𑁄 𑀉𑀧𑁆𑀧𑀸𑀝𑀺𑀢𑀁, 𑀦𑀺𑀫𑀺𑀢𑁆𑀢𑀲𑀡𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀧𑀯𑁂𑀲𑀦𑀓𑁆𑀔𑀫𑀁 𑀳𑁄𑀢𑀺, 𑀢𑀢𑁆𑀣 𑀲𑁂𑀯𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯𑀸𑀢𑀺 𑀯𑀺𑀜𑁆𑀜𑀸𑀬𑀫𑀸𑀦𑀫𑀢𑁆𑀣𑀁 𑀚𑁄𑀢𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁬. 𑀢𑀢𑁄 𑀦𑀺𑀫𑀺𑀢𑁆𑀢𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀢𑀺𑀢𑀸𑀬𑀸𑀢𑀺 𑀧𑀢𑀺𑀢𑀸𑀬𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀦𑀺𑀫𑀺𑀢𑁆𑀢𑀢𑁄𑀢𑀺 𑀦𑀺𑀫𑀺𑀢𑁆𑀢𑀧𑁆𑀧𑀤𑁂𑀲𑀢𑁄 𑀧𑀢𑀺𑀢𑀸𑀬𑀁 𑀫𑀁𑀲𑀧𑁂𑀲𑀺𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀢𑀘𑁆𑀙𑁂𑀢𑁆𑀯𑀸 𑀯𑀸 𑀧𑀢𑀺𑀢𑀸𑀬𑀁 𑀢𑀲𑁆𑀲𑀁 𑀦𑀺𑀫𑀺𑀢𑁆𑀢𑀫𑀁𑀲𑀧𑁂𑀲𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀫𑁂𑀣𑀼𑀦𑀭𑀸𑀕𑁂𑀦 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀯𑀺𑀦𑀺𑀤𑁆𑀤𑀺𑀲𑁂𑀢𑀺 𑀬𑁄𑀚𑀦𑀸.

𑁧𑁭. ‘‘𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑁂𑀧𑀻’’𑀢𑀺𑀆𑀤𑀺𑀕𑀸𑀣𑀸𑀬 ‘‘𑀙𑀺𑀦𑁆𑀤𑀺𑀢𑁆𑀯𑀸’’𑀢𑀺𑀆𑀤𑀺𑀓𑀸 𑀅𑀝𑁆𑀞𑀓𑀣𑀸 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀸. 𑀲𑀢𑀻𑀢𑀺 𑀏𑀢𑁆𑀣 ‘‘𑀅𑀯𑀲𑀺𑀝𑁆𑀞𑁂’’𑀢𑀺 𑀧𑀸𑀞𑀲𑁂𑀲𑁄. 𑀚𑀻𑀯𑀫𑀸𑀦𑁂𑀢𑀺 𑀏𑀢𑁆𑀣 ‘‘𑀲𑀭𑀻𑀭𑁂’’𑀢𑀺 𑀧𑀸𑀞𑀲𑁂𑀲𑁄. 𑀚𑀻𑀯𑀫𑀸𑀦𑀲𑀭𑀻𑀭𑁂 𑀧𑀦 𑀙𑀺𑀦𑁆𑀤𑀺𑀢𑁆𑀯𑀸 𑀢𑀘𑁆𑀙𑁂𑀢𑁆𑀯𑀸 𑀦𑀺𑀫𑀺𑀢𑁆𑀢𑁂 𑀉𑀧𑁆𑀧𑀸𑀝𑀺𑀢𑁂 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑁂𑀧𑀺 𑀫𑀁𑀲𑁂, 𑀦𑁆𑀳𑀸𑀭𑀼𑀫𑁆𑀳𑀺 𑀯𑀸 𑀅𑀯𑀲𑀺𑀝𑁆𑀞𑁂 𑀲𑀢𑀺 𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀦𑁆𑀢𑁄 𑀧𑀭𑀸𑀚𑀺𑀢𑁄𑀢𑀺 𑀬𑁄𑀚𑀦𑀸.

𑁧𑁮. ‘‘𑀓𑀡𑁆𑀡𑀘𑁆𑀙𑀺𑀤𑁆𑀤𑀓𑁆𑀔𑀻’’𑀢𑀺 𑀕𑀸𑀣𑀸𑀬 ‘‘𑀚𑀻𑀯𑀫𑀸𑀦𑁂’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, ‘‘𑀲𑀭𑀻𑀭𑁂’’𑀢𑀺 𑀧𑀸𑀞𑀲𑁂𑀲𑁄. ‘‘𑀅𑀲𑁆𑀲𑀕𑁄𑀫𑀳𑀺𑀲𑀸𑀤𑀻𑀦’’𑀦𑁆𑀢𑀺𑀆𑀤𑀺𑀦𑀸 𑀅𑀲𑁆𑀲𑀸𑀤𑀻𑀦𑀁 𑀯𑀓𑁆𑀔𑀫𑀸𑀦𑀢𑁆𑀢𑀸 𑀧𑀸𑀭𑀺𑀲𑁂𑀲𑀢𑁄 ‘‘𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 𑀮𑀩𑁆𑀪𑀢𑀺. 𑀫𑀦𑀼𑀲𑁆𑀲𑀸𑀦𑀁 𑀚𑀻𑀯𑀫𑀸𑀦𑀲𑀭𑀻𑀭𑁂 𑀓𑀡𑁆𑀡…𑀧𑁂… 𑀯𑀡𑁂𑀲𑀼 𑀯𑀸𑀢𑀺 𑀬𑁄𑀚𑀦𑀸. 𑀯𑀢𑁆𑀣𑀺𑀓𑁄𑀲𑁂𑀢𑀺 𑀫𑀼𑀢𑁆𑀢𑀧𑀣𑀩𑁆𑀪𑀦𑁆𑀢𑀭𑁂. 𑀯𑀡𑁂𑀲𑀼 𑀯𑀸𑀢𑀺 𑀲𑀢𑁆𑀣𑀓𑀸𑀤𑀻𑀳𑀺 𑀓𑀢𑀯𑀡𑁂𑀲𑀼. 𑀅𑀗𑁆𑀕𑀚𑀸𑀢𑀦𑁆𑀢𑀺 𑀢𑀺𑀮𑀫𑀢𑁆𑀢𑀫𑁆𑀧𑀺 𑀅𑀗𑁆𑀕𑀚𑀸𑀢𑁂𑀓𑀤𑁂𑀲𑀁. 𑀭𑀸𑀕𑀸𑀢𑀺 𑀫𑁂𑀣𑀼𑀦𑀭𑀸𑀕𑁂𑀦.

𑁧𑁯. 𑀅𑀯𑀲𑁂𑀲𑀲𑀭𑀻𑀭𑀲𑁆𑀫𑀺𑀦𑁆𑀢𑀺 𑀓𑀡𑁆𑀡𑀘𑁆𑀙𑀺𑀤𑁆𑀤𑀸𑀤𑀺𑀬𑀣𑀸𑀯𑀼𑀢𑁆𑀢𑀲𑀭𑀻𑀭𑀸𑀯𑀬𑀯𑀯𑀚𑁆𑀚𑀺𑀢𑀲𑀭𑀻𑀭𑀧𑁆𑀧𑀤𑁂𑀲𑁂. 𑀢𑁂𑀦𑀸𑀳 ‘‘𑀉𑀧𑀓𑀘𑁆𑀙𑀽𑀭𑀼𑀓𑀸𑀤𑀺𑀲𑀽’’𑀢𑀺 𑀉𑀧𑀓𑀘𑁆𑀙𑀁 𑀦𑀸𑀫 𑀩𑀸𑀳𑀼𑀫𑀽𑀮𑀦𑁆𑀢𑀭𑀁. 𑀊𑀭𑀼𑀓𑀸𑀤𑀺𑀲𑀽𑀢𑀺 𑀊𑀭𑀼𑀯𑁂𑀫𑀚𑁆𑀛𑀸𑀤𑀻𑀲𑀼. 𑀆𑀤𑀺-𑀲𑀤𑁆𑀤𑁂𑀦 𑀯𑀼𑀢𑁆𑀢𑀸𑀯𑀲𑁂𑀲𑀁 𑀲𑀭𑀻𑀭𑀧𑁆𑀧𑀤𑁂𑀲𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀅𑀗𑁆𑀕𑀚𑀸𑀢’’𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. ‘‘𑀧𑀯𑁂𑀲𑁂𑀢𑁆𑀯𑀸’’𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺, 𑀅𑀗𑁆𑀕𑀚𑀸𑀢𑀁 𑀢𑀺𑀮𑀩𑀻𑀚𑀫𑀢𑁆𑀢𑀁 𑀧𑀯𑁂𑀲𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀲𑀸 𑀫𑁂𑀣𑀼𑀦𑀭𑀸𑀕𑀲𑁆𑀲 𑀲𑁂𑀯𑀫𑀸𑀦𑀲𑁆𑀲𑀸𑀢𑀺 𑀫𑁂𑀣𑀼𑀦𑀭𑀸𑀕𑁂𑀦 𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀲𑀦𑁆𑀣𑀢𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀏𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑁄.

𑁨𑁦. 𑀅𑀲𑁆𑀲𑀕𑁄𑀫𑀳𑀺𑀲𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀕𑁄𑀓𑀡𑁆𑀡𑀕𑀯𑀚𑀸𑀤𑀬𑁄 𑀲𑀗𑁆𑀕𑀳𑀺𑀢𑀸. 𑀅𑀲𑁆𑀲𑀸𑀤𑀬𑁄 𑀧𑀸𑀓𑀝𑀸𑀬𑁂𑀯. ‘‘𑀫𑀢𑀸𑀦’’𑀦𑁆𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀚𑀻𑀯𑀫𑀸𑀦𑀸𑀦’’𑀦𑁆𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺. 𑀲𑁂𑀯𑀦𑁆𑀢𑀺 ‘‘𑀯𑀲𑀸 𑀫𑁂𑀣𑀼𑀦𑀭𑀸𑀕𑀲𑁆𑀲𑀸’’𑀢𑀺 𑀅𑀦𑀼𑀯𑀢𑁆𑀢𑀫𑀸𑀦𑀢𑁆𑀢𑀸 𑀫𑁂𑀣𑀼𑀦𑀭𑀸𑀕𑀯𑀲𑁂𑀦 𑀢𑀺𑀮𑀩𑀻𑀚𑀫𑀢𑁆𑀢𑀫𑁆𑀧𑀺 𑀅𑀗𑁆𑀕𑀚𑀸𑀢𑀧𑁆𑀧𑀤𑁂𑀲𑀁 𑀧𑀯𑁂𑀲𑁂𑀦𑁆𑀢𑁄 𑀣𑀼𑀮𑁆𑀮𑀘𑁆𑀘𑀬𑀁 𑀨𑀼𑀲𑁂𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 ‘‘𑀑𑀝𑁆𑀞𑀕𑀤𑁆𑀭𑀪𑀤𑀦𑁆𑀢𑀻𑀦𑀁, 𑀅𑀲𑁆𑀲𑀕𑁄𑀫𑀳𑀺𑀲𑀸𑀤𑀺𑀦’’𑀦𑁆𑀢𑀺 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀲𑀢𑀺 𑀅𑀝𑁆𑀞𑀓𑀣𑀸𑀯𑀲𑀸𑀦𑁂 𑀦𑀺𑀤𑁆𑀤𑀺𑀝𑁆𑀞𑁂𑀦 𑀧𑀓𑀸𑀭𑀢𑁆𑀣𑀯𑀸𑀘𑀺𑀦𑀸 𑀆𑀤𑀺-𑀲𑀤𑁆𑀤𑁂𑀦 𑀣𑀼𑀮𑁆𑀮𑀘𑁆𑀘𑀬𑀯𑀻𑀢𑀺𑀓𑁆𑀓𑀫𑀸𑀭𑀳𑀦𑀸𑀲𑀸𑀯𑀢𑁆𑀣𑀺𑀓𑁄𑀲𑀯𑀦𑁆𑀢𑁄 𑀅𑀯𑀼𑀢𑁆𑀢𑀸 𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀕𑀬𑁆𑀳𑀦𑁆𑀢𑀺. ‘‘𑀅𑀲𑁆𑀲𑀕𑁄𑀫𑀳𑀺𑀲𑀸𑀤𑀻𑀦’’𑀦𑁆𑀢𑀺 𑀧𑀞𑀫𑀧𑀸𑀤𑀸𑀯𑀲𑀸𑀦𑁂 𑀦𑀺𑀤𑁆𑀤𑀺𑀝𑁆𑀞𑁂𑀦 𑀆𑀤𑀺-𑀲𑀤𑁆𑀤𑁂𑀦 𑀑𑀝𑁆𑀞𑀕𑀤𑁆𑀭𑀪𑀤𑀦𑁆𑀢𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀳𑁄𑀢𑀻𑀢𑀺 𑀢𑁂𑀲𑀁 𑀧𑀼𑀦𑀯𑀘𑀦𑀁 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸𑀢𑀺.

𑁨𑁧. 𑀢𑀣𑀸 𑀲𑁂𑀯𑀫𑀸𑀦𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀢𑀺𑀭𑀘𑁆𑀙𑀸𑀦𑀦𑁆𑀢𑀺 𑀢𑀺𑀭𑀺𑀬𑀁 𑀅𑀜𑁆𑀘𑀦𑁆𑀢𑀺 𑀯𑀟𑁆𑀠𑀦𑁆𑀢𑀻𑀢𑀺 𑀢𑀺𑀭𑀘𑁆𑀙𑀸, 𑀲𑀩𑁆𑀩𑁂 𑀘 𑀢𑁂 𑀢𑀺𑀭𑀘𑁆𑀙𑀸𑀘𑀸𑀢𑀺 𑀲𑀩𑁆𑀩𑀢𑀺𑀭𑀘𑁆𑀙𑀸, 𑀢𑁂𑀲𑀁 𑀲𑀩𑁆𑀩𑀢𑀺𑀭𑀘𑁆𑀙𑀸𑀦𑀁. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀯𑀲𑀸 𑀫𑁂𑀣𑀼𑀦𑀭𑀸𑀕𑀲𑁆𑀲𑀸’’𑀢𑀺𑀆𑀤𑀻𑀦𑀁 𑀧𑀭𑀸𑀫𑀝𑁆𑀞𑀢𑁆𑀢𑀸 𑀲𑀩𑁆𑀩𑀢𑀺𑀭𑀘𑁆𑀙𑀸𑀦𑀸𑀦𑀁 𑀅𑀓𑁆𑀔𑀺𑀆𑀤𑀻𑀲𑀼 𑀢𑀺𑀮𑀩𑀻𑀚𑀫𑀢𑁆𑀢𑀫𑁆𑀧𑀺 𑀅𑀗𑁆𑀕𑀚𑀸𑀢𑀧𑁆𑀧𑀤𑁂𑀲𑀁 𑀫𑁂𑀣𑀼𑀦𑀭𑀸𑀕𑁂𑀦 𑀧𑀯𑁂𑀲𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣𑀸𑀧𑀺 𑀲𑀦𑁆𑀣𑀢𑀸𑀤𑀺𑀯𑀺𑀓𑀧𑁆𑀧𑁂 𑀦𑀺𑀤𑁆𑀤𑁄𑀲𑀪𑀸𑀯𑁄 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀢𑀫𑁆𑀧𑀺 𑀬𑁄𑀚𑁂𑀢𑀩𑁆𑀩𑀁.

𑁨𑁨. 𑀏𑀯𑀁 𑀢𑀺𑀭𑀘𑁆𑀙𑀸𑀦𑀸𑀦𑀁 𑀚𑀻𑀯𑀫𑀸𑀦𑀓𑀲𑀭𑀻𑀭𑁂 𑀮𑀩𑁆𑀪𑀫𑀸𑀦𑀸 𑀆𑀧𑀢𑁆𑀢𑀺𑀬𑁄 𑀤𑀲𑁆𑀲𑁂𑀢𑁆𑀯𑀸 𑀢𑁂𑀲𑀁𑀬𑁂𑀯 𑀫𑀢𑀲𑀭𑀻𑀭𑁂𑀧𑀺 𑀲𑀫𑁆𑀪𑀯𑀦𑀓𑀆𑀧𑀢𑁆𑀢𑀺𑀬𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑁂𑀲’’𑀦𑁆𑀢𑀺𑀆𑀤𑀺. ‘‘𑀢𑁂𑀲’’𑀦𑁆𑀢𑀺 𑀇𑀫𑀺𑀦𑀸 𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀕𑀳𑀡𑀦𑁆𑀢𑀺 𑀯𑀤𑀦𑁆𑀢𑀺. 𑀫𑀦𑀼𑀲𑁆𑀲𑀸𑀦𑀁 𑀫𑀢𑀸𑀫𑀢𑀲𑀭𑀻𑀭𑁂 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂𑀲𑀼 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑀲𑁆𑀲𑀺𑀢𑀢𑁆𑀢𑀸, 𑀧𑀼𑀦 𑀕𑀳𑀡𑁂 𑀧𑀬𑁄𑀚𑀦𑀸𑀪𑀸𑀯𑀸 𑀢𑁂 𑀯𑀚𑁆𑀚𑁂𑀢𑁆𑀯𑀸 𑀅𑀦𑀼𑀯𑀢𑁆𑀢𑀫𑀸𑀦𑀲𑀩𑁆𑀩𑀢𑀺𑀭𑀘𑁆𑀙𑀸𑀦𑀦𑁆𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀁, 𑀢𑁂𑀲𑀁 𑀲𑀩𑁆𑀩𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀮𑁆𑀮𑀲𑀭𑀻𑀭𑁂𑀲𑀽𑀢𑀺 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀪𑀸𑀯𑀫𑀲𑀫𑁆𑀧𑀢𑁆𑀢𑁂𑀲𑀼 𑀅𑀮𑁆𑀮𑀫𑀢𑀲𑀭𑀻𑀭𑁂𑀲𑀼 𑀢𑀺𑀯𑀺𑀥𑁂 𑀔𑁂𑀢𑁆𑀢𑀲𑁆𑀫𑀺𑀁 𑀅𑀲𑀦𑁆𑀣𑀢𑁂, 𑀲𑀦𑁆𑀣𑀢𑁂 𑀯𑀸 𑀲𑀢𑀺 𑀫𑁂𑀣𑀼𑀦𑀭𑀸𑀕𑀲𑁆𑀲 𑀯𑀲𑀸 𑀲𑁂𑀯𑀢𑁄 𑀢𑀺𑀯𑀺𑀥𑀸𑀧𑀺 𑀆𑀧𑀢𑁆𑀢𑀺 𑀲𑀺𑀬𑀸𑀢𑀺 𑀅𑀦𑀼𑀯𑀢𑁆𑀢𑀫𑀸𑀦𑀧𑀤𑁂𑀳𑀺 𑀲𑀳 𑀬𑁄𑀚𑀦𑀸.

𑀢𑀺𑀯𑀺𑀥𑁂 𑀔𑁂𑀢𑁆𑀢𑀲𑁆𑀫𑀺𑀦𑁆𑀢𑀺 𑀫𑀢𑀫𑀦𑀼𑀲𑁆𑀲𑀲𑀭𑀻𑀭𑁂 𑀯𑀼𑀢𑁆𑀢𑀦𑀬𑁂𑀦 𑀅𑀓𑁆𑀔𑀸𑀬𑀺𑀢𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑀪𑁂𑀤𑁂 𑀫𑀕𑁆𑀕𑀢𑁆𑀢𑀬𑀲𑀗𑁆𑀔𑀸𑀢𑁂 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂 𑀘 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑀉𑀧𑀟𑁆𑀠𑀓𑁆𑀔𑀸𑀬𑀺𑀢𑀪𑁂𑀤𑁂 𑀢𑀲𑁆𑀫𑀺𑀁𑀬𑁂𑀯 𑀫𑀕𑁆𑀕𑀢𑁆𑀢𑀬𑀲𑀗𑁆𑀔𑀸𑀢𑁂 𑀘, 𑀅𑀓𑁆𑀔𑀸𑀬𑀺𑀢𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑀪𑁂𑀤𑁂 𑀓𑀡𑁆𑀡𑀘𑁆𑀙𑀺𑀤𑁆𑀤𑀓𑁆𑀔𑀺𑀦𑀸𑀲𑀸𑀯𑀢𑁆𑀣𑀺𑀓𑁄𑀲𑀯𑀡𑀲𑀗𑁆𑀔𑀸𑀢𑁂 𑀘 𑀣𑀼𑀮𑁆𑀮𑀘𑁆𑀘𑀬𑀓𑁆𑀔𑁂𑀢𑁆𑀢𑁂 𑀉𑀧𑀟𑁆𑀠𑀓𑁆𑀔𑀸𑀬𑀺𑀢𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑀪𑁂𑀤𑁂 𑀢𑀲𑁆𑀫𑀺𑀁𑀬𑁂𑀯 𑀓𑀡𑁆𑀡𑀘𑁆𑀙𑀺𑀤𑁆𑀤𑀓𑁆𑀔𑀺𑀦𑀸𑀲𑀸𑀯𑀢𑁆𑀣𑀺𑀓𑁄𑀲𑀯𑀡𑀲𑀗𑁆𑀔𑀸𑀢𑁂 𑀘, 𑀅𑀓𑁆𑀔𑀸𑀬𑀺𑀢𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑀉𑀧𑀟𑁆𑀠𑀓𑁆𑀔𑀸𑀬𑀺𑀢 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑀪𑁂𑀤𑁂 𑀅𑀯𑀲𑁂𑀲𑀲𑀭𑀻𑀭𑀲𑀗𑁆𑀔𑀸𑀢𑁂 𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂 𑀘𑀸𑀢𑀺 𑀢𑀺𑀯𑀺𑀥𑁂𑀧𑀺 𑀔𑁂𑀢𑁆𑀢𑁂. 𑀲𑀢𑀻𑀢𑀺 𑀯𑀺𑀚𑁆𑀚𑀫𑀸𑀦𑁂. 𑀲𑀦𑁆𑀣𑀢𑁂 𑀯𑀸 𑀅𑀲𑀦𑁆𑀣𑀢𑁂 𑀯𑀸 𑀫𑁂𑀣𑀼𑀦𑀭𑀸𑀕𑀲𑁆𑀲 𑀯𑀲𑀸 𑀲𑁂𑀯𑀢𑁄 𑀬𑀣𑀸𑀭𑀳𑀁 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀲𑀗𑁆𑀔𑀸𑀢𑀸 𑀢𑀺𑀯𑀺𑀥𑀸 𑀆𑀧𑀢𑁆𑀢𑀺 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀏𑀢𑁂𑀲𑀫𑁂𑀯 𑀘 𑀉𑀤𑁆𑀥𑀼𑀫𑀸𑀢𑀸𑀤𑀺𑀪𑀸𑀯𑀁 𑀲𑀫𑁆𑀧𑀢𑁆𑀢𑁂 𑀲𑀭𑀻𑀭𑁂 𑀲𑀦𑁆𑀣𑀢𑀸𑀤𑀺𑀯𑀼𑀢𑁆𑀢𑀯𑀺𑀓𑀧𑁆𑀧𑀬𑀼𑀢𑁆𑀢𑁂𑀲𑀼 𑀢𑀻𑀲𑀼 𑀫𑀕𑁆𑀕𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀫𑁂𑀣𑀼𑀦𑀭𑀸𑀕𑁂𑀦 𑀲𑁂𑀯𑀢𑁄 𑀆𑀧𑀚𑁆𑀚𑀺𑀢𑀩𑁆𑀩𑀤𑀼𑀓𑁆𑀓𑀝𑀜𑁆𑀘 𑀉𑀤𑁆𑀥𑀼𑀫𑀸𑀢𑀸𑀤𑀺𑀲𑀫𑁆𑀧𑀢𑁆𑀢𑁂 𑀲𑀩𑁆𑀩𑀢𑁆𑀣𑀸𑀧𑀺 𑀘 𑀤𑀼𑀓𑁆𑀓𑀝𑀦𑁆𑀢𑀺 𑀫𑀦𑀼𑀲𑁆𑀲𑀲𑀭𑀻𑀭𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀜𑁆𑀜𑀸𑀢𑀼𑀁 𑀲𑀓𑁆𑀓𑀸𑀢𑀺 𑀇𑀫𑀲𑁆𑀫𑀺𑀁 𑀢𑀺𑀭𑀘𑁆𑀙𑀸𑀦𑀕𑀢𑀲𑀭𑀻𑀭𑁂 𑀯𑀺𑀲𑁂𑀲𑀫𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀲𑀁 𑀅𑀮𑁆𑀮𑀲𑀭𑀻𑀭𑁂𑀲𑀽’’𑀢𑀺𑀆𑀤𑀻𑀦𑀁 𑀯𑀼𑀢𑁆𑀢𑀢𑁆𑀢𑀸 𑀤𑀼𑀓𑁆𑀓𑀝𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀼𑀣𑀺𑀢𑀓𑀼𑀡𑀧𑁂 𑀧𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝’’𑀦𑁆𑀢𑀺.

𑁨𑁩. 𑀩𑀳𑀺 𑀙𑀼𑀧𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀦𑀺𑀫𑀺𑀢𑁆𑀢𑀁 𑀫𑀼𑀢𑁆𑀢𑀓𑀭𑀡𑀁. ‘‘𑀇𑀢𑁆𑀣𑀺𑀬𑀸’’𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑁂𑀧𑀺 𑀘𑀢𑀼𑀢𑁆𑀣𑀕𑀸𑀣𑀸𑀬 ‘‘𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀧𑀸𑀭𑀺𑀲𑁂𑀲𑀢𑁄 𑀇𑀫𑀺𑀦𑀸 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀺𑀢𑁆𑀣𑀻𑀦𑀫𑁂𑀯 𑀕𑀳𑀡𑀁, 𑀇𑀫𑀺𑀦𑀸 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸𑀧𑀺 𑀕𑀳𑀡𑀲𑁆𑀲. 𑀇𑀫𑀺𑀲𑁆𑀲𑀸𑀦𑀦𑁆𑀢𑀭𑀕𑀸𑀣𑀸𑀬 𑀇𑀢𑁄 ‘‘𑀇𑀢𑁆𑀣𑀺𑀬𑀸’’𑀢𑀺 𑀅𑀦𑀼𑀯𑀢𑁆𑀢𑀺𑀢𑁂 𑀢𑀢𑁆𑀭𑀸𑀧𑀺 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸𑀧𑀺 𑀕𑀳𑀡𑀁 𑀲𑀺𑀬𑀸𑀢𑀺 𑀢𑀫𑁆𑀧𑀺 𑀯𑀚𑁆𑀚𑁂𑀢𑁆𑀯𑀸 𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲 𑀯𑀢𑁆𑀣𑀼𑀪𑀽𑀢𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀫𑁂𑀯 𑀤𑀲𑁆𑀲𑁂𑀢𑀼𑀁 𑀢𑀢𑁆𑀣 𑀯𑀼𑀢𑁆𑀢𑀁 ‘‘𑀇𑀢𑁆𑀣𑀺𑀬𑀸’’𑀢𑀺𑀅𑀥𑀺𑀓𑀯𑀘𑀦𑀫𑁂𑀯 𑀜𑀸𑀧𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀫𑀳𑀸𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁫𑁯-𑁬𑁦) ‘‘𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀫𑁂𑀣𑀼𑀦𑀭𑀸𑀕𑁂𑀦 𑀫𑀼𑀔𑁂𑀦 𑀙𑀼𑀧𑀢𑀺, 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀢𑁆𑀢𑀸 𑀘 𑀥𑀫𑁆𑀫𑀓𑁆𑀔𑀦𑁆𑀥𑀓𑁂 ‘‘𑀦 𑀘 𑀪𑀺𑀓𑁆𑀔𑀯𑁂 𑀭𑀢𑁆𑀢𑀘𑀺𑀢𑁆𑀢𑁂𑀦 𑀅𑀗𑁆𑀕𑀚𑀸𑀢𑀁 𑀙𑀼𑀧𑀺𑀢𑀩𑁆𑀩𑀁, 𑀬𑁄 𑀙𑀼𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁫𑁨) 𑀲𑀸𑀫𑀜𑁆𑀜𑀯𑀘𑀦𑀢𑁄 𑀘 𑀉𑀤𑁆𑀥𑀼𑀫𑀸𑀢𑀸𑀤𑀺𑀪𑀸𑀯𑀫𑀲𑀫𑁆𑀧𑀢𑁆𑀢𑀸𑀬 𑀅𑀮𑁆𑀮𑀫𑀢𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀘 𑀅𑀓𑁆𑀔𑀸𑀬𑀺𑀢𑁂 𑀯𑀸 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑁂 𑀯𑀸 𑀦𑀺𑀫𑀺𑀢𑁆𑀢𑁂 𑀲𑀢𑀺 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀸𑀯𑀢𑁄 𑀢𑀢𑁆𑀣𑀸𑀧𑀺 𑀩𑀳𑀺 𑀙𑀼𑀧𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀅𑀬𑀫𑀢𑁆𑀣𑁄𑀧𑀺 𑀫𑀢𑀸𑀫𑀢𑀯𑀺𑀲𑁂𑀲𑀁 𑀅𑀓𑀢𑁆𑀯𑀸 ‘‘𑀇𑀢𑁆𑀣𑀺𑀬𑀸’’𑀢𑀺 𑀇𑀫𑀺𑀦𑀸𑀯 𑀲𑀸𑀫𑀜𑁆𑀜𑀯𑀘𑀦𑁂𑀦 𑀕𑀳𑁂𑀢𑀩𑁆𑀩𑁄.

𑁨𑁪. 𑀦𑀺𑀫𑀺𑀢𑁆𑀢𑁂𑀦𑀸𑀢𑀺 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑁂𑀦. 𑀫𑀼𑀔𑁂𑀦𑀸𑀢𑀺 𑀧𑀓𑀢𑀺𑀫𑀼𑀔𑁂𑀦. 𑀦𑀺𑀫𑀺𑀢𑁆𑀢𑀁 𑀇𑀢𑁆𑀣𑀺𑀬𑀸𑀢𑀺 𑀚𑀻𑀯𑀫𑀸𑀦𑀓𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀅𑀗𑁆𑀕𑀚𑀸𑀢𑀁. 𑀬𑀲𑁆𑀫𑀸 𑀧𑀦 𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑀫𑀢𑀺𑀢𑁆𑀣𑀺𑀯𑀢𑁆𑀣𑀼𑀫𑁆𑀳𑀺 𑀫𑀢𑀺𑀢𑁆𑀣𑀺𑀬𑀸 𑀲𑀭𑀻𑀭𑁂 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀬𑁄 𑀙𑀼𑀧𑀢𑀺, 𑀢𑀲𑁆𑀲 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀧𑀸𑀭𑀸. 𑁨𑁮𑁧) 𑀯𑀼𑀢𑁆𑀢𑀢𑁆𑀢𑀸 𑀫𑀢𑀫𑀦𑀼𑀲𑁆𑀲𑀺𑀢𑁆𑀣𑀻 𑀦 𑀕𑀳𑁂𑀢𑀩𑁆𑀩𑀸. 𑀢𑀣𑁂𑀯 𑀬𑀓𑁆𑀔𑀺𑀯𑀢𑁆𑀣𑀼𑀫𑁆𑀳𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀬𑀓𑁆𑀔𑀺𑀦𑀺𑀬𑀸 𑀲𑀭𑀻𑀭𑀁 𑀬𑁂𑀦 𑀨𑀼𑀝𑁆𑀞𑀁, 𑀢𑀲𑁆𑀲 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀇𑀥𑁂𑀯 𑀉𑀧𑀭𑀺 𑀤𑀼𑀢𑀺𑀬𑀲𑀗𑁆𑀖𑀸𑀤𑀺𑀲𑁂𑀲𑁂 ‘‘𑀧𑀡𑁆𑀟𑀓𑁂 𑀬𑀓𑁆𑀔𑀺𑀧𑁂𑀢𑀻𑀲𑀼, 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸’’𑀢𑀺 (𑀯𑀺. 𑀯𑀺. 𑁩𑁪𑁧) 𑀯𑀓𑁆𑀔𑀫𑀸𑀦𑀢𑁆𑀢𑀸 𑀘 𑀅𑀫𑀦𑀼𑀲𑁆𑀲𑀺𑀢𑁆𑀣𑀻𑀧𑀺 𑀦 𑀕𑀳𑁂𑀢𑀩𑁆𑀩𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀚𑀻𑀯𑀫𑀸𑀦𑀓𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀅𑀗𑁆𑀕𑀚𑀸𑀢’’𑀦𑁆𑀢𑀺. 𑀅𑀦𑁆𑀢𑁄 𑀧𑀯𑁂𑀲𑁂𑀢𑀼𑀓𑀸𑀫𑀢𑀸𑀬 𑀲𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀸𑀲𑀫𑁆𑀪𑀯𑀢𑁄 ‘‘𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦𑀸’’𑀢𑀺 𑀇𑀫𑀺𑀦𑀸 𑀘 𑀩𑀳𑀺 𑀙𑀼𑀧𑀺𑀢𑀼𑀓𑀸𑀫𑀢𑀸 𑀯𑀺𑀜𑁆𑀜𑀸𑀬𑀢𑀻𑀢𑀺 ‘‘𑀩𑀳𑀻’’𑀢𑀺 𑀅𑀦𑀼𑀯𑀢𑁆𑀢𑀦𑀁 𑀯𑀺𑀦𑀸𑀧𑀺 𑀢𑀤𑀢𑁆𑀣𑁄 𑀮𑀩𑁆𑀪𑀢𑀺. 𑀕𑀭𑀼𑀓𑀦𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄.

𑁨𑁫. 𑀢𑀣𑁂𑀯 𑀩𑀳𑀺 𑀙𑀼𑀧𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸, 𑀅𑀦𑁆𑀢𑁄 𑀅𑀧𑁆𑀧𑀯𑁂𑀲𑁂𑀢𑁆𑀯𑀸 𑀩𑀳𑀺𑀬𑁂𑀯 𑀙𑀼𑀧𑀦𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀪𑀬𑀭𑀸𑀕𑁂𑀦𑀸𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦, 𑀫𑁂𑀣𑀼𑀦𑀭𑀸𑀕𑁂𑀦 𑀯𑀸. 𑀧𑀼𑀭𑀺𑀲𑀲𑁆𑀲𑀸𑀧𑀻𑀢𑀺 𑀚𑀻𑀯𑀫𑀸𑀦𑀓𑀧𑀼𑀭𑀺𑀲𑀲𑁆𑀲𑀧𑀺. 𑀧𑀺-𑀲𑀤𑁆𑀤𑁄 𑀦 𑀓𑁂𑀯𑀮𑀁 𑀯𑀼𑀢𑁆𑀢𑀦𑀬𑁂𑀦 𑀇𑀢𑁆𑀣𑀺𑀬𑀸 𑀦𑀺𑀫𑀺𑀢𑁆𑀢𑀁 𑀨𑀼𑀲𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀺, 𑀅𑀣 𑀔𑁄 𑀧𑀼𑀭𑀺𑀲𑀲𑁆𑀲𑀸𑀧𑀻𑀢𑀺 𑀤𑀻𑀧𑁂𑀢𑀺. ‘‘𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀫𑀼𑀢𑁆𑀢𑀓𑀭𑀡𑀫𑁂𑀯 𑀯𑀼𑀘𑁆𑀘𑀢𑀺. ‘‘𑀚𑀻𑀯𑀫𑀸𑀦𑀓𑀧𑀼𑀭𑀺𑀲𑀲𑁆𑀲𑀸’’𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀓𑀼𑀢𑁄 𑀮𑀩𑁆𑀪𑀢𑀻𑀢𑀺 𑀘𑁂? ‘‘𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀯𑀸 𑀫𑁂𑀣𑀼𑀦𑀭𑀸𑀕𑁂𑀦 𑀯𑀸 𑀚𑀻𑀯𑀫𑀸𑀦𑀓𑀧𑀼𑀭𑀺𑀲𑀲𑁆𑀲 𑀯𑀢𑁆𑀣𑀺𑀓𑁄𑀲𑀁 𑀅𑀧𑁆𑀧𑀯𑁂𑀲𑁂𑀦𑁆𑀢𑁄 𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀙𑀼𑀧𑀢𑀺, 𑀤𑀼𑀓𑁆𑀓𑀝’’𑀦𑁆𑀢𑀺 𑀇𑀢𑁄 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 (𑀧𑀸𑀭𑀸. 𑀅𑀝𑁆𑀞. 𑁧.𑁫𑁯-𑁬𑁦) 𑀮𑀩𑁆𑀪𑀢𑀺.

𑁨𑁬. 𑀅𑀘𑀺𑀭𑀯𑀢𑀺𑀢𑀭𑀦𑁆𑀢𑀸𑀦𑀁 𑀕𑀼𑀦𑁆𑀦𑀁 𑀧𑀺𑀝𑁆𑀞𑀺𑀁 𑀅𑀪𑀺𑀭𑀼𑀳𑀦𑁆𑀢𑀸 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀫𑁂𑀣𑀼𑀦𑀭𑀸𑀕𑁂𑀦 𑀅𑀗𑁆𑀕𑀚𑀸𑀢𑁂𑀦 𑀅𑀗𑁆𑀕𑀚𑀸𑀢𑀁 𑀙𑀼𑀧𑀺𑀁𑀲𑀽𑀢𑀺 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀫𑁆𑀳𑀺 ‘‘𑀦 𑀘 𑀪𑀺𑀓𑁆𑀔𑀯𑁂 𑀭𑀢𑁆𑀢𑀘𑀺𑀢𑁆𑀢𑁂𑀦 𑀅𑀗𑁆𑀕𑀚𑀸𑀢𑀁 𑀙𑀼𑀧𑀺𑀢𑀩𑁆𑀩𑀁, 𑀬𑁄 𑀙𑀼𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁫𑁨) 𑀆𑀕𑀢𑀦𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦𑀺𑀫𑀺𑀢𑁆𑀢𑁂𑀦𑀸’’𑀢𑀺𑀆𑀤𑀺. 𑀏𑀢𑁆𑀣𑀸𑀧𑀺 ‘‘𑀢𑀣𑀸’’𑀢𑀺 𑀇𑀫𑀲𑁆𑀲𑀸𑀦𑀼𑀯𑀢𑁆𑀢𑀦𑀢𑁄 ‘‘𑀩𑀳𑀻’’𑀢𑀺 𑀮𑀩𑁆𑀪𑀢𑀺. 𑀅𑀢𑁆𑀢𑀦𑁄 𑀦𑀺𑀫𑀺𑀢𑁆𑀢𑁂𑀦 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸 𑀦𑀺𑀫𑀺𑀢𑁆𑀢𑀁 𑀫𑁂𑀣𑀼𑀦𑀭𑀸𑀕𑀢𑁄 𑀩𑀳𑀺 𑀙𑀼𑀧𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁭. ‘‘𑀫𑁂𑀣𑀼𑀦𑀭𑀸𑀕𑀢𑁄’’𑀢𑀺 𑀇𑀫𑀺𑀦𑀸 𑀩𑁆𑀬𑀯𑀘𑁆𑀙𑀺𑀦𑁆𑀦𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦𑀸’’𑀢𑀺𑀆𑀤𑀺. 𑀏𑀢𑁆𑀣𑀸𑀧𑀺 ‘‘𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦𑀸’’𑀢𑀺𑀯𑀘𑀦𑀲𑀸𑀫𑀢𑁆𑀣𑀺𑀬𑀸 𑀩𑀳𑀺 𑀙𑀼𑀧𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀦𑀺𑀫𑀺𑀢𑁆𑀢𑀲𑁆𑀲𑀸𑀢𑀺 𑀧𑀲𑁆𑀲𑀸𑀯𑀫𑀕𑁆𑀕𑀲𑁆𑀲. 𑀙𑀼𑀧𑀦𑁂𑀢𑀺 𑀨𑀼𑀲𑀦𑁂.

𑁨𑁮. 𑀢𑀫𑀸𑀯𑀝𑁆𑀝𑀓𑀢𑁂𑀢𑀺 𑀏𑀢𑁆𑀣 ‘‘𑀢𑀁 𑀆𑀯𑀝𑁆𑀝𑀓𑀢𑁂’’𑀢𑀺 𑀧𑀤𑀘𑁆𑀙𑁂𑀤𑁄. 𑀆𑀯𑀝𑁆𑀝𑀓𑀢𑁂𑀢𑀺 𑀯𑀺𑀯𑀝𑁂. ‘‘𑀫𑀼𑀔𑁂’’𑀢𑀺 𑀲𑀫𑁆𑀩𑀦𑁆𑀥𑀺𑀲𑀤𑁆𑀤𑀢𑁆𑀢𑀸, 𑀅𑀜𑁆𑀜𑀲𑁆𑀲 𑀲𑀫𑁆𑀩𑀦𑁆𑀥𑀺𑀦𑁄 𑀘 𑀅𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀲𑀼𑀢𑀸𑀦𑀼𑀮𑁄𑀫𑀺𑀓𑀸𑀦𑀁 𑀲𑀼𑀢𑀲𑀫𑁆𑀩𑀦𑁆𑀥𑀲𑁆𑀲𑁂𑀯 𑀩𑀮𑀯𑀢𑁆𑀢𑀸 𑀘 𑀧𑀼𑀭𑀺𑀫𑀸𑀦𑀦𑁆𑀢𑀭𑀕𑀸𑀣𑀸𑀬 ‘‘𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸 𑀫𑀼𑀔𑁂’’𑀢𑀺 𑀓𑀺𑀜𑁆𑀘𑀸𑀧𑀺 𑀲𑀼𑀢𑀲𑁆𑀲𑁂𑀯 𑀲𑀫𑁆𑀩𑀦𑁆𑀥𑁄 𑀯𑀺𑀜𑁆𑀜𑀸𑀬𑀢𑀺, 𑀢𑀣𑀸𑀧𑀺 𑀇𑀫𑀸𑀬 𑀕𑀸𑀣𑀸𑀬 𑀯𑀺𑀦𑀻𑀢𑀯𑀢𑁆𑀣𑀼𑀫𑁆𑀳𑀺 (𑀧𑀸𑀭𑀸. 𑁭𑁩) ‘‘𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀺𑀯𑀣𑀺𑀓𑀁 𑀕𑀦𑁆𑀢𑁆𑀯𑀸 𑀙𑀺𑀦𑁆𑀦𑀲𑀻𑀲𑀁 𑀧𑀲𑁆𑀲𑀺𑀢𑁆𑀯𑀸 𑀯𑀝𑁆𑀝𑀓𑀢𑁂 𑀫𑀼𑀔𑁂 𑀅𑀘𑁆𑀙𑀼𑀧𑀦𑁆𑀢𑀁 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀲𑀻’’𑀢𑀺 𑀤𑀲𑁆𑀲𑀺𑀢𑀙𑀺𑀦𑁆𑀦𑀲𑀻𑀲𑀯𑀢𑁆𑀣𑀼𑀲𑁆𑀲 𑀲𑀗𑁆𑀕𑀳𑀺𑀢𑀢𑁆𑀢𑀸 𑀫𑀦𑀼𑀲𑁆𑀲𑀫𑀼𑀔𑀫𑁂𑀯 𑀕𑀳𑁂𑀢𑀩𑁆𑀩𑀁 𑀲𑀺𑀬𑀸. 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁, 𑀧𑀦 𑀅𑀫𑀦𑀼𑀲𑁆𑀲𑀸𑀦𑀜𑁆𑀘 𑀫𑀼𑀔𑁂 𑀢𑀣𑀸 𑀧𑀯𑁂𑀲𑁄 𑀦𑀺𑀤𑁆𑀤𑁄𑀲𑁄𑀢𑀺 𑀯𑀢𑁆𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀢𑀢𑁆𑀣𑀸𑀧𑀺 𑀇𑀤𑀫𑁂𑀯 𑀉𑀧𑀮𑀓𑁆𑀔𑀡𑀦𑁆𑀢𑀺 𑀧𑀸𑀭𑀸𑀚𑀺𑀓𑀧𑁆𑀧𑀳𑁄𑀦𑀓𑀸𑀦𑀁 𑀲𑀩𑁆𑀩𑁂𑀲𑀁 𑀫𑀼𑀔𑁂𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀁 𑀅𑀗𑁆𑀕𑀚𑀸𑀢𑀁. 𑀢𑀢𑁆𑀣 𑀆𑀯𑀝𑁆𑀝𑀓𑀢𑁂 𑀧𑀸𑀭𑀸𑀚𑀺𑀓𑀧𑁆𑀧𑀳𑁄𑀦𑀓𑀸𑀦𑀁 𑀫𑀼𑀔𑁂 𑀆𑀓𑀸𑀲𑀕𑀢𑀁 𑀓𑀢𑁆𑀯𑀸 𑀓𑀢𑁆𑀣𑀘𑀺 𑀅𑀨𑀼𑀲𑀸𑀧𑁂𑀢𑁆𑀯𑀸 𑀦𑀻𑀳𑀭𑀦𑁆𑀢𑀲𑁆𑀲 𑀉𑀓𑁆𑀔𑀺𑀧𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀅𑀣 𑀯𑀸 𑀢𑀺𑀭𑀘𑁆𑀙𑀸𑀦𑀸𑀦𑀁 𑀆𑀯𑀝𑁆𑀝𑀓𑀢𑁂 𑀫𑀼𑀔𑁂𑀢𑀺 𑀬𑁄𑀚𑁂𑀢𑁆𑀯𑀸 𑀢𑀤𑀜𑁆𑀜𑀲𑀗𑁆𑀕𑀳𑁄 𑀉𑀧𑀮𑀓𑁆𑀔𑀡𑀯𑀲𑁂𑀦 𑀓𑀸𑀢𑀩𑁆𑀩𑁄.

𑁨𑁯. 𑀢𑀣𑀸𑀢𑀺 ‘‘𑀆𑀓𑀸𑀲𑀕𑀢𑀁 𑀓𑀢𑁆𑀯𑀸’’𑀢𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀭𑀸𑀫𑀲𑀢𑀺. 𑀘𑀢𑀽𑀳𑀺 𑀧𑀲𑁆𑀲𑁂𑀳𑀻𑀢𑀺 𑀲𑀳𑀢𑁆𑀣𑁂 𑀓𑀭𑀡𑀯𑀘𑀦𑀁. ‘‘𑀧𑀲𑁆𑀲𑁂𑀳𑀻’’𑀢𑀺 𑀲𑀫𑁆𑀩𑀦𑁆𑀥𑀺𑀲𑀤𑁆𑀤𑀢𑁆𑀢𑀸 ‘‘𑀦𑀺𑀫𑀺𑀢𑁆𑀢𑀲𑁆𑀲𑀸’’𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺. ‘‘𑀇𑀢𑁆𑀣𑀺𑀬𑀸’’𑀢𑀺 𑀲𑀸𑀫𑀜𑁆𑀜𑀲𑀤𑁆𑀤𑀢𑁆𑀢𑀸 ‘‘𑀲𑀩𑁆𑀩𑀲𑁆𑀲𑀸’’𑀢𑀺 𑀧𑀸𑀞𑀲𑁂𑀲𑁄. 𑀚𑀸𑀢𑀺𑀯𑀸𑀘𑀓𑀢𑁆𑀢𑀸 𑀏𑀓𑀯𑀘𑀦𑀁. ‘‘𑀘𑀢𑀽𑀳𑀺 𑀧𑀲𑁆𑀲𑁂𑀳𑀺, 𑀳𑁂𑀝𑁆𑀞𑀺𑀫𑀢𑁆𑀢𑀮’’𑀦𑁆𑀢𑀺 𑀘 𑀇𑀫𑁂𑀲𑀁 𑀲𑀫𑁆𑀩𑀦𑁆𑀥𑀺𑀧𑀤𑀲𑁆𑀲 𑀅𑀦𑀺𑀤𑁆𑀤𑁂𑀲𑁂𑀧𑀺 𑀫𑁂𑀣𑀼𑀦𑀧𑀸𑀭𑀸𑀚𑀺𑀓𑀸𑀥𑀺𑀓𑀸𑀭𑀢𑁆𑀢𑀸 𑀘 𑀲𑀦𑁆𑀣𑀢𑀘𑀢𑀼𑀓𑁆𑀓𑀲𑁆𑀲 𑀅𑀝𑁆𑀞𑀓𑀣𑀸𑀯𑀲𑀸𑀦𑁂 𑀇𑀫𑀸𑀬 𑀕𑀸𑀣𑀸𑀬 𑀲𑀗𑁆𑀕𑀳𑀺𑀢𑀲𑁆𑀲 𑀇𑀫𑀲𑁆𑀲 𑀯𑀺𑀦𑀺𑀘𑁆𑀙𑀬𑀲𑁆𑀲 𑀧𑀭𑀺𑀬𑁄𑀲𑀸𑀦𑁂 ‘‘𑀬𑀣𑀸 𑀘 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑁂 𑀯𑀼𑀢𑁆𑀢𑀁, 𑀏𑀯𑀁 𑀲𑀩𑁆𑀩𑀢𑁆𑀣 𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁬𑁧-𑁬𑁨) 𑀦𑀺𑀫𑀺𑀢𑁆𑀢𑀯𑀺𑀦𑀺𑀘𑁆𑀙𑀬𑀲𑁆𑀲𑀸𑀢𑀺𑀤𑁂𑀲𑀲𑁆𑀲 𑀓𑀢𑀢𑁆𑀢𑀸 𑀘 𑀲𑀸𑀫𑀢𑁆𑀣𑀺𑀬𑁂𑀦 ‘‘𑀦𑀺𑀫𑀺𑀢𑁆𑀢𑀲𑁆𑀲𑀸’’𑀢𑀺 𑀮𑀩𑁆𑀪𑀢𑀺. 𑀇𑀤𑀫𑁂𑀯 ‘‘𑀧𑀯𑁂𑀲𑁂𑀢𑁆𑀯𑀸’’𑀢𑀺 𑀏𑀢𑀲𑁆𑀲 𑀆𑀥𑀸𑀭𑀯𑀲𑁂𑀦 𑀕𑀳𑁂𑀢𑀩𑁆𑀩𑀁. ‘‘𑀅𑀗𑁆𑀕𑀚𑀸𑀢’’𑀦𑁆𑀢𑀺 𑀅𑀦𑀼𑀯𑀢𑁆𑀢𑀢𑀺.

𑀏𑀯𑀁 𑀯𑀸𑀓𑁆𑀬𑀁 𑀧𑀽𑀭𑁂𑀢𑁆𑀯𑀸 ‘‘𑀬𑀣𑀸 𑀆𑀯𑀝𑁆𑀝𑀓𑀢𑁂 𑀫𑀼𑀔𑁂 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀢𑁆𑀯𑀸 𑀢𑀫𑀸𑀓𑀸𑀲𑀕𑀢𑀁 𑀓𑀢𑁆𑀯𑀸 𑀦𑀻𑀳𑀭𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀢𑀣𑀸 𑀲𑀩𑁆𑀩𑀲𑁆𑀲𑀸 𑀇𑀢𑁆𑀣𑀺𑀬𑀸 𑀦𑀺𑀫𑀺𑀢𑁆𑀢𑁂 𑀧𑀲𑁆𑀲𑀸𑀯𑀫𑀕𑁆𑀕𑀲𑀗𑁆𑀔𑀸𑀢𑁂 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀢𑁆𑀯𑀸 𑀢𑀲𑁆𑀲 𑀘𑀢𑀽𑀳𑀺 𑀧𑀲𑁆𑀲𑁂𑀳𑀺 𑀲𑀳 𑀳𑁂𑀝𑁆𑀞𑀺𑀫𑀢𑁆𑀢𑀮𑀁 𑀘𑀢𑁆𑀢𑀸𑀭𑁄 𑀧𑀲𑁆𑀲𑁂, 𑀳𑁂𑀝𑁆𑀞𑀺𑀫𑀢𑁆𑀢𑀮𑀜𑁆𑀘 𑀅𑀘𑁆𑀙𑀼𑀧𑀦𑁆𑀢𑀁 𑀆𑀓𑀸𑀲𑀕𑀢𑀁 𑀓𑀢𑁆𑀯𑀸 𑀦𑀻𑀳𑀭𑀦𑁆𑀢𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄.

𑁩𑁦. 𑀉𑀧𑁆𑀧𑀸𑀝𑀺𑀢𑁄𑀝𑁆𑀞𑀫𑀁𑀲𑁂𑀲𑀽𑀢𑀺 𑀉𑀧𑁆𑀧𑀸𑀝𑀺𑀢𑀁 𑀑𑀝𑁆𑀞𑀫𑀁𑀲𑀁 𑀬𑁂𑀲𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀢𑁂𑀲𑀼 𑀤𑀦𑁆𑀢𑁂𑀲𑀼. 𑀩𑀳𑀺𑀦𑀺𑀓𑁆𑀔𑀦𑁆𑀢𑀓𑁂𑀲𑀼 𑀯𑀸𑀢𑀺 𑀧𑀓𑀢𑀺𑀬𑀸 𑀑𑀝𑁆𑀞𑀫𑀁𑀲𑀢𑁄 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀞𑀺𑀢𑁂𑀲𑀼 𑀯𑀸 𑀤𑀦𑁆𑀢𑁂𑀲𑀼. 𑀯𑀸𑀬𑀫𑀦𑁆𑀢𑀲𑁆𑀲𑀸𑀢𑀺 𑀅𑀗𑁆𑀕𑀚𑀸𑀢𑁂𑀦 𑀙𑀼𑀧𑀦𑁆𑀢𑀲𑁆𑀲.

𑁩𑁧. 𑀅𑀝𑁆𑀞𑀺𑀲𑀗𑁆𑀖𑀝𑁆𑀝𑀦𑀁 𑀓𑀢𑁆𑀯𑀸𑀢𑀺 𑀦𑀺𑀫𑀺𑀢𑁆𑀢𑀫𑀁𑀲𑀲𑀦𑁆𑀦𑀺𑀲𑁆𑀲𑀬𑀸𑀦𑀺 𑀅𑀝𑁆𑀞𑀻𑀦𑀺 𑀲𑀗𑁆𑀖𑀝𑁆𑀝𑁂𑀢𑁆𑀯𑀸. 𑀫𑀕𑁆𑀕𑁂𑀢𑀺 𑀅𑀝𑁆𑀞𑀺𑀲𑀗𑁆𑀖𑀸𑀢𑀫𑀬𑁂 𑀫𑀕𑁆𑀕𑁂. 𑀤𑀼𑀯𑀺𑀥𑀭𑀸𑀕𑀢𑁄𑀢𑀺 𑀫𑁂𑀣𑀼𑀦𑀭𑀸𑀕𑁂𑀦 𑀯𑀸 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀯𑀸. 𑀯𑀸𑀬𑀫𑀦𑁆𑀢𑀲𑁆𑀲𑀸𑀢𑀺 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀢𑁆𑀯𑀸 𑀘𑀸𑀭𑁂𑀦𑁆𑀢𑀲𑁆𑀲.

𑁩𑁨. 𑀆𑀮𑀺𑀗𑁆𑀕𑀦𑁆𑀢𑀲𑁆𑀲𑀸𑀢𑀺 𑀧𑀭𑀺𑀲𑁆𑀲𑀚𑀦𑁆𑀢𑀲𑁆𑀲. 𑀳𑀢𑁆𑀣𑀕𑀸𑀳𑀸𑀤𑀻𑀲𑀼 𑀳𑀢𑁆𑀣𑁄 𑀦𑀸𑀫 𑀓𑀧𑁆𑀧𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀕𑁆𑀕𑀦𑀔𑀸. 𑀳𑀢𑁆𑀣𑀲𑁆𑀲, 𑀢𑀧𑁆𑀧𑀝𑀺𑀩𑀦𑁆𑀥𑀲𑁆𑀲 𑀘 𑀕𑀳𑀡𑀁 𑀳𑀢𑁆𑀣𑀕𑁆𑀕𑀸𑀳𑁄. 𑀅𑀯𑀲𑁂𑀲𑀲𑀭𑀻𑀭𑀲𑁆𑀲, 𑀢𑀧𑁆𑀧𑀝𑀺𑀩𑀦𑁆𑀥𑀲𑁆𑀲 𑀘 𑀧𑀭𑀸𑀫𑀲𑀦𑀁 𑀧𑀭𑀸𑀫𑀸𑀲𑁄. 𑀦𑀺𑀲𑁆𑀲𑀦𑁆𑀤𑁂𑀳𑁂 𑀧𑀦 ‘‘𑀫𑀸𑀢𑀼𑀕𑀸𑀫𑀲𑁆𑀲 𑀲𑀭𑀻𑀭𑀲𑁆𑀲 𑀯𑀸 𑀢𑀧𑁆𑀧𑀝𑀺𑀩𑀦𑁆𑀥𑀲𑁆𑀲 𑀯𑀸 𑀳𑀢𑁆𑀣𑁂𑀦 𑀕𑀳𑀡𑀁 𑀳𑀢𑁆𑀣𑀕𑁆𑀕𑀸𑀳𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀦𑀬𑀲𑁆𑀲𑁂𑀯 𑀅𑀝𑁆𑀞𑀓𑀣𑀸𑀲𑀼 𑀆𑀕𑀢𑀢𑁆𑀢𑀸 𑀲𑁄𑀬𑁂𑀯 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑁄. 𑀧𑀭𑀸𑀫𑀲𑁂𑀧𑀺 ‘‘𑀳𑀢𑁆𑀣𑁂𑀦 𑀲𑀭𑀻𑀭𑀲𑁆𑀲, 𑀢𑀧𑁆𑀧𑀝𑀺𑀩𑀦𑁆𑀥𑀲𑁆𑀲 𑀘 𑀧𑀭𑀸𑀫𑀲𑀦’’𑀦𑁆𑀢𑀺 𑀬𑀁 𑀢𑀢𑁆𑀣 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀦 𑀬𑀼𑀚𑁆𑀚𑀢𑀺. 𑀅𑀯𑀲𑁂𑀲𑀲𑀭𑀻𑀭𑀸𑀯𑀬𑀯𑁂𑀦𑀸𑀧𑀺 𑀧𑀭𑀸𑀫𑀲𑀢𑁄 𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀻𑀢𑀺. 𑀘𑀼𑀫𑁆𑀩𑀦𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑁂𑀡𑀺𑀕𑁆𑀕𑀸𑀳𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀅𑀬𑀁 𑀦𑀬𑁄’’𑀢𑀺 𑀏𑀢𑁂𑀦 ‘‘𑀇𑀢𑁆𑀣𑀺𑀬𑀸 𑀫𑁂𑀣𑀼𑀦𑀭𑀸𑀕𑁂𑀦 𑀳𑀢𑁆𑀣𑀕𑁆𑀕𑀸𑀳𑀸𑀤𑀻𑀲𑀼 𑀤𑀼𑀓𑁆𑀓𑀝’’𑀦𑁆𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺.

𑁩𑁩. 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑁂𑀳𑀺 𑀅𑀜𑁆𑀜𑁂𑀲𑀼 𑀢𑀺𑀭𑀘𑁆𑀙𑀸𑀦𑀕𑀢𑁂𑀲𑀼 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑁂 𑀲𑀢𑁆𑀢𑁂 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀧𑀤𑁂’’𑀢𑀺𑀆𑀤𑀺. ‘‘𑀅𑀧𑀤𑁂, 𑀤𑁆𑀯𑀺𑀧𑀤𑁂, 𑀘𑀢𑀼𑀧𑁆𑀧𑀤𑁂’’𑀢𑀺 𑀇𑀫𑁂𑀳𑀺 𑀯𑀺𑀲𑁂𑀲𑀦𑁂𑀳𑀺 𑀯𑀺𑀲𑁂𑀲𑀺𑀢𑀩𑁆𑀩𑀁 ‘‘𑀲𑀢𑁆𑀢𑀦𑀺𑀓𑀸𑀬𑁂’’𑀢𑀺 𑀇𑀤𑀁 𑀯𑀢𑁆𑀢𑀩𑁆𑀩𑀁. 𑀅𑀧𑀤𑁂 𑀲𑀢𑁆𑀢𑀦𑀺𑀓𑀸𑀬𑁂. 𑀅𑀳𑀬𑁄𑀢𑀺 𑀣𑀮𑀘𑀭𑁂𑀲𑀼 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄 𑀳𑀢𑁆𑀣𑀺𑀕𑀺𑀮𑀦𑀓𑁂 𑀅𑀚𑀕𑀭𑁂 𑀉𑀧𑀸𑀤𑀸𑀬 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀦𑀸𑀕𑀸 𑀘. 𑀫𑀘𑁆𑀙𑀸𑀢𑀺 𑀚𑀮𑀚𑁂𑀲𑀼 𑀉𑀧𑀭𑀺𑀫𑀓𑁄𑀝𑀺𑀬𑀸 𑀧𑀜𑁆𑀘𑀲𑀢𑀬𑁄𑀚𑀦𑀺𑀓𑀸𑀦𑀺 𑀢𑀺𑀫𑀺𑀭𑀧𑀺𑀗𑁆𑀕𑀮𑀸𑀤𑀺𑀫𑀘𑁆𑀙𑁂 𑀉𑀧𑀸𑀤𑀸𑀬 𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀧𑀸𑀞𑀻𑀦𑀧𑀸𑀯𑀼𑀲𑀸𑀤𑀬𑁄 𑀫𑀘𑁆𑀙𑀸 𑀘. 𑀤𑁆𑀯𑀺𑀧𑀤𑁂 𑀲𑀢𑁆𑀢𑀦𑀺𑀓𑀸𑀬𑁂. 𑀓𑀧𑁄𑀢𑀸𑀢𑀺 𑀉𑀧𑀭𑀺𑀫𑀓𑁄𑀝𑀺𑀬𑀸 𑀕𑀭𑀼𑀴𑁂 𑀉𑀧𑀸𑀤𑀸𑀬 𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀓𑀧𑁄𑀢𑀸𑀓𑀧𑁄𑀢𑀧𑀓𑁆𑀔𑀻 𑀘. 𑀧𑀸𑀭𑀸𑀯𑀢𑀸𑀢𑀺 𑀓𑁂𑀘𑀺. 𑀘𑀢𑀼𑀧𑁆𑀧𑀤𑁂 𑀲𑀢𑁆𑀢𑀦𑀺𑀓𑀸𑀬𑁂. 𑀕𑁄𑀥𑀸𑀢𑀺 𑀉𑀧𑀭𑀺𑀫𑀓𑁄𑀝𑀺𑀬𑀸 𑀳𑀢𑁆𑀣𑀺𑀁 𑀉𑀧𑀸𑀤𑀸𑀬 𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀕𑁄𑀥𑀸 𑀘𑀸𑀢𑀺 𑀇𑀫𑁂 𑀲𑀢𑁆𑀢𑀸. 𑀳𑁂𑀝𑁆𑀞𑀸𑀢𑀺 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑀢𑁄. 𑀧𑀸𑀭𑀸𑀚𑀺𑀓𑀲𑁆𑀲𑀯𑀢𑁆𑀣𑀽𑀢𑀺 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀲𑁆𑀲 𑀯𑀢𑁆𑀣𑀽𑀦𑀻𑀢𑀺 𑀧𑀸𑀞𑀲𑁂𑀲𑁄.

𑁩𑁪. 𑀲𑁂𑀯𑁂𑀢𑀼𑀓𑀸𑀫𑀢𑀸 𑀫𑁂𑀣𑀼𑀦𑀲𑁂𑀯𑀸𑀬 𑀢𑀡𑁆𑀳𑀸, 𑀢𑀸𑀬 𑀫𑁂𑀣𑀼𑀦𑀭𑀸𑀕𑀲𑀗𑁆𑀔𑀸𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀲𑁂𑀯𑁂𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑀁. 𑀫𑀕𑁆𑀕𑁂𑀢𑀺 𑀯𑀘𑁆𑀘𑀫𑀕𑁆𑀕𑀸𑀤𑀻𑀦𑀁 𑀅𑀜𑁆𑀜𑀢𑀭𑁂 𑀫𑀕𑁆𑀕𑁂. 𑀫𑀕𑁆𑀕𑀲𑁆𑀲 𑀅𑀢𑁆𑀢𑀦𑁄 𑀫𑀼𑀢𑁆𑀢𑀓𑀭𑀡𑀲𑁆𑀲 𑀧𑀯𑁂𑀲𑀦𑀁. 𑀧𑀩𑁆𑀩𑀚𑁆𑀚𑀸𑀬, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀲𑁆𑀲 𑀯𑀸 𑀅𑀦𑁆𑀢𑁂 𑀯𑀺𑀦𑀸𑀲𑁂 𑀪𑀯𑁄𑀢𑀺 𑀅𑀦𑁆𑀢𑀺𑀫𑁄, 𑀧𑀸𑀭𑀸𑀚𑀺𑀓𑀸𑀧𑀦𑁆𑀦𑁄 𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀯𑀢𑁆𑀣𑀼 𑀅𑀦𑁆𑀢𑀺𑀫𑀪𑀸𑀯𑀲𑁆𑀲 𑀓𑀸𑀭𑀡𑀢𑁆𑀢𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀅𑀦𑁆𑀢𑀺𑀫𑀯𑀢𑁆𑀣𑀽𑀢𑀺 𑀯𑀼𑀘𑁆𑀘𑀢𑀺, 𑀢𑀤𑁂𑀯 𑀧𑀞𑀫𑀁 𑀘𑀢𑀼𑀦𑁆𑀦𑀁 𑀧𑀸𑀭𑀸𑀚𑀺𑀓𑀸𑀦𑀁 𑀆𑀤𑀺𑀫𑁆𑀳𑀺 𑀤𑁂𑀲𑀺𑀢𑀢𑁆𑀢𑀸 𑀧𑀞𑀫𑀦𑁆𑀢𑀺𑀫𑀯𑀢𑁆𑀣𑀼, 𑀢𑀲𑁆𑀲 𑀧𑀞𑀫𑀦𑁆𑀢𑀺𑀫𑀯𑀢𑁆𑀣𑀼𑀦𑁄, 𑀧𑀞𑀫𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁫. 𑀲𑀸𑀫𑀦𑁆𑀢𑀸 𑀆𑀧𑀢𑁆𑀢𑀺𑀲𑀫𑀻𑀧𑁂 𑀪𑀯𑀁 𑀲𑀸𑀫𑀦𑁆𑀢𑀁, 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀲𑀫𑀻𑀧𑁂 𑀧𑀼𑀩𑁆𑀩𑀪𑀸𑀕𑁂 𑀪𑀯𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀸𑀦𑀁 𑀧𑀦 𑀢𑀺𑀡𑁆𑀡𑀫𑁆𑀧𑀻𑀢𑀺 𑀅𑀯𑀲𑁂𑀲𑀸𑀦𑀁 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀦𑀁 𑀢𑀺𑀡𑁆𑀡𑀁 𑀧𑀸𑀭𑀸𑀚𑀺𑀓𑀥𑀫𑁆𑀫𑀸𑀦𑀁. 𑀣𑀼𑀮𑁆𑀮𑀘𑁆𑀘𑀬𑀁 𑀲𑀸𑀫𑀦𑁆𑀢𑀫𑀺𑀢𑀺 𑀉𑀤𑀻𑀭𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀫𑀼𑀤𑀻𑀭𑀺𑀢𑀁? ‘‘𑀨𑀦𑁆𑀤𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀧𑀸𑀭𑀸. 𑁯𑁪) 𑀤𑀼𑀢𑀺𑀬𑁂, ‘‘𑀫𑀦𑀼𑀲𑁆𑀲𑀁 𑀉𑀤𑁆𑀤𑀺𑀲𑁆𑀲 𑀑𑀧𑀸𑀢𑀁 𑀔𑀡𑀢𑀺, 𑀧𑀢𑀺𑀢𑁆𑀯𑀸 𑀤𑀼𑀓𑁆𑀔𑀯𑁂𑀤𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺, 𑀢𑀢𑀺𑀬𑁂, ‘‘𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲, 𑀅𑀧𑁆𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀧𑀸𑀭𑀸. 𑁨𑁧𑁫) 𑀘𑀢𑀼𑀢𑁆𑀣𑁂 𑀲𑀫𑀼𑀤𑀻𑀭𑀺𑀢𑀁.

𑀏𑀢𑁆𑀣 𑀘 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀬𑀸 𑀲𑀸𑀫𑀦𑁆𑀢𑀸𑀧𑀢𑁆𑀢𑀺𑀪𑀸𑀯𑁄 𑀬𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀲𑀫𑀼𑀮𑁆𑀮𑀧𑀢𑀺, 𑀲𑁄 𑀬𑀸𑀯 𑀦 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀢𑀸𑀯 𑀲𑀫𑀼𑀮𑁆𑀮𑀧𑀦𑀧𑀘𑁆𑀘𑀬𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀲𑀫𑁆𑀪𑀸𑀯𑁂, 𑀲𑀫𑀼𑀮𑁆𑀮𑀧𑀺𑀢𑁂 𑀢𑀲𑁆𑀫𑀺𑀁 𑀲𑀫𑀼𑀮𑁆𑀮𑀧𑀺𑀢𑀫𑀢𑁆𑀣𑁂 𑀧𑀝𑀺𑀯𑀺𑀚𑀸𑀦𑀦𑁆𑀢𑁂 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀲𑀫𑁆𑀪𑀸𑀯𑁂 𑀘 𑀬𑀼𑀚𑁆𑀚𑀢𑀺. 𑀲𑁄 𑀘 ‘‘𑀅𑀧𑁆𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀯𑀼𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑀇𑀫𑀺𑀦𑀸𑀯 𑀲𑀗𑁆𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁩𑁬. 𑀅𑀚𑀸𑀦𑀦𑁆𑀢𑀲𑁆𑀲 𑀯𑀸𑀢𑀽𑀧𑀢𑁆𑀣𑀤𑁆𑀥𑀁 𑀅𑀗𑁆𑀕𑀚𑀸𑀢𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀯𑀻𑀢𑀺𑀓𑁆𑀓𑀫𑀁 𑀓𑀢𑁆𑀯𑀸 𑀫𑀸𑀢𑀼𑀕𑀸𑀫𑁂𑀲𑀼 𑀕𑀘𑁆𑀙𑀦𑁆𑀢𑁂𑀲𑀼 𑀅𑀚𑀸𑀦𑀫𑀸𑀦𑀲𑁆𑀲, 𑀫𑀳𑀸𑀯𑀦𑁂 𑀤𑀺𑀯𑀸 𑀦𑀺𑀤𑁆𑀤𑀼𑀧𑀕𑀢𑀪𑀺𑀓𑁆𑀔𑀼𑀦𑁄 𑀯𑀺𑀬 𑀧𑀭𑁂𑀳𑀺 𑀓𑀺𑀭𑀺𑀬𑀫𑀸𑀦𑀁 𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑁂𑀯𑀸𑀢𑀺 𑀇𑀫𑀺𑀦𑀸 ‘‘𑀅𑀦𑀸𑀧𑀢𑁆𑀢𑀻𑀢𑀺 𑀜𑀸𑀢𑀩𑁆𑀩’’𑀦𑁆𑀢𑀺 𑀇𑀤𑀫𑀸𑀓𑀟𑁆𑀠𑀢𑀺. 𑀅𑀲𑁆𑀲𑀸𑀤𑀺𑀬𑀦𑁆𑀢𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑁂𑀲𑀼 𑀅𑀪𑀺𑀪𑀯𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀦𑁆𑀢𑁂𑀲𑀼 𑀘 𑀓𑀸𑀭𑀸𑀧𑁂𑀦𑁆𑀢𑁂𑀲𑀼 𑀘, 𑀲𑀧𑁆𑀧𑀫𑀼𑀔𑀁 𑀧𑀯𑀺𑀝𑁆𑀞𑀓𑀸𑀮𑁂 𑀯𑀺𑀬 𑀉𑀢𑁆𑀢𑀲𑀺𑀢𑁆𑀯𑀸 𑀅𑀦𑀥𑀺𑀯𑀸𑀲𑁂𑀦𑁆𑀢𑀲𑁆𑀲 𑀘, 𑀫𑀳𑀸𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑁄𑀧𑀕𑀢𑀪𑀺𑀓𑁆𑀔𑀼𑀦𑁄 𑀯𑀺𑀬 𑀧𑀭𑁄𑀧𑀓𑁆𑀓𑀫𑀁 𑀜𑀢𑁆𑀯𑀸𑀧𑀺 𑀓𑀸𑀬𑁂 𑀆𑀤𑀺𑀢𑁆𑀢𑀅𑀕𑁆𑀕𑀺𑀦𑀸 𑀯𑀺𑀬 𑀉𑀢𑁆𑀢𑀲𑀺𑀢𑁆𑀯𑀸 𑀅𑀦𑀥𑀺𑀯𑀸𑀲𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀅𑀚𑀸𑀦𑀦𑁆𑀢𑀲𑁆𑀲𑀸’’𑀢𑀺 𑀏𑀢𑁆𑀣 𑀅𑀧𑀺-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀩𑀼𑀤𑁆𑀥𑀲𑀸𑀲𑀦𑁂 𑀔𑀻𑀭𑀲𑀸𑀕𑀭𑀲𑀮𑀺𑀮𑀦𑀺𑀫𑁆𑀫𑀮𑁂 𑀲𑀩𑁆𑀩𑀧𑀞𑀫𑀁 𑀧𑀸𑀢𑀼𑀪𑀽𑀢𑀢𑁆𑀢𑀸 𑀆𑀤𑀺 𑀘 𑀢𑀁 𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑀁 𑀓𑀫𑁆𑀫𑀜𑁆𑀘𑀸𑀢𑀺 𑀆𑀤𑀺𑀓𑀫𑁆𑀫𑀁, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀆𑀤𑀺𑀓𑀫𑁆𑀫𑀻, 𑀏𑀢𑁆𑀣 𑀲𑀼𑀤𑀺𑀦𑁆𑀦𑁄 𑀪𑀺𑀓𑁆𑀔𑀼, 𑀢𑀲𑁆𑀲 𑀆𑀤𑀺𑀓𑀫𑁆𑀫𑀺𑀦𑁄𑀢𑀺 𑀕𑀳𑁂𑀢𑀩𑁆𑀩𑁄. 𑀉𑀧𑀭𑀺𑀧𑀺 𑀇𑀫𑁂𑀲𑀁 𑀧𑀤𑀸𑀦𑀁 𑀆𑀕𑀢𑀸𑀕𑀢𑀝𑁆𑀞𑀸𑀦𑁂 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀥 𑀘 𑀉𑀧𑀭𑀺 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑁂𑀲𑀼 𑀘 𑀦𑀺𑀤𑀸𑀦𑀸𑀤𑀺𑀯𑀲𑁂𑀦 𑀲𑀢𑁆𑀢𑀭𑀲𑀯𑀺𑀥𑁄 𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑁄 𑀧𑀓𑀺𑀡𑁆𑀡𑀓𑁂 𑀲𑀗𑁆𑀔𑁂𑀧𑀢𑁄, 𑀉𑀢𑁆𑀢𑀭𑁂 𑀯𑀺𑀢𑁆𑀣𑀸𑀭𑀢𑁄 𑀘 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀏𑀢𑁆𑀣 𑀦 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁩𑁭-𑁩𑁮. 𑀯𑀺𑀦𑀬𑁂𑀢𑀺 𑀯𑀺𑀦𑀬𑀧𑀺𑀝𑀓𑁂. 𑀅𑀦𑀬𑀽𑀧𑀭𑀫𑁂𑀢𑀺 𑀦𑁂𑀢𑀺 𑀧𑀸𑀧𑁂𑀢𑀺 𑀲𑀻𑀮𑀲𑀫𑁆𑀧𑀤𑀁 𑀲𑀫𑀸𑀥𑀺𑀲𑀫𑁆𑀧𑀤𑀁 𑀧𑀜𑁆𑀜𑀸𑀲𑀫𑁆𑀧𑀤𑀜𑁆𑀘𑀸𑀢𑀺 𑀦𑀬𑁄, 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀳𑀺 𑀅𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑁄 𑀲𑀁𑀯𑀭𑁄, 𑀢𑀧𑁆𑀧𑀝𑀺𑀧𑀓𑁆𑀔𑁄 𑀅𑀲𑀁𑀯𑀭𑁄 𑀅𑀦𑀬𑁄 𑀦𑀸𑀫, 𑀢𑀲𑁆𑀲 𑀉𑀧𑀭𑀫𑁄 𑀦𑀺𑀯𑀢𑁆𑀢𑀺 𑀏𑀢𑁆𑀣𑀸𑀢𑀺 𑀅𑀦𑀬𑀽𑀧𑀭𑀫𑁄, 𑀯𑀺𑀦𑀬𑁄, 𑀢𑀢𑁆𑀣 𑀅𑀦𑀬𑀽𑀧𑀭𑀫𑁂 𑀯𑀺𑀦𑀬𑁂.

𑀢𑀢𑁄 𑀏𑀯 𑀧𑀭𑀫𑁂 𑀉𑀓𑁆𑀓𑀝𑁆𑀞𑁂. 𑀅𑀦𑀬𑀲𑁆𑀲 𑀯𑀸 𑀉𑀧𑀭𑀫𑁂 𑀦𑀺𑀯𑀢𑁆𑀢𑀦𑁂 𑀧𑀭𑀫𑁂 𑀉𑀓𑁆𑀓𑀝𑁆𑀞𑁂𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀭𑀸 𑀉𑀢𑁆𑀢𑀫𑀸 𑀫𑀸 𑀲𑀸𑀲𑀦𑀲𑀺𑀭𑀻 𑀏𑀢𑁆𑀣𑀸𑀢𑀺 𑀧𑀭𑀫𑁄, 𑀯𑀺𑀦𑀬𑁄𑀢𑀺 𑀏𑀯𑀫𑁆𑀧𑀺 𑀕𑀳𑁂𑀢𑀩𑁆𑀩𑀁. ‘‘𑀯𑀺𑀦𑀬𑁄 𑀦𑀸𑀫 𑀲𑀸𑀲𑀦𑀲𑁆𑀲 𑀆𑀬𑀽’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑀧𑀞𑀫𑀲𑀗𑁆𑀕𑀻𑀢𑀺𑀓𑀣𑀸; 𑀧𑀸𑀭𑀸. 𑀅𑀝𑁆𑀞. 𑁧.𑀧𑀞𑀫𑀲𑀗𑁆𑀕𑀻𑀢𑀺𑀓𑀣𑀸; 𑀔𑀼. 𑀧𑀸. 𑀅𑀝𑁆𑀞. 𑁫.𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸; 𑀣𑁂𑀭𑀕𑀸. 𑀅𑀝𑁆𑀞. 𑁧.𑁨𑁫𑁧) 𑀯𑀘𑀦𑀢𑁄 𑀉𑀢𑁆𑀢𑀫𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑁂𑀢𑀺 𑀅𑀢𑁆𑀣𑁄.

𑀲𑀼𑀚𑀦𑀲𑁆𑀲𑀸𑀢𑀺 𑀲𑁄𑀪𑀡𑁄 𑀚𑀦𑁄 𑀲𑀼𑀚𑀦𑁄, 𑀲𑀺𑀓𑁆𑀔𑀸𑀓𑀸𑀫𑁄 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬 𑀲𑁄𑀪𑀫𑀸𑀦𑁄 𑀧𑀺𑀬𑀲𑀻𑀮𑁄 𑀓𑀼𑀮𑀧𑀼𑀢𑁆𑀢𑁄, 𑀢𑀲𑁆𑀲 𑀦𑀬𑀦𑁂 𑀦𑀬𑀦𑀽𑀧𑀫𑁂 𑀯𑀺𑀦𑀬𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀬𑀽𑀧𑀭𑀫𑀢𑁆𑀢𑀸, 𑀧𑀭𑀫𑀢𑁆𑀢𑀸 𑀘 𑀲𑀼𑀚𑀦𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀦𑀬𑀦𑁂 𑀦𑀬𑀦𑀽𑀧𑀫𑁂. 𑀲𑀼𑀔𑀸𑀦𑀬𑀦𑁂𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀪𑁂𑀤𑀁 𑀲𑀼𑀔𑀁 𑀆𑀦𑁂𑀢𑀻𑀢𑀺 𑀲𑀼𑀔𑀸𑀦𑀬𑀦𑀁, 𑀢𑀲𑁆𑀫𑀺𑀁. 𑀇𑀤𑀜𑁆𑀘 ‘‘𑀦𑀬𑀦𑁂’’𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁.

𑀏𑀢𑀁 𑀯𑀺𑀲𑁂𑀲𑀦𑀁 𑀓𑀺𑀫𑀢𑁆𑀣𑀦𑁆𑀢𑀺 𑀘𑁂? 𑀉𑀧𑀫𑀸𑀪𑀸𑀯𑁂𑀦 𑀕𑀳𑀺𑀢𑀧𑀓𑀢𑀺𑀦𑀬𑀦𑀢𑁄 𑀇𑀥 𑀲𑀫𑁆𑀪𑀯𑀦𑁆𑀢𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀢𑀭𑁄 𑀲𑁄 𑀯𑀺𑀲𑁂𑀲𑁄𑀢𑀺 𑀘𑁂? 𑀧𑀓𑀢𑀺𑀦𑀬𑀦𑀁 𑀭𑀸𑀕𑀤𑁄𑀲𑀸𑀤𑀺𑀓𑀺𑀮𑁂𑀲𑀽𑀧𑀦𑀺𑀲𑁆𑀲𑀬𑁄 𑀳𑀼𑀢𑁆𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀤𑀼𑀓𑁆𑀔𑀲𑁆𑀲 𑀘 𑀧𑀘𑁆𑀘𑀬𑁄 𑀳𑁄𑀢𑀺. 𑀇𑀤𑀁 𑀧𑀦 𑀯𑀺𑀦𑀬𑀦𑀬𑀦𑀁 𑀇𑀫𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀏𑀯𑀁 𑀅𑀳𑀼𑀢𑁆𑀯𑀸 𑀏𑀓𑀁𑀲𑁂𑀦 𑀫𑁄𑀓𑁆𑀔𑀸𑀯𑀳𑀦𑀲𑀼𑀔𑀲𑁆𑀲𑁂𑀯 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁. 𑀬𑀣𑀸 𑀯𑀺𑀦𑀬𑀫𑀯𑀺𑀭𑀸𑀥𑁂𑀢𑁆𑀯𑀸 𑀧𑀝𑀺𑀧𑀚𑁆𑀚𑀦𑁂𑀦 𑀲𑀺𑀚𑁆𑀛𑀦𑀓𑀲𑀻𑀮𑀲𑀁𑀯𑀭𑀫𑀽𑀮𑀓𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀅𑀦𑀼𑀧𑀸𑀤𑀺𑀲𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀸𑀯𑀲𑀸- 𑀦𑀨𑀮𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑀸𑀯𑀳𑀦𑁂 𑀯𑀺𑀦𑀬𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀧𑀥𑀸𑀦𑀭𑀢𑁄𑀢𑀺 𑀏𑀢𑁆𑀣 ‘‘𑀅𑀧𑀻’’𑀢𑀺 𑀧𑀸𑀞𑀲𑁂𑀲𑁄. 𑀧𑀥𑀸𑀦𑁂 𑀯𑀺𑀦𑀬𑀸𑀪𑀺𑀬𑁄𑀕𑁂 𑀭𑀢𑁄𑀧𑀺, 𑀯𑀺𑀦𑀬𑁂 𑀅𑀚𑁆𑀛𑀸𑀬𑀦𑀲𑀯𑀦𑀘𑀺𑀦𑁆𑀢𑀦𑀸𑀤𑀺𑀯𑀲𑁂𑀦 𑀯𑀸𑀬𑀫𑀦𑁆𑀢𑁄𑀧𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 ‘‘𑀯𑀺𑀭𑀸𑀕𑁄 𑀲𑁂𑀝𑁆𑀞𑁄 𑀥𑀫𑁆𑀫𑀸𑀦’’𑀦𑁆𑀢𑀺 (𑀥. 𑀧. 𑁨𑁭𑁩; 𑀦𑁂𑀢𑁆𑀢𑀺. 𑁧𑁭𑁦; 𑀓𑀣𑀸. 𑁮𑁭𑁨) 𑀯𑀘𑀦𑀢𑁄 𑀧𑀥𑀸𑀦𑀁 𑀦𑀺𑀩𑁆𑀩𑀸𑀦𑀁, 𑀢𑀲𑁆𑀫𑀺𑀁 𑀭𑀢𑁄𑀢𑀺 𑀅𑀢𑁆𑀣𑁄. 𑀲𑀸𑀭𑀫𑀢𑁂𑀢𑀺 ‘‘𑀲𑀸𑀭’’𑀦𑁆𑀢𑀺 𑀅𑀥𑀺𑀫𑀢𑁂. 𑀅𑀣 𑀯𑀸 𑀲𑀸𑀭𑀁 𑀅𑀨𑁂𑀕𑁆𑀕𑀼𑀫𑀢𑀁 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀆𑀘𑀭𑀺𑀬𑀫𑀢𑀁 𑀏𑀢𑁆𑀣𑀸𑀢𑀺 ‘‘𑀲𑀸𑀭𑀫𑀢𑁄’’𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀺𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂. 𑀭𑀢𑁄𑀢𑀺 𑀅𑀘𑁆𑀘𑀦𑁆𑀢𑀸𑀪𑀺𑀭𑀢𑁄. ‘‘𑀦 𑀭𑀢𑁄’’𑀢𑀺 𑀏𑀢𑁆𑀣 𑀦-𑀓𑀸𑀭𑀁 ‘‘𑀭𑀫𑀢𑁂’’𑀢𑀺 𑀑𑀲𑀸𑀦𑀧𑀤𑁂𑀦 𑀬𑁄𑀚𑁂𑀢𑁆𑀯𑀸 𑀬𑁄 𑀧𑀦 𑀦 𑀭𑀫𑀢𑁂𑀢𑀺 𑀲𑀫𑁆𑀩𑀦𑁆𑀥𑁄.

𑀣𑁂𑀭𑀦𑀯𑀫𑀚𑁆𑀛𑀺𑀫𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁 𑀅𑀦𑁆𑀢𑀭𑁂 𑀬𑁄 𑀧𑀦 𑀧𑀼𑀕𑁆𑀕𑀮𑁄 𑀦𑀺𑀘𑁆𑀘𑀧𑀭𑀺𑀯𑀢𑁆𑀢𑀦𑀲𑀯𑀦𑀸𑀦𑀼𑀲𑁆𑀲𑀭𑀡𑀘𑀺𑀦𑁆𑀢𑀦𑀯𑀲𑁂𑀦 𑀦 𑀭𑀫𑀢𑁂 𑀦 𑀓𑀻𑀴𑀢𑀺, 𑀲𑁄 𑀧𑀼𑀕𑁆𑀕𑀮𑁄 𑀯𑀺𑀦𑀬𑁂 𑀧𑀥𑀸𑀦𑀭𑀢𑁄𑀧𑀺 𑀯𑀺𑀦𑀬𑀧𑀺𑀝𑀓𑁂 𑀅𑀚𑁆𑀛𑀬𑀦𑀲𑀯𑀦𑀸𑀤𑀺𑀯𑀲𑁂𑀦 𑀬𑀼𑀢𑁆𑀢𑀧𑀬𑀼𑀢𑁆𑀢𑁄𑀧𑀺 𑀧𑀝𑀼 𑀳𑁄𑀢𑀺 𑀓𑀺𑀁, 𑀦 𑀳𑁄𑀢𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀦𑀬𑀧𑀺𑀝𑀓𑁂 𑀧𑀸𑀝𑀯𑀫𑀸𑀓𑀗𑁆𑀔𑀦𑁆𑀢𑁂𑀳𑀺 𑀧𑀞𑀫𑀁 𑀢𑀸𑀯𑁂𑀢𑁆𑀣 𑀲𑀓𑁆𑀓𑀘𑁆𑀘𑀁 𑀅𑀪𑀺𑀬𑁄𑀕𑁄 𑀓𑀸𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀫𑀫𑁂𑀯𑀢𑁆𑀣𑀁 𑀆𑀦𑀺𑀲𑀁𑀲𑀧𑀸𑀭𑀁𑀧𑀭𑀺𑀬𑀧𑀬𑁄𑀚𑀦𑁂𑀦 𑀲𑀳 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀇𑀫’’𑀦𑁆𑀢𑀺𑀆𑀤𑀺. 𑀇𑀫𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀁, ‘‘𑀅𑀯𑁂𑀤𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. ‘‘𑀬𑁄’’𑀢𑀺 𑀧𑀸𑀞𑀲𑁂𑀲𑁄. 𑀬𑁄 𑀓𑀼𑀮𑀧𑀼𑀢𑁆𑀢𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀇𑀫𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀁 𑀲𑀫𑁆𑀫𑀸 𑀅𑀯𑁂𑀤𑀺 𑀅𑀜𑁆𑀜𑀸𑀲𑀺. 𑀓𑀺𑀁 𑀪𑀽𑀢𑀦𑁆𑀢𑀺 𑀆𑀳 ‘‘𑀳𑀺𑀢𑀯𑀺𑀪𑀸𑀯𑀦’’𑀦𑁆𑀢𑀺. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀺𑀬𑀸 𑀫𑀽𑀮𑀲𑀸𑀥𑀦𑀢𑁆𑀢𑀸 𑀲𑀻𑀮𑀫𑀺𑀥 𑀳𑀺𑀢𑀁 𑀦𑀸𑀫, 𑀢𑀁 𑀯𑀺𑀪𑀸𑀯𑁂𑀢𑀺 𑀧𑀓𑀸𑀲𑁂𑀢𑀻𑀢𑀺 𑀳𑀺𑀢𑀯𑀺𑀪𑀸𑀯𑀦𑁄𑀢𑀺 𑀯𑀺𑀕𑁆𑀕𑀳𑁄. ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬…𑀧𑁂… 𑀯𑀺𑀚𑀝𑀬𑁂 𑀚𑀝’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁩, 𑁧𑁯𑁨; 𑀫𑀺. 𑀧. 𑁨.𑁧.𑁯) 𑀯𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑀓𑀺𑀮𑁂𑀲𑀚𑀝𑀸𑀯𑀺𑀚𑀝𑀦𑀮𑁄𑀓𑀼𑀢𑁆𑀢𑀭𑀜𑀸𑀡𑀲𑁆𑀲 𑀧𑀤𑀝𑁆𑀞𑀸𑀦𑀲𑁄𑀧𑀘𑀸𑀭𑀲𑀸𑀪𑀺𑀜𑁆𑀜𑀸𑀭𑀽𑀧𑀸𑀭𑀽𑀧𑀅𑀝𑁆𑀞𑀲𑀫𑀸𑀥𑀻𑀦𑀁 𑀧𑀤𑀝𑁆𑀞𑀸𑀦𑀢𑀸𑀬 𑀲𑀩𑁆𑀩𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀲𑀫𑁆𑀧𑀤𑀸𑀦𑀁 𑀫𑀽𑀮𑀪𑀽𑀢𑁂𑀲𑀼 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀲𑀼 𑀧𑀥𑀸𑀦𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁, 𑀢𑀧𑁆𑀧𑀓𑀸𑀲𑀓𑀢𑁆𑀢𑀸 𑀅𑀬𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁄 ‘‘𑀳𑀺𑀢𑀯𑀺𑀪𑀸𑀯𑀦𑁄’’𑀢𑀺 𑀯𑀼𑀢𑁆𑀢𑁄.

𑀪𑀸𑀯𑀦𑀦𑁆𑀢𑀺 𑀪𑀸𑀯𑀻𑀬𑀢𑀺 𑀧𑀼𑀦𑀧𑁆𑀧𑀼𑀦𑀁 𑀘𑁂𑀢𑀲𑀺 𑀦𑀺𑀯𑁂𑀲𑀻𑀬𑀢𑀻𑀢𑀺 𑀪𑀸𑀯𑀦𑁄, 𑀪𑀸𑀯𑀦𑀻𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑀺𑀢𑀯𑀺𑀪𑀸𑀯𑀓𑀢𑁆𑀢𑀸𑀬𑁂𑀯 𑀳𑀺𑀢𑀢𑁆𑀣𑀻𑀳𑀺 𑀧𑀼𑀦𑀧𑁆𑀧𑀼𑀦𑀁 𑀘𑀺𑀢𑁆𑀢𑁂 𑀯𑀸𑀲𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀁 𑀏𑀯𑀁𑀯𑀺𑀥𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀁. 𑀲𑀼𑀭𑀲𑀫𑁆𑀪𑀯𑀦𑁆𑀢𑀺 𑀭𑀲𑀻𑀬𑀢𑀺 𑀅𑀲𑁆𑀲𑀸𑀤𑀻𑀬𑀢𑀻𑀢𑀺 𑀭𑀲𑁄, 𑀲𑀤𑁆𑀤𑀭𑀲𑁄 𑀅𑀢𑁆𑀣𑀭𑀲𑁄 𑀓𑀭𑀼𑀡𑀸𑀤𑀺𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑀘, 𑀲𑁄𑀪𑀡𑁄 𑀭𑀲𑁄 𑀏𑀢𑀲𑁆𑀲𑀸𑀢𑀺 𑀲𑀼𑀭𑀲𑁄, 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁄, 𑀢𑀁 𑀲𑀼𑀭𑀲𑀁. 𑀪𑀯𑀁 𑀪𑀯𑀦𑁆𑀢𑀁, 𑀲𑀦𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀲𑀼𑀭𑀲𑀁 𑀲𑀫𑀸𑀦𑀁, 𑀲𑀼𑀭𑀲𑀁 𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? ‘‘𑀲𑀺𑀮𑁂𑀲𑁄 𑀧𑀲𑀸𑀤𑁄 𑀲𑀫𑀢𑀸 𑀫𑀥𑀼𑀭𑀢𑀸 𑀲𑀼𑀔𑀼𑀫𑀸𑀮𑀢𑀸 𑀅𑀢𑁆𑀣𑀩𑁆𑀬𑀢𑁆𑀢𑀺 𑀉𑀤𑀸𑀭𑀢𑀸 𑀑𑀚𑁄 𑀓𑀦𑁆𑀢𑀺 𑀲𑀫𑀸𑀥𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀓𑀯𑀺𑀚𑀦𑁂𑀳𑀺 𑀅𑀲𑁆𑀲𑀸𑀤𑁂𑀢𑀩𑁆𑀩𑀲𑀺𑀮𑁂𑀲𑀸𑀤𑀺𑀤𑀲𑀯𑀺𑀥𑀲𑀤𑁆𑀤𑀚𑀻𑀯𑀺𑀢𑀕𑀼𑀡𑀲𑀗𑁆𑀔𑀸𑀢𑀲𑀤𑁆𑀤𑀭𑀲𑀲𑀫𑁆𑀧𑀢𑁆𑀢𑀻𑀳𑀺 𑀘 𑀲𑀪𑀸𑀯𑀸𑀔𑁆𑀬𑀸𑀦𑀁 𑀉𑀧𑀫𑀸 𑀭𑀽𑀧𑀓𑀁 𑀤𑀻𑀧𑀓𑀁 𑀆𑀯𑀼𑀢𑁆𑀢𑀻𑀢𑀺 𑀏𑀯𑀫𑀸𑀤𑀺𑀓𑁆𑀓𑀫𑀦𑀺𑀤𑁆𑀤𑀺𑀝𑁆𑀞𑀧𑀜𑁆𑀘𑀢𑀺𑀁𑀲𑀅𑀢𑁆𑀣𑀸𑀮𑀗𑁆𑀓𑀸𑀭𑁂𑀲𑀼 𑀅𑀦𑀼𑀭𑀽𑀧𑀲𑀪𑀸𑀯𑀸𑀔𑁆𑀬𑀸𑀦𑀸𑀤𑀺𑀧𑁆𑀧𑀥𑀸𑀦𑀅𑀢𑁆𑀣𑀸𑀮𑀗𑁆𑀓𑀸𑀭𑀲𑀗𑁆𑀔𑀸𑀢𑀅𑀢𑁆𑀣𑀭𑀲𑀲𑀫𑁆𑀧𑀢𑁆𑀢𑀻𑀳𑀺 𑀘 𑀬𑀣𑀸𑀲𑀫𑁆𑀪𑀯𑀁 𑀧𑀓𑀸𑀲𑀺𑀢𑀩𑁆𑀩𑀓𑀭𑀼𑀡𑀸𑀭𑀲𑀅𑀩𑁆𑀪𑀼𑀢𑀭𑀲𑀲𑀦𑁆𑀢𑀭𑀲𑀸𑀤𑀻𑀳𑀺 𑀘 𑀬𑀼𑀢𑁆𑀢𑀢𑁆𑀢𑀸 𑀲𑀼𑀭𑀲𑀁 𑀇𑀫𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀣 𑀯𑀸 𑀇𑀫𑀺𑀦𑀸 𑀧𑀓𑀭𑀡𑁂𑀦 𑀧𑀥𑀸𑀦𑀢𑁄 𑀯𑀺𑀥𑀻𑀬𑀫𑀸𑀦𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀲𑁆𑀲 𑀏𑀓𑀦𑁆𑀢𑁂𑀦 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀢𑁆𑀢𑀸 𑀲𑀫𑀸𑀥𑀺𑀲𑁆𑀲 𑀘 𑀧𑀜𑁆𑀜𑀸𑀬 𑀧𑀤𑀝𑁆𑀞𑀸𑀦𑀢𑁆𑀢𑀸 𑀧𑀜𑁆𑀜𑀸𑀬 𑀘 𑀦𑀺𑀩𑁆𑀩𑀸𑀦𑀧𑀸𑀧𑀦𑀢𑁄 𑀫𑀽𑀮𑀓𑀸𑀭𑀡𑀁 𑀳𑀼𑀢𑁆𑀯𑀸 𑀓𑀫𑁂𑀦 𑀦𑀺𑀩𑁆𑀩𑀸𑀦𑀸𑀫𑀢𑀨𑀮𑀭𑀲𑀲𑀫𑁆𑀧𑀤𑀸𑀬𑀓𑀁 𑀇𑀫𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀁 𑀧𑀭𑀫𑀲𑁆𑀲𑀸𑀤𑀦𑀻𑀬𑀭𑀽𑀧𑁂𑀦 𑀥𑀺𑀢𑀺𑀯𑀺𑀫𑀼𑀢𑁆𑀢𑀺𑀭𑀲𑁂𑀦 𑀲𑀼𑀭𑀲𑀪𑀽𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀘 𑀯𑁂𑀤𑀺𑀢𑀩𑁆𑀩𑀁. 𑀲𑀫𑁆𑀪𑀯𑀦𑁆𑀢𑀺 𑀏𑀢𑁆𑀣 𑀲𑀁 𑀯𑀼𑀘𑁆𑀘𑀢𑀺 𑀲𑀼𑀔𑀁 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘, 𑀢𑀁 𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀲𑀫𑁆𑀪𑀯𑁄, 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁄, 𑀢𑀁, 𑀓𑀸𑀬𑀘𑀺𑀢𑁆𑀢𑀲𑀼𑀔𑀸𑀦𑀁 𑀫𑀽𑀮𑀓𑀸𑀭𑀡𑀪𑀽𑀢𑀁, 𑀯𑀼𑀢𑁆𑀢𑀦𑀬𑁂𑀦 𑀲𑀼𑀭𑀲𑀢𑁆𑀢𑀸 𑀘 𑀬𑀣𑀸𑀯𑀼𑀢𑁆𑀢𑀭𑀲𑀲𑀫𑁆𑀧𑀤𑀲𑀸𑀭𑀫𑀳𑀼𑀲𑁆𑀲𑀯𑁂𑀦 𑀲𑀫𑁆𑀪𑀽𑀢𑀫𑀸𑀦𑀲𑀺𑀓𑀲𑀼𑀔𑀲𑁆𑀲, 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀦𑀺𑀲𑁆𑀲𑀬𑀓𑀸𑀬𑀺𑀓𑀲𑀼𑀔𑀲𑁆𑀲 𑀘 𑀧𑀪𑀯𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 𑀇𑀫𑀲𑁆𑀲 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀲𑁆𑀲 𑀲𑀫𑁆𑀫𑀸 𑀯𑀺𑀜𑁆𑀜𑀸𑀢𑀩𑁆𑀩𑀢𑀸𑀬 𑀓𑀸𑀭𑀡𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑀏𑀯𑀁 𑀦𑀸𑀦𑀸𑀕𑀼𑀡𑀭𑀢𑀦𑀸𑀓𑀭𑀁 𑀇𑀫𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀁 𑀲𑀫𑁆𑀧𑀚𑀸𑀦𑀦𑁆𑀢𑁄 𑀲𑁄 𑀓𑀼𑀮𑀧𑀼𑀢𑁆𑀢𑁄 𑀓𑀺𑀁 𑀳𑁄𑀢𑀻𑀢𑀺 𑀘𑁂? 𑀧𑀸𑀮𑀺𑀦𑀸 𑀉𑀧𑀸𑀮𑀺𑀦𑀸 𑀲𑀫𑁄 𑀪𑀯𑀢𑀺. 𑀧𑀸𑀮𑀺𑀦𑀸𑀢𑀺 𑀲𑀸𑀲𑀦𑀁 𑀧𑀸𑀮𑁂𑀢𑀻𑀢𑀺 ‘‘𑀧𑀸𑀮𑁄’’𑀢𑀺 𑀯𑀺𑀦𑀬𑁄 𑀯𑀼𑀘𑁆𑀘𑀢𑀺, 𑀯𑀼𑀢𑁆𑀢𑀜𑁆𑀳𑀺 ‘‘𑀯𑀺𑀦𑀬𑁄 𑀦𑀸𑀫 𑀲𑀸𑀲𑀦𑀲𑁆𑀲 𑀆𑀬𑀽’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑀧𑀞𑀫𑀲𑀗𑁆𑀕𑀻𑀢𑀺𑀓𑀣𑀸; 𑀧𑀸𑀭𑀸. 𑀅𑀝𑁆𑀞. 𑁧.𑀧𑀞𑀫𑀲𑀗𑁆𑀕𑀻𑀢𑀺𑀓𑀣𑀸; 𑀔𑀼. 𑀧𑀸. 𑀅𑀝𑁆𑀞. 𑁫.𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸; 𑀣𑁂𑀭𑀕𑀸. 𑀅𑀝𑁆𑀞. 𑁧.𑁨𑁫𑁧) 𑀲𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀸𑀮𑀻, 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀯𑀲𑁂𑀦 𑀢𑀺𑀯𑀺𑀥𑀲𑀸𑀲𑀦𑀲𑁆𑀲 𑀚𑀻𑀯𑀺𑀢𑀪𑀽𑀢𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀲𑀸𑀲𑀦𑀥𑀭𑀢𑁆𑀢𑀸 ‘‘𑀧𑀸𑀮𑀻’’𑀢𑀺 𑀮𑀤𑁆𑀥𑀦𑀸𑀫𑁂𑀦 𑀉𑀧𑀸𑀮𑀺𑀦𑀸, ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑀥𑀭𑀸𑀦𑀁 𑀬𑀤𑀺𑀤𑀁 𑀉𑀧𑀸𑀮𑀻’’𑀢𑀺 (𑀅. 𑀦𑀺. 𑁧.𑁨𑁧𑁯, 𑁨𑁨𑁮) 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁂𑀦 𑀲𑀤𑁆𑀥𑀫𑁆𑀫𑀯𑀭𑀘𑀓𑁆𑀓𑀯𑀢𑁆𑀢𑀺𑀦𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀫𑀼𑀔𑀧𑀤𑀼𑀫𑀁 𑀯𑀺𑀓𑀸𑀲𑁂𑀢𑁆𑀯𑀸 𑀧𑀓𑀸𑀲𑀺𑀢𑀏𑀢𑀤𑀕𑁆𑀕𑀝𑁆𑀞𑀸𑀦𑁂𑀦 𑀯𑀺𑀲𑁂𑀲𑀢𑁄 𑀲𑀸𑀬𑀦𑀭𑀓𑁆𑀔𑀦𑀓𑀪𑀸𑀯𑁂𑀦 𑀧𑀝𑀺𑀮𑀤𑁆𑀥𑀧𑀸𑀮𑀻𑀢𑀺𑀦𑀸𑀫𑀥𑁂𑀬𑁆𑀬𑁂𑀦 𑀉𑀧𑀸𑀮𑀺𑀫𑀳𑀸𑀣𑁂𑀭𑁂𑀦 𑀲𑀫𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀲𑁆𑀫𑀺𑀁 𑀯𑀺𑀲𑀬𑁂 𑀲𑀫𑁄 𑀪𑀯𑀢𑀻𑀢𑀺 𑀘𑁂? 𑀲𑀸𑀲𑀦𑁂. 𑀲𑀸𑀲𑀦𑁂𑀢𑀺 𑀬𑀣𑀸𑀯𑀼𑀢𑁆𑀢𑁂 𑀢𑀺𑀯𑀺𑀥𑁂 𑀲𑀸𑀲𑀦𑁂, 𑀢𑀢𑁆𑀭𑀸𑀧𑀺 𑀣𑀸𑀯𑀭𑀚𑀗𑁆𑀕𑀫𑀲𑀓𑀮𑀯𑀢𑁆𑀣𑀼𑀯𑀺𑀢𑁆𑀣𑀸𑀭𑀸𑀥𑀭𑀫𑀡𑁆𑀟𑀮𑀲𑀤𑀺𑀲𑁂 𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀤𑁆𑀯𑀬𑀥𑀸𑀭𑁂 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑁂, 𑀢𑀢𑁆𑀣𑀸𑀧𑀺 𑀯𑀺𑀦𑀬𑀓𑀣𑀸𑀥𑀺𑀓𑀸𑀭𑀢𑁆𑀢𑀸 𑀮𑀩𑁆𑀪𑀫𑀸𑀦𑁂 𑀯𑀺𑀦𑀬𑀧𑀺𑀝𑀓𑀲𑀗𑁆𑀔𑀸𑀢𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑁂𑀓𑀤𑁂𑀲𑁂 𑀲𑀫𑁄 𑀪𑀯𑀢𑀻𑀢𑀺 𑀅𑀢𑁆𑀣𑁄.

𑀓𑀺𑀁𑀪𑀽𑀢𑁂 𑀲𑀸𑀲𑀦𑁂? 𑀫𑀸𑀭𑀩𑀮𑀺𑀲𑀸𑀲𑀦𑁂. 𑀫𑀸𑀭𑀲𑁆𑀲 𑀩𑀮𑀺 𑀫𑀸𑀭𑀩𑀮𑀺, 𑀫𑀸𑀭𑀕𑁄𑀘𑀭𑁄, 𑀢𑀲𑁆𑀲 𑀲𑀸𑀲𑀦𑀁 𑀳𑀺𑀁𑀲𑀓𑀁 𑀫𑀸𑀭𑀩𑀮𑀺𑀲𑀸𑀲𑀦𑀁, 𑀢𑀲𑁆𑀫𑀺𑀁. 𑀔𑀦𑁆𑀥𑀸𑀤𑀻𑀲𑀼 𑀧𑀜𑁆𑀘𑀲𑀼 𑀫𑀸𑀭𑁂𑀲𑀼 𑀧𑀥𑀸𑀦𑀪𑀽𑀢𑀓𑀸𑀫𑀭𑀸𑀕𑀸𑀤𑀺𑀧𑀪𑀯𑀓𑀺𑀮𑁂𑀲𑀫𑀸𑀭𑀲𑁆𑀲 𑀕𑁄𑀘𑀭𑀪𑀸𑀯𑁂𑀦 𑀩𑀮𑀺𑀲𑀗𑁆𑀔𑀸𑀢𑀇𑀢𑁆𑀣𑀺𑀲𑀭𑀻𑀭𑀸𑀤𑀺𑀦𑀺𑀲𑁆𑀲𑀬𑀨𑁄𑀝𑁆𑀞𑀩𑁆𑀩𑀸𑀤𑀺𑀯𑀺𑀲𑀬𑀲𑁆𑀲 𑀧𑀭𑀺𑀘𑁆𑀘𑀚𑀸𑀧𑀦𑀢𑁆𑀣𑀁 ‘‘𑀬𑁄 𑀧𑀦 𑀪𑀺𑀓𑁆𑀔𑀼…𑀧𑁂… 𑀅𑀲𑀁𑀯𑀸𑀲𑁄’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁪) 𑀦𑀬𑁂𑀦 𑀯𑀼𑀢𑁆𑀢𑀢𑁆𑀢𑀸 𑀢𑀲𑁆𑀲 𑀫𑀸𑀭𑀩𑀮𑀺𑀲𑁆𑀲 𑀳𑀺𑀁𑀲𑀓𑀁 𑀳𑁄𑀢𑀻𑀢𑀺 𑀫𑀸𑀭𑀩𑀮𑀺𑀲𑀸𑀲𑀦𑀦𑀸𑀫𑀥𑁂𑀬𑁆𑀬𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀲𑀸𑀲𑀦𑁂𑀢𑀺 𑀅𑀢𑁆𑀣𑁄.

𑀅𑀣 𑀯𑀸 ‘‘𑀩𑀴𑀺𑀲𑁂𑀦𑀧𑀺 𑀚𑀸𑀮𑁂𑀦, 𑀳𑀢𑁆𑀣𑁂𑀦 𑀓𑀼𑀫𑀺𑀦𑁂𑀦 𑀯𑀸’’𑀢𑀺 𑀉𑀤𑀓𑀝𑁆𑀞𑀓𑀣𑀸𑀬 𑀯𑀓𑁆𑀔𑀫𑀸𑀦𑀢𑁆𑀢𑀸 𑀩𑀴𑀺𑀲-𑀲𑀤𑁆𑀤𑁂𑀦 𑀫𑀘𑁆𑀙𑀫𑀸𑀭𑀡𑀓𑀡𑁆𑀝𑀓𑀫𑀸𑀳, 𑀢𑀁 𑀫𑀸𑀭𑀲𑁆𑀲 𑀩𑀴𑀺𑀲𑀁 𑀅𑀲𑀢𑀺 𑀔𑀺𑀧𑀢𑀺 𑀯𑀚𑁆𑀚𑁂𑀢𑀻𑀢𑀺 𑀫𑀸𑀭𑀩𑀴𑀺𑀲𑀸𑀲𑀦𑀁, 𑀢𑀲𑁆𑀫𑀺𑀁, ‘‘𑀲𑀫𑀦𑁆𑀢𑀧𑀸𑀲𑁄 𑀫𑀸𑀭𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀁𑀲𑀸𑀭𑀲𑀸𑀕𑀭𑁂 𑀧𑀭𑀺𑀯𑀢𑁆𑀢𑀫𑀸𑀦𑀓𑀲𑀁𑀓𑀺𑀮𑁂𑀲𑀤𑀸𑀲𑀧𑀼𑀣𑀼𑀚𑁆𑀚𑀦𑀲𑀗𑁆𑀔𑀸𑀢𑀫𑀘𑁆𑀙𑁂 𑀕𑀡𑁆𑀳𑀺𑀢𑀼𑀁 𑀫𑀸𑀭𑀫𑀳𑀸𑀓𑁂𑀯𑀝𑁆𑀝𑁂𑀦 𑀧𑀓𑁆𑀔𑀺𑀢𑁆𑀢𑀩𑀴𑀺𑀲𑀲𑀗𑁆𑀔𑀸𑀢𑀇𑀢𑁆𑀣𑀺𑀭𑀽𑀧𑀲𑀤𑁆𑀤𑀸𑀤𑀺𑀧𑀜𑁆𑀘𑀓𑀸𑀫𑀕𑀼𑀡𑀸- 𑀫𑀺𑀲𑀸𑀯𑀼𑀢𑀓𑀸𑀫𑀭𑀸𑀕𑀸𑀤𑀺𑀓𑀺𑀮𑁂𑀲𑀫𑀳𑀸𑀩𑀴𑀺𑀲𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀯𑀻𑀢𑀺𑀓𑁆𑀓𑀫𑀧𑁆𑀧𑀳𑀸𑀦𑀸𑀤𑀺𑀯𑀲𑁂𑀦 𑀧𑀚𑀳𑀦𑁆𑀢𑁂 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑁂 𑀲𑀸𑀲𑀦𑁂𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀢𑁆𑀣 𑀘 𑀲𑀸𑀭𑀫𑀢𑁂 𑀇𑀥 𑀇𑀫𑀲𑁆𑀫𑀺𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀬𑁄 𑀧𑀦 𑀦 𑀭𑀫𑀢𑁂, 𑀲𑁄 𑀧𑀼𑀕𑁆𑀕𑀮𑁄 𑀅𑀦𑀬𑀽𑀧𑀭𑀫𑁂 𑀢𑀢𑁄 𑀏𑀯 𑀧𑀭𑀫𑁂 𑀉𑀢𑁆𑀢𑀫𑁂 𑀲𑀼𑀚𑀦𑀲𑁆𑀲 𑀲𑀼𑀔𑀸𑀦𑀬𑀦𑁂 𑀦𑀬𑀦𑁂 𑀦𑀬𑀦𑀼𑀧𑀫𑁂 𑀯𑀺𑀦𑀬𑁂 𑀭𑀢𑁄 𑀅𑀪𑀺𑀭𑀢𑁄 𑀧𑀥𑀸𑀦𑀭𑀢𑁄𑀧𑀺 𑀯𑀺𑀦𑀬𑁂 𑀅𑀚𑁆𑀛𑀸𑀬𑀦𑀸𑀤𑀻𑀲𑀼 𑀬𑁄𑀕𑀫𑀸𑀧𑀚𑁆𑀚𑀦𑁆𑀢𑁄𑀧𑀺 𑀧𑀝𑀼 𑀳𑁄𑀢𑀺 𑀧𑀝𑀼𑀢𑀭𑁄 𑀳𑁄𑀢𑀺 𑀓𑀺𑀁, 𑀦 𑀳𑁄𑀢𑁂𑀯. 𑀢𑀲𑁆𑀫𑀸 𑀯𑀺𑀦𑀬𑁂 𑀧𑀸𑀝𑀯𑀢𑁆𑀣𑀺𑀦𑀸 𑀏𑀢𑁆𑀣𑁂𑀯 𑀲𑀓𑁆𑀓𑀘𑁆𑀘𑀸𑀪𑀺𑀬𑁄𑀕𑁄 𑀓𑀸𑀢𑀩𑁆𑀩𑁄𑀢𑀺 𑀲𑀗𑁆𑀔𑁂𑀧𑀢𑁄 𑀲𑀸𑀥𑀺𑀧𑁆𑀧𑀸𑀬𑀸 𑀅𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 𑀧𑀥𑀸𑀦𑁂 𑀘𑀢𑀼𑀩𑁆𑀩𑀺𑀥𑁂 𑀲𑀫𑁆𑀫𑀧𑁆𑀧𑀥𑀸𑀦𑁂 𑀯𑀻𑀭𑀺𑀬𑁂 𑀭𑀢𑁄 𑀅𑀪𑀺𑀭𑀢𑁄 𑀬𑁄 𑀧𑀦 𑀦𑀭𑁄 𑀲𑀸𑀭𑀫𑀢𑁂 𑀇𑀥 𑀇𑀫𑀲𑁆𑀫𑀺𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀬𑀢𑁄 𑀭𑀫𑀢𑁂, 𑀅𑀢𑁄 𑀢𑀲𑁆𑀫𑀸 𑀲𑁄 𑀅𑀦𑀬𑀽𑀧𑀭𑀫𑁂 𑀲𑀼𑀚𑀦𑀲𑁆𑀲 𑀲𑀼𑀔𑀸𑀦𑀬𑀦𑁂 𑀯𑀺𑀦𑀬𑁂 𑀧𑀝𑀼 𑀳𑁄𑀢𑀺 𑀓𑀼𑀲𑀮𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸𑀢𑀺 𑀦𑁄 𑀔𑀦𑁆𑀢𑀺.

𑀳𑀺𑀢𑀯𑀺𑀪𑀸𑀯𑀦𑀁 𑀳𑀺𑀢𑀧𑁆𑀧𑀓𑀸𑀲𑀓𑀁 𑀪𑀸𑀯𑀦𑀁 𑀪𑀸𑀯𑀦𑀻𑀬𑀁 𑀆𑀲𑁂𑀯𑀺𑀢𑀩𑁆𑀩𑀁 𑀲𑀼𑀭𑀲𑀫𑁆𑀪𑀯𑀁 𑀲𑀼𑀭𑀲𑀁 𑀲𑀫𑀸𑀦𑀁 𑀲𑀼𑀭𑀲𑀁 𑀪𑀽𑀢𑀁 𑀲𑀫𑁆𑀪𑀯𑀁 𑀲𑀼𑀔𑀳𑁂𑀢𑀼𑀓𑀁 𑀇𑀫𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀁 𑀬𑁄 𑀅𑀯𑁂𑀤𑀺 𑀅𑀜𑁆𑀜𑀸𑀲𑀺, 𑀲𑁄 𑀧𑀼𑀕𑁆𑀕𑀮𑁄 𑀫𑀸𑀭𑀩𑀴𑀺𑀲𑀸𑀲𑀦𑁂 𑀫𑀸𑀭𑀯𑀺𑀲𑀬𑀧𑁆𑀧𑀳𑀸𑀦𑀓𑀭𑁂, 𑀅𑀣 𑀯𑀸 𑀫𑀸𑀭𑀩𑀴𑀺𑀲𑀲𑁆𑀲 𑀫𑀸𑀭𑀲𑁆𑀲 𑀯𑀢𑁆𑀣𑀼𑀓𑀸𑀫𑀸𑀫𑀺𑀲𑀸𑀯𑀼𑀢𑀓𑀺𑀮𑁂𑀲𑀓𑀸𑀫𑀩𑀴𑀺𑀲𑀲𑁆𑀲 𑀅𑀲𑀦𑁂 𑀯𑀚𑁆𑀚𑀫𑀸𑀦𑁂 𑀲𑀸𑀲𑀦𑁂 𑀢𑀺𑀯𑀺𑀥𑁂𑀧𑀺 𑀚𑀺𑀦𑀲𑀸𑀲𑀦𑁂, 𑀢𑀢𑁆𑀣𑀸𑀧𑀺 𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀸𑀦𑀁 𑀧𑀢𑀺𑀝𑁆𑀞𑀸𑀦𑀪𑀽𑀢𑁂 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑁂, 𑀢𑀢𑁆𑀭𑀸𑀧𑀺 𑀲𑀓𑀮𑀲𑀸𑀲𑀦𑀲𑁆𑀲 𑀚𑀻𑀯𑀺𑀢𑀲𑀫𑀸𑀦𑁂 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑁂𑀓𑀤𑁂𑀲𑁂 𑀧𑀸𑀮𑀺𑀦𑀸 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀬𑀁 𑀏𑀢𑀤𑀕𑁆𑀕𑁂 𑀞𑀧𑀦𑁂𑀦 𑀲𑀸𑀲𑀦𑀧𑀸𑀮𑀦𑁂 𑀢𑀁𑀫𑀽𑀮𑀪𑀸𑀯𑀢𑁄 𑀧𑀸𑀮𑀲𑀗𑁆𑀔𑀸𑀢𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀬𑀸 𑀧𑀲𑀢𑁆𑀣𑀢𑀭𑁂𑀦 𑀉𑀧𑀸𑀮𑀺𑀦𑀸 𑀉𑀧𑀸𑀮𑀺𑀫𑀳𑀸𑀣𑁂𑀭𑁂𑀦 𑀲𑀫𑁄 𑀪𑀯𑀢𑀻𑀢𑀺 𑀬𑁄𑀚𑀦𑀸.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀧𑀞𑀫𑀧𑀸𑀭𑀸𑀚𑀺𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀓𑀣𑀸𑀯𑀡𑁆𑀡𑀦𑀸

𑁩𑁯. 𑀇𑀤𑀸𑀦𑀺 𑀤𑀼𑀢𑀺𑀬𑀁 𑀧𑀸𑀭𑀸𑀚𑀺𑀓𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀆𑀤𑀺𑀬𑀦𑁆𑀢𑁄’’𑀢𑀺𑀆𑀤𑀺. 𑀢𑀢𑁆𑀣 ‘‘𑀣𑁂𑀬𑁆𑀬𑀘𑀺𑀢𑁆𑀢𑁂𑀦𑀸’’𑀢𑀺 𑀧𑀸𑀞𑀲𑁂𑀲𑁄. 𑀲𑁄 𑀘 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀦𑁆𑀢𑁂𑀳𑀺 𑀲𑀩𑁆𑀩𑀧𑀤𑁂𑀳𑀺 𑀬𑁄𑀚𑁂𑀢𑀩𑁆𑀩𑁄, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀆𑀤𑀺𑀬𑀦𑁆𑀢𑁄 𑀧𑀭𑀸𑀚𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀲𑀦𑁆𑀢𑀓𑀁 𑀆𑀭𑀸𑀫𑀸𑀤𑀺𑀁 𑀅𑀪𑀺𑀬𑀼𑀜𑁆𑀚𑀺𑀢𑁆𑀯𑀸 𑀲𑀸𑀫𑀺𑀓𑀁 𑀧𑀭𑀸𑀚𑁂𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑁄 𑀢𑀤𑀢𑁆𑀣𑀸𑀬 𑀓𑀢𑁂 𑀧𑀼𑀩𑁆𑀩𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀲𑀸𑀫𑀺𑀓𑀲𑁆𑀲 𑀯𑀺𑀫𑀢𑀼𑀧𑁆𑀧𑀸𑀤𑀦𑁂 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀆𑀧𑀚𑁆𑀚𑀺𑀢𑁆𑀯𑀸 𑀢𑀲𑁆𑀲 𑀘 𑀅𑀢𑁆𑀢𑀦𑁄 𑀘 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀅𑀤𑀸𑀬𑀸𑀤𑁄 𑀳𑀼𑀢𑁆𑀯𑀸 𑀧𑀭𑀸𑀚𑀺𑀢𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀢𑀣𑀸’’𑀢𑀺 𑀘 ‘‘𑀅𑀧𑀻’’𑀢𑀺 𑀘 ‘‘𑀧𑀭𑀸𑀚𑀺𑀢𑁄’’𑀢𑀺 𑀘 ‘‘𑀣𑁂𑀬𑁆𑀬𑀘𑀺𑀢𑁆𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀲𑀳 𑀏𑀓𑀢𑁄 𑀓𑀢𑁆𑀯𑀸 ‘‘𑀳𑀭𑀦𑁆𑀢𑁄’’𑀢𑀺𑀆𑀤𑀻𑀳𑀺 𑀘𑀢𑀽𑀳𑀺𑀧𑀺 𑀧𑀤𑁂𑀳𑀺 𑀬𑁄𑀚𑁂𑀢𑀩𑁆𑀩𑀁. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀳𑀭𑀦𑁆𑀢𑁄𑀧𑀺 𑀢𑀣𑀸 𑀧𑀭𑀸𑀚𑀺𑀢𑁄𑀢𑀺 𑀬𑁄𑀚𑀦𑀸 𑀲𑀻𑀲𑀸𑀤𑀻𑀳𑀺 𑀧𑀭𑀲𑀦𑁆𑀢𑀓𑀁 𑀪𑀡𑁆𑀟𑀁 𑀳𑀭𑀦𑁆𑀢𑁄 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀪𑀡𑁆𑀟𑀲𑁆𑀲 𑀆𑀫𑀲𑀦𑁂 𑀤𑀼𑀓𑁆𑀓𑀝𑀜𑁆𑀘 𑀨𑀦𑁆𑀤𑀸𑀧𑀦𑁂 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀆𑀧𑀚𑁆𑀚𑀺𑀢𑁆𑀯𑀸 𑀲𑀻𑀲𑀢𑁄 𑀔𑀦𑁆𑀥𑁄𑀳𑀭𑀡𑀸𑀤𑀺𑀧𑀬𑁄𑀕𑀁 𑀓𑀭𑁄𑀦𑁆𑀢𑁄𑀧𑀺 𑀢𑀣𑀸 𑀧𑀭𑀸𑀚𑀺𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀅𑀯𑀳𑀭𑀦𑁆𑀢𑁄𑀧𑀺 𑀢𑀣𑀸 𑀧𑀭𑀸𑀚𑀺𑀢𑁄𑀢𑀺 𑀬𑁄𑀚𑀦𑀸. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀅𑀜𑁆𑀜𑁂𑀳𑀺 𑀲𑀗𑁆𑀕𑁄𑀧𑀦𑀸𑀤𑀺𑀁 𑀲𑀦𑁆𑀥𑀸𑀬 𑀅𑀢𑁆𑀢𑀦𑀺 𑀉𑀧𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑀁 ‘‘𑀤𑁂𑀳𑀺 𑀫𑁂 𑀪𑀡𑁆𑀟’’𑀦𑁆𑀢𑀺 𑀘𑁄𑀤𑀺𑀬𑀫𑀸𑀦𑁄 ‘‘𑀦 𑀫𑀬𑀸 𑀕𑀳𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀫𑀼𑀲𑀸 𑀯𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑁄𑀧𑀺 𑀢𑀲𑁆𑀲 𑀯𑀺𑀫𑀢𑀼𑀧𑁆𑀧𑀸𑀤𑀦𑁂 𑀣𑀼𑀮𑁆𑀮𑀘𑁆𑀘𑀬𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀣𑁂𑀯 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀧𑀭𑀸𑀚𑀺𑀢𑁄 𑀳𑁄𑀢𑀻𑀢𑀺. ‘‘𑀦𑀸𑀳𑀁 𑀅𑀕𑁆𑀕𑀳𑁂𑀲𑀺’’𑀦𑁆𑀢𑀺𑀆𑀤𑀺𑀦𑀸 𑀅𑀯𑀚𑀸𑀦𑀺𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀳𑀭𑀦𑁆𑀢𑁄 ‘‘𑀅𑀯𑀳𑀭𑀦𑁆𑀢𑁄’’𑀢𑀺 𑀯𑀼𑀢𑁆𑀢𑁄.

𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀇𑀭𑀺𑀬𑀸𑀧𑀣𑀁 𑀯𑀺𑀓𑁄𑀧𑁂𑀦𑁆𑀢𑁄𑀧𑀺 𑀢𑀣𑀸 𑀧𑀭𑀸𑀚𑀺𑀢𑁄𑀢𑀺 𑀬𑁄𑀚𑀦𑀸. 𑀬𑀁 𑀧𑀦 𑀅𑀜𑁆𑀜𑁂𑀲𑀁 𑀪𑀡𑁆𑀟𑀳𑀭𑀡𑀓𑀫𑀦𑀼𑀲𑁆𑀲𑀸𑀤𑀻𑀦𑀫𑀜𑁆𑀜𑀢𑀭𑀁 ‘‘𑀢𑁂𑀦 𑀪𑀡𑁆𑀟𑁂𑀦 𑀲𑀳 𑀕𑀡𑁆𑀳𑀸𑀫𑀻’’𑀢𑀺 𑀪𑀡𑁆𑀟𑀁 𑀳𑀭𑀦𑁆𑀢𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀦𑀺𑀯𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀤𑀺𑀲𑀸𑀪𑀺𑀫𑀼𑀔𑀁 𑀓𑀢𑁆𑀯𑀸 𑀢𑀲𑁆𑀲 𑀧𑀓𑀢𑀺𑀇𑀭𑀺𑀬𑀸𑀧𑀣𑀁 𑀯𑀺𑀓𑁄𑀧𑁂𑀦𑁆𑀢𑁄𑀧𑀺 𑀧𑀞𑀫𑀧𑀸𑀤𑀼𑀤𑁆𑀥𑀸𑀭𑁂𑀦 𑀣𑀼𑀮𑁆𑀮𑀘𑁆𑀘𑀬𑀫𑀸𑀧𑀚𑁆𑀚𑀺𑀢𑁆𑀯𑀸 𑀤𑀼𑀢𑀺𑀬𑀧𑀤𑀯𑀸𑀭𑀸𑀢𑀺𑀓𑁆𑀓𑀫𑁂𑀦 𑀢𑀣𑁂𑀯 𑀧𑀭𑀸𑀚𑀺𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀞𑀸𑀦𑀸 𑀘𑀸𑀯𑁂𑀦𑁆𑀢𑁄𑀧𑀺 𑀢𑀣𑀸 𑀧𑀭𑀸𑀚𑀺𑀢𑁄𑀢𑀺 𑀬𑁄𑀚𑀦𑀸. 𑀣𑀮𑀸𑀤𑀻𑀲𑀼 𑀞𑀺𑀢𑀁 𑀪𑀡𑁆𑀟𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀅𑀯𑀳𑀭𑀺𑀢𑀼𑀓𑀸𑀫𑀢𑀸𑀬 𑀞𑀺𑀢𑀝𑁆𑀞𑀸𑀦𑀢𑁄 𑀅𑀧𑀦𑁂𑀦𑁆𑀢𑁄𑀧𑀺 𑀤𑀼𑀢𑀺𑀬𑀧𑀭𑀺𑀬𑁂𑀲𑀦𑀸𑀤𑀻𑀲𑀼 𑀆𑀫𑀲𑀦𑀸𑀯𑀲𑀸𑀦𑁂𑀲𑀼 𑀲𑀩𑁆𑀩𑁂𑀲𑀼𑀧𑀺 𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀸𑀦𑀺 𑀘 𑀨𑀦𑁆𑀤𑀸𑀧𑀦𑁂 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀆𑀧𑀚𑁆𑀚𑀺𑀢𑁆𑀯𑀸 𑀉𑀧𑀭𑀺 𑀯𑀓𑁆𑀔𑀫𑀸𑀦𑀧𑁆𑀧𑀓𑀸𑀭𑁂𑀲𑀼 𑀯𑀺𑀬 𑀞𑀺𑀢𑀝𑁆𑀞𑀸𑀦𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀧𑀦𑁂𑀦𑁆𑀢𑁄 𑀢𑀣𑁂𑀯 𑀧𑀭𑀸𑀚𑀺𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀫𑁂𑀢𑀸𑀬 𑀕𑀸𑀣𑀸𑀬 ‘‘𑀆𑀤𑀺𑀬𑁂𑀬𑁆𑀬 𑀳𑀭𑁂𑀬𑁆𑀬 𑀅𑀯𑀳𑀭𑁂𑀬𑁆𑀬 𑀇𑀭𑀺𑀬𑀸𑀧𑀣𑀁 𑀯𑀺𑀓𑁄𑀧𑁂𑀬𑁆𑀬 𑀞𑀸𑀦𑀸𑀘𑀸𑀯𑁂𑀬𑁆𑀬 𑀲𑀗𑁆𑀓𑁂𑀢𑀁 𑀯𑀻𑀢𑀺𑀦𑀸𑀫𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁯𑁨) 𑀧𑀤𑀪𑀸𑀚𑀦𑀸𑀕𑀢𑁂𑀲𑀼 𑀙𑀲𑀼 𑀧𑀤𑁂𑀲𑀼 𑀆𑀤𑁄 𑀧𑀜𑁆𑀘 𑀧𑀤𑀸𑀦𑀺 𑀲𑀗𑁆𑀕𑀳𑁂𑀢𑁆𑀯𑀸 𑀙𑀝𑁆𑀞𑀁 𑀧𑀤𑀁 𑀓𑀲𑁆𑀫𑀸 𑀦 𑀲𑀗𑁆𑀕𑀳𑀺𑀢𑀦𑁆𑀢𑀺 𑀘𑁂? 𑀅𑀬𑀁 𑀕𑀸𑀣𑀸 𑀦 𑀢𑀁𑀧𑀤𑀪𑀸𑀚𑀦𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀸, 𑀅𑀣 𑀔𑁄 𑀢𑁂𑀲𑀁 𑀧𑀤𑀸𑀦𑀁 𑀯𑀺𑀦𑀺𑀘𑁆𑀙𑀬𑀁 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀲𑀼 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁨) 𑀯𑀼𑀢𑁆𑀢𑀧𑀜𑁆𑀘𑀯𑀻𑀲𑀢𑀺𑀅𑀯𑀳𑀸𑀭𑁂 𑀤𑀲𑁆𑀲𑁂𑀢𑀼𑀁 𑀢𑀤𑀯𑀬𑀯𑀪𑀽𑀢𑀧𑀜𑁆𑀘𑀧𑀜𑁆𑀘𑀓𑀸𑀦𑀺 𑀤𑀲𑁆𑀲𑁂𑀢𑀼𑀓𑀸𑀫𑁂𑀦 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀏𑀢𑁆𑀣 𑀙𑀝𑁆𑀞𑀁 𑀧𑀤𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀯𑀓𑁆𑀔𑀫𑀸𑀦𑁂 𑀢𑀢𑀺𑀬𑀧𑀜𑁆𑀘𑀓𑁂 𑀦𑀺𑀲𑁆𑀲𑀕𑁆𑀕𑀺𑀬𑀸𑀯𑀳𑀸𑀭𑀧𑀤𑁂𑀦, 𑀧𑀜𑁆𑀘𑀫𑀧𑀜𑁆𑀘𑀓𑁂 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑀧𑀤𑁂𑀦 𑀘 𑀲𑀗𑁆𑀕𑀬𑁆𑀳𑀫𑀸𑀦𑀢𑁆𑀢𑀸 𑀏𑀢𑁆𑀣 𑀦𑀸𑀦𑁂𑀓𑀪𑀡𑁆𑀟𑀧𑀜𑁆𑀘𑀓𑀤𑁆𑀯𑀬𑀁 𑀅𑀲𑀗𑁆𑀓𑀭𑀢𑁄 𑀤𑀲𑁆𑀲𑁂𑀢𑀼𑀁 𑀙𑀝𑁆𑀞𑀁 𑀧𑀤𑀁 𑀦 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁪𑁦. 𑀇𑀫𑀲𑁆𑀫𑀺𑀁 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑁂 𑀯𑀢𑁆𑀣𑀼𑀫𑁆𑀳𑀺 𑀑𑀢𑀺𑀡𑁆𑀡𑁂 𑀓𑀢𑁆𑀢𑀩𑁆𑀩𑀯𑀺𑀦𑀺𑀘𑁆𑀙𑀬𑀲𑁆𑀲 𑀧𑀜𑁆𑀘𑀯𑀻𑀲𑀢𑀺𑀅𑀯𑀳𑀸𑀭𑀸𑀦𑀁 𑀅𑀗𑁆𑀕𑀸𑀦𑀺 𑀳𑁄𑀦𑁆𑀢𑀺, 𑀢𑁂 𑀘 𑀦𑀸𑀦𑀸𑀪𑀡𑁆𑀟𑀧𑀜𑁆𑀘𑀓𑀁 𑀏𑀓𑀪𑀡𑁆𑀟𑀧𑀜𑁆𑀘𑀓𑀁 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑀁 𑀧𑀼𑀩𑁆𑀩𑀧𑀬𑁄𑀕𑀧𑀜𑁆𑀘𑀓𑀁 𑀣𑁂𑀬𑁆𑀬𑀸𑀯𑀳𑀸𑀭𑀧𑀜𑁆𑀘𑀓𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀸 𑀧𑀜𑁆𑀘𑀧𑀜𑁆𑀘𑀓𑀪𑁂𑀤𑀸, 𑀢𑀢𑁆𑀣 𑀇𑀫𑀸𑀬 𑀕𑀸𑀣𑀸𑀬 𑀦𑀸𑀦𑁂𑀓𑀪𑀡𑁆𑀟𑀧𑀜𑁆𑀘𑀓𑀤𑁆𑀯𑀬𑀧𑁆𑀧𑀪𑁂𑀤𑁂 𑀤𑀲 𑀅𑀯𑀳𑀸𑀭𑁂 𑀲𑀗𑁆𑀕𑀳𑁂𑀢𑁆𑀯𑀸 𑀅𑀯𑀲𑁂𑀲𑀧𑀜𑁆𑀘𑀓𑀢𑁆𑀢𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀺𑀲𑁆𑀲𑀁 𑀕𑀸𑀣𑀸𑀬𑀁. 𑀦𑀸𑀦𑁂𑀓𑀪𑀡𑁆𑀟𑀸𑀦𑀦𑁆𑀢𑀺 𑀦𑀸𑀦𑀸, 𑀏𑀓𑁄 𑀘 𑀪𑀡𑁆𑀟𑁄 𑀬𑁂𑀲𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀲𑀯𑀺𑀜𑁆𑀜𑀸𑀡𑀓𑀅𑀯𑀺𑀜𑁆𑀜𑀸𑀡𑀓𑀪𑀡𑁆𑀟𑀯𑀲𑁂𑀦 𑀦𑀸𑀦𑀸𑀪𑀡𑁆𑀟𑀧𑀜𑁆𑀘𑀓𑀜𑁆𑀘 𑀲𑀯𑀺𑀜𑁆𑀜𑀸𑀡𑀓𑀪𑀡𑁆𑀟𑀯𑀲𑁂𑀦𑁂𑀯 𑀏𑀓𑀪𑀡𑁆𑀟𑀧𑀜𑁆𑀘𑀓𑀜𑁆𑀘 𑀯𑁂𑀤𑀺𑀢𑀩𑁆𑀩𑀁. 𑀧𑀜𑁆𑀘 𑀧𑀭𑀺𑀫𑀸𑀡𑀸 𑀬𑁂𑀲𑀦𑁆𑀢𑁂 𑀧𑀜𑁆𑀘𑀓𑀸, 𑀢𑁂𑀲𑀁. 𑀅𑀯𑀳𑀸𑀭𑀸𑀢𑀺 𑀅𑀯𑀳𑀭𑀡𑀸𑀦𑀺, 𑀘𑁄𑀭𑀓𑀫𑁆𑀫𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀢𑀺 𑀅𑀦𑀦𑁆𑀢𑀭𑀕𑀸𑀣𑀸𑀬 ‘‘𑀆𑀤𑀺𑀬𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀸 𑀆𑀤𑀺𑀬𑀦𑁆𑀢𑀸𑀤𑀬𑁄. 𑀧𑀝𑀺𑀧𑀢𑁆𑀢𑀺𑀲𑀦𑁆𑀢𑀸𑀦𑁂 𑀯𑀺𑀲𑁂𑀲𑀁 𑀯𑀺𑀦𑀺𑀘𑁆𑀙𑀬𑀁 𑀪𑀸𑀯𑁂𑀢𑀺 𑀉𑀧𑁆𑀧𑀸𑀤𑁂𑀢𑀻𑀢𑀺 𑀯𑀺𑀪𑀸𑀯𑀻, 𑀯𑀺𑀦𑀬𑀥𑀭𑁄, 𑀢𑁂𑀦 𑀯𑀺𑀪𑀸𑀯𑀺𑀦𑀸. 𑀯𑀺𑀜𑁆𑀜𑀸𑀢𑀩𑁆𑀩𑀸𑀢𑀺 𑀧𑀭𑁂𑀲𑀁 𑀆𑀭𑀸𑀫𑀸𑀤𑀺𑀲𑀯𑀺𑀜𑁆𑀜𑀸𑀡𑀓𑀯𑀢𑁆𑀣𑀽𑀦𑀺 𑀯𑀸 𑀤𑀸𑀲𑀫𑀬𑀽𑀭𑀸𑀤𑀺𑀁 𑀓𑁂𑀯𑀮𑀁 𑀲𑀯𑀺𑀜𑁆𑀜𑀸𑀡𑀓𑀯𑀢𑁆𑀣𑀼𑀫𑀢𑁆𑀢𑀁 𑀯𑀸 𑀅𑀯𑀳𑀭𑀺𑀢𑀼𑀁 𑀓𑀢𑀸 𑀬𑀣𑀸𑀯𑀼𑀢𑁆𑀢𑀲𑀭𑀽𑀧𑀸 𑀆𑀤𑀺𑀬𑀦𑀸𑀤𑀬𑁄 𑀞𑀸𑀦𑀸𑀘𑀸𑀯𑀦𑀧𑀭𑀺𑀬𑁄𑀲𑀸𑀦𑀸 𑀧𑀜𑁆𑀘 𑀅𑀯𑀳𑀸𑀭𑀸 𑀬𑀣𑀸𑀯𑀼𑀢𑁆𑀢𑀦𑀸𑀦𑀸𑀪𑀡𑁆𑀟𑀏𑀓𑀪𑀡𑁆𑀟𑀯𑀺𑀲𑀬𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀦𑀸𑀦𑀸𑀪𑀡𑁆𑀟𑀧𑀜𑁆𑀘𑀓𑀁 𑀏𑀓𑀪𑀡𑁆𑀟𑀧𑀜𑁆𑀘𑀓𑀦𑁆𑀢𑀺 𑀤𑀲 𑀅𑀯𑀳𑀸𑀭𑀸 𑀪𑀯𑀦𑁆𑀢𑀻𑀢𑀺 𑀯𑀺𑀦𑀬𑀥𑀭𑁂𑀦 𑀑𑀢𑀺𑀡𑁆𑀡𑀲𑁆𑀲 𑀯𑀢𑁆𑀣𑀼𑀦𑁄 𑀯𑀺𑀦𑀺𑀘𑁆𑀙𑀬𑁄𑀧𑀓𑀸𑀭𑀓𑀢𑁆𑀢𑀸 𑀢𑀣𑀢𑁄 𑀜𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑁪𑁧. 𑀏𑀯𑀁 𑀧𑀜𑁆𑀘𑀯𑀻𑀲𑀢𑀺 𑀅𑀯𑀳𑀸𑀭𑁂 𑀤𑀲𑁆𑀲𑁂𑀢𑀼𑀁 𑀯𑀢𑁆𑀢𑀩𑁆𑀩𑁂𑀲𑀼 𑀧𑀜𑁆𑀘𑀲𑀼 𑀧𑀜𑁆𑀘𑀓𑁂𑀲𑀼 𑀦𑀸𑀦𑁂𑀓𑀪𑀡𑁆𑀟𑀧𑀜𑁆𑀘𑀓𑀸𑀦𑀺 𑀤𑁆𑀯𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀯𑀲𑁂𑀲𑀧𑀜𑁆𑀘𑀓𑀢𑁆𑀢𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀸𑀳𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀸𑀳𑀢𑁆𑀣𑁄𑀢𑀺 𑀲𑀓𑁄 𑀳𑀢𑁆𑀣𑁄, 𑀢𑁂𑀦 𑀦𑀺𑀩𑁆𑀩𑀢𑁆𑀢𑁄, 𑀢𑀲𑁆𑀲 𑀯𑀸 𑀲𑀫𑁆𑀩𑀦𑁆𑀥𑀻𑀢𑀺 𑀲𑀸𑀳𑀢𑁆𑀣𑁄, 𑀅𑀯𑀳𑀸𑀭𑁄, 𑀘𑁄𑀭𑁂𑀦 𑀲𑀳𑀢𑁆𑀣𑀸 𑀓𑀢𑁄 𑀅𑀯𑀳𑀸𑀭𑁄𑀢𑀺 𑀅𑀢𑁆𑀣𑁄. 𑀆𑀡𑀢𑁆𑀢𑀺𑀓𑁄 𑀘𑁂𑀯𑀸𑀢𑀺 𑀆𑀡𑀢𑁆𑀢𑀺𑀬𑀸 𑀦𑀺𑀩𑁆𑀩𑀢𑁆𑀢𑁄 𑀆𑀡𑀢𑁆𑀢𑀺𑀓𑁄, 𑀅𑀯𑀳𑀸𑀭𑁄, 𑀘𑁄𑀭𑀲𑁆𑀲 ‘‘𑀇𑀫𑀁 𑀦𑀸𑀫 𑀪𑀡𑁆𑀟𑀁 𑀕𑀡𑁆𑀳𑀸’’𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀆𑀡𑀸𑀧𑀦𑁂𑀦 𑀲𑀺𑀤𑁆𑀥𑁄 𑀅𑀯𑀳𑀸𑀭𑁄 𑀘. 𑀦𑀺𑀲𑁆𑀲𑀕𑁆𑀕𑁄𑀢𑀺 𑀦𑀺𑀲𑁆𑀲𑀚𑁆𑀚𑀦𑀁 𑀦𑀺𑀲𑁆𑀲𑀕𑁆𑀕𑁄, 𑀅𑀯𑀳𑀸𑀭𑁄, 𑀲𑀼𑀗𑁆𑀓𑀖𑀸𑀢𑀝𑁆𑀞𑀸𑀦𑁂, 𑀧𑀭𑀺𑀓𑀧𑁆𑀧𑀺𑀢𑁄𑀓𑀸𑀲𑁂 𑀯𑀸 𑀞𑀢𑁆𑀯𑀸 𑀪𑀡𑁆𑀟𑀲𑁆𑀲 𑀩𑀳𑀺 𑀧𑀸𑀢𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀢𑁆𑀣𑀲𑀸𑀥𑀓𑁄𑀢𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀲𑀸𑀥𑁂𑀢𑀻𑀢𑀺 𑀅𑀢𑁆𑀣𑀲𑀸𑀥𑀓𑁄, 𑀲𑁄 𑀅𑀯𑀳𑀸𑀭𑁄 𑀘 𑀬𑀣𑀸𑀡𑀢𑁆𑀢𑀺𑀓𑀁 𑀅𑀯𑀺𑀭𑀸𑀥𑁂𑀢𑁆𑀯𑀸 𑀏𑀓𑀁𑀲𑁂𑀦 𑀅𑀯𑀳𑀭𑀦𑁆𑀢𑀲𑁆𑀲 ‘‘𑀅𑀲𑀼𑀓𑀲𑁆𑀲 𑀪𑀡𑁆𑀟𑀁 𑀅𑀯𑀳𑀭𑀸’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀸 𑀅𑀯𑀳𑀭𑀺𑀢𑀩𑁆𑀩𑀯𑀢𑁆𑀣𑀼𑀯𑀺𑀲𑁂𑀲𑁄 𑀕𑀳𑀡𑀓𑀸𑀮𑁄 𑀕𑀳𑀡𑀤𑁂𑀲𑁄 𑀕𑀳𑀡𑀸𑀓𑀸𑀭𑁄 𑀘𑀸𑀢𑀺 𑀏𑀯𑀫𑀸𑀤𑀺𑀯𑀺𑀲𑁂𑀲𑀸𑀦𑀫𑀜𑁆𑀜𑀢𑀭𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀸 𑀆𑀡𑀸𑀧𑀦𑀜𑁆𑀘 𑀏𑀓𑀁𑀲𑁂𑀦 𑀧𑀸𑀤𑀕𑁆𑀖𑀦𑀓𑀢𑁂𑀮𑀧𑀺𑀯𑀦𑀓𑀁 𑀉𑀧𑀸𑀳𑀦𑀸𑀤𑀺𑀓𑀺𑀜𑁆𑀘𑀺𑀯𑀢𑁆𑀣𑀼𑀁 𑀢𑁂𑀮𑀪𑀸𑀚𑀦𑀸𑀤𑀻𑀲𑀼 𑀧𑀸𑀢𑀦𑀸𑀤𑀺𑀧𑁆𑀧𑀬𑁄𑀕𑁄 𑀘𑀸𑀢𑀺 𑀏𑀯𑀫𑀸𑀤𑀺𑀧𑁆𑀧𑀬𑁄𑀕𑁄 𑀘 𑀓𑀺𑀭𑀺𑀬𑀸𑀲𑀺𑀤𑁆𑀥𑀺𑀬𑀸 𑀧𑀼𑀭𑁂𑀢𑀭𑀫𑁂𑀯 𑀧𑀸𑀭𑀸𑀚𑀺𑀓𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀦𑀢𑁄 𑀅𑀢𑁆𑀣𑀲𑀸𑀥𑀓𑁄 𑀅𑀯𑀳𑀸𑀭𑁄 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀥𑀼𑀭𑀦𑀺𑀓𑁆𑀔𑁂𑀧𑀦𑀜𑁆𑀘𑀸𑀢𑀺 𑀥𑀼𑀭𑀲𑁆𑀲 𑀦𑀺𑀓𑁆𑀔𑁂𑀧𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑀦𑀁, 𑀢𑀜𑁆𑀘 𑀅𑀯𑀳𑀸𑀭𑁄, 𑀧𑀭𑀲𑀦𑁆𑀢𑀓𑀸𑀦𑀁 𑀆𑀭𑀸𑀫𑀸𑀤𑀻𑀦𑀁 𑀅𑀪𑀺𑀬𑁄𑀕𑀯𑀺𑀲𑀬𑁂 𑀘 𑀉𑀧𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀪𑀡𑁆𑀟𑀸𑀤𑀺𑀦𑁄 𑀯𑀺𑀲𑀬𑁂 𑀘 𑀘𑁄𑀭𑀲𑁆𑀲 𑀲𑀸𑀫𑀺𑀦𑁄 𑀯𑀺𑀲𑁆𑀲𑀚𑁆𑀚𑀦𑁂 𑀘 𑀲𑀸𑀫𑀺𑀦𑁄 𑀘, 𑀬𑀤𑀸 𑀓𑀤𑀸𑀘𑀺 𑀬𑀣𑀸𑀓𑀣𑀜𑁆𑀘𑀺 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀕𑀳𑀡𑁂 𑀦𑀺𑀭𑀼𑀲𑁆𑀲𑀸𑀳𑀪𑀸𑀯𑀲𑀗𑁆𑀔𑀸𑀢𑁄 𑀥𑀼𑀭𑀦𑀺𑀓𑁆𑀔𑁂𑀧𑀸𑀯𑀳𑀸𑀭𑁄 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀢𑀺 𑀇𑀤𑀁 𑀥𑀼𑀭𑀦𑀺𑀓𑁆𑀔𑁂𑀧𑀦𑀜𑁆𑀘 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀸𑀳𑀢𑁆𑀣𑀸𑀤𑀺𑀘𑀢𑀼𑀓𑁆𑀓𑀜𑁆𑀘 𑀧𑀜𑁆𑀘𑀦𑁆𑀦𑀁 𑀅𑀯𑀳𑀸𑀭𑀸𑀦𑀁 𑀲𑀫𑀽𑀳𑁄 𑀧𑀜𑁆𑀘𑀓𑀁, 𑀲𑀸𑀳𑀢𑁆𑀣𑀸𑀤𑀺𑀧𑀜𑁆𑀘𑀓𑀁 ‘‘𑀲𑀸𑀳𑀢𑁆𑀣𑀧𑀜𑁆𑀘𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀤𑀺-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁪𑁨. 𑀧𑀼𑀩𑁆𑀩𑀲𑀳𑀧𑀬𑁄𑀕𑀸 𑀘𑀸𑀢𑀺 𑀏𑀢𑁆𑀣 ‘‘𑀧𑀼𑀩𑁆𑀩𑀧𑀬𑁄𑀕𑁄 𑀲𑀳𑀧𑀬𑁄𑀕𑁄’’𑀢𑀺 𑀧𑀬𑁄𑀕-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. ‘‘𑀆𑀡𑀢𑁆𑀢𑀺𑀯𑀲𑁂𑀦 𑀧𑀼𑀩𑁆𑀩𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁨) 𑀬𑀣𑀸𑀡𑀢𑁆𑀢𑀺𑀓𑀫𑀯𑀺𑀭𑀸𑀥𑁂𑀢𑁆𑀯𑀸 𑀕𑀡𑁆𑀳𑀢𑁄 ‘‘𑀅𑀲𑀼𑀓𑀲𑁆𑀲 𑀇𑀢𑁆𑀣𑀦𑁆𑀦𑀸𑀫𑀁 𑀪𑀡𑁆𑀟𑀁 𑀅𑀯𑀳𑀭𑀸’’𑀢𑀺 𑀆𑀡𑀸𑀧𑀦𑀁 𑀧𑀼𑀩𑁆𑀩𑀧𑀬𑁄𑀕𑁄 𑀦𑀸𑀫 𑀅𑀯𑀳𑀸𑀭𑁄. 𑀓𑀸𑀬𑁂𑀦, 𑀯𑀸𑀘𑀸𑀬 𑀯𑀸 𑀧𑀬𑀼𑀚𑁆𑀚𑀦𑀁 𑀆𑀡𑀸𑀧𑀦𑀁 𑀧𑀬𑁄𑀕𑁄, 𑀆𑀡𑀢𑁆𑀢𑀲𑁆𑀲 𑀪𑀡𑁆𑀟𑀕𑁆𑀕𑀳𑀡𑀢𑁄 𑀧𑀼𑀩𑁆𑀩𑀢𑁆𑀢𑀸 𑀧𑀼𑀩𑁆𑀩𑁄 𑀘 𑀲𑁄 𑀧𑀬𑁄𑀕𑁄 𑀘𑀸𑀢𑀺 𑀧𑀼𑀩𑁆𑀩𑀧𑀬𑁄𑀕𑁄 𑀅𑀯𑀳𑀸𑀭𑁄𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀞𑀸𑀦𑀸𑀘𑀸𑀯𑀦𑀯𑀲𑁂𑀦 𑀲𑀳𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀲𑁆𑀲 𑀉𑀧𑀮𑀓𑁆𑀔𑀡𑀧𑀤𑀢𑁆𑀢𑀸 𑀞𑀸𑀦𑀸𑀘𑀸𑀯𑀦𑀜𑁆𑀘 𑀧𑀭𑀸𑀬𑀢𑁆𑀢𑀪𑀽𑀫𑀺𑀕𑀳𑀡𑁂 𑀔𑀻𑀮𑀲𑀗𑁆𑀓𑀫𑀦𑀸𑀤𑀺𑀓𑀜𑁆𑀘 𑀲𑀳𑀧𑀬𑁄𑀕𑁄 𑀅𑀯𑀳𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀁𑀯𑀺𑀤𑀸𑀳𑀭𑀡𑀦𑁆𑀢𑀺 𑀩𑀳𑀽𑀳𑀺 𑀏𑀓𑀢𑁄 𑀳𑀼𑀢𑁆𑀯𑀸 ‘‘𑀇𑀤𑀁 𑀦𑀸𑀫 𑀪𑀡𑁆𑀟𑀁 𑀅𑀯𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀁𑀯𑀺𑀤𑀳𑀺𑀢𑁆𑀯𑀸 𑀲𑀩𑁆𑀩𑁂𑀳𑀺, 𑀏𑀓𑀢𑁄 𑀯𑀸 𑀲𑀩𑁆𑀩𑁂𑀲𑀁 𑀅𑀦𑀼𑀫𑀢𑀺𑀬𑀸 𑀏𑀓𑁂𑀦 𑀯𑀸 𑀕𑀦𑁆𑀢𑁆𑀯𑀸 𑀧𑀭𑀲𑀦𑁆𑀢𑀓𑀲𑁆𑀲 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀳𑀭𑀡𑀲𑀗𑁆𑀔𑀸𑀢𑁄 𑀲𑀁𑀯𑀺𑀤𑀸𑀯𑀳𑀸𑀭𑁄 𑀘. 𑀲𑀫𑀁 𑀏𑀓𑀻 𑀳𑀼𑀢𑁆𑀯𑀸 𑀯𑀺𑀲𑀼𑀁 𑀏𑀓𑁂𑀦𑀸𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀸𑀤𑁂 𑀯𑀸 𑀧𑀸𑀤𑀸𑀭𑀳𑁂 𑀯𑀸 𑀕𑀳𑀺𑀢𑁂 𑀓𑀢𑀫𑀦𑁆𑀢𑀦𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀧𑀸𑀭𑀸𑀚𑀺𑀓𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀁𑀯𑀺𑀤𑀳𑀺𑀢𑁆𑀯𑀸 𑀫𑀦𑁆𑀢𑁂𑀢𑁆𑀯𑀸 𑀅𑀯𑀳𑀭𑀡𑀁 𑀲𑀁𑀯𑀺𑀤𑀸𑀳𑀭𑀡𑀁. 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀲𑀁𑀯𑀺𑀤𑀸𑀳𑀭𑀡’’𑀦𑁆𑀢𑀺 ‘‘𑀲𑀁𑀯𑀺𑀤𑀸𑀯𑀳𑀸𑀭𑁄’’𑀢𑀺 𑀇𑀫𑀲𑁆𑀲 𑀯𑁂𑀯𑀘𑀦𑀁. ‘‘𑀲𑀫𑁆𑀩𑀳𑀼𑀮𑀸 𑀲𑀁𑀯𑀺𑀤𑀳𑀺𑀢𑁆𑀯𑀸 𑀏𑀓𑁄 𑀪𑀡𑁆𑀟𑀁 𑀅𑀯𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁧𑁮) 𑀯𑀘𑀦𑀢𑁄 𑀏𑀯𑀁 𑀲𑀳𑀓𑀢𑀫𑀦𑁆𑀢𑀦𑁂𑀲𑀼 𑀏𑀓𑁂𑀦𑀸𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀸𑀤𑁂 𑀯𑀸 𑀧𑀸𑀤𑀸𑀭𑀳𑁂 𑀯𑀸 𑀕𑀳𑀺𑀢𑁂 𑀓𑀢𑀫𑀦𑁆𑀢𑀦𑀸𑀦𑀁 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀗𑁆𑀓𑁂𑀢𑀓𑀫𑁆𑀫𑀦𑁆𑀢𑀺 𑀧𑀼𑀩𑁆𑀩𑀡𑁆𑀳𑀸𑀤𑀺𑀓𑀸𑀮𑀧𑀭𑀺𑀘𑁆𑀙𑁂𑀤𑁂𑀦 𑀲𑀜𑁆𑀚𑀸𑀦𑀦𑀁 𑀲𑀗𑁆𑀓𑁂𑀢𑁄, 𑀢𑁂𑀦 𑀓𑀢𑀁 𑀓𑀫𑁆𑀫𑀁 𑀅𑀯𑀳𑀭𑀡𑀁 𑀲𑀗𑁆𑀓𑁂𑀢𑀓𑀫𑁆𑀫𑀁 𑀦𑀸𑀫. 𑀢𑀁 𑀧𑀦 𑀧𑀼𑀭𑁂𑀪𑀢𑁆𑀢𑀸𑀤𑀻𑀲𑀼 𑀓𑀜𑁆𑀘𑀺 𑀓𑀸𑀮𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀇𑀢𑁆𑀣𑀦𑁆𑀦𑀸𑀫𑀁 𑀪𑀡𑁆𑀟𑀁 𑀅𑀯𑀳𑀭𑀸’’𑀢𑀺 𑀯𑀼𑀢𑁆𑀢𑁂 𑀢𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀢𑀁𑀬𑁂𑀯 𑀬𑀣𑀸𑀯𑀼𑀢𑁆𑀢𑀁 𑀪𑀡𑁆𑀟𑀁 𑀅𑀯𑀳𑀭𑀢𑀺 𑀘𑁂, 𑀲𑀗𑁆𑀓𑁂𑀢𑀓𑀸𑀭𑀓𑀲𑁆𑀲 𑀲𑀗𑁆𑀓𑁂𑀢𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀦𑁆𑀢𑀺 𑀲𑀗𑁆𑀔𑁂𑀧𑀢𑁄 𑀯𑁂𑀤𑀺𑀢𑀩𑁆𑀩𑀁.

𑀦𑁂𑀫𑀺𑀢𑁆𑀢𑀦𑁆𑀢𑀺 𑀧𑀭𑀪𑀡𑁆𑀟𑀸𑀯𑀳𑀸𑀭𑀲𑁆𑀲 𑀳𑁂𑀢𑀼𑀢𑁆𑀢𑀸 𑀅𑀓𑁆𑀔𑀺𑀦𑀺𑀔𑀡𑀦𑀸𑀤𑀺 𑀦𑀺𑀫𑀺𑀢𑁆𑀢𑀁 𑀦𑀸𑀫, 𑀢𑁂𑀦 𑀦𑀺𑀩𑁆𑀩𑀢𑁆𑀢𑀁 𑀦𑁂𑀫𑀺𑀢𑁆𑀢𑀁, 𑀅𑀯𑀳𑀭𑀡𑀲𑀗𑁆𑀔𑀸𑀢𑀓𑀫𑁆𑀫𑀁 𑀅𑀯𑀳𑀸𑀭𑁄. ‘‘𑀫𑀬𑀸 𑀅𑀓𑁆𑀔𑀺𑀫𑁆𑀳𑀺 𑀦𑀺𑀔𑀡𑀺𑀢𑁂 𑀯𑀸 𑀪𑀫𑀼𑀫𑁆𑀳𑀺 𑀉𑀓𑁆𑀔𑀺𑀢𑁆𑀢𑁂 𑀯𑀸 𑀇𑀢𑁆𑀣𑀦𑁆𑀦𑀸𑀫𑀁 𑀪𑀡𑁆𑀟𑀁 𑀅𑀯𑀳𑀭𑀸’’𑀢𑀺 𑀆𑀡𑀢𑁆𑀢𑁂𑀦 𑀢𑀁 𑀦𑀺𑀫𑀺𑀢𑁆𑀢𑀁 𑀤𑀺𑀲𑁆𑀯𑀸 𑀯𑀼𑀢𑁆𑀢𑀫𑁂𑀯 𑀪𑀡𑁆𑀟𑀁 𑀯𑀼𑀢𑁆𑀢𑀦𑀺𑀬𑀸𑀫𑀫𑀯𑀺𑀭𑀸𑀥𑁂𑀢𑁆𑀯𑀸 𑀕𑀳𑀺𑀢𑀁 𑀘𑁂, 𑀦𑀺𑀫𑀺𑀢𑁆𑀢𑀓𑀸𑀭𑀓𑀲𑁆𑀲 𑀦𑀺𑀫𑀺𑀢𑁆𑀢𑀓𑀭𑀡𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺. 𑀯𑀼𑀢𑁆𑀢𑀦𑀺𑀬𑀸𑀫𑀁 𑀯𑀺𑀭𑀸𑀥𑁂𑀢𑁆𑀯𑀸 𑀕𑀳𑀺𑀢𑀁 𑀘𑁂, 𑀦𑀺𑀫𑀺𑀢𑁆𑀢𑀓𑀸𑀭𑀓𑁄 𑀫𑀼𑀘𑁆𑀘𑀢𑀺, 𑀅𑀯𑀳𑀸𑀭𑀓𑀲𑁆𑀲𑁂𑀯 𑀧𑀸𑀭𑀸𑀚𑀺𑀓𑀁. 𑀧𑀼𑀩𑁆𑀩𑀧𑀬𑁄𑀕𑁄 𑀆𑀤𑀺 𑀬𑀲𑁆𑀲 𑀢𑀁 𑀧𑀼𑀩𑁆𑀩𑀧𑀬𑁄𑀕𑀸𑀤𑀺, 𑀧𑀼𑀩𑁆𑀩𑀧𑀬𑁄𑀕𑀸𑀤𑀺 𑀘 𑀢𑀁 𑀧𑀜𑁆𑀘𑀓𑀜𑁆𑀘𑀸𑀢𑀺 𑀯𑀺𑀕𑁆𑀕𑀳𑁄.

𑁪𑁩. 𑀣𑁂𑀬𑁆𑀬𑀜𑁆𑀘 𑀧𑀲𑀬𑁆𑀳𑀜𑁆𑀘 𑀧𑀭𑀺𑀓𑀧𑁆𑀧𑁄 𑀘 𑀧𑀝𑀺𑀘𑁆𑀙𑀦𑁆𑀦𑁄 𑀘 𑀓𑀼𑀲𑁄 𑀘 𑀣𑁂𑀬𑁆𑀬𑀧𑀲𑀬𑁆𑀳𑀧𑀭𑀺𑀓𑀧𑁆𑀧𑀧𑀝𑀺𑀘𑁆𑀙𑀦𑁆𑀦𑀓𑀼𑀲𑀸, 𑀢𑁂 𑀆𑀤𑀻 𑀉𑀧𑀧𑀤𑀪𑀽𑀢𑀸 𑀬𑁂𑀲𑀁 𑀅𑀯𑀳𑀸𑀭𑀸𑀦𑀁 𑀢𑁂 𑀣𑁂𑀬𑁆𑀬…𑀧𑁂… 𑀓𑀼𑀲𑀸𑀤𑀺𑀓𑀸, 𑀅𑀯𑀳𑀸𑀭𑀸, 𑀇𑀫𑀺𑀦𑀸 𑀣𑁂𑀬𑁆𑀬𑀸𑀯𑀳𑀸𑀭𑁄 𑀘…𑀧𑁂… 𑀓𑀼𑀲𑀸𑀯𑀳𑀸𑀭𑁄 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀣𑁂𑀬𑁆𑀬𑀸𑀯𑀳𑀸𑀭𑁄𑀢𑀺 𑀣𑁂𑀦𑁄 𑀯𑀼𑀘𑁆𑀘𑀢𑀺 𑀘𑁄𑀭𑁄, 𑀢𑀲𑁆𑀲 𑀪𑀸𑀯𑁄 𑀣𑁂𑀬𑁆𑀬𑀁, 𑀏𑀢𑁆𑀣 𑀦-𑀓𑀸𑀭𑀮𑁄𑀧𑁄 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀤𑀝𑁆𑀞𑀩𑁆𑀩𑁄, 𑀢𑁂𑀦 𑀅𑀯𑀳𑀭𑀡𑀁 𑀣𑁂𑀬𑁆𑀬𑀸𑀯𑀳𑀸𑀭𑁄, 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀺𑀯𑀲𑁂𑀦 𑀅𑀤𑀺𑀲𑁆𑀲𑀫𑀸𑀦𑁂𑀦 𑀕𑀳𑀡𑀜𑁆𑀘 𑀓𑀽𑀝𑀫𑀸𑀦𑀓𑀽𑀝𑀓𑀳𑀸𑀧𑀡𑀸𑀤𑀻𑀳𑀺 𑀯𑀜𑁆𑀘𑁂𑀢𑁆𑀯𑀸 𑀕𑀳𑀡𑀜𑁆𑀘 𑀣𑁂𑀬𑁆𑀬𑀸𑀯𑀳𑀸𑀭𑁄.

𑀧𑀲𑀬𑁆𑀳 𑀅𑀪𑀺𑀪𑀯𑀺𑀢𑁆𑀯𑀸 𑀅𑀯𑀳𑀭𑀡𑀁 𑀧𑀲𑀬𑁆𑀳𑀸𑀯𑀳𑀸𑀭𑁄, 𑀕𑀸𑀫𑀯𑀺𑀮𑁄𑀧𑀓𑀸 𑀯𑀺𑀬 𑀲𑀸𑀫𑀺𑀓𑁂 𑀅𑀪𑀺𑀪𑀯𑀺𑀢𑁆𑀯𑀸 𑀕𑀳𑀡𑀜𑁆𑀘 𑀭𑀸𑀚𑀪𑀝𑀸𑀤𑀬𑁄 𑀯𑀺𑀬 𑀅𑀪𑀺𑀪𑀯𑀺𑀢𑁆𑀯𑀸 𑀦𑀺𑀩𑀤𑁆𑀥𑀓𑀭𑀕𑁆𑀕𑀳𑀡𑁂 𑀅𑀥𑀺𑀓𑀕𑁆𑀕𑀳𑀡𑀜𑁆𑀘 𑀧𑀲𑀬𑁆𑀳𑀸𑀯𑀳𑀸𑀭𑁄.

𑀯𑀢𑁆𑀣𑀲𑀼𑀢𑁆𑀢𑀸𑀤𑀺𑀓𑀁 𑀧𑀭𑀺𑀘𑁆𑀙𑀺𑀚𑁆𑀚 𑀓𑀧𑁆𑀧𑁂𑀢𑁆𑀯𑀸 𑀅𑀯𑀳𑀭𑀡𑀁 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄, 𑀲𑁄 𑀘 𑀪𑀡𑁆𑀟𑁄𑀓𑀸𑀲𑀧𑀭𑀺𑀓𑀧𑁆𑀧𑀯𑀲𑁂𑀦 𑀤𑀼𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑀁 𑀅𑀦𑁆𑀥𑀓𑀸𑀭𑀧𑁆𑀧𑀤𑁂𑀲𑀁 𑀧𑀯𑀺𑀲𑀺𑀢𑁆𑀯𑀸 𑀲𑀼𑀢𑁆𑀢𑀸𑀤𑀺𑀪𑀡𑁆𑀟𑀸𑀦𑀺 𑀢𑀢𑁆𑀣 𑀦𑀺𑀓𑁆𑀔𑀺𑀢𑁆𑀢𑀸𑀦𑀺, 𑀢𑁂 𑀧𑁂𑀴𑀸𑀤𑀬𑁄 𑀕𑀡𑁆𑀳𑀦𑁆𑀢𑀲𑁆𑀲 ‘‘𑀯𑀢𑁆𑀣𑀸𑀦𑀺 𑀘𑁂 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀲𑀼𑀢𑁆𑀢𑀸𑀦𑀺 𑀘𑁂 𑀦 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀉𑀓𑁆𑀔𑀺𑀧𑀦𑀁 𑀪𑀡𑁆𑀟𑀧𑀭𑀺𑀓𑀧𑁆𑀧𑀧𑀼𑀩𑁆𑀩𑀓𑀢𑁆𑀢𑀸 𑀪𑀡𑁆𑀟𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄 𑀦𑀸𑀫. 𑀆𑀭𑀸𑀫𑀧𑀭𑀺𑀯𑁂𑀡𑀸𑀤𑀻𑀦𑀺 𑀧𑀯𑀺𑀲𑀺𑀢𑁆𑀯𑀸 𑀮𑁄𑀪𑀦𑀻𑀬𑀁 𑀪𑀡𑁆𑀟𑀁 𑀤𑀺𑀲𑁆𑀯𑀸 𑀕𑀩𑁆𑀪𑀧𑀸𑀲𑀸𑀤𑀢𑀮𑀧𑀫𑀼𑀔𑀫𑀸𑀴𑀓𑀧𑀸𑀓𑀸𑀭𑀤𑁆𑀯𑀸𑀭𑀓𑁄𑀝𑁆𑀞𑀓𑀸𑀤𑀺𑀁 𑀬𑀁 𑀓𑀺𑀜𑁆𑀘𑀺 𑀞𑀸𑀦𑀁 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 ‘‘𑀏𑀢𑁆𑀣𑀦𑁆𑀢𑀭𑁂 𑀤𑀺𑀝𑁆𑀞𑁄 𑀘𑁂, 𑀑𑀮𑁄𑀓𑁂𑀢𑀼𑀁 𑀕𑀳𑀺𑀢𑀁 𑀯𑀺𑀬 𑀤𑀲𑁆𑀲𑀸𑀫𑀺, 𑀦𑁄 𑀘𑁂, 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀧𑀭𑀺𑀓𑀧𑁆𑀧𑀺𑀢𑀝𑁆𑀞𑀸𑀦𑀸𑀢𑀺𑀓𑁆𑀓𑀫𑁄 𑀑𑀓𑀸𑀲𑀧𑀭𑀺𑀓𑀧𑁆𑀧𑀧𑀼𑀩𑁆𑀩𑀓𑀢𑁆𑀢𑀸 𑀑𑀓𑀸𑀲𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄 𑀦𑀸𑀫𑀸𑀢𑀺 𑀲𑀗𑁆𑀔𑁂𑀧𑀢𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀺𑀡𑀧𑀡𑁆𑀡𑀸𑀤𑀻𑀳𑀺 𑀧𑀝𑀺𑀘𑁆𑀙𑀦𑁆𑀦𑀲𑁆𑀲 𑀪𑀡𑁆𑀟𑀲𑁆𑀲 𑀅𑀯𑀳𑀭𑀡𑀁 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑁄, 𑀉𑀬𑁆𑀬𑀸𑀦𑀸𑀤𑀻𑀲𑀼 𑀓𑀻𑀴𑀫𑀸𑀦𑁂𑀳𑀺 𑀯𑀸 𑀲𑀗𑁆𑀖𑀧𑀭𑀺𑀯𑀺𑀲𑀦𑁆𑀢𑁂𑀳𑀺 𑀯𑀸 𑀫𑀦𑀼𑀲𑁆𑀲𑁂𑀳𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀞𑀧𑀺𑀢𑀁 𑀅𑀮𑀗𑁆𑀓𑀸𑀭𑀸𑀤𑀺𑀓𑀁 𑀬𑀁 𑀓𑀺𑀜𑁆𑀘𑀺 𑀪𑀡𑁆𑀟𑀁 𑀤𑀺𑀲𑁆𑀯𑀸 ‘‘𑀑𑀡𑀫𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁂 𑀆𑀲𑀗𑁆𑀓𑀦𑁆𑀢𑀻’’𑀢𑀺 𑀞𑀢𑁆𑀯𑀸 𑀢𑀺𑀡𑀧𑀡𑁆𑀡𑀧𑀁𑀲𑀼𑀯𑀸𑀮𑀼𑀓𑀸𑀤𑀻𑀳𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀲𑀸𑀫𑀺𑀓𑁂𑀲𑀼 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀤𑀺𑀲𑁆𑀯𑀸 𑀲𑀸𑀮𑀬𑁂𑀲𑀼 𑀕𑀢𑁂𑀲𑀼 𑀧𑀘𑁆𑀙𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀳𑀡𑀜𑁆𑀘 𑀢𑀤𑁂𑀯 𑀪𑀡𑁆𑀟𑀁 𑀓𑀤𑁆𑀤𑀫𑀸𑀤𑀻𑀲𑀼 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀅𑀗𑁆𑀕𑀼𑀝𑁆𑀞𑀸𑀤𑀻𑀳𑀺 𑀧𑀻𑀴𑁂𑀢𑁆𑀯𑀸 𑀑𑀲𑀻𑀤𑀸𑀧𑁂𑀢𑁆𑀯𑀸 𑀳𑁂𑀝𑁆𑀞𑀸𑀪𑀸𑀕𑁂𑀦 𑀨𑀼𑀝𑁆𑀞𑀝𑁆𑀞𑀸𑀦𑀁 𑀉𑀧𑀭𑀺𑀪𑀸𑀕𑁂𑀦 𑀅𑀢𑀺𑀓𑁆𑀓𑀫𑀦𑀜𑁆𑀘 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀼𑀲𑁂𑀦 𑀅𑀯𑀳𑀸𑀭𑁄 𑀓𑀼𑀲𑀸𑀯𑀳𑀸𑀭𑁄, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀓𑀼𑀲𑀁 𑀲𑀗𑁆𑀓𑀸𑀫𑁂𑀢𑁆𑀯𑀸 𑀧𑀭𑀓𑁄𑀝𑁆𑀞𑀸𑀲𑀲𑁆𑀲 𑀅𑀕𑁆𑀖𑁂𑀦 𑀫𑀳𑀦𑁆𑀢𑀲𑁆𑀲 𑀯𑀸 𑀲𑀫𑀲𑀫𑀲𑁆𑀲 𑀯𑀸 𑀕𑀳𑀡𑀦𑁆𑀢𑀺 𑀅𑀢𑁆𑀣𑁄. 𑀬𑁄 𑀧𑀦 𑀪𑀺𑀓𑁆𑀔𑀼 𑀓𑀼𑀲𑀧𑀸𑀢𑀦𑁂𑀦 𑀲𑀗𑁆𑀖𑀲𑁆𑀲 𑀘𑀻𑀯𑀭𑁂𑀲𑀼 𑀪𑀸𑀚𑀺𑀬𑀫𑀸𑀦𑁂𑀲𑀼 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑁂𑀦 𑀲𑀫𑀁 𑀯𑀸 𑀅𑀥𑀺𑀓𑀁 𑀯𑀸 𑀊𑀦𑀓𑀁 𑀯𑀸 𑀅𑀕𑁆𑀖𑁂𑀦 𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀕𑁆𑀖𑀦𑀓𑀁 𑀅𑀜𑁆𑀜𑀲𑁆𑀲 𑀓𑁄𑀝𑁆𑀞𑀸𑀲𑀁 𑀅𑀯𑀳𑀭𑀺𑀢𑀼𑀓𑀸𑀫𑁄 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑁂 𑀧𑀢𑀺𑀢𑀁 𑀓𑀼𑀲𑀁 𑀧𑀭𑀓𑁄𑀝𑁆𑀞𑀸𑀲𑁂 𑀧𑀸𑀢𑁂𑀢𑀼𑀓𑀸𑀫𑁄 𑀉𑀤𑁆𑀥𑀭𑀢𑀺, 𑀢𑀗𑁆𑀔𑀡𑁂 𑀘 𑀧𑀭𑀲𑁆𑀲 𑀓𑁄𑀝𑁆𑀞𑀸𑀲𑁂 𑀧𑀸𑀢𑀺𑀢𑀓𑁆𑀔𑀡𑁂 𑀘 𑀦 𑀧𑀸𑀭𑀸𑀚𑀺𑀓𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀧𑀭𑀓𑁄𑀝𑁆𑀞𑀸𑀲𑀢𑁄 𑀧𑀭𑀦𑀸𑀫𑀮𑀺𑀔𑀺𑀢𑀁 𑀓𑀼𑀲𑀁 𑀉𑀓𑁆𑀔𑀺𑀧𑁂𑀦𑁆𑀢𑁄 𑀢𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀧𑀦𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀬𑀤𑀺 𑀧𑀞𑀫𑀁 𑀧𑀭𑀓𑁄𑀝𑁆𑀞𑀸𑀲𑀢𑁄 𑀓𑀼𑀲𑀁 𑀉𑀤𑁆𑀥𑀭𑀢𑀺, 𑀉𑀤𑁆𑀥𑀝𑀓𑁆𑀔𑀡𑁂 𑀘 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑁂 𑀧𑀸𑀢𑀺𑀢𑀓𑁆𑀔𑀡𑁂 𑀘 𑀲𑀓𑀦𑀸𑀫𑀮𑀺𑀔𑀺𑀢𑀁 𑀓𑀼𑀲𑀁 𑀉𑀤𑁆𑀥𑀭𑀡𑀓𑁆𑀔𑀡𑁂 𑀘 𑀧𑀸𑀭𑀸𑀚𑀺𑀓𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀧𑀭𑀓𑁄𑀝𑁆𑀞𑀸𑀲𑁂 𑀧𑀸𑀢𑀦𑀓𑁆𑀔𑀡𑁂 𑀳𑀢𑁆𑀣𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀫𑀼𑀢𑁆𑀢𑁂 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺.

𑀬𑀤𑀺 𑀤𑁆𑀯𑁂𑀧𑀺 𑀓𑀼𑀲𑁂 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀲𑀩𑁆𑀩𑁂𑀲𑀼 𑀪𑀺𑀓𑁆𑀔𑀽𑀲𑀼 𑀲𑀓𑀲𑀓𑀓𑁄𑀝𑁆𑀞𑀸𑀲𑀁 𑀆𑀤𑀸𑀬 𑀕𑀢𑁂𑀲𑀼 𑀬𑀲𑁆𑀫𑀺𑀁 𑀓𑀼𑀲𑀁 𑀧𑀝𑀺𑀘𑁆𑀙𑀸𑀤𑁂𑀲𑀺, 𑀢𑀲𑁆𑀲 𑀲𑀸𑀫𑀺𑀓𑁂𑀦 𑀆𑀕𑀦𑁆𑀢𑁆𑀯𑀸 ‘‘𑀫𑀬𑁆𑀳𑀁 𑀓𑀼𑀲𑁄 𑀓𑀲𑁆𑀫𑀸 𑀦 𑀤𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂 𑀘𑁄𑀭𑁄 ‘‘𑀫𑀬𑁆𑀳𑀫𑁆𑀧𑀺 𑀓𑀼𑀲𑁄 𑀦 𑀤𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀁 𑀢𑀲𑁆𑀲 𑀲𑀦𑁆𑀢𑀓𑀁 𑀯𑀺𑀬 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀫𑀺𑀁 𑀯𑀺𑀯𑀤𑀺𑀢𑁆𑀯𑀸 𑀯𑀸 𑀅𑀯𑀺𑀯𑀤𑀺𑀢𑁆𑀯𑀸 𑀯𑀸 𑀕𑀳𑁂𑀢𑁆𑀯𑀸 𑀕𑀢𑁂 𑀇𑀢𑀭𑀁 𑀓𑁄𑀝𑁆𑀞𑀸𑀲𑀁 𑀉𑀤𑁆𑀥𑀭𑀢𑀺 𑀘𑁂, 𑀉𑀤𑁆𑀥𑀝𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀬𑀤𑀺 𑀧𑀭𑁄 ‘‘𑀫𑀬𑁆𑀳𑀁 𑀓𑁄𑀝𑁆𑀞𑀸𑀲𑀁 𑀢𑀼𑀬𑁆𑀳𑀁 𑀦 𑀤𑁂𑀫𑀺, 𑀢𑁆𑀯𑀁 𑀢𑀼𑀬𑁆𑀳𑀁 𑀓𑁄𑀝𑁆𑀞𑀸𑀲𑀁 𑀯𑀺𑀘𑀺𑀦𑀺𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺 𑀯𑀤𑀢𑀺, 𑀏𑀯𑀁 𑀯𑀼𑀢𑁆𑀢𑁂 𑀲𑁄 𑀅𑀢𑁆𑀢𑀦𑁄 𑀅𑀲𑁆𑀲𑀸𑀫𑀺𑀓𑀪𑀸𑀯𑀁 𑀚𑀸𑀦𑀦𑁆𑀢𑁄𑀧𑀺 𑀧𑀭𑀲𑁆𑀲 𑀓𑁄𑀝𑁆𑀞𑀸𑀲𑀁 𑀉𑀤𑁆𑀥𑀭𑀢𑀺, 𑀉𑀤𑁆𑀥𑀝𑀓𑁆𑀔𑀡𑁂 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀬𑀤𑀺 𑀧𑀭𑁄 𑀯𑀺𑀯𑀸𑀤𑀪𑀻𑀭𑀼𑀓𑀢𑁆𑀢𑀸 ‘‘𑀓𑀺𑀁 𑀯𑀺𑀯𑀸𑀤𑁂𑀦𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀯𑀸 𑀧𑀢𑁆𑀢𑀁 𑀳𑁄𑀢𑀼 𑀢𑀼𑀬𑁆𑀳𑀁 𑀯𑀸, 𑀯𑀭𑀓𑁄𑀝𑁆𑀞𑀸𑀲𑀁 𑀢𑁆𑀯𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀤𑁂𑀬𑁆𑀬, 𑀤𑀺𑀦𑁆𑀦𑀓𑀁 𑀦𑀸𑀫 𑀕𑀳𑀺𑀢𑀁 𑀳𑁄𑀢𑀻𑀢𑀺 𑀧𑀸𑀭𑀸𑀚𑀺𑀓𑀁 𑀦 𑀳𑁄𑀢𑀻𑀢𑀺. 𑀬𑀤𑀺 ‘‘𑀢𑀯 𑀭𑀼𑀘𑁆𑀘𑀦𑀓𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀼𑀢𑁆𑀢𑁄 𑀯𑀺𑀯𑀸𑀤𑀪𑀬𑁂𑀦 𑀅𑀢𑁆𑀢𑀦𑁄 𑀧𑀢𑁆𑀢𑀁 𑀯𑀭𑀪𑀸𑀕𑀁 𑀞𑀧𑁂𑀢𑁆𑀯𑀸 𑀮𑀸𑀫𑀓𑀪𑀸𑀕𑀁 𑀕𑀳𑁂𑀢𑁆𑀯𑀸 𑀕𑀢𑁄, 𑀘𑁄𑀭𑁄 𑀧𑀘𑁆𑀙𑀸 𑀕𑀡𑁆𑀳𑀦𑁆𑀢𑁄 𑀯𑀺𑀘𑀺𑀢𑀸𑀯𑀲𑁂𑀲𑀁 𑀦𑀸𑀫 𑀅𑀕𑁆𑀕𑀳𑁂𑀲𑀻𑀢𑀺 𑀧𑀸𑀭𑀸𑀚𑀺𑀓𑁄 𑀦 𑀳𑁄𑀢𑀺. 𑀏𑀯𑀁 𑀓𑀼𑀲𑀸𑀯𑀳𑀸𑀭𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀫𑁂𑀢𑁆𑀣 𑀧𑀜𑁆𑀘𑀯𑀻𑀲𑀢𑀺𑀬𑀸 𑀅𑀯𑀳𑀸𑀭𑁂𑀲𑀼 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁪𑁪. 𑀏𑀢𑁆𑀢𑀸𑀯𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑀲𑁆𑀲 𑀯𑀺𑀦𑀺𑀘𑁆𑀙𑀬𑀸𑀯𑀬𑀯𑀭𑀽𑀧𑁂𑀦 𑀉𑀕𑁆𑀕𑀳𑁂𑀢𑀩𑁆𑀩𑁂 𑀧𑀜𑁆𑀘𑀯𑀻𑀲𑀢𑀺 𑀅𑀯𑀳𑀸𑀭𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀤𑀺𑀦𑁆𑀦𑀸𑀤𑀸𑀦𑀯𑀺𑀦𑀺𑀘𑁆𑀙𑀬𑁂 𑀲𑀫𑁆𑀧𑀢𑁆𑀢𑁂 𑀲𑀳𑀲𑀸 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀧𑀞𑀫𑀁 𑀑𑀮𑁄𑀓𑁂𑀢𑀩𑁆𑀩𑀸𑀦𑀺 𑀧𑀜𑁆𑀘 𑀞𑀸𑀦𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀢𑁆𑀣𑀼𑀓𑀸𑀮𑀕𑁆𑀖𑀤𑁂𑀲𑁂 𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁.

𑀢𑀢𑁆𑀣 𑀯𑀢𑁆𑀣𑀼 𑀦𑀸𑀫 𑀅𑀯𑀳𑀝𑀪𑀡𑁆𑀟𑀁. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀅𑀯𑀳𑀸𑀭𑀓𑁂𑀦 ‘‘𑀫𑀬𑀸 𑀇𑀢𑁆𑀣𑀦𑁆𑀦𑀸𑀫𑀁 𑀪𑀡𑁆𑀟𑀁 𑀅𑀯𑀳𑀝’’𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 𑀢𑀲𑁆𑀲 𑀪𑀡𑁆𑀟𑀲𑁆𑀲 𑀲𑀲𑁆𑀲𑀸𑀫𑀺𑀓𑀅𑀲𑁆𑀲𑀸𑀫𑀺𑀓𑀪𑀸𑀯𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀲𑀲𑁆𑀲𑀸𑀫𑀺𑀓𑀁 𑀘𑁂, 𑀅𑀯𑀳𑀸𑀭𑀓𑀸𑀮𑁂 𑀢𑁂𑀲𑀁 𑀲𑀸𑀮𑀬𑀪𑀸𑀯𑀁 𑀯𑀸 𑀦𑀺𑀭𑀸𑀮𑀬𑀪𑀸𑀯𑀁 𑀯𑀸 𑀦𑀺𑀬𑀫𑁂𑀢𑁆𑀯𑀸 𑀲𑀸𑀮𑀬𑀓𑀸𑀮𑁂 𑀘𑁂 𑀕𑀳𑀺𑀢𑀁, 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀫𑀸𑀲𑀓𑀁 𑀯𑀸 𑀊𑀦𑀫𑀸𑀲𑀓𑀁 𑀯𑀸 𑀳𑁄𑀢𑀺, 𑀤𑀼𑀓𑁆𑀓𑀝𑁂𑀦, 𑀅𑀢𑀺𑀭𑁂𑀓𑀫𑀸𑀲𑀓𑀁 𑀯𑀸 𑀊𑀦𑀧𑀜𑁆𑀘𑀫𑀸𑀲𑀓𑀁 𑀯𑀸 𑀳𑁄𑀢𑀺, 𑀣𑀼𑀮𑁆𑀮𑀘𑁆𑀘𑀬𑁂𑀦, 𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑀁 𑀯𑀸 𑀳𑁄𑀢𑀺, 𑀧𑀸𑀭𑀸𑀚𑀺𑀓𑁂𑀦 𑀓𑀸𑀢𑀩𑁆𑀩𑁄. 𑀲𑀸𑀫𑀺𑀓𑀸𑀦𑀁 𑀦𑀺𑀭𑀸𑀮𑀬𑀓𑀸𑀮𑁂 𑀘𑁂 𑀕𑀳𑀺𑀢𑀁, 𑀦𑀢𑁆𑀣𑀺 𑀧𑀸𑀭𑀸𑀚𑀺𑀓𑀁. 𑀪𑀡𑁆𑀟𑀲𑀸𑀫𑀺𑀓𑁂 𑀧𑀦 𑀪𑀡𑁆𑀟𑀁 𑀆𑀳𑀭𑀸𑀧𑁂𑀦𑁆𑀢𑁂 𑀢𑀁 𑀯𑀸 𑀪𑀡𑁆𑀟𑀁 𑀢𑀤𑀕𑁆𑀖𑀦𑀓𑀁 𑀯𑀸 𑀤𑀸𑀢𑀩𑁆𑀩𑀦𑁆𑀢𑀺.

𑀓𑀸𑀮𑁄 𑀦𑀸𑀫 𑀅𑀯𑀳𑀸𑀭𑀓𑀸𑀮𑁄. 𑀪𑀡𑁆𑀟𑀁 𑀦𑀸𑀫𑁂𑀢𑀁 𑀓𑀤𑀸𑀘𑀺 𑀫𑀳𑀕𑁆𑀖𑀁 𑀳𑁄𑀢𑀺, 𑀓𑀤𑀸𑀘𑀺 𑀲𑀫𑀕𑁆𑀖𑀁. 𑀢𑀲𑁆𑀫𑀸 𑀅𑀯𑀳𑀝𑀪𑀡𑁆𑀟𑀲𑁆𑀲 𑀅𑀕𑁆𑀖𑀁 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑁂𑀳𑀺 𑀅𑀯𑀳𑀝𑀓𑀸𑀮𑀸𑀦𑀼𑀭𑀽𑀧𑀁 𑀓𑀢𑁆𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀦𑀢𑁆𑀣𑀁 𑀓𑀸𑀮𑀯𑀺𑀦𑀺𑀘𑁆𑀙𑀬𑁄 𑀓𑀸𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀕𑁆𑀖𑁄 𑀦𑀸𑀫 𑀅𑀯𑀳𑀝𑀪𑀡𑁆𑀟𑀲𑁆𑀲 𑀅𑀕𑁆𑀖𑁄. 𑀏𑀢𑁆𑀣 𑀘 𑀲𑀩𑁆𑀩𑀤𑀸 𑀪𑀡𑁆𑀟𑀸𑀦𑀁 𑀅𑀕𑁆𑀖𑁄 𑀲𑀫𑀸𑀦𑀭𑀽𑀧𑁄 𑀦 𑀳𑁄𑀢𑀺, 𑀦𑀯𑀪𑀡𑁆𑀟𑀁 𑀫𑀳𑀕𑁆𑀖𑀁 𑀳𑁄𑀢𑀺, 𑀧𑀼𑀭𑀸𑀡𑀁 𑀘𑁂 𑀲𑀫𑀕𑁆𑀖𑀁. 𑀢𑀲𑁆𑀫𑀸 𑀅𑀯𑀳𑀸𑀭𑀓𑀸𑀮𑁂 𑀪𑀡𑁆𑀟𑀲𑁆𑀲 𑀦𑀯𑀪𑀸𑀯𑀁 𑀯𑀸 𑀧𑀼𑀭𑀸𑀡𑀪𑀸𑀯𑀁 𑀯𑀸 𑀦𑀺𑀬𑀫𑁂𑀢𑁆𑀯𑀸 𑀅𑀕𑁆𑀖𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀤𑁂𑀲𑁄 𑀘𑀸𑀢𑀺 𑀪𑀡𑁆𑀟𑀸𑀯𑀳𑀸𑀭𑀤𑁂𑀲𑁄. 𑀏𑀢𑁆𑀣 𑀘 𑀲𑀩𑁆𑀩𑀲𑁆𑀲𑀸𑀧𑀺 𑀪𑀡𑁆𑀟𑀲𑁆𑀲 𑀉𑀝𑁆𑀞𑀸𑀦𑀤𑁂𑀲𑁂 𑀲𑀫𑀕𑁆𑀖𑀁 𑀳𑀼𑀢𑁆𑀯𑀸 𑀅𑀜𑁆𑀜𑀢𑁆𑀣 𑀫𑀳𑀕𑁆𑀖𑀢𑁆𑀢𑀸 𑀅𑀯𑀳𑀝𑀪𑀡𑁆𑀟𑁂 𑀅𑀕𑁆𑀖𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀤𑀦𑀼𑀭𑀽𑀧𑀸 𑀆𑀧𑀢𑁆𑀢𑀺𑀬𑁄 𑀦𑀺𑀬𑀫𑀦𑁆𑀢𑁂𑀳𑀺 𑀅𑀕𑁆𑀖𑀁 𑀧𑀭𑀺𑀘𑁆𑀙𑀺𑀦𑁆𑀤𑀦𑀢𑁆𑀣𑀸𑀬 𑀅𑀯𑀳𑀸𑀭𑀤𑁂𑀲𑀁 𑀦𑀺𑀬𑀫𑁂𑀢𑁆𑀯𑀸 𑀢𑀲𑁆𑀫𑀺𑀁 𑀤𑁂𑀲𑁂 𑀅𑀕𑁆𑀖𑀯𑀲𑁂𑀦 𑀢𑀤𑀦𑀼𑀭𑀽𑀧𑀸 𑀆𑀧𑀢𑁆𑀢𑀺𑀬𑁄 𑀓𑀸𑀭𑁂𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀭𑀺𑀪𑁄𑀕𑁄 𑀦𑀸𑀫 𑀅𑀯𑀳𑀝𑀪𑀡𑁆𑀟𑁂 𑀅𑀯𑀳𑀸𑀭𑀢𑁄 𑀧𑀼𑀩𑁆𑀩𑁂 𑀧𑀭𑁂𑀳𑀺 𑀓𑀢𑀧𑀭𑀺𑀪𑁄𑀕𑁄. 𑀏𑀢𑁆𑀣 𑀘 𑀬𑀲𑁆𑀲 𑀓𑀲𑁆𑀲𑀘𑀺 𑀪𑀡𑁆𑀟𑀲𑁆𑀲 𑀧𑀭𑀺𑀪𑁄𑀕𑁂𑀦 𑀅𑀕𑁆𑀖𑁄 𑀧𑀭𑀺𑀳𑀸𑀬𑀢𑀻𑀢𑀺 𑀪𑀡𑁆𑀟𑀲𑀸𑀫𑀺𑀓𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀫𑀺𑀁 𑀪𑀡𑁆𑀟𑁂 𑀦𑀯𑁂𑀧𑀺 𑀏𑀓𑀯𑀸𑀭𑀫𑁆𑀧𑀺 𑀬𑁂𑀦 𑀓𑁂𑀦𑀘𑀺 𑀧𑀓𑀸𑀭𑁂𑀦 𑀧𑀭𑀺𑀪𑀼𑀢𑁆𑀢𑁂 𑀧𑀭𑀺𑀳𑀸𑀧𑁂𑀢𑁆𑀯𑀸 𑀅𑀕𑁆𑀖𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀏𑀢𑀸𑀦𑀺 𑀧𑀜𑁆𑀘 𑀞𑀸𑀦𑀸𑀦𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸𑀯 𑀯𑀺𑀦𑀺𑀘𑁆𑀙𑀬𑁄 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀜𑁆𑀘𑀧𑀺 𑀜𑀢𑁆𑀯𑀸 𑀏𑀢𑀸𑀦𑀺 𑀓𑀢𑁆𑀢𑀩𑁆𑀩𑁄 𑀧𑀡𑁆𑀟𑀺𑀢𑁂𑀦 𑀯𑀺𑀦𑀺𑀘𑁆𑀙𑀬𑁄’’𑀢𑀺.

𑁪𑁫. 𑀏𑀢𑁆𑀢𑀸𑀯𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀯𑀺𑀦𑀺𑀘𑁆𑀙𑀬𑀸𑀯𑀬𑀯𑀪𑀽𑀢𑁂 𑀧𑀜𑁆𑀘𑀯𑀻𑀲𑀢𑀺 𑀅𑀯𑀳𑀸𑀭𑁂 𑀘 𑀧𑀜𑁆𑀘𑀝𑁆𑀞𑀸𑀦𑀸𑀯𑀮𑁄𑀓𑀦𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑀸𑀕𑀢𑁂 𑀧𑀸𑀧𑀪𑀺𑀓𑁆𑀔𑀽𑀦𑀁 𑀮𑁂𑀲𑁄𑀓𑀸𑀲𑀧𑀺𑀤𑀳𑀦𑀢𑁆𑀣𑀁 𑀧𑀭𑀲𑀦𑁆𑀢𑀓𑀁 𑀬𑀁 𑀓𑀺𑀜𑁆𑀘𑀺 𑀯𑀢𑁆𑀣𑀼𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑀁 𑀬𑁂𑀦 𑀓𑁂𑀦𑀘𑀺 𑀧𑀓𑀸𑀭𑁂𑀦 𑀕𑀡𑁆𑀳𑀢𑁄 𑀫𑁄𑀓𑁆𑀔𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀓𑀸𑀫𑁂𑀦 𑀢𑀣𑀸𑀕𑀢𑁂𑀦 𑀬𑀸 𑀧𑀦𑁂𑀢𑀸 𑁋

𑀪𑀽𑀫𑀝𑁆𑀞𑀜𑁆𑀘 𑀣𑀮𑀝𑁆𑀞𑀜𑁆𑀘;

𑀆𑀓𑀸𑀲𑀝𑁆𑀞 𑀫𑀣𑀸𑀧𑀭𑀁;

𑀯𑁂𑀳𑀸𑀲𑀝𑁆𑀞𑁄 𑀤𑀓𑀝𑁆𑀞𑀜𑁆𑀘;

𑀦𑀸𑀯𑀸 𑀬𑀸𑀦𑀝𑁆𑀞𑀫𑁂𑀯 𑀘.

𑀪𑀸𑀭𑀸 𑀭𑀸𑀫 𑀯𑀺𑀳𑀸𑀭𑀝𑁆𑀞𑀁;

𑀔𑁂𑀢𑁆𑀢 𑀯𑀢𑁆𑀣𑀼𑀝𑁆𑀞𑀫𑁂𑀯 𑀘;

𑀕𑀸𑀫𑀸 𑀭𑀜𑁆𑀜𑀝𑁆𑀞 𑀫𑀼𑀤𑀓𑀁;

𑀤𑀦𑁆𑀢𑀧𑁄𑀦𑁄 𑀯𑀦𑀧𑁆𑀧𑀢𑀺.

𑀳𑀭𑀡𑀓𑁄 𑀧𑀦𑀺𑀥𑀺 𑀘𑁂𑀯;

𑀲𑀼𑀗𑁆𑀓𑀖𑀸𑀢𑀓𑀁 𑀧𑀸𑀡𑀓𑀸;

𑀅𑀧𑀤𑀁 𑀤𑁆𑀯𑀺𑀧𑀤𑀜𑁆𑀘𑁂𑀯;

𑀘𑀢𑀼𑀧𑁆𑀧𑀤𑀁 𑀩𑀳𑀼𑀧𑁆𑀧𑀤𑀁.

𑀑𑀘𑀭𑀓𑁄𑀡𑀺𑀭𑀓𑁆𑀔𑁄 𑀘;

𑀲𑀁𑀯𑀺𑀤𑀸𑀳𑀭𑀡𑀫𑁆𑀧𑀺 𑀘;

𑀲𑀗𑁆𑀓𑁂𑀢𑀓𑀫𑁆𑀫𑀁 𑀦𑀺𑀫𑀺𑀢𑁆𑀢-

𑀫𑀺𑀢𑀺 𑀢𑀺𑀁 𑀲𑁂𑀢𑁆𑀣 𑀫𑀸𑀢𑀺𑀓𑀸. 𑁋

𑀦𑀺𑀓𑁆𑀔𑀺𑀢𑁆𑀢𑀸, 𑀢𑀸𑀲𑀁 𑀬𑀣𑀸𑀓𑁆𑀓𑀫𑀁 𑀧𑀤𑀪𑀸𑀚𑀦𑁂, 𑀢𑀤𑀝𑁆𑀞𑀓𑀣𑀸𑀬 𑀘 𑀆𑀕𑀢𑀦𑀬𑁂𑀦 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 𑀧𑀞𑀫𑀁 𑀢𑀸𑀯 𑀪𑀽𑀫𑀝𑁆𑀞𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀤𑀼𑀢𑀺𑀬𑀁 𑀯𑀸𑀧𑀻’’𑀢𑀺𑀆𑀤𑀺.

𑀢𑀢𑁆𑀣 𑀤𑀼𑀢𑀺𑀬𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀬𑁂𑀲𑀢𑁄 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼. 𑀉𑀧𑀭𑀺 𑀲𑀜𑁆𑀚𑀸𑀢𑀸𑀳𑀺 𑀭𑀼𑀓𑁆𑀔𑀮𑀢𑀸𑀳𑀺, 𑀇𑀝𑁆𑀞𑀓𑀧𑀸𑀲𑀸𑀡𑀸𑀤𑀻𑀳𑀺 𑀘 𑀲𑀜𑁆𑀙𑀦𑁆𑀦𑀁 𑀫𑀳𑀸𑀦𑀺𑀥𑀺𑀁 𑀉𑀤𑁆𑀥𑀭𑀺𑀢𑀼𑀓𑀸𑀫𑁂𑀦 ‘‘𑀫𑀬𑀸 𑀏𑀓𑁂𑀦𑁂𑀯 𑀦 𑀲𑀓𑁆𑀓𑀸’’𑀢𑀺 𑀅𑀢𑁆𑀢𑀦𑁄 𑀅𑀜𑁆𑀜𑀁 𑀲𑀳𑀸𑀬𑀁 𑀧𑀭𑀺𑀬𑁂𑀲𑀺𑀢𑀼𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀲𑀬𑀺𑀢𑀝𑁆𑀞𑀸𑀦𑀸 𑀉𑀝𑁆𑀞𑀸𑀦𑀸𑀤𑀻𑀲𑀼 𑀲𑀩𑁆𑀩𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀼𑀤𑀸𑀮𑀁 𑀪𑀽𑀫𑀺𑀔𑀡𑀦𑀢𑁆𑀣𑀸𑀬 𑀧𑀺𑀝𑀓𑀁 𑀯𑀸𑀧𑀺 𑀧𑀁𑀲𑀼𑀉𑀤𑁆𑀥𑀭𑀡𑀢𑁆𑀣𑀸𑀬 𑀬𑀁 𑀓𑀺𑀜𑁆𑀘𑀺 𑀪𑀸𑀚𑀦𑀁. 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀓𑀼𑀤𑀸𑀮𑀲𑁆𑀲 𑀘𑁂 𑀤𑀡𑁆𑀟𑁄 𑀦𑀢𑁆𑀣𑀺, 𑀤𑀡𑁆𑀟𑀢𑁆𑀣𑀸𑀬 𑀭𑀼𑀓𑁆𑀔𑀢𑁄 𑀤𑀡𑁆𑀟𑀁 𑀙𑀺𑀦𑁆𑀤𑀢𑁄 𑀘 𑀓𑀼𑀤𑀸𑀮𑁄 𑀘𑁂 𑀦 𑀳𑁄𑀢𑀺, 𑀓𑀼𑀤𑀸𑀮𑀓𑀭𑀡𑀢𑁆𑀣𑀸𑀬 𑀅𑀬𑁄𑀩𑀻𑀚𑀁 𑀉𑀤𑁆𑀥𑀭𑀡𑀢𑁆𑀣𑀸𑀬 𑀅𑀓𑀧𑁆𑀧𑀺𑀬𑀧𑀣𑀯𑀺𑀁 𑀔𑀡𑀦𑁆𑀢𑀲𑁆𑀲𑀧𑀺 𑀧𑀘𑁆𑀙𑀺𑀓𑀭𑀡𑀢𑁆𑀣𑀸𑀬 𑀧𑀡𑁆𑀡𑀸𑀦𑀺 𑀙𑀺𑀦𑁆𑀤𑀢𑁄𑀧𑀺 𑀧𑀺𑀝𑀓𑀯𑀸𑀬𑀦𑀢𑁆𑀣𑀸𑀬 𑀯𑀮𑁆𑀮𑀺𑀁 𑀙𑀺𑀦𑁆𑀤𑀢𑁄𑀧𑀺 𑀉𑀪𑀬𑀢𑁆𑀣𑀸𑀧𑀺 𑀧𑀭𑀺𑀬𑁂𑀲𑀦𑁂 𑀫𑀼𑀲𑀸 𑀪𑀡𑀢𑁄𑀧𑀺 𑀤𑀼𑀓𑁆𑀓𑀝𑀜𑁆𑀘𑁂𑀯 𑀧𑀸𑀘𑀺𑀢𑁆𑀢𑀺𑀬𑀜𑁆𑀘, 𑀇𑀢𑀭𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀕𑀘𑁆𑀙𑀢𑁄𑀢𑀺 𑀤𑀼𑀢𑀺𑀬𑀸𑀤𑀺𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀮𑀤𑁆𑀥𑀸 𑀯𑀸 𑀅𑀮𑀤𑁆𑀥𑀸 𑀯𑀸 𑀦𑀺𑀥𑀺𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀲𑁆𑀲 𑀧𑀤𑁂 𑀧𑀤𑁂 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 ‘‘𑀣𑁂𑀬𑁆𑀬𑀘𑀺𑀢𑁆𑀢𑁄 𑀤𑀼𑀢𑀺𑀬𑀁 𑀯𑀸 𑀧𑀭𑀺𑀬𑁂𑀲𑀢𑀻’’𑀢𑀺𑀆𑀤𑀺 𑀧𑀸𑀴𑀺𑀬𑀁 (𑀧𑀸𑀭𑀸. 𑁯𑁪) ‘‘𑀣𑁂𑀬𑁆𑀬𑀘𑀺𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀇𑀥 ‘‘𑀣𑁂𑀬𑁆𑀬𑀘𑀺𑀢𑁆𑀢𑁂𑀦𑀸’’𑀢𑀺 𑀯𑀘𑀦𑀢𑁄 ‘‘𑀇𑀫𑀁 𑀦𑀺𑀥𑀺𑀁 𑀮𑀪𑀺𑀢𑁆𑀯𑀸 𑀩𑀼𑀤𑁆𑀥𑀧𑀽𑀚𑀁 𑀯𑀸 𑀓𑀭𑀺𑀲𑁆𑀲𑀸𑀫𑀺, 𑀲𑀗𑁆𑀖𑀪𑀢𑁆𑀢𑀁 𑀯𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀓𑀼𑀲𑀮𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀲𑀢𑀺 𑀅𑀦𑀸𑀧𑀢𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀩𑁆𑀩𑀬𑁄𑀕𑀢𑁄𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀼𑀩𑁆𑀩𑀧𑀬𑁄𑀕𑀪𑀸𑀯𑀢𑁄, 𑀤𑀼𑀢𑀺𑀬𑀧𑀭𑀺𑀬𑁂𑀲𑀦𑀸𑀤𑀻𑀲𑀼 𑀧𑀼𑀩𑁆𑀩𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄.

𑀤𑀼𑀓𑁆𑀓𑀝𑀜𑁆𑀘 𑀅𑀝𑁆𑀞𑀯𑀺𑀥𑀁 𑀳𑁄𑀢𑀺 𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑀁 𑀲𑀳𑀧𑀬𑁄𑀕𑀤𑀼𑀓𑁆𑀓𑀝𑀁 𑀅𑀦𑀸𑀫𑀸𑀲𑀤𑀼𑀓𑁆𑀓𑀝𑀁 𑀤𑀼𑀭𑀼𑀧𑀘𑀺𑀡𑁆𑀡𑀤𑀼𑀓𑁆𑀓𑀝𑀁 𑀯𑀺𑀦𑀬𑀤𑀼𑀓𑁆𑀓𑀝𑀁 𑀜𑀸𑀢𑀤𑀼𑀓𑁆𑀓𑀝𑀁 𑀜𑀢𑁆𑀢𑀺𑀤𑀼𑀓𑁆𑀓𑀝𑀁 𑀧𑀝𑀺𑀲𑁆𑀲𑀯𑀤𑀼𑀓𑁆𑀓𑀝𑀦𑁆𑀢𑀺. 𑀢𑀢𑁆𑀣 ‘‘𑀣𑁂𑀬𑁆𑀬𑀘𑀺𑀢𑁆𑀢𑁄 𑀤𑀼𑀢𑀺𑀬𑀁 𑀯𑀸 𑀓𑀼𑀤𑀸𑀮𑀁 𑀯𑀸 𑀧𑀺𑀝𑀓𑀁 𑀯𑀸 𑀧𑀭𑀺𑀬𑁂𑀲𑀢𑀺 𑀕𑀘𑁆𑀙𑀢𑀺 𑀯𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁 𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑀁 𑀦𑀸𑀫. 𑀇𑀥 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀇𑀢𑀭𑁂𑀲𑀼 𑀧𑀼𑀩𑁆𑀩𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀁. ‘‘𑀢𑀢𑁆𑀣𑀚𑀸𑀢𑀓𑀁 𑀓𑀝𑁆𑀞𑀁 𑀯𑀸 𑀮𑀢𑀁 𑀯𑀸 𑀙𑀺𑀦𑁆𑀤𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁 𑀲𑀳𑀧𑀬𑁄𑀕𑀤𑀼𑀓𑁆𑀓𑀝𑀁. 𑀇𑀥 𑀅𑀤𑀺𑀦𑁆𑀦𑀸𑀤𑀸𑀦𑀲𑀳𑀺𑀢𑀧𑀬𑁄𑀕𑀢𑁆𑀢𑀸 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼𑀫𑁆𑀳𑀺, 𑀇𑀢𑀭𑀢𑁆𑀭 𑀘 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀫𑀼𑀢𑁆𑀢𑀸𑀫𑀡𑀺𑀆𑀤𑀻𑀲𑀼 𑀤𑀲𑀲𑀼 𑀭𑀢𑀦𑁂𑀲𑀼, 𑀲𑀸𑀮𑀺𑀆𑀤𑀻𑀲𑀼 𑀲𑀢𑁆𑀢𑀲𑀼 𑀥𑀜𑁆𑀜𑁂𑀲𑀼, 𑀲𑀩𑁆𑀩𑁂𑀲𑀼 𑀘 𑀆𑀯𑀼𑀥𑀪𑀡𑁆𑀟𑀸𑀤𑀻𑀲𑀼 𑀆𑀫𑀲𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀅𑀦𑀸𑀫𑀸𑀲𑀤𑀼𑀓𑁆𑀓𑀝𑀁. 𑀓𑀤𑀮𑀺𑀦𑀸𑀴𑀺𑀓𑁂𑀭𑀧𑀦𑀲𑀸𑀤𑀺𑀭𑀼𑀓𑁆𑀔𑀝𑁆𑀞𑀫𑁂𑀯 𑀨𑀮𑀁 𑀆𑀫𑀲𑀦𑁆𑀢𑀲𑁆𑀲 𑀯𑀼𑀢𑁆𑀢𑀁 𑀤𑀼𑀓𑁆𑀓𑀝𑀁 𑀤𑀼𑀭𑀼𑀧𑀘𑀺𑀡𑁆𑀡𑀤𑀼𑀓𑁆𑀓𑀝𑀁. 𑀉𑀧𑀘𑀭𑀡𑀁 𑀉𑀧𑀘𑀺𑀡𑁆𑀡𑀁, 𑀧𑀭𑀸𑀫𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀝𑁆𑀞𑀼 𑀉𑀧𑀘𑀺𑀡𑁆𑀡𑀁 𑀤𑀼𑀭𑀼𑀧𑀘𑀺𑀡𑁆𑀡𑀁, 𑀤𑀼𑀭𑀼𑀧𑀘𑀺𑀡𑁆𑀡𑁂 𑀤𑀼𑀓𑁆𑀓𑀝𑀁 𑀤𑀼𑀭𑀼𑀧𑀘𑀺𑀡𑁆𑀡𑀤𑀼𑀓𑁆𑀓𑀝𑀁. 𑀪𑀺𑀓𑁆𑀔𑀸𑀘𑀸𑀭𑀓𑀸𑀮𑁂 𑀧𑀢𑁆𑀢𑁂 𑀭𑀚𑀲𑁆𑀫𑀺𑀁 𑀧𑀢𑀺𑀢𑁂 𑀧𑀢𑁆𑀢𑀁 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀯𑀸 𑀅𑀥𑁄𑀯𑀺𑀢𑁆𑀯𑀸 𑀯𑀸 𑀪𑀺𑀓𑁆𑀔𑀸𑀧𑀝𑀺𑀕𑁆𑀕𑀳𑀡𑁂𑀦 𑀤𑀼𑀓𑁆𑀓𑀝𑀁 𑀯𑀺𑀦𑀬𑀤𑀼𑀓𑁆𑀓𑀝𑀁, 𑀯𑀺𑀦𑀬𑁂 𑀧𑀜𑁆𑀜𑀢𑁆𑀢𑀁 𑀤𑀼𑀓𑁆𑀓𑀝𑀁 𑀯𑀺𑀦𑀬𑀤𑀼𑀓𑁆𑀓𑀝𑀁. 𑀓𑀺𑀜𑁆𑀘𑀸𑀧𑀺 𑀅𑀯𑀲𑁂𑀲𑀤𑀼𑀓𑁆𑀓𑀝𑀸𑀦𑀺𑀧𑀺 𑀯𑀺𑀦𑀬𑁂 𑀧𑀜𑁆𑀜𑀢𑁆𑀢𑀸𑀦𑁂𑀯, 𑀢𑀣𑀸𑀧𑀺 𑀭𑀼𑀴𑁆𑀳𑀺𑀬𑀸 𑀫𑀬𑀽𑀭𑀸𑀤𑀺𑀲𑀤𑁆𑀤𑁂𑀳𑀺 𑀫𑁄𑀭𑀸𑀤𑀬𑁄 𑀯𑀺𑀬 𑀇𑀤𑀫𑁂𑀯 𑀢𑀣𑀸 𑀯𑀼𑀘𑁆𑀘𑀢𑀺. ‘‘𑀲𑀼𑀢𑁆𑀯𑀸 𑀦 𑀯𑀤𑀦𑁆𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁 𑀜𑀸𑀢𑀤𑀼𑀓𑁆𑀓𑀝𑀁 𑀦𑀸𑀫. 𑀏𑀓𑀸𑀤𑀲𑀲𑀼 𑀲𑀫𑀦𑀼𑀪𑀸𑀲𑀦𑀸𑀲𑀼 ‘‘𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀼𑀢𑁆𑀢𑀁 𑀜𑀢𑁆𑀢𑀺𑀤𑀼𑀓𑁆𑀓𑀝𑀁. ‘‘𑀢𑀲𑁆𑀲 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁦𑁭) 𑀯𑀼𑀢𑁆𑀢𑀁 𑀧𑀝𑀺𑀲𑁆𑀲𑀯𑀤𑀼𑀓𑁆𑀓𑀝𑀁 𑀦𑀸𑀫. 𑀇𑀫𑁂𑀲𑀼 𑀅𑀝𑁆𑀞𑀲𑀼 𑀤𑀼𑀓𑁆𑀓𑀝𑁂𑀲𑀼 𑀇𑀥 𑀆𑀧𑀚𑁆𑀚𑀺𑀢𑀩𑁆𑀩𑀁 𑀤𑀼𑀓𑁆𑀓𑀝𑀁 𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑀁 𑀦𑀸𑀫. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑀬𑁄𑀕𑀢𑁄’’𑀢𑀺. 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀉𑀧𑀲𑀕𑁆𑀕𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 ‘‘𑀧𑀼𑀩𑁆𑀩𑀧𑀬𑁄𑀕𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀩𑁆𑀩𑀬𑁄𑀕𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀇𑀫𑁂𑀲𑀼 𑀤𑀼𑀓𑁆𑀓𑀝𑁂𑀲𑀼 𑀅𑀲𑀗𑁆𑀕𑀳𑀺𑀢𑀸𑀦𑀺 𑀉𑀪𑀢𑁄𑀯𑀺𑀪𑀗𑁆𑀕𑀸𑀕𑀢𑀸𑀦𑀺 𑀤𑀺𑀯𑀸𑀲𑁂𑀬𑁆𑀬𑀸𑀤𑀺𑀤𑀼𑀓𑁆𑀓𑀝𑀸𑀦𑀺 𑀘𑁂𑀯 𑀔𑀦𑁆𑀥𑀓𑀸𑀕𑀢𑀸𑀦𑀺 𑀘 𑀩𑀳𑀽𑀦𑀺 𑀤𑀼𑀓𑁆𑀓𑀝𑀸𑀦𑀺 𑀲𑀦𑁆𑀢𑀺, 𑀢𑀸𑀦𑀺 𑀧𑀦𑁂𑀢𑁆𑀣 𑀯𑀺𑀦𑀬𑀤𑀼𑀓𑁆𑀓𑀝𑁂𑀬𑁂𑀯 𑀲𑀗𑁆𑀕𑀳𑀺𑀢𑀩𑁆𑀩𑀸𑀦𑀺. ‘‘𑀯𑀺𑀦𑀬𑁂 𑀧𑀜𑁆𑀜𑀢𑁆𑀢𑀁 𑀤𑀼𑀓𑁆𑀓𑀝𑀁 𑀯𑀺𑀦𑀬𑀤𑀼𑀓𑁆𑀓𑀝’’𑀦𑁆𑀢𑀺 𑀳𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁯𑁪) 𑀯𑀼𑀢𑁆𑀢𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁪) 𑀧𑀦 𑀭𑀚𑁄𑀓𑀺𑀡𑁆𑀡𑀤𑀼𑀓𑁆𑀓𑀝𑀲𑁆𑀲𑁂𑀯 ‘‘𑀯𑀺𑀦𑀬𑀤𑀼𑀓𑁆𑀓𑀝’’𑀦𑁆𑀢𑀺 𑀕𑀳𑀡𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀁. 𑀇𑀢𑀭𑀣𑀸 𑀅𑀝𑁆𑀞 𑀤𑀼𑀓𑁆𑀓𑀝𑀸𑀦𑀻𑀢𑀺 𑀕𑀡𑀦𑀸𑀧𑀭𑀺𑀘𑁆𑀙𑁂𑀤𑁄𑀬𑁂𑀯 𑀦𑀺𑀭𑀢𑁆𑀣𑀓𑁄 𑀲𑀺𑀬𑀸𑀢𑀺 𑀧𑀼𑀩𑁆𑀩𑀧𑀬𑁄𑀕𑁂 𑀤𑀼𑀓𑁆𑀓𑀝𑀸𑀤𑀻𑀦𑀫𑁆𑀧𑀺 𑀯𑀺𑀦𑀬𑀤𑀼𑀓𑁆𑀓𑀝𑁂𑀬𑁂𑀯 𑀲𑀗𑁆𑀕𑀳𑁂𑀢𑀩𑁆𑀩𑀪𑀸𑀯𑁂𑀧𑀺 𑀓𑀢𑀺𑀧𑀬𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀢𑀭𑁂𑀲𑀫𑁂𑀓𑀢𑁄 𑀤𑀲𑁆𑀲𑀦𑀢𑁆𑀣𑀁 𑀢𑁂𑀲𑀁 𑀯𑀺𑀲𑀼𑀁 𑀕𑀳𑀡𑀁 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑀺𑀢𑀢𑁆𑀢𑁂𑀧𑀺 𑀕𑁂𑀬𑁆𑀬𑀕𑀸𑀣𑀸𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀯𑀺𑀲𑀼𑀁 𑀤𑀲𑁆𑀲𑀦𑀁 𑀯𑀺𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁪𑁬. 𑀢𑀢𑁆𑀣𑀚𑀸𑀢𑀓𑀁 𑀓𑀝𑁆𑀞𑀁 𑀯𑀸𑀢𑀺 𑀢𑀲𑁆𑀫𑀺𑀁 𑀘𑀺𑀭𑀦𑀺𑀳𑀺𑀢𑀦𑀺𑀥𑀽𑀧𑀭𑀺 𑀚𑀸𑀢𑀁 𑀅𑀮𑁆𑀮𑀁 𑀲𑀼𑀓𑁆𑀔𑀁 𑀓𑀝𑁆𑀞𑀁 𑀯𑀸. 𑀮𑀢𑀁 𑀯𑀸𑀢𑀺 𑀢𑀸𑀤𑀺𑀲𑀁 𑀯𑀮𑁆𑀮𑀺𑀁 𑀯𑀸. 𑀇𑀤𑀁 𑀉𑀧𑀮𑀓𑁆𑀔𑀡𑀁 𑀢𑀺𑀡𑀸𑀤𑀻𑀦𑀁 𑀔𑀼𑀤𑁆𑀤𑀓𑀕𑀘𑁆𑀙𑀸𑀦𑀜𑁆𑀘 𑀕𑀳𑁂𑀢𑀩𑁆𑀩𑀢𑁆𑀢𑀸. 𑀉𑀪𑀬𑀢𑁆𑀣𑀸𑀧𑀻𑀢𑀺 𑀅𑀮𑁆𑀮𑁂 𑀘 𑀲𑀼𑀓𑁆𑀔𑁂 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀮𑁆𑀮𑀭𑀼𑀓𑁆𑀔𑀸𑀤𑀻𑀦𑀺 𑀙𑀺𑀦𑁆𑀤𑀢𑁄 𑀧𑀸𑀘𑀺𑀢𑁆𑀢𑀺𑀬𑀁 𑀅𑀳𑀼𑀢𑁆𑀯𑀸 𑀤𑀼𑀓𑁆𑀓𑀝𑀫𑀢𑁆𑀢𑀲𑁆𑀲 𑀪𑀯𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺 ‘‘𑀲𑀳𑀧𑀬𑁄𑀕𑀢𑁄’’𑀢𑀺. 𑀅𑀯𑀳𑀸𑀭𑁂𑀦 𑀲𑀳𑀺𑀢𑀧𑀬𑁄𑀕𑀢𑁆𑀢𑀸 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂𑀧𑀺 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑀳𑀧𑀬𑁄𑀕𑀢𑁄 𑀉𑀪𑀬𑀢𑁆𑀣𑀸𑀧𑀺 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀤𑀦𑁆𑀢𑁄 𑀧𑀞𑀫𑀕𑀸𑀣𑀸𑀬 𑀤𑀲𑁆𑀲𑀺𑀢𑀧𑀼𑀩𑁆𑀩𑀧𑀬𑁄𑀕𑀢𑁄 𑀇𑀫𑀸𑀬 𑀤𑀲𑁆𑀲𑀺𑀢𑀲𑀳𑀧𑀬𑁄𑀕𑀲𑁆𑀲 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺.

𑁪𑁭. 𑀧𑀣𑀯𑀺𑀦𑁆𑀢𑀺 𑀓𑀧𑁆𑀧𑀺𑀬𑀁 𑀯𑀸 𑀅𑀓𑀧𑁆𑀧𑀺𑀬𑀁 𑀯𑀸 𑀧𑀣𑀯𑀺𑀁. 𑀅𑀓𑀧𑁆𑀧𑀺𑀬𑀧𑀣𑀯𑀺𑀁 𑀔𑀡𑀢𑁄 𑀲𑀳𑀧𑀬𑁄𑀕𑀢𑁆𑀢𑀸 𑀤𑀼𑀓𑁆𑀓𑀝𑀫𑁂𑀯. 𑀩𑁆𑀬𑀽𑀳𑀢𑁄𑀢𑀺 𑀧𑀁𑀲𑀼𑀁 𑀏𑀓𑀢𑁄 𑀭𑀸𑀲𑀺𑀁 𑀓𑀭𑁄𑀦𑁆𑀢𑀲𑁆𑀲. ‘‘𑀯𑀺𑀬𑀽𑀳𑀢𑀺 𑀏𑀓𑀧𑀲𑁆𑀲𑁂 𑀭𑀸𑀲𑀺𑀁 𑀓𑀭𑁄𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀊𑀳-𑀇𑀘𑁆𑀘𑁂𑀢𑀲𑁆𑀲 𑀥𑀸𑀢𑀼𑀦𑁄 𑀯𑀺𑀢𑀓𑁆𑀓𑁂 𑀉𑀧𑁆𑀧𑀦𑁆𑀦𑀢𑁆𑀢𑁂𑀧𑀺 𑀥𑀸𑀢𑀽𑀦𑀫𑀦𑁂𑀓𑀢𑁆𑀣𑀢𑁆𑀢𑀸 𑀯𑀺-𑀉𑀧𑀲𑀕𑁆𑀕𑀯𑀲𑁂𑀦 𑀇𑀥 𑀭𑀸𑀲𑀺𑀓𑀭𑀡𑁂 𑀯𑀢𑁆𑀢𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀭𑀸𑀲𑀺𑀪𑀽𑀢𑀁 𑀧𑀁𑀲𑀼𑀁 𑀓𑀼𑀤𑀸𑀮𑁂𑀦 𑀯𑀸 𑀳𑀢𑁆𑀣𑁂𑀦 𑀯𑀸 𑀧𑀘𑁆𑀙𑀺𑀬𑀸 𑀯𑀸 𑀉𑀤𑁆𑀥𑀭𑀦𑁆𑀢𑀲𑁆𑀲 𑀘 𑀅𑀧𑀦𑁂𑀦𑁆𑀢𑀲𑁆𑀲 𑀘 𑀧𑀬𑁄𑀕𑀕𑀡𑀦𑀸𑀬 𑀤𑀼𑀓𑁆𑀓𑀝𑀁 𑀧𑀁𑀲𑀼𑀫𑁂𑀯 𑀯𑀸𑀢𑀺 𑀏𑀢𑁆𑀣 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁂𑀦 𑀯𑀸-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀫𑀲𑀦𑁆𑀢𑀲𑁆𑀲𑀸𑀢𑀺 𑀦𑀺𑀥𑀺𑀓𑀼𑀫𑁆𑀪𑀺𑀁 𑀳𑀢𑁆𑀣𑁂𑀦 𑀧𑀭𑀸𑀫𑀲𑀦𑁆𑀢𑀲𑁆𑀲. 𑀯𑀸𑀢𑀺 𑀲𑀫𑀼𑀘𑁆𑀘𑀬𑁂. 𑀤𑀼𑀓𑁆𑀓𑀝𑀦𑁆𑀢𑀺 𑀤𑀼𑀝𑁆𑀞𑀼 𑀓𑀢𑀁 𑀓𑀺𑀭𑀺𑀬𑀁 𑀲𑀢𑁆𑀣𑀸𑀭𑀸 𑀯𑀼𑀢𑁆𑀢𑀁 𑀯𑀺𑀭𑀸𑀥𑁂𑀢𑁆𑀯𑀸 𑀔𑀮𑀺𑀢𑁆𑀯𑀸 𑀓𑀢𑀢𑁆𑀢𑀸𑀢𑀺 𑀤𑀼𑀓𑁆𑀓𑀝𑀁. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀧𑀭𑀺𑀯𑀸𑀭𑁂 (𑀧𑀭𑀺. 𑁩𑁩𑁯) 𑁋

‘‘𑀤𑀼𑀓𑁆𑀓𑀝𑀦𑁆𑀢𑀺 𑀳𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀅𑀧𑀭𑀤𑁆𑀥𑀁 𑀯𑀺𑀭𑀤𑁆𑀥𑀜𑁆𑀘, 𑀔𑀮𑀺𑀢𑀁 𑀬𑀜𑁆𑀘 𑀤𑀼𑀓𑁆𑀓𑀝’’𑀦𑁆𑀢𑀺.

𑀤𑀼𑀝𑁆𑀞𑀼 𑀯𑀸 𑀯𑀺𑀭𑀽𑀧𑀁 𑀓𑀢𑀁 𑀓𑀺𑀭𑀺𑀬𑀸𑀢𑀺 𑀤𑀼𑀓𑁆𑀓𑀝𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀧𑀭𑀺𑀯𑀸𑀭𑁂 (𑀧𑀭𑀺. 𑁩𑁩𑁯) 𑁋

‘‘𑀬𑀁 𑀫𑀦𑀼𑀲𑁆𑀲𑁄 𑀓𑀭𑁂 𑀧𑀸𑀧𑀁, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄;

‘𑀤𑀼𑀓𑁆𑀓𑀝’𑀦𑁆𑀢𑀺 𑀧𑀯𑁂𑀤𑁂𑀦𑁆𑀢𑀺, 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀏𑀯𑀁 ‘‘𑀢𑀢𑁆𑀣𑀚𑀸𑀢𑀓’’𑀦𑁆𑀢𑀺𑀆𑀤𑀺𑀕𑀸𑀣𑀸𑀤𑁆𑀯𑀬𑀸𑀕𑀢𑀁 𑀙𑁂𑀤𑀦𑀤𑀼𑀓𑁆𑀓𑀝𑀁 𑀔𑀡𑀦𑀤𑀼𑀓𑁆𑀓𑀝𑀁 𑀩𑁆𑀬𑀽𑀳𑀦𑀤𑀼𑀓𑁆𑀓𑀝𑀁 𑀉𑀤𑁆𑀥𑀭𑀡𑀤𑀼𑀓𑁆𑀓𑀝𑀁 𑀆𑀫𑀲𑀦𑀤𑀼𑀓𑁆𑀓𑀝𑀦𑁆𑀢𑀺 𑀧𑀜𑁆𑀘𑀲𑀼 𑀲𑀳𑀧𑀬𑁄𑀕𑀤𑀼𑀓𑁆𑀓𑀝𑁂𑀲𑀼 𑀧𑀼𑀭𑀺𑀫𑀧𑀼𑀭𑀺𑀫𑀧𑀬𑁄𑀕𑁂𑀳𑀺 𑀆𑀧𑀦𑁆𑀦𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑁄 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀤𑀼𑀓𑁆𑀓𑀝𑀁 𑀧𑀢𑁆𑀯𑀸 𑀧𑀝𑀺𑀧𑀲𑁆𑀲𑀫𑁆𑀪𑀦𑁆𑀢𑀺, 𑀢𑀁𑀢𑀁𑀧𑀬𑁄𑀕𑀸𑀯𑀲𑀸𑀦𑁂 𑀮𑀚𑁆𑀚𑀺𑀥𑀫𑁆𑀫𑀁 𑀑𑀓𑁆𑀓𑀫𑀺𑀢𑁆𑀯𑀸 𑀑𑀭𑀫𑀢𑀺 𑀘𑁂, 𑀢𑀁𑀢𑀁𑀤𑀼𑀓𑁆𑀓𑀝𑀫𑀢𑁆𑀢𑀁 𑀤𑁂𑀲𑁂𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺. 𑀥𑀼𑀭𑀦𑀺𑀓𑁆𑀔𑁂𑀧𑀫𑀓𑀢𑁆𑀯𑀸 𑀨𑀦𑁆𑀤𑀸𑀧𑁂𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀧𑀢𑁆𑀯𑀸 𑀆𑀫𑀲𑀦𑀤𑀼𑀓𑁆𑀓𑀝𑀁 𑀧𑀝𑀺𑀧𑀲𑁆𑀲𑀫𑁆𑀪𑀢𑀻𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁪) 𑀯𑀼𑀢𑁆𑀢𑀁. 𑀬𑀣𑀸𑀧𑀸𑀴𑀺𑀬𑀸 𑀕𑀬𑁆𑀳𑀫𑀸𑀦𑁂 𑀧𑀼𑀭𑀺𑀫𑀧𑀼𑀭𑀺𑀫𑀸𑀧𑀢𑁆𑀢𑀻𑀦𑀁 𑀧𑀝𑀺𑀧𑀲𑁆𑀲𑀤𑁆𑀥𑀺 ‘‘𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑀸 𑀧𑀝𑀺𑀧𑀲𑁆𑀲𑀫𑁆𑀪𑀦𑁆𑀢𑀻’’𑀢𑀺 𑀧𑀸𑀴𑀺𑀬𑀁 (𑀧𑀸𑀭𑀸. 𑁪𑁧𑁪, 𑁪𑁨𑁧, 𑁪𑁨𑁮, 𑁪𑁩𑁯) 𑀆𑀕𑀢𑀢𑁆𑀢𑀸 𑀅𑀦𑀼𑀲𑁆𑀲𑀸𑀯𑀦𑀸𑀬 𑀏𑀯 𑀮𑀩𑁆𑀪𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀲𑁆𑀲 𑀧𑀦 𑀲𑀼𑀢𑁆𑀢𑀲𑁆𑀲 𑀅𑀦𑀼𑀮𑁄𑀫𑀯𑀲𑁂𑀦 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸 𑀇𑀫𑀲𑁆𑀫𑀺𑀁 𑀅𑀤𑀺𑀦𑁆𑀦𑀸𑀤𑀸𑀦𑀲𑀺𑀓𑁆𑀔𑀸𑀧𑀤𑁂𑀧𑀺 𑀆𑀧𑀢𑁆𑀢𑀺𑀧𑀝𑀺𑀧𑀲𑁆𑀲𑀤𑁆𑀥𑀺 𑀧𑀫𑀸𑀡𑀦𑁆𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑁪𑁮. ‘‘𑀨𑀦𑁆𑀤𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀞𑀸𑀦𑀸 𑀘𑀸𑀯𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁯𑁪) 𑀯𑀼𑀢𑁆𑀢𑀁 𑀞𑀸𑀦𑀸𑀘𑀸𑀯𑀦𑁂 𑀧𑀸𑀭𑀸𑀚𑀺𑀓𑀜𑁆𑀘 𑀢𑀲𑁆𑀲 𑀲𑀸𑀫𑀦𑁆𑀢𑀸𑀧𑀢𑁆𑀢𑀺𑀪𑀽𑀢𑀁 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀞𑀸𑀦𑀪𑁂𑀤𑀯𑀺𑀜𑁆𑀜𑀸𑀧𑀦𑀫𑀼𑀔𑁂𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀇𑀤𑀸𑀦𑀺 𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀫𑀼𑀔𑁂𑀧𑀸𑀲’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀫𑀼𑀔𑁂 𑀓𑀼𑀫𑁆𑀪𑀺𑀫𑀼𑀔𑀯𑀝𑁆𑀝𑀺𑀬𑀁. 𑀧𑀸𑀲𑀁 𑀧𑀯𑁂𑀲𑁂𑀢𑁆𑀯𑀸𑀢𑀺 𑀩𑀦𑁆𑀥𑀦𑀁 𑀧𑀸𑀲𑀁 𑀧𑀓𑁆𑀔𑀺𑀧𑀺𑀢𑁆𑀯𑀸. 𑀔𑀸𑀡𑀼𑀓𑁂𑀢𑀺 𑀅𑀬𑁄𑀔𑀸𑀡𑀼𑀫𑁆𑀳𑀺, 𑀔𑀤𑀺𑀭𑀔𑀸𑀡𑀼𑀓𑁂 𑀯𑀸. 𑀩𑀤𑁆𑀥𑀓𑀼𑀫𑁆𑀪𑀺𑀬𑀸 𑀞𑀸𑀦𑀪𑁂𑀤𑁄 𑀩𑀦𑁆𑀥𑀦𑀸𑀦𑀁 𑀯𑀲𑀸 𑀜𑁂𑀬𑁆𑀬𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁯. 𑀇𑀤𑀸𑀦𑀺 𑀞𑀸𑀦𑀪𑁂𑀤𑀁 𑀤𑀲𑁆𑀲𑁂𑀢𑀺 ‘‘𑀤𑁆𑀯𑁂’’𑀢𑀺𑀆𑀤𑀺𑀦𑀸. ‘‘𑀏𑀓𑀲𑁆𑀫𑀺𑀁 𑀔𑀸𑀡𑀼𑀓𑁂’’𑀢𑀺 𑀇𑀫𑀺𑀦𑀸 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀯𑀸 𑀢𑀻𑀲𑀼 𑀘𑀢𑀽𑀲𑀼 𑀯𑀸 𑀤𑀺𑀲𑀸𑀲𑀼 𑀔𑀸𑀡𑀼𑀓𑁂 𑀔𑀡𑀺𑀢𑁆𑀯𑀸 𑀩𑀤𑁆𑀥𑀔𑀸𑀡𑀼𑀕𑀡𑀦𑀸𑀬 𑀲𑀫𑁆𑀪𑀯𑀦𑁆𑀢𑁄 𑀞𑀸𑀦𑀪𑁂𑀤𑁄 𑀉𑀧𑀮𑀓𑁆𑀔𑀺𑀢𑁄 𑀳𑁄𑀢𑀺. 𑀯𑀮𑀬𑀁…𑀧𑁂… 𑀓𑀢𑀸𑀬 𑀯𑀸 𑀤𑁆𑀯𑁂 𑀞𑀸𑀦𑀸𑀦𑀻𑀢𑀺 𑀬𑁄𑀚𑀦𑀸. 𑀯𑀸𑀢𑀺 𑀲𑀫𑀼𑀘𑁆𑀘𑀬𑁂 𑀉𑀧𑀮𑀓𑁆𑀔𑀺𑀢𑁄 𑀳𑁄𑀢𑀺.

𑁫𑁦. 𑀏𑀯𑀁 𑀞𑀸𑀦𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀞𑀸𑀦𑀯𑀲𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀸 𑀆𑀧𑀢𑁆𑀢𑀺𑀬𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀉𑀤𑁆𑀥𑀭𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺. 𑀲𑀗𑁆𑀔𑀮𑀺𑀦𑁆𑀢𑀺 𑀤𑀸𑀫𑀁. 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀤𑁂𑀲𑁂𑀢𑀩𑁆𑀩𑀸𑀲𑀼 𑀆𑀧𑀢𑁆𑀢𑀻𑀲𑀼 𑀣𑀽𑀮𑀢𑁆𑀢𑀸, 𑀅𑀘𑁆𑀘𑀬𑀢𑁆𑀢𑀸 𑀘 𑀣𑀼𑀮𑁆𑀮𑀘𑁆𑀘𑀬𑀁 𑀦𑀸𑀫. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀭𑀺𑀯𑀸𑀭𑁂 𑁋

‘‘𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀬𑀁 𑀯𑀼𑀢𑁆𑀢𑀁;

𑀢𑀁 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀏𑀓𑀲𑁆𑀲 𑀫𑀽𑀮𑁂 𑀬𑁄 𑀤𑁂𑀲𑁂𑀢𑀺;

𑀬𑁄 𑀘 𑀢𑀁 𑀧𑀝𑀺𑀕𑀡𑁆𑀳𑀢𑀺;

𑀅𑀘𑁆𑀘𑀬𑁄 𑀢𑁂𑀦 𑀲𑀫𑁄 𑀦𑀢𑁆𑀣𑀺;

𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀻’’𑀢𑀺. (𑀧𑀭𑀺. 𑁩𑁩𑁯);

𑀏𑀢𑁆𑀣 𑀘 𑀣𑀽𑀮𑀘𑁆𑀘𑀬𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀫𑁆𑀧𑀭𑀸𑀬𑁂 𑀘 (𑀲𑀁. 𑀦𑀺. 𑁧.𑁪𑁯) 𑀲𑀼𑀕𑁆𑀕𑀢𑀺, 𑀢𑀁 𑀳𑁄𑀢𑀺 𑀓𑀝𑀼𑀓𑀧𑁆𑀨𑀮’’𑀦𑁆𑀢𑀺𑀆𑀤𑀻𑀲𑀼 (𑀥. 𑀧. 𑁬𑁬) 𑀯𑀺𑀬 𑀮𑀓𑀸𑀭𑀲𑁆𑀲 𑀤𑁆𑀯𑀺𑀢𑁆𑀢𑀁, 𑀲𑀁𑀬𑁄𑀕𑁂 𑀊𑀓𑀸𑀭𑀲𑁆𑀲 𑀭𑀲𑁆𑀲𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁄 𑀲𑀗𑁆𑀔𑀮𑀺𑀓𑀪𑁂𑀤𑀢𑁄 𑀧𑀭𑀁. 𑀞𑀸𑀦𑀸 𑀘𑀸𑀯𑁂𑀢𑀻𑀢𑀺 𑀞𑀺𑀢𑀝𑁆𑀞𑀸𑀦𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀧𑀦𑁂𑀢𑀺. 𑀏𑀢𑁆𑀣 𑀘 𑀦𑀸𑀯𑀝𑁆𑀞𑀓𑀣𑀸𑀬𑀁 ‘‘𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀢𑀺𑀭𑀺𑀬𑀁 𑀯𑀸 𑀅𑀦𑁆𑀢𑀫𑀲𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀲𑀗𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁯𑁯) 𑀯𑀼𑀢𑁆𑀢𑀦𑀬𑁂𑀦 ‘‘𑀢𑀺𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀸 𑀘𑀢𑀲𑁆𑀲𑁄 𑀤𑀺𑀲𑀸, 𑀉𑀤𑁆𑀥𑀫𑀥𑁄 𑀘𑀸𑀢𑀺 𑀙𑀝𑁆𑀞𑀸𑀦𑀸𑀦𑀺. 𑀢𑀸𑀲𑀼 𑀏𑀓𑀁 𑀤𑀺𑀲𑀁 𑀅𑀧𑀦𑀻𑀬𑀫𑀸𑀦𑀸𑀬 𑀓𑀼𑀫𑁆𑀪𑀺𑀬𑀸 𑀢𑀁𑀤𑀺𑀲𑀸𑀪𑀺𑀫𑀼𑀔𑀁 𑀇𑀢𑀭𑀤𑀺𑀲𑀸𑀬𑀁 𑀞𑀺𑀢𑀧𑀲𑁆𑀲𑁂 𑀑𑀭𑀺𑀫𑀤𑀺𑀲𑀸𑀬 𑀞𑀺𑀢𑀧𑀲𑁆𑀲𑁂𑀦 𑀨𑀼𑀝𑁆𑀞𑁄𑀓𑀸𑀲𑀲𑁆𑀲 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀦𑀢𑀺𑀓𑁆𑀓𑀦𑁆𑀢𑁂 𑀨𑀦𑁆𑀤𑀸𑀧𑀦𑀯𑀲𑁂𑀦 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀺, 𑀅𑀢𑀺𑀓𑁆𑀓𑀦𑁆𑀢𑁂 𑀞𑀸𑀦𑀸 𑀘𑀸𑀯𑀺𑀢𑀢𑁆𑀢𑀸 𑀧𑀸𑀭𑀸𑀚𑀺𑀓𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀫𑁂𑀯 𑀲𑀦𑁆𑀥𑀸𑀬𑀸𑀳 ‘‘𑀞𑀸𑀦𑀸 𑀘𑀸𑀯𑁂𑀢𑀺 𑀘𑁂 𑀘𑀼𑀢𑁄’’𑀢𑀺. 𑀏𑀲𑁂𑀯 𑀦𑀬𑁄 𑀨𑀦𑁆𑀤𑀦𑀭𑀳𑀺𑀢𑀸𑀬 𑀦𑀺𑀥𑀺𑀓𑀼𑀫𑁆𑀪𑀺𑀬𑀸 𑀞𑀸𑀦𑀸𑀘𑀸𑀯𑀦𑁂𑀧𑀺.

𑁫𑁧. 𑀏𑀯𑀁 𑀧𑀞𑀫𑀁 𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀘𑁆𑀙𑀸 𑀓𑀼𑀫𑁆𑀪𑀺𑀕𑁆𑀕𑀳𑀡𑁂 𑀦𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀞𑀫𑀁 𑀓𑀼𑀫𑁆𑀪𑀺𑀁 𑀅𑀧𑀦𑁂𑀢𑁆𑀯𑀸 𑀧𑀘𑁆𑀙𑀸 𑀩𑀦𑁆𑀥𑀦𑀸𑀧𑀦𑀬𑀦𑁂 𑀦𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀞𑀫’’𑀦𑁆𑀢𑀺𑀆𑀤𑀺. 𑀲𑁄 𑀦𑀬𑁄𑀢𑀺 ‘‘𑀧𑀞𑀫𑀼𑀤𑁆𑀥𑀸𑀭𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀢𑀺𑀬𑀼𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀢𑀫𑁂𑀯𑀢𑁆𑀣𑀫𑀢𑀺𑀤𑀺𑀲𑀢𑀺.

𑁫𑁨. 𑀯𑀮𑀬𑀦𑁆𑀢𑀺 𑀓𑀼𑀫𑁆𑀪𑀺𑀬𑀸 𑀩𑀤𑁆𑀥𑀲𑀗𑁆𑀔𑀮𑀺𑀓𑀸𑀬 𑀫𑀽𑀮𑁂 𑀧𑀯𑁂𑀲𑀺𑀢𑀁 𑀯𑀮𑀬𑀁. 𑀫𑀽𑀮𑁂 𑀖𑀁𑀲𑀦𑁆𑀢𑁄 𑀇𑀢𑁄 𑀘𑀺𑀢𑁄 𑀘 𑀲𑀸𑀭𑁂𑀢𑀻𑀢𑀺 𑀬𑁄𑀚𑀦𑀸. 𑀖𑀁𑀲𑀦𑁆𑀢𑁄𑀢𑀺 𑀨𑀼𑀲𑀸𑀧𑁂𑀦𑁆𑀢𑁄. 𑀇𑀢𑁄 𑀘𑀺𑀢𑁄 𑀘 𑀲𑀸𑀭𑁂𑀢𑀻𑀢𑀺 𑀑𑀭𑀢𑁄 𑀘 𑀧𑀸𑀭𑀢𑁄 𑀘 𑀲𑀜𑁆𑀘𑀸𑀮𑁂𑀢𑀺. 𑀭𑀓𑁆𑀔𑀢𑀻𑀢𑀺 𑀏𑀢𑁆𑀣 ‘‘𑀲𑀻𑀮𑀁 𑀪𑀺𑀓𑁆𑀔𑀼’’𑀦𑁆𑀢𑀺 𑀧𑀸𑀞𑀲𑁂𑀲𑁄, 𑀧𑀸𑀭𑀸𑀚𑀺𑀓𑀁 𑀦𑀸𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀫𑀽𑀮𑁂. 𑀔𑁂𑀕𑀢𑀁 𑀓𑀭𑁄𑀦𑁆𑀢𑁄𑀯𑀸𑀢𑀺 𑀲𑀩𑁆𑀩𑀧𑀲𑁆𑀲𑀢𑁄 𑀫𑀽𑀮𑀁 𑀅𑀨𑀼𑀲𑀸𑀧𑁂𑀢𑁆𑀯𑀸 𑀆𑀓𑀸𑀲𑀕𑀢𑀁 𑀓𑀭𑁄𑀦𑁆𑀢𑁄𑀯. 𑀧𑀭𑀸𑀚𑀺𑀢𑁄𑀢𑀺 𑀞𑀸𑀦𑀸𑀘𑀸𑀯𑀦𑀲𑁆𑀲 𑀓𑀢𑀢𑁆𑀢𑀸 𑀧𑀭𑀸𑀚𑀬𑀫𑀸𑀧𑀦𑁆𑀦𑁄 𑀳𑁄𑀢𑀺.

𑁫𑁩. 𑀓𑀼𑀫𑁆𑀪𑀺𑀫𑀢𑁆𑀣𑀓𑁂 𑀚𑀸𑀢𑀦𑁆𑀢𑀺 𑀬𑁄𑀚𑀦𑀸. 𑀘𑀺𑀭𑀓𑀸𑀮𑀁 𑀦𑀺𑀳𑀺𑀢𑀢𑁆𑀢𑀸 𑀫𑀽𑀮𑁂𑀳𑀺 𑀓𑀼𑀫𑁆𑀪𑀺𑀁 𑀯𑀺𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀻𑀧𑁂 𑀚𑀸𑀢𑀁 𑀭𑀼𑀓𑁆𑀔𑀁 𑀙𑀺𑀦𑁆𑀤𑀢𑁄𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 ‘‘𑀢𑀢𑁆𑀣𑀚𑀸𑀢𑀓𑀁 𑀓𑀝𑁆𑀞𑀁 𑀯𑀸’’𑀢𑀺𑀆𑀤𑀺𑀓𑀸𑀬 𑀕𑀸𑀣𑀸𑀬 𑀦𑀺𑀥𑀺𑀫𑀢𑁆𑀣𑀓𑁂 𑀪𑀽𑀫𑀺𑀬𑀁 𑀞𑀺𑀢𑀭𑀼𑀓𑁆𑀔𑀮𑀢𑀸𑀤𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀇𑀫𑀸𑀬 𑀧𑀦 𑀕𑀸𑀣𑀸𑀬 𑀪𑀽𑀫𑀺𑀁 𑀦𑀺𑀔𑀡𑀺𑀢𑁆𑀯𑀸 𑀑𑀢𑀺𑀡𑁆𑀡𑀓𑀸𑀮𑁂 𑀦𑀺𑀥𑀺𑀁 𑀯𑀺𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀫𑀽𑀮𑀁 𑀅𑀮𑁆𑀮𑀭𑀼𑀓𑁆𑀔𑀁, 𑀔𑀸𑀡𑀼𑀓𑀁 𑀯𑀸 𑀕𑀳𑁂𑀢𑁆𑀯𑀸 𑀆𑀳𑀸𑀢𑀺 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀅𑀢𑀢𑁆𑀣𑀚’’𑀦𑁆𑀢𑀺 𑀇𑀫𑀺𑀦𑀸 𑀲𑀳𑀧𑀬𑁄𑀕𑀸𑀪𑀸𑀯𑀫𑀸𑀳. 𑀇𑀫𑀺𑀦𑀸𑀯 𑀧𑀼𑀭𑀺𑀫𑀕𑀸𑀣𑀸𑀬 𑀯𑀼𑀢𑁆𑀢𑀁 𑀓𑀝𑁆𑀞𑀮𑀢𑀸𑀤𑀻𑀦𑀺 𑀦𑀺𑀥𑀺𑀲𑀫𑁆𑀩𑀦𑁆𑀥𑀸𑀦𑀺 𑀘𑁂, 𑀬𑀣𑀸𑀯𑀼𑀢𑁆𑀢𑀤𑀼𑀓𑁆𑀓𑀝𑀲𑁆𑀲 𑀯𑀢𑁆𑀣𑀽𑀦𑀺, 𑀲𑀫𑀻𑀧𑀸𑀦𑀺 𑀘𑁂, 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑁂𑀯 𑀯𑀢𑁆𑀣𑀽𑀦𑀻𑀢𑀺 𑀤𑀻𑀧𑁂𑀢𑀺.

𑁫𑁪. 𑀇𑀤𑀸𑀦𑀺 𑀏𑀯𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀤𑀺𑀝𑁆𑀞𑀦𑀺𑀥𑀺𑀪𑀸𑀚𑀦𑀁 𑀞𑀺𑀢𑀝𑁆𑀞𑀸𑀦𑀢𑁄 𑀅𑀘𑀸𑀮𑁂𑀢𑁆𑀯𑀸 𑀅𑀦𑁆𑀢𑁄𑀞𑀺𑀢𑀁 𑀪𑀡𑁆𑀟𑀫𑀢𑁆𑀢𑀁 𑀕𑀡𑁆𑀳𑀢𑁄 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀦𑁆𑀢𑁄𑀓𑀼𑀫𑁆𑀪𑀺𑀕𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀨𑀦𑁆𑀤𑀸𑀧𑁂𑀢𑀻𑀢𑀺 𑀅𑀦𑁆𑀢𑁄𑀘𑀸𑀝𑀺𑀬𑀸 𑀧𑀓𑁆𑀔𑀺𑀢𑁆𑀢𑁂 𑀅𑀢𑁆𑀢𑀦𑁄 𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑀼𑀁 𑀭𑀸𑀲𑀺𑀓𑀭𑀡𑀸𑀤𑀺𑀯𑀲𑁂𑀦 𑀨𑀦𑁆𑀤𑀸𑀧𑁂𑀢𑀺. 𑀅𑀧𑀩𑁆𑀬𑀽𑀳𑀢𑀺 𑀯𑀸𑀢𑀺 𑀳𑁂𑀝𑁆𑀞𑀸 𑀞𑀺𑀢𑀁 𑀕𑀡𑁆𑀳𑀺𑀢𑀼𑀁 𑀉𑀧𑀭𑀺 𑀞𑀺𑀢𑀸𑀦𑀺 𑀅𑀧𑀦𑁂𑀦𑁆𑀢𑁄 𑀯𑀺𑀬𑀽𑀳𑀢𑀺 𑀯𑀸. 𑀅𑀣 𑀯𑀸 𑀅𑀧𑀩𑁆𑀬𑀽𑀳𑀦𑁆𑀢𑁄𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁪) 𑀅𑀝𑁆𑀞𑀓𑀣𑀸𑀯𑀘𑀦𑀲𑁆𑀲 𑀤𑁆𑀯𑀺𑀥𑀸 𑀓𑀭𑁄𑀦𑁆𑀢𑁄𑀢𑀺 𑀕𑀡𑁆𑀞𑀺𑀧𑀤𑁂 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀅𑀢𑁆𑀢𑀦𑁄 𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑀼𑀁 𑀇𑀢𑁄 𑀘𑀺𑀢𑁄 𑀘 𑀭𑀸𑀲𑀺𑀁 𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣𑁂𑀯𑀸𑀢𑀺 𑀅𑀦𑁆𑀢𑁄𑀓𑀼𑀫𑁆𑀪𑀺𑀬𑀫𑁂𑀯.