𑁬. 𑀆𑀭𑀸𑀫𑀯𑀕𑁆𑀕𑀯𑀡𑁆𑀡𑀦𑀸

𑁧𑁦𑁨𑁧. 𑀧𑀞𑀫𑀲𑀺𑀓𑁆𑀔𑀸𑀧𑀤𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁨. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁦𑁩𑁦. 𑀪𑀺𑀓𑁆𑀔𑀼𑀦𑀻 𑀘𑁂 𑀪𑀺𑀓𑁆𑀔𑀼𑀁 𑀅𑀓𑁆𑀓𑁄𑀲𑀢𑀺, 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀧𑀸𑀘𑀺𑀢𑁆𑀢𑀺𑀬𑀁. 𑀪𑀺𑀓𑁆𑀔𑀼𑀦𑀺𑀁 𑀘𑁂 𑀅𑀓𑁆𑀓𑁄𑀲𑀢𑀺, 𑀑𑀫𑀲𑀯𑀸𑀤𑁂𑀦 𑀆𑀧𑀚𑁆𑀚𑀢𑀺. 𑀑𑀫𑀲𑀯𑀸𑀤𑁂 𑀲𑀫𑁆𑀫𑀼𑀔𑀸𑀯 𑀭𑀼𑀳𑀢𑀺, 𑀇𑀥 𑀧𑀦 𑀧𑀭𑀫𑁆𑀫𑀼𑀔𑀸𑀧𑀺.

𑀢𑀢𑁆𑀭𑀸𑀬𑀁 𑀯𑀺𑀘𑀸𑀭𑀡𑀸 𑁋 𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑁂 𑀑𑀲𑀫𑀯𑀸𑀤𑀲𑀺𑀓𑁆𑀔𑀸𑀧𑀤𑁂 𑀪𑀺𑀓𑁆𑀔𑀼𑀦𑀻 𑀅𑀦𑀼𑀧𑀲𑀫𑁆𑀧𑀦𑁆𑀦𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻𑀢𑀺 𑀓𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂𑀧𑀺 𑀑𑀫𑀲𑀯𑀸𑀤𑀲𑀺𑀓𑁆𑀔𑀸𑀧𑀤𑁂 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻𑀢𑀺 𑀲𑀺𑀤𑁆𑀥𑀁. 𑀇𑀥 𑀘 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀓𑁆𑀓𑁄𑀲𑀦𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀪𑀺𑀓𑁆𑀔𑀼𑀲𑁆𑀲 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀓𑁆𑀓𑁄𑀲𑀦𑁂 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀇𑀫𑀸𑀦𑀺 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀪𑀺𑀓𑁆𑀔𑀼𑀫𑁆𑀳𑀺 𑀲𑀁𑀲𑀦𑁆𑀤𑀺𑀬𑀫𑀸𑀦𑀸𑀦𑀺 𑀅𑀜𑁆𑀜𑀫𑀜𑁆𑀜𑀁 𑀦 𑀲𑀫𑁂𑀦𑁆𑀢𑀺. 𑀬𑀣𑀸 𑀲𑀫𑁂𑀦𑁆𑀢𑀺, 𑀢𑀣𑀸 𑀚𑀸𑀦𑀺𑀢𑀩𑁆𑀩𑀁. 𑀢𑀢𑁆𑀣 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀦𑀬𑁂𑀦 𑀪𑀺𑀓𑁆𑀔𑀼𑀦𑀻𑀦𑀁 𑀑𑀫𑀲𑀯𑀸𑀤𑀲𑀺𑀓𑁆𑀔𑀸𑀧𑀤𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀢𑀺 𑀦 𑀕𑀳𑁂𑀢𑀩𑁆𑀩𑁄, 𑀇𑀤𑀫𑁂𑀢𑁆𑀣 𑀬𑀼𑀢𑁆𑀢𑀁. 𑀧𑀭𑀺𑀪𑀸𑀲𑁂𑀬𑁆𑀬𑀸𑀢𑀺 𑀅𑀜𑁆𑀜𑀢𑁆𑀭 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺. 𑀢𑁂𑀲𑀼 𑀳𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀢𑀺 𑀑𑀫𑀲𑀯𑀸𑀤𑀧𑀸𑀘𑀺𑀢𑁆𑀢𑀺𑀬𑀫𑁂𑀯𑀸𑀢𑀺 𑀏𑀓𑁂, 𑀢𑀁 𑀦 𑀬𑀼𑀢𑁆𑀢𑀁. 𑀑𑀫𑀲𑀯𑀸𑀤𑁂 𑀧𑀸𑀴𑀺𑀫𑀼𑀢𑁆𑀢𑀓𑀅𑀓𑁆𑀓𑁄𑀲𑁂 𑀳𑀺 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺. 𑀤𑀼𑀓𑁆𑀓𑀝𑁄𑀓𑀸𑀲𑁂 𑀇𑀤𑀁 𑀧𑀸𑀘𑀺𑀢𑁆𑀢𑀺𑀬𑀁 𑀢𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀩𑀸𑀮𑀸 𑀏𑀢𑀸’’𑀢𑀺 𑀧𑀸𑀴𑀺𑀬𑀁 𑀇𑀥 𑀆𑀕𑀢𑀧𑀤𑀸𑀦𑀁𑀬𑁂𑀯 𑀯𑀲𑁂𑀦 𑀧𑀭𑀺𑀪𑀸𑀲𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦𑁩𑁩. 𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁪. 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁦𑁩𑁮. 𑀦𑀺𑀫𑀦𑁆𑀢𑀺𑀢𑀸 𑀯𑀸 𑀧𑀯𑀸𑀭𑀺𑀢𑀸 𑀯𑀸𑀢𑀺 𑀏𑀢𑁆𑀣 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀢𑀸𑀯 𑀏𑀯𑀁 𑀯𑀼𑀢𑁆𑀢𑀁 ‘‘𑀧𑀯𑀸𑀭𑀺𑀢𑀸𑀧𑀺 𑀬𑀸𑀕𑀼𑀁 𑀧𑀸𑀢𑀼𑀁 𑀮𑀪𑀢𑀺, 𑀪𑁄𑀚𑁆𑀚𑀬𑀸𑀕𑀼𑀁 𑀦 𑀮𑀪𑀢𑀺. 𑀬𑀸𑀕𑀼 𑀧𑀦𑁂𑀢𑁆𑀣 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺. 𑀦𑀺𑀫𑀦𑁆𑀢𑀺𑀢𑀸 𑀪𑀺𑀓𑁆𑀔𑀼𑀦𑀻 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀓𑀸𑀫𑀸 𑀲𑀸𑀫𑀺𑀓𑁂 𑀅𑀧𑀮𑁄𑀓𑁂𑀢𑁆𑀯𑀸𑀯 𑀪𑀼𑀜𑁆𑀚𑀺𑀢𑀼𑀁 𑀮𑀪𑀢𑀺. 𑀧𑀭𑀫𑁆𑀧𑀭𑀪𑁄𑀚𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀦𑀢𑁆𑀣𑀺. 𑀦𑀺𑀫𑀦𑁆𑀢𑀺𑀢𑀸 𑀢𑀁 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀸 𑀅𑀪𑀼𑀜𑁆𑀚𑀺𑀢𑁆𑀯𑀸 𑀯𑀸 𑀧𑀯𑀸𑀭𑀺𑀢𑀸 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀦 𑀮𑀪𑀢𑀺, 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑁂𑀦 𑀦𑀺𑀫𑀦𑁆𑀢𑀺𑀬𑀫𑀸𑀦𑀸 𑀤𑁆𑀯𑁂 𑀦𑀺𑀫𑀦𑁆𑀢𑀦𑀸𑀦𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀜𑁆𑀘 𑀦 𑀮𑀪𑀢𑀻’’𑀢𑀺. 𑀢𑀢𑁆𑀣 ‘‘𑀧𑀯𑀸𑀭𑀺𑀢𑀸𑀧𑀺 𑀬𑀸𑀕𑀼𑀁 𑀧𑀸𑀢𑀼𑀁 𑀮𑀪𑀢𑀻’’𑀢𑀺 𑀯𑀼𑀢𑁆𑀢𑀁 𑀧𑀸𑀴𑀺𑀬𑀁, 𑀅𑀝𑁆𑀞𑀓𑀣𑀸𑀬𑀜𑁆𑀘 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. ‘‘𑀦𑀺𑀫𑀦𑁆𑀢𑀺𑀢𑀸 𑀅𑀧𑁆𑀧𑀯𑀸𑀭𑀺𑀢𑀸 𑀬𑀸𑀕𑀼𑀁 𑀧𑀺𑀯𑀢𑀻’’𑀢𑀺 𑀳𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀢𑀢𑁆𑀭𑀺𑀤𑀁 𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸𑀧𑀼𑀩𑁆𑀩𑀗𑁆𑀕𑀫𑀲𑀦𑁆𑀦𑀺𑀝𑁆𑀞𑀸𑀦𑀁 𑁋 𑀦𑀺𑀫𑀦𑁆𑀢𑀺𑀢𑀸 𑀯𑀸 𑀧𑀯𑀸𑀭𑀺𑀢𑀸 𑀯𑀸𑀢𑀺 𑀏𑀢𑁆𑀣 𑀯𑀸𑀲𑀤𑁆𑀤𑁂𑀦 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑁂𑀦 𑀦𑀺𑀫𑀦𑁆𑀢𑀺𑀢𑀸 𑀅𑀧𑁆𑀧𑀯𑀸𑀭𑀺𑀢𑀸 𑀞𑀧𑁂𑀢𑁆𑀯𑀸 𑀬𑀸𑀕𑀼𑀁 𑀅𑀜𑁆𑀜𑀁 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀔𑀸𑀤𑁂𑀬𑁆𑀬 𑀯𑀸 𑀪𑀼𑀜𑁆𑀚𑁂𑀬𑁆𑀬 𑀯𑀸, 𑀧𑀸𑀘𑀺𑀢𑁆𑀢𑀺𑀬𑀁 𑀅𑀜𑁆𑀜𑀢𑁆𑀭 𑀲𑀸𑀫𑀺𑀓𑀸𑀦𑀁 𑀅𑀧𑀮𑁄𑀓𑀦𑀸. 𑀧𑀭𑀫𑁆𑀧𑀭𑀪𑁄𑀚𑀦𑀸𑀪𑀸𑀯𑁂𑀦 𑀪𑀺𑀓𑁆𑀔𑀼𑀦𑀻𑀦𑀁 𑀓𑁄 𑀕𑀼𑀡𑁄 𑀚𑀸𑀢𑁄𑀢𑀺? 𑀦 𑀏𑀢𑀸𑀲𑀁 𑀕𑀼𑀡𑀮𑀸𑀪𑁄, 𑀓𑁂𑀯𑀮𑀁 𑀧𑀸𑀓𑀝𑀢𑀭𑀁 𑀚𑀸𑀢𑀁. 𑀪𑀺𑀓𑁆𑀔𑀽𑀧𑀺 𑀯𑀺𑀓𑀧𑁆𑀧𑁂𑀢𑁆𑀯𑀸 𑀫𑀺𑀲𑁆𑀲𑁂𑀢𑁆𑀯𑀸𑀯 𑀪𑀼𑀜𑁆𑀚𑀺𑀢𑀼𑀁 𑀮𑀪𑀦𑁆𑀢𑀺. 𑀲𑀫𑀬𑁂 𑀬𑀣𑀸𑀲𑀼𑀔𑀁 𑀮𑀪𑀦𑁆𑀢𑀺. 𑀇𑀫𑀺𑀦𑀸 𑀅𑀧𑀮𑁄𑀓𑀦𑁂𑀦 𑀓𑀺𑀦𑁆𑀢𑀺? 𑀧𑀯𑀸𑀭𑀺𑀢𑀸 𑀯𑀸 𑀅𑀦𑀺𑀫𑀦𑁆𑀢𑀺𑀢𑀸 𑀯𑀸 𑀦 𑀓𑀺𑀜𑁆𑀘𑀺 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀕𑀺𑀮𑀸𑀦𑀸𑀢𑀺𑀭𑀺𑀢𑁆𑀢𑀫𑁆𑀧𑀺 𑀮𑀪𑀦𑁆𑀢𑀺, 𑀦𑀺𑀫𑀦𑁆𑀢𑀺𑀢𑀸 𑀘 𑀧𑀯𑀸𑀭𑀺𑀢𑀸 𑀘 𑀬𑀸𑀕𑀼𑀫𑁆𑀧𑀺 𑀦 𑀮𑀪𑀦𑁆𑀢𑀺, 𑀅𑀧𑀮𑁄𑀓𑁂𑀢𑁆𑀯𑀸𑀧𑀺 𑀦 𑀮𑀪𑀦𑁆𑀢𑀻𑀢𑀺.

𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀭𑀸𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.