𑁪. 𑀢𑀼𑀯𑀝𑁆𑀝𑀯𑀕𑁆𑀕𑀯𑀡𑁆𑀡𑀦𑀸

𑁧. 𑀧𑀞𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁯𑁩𑁪-𑁫. 𑀏𑀓𑀸𑀬 𑀦𑀺𑀧𑀦𑁆𑀦𑀸𑀬 𑀅𑀧𑀭𑀸 𑀦𑀺𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 ‘‘𑀉𑀪𑀺𑀦𑁆𑀦𑀫𑁆𑀧𑀺 𑀧𑀞𑀫𑀦𑀺𑀧𑀦𑁆𑀦𑀸𑀬 𑀅𑀦𑀼𑀝𑁆𑀞𑀸𑀧𑀦𑀸’’𑀢𑀺 𑀯𑀢𑁆𑀯𑀸 𑀏𑀢𑁆𑀣 𑀓𑀺𑀭𑀺𑀬𑀸𑀓𑀺𑀭𑀺𑀬𑀦𑁆𑀢𑀺 𑀏𑀓𑁂, 𑀢𑀁 𑀅𑀝𑁆𑀞𑀓𑀣𑀸𑀬 𑀯𑀺𑀭𑀼𑀚𑁆𑀛𑀢𑀺. ‘‘𑀓𑀺𑀭𑀺𑀬’’𑀦𑁆𑀢𑀺 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀅𑀣 𑀓𑀲𑁆𑀲𑀸 𑀆𑀧𑀢𑁆𑀢𑀻𑀢𑀺? 𑀉𑀪𑀺𑀦𑁆𑀦𑀫𑁆𑀧𑀺 𑀦𑀺𑀧𑀚𑁆𑀚𑀦𑀓𑀺𑀭𑀺𑀬𑀁 𑀧𑀝𑀺𑀘𑁆𑀘. 𑀇𑀫𑀲𑁆𑀲 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀯𑀯𑀢𑁆𑀣𑀸𑀦𑀁 𑀤𑀲𑁆𑀲𑁂𑀢𑁆𑀯𑀸’’𑀢𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀯𑀢𑁆𑀣𑀸𑀦𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀏𑀓𑁂. 𑀯𑀺𑀧𑀼𑀮𑀢𑀭𑁂 𑀯𑀝𑁆𑀝𑀢𑀻𑀢𑀺 𑀏𑀓𑁂. ‘‘𑀅𑀦𑁆𑀢𑀭𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀮𑀺𑀔𑀺𑀢𑀁.

𑀧𑀞𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁯𑁪𑁦. 𑀯𑀯𑀢𑁆𑀣𑀸𑀦𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀏𑀢𑁆𑀣 𑀉𑀧𑀭𑀺 𑀧𑀸𑀭𑀼𑀧𑀦𑀫𑁆𑀧𑀺 𑀫𑀚𑁆𑀛𑁂 𑀑𑀪𑁄𑀕𑀁 𑀓𑀢𑁆𑀯𑀸 𑀉𑀪𑀺𑀦𑁆𑀦𑀁 𑀅𑀦𑁆𑀢𑀭𑁂 𑀑𑀢𑀸𑀭𑁂𑀢𑀺, 𑀯𑀝𑁆𑀝𑀢𑀻𑀢𑀺 𑀏𑀓𑁂. 𑀯𑀯𑀢𑁆𑀣𑀸𑀦𑀜𑁆𑀘 𑀬𑀣𑀸 𑀞𑀸𑀦𑁂 𑀦 𑀢𑀺𑀝𑁆𑀞𑀢𑀺, 𑀢𑀣𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀼𑀯𑀝𑁆𑀝𑁂𑀦𑁆𑀢𑀺𑀬𑀸 𑀆𑀧𑀢𑁆𑀢𑀺𑀬𑁂𑀯𑀸𑀢𑀺. ‘‘𑀓𑀺𑀭𑀺𑀬𑀸𑀓𑀺𑀭𑀺𑀬’’𑀦𑁆𑀢𑀺 𑀘 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁.

𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁯𑁪𑁧. 𑀅𑀢𑁆𑀢𑀦𑁄 𑀲𑀚𑁆𑀛𑀸𑀬𑀦𑀝𑁆𑀞𑀸𑀦𑁂 𑀘𑁂 𑀯𑀼𑀟𑁆𑀠𑀢𑀭𑀸 𑀆𑀕𑀘𑁆𑀙𑀢𑀺, 𑀯𑀦𑁆𑀤𑀦𑀓𑀸𑀮𑁂 𑀯𑀸, 𑀆𑀧𑀼𑀘𑁆𑀙𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀏𑀓𑀲𑁆𑀫𑀺𑀁 𑀑𑀯𑀭𑀓𑁂 𑀆𑀧𑀼𑀘𑁆𑀙𑀺𑀢𑀩𑁆𑀩𑀁. ‘‘𑀅𑀣 𑀑𑀯𑀭𑀓𑁂 𑀫𑀳𑀸𑀣𑁂𑀭𑀻 𑀯𑀲𑀢𑀺, 𑀲𑀫𑁆𑀫𑀼𑀔𑁂 𑀇𑀢𑀭𑀸, 𑀆𑀧𑀼𑀘𑁆𑀙𑀺𑀢𑀩𑁆𑀩𑀸 𑀢𑀲𑁆𑀲𑀸 𑀉𑀧𑀘𑀸𑀭𑀢𑁆𑀢𑀸’’𑀢𑀺 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁.

𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯𑁪𑁬-𑁯𑁫𑁦. 𑀘𑀢𑀼𑀢𑁆𑀣𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁬. 𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁯𑁫𑁬. 𑀕𑀳𑀧𑀢𑀺 𑀦𑀸𑀫 𑀞𑀧𑁂𑀢𑁆𑀯𑀸 𑀲𑀳𑀥𑀫𑁆𑀫𑀺𑀓𑁂 𑀯𑁂𑀤𑀺𑀢𑀩𑁆𑀩𑁄, 𑀢𑀲𑁆𑀫𑀸 𑀪𑀺𑀓𑁆𑀔𑀼𑀦𑀸 𑀯𑀸 𑀲𑀸𑀫𑀡𑁂𑀭𑁂𑀦 𑀯𑀸 𑀅𑀦𑀦𑀼𑀮𑁄𑀫𑀺𑀓𑁂𑀦 𑀲𑀁𑀲𑀕𑁆𑀕𑁂𑀦 𑀲𑀁𑀲𑀝𑁆𑀞𑀸𑀧𑀺 𑀦 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑀸𑀢𑀺 𑀲𑀫𑁆𑀪𑀯𑀢𑀺 𑀏𑀯.

𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯𑁬𑁧-𑁫. 𑀲𑀢𑁆𑀢𑀫𑀅𑀝𑁆𑀞𑀫 𑀲𑀺𑀓𑁆𑀔𑀸𑀧𑀤𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁯. 𑀦𑀯𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁯𑁬𑁯. 𑀏𑀓𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀓𑀸𑀬𑀺𑀦𑁆𑀤𑁆𑀭𑀺𑀬𑁂𑀦𑁂𑀯 𑀏𑀓𑀺𑀦𑁆𑀤𑁆𑀭𑀺𑀬𑀁, 𑀦𑀺𑀕𑀡𑁆𑀞𑀸𑀦𑀁 𑀅𑀘𑁂𑀮𑀓𑀸𑀦𑀁 𑀫𑀢𑀁. 𑀓𑀸𑀧𑀺𑀮𑀸 𑀧𑀦 ‘‘𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸’’𑀢𑀺 𑀫𑀜𑁆𑀜𑀦𑁆𑀢𑀸 𑀏𑀯𑀁 𑀯𑀤𑀦𑁆𑀢𑀺 ‘‘𑀲𑀘𑀓𑁆𑀔𑀼𑀓𑀢𑁆𑀢𑀸 𑀅𑀮𑀸𑀩𑀼𑀫𑀸𑀮𑀼𑀯𑀸𑀤𑀬𑁄 𑀬𑀢𑁆𑀣 𑀆𑀮𑀫𑁆𑀩𑀦𑀁, 𑀢𑀢𑁆𑀣 𑀕𑀘𑁆𑀙𑀦𑁆𑀢𑀺. 𑀲𑀲𑁄𑀢𑀓𑀢𑁆𑀢𑀸 𑀓𑀤𑀮𑀺𑀬𑁄 𑀫𑁂𑀖𑀕𑀚𑁆𑀚𑀺𑀢𑀁 𑀲𑀼𑀢𑁆𑀯𑀸 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺. 𑀲𑀖𑀸𑀦𑀓𑀢𑁆𑀢𑀸 𑀧𑀦𑀲𑀸𑀤𑀬𑁄 𑀓𑀼𑀡𑀧𑀕𑀦𑁆𑀥𑁂𑀦 𑀨𑀮𑀦𑁆𑀢𑀺. 𑀲𑀚𑀺𑀯𑁆𑀳𑀓𑀢𑁆𑀢𑀸 𑀉𑀤𑀓𑀁 𑀧𑀺𑀯𑀦𑁆𑀢𑀺 𑀬𑁂𑀦, 𑀲𑀩𑁆𑀩𑁂𑀧𑀺 ‘𑀧𑀸𑀤𑀧𑀸’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀓𑀸𑀬𑀧𑀲𑀸𑀤𑀢𑁆𑀢𑀸 𑀇𑀢𑁆𑀣𑀺𑀲𑀫𑁆𑀨𑀲𑁆𑀲𑁂𑀦 𑀅𑀲𑁄𑀓𑀭𑀼𑀓𑁆𑀔𑀸 𑀧𑀼𑀧𑁆𑀨𑀦𑁆𑀢𑀻’’𑀢𑀺. 𑀲𑀗𑁆𑀖𑀸𑀢𑀦𑁆𑀢𑀺 𑀯𑀺𑀦𑀸𑀲𑀁.

𑁯𑁭𑁦. 𑀇𑀥 𑀘 𑀯𑀲𑁆𑀲𑀘𑁆𑀙𑁂𑀤𑁂𑀦 𑀤𑀼𑀓𑁆𑀓𑀝𑀁. 𑀧𑀞𑀫𑀁 𑀆𑀯𑀲𑀺𑀢𑁆𑀯𑀸 𑀧𑀘𑁆𑀙𑀸 𑀘𑀸𑀭𑀺𑀓𑀸 𑀘𑀭𑀡𑀧𑀘𑁆𑀘𑀬𑀸 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀲𑁆𑀲𑀁 𑀅𑀯𑀲𑀺𑀢𑁆𑀯𑀸 𑀘𑀭𑀢𑀺, 𑀅𑀯𑀲𑁆𑀲𑀼𑀧𑀕𑀫𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀅𑀦𑁆𑀢𑁄𑀲𑀢𑁆𑀢𑀸𑀳𑁂 𑀅𑀦𑁆𑀢𑁄𑀯𑀲𑁆𑀲𑁂 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀦 𑀯𑀝𑁆𑀝𑀢𑀺, 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑁯𑁭𑁨. 𑀓𑁂𑀦𑀘𑀺 𑀉𑀩𑁆𑀩𑀸𑀴𑁆𑀳𑀸𑀢𑀺 𑀯𑀲𑁆𑀲𑀘𑁆𑀙𑁂𑀤𑀓𑀸𑀭𑀡𑁂𑀦𑀸𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄. 𑀓𑀺𑀢𑁆𑀢𑀸𑀯𑀢𑀸 𑀘𑀸𑀭𑀺𑀓𑀸 𑀳𑁄𑀢𑀻𑀢𑀺? 𑀇𑀤𑀁 𑀦 𑀲𑀩𑁆𑀩𑀢𑁆𑀣 𑀯𑀺𑀘𑀸𑀭𑀺𑀢𑀁. 𑀅𑀦𑀦𑁆𑀢𑀭𑀲𑀺𑀓𑁆𑀔𑀸𑀧𑀤𑁂 ‘‘𑀅𑀦𑁆𑀢𑀫𑀲𑁄 𑀙𑀧𑁆𑀧𑀜𑁆𑀘𑀬𑁄𑀚𑀦𑀸𑀦𑀺𑀧𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑁄 𑀘 𑀫𑀜𑁆𑀜𑁂 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁄𑀢𑀺.

𑀦𑀯𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀲𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁯𑁭𑁩. 𑀤𑀲𑀫𑁂 ‘‘𑀆𑀳𑀼𑀦𑁆𑀤𑀭𑀺𑀓𑀸’’𑀢𑀺 𑀧𑀞𑀦𑁆𑀢𑀺 𑀓𑀺𑀭.

𑀤𑀲𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀼𑀯𑀝𑁆𑀝𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.