𑁨. 𑀤𑀼𑀢𑀺𑀬𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁧𑁨𑁪. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀸𑀭𑀲𑀯𑀲𑁆𑀲𑀸𑀬 𑀓𑀼𑀫𑀸𑀭𑀺𑀪𑀽𑀢𑀸𑀬…𑀧𑁂… 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀤𑀸𑀢𑀼’’𑀦𑁆𑀢𑀺 𑀇𑀥 𑀯𑀼𑀢𑁆𑀢𑀁 𑀯𑀺𑀬 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀲𑀯𑀲𑁆𑀲𑀸𑀬 𑀕𑀺𑀳𑀺𑀕𑀢𑀸𑀬…𑀧𑁂… 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀤𑀸𑀢𑀼’’𑀦𑁆𑀢𑀺 𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀏𑀯 𑀕𑀺𑀳𑀺𑀕𑀢𑀸𑀬 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺 𑀤𑀸𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀕𑀺𑀳𑀺𑀕𑀢𑀸𑀬 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺 𑀤𑀸𑀢𑀩𑁆𑀩𑀸𑀢𑀺 𑀏𑀓𑁂𑀢𑀺 𑀓𑀢𑁆𑀯𑀸 𑀤𑀲𑀯𑀲𑁆𑀲𑀸𑀬𑀧𑀺 𑀯𑀝𑁆𑀝𑀢𑀺. 𑀓𑀲𑁆𑀫𑀸? ‘‘𑀅𑀦𑀸𑀧𑀢𑁆𑀢𑀺 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀁 𑀧𑀭𑀺𑀧𑀼𑀡𑁆𑀡𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀻’𑀢𑀺 (𑀧𑀸𑀘𑀺. 𑁧𑁦𑁯𑁩-𑁧𑁦𑁯𑁫) 𑀘 ‘𑀅𑀦𑀸𑀧𑀢𑁆𑀢𑀺 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁…𑀧𑁂… 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀯𑀼𑀝𑁆𑀞𑀸𑀧𑁂𑀢𑀻’𑀢𑀺 (𑀧𑀸𑀘𑀺. 𑁧𑁦𑁯𑁭-𑁧𑁧𑁦𑁧) 𑀘 𑀯𑀼𑀢𑁆𑀢𑀢𑁆𑀢𑀸’’𑀢𑀺 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀓𑀺𑀁 𑀇𑀫𑀺𑀦𑀸 𑀧𑀭𑀺𑀳𑀸𑀭𑁂𑀦. ‘‘𑀤𑀲𑀯𑀲𑁆𑀲𑀸𑀬 𑀕𑀺𑀳𑀺𑀕𑀢𑀸𑀬 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺 𑀤𑀸𑀢𑀩𑁆𑀩𑀸’’𑀢𑀺 𑀳𑀺 𑀯𑀼𑀢𑁆𑀢𑀁. ‘‘𑀕𑀺𑀳𑀺𑀕𑀢𑀸𑀢𑀺𑀧𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀻’𑀢𑀺 𑀲𑀘𑁂 𑀯𑀤𑀦𑁆𑀢𑀺, 𑀓𑀫𑁆𑀫𑀁 𑀓𑀼𑀧𑁆𑀧𑀢𑀻’’𑀢𑀺 𑀮𑀺𑀔𑀺𑀢𑀁.

𑁧𑁧𑁪𑁬. 𑀅𑀳𑀫𑁂𑀯 𑀦𑀽𑀦…𑀧𑁂… 𑀅𑀮𑀚𑁆𑀚𑀺𑀦𑀻, 𑀬𑀸 𑀲𑀗𑁆𑀖𑁄𑀢𑀺 𑀏𑀢𑁆𑀣 𑀬𑀸 𑀅𑀳𑀫𑁂𑀯 𑀦𑀽𑀦 𑀩𑀸𑀮𑀸𑀢𑀺 𑀅𑀢𑁆𑀣𑁄. ‘‘𑀬𑀁 𑀲𑀗𑁆𑀖𑁄’’𑀢𑀺𑀧𑀺 𑀅𑀢𑁆𑀣𑀺, 𑀢𑀢𑁆𑀣 𑀬𑀁 𑀬𑀲𑁆𑀫𑀸 𑀤𑁂𑀢𑀺, 𑀢𑀲𑁆𑀫𑀸 𑀅𑀳𑀫𑁂𑀯 𑀦𑀽𑀦 𑀩𑀸𑀮𑀸𑀢𑀺 𑀅𑀢𑁆𑀣𑁄.

𑁧𑁧𑁫𑁯. 𑀧𑀼𑀭𑀺𑀲𑀲𑀁𑀲𑀝𑁆𑀞𑀸 𑀓𑀼𑀫𑀸𑀭𑀓𑀲𑀁𑀲𑀝𑁆𑀞𑀸 𑀘𑀡𑁆𑀟𑀻 𑀲𑁄𑀓𑀸𑀯𑀸𑀲𑀸𑀯𑀓𑀣𑀁 𑀲𑀺𑀓𑁆𑀔𑀫𑀸𑀦𑀸𑀢𑀺 𑀯𑀼𑀘𑁆𑀘𑀢𑀺, 𑀧𑀤𑀪𑀸𑀚𑀦𑁂 𑀏𑀯 𑀘𑀸𑀬𑀁 𑀲𑀺𑀓𑁆𑀔𑀫𑀸𑀦𑀸 ‘‘𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? 𑀧𑀼𑀩𑁆𑀩𑁂 𑀕𑀳𑀺𑀢𑀲𑀺𑀓𑁆𑀔𑀢𑁆𑀢𑀸, 𑀧𑀼𑀩𑁆𑀩𑁂 𑀧𑀭𑀺𑀧𑀼𑀡𑁆𑀡𑀲𑀺𑀓𑁆𑀔𑀢𑁆𑀢𑀸 𑀘 𑀏𑀯𑀁 𑀯𑀼𑀘𑁆𑀘𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁧𑁬𑁬-𑁭. 𑀧𑀳𑀽𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀲𑁆𑀲𑀺𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀲𑀺𑀓𑁆𑀔𑀫𑀸𑀦𑀸𑀬 𑀜𑀸𑀢𑀓𑀸 𑀓𑀺𑀭 𑀲𑀫𑁆𑀧𑀸𑀤𑀬𑀺𑀁𑀲𑀼, 𑀢𑀁 𑀧𑀲𑁆𑀲𑀺𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀉𑀬𑁆𑀬𑁄𑀚𑁂𑀲𑀺. 𑀉𑀬𑁆𑀬𑁄𑀚𑁂𑀢𑁆𑀯𑀸 𑀢𑁂𑀲𑀁 𑀙𑀦𑁆𑀤𑀁 𑀕𑀳𑁂𑀢𑁆𑀯𑀸 𑀧𑀼𑀩𑁆𑀩𑁂 𑀙𑀦𑁆𑀤𑀤𑀸𑀬𑀓𑁂 𑀕𑀡𑀁 𑀓𑀢𑁆𑀯𑀸 𑀲𑁂𑀲𑀸𑀦𑀁 𑀙𑀦𑁆𑀤𑀁 𑀙𑀦𑁆𑀤𑀫𑁂𑀯 𑀓𑀢𑁆𑀯𑀸 𑀓𑀫𑁆𑀫𑀁 𑀓𑀸𑀭𑀸𑀧𑁂𑀲𑀻’’𑀢𑀺 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀙𑀦𑁆𑀤𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀢𑀺 𑀏𑀢𑁆𑀣 𑀅𑀦𑀼𑀕𑀡𑁆𑀞𑀺𑀧𑀤𑁂 𑀏𑀯𑀁 𑀯𑀼𑀢𑁆𑀢𑀁 ‘‘𑀇𑀤𑀁 𑀓𑀫𑁆𑀫𑀁 𑀅𑀚𑁆𑀚 𑀦 𑀓𑀢𑁆𑀢𑀩𑁆𑀩𑀁. ‘𑀬𑀣𑀸𑀲𑀼𑀔’𑀦𑁆𑀢𑀺 𑀯𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀺𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀬𑁄 𑀓𑁄𑀘𑀺 𑀫𑀼𑀔𑀭𑁄, 𑀩𑀸𑀮𑁄 𑀯𑀸 𑀓𑀺𑀜𑁆𑀘𑀸𑀧𑀺 ‘𑀬𑀣𑀸𑀲𑀼𑀔’𑀦𑁆𑀢𑀺 𑀯𑀤𑀢𑀺, 𑀣𑁂𑀭𑀸𑀬𑀢𑁆𑀢𑀢𑁆𑀢𑀸 𑀧𑀦 𑀣𑁂𑀭𑀲𑁆𑀲 𑀅𑀦𑀼𑀫𑀢𑀺𑀬𑀸 𑀲𑀢𑀺𑀬𑀸 𑀯𑀺𑀲𑁆𑀲𑀚𑁆𑀚𑀺𑀢𑁄 𑀳𑁄𑀢𑀺, 𑀅𑀲𑀢𑀺𑀬𑀸 𑀦 𑀳𑁄𑀢𑀺, 𑀢𑀣𑀸𑀧𑀺 𑀧𑀼𑀦 𑀙𑀦𑁆𑀤𑀁 𑀕𑀳𑁂𑀢𑁆𑀯𑀸𑀯 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀅𑀬𑀁 𑀧𑀬𑁄𑀕𑁄. 𑀕𑀳𑀡𑁂 𑀧𑀬𑁄𑀚𑀦𑀁 𑀧𑀦 𑀦𑀢𑁆𑀣𑀺. 𑀲𑀗𑁆𑀖𑀢𑁆𑀣𑁂𑀭𑁄 𑀘𑁂 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀙𑀦𑁆𑀤𑀁 𑀕𑀳𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀁. 𑀙𑀦𑁆𑀤𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀓𑀸𑀬𑁂𑀦 𑀯𑀼𑀝𑁆𑀞𑀺𑀢𑀸𑀬𑀸𑀢𑀺 𑀏𑀢𑁆𑀣 𑀇𑀥 𑀲𑀫𑁆𑀩𑀸𑀥𑁄, ‘𑀅𑀫𑀼𑀓𑀫𑁆𑀳𑀺 𑀞𑀸𑀦𑁂 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸𑀧𑀺 𑀕𑀘𑁆𑀙𑀦𑁆𑀢𑀺 𑀘𑁂, 𑀦𑀢𑁆𑀣𑀺 𑀤𑁄𑀲𑁄. 𑀓𑀺𑀜𑁆𑀘𑀸𑀧𑀺 𑀦𑀢𑁆𑀣𑀺, 𑀢𑀸 𑀧𑀦 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸𑀯 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀧𑀬𑁄𑀕𑁄’’𑀢𑀺. ‘‘𑀭𑀢𑁆𑀢𑀺𑀧𑀸𑀭𑀺𑀯𑀸𑀲𑀺𑀬𑁂 𑀉𑀧𑁄𑀲𑀣𑀧𑀯𑀸𑀭𑀡𑀸𑀯 𑀦 𑀯𑀝𑁆𑀝𑀢𑀺, 𑀅𑀜𑁆𑀜𑀓𑀫𑁆𑀫𑀁 𑀧𑀦 𑀯𑀝𑁆𑀝𑀢𑀺. 𑀉𑀧𑁄𑀲𑀣𑀧𑀯𑀸𑀭𑀡𑀸𑀧𑀺 𑀅𑀦𑀼𑀧𑁄𑀲𑀣𑀧𑀯𑀸𑀭𑀡𑀤𑀺𑀯𑀲𑁂 𑀦 𑀯𑀝𑁆𑀝𑀦𑁆𑀢𑀺, 𑀇𑀢𑀭𑀁 𑀲𑀩𑁆𑀩𑀓𑀸𑀮𑀁 𑀯𑀝𑁆𑀝𑀢𑀺. 𑀧𑀭𑀺𑀲𑀧𑀸𑀭𑀺𑀯𑀸𑀲𑀺𑀬𑁂 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀘𑀢𑀽𑀲𑀼 𑀕𑀢𑁂𑀲𑀼 𑀘𑀢𑀼𑀯𑀕𑁆𑀕𑀓𑀭𑀡𑀻𑀬𑁂 𑀅𑀜𑁆𑀜𑀲𑁆𑀫𑀺𑀁 𑀧𑀜𑁆𑀘𑀲𑀼 𑀤𑀲𑀲𑀼 𑀯𑀻𑀲𑀢𑀻𑀲𑀼 𑀕𑀢𑁂𑀲𑀼 𑀲𑁂𑀲𑁂𑀳𑀺 𑀯𑀺𑀲𑀼𑀁 𑀢𑀳𑀺𑀁 𑀢𑀳𑀺𑀁 𑀕𑀦𑁆𑀢𑁆𑀯𑀸𑀧𑀺 𑀧𑀼𑀦 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀅𑀚𑁆𑀛𑀸𑀲𑀬𑀧𑀸𑀭𑀺𑀯𑀸𑀲𑀺𑀬𑁂 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀬𑀣𑀸𑀦𑀺𑀲𑀺𑀦𑁆𑀦𑀸𑀯 𑀦𑀺𑀲𑀺𑀦𑁆𑀦𑀸 𑀘𑁂, 𑀧𑀼𑀦 𑀓𑀸𑀢𑀼𑀁 𑀯𑀝𑁆𑀝𑀢𑀺 𑀳𑀢𑁆𑀣𑀧𑀸𑀲𑀲𑁆𑀲 𑀅𑀯𑀺𑀚𑀳𑀺𑀢𑀢𑁆𑀢𑀸’’𑀢𑀺 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀢𑁂𑀲𑀁 𑀧𑁄𑀭𑀸𑀡𑀸𑀦𑀁 𑀫𑀢𑁂𑀦 𑀙𑀦𑁆𑀤𑀧𑀸𑀭𑀺𑀯𑀸𑀲𑀺𑀬𑀫𑁂𑀯𑁂𑀓𑀁 𑀦 𑀯𑀝𑁆𑀝𑀢𑀻𑀢𑀺 𑀆𑀧𑀦𑁆𑀦𑀗𑁆𑀕𑀜𑁆𑀘 𑀤𑀲𑁆𑀲𑀺𑀢𑀁, 𑀇𑀥𑀸𑀧𑀺 𑀢𑀁 𑀯𑀺𑀲𑀼𑀁 𑀦 𑀤𑀲𑁆𑀲𑀺𑀢𑀁 𑀅𑀲𑀫𑁆𑀪𑀯𑀢𑁄𑀢𑀺 𑀏𑀓𑁂. 𑀙𑀦𑁆𑀤𑀤𑀸𑀬𑀓𑁂 𑀧𑀭𑀺𑀲𑀁 𑀧𑀢𑁆𑀯𑀸 𑀕𑀢𑁂 𑀢𑀲𑁆𑀲 𑀧𑀼𑀩𑁆𑀩𑀙𑀦𑁆𑀤𑀤𑀸𑀦𑀁 𑀙𑀦𑁆𑀤𑀧𑀸𑀭𑀺𑀯𑀸𑀲𑀺𑀬𑀦𑁆𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄.

𑀢𑀢𑁆𑀭𑀺𑀤𑀁 𑀲𑀦𑁆𑀦𑀺𑀝𑁆𑀞𑀸𑀦𑀁 𑁋 𑀧𑀭𑀺𑀲𑀧𑀸𑀭𑀺𑀯𑀸𑀲𑀺𑀬𑁂 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀜𑁆𑀜𑀢𑁆𑀭 𑀕𑀘𑁆𑀙𑀸𑀫𑀸𑀢𑀺 𑀙𑀦𑁆𑀤𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀉𑀝𑁆𑀞𑀳𑀦𑁆𑀢𑀺…𑀧𑁂… 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀯𑀘𑀦𑁂 𑀳𑀢𑁆𑀣𑀧𑀸𑀲𑀸 𑀯𑀺𑀚𑀳𑀦𑀁 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀣 𑀧𑀦 𑀓𑀫𑁆𑀫𑀧𑁆𑀧𑀢𑁆𑀢𑀸𑀦𑀁 𑀳𑀢𑁆𑀣𑀧𑀸𑀲𑀲𑁆𑀲 𑀅𑀯𑀺𑀚𑀳𑀦𑀫𑁂𑀯 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀓𑀢𑁆𑀯𑀸 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀦 𑀧𑀜𑁆𑀜𑀸𑀬𑀢𑀺, 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀧𑀦 𑀯𑀝𑁆𑀝𑀢𑀻𑀢𑀺 𑀘𑁂? 𑀦, 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀓𑀣𑀁? 𑀙𑀦𑁆𑀤𑁄 𑀦𑀸𑀫 𑀓𑀫𑁆𑀫𑀧𑁆𑀧𑀢𑁆𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀏𑀓𑀲𑀻𑀫𑀸𑀬 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀆𑀕𑀘𑁆𑀙𑀢𑀺, 𑀦𑀸𑀲𑀦𑁆𑀦𑀺𑀧𑀢𑀺𑀢𑁂𑀲𑀼. 𑀇𑀥 𑀳𑀺 ‘‘𑀙𑀦𑁆𑀤𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸’’𑀢𑀺 𑀘 ‘‘𑀙𑀦𑁆𑀤𑀲𑁆𑀲 𑀧𑀦 𑀅𑀯𑀺𑀲𑁆𑀲𑀝𑁆𑀞𑀢𑁆𑀢𑀸’’𑀢𑀺 𑀘 𑀯𑀼𑀢𑁆𑀢𑀁. ‘‘𑀅𑀚𑁆𑀛𑀸𑀲𑀬𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸’’𑀢𑀺 𑀘 ‘‘𑀅𑀚𑁆𑀛𑀸𑀲𑀬𑀲𑁆𑀲 𑀅𑀯𑀺𑀲𑁆𑀲𑀝𑁆𑀞𑀢𑁆𑀢𑀸’’𑀢𑀺 𑀘 𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀙𑀦𑁆𑀤𑀲𑁆𑀲 𑀅𑀯𑀺𑀲𑁆𑀲𑀚𑁆𑀚𑀦𑀁 𑀓𑀫𑁆𑀫𑀧𑁆𑀧𑀢𑁆𑀢𑀸𑀦𑀁 𑀳𑀢𑁆𑀣𑀧𑀸𑀲𑀸𑀯𑀺𑀚𑀳𑀦𑁂𑀦𑁂𑀯 𑀳𑁄𑀢𑀺, 𑀦 𑀯𑀺𑀚𑀳𑀦𑁂𑀢𑀺 𑀲𑀺𑀤𑁆𑀥𑀁.

𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀬𑀢𑁄 𑀆𑀕𑀫𑀦𑀁 𑀬𑀲𑁆𑀲, 𑀢𑀤𑀪𑀸𑀯𑀲𑁆𑀲 𑀦𑀺𑀕𑁆𑀕𑀳𑁂;

𑀢𑀲𑁆𑀫𑀸 𑀲𑀦𑁆𑀦𑀺𑀧𑀢𑀺𑀢𑁂𑀲𑀼, 𑀪𑀺𑀓𑁆𑀔𑀽𑀲𑀼 𑀢𑀲𑁆𑀲 𑀪𑁂𑀤𑀢𑁄’’𑀢𑀺.

𑀭𑀢𑁆𑀢𑀺𑀧𑀸𑀭𑀺𑀯𑀸𑀲𑀺𑀬𑀙𑀦𑁆𑀤𑁄 𑀯𑀺𑀬 𑀭𑀢𑁆𑀢𑀺𑀧𑀸𑀭𑀺𑀯𑀸𑀲𑀺𑀬𑀧𑀸𑀭𑀺𑀲𑀼𑀤𑁆𑀥𑀺𑀧𑀻𑀢𑀺 𑀢𑀤𑀦𑀼𑀮𑁄𑀫𑁂𑀦 𑀯𑀝𑁆𑀝𑀢𑀺 𑀲𑁆𑀯𑀸𑀢𑀦𑀸𑀬 𑀙𑀦𑁆𑀤𑁄 𑀯𑀸 𑀧𑀸𑀭𑀺𑀲𑀼𑀤𑁆𑀥𑀺 𑀯𑀸 𑀧𑀯𑀸𑀭𑀡𑀸 𑀯𑀸, 𑀢𑀸𑀬 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀉𑀧𑁄𑀲𑀣𑀧𑀯𑀸𑀭𑀡𑀸 𑀧𑀦 𑀅𑀦𑀼𑀧𑁄𑀲𑀣𑀤𑀺𑀯𑀲𑁂 𑀦 𑀯𑀝𑁆𑀝𑀢𑀺, 𑀇𑀢𑀭𑀁 𑀯𑀝𑁆𑀝𑀢𑀺. 𑀧𑀦𑁆𑀦𑀭𑀲𑀺𑀉𑀧𑁄𑀲𑀣𑀁 𑀘𑀸𑀢𑀼𑀤𑁆𑀤𑀲𑀺𑀬𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺 𑀔𑁂𑀢𑁆𑀢𑀢𑁆𑀢𑀸. 𑀦 𑀘𑀸𑀢𑀼𑀤𑁆𑀤𑀲𑀺𑀉𑀧𑁄𑀲𑀣𑀁 𑀧𑀦𑁆𑀦𑀭𑀲𑀺𑀬𑀁 𑀅𑀔𑁂𑀢𑁆𑀢𑀢𑁆𑀢𑀸 𑀅𑀦𑀼𑀧𑁄𑀲𑀣𑀤𑀺𑀯𑀲𑀢𑁆𑀢𑀸 𑀧𑀸𑀝𑀺𑀧𑀤𑀤𑀺𑀯𑀲𑀢𑁆𑀢𑀸𑀢𑀺 𑀏𑀓𑀘𑁆𑀘𑁂 𑀆𑀘𑀭𑀺𑀬𑀸, 𑀢𑀲𑁆𑀫𑀸 𑀢𑁂𑀲𑀁 𑀫𑀢𑁂𑀦 𑀘𑀸𑀢𑀼𑀤𑁆𑀤𑀲𑀺𑀉𑀧𑁄𑀲𑀣𑀁 𑀢𑀢𑀺𑀬𑀁, 𑀲𑀢𑁆𑀢𑀫𑀁 𑀯𑀸 𑀧𑀦𑁆𑀦𑀭𑀲𑀺𑀬𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀁 𑀧𑀦𑁂𑀢𑁆𑀣 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀘𑁂 𑀘𑀸𑀢𑀼𑀤𑁆𑀤𑀲𑀺𑀓𑀁 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀸𑀢𑀺 𑀦𑀺𑀲𑀺𑀦𑁆𑀦𑀸, 𑀧𑀦𑁆𑀦𑀭𑀲𑁄𑀢𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀢𑀢𑁄 ‘‘𑀧𑀦𑁆𑀦𑀭𑀲𑀺𑀬𑀫𑁂𑀯 ‘𑀘𑀸𑀢𑀼𑀤𑁆𑀤𑀲𑀺𑀓𑀁 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀦𑀺𑀲𑀺𑀦𑁆𑀦𑀸 𑀧𑀼𑀦𑀤𑀺𑀯𑀲𑁂 𑀅𑀢𑁆𑀢𑀦𑁄 𑀢𑀁 𑀉𑀧𑁄𑀲𑀣𑀁 ‘𑀧𑀦𑁆𑀦𑀭𑀲𑁄’𑀢𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄’’𑀢𑀺 𑀏𑀯𑀁 𑀧𑀭𑀺𑀳𑀭𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀁 ‘‘𑀢𑀣𑀸𑀭𑀽𑀧𑀧𑀘𑁆𑀘𑀬𑁂 𑀲𑀢𑀺 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀘𑀸𑀢𑀼𑀤𑁆𑀤𑀲𑁂 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀇𑀫𑀺𑀦𑀸 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀯𑀘𑀦𑁂𑀦 𑀦 𑀲𑀫𑁂𑀢𑀺. 𑀦 𑀳𑀺 𑀢𑀢𑁆𑀣 ‘‘𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀧𑀦𑁆𑀦𑀭𑀲𑁂 𑀘𑀸𑀢𑀼𑀤𑁆𑀤𑀲𑀺𑀓𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀲𑀓𑀺𑀁 𑀧𑀓𑁆𑀔𑀲𑁆𑀲 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀧𑀦𑁆𑀦𑀭𑀲𑁂 𑀯𑀸’’𑀢𑀺 𑀅𑀦𑀼𑀜𑁆𑀜𑀸𑀢𑀤𑀺𑀯𑀲𑁂 𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀙𑀦𑁆𑀦𑀁 𑀘𑀸𑀢𑀼𑀤𑁆𑀤𑀲𑀺𑀓𑀸𑀦𑀁 𑀧𑀘𑁆𑀙𑀺𑀫𑀸 𑀧𑀦𑁆𑀦𑀭𑀲𑀻 𑀅𑀦𑀼𑀧𑁄𑀲𑀣𑀤𑀺𑀯𑀲𑁄 𑀦 𑀳𑁄𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀓𑀺𑀜𑁆𑀘𑀸𑀧𑀺 𑀲𑀺𑀤𑁆𑀥𑀁, 𑀇𑀫𑀺𑀦𑀸 𑀧𑀦 ‘‘𑀆𑀯𑀸𑀲𑀺𑀓𑀸𑀦𑀁 𑀧𑀦𑁆𑀦𑀭𑀲𑁄, 𑀆𑀕𑀦𑁆𑀢𑀼𑀓𑀸𑀦𑀁 𑀘𑀸𑀢𑀼𑀤𑁆𑀤𑀲𑁄, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀲𑀫𑀲𑀫𑁂𑀳𑀺 𑀯𑀸 𑀅𑀧𑁆𑀧𑀢𑀭𑁂𑀳𑀺 𑀯𑀸 𑀅𑀦𑀼𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀫𑁂𑀢𑁆𑀣 𑀦𑀺𑀭𑀢𑁆𑀣𑀓𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀤𑀼𑀢𑀺𑀬𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀼𑀫𑀸𑀭𑀺𑀪𑀽𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.