𑁧𑁦. 𑀤𑀦𑁆𑀢𑀧𑁄𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁬𑁪-𑁫. 𑀫𑀼𑀔𑀤𑁆𑀯𑀸𑀭𑀦𑁆𑀢𑀺 𑀓𑀡𑁆𑀞𑀦𑀸𑀴𑀺. 𑀉𑀘𑁆𑀘𑀸𑀭𑀡𑀫𑀢𑁆𑀢𑀦𑁆𑀢𑀺 𑀉𑀓𑁆𑀔𑀺𑀧𑀺𑀢𑀩𑁆𑀩𑀫𑀢𑁆𑀢𑀓𑀁. 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸𑀢𑀺 𑀲𑀫𑀼𑀤𑀸𑀘𑀸𑀭𑀯𑀲𑁂𑀦, 𑀅𑀙𑀟𑁆𑀟𑀺𑀢𑁂𑀧𑀺 ‘‘𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀳𑀢𑁆𑀣𑀧𑀸𑀲𑀸𑀢𑀺𑀓𑁆𑀓𑀫𑀦𑁆𑀢𑀺 𑀤𑀸𑀬𑀓𑀲𑁆𑀲. 𑀪𑀺𑀓𑁆𑀔𑀼𑀲𑁆𑀲 𑀤𑁂𑀢𑀻𑀢𑀺 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀲𑁆𑀲. 𑀓𑀜𑁆𑀚𑀺𑀓𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀤𑁆𑀭𑀯𑀁. 𑀧𑀢𑁆𑀢𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 𑀪𑀽𑀫𑀺𑀬𑀁 𑀞𑀧𑀺𑀢𑁂 𑀅𑀪𑀺𑀳𑀸𑀭𑀸𑀪𑀸𑀯𑀢𑁄. ‘‘𑀬𑀣𑀸 𑀧𑀞𑀫𑀢𑀭𑀁 𑀧𑀢𑀺𑀢𑀣𑁂𑀯𑁂 𑀤𑁄𑀲𑁄 𑀦𑀢𑁆𑀣𑀺, 𑀢𑀣𑀸 𑀆𑀓𑀺𑀭𑀺𑀢𑁆𑀯𑀸 𑀅𑀧𑀦𑁂𑀦𑁆𑀢𑀸𑀦𑀁 𑀧𑀢𑀺𑀢𑀣𑁂𑀯𑁂𑀧𑀺 𑀅𑀪𑀺𑀳𑀝𑀢𑁆𑀢𑀸 𑀦𑁂𑀯𑀢𑁆𑀣𑀺 𑀤𑁄𑀲𑁄’’𑀢𑀺 𑀮𑀺𑀔𑀺𑀢𑀁. 𑀘𑀭𑀼𑀓𑁂𑀦𑀸𑀢𑀺 𑀔𑀼𑀤𑁆𑀤𑀓𑀧𑀺𑀡𑁆𑀟𑁂𑀦. 𑀚𑀸𑀕𑀭𑀦𑁆𑀢𑀲𑁆𑀲𑀧𑀻𑀢𑀺 ‘‘𑀅𑀧𑀺-𑀲𑀤𑁆𑀤𑁂𑀦 𑀲𑀼𑀢𑁆𑀢𑀲𑁆𑀲𑀧𑀻’’𑀢𑀺 𑀮𑀺𑀔𑀺𑀢𑀁. 𑀓𑁂𑀘𑀻𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄. 𑀢𑁂𑀳𑀺 𑀓𑀸𑀬𑀲𑀁𑀲𑀕𑁆𑀕𑁂 𑀓𑀸𑀬𑀧𑀝𑀺𑀩𑀤𑁆𑀥𑁂𑀦𑀸𑀧𑀺 𑀢𑀧𑁆𑀧𑀝𑀺𑀩𑀤𑁆𑀥𑁂𑀦𑀸𑀧𑀺 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺 𑀤𑀲𑁆𑀲𑀺𑀢𑀸 𑀏𑀯𑀸𑀢𑀺 𑀅𑀢𑁆𑀣𑁄. 𑀓𑀸𑀬𑀧𑀝𑀺𑀩𑀤𑁆𑀥𑀧𑀝𑀺𑀩𑀤𑁆𑀥𑁂𑀦𑀸𑀢𑀺 𑀯𑀘𑀦𑀫𑀢𑁆𑀢𑀫𑁂𑀯𑁂𑀢𑀁. ‘‘𑀲𑀢𑁆𑀣𑀓𑁂𑀦𑀸𑀢𑀺 𑀧𑀝𑀺𑀕𑁆𑀕𑀳𑀺𑀢𑀓𑁂𑀦𑀸’’𑀢𑀺 𑀮𑀺𑀔𑀺𑀢𑀁, 𑀢𑀁 𑀤𑀼𑀮𑁆𑀮𑀺𑀔𑀺𑀢𑀁 𑀲𑀢𑀺𑀧𑀺 𑀫𑀮𑁂 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀓𑀺𑀘𑁆𑀘𑀸𑀪𑀸𑀯𑀢𑁄. 𑀓𑁂𑀲𑀜𑁆𑀘𑀺 𑀅𑀢𑁆𑀣𑀸𑀬𑀸𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀦𑀁 𑀅𑀢𑁆𑀣𑀸𑀬. ‘‘𑀲𑀸𑀫𑀡𑁂𑀭𑀲𑁆𑀲 𑀳𑀢𑁆𑀣𑀁 𑀨𑀼𑀝𑁆𑀞𑀫𑀢𑁆𑀢𑀫𑁂𑀯 𑀢𑀁 𑀧𑀭𑀺𑀘𑁆𑀘𑀢𑁆𑀢’’𑀦𑁆𑀢𑀺 𑀮𑀺𑀔𑀺𑀢𑀁.

𑀧𑀝𑀺𑀕𑁆𑀕𑀳𑀡𑀼𑀧𑀕𑀪𑀸𑀭𑀁 𑀦𑀸𑀫 𑀫𑀚𑁆𑀛𑀺𑀫𑀧𑀼𑀭𑀺𑀲𑁂𑀦 𑀉𑀓𑁆𑀔𑀺𑀧𑀺𑀢𑀩𑁆𑀩𑀓𑀁. 𑀫𑀽𑀮𑀧𑀝𑀺𑀕𑁆𑀕𑀳𑀡𑀫𑁂𑀯 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 ‘‘𑀫𑀘𑁆𑀙𑀺𑀓𑀯𑀸𑀭𑀡𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 ‘𑀅𑀪𑀼𑀜𑁆𑀚𑀦𑀢𑁆𑀣𑀸𑀬𑀸𑀧𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀕𑀳𑀺𑀢𑁂 𑀯𑀝𑁆𑀝𑀢𑀻’’’𑀢𑀺 𑀬𑁂 𑀯𑀤𑀦𑁆𑀢𑀺, 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀲𑀻𑀲𑀫𑀓𑁆𑀔𑀦𑀢𑁂𑀮𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 ‘𑀇𑀤𑀁 𑀲𑀻𑀲𑀫𑀓𑁆𑀔𑀦’𑀦𑁆𑀢𑀺 𑀅𑀦𑀸𑀪𑁄𑀕𑁂𑀦𑁂𑀯 𑀲𑀢𑁆𑀢𑀸𑀳𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲 𑀓𑀺𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀪𑀯𑁂𑀬𑁆𑀬𑀸’’𑀢𑀺𑀆𑀤𑀺, 𑀲𑀼𑀢𑁆𑀢𑀸𑀥𑀺𑀧𑁆𑀧𑀸𑀬𑁄 𑀧𑀦 𑀏𑀯𑀁 𑀕𑀳𑁂𑀢𑀩𑁆𑀩𑁄 ‘‘𑀫𑀘𑁆𑀙𑀺𑀓𑀯𑀸𑀭𑀡𑀢𑁆𑀣𑀁 𑀩𑀻𑀚𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀮𑀕𑁆𑀕𑀭𑀚𑀸𑀤𑀺𑀫𑁆𑀳𑀺 𑀧𑀢𑁆𑀢𑁂 𑀧𑀢𑀺𑀢𑁂 𑀲𑀼𑀔𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑀓𑁆𑀓𑀸’𑀢𑀺 𑀲𑀜𑁆𑀜𑀸𑀬 𑀧𑀼𑀩𑁆𑀩𑁂 𑀧𑀝𑀺𑀕𑁆𑀕𑀳𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀯𑀢𑁆𑀢𑀦𑀓𑀣𑀸𑀬𑀁 ‘‘𑀅𑀫𑁆𑀳𑀸𑀓𑀁 𑀢𑀡𑁆𑀟𑀼𑀮𑁂𑀲𑀼 𑀔𑀻𑀡𑁂𑀲𑀼 𑀏𑀢𑁂𑀳𑀺 𑀅𑀫𑁆𑀳𑀸𑀓𑀁 𑀳𑀢𑁆𑀣𑀕𑀢𑁂𑀳𑀺 𑀲𑀸𑀫𑀡𑁂𑀭𑀲𑀦𑁆𑀢𑀓𑁂𑀳𑀺𑀧𑀺 𑀲𑀓𑁆𑀓𑀸 𑀧𑀢𑀺𑀝𑁆𑀞𑀧𑁂𑀢𑀼’𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀘𑁂 𑀲𑀫𑁆𑀪𑀯𑀢𑀺, ‘𑀧𑀭𑀺𑀯𑀢𑁆𑀢𑀦𑀁 𑀲𑀸𑀢𑁆𑀣𑀓’𑀦𑁆𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁 𑀦𑀺𑀭𑀢𑁆𑀣𑀓𑀦𑁆𑀢𑀺 𑀆𑀧𑀦𑁆𑀦𑀫𑁂𑀯, 𑀢𑀣𑀸 ‘‘𑀧𑀡𑁆𑀟𑀺𑀢𑁄 𑀏𑀲 𑀲𑀸𑀫𑀡𑁂𑀭𑁄 𑀧𑀢𑁆𑀢𑀧𑀭𑀺𑀯𑀢𑁆𑀢𑀦𑀁 𑀓𑀢𑁆𑀯𑀸 𑀤𑀲𑁆𑀲𑀢𑀺, 𑀫𑀬𑀫𑁂𑀯 𑀘 𑀇𑀫𑀲𑁆𑀲 𑀯𑀺𑀲𑁆𑀲𑀸𑀲𑁂𑀦 𑀯𑀸 𑀬𑀸𑀘𑀺𑀢𑁆𑀯𑀸 𑀯𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀢𑁆𑀢𑁂 𑀲𑀢𑀺 𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺 𑀓𑀢𑁂𑀧𑀺 𑀧𑀭𑀺𑀯𑀢𑁆𑀢𑀦𑁂𑀢𑀺 𑀘 𑀆𑀧𑀦𑁆𑀦𑀁, 𑀓𑀺𑀁 𑀩𑀳𑀼𑀦𑀸. 𑀦𑀺𑀭𑀧𑁂𑀓𑁆𑀔𑁂𑀳𑁂𑀯 𑀕𑀡𑁆𑀳𑀺𑀢𑀩𑁆𑀩𑀁, 𑀦 𑀲𑀸𑀧𑁂𑀓𑁆𑀔𑁂𑀳𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀆𑀘𑀭𑀺𑀬𑁄. 𑀅𑀬𑀫𑁂𑀯𑀢𑁆𑀣𑁄 ‘‘𑀲𑀘𑁂 𑀧𑀦 𑀲𑀓𑁆𑀓𑁄𑀢𑀺 𑀯𑀺𑀢𑀓𑁆𑀓𑀁 𑀲𑁄𑀥𑁂𑀢𑀼𑀁, 𑀢𑀢𑁄 𑀮𑀤𑁆𑀥𑀁 𑀔𑀸𑀤𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 𑀯𑀘𑀦𑁂𑀦 𑀲𑀺𑀤𑁆𑀥𑁄𑀯. 𑀆𑀥𑀸𑀭𑀓𑁂 𑀧𑀢𑁆𑀢𑁄 𑀞𑀧𑀺𑀢𑁄 𑀳𑁄𑀢𑀺 𑀬𑀣𑀸𑀧𑀝𑀺𑀕𑁆𑀕𑀳𑀺𑀢𑀪𑀸𑀯𑁂 𑀦𑀺𑀭𑀸𑀮𑀬𑁄. 𑀲𑀫𑀼𑀤𑁆𑀤𑁄𑀤𑀓𑁂𑀦 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑁂𑀦. 𑀫𑁂𑀡𑁆𑀟𑀓𑀲𑁆𑀲 𑀔𑀻𑀭𑀁 𑀔𑀻𑀭𑀢𑁆𑀢𑀸𑀯 𑀯𑀝𑁆𑀝𑀢𑀺. ‘‘𑀅𑀢𑁆𑀢𑀦𑁄 𑀧𑀦 𑀔𑀻𑀭𑀁 𑀫𑀼𑀔𑁂𑀦𑁂𑀯 𑀧𑀺𑀯𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀲𑀭𑀻𑀭𑀦𑀺𑀲𑁆𑀲𑀺𑀢𑀫𑀳𑀸𑀪𑀽𑀢𑀸𑀦𑀺 𑀳𑀺 𑀇𑀥𑀸𑀥𑀺𑀧𑁆𑀧𑁂𑀢𑀸𑀦𑀻’’𑀢𑀺 𑀮𑀺𑀔𑀺𑀢𑀁, 𑀢𑀤𑀼𑀪𑀬𑀫𑁆𑀧𑀺 ‘‘𑀓𑀧𑁆𑀧𑀺𑀬𑀫𑀁𑀲𑀔𑀻𑀭𑀁 𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀭𑀼𑀚𑁆𑀛𑀢𑀺.

𑀅𑀧𑀺𑀘 ‘‘𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀪𑀸𑀚𑀦𑁂 𑀅𑀜𑁆𑀜𑀪𑀺𑀓𑁆𑀔𑀼𑀲𑀦𑁆𑀢𑀓𑁂 𑀅𑀢𑁆𑀢𑀦𑁄 𑀧𑀺𑀡𑁆𑀟𑀧𑀸𑀢𑀁 𑀧𑀓𑁆𑀔𑀺𑀧𑀢𑀺, ‘𑀢𑀁 𑀣𑁄𑀓’𑀦𑁆𑀢𑀺 𑀯𑀸 𑀅𑀜𑁆𑀜𑁂𑀦 𑀯𑀸 𑀓𑀸𑀭𑀡𑁂𑀦 𑀯𑀤𑀢𑀺, 𑀢𑀁 𑀲𑀩𑁆𑀩𑁂𑀲𑀁 𑀦 𑀓𑀧𑁆𑀧𑀢𑀺. 𑀓𑀲𑁆𑀫𑀸? 𑀯𑀺𑀦𑀬𑀤𑀼𑀓𑁆𑀓𑀝𑀢𑁆𑀢𑀸. 𑀅𑀢𑁆𑀢𑀦𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀓𑁆𑀔𑀺𑀧𑀺𑀢𑀩𑁆𑀩𑀁 𑀯𑀺𑀦𑀬𑀯𑀺𑀥𑀺𑀁 𑀅𑀓𑀢𑁆𑀯𑀸 𑀤𑀼𑀓𑁆𑀓𑀝𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀢𑀸𑀤𑀺𑀲𑀁 𑀓𑀺𑀫𑀢𑁆𑀣𑀁 𑀦 𑀪𑀼𑀜𑁆𑀚𑀢𑀻𑀢𑀺? 𑀅𑀝𑁆𑀞𑀓𑀣𑀸𑀬𑀁 ‘𑀉𑀕𑁆𑀕𑀳𑀺𑀢𑀓𑁄 𑀳𑁄𑀢𑀻’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀏𑀯𑀜𑁆𑀳𑀺 𑀢𑀢𑁆𑀣 𑀯𑀼𑀢𑁆𑀢𑀁 𑀪𑀽𑀫𑀺𑀬𑀁 𑀯𑀸 𑀪𑀸𑀚𑀦𑁂 𑀯𑀸 𑀨𑀮𑀁 𑀯𑀸 𑀬𑀁 𑀓𑀺𑀜𑁆𑀘𑀺 𑀆𑀫𑀺𑀲𑀁 𑀯𑀸 𑀬𑀸𑀯𑀚𑀻𑀯𑀺𑀓𑀫𑁆𑀧𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀁 𑀅𑀚𑀸𑀦𑀦𑁆𑀢𑁄 𑀆𑀫𑀲𑀢𑀺, 𑀦 𑀯𑀝𑁆𑀝𑀢𑀺, 𑀉𑀕𑁆𑀕𑀳𑀺𑀢𑀓𑀁 𑀳𑁄𑀢𑀻’’𑀢𑀺 𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀇𑀫𑀲𑁆𑀲 𑀫𑀢𑁂𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀲𑀘𑁂 𑀧𑀢𑁆𑀢𑁂 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑁂 𑀧𑀺𑀡𑁆𑀟𑀁 𑀞𑀧𑁂𑀢𑀺, 𑀢𑀁 𑀅𑀓𑀧𑁆𑀧𑀺𑀬𑀁 𑀉𑀕𑁆𑀕𑀳𑀺𑀢𑀓𑀦𑁆𑀢𑀺 𑀲𑀺𑀤𑁆𑀥𑀁. 𑀅𑀬𑀫𑁂𑀯𑀢𑁆𑀣𑁄 ‘‘𑀲𑀘𑁂 𑀅𑀢𑁆𑀢𑀦𑁄 𑀯𑀸 𑀪𑀺𑀓𑁆𑀔𑀽𑀦𑀁 𑀯𑀸 𑀬𑀸𑀕𑀼𑀧𑀘𑀦𑀓𑀪𑀸𑀚𑀦𑁂…𑀧𑁂… 𑀦𑀺𑀭𑀸𑀫𑀺𑀲𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀯𑀘𑀦𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀓𑀣𑁂𑀢𑀩𑁆𑀩𑁄. ‘‘𑀓𑀧𑁆𑀧𑀺𑀬𑀫𑀁𑀲𑀔𑀻𑀭𑀁 𑀯𑀸’’𑀢𑀺 𑀧𑀲𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀁. 𑀤𑀥𑀺 𑀘𑁂 𑀧𑀝𑀺𑀮𑀤𑁆𑀥𑀁, 𑀢𑀜𑁆𑀘 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀓𑁂𑀘𑀺.

𑀤𑀦𑁆𑀢𑀧𑁄𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀢𑁆𑀢𑁄 𑀯𑀡𑁆𑀡𑀦𑀸𑀓𑁆𑀓𑀫𑁂𑀦 𑀪𑁄𑀚𑀦𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.