𑁫. 𑀤𑀼𑀢𑀺𑀬𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁧𑁬-𑁭. 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀫𑀝𑁆𑀞𑀓𑀣𑀸𑀲𑀼, 𑀢𑀣𑀸𑀧𑀺 𑀧𑀤𑀝𑁆𑀞𑀸𑀤𑀬𑁄𑀧𑀺 𑀮𑀩𑁆𑀪𑀦𑁆𑀢𑀺 𑀏𑀯. 𑀅𑀦𑀼𑀕𑀡𑁆𑀞𑀺𑀧𑀤𑁂 ‘‘𑀅𑀜𑁆𑀜𑀁 𑀅𑀢𑁆𑀣𑀭𑀡𑀸𑀤𑀺 𑀅𑀓𑀧𑁆𑀧𑀺𑀬𑀢𑁆𑀢𑀸 𑀦 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸 𑀯𑀺𑀳𑀸𑀭𑁂 𑀯𑀸 𑀯𑀺𑀳𑀸𑀭𑀽𑀧𑀘𑀸𑀭𑁂 𑀯𑀸’𑀢𑀺 𑀇𑀫𑀺𑀦𑀸𑀧𑀺 𑀲𑀁𑀲𑀦𑁆𑀤𑀦𑀢𑁆𑀣𑀁 ‘𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑁄, 𑀅𑀣 𑀔𑁄’𑀢𑀺𑀆𑀤𑀺 𑀆𑀭𑀤𑁆𑀥’’𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀉𑀧𑀘𑀸𑀭𑀫𑀢𑁆𑀢𑀜𑁆𑀘𑁂𑀢𑀁 ‘‘𑀭𑀼𑀓𑁆𑀔𑀫𑀽𑀮𑁂’’𑀢𑀺, 𑀢𑀢𑁆𑀣 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺.

𑁧𑁧𑁮. 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀲𑀢𑀺𑀬𑀸 𑀕𑀘𑁆𑀙𑀢𑁄𑀧𑀺 𑀅𑀦𑀸𑀧𑀢𑁆𑀢𑀺, 𑀆𑀧𑀼𑀘𑁆𑀙𑀦𑀁 𑀧𑀦 𑀯𑀢𑁆𑀢𑀁 𑀲𑀜𑁆𑀘𑀺𑀘𑁆𑀘 𑀅𑀦𑀸𑀧𑀼𑀘𑁆𑀙𑀢𑁄 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀢𑁆𑀢𑀸. 𑀧𑀼𑀕𑁆𑀕𑀮𑀺𑀓𑀲𑁂𑀦𑀸𑀲𑀦𑁂 𑀲𑀗𑁆𑀖𑀺𑀓𑀲𑁂𑀬𑁆𑀬𑀁, 𑀲𑀗𑁆𑀖𑀺𑀓𑀲𑁂𑀦𑀸𑀲𑀦𑁂 𑀯𑀸 𑀧𑀼𑀕𑁆𑀕𑀮𑀺𑀓𑀲𑁂𑀬𑁆𑀬𑀁 𑀅𑀢𑁆𑀣𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀬𑀼𑀢𑁆𑀢𑀁 𑀯𑀺𑀬. 𑀓𑀲𑁆𑀫𑀸? ‘‘𑀲𑁂𑀬𑁆𑀬𑀸𑀫𑀢𑁆𑀢𑀫𑁂𑀯 𑀦𑀲𑁆𑀲𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀇𑀥 𑀧𑀦 ‘‘𑀧𑀮𑀺𑀩𑀼𑀤𑁆𑀥𑀁 𑀧𑀮𑀺𑀩𑀼𑀤𑁆𑀥𑁄’’𑀢𑀺 𑀤𑀼𑀯𑀺𑀥𑀫𑁆𑀧𑀺 𑀅𑀢𑁆𑀣𑀺.

𑀤𑀼𑀢𑀺𑀬𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.