𑁭. 𑀥𑀫𑁆𑀫𑀤𑁂𑀲𑀦𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁬. ‘‘𑀯𑀺𑀜𑁆𑀜𑀽 𑀧𑀝𑀺𑀩𑀮𑀸’’𑀢𑀺 𑀯𑀘𑀦𑀢𑁄 𑀅𑀯𑀺𑀜𑁆𑀜𑀽 𑀇𑀢𑁆𑀣𑀺𑀬𑀸𑀧𑀺 𑀤𑁂𑀲𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀇𑀥 𑀬𑀓𑁆𑀔𑀻𑀆𑀤𑀬𑁄 𑀫𑀦𑀼𑀲𑁆𑀲𑀺𑀢𑁆𑀣𑀻 𑀯𑀺𑀬 𑀅𑀦𑁄𑀴𑀸𑀭𑀺𑀓𑀢𑁆𑀢𑀸 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀸 𑀚𑀸𑀢𑀸. 𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀺𑀢𑁆𑀣𑀺𑀬𑀸 𑀧𑀝𑀺𑀩𑀮𑀢𑀸𑀬 𑀯𑀼𑀢𑁆𑀢𑀢𑁆𑀢𑀸 𑀇𑀢𑀭𑀸𑀧𑀺 𑀤𑀼𑀓𑁆𑀓𑀝𑀯𑀢𑁆𑀣𑀼𑀬𑁂𑀯𑀸𑀢𑀺 𑀏𑀓𑁂. ‘‘𑀫𑀸𑀢𑀼𑀕𑀸𑀫𑀸𑀬𑀸’’𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁. ‘‘𑀅𑀝𑁆𑀞𑀓𑀣𑀸𑀤𑀺𑀧𑀸𑀞𑀁 𑀞𑀧𑁂𑀢𑁆𑀯𑀸 𑀤𑀫𑀺𑀴𑀸𑀤𑀺𑀦𑀸 𑀬𑀣𑀸𑀭𑀼𑀘𑀺 𑀓𑀣𑁂𑀢𑀼𑀁 𑀮𑀪𑀢𑀺 𑀓𑀺𑀭𑀸’’𑀢𑀺 𑀮𑀺𑀔𑀺𑀢𑀁, 𑀬𑀣𑀸 𑀬𑀓𑁆𑀔𑀻𑀆𑀤𑀬𑁄 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀸 𑀚𑀸𑀢𑀸, 𑀢𑀣𑀸 𑀧𑀼𑀭𑀺𑀲𑀯𑀺𑀕𑁆𑀕𑀳𑀁 𑀕𑀳𑁂𑀢𑁆𑀯𑀸 𑀞𑀺𑀢𑁂𑀦 𑀬𑀓𑁆𑀔𑀸𑀤𑀺𑀦𑀸 𑀲𑀤𑁆𑀥𑀺𑀁 𑀞𑀺𑀢𑀲𑁆𑀲 𑀫𑀸𑀢𑀼𑀕𑀸𑀫𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀤𑀼𑀓𑁆𑀓𑀝𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀓𑀲𑁆𑀫𑀸 𑀧𑀸𑀘𑀺𑀢𑁆𑀢𑀺𑀬𑀫𑀸𑀧𑀚𑁆𑀚𑀢𑀻𑀢𑀺 𑀘𑁂? 𑀈𑀲𑀓𑀫𑁆𑀧𑀺 𑀤𑀼𑀢𑀺𑀬𑀧𑀓𑁆𑀔𑀁 𑀅𑀪𑀚𑀦𑀢𑁄. 𑀫𑀦𑀼𑀲𑁆𑀲𑀫𑀸𑀢𑀼𑀕𑀸𑀫𑁄𑀧𑀺 𑀦 𑀤𑀼𑀢𑀺𑀬𑁄, 𑀧𑀕𑁂𑀯 𑀬𑀓𑁆𑀔𑀸𑀤𑀬𑁄𑀢𑀺. 𑀦 𑀤𑀼𑀢𑀺𑀬𑀸𑀦𑀺𑀬𑀢𑁂 𑀢𑀲𑁆𑀲 𑀤𑀼𑀢𑀺𑀬𑀢𑁆𑀢𑀸𑀢𑀺 𑀘𑁂? 𑀦 𑀢𑀢𑁆𑀣 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀧𑁂𑀓𑁆𑀔𑀸 𑀤𑀼𑀢𑀺𑀬𑀢𑀸, 𑀓𑀺𑀦𑁆𑀢𑀼 𑀦𑀺𑀲𑀚𑁆𑀚𑀸𑀧𑁂𑀓𑁆𑀔𑀸, 𑀇𑀥 𑀘 𑀦 𑀦𑀺𑀲𑀚𑁆𑀚𑀫𑀢𑁆𑀢𑀁, 𑀓𑀺𑀦𑁆𑀢𑀼 𑀤𑁂𑀲𑀦𑀸 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀲𑀸 𑀘 𑀦𑀺𑀧𑀚𑁆𑀚𑀦𑀢𑁄 𑀑𑀴𑀸𑀭𑀺𑀓𑀸, 𑀢𑀲𑁆𑀫𑀸 𑀅𑀲𑀫𑀢𑁆𑀣𑀦𑀺𑀤𑀲𑁆𑀲𑀦𑀁.

𑀥𑀫𑁆𑀫𑀤𑁂𑀲𑀦𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.