𑁭. 𑀭𑀸𑀳𑀼𑀮𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧-𑁮. 𑀘𑀓𑁆𑀔𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁮𑁮-𑁧𑁯𑁫. 𑀏𑀓𑀯𑀺𑀳𑀸𑀭𑀻𑀢𑀺 𑀘𑀢𑀽𑀲𑀼𑀧𑀺 𑀇𑀭𑀺𑀬𑀸𑀧𑀣𑁂𑀲𑀼 𑀏𑀓𑀸𑀓𑀻 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑁄. 𑀯𑀺𑀯𑁂𑀓𑀝𑁆𑀞𑁄𑀢𑀺 𑀯𑀺𑀯𑀺𑀢𑁆𑀢𑀝𑁆𑀞𑁄, 𑀢𑁂𑀦𑀸𑀳 ‘‘𑀦𑀺𑀲𑁆𑀲𑀤𑁆𑀤𑁄’’𑀢𑀺. 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀲𑀦𑁆𑀢𑁄𑀢𑀺 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁂𑀦 𑀞𑀺𑀢𑁄, 𑀲𑀩𑁆𑀩𑀤𑀸 𑀅𑀯𑀺𑀚𑀳𑀦𑀯𑀲𑁂𑀦 𑀧𑀯𑀢𑁆𑀢𑁄. 𑀆𑀢𑀸𑀧𑀻𑀢𑀺 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑁄𑀢𑀺 𑀲𑀩𑁆𑀩𑀲𑁄 𑀓𑀺𑀮𑁂𑀲𑀸𑀦𑀁 𑀆𑀢𑀸𑀧𑀦𑀧𑀭𑀺𑀢𑀸𑀧𑀦𑀯𑀲𑁂𑀦 𑀧𑀯𑀢𑁆𑀢𑀯𑀻𑀭𑀺𑀬𑀲𑀫𑀗𑁆𑀕𑀻𑀪𑀽𑀢𑁄. 𑀧𑀳𑀺𑀢𑀢𑁆𑀢𑁄𑀢𑀺 𑀢𑀲𑁆𑀫𑀺𑀁 𑀯𑀺𑀲𑁂𑀲𑀸𑀥𑀺𑀕𑀫𑁂 𑀧𑁂𑀲𑀺𑀢𑀘𑀺𑀢𑁆𑀢𑁄, 𑀢𑀢𑁆𑀣 𑀦𑀺𑀦𑁆𑀦𑁄 𑀢𑀧𑁆𑀧𑀩𑁆𑀪𑀸𑀭𑁄𑀢𑀺 𑀅𑀢𑁆𑀣𑁄. 𑀳𑀼𑀢𑁆𑀯𑀸 𑀅𑀪𑀸𑀯𑀸𑀓𑀸𑀭𑁂𑀦𑀸𑀢𑀺 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀅𑀯𑀺𑀚𑁆𑀚𑀫𑀸𑀦𑁄 𑀧𑀘𑁆𑀘𑀬𑀲𑀫𑀯𑀸𑀬𑁂𑀦 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀗𑁆𑀕𑀼𑀧𑀭𑀫𑀲𑀗𑁆𑀔𑀸𑀢𑁂𑀦 𑀅𑀪𑀸𑀯𑀸𑀓𑀸𑀭𑁂𑀦. 𑀅𑀦𑀺𑀘𑁆𑀘𑀦𑁆𑀢𑀺 𑀦𑀺𑀘𑁆𑀘𑀥𑀼𑀯𑀢𑀸𑀪𑀸𑀯𑀢𑁄. 𑀉𑀧𑁆𑀧𑀸𑀤𑀯𑀬𑀯𑀦𑁆𑀢𑀢𑀸𑀬𑀸𑀢𑀺 𑀔𑀡𑁂 𑀔𑀡𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑀢𑁄. 𑀢𑀸𑀯𑀓𑀸𑀮𑀺𑀓𑀢𑀸𑀬𑀸𑀢𑀺 𑀢𑀗𑁆𑀔𑀡𑀺𑀓𑀢𑀸𑀬. 𑀯𑀺𑀧𑀭𑀺𑀡𑀸𑀫𑀓𑁄𑀝𑀺𑀬𑀸𑀢𑀺 𑀯𑀺𑀧𑀭𑀺𑀡𑀸𑀫𑀯𑀦𑁆𑀢𑀢𑀸𑀬. 𑀘𑀓𑁆𑀔𑀼𑀜𑁆𑀳𑀺 𑀉𑀧𑀸𑀤𑀸𑀬 𑀯𑀺𑀓𑀸𑀭𑀸𑀧𑀚𑁆𑀚𑀦𑁂𑀦 𑀯𑀺𑀧𑀭𑀺𑀡𑀫𑀦𑁆𑀢𑀁 𑀯𑀺𑀦𑀸𑀲𑀁 𑀧𑀝𑀺𑀧𑀻𑀴𑀁 𑀧𑀸𑀧𑀼𑀡𑀸𑀢𑀺. 𑀦𑀺𑀘𑁆𑀘𑀧𑀝𑀺𑀓𑁆𑀔𑁂𑀧𑀢𑁄𑀢𑀺 𑀦𑀺𑀘𑁆𑀘𑀢𑀸𑀬 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀢𑁄 𑀮𑁂𑀲𑀫𑀢𑁆𑀢𑀲𑁆𑀲𑀧𑀺 𑀅𑀦𑀼𑀧𑀮𑀩𑁆𑀪𑀦𑀢𑁄. 𑀤𑀼𑀓𑁆𑀔𑀫𑀦𑀝𑁆𑀞𑁂𑀦𑀸𑀢𑀺 𑀦𑀺𑀭𑀦𑁆𑀢𑀭𑀤𑀼𑀓𑁆𑀔𑀢𑀸𑀬 𑀤𑀼𑀓𑁆𑀔𑁂𑀦 𑀔𑀫𑀺𑀢𑀩𑁆𑀩𑀢𑁄. 𑀤𑀼𑀓𑁆𑀔𑀯𑀢𑁆𑀣𑀼𑀓𑀝𑁆𑀞𑁂𑀦𑀸𑀢𑀺 𑀦𑀸𑀦𑀧𑁆𑀧𑀓𑀸𑀭𑀤𑀼𑀓𑁆𑀔𑀸𑀥𑀺𑀝𑁆𑀞𑀸𑀦𑀢𑁄. 𑀲𑀢𑀢𑀲𑀫𑁆𑀧𑀻𑀴𑀦𑀝𑁆𑀞𑁂𑀦𑀸𑀢𑀺 𑀅𑀪𑀺𑀡𑁆𑀳𑀢𑀸𑀧𑀲𑀪𑀸𑀯𑀢𑁄. 𑀲𑀼𑀔𑀧𑀝𑀺𑀓𑁆𑀔𑁂𑀧𑁂𑀦𑀸𑀢𑀺 𑀲𑀼𑀔𑀪𑀸𑀯𑀲𑁆𑀲 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀢𑁄. 𑀢𑀡𑁆𑀳𑀸𑀕𑀸𑀳𑁄 𑀫𑀫𑀁𑀓𑀸𑀭𑀪𑀸𑀯𑀢𑁄. 𑀫𑀸𑀦𑀕𑀸𑀳𑁄 𑀅𑀳𑀁𑀓𑀸𑀭𑀪𑀸𑀯𑀢𑁄. 𑀤𑀺𑀝𑁆𑀞𑀺𑀕𑀸𑀳𑁄 ‘‘𑀅𑀢𑁆𑀢𑀸 𑀫𑁂’’𑀢𑀺 𑀯𑀺𑀧𑀮𑁆𑀮𑀸𑀲𑀪𑀸𑀯𑀢𑁄. 𑀯𑀺𑀭𑀸𑀕𑀯𑀲𑁂𑀦𑀸𑀢𑀺 𑀯𑀺𑀭𑀸𑀕𑀕𑁆𑀕𑀳𑀡𑁂𑀦. 𑀢𑀣𑀸 𑀯𑀺𑀫𑀼𑀢𑁆𑀢𑀺𑀯𑀲𑁂𑀦𑀸𑀢𑀺 𑀯𑀺𑀫𑀼𑀢𑁆𑀢𑀺𑀕𑁆𑀕𑀳𑀡𑁂𑀦.

𑀧𑀲𑀸𑀤𑀸𑀯 𑀕𑀳𑀺𑀢𑀸 𑀤𑁆𑀯𑀸𑀭𑀪𑀸𑀯𑀧𑁆𑀧𑀢𑁆𑀢𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀲𑀫𑁆𑀫𑀲𑀦𑀘𑀸𑀭𑀘𑀺𑀢𑁆𑀢𑀁 𑀤𑁆𑀯𑀸𑀭𑀪𑀽𑀢𑀫𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀙𑀝𑁆𑀞𑁂 𑀆𑀭𑀫𑁆𑀫𑀡𑁂 𑀢𑁂𑀪𑀽𑀫𑀓𑀥𑀫𑁆𑀫𑀸 𑀲𑀫𑁆𑀫𑀲𑀦𑀘𑀸𑀭𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀬𑀣𑀸 𑀧𑀞𑀫𑀲𑀼𑀢𑁆𑀢𑁂 𑀧𑀜𑁆𑀘 𑀧𑀲𑀸𑀤𑀸 𑀕𑀳𑀺𑀢𑀸, 𑀦 𑀲𑀲𑀫𑁆𑀪𑀸𑀭𑀘𑀓𑁆𑀔𑀼𑀆𑀤𑀬𑁄, 𑀏𑀯𑀁 𑀢𑀢𑀺𑀬𑀲𑀼𑀢𑁆𑀢𑁂 𑀦 𑀧𑀲𑀸𑀤𑀯𑀢𑁆𑀣𑀼𑀓𑀘𑀺𑀢𑁆𑀢𑀫𑁂𑀯 𑀕𑀳𑀺𑀢𑀁. 𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸. 𑀏𑀯𑀜𑁆𑀳𑀺 𑀅𑀯𑀥𑀸𑀭𑀡𑀁 𑀲𑀸𑀢𑁆𑀣𑀓𑀁 𑀳𑁄𑀢𑀺 𑀅𑀜𑁆𑀜𑀣𑀸 𑀢𑁂𑀦 𑀅𑀧𑀦𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀘𑀢𑀼𑀢𑁆𑀣𑀲𑀼𑀢𑁆𑀢𑀸𑀤𑀻𑀲𑀼. 𑀚𑀯𑀦𑀧𑁆𑀧𑀢𑁆𑀢𑀸𑀢𑀺 𑀚𑀯𑀦𑀘𑀺𑀢𑁆𑀢𑀲𑀁𑀬𑀼𑀢𑁆𑀢𑀸.

𑀘𑀓𑁆𑀔𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀥𑀸𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁬. 𑀆𑀓𑀸𑀲𑀥𑀸𑀢𑀼 𑀭𑀽𑀧𑀧𑀭𑀺𑀘𑁆𑀙𑁂𑀤𑀢𑀸𑀬 𑀭𑀽𑀧𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀲𑁂𑀲𑀸𑀳𑀺 𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁. 𑀦𑀸𑀫𑀭𑀽𑀧𑀦𑁆𑀢𑀺 𑀢𑁂𑀪𑀽𑀫𑀓𑀁 𑀦𑀸𑀫𑀁 𑀭𑀽𑀧𑀜𑁆𑀘 𑀓𑀣𑀺𑀢𑀁.

𑀥𑀸𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀔𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁭. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀧𑀭𑀺𑀘𑁆𑀙𑁂𑀤𑁂𑀦𑀸𑀢𑀺 𑀥𑀫𑁆𑀫𑀲𑀗𑁆𑀕𑀡𑁆𑀳𑀦𑀧𑀭𑀺𑀬𑀸𑀬𑁂𑀦. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂. 𑀢𑁂𑀪𑀽𑀫𑀓𑀸𑀢𑀺 𑀕𑀳𑁂𑀢𑀩𑁆𑀩𑀸 𑀲𑀫𑁆𑀫𑀲𑀦𑀘𑀸𑀭𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸.

𑀔𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧𑁧. 𑀅𑀦𑀼𑀲𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁦. 𑀤𑀼𑀢𑀺𑀬𑀯𑀕𑁆𑀕𑁂 𑀅𑀢𑁆𑀢𑀦𑁄𑀢𑀺 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄 𑀅𑀢𑁆𑀢𑀦𑁄 𑀲𑀯𑀺𑀜𑁆𑀜𑀸𑀡𑀓𑀁 𑀓𑀸𑀬𑀁 𑀤𑀲𑁆𑀲𑁂𑀢𑀺. 𑀧𑀭𑀲𑁆𑀲𑀸𑀢𑀺 𑀧𑀭𑀲𑁆𑀲 𑀅𑀯𑀺𑀜𑁆𑀜𑀸𑀡𑀓𑀓𑀸𑀬𑀁 𑀤𑀲𑁆𑀲𑁂𑀢𑀺. 𑀧𑀭𑀲𑀦𑁆𑀢𑀸𑀦𑁂 𑀯𑀸 𑀅𑀭𑀽𑀧𑁂 𑀥𑀫𑁆𑀫𑁂 𑀅𑀕𑁆𑀕𑀳𑁂𑀢𑁆𑀯𑀸 𑀭𑀽𑀧𑀓𑀸𑀬𑀫𑁂𑀯 𑀕𑀡𑁆𑀳𑀦𑁆𑀢𑁄 𑀯𑀤𑀢𑀺. 𑀅𑀧𑀭𑁂 ‘‘𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀅𑀢𑁆𑀢𑀪𑀸𑀯𑀁 𑀲𑀦𑁆𑀥𑀸𑀬 𑀢𑀣𑀸 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀧𑀼𑀭𑀺𑀫𑁂𑀦𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂’’𑀢𑀺 𑀇𑀫𑀺𑀦𑀸 𑀧𑀤𑁂𑀦. 𑀧𑀘𑁆𑀙𑀺𑀫𑁂𑀦𑀸𑀢𑀺 ‘‘𑀩𑀳𑀺𑀤𑁆𑀥𑀸’’𑀢𑀺 𑀇𑀫𑀺𑀦𑀸 𑀧𑀤𑁂𑀦. 𑀏𑀢𑁂 𑀓𑀺𑀮𑁂𑀲𑀸𑀢𑀺 𑀏𑀢𑁂 𑀤𑀺𑀝𑁆𑀞𑀺𑀢𑀡𑁆𑀳𑀸𑀫𑀸𑀦𑀲𑀜𑁆𑀜𑀺𑀢𑀸 𑀓𑀺𑀮𑁂𑀲𑀸. 𑀏𑀢𑁂𑀲𑀼 𑀯𑀢𑁆𑀣𑀽𑀲𑀽𑀢𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀯𑀢𑁆𑀣𑀽𑀲𑀼. 𑀲𑀫𑁆𑀫…𑀧𑁂… 𑀧𑀲𑁆𑀲𑀢𑀻𑀢𑀺 𑀧𑀼𑀩𑁆𑀩𑀪𑀸𑀕𑁂 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀲𑀫𑁆𑀫𑀲𑀦𑀯𑀲𑁂𑀦, 𑀫𑀕𑁆𑀕𑀓𑁆𑀔𑀡𑁂 𑀅𑀪𑀺𑀲𑀫𑀬𑀯𑀲𑁂𑀦 𑀲𑀼𑀝𑁆𑀞𑀼 𑀅𑀢𑁆𑀢𑀧𑀘𑁆𑀘𑀓𑁆𑀔𑁂𑀦 𑀜𑀸𑀡𑁂𑀦 𑀧𑀲𑁆𑀲𑀢𑀺.

𑀅𑀦𑀼𑀲𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀅𑀧𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁧. ‘‘𑀅𑀳𑀫𑁂𑀢’’𑀦𑁆𑀢𑀺 𑀅𑀳𑀁𑀓𑀸𑀭𑀸𑀤𑀻𑀦𑀁 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑁂𑀦 𑀅𑀘𑁆𑀘𑀦𑁆𑀢𑀫𑁂𑀯 𑀅𑀧𑀕𑀢𑀁.

𑀅𑀧𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑀻𑀲𑀽𑀢𑀺 𑀧𑀞𑀫𑀯𑀕𑁆𑀕𑀸𑀤𑀻𑀲𑀼. 𑀤𑁂𑀲𑀦𑀸𑀬 𑀅𑀲𑁂𑀓𑁆𑀔𑀪𑀽𑀫𑀺𑀬𑀸 𑀤𑁂𑀲𑀺𑀢𑀢𑁆𑀢𑀸 𑀅𑀲𑁂𑀓𑁆𑀔𑀪𑀽𑀫𑀺 𑀓𑀣𑀺𑀢𑀸. 𑀧𑀞𑀫𑁄𑀢𑀺 𑀧𑀞𑀫𑀯𑀕𑁆𑀕𑁄 ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀆𑀬𑀸𑀘𑀦𑁆𑀢𑀲𑁆𑀲, 𑀤𑀼𑀢𑀺𑀬𑁄 𑀅𑀦𑀸𑀬𑀸𑀘𑀦𑁆𑀢𑀲𑁆𑀲 𑀣𑁂𑀭𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦 𑀓𑀣𑀺𑀢𑁄. 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀥𑀫𑁆𑀫𑀸 𑀦𑀸𑀫 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀬𑁄. 𑀢𑁂𑀦 𑀧𑀦 𑀯𑀺𑀧𑀲𑁆𑀲𑀦𑀸𑀬 𑀓𑀣𑀺𑀢𑀢𑁆𑀢𑀸 𑀓𑀣𑀺𑀢𑀸 𑀏𑀯𑀸𑀢𑀺. 𑀢𑀁𑀢𑀁𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀳𑀺 𑀣𑁂𑀭𑁄 𑀢𑁂 𑀥𑀫𑁆𑀫𑁂 𑀧𑀭𑀺𑀧𑀸𑀓𑀁 𑀧𑀸𑀧𑁂𑀲𑀺. 𑀢𑀣𑀸 𑀳𑀺 𑀪𑀕𑀯𑀸 𑀤𑀼𑀢𑀺𑀬𑀯𑀕𑁆𑀕𑀁 𑀅𑀦𑀸𑀬𑀸𑀘𑀺𑀢𑁄𑀧𑀺 𑀤𑁂𑀲𑁂𑀲𑀺.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀭𑀸𑀳𑀼𑀮𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.