𑁪. 𑀅𑀦𑀫𑀢𑀕𑁆𑀕𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧. 𑀢𑀺𑀡𑀓𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁪. 𑀉𑀧𑀲𑀕𑁆𑀕𑁄 𑀲𑀫𑀸𑀲𑀯𑀺𑀲𑀬𑁂 𑀲𑀲𑀸𑀥𑀦𑀁 𑀓𑀺𑀭𑀺𑀬𑀁 𑀤𑀲𑁆𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀜𑀸𑀡𑁂𑀦 𑀅𑀦𑀼𑀕𑀦𑁆𑀢𑁆𑀯𑀸𑀧𑀻’’𑀢𑀺. 𑀯𑀲𑁆𑀲𑀲𑀢𑀁 𑀯𑀲𑁆𑀲𑀲𑀳𑀲𑁆𑀲𑀦𑁆𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀢𑀢𑁄 𑀪𑀺𑀬𑁆𑀬𑁄𑀧𑀺 𑀅𑀦𑀼𑀕𑀦𑁆𑀢𑁆𑀯𑀸 𑀅𑀦𑀫𑀢𑀕𑁆𑀕𑁄 𑀏𑀯 𑀲𑀁𑀲𑀸𑀭𑁄. 𑀅𑀕𑁆𑀕-𑀲𑀤𑁆𑀤𑁄 𑀇𑀥 𑀫𑀭𑀺𑀬𑀸𑀤𑀯𑀘𑀦𑁄, 𑀅𑀦𑀼𑀤𑁆𑀤𑁂𑀲𑀺𑀓𑀜𑁆𑀘𑁂𑀢𑀁 𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀧𑀭𑀺𑀘𑁆𑀙𑀺𑀦𑁆𑀦𑀧𑀼𑀩𑁆𑀩𑀸𑀧𑀭𑀓𑁄𑀝𑀺𑀓𑁄’’𑀢𑀺. 𑀅𑀜𑁆𑀜𑀣𑀸 𑀅𑀦𑁆𑀢𑀺𑀫𑀪𑀯𑀺𑀓𑀧𑀭𑀺𑀘𑁆𑀙𑀺𑀦𑁆𑀦𑀓𑀢𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀥𑀫𑁆𑀫𑀸𑀤𑀻𑀦𑀁 𑀯𑀲𑁂𑀦 𑀅𑀧𑀭𑀺𑀘𑁆𑀙𑀺𑀦𑁆𑀦𑀧𑀼𑀩𑁆𑀩𑀸𑀧𑀭𑀓𑁄𑀝𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀲𑀁𑀲𑀭𑀡𑀁 𑀲𑀁𑀲𑀸𑀭𑁄. 𑀧𑀘𑁆𑀙𑀺𑀫𑀸𑀧𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀦𑁆𑀥𑀩𑀸𑀮𑀸𑀦𑀁 𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 𑀪𑀕𑀯𑀸 ‘‘𑀤𑀻𑀖𑁄 𑀩𑀸𑀮𑀸𑀦 𑀲𑀁𑀲𑀸𑀭𑁄’’𑀢𑀺 (𑀥. 𑀧. 𑁬𑁦). 𑀯𑁂𑀫𑀚𑁆𑀛𑁂𑀬𑁂𑀯 𑀧𑀦 𑀲𑀢𑁆𑀢𑀸 𑀲𑀁𑀲𑀭𑀦𑁆𑀢𑀺 𑀧𑀼𑀩𑁆𑀩𑀸𑀧𑀭𑀓𑁄𑀝𑀻𑀦𑀁 𑀅𑀮𑀩𑁆𑀪𑀦𑀻𑀬𑀢𑁆𑀢𑀸. 𑀅𑀢𑁆𑀣𑁄 𑀧𑀭𑀺𑀢𑁆𑀢𑁄 𑀳𑁄𑀢𑀺 𑀬𑀣𑀸𑀪𑀽𑀢𑀸𑀯𑀩𑁄𑀥𑀸𑀪𑀸𑀯𑀢𑁄. 𑀩𑀼𑀤𑁆𑀥𑀲𑀫𑀬𑁂𑀢𑀺 𑀲𑀸𑀲𑀦𑁂𑀢𑀺 𑀅𑀢𑁆𑀣𑁄. 𑀅𑀢𑁆𑀣𑁄 𑀫𑀳𑀸 𑀬𑀣𑀸𑀪𑀽𑀢𑀸𑀯𑀩𑁄𑀥𑀺𑀲𑀫𑁆𑀪𑀯𑀢𑁄, 𑀅𑀢𑁆𑀣𑀲𑁆𑀲 𑀯𑀺𑀧𑀼𑀮𑀢𑀸𑀬 𑀢𑀁𑀲𑀤𑀺𑀲𑀸 𑀉𑀧𑀫𑀸 𑀦𑀢𑁆𑀣𑀻𑀢𑀺 𑀧𑀭𑀺𑀢𑁆𑀢𑀁𑀬𑁂𑀯 𑀉𑀧𑀫𑀁 𑀆𑀳𑀭𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 ‘‘𑀧𑀸𑀴𑀺𑀬𑀁 𑀳𑀻’’𑀢𑀺𑀆𑀤𑀺𑀦𑀸 𑀲𑀫𑀢𑁆𑀣𑁂𑀢𑀺. 𑀫𑀸𑀢𑀼 𑀫𑀸𑀢𑀭𑁄𑀢𑀺 𑀫𑀸𑀢𑀼 𑀫𑀸𑀢𑀸𑀫𑀳𑀺𑀬𑁄. 𑀢𑀲𑁆𑀲𑁂𑀯𑀸𑀢𑀺 𑀤𑀼𑀓𑁆𑀔𑀲𑁆𑀲𑁂𑀯. 𑀢𑀺𑀩𑁆𑀩𑀦𑁆𑀢𑀺 𑀤𑀼𑀓𑁆𑀔𑀧𑀭𑀺𑀬𑀸𑀬𑁄𑀢𑀺.

𑀢𑀺𑀡𑀓𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀣𑀯𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁫. 𑀫𑀳𑀸𑀧𑀣𑀯𑀺𑀦𑁆𑀢𑀺 𑀅𑀯𑀺𑀲𑁂𑀲𑁂𑀦 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀬𑀺𑀦𑀻𑀢𑀺 𑀆𑀳 ‘‘𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢’’𑀦𑁆𑀢𑀺. 𑀧𑀭𑀺𑀓𑀧𑁆𑀧𑀯𑀘𑀦𑀜𑁆𑀘𑁂𑀢𑀁.

𑀧𑀣𑀯𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀲𑁆𑀲𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁬. 𑀓𑀦𑁆𑀤𑀦𑀁 𑀲𑀲𑀤𑁆𑀤𑀁, 𑀭𑁄𑀤𑀦𑀁 𑀧𑀦 𑀓𑁂𑀯𑀮𑀫𑁂𑀯𑀸𑀢𑀺 𑀆𑀳 ‘‘𑀓𑀦𑁆𑀤𑀦𑁆𑀢𑀸𑀦𑀦𑁆𑀢𑀺 𑀲𑀲𑀤𑁆𑀤𑀁 𑀭𑀼𑀤𑀫𑀸𑀦𑀸𑀦’’𑀦𑁆𑀢𑀺. 𑀧𑀯𑀢𑁆𑀢𑀦𑁆𑀢𑀺 𑀲𑀦𑁆𑀤𑀦𑀯𑀲𑁂𑀦 𑀧𑀯𑀢𑁆𑀢𑀁. ‘‘𑀲𑀺𑀦𑁂𑀭𑀼𑀭𑀲𑁆𑀫𑀻𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑁂𑀲𑀽’’𑀢𑀺 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀲𑀺𑀦𑁂𑀭𑀼𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀫𑀡𑀺𑀫𑀬𑀦𑁆𑀢𑀺 𑀇𑀦𑁆𑀤𑀦𑀻𑀮𑀫𑀡𑀺𑀫𑀬𑀁. 𑀲𑀺𑀦𑁂𑀭𑀼𑀲𑁆𑀲 𑀧𑀼𑀩𑁆𑀩𑀤𑀓𑁆𑀔𑀺𑀡𑀓𑁄𑀡𑀲𑀫𑀧𑀤𑁂𑀲𑀸 ‘‘𑀧𑀼𑀩𑁆𑀩𑀤𑀓𑁆𑀔𑀺𑀡𑀧𑀲𑁆𑀲𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀳𑀺 𑀦𑀺𑀓𑁆𑀔𑀦𑁆𑀢𑀭𑀚𑀢𑀭𑀲𑁆𑀫𑀺𑀬𑁄 𑀇𑀦𑁆𑀤𑀦𑀻𑀮𑀭𑀲𑁆𑀫𑀺𑀬𑁄 𑀘 𑀏𑀓𑀢𑁄 𑀳𑀼𑀢𑁆𑀯𑀸. 𑀢𑀸𑀲𑀁 𑀭𑀲𑁆𑀫𑀻𑀦𑀁 𑀅𑀦𑁆𑀢𑀭𑁂𑀲𑀽𑀢𑀺 𑀢𑀸𑀲𑀁 𑀘𑀢𑀽𑀳𑀺 𑀓𑁄𑀡𑁂𑀳𑀺 𑀦𑀺𑀓𑁆𑀔𑀦𑁆𑀢𑀭𑀲𑁆𑀫𑀻𑀦𑀁 𑀘𑀢𑀽𑀲𑀼 𑀅𑀦𑁆𑀢𑀭𑁂𑀲𑀼. 𑀘𑀢𑁆𑀢𑀸𑀭𑁄𑀢𑀺 𑀤𑀓𑁆𑀔𑀺𑀡𑀸𑀤𑀺𑀪𑁂𑀤𑀸 𑀘𑀢𑁆𑀢𑀸𑀭𑁄 𑀫𑀳𑀸𑀲𑀫𑀼𑀤𑁆𑀤𑀸 𑀳𑁄𑀦𑁆𑀢𑀺. 𑀯𑀺𑀅𑀲𑀦𑀦𑁆𑀢𑀺 𑀯𑀺𑀲𑁂𑀲𑁂𑀦 𑀔𑁂𑀧𑀦𑀁. 𑀓𑀺𑀁 𑀧𑀦 𑀢𑀦𑁆𑀢𑀺 𑀆𑀳 ‘‘𑀯𑀺𑀦𑀸𑀲𑁄𑀢𑀺 𑀅𑀢𑁆𑀣𑁄’’𑀢𑀺.

𑀅𑀲𑁆𑀲𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀔𑀻𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁭. 𑀫𑀸𑀢𑀼𑀣𑀜𑁆𑀜𑀦𑁆𑀢𑀺 𑀧𑀻𑀢𑀁 𑀫𑀸𑀢𑀼𑀬𑀸 𑀣𑀦𑀢𑁄 𑀦𑀺𑀩𑁆𑀩𑀢𑁆𑀢𑀔𑀻𑀭𑀁 𑀩𑀳𑀼𑀢𑀭𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀔𑀻𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀩𑁆𑀩𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁮. ‘‘𑀅𑀦𑀫𑀢𑀕𑁆𑀕𑀲𑁆𑀲 𑀲𑀁𑀲𑀸𑀭𑀲𑁆𑀲 𑀤𑀻𑀖𑀢𑀫𑀢𑁆𑀢𑀸 𑀦 𑀲𑀼𑀓𑀭𑀁 𑀦𑀲𑀼𑀓𑀭’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀧𑀸𑀞𑁄. 𑀓𑀣𑀁 𑀦𑀘𑁆𑀙𑀺𑀦𑁆𑀤𑀢𑀻𑀢𑀺 𑀓𑀣𑀁 𑀦 𑀧𑀭𑀺𑀬𑁄𑀲𑀸𑀧𑁂𑀢𑀺, 𑀓𑀸𑀬𑀘𑀺𑀧𑀺 𑀕𑀳𑀡𑀢𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀬𑁄 𑀓𑀧𑁆𑀧𑀸𑀲𑀁𑀲𑀽𑀢𑀺 𑀢𑀬𑁄 𑀏𑀓𑀓𑀧𑁆𑀧𑀸𑀲𑀁𑀲𑀽. 𑀬𑁂𑀳𑀺 𑀦𑀁 𑀨𑀼𑀝𑁆𑀞𑀁, 𑀢𑀢𑁄𑀧𑀺 𑀲𑀼𑀔𑀼𑀫𑀢𑀭𑀁 𑀲𑀸𑀲𑀧𑀫𑀢𑁆𑀢𑀁 𑀔𑀻𑀬𑁂𑀬𑁆𑀬 𑀧𑀩𑁆𑀩𑀢𑀁 𑀲𑀩𑁆𑀩𑀪𑀸𑀕𑁂𑀳𑀺 𑀅𑀢𑀺𑀘𑀺𑀭𑀯𑁂𑀮𑀁 𑀧𑀭𑀺𑀫𑀚𑁆𑀚𑀦𑁆𑀢𑁂.

𑀧𑀩𑁆𑀩𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀸𑀲𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁯. 𑀦𑀕𑀭𑀦𑁆𑀢𑀺 𑀦𑀕𑀭𑀲𑀗𑁆𑀔𑁂𑀧𑁂𑀦 𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀦𑁆𑀢𑁄 𑀧𑀦 𑀲𑀩𑁆𑀩𑀲𑁄 𑀯𑀺𑀘𑀺𑀢𑁆𑀢𑀲𑀸𑀲𑀧𑁂𑀳𑀺 𑀏𑀯 𑀧𑀼𑀡𑁆𑀡𑀁, 𑀏𑀯𑀁 𑀘𑀼𑀡𑁆𑀡𑀺𑀓𑀸𑀩𑀤𑁆𑀥𑀁. 𑀢𑁂𑀦𑀸𑀳 ‘‘𑀦 𑀧𑀦…𑀧𑁂… 𑀤𑀝𑁆𑀞𑀩𑁆𑀩’’𑀦𑁆𑀢𑀺.

𑀲𑀸𑀲𑀧𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀸𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁦. 𑀢𑀲𑁆𑀲 𑀞𑀺𑀢𑀝𑁆𑀞𑀸𑀦𑀢𑁄𑀢𑀺 𑀪𑀺𑀓𑁆𑀔𑀼𑀦𑁄 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑀢𑁄, 𑀢𑁂𑀦 𑀅𑀦𑀼𑀲𑁆𑀲𑀭𑀺𑀢𑀲𑁆𑀲 𑀲𑀢𑀲𑀳𑀲𑁆𑀲𑀓𑀧𑁆𑀧𑀲𑁆𑀲 𑀅𑀦𑀦𑁆𑀢𑀭𑀓𑀧𑁆𑀧𑀢𑁄 𑀧𑀝𑁆𑀞𑀸𑀬𑀸𑀢𑀺 𑀅𑀢𑁆𑀣𑁄. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀘𑀢𑁆𑀢𑀸𑀭𑁄𑀧𑀺 𑀪𑀺𑀓𑁆𑀔𑀽 𑀅𑀪𑀺𑀜𑁆𑀜𑀸𑀮𑀸𑀪𑀺𑀦𑁄. 𑀘𑀢𑁆𑀢𑀸𑀭𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀅𑀦𑀼𑀲𑁆𑀲𑀭𑁂𑀬𑁆𑀬𑀼𑀦𑁆𑀢𑀺 𑀧𑀭𑀺𑀓𑀧𑁆𑀧𑀦𑀯𑀲𑁂𑀦 𑀯𑀤𑀦𑁆𑀢𑀺.

𑀲𑀸𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀕𑀗𑁆𑀕𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁧. 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂𑀢𑀺 𑀏𑀢𑀲𑁆𑀫𑀺𑀁 𑀧𑀪𑀯𑀲𑀫𑀼𑀤𑁆𑀤𑀧𑀤𑁂𑀲𑀧𑀭𑀺𑀘𑁆𑀙𑀺𑀦𑁆𑀦𑁂 𑀆𑀬𑀸𑀫𑀢𑁄 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑁂 𑀅𑀢𑀺𑀭𑁂𑀓𑀬𑁄𑀚𑀦𑀲𑀢𑀺𑀓𑁂 𑀯𑀸 𑀞𑀸𑀦𑁂.

𑀕𑀗𑁆𑀕𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀤𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁨. 𑀦𑀯𑀫𑁂 𑀔𑀺𑀢𑁆𑀢𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀔𑀺𑀢𑁆𑀢𑁄. 𑀏𑀓𑀯𑀸𑀭𑀜𑁆𑀳𑀺 𑀔𑀺𑀢𑁆𑀢𑁄 𑀫𑀽𑀮𑀸𑀤𑀻𑀲𑀼 𑀏𑀓𑁂𑀦𑁂𑀯 𑀦𑀺𑀧𑀢𑁂𑀬𑁆𑀬. 𑀢𑀣𑀸 𑀲𑀢𑀺 𑀅𑀥𑀺𑀧𑁆𑀧𑁂𑀢𑁄 𑀧𑀸𑀢𑀲𑁆𑀲 𑀅𑀦𑀺𑀬𑀫𑁄 𑀦 𑀦𑀺𑀤𑀲𑁆𑀲𑀺𑀢𑁄 𑀲𑀺𑀬𑀸. 𑀢𑀢𑁆𑀣 𑀘 𑀥𑀫𑁆𑀫𑀁 𑀲𑀼𑀡𑀦𑁆𑀢𑀸 𑀪𑀺𑀓𑁆𑀔𑀽 𑀫𑀦𑀼𑀲𑁆𑀲𑀮𑁄𑀓𑁂, 𑀢𑁂 𑀲𑀦𑁆𑀥𑀸𑀬 ‘‘𑀅𑀲𑁆𑀫𑀸 𑀮𑁄𑀓𑀸’’𑀢𑀺 𑀆𑀳, 𑀢𑀤𑀜𑁆𑀜𑀁 𑀲𑀦𑁆𑀥𑀸𑀬 ‘‘𑀧𑀭𑀮𑁄𑀓’’𑀦𑁆𑀢𑀺. 𑀢𑀲𑁆𑀲 𑀢𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀬𑀣𑀸𑀥𑀺𑀧𑁆𑀧𑁂𑀢𑁄 𑀅𑀬𑀁 𑀮𑁄𑀓𑁄, 𑀢𑀤𑀜𑁆𑀜𑁄 𑀧𑀭𑀮𑁄𑀓𑁄.

𑀤𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀼𑀕𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁩. 𑀲𑀫𑀝𑁆𑀞𑀺𑀓𑀸𑀮𑁄𑀢𑀺 𑀲𑀫𑁂𑀦 𑀆𑀓𑀸𑀭𑁂𑀦 𑀮𑀤𑁆𑀥𑀩𑁆𑀩𑀅𑀝𑁆𑀞𑀺𑀓𑀸𑀮𑁄. 𑀕𑀺𑀭𑀺𑀧𑀭𑀺𑀓𑁆𑀔𑁂𑀧𑁂𑀢𑀺 𑀧𑀜𑁆𑀘𑀳𑀺 𑀕𑀺𑀭𑀻𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 ‘‘𑀕𑀺𑀭𑀺𑀧𑀭𑀺𑀓𑁆𑀔𑁂𑀧𑁄’’𑀢𑀺 𑀮𑀤𑁆𑀥𑀦𑀸𑀫𑁂 𑀭𑀸𑀚𑀕𑀳𑁂.

𑀧𑀼𑀕𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀤𑀼𑀕𑁆𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁪. 𑀤𑀼𑀕𑁆𑀕𑀢𑀦𑁆𑀢𑀺 𑀓𑀺𑀘𑁆𑀙𑀚𑀻𑀯𑀺𑀓𑀢𑁆𑀢𑀸 𑀲𑀩𑁆𑀩𑀣𑀸 𑀤𑀼𑀓𑁆𑀔𑀁 𑀕𑀢𑀁 𑀉𑀧𑀕𑀢𑀁. 𑀢𑀣𑀸𑀪𑀽𑀢𑁄 𑀧𑀦 𑀤𑀮𑀺𑀤𑁆𑀤𑁄 𑀯𑀭𑀸𑀓𑁄 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀤𑀮𑀺𑀤𑁆𑀤𑀁 𑀓𑀧𑀡’’𑀦𑁆𑀢𑀺. 𑀳𑀢𑁆𑀣𑀧𑀸𑀤𑁂𑀳𑀻𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀅𑀜𑁆𑀜𑁂𑀳𑀺𑀧𑀺 𑀲𑀭𑀻𑀭𑀸𑀯𑀬𑀯𑁂𑀳𑀺 𑀤𑀼𑀲𑁆𑀲𑀡𑁆𑀞𑀸𑀦𑁂𑀳𑀺 𑀉𑀧𑁂𑀢𑁄 𑀤𑀼𑀭𑀼𑀧𑁂𑀢𑁄 𑀏𑀯𑀸𑀢𑀺.

𑀤𑀼𑀕𑁆𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀼𑀔𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁫. 𑀲𑀼𑀔𑀺𑀢𑀦𑁆𑀢𑀺 𑀲𑀜𑁆𑀚𑀸𑀢𑀲𑀼𑀔𑀁. 𑀢𑁂𑀦𑀸𑀳 ‘‘𑀲𑀼𑀔𑀲𑀫𑀧𑁆𑀧𑀺𑀢’’𑀦𑁆𑀢𑀺𑀆𑀤𑀺. 𑀲𑀼𑀲𑀚𑁆𑀚𑀺𑀢𑀦𑁆𑀢𑀺 𑀲𑀼𑀔𑀼𑀫𑀼𑀧𑀓𑀭𑀡𑁂𑀳𑀺 𑀲𑀩𑁆𑀩𑀣𑀸 𑀲𑀚𑁆𑀚𑀺𑀢𑀁.

𑀲𑀼𑀔𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀺𑀁𑀲𑀫𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁬. 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀯𑀲𑁂𑀦, 𑀦 𑀅𑀭𑀜𑁆𑀜𑀯𑀸𑀲𑀸𑀤𑀺𑀫𑀢𑁆𑀢𑁂𑀦. 𑀲𑀲𑀁𑀬𑁄𑀚𑀦𑀸 𑀲𑀩𑁆𑀩𑀲𑁄 𑀲𑀁𑀬𑁄𑀚𑀦𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸, 𑀦 𑀧𑀼𑀣𑀼𑀚𑁆𑀚𑀦𑀪𑀸𑀯𑀢𑁄. 𑀏𑀓𑁂𑀓𑀯𑀡𑁆𑀡𑀓𑀸𑀮𑁄𑀯 𑀕𑀳𑁂𑀢𑀩𑁆𑀩𑁄𑀢𑀺 𑀏𑀢𑁂𑀦 𑀫𑀳𑀺𑀁𑀲𑀸𑀤𑀻𑀦𑀁 𑀭𑀲𑁆𑀲𑀤𑀻𑀖𑀧𑀺𑀗𑁆𑀕𑀮𑀸𑀤𑀻𑀲𑀼 𑀏𑀓𑁂𑀓𑀸𑀦𑁂𑀯 𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀺.

𑀢𑀺𑀁𑀲𑀫𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪-𑁯. 𑀫𑀸𑀢𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁩𑁭-𑁧𑁪𑁨. 𑀮𑀺𑀗𑁆𑀕𑀦𑀺𑀬𑀫𑁂𑀦 𑀘𑁂𑀯 𑀘𑀓𑁆𑀓𑀯𑀸𑀴𑀦𑀺𑀬𑀫𑁂𑀦 𑀘𑀸𑀢𑀺 ‘‘𑀧𑀼𑀭𑀺𑀲𑀸𑀦𑀜𑁆𑀳𑀺 𑀫𑀸𑀢𑀼𑀕𑀸𑀫𑀓𑀸𑀮𑁄, 𑀫𑀸𑀢𑀼𑀕𑀸𑀫𑀸𑀦𑀜𑁆𑀘 𑀧𑀼𑀭𑀺𑀲𑀓𑀸𑀮𑁄’’𑀢𑀺 𑀬𑀣𑀸 𑀲𑀢𑁆𑀢𑀲𑀦𑁆𑀢𑀸𑀦𑁂 𑀮𑀺𑀗𑁆𑀕𑀦𑀺𑀬𑀫𑁄 𑀦𑀢𑁆𑀣𑀺, 𑀏𑀯𑀁 𑀓𑀤𑀸𑀘𑀺 𑀇𑀫𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀓𑀤𑀸𑀘𑀺 𑀅𑀜𑁆𑀜𑀢𑀭𑀲𑁆𑀫𑀺𑀦𑁆𑀢𑀺 𑀘𑀓𑁆𑀓𑀯𑀸𑀴𑀦𑀺𑀬𑀫𑁄𑀧𑀺 𑀦𑀢𑁆𑀣𑀺. 𑀏𑀯𑀫𑁂𑀯 𑀞𑀺𑀢𑁂

𑀘𑀓𑁆𑀓𑀯𑀸𑀴𑁂 𑀫𑀸𑀢𑀼𑀕𑀸𑀫𑀓𑀸𑀮𑁂 𑀦𑀫𑀸𑀢𑀸𑀪𑀽𑀢𑀧𑀼𑀩𑁆𑀩𑁄 𑀦𑀢𑁆𑀣𑀻𑀢𑀺𑀆𑀤𑀺𑀦𑀸 𑀮𑀺𑀗𑁆𑀕𑀦𑀺𑀬𑀫𑁂𑀦 𑀘𑀓𑁆𑀓𑀯𑀸𑀴𑀦𑀺𑀬𑀫𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀢𑁂𑀲𑀽’’𑀢𑀺𑀆𑀤𑀺.

𑀫𑀸𑀢𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁩. 𑀏𑀓𑀁 𑀅𑀧𑀤𑀸𑀦𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀺 ‘‘𑀏𑀯𑀁 𑀲𑀁𑀯𑁂𑀕𑀁 𑀚𑀦𑁂𑀢𑁆𑀯𑀸 𑀪𑀺𑀓𑁆𑀔𑀽 𑀯𑀺𑀲𑁂𑀲𑀁 𑀧𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀘𑀢𑀽𑀳𑁂𑀦 𑀆𑀭𑁄𑀳𑀦𑁆𑀢𑀺 𑀘𑀢𑀼𑀬𑁄𑀚𑀦𑀼𑀩𑁆𑀩𑁂𑀥𑀢𑁆𑀢𑀸. 𑀤𑁆𑀯𑀺𑀦𑁆𑀦𑀁 𑀩𑀼𑀤𑁆𑀥𑀸𑀦𑀦𑁆𑀢𑀺 𑀓𑀓𑀼𑀲𑀦𑁆𑀥𑀲𑁆𑀲 𑀓𑁄𑀡𑀸𑀕𑀫𑀦𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀩𑀼𑀤𑁆𑀥𑀸𑀦𑀁. ‘‘𑀢𑀺𑀯𑀭𑀸 𑀭𑁄𑀳𑀺𑀢𑀲𑁆𑀲𑀸 𑀲𑀼𑀧𑁆𑀧𑀺𑀬𑀸’’𑀢𑀺 𑀫𑀦𑀼𑀲𑁆𑀲𑀸𑀦𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀫𑀜𑁆𑀜𑀸 𑀢𑀢𑁆𑀣 𑀤𑁂𑀲𑀦𑀸𑀫𑀯𑀲𑁂𑀦 𑀚𑀸𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀬𑀣𑀸 𑀏𑀢𑀭𑀳𑀺 𑀫𑀸𑀕𑀥𑀸𑀢𑀺.

𑀧𑀼𑀦 𑀯𑀲𑁆𑀲𑀲𑀢𑀦𑁆𑀢𑀺 𑀧𑀞𑀫𑀯𑀲𑁆𑀲𑀲𑀢𑀢𑁄 𑀉𑀧𑀭𑀺𑀯𑀲𑁆𑀲𑀲𑀢𑀁 𑀚𑀻𑀯𑀦𑀓𑁄 𑀦𑀸𑀫 𑀫𑀦𑀼𑀲𑁆𑀲𑁄 𑀦𑀢𑁆𑀣𑀺. 𑀧𑀭𑀺𑀳𑀻𑀦𑀲𑀤𑀺𑀲𑀁 𑀓𑀢𑀁 𑀤𑁂𑀲𑀦𑀸𑀬. 𑀯𑀟𑁆𑀠𑀺𑀢𑁆𑀯𑀸𑀢𑀺 𑀤𑀲𑀯𑀲𑁆𑀲𑀸𑀬𑀼𑀓𑀪𑀸𑀯𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀬𑀼𑀓𑀪𑀸𑀯𑀸 𑀯𑀟𑁆𑀠𑀺𑀢𑁆𑀯𑀸. ‘‘𑀧𑀭𑀺𑀳𑀻𑀦’’𑀦𑁆𑀢𑀺 𑀯𑀢𑁆𑀯𑀸 𑀢𑀁 𑀧𑀭𑀺𑀳𑀻𑀦𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀣’’𑀦𑁆𑀢𑀺𑀆𑀤𑀺𑀫𑀸𑀳. 𑀬𑀁 𑀆𑀬𑀼𑀧𑁆𑀧𑀫𑀸𑀡𑁂𑀲𑀽𑀢𑀺 𑀬𑀢𑁆𑀢𑀓𑀁 𑀆𑀬𑀼𑀧𑁆𑀧𑀫𑀸𑀡𑁂𑀲𑀽𑀢𑀺.

𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀅𑀦𑀫𑀢𑀕𑁆𑀕𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.