𑁫. 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑀁

𑁧. 𑀲𑀦𑁆𑀢𑀼𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁪. 𑀲𑀦𑁆𑀢𑀼𑀝𑁆𑀞𑁄𑀢𑀺 𑀲𑀓𑁂𑀦 𑀉𑀘𑁆𑀘𑀸𑀯𑀘𑁂𑀦 𑀧𑀘𑁆𑀘𑀬𑁂𑀦 𑀲𑀫𑀫𑁂𑀯 𑀘 𑀢𑀼𑀲𑁆𑀲𑀦𑀓𑁄. 𑀢𑁂𑀦𑀸𑀳 ‘‘𑀇𑀢𑀭𑀻𑀢𑀭𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀤𑀼𑀯𑀺𑀥𑀁 𑀇𑀢𑀭𑀻𑀢𑀭𑀁 𑁋 𑀧𑀸𑀓𑀢𑀺𑀓𑀁, 𑀜𑀸𑀡𑀲𑀜𑁆𑀚𑀦𑀺𑀢𑀜𑁆𑀘𑀸𑀢𑀺. 𑀢𑀢𑁆𑀣 𑀧𑀸𑀓𑀢𑀺𑀓𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀜𑀸𑀡𑀲𑀜𑁆𑀚𑀦𑀺𑀢𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀣𑀽𑀮𑀲𑀼𑀔𑀼𑀫𑀸’’𑀢𑀺𑀆𑀤𑀺𑀫𑀸𑀳. 𑀇𑀢𑀭𑀁 𑀯𑀼𑀘𑁆𑀘𑀢𑀺 𑀳𑀻𑀦𑀁 𑀧𑀡𑀻𑀢𑀢𑁄 𑀅𑀜𑁆𑀜𑀢𑁆𑀢𑀸. 𑀢𑀣𑀸 𑀧𑀡𑀻𑀢𑀫𑁆𑀧𑀺 𑀇𑀢𑀭𑀁 𑀳𑀻𑀦𑀢𑁄 𑀅𑀜𑁆𑀜𑀢𑁆𑀢𑀸. 𑀅𑀧𑁂𑀓𑁆𑀔𑀸𑀲𑀤𑁆𑀤𑀸 𑀳𑀺 𑀇𑀢𑀭𑀻𑀢𑀭𑀸𑀢𑀺. 𑀇𑀢𑀺 𑀬𑁂𑀦 𑀓𑁂𑀦𑀘𑀺 𑀳𑀻𑀦𑁂𑀦 𑀯𑀸 𑀧𑀡𑀻𑀢𑁂𑀦 𑀯𑀸 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑁂𑀦 𑀲𑀦𑁆𑀢𑀼𑀲𑁆𑀲𑀺𑀢𑁄 𑀢𑀣𑀸𑀧𑀯𑀢𑁆𑀢𑁄 𑀅𑀮𑁄𑀪𑁄 𑀇𑀢𑀭𑀻𑀢𑀭𑀧𑀘𑁆𑀘𑀬𑀲𑀦𑁆𑀢𑁄𑀲𑁄, 𑀢𑀁𑀲𑀫𑀗𑁆𑀕𑀺𑀢𑀸𑀬 𑀲𑀦𑁆𑀢𑀼𑀝𑁆𑀞𑁄. 𑀬𑀣𑀸𑀮𑀸𑀪𑀁 𑀅𑀢𑁆𑀢𑀦𑁄 𑀮𑀸𑀪𑀸𑀦𑀼𑀭𑀽𑀧𑀁 𑀲𑀦𑁆𑀢𑁄𑀲𑁄 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀮𑀩𑁆𑀪𑀢𑀻𑀢𑀺 𑀯𑀸 𑀮𑀸𑀪𑁄, 𑀬𑁄 𑀬𑁄 𑀮𑀸𑀪𑁄 𑀬𑀣𑀸𑀮𑀸𑀪𑁄, 𑀢𑁂𑀦 𑀲𑀦𑁆𑀢𑁄𑀲𑁄 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀩𑀮𑀦𑁆𑀢𑀺 𑀓𑀸𑀬𑀩𑀮𑀁. 𑀲𑀸𑀭𑀼𑀧𑁆𑀧𑀦𑁆𑀢𑀺 𑀪𑀺𑀓𑁆𑀔𑀼𑀦𑁄 𑀅𑀦𑀼𑀘𑁆𑀙𑀯𑀺𑀓𑀢𑀸.

𑀬𑀣𑀸𑀮𑀤𑁆𑀥𑀢𑁄 𑀅𑀜𑁆𑀜𑀲𑁆𑀲 𑀅𑀧𑀢𑁆𑀣𑀦𑀸 𑀦𑀸𑀫 𑀲𑀺𑀬𑀸 𑀅𑀧𑁆𑀧𑀺𑀘𑁆𑀙𑀢𑀸𑀬 𑀧𑀯𑀢𑁆𑀢𑀺𑀆𑀓𑀸𑀭𑁄𑀢𑀺 𑀢𑀢𑁄 𑀯𑀺𑀦𑀺𑀯𑀢𑁆𑀢𑀺𑀢𑀫𑁂𑀯 𑀲𑀦𑁆𑀢𑁄𑀲𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀻’’𑀢𑀺 𑀆𑀳. 𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀧𑀓𑀢𑀺𑀤𑀼𑀩𑁆𑀩𑀮𑀸𑀤𑀻𑀦𑀁 𑀕𑀭𑀼𑀘𑀻𑀯𑀭𑀁 𑀦 𑀨𑀸𑀲𑀼𑀪𑀸𑀯𑀸𑀯𑀳𑀁 𑀲𑀭𑀻𑀭𑀩𑀸𑀥𑀸𑀯𑀳𑀜𑁆𑀘 𑀳𑁄𑀢𑀻𑀢𑀺 𑀧𑀬𑁄𑀚𑀦𑀯𑀲𑁂𑀦, 𑀦𑀸𑀢𑁆𑀭𑀺𑀘𑁆𑀙𑀢𑀸𑀤𑀺𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸. 𑀮𑀳𑀼𑀓𑀘𑀻𑀯𑀭𑀧𑀭𑀺𑀪𑁄𑀕𑁂 𑀲𑀦𑁆𑀢𑁄𑀲𑀯𑀺𑀭𑁄𑀥𑀺 𑀦 𑀳𑁄𑀢𑀻𑀢𑀺 𑀆𑀳 ‘‘𑀮𑀳𑀼𑀓𑁂𑀦 𑀬𑀸𑀧𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀻’’𑀢𑀺. 𑀫𑀳𑀕𑁆𑀖𑀘𑀻𑀯𑀭𑀁 𑀩𑀳𑀽𑀦𑀺 𑀯𑀸 𑀘𑀻𑀯𑀭𑀸𑀦𑀺 𑀮𑀪𑀺𑀢𑁆𑀯𑀸 𑀢𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀕𑀳𑀡𑀁 𑀬𑀣𑀸𑀲𑀸𑀭𑀼𑀧𑁆𑀧𑀦𑀬𑁂 𑀞𑀺𑀢𑀢𑁆𑀢𑀸 𑀦 𑀲𑀦𑁆𑀢𑁄𑀲𑀯𑀺𑀭𑁄𑀥𑀻𑀢𑀺 𑀆𑀳 ‘‘𑀢𑁂𑀲𑀁…𑀧𑁂… 𑀥𑀸𑀭𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀻’’𑀢𑀺. 𑀏𑀯𑀁 𑀲𑁂𑀲𑀧𑀘𑁆𑀘𑀬𑁂𑀲𑀼 𑀬𑀣𑀸𑀩𑀮𑀬𑀣𑀸𑀲𑀸𑀭𑀼𑀧𑁆𑀧𑀦𑀺𑀤𑁆𑀤𑁂𑀲𑁂𑀲𑀼 𑀅𑀧𑀺-𑀲𑀤𑁆𑀤𑀕𑁆𑀕𑀳𑀡𑁂 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀓𑀢𑀻𑀢𑀺 𑀯𑀸𑀘𑀸𑀧𑀓𑀢𑀺𑀆𑀤𑀺𑀓𑀸. 𑀅𑀯𑀲𑁂𑀲𑀦𑀺𑀤𑁆𑀤𑀸𑀬 𑀅𑀪𑀺𑀪𑀽𑀢𑀢𑁆𑀢𑀸 𑀧𑀝𑀺𑀩𑀼𑀚𑁆𑀛𑀢𑁄 𑀲𑀳𑀲𑀸 𑀧𑀸𑀧𑀓𑀸 𑀯𑀺𑀢𑀓𑁆𑀓𑀸 𑀧𑀸𑀢𑀼𑀪𑀯𑀦𑁆𑀢𑀻𑀢𑀺.

𑀫𑀼𑀢𑁆𑀢𑀳𑀭𑀻𑀢𑀓𑀦𑁆𑀢𑀺 𑀕𑁄𑀫𑀼𑀢𑁆𑀢𑀧𑀭𑀺𑀪𑀸𑀯𑀺𑀢𑀁, 𑀧𑀽𑀢𑀺𑀪𑀸𑀯𑁂𑀦 𑀯𑀸 𑀙𑀟𑁆𑀟𑀺𑀢𑀢𑁆𑀢𑀸 𑀫𑀼𑀢𑁆𑀢𑀳𑀭𑀻𑀢𑀓𑀁. 𑀩𑀼𑀤𑁆𑀥𑀸𑀤𑀻𑀳𑀺 𑀯𑀡𑁆𑀡𑀺𑀢𑀦𑁆𑀢𑀺 ‘‘𑀧𑀽𑀢𑀺𑀫𑀼𑀢𑁆𑀢𑀪𑁂𑀲𑀚𑁆𑀚𑀁 𑀦𑀺𑀲𑁆𑀲𑀸𑀬 𑀬𑀸 𑀧𑀩𑁆𑀩𑀚𑁆𑀚𑀸’’𑀢𑀺𑀆𑀤𑀺𑀦𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀤𑀻𑀳𑀺 𑀧𑀲𑀢𑁆𑀣𑀁.

𑀏𑀓𑁄 𑀏𑀓𑀘𑁆𑀘𑁄 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺, 𑀲𑀦𑁆𑀢𑁄𑀲𑀲𑁆𑀲 𑀯𑀡𑁆𑀡𑀁 𑀦 𑀓𑀣𑁂𑀢𑀺 𑀲𑁂𑀬𑁆𑀬𑀣𑀸𑀧𑀺 𑀆𑀬𑀲𑁆𑀫𑀸 𑀩𑀸𑀓𑀼𑀮𑀢𑁆𑀣𑁂𑀭𑁄. 𑀦 𑀲𑀦𑁆𑀢𑀼𑀝𑁆𑀝𑁄 𑀳𑁄𑀢𑀺, 𑀲𑀦𑁆𑀢𑁄𑀲𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑀺 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄. 𑀦𑁂𑀯 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺, 𑀦 𑀲𑀦𑁆𑀢𑁄𑀲𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑀺 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀮𑀸𑀴𑀼𑀤𑀸𑀬𑀻. 𑀅𑀬𑀦𑁆𑀢𑀺 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄. 𑀅𑀦𑁂𑀲𑀦𑀦𑁆𑀢𑀺 𑀅𑀬𑁄𑀦𑀺𑀲𑁄 𑀫𑀺𑀘𑁆𑀙𑀸𑀚𑀻𑀯𑀯𑀲𑁂𑀦 𑀧𑀘𑁆𑀘𑀬𑀧𑀭𑀺𑀬𑁂𑀲𑀦𑀁. 𑀉𑀢𑁆𑀢𑀲𑀢𑀻𑀢𑀺 ‘‘𑀓𑀣𑀁 𑀦𑀼 𑀔𑁄 𑀮𑀪𑁂𑀬𑁆𑀬’’𑀦𑁆𑀢𑀺 𑀚𑀸𑀢𑀼𑀢𑁆𑀢𑀸𑀲𑁂𑀦 𑀉𑀢𑁆𑀢𑀲𑀢𑀺. 𑀢𑀣𑀸 𑀧𑀭𑀺𑀢𑀲𑁆𑀲𑀢𑀺. 𑀅𑀬𑀦𑁆𑀢𑀺 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄. 𑀏𑀯𑀁 𑀬𑀣𑀸𑀯𑀼𑀢𑁆𑀢𑀏𑀓𑀘𑁆𑀘𑀪𑀺𑀓𑁆𑀔𑀼 𑀯𑀺𑀬 𑀦 𑀧𑀭𑀺𑀢𑀲𑁆𑀲𑀢𑀺, 𑀅𑀮𑀸𑀪𑀧𑀭𑀺𑀢𑁆𑀢𑀸𑀲𑁂𑀦 𑀯𑀺𑀖𑀸𑀢𑀧𑁆𑀧𑀢𑁆𑀢𑀺𑀬𑀸 𑀦 𑀧𑀭𑀺𑀢𑁆𑀢𑀸𑀲𑀁 𑀆𑀧𑀚𑁆𑀚𑀢𑀺. 𑀮𑁄𑀪𑁄𑀬𑁂𑀯 𑀆𑀭𑀫𑁆𑀫𑀡𑁂𑀦 𑀲𑀤𑁆𑀥𑀺𑀁 𑀕𑀦𑁆𑀣𑀦𑀝𑁆𑀞𑁂𑀦 𑀩𑀚𑁆𑀛𑀦𑀝𑁆𑀞𑁂𑀦 𑀕𑁂𑀥𑁄 𑀮𑁄𑀪𑀕𑁂𑀥𑁄. 𑀫𑀼𑀘𑁆𑀙𑀦𑁆𑀢𑀺 𑀕𑁂𑀥𑀁 𑀫𑁄𑀫𑀽𑀳𑀢𑁆𑀢𑀪𑀸𑀯𑀁. 𑀆𑀤𑀻𑀦𑀯𑀦𑁆𑀢𑀺 𑀤𑁄𑀲𑀁. 𑀦𑀺𑀲𑁆𑀲𑀭𑀡𑀫𑁂𑀯𑀸𑀢𑀺 𑀘𑀻𑀯𑀭𑁂 𑀇𑀤𑀫𑀢𑁆𑀣𑀺𑀢𑀸𑀤𑀲𑁆𑀲𑀦𑀧𑀼𑀩𑁆𑀩𑀓𑀁 𑀅𑀮𑀕𑁆𑀕𑀪𑀸𑀯𑀲𑀗𑁆𑀔𑀸𑀢𑀦𑀺𑀬𑁆𑀬𑀸𑀦𑀫𑁂𑀯 𑀧𑀚𑀸𑀦𑀦𑁆𑀢𑁄. 𑀬𑀣𑀸𑀮𑀤𑁆𑀥𑀸𑀤𑀻𑀦𑀦𑁆𑀢𑀺 𑀬𑀣𑀸𑀮𑀤𑁆𑀥𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀁. 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁.

𑀬𑀣𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄𑀢𑀺 𑀅𑀢𑁆𑀢𑀦𑀸 𑀯𑀢𑁆𑀢𑀩𑁆𑀩𑀦𑀺𑀬𑀸𑀫𑁂𑀦 𑀯𑀤𑀢𑀺, 𑀪𑀕𑀯𑀢𑀸 𑀧𑀦 𑀯𑀢𑁆𑀢𑀩𑁆𑀩𑀦𑀺𑀬𑀸𑀫𑁂𑀦 ‘‘𑀬𑀣𑀸 𑀓𑀲𑁆𑀲𑀧𑁄 𑀪𑀺𑀓𑁆𑀔𑀽’’𑀢𑀺 𑀪𑀯𑀺𑀢𑀩𑁆𑀩𑀁. 𑀓𑀲𑁆𑀲𑀧𑁂𑀦 𑀦𑀺𑀤𑀲𑁆𑀲𑀦𑀪𑀽𑀢𑁂𑀦. 𑀓𑀣𑀦𑀁 𑀦𑀸𑀫 𑀪𑀸𑀭𑁄 ‘‘𑀫𑀼𑀢𑁆𑀢𑁄 𑀫𑁄𑀘𑁂𑀬𑁆𑀬’’𑀦𑁆𑀢𑀺 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀢𑁆𑀢𑀸. 𑀧𑀝𑀺𑀧𑀢𑁆𑀢𑀺𑀁 𑀧𑀭𑀺𑀧𑀽𑀭𑀁 𑀓𑀢𑁆𑀯𑀸 𑀧𑀽𑀭𑀡𑀁 𑀪𑀸𑀭𑁄 𑀲𑀢𑁆𑀣𑀼 𑀆𑀡𑀸𑀬 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀢𑁄.

𑀲𑀦𑁆𑀢𑀼𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀦𑁄𑀢𑁆𑀢𑀧𑁆𑀧𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁫. 𑀢𑁂𑀦 𑀭𑀳𑀺𑀢𑁄𑀢𑀺 𑀢𑁂𑀦 𑀲𑀫𑁆𑀫𑀸𑀯𑀸𑀬𑀸𑀫𑁂𑀦 𑀭𑀳𑀺𑀢𑁄. 𑀦𑀺𑀩𑁆𑀪𑀬𑁄𑀢𑀺 𑀪𑀬𑀭𑀳𑀺𑀢𑁄. 𑀓𑀼𑀲𑀮𑀸𑀦𑀼𑀧𑁆𑀧𑀸𑀤𑀦𑀫𑁆𑀧𑀺 𑀳𑀺 𑀲𑀸𑀯𑀚𑁆𑀚𑀫𑁂𑀯 𑀅𑀜𑁆𑀜𑀸𑀡𑀸𑀮𑀲𑀺𑀬𑀳𑁂𑀢𑀼𑀓𑀢𑁆𑀢𑀸. 𑀲𑀫𑁆𑀩𑀼𑀚𑁆𑀛𑀦𑀢𑁆𑀣𑀸𑀬𑀸𑀢𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀲𑀫𑁆𑀩𑀼𑀚𑁆𑀛𑀦𑀸𑀬. 𑀬𑁄𑀕𑁂𑀳𑀺 𑀔𑁂𑀫𑀁 𑀢𑁂𑀳𑀺 𑀅𑀦𑀼𑀧𑀤𑁆𑀤𑀼𑀢𑀢𑁆𑀢𑀸.

𑀫𑀦𑀼𑀜𑁆𑀜𑀯𑀢𑁆𑀣𑀼𑀦𑁆𑀢𑀺 𑀫𑀦𑁄𑀭𑀫𑀁 𑀮𑁄𑀪𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀁. 𑀬𑀣𑀸 𑀯𑀸 𑀢𑀣𑀸 𑀯𑀸𑀢𑀺 𑀲𑀼𑀪𑀲𑀼𑀔𑀸𑀤𑀺𑀯𑀲𑁂𑀦. 𑀢𑁂𑀢𑀺 𑀮𑁄𑀪𑀸𑀤𑀬𑁄. 𑀅𑀦𑀼𑀧𑁆𑀧𑀦𑁆𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸 𑀢𑀣𑀸𑀭𑀽𑀧𑁂 𑀯𑀢𑁆𑀣𑀸𑀭𑀫𑁆𑀫𑀡𑁂 𑀢𑀣𑀸 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩𑀢𑁆𑀢𑀸. 𑀅𑀜𑁆𑀜𑀣𑀸𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀢𑁆𑀣𑀸𑀭𑀫𑁆𑀫𑀡𑁂𑀳𑀺 𑀅𑀬𑁄𑀚𑁂𑀢𑁆𑀯𑀸 𑀕𑀬𑁆𑀳𑀫𑀸𑀦𑁂. 𑀯𑀢𑁆𑀣𑀼𑀫𑁆𑀳𑀻𑀢𑀺 𑀉𑀧𑀝𑁆𑀞𑀸𑀓𑀸𑀤𑀺𑀘𑀻𑀯𑀭𑀸𑀤𑀺𑀯𑀢𑁆𑀣𑀼𑀫𑁆𑀳𑀺. 𑀆𑀭𑀫𑁆𑀫𑀡𑁂𑀢𑀺 𑀫𑀦𑀸𑀧𑀺𑀬𑀸𑀤𑀺𑀪𑁂𑀤𑁂 𑀆𑀭𑀫𑁆𑀫𑀡𑁂. 𑀢𑀸𑀤𑀺𑀲𑁂𑀦 𑀧𑀘𑁆𑀘𑀬𑁂𑀦𑀸𑀢𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀢𑀺𑀯𑁄𑀲𑁆𑀲𑀕𑁆𑀕𑀸𑀤𑀺𑀧𑀘𑁆𑀘𑀬𑁂𑀦. 𑀇𑀫𑁂𑀢𑀺 𑀯𑀼𑀢𑁆𑀢𑀦𑀬𑁂𑀦 𑀧𑀘𑁆𑀘𑀬𑀮𑀸𑀪𑁂𑀦 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀧𑀸𑀴𑀺𑀬𑀁 𑀢𑀣𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀉𑀧𑁆𑀧𑀚𑁆𑀚𑀫𑀸𑀦𑀢𑀸𑀬 𑀦𑀧𑁆𑀧𑀳𑀻𑀬𑀦𑁆𑀢𑀺 𑀦𑀸𑀫. 𑀅𑀦𑀼𑀧𑁆𑀧𑀸𑀤𑁄 𑀳𑀺 𑀧𑀭𑀫𑀢𑁆𑀣𑀢𑁄 𑀧𑀳𑀸𑀦𑀁 𑀓𑀣𑀺𑀢𑀁, 𑀢𑀲𑁆𑀫𑀸 𑀢𑀢𑁆𑀣 𑀓𑀣𑀺𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀧𑁆𑀧𑀝𑀺𑀮𑀤𑁆𑀥𑀸𑀢𑀺 𑀅𑀦𑀼𑀧𑁆𑀧𑀢𑁆𑀢𑀺𑀬𑀸. 𑀢𑁂𑀢𑀺 𑀬𑀣𑀸𑀯𑀼𑀢𑁆𑀢𑀲𑀻𑀮𑀸𑀤𑀺𑀅𑀦𑀯𑀚𑁆𑀚𑀥𑀫𑁆𑀫𑀸. 𑀧𑀝𑀺𑀮𑀤𑁆𑀥𑀸𑀢𑀺 𑀅𑀥𑀺𑀕𑀢𑀸. ‘‘𑀲𑀻𑀮𑀸𑀤𑀺𑀥𑀫𑁆𑀫𑀸’’𑀢𑀺 𑀏𑀢𑁆𑀣 𑀬𑀤𑀺 𑀫𑀕𑁆𑀕𑀨𑀮𑀸𑀦𑀺𑀧𑀺 𑀕𑀳𑀺𑀢𑀸𑀦𑀺, 𑀅𑀣 𑀓𑀲𑁆𑀫𑀸 ‘‘𑀧𑀭𑀺𑀳𑀸𑀦𑀺𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺. 𑀇𑀫𑀲𑁆𑀲 𑀧𑀦 𑀲𑀫𑁆𑀫𑀧𑁆𑀧𑀥𑀸𑀦𑀲𑁆𑀲𑀸𑀢𑀺 𑀘𑀢𑀼𑀢𑁆𑀣𑀲𑁆𑀲 𑀲𑀫𑁆𑀫𑀧𑁆𑀧𑀥𑀸𑀦𑀲𑁆𑀲 𑀯𑀲𑁂𑀦. 𑀅𑀬𑀁 𑀤𑁂𑀲𑀦𑀸𑀢𑀺 ‘‘𑀉𑀧𑁆𑀧𑀦𑁆𑀦𑀸 𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀺𑀭𑀼𑀚𑁆𑀛𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’’𑀦𑁆𑀢𑀺 𑀅𑀬𑀁 𑀤𑁂𑀲𑀦𑀸 𑀓𑀢𑀸. 𑀤𑀼𑀢𑀺𑀬𑀫𑀕𑁆𑀕𑁄 𑀯𑀸…𑀧𑁂… 𑀲𑀁𑀯𑀢𑁆𑀢𑁂𑀬𑁆𑀬𑀸𑀢𑀺 𑀇𑀤𑀁 𑀆𑀬𑀢𑀺𑀁 𑀲𑀢𑁆𑀢𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀤𑀼𑀓𑁆𑀔𑀲𑀗𑁆𑀔𑀸𑀢𑀅𑀦𑀢𑁆𑀣𑀼𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀆𑀢𑀸𑀧𑀻 𑀑𑀢𑁆𑀢𑀧𑁆𑀧𑀻 𑀪𑀩𑁆𑀩𑁄 𑀲𑀫𑁆𑀩𑁄𑀥𑀸𑀬𑀸’’𑀢𑀺𑀆𑀤𑀺𑀯𑀘𑀦𑀢𑁄 ‘‘𑀇𑀫𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀓𑀣𑀺𑀢𑀸’’𑀢𑀺 𑀯𑀼𑀢𑁆𑀢𑀁.

𑀅𑀦𑁄𑀢𑁆𑀢𑀧𑁆𑀧𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀘𑀦𑁆𑀤𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁬. 𑀧𑀺𑀬𑀫𑀦𑀸𑀧𑀦𑀺𑀘𑁆𑀘𑀦𑀯𑀓𑀸𑀤𑀺𑀕𑀼𑀡𑁂𑀳𑀺 𑀘𑀦𑁆𑀤𑁄 𑀉𑀧𑀫𑀸 𑀏𑀢𑁂𑀲𑀦𑁆𑀢𑀺 𑀘𑀦𑁆𑀤𑀽𑀧𑀫𑀸. 𑀲𑀦𑁆𑀣𑀯𑀸𑀤𑀻𑀦𑀺 𑀧𑀤𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀺. 𑀧𑀭𑀺𑀬𑀼𑀝𑁆𑀞𑀸𑀦𑀁 𑀧𑀼𑀦 𑀘𑀺𑀢𑁆𑀢𑁂 𑀓𑀺𑀮𑁂𑀲𑀸𑀥𑀺𑀕𑀫𑁄. 𑀲𑀩𑁆𑀩𑁂𑀳𑀺𑀧𑀺 𑀧𑀤𑁂𑀳𑀺 𑀓𑀢𑁆𑀣𑀘𑀺 𑀲𑀢𑁆𑀢𑁂 𑀅𑀦𑀼𑀭𑁄𑀥𑀭𑁄𑀥𑀸𑀪𑀸𑀯𑀫𑀸𑀳. 𑀅𑀢𑁆𑀢𑀦𑁄 𑀧𑀦 𑀲𑁄𑀫𑁆𑀫𑀪𑀸𑀯𑁂𑀦 𑀫𑀳𑀸𑀚𑀦𑀲𑁆𑀲 𑀧𑀺𑀬𑁄 𑀫𑀦𑀸𑀧𑁄. 𑀬𑀤𑀢𑁆𑀣𑀫𑁂𑀢𑁆𑀣 𑀘𑀦𑁆𑀤𑀽𑀧𑀫𑀸 𑀆𑀳𑀝𑀸, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯’’𑀦𑁆𑀢𑀺𑀆𑀤𑀺𑀫𑀸𑀳. 𑀦 𑀓𑁂𑀯𑀮𑀁 𑀘𑀦𑁆𑀤𑀽𑀧𑀫𑀢𑀸𑀬 𑀏𑀢𑁆𑀢𑀓𑁄 𑀏𑀯 𑀕𑀼𑀡𑁄, 𑀅𑀣 𑀔𑁄 𑀅𑀜𑁆𑀜𑁂𑀧𑀺 𑀲𑀦𑁆𑀢𑀻𑀢𑀺 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀫𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀬𑀣𑀸. 𑀘𑀦𑁆𑀤𑁄 𑀮𑁄𑀓𑀸𑀦𑀼𑀕𑁆𑀕𑀳𑁂𑀦 𑀅𑀚𑀯𑀻𑀣𑀺𑀆𑀤𑀺𑀓𑀸 𑀦𑀸𑀦𑀸𑀯𑀻𑀣𑀺𑀬𑁄 𑀧𑀝𑀺𑀧𑀚𑁆𑀚𑀢𑀺, 𑀏𑀯𑀁 𑀪𑀺𑀓𑁆𑀔𑀼 𑀢𑀁 𑀢𑀁 𑀤𑀺𑀲𑀁 𑀉𑀧𑀕𑀘𑁆𑀙𑀢𑀺 𑀓𑀼𑀮𑀸𑀦𑀼𑀤𑁆𑀤𑀬𑀸𑀬. 𑀬𑀣𑀸 𑀘𑀦𑁆𑀤𑁄 𑀓𑀡𑁆𑀳𑀧𑀓𑁆𑀔𑀢𑁄 𑀲𑀼𑀓𑁆𑀓𑀧𑀓𑁆𑀔𑀁 𑀉𑀧𑀕𑀘𑁆𑀙𑀦𑁆𑀢𑁄 𑀓𑀮𑀸𑀳𑀺 𑀯𑀟𑁆𑀠𑀫𑀸𑀦𑁄 𑀳𑀼𑀢𑁆𑀯𑀸 𑀦𑀺𑀘𑁆𑀘𑀦𑀯𑁄 𑀳𑁄𑀢𑀺, 𑀏𑀯𑀁 𑀪𑀺𑀓𑁆𑀔𑀼 𑀓𑀡𑁆𑀳𑀧𑀓𑁆𑀔𑀁 𑀧𑀳𑀸𑀬 𑀲𑀼𑀓𑁆𑀓𑀧𑀓𑁆𑀔𑀁 𑀉𑀧𑀕𑀦𑁆𑀢𑁆𑀯𑀸 𑀕𑀼𑀡𑁂𑀳𑀺 𑀯𑀟𑁆𑀠𑀫𑀸𑀦𑁄 𑀮𑁄𑀓𑀲𑁆𑀲 𑀯𑀸 𑀧𑀸𑀫𑁄𑀚𑁆𑀚𑀧𑀸𑀲𑀁𑀲𑀢𑁆𑀣𑁄 𑀦𑀺𑀘𑁆𑀘𑀦𑀯𑀢𑀸𑀬 𑀘𑀦𑁆𑀤𑀲𑀫𑀘𑀺𑀢𑁆𑀢𑁄 𑀅𑀥𑀼𑀦𑀼𑀧𑀲𑀫𑁆𑀧𑀦𑁆𑀦𑁄 𑀯𑀺𑀬 𑀘 𑀦𑀺𑀘𑁆𑀘𑀦𑀯𑁄 𑀳𑀼𑀢𑁆𑀯𑀸 𑀘𑀭𑀢𑀺.

𑀅𑀧𑀓𑀲𑁆𑀲𑀺𑀢𑁆𑀯𑀸𑀢𑀺 𑀓𑀺𑀮𑁂𑀲𑀓𑀸𑀫𑀯𑀢𑁆𑀣𑀼𑀓𑀸𑀫𑁂𑀳𑀺 𑀯𑀺𑀯𑁂𑀘𑁂𑀢𑁆𑀯𑀸. 𑀢𑀁 𑀦𑁂𑀓𑁆𑀔𑀫𑁆𑀫𑀸𑀪𑀺𑀫𑀼𑀔𑀁 𑀓𑀸𑀬𑀘𑀺𑀢𑁆𑀢𑀸𑀦𑀁 𑀆𑀓𑀟𑁆𑀠𑀦𑀁 𑀓𑀸𑀬𑀢𑁄 𑀅𑀧𑀦𑀬𑀦𑀜𑁆𑀘 𑀳𑁄𑀢𑀻𑀢𑀺 𑀆𑀳 ‘‘𑀆𑀓𑀟𑁆𑀠𑀺𑀢𑁆𑀯𑀸 𑀅𑀧𑀦𑁂𑀢𑁆𑀯𑀸𑀢𑀺 𑀅𑀢𑁆𑀣𑁄’’𑀢𑀺. 𑀘𑀢𑀼𑀓𑁆𑀓𑀜𑁆𑀘𑁂𑀢𑁆𑀣 𑀲𑀫𑁆𑀪𑀯𑀢𑀻𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀳𑀺 𑀪𑀺𑀓𑁆𑀔𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀦𑀺𑀘𑁆𑀘𑀦𑀯𑀬𑀸𑀢𑀺 ‘‘𑀦𑀺𑀘𑁆𑀘𑀦𑀯𑀓𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺. 𑀓-𑀲𑀤𑁆𑀤𑁂𑀦 𑀳𑀺 𑀧𑀤𑀁 𑀯𑀟𑁆𑀠𑀺𑀢𑀁, 𑀓-𑀓𑀸𑀭𑀲𑁆𑀲 𑀘 𑀬-𑀓𑀸𑀭𑀸𑀤𑁂𑀲𑁄. 𑀏𑀯𑀁 𑀯𑀺𑀘𑀭𑀺𑀁𑀲𑀽𑀢𑀺 𑀓𑀺𑀜𑁆𑀚𑀓𑁆𑀔𑀯𑀲𑁂𑀦 𑀧𑀭𑀺𑀕𑁆𑀕𑀳𑀸𑀪𑀸𑀯𑁂𑀦 𑀬𑀣𑀸 𑀇𑀫𑁂, 𑀏𑀯𑀁 𑀯𑀺𑀘𑀭𑀺𑀁𑀲𑀼 𑀅𑀜𑁆𑀜𑁂𑀢𑀺 𑀅𑀦𑀼𑀓𑀫𑁆𑀧𑀫𑀸𑀦𑀸.

𑀤𑁆𑀯𑁂𑀪𑀸𑀢𑀺𑀓𑀯𑀢𑁆𑀣𑀽𑀢𑀺 𑀤𑁆𑀯𑁂𑀪𑀸𑀢𑀺𑀓𑀢𑁆𑀣𑁂𑀭𑀧𑀝𑀺𑀩𑀤𑁆𑀥𑀁 𑀯𑀢𑁆𑀣𑀼𑀁. 𑀅𑀧𑁆𑀧𑀢𑀺𑀭𑀽𑀧𑀓𑀭𑀡𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀅𑀲𑀸𑀭𑀼𑀧𑁆𑀧𑀓𑀭𑀡𑀁. 𑀆𑀥𑀸𑀬𑀺𑀢𑁆𑀯𑀸𑀢𑀺 𑀆𑀭𑁄𑀧𑀦𑀁 𑀞𑀧𑁂𑀢𑁆𑀯𑀸. 𑀢𑀣𑀸𑀢𑀺 𑀬𑀣𑀸 𑀲𑀗𑁆𑀖𑀫𑀚𑁆𑀛𑁂 𑀕𑀡𑀫𑀚𑁆𑀛𑁂 𑀘, 𑀢𑀣𑀸 𑀯𑀼𑀟𑁆𑀠𑀢𑀭𑁂 𑀧𑀼𑀕𑁆𑀕𑀮𑁂 𑀅𑀧𑁆𑀧𑀢𑀺𑀭𑀽𑀧𑀓𑀭𑀡𑀁. 𑀏𑀯𑀫𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀦𑁆𑀢𑀭𑀖𑀭𑀧𑁆𑀧𑀯𑁂𑀲𑀦𑁂 𑀅𑀜𑁆𑀜𑀢𑁆𑀣 𑀘 𑀬𑀣𑀸𑀯𑀼𑀢𑁆𑀢𑀢𑁄 𑀅𑀜𑁆𑀜𑀁 𑀅𑀲𑀸𑀭𑀼𑀧𑁆𑀧𑀓𑀺𑀭𑀺𑀬𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣𑁂𑀯𑀸𑀢𑀺 𑀲𑀗𑁆𑀖𑀫𑀚𑁆𑀛𑁂 𑀕𑀡𑀫𑀚𑁆𑀛𑁂 𑀧𑀼𑀕𑁆𑀕𑀮𑀲𑁆𑀲 𑀘 𑀯𑀼𑀟𑁆𑀠𑀲𑁆𑀲 𑀲𑀦𑁆𑀢𑀺𑀓𑁂.

𑀬𑀣𑀸𑀯𑀼𑀢𑁆𑀢𑁂𑀲𑀼 𑀅𑀜𑁆𑀜𑁂𑀲𑀼 𑀘 𑀢𑁂𑀲𑀼 𑀞𑀸𑀦𑁂𑀲𑀼. 𑀧𑀸𑀧𑀺𑀘𑁆𑀙𑀢𑀸𑀧𑀺 𑀫𑀦𑁄𑀧𑀸𑀕𑀩𑁆𑀪𑀺𑀬𑀦𑁆𑀢𑀺 𑀏𑀢𑁂𑀦𑁂𑀯 𑀓𑁄𑀥𑀽𑀧𑀦𑀸𑀳𑀸𑀤𑀻𑀦𑀁 𑀲𑀫𑀼𑀤𑀸𑀘𑀸𑀭𑁄 𑀫𑀦𑁄𑀧𑀸𑀕𑀩𑁆𑀪𑀺𑀬𑀦𑁆𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑀏𑀓𑀢𑁄 𑀪𑀸𑀭𑀺𑀬𑀦𑁆𑀢𑀺 𑀧𑀺𑀝𑁆𑀞𑀺𑀧𑀲𑁆𑀲𑀢𑁄 𑀑𑀦𑀢𑀁. 𑀯𑀸𑀬𑀼𑀧𑀢𑁆𑀣𑀫𑁆𑀪𑀦𑁆𑀢𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀯𑀸𑀬𑀼𑀦𑀸 𑀉𑀧𑀢𑁆𑀣𑀫𑁆𑀪𑀦𑀁. 𑀅𑀦𑀼𑀩𑁆𑀩𑁂𑀚𑁂𑀢𑁆𑀯𑀸 𑀘𑀺𑀢𑁆𑀢𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀘𑀺𑀢𑁆𑀢𑀲𑁆𑀲 𑀳𑀺 𑀢𑀢𑁄 𑀅𑀦𑀼𑀩𑁆𑀩𑁂𑀚𑀦𑀁 𑀢𑀤𑀦𑀼𑀦𑀬𑀦𑀁. 𑀢𑁂𑀦𑀸𑀳 ‘‘𑀲𑀫𑁆𑀧𑀺𑀬𑀸𑀬𑀫𑀸𑀦𑁄 𑀑𑀮𑁄𑀓𑁂𑀢𑀻’’𑀢𑀺. 𑀯𑀸𑀬𑀼𑀧𑀢𑁆𑀣𑀫𑁆𑀪𑀓𑀁 𑀕𑀸𑀳𑀸𑀧𑁂𑀢𑁆𑀯𑀸𑀢𑀺 𑀓𑀸𑀬𑀁 𑀢𑀣𑀸 𑀉𑀧𑀢𑁆𑀣𑀫𑁆𑀪𑀓𑀁 𑀓𑀢𑁆𑀯𑀸.

𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀓𑀸𑀫𑀕𑀺𑀤𑁆𑀥𑀢𑀸𑀬 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑁄, 𑀅𑀯𑀺𑀲𑀼𑀤𑁆𑀥𑀲𑀻𑀮𑀸𑀘𑀸𑀭𑀢𑀸𑀬 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁄.

𑀅𑀗𑁆𑀕𑀼𑀮𑀻𑀳𑀺 𑀦𑀺𑀓𑁆𑀔𑀦𑁆𑀢𑀧𑀪𑀸 𑀆𑀓𑀸𑀲𑀲𑀜𑁆𑀘𑀮𑀦𑁂𑀦 𑀤𑀺𑀕𑀼𑀡𑀸 𑀳𑀼𑀢𑁆𑀯𑀸 𑀆𑀓𑀸𑀲𑁂 𑀯𑀺𑀘𑀭𑀺𑀁𑀲𑀽𑀢𑀺 𑀆𑀳 ‘‘𑀬𑀫𑀓𑀯𑀺𑀚𑁆𑀚𑀼𑀢𑀁 𑀘𑀸𑀭𑀬𑀫𑀸𑀦𑁄 𑀯𑀺𑀬𑀸’’𑀢𑀺. ‘‘𑀆𑀓𑀸𑀲𑁂 𑀧𑀸𑀡𑀺𑀁 𑀘𑀸𑀮𑁂𑀲𑀻’’𑀢𑀺 𑀧𑀤𑀲𑁆𑀲 𑀅𑀜𑁆𑀜𑀢𑁆𑀣 𑀅𑀦𑀸𑀕𑀢𑀢𑁆𑀢𑀸 ‘‘𑀅𑀲𑀫𑁆𑀪𑀺𑀦𑁆𑀦𑀧𑀤’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀫𑀦𑁄𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑁂𑀳𑀺 𑀕𑀳𑀺𑀢𑀫𑀦𑁄. 𑀬𑀜𑁆𑀳𑀺 𑀘𑀺𑀢𑁆𑀢𑀁 𑀅𑀦𑀯𑀚𑁆𑀚𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀳𑀺𑀢𑀁, 𑀢𑀁 𑀲𑀲𑀦𑁆𑀢𑀓𑀁 𑀳𑀺𑀢𑀲𑀼𑀔𑀸𑀯𑀳𑀢𑁆𑀢𑀸. 𑀢𑁂𑀦𑀸𑀳 ‘‘𑀲𑀓𑀫𑀦𑁄’’𑀢𑀺𑀆𑀤𑀺. 𑀦 𑀤𑁄𑀫𑀦𑀲𑁆𑀲𑁂𑀦…𑀧𑁂… 𑀕𑀳𑀺𑀢𑀫𑀦𑁄 𑀲𑀓𑀘𑀺𑀢𑁆𑀢𑀲𑁆𑀲 𑀢𑀩𑁆𑀩𑀺𑀭𑀼𑀤𑁆𑀥𑀢𑁆𑀢𑀸. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 ‘‘𑀇𑀤𑀸𑀦𑀺 𑀬𑁄 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑁄’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯.

𑀧𑀲𑀦𑁆𑀦𑀸𑀓𑀸𑀭𑀦𑁆𑀢𑀺 𑀧𑀲𑀦𑁆𑀦𑁂𑀳𑀺 𑀓𑀸𑀢𑀩𑁆𑀩𑀓𑀺𑀭𑀺𑀬𑀁. 𑀢𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺 ‘‘𑀘𑀻𑀯𑀭𑀸𑀤𑀬𑁄 𑀧𑀘𑁆𑀘𑀬𑁂 𑀤𑀤𑁂𑀬𑁆𑀬𑀼’’𑀦𑁆𑀢𑀺. 𑀢𑀣𑀪𑀸𑀯𑀸𑀬𑀸𑀢𑀺 𑀬𑀤𑀢𑁆𑀣𑀁 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀬𑀤𑀢𑁆𑀣𑀜𑁆𑀘 𑀲𑀸𑀲𑀦𑁂 𑀧𑀩𑁆𑀩𑀚𑁆𑀚𑀸, 𑀢𑀤𑀢𑁆𑀣𑀸𑀬. 𑀭𑀓𑁆𑀔𑀡𑀪𑀸𑀯𑀦𑁆𑀢𑀺 𑀅𑀧𑀸𑀬𑀪𑀬𑀢𑁄 𑀘 𑀭𑀓𑁆𑀔𑀡𑀚𑁆𑀛𑀸𑀲𑀬𑀁. 𑀘𑀦𑁆𑀤𑁄𑀧𑀫𑀸𑀤𑀺𑀯𑀲𑁂𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀓𑀸𑀲𑁂 𑀘𑀮𑀺𑀢𑀧𑀸𑀡𑀺 𑀯𑀺𑀬 𑀓𑀢𑁆𑀣𑀘𑀺 𑀅𑀮𑀕𑁆𑀕𑀢𑀸𑀬 𑀧𑀭𑀺𑀲𑀼𑀤𑁆𑀥𑀚𑁆𑀛𑀸𑀲𑀬𑀢𑀸 𑀲𑀢𑁆𑀢𑁂𑀲𑀼 𑀓𑀸𑀭𑀼𑀜𑁆𑀜𑀦𑁆𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄.

𑀘𑀦𑁆𑀤𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀓𑀼𑀮𑀽𑀧𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁭. 𑀓𑀼𑀮𑀸𑀦𑀺 𑀉𑀧𑀕𑀘𑁆𑀙𑀢𑀻𑀢𑀺 𑀓𑀼𑀮𑀽𑀧𑀓𑁄. 𑀲𑀦𑁆𑀤𑀻𑀬𑀢𑀻𑀢𑀺 𑀲𑀩𑁆𑀩𑀲𑁄 𑀤𑀻𑀬𑀢𑀺, 𑀅𑀯𑀔𑀡𑁆𑀟𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀲𑀸 𑀧𑀦 𑀅𑀯𑀔𑀡𑁆𑀟𑀺𑀬𑀦𑀸 𑀤𑀼𑀓𑁆𑀔𑀸𑀧𑀦𑀸 𑀅𑀝𑁆𑀝𑀺𑀬𑀦𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀝𑁆𑀝𑀻𑀬𑀢𑀻’’𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀲𑁄 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀬𑀢𑀻’’𑀢𑀺. 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀲𑁆𑀲 𑀅𑀦𑀼𑀲𑀭𑀡𑁂𑀦.

𑀓𑀼𑀮𑀽𑀧𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀚𑀺𑀡𑁆𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁮. 𑀙𑀺𑀦𑁆𑀦𑀪𑀺𑀦𑁆𑀦𑀝𑁆𑀞𑀸𑀦𑁂 𑀙𑀺𑀤𑁆𑀤𑀲𑁆𑀲 𑀅𑀧𑀼𑀣𑀼𑀮𑀢𑁆𑀢𑀸 𑀅𑀕𑁆𑀕𑀴𑀁 𑀅𑀤𑀢𑁆𑀯𑀸𑀯 𑀲𑀼𑀢𑁆𑀢𑁂𑀦 𑀲𑀁𑀲𑀺𑀩𑁆𑀩𑀦𑀫𑀢𑁆𑀢𑁂𑀦 𑀅𑀕𑁆𑀕𑀴𑀤𑀸𑀦𑁂𑀦 𑀘 𑀙𑀺𑀤𑁆𑀤𑁂 𑀧𑀼𑀣𑀼𑀮𑁂. 𑀦𑀺𑀩𑁆𑀩𑀲𑀦𑀸𑀦𑀻𑀢𑀺 𑀘𑀺𑀭𑀦𑀺𑀲𑁂𑀯𑀺𑀢𑀯𑀲𑀦𑀓𑀺𑀘𑁆𑀘𑀸𑀦𑀺, 𑀧𑀭𑀺𑀪𑁄𑀕𑀚𑀺𑀡𑁆𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑁂…𑀧𑁂… 𑀮𑀤𑁆𑀥𑀦𑀸𑀫𑀸𑀦𑀻’’𑀢𑀺, 𑀲𑀜𑁆𑀜𑀸𑀧𑀼𑀩𑁆𑀩𑀓𑁄 𑀯𑀺𑀥𑀺 𑀅𑀦𑀺𑀘𑁆𑀘𑁄𑀢𑀺 ‘‘𑀕𑀳𑀧𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁 𑀬𑀣𑀸 ‘‘𑀯𑀻𑀭𑀺𑀬’’𑀦𑁆𑀢𑀺.

𑀲𑁂𑀦𑀸𑀧𑀢𑀺𑀦𑁆𑀢𑀺 𑀲𑁂𑀦𑀸𑀧𑀢𑀺𑀪𑀸𑀯𑀺𑀦𑀁, 𑀲𑁂𑀦𑀸𑀧𑀘𑁆𑀘𑀸𑀭𑀳𑀦𑁆𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦𑀸𑀢𑀺 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀓𑀫𑁆𑀫𑁂𑀦. 𑀲𑁄𑀢𑀺 𑀲𑀢𑁆𑀣𑀸. 𑀢𑀲𑁆𑀫𑀺𑀦𑁆𑀢𑀺 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂 𑀓𑀭𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀓𑀲𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀬𑀤𑀺 𑀲𑀢𑁆𑀣𑀸 𑀥𑀼𑀢𑀗𑁆𑀕𑀸𑀦𑀺 𑀦 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑀼𑀓𑀸𑀫𑁄, 𑀅𑀣 𑀓𑀲𑁆𑀫𑀸 ‘‘𑀚𑀺𑀡𑁆𑀡𑁄𑀲𑀺 𑀤𑀸𑀦𑀺 𑀢𑁆𑀯’’𑀦𑁆𑀢𑀺𑀆𑀤𑀺𑀫𑀯𑁄𑀘𑀸𑀢𑀺 𑀆𑀳 ‘‘𑀬𑀣𑀸 𑀧𑀦𑀸’’𑀢𑀺𑀆𑀤𑀺.

𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀦𑁆𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀨𑀸𑀲𑀼𑀯𑀺𑀳𑀸𑀭𑀁. 𑀅𑀫𑀸𑀦𑀼𑀲𑀺𑀓𑀸 𑀲𑀯𑀦𑀭𑀢𑀻𑀢𑀺 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬 𑀅𑀭𑀜𑁆𑀜𑀲𑀤𑁆𑀤𑀼𑀧𑁆𑀧𑀢𑁆𑀢𑀺𑀬𑀸 𑀅𑀭𑀜𑁆𑀜𑁂𑀳𑀁 𑀯𑀲𑀸𑀫𑀻𑀢𑀺 𑀯𑀺𑀯𑁂𑀓𑀯𑀸𑀲𑀽𑀧𑀦𑀺𑀲𑁆𑀲𑀬𑀸𑀥𑀻𑀦𑀲𑀤𑁆𑀤𑀲𑀯𑀦𑀧𑀘𑁆𑀘𑀬𑀸 𑀥𑀫𑁆𑀫𑀭𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀅𑀧𑀭𑁄𑀢𑀺 𑀅𑀜𑁆𑀜𑁄, 𑀤𑀼𑀢𑀺𑀬𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣𑁂𑀯𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀏𑀓𑀲𑁆𑀲 𑀯𑀺𑀳𑀭𑀡𑀝𑁆𑀞𑀸𑀦𑁂 𑀯𑀺𑀳𑀭𑀡𑀲𑀫𑀬𑁂 𑀘 𑀨𑀸𑀲𑀼 𑀪𑀯𑀢𑀺 𑀘𑀺𑀢𑁆𑀢𑀯𑀺𑀯𑁂𑀓𑀲𑀫𑁆𑀪𑀯𑀢𑁄. 𑀢𑁂𑀦𑀸𑀳 ‘‘𑀏𑀓𑀲𑁆𑀲 𑀭𑀫𑀢𑁄 𑀯𑀦𑁂’’𑀢𑀺.

𑀢𑀣𑀸𑀢𑀺 𑀬𑀣𑀸 𑀆𑀭𑀜𑁆𑀜𑀺𑀓𑀲𑁆𑀲 𑀭𑀢𑀺, 𑀢𑀣𑀸 𑀧𑀺𑀡𑁆𑀟𑀧𑀸𑀢𑀺𑀓𑀲𑁆𑀲 𑀮𑀩𑁆𑀪𑀢𑀺 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼. 𑀅𑀧𑀺𑀡𑁆𑀟𑀧𑀸𑀢𑀺𑀓𑀸𑀥𑀻𑀦𑁄 𑀇𑀢𑀭𑀲𑁆𑀲 𑀯𑀺𑀲𑁂𑀲𑀚𑁄𑀢𑀓𑁄𑀢𑀺 𑀢𑀫𑁂𑀯𑀲𑁆𑀲 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀓𑀸𑀮𑀘𑀸𑀭𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀫𑁆𑀳𑀸𑀓𑀁 𑀲𑀮𑀸𑀓𑀁 𑀕𑀳𑁂𑀢𑁆𑀯𑀸 𑀪𑀢𑁆𑀢𑀢𑁆𑀣𑀸𑀬 𑀕𑁂𑀳𑀁 𑀅𑀦𑀸𑀕𑀘𑁆𑀙𑀦𑁆𑀢𑀲𑁆𑀲 𑀲𑀢𑁆𑀢𑀸𑀳𑀁 𑀦 𑀧𑀸𑀢𑁂𑀢𑀩𑁆𑀩𑀦𑁆𑀢𑀺 𑀲𑀸𑀫𑀺𑀓𑁂𑀳𑀺 𑀤𑀺𑀦𑁆𑀦𑀢𑁆𑀢𑀸 𑀲𑀢𑁆𑀢𑀸𑀳𑀁 𑀲𑀮𑀸𑀓𑀁 𑀦 𑀮𑀪𑀢𑀺, 𑀦 𑀓𑀢𑀺𑀓𑀯𑀲𑁂𑀦. 𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑁂 𑀅𑀯𑀢𑁆𑀢𑀦𑀢𑁄 ‘‘𑀬𑀲𑁆𑀲 𑀘𑁂𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀞𑀫𑀢𑀭𑀁 𑀓𑀸𑀢𑀩𑁆𑀩𑀁 𑀬𑀁, 𑀢𑀁 𑀯𑀢𑁆𑀢𑀁, 𑀇𑀢𑀭𑀁 𑀧𑀝𑀺𑀯𑀢𑁆𑀢𑀁. 𑀫𑀳𑀦𑁆𑀢𑀁 𑀯𑀸 𑀯𑀢𑁆𑀢𑀁, 𑀔𑀼𑀤𑁆𑀤𑀓𑀁 𑀧𑀝𑀺𑀯𑀢𑁆𑀢𑀁. 𑀓𑁂𑀘𑀺 ‘‘𑀯𑀢𑁆𑀢𑀧𑀝𑀺𑀧𑀢𑁆𑀢𑀺’’𑀦𑁆𑀢𑀺 𑀧𑀞𑀦𑁆𑀢𑀺, 𑀯𑀢𑁆𑀢𑀲𑁆𑀲 𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀉𑀤𑁆𑀥𑀭𑀡-𑀅𑀢𑀺𑀳𑀭𑀡-𑀯𑀻𑀢𑀺𑀳𑀭𑀡𑀯𑁄𑀲𑁆𑀲𑀚𑁆𑀚𑀦-𑀲𑀦𑁆𑀦𑀺𑀓𑁆𑀔𑁂𑀧𑀦-𑀲𑀦𑁆𑀦𑀺𑀭𑀼𑀫𑁆𑀪𑀦𑀸𑀦𑀁 𑀯𑀲𑁂𑀦 𑀙 𑀓𑁄𑀝𑁆𑀞𑀸𑀲𑁂. 𑀕𑀭𑀼𑀪𑀸𑀯𑁂𑀦𑀸𑀢𑀺 𑀣𑀺𑀭𑀪𑀸𑀯𑁂𑀦.

‘‘𑀅𑀫𑀼𑀓𑀲𑁆𑀫𑀺𑀁 𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑀸 𑀩𑀳𑀼𑀁 𑀯𑀲𑁆𑀲𑀯𑀸𑀲𑀺𑀓𑀁 𑀮𑀪𑀦𑁆𑀢𑀻’’𑀢𑀺 𑀢𑀣𑀸 𑀦 𑀯𑀲𑁆𑀲𑀯𑀸𑀲𑀺𑀓𑀁 𑀧𑀭𑀺𑀬𑁂𑀲𑀦𑁆𑀢𑁄 𑀘𑀭𑀢𑀺 𑀯𑀲𑁆𑀲𑀯𑀸𑀲𑀺𑀓𑀲𑁆𑀲𑁂𑀯 𑀅𑀕𑁆𑀕𑀳𑀡𑀢𑁄. 𑀢𑀲𑁆𑀫𑀸 𑀲𑁂𑀦𑀸𑀲𑀦𑀨𑀸𑀲𑀼𑀓𑀁𑀬𑁂𑀯 𑀘𑀺𑀦𑁆𑀢𑁂𑀢𑀺. 𑀢𑁂𑀦 𑀩𑀳𑀼𑀧𑀭𑀺𑀓𑁆𑀔𑀸𑀭𑀪𑀸𑀯𑁂𑀦 𑀨𑀸𑀲𑀼𑀯𑀺𑀳𑀸𑀭𑁄 𑀦𑀢𑁆𑀣𑀺 𑀧𑀭𑀺𑀓𑁆𑀔𑀸𑀭𑀸𑀦𑀁 𑀭𑀓𑁆𑀔𑀡𑀧𑀝𑀺𑀚𑀕𑁆𑀕𑀦𑀸𑀤𑀺𑀤𑀼𑀓𑁆𑀔𑀩𑀳𑀼𑀮𑀢𑀸𑀬. 𑀅𑀧𑁆𑀧𑀺𑀘𑁆𑀙𑀸𑀤𑀻𑀦𑀦𑁆𑀢𑀺 𑀅𑀧𑁆𑀧𑀺𑀘𑁆𑀙𑀲𑀦𑁆𑀢𑀼𑀝𑁆𑀞𑀸𑀤𑀻𑀦𑀁𑀬𑁂𑀯 𑀮𑀩𑁆𑀪𑀢𑀺 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄.

𑀚𑀺𑀡𑁆𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀑𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁯. 𑀅𑀢𑁆𑀢𑀦𑁄 𑀞𑀸𑀦𑁂𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀑𑀯𑀸𑀤𑀓𑀯𑀺𑀜𑁆𑀜𑀸𑀧𑀓𑀪𑀸𑀯𑁂𑀦 𑀅𑀢𑁆𑀢𑀦𑁄 𑀫𑀳𑀸𑀲𑀸𑀯𑀓𑀝𑁆𑀞𑀸𑀦𑁂 𑀞𑀧𑀦𑀢𑁆𑀣𑀁. 𑀅𑀣 𑀯𑀸 𑀬𑀲𑁆𑀫𑀸 ‘‘𑀅𑀳𑀁 𑀤𑀸𑀦𑀺 𑀦 𑀘𑀺𑀭𑀁 𑀞𑀲𑁆𑀲𑀸𑀫𑀺, 𑀢𑀣𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸, 𑀅𑀬𑀁 𑀧𑀦 𑀯𑀻𑀲𑀁𑀯𑀲𑁆𑀲𑀢𑀸𑀬𑀼𑀓𑁄, 𑀑𑀯𑀤𑀦𑁆𑀢𑁄 𑀅𑀦𑀼𑀲𑀸𑀲𑀦𑁆𑀢𑁄 𑀫𑀫𑀘𑁆𑀘𑀬𑁂𑀦 𑀪𑀺𑀓𑁆𑀔𑀽𑀦𑀁 𑀫𑀬𑀸 𑀓𑀸𑀢𑀩𑁆𑀩𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀪𑀕𑀯𑀸 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀞𑀸𑀦𑁂𑀢𑀺 𑀲𑀢𑁆𑀣𑀸𑀭𑀸 𑀓𑀸𑀢𑀩𑁆𑀩𑀑𑀯𑀸𑀤𑀤𑀸𑀬𑀓𑀝𑁆𑀞𑀸𑀦𑁂. 𑀢𑁂𑀦𑀸𑀳 ‘‘𑀏𑀯𑀁 𑀧𑀦𑀲𑁆𑀲𑀸’’𑀢𑀺𑀆𑀤𑀺. 𑀬𑀣𑀸𑀳 𑀪𑀕𑀯𑀸 ‘‘𑀑𑀯𑀤, 𑀓𑀲𑁆𑀲𑀧…𑀧𑁂… 𑀢𑁆𑀯𑀁 𑀯𑀸’’𑀢𑀺. 𑀤𑀼𑀓𑁆𑀔𑁂𑀦 𑀯𑀢𑁆𑀢𑀩𑁆𑀩𑀸 𑀅𑀧𑁆𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀺𑀪𑀸𑀯𑀢𑁄. 𑀤𑀼𑀩𑁆𑀩𑀘𑀪𑀸𑀯𑀓𑀭𑀡𑁂𑀳𑀻𑀢𑀺 𑀓𑁄𑀥𑀽𑀧𑀦𑀸𑀳𑀸𑀤𑀻𑀳𑀺. 𑀅𑀦𑀼𑀲𑀸𑀲𑀦𑀺𑀬𑀸 𑀧𑀤𑀓𑁆𑀔𑀺𑀡𑀕𑁆𑀕𑀳𑀡𑀁 𑀦𑀸𑀫 𑀅𑀦𑀼𑀥𑀫𑁆𑀫𑀘𑀭𑀡𑀁, 𑀙𑀺𑀦𑁆𑀦𑀧𑀝𑀺𑀧𑀢𑁆𑀢𑀺 𑀓𑀢𑀸 𑀯𑀸𑀫𑀕𑁆𑀕𑀸𑀳𑁄 𑀦𑀸𑀫𑀸𑀢𑀺 𑀆𑀳 ‘‘𑀅𑀦𑀼𑀲𑀸𑀲𑀦𑀺’’𑀦𑁆𑀢𑀺𑀆𑀤𑀺. 𑀅𑀢𑀺𑀓𑁆𑀓𑀫𑁆𑀫 𑀯𑀤𑀦𑁆𑀢𑁂𑀢𑀺 𑀅𑀜𑁆𑀜𑀫𑀜𑁆𑀜𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀢𑀺𑀫𑀜𑁆𑀜𑀺𑀢𑁆𑀯𑀸 𑀯𑀤𑀦𑁆𑀢𑁂. 𑀩𑀳𑀼𑀁 𑀪𑀸𑀲𑀺𑀲𑁆𑀲𑀢𑀻𑀢𑀺 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑀓𑁄 𑀯𑀺𑀧𑀼𑀮𑀁 𑀓𑀢𑁆𑀯𑀸 𑀓𑀣𑁂𑀲𑁆𑀲𑀢𑀺. 𑀅𑀲𑀳𑀺𑀢𑀦𑁆𑀢𑀺 𑀧𑀼𑀩𑁆𑀩𑁂𑀦𑀸𑀧𑀭𑀁 𑀦𑀲𑀳𑀺𑀢𑀁 𑀳𑁂𑀢𑀼𑀧𑀫𑀸𑀯𑀺𑀭𑀳𑀺𑀢𑀁. 𑀅𑀫𑀥𑀼𑀭𑀦𑁆𑀢𑀺 𑀦 𑀫𑀥𑀼𑀭𑀁 𑀦 𑀓𑀡𑁆𑀡𑀲𑀼𑀔𑀁 𑀦 𑀧𑁂𑀫𑀦𑀻𑀬𑀁. 𑀮𑀳𑀼𑀜𑁆𑀜𑁂𑀯 𑀉𑀝𑁆𑀞𑀸𑀢𑀺 𑀅𑀧𑁆𑀧𑀯𑀢𑁆𑀢𑀦𑁂𑀦 𑀓𑀽𑀮𑀝𑁆𑀞𑀸𑀦𑀁 𑀯𑀺𑀬 𑀢𑀲𑁆𑀲 𑀓𑀣𑀦𑀁.

𑀑𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀤𑀼𑀢𑀺𑀬𑀑𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁦. 𑀑𑀓𑀧𑁆𑀧𑀦𑀲𑀤𑁆𑀥𑀸𑀢𑀺 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀁 𑀑𑀕𑀸𑀳𑀺𑀢𑁆𑀯𑀸 ‘‘𑀏𑀯𑀫𑁂𑀢’’𑀦𑁆𑀢𑀺 𑀓𑀧𑁆𑀧𑀦𑀲𑀤𑁆𑀥𑀸. 𑀓𑀼𑀲𑀮𑀥𑀫𑁆𑀫𑀚𑀸𑀦𑀦𑀧𑀜𑁆𑀜𑀸𑀢𑀺 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁 𑀲𑀩𑁆𑀩𑀲𑁄 𑀚𑀸𑀦𑀦𑀧𑀜𑁆𑀜𑀸. 𑀧𑀭𑀺𑀳𑀸𑀦𑀦𑁆𑀢𑀺 𑀲𑀩𑁆𑀩𑀸𑀳𑀺 𑀲𑀫𑁆𑀧𑀢𑁆𑀢𑀻𑀳𑀺 𑀧𑀭𑀺𑀳𑀸𑀦𑀁. 𑀦 𑀳𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀭𑀳𑀺𑀢𑀲𑁆𑀲 𑀓𑀸𑀘𑀺 𑀲𑀫𑁆𑀧𑀢𑁆𑀢𑀺 𑀦𑀸𑀫 𑀅𑀢𑁆𑀣𑀻𑀢𑀺.

𑀤𑀼𑀢𑀺𑀬𑀑𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀢𑀢𑀺𑀬𑀑𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁧. 𑀧𑀼𑀩𑁆𑀩𑁂𑀢𑀺 𑀧𑀞𑀫𑀩𑁄𑀥𑀺𑀬𑀁. 𑀏𑀢𑀭𑀳𑀻𑀢𑀺 𑀢𑀢𑁄 𑀧𑀘𑁆𑀙𑀺𑀫𑁂 𑀓𑀸𑀮𑁂. 𑀓𑀸𑀭𑀡𑀧𑀝𑁆𑀞𑀧𑀦𑁂𑀢𑀺 𑀓𑀸𑀭𑀡𑀸𑀭𑀫𑁆𑀪𑁂. 𑀢𑁂𑀲𑀼 𑀯𑀼𑀢𑁆𑀢𑀕𑀼𑀡𑀬𑀼𑀢𑁆𑀢𑁂𑀲𑀼 𑀣𑁂𑀭𑁂𑀲𑀼. 𑀢𑀲𑁆𑀫𑀺𑀦𑁆𑀢𑀺 𑀢𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑀕𑀼𑀡𑀬𑀼𑀢𑁆𑀢𑁂 𑀧𑀼𑀕𑁆𑀕𑀮𑁂. 𑀏𑀯𑀁 𑀲𑀓𑁆𑀓𑀸𑀭𑁂 𑀓𑀬𑀺𑀭𑀫𑀸𑀦𑁂𑀢𑀺 ‘‘𑀪𑀤𑁆𑀤𑀓𑁄 𑀯𑀢𑀸𑀬𑀁 𑀪𑀺𑀓𑁆𑀔𑀽’’𑀢𑀺 𑀆𑀤𑀭𑀚𑀸𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀓𑁆𑀓𑀸𑀭𑁂 𑀓𑀬𑀺𑀭𑀫𑀸𑀦𑁂. 𑀇𑀫𑁂 𑀲𑀩𑁆𑀭𑀳𑁆𑀫𑀘𑀸𑀭𑀻. ‘‘𑀏𑀳𑀺 𑀪𑀺𑀓𑁆𑀔𑀽’’𑀢𑀺 𑀢𑀁 𑀪𑀺𑀓𑁆𑀔𑀼𑀁 𑀅𑀢𑁆𑀢𑀦𑁄 𑀫𑀼𑀔𑀸𑀪𑀺𑀫𑀼𑀔𑀁 𑀓𑀭𑁄𑀦𑁆𑀢𑀸 𑀯𑀤𑀦𑁆𑀢𑀺. 𑀬𑀜𑁆𑀳𑀺 𑀢𑀦𑁆𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁 𑀉𑀧𑀤𑁆𑀤𑀯𑁄𑀢𑀺 𑀯𑀼𑀘𑁆𑀘𑀢𑀺 𑀅𑀦𑀢𑁆𑀣𑀚𑀦𑀦𑀢𑁄. 𑀧𑀢𑁆𑀣𑀬𑀢𑀺 𑀪𑀚𑀢𑀺 𑀩𑀚𑁆𑀛𑀢𑀻𑀢𑀺 𑀧𑀢𑁆𑀣𑀦𑀸, 𑀅𑀪𑀺𑀲𑀗𑁆𑀕𑁄𑀢𑀺 𑀆𑀳 ‘‘𑀅𑀪𑀺𑀧𑀢𑁆𑀣𑀦𑀸𑀢𑀺 𑀅𑀥𑀺𑀫𑀢𑁆𑀢𑀧𑀢𑁆𑀣𑀦𑀸’’𑀢𑀺.

𑀢𑀢𑀺𑀬𑀑𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀛𑀸𑀦𑀸𑀪𑀺𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁨. 𑀬𑀸𑀯𑀤𑁂𑀯𑀸𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑀁 ‘‘𑀬𑀸𑀯𑀤𑁂’’𑀢𑀺 𑀇𑀤𑀁 𑀧𑀤𑀦𑁆𑀢𑀺 𑀆𑀳 ‘‘𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀻𑀢𑀺 𑀬𑀸𑀯𑀤𑁂𑀯 𑀇𑀘𑁆𑀙𑀸𑀫𑀻’’𑀢𑀺. 𑀬𑀤𑀺𑀘𑁆𑀙𑀓𑀁 𑀛𑀸𑀦𑀲𑀫𑀸𑀧𑀢𑁆𑀢𑀻𑀲𑀼 𑀯𑀲𑀻𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀢𑀤𑁂𑀢𑀁 𑀆𑀭𑀤𑁆𑀥𑀁. 𑀯𑀺𑀢𑁆𑀣𑀸𑀭𑀺𑀢𑀫𑁂𑀯, 𑀢𑀲𑁆𑀫𑀸 𑀢𑀢𑁆𑀣 𑀯𑀺𑀢𑁆𑀣𑀸𑀭𑀺𑀢𑀫𑁂𑀯 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀲𑀯𑀸𑀦𑀁 𑀔𑀬𑀸𑀢𑀺 𑀆𑀲𑀯𑀸𑀦𑀁 𑀔𑀬𑀳𑁂𑀢𑀼 𑀅𑀭𑀺𑀬𑀫𑀕𑁆𑀕𑁂𑀦 𑀲𑀩𑁆𑀩𑀲𑁄 𑀆𑀲𑀯𑀸𑀦𑀁 𑀔𑁂𑀧𑀺𑀢𑀢𑁆𑀢𑀸. 𑀅𑀧𑀘𑁆𑀘𑀬𑀪𑀽𑀢𑀦𑁆𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁂𑀦 𑀅𑀧𑀘𑁆𑀘𑀬𑀪𑀽𑀢𑀁.

𑀛𑀸𑀦𑀸𑀪𑀺𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀉𑀧𑀲𑁆𑀲𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁩. 𑀮𑀸𑀪𑀲𑀓𑁆𑀓𑀸𑀭𑀳𑁂𑀢𑀼𑀧𑀺 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀦𑁆𑀢𑀺, 𑀏𑀯𑀫𑁂𑀯𑀁 𑀅𑀬𑀁 𑀧𑀦 𑀣𑁂𑀭𑁄 𑀦 𑀮𑀸𑀪𑀲𑀓𑁆𑀓𑀸𑀭𑀳𑁂𑀢𑀼 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀕𑀫𑀦𑀁 𑀬𑀸𑀘𑀢𑀺, 𑀅𑀣 𑀓𑀲𑁆𑀫𑀸𑀢𑀺 𑀆𑀳 ‘‘𑀓𑀫𑁆𑀫𑀝𑁆𑀞𑀸𑀦𑀢𑁆𑀣𑀺𑀓𑀸’’𑀢𑀺𑀆𑀤𑀺. 𑀏𑀲𑁄 𑀳𑀺 𑀆𑀦𑀦𑁆𑀤𑀢𑁆𑀣𑁂𑀭𑁄 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀧𑀝𑀺𑀧𑀢𑁆𑀢𑀺𑀕𑀼𑀡𑀁 𑀤𑀲𑁆𑀲𑁂𑀦𑁆𑀢𑁄 𑀬𑀲𑁆𑀫𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀺𑀓𑀸, 𑀢𑀲𑁆𑀫𑀸 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀸𑀤𑀺𑀧𑀓𑀸𑀲𑀦𑀺𑀬𑀸 𑀥𑀫𑁆𑀫𑀓𑀣𑀸𑀬 𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀢𑁆𑀢𑀺𑀲𑀫𑁆𑀧𑀤𑀁 𑀤𑀲𑁆𑀲𑁂𑀲𑀺. 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀸𑀦𑀺 𑀘𑁂𑀯 𑀉𑀤𑀬𑀩𑁆𑀩𑀬𑀸𑀤𑀺𑀓𑁂 𑀘 𑀲𑀫𑁆𑀫𑀸 𑀤𑀲𑁆𑀲𑁂𑀲𑀺. 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀯𑀺𑀬 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑁂𑀲𑀺. 𑀲𑀫𑀸𑀤𑀧𑁂𑀲𑀻𑀢𑀺 𑀢𑀢𑁆𑀣 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀁 𑀲𑀫𑀸𑀤𑀧𑁂𑀲𑀺. 𑀬𑀣𑀸 𑀯𑀻𑀣𑀺𑀧𑀝𑀺𑀧𑀦𑁆𑀦𑁄 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀏𑀯𑀁 𑀕𑀡𑁆𑀳𑀸𑀧𑁂𑀲𑀺. 𑀲𑀫𑀼𑀢𑁆𑀢𑁂𑀚𑁂𑀲𑀻𑀢𑀺 𑀯𑀺𑀧𑀲𑁆𑀲𑀦𑀸𑀬 𑀆𑀭𑀤𑁆𑀥𑀸𑀬 𑀲𑀗𑁆𑀔𑀸𑀭𑀸𑀦𑀁 𑀉𑀤𑀬𑀩𑁆𑀩𑀬𑀸𑀤𑀻𑀲𑀼 𑀉𑀧𑀝𑁆𑀞𑀳𑀦𑁆𑀢𑁂𑀲𑀼 𑀬𑀣𑀸𑀓𑀸𑀮𑀁 𑀧𑀕𑁆𑀕𑀳𑀲𑀫𑀼𑀧𑁂𑀓𑁆𑀔𑀡𑁂𑀳𑀺 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀦𑀼𑀧𑀯𑀢𑁆𑀢𑀦𑁂𑀦 𑀪𑀸𑀯𑀦𑀸𑀫𑀚𑁆𑀛𑀺𑀫𑀯𑀻𑀣𑀺𑀁 𑀧𑀸𑀧𑁂𑀢𑁆𑀯𑀸 𑀬𑀣𑀸 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀲𑀼𑀧𑁆𑀧𑀲𑀦𑁆𑀦𑀁 𑀳𑀼𑀢𑁆𑀯𑀸 𑀯𑀳𑀢𑀺, 𑀏𑀯𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀺𑀲𑀤𑀪𑀸𑀯𑀓𑀭𑀡𑁂𑀦 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀲𑀫𑁆𑀫𑀸 𑀉𑀢𑁆𑀢𑁂𑀚𑁂𑀲𑀺, 𑀦𑀺𑀩𑁆𑀩𑀸𑀦𑀯𑀲𑁂𑀦 𑀯𑀸 𑀲𑀫𑀸𑀤𑀧𑁂𑀲𑀺. 𑀲𑀫𑁆𑀧𑀳𑀁𑀲𑁂𑀲𑀻𑀢𑀺 𑀢𑀣𑀸 𑀧𑀯𑀢𑁆𑀢𑀺𑀬𑀫𑀸𑀦𑀸𑀬 𑀯𑀺𑀧𑀲𑁆𑀲𑀦𑀸𑀬 𑀲𑀫𑀧𑁆𑀧𑀯𑀢𑁆𑀢𑀪𑀸𑀯𑀦𑀸𑀯𑀲𑁂𑀦 𑀉𑀧𑀭𑀺 𑀮𑀤𑁆𑀥𑀩𑁆𑀩𑀪𑀸𑀯𑀦𑀸𑀯𑀲𑁂𑀦 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑁂𑀲𑀺, 𑀮𑀤𑁆𑀥𑀲𑁆𑀲𑀸𑀤𑀯𑀲𑁂𑀦 𑀲𑀼𑀝𑁆𑀞𑀼 𑀢𑁄𑀲𑁂𑀲𑀺. 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀫𑀦𑀼𑀢𑁂 𑀧𑀭𑀺𑀜𑁆𑀜𑀸𑀤𑀺𑀯𑀲𑁂𑀦 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀢𑀻𑀢𑀺 𑀫𑀼𑀦𑀺. 𑀢𑁂𑀢𑀺 𑀢𑀁. 𑀉𑀧𑀬𑁄𑀕𑀢𑁆𑀣𑁂 𑀳𑀺 𑀇𑀤𑀁 𑀲𑀸𑀫𑀺𑀯𑀘𑀦𑀁. 𑀉𑀢𑁆𑀢𑀭𑀻𑀢𑀺 𑀉𑀧𑀭𑀺, 𑀢𑀯 𑀬𑀣𑀸𑀪𑀽𑀢𑀲𑀪𑀸𑀯𑀢𑁄 𑀧𑀭𑀢𑁄𑀢𑀺 𑀅𑀢𑁆𑀣𑁄. 𑀧𑀓𑁆𑀔𑀧𑀢𑀺𑀢𑁄 𑀅𑀕𑀢𑀺𑀕𑀫𑀦𑀁 𑀅𑀢𑀺𑀭𑁂𑀓𑀑𑀓𑀸𑀲𑁄. 𑀉𑀧𑀧𑀭𑀺𑀓𑁆𑀔𑀻𑀢𑀺 𑀅𑀦𑀼𑀯𑀺𑀘𑁆𑀘 𑀦𑀺𑀯𑀸𑀭𑀓𑁄 𑀦 𑀩𑀳𑀼𑀫𑀢𑁄. 𑀩𑀼𑀤𑁆𑀥𑀧𑀝𑀺𑀪𑀸𑀕𑁄 𑀣𑁂𑀭𑁄. ‘‘𑀩𑀸𑀮𑀸 𑀪𑀺𑀓𑁆𑀔𑀼𑀦𑀻 𑀤𑀼𑀩𑁆𑀪𑀸𑀲𑀺𑀢𑀁 𑀆𑀳𑀸’’𑀢𑀺 𑀅𑀯𑀢𑁆𑀯𑀸 ‘‘𑀔𑀫𑀣, 𑀪𑀦𑁆𑀢𑁂’’𑀢𑀺 𑀯𑀤𑀦𑁆𑀢𑁂𑀦 𑀧𑀓𑁆𑀔𑀧𑀸𑀢𑁂𑀦 𑀯𑀺𑀬 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀏𑀓𑀸 𑀪𑀺𑀓𑁆𑀔𑀼𑀦𑀻 𑀦 𑀯𑀸𑀭𑀺𑀢𑀸’’𑀢𑀺𑀆𑀤𑀺.

𑀘𑀼𑀢𑀸 𑀲𑀮𑀺𑀗𑁆𑀕𑀢𑁄 𑀦𑀝𑁆𑀞𑀸, 𑀤𑁂𑀲𑀦𑁆𑀢𑀭𑀧𑀓𑁆𑀓𑀫𑁂𑀦 𑀅𑀤𑀲𑁆𑀲𑀦𑀁 𑀦 𑀕𑀢𑀸. 𑀓𑀡𑁆𑀝𑀓𑀲𑀸𑀔𑀸 𑀯𑀺𑀬𑀸𑀢𑀺 𑀓𑀼𑀭𑀡𑁆𑀝𑀓𑀅𑀧𑀸𑀫𑀕𑁆𑀕𑀓𑀡𑁆𑀝𑀓𑀮𑀲𑀺𑀓𑀸𑀳𑀺 𑀲𑀸𑀔𑀸 𑀯𑀺𑀬.

𑀉𑀧𑀲𑁆𑀲𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀘𑀻𑀯𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁪. 𑀭𑀸𑀚𑀕𑀳𑀲𑁆𑀲 𑀤𑀓𑁆𑀔𑀺𑀡𑀪𑀸𑀕𑁂 𑀕𑀺𑀭𑀺 𑀤𑀓𑁆𑀔𑀺𑀡𑀸𑀕𑀺𑀭𑀺 𑀡-𑀓𑀸𑀭𑁂 𑀅-𑀓𑀸𑀭𑀲𑁆𑀲 𑀤𑀻𑀖𑀁 𑀓𑀢𑁆𑀯𑀸, 𑀢𑀲𑁆𑀲 𑀤𑀓𑁆𑀔𑀺𑀡𑀪𑀸𑀕𑁂 𑀚𑀦𑀧𑀤𑁄𑀧𑀺 ‘‘𑀤𑀓𑁆𑀔𑀺𑀡𑀸𑀕𑀺𑀭𑀻’’𑀢𑀺 𑀯𑀼𑀘𑁆𑀘𑀢𑀺, ‘‘𑀕𑀺𑀭𑀺𑀢𑁄 𑀤𑀓𑁆𑀔𑀺𑀡𑀪𑀸𑀕𑁄’’𑀢𑀺 𑀓𑀢𑁆𑀯𑀸. 𑀏𑀓𑀤𑀺𑀯𑀲𑁂𑀦𑀸𑀢𑀺 𑀏𑀓𑁂𑀦 𑀤𑀺𑀯𑀲𑁂𑀦 𑀉𑀧𑁆𑀧𑀩𑁆𑀩𑀸𑀚𑁂𑀲𑀼𑀁 𑀢𑁂𑀲𑀁 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀪𑀸𑀯𑀢𑁄.

𑀬𑀢𑁆𑀣 𑀘𑀢𑁆𑀢𑀸𑀭𑁄 𑀯𑀸 𑀉𑀢𑁆𑀢𑀭𑀺 𑀯𑀸 𑀪𑀺𑀓𑁆𑀔𑀽 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑀁 𑀲𑀸𑀤𑀺𑀬𑀺𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀁 𑀪𑁄𑀚𑀦𑀁 𑀏𑀓𑀢𑁄 𑀧𑀝𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺, 𑀏𑀢𑀁 𑀕𑀡𑀪𑁄𑀚𑀦𑀁 𑀦𑀸𑀫, 𑀢𑀁 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 ‘‘𑀢𑀺𑀓𑀪𑁄𑀚𑀦𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀯𑀘𑀦𑁂𑀦 𑀕𑀡𑀪𑁄𑀚𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀬𑁄 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀅𑀦𑀼𑀜𑁆𑀜𑀸𑀢𑀢𑁆𑀢𑀸𑀧𑀺 ‘‘𑀢𑀺𑀓𑀪𑁄𑀚𑀦’’𑀦𑁆𑀢𑀺 𑀯𑀤𑀦𑁆𑀢𑀺.

‘‘𑀤𑀼𑀫𑁆𑀫𑀗𑁆𑀓𑀽𑀦𑀁 𑀦𑀺𑀕𑁆𑀕𑀳𑁄 𑀏𑀯 𑀧𑁂𑀲𑀮𑀸𑀦𑀁 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺 𑀇𑀤𑀁 𑀏𑀓𑀁 𑀅𑀗𑁆𑀕𑀁. 𑀢𑁂𑀦𑁂𑀯𑀸𑀳 ‘‘𑀤𑀼𑀫𑁆𑀫𑀗𑁆𑀓𑀽𑀦𑀁 𑀦𑀺𑀕𑁆𑀕𑀳𑁂𑀦𑁂𑀯𑀸’’𑀢𑀺𑀆𑀤𑀺. ‘‘𑀬𑀣𑀸 𑀤𑁂𑀯𑀤𑀢𑁆𑀢𑁄…𑀧𑁂… 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬𑀼’’𑀦𑁆𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀢𑀺𑀓𑀪𑁄𑀚𑀦𑀁 𑀧𑀜𑁆𑀜𑀢𑁆𑀢𑀁.

𑀅𑀣 𑀓𑀺𑀜𑁆𑀘𑀭𑀳𑀻𑀢𑀺 𑀅𑀣 𑀓𑀲𑁆𑀫𑀸 𑀢𑁆𑀯𑀁 𑀅𑀲𑀫𑁆𑀧𑀦𑁆𑀦𑀕𑀡𑀁 𑀩𑀦𑁆𑀥𑀺𑀢𑁆𑀯𑀸 𑀘𑀭𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀲𑀫𑁆𑀧𑀦𑁆𑀦𑀸𑀬 𑀧𑀭𑀺𑀲𑀸𑀬 𑀘𑀸𑀭𑀺𑀓𑀸𑀘𑀭𑀡𑀁 𑀓𑀼𑀮𑀸𑀦𑀼𑀤𑁆𑀤𑀬𑀸𑀬 𑀦 𑀳𑁄𑀢𑀺, 𑀓𑀼𑀮𑀸𑀦𑀁 𑀖𑀸𑀢𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀣𑁂𑀭𑁄 ‘‘𑀲𑀲𑁆𑀲𑀖𑀸𑀢𑀁 𑀫𑀜𑁆𑀜𑁂 𑀘𑀭𑀲𑀻’’𑀢𑀺𑀆𑀤𑀺𑀫𑀯𑁄𑀘.

𑀲𑁄𑀥𑁂𑀦𑁆𑀢𑁄 𑀢𑀲𑁆𑀲𑀸 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑀪𑀸𑀯𑀤𑀲𑁆𑀲𑀦𑁂𑀦. 𑀉𑀤𑁆𑀤𑀺𑀲𑀺𑀢𑀼𑀁 𑀦 𑀚𑀸𑀦𑀸𑀫𑀺 𑀢𑀣𑀸 𑀘𑀺𑀢𑁆𑀢𑀲𑁆𑀲𑁂𑀯 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩𑀢𑁆𑀢𑀸. 𑀓𑀺𑀜𑁆𑀘𑀦𑀁 𑀓𑀺𑀮𑁂𑀲𑀯𑀢𑁆𑀣𑀼. 𑀲𑀗𑁆𑀕𑀳𑁂𑀢𑀩𑁆𑀩𑀔𑁂𑀢𑁆𑀢𑀯𑀢𑁆𑀣𑀼 𑀧𑀮𑀺𑀩𑁄𑀥𑁄, 𑀆𑀮𑀬𑁄 𑀅𑀧𑁂𑀓𑁆𑀔𑀸. 𑀑𑀓𑀸𑀲𑀸𑀪𑀸𑀯𑀢𑁄𑀢𑀺 𑀩𑀳𑀼𑀓𑀺𑀘𑁆𑀘𑀓𑀭𑀡𑀻𑀬𑀢𑀸𑀬 𑀓𑀼𑀲𑀮𑀓𑀺𑀭𑀺𑀬𑀸𑀬 𑀑𑀓𑀸𑀲𑀸𑀪𑀸𑀯𑀢𑁄. 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀢𑁄𑀢𑀺 𑀲𑀗𑁆𑀓𑁂𑀢𑀁 𑀓𑀢𑁆𑀯𑀸 𑀯𑀺𑀬 𑀓𑀺𑀮𑁂𑀲𑀭𑀚𑀸𑀦𑀁 𑀢𑀢𑁆𑀣 𑀲𑀦𑁆𑀦𑀺𑀚𑁆𑀛𑀧𑀯𑀢𑁆𑀢𑀦𑀢𑁄.

𑀲𑀺𑀓𑁆𑀔𑀢𑁆𑀢𑀬𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀺𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀩𑁆𑀭𑀳𑁆𑀫𑀁 𑀲𑁂𑀝𑁆𑀞𑀁 𑀘𑀭𑀺𑀬𑀁. 𑀔𑀡𑁆𑀟𑀸𑀤𑀺𑀪𑀸𑀯𑀸𑀧𑀸𑀤𑀦𑁂𑀦 𑀅𑀔𑀡𑁆𑀟𑀁 𑀓𑀢𑁆𑀯𑀸. 𑀮𑀓𑁆𑀔𑀡𑀯𑀘𑀦𑀜𑁆𑀳𑁂𑀢𑀁. 𑀓𑀺𑀜𑁆𑀘𑀺 𑀲𑀺𑀓𑁆𑀔𑁂𑀓𑀤𑁂𑀲𑀁 𑀅𑀲𑁂𑀲𑁂𑀢𑁆𑀯𑀸 𑀏𑀓𑀦𑁆𑀢𑁂𑀦𑁂𑀯 𑀧𑀭𑀺𑀧𑀽𑀭𑁂𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁. 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑀫𑁆𑀧𑀺 𑀲𑀁𑀓𑀺𑀮𑁂𑀲𑀫𑀮𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀅𑀘𑁆𑀘𑀦𑁆𑀢𑀫𑁂𑀯 𑀯𑀺𑀲𑀼𑀤𑁆𑀥𑀁 𑀓𑀢𑁆𑀯𑀸 𑀧𑀭𑀺𑀳𑀭𑀺𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁. 𑀢𑀢𑁄 𑀏𑀯 𑀲𑀗𑁆𑀔𑀁 𑀯𑀺𑀬 𑀮𑀺𑀔𑀺𑀢𑀦𑁆𑀢𑀺 𑀲𑀗𑁆𑀔𑀮𑀺𑀔𑀺𑀢𑀁. 𑀢𑁂𑀦𑀸𑀳 ‘‘𑀮𑀺𑀔𑀺𑀢𑀲𑀗𑁆𑀔𑀲𑀤𑀺𑀲’’𑀦𑁆𑀢𑀺. 𑀤𑀸𑀞𑀺𑀓𑀸𑀧𑀺 𑀢𑀕𑁆𑀕𑀳𑀡𑁂𑀦𑁂𑀯 𑀕𑀳𑁂𑀢𑁆𑀯𑀸 ‘‘𑀫𑀲𑁆𑀲𑀼’’𑀢𑁆𑀯𑁂𑀯 𑀯𑀼𑀢𑁆𑀢𑀁, 𑀦 𑀏𑀢𑁆𑀣 𑀓𑁂𑀯𑀮𑀁 𑀫𑀲𑁆𑀲𑀼𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀓𑀲𑀸𑀬𑁂𑀦 𑀭𑀢𑁆𑀢𑀸𑀦𑀺 𑀓𑀸𑀲𑀸𑀬𑀸𑀦𑀺.

𑀯𑀗𑁆𑀕𑀲𑀸𑀝𑀓𑁄𑀢𑀺 𑀯𑀗𑁆𑀕𑀤𑁂𑀲𑁂 𑀉𑀧𑁆𑀧𑀦𑁆𑀦𑀲𑀸𑀝𑀓𑁄. 𑀏𑀲𑀸𑀢𑀺 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄. 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀧𑀡𑀺𑀥𑀸𑀦𑀢𑁄 𑀧𑀪𑀼𑀢𑀺, 𑀅𑀬𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸. 𑀅𑀕𑁆𑀕𑀲𑀸𑀯𑀓𑀤𑁆𑀯𑀬𑀁 𑀉𑀧𑀸𑀤𑀸𑀬 𑀢𑀢𑀺𑀬𑀢𑁆𑀢𑀸 ‘‘𑀢𑀢𑀺𑀬𑀲𑀸𑀯𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀲𑀢𑀲𑀳𑀲𑁆𑀲𑀜𑁆𑀘𑁂𑀯 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀺 𑀘 𑀅𑀝𑁆𑀞 𑀘 𑀲𑀳𑀲𑁆𑀲𑀸𑀦𑀺.

𑀅𑀬𑀜𑁆𑀘 𑀅𑀬𑀜𑁆𑀘 𑀕𑀼𑀡𑁄𑀢𑀺 𑀲𑀻𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀕𑁆𑀕𑀨𑀮𑀸 𑀕𑀼𑀡𑁄𑀢𑀺 𑀓𑀺𑀢𑁆𑀢𑁂𑀦𑁆𑀢𑁄 𑀫𑀳𑀸𑀲𑀫𑀼𑀤𑁆𑀤𑀁 𑀧𑀽𑀭𑀬𑀫𑀸𑀦𑁄 𑀯𑀺𑀬 𑀓𑀣𑁂𑀲𑀺.

𑀓𑁄𑀮𑀸𑀳𑀮𑀦𑁆𑀢𑀺 𑀤𑁂𑀯𑀢𑀸𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁄 𑀓𑁄𑀮𑀸𑀳𑀮𑁄.

𑀔𑀼𑀤𑁆𑀤𑀓𑀸𑀤𑀺𑀯𑀲𑁂𑀦 𑀧𑀜𑁆𑀘𑀯𑀡𑁆𑀡𑀸. 𑀢𑀭𑀡𑀁 𑀯𑀸 𑀳𑁄𑀢𑀼 𑀫𑀭𑀡𑀁 𑀯𑀸𑀢𑀺 𑀫𑀳𑁄𑀖𑀁 𑀑𑀕𑀸𑀳𑀦𑁆𑀢𑁄 𑀧𑀼𑀭𑀺𑀲𑁄 𑀯𑀺𑀬 𑀫𑀘𑁆𑀙𑁂𑀭𑀲𑀫𑀼𑀤𑁆𑀤𑀁 𑀉𑀢𑁆𑀢𑀭𑀦𑁆𑀢𑁄 𑀧𑀘𑁆𑀙𑀸𑀧𑀺…𑀧𑁂… 𑀧𑀸𑀤𑀫𑀽𑀮𑁂 𑀞𑀧𑁂𑀲𑀺 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸𑀬 𑀫𑀘𑁆𑀙𑁂𑀭𑀧𑀳𑀸𑀦𑀲𑁆𑀲 𑀓𑀣𑀺𑀢𑀢𑁆𑀢𑀸.

𑀲𑀢𑁆𑀣𑀼 𑀕𑀼𑀡𑀸 𑀓𑀣𑀺𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀢𑁆𑀣𑀼 𑀕𑀼𑀡𑁂 𑀓𑀣𑁂𑀦𑁆𑀢𑀲𑁆𑀲𑀸’’𑀢𑀺. 𑀢𑀢𑁄 𑀧𑀝𑁆𑀞𑀸𑀬𑀸𑀢𑀺 𑀢𑀤𑀸 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀥𑀫𑁆𑀫𑀲𑁆𑀲𑀯𑀦𑀢𑁄 𑀧𑀝𑁆𑀞𑀸𑀬.

𑀢𑀣𑀸𑀕𑀢𑀫𑀜𑁆𑀘𑀲𑁆𑀲𑀸𑀢𑀺 𑀢𑀣𑀸𑀕𑀢𑀲𑁆𑀲 𑀧𑀭𑀺𑀪𑁄𑀕𑀫𑀜𑁆𑀘𑀲𑁆𑀲. 𑀤𑀸𑀦𑀁 𑀤𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀢𑀸𑀤𑀺𑀲𑀲𑁆𑀲𑁂𑀯 𑀲𑁂𑀝𑁆𑀞𑀺𑀦𑁄 𑀥𑀻𑀢𑀸 𑀳𑀼𑀢𑁆𑀯𑀸.

𑀅𑀤𑀺𑀦𑁆𑀦𑀯𑀺𑀧𑀸𑀓𑀲𑁆𑀲𑀸𑀢𑀺 𑀧𑀼𑀩𑁆𑀩𑁂 𑀓𑀢𑀽𑀧𑀘𑀺𑀢𑀲𑁆𑀲 𑀲𑀩𑁆𑀩𑀲𑁄 𑀦 𑀤𑀺𑀦𑁆𑀦𑀯𑀺𑀧𑀸𑀓𑀲𑁆𑀲. 𑀢𑀲𑁆𑀲 𑀓𑀫𑁆𑀫𑀲𑁆𑀲𑀸𑀢𑀺 𑀢𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀢𑁆𑀢𑁂 𑀧𑀺𑀡𑁆𑀟𑀧𑀸𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑀮𑀮𑀧𑀽𑀭𑀡𑀓𑀫𑁆𑀫𑀲𑁆𑀲. 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀤𑀼𑀕𑁆𑀕𑀦𑁆𑀥𑀲𑀭𑀻𑀭𑀢𑀸𑀬 𑀧𑀝𑀺𑀦𑀺𑀯𑀢𑁆𑀢𑀺𑀢𑀸. 𑀇𑀝𑁆𑀞𑀓𑀧𑀦𑁆𑀢𑀻𑀢𑀺 𑀲𑀼𑀯𑀡𑁆𑀡𑀺𑀝𑁆𑀞𑀓𑀧𑀦𑁆𑀢𑀺. 𑀖𑀝𑀦𑀺𑀝𑁆𑀞𑀓𑀸𑀬𑀸𑀢𑀺 𑀢𑀲𑁆𑀲 𑀧𑀦𑁆𑀢𑀺𑀬𑀁 𑀧𑀞𑀫𑀁 𑀞𑀧𑀺𑀢𑀇𑀝𑁆𑀞𑀓𑀸𑀬 𑀲𑀤𑁆𑀥𑀺𑀁 𑀖𑀝𑁂𑀢𑀩𑁆𑀩𑀇𑀝𑁆𑀞𑀓𑀸𑀬 𑀊𑀦𑀸 𑀳𑁄𑀢𑀺. 𑀪𑀤𑁆𑀤𑀓𑁂 𑀓𑀸𑀮𑁂𑀢𑀺 𑀈𑀤𑀺𑀲𑀺𑀬𑀸 𑀇𑀝𑁆𑀞𑀓𑀸𑀬 𑀇𑀘𑁆𑀙𑀺𑀢𑀓𑀸𑀮𑁂𑀬𑁂𑀯 𑀆𑀕𑀢𑀸𑀲𑀺. 𑀢𑁂𑀦 𑀩𑀦𑁆𑀥𑀦𑁂𑀦𑀸𑀢𑀺 𑀢𑁂𑀦 𑀲𑀺𑀮𑁂𑀲𑀲𑀫𑁆𑀩𑀦𑁆𑀥𑁂𑀦.

𑀑𑀮𑀫𑁆𑀩𑀓𑀸𑀢𑀺 𑀫𑀼𑀢𑁆𑀢𑀸𑀫𑀡𑀺𑀫𑀬𑀸 𑀑𑀮𑀫𑁆𑀩𑀓𑀸. 𑀧𑀼𑀜𑁆𑀜𑀦𑁆𑀢𑀺 𑀦𑀢𑁆𑀣𑀺 𑀦𑁄 𑀧𑀼𑀜𑁆𑀜𑀁 𑀢𑀁, 𑀬𑀁 𑀦𑀺𑀫𑀺𑀢𑁆𑀢𑀁 𑀬𑀁 𑀓𑀸𑀭𑀡𑀸 𑀇𑀢𑁄 𑀲𑀼𑀔𑀼𑀫𑀢𑀭𑀲𑁆𑀲 𑀧𑀝𑀺𑀮𑀸𑀪𑁄 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀧𑀼𑀜𑁆𑀜𑀦𑀺𑀬𑀸𑀫𑁂𑀦𑀸𑀢𑀺 𑀧𑀼𑀜𑁆𑀜𑀸𑀦𑀼𑀪𑀸𑀯𑀲𑀺𑀤𑁆𑀥𑁂𑀦 𑀦𑀺𑀬𑀸𑀫𑁂𑀦. 𑀲𑁄 𑀘 𑀅𑀲𑁆𑀲 𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀤𑀸𑀢𑀼𑀁 𑀓𑀢𑁄𑀓𑀸𑀲𑁄.

𑀨𑀼𑀲𑁆𑀲𑀭𑀣𑀦𑁆𑀢𑀺 𑀫𑀗𑁆𑀕𑀮𑀭𑀣𑀁. 𑀉𑀡𑁆𑀳𑀻𑀲𑀁 𑀯𑀸𑀮𑀩𑀻𑀚𑀦𑀻 𑀔𑀕𑁆𑀕𑁄 𑀫𑀡𑀺𑀧𑀸𑀤𑀼𑀓𑀸 𑀲𑁂𑀢𑀘𑁆𑀙𑀢𑁆𑀢𑀦𑁆𑀢𑀺 𑀧𑀜𑁆𑀘𑀯𑀺𑀥𑀁 𑀭𑀸𑀚𑀓𑀓𑀼𑀥𑀪𑀡𑁆𑀟𑀁. 𑀲𑁂𑀢𑀘𑁆𑀙𑀢𑁆𑀢𑀁 𑀯𑀺𑀲𑀼𑀁 𑀕𑀳𑀺𑀢𑀁. 𑀤𑀺𑀩𑁆𑀩𑀯𑀢𑁆𑀣𑀁 𑀲𑀸𑀤𑀺𑀬𑀺𑀢𑀼𑀁 𑀧𑀼𑀜𑁆𑀜𑀸𑀦𑀼𑀪𑀸𑀯𑀘𑁄𑀤𑀺𑀢𑁄 ‘‘𑀦𑀦𑀼 𑀢𑀸𑀢𑀸 𑀣𑀽𑀮’’𑀦𑁆𑀢𑀺𑀆𑀤𑀺𑀫𑀸𑀳.

𑀧𑀜𑁆𑀘 𑀘𑀗𑁆𑀓𑀫𑀦𑀲𑀢𑀸𑀦𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁂𑀦 𑀆𑀤𑀺𑀅𑀢𑁆𑀣𑁂𑀦 𑀅𑀕𑁆𑀕𑀺𑀲𑀸𑀮𑀸𑀤𑀻𑀦𑀺 𑀧𑀩𑁆𑀩𑀚𑀺𑀢𑀲𑀸𑀭𑀼𑀧𑁆𑀧𑀝𑁆𑀞𑀸𑀦𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺.

𑀲𑀸𑀥𑀼𑀓𑀻𑀴𑀺𑀢𑀦𑁆𑀢𑀺 𑀅𑀭𑀺𑀬𑀸𑀦𑀁 𑀧𑀭𑀺𑀦𑀺𑀩𑁆𑀩𑀼𑀢𑀝𑁆𑀞𑀸𑀦𑁂 𑀓𑀸𑀢𑀩𑁆𑀩𑀲𑀓𑁆𑀓𑀸𑀭𑀁 𑀯𑀤𑀢𑀺.

𑀦𑀧𑁆𑀧𑀫𑀚𑁆𑀚𑀺 𑀦𑀺𑀭𑁄𑀕𑀸 𑀅𑀬𑁆𑀬𑀸𑀢𑀺 𑀧𑀼𑀘𑁆𑀙𑀺𑀢𑀸𑀓𑀸𑀭𑀤𑀲𑁆𑀲𑀦𑀁. 𑀧𑀭𑀺𑀦𑀺𑀩𑁆𑀩𑀼𑀢𑀸 𑀤𑁂𑀯𑀸𑀢𑀺 𑀤𑁂𑀯𑀻 𑀧𑀝𑀺𑀯𑀘𑀦𑀁 𑀅𑀤𑀸𑀲𑀺. 𑀧𑀝𑀺𑀬𑀸𑀤𑁂𑀢𑁆𑀯𑀸𑀢𑀺 𑀦𑀺𑀬𑁆𑀬𑀸𑀢𑁂𑀢𑁆𑀯𑀸. 𑀲𑀫𑀡𑀓𑀧𑀩𑁆𑀩𑀚𑁆𑀚𑀦𑁆𑀢𑀺 𑀲𑀫𑀺𑀢𑀧𑀸𑀧𑁂𑀳𑀺 𑀅𑀭𑀺𑀬𑁂𑀳𑀺 𑀅𑀦𑀼𑀝𑁆𑀞𑀸𑀢𑀩𑁆𑀩𑀧𑀩𑁆𑀩𑀚𑁆𑀚𑀁. 𑀲𑁄 𑀳𑀺 𑀭𑀸𑀚𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀯𑁂𑀲𑀲𑁆𑀲 𑀤𑀺𑀝𑁆𑀞𑀢𑁆𑀢𑀸 ‘‘𑀇𑀤𑀫𑁂𑀯 𑀪𑀤𑁆𑀤𑀓’’𑀦𑁆𑀢𑀺 𑀢𑀸𑀤𑀺𑀲𑀁𑀬𑁂𑀯 𑀮𑀺𑀗𑁆𑀕𑀁 𑀕𑀡𑁆𑀳𑀺.

𑀢𑀢𑁆𑀣𑁂𑀯𑀸𑀢𑀺 𑀩𑁆𑀭𑀳𑁆𑀫𑀮𑁄𑀓𑁂𑀬𑁂𑀯. 𑀯𑀻𑀲𑀢𑀺𑀫𑁂 𑀯𑀲𑁆𑀲𑁂 𑀲𑀫𑁆𑀧𑀢𑁆𑀢𑁂𑀢𑀺 𑀆𑀳𑀭𑀺𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀩𑁆𑀭𑀳𑁆𑀫𑀮𑁄𑀓𑀢𑁄 𑀆𑀕𑀦𑁆𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀩𑁆𑀭𑀳𑁆𑀫𑀘𑀭𑀺𑀬𑀸𑀥𑀺𑀓𑀸𑀭𑀲𑁆𑀲 𑀘𑀺𑀭𑀓𑀸𑀮𑀁 𑀲𑀗𑁆𑀕𑀳𑀺𑀢𑀢𑁆𑀢𑀸 ‘‘𑀏𑀯𑀭𑀽𑀧𑀁 𑀓𑀣𑀁 𑀫𑀸 𑀓𑀣𑁂𑀣𑀸’’𑀢𑀺𑀆𑀤𑀺𑀫𑀸𑀳.

𑀯𑀻𑀲𑀢𑀺 𑀥𑀭𑀡𑀸𑀦𑀺 ‘‘𑀦𑀺𑀓𑁆𑀔’’𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀮𑀪𑀦𑁆𑀢𑁄 𑀦 𑀯𑀲𑀸𑀫𑀻𑀢𑀺 𑀲𑀜𑁆𑀜𑀸𑀧𑁂𑀲𑁆𑀲𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀇𑀢𑁆𑀣𑀸𑀓𑀭𑁄𑀢𑀺 𑀇𑀢𑁆𑀣𑀺𑀭𑀢𑀦𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁. 𑀅𑀬𑁆𑀬𑀥𑀻𑀢𑀸𑀢𑀺 𑀅𑀫𑁆𑀳𑀸𑀓𑀁 𑀅𑀬𑁆𑀬𑀲𑁆𑀲 𑀥𑀻𑀢𑀸, 𑀪𑀤𑁆𑀤𑀓𑀸𑀧𑀺𑀮𑀸𑀦𑀻𑀢𑀺 𑀅𑀢𑁆𑀣𑁄. 𑀧𑀲𑀸𑀤𑀭𑀽𑀧𑁂𑀦 𑀦𑀺𑀩𑁆𑀩𑀺𑀲𑀺𑀝𑁆𑀞𑀢𑀸𑀬 ‘‘𑀫𑀳𑀸𑀕𑀻𑀯’’𑀦𑁆𑀢𑀺 𑀧𑀝𑀺𑀫𑀸𑀬 𑀲𑀤𑀺𑀲𑀪𑀸𑀯𑀫𑀸𑀳. 𑀢𑁂𑀦𑀸𑀳 ‘‘𑀅𑀬𑁆𑀬𑀥𑀻𑀢𑀸𑀬𑀸’’𑀢𑀺𑀆𑀤𑀺.

𑀲𑀫𑀸𑀦𑀧𑀡𑁆𑀡𑀦𑁆𑀢𑀺 𑀲𑀤𑀺𑀲𑀧𑀡𑁆𑀡𑀁, 𑀓𑀼𑀫𑀸𑀭𑀲𑁆𑀲 𑀓𑀼𑀫𑀸𑀭𑀺𑀬𑀸 𑀘 𑀯𑀼𑀢𑁆𑀢𑀦𑁆𑀢𑀧𑀡𑁆𑀡𑀁. 𑀇𑀢𑁄 𑀘 𑀏𑀢𑁆𑀢𑁄 𑀘𑀸𑀢𑀺 𑀢𑁂 𑀧𑀼𑀭𑀺𑀲𑀸 𑀲𑀫𑀸𑀕𑀫𑀝𑁆𑀞𑀸𑀦𑀢𑁄 𑀫𑀕𑀥𑀭𑀝𑁆𑀞𑁂 𑀫𑀳𑀸𑀢𑀺𑀢𑁆𑀣𑀕𑀸𑀫𑀁 𑀫𑀤𑁆𑀤𑀭𑀝𑁆𑀞𑁂 𑀲𑀸𑀕𑀮𑀦𑀕𑀭𑀜𑁆𑀘 𑀉𑀤𑁆𑀤𑀺𑀲𑁆𑀲 𑀧𑀓𑁆𑀓𑀫𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 ‘‘𑀇𑀢𑁄 𑀘 𑀏𑀢𑁆𑀢𑁄 𑀘 𑀧𑁂𑀲𑁂𑀲𑀼’’𑀦𑁆𑀢𑀺 𑀯𑀼𑀢𑁆𑀢𑀸.

𑀧𑀼𑀧𑁆𑀨𑀤𑀸𑀫𑀦𑁆𑀢𑀺 𑀳𑀢𑁆𑀣𑀺𑀳𑀢𑁆𑀣𑀧𑁆𑀧𑀫𑀸𑀡𑀁 𑀧𑀼𑀧𑁆𑀨𑀤𑀸𑀫𑀁. 𑀢𑀸𑀦𑀺 𑀧𑀼𑀧𑁆𑀨𑀤𑀸𑀫𑀸𑀦𑀺. 𑀢𑁂𑀢𑀺 𑀉𑀪𑁄 𑀪𑀤𑁆𑀤𑀸 𑀘𑁂𑀯 𑀧𑀺𑀧𑁆𑀧𑀮𑀺𑀓𑀼𑀫𑀸𑀭𑁄 𑀘. 𑀮𑁄𑀓𑀸𑀫𑀺𑀲𑁂𑀦𑀸𑀢𑀺 𑀕𑁂𑀳𑀲𑁆𑀲𑀺𑀢𑀧𑁂𑀫𑁂𑀦, 𑀓𑀸𑀫𑀲𑁆𑀲𑀸𑀤𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀲𑀁𑀲𑀝𑁆𑀞𑀸𑀢𑀺 𑀦 𑀲𑀁𑀲𑀝𑁆𑀞𑀸. 𑀯𑀺𑀘𑀸𑀭𑀬𑀺𑀁𑀲𑀼 𑀖𑀝𑁂 𑀚𑀮𑀦𑁆𑀢𑁂𑀦 𑀯𑀺𑀬 𑀧𑀤𑀻𑀧𑁂𑀦 𑀅𑀚𑁆𑀛𑀸𑀲𑀬𑁂𑀦 𑀲𑀫𑀼𑀚𑁆𑀚𑀮𑀦𑁆𑀢𑁂𑀦 𑀯𑀺𑀫𑁄𑀓𑁆𑀔𑀩𑀻𑀚𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑀘𑀺𑀢𑁆𑀢𑀸. 𑀬𑀦𑁆𑀢𑀩𑀤𑁆𑀥𑀸𑀦𑀻𑀢𑀺 𑀲𑀲𑁆𑀲𑀲𑀫𑁆𑀧𑀸𑀤𑀦𑀢𑁆𑀣𑀁 𑀢𑀢𑁆𑀣 𑀢𑀢𑁆𑀣 𑀇𑀝𑁆𑀞𑀓𑀤𑁆𑀯𑀸𑀭𑀓𑀯𑀸𑀝𑀬𑁄𑀚𑀦𑀯𑀲𑁂𑀦 𑀬𑀦𑁆𑀢𑀩𑀤𑁆𑀥𑀉𑀤𑀓𑀦𑀺𑀓𑁆𑀔𑀫𑀦𑀢𑀼𑀫𑁆𑀩𑀸𑀦𑀺. 𑀓𑀫𑁆𑀫𑀦𑁆𑀢𑁄𑀢𑀺 𑀓𑀲𑀺𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑀁. 𑀤𑀸𑀲𑀕𑀸𑀫𑀸𑀢𑀺 𑀤𑀸𑀲𑀸𑀦𑀁 𑀯𑀲𑀦𑀕𑀸𑀫𑀸.

𑀑𑀲𑀸𑀧𑁂𑀢𑁆𑀯𑀸𑀢𑀺 𑀧𑀓𑁆𑀔𑀺𑀧𑀺𑀢𑁆𑀯𑀸. 𑀆𑀓𑀧𑁆𑀧𑀓𑀼𑀢𑁆𑀢𑀯𑀲𑁂𑀦𑀸𑀢𑀺 𑀆𑀓𑀸𑀭𑀯𑀲𑁂𑀦 𑀓𑀺𑀭𑀺𑀬𑀸𑀯𑀲𑁂𑀦 𑀘. 𑀅𑀦𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀧𑀩𑁆𑀩𑀚𑀺𑀢𑀯𑁂𑀲𑀲𑁆𑀲 𑀅𑀦𑀦𑀼𑀭𑀽𑀧𑀁. 𑀢𑀲𑁆𑀲 𑀫𑀢𑁆𑀣𑀓𑁂𑀢𑀺 𑀤𑁆𑀯𑁂𑀥𑀸𑀧𑀣𑀲𑁆𑀲 𑀤𑁆𑀯𑀺𑀥𑀸𑀪𑀽𑀢𑀝𑁆𑀞𑀸𑀦𑁂.

𑀏𑀢𑁂𑀲𑀁 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀦𑀺𑀲𑀻𑀤𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀸 𑀧𑀦 𑀲𑀢𑁆𑀣𑀼 𑀢𑀢𑁆𑀣 𑀦𑀺𑀲𑀚𑁆𑀚𑀸 𑀏𑀤𑀺𑀲𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀲𑀻𑀤𑀦𑁆𑀢𑁄 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀅𑀧𑀭𑀺𑀫𑀺𑀢𑀓𑀸𑀮𑀲𑀗𑁆𑀕𑀳𑀺𑀢𑀸 𑀅𑀘𑀺𑀦𑁆𑀢𑁂𑀬𑁆𑀬𑀸𑀧𑀭𑀺𑀫𑁂𑀬𑁆𑀬𑀧𑀼𑀜𑁆𑀜𑀲𑀫𑁆𑀪𑀸𑀭𑀽𑀧𑀘𑀬𑀦𑀺𑀩𑁆𑀩𑀢𑁆𑀢𑀸 𑀦𑀺𑀭𑀽𑀧𑀺𑀢𑀲𑀪𑀸𑀯𑀩𑀼𑀤𑁆𑀥𑀕𑀼𑀡𑀯𑀺𑀚𑁆𑀚𑁄𑀢𑀺𑀢𑀸 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀲𑀫𑀼𑀚𑁆𑀚𑀮𑀸 𑀩𑁆𑀬𑀸𑀫𑀧𑁆𑀧𑀪𑀸𑀓𑁂𑀢𑀼𑀫𑀸𑀮𑀸𑀮𑀗𑁆𑀓𑀢𑀸 𑀲𑀪𑀸𑀯𑀲𑀺𑀤𑁆𑀥𑀢𑀸𑀬 𑀅𑀓𑀺𑀢𑁆𑀢𑀺𑀫𑀸 𑀭𑀽𑀧𑀓𑀸𑀬𑀲𑀺𑀭𑀻, 𑀢𑀁𑀬𑁂𑀯 𑀫𑀳𑀸𑀓𑀲𑁆𑀲𑀧𑀲𑁆𑀲 𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀧𑀲𑀸𑀤𑀲𑀁𑀯𑀟𑁆𑀠𑀦𑀢𑁆𑀣𑀁 𑀅𑀦𑀺𑀕𑁆𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀪𑀕𑀯𑀸 ‘‘𑀩𑀼𑀤𑁆𑀥𑀯𑁂𑀲𑀁 𑀕𑀳𑁂𑀢𑁆𑀯𑀸…𑀧𑁂… 𑀦𑀺𑀲𑀻𑀤𑀻’’𑀢𑀺 𑀯𑀼𑀢𑁆𑀢𑁄. 𑀅𑀲𑀻𑀢𑀺𑀳𑀢𑁆𑀣𑀁 𑀧𑀤𑁂𑀲𑀁 𑀩𑁆𑀬𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑀺𑀬𑀸 ‘‘𑀅𑀲𑀻𑀢𑀺𑀳𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀸. 𑀲𑀢𑀲𑀸𑀔𑁄𑀢𑀺 𑀩𑀳𑀼𑀲𑀸𑀔𑁄 𑀅𑀦𑁂𑀓𑀲𑀸𑀔𑁄. 𑀲𑀼𑀯𑀡𑁆𑀡𑀯𑀡𑁆𑀡𑁄 𑀅𑀳𑁄𑀲𑀺 𑀦𑀺𑀭𑀦𑁆𑀢𑀭𑀁 𑀩𑀼𑀤𑁆𑀥𑀭𑀲𑁆𑀫𑀻𑀳𑀺 𑀲𑀫𑀦𑁆𑀢𑀢𑁄 𑀲𑀫𑁄𑀓𑀺𑀡𑁆𑀡𑀢𑁆𑀢𑀸. 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀭𑀸𑀚𑀕𑀳𑀁 𑀦𑀸𑀴𑀦𑁆𑀤𑀦𑁆𑀢𑀺 𑀘 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁 𑀅𑀦𑁆𑀢𑀭𑀸𑀲𑀤𑁆𑀤𑀬𑁄𑀕𑀢𑁄𑀢𑀺 𑀆𑀳 ‘‘𑀭𑀸𑀚𑀕𑀳𑀲𑁆𑀲 𑀦𑀸𑀴𑀦𑁆𑀤𑀸𑀬 𑀘𑀸’’𑀢𑀺. 𑀦 𑀳𑀺 𑀫𑁂 𑀇𑀢𑁄 𑀅𑀜𑁆𑀜𑁂𑀦 𑀲𑀢𑁆𑀣𑀸𑀭𑀸 𑀪𑀯𑀺𑀢𑀼𑀁 𑀲𑀓𑁆𑀓𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀲𑀢𑁆𑀢𑀸𑀦𑀁 𑀬𑀣𑀸𑀭𑀳𑀁 𑀅𑀦𑀼𑀲𑀸𑀲𑀦𑀲𑀫𑀢𑁆𑀣𑀲𑁆𑀲 𑀅𑀜𑁆𑀜𑀲𑁆𑀲 𑀲𑀤𑁂𑀯𑀓𑁂 𑀅𑀪𑀸𑀯𑀢𑁄. 𑀦 𑀳𑀺 𑀫𑁂 𑀇𑀢𑁄 𑀅𑀜𑁆𑀜𑁂𑀦 𑀲𑀼𑀕𑀢𑁂𑀦 𑀪𑀯𑀺𑀢𑀼𑀁 𑀲𑀓𑁆𑀓𑀸 𑀲𑁄𑀪𑀦𑀕𑀫𑀦𑀕𑀼𑀡𑀕𑀡𑀬𑀼𑀢𑁆𑀢𑀲𑁆𑀲 𑀅𑀜𑁆𑀜𑀲𑁆𑀲 𑀅𑀪𑀸𑀯𑀢𑁄. 𑀦 𑀳𑀺 𑀫𑁂 𑀇𑀢𑁄 𑀅𑀜𑁆𑀜𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀪𑀯𑀺𑀢𑀼𑀁 𑀲𑀓𑁆𑀓𑀸 𑀲𑀫𑁆𑀫𑀸 𑀲𑀩𑁆𑀩𑀥𑀫𑁆𑀫𑀸𑀦𑀁 𑀲𑀬𑀫𑁆𑀪𑀼𑀜𑀸𑀡𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀪𑀸𑀯𑀢𑁄. 𑀇𑀫𑀺𑀦𑀸𑀢𑀺 ‘‘𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦.

𑀅𑀚𑀸𑀦𑀫𑀸𑀦𑁄𑀯 𑀲𑀩𑁆𑀩𑀜𑁆𑀜𑁂𑀬𑁆𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀩𑁆𑀩𑀘𑁂𑀢𑀲𑀸𑀢𑀺 𑀲𑀩𑁆𑀩𑀅𑀚𑁆𑀛𑀢𑁆𑀢𑀺𑀓𑀗𑁆𑀕𑀧𑀭𑀺𑀧𑀼𑀡𑁆𑀡𑀘𑁂𑀢𑀲𑀸. 𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀲𑀫𑁆𑀧𑀦𑁆𑀦𑀁 𑀲𑀫𑁆𑀫𑀤𑁂𑀯 𑀅𑀦𑀼 𑀅𑀦𑀼 𑀆𑀕𑀢𑀁 𑀉𑀧𑀕𑀢𑀁. 𑀨𑀮𑁂𑀬𑁆𑀬𑀸𑀢𑀺 𑀯𑀺𑀤𑀸𑀮𑁂𑀬𑁆𑀬. 𑀯𑀺𑀮𑀬𑀦𑁆𑀢𑀺 𑀯𑀺𑀦𑀸𑀲𑀁.

𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁂𑀦. 𑀳𑀺𑀭𑁄𑀢𑁆𑀢𑀧𑁆𑀧𑀲𑁆𑀲 𑀩𑀳𑀮𑀢𑀸 𑀦𑀸𑀫 𑀯𑀺𑀧𑀼𑀮𑀢𑀸𑀢𑀺 𑀆𑀳 ‘‘𑀫𑀳𑀦𑁆𑀢’’𑀦𑁆𑀢𑀺. 𑀧𑀞𑀫𑀢𑀭𑀫𑁂𑀯𑀸𑀢𑀺 𑀧𑀕𑁂𑀯 𑀉𑀧𑀲𑀗𑁆𑀓𑀫𑀦𑀢𑁄. 𑀢𑀣𑀸 𑀅𑀢𑀺𑀫𑀸𑀦𑀧𑀳𑀻𑀦𑁄 𑀅𑀲𑁆𑀲, 𑀳𑀺𑀭𑀺𑀑𑀢𑁆𑀢𑀧𑁆𑀧𑀁 𑀬𑀣𑀸 𑀲𑀡𑁆𑀞𑀸𑀢𑀺. 𑀓𑀼𑀲𑀮𑀲𑀦𑁆𑀦𑀺𑀲𑁆𑀲𑀺𑀢𑀦𑁆𑀢𑀺 𑀅𑀦𑀯𑀚𑁆𑀚𑀥𑀫𑁆𑀫𑀦𑀺𑀲𑁆𑀲𑀺𑀢𑀁. 𑀅𑀝𑁆𑀞𑀺𑀓𑀦𑁆𑀢𑀺 𑀢𑁂𑀦 𑀥𑀫𑁆𑀫𑁂𑀦 𑀅𑀝𑁆𑀞𑀺𑀓𑀁. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀲𑀯𑀦𑀘𑀺𑀢𑁆𑀢𑀁 ‘‘𑀲𑀩𑁆𑀩𑀘𑁂𑀢𑁄’’𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀘𑀺𑀢𑁆𑀢𑀲𑁆𑀲 𑀣𑁄𑀓𑀫𑁆𑀧𑀺 𑀩𑀳𑀺 𑀕𑀦𑁆𑀢𑀼𑀁 𑀅𑀤𑁂𑀦𑁆𑀢𑁄’’𑀢𑀺. 𑀢𑁂𑀦 𑀲𑀫𑁄𑀥𑀸𑀦𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑁂𑀦…𑀧𑁂… 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀆𑀭𑀫𑁆𑀪𑀢𑁄 𑀧𑀪𑀼𑀢𑀺 𑀬𑀸𑀯 𑀤𑁂𑀲𑀦𑀸 𑀦𑀺𑀧𑁆𑀨𑀦𑁆𑀦𑀸, 𑀢𑀸𑀯 𑀅𑀦𑁆𑀢𑀭𑀦𑁆𑀢𑀭𑀸 𑀧𑀯𑀢𑁆𑀢𑁂𑀦 𑀲𑀩𑁆𑀩𑁂𑀦 𑀲𑀫𑀦𑁆𑀦𑀸𑀳𑀸𑀭𑀘𑀺𑀢𑁆𑀢𑁂𑀦 𑀥𑀫𑁆𑀫𑀁𑀬𑁂𑀯 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸. 𑀞𑀧𑀺𑀢𑀲𑁄𑀢𑁄𑀢𑀺 𑀥𑀫𑁆𑀫𑁂 𑀦𑀺𑀳𑀺𑀢𑀲𑁄𑀢𑁄. 𑀑𑀤𑀳𑀺𑀢𑁆𑀯𑀸𑀢𑀺 𑀅𑀧𑀺𑀳𑀺𑀢𑀁 𑀓𑀢𑁆𑀯𑀸. 𑀧𑀞𑀫𑀚𑁆𑀛𑀸𑀦𑀯𑀲𑁂𑀦𑀸𑀢𑀺 𑀇𑀤𑀁 𑀅𑀲𑀼𑀪𑁂𑀲𑀼 𑀢𑀲𑁆𑀲𑁂𑀯 𑀇𑀚𑁆𑀛𑀢𑁄, 𑀇𑀢𑀭𑀢𑁆𑀣𑀜𑁆𑀘 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀢𑀸 𑀯𑀼𑀢𑁆𑀢𑀸.

𑀲𑀁𑀲𑀸𑀭𑀲𑀸𑀕𑀭𑁂 𑀧𑀭𑀺𑀩𑁆𑀪𑀫𑀦𑁆𑀢𑀲𑁆𑀲 𑀇𑀡𑀝𑁆𑀞𑀸𑀦𑁂 𑀢𑀺𑀝𑁆𑀞𑀦𑁆𑀢𑀺 𑀓𑀺𑀮𑁂𑀲𑀸 𑀆𑀲𑀯𑀲𑀪𑀸𑀯𑀸𑀧𑀸𑀤𑀦𑀢𑁄𑀢𑀺 𑀆𑀳 ‘‘𑀲𑀭𑀡𑁄𑀢𑀺 𑀲𑀓𑀺𑀮𑁂𑀲𑁄’’𑀢𑀺. 𑀘𑀢𑁆𑀢𑀸𑀭𑁄 𑀳𑀺 𑀧𑀭𑀺𑀪𑁄𑀕𑀸𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁆𑀢𑀁 𑀲𑀁𑀯𑀡𑁆𑀡𑀦𑀸𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘 𑀪𑀕𑀯𑀸 𑀧𑀞𑀫𑀁 𑀑𑀯𑀸𑀤𑀁 𑀣𑁂𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀓𑀢𑁆𑀢𑀸 𑀚𑀸𑀢𑀺𑀫𑀸𑀦𑀧𑀳𑀸𑀦𑀢𑁆𑀣𑀫𑀪𑀸𑀲𑀺, 𑀤𑀼𑀢𑀺𑀬𑀁 𑀩𑀸𑀳𑀼𑀲𑀘𑁆𑀘𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀅𑀳𑀁𑀓𑀸𑀭𑀧𑀳𑀸𑀦𑀢𑁆𑀣𑀁, 𑀢𑀢𑀺𑀬𑀁 𑀉𑀧𑀥𑀺𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀅𑀢𑁆𑀢𑀲𑀺𑀦𑁂𑀳𑀧𑀳𑀸𑀦𑀢𑁆𑀣𑀁. 𑀅𑀝𑁆𑀞𑀫𑁂 𑀤𑀺𑀯𑀲𑁂𑀢𑀺 𑀪𑀕𑀯𑀢𑀸 𑀲𑀫𑀸𑀕𑀢𑀤𑀺𑀯𑀲𑀢𑁄 𑀅𑀝𑁆𑀞𑀫𑁂 𑀤𑀺𑀯𑀲𑁂.

𑀫𑀕𑁆𑀕𑀢𑁄 𑀑𑀓𑁆𑀓𑀫𑀦𑀁 𑀧𑀞𑀫𑀢𑀭𑀁 𑀪𑀕𑀯𑀢𑀸 𑀲𑀫𑀸𑀕𑀢𑀤𑀺𑀯𑀲𑁂𑀬𑁂𑀯 𑀅𑀳𑁄𑀲𑀺. 𑀬𑀤𑀺 𑀅𑀭𑀳𑀢𑁆𑀢𑀸𑀥𑀺𑀕𑀫𑁄 𑀧𑀘𑁆𑀙𑀸, 𑀅𑀣 𑀓𑀲𑁆𑀫𑀸 𑀧𑀸𑀴𑀺𑀬𑀁 𑀧𑀕𑁂𑀯 𑀲𑀺𑀤𑁆𑀥𑀁 𑀯𑀺𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀤𑁂𑀲𑀦𑀸𑀯𑀸𑀭𑀲𑁆𑀲𑀸’’𑀢𑀺𑀆𑀤𑀺. ‘‘𑀲𑀢𑁆𑀢𑀸𑀳𑀫𑁂𑀯 𑀔𑁆𑀯𑀸𑀳𑀁, 𑀆𑀯𑀼𑀲𑁄 𑀲𑀭𑀡𑁄, 𑀭𑀝𑁆𑀞𑀧𑀺𑀡𑁆𑀟𑀁 𑀪𑀼𑀜𑁆𑀚𑀺’’𑀦𑁆𑀢𑀺 𑀯𑀢𑁆𑀯𑀸 𑀅𑀯𑀲𑀭𑀧𑁆𑀧𑀢𑁆𑀢𑀁 𑀅𑀭𑀳𑀢𑁆𑀢𑀁 𑀧𑀯𑁂𑀤𑁂𑀦𑁆𑀢𑁄 ‘‘𑀅𑀝𑁆𑀞𑀫𑀺𑀬𑀸 𑀅𑀜𑁆𑀜𑀸 𑀉𑀤𑀧𑀸𑀤𑀻’’𑀢𑀺 𑀆𑀳. 𑀅𑀬𑀫𑁂𑀢𑁆𑀣 𑀤𑁂𑀲𑀦𑀸𑀯𑀸𑀭𑀲𑁆𑀲 𑀆𑀕𑀫𑁄. 𑀢𑀢𑁄 𑀧𑀭𑀁 𑀪𑀕𑀯𑀢𑀸 𑀅𑀢𑁆𑀢𑀦𑁄 𑀓𑀢𑀁 𑀅𑀦𑀼𑀕𑁆𑀕𑀳𑀁 𑀘𑀻𑀯𑀭𑀧𑀭𑀺𑀯𑀢𑁆𑀢𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀔𑁄, 𑀆𑀯𑀼𑀲𑁄’’𑀢𑀺𑀆𑀤𑀺𑀫𑀸𑀳.

𑀅𑀦𑁆𑀢𑀦𑁆𑀢𑁂𑀦𑀸𑀢𑀺 𑀘𑀢𑀼𑀕𑁆𑀕𑀼𑀡𑀁 𑀓𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀬 𑀲𑀗𑁆𑀖𑀸𑀝𑀺𑀬𑀸 𑀅𑀦𑁆𑀢𑀦𑁆𑀢𑁂𑀦. 𑀚𑀸𑀢𑀺𑀧𑀁𑀲𑀼𑀓𑀽𑀮𑀺𑀓𑁂𑀦…𑀧𑁂… 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀢𑁂𑀦 𑀧𑀼𑀩𑁆𑀩𑁂 𑀚𑀸𑀢𑀺𑀆𑀭𑀜𑁆𑀜𑀓𑀕𑁆𑀕𑀳𑀡𑁂𑀦 𑀘 𑀢𑁂𑀭𑀲 𑀥𑀼𑀢𑀗𑁆𑀕𑀸 𑀕𑀳𑀺𑀢𑀸 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀦𑀼𑀘𑁆𑀙𑀯𑀺𑀓𑀁 𑀓𑀸𑀢𑀼𑀦𑁆𑀢𑀺 𑀅𑀦𑀼𑀭𑀽𑀧𑀁 𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀚𑁆𑀚𑀺𑀢𑀼𑀁. 𑀣𑁂𑀭𑁄 𑀧𑀸𑀭𑀼𑀧𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀪𑀕𑀯𑀢𑁄 𑀑𑀯𑀸𑀤𑀁 𑀪𑀕𑀯𑀢𑁄 𑀯𑀸 𑀥𑀫𑁆𑀫𑀓𑀸𑀬𑀁 𑀦𑀺𑀲𑁆𑀲𑀸𑀬 𑀉𑀭𑀲𑁆𑀲 𑀯𑀲𑁂𑀦 𑀚𑀸𑀢𑁄𑀢𑀺 𑀑𑀭𑀲𑁄. 𑀪𑀕𑀯𑀢𑁄 𑀯𑀸 𑀥𑀫𑁆𑀫𑀲𑀭𑀻𑀭𑀲𑁆𑀲 𑀫𑀼𑀔𑀢𑁄 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀢𑁄 𑀚𑀸𑀢𑁄. 𑀢𑁂𑀦𑁂𑀯 𑀥𑀫𑁆𑀫𑀚𑀸𑀢𑀥𑀫𑁆𑀫𑀦𑀺𑀫𑁆𑀫𑀺𑀢𑀪𑀸𑀯𑁄𑀧𑀺 𑀲𑀁𑀯𑀡𑁆𑀡𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀑𑀯𑀸𑀤𑀥𑀫𑁆𑀫𑁄 𑀏𑀯 𑀲𑀢𑁆𑀣𑀸𑀭𑀸 𑀤𑀸𑀢𑀩𑁆𑀩𑀢𑁄 𑀣𑁂𑀭𑁂𑀦 𑀆𑀤𑀸𑀢𑀩𑁆𑀩𑀢𑁄 𑀑𑀯𑀸𑀤𑀥𑀫𑁆𑀫𑀤𑀸𑀬𑀸𑀤𑁄, 𑀑𑀯𑀸𑀤𑀥𑀫𑁆𑀫𑀤𑀸𑀬𑀚𑁆𑀚𑁄𑀢𑀺 𑀅𑀢𑁆𑀣𑁄, 𑀢𑀁 𑀅𑀭𑀳𑀢𑀻𑀢𑀺. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺.

‘‘𑀧𑀩𑁆𑀩𑀚𑁆𑀚𑀸 𑀘 𑀧𑀭𑀺𑀲𑁄𑀥𑀺𑀢𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸 𑀲𑀫𑁆𑀫𑀤𑁂𑀯 𑀲𑁄𑀥𑀺𑀢𑀪𑀸𑀯𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁, ‘‘𑀆𑀯𑀼𑀲𑁄, 𑀬𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀯𑀦𑁆𑀢𑀺 𑀬𑀣𑀸 𑀅𑀳𑀁 𑀮𑀪𑀺𑀁, 𑀏𑀯𑀁 𑀲𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀮𑀪𑀢𑀻𑀢𑀺 𑀬𑁄𑀚𑀦𑀸. 𑀲𑀻𑀳𑀦𑀸𑀤𑀁 𑀦𑀤𑀺𑀢𑀼𑀦𑁆𑀢𑀺 𑀏𑀢𑁆𑀣𑀸𑀧𑀺 𑀲𑀻𑀳𑀦𑀸𑀤𑀦𑀤𑀦𑀸 𑀦𑀸𑀫 𑀤𑁂𑀲𑀦𑀸𑀯, 𑀣𑁂𑀭𑁄 𑀲𑀢𑁆𑀣𑀸𑀭𑀸 𑀅𑀢𑁆𑀢𑀦𑁄 𑀓𑀢𑀸𑀦𑀼𑀕𑁆𑀕𑀳𑀫𑁂𑀯 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀉𑀮𑁆𑀮𑀺𑀗𑁆𑀕𑁂𑀢𑀺, 𑀦 𑀅𑀜𑁆𑀜𑀣𑀸. 𑀦 𑀳𑀺 𑀫𑀳𑀸𑀣𑁂𑀭𑁄 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀕𑀼𑀡𑀸𑀦𑀼𑀪𑀸𑀯𑀁 𑀯𑀺𑀪𑀸𑀯𑁂𑀢𑀺. 𑀲𑁂𑀲𑀦𑁆𑀢𑀺 𑀬𑀁 𑀇𑀥 𑀅𑀲𑀁𑀯𑀡𑁆𑀡𑀺𑀢𑀁. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯.

𑀘𑀻𑀯𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀧𑀭𑀁𑀫𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁫. 𑀬𑀣𑀸 𑀅𑀢𑀻𑀢𑀓𑀧𑁆𑀧𑁂 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼 𑀓𑀫𑁆𑀫𑀓𑀺𑀮𑁂𑀲𑀯𑀲𑁂𑀦 𑀆𑀕𑀢𑁄, 𑀢𑀣𑀸 𑀏𑀢𑀭𑀳𑀺𑀧𑀺 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀬𑀣𑀸 𑀬𑀣𑀸 𑀯𑀸 𑀧𑀦 𑀓𑀫𑁆𑀫𑀁 𑀓𑀢𑀽𑀧𑀘𑀺𑀢𑀁, 𑀢𑀣𑀸 𑀢𑀁 𑀢𑀁 𑀅𑀢𑁆𑀢𑀪𑀸𑀯𑀁 𑀆𑀕𑀢𑁄 𑀉𑀧𑀕𑀢𑁄 𑀉𑀧𑀧𑀦𑁆𑀦𑁄𑀢𑀺 𑀢𑀣𑀸𑀕𑀢𑁄, 𑀲𑀢𑁆𑀢𑁄𑀢𑀺 𑀆𑀳 ‘‘𑀢𑀣𑀸𑀕𑀢𑁄𑀢𑀺 𑀲𑀢𑁆𑀢𑁄’’𑀢𑀺. 𑀏𑀢𑀦𑁆𑀢𑀺 ‘‘𑀏𑀯𑀁 𑀳𑁄𑀢𑀺 𑀪𑀯𑀢𑀺 𑀢𑀺𑀝𑁆𑀞𑀢𑀺 𑀲𑀲𑁆𑀲𑀢𑀺𑀲𑀫’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀤𑀺𑀝𑁆𑀞𑀺𑀕𑀢𑀁. 𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀁 𑀦 𑀳𑁄𑀢𑀻𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀢𑁄 𑀲𑀼𑀔𑀦𑁆𑀢𑀺 𑀧𑀲𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀁 𑀦 𑀳𑁄𑀢𑀺. 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀦𑁆𑀢𑀺 𑀏𑀢𑁆𑀣 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀥𑀺𑀧𑁆𑀧𑁂𑀢𑀁 𑀢𑀲𑁆𑀲 𑀧𑀥𑀸𑀦𑀪𑀸𑀯𑀢𑁄. 𑀢𑀲𑁆𑀲 𑀧𑀦 𑀏𑀢𑀁 𑀤𑀺𑀝𑁆𑀞𑀺𑀕𑀢𑀁 𑀆𑀤𑀺𑀧𑀝𑀺𑀧𑀤𑀸𑀫𑀢𑁆𑀢𑀁 𑀦 𑀳𑁄𑀢𑀺 𑀅𑀦𑀼𑀧𑀓𑀸𑀭𑀓𑀢𑁆𑀢𑀸 𑀯𑀺𑀮𑁄𑀫𑀦𑀢𑁄 𑀘. 𑀢𑀢𑁄 𑀏𑀯 𑀇𑀢𑀭𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲𑀧𑀺 𑀅𑀦𑀺𑀲𑁆𑀲𑀬𑁄𑀯. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀧𑀭𑀁𑀫𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀲𑀤𑁆𑀥𑀫𑁆𑀫𑀧𑁆𑀧𑀢𑀺𑀭𑀽𑀧𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁬. 𑀆𑀚𑀸𑀦𑀸𑀢𑀺 𑀳𑁂𑀝𑁆𑀞𑀺𑀫𑀫𑀕𑁆𑀕𑁂𑀳𑀺 𑀜𑀸𑀢𑀫𑀭𑀺𑀬𑀸𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀚𑀸𑀦𑀸𑀢𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀜𑁆𑀜𑀸, 𑀅𑀕𑁆𑀕𑀫𑀕𑁆𑀕𑀧𑀜𑁆𑀜𑀸. 𑀅𑀜𑁆𑀜𑀲𑁆𑀲 𑀅𑀬𑀦𑁆𑀢𑀺 𑀅𑀜𑁆𑀜𑀸, 𑀅𑀭𑀳𑀢𑁆𑀢𑀨𑀮𑀁. 𑀢𑁂𑀦𑀸𑀳 ‘‘𑀅𑀭𑀳𑀢𑁆𑀢𑁂’’𑀢𑀺.

𑀑𑀪𑀸𑀲𑁂𑀢𑀺 𑀑𑀪𑀸𑀲𑀦𑀺𑀫𑀺𑀢𑁆𑀢𑀁. ‘‘𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀢𑀻’’𑀢𑀺 𑀧𑀤𑀤𑁆𑀯𑀬𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀑𑀪𑀸𑀲𑁂𑀢𑀺 𑀯𑀺𑀲𑀬𑀪𑀽𑀢𑁂. 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀦𑀸𑀳 ‘‘𑀬𑁂𑀳𑀺 𑀘𑀺𑀢𑁆𑀢𑀁 𑀧𑀯𑁂𑀥𑀢𑀻’’𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀉𑀧𑀝𑁆𑀞𑀸𑀦𑁂𑀢𑀺 𑀲𑀢𑀺𑀬𑀁. 𑀉𑀧𑁂𑀓𑁆𑀔𑀸𑀬 𑀘𑀸𑀢𑀺 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀬 𑀘. 𑀏𑀢𑁆𑀣 𑀘 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑀦𑁆𑀢𑀸𑀦𑀯𑀺𑀦𑀺𑀫𑀼𑀢𑁆𑀢𑀁 𑀧𑀪𑀸𑀲𑀦𑀁 𑀭𑀽𑀧𑀸𑀬𑀢𑀦𑀁 𑀑𑀪𑀸𑀲𑁄. 𑀜𑀸𑀡𑀸𑀤𑀬𑁄 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀯. 𑀲𑀓𑀲𑀓𑀓𑀺𑀘𑁆𑀘𑁂 𑀲𑀯𑀺𑀲𑁂𑀲𑁄 𑀳𑀼𑀢𑁆𑀯𑀸 𑀧𑀯𑀢𑁆𑀢𑁄 𑀅𑀥𑀺𑀫𑁄𑀓𑁆𑀔𑁄 𑀲𑀤𑁆𑀥𑀸𑀥𑀺𑀫𑁄𑀓𑁆𑀔𑁄. 𑀉𑀧𑀝𑁆𑀞𑀸𑀦𑀁 𑀲𑀢𑀺. 𑀉𑀧𑁂𑀓𑁆𑀔𑀸𑀢𑀺 𑀆𑀯𑀚𑁆𑀚𑀦𑀼𑀧𑁂𑀓𑁆𑀔𑀸. 𑀲𑀸 𑀳𑀺 𑀆𑀯𑀚𑁆𑀚𑀦𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀢𑀦𑀸. 𑀆𑀯𑀚𑁆𑀚𑀦𑀅𑀚𑁆𑀛𑀼𑀧𑁂𑀓𑁆𑀔𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀇𑀥 ‘‘𑀆𑀯𑀚𑁆𑀚𑀦𑀼𑀧𑁂𑀓𑁆𑀔𑀸’’𑀢𑀺 𑀯𑀼𑀘𑁆𑀘𑀢𑀺. 𑀧𑀼𑀦 𑀉𑀧𑁂𑀓𑁆𑀔𑀸𑀬𑀸𑀢𑀺 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀯 𑀅𑀦𑁂𑀦 𑀲𑀫𑀚𑁆𑀛𑀢𑁆𑀢𑀢𑀸𑀬 𑀏𑀯𑀁 𑀯𑀼𑀢𑁆𑀢𑀸. 𑀦𑀺𑀓𑀦𑁆𑀢𑀺 𑀦𑀸𑀫 𑀯𑀺𑀧𑀲𑁆𑀲𑀦𑀸𑀬 𑀦𑀺𑀓𑀸𑀫𑀦𑀸 𑀅𑀧𑁂𑀓𑁆𑀔𑀸. 𑀲𑀼𑀔𑀼𑀫𑀢𑀭𑀓𑀺𑀮𑁂𑀲𑁄 𑀯𑀸 𑀲𑀺𑀬𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑁄.

𑀇𑀫𑀸𑀦𑀺 𑀤𑀲 𑀞𑀸𑀦𑀸𑀦𑀻𑀢𑀺 𑀇𑀫𑀸𑀦𑀺 𑀑𑀪𑀸𑀲𑀸𑀤𑀻𑀦𑀺 𑀉𑀧𑀓𑁆𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀬𑀸 𑀞𑀸𑀦𑀸𑀦𑀺 𑀉𑀧𑀓𑁆𑀓𑀺𑀮𑁂𑀲𑀯𑀢𑁆𑀣𑀽𑀦𑀺. 𑀧𑀜𑁆𑀜𑀸 𑀬𑀲𑁆𑀲 𑀧𑀭𑀺𑀘𑀺𑀢𑀸𑀢𑀺 𑀬𑀲𑁆𑀲 𑀧𑀜𑁆𑀜𑀸 𑀧𑀭𑀺𑀘𑀺𑀢𑀯𑀢𑀻 𑀬𑀸𑀣𑀸𑀯𑀢𑁄 𑀚𑀸𑀦𑀸𑀢𑀺. ‘‘𑀇𑀫𑀸𑀦𑀺 𑀦𑀺𑀲𑁆𑀲𑀸𑀬 𑀅𑀤𑁆𑀥𑀸 𑀫𑀕𑁆𑀕𑀧𑁆𑀧𑀢𑁆𑀢𑁄 𑀨𑀮𑀧𑁆𑀧𑀢𑁆𑀢𑁄 𑀅𑀳’’𑀦𑁆𑀢𑀺 𑀧𑀯𑀢𑁆𑀢𑀅𑀥𑀺𑀫𑀸𑀦𑁄 𑀥𑀫𑁆𑀫𑀼𑀤𑁆𑀥𑀘𑁆𑀘𑀁 𑀥𑀫𑁆𑀫𑀽𑀧𑀦𑀺𑀲𑁆𑀲𑀬𑁄 𑀯𑀺𑀓𑁆𑀔𑁂𑀧𑁄. 𑀢𑀢𑁆𑀣 𑀓𑀼𑀲𑀮𑁄 𑀳𑀺 𑀢𑀁 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑁄 𑀦 𑀘 𑀢𑀢𑁆𑀣 𑀲𑀫𑁆𑀫𑁄𑀳𑀁 𑀕𑀘𑁆𑀙𑀢𑀺.

𑀅𑀥𑀺𑀕𑀫𑀲𑀤𑁆𑀥𑀫𑁆𑀫𑀧𑁆𑀧𑀢𑀺𑀭𑀽𑀧𑀓𑀁 𑀦𑀸𑀫 𑀅𑀦𑀥𑀺𑀕𑀢𑁂 𑀅𑀥𑀺𑀕𑀢𑀫𑀸𑀦𑀺𑀪𑀸𑀯𑀸𑀯𑀳𑀢𑁆𑀢𑀸. 𑀬𑀤𑀕𑁆𑀕𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄, 𑀢𑀤𑀕𑁆𑀕𑁂𑀦 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑀧𑁆𑀧𑀢𑀺𑀭𑀽𑀧𑀓𑁄𑀢𑀺𑀧𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀥𑀸𑀢𑀼𑀓𑀣𑀸𑀢𑀺 𑀫𑀳𑀸𑀥𑀸𑀢𑀼𑀓𑀣𑀁 𑀯𑀤𑀢𑀺. 𑀯𑁂𑀤𑀮𑁆𑀮𑀧𑀺𑀝𑀓𑀦𑁆𑀢𑀺 𑀯𑁂𑀢𑀼𑀮𑁆𑀮𑀧𑀺𑀝𑀓𑀁. 𑀢𑀁 𑀦𑀸𑀕𑀪𑀯𑀦𑀢𑁄 𑀆𑀦𑀻𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀯𑀸𑀤𑀪𑀸𑀲𑀺𑀢𑀦𑁆𑀢𑀺 𑀅𑀧𑀭𑁂. 𑀅𑀩𑀼𑀤𑁆𑀥𑀯𑀘𑀦𑀁 𑀩𑀼𑀤𑁆𑀥𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀦𑀢𑁄. 𑀦 𑀳𑀺 𑀲𑀫𑁆𑀩𑀼𑀤𑁆𑀥𑁄 𑀧𑀼𑀩𑁆𑀩𑀸𑀧𑀭𑀯𑀺𑀭𑀼𑀤𑁆𑀥𑀁 𑀯𑀤𑀢𑀺. 𑀢𑀢𑁆𑀣 𑀲𑀮𑁆𑀮𑀁 𑀉𑀧𑀝𑁆𑀞𑀧𑁂𑀦𑁆𑀢𑀺 𑀓𑀺𑀮𑁂𑀲𑀯𑀺𑀦𑀬𑀁 𑀦 𑀲𑀦𑁆𑀤𑀺𑀲𑁆𑀲𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺.

𑀅𑀯𑀺𑀓𑁆𑀓𑀬𑀫𑀸𑀦𑀦𑁆𑀢𑀺 𑀯𑀺𑀓𑁆𑀓𑀬𑀁 𑀅𑀕𑀘𑁆𑀙𑀦𑁆𑀢𑀁. 𑀢𑀦𑁆𑀢𑀺 𑀲𑀼𑀯𑀡𑁆𑀡𑀪𑀡𑁆𑀟𑀁.

𑀦 𑀲𑀓𑁆𑀔𑀺𑀁𑀲𑀼 𑀜𑀸𑀡𑀲𑁆𑀲 𑀅𑀯𑀺𑀲𑀤𑀪𑀸𑀯𑀢𑁄. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺.

𑀇𑀤𑀸𑀦𑀺 ‘‘𑀪𑀺𑀓𑁆𑀔𑀽 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸 𑀅𑀳𑁂𑀲𑀼’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯 𑀅𑀢𑁆𑀣𑀁 𑀓𑀸𑀭𑀡𑀢𑁄 𑀯𑀺𑀪𑀸𑀯𑁂𑀢𑀼𑀁 𑀧𑀼𑀦 ‘‘𑀧𑀞𑀫𑀩𑁄𑀥𑀺𑀬𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑀬𑀺𑀁𑀲𑀽𑀢𑀺 𑀅𑀢𑀻𑀢𑁂 𑀓𑀤𑀸 𑀢𑁂 𑀧𑀝𑀺𑀲𑀫𑁆𑀪𑀺𑀤𑀸𑀯𑀳𑀁 𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑀬𑀺𑀁𑀲𑀼? 𑀧𑀞𑀫𑀩𑁄𑀥𑀺𑀓𑀸𑀮𑀺𑀓𑀸 𑀪𑀺𑀓𑁆𑀔𑀽. 𑀦 𑀳𑀺 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀬𑀸 𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸𑀬 𑀘 𑀯𑀺𑀦𑀸 𑀢𑀸𑀤𑀺𑀲𑀁 𑀪𑀯𑀢𑀺. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. 𑀢𑀤𑀸 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑁄 𑀅𑀦𑁆𑀢𑀭𑀳𑀺𑀢𑁄 𑀦𑀸𑀫 𑀪𑀯𑀺𑀲𑁆𑀲𑀢𑀻𑀢𑀺 𑀏𑀢𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀆𑀲𑀦𑁆𑀦𑀸 𑀏𑀯 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑁄𑀢𑀺 𑀤𑀲𑁆𑀲𑁂𑀢𑀺.

𑀤𑁆𑀯𑀻𑀲𑀽𑀢𑀺 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀧𑀺𑀝𑀓𑁂𑀲𑀼 𑀅𑀦𑁆𑀢𑀭𑀳𑀺𑀢𑁂𑀲𑀼𑀧𑀺. 𑀅𑀦𑀦𑁆𑀢𑀭𑀳𑀺𑀢𑀫𑁂𑀯 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬𑀁 𑀞𑀺𑀢𑀲𑁆𑀲 𑀇𑀢𑀭𑀲𑀺𑀓𑁆𑀔𑀸𑀤𑁆𑀯𑀬𑀲𑀫𑀼𑀝𑁆𑀞𑀸𑀧𑀺𑀢𑀢𑁄. 𑀓𑀺𑀁 𑀓𑀸𑀭𑀡𑀸𑀢𑀺 𑀓𑁂𑀦 𑀓𑀸𑀭𑀡𑁂𑀦, 𑀅𑀜𑁆𑀜𑀲𑁆𑀫𑀺𑀁 𑀥𑀫𑁆𑀫𑁂 𑀅𑀦𑁆𑀢𑀭𑀳𑀺𑀢𑁂 𑀅𑀜𑁆𑀜𑀢𑀭𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀥𑀸𑀦𑀁 𑀯𑀼𑀘𑁆𑀘𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀝𑀺𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺 𑀅𑀦𑀯𑀲𑁂𑀲𑀢𑁄 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑀲𑁆𑀲 𑀧𑀭𑀺𑀤𑀻𑀧𑀦𑀢𑁄. 𑀧𑀝𑀺𑀧𑀢𑁆𑀢𑀺 𑀅𑀥𑀺𑀕𑀫𑀲𑁆𑀲 𑀧𑀘𑁆𑀘𑀬𑁄 𑀯𑀺𑀲𑁂𑀲𑀮𑀓𑁆𑀔𑀡𑀧𑀝𑀺𑀯𑁂𑀥𑀪𑀸𑀯𑀢𑁄. 𑀧𑀭𑀺𑀬𑀢𑁆𑀢𑀺𑀬𑁂𑀯 𑀧𑀫𑀸𑀡𑀁 𑀲𑀸𑀲𑀦𑀲𑁆𑀲 𑀞𑀺𑀢𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀦𑀼 𑀘 𑀲𑀸𑀲𑀦𑀁 𑀑𑀲𑀓𑁆𑀓𑀺𑀢𑀁 𑀧𑀭𑀺𑀬𑀢𑁆𑀢𑀺𑀬𑀸 𑀯𑀢𑁆𑀢𑀫𑀸𑀦𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀸𑀭𑀸𑀥𑀓𑀪𑀺𑀓𑁆𑀔𑀽𑀢𑀺 𑀲𑀻𑀮𑀫𑀢𑁆𑀢𑀲𑁆𑀲𑀧𑀺 𑀦 𑀆𑀭𑀸𑀥𑀓𑁄 𑀤𑀼𑀲𑁆𑀲𑀻𑀮𑁄. 𑀇𑀫𑀲𑁆𑀫𑀺𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀸𑀢𑀺𑀫𑁄𑀓𑁆𑀔𑁂. 𑀯𑀢𑁆𑀢𑀦𑁆𑀢𑀸𑀢𑀺 ‘‘𑀲𑀻𑀮𑀁 𑀅𑀓𑁄𑀧𑁂𑀢𑁆𑀯𑀸 𑀞𑀺𑀢𑀸 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺.

𑀏𑀢𑁂𑀲𑀽𑀢𑀺 𑀏𑀯𑀁 𑀫𑀳𑀦𑁆𑀢𑁂𑀲𑀼 𑀲𑀓𑀮𑀁 𑀮𑁄𑀓𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑀼𑀁 𑀲𑀫𑀢𑁆𑀣𑁂𑀲𑀼 𑀘𑀢𑀽𑀲𑀼 𑀫𑀳𑀸𑀪𑀽𑀢𑁂𑀲𑀼. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀅𑀢𑀺𑀫𑀳𑀦𑁆𑀢𑁂𑀦𑀧𑀺 𑀲𑀤𑁆𑀥𑀫𑁆𑀫𑁄 𑀦 𑀅𑀦𑁆𑀢𑀭𑀥𑀸𑀬𑀢𑀺, 𑀲𑀫𑀬𑀦𑁆𑀢𑀭𑁂𑀦 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀢𑀲𑁆𑀫𑀸. 𑀏𑀯𑀫𑀸𑀳𑀸𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑀁 𑀯𑀤𑀢𑀺.

𑀆𑀤𑀸𑀦𑀁 𑀆𑀤𑀺, 𑀆𑀤𑀺 𑀏𑀯 𑀆𑀤𑀺𑀓𑀦𑁆𑀢𑀺 𑀆𑀳 ‘‘𑀆𑀤𑀺𑀓𑁂𑀦𑀸𑀢𑀺 𑀆𑀤𑀸𑀦𑁂𑀦𑀸’’𑀢𑀺. 𑀳𑁂𑀝𑁆𑀞𑀸𑀕𑀫𑀦𑀻𑀬𑀸𑀢𑀺 𑀅𑀥𑁄𑀪𑀸𑀕𑀕𑀫𑀦𑀻𑀬𑀸, 𑀅𑀧𑀸𑀬𑀤𑀼𑀓𑁆𑀔𑀲𑁆𑀲 𑀲𑀁𑀲𑀸𑀭𑀤𑀼𑀓𑁆𑀔𑀲𑁆𑀲 𑀘 𑀦𑀺𑀩𑁆𑀩𑀢𑁆𑀢𑀓𑀸𑀢𑀺 𑀅𑀢𑁆𑀣𑁄. 𑀕𑀸𑀭𑀯𑀭𑀳𑀺𑀢𑀸𑀢𑀺 𑀕𑀭𑀼𑀓𑀸𑀭𑀭𑀳𑀺𑀢𑀸. 𑀧𑀢𑀺𑀲𑁆𑀲𑀬𑀦𑀁 𑀦𑀻𑀘𑀪𑀸𑀯𑁂𑀦 𑀧𑀢𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸, 𑀧𑀢𑀺𑀲𑁆𑀲𑁄 𑀧𑀢𑀺𑀲𑁆𑀲𑀬𑁄𑀢𑀺 𑀅𑀢𑁆𑀣𑀢𑁄 𑀏𑀓𑀁, 𑀲𑁄 𑀏𑀢𑁂𑀲𑀁 𑀦𑀢𑁆𑀣𑀻𑀢𑀺 𑀆𑀳 ‘‘𑀅𑀧𑁆𑀧𑀢𑀺𑀲𑁆𑀲𑀸𑀢𑀺 𑀅𑀧𑁆𑀧𑀢𑀺𑀲𑁆𑀲𑀬𑀸 𑀅𑀦𑀻𑀘𑀯𑀼𑀢𑁆𑀢𑀺𑀓𑀸’’𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀤𑁆𑀥𑀫𑁆𑀫𑀧𑁆𑀧𑀢𑀺𑀭𑀽𑀧𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.