𑁩. 𑀥𑀸𑀢𑀼𑀲𑀁𑀬𑀼𑀢𑁆𑀢𑀁

𑁧. 𑀦𑀸𑀦𑀢𑁆𑀢𑀯𑀕𑁆𑀕𑁄

𑁧. 𑀥𑀸𑀢𑀼𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁫. 𑀧𑀞𑀫𑀦𑁆𑀢𑀺 𑀇𑀫𑀲𑁆𑀫𑀺𑀁 𑀦𑀺𑀤𑀸𑀦𑀯𑀕𑁆𑀕𑁂 𑀲𑀁𑀬𑀼𑀢𑁆𑀢𑀸𑀦𑀁 𑀧𑀞𑀫𑀁 𑀲𑀁𑀕𑀻𑀢𑀢𑁆𑀢𑀸. 𑀦𑀺𑀲𑁆𑀲𑀢𑁆𑀢𑀝𑁆𑀞𑀲𑀼𑀜𑁆𑀜𑀢𑀝𑁆𑀞𑀲𑀗𑁆𑀔𑀸𑀢𑁂𑀦𑀸𑀢𑀺 𑀥𑀫𑁆𑀫𑀫𑀢𑁆𑀢𑀢𑀸𑀬 𑀦𑀺𑀲𑁆𑀲𑀢𑁆𑀢𑀢𑀸𑀲𑀗𑁆𑀔𑀸𑀢𑁂𑀦 𑀦𑀺𑀘𑁆𑀘𑀲𑀼𑀪𑀲𑀼𑀔𑀅𑀢𑁆𑀢𑀲𑀼𑀜𑁆𑀜𑀢𑀢𑁆𑀣𑀲𑀗𑁆𑀔𑀸𑀢𑁂𑀦. 𑀲𑀪𑀸𑀯𑀝𑁆𑀞𑁂𑀦𑀸𑀢𑀺 𑀬𑀣𑀸𑀪𑀽𑀢𑀲𑀪𑀸𑀯𑀝𑁆𑀞𑁂𑀦. 𑀢𑀢𑁄 𑀏𑀯 𑀲𑀪𑀸𑀯𑀲𑁆𑀲 𑀥𑀸𑀭𑀡𑀝𑁆𑀞𑁂𑀦 𑀥𑀸𑀢𑀽𑀢𑀺 𑀮𑀤𑁆𑀥𑀦𑀸𑀫𑀸𑀦𑀁. 𑀦𑀸𑀦𑀸𑀲𑀪𑀸𑀯𑁄 𑀅𑀜𑁆𑀜𑀫𑀜𑁆𑀜𑀯𑀺𑀲𑀤𑀺𑀲𑀢𑀸 𑀥𑀸𑀢𑀼𑀦𑀸𑀦𑀢𑁆𑀢𑀁. 𑀘𑀓𑁆𑀔𑀼𑀲𑀗𑁆𑀔𑀸𑀢𑁄 𑀧𑀲𑀸𑀤𑁄 𑀘𑀓𑁆𑀔𑀼𑀧𑀲𑀸𑀤𑁄. 𑀲𑁄 𑀏𑀯 𑀘𑀓𑁆𑀔𑀦𑀝𑁆𑀞𑁂𑀦 𑀘𑀓𑁆𑀔𑀼, 𑀦𑀺𑀲𑁆𑀲𑀢𑁆𑀢𑀲𑀼𑀜𑁆𑀜𑀢𑀝𑁆𑀞𑁂𑀦 𑀥𑀸𑀢𑀼 𑀘𑀸𑀢𑀺 𑀘𑀓𑁆𑀔𑀼𑀥𑀸𑀢𑀼. 𑀘𑀓𑁆𑀔𑀼𑀧𑀲𑀸𑀤𑀯𑀢𑁆𑀣𑀼𑀁 𑀅𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀧𑀯𑀢𑁆𑀢𑀁 𑀘𑀓𑁆𑀔𑀼𑀧𑀲𑀸𑀤𑀯𑀢𑁆𑀣𑀼𑀓𑀁. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑁆𑀯𑁂 𑀲𑀫𑁆𑀧𑀝𑀺𑀘𑁆𑀙𑀦𑀫𑀦𑁄𑀥𑀸𑀢𑀼𑀬𑁄, 𑀏𑀓𑀸 𑀓𑀺𑀭𑀺𑀬𑀸 𑀫𑀦𑁄𑀥𑀸𑀢𑀽𑀢𑀺 𑀢𑀺𑀲𑁆𑀲𑁄 𑀫𑀦𑁄𑀥𑀸𑀢𑀼𑀬𑁄 𑀫𑀦𑁄𑀥𑀸𑀢𑀼 ‘‘𑀫𑀦𑀦𑀫𑀢𑁆𑀢𑀸 𑀥𑀸𑀢𑀽’’𑀢𑀺 𑀓𑀢𑁆𑀯𑀸. 𑀯𑁂𑀤𑀦𑀸𑀤𑀬𑁄…𑀧𑁂… 𑀦𑀺𑀩𑁆𑀩𑀸𑀦𑀜𑁆𑀘 𑀥𑀫𑁆𑀫𑀥𑀸𑀢𑀼 𑀯𑀺𑀲𑁂𑀲𑀲𑀜𑁆𑀜𑀸𑀧𑀭𑀺𑀳𑀸𑀭𑁂𑀦 𑀲𑀸𑀫𑀜𑁆𑀜𑀲𑀜𑁆𑀜𑀸𑀬 𑀧𑀯𑀢𑁆𑀢𑀦𑀢𑁄. 𑀢𑀣𑀸 𑀳𑁂𑀢𑁂 𑀥𑀫𑁆𑀫𑀸 𑀆𑀬𑀢𑀦𑀤𑁂𑀲𑀦𑀸𑀬 ‘‘𑀥𑀫𑁆𑀫𑀸𑀬𑀢𑀦’’𑀦𑁆𑀢𑁂𑀯 𑀤𑁂𑀲𑀺𑀢𑀸. 𑀦 𑀳𑀺 𑀦𑁂𑀲𑀁 𑀭𑀽𑀧𑀸𑀬𑀢𑀦𑀸𑀤𑀻𑀦𑀁 𑀯𑀺𑀬 𑀯𑀺𑀜𑁆𑀜𑀸𑀡𑁂𑀳𑀺 𑀅𑀜𑁆𑀜𑀯𑀺𑀜𑁆𑀜𑀸𑀡𑁂𑀦 𑀕𑀳𑁂𑀢𑀩𑁆𑀩𑀢𑀸𑀓𑀸𑀭𑁄 𑀅𑀢𑁆𑀣𑀺. 𑀲𑀩𑁆𑀩𑀫𑁆𑀧𑀻𑀢𑀺 𑀙𑀲𑀢𑁆𑀢𑀢𑀺𑀯𑀺𑀥𑀁 𑀫𑀦𑁄𑀯𑀺𑀜𑁆𑀜𑀸𑀡𑀁. 𑀓𑀸𑀫𑀸𑀯𑀘𑀭𑀸 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸. 𑀅𑀯𑀲𑀸𑀦𑁂 𑀤𑁆𑀯𑁂𑀢𑀺 𑀥𑀫𑁆𑀫𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀢𑀁𑀲𑀁𑀯𑀡𑁆𑀡𑀦𑀸𑀲𑀼 𑀤𑀝𑁆𑀞𑀩𑁆𑀩𑁄.

𑀥𑀸𑀢𑀼𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀨𑀲𑁆𑀲𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁬. 𑀚𑀸𑀢𑀺𑀧𑀲𑀼𑀢𑀺𑀆𑀭𑀫𑁆𑀫𑀡𑀸𑀤𑀺𑀪𑁂𑀤𑁂𑀦 𑀦𑀸𑀦𑀸𑀪𑀸𑀯𑁄 𑀨𑀲𑁆𑀲𑁄. 𑀚𑀸𑀢𑀺𑀧𑀘𑁆𑀘𑀬𑀪𑁂𑀤𑁂𑀦 𑀳𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀪𑁂𑀤𑁄 𑀳𑁄𑀢𑀺𑀬𑁂𑀯. 𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀥𑀸𑀢𑀼𑀤𑁂𑀲𑀦𑀸𑀬𑀁 𑀢𑀺𑀲𑁆𑀲𑁄 𑀫𑀦𑀦𑀫𑀢𑁆𑀢𑀸 𑀥𑀸𑀢𑀼𑀬𑁄𑀯 𑀫𑀦𑁄𑀥𑀸𑀢𑀼𑀬𑁄. 𑀓𑀺𑀭𑀺𑀬𑀸𑀫𑀬𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀯𑀺𑀪𑀸𑀕𑁂𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀯𑀲𑁂𑀦 𑀥𑀸𑀢𑀼𑀤𑁂𑀲𑀦𑀸𑀬𑀁 𑀫𑀦𑀦𑀝𑁆𑀞𑁂𑀦 𑀥𑀸𑀢𑀼𑀢𑀸𑀬 𑀲𑀸𑀫𑀜𑁆𑀜𑀢𑁄 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 ‘‘𑀫𑀦𑁄𑀥𑀸𑀢𑀽’’𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀫𑀦𑁄𑀲𑀫𑁆𑀨𑀲𑁆𑀲𑁄 𑀫𑀦𑁄𑀤𑁆𑀯𑀸𑀭𑁂 𑀧𑀞𑀫𑀚𑀯𑀦𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺𑀆𑀤𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀓𑀸𑀫𑀁 𑀲𑀫𑁆𑀧𑀝𑀺𑀘𑁆𑀙𑀦𑀫𑀦𑁄𑀥𑀸𑀢𑀼𑀅𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀦𑁆𑀢𑀻𑀭𑀡𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑁄 𑀨𑀲𑁆𑀲𑁄𑀧𑀺 𑀫𑀦𑁄𑀲𑀫𑁆𑀨𑀲𑁆𑀲𑁄 𑀏𑀯 𑀦𑀸𑀫, 𑀤𑀼𑀩𑁆𑀩𑀮𑀢𑁆𑀢𑀸 𑀧𑀦 𑀲𑁄 𑀲𑀩𑁆𑀩𑀪𑀯𑁂𑀲𑀼 𑀅𑀲𑀫𑁆𑀪𑀯𑀢𑁄 𑀘 𑀕𑀳𑀺𑀢𑁄 𑀅𑀦𑀯𑀲𑁂𑀲𑀢𑁄 𑀕𑀳𑀡𑀁 𑀦 𑀳𑁄𑀢𑀻𑀢𑀺 𑀫𑀦𑁄𑀤𑁆𑀯𑀸𑀭𑁂 𑀚𑀯𑀦𑀲𑀫𑁆𑀨𑀲𑁆𑀲𑁄 𑀳𑁄𑀢𑀺, 𑀢𑀲𑁆𑀫𑀸. 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀅𑀬𑀁 𑀇𑀥 𑀅𑀥𑀺𑀧𑁆𑀧𑀸𑀬𑀸𑀦𑀼𑀕𑀢𑁄 𑀅𑀢𑁆𑀣𑁄.

𑀨𑀲𑁆𑀲𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀦𑁄𑀨𑀲𑁆𑀲𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁭. 𑀫𑀦𑁄𑀲𑀫𑁆𑀨𑀲𑁆𑀲𑀁 𑀧𑀝𑀺𑀘𑁆𑀘𑀸𑀢𑀺 𑀫𑀦𑁄𑀤𑁆𑀯𑀸𑀭𑁂 𑀧𑀞𑀫𑀚𑀯𑀦𑀲𑀫𑁆𑀧𑀬𑀼𑀢𑁆𑀢𑁄 𑀨𑀲𑁆𑀲𑁄 𑀫𑀦𑁄𑀲𑀫𑁆𑀨𑀲𑁆𑀲𑁄, 𑀢𑀁 𑀫𑀦𑁄𑀲𑀫𑁆𑀨𑀲𑁆𑀲𑀁 𑀧𑀝𑀺𑀘𑁆𑀘. 𑀫𑀦𑁄𑀥𑀸𑀢𑀽𑀢𑀺 𑀆𑀯𑀚𑁆𑀚𑀦𑀓𑀺𑀭𑀺𑀬𑀫𑀦𑁄𑀥𑀸𑀢𑀼. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀫𑀦𑁄𑀥𑀸𑀢𑀽𑀢𑀺 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀫𑀦𑁄𑀤𑁆𑀯𑀸𑀭𑁂…𑀧𑁂… 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀲𑀩𑁆𑀩𑀸𑀦𑀺 𑀘𑁂𑀢𑀸𑀦𑀻’’𑀢𑀺𑀆𑀤𑀺.

𑀦𑁄𑀨𑀲𑁆𑀲𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀯𑁂𑀤𑀦𑀸𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁮. 𑀲𑀩𑁆𑀩𑀸𑀧𑀺 𑀢𑀲𑁆𑀫𑀺𑀁 𑀤𑁆𑀯𑀸𑀭𑁂 𑀯𑁂𑀤𑀦𑀸 𑀯𑀢𑁆𑀢𑁂𑀬𑁆𑀬𑀼𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀯𑁂𑀤𑀦𑀸 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀺𑀢𑀸. 𑀦𑀺𑀩𑁆𑀩𑀢𑁆𑀢𑀺𑀨𑀸𑀲𑀼𑀓𑀢𑁆𑀣𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑀪𑀸𑀯𑁂𑀦 𑀧𑀯𑀢𑁆𑀢𑀺𑀬𑀸 𑀤𑀲𑁆𑀲𑀦𑀲𑀼𑀔𑀢𑁆𑀣𑀁. 𑀲𑀫𑁆𑀧𑀝𑀺𑀘𑁆𑀙𑀦𑀯𑁂𑀤𑀦𑀫𑁂𑀯 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺, 𑀢𑀸𑀬 𑀕𑀳𑀺𑀢𑀸𑀬 𑀇𑀢𑀭𑀸𑀲𑀁 𑀕𑀳𑀡𑀁 𑀜𑀸𑀬𑀸𑀕𑀢𑀫𑁂𑀯𑀸𑀢𑀺. 𑀯𑀼𑀢𑁆𑀢𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁. 𑀆𑀯𑀚𑁆𑀚𑀦𑀲𑀫𑁆𑀨𑀲𑁆𑀲𑀦𑁆𑀢𑀺 𑀆𑀯𑀚𑁆𑀚𑀦𑀫𑀦𑁄𑀲𑀫𑁆𑀨𑀲𑁆𑀲𑀁. 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀪𑀽𑀢𑀁 𑀧𑀝𑀺𑀘𑁆𑀘 𑀧𑀞𑀫𑀚𑀯𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀅𑀬𑀫𑀥𑀺𑀧𑁆𑀧𑀸𑀬𑁄 𑀉𑀧𑀦𑀺𑀲𑁆𑀲𑀬𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸.

𑀯𑁂𑀤𑀦𑀸𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀤𑀼𑀢𑀺𑀬𑀯𑁂𑀤𑀦𑀸𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁯. 𑀢𑀢𑀺𑀬𑀘𑀢𑀼𑀢𑁆𑀣𑁂𑀲𑀼 𑀯𑀼𑀢𑁆𑀢𑀦𑀬𑀸𑀯𑀸𑀢𑀺 ‘‘𑀦𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀥𑀸𑀢𑀽’’𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁄, 𑀘𑀢𑀼𑀢𑁆𑀣𑁂 ‘‘𑀘𑀓𑁆𑀔𑀼𑀥𑀸𑀢𑀼𑀁, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁄 𑀘. 𑀏𑀓𑀢𑁄 𑀓𑀢𑁆𑀯𑀸𑀢𑀺 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀤𑁂𑀲𑀺𑀢𑀸. 𑀓𑀲𑁆𑀫𑀸 𑀧𑀦 𑀢𑁂𑀲𑀼 𑀲𑀼𑀢𑁆𑀢𑁂𑀲𑀼 𑀏𑀯𑀁 𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺 𑀆𑀳 ‘‘𑀲𑀩𑁆𑀩𑀸𑀦𑀺 𑀘𑁂𑀢𑀸𑀦𑀻’’𑀢𑀺𑀆𑀤𑀺. 𑀧𑀝𑀺𑀲𑁂𑀥𑁄 𑀧𑀦 𑀢𑁂𑀲𑀁 𑀯𑁂𑀤𑀦𑀸𑀦𑀸𑀦𑀢𑁆𑀢𑀸𑀤𑀻𑀦𑀁 𑀨𑀲𑁆𑀲𑀦𑀸𑀦𑀢𑁆𑀢𑀸𑀤𑀺𑀓𑀲𑁆𑀲 𑀧𑀘𑁆𑀘𑀬𑀪𑀸𑀯𑀢𑁄 𑀢𑀣𑀸𑀉𑀧𑁆𑀧𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑀢𑁄. 𑀇𑀢𑁄 𑀧𑀭𑁂𑀲𑀽𑀢𑀺 ‘‘𑀦𑁄 𑀧𑀭𑀺𑀬𑁂𑀲𑀦𑀸𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀧𑀭𑀺𑀴𑀸𑀳𑀦𑀸𑀦𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼.

𑀤𑀼𑀢𑀺𑀬𑀯𑁂𑀤𑀦𑀸𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀩𑀸𑀳𑀺𑀭𑀥𑀸𑀢𑀼𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁦. 𑀧𑀜𑁆𑀘 𑀥𑀸𑀢𑀼𑀬𑁄 𑀓𑀸𑀫𑀸𑀯𑀘𑀭𑀸 𑀭𑀽𑀧𑀲𑀪𑀸𑀯𑀢𑁆𑀢𑀸.

𑀩𑀸𑀳𑀺𑀭𑀥𑀸𑀢𑀼𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀜𑁆𑀜𑀸𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁧. 𑀆𑀧𑀸𑀣𑁂 𑀧𑀢𑀺𑀢𑀦𑁆𑀢𑀺 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀕𑀢𑀁 𑀲𑀸𑀝𑀓𑀯𑁂𑀞𑀦𑀸𑀤𑀺𑀲𑀜𑁆𑀜𑀺𑀢𑀁 𑀪𑀽𑀢𑀲𑀗𑁆𑀖𑀸𑀢𑀁 𑀲𑀫𑁆𑀫𑀸 𑀦𑀺𑀲𑁆𑀲𑀺𑀢𑀁. 𑀘𑀓𑁆𑀔𑀼𑀤𑁆𑀯𑀸𑀭𑁂 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀲𑀜𑁆𑀜𑀸𑀦𑀁 𑀲𑀗𑁆𑀓𑀧𑁆𑀧𑀕𑀢𑀺𑀓𑀢𑁆𑀢𑀸, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀲𑀜𑁆𑀜𑀸𑀕𑀳𑀡𑁂𑀦𑁂𑀯 𑀯𑀸 𑀕𑀳𑁂𑀢𑀩𑁆𑀩𑀢𑁄 ‘‘𑀭𑀽𑀧𑀲𑀜𑁆𑀜𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀲𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀁 𑀢𑀢𑁆𑀣 𑀲𑀜𑁆𑀜𑀸𑀬 𑀏𑀯 𑀮𑀩𑁆𑀪𑀦𑀢𑁄. 𑀏𑀢𑁂𑀦𑁂𑀯 𑀳𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀲𑀗𑁆𑀓𑀧𑁆𑀧𑁄𑀢𑀺 𑀇𑀤𑀫𑁆𑀧𑀺 𑀲𑀁𑀯𑀡𑁆𑀡𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀲𑀜𑁆𑀜𑀸𑀲𑀗𑁆𑀓𑀧𑁆𑀧𑀙𑀦𑁆𑀤𑀸 𑀏𑀓𑀚𑀯𑀦𑀯𑀸𑀭𑁂𑀧𑀺 𑀦𑀸𑀦𑀸𑀚𑀯𑀦𑀯𑀸𑀭𑁂𑀧𑀺 𑀮𑀩𑁆𑀪𑀦𑁆𑀢𑀻’’𑀢𑀺. 𑀚𑀯𑀦𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀯𑀺𑀢𑀓𑁆𑀓𑀲𑁆𑀲 𑀙𑀦𑁆𑀤𑀕𑀢𑀺𑀓𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀢𑀻𑀳𑀺 𑀘𑀺𑀢𑁆𑀢𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑁄 𑀲𑀗𑁆𑀓𑀧𑁆𑀧𑁄’’𑀢𑀺. 𑀙𑀦𑁆𑀤𑀺𑀓𑀢𑀝𑁆𑀞𑁂𑀦𑀸𑀢𑀺 𑀙𑀦𑁆𑀤𑀓𑀭𑀡𑀝𑁆𑀞𑁂𑀦, 𑀇𑀘𑁆𑀙𑀺𑀢𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀟𑀳𑀦𑀝𑁆𑀞𑁂𑀦𑀸𑀢𑀺 𑀧𑀭𑀺𑀟𑀳𑀦𑀝𑁆𑀞𑁂𑀦. 𑀲𑀦𑁆𑀦𑀺𑀲𑁆𑀲𑀬𑀟𑀸𑀳𑀭𑀲𑀸 𑀳𑀺 𑀭𑀸𑀕𑀕𑁆𑀕𑀺𑀆𑀤𑀬𑁄 ‘‘𑀭𑀽𑀧𑁂’’𑀢𑀺 𑀧𑀦 𑀢𑀲𑁆𑀲 𑀆𑀭𑀫𑁆𑀫𑀡𑀤𑀲𑁆𑀲𑀦𑀫𑁂𑀢𑀁. 𑀧𑀭𑀺𑀴𑀸𑀳𑁄𑀢𑀺 𑀧𑀭𑀺𑀴𑀸𑀳𑀲𑀻𑀲𑁂𑀦 𑀅𑀧𑁂𑀓𑁆𑀔𑀁 𑀯𑀤𑀢𑀺. 𑀢𑁂𑀦𑀸𑀳 ‘‘𑀧𑀭𑀺𑀴𑀸𑀳𑁂 𑀉𑀧𑁆𑀧𑀦𑁆𑀦𑁂’’𑀢𑀺𑀆𑀤𑀺. ‘‘𑀧𑀭𑀺𑀴𑀸𑀳𑁄’’𑀢𑀺 𑀤𑀴𑁆𑀳𑀚𑁆𑀛𑁄𑀲𑀸𑀦𑀸 𑀩𑀮𑀯𑀸𑀓𑀸𑀭𑀧𑁆𑀧𑀢𑁆𑀢𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀧𑀭𑀺𑀴𑀸𑀳𑀧𑀭𑀺𑀬𑁂𑀲𑀦𑀸 𑀧𑀦 𑀦𑀸𑀦𑀸𑀚𑀯𑀦𑀯𑀸𑀭𑁂𑀬𑁂𑀯 𑀮𑀩𑁆𑀪𑀦𑁆𑀢𑀻’’𑀢𑀺. 𑀢𑀸𑀲𑀁 𑀮𑀤𑁆𑀥𑀽𑀧𑀦𑀺𑀲𑁆𑀲𑀬𑀪𑀸𑀯𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸 𑀦𑀬𑁂𑀦𑀸𑀢𑀺 ‘‘𑀉𑀧𑁆𑀧𑀚𑁆𑀚𑀢𑀺 𑀲𑀜𑁆𑀜𑀸𑀦𑀸𑀦𑀢𑁆𑀢’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀭𑀽𑀧𑀲𑀜𑁆𑀜𑀸𑀤𑀺𑀦𑀸𑀦𑀸𑀲𑀪𑀸𑀯𑀁 𑀲𑀜𑁆𑀜𑀁 𑀧𑀝𑀺𑀘𑁆𑀘 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀺𑀦𑀸𑀦𑀸𑀲𑀪𑀸𑀯𑁄 𑀲𑀗𑁆𑀓𑀧𑁆𑀧𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀲𑀜𑁆𑀜𑀸𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀦𑁄𑀧𑀭𑀺𑀬𑁂𑀲𑀦𑀸𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁨. 𑀧𑀝𑀺𑀲𑁂𑀥𑀫𑀢𑁆𑀢𑀫𑁂𑀯 𑀦𑀸𑀦𑀁, 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑁄𑀧𑀭𑀺𑀬𑁂𑀲𑀦𑀸𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀩𑀸𑀳𑀺𑀭𑀨𑀲𑁆𑀲𑀦𑀸𑀦𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁩. 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀆𑀭𑀫𑁆𑀫𑀡𑁂𑀢𑀺 ‘‘𑀆𑀧𑀸𑀣𑁂 𑀧𑀢𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀭𑀽𑀧𑀸𑀭𑀫𑁆𑀫𑀡𑁂. 𑀲𑀜𑁆𑀜𑀸𑀢𑀺 𑀭𑀽𑀧𑀲𑀜𑁆𑀜𑀸𑀯. 𑀅𑀭𑀽𑀧𑀥𑀫𑁆𑀫𑁄𑀧𑀺 𑀲𑀫𑀸𑀦𑁄 𑀬𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀢𑀺, 𑀢𑀁 𑀨𑀼𑀲𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀆𑀭𑀫𑁆𑀫𑀡𑀁 𑀨𑀼𑀲𑀫𑀸𑀦𑁄’’𑀢𑀺. 𑀢𑀡𑁆𑀳𑀸𑀬 𑀯𑀢𑁆𑀣𑀼𑀪𑀽𑀢𑀁𑀬𑁂𑀯 𑀭𑀽𑀧𑀸𑀭𑀫𑁆𑀫𑀡𑀁 𑀮𑀩𑁆𑀪𑀢𑀻𑀢𑀺 𑀓𑀢𑁆𑀯𑀸 ‘‘𑀭𑀽𑀧𑀮𑀸𑀪𑁄’’𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀲𑀳 𑀢𑀡𑁆𑀳𑀸𑀬 𑀆𑀭𑀫𑁆𑀫𑀡𑀁 𑀭𑀽𑀧𑀮𑀸𑀪𑁄’’𑀢𑀺. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀦𑀬𑁄𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀲𑀩𑁆𑀩𑁂𑀲𑀁 𑀲𑀜𑁆𑀜𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑀲𑀗𑁆𑀕𑀡𑁆𑀳𑀦𑀯𑀲𑁂𑀦 𑀤𑀲𑁆𑀲𑀺𑀢𑀦𑀬𑁄. 𑀢𑁂𑀦𑀸𑀳 ‘‘𑀏𑀓𑀲𑁆𑀫𑀺𑀁𑀬𑁂𑀯𑀸’’𑀢𑀺𑀆𑀤𑀺. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀦𑀬𑁄𑀢𑀺 𑀯𑀸 𑀥𑀼𑀯𑀧𑀭𑀺𑀪𑁄𑀕𑀯𑀲𑁂𑀦 𑀦𑀺𑀩𑀤𑁆𑀥𑀸𑀭𑀫𑁆𑀫𑀡𑀦𑁆𑀢𑀺 𑀯𑀸 𑀆𑀕𑀦𑁆𑀢𑀼𑀓𑀸𑀭𑀫𑁆𑀫𑀡𑀦𑁆𑀢𑀺 𑀯𑀸 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀦𑀬𑁄. 𑀅𑀧𑀭𑁄 𑀦𑀬𑁄. 𑀫𑀺𑀲𑁆𑀲𑀓𑁄𑀢𑀺 𑀆𑀕𑀦𑁆𑀢𑀼𑀓𑀸𑀭𑀫𑁆𑀫𑀡𑁂 𑀦𑀺𑀩𑀤𑁆𑀥𑀸𑀭𑀫𑁆𑀫𑀡𑁂 𑀘 𑀯𑀺𑀲𑀬𑀢𑁄 𑀦𑀺𑀩𑀤𑁆𑀥𑀸𑀭𑀫𑁆𑀫𑀡𑁂𑀦 𑀫𑀺𑀲𑁆𑀲𑀓𑁄. 𑀦𑀺𑀩𑀤𑁆𑀥𑀸𑀭𑀫𑁆𑀫𑀡𑁂 𑀲𑀢𑁆𑀢𑀸𑀦𑀁 𑀓𑀺𑀮𑁂𑀲𑁄 𑀫𑀦𑁆𑀤𑁄 𑀳𑁄𑀢𑀺. 𑀢𑀣𑀸 𑀳𑀺 𑀲𑀜𑁆𑀜𑀸𑀲𑀗𑁆𑀓𑀧𑁆𑀧𑀨𑀲𑁆𑀲𑀯𑁂𑀤𑀦𑀸𑀯 𑀤𑀲𑁆𑀲𑀺𑀢𑀸. 𑀬𑀁 𑀓𑀺𑀜𑁆𑀘𑀺 𑀯𑀺𑀬𑀸𑀢𑀺 𑀬𑀁 𑀓𑀺𑀜𑁆𑀘𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀬. 𑀔𑁄𑀪𑁂𑀢𑁆𑀯𑀸𑀢𑀺 𑀓𑀼𑀢𑀽𑀳𑀮𑀼𑀧𑁆𑀧𑀸𑀤𑀦𑀯𑀲𑁂𑀦 𑀘𑀺𑀢𑁆𑀢𑀁 𑀔𑁄𑀪𑁂𑀢𑁆𑀯𑀸.

𑀉𑀧𑀸𑀲𑀺𑀓𑀸𑀢𑀺 𑀢𑀲𑁆𑀲 𑀅𑀫𑀘𑁆𑀘𑀧𑀼𑀢𑁆𑀢𑀲𑁆𑀲 𑀪𑀭𑀺𑀬𑀁 𑀲𑀦𑁆𑀥𑀸𑀬𑀸𑀳. 𑀢𑀲𑁆𑀫𑀺𑀦𑁆𑀢𑀺 𑀆𑀕𑀦𑁆𑀢𑀼𑀓𑀸𑀭𑀫𑁆𑀫𑀡𑁂. 𑀮𑀸𑀪𑁄 𑀦𑀸𑀫 ‘‘𑀮𑀩𑁆𑀪𑀢𑀻’’𑀢𑀺 𑀓𑀢𑁆𑀯𑀸.

𑀉𑀭𑀼𑀯𑀮𑁆𑀮𑀺𑀬𑀯𑀸𑀲𑀻𑀢𑀺 𑀉𑀭𑀼𑀯𑀮𑁆𑀮𑀺𑀬𑀮𑁂𑀡𑀯𑀸𑀲𑀻, 𑀉𑀭𑀼𑀯𑀮𑁆𑀮𑀺𑀬𑀯𑀺𑀳𑀸𑀭𑀯𑀸𑀲𑀻𑀢𑀺 𑀯𑀤𑀦𑁆𑀢𑀺. 𑀧𑀸𑀴𑀺𑀬𑀸𑀢𑀺 ‘‘𑀥𑀸𑀢𑀼𑀦𑀸𑀦𑀢𑁆𑀢𑀁, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀬𑀧𑀯𑀢𑁆𑀢𑀸𑀬 𑀇𑀫𑀺𑀲𑁆𑀲𑀸 𑀲𑀼𑀢𑁆𑀢𑀧𑀸𑀴𑀺𑀬𑀸. 𑀧𑀭𑀺𑀯𑀝𑁆𑀝𑁂𑀢𑁆𑀯𑀸𑀢𑀺 𑀫𑀚𑁆𑀛𑁂 𑀕𑀳𑀺𑀢𑀨𑀲𑁆𑀲𑀯𑁂𑀤𑀦𑀸𑀧𑀭𑀺𑀬𑁄𑀲𑀸𑀦𑁂 𑀞𑀧𑀦𑀯𑀲𑁂𑀦 𑀧𑀸𑀴𑀺𑀁 𑀧𑀭𑀺𑀯𑀝𑁆𑀝𑁂𑀢𑁆𑀯𑀸. 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀢𑀺𑀆𑀤𑀺 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀸𑀓𑀸𑀭𑀤𑀲𑁆𑀲𑀦𑀁. 𑀢𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀢𑀺 𑀆𑀧𑀸𑀣𑀕𑀢𑀭𑀽𑀧𑀸𑀭𑀫𑁆𑀫𑀡𑁂. 𑀅𑀯𑀺𑀪𑀽𑀢𑀯𑀸𑀭𑀦𑁆𑀢𑀺 𑀅𑀯𑀺𑀪𑀽𑀢𑀸𑀭𑀫𑁆𑀫𑀡𑀯𑀸𑀭𑀁. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀕𑀡𑁆𑀳𑀦𑁆𑀢𑀺 𑀓𑀣𑁂𑀦𑁆𑀢𑀺. 𑀏𑀓𑀚𑀯𑀦𑀯𑀸𑀭𑁂𑀧𑀺 𑀮𑀩𑁆𑀪𑀦𑁆𑀢𑀺 𑀘𑀺𑀭𑀢𑀭𑀦𑀺𑀯𑁂𑀲𑀸𑀪𑀸𑀯𑀸. 𑀦𑀸𑀦𑀸𑀚𑀯𑀦𑀯𑀸𑀭𑁂𑀬𑁂𑀯 𑀤𑀴𑁆𑀳𑀢𑀭𑀦𑀺𑀯𑁂𑀲𑀢𑀸𑀬.

𑁯𑁪. 𑀤𑀲𑀫𑀁 𑀉𑀢𑁆𑀢𑀸𑀦𑀫𑁂𑀯 𑀦𑀯𑀫𑁂 𑀯𑀼𑀢𑁆𑀢𑀦𑀬𑀢𑁆𑀢𑀸. 𑀧𑀝𑀺𑀲𑁂𑀥𑀫𑀢𑁆𑀢𑀫𑁂𑀯 𑀳𑁂𑀢𑁆𑀣 𑀦𑀸𑀦𑀢𑁆𑀢𑀦𑁆𑀢𑀺.

𑀩𑀸𑀳𑀺𑀭𑀨𑀲𑁆𑀲𑀦𑀸𑀦𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀸𑀦𑀢𑁆𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀲𑀢𑁆𑀢𑀥𑀸𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁫. 𑀆𑀪𑀸𑀢𑀻𑀢𑀺 𑀆𑀪𑀸, 𑀆𑀮𑁄𑀓𑀪𑀸𑀯𑁂𑀦 𑀦𑀺𑀧𑁆𑀨𑀚𑁆𑀚𑀢𑀺, 𑀉𑀧𑀝𑁆𑀞𑀸𑀢𑀻𑀢𑀺 𑀯𑀸 𑀅𑀢𑁆𑀣𑁄. 𑀲𑁄 𑀏𑀯 𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀥𑀸𑀢𑀽𑀢𑀺 𑀆𑀪𑀸𑀥𑀸𑀢𑀼. 𑀆𑀮𑁄𑀓𑀲𑁆𑀲𑀸𑀢𑀺 𑀆𑀮𑁄𑀓𑀓𑀲𑀺𑀡𑀲𑁆𑀲. 𑀲𑀼𑀝𑁆𑀞𑀼, 𑀲𑁄𑀪𑀦𑀁 𑀯𑀸 𑀪𑀸𑀢𑀻𑀢𑀺 𑀲𑀼𑀪𑀁. 𑀓𑀲𑀺𑀡𑀲𑀳𑀘𑀭𑀡𑀢𑁄 𑀛𑀸𑀦𑀁 𑀲𑀼𑀪𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀲𑀼𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑀁 𑀓𑀲𑀺𑀡𑀁. 𑀆𑀓𑀸𑀲𑀸𑀦𑀜𑁆𑀘𑀸𑀤𑀬𑁄𑀧𑀺 𑀲𑀼𑀪𑀸𑀭𑀫𑁆𑀫𑀡𑀁 𑀏𑀯𑀸𑀢𑀺 𑀓𑁂𑀘𑀺. 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀻𑀢𑀺 𑀤𑁂𑀲𑀦𑀁 𑀉𑀤𑁆𑀤𑁂𑀲𑀫𑀢𑁆𑀢𑁂 𑀏𑀯 𑀞𑀧𑁂𑀲𑀺. 𑀧𑀸𑀴𑀺𑀬𑀁 ‘‘𑀅𑀦𑁆𑀥𑀓𑀸𑀭𑀁 𑀧𑀝𑀺𑀘𑁆𑀘 𑀧𑀜𑁆𑀜𑀸𑀬𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀆𑀭𑀫𑁆𑀫𑀡𑀫𑁂𑀯 𑀕𑀳𑀺𑀢𑀁, 𑀢𑀣𑀸 ‘‘𑀅𑀬𑀁 𑀥𑀸𑀢𑀼 𑀅𑀲𑀼𑀪𑀁 𑀧𑀝𑀺𑀘𑁆𑀘 𑀧𑀜𑁆𑀜𑀸𑀬𑀢𑀻’’𑀢𑀺 𑀏𑀢𑁆𑀣𑀸𑀧𑀺. 𑀬𑀣𑀸 𑀳𑀺 𑀇𑀥 𑀲𑀼𑀯𑀡𑁆𑀡𑀁 𑀓𑀲𑀺𑀡𑀁 𑀲𑀼𑀪𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀏𑀯𑀁 𑀤𑀼𑀩𑁆𑀩𑀡𑁆𑀡𑀁 𑀅𑀲𑀼𑀪𑀦𑁆𑀢𑀺.

𑀅𑀦𑁆𑀥𑀓𑀸𑀭𑀁 𑀧𑀝𑀺𑀘𑁆𑀘𑀸𑀢𑀺 𑀅𑀦𑁆𑀥𑀓𑀸𑀭𑀁 𑀧𑀝𑀺𑀘𑁆𑀙𑀸𑀤𑀓𑀧𑀘𑁆𑀘𑀬𑀁 𑀧𑀝𑀺𑀘𑁆𑀘. 𑀧𑀜𑁆𑀜𑀸𑀬𑀢𑀻𑀢𑀺 𑀧𑀸𑀓𑀝𑁄 𑀳𑁄𑀢𑀺. 𑀢𑁂𑀦𑀸𑀳 ‘‘𑀅𑀦𑁆𑀥𑀓𑀸𑀭𑁄 𑀳𑀻’’𑀢𑀺𑀆𑀤𑀺. 𑀆𑀮𑁄𑀓𑁄𑀧𑀺, 𑀅𑀦𑁆𑀥𑀓𑀸𑀭𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀅𑀦𑁆𑀥𑀓𑀸𑀭𑁄 𑀢𑀸𑀯 𑀆𑀮𑁄𑀓𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄 𑀳𑁄𑀢𑀼 ‘‘𑀬𑀢𑁆𑀣 𑀆𑀮𑁄𑀓𑁄 𑀦𑀢𑁆𑀣𑀺, 𑀢𑀢𑁆𑀣 𑀅𑀦𑁆𑀥𑀓𑀸𑀭𑁄’’𑀢𑀺 𑀆𑀮𑁄𑀓𑁄 𑀓𑀣𑀁 𑀅𑀦𑁆𑀥𑀓𑀸𑀭𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑁆𑀥𑀓𑀸𑀭𑁂𑀦 𑀳𑀺 𑀲𑁄 𑀧𑀸𑀓𑀝𑁄 𑀳𑁄𑀢𑀻’’𑀢𑀺. 𑀧𑀭𑀺𑀘𑁆𑀙𑁂𑀤𑀮𑁂𑀔𑀸𑀬 𑀯𑀺𑀬 𑀘𑀺𑀢𑁆𑀢𑀭𑀽𑀧𑀁 𑀅𑀦𑁆𑀥𑀓𑀸𑀭𑁂𑀦 𑀳𑀺 𑀧𑀭𑀺𑀢𑁄 𑀧𑀭𑀺𑀘𑁆𑀙𑀺𑀦𑁆𑀦𑁄 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀢𑀺, 𑀬𑀣𑀸 𑀢𑀁 𑀙𑀸𑀬𑀸𑀬 𑀆𑀢𑀧𑁄. 𑀏𑀲𑁂𑀯 𑀦𑀬𑁄𑀢𑀺 𑀅𑀲𑀼𑀪𑀲𑀼𑀪𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀭𑀺𑀘𑁆𑀙𑀺𑀦𑁆𑀦𑀢𑀁 𑀅𑀢𑀺𑀤𑀺𑀲𑀺𑀢𑁆𑀯𑀸 𑀢𑀢𑁆𑀣 𑀅𑀥𑀺𑀧𑁆𑀧𑁂𑀢𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑀼𑀪𑁂 𑀲𑀢𑀺 𑀲𑀼𑀪𑀁 𑀧𑀜𑁆𑀜𑀸𑀬𑀢𑀻’’𑀢𑀺 𑀆𑀳. 𑀏𑀯𑀫𑀸𑀳𑀸𑀢𑀺 ‘‘𑀅𑀲𑀼𑀪𑀁 𑀧𑀝𑀺𑀘𑁆𑀘 𑀲𑀼𑀪𑀁 𑀧𑀜𑁆𑀜𑀸𑀬𑀢𑀻’’𑀢𑀺 𑀅𑀯𑁄𑀘. ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀉𑀢𑁆𑀢𑀭𑀧𑀤𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀭𑀽𑀧𑀁 𑀧𑀝𑀺𑀘𑁆𑀘𑀸𑀢𑀺 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀘𑁆𑀘𑀸’’𑀢𑀺. 𑀢𑀸𑀬 𑀳𑀺 𑀲𑀢𑀺 𑀅𑀥𑀺𑀕𑀢𑀸𑀬. 𑀭𑀽𑀧𑀲𑀫𑀢𑀺𑀓𑁆𑀓𑀫𑀸 𑀯𑀸 𑀳𑁄𑀢𑀻𑀢𑀺 𑀲𑀪𑀸𑀯𑀸𑀭𑀫𑁆𑀫𑀡𑀸𑀦𑀁 𑀭𑀽𑀧𑀚𑁆𑀛𑀸𑀦𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀢𑀺𑀓𑁆𑀓𑀫𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀦𑀸𑀫 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀤𑁆𑀯𑁂𑀧𑀺 𑀧𑀓𑀸𑀭𑁂 𑀅𑀢𑀺𑀤𑀺𑀲𑀢𑀺. 𑀧𑀝𑀺𑀲𑀗𑁆𑀔𑀸𑀢𑀺 𑀧𑀝𑀺𑀲𑀗𑁆𑀔𑀸𑀜𑀸𑀡𑁂𑀦. 𑀅𑀧𑁆𑀧𑀯𑀢𑁆𑀢𑀺𑀦𑁆𑀢𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀁 𑀅𑀧𑁆𑀧𑀯𑀢𑁆𑀢𑀦𑀁. 𑀏𑀢𑁂𑀦 𑀔𑀡𑀦𑀺𑀭𑁄𑀥𑀸𑀤𑀺𑀁 𑀧𑀝𑀺𑀓𑁆𑀔𑀺𑀧𑀢𑀺.

𑀓𑀣𑀁 𑀲𑀫𑀸𑀧𑀢𑁆𑀢𑀺 𑀧𑀢𑁆𑀢𑀩𑁆𑀩𑀸𑀢𑀺 𑀇𑀫𑀸𑀲𑀼 𑀲𑀢𑁆𑀢𑀲𑀼 𑀥𑀸𑀢𑀽𑀲𑀼 𑀓𑀸 𑀧𑀓𑀸𑀭𑀸 𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺 𑀦𑀸𑀦𑀸 𑀳𑀼𑀢𑁆𑀯𑀸 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀓𑀻𑀤𑀺𑀲𑀸 𑀲𑀫𑀸𑀧𑀢𑁆𑀢𑀺𑀬𑁄’’𑀢𑀺𑀆𑀤𑀺. 𑀲𑀜𑁆𑀜𑀸𑀬 𑀅𑀢𑁆𑀣𑀺𑀪𑀸𑀯𑁂𑀦𑀸𑀢𑀺 𑀧𑀝𑀼𑀓𑀺𑀘𑁆𑀘𑀸𑀬 𑀲𑀜𑁆𑀜𑀸𑀬 𑀅𑀢𑁆𑀣𑀺𑀪𑀸𑀯𑁂𑀦. 𑀲𑀼𑀔𑀼𑀫𑀲𑀗𑁆𑀔𑀸𑀭𑀸𑀦𑀁 𑀢𑀢𑁆𑀣 𑀲𑀫𑀸𑀧𑀢𑁆𑀢𑀺𑀬𑀁 𑀅𑀯𑀲𑀺𑀲𑁆𑀲𑀢𑀸𑀬. 𑀦𑀺𑀭𑁄𑀥𑁄𑀯𑀸𑀢𑀺 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑁄 𑀏𑀯.

𑀲𑀢𑁆𑀢𑀥𑀸𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁬. 𑀪𑀸𑀯𑀦𑀧𑀼𑀁𑀲𑀓𑀫𑁂𑀢𑀁 ‘‘𑀯𑀺𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁭𑁦) 𑀯𑀺𑀬. 𑀲𑀦𑀺𑀤𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀨𑀮𑀁 𑀦𑀺𑀤𑀤𑀸𑀢𑀻𑀢𑀺 𑀦𑀺𑀤𑀸𑀦𑀁, 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀲𑀦𑀺𑀤𑀸𑀦𑁄 𑀲𑀧𑁆𑀧𑀘𑁆𑀘𑀬𑁄’’𑀢𑀺. 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀓𑀸𑀫𑀭𑀸𑀕𑀲𑀗𑁆𑀔𑀸𑀢𑁂𑀦 𑀓𑀸𑀫𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀸 𑀓𑀸𑀫𑀧𑀝𑀺𑀩𑀤𑁆𑀥𑁄 𑀯𑀸. 𑀢𑀓𑁆𑀓𑁂𑀢𑀻𑀢𑀺 𑀢𑀓𑁆𑀓𑁄. 𑀅𑀪𑀽𑀢𑀓𑀸𑀭𑀁 𑀲𑀫𑀸𑀭𑁄𑀧𑁂𑀢𑁆𑀯𑀸 𑀓𑀧𑁆𑀧𑁂𑀢𑀻𑀢𑀺 𑀲𑀗𑁆𑀓𑀧𑁆𑀧𑁄. 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀅𑀧𑁆𑀧𑁂𑀢𑀻𑀢𑀺 𑀅𑀧𑁆𑀧𑀦𑀸. 𑀯𑀺𑀲𑁂𑀲𑁂𑀦 𑀅𑀧𑁆𑀧𑁂𑀢𑀻𑀢𑀺 𑀩𑁆𑀬𑀧𑁆𑀧𑀦𑀸. 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀅𑀪𑀺𑀦𑀺𑀭𑁄𑀧𑁂𑀦𑁆𑀢𑀁 𑀯𑀺𑀬 𑀧𑀯𑀢𑁆𑀢𑀢𑀻𑀢𑀺 𑀘𑁂𑀢𑀲𑁄 𑀅𑀪𑀺𑀦𑀺𑀭𑁄𑀧𑀦𑀸. 𑀫𑀺𑀘𑁆𑀙𑀸 𑀯𑀺𑀧𑀭𑀻𑀢𑁄 𑀧𑀸𑀧𑀓𑁄 𑀲𑀗𑁆𑀓𑀧𑁆𑀧𑁄𑀢𑀺 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄. 𑀅𑀜𑁆𑀜𑁂𑀲𑀼 𑀘 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀯𑀺𑀢𑀓𑁆𑀓𑁄 𑀏𑀯 𑀓𑀸𑀫𑀥𑀸𑀢𑀼𑀲𑀤𑁆𑀤𑁂𑀦 𑀦𑀺𑀭𑀼𑀴𑁆𑀳𑁄 𑀤𑀝𑁆𑀞𑀩𑁆𑀩𑁄 𑀯𑀺𑀢𑀓𑁆𑀓𑀲𑁆𑀲 𑀓𑀸𑀫𑀧𑀲𑀗𑁆𑀕𑀧𑁆𑀧𑀢𑁆𑀢𑀺𑀲𑀸𑀢𑀺𑀲𑀬𑀢𑁆𑀢𑀸. 𑀏𑀲 𑀦𑀬𑁄 𑀩𑁆𑀬𑀸𑀧𑀸𑀤𑀥𑀸𑀢𑀼𑀆𑀤𑀻𑀲𑀼𑀧𑀺. 𑀲𑀩𑁆𑀩𑁂𑀧𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀓𑀸𑀫𑀥𑀸𑀢𑀼 𑀳𑀻𑀦𑀚𑁆𑀛𑀸𑀲𑀬𑁂𑀳𑀺 𑀓𑀸𑀫𑁂𑀢𑀩𑁆𑀩𑀥𑀸𑀢𑀼𑀪𑀸𑀯𑀢𑁄.

𑀓𑀺𑀮𑁂𑀲𑀓𑀸𑀫𑀲𑁆𑀲 𑀆𑀭𑀫𑁆𑀫𑀡𑀪𑀸𑀯𑀢𑁆𑀢𑀸 𑀲𑀩𑁆𑀩𑀸𑀓𑀼𑀲𑀮𑀲𑀁𑀕𑀸𑀳𑀺𑀓𑀸𑀬 𑀓𑀸𑀫𑀥𑀸𑀢𑀼𑀬𑀸 𑀇𑀢𑀭𑀸 𑀤𑁆𑀯𑁂 𑀲𑀗𑁆𑀕𑀳𑁂𑀢𑁆𑀯𑀸 𑀓𑀣𑀦𑀁 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀸. 𑀢𑀺𑀲𑁆𑀲𑀦𑁆𑀦𑀁 𑀥𑀸𑀢𑀽𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀲𑀗𑁆𑀓𑀭𑀢𑁄 𑀓𑀣𑀸 𑀅𑀲𑀫𑁆𑀪𑀺𑀦𑁆𑀦𑀸. 𑀇𑀫𑀁 𑀓𑀸𑀫𑀸𑀯𑀘𑀭𑀲𑀜𑁆𑀜𑀺𑀢𑀁 𑀓𑀸𑀫𑀯𑀺𑀢𑀓𑁆𑀓𑀲𑀜𑁆𑀜𑀺𑀢𑀜𑁆𑀘 𑀓𑀸𑀫𑀥𑀸𑀢𑀼𑀁. 𑀧𑀝𑀺𑀘𑁆𑀘𑀸𑀢𑀺 𑀧𑀘𑁆𑀘𑀬𑀪𑀽𑀢𑀁 𑀮𑀪𑀺𑀢𑁆𑀯𑀸. 𑀢𑀻𑀳𑀺 𑀓𑀸𑀭𑀡𑁂𑀳𑀻𑀢𑀺 𑀢𑀻𑀳𑀺 𑀲𑀸𑀭𑀪𑀽𑀢𑁂𑀳𑀺 𑀓𑀸𑀭𑀡𑁂𑀳𑀺.

𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀩𑁆𑀬𑀸𑀧𑀸𑀤𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀲𑁄 𑀏𑀯 𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀲𑀪𑀸𑀯𑀥𑀸𑀭𑀡𑀝𑁆𑀞𑁂𑀦 𑀥𑀸𑀢𑀽𑀢𑀺 𑀩𑁆𑀬𑀸𑀧𑀸𑀤𑀥𑀸𑀢𑀼. 𑀩𑁆𑀬𑀸𑀧𑀚𑁆𑀚𑀢𑀺 𑀘𑀺𑀢𑁆𑀢𑀁 𑀏𑀢𑁂𑀦𑀸𑀢𑀺 𑀩𑁆𑀬𑀸𑀧𑀸𑀤𑁄, 𑀤𑁄𑀲𑁄. 𑀩𑁆𑀬𑀸𑀧𑀸𑀤𑁄𑀧𑀺 𑀥𑀸𑀢𑀽𑀢𑀺 𑀬𑁄𑀚𑀦𑀸. 𑀲𑀳𑀚𑀸𑀢𑀧𑀘𑁆𑀘𑀬𑀸𑀤𑀺𑀯𑀲𑁂𑀦𑀸𑀢𑀺 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀯𑀲𑁂𑀦. 𑀯𑀺𑀲𑁂𑀲𑁂𑀦 𑀳𑀺 𑀧𑀭𑀲𑁆𑀲 𑀅𑀢𑁆𑀢𑀦𑁄 𑀘 𑀤𑀼𑀓𑁆𑀔𑀸𑀧𑀦𑀁 𑀯𑀺𑀳𑀺𑀁𑀲𑀸, 𑀲𑀸 𑀏𑀯 𑀥𑀸𑀢𑀼, 𑀅𑀢𑁆𑀣𑀢𑁄 𑀭𑁄𑀲𑀦𑀸 𑀧𑀭𑀽𑀧𑀖𑀸𑀢𑁄, 𑀢𑀣𑀸 𑀧𑀯𑀢𑁆𑀢𑁄 𑀯𑀸 𑀤𑁄𑀲𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄.

𑀢𑀺𑀡𑀕𑀳𑀦𑁂 𑀅𑀭𑀜𑁆𑀜𑁂𑀢𑀺 𑀢𑀺𑀡𑁂𑀳𑀺 𑀕𑀳𑀦𑀪𑀽𑀢𑁂 𑀅𑀭𑀜𑁆𑀜𑁂. 𑀅𑀦𑀬𑀩𑁆𑀬𑀲𑀦𑀦𑁆𑀢𑀺 𑀅𑀧𑀸𑀬𑀩𑁆𑀬𑀲𑀦𑀁, 𑀧𑀭𑀺𑀳𑀭𑀡𑀽𑀧𑀸𑀬𑀭𑀳𑀺𑀢𑀁 𑀯𑀺𑀧𑀢𑁆𑀢𑀺𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀅𑀯𑀟𑁆𑀠𑀺𑀁 𑀯𑀺𑀦𑀸𑀲𑀦𑁆𑀢𑀺 𑀅𑀯𑀟𑁆𑀠𑀺𑀜𑁆𑀘𑁂𑀯 𑀯𑀺𑀦𑀸𑀲𑀜𑁆𑀘𑀸𑀢𑀺 𑀯𑀤𑀦𑁆𑀢𑀺 𑀲𑀩𑁆𑀩𑀲𑁄 𑀯𑀟𑁆𑀠𑀺𑀭𑀳𑀺𑀢𑀁. 𑀲𑀼𑀓𑁆𑀔𑀢𑀺𑀡𑀤𑀸𑀬𑁄 𑀯𑀺𑀬 𑀆𑀭𑀫𑁆𑀫𑀡𑀁 𑀓𑀺𑀮𑁂𑀲𑀕𑁆𑀕𑀺𑀲𑀁𑀯𑀤𑁆𑀥𑀦𑀝𑁆𑀞𑁂𑀦. 𑀢𑀺𑀡𑀼𑀓𑁆𑀓𑀸 𑀯𑀺𑀬 𑀅𑀓𑀼𑀲𑀮𑀲𑀜𑁆𑀜𑀸 𑀅𑀦𑀼𑀤𑀳𑀦𑀝𑁆𑀞𑁂𑀦. 𑀢𑀺𑀡𑀓𑀝𑁆𑀞…𑀧𑁂… 𑀲𑀢𑁆𑀢𑀸 𑀅𑀦𑀬𑀩𑁆𑀬𑀲𑀦𑀸𑀧𑀢𑁆𑀢𑀺𑀢𑁄. ‘‘𑀇𑀫𑁂 𑀲𑀢𑁆𑀢𑀸’’𑀢𑀺 𑀳𑀺 𑀅𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀫𑀸𑀦𑀸 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦𑀸𑀳 ‘‘𑀬𑀣𑀸 𑀲𑀼𑀓𑁆𑀔𑀢𑀺𑀡𑀤𑀸𑀬𑁂’’𑀢𑀺𑀆𑀤𑀺.

𑀲𑀫𑀢𑀸𑀪𑀸𑀯𑀢𑁄 𑀲𑀫𑀢𑀸𑀯𑀺𑀭𑁄𑀥𑀢𑁄 𑀯𑀺𑀲𑀫𑀢𑀸𑀳𑁂𑀢𑀼𑀢𑁄 𑀘 𑀯𑀺𑀲𑀫𑀸 𑀭𑀸𑀕𑀸𑀤𑀬𑁄𑀢𑀺 𑀆𑀳 ‘‘𑀭𑀸𑀕𑀯𑀺𑀲𑀫𑀸𑀤𑀻𑀦𑀺 𑀅𑀦𑀼𑀕𑀢’’𑀦𑁆𑀢𑀺. 𑀇𑀘𑁆𑀙𑀺𑀢𑀩𑁆𑀩𑀸 𑀅𑀯𑀲𑁆𑀲𑀁𑀪𑀸𑀯𑀺𑀦𑀺𑀪𑀸𑀯𑁂𑀦.

𑀲𑀁𑀓𑀺𑀮𑁂𑀲𑀢𑁄 𑀦𑀺𑀓𑁆𑀔𑀫𑀦𑀝𑁆𑀞𑁂𑀦 𑀦𑁂𑀓𑁆𑀔𑀫𑁆𑀫𑁄, 𑀲𑁄 𑀏𑀯 𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀥𑀸𑀢𑀽𑀢𑀺 𑀦𑁂𑀓𑁆𑀔𑀫𑁆𑀫𑀥𑀸𑀢𑀼. 𑀲𑁆𑀯𑀸𑀬𑀁 𑀦𑁂𑀓𑁆𑀔𑀫𑁆𑀫𑀲𑀤𑁆𑀤𑁄 𑀧𑀩𑁆𑀩𑀚𑁆𑀚𑀸𑀤𑀻𑀲𑀼 𑀓𑀼𑀲𑀮𑀯𑀺𑀢𑀓𑁆𑀓𑁂 𑀘 𑀦𑀺𑀭𑀼𑀴𑁆𑀳𑁄𑀢𑀺 𑀆𑀳 ‘‘𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄𑀧𑀺 𑀦𑁂𑀓𑁆𑀔𑀫𑁆𑀫𑀥𑀸𑀢𑀽’’𑀢𑀺. 𑀇𑀢𑀭𑀸𑀧𑀺 𑀤𑁆𑀯𑁂 𑀥𑀸𑀢𑀼𑀬𑁄𑀢𑀺 𑀅𑀩𑁆𑀬𑀸𑀧𑀸𑀤𑀅𑀯𑀺𑀳𑀺𑀁𑀲𑀸𑀥𑀸𑀢𑀼𑀬𑁄 𑀯𑀤𑀢𑀺. 𑀯𑀺𑀲𑀼𑀁 𑀤𑀻𑀧𑁂𑀢𑀩𑁆𑀩𑀸 𑀲𑀭𑀽𑀧𑁂𑀦 𑀆𑀕𑀢𑀢𑁆𑀢𑀸. 𑀯𑀺𑀢𑀓𑁆𑀓𑀸𑀤𑀬𑁄𑀢𑀺 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀘𑁆𑀙𑀦𑁆𑀤𑀧𑀭𑀺𑀴𑀸𑀳𑀧𑀭𑀺𑀬𑁂𑀲𑀦𑀸. 𑀬𑀣𑀸𑀦𑀼𑀭𑀽𑀧𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀘𑁆𑀘𑀬𑀸𑀦𑀼𑀭𑀽𑀧𑀁. 𑀓𑀣𑀁 𑀧𑀦𑁂𑀢𑁆𑀣 𑀓𑀼𑀲𑀮𑀥𑀫𑁆𑀫𑁂𑀲𑀼 𑀧𑀭𑀺𑀴𑀸𑀳𑁄 𑀯𑀼𑀢𑁆𑀢𑁄𑀢𑀺? 𑀲𑀗𑁆𑀔𑀸𑀭𑀧𑀭𑀺𑀴𑀸𑀳𑀫𑀢𑁆𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁, 𑀲𑁄𑀴𑀲𑀲𑀼 𑀆𑀓𑀸𑀭𑁂𑀲𑀼 𑀤𑀼𑀓𑁆𑀔𑀲𑀘𑁆𑀘𑁂 𑀲𑀦𑁆𑀢𑀸𑀧𑀝𑁆𑀞𑁄 𑀯𑀺𑀬 𑀯𑀼𑀢𑁆𑀢𑁄, 𑀬𑀲𑁆𑀲 𑀯𑀺𑀕𑀫𑁂𑀦 𑀅𑀭𑀳𑀢𑁄 𑀲𑀻𑀢𑀺𑀪𑀸𑀯𑀧𑁆𑀧𑀢𑁆𑀢𑀺 𑀯𑀼𑀘𑁆𑀘𑀢𑀺.

𑀲𑀬𑀁 𑀦 𑀩𑁆𑀬𑀸𑀧𑀚𑁆𑀚𑀢𑀺, 𑀢𑁂𑀦 𑀯𑀸 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀦 𑀓𑀺𑀜𑁆𑀘𑀺 𑀩𑁆𑀬𑀸𑀧𑀸𑀤𑁂𑀢𑀻𑀢𑀺 𑀅𑀩𑁆𑀬𑀸𑀧𑀸𑀤𑁄, 𑀯𑀺𑀳𑀺𑀁𑀲𑀸𑀬 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀳𑀺 𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀳𑀺𑀢𑁂𑀲𑀺𑀪𑀸𑀯𑁂𑀦 𑀫𑀺𑀚𑁆𑀚𑀢𑀺 𑀲𑀺𑀦𑀺𑀬𑁆𑀳𑀢𑀻𑀢𑀺 𑀫𑀺𑀢𑁆𑀢𑁄, 𑀫𑀺𑀢𑁆𑀢𑀲𑁆𑀲 𑀏𑀲𑀸𑀢𑀺 𑀫𑁂𑀢𑁆𑀢𑀺, 𑀅𑀩𑁆𑀬𑀸𑀧𑀸𑀤𑁄. 𑀫𑁂𑀢𑁆𑀢𑀸𑀬𑀦𑀸𑀢𑀺 𑀫𑁂𑀢𑁆𑀢𑀸𑀓𑀸𑀭𑀡𑀁, 𑀫𑁂𑀢𑁆𑀢𑀸𑀬 𑀯𑀸 𑀅𑀬𑀦𑀸 𑀧𑀯𑀢𑁆𑀢𑀦𑀸. 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀦𑁆𑀢𑀺 𑀫𑁂𑀢𑁆𑀢𑀸𑀬𑀺𑀢𑀲𑁆𑀲 𑀫𑁂𑀢𑁆𑀢𑀸𑀬 𑀧𑀯𑀢𑁆𑀢𑀲𑁆𑀲 𑀪𑀸𑀯𑁄. 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀫𑁂𑀢𑁆𑀢𑀸𑀬𑀦𑀯𑀲𑁂𑀦 𑀧𑀯𑀢𑁆𑀢𑁄 𑀘𑀺𑀢𑁆𑀢𑀲𑀫𑀸𑀥𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀕𑀺𑀜𑁆𑀚𑀓𑀸𑀯𑀲𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁭. 𑀇𑀢𑁄 𑀧𑀝𑁆𑀞𑀸𑀬𑀸𑀢𑀺 ‘‘𑀥𑀸𑀢𑀼𑀁, 𑀪𑀺𑀓𑁆𑀔𑀯𑁂’’𑀢𑀺 𑀇𑀫𑀲𑁆𑀫𑀸 𑀢𑀢𑀺𑀬𑀲𑀼𑀢𑁆𑀢𑀢𑁄 𑀧𑀝𑁆𑀞𑀸𑀬. 𑀬𑀸𑀯 𑀓𑀫𑁆𑀫𑀯𑀕𑁆𑀕𑁄, 𑀢𑀸𑀯 𑀦𑁂𑀢𑁆𑀯𑀸 𑀉𑀧𑀕𑀦𑁆𑀢𑁆𑀯𑀸 𑀲𑁂𑀢𑀺 𑀏𑀢𑁆𑀣𑀸𑀢𑀺 𑀆𑀲𑀬𑁄, 𑀳𑀻𑀦𑀸𑀤𑀺𑀪𑀸𑀯𑁂𑀦 𑀅𑀥𑀻𑀦𑁄 𑀆𑀲𑀬𑁄 𑀅𑀚𑁆𑀛𑀸𑀲𑀬𑁄, 𑀢𑀁 𑀅𑀚𑁆𑀛𑀸𑀲𑀬𑀁, 𑀅𑀥𑀺𑀫𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀻𑀢𑀺𑀆𑀤𑀻𑀲𑀼 𑀳𑀻𑀦𑀸𑀤𑀺𑀪𑁂𑀤𑀁 𑀅𑀚𑁆𑀛𑀸𑀲𑀬𑀁 𑀧𑀝𑀺𑀘𑁆𑀘 𑀳𑀻𑀦𑀸𑀤𑀺𑀪𑁂𑀤𑀸 𑀲𑀜𑁆𑀜𑀸, 𑀢𑀦𑁆𑀦𑀺𑀲𑁆𑀲𑀬𑀤𑀺𑀝𑁆𑀞𑀺𑀯𑀺𑀓𑀧𑁆𑀧𑀦𑀸, 𑀯𑀺𑀢𑀓𑁆𑀓𑁄 𑀘 𑀉𑀧𑁆𑀧𑀚𑁆𑀚𑀢𑀺 𑀲𑀳𑀚𑀸𑀢𑀓𑁄𑀝𑀺𑀬𑀸 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀘. 𑀲𑀢𑁆𑀣𑀸𑀭𑁂𑀲𑀽𑀢𑀺 𑀢𑁂𑀲𑀁 𑀲𑀢𑁆𑀣𑀼𑀧𑀝𑀺𑀜𑁆𑀜𑀢𑀸𑀬 𑀯𑀼𑀢𑁆𑀢𑀁, 𑀦 𑀲𑀢𑁆𑀣𑀼𑀮𑀓𑁆𑀔𑀡𑀲𑀩𑁆𑀪𑀸𑀯𑀢𑁄. 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀲𑀽𑀢𑀺 𑀆𑀥𑀸𑀭𑁂 𑀯𑀺𑀲𑀬𑁂 𑀘 𑀪𑀼𑀫𑁆𑀫𑀁 𑀏𑀓𑀢𑁄 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀧𑀞𑀫𑀁 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀬𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀇𑀢𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀲𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑁂𑀲𑀁 ‘‘𑀫𑀬𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸’’𑀢𑀺 𑀉𑀧𑁆𑀧𑀦𑁆𑀦𑀤𑀺𑀝𑁆𑀞𑀺 𑀇𑀥 𑀫𑀽𑀮𑀪𑀸𑀯𑁂𑀦 𑀧𑀼𑀘𑁆𑀙𑀺𑀢𑀸, 𑀇𑀢𑀭𑀸 𑀅𑀦𑀼𑀲𑀗𑁆𑀓𑀺𑀢𑀸𑀢𑀺 𑀧𑀼𑀘𑁆𑀙𑀢𑀺𑀬𑁂𑀯𑀸𑀢𑀺 𑀲𑀸𑀲𑀗𑁆𑀓𑀁 𑀯𑀤𑀢𑀺.

‘‘𑀫𑀳𑀢𑀻’’𑀢𑀺 𑀏𑀢𑁆𑀣 𑀫𑀳𑀸𑀲𑀤𑁆𑀤𑁄 ‘‘𑀫𑀳𑀸𑀚𑀦𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀩𑀳𑀼𑀅𑀢𑁆𑀣𑀯𑀸𑀘𑀓𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀯𑀺𑀚𑁆𑀚𑀸𑀧𑀺 𑀳𑀻𑀦𑀳𑀻𑀦𑀢𑀭𑀳𑀻𑀦𑀢𑀫𑀸𑀤𑀺𑀪𑁂𑀤𑁂𑀦 𑀩𑀳𑀼𑀧𑀓𑀸𑀭𑀸. 𑀢𑀲𑁆𑀲𑀸𑀢𑀺 𑀤𑀺𑀝𑁆𑀞𑀺𑀬𑀸. 𑀓𑀲𑁆𑀫𑀸 𑀧𑀦𑁂𑀢𑁆𑀣 ‘‘𑀬𑀤𑀺𑀤𑀁 𑀅𑀯𑀺𑀚𑁆𑀚𑀸 𑀥𑀸𑀢𑀽’’𑀢𑀺 𑀅𑀯𑀺𑀚𑁆𑀚𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀳𑀻𑀦𑀁 𑀥𑀸𑀢𑀼𑀁 𑀧𑀝𑀺𑀘𑁆𑀘𑀸’’𑀢𑀺 𑀅𑀚𑁆𑀛𑀸𑀲𑀬𑀥𑀸𑀢𑀼 𑀦𑀺𑀤𑁆𑀤𑀺𑀝𑁆𑀞𑀸𑀢𑀺? 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁, ‘‘𑀅𑀜𑁆𑀜𑀁 𑀉𑀤𑁆𑀥𑀭𑀺𑀢𑁆𑀯𑀸 𑀅𑀜𑁆𑀜𑀁 𑀦𑀺𑀤𑁆𑀤𑀺𑀝𑁆𑀞𑀸’’𑀢𑀺, 𑀬𑀢𑁄 𑀅𑀯𑀺𑀚𑁆𑀚𑀸𑀲𑀻𑀲𑁂𑀦 𑀅𑀚𑁆𑀛𑀸𑀲𑀬𑀥𑀸𑀢𑀼 𑀏𑀯 𑀕𑀳𑀺𑀢𑀸. 𑀅𑀯𑀺𑀚𑁆𑀚𑀸𑀕𑀳𑀺𑀢𑁄 𑀳𑀺 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀤𑀺𑀝𑁆𑀞𑀚𑁆𑀛𑀸𑀲𑀬𑁄 𑀳𑀻𑀦𑀸𑀤𑀺𑀪𑁂𑀤𑀁 𑀅𑀯𑀺𑀚𑁆𑀚𑀸𑀥𑀸𑀢𑀼𑀁 𑀦𑀺𑀲𑁆𑀲𑀸𑀬 𑀢𑀢𑁄 𑀲𑀜𑁆𑀜𑀸𑀤𑀺𑀝𑁆𑀞𑀺𑀆𑀤𑀺𑀓𑁂 𑀲𑀗𑁆𑀓𑀧𑁆𑀧𑁂𑀢𑀺. 𑀧𑀡𑀺𑀥𑀺 𑀧𑀢𑁆𑀣𑀦𑀸, 𑀲𑀸 𑀧𑀦 𑀢𑀣𑀸 𑀢𑀣𑀸 𑀘𑀺𑀢𑁆𑀢𑀲𑁆𑀲 𑀞𑀧𑀦𑀯𑀲𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀘𑀺𑀢𑁆𑀢𑀝𑁆𑀞𑀧𑀦’’𑀦𑁆𑀢𑀺. 𑀢𑁂𑀦𑀸𑀳 ‘‘𑀲𑀸 𑀧𑀦𑁂𑀲𑀸’’𑀢𑀺𑀆𑀤𑀺. 𑀏𑀢𑁂𑀢𑀺 𑀳𑀻𑀦𑀧𑀘𑁆𑀘𑀬𑀸 𑀲𑀜𑁆𑀜𑀸𑀤𑀺𑀝𑁆𑀞𑀺𑀯𑀺𑀢𑀓𑁆𑀓𑀘𑁂𑀢𑀦𑀸 𑀧𑀢𑁆𑀣𑀦𑀸 𑀧𑀡𑀺𑀥𑀺𑀲𑀗𑁆𑀔𑀸𑀢𑀸 𑀳𑀻𑀦𑀸 𑀥𑀫𑁆𑀫𑀸. 𑀳𑀻𑀦𑁄 𑀦𑀸𑀫 𑀳𑀻𑀦𑀥𑀫𑁆𑀫𑀲𑀫𑀸𑀬𑁄𑀕𑀢𑁄. 𑀲𑀩𑁆𑀩𑀧𑀤𑀸𑀦𑀻𑀢𑀺 ‘‘𑀧𑀜𑁆𑀜𑀧𑁂𑀢𑀻’’𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺 𑀳𑀻𑀦𑀲𑀤𑁆𑀤𑁂𑀦 𑀫𑀚𑁆𑀛𑀺𑀫𑀼𑀢𑁆𑀢𑀫𑀝𑁆𑀞𑀸𑀦𑀦𑁆𑀢𑀭𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀉𑀧𑀧𑀚𑁆𑀚𑀦𑀁 ‘‘𑀉𑀧𑀧𑀢𑁆𑀢𑀻’’𑀢𑀺 𑀆𑀳 ‘‘𑀤𑁆𑀯𑁂 𑀉𑀧𑀧𑀢𑁆𑀢𑀺𑀬𑁄 𑀧𑀝𑀺𑀮𑀸𑀪𑁄 𑀘 𑀦𑀺𑀩𑁆𑀩𑀢𑁆𑀢𑀺 𑀘𑀸’’𑀢𑀺. 𑀢𑀢𑁆𑀣 𑀳𑀻𑀦𑀓𑀼𑀮𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀳𑀻𑀦𑀭𑀽𑀧𑀪𑁄𑀕𑀧𑀭𑀺𑀲𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀳𑀻𑀦𑀢𑁆𑀢𑀺𑀓𑀯𑀲𑁂𑀦𑀸𑀢𑀺 𑀳𑀻𑀦𑀢𑁆𑀢𑀺𑀓𑁂 𑀯𑀼𑀢𑁆𑀢𑀢𑁆𑀢𑀺𑀓𑀧𑀤𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑁆𑀔𑀡𑁂𑀢𑀺 𑀇𑀤𑀁 𑀳𑀻𑀦𑀢𑁆𑀢𑀺𑀓𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀯𑀲𑁂𑀦 𑀢𑀢𑁆𑀣 𑀢𑀢𑁆𑀣 𑀮𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀁. 𑀧𑀜𑁆𑀘𑀲𑀼 𑀦𑀻𑀘𑀓𑀼𑀮𑁂𑀲𑀽𑀢𑀺 𑀘𑀡𑁆𑀟𑀸𑀮𑀯𑁂𑀦𑀦𑁂𑀲𑀸𑀤𑀭𑀣𑀓𑀸𑀭𑀧𑀼𑀓𑁆𑀓𑀼𑀲𑀓𑀼𑀮𑁂𑀲𑀼. 𑀤𑁆𑀯𑀸𑀤𑀲𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀧𑀦 𑀬𑁄 𑀓𑁄𑀘𑀺 𑀧𑀝𑀺𑀮𑀸𑀪𑁄 𑀳𑀻𑀦𑁄𑀢𑀺 𑀬𑁄𑀚𑀦𑀸. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀲𑁆𑀫𑀺𑀁 𑀞𑀸𑀦𑁂𑀢𑀺 ‘‘𑀬𑀸𑀬𑀁, 𑀪𑀦𑁆𑀢𑁂, 𑀤𑀺𑀝𑁆𑀞𑀻’’𑀢𑀺𑀆𑀤𑀺𑀦𑀸 𑀆𑀕𑀢𑁂 𑀇𑀫𑀲𑁆𑀫𑀺𑀁 𑀞𑀸𑀦𑁂. ‘‘𑀥𑀸𑀢𑀼𑀁, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀆𑀕𑀢𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀺𑀬𑁂𑀯 𑀅𑀥𑀺𑀧𑁆𑀧𑁂𑀢𑀸, 𑀦 𑀧𑀝𑀺𑀮𑀸𑀪𑁄.

𑀕𑀺𑀜𑁆𑀚𑀓𑀸𑀯𑀲𑀣𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁮. 𑀏𑀓𑀢𑁄 𑀳𑁄𑀦𑁆𑀢𑀻𑀢𑀺 𑀲𑀫𑀸𑀦𑀘𑁆𑀙𑀦𑁆𑀤𑀢𑀸𑀬 𑀅𑀚𑁆𑀛𑀸𑀲𑀬𑀢𑁄 𑀏𑀓𑀢𑁄 𑀳𑁄𑀦𑁆𑀢𑀺. 𑀦𑀺𑀭𑀦𑁆𑀢𑀭𑀸 𑀳𑁄𑀦𑁆𑀢𑀻𑀢𑀺 𑀢𑀸𑀬 𑀏𑀯 𑀲𑀫𑀸𑀦𑀘𑁆𑀙𑀦𑁆𑀤𑀢𑀸𑀬 𑀘𑀺𑀢𑁆𑀢𑁂𑀦 𑀦𑀺𑀩𑁆𑀩𑀺𑀲𑁂𑀲𑀸 𑀳𑁄𑀦𑁆𑀢𑀺. 𑀇𑀥 𑀅𑀥𑀺𑀫𑀼𑀢𑁆𑀢𑀺 𑀦𑀸𑀫 𑀅𑀚𑁆𑀛𑀸𑀲𑀬𑀥𑀸𑀢𑀽𑀢𑀺 𑀆𑀳 ‘‘𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸𑀢𑀺 𑀳𑀻𑀦𑀚𑁆𑀛𑀸𑀲𑀬𑀸’’𑀢𑀺.

𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀗𑁆𑀓𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁯. 𑀫𑀳𑀸𑀧𑀜𑁆𑀜𑁂𑀲𑀽𑀢𑀺 𑀯𑀺𑀧𑀼𑀮𑀧𑀜𑁆𑀜𑁂𑀲𑀼. 𑀦𑀦𑁆𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁. 𑀔𑀦𑁆𑀥𑀦𑁆𑀢𑀭𑀦𑁆𑀢𑀺 𑀔𑀦𑁆𑀥𑀯𑀺𑀪𑀸𑀕𑀁, 𑀔𑀦𑁆𑀥𑀸𑀦𑀁 𑀯𑀸 𑀅𑀦𑁆𑀢𑀭𑀁 𑀯𑀺𑀲𑁂𑀲𑁄 𑀅𑀢𑁆𑀣𑀻𑀢𑀺 𑀔𑀦𑁆𑀥𑀦𑁆𑀢𑀭𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀧𑀭𑀺𑀓𑀫𑁆𑀫𑀦𑁆𑀢𑀺 𑀇𑀤𑁆𑀥𑀺𑀯𑀺𑀥𑀸𑀥𑀺𑀕𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀭𑀺𑀓𑀫𑁆𑀫𑀜𑁆𑀘𑁂𑀯 𑀉𑀢𑁆𑀢𑀭𑀧𑀭𑀺𑀓𑀫𑁆𑀫𑀜𑁆𑀘. 𑀆𑀦𑀺𑀲𑀁𑀲𑀦𑁆𑀢𑀺 𑀇𑀤𑁆𑀥𑀸𑀦𑀺𑀲𑀁𑀲𑀜𑁆𑀘𑁂𑀯 𑀆𑀦𑀺𑀲𑀁𑀲𑀜𑁆𑀘. 𑀅𑀥𑀺𑀝𑁆𑀞𑀸𑀦𑀁 𑀯𑀺𑀓𑀼𑀩𑁆𑀩𑀦𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑀯𑀺𑀥𑀸𑀦𑀜𑁆𑀘𑁂𑀯 𑀯𑀺𑀓𑀼𑀩𑁆𑀩𑀦𑀯𑀺𑀥𑀸𑀦𑀜𑁆𑀘. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀧𑀣𑀯𑀺𑀁 𑀧𑀢𑁆𑀣𑀭𑀦𑁆𑀢𑁄 𑀯𑀺𑀬𑀸’’𑀢𑀺𑀆𑀤𑀺𑀦𑀸.

𑀥𑀼𑀢𑀗𑁆𑀕𑀧𑀭𑀺𑀳𑀸𑀭𑀦𑁆𑀢𑀺 𑀥𑀼𑀢𑀗𑁆𑀕𑀸𑀦𑀁 𑀧𑀭𑀺𑀳𑀭𑀡𑀯𑀺𑀥𑀺𑀁. 𑀧𑀭𑀺𑀳𑀭𑀡𑀕𑁆𑀕𑀳𑀡𑁂𑀦𑁂𑀯 𑀲𑀫𑀸𑀤𑀸𑀦𑀁 𑀲𑀺𑀤𑁆𑀥𑀁 𑀳𑁄𑀢𑀻𑀢𑀺 𑀢𑀁 𑀦 𑀕𑀳𑀺𑀢𑀁. 𑀆𑀦𑀺𑀲𑀁𑀲𑀦𑁆𑀢𑀺 𑀢𑀁𑀢𑀁𑀥𑀼𑀢𑀗𑁆𑀕𑀧𑀭𑀺𑀳𑀭𑀡𑁂 𑀤𑀝𑁆𑀞𑀩𑁆𑀩𑀁 𑀆𑀦𑀺𑀲𑀁𑀲𑀫𑁂𑀯. 𑀲𑀫𑁄𑀥𑀸𑀦𑀦𑁆𑀢𑀺 ‘‘𑀏𑀢𑁆𑀢𑀓𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀲𑀁𑀬𑀼𑀢𑁆𑀢𑀸, 𑀏𑀢𑁆𑀢𑀓𑀸 𑀲𑁂𑀦𑀸𑀲𑀦𑀧𑀝𑀺𑀲𑀁𑀬𑀼𑀢𑁆𑀢𑀸’’𑀢𑀺 𑀧𑀘𑁆𑀘𑀬𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀜𑁆𑀘 𑀅𑀦𑁆𑀢𑁄𑀕𑀥𑀢𑁆𑀢𑀸. 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑀯𑀺𑀥𑀺𑀁. 𑀪𑁂𑀤𑀦𑁆𑀢𑀺 𑀉𑀓𑁆𑀓𑀝𑁆𑀞𑀸𑀤𑀺𑀪𑁂𑀤𑀜𑁆𑀘𑁂𑀯 𑀪𑀺𑀦𑁆𑀦𑀸𑀓𑀸𑀭𑀜𑁆𑀘.

𑀧𑀭𑀺𑀓𑀫𑁆𑀫𑀦𑁆𑀢𑀺 ‘‘𑀤𑀺𑀩𑁆𑀩𑀘𑀓𑁆𑀔𑀼 𑀏𑀯𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁, 𑀏𑀯𑀁 𑀯𑀺𑀲𑁄𑀥𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀧𑀭𑀺𑀓𑀫𑁆𑀫𑀯𑀺𑀥𑀸𑀦𑀁. 𑀆𑀦𑀺𑀲𑀁𑀲𑀦𑁆𑀢𑀺 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀸𑀬𑀢𑀦𑀸𑀤𑀺𑀆𑀦𑀺𑀲𑀁𑀲𑀧𑀪𑁂𑀤𑀁. 𑀉𑀧𑀓𑁆𑀓𑀺𑀮𑁂𑀲𑀦𑁆𑀢𑀺 𑀲𑀸𑀥𑀸𑀭𑀡𑀁 𑀅𑀲𑀸𑀥𑀸𑀭𑀡𑀁 𑀤𑀼𑀯𑀺𑀥𑀁 𑀉𑀧𑀓𑁆𑀓𑀺𑀮𑁂𑀲𑀁. 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀼𑀧𑀓𑁆𑀓𑀺𑀮𑁂𑀲𑀸 𑀳𑀺 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀕𑀫𑁆𑀪𑀻𑀭𑀼𑀢𑁆𑀢𑀸𑀦𑀯𑀺𑀘𑀺𑀢𑁆𑀭𑀓𑀣𑀸𑀤𑀻𑀲𑀽𑀢𑀺 𑀲𑀗𑁆𑀔𑁂𑀧𑁄 𑀯𑀺𑀢𑁆𑀣𑀸𑀭𑁄 𑀕𑀫𑁆𑀪𑀻𑀭𑀢𑀸 𑀉𑀢𑁆𑀢𑀸𑀦𑀢𑀸 𑀯𑀺𑀘𑀺𑀢𑁆𑀭𑀪𑀸𑀯𑁄 𑀦𑁂𑀬𑁆𑀬𑀢𑁆𑀣𑀢𑀸 𑀦𑀻𑀢𑀢𑁆𑀣𑀢𑀸𑀢𑀺 𑀏𑀯𑀫𑀸𑀤𑀻𑀲𑀼 𑀥𑀫𑁆𑀫𑀲𑁆𑀲 𑀓𑀣𑁂𑀢𑀩𑁆𑀩𑀧𑁆𑀧𑀓𑀸𑀭𑁂𑀲𑀼 𑀢𑀁 𑀢𑀁 𑀓𑀣𑁂𑀢𑀩𑁆𑀩𑀸𑀓𑀸𑀭𑀁.

𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸. 𑀢𑁂𑀦 𑁋

‘‘𑀆𑀤𑀺𑀫𑁆𑀳𑀺 𑀲𑀻𑀮𑀁 𑀤𑁂𑀲𑁂𑀬𑁆𑀬, (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁯𑁦; 𑀫. 𑀦𑀺. 𑀅𑀝𑁆𑀞. 𑁧.𑁨𑁯𑁧)

𑀫𑀚𑁆𑀛𑁂 𑀘𑀺𑀢𑁆𑀢𑀁 𑀯𑀺𑀦𑀺𑀤𑁆𑀤𑀺𑀲𑁂;

𑀅𑀦𑁆𑀢𑁂 𑀧𑀜𑁆𑀜𑀸 𑀓𑀣𑁂𑀢𑀩𑁆𑀩𑀸,

𑀏𑀲𑁄 𑀥𑀫𑁆𑀫𑀓𑀣𑀸𑀯𑀺𑀥𑁄’’𑀢𑀺. 𑁋

𑀏𑀯𑀁 𑀓𑀣𑁂𑀢𑀩𑁆𑀩𑀸𑀓𑀸𑀭𑀁 𑀲𑀗𑁆𑀕𑀡𑁆𑀳𑀸𑀢𑀺.

‘‘𑀲𑀺𑀣𑀺𑀮𑀁 𑀥𑀦𑀺𑀢𑀜𑁆𑀘 𑀤𑀻𑀖𑀭𑀲𑁆𑀲𑀁, 𑀕𑀭𑀼𑀓𑀁 𑀮𑀳𑀼𑀓𑀜𑁆𑀘 𑀦𑀺𑀕𑁆𑀕𑀳𑀻𑀢𑀁;

𑀲𑀫𑁆𑀩𑀦𑁆𑀥𑀁 𑀯𑀯𑀢𑁆𑀣𑀺𑀢𑀁 𑀯𑀺𑀫𑀼𑀢𑁆𑀢𑀁, 𑀤𑀲𑀥𑀸 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀧𑀪𑁂𑀤𑁄’’𑀢𑀺. (𑀤𑀻. 𑀦𑀺. 𑁧.𑁧𑁯𑁦; 𑀫. 𑀦𑀺. 𑀅𑀝𑁆𑀞. 𑁧.𑁨𑁯𑁧; 𑀧𑀭𑀺. 𑁪𑁮𑁫) 𑁋

𑀏𑀯𑀁 𑀯𑀼𑀢𑁆𑀢𑀁 𑀤𑀲𑀯𑀺𑀥𑀁 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀁. 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀦𑁆𑀢𑀺 𑀢𑀲𑁆𑀲 𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀚𑀸𑀢𑀓𑀲𑁆𑀲 𑀘 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁. 𑀅𑀦𑀼𑀲𑀦𑁆𑀥𑀺𑀦𑁆𑀢𑀺 𑀧𑀘𑁆𑀙𑀸𑀦𑀼𑀲𑀦𑁆𑀥𑀺𑀆𑀤𑀺𑀅𑀦𑀼𑀲𑀦𑁆𑀥𑀺𑀁. 𑀧𑀼𑀩𑁆𑀩𑀸𑀧𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑀁. 𑀇𑀤𑀁 𑀧𑀤𑀁 𑀏𑀯𑀁 𑀯𑀢𑁆𑀢𑀩𑁆𑀩𑀁, 𑀇𑀤𑀁 𑀧𑀼𑀩𑁆𑀩𑀸𑀧𑀭𑀁 𑀏𑀯𑀁 𑀕𑀳𑁂𑀢𑀩𑁆𑀩𑀦𑁆𑀢𑀺.

𑀓𑀼𑀮𑀲𑀗𑁆𑀕𑀡𑁆𑀳𑀦𑀧𑀭𑀺𑀳𑀸𑀭𑀦𑁆𑀢𑀺 𑀮𑀸𑀪𑀼𑀧𑁆𑀧𑀸𑀤𑀦𑀢𑁆𑀣𑀁 𑀓𑀼𑀮𑀸𑀦𑀁 𑀲𑀗𑁆𑀕𑀡𑁆𑀳𑀦𑀯𑀺𑀥𑀺𑀦𑁄 𑀧𑀭𑀺𑀳𑀭𑀡𑀁 𑀢𑀦𑁆𑀦𑀺𑀬𑀫𑀺𑀢𑀁 𑀏𑀓𑀦𑁆𑀢𑀺𑀓𑀁 𑀓𑀼𑀮𑀲𑀗𑁆𑀕𑀳𑀡𑀯𑀺𑀥𑀺𑀁.

𑀘𑀗𑁆𑀓𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀕𑀸𑀣𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁦. ‘‘𑀥𑀸𑀢𑀼𑀲𑁄 𑀲𑀁𑀲𑀦𑁆𑀤𑀦𑁆𑀢𑀻’’𑀢𑀺 𑀇𑀤𑀁 𑀅𑀚𑁆𑀛𑀸𑀲𑀬𑀢𑁄 𑀲𑀭𑀺𑀓𑁆𑀔𑀢𑀸𑀤𑀲𑁆𑀲𑀦𑀁, 𑀦 𑀓𑀸𑀬𑁂𑀦 𑀫𑀺𑀲𑁆𑀲𑀻𑀪𑀸𑀯𑀤𑀲𑁆𑀲𑀦𑀦𑁆𑀢𑀺 𑀆𑀳 ‘‘𑀲𑀫𑀼𑀤𑁆𑀤𑀦𑁆𑀢𑀭𑁂’’𑀢𑀺𑀆𑀤𑀺. 𑀦𑀺𑀭𑀦𑁆𑀢𑀭𑁄𑀢𑀺 𑀦𑀺𑀩𑁆𑀩𑀺𑀲𑁂𑀲𑁄. 𑀲𑀁𑀲𑀕𑁆𑀕𑀸𑀢𑀺 𑀧𑀜𑁆𑀘𑀯𑀺𑀥𑀲𑀁𑀲𑀕𑁆𑀕𑀳𑁂𑀢𑀼. 𑀲𑀁𑀲𑀕𑁆𑀕𑀕𑀳𑀡𑁂𑀦 𑀘𑁂𑀢𑁆𑀣 𑀲𑀁𑀲𑀕𑁆𑀕𑀯𑀢𑁆𑀣𑀼𑀓𑀸 𑀢𑀡𑁆𑀳𑀸 𑀕𑀳𑀺𑀢𑀸. 𑀢𑁂𑀦𑀸𑀳 ‘‘𑀤𑀲𑁆𑀲𑀦…𑀧𑁂… 𑀲𑁆𑀦𑁂𑀳𑁂𑀦𑀸’’𑀢𑀺.

𑀯𑀦𑀢𑀺 𑀪𑀚𑀢𑀺 𑀲𑀚𑁆𑀚𑀢𑀺 𑀢𑁂𑀦𑀸𑀢𑀺 𑀯𑀦𑀁, 𑀯𑀦𑀣𑁄𑀢𑀺 𑀘 𑀓𑀺𑀮𑁂𑀲𑁄 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀯𑀦𑀣𑁄 𑀚𑀸𑀢𑁄𑀢𑀺 𑀓𑀺𑀮𑁂𑀲𑀯𑀦𑀁 𑀚𑀸𑀢’’𑀦𑁆𑀢𑀺. 𑀇𑀢𑀭𑁂 𑀲𑀁𑀲𑀕𑁆𑀕𑀫𑀽𑀮𑀓𑀸𑀢𑀺 𑀢𑀫𑁂𑀯 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀅𑀤𑀲𑁆𑀲𑀦𑁂𑀦𑀸’’𑀢𑀺. 𑀲𑀸𑀥𑀼𑀚𑀻𑀯𑀻𑀢𑀺 𑀲𑀸𑀥𑀼 𑀲𑀼𑀝𑁆𑀞𑀼 𑀚𑀻𑀯𑀻, 𑀢𑀁𑀚𑀻𑀯𑀦𑀲𑀻𑀮𑁄. 𑀢𑁂𑀦𑀸𑀳 ‘‘𑀧𑀭𑀺𑀲𑀼𑀤𑁆𑀥𑀚𑀻𑀯𑀺𑀢𑀁 𑀚𑀻𑀯𑀫𑀸𑀦𑁄’’𑀢𑀺.

𑀲𑀕𑀸𑀣𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀲𑁆𑀲𑀤𑁆𑀥𑀲𑀁𑀲𑀦𑁆𑀤𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁧. 𑀦𑀺𑀭𑁄𑀚𑀸𑀢𑀺 𑀲𑀤𑁆𑀥𑀸𑀲𑁆𑀦𑁂𑀳𑀸𑀪𑀸𑀯𑁂𑀦 𑀦𑀺𑀲𑁆𑀦𑁂𑀳𑀸. 𑀢𑀢𑁄 𑀏𑀯 𑀅𑀭𑀲𑀪𑀸𑀯𑁂𑀦 𑀦𑀺𑀭𑀲𑀸. 𑀏𑀓𑀲𑀤𑀺𑀲𑀸𑀢𑀺 𑀲𑀫𑀲𑀫𑀸 𑀦𑀺𑀩𑁆𑀩𑀺𑀲𑁂𑀲𑀸. 𑀢𑁂𑀦𑀸𑀳 ‘‘𑀦𑀺𑀭𑀦𑁆𑀢𑀭𑀸’’𑀢𑀺. 𑀅𑀮𑀚𑁆𑀚𑀺𑀢𑀸𑀬 𑀏𑀓𑀲𑀻𑀫𑀓𑀢𑀸 𑀪𑀺𑀦𑁆𑀦𑀫𑀭𑀺𑀬𑀸𑀤𑀸. 𑀲𑀤𑁆𑀥𑀸 𑀢𑁂𑀲𑀁 𑀅𑀢𑁆𑀣𑀻𑀢𑀺 𑀲𑀤𑁆𑀥𑀸. 𑀢𑀦𑁆𑀢𑀺𑀧𑀸𑀮𑀓𑀸𑀢𑀺 𑀲𑀤𑁆𑀥𑀫𑁆𑀫𑀢𑀦𑁆𑀢𑀺𑀬𑀸 𑀧𑀸𑀮𑀓𑀸. 𑀯𑀁𑀲𑀸𑀦𑀼𑀭𑀓𑁆𑀔𑀓𑀸𑀢𑀺 𑀅𑀭𑀺𑀬𑀯𑀁𑀲𑀲𑁆𑀲 𑀅𑀦𑀼𑀭𑀓𑁆𑀔𑀓𑀸. 𑀆𑀭𑀤𑁆𑀥𑀯𑀻𑀭𑀺𑀬𑀸𑀢𑀺 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑀸. 𑀬𑀲𑁆𑀫𑀸 𑀢𑀸𑀤𑀺𑀲𑀸𑀦𑀁 𑀯𑀻𑀭𑀺𑀬𑀁 𑀧𑀭𑀺𑀧𑀼𑀡𑁆𑀡𑀁 𑀦𑀸𑀫 𑀳𑁄𑀢𑀺 𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀭𑀺𑀧𑀼𑀡𑁆𑀡𑀧𑀭𑀓𑁆𑀓𑀫𑀸’’𑀢𑀺. 𑀲𑀩𑁆𑀩𑀓𑀺𑀘𑁆𑀘𑀧𑀭𑀺𑀕𑁆𑀕𑀸𑀳𑀺𑀓𑀸𑀬𑀸𑀢𑀺 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀪𑀸𑀯𑀦𑀸𑀓𑀺𑀘𑁆𑀘𑀧𑀭𑀺𑀕𑁆𑀕𑀸𑀳𑀺𑀓𑀸𑀬.

𑀅𑀲𑁆𑀲𑀤𑁆𑀥𑀲𑀁𑀲𑀦𑁆𑀤𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮-𑁧𑁨. 𑀅𑀲𑁆𑀲𑀤𑁆𑀥𑀫𑀽𑀮𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁨-𑁧𑁦𑁬. 𑀅𑀝𑁆𑀞𑀫𑀸𑀤𑀻𑀦𑀻𑀢𑀺 𑀅𑀝𑁆𑀞𑀫𑀁 𑀦𑀯𑀫𑀁 𑀤𑀲𑀫𑀁 𑀏𑀓𑀸𑀤𑀲𑀫𑀁 𑀤𑁆𑀯𑀸𑀤𑀲𑀫𑀦𑁆𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀲𑀼𑀢𑁆𑀢𑀸𑀦𑀻𑀢𑀺 𑀏𑀓𑁂. 𑀅𑀧𑀭𑁂 𑀧𑀦 𑀦𑀯 𑀲𑀼𑀢𑁆𑀢𑀸𑀦𑀻𑀢𑀺 𑀇𑀘𑁆𑀙𑀦𑁆𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄𑀬𑁂𑀯. 𑀧𑀸𑀴𑀺𑀬𑀜𑁆𑀘 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀻𑀬𑀢𑀺.

𑀅𑀲𑁆𑀲𑀤𑁆𑀥𑀫𑀽𑀮𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀓𑀫𑁆𑀫𑀧𑀣𑀯𑀕𑁆𑀕𑁄

𑁧-𑁨. 𑀅𑀲𑀫𑀸𑀳𑀺𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁭-𑁧𑁦𑁮. 𑀇𑀢𑁄 𑀧𑀭𑁂𑀲𑀽𑀢𑀺 𑀇𑀢𑁄 𑀤𑀼𑀢𑀺𑀬𑀯𑀕𑁆𑀕𑀢𑁄 𑀧𑀭𑁂𑀲𑀼 𑀲𑀼𑀢𑁆𑀢𑁂𑀲𑀼. 𑀧𑀞𑀫𑀦𑁆𑀢𑀺 𑀧𑀞𑀫𑀯𑀕𑁆𑀕𑁂 𑀧𑀞𑀫𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀏𑀯𑀁 𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺 𑀆𑀳 ‘‘𑀏𑀯𑀁 𑀯𑀼𑀘𑁆𑀘𑀫𑀸𑀦𑁂’’𑀢𑀺𑀆𑀤𑀺.

𑀅𑀲𑀫𑀸𑀳𑀺𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁫. 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁯-𑁧𑁧𑁧. 𑀲𑀼𑀭𑀸𑀫𑁂𑀭𑀬𑀲𑀗𑁆𑀔𑀸𑀢𑀦𑁆𑀢𑀺 𑀧𑀺𑀝𑁆𑀞𑀲𑀼𑀭𑀸𑀤𑀺𑀲𑀼𑀭𑀸𑀲𑀗𑁆𑀔𑀸𑀢𑀁 𑀧𑀼𑀧𑁆𑀨𑀸𑀲𑀯𑀸𑀤𑀺𑀫𑁂𑀭𑀬𑀲𑀗𑁆𑀔𑀸𑀢𑀜𑁆𑀘. 𑀫𑀚𑁆𑀚𑀦𑀝𑁆𑀞𑁂𑀦 𑀫𑀚𑁆𑀚𑀁. 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑁄𑀢𑀺 𑀯𑀼𑀘𑁆𑀘𑀢𑀺 ‘‘𑀫𑀚𑁆𑀚𑀢𑀺 𑀢𑁂𑀦𑀸’’𑀢𑀺 𑀓𑀢𑁆𑀯𑀸. 𑀢𑀲𑁆𑀫𑀺𑀁 𑀢𑀺𑀝𑁆𑀞𑀦𑁆𑀢𑀻𑀢𑀺 𑀢𑀲𑁆𑀫𑀺𑀁 𑀧𑀫𑀸𑀤𑁂 𑀧𑀫𑀚𑁆𑀚𑀦𑀯𑀲𑁂𑀦 𑀢𑀺𑀝𑁆𑀞𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀢𑀢𑀺𑀬𑀘𑀢𑀼𑀢𑁆𑀣𑁂𑀲𑀼 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀧𑀜𑁆𑀘𑀫𑁂 𑀢𑀸𑀦𑀺 𑀧𑀤𑀸𑀦𑀺 𑀲𑀁𑀯𑀡𑁆𑀡𑁂𑀢𑀼𑀁 ‘‘𑀧𑀜𑁆𑀘𑀫𑁂’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀧𑀸𑀡𑁄 𑀦𑀸𑀫 𑀯𑁄𑀳𑀸𑀭𑀢𑁄 𑀲𑀢𑁆𑀢𑁄, 𑀧𑀭𑀫𑀢𑁆𑀣𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀢𑀁 𑀧𑀸𑀡𑀁 𑀅𑀢𑀺𑀧𑀸𑀢𑁂𑀦𑁆𑀢𑀺 𑀅𑀢𑀺𑀘𑁆𑀘 𑀅𑀦𑁆𑀢𑀭𑁂𑀬𑁂𑀯, 𑀅𑀢𑀺𑀓𑁆𑀓𑀫𑁆𑀫 𑀯𑀸 𑀲𑀢𑁆𑀣𑀸𑀤𑀻𑀳𑀺 𑀅𑀪𑀺𑀪𑀯𑀺𑀢𑁆𑀯𑀸 𑀧𑀸𑀢𑁂𑀦𑁆𑀢𑀺 𑀲𑀡𑀺𑀓𑀁 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀲𑀻𑀖𑀁 𑀧𑀸𑀢𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀸 𑀅𑀤𑀺𑀦𑁆𑀦𑀁 𑀧𑀭𑀲𑀦𑁆𑀢𑀓𑀁. 𑀆𑀤𑀺𑀬𑀦𑁆𑀢𑀻𑀢𑀺 𑀕𑀡𑁆𑀳𑀦𑁆𑀢𑀺. 𑀫𑀺𑀘𑁆𑀙𑀸𑀢𑀺 𑀦 𑀲𑀫𑁆𑀫𑀸, 𑀕𑀸𑀭𑀬𑁆𑀳𑀯𑀲𑁂𑀦. 𑀫𑀼𑀲𑀸𑀢𑀺 𑀅𑀢𑀣𑀁 𑀯𑀢𑁆𑀣𑀼. 𑀯𑀤𑀦𑁆𑀢𑀻𑀢𑀺 𑀯𑀺𑀲𑀁𑀯𑀸𑀤𑀦𑀯𑀲𑁂𑀦 𑀯𑀤𑀦𑁆𑀢𑀺. 𑀧𑀺𑀬𑀲𑀼𑀜𑁆𑀜𑀓𑀭𑀡𑀢𑁄 𑀧𑀺𑀲𑀼𑀡𑀸, 𑀧𑀺𑀲𑀢𑀺 𑀯𑀸 𑀧𑀭𑁂 𑀲𑀢𑁆𑀢𑁂, 𑀳𑀺𑀁𑀲𑀢𑀻𑀢𑀺 𑀅𑀢𑁆𑀣𑁄. 𑀫𑀫𑁆𑀫𑀘𑁆𑀙𑁂𑀤𑀺𑀓𑀸𑀢𑀺 𑀏𑀢𑁂𑀦 𑀧𑀭𑀲𑁆𑀲 𑀫𑀫𑁆𑀫𑀘𑁆𑀙𑁂𑀤𑀯𑀲𑁂𑀦 𑀏𑀓𑀦𑁆𑀢𑀨𑀭𑀼𑀲𑀲𑀜𑁆𑀘𑁂𑀢𑀦𑀸 𑀨𑀭𑀼𑀲𑀯𑀸𑀘𑀸 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀪𑀺𑀚𑁆𑀛𑀸𑀲𑀤𑁆𑀤𑁄 𑀮𑀼𑀩𑁆𑀪𑀦𑁂 𑀦𑀺𑀭𑀼𑀴𑁆𑀳𑁄𑀢𑀺 𑀆𑀳 ‘‘𑀧𑀭𑀪𑀡𑁆𑀟𑁂 𑀮𑀼𑀩𑁆𑀪𑀦𑀲𑀻𑀮𑀸𑀢𑀺 𑀅𑀢𑁆𑀣𑁄’’𑀢𑀺. 𑀩𑁆𑀬𑀸𑀧𑀦𑁆𑀦𑀦𑁆𑀢𑀺 𑀤𑁄𑀲𑀯𑀲𑁂𑀦 𑀯𑀺𑀧𑀦𑁆𑀦𑀁. 𑀧𑀓𑀢𑀺𑀯𑀺𑀚𑀳𑀦𑁂𑀦 𑀧𑀽𑀢𑀺𑀪𑀽𑀢𑀁. 𑀲𑀸𑀥𑀽𑀳𑀺 𑀕𑀭𑀳𑀺𑀢𑀩𑁆𑀩𑀢𑀁 𑀧𑀢𑁆𑀢𑀸 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀦𑀢𑁆𑀣𑀺𑀓𑀸𑀳𑁂𑀢𑀼𑀓𑀅𑀓𑀺𑀭𑀺𑀬𑀤𑀺𑀝𑁆𑀞𑀺 𑀓𑀫𑁆𑀫𑀧𑀣𑀧𑀭𑀺𑀬𑀸𑀧𑀦𑁆𑀦𑀸 𑀦𑀸𑀫. 𑀫𑀺𑀘𑁆𑀙𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀸 𑀲𑀩𑁆𑀩𑀸𑀧𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀧𑀝𑀺𑀧𑀓𑁆𑀔𑀸 𑀯𑀺𑀧𑀭𑀻𑀢𑀤𑀺𑀝𑁆𑀞𑀺.

𑀢𑁂𑀲𑀦𑁆𑀢𑀺 𑀓𑀫𑁆𑀫𑀧𑀣𑀸𑀦𑀁. 𑀯𑁄𑀳𑀸𑀭𑀢𑁄𑀢𑀺 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀁 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀢𑁄. 𑀢𑀺𑀭𑀘𑁆𑀙𑀸𑀦𑀕𑀢𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑁂𑀢𑀸𑀦𑀁 𑀲𑀗𑁆𑀕𑀳𑁄. 𑀧𑀬𑁄𑀕𑀯𑀢𑁆𑀣𑀼𑀫𑀳𑀦𑁆𑀢𑀢𑀸𑀤𑀻𑀳𑀺 𑀫𑀳𑀸𑀲𑀸𑀯𑀚𑁆𑀚𑀢𑀸 𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀘𑁂𑀢𑀦𑀸𑀬 𑀩𑀮𑀯𑀪𑀸𑀯𑀢𑁄. 𑀬𑀣𑀸𑀯𑀼𑀢𑁆𑀢𑀧𑀘𑁆𑀘𑀬𑀯𑀺𑀧𑀭𑀺𑀬𑀸𑀬𑁂𑀧𑀺 𑀢𑀁𑀢𑀁𑀧𑀘𑁆𑀘𑀬𑁂𑀳𑀺 𑀘𑁂𑀢𑀦𑀸𑀬 𑀩𑀮𑀯𑀪𑀸𑀯𑀯𑀲𑁂𑀦 𑀅𑀧𑁆𑀧𑀲𑀸𑀯𑀚𑁆𑀚𑀫𑀳𑀸𑀲𑀸𑀯𑀚𑁆𑀚𑀢𑀸 𑀯𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀤𑁆𑀥𑀺𑀫𑀬𑁄𑀢𑀺 𑀓𑀫𑁆𑀫𑀯𑀺𑀧𑀸𑀓𑀺𑀤𑁆𑀥𑀺𑀫𑀬𑁄 𑀤𑀸𑀞𑀸𑀓𑁄𑀝𑀦𑀸𑀤𑀻𑀦𑀁 𑀯𑀺𑀬.

𑀫𑁂𑀣𑀼𑀦𑀲𑀫𑀸𑀘𑀸𑀭𑁂𑀲𑀽𑀢𑀺 𑀲𑀤𑀸𑀭𑀧𑀭𑀤𑀸𑀭𑀕𑀫𑀦𑀯𑀲𑁂𑀦 𑀤𑀼𑀯𑀺𑀥𑁂𑀲𑀼 𑀫𑁂𑀣𑀼𑀦𑀲𑀫𑀸𑀘𑀸𑀭𑁂𑀲𑀼. 𑀢𑁂𑀧𑀺 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑁂𑀳𑀺 𑀓𑀢𑁆𑀢𑀩𑁆𑀩𑀢𑁄 𑀓𑀸𑀫𑀸 𑀦𑀸𑀫. 𑀫𑀺𑀘𑁆𑀙𑀸𑀘𑀸𑀭𑁄𑀢𑀺 𑀕𑀸𑀭𑀬𑁆𑀳𑀸𑀘𑀸𑀭𑁄. 𑀕𑀸𑀭𑀬𑁆𑀳𑀢𑀸 𑀘𑀲𑁆𑀲 𑀏𑀓𑀦𑁆𑀢𑀦𑀺𑀳𑀻𑀦𑀢𑀸𑀬𑀸𑀢𑀺 𑀆𑀳 ‘‘𑀏𑀓𑀦𑁆𑀢𑀦𑀺𑀦𑁆𑀤𑀺𑀢𑁄 𑀮𑀸𑀫𑀓𑀸𑀘𑀸𑀭𑁄’’𑀢𑀺 𑀅𑀲𑀤𑁆𑀥𑀫𑁆𑀫𑀸𑀥𑀺𑀧𑁆𑀧𑀸𑀬𑁂𑀦𑀸𑀢𑀺 𑀅𑀲𑀤𑁆𑀥𑀫𑁆𑀫𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁂𑀦. 𑀕𑁄𑀢𑁆𑀢𑀭𑀓𑁆𑀔𑀺𑀢𑀸𑀢𑀺 𑀲𑀕𑁄𑀢𑁆𑀢𑁂𑀳𑀺 𑀭𑀓𑁆𑀔𑀺𑀢𑀸. 𑀥𑀫𑁆𑀫𑀭𑀓𑁆𑀔𑀺𑀢𑀸𑀢𑀺 𑀲𑀳𑀥𑀫𑁆𑀫𑁂𑀳𑀺 𑀭𑀓𑁆𑀔𑀺𑀢𑀸. 𑀲𑀲𑁆𑀲𑀸𑀫𑀺𑀓𑀸 𑀦𑀸𑀫 𑀲𑀸𑀭𑀓𑁆𑀔𑀸. 𑀬𑀲𑁆𑀲𑀸 𑀕𑀫𑀦𑁂 𑀤𑀡𑁆𑀟𑁄 𑀞𑀧𑀺𑀢𑁄, 𑀲𑀸 𑀲𑀧𑀭𑀺𑀤𑀡𑁆𑀟𑀸. 𑀪𑀭𑀺𑀬𑀪𑀸𑀯𑀸𑀬 𑀥𑀦𑁂𑀦 𑀓𑀻𑀢𑀸 𑀥𑀦𑀓𑁆𑀓𑀻𑀢𑀸. 𑀙𑀦𑁆𑀤𑁂𑀦 𑀯𑀲𑀢𑀻𑀢𑀺 𑀙𑀦𑁆𑀤𑀯𑀸𑀲𑀺𑀦𑀻. 𑀪𑁄𑀕𑀢𑁆𑀣𑀁 𑀯𑀲𑀢𑀻𑀢𑀺 𑀪𑁄𑀕𑀯𑀸𑀲𑀺𑀦𑀻. 𑀧𑀝𑀢𑁆𑀣𑀁 𑀯𑀲𑀢𑀻𑀢𑀺 𑀧𑀝𑀯𑀸𑀲𑀺𑀦𑀻. 𑀉𑀤𑀓𑀧𑀢𑁆𑀢𑀁 𑀆𑀫𑀲𑀺𑀢𑁆𑀯𑀸 𑀕𑀳𑀺𑀢𑀸 𑀑𑀤𑀧𑀢𑁆𑀢𑀓𑀺𑀦𑀻. 𑀘𑀼𑀫𑁆𑀩𑀝𑀁 𑀅𑀧𑀦𑁂𑀢𑁆𑀯𑀸 𑀕𑀳𑀺𑀢𑀸 𑀑𑀪𑀝𑀘𑀼𑀫𑁆𑀩𑀝𑀸. 𑀓𑀭𑀫𑀭𑀸𑀦𑀻𑀢𑀸 𑀥𑀚𑀸𑀳𑀝𑀸. 𑀢𑀗𑁆𑀔𑀡𑀺𑀓𑀁 𑀕𑀳𑀺𑀢𑀸 𑀫𑀼𑀳𑀼𑀢𑁆𑀢𑀺𑀓𑀸. 𑀅𑀪𑀺𑀪𑀯𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑁄 𑀫𑀺𑀘𑁆𑀙𑀸𑀘𑀸𑀭𑁄 𑀫𑀳𑀸𑀲𑀸𑀯𑀚𑁆𑀚𑁄, 𑀦 𑀢𑀣𑀸 𑀤𑁆𑀯𑀺𑀦𑁆𑀦𑀁 𑀲𑀫𑀸𑀦𑀘𑁆𑀙𑀦𑁆𑀤𑀢𑀸𑀬. 𑀅𑀪𑀺𑀪𑀯𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀦𑁂 𑀲𑀢𑀺𑀧𑀺 𑀫𑀕𑁆𑀕𑁂𑀦𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀅𑀥𑀺𑀯𑀸𑀲𑀦𑁂 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀲𑁂𑀯𑀦𑀸𑀪𑀺𑀲𑀦𑁆𑀥𑀺𑀧𑀬𑁄𑀕𑀸𑀪𑀸𑀯𑀢𑁄 𑀫𑀺𑀘𑁆𑀙𑀸𑀘𑀸𑀭𑁄 𑀦 𑀳𑁄𑀢𑀺 𑀅𑀪𑀺𑀪𑀼𑀬𑁆𑀬𑀫𑀸𑀦𑀲𑁆𑀲𑀸𑀢𑀺 𑀯𑀤𑀦𑁆𑀢𑀺. 𑀲𑁂𑀯𑀦𑀸𑀘𑀺𑀢𑁆𑀢𑁂 𑀲𑀢𑀺 𑀧𑀬𑁄𑀕𑀸𑀪𑀸𑀯𑁄 𑀅𑀧𑁆𑀧𑀫𑀸𑀡𑀁 𑀬𑁂𑀪𑀼𑀬𑁆𑀬𑁂𑀦 𑀇𑀢𑁆𑀣𑀺𑀬𑀸 𑀲𑁂𑀯𑀦𑀸𑀧𑀬𑁄𑀕𑀲𑁆𑀲 𑀅𑀪𑀸𑀯𑀢𑁄. 𑀢𑀣𑀸 𑀲𑀢𑀺 𑀧𑀼𑀭𑁂𑀢𑀭𑀁 𑀲𑁂𑀯𑀦𑀸𑀘𑀺𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀦𑁂𑀧𑀺 𑀢𑀲𑁆𑀲𑀸 𑀫𑀺𑀘𑁆𑀙𑀸𑀘𑀸𑀭𑁄 𑀦 𑀲𑀺𑀬𑀸, 𑀢𑀣𑀸 𑀧𑀼𑀭𑀺𑀲𑀲𑁆𑀲𑀧𑀺 𑀲𑁂𑀯𑀦𑀸𑀧𑀬𑁄𑀕𑀸𑀪𑀸𑀯𑁂. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀧𑀯𑀢𑁆𑀢𑀺𑀢𑀲𑁆𑀲 𑀯𑀲𑁂𑀦 𑀢𑀬𑁄, 𑀩𑀮𑀓𑁆𑀓𑀸𑀭𑁂𑀦 𑀧𑀯𑀢𑁆𑀢𑀺𑀢𑀲𑁆𑀲 𑀯𑀲𑁂𑀦 𑀢𑀬𑁄𑀢𑀺 𑀲𑀩𑁆𑀩𑁂𑀧𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 ‘‘𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸’’𑀢𑀺 𑀯𑀼𑀢𑁆𑀢𑀁.

𑀆𑀲𑁂𑀯𑀦𑀫𑀦𑁆𑀤𑀢𑀸𑀬𑀸𑀢𑀺 𑀬𑀸𑀬 𑀅𑀓𑀼𑀲𑀮𑀘𑁂𑀢𑀦𑀸𑀬 𑀲𑀫𑁆𑀨𑀁 𑀧𑀮𑀧𑀢𑀺, 𑀢𑀲𑁆𑀲𑀸 𑀇𑀢𑁆𑀢𑀭𑀓𑀸𑀮𑀢𑀸𑀬 𑀧𑀯𑀢𑁆𑀢𑀺𑀬𑀸 𑀅𑀦𑀸𑀲𑁂𑀯𑀦𑀸𑀢𑀺 𑀧𑀭𑀺𑀤𑀼𑀩𑁆𑀩𑀮𑀸 𑀳𑁄𑀢𑀺 𑀘𑁂𑀢𑀦𑀸.

𑀉𑀧𑀲𑀕𑁆𑀕𑀯𑀲𑁂𑀦 𑀅𑀢𑁆𑀣𑀯𑀺𑀲𑁂𑀲𑀯𑀸𑀘𑀺𑀦𑁄 𑀥𑀸𑀢𑀼𑀲𑀤𑁆𑀤𑀸𑀢𑀺 𑀅𑀪𑀺𑀚𑁆𑀛𑀸𑀬𑀢𑀻𑀢𑀺 𑀧𑀤𑀲𑁆𑀲 𑀧𑀭𑀪𑀡𑁆𑀟𑀸𑀪𑀺𑀫𑀼𑀔𑀻𑀢𑀺𑀆𑀤𑀺𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀢𑀦𑁆𑀦𑀺𑀦𑁆𑀦𑀢𑀸𑀬𑀸𑀢𑀺 𑀢𑀲𑁆𑀫𑀺𑀁 𑀧𑀭𑀪𑀡𑁆𑀟𑁂 𑀮𑀼𑀩𑁆𑀪𑀦𑀯𑀲𑁂𑀦 𑀦𑀺𑀦𑁆𑀦𑀢𑀸𑀬. 𑀅𑀪𑀺𑀧𑀼𑀩𑁆𑀩𑁄 𑀛𑁂-𑀲𑀤𑁆𑀤𑁄 𑀮𑀼𑀩𑁆𑀪𑀦𑁂 𑀦𑀺𑀭𑀼𑀴𑁆𑀳𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀬𑀲𑁆𑀲 𑀪𑀡𑁆𑀟𑀁 𑀅𑀪𑀺𑀚𑁆𑀛𑀸𑀬𑀢𑀺, 𑀢𑀲𑁆𑀲 𑀅𑀧𑁆𑀧𑀕𑀼𑀡𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀫𑀳𑀸𑀕𑀼𑀡𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀢𑁆𑀣 𑀅𑀧𑁆𑀧𑀲𑀸𑀯𑀚𑁆𑀚𑀫𑀳𑀸𑀲𑀸𑀯𑀚𑁆𑀚𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀅𑀤𑀺𑀦𑁆𑀦𑀸𑀤𑀸𑀦𑀁 𑀯𑀺𑀬𑀸’’𑀢𑀺𑀆𑀤𑀺. 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀁 𑀘𑀺𑀢𑁆𑀢𑁂𑀦𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀳𑀺𑀢𑀲𑀼𑀔𑀁 𑀩𑁆𑀬𑀸𑀧𑀸𑀤𑀬𑀢𑀻𑀢𑀺 𑀬𑁄 𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀬𑀲𑁆𑀲 𑀉𑀧𑁆𑀧𑀸𑀤𑁂𑀢𑀺, 𑀢𑀲𑁆𑀲 𑀲𑀢𑀺 𑀲𑀫𑀯𑀸𑀬𑁂 𑀳𑀺𑀢𑀲𑀼𑀔𑀁 𑀯𑀺𑀦𑀸𑀲𑁂𑀢𑀺. 𑀅𑀳𑁄 𑀯𑀢𑀸𑀢𑀺 𑀇𑀫𑀺𑀦𑀸 𑀬𑀣𑀸 𑀅𑀪𑀺𑀚𑁆𑀛𑀸𑀦𑁂 𑀯𑀢𑁆𑀣𑀼𑀦𑁄 𑀏𑀓𑀦𑁆𑀢𑀢𑁄 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀁 𑀤𑀲𑁆𑀲𑀺𑀢𑀁, 𑀏𑀯𑀫𑀺𑀥𑀸𑀧𑀺 𑀯𑀢𑁆𑀣𑀼𑀦𑁄 ‘‘𑀅𑀳𑁄 𑀯𑀢𑀸’’𑀢𑀺 𑀇𑀫𑀺𑀦𑀸 𑀧𑀭𑀲𑁆𑀲 𑀯𑀺𑀦𑀸𑀲𑀘𑀺𑀦𑁆𑀢𑀸𑀬 𑀏𑀓𑀦𑁆𑀢𑀢𑁄 𑀦𑀺𑀬𑀫𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀏𑀯𑀜𑁆𑀳𑀺 𑀦𑁂𑀲𑀁 𑀤𑀸𑀭𑀼𑀡𑀧𑁆𑀧𑀯𑀢𑁆𑀢𑀺𑀬𑀸 𑀓𑀫𑁆𑀫𑀧𑀣𑀧𑁆𑀧𑀯𑀢𑁆𑀢𑀺.

𑀬𑀣𑀸𑀪𑀼𑀘𑁆𑀘𑀕𑀳𑀡𑀸𑀪𑀸𑀯𑁂𑀦𑀸𑀢𑀺 𑀬𑀣𑀸𑀢𑀘𑁆𑀙𑀕𑀳𑀡𑀲𑁆𑀲 𑀅𑀪𑀸𑀯𑁂𑀦 𑀅𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑀲𑁆𑀲 𑀦𑀺𑀘𑁆𑀘𑀸𑀤𑀺𑀢𑁄 𑀕𑀳𑀡𑁂𑀦. 𑀫𑀺𑀘𑁆𑀙𑀸 𑀧𑀲𑁆𑀲𑀢𑀻𑀢𑀺 𑀯𑀺𑀢𑀣𑀁 𑀧𑀲𑁆𑀲𑀢𑀺. 𑀲𑀫𑁆𑀨𑀧𑁆𑀧𑀮𑀸𑀧𑁄 𑀯𑀺𑀬𑀸𑀢𑀺 𑀇𑀫𑀺𑀦𑀸 𑀆𑀲𑁂𑀯𑀦𑀲𑁆𑀲 𑀅𑀧𑁆𑀧𑀫𑀳𑀦𑁆𑀢𑀢𑀸𑀳𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀲𑀸𑀯𑀚𑁆𑀚𑀫𑀳𑀸𑀲𑀸𑀯𑀚𑁆𑀚𑀢𑀸. 𑀯𑀢𑁆𑀣𑀼𑀦𑁄𑀢𑀺 𑀕𑀳𑀺𑀢𑀯𑀢𑁆𑀣𑀼𑀦𑁄. 𑀕𑀳𑀺𑀢𑀸𑀓𑀸𑀭𑀯𑀺𑀧𑀭𑀻𑀢𑀢𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀕𑀳𑀺𑀢𑀸𑀓𑀸𑀭𑀲𑁆𑀲 𑀯𑀺𑀧𑀭𑀻𑀢𑀢𑀸. 𑀢𑀣𑀸𑀪𑀸𑀯𑁂𑀦𑀸𑀢𑀺 𑀅𑀢𑁆𑀢𑀦𑁄 𑀕𑀳𑀺𑀢𑀸𑀓𑀸𑀭𑁂𑀦𑁂𑀯 𑀢𑀲𑁆𑀲𑀸 𑀤𑀺𑀝𑁆𑀞𑀺𑀬𑀸, 𑀕𑀳𑀺𑀢𑀲𑁆𑀲 𑀯𑀸 𑀯𑀢𑁆𑀣𑀼𑀦𑁄 𑀉𑀧𑀝𑁆𑀞𑀸𑀦𑀁 ‘‘𑀏𑀯𑀫𑁂𑀢𑀁, 𑀦 𑀇𑀢𑁄 𑀅𑀜𑁆𑀜𑀣𑀸’’𑀢𑀺.

𑀥𑀫𑁆𑀫𑀢𑁄𑀢𑀺 𑀲𑀪𑀸𑀯𑀢𑁄. 𑀓𑁄𑀝𑁆𑀞𑀸𑀲𑀢𑁄𑀢𑀺 𑀘𑀺𑀢𑁆𑀢𑀗𑁆𑀕𑀓𑁄𑀝𑁆𑀞𑀸𑀲𑀢𑁄, 𑀬𑀁𑀓𑁄𑀝𑁆𑀞𑀸𑀲𑀸 𑀳𑁄𑀦𑁆𑀢𑀺, 𑀢𑀢𑁄𑀢𑀺 𑀅𑀢𑁆𑀣𑁄. 𑀘𑁂𑀢𑀦𑀸𑀥𑀫𑁆𑀫𑀸𑀯𑀸𑀢𑀺 𑀘𑁂𑀢𑀦𑀸𑀲𑀪𑀸𑀯𑀸 𑀏𑀯. 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢𑀸𑀢𑀺 𑀏𑀢𑁆𑀣 𑀦𑀦𑀼 𑀘𑁂𑀢𑀦𑀸 𑀅𑀪𑀺𑀥𑀫𑁆𑀫𑁂 𑀓𑀫𑁆𑀫𑀧𑀣𑁂𑀲𑀼 𑀦 𑀯𑀼𑀢𑁆𑀢𑀸𑀢𑀺 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢𑀦𑁆𑀦𑀁 𑀓𑀫𑁆𑀫𑀧𑀣𑀪𑀸𑀯𑁄 𑀦 𑀬𑀼𑀢𑁆𑀢𑁄𑀢𑀺? 𑀦, 𑀅𑀯𑀘𑀦𑀲𑁆𑀲 𑀅𑀜𑁆𑀜𑀳𑁂𑀢𑀼𑀓𑀢𑁆𑀢𑀸. 𑀦 𑀳𑀺 𑀢𑀢𑁆𑀣 𑀘𑁂𑀢𑀦𑀸𑀬 𑀅𑀓𑀫𑁆𑀫𑀧𑀣𑀢𑁆𑀢𑀸 𑀓𑀫𑁆𑀫𑀧𑀣𑀭𑀸𑀲𑀺𑀫𑁆𑀳𑀺 𑀅𑀯𑀘𑀦𑀁, 𑀓𑀤𑀸𑀘𑀺 𑀧𑀦 𑀓𑀫𑁆𑀫𑀧𑀣𑁄 𑀳𑁄𑀢𑀺, 𑀦 𑀲𑀩𑁆𑀩𑀤𑀸𑀢𑀺 𑀓𑀫𑁆𑀫𑀧𑀣𑀪𑀸𑀯𑀲𑁆𑀲 𑀅𑀦𑀺𑀬𑀢𑀢𑁆𑀢𑀸 𑀅𑀯𑀘𑀦𑀁. 𑀬𑀤𑀸, 𑀧𑀦𑀲𑁆𑀲 𑀓𑀫𑁆𑀫𑀧𑀣𑀪𑀸𑀯𑁄 𑀳𑁄𑀢𑀺, 𑀢𑀤𑀸 𑀓𑀫𑁆𑀫𑀧𑀣𑀭𑀸𑀲𑀺𑀲𑀗𑁆𑀕𑀳𑁄 𑀦 𑀦𑀺𑀯𑀸𑀭𑀺𑀢𑁄. 𑀏𑀢𑁆𑀣𑀸𑀳 𑁋 𑀬𑀤𑀺 𑀘𑁂𑀢𑀦𑀸𑀬 𑀲𑀩𑁆𑀩𑀤𑀸 𑀓𑀫𑁆𑀫𑀧𑀣𑀪𑀸𑀯𑀸𑀪𑀸𑀯𑀢𑁄 𑀅𑀦𑀺𑀬𑀢𑁄 𑀓𑀫𑁆𑀫𑀧𑀣𑀪𑀸𑀯𑁄𑀢𑀺 𑀓𑀫𑁆𑀫𑀧𑀣𑀭𑀸𑀲𑀺𑀫𑁆𑀳𑀺 𑀅𑀯𑀘𑀦𑀁, 𑀦𑀦𑀼 𑀅𑀪𑀺𑀚𑁆𑀛𑀸𑀤𑀻𑀦𑀫𑁆𑀧𑀺 𑀓𑀫𑁆𑀫𑀧𑀣𑀪𑀸𑀯𑀁 𑀅𑀧𑁆𑀧𑀢𑁆𑀢𑀸𑀦𑀁 𑀅𑀢𑁆𑀣𑀺𑀢𑀸𑀬 𑀅𑀦𑀺𑀬𑀢𑁄 𑀓𑀫𑁆𑀫𑀧𑀣𑀪𑀸𑀯𑁄𑀢𑀺 𑀢𑁂𑀲𑀫𑁆𑀧𑀺 𑀓𑀫𑁆𑀫𑀧𑀣𑀭𑀸𑀲𑀺𑀫𑁆𑀳𑀺 𑀅𑀯𑀘𑀦𑀁 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀓𑀫𑁆𑀫𑀧𑀣𑀢𑀸𑀢𑀁𑀲𑀪𑀸𑀕𑀢𑀸𑀳𑀺 𑀢𑁂𑀲𑀁 𑀢𑀢𑁆𑀣 𑀯𑀼𑀢𑁆𑀢𑀢𑁆𑀢𑀸. 𑀬𑀤𑀺 𑀏𑀯𑀁 𑀘𑁂𑀢𑀦𑀸𑀧𑀺 𑀢𑀢𑁆𑀣 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸? 𑀲𑀘𑁆𑀘𑀫𑁂𑀢𑀁. 𑀲𑀸 𑀧𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀸𑀢𑀺 𑀧𑀸𑀓𑀝𑁄 𑀢𑀲𑁆𑀲𑀸 𑀓𑀫𑁆𑀫𑀧𑀣𑀪𑀸𑀯𑁄𑀢𑀺 𑀦 𑀯𑀼𑀢𑁆𑀢𑀸 𑀲𑀺𑀬𑀸. 𑀘𑁂𑀢𑀦𑀸𑀬 𑀳𑀺 ‘‘𑀘𑁂𑀢𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀯𑀤𑀸𑀫𑀺 (𑀅. 𑀦𑀺. 𑁬.𑁬𑁩; 𑀓𑀣𑀸. 𑁫𑁩𑁯) 𑀢𑀺𑀯𑀺𑀥𑀸, 𑀪𑀺𑀓𑁆𑀔𑀯𑁂, 𑀓𑀸𑀬𑀲𑀜𑁆𑀘𑁂𑀢𑀦𑀸 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀓𑀣𑀸. 𑁫𑁩𑁯) 𑀓𑀫𑁆𑀫𑀪𑀸𑀯𑁄 𑀧𑀸𑀓𑀝𑁄. 𑀓𑀫𑁆𑀫𑀁𑀬𑁂𑀯 𑀘 𑀲𑀼𑀕𑀢𑀺𑀤𑀼𑀕𑁆𑀕𑀢𑀻𑀦𑀁 𑀢𑀢𑁆𑀣𑀼𑀧𑁆𑀧𑀚𑁆𑀚𑀦𑀓𑀲𑀼𑀔𑀤𑀼𑀓𑁆𑀔𑀸𑀦𑀜𑁆𑀘 𑀧𑀣𑀪𑀸𑀯𑁂𑀦 𑀧𑀯𑀢𑁆𑀢𑀁 𑀓𑀫𑁆𑀫𑀧𑀣𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀧𑀸𑀓𑀝𑁄, 𑀢𑀲𑁆𑀲𑀸 𑀓𑀫𑁆𑀫𑀧𑀣𑀪𑀸𑀯𑁄. 𑀅𑀪𑀺𑀚𑁆𑀛𑀸𑀤𑀻𑀦𑀁 𑀧𑀦 𑀘𑁂𑀢𑀦𑀸𑀲𑀫𑀻𑀳𑀦𑀪𑀸𑀯𑁂𑀦 𑀲𑀼𑀘𑀭𑀺𑀢𑀤𑀼𑀘𑁆𑀘𑀭𑀺𑀢𑀪𑀸𑀯𑁄, 𑀘𑁂𑀢𑀦𑀸𑀚𑀦𑀺𑀢𑀧𑀺𑀝𑁆𑀞𑀺𑀯𑀝𑁆𑀝𑀓𑀪𑀸𑀯𑁂𑀦 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀢𑀤𑀼𑀧𑁆𑀧𑀚𑁆𑀚𑀦𑀓𑀲𑀼𑀔𑀤𑀼𑀓𑁆𑀔𑀸𑀦𑀁 𑀧𑀣𑀪𑀸𑀯𑁄 𑀘𑀸𑀢𑀺, 𑀦 𑀢𑀣𑀸 𑀧𑀸𑀓𑀝𑁄 𑀓𑀫𑁆𑀫𑀧𑀣𑀪𑀸𑀯𑁄𑀢𑀺, 𑀢𑁂 𑀏𑀯 𑀢𑁂𑀦 𑀲𑀪𑀸𑀯𑁂𑀦 𑀤𑀲𑁆𑀲𑁂𑀢𑀼𑀁 𑀅𑀪𑀺𑀥𑀫𑁆𑀫𑁂 𑀓𑀫𑁆𑀫𑀧𑀣𑀭𑀸𑀲𑀺𑀪𑀸𑀯𑁂𑀦 𑀯𑀼𑀢𑁆𑀢𑀸. 𑀅𑀢𑀣𑀸𑀚𑀸𑀢𑀺𑀬𑀓𑀢𑁆𑀢𑀸 𑀯𑀸 𑀘𑁂𑀢𑀦𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀦 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀫𑀽𑀮𑀁 𑀧𑀢𑁆𑀯𑀸𑀢𑀺 𑀫𑀽𑀮𑀤𑁂𑀲𑀦𑀁 𑀧𑀢𑁆𑀯𑀸, 𑀫𑀽𑀮𑀲𑀪𑀸𑀯𑁂𑀲𑀼 𑀥𑀫𑁆𑀫𑁂𑀲𑀼 𑀤𑁂𑀲𑀺𑀬𑀫𑀸𑀦𑁂𑀲𑀽𑀢𑀺 𑀅𑀢𑁆𑀣𑁄.

𑀅𑀤𑀺𑀦𑁆𑀦𑀸𑀤𑀸𑀦𑀁 𑀲𑀢𑁆𑀢𑀸𑀭𑀫𑁆𑀫𑀡𑀦𑁆𑀢𑀺 𑀇𑀤𑀁 ‘‘𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸 𑀏𑀯𑀸’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀢𑀺. 𑀬𑀜𑁆𑀳𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀤𑀼𑀲𑁆𑀲𑀻𑀮𑁆𑀬𑀲𑁆𑀲 𑀆𑀭𑀫𑁆𑀫𑀡𑀁, 𑀢𑀤𑁂𑀯 𑀢𑀁 𑀯𑁂𑀭𑀫𑀡𑀺𑀬𑀸 𑀆𑀭𑀫𑁆𑀫𑀡𑀁. 𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀯𑀢𑁆𑀣𑀼𑀢𑁄 𑀏𑀯 𑀳𑀺 𑀯𑀺𑀭𑀢𑀻𑀢𑀺. ‘‘𑀲𑀢𑁆𑀢𑀸𑀭𑀫𑁆𑀫𑀡’’𑀦𑁆𑀢𑀺 𑀯𑀸 𑀲𑀢𑁆𑀢𑀲𑀗𑁆𑀔𑀸𑀢𑀁 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀫𑁂𑀯 𑀉𑀧𑀸𑀤𑀸𑀬 𑀯𑀼𑀢𑁆𑀢𑀢𑁆𑀢𑀸 𑀦 𑀓𑁄𑀘𑀺 𑀯𑀺𑀭𑁄𑀥𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 (𑀯𑀺𑀪. 𑀅𑀝𑁆𑀞. 𑁭𑁧𑁪) ‘‘𑀬𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀏𑀢𑁆𑀣 ‘𑀲𑀢𑁆𑀢𑀸𑀭𑀫𑁆𑀫𑀡𑀸𑀦𑀻’𑀢𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀬𑀲𑁆𑀫𑀸 ‘𑀲𑀢𑁆𑀢𑁄𑀢𑀺’𑀢𑀺 𑀲𑀗𑁆𑀔𑀁 𑀕𑀢𑁂 𑀲𑀗𑁆𑀔𑀸𑀭𑁂𑀬𑁂𑀯 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑀻’’𑀢𑀺. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀲𑀪𑀸𑀕𑀯𑀢𑁆𑀣𑀼𑀦𑁄 ‘‘𑀇𑀢𑁆𑀣𑀺𑀧𑀼𑀭𑀺𑀲𑀸’’𑀢𑀺 𑀕𑀳𑁂𑀢𑀩𑁆𑀩𑀢𑁄 𑀲𑀢𑁆𑀢𑀸𑀭𑀫𑁆𑀫𑀡𑁄𑀢𑀺𑀧𑀺 𑀏𑀓𑁂. ‘‘𑀏𑀓𑁄 𑀤𑀺𑀝𑁆𑀞𑁄, 𑀤𑁆𑀯𑁂 𑀲𑀼𑀢𑀸’’𑀢𑀺𑀆𑀤𑀺𑀦𑀸 𑀲𑀫𑁆𑀨𑀧𑁆𑀧𑀮𑀧𑀦𑁂 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀯𑀲𑁂𑀦. 𑀢𑀣𑀸 𑀅𑀪𑀺𑀚𑁆𑀛𑀸𑀢𑀺 𑀏𑀢𑁆𑀣 𑀢𑀣𑀸-𑀲𑀤𑁆𑀤𑁄 ‘‘𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀯𑀲𑁂𑀦𑀸’’𑀢𑀺 𑀇𑀤𑀫𑁆𑀧𑀺 𑀉𑀧𑀲𑀁𑀳𑀭𑀢𑀺, 𑀦 𑀲𑀢𑁆𑀢𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀢𑀁 𑀏𑀯 𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀅𑀪𑀺𑀚𑁆𑀛𑀸𑀬𑀦𑀢𑁄. ‘‘𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸’’𑀢𑀺 𑀧𑀯𑀢𑁆𑀢𑀫𑀸𑀦𑀸𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀢𑁂𑀪𑀽𑀫𑀓𑀥𑀫𑁆𑀫𑀸𑀭𑀫𑁆𑀫𑀡𑀸 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀢𑀲𑁆𑀲𑀸 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀢𑀸 𑀯𑀼𑀢𑁆𑀢𑀸. 𑀓𑀣𑀁 𑀧𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀫𑀳𑀕𑁆𑀕𑀢𑀧𑁆𑀧𑀢𑁆𑀢𑀸 𑀥𑀫𑁆𑀫𑀸 𑀆𑀭𑀫𑁆𑀫𑀡𑀁 𑀳𑁄𑀦𑁆𑀢𑀻𑀢𑀺? 𑀲𑀸𑀥𑀸𑀭𑀡𑀢𑁄. 𑀦𑀢𑁆𑀣𑀺 𑀲𑀼𑀓𑀝𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄𑀢𑀺 𑀳𑀺 𑀧𑀯𑀢𑁆𑀢𑀫𑀸𑀦𑀸𑀬 𑀅𑀢𑁆𑀣𑀢𑁄 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑀸𑀧𑀺 𑀕𑀳𑀺𑀢𑀸𑀯 𑀳𑁄𑀦𑁆𑀢𑀻𑀢𑀺.

𑀲𑀼𑀔𑀩𑀳𑀼𑀮𑀢𑀸𑀬 𑀭𑀸𑀚𑀸𑀦𑁄 𑀳𑀲𑀫𑀸𑀦𑀸𑀧𑀺 ‘‘𑀘𑁄𑀭𑀁 𑀖𑀸𑀢𑁂𑀣𑀸’’𑀢𑀺 𑀯𑀤𑀦𑁆𑀢𑀺, 𑀳𑀸𑀲𑁄 𑀧𑀦 𑀢𑁂𑀲𑀁 𑀅𑀜𑁆𑀜𑀯𑀺𑀲𑀬𑁄𑀢𑀺 𑀆𑀳 ‘‘𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀧𑀦 𑀦𑁂𑀲𑀁 𑀤𑀼𑀓𑁆𑀔𑀲𑀫𑁆𑀧𑀬𑀼𑀢𑁆𑀢𑀸𑀯 𑀳𑁄𑀢𑀻’’𑀢𑀺. 𑀫𑀚𑁆𑀛𑀢𑁆𑀢𑀯𑁂𑀤𑀦𑁄 𑀦 𑀳𑁄𑀢𑀺, 𑀲𑀼𑀔𑀯𑁂𑀤𑀦𑁄𑀯. 𑀢𑀢𑁆𑀣 ‘‘𑀓𑀸𑀫𑀸𑀦𑀁 𑀲𑀫𑀼𑀤𑀬𑀸’’𑀢𑀺𑀆𑀤𑀺𑀦𑀸 𑀯𑁂𑀤𑀦𑀸𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀮𑁄𑀪𑀲𑀫𑀼𑀝𑁆𑀞𑀸𑀦𑁄 𑀫𑀼𑀲𑀸𑀯𑀸𑀤𑁄 𑀲𑀼𑀔𑀯𑁂𑀤𑀦𑁄 𑀯𑀸 𑀲𑀺𑀬𑀸 𑀫𑀚𑁆𑀛𑀢𑁆𑀢𑀯𑁂𑀤𑀦𑁄 𑀯𑀸, 𑀤𑁄𑀲𑀲𑀫𑀼𑀝𑁆𑀞𑀸𑀦𑁄 𑀤𑀼𑀓𑁆𑀔𑀯𑁂𑀤𑀦𑁄 𑀯𑀸𑀢𑀺 𑀫𑀼𑀲𑀸𑀯𑀸𑀤𑁄 𑀢𑀺𑀯𑁂𑀤𑀦𑁄 𑀲𑀺𑀬𑀸. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑁂𑀲𑀼𑀧𑀺 𑀬𑀣𑀸𑀭𑀳𑀁 𑀯𑁂𑀤𑀦𑀸𑀦𑀁 ‘‘𑀮𑁄𑀪𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬𑀸’’𑀢𑀺𑀆𑀤𑀺𑀦𑀸 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀸𑀡𑀸𑀢𑀺𑀧𑀸𑀢𑁄 𑀤𑁄𑀲𑀫𑁄𑀳𑀯𑀲𑁂𑀦 𑀤𑁆𑀯𑀺𑀫𑀽𑀮𑀓𑁄𑀢𑀺 𑀲𑀫𑁆𑀧𑀬𑀼𑀢𑁆𑀢𑀫𑀽𑀮𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀲𑁆𑀲 𑀳𑀺 𑀫𑀽𑀮𑀝𑁆𑀞𑁂𑀦 𑀉𑀧𑀓𑀸𑀭𑀪𑀸𑀯𑁄 𑀤𑁄𑀲𑀯𑀺𑀲𑁂𑀲𑁄, 𑀦𑀺𑀤𑀸𑀦𑀫𑀽𑀮𑁂 𑀧𑀦 𑀕𑀬𑁆𑀳𑀫𑀸𑀦𑁂 𑀮𑁄𑀪𑀫𑁄𑀳𑀯𑀲𑁂𑀦𑀧𑀺 𑀯𑀝𑁆𑀝𑀢𑀺. 𑀲𑀫𑁆𑀫𑀽𑀴𑁆𑀳𑁄 𑀆𑀫𑀺𑀲𑀓𑀺𑀜𑁆𑀚𑀓𑁆𑀔𑀓𑀸𑀫𑁄𑀧𑀺 𑀳𑀺 𑀧𑀸𑀡𑀁 𑀳𑀦𑀢𑀺. 𑀢𑁂𑀦𑁂𑀯𑀸𑀳 ‘‘𑀮𑁄𑀪𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬𑀸’’𑀢𑀺𑀆𑀤𑀺 (𑀅. 𑀦𑀺. 𑁩.𑁩𑁪). 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀲𑀫𑀸𑀤𑀺𑀦𑁆𑀦𑀲𑀻𑀮𑀲𑁆𑀲 𑀲𑀫𑁆𑀧𑀢𑁆𑀢𑀢𑁄 𑀬𑀣𑀸𑀉𑀧𑀝𑁆𑀞𑀺𑀢𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀯𑀢𑁆𑀣𑀼𑀢𑁄 𑀯𑀺𑀭𑀢𑀺 𑀲𑀫𑁆𑀧𑀢𑁆𑀢𑀯𑀺𑀭𑀢𑀺. 𑀲𑀫𑀸𑀤𑀸𑀦𑁂𑀦 𑀉𑀧𑁆𑀧𑀦𑁆𑀦𑀸 𑀯𑀺𑀭𑀢𑀺 𑀲𑀫𑀸𑀤𑀸𑀦𑀯𑀺𑀭𑀢𑀺. 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀯𑀲𑁂𑀦 𑀧𑀯𑀢𑁆𑀢𑀸 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀭𑀢𑀺 𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀧𑀸𑀴𑀺𑀬𑀁 𑀯𑀺𑀭𑀢𑀺𑀬𑁄𑀯 𑀆𑀕𑀢𑀸, 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀧𑀦 𑀘𑁂𑀢𑀦𑀸𑀧𑀺 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑀺𑀢𑀸𑀢𑀺 𑀢𑀤𑀼𑀪𑀬𑀫𑁆𑀧𑀺 𑀕𑀡𑁆𑀳𑀦𑁆𑀢𑁄 ‘‘𑀘𑁂𑀢𑀦𑀸𑀧𑀺 𑀯𑀝𑁆𑀝𑀦𑁆𑀢𑀺 𑀯𑀺𑀭𑀢𑀺𑀬𑁄𑀧𑀻’’𑀢𑀺 𑀆𑀳.

𑀅𑀤𑀼𑀲𑁆𑀲𑀻𑀮𑁆𑀬𑀸𑀭𑀫𑁆𑀫𑀡𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀺𑀆𑀭𑀫𑁆𑀫𑀡𑀸 𑀓𑀣𑀁 𑀤𑀼𑀲𑁆𑀲𑀻𑀮𑁆𑀬𑀸𑀦𑀺 𑀧𑀚𑀳𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀺𑀭𑀫𑀡𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀢𑀤𑀸𑀭𑀫𑁆𑀫𑀡𑀪𑀸𑀯𑁂𑀦𑁂𑀯 𑀢𑀸𑀦𑀺 𑀧𑀚𑀳𑀦𑁆𑀢𑀺. 𑀦 𑀳𑀺 𑀢𑀤𑁂𑀯 𑀆𑀭𑀩𑁆𑀪 𑀢𑀁 𑀧𑀚𑀳𑀺𑀢𑀼𑀁 𑀲𑀓𑁆𑀓𑀸 𑀢𑀢𑁄 𑀅𑀦𑀺𑀲𑁆𑀲𑀝𑀪𑀸𑀯𑀢𑁄.

𑀅𑀦𑀪𑀺𑀚𑁆𑀛𑀸…𑀧𑁂… 𑀯𑀺𑀭𑀫𑀦𑁆𑀢𑀲𑁆𑀲𑀸𑀢𑀺 𑀅𑀪𑀺𑀚𑁆𑀛𑀁 𑀧𑀚𑀳𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀦 𑀳𑀺 𑀫𑀦𑁄𑀤𑀼𑀘𑁆𑀘𑀭𑀺𑀢𑀢𑁄 𑀯𑀺𑀭𑀢𑀺 𑀅𑀢𑁆𑀣𑀺 𑀅𑀦𑀪𑀺𑀚𑁆𑀛𑀸𑀤𑀻𑀳𑁂𑀯 𑀢𑀧𑁆𑀧𑀳𑀸𑀦𑀲𑀺𑀤𑁆𑀥𑀺𑀢𑁄.

𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀤𑀲𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁩. 𑀫𑀺𑀘𑁆𑀙𑀢𑁆𑀢𑀲𑀫𑁆𑀫𑀢𑁆𑀢𑀯𑀲𑁂𑀦𑀸𑀢𑀺 𑀏𑀢𑁆𑀣 𑀫𑀺𑀘𑁆𑀙𑀸𑀪𑀸𑀯𑁄 𑀫𑀺𑀘𑁆𑀙𑀢𑁆𑀢𑀁, 𑀢𑀣𑀸 𑀲𑀫𑁆𑀫𑀸𑀪𑀸𑀯𑁄 𑀲𑀫𑁆𑀫𑀢𑁆𑀢𑀁. 𑀢𑀣𑀸 𑀢𑀣𑀸 𑀧𑀯𑀢𑁆𑀢𑀸 𑀅𑀓𑀼𑀲𑀮𑀓𑁆𑀔𑀦𑁆𑀥𑀸𑀯 𑀫𑀺𑀘𑁆𑀙𑀸𑀲𑀢𑀺, 𑀏𑀯𑀁 𑀫𑀺𑀘𑁆𑀙𑀸𑀜𑀸𑀡𑀫𑁆𑀧𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀜𑀸𑀡𑀲𑁆𑀲 𑀫𑀺𑀘𑁆𑀙𑀸𑀪𑀸𑀯𑁄 𑀦𑀸𑀫 𑀅𑀢𑁆𑀣𑀺. 𑀢𑀲𑁆𑀫𑀸 𑀫𑀺𑀘𑁆𑀙𑀸𑀜𑀸𑀡𑀺𑀦𑁄𑀢𑀺 𑀫𑀺𑀘𑁆𑀙𑀸𑀲𑀜𑁆𑀜𑀸𑀡𑀸𑀢𑀺 𑀅𑀢𑁆𑀣𑁄, 𑀅𑀬𑁄𑀦𑀺𑀲𑁄 𑀧𑀯𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀺𑀘𑁆𑀙𑀸𑀧𑀘𑁆𑀘𑀯𑁂𑀓𑁆𑀔𑀡𑁂𑀦𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀫𑀺𑀘𑁆𑀙𑀸 𑀅𑀬𑁄𑀦𑀺𑀲𑁄 𑀧𑀘𑁆𑀘𑀯𑁂𑀓𑁆𑀔𑀡𑁂𑀦. 𑀓𑀼𑀲𑀮𑀯𑀺𑀫𑀼𑀢𑁆𑀢𑀻𑀢𑀺 𑀧𑀓𑀢𑀺𑀧𑀼𑀭𑀺𑀲𑀲𑀦𑁆𑀢𑀭𑀚𑀸𑀦𑀦𑀁, 𑀕𑀼𑀡𑀯𑀺𑀬𑀼𑀢𑁆𑀢𑀲𑁆𑀲 𑀅𑀢𑁆𑀢𑀦𑁄 𑀲𑀓𑀢𑁆𑀢𑀦𑀺 𑀅𑀯𑀝𑁆𑀞𑀸𑀦𑀦𑁆𑀢𑀺 𑀏𑀯𑀫𑀸𑀤𑀺𑀁 𑀅𑀓𑀼𑀲𑀮𑀧𑀯𑀢𑁆𑀢𑀺𑀁 ‘‘𑀓𑀼𑀲𑀮𑀯𑀺𑀫𑀼𑀢𑁆𑀢𑀻’’𑀢𑀺 𑀕𑀳𑁂𑀢𑁆𑀯𑀸 𑀞𑀺𑀢𑀸 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀓𑀸. 𑀲𑀫𑁆𑀫𑀸𑀧𑀘𑁆𑀘𑀯𑁂𑀓𑁆𑀔𑀡𑀸𑀢𑀺 𑀛𑀸𑀦𑀯𑀺𑀫𑁄𑀓𑁆𑀔𑀸𑀤𑀻𑀲𑀼 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑀁 𑀧𑀯𑀢𑁆𑀢𑀸 𑀧𑀘𑁆𑀘𑀯𑁂𑀓𑁆𑀔𑀡𑀸.

𑀤𑀲𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀢𑁆𑀣𑀯𑀕𑁆𑀕𑁄

𑁧. 𑀘𑀢𑀼𑀥𑀸𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁪. 𑀧𑀢𑀺𑀝𑁆𑀞𑀸𑀥𑀸𑀢𑀽𑀢𑀺 𑀲𑀳𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀧𑀢𑀺𑀝𑁆𑀞𑀸𑀪𑀽𑀢𑀸 𑀥𑀸𑀢𑀼. 𑀆𑀩𑀦𑁆𑀥𑀦𑀥𑀸𑀢𑀽𑀢𑀺 𑀦𑀳𑀸𑀦𑀺𑀬𑀘𑀼𑀡𑁆𑀡𑀲𑁆𑀲 𑀉𑀤𑀓𑀁 𑀯𑀺𑀬 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀆𑀩𑀦𑁆𑀥𑀦𑀪𑀽𑀢𑀸 𑀥𑀸𑀢𑀼. 𑀧𑀭𑀺𑀧𑀸𑀘𑀦𑀥𑀸𑀢𑀽𑀢𑀺 𑀲𑀽𑀭𑀺𑀬𑁄 𑀨𑀮𑀸𑀤𑀻𑀦𑀁 𑀯𑀺𑀬 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀧𑀭𑀺𑀧𑀸𑀘𑀦𑀪𑀽𑀢𑀸 𑀥𑀸𑀢𑀼. 𑀯𑀺𑀢𑁆𑀣𑀫𑁆𑀪𑀦𑀥𑀸𑀢𑀽𑀢𑀺 𑀤𑀼𑀢𑀺𑀬𑁄 𑀯𑀺𑀬 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀯𑀺𑀢𑁆𑀣𑀫𑁆𑀪𑀦𑀪𑀽𑀢𑀸 𑀥𑀸𑀢𑀼. 𑀓𑁂𑀲𑀸𑀤𑀬𑁄 𑀯𑀻𑀲𑀢𑀺 𑀓𑁄𑀝𑁆𑀞𑀸𑀲𑀸. 𑀆𑀤𑀺-𑀲𑀤𑁆𑀤𑁂𑀦 𑀧𑀺𑀢𑁆𑀢𑀸𑀤𑀬𑁄 𑀲𑀦𑁆𑀢𑀧𑁆𑀧𑀦𑀸𑀤𑀬𑁄 𑀉𑀤𑁆𑀥𑀗𑁆𑀕𑀫𑀸 𑀯𑀸𑀢𑀸𑀤𑀬𑁄 𑀕𑀳𑀺𑀢𑀸. 𑀏𑀢𑀸𑀢𑀺 𑀥𑀸𑀢𑀼𑀬𑁄.

𑀘𑀢𑀼𑀥𑀸𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀼𑀩𑁆𑀩𑁂𑀲𑀫𑁆𑀩𑁄𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫. 𑀅𑀬𑀁 𑀧𑀣𑀯𑀻𑀥𑀸𑀢𑀼𑀁 𑀦𑀺𑀲𑁆𑀲𑀸𑀬 𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑁄 𑀅𑀲𑁆𑀲𑀸𑀤𑁄. 𑀏𑀯𑀁 𑀧𑀯𑀢𑁆𑀢𑀸𑀦𑀦𑁆𑀢𑀺 𑀏𑀯𑀁 𑀓𑀸𑀬𑁂 𑀧𑀪𑀸𑀯𑀲𑁆𑀲 𑀧𑀯𑁂𑀤𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀸𑀦𑀁. 𑀳𑀼𑀢𑁆𑀯𑀸 𑀅𑀪𑀸𑀯𑀸𑀓𑀸𑀭𑁂𑀦𑀸𑀢𑀺 𑀧𑀼𑀩𑁆𑀩𑁂 𑀅𑀯𑀺𑀚𑁆𑀚𑀫𑀸𑀦𑀸 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 𑀪𑀗𑁆𑀕𑀼𑀧𑀕𑀫𑀦𑀢𑁄 𑀉𑀤𑁆𑀥𑀁 𑀅𑀪𑀸𑀯𑀸𑀓𑀸𑀭𑁂𑀦. 𑀦 𑀦𑀺𑀘𑁆𑀘𑀸𑀢𑀺 𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀢𑁆𑀢𑀸, 𑀥𑀼𑀯𑀁 𑀦𑀺𑀘𑁆𑀘𑀁. 𑀧𑀝𑀺𑀧𑀻𑀴𑀦𑀸𑀓𑀸𑀭𑁂𑀦𑀸𑀢𑀺 𑀉𑀤𑀬𑀩𑁆𑀩𑀬𑀯𑀲𑁂𑀦 𑀅𑀪𑀺𑀡𑁆𑀳𑀁 𑀧𑀻𑀴𑀦𑀸𑀓𑀸𑀭𑁂𑀦 𑀤𑀼𑀓𑁆𑀔𑀝𑁆𑀞𑁂𑀦. 𑀲𑀪𑀸𑀯𑀯𑀺𑀕𑀫𑀸𑀓𑀸𑀭𑁂𑀦𑀸𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑀲𑁆𑀲 𑀯𑀺𑀕𑀘𑁆𑀙𑀦𑀸𑀓𑀸𑀭𑁂𑀦. 𑀲𑀪𑀸𑀯𑀥𑀫𑁆𑀫𑀸 𑀳𑀺 𑀅𑀧𑁆𑀧𑀫𑀢𑁆𑀢𑀁 𑀔𑀡𑀁 𑀧𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀢𑀲𑁆𑀫𑀸 𑀢𑁂 ‘‘𑀚𑀭𑀸𑀬 𑀫𑀭𑀡𑁂𑀦 𑀘𑀸’’𑀢𑀺 𑀤𑁆𑀯𑁂𑀥𑀸 𑀯𑀺𑀧𑀭𑀺𑀡𑀫𑀦𑁆𑀢𑀺. 𑀢𑁂𑀦𑀸𑀳 ‘‘𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’’𑀢𑀺. 𑀆𑀤𑀻𑀦𑀁 𑀯𑀸𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀆𑀤𑀻𑀦𑀯𑁄, 𑀧𑀭𑀫𑀓𑀸𑀧𑀜𑁆𑀜𑀢𑀸. 𑀯𑀺𑀦𑀻𑀬𑀢𑀻𑀢𑀺 𑀯𑀽𑀧𑀲𑀫𑀻𑀬𑀢𑀺. 𑀅𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀯𑀲𑁂𑀦 𑀦𑀺𑀲𑁆𑀲𑀭𑀢𑀺 𑀏𑀢𑁂𑀦𑀸𑀢𑀺 𑀦𑀺𑀲𑁆𑀲𑀭𑀡𑀁.

𑀲𑀸𑀬𑀁 𑀦𑀺𑀧𑀦𑁆𑀦𑀸 𑀲𑀩𑁆𑀩𑀭𑀢𑁆𑀢𑀺𑀁 𑀔𑁂𑀧𑁂𑀢𑁆𑀯𑀸 𑀧𑀸𑀢𑁄 𑀉𑀝𑁆𑀞𑀳𑀸𑀫, 𑀫𑀸𑀲𑀧𑀼𑀡𑁆𑀡𑀖𑀝𑁄 𑀯𑀺𑀬 𑀦𑁄 𑀲𑀭𑀻𑀭𑀁 𑀦𑀺𑀲𑁆𑀲𑀦𑁆𑀤𑀸𑀪𑀸𑀯𑀢𑁄.

𑀨𑀼𑀲𑀺𑀢𑀫𑀢𑁆𑀢𑁂𑀲𑀼𑀧𑀻𑀢𑀺 𑀉𑀤𑀓𑀲𑁆𑀲 𑀨𑀼𑀲𑀺𑀢𑀫𑀢𑁆𑀢𑁂𑀲𑀼𑀧𑀺.

𑀅𑀢𑀺𑀦𑀸𑀫𑁂𑀦𑁆𑀢𑀺 𑀓𑀸𑀮𑀁. 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀧𑀯𑀢𑁆𑀢𑀸 𑀧𑀼𑀕𑁆𑀕𑀮𑀸 𑀏𑀢𑀸 𑀧𑀣𑀯𑀻𑀥𑀸𑀢𑀼𑀆𑀤𑀬𑁄 𑀅𑀲𑁆𑀲𑀸𑀤𑁂𑀦𑁆𑀢𑀺 𑀦𑀸𑀫 𑀅𑀪𑀺𑀭𑀢𑀺𑀯𑀲𑁂𑀦 𑀢𑀢𑁆𑀣 𑀆𑀓𑀗𑁆𑀔𑀼𑀧𑁆𑀧𑀸𑀤𑀦𑀢𑁄.

𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦𑀸𑀢𑀺 𑀅𑀕𑁆𑀕𑀫𑀕𑁆𑀕𑀜𑀸𑀡𑁂𑀦. 𑀭𑀼𑀓𑁆𑀔𑁄 𑀩𑁄𑀥𑀺 ‘‘𑀩𑀼𑀚𑁆𑀛𑀢𑀺 𑀏𑀢𑁆𑀣𑀸’’𑀢𑀺 𑀓𑀢𑁆𑀯𑀸. 𑀫𑀕𑁆𑀕𑁄 𑀩𑁄𑀥𑀺 ‘‘𑀩𑀼𑀚𑁆𑀛𑀢𑀺 𑀏𑀢𑁂𑀦𑀸’’𑀢𑀺 𑀓𑀢𑁆𑀯𑀸. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀩𑁄𑀥𑀺 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀚𑁆𑀛𑀦𑀢𑁄. 𑀦𑀺𑀩𑁆𑀩𑀸𑀦𑀁 𑀩𑁄𑀥𑀺 𑀩𑀼𑀚𑁆𑀛𑀺𑀢𑀩𑁆𑀩𑀢𑁄. 𑀢𑁂𑀲𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁. 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀦𑁆𑀢𑀺 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁 𑀬𑀸𑀣𑀸𑀯𑀢𑁄 𑀤𑀲𑁆𑀲𑀦𑀯𑀢𑁆𑀣𑀼.

𑀅𑀓𑀼𑀧𑁆𑀧𑀸𑀢𑀺 𑀧𑀝𑀺𑀧𑀓𑁆𑀔𑁂𑀳𑀺 𑀅𑀓𑁄𑀧𑁂𑀢𑀩𑁆𑀩𑁄. 𑀓𑀸𑀭𑀡𑀢𑁄𑀢𑀺 𑀅𑀭𑀺𑀬𑀫𑀕𑁆𑀕𑀢𑁄. 𑀢𑀢𑁄 𑀳𑀺𑀲𑁆𑀲 𑀅𑀓𑀼𑀧𑁆𑀧𑀢𑀸. 𑀢𑁂𑀦𑀸𑀳 ‘‘𑀲𑀸 𑀳𑀻’’𑀢𑀺𑀆𑀤𑀻. 𑀆𑀭𑀫𑁆𑀫𑀡𑀢𑁄𑀢𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀦𑀁 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀻𑀦𑀁 𑀅𑀪𑀸𑀯𑀢𑁄.

𑀯𑀺𑀢𑁆𑀣𑀸𑀭𑀯𑀲𑁂𑀦𑀸𑀢𑀺 𑀏𑀓𑁂𑀓𑀥𑀸𑀢𑀼𑀯𑀲𑁂𑀦𑀸𑀢𑀺 𑀯𑀤𑀦𑁆𑀢𑀺, 𑀏𑀓𑁂𑀓𑀺𑀲𑁆𑀲𑀸 𑀧𑀦 𑀥𑀸𑀢𑀼𑀬𑀸 𑀮𑀓𑁆𑀔𑀡𑀯𑀺𑀪𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦. 𑀬𑀦𑁆𑀢𑀺 𑀳𑁂𑀢𑀼𑀅𑀢𑁆𑀣𑁂 𑀦𑀺𑀧𑀸𑀢𑁄, 𑀬𑀁 𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀸𑀤𑁂𑀢𑀺 𑀏𑀢𑁂𑀦𑀸𑀢𑀺 𑀅𑀲𑁆𑀲𑀸𑀤𑁄, 𑀢𑀡𑁆𑀳𑀸. 𑀅𑀬𑀁 𑀧𑀣𑀯𑀻𑀥𑀸𑀢𑀼𑀬𑀸 𑀅𑀲𑁆𑀲𑀸𑀤𑁄𑀢𑀺 𑀏𑀢𑁆𑀣 𑀅𑀬𑀁-𑀲𑀤𑁆𑀤𑁄 ‘‘𑀧𑀳𑀸𑀦𑀧𑀝𑀺𑀯𑁂𑀥𑁄’’𑀢𑀺 𑀏𑀢𑁆𑀣𑀸𑀧𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄 ‘‘𑀅𑀬𑀁 𑀧𑀳𑀸𑀦𑀧𑀝𑀺𑀯𑁂𑀥𑁄 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀝𑁆𑀞𑁂𑀦 𑀲𑀫𑀼𑀤𑀬𑀲𑀘𑁆𑀘’’𑀦𑁆𑀢𑀺. 𑀏𑀲 𑀦𑀬𑁄 𑀲𑁂𑀲𑀲𑀘𑁆𑀘𑁂𑀲𑀼𑀧𑀺. 𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀅𑀲𑁆𑀲𑀸𑀤𑁄 𑀆𑀤𑀻𑀦𑀯𑁄 𑀦𑀺𑀲𑁆𑀲𑀭𑀡𑀦𑁆𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀧𑀯𑀢𑁆𑀢𑀸 𑀬𑀸 𑀤𑀺𑀝𑁆𑀞𑀺…𑀧𑁂… 𑀬𑁄 𑀲𑀫𑀸𑀥𑀺, 𑀅𑀬𑀁 𑀪𑀸𑀯𑀦𑀸𑀧𑀝𑀺𑀯𑁂𑀥𑁄 𑀫𑀕𑁆𑀕𑀲𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑀧𑀼𑀩𑁆𑀩𑁂𑀲𑀫𑁆𑀩𑁄𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀘𑀭𑀺𑀁𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁬. 𑀬𑀣𑀸 𑀬𑀸𑀯𑀢𑀸 𑀦𑀺𑀲𑁆𑀲𑀭𑀡𑀧𑀭𑀺𑀬𑁂𑀲𑀦𑀝𑁆𑀞𑀸𑀦𑁂 𑀆𑀤𑀻𑀦𑀯𑀧𑀭𑀺𑀬𑁂𑀲𑀦𑀸, 𑀏𑀯𑀁 𑀬𑀸𑀯𑀢𑀸 𑀆𑀤𑀻𑀦𑀯𑀧𑀭𑀺𑀬𑁂𑀲𑀦𑀝𑁆𑀞𑀸𑀦𑁂 𑀅𑀲𑁆𑀲𑀸𑀤𑀧𑀭𑀺𑀬𑁂𑀲𑀦𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀘𑀭𑀺𑀦𑁆𑀢𑀺 𑀜𑀸𑀡𑀘𑀸𑀭𑁂𑀦 𑀅𑀘𑀭𑀺𑀁, 𑀅𑀦𑀼𑀪𑀯𑀦𑀘𑀸𑀭𑁂𑀦𑀸’’𑀢𑀺.

𑀅𑀘𑀭𑀺𑀁𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀦𑁄𑀘𑁂𑀤𑀁𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁭. 𑀦𑀺𑀲𑁆𑀲𑀝𑀸𑀢𑀺𑀆𑀤𑀻𑀦𑀺 𑀧𑀤𑀸𑀦𑀺, 𑀆𑀤𑀺𑀢𑁄 𑀯𑀼𑀢𑁆𑀢𑀧𑀝𑀺𑀲𑁂𑀥𑁂𑀦𑀸𑀢𑀺 ‘‘𑀦𑁂𑀯𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑁂𑀦 𑀦𑀓𑀸𑀭𑁂𑀦. 𑀢𑁂𑀦𑀸𑀳 ‘‘𑀦 𑀦𑀺𑀲𑁆𑀲𑀝𑀸’’𑀢𑀺𑀆𑀤𑀺. 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦𑀸𑀢𑀺𑀆𑀤𑀺 𑀘 𑀏𑀢𑁆𑀣 𑀯𑀺𑀳𑀭𑀡𑀧𑁂𑀓𑁆𑀔𑀡𑁂 𑀓𑀭𑀡𑀯𑀘𑀦𑀁. 𑀤𑀼𑀢𑀺𑀬𑀦𑀬𑁂𑀢𑀺 ‘‘𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂. 𑀓𑀺𑀮𑁂𑀲𑀯𑀝𑁆𑀝𑀫𑀭𑀺𑀬𑀸𑀤𑀸𑀬 𑀲𑀩𑁆𑀩𑀲𑁄 𑀅𑀪𑀸𑀯𑀢𑁄 𑀦𑀺𑀫𑁆𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑀺𑀢𑁆𑀢𑁂𑀦. 𑀢𑁂𑀦𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑀻𑀲𑀽𑀢𑀺 𑀤𑀼𑀢𑀺𑀬𑀸𑀤𑀻𑀲𑀼 𑀢𑀻𑀲𑀼.

𑀦𑁄𑀘𑁂𑀤𑀁𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀏𑀓𑀦𑁆𑀢𑀤𑀼𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁮. 𑀏𑀓𑀦𑁆𑀢𑁂𑀦𑁂𑀯 𑀤𑀼𑀓𑁆𑀔𑀸𑀢𑀺 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁄 𑀯𑀺𑀬 𑀏𑀓𑀦𑁆𑀢𑀢𑁄 𑀤𑀼𑀓𑁆𑀔𑀸 𑀏𑀯 𑀲𑀼𑀔𑁂𑀦 𑀅𑀯𑁄𑀫𑀺𑀲𑁆𑀲𑀸. 𑀤𑀼𑀓𑁆𑀔𑁂𑀦 𑀅𑀦𑀼𑀧𑀢𑀺𑀢𑀸𑀢𑀺 𑀤𑀼𑀓𑁆𑀔𑁂𑀦𑁂𑀯 𑀲𑀩𑁆𑀩𑀲𑁄 𑀉𑀧𑀕𑀢𑀸. 𑀤𑀼𑀓𑁆𑀔𑁂𑀦 𑀑𑀓𑁆𑀓𑀦𑁆𑀢𑀸𑀢𑀺 𑀩𑀳𑀺𑀤𑁆𑀥𑀸 𑀯𑀺𑀬 𑀅𑀦𑁆𑀢𑁄𑀧𑀺 𑀤𑀼𑀓𑁆𑀔𑁂𑀦 𑀅𑀯𑀓𑁆𑀓𑀦𑁆𑀢𑀸 𑀅𑀦𑀼𑀧𑀯𑀺𑀝𑁆𑀞𑀸. 𑀲𑀼𑀔𑀯𑁂𑀤𑀦𑀸𑀧𑀘𑁆𑀘𑀬𑀢𑀸𑀬 𑀇𑀫𑀸𑀲𑀁 𑀥𑀸𑀢𑀽𑀦𑀁 𑀲𑀼𑀔𑀢𑀸 𑀯𑀺𑀬 𑀤𑀼𑀓𑁆𑀔𑀯𑁂𑀤𑀦𑀸𑀧𑀘𑁆𑀘𑀬𑀢𑀸𑀧𑀺 𑀯𑁂𑀤𑀺𑀢𑀩𑁆𑀩𑀸, 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸 𑀧𑀦 𑀲𑀩𑁆𑀩𑀢𑁆𑀣 𑀘𑀭𑀺𑀢𑀸 𑀏𑀯. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀸𑀲𑀼 𑀥𑀸𑀢𑀽𑀲𑀼, 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀯𑀸. 𑀧𑀞𑀫𑀁 𑀲𑀼𑀔𑀁 𑀤𑀲𑁆𑀲𑁂𑀢𑁆𑀯𑀸𑀧𑀺 𑀧𑀘𑁆𑀙𑀸 𑀤𑀼𑀓𑁆𑀔𑀲𑁆𑀲 𑀓𑀣𑀺𑀢𑀢𑁆𑀢𑀸 ‘‘𑀤𑀼𑀓𑁆𑀔𑀮𑀓𑁆𑀔𑀡𑀁 𑀓𑀣𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀏𑀓𑀦𑁆𑀢𑀤𑀼𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬-𑁧𑁦. 𑀅𑀪𑀺𑀦𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁯-𑁧𑁨𑁩. 𑀙𑀝𑁆𑀞𑀲𑀢𑁆𑀢𑀫𑁂𑀲𑀼 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀯𑀺𑀯𑀝𑁆𑀝𑀁 𑀓𑀣𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀻𑀲𑀼 𑀲𑀼𑀢𑁆𑀢𑁂𑀲𑀼. 𑀘𑀢𑀼𑀲𑀘𑁆𑀘𑀫𑁂𑀯𑀸𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑀫𑀸𑀳𑀝𑀸𑀦𑀺 𑀘𑀢𑀼𑀲𑀘𑁆𑀘𑀦𑁆𑀢𑀺 𑀢𑁂𑀲𑀁 𑀏𑀓𑀚𑁆𑀛𑀁 𑀕𑀳𑀡𑀁, 𑀦𑀺𑀬𑀫𑁄 𑀧𑀦 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀧𑀭𑀫𑀢𑁆𑀣𑀲𑁆𑀲 𑀅𑀪𑀸𑀯𑀢𑁄.

𑀅𑀪𑀺𑀦𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀥𑀸𑀢𑀼𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.