𑁫. 𑀕𑀳𑀧𑀢𑀺𑀯𑀕𑁆𑀕𑁄

𑁧. 𑀧𑀜𑁆𑀘𑀯𑁂𑀭𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧. 𑀬𑀢𑁄𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀅𑀬𑀜𑁆𑀳𑀺 𑀢𑁄-𑀲𑀤𑁆𑀤𑁄 𑀤𑀸-𑀲𑀤𑁆𑀤𑁄 𑀯𑀺𑀬 𑀇𑀥 𑀓𑀸𑀮𑀯𑀺𑀲𑀬𑁄. 𑀢𑁂𑀦𑀸𑀳 ‘‘𑀬𑀤𑀸’’𑀢𑀺. 𑀪𑀬𑀯𑁂𑀭𑀘𑁂𑀢𑀦𑀸𑀬𑁄𑀢𑀺 𑀪𑀸𑀬𑀺𑀢𑀩𑁆𑀩𑀝𑁆𑀞𑁂𑀦 𑀪𑀬𑀁, 𑀯𑁂𑀭𑀧𑀲𑀯𑀦𑀝𑁆𑀞𑁂𑀦 𑀯𑁂𑀭𑀦𑁆𑀢𑀺 𑀘 𑀮𑀤𑁆𑀥𑀦𑀸𑀫𑀸 𑀘𑁂𑀢𑀦𑀸𑀬𑁄. 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀳𑀺 𑀬𑀲𑁆𑀲 𑀧𑀯𑀢𑁆𑀢𑀦𑁆𑀢𑀺, 𑀬𑀜𑁆𑀘 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀺𑀬𑀦𑁆𑀢𑀺, 𑀉𑀪𑀬𑁂 𑀲𑀪𑀬𑀪𑁂𑀭𑀯𑀸𑀢𑀺 𑀢𑁂 𑀏𑀯 𑀪𑀸𑀬𑀺𑀢𑀩𑁆𑀩𑀪𑀬𑀯𑁂𑀭𑀚𑀦𑀓𑀸𑀯𑀸𑀢𑀺. 𑀲𑁄𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀝𑀺𑀧𑀢𑁆𑀢𑀺𑀅𑀥𑀺𑀕𑀫𑁄 𑀲𑁄𑀢𑀸𑀧𑀢𑁆𑀢𑀺, 𑀢𑀤𑀢𑁆𑀣𑀸𑀬 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑀲𑁆𑀲 𑀘 𑀅𑀗𑁆𑀕𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺, 𑀢𑀤𑀼𑀪𑀬𑀁 𑀲𑀦𑁆𑀥𑀸𑀬𑀸𑀳 ‘‘𑀤𑀼𑀯𑀺𑀥𑀁 𑀲𑁄𑀢𑀸𑀧𑀢𑁆𑀢𑀺𑀬𑀸 𑀅𑀗𑁆𑀕’’𑀦𑁆𑀢𑀺, 𑀲𑁄𑀢𑀸𑀧𑀢𑁆𑀢𑀺𑀅𑀢𑁆𑀣𑀁 𑀅𑀗𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀬𑀁 𑀧𑀼𑀩𑁆𑀩𑀪𑀸𑀕𑁂𑀢𑀺 𑀬𑀁 𑀲𑀬𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀨𑀮𑀧𑀝𑀺𑀮𑀸𑀪𑀢𑁄 𑀧𑀼𑀩𑁆𑀩𑀪𑀸𑀕𑁂 𑀢𑀤𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺. 𑀓𑀺𑀁 𑀧𑀦 𑀢𑀦𑁆𑀢𑀺 𑀆𑀳 ‘‘𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄’’𑀢𑀺𑀆𑀤𑀺. 𑀲𑀧𑁆𑀧𑀼𑀭𑀺𑀲𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀅𑀭𑀺𑀬𑀜𑀸𑀡𑀲𑀜𑁆𑀜𑀸𑀡𑀚𑀸𑀢𑀸 𑀧𑀬𑀺𑀭𑀼𑀧𑀸𑀲𑀦𑀸, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀲𑁆𑀲𑀯𑀦𑀁, 𑀬𑁄𑀦𑀺𑀲𑁄 𑀉𑀧𑀸𑀬𑁂𑀦 𑀅𑀦𑀺𑀘𑁆𑀘𑀸𑀤𑀺𑀢𑁄 𑀫𑀦𑀲𑀺 𑀓𑀭𑀡𑀁 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄, 𑀉𑀲𑁆𑀲𑀼𑀓𑁆𑀓𑀸𑀧𑁂𑀦𑁆𑀢𑁂𑀦 𑀥𑀫𑁆𑀫𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀅𑀦𑀼𑀥𑀫𑁆𑀫𑀧𑀝𑀺𑀧𑀚𑁆𑀚𑀦𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀻𑀢𑀺 𑀏𑀢𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀬𑀸 𑀅𑀗𑁆𑀕𑀸𑀦𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑁄𑀢𑀸𑀧𑀢𑁆𑀢𑀺𑀅𑀗𑁆𑀕𑀦𑁆𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀏𑀯𑀁 𑀆𑀕𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀞𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀗𑁆𑀕𑀁. 𑀲𑁄𑀢𑀸𑀧𑀦𑁆𑀦𑁄 𑀅𑀗𑁆𑀕𑀻𑀬𑀢𑀺 𑀜𑀸𑀬𑀢𑀺 𑀏𑀢𑁂𑀦𑀸𑀢𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀅𑀗𑁆𑀕𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀇𑀤𑀁 𑀧𑀘𑁆𑀙𑀸 𑀯𑀼𑀢𑁆𑀢𑀁 𑀅𑀗𑁆𑀕𑀁. 𑀤𑁄𑀲𑁂𑀳𑀺 𑀆𑀭𑀓𑀸𑀢𑀺 𑀅𑀭𑀺𑀬𑁄𑀢𑀺 𑀆𑀳 ‘‘𑀦𑀺𑀤𑁆𑀤𑁄𑀲𑁄’’𑀢𑀺. 𑀓𑀣𑀁 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄𑀢𑀺𑀆𑀤𑀺𑀦𑀸 𑀓𑁂𑀦𑀘𑀺𑀧𑀺 𑀅𑀦𑀼𑀧𑀸𑀭𑀫𑁆𑀪𑀺𑀬𑀢𑁆𑀢𑀸 𑀦𑀺𑀭𑀼𑀧𑀸𑀭𑀫𑁆𑀪𑁄. 𑀜𑀸𑀡𑀁 𑀲𑀦𑁆𑀥𑀸𑀬 ‘‘𑀦𑀺𑀤𑁆𑀤𑁄𑀲𑁄’’𑀢𑀺 𑀯𑀼𑀢𑁆𑀢𑀁, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀲𑀦𑁆𑀥𑀸𑀬 ‘‘𑀦𑀺𑀭𑀼𑀧𑀸𑀭𑀫𑁆𑀪𑁄’’𑀢𑀺 𑀯𑀤𑀦𑁆𑀢𑀺. 𑀉𑀪𑀬𑀫𑁆𑀧𑀺 𑀧𑀦 𑀲𑀦𑁆𑀥𑀸𑀬 𑀉𑀪𑀬𑀁 𑀯𑀼𑀢𑁆𑀢𑀦𑁆𑀢𑀺 𑀅𑀧𑀭𑁂. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀏𑀢𑁆𑀣 𑀅𑀥𑀺𑀧𑁆𑀧𑁂𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀅𑀧𑀭𑀸𑀧𑀭𑀁 𑀉𑀧𑁆𑀧𑀦𑁆𑀦𑀸𑀬 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬𑀸’’𑀢𑀺. 𑀦 𑀳𑀺 𑀫𑀕𑁆𑀕𑀜𑀸𑀡𑀁 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀢𑀺. 𑀲𑀫𑁆𑀫𑀸 𑀉𑀧𑀸𑀬𑀢𑁆𑀢𑀸 𑀢𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂 𑀬𑀸𑀣𑀸𑀯𑀢𑁄 𑀜𑀸𑀬𑀢𑀻𑀢𑀺 𑀜𑀸𑀬𑁄, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀜𑀸𑀡𑀁 𑀧𑀦 𑀜𑀸𑀬𑀢𑀺 𑀲𑁄 𑀏𑀢𑁂𑀦𑀸𑀢𑀺 𑀜𑀸𑀬𑁄.

𑀢𑀢𑁆𑀣𑀸𑀢𑀺 𑀦𑀺𑀭𑀬𑁂. 𑀫𑀕𑁆𑀕𑀲𑁄𑀢𑀦𑁆𑀢𑀺 𑀫𑀕𑁆𑀕𑀲𑁆𑀲 𑀲𑁄𑀢𑀁. 𑀆𑀧𑀦𑁆𑀦𑁄𑀢𑀺 𑀅𑀥𑀺𑀕𑀢𑁄. 𑀅𑀧𑀸𑀬𑁂𑀲𑀼 𑀉𑀧𑁆𑀧𑀚𑁆𑀚𑀦𑀲𑀗𑁆𑀔𑀸𑀢𑁄 𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀏𑀢𑀲𑁆𑀲𑀸𑀢𑀺 𑀯𑀺𑀦𑀺𑀧𑀸𑀢𑀥𑀫𑁆𑀫𑁄, 𑀦 𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄. 𑀧𑀭𑀁 𑀅𑀬𑀦𑀦𑁆𑀢𑀺 𑀅𑀢𑀺𑀯𑀺𑀬 𑀲𑀯𑀺𑀲𑀬𑁂 𑀅𑀬𑀺𑀢𑀩𑁆𑀩𑀁 𑀩𑀼𑀚𑁆𑀛𑀺𑀢𑀩𑁆𑀩𑀁. 𑀬𑁂𑀲𑀜𑁆𑀳𑀺 𑀥𑀸𑀢𑀽𑀦𑀁 𑀕𑀢𑀺𑀅𑀢𑁆𑀣𑁄, 𑀩𑀼𑀤𑁆𑀥𑀺𑀧𑀺 𑀢𑁂𑀲𑀁 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀯𑀲𑁆𑀲𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀓𑁄’’𑀢𑀺.

𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀓𑀸𑀭𑀡𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀲𑀗𑁆𑀔𑀸𑀢𑀲𑁆𑀲 𑀧𑀸𑀧𑀓𑀫𑁆𑀫𑀲𑁆𑀲 𑀓𑀭𑀡𑀳𑁂𑀢𑀼. 𑀯𑁂𑀭𑀁 𑀯𑀼𑀘𑁆𑀘𑀢𑀺 𑀯𑀺𑀭𑁄𑀥𑁄, 𑀢𑀤𑁂𑀯 𑀪𑀸𑀬𑀺𑀢𑀩𑁆𑀩𑀢𑁄 𑀪𑀬𑀦𑁆𑀢𑀺 𑀆𑀳 ‘‘𑀪𑀬𑀁 𑀯𑁂𑀭𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓’’𑀦𑁆𑀢𑀺. 𑀇𑀤𑀁 𑀩𑀸𑀳𑀺𑀭𑀁 𑀯𑁂𑀭𑀁 𑀦𑀸𑀫 𑀢𑀲𑁆𑀲 𑀯𑁂𑀭𑀲𑁆𑀲 𑀫𑀽𑀮𑀪𑀽𑀢𑀢𑁄 𑀯𑁂𑀭𑀓𑀸𑀭𑀧𑀼𑀕𑁆𑀕𑀮𑀢𑁄 𑀩𑀳𑀺𑀪𑀸𑀯𑀢𑁆𑀢𑀸. 𑀢𑁂𑀦𑁂𑀯 𑀳𑀺 𑀢𑀲𑁆𑀲 𑀯𑁂𑀭𑀓𑀸𑀭𑀧𑀼𑀕𑁆𑀕𑀮𑀲𑁆𑀲 𑀉𑀧𑁆𑀧𑀦𑁆𑀦𑀁 𑀯𑁂𑀭𑀁 𑀲𑀦𑁆𑀥𑀸𑀬 ‘‘𑀇𑀤𑀁 𑀅𑀚𑁆𑀛𑀢𑁆𑀢𑀺𑀓𑀯𑁂𑀭𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁, 𑀢𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀯𑁂𑀭𑀲𑁆𑀲 𑀫𑀽𑀮𑀪𑀽𑀢𑀸 𑀯𑁂𑀭𑀓𑀸𑀭𑀧𑀼𑀕𑁆𑀕𑀮𑀘𑁂𑀢𑀦𑀸 𑀉𑀧𑁆𑀧𑀚𑁆𑀚𑀢𑀺 𑀧𑀳𑀭𑀺𑀢𑀼𑀁 𑀅𑀲𑀫𑀢𑁆𑀣𑀲𑁆𑀲𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀦𑁂𑀭𑀬𑀺𑀓𑀸 𑀦𑀺𑀭𑀬𑀧𑀸𑀮𑁂𑀲𑀼 𑀧𑀝𑀺𑀧𑀳𑀭𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀦𑀺𑀭𑀬𑀧𑀸𑀮𑀲𑁆𑀲 𑀘𑁂𑀢𑀦𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀢𑁂𑀦 ‘‘𑀅𑀢𑁆𑀣𑀺 𑀦𑀺𑀭𑀬𑁂 𑀦𑀺𑀭𑀬𑀧𑀸𑀮𑀸’’𑀢𑀺 𑀤𑀲𑁆𑀲𑁂𑀢𑀺. 𑀬𑀁 𑀧𑀦𑁂𑀢𑀁 𑀩𑀸𑀳𑀺𑀭𑀯𑁂𑀭𑀦𑁆𑀢𑀺 𑀬𑀫𑀺𑀤𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀩𑀸𑀳𑀺𑀭𑀁 𑀯𑁂𑀭𑀁. 𑀧𑀼𑀕𑁆𑀕𑀮𑀯𑁂𑀭𑀦𑁆𑀢𑀺 𑀯𑀼𑀢𑁆𑀢𑀁 𑀅𑀢𑁆𑀢𑀓𑀺𑀘𑁆𑀘𑀁 𑀲𑀸𑀥𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑁂𑀯𑀮𑀁 𑀧𑀭𑀧𑀼𑀕𑁆𑀕𑀮𑁂 𑀉𑀧𑁆𑀧𑀦𑁆𑀦𑀫𑀢𑁆𑀢𑀁 𑀯𑁂𑀭𑀦𑁆𑀢𑀺 𑀓𑀢𑁆𑀯𑀸. 𑀅𑀢𑁆𑀣𑀢𑁄 𑀏𑀓𑀫𑁂𑀯 ‘‘𑀘𑁂𑀢𑀲𑀺𑀓’’𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸. 𑀲𑁂𑀲𑀧𑀤𑁂𑀲𑀽𑀢𑀺 ‘‘𑀅𑀤𑀺𑀦𑁆𑀦𑀸𑀤𑀸𑀦𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀆𑀕𑀢𑁂𑀲𑀼 𑀲𑁂𑀲𑀓𑁄𑀝𑁆𑀞𑀸𑀲𑁂𑀲𑀼. 𑀅𑀢𑁆𑀣𑁄 𑀪𑀕𑁆𑀕𑁄𑀢𑀺 𑀅𑀢𑁆𑀣𑁄 𑀥𑀁𑀲𑀺𑀢𑁄. 𑀅𑀥𑀺𑀕𑀢𑁂𑀦𑀸𑀢𑀺 𑀫𑀕𑁆𑀕𑁂𑀦 𑀅𑀥𑀺𑀕𑀢𑁂𑀦. ‘‘𑀅𑀪𑀺𑀕𑀢𑁂𑀦𑀸’’𑀢𑀺𑀧𑀺 𑀧𑀸𑀞𑁄, 𑀅𑀥𑀺𑀯𑀼𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀘𑀮𑀧𑁆𑀧𑀲𑀸𑀤𑁂𑀦𑀸’’𑀢𑀺.

𑀧𑀜𑁆𑀘𑀯𑁂𑀭𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀧𑀜𑁆𑀘𑀯𑁂𑀭𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁨. 𑀪𑀺𑀓𑁆𑀔𑀽𑀦𑀁 𑀓𑀣𑀺𑀢𑀪𑀸𑀯𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑁄𑀢𑀺 𑀏𑀢𑁂𑀦 𑀬𑀸 𑀲𑀢𑁆𑀣𑀸𑀭𑀸 𑀏𑀓𑀘𑁆𑀘𑀸𑀦𑀁 𑀤𑁂𑀲𑀺𑀢𑀤𑁂𑀲𑀦𑀸, 𑀧𑀼𑀦 𑀢𑀤𑀜𑁆𑀜𑁂𑀲𑀁 𑀯𑁂𑀦𑁂𑀬𑁆𑀬𑀤𑀫𑀓𑀼𑀲𑀮𑁂𑀦 𑀓𑀸𑀮𑀦𑁆𑀢𑀭𑁂 𑀢𑁂𑀦𑁂𑀯 𑀤𑁂𑀲𑀺𑀢𑀸, 𑀲𑀸 𑀥𑀫𑁆𑀫𑀲𑀁𑀕𑀸𑀳𑀓𑁂𑀳𑀺 ‘‘𑀫𑀸 𑀦𑁄 𑀲𑀢𑁆𑀣𑀼𑀤𑁂𑀲𑀦𑀸 𑀲𑀫𑁆𑀧𑀝𑀺𑀕𑁆𑀕𑀳𑀁 𑀯𑀺𑀦𑀸 𑀦𑀲𑁆𑀲𑀢𑀽’’𑀢𑀺 𑀯𑀺𑀲𑀼𑀁 𑀲𑀗𑁆𑀕𑀳𑀁 𑀆𑀭𑁄𑀧𑀺𑀢𑀸𑀢𑀺 𑀤𑀲𑁆𑀲𑁂𑀢𑀺.

𑀤𑀼𑀢𑀺𑀬𑀧𑀜𑁆𑀘𑀯𑁂𑀭𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑀼𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩. 𑀲𑀫𑀼𑀤𑀬𑀦𑀁 𑀲𑀫𑀼𑀤𑀬𑁄, 𑀲𑀫𑀼𑀤𑁂𑀢𑀺 𑀏𑀢𑀫𑁆𑀳𑀸𑀢𑀺 𑀲𑀫𑀼𑀤𑀬𑁄, 𑀏𑀯𑀁 𑀉𑀪𑀺𑀦𑁆𑀦𑀁 𑀲𑀫𑀼𑀤𑀬𑀸𑀦𑀫𑀢𑁆𑀣𑀢𑁄𑀧𑀺 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀘𑀬𑀸𑀯 𑀧𑀘𑁆𑀘𑀬𑀲𑀫𑀼𑀤𑀬𑁄. 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 ‘‘𑀇𑀫𑀜𑁆𑀘 𑀇𑀫𑀜𑁆𑀘 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀁 𑀧𑀝𑀺𑀘𑁆𑀘 𑀇𑀫𑁂 𑀥𑀫𑁆𑀫𑀸 𑀔𑀡𑁂 𑀔𑀡𑁂 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀧𑀲𑁆𑀲𑀦𑁆𑀢𑁄 ‘‘𑀧𑀘𑁆𑀘𑀬𑀲𑀫𑀼𑀤𑀬𑀁 𑀧𑀲𑁆𑀲𑀦𑁆𑀢𑁄𑀧𑀺 𑀪𑀺𑀓𑁆𑀔𑀼 𑀔𑀡𑀺𑀓𑀲𑀫𑀼𑀤𑀬𑀁 𑀧𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁄 𑀧𑀘𑁆𑀘𑀬𑀤𑀲𑁆𑀲𑀦𑀫𑀼𑀔𑁂𑀦 𑀦𑀺𑀩𑁆𑀩𑀢𑁆𑀢𑀺𑀓𑁆𑀔𑀡𑀲𑁆𑀲 𑀤𑀲𑁆𑀲𑀦𑀢𑁄. 𑀲𑁄 𑀧𑀦 𑀔𑀡𑁂 𑀔𑀡𑁂 𑀲𑀗𑁆𑀔𑀸𑀭𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀁 𑀧𑀲𑁆𑀲𑀺𑀢𑀼𑀁 𑀆𑀭𑀤𑁆𑀥𑁄 ‘‘𑀇𑀫𑁂𑀳𑀺 𑀦𑀸𑀫 𑀧𑀘𑁆𑀘𑀬𑁂𑀳𑀺 𑀦𑀺𑀩𑁆𑀩𑀢𑁆𑀢𑀢𑀻’’𑀢𑀺 𑀧𑀲𑁆𑀲𑀢𑀺. ‘‘𑀲𑁄 𑀔𑀡𑀺𑀓𑀲𑀫𑀼𑀤𑀬𑀁 𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑀬𑀁 𑀧𑀲𑁆𑀲𑀢𑀻’’𑀢𑀺 𑀯𑀤𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀧𑀘𑁆𑀘𑀬𑀢𑁄 𑀲𑀗𑁆𑀔𑀸𑀭𑀸𑀦𑀁 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀔𑀡𑀢𑁄 𑀢𑁂𑀲𑀁 𑀉𑀤𑀬𑀤𑀲𑁆𑀲𑀦𑀁 𑀳𑁄𑀢𑀺, 𑀔𑀡𑀢𑁄 𑀏𑀢𑁂𑀲𑀁 𑀉𑀤𑀬𑀁 𑀧𑀲𑁆𑀲𑀢𑁄 𑀧𑀕𑁂𑀯 𑀧𑀘𑁆𑀘𑀬𑀸𑀦𑀁 𑀲𑀼𑀕𑁆𑀕𑀳𑀺𑀢𑀢𑁆𑀢𑀸 𑀧𑀘𑁆𑀘𑀬𑀢𑁄 𑀤𑀲𑁆𑀲𑀦𑀁 𑀲𑀼𑀔𑁂𑀦 𑀇𑀚𑁆𑀛𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀘𑁆𑀘𑀬𑀲𑀫𑀼𑀤𑀬𑀁 𑀧𑀲𑁆𑀲𑀦𑁆𑀢𑁄𑀧𑀻’’𑀢𑀺𑀆𑀤𑀺. 𑀅𑀢𑁆𑀣𑀗𑁆𑀕𑀫𑀤𑀲𑁆𑀲𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀘𑁆𑀘𑀦𑁆𑀢𑀢𑁆𑀣𑀗𑁆𑀕𑀫𑁄𑀢𑀺 𑀅𑀧𑁆𑀧𑀯𑀢𑁆𑀢𑀺 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀦𑁆𑀢𑀺. 𑀪𑁂𑀤𑀢𑁆𑀣𑀗𑁆𑀕𑀫𑁄𑀢𑀺 𑀔𑀡𑀺𑀓𑀦𑀺𑀭𑁄𑀥𑁄. 𑀢𑀤𑀼𑀪𑀬𑀁 𑀧𑀼𑀩𑁆𑀩𑀪𑀸𑀕𑁂 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀤𑀺𑀯𑀲𑁂𑀦 𑀧𑀲𑁆𑀲𑀦𑁆𑀢𑁄 𑀅𑀜𑁆𑀜𑀢𑀭𑀲𑁆𑀲 𑀤𑀲𑁆𑀲𑀦𑁂 𑀇𑀢𑀭𑀤𑀲𑁆𑀲𑀦𑀫𑁆𑀧𑀺 𑀲𑀺𑀤𑁆𑀥𑀫𑁂𑀯 𑀳𑁄𑀢𑀺, 𑀧𑀼𑀩𑁆𑀩𑀪𑀸𑀕𑁂 𑀘 𑀆𑀭𑀫𑁆𑀫𑀡𑀯𑀲𑁂𑀦 𑀔𑀬𑀢𑁄 𑀯𑀬𑀲𑀫𑁆𑀫𑀲𑀦𑀸𑀤𑀺𑀓𑀸𑀮𑁂 𑀪𑁂𑀤𑀢𑁆𑀣𑀗𑁆𑀕𑀫𑀁 𑀧𑀲𑁆𑀲𑀦𑁆𑀢𑁄 𑀅𑀢𑀺𑀭𑁂𑀓𑀯𑀲𑁂𑀦 𑀅𑀦𑀼𑀲𑁆𑀲𑀯𑀸𑀤𑀺𑀢𑁄 𑀅𑀘𑁆𑀘𑀦𑁆𑀢𑀁 𑀅𑀢𑁆𑀣𑀗𑁆𑀕𑀫𑀁 𑀧𑀲𑁆𑀲𑀢𑀺. 𑀫𑀕𑁆𑀕𑀓𑁆𑀔𑀡𑁂 𑀧𑀦𑀸𑀭𑀫𑁆𑀫𑀡𑀢𑁄 𑀅𑀘𑁆𑀘𑀦𑁆𑀢𑀅𑀢𑁆𑀣𑀗𑁆𑀕𑀫𑀁 𑀧𑀲𑁆𑀲𑀢𑀺, 𑀅𑀲𑀫𑁆𑀫𑁄𑀳𑀢𑁄 𑀇𑀢𑀭𑀫𑁆𑀧𑀺 𑀧𑀲𑁆𑀲𑀢𑀺. 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀘𑁆𑀘𑀦𑁆𑀢𑀢𑁆𑀣𑀗𑁆𑀕𑀫𑀁 𑀧𑀲𑁆𑀲𑀦𑁆𑀢𑁄𑀧𑀻’’𑀢𑀺𑀆𑀤𑀺. 𑀲𑀫𑀼𑀤𑀬𑀢𑁆𑀣𑀗𑁆𑀕𑀫𑀁 𑀦𑀺𑀩𑁆𑀩𑀢𑁆𑀢𑀺𑀪𑁂𑀤𑀦𑁆𑀢𑀺 𑀲𑀫𑀼𑀤𑀬𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀢𑁆𑀢𑀺𑀁 𑀅𑀢𑁆𑀣𑀗𑁆𑀕𑀫𑀲𑀗𑁆𑀔𑀸𑀢𑀁 𑀪𑁂𑀤𑀜𑁆𑀘. 𑀦𑀺𑀲𑁆𑀲𑀬𑀯𑀲𑁂𑀦𑀸𑀢𑀺 𑀘𑀓𑁆𑀔𑀼𑀲𑁆𑀲 𑀲𑀦𑁆𑀦𑀺𑀲𑁆𑀲𑀬𑀯𑀲𑁂𑀦 𑀧𑀘𑁆𑀘𑀬𑀁 𑀓𑀢𑁆𑀯𑀸. 𑀆𑀭𑀫𑁆𑀫𑀡𑀯𑀲𑁂𑀦𑀸𑀢𑀺 𑀭𑀽𑀧𑁂 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀫𑀥𑀼𑀧𑀺𑀡𑁆𑀟𑀺𑀓𑀲𑀼𑀢𑁆𑀢𑀝𑀻𑀓𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄𑀢𑀺 ‘‘𑀘𑀓𑁆𑀔𑀼 𑀭𑀽𑀧𑀸𑀦𑀺 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀲𑀫𑀸𑀕𑀫𑁂 𑀦𑀺𑀩𑁆𑀩𑀢𑁆𑀢𑀺 𑀨𑀲𑁆𑀲𑁄𑀢𑀺 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀢𑀺𑀡𑁆𑀡𑀁 𑀲𑀗𑁆𑀕𑀢𑀺𑀬𑀸 𑀨𑀲𑁆𑀲𑁄’’𑀢𑀺. 𑀢𑀺𑀡𑁆𑀡𑀦𑁆𑀢𑀺 𑀘 𑀧𑀸𑀓𑀝𑀧𑀘𑁆𑀘𑀬𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀤𑀜𑁆𑀜𑁂𑀧𑀺 𑀧𑀦 𑀫𑀦𑀲𑀺𑀓𑀸𑀭𑀸𑀤𑀬𑁄 𑀨𑀲𑁆𑀲𑀧𑀘𑁆𑀘𑀬𑀸 𑀳𑁄𑀦𑁆𑀢𑀺𑀬𑁂𑀯. 𑀏𑀯𑀦𑁆𑀢𑀺 𑀢𑀡𑁆𑀳𑀸𑀤𑀻𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀓𑁆𑀓𑀫𑁂𑀦. 𑀪𑀺𑀦𑁆𑀦𑀁 𑀳𑁄𑀢𑀻𑀢𑀺 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦 𑀦𑀺𑀭𑀼𑀤𑁆𑀥𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀅𑀧𑁆𑀧𑀝𑀺𑀲𑀦𑁆𑀥𑀺𑀬’’𑀦𑁆𑀢𑀺.

𑀤𑀼𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪. 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄𑀢𑀺 ‘‘𑀅𑀬𑀁 𑀮𑁄𑀓𑀲𑁆𑀲𑀸’’𑀢𑀺 𑀲𑀫𑀼𑀤𑀬𑀢𑁆𑀣𑀗𑁆𑀕𑀫𑀸𑀦𑀁 𑀯𑀺𑀲𑁂𑀲𑀤𑀲𑁆𑀲𑀦𑀁. 𑀏𑀢𑁆𑀣 𑀘𑀢𑀼𑀢𑁆𑀣𑀲𑀼𑀢𑁆𑀢𑁂 𑀢𑀢𑀺𑀬𑀲𑀼𑀢𑁆𑀢𑀢𑁄 𑀯𑀺𑀲𑁂𑀲𑁄.

𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀜𑀸𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁫. 𑀅𑀜𑁆𑀜𑀫𑀜𑁆𑀜𑀁 𑀤𑁆𑀯𑀺𑀦𑁆𑀦𑀁 𑀜𑀸𑀢𑀻𑀦𑀁 𑀕𑀸𑀫𑁄 𑀜𑀸𑀢𑀺𑀓𑁄𑀢𑀺 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀤𑁆𑀯𑀺𑀦𑁆𑀦𑀁 𑀜𑀸𑀢𑀓𑀸𑀦𑀁 𑀕𑀸𑀫𑁂’’𑀢𑀺. 𑀕𑀺𑀜𑁆𑀚𑀓𑀸 𑀯𑀼𑀘𑁆𑀘𑀦𑁆𑀢𑀺 𑀇𑀝𑁆𑀞𑀓𑀸, 𑀕𑀺𑀜𑁆𑀚𑀓𑀸𑀳𑀺 𑀏𑀯 𑀓𑀢𑁄 𑀆𑀯𑀲𑀣𑁄 𑀕𑀺𑀜𑁆𑀚𑀓𑀸𑀯𑀲𑀣𑁄. 𑀲𑁄 𑀓𑀺𑀭 𑀆𑀯𑀸𑀲𑁄 𑀬𑀣𑀸 𑀲𑀼𑀥𑀸𑀧𑀭𑀺𑀓𑀫𑁆𑀫𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀺, 𑀏𑀯𑀁 𑀇𑀝𑁆𑀞𑀓𑀸𑀳𑀺 𑀏𑀯 𑀘𑀺𑀦𑀺𑀢𑁆𑀯𑀸 𑀙𑀸𑀤𑁂𑀢𑁆𑀯𑀸 𑀓𑀢𑁄. 𑀢𑀸𑀤𑀺𑀲𑀜𑁆𑀳𑀺 𑀙𑀤𑀦𑀁 𑀲𑀦𑁆𑀥𑀸𑀬 𑀪𑀕𑀯𑀢𑀸 𑀇𑀝𑁆𑀞𑀓𑀸𑀙𑀤𑀦𑀁 𑀅𑀦𑀼𑀜𑁆𑀜𑀸𑀢𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀝𑁆𑀞𑀓𑀸𑀳𑀺 𑀓𑀢𑁂 𑀫𑀳𑀸𑀧𑀸𑀲𑀸𑀤𑁂’’𑀢𑀺. 𑀢𑀢𑁆𑀣 𑀤𑁆𑀯𑀸𑀭𑀩𑀦𑁆𑀥𑀓𑀯𑀸𑀝𑀨𑀮𑀓𑀸𑀤𑀻𑀦𑀺 𑀧𑀦 𑀤𑀸𑀭𑀼𑀫𑀬𑀸𑀦𑀺𑀬𑁂𑀯. 𑀧𑀭𑀺𑀬𑀸𑀬𑀢𑀺 𑀅𑀢𑁆𑀢𑀦𑁄 𑀨𑀮𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀢𑁆𑀢𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀥𑀫𑁆𑀫𑀧𑀭𑀺𑀬𑀸𑀬𑀦𑁆𑀢𑀺 𑀥𑀫𑁆𑀫𑀓𑀸𑀭𑀡’’𑀦𑁆𑀢𑀺, 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀪𑀽𑀢𑀁 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀳𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀉𑀧𑁂𑀘𑁆𑀘 𑀲𑀼𑀬𑁆𑀬𑀢𑀺 𑀏𑀢𑁆𑀣𑀸𑀢𑀺 𑀉𑀧𑀲𑁆𑀲𑀼𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀧𑀲𑁆𑀲𑀼𑀢𑀻𑀢𑀺 𑀉𑀧𑀲𑁆𑀲𑀼𑀢𑀺𑀝𑁆𑀞𑀸𑀦’’𑀦𑁆𑀢𑀺. 𑀅𑀢𑁆𑀢𑀦𑁄 𑀓𑀫𑁆𑀫𑀦𑁆𑀢𑀺 𑀬𑀤𑀢𑁆𑀣𑀁 𑀢𑀢𑁆𑀣 𑀕𑀢𑁄, 𑀢𑀁 𑀧𑀭𑀺𑀯𑁂𑀡𑀲𑀫𑀚𑁆𑀚𑀦𑀓𑀺𑀭𑀺𑀬𑀁. 𑀧𑀳𑀸𑀬𑀸𑀢𑀺 𑀅𑀓𑀢𑁆𑀯𑀸. 𑀏𑀯𑀁 𑀫𑀳𑀢𑁆𑀣𑀜𑁆𑀳𑀺 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂 𑀞𑀢𑁆𑀯𑀸 𑀲𑀼𑀡𑀦𑁆𑀢𑀲𑁆𑀲 𑀫𑀳𑀢𑁄 𑀅𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺. 𑀏𑀓𑀗𑁆𑀕𑀡𑀁 𑀅𑀳𑁄𑀲𑀻𑀢𑀺 𑀲𑀩𑁆𑀩𑀁 𑀯𑀺𑀯𑀝𑀁 𑀅𑀳𑁄𑀲𑀺. 𑀢𑀻𑀲𑀼 𑀳𑀺 𑀪𑀯𑁂𑀲𑀼 𑀲𑀗𑁆𑀔𑀸𑀭𑀕𑀢𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀲𑁂𑀦 𑀫𑀦𑀲𑀺𑀓𑀭𑁄𑀢𑁄 𑀪𑀕𑀯𑀢𑁄 𑀓𑀺𑀜𑁆𑀘𑀺 𑀅𑀲𑁂𑀲𑁂𑀢𑁆𑀯𑀸 𑀲𑀩𑁆𑀩𑀫𑁆𑀧𑀺 𑀢𑀁 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀉𑀧𑀕𑀘𑁆𑀙𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀸𑀯𑀪𑀯𑀕𑁆𑀕𑀸 𑀏𑀓𑀗𑁆𑀕𑀡𑀁 𑀅𑀳𑁄𑀲𑀻’’𑀢𑀺. 𑀢𑀦𑁆𑀢𑀺𑀯𑀲𑁂𑀦 𑀢𑀫𑀢𑁆𑀣𑀁 𑀯𑀸𑀘𑀸𑀬 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 ‘‘𑀯𑀘𑀲𑀸 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑁄’’𑀢𑀺 𑀯𑀼𑀢𑁆𑀢𑁄. 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀲𑁂𑀦 𑀘 𑀅𑀢𑁆𑀣𑀁 𑀆𑀳𑀭𑀺𑀢𑁆𑀯𑀸 𑀢𑁂𑀲𑀁 𑀦𑀺𑀭𑁄𑀥𑁂𑀦 𑀯𑀺𑀯𑀝𑁆𑀝𑀲𑁆𑀲 𑀆𑀳𑀢𑀢𑁆𑀢𑀸 ‘‘𑀬𑀣𑀸𑀦𑀼𑀲𑀦𑁆𑀥𑀺𑀦𑀸’’𑀢𑀺 𑀯𑀼𑀢𑁆𑀢𑀁. 𑀅𑀤𑁆𑀤𑀲 𑀜𑀸𑀡𑀘𑀓𑁆𑀔𑀼𑀦𑀸.

𑀫𑀦𑀲𑀸 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑁄 ‘‘𑀢𑀼𑀡𑁆𑀳𑀻𑀪𑀽𑀢𑁄𑀯 𑀧𑀕𑀼𑀡𑀁 𑀓𑀭𑁄𑀦𑁆𑀢𑁄’’𑀢𑀺 𑀯𑀼𑀢𑁆𑀢𑁄. 𑀧𑀤𑀸𑀦𑀼𑀧𑀤𑀦𑁆𑀢𑀺 𑀧𑀤𑀜𑁆𑀘 𑀅𑀦𑀼𑀧𑀤𑀜𑁆𑀘. 𑀧𑀼𑀭𑀺𑀫𑀜𑁆𑀳𑀺 𑀧𑀤𑀁 𑀦𑀸𑀫, 𑀢𑀤𑀦𑀦𑁆𑀢𑀭𑀁 𑀅𑀦𑀼𑀧𑀤𑀁. 𑀖𑀝𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀅𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀧𑀭𑀺𑀬𑀸𑀧𑀼𑀡𑀸𑀢𑀻𑀢𑀺 𑀅𑀚𑁆𑀛𑀬𑀢𑀺. 𑀆𑀥𑀸𑀭𑀧𑁆𑀧𑀢𑁆𑀢𑀦𑁆𑀢𑀺 𑀆𑀥𑀸𑀭𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀧𑁆𑀧𑀢𑁆𑀢𑀁 𑀅𑀧𑁆𑀧𑀫𑀼𑀝𑁆𑀞𑀁 𑀕𑀢𑀢𑁆𑀢𑀸 𑀆𑀥𑀸𑀭𑀧𑁆𑀧𑀢𑁆𑀢𑀁 𑀦𑀸𑀫. 𑀓𑀸𑀭𑀡𑀦𑀺𑀲𑁆𑀲𑀺𑀢𑁄𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀓𑀸𑀭𑀡𑀲𑀦𑁆𑀦𑀺𑀲𑁆𑀲𑀺𑀢𑁄. 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑁄𑀢𑀺 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀁, 𑀢𑀤𑁂𑀯 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀁. 𑀥𑀫𑁆𑀫𑀧𑀭𑀺𑀬𑀸𑀬𑀸𑀧𑁂𑀓𑁆𑀔𑀸𑀬 𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄. 𑀢𑀻𑀲𑀼𑀧𑀺 𑀇𑀫𑁂𑀲𑀽𑀢𑀺 𑀢𑀢𑀺𑀬𑀘𑀢𑀼𑀢𑁆𑀣𑀧𑀜𑁆𑀘𑀫𑁂𑀲𑀼 𑀢𑀻𑀲𑀼 𑀲𑀼𑀢𑁆𑀢𑁂𑀲𑀼.

𑀜𑀸𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀜𑁆𑀜𑀢𑀭𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬. 𑀦𑀸𑀫𑀯𑀲𑁂𑀦𑀸𑀢𑀺 𑀕𑁄𑀢𑁆𑀢𑀦𑀸𑀫𑀯𑀲𑁂𑀦 𑀘 𑀓𑀺𑀢𑁆𑀢𑀺𑀯𑀲𑁂𑀦 𑀘 𑀅𑀧𑀸𑀓𑀝𑁄, 𑀢𑀲𑁆𑀫𑀸 ‘‘𑀚𑀸𑀢𑀺𑀯𑀲𑁂𑀦 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀯𑀼𑀢𑁆𑀢𑀁.

𑀅𑀜𑁆𑀜𑀢𑀭𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀚𑀸𑀡𑀼𑀲𑁆𑀲𑁄𑀡𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭. 𑀏𑀯𑀁𑀮𑀤𑁆𑀥𑀦𑀸𑀫𑁄𑀢𑀺 ‘‘𑀚𑀸𑀡𑀼𑀲𑁆𑀲𑁄𑀡𑀻’’𑀢𑀺 𑀏𑀯𑀁𑀮𑀤𑁆𑀥𑀦𑀸𑀫𑁄 𑀭𑀜𑁆𑀜𑁄 𑀲𑀦𑁆𑀢𑀺𑀓𑀸 𑀅𑀥𑀺𑀕𑀢𑀦𑀸𑀫𑁄.

𑀚𑀸𑀡𑀼𑀲𑁆𑀲𑁄𑀡𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀮𑁄𑀓𑀸𑀬𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮. 𑀆𑀬𑀢𑀺𑀁 𑀳𑀺𑀢𑀁 𑀢𑁂𑀦 𑀮𑁄𑀓𑁄 𑀦 𑀬𑀢𑀢𑀺 𑀦 𑀈𑀳𑀢𑀻𑀢𑀺 𑀮𑁄𑀓𑀸𑀬𑀢𑀁. 𑀦 𑀳𑀺 𑀢𑀁 𑀮𑀤𑁆𑀥𑀺𑀁 𑀦𑀺𑀲𑁆𑀲𑀸𑀬 𑀲𑀢𑁆𑀢𑀸 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀘𑀺𑀢𑁆𑀢𑀫𑁆𑀧𑀺 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀓𑀼𑀢𑁄 𑀧𑀬𑁄𑀕𑁄, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀺, 𑀢𑀢𑁆𑀣 𑀯𑀸 𑀦𑀺𑀬𑀼𑀢𑁆𑀢𑁄𑀢𑀺 𑀮𑁄𑀓𑀸𑀬𑀢𑀺𑀓𑁄. 𑀧𑀞𑀫𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑀯𑀸𑀘𑀓𑀢𑁆𑀢𑀸 𑀚𑁂𑀝𑁆𑀞𑀯𑁂𑀯𑀘𑀦𑁄𑀢𑀺 𑀆𑀳 ‘‘𑀧𑀞𑀫𑀁 𑀮𑁄𑀓𑀸𑀬𑀢’’𑀦𑁆𑀢𑀺. 𑀲𑀸𑀥𑀸𑀭𑀡𑀯𑀘𑀦𑁄𑀧𑀺 𑀮𑁄𑀓𑀲𑀤𑁆𑀤𑁄 𑀯𑀺𑀲𑀺𑀝𑁆𑀞𑀯𑀺𑀲𑀬𑁄 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀩𑀸𑀮𑀧𑀼𑀣𑀼𑀚𑁆𑀚𑀦𑀮𑁄𑀓𑀲𑁆𑀲𑀸’’𑀢𑀺. 𑀇𑀢𑁆𑀢𑀭𑀪𑀸𑀯𑁂𑀦 𑀮𑀓𑀼𑀡𑁆𑀟𑀓𑀪𑀸𑀯𑁂𑀦 𑀢𑀲𑁆𑀲 𑀯𑀺𑀧𑀼𑀮𑀸𑀤𑀺𑀪𑀸𑀯𑁂𑀦 𑀩𑀸𑀮𑀸𑀦𑀁 𑀉𑀧𑀝𑁆𑀞𑀸𑀦𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀬𑀢𑀁 𑀫𑀳𑀦𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀧𑀭𑀺𑀢𑁆𑀢𑀦𑁆𑀢𑀺 𑀔𑀼𑀤𑁆𑀤𑀓𑀁. 𑀏𑀓𑀲𑀪𑀸𑀯𑀦𑁆𑀢𑀺 𑀏𑀓𑀁 𑀲𑀪𑀸𑀯𑀁. 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑀸𑀬𑀸𑀢𑀺 𑀆𑀳 ‘‘𑀦𑀺𑀘𑁆𑀘𑀲𑀪𑀸𑀯𑀫𑁂𑀯𑀸𑀢𑀺 𑀧𑀼𑀘𑁆𑀙𑀢𑀻’’𑀢𑀺. 𑀧𑀼𑀭𑀺𑀫𑀲𑀪𑀸𑀯𑁂𑀦 𑀦𑀸𑀦𑀸𑀲𑀪𑀸𑀯𑀦𑁆𑀢𑀺 𑀧𑀼𑀭𑀺𑀫𑀲𑀪𑀸𑀯𑀢𑁄 𑀪𑀺𑀦𑁆𑀦𑀲𑀪𑀸𑀯𑀁. 𑀧𑀘𑁆𑀙𑀸 𑀦 𑀳𑁄𑀢𑀻𑀢𑀺 𑀧𑀘𑁆𑀙𑀸 𑀓𑀺𑀜𑁆𑀘𑀺 𑀦 𑀳𑁄𑀢𑀺 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀚𑁆𑀚𑀦𑀢𑁄. 𑀢𑁂𑀦𑀸𑀳 ‘‘𑀉𑀘𑁆𑀙𑁂𑀤𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀢𑀻’’𑀢𑀺. 𑀏𑀓𑀢𑁆𑀢𑀦𑁆𑀢𑀺 𑀲𑀩𑁆𑀩𑀓𑀸𑀮𑀁 𑀅𑀢𑁆𑀢𑀲𑀫𑁆𑀪𑀯𑀁. 𑀢𑀣𑀸 𑀘𑁂𑀯 𑀕𑀳𑀡𑁂𑀦 𑀤𑁆𑀯𑁂𑀧𑀺 𑀯𑀸𑀤𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑁄 𑀳𑁄𑀦𑁆𑀢𑀺. 𑀦𑀢𑁆𑀣𑀺 𑀦 𑀳𑁄𑀢𑀺. 𑀧𑀼𑀣𑀼𑀢𑁆𑀢𑀁 𑀦𑀸𑀦𑀸𑀲𑀪𑀸𑀯𑀁, 𑀏𑀓𑀭𑀽𑀧𑀁 𑀦 𑀳𑁄𑀢𑀻𑀢𑀺 𑀯𑀸 𑀕𑀳𑀡𑁂𑀦 𑀤𑁆𑀯𑁂𑀧𑀺 𑀯𑀸𑀤𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄𑀢𑀺.

𑀮𑁄𑀓𑀸𑀬𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀭𑀺𑀬𑀲𑀸𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯. 𑀲𑀁𑀲𑀬𑀼𑀧𑁆𑀧𑀢𑁆𑀢𑀺 𑀆𑀓𑀸𑀭𑀤𑀲𑁆𑀲𑀦𑀦𑁆𑀢𑀺 ‘‘𑀓𑀲𑁆𑀫𑀺𑀁 𑀲𑀢𑀺 𑀓𑀺𑀁 𑀳𑁄𑀢𑀻’’𑀢𑀺 𑀓𑀸𑀭𑀡𑀲𑁆𑀲 𑀨𑀮𑀲𑁆𑀲 𑀘 𑀧𑀘𑁆𑀘𑀸𑀫𑀲𑀦𑁂𑀦 𑀯𑀺𑀦𑀸 𑀓𑁂𑀯𑀮𑀁 𑀇𑀤𑀧𑁆𑀧𑀘𑁆𑀘𑀬𑀢𑀸𑀬 𑀲𑀁𑀲𑀬𑀲𑁆𑀲 𑀉𑀧𑁆𑀧𑀚𑁆𑀚𑀦𑀸𑀓𑀸𑀭𑀤𑀲𑁆𑀲𑀦𑀁. 𑀲𑀫𑀼𑀤𑀬𑀢𑀺 𑀲𑀫𑀼𑀤𑁂𑀢𑀻𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺.

𑀅𑀭𑀺𑀬𑀲𑀸𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀼𑀢𑀺𑀬𑀅𑀭𑀺𑀬𑀲𑀸𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦. 𑀤𑁆𑀯𑁂𑀧𑀺 𑀦𑀬𑀸 𑀏𑀓𑀢𑁄 𑀯𑀼𑀢𑁆𑀢𑀸𑀢𑀺 𑀇𑀤𑀁 ‘‘𑀯𑀺𑀜𑁆𑀜𑀸𑀡𑁂 𑀲𑀢𑀺 𑀦𑀸𑀫𑀭𑀽𑀧𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀯𑀫𑁂 𑀯𑀼𑀢𑁆𑀢𑀲𑁆𑀲 𑀦𑀬𑀲𑁆𑀲 ‘‘𑀅𑀯𑀺𑀚𑁆𑀚𑀸𑀬 𑀲𑀢𑀺 𑀲𑀗𑁆𑀔𑀸𑀭𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀤𑀲𑀫𑁂 𑀯𑀼𑀢𑁆𑀢𑀦𑀬𑁂 𑀅𑀦𑁆𑀢𑁄𑀕𑀥𑀢𑁆𑀢𑀸. 𑀦𑀸𑀦𑀢𑁆𑀢𑀦𑁆𑀢𑀺 𑀧𑀼𑀭𑀺𑀫𑀢𑁄 𑀦𑀯𑀫𑀢𑁄 𑀤𑀲𑀫𑀲𑁆𑀲 𑀦𑀸𑀦𑀢𑁆𑀢𑀁.

𑀤𑀼𑀢𑀺𑀬𑀅𑀭𑀺𑀬𑀲𑀸𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀕𑀳𑀧𑀢𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.