𑁪. 𑀤𑀼𑀢𑀺𑀬𑀜𑀸𑀡𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀲𑀢𑁆𑀢𑀭𑀻𑀢𑀺 𑀢-𑀓𑀸𑀭𑀲𑁆𑀲 𑀭-𑀓𑀸𑀭𑀸𑀤𑁂𑀲𑀁 𑀯𑀼𑀢𑁆𑀢𑀁. 𑀲𑀢𑁆𑀢𑀢𑀺𑀲𑀤𑁆𑀤𑁂𑀦 𑀯𑀸 𑀲𑀫𑀸𑀦𑀢𑁆𑀣𑁄 𑀲𑀢𑁆𑀢𑀭𑀺𑀲𑀤𑁆𑀤𑁄. 𑀩𑁆𑀬𑀜𑁆𑀚𑀦𑀭𑀼𑀘𑀺𑀯𑀲𑁂𑀦 𑀩𑁆𑀬𑀜𑁆𑀚𑀦𑀁 𑀪𑀡𑀦𑁆𑀢𑀻𑀢𑀺 𑀩𑁆𑀬𑀜𑁆𑀚𑀦𑀪𑀸𑀡𑀓𑀸. 𑀢𑁂𑀦𑀸𑀳 ‘‘𑀩𑀳𑀼𑀩𑁆𑀬𑀜𑁆𑀚𑀦𑀁 𑀓𑀢𑁆𑀯𑀸’’𑀢𑀺𑀆𑀤𑀺. 𑀢𑀺𑀝𑁆𑀞𑀢𑀺 𑀢𑀢𑁆𑀣 𑀨𑀮𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀞𑀺𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀮𑀓𑁆𑀔𑀡𑀲𑁆𑀲 𑀥𑀫𑁆𑀫𑀲𑁆𑀲 𑀞𑀺𑀢𑀺 𑀥𑀫𑁆𑀫𑀝𑁆𑀞𑀺𑀢𑀺. 𑀅𑀣 𑀯𑀸 𑀥𑀫𑁆𑀫𑁄𑀢𑀺 𑀓𑀸𑀭𑀡𑀁, 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀲𑁆𑀲 𑀬𑁄 𑀞𑀺𑀢𑀺𑀲𑀪𑀸𑀯𑁄, 𑀲𑁄𑀯 𑀥𑀫𑁆𑀫𑀢𑁄 𑀅𑀜𑁆𑀜𑁄 𑀦𑀢𑁆𑀣𑀻𑀢𑀺 𑀥𑀫𑁆𑀫𑀝𑁆𑀞𑀺𑀢𑀺, 𑀧𑀘𑁆𑀘𑀬𑁄. 𑀢𑀢𑁆𑀣 𑀜𑀸𑀡𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 𑁋 ‘‘𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑀫𑀸𑀢𑀺𑀓𑀸 𑁪). 𑀢𑀣𑀸 𑀘𑀸𑀳 ‘‘𑀧𑀘𑁆𑀘𑀬𑀸𑀓𑀸𑀭𑁂 𑀜𑀸𑀡’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀥𑀫𑁆𑀫𑀸𑀦𑀦𑁆𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁. 𑀧𑀯𑀢𑁆𑀢𑀺𑀝𑁆𑀞𑀺𑀢𑀺𑀓𑀸𑀭𑀡𑀢𑁆𑀢𑀸𑀢𑀺 𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑀸𑀬 𑀞𑀺𑀢𑀺𑀬𑀸 𑀓𑀸𑀭𑀡𑀢𑁆𑀢𑀸. ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺𑀆𑀤𑀺𑀦𑀸 𑀅𑀤𑁆𑀥𑀢𑁆𑀢𑀬𑁂 𑀅𑀦𑁆𑀯𑀬𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀙𑀩𑁆𑀩𑀺𑀥𑀲𑁆𑀲 𑀜𑀸𑀡𑀲𑁆𑀲. 𑀔𑀬𑁄 𑀦𑀸𑀫 𑀯𑀺𑀦𑀸𑀲𑁄, 𑀲𑁄𑀯 𑀪𑁂𑀤𑁄𑀢𑀺. 𑀯𑀺𑀭𑀚𑁆𑀚𑀦𑀁 𑀧𑀮𑀼𑀚𑁆𑀚𑀦𑀁. 𑀦𑀺𑀭𑀼𑀚𑁆𑀛𑀦𑀁 𑀅𑀦𑁆𑀢𑀭𑀥𑀸𑀦𑀁. 𑀏𑀓𑁂𑀓𑀲𑁆𑀫𑀺𑀦𑁆𑀢𑀺 𑀚𑀭𑀸𑀫𑀭𑀡𑀸𑀤𑀻𑀲𑀼 𑀏𑀓𑁂𑀓𑀲𑁆𑀫𑀺𑀁. 𑀧𑀼𑀩𑁆𑀩𑁂 ‘‘𑀬𑀣𑀸𑀪𑀽𑀢𑀜𑀸𑀡’’𑀦𑁆𑀢𑀺 𑀢𑀭𑀼𑀡𑀯𑀺𑀧𑀲𑁆𑀲𑀦𑀁 𑀆𑀳. 𑀢𑀲𑁆𑀫𑀸 𑀇𑀥𑀸𑀧𑀺 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁 𑀯𑀺𑀧𑀲𑁆𑀲𑀦𑀸𑀢𑀺 𑀕𑀳𑁂𑀢𑁆𑀯𑀸 ‘‘𑀯𑀺𑀧𑀲𑁆𑀲𑀦𑀸𑀧𑀝𑀺𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸’’𑀢𑀺 𑀯𑀼𑀢𑁆𑀢𑀁.

𑀤𑀼𑀢𑀺𑀬𑀜𑀸𑀡𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.