𑁪. 𑀓𑀴𑀸𑀭𑀔𑀢𑁆𑀢𑀺𑀬𑀯𑀕𑁆𑀕𑁄

𑁧. 𑀪𑀽𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀅𑀚𑀺𑀢𑀫𑀸𑀡𑀯𑁂𑀦𑀸𑀢𑀺 𑀲𑁄𑀴𑀲𑀲𑀼 𑀩𑀸𑀯𑀭𑀺𑀬𑀩𑁆𑀭𑀸𑀳𑁆𑀫𑀡𑀧𑀭𑀺𑀘𑀸𑀭𑀓𑁂𑀲𑀼 ‘‘𑀅𑀚𑀺𑀢𑁄’’𑀢𑀺 𑀮𑀤𑁆𑀥𑀦𑀸𑀫𑁂𑀦 𑀫𑀸𑀡𑀯𑁂𑀦. 𑀲𑀗𑁆𑀔𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀲𑀗𑁆𑀔𑀸𑀢𑀸 𑀧𑀭𑀺𑀜𑁆𑀜𑀸𑀢𑀸 𑀥𑀫𑁆𑀫𑀸 𑀬𑁂𑀲𑀁 𑀢𑁂 𑀲𑀗𑁆𑀔𑀸𑀢𑀥𑀫𑁆𑀫𑀸, 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑀸 𑀔𑀻𑀡𑀸𑀲𑀯𑀸. 𑀲𑁂𑀓𑁆𑀔𑀸 𑀧𑀦 𑀯𑀺𑀧𑀸𑀓𑀲𑁆𑀲 𑀅𑀧𑀭𑀺𑀜𑁆𑀜𑀸𑀢𑀢𑁆𑀢𑀸 ‘‘𑀲𑀗𑁆𑀔𑀸𑀢𑀥𑀫𑁆𑀫𑀸’’𑀢𑀺 𑀦 𑀯𑀼𑀘𑁆𑀘𑀦𑁆𑀢𑀺. 𑀲𑁂𑀓𑁆𑀔𑀥𑀫𑁆𑀫𑀲𑀫𑀦𑁆𑀦𑀸𑀕𑀫𑁂𑀦 𑀢𑁂 𑀲𑁂𑀓𑁆𑀔𑀸. 𑀢𑁂 𑀧𑀦 𑀓𑀸𑀫𑀁 𑀧𑀼𑀕𑁆𑀕𑀮𑀧𑀝𑀺𑀮𑀸𑀪𑀯𑀲𑁂𑀦 𑀅𑀦𑁂𑀓𑀲𑀳𑀲𑁆𑀲𑀸𑀯 𑀳𑁄𑀦𑁆𑀢𑀺, 𑀘𑀢𑀼𑀫𑀕𑁆𑀕𑀳𑁂𑀝𑁆𑀞𑀺𑀫𑀨𑀮𑀢𑁆𑀢𑀬𑀲𑁆𑀲 𑀧𑀦 𑀯𑀲𑁂𑀦 𑀢𑀁𑀲𑀫𑀗𑁆𑀕𑀺𑀢𑀸𑀲𑀸𑀫𑀜𑁆𑀜𑁂𑀦 𑀦 𑀲𑀢𑁆𑀢𑀚𑀦𑀢𑁄 𑀉𑀤𑁆𑀥𑀦𑁆𑀢𑀺 𑀆𑀳 ‘‘𑀲𑀢𑁆𑀢 𑀚𑀦𑁂’’𑀢𑀺 𑀦𑀺𑀬𑀫𑁂𑀢𑁆𑀯𑀸 𑀯𑀺𑀲𑁂𑀲𑁂𑀢𑀺. 𑀲𑀁𑀓𑀺𑀮𑁂𑀲𑀯𑀚𑁆𑀚𑀁, 𑀢𑀢𑁄 𑀯𑀸 𑀅𑀢𑁆𑀢𑀸𑀦𑀁 𑀯𑀺𑀬 𑀯𑀺𑀦𑁂𑀬𑁆𑀬𑀮𑁄𑀓𑀁 𑀦𑀺𑀧𑀸𑀢𑀺 𑀭𑀓𑁆𑀔𑀢𑀻𑀢𑀺 𑀦𑀺𑀧𑀓𑁄, 𑀢𑀲𑁆𑀲 𑀪𑀸𑀯𑁄 𑀦𑁂𑀧𑀓𑁆𑀓𑀁, 𑀜𑀸𑀡𑀦𑁆𑀢𑀺 𑀆𑀳 ‘‘𑀦𑁂𑀧𑀓𑁆𑀓𑀁 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀢𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀦𑀺𑀧𑀓𑁄’’𑀢𑀺.

‘‘𑀓𑁄 𑀦𑀼 𑀔𑁄 𑀇𑀫𑀲𑁆𑀲 𑀧𑀜𑁆𑀳𑀲𑁆𑀲 𑀅𑀢𑁆𑀣𑁄’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀧𑀜𑁆𑀳𑀸𑀬 𑀓𑀗𑁆𑀔𑀢𑀺 𑀦𑀸𑀫. ‘‘𑀓𑀣𑀁 𑀩𑁆𑀬𑀸𑀓𑀭𑀫𑀸𑀦𑁄 𑀦𑀼 𑀔𑁄 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀁 𑀦 𑀯𑀺𑀭𑁄𑀥𑁂𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀅𑀚𑁆𑀛𑀸𑀲𑀬𑀁 𑀓𑀗𑁆𑀔𑀢𑀺 𑀦𑀸𑀫. 𑀲𑀼𑀚𑀸𑀦𑀦𑀻𑀬𑀢𑁆𑀣𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀘𑀺𑀦𑁆𑀢𑀦𑀸 𑀳𑁂𑀢𑁆𑀣 ‘‘𑀓𑀗𑁆𑀔𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀦 𑀯𑀺𑀘𑀺𑀓𑀺𑀘𑁆𑀙𑀸𑀢𑀺. 𑀧𑀳𑀻𑀦𑀯𑀺𑀘𑀺𑀓𑀺𑀘𑁆𑀙𑁄 𑀳𑀺 𑀫𑀳𑀸𑀣𑁂𑀭𑁄 𑀆𑀬𑀲𑁆𑀫𑀢𑁄 𑀅𑀲𑁆𑀲𑀚𑀺𑀫𑀳𑀸𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂𑀬𑁂𑀯, 𑀯𑀺𑀘𑀺𑀦𑀦𑀪𑀽𑀢𑀁 𑀓𑀼𑀓𑁆𑀓𑀼𑀘𑁆𑀘𑀲𑀤𑀺𑀲𑀁 𑀧𑀦𑁂𑀢𑀁 𑀯𑀻𑀫𑀁𑀲𑀦𑀫𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀢𑁆𑀢𑀁 𑀆𑀤𑀸𑀬 𑀘𑀭𑀦𑁆𑀢𑁄𑀢𑀺 𑀧𑀩𑁆𑀩𑀚𑀺𑀢𑀪𑀸𑀯𑀮𑀓𑁆𑀔𑀡𑀁. 𑀥𑀫𑁆𑀫𑀲𑁂𑀦𑀸𑀧𑀢𑀺𑀪𑀸𑀯𑁂𑀦 𑀯𑀸 𑀫𑀫 𑀧𑀢𑁆𑀢𑀥𑀫𑁆𑀫𑀤𑁂𑀲𑀦𑀸𑀯𑀸𑀭𑀁 𑀆𑀤𑀸𑀬 𑀘𑀭𑀦𑁆𑀢𑁄𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀚𑀸𑀢𑀦𑁆𑀢𑀺 𑀬𑀣𑀸𑀭𑀳𑀁 𑀧𑀘𑁆𑀘𑀬𑀢𑁄 𑀉𑀧𑁆𑀧𑀦𑁆𑀦𑀁, 𑀲𑀗𑁆𑀔𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀜𑁆𑀳𑀩𑁆𑀬𑀸𑀓𑀭𑀡𑀁 𑀉𑀧𑀝𑁆𑀞𑀸𑀲𑀻𑀢𑀺 𑀧𑀜𑁆𑀳𑀲𑁆𑀲 𑀩𑁆𑀬𑀸𑀓𑀭𑀡𑀢𑀸 𑀧𑀝𑀺𑀪𑀸𑀲𑀺. ‘‘𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀻’’𑀢𑀺 𑀧𑀸𑀞𑁄, 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄’’𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀧𑀲𑁆𑀲𑀦𑁆𑀢𑀲𑁆𑀲𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀢𑀁 ‘‘𑀪𑀽𑀢𑀦𑁆𑀢𑀺…𑀧𑁂… 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀺, 𑀢𑀲𑁆𑀫𑀸 𑀬𑀣𑀸𑀤𑀲𑁆𑀲𑀺𑀢𑀧𑀸𑀞𑁄 𑀏𑀯 𑀬𑀼𑀢𑁆𑀢𑁄. 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀦𑀺𑀩𑁆𑀩𑀺𑀤𑀸𑀤𑀻𑀦𑀁 𑀅𑀢𑁆𑀣𑀸𑀬𑀸𑀢𑀺 𑀲𑀫𑀺𑀢𑀸𑀧𑁂𑀓𑁆𑀔𑀥𑀫𑁆𑀫𑀯𑀲𑀸 𑀧𑀤𑀁 𑀯𑀤𑀦𑁆𑀢𑀺. 𑀆𑀳𑀸𑀭𑀲𑀫𑁆𑀪𑀯𑀦𑁆𑀢𑀺 𑀧𑀘𑁆𑀘𑀬𑀳𑁂𑀢𑀼𑀓𑀁. 𑀲𑁂𑀓𑁆𑀔𑀧𑀝𑀺𑀧𑀤𑀸 𑀓𑀣𑀺𑀢𑀸 ‘‘𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺 𑀯𑀘𑀦𑀢𑁄. 𑀏𑀲 𑀦𑀬𑁄 𑀦𑀺𑀭𑁄𑀥𑀯𑀸𑀭𑁂𑀧𑀺. 𑀦𑀺𑀩𑁆𑀩𑀺𑀤𑀸𑀢𑀺 𑀓𑀭𑀡𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸𑀢𑀺 𑀓𑀭𑀡𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀩𑁆𑀩𑀸𑀦𑀺 𑀓𑀸𑀭𑀡𑀯𑀘𑀦𑀸𑀦𑀻’’𑀢𑀺. 𑀅𑀦𑀼𑀧𑀸𑀤𑀸𑀢𑀺 𑀅𑀦𑀼𑀧𑀸𑀤𑀸𑀬. 𑀪𑀽𑀢𑀫𑀺𑀤𑀦𑁆𑀢𑀺𑀆𑀤𑀺𑀫𑀸𑀳 𑀲𑀩𑁆𑀩𑀲𑀼𑀢𑁆𑀢𑀁 𑀆𑀳𑀘𑁆𑀘𑀪𑀸𑀲𑀺𑀢𑀁 𑀚𑀺𑀦𑀯𑀘𑀦𑀫𑁂𑀯 𑀓𑀭𑁄𑀦𑁆𑀢𑁄.

𑀪𑀽𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀓𑀴𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨. 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁 𑀚𑀸𑀢𑀺𑀲𑀫𑀼𑀤𑀸𑀕𑀢𑀁. 𑀦𑀺𑀯𑀢𑁆𑀢𑁄𑀢𑀺 𑀧𑀼𑀩𑁆𑀩𑁂 𑀯𑀝𑁆𑀝𑀲𑁄𑀢𑀲𑁆𑀲 𑀧𑀝𑀺𑀲𑁄𑀢𑀁 𑀕𑀦𑁆𑀢𑀼𑀁 𑀆𑀭𑀤𑁆𑀥𑁄, 𑀢𑀁 𑀅𑀯𑀺𑀲𑀳𑀦𑁆𑀢𑁄 𑀅𑀦𑀼𑀲𑁄𑀢𑀫𑁂𑀯 𑀕𑀘𑁆𑀙𑀦𑁆𑀢𑁄, 𑀢𑀢𑁄 𑀦𑀺𑀯𑀢𑁆𑀢𑁄 𑀧𑀭𑀺𑀓𑁆𑀮𑁂𑀲𑀯𑀺𑀥𑀫𑁂 𑀅𑀲𑀁𑀲𑀝𑁆𑀞𑁄 𑀯𑀺𑀬𑀼𑀢𑁆𑀢𑁄 𑀳𑁄𑀢𑀺. 𑀏𑀢𑁆𑀣 𑀘𑁂𑀢𑀦𑀸𑀢𑀺 𑀯𑀸 𑀅𑀲𑁆𑀲𑀸𑀲𑁄. 𑀳𑀻𑀦𑀸𑀬𑀸𑀯𑀢𑁆𑀢𑀦𑀁 𑀦𑀸𑀫 𑀓𑀸𑀫𑁂𑀲𑀼 𑀲𑀸𑀧𑁂𑀓𑁆𑀔𑀢𑀸𑀬, 𑀢𑀢𑁆𑀣 𑀘 𑀦𑀺𑀭𑀧𑁂𑀓𑁆𑀔𑀢𑀸 𑀢𑀢𑀺𑀬𑀫𑀕𑁆𑀕𑀸𑀥𑀺𑀕𑀫𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀬𑁄 𑀫𑀕𑁆𑀕𑁂’’𑀢𑀺𑀆𑀤𑀺𑀫𑀸𑀳. 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁 𑀣𑁂𑀭𑀲𑁆𑀲 𑀅𑀭𑀳𑀢𑁆𑀢𑀸𑀥𑀺𑀕𑀫𑁂𑀦 𑀦𑀺𑀧𑁆𑀨𑀦𑁆𑀦𑀁, 𑀢𑀲𑁆𑀫𑀸 𑀢𑀲𑁆𑀲 𑀢𑀁 𑀉𑀧𑀭𑀺𑀫𑀓𑁄𑀝𑀺𑀬𑀸 𑀅𑀲𑁆𑀲𑀸𑀲𑁄 𑀯𑀼𑀢𑁆𑀢𑁄. 𑀉𑀕𑁆𑀖𑀸𑀝𑀺𑀢𑀸𑀢𑀺 𑀯𑀺𑀯𑀝𑀸, 𑀯𑀽𑀧𑀲𑀫𑀺𑀢𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀁. 𑀯𑀺𑀘𑀺𑀓𑀺𑀘𑁆𑀙𑀸𑀪𑀸𑀯𑀦𑁆𑀢𑀺 𑀦𑀺𑀩𑁆𑀩𑁂𑀫𑀢𑀺𑀓𑀢𑀁.

𑀦 𑀏𑀯𑀁 𑀩𑁆𑀬𑀸𑀓𑀢𑀸𑀢𑀺 ‘‘𑀔𑀻𑀡𑀸 𑀚𑀸𑀢𑀻’’𑀢𑀺𑀆𑀤𑀺𑀓𑀸 𑀏𑀯𑀁 𑀉𑀢𑁆𑀢𑀸𑀦𑀓𑀁 𑀦 𑀩𑁆𑀬𑀸𑀓𑀢𑀸, 𑀧𑀭𑀺𑀬𑀸𑀬𑁂𑀦 𑀧𑀦 𑀩𑁆𑀬𑀸𑀓𑀢𑀸. 𑀓𑁂𑀦𑀘𑀻𑀢𑀺 𑀓𑁂𑀦𑀘𑀺𑀧𑀺 𑀓𑀸𑀭𑀡𑁂𑀦. 𑀏𑀯𑀁 𑀉𑀢𑁆𑀢𑀸𑀦𑀓𑀁 𑀩𑁆𑀬𑀸𑀓𑀭𑀺𑀲𑁆𑀲𑀢𑀺.

𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀔𑀬𑀸𑀢𑀺 𑀢𑀲𑁆𑀲 𑀓𑀫𑁆𑀫𑀪𑀯𑀲𑀗𑁆𑀔𑀸𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀅𑀯𑀺𑀚𑁆𑀚𑀸𑀬 𑀲𑀳𑀓𑀸𑀭𑀺𑀢𑀸𑀬𑀁 𑀲𑀗𑁆𑀕𑀳𑀺𑀢𑀲𑁆𑀲 𑀔𑀬𑀸 𑀅𑀦𑀼𑀧𑁆𑀧𑀸𑀤𑀸 𑀦𑀺𑀭𑁄𑀥𑀸. 𑀔𑀻𑀡𑀲𑁆𑀫𑀺𑀦𑁆𑀢𑀺 𑀔𑀻𑀡𑁂. 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦 𑀦𑀺𑀭𑀼𑀤𑁆𑀥𑁂 𑀚𑀸𑀢𑀺𑀬𑀸 𑀬𑀣𑀸𑀯𑀼𑀢𑁆𑀢𑁂 𑀧𑀘𑁆𑀘𑀬𑁂. 𑀚𑀸𑀢𑀺𑀲𑀗𑁆𑀔𑀸𑀢𑀁 𑀨𑀮𑀁 𑀔𑀻𑀡𑀁 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑀺𑀢𑀦𑁆𑀢𑀺. 𑀯𑀺𑀤𑀺𑀢𑀁 𑀜𑀸𑀢𑀁. 𑀆𑀚𑀸𑀦𑀸𑀢𑀺 𑀘𑀢𑀼𑀲𑀘𑁆𑀘𑀁 𑀳𑁂𑀝𑁆𑀞𑀺𑀫𑀫𑀕𑁆𑀕𑁂𑀳𑀺 𑀜𑀸𑀢𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀜𑁆𑀜𑀸 𑀅𑀕𑁆𑀕𑀫𑀕𑁆𑀕𑁄. 𑀢𑀤𑀼𑀧𑀘𑀸𑀭𑁂𑀦 𑀅𑀕𑁆𑀕𑀨𑀮𑀁 𑀇𑀥 ‘‘𑀅𑀜𑁆𑀜𑀸’’ 𑀦𑀸𑀫. 𑀧𑀘𑁆𑀘𑀬𑁄𑀢𑀺 𑀪𑀯𑀽𑀧𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄.

𑀫𑁂𑀢𑀺 𑀫𑀬𑀸. 𑀅𑀜𑁆𑀜𑀸𑀲𑀺 𑀆𑀓𑀸𑀭𑀕𑁆𑀕𑀳𑀡𑁂𑀦 𑀘𑀺𑀢𑁆𑀢𑀸𑀘𑀸𑀭𑀁 𑀚𑀸𑀦𑀸𑀢𑀺. 𑀢𑁂𑀦𑀸𑀢𑀺 𑀪𑀕𑀯𑀢𑀸. 𑀩𑁆𑀬𑀸𑀓𑀭𑀡𑀁 𑀅𑀦𑀼𑀫𑁄𑀤𑀺𑀢𑀁 𑀧𑀜𑁆𑀳𑀩𑁆𑀬𑀸𑀓𑀭𑀡𑀲𑁆𑀲 𑀯𑀺𑀲𑀬𑀓𑀢𑀪𑀸𑀯𑀢𑁄.

𑀅𑀬𑀫𑀲𑁆𑀲 𑀯𑀺𑀲𑀬𑁄𑀢𑀺 𑀅𑀬𑀁 𑀯𑁂𑀤𑀦𑀸 𑀅𑀲𑁆𑀲 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀯𑀺𑀲𑀬𑁄 𑀢𑀢𑁆𑀣 𑀯𑀺𑀲𑀬𑀪𑀸𑀯𑁂𑀦 𑀧𑀯𑀢𑁆𑀢𑀢𑁆𑀢𑀸. 𑀓𑀺𑀜𑁆𑀘𑀸𑀧𑀻𑀢𑀺 𑀓𑀺𑀜𑁆𑀘𑀸𑀧𑀺 𑀲𑀼𑀔𑀸 𑀯𑁂𑀤𑀦𑀸 𑀞𑀺𑀢𑀺𑀲𑀼𑀔𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀯𑀺𑀧𑀭𑀺𑀡𑀸𑀫𑀲𑀼𑀔𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀜𑀸𑀡𑀲𑀼𑀔𑀸. 𑀯𑀺𑀧𑀭𑀺𑀡𑀸𑀫𑀓𑁄𑀝𑀺𑀬𑀸𑀢𑀺 𑀅𑀦𑀺𑀘𑁆𑀘𑀪𑀸𑀯𑁂𑀦 𑀲𑀩𑁆𑀩𑀸𑀯 𑀯𑁂𑀤𑀦𑀸 𑀤𑀼𑀓𑁆𑀔𑀸 𑀦𑀸𑀫. 𑀲𑀼𑀔𑀧𑀝𑀺𑀓𑁆𑀔𑁂𑀧𑀢𑁄𑀧𑀺 𑀳𑀺 𑀲𑀼𑀔𑀧𑀻𑀢𑀺𑀬𑀸 𑀨𑀭𑀡𑀢𑀸𑀬 𑀲𑀼𑀔𑀸𑀢𑀺 𑀢𑀺𑀓𑁆𑀔𑀫𑀢𑁆𑀢𑁂𑀦 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸𑀢𑀺 𑀯𑀺𑀧𑀭𑀺𑀡𑀸𑀫𑀢𑁄 𑀅𑀪𑀸𑀯𑀸𑀥𑀺𑀕𑀫𑁂𑀦 𑀲𑀼𑀔𑀦𑀺𑀭𑁄𑀥𑀓𑁆𑀔𑀡𑀫𑀢𑁆𑀢𑁂𑀦. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀅𑀢𑁆𑀣𑀺𑀪𑀸𑀯𑁄 𑀲𑀼𑀔’’𑀦𑁆𑀢𑀺. 𑀲𑀼𑀔𑀓𑀸𑀫𑁄 𑀤𑀼𑀓𑁆𑀔𑀁 𑀢𑀺𑀢𑀺𑀓𑁆𑀔𑀢𑀺. 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀸𑀦𑀜𑁆𑀳𑀺 𑀲𑀼𑀔𑀯𑁂𑀤𑀦𑀼𑀧𑀭𑀫𑁄 𑀤𑀼𑀓𑁆𑀔𑀢𑁄 𑀉𑀧𑀝𑁆𑀞𑀸𑀢𑀺, 𑀢𑀲𑁆𑀫𑀸𑀬𑀫𑀢𑁆𑀣𑁄 𑀯𑀺𑀬𑁄𑀕𑁂𑀦 𑀤𑀻𑀧𑁂𑀢𑀩𑁆𑀩𑁄. ‘‘𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀲𑀼𑀔𑀸’’𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀣𑀸𑀘𑀸𑀳 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 ‘‘𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀦𑀢𑁆𑀣𑀺𑀪𑀸𑀯𑁄 𑀲𑀼𑀔’’𑀦𑁆𑀢𑀺. 𑀤𑀼𑀓𑁆𑀔𑀯𑁂𑀤𑀦𑀼𑀧𑀭𑀫𑁄 𑀳𑀺 𑀯𑀼𑀢𑁆𑀢𑀸𑀦𑀁 𑀲𑀼𑀔𑀢𑁄 𑀉𑀧𑀝𑁆𑀞𑀸𑀢𑀺 𑀏𑀯𑀸𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀲 𑀬𑁄𑀕𑀲𑁆𑀲 𑀯𑀽𑀧𑀲𑀫𑁂𑀦 ‘‘𑀅𑀳𑁄 𑀲𑀼𑀔𑀁 𑀚𑀸𑀢’’𑀦𑁆𑀢𑀺 𑀫𑀚𑁆𑀛𑀢𑁆𑀢𑀯𑁂𑀤𑀦𑀸𑀬 𑀚𑀸𑀦𑀦𑀪𑀸𑀯𑁄 𑀬𑀸𑀣𑀸𑀯𑀢𑁄 𑀅𑀯𑀩𑀼𑀚𑁆𑀛𑀦𑀁 𑀲𑀼𑀔𑀁. 𑀅𑀤𑀼𑀓𑁆𑀔𑀫𑀲𑀼𑀔𑀸𑀧𑀺 𑀯𑁂𑀤𑀦𑀸 𑀯𑀺𑀚𑀸𑀦𑀦𑁆𑀢𑀲𑁆𑀲 𑀲𑀼𑀔𑀁 𑀳𑁄𑀢𑀺 𑀢𑀲𑁆𑀲 𑀲𑀼𑀔𑀼𑀫𑀢𑀸𑀬 𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑀢𑁄. 𑀬𑀣𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀲𑀮𑀓𑁆𑀔𑀡𑀢𑁄 𑀲𑀸𑀫𑀜𑁆𑀜𑀮𑀓𑁆𑀔𑀡𑀢𑁄 𑀘 𑀲𑀫𑁆𑀫𑀤𑁂𑀯 𑀅𑀯𑀩𑁄𑀥𑁄 𑀧𑀭𑀫𑀁 𑀲𑀼𑀔𑀁. 𑀢𑁂𑀦𑀸𑀳 𑁋

‘‘𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢’’𑀦𑁆𑀢𑀺. (𑀥. 𑀧. 𑁩𑁭𑁪);

𑀅𑀜𑁆𑀜𑀸𑀡𑀤𑀼𑀓𑁆𑀔𑀸𑀢𑀺 𑀅𑀚𑀸𑀦𑀦𑀪𑀸𑀯𑁄 𑀅𑀤𑀼𑀓𑁆𑀔𑀫𑀲𑀼𑀔𑀸𑀯𑁂𑀤𑀦𑀸𑀬 𑀤𑀼𑀓𑁆𑀔𑀁. 𑀲𑀫𑁆𑀫𑀸 𑀯𑀺𑀪𑀸𑀕𑀚𑀸𑀦𑀦𑀲𑀪𑀸𑀯𑁄 𑀜𑀸𑀡𑀲𑁆𑀲 𑀲𑀫𑁆𑀪𑀯𑁄. 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀳𑀺 𑀜𑀸𑀡𑀽𑀧𑀦𑀺𑀲𑁆𑀲𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀧𑀲𑀢𑁆𑀣𑀸𑀓𑀸𑀭𑀸, 𑀬𑀢𑁄 𑀲𑀸 𑀇𑀝𑁆𑀞𑀸 𑀘𑁂𑀯 𑀇𑀝𑁆𑀞𑀨𑀮𑀸 𑀘𑀸𑀢𑀺. 𑀅𑀚𑀸𑀦𑀦𑀪𑀸𑀯𑁄𑀢𑀺 𑀏𑀢𑁆𑀣 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀤𑀼𑀓𑁆𑀔𑀦𑁆𑀢𑀺 𑀯𑀺𑀤𑀺𑀢𑁄’’𑀢𑀺 𑀧𑀸𑀴𑀺, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀺𑀤𑀺𑀢𑀦𑁆𑀢𑀺 𑀧𑀤𑀼𑀤𑁆𑀥𑀸𑀭𑁄 𑀓𑀢𑁄, 𑀢𑀁 𑀅𑀢𑁆𑀣𑀤𑀲𑁆𑀲𑀦𑀫𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀯𑁂𑀤𑀦𑀸𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑁂𑀢𑀺 ‘‘𑀢𑀺𑀲𑁆𑀲𑁄 𑀇𑀫𑀸 𑀯𑁂𑀤𑀦𑀸’’𑀢𑀺 𑀏𑀯𑀁 𑀧𑀭𑀺𑀘𑁆𑀙𑁂𑀤𑀢𑁄 𑀚𑀸𑀦𑀦𑁂. 𑀅𑀜𑁆𑀜𑀸𑀲𑀻𑀢𑀺 𑀓𑀤𑀸 𑀅𑀜𑁆𑀜𑀸𑀲𑀺? 𑀇𑀫𑀲𑁆𑀫𑀺𑀁 𑀤𑁂𑀲𑀦𑀸𑀓𑀸𑀮𑁂𑀢𑀺 𑀯𑀤𑀦𑁆𑀢𑀺, 𑀧𑀝𑀺𑀯𑁂𑀥𑀓𑀸𑀮𑁂𑀢𑀺 𑀧𑀦 𑀬𑀼𑀢𑁆𑀢𑀁. 𑀬𑀣𑀸𑀧𑀝𑀺𑀯𑀺𑀤𑁆𑀥𑀸 𑀳𑀺 𑀯𑁂𑀤𑀦𑀸 𑀇𑀥 𑀣𑁂𑀭𑁂𑀦 𑀤𑁂𑀲𑀺𑀢𑀸𑀢𑀺. 𑀇𑀫𑀺𑀦𑀸 𑀓𑀸𑀭𑀡𑁂𑀦𑀸𑀢𑀺 ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀯𑁂𑀤𑀦𑀸𑀦𑀁 𑀅𑀦𑀺𑀘𑁆𑀘𑀢𑀸𑀬 𑀤𑀼𑀓𑁆𑀔𑀪𑀸𑀯𑀚𑀸𑀦𑀦𑀲𑀗𑁆𑀔𑀸𑀢𑁂𑀦 𑀓𑀸𑀭𑀡𑁂𑀦. 𑀢𑀁𑀦𑀺𑀫𑀺𑀢𑁆𑀢𑀁 𑀳𑀺𑀲𑁆𑀲 𑀯𑁂𑀤𑀦𑀸𑀲𑀼 𑀢𑀡𑁆𑀳𑀸 𑀦 𑀉𑀧𑁆𑀧𑀚𑁆𑀚𑀢𑀺. 𑀅𑀢𑀺𑀧𑁆𑀧𑀧𑀜𑁆𑀘𑁄𑀢𑀺 𑀅𑀢𑀺𑀯𑀺𑀢𑁆𑀣𑀸𑀭𑁄. 𑀤𑀼𑀓𑁆𑀔𑀲𑁆𑀫𑀺𑀁 𑀅𑀦𑁆𑀢𑁄𑀕𑀥𑀁 𑀤𑀼𑀓𑁆𑀔𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸. 𑀤𑀼𑀓𑁆𑀔𑀦𑁆𑀢𑀺 𑀲𑀩𑁆𑀩𑀁 𑀯𑁂𑀤𑀬𑀺𑀢𑀁 𑀤𑀼𑀓𑁆𑀔𑀁 𑀲𑀗𑁆𑀔𑀸𑀭𑀤𑀼𑀓𑁆𑀔𑀪𑀸𑀯𑀢𑁄. 𑀜𑀸𑀢𑀫𑀢𑁆𑀢𑁂𑀢𑀺 𑀬𑀸𑀣𑀸𑀯𑀢𑁄 𑀅𑀯𑀩𑀼𑀚𑁆𑀛𑀦𑀫𑀢𑁆𑀢𑁂. 𑀢𑀡𑁆𑀳𑀸 𑀦 𑀢𑀺𑀝𑁆𑀞𑀢𑀻𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺 𑀦𑀧𑁆𑀧𑀯𑀢𑁆𑀢𑀢𑀺.

𑀓𑀣𑀁 𑀯𑀺𑀫𑁄𑀓𑁆𑀔𑀸𑀢𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀪𑁂𑀤𑁂𑀲𑀼 𑀯𑀺𑀫𑀼𑀢𑁆𑀢𑀸. 𑀳𑁂𑀢𑀼𑀫𑁆𑀳𑀺 𑀘𑁂𑀢𑀁 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀳𑁂𑀢𑀼𑀅𑀢𑁆𑀣𑁂𑀦 𑀓𑀭𑀡𑀯𑀘𑀦𑁂𑀦 𑀅𑀢𑁆𑀣𑀫𑀸𑀳 ‘‘𑀓𑀢𑀭𑁂𑀦 𑀯𑀺𑀫𑁄𑀓𑁆𑀔𑁂𑀦𑀸’’𑀢𑀺. 𑀓𑀭𑀡𑀢𑁆𑀣𑁂𑀧𑀺 𑀯𑀸 𑀏𑀢𑀁 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀢𑀣𑀸 𑀯𑀼𑀢𑁆𑀢𑀁. 𑀅𑀪𑀺𑀦𑀺𑀯𑁂𑀲𑁄𑀢𑀺 𑀯𑀺𑀧𑀲𑁆𑀲𑀦𑀸𑀭𑀫𑁆𑀪𑁄. 𑀩𑀳𑀺𑀤𑁆𑀥𑀸𑀥𑀫𑁆𑀫𑀸𑀧𑀺 𑀤𑀝𑁆𑀞𑀩𑁆𑀩𑀸𑀬𑁂𑀯 𑀲𑀩𑁆𑀩𑀲𑁆𑀲𑀧𑀺 𑀧𑀭𑀺𑀜𑁆𑀜𑁂𑀬𑁆𑀬𑀲𑁆𑀲 𑀧𑀭𑀺𑀚𑀸𑀦𑀺𑀢𑀩𑁆𑀩𑀢𑁄. 𑀜𑀸𑀡𑀁 𑀧𑀯𑀢𑁆𑀢𑁂𑀢𑁆𑀯𑀸. 𑀢𑁂𑀢𑀺 𑀅𑀚𑁆𑀛𑀢𑁆𑀢𑀲𑀗𑁆𑀔𑀸𑀭𑁂. 𑀯𑀯𑀢𑁆𑀣𑀧𑁂𑀢𑁆𑀯𑀸𑀢𑀺 𑀲𑀮𑀓𑁆𑀔𑀡𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀩𑀳𑀺𑀤𑁆𑀥𑀸 𑀑𑀢𑀸𑀭𑁂𑀢𑀻𑀢𑀺 𑀩𑀳𑀺𑀤𑁆𑀥𑀸𑀲𑀗𑁆𑀔𑀸𑀭𑁂𑀲𑀼 𑀜𑀸𑀡𑀁 𑀑𑀢𑀸𑀭𑁂𑀢𑀺. 𑀅𑀚𑁆𑀛𑀢𑁆𑀢𑀁 𑀑𑀢𑀸𑀭𑁂𑀢𑀻𑀢𑀺 𑀅𑀚𑁆𑀛𑀢𑁆𑀢𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀢𑀺. 𑀢𑀢𑁆𑀭 𑀢𑀲𑁆𑀫𑀺𑀁 𑀘𑀢𑀼𑀓𑁆𑀓𑁂. 𑀢𑁂𑀲𑀁 𑀯𑀯𑀢𑁆𑀣𑀸𑀦𑀓𑀸𑀮𑁂𑀢𑀺 𑀢𑁂𑀲𑀁 𑀅𑀚𑁆𑀛𑀢𑁆𑀢𑀲𑀗𑁆𑀔𑀸𑀭𑀸𑀦𑀁 𑀯𑀺𑀧𑀲𑁆𑀲𑀦𑀸𑀓𑀸𑀮𑁂.

𑀲𑀩𑁆𑀩𑀼𑀧𑀸𑀤𑀸𑀦𑀓𑁆𑀔𑀬𑀸𑀢𑀺 𑀲𑀩𑁆𑀩𑀲𑁄 𑀉𑀧𑀸𑀤𑀸𑀦𑀸𑀦𑀁 𑀔𑀬𑀸. 𑀓𑀸𑀫𑀁 𑀤𑀺𑀝𑁆𑀞𑀺𑀲𑀻𑀮𑀩𑁆𑀩𑀢𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀸𑀦𑀺 𑀧𑀞𑀫𑀫𑀕𑁆𑀕𑁂𑀦𑁂𑀯 𑀔𑀻𑀬𑀦𑁆𑀢𑀺, 𑀓𑀸𑀫𑀼𑀧𑀸𑀤𑀸𑀦𑀁 𑀧𑀦 𑀅𑀕𑁆𑀕𑀫𑀕𑁆𑀕𑁂𑀦𑀸𑀢𑀺 𑀢𑀲𑁆𑀲 𑀯𑀲𑁂𑀦 ‘‘𑀲𑀩𑁆𑀩𑀼𑀧𑀸𑀤𑀸𑀦𑀓𑁆𑀔𑀬𑀸’’𑀢𑀺 𑀯𑀤𑀦𑁆𑀢𑁄 𑀣𑁂𑀭𑁄 𑀅𑀢𑁆𑀢𑀦𑁄 𑀅𑀭𑀳𑀢𑁆𑀢𑀧𑀢𑁆𑀢𑀺𑀁 𑀩𑁆𑀬𑀸𑀓𑀭𑁄𑀢𑀺. 𑀢𑁂𑀦𑀸𑀳 ‘‘𑀆𑀲𑀯𑀸 𑀦𑀸𑀦𑀼𑀲𑁆𑀲𑀯𑀦𑁆𑀢𑀻’’𑀢𑀺. 𑀲𑀢𑁄𑀢𑀺 𑀇𑀫𑀺𑀦𑀸 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀘𑀓𑁆𑀔𑀼𑀢𑁄 𑀭𑀽𑀧𑁂 𑀲𑀯𑀦𑁆𑀢𑀻𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀁 𑀢𑀤𑀦𑀼𑀕𑀢𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀜𑁆𑀘 𑀭𑀽𑀧𑀸𑀭𑀫𑁆𑀫𑀡𑀸 𑀆𑀲𑀯𑀸 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀓𑀺𑀜𑁆𑀘𑀸𑀧𑀺 𑀢𑀢𑁆𑀣 𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀧𑀯𑀢𑁆𑀢𑀺 𑀅𑀢𑁆𑀣𑀺, 𑀓𑀸𑀫𑀸𑀲𑀯𑀸𑀤𑀬𑁄 𑀏𑀯 𑀯𑀡𑀢𑁄 𑀬𑀽𑀲𑀁 𑀯𑀺𑀬 𑀧𑀕𑁆𑀖𑀭𑀡𑀓𑀅𑀲𑀼𑀘𑀺𑀪𑀸𑀯𑁂𑀦 𑀲𑀦𑁆𑀤𑀦𑁆𑀢𑀺, 𑀢𑀣𑀸 𑀲𑁂𑀲𑀯𑀸𑀭𑁂𑀲𑀼. 𑀢𑁂𑀦𑀸𑀳 ‘‘𑀏𑀯’’𑀦𑁆𑀢𑀺𑀆𑀤𑀺, 𑀢𑀲𑁆𑀫𑀸 𑀢𑁂 𑀏𑀯 ‘‘𑀆𑀲𑀯𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 𑀳𑀺 𑀧𑀕𑁆𑀖𑀭𑀡𑀓𑀅𑀲𑀼𑀘𑀺𑀫𑁆𑀳𑀺 𑀦𑀺𑀭𑀼𑀴𑁆𑀳𑁄 𑀆𑀲𑀯𑀲𑀤𑁆𑀤𑁄. ‘‘𑀅𑀢𑁆𑀢𑀸𑀦𑀁 𑀦𑀸𑀯𑀚𑀸𑀦𑀸𑀫𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀑𑀫𑀸𑀦𑀧𑀳𑀸𑀦𑀁 𑀓𑀣𑀺𑀢’’𑀦𑁆𑀢𑀺 𑀆𑀳. 𑀢𑁂𑀦 𑀆𑀲𑀯𑁂𑀲𑀼 𑀲𑀫𑀼𑀤𑀸𑀬𑀼𑀧𑀮𑀓𑁆𑀔𑀡𑀁 𑀓𑀣𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀲𑁂𑀬𑁆𑀬𑀫𑀸𑀦𑀸𑀤𑀺𑀧𑁆𑀧𑀳𑀸𑀦𑁂𑀦 𑀯𑀺𑀦𑀸 𑀳𑀻𑀦𑀫𑀸𑀦𑀁𑀬𑁂𑀯 𑀧𑀚𑀳𑀢𑀺. 𑀧𑀚𑀸𑀦𑀦𑀸𑀢𑀺 ‘‘𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀧𑀚𑀸𑀦𑀦𑀲𑀫𑁆𑀧𑀦𑁆𑀦𑁄 𑀳𑁄𑀢𑀻𑀢𑀺.

𑀲𑀭𑀽𑀧𑀪𑁂𑀤𑀢𑁄𑀧𑀻𑀢𑀺 ‘‘𑀘𑀢𑁆𑀢𑀸𑀭𑁄’’𑀢𑀺 𑀏𑀯𑀁 𑀧𑀭𑀺𑀫𑀸𑀡𑀧𑀭𑀺𑀘𑁆𑀙𑁂𑀤𑀢𑁄𑀧𑀺. 𑀇𑀤𑀁 𑀪𑀕𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀦𑁆𑀢𑀺 𑀘 ‘‘𑀅𑀬𑀫𑁆𑀧𑀺 𑀔𑁄’’𑀢𑀺𑀆𑀤𑀺𑀯𑀘𑀦𑀁 𑀲𑀦𑁆𑀥𑀸𑀬𑀸𑀳.

𑀅𑀲𑀫𑁆𑀪𑀺𑀦𑁆𑀦𑀸𑀬 𑀏𑀯𑀸𑀢𑀺 𑀬𑀣𑀸𑀦𑀺𑀲𑀺𑀦𑁆𑀦𑀸𑀬 𑀏𑀯, 𑀅𑀯𑀼𑀝𑁆𑀞𑀺𑀢𑀸𑀬 𑀏𑀯𑀸𑀢𑀺 𑀅𑀢𑁆𑀣𑁄. 𑀧𑀼𑀕𑁆𑀕𑀮𑀣𑁄𑀫𑀦𑀢𑁆𑀣𑀦𑁆𑀢𑀺 𑀤𑁂𑀲𑀦𑀸𑀓𑀼𑀲𑀮𑀸𑀦𑀁 𑀆𑀦𑀦𑁆𑀤𑀢𑁆𑀣𑁂𑀭𑀸𑀤𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀧𑀲𑀁𑀲𑀦𑀢𑁆𑀣𑀁 𑀉𑀓𑁆𑀓𑀁𑀲𑀦𑀢𑁆𑀣𑀁. 𑀥𑀫𑁆𑀫𑀣𑁄𑀫𑀦𑀢𑁆𑀣𑀦𑁆𑀢𑀺 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀲𑁆𑀲 𑀧𑀲𑀁𑀲𑀦𑀢𑁆𑀣𑀁. 𑀢𑁂𑀧𑀻𑀢𑀺 𑀆𑀦𑀦𑁆𑀤𑀢𑁆𑀣𑁂𑀭𑀸𑀤𑀬𑁄 𑀪𑀺𑀓𑁆𑀔𑀽𑀧𑀺. 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸 𑀪𑀺𑀓𑁆𑀔𑀽. 𑀅𑀢𑁆𑀣𑁂𑀢𑀺 𑀲𑀻𑀮𑀸𑀤𑀺𑀅𑀢𑁆𑀣𑁂. 𑀥𑀫𑁆𑀫𑁂𑀢𑀺 𑀧𑀸𑀴𑀺𑀥𑀫𑁆𑀫𑁂.

𑀅𑀲𑁆𑀲𑀸𑀢𑀺 𑀪𑀕𑀯𑀢𑁄. 𑀆𑀦𑀼𑀪𑀸𑀯𑀁 𑀓𑀭𑀺𑀲𑁆𑀲𑀢𑀺 ‘‘𑀤𑀺𑀯𑀲𑀜𑁆𑀘𑁂𑀧𑀺 𑀪𑀕𑀯𑀸’’𑀢𑀺𑀆𑀤𑀺𑀦𑀸. 𑀦𑀦𑁆𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁. 𑀅𑀳𑀫𑁆𑀧𑀺 𑀢𑀣𑁂𑀯 𑀣𑁄𑀫𑁂𑀲𑁆𑀲𑀸𑀫𑀺 ‘‘𑀲𑀸 𑀳𑀺 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸. 𑀏𑀯𑀁 𑀘𑀺𑀦𑁆𑀢𑁂𑀲𑀻𑀢𑀺 𑀏𑀯𑀁 𑀯𑀓𑁆𑀔𑀫𑀸𑀦𑁂𑀦 𑀥𑀫𑁆𑀫𑀤𑀸𑀬𑀸𑀤𑀤𑁂𑀲𑀦𑀸𑀬 𑀘𑀺𑀦𑁆𑀢𑀺𑀢𑀸𑀓𑀸𑀭𑁂𑀦 𑀘𑀺𑀦𑁆𑀢𑁂𑀲𑀺. 𑀢𑁂𑀦𑀸𑀳 ‘‘𑀬𑀣𑀸’’𑀢𑀺𑀆𑀤𑀺. 𑀏𑀓𑀚𑁆𑀛𑀸𑀲𑀬𑀸𑀬𑀸𑀢𑀺 𑀲𑀫𑀸𑀦𑀸𑀥𑀺𑀧𑁆𑀧𑀸𑀬𑀸𑀬. 𑀫𑀢𑀺𑀬𑀸𑀢𑀺 𑀧𑀜𑁆𑀜𑀸𑀬. 𑀅𑀬𑀁 𑀤𑁂𑀲𑀦𑀸 𑀅𑀕𑁆𑀕𑀸𑀢𑀺 𑀪𑀕𑀯𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀕𑀼𑀡𑀢𑁄 𑀏𑀯𑀁 𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀧𑀓𑀸𑀲𑁂𑀢𑁆𑀯𑀸𑀢𑀺 𑀕𑀼𑀡𑀢𑁄 𑀧𑀸𑀓𑀝𑀁 𑀧𑀜𑁆𑀜𑀸𑀢𑀁 𑀓𑀢𑁆𑀯𑀸 𑀲𑀩𑁆𑀩𑀲𑀸𑀯𑀓𑁂𑀳𑀺 𑀲𑁂𑀝𑁆𑀞𑀪𑀸𑀯𑁂 𑀞𑀧𑁂𑀢𑀼𑀓𑀸𑀫𑁄. 𑀘𑀺𑀢𑁆𑀢𑀕𑀢𑀺𑀬𑀸 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀲𑁆𑀲 𑀧𑀭𑀺𑀡𑀸𑀫𑀦𑁂𑀦 ‘‘𑀅𑀬𑀁 𑀓𑀸𑀬𑁄 𑀇𑀤𑀁 𑀘𑀺𑀢𑁆𑀢𑀁 𑀯𑀺𑀬 𑀳𑁄𑀢𑀽’’𑀢𑀺 𑀓𑀸𑀬𑀲𑀫𑀸𑀦𑀕𑀢𑀺𑀓𑀢𑁆𑀢𑀸𑀥𑀺𑀝𑁆𑀞𑀸𑀦𑁂𑀦. 𑀓𑀣𑀁 𑀧𑀦 𑀓𑀸𑀬𑁄 𑀤𑀦𑁆𑀥𑀧𑁆𑀧𑀯𑀢𑁆𑀢𑀺𑀓𑁄 𑀮𑀳𑀼𑀧𑀭𑀺𑀯𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀲𑀫𑀸𑀦𑀕𑀢𑀺𑀓𑁄 𑀳𑁄𑀢𑀻𑀢𑀺? 𑀦 𑀲𑀩𑁆𑀩𑀣𑀸 𑀲𑀫𑀸𑀦𑀕𑀢𑀺𑀓𑁄. 𑀬𑀣𑁂𑀯 𑀳𑀺 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀡𑀸𑀫𑀦𑁂 𑀘𑀺𑀢𑁆𑀢𑀁 𑀲𑀩𑁆𑀩𑀣𑀸 𑀓𑀸𑀬𑁂𑀦 𑀲𑀫𑀸𑀦𑀕𑀢𑀺𑀓𑀁 𑀳𑁄𑀢𑀺. 𑀦 𑀳𑀺 𑀢𑀤𑀸 𑀘𑀺𑀢𑁆𑀢𑀁 𑀲𑀪𑀸𑀯𑀲𑀺𑀤𑁆𑀥𑁂𑀦 𑀅𑀢𑁆𑀢𑀦𑁄 𑀔𑀡𑁂𑀦 𑀅𑀯𑀢𑁆𑀢𑀺𑀢𑁆𑀯𑀸 𑀤𑀦𑁆𑀥𑀯𑀼𑀢𑁆𑀢𑀺𑀓𑀲𑁆𑀲 𑀭𑀽𑀧𑀥𑀫𑁆𑀫𑀲𑁆𑀲 𑀔𑀡𑁂𑀦 𑀯𑀢𑁆𑀢𑀺𑀢𑀼𑀁 𑀲𑀓𑁆𑀓𑁄𑀢𑀺, ‘‘𑀇𑀤𑀁 𑀘𑀺𑀢𑁆𑀢𑀁 𑀅𑀬𑀁 𑀓𑀸𑀬𑁄 𑀯𑀺𑀬 𑀳𑁄𑀢𑀽’’𑀢𑀺 𑀧𑀦𑀸𑀥𑀺𑀝𑁆𑀞𑀸𑀦𑁂𑀦 𑀤𑀦𑁆𑀥𑀕𑀢𑀺𑀓𑀲𑁆𑀲 𑀓𑀸𑀬𑀲𑁆𑀲 𑀅𑀦𑀼𑀯𑀢𑁆𑀢𑀦𑀢𑁄 𑀬𑀸𑀯 𑀇𑀘𑁆𑀙𑀺𑀢𑀝𑁆𑀞𑀸𑀦𑀧𑁆𑀧𑀢𑁆𑀢𑀺 𑀳𑁄𑀢𑀺, 𑀢𑀸𑀯 𑀓𑀸𑀬𑀕𑀢𑀺𑀅𑀦𑀼𑀮𑁄𑀫𑁂𑀦𑁂𑀯 𑀳𑀼𑀢𑁆𑀯𑀸 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀘𑀺𑀢𑁆𑀢𑀁 𑀓𑀸𑀬𑀕𑀢𑀺𑀬𑀸 𑀧𑀭𑀺𑀡𑀸𑀫𑀺𑀢𑀁 𑀦𑀸𑀫 𑀳𑁄𑀢𑀺, 𑀏𑀯𑀁 ‘‘𑀅𑀬𑀁 𑀓𑀸𑀬𑁄 𑀇𑀤𑀁 𑀘𑀺𑀢𑁆𑀢𑀁 𑀯𑀺𑀬 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀦𑁂𑀦 𑀧𑀕𑁂𑀯 𑀲𑀼𑀔𑀮𑀳𑀼𑀲𑀜𑁆𑀜𑀸𑀬 𑀲𑀫𑁆𑀧𑀸𑀤𑀺𑀢𑀢𑁆𑀢𑀸 𑀅𑀪𑀸𑀯𑀺𑀢𑀺𑀤𑁆𑀥𑀺𑀧𑀸𑀤𑀸𑀦𑀁 𑀯𑀺𑀬 𑀤𑀦𑁆𑀥𑀁 𑀅𑀯𑀢𑁆𑀢𑀺𑀢𑁆𑀯𑀸 𑀬𑀣𑀸 𑀮𑀳𑀼𑀓𑀢𑀺𑀧𑀬𑀘𑀺𑀢𑁆𑀢𑀯𑀸𑀭𑁂𑀳𑁂𑀯 𑀇𑀘𑁆𑀙𑀺𑀢𑀝𑁆𑀞𑀸𑀦𑀧𑁆𑀧𑀢𑀺 𑀳𑁄𑀢𑀺, 𑀏𑀯𑀁 𑀧𑀯𑀢𑁆𑀢𑀭𑀽𑀧𑀢𑀸 𑀯𑀺𑀜𑁆𑀜𑀸𑀬𑀢𑀻𑀢𑀺.

𑀅𑀥𑀺𑀧𑁆𑀧𑀸𑀬𑀸𑀦𑀼𑀭𑀽𑀧𑀫𑁂𑀯 𑀢𑀲𑁆𑀲 𑀪𑀕𑀯𑀢𑁄 𑀣𑁄𑀫𑀦𑀸𑀬 𑀓𑀢𑀢𑁆𑀢𑀸. 𑀇𑀤𑀁 𑀦𑀸𑀫 𑀅𑀢𑁆𑀣𑀚𑀸𑀢𑀁 𑀪𑀕𑀯𑀸 𑀧𑀼𑀘𑁆𑀙𑀺𑀲𑁆𑀲𑀢𑀻𑀢𑀺 𑀧𑀼𑀩𑁆𑀩𑁂 𑀫𑀬𑀸 𑀅𑀯𑀺𑀤𑀺𑀢𑀁 𑀅𑀧𑀲𑁆𑀲𑀁. 𑀆𑀲𑀬𑀚𑀸𑀦𑀦𑀢𑁆𑀣𑀦𑁆𑀢𑀺 ‘‘𑀏𑀯𑀁 𑀩𑁆𑀬𑀸𑀓𑀭𑁄𑀦𑁆𑀢𑁂𑀦 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑁄 𑀕𑀳𑀺𑀢𑁄 𑀳𑁄𑀢𑀻’’𑀢𑀺 𑀏𑀯𑀁 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀚𑀸𑀦𑀦𑀢𑁆𑀣𑀁. 𑀤𑀼𑀢𑀺𑀬𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀪𑀕𑀯𑀸 𑀧𑀞𑀫𑀁 𑀧𑀜𑁆𑀳𑀁 𑀅𑀦𑀼𑀫𑁄𑀤𑀺 𑀤𑀼𑀢𑀺𑀬𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁂𑀦𑁂𑀯 𑀧𑀞𑀫𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀪𑀸𑀯𑀢𑁄.

𑀏𑀢𑀁 𑀅𑀳𑁄𑀲𑀻𑀢𑀺 𑀏𑀢𑀁 𑀧𑀭𑀺𑀯𑀺𑀢𑀓𑁆𑀓𑀦𑀁 𑀅𑀳𑁄𑀲𑀺. 𑀅𑀲𑁆𑀲𑀸𑀢𑀺 𑀓𑀴𑀸𑀭𑀔𑀢𑁆𑀢𑀺𑀬𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀥𑀫𑁆𑀫𑁂 𑀤𑀳𑀢𑀻𑀢𑀺 𑀥𑀫𑁆𑀫𑀥𑀸𑀢𑀼, 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁, 𑀲𑀸𑀯𑀓𑀯𑀺𑀲𑀬𑁂 𑀥𑀫𑁆𑀫𑁂 𑀤𑀳𑀢𑀺 𑀬𑀸𑀣𑀸𑀯𑀢𑁄 𑀅𑀚𑀺𑀢𑁂 𑀓𑀢𑁆𑀯𑀸 𑀞𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀥𑀫𑁆𑀫𑀥𑀸𑀢𑀽’’𑀢𑀺𑀆𑀤𑀺. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀕𑀢𑀺𑀓𑀫𑁂𑀯 𑀯𑀺𑀲𑀬𑁂. 𑀕𑁄𑀘𑀭𑀥𑀫𑁆𑀫𑁂𑀢𑀺 𑀕𑁄𑀘𑀭𑀪𑀽𑀢𑁂 𑀜𑁂𑀬𑁆𑀬𑀥𑀫𑁆𑀫𑁂.

𑀓𑀴𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀜𑀸𑀡𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁩. 𑀜𑀸𑀡𑀫𑁂𑀯 𑀜𑀸𑀡𑀯𑀢𑁆𑀣𑀼 𑀲𑀫𑁆𑀧𑀢𑁆𑀢𑀻𑀦𑀁 𑀓𑀸𑀭𑀡𑀪𑀸𑀯𑀢𑁄. 𑀘𑀢𑀽𑀲𑀽𑀢𑀺 𑀘𑀢𑀼𑀲𑀘𑁆𑀘𑀲𑁆𑀲 𑀩𑁄𑀥𑀦𑀯𑀲𑁂𑀦 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀜𑀸𑀡𑁂𑀲𑀼. 𑀧𑀞𑀫𑀦𑁆𑀢𑀺 ‘‘𑀚𑀭𑀸𑀫𑀭𑀡𑁂 𑀜𑀸𑀡’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀜𑀸𑀡𑀁, 𑀬𑁂𑀦 𑀥𑀸𑀭𑀡𑀧𑀭𑀺𑀘𑀬𑀫𑀦𑀲𑀺𑀓𑀸𑀭𑀯𑀲𑁂𑀦 𑀧𑀯𑀢𑁆𑀢𑀁 𑀲𑀩𑁆𑀩𑀁 𑀕𑀡𑁆𑀳𑀺. 𑀲𑀦𑁆𑀦𑀺𑀘𑀬𑀜𑀸𑀡𑀫𑀬𑀁 𑀲𑀯𑀦𑀫𑀬𑀁 𑀦𑀸𑀫𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑀪𑀸𑀯𑀢𑁄 𑀧𑀘𑁆𑀘𑀬𑀢𑁄 𑀘𑀲𑁆𑀲 𑀧𑀭𑀺𑀕𑁆𑀕𑀡𑁆𑀳𑀦𑀜𑀸𑀡𑀁 𑀲𑀫𑁆𑀫𑀲𑀦𑀜𑀸𑀡𑀁𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀚𑀭𑀸𑀫𑀭𑀡𑀲𑀻𑀲𑁂𑀦 𑀘𑁂𑀢𑁆𑀣 𑀚𑀭𑀸𑀫𑀭𑀡𑀯𑀦𑁆𑀢𑁄𑀯 𑀥𑀫𑁆𑀫𑀸 𑀕𑀳𑀺𑀢𑀸. 𑀧𑀝𑀺𑀯𑁂𑀥𑀜𑀸𑀡𑀦𑁆𑀢𑀺 𑀅𑀲𑀫𑁆𑀫𑁄𑀳𑀢𑁄 𑀧𑀝𑀺𑀯𑀺𑀚𑁆𑀛𑀦𑀜𑀸𑀡𑀁. 𑀇𑀫𑀺𑀦𑀸 𑀥𑀫𑁆𑀫𑁂𑀦𑀸𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀁. 𑀇𑀫𑀲𑁆𑀲 𑀳𑀺 𑀥𑀫𑁆𑀫𑀲𑁆𑀲 𑀅𑀥𑀺𑀕𑀫𑀳𑁂𑀢𑀼 𑀅𑀬𑀁 𑀅𑀭𑀺𑀬𑁄 𑀅𑀢𑀻𑀢𑀸𑀦𑀸𑀕𑀢𑁂 𑀦𑀬𑁂𑀦𑀧𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺. 𑀫𑀕𑁆𑀕𑀜𑀸𑀡𑀫𑁂𑀯 𑀧𑀦 𑀅𑀢𑀻𑀢𑀸𑀦𑀸𑀕𑀢𑁂 𑀦𑀬𑀦𑀲𑀤𑀺𑀲𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀫𑀕𑁆𑀕𑀜𑀸𑀡𑀥𑀫𑁆𑀫𑁂𑀦 𑀯𑀸’’𑀢𑀺 𑀤𑀼𑀢𑀺𑀬𑀯𑀺𑀓𑀧𑁆𑀧𑁄 𑀯𑀼𑀢𑁆𑀢𑁄. 𑀏𑀯𑀜𑁆𑀳𑀺 ‘‘𑀅𑀓𑀸𑀮𑀺𑀓’’𑀦𑁆𑀢𑀺 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺.

𑀜𑀸𑀡𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑁂𑀦𑀸𑀢𑀺 𑀥𑀫𑁆𑀫𑀘𑀓𑁆𑀔𑀼𑀪𑀽𑀢𑁂𑀦 𑀜𑀸𑀡𑀘𑀓𑁆𑀔𑀼𑀦𑀸 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑀯𑀲𑁂𑀦 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑁂𑀦. 𑀧𑀜𑁆𑀜𑀸𑀬 𑀯𑀺𑀤𑀺𑀢𑁂𑀦𑀸𑀢𑀺 𑀫𑀕𑁆𑀕𑀧𑀜𑁆𑀜𑀸𑀬 𑀢𑀣𑁂𑀯 𑀯𑀺𑀤𑀺𑀢𑁂𑀦. 𑀬𑀲𑁆𑀫𑀸 𑀢𑀣𑀸 𑀤𑀺𑀝𑁆𑀞𑀁 𑀯𑀺𑀤𑀺𑀢𑀁 𑀲𑀩𑁆𑀩𑀲𑁄 𑀧𑀢𑁆𑀢𑀁 𑀫𑀳𑀸𑀉𑀧𑀸𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀭𑀺𑀬𑁄𑀕𑀸𑀴𑁆𑀳𑁂𑀦𑀸’’𑀢𑀺. 𑀤𑀺𑀝𑁆𑀞𑁂𑀦𑀸𑀢𑀺 𑀯𑀸 𑀤𑀲𑁆𑀲𑀦𑁂𑀦, 𑀥𑀫𑁆𑀫𑀁 𑀧𑀲𑁆𑀲𑀺𑀢𑁆𑀯𑀸 𑀞𑀺𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀯𑀺𑀤𑀺𑀢𑁂𑀦𑀸𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀯𑀺𑀤𑀺𑀢𑁆𑀯𑀸 𑀧𑀸𑀓𑀝𑀸𑀦𑀺 𑀓𑀢𑁆𑀯𑀸 𑀞𑀺𑀢𑁂𑀦. 𑀅𑀓𑀸𑀮𑀺𑀓𑁂𑀦𑀸𑀢𑀺 𑀦 𑀓𑀸𑀮𑀦𑁆𑀢𑀭𑀯𑀺𑀧𑀸𑀓𑀤𑀸𑀬𑀺𑀦𑀸. 𑀧𑀢𑁆𑀢𑁂𑀦𑀸𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀢𑁆𑀯𑀸 𑀞𑀺𑀢𑀢𑁆𑀢𑀸 𑀥𑀫𑁆𑀫𑀁 𑀧𑀢𑁆𑀢𑁂𑀦. 𑀧𑀭𑀺𑀬𑁄𑀕𑀸𑀴𑁆𑀳𑁂𑀦𑀸𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀧𑀭𑀺𑀬𑁄𑀕𑀸𑀳𑀺𑀢𑁆𑀯𑀸 𑀞𑀺𑀢𑁂𑀦. 𑀅𑀢𑀻𑀢𑀸𑀦𑀸𑀕𑀢𑁂 𑀦𑀬𑀁 𑀦𑁂𑀢𑀻𑀢𑀺 𑀅𑀢𑀻𑀢𑁂 𑀘 𑀅𑀦𑀸𑀕𑀢𑁂 𑀘 𑀦𑀬𑀁 𑀦𑁂𑀢𑀺 𑀳𑀭𑀢𑀺 𑀧𑁂𑀲𑁂𑀢𑀺. 𑀇𑀤𑀁 𑀧𑀦 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀓𑀺𑀘𑁆𑀘𑀁, 𑀲𑀢𑁆𑀣𑀸𑀭𑀸 𑀧𑀦 𑀫𑀕𑁆𑀕𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑁂 𑀦𑀬𑀦𑀲𑀤𑀺𑀲𑀁 𑀓𑀢𑀁 𑀢𑀁𑀫𑀽𑀮𑀓𑀢𑁆𑀢𑀸. 𑀅𑀢𑀻𑀢𑀫𑀕𑁆𑀕𑀲𑁆𑀲 𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀫𑀕𑁆𑀕𑀜𑀸𑀡𑀁 𑀦𑀬𑀦𑀲𑀤𑀺𑀲𑀁 𑀓𑀢𑀁 𑀦𑀸𑀫 𑀳𑁄𑀢𑀺, 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦 𑀧𑀦 𑀦𑀬𑀁 𑀦𑁂𑀢𑀺. 𑀢𑁂𑀦𑀸𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺. 𑀬𑀣𑀸 𑀧𑀦 𑀢𑁂𑀦 𑀦𑀬𑀁 𑀦𑁂𑀢𑀺. 𑀢𑀁 𑀆𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀔𑁄 𑀓𑁂𑀘𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀦𑀬𑀦𑀼𑀧𑁆𑀧𑀸𑀤𑀦𑀁 𑀦𑀬𑀜𑀸𑀡𑀲𑁆𑀲𑁂𑀯 𑀧𑀯𑀢𑁆𑀢𑀺𑀯𑀺𑀲𑁂𑀲𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀓𑀺𑀘𑁆𑀘’’𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 ‘‘𑀇𑀫𑀺𑀦𑀸𑀢𑀺 𑀫𑀕𑁆𑀕𑀜𑀸𑀡𑀥𑀫𑁆𑀫𑁂𑀦 𑀯𑀸’’𑀢𑀺 𑀯𑀼𑀢𑁆𑀢𑀁, 𑀤𑀼𑀯𑀺𑀥𑀁 𑀧𑀦 𑀫𑀕𑁆𑀕𑀨𑀮𑀜𑀸𑀡𑀁 𑀲𑀫𑁆𑀫𑀲𑀦𑀜𑀸𑀡𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀫𑀽𑀮𑀓𑀸𑀭𑀡𑀁, 𑀦 𑀦𑀬𑀦𑀲𑁆𑀲𑀸𑀢𑀺 𑀤𑀼𑀯𑀺𑀥𑁂𑀦 𑀜𑀸𑀡𑀥𑀫𑁆𑀫𑁂𑀦𑀸𑀢𑀺 𑀦 𑀦 𑀬𑀼𑀚𑁆𑀚𑀢𑀺. 𑀢𑀣𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑀲𑁆𑀲 𑀜𑀸𑀢𑀢𑁆𑀢𑀸 𑀫𑀕𑁆𑀕𑀨𑀮𑀲𑀗𑁆𑀔𑀸𑀢𑀲𑁆𑀲 𑀯𑀸 𑀥𑀫𑁆𑀫𑀲𑁆𑀲 𑀲𑀘𑁆𑀘𑀧𑀝𑀺𑀯𑁂𑀥𑀲𑀫𑁆𑀧𑀬𑁄𑀕𑀁 𑀕𑀢𑀢𑁆𑀢𑀸 ‘‘𑀦𑀬𑀦𑀁 𑀳𑁄𑀢𑀽’’𑀢𑀺 𑀢𑁂𑀦 ‘‘𑀇𑀫𑀺𑀦𑀸 𑀥𑀫𑁆𑀫𑁂𑀦𑀸’’𑀢𑀺 𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑁂𑀦 𑀜𑀸𑀡𑀲𑀫𑁆𑀧𑀬𑁄𑀕𑁂𑀦 𑀢𑀤𑀜𑀸𑀢𑁂𑀦𑀸𑀢𑀺 𑀘 𑀅𑀢𑁆𑀣𑁄 𑀦 𑀦 𑀬𑀼𑀚𑁆𑀚𑀢𑀺. 𑀅𑀦𑀼𑀅𑀬𑁂𑀢𑀺 𑀥𑀫𑁆𑀫𑀜𑀸𑀡𑀲𑁆𑀲 𑀅𑀦𑀼𑀭𑀽𑀧𑀯𑀲𑁂𑀦 𑀅𑀬𑁂 𑀩𑀼𑀚𑁆𑀛𑀦𑀜𑀸𑀡𑁂 𑀤𑀺𑀝𑁆𑀞𑀸𑀦𑀁 𑀅𑀤𑀺𑀝𑁆𑀞𑀸𑀦𑀬𑀦𑀢𑁄 𑀅𑀤𑀺𑀝𑁆𑀞𑀲𑁆𑀲 𑀤𑀺𑀝𑁆𑀞𑀢𑀸𑀬 𑀜𑀸𑀧𑀦𑀢𑁄 𑀘. 𑀢𑁂𑀦𑀸𑀳 ‘‘𑀥𑀫𑁆𑀫𑀜𑀸𑀡𑀲𑁆𑀲 𑀅𑀦𑀼𑀕𑀫𑀦𑁂 𑀜𑀸𑀡’’𑀦𑁆𑀢𑀺. 𑀔𑀻𑀡𑀸𑀲𑀯𑀲𑁆𑀲 𑀲𑁂𑀓𑁆𑀔𑀪𑀽𑀫𑀺 𑀦𑀸𑀫 𑀅𑀕𑁆𑀕𑀫𑀕𑁆𑀕𑀓𑁆𑀔𑀡𑁄. 𑀓𑀲𑁆𑀫𑀸 𑀧𑀦𑁂𑀢𑀁 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀘𑁂? ‘‘𑀏𑀯𑀁 𑀚𑀭𑀸𑀫𑀭𑀡𑀁 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀫𑀸𑀦𑀯𑀲𑁂𑀦 𑀤𑁂𑀲𑀦𑀸𑀬 𑀧𑀯𑀢𑁆𑀢𑀢𑁆𑀢𑀸.

𑀜𑀸𑀡𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑀼𑀢𑀺𑀬𑀜𑀸𑀡𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀲𑀢𑁆𑀢𑀭𑀻𑀢𑀺 𑀢-𑀓𑀸𑀭𑀲𑁆𑀲 𑀭-𑀓𑀸𑀭𑀸𑀤𑁂𑀲𑀁 𑀯𑀼𑀢𑁆𑀢𑀁. 𑀲𑀢𑁆𑀢𑀢𑀺𑀲𑀤𑁆𑀤𑁂𑀦 𑀯𑀸 𑀲𑀫𑀸𑀦𑀢𑁆𑀣𑁄 𑀲𑀢𑁆𑀢𑀭𑀺𑀲𑀤𑁆𑀤𑁄. 𑀩𑁆𑀬𑀜𑁆𑀚𑀦𑀭𑀼𑀘𑀺𑀯𑀲𑁂𑀦 𑀩𑁆𑀬𑀜𑁆𑀚𑀦𑀁 𑀪𑀡𑀦𑁆𑀢𑀻𑀢𑀺 𑀩𑁆𑀬𑀜𑁆𑀚𑀦𑀪𑀸𑀡𑀓𑀸. 𑀢𑁂𑀦𑀸𑀳 ‘‘𑀩𑀳𑀼𑀩𑁆𑀬𑀜𑁆𑀚𑀦𑀁 𑀓𑀢𑁆𑀯𑀸’’𑀢𑀺𑀆𑀤𑀺. 𑀢𑀺𑀝𑁆𑀞𑀢𑀺 𑀢𑀢𑁆𑀣 𑀨𑀮𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀞𑀺𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀮𑀓𑁆𑀔𑀡𑀲𑁆𑀲 𑀥𑀫𑁆𑀫𑀲𑁆𑀲 𑀞𑀺𑀢𑀺 𑀥𑀫𑁆𑀫𑀝𑁆𑀞𑀺𑀢𑀺. 𑀅𑀣 𑀯𑀸 𑀥𑀫𑁆𑀫𑁄𑀢𑀺 𑀓𑀸𑀭𑀡𑀁, 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀲𑁆𑀲 𑀬𑁄 𑀞𑀺𑀢𑀺𑀲𑀪𑀸𑀯𑁄, 𑀲𑁄𑀯 𑀥𑀫𑁆𑀫𑀢𑁄 𑀅𑀜𑁆𑀜𑁄 𑀦𑀢𑁆𑀣𑀻𑀢𑀺 𑀥𑀫𑁆𑀫𑀝𑁆𑀞𑀺𑀢𑀺, 𑀧𑀘𑁆𑀘𑀬𑁄. 𑀢𑀢𑁆𑀣 𑀜𑀸𑀡𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 𑁋 ‘‘𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑀫𑀸𑀢𑀺𑀓𑀸 𑁪). 𑀢𑀣𑀸 𑀘𑀸𑀳 ‘‘𑀧𑀘𑁆𑀘𑀬𑀸𑀓𑀸𑀭𑁂 𑀜𑀸𑀡’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀥𑀫𑁆𑀫𑀸𑀦𑀦𑁆𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁. 𑀧𑀯𑀢𑁆𑀢𑀺𑀝𑁆𑀞𑀺𑀢𑀺𑀓𑀸𑀭𑀡𑀢𑁆𑀢𑀸𑀢𑀺 𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑀸𑀬 𑀞𑀺𑀢𑀺𑀬𑀸 𑀓𑀸𑀭𑀡𑀢𑁆𑀢𑀸. ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺𑀆𑀤𑀺𑀦𑀸 𑀅𑀤𑁆𑀥𑀢𑁆𑀢𑀬𑁂 𑀅𑀦𑁆𑀯𑀬𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀙𑀩𑁆𑀩𑀺𑀥𑀲𑁆𑀲 𑀜𑀸𑀡𑀲𑁆𑀲. 𑀔𑀬𑁄 𑀦𑀸𑀫 𑀯𑀺𑀦𑀸𑀲𑁄, 𑀲𑁄𑀯 𑀪𑁂𑀤𑁄𑀢𑀺. 𑀯𑀺𑀭𑀚𑁆𑀚𑀦𑀁 𑀧𑀮𑀼𑀚𑁆𑀚𑀦𑀁. 𑀦𑀺𑀭𑀼𑀚𑁆𑀛𑀦𑀁 𑀅𑀦𑁆𑀢𑀭𑀥𑀸𑀦𑀁. 𑀏𑀓𑁂𑀓𑀲𑁆𑀫𑀺𑀦𑁆𑀢𑀺 𑀚𑀭𑀸𑀫𑀭𑀡𑀸𑀤𑀻𑀲𑀼 𑀏𑀓𑁂𑀓𑀲𑁆𑀫𑀺𑀁. 𑀧𑀼𑀩𑁆𑀩𑁂 ‘‘𑀬𑀣𑀸𑀪𑀽𑀢𑀜𑀸𑀡’’𑀦𑁆𑀢𑀺 𑀢𑀭𑀼𑀡𑀯𑀺𑀧𑀲𑁆𑀲𑀦𑀁 𑀆𑀳. 𑀢𑀲𑁆𑀫𑀸 𑀇𑀥𑀸𑀧𑀺 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁 𑀯𑀺𑀧𑀲𑁆𑀲𑀦𑀸𑀢𑀺 𑀕𑀳𑁂𑀢𑁆𑀯𑀸 ‘‘𑀯𑀺𑀧𑀲𑁆𑀲𑀦𑀸𑀧𑀝𑀺𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸’’𑀢𑀺 𑀯𑀼𑀢𑁆𑀢𑀁.

𑀤𑀼𑀢𑀺𑀬𑀜𑀸𑀡𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫. 𑀤𑁂𑀲𑀦𑀁 𑀑𑀲𑀸𑀧𑁂𑀲𑀻𑀢𑀺 𑀬𑀣𑀸𑀭𑀤𑁆𑀥𑀓𑀣𑀁 𑀞𑀧𑁂𑀲𑀺. 𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀮𑀤𑁆𑀥𑀺𑀬𑀸 𑀪𑀺𑀦𑁆𑀤𑀦𑀯𑀲𑁂𑀦 𑀉𑀧𑀭𑀺 𑀓𑀣𑁂𑀢𑀼𑀓𑀸𑀫𑁄. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀤𑁂𑀲𑀦𑀸𑀯𑀸𑀭𑀁 𑀧𑀘𑁆𑀙𑀺𑀦𑁆𑀤𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀑𑀓𑀸𑀲𑀤𑀸𑀦𑀢𑁆𑀣’’𑀦𑁆𑀢𑀺. 𑀤𑀼𑀧𑁆𑀧𑀜𑁆𑀳𑁄 𑀏𑀲𑁄 𑀲𑀢𑁆𑀢𑀽𑀧𑀮𑀤𑁆𑀥𑀺𑀬𑀸 𑀧𑀼𑀘𑁆𑀙𑀺𑀢𑀢𑁆𑀢𑀸. 𑀲𑀢𑁆𑀢𑀽𑀧𑀮𑀤𑁆𑀥𑀺𑀯𑀸𑀤𑀧𑀤𑁂𑀦𑀸𑀢𑀺 ‘‘𑀲𑀢𑁆𑀢𑁄 𑀚𑀻𑀯𑁄 𑀉𑀧𑀮𑀩𑁆𑀪𑀢𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀤𑀺𑀝𑁆𑀞𑀺𑀤𑀻𑀧𑀓𑀧𑀤𑀯𑀲𑁂𑀦. 𑀯𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸𑀤𑁄. 𑀤𑀺𑀝𑁆𑀞𑀺-𑀲𑀤𑁆𑀤𑁄 𑀧𑀦 𑀤𑁆𑀯𑀬𑀲𑀗𑁆𑀕𑀳𑀺𑀢𑁄, 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀧𑀦 𑀧𑀭𑀫𑀢𑁆𑀣𑀢𑁄 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀢𑀺 𑀆𑀳 ‘‘𑀅𑀭𑀺𑀬𑀫𑀕𑁆𑀕𑀯𑀸𑀲𑁄’’𑀢𑀺. 𑀅𑀬𑀁 𑀤𑀺𑀝𑁆𑀞𑀻𑀢𑀺 𑀅𑀦𑀜𑁆𑀜𑁂 𑀲𑀭𑀻𑀭𑀚𑀻𑀯𑀸𑀢𑀺 𑀤𑀺𑀝𑁆𑀞𑀺. ‘‘𑀚𑀻𑀯𑁄’’𑀢𑀺 𑀘 𑀚𑀻𑀯𑀺𑀢𑀫𑁂𑀯 𑀯𑀤𑀦𑁆𑀢𑀺. 𑀯𑀝𑁆𑀝𑀦𑁆𑀢𑀺 𑀤𑀼𑀯𑀺𑀥𑀁 𑀯𑀝𑁆𑀝𑀁. 𑀦𑀺𑀭𑁄𑀥𑁂𑀦𑁆𑀢𑁄𑀢𑀺 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑁂𑀦𑁆𑀢𑁄. 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑁄𑀢𑀺 𑀅𑀧𑁆𑀧𑀯𑀢𑁆𑀢𑀺𑀬𑀁 𑀧𑀸𑀧𑀦𑁂𑀦 𑀉𑀧𑀘𑁆𑀙𑀺𑀦𑁆𑀤𑀦𑁆𑀢𑁄. 𑀢𑀤𑁂𑀢𑀁 𑀫𑀕𑁆𑀕𑁂𑀦 𑀦𑀺𑀭𑁄𑀥𑁂𑀢𑀩𑁆𑀩𑀁 𑀯𑀝𑁆𑀝𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀬𑁄𑀚𑀦𑀸. ‘‘𑀅𑀬𑀁 𑀲𑀢𑁆𑀢𑁄 𑀯𑀺𑀦𑀸𑀲𑀁 𑀅𑀪𑀸𑀯𑀁 𑀧𑀢𑁆𑀯𑀸 𑀲𑀩𑁆𑀩𑀲𑁄 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀏𑀯𑀁 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀕𑀳𑀺𑀢𑀸𑀓𑀸𑀭𑀲𑁆𑀲 𑀲𑀫𑁆𑀪𑀯𑁂 𑀲𑀘𑁆𑀘𑀪𑀸𑀯𑁂 𑀲𑀢𑀺. 𑀦 𑀳𑁄𑀢𑀻𑀢𑀺 𑀲𑀸𑀢𑁆𑀣𑀓𑁄 𑀦 𑀳𑁄𑀢𑀺.

𑀕𑀘𑁆𑀙𑀢𑀻𑀢𑀺 𑀲𑀭𑀻𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀯𑀺𑀯𑀝𑁆𑀝𑁂𑀦𑁆𑀢𑁄𑀢𑀺 𑀅𑀧𑁆𑀧𑀯𑀢𑁆𑀢𑀺𑀁 𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀯𑀝𑁆𑀝𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀦𑀺𑀘𑁆𑀘𑀲𑁆𑀲 𑀅𑀧𑁆𑀧𑀯𑀢𑁆𑀢𑀺𑀁 𑀧𑀸𑀧𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀯𑀺𑀚𑁆𑀛𑀢𑀺 𑀅𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀲𑁂𑀯𑀦𑀯𑀲𑁂𑀦 𑀢𑀣𑀸 𑀧𑀯𑀢𑁆𑀢𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀘 𑀧𑀚𑀳𑀺𑀢𑀩𑁆𑀩𑀸𑀧𑀚𑀳𑀦𑀯𑀲𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀯𑀺𑀚𑁆𑀛𑀢𑀺. 𑀯𑀺𑀲𑀽𑀓𑀫𑀺𑀯𑀸𑀢𑀺 𑀓𑀡𑁆𑀟𑀓𑁄 𑀯𑀺𑀬. 𑀦 𑀓𑁂𑀯𑀮𑀁 𑀅𑀦𑀦𑀼𑀯𑀢𑁆𑀢𑀓𑁄𑀯, 𑀅𑀣 𑀔𑁄 𑀯𑀺𑀭𑁄𑀥𑁄𑀧𑀺 ‘‘𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀦𑀥𑀫𑁆𑀫𑀢𑀸𑀬 𑀯𑀺𑀜𑁆𑀜𑀸𑀧𑀦𑀢𑁄. 𑀯𑀺𑀭𑀽𑀧𑀁 𑀩𑀻𑀪𑀘𑁆𑀙𑀁 𑀨𑀦𑁆𑀤𑀺𑀢𑀁 𑀯𑀺𑀧𑁆𑀨𑀦𑁆𑀤𑀺𑀢𑀁. 𑀧𑀡𑁆𑀡𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀦𑀁 𑀅𑀯𑀢𑁆𑀣𑀼𑀪𑀽𑀢𑁄 𑀢𑀸𑀮𑁄 𑀏𑀯 𑀢𑀸𑀮𑀸𑀯𑀢𑁆𑀣𑀼 ‘‘𑀅𑀲𑀺𑀯𑁂 𑀲𑀺𑀯𑀸’’𑀢𑀺 𑀯𑁄𑀳𑀸𑀭𑁄 𑀯𑀺𑀬. 𑀓𑁂𑀘𑀺 𑀧𑀦 ‘‘𑀢𑀸𑀮𑀯𑀢𑁆𑀣𑀼𑀓𑀢𑀸𑀦𑀻’’𑀢𑀺 𑀧𑀞𑀦𑁆𑀢𑀺, 𑀅𑀯𑀢𑁆𑀣𑀼𑀪𑀽𑀢𑀢𑀸𑀬 𑀢𑀸𑀮𑁄 𑀯𑀺𑀬 𑀓𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀢𑀸𑀮𑁄 𑀯𑀺𑀬𑀸’’𑀢𑀺. 𑀅𑀦𑀼𑀅𑀪𑀸𑀯𑀦𑁆𑀢𑀺 𑀯𑀺𑀦𑀸𑀲𑀁.

𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀤𑀼𑀢𑀺𑀬𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬. 𑀇𑀢𑀺 𑀯𑀸𑀢𑀺 𑀏𑀯𑀁 𑀯𑀸. 𑀚𑀭𑀸𑀫𑀭𑀡𑀲𑁆𑀲 𑀘𑁂𑀯 𑀚𑀭𑀸𑀫𑀭𑀡𑀲𑀸𑀫𑀺𑀓𑀲𑁆𑀲 𑀘 𑀔𑀡𑀯𑀲𑁂𑀦 𑀬𑁄 𑀯𑀤𑁂𑀬𑁆𑀬. 𑀅𑀯𑀺𑀲𑀸𑀭𑀤𑀥𑀸𑀢𑀼𑀓𑁄 𑀧𑀼𑀘𑁆𑀙𑀺𑀢𑀼𑀁 𑀅𑀘𑁆𑀙𑁂𑀓𑀢𑀸𑀬 𑀫𑀗𑁆𑀓𑀼𑀪𑀸𑀯𑁂𑀦 𑀚𑀸𑀢𑁄. 𑀢𑁂𑀦𑀸𑀳 ‘‘𑀧𑀼𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺.

𑀤𑀼𑀢𑀺𑀬𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀦𑀢𑀼𑀫𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭. 𑀦 𑀢𑀼𑀫𑁆𑀳𑀸𑀓𑀦𑁆𑀢𑀺 𑀓𑀸𑀬𑀲𑁆𑀲 𑀅𑀦𑀢𑁆𑀢𑀦𑀺𑀬𑀪𑀸𑀯𑀤𑀲𑁆𑀲𑀦𑀫𑁂𑀯 𑀧𑀦𑁂𑀢𑀦𑁆𑀢𑀺 𑀬𑀸 𑀢𑀲𑁆𑀲 𑀅𑀦𑀢𑁆𑀢𑀦𑀺𑀬𑀢𑀸, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀢𑀦𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀤𑀺 𑀦 𑀅𑀢𑁆𑀢𑀦𑀺𑀬𑀁, 𑀧𑀭𑀓𑀺𑀬𑀁 𑀦𑀸𑀫 𑀲𑀺𑀬𑀸𑀢𑀺, 𑀢𑀫𑁆𑀧𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀸𑀧𑀺 𑀅𑀜𑁆𑀜𑁂𑀲’’𑀦𑁆𑀢𑀺 𑀆𑀳. 𑀦𑀬𑀺𑀤𑀁 𑀧𑀼𑀭𑀸𑀡𑀓𑀫𑁆𑀫𑀫𑁂𑀯𑀸𑀢𑀺 ‘‘𑀇𑀤𑀁 𑀓𑀸𑀬𑁄’’𑀢𑀺 𑀯𑀼𑀢𑁆𑀢𑀲𑀭𑀻𑀭𑀁 𑀧𑀼𑀭𑀸𑀡𑀓𑀫𑁆𑀫𑀫𑁂𑀯 𑀦 𑀳𑁄𑀢𑀺. 𑀦 𑀳𑀺 𑀓𑀸𑀬𑁄 𑀯𑁂𑀤𑀦𑀸𑀲𑀪𑀸𑀯𑁄. 𑀧𑀘𑁆𑀘𑀬𑀯𑁄𑀳𑀸𑀭𑁂𑀦𑀸𑀢𑀺 𑀓𑀸𑀭𑀡𑁄𑀧𑀘𑀸𑀭𑁂𑀦. 𑀅𑀪𑀺𑀲𑀗𑁆𑀔𑀢𑀦𑁆𑀢𑀺𑀆𑀤𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀘𑀦𑀁. 𑀧𑀼𑀭𑀺𑀫𑀮𑀺𑀗𑁆𑀕𑀲𑀪𑀸𑀕𑀢𑀸𑀬𑀸𑀢𑀺 ‘‘𑀧𑀼𑀭𑀸𑀡𑀫𑀺𑀤𑀁 𑀓𑀫𑁆𑀫’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀧𑀼𑀭𑀺𑀫𑀦𑀧𑀼𑀁𑀲𑀓𑀮𑀺𑀗𑁆𑀕𑀲𑀪𑀸𑀕𑀢𑀸𑀬. 𑀅𑀜𑁆𑀜𑀫𑀜𑁆𑀜𑀸𑀪𑀺𑀫𑀼𑀔𑁂𑀳𑀺 𑀲𑀫𑁂𑀘𑁆𑀘 𑀧𑀘𑁆𑀘𑀬𑁂𑀳𑀺 𑀓𑀢𑁄 𑀅𑀪𑀺𑀲𑀗𑁆𑀔𑀢𑁄𑀢𑀺 𑀆𑀳 ‘‘𑀧𑀘𑁆𑀘𑀬𑁂𑀳𑀺 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑁄’’𑀢𑀺. 𑀅𑀪𑀺𑀲𑀜𑁆𑀘𑁂𑀢𑀬𑀺𑀢𑀦𑁆𑀢𑀺 𑀢𑀣𑀸 𑀅𑀪𑀺𑀲𑀗𑁆𑀔𑀢𑀢𑁆𑀢𑀲𑀗𑁆𑀔𑀸𑀢𑁂𑀦 𑀅𑀪𑀺𑀫𑀼𑀔𑀪𑀸𑀯𑁂𑀦 𑀘𑁂𑀢𑀬𑀺𑀢𑀁 𑀧𑀓𑀧𑁆𑀧𑀺𑀢𑀁, 𑀧𑀯𑀢𑁆𑀢𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀘𑁂𑀢𑀦𑀸𑀯𑀢𑁆𑀣𑀼𑀓𑁄𑀢𑀺 𑀘𑁂𑀢𑀦𑀸𑀳𑁂𑀢𑀼𑀓𑁄. 𑀯𑁂𑀤𑀦𑀺𑀬𑀦𑁆𑀢𑀺 𑀯𑁂𑀤𑀦𑀸𑀬 𑀳𑀺𑀢𑀁 𑀯𑀢𑁆𑀣𑀸𑀭𑀫𑁆𑀫𑀡𑀪𑀸𑀯𑁂𑀦 𑀯𑁂𑀤𑀦𑀸𑀬 𑀧𑀘𑁆𑀘𑀬𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀯𑁂𑀤𑀦𑀺𑀬𑀯𑀢𑁆𑀣𑀽’’𑀢𑀺.

𑀦𑀢𑀼𑀫𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀘𑁂𑀢𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮. 𑀬𑀜𑁆𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀅𑀝𑁆𑀞𑀸𑀦𑁂. 𑀢𑁂𑀦 𑀘𑁂𑀢𑀦𑀸𑀬 𑀯𑀺𑀬 𑀧𑀓𑀧𑁆𑀧𑀸𑀦𑀸𑀦𑀼𑀲𑀬𑀸𑀦𑀫𑁆𑀧𑀺 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸 𑀯𑀓𑁆𑀔𑀫𑀸𑀦𑀁𑀬𑁂𑀯 𑀅𑀯𑀺𑀲𑀺𑀝𑁆𑀞𑀁 𑀆𑀭𑀫𑁆𑀫𑀡𑀪𑀸𑀯𑀁 𑀚𑁄𑀢𑁂𑀢𑀺. 𑀓𑀸𑀫𑀁 𑀢𑀻𑀲𑀼𑀧𑀺 𑀧𑀤𑁂𑀲𑀼 ‘‘𑀧𑀯𑀢𑁆𑀢𑁂𑀢𑀺’’𑀇𑀘𑁆𑀘𑁂𑀯 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀯𑀢𑁆𑀢𑀦𑀢𑁆𑀣𑁄 𑀧𑀦 𑀘𑁂𑀢𑀦𑀸𑀤𑀻𑀦𑀁 𑀬𑀣𑀸𑀓𑁆𑀓𑀫𑀁 𑀘𑁂𑀢𑀬𑀦𑀧𑀓𑀧𑁆𑀧𑀦𑀸𑀦𑀼𑀲𑀬𑀦𑀭𑀽𑀧𑁄 𑀯𑀺𑀲𑀺𑀝𑁆𑀞𑀝𑁆𑀞𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀪𑀽𑀫𑀓𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀕𑀳𑀺𑀢𑀸 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀦𑀺𑀤𑁆𑀥𑀸𑀭𑀡𑀫𑁂𑀢𑀦𑁆𑀢𑀺. 𑀢𑀡𑁆𑀳𑀸𑀤𑀺𑀝𑁆𑀞𑀺𑀓𑀧𑁆𑀧𑀸 𑀕𑀳𑀺𑀢𑀸 𑀬𑀣𑀸𑀭𑀳𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀝𑁆𑀞𑀲𑀼𑀧𑀺 𑀳𑀺 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑁂𑀲𑀼 𑀢𑀡𑁆𑀳𑀸𑀓𑀧𑁆𑀧𑁄, 𑀢𑀢𑁆𑀣 𑀘𑀢𑀽𑀲𑁆𑀯𑁂𑀯 𑀤𑀺𑀝𑁆𑀞𑀺𑀓𑀧𑁆𑀧𑁄𑀢𑀺. 𑀓𑀸𑀫𑀁 𑀅𑀦𑀼𑀲𑀬𑀸 𑀮𑁄𑀓𑀺𑀬𑀓𑀼𑀲𑀮𑀘𑁂𑀢𑀦𑀸𑀲𑀼𑀧𑀺 𑀅𑀦𑀼𑀲𑁂𑀦𑁆𑀢𑀺𑀬𑁂𑀯, 𑀅𑀓𑀼𑀲𑀮𑁂𑀲𑀼 𑀧𑀦 𑀧𑀯𑀢𑁆𑀢𑀺 𑀧𑀸𑀓𑀝𑀸𑀢𑀺 ‘‘𑀤𑁆𑀯𑀸𑀤𑀲𑀦𑁆𑀦𑀁 𑀘𑁂𑀢𑀦𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀳𑀚𑀸𑀢𑀓𑁄𑀝𑀺𑀬𑀸𑀢𑀺 𑀇𑀤𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀧𑀺 𑀓𑀸𑀫𑀭𑀸𑀕𑀸𑀤𑀬𑁄 𑀅𑀦𑀼𑀲𑀬𑀸𑀯 𑀯𑀼𑀘𑁆𑀘𑀦𑁆𑀢𑀺 𑀢𑀁𑀲𑀤𑀺𑀲𑀢𑀸𑀬𑀸𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀓𑀸𑀮𑀪𑁂𑀤𑁂𑀦 𑀮𑀓𑁆𑀔𑀡𑀧𑁆𑀧𑀪𑁂𑀤𑁄 𑀅𑀢𑁆𑀣𑀻𑀢𑀺. 𑀅𑀦𑀸𑀕𑀢𑀸 𑀏𑀯 𑀳𑀺 𑀓𑀸𑀫𑀭𑀸𑀕𑀸𑀤𑀬𑁄 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 ‘‘𑀅𑀦𑀼𑀲𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀺. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀆𑀭𑀫𑁆𑀫𑀡𑀁 𑀧𑀘𑁆𑀘𑀬𑁄’’𑀢𑀺. 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀢𑁆𑀣𑀦𑁆𑀢𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲𑁂𑀯 𑀧𑀯𑀢𑁆𑀢𑀺𑀬𑀸. 𑀢𑀲𑁆𑀫𑀺𑀁 𑀧𑀘𑁆𑀘𑀬𑁂 𑀲𑀢𑀻𑀢𑀺 𑀢𑀲𑁆𑀫𑀺𑀁 𑀘𑁂𑀢𑀦𑀸𑀧𑀓𑀧𑁆𑀧𑀦𑀸𑀦𑀼𑀲𑀬𑀲𑀜𑁆𑀜𑀺𑀢𑁂 𑀧𑀘𑁆𑀘𑀬𑁂 𑀲𑀢𑀺 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀳𑁄𑀢𑀺. 𑀲𑀦𑁆𑀢𑀸𑀦𑁂 𑀨𑀮𑀤𑀸𑀦𑀲𑀫𑀢𑁆𑀣𑀢𑀸𑀬𑁂𑀯 𑀳𑁄𑀢𑀻𑀢𑀺 ‘‘𑀧𑀢𑀺𑀝𑁆𑀞𑀸 𑀳𑁄𑀢𑀺, 𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁂’’𑀢𑀺 𑀯𑀼𑀢𑁆𑀢𑀁. 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀯𑀲𑁂𑀦 𑀯𑀺𑀭𑀼𑀴𑁆𑀳𑁂𑀢𑀺. 𑀧𑀢𑀺𑀝𑁆𑀞𑀺𑀢𑁂𑀢𑀺 𑀳𑀺 𑀇𑀫𑀺𑀦𑀸 𑀓𑀫𑁆𑀫𑀲𑁆𑀲 𑀓𑀢𑀪𑀸𑀯𑁄 𑀯𑀼𑀢𑁆𑀢𑁄, ‘‘𑀯𑀺𑀭𑀼𑀴𑁆𑀳𑁂’’𑀢𑀺 𑀇𑀫𑀺𑀦𑀸 𑀉𑀧𑀘𑀺𑀢𑀪𑀸𑀯𑁄. 𑀢𑁂𑀦𑀸𑀳 ‘‘𑀓𑀫𑁆𑀫𑀁 𑀚𑀯𑀸𑀧𑁂𑀢𑁆𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀼𑀭𑁂𑀢𑀭𑀁 𑀉𑀧𑁆𑀧𑀦𑁆𑀦𑀸𑀳𑀺 𑀓𑀫𑁆𑀫𑀘𑁂𑀢𑀦𑀸𑀳𑀺 𑀮𑀤𑁆𑀥𑀧𑀘𑁆𑀘𑀬𑀢𑁆𑀢𑀸 𑀩𑀮𑀧𑁆𑀧𑀢𑁆𑀢𑀸𑀬 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀬 𑀓𑀫𑁆𑀫𑀯𑀺𑀜𑁆𑀜𑀸𑀡𑀁 𑀮𑀤𑁆𑀥𑀧𑀢𑀺𑀝𑁆𑀞𑀁 𑀯𑀺𑀭𑀼𑀴𑁆𑀳𑀫𑀽𑀮𑀜𑁆𑀘 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀩𑁆𑀩𑀢𑁆𑀢𑀫𑀽𑀮𑁂 𑀚𑀸𑀢𑁂’’𑀢𑀺. 𑀢𑀣𑀸 𑀳𑀺 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀯𑀺𑀧𑀸𑀓𑀁 𑀤𑁂𑀦𑁆𑀢𑀁 𑀅𑀦𑀦𑁆𑀢𑀭𑁂 𑀚𑀸𑀢𑀺𑀯𑀲𑁂𑀦 𑀤𑁂𑀢𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀓𑀫𑁆𑀫𑀦𑁆𑀢𑀺.

𑀢𑁂𑀪𑀽𑀫𑀓𑀘𑁂𑀢𑀦𑀸𑀬𑀸𑀢𑀺 𑀢𑁂𑀪𑀽𑀫𑀓𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀬. 𑀅𑀧𑁆𑀧𑀯𑀢𑁆𑀢𑀦𑀓𑁆𑀔𑀡𑁄𑀢𑀺 𑀇𑀥 𑀧𑀯𑀢𑁆𑀢𑀦𑀓𑁆𑀔𑀡𑁄 𑀚𑀸𑀬𑀫𑀸𑀦𑀓𑁆𑀔𑀡𑁄. 𑀦 𑀚𑀸𑀬𑀫𑀸𑀦𑀓𑁆𑀔𑀡𑁄 𑀅𑀧𑁆𑀧𑀯𑀢𑁆𑀢𑀦𑀓𑁆𑀔𑀡𑁄 𑀦 𑀓𑁂𑀯𑀮𑀁 𑀪𑀗𑁆𑀕𑀓𑁆𑀔𑀡𑁄 𑀅𑀧𑁆𑀧𑀳𑀻𑀦𑀸𑀦𑀼𑀲𑀬𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀅𑀧𑁆𑀧𑀳𑀻𑀦𑀓𑁄𑀝𑀺𑀬𑀸𑀢𑀺 𑀅𑀲𑀫𑀼𑀘𑁆𑀙𑀺𑀦𑁆𑀦𑀪𑀸𑀯𑁂𑀦. 𑀢𑀤𑀺𑀤𑀁 𑀢𑁂𑀪𑀽𑀫𑀓𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀲𑀼 𑀅𑀧𑁆𑀧𑀯𑀢𑁆𑀢𑀫𑀸𑀦𑀸𑀲𑀼 𑀅𑀦𑀼𑀲𑀬𑀸𑀦𑀁 𑀲𑀳𑀚𑀸𑀢𑀓𑁄𑀝𑀺𑀆𑀤𑀺𑀦𑀸 𑀧𑀯𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺, 𑀯𑀺𑀧𑀸𑀓𑀸𑀤𑀻𑀲𑀼 𑀅𑀧𑁆𑀧𑀳𑀻𑀦𑀓𑁄𑀝𑀺𑀬𑀸 𑀧𑀯𑀢𑁆𑀢𑀢𑀺 𑀓𑀭𑁄𑀦𑁆𑀢𑀲𑁆𑀲 𑀅𑀪𑀸𑀯𑀢𑁄𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀯𑀸𑀭𑀺𑀢𑀢𑁆𑀢𑀸𑀢𑀺 𑀧𑀝𑀺𑀧𑀓𑁆𑀔𑁂𑀢𑀺 𑀅𑀯𑀸𑀭𑀺𑀢𑀩𑁆𑀩𑀢𑁆𑀢𑀸. 𑀧𑀘𑁆𑀘𑀬𑁄𑀯 𑀳𑁄𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸.

𑀧𑀞𑀫𑀤𑀼𑀢𑀺𑀬𑀯𑀸𑀭𑁂𑀳𑀺 𑀯𑀝𑁆𑀝𑀁 𑀤𑀲𑁆𑀲𑁂𑀢𑁆𑀯𑀸 𑀢𑀢𑀺𑀬𑀯𑀸𑀭𑁂 ‘‘𑀦𑁄 𑀘𑁂’’𑀢𑀺𑀆𑀤𑀺𑀦𑀸 𑀯𑀺𑀯𑀝𑁆𑀝𑀁 𑀤𑀲𑁆𑀲𑀺𑀢𑀦𑁆𑀢𑀺 ‘‘𑀧𑀞𑀫𑀧𑀤𑁂 𑀢𑁂𑀪𑀽𑀫𑀓𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀦𑀺𑀯𑀢𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀺𑀯𑀢𑁆𑀢𑀸𑀢𑀺 𑀅𑀓𑀭𑀡𑀢𑁄 𑀅𑀧𑁆𑀧𑀯𑀢𑁆𑀢𑀺𑀬𑀸 𑀅𑀧𑀕𑀢𑀸. 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄 𑀦𑀺𑀯𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀽𑀢𑀺 ‘‘𑀢𑁂𑀪𑀽𑀫𑀓𑀯𑀺𑀧𑀸𑀓𑁂𑀲𑀽’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼.

𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂. 𑀏𑀢𑁆𑀣 𑀘𑁂𑀢𑀦𑀸𑀧𑀓𑀧𑁆𑀧𑀦𑀸𑀦𑀁 𑀧𑀯𑀢𑁆𑀢𑀦𑀯𑀲𑁂𑀦 𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑁄 𑀤𑀲𑁆𑀲𑀺𑀢𑁄𑀢𑀺 ‘‘𑀘𑁂𑀢𑁂𑀢𑀻𑀢𑀺 𑀢𑁂𑀪𑀽𑀫𑀓𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀕𑀳𑀺𑀢𑀸’’𑀢𑀺𑀆𑀤𑀺𑀦𑀬𑁄 𑀇𑀥𑁂𑀯 𑀳𑁄𑀢𑀻𑀢𑀺 𑀤𑀲𑁆𑀲𑀺𑀢𑁄. 𑀘𑀢𑀲𑁆𑀲𑁄𑀢𑀺 𑀧𑀝𑀺𑀖𑀤𑁆𑀯𑀬𑀫𑁄𑀳𑀫𑀽𑀮𑀲𑀫𑀸𑀕𑀢𑀸 𑀘𑀢𑀲𑁆𑀲𑁄 𑀅𑀓𑀼𑀲𑀮𑀘𑁂𑀢𑀦𑀸. 𑀘𑀢𑀽𑀲𑀼 𑀅𑀓𑀼𑀲𑀮𑀘𑁂𑀢𑀦𑀸𑀲𑀽𑀢𑀺 𑀬𑀣𑀸𑀯𑀼𑀢𑁆𑀢𑀸𑀲𑀼 𑀏𑀯 𑀘𑀢𑀽𑀲𑀼 𑀅𑀓𑀼𑀲𑀮𑀘𑁂𑀢𑀦𑀸𑀲𑀼, 𑀇𑀢𑀭𑀸 𑀧𑀦 ‘‘𑀦 𑀧𑀓𑀧𑁆𑀧𑁂𑀢𑀻’’𑀢𑀺 𑀇𑀫𑀺𑀦𑀸 𑀧𑀝𑀺𑀓𑁆𑀔𑁂𑀧𑁂𑀦 𑀦𑀺𑀯𑀢𑁆𑀢𑀸𑀢𑀺. 𑀲𑀼𑀢𑁆𑀢𑁂 𑀆𑀕𑀢𑀁 𑀯𑀸𑀭𑁂𑀢𑁆𑀯𑀸𑀢𑀺 ‘‘𑀦𑁄 𑀘 𑀧𑀓𑀧𑁆𑀧𑁂𑀢𑀻’’𑀢𑀺 𑀏𑀯𑀁 𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀲𑀼𑀢𑁆𑀢𑁂 𑀆𑀕𑀢𑀁 𑀯𑀚𑁆𑀚𑁂𑀢𑁆𑀯𑀸. ‘‘𑀦 𑀧𑀓𑀧𑁆𑀧𑁂𑀢𑀻’’𑀢𑀺 𑀳𑀺 𑀇𑀫𑀺𑀦𑀸 𑀅𑀝𑁆𑀞𑀲𑀼 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑁂𑀲𑀼 𑀲𑀳𑀚𑀸𑀢𑀓𑁄𑀝𑀺𑀬𑀸 𑀧𑀯𑀢𑁆𑀢𑀅𑀦𑀼𑀲𑀬𑁄 𑀦𑀺𑀯𑀢𑁆𑀢𑀺𑀢𑁄 𑀢𑁂𑀲𑀁 𑀘𑀺𑀢𑁆𑀢𑀸𑀦𑀁 𑀅𑀧𑁆𑀧𑀯𑀢𑁆𑀢𑀦𑀢𑁄, 𑀢𑀲𑁆𑀫𑀸 𑀢𑀁 𑀞𑀸𑀦𑀁 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀲𑀤𑀺𑀲𑁄𑀯 𑀧𑀼𑀭𑀺𑀫𑀦𑀬𑁂𑀲𑀼 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑁄 𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑀢𑁆𑀢𑀸.

𑀢𑀤𑀧𑁆𑀧𑀢𑀺𑀝𑁆𑀞𑀺𑀢𑁂𑀢𑀺 𑀲𑀫𑀸𑀲𑀪𑀸𑀯𑀢𑁄 𑀯𑀺𑀪𑀢𑁆𑀢𑀺𑀮𑁄𑀧𑁄, 𑀲𑀦𑁆𑀥𑀺𑀯𑀲𑁂𑀦 𑀤-𑀓𑀸𑀭𑀸𑀕𑀫𑁄, 𑀢𑀲𑁆𑀲 𑀅𑀧𑁆𑀧𑀢𑀺𑀝𑁆𑀞𑀺𑀢𑀁 𑀢𑀤𑀧𑁆𑀧𑀢𑀺𑀝𑁆𑀞𑀺𑀢𑀁, 𑀢𑀲𑁆𑀫𑀺𑀁 𑀢𑀤𑀧𑁆𑀧𑀢𑀺𑀝𑁆𑀞𑀺𑀢𑁂𑀢𑀺 𑀏𑀯𑀫𑁂𑀢𑁆𑀣 𑀲𑀫𑀸𑀲𑀧𑀤𑀲𑀺𑀤𑁆𑀥𑀺 𑀤𑀝𑁆𑀞𑀩𑁆𑀩𑀸. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀢𑀢𑀺𑀬𑀯𑀸𑀭𑁂 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀓𑀺𑀘𑁆𑀘𑀁 𑀓𑀣𑀺𑀢𑀁 𑀲𑀩𑁆𑀩𑀲𑁄 𑀅𑀦𑀼𑀲𑀬𑀦𑀺𑀩𑁆𑀩𑀢𑁆𑀢𑀺𑀪𑁂𑀤𑀦𑀢𑁄. 𑀔𑀻𑀡𑀸𑀲𑀯𑀲𑁆𑀲 𑀓𑀺𑀘𑁆𑀘𑀓𑀭𑀡𑀦𑁆𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺 𑀲𑀩𑁆𑀩𑀲𑁄 𑀯𑁂𑀤𑀦𑀸𑀤𑀻𑀦𑀁 𑀧𑀝𑀺𑀓𑁆𑀔𑁂𑀧𑀪𑀸𑀯𑀢𑁄. 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀝𑀦𑀢𑁄 𑀫𑀕𑁆𑀕𑀸𑀦𑀦𑁆𑀢𑀭𑀸𑀦𑀺 𑀨𑀮𑀸𑀦𑀺, 𑀢𑀤𑀼𑀪𑀬𑀸𑀭𑀫𑁆𑀫𑀡𑀜𑁆𑀘 𑀦𑀺𑀩𑁆𑀩𑀸𑀦𑀦𑁆𑀢𑀺. 𑀯𑀺𑀜𑁆𑀜𑀸𑀡𑀲𑁆𑀲𑀸𑀢𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲. 𑀧𑀼𑀦𑀩𑁆𑀪𑀯𑀲𑀻𑀲𑁂𑀦 𑀅𑀦𑀦𑁆𑀢𑀭𑀪𑀯𑀲𑀗𑁆𑀕𑀳𑀺𑀢𑀁 𑀦𑀸𑀫𑀭𑀽𑀧𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀫𑁂𑀯 𑀯𑀸 𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀧𑀼𑀦𑀩𑁆𑀪𑀯𑀲𑁆𑀲 𑀘 𑀅𑀦𑁆𑀢𑀭𑁂 𑀏𑀓𑁄 𑀲𑀦𑁆𑀥𑀻’’𑀢𑀺. 𑀪𑀯𑀚𑀸𑀢𑀻𑀦𑀦𑁆𑀢𑀺 𑀏𑀢𑁆𑀣 ‘‘𑀤𑀼𑀢𑀺𑀬𑀪𑀯𑀲𑁆𑀲 𑀢𑀢𑀺𑀬𑀪𑀯𑁂 𑀚𑀸𑀢𑀺𑀬𑀸’’𑀢𑀺 𑀏𑀯𑀁 𑀧𑀭𑀫𑁆𑀧𑀭𑀯𑀲𑁂𑀦 𑀕𑀳𑁂𑀢𑀩𑁆𑀩𑀁. 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀕𑀳𑀡𑁂𑀦 𑀧𑀦 𑀦𑀸𑀦𑀦𑁆𑀢𑀭𑀺𑀬𑀢𑁄 𑀓𑀫𑁆𑀫𑀪𑀯𑁄 𑀕𑀳𑀺𑀢𑁄, 𑀚𑀸𑀢𑀺𑀳𑁂𑀢𑀼𑀨𑀮𑀲𑀺𑀤𑁆𑀥𑀺𑀧𑁂𑀢𑁆𑀣 𑀯𑀼𑀢𑁆𑀢𑀸 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘 ‘‘𑀦𑁄 𑀘𑁂, 𑀪𑀺𑀓𑁆𑀔𑀯𑁂, 𑀘𑁂𑀢𑁂𑀢𑀺 𑀦𑁄 𑀘 𑀧𑀓𑀧𑁆𑀧𑁂𑀢𑀺, 𑀅𑀣 𑀔𑁄 𑀅𑀦𑀼𑀲𑁂𑀢𑀻’’𑀢𑀺 𑀏𑀯𑀁 𑀪𑀕𑀯𑀢𑀸 𑀤𑀼𑀢𑀺𑀬𑀦𑀬𑁂 𑀧𑀼𑀩𑁆𑀩𑀪𑀸𑀕𑁂 𑀪𑀯𑀦𑀺𑀩𑁆𑀩𑀢𑁆𑀢𑀓𑀓𑀼𑀲𑀮𑀸𑀓𑀼𑀲𑀮𑀸𑀬𑀽𑀳𑀦𑀁, 𑀧𑀓𑀧𑁆𑀧𑀦𑀜𑁆𑀘 𑀯𑀺𑀦𑀸𑀧𑀺 𑀪𑀯𑁂𑀲𑀼 𑀤𑀺𑀝𑁆𑀞𑀸𑀤𑀻𑀦𑀯𑀲𑁆𑀲 𑀬𑁄𑀕𑀺𑀦𑁄 𑀅𑀦𑀼𑀲𑀬𑀧𑀘𑁆𑀘𑀬𑀸 𑀯𑀺𑀧𑀲𑁆𑀲𑀦𑀸𑀘𑁂𑀢𑀦𑀸𑀧𑀺 𑀧𑀝𑀺𑀲𑀦𑁆𑀥𑀺𑀚𑀦𑀓𑀸 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀓𑀼𑀲𑀮𑀸𑀓𑀼𑀲𑀮𑀲𑁆𑀲 𑀅𑀧𑁆𑀧𑀯𑀢𑁆𑀢𑀺 𑀘𑁂𑀧𑀺, 𑀢𑀤𑀸 𑀯𑀺𑀚𑁆𑀚𑀫𑀸𑀦𑀢𑁂𑀪𑀽𑀫𑀓𑀯𑀺𑀧𑀸𑀓𑀸𑀤𑀺𑀥𑀫𑁆𑀫𑁂𑀲𑀼 𑀅𑀧𑁆𑀧𑀳𑀻𑀦𑀓𑁄𑀝𑀺𑀬𑀸 𑀅𑀦𑀼𑀲𑀬𑀺𑀢𑀓𑀺𑀮𑁂𑀲𑀧𑁆𑀧𑀘𑁆𑀘𑀬𑀸 𑀪𑀯𑀯𑀚𑁆𑀚𑀲𑁆𑀲 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲 𑀧𑀢𑀺𑀝𑁆𑀞𑀺𑀢𑀢𑀸 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀜𑁆𑀘 𑀯𑀼𑀢𑁆𑀢𑁄. ‘‘𑀦 𑀘𑁂𑀢𑁂𑀢𑀺 𑀧𑀓𑀧𑁆𑀧𑁂𑀢𑀺 𑀅𑀦𑀼𑀲𑁂𑀢𑀻’’𑀢𑀺 𑀅𑀬𑀁 𑀦𑀬𑁄 𑀦 𑀕𑀳𑀺𑀢𑁄 𑀘𑁂𑀢𑀦𑀁 𑀯𑀺𑀦𑀸 𑀧𑀓𑀧𑁆𑀧𑀦𑀲𑁆𑀲 𑀅𑀪𑀸𑀯𑀢𑁄.

𑀘𑁂𑀢𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀤𑀼𑀢𑀺𑀬𑀘𑁂𑀢𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯. 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀸𑀦𑀁 𑀅𑀦𑁆𑀢𑀭𑁂 𑀏𑀓𑁄 𑀲𑀦𑁆𑀥𑀻𑀢𑀺 𑀳𑁂𑀢𑀼𑀨𑀮𑀲𑀦𑁆𑀥𑀺 𑀯𑀺𑀜𑁆𑀜𑀸𑀡𑀕𑁆𑀕𑀳𑀡𑁂𑀦 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲 𑀕𑀳𑀺𑀢𑀢𑁆𑀢𑀸. 𑀦𑀸𑀫𑀭𑀽𑀧𑀁 𑀧𑀦 𑀯𑀺𑀧𑀸𑀓𑀦𑀸𑀫𑀭𑀽𑀧𑀫𑁂𑀯𑀸𑀢𑀺 𑀧𑀸𑀓𑀝𑀫𑁂𑀯. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀤𑀼𑀢𑀺𑀬𑀘𑁂𑀢𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀢𑀢𑀺𑀬𑀘𑁂𑀢𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁦. 𑀭𑀽𑀧𑀸𑀤𑀻𑀲𑀼 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼. 𑀢𑁂𑀦 𑀘𑁂𑀢𑁆𑀣 𑀪𑀯𑀢𑁆𑀢𑀬𑀁 𑀲𑀗𑁆𑀕𑀡𑁆𑀳𑀸𑀢𑀺 𑀙𑀴𑀸𑀭𑀫𑁆𑀫𑀡𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸. 𑀢𑀲𑁆𑀲𑁂𑀯 𑀪𑀯𑀢𑁆𑀢𑀬𑀲𑁆𑀲 𑀧𑀢𑁆𑀣𑀦𑀸 𑀧𑀡𑀺𑀥𑀸𑀦𑀸𑀤𑀺𑀯𑀲𑁂𑀦 𑀦𑀢𑀺 𑀦𑀸𑀫. 𑀆𑀕𑀢𑀺𑀫𑁆𑀳𑀺 𑀕𑀢𑀻𑀢𑀺 𑀧𑀘𑁆𑀘𑀼𑀧𑀝𑁆𑀞𑀸𑀦𑀯𑀲𑁂𑀦 𑀅𑀪𑀺𑀫𑀼𑀔𑀁 𑀕𑀢𑀺 𑀧𑀯𑀢𑁆𑀢𑀺 𑀏𑀢𑀲𑁆𑀫𑀸𑀢𑀺 𑀆𑀕𑀢𑀺, 𑀓𑀫𑁆𑀫𑀸𑀤𑀺𑀦𑀺𑀫𑀺𑀢𑁆𑀢𑀁. 𑀢𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀕𑀢𑀺 𑀧𑀯𑀢𑁆𑀢𑀺 𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺. 𑀢𑁂𑀦𑀸𑀳 ‘‘𑀆𑀕𑀢𑁂’’𑀢𑀺𑀆𑀤𑀺. 𑀘𑀼𑀢𑀽𑀧𑀧𑀸𑀢𑁄𑀢𑀺 𑀘𑀯𑀦𑀁 𑀘𑀼𑀢𑀺, 𑀫𑀭𑀡𑀁. 𑀉𑀧𑀧𑀚𑁆𑀚𑀦𑀁 𑀦𑀺𑀩𑁆𑀩𑀢𑁆𑀢𑀺, 𑀉𑀧𑀧𑀸𑀢𑁄. 𑀘𑀼𑀢𑀺𑀢𑁄 𑀉𑀧𑀧𑀸𑀢𑁄 𑀧𑀼𑀦𑀭𑀼𑀧𑁆𑀧𑀸𑀤𑁄. 𑀢𑁂𑀦𑀸𑀳 ‘‘𑀏𑀯𑀁 𑀯𑀺𑀜𑁆𑀜𑀸𑀡𑀲𑁆𑀲𑀸’’𑀢𑀺𑀆𑀤𑀺. 𑀇𑀢𑁄𑀢𑀺 𑀦𑀺𑀩𑁆𑀩𑀢𑁆𑀢𑀪𑀯𑀢𑁄. 𑀢𑀢𑁆𑀣𑀸𑀢𑀺 𑀧𑀼𑀦𑀩𑁆𑀪𑀯𑀲𑀗𑁆𑀔𑀸𑀢𑁂 𑀆𑀬𑀢𑀺𑀪𑀯𑁂. 𑀏𑀓𑁄𑀯 𑀲𑀦𑁆𑀥𑀻𑀢𑀺 𑀏𑀓𑁄 𑀳𑁂𑀢𑀼𑀨𑀮𑀲𑀦𑁆𑀥𑀺 𑀏𑀯 𑀓𑀣𑀺𑀢𑁄.

𑀢𑀢𑀺𑀬𑀘𑁂𑀢𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀴𑀸𑀭𑀔𑀢𑁆𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.