𑁪. 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪. 𑀲𑁄𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄. 𑀬𑀤𑀺 𑀦 𑀢𑀸𑀯 𑀧𑀯𑀺𑀝𑁆𑀞𑁄, 𑀓𑀲𑁆𑀫𑀸 ‘‘𑀧𑀸𑀯𑀺𑀲𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀯𑀺𑀲𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺. 𑀢𑁂𑀦 𑀅𑀯𑀲𑁆𑀲𑀫𑁆𑀪𑀸𑀯𑀺𑀦𑀺 𑀪𑀽𑀢𑁂 𑀯𑀺𑀬 𑀉𑀧𑀘𑀸𑀭𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀬𑀣𑀸 𑀓𑀺’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀢𑀺𑀧𑁆𑀧𑀕𑁄𑀬𑁂𑀯 𑀦𑀺𑀓𑁆𑀔𑀦𑁆𑀢𑀤𑀺𑀯𑀲𑁄𑀢𑀺 𑀧𑀓𑀢𑀺𑀬𑀸 𑀪𑀺𑀓𑁆𑀔𑀸𑀘𑀭𑀡𑀯𑁂𑀮𑀸𑀬 𑀅𑀢𑀺𑀯𑀺𑀬 𑀧𑀸𑀢𑁄 𑀏𑀯 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀦𑁆𑀢𑀤𑀺𑀯𑀲𑀪𑀸𑀕𑁄. 𑀏𑀢𑀤𑀳𑁄𑀲𑀻𑀢𑀺 𑀏𑀢𑀁 ‘‘𑀅𑀢𑀺𑀧𑁆𑀧𑀕𑁄 𑀔𑁄’’𑀢𑀺𑀆𑀤𑀺𑀓𑀁 𑀘𑀺𑀦𑁆𑀢𑀦𑀁 𑀅𑀳𑁄𑀲𑀺. 𑀤𑀓𑁆𑀔𑀺𑀡𑀤𑁆𑀯𑀸𑀭𑀲𑁆𑀲𑀸𑀢𑀺 𑀭𑀸𑀚𑀕𑀳𑀦𑀕𑀭𑁂 𑀤𑀓𑁆𑀔𑀺𑀡𑀤𑁆𑀯𑀸𑀭𑀲𑁆𑀲 𑀯𑁂𑀴𑀼𑀯𑀦𑀲𑁆𑀲 𑀘 𑀅𑀦𑁆𑀢𑀭𑀸 𑀅𑀳𑁄𑀲𑀺, 𑀢𑀲𑁆𑀫𑀸 ‘‘𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲’’𑀦𑁆𑀢𑀺 𑀘𑀺𑀦𑁆𑀢𑀦𑀸 𑀅𑀳𑁄𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀁 𑀯𑀸𑀤𑀻𑀢𑀺 𑀘𑀢𑀽𑀲𑀼 𑀯𑀸𑀤𑁂𑀲𑀼 𑀓𑀢𑀭𑀁 𑀯𑀸𑀤𑀁 𑀯𑀤𑀲𑀺. 𑀓𑀺𑀫𑀓𑁆𑀔𑀸𑀬𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀓𑀺𑀁 𑀯𑀤𑀢𑀻𑀢𑀺 𑀧𑀦 𑀘𑀢𑁆𑀢𑀸𑀭𑁄 𑀯𑀸𑀤𑁂 𑀲𑀸𑀫𑀜𑁆𑀜𑀢𑁄 𑀕𑀳𑁂𑀢𑁆𑀯𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀯𑀤𑀢𑀺 𑀬𑀣𑀸 𑀓𑀺𑀁 𑀢𑁂 𑀚𑀸𑀢𑀮𑀺𑀗𑁆𑀕𑀁. 𑀲𑀩𑁆𑀩𑀦𑀸𑀫𑀜𑁆𑀳𑁂𑀢𑀁, 𑀬𑀤𑀺𑀤𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀁. 𑀯𑀤𑀢𑀺 𑀏𑀢𑁂𑀦𑀸𑀢𑀺 𑀯𑀸𑀤𑁄, 𑀤𑀲𑁆𑀲𑀦𑀁. 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀺𑀁 𑀏𑀢𑁆𑀣…𑀧𑁂… 𑀤𑀲𑁆𑀲𑀦𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑀻’’𑀢𑀺. ‘‘𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀥𑀫𑁆𑀫-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄𑀢𑀺 𑀆𑀳 ‘‘𑀬𑀁 𑀯𑀼𑀢𑁆𑀢𑀁 𑀓𑀸𑀭𑀡𑀁, 𑀢𑀲𑁆𑀲 𑀅𑀦𑀼𑀓𑀸𑀭𑀡’’𑀦𑁆𑀢𑀺. 𑀯𑀸𑀤𑀲𑁆𑀲 𑀯𑀘𑀦𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺 𑀯𑀸𑀤𑀧𑁆𑀧𑀯𑀢𑁆𑀢𑀺.

𑀇𑀤𑀁 𑀯𑀘𑀦𑀦𑁆𑀢𑀺 ‘‘𑀏𑀓𑀫𑀺𑀤𑀸𑀳’’𑀦𑁆𑀢𑀺𑀆𑀤𑀺𑀯𑀘𑀦𑀁. 𑀲𑀸𑀢𑀺 ‘‘𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀓𑀣𑀸. 𑀅𑀘𑁆𑀙𑀭𑀁 𑀅𑀗𑁆𑀕𑀼𑀮𑀺𑀨𑁄𑀝𑀦𑀁 𑀅𑀭𑀳𑀢𑀻𑀢𑀺 𑀅𑀘𑁆𑀙𑀭𑀺𑀬𑀁. 𑀅𑀩𑁆𑀪𑀼𑀢𑀦𑁆𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀤𑀲𑀺𑀤𑁆𑀥𑀺 𑀤𑀝𑁆𑀞𑀩𑁆𑀩𑀸. 𑀲𑀩𑁆𑀩𑀯𑀸𑀤𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀘𑀢𑀼𑀩𑁆𑀩𑀺𑀥𑀯𑀸𑀤𑀸𑀦𑀁. 𑀧𑀞𑀫𑁄 𑀳𑁂𑀢𑁆𑀣 𑀲𑀲𑁆𑀲𑀢𑀯𑀸𑀤𑁄, 𑀤𑀼𑀢𑀺𑀬𑁄 𑀉𑀘𑁆𑀙𑁂𑀤𑀯𑀸𑀤𑁄, 𑀢𑀢𑀺𑀬𑁄 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑁄, 𑀘𑀢𑀼𑀢𑁆𑀣𑁄 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀯𑀸𑀤𑁄, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀧𑀝𑀺𑀓𑁆𑀔𑁂𑀧𑀢𑁄 𑀧𑀝𑀺𑀓𑁆𑀔𑁂𑀧𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀺𑀢𑁆𑀢𑀦𑀁 𑀯𑀸 𑀧𑀘𑀼𑀭𑀚𑀦𑀜𑀸𑀡𑀲𑁆𑀲 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀢𑀸𑀬 𑀕𑀫𑁆𑀪𑀻𑀭𑀜𑁆𑀘𑁂𑀯, 𑀢𑀣𑀸 𑀅𑀯𑀪𑀸𑀲𑀦𑀢𑁄 𑀘𑁂𑀢𑀲𑀺 𑀉𑀧𑀝𑁆𑀞𑀸𑀦𑀢𑁄 𑀕𑀫𑁆𑀪𑀻𑀭𑀸𑀯𑀪𑀸𑀲𑀜𑁆𑀘 𑀓𑀭𑁄𑀦𑁆𑀢𑁄. 𑀢𑀤𑁂𑀯 𑀧𑀤𑀦𑁆𑀢𑀺 𑀨𑀲𑁆𑀲𑀧𑀤𑀁𑀬𑁂𑀯 𑀆𑀤𑀺𑀪𑀽𑀢𑀁 𑀕𑀳𑁂𑀢𑁆𑀯𑀸.

𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.