𑁫. 𑀪𑀽𑀫𑀺𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫. 𑀧𑀼𑀭𑀺𑀫𑀲𑀼𑀢𑁆𑀢𑁂𑀢𑀺 𑀅𑀦𑀦𑁆𑀢𑀭𑁂 𑀧𑀼𑀭𑀺𑀫𑁂 𑀲𑀼𑀢𑁆𑀢𑁂. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀧𑀤𑀢𑁆𑀣𑁂 𑀢𑀢𑁄 𑀯𑀺𑀲𑀺𑀝𑁆𑀞𑀁 𑀅𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀢𑀭𑀁 𑀅𑀢𑁆𑀣𑀢𑁄 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀬𑀁 𑀧𑀦 𑀯𑀺𑀲𑁂𑀲𑁄’’𑀢𑀺𑀆𑀤𑀺𑀫𑀸𑀳. 𑀦 𑀓𑁂𑀯𑀮𑀁 𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀣 𑀔𑁄 𑀨𑀲𑁆𑀲𑀲𑁆𑀲 𑀲𑀳𑀓𑀸𑀭𑀻𑀓𑀸𑀭𑀡𑀪𑀽𑀢𑀅𑀜𑁆𑀜𑀧𑀘𑁆𑀘𑀬𑀸 𑀘 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀓𑀸𑀬𑁂𑀦𑀸𑀢𑀺 𑀘𑁄𑀧𑀦𑀓𑀸𑀬𑁂𑀦, 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀲𑀸 𑀳𑀺 𑀓𑀸𑀫𑀁 𑀧𑀝𑁆𑀞𑀸𑀦𑁂 𑀆𑀕𑀢𑁂𑀲𑀼 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀘𑁂𑀢𑀦𑀸𑀬 𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀓𑀸𑀬𑁂 𑀲𑀢𑀺 𑀏𑀯 𑀓𑀸𑀬𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺, 𑀦𑀸𑀲𑀢𑀺, 𑀢𑀲𑁆𑀫𑀸 𑀲𑀸 𑀢𑀲𑁆𑀲𑀸 𑀲𑀸𑀫𑀕𑁆𑀕𑀺𑀬𑀪𑀸𑀯𑁂𑀦 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 ‘‘𑀓𑀸𑀬𑁂𑀦𑀧𑀺 𑀓𑀭𑀺𑀬𑀫𑀸𑀦𑀁 𑀓𑀭𑀻𑀬𑀢𑀻’’𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀓𑀸𑀬𑁂 𑀯𑀸, 𑀳𑀸𑀦𑀦𑁆𑀤, 𑀲𑀢𑀺 𑀓𑀸𑀬𑀲𑀜𑁆𑀘𑁂𑀢𑀦𑀸𑀳𑁂𑀢𑀼 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀁 𑀤𑀼𑀓𑁆𑀔’’𑀦𑁆𑀢𑀺. 𑀯𑀸𑀘𑀸𑀬𑀧𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀫𑀦𑀲𑀸𑀢𑀺 𑀧𑀸𑀢𑀼𑀪𑀽𑀢𑁂𑀦 𑀫𑀦𑀲𑀸, 𑀦 𑀫𑀦𑀫𑀢𑁆𑀢𑁂𑀦𑀸𑀢𑀺. 𑀅𑀢𑁆𑀢𑀦𑀸 𑀧𑀭𑁂𑀳𑀺 𑀅𑀦𑀼𑀲𑁆𑀲𑀸𑀳𑀺𑀢𑁂𑀦. 𑀧𑀭𑁂𑀦𑀸𑀢𑀺 𑀧𑀭𑁂𑀦 𑀅𑀦𑀼𑀲𑁆𑀲𑀸𑀳𑁂𑀦. 𑀲𑀫𑁆𑀧𑀚𑀸𑀦𑁂𑀦𑀸𑀢𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀯𑀲𑁂𑀦 𑀧𑀚𑀸𑀦𑀦𑁆𑀢𑁂𑀦. 𑀅𑀲𑀫𑁆𑀧𑀚𑀸𑀦𑁂𑀦𑀸𑀢𑀺 𑀢𑀣𑀸 𑀦 𑀲𑀫𑁆𑀧𑀚𑀸𑀦𑀦𑁆𑀢𑁂𑀦. 𑀢𑀲𑁆𑀲𑀸𑀢𑀺 𑀲𑀼𑀔𑀤𑀼𑀓𑁆𑀔𑀲𑁆𑀲. 𑀓𑀸𑀬𑀲𑀜𑁆𑀘𑁂𑀢𑀦𑀸𑀳𑁂𑀢𑀽𑀢𑀺 𑀓𑀸𑀬𑀓𑀫𑁆𑀫𑀦𑀺𑀫𑀺𑀢𑁆𑀢𑀁, 𑀓𑀸𑀬𑀺𑀓𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑁂𑀲𑀲𑀜𑁆𑀘𑁂𑀢𑀦𑀸𑀲𑀼𑀧𑀺. 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑁂𑀢𑀦𑀸 𑀧𑀯𑀢𑁆𑀢𑀺𑀬𑀁 𑀯𑀺𑀧𑀸𑀓𑀁 𑀤𑁂𑀢𑀺𑀬𑁂𑀯𑀸𑀢𑀺 ‘‘𑀯𑀻𑀲𑀢𑀺 𑀘𑁂𑀢𑀦𑀸 𑀮𑀩𑁆𑀪𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀯𑀘𑀻𑀤𑁆𑀯𑀸𑀭𑁂𑀢𑀺 𑀏𑀢𑁆𑀣 ‘‘𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀓𑀼𑀲𑀮𑀯𑀲𑁂𑀦 𑀯𑀻𑀲𑀢𑀺 𑀘𑁂𑀢𑀦𑀸 𑀮𑀩𑁆𑀪𑀦𑁆𑀢𑀻’’𑀢𑀺 𑀇𑀤𑀁 𑀢𑀣𑀸-𑀲𑀤𑁆𑀤𑁂𑀦 𑀉𑀧𑀲𑀁𑀳𑀭𑀢𑀺. 𑀭𑀽𑀧𑀸𑀭𑀽𑀧𑀘𑁂𑀢𑀦𑀸𑀳𑀻𑀢𑀺 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸𑀳𑀺. 𑀢𑀧𑁆𑀧𑀘𑁆𑀘𑀬𑀁 𑀬𑀣𑀸𑀭𑀳𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀸𑀧𑀺 𑀘𑁂𑀢𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀸 𑀏𑀓𑀽𑀦𑀯𑀻𑀲𑀢𑀺 𑀘𑁂𑀢𑀦𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀓𑀼𑀲𑀮𑀸𑀦𑀫𑁆𑀧𑀺 𑀧𑀕𑁂𑀯 𑀇𑀢𑀭𑀸𑀥𑀺𑀝𑁆𑀞𑀳𑀺𑀢𑀸𑀯𑀺𑀚𑁆𑀚𑀲𑁆𑀲𑁂𑀯 𑀉𑀧𑁆𑀧𑀚𑁆𑀚𑀦𑀢𑁄, 𑀅𑀜𑁆𑀜𑀣𑀸 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀬𑀣𑀸𑀯𑀼𑀢𑁆𑀢𑀘𑁂𑀢𑀦𑀸𑀪𑁂𑀤𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀓𑀸𑀬𑀘𑁂𑀢𑀦𑀸𑀤𑀺𑀯𑀺𑀪𑀸𑀕𑀁. 𑀧𑀭𑁂𑀳𑀺 𑀅𑀦𑀼𑀲𑁆𑀲𑀸𑀳𑀺𑀢𑁄 𑀲𑀭𑀲𑁂𑀦𑁂𑀯 𑀧𑀯𑀢𑁆𑀢𑀫𑀸𑀦𑁄. 𑀧𑀭𑁂𑀳𑀺 𑀓𑀸𑀭𑀺𑀬𑀫𑀸𑀦𑁄𑀢𑀺 𑀧𑀭𑁂𑀳𑀺 𑀉𑀲𑁆𑀲𑀸𑀳𑀺𑀢𑁄 𑀳𑀼𑀢𑁆𑀯𑀸 𑀓𑀬𑀺𑀭𑀫𑀸𑀦𑁄. 𑀚𑀸𑀦𑀦𑁆𑀢𑁄𑀧𑀻𑀢𑀺 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀚𑀸𑀦𑀦𑁆𑀢𑁄𑀧𑀺. 𑀓𑀫𑁆𑀫𑀫𑁂𑀯 𑀚𑀸𑀦𑀦𑁆𑀢𑁄𑀢𑀺 𑀢𑀤𑀸 𑀅𑀢𑁆𑀢𑀦𑀸 𑀓𑀭𑀺𑀬𑀫𑀸𑀦𑀓𑀫𑁆𑀫𑀫𑁂𑀯 𑀚𑀸𑀦𑀦𑁆𑀢𑁄.

𑀘𑀢𑀽𑀲𑀽𑀢𑀺 ‘‘𑀲𑀸𑀫𑀁 𑀯𑀸 𑀧𑀭𑁂 𑀯𑀸 𑀲𑀫𑁆𑀧𑀚𑀸𑀦𑁄 𑀯𑀸 𑀅𑀲𑀫𑁆𑀧𑀚𑀸𑀦𑁄 𑀯𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼. 𑀬𑀣𑀸𑀯𑀼𑀢𑁆𑀢𑁂 𑀏𑀓𑀽𑀦𑀯𑀻𑀲𑀢𑀺𑀘𑁂𑀢𑀦𑀸𑀥𑀫𑁆𑀫𑁂 𑀅𑀲𑀗𑁆𑀔𑀸𑀭𑀺𑀓𑀲𑀲𑀗𑁆𑀔𑀸𑀭𑀺𑀓𑀪𑀸𑀯𑁂𑀦 𑀲𑀫𑁆𑀧𑀚𑀸𑀦𑀓𑀢𑀸𑀲𑀫𑁆𑀧𑀚𑀸𑀦𑀓𑀢𑀪𑀸𑀯𑁂𑀦 𑀘𑀢𑀼𑀕𑀼𑀡𑁂 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀙𑀲𑀢𑁆𑀢𑀢𑀺 𑀤𑁆𑀯𑁂𑀲𑀢𑀸 𑀘𑁂𑀢𑀦𑀸𑀥𑀫𑁆𑀫𑀸’’𑀢𑀺. 𑀬𑁂𑀲𑀁 𑀲𑀳𑀚𑀸𑀢𑀓𑁄𑀝𑀺 𑀮𑀩𑁆𑀪𑀢𑀺, 𑀢𑁂𑀲𑀫𑁆𑀧𑀺 𑀉𑀧𑀦𑀺𑀲𑁆𑀲𑀬𑀓𑁄𑀝𑀺 𑀮𑀩𑁆𑀪𑀢𑁂𑀯𑀸𑀢𑀺 ‘‘𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀅𑀦𑀼𑀧𑀢𑀺𑀢𑀸’’𑀢𑀺𑀇𑀘𑁆𑀘𑁂𑀯 𑀯𑀼𑀢𑁆𑀢𑀸. 𑀢𑁂𑀢𑀺 𑀬𑀣𑀸𑀯𑀼𑀢𑁆𑀢𑀸 𑀲𑀩𑁆𑀩𑁂𑀧𑀺 𑀥𑀫𑁆𑀫𑀸. 𑀲𑁄 𑀓𑀸𑀬𑁄 𑀦 𑀳𑁄𑀢𑀻𑀢𑀺 𑀏𑀢𑁆𑀣 𑀧𑀲𑀸𑀤𑀓𑀸𑀬𑁄𑀧𑀺 𑀕𑀳𑁂𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀬𑀲𑁆𑀫𑀺𑀁 𑀓𑀸𑀬𑁂 𑀲𑀢𑀻’’𑀢𑀺𑀆𑀤𑀺. 𑀲𑁄 𑀓𑀸𑀬𑁄 𑀦 𑀳𑁄𑀢𑀻𑀢𑀺 𑀲𑁄 𑀓𑀸𑀬𑁄 𑀧𑀘𑁆𑀘𑀬𑀦𑀺𑀭𑁄𑀥𑁂𑀦 𑀦 𑀳𑁄𑀢𑀺. 𑀯𑀸𑀘𑀸𑀢𑀺 𑀲𑀤𑁆𑀤𑀯𑀸𑀘𑀸. 𑀫𑀦𑁄𑀢𑀺 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁. 𑀇𑀤𑀸𑀦𑀺 𑀓𑀫𑁆𑀫𑀯𑀲𑁂𑀦𑁂𑀯 𑀬𑁄𑀚𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀲𑁂𑀯 𑀦𑀬𑁄 ‘‘𑀯𑀸𑀘𑀸𑀧𑀺 𑀤𑁆𑀯𑀸𑀭𑀪𑀽𑀢𑀸 𑀫𑀦𑁄𑀧𑀺 𑀤𑁆𑀯𑀸𑀭𑀪𑀽𑀢𑁄’’𑀢𑀺. 𑀔𑀻𑀡𑀸𑀲𑀯𑀲𑁆𑀲 𑀓𑀣𑀁 𑀓𑀸𑀬𑁄 𑀦 𑀳𑁄𑀢𑀺, 𑀦 𑀢𑀲𑁆𑀲 𑀓𑀸𑀬𑀓𑀫𑁆𑀫𑀸𑀥𑀺𑀝𑁆𑀞𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀯𑀺𑀧𑀸𑀓𑀢𑁆𑀢𑀸𑀢𑀺 𑀅𑀯𑀺𑀧𑀸𑀓𑀥𑀫𑁆𑀫𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀓𑀸𑀬𑁄 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀅𑀓𑀫𑁆𑀫𑀓𑀭𑀡𑀪𑀸𑀯𑀢𑁄.

𑀢𑀦𑁆𑀢𑀺 𑀓𑀫𑁆𑀫𑀁. 𑀔𑁂𑀢𑁆𑀢𑀁 𑀦 𑀳𑁄𑀢𑀻𑀢𑀺 𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀯𑀺𑀭𑀼𑀳𑀦𑀝𑁆𑀞𑀸𑀦𑀢𑁆𑀢𑀸. 𑀯𑀺𑀭𑀼𑀳𑀦𑀝𑁆𑀞𑀸𑀦𑀸𑀤𑀬𑁄 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀯𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀦 𑀳𑁄𑀢𑀻’’𑀢𑀺. 𑀓𑀸𑀭𑀡𑀝𑁆𑀞𑁂𑀦𑀸𑀢𑀺 𑀆𑀥𑀸𑀭𑀪𑀽𑀢𑀓𑀸𑀭𑀡𑀪𑀸𑀯𑁂𑀦. 𑀲𑀜𑁆𑀘𑁂𑀢𑀦𑀸𑀫𑀽𑀮𑀓𑀦𑁆𑀢𑀺 𑀲𑀜𑁆𑀘𑁂𑀢𑀦𑀸𑀦𑀺𑀫𑀺𑀢𑁆𑀢𑀁. 𑀯𑀺𑀭𑀼𑀳𑀦𑀸𑀤𑀻𑀦𑀁 𑀅𑀢𑁆𑀣𑀸𑀦𑀦𑁆𑀢𑀺 ‘‘𑀯𑀺𑀭𑀼𑀳𑀦𑀝𑁆𑀞𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀦𑀁 𑀅𑀢𑁆𑀣𑀸𑀦𑀁. 𑀇𑀫𑀺𑀦𑀸 𑀯𑀺𑀭𑀼𑀳𑀦𑀸𑀤𑀺𑀪𑀸𑀯𑁂𑀦 𑀯𑁂𑀤𑀦𑀸 ‘‘𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸’’𑀢𑀺 𑀓𑀣𑀺𑀢𑀸, 𑀦𑀬𑀺𑀥 𑀚𑁂𑀝𑁆𑀞𑀮𑀓𑁆𑀔𑀡𑀁 𑀲𑀼𑀔𑀤𑀼𑀓𑁆𑀔𑀁 𑀦𑀺𑀧𑁆𑀧𑀬𑁄𑀚𑀓𑀲𑁆𑀲 𑀲𑀼𑀔𑀲𑁆𑀲 𑀤𑀼𑀓𑁆𑀔𑀲𑁆𑀲 𑀘 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀧𑁂𑀢𑁆𑀣 𑀲𑀼𑀔𑀲𑀡𑁆𑀳𑀲𑀪𑀸𑀯𑀯𑀺𑀧𑀸𑀓𑀪𑀽𑀢𑀸 𑀯𑁂𑀤𑀦𑀸𑀯.

𑀪𑀽𑀫𑀺𑀚𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.