𑁫. 𑀅𑀓𑁆𑀓𑁄𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭𑁧. 𑀓𑁄𑀥𑁄 𑀢𑀼𑀫𑁆𑀳𑁂 𑀫𑀸 𑀅𑀪𑀺𑀪𑀯𑀻𑀢𑀺 𑀏𑀢𑁆𑀣 𑀓𑁄𑀥𑁂𑀦 𑀅𑀦𑀪𑀺𑀪𑀯𑀦𑀻𑀬𑀢𑁆𑀢𑀁 𑀔𑀦𑁆𑀢𑀺𑀫𑁂𑀢𑁆𑀢𑀸𑀓𑀭𑀼𑀡𑀸𑀤𑀺𑀢𑀧𑁆𑀧𑀝𑀺𑀧𑀓𑁆𑀔𑀥𑀫𑁆𑀫𑀧𑀭𑀺𑀩𑁆𑀭𑀽𑀳𑀦𑁂𑀦. 𑀢𑀣𑀸 𑀳𑀺 𑀢𑀁𑀲𑀫𑀗𑁆𑀕𑀺𑀦𑁄 𑀓𑁄𑀥𑁄 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑀆𑀳 ‘‘𑀢𑀼𑀫𑁆𑀳𑁂𑀯 𑀓𑁄𑀥𑀁 𑀅𑀪𑀺𑀪𑀯𑀣. 𑀓𑀼𑀚𑁆𑀛𑀦𑁆𑀢𑀸𑀦𑀁 𑀫𑀸 𑀧𑀝𑀺𑀓𑀼𑀚𑁆𑀛𑀺𑀢𑁆𑀣𑀸’’𑀢𑀺. 𑀧𑀝𑀺𑀧𑀤𑀸𑀢𑀺 𑀏𑀲𑀸 𑀧𑀝𑀺𑀧𑀢𑁆𑀢𑀺. 𑀫𑁂𑀢𑁆𑀢𑀸𑀢𑀺 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸 𑀫𑁂𑀢𑁆𑀢𑀸. 𑀢𑀤𑀼𑀧𑀘𑀸𑀭𑁄 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑁄. 𑀦 𑀯𑀺𑀳𑀺𑀁𑀲𑀢𑀺 𑀓𑀺𑀜𑁆𑀘𑀺 𑀏𑀢𑀸𑀬𑀸𑀢𑀺 𑀅𑀯𑀺𑀳𑀺𑀁𑀲𑀸. 𑀓𑀭𑀼𑀡𑀸𑀢𑀺 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀓𑀭𑀼𑀡𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀤𑀼𑀧𑀘𑀸𑀭𑁄 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄. 𑀮𑀸𑀫𑀓𑀚𑀦𑀦𑁆𑀢𑀺 𑀔𑀦𑁆𑀢𑀺𑀆𑀤𑀻𑀲𑀼 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀪𑀸𑀯𑁂𑀦 𑀕𑀸𑀭𑀬𑁆𑀳𑀲𑀫𑀸𑀘𑀸𑀭𑀲𑀫𑀸𑀬𑁄𑀕𑁂𑀦 𑀘 𑀦𑀺𑀳𑀻𑀦𑀁 𑀚𑀦𑀁. 𑀧𑀘𑁆𑀘𑀬𑀧𑀭𑀺𑀲𑀼𑀤𑁆𑀥𑀺𑀬𑀸 𑀓𑁄𑀥𑁄 𑀅𑀪𑀺𑀫𑀤𑁆𑀤𑀫𑀸𑀦𑁄 𑀧𑀼𑀕𑁆𑀕𑀮𑀁 𑀅𑀪𑀺𑀫𑀤𑁆𑀤𑀢𑀺, 𑀢𑀲𑁆𑀲 𑀲𑁄 𑀧𑀝𑀺𑀲𑀗𑁆𑀔𑀸𑀦𑀪𑀸𑀯𑀦𑀸𑀩𑀮𑁂𑀳𑀺 𑀲𑀫𑁆𑀫𑀤𑁂𑀯 𑀧𑀳𑀸𑀢𑀩𑁆𑀩𑁄𑀢𑀺.

𑀅𑀓𑁆𑀓𑁄𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀲𑀓𑁆𑀓𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸

𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬 𑀲𑀕𑀸𑀣𑀸𑀯𑀕𑁆𑀕𑀯𑀡𑁆𑀡𑀦𑀸.

𑀧𑀞𑀫𑁄 𑀪𑀸𑀕𑁄 𑀦𑀺𑀝𑁆𑀞𑀺𑀢𑁄.