𑁧𑁧. 𑀲𑀓𑁆𑀓𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧. 𑀲𑀼𑀯𑀻𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁭. 𑀅𑀪𑀺𑀬𑀁𑀲𑀽𑀢𑀺 𑀬𑀼𑀤𑁆𑀥𑀲𑀚𑁆𑀚𑀸𑀪𑀺𑀫𑀼𑀔𑀸 𑀳𑀼𑀢𑁆𑀯𑀸 𑀕𑀘𑁆𑀙𑀺𑀁𑀲𑀼. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀅𑀲𑀼𑀭𑀸𑀦𑀁 𑀅𑀪𑀺𑀬𑀸𑀦𑁂 𑀅𑀬𑀁 𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸 𑀅𑀦𑀼𑀧𑀼𑀩𑁆𑀩𑀢𑁄 𑀓𑀣𑀸. 𑀢𑁂𑀢𑁆𑀢𑀺𑀁𑀲 𑀧𑀼𑀭𑀺𑀲𑁂 𑀕𑀳𑁂𑀢𑁆𑀯𑀸𑀢𑀺 𑀢𑁂𑀢𑁆𑀢𑀺𑀁𑀲 𑀧𑀼𑀭𑀺𑀲𑁂 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀲𑀳𑀸𑀬𑀪𑀽𑀢𑁂 𑀕𑀳𑁂𑀢𑁆𑀯𑀸. ‘‘𑀬𑀸𑀯𑀚𑀻𑀯𑀁 𑀫𑀸𑀢𑀸𑀧𑀺𑀢𑀼𑀪𑀭𑁄 𑀅𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 𑀲𑀫𑀸𑀤𑀺𑀦𑁆𑀦𑀸𑀦𑀺 𑀲𑀢𑁆𑀢 𑀯𑀢𑀧𑀤𑀸𑀦𑀺 𑀧𑀽𑀭𑁂𑀢𑁆𑀯𑀸. 𑀅𑀥𑀺𑀕𑀡𑁆𑀳𑀦𑁆𑀢𑀁 𑀅𑀪𑀺𑀪𑀯𑀦𑁆𑀢𑀁. 𑀧𑀼𑀢𑁆𑀢𑀳𑀢𑀸𑀬𑀸𑀢𑀺 𑀳𑀢𑀧𑀼𑀢𑁆𑀢𑀸𑀬. 𑀲𑀸 𑀲𑀼𑀭𑀸 𑀦 𑀳𑁄𑀢𑀺, 𑀦 𑀲𑀼𑀭𑀁 𑀧𑀺𑀯𑀺𑀫𑁆𑀳𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁄 𑀧𑀝𑁆𑀞𑀸𑀬𑀸𑀢𑀺 ‘‘𑀦 𑀲𑀼𑀭𑀸’’𑀢𑀺 𑀯𑀼𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬. ‘‘𑀦 𑀲𑀼𑀭𑀦𑁆𑀢𑀺 𑀦 𑀤𑀺𑀩𑁆𑀩𑀦𑁆𑀢𑀻𑀢𑀺 𑀅𑀲𑀼𑀭𑀸’’𑀢𑀺 𑀓𑁂𑀘𑀺. 𑀳𑁂𑀝𑁆𑀞𑀺𑀫𑀢𑀮𑁂 𑀅𑀦𑁆𑀢𑁄𑀪𑀽𑀫𑀺𑀬𑀁 𑀆𑀬𑀸𑀫𑀢𑁄 𑀤𑀲𑀬𑁄𑀚𑀦𑀲𑀳𑀲𑁆𑀲𑀁.

𑀉𑀭𑀕𑀸𑀤𑀺𑀲𑀳𑀘𑀭𑀺𑀢𑀸𑀦𑀺 𑀞𑀸𑀦𑀸𑀦𑀺 𑀉𑀭𑀕𑀸𑀤𑀻𑀦𑀻𑀢𑀺 𑀆𑀳 ‘‘𑀉𑀭𑀕𑀸𑀤𑀻𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀽’’𑀢𑀺. 𑀧𑀞𑀫𑀸𑀮𑀺𑀦𑁆𑀤𑁂𑀢𑀺 𑀧𑀞𑀫𑁂 𑀧𑀭𑀺𑀪𑀡𑁆𑀟𑁂. 𑀧𑀜𑁆𑀘𑀬𑁄𑀚𑀦𑀲𑀳𑀲𑁆𑀲𑀯𑀺𑀢𑁆𑀣𑀸𑀭𑀧𑀼𑀣𑀼𑀩𑀳𑀮𑀸𑀳𑀺 𑀲𑀺𑀦𑁂𑀭𑀼𑀲𑁆𑀲 𑀘𑀢𑀽𑀲𑀼𑀧𑀺 𑀧𑀲𑁆𑀲𑁂𑀲𑀼 𑀘𑀢𑁆𑀢𑀸𑀭𑁄 𑀧𑀭𑀺𑀪𑀡𑁆𑀟𑀸. 𑀲𑀺𑀦𑁂𑀭𑀼𑀲𑁆𑀲 𑀳𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀲𑁆𑀲𑁂 𑀬𑀼𑀕𑀦𑁆𑀥𑀭𑀸𑀤𑀻𑀲𑀼 𑀧𑀜𑁆𑀘𑀲𑀢𑀧𑀭𑀺𑀢𑁆𑀢𑀤𑀻𑀧𑀧𑀭𑀺𑀯𑀸𑀭𑁂 𑀫𑀳𑀸𑀤𑀻𑀧𑁂 𑀘 𑀮𑀪𑀺𑀢𑀩𑁆𑀩𑀲𑁆𑀲 𑀫𑀳𑀢𑁄 𑀅𑀢𑁆𑀣𑀲𑁆𑀲 𑀯𑀲𑁂𑀦 𑀫𑀳𑀢𑁆𑀣𑀸. 𑀓𑀼𑀧𑀺𑀢𑀸𑀯𑀺𑀮𑀘𑀺𑀢𑁆𑀢𑀸𑀢𑀺 𑀓𑀼𑀧𑀺𑀢𑁂𑀦 𑀓𑁄𑀧𑁂𑀦 𑀆𑀓𑀼𑀮𑀘𑀺𑀢𑁆𑀢𑀸. 𑀬𑀼𑀤𑁆𑀥𑁂𑀲𑀻𑀢𑀺 𑀬𑀼𑀤𑁆𑀥𑁂𑀲𑀺𑀦𑁄. 𑀲𑁂𑀲𑁂𑀲𑀽𑀢𑀺 𑀲𑁂𑀲𑁂𑀲𑀼 𑀧𑀭𑀺𑀪𑀡𑁆𑀟𑁂𑀲𑀼. 𑀲𑁂𑀲𑀸𑀢𑀺 𑀲𑀼𑀧𑀡𑁆𑀡𑀸𑀤𑀬𑁄.

𑀯𑀫𑁆𑀫𑀺𑀓𑀫𑀓𑁆𑀔𑀺𑀓𑀸𑀢𑀺 𑀲𑀧𑀓𑁆𑀔𑀺𑀓𑀉𑀧𑀘𑀺𑀓𑀸. 𑀑𑀲𑀓𑁆𑀓𑀺𑀢𑁆𑀯𑀸𑀢𑀺 𑀧𑀺𑀝𑁆𑀞𑀺𑀪𑀸𑀕𑁂𑀦 𑀦𑀺𑀯𑀢𑁆𑀢𑀺𑀢𑁆𑀯𑀸.

𑀧𑀫𑀸𑀤𑀁 𑀆𑀧𑀸𑀤𑁂𑀲𑀻𑀢𑀺 𑀲𑀓𑁆𑀓𑀲𑁆𑀲 𑀆𑀡𑀸𑀬 𑀧𑀫𑀸𑀤𑀁 𑀆𑀧𑀚𑁆𑀚𑀺. 𑀲𑀝𑁆𑀞𑀺𑀬𑁄𑀚𑀦𑀁 𑀯𑀺𑀢𑁆𑀣𑀸𑀭𑁂𑀦. 𑀲𑀼𑀯𑀡𑁆𑀡𑀫𑀳𑀸𑀯𑀻𑀣𑀺𑀦𑁆𑀢𑀺 𑀲𑀼𑀯𑀡𑁆𑀡𑀫𑀬𑀪𑀽𑀫𑀺𑀚𑀕𑀢𑀺𑀯𑀻𑀣𑀺𑀁.

𑀅𑀦𑀼𑀝𑁆𑀞𑀳𑀦𑁆𑀢𑁄𑀢𑀺 𑀉𑀝𑁆𑀞𑀸𑀦𑀁 𑀓𑀸𑀬𑀺𑀓𑀯𑀻𑀭𑀺𑀬𑀁 𑀅𑀓𑀭𑁄𑀦𑁆𑀢𑁄. 𑀅𑀯𑀸𑀬𑀫𑀦𑁆𑀢𑁄𑀢𑀺 𑀯𑀸𑀬𑀸𑀫𑀁 𑀘𑁂𑀢𑀲𑀺𑀓𑀯𑀻𑀭𑀺𑀬𑀁 𑀅𑀓𑀭𑁄𑀦𑁆𑀢𑁄. 𑀓𑀺𑀜𑁆𑀘𑀺 𑀓𑀺𑀘𑁆𑀘𑀦𑁆𑀢𑀺 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀪𑁂𑀤𑀁 𑀅𑀜𑁆𑀜𑀢𑀭𑀁 𑀓𑀺𑀘𑁆𑀘𑀁 𑀓𑀢𑁆𑀢𑀩𑁆𑀩𑀓𑀫𑁆𑀫𑀁. 𑀯𑀭𑀦𑁆𑀢𑀺 𑀧𑀯𑀭𑀁. 𑀢𑁂𑀦𑀸𑀳 ‘‘𑀉𑀢𑁆𑀢𑀫’’𑀦𑁆𑀢𑀺. 𑀢𑀜𑁆𑀘 𑀔𑁄 𑀓𑀲𑀺𑀢𑀩𑁆𑀩𑀝𑁆𑀞𑀸𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀑𑀓𑀸𑀲’’𑀦𑁆𑀢𑀺. 𑀓𑀫𑁆𑀫𑀁 𑀅𑀓𑀢𑁆𑀯𑀸𑀢𑀺 𑀓𑀺𑀜𑁆𑀘𑀺𑀧𑀺 𑀚𑀻𑀯𑀺𑀢𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁 𑀅𑀓𑀢𑁆𑀯𑀸. 𑀚𑀻𑀯𑀺𑀢𑀝𑁆𑀞𑀸𑀦𑀁 𑀦𑀸𑀫𑀸𑀢𑀺 𑀢𑀲𑁆𑀲 𑀚𑀻𑀯𑀺𑀢𑀲𑁆𑀲 𑀳𑁂𑀢𑀼 𑀦𑀸𑀫. 𑀦𑀺𑀩𑁆𑀩𑀸𑀦𑀲𑁆𑀲 𑀫𑀕𑁆𑀕𑁄𑀢𑀺 𑀦𑀺𑀩𑁆𑀩𑀸𑀦𑀲𑁆𑀲 𑀅𑀥𑀺𑀕𑀫𑀼𑀧𑀸𑀬𑀪𑀽𑀢𑁄 𑀫𑀕𑁆𑀕𑁄.

𑀲𑀼𑀯𑀻𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀼𑀲𑀻𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁮. 𑀅𑀦𑁆𑀢𑀭𑁂𑀢𑀺 𑀅𑀩𑁆𑀪𑀦𑁆𑀢𑀭𑁂. 𑀏𑀯𑀁𑀦𑀸𑀫𑀓𑀦𑁆𑀢𑀺 ‘‘𑀲𑀼𑀲𑀻𑀫𑁄’’𑀢𑀺 𑀏𑀯𑀁𑀦𑀸𑀫𑀓𑀁. 𑀏𑀓𑀁 𑀧𑀼𑀢𑁆𑀢𑀫𑁂𑀯 𑀅𑀜𑁆𑀜𑀢𑀭𑀁 𑀅𑀢𑁆𑀢𑀦𑁄 𑀧𑀼𑀢𑁆𑀢𑀫𑁂𑀯.

𑀲𑀼𑀲𑀻𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀥𑀚𑀕𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁯. 𑀲𑀫𑀼𑀧𑀩𑁆𑀬𑀽𑀴𑁆𑀳𑁄𑀢𑀺 𑀉𑀪𑀺𑀦𑁆𑀦𑀁 𑀲𑀳 𑀏𑀯 𑀲𑀫𑀸𑀕𑀫𑁄, 𑀪𑀼𑀲𑀁 𑀯𑀸 𑀩𑁆𑀬𑀽𑀴𑁆𑀳𑁄𑀢𑀺 𑀅𑀢𑁆𑀣𑁄. 𑀪𑀼𑀲𑀸 𑀧𑀦𑀲𑁆𑀲 𑀩𑁆𑀬𑀽𑀴𑁆𑀳𑀢𑀸 𑀤𑁆𑀯𑀺𑀦𑁆𑀦𑀁 𑀲𑁂𑀦𑀸𑀦𑀁 𑀲𑀫𑀸𑀕𑀦𑁆𑀢𑁆𑀯𑀸 𑀲𑀫𑁆𑀧𑀺𑀡𑁆𑀟𑀺𑀢𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀲𑀫𑁆𑀧𑀺𑀡𑁆𑀟𑀺𑀢𑁄 𑀭𑀸𑀲𑀺𑀪𑀽𑀢𑁄’’𑀢𑀺. 𑀧𑀘𑁆𑀙𑀺𑀫𑀦𑁆𑀢𑁄𑀢𑀺 𑀭𑀣𑀧𑀜𑁆𑀚𑀭𑀲𑁆𑀲 𑀧𑀭𑀦𑁆𑀢𑁄 𑀧𑀘𑁆𑀙𑀺𑀫𑀦𑁆𑀢𑁄 𑀧𑀘𑁆𑀙𑀺𑀫𑀓𑁄𑀝𑁆𑀞𑀸𑀲𑁄. 𑀭𑀣𑀲𑀦𑁆𑀥𑀺𑀢𑁄𑀢𑀺 𑀭𑀣𑀧𑀜𑁆𑀚𑀭𑀲𑁆𑀲 𑀓𑀼𑀩𑁆𑀩𑀭𑁂𑀦 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑀦𑀝𑁆𑀞𑀸𑀦𑀢𑁄. 𑀢𑀤𑁂𑀯 𑀧𑀫𑀸𑀡𑀦𑁆𑀢𑀺 𑀢𑀤𑁂𑀯 ‘‘𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀸𑀬𑀸𑀫𑁄’’𑀢𑀺 𑀯𑀼𑀢𑁆𑀢𑀧𑁆𑀧𑀫𑀸𑀡𑀫𑁂𑀯. 𑀤𑀺𑀕𑀼𑀡𑀁 𑀓𑀢𑁆𑀯𑀸𑀢𑀺 ‘‘𑀧𑀘𑁆𑀙𑀺𑀫𑀦𑁆𑀢𑁄 𑀲𑀢𑀬𑁄𑀚𑀦𑁄’’𑀢𑀺𑀆𑀤𑀺𑀦𑀸 𑀤𑀺𑀕𑀼𑀡𑀁 𑀓𑀢𑁆𑀯𑀸. 𑀘𑀦𑁆𑀤𑀫𑀡𑁆𑀟𑀮𑀲𑀽𑀭𑀺𑀬𑀫𑀡𑁆𑀟𑀮𑀓𑀺𑀗𑁆𑀓𑀺𑀡𑀺𑀓𑀚𑀸𑀮𑀸𑀤𑀺𑀪𑁂𑀤𑀲𑁆𑀲 𑀲𑁂𑀲𑀸𑀮𑀗𑁆𑀓𑀸𑀭𑀲𑁆𑀲. 𑀧𑀲𑁆𑀲𑀦𑁆𑀢𑀸𑀦𑀁 𑀤𑁂𑀯𑀸𑀦𑀁. 𑀭𑀸𑀚𑀸 𑀦𑁄𑀢𑀺 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀤𑁂𑀯𑀲𑁂𑀝𑁆𑀞𑁄. 𑀤𑀼𑀢𑀺𑀬𑀁 𑀆𑀲𑀦𑀁 𑀮𑀪𑀢𑀻𑀢𑀺 𑀲𑀓𑁆𑀓𑁂 𑀦𑀺𑀲𑀺𑀦𑁆𑀦𑁂 𑀢𑀲𑁆𑀲 𑀅𑀦𑀦𑁆𑀢𑀭𑀁 𑀤𑀼𑀢𑀺𑀬𑀁 𑀆𑀲𑀦𑀁 𑀮𑀪𑀢𑀺. 𑀢𑀲𑁆𑀫𑀸 𑀤𑁂𑀯𑀲𑁂𑀝𑁆𑀞𑀢𑀸𑀬 𑀲𑀓𑁆𑀓𑁄 𑀯𑀺𑀬 𑀕𑀸𑀭𑀯𑀝𑁆𑀞𑀸𑀦𑀺𑀬𑁄, 𑀬𑀢𑁄 𑀲𑀓𑁆𑀓𑁄 ‘‘𑀢𑀲𑁆𑀲 𑀥𑀚𑀕𑁆𑀕𑀁 𑀉𑀮𑁆𑀮𑁄𑀓𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀅𑀲𑀼𑀭𑁂𑀳𑀺 𑀧𑀭𑀸𑀚𑀺𑀢𑁄𑀢𑀺 𑀅𑀲𑀼𑀭𑁂𑀳𑀺 𑀧𑀭𑀸𑀚𑀬𑀁 𑀆𑀧𑀸𑀤𑀺𑀢𑁄. 𑀭𑀚𑀥𑀚𑀁 𑀤𑀺𑀲𑁆𑀯𑀸𑀢𑀺 𑀧𑀭𑀲𑁂𑀦𑀸𑀬 𑀉𑀧𑀕𑀘𑁆𑀙𑀦𑁆𑀢𑀺𑀬𑀸 𑀉𑀝𑁆𑀞𑀺𑀢𑀭𑀚𑀫𑀢𑁆𑀢𑀫𑁆𑀧𑀺 𑀤𑀺𑀲𑁆𑀯𑀸 𑀞𑀺𑀢𑁄𑀧𑀺 𑀢𑀁 𑀭𑀚𑀥𑀚𑀁 𑀤𑀺𑀲𑁆𑀯𑀸 𑀪𑀻𑀭𑀼𑀪𑀸𑀯𑁂𑀦 𑀧𑀮𑀸𑀬𑀦𑀥𑀫𑁆𑀫𑁄.

𑀬𑀲𑁆𑀲 𑀥𑀚𑀕𑁆𑀕𑀧𑀭𑀺𑀢𑁆𑀢𑀲𑁆𑀲. 𑀆𑀦𑀼𑀪𑀸𑀯𑁄 𑀯𑀢𑁆𑀢𑀢𑀺 𑀅𑀲𑀫𑁆𑀫𑀼𑀔𑀻𑀪𑀽𑀢𑀸𑀳𑀺𑀧𑀺 𑀤𑁂𑀯𑀢𑀸𑀳𑀺 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀢𑁄. 𑀘𑁄𑀭𑀪𑀬𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀭𑁄𑀕𑀪𑀬𑀸𑀤𑀻𑀦𑀜𑁆𑀘𑁂𑀯 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀘 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄 𑀯𑀺𑀥𑀺𑀦𑀸 𑀪𑀸𑀯𑀺𑀢𑁂 𑀧𑀭𑀺𑀢𑁆𑀢𑀲𑁆𑀲 𑀅𑀢𑁆𑀣𑁂 𑀉𑀧𑀘𑀸𑀭𑀚𑁆𑀛𑀸𑀦𑀸𑀤𑀻𑀦𑀫𑁆𑀧𑀺 𑀇𑀚𑁆𑀛𑀦𑀢𑁄.

𑀤𑀻𑀖𑀯𑀸𑀧𑀻𑀦𑀸𑀫𑀓𑁂 𑀕𑀸𑀫𑁂 𑀘𑁂𑀢𑀺𑀬𑀁 𑀤𑀻𑀖𑀯𑀸𑀧𑀺𑀘𑁂𑀢𑀺𑀬𑀁. 𑀫𑀼𑀤𑁆𑀥𑀯𑁂𑀤𑀺𑀓𑀸 𑀦𑀸𑀫 𑀳𑀫𑁆𑀫𑀺𑀬𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀯𑁂𑀤𑀺𑀓𑀸. 𑀩𑀼𑀤𑁆𑀥𑀕𑀢𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀧𑀭𑀺𑀢𑁆𑀢𑀭𑀓𑁆𑀔𑀕𑀼𑀢𑁆𑀢𑀺𑀁 𑀆𑀳. 𑀧𑀭𑀺𑀢𑁆𑀢𑀲𑁆𑀲 𑀆𑀦𑀼𑀪𑀸𑀯𑁂𑀦 𑀤𑁆𑀯𑁂 𑀇𑀝𑁆𑀞𑀓𑀸…𑀧𑁂… 𑀅𑀝𑁆𑀞𑀁𑀲𑀼. 𑀢𑀣𑀸 𑀳𑀺 𑀢𑀲𑁆𑀫𑀺𑀁 𑀦𑀺𑀲𑁆𑀲𑁂𑀡𑀺𑀬𑀁 𑀞𑀺𑀢𑁂…𑀧𑁂… 𑀅𑀝𑁆𑀞𑀁𑀲𑀽𑀢𑀺.

𑀥𑀚𑀕𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀯𑁂𑀧𑀘𑀺𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁦. ‘‘𑀫𑀳𑀸𑀦𑀼𑀪𑀸𑀯𑀢𑀸𑀬 𑀅𑀲𑀼𑀭𑀸𑀦𑀁 𑀘𑀺𑀢𑁆𑀢𑀯𑁂𑀧𑀦𑁂𑀦 𑀯𑁂𑀧𑀘𑀺𑀢𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀇𑀲𑀻𑀳𑀺 𑀧𑀦 𑀅𑀪𑀬𑀁 𑀬𑀸𑀘𑀺𑀢𑁂 ‘‘𑀪𑀬𑀫𑁂𑀯 𑀤𑀤𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 ‘‘𑀅𑀓𑁆𑀔𑀬𑀁 𑀳𑁄𑀢𑀼 𑀢𑁂 𑀪𑀬’’𑀦𑁆𑀢𑀺 𑀅𑀪𑀺𑀲𑀧𑀯𑀲𑁂𑀦 𑀯𑀼𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀯𑁂𑀧𑀦𑀘𑀺𑀢𑁆𑀢𑀢𑀸𑀬 ‘‘𑀯𑁂𑀧𑀘𑀺𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀬𑀁 𑀮𑁄𑀓𑀺𑀬𑀸 ‘‘𑀧𑀼𑀮𑁄𑀫𑁄’’𑀢𑀺 𑀘 𑀯𑀤𑀦𑁆𑀢𑀺. 𑀦𑀺𑀧𑀸𑀢𑀧𑀤𑀸𑀦𑀺𑀧𑀺 𑀓𑀸𑀦𑀺𑀘𑀺 𑀅𑀢𑁆𑀣𑀯𑀺𑀲𑁂𑀲𑀚𑁄𑀢𑀓𑀸𑀦𑀺 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀦𑀺𑀧𑀸𑀢𑀫𑀢𑁆𑀢’’𑀦𑁆𑀢𑀺 𑀳𑁂𑀢𑀼𑀅𑀢𑁆𑀣𑀸𑀤𑀻𑀦𑀫𑁂𑀢𑁆𑀣 𑀅𑀲𑀫𑁆𑀪𑀯𑀢𑁄. 𑀢𑀦𑁆𑀢𑀺 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁. 𑀓𑀡𑁆𑀞𑁂 𑀧𑀜𑁆𑀘𑀫𑁂𑀳𑀻𑀢𑀺 𑀓𑀡𑁆𑀞𑀩𑀦𑁆𑀥𑀦𑀧𑀜𑁆𑀘𑀫𑁂𑀳𑀺, 𑀯𑀺𑀪𑀢𑁆𑀢𑀺𑀅𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄. 𑀘𑀺𑀢𑁆𑀢𑁂𑀦𑁂𑀯𑀸𑀢𑀺 ‘‘𑀇𑀫𑀁 𑀩𑀦𑁆𑀥𑀸𑀫𑀺, 𑀅𑀬𑀁 𑀩𑀚𑁆𑀛𑀢𑀽’’𑀢𑀺 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑁂𑀦𑁂𑀯. 𑀩𑀚𑁆𑀛𑀢𑀺 𑀩𑀤𑁆𑀥𑁄 𑀳𑁄𑀢𑀺, 𑀅𑀬𑀁 𑀤𑁂𑀯𑀸𑀦𑀼𑀪𑀸𑀯𑁄. 𑀫𑀼𑀘𑁆𑀘𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀤𑀲𑀳𑀻𑀢𑀺 ‘‘𑀘𑁄𑀭𑁄𑀲𑀻’’𑀢𑀺𑀆𑀤𑀺𑀦𑀸 𑀇𑀥 𑀯𑀼𑀢𑁆𑀢𑁂𑀳𑀺 𑀤𑀲𑀳𑀺. 𑀢𑁂𑀦𑀸𑀳 ‘‘𑀇𑀫𑁂𑀳𑀻’’𑀢𑀺. 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀘𑀺𑀭𑀓𑀸𑀮𑀢𑀁 𑀉𑀧𑀸𑀤𑀸𑀬 𑀔𑀼𑀁𑀲𑀦𑀯𑀲𑁂𑀦 𑀯𑀤𑀢𑀺 ‘‘𑀚𑀭𑀲𑀓𑁆𑀓𑀸’’𑀢𑀺. 𑀦 𑀢𑀁 𑀅𑀓𑁆𑀓𑁄𑀲𑀁 𑀫𑀦𑀲𑀺 𑀓𑀭𑁄𑀢𑀺 𑀤𑀻𑀖𑀭𑀢𑁆𑀢𑀁 𑀔𑀦𑁆𑀢𑀺𑀲𑁄𑀭𑀘𑁆𑀘𑁂𑀲𑀼 𑀦𑀺𑀭𑀼𑀴𑁆𑀳𑀅𑀚𑁆𑀛𑀸𑀲𑀬𑀢𑁆𑀢𑀸. 𑀫𑀳𑀸𑀧𑀝𑀺𑀕𑁆𑀕𑀳𑀡𑀦𑁆𑀢𑀺 𑀫𑀳𑀦𑁆𑀢𑀁 𑀉𑀧𑀲𑀫𑀩𑁆𑀬𑀜𑁆𑀚𑀦𑀁. 𑀅𑀲𑁆𑀲𑀸𑀢𑀺 𑀯𑁂𑀧𑀘𑀺𑀢𑁆𑀢𑀲𑁆𑀲.

𑀧𑀝𑀺𑀲𑀁𑀬𑀼𑀚𑁂𑀢𑀺 𑀧𑀝𑀺𑀲𑀢𑁆𑀢𑀼 𑀳𑀼𑀢𑁆𑀯𑀸 𑀲𑀁𑀬𑀼𑀤𑁆𑀥𑀁 𑀓𑀭𑁂𑀬𑁆𑀬. 𑀢𑁂𑀦𑀸𑀳 ‘‘𑀧𑀝𑀺𑀧𑁆𑀨𑀭𑁂𑀬𑁆𑀬𑀸’’𑀢𑀺. 𑀉𑀧𑀲𑀫𑀁…𑀧𑁂… 𑀫𑀜𑁆𑀜𑁂 𑀉𑀧𑀲𑀫𑁂𑀦𑁂𑀯 𑀧𑀘𑁆𑀘𑀢𑁆𑀣𑀺𑀓𑀲𑁆𑀲 𑀦𑀸𑀬𑀓𑀪𑀽𑀢𑀲𑁆𑀲 𑀓𑁄𑀥𑀲𑁆𑀲 𑀧𑀝𑀺𑀲𑁂𑀥𑀦𑀢𑁄. 𑀢𑀸𑀤𑀺𑀲𑁂 𑀳𑀺 𑀓𑁄𑀥𑁄 𑀧𑀝𑀺𑀓𑀺𑀭𑀺𑀬𑀁 𑀅𑀮𑀪𑀦𑁆𑀢𑁄 𑀅𑀦𑀼𑀧𑀸𑀤𑀸𑀦𑁄 𑀯𑀺𑀬 𑀚𑀸𑀢𑀯𑁂𑀤𑁄 𑀯𑀽𑀧𑀲𑀫𑁆𑀫𑀢𑀺. 𑀬𑀤𑀸-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄, 𑀦 𑀓𑀸𑀮𑀢𑁆𑀣𑁄𑀢𑀺 𑀆𑀳 ‘‘𑀬𑀲𑁆𑀫𑀸 𑀢𑀁 𑀫𑀜𑁆𑀜𑀢𑀻’’𑀢𑀺. 𑀢𑀸𑀯𑀤𑁂𑀯 𑀤𑁆𑀯𑁂 𑀕𑀸𑀯𑁄 𑀬𑀼𑀚𑁆𑀛𑀦𑁆𑀢𑁂𑀢𑀺 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀤𑁆𑀯𑀻𑀲𑀼 𑀕𑁄𑀡𑁂𑀲𑀼 𑀬𑀼𑀚𑁆𑀛𑀦𑁆𑀢𑁂𑀲𑀼.

𑀔𑀦𑁆𑀢𑀺𑀢𑁄 𑀉𑀢𑁆𑀢𑀭𑀺𑀢𑀭𑁄 𑀅𑀜𑁆𑀜𑁄 𑀅𑀢𑁆𑀣𑁄 𑀦 𑀯𑀺𑀚𑁆𑀚𑀢𑀺 𑀅𑀦𑀦𑁆𑀢𑀭𑁂𑀯 𑀅𑀲𑁆𑀲 𑀯𑀺𑀭𑁄𑀥𑀁 𑀅𑀦𑀢𑁆𑀣𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑁆𑀲 𑀘𑁂𑀯 𑀲𑀫𑁆𑀧𑀭𑀸𑀬𑀺𑀓𑀲𑁆𑀲 𑀘 𑀲𑀁𑀯𑀺𑀥𑀸𑀦𑀢𑁄. 𑀢𑀁 𑀔𑀦𑁆𑀢𑀺𑀁 𑀧𑀭𑀫𑀁 𑀆𑀳𑀼 𑀲𑁂𑀝𑁆𑀞𑀩𑀮𑀁 𑀯𑀺𑀭𑁄𑀥𑀧𑀘𑁆𑀘𑀬𑀁 𑀅𑀪𑀺𑀪𑀼𑀬𑁆𑀬 𑀧𑀯𑀢𑁆𑀢𑀦𑀢𑁄. 𑀩𑀸𑀮𑀬𑁄𑀕𑀢𑁄 𑀩𑀸𑀮𑁄, 𑀢𑀲𑁆𑀲 𑀩𑀮𑀁 𑀩𑀸𑀮𑀩𑀮𑀁, 𑀅𑀜𑁆𑀜𑀸𑀡𑀦𑁆𑀢𑀺 𑀆𑀳 ‘‘𑀩𑀸𑀮𑀩𑀮𑀁 𑀦𑀸𑀫 𑀅𑀜𑁆𑀜𑀸𑀡𑀩𑀮’’𑀦𑁆𑀢𑀺. 𑀢𑀁 𑀬𑀲𑁆𑀲 𑀩𑀮𑀦𑁆𑀢𑀺 𑀢𑀁 𑀅𑀜𑁆𑀜𑀸𑀡𑀩𑀮𑀁 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀩𑀮𑀁, 𑀅𑀩𑀮𑀫𑁂𑀯 𑀢𑀁 𑀧𑀜𑁆𑀜𑀸𑀩𑀮𑁂𑀦 𑀯𑀺𑀤𑁆𑀥𑀁𑀲𑁂𑀢𑀩𑁆𑀩𑀢𑁄. 𑀧𑀝𑀺𑀯𑀢𑁆𑀢𑀸 𑀦 𑀯𑀺𑀚𑁆𑀚𑀢𑀻𑀢𑀺 𑀥𑀫𑁆𑀫𑀝𑁆𑀞𑀁 𑀧𑀝𑀺𑀧𑁆𑀨𑀭𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀸 𑀦𑀢𑁆𑀣𑀺. 𑀧𑀝𑀺𑀯𑀘𑀦𑀫𑀢𑁆𑀢𑀁 𑀧𑀦 𑀓𑁄𑀘𑀺 𑀯𑀤𑁂𑀬𑁆𑀬𑀸𑀧𑀺, 𑀢𑀁 𑀅𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀝𑀺𑀧𑁆𑀨𑀭𑀺𑀢𑁆𑀯𑀸 𑀯𑀸’’𑀢𑀺𑀆𑀤𑀺𑀫𑀸𑀳. 𑀩𑀸𑀮𑀩𑀮𑀦𑁆𑀢𑀺 ‘‘𑀧𑀝𑀺𑀧𑁆𑀨𑀭𑀺𑀢𑁆𑀯𑀸’’𑀢𑀺 𑀯𑀘𑀦𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀢𑀲𑁆𑀲𑁂𑀯 𑀧𑀼𑀕𑁆𑀕𑀮𑀲𑁆𑀲 𑀧𑀝𑀺𑀓𑀼𑀚𑁆𑀛𑀦𑀓𑀲𑁆𑀲. 𑀦𑀸𑀦𑀢𑁆𑀢𑀸𑀯𑀺𑀢𑀓𑁆𑀓𑀦𑀢𑁄 𑀉𑀪𑀺𑀦𑁆𑀦𑀁 𑀅𑀢𑁆𑀣𑀁. 𑀢𑀺𑀓𑀺𑀘𑁆𑀙𑀦𑁆𑀢𑀦𑁆𑀢𑀺 𑀅𑀦𑀢𑁆𑀣𑀧𑀝𑀺𑀩𑀸𑀳𑀦𑀫𑀼𑀔𑁂𑀦 𑀧𑀡𑁆𑀟𑀺𑀢𑀓𑀺𑀘𑁆𑀘𑀓𑀭𑀡𑁂𑀦 𑀧𑀝𑀺𑀲𑁂𑀥𑁂𑀦𑁆𑀢𑀁. ‘‘𑀩𑀸𑀮𑁄 𑀅𑀬’’𑀦𑁆𑀢𑀺 𑀏𑀯𑀁 𑀧𑀜𑁆𑀜𑀧𑁂𑀢𑀼𑀁 𑀳𑁂𑀢𑀼𑀨𑀮𑀸𑀦𑀁 𑀅𑀦𑀯𑀩𑁄𑀥𑀢𑁄 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀅𑀙𑁂𑀓𑀸𑀢𑀺.

𑀯𑁂𑀧𑀘𑀺𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀼𑀪𑀸𑀲𑀺𑀢𑀚𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁧. ‘‘𑀙𑁂𑀓𑀢𑀸𑀬𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀯𑀢𑁆𑀢𑀼𑀁 𑀙𑁂𑀓𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀓𑀺𑀭𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀕𑀸𑀳𑀦𑁆𑀢𑀺 𑀮𑀤𑁆𑀥𑀺𑀁. 𑀫𑁄𑀘𑁂𑀢𑁆𑀯𑀸𑀢𑀺 𑀬𑀲𑁆𑀲 𑀧𑀼𑀦 ‘‘𑀘𑁄𑀭𑁄’’𑀢𑀺 𑀉𑀢𑁆𑀢𑀭𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀯𑀺𑀫𑁄𑀘𑁂𑀢𑁆𑀯𑀸𑀢𑀺 𑀧𑀞𑀫𑀁 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸. 𑀕𑀭𑀽𑀢𑀺 𑀪𑀸𑀭𑀺𑀬𑀁, 𑀤𑀼𑀓𑁆𑀓𑀭𑀦𑁆𑀢𑀺 𑀅𑀢𑁆𑀣𑁄. 𑀧𑀘𑁆𑀙𑀸𑀢𑀺 ‘‘𑀧𑀭𑀲𑁆𑀲𑀸’’𑀢𑀺 𑀯𑀼𑀢𑁆𑀢𑁄 𑀲𑁄 𑀓𑀺𑀜𑁆𑀘𑀺 𑀧𑀞𑀫𑀁 𑀯𑀤𑀦𑁆𑀢𑁄 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀧𑀯𑁂𑀤𑁂𑀢𑀺 𑀦𑀸𑀫, 𑀢𑀁 𑀬𑀣𑀸𑀲𑀢𑁆𑀢𑀺 𑀯𑀺𑀤𑀺𑀢𑀫𑀦𑁄 𑀢𑀲𑁆𑀲 𑀉𑀢𑁆𑀢𑀭𑀺 𑀯𑀢𑁆𑀢𑀼𑀁 𑀲𑀓𑁆𑀓𑁄𑀢𑀺. 𑀢𑁂𑀦𑀸𑀳 ‘‘𑀧𑀭𑀲𑁆𑀲 𑀯𑀘𑀦𑀁 𑀅𑀦𑀼𑀕𑀦𑁆𑀢𑁆𑀯𑀸 𑀧𑀦 𑀧𑀘𑁆𑀙𑀸 𑀲𑀼𑀔𑀁 𑀯𑀢𑁆𑀢𑀼’’𑀦𑁆𑀢𑀺. 𑀅𑀧𑀺 𑀘 𑀅𑀲𑀼𑀭𑀺𑀦𑁆𑀤𑁂𑀦 ‘‘𑀳𑁄𑀢𑀼, 𑀤𑁂𑀯𑀸𑀦𑀫𑀺𑀦𑁆𑀤, 𑀲𑀼𑀪𑀸𑀲𑀺𑀢𑁂𑀦 𑀚𑀬𑁄’’𑀢𑀺 𑀧𑀞𑀫𑀁 𑀯𑀼𑀢𑁆𑀢𑀁, 𑀯𑀺𑀲𑁂𑀲𑁄 𑀘 𑀧𑀼𑀩𑁆𑀩𑀁 𑀉𑀧𑀦𑁂𑀦𑁆𑀢𑀁 𑀅𑀦𑀼𑀯𑀢𑁆𑀢𑀢𑀺. 𑀯𑀘𑀲𑀺 𑀓𑀼𑀲𑀮𑁄 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀢𑀁 𑀯𑀺𑀲𑁂𑀲𑀁 𑀢𑁂𑀦𑁂𑀯 𑀧𑀼𑀩𑁆𑀩𑀁 𑀉𑀧𑀦𑀬𑀸𑀧𑁂𑀦𑁆𑀢𑁄 𑀉𑀧𑀮𑀸𑀧𑀦𑀯𑀲𑁂𑀦 ‘‘𑀢𑀼𑀫𑁆𑀳𑁂 𑀔𑁆𑀯𑁂𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀧𑀼𑀩𑁆𑀩𑀤𑁂𑀯𑀸𑀢𑀺 𑀲𑀓𑁆𑀓𑀧𑀫𑀼𑀔𑀸𑀬 𑀤𑁂𑀯𑀧𑀭𑀺𑀲𑀸𑀬 𑀮𑁄𑀓𑁂 𑀧𑀼𑀩𑁆𑀩𑁂𑀯 𑀉𑀧𑁆𑀧𑀦𑁆𑀦𑀢𑁆𑀢𑀸 ‘‘𑀧𑀼𑀩𑁆𑀩𑀤𑁂𑀯𑀸’’𑀢𑀺 𑀧𑀲𑀁𑀲𑀯𑀘𑀦𑀁. 𑀯𑁂𑀧𑀘𑀺𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀢𑀼𑀫𑁆𑀳𑁂’’𑀢𑀺 ‘‘𑀧𑀼𑀩𑁆𑀩𑀤𑁂𑀯𑀸’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 ‘‘𑀢𑀼𑀫𑁆𑀳𑀸𑀓𑀁 𑀢𑀸𑀯 𑀧𑀯𑁂𑀡𑀺𑀆𑀕𑀢𑀁 𑀪𑀡𑀣𑀸’’𑀢𑀺 𑀯𑀼𑀢𑁆𑀢𑀁. 𑀕𑀸𑀭𑀯𑀝𑁆𑀞𑀸𑀦𑀺𑀬𑀢𑁆𑀢𑀸 𑀯𑁂𑀧𑀘𑀺𑀢𑁆𑀢𑀺𑀦𑁄 𑀩𑀳𑀼𑀯𑀘𑀦𑀧𑀬𑁄𑀕𑁄. 𑀤𑀡𑁆𑀟𑁂𑀦 𑀅𑀯𑀘𑀸𑀭𑁄 𑀅𑀯𑀘𑀭𑀡𑀁 𑀤𑀡𑁆𑀟𑀸𑀯𑀘𑀭𑁄, 𑀦𑀢𑁆𑀣𑀺 𑀏𑀢𑁆𑀣 𑀯𑀼𑀢𑁆𑀢𑁄 𑀤𑀡𑁆𑀟𑀸𑀯𑀘𑀭𑁄𑀢𑀺 𑀅𑀤𑀡𑁆𑀟𑀸𑀯𑀘𑀭𑀸, 𑀲𑀓𑁆𑀓𑁂𑀦 𑀯𑀼𑀢𑁆𑀢𑀸 𑀕𑀸𑀣𑀸𑀬𑁄.

𑀲𑀼𑀪𑀸𑀲𑀺𑀢𑀚𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀓𑀼𑀮𑀸𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁨. 𑀭𑀣𑀲𑀤𑁆𑀤𑁄𑀢𑀺 𑀭𑀣𑀸𑀮𑀗𑁆𑀓𑀸𑀭𑀪𑀽𑀢𑀸𑀦𑀁 𑀓𑀺𑀗𑁆𑀓𑀺𑀡𑀺𑀓𑀚𑀸𑀮𑀸𑀤𑀻𑀦𑀁 𑀲𑀤𑁆𑀤𑁄. 𑀢𑀣𑀸 𑀥𑀚𑀲𑀤𑁆𑀤𑁄. 𑀆𑀚𑀸𑀦𑀻𑀬𑀲𑀤𑁆𑀤𑁄𑀢𑀺 𑀆𑀚𑀸𑀦𑀻𑀬𑀸𑀦𑀁 𑀳𑀲𑀺𑀢𑀲𑀤𑁆𑀤𑁄 𑀘. 𑀓𑀭𑀼𑀡𑀸𑀲𑀫𑀸𑀯𑀚𑁆𑀚𑀺𑀢𑀳𑀤𑀬𑁄𑀢𑀺 𑀧𑀸𑀡𑀸𑀦𑀁 𑀅𑀦𑀼𑀧𑀭𑁄𑀥𑁂𑀦 𑀧𑀡𑀸𑀫𑀺𑀢𑀘𑀺𑀢𑁆𑀢𑁄. 𑀈𑀲𑀸𑀫𑀼𑀔𑁂𑀦𑀸𑀢𑀺 𑀭𑀣𑀓𑀧𑁆𑀧𑀭𑀫𑀼𑀔𑁂𑀦. 𑀧𑀼𑀜𑁆𑀜𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑁄𑀢𑀺 𑀉𑀴𑀸𑀭𑀁 𑀲𑀼𑀯𑀺𑀧𑀼𑀮𑀁 𑀧𑀼𑀜𑁆𑀜𑀁 𑀧𑀘𑁆𑀘𑀬𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄. 𑀦 𑀲𑀚𑁆𑀚𑀢𑀺 𑀓𑀢𑁆𑀣𑀘𑀺 𑀅𑀧𑁆𑀧𑀝𑀺𑀖𑀝𑁆𑀝𑀦𑁂𑀦 𑀕𑀘𑁆𑀙𑀦𑁆𑀢𑁄. 𑀲𑀺𑀫𑁆𑀩𑀮𑀺𑀯𑀦𑁂𑀦𑀸𑀢𑀺 𑀲𑀺𑀫𑁆𑀩𑀮𑀺𑀯𑀦𑀫𑀚𑁆𑀛𑁂𑀦. 𑀯𑀺𑀪𑀕𑁆𑀕𑀁 𑀦𑀺𑀫𑁆𑀫𑀣𑀺𑀢𑀦𑁆𑀢𑀺 𑀇𑀢𑁄 𑀘𑀺𑀢𑁄 𑀯𑀺𑀪𑀕𑁆𑀕𑀜𑁆𑀘𑁂𑀯 𑀦𑀺𑀭𑀯𑀲𑁂𑀲𑀢𑁄 𑀫𑀣𑀺𑀢𑀜𑁆𑀘 𑀳𑁄𑀢𑀺.

𑀓𑀼𑀮𑀸𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀦𑀤𑀼𑀩𑁆𑀪𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁩. 𑀲𑀼𑀧𑀘𑁆𑀘𑀢𑁆𑀣𑀺𑀓𑁄𑀢𑀺 𑀲𑀼𑀝𑁆𑀞𑀼 𑀅𑀢𑀺𑀯𑀺𑀬 𑀧𑀘𑁆𑀘𑀢𑁆𑀣𑀺𑀓𑁄 𑀧𑀝𑀺𑀲𑀢𑁆𑀢𑀼. 𑀕𑀳𑀺𑀢𑁄𑀲𑀻𑀢𑀺 𑀤𑁂𑀯𑀧𑀸𑀲𑁂𑀦 𑀩𑀦𑁆𑀥𑀺𑀢𑁆𑀯𑀸 𑀕𑀳𑀺𑀢𑁄 𑀅𑀲𑀺. 𑀩𑀤𑁆𑀥𑁄𑀯 𑀅𑀳𑁄𑀲𑀺 𑀲𑀓𑁆𑀓𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦. 𑀘𑁂𑀢𑀺𑀬𑀭𑀸𑀚𑀸 𑀓𑀺𑀭 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀢𑀢𑁄 𑀧𑀼𑀩𑁆𑀩𑁂 𑀓𑁂𑀦𑀘𑀺 𑀅𑀯𑀼𑀢𑁆𑀢𑀧𑀼𑀩𑁆𑀩𑀁 𑀔𑀭𑀫𑀼𑀲𑀸𑀯𑀸𑀤𑀁 𑀅𑀪𑀸𑀲𑀺, 𑀢𑀸𑀯𑀤𑁂𑀯 𑀯𑀺𑀭𑀚𑁆𑀛𑀺𑀢𑁆𑀯𑀸 𑀫𑀳𑀸𑀧𑀣𑀯𑀺𑀬𑀸 𑀯𑀺𑀯𑀭𑁂 𑀤𑀺𑀦𑁂 𑀦𑀺𑀧𑀢𑀺𑀢𑁆𑀯𑀸 𑀅𑀯𑀻𑀘𑀺𑀅𑀕𑁆𑀕𑀺𑀚𑀸𑀮𑀸𑀦𑀫𑀺𑀦𑁆𑀤𑀦𑀫𑀳𑁄𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀘𑁂𑀢𑀺𑀬𑀭𑀜𑁆𑀜𑁄 𑀧𑀸𑀧𑀁 𑀲𑀦𑁆𑀥𑀸𑀬𑀸’’𑀢𑀺. 𑀫𑀳𑀸𑀧𑀸𑀧𑀸𑀦𑀻𑀢𑀺 𑀫𑀳𑀦𑁆𑀢𑀸𑀦𑀺 𑀕𑀭𑀼𑀢𑀭𑀸𑀦𑀺 𑀧𑀸𑀧𑀸𑀦𑀺. 𑀢𑀣𑀸 𑀳𑀺 𑀯𑁂𑀧𑀘𑀺𑀢𑁆𑀢𑀺𑀦𑁄 𑀲𑀧𑀣𑀓𑀭𑀡𑁂 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀏𑀢𑀸𑀦𑀺 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀸𑀦𑀻𑀢𑀺.

𑀦𑀤𑀼𑀩𑁆𑀪𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀯𑁂𑀭𑁄𑀘𑀦𑀅𑀲𑀼𑀭𑀺𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁪. 𑀤𑁆𑀯𑀸𑀭𑀧𑀸𑀮𑀭𑀽𑀧𑀓𑀸𑀦𑀺 𑀯𑀺𑀬𑀸𑀢𑀺 𑀤𑁆𑀯𑀸𑀭𑀧𑀸𑀮𑀸𑀓𑀸𑀭𑁂𑀦 𑀓𑀢𑀧𑀝𑀺𑀫𑀸𑀬𑁄 𑀯𑀺𑀬. 𑀯𑀸𑀬𑀫𑁂𑀣𑁂𑀯, 𑀦 𑀅𑀦𑁆𑀢𑀭𑀸 𑀲𑀁𑀓𑁄𑀘𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀧𑁆𑀨𑀦𑁆𑀦𑀲𑁄𑀪𑀦𑁂𑀲𑀽𑀢𑀺 𑀦𑀺𑀧𑁆𑀨𑀦𑁆𑀦𑀪𑀸𑀯𑁂𑀦 𑀲𑀼𑀦𑁆𑀤𑀭𑁂𑀲𑀼. 𑀲𑀩𑁆𑀩𑁂 𑀳𑀺 𑀅𑀦𑀺𑀧𑁆𑀨𑀦𑁆𑀦𑀸 𑀅𑀢𑁆𑀣𑀸 𑀦 𑀲𑁄𑀪𑀦𑁆𑀢𑀺. 𑀓𑀺𑀘𑁆𑀘𑀚𑀸𑀢𑀸𑀢𑀺 𑀯𑀺𑀧𑁆𑀧𑀓𑀢𑀪𑀸𑀯𑁂𑀦 𑀲𑀜𑁆𑀚𑀸𑀢𑀓𑀺𑀘𑁆𑀘𑀸. 𑀅𑀓𑀺𑀘𑁆𑀘𑀚𑀸𑀢𑁄𑀢𑀺 𑀅𑀲𑀜𑁆𑀚𑀸𑀢𑀓𑀺𑀘𑁆𑀘𑁄 𑀓𑀺𑀘𑁆𑀘𑀭𑀳𑀺𑀢𑁄 𑀦𑀸𑀫 𑀦𑀢𑁆𑀣𑀺 𑀕𑀫𑀦𑀝𑁆𑀞𑀺𑀢𑀲𑀬𑀦𑀦𑀺𑀲𑀚𑁆𑀚𑀸𑀤𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀤𑀼𑀓𑁆𑀔𑀯𑀺𑀦𑁄𑀤𑀦𑀪𑀸𑀯𑀢𑁄. 𑀲𑀁𑀬𑁄𑀕𑀧𑀭𑀫𑀸𑀢𑁆𑀯𑁂𑀯 𑀲𑀫𑁆𑀪𑁄𑀕𑀸𑀢𑀺 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀲𑀁𑀪𑀼𑀜𑁆𑀚𑀺𑀢𑀩𑁆𑀩𑀯𑀢𑁆𑀣𑀽𑀦𑀺 𑀦𑀸𑀫 𑀧𑀓𑀢𑀺𑀬𑀸 𑀯𑀺𑀭𑁄𑀥𑀲𑀻𑀮𑀸𑀦𑀺𑀧𑀺 𑀅𑀲𑀁𑀬𑁄𑀕𑁂𑀦 𑀯𑀸 𑀅𑀲𑀼𑀦𑁆𑀤𑀭𑀸𑀦𑀺𑀧𑀺, 𑀢𑀸𑀦𑀺 𑀅𑀪𑀺𑀲𑀗𑁆𑀔𑀭𑀡𑀧𑀘𑀦𑀲𑀁𑀬𑁄𑀚𑀦𑀧𑀭𑀫𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺 𑀢𑀣𑀸 𑀲𑀢𑀺 𑀲𑀫𑁆𑀪𑁄𑀕𑀸𑀭𑀳𑀪𑀸𑀯𑀽𑀧𑀕𑀫𑀦𑀢𑁄. 𑀢𑁂𑀦𑀸𑀳 ‘‘𑀧𑀸𑀭𑀺𑀯𑀸𑀲𑀺𑀓𑀑𑀤𑀦𑀸𑀤𑀻𑀦𑀻’’𑀢𑀺𑀆𑀤𑀺. 𑀉𑀡𑁆𑀳𑀸𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀬𑀼𑀢𑁆𑀢𑁂 𑀧𑀭𑀺𑀪𑀚𑁆𑀚𑀺𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀯𑁂𑀭𑁄𑀘𑀦𑀅𑀲𑀼𑀭𑀺𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀭𑀜𑁆𑀜𑀸𑀬𑀢𑀦𑀇𑀲𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁫. 𑀚𑀸𑀫𑀸𑀢𑀺𑀓𑀸 𑀯𑀼𑀘𑁆𑀘𑀢𑀺 𑀥𑀻𑀢𑀼𑀧𑀢𑀺, 𑀲𑀲𑀼𑀭𑁄 𑀪𑀭𑀺𑀬𑀸𑀬 𑀧𑀺𑀢𑀸, 𑀢𑀲𑁆𑀫𑀸 𑀇𑀫𑁂 𑀅𑀦𑁆𑀢𑀭𑀯𑀢𑁆𑀢𑀺𑀦𑁄 𑀤𑁆𑀯𑁂 𑀚𑀦𑀸 𑀲𑀓𑁆𑀓𑀯𑁂𑀧𑀘𑀺𑀢𑁆𑀢𑀺𑀦𑁄 𑀲𑀼𑀚𑀸𑀬 𑀯𑀲𑁂𑀦 𑀚𑀸𑀫𑀸𑀢𑀺𑀓𑀲𑀲𑀼𑀭𑀸. ‘‘𑀘𑀺𑀭𑀤𑀺𑀓𑁆𑀔𑀺𑀢𑀸𑀦’’𑀦𑁆𑀢𑀺 𑀤𑀺𑀓𑁆𑀔𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀘𑀺𑀭𑀓𑀸𑀮𑀸𑀦𑀁 𑀯𑀢𑀲𑀫𑀸𑀤𑀸𑀦𑀯𑀲𑁂𑀦 𑀇𑀢𑁄 𑀩𑀸𑀳𑀺𑀭𑀓𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀦𑁆𑀢𑀺 𑀆𑀳 ‘‘𑀘𑀺𑀭𑀲𑀫𑀸𑀤𑀺𑀦𑁆𑀦𑀯𑀢𑀸𑀦’’𑀦𑁆𑀢𑀺. 𑀇𑀢𑁄 𑀧𑀝𑀺𑀓𑁆𑀓𑀫𑀸𑀢𑀺 𑀇𑀢𑁄 𑀬𑀣𑀸𑀞𑀺𑀢𑀝𑁆𑀞𑀸𑀦𑀢𑁄 𑀅𑀧𑁂𑀳𑀺 𑀅𑀧𑀓𑁆𑀓𑀫. 𑀦 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀺𑀦𑁄 𑀕𑀼𑀡𑁂 𑀕𑀸𑀭𑀯𑀬𑁄𑀕𑀢𑁄. 𑀤𑁂𑀯𑀸 𑀳𑀺 𑀬𑁂𑀪𑀼𑀬𑁆𑀬𑁂𑀦 ‘‘𑀫𑀬𑀁 𑀧𑀼𑀩𑁆𑀩𑁂 𑀕𑀼𑀡𑀯𑀦𑁆𑀢𑁂 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀢𑁂𑀲𑀁 𑀑𑀯𑀸𑀤𑁂 𑀞𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀺𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑀸’’𑀢𑀺 𑀕𑀼𑀡𑀯𑀦𑁆𑀢𑁂𑀲𑀼 𑀆𑀤𑀭𑀪𑀸𑀯𑀁 𑀉𑀧𑀝𑁆𑀞𑀧𑁂𑀦𑁆𑀢𑀺.

𑀅𑀭𑀜𑁆𑀜𑀸𑀬𑀢𑀦𑀇𑀲𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀫𑀼𑀤𑁆𑀤𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁬. 𑀘𑀓𑁆𑀓𑀯𑀸𑀴𑀫𑀳𑀸𑀲𑀫𑀼𑀤𑁆𑀤𑀧𑀺𑀝𑁆𑀞𑀺𑀬𑀦𑁆𑀢𑀺 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀧𑀸𑀤𑀲𑀫𑀦𑁆𑀢𑀸 𑀫𑀳𑀸𑀲𑀫𑀼𑀤𑁆𑀤𑀢𑀻𑀭𑀧𑀺𑀝𑁆𑀞𑀺𑀬𑀁. 𑀬𑀣𑁂𑀯 𑀲𑀺𑀦𑁂𑀭𑀼𑀲𑀫𑀻𑀧𑁂 𑀫𑀳𑀸𑀲𑀫𑀼𑀤𑁆𑀤𑁄 𑀅𑀦𑀼𑀧𑀼𑀩𑁆𑀩𑀦𑀺𑀦𑁆𑀦𑁄 𑀅𑀦𑀼𑀧𑀼𑀩𑁆𑀩𑀧𑁄𑀡𑁄 𑀅𑀦𑀼𑀧𑀼𑀩𑁆𑀩𑀧𑀩𑁆𑀪𑀸𑀭𑁄, 𑀏𑀯𑀁 𑀬𑁂𑀪𑀼𑀬𑁆𑀬𑁂𑀦 𑀘𑀓𑁆𑀓𑀯𑀸𑀴𑀧𑀸𑀤𑀲𑀫𑀻𑀧𑁂𑀧𑀺. 𑀢𑁂𑀦𑀸𑀳 ‘‘𑀭𑀚𑀢𑀧𑀝𑁆𑀝𑀯𑀡𑁆𑀡𑁂 𑀯𑀸𑀮𑀼𑀓𑀧𑀼𑀮𑀺𑀦𑁂’’𑀢𑀺. 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀲𑀽𑀢𑀺 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀲𑀼. 𑀅𑀲𑁆𑀲𑀫𑀧𑀤𑁂𑀦𑀸𑀢𑀺 𑀅𑀲𑁆𑀲𑀫𑀧𑀤𑀯𑁂𑀫𑀚𑁆𑀛𑁂𑀦. 𑀏𑀯𑀁 𑀘𑀺𑀦𑁆𑀢𑀬𑀺𑀁𑀲𑀽𑀢𑀺 ‘‘𑀬𑀁 𑀦𑀽𑀦 𑀫𑀬’’𑀦𑁆𑀢𑀺𑀆𑀤𑀺𑀦𑀸 𑀬𑀣𑀸 𑀧𑀸𑀴𑀺𑀬𑀁 𑀆𑀕𑀢𑀁, 𑀏𑀯𑀁 𑀫𑀦𑁆𑀢𑀬𑀺𑀁𑀲𑀼.

𑀇𑀘𑁆𑀙𑀺𑀢𑀓𑀭𑁄𑀢𑀺 𑀬𑀤𑀺𑀘𑁆𑀙𑀺𑀢𑀓𑀭𑀡𑀁. 𑀤𑀼𑀝𑁆𑀞𑀸𑀦𑀦𑁆𑀢𑀺 𑀤𑀼𑀭𑀸𑀲𑀬𑀸𑀦𑀁. 𑀢𑁂 𑀧𑀦 𑀤𑀼𑀝𑁆𑀞𑀚𑁆𑀛𑀸𑀲𑀬𑀸 𑀯𑀺𑀭𑀼𑀤𑁆𑀥𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀤𑀼𑀝𑁆𑀞𑀸𑀦𑀁 𑀯𑀺𑀭𑀼𑀤𑁆𑀥𑀸𑀦’’𑀦𑁆𑀢𑀺. 𑀧𑀯𑀼𑀢𑁆𑀢𑀦𑁆𑀢𑀺 𑀩𑀻𑀚𑀁 𑀲𑀦𑁆𑀥𑀸𑀬 𑀯𑀧𑀺𑀢𑀁. 𑀢𑁂𑀦𑀸𑀳 ‘‘𑀔𑁂𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑀺𑀢’’𑀦𑁆𑀢𑀺.

𑀲𑀸𑀬𑀫𑀸𑀲𑀪𑀢𑁆𑀢𑀦𑁆𑀢𑀺 𑀲𑀸𑀬𑀁 𑀅𑀲𑀺𑀢𑀩𑁆𑀩𑀪𑁄𑀚𑀦𑀁. 𑀬𑀣𑀸𑀯𑀸𑀭𑀁 𑀪𑀓𑁆𑀔𑀺𑀢𑀫𑁂𑀢𑀁 𑀤𑁂𑀯𑀸𑀦𑀁 𑀯𑀺𑀬 𑀲𑀼𑀔𑀼𑀫𑀁 𑀕𑀼𑀭𑀼𑀯𑀸𑀲𑀜𑁆𑀘 𑀦 𑀳𑁄𑀢𑀻𑀢𑀺 ‘‘𑀪𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀕𑁂𑀮𑀜𑁆𑀜𑀚𑀸𑀢𑀦𑁆𑀢𑀺 𑀲𑀜𑁆𑀚𑀸𑀢𑀕𑁂𑀮𑀜𑁆𑀜𑀁. 𑀯𑁂𑀧𑀢𑀻𑀢𑀺 𑀓𑀫𑁆𑀧𑀢𑀺 𑀧𑀯𑁂𑀥𑀢𑀺.

𑀲𑀫𑀼𑀤𑁆𑀤𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀯𑀢𑀧𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁭. 𑀲𑀫𑀸𑀤𑀸𑀢𑀩𑁆𑀩𑀢𑁄 𑀯𑀢𑀸𑀦𑀺, 𑀅𑀜𑁆𑀜𑀫𑀜𑁆𑀜𑀁 𑀅𑀲𑀗𑁆𑀓𑀭𑀲𑀪𑀸𑀯𑁂𑀦 𑀧𑀩𑁆𑀩𑀚𑀺𑀢𑀩𑁆𑀩𑀢𑁄 𑀧𑀤𑀸𑀦𑀺, 𑀢𑀢𑁄 𑀏𑀯 𑀅𑀲𑀁𑀓𑀺𑀡𑁆𑀡𑀪𑀸𑀕𑀸𑀢𑀺 𑀓𑀢𑁆𑀯𑀸 ‘‘𑀯𑀢𑀓𑁄𑀝𑁆𑀞𑀸𑀲𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀲𑀫𑀢𑁆𑀢𑀸𑀦𑀻𑀢𑀺 𑀧𑀼𑀜𑁆𑀜𑀯𑀺𑀲𑁂𑀲𑀢𑀸𑀬 𑀧𑀼𑀚𑁆𑀚𑀪𑀯𑀨𑀮𑀦𑀺𑀩𑁆𑀩𑀢𑁆𑀢𑀦𑁂𑀦 𑀓𑀺𑀢𑁆𑀢𑀺𑀲𑀜𑁆𑀜𑀸𑀦𑁂𑀦 𑀘 𑀲𑀫𑀁 𑀅𑀢𑁆𑀢𑀸𑀦𑀺 𑀲𑀫𑀢𑁆𑀢𑀸𑀦𑀺. 𑀧𑀭𑀺𑀧𑀼𑀡𑁆𑀡𑀸𑀦𑀻𑀢𑀺 𑀅𑀔𑀡𑁆𑀟𑀸𑀤𑀺𑀪𑀸𑀯𑁂𑀦 𑀲𑀩𑁆𑀩𑀲𑁄 𑀧𑀼𑀡𑁆𑀡𑀸𑀦𑀺. 𑀲𑀫𑀸𑀤𑀺𑀦𑁆𑀦𑀸𑀦𑀻𑀢𑀺 𑀢𑀢𑁆𑀣 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸𑀬 𑀲𑀫𑁆𑀫𑀸 𑀆𑀤𑀺𑀦𑁆𑀦𑀸𑀦𑀺. 𑀫𑀸𑀢𑀼𑀮𑀸𑀦𑀻𑀢𑀺 𑀧𑀺𑀢𑀼𑀪𑀕𑀺𑀦𑀻, 𑀦 𑀬𑀸 𑀓𑀸𑀘𑀺 𑀫𑀸𑀢𑀼𑀮𑀲𑁆𑀲 𑀪𑀭𑀺𑀬𑀸 𑀓𑀼𑀮𑀚𑁂𑀝𑁆𑀞𑀓𑀸𑀦𑀁 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀪𑀭𑀺𑀬𑀸𑀧𑀺 𑀯𑀸 𑀫𑀸𑀢𑀼𑀮𑀲𑀫𑁆𑀩𑀦𑁆𑀥𑀢𑁄 𑀕𑀳𑁂𑀢𑀩𑁆𑀩𑀸, 𑀢𑀣𑀸 𑀲𑀢𑀺 𑀫𑀳𑀸𑀧𑀺𑀢𑀼𑀪𑀭𑀺𑀬𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀆𑀤𑀺-𑀲𑀤𑁆𑀤𑁂𑀦 𑀚𑁂𑀝𑁆𑀞𑀪𑀕𑀺𑀦𑀻𑀦𑀁 𑀲𑀗𑁆𑀕𑀳𑁄. 𑀅𑀧𑀘𑀺𑀢𑀺𑀓𑀸𑀭𑀓𑁄𑀢𑀺 𑀢𑁂𑀲𑀁 𑀧𑀘𑁆𑀘𑀼𑀝𑁆𑀞𑀸𑀦𑀓𑀭𑁄. 𑀬𑁄 𑀓𑁄𑀘𑀺 𑀤𑀤𑀦𑁆𑀢𑁄𑀧𑀺 𑀲𑀸𑀧𑁂𑀓𑁆𑀔𑁄 𑀤𑁂𑀢𑀺, 𑀲𑁄 𑀫𑀼𑀢𑁆𑀢𑀘𑀸𑀕𑁄 𑀦 𑀳𑁄𑀢𑀺, 𑀅𑀬𑀁 𑀧𑀦 𑀦 𑀏𑀯𑀦𑁆𑀢𑀺 ‘‘𑀫𑀼𑀢𑁆𑀢𑀘𑀸𑀕𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀺𑀲𑁆𑀲𑀝𑁆𑀞𑀘𑀸𑀕𑁄𑀢𑀺 𑀦𑀺𑀭𑀧𑁂𑀓𑁆𑀔𑀧𑀭𑀺𑀘𑁆𑀘𑀸𑀕𑁄𑀢𑀺 𑀅𑀢𑁆𑀣𑁄. 𑀬𑀣𑀸 𑀧𑀸𑀡𑀸𑀢𑀺𑀧𑀸𑀢𑀩𑀳𑀼𑀮𑁄 ‘‘𑀮𑁄𑀳𑀺𑀢𑀧𑀸𑀡𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀤𑀸𑀦𑀩𑀳𑀼𑀮𑁄 ‘‘𑀧𑀬𑀢𑀧𑀸𑀡𑀻’’𑀢𑀺 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀤𑁂𑀬𑁆𑀬𑀥𑀫𑁆𑀫𑀤𑀸𑀦𑀢𑁆𑀣𑀸𑀬 𑀲𑀤𑀸 𑀥𑁄𑀢𑀳𑀢𑁆𑀣𑁄’’𑀢𑀺. 𑀯𑁄𑀲𑁆𑀲𑀕𑁆𑀕𑀭𑀢𑁄𑀢𑀺 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀧𑀭𑀺𑀘𑁆𑀘𑀚𑀦𑁂 𑀅𑀪𑀺𑀭𑀢𑁄. 𑀧𑀭𑁂𑀳𑀺 𑀬𑀸𑀘𑀺𑀢𑀩𑁆𑀩𑀸𑀭𑀳𑁄𑀢𑀺 𑀧𑀭𑁂𑀳𑀺 𑀬𑀸𑀘𑀺𑀢𑀼𑀁 𑀬𑀼𑀢𑁆𑀢𑁄 𑀇𑀘𑁆𑀙𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀢𑀸𑀯𑀤𑁂𑀯 𑀯𑀺𑀲𑁆𑀲𑀚𑁆𑀚𑀦𑀢𑁄. 𑀤𑀸𑀦𑁂𑀦𑁂𑀯 𑀬𑀼𑀢𑁆𑀢𑁄𑀢𑀺 𑀲𑀩𑁆𑀩𑀓𑀸𑀮𑀁 𑀤𑀸𑀦𑁂𑀦𑁂𑀯 𑀬𑀼𑀢𑁆𑀢𑁄 𑀅𑀪𑀺𑀡𑁆𑀳𑀁 𑀧𑀯𑀢𑁆𑀢𑀫𑀳𑀸𑀤𑀸𑀦𑀢𑁆𑀢𑀸. 𑀤𑀸𑀦𑁂 𑀘 𑀲𑀁𑀯𑀺𑀪𑀸𑀕𑁂 𑀘𑀸𑀢𑀺 𑀧𑀭𑀲𑁆𑀲 𑀲𑀫𑁆𑀧𑀼𑀡𑁆𑀡𑀁 𑀓𑀢𑁆𑀯𑀸 𑀧𑀭𑀺𑀘𑁆𑀘𑀚𑀦𑀲𑀗𑁆𑀔𑀸𑀢𑁂 𑀤𑀸𑀦𑁂 𑀘 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀲𑀁𑀯𑀺𑀪𑀚𑀦𑀲𑀗𑁆𑀔𑀸𑀢𑁂 𑀲𑀁𑀯𑀺𑀪𑀸𑀕𑁂 𑀘 𑀭𑀢𑁄 𑀅𑀪𑀺𑀭𑀢𑁄.

𑀯𑀢𑀧𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀓𑁆𑀓𑀦𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁮. 𑀫𑀦𑀼𑀲𑁆𑀲𑀪𑀽𑀢𑁄𑀢𑀺 𑀫𑀦𑀼𑀲𑁆𑀲𑁂𑀲𑀼 𑀪𑀽𑀢𑁄, 𑀫𑀦𑀼𑀲𑁆𑀲𑀢𑁆𑀢𑀁 𑀯𑀸 𑀧𑀢𑁆𑀢𑁄. 𑀆𑀯𑀲𑀣𑀦𑁆𑀢𑀺 𑀦𑀺𑀯𑀸𑀲𑀝𑁆𑀞𑀸𑀦𑀁 𑀓𑀸𑀭𑁂𑀢𑁆𑀯𑀸 𑀅𑀤𑀸𑀲𑀺, 𑀢𑀲𑁆𑀫𑀸 𑀯𑀸𑀲𑀁 𑀅𑀤𑀸𑀲𑀻𑀢𑀺 𑀯𑀸𑀲𑀯𑁄. 𑀅𑀢𑁆𑀣-𑀲𑀤𑁆𑀤𑁄 𑀇𑀥 𑀓𑀸𑀭𑀡𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀲𑀳𑀲𑁆𑀲𑀫𑁆𑀧𑀺 𑀓𑀸𑀭𑀡𑀸𑀦’’𑀦𑁆𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀳𑁂𑀝𑁆𑀞𑀸 𑀯𑀺𑀪𑀸𑀯𑀺𑀢𑁄𑀯. 𑀯𑀺𑀦𑀺𑀘𑁆𑀙𑀺𑀦𑀢𑀺, 𑀢𑀲𑁆𑀫𑀸 𑀲𑀳𑀲𑁆𑀲𑀁 𑀧𑀜𑁆𑀜𑀸𑀅𑀓𑁆𑀔𑀻𑀦𑀺 𑀏𑀢𑀲𑁆𑀲𑀸𑀢𑀺 𑀲𑀳𑀲𑁆𑀲𑀓𑁆𑀔𑁄. 𑀫𑀖𑀁 𑀯𑀼𑀘𑁆𑀘𑀢𑀺 𑀥𑀦𑀁, 𑀢𑀁 𑀧𑀦 𑀲𑀤𑁆𑀥𑀸𑀲𑀗𑁆𑀔𑀸𑀢𑀁 𑀫𑀖𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀫𑀖𑀯𑀸. 𑀧𑀼𑀭𑁂 𑀤𑀸𑀦𑀁 𑀤𑀤𑀸𑀢𑀻𑀢𑀺 𑀧𑀼𑀭𑀺𑀦𑁆𑀤𑀤𑁄 𑀅𑀦𑀼𑀦𑀸𑀲𑀺𑀓𑀮𑁄𑀧𑀁 𑀅𑀓𑀢𑁆𑀯𑀸. 𑀧𑀼𑀜𑁆𑀜𑀸𑀦𑀺 𑀓𑀸𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀲𑀓𑁆𑀓𑁄.

𑀲𑀓𑁆𑀓𑀦𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑀳𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁯. 𑀲𑁄𑀢𑀺 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸. 𑀩𑀳𑀼𑀯𑀘𑀦𑁂 𑀯𑀢𑁆𑀢𑀩𑁆𑀩𑁂 𑀏𑀓𑀯𑀘𑀦𑀁 𑀯𑀼𑀢𑁆𑀢𑀁. 𑀯𑀼𑀘𑁆𑀘𑀢𑀻𑀢𑀺 𑀯𑀘𑀦𑀁, 𑀅𑀢𑁆𑀣𑁄. 𑀢𑀲𑁆𑀫𑀸 𑀩𑀳𑀼𑀯𑀘𑀦𑁂𑀢𑀺 𑀩𑀳𑀼𑀫𑁆𑀳𑀺 𑀅𑀢𑁆𑀣𑁂𑀢𑀺 𑀅𑀢𑁆𑀣𑁄. 𑀬𑀣𑀸 𑀧𑀝𑀺𑀧𑀚𑁆𑀚𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀢𑁂 𑀥𑀫𑁆𑀫𑁂 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀓𑁆𑀓𑁄 𑀲𑀓𑁆𑀓𑀢𑁆𑀢𑀁 𑀅𑀚𑁆𑀛𑀕𑀸, 𑀢𑀁 𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀓𑁆𑀓𑁄 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑀦𑁆𑀢𑀭𑁂𑀢𑀺 𑀲𑀓𑁆𑀓𑀪𑀸𑀯𑀲𑁆𑀲 𑀅𑀢𑀻𑀢𑀸𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂. 𑀢𑀁 𑀲𑀩𑁆𑀩𑀦𑁆𑀢𑀺 𑀲𑀓𑁆𑀓𑀲𑁆𑀲 𑀫𑀖𑀫𑀸𑀡𑀯𑀓𑀸𑀮𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁, 𑀢𑀸𑀬 𑀲𑀓𑁆𑀓𑀪𑀸𑀯𑀽𑀧𑀕𑀫𑀦𑀜𑁆𑀘𑀸𑀢𑀺 𑀢𑀁 𑀲𑀩𑁆𑀩𑀁. 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀳𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑀮𑀺𑀤𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁦. 𑀫𑀦𑀼𑀲𑁆𑀲𑀤𑀮𑀺𑀤𑁆𑀤𑁄𑀢𑀺 𑀫𑀦𑀼𑀲𑁆𑀲𑁂𑀲𑀼 𑀤𑀼𑀕𑁆𑀕𑀢𑁄. 𑀫𑀦𑀼𑀲𑁆𑀲𑀓𑀸𑀭𑀼𑀜𑁆𑀜𑀢𑀦𑁆𑀢𑀺 𑀫𑀦𑀼𑀲𑁆𑀲𑁂𑀲𑀼 𑀧𑀭𑀫𑀦𑀺𑀳𑀻𑀦𑀢𑀁. 𑀫𑀦𑀼𑀲𑁆𑀲𑀓𑀧𑀡𑁄𑀢𑀺 𑀫𑀦𑀼𑀲𑁆𑀲𑁂𑀲𑀼 𑀯𑀸 𑀧𑀭𑀫𑀦𑀺𑀳𑀻𑀦𑁄. 𑀢𑀲𑁆𑀫𑀺𑀁 𑀞𑀸𑀦𑁂𑀢𑀺 𑀢𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀢𑀲𑁆𑀫𑀺𑀁 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑁂. 𑀮𑀸𑀫𑀓𑀢𑁄 𑀘𑀺𑀦𑁆𑀢𑁂𑀦𑁆𑀢𑀻𑀢𑀺 𑀢𑀲𑁆𑀲 𑀧𑀼𑀭𑀺𑀫𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀳𑀻𑀦𑀢𑁄 𑀘𑀺𑀦𑁆𑀢𑁂𑀦𑁆𑀢𑀺. 𑀓𑀣𑁂𑀦𑁆𑀢𑀻𑀢𑀺 𑀢𑀫𑁂𑀯 𑀧𑀭𑁂𑀲𑀁 𑀓𑀣𑁂𑀦𑁆𑀢𑀺. 𑀯𑀺𑀢𑁆𑀣𑀸𑀭𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀺𑀓𑀁 𑀓𑀭𑁄𑀦𑁆𑀢𑀺. 𑀲𑀩𑁆𑀩𑀤𑀸 𑀧𑀭𑀺𑀘𑁆𑀙𑀺𑀚𑁆𑀚 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀅𑀟𑁆𑀠𑀝𑁆𑀞𑀭𑀢𑀦𑁂 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀫𑀳𑀘𑁆𑀘𑀭𑀸𑀚𑀸𑀦𑀼𑀪𑀸𑀯𑁂𑀦 𑀦𑀺𑀲𑀺𑀦𑁆𑀦𑀢𑁆𑀢𑀸 𑀚𑀦𑀓𑀸𑀬𑁂𑀦 𑀲𑀫𑀼𑀮𑁆𑀮𑁄𑀓𑀺𑀬𑀫𑀸𑀦𑁄. 𑀅𑀯𑀮𑀫𑁆𑀩𑀦𑁆𑀢𑀻𑀢𑀺 𑀑𑀮𑀫𑁆𑀩𑀦𑁆𑀢𑀺. 𑀯𑀦𑁆𑀤𑀦𑀫𑀢𑁆𑀢𑀁 𑀯𑀸 𑀦𑀸𑀳𑁄𑀲𑀺, 𑀅𑀜𑁆𑀜𑀤𑀢𑁆𑀣𑀼 𑀧𑀘𑁆𑀘𑁂𑀓𑀩𑀼𑀤𑁆𑀥𑀢𑁄 𑀅𑀢𑁆𑀢𑀦𑁄 𑀲𑀫𑀸𑀦𑀸𑀤𑀭𑀓𑀺𑀭𑀺𑀬𑀁 𑀧𑀘𑁆𑀘𑀸𑀲𑀻𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑁄’’𑀢𑀺𑀆𑀤𑀺. 𑀓𑁆𑀯𑀸𑀬𑀦𑁆𑀢𑀺 𑀓𑁄 𑀅𑀬𑀦𑁆𑀢𑀺 𑀩𑁆𑀬𑀸𑀧𑀦𑁆𑀦𑀯𑀲𑁂𑀦 𑀯𑀤𑀢𑀺. 𑀓𑀸𑀴𑀭𑀢𑁆𑀢𑁂𑀳𑀺 𑀲𑀼𑀢𑁆𑀢𑁂𑀳𑀺 𑀲𑀺𑀩𑁆𑀩𑀺𑀢𑀢𑁆𑀢𑀸 𑀯𑀡𑁆𑀡𑀯𑀺𑀓𑀸𑀭𑀁 𑀤𑀺𑀲𑁆𑀯𑀸 ‘‘𑀓𑀼𑀝𑁆𑀞𑀺𑀘𑀻𑀯𑀭𑀸𑀦𑀺 𑀧𑀸𑀭𑀼𑀢𑁄’’𑀢𑀺 𑀆𑀳. 𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑀳𑀸𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑁄𑀢𑀺. 𑀢𑀤𑀦𑀼𑀭𑀽𑀧𑀧𑀸𑀧𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀮𑀤𑁆𑀥𑁄𑀓𑀸𑀲𑁂𑀦 𑀭𑀸𑀚𑀕𑀳𑁂…𑀧𑁂… 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀓𑀸𑀫𑀜𑁆𑀘 𑀏𑀢𑁆𑀣 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀁 𑀓𑀼𑀲𑀮𑀓𑀫𑁆𑀫𑁂𑀦𑁂𑀯, 𑀢𑀲𑁆𑀲 𑀧𑀦 𑀅𑀓𑀼𑀲𑀮𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀺𑀦𑁄 𑀩𑀮𑀯𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀯𑀺𑀧𑀸𑀓𑀸𑀯𑀲𑁂𑀲𑁂𑀦𑀸’’𑀢𑀺. 𑀢𑁂𑀦𑀸𑀳 ‘‘𑀕𑀳𑀺𑀢𑀓𑀸𑀮𑀢𑁄…𑀧𑁂… 𑀦𑀺𑀓𑁆𑀔𑀦𑁆𑀢𑁄’’𑀢𑀺. 𑀪𑀺𑀓𑁆𑀔𑀸𑀬 𑀘𑀭𑀺𑀢𑀼𑀁 𑀲𑀫𑀢𑁆𑀣𑀓𑀸𑀮𑀢𑁄 𑀧𑀝𑁆𑀞𑀸𑀬 𑀭𑁄𑀕𑀲𑁆𑀲 𑀩𑀮𑀯𑀢𑀸𑀬 𑀫𑀁𑀲𑀸𑀦𑀺…𑀧𑁂… 𑀧𑀢𑀦𑁆𑀢𑀺. 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀸𑀝𑀺𑀬𑀸 𑀪𑀸𑀯𑀦𑀸𑀜𑀸𑀡𑀁 𑀦𑀺𑀩𑁆𑀩𑀸𑀦𑀁 𑀧𑀝𑀺𑀧𑁂𑀲𑁂𑀢𑁆𑀯𑀸 𑀧𑀯𑀢𑁆𑀢𑁂𑀢𑁆𑀯𑀸. 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀓𑁆𑀓𑀢𑁆𑀢𑀸 𑀲𑀢𑁆𑀣𑀼 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄. 𑀘𑀼𑀫𑁆𑀩𑀝𑀦𑁆𑀢𑀺 𑀧𑀸𑀤𑀘𑀼𑀫𑁆𑀩𑀝𑀁. 𑀓𑀼𑀝𑁆𑀞𑀺𑀦𑁄 𑀳𑀺 𑀲𑀓𑀮𑀧𑀸𑀤𑀢𑀮𑀁 𑀫𑀸 𑀭𑀼𑀚𑀻𑀢𑀺 𑀘𑀼𑀫𑁆𑀩𑀝𑀁 𑀓𑀢𑁆𑀯𑀸 𑀢𑀁 𑀧𑀸𑀤𑀢𑀮𑁂 𑀩𑀦𑁆𑀥𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀫𑀢𑁆𑀢𑀺𑀓𑀧𑀸𑀢𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀯𑀺𑀬 𑀢𑀣𑀸 𑀦𑀺𑀳𑀻𑀦𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀢𑁄 𑀘𑀯𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀢𑀺𑀁 𑀧𑀝𑀺𑀮𑀪𑀦𑁆𑀢𑁄 𑀯𑀺𑀬 𑀤𑁂𑀯𑀢𑁆𑀢𑀪𑀸𑀯𑀁 𑀕𑀡𑁆𑀳𑀦𑁆𑀢𑁄 𑀘𑀼𑀢𑀺𑀘𑀺𑀢𑁆𑀢𑀢𑁄 𑀤𑀼𑀢𑀺𑀬𑀘𑀺𑀢𑁆𑀢𑀯𑀸𑀭𑁂 𑀆𑀤𑀸𑀦𑀘𑀺𑀢𑁆𑀢𑀓𑁆𑀔𑀡𑁂 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄.

𑀫𑀕𑁆𑀕𑁂𑀦𑀸𑀕𑀢𑀸𑀢𑀺 𑀫𑀕𑁆𑀕𑀸𑀥𑀺𑀕𑀫𑀦𑁂𑀦 𑀆𑀕𑀢𑀸 𑀉𑀧𑁆𑀧𑀦𑁆𑀦𑀸. 𑀅𑀭𑀺𑀬𑀓𑀦𑁆𑀢𑀲𑀻𑀮𑀦𑁆𑀢𑀺 𑀅𑀭𑀺𑀬𑀸𑀦𑀁 𑀓𑀦𑁆𑀢𑀁 𑀫𑀦𑀸𑀧𑀁 𑀫𑀦𑁄𑀭𑀫𑀁 𑀲𑀻𑀮𑀥𑀫𑁆𑀫𑀁. 𑀅𑀭𑀺𑀬𑀸𑀦𑀁 𑀅𑀥𑀺𑀘𑀺𑀢𑁆𑀢𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸 𑀯𑀺𑀬 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀧𑀺 𑀲𑀩𑁆𑀩𑀸 𑀅𑀢𑀺𑀯𑀺𑀬 𑀓𑀦𑁆𑀢𑀸 𑀏𑀯𑀸𑀢𑀺 𑀆𑀳 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂𑀢𑀺 𑀇𑀫𑀲𑁆𑀫𑀺𑀁 𑀲𑁄𑀢𑀸𑀧𑀦𑁆𑀦𑀲𑁆𑀲 𑀪𑀯𑀲𑀗𑁆𑀔𑀸𑀢𑁂 𑀅𑀢𑁆𑀣𑁂 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑁂. 𑀧𑀜𑁆𑀘𑀲𑀻𑀮𑀫𑁆𑀧𑀺 𑀬𑀲𑁆𑀫𑀸 𑀤𑀺𑀝𑁆𑀞𑀺 𑀯𑀺𑀬 𑀪𑀯𑀦𑁆𑀢𑀭𑁂𑀧𑀺 𑀅𑀧𑁆𑀧𑀳𑀻𑀦𑀁.

𑀤𑀮𑀺𑀤𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀭𑀸𑀫𑀡𑁂𑀬𑁆𑀬𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁧. 𑀆𑀭𑀫𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀸𑀢𑀺 𑀆𑀭𑀸𑀫𑀸, 𑀫𑀦𑁄𑀭𑀫𑀸 𑀉𑀧𑀯𑀦𑀸𑀤𑀬𑁄. 𑀢𑁂 𑀏𑀯 𑀘𑁂𑀢𑁂𑀦𑁆𑀢𑀺 𑀏𑀢𑁆𑀣 𑀲𑀤𑁆𑀥𑀸𑀬 𑀅𑀢𑁆𑀢𑀦𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀲𑀦𑁆𑀥𑀳𑀦𑁆𑀢𑀻𑀢𑀺 𑀘𑁂𑀢𑀺𑀬𑀸𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀫𑀦𑀼𑀲𑁆𑀲𑀭𑀫𑀡𑀻𑀬𑀪𑀸𑀯𑀲𑁆𑀲𑀸𑀢𑀺 𑀫𑀦𑀼𑀲𑁆𑀲𑀸𑀦𑀁 𑀆𑀭𑀫𑀡𑀻𑀬𑀪𑀸𑀯𑀲𑁆𑀲. 𑀢𑀲𑁆𑀲 𑀧𑀦 𑀲𑀻𑀮𑀸𑀤𑀺𑀕𑀼𑀡𑀯𑀲𑁂𑀦 𑀅𑀘𑀺𑀦𑁆𑀢𑁂𑀬𑁆𑀬𑀸𑀧𑀭𑀺𑀫𑁂𑀬𑁆𑀬𑀸𑀦𑀼𑀪𑀸𑀯𑀢𑀸𑀧𑀺 𑀳𑁄𑀢𑀻𑀢𑀺 𑀪𑀕𑀯𑀸 ‘‘𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺’’𑀦𑁆𑀢𑀺 𑀅𑀯𑁄𑀘. 𑀅𑀘𑁂𑀢𑀦𑀸𑀬 𑀪𑀽𑀫𑀺𑀬𑀸 𑀭𑀫𑀡𑀻𑀬𑀢𑀸 𑀦𑀸𑀫 𑀕𑀼𑀡𑀯𑀺𑀲𑀺𑀝𑁆𑀞𑀸𑀦𑀁 𑀅𑀭𑀺𑀬𑀸𑀦𑀁 𑀲𑁂𑀯𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 ‘‘𑀇𑀤𑀸𑀦𑀺…𑀧𑁂… 𑀕𑀸𑀫𑁂 𑀯𑀸𑀢𑀺𑀆𑀤𑀺𑀫𑀸𑀳𑀸’’𑀢𑀺.

𑀭𑀸𑀫𑀡𑁂𑀬𑁆𑀬𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀬𑀚𑀫𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁨. 𑀬𑀚𑀦𑁆𑀢𑀸𑀦𑀦𑁆𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑀁 𑀉𑀤𑁆𑀤𑀺𑀲𑁆𑀲 𑀤𑁂𑀦𑁆𑀢𑀸𑀦𑀁. 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄𑀢𑀺 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀣𑀯𑀡𑁆𑀡𑀦𑀁 𑀓𑀸𑀢𑀼𑀁 ‘‘𑀢𑀤𑀸 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀕𑁆𑀕𑀦𑁆𑀢𑀺 𑀲𑁂𑀝𑁆𑀞𑀁. 𑀢𑁂𑀳𑀺 𑀢𑁂𑀳𑀺 𑀯𑀸 𑀬𑀣𑀸𑀮𑀤𑁆𑀥𑀲𑀧𑁆𑀧𑀺𑀆𑀤𑀬𑁄 𑀫𑀸 𑀦𑀲𑁆𑀲𑀦𑁆𑀢𑀼, 𑀅𑀕𑁆𑀕𑀪𑀸𑀯𑁂𑀦 𑀕𑀳𑀺𑀢𑀸𑀦𑀺 𑀲𑀧𑁆𑀧𑀺𑀆𑀤𑀻𑀦𑀺 𑀓𑁂𑀯𑀮𑀁 𑀅𑀕𑁆𑀕𑀺𑀫𑁆𑀳𑀺 𑀛𑀸𑀧𑀦𑁂𑀦, 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀫𑀺𑀘𑁆𑀙𑀸𑀕𑀸𑀳𑁂𑀦 𑀫𑀸 𑀦𑀲𑁆𑀲𑀦𑁆𑀢𑀼. 𑀢𑀓𑁆𑀓𑁂𑀦𑀸𑀢𑀺 𑀢𑀓𑁆𑀓𑀫𑀢𑁆𑀢𑁂𑀦. ‘‘𑀓𑀣𑁂𑀫𑀸’’𑀢𑀺 𑀅𑀫𑁆𑀳𑁂 𑀫𑀜𑁆𑀜𑀣, 𑀇𑀤𑀸𑀦𑀺 𑀧𑀲𑁆𑀲𑀣, 𑀧𑀘𑁆𑀘𑀓𑁆𑀔𑀢𑁄 𑀅𑀬𑀁 𑀯𑁄…𑀧𑁂… 𑀆𑀕𑀘𑁆𑀙𑀢𑀻𑀢𑀺 𑀆𑀳𑀁𑀲𑀽𑀢𑀺 𑀬𑁄𑀚𑀦𑀸.

𑀉𑀧𑀥𑀺𑀯𑀺𑀧𑀸𑀓𑀦𑁆𑀢𑀺 𑀉𑀧𑀥𑀻𑀲𑀼 𑀯𑀸 𑀯𑀺𑀧𑀘𑁆𑀘𑀢𑀺, 𑀉𑀧𑀥𑀬𑁄 𑀯𑀸 𑀯𑀺𑀧𑀸𑀓𑀸 𑀏𑀢𑀲𑁆𑀲𑀸𑀢𑀺 𑀉𑀧𑀥𑀺𑀯𑀺𑀧𑀸𑀓𑀁. 𑀯𑀺𑀧𑁆𑀨𑀸𑀭𑀯𑀦𑁆𑀢𑀁 𑀳𑁄𑀢𑀺 𑀯𑀺𑀧𑀼𑀮𑀧𑀓𑁆𑀔𑀢𑀸𑀬. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀤𑀁𑀲𑀼 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀘 𑀏𑀯𑀁 𑀑𑀯𑀸𑀤𑁄 𑀤𑀺𑀦𑁆𑀦𑁄’’𑀢𑀺.

𑀬𑀚𑀫𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀩𑀼𑀤𑁆𑀥𑀯𑀦𑁆𑀤𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁩. 𑀉𑀝𑁆𑀞𑀳𑀸𑀢𑀺 𑀉𑀝𑁆𑀞𑀸𑀦𑀁 𑀓𑀸𑀬𑀺𑀓𑀯𑀻𑀭𑀺𑀬𑀁 𑀓𑀭𑁄𑀳𑀺. 𑀢𑁂𑀦𑀸𑀳 ‘‘𑀯𑀺𑀘𑀭, 𑀮𑁄𑀓𑁂’’𑀢𑀺. 𑀘𑁂𑀢𑀲𑀺𑀓𑀯𑀻𑀭𑀺𑀬𑀁 𑀧𑀦 𑀪𑀕𑀯𑀢𑀸 𑀫𑀢𑁆𑀣𑀓𑀁 𑀧𑀸𑀧𑀺𑀢𑀫𑁂𑀯. 𑀢𑁂𑀦𑀸𑀳 ‘‘𑀯𑀺𑀚𑀺𑀢𑀲𑀗𑁆𑀕𑀸𑀫𑀸’’𑀢𑀺. 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀲𑁆𑀲 𑀉𑀘𑁆𑀘𑀪𑀸𑀯𑁂𑀦. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀆𑀬𑀸𑀫𑀢𑁄 𑀘 𑀅𑀦𑁂𑀓𑀬𑁄𑀚𑀦𑀲𑀢𑀲𑀳𑀲𑁆𑀲𑀧𑀭𑀺𑀫𑀸𑀡𑀘𑀓𑁆𑀓𑀯𑀸𑀴𑀁 𑀅𑀢𑀺𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀲𑁆𑀲. 𑀧𑀦𑁆𑀦𑀪𑀸𑀭𑀸𑀢𑀺 𑀧𑀸𑀢𑀺𑀢𑀪𑀸𑀭. 𑀦𑀺𑀓𑁆𑀔𑁂𑀧𑀺𑀢𑀩𑁆𑀩𑀢𑁄 𑀪𑀸𑀭𑀸𑀢𑀺 𑀆𑀳 ‘‘𑀑𑀭𑁄𑀧𑀺𑀢𑀔𑀦𑁆𑀥𑀸’’𑀢𑀺𑀆𑀤𑀺. 𑀢𑁂 𑀳𑀺 𑀢𑀁𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀲𑀫𑁆𑀧𑀸𑀢𑀦𑀝𑁆𑀞𑁂𑀦 𑀪𑀸𑀭𑀸 𑀦𑀸𑀫. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀪𑀸𑀭𑀸 𑀳𑀯𑁂 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺 (𑀲𑀁. 𑀦𑀺. 𑁩.𑁨𑁨). 𑀢𑀤𑁂𑀓𑀤𑁂𑀲𑀸 𑀘 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀸. 𑀧𑀦𑁆𑀦𑀭𑀲𑀸𑀬 𑀧𑀼𑀡𑁆𑀡𑀫𑀸𑀬 𑀭𑀢𑁆𑀢𑀺𑀦𑁆𑀢𑀺 𑀬𑀣𑀸 𑀧𑀦𑁆𑀦𑀭𑀲𑀧𑀼𑀡𑁆𑀡𑀫𑀸𑀬 𑀭𑀢𑁆𑀢𑀺𑀬𑀁 𑀧𑀭𑀺𑀧𑀼𑀡𑁆𑀡𑀓𑀸𑀮𑁂 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑁄 𑀘𑀦𑁆𑀤𑁄 𑀲𑁄𑀪𑀢𑀺, 𑀏𑀯𑀁 𑀢𑀯 𑀘𑀺𑀢𑁆𑀢𑀁 𑀲𑀩𑁆𑀩𑀲𑁄 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀁 𑀲𑁄𑀪𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀩𑀼𑀤𑁆𑀥𑀯𑀦𑁆𑀤𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀕𑀳𑀝𑁆𑀞𑀯𑀦𑁆𑀤𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁪. 𑀧𑀼𑀣𑀼𑀤𑁆𑀤𑀺𑀲𑀸𑀢𑀺 𑀩𑀳𑀼𑀤𑀺𑀲𑀸. 𑀓𑀸 𑀧𑀦 𑀢𑀸𑀢𑀺 𑀆𑀳 ‘‘𑀘𑀢𑀲𑁆𑀲𑁄 𑀤𑀺𑀲𑀸 𑀘𑀢𑀲𑁆𑀲𑁄 𑀅𑀦𑀼𑀤𑀺𑀲𑀸 𑀘𑀸’’𑀢𑀺. 𑀅𑀦𑀼𑀤𑀺𑀲𑀸𑀕𑀳𑀡𑁂𑀦 𑀘𑁂𑀢𑁆𑀣 𑀉𑀤𑁆𑀥𑀁 𑀅𑀥𑁄𑀧𑀺 𑀕𑀬𑁆𑀳𑀢𑀻𑀢𑀺 𑀘 𑀤𑀲𑁆𑀲𑁂𑀢𑀺. 𑀪𑀽𑀫𑀺𑀯𑀸𑀲𑀺𑀦𑁄𑀢𑀺 𑀪𑀽𑀫𑀺𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀦𑁄. 𑀏𑀢𑁂𑀦 𑀭𑀼𑀓𑁆𑀔𑀧𑀩𑁆𑀩𑀢𑀦𑀺𑀯𑀸𑀲𑀺𑀦𑁄𑀧𑀺 𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀘𑀺𑀭𑀭𑀢𑁆𑀢𑀲𑀫𑀸𑀳𑀺𑀢𑀘𑀺𑀢𑁆𑀢𑁂𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀛𑀸𑀦𑀸𑀦𑀺 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀢𑀸𑀬 𑀘𑀺𑀭𑀓𑀸𑀮𑀁 𑀲𑀫𑀸𑀳𑀺𑀢𑀘𑀺𑀢𑁆𑀢𑁂. 𑀆𑀧𑀸𑀡𑀓𑁄𑀝𑀺𑀓𑀦𑁆𑀢𑀺 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀁 𑀬𑀸𑀯𑀚𑀻𑀯𑀁. 𑀏𑀯𑀫𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀯𑀲𑁂𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀦𑀺𑀘𑁆𑀘𑀲𑀻𑀮𑀯𑀲𑁂𑀦 𑀧𑀜𑁆𑀘𑀳𑀺, 𑀦𑀺𑀬𑀫𑀲𑀻𑀮𑀯𑀲𑁂𑀦 𑀤𑀲𑀳𑀺. 𑀧𑀺-𑀲𑀤𑁆𑀤𑁂𑀦 𑀢𑀢𑁄 𑀓𑀢𑀺𑀧𑀬𑁂𑀳𑀺 𑀉𑀧𑁄𑀲𑀣𑀲𑀻𑀮𑀯𑀲𑁂𑀦 𑀅𑀝𑁆𑀞𑀳𑀺𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀥𑀫𑁆𑀫𑀺𑀓𑁂𑀳𑀻𑀢𑀺 𑀥𑀫𑁆𑀫𑀢𑁄 𑀅𑀦𑀧𑁂𑀢𑁂𑀳𑀺. 𑀧𑀫𑀼𑀔𑁄𑀢𑀺 𑀧𑀫𑁄𑀓𑁆𑀔𑁄.

𑀕𑀳𑀝𑁆𑀞𑀯𑀦𑁆𑀤𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀲𑀢𑁆𑀣𑀸𑀭𑀯𑀦𑁆𑀤𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁫. 𑀩𑁆𑀭𑀳𑁆𑀫𑀚𑀸𑀡𑀼𑀓𑁄𑀢𑀺 𑀤𑀓𑁆𑀔𑀺𑀡𑀚𑀸𑀡𑀼𑀫𑀡𑁆𑀟𑀮𑀁 𑀧𑀣𑀯𑀺𑀬𑀁 𑀞𑀧𑁂𑀢𑁆𑀯𑀸 𑀯𑀦𑁆𑀤𑀫𑀸𑀦𑁄 𑀩𑁆𑀭𑀳𑁆𑀫𑀚𑀸𑀡𑀼𑀓𑁄 𑀦𑀸𑀫 𑀢𑀣𑀸𑀪𑀽𑀢𑁄 𑀳𑀼𑀢𑁆𑀯𑀸. 𑀬𑀚𑀺𑀢𑀩𑁆𑀩𑀢𑁄 𑀬𑀓𑁆𑀔𑁄, 𑀧𑀽𑀚𑀦𑀻𑀬𑁄. 𑀏𑀯𑀁 𑀧𑀽𑀚𑀸𑀯𑀺𑀲𑁂𑀲𑀬𑁄𑀕𑀢𑁄 𑀲𑀓𑁆𑀓𑁄𑀢𑀺 𑀆𑀳 ‘‘𑀲𑁄 𑀬𑀓𑁆𑀔𑁄𑀢𑀺 𑀲𑁄 𑀲𑀓𑁆𑀓𑁄’’𑀢𑀺. 𑀲𑀓𑁆𑀓𑀲𑁆𑀲 𑀦𑀫𑀓𑁆𑀓𑀸𑀭𑀪𑀸𑀚𑀦𑀪𑀽𑀢𑀜𑁆𑀳𑀺 𑀧𑀼𑀘𑁆𑀙𑀦𑁆𑀢𑁄 𑀫𑀸𑀢𑀮𑀺 ‘‘𑀓𑁄 𑀦𑀸𑀫 𑀲𑁄 𑀬𑀓𑁆𑀔𑁄’’𑀢𑀺 𑀆𑀳. 𑀕𑀼𑀡𑀦𑁂𑀫𑀺𑀢𑁆𑀢𑀓𑁂𑀳𑀻𑀢𑀺 𑀕𑀼𑀡𑀳𑁂𑀢𑀼𑀓𑁂𑀳𑀺 𑀅𑀦𑀦𑁆𑀢𑀸𑀦𑀺 𑀳𑀺 𑀩𑀼𑀤𑁆𑀥𑀸𑀦𑀁 𑀦𑀸𑀫𑀸𑀦𑀺, 𑀢𑀸𑀦𑀺 𑀘 𑀔𑁄 𑀲𑀩𑁆𑀩𑀸𑀦𑀺𑀧𑀺 𑀕𑀼𑀡𑀦𑁂𑀫𑀺𑀢𑁆𑀢𑀓𑀸𑀦𑁂𑀯. 𑀅𑀦𑀦𑁆𑀢𑀕𑀼𑀡𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀦𑀸𑀫𑀸𑀦𑀺, 𑀲𑀕𑀼𑀡𑁂𑀦 𑀫𑀳𑁂𑀲𑀺𑀦𑁄;

𑀕𑀼𑀡𑁂𑀦 𑀦𑀸𑀫𑀫𑀼𑀤𑁆𑀥𑁂𑀬𑁆𑀬𑀁, 𑀅𑀧𑀺 𑀦𑀸𑀫𑀲𑀳𑀲𑁆𑀲𑀢𑁄’’𑀢𑀺. 𑁋

𑀢𑀲𑁆𑀫𑀸 𑀅𑀦𑁄𑀫𑀦𑀸𑀫𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀕𑀼𑀡𑀦𑀸𑀫𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀢𑀺𑀓𑁆𑀓𑀫𑁂𑀦𑀸𑀢𑀺 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀤𑀦𑀯𑀲𑁂𑀦 𑀅𑀢𑀺𑀓𑁆𑀓𑀫𑀦𑁂𑀦. 𑀓𑀺𑀮𑁂𑀲𑀸𑀭𑀻𑀦𑀁 𑀅𑀧𑁂𑀢𑀘𑀬𑁄𑀢𑀺 𑀅𑀧𑀘𑀬𑁄, 𑀲𑁄 𑀆𑀭𑀫𑀺𑀢𑀩𑁆𑀩𑀝𑁆𑀞𑁂𑀦 𑀆𑀭𑀸𑀫𑁄 𑀏𑀢𑁂𑀲𑀦𑁆𑀢𑀺 𑀅𑀧𑀘𑀬𑀸𑀭𑀸𑀫𑀸. 𑀢𑁂𑀦𑀸𑀳 ‘‘𑀯𑀝𑁆𑀝𑀯𑀺𑀤𑁆𑀥𑀁𑀲𑀦𑁂 𑀭𑀢𑀸’’𑀢𑀺.

𑀲𑀢𑁆𑀣𑀸𑀭𑀯𑀦𑁆𑀤𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀗𑁆𑀖𑀯𑀦𑁆𑀤𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁬. 𑀧𑀽𑀢𑀺𑀫𑁆𑀳𑀺 𑀤𑁂𑀳𑁂 𑀫𑀸𑀢𑀼 𑀲𑀭𑀻𑀭𑁂 𑀲𑀬𑀦𑀢𑁄, 𑀅𑀢𑁆𑀢𑀦𑁄 𑀏𑀯 𑀯𑀸 𑀧𑀽𑀢𑀺𑀤𑁂𑀳𑀁 𑀲𑀭𑀻𑀭𑀁 𑀢𑀲𑁆𑀫𑀺𑀁 𑀞𑀺𑀢𑀢𑀸𑀬 𑀅𑀯𑀢𑁆𑀣𑀭𑀺𑀢𑁆𑀯𑀸 𑀲𑀬𑀦𑀢𑁄 𑀧𑀽𑀢𑀺𑀤𑁂𑀳𑀲𑀬𑀸𑀢𑀺 𑀬𑁄𑀚𑀦𑀸. 𑀓𑀼𑀡𑀧𑀫𑁆𑀳𑁂𑀢𑁂𑀢𑀺 𑀏𑀢𑁂 𑀫𑀦𑀼𑀲𑁆𑀲𑀸 𑀅𑀲𑀼𑀘𑀺𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀧𑀝𑀺𑀓𑁆𑀓𑀽𑀮𑁂 𑀫𑀸𑀢𑀼𑀓𑀼𑀘𑁆𑀙𑀺𑀲𑀗𑁆𑀔𑀸𑀢𑁂 𑀓𑀼𑀡𑀧𑀲𑁆𑀫𑀺𑀁 𑀤𑀲 𑀫𑀸𑀲𑁂 𑀦𑀺𑀫𑀼𑀕𑁆𑀕𑀸. 𑀢𑁂𑀲𑀁 𑀓𑀺𑀦𑁆𑀦𑀸𑀫 𑀢𑁆𑀯𑀁 𑀧𑀺𑀳𑀬𑀲𑀻𑀢𑀺 𑀬𑁄𑀚𑀦𑀸. 𑀏𑀢𑁂𑀲𑀁 𑀏𑀢𑀁 𑀯𑀺𑀳𑀬𑀸𑀫𑀻𑀢𑀺 𑀏𑀢𑁂𑀲𑀁 𑀇𑀲𑀻𑀦𑀁 𑀏𑀢𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀯𑀺𑀳𑀬𑀸𑀫𑀺. 𑀇𑀤𑀸𑀦𑀺 𑀢𑀁 𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀢𑁂 𑀲𑀁 𑀓𑁄𑀝𑁆𑀞𑁂 𑀑𑀧𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀥𑀜𑁆𑀜𑀁 𑀓𑁄𑀝𑁆𑀞𑁂 𑀦 𑀧𑀓𑁆𑀔𑀺𑀧𑀦𑁆𑀢𑀺 𑀧𑀓𑁆𑀔𑀺𑀧𑀺𑀢𑀩𑁆𑀩𑀲𑁆𑀲 𑀘 𑀅𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀦 𑀳𑀺 𑀏𑀢𑁂𑀲𑀁 𑀥𑀜𑁆𑀜’’𑀦𑁆𑀢𑀺. 𑀧𑀭𑁂𑀲𑀁 𑀦𑀺𑀝𑁆𑀞𑀺𑀢𑀦𑁆𑀢𑀺 𑀧𑀭𑁂𑀲𑀁 𑀕𑀳𑀺𑀢𑀁 𑀲𑀦𑁆𑀢𑀓𑀁 𑀢𑁂𑀲𑀁 𑀧𑀸𑀓𑀸𑀬 𑀦𑀺𑀝𑁆𑀞𑀺𑀢𑀁. 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦𑀸𑀢𑀺 𑀧𑀺𑀡𑁆𑀟𑀸𑀘𑀭𑀺𑀬𑀸𑀬. 𑀏𑀲𑀫𑀸𑀦𑀸 𑀧𑀭𑀺𑀬𑁂𑀲𑀦𑁆𑀢𑀸. 𑀏𑀯𑀁 𑀧𑀭𑀺𑀬𑀺𑀝𑁆𑀞𑁂𑀦. 𑀬𑀸𑀧𑁂𑀦𑁆𑀢𑀺, 𑀦 𑀏𑀲𑀦𑁆𑀢𑀺 𑀅𑀦𑁂𑀲𑀦𑀁. 𑀲𑀼𑀲𑀫𑀸𑀤𑀺𑀦𑁆𑀦𑀲𑀼𑀦𑁆𑀤𑀭𑀯𑀢𑀸𑀢𑀺 𑀲𑀼𑀝𑁆𑀞𑀼 𑀲𑀫𑀸𑀤𑀺𑀦𑁆𑀦𑀲𑁄𑀪𑀦𑀯𑀢𑀸.

𑀏𑀯𑀁 𑀲𑀼𑀪𑀸𑀲𑀺𑀢𑀪𑀸𑀲𑀺𑀦𑁄𑀢𑀺 𑀕𑀦𑁆𑀣𑀥𑀼𑀭𑀯𑀺𑀧𑀲𑁆𑀲𑀦𑀸𑀥𑀼𑀭𑀸𑀦𑀁 𑀯𑀲𑁂𑀦 𑀕𑀼𑀡𑀧𑀭𑀺𑀫𑀸𑀡𑀲𑀼𑀪𑀸𑀲𑀺𑀢𑀲𑁆𑀲𑁂𑀯 𑀪𑀸𑀲𑀦𑀲𑀻𑀮𑀸. 𑀅𑀭𑀺𑀬𑁂𑀦 𑀢𑀼𑀡𑁆𑀳𑀻𑀪𑀽𑀢𑁂𑀦 𑀢𑀼𑀡𑁆𑀳𑀻𑀪𑀽𑀢𑀸. 𑀢𑀢𑁄 𑀏𑀯 𑀫𑀦𑀲𑁆𑀲 𑀲𑀸𑀢𑀺𑀲𑀬𑀁 𑀲𑀫𑀜𑁆𑀘𑀭𑀸. 𑀕𑀳𑀺𑀢𑀤𑀡𑁆𑀟𑁂𑀲𑀼 𑀧𑀭𑀸𑀫𑀸𑀲𑀸𑀤𑀺𑀧𑀬𑀼𑀢𑁆𑀢𑁂𑀲𑀼 𑀤𑀡𑁆𑀟𑀸𑀤𑀸𑀦𑀸𑀤𑀺𑀳𑁂𑀢𑀼 𑀉𑀧𑁆𑀧𑀚𑁆𑀚𑀦𑀓𑀓𑀺𑀮𑁂𑀲𑀧𑀭𑀺𑀴𑀸𑀳𑀸𑀪𑀸𑀯𑀢𑁄 𑀦𑀺𑀩𑁆𑀩𑀼𑀢𑀸. 𑀢𑁂𑀦𑀸𑀳 ‘‘𑀯𑀺𑀲𑁆𑀲𑀝𑁆𑀞𑀤𑀡𑁆𑀟𑀸’’𑀢𑀺. 𑀲𑀸𑀤𑀸𑀦𑁂𑀲𑀽𑀢𑀺 𑀲𑀪𑀯𑀸𑀤𑀸𑀦𑁂𑀲𑀼. 𑀅𑀦𑀸𑀤𑀸𑀦𑀸𑀢𑀺 𑀢𑀩𑁆𑀩𑀺𑀭𑀳𑀺𑀢𑀸. 𑀢𑁂𑀦𑀸𑀳 ‘‘𑀪𑀯𑀬𑁄𑀦𑀻’’𑀢𑀺𑀆𑀤𑀺.

𑀲𑀗𑁆𑀖𑀯𑀦𑁆𑀤𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀯𑀕𑁆𑀕𑁄

𑁧. 𑀙𑁂𑀢𑁆𑀯𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁭. 𑀯𑀼𑀢𑁆𑀢𑀢𑁆𑀣𑀫𑁂𑀯 𑀳𑁂𑀝𑁆𑀞𑀸 𑀤𑁂𑀯𑀧𑀼𑀢𑁆𑀢𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬𑀁.

𑀙𑁂𑀢𑁆𑀯𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑀼𑀩𑁆𑀩𑀡𑁆𑀡𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁮. 𑀤𑀼𑀩𑁆𑀩𑀡𑁆𑀡𑁄 𑀤𑀼𑀤𑁆𑀤𑀲𑀺𑀓𑁄 𑀯𑀺𑀭𑀽𑀧𑀯𑀡𑁆𑀡𑁄. 𑀑𑀓𑁄𑀝𑀺𑀫𑀓𑁄𑀢𑀺 𑀭𑀲𑁆𑀲𑀪𑀸𑀯𑁂𑀦 𑀅𑀯𑀭𑀓𑁄𑀝𑀺𑀫𑀓𑁄. 𑀲𑀓𑁆𑀓𑁂𑀦 𑀕𑀳𑀺𑀢𑀦𑀸𑀫𑀫𑁂𑀯𑁂𑀢𑀁, 𑀦 𑀧𑀦 𑀲𑁄 𑀢𑀣𑀸𑀭𑀽𑀧𑁄 𑀓𑁄𑀘𑀺 𑀬𑀓𑁆𑀔𑁄. 𑀢𑁂𑀦𑀸𑀳 ‘‘𑀏𑀓𑁄 𑀭𑀽𑀧𑀸𑀯𑀘𑀭𑀩𑁆𑀭𑀳𑁆𑀫𑀸’’𑀢𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀲𑁄 𑀢𑀣𑀸𑀭𑀽𑀧𑁄 𑀳𑀼𑀢𑁆𑀯𑀸 𑀆𑀕𑀢𑁄𑀢𑀺 𑀆𑀳 ‘‘𑀲𑀓𑁆𑀓𑁄 𑀓𑀺𑀭𑀸’’𑀢𑀺. 𑀓𑀣𑀁 𑀧𑀦𑁂𑀢𑁆𑀣 𑀜𑀸𑀬𑀢𑀺 ‘‘𑀲𑁄 𑀏𑀓𑁄 𑀭𑀽𑀧𑀸𑀯𑀘𑀭𑀩𑁆𑀭𑀳𑁆𑀫𑀸, 𑀦 𑀧𑀦𑁂𑀲𑁄 𑀅𑀯𑀭𑀼𑀤𑁆𑀥𑀓𑀬𑀓𑁆𑀔𑁄’’𑀢𑀺 𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀯𑀭𑀼𑀤𑁆𑀥𑀓𑀬𑀓𑁆𑀔𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀤𑁂𑀯𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸. 𑀨𑀭𑀼𑀲𑁂𑀦𑀸𑀢𑀺 𑀨𑀭𑀼𑀲𑀲𑀫𑀸𑀘𑀸𑀭𑁂𑀦. ‘‘𑀓𑁄 𑀦𑀸𑀫 𑀫𑀬𑁆𑀳𑀁 𑀆𑀲𑀦𑁂 𑀲𑀦𑁆𑀦𑀺𑀲𑀺𑀦𑁆𑀦𑁄’’𑀢𑀺 𑀅𑀓𑁆𑀔𑀦𑁆𑀢𑀺𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄 𑀔𑀦𑁆𑀢𑀺𑀬𑀁 𑀞𑀢𑁆𑀯𑀸. 𑀩𑀮𑀯𑀘𑀺𑀢𑁆𑀢𑀻𑀓𑀸𑀭𑀦𑁆𑀢𑀺 𑀕𑀭𑀼𑀢𑀭𑀁 𑀲𑀓𑁆𑀓𑀸𑀭𑀩𑀳𑀼𑀫𑀸𑀦𑀁. 𑀦𑀻𑀘𑀯𑀼𑀢𑁆𑀢𑀺𑀬𑀸𑀢𑀺 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑁂 𑀲𑀼𑀯𑀽𑀧𑀲𑀫𑀦𑁂 𑀘 𑀤𑀲𑁆𑀲𑀺𑀬𑀫𑀸𑀦𑁂. 𑀲𑀓𑁆𑀓𑀲𑁆𑀲 𑀢𑀸𑀬 𑀏𑀯 𑀆𑀘𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀲𑀓𑁆𑀓𑀸𑀲𑀦𑁂 𑀞𑀸𑀢𑀼𑀁, 𑀅𑀢𑁆𑀢𑀦𑁄 𑀘 𑀆𑀯𑀺𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀦𑁆𑀢𑀭𑀥𑀸𑀬𑀺. 𑀉𑀧𑀳𑀢𑀘𑀺𑀢𑁆𑀢𑁄𑀫𑁆𑀳𑀻𑀢𑀺 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀸𑀲𑀩𑁆𑀪𑀸𑀯𑀢𑁄 𑀧𑀭𑀲𑁆𑀫𑀺𑀁 𑀉𑀧𑀳𑀢𑀘𑀺𑀢𑁆𑀢𑁄𑀫𑁆𑀳𑀻𑀢𑀺 𑀲𑀓𑁆𑀓𑁄 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀯𑀤𑀢𑀺. 𑀓𑁄𑀥𑀯𑀲𑁂 𑀯𑀢𑁆𑀢𑁂𑀢𑀼𑀦𑁆𑀢𑀺 𑀓𑁄𑀥𑁂𑀦 𑀅𑀢𑁆𑀢𑀦𑁄 𑀯𑀲𑁂 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀼𑀓𑀭𑁄𑀫𑁆𑀳𑀺, 𑀅𑀣 𑀔𑁄 𑀓𑁄𑀥𑀁 𑀫𑀬𑁆𑀳𑀁 𑀯𑀲𑁂 𑀦 𑀯𑀢𑁆𑀢𑁂𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀺𑀭𑀁 𑀦 𑀓𑀼𑀚𑁆𑀛𑀸𑀫𑀻𑀢𑀺 𑀬𑀤𑀺 𑀫𑁂 𑀓𑀤𑀸𑀘𑀺 𑀓𑁄𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀁 𑀓𑁄𑀥𑀁 𑀅𑀦𑀼𑀯𑀢𑁆𑀢𑁂𑀦𑁆𑀢𑁄 𑀘𑀺𑀭𑀓𑀸𑀮𑀁 𑀦 𑀓𑀼𑀚𑁆𑀛𑀸𑀫𑀺. 𑀦 𑀉𑀧𑀦𑀬𑁆𑀳𑀸𑀫𑀻𑀢𑀺 𑀅𑀦𑁆𑀢𑁄 𑀲𑀘𑁂 𑀫𑁂 𑀓𑁄𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀔𑀺𑀧𑁆𑀧𑀫𑁂𑀯 𑀘 𑀦𑀁 𑀧𑀝𑀺𑀯𑀺𑀦𑁂𑀬𑁆𑀬𑀦𑁆𑀢𑀺 𑀢𑀁 𑀫𑁂 𑀧𑀼𑀩𑁆𑀩𑁂𑀯 𑀯𑀢𑀁 𑀧𑀭𑀺𑀧𑀽𑀭𑀺𑀢𑀁.

𑀤𑀼𑀩𑁆𑀩𑀡𑁆𑀡𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀫𑁆𑀩𑀭𑀺𑀫𑀸𑀬𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁯. 𑀆𑀩𑀸𑀥𑀺𑀓𑁄𑀢𑀺 𑀆𑀩𑀸𑀥𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀆𑀩𑀸𑀥𑀺𑀓𑁄. 𑀯𑀸𑀘𑁂𑀲𑀻𑀢𑀺 𑀲𑀺𑀓𑁆𑀔𑀸𑀧𑁂𑀲𑀺. 𑀲𑀫𑁆𑀩𑀭𑁄 𑀦𑀸𑀫 𑀅𑀲𑀼𑀭𑀫𑀸𑀬𑀸𑀬 𑀆𑀤𑀺𑀧𑀼𑀭𑀺𑀲𑁄 𑀧𑀼𑀭𑀸𑀢𑀦𑁄 𑀅𑀲𑀼𑀭𑀺𑀦𑁆𑀤𑁄. 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀣𑀸 𑀲𑀫𑁆𑀩𑀭𑁄’’𑀢𑀺𑀆𑀤𑀺. 𑀏𑀯𑀁 𑀧𑀘𑁆𑀘𑀢𑀺 𑀅𑀜𑁆𑀜𑁄𑀧𑀺 𑀫𑀸𑀬𑀸𑀯𑀻 𑀫𑀸𑀬𑀁 𑀧𑀬𑁄𑀚𑁂𑀢𑁆𑀯𑀸. 𑀉𑀧𑀯𑀸𑀤𑀦𑁆𑀢𑀭𑀸𑀬𑁄 𑀦𑀸𑀫 𑀔𑀫𑀸𑀧𑀦𑁂 𑀲𑀢𑀺 𑀯𑀺𑀕𑀘𑁆𑀙𑀢𑀺, 𑀧𑀸𑀓𑀢𑀺𑀓𑀫𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀏𑀯𑀫𑀲𑁆𑀲 𑀨𑀸𑀲𑀼 𑀪𑀯𑁂𑀬𑁆𑀬𑀸’’𑀢𑀺. 𑀢𑁂𑀦𑀸𑀢𑀺 𑀯𑁂𑀧𑀘𑀺𑀢𑁆𑀢𑀺𑀦𑀸 𑀲𑀫𑁆𑀩𑀭𑀯𑀺𑀚𑁆𑀚𑀸𑀬 𑀅𑀤𑀸𑀦𑁂𑀦 𑀯𑀜𑁆𑀘𑀺𑀢𑀢𑁆𑀢𑀸. 𑀢𑀣𑀸 𑀅𑀓𑀢𑁆𑀯𑀸𑀢𑀺 𑀇𑀲𑀻𑀦𑀁 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀔𑀫𑀸𑀧𑀦𑀯𑀲𑁂𑀦 𑀓𑀸𑀢𑀩𑁆𑀩𑀁 𑀅𑀓𑀢𑁆𑀯𑀸.

𑀲𑀫𑁆𑀩𑀭𑀺𑀫𑀸𑀬𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀘𑁆𑀘𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭𑁦. 𑀲𑀫𑁆𑀧𑀬𑁄𑀚𑁂𑀲𑀼𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁 𑀯𑀸𑀘𑀲𑀺𑀓𑀁 𑀨𑀭𑀼𑀲𑀁 𑀧𑀬𑁄𑀚𑁂𑀲𑀼𑀁. 𑀢𑁂𑀦𑀸𑀳 ‘‘𑀓𑀮𑀳𑀁 𑀅𑀓𑀁𑀲𑀽’’𑀢𑀺, 𑀯𑀺𑀯𑀸𑀤𑀁 𑀅𑀓𑀁𑀲𑀽𑀢𑀺 𑀅𑀢𑁆𑀣𑁄. 𑀅𑀢𑀺𑀓𑁆𑀓𑀫𑁆𑀫𑀯𑀘𑀦𑀦𑁆𑀢𑀺 𑀯𑀘𑀻𑀲𑀁𑀯𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀘𑀦𑀁. 𑀬𑀲𑁆𑀫𑀸 𑀅𑀘𑁆𑀘𑀬𑁂 𑀤𑁂𑀲𑀺𑀬𑀫𑀸𑀦𑁂 𑀢𑀁 𑀔𑀻𑀡𑀬𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀔𑀫𑀫𑀸𑀦𑀲𑁆𑀲 𑀔𑀫𑀦𑀁 𑀧𑀝𑀺𑀕𑁆𑀕𑀡𑁆𑀳𑀢𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦𑀧𑁆𑀧𑀝𑀺𑀕𑀡𑁆𑀳𑀸𑀢𑀻𑀢𑀺 𑀦 𑀔𑀫𑀢𑀻’’𑀢𑀺. 𑀢𑀼𑀫𑁆𑀳𑀸𑀓𑀁 𑀯𑀲𑁂 𑀯𑀢𑁆𑀢𑀢𑀼, 𑀯𑀺𑀲𑁂𑀯𑀺𑀢𑀁 𑀅𑀓𑀢𑁆𑀯𑀸 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀳𑁄𑀢𑀼. 𑀫𑀺𑀢𑁆𑀢𑀥𑀫𑁆𑀫𑁄 𑀇𑀥 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀫𑀺𑀢𑁆𑀢𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀫𑀺𑀢𑁆𑀢𑀥𑀫𑁆𑀫𑁂’’𑀢𑀺. 𑀓𑀭𑀡𑀯𑀘𑀦𑀦𑁆𑀢𑀺 ‘‘𑀫𑀺𑀢𑁆𑀢𑁂𑀳𑀻’’𑀢𑀺 𑀓𑀭𑀡𑀯𑀘𑀦𑀁 𑀪𑀼𑀫𑁆𑀫𑀢𑁆𑀣𑁂. 𑀢𑁂𑀦𑀸𑀳 ‘‘𑀫𑀺𑀢𑁆𑀢𑁂𑀲𑀽’’𑀢𑀺. 𑀬𑀣𑀸 𑀦𑀺𑀩𑁆𑀩𑀢𑁆𑀢𑀲𑀪𑀸𑀯𑀲𑁆𑀲 𑀪𑀸𑀯𑀢𑁄 𑀅𑀜𑁆𑀜𑀣𑀢𑁆𑀢𑀁 𑀚𑀭𑀸, 𑀏𑀯𑀁 𑀫𑀺𑀢𑁆𑀢𑀪𑀸𑀯𑀢𑁄 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁄 𑀅𑀫𑀺𑀢𑁆𑀢𑀥𑀫𑁆𑀫𑁄 𑀚𑀭𑀸𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑁄. 𑀅𑀕𑀸𑀭𑀬𑁆𑀳𑀁 𑀅𑀦𑀯𑀚𑁆𑀚𑀁 𑀲𑀩𑁆𑀩𑀲𑁄 𑀧𑀳𑀻𑀦𑀓𑀺𑀮𑁂𑀲𑀁. 𑀢𑁂𑀦𑀸𑀳 ‘‘𑀔𑀻𑀡𑀸𑀲𑀯𑀧𑀼𑀕𑁆𑀕𑀮’’𑀦𑁆𑀢𑀺.

𑀅𑀘𑁆𑀘𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀓𑁆𑀓𑁄𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭𑁧. 𑀓𑁄𑀥𑁄 𑀢𑀼𑀫𑁆𑀳𑁂 𑀫𑀸 𑀅𑀪𑀺𑀪𑀯𑀻𑀢𑀺 𑀏𑀢𑁆𑀣 𑀓𑁄𑀥𑁂𑀦 𑀅𑀦𑀪𑀺𑀪𑀯𑀦𑀻𑀬𑀢𑁆𑀢𑀁 𑀔𑀦𑁆𑀢𑀺𑀫𑁂𑀢𑁆𑀢𑀸𑀓𑀭𑀼𑀡𑀸𑀤𑀺𑀢𑀧𑁆𑀧𑀝𑀺𑀧𑀓𑁆𑀔𑀥𑀫𑁆𑀫𑀧𑀭𑀺𑀩𑁆𑀭𑀽𑀳𑀦𑁂𑀦. 𑀢𑀣𑀸 𑀳𑀺 𑀢𑀁𑀲𑀫𑀗𑁆𑀕𑀺𑀦𑁄 𑀓𑁄𑀥𑁄 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑀆𑀳 ‘‘𑀢𑀼𑀫𑁆𑀳𑁂𑀯 𑀓𑁄𑀥𑀁 𑀅𑀪𑀺𑀪𑀯𑀣. 𑀓𑀼𑀚𑁆𑀛𑀦𑁆𑀢𑀸𑀦𑀁 𑀫𑀸 𑀧𑀝𑀺𑀓𑀼𑀚𑁆𑀛𑀺𑀢𑁆𑀣𑀸’’𑀢𑀺. 𑀧𑀝𑀺𑀧𑀤𑀸𑀢𑀺 𑀏𑀲𑀸 𑀧𑀝𑀺𑀧𑀢𑁆𑀢𑀺. 𑀫𑁂𑀢𑁆𑀢𑀸𑀢𑀺 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸 𑀫𑁂𑀢𑁆𑀢𑀸. 𑀢𑀤𑀼𑀧𑀘𑀸𑀭𑁄 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑁄. 𑀦 𑀯𑀺𑀳𑀺𑀁𑀲𑀢𑀺 𑀓𑀺𑀜𑁆𑀘𑀺 𑀏𑀢𑀸𑀬𑀸𑀢𑀺 𑀅𑀯𑀺𑀳𑀺𑀁𑀲𑀸. 𑀓𑀭𑀼𑀡𑀸𑀢𑀺 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀓𑀭𑀼𑀡𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀤𑀼𑀧𑀘𑀸𑀭𑁄 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄. 𑀮𑀸𑀫𑀓𑀚𑀦𑀦𑁆𑀢𑀺 𑀔𑀦𑁆𑀢𑀺𑀆𑀤𑀻𑀲𑀼 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀪𑀸𑀯𑁂𑀦 𑀕𑀸𑀭𑀬𑁆𑀳𑀲𑀫𑀸𑀘𑀸𑀭𑀲𑀫𑀸𑀬𑁄𑀕𑁂𑀦 𑀘 𑀦𑀺𑀳𑀻𑀦𑀁 𑀚𑀦𑀁. 𑀧𑀘𑁆𑀘𑀬𑀧𑀭𑀺𑀲𑀼𑀤𑁆𑀥𑀺𑀬𑀸 𑀓𑁄𑀥𑁄 𑀅𑀪𑀺𑀫𑀤𑁆𑀤𑀫𑀸𑀦𑁄 𑀧𑀼𑀕𑁆𑀕𑀮𑀁 𑀅𑀪𑀺𑀫𑀤𑁆𑀤𑀢𑀺, 𑀢𑀲𑁆𑀲 𑀲𑁄 𑀧𑀝𑀺𑀲𑀗𑁆𑀔𑀸𑀦𑀪𑀸𑀯𑀦𑀸𑀩𑀮𑁂𑀳𑀺 𑀲𑀫𑁆𑀫𑀤𑁂𑀯 𑀧𑀳𑀸𑀢𑀩𑁆𑀩𑁄𑀢𑀺.

𑀅𑀓𑁆𑀓𑁄𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀲𑀓𑁆𑀓𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸

𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬 𑀲𑀕𑀸𑀣𑀸𑀯𑀕𑁆𑀕𑀯𑀡𑁆𑀡𑀦𑀸.

𑀧𑀞𑀫𑁄 𑀪𑀸𑀕𑁄 𑀦𑀺𑀝𑁆𑀞𑀺𑀢𑁄.