𑁪. 𑀅𑀘𑁆𑀘𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭𑁦. 𑀲𑀫𑁆𑀧𑀬𑁄𑀚𑁂𑀲𑀼𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁 𑀯𑀸𑀘𑀲𑀺𑀓𑀁 𑀨𑀭𑀼𑀲𑀁 𑀧𑀬𑁄𑀚𑁂𑀲𑀼𑀁. 𑀢𑁂𑀦𑀸𑀳 ‘‘𑀓𑀮𑀳𑀁 𑀅𑀓𑀁𑀲𑀽’’𑀢𑀺, 𑀯𑀺𑀯𑀸𑀤𑀁 𑀅𑀓𑀁𑀲𑀽𑀢𑀺 𑀅𑀢𑁆𑀣𑁄. 𑀅𑀢𑀺𑀓𑁆𑀓𑀫𑁆𑀫𑀯𑀘𑀦𑀦𑁆𑀢𑀺 𑀯𑀘𑀻𑀲𑀁𑀯𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀘𑀦𑀁. 𑀬𑀲𑁆𑀫𑀸 𑀅𑀘𑁆𑀘𑀬𑁂 𑀤𑁂𑀲𑀺𑀬𑀫𑀸𑀦𑁂 𑀢𑀁 𑀔𑀻𑀡𑀬𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀔𑀫𑀫𑀸𑀦𑀲𑁆𑀲 𑀔𑀫𑀦𑀁 𑀧𑀝𑀺𑀕𑁆𑀕𑀡𑁆𑀳𑀢𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦𑀧𑁆𑀧𑀝𑀺𑀕𑀡𑁆𑀳𑀸𑀢𑀻𑀢𑀺 𑀦 𑀔𑀫𑀢𑀻’’𑀢𑀺. 𑀢𑀼𑀫𑁆𑀳𑀸𑀓𑀁 𑀯𑀲𑁂 𑀯𑀢𑁆𑀢𑀢𑀼, 𑀯𑀺𑀲𑁂𑀯𑀺𑀢𑀁 𑀅𑀓𑀢𑁆𑀯𑀸 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀳𑁄𑀢𑀼. 𑀫𑀺𑀢𑁆𑀢𑀥𑀫𑁆𑀫𑁄 𑀇𑀥 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀫𑀺𑀢𑁆𑀢𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀫𑀺𑀢𑁆𑀢𑀥𑀫𑁆𑀫𑁂’’𑀢𑀺. 𑀓𑀭𑀡𑀯𑀘𑀦𑀦𑁆𑀢𑀺 ‘‘𑀫𑀺𑀢𑁆𑀢𑁂𑀳𑀻’’𑀢𑀺 𑀓𑀭𑀡𑀯𑀘𑀦𑀁 𑀪𑀼𑀫𑁆𑀫𑀢𑁆𑀣𑁂. 𑀢𑁂𑀦𑀸𑀳 ‘‘𑀫𑀺𑀢𑁆𑀢𑁂𑀲𑀽’’𑀢𑀺. 𑀬𑀣𑀸 𑀦𑀺𑀩𑁆𑀩𑀢𑁆𑀢𑀲𑀪𑀸𑀯𑀲𑁆𑀲 𑀪𑀸𑀯𑀢𑁄 𑀅𑀜𑁆𑀜𑀣𑀢𑁆𑀢𑀁 𑀚𑀭𑀸, 𑀏𑀯𑀁 𑀫𑀺𑀢𑁆𑀢𑀪𑀸𑀯𑀢𑁄 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁄 𑀅𑀫𑀺𑀢𑁆𑀢𑀥𑀫𑁆𑀫𑁄 𑀚𑀭𑀸𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑁄. 𑀅𑀕𑀸𑀭𑀬𑁆𑀳𑀁 𑀅𑀦𑀯𑀚𑁆𑀚𑀁 𑀲𑀩𑁆𑀩𑀲𑁄 𑀧𑀳𑀻𑀦𑀓𑀺𑀮𑁂𑀲𑀁. 𑀢𑁂𑀦𑀸𑀳 ‘‘𑀔𑀻𑀡𑀸𑀲𑀯𑀧𑀼𑀕𑁆𑀕𑀮’’𑀦𑁆𑀢𑀺.

𑀅𑀘𑁆𑀘𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.