𑀅𑀥𑀺𑀓𑀭𑀡𑀪𑁂𑀤𑀁

𑀉𑀓𑁆𑀓𑁄𑀝𑀦𑀪𑁂𑀤𑀸𑀤𑀺𑀯𑀡𑁆𑀡𑀦𑀸

𑁩𑁪𑁦. 𑀅𑀥𑀺𑀓𑀭𑀡𑀪𑁂𑀤𑁂 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀤𑀲𑁆𑀲𑁂𑀢𑀼𑀁 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀤𑁆𑀯𑁂 𑀲𑀫𑀣𑁂𑀢𑀺 𑀏𑀢𑁆𑀣 𑀤𑁆𑀯𑀺𑀦𑁆𑀦𑀁 𑀲𑀫𑀣𑀸𑀦𑀁 𑀲𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑁆𑀫𑀼𑀔𑀸𑀯𑀺𑀦𑀬𑀜𑁆𑀘 𑀬𑁂𑀪𑀼𑀬𑁆𑀬𑀲𑀺𑀓𑀜𑁆𑀘𑀸’’𑀢𑀺. ‘‘𑀧𑀝𑀺𑀲𑁂𑀥𑁂𑀢𑀻’’𑀢𑀺 𑀇𑀫𑀺𑀦𑀸 𑀉𑀓𑁆𑀓𑁄𑀝𑁂𑀢𑀻𑀢𑀺 𑀏𑀢𑁆𑀣 𑀓𑀼𑀝𑀥𑀸𑀢𑀼𑀬𑀸 𑀙𑁂𑀤𑀦𑀢𑁆𑀣𑀁 𑀅𑀢𑁆𑀣𑀢𑁄 𑀤𑀲𑁆𑀲𑁂𑀢𑀺. 𑀙𑁂𑀤𑀦𑀁 𑀦𑀸𑀫 𑀅𑀢𑁆𑀣𑀢𑁄 𑀲𑀫𑀣𑀧𑀝𑀺𑀲𑁂𑀥𑀦𑀦𑁆𑀢𑀺 𑀅𑀢𑁆𑀣𑁄.

𑁩𑁪𑁧. 𑀤𑁆𑀯𑀸𑀤𑀲𑀲𑀼 𑀉𑀓𑁆𑀓𑁄𑀝𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀅𑀓𑀢𑀁 𑀓𑀫𑁆𑀫𑀦𑁆𑀢𑀺𑀆𑀤𑀬𑁄𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 ‘‘𑀤𑀼𑀓𑁆𑀓𑀝𑀁 𑀓𑀫𑁆𑀫𑀁, 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺 𑀤𑁆𑀯𑁂 𑀉𑀓𑁆𑀓𑁄𑀝𑀸 𑀲𑀗𑁆𑀕𑀳𑁂𑀢𑀩𑁆𑀩𑀸. 𑀅𑀦𑀺𑀳𑀢𑀁 𑀓𑀫𑁆𑀫𑀦𑁆𑀢𑀺𑀆𑀤𑀬𑁄𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 ‘‘𑀤𑀼𑀦𑁆𑀦𑀺𑀳𑀢𑀁, 𑀧𑀼𑀦 𑀦𑀺𑀳𑀦𑀺𑀢𑀩𑁆𑀩’’𑀦𑁆𑀢𑀺 𑀤𑁆𑀯𑁂 𑀉𑀓𑁆𑀓𑁄𑀝𑀸 𑀲𑀗𑁆𑀕𑀳𑁂𑀢𑀩𑁆𑀩𑀸. 𑀅𑀯𑀺𑀦𑀺𑀘𑁆𑀙𑀺𑀢𑀦𑁆𑀢𑀺𑀆𑀤𑀬𑁄𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 ‘‘𑀤𑀼𑀯𑀺𑀦𑀺𑀘𑁆𑀙𑀺𑀢𑀁, 𑀧𑀼𑀦 𑀯𑀺𑀦𑀺𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺 𑀤𑁆𑀯𑁂 𑀉𑀓𑁆𑀓𑁄𑀝𑀸 𑀲𑀗𑁆𑀕𑀳𑁂𑀢𑀩𑁆𑀩𑀸. 𑀅𑀯𑀽𑀧𑀲𑀦𑁆𑀢𑀦𑁆𑀢𑀺𑀆𑀤𑀬𑁄𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 ‘‘𑀤𑀼𑀯𑀽𑀧𑀲𑀦𑁆𑀢𑀁, 𑀧𑀼𑀦 𑀯𑀽𑀧𑀲𑀫𑁂𑀢𑀩𑁆𑀩’’𑀦𑁆𑀢𑀺 𑀤𑁆𑀯𑁂 𑀉𑀓𑁆𑀓𑁄𑀝𑀸 𑀲𑀗𑁆𑀕𑀳𑁂𑀢𑀩𑁆𑀩𑀸. 𑀅𑀧𑀺𑀘𑀸𑀢𑀺 𑀲𑀸𑀫𑀜𑁆𑀜𑀢𑁄 𑀧𑀦.

𑀢𑀢𑁆𑀣 𑀚𑀸𑀢𑀓𑀦𑁆𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀫𑀺𑀁𑀯𑀺𑀳𑀸𑀭𑁂’’𑀢𑀺. 𑀬𑀲𑁆𑀫𑀺𑀁𑀯𑀺𑀳𑀸𑀭𑁂 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀢𑁆𑀢𑁂𑀲𑀼, 𑀅𑀢𑁆𑀢𑀸𑀦𑀁 𑀯𑀸 𑀧𑀝𑀺𑀧𑀓𑁆𑀔𑀁 𑀅𑀢𑁆𑀣𑀬𑀦𑁆𑀢𑀺 𑀇𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀸. 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁂𑀦𑁂𑀯𑀸𑀢𑀺 𑀧𑀸𑀴𑀺𑀬𑀁 𑀆𑀕𑀢𑁂𑀳𑀺 𑀲𑀫𑀣𑁂𑀳𑀺 𑀫𑀼𑀢𑁆𑀢𑀓𑁂𑀦 𑀥𑀫𑁆𑀫𑀤𑁂𑀲𑀦𑀸𑀫𑀢𑁆𑀢𑀯𑀺𑀦𑀺𑀘𑁆𑀙𑀬𑁂𑀦𑁂𑀯. 𑀇𑀤𑀦𑁆𑀢𑀺 𑀅𑀥𑀺𑀓𑀭𑀡𑀁. 𑀬𑁂𑀦𑀸𑀧𑀺 𑀯𑀺𑀦𑀺𑀘𑁆𑀙𑀬𑁂𑀦𑀸𑀢𑀺 𑀧𑀸𑀴𑀺𑀫𑀼𑀢𑁆𑀢𑀓𑁂𑀦 𑀬𑁂𑀦𑀸𑀧𑀺 𑀯𑀺𑀦𑀺𑀘𑁆𑀙𑀬𑁂𑀦.

𑀅𑀜𑁆𑀜𑁄𑀢𑀺 𑀦𑁂𑀯𑀸𑀲𑀺𑀓𑁂𑀳𑀺 𑀅𑀜𑁆𑀜𑁄 𑀯𑀺𑀦𑀬𑀥𑀭𑁄 𑀧𑀼𑀘𑁆𑀙𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀳𑀺 𑀘𑀸𑀢𑀺 𑀦𑁂𑀯𑀸𑀲𑀺𑀓𑁂𑀳𑀺 𑀘.

𑀏𑀢𑀲𑁆𑀲𑀸𑀢𑀺 𑀯𑀺𑀦𑀬𑀥𑀭𑀲𑁆𑀲. 𑀅𑀬𑀦𑁆𑀢𑀺 𑀯𑀺𑀦𑀬𑀥𑀭𑁄. 𑀢𑀢𑁆𑀣𑀸𑀢𑀺 𑀢𑀁 𑀕𑀸𑀫𑀁. 𑀅𑀜𑁆𑀜𑀫𑀜𑁆𑀜𑀁 𑀯𑀸 𑀲𑀜𑁆𑀜𑀸𑀧𑁂𑀦𑁆𑀢𑀻𑀢𑀺 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀸 𑀅𑀜𑁆𑀜𑀫𑀜𑁆𑀜𑀁 𑀯𑀸 𑀲𑀜𑁆𑀜𑀸𑀧𑁂𑀦𑁆𑀢𑀺. 𑀢𑁂 𑀪𑀺𑀓𑁆𑀔𑀽𑀢𑀺 𑀢𑁂 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀸 𑀪𑀺𑀓𑁆𑀔𑀽. 𑀦𑀺𑀚𑁆𑀛𑀸𑀧𑁂𑀦𑁆𑀢𑀻𑀢𑀺 𑀲𑀜𑁆𑀜𑀸𑀧𑁂𑀦𑁆𑀢𑀺. 𑀉𑀓𑁆𑀓𑁄𑀝𑁂𑀢𑀺 𑀬𑁄𑀢𑀺 𑀬𑁄 𑀉𑀓𑁆𑀓𑁄𑀝𑁂𑀢𑀺. 𑀏𑀢𑁂𑀢𑀺 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑁂 𑀪𑀺𑀓𑁆𑀔𑀽, 𑀤𑀺𑀲𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀕𑀸𑀫𑀁. 𑀢𑀢𑁆𑀣𑁂𑀯𑀸𑀢𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀯.

𑀢𑀢𑁆𑀣𑁂𑀯𑀸𑀢𑀺 𑀕𑀸𑀫𑀫𑁂𑀯. 𑀢𑀢𑁆𑀣𑁂𑀯𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂. 𑀢𑀢𑁆𑀣 𑀕𑀢𑀦𑁆𑀢𑀺 𑀢𑀁 𑀕𑀸𑀫𑀁 𑀕𑀢𑀁.

‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀅𑀢𑀺𑀤𑀺𑀲𑀢𑀺.

𑀲𑀗𑁆𑀖𑁂𑀦…𑀧𑁂… 𑀅𑀥𑀺𑀓𑀭𑀡𑁂 𑀯𑀤𑀦𑁆𑀢𑁄𑀧𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀁 𑀧𑀦𑁂𑀢𑀁 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀁 𑀦𑀸𑀫 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀏𑀢𑀦𑁆𑀢𑀺 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀁. 𑀯𑀤𑀦𑁆𑀢𑁄𑀧𑀻𑀢𑀺 𑀧𑀺𑀲𑀤𑁆𑀤𑁄 𑀦 𑀓𑁂𑀯𑀮𑀁 𑀢𑀺𑀡𑀯𑀢𑁆𑀣𑀸𑀭𑀓𑀁 𑀉𑀓𑁆𑀓𑁄𑀝𑁂𑀦𑁆𑀢𑁄𑀬𑁂𑀯 𑀉𑀓𑁆𑀓𑁄𑀝𑁂𑀢𑀺 𑀦𑀸𑀫, 𑀅𑀣 𑀔𑁄 𑀯𑀤𑀦𑁆𑀢𑁄𑀧𑀻𑀢𑀺 𑀤𑀲𑁆𑀲𑁂𑀢𑀺.

𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄𑀢𑀺𑀆𑀤𑀻𑀲𑀼 𑀅𑀕𑀢𑀺𑀕𑀫𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀦𑀬𑀥𑀭𑁄 𑀳𑀼𑀢𑁆𑀯𑀸’’𑀢𑀺𑀆𑀤𑀺. 𑀅𑀢𑁆𑀣𑀸𑀬 𑀉𑀓𑁆𑀓𑁄𑀝𑁂𑀦𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀅𑀦𑀢𑁆𑀣𑀁 𑀘𑀭𑀦𑁆𑀢𑀲𑁆𑀲. 𑀫𑀦𑁆𑀤𑁄 𑀧𑀦 𑀉𑀓𑁆𑀓𑁄𑀝𑁂𑀢𑀺 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑁄 𑀩𑀮𑀯𑀦𑀺𑀲𑁆𑀲𑀺𑀢𑁄 𑀘 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀳𑀦𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑁆𑀢𑀺 𑀕𑀳𑀦𑀲𑀤𑀺𑀲𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀯𑀦𑀲𑀤𑀺𑀲𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑁆𑀢𑀺 𑀅𑀢𑁆𑀣𑁄. 𑀩𑀮𑀯𑀦𑁆𑀢𑁂 𑀘𑀸𑀢𑀺 𑀏𑀢𑁆𑀣 𑀘𑀲𑀤𑁆𑀤𑁄 𑀲𑀩𑁆𑀩𑀓𑀫𑁆𑀫𑁂𑀲𑀼 𑀬𑁄𑀚𑁂𑀢𑀩𑁆𑀩𑁄. 𑀦𑀺𑀲𑁆𑀲𑀺𑀢𑀢𑁆𑀢𑀸𑀢𑀺 𑀏𑀓𑀲𑁆𑀲 𑀦𑀺𑀲𑁆𑀲𑀺𑀢𑀢𑁆𑀢𑀸. 𑀩𑀮𑀯𑀦𑀺𑀲𑁆𑀲𑀺𑀢𑁄 𑀘𑀸𑀢𑀺 𑀏𑀢𑁆𑀣𑀸𑀧𑀺 𑀘 𑀲𑀤𑁆𑀤𑁄 𑀲𑀩𑁆𑀩𑀓𑀢𑁆𑀢𑀽𑀲𑀼 𑀬𑁄𑀚𑁂𑀢𑀩𑁆𑀩𑁄. 𑀢𑀲𑁆𑀲𑀸𑀢𑀺 𑀯𑀺𑀲𑀫𑀸𑀤𑀺𑀦𑀺𑀲𑁆𑀲𑀺𑀢𑀲𑁆𑀲.

𑀲𑁄𑀢𑀺 𑀲𑀸𑀫𑀡𑁂𑀭𑁄. 𑀫𑀗𑁆𑀓𑀼𑀪𑀽𑀢𑀸𑀢𑁆𑀣𑀸𑀢𑀺 𑀫𑀗𑁆𑀓𑀽 𑀳𑀼𑀢𑁆𑀯𑀸 𑀪𑀽𑀢𑀸, 𑀫𑀗𑁆𑀓𑀼𑀁 𑀯𑀸 𑀧𑀢𑁆𑀢𑀸 𑀅𑀢𑁆𑀣 𑀪𑀯𑀣𑀸𑀢𑀺 𑀅𑀢𑁆𑀣𑁄. 𑀢𑁂𑀢𑀺 𑀧𑀭𑀸𑀚𑀬𑀪𑀺𑀓𑁆𑀔𑀽. 𑀢𑀲𑁆𑀲𑀸𑀢𑀺 𑀲𑀸𑀫𑀡𑁂𑀭𑀲𑁆𑀲. 𑀲𑁄𑀢𑀺 𑀲𑀸𑀫𑀡𑁂𑀭𑁄. 𑀢𑁂𑀢𑀺 𑀧𑀭𑀸𑀚𑀬𑀪𑀺𑀓𑁆𑀔𑀽. 𑀢𑀦𑁆𑀢𑀺 𑀲𑀸𑀫𑀡𑁂𑀭𑀁. 𑀲𑁄𑀢𑀺 𑀤𑀳𑀭𑁄. 𑀢𑀢𑁄𑀢𑀺 𑀲𑀦𑁆𑀦𑀺𑀧𑀸𑀢𑀓𑀸𑀭𑀡𑀸. 𑀳𑀺𑀬𑁆𑀬𑁄𑀢𑀺 𑀅𑀦𑀦𑁆𑀢𑀭𑀸𑀢𑀻𑀢𑀸𑀳𑁂. 𑀇𑀢𑀻𑀢𑀺 𑀏𑀯𑀁 𑀯𑀤𑁂𑀢𑀺. 𑀲𑁄𑀢𑀺 𑀤𑀳𑀭𑁄. 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀕𑀘𑁆𑀙𑀸𑀢𑀺 𑀕𑀘𑁆𑀙𑀸𑀳𑀺. 𑀇𑀢𑀻𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑁄𑀢𑀺 𑀬𑁄𑀚𑀦𑀸.

𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀧𑀭𑀺𑀯𑁂𑀡𑀕𑀢𑀁 𑀏𑀓𑀁 𑀪𑀺𑀓𑁆𑀔𑀼𑀦𑁆𑀢𑀺 𑀬𑁄𑀚𑀦𑀸. 𑀓𑀺𑀲𑁆𑀲𑀸𑀢𑀺 𑀓𑁂𑀦 𑀓𑀸𑀭𑀡𑁂𑀦. 𑀏𑀯𑀁 𑀇𑀫𑀺𑀦𑀸𑀓𑀸𑀭𑁂𑀦 𑀯𑀺𑀦𑀺𑀘𑁆𑀙𑀺𑀢𑀩𑁆𑀩𑀁 𑀦𑀦𑀽𑀢𑀺 𑀬𑁄𑀚𑀦𑀸. 𑀲𑁄𑀢𑀺 𑀯𑀺𑀦𑀺𑀘𑁆𑀙𑀬𑀓𑀸𑀭𑀓𑁄 𑀪𑀺𑀓𑁆𑀔𑀼. 𑀙𑀦𑁆𑀤𑀤𑀸𑀬𑀓𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀬𑁂𑀯.

𑀅𑀥𑀺𑀓𑀭𑀡𑀦𑀺𑀤𑀸𑀦𑀸𑀤𑀺𑀯𑀡𑁆𑀡𑀦𑀸

𑁩𑁪𑁨. 𑀓𑀺𑀁𑀦𑀺𑀤𑀸𑀦𑀦𑁆𑀢𑀺𑀆𑀤𑀻𑀲𑀼 𑀙𑀲𑀼 𑀧𑀤𑁂𑀲𑀼 𑀲𑀫𑀸𑀲𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀺𑀁𑀦𑀺𑀤𑀸𑀦𑀫𑀲𑁆𑀲𑀸’’𑀢𑀺𑀆𑀤𑀺. 𑀅𑀲𑁆𑀲𑀸𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲. ‘‘𑀓𑀺𑀁𑀦𑀺𑀤𑀸𑀦’’𑀦𑁆𑀢𑀺 𑀧𑀤𑀸𑀦𑀁 𑀲𑀢𑀺𑀧𑀺 𑀲𑀫𑀸𑀲𑀪𑀸𑀯𑁂 𑀩𑁆𑀬𑀜𑁆𑀚𑀦𑀦𑁆𑀢𑀧𑀓𑀢𑀺𑀓𑀢𑁆𑀢𑀸 ‘‘𑀓𑀺’’𑀦𑁆𑀢𑀺 𑀦𑀺𑀕𑁆𑀕𑀳𑀺𑀢𑀦𑁆𑀢𑀪𑀸𑀯𑁂𑀦 𑀉𑀘𑁆𑀘𑀸𑀭𑀡𑀁 𑀓𑀸𑀢𑀩𑁆𑀩𑀁. 𑀲𑀩𑁆𑀩𑀸𑀦𑁂𑀢𑀸𑀦𑀻𑀢𑀺 𑀲𑀩𑁆𑀩𑀸𑀦𑀺 𑀦𑀺𑀤𑀸𑀦𑀦𑁆𑀢𑀺𑀆𑀤𑀻𑀦𑀺 𑀏𑀢𑀸𑀦𑀺 𑀧𑀤𑀸𑀦𑀺. 𑀯𑁂𑀯𑀘𑀦𑀸𑀦𑀻𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 ‘‘𑀓𑀸𑀭𑀡’’𑀦𑁆𑀢𑀺 𑀅𑀢𑁆𑀣𑁂 𑀯𑀺𑀯𑀺𑀥𑀸𑀦𑀺 𑀯𑀘𑀦𑀸𑀦𑀺 𑀯𑀺𑀯𑀘𑀦𑀸𑀦𑀺, 𑀢𑀸𑀦𑀺𑀬𑁂𑀯 𑀯𑁂𑀯𑀘𑀦𑀸𑀦𑀺. 𑀅𑀣 𑀯𑀸 𑀯𑀺𑀯𑀺𑀥𑀁 𑀯𑀘𑀦𑀫𑁂𑀢𑀲𑁆𑀲𑀢𑁆𑀣𑀲𑁆𑀲𑀸𑀢𑀺 𑀯𑀺𑀯𑀘𑀦𑀁, 𑀓𑀸𑀭𑀡𑀲𑀗𑁆𑀔𑀸𑀢𑁄 𑀅𑀢𑁆𑀣𑁄, 𑀅𑀪𑀺𑀥𑁂𑀬𑁆𑀬𑀅𑀪𑀺𑀥𑀸𑀦𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑀢𑁆𑀢𑀸 𑀯𑀺𑀯𑀘𑀦𑀲𑁆𑀲 𑀏𑀢𑀸𑀦𑀺 𑀯𑁂𑀯𑀘𑀦𑀸𑀦𑀺, 𑀧𑀤𑀸𑀦𑀺.

‘‘𑀅𑀝𑁆𑀞𑀸𑀭𑀲𑀪𑁂𑀤𑀓𑀭𑀯𑀢𑁆𑀣𑀼𑀲𑀗𑁆𑀔𑀸𑀢𑁄’’𑀢𑀺 𑀇𑀫𑀺𑀦𑀸 𑀯𑀺𑀯𑀸𑀤𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀯𑀺𑀯𑀸𑀤𑀦𑁆𑀢𑀺 𑀅𑀝𑁆𑀞𑀸𑀭𑀲𑀪𑁂𑀤𑀓𑀭𑀯𑀢𑁆𑀣𑀼𑀲𑀗𑁆𑀔𑀸𑀢𑀁 𑀯𑀺𑀯𑀸𑀤𑀁. 𑀏𑀢𑀦𑁆𑀢𑀺 ‘‘𑀯𑀺𑀯𑀸𑀤𑀦𑀺𑀤𑀸𑀦’’𑀦𑁆𑀢𑀺 𑀏𑀢𑀁 𑀯𑀘𑀦𑀁. 𑀅𑀲𑁆𑀲𑀸𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲. 𑀇𑀤𑀫𑁆𑀧𑀻𑀢𑀺 ‘‘𑀅𑀦𑀼𑀯𑀸𑀤𑀦𑀺𑀤𑀸𑀦’’𑀦𑁆𑀢𑀺 𑀯𑀘𑀦𑀫𑁆𑀧𑀺. 𑀅𑀲𑁆𑀲𑀸𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲. 𑀏𑀢𑀦𑁆𑀢𑀺 ‘‘𑀆𑀧𑀢𑁆𑀢𑀺𑀦𑀺𑀤𑀸𑀦’’𑀦𑁆𑀢𑀺 𑀯𑀘𑀦𑀁. 𑀓𑀺𑀘𑁆𑀘𑀫𑁂𑀯 𑀩𑁆𑀬𑀜𑁆𑀚𑀦𑀯𑀟𑁆𑀠𑀦𑀯𑀲𑁂𑀦 𑀓𑀺𑀘𑁆𑀘𑀬𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀲𑁆𑀲𑀸𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲. 𑀲𑀫𑀦𑀼𑀪𑀸𑀲𑀦𑀸𑀤𑀻𑀦𑀁 𑀉𑀧𑁆𑀧𑀚𑁆𑀚𑀦𑀓𑀓𑀺𑀘𑁆𑀘𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀦𑁆𑀢𑀺 ‘‘𑀓𑀺𑀘𑁆𑀘𑀬𑀦𑀺𑀤𑀸𑀦’’𑀦𑁆𑀢𑀺 𑀯𑀘𑀦𑀁. 𑀏𑀓𑀧𑀤𑀬𑁄𑀚𑀦𑀸𑀢𑀺 𑀏𑀓𑁂𑀦 ‘‘𑀦𑀺𑀤𑀸𑀦’’𑀦𑁆𑀢𑀺 𑀧𑀤𑁂𑀦 𑀬𑁄𑀚𑀦𑀸. 𑀲𑀩𑁆𑀩𑀧𑀤𑀸𑀦𑀻𑀢𑀺 𑀲𑀩𑁆𑀩𑀸𑀦𑀺 𑀲𑀫𑀼𑀤𑀬𑀸𑀤𑀻𑀦𑀺 𑀧𑀤𑀸𑀦𑀺.

𑀦𑀯𑀦𑁆𑀦𑀦𑁆𑀢𑀺 𑀚𑀸𑀢𑀺𑀯𑀲𑁂𑀦 𑀙𑀦𑁆𑀦𑀁 𑀳𑁂𑀢𑀽𑀦𑀁 𑀦𑀯𑀲𑀼 𑀅𑀦𑁆𑀢𑁄𑀕𑀥𑀢𑁆𑀢𑀸 𑀢𑀺𑀓𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀩𑁆𑀬𑀜𑁆𑀚𑀦𑀫𑀢𑁆𑀢𑀦𑁆𑀢𑀺 𑀳𑁂𑀢𑀼𑀧𑀘𑁆𑀘𑀬𑀯𑀲𑁂𑀦 𑀩𑁆𑀬𑀜𑁆𑀚𑀦𑀫𑁂𑀯. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀏𑀢𑁆𑀣𑀸𑀢𑀺 𑀢𑀢𑀺𑀬𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂.

𑁩𑁪𑁩. 𑀤𑁆𑀯𑀸𑀤𑀲 𑀫𑀽𑀮𑀸𑀦𑀻𑀢𑀺 𑀏𑀢𑁆𑀣 𑀤𑁆𑀯𑀸𑀤𑀲𑀦𑁆𑀦𑀁 𑀫𑀽𑀮𑀸𑀦𑀁 𑀲𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑁄𑀥𑀉𑀧𑀦𑀸𑀳𑀬𑀼𑀕𑀴𑀓𑀸𑀤𑀻𑀦𑀻’’𑀢𑀺𑀆𑀤𑀺. 𑀏𑀢𑁆𑀣 (𑀯𑀺𑀪. 𑁮𑁩𑁩, 𑁯𑁪𑁪) 𑀆𑀤𑀺𑀲𑀤𑁆𑀤𑁂𑀦 𑀫𑀓𑁆𑀔𑀧𑀴𑀸𑀲𑀬𑀼𑀕𑀴 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀬𑀼𑀕𑀴 𑀫𑀸𑀬𑀸𑀲𑀸𑀞𑁂𑀬𑁆𑀬𑀬𑀼𑀕𑀴 𑀧𑀸𑀧𑀺𑀘𑁆𑀙𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀼𑀕𑀴 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀺𑀆𑀥𑀸𑀦𑀕𑁆𑀕𑀸𑀳𑀺𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀺𑀬𑀼𑀕𑀴𑀯𑀲𑁂𑀦 𑀧𑀜𑁆𑀘 𑀬𑀼𑀕𑀴𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀸𑀦𑀻𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀸𑀦𑀺.

𑀅𑀝𑁆𑀞𑀸𑀭𑀲𑀪𑁂𑀤𑀓𑀭𑀯𑀢𑁆𑀣𑀽𑀦𑀁 𑀲𑀫𑀼𑀝𑁆𑀞𑀸𑀦𑀪𑀸𑀯𑀁 𑀦𑀺𑀩𑁆𑀩𑀘𑀦𑁂𑀦 𑀧𑀓𑀸𑀲𑁂𑀦𑁆𑀢𑁄 𑀆𑀳 ‘‘𑀢𑀁 𑀳𑀻’’𑀢𑀺𑀆𑀤𑀺. 𑀢𑀦𑁆𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀲𑀫𑀼𑀝𑁆𑀞𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀘 ‘‘𑀏𑀢𑁂𑀲𑀽’’𑀢𑀺 𑀇𑀫𑀺𑀦𑀸 𑀅𑀥𑀺𑀓𑀭𑀡𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀏𑀢𑁂𑀳𑀻’’𑀢𑀺 𑀇𑀫𑀺𑀦𑀸 𑀓𑀭𑀡𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀢𑀺 𑀓𑀸𑀭𑀡𑁂𑀦. 𑀅𑀲𑁆𑀲𑀸𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲. 𑀏𑀢𑀸𑀦𑀻𑀢𑀺 𑀅𑀝𑁆𑀞𑀸𑀭𑀲𑀪𑁂𑀤𑀓𑀭𑀯𑀢𑁆𑀣𑀽𑀦𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀁 𑀅𑀥𑀺𑀓𑀭𑀡𑀸𑀦𑀁 𑀲𑀩𑁆𑀩𑁂𑀲𑀼 𑀲𑀫𑀼𑀝𑁆𑀞𑀸𑀦𑁂𑀲𑀼.

𑁩𑁪𑁪. 𑀏𑀓𑁂𑀦 𑀅𑀥𑀺𑀓𑀭𑀡𑁂𑀦 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦𑀸𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀸𑀦𑀻𑀢𑀺 𑀅𑀥𑀺𑀓𑀭𑀡𑀸𑀦𑀺. 𑀏𑀓𑀁𑀲𑀢𑁄𑀢𑀺 𑀏𑀓𑀁𑀲𑁂𑀦, 𑀏𑀓𑀓𑁄𑀝𑁆𑀞𑀸𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸.

𑀲𑀸𑀯𑀲𑁂𑀲𑀸𑀧𑀢𑁆𑀢𑀺 𑀲𑀫𑁆𑀫𑀢𑀺 𑀯𑀺𑀬 𑀅𑀦𑀯𑀲𑁂𑀲𑀸𑀧𑀢𑁆𑀢𑀺 𑀦 𑀲𑀫𑁆𑀫𑀢𑀻𑀢𑀺 𑀬𑁄𑀚𑀦𑀸. 𑀓𑀲𑁆𑀫𑀸 𑀦 𑀲𑀫𑁆𑀫𑀢𑀻𑀢𑀺 𑀆𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀬𑀲𑁆𑀫𑀸. 𑀲𑀸𑀢𑀺 𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀺. 𑀢𑀢𑁄𑀢𑀺 𑀅𑀦𑀯𑀲𑁂𑀲𑀸𑀧𑀢𑁆𑀢𑀺𑀢𑁄. 𑀏𑀢𑁆𑀣 𑀘 ‘‘𑀦 𑀲𑀓𑁆𑀓𑀸 𑀤𑁂𑀲𑁂𑀢𑀼’’𑀦𑁆𑀢𑀺 𑀇𑀫𑀺𑀦𑀸 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀅𑀪𑀸𑀯𑀁 𑀤𑀻𑀧𑁂𑀢𑀺. ‘‘𑀦 𑀲𑀓𑁆𑀓𑀸…𑀧𑁂… 𑀧𑀢𑀺𑀝𑁆𑀞𑀸𑀢𑀼’’𑀦𑁆𑀢𑀺 𑀇𑀫𑀺𑀦𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀅𑀪𑀸𑀯𑀁 𑀤𑀻𑀧𑁂𑀢𑀺.

𑁩𑁪𑁯. 𑀢𑀢𑁄𑀢𑀺 𑀦𑀬𑀢𑁄. 𑀬𑀢𑁆𑀣 𑀲𑀢𑀺𑀯𑀺𑀦𑀬𑁄𑀢𑀺𑀆𑀤𑀺𑀓𑀸 𑀙 𑀬𑀫𑀓𑀧𑀼𑀘𑁆𑀙𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀸𑀲𑀦𑁆𑀢𑀺 𑀧𑀼𑀘𑁆𑀙𑀸𑀦𑀁. 𑀧𑀓𑀸𑀲𑀺𑀢𑁄𑀢𑀺 𑀧𑀸𑀓𑀝𑁄.

𑁩𑁫𑁧. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀫𑀣𑀸𑀦𑀦𑁆𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑀢𑀺𑀯𑀺𑀦𑀬𑀯𑀲𑁂𑀦 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀫𑀣𑀸𑀦𑀁. 𑀬𑀲𑁆𑀫𑀸𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀦 𑀲𑀓𑁆𑀓𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀢𑁆𑀢𑀯𑀝𑁆𑀝𑀻𑀦𑀁 𑀦𑀸𑀦𑀸𑀓𑀭𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀦𑁆𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑀢𑀺𑀯𑀺𑀦𑀬𑀸𑀦𑀁 𑀦𑀸𑀦𑀸𑀓𑀭𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀬𑀲𑁆𑀫𑀸 𑀓𑀤𑀮𑀺𑀓𑁆𑀔𑀦𑁆𑀥𑁂 𑀧𑀢𑁆𑀢𑀯𑀝𑁆𑀝𑀻𑀦𑀁 𑀦𑀸𑀦𑀸𑀓𑀭𑀡𑀁 𑀯𑀺𑀦𑀺𑀩𑁆𑀪𑀼𑀚𑁆𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀦 𑀲𑀓𑁆𑀓𑀸 𑀯𑀺𑀬 𑀢𑁂𑀲𑀁 𑀦𑀸𑀦𑀸𑀓𑀭𑀡𑀁 𑀯𑀺𑀦𑀺𑀩𑁆𑀪𑀼𑀚𑁆𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺. 𑀢𑁂𑀦𑀸𑀢𑀺 𑀓𑀸𑀭𑀡𑁂𑀦. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀯𑀺𑀲𑁆𑀲𑀚𑁆𑀚𑀦𑁂𑀲𑀼.

𑀲𑀢𑁆𑀢𑀲𑀫𑀣𑀦𑀺𑀤𑀸𑀦𑀯𑀡𑁆𑀡𑀦𑀸

𑁩𑁫𑁨. 𑀅𑀲𑁆𑀲𑀸𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀲. 𑀢𑀢𑁆𑀣𑀸𑀢𑀺 ‘‘𑀦𑀺𑀤𑀸𑀦𑀦𑀺𑀤𑀸𑀦𑁄’’𑀢𑀺 𑀧𑀸𑀞𑁂. 𑀇𑀤𑀦𑁆𑀢𑀺 𑀲𑀫𑁆𑀫𑀼𑀔𑀸𑀘𑀢𑀼𑀓𑁆𑀓𑀁. 𑀮𑀤𑁆𑀥𑀼𑀧𑀯𑀸𑀤𑁄𑀢𑀺 𑀮𑀤𑁆𑀥𑁄 𑀧𑀭𑁂𑀲𑀁 𑀉𑀧𑀯𑀸𑀤𑁄 𑀬𑁂𑀦𑀸𑀢𑀺 𑀮𑀤𑁆𑀥𑀼𑀧𑀯𑀸𑀤𑁄, 𑀔𑀻𑀡𑀸𑀲𑀯𑁄. 𑀬𑀲𑁆𑀲 𑀘𑀸𑀢𑀺 𑀬𑀲𑁆𑀲 𑀘 𑀲𑀦𑁆𑀢𑀺𑀓𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀪𑀺𑀦𑁆𑀦𑀦𑁆𑀢𑀺 𑀤𑁂𑀲𑀓𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀤𑁆𑀯𑀺𑀦𑁆𑀦𑀁.

𑁩𑁫𑁩. 𑀦𑀦𑀼 𑀧𑀼𑀘𑁆𑀙𑀸𑀬𑀁 ‘‘𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀓𑀲𑁆𑀫𑀸 𑀧𑀦 𑀯𑀺𑀲𑁆𑀲𑀚𑁆𑀚𑀦𑀸𑀬𑀁 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀲 𑀲𑀫𑀼𑀝𑁆𑀞𑀸𑀦𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑀢𑁆𑀣𑁄, 𑀧𑀦𑀲𑀤𑁆𑀤𑁄 𑀕𑀭𑀳𑀢𑁆𑀣𑁄. 𑀢𑀣𑀸 𑀯𑀼𑀢𑁆𑀢𑀫𑁆𑀧𑀻𑀢𑀺 𑀬𑁄𑀚𑀦𑀸. 𑀓𑀫𑁆𑀫𑀲𑀗𑁆𑀕𑀳𑀸𑀪𑀸𑀯𑁂𑀦𑀸𑀢𑀺 𑀓𑀫𑁆𑀫𑁂 𑀲𑀗𑁆𑀕𑀳𑀲𑁆𑀲 𑀅𑀪𑀸𑀯𑁂𑀦. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 ‘‘𑀓𑀫𑁆𑀫𑀲𑁆𑀲 𑀓𑀺𑀭𑀺𑀬𑀸’’𑀢𑀺𑀆𑀤𑀺𑀧𑀸𑀞𑁂. 𑀓𑀫𑁆𑀫𑀁 𑀓𑀭𑀻𑀬𑀢𑀺 𑀇𑀫𑀸𑀬𑀸𑀢𑀺 𑀓𑀺𑀭𑀺𑀬𑀸, 𑀜𑀢𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀫𑁆𑀫𑀲𑁆𑀲 𑀓𑀺𑀭𑀺𑀬𑀸𑀢𑀺 𑀜𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀓𑀭𑀺𑀬𑀢𑁂 𑀞𑀧𑀺𑀬𑀢𑁂 𑀓𑀭𑀡𑀁. 𑀲𑀬𑀁 𑀉𑀧𑀕𑀫𑀺𑀬𑀢𑁂 𑀉𑀧𑀕𑀫𑀦𑀁. 𑀅𑀚𑁆𑀛𑁂𑀲𑀦𑁂𑀦 𑀧𑀭𑀁 𑀉𑀧𑀕𑀫𑀸𑀧𑀺𑀬𑀢𑁂 𑀅𑀚𑁆𑀛𑀼𑀧𑀕𑀫𑀦𑀁. 𑀅𑀥𑀺𑀯𑀸𑀲𑀺𑀬𑀢𑁂 𑀅𑀥𑀺𑀯𑀸𑀲𑀦𑀸. 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀬𑀢𑁂 𑀅𑀧𑀝𑀺𑀓𑁆𑀓𑁄𑀲𑀦𑀸. 𑀇𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀭𑀡𑀦𑁆𑀢𑀺 𑀢𑀲𑁆𑀲𑀸𑀬𑁂𑀯𑀸’’𑀢𑀺𑀆𑀤𑀺. 𑀏𑀢𑀦𑁆𑀢𑀺 𑀓𑀫𑁆𑀫𑀁. 𑀫𑁂𑀢𑀺 𑀫𑀬𑁆𑀳𑀁. 𑀔𑀫𑀼𑀥𑀸𑀢𑀼𑀧𑀬𑁄𑀕𑁂 𑀲𑀫𑁆𑀧𑀤𑀸𑀦𑀢𑁆𑀣𑁂 𑀲𑀫𑁆𑀧𑀤𑀸𑀦𑀯𑀘𑀦𑀁. 𑀅𑀣 𑀯𑀸 𑀫𑁂𑀢𑀺 𑀫𑀬𑀸. 𑀓𑀢𑁆𑀯𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀲𑀸𑀫𑀺𑀯𑀘𑀦𑀁 𑀯𑀸. 𑀔𑀫𑀢𑀻𑀢𑀺 𑀓𑀢𑁆𑀢𑀼𑀭𑀽𑀧𑀲𑀤𑀺𑀲𑀁 𑀓𑀫𑁆𑀫𑀭𑀽𑀧𑀁. 𑀭𑀽𑀧𑀜𑁆𑀳𑀺 𑀓𑀢𑁆𑀢𑀼𑀭𑀽𑀧𑀲𑀤𑀺𑀲𑀁 𑀓𑀫𑁆𑀫𑀭𑀽𑀧𑀁 ‘‘𑀔𑀫𑀢𑀺 𑀲𑀗𑁆𑀖𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁧𑁨𑁭) 𑀯𑀺𑀬. 𑀓𑀫𑁆𑀫𑀭𑀽𑀧𑀲𑀤𑀺𑀲𑀁 𑀓𑀢𑁆𑀢𑀼𑀭𑀽𑀧𑀁 ‘‘𑀉𑀧𑀸𑀲𑀓𑁄 𑀲𑀻𑀮𑀁 𑀲𑀫𑀸𑀤𑀺𑀬𑀢𑀻’’𑀢𑀺𑀆𑀤𑀻𑀲𑀼 (𑀧𑀝𑁆𑀞𑀸. 𑁧.𑁧.𑁪𑁨𑁩) 𑀯𑀺𑀬. 𑀏𑀢𑁆𑀣 𑀓𑀫𑁆𑀫𑀢𑁆𑀣𑁂 𑀧𑀯𑀢𑁆𑀢𑁄 𑀬𑀧𑀘𑁆𑀘𑀬𑁄 𑀮𑁄𑀧𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀢𑁆𑀢𑀲𑀫𑀣𑀦𑀸𑀦𑀸𑀢𑁆𑀣𑀸𑀤𑀺𑀯𑀡𑁆𑀡𑀦𑀸

𑁩𑁫𑁪. 𑀫𑀸𑀢𑀸𑀧𑀼𑀢𑁆𑀢𑀸𑀤𑀻𑀦𑀁 𑀅𑀬𑀁 𑀯𑀺𑀯𑀸𑀤𑁄𑀢𑀺 𑀬𑁄𑀚𑀦𑀸. ‘‘𑀯𑀺𑀭𑀼𑀤𑁆𑀥𑀯𑀸𑀤𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀯𑀤𑀦𑀁 𑀯𑀸𑀤𑁄, 𑀯𑀺𑀭𑀼𑀤𑁆𑀥𑁄 𑀯𑀸𑀤𑁄 𑀯𑀺𑀯𑀸𑀤𑁄𑀢𑀺 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑀺. 𑀅𑀥𑀺𑀓𑀭𑀡𑀻𑀬𑀢𑀸𑀬𑀸𑀢𑀺 𑀯𑀽𑀧𑀲𑀫𑀺𑀢𑀢𑀸𑀬. 𑀇𑀫𑀺𑀦𑀸 𑀅𑀥𑀺𑀓𑀭𑀺𑀬𑀢𑀺 𑀲𑀫𑀣𑁂𑀳𑀺 𑀯𑀽𑀧𑀲𑀫𑀺𑀬𑀢𑀻𑀢𑀺 𑀅𑀥𑀺𑀓𑀭𑀡𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀅𑀥𑀺𑀓𑀭𑀡𑀪𑁂𑀤𑁂𑀲𑀼.

𑀇𑀢𑀺 𑀅𑀥𑀺𑀓𑀭𑀡𑀪𑁂𑀤𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.