𑀤𑀼𑀢𑀺𑀬𑀕𑀸𑀣𑀸𑀲𑀗𑁆𑀕𑀡𑀺𑀓𑀁

𑀘𑁄𑀤𑀦𑀸𑀤𑀺𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀯𑀡𑁆𑀡𑀦𑀸

𑁩𑁫𑁯. 𑀤𑀼𑀢𑀺𑀬𑀕𑀸𑀣𑀸𑀲𑀗𑁆𑀕𑀡𑀺𑀬𑀁 𑀘𑁄𑀤𑀦𑀸 𑀦𑀸𑀫 𑀓𑀺𑀁 𑀤𑀲𑁆𑀲𑁂𑀢𑁆𑀯𑀸 𑀘𑁄𑀤𑀦𑀸𑀢𑀺 𑀆𑀳 ‘‘𑀯𑀢𑁆𑀣𑀼𑀜𑁆𑀘 𑀆𑀧𑀢𑁆𑀢𑀺𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀘𑁄𑀤𑀦𑀸’’𑀢𑀺. 𑀤𑁄𑀲𑀁 𑀲𑀭𑀸𑀧𑁂𑀢𑀻𑀢𑀺 𑀤𑁄𑀲𑀲𑀸𑀭𑀡𑀸. 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑁄𑀢𑀺 𑀲𑀗𑁆𑀖𑀲𑁆𑀲 𑀲𑀦𑁆𑀦𑀺𑀧𑀢𑀦𑀁. 𑀇𑀫𑀺𑀦𑀸 𑀲𑀗𑁆𑀖𑁄𑀢𑀺 𑀏𑀢𑁆𑀣 𑀉𑀢𑁆𑀢𑀭𑀧𑀤𑀮𑁄𑀧𑀁 𑀤𑀲𑁆𑀲𑁂𑀢𑀺. 𑀫𑀢𑀺𑀓𑀫𑁆𑀫𑀦𑁆𑀢𑀺 𑀏𑀢𑁆𑀣 𑀫𑀢𑀺𑀲𑀤𑁆𑀤𑁄 𑀇𑀘𑁆𑀙𑀢𑁆𑀣𑁄𑀢𑀺 𑀆𑀳 ‘‘𑀯𑀼𑀘𑁆𑀘𑀢𑀺 𑀫𑀦𑁆𑀢𑀕𑁆𑀕𑀳𑀡’’𑀦𑁆𑀢𑀺. 𑀢𑀦𑁆𑀢𑀺 𑀫𑀢𑀺𑀓𑀫𑁆𑀫𑀁.

‘‘𑀢𑁂𑀦 𑀘𑀼𑀤𑀺𑀢𑀓𑀧𑀼𑀕𑁆𑀕𑀮𑁂𑀦𑀸’’𑀢𑀺 𑀧𑀤𑀁 ‘‘𑀲𑀸𑀭𑀡𑀢𑁆𑀣𑀸𑀬𑀸’’𑀢𑀺 𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀁. 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀢𑀲𑁆𑀲 𑀘𑀼𑀤𑀺𑀢𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀇𑀫𑀺𑀦𑀸 ‘‘𑀦𑀺𑀕𑁆𑀕𑀳𑀢𑁆𑀣𑀸𑀬𑀸’’𑀢𑀺 𑀧𑀤𑀲𑁆𑀲 𑀓𑀫𑁆𑀫𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀅𑀥𑀺𑀓𑀭𑀡𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂. 𑀧𑀭𑀺𑀕𑁆𑀕𑀳𑀡𑀢𑁆𑀣𑀸𑀬𑀸𑀢𑀺 𑀧𑀭𑀺 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑀡𑀢𑁆𑀣𑀸𑀬. 𑀥𑀫𑁆𑀫𑀸-𑀥𑀫𑁆𑀫𑀦𑁆𑀢𑀺 𑀪𑀽𑀢𑀸𑀪𑀽𑀢𑀁. ‘‘𑀯𑀺𑀦𑀺𑀘𑁆𑀙𑀬𑀲𑀦𑁆𑀦𑀺𑀝𑁆𑀞𑀸𑀧𑀦𑀢𑁆𑀣’’𑀦𑁆𑀢𑀺 𑀇𑀫𑀺𑀦𑀸 𑀧𑀸𑀴𑀺𑀬𑀁 𑀧𑀸𑀞𑀲𑁂𑀲𑀁 𑀤𑀲𑁆𑀲𑁂𑀢𑀺.

𑀫𑀸 𑀔𑁄 𑀧𑀝𑀺𑀖𑀦𑁆𑀢𑀺 𑀏𑀢𑁆𑀣 𑀧𑀝𑀺𑀖𑀲𑀤𑁆𑀤𑁄 𑀓𑁄𑀧𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀓𑁄𑀧𑀁 𑀫𑀸 𑀚𑀦𑀬𑀻’’𑀢𑀺. ‘‘𑀘𑀼𑀤𑀺𑀢𑀓𑁂 𑀯𑀸 𑀘𑁄𑀤𑀓𑁂 𑀯𑀸’’𑀢𑀺 𑀇𑀫𑀺𑀦𑀸 ‘‘𑀲𑀗𑁆𑀖𑁂’’𑀢𑀺 𑀆𑀥𑀸𑀭𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀘𑁂 𑀅𑀦𑀼𑀯𑀺𑀚𑁆𑀚𑀓𑁄 𑀢𑀼𑀯𑀦𑁆𑀢𑀺 𑀏𑀢𑁆𑀣 𑀅𑀦𑀼𑀯𑀺𑀚𑁆𑀚𑀓𑀲𑀤𑁆𑀤𑁄 𑀯𑀺𑀦𑀬𑀥𑀭𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀯𑀺𑀦𑀬𑀥𑀭𑁄’’𑀢𑀺. 𑀯𑀺𑀦𑀬𑀥𑀭𑁄 𑀳𑀺 𑀬𑀲𑁆𑀫𑀸 𑀘𑁄𑀤𑀓𑀘𑀼𑀤𑀺𑀢𑀓𑀸𑀦𑀁 𑀯𑀘𑀦𑀁 𑀅𑀦𑀼𑀫𑀺𑀦𑀺𑀢𑁆𑀯𑀸 𑀯𑀢𑁆𑀣𑀼𑀆𑀧𑀢𑁆𑀢𑀸𑀤𑀺𑀯𑀲𑁂𑀦 𑀯𑀺𑀤𑀢𑀺, 𑀢𑀲𑁆𑀫𑀸 𑀅𑀦𑀼𑀯𑀺𑀚𑁆𑀚𑀓𑁄𑀢𑀺 𑀯𑀼𑀘𑁆𑀘𑀢𑀺.

𑀯𑀺𑀭𑀼𑀤𑁆𑀥𑀁 𑀕𑀸𑀳𑀁 𑀲𑀁𑀯𑀢𑁆𑀢𑁂𑀢𑀻𑀢𑀺 𑀯𑀺𑀕𑁆𑀕𑀸𑀳𑀺𑀓𑀁. ‘‘𑀦 𑀢𑁆𑀯’’𑀦𑁆𑀢𑀺𑀆𑀤𑀺𑀦𑀸 𑀡𑀺𑀓𑀧𑀘𑁆𑀘𑀬𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀬𑀸𑀬𑀸𑀢𑀺 𑀓𑀣𑀸𑀬. 𑀲𑀼𑀢𑁆𑀢𑀸𑀤𑀻𑀦𑀁 𑀲𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀼𑀢𑁆𑀢𑀁 𑀦𑀸𑀫𑀸’’𑀢𑀺𑀆𑀤𑀺.

𑀅𑀦𑀼𑀬𑀼𑀜𑁆𑀚𑀦𑀯𑀢𑁆𑀢𑀦𑁆𑀢𑀺 𑀅𑀦𑀼𑀬𑀼𑀜𑁆𑀚𑀦𑀲𑁆𑀲, 𑀅𑀦𑀼𑀬𑀼𑀜𑁆𑀚𑀦𑁂 𑀯𑀸 𑀯𑀢𑁆𑀢𑀁. 𑀓𑀼𑀲𑀮𑁂𑀦 𑀩𑀼𑀤𑁆𑀥𑀺𑀫𑀢𑀸𑀢𑀺 𑀏𑀢𑁆𑀣 𑀓𑀼𑀲𑀮𑀲𑀤𑁆𑀤𑁄 𑀙𑁂𑀓𑀧𑀭𑀺𑀬𑀸𑀬𑁄, 𑀩𑀼𑀤𑁆𑀥𑀺𑀫𑀦𑁆𑀢𑀼𑀲𑀤𑁆𑀤𑁄 𑀧𑀡𑁆𑀟𑀺𑀢𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀙𑁂𑀓𑁂𑀦 𑀧𑀡𑁆𑀟𑀺𑀢𑁂𑀦𑀸’’𑀢𑀺. ‘‘𑀜𑀸𑀡𑀧𑀸𑀭𑀫𑀺𑀧𑁆𑀧𑀢𑁆𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀩𑀼𑀤𑁆𑀥𑀺𑀫𑀢𑀸𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 𑀜𑀸𑀡𑀲𑀸𑀫𑀜𑁆𑀜𑀁, 𑀅𑀣 𑀔𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀬𑀦𑁆𑀢𑀺 𑀏𑀲𑁄 𑀬𑀣𑀸𑀯𑀼𑀢𑁆𑀢𑁄 𑀅𑀢𑁆𑀣𑁄. 𑀅𑀬𑀁 𑀧𑀦𑀸𑀢𑀺 𑀏𑀲𑁄 𑀯𑀓𑁆𑀔𑀫𑀸𑀦𑁄 𑀧𑀦. 𑀏𑀢𑁆𑀣𑀸𑀢𑀺 𑀇𑀫𑀸𑀲𑀼 𑀕𑀸𑀣𑀸𑀲𑀼. 𑀲𑀘𑁂 𑀢𑁆𑀯𑀁 𑀅𑀦𑀼𑀯𑀺𑀚𑁆𑀚𑀓𑁄 𑀳𑁄𑀲𑀻𑀢𑀺 𑀬𑁄𑀚𑀦𑀸. 𑀬𑀁 𑀧𑀦 𑀅𑀦𑀼𑀬𑁄𑀕𑀯𑀢𑁆𑀢𑀁 𑀓𑀢𑀁 𑀲𑀼𑀧𑀜𑁆𑀜𑀢𑁆𑀢𑀁 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀦𑀼𑀮𑁄𑀫𑀦𑁆𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀅𑀦𑀼𑀬𑁄𑀕𑀯𑀢𑁆𑀢𑀁. 𑀇𑀢𑀻𑀢𑀺 𑀅𑀬𑀁 𑀲𑀸𑀥𑀺𑀧𑁆𑀧𑀸𑀬𑀲𑀗𑁆𑀔𑁂𑀧𑀯𑀡𑁆𑀡𑀦𑀸. 𑀅𑀢𑁆𑀢𑀦𑁄𑀢𑀺 𑀅𑀦𑀼𑀯𑀺𑀚𑁆𑀚𑀓𑀲𑁆𑀲. 𑀲𑀫𑁆𑀧𑀭𑀸𑀬𑁂𑀢𑀺 𑀧𑀭𑀮𑁄𑀓𑁂. 𑀬𑁄𑀢𑀺 𑀅𑀦𑀼𑀯𑀺𑀚𑁆𑀚𑀓𑁄. 𑀢𑀦𑁆𑀢𑀺 𑀅𑀦𑀼𑀬𑁄𑀕𑀯𑀢𑁆𑀢𑀁. 𑀕𑀢𑀺𑀦𑁆𑀢𑀺 𑀲𑀼𑀕𑀢𑀺𑀁. 𑀳𑀺𑀢𑀦𑁆𑀢𑀺 𑀘𑁄𑀤𑀓𑀘𑀼𑀤𑀺𑀢𑀓𑀸𑀦𑀁 𑀳𑀺𑀢𑀁. 𑀕𑀯𑁂𑀲𑀦𑁆𑀢𑁄𑀢𑀺 𑀜𑀸𑀡𑁂𑀦 𑀏𑀲𑀦𑁆𑀢𑁄. 𑀇𑀫𑀺𑀦𑀸 𑀳𑀺𑀢𑀁 𑀏𑀲𑀦𑁆𑀢𑁄𑀢𑀺 𑀳𑀺𑀢𑁂𑀲𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀫𑁂𑀢𑁆𑀢𑀜𑁆𑀘𑀸𑀢𑀺 𑀅𑀧𑁆𑀧𑀦𑀸𑀧𑀢𑁆𑀢𑀁 𑀫𑁂𑀢𑁆𑀢𑀜𑁆𑀘. 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀜𑁆𑀘𑀸𑀢𑀺 𑀅𑀧𑁆𑀧𑀦𑀸𑀫𑁂𑀢𑁆𑀢𑀸𑀬 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑀁 𑀧𑀭𑀺𑀓𑀫𑁆𑀫𑀉𑀧𑀘𑀸𑀭𑀫𑁂𑀢𑁆𑀢𑀜𑁆𑀘. 𑀢𑀯 𑀪𑀸𑀭𑁂 𑀲𑀗𑁆𑀖𑁂𑀦 𑀓𑀢𑁂 𑀏𑀯𑀸𑀢𑀺 𑀬𑁄𑀚𑀦𑀸.

𑀬𑁄𑀢𑀺 𑀅𑀦𑀼𑀯𑀺𑀚𑁆𑀚𑀓𑁄. 𑀏𑀢𑁂𑀲𑀦𑁆𑀢𑀺 𑀘𑁄𑀤𑀓𑀘𑀼𑀤𑀺𑀢𑀓𑀸𑀦𑀁. ‘‘𑀪𑀸𑀲𑀺𑀢’’𑀦𑁆𑀢𑀺 𑀇𑀫𑀺𑀦𑀸 𑀯𑁄𑀳𑀸𑀭𑀲𑀤𑁆𑀤𑁄 𑀪𑀸𑀲𑀺𑀢𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀦𑁆𑀢𑀺 𑀲𑀳𑀲𑀸 𑀯𑁄𑀳𑀸𑀭𑀁.

𑀅𑀦𑀼𑀲𑀦𑁆𑀥𑀺𑀢𑀦𑁆𑀢𑀺 𑀏𑀢𑁆𑀣 𑀯𑀺𑀦𑀺𑀘𑁆𑀙𑀬𑀸𑀦𑀼𑀲𑀦𑁆𑀥𑀺𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀓𑀣𑀸𑀦𑀼𑀲𑀦𑁆𑀥𑀺 𑀯𑀼𑀘𑁆𑀘𑀢𑀻’’𑀢𑀺. 𑀓𑀣𑀸𑀬 𑀅𑀦𑀼𑀭𑀽𑀧𑀁 𑀲𑀦𑁆𑀤𑀳𑀦𑀁 𑀓𑀣𑀸𑀦𑀼𑀲𑀦𑁆𑀥𑀺. 𑀧𑀝𑀺𑀜𑁆𑀜𑀸𑀦𑀼𑀲𑀦𑁆𑀥𑀺𑀢𑁂𑀦𑀸𑀢𑀺 𑀏𑀢𑁆𑀣 𑀧𑀝𑀺𑀜𑁆𑀜𑀸𑀲𑀤𑁆𑀤𑀅𑀦𑀼𑀲𑀦𑁆𑀥𑀺𑀲𑀤𑁆𑀤𑀸𑀦𑀁 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑁄 𑀅𑀜𑁆𑀜𑀁 𑀪𑀺𑀦𑁆𑀦𑀸𑀥𑀺𑀓𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀣𑀯𑀸’’𑀢𑀺𑀆𑀤𑀺. 𑀮𑀚𑁆𑀚𑀺𑀁 𑀧𑀼𑀕𑁆𑀕𑀮𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀕𑀸𑀣𑀸𑀬𑀁. 𑀯𑀢𑁆𑀢𑀸𑀦𑀼𑀲𑀦𑁆𑀥𑀺𑀦𑀸𑀢𑀺 𑀆𑀘𑀸𑀭𑀲𑀗𑁆𑀔𑀸𑀢𑁂𑀦 𑀯𑀢𑁆𑀢𑁂𑀦 𑀅𑀦𑀼𑀲𑀦𑁆𑀥𑀺𑀦𑀸 𑀅𑀲𑁆𑀲 𑀅𑀮𑀚𑁆𑀚𑀻𑀲𑁆𑀲 𑀯𑀢𑁆𑀢𑁂𑀦 𑀲𑀤𑁆𑀥𑀺𑀁 𑀬𑀸 𑀧𑀝𑀺𑀜𑁆𑀜𑀸 𑀲𑀦𑁆𑀥𑀺𑀬𑀢𑀻𑀢𑀺 𑀬𑁄𑀚𑀦𑀸.

𑀚𑀸𑀦𑀦𑁆𑀢𑁄 𑀆𑀧𑀚𑁆𑀚𑀢𑀻𑀢𑀺 𑀚𑀸𑀦𑀦𑁆𑀢𑁄 𑀳𑀼𑀢𑁆𑀯𑀸 𑀆𑀧𑀚𑁆𑀚𑀢𑀺. 𑀇𑀫𑀺𑀦𑀸 𑀲𑀜𑁆𑀘𑀺𑀘𑁆𑀘𑀸𑀢𑀺 𑀧𑀤𑀲𑁆𑀲 𑀲𑀜𑁆𑀘𑁂𑀢𑁂𑀢𑁆𑀯𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸𑀬 𑀲𑀤𑁆𑀥𑀺𑀁 𑀘𑁂𑀢𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀦 𑀤𑁂𑀲𑁂𑀢𑀺 𑀦 𑀯𑀼𑀝𑁆𑀞𑀸𑀢𑀻’’𑀢𑀺 𑀇𑀫𑀺𑀦𑀸 𑀧𑀭𑀺𑀕𑀽𑀳𑀢𑀻𑀢𑀺 𑀏𑀢𑁆𑀣 𑀧𑀭𑀺𑀕𑀽𑀳𑀦𑀁 𑀦𑀸𑀫 𑀅𑀢𑁆𑀣𑀢𑁄 𑀦 𑀤𑁂𑀲𑀦𑀁 𑀦 𑀯𑀼𑀝𑁆𑀞𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀬𑀦𑁆𑀢𑀺 ‘‘𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀁. 𑀢𑀼𑀫𑁆𑀳𑁂𑀳𑀻𑀢𑀺 𑀧𑀭𑀺𑀳𑀸𑀭𑀓𑀸𑀭𑀓𑁂𑀳𑀺. 𑀲𑀘𑁆𑀘𑀦𑁆𑀢𑀺 𑀢𑀣𑀁 𑀅𑀯𑀺𑀢𑀣𑀁. 𑀅𑀳𑀫𑁆𑀧𑀻𑀢𑀺 𑀘𑁄𑀤𑀓𑁄𑀧𑀺. 𑀧𑀺𑀲𑀤𑁆𑀤𑁂𑀦 𑀧𑀭𑀺𑀳𑀸𑀭𑀓𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀦𑀦𑁆𑀢𑀺 ‘‘𑀲𑀜𑁆𑀘𑀺𑀘𑁆𑀘𑀸’’𑀢𑀺𑀆𑀤𑀺𑀯𑀘𑀦𑀁. 𑀢𑀦𑁆𑀢𑀺 𑀢𑀼𑀯𑀁, 𑀢𑁆𑀯𑀁 𑀯𑀸.

𑀧𑀼𑀩𑁆𑀩𑀸𑀧𑀭𑀦𑁆𑀢𑀺 𑀏𑀢𑁆𑀣 𑀧𑀼𑀩𑁆𑀩𑁂 𑀓𑀣𑁂𑀢𑀩𑁆𑀩𑀁 𑀧𑀼𑀩𑁆𑀩𑀁, 𑀅𑀧𑀭𑀫𑁆𑀳𑀺 𑀓𑀣𑁂𑀢𑀩𑁆𑀩𑀁 𑀅𑀧𑀭𑀁, 𑀧𑀼𑀩𑁆𑀩𑀜𑁆𑀘 𑀅𑀧𑀭𑀜𑁆𑀘 𑀧𑀼𑀩𑁆𑀩𑀸𑀧𑀭𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀼𑀭𑁂’’𑀢𑀺𑀆𑀤𑀺. ‘‘𑀢𑀲𑁆𑀫𑀺𑀁 𑀧𑀼𑀩𑁆𑀩𑀸𑀧𑀭𑁂’’𑀢𑀺 𑀇𑀫𑀺𑀦𑀸 𑀧𑀸𑀴𑀺𑀬𑀁 𑀧𑀼𑀩𑁆𑀩𑀧𑀭𑀲𑁆𑀲𑀸𑀢𑀺 𑀏𑀢𑁆𑀣 𑀪𑀼𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀤𑁆𑀯𑀻𑀳𑀻𑀢𑀺 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀯𑀲𑁂𑀦 𑀤𑁆𑀯𑀻𑀳𑀺. 𑀧𑀜𑁆𑀘𑀳𑀻𑀢𑀺 𑀣𑀼𑀮𑁆𑀮𑀘𑁆𑀘𑀬𑀸𑀤𑀺𑀯𑀲𑁂𑀦 𑀧𑀜𑁆𑀘𑀳𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸𑀢𑀺 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 (𑀥. 𑀲. 𑁧𑁨𑁨𑁧) 𑀤𑀲𑀯𑀢𑁆𑀣𑀼𑀓𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸. 𑀅𑀦𑁆𑀢𑀕𑁆𑀕𑀸𑀳𑀺𑀓𑀤𑀺𑀝𑁆𑀞𑀺𑀬𑀸𑀢𑀺 ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁩𑁧; 𑀫. 𑀦𑀺. 𑁧.𑁨𑁬𑁯) 𑀤𑀲𑀯𑀢𑁆𑀣𑀼𑀓𑀸𑀬 𑀅𑀦𑁆𑀢𑀕𑁆𑀕𑀸𑀳𑀺𑀓𑀤𑀺𑀝𑁆𑀞𑀺𑀬𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀤𑀼𑀢𑀺𑀬𑀕𑀸𑀣𑀸𑀲𑀗𑁆𑀕𑀡𑀺𑀓𑁂𑀲𑀼.

𑀇𑀢𑀺 𑀤𑀼𑀢𑀺𑀬𑀕𑀸𑀣𑀸𑀲𑀗𑁆𑀕𑀡𑀺𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.