𑀘𑁄𑀤𑀦𑀸𑀓𑀡𑁆𑀟𑀁

𑀅𑀦𑀼𑀯𑀺𑀚𑁆𑀚𑀓𑀓𑀺𑀘𑁆𑀘𑀯𑀡𑁆𑀡𑀦𑀸

𑁩𑁬𑁦-𑁧. 𑀇𑀤𑀸𑀦𑀺 𑀆𑀭𑀤𑁆𑀥𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑁄 𑀪𑀺𑀓𑁆𑀔𑀼 𑀏𑀓𑁂𑀦 𑀫𑀸𑀢𑀼𑀕𑀸𑀫𑁂𑀦𑀸𑀢𑀺 𑀬𑁄𑀚𑀦𑀸. 𑀲𑁄𑀢𑀺 𑀧𑀲𑁆𑀲𑀦𑁆𑀢𑁄 𑀪𑀺𑀓𑁆𑀔𑀼. 𑀢𑀦𑁆𑀢𑀺 𑀦𑀺𑀓𑁆𑀔𑀫𑀦𑁆𑀢𑀁 𑀧𑀯𑀺𑀲𑀦𑁆𑀢𑀁 𑀯𑀸 𑀪𑀺𑀓𑁆𑀔𑀼𑀁. 𑀇𑀢𑀭𑁄𑀢𑀺 𑀘𑀼𑀤𑀺𑀢𑀓𑁄. 𑀢𑀲𑁆𑀲𑀸𑀢𑀺 𑀘𑁄𑀤𑀓𑀲𑁆𑀲. 𑀦 𑀉𑀧𑁂𑀢𑀻𑀢𑀺 𑀦 𑀉𑀧𑀕𑀘𑁆𑀙𑀢𑀺. 𑀦 𑀧𑀝𑀺𑀚𑀸𑀦𑀸𑀢𑀻𑀢𑀺 𑀦 𑀧𑀝𑀺𑀲𑁆𑀲𑀯𑀁 𑀓𑀭𑁄𑀢𑀺. 𑀏𑀢𑁆𑀣𑀸𑀢𑀺 𑀫𑀸𑀢𑀼𑀕𑀸𑀫𑁂𑀦 𑀦𑀺𑀓𑁆𑀔𑀫𑀦𑁆𑀢𑀧𑀯𑀺𑀲𑀦𑁆𑀢𑀝𑁆𑀞𑀸𑀦𑁂. 𑀬𑀦𑁆𑀢𑀺 𑀓𑀫𑁆𑀫𑀁. 𑀢𑁂𑀦𑀸𑀢𑀺 𑀘𑁄𑀤𑀓𑁂𑀦. 𑀢𑀲𑁆𑀲𑀸𑀢𑀺 𑀘𑁄𑀤𑀓𑀲𑁆𑀲 𑀯𑀘𑀦𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑀭𑁄𑀢𑀺 𑀘𑀼𑀤𑀺𑀢𑀓𑁄. 𑀅𑀲𑀼𑀤𑁆𑀥𑀧𑀭𑀺𑀲𑀗𑁆𑀓𑀺𑀢𑁄𑀢𑀺 𑀅𑀲𑀼𑀤𑁆𑀥𑀸𑀬 𑀅𑀝𑁆𑀞𑀸𑀦𑁂 𑀉𑀧𑁆𑀧𑀦𑁆𑀦𑀸𑀬 𑀧𑀭𑀺𑀲𑀗𑁆𑀓𑀸𑀬 𑀧𑀭𑀺𑀲𑀗𑁆𑀓𑀺𑀢𑁄. 𑀢𑀤𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀅𑀫𑀽𑀮𑀓𑀧𑀭𑀺𑀲𑀗𑁆𑀓𑀺𑀢𑁄’’𑀢𑀺 𑀇𑀫𑀺𑀦𑀸. 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀘𑀼𑀤𑀺𑀢𑀓𑀲𑁆𑀲 𑀧𑀝𑀺𑀜𑁆𑀜𑀸𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀅𑀦𑀼𑀯𑀺𑀚𑁆𑀚𑀓𑀓𑀺𑀘𑁆𑀘𑁂𑀲𑀼.

𑀇𑀢𑀺 𑀅𑀦𑀼𑀯𑀺𑀚𑁆𑀚𑀓𑀓𑀺𑀘𑁆𑀘𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀘𑁄𑀤𑀓𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸

𑁩𑁬𑁨-𑁩. 𑀲𑀘𑁆𑀘𑁂 𑀘 𑀅𑀓𑀼𑀧𑁆𑀧𑁂 𑀘𑀸𑀢𑀺 𑀧𑀥𑀸𑀦𑀁 𑀲𑀫𑁆𑀩𑀦𑁆𑀥𑀝𑁆𑀞𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀢𑀺𑀝𑁆𑀞𑀸𑀢𑀩𑁆𑀩’’𑀦𑁆𑀢𑀺. ‘‘𑀬’’𑀦𑁆𑀢𑀺𑀆𑀤𑀺𑀦𑀸 𑀲𑀘𑁆𑀘𑁂 𑀧𑀢𑀺𑀝𑁆𑀞𑀸𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀬𑀦𑁆𑀢𑀺 𑀓𑀫𑁆𑀫𑀁. ‘‘𑀦 𑀘𑀸’’𑀢𑀺𑀆𑀤𑀺𑀦𑀸 𑀅𑀓𑀼𑀧𑁆𑀧𑁂 𑀧𑀢𑀺𑀝𑁆𑀞𑀸𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀑𑀢𑀺𑀡𑁆𑀡𑀜𑁆𑀘𑀸𑀢𑀺 𑀯𑀺𑀦𑀺𑀘𑁆𑀙𑀬𑀁 𑀑𑀢𑀺𑀡𑁆𑀡𑀜𑁆𑀘. ‘‘𑀯𑀘𑀦’’𑀦𑁆𑀢𑀺 𑀇𑀫𑀺𑀦𑀸 𑀑𑀢𑀺𑀡𑁆𑀡𑀸𑀦𑁄𑀢𑀺𑀡𑁆𑀡𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀭𑀸𑀢𑀺 𑀧𑀼𑀭𑀺𑀫𑀯𑀘𑀦𑀸𑀧𑁂𑀓𑁆𑀔𑀁. ‘‘𑀑𑀢𑀺𑀡𑁆𑀡𑀸𑀦𑁄𑀢𑀺𑀡𑁆𑀡𑀁 𑀚𑀸𑀦𑀺𑀢𑀩𑁆𑀩’’𑀦𑁆𑀢𑀺 𑀯𑀘𑀦𑁂𑀢𑀺 𑀳𑀺 𑀅𑀢𑁆𑀣𑁄. 𑀘𑁄𑀤𑀓𑀲𑁆𑀲 𑀧𑀫𑀸𑀡𑀦𑁆𑀢𑀺 ‘‘𑀥𑀫𑁆𑀫𑁄’’𑀢𑀺 𑀯𑀸 ‘‘𑀅𑀥𑀫𑁆𑀫𑁄’’𑀢𑀺 𑀯𑀸 ‘‘𑀩𑀸𑀮𑁄’’𑀢𑀺 𑀯𑀸 ‘‘𑀧𑀡𑁆𑀟𑀺𑀢𑁄’’𑀢𑀺 𑀯𑀸 𑀘𑁄𑀤𑀓𑀲𑁆𑀲 𑀧𑀫𑀸𑀡𑀁. 𑀘𑀼𑀤𑀺𑀢𑀓𑀲𑁆𑀲 𑀧𑀫𑀸𑀡𑀦𑁆𑀢𑀺 𑀥𑀫𑁆𑀫𑀘𑀼𑀤𑀺𑀢𑀓𑁄 𑀦𑀼 𑀔𑁄, 𑀦𑁄𑀢𑀺 𑀘𑀼𑀤𑀺𑀢𑀓𑀲𑁆𑀲 𑀧𑀫𑀸𑀡𑀁. 𑀅𑀦𑀼𑀯𑀺𑀚𑁆𑀚𑀓𑀲𑁆𑀲 𑀧𑀫𑀸𑀡𑀦𑁆𑀢𑀺 𑀲𑀓𑁆𑀓𑀸 𑀦𑀼 𑀔𑁄 𑀯𑀺𑀦𑀺𑀘𑁆𑀙𑀺𑀢𑀼𑀁, 𑀦𑁄𑀢𑀺 𑀅𑀦𑀼𑀯𑀺𑀚𑁆𑀚𑀓𑀲𑁆𑀲 𑀧𑀫𑀸𑀡𑀁. 𑀅𑀦𑀼𑀯𑀺𑀚𑁆𑀚𑀓𑁄 𑀯𑀢𑁆𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂𑀦 𑀥𑀫𑁆𑀫𑁂𑀦𑀸𑀢𑀺𑀆𑀤𑀻𑀲𑀼 𑀥𑀫𑁆𑀫𑀸𑀤𑀻𑀦𑀁 𑀲𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀥𑀫𑁆𑀫𑁄𑀢𑀺 𑀪𑀽𑀢𑀁 𑀯𑀢𑁆𑀣𑀽’’𑀢𑀺𑀆𑀤𑀺. 𑀏𑀢𑁂𑀦 𑀥𑀫𑁆𑀫𑁂𑀦 𑀘 𑀏𑀢𑁂𑀦 𑀯𑀺𑀦𑀬𑁂𑀦 𑀘 𑀏𑀢𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀘𑀸𑀢𑀺 𑀬𑁄𑀚𑀦𑀸. 𑀢𑀲𑁆𑀫𑀸 𑀅𑀦𑀼𑀯𑀺𑀚𑁆𑀚𑀓𑁂𑀦 𑀯𑀽𑀧𑀲𑀫𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀅𑀦𑀼𑀯𑀺𑀚𑁆𑀚𑀓𑀲𑁆𑀲 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀝𑁆𑀞𑀸𑀦𑁂.

𑀅𑀯𑀜𑁆𑀜𑀦𑁆𑀢𑀺 𑀅𑀯𑀚𑀸𑀦𑀦𑀁. 𑀇𑀫𑁂𑀢𑀺 𑀣𑁂𑀭𑀸. ‘‘𑀔𑀢𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸 𑀔𑀜𑁆𑀜𑀢𑀻𑀢𑀺 𑀔𑀢𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀉𑀧𑀳𑀦𑀺𑀬𑀦𑁆𑀢𑀻𑀢𑀺 𑀉𑀧𑀳𑀢𑀸𑀦𑀺, 𑀉𑀧𑀳𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀦𑁂𑀦𑀸𑀢𑀺 𑀉𑀧𑀳𑀢𑀺𑀦𑁆𑀤𑁆𑀭𑀺𑀬𑁄. ‘‘𑀧𑀜𑁆𑀜𑀸𑀬 𑀅𑀪𑀸𑀯𑀢𑁄’’𑀢𑀺 𑀇𑀫𑀺𑀦𑀸 𑀤𑀼𑀫𑁆𑀫𑁂𑀥𑁄𑀢𑀺 𑀏𑀢𑁆𑀣 𑀤𑀼𑀲𑀤𑁆𑀤𑁄 𑀅𑀪𑀸𑀯𑀢𑁆𑀣𑁄, 𑀫𑁂𑀥𑀸𑀲𑀤𑁆𑀤𑁄 𑀧𑀜𑁆𑀜𑀸𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀦𑀢𑁆𑀣𑀺 𑀫𑁂𑀥𑀸 𑀏𑀢𑀲𑁆𑀲𑀸𑀢𑀺 𑀤𑀼𑀫𑁆𑀫𑁂𑀥𑁄𑀢𑀺 𑀦𑀺𑀩𑁆𑀩𑀘𑀦𑀁 𑀓𑀸𑀢𑀩𑁆𑀩𑀁. 𑀔𑀢𑁄…𑀧𑁂… 𑀤𑀼𑀫𑁆𑀫𑁂𑀥𑁄 𑀲𑁄 𑀅𑀦𑀼𑀯𑀺𑀚𑁆𑀚𑀓𑁄 𑀉𑀧𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀉𑀧𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀧𑀸𑀞𑀲𑁆𑀲, 𑀕𑀸𑀣𑀸𑀬 𑀯𑀸. 𑀯𑀺𑀢𑁆𑀣𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀼𑀤𑀺𑀢𑀓𑀘𑁄𑀤𑀓𑁂𑀲𑀼 𑀳𑀻’’𑀢𑀺𑀆𑀤𑀺. 𑀉𑀪𑁄𑀧𑁂𑀢𑁂𑀢𑀺 𑀉𑀪𑁄𑀧𑀺 𑀏𑀢𑁂 𑀆𑀫𑀺𑀲𑀧𑀼𑀕𑁆𑀕𑀮𑀦𑀺𑀲𑁆𑀲𑀬𑁂. 𑀥𑀫𑁆𑀫𑁄𑀢𑀺 𑀲𑀸𑀲𑀦𑀥𑀫𑁆𑀫𑁄. 𑀇𑀢𑀻𑀢𑀺 𑀅𑀬𑀫𑀢𑁆𑀣𑁄.

𑀉𑀧𑀓𑀡𑁆𑀡𑀓𑀁 𑀚𑀧𑁆𑀧𑀢𑀻𑀢𑀺 𑀏𑀢𑁆𑀣 𑀓𑀡𑁆𑀡𑀲𑁆𑀲 𑀲𑀫𑀻𑀧𑀁 𑀉𑀧𑀓𑀡𑁆𑀡𑀁, 𑀢𑀤𑁂𑀯 𑀉𑀧𑀓𑀡𑁆𑀡𑀓𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀯𑀁 𑀓𑀣𑁂𑀳𑀻’’𑀢𑀺𑀆𑀤𑀺. ‘‘𑀓𑀡𑁆𑀡𑀫𑀽𑀮𑁂’’𑀢𑀺 𑀇𑀫𑀺𑀦𑀸 𑀉𑀧𑀓𑀡𑁆𑀡𑀓𑀦𑁆𑀢𑀺 𑀏𑀢𑁆𑀣 𑀉𑀧𑀲𑀤𑁆𑀤𑀲𑁆𑀲 𑀲𑀫𑀻𑀧𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀫𑀦𑁆𑀢𑁂𑀢𑀻𑀢𑀺 𑀓𑀣𑁂𑀢𑀺. 𑀇𑀫𑀺𑀦𑀸 𑀚𑀧𑁆𑀧𑀥𑀸𑀢𑀼𑀬𑀸 𑀓𑀣𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀚𑀺𑀫𑁆𑀳𑀁 𑀧𑁂𑀓𑁆𑀔𑀢𑀻𑀢𑀺 𑀏𑀢𑁆𑀣 𑀚𑀺𑀫𑁆𑀳𑀲𑀤𑁆𑀤𑁄 𑀓𑀼𑀝𑀺𑀮𑀯𑀸𑀘𑀓𑁄, 𑀓𑀼𑀝𑀺𑀮𑀁 𑀦𑀸𑀫 𑀅𑀢𑁆𑀣𑀢𑁄 𑀇𑀥 𑀤𑁄𑀲𑁄𑀢𑀺 𑀆𑀳 ‘‘𑀤𑁄𑀲𑀫𑁂𑀯𑀸’’𑀢𑀺.

𑀓𑀣𑀸𑀦𑀼𑀲𑀦𑁆𑀥𑀻𑀢𑀺 𑀘𑀼𑀤𑀺𑀢𑀓𑀅𑀦𑀼𑀯𑀺𑀚𑁆𑀚𑀓𑀸𑀦𑀁 𑀓𑀣𑀸𑀬 𑀅𑀦𑀼𑀲𑀦𑁆𑀥𑀺. 𑀯𑀺𑀦𑀺𑀘𑁆𑀙𑀬𑀸𑀦𑀼𑀲𑀦𑁆𑀥𑀻𑀢𑀺 𑀅𑀦𑀼𑀯𑀺𑀚𑁆𑀚𑀓𑁂𑀦 𑀓𑀢𑀲𑁆𑀲 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑀲𑁆𑀲 𑀅𑀦𑀼𑀲𑀦𑁆𑀥𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀘𑁄𑀤𑀦𑀸𑀓𑀡𑁆𑀟𑁂.

𑀇𑀢𑀺 𑀘𑁄𑀤𑀦𑀸𑀓𑀡𑁆𑀟𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.