𑀘𑀽𑀴𑀲𑀗𑁆𑀕𑀸𑀫𑀁

𑀅𑀦𑀼𑀯𑀺𑀚𑁆𑀚𑀓𑀲𑁆𑀲 𑀧𑀝𑀺𑀧𑀢𑁆𑀢𑀺𑀯𑀡𑁆𑀡𑀦𑀸

𑁩𑁬𑁫. 𑀘𑀽𑀴𑀲𑀗𑁆𑀕𑀸𑀫𑁂 𑀲𑀫𑀸𑀕𑀫𑀦𑀁 𑀲𑀗𑁆𑀕𑀸𑀫𑁄, 𑀲𑀫𑀸𑀕𑀫𑁂𑀦𑁆𑀢𑀺 𑀲𑀦𑁆𑀦𑀺𑀧𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀲𑀗𑁆𑀕𑀸𑀫𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀗𑁆𑀕𑀸𑀫𑁄 𑀯𑀼𑀘𑁆𑀘𑀢𑀺…𑀧𑁂… 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑁄’’𑀢𑀺. 𑀲𑀦𑁆𑀦𑀺𑀧𑀢𑀦𑀁 𑀲𑀦𑁆𑀦𑀺𑀧𑀸𑀢𑁄, 𑀲𑀦𑁆𑀦𑀺𑀧𑀢𑀦𑁆𑀢𑀺 𑀏𑀢𑁆𑀣 𑀤𑁂𑀲𑁂𑀢𑀺 𑀯𑀸 𑀲𑀦𑁆𑀦𑀺𑀧𑀸𑀢𑁄, 𑀲𑀗𑁆𑀖𑀲𑁆𑀲 𑀲𑀦𑁆𑀦𑀺𑀧𑀸𑀢𑁄 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑁄. 𑀲𑀗𑁆𑀕𑀸𑀫 𑀬𑀼𑀤𑁆𑀥𑁂𑀢𑀺 𑀥𑀸𑀢𑀼𑀧𑀸𑀞𑁂𑀲𑀼 (𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀁 𑁧𑁮 𑀫𑀓𑀸𑀭𑀦𑁆𑀢𑀥𑀸𑀢𑀼) 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀼𑀤𑁆𑀥𑀁 𑀦𑀸𑀫 𑀅𑀢𑁆𑀣𑀢𑁄 𑀅𑀥𑀺𑀓𑀭𑀡𑀯𑀺𑀦𑀺𑀘𑁆𑀙𑀬𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀤𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀢𑀢𑁆𑀭 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀲𑀗𑁆𑀕𑀸𑀫𑁂, 𑀲𑀫𑁄𑀲𑀭𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀸𑀢𑀺 𑀅𑀢𑁆𑀢𑀦𑁄 𑀧𑀝𑀺𑀧𑀓𑁆𑀔𑀁 𑀅𑀢𑁆𑀣𑀬𑀦𑁆𑀢𑀺. 𑀉𑀤𑁆𑀥𑀫𑁆𑀫𑀦𑁆𑀢𑀺 𑀥𑀫𑁆𑀫𑀢𑁄 𑀯𑀺𑀬𑁄𑀕𑀁. 𑀤𑀻𑀧𑁂𑀦𑁆𑀢𑀸 𑀳𑀼𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀓𑁂 𑀯𑀺𑀬𑀸𑀢𑀺 𑀆𑀳 ‘‘𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀯𑀺𑀬𑀸’’𑀢𑀺. 𑀲𑁄 𑀪𑀺𑀓𑁆𑀔𑀼 𑀧𑀯𑀢𑁆𑀢𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀮𑀤𑁆𑀥𑀺𑀦𑁆𑀢𑀺 𑀉𑀤𑁆𑀥𑀫𑁆𑀫𑀸𑀤𑀺𑀯𑀸𑀤𑀁. 𑀢𑀢𑁆𑀣𑀸𑀢𑀺 𑀲𑀗𑁆𑀕𑀸𑀫𑁂. 𑀅𑀯𑀘𑀭𑀢𑀻𑀢𑀺 𑀑𑀕𑀸𑀳𑁂𑀢𑁆𑀯𑀸 𑀘𑀸𑀭𑁂𑀢𑀺 𑀧𑀯𑀢𑁆𑀢𑁂𑀢𑀺. 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀁 𑀧𑀯𑀢𑁆𑀢𑁂𑀢𑀻’’𑀢𑀺. 𑀏𑀢𑁆𑀣 ‘‘𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀅𑀯𑀢𑁆𑀬𑀽𑀧𑀲𑀕𑁆𑀕𑀲𑁆𑀲 𑀑𑀕𑀸𑀳𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀯𑀺𑀦𑀺𑀘𑁆𑀙𑀬𑀁 𑀧𑀯𑀢𑁆𑀢𑁂𑀢𑀻’’𑀢𑀺 𑀇𑀫𑀺𑀦𑀸 𑀘𑀭𑀥𑀸𑀢𑀼𑀲𑁆𑀲 𑀓𑀸𑀭𑀺𑀢𑀦𑁆𑀢𑁄𑀕𑀥𑀢𑁆𑀢𑀸 𑀲𑀳𑀓𑀸𑀭𑀺𑀢𑀓𑀫𑁆𑀫𑁂𑀦 𑀧𑀯𑀢𑁆𑀢𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸 𑀲𑀗𑁆𑀕𑀸𑀫𑁂 𑀅𑀯𑀘𑀭𑀢𑀻𑀢𑀺 𑀲𑀗𑁆𑀕𑀸𑀫𑀸𑀯𑀘𑀭𑁄𑀢𑀺 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑀺. 𑀓𑁄 𑀯𑀺𑀬𑀸𑀢𑀺 𑀆𑀳 ‘‘𑀬𑀲𑀢𑁆𑀣𑁂𑀭𑁄 𑀯𑀺𑀬𑀸’’𑀢𑀺. 𑀫𑀸𑀦𑀤𑁆𑀥𑀚𑀦𑁆𑀢𑀺 𑀓𑁂𑀢𑀼𑀓𑀫𑁆𑀬𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀫𑀸𑀦𑀲𑀗𑁆𑀔𑀸𑀢𑀁 𑀥𑀚𑀁. 𑀭𑀚𑁄𑀳𑀭𑀡𑀲𑀫𑁂𑀦𑀸𑀢𑀺 𑀏𑀢𑁆𑀣 𑀭𑀚𑀁 𑀳𑀭𑀢𑀺 𑀅𑀧𑀦𑁂𑀢𑀺 𑀅𑀦𑁂𑀦𑀸𑀢𑀺 𑀭𑀚𑁄𑀳𑀭𑀡𑀁, 𑀧𑀸𑀤𑀧𑀼𑀜𑁆𑀚𑀦𑀁, 𑀢𑁂𑀦 𑀲𑀫𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀸𑀤𑀧𑀼𑀜𑁆𑀚𑀦𑀲𑀫𑁂𑀦𑀸’’𑀢𑀺. 𑀧𑀸𑀤𑀁 𑀧𑀼𑀜𑁆𑀚𑀢𑀺 𑀲𑁄𑀥𑁂𑀢𑀺 𑀅𑀦𑁂𑀦𑀸𑀢𑀺 𑀧𑀸𑀤𑀧𑀼𑀜𑁆𑀚𑀦𑀁, 𑀢𑁂𑀦 𑀲𑀫𑁄 𑀧𑀸𑀤𑀧𑀼𑀜𑁆𑀚𑀦𑀲𑀫𑁄, 𑀢𑁂𑀦. 𑀲𑀫𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸’’𑀢𑀺𑀆𑀤𑀺. 𑀭𑀚𑁄𑀳𑀭𑀡𑀲𑁆𑀲 𑀦𑁂𑀯 𑀭𑀸𑀕𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀣𑀸𑀧𑀢𑀺𑀭𑀽𑀧𑀦𑁆𑀢𑀺 𑀧𑀢𑀺𑀭𑀽𑀧𑀲𑁆𑀲 𑀅𑀦𑀼𑀮𑁄𑀫𑀁, 𑀧𑀢𑀺𑀭𑀽𑀧𑀸𑀦𑀢𑀺𑀓𑁆𑀓𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀓𑀣𑁂𑀦𑁆𑀢𑁂𑀦 𑀦𑀺𑀲𑀻𑀤𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀸𑀫𑀁 𑀯𑀸 𑀥𑀫𑁆𑀫𑁄𑀢𑀺 𑀏𑀢𑁆𑀣 𑀥𑀫𑁆𑀫𑁄 𑀦𑀸𑀫 𑀓𑁄𑀢𑀺 𑀆𑀳 ‘‘𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀦𑀺𑀲𑁆𑀲𑀺𑀢𑀸 𑀯𑀸’’𑀢𑀺𑀆𑀤𑀺. 𑀭𑀽𑀧𑀸𑀭𑀽𑀧𑀧𑀭𑀺𑀘𑁆𑀙𑁂𑀤𑁄 𑀘 𑀲𑀫𑀣𑀸𑀘𑀸𑀭𑁄 𑀘 𑀯𑀺𑀧𑀲𑁆𑀲𑀸𑀦𑀸𑀘𑀸𑀭𑁄 𑀘 𑀞𑀸𑀦𑀯𑀢𑁆𑀢𑀜𑁆𑀘 𑀦𑀺𑀲𑀚𑁆𑀚𑀯𑀢𑁆𑀢𑀜𑁆𑀘, 𑀆𑀤𑀺𑀲𑀤𑁆𑀤𑁂𑀦 𑀘𑀗𑁆𑀓𑀫𑀯𑀢𑁆𑀢𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀘𑀼𑀤𑁆𑀤𑀲𑀫𑀳𑀸𑀯𑀢𑁆𑀢𑀸𑀤𑀻𑀦𑀁 ‘‘𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀦𑀺𑀲𑁆𑀲𑀺𑀢𑀸’’𑀢𑀺 𑀧𑀤𑁂𑀦 𑀕𑀳𑀺𑀢𑀢𑁆𑀢𑀸 𑀯𑀢𑁆𑀢𑀲𑀤𑁆𑀤𑁂𑀦 𑀞𑀸𑀦𑀯𑀢𑁆𑀢𑀸𑀤𑀻𑀦𑀺 𑀏𑀯 𑀕𑀳𑁂𑀢𑀩𑁆𑀩𑀸𑀦𑀺, 𑀆𑀤𑀺𑀲𑀤𑁆𑀤𑁂𑀦 𑀘𑀗𑁆𑀓𑀫𑀯𑀢𑁆𑀢𑀸𑀤𑀻𑀦𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀧𑀭𑁄 𑀯𑀸 𑀅𑀚𑁆𑀛𑁂𑀲𑀺𑀢𑀩𑁆𑀩𑁄𑀢𑀺 𑀬𑁄𑀯𑀸 𑀲𑁄 𑀯𑀸 𑀓𑁄𑀘𑀺 𑀅𑀚𑁆𑀛𑁂𑀲𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀬𑁄’’𑀢𑀺𑀆𑀤𑀺. 𑀇𑀫𑀺𑀦𑀸 𑀦 𑀬𑁄 𑀯𑀸 𑀲𑁄 𑀯𑀸 𑀓𑁄𑀘𑀺 𑀅𑀚𑁆𑀛𑁂𑀲𑀺𑀢𑀩𑁆𑀩𑁄, 𑀲𑀫𑀢𑁆𑀣𑁄𑀬𑁂𑀯 𑀧𑀦 𑀅𑀚𑁆𑀛𑁂𑀲𑀺𑀢𑀩𑁆𑀩𑁄𑀢𑀺 𑀯𑀸 𑀤𑀲𑁆𑀲𑁂𑀢𑀺. ‘‘𑀆𑀯𑀼𑀲𑁄’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀅𑀭𑀺𑀬𑁄 𑀯𑀸 𑀢𑀼𑀡𑁆𑀳𑀻𑀪𑀸𑀯𑁄𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 𑀓𑀣𑁂𑀢𑀼𑀁 𑀅𑀲𑀫𑀢𑁆𑀣𑀯𑀲𑁂𑀦 𑀢𑀼𑀡𑁆𑀳𑀻𑀪𑀸𑀯𑁄, 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀯𑀲𑁂𑀦 𑀧𑀦𑀸𑀢𑀺 𑀆𑀳 ‘‘𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀯𑀲𑁂𑀦 𑀢𑀼𑀡𑁆𑀳𑀻𑀪𑀸𑀯𑁄’’𑀢𑀺. 𑀅𑀭𑀺𑀬𑀸𑀦𑀁 𑀏𑀲𑁄 𑀅𑀭𑀺𑀬𑁄, 𑀢𑀼𑀡𑁆𑀳𑀻𑀪𑀸𑀯𑁄. ‘‘𑀦𑀸𑀯𑀚𑀸𑀦𑀺𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀦𑀸𑀢𑀺𑀫𑀜𑁆𑀜𑀺𑀢𑀩𑁆𑀩𑁄𑀢𑀺 𑀧𑀤𑀲𑁆𑀲 𑀅𑀢𑀺𑀓𑁆𑀓𑀫𑁆𑀫 𑀦 𑀫𑀜𑁆𑀜𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺.

𑀉𑀧𑀚𑁆𑀛𑀸𑀬𑁄𑀢𑀺 𑀘𑁄𑀤𑀓𑀘𑀼𑀤𑀺𑀢𑀓𑀸𑀦𑀁 𑀉𑀧𑀚𑁆𑀛𑀸𑀬𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 ‘‘𑀦 𑀆𑀘𑀭𑀺𑀬𑁄 𑀧𑀼𑀘𑁆𑀙𑀺𑀢𑀩𑁆𑀩𑁄’’𑀢𑀺𑀆𑀤𑀺𑀧𑀤𑁂𑀲𑀼. 𑀓𑀼𑀮𑀫𑁂𑀯 𑀚𑀸𑀢𑀺𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀅𑀬𑀦𑁆𑀢𑀺 𑀅𑀧𑀤𑀺𑀲𑀺𑀬𑀢𑀻𑀢𑀺 𑀓𑀼𑀮𑀧𑀤𑁂𑀲𑁄. 𑀅𑀢𑁆𑀭𑀲𑁆𑀲𑀸𑀢𑀺 𑀏𑀢𑁆𑀣 𑀅𑀢𑁆𑀭 𑀅𑀲𑁆𑀲𑀸𑀢𑀺 𑀧𑀤𑀘𑁆𑀙𑁂𑀤𑀁 𑀓𑀢𑁆𑀯𑀸 𑀅𑀢𑁆𑀭𑀲𑀤𑁆𑀤𑁄 𑀧𑀼𑀕𑁆𑀕𑀮𑀯𑀺𑀲𑀬𑁄, 𑀅𑀲𑁆𑀲𑀲𑀤𑁆𑀤𑁄 𑀆𑀔𑁆𑀬𑀸𑀢𑀺𑀓𑁄𑀢𑀺 𑀆𑀳 ‘‘𑀅𑀢𑁆𑀭 𑀧𑀼𑀕𑁆𑀕𑀮𑁂’’𑀢𑀺𑀆𑀤𑀺. 𑀢𑀢𑁆𑀣 ‘‘𑀪𑀯𑁂𑀬𑁆𑀬𑀸’’𑀢𑀺 𑀇𑀫𑀺𑀦𑀸 𑀅𑀲𑁆𑀲𑀲𑀤𑁆𑀤𑀲𑁆𑀲 𑀲𑀩𑁆𑀩𑀦𑀸𑀫𑀢𑁆𑀢𑀜𑁆𑀘 ‘‘𑀪𑀯𑀢𑀻’’𑀢𑀺 𑀯𑀢𑁆𑀢𑀫𑀸𑀦𑀺𑀓𑀪𑀸𑀯𑀜𑁆𑀘 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀭𑀺𑀲𑀸𑀦𑀼𑀯𑀺𑀥𑀸𑀬𑀓𑁂𑀦𑀸𑀢𑀺 𑀧𑀭𑀺𑀲𑀸𑀬 𑀅𑀦𑀼𑀫𑀢𑀁 𑀓𑀭𑁄𑀦𑁆𑀢𑁂𑀦. 𑀇𑀫𑀺𑀦𑀸 𑀦𑁄 𑀧𑀭𑀺𑀲𑀓𑀧𑁆𑀧𑀺𑀓𑁂𑀦𑀸𑀢𑀺 𑀏𑀢𑁆𑀣 𑀓𑀧𑁆𑀧𑀲𑀤𑁆𑀤𑁄 𑀯𑀺𑀛𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀬𑀦𑁆𑀢𑀺 𑀯𑀘𑀦𑀁. 𑀦 𑀳𑀢𑁆𑀣𑀫𑀼𑀤𑁆𑀤𑀸𑀢𑀺 𑀫𑀼𑀤𑀦𑁆𑀢𑀺 𑀏𑀢𑀸𑀬𑀸𑀢𑀺 𑀫𑀼𑀤𑁆𑀤𑀸, 𑀲𑀓𑁆𑀔𑀭𑀫𑀗𑁆𑀕𑀼𑀮𑀺𑀬𑀁 𑀳𑀢𑁆𑀣𑀲𑁆𑀲 𑀫𑀼𑀤𑁆𑀤𑀸 𑀅𑀯𑀬𑀯𑀺𑀅𑀯𑀬𑀯𑀯𑀲𑁂𑀦 𑀲𑀫𑁆𑀩𑀦𑁆𑀥𑀢𑁆𑀢𑀸𑀢𑀺 𑀳𑀢𑁆𑀣𑀫𑀼𑀤𑁆𑀤𑀸. 𑀢𑀲𑁆𑀲𑀸 𑀯𑀺𑀓𑀸𑀭𑁄 ‘‘𑀳𑀢𑁆𑀣𑀫𑀼𑀤𑁆𑀤𑀸’’𑀢𑀺 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀳𑀢𑁆𑀣𑀯𑀺𑀓𑀸𑀭𑁄’’𑀢𑀺.

‘‘𑀅𑀢𑁆𑀣𑀁 𑀅𑀦𑀼𑀯𑀺𑀥𑀺𑀬𑀦𑁆𑀢𑁂𑀦𑀸’’𑀢𑀺 𑀏𑀢𑁆𑀣 𑀅𑀢𑁆𑀣𑀦𑁆𑀢𑀺 𑀯𑀺𑀦𑀺𑀘𑁆𑀙𑀬𑀢𑁆𑀣𑀁. 𑀅𑀦𑀼𑀯𑀺𑀥𑀺𑀬𑀦𑁆𑀢𑁂𑀦𑀸𑀢𑀺 𑀲𑀮𑁆𑀮𑀓𑁆𑀔𑁂𑀦𑁆𑀢𑁂𑀦. 𑀇𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀦𑀺𑀘𑁆𑀙𑀬𑀧𑀝𑀺𑀯𑁂𑀥𑀫𑁂𑀯 𑀲𑀮𑁆𑀮𑀓𑁆𑀔𑁂𑀦𑁆𑀢𑁂𑀦𑀸’’𑀢𑀺. 𑀲𑀦𑁆𑀦𑀺𑀧𑀸𑀢𑀫𑀡𑁆𑀟𑀮𑁂𑀢𑀺 𑀲𑀦𑁆𑀦𑀺𑀧𑀸𑀢𑀸𑀬 𑀧𑀭𑀺𑀲𑀸𑀬 𑀲𑀫𑀽𑀳𑁂, 𑀲𑀦𑁆𑀦𑀺𑀧𑀸𑀢𑀫𑀡𑁆𑀟𑀮𑀲𑁆𑀲 𑀫𑀚𑁆𑀛𑁂𑀢𑀺 𑀅𑀢𑁆𑀣𑁄. 𑀦 𑀯𑀻𑀢𑀺𑀳𑀸𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀯𑀻𑀢𑀺𑀳𑀭𑀡𑀁 𑀦𑀸𑀫 𑀅𑀢𑁆𑀣𑀢𑁄 𑀳𑀸𑀧𑀦𑀦𑁆𑀢𑀺 𑀆𑀳 ‘‘𑀦 𑀯𑀺𑀦𑀺𑀘𑁆𑀙𑀬𑁄 𑀳𑀸𑀧𑁂𑀢𑀩𑁆𑀩𑁄’’𑀢𑀺. 𑀤𑀼𑀭𑀼𑀢𑁆𑀢𑀯𑀸𑀘𑀦𑁆𑀢𑀺 𑀘𑁄𑀤𑀓𑀘𑀼𑀤𑀺𑀢𑀓𑀸𑀦𑀁 𑀤𑀼𑀭𑀼𑀢𑁆𑀢𑀯𑀸𑀘𑀁. 𑀳𑀺𑀢𑀧𑀭𑀺𑀲𑀓𑀺𑀦𑀸𑀢𑀺 𑀏𑀢𑁆𑀣 𑀳𑀺𑀢𑀁 𑀧𑀭𑀺 𑀏𑀲𑀢𑀻𑀢𑀺 𑀳𑀺𑀢𑀧𑀭𑀺𑀲𑀓𑁄, 𑀓𑀭𑀼𑀡𑀸 𑀘 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄 𑀘, 𑀲𑁄 𑀏𑀢𑀲𑁆𑀲𑀢𑁆𑀣𑀻𑀢𑀺 𑀳𑀺𑀢𑀧𑀭𑀺𑀲𑀓𑀻, 𑀧𑀼𑀕𑁆𑀕𑀮𑁄, 𑀢𑁂𑀦 𑀳𑀺𑀢𑀧𑀭𑀺𑀲𑀓𑀺𑀦𑀸. 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀳𑀺𑀢𑁂𑀲𑀺𑀦𑀸 𑀳𑀺𑀢𑀕𑀯𑁂𑀲𑀺𑀦𑀸’’𑀢𑀺. 𑀓𑀭𑀼𑀡𑀸𑀢𑀺 𑀅𑀧𑁆𑀧𑀦𑀸𑀧𑀢𑁆𑀢𑀸 𑀓𑀭𑀼𑀡𑀸. 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄𑀢𑀺 𑀅𑀧𑁆𑀧𑀦𑀸𑀧𑀢𑁆𑀢𑀸𑀬 𑀓𑀭𑀼𑀡𑀸𑀬 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑀸 𑀧𑀭𑀺𑀓𑀫𑁆𑀫𑀉𑀧𑀘𑀸𑀭𑀓𑀭𑀼𑀡𑀸. 𑀧𑀤𑀤𑁆𑀯𑀬𑁂𑀧𑀻𑀢𑀺 ‘‘𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑀸 𑀓𑀸𑀭𑀼𑀡𑀺𑀓𑁂𑀦 𑀪𑀯𑀺𑀢𑀩𑁆𑀩𑀁. 𑀳𑀺𑀢𑀧𑀭𑀺𑀲𑀓𑀺𑀦𑀸 𑀅𑀲𑀫𑁆𑀨𑀧𑁆𑀧𑀮𑀸𑀧𑀺𑀦𑀸 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀧𑀤𑀤𑁆𑀯𑀬𑁂𑀧𑀺. 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. ‘‘𑀅𑀲𑀼𑀦𑁆𑀤𑀭𑀯𑀘𑀦’’𑀦𑁆𑀢𑀺 𑀇𑀫𑀺𑀦𑀸 𑀅𑀲𑀼𑀭𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀲𑀼𑀦𑁆𑀤𑀭𑀁 𑀉𑀢𑁆𑀢𑀁 𑀲𑀼𑀭𑀼𑀢𑁆𑀢𑀁, 𑀦 𑀲𑀼𑀭𑀼𑀢𑁆𑀢𑀁 𑀅𑀲𑀼𑀭𑀼𑀢𑁆𑀢𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 𑀧𑀭𑀺𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄.

𑀢𑀲𑁆𑀲𑀸𑀢𑀺 𑀅𑀥𑀫𑁆𑀫𑀘𑁄𑀤𑀓𑀲𑁆𑀲. 𑀅𑀦𑁄𑀲𑀝𑀁 𑀯𑀢𑁆𑀣𑀼𑀦𑁆𑀢𑀺 𑀏𑀢𑁆𑀣 ‘‘𑀘𑁄𑀤𑀓𑀘𑀼𑀤𑀺𑀢𑀓𑁂𑀳𑀺 𑀯𑀼𑀢𑁆𑀢’’𑀦𑁆𑀢𑀺 𑀧𑀤𑀁 𑀅𑀥𑀺𑀓𑀸𑀭𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘 𑀅𑀦𑁄𑀲𑀝𑀦𑁆𑀢𑀺 𑀯𑀺𑀦𑀺𑀘𑁆𑀙𑀬𑀁 𑀅𑀦𑁄𑀲𑀝𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀕𑁆𑀕𑀡𑁆𑀳𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀦𑀦𑀼 𑀢𑁆𑀯’’𑀦𑁆𑀢𑀺𑀆𑀤𑀺. 𑀅𑀦𑀼𑀬𑁄𑀕𑀯𑀢𑁆𑀢𑀦𑁆𑀢𑀺 ‘‘𑀓𑀸𑀮𑁂𑀦 𑀯𑀓𑁆𑀔𑀸𑀫𑀻’’𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁩𑁯𑁯; 𑀧𑀭𑀺. 𑁩𑁬𑁨, 𑁪𑁩𑁭) 𑀯𑀼𑀢𑁆𑀢𑀁, ‘‘𑀲𑀘𑁆𑀘𑁂 𑀘 𑀅𑀓𑀼𑀧𑁆𑀧𑁂 𑀘𑀸’’𑀢𑀺 (𑀘𑀽𑀴𑀯. 𑁪𑁦𑁧) 𑀘 𑀯𑀼𑀢𑁆𑀢𑀁 𑀅𑀦𑀼𑀬𑀼𑀜𑁆𑀚𑀦𑀯𑀢𑁆𑀢𑀁. 𑀢𑀜𑁆𑀳𑀺 𑀬𑀲𑁆𑀫𑀸 𑀅𑀦𑁂𑀦 𑀯𑀢𑁆𑀢𑁂𑀦 𑀘𑁄𑀤𑀓𑁄 𑀘𑀼𑀤𑀺𑀢𑀓𑀁, 𑀘𑀼𑀤𑀺𑀢𑀓𑁄 𑀯𑀸 𑀘𑁄𑀤𑀓𑀁 𑀅𑀦𑀼𑀬𑀼𑀜𑁆𑀚𑀢𑀺, 𑀘𑁄𑀤𑀓𑁂𑀦 𑀘𑀼𑀤𑀺𑀢𑀓𑁄, 𑀘𑀼𑀤𑀺𑀢𑀓𑁂𑀦 𑀯𑀸 𑀘𑁄𑀤𑀓𑁄 𑀅𑀦𑀼𑀬𑀼𑀜𑁆𑀚𑀺𑀬𑀢𑀺, 𑀢𑀲𑁆𑀫𑀸 𑀅𑀦𑀼𑀬𑁄𑀕𑀯𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀣𑀸𑀧𑁂𑀢𑁆𑀯𑀸𑀢𑀺 𑀘𑁄𑀤𑀓𑀘𑀼𑀤𑀺𑀢𑀓𑁂𑀳𑁂𑀯 𑀓𑀣𑀸𑀧𑁂𑀢𑁆𑀯𑀸. 𑀢𑀲𑁆𑀲𑀸𑀢𑀺 𑀘𑁄𑀤𑀓𑀲𑁆𑀲 𑀯𑀸 𑀘𑀼𑀤𑀺𑀢𑀓𑀲𑁆𑀲 𑀯𑀸, 𑀲𑀸𑀭𑀚𑁆𑀚𑀦𑁆𑀢𑀺 𑀪𑀬𑀁. 𑀢𑁂𑀢𑀺 𑀢𑀯. 𑀯𑀢𑁆𑀯𑀸𑀧𑀻𑀢𑀺 𑀫𑀼𑀔𑁂𑀦 𑀯𑀢𑁆𑀯𑀸𑀧𑀺. 𑀧𑀺𑀲𑀤𑁆𑀤𑁂𑀦 𑀓𑀸𑀬𑀯𑀺𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸𑀧𑀻𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑀺. ‘‘𑀅𑀦𑀼𑀬𑁄𑀕𑀯𑀢𑁆𑀢’’𑀦𑁆𑀢𑀺 𑀥𑀸𑀢𑀼𑀓𑀫𑁆𑀫𑀁, ‘‘𑀲𑁄 𑀪𑀺𑀓𑁆𑀔𑀽’’𑀢𑀺 𑀓𑀸𑀭𑀺𑀢𑀓𑀫𑁆𑀫𑀁 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁, 𑀢𑀁 𑀓𑀫𑁆𑀫𑀁 𑀢𑀩𑁆𑀩𑀧𑀘𑁆𑀘𑀬𑁄 𑀯𑀤𑀢𑀺. 𑀅𑀲𑀼𑀘𑀺 𑀯𑀺𑀪𑀸𑀯𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 𑀦𑀢𑁆𑀣𑀺 𑀲𑀼𑀘𑀺 𑀲𑀻𑀮𑀫𑁂𑀢𑀲𑁆𑀲𑀸𑀢𑀺 𑀅𑀲𑀼𑀘𑀻𑀢𑀺 𑀯𑀼𑀢𑁆𑀢𑁂 𑀅𑀮𑀚𑁆𑀚𑀻𑀢𑀺 𑀆𑀳 ‘‘𑀅𑀮𑀚𑁆𑀚𑀺’’𑀦𑁆𑀢𑀺. 𑀉𑀚𑀼 𑀲𑀻𑀮𑀯𑀸 𑀓𑀸𑀬𑀯𑀗𑁆𑀓𑀸𑀤𑀺𑀭𑀳𑀺𑀢𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 𑀓𑀸𑀬𑀯𑀗𑁆𑀓𑀸𑀤𑀺𑀭𑀳𑀺𑀢𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀉𑀚𑀼𑀦𑁄 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀓𑀸𑀬𑀯𑀗𑁆𑀓𑀸𑀤𑀺𑀭𑀳𑀺𑀢𑀢𑁆𑀢𑀸 𑀉𑀚𑀼 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄𑀢𑀺 𑀪𑀺𑀓𑁆𑀔𑀼. 𑀫𑀤𑁆𑀤𑀯𑁂𑀦𑁂𑀯𑀸𑀢𑀺 𑀫𑀼𑀤𑀼𑀪𑀸𑀯𑁂𑀦𑁂𑀯. 𑀉𑀧𑀘𑀭𑀺𑀢𑀩𑁆𑀩𑁄𑀢𑀺 𑀓𑀣𑁂𑀢𑀩𑁆𑀩𑁄. 𑀇𑀫𑀺𑀦𑀸 𑀉𑀚𑀼𑀫𑀤𑁆𑀤𑀯𑁂𑀦𑀸𑀢𑀺 𑀧𑀤𑀲𑁆𑀲 𑀲𑀫𑁆𑀩𑀦𑁆𑀥𑀝𑁆𑀞𑀸𑀦𑀁 𑀧𑀸𑀞𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀬𑁄𑀢𑀺 𑀪𑀺𑀓𑁆𑀔𑀼. 𑀅𑀬𑀫𑁂𑀯𑀸𑀢𑀺 𑀏𑀯𑀲𑀤𑁆𑀤𑁂𑀦 𑀦 𑀥𑀫𑁆𑀫𑀕𑀭𑀼𑀓𑁄, 𑀧𑀼𑀕𑁆𑀕𑀮𑀕𑀭𑀼𑀓𑁄, 𑀥𑀫𑁆𑀫𑁂𑀲𑀼 𑀘 𑀧𑀼𑀕𑁆𑀕𑀮𑁂𑀲𑀼 𑀘 𑀦 𑀫𑀚𑁆𑀛𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺.

𑁩𑁬𑁬. 𑀢𑁂𑀦 𑀘 𑀧𑀦 𑀅𑀦𑀼𑀯𑀺𑀚𑁆𑀚𑀓𑁂𑀦𑀸𑀢𑀺 𑀬𑁄𑀚𑀦𑀸. 𑀲𑀼𑀢𑁆𑀢𑀸𑀤𑀻𑀲𑀽𑀢𑀺 𑀆𑀤𑀺𑀲𑀤𑁆𑀤𑁂𑀦 𑀯𑀺𑀦𑀬𑀅𑀦𑀼𑀮𑁄𑀫 𑀧𑀜𑁆𑀜𑀢𑁆𑀢𑀅𑀦𑀼𑀮𑁄𑀫𑀺𑀓𑀸𑀦𑀺 𑀲𑀗𑁆𑀕𑀳𑁂𑀢𑀩𑁆𑀩𑀸𑀦𑀺. 𑀲𑀼𑀢𑁆𑀢𑀁 𑀲𑀁𑀲𑀦𑁆𑀤𑀦𑀢𑁆𑀣𑀸𑀬 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀓𑁂𑀲𑀁 𑀲𑀁𑀲𑀦𑁆𑀤𑀦𑀢𑁆𑀣𑀸𑀬𑀸𑀢𑀺 𑀆𑀳 ‘‘𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀻𑀦𑀁 𑀲𑀁𑀲𑀦𑁆𑀤𑀦𑀢𑁆𑀣’’𑀦𑁆𑀢𑀺. 𑀑𑀧𑀫𑁆𑀫𑀁 𑀅𑀢𑁆𑀣𑀤𑀲𑁆𑀲𑀦𑀢𑁆𑀣𑀸𑀬 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀧𑀘𑁆𑀘𑁂𑀓𑀝𑁆𑀞𑀸𑀬𑀺𑀦𑁄 𑀅𑀯𑀺𑀲𑀁𑀯𑀸𑀤𑀓𑀝𑁆𑀞𑀸𑀬𑀺𑀦𑁄𑀢𑀺 𑀏𑀢𑁆𑀣 𑀧𑀘𑁆𑀘𑁂𑀓𑀲𑁆𑀫𑀺𑀁 𑀢𑀺𑀝𑁆𑀞𑀦𑁆𑀢𑀺 𑀲𑀻𑀮𑁂𑀦𑀸𑀢𑀺 𑀧𑀘𑁆𑀘𑁂𑀓𑀝𑁆𑀞𑀸𑀬𑀺𑀦𑁄, 𑀅𑀯𑀺𑀲𑀁𑀯𑀸𑀤𑀓𑁂 𑀢𑀺𑀝𑁆𑀞𑀦𑁆𑀢𑀺 𑀲𑀻𑀮𑁂𑀦𑀸𑀢𑀺 𑀅𑀯𑀺𑀲𑀁𑀯𑀸𑀤𑀓𑀝𑁆𑀞𑀸𑀬𑀺𑀦𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀲𑁆𑀲…𑀧𑁂… 𑀞𑀺𑀢𑀸’’𑀢𑀺. ‘‘𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀚𑁂𑀝𑁆𑀞𑀓𑀝𑁆𑀞𑀸𑀦𑁂’’𑀢𑀺 𑀇𑀫𑀺𑀦𑀸 𑀧𑀘𑁆𑀘𑁂𑀓𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀢𑁂𑀢𑀺 𑀲𑀗𑁆𑀖𑁂𑀦 𑀅𑀦𑀼𑀫𑀢𑀸 𑀧𑀼𑀕𑁆𑀕𑀮𑀸.

𑀓𑀺𑀫𑀢𑁆𑀣𑀁 ‘‘𑀯𑀺𑀦𑀬𑁄 𑀲𑀁𑀯𑀭𑀢𑁆𑀣𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀇𑀤𑀸𑀦𑀻’’𑀢𑀺𑀆𑀤𑀺. 𑀇𑀤𑀸𑀦𑀺 𑀤𑀲𑁆𑀲𑁂𑀢𑀼𑀁 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂 𑀫𑀦𑁆𑀤𑀸 𑀫𑀦𑁆𑀤𑀩𑀼𑀤𑁆𑀥𑀺𑀦𑁄 𑀳𑀼𑀢𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬𑀼𑀦𑁆𑀢𑀺 𑀬𑁄𑀚𑀦𑀸. 𑀅𑀣 𑀯𑀸 𑀫𑀦𑁆𑀤𑀸 𑀫𑀦𑁆𑀤𑀩𑀼𑀤𑁆𑀥𑀺𑀦𑁄 𑀬𑁂 𑀧𑀼𑀕𑁆𑀕𑀮𑀸 𑀏𑀯𑀁 𑀯𑀤𑁂𑀬𑁆𑀬𑀼𑀦𑁆𑀢𑀺 𑀬𑁄𑀚𑀦𑀸. 𑀲𑀓𑀮𑀸𑀧𑀺 𑀯𑀺𑀦𑀬𑀧𑀜𑁆𑀜𑀢𑁆𑀢𑀺 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 ‘‘𑀲𑀁𑀯𑀭𑀢𑁆𑀣𑀸𑀬𑀸’’𑀢𑀺𑀆𑀤𑀻𑀲𑀼 ‘‘𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬𑀸’’𑀢𑀺𑀧𑀭𑀺𑀬𑁄𑀲𑀸𑀦𑁂𑀲𑀼 𑀢𑁂𑀭𑀲𑀯𑀸𑀓𑁆𑀬𑁂𑀲𑀼 ‘‘𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀻’’𑀢𑀺 𑀧𑀸𑀞𑀲𑁂𑀲𑁄 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀧𑀘𑁆𑀘𑀬𑁄’’𑀢𑀺 𑀇𑀫𑀺𑀦𑀸 ‘‘𑀉𑀧𑀦𑀺𑀲𑁆𑀲𑀬𑁄’’𑀢𑀺 𑀧𑀤𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀤𑁆𑀯𑀸𑀤𑀲𑀯𑀸𑀓𑁆𑀬𑁂𑀲𑀼. 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀺𑀘𑁂𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀧𑀺𑀘 𑀯𑀺𑀲𑁂𑀲𑀁 𑀯𑀓𑁆𑀔𑀸𑀫𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀢𑀺 ‘‘𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀬𑀸’’𑀢𑀺𑀆𑀤𑀻𑀲𑀼. 𑀢𑀦𑁆𑀢𑀺 𑀲𑀼𑀔𑀁. 𑀢𑀭𑀼𑀡𑀯𑀺𑀧𑀲𑁆𑀲𑀦𑀸 𑀦𑀸𑀫 𑀓𑀲𑁆𑀲 𑀅𑀥𑀺𑀯𑀘𑀦𑀦𑁆𑀢𑀺 𑀆𑀳 ‘‘𑀉𑀤𑀬𑀩𑁆𑀩𑀬𑀜𑀸𑀡𑀲𑁆𑀲𑁂𑀢𑀫𑀥𑀺𑀯𑀘𑀦’’𑀦𑁆𑀢𑀺. 𑀦𑀦𑀼 ‘‘𑀯𑀺𑀭𑀸𑀕𑁄’’𑀢𑀺 𑀏𑀢𑁆𑀣 𑀘𑀢𑀼𑀩𑁆𑀩𑀺𑀥𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀕𑀳𑀺𑀢𑀢𑁆𑀢𑀸 ‘‘𑀯𑀺𑀫𑀼𑀢𑁆𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀘𑀢𑀼𑀩𑁆𑀩𑀺𑀥𑀁 𑀨𑀮𑀁 𑀕𑀳𑁂𑀢𑀩𑁆𑀩𑀁, 𑀓𑀲𑁆𑀫𑀸 𑀧𑀦 ‘‘𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀘𑀢𑀼𑀩𑁆𑀩𑀺𑀥𑁄𑀧𑀺 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀅𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬𑀸𑀢𑀺 𑀅𑀲𑀗𑁆𑀔𑀢𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬. 𑀦𑀢𑁆𑀣𑁂𑀢𑁆𑀣 𑀳𑀺 𑀧𑀭𑀺𑀦𑀺𑀩𑁆𑀩𑀸𑀦𑁂 𑀓𑁄𑀘𑀺 𑀧𑀘𑁆𑀘𑀬𑁄, 𑀢𑀲𑁆𑀫𑀸 𑀅𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀦𑁆𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁. 𑀢𑀲𑁆𑀫𑀺𑀁𑀅𑀦𑀼𑀧𑁆𑀧𑀢𑁆𑀢𑁂𑀢𑀺 𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑁂 𑀅𑀦𑀼𑀓𑁆𑀓𑀫𑁂𑀦 𑀧𑀢𑁆𑀢𑁂. 𑀅𑀯𑀲𑁆𑀲𑀦𑁆𑀢𑀺 𑀥𑀼𑀯𑀁 𑀏𑀓𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀢𑀤𑀢𑁆𑀣𑀸𑀢𑀺 𑀏𑀲𑁄 𑀅𑀦𑀼𑀧𑀸𑀤𑀸 𑀧𑀭𑀺𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀧𑀬𑁄𑀚𑀦𑀁 𑀇𑀫𑀺𑀲𑁆𑀲𑀸 𑀓𑀣𑀸𑀬𑀸𑀢𑀺 𑀏𑀢𑀤𑀢𑁆𑀣𑀸. 𑀓𑀣𑀸𑀢𑀺 𑀅𑀢𑁆𑀣𑀲𑁆𑀲 𑀓𑀣𑀸. 𑀫𑀦𑁆𑀢𑀦𑀸𑀢𑀺 𑀥𑀫𑁆𑀫𑀲𑁆𑀲 𑀫𑀦𑁆𑀢𑀦𑀸. 𑀏𑀢𑀤𑀢𑁆𑀣𑀸 𑀉𑀧𑀦𑀺𑀲𑀸𑀢𑀺 𑀏𑀢𑁆𑀣 𑀉𑀧𑀦𑀺𑀲𑀸𑀲𑀤𑁆𑀤𑁄 𑀧𑀘𑁆𑀘𑀬𑀯𑀸𑀘𑀓𑁄𑀢𑀺 𑀆𑀳 ‘‘𑀧𑀭𑀁𑀧𑀭𑀧𑀘𑁆𑀘𑀬𑀢𑀸𑀧𑀻’’𑀢𑀺. 𑀧𑀭𑀁𑀧𑀭𑀧𑀘𑁆𑀘𑀬𑁄 𑀳𑀺 𑀬𑀲𑁆𑀫𑀸 𑀏𑀢𑁆𑀣 𑀧𑀭𑀁𑀧𑀭𑀨𑀮𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀢𑀲𑁆𑀫𑀸 𑀉𑀧𑀦𑀺𑀲𑀸𑀢𑀺 𑀯𑀼𑀘𑁆𑀘𑀢𑀺. ‘‘𑀯𑀺𑀦𑀬𑁄 𑀲𑀁𑀯𑀭𑀢𑁆𑀣𑀸𑀬𑀸’’𑀢𑀺𑀆𑀤𑀺𑀓𑀸 𑀅𑀬𑀁 𑀧𑀭𑀁𑀧𑀭𑀧𑀘𑁆𑀘𑀬𑀢𑀸𑀧𑀻𑀢𑀺 𑀬𑁄𑀚𑀦𑀸. 𑀲𑁄𑀢𑀸𑀯𑀥𑀸𑀦𑀦𑁆𑀢𑀺 𑀑𑀕𑀸𑀳𑁂𑀢𑁆𑀯𑀸 𑀥𑀺𑀬𑀢𑁂 𑀞𑀧𑀺𑀬𑀢𑁂 𑀅𑀯𑀥𑀸𑀦𑀁, 𑀲𑁄𑀢𑀲𑁆𑀲 𑀅𑀯𑀥𑀸𑀦𑀁 𑀲𑁄𑀢𑀸𑀯𑀥𑀸𑀦𑀁. 𑀇𑀫𑀁 𑀓𑀣𑀦𑁆𑀢𑀺 ‘‘𑀯𑀺𑀦𑀬𑁄 𑀲𑀁𑀯𑀭𑀢𑁆𑀣𑀸𑀬𑀸’’𑀢𑀺𑀆𑀤𑀺𑀁 𑀇𑀫𑀁 𑀓𑀣𑀁. 𑀬𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀫𑁆𑀧𑀺 𑀏𑀢𑀤𑀢𑁆𑀣𑀦𑁆𑀢𑀺 𑀬𑁄𑀚𑀦𑀸. 𑀬𑀤𑀺𑀤𑀁 𑀅𑀦𑀼𑀧𑀸𑀤𑀸 𑀘𑀺𑀢𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀬𑀤𑀺𑀤’’𑀦𑁆𑀢𑀺 𑀦𑀺𑀧𑀸𑀢𑁄 ‘‘𑀯𑀺𑀫𑁄𑀓𑁆𑀔𑁄’’𑀢𑀺 𑀧𑀤𑀫𑀧𑁂𑀓𑁆𑀔𑀺𑀢𑁆𑀯𑀸 𑀬𑁄 𑀅𑀬𑀦𑁆𑀢𑀺 𑀅𑀢𑁆𑀣𑀁 𑀯𑀤𑀢𑀺. 𑀅𑀦𑀼𑀧𑀸𑀤𑀸𑀢𑀺 𑀏𑀢𑁆𑀣 ‘‘𑀲𑀬𑀁 𑀅𑀪𑀺𑀜𑁆𑀜𑀸’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁧𑁧) 𑀯𑀺𑀬 𑀬𑀓𑀸𑀭𑀮𑁄𑀧𑁄 𑀳𑁄𑀢𑀺, 𑀢𑀲𑁆𑀲 𑀧𑀤𑀲𑁆𑀲 𑀓𑀭𑀡𑀁 𑀧𑀦 ‘‘𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀻’’𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀺 𑀇𑀫 𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁄 𑀅𑀬𑀁 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀅𑀦𑀼𑀧𑀸𑀤𑀺𑀬𑀺𑀢𑁆𑀯𑀸’’𑀢𑀺. 𑀏𑀢𑁆𑀣 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀅𑀦𑀼𑀧𑀸𑀤𑀺𑀬𑀺𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀅𑀭𑀳𑀢𑁆𑀢𑀨𑀮𑀲𑀗𑁆𑀔𑀸𑀢𑁄 𑀬𑁄 𑀅𑀬𑀁 𑀯𑀺𑀫𑁄𑀓𑁆𑀔𑁄 𑀅𑀢𑁆𑀣𑀺, 𑀲𑁄𑀧𑀺 𑀏𑀢𑀤𑀢𑁆𑀣𑀸𑀬 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀅𑀭𑀳𑀢𑁆𑀢𑀨𑀮𑀲𑀗𑁆𑀔𑀸𑀢𑁄’’𑀢𑀺 𑀇𑀫𑀺𑀦𑀸 ‘‘𑀯𑀺𑀫𑁄𑀓𑁆𑀔𑁄’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀭𑀳𑀢𑁆𑀢𑀨𑀮𑀜𑁆𑀳𑀺 𑀬𑀲𑁆𑀫𑀸 𑀯𑀺𑀭𑀼𑀤𑁆𑀥𑁂𑀳𑀺, 𑀯𑀺𑀲𑁂𑀲𑁂𑀦 𑀯𑀸 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀫𑀼𑀘𑁆𑀘𑀺𑀢𑁆𑀣, 𑀢𑀲𑁆𑀫𑀸 𑀯𑀺𑀫𑁄𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺. ‘‘𑀅𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀏𑀯𑀸’’𑀢𑀺 𑀇𑀫𑀺𑀦𑀸 𑀏𑀢𑀤𑀢𑁆𑀣𑀸𑀬𑀸𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁩𑁬𑁭. 𑀯𑀢𑁆𑀣𑀼𑀁…𑀧𑁂… 𑀦 𑀚𑀸𑀦𑀸𑀢𑀻𑀢𑀺 𑀏𑀢𑁆𑀣𑀸𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀫𑁆𑀩𑀦𑁆𑀥𑁄, 𑀢𑀲𑁆𑀫𑀸. 𑀏𑀢𑁆𑀣𑀸𑀢𑀺 𑀇𑀫𑀸𑀲𑀼 𑀕𑀸𑀣𑀸𑀲𑀼. 𑀲𑀫𑁂𑀦 𑀘𑀸𑀢𑀺 𑀏𑀢𑁆𑀣 ‘‘𑀲𑀫𑁂𑀦𑀸’’𑀢𑀺 𑀧𑀤𑀁 ‘‘𑀅𑀜𑁆𑀜𑀸𑀡𑁂𑀦𑀸’’𑀢𑀺 𑀅𑀢𑁆𑀣𑀲𑁆𑀲 𑀯𑀸𑀘𑀓𑀁 𑀭𑀽𑀴𑁆𑀳𑀻𑀧𑀤𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑁂𑀦𑁂𑀯 𑀧𑀼𑀩𑁆𑀩𑀸𑀧𑀭𑀁 𑀅𑀚𑀸𑀦𑀦𑀲𑁆𑀲 𑀲𑀫𑁂𑀦 𑀅𑀜𑁆𑀜𑀸𑀡𑁂𑀦𑀸’’𑀢𑀺. 𑀧𑀸𑀴𑀺𑀬𑀁 𑀓𑁂𑀦 𑀓𑀸𑀭𑀡𑁂𑀦 𑀓𑀢𑀸𑀓𑀢𑀁 𑀦 𑀚𑀸𑀦𑀸𑀢𑀻𑀢𑀺 𑀆𑀳 ‘‘𑀲𑀫𑁂𑀦𑀸’’𑀢𑀺. 𑀲𑀫𑁂𑀦 𑀧𑀼𑀩𑁆𑀩𑀸𑀧𑀭𑀲𑁆𑀲 𑀅𑀜𑁆𑀜𑀸𑀡𑁂𑀦 𑀓𑀢𑀸𑀓𑀢𑀁 𑀦 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀬𑀁 𑀧𑀦𑁂𑀢𑀁 𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. ‘‘𑀢𑀢𑁆𑀣𑀸’’𑀢𑀺 𑀘 ‘‘𑀆𑀓𑀸𑀭𑀅𑀓𑁄𑀯𑀺𑀤𑁄’’𑀢𑀺 𑀘 𑀆𑀥𑀸𑀭𑀸𑀥𑁂𑀬𑁆𑀬𑀸𑀦𑀫𑀪𑁂𑀤𑁄 𑀳𑁄𑀢𑀺, 𑀢𑀲𑁆𑀫𑀸 𑀅𑀯𑀬𑀯𑀻 𑀆𑀥𑀸𑀭𑁄, 𑀅𑀯𑀬𑀯𑁄 𑀆𑀥𑁂𑀬𑁆𑀬𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀓𑀸𑀭𑀲𑀤𑁆𑀤𑁄 𑀇𑀗𑁆𑀕𑀺𑀢𑀢𑁆𑀣𑁄𑀢𑀺 𑀆𑀳 ‘‘𑀓𑀸𑀭𑀡𑀸𑀓𑀸𑀭𑀡𑁂’’𑀢𑀺. 𑀓𑀸𑀭𑀡𑀅𑀓𑀸𑀭𑀡𑀲𑀗𑁆𑀔𑀸𑀢𑁂 𑀇𑀗𑁆𑀕𑀺𑀢𑁂𑀢𑀺 𑀅𑀢𑁆𑀣𑁄. 𑀆𑀓𑀸𑀭𑀲𑁆𑀲𑀸𑀢𑀺 𑀪𑀼𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀆𑀓𑀸𑀭𑀲𑁆𑀫𑀺𑀦𑁆𑀢𑀺 𑀳𑀺 𑀅𑀢𑁆𑀣𑁄.

𑀢𑀣𑁂𑀯𑀸𑀢𑀺 𑀬𑀣𑀸 𑀯𑀢𑁆𑀣𑀼𑀆𑀤𑀻𑀦𑀺 𑀦 𑀚𑀸𑀦𑀸𑀢𑀺, 𑀢𑀣𑁂𑀯. 𑀇𑀢𑀻𑀢𑀺 𑀏𑀯𑀁. 𑀬𑁆𑀯𑀸𑀬𑀦𑁆𑀢𑀺 𑀬𑁄 𑀅𑀬𑀁 𑀪𑀺𑀓𑁆𑀔𑀼. ‘‘𑀪𑀬𑁂𑀦𑀸’’𑀢𑀺 𑀇𑀫𑀺𑀦𑀸 𑀪𑀬𑀸𑀢𑀺 𑀏𑀢𑁆𑀣 𑀓𑀸𑀭𑀡𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀪𑀬𑀸 𑀪𑀬𑁂𑀦 𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸. 𑀏𑀲𑁂𑀯 𑀦𑀬𑁄 𑀲𑀫𑁆𑀫𑁄𑀳𑁂𑀦 𑀫𑁄𑀳𑀸 𑀕𑀘𑁆𑀙𑀢𑀻𑀢𑀺 𑀏𑀢𑁆𑀣𑀸𑀧𑀺. 𑀙𑀦𑁆𑀤𑀸𑀢𑀺 𑀙𑀦𑁆𑀤𑁂𑀦. 𑀤𑁄𑀲𑀸𑀢𑀺 𑀤𑁄𑀲𑁂𑀦. 𑀅𑀢𑁆𑀢𑀦𑀸 𑀜𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀦 𑀲𑀜𑁆𑀜𑀢𑁆𑀢𑀺𑀬𑀸 𑀓𑀼𑀲𑀮𑁄𑀢𑀺 𑀆𑀳 ‘‘𑀧𑀭𑀁 𑀲𑀜𑁆𑀜𑀸𑀧𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬𑀸’’𑀢𑀺. 𑀓𑀲𑁆𑀫𑀸 𑀦𑀺𑀚𑁆𑀛𑀢𑁆𑀢𑀺𑀬𑀸 𑀘 𑀅𑀓𑁄𑀯𑀺𑀤𑁄𑀢𑀺 𑀆𑀳 ‘‘𑀓𑀸𑀭𑀡𑀸…𑀧𑁂… 𑀢𑀸𑀬𑀸’’𑀢𑀺. ‘‘𑀧𑀭𑀺𑀲𑀸𑀬 𑀮𑀤𑁆𑀥𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀮𑀤𑁆𑀥𑁄 𑀧𑀭𑀺𑀲𑀲𑀗𑁆𑀔𑀸𑀢𑁄 𑀧𑀓𑁆𑀔𑁄 𑀬𑁂𑀦𑀸𑀢𑀺 𑀮𑀤𑁆𑀥𑀧𑀓𑁆𑀔𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀘𑁂 𑀢𑀸𑀤𑀺𑀲𑀓𑁄 𑀪𑀺𑀓𑁆𑀔𑀼 𑀳𑁄𑀢𑀺, 𑀲𑁄 𑀪𑀺𑀓𑁆𑀔𑀼 ‘‘𑀅𑀧𑀝𑀺𑀓𑁆𑀔𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀏𑀲𑁂𑀯 𑀦𑀬𑁄 𑀳𑁂𑀝𑁆𑀞𑀸𑀧𑀺. ‘‘𑀦 𑀧𑀝𑀺𑀓𑁆𑀔𑀺𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀧𑀝𑀺𑀫𑀼𑀔𑀁 𑀦 𑀇𑀓𑁆𑀔𑀺𑀢𑀩𑁆𑀩𑁄𑀢𑀺 𑀅𑀧𑀝𑀺𑀓𑁆𑀔𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀦 𑀑𑀮𑁄𑀓𑁂𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀇𑀓𑁆𑀔𑀥𑀸𑀢𑀼𑀬𑀸 𑀤𑀲𑁆𑀲𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀇𑀢𑀺 𑀘𑀽𑀴𑀲𑀗𑁆𑀕𑀸𑀫𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.