𑀧𑀞𑀫𑀕𑀸𑀣𑀸𑀲𑀗𑁆𑀕𑀡𑀺𑀓𑀁

𑀲𑀢𑁆𑀢𑀦𑀕𑀭𑁂𑀲𑀼 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁩𑁫. 𑀏𑀓𑀁𑀲𑀦𑁆𑀢𑀺 𑀏𑀢𑁆𑀣 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀏𑀓𑀲𑁆𑀫𑀺𑀁 𑀅𑀁𑀲𑁂’’𑀢𑀺. 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀦𑁆𑀢𑀺 𑀤𑀲𑀦𑁆𑀦𑀁 𑀦𑀔𑀸𑀦𑀁 𑀲𑀫𑀽𑀳𑁂𑀦 𑀲𑀼𑀝𑁆𑀞𑀼 𑀉𑀚𑁆𑀚𑀮𑀁. 𑀏𑀢𑁆𑀣 ‘‘𑀲𑀫𑀼𑀚𑁆𑀚𑀮’’𑀦𑁆𑀢𑀺 𑀇𑀫𑀺𑀦𑀸 𑀅𑀜𑁆𑀚𑀮𑀺𑀦𑁆𑀢𑀺 𑀧𑀤𑀲𑁆𑀲 𑀆𑀤𑀭𑁂𑀦, 𑀅𑀪𑀺𑀫𑀼𑀔𑀁 𑀯𑀸 𑀚𑀮𑀢𑀺 𑀤𑀺𑀩𑁆𑀩𑀢𑀻𑀢𑀺 𑀅𑀜𑁆𑀚𑀮𑀻𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀆𑀲𑀻𑀲𑀫𑀸𑀦𑀭𑀽𑀧𑁄𑀯𑀸𑀢𑀺 𑀏𑀢𑁆𑀣 𑀆𑀲𑀻𑀲𑀫𑀸𑀦𑀭𑀽𑀧𑁄 𑀏𑀯𑀸𑀢𑀺 𑀅𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀧𑀘𑁆𑀘𑀸𑀲𑀻𑀲𑀫𑀸𑀦𑀭𑀽𑀧𑁄 𑀯𑀺𑀬𑀸’’𑀢𑀺. 𑀏𑀢𑁆𑀣 ‘‘𑀯𑀺𑀬𑀸’’𑀢𑀺 𑀇𑀫𑀺𑀦𑀸 ‘‘𑀆𑀲𑀻𑀲𑀫𑀸𑀦𑁄 𑀇𑀯𑀸’’𑀢𑀺 𑀧𑀤𑀯𑀺𑀪𑀸𑀕𑀁 𑀓𑀢𑁆𑀯𑀸 𑀇𑀯𑀲𑀤𑁆𑀤𑁄 𑀉𑀧𑀫𑀢𑁆𑀣𑀚𑁄𑀢𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀲𑁆𑀲𑀸𑀢𑀺 𑀏𑀢𑁆𑀣 𑀓𑀭𑀡𑀢𑁆𑀣𑁂 𑀙𑀝𑁆𑀞𑀻𑀯𑀺𑀪𑀢𑁆𑀢𑀺 𑀳𑁄𑀢𑀻𑀢𑀺 𑀆𑀳 ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺. 𑀇𑀥𑀸𑀢𑀺 𑀫𑀫 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁. ‘‘𑀆𑀕𑀢𑁄’’𑀢𑀺 𑀇𑀫𑀺𑀦𑀸 𑀇𑀥𑀫𑀸𑀕𑀢𑁄𑀢𑀺 𑀏𑀢𑁆𑀣 𑀫𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑀫𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀲𑁆𑀲𑀸𑀢𑀺 𑀉𑀧𑀸𑀮𑀺𑀲𑁆𑀲 𑀯𑀺𑀲𑁆𑀲𑀚𑁆𑀚𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀧𑀜𑁆𑀳𑁂𑀲𑀼. 𑀇𑀢𑀻𑀢𑀺 𑀏𑀯𑀁.

𑀢𑀢𑁆𑀣𑀸𑀢𑀺 𑀯𑀺𑀲𑁆𑀲𑀚𑁆𑀚𑀦𑁂. 𑀪𑀤𑁆𑀤𑀓𑁄 𑀢𑁂 𑀉𑀫𑁆𑀫𑀗𑁆𑀕𑁄𑀢𑀺 𑀏𑀢𑁆𑀣 𑀉𑀫𑁆𑀫𑀗𑁆𑀕𑀲𑀤𑁆𑀤𑁄 𑀧𑀜𑁆𑀳𑀯𑀸𑀘𑀓𑁄𑀢𑀺 𑀆𑀳 ‘‘𑀪𑀤𑁆𑀤𑀓𑀸 𑀢𑁂 𑀧𑀜𑁆𑀳𑀸’’𑀢𑀺. 𑀢𑀢𑁆𑀣 𑀢𑁂𑀢𑀺 𑀢𑀯. 𑀓𑀲𑁆𑀫𑀸 𑀧𑀜𑁆𑀳𑀸 ‘‘𑀉𑀫𑁆𑀫𑀗𑁆𑀕𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀧𑀜𑁆𑀘𑀸 𑀳𑀻’’𑀢𑀺𑀆𑀤𑀺. 𑀳𑀺 𑀬𑀲𑁆𑀫𑀸 𑀉𑀫𑁆𑀫𑀗𑁆𑀕𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀧𑀜𑁆𑀳𑀸 𑀉𑀫𑁆𑀫𑀗𑁆𑀕𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. ‘‘𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀞𑀺𑀢𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀉𑀫𑁆𑀫𑀼𑀚𑁆𑀚𑀢𑀻𑀢𑀺 𑀉𑀫𑁆𑀫𑀗𑁆𑀕𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀫𑀼𑀚𑀥𑀸𑀢𑀼 𑀉𑀓𑀸𑀭𑀲𑁆𑀲 𑀅𑀓𑀸𑀭𑁄, 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀲𑀗𑁆𑀔𑀸𑀢𑀸 𑀉𑀤𑀓𑀢𑁄 𑀉𑀫𑁆𑀫𑀼𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. ‘‘𑀢𑀕𑁆𑀖𑀸’’𑀢𑀺 𑀦𑀺𑀧𑀸𑀢𑀲𑁆𑀲 𑀢𑀲𑁆𑀫𑀸 𑀓𑀸𑀭𑀡𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀫𑀸’’𑀢𑀺𑀆𑀤𑀺. ‘‘𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑁂’’𑀢𑀺 𑀇𑀫𑀺𑀦𑀸 𑀢𑀕𑁆𑀖𑀲𑀤𑁆𑀤𑁄 𑀲𑀸𑀥𑀼𑀅𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺, 𑀢𑀕𑁆𑀖 𑀲𑀸𑀥𑀽𑀢𑀺 𑀅𑀢𑁆𑀣𑁄. 𑀢𑀻𑀡𑀺𑀬𑁂𑀯𑀸𑀢𑀺 ‘‘𑀲𑀫𑀸𑀤𑀳𑀺𑀢𑁆𑀯𑀸 𑀯𑀺𑀲𑀺𑀩𑁆𑀩𑁂𑀦𑁆𑀢𑀻’’𑀢𑀺 𑀏𑀓𑀁, ‘‘𑀲𑀸𑀫𑀺𑀲𑁂𑀦𑀸’’𑀢𑀺 𑀏𑀓𑀁, ‘‘𑀲𑀲𑀺𑀢𑁆𑀣𑀓’’𑀦𑁆𑀢𑀺 𑀏𑀓𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺𑀬𑁂𑀯.

𑀘𑀢𑀼𑀯𑀺𑀧𑀢𑁆𑀢𑀺𑀯𑀡𑁆𑀡𑀦𑀸

𑁩𑁩𑁬. 𑀬𑀁 𑀢𑀁 𑀧𑀼𑀘𑁆𑀙𑀺𑀫𑁆𑀳𑀸𑀢𑀺 𑀏𑀢𑁆𑀣 𑀦𑀺𑀕𑁆𑀕𑀳𑀺𑀢𑀢𑁄 𑀧𑀭𑀁 𑀅𑀓𑀸𑀭𑀮𑁄𑀧𑁄𑀢𑀺 𑀆𑀳 ‘‘𑀬𑀁 𑀢𑀁 𑀅𑀧𑀼𑀘𑁆𑀙𑀺𑀫𑁆𑀳𑀸’’𑀢𑀺. 𑀢𑀢𑁆𑀣 𑀬𑀦𑁆𑀢𑀺 𑀧𑀜𑁆𑀳𑀁. 𑀢𑀦𑁆𑀢𑀺 𑀢𑀼𑀯𑀁. ‘‘𑀢𑁆𑀯’’𑀦𑁆𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀢𑀁 𑀢𑀤𑁂𑀯𑀸𑀢𑀺 𑀢𑀁 𑀢𑀁 𑀏𑀯 𑀧𑀜𑁆𑀳𑀁. 𑀅𑀜𑁆𑀜𑀣𑀸𑀢𑀺 𑀅𑀜𑁆𑀜𑀁 𑀆𑀓𑀸𑀭𑀁.

𑀬𑁂 𑀤𑀼𑀝𑁆𑀞𑀼𑀮𑁆𑀮𑀸 𑀲𑀸 𑀲𑀻𑀮𑀯𑀺𑀧𑀢𑁆𑀢𑀻𑀢𑀺 𑀏𑀢𑁆𑀣 𑀦𑀦𑀼 𑀲𑀻𑀮𑀯𑀺𑀧𑀢𑁆𑀢𑀺𑀁 𑀧𑀼𑀘𑁆𑀙𑀦𑁆𑀢𑁄 𑀧𑀜𑁆𑀳𑁄 𑀦𑀢𑁆𑀣𑀺, 𑀓𑀲𑁆𑀫𑀸 𑀧𑀦 ‘‘𑀲𑀸 𑀲𑀻𑀮𑀯𑀺𑀧𑀢𑁆𑀢𑀻’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀏𑀢𑀦𑁆𑀢𑀺 ‘‘𑀬𑁂 𑀤𑀼𑀝𑁆𑀞𑀼𑀮𑁆𑀮𑀸 𑀲𑀸 𑀲𑀻𑀮𑀯𑀺𑀧𑀢𑁆𑀢𑀻’’𑀢𑀺 𑀯𑀘𑀦𑀁. 𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀘𑀢𑀽𑀲𑀼 𑀳𑀻’’𑀢𑀺𑀆𑀤𑀺. 𑀯𑀢𑁆𑀯𑀸𑀢𑀺 𑀲𑀁𑀔𑁂𑀧𑁂𑀦 𑀯𑀢𑁆𑀯𑀸.

𑀢𑀺𑀲𑁆𑀲𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀦𑁆𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀢𑁄 𑀅𑀯𑀲𑁂𑀲𑀸𑀦𑀁 𑀢𑀺𑀲𑁆𑀲𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁. 𑀢𑀢𑁆𑀣𑀸𑀢𑀺 ‘‘𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺𑀆𑀤𑀺𑀯𑀘𑀦𑁂.

‘‘𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀻’’𑀢𑀺 𑀧𑀤𑀲𑁆𑀲 𑀓𑀢𑁆𑀢𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀤𑀦𑁆𑀢𑀸’’𑀢𑀺. ‘‘𑀢𑀣𑀸𑀳’’𑀦𑁆𑀢𑀺𑀆𑀤𑀺𑀦𑀸 𑀯𑀤𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀺.

‘‘𑀅𑀬𑀁 𑀙𑀳𑀻’’𑀢𑀺 𑀇𑀫𑀺𑀦𑀸 𑀅𑀬𑀁 𑀲𑀸𑀢𑀺 𑀏𑀢𑁆𑀣 𑀲𑀸𑀲𑀤𑁆𑀤𑁄 𑀧𑀤𑀸𑀮𑀗𑁆𑀓𑀸𑀭𑁄𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁂𑀦 ‘‘𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺𑀆𑀤𑀺𑀯𑀘𑀦𑀫𑀢𑁆𑀢𑁂𑀦. 𑀯𑀺𑀲𑁆𑀲𑀚𑁆𑀚𑀺𑀢𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀙𑁂𑀤𑀦𑀓𑀸𑀤𑀺𑀯𑀡𑁆𑀡𑀦𑀸

𑁩𑁩𑁭. 𑀓𑀢𑀺 𑀙𑁂𑀤𑀦𑀓𑀸𑀦𑀻𑀢𑀺𑀆𑀤𑀺𑀧𑀼𑀘𑁆𑀙𑀸𑀦𑀁 𑀅𑀦𑀼𑀲𑀦𑁆𑀥𑀺𑀧𑀼𑀘𑁆𑀙𑀸𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀧𑀼𑀘𑁆𑀙𑀸 𑀳𑀺 𑀅𑀦𑀼𑀲𑀦𑁆𑀥𑀺𑀅𑀦𑀦𑀼𑀲𑀦𑁆𑀥𑀺𑀯𑀲𑁂𑀦 𑀤𑀼𑀯𑀺𑀥𑀸. 𑀢𑀢𑁆𑀣 𑀯𑀺𑀲𑁆𑀲𑀚𑁆𑀚𑀦𑁂𑀦 𑀅𑀦𑀼𑀲𑀦𑁆𑀥𑀺𑀯𑀲𑁂𑀦 𑀧𑀼𑀘𑁆𑀙𑀸 𑀅𑀦𑀼𑀲𑀦𑁆𑀥𑀺𑀧𑀼𑀘𑁆𑀙𑀸 𑀦𑀸𑀫, 𑀯𑀺𑀲𑁆𑀲𑀚𑁆𑀚𑀦𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀬𑀣𑀸𑀓𑀸𑀫𑀧𑀼𑀘𑁆𑀙𑀸 𑀅𑀦𑀦𑀼𑀲𑀦𑁆𑀥𑀺𑀧𑀼𑀘𑁆𑀙𑀸 𑀦𑀸𑀫. 𑀢𑀸𑀲𑀁 𑀯𑀺𑀢𑁆𑀣𑀸𑀭𑁄 𑀦𑁂𑀢𑁆𑀢𑀺𑀅𑀝𑁆𑀞𑀓𑀣𑀸𑀤𑀻𑀲𑀼 𑀕𑀳𑁂𑀢𑀩𑁆𑀩𑁄. 𑀇𑀥𑀸𑀧𑀺 ‘‘𑀏𑀓𑀸𑀤𑀲 𑀬𑀸𑀯𑀢𑀢𑀺𑀬𑀓𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑁂𑀦 𑀅𑀦𑀼𑀲𑀦𑁆𑀥𑀸𑀦𑀢𑁆𑀢𑀸 𑀅𑀦𑀼𑀲𑀦𑁆𑀥𑀺𑀧𑀼𑀘𑁆𑀙𑀸 𑀦𑀸𑀫. 𑀬𑀲𑁆𑀫𑀸 𑀧𑀦 𑀯𑀺𑀲𑁆𑀲𑀚𑁆𑀚𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀔𑀸𑀯𑀲𑁂𑀦𑀸𑀢𑀺 𑀏𑀓𑀸𑀤𑀲𑀸’’𑀢𑀺 𑀲𑀗𑁆𑀔𑀸𑀬 𑀲𑀢𑁆𑀢𑀺𑀬𑀸, 𑀆𑀬𑀢𑁆𑀢𑁂𑀦 𑀯𑀸. 𑀲𑀗𑁆𑀔𑀸𑀦𑀼𑀲𑀦𑁆𑀥𑀺𑀯𑀲𑁂𑀦𑁂𑀯𑀸𑀢𑀺 ‘‘𑀓𑀢𑀻’’𑀢𑀺 𑀲𑀗𑁆𑀔𑀸𑀬 𑀅𑀦𑀼𑀲𑀦𑁆𑀥𑀺𑀯𑀲𑁂𑀦 𑀏𑀯. 𑀢𑁂𑀲𑀦𑁆𑀢𑀺 𑀧𑀜𑁆𑀳𑀸𑀦𑀁. 𑀢𑀢𑁆𑀣𑀸𑀢𑀺 ‘‘𑀙 𑀙𑁂𑀤𑀦𑀓𑀸𑀦𑀻’’𑀢𑀺𑀆𑀤𑀺𑀧𑀸𑀞𑁂. 𑀇𑀤𑀫𑁂𑀯𑀸𑀢𑀺 𑀇𑀤𑀁 𑀏𑀯 𑀯𑀘𑀦𑀁. 𑀅𑀧𑀼𑀩𑁆𑀩𑀦𑁆𑀢𑀺 𑀧𑀼𑀩𑁆𑀩𑁂 𑀦 𑀯𑀼𑀢𑁆𑀢𑀁, 𑀅𑀧𑁄𑀭𑀸𑀡𑀁 𑀦𑀯𑀦𑁆𑀢𑀺 𑀅𑀢𑁆𑀣𑁄. 𑀬𑀁 𑀧𑀦𑁂𑀢𑀦𑁆𑀢𑀺 𑀬𑀁 𑀧𑀦 𑀏𑀢𑀁 𑀯𑀘𑀦𑀁. ‘‘𑀲𑁄𑀴𑀲𑀸’’𑀢𑀺 𑀇𑀫𑀺𑀦𑀸 𑀲𑁄𑀤𑀲𑀸𑀢𑀺 𑀏𑀢𑁆𑀣 𑀤𑀓𑀸𑀭𑀲𑁆𑀲 𑀴𑀓𑀸𑀭𑀁 𑀓𑀢𑁆𑀯𑀸 ‘‘𑀲𑁄𑀴𑀲𑀸’’𑀢𑀺 𑀧𑀸𑀞𑁄𑀧𑀺 𑀬𑀼𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀚𑀸𑀦𑀦𑁆𑀢𑀺 𑀧𑀜𑁆𑀜𑀢𑁆𑀢𑀸𑀢𑀺 𑀏𑀢𑁆𑀣 ‘‘𑀏𑀯𑀁 𑀯𑀢𑁆𑀯𑀸’’𑀢𑀺 𑀧𑀸𑀞𑀲𑁂𑀲𑀁 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀚𑀸𑀦’’𑀦𑁆𑀢𑀺 𑀏𑀯𑀁 𑀯𑀢𑁆𑀯𑀸 𑀧𑀜𑁆𑀜𑀢𑁆𑀢𑀸’’𑀢𑀺. 𑀢𑁂𑀢𑀺 ‘‘𑀚𑀸𑀦’’𑀦𑁆𑀢𑀺 𑀧𑀜𑁆𑀜𑀢𑁆𑀢𑀸 𑀲𑀺𑀓𑁆𑀔𑀸𑀧𑀤𑀸𑀢𑀺 𑀅𑀢𑁆𑀣𑁄. 𑀏𑀯𑀦𑁆𑀢𑀺 𑀯𑀓𑁆𑀔𑀫𑀸𑀦𑀦𑀬𑁂𑀦. 𑀧𑀯𑀺𑀲𑁂𑀬𑁆𑀬𑀸𑀢𑀻𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 𑀧𑀭𑀺𑀲𑀫𑀸𑀦𑀢𑁆𑀣𑁄. 𑀇𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸.

𑀅𑀲𑀸𑀥𑀸𑀭𑀡𑀸𑀤𑀺𑀯𑀡𑁆𑀡𑀦𑀸

𑁩𑁩𑁮. 𑀧𑀼𑀭𑀺𑀫 𑀧𑀜𑁆𑀳𑀦𑁆𑀢𑀺 ‘‘𑀓𑀢𑀺 𑀙𑁂𑀤𑀦𑀓𑀸𑀦𑀻’’𑀢𑀺𑀆𑀤𑀺𑀧𑀜𑁆𑀳𑀸𑀦𑀁 𑀧𑀼𑀭𑁂 𑀯𑀼𑀢𑁆𑀢𑀁 𑀧𑀜𑁆𑀳𑀁. 𑀢𑀢𑁆𑀣𑀸𑀢𑀺 ‘‘𑀯𑀻𑀲𑀁 𑀤𑁆𑀯𑁂 𑀲𑀢𑀸𑀦𑀻’’𑀢𑀺𑀆𑀤𑀺𑀧𑀸𑀞𑁂. ‘‘𑀤𑁆𑀯𑁂𑀅𑀦𑀺𑀬𑀢𑁂𑀳𑀻’’𑀢𑀺 𑀧𑀤𑀲𑁆𑀲 𑀅𑀲𑀫𑀸𑀳𑀸𑀭𑀤𑀺𑀕𑀼𑀯𑀸𑀓𑁆𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑁆𑀯𑀻𑀳𑀺 𑀅𑀦𑀺𑀬𑀢𑁂𑀳𑀻’’𑀢𑀺. ‘‘𑀲𑀤𑁆𑀥𑀺’’𑀦𑁆𑀢𑀺 𑀇𑀫𑀺𑀦𑀸 𑀲𑀳𑀸𑀤𑀺𑀬𑁄𑀕𑁂 𑀓𑀭𑀡𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀕𑀸𑀣𑀸𑀬𑀁 ‘‘𑀥𑁄𑀯𑀦𑀜𑁆𑀘 𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺𑀆𑀤𑀺𑀦𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀤𑁆𑀯𑁂 𑀮𑁄𑀫𑀸𑀢𑀺 𑀤𑁆𑀯𑁂 𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑀸𑀦𑀺.

‘‘𑀲𑀓𑀮𑁄’’𑀢𑀺𑀆𑀤𑀺𑀓𑀸𑀬 𑀅𑀟𑁆𑀠𑀢𑁂𑀬𑁆𑀬𑀕𑀸𑀣𑀸𑀬 𑀬𑁄𑀚𑀦𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯.

𑀲𑀗𑁆𑀖𑀫𑁆𑀳𑀸 𑀤𑀲 𑀦𑀺𑀲𑁆𑀲𑀭𑁂𑀢𑀺 𑀏𑀢𑁆𑀣 ‘‘𑀲𑀗𑁆𑀖𑀫𑁆𑀳𑀸 𑀦𑀺𑀲𑁆𑀲𑀸𑀭𑀻𑀬𑀢𑀻’’𑀢𑀺 (𑀧𑀸𑀘𑀺. 𑁬𑁮𑁦, 𑁭𑁩𑁦) 𑀏𑀯𑀁 𑀯𑀼𑀢𑁆𑀢𑀸 𑀤𑀲𑀸𑀢𑀺 𑀬𑁄𑀚𑀦𑀸𑀦𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀗𑁆𑀖𑀫𑁆𑀳𑀸 𑀦𑀺𑀲𑁆𑀲𑀸𑀭𑀻𑀬𑀢𑀻’’𑀢𑀺𑀆𑀤𑀺. 𑀢𑀢𑁆𑀣𑀸𑀢𑀺 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂. 𑀢𑀣𑀸𑀢𑀺 𑀬𑀣𑀸 𑀔𑀼𑀤𑁆𑀤𑀓𑀸, 𑀢𑀣𑀸𑀢𑀺 𑀅𑀢𑁆𑀣𑁄. 𑀇𑀢𑀻𑀢𑀺 𑀏𑀯𑀁.

𑀢𑁂𑀲𑀦𑁆𑀢𑀺 𑀧𑀸𑀭𑀸𑀚𑀺𑀓𑀸𑀦𑀁. 𑀓𑀡𑁆𑀳𑀲𑀧𑁆𑀧𑀸𑀤𑀬𑁄 𑀤𑀼𑀭𑀸𑀲𑀤𑀸 𑀯𑀺𑀬 𑀤𑀼𑀭𑀸𑀲𑀤𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀤𑀼𑀭𑀽𑀧𑀕𑀫𑀦𑀸𑀢𑀺 𑀇𑀫𑀺𑀦𑀸 𑀲𑀤𑀥𑀸𑀢𑀼𑀬𑀸 𑀕𑀢𑁆𑀬𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀤𑀼𑀭𑀸𑀲𑀚𑁆𑀚𑀦𑀸𑀢𑀺 𑀤𑀼𑀓𑁆𑀔𑁂𑀦 𑀆𑀲𑀚𑁆𑀚𑀺𑀢𑀩𑁆𑀩𑀸, 𑀆𑀲𑀚𑁆𑀚𑀺𑀢𑀼𑀁 𑀦 𑀲𑀼𑀓𑀭𑀸𑀢𑀺 𑀅𑀢𑁆𑀣𑁄. 𑀲𑀫𑀽𑀧𑀫𑀸𑀢𑀺 𑀲𑀫𑀉𑀧𑀫𑀸. 𑀲𑀫𑀽𑀧𑀫𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸’’𑀢𑀺𑀆𑀤𑀺.

𑀲𑀸𑀥𑀸𑀭𑀡𑀦𑁆𑀢𑀺 𑀅𑀝𑁆𑀞𑀳𑀺 𑀧𑀸𑀭𑀸𑀚𑀺𑀓𑁂𑀳𑀺 𑀲𑀸𑀥𑀸𑀭𑀡𑀁. 𑀏𑀓𑁂𑀓𑀲𑁆𑀲 𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀯𑀺𑀭𑀽𑀴𑁆𑀳𑀻 𑀪𑀯𑀦𑁆𑀢𑀺 𑀢𑁂𑀢𑀺 𑀏𑀢𑁆𑀣 𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀸𑀦𑀁 𑀧𑀸𑀓𑀝𑀪𑀸𑀯𑀁 𑀓𑀢𑁆𑀯𑀸 𑀬𑁄𑀚𑀦𑀸𑀦𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸 𑀏𑀢𑁂’’𑀢𑀺𑀆𑀤𑀺. 𑀅𑀯𑀺𑀭𑀽𑀴𑁆𑀳𑀺𑀥𑀫𑁆𑀫𑀸𑀢𑀺 𑀅𑀯𑀺𑀭𑀽𑀴𑁆𑀳𑀻𑀲𑀪𑀸𑀯𑀸. 𑀧𑀓𑀢𑀺𑀲𑀻𑀮𑀪𑀸𑀯𑁂𑀦𑀸𑀢𑀺 𑀧𑀓𑀢𑀺𑀬𑀸 𑀲𑀻𑀮𑀯𑀦𑁆𑀢𑀪𑀸𑀯𑁂𑀦, ‘‘𑀧𑀓𑀢𑀺𑀲𑀻𑀮𑀸𑀪𑀸𑀯𑁂𑀦𑀸’’𑀢𑀺𑀧𑀺 𑀧𑀸𑀞𑁄, 𑀧𑀓𑀢𑀺𑀲𑀻𑀮𑀲𑁆𑀲 𑀅𑀪𑀸𑀯𑁂𑀦, 𑀅𑀪𑀸𑀯𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁂𑀦 ‘‘𑀅𑀝𑁆𑀞𑁂𑀯 𑀧𑀸𑀭𑀸𑀚𑀺𑀓𑀸’’𑀢𑀺𑀆𑀤𑀺𑀯𑀘𑀦𑀫𑀢𑁆𑀢𑁂𑀦, 𑀤𑀲𑁆𑀲𑀺𑀢𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀪𑀢𑁆𑀢𑀺𑀬𑁄𑀢𑀺 𑀧𑀸𑀭𑀸𑀚𑀺𑀓𑀸𑀤𑀺𑀯𑀲𑁂𑀦 𑀯𑀺𑀪𑀚𑀺𑀢𑀩𑁆𑀩𑀸𑀢𑀺 𑀯𑀺𑀪𑀢𑁆𑀢𑀺𑀬𑁄𑀢𑀺. 𑀢𑀢𑁆𑀣𑀸𑀢𑀺 ‘‘𑀢𑁂𑀯𑀻𑀲𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀸’’𑀢𑀺𑀆𑀤𑀺𑀧𑀸𑀞𑁂. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀘𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀢𑀺𑀡𑁆𑀡𑀁 𑀲𑀫𑀣𑀸𑀦𑀁, 𑀲𑀩𑁆𑀩𑀸𑀲𑀁 𑀯𑀸 𑀆𑀧𑀢𑁆𑀢𑀻𑀦𑀁 𑀲𑀫𑀣𑀸𑀦𑀁 𑀲𑀗𑁆𑀕𑀸𑀳𑀺𑀓𑀯𑀘𑀦𑀁. ‘‘𑀤𑁆𑀯𑀻𑀳𑀺 𑀲𑀫𑀣𑁂𑀳𑀻’’𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺.

𑀏𑀢𑀦𑁆𑀢𑀺 ‘‘𑀤𑁆𑀯𑁂 𑀉𑀧𑁄𑀲𑀣𑀸 𑀤𑁆𑀯𑁂 𑀧𑀯𑀸𑀭𑀡𑀸’’𑀢𑀺 𑀯𑀘𑀦𑀁. 𑀯𑀺𑀪𑀚𑀦𑀸𑀦𑀻𑀢𑀺 𑀯𑀺𑀪𑀚𑀺𑀢𑀩𑁆𑀩𑀸𑀦𑀁 𑀯𑀺𑀪𑀚𑀦𑀓𑀺𑀭𑀺𑀬𑀸𑀬 𑀅𑀯𑀺𑀦𑀸𑀪𑀸𑀯𑀢𑁄 𑀪𑀸𑀯𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀯𑀺𑀪𑀚𑀺𑀢𑀩𑁆𑀩𑀸𑀢𑀺 𑀯𑀺𑀪𑀢𑁆𑀢𑀺𑀬𑁄𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. 𑀅𑀧𑀭𑀸𑀧𑀺 𑀇𑀫𑀸 𑀯𑀺𑀪𑀢𑁆𑀢𑀺𑀬𑁄 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑁆𑀲 ‘‘𑀯𑀺𑀪𑀢𑁆𑀢𑀺𑀫𑀢𑁆𑀢𑀤𑀲𑁆𑀲𑀦𑁂𑀦𑁂𑀯 𑀘𑁂𑀢𑀁 𑀯𑀼𑀢𑁆𑀢𑀁, 𑀦 𑀲𑀫𑀣𑁂𑀳𑀺 𑀯𑀽𑀧𑀲𑀫𑀦𑀯𑀲𑁂𑀦𑀸’’𑀢𑀺 𑀯𑀘𑀦𑀲𑁆𑀲 𑀅𑀢𑁆𑀣𑀦𑀬𑀢𑁄 𑀅𑀜𑁆𑀜𑀁 𑀅𑀢𑁆𑀣𑀦𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀣𑀯𑀸’’𑀢𑀺𑀆𑀤𑀺, ‘‘𑀇𑀫𑀸𑀧𑀺 𑀯𑀺𑀪𑀢𑁆𑀢𑀺𑀬𑁄’’𑀢𑀺 𑀧𑀤𑀁 ‘‘𑀦𑀺𑀲𑁆𑀲𑀸𑀬𑀸’’𑀢𑀺 𑀧𑀤𑁂 𑀅𑀯𑀼𑀢𑁆𑀢𑀓𑀫𑁆𑀫𑀁. 𑀦𑀺𑀲𑁆𑀲𑀸𑀬 𑀆𑀧𑀚𑁆𑀚𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀸𑀢𑀺 𑀆𑀧𑀢𑁆𑀢𑀺𑀬𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑁂𑀯𑀸𑀢𑀺 𑀢𑀻𑀳𑀺 𑀲𑀫𑀣𑁂𑀳𑀻𑀢𑀺 𑀯𑀼𑀢𑁆𑀢𑀧𑀓𑀸𑀭𑁂𑀳𑁂𑀯. 𑀢𑀁𑀫𑀽𑀮𑀺𑀓𑀸𑀦𑀦𑁆𑀢𑀺 𑀢𑁂 𑀏𑀯 𑀉𑀧𑁄𑀲𑀣𑀸𑀤𑀬𑁄 𑀫𑀽𑀮𑀫𑁂𑀢𑀸𑀲𑀦𑁆𑀢𑀺 𑀢𑀁𑀫𑀽𑀮𑀺𑀓𑀸, 𑀢𑀸𑀲𑀁. 𑀇𑀫𑀺𑀦𑀸 𑀓𑀸𑀭𑀺𑀬𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑀦𑀬𑀁 𑀤𑀲𑁆𑀲𑁂𑀢𑀺. 𑀢𑀸 𑀯𑀺𑀪𑀢𑁆𑀢𑀺𑀬𑁄𑀢𑀺 𑀉𑀧𑁄𑀲𑀣𑀸𑀤𑀺𑀯𑀺𑀪𑀢𑁆𑀢𑀺𑀬𑁄.

𑀧𑀸𑀭𑀸𑀚𑀺𑀓𑀸𑀤𑀺𑀆𑀧𑀢𑁆𑀢𑀺𑀯𑀡𑁆𑀡𑀦𑀸

𑁩𑁩𑁯. 𑀏𑀯𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀤𑀺𑀤𑀁 𑀆𑀧𑀢𑁆𑀢𑀺𑀧𑀸𑀭𑀸𑀚𑀺𑀓𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀆𑀧𑀢𑁆𑀢𑀺𑀧𑀸𑀭𑀸𑀚𑀺𑀓𑀦𑁆𑀢𑀺 𑀆𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀧𑀸𑀭𑀸𑀚𑀺𑀓𑀁. ‘‘𑀧𑀭𑀸𑀚𑀬𑀫𑀸𑀧𑀦𑁆𑀦𑁄’’𑀢𑀺 𑀇𑀫𑀺𑀦𑀸 𑀲𑀸𑀲𑀦𑀢𑁄 𑀧𑀼𑀕𑁆𑀕𑀮𑀁 𑀧𑀭𑀸𑀚𑁂𑀢𑀻𑀢𑀺 𑀧𑀸𑀭𑀸𑀚𑀺𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀡𑁆𑀬𑀧𑀘𑁆𑀘𑀬𑁄 𑀳𑁂𑀢𑀼𑀓𑀢𑁆𑀯𑀢𑁆𑀣𑀯𑀸𑀘𑀓𑁄, 𑀬𑀓𑀸𑀭𑀲𑁆𑀲 𑀓𑀓𑀸𑀭𑁄. 𑀘𑀼𑀢𑁄𑀢𑀺 𑀘𑀯𑀓𑁄. 𑀧𑀭𑀤𑁆𑀥𑁄𑀢𑀺 𑀯𑀺𑀭𑀤𑁆𑀥𑁄. 𑀪𑀝𑁆𑀞𑁄𑀢𑀺 𑀧𑀢𑀺𑀢𑁄. 𑀦𑀺𑀭𑀗𑁆𑀓𑀢𑁄𑀢𑀺 𑀲𑀗𑁆𑀖𑀫𑁆𑀳𑀸 𑀅𑀧𑀲𑀸𑀭𑀺𑀢𑁄. 𑀅𑀦𑀻𑀳𑀢𑁂 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂𑀢𑀺 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀲𑀗𑁆𑀖𑀫𑁆𑀳𑀸 𑀦𑀻𑀳𑀭𑀺𑀢𑁆𑀯𑀸 𑀦 𑀳𑀭𑀺𑀢𑁂, 𑀅𑀦𑀧𑀦𑀻𑀢𑁂𑀢𑀺 𑀅𑀢𑁆𑀣𑁄. ‘‘𑀉𑀧𑁄𑀲𑀣𑀧𑀯𑀸𑀭𑀡𑀸𑀤𑀺𑀪𑁂𑀤𑁄’’𑀢𑀺 𑀇𑀫𑀺𑀦𑀸 𑀲𑀁𑀯𑀸𑀲𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀩𑁆𑀬𑀜𑁆𑀚𑀦𑁂 𑀆𑀤𑀭𑀫𑀓𑀢𑁆𑀯𑀸 ‘‘𑀏𑀢𑀁 𑀆𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀬𑀁 𑀳𑀻𑀢𑀺 𑀅𑀬𑀁 𑀏𑀯𑀁 𑀯𑀓𑁆𑀔𑀫𑀸𑀦𑁄. 𑀏𑀢𑁆𑀣𑀸𑀢𑀺 𑀕𑀸𑀣𑀸𑀬𑀁. 𑀢𑁂𑀦 𑀢𑀲𑁆𑀫𑀸𑀢𑀺 𑀏𑀢𑁆𑀣 ‘‘𑀢𑀲𑁆𑀫𑀸’’𑀢𑀺 𑀧𑀤𑁂𑀦 ‘‘𑀢𑁂𑀦𑀸’’𑀢𑀺 𑀧𑀤𑀲𑁆𑀲 𑀓𑀸𑀭𑀡𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀏𑀢𑁆𑀣𑀸𑀢𑀺 𑀤𑀼𑀢𑀺𑀬𑀕𑀸𑀣𑀸𑀬𑀁. 𑀆𑀤𑀺𑀫𑁆𑀳𑀺 𑀘𑁂𑀯 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀲𑀘𑁆𑀘𑀁. 𑀏𑀢𑁆𑀣𑀸𑀢𑀺 𑀧𑀭𑀺𑀯𑀸𑀲𑀤𑀸𑀦𑀸𑀤𑀻𑀲𑀼 𑀘𑀢𑀽𑀲𑀼 𑀓𑀫𑁆𑀫𑁂𑀲𑀼. ‘‘𑀲𑀗𑁆𑀖𑁄’’𑀢𑀺𑀆𑀤𑀺𑀯𑀘𑀦𑀢𑁆𑀣𑁄 𑀢𑀺𑀧𑀤𑀪𑀺𑀦𑁆𑀦𑀸𑀥𑀺𑀓𑀭𑀡𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄 𑀳𑁄𑀢𑀺, 𑀘𑁂𑀯𑀲𑀤𑁆𑀤𑀘𑀲𑀤𑁆𑀤𑁂𑀳𑀺 𑀆𑀤𑀺𑀲𑁂𑀲𑀧𑀤𑀸𑀦𑀁 𑀉𑀪𑀬𑀧𑀤𑀢𑁆𑀣𑀧𑀥𑀸𑀦𑀪𑀸𑀯𑀁 𑀤𑀲𑁆𑀲𑁂𑀢𑀺, ‘‘𑀇𑀘𑁆𑀙𑀺𑀢𑀩𑁆𑀩𑁄’’𑀢𑀺 𑀧𑀤𑀁 𑀓𑀸𑀭𑀓𑀸𑀦𑀁 𑀓𑀺𑀭𑀺𑀬𑀸𑀧𑁂𑀓𑁆𑀔𑀢𑁆𑀢𑀸 𑀓𑀺𑀭𑀺𑀬𑀢𑁆𑀣𑀸𑀬 𑀧𑀓𑁆𑀔𑀺𑀢𑁆𑀢𑀁. 𑀅𑀲𑁆𑀲𑀸𑀢𑀺 𑀆𑀧𑀢𑁆𑀢𑀺𑀬𑀸, 𑀇𑀫𑀺𑀦𑀸 𑀅𑀜𑁆𑀜𑀧𑀤𑀁 𑀤𑀲𑁆𑀲𑁂𑀢𑀺. 𑀇𑀘𑁆𑀙𑀺𑀢𑀩𑁆𑀩𑀢𑁆𑀣𑁂 𑀅𑀧𑀘𑁆𑀘𑀬𑀁 𑀓𑀢𑁆𑀯𑀸 𑀢𑀤𑁆𑀥𑀺𑀢𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀮𑀳𑀼𑀓𑀦𑀬𑁄 𑀧𑀦𑁂𑀲. 𑀅𑀬𑀁 𑀧𑀦𑁂𑀢𑁆𑀣 𑀕𑀭𑀼𑀓𑀦𑀬𑁄 𑁋 𑀆𑀤𑀺 𑀘 𑀲𑁂𑀲𑁄 𑀘 𑀆𑀤𑀺𑀲𑁂𑀲𑀸, 𑀲𑀗𑁆𑀖𑁄 𑀆𑀤𑀺𑀲𑁂𑀲𑁂𑀲𑀼 𑀅𑀲𑁆𑀲𑀸 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺.

𑀅𑀦𑁂𑀓𑀁𑀲𑀺𑀓𑀢𑀁 𑀧𑀤𑀦𑁆𑀢𑀺 𑀏𑀢𑁆𑀣 𑀧𑀤𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀁. 𑀅𑀦𑁂𑀓𑀁𑀲𑁂𑀦 𑀓𑀢𑀁 𑀅𑀦𑁂𑀓𑀁𑀲𑀺𑀓𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀫𑀸 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀅𑀦𑁂𑀓𑀁𑀲𑁂𑀦 𑀓𑀢’’𑀦𑁆𑀢𑀺. 𑀬𑀲𑁆𑀫𑀸 𑀓𑀢𑀁, 𑀢𑀲𑁆𑀫𑀸 𑀅𑀦𑀺𑀬𑀢𑁄𑀢𑀺 𑀧𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀅𑀦𑀺𑀬𑀢𑁂. 𑀬𑀢𑁆𑀣𑀸𑀢𑀺 𑀲𑀺𑀓𑁆𑀔𑀸𑀧𑀤𑁂. 𑀲𑁄𑀧𑀻𑀢𑀺 𑀲𑀺𑀓𑁆𑀔𑀸𑀧𑀤𑀥𑀫𑁆𑀫𑁄𑀧𑀺.

𑀅𑀘𑁆𑀘𑀬𑁂𑀲𑀽𑀢𑀺 𑀤𑁄𑀲𑁂𑀲𑀼. 𑀢𑁂 𑀳𑀺 𑀦𑀺𑀤𑁆𑀤𑁄𑀲𑀁 𑀅𑀢𑀺𑀓𑁆𑀓𑀫𑁆𑀫 𑀅𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀘𑁆𑀘𑀬𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀦𑀸𑀢𑀺 𑀅𑀘𑁆𑀘𑀬𑁂𑀦. 𑀣𑀽𑀮𑁄𑀢𑀺 𑀑𑀴𑀸𑀭𑀺𑀓𑁄. ‘‘𑀣𑀽𑀮𑀢𑁆𑀢𑀸’’𑀢𑀺 𑀇𑀫𑀺𑀦𑀸 ‘‘𑀢𑁂𑀦𑁂𑀢’’𑀦𑁆𑀢𑀺 𑀏𑀢𑁆𑀣 𑀢𑁂𑀦𑀲𑀤𑁆𑀤𑀲𑁆𑀲 𑀓𑀸𑀭𑀡𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀘𑁆𑀘𑀬𑀲𑁆𑀲 𑀣𑀽𑀮𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀦𑁆𑀢𑀺 𑀆𑀧𑀢𑁆𑀢𑀺𑀥𑀫𑁆𑀫𑀁. 𑀇𑀫𑀸𑀬 𑀕𑀸𑀣𑀸𑀬 𑀅𑀜𑁆𑀜𑁂𑀲𑀁 𑀮𑀳𑀼𑀓𑀸𑀧𑀢𑁆𑀢𑀻𑀦𑀁 𑀣𑀽𑀮𑁄 𑀅𑀘𑁆𑀘𑀬𑁄 𑀣𑀼𑀮𑁆𑀮𑀘𑁆𑀘𑀬𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀤𑁆𑀯𑁂𑀪𑀸𑀯𑁂 𑀲𑀢𑀺 𑀲𑀁𑀬𑁄𑀕𑀧𑀭𑀢𑁆𑀢𑀸 𑀭𑀲𑁆𑀲𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀤𑁂𑀲𑁂𑀢𑀩𑁆𑀩𑀢𑁄’’𑀢𑀺 𑀇𑀫𑀺𑀦𑀸 𑀦𑀺𑀲𑁆𑀲𑀚𑁆𑀚𑀦𑀁 𑀦𑀺𑀲𑁆𑀲𑀕𑁆𑀕𑁄, 𑀆𑀧𑀢𑁆𑀢𑀺𑀤𑁂𑀲𑀦𑀢𑁄 𑀧𑀼𑀩𑁆𑀩𑀪𑀸𑀕𑁂 𑀓𑀢𑁆𑀢𑀩𑁆𑀩𑀲𑁆𑀲 𑀯𑀺𑀦𑀬𑀓𑀫𑁆𑀫𑀲𑁆𑀲𑁂𑀢𑀫𑀥𑀺𑀯𑀘𑀦𑀁, 𑀲𑁄 𑀏𑀢𑀲𑁆𑀲𑀢𑁆𑀣𑀻𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀓𑀼𑀲𑀮𑀥𑀫𑁆𑀫𑀲𑀤𑁆𑀤𑁂𑀦 𑀓𑀼𑀲𑀮𑀘𑀺𑀢𑁆𑀢𑀫𑁂𑀯 𑀕𑀳𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀓𑀼𑀲𑀮𑀥𑀫𑁆𑀫𑀲𑀗𑁆𑀔𑀸𑀢𑀁 𑀓𑀼𑀲𑀮𑀘𑀺𑀢𑁆𑀢’’𑀦𑁆𑀢𑀺. ‘‘𑀓𑀼𑀲𑀮𑀘𑀺𑀢𑁆𑀢𑀁 𑀧𑀸𑀢𑁂𑀢𑀻’’𑀢𑀺 𑀇𑀫𑀺𑀦𑀸 𑀘𑀺𑀢𑁆𑀢𑀁 𑀧𑀸𑀢𑁂𑀢𑀻𑀢𑀺 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀏𑀢𑁆𑀣 ‘‘𑀘𑀺𑀢𑁆𑀢𑀧𑀸𑀢𑀺𑀬’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀧𑀤𑀯𑀺𑀧𑀭𑀺𑀬𑀸𑀬𑀁 𑀓𑀢𑁆𑀯𑀸, 𑀢𑀓𑀸𑀭𑀲𑁆𑀲 𑀘 𑀮𑁄𑀧𑀁 𑀓𑀢𑁆𑀯𑀸 ‘‘𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀘𑀺𑀦𑁆𑀢𑁂𑀬𑁆𑀬𑁄 𑀳𑀺 𑀧𑀸𑀴𑀺𑀦𑀬𑁄. 𑀡𑁆𑀬𑀧𑀘𑁆𑀘𑀬𑁄 𑀳𑁂𑀢𑀼𑀓𑀢𑁆𑀯𑀢𑁆𑀣𑀯𑀸𑀘𑀓𑁄. 𑀦𑀦𑀼 ‘‘𑀧𑀸𑀢𑁂𑀢𑀺 𑀓𑀼𑀲𑀮𑀁 𑀥𑀫𑁆𑀫’’𑀦𑁆𑀢𑀺 𑀇𑀫𑀺𑀦𑀸𑀯 ‘‘𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀧𑀤𑀲𑁆𑀲 𑀦𑀺𑀩𑁆𑀩𑀘𑀦𑀁 𑀲𑀺𑀤𑁆𑀥𑀁, 𑀓𑀲𑁆𑀫𑀸 𑀧𑀦 ‘‘𑀅𑀧𑀭𑀚𑁆𑀛𑀢𑀺 𑀘𑀺𑀢𑁆𑀢𑀲𑀫𑁆𑀫𑁄𑀳𑀦𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀁 𑀧𑀦𑀸’’𑀢𑀺𑀆𑀤𑀺. 𑀬𑀲𑁆𑀫𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀸𑀝𑀺𑀤𑁂𑀲𑀦𑀻𑀬𑀸𑀲𑀼 𑀦𑀺𑀩𑁆𑀩𑀘𑀦𑀫𑁂𑀯 𑀅𑀤𑀲𑁆𑀲𑁂𑀢𑁆𑀯𑀸 𑀓𑀲𑁆𑀫𑀸 ‘‘𑀪𑀺𑀓𑁆𑀔𑀼 𑀅𑀜𑁆𑀜𑀸𑀢𑀓𑁄 𑀲𑀦𑁆𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀼𑀢𑁆𑀢𑀕𑀸𑀭𑀬𑁆𑀳𑀪𑀸𑀯𑀓𑀸𑀭𑀡𑀤𑀲𑁆𑀲𑀦𑀢𑁆𑀣𑀫𑁂𑀯𑀸’’𑀢𑀺. ‘‘𑀧𑀝𑀺𑀤𑁂𑀲𑁂𑀢𑀩𑁆𑀩𑀢𑁄’’𑀢𑀺 𑀇𑀫𑀺𑀦𑀸 𑀅𑀜𑁆𑀜𑀸𑀧𑀢𑁆𑀢𑀺𑀤𑁂𑀲𑀦𑀸𑀦𑀬𑀢𑁄 ‘‘𑀕𑀸𑀭𑀬𑁆𑀳’’𑀦𑁆𑀢𑀺𑀆𑀤𑀺𑀦𑀸 𑀧𑀝𑀺 𑀯𑀺𑀲𑀼𑀁 𑀯𑀢𑁆𑀯𑀸 𑀤𑁂𑀲𑁂𑀢𑀩𑁆𑀩𑀸𑀢𑀺 𑀧𑀸𑀝𑀺𑀤𑁂𑀲𑀦𑀻𑀬𑀸𑀢𑀺 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑀺.

𑀤𑀼𑀓𑁆𑀓𑀝𑀦𑁆𑀢𑀺 𑀏𑀢𑁆𑀣 𑀤𑀼𑀲𑀤𑁆𑀤𑁄 𑀤𑀼𑀝𑁆𑀞𑀼𑀅𑀢𑁆𑀣𑁄 𑀘 𑀯𑀺𑀭𑀽𑀧𑀢𑁆𑀣𑁄 𑀘 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀼𑀝𑁆𑀞𑀼 𑀓𑀢𑀁, 𑀯𑀺𑀭𑀽𑀧𑀁 𑀯𑀸 𑀓𑀢’’𑀦𑁆𑀢𑀺. 𑀢𑀦𑁆𑀢𑀺 𑀓𑀫𑁆𑀫𑀁. 𑀢𑀁 𑀧𑀦𑁂𑀢𑀦𑁆𑀢𑀺 𑀤𑀼𑀓𑁆𑀓𑀝𑀁, 𑀔𑀮𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑁆𑀲𑀸𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀲𑁆𑀲𑀢𑁆𑀣𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀬𑀁 𑀧𑀸𑀧𑀦𑁆𑀢𑀺 𑀬𑁄𑀚𑀦𑀸. 𑀬𑀤𑀻𑀢𑀺 𑀅𑀣. 𑀬𑀤𑀺𑀲𑀤𑁆𑀤𑁄 𑀳𑀺 𑀅𑀣𑀧𑀭𑀺𑀬𑀸𑀬𑁄. 𑀇𑀤𑀫𑁆𑀧𑀻𑀢𑀺 𑀇𑀤𑀫𑁆𑀧𑀺 𑀓𑀫𑁆𑀫𑀁, 𑀧𑀸𑀧𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

‘‘𑀮𑀧𑀺𑀢’’𑀦𑁆𑀢𑀺 𑀇𑀫𑀺𑀦𑀸 𑀤𑀼𑀭𑀸𑀪𑀝𑁆𑀞𑀦𑁆𑀢𑀺 𑀏𑀢𑁆𑀣 𑀪𑀸𑀲𑀥𑀸𑀢𑀼𑀬𑀸 𑀓𑀣𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀬𑀦𑁆𑀢𑀺 𑀯𑀘𑀦𑀁. 𑀓𑀺𑀜𑁆𑀘 𑀪𑀺𑀬𑁆𑀬𑁄𑀢𑀺 𑀢𑀢𑁄 𑀅𑀢𑀺𑀭𑁂𑀓𑀁 𑀓𑀣𑁂𑀢𑀩𑁆𑀩𑀯𑀘𑀦𑀁 𑀓𑀺𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀲𑀁𑀓𑀺𑀮𑀺𑀝𑁆𑀞𑀜𑁆𑀘 𑀬𑀁 𑀧𑀤𑀦𑁆𑀢𑀺 𑀏𑀢𑁆𑀣 𑀘𑀓𑀸𑀭𑁄 𑀧𑀺𑀲𑀤𑁆𑀤𑀢𑁆𑀣𑁄 ‘‘𑀧𑀤’’𑀦𑁆𑀢𑀺 𑀏𑀢𑁆𑀣 𑀬𑁄𑀚𑁂𑀢𑀩𑁆𑀩𑁄, 𑀬𑀁𑀲𑀤𑁆𑀤𑁄 𑀓𑀸𑀭𑀡𑀢𑁆𑀣𑁄𑀢𑀺 𑀆𑀳 ‘‘𑀲𑀁𑀓𑀺𑀮𑀺𑀝𑁆𑀞𑀁 𑀬𑀲𑁆𑀫𑀸 𑀢𑀫𑁆𑀧𑀺 𑀧𑀤’’𑀦𑁆𑀢𑀺. 𑀢𑀫𑁆𑀧𑀺 𑀧𑀤𑀦𑁆𑀢𑀺 𑀢𑀫𑁆𑀧𑀺 𑀯𑀘𑀦𑀁. 𑀧𑀤𑀲𑀤𑁆𑀤𑁄 𑀳𑀺 𑀯𑀘𑀦𑀯𑀸𑀘𑀓𑁄. 𑀢𑀫𑁆𑀧𑀺 𑀯𑀘𑀦𑀁 𑀬𑀲𑁆𑀫𑀸 𑀲𑀁𑀓𑀺𑀮𑀺𑀝𑁆𑀞𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀓𑀣𑀁 𑀲𑀁𑀓𑀺𑀮𑀺𑀝𑁆𑀞𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀬𑀲𑁆𑀫𑀸’’𑀢𑀺 𑀧𑀤𑁂𑀦 𑀬𑀁𑀲𑀤𑁆𑀤𑁄 𑀓𑀸𑀭𑀡𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀦𑀦𑁆𑀢𑀺 𑀧𑀤𑀁. ‘‘𑀏𑀢𑀁 𑀇𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀲𑀁𑀯𑀡𑁆𑀡𑁂𑀢𑀩𑁆𑀩𑀧𑀤𑀁. ‘‘𑀤𑀼𑀩𑁆𑀪𑀸𑀲𑀺𑀢𑀦𑁆𑀢𑀺 𑀏𑀢𑀁 𑀯𑀼𑀘𑁆𑀘𑀢𑀻’’𑀢𑀺 𑀲𑀁𑀯𑀡𑁆𑀡𑀦𑀸𑀧𑀤𑀁. 𑀏𑀢𑀦𑁆𑀢𑀺 𑀏𑀢𑀁 𑀧𑀤𑀁, 𑀏𑀢𑀁 𑀯𑀘𑀦𑀦𑁆𑀢𑀺 𑀅𑀢𑁆𑀣𑁄.

𑀏𑀢𑁆𑀣𑀸𑀢𑀺 𑀲𑁂𑀔𑀺𑀬𑀕𑀸𑀣𑀸𑀬. 𑀇𑀤𑀦𑁆𑀢𑀺 𑀆𑀧𑀢𑁆𑀢𑀻𑀦𑀁 𑀦𑀺𑀩𑁆𑀩𑀘𑀦𑀤𑀻𑀧𑀓𑀁 𑀯𑀘𑀦𑀁, 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀲 𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀗𑁆𑀕𑀳𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣’’𑀦𑁆𑀢𑀺.

𑀢𑀢𑁆𑀣𑀸𑀢𑀺 ‘‘𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀻’’𑀢𑀺𑀆𑀤𑀺𑀯𑀘𑀦𑁂. 𑀕𑁂𑀳𑀦𑁆𑀢𑀺 𑀧𑀓𑀢𑀺𑀕𑁂𑀳𑀁. 𑀇𑀤𑀁 𑀧𑀦 𑀕𑁂𑀳𑀦𑁆𑀢𑀺 𑀬𑁄𑀚𑀦𑀸. 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀫𑀽𑀮𑀸𑀧𑀢𑁆𑀢𑀺𑀜𑁆𑀳𑀻’’𑀢𑀺𑀆𑀤𑀺. ‘‘𑀅𑀯𑀺𑀯𑀝’’𑀦𑁆𑀢𑀺 𑀯𑀢𑁆𑀯𑀸 𑀢𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀼𑀘𑁆𑀙𑀦𑁆𑀦’’𑀦𑁆𑀢𑀺. 𑀯𑀺𑀯𑀝𑀦𑁆𑀢𑀺 𑀅𑀘𑁆𑀙𑀦𑁆𑀦𑀁. 𑀦𑀸𑀢𑀺𑀯𑀲𑁆𑀲𑀦𑀪𑀸𑀯𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀫𑀽𑀮𑀸𑀧𑀢𑁆𑀢𑀺𑀜𑁆𑀳𑀻’’𑀢𑀺𑀆𑀤𑀺. 𑀯𑀺𑀯𑀭𑀦𑁆𑀢𑁄 𑀪𑀺𑀓𑁆𑀔𑀼 𑀦𑀸𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀼𑀤𑁆𑀥𑀦𑁆𑀢𑁂𑀢𑀺 𑀲𑀼𑀤𑁆𑀥𑀓𑁄𑀝𑁆𑀞𑀸𑀲𑁂. ‘‘𑀢𑀲𑁆𑀫𑀸’’𑀢𑀺 𑀘 ‘‘𑀢𑁂𑀦𑀸’’𑀢𑀺 𑀘 𑀬𑁂𑀪𑀼𑀬𑁆𑀬𑁂𑀦 𑀅𑀢𑁆𑀣𑀢𑁄 𑀏𑀓𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑁂𑀦 𑀓𑀸𑀭𑀡𑁂𑀦𑀸’’𑀢𑀺. 𑀏𑀯𑀜𑁆𑀘𑁂𑀢𑀁 𑀯𑀺𑀯𑀝𑀦𑁆𑀢𑀺 𑀏𑀯𑀁 𑀏𑀢𑀁 𑀙𑀦𑁆𑀦𑀁 𑀘𑁂 𑀯𑀺𑀯𑀝𑀦𑁆𑀢𑀺 𑀬𑁄𑀚𑀦𑀸.

𑀧𑀭𑀺𑀧𑀸𑀢𑀺𑀬𑀫𑀸𑀦𑀸𑀦𑀦𑁆𑀢𑀺 𑀅𑀪𑀺𑀪𑀽𑀬𑀫𑀸𑀦𑀸𑀦𑀁. ‘‘𑀭𑀼𑀓𑁆𑀔𑀸𑀤𑀺𑀕𑀳𑀦𑀁 𑀅𑀭𑀜𑁆𑀜’’𑀦𑁆𑀢𑀺 𑀇𑀫𑀺𑀦𑀸 𑀧𑀯𑀦𑀦𑁆𑀢𑀺 𑀧𑀤𑀲𑁆𑀲 𑀅𑀭𑀜𑁆𑀜𑀧𑀭𑀺𑀬𑀸𑀬𑀢𑀁 𑀤𑀲𑁆𑀲𑁂𑀢𑀺. 𑀕𑀢𑀺𑀲𑀤𑁆𑀤𑀲𑁆𑀲 𑀪𑀯𑀪𑁂𑀤𑀸𑀤𑀺𑀅𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀲𑁆𑀲𑀭𑀡𑀢𑁆𑀣𑁂 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀝𑀺𑀲𑁆𑀲𑀭𑀡𑀁 𑀳𑁄𑀢𑀻’’𑀢𑀺. 𑀢𑀦𑁆𑀢𑀺 𑀧𑀯𑀦𑀁. 𑀢𑁂𑀢𑀺 𑀫𑀺𑀕𑀸. ‘‘𑀅𑀲𑁆𑀲𑀲𑀦𑁆𑀢𑀻’’𑀢𑀺 𑀧𑀤𑁂𑀦 ‘‘𑀧𑀲𑁆𑀲𑀲𑀦𑁆𑀢𑀻’’𑀢𑀺 𑀅𑀢𑁆𑀣𑁄𑀧𑀺 𑀕𑀳𑁂𑀢𑀩𑁆𑀩𑁄 𑀅𑀯𑀺𑀦𑀸𑀪𑀸𑀯𑀢𑁄, 𑀆𑀦𑀸𑀧𑀸𑀦𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀆𑀓𑀸𑀲𑁄𑀢𑀺 𑀅𑀚𑀝𑀸𑀓𑀸𑀲𑁄. 𑀧𑀓𑁆𑀔𑀻𑀦𑀦𑁆𑀢𑀺 𑀯𑀺𑀳𑀗𑁆𑀕𑀫𑀸𑀦𑀁. ‘‘𑀲𑀩𑁆𑀩𑁂𑀲𑀁 𑀲𑀗𑁆𑀔𑀢𑀥𑀫𑁆𑀫𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀥𑀫𑁆𑀫𑀸𑀦𑀦𑁆𑀢𑀺 𑀏𑀢𑁆𑀣 𑀲𑀗𑁆𑀔𑀢𑀥𑀫𑁆𑀫𑁄𑀬𑁂𑀯 𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀯𑀺𑀦𑀸𑀲𑁄𑀯𑀸’’𑀢𑀺 𑀇𑀫𑀺𑀦𑀸 𑀯𑀺𑀪𑀯𑀲𑀤𑁆𑀤𑁄 𑀯𑀺𑀦𑀸𑀲𑀯𑀸𑀘𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀲𑀦𑁆𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀲𑀗𑁆𑀔𑀢𑀥𑀫𑁆𑀫𑀸𑀦𑀁. 𑀕𑀢𑀻𑀢𑀺 𑀧𑀢𑀺𑀝𑁆𑀞𑀸. 𑀓𑀲𑁆𑀫𑀸 𑀯𑀺𑀪𑀯𑁄 𑀥𑀫𑁆𑀫𑀸𑀦𑀁 𑀕𑀢𑀺 𑀳𑁄𑀢𑀻𑀢𑀺 𑀆𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀬𑀲𑁆𑀫𑀸. 𑀢𑁂𑀢𑀺 𑀲𑀩𑁆𑀩𑁂𑀧𑀺 𑀲𑀗𑁆𑀔𑀢𑀥𑀫𑁆𑀫𑀸. 𑀯𑀺𑀦𑀸𑀲𑀦𑁆𑀢𑀺 𑀯𑀺𑀪𑀯𑀁. 𑀲𑀼𑀘𑀺𑀭𑀫𑁆𑀧𑀻𑀢𑀺 𑀅𑀲𑀻𑀢𑀺𑀯𑀲𑁆𑀲𑀸𑀤𑀺𑀓𑀸𑀮𑀫𑁆𑀧𑀺. 𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁄 𑀕𑀢𑀻𑀢𑀺 𑀲𑀁𑀯𑀡𑁆𑀡𑁂𑀢𑀩𑁆𑀩𑀧𑀤𑀁. ‘‘𑀔𑀻𑀡𑀸𑀲𑀯𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀅𑀭𑀳𑀢𑁄𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀽’’𑀢𑀺 𑀇𑀫𑀺𑀦𑀸 ‘‘𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀧𑀤𑀲𑁆𑀲 𑀇𑀥 𑀅𑀥𑀺𑀧𑁆𑀧𑁂𑀢𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑁂𑀢𑀺. 𑀕𑀸𑀣𑀸𑀬 𑀢𑁂 𑀢𑁂 𑀅𑀢𑁆𑀣𑀸 𑀲𑀁𑀕𑀳𑁂𑀢𑁆𑀯𑀸 𑀕𑀡𑀺𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑀸𑀣𑀸𑀲𑀗𑁆𑀕𑀡𑀺𑀓𑀁.

𑀇𑀢𑀺 𑀧𑀞𑀫𑀕𑀸𑀣𑀸𑀲𑀗𑁆𑀕𑀡𑀺𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.