𑀉𑀧𑁄𑀲𑀣𑀸𑀤𑀺𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸

𑁩𑁩𑁨. 𑀯𑀺𑀲𑁆𑀲𑀚𑁆𑀚𑀦𑁂 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀓𑀸𑀬𑀲𑀸𑀫𑀕𑁆𑀕𑀻 𑀆𑀤𑀺 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀑𑀲𑀸𑀭𑀡𑀓𑀺𑀭𑀺𑀬𑀸𑀢𑀺 𑀓𑀣𑀦𑀓𑀺𑀭𑀺𑀬𑀸. 𑀙𑀦𑁆𑀤𑀧𑀯𑀸𑀭𑀡𑀁 𑀆𑀳𑀭𑀺𑀢𑁆𑀯𑀸𑀢𑀺 𑀙𑀦𑁆𑀤𑀜𑁆𑀘 𑀧𑀯𑀸𑀭𑀡𑀜𑁆𑀘 𑀆𑀳𑀭𑀺𑀢𑁆𑀯𑀸. 𑀧𑀯𑀸𑀭𑀡𑀸𑀓𑀣𑀸𑀢𑀺 ‘‘𑀲𑀗𑁆𑀖𑀁 𑀪𑀦𑁆𑀢𑁂 𑀧𑀯𑀸𑀭𑁂𑀫𑀻’’𑀢𑀺𑀆𑀤𑀺𑀓𑀸 (𑀫𑀳𑀸𑀯. 𑁨𑁧𑁦) 𑀧𑀯𑀸𑀭𑀡𑀸𑀓𑀣𑀸. 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀤𑀻𑀲𑀼 𑀯𑀢𑁆𑀣𑀼 𑀦𑀸𑀫 𑀓𑀺𑀁? 𑀧𑀼𑀕𑁆𑀕𑀮𑁄 𑀦𑀸𑀫 𑀓𑁄𑀢𑀺 𑀆𑀳 ‘‘𑀯𑀢𑁆𑀣𑀼 𑀦𑀸𑀫𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑁂𑀦 𑀯𑀢𑁆𑀣𑀼𑀦𑀸𑀢𑀺 𑀪𑀡𑁆𑀟𑀦𑀓𑀸𑀭𑀓𑀸𑀤𑀺𑀦𑀸 𑀬𑁂𑀦 𑀯𑀢𑁆𑀣𑀼𑀦𑀸 𑀓𑀭𑀡𑀪𑀽𑀢𑁂𑀦, 𑀳𑁂𑀢𑀼𑀪𑀽𑀢𑁂𑀦 𑀯𑀸. 𑀬𑁂𑀦𑀸𑀢𑀺 𑀧𑀼𑀕𑁆𑀕𑀮𑁂𑀦 𑀓𑀢𑁆𑀢𑀼𑀪𑀽𑀢𑁂𑀦, 𑀓𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀲𑁆𑀲𑀸 𑀢𑀲𑁆𑀲𑀸 𑀓𑀫𑁆𑀫𑀯𑀸𑀘𑀸𑀬𑀸’’𑀢𑀺 𑀧𑀤𑀁 ‘‘𑀅𑀯𑀲𑀸𑀦𑀯𑀘𑀦’’𑀦𑁆𑀢𑀺 𑀧𑀤𑁂 𑀅𑀯𑀬𑀯𑀺𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀯𑀺𑀲𑁆𑀲𑀚𑁆𑀚𑀦𑁂𑀲𑀼.

𑀇𑀢𑀺 𑀉𑀧𑁄𑀲𑀣𑀸𑀤𑀺𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀯𑀡𑁆𑀡𑀦𑀸𑀬 𑀬𑁄𑀚𑀦𑀸

𑀲𑀫𑀢𑁆𑀢𑀸.

𑀅𑀢𑁆𑀣𑀯𑀲𑀧𑀓𑀭𑀡𑀯𑀡𑁆𑀡𑀦𑀸

𑁩𑁩𑁪. 𑀅𑀢𑁆𑀣𑀯𑀲𑀧𑀓𑀭𑀡𑁂𑀢𑀺 𑀅𑀯𑀬𑀯𑀺𑀆𑀥𑀸𑀭𑁄. 𑀤𑀲 𑀅𑀢𑁆𑀣𑀯𑀲𑁂𑀢𑀺𑀆𑀤𑀻𑀲𑀽𑀢𑀺 𑀅𑀯𑀬𑀯𑀸𑀥𑀸𑀭𑁄. 𑀬𑀦𑁆𑀢𑀺 𑀯𑀘𑀦𑀁. 𑀉𑀧𑀭𑀺𑀫𑀁 𑀉𑀧𑀭𑀺𑀫𑀁 𑀧𑀤𑀦𑁆𑀢𑀺 ‘‘𑀲𑀗𑁆𑀖𑀨𑀸𑀲𑀼𑀢𑀸𑀬𑀸’’𑀢𑀺𑀆𑀤𑀺𑀓𑀁 𑀉𑀢𑁆𑀢𑀭𑀼𑀢𑁆𑀢𑀭𑀺 𑀯𑀼𑀢𑁆𑀢𑀁 𑀧𑀤𑀁. 𑀳𑁂𑀝𑁆𑀞𑀺𑀫𑀲𑁆𑀲 𑀳𑁂𑀝𑁆𑀞𑀺𑀫𑀲𑁆𑀲 𑀧𑀤𑀲𑁆𑀲𑀸𑀢𑀺 ‘‘𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬𑀸’’𑀢𑀺𑀆𑀤𑀺𑀓𑀲𑁆𑀲 𑀅𑀥𑁄 𑀅𑀥𑁄 𑀯𑀼𑀢𑁆𑀢𑀲𑁆𑀲 𑀧𑀤𑀲𑁆𑀲.

𑀬𑀤𑁂𑀢𑀁 𑀧𑀤𑀲𑀢𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀤𑀲𑀢𑁂, 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁, 𑀅𑀢𑁆𑀣𑀲𑀢𑀦𑁆𑀢𑀺 𑀅𑀪𑀺𑀥𑁂𑀬𑁆𑀬𑀲𑀢𑀁. 𑀥𑀫𑁆𑀫𑀲𑀢𑀦𑁆𑀢𑀺𑀅𑀪𑀺𑀥𑀸𑀦𑀲𑀢𑀁, 𑀧𑀸𑀴𑀺𑀲𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀅𑀢𑁆𑀣𑀲𑀢𑀁 𑀥𑀫𑁆𑀫𑀲𑀢’’𑀦𑁆𑀢𑀺 𑀧𑀤𑀸𑀦𑀁 𑀅𑀢𑁆𑀣𑀦𑁆𑀢𑀭𑀯𑀺𑀓𑀧𑁆𑀧𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀣 𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑁂 𑀤𑀲 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀧𑀜𑁆𑀜𑀢𑁆𑀢𑀁, 𑀢𑁂𑀲𑀁 𑀤𑀲𑀅𑀢𑁆𑀣𑀯𑀲𑀸𑀦𑀦𑁆𑀢𑀺 𑀬𑁄𑀚𑀦𑀸, 𑀬𑁂 𑀤𑀲 𑀅𑀢𑁆𑀣𑀯𑀲𑁂 𑀧𑀼𑀩𑁆𑀩𑁂 𑀯𑀡𑁆𑀡𑀺𑀢𑀸, 𑀢𑁂𑀲𑀁 𑀤𑀲𑀅𑀢𑁆𑀣𑀯𑀲𑀸𑀦𑀦𑁆𑀢𑀺 𑀬𑁄𑀚𑀦𑀸. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁩𑁯) 𑀯𑀡𑁆𑀡𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 ‘‘𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬𑀸’’𑀢𑀺𑀆𑀤𑀺𑀧𑀸𑀞𑁂. 𑀲𑀼𑀝𑁆𑀞𑀼 𑀤𑁂𑀯𑀸𑀢𑀺 𑀲𑀼𑀝𑁆𑀞𑀼 𑀫𑀳𑀸𑀭𑀸𑀚. 𑀳𑀺 𑀬𑀲𑁆𑀫𑀸 𑀆𑀡𑀸𑀩𑀮𑀪𑁄𑀕𑀩𑀮𑀇𑀲𑁆𑀲𑀭𑀺𑀬𑀩𑀮𑁂𑀳𑀺 𑀤𑀺𑀩𑁆𑀩𑀢𑀺, 𑀢𑀲𑁆𑀫𑀸 𑀤𑁂𑀯𑁄𑀢𑀺 𑀯𑀼𑀘𑁆𑀘𑀢𑀺. 𑀬𑁄 𑀘𑀸𑀢𑀺 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸, 𑀲𑀫𑁆𑀧𑀝𑀺𑀘𑁆𑀙𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀺, 𑀢𑀲𑁆𑀫𑀸. 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀧𑀜𑁆𑀜𑀧𑁂𑀲𑁆𑀲𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀪𑀺𑀪𑀯𑀺𑀢𑁆𑀯𑀸 𑀦 𑀧𑀜𑁆𑀜𑀧𑁂𑀲𑁆𑀲𑀸𑀫𑀻𑀢𑀺 𑀬𑁄𑀚𑀦𑀸. 𑀇𑀥𑀸𑀢𑀺 𑀅𑀢𑁆𑀣𑀯𑀲𑀧𑀓𑀭𑀡𑁂. 𑀢𑀤𑀢𑁆𑀣𑀚𑁄𑀢𑀓𑀸𑀦𑀦𑁆𑀢𑀺 𑀲𑁄𑀬𑁂𑀯 𑀅𑀢𑁆𑀣𑁄 𑀢𑀤𑀢𑁆𑀣𑁄, 𑀢𑀲𑁆𑀲 𑀚𑁄𑀢𑀓𑀸 𑀢𑀤𑀢𑁆𑀣𑀚𑁄𑀢𑀓𑀸, 𑀢𑁂𑀲𑀁. 𑀇𑀤𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀢𑁆𑀣𑀁 𑀚𑁄𑀢𑁂𑀦𑁆𑀢𑀻𑀢𑀺 𑀅𑀢𑁆𑀣𑀚𑁄𑀢𑀓𑀸, 𑀲𑀤𑁆𑀤𑀸. 𑀦𑀻𑀳𑀭𑀺𑀢𑁆𑀯𑀸, 𑀦𑀺𑀬𑀫𑁂𑀢𑁆𑀯𑀸 𑀯𑀸 𑀅𑀢𑁆𑀣𑁄 𑀯𑀼𑀘𑁆𑀘𑀢𑁂 𑀇𑀫𑀸𑀳𑀺 𑀲𑀤𑁆𑀤𑀧𑀜𑁆𑀜𑀢𑁆𑀢𑀻𑀳𑀻𑀢𑀺 𑀦𑀺𑀭𑀼𑀢𑁆𑀢𑀺𑀬𑁄.

𑀅𑀢𑁆𑀣𑀲𑀢𑀦𑁆𑀢𑀺 𑀕𑀸𑀣𑀸𑀬𑀁 𑀅𑀢𑁆𑀣𑀯𑀲𑁂 𑀧𑀓𑀭𑀡𑁂 𑀅𑀢𑁆𑀣𑀲𑀢𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺𑀆𑀤𑀺𑀦𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀇𑀢𑀺 𑀳𑀻𑀢𑀺 𑀇𑀢𑀺 𑀏𑀯. 𑀳𑀺𑀲𑀤𑁆𑀤𑁄 𑀳𑀺 𑀏𑀯𑀲𑀤𑁆𑀤𑀢𑁆𑀣𑁄. 𑀇𑀤𑀦𑁆𑀢𑀺 ‘‘𑀅𑀢𑁆𑀣𑀲𑀢’’𑀦𑁆𑀢𑀺𑀆𑀤𑀺𑀯𑀘𑀦𑀁, 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀅𑀢𑁆𑀣𑀁 𑀧𑀝𑀺𑀘𑁆𑀘𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸𑀬

𑀬𑁄𑀚𑀦𑀸 𑀲𑀫𑀢𑁆𑀢𑀸.