𑀏𑀓𑀼𑀢𑁆𑀢𑀭𑀺𑀓𑀦𑀬𑁄

𑀏𑀓𑀼𑀢𑁆𑀢𑀭𑀺𑀓𑀦𑀬𑁄 𑀏𑀓𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁧. 𑀏𑀯𑀁 𑀔𑀦𑁆𑀥𑀓𑀧𑀼𑀘𑁆𑀙𑀸𑀬 𑀯𑀡𑁆𑀡𑀦𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀏𑀓𑀼𑀢𑁆𑀢𑀭𑀺𑀓𑀦𑀬𑀲𑁆𑀲 𑀢𑀁 𑀓𑀭𑁄𑀦𑁆𑀢𑁄 𑀆𑀳 ‘‘𑀆𑀧𑀢𑁆𑀢𑀺…𑀧𑁂… 𑀦𑀬𑁂’’𑀢𑀺. 𑀢𑀢𑁆𑀣 𑀏𑀓𑀼𑀢𑁆𑀢𑀭𑀺𑀓𑀦𑀬𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. ‘‘𑀙 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀻’’𑀢𑀺 𑀇𑀫𑀺𑀦𑀸 𑀲𑀫𑀼𑀝𑁆𑀞𑀸𑀦𑀸𑀦𑀺 𑀆𑀧𑀢𑁆𑀢𑀺𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁂𑀦 𑀆𑀧𑀢𑁆𑀢𑀺𑀓𑀭𑀸 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁂𑀲𑀦𑁆𑀢𑀺 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁. 𑀳𑀻𑀢𑀺 𑀬𑀲𑁆𑀫𑀸, 𑀆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀺𑀓𑁆𑀔𑀸𑀧𑀤𑁂 𑀘𑀸𑀢𑀺 𑀫𑀸𑀢𑀺𑀓𑀸𑀲𑀺𑀓𑁆𑀔𑀸𑀧𑀤𑁂 𑀘. 𑀮𑀳𑀼𑀓𑀸 𑀆𑀧𑀢𑁆𑀢𑀻𑀢𑀺 𑀏𑀢𑁆𑀣 𑀅𑀧𑁆𑀧𑀲𑀸𑀯𑀚𑁆𑀚𑀢𑁆𑀢𑀸 𑀦 𑀮𑀳𑀼𑀓𑀸 𑀦𑀸𑀫 𑀳𑁄𑀢𑀺, 𑀮𑀳𑀼𑀓𑁂𑀦 𑀧𑀦 𑀯𑀺𑀦𑀬𑀓𑀫𑁆𑀫𑁂𑀦𑀸𑀢𑀺 𑀆𑀳 ‘‘𑀮𑀳𑀼𑀓𑁂𑀦 𑀯𑀺𑀦𑀬𑀓𑀫𑁆𑀫𑁂𑀦 𑀯𑀺𑀲𑀼𑀚𑁆𑀛𑀦𑀢𑁄’’𑀢𑀺. 𑀧𑀜𑁆𑀘𑀯𑀺𑀥𑀸𑀢𑀺 𑀣𑀼𑀮𑁆𑀮𑀘𑁆𑀘𑀬𑀸𑀤𑀺𑀯𑀲𑁂𑀦 𑀧𑀜𑁆𑀘𑀧𑀓𑀸𑀭𑀸. 𑀓𑁂𑀦𑀘𑀻𑀢𑀺 𑀮𑀳𑀼𑀓𑁂𑀦 𑀯𑀸 𑀕𑀭𑀼𑀓𑁂𑀦 𑀯𑀸 𑀓𑁂𑀦𑀘𑀺 𑀆𑀓𑀸𑀭𑁂𑀦. 𑀲𑀁𑀯𑀺𑀚𑁆𑀚𑀢𑀺 𑀕𑀺𑀳𑀺𑀪𑀸𑀯𑀢𑁄 𑀅𑀯𑀲𑁂𑀲𑁄 𑀲𑀫𑀡𑀪𑀸𑀯𑁄 𑀏𑀢𑀺𑀲𑁆𑀲𑀸𑀢𑀺 𑀲𑀸𑀯𑀲𑁂𑀲𑀸, 𑀧𑀝𑀺𑀧𑀓𑁆𑀔𑀯𑀲𑁂𑀦 𑀅𑀦𑀯𑀲𑁂𑀲𑀸. 𑀤𑁆𑀯𑁂 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀢𑀺 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀯𑀲𑁂𑀦 𑀤𑁆𑀯𑁂 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸.

‘‘𑀓𑀭𑁄𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀅𑀦𑁆𑀢𑀭𑀸𑀬𑀺𑀓𑀸𑀢𑀺 𑀏𑀢𑁆𑀣 𑀡𑀺𑀓𑀧𑀘𑁆𑀘𑀬𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀦𑁆𑀢𑀭𑀸𑀬𑀺𑀓𑀸 𑀆𑀧𑀢𑁆𑀢𑀺𑀬𑁄 𑀲𑀩𑁆𑀩𑀣𑀸 𑀅𑀦𑁆𑀢𑀭𑀸𑀬𑀺𑀓𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀅𑀦𑁆𑀢𑀭𑀸𑀬𑀺𑀓𑀁 𑀆𑀧𑀦𑁆𑀦𑀲𑁆𑀲𑀸𑀧𑀻’’𑀢𑀺𑀆𑀤𑀺. 𑀤𑁂𑀲𑁂𑀢𑁆𑀯𑀸 𑀲𑀼𑀤𑁆𑀥𑀺𑀧𑀢𑁆𑀢𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀮𑁄𑀓𑀯𑀚𑁆𑀚𑀸𑀢𑀺 𑀮𑁄𑀓𑁂𑀳𑀺 𑀯𑀚𑁆𑀚𑁂𑀢𑀩𑁆𑀩𑀸. 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸𑀢𑀺 𑀪𑀕𑀯𑀢𑁄 𑀧𑀡𑁆𑀡𑀢𑁆𑀢𑀺𑀬𑀸 𑀯𑀚𑁆𑀚𑁂𑀢𑀩𑁆𑀩𑀸. 𑀬𑀦𑁆𑀢𑀺 𑀬𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀭𑁄𑀦𑁆𑀢𑁄𑀢𑀺 𑀓𑀺𑀭𑀺𑀬𑀫𑀸𑀦𑀢𑁄. 𑀏𑀢𑁆𑀣 𑀳𑀺 𑀫𑀸𑀦𑀲𑀤𑁆𑀤𑀲𑁆𑀲 𑀅𑀦𑁆𑀢𑀸𑀤𑁂𑀲𑁄. 𑀇𑀫𑀺𑀦𑀸 𑀓𑀭𑀡𑀁 𑀓𑀺𑀭𑀺𑀬𑀦𑁆𑀢𑀺 𑀪𑀸𑀯𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀆𑀧𑀚𑁆𑀚𑀢𑀻𑀢𑀺 𑀧𑀼𑀕𑁆𑀕𑀮𑁄 𑀆𑀧𑀚𑁆𑀚𑀢𑀺. 𑀲𑀸 𑀆𑀧𑀢𑁆𑀢𑀺 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀺𑀢𑀸 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀓𑀸 𑀆𑀧𑀢𑁆𑀢𑀺 𑀯𑀺𑀬𑀸𑀢𑀺 𑀆𑀳 ‘‘𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀯𑀺𑀬𑀸’’𑀢𑀺. 𑀏𑀲𑁂𑀯 𑀦𑀬𑁄 𑀅𑀦𑀦𑁆𑀢𑀭𑀯𑀸𑀓𑁆𑀬𑁂𑀲𑀼𑀧𑀺.

𑀧𑀼𑀩𑁆𑀩𑀸𑀧𑀢𑁆𑀢𑀻𑀢𑀺 𑀏𑀢𑁆𑀣 𑀧𑀼𑀩𑁆𑀩𑀲𑀤𑁆𑀤𑁄 𑀧𑀞𑀫𑀢𑁆𑀣𑁄𑀢𑀺 𑀆𑀳 ‘‘𑀧𑀞𑀫𑀁 𑀆𑀧𑀦𑁆𑀦𑀸𑀧𑀢𑁆𑀢𑀻’’𑀢𑀺. ‘‘𑀆𑀧𑀦𑁆𑀦𑀸’’𑀢𑀺 𑀧𑀤𑁂𑀦 𑀫𑀚𑁆𑀛𑁂𑀮𑁄𑀧𑀁 𑀤𑀲𑁆𑀲𑁂𑀢𑀺. 𑀧𑀘𑁆𑀙𑀸 𑀆𑀧𑀦𑁆𑀦𑀸𑀧𑀢𑁆𑀢𑀻𑀢𑀺 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀸𑀧𑀢𑁆𑀢𑀺. 𑀫𑀽𑀮𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀫𑀽𑀮𑁂 𑀓𑀸𑀬𑀘𑀺 𑀆𑀧𑀢𑁆𑀢𑀺𑀬𑀸 𑀅𑀫𑀺𑀲𑁆𑀲𑀢𑁆𑀢𑀸 𑀯𑀺𑀲𑀼𑀤𑁆𑀥𑀺𑀬𑀸 𑀆𑀧𑀢𑁆𑀢𑀺𑀬𑀸. 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀫𑁆𑀧𑀻𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀯𑀘𑀦𑀫𑁆𑀧𑀺. 𑀧𑀺𑀲𑀤𑁆𑀤𑁂𑀦 𑀧𑀼𑀭𑀺𑀫𑀁 𑀫𑀳𑀸𑀅𑀝𑁆𑀞𑀓𑀣𑀸𑀯𑀘𑀦𑀁 𑀅𑀧𑁂𑀓𑁆𑀔𑀢𑀺. 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦𑀸𑀢𑀺 𑀏𑀓𑁂𑀦 𑀓𑀸𑀭𑀡𑁂𑀦.

𑀬𑀸𑀢𑀺 𑀆𑀧𑀢𑁆𑀢𑀺, 𑀤𑁂𑀲𑀺𑀢𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀁 𑀤𑁂𑀲𑀺𑀢𑀸 𑀕𑀡𑀦𑀽𑀧𑀺𑀓𑀸 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀬𑀸 𑀤𑁂𑀲𑀺𑀢𑀸 𑀳𑁄𑀢𑀺, 𑀅𑀬𑀁 𑀅𑀕𑀡𑀦𑀽𑀧𑀺𑀓𑀸 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀲𑀉𑀲𑁆𑀲𑀸𑀳𑁂𑀦𑁂𑀯𑀸𑀢𑀺 𑀧𑀼𑀦𑀧𑀺 𑀆𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀲𑀳 𑀉𑀲𑁆𑀲𑀸𑀳𑁂𑀦𑁂𑀯. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. ‘‘𑀕𑀡𑀦𑀁 𑀦 𑀉𑀧𑁂𑀢𑀻’’𑀢𑀺 𑀇𑀫𑀺𑀦𑀸 𑀕𑀡𑀦𑀁 𑀦 𑀉𑀧𑀕𑀘𑁆𑀙𑀢𑀻𑀢𑀺 𑀅𑀕𑀡𑀦𑀽𑀧𑀺𑀓𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀝𑁆𑀞𑀫𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀽𑀭𑀡𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀁 𑀧𑀸𑀴𑀺𑀬𑀁 𑀅𑀝𑁆𑀞𑀯𑀢𑁆𑀣𑀼𑀓𑀧𑀽𑀭𑀡𑀯𑀲𑁂𑀦 𑀪𑀺𑀓𑁆𑀔𑀼𑀦𑀻𑀦𑀁 𑀆𑀕𑀢𑀢𑁆𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀽𑀦𑀫𑁆𑀧𑀺 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀝𑁆𑀞𑀸𑀦𑁂 𑀮𑀩𑁆𑀪𑀢𑀺𑀬𑁂𑀯.

𑀣𑀼𑀮𑁆𑀮𑀯𑀚𑁆𑀚𑀸𑀢𑀺 𑀏𑀢𑁆𑀣 𑀣𑀼𑀮𑁆𑀮𑀁 𑀯𑀚𑁆𑀚𑀁 𑀏𑀢𑀺𑀲𑁆𑀲𑀸𑀢𑀺 𑀣𑀼𑀮𑁆𑀮𑀯𑀚𑁆𑀚𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀣𑀼𑀮𑁆𑀮𑀤𑁄𑀲𑁂 𑀧𑀜𑁆𑀜𑀢𑁆𑀢𑀸’’𑀢𑀺. 𑀬𑀸 𑀘 𑀥𑀫𑁆𑀫𑀺𑀓𑀲𑁆𑀲 𑀧𑀝𑀺𑀲𑁆𑀲𑀯𑀲𑁆𑀲 𑀅𑀲𑀘𑁆𑀘𑀸𑀧𑀦𑁂 𑀆𑀧𑀢𑁆𑀢𑀺 𑀅𑀢𑁆𑀣𑀺, 𑀲𑀸 𑀘 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀧𑀢𑁆𑀢𑀻𑀢𑀺 𑀧𑀜𑁆𑀘𑀳𑀺 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑁂𑀳𑀺 𑀆𑀧𑀦𑁆𑀦𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺. 𑀲𑀼𑀤𑀺𑀦𑁆𑀦𑀢𑁆𑀣𑁂𑀭𑀸𑀤𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀥𑀦𑀺𑀬𑀢𑁆𑀣𑁂𑀭𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀆𑀤𑀺𑀓𑀫𑁆𑀫𑀺𑀓𑁄𑀢𑀺 𑀆𑀤𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄, 𑀢𑀲𑁆𑀫𑀺𑀁 𑀦𑀺𑀬𑀼𑀢𑁆𑀢𑁄 𑀯𑀸. 𑀫𑀓𑁆𑀓𑀝𑀺𑀲𑀫𑀡𑀸𑀤𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀬𑁄 𑀓𑀤𑀸𑀘𑀺 𑀓𑀭𑀳𑀘𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀲𑁄 𑀅𑀥𑀺𑀘𑁆𑀘𑀸𑀧𑀢𑁆𑀢𑀺𑀓𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀧𑀭𑀢𑁄𑀧𑀺 𑀏𑀲𑁂𑀯 𑀦𑀬𑁄.

‘‘𑀘𑁄𑀤𑁂𑀢𑀻’’𑀢𑀺 𑀇𑀫𑀺𑀦𑀸 𑀘𑁄𑀤𑁂𑀢𑀻𑀢𑀺 𑀘𑁄𑀤𑀓𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀘𑁄𑀤𑀺𑀢𑁄’’𑀢𑀺 𑀇𑀫𑀺𑀦𑀸 𑀘𑁄𑀤𑀺𑀢𑀩𑁆𑀩𑁄𑀢𑀺 𑀘𑀼𑀤𑀺𑀢𑁄, 𑀲𑁄𑀬𑁂𑀯 𑀘𑀼𑀤𑀺𑀢𑀓𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀜𑁆𑀘𑀤𑀲𑀲𑀽𑀢𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑁂𑀲𑀼 𑀧𑀜𑁆𑀘𑀤𑀲𑀥𑀫𑁆𑀫𑁂𑀲𑀼. 𑀢𑁂𑀦𑀸𑀢𑀺 𑀅𑀥𑀫𑁆𑀫𑀘𑁄𑀤𑀓𑁂𑀦, 𑀘𑁄𑀤𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁪𑁦𑁧) 𑀯𑀼𑀢𑁆𑀢𑁂 𑀲𑀘𑁆𑀘𑁂 𑀘 𑀅𑀓𑀼𑀧𑁆𑀧𑁂 𑀘 𑀅𑀢𑀺𑀝𑁆𑀞𑀦𑁆𑀢𑁄𑀧𑀺 𑀅𑀥𑀫𑁆𑀫𑀘𑀼𑀤𑀺𑀢𑀓𑁄𑀬𑁂𑀯 𑀦𑀸𑀫, 𑀲𑁄 𑀧𑀦 𑀥𑀫𑁆𑀫𑀘𑁄𑀤𑀓𑁂𑀦 𑀘𑁄𑀤𑀺𑀢𑁂𑀬𑁂𑀯 𑀓𑀼𑀧𑁆𑀧𑀦𑁆𑀢𑁄 𑀅𑀥𑀫𑁆𑀫𑀘𑀼𑀤𑀺𑀢𑀓𑁄 𑀦𑀸𑀫, 𑀅𑀥𑀫𑁆𑀫𑀘𑁄𑀤𑀓𑁂𑀦 𑀘𑁄𑀤𑀺𑀢𑁂 𑀧𑀦 𑀓𑀼𑀧𑁆𑀧𑀦𑁆𑀢𑁄𑀧𑀺 𑀅𑀥𑀫𑁆𑀫𑀘𑀼𑀤𑀺𑀢𑀓𑁄 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀫𑀸 𑀇𑀥 𑀦 𑀯𑀼𑀢𑁆𑀢𑁄. ‘‘𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀇𑀫𑀺𑀦𑀸 𑀦𑀺𑀬𑀢𑀸 𑀏𑀢𑀲𑁆𑀲 𑀲𑀦𑁆𑀢𑀻𑀢𑀺 𑀦𑀺𑀬𑀢𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀆𑀧𑀚𑁆𑀚𑀺𑀢𑀼𑀁 𑀪𑀩𑁆𑀩𑀸𑀢𑀺 𑀪𑀩𑁆𑀩𑀸𑀧𑀢𑁆𑀢𑀺𑀓𑀸. 𑀓𑁂𑀦𑀘𑀺 𑀓𑀫𑁆𑀫𑁂𑀦 𑀅𑀓𑀢𑁄𑀧𑀺 𑀅𑀦𑀼𑀓𑁆𑀔𑀺𑀢𑁆𑀢𑀓𑁄𑀬𑁂𑀯 𑀦𑀸𑀫, 𑀲𑁄 𑀧𑀦 𑀉𑀓𑁆𑀔𑀺𑀢𑁆𑀢𑀓𑁄𑀢𑀺 𑀲𑀗𑁆𑀓𑀸𑀪𑀸𑀯𑀢𑁄 𑀇𑀥 𑀦 𑀯𑀼𑀢𑁆𑀢𑁄. 𑀅𑀬𑀦𑁆𑀢𑀺 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀓𑀢𑁄 𑀪𑀺𑀓𑁆𑀔𑀼. 𑀳𑀻𑀢𑀺 𑀬𑀲𑁆𑀫𑀸, 𑀦 𑀓𑁄𑀧𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀮𑀺𑀗𑁆𑀕𑀤𑀡𑁆𑀟𑀓𑀫𑁆𑀫𑀲𑀁𑀯𑀸𑀲𑀦𑀸𑀲𑀦𑀸𑀳𑀻𑀢𑀺 𑀮𑀺𑀗𑁆𑀕𑀦𑀸𑀲𑀦𑁂𑀦 𑀘 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑁂𑀦 𑀘 𑀲𑀁𑀯𑀸𑀲𑀦𑀸𑀲𑀦𑁂𑀦 𑀘. 𑀬𑁂𑀦𑀸𑀢𑀺 𑀪𑀺𑀓𑁆𑀔𑀼𑀦𑀸. 𑀲𑁄𑀢𑀺 𑀦𑀸𑀦𑀸𑀲𑀁𑀯𑀸𑀲𑀓𑁄. 𑀤𑁆𑀯𑀺𑀦𑁆𑀦𑀁 𑀦𑀸𑀦𑀸𑀲𑀁𑀯𑀸𑀲𑀓𑀸𑀦𑀁 𑀯𑀺𑀲𑁂𑀲𑁄 𑀳𑁂𑀝𑁆𑀞𑀸 (𑀧𑀸𑀘𑀺. 𑀅𑀝𑁆𑀞. 𑁪𑁨𑁮) 𑀯𑀼𑀢𑁆𑀢𑁄𑀬𑁂𑀯. 𑀞𑀧𑀦𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀓𑀺𑀁 𑀞𑀧𑀦𑀁 𑀦𑀸𑀫𑀸𑀢𑀺 𑀆𑀳 ‘‘𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦’’𑀦𑁆𑀢𑀺.

𑀇𑀢𑀺 𑀏𑀓𑀓𑀯𑀸𑀭𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀏𑀓𑀼𑀢𑁆𑀢𑀭𑀺𑀓𑀦𑀬𑁄 𑀤𑀼𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁨. 𑀤𑀼𑀓𑁂𑀲𑀼 𑀅𑀘𑀺𑀢𑁆𑀢𑀓𑀸 𑀆𑀧𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀽𑀢𑀸𑀭𑁄𑀘𑀦𑀸𑀧𑀢𑁆𑀢𑀻𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺. 𑀅𑀪𑀽𑀢𑀸𑀭𑁄𑀘𑀦𑀸𑀧𑀢𑁆𑀢𑀻𑀢𑀺 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺. 𑀧𑀤𑀲𑁄𑀥𑀫𑁆𑀫𑀸𑀤𑀺𑀓𑀸𑀢𑀺𑀆𑀤𑀺𑀲𑀤𑁆𑀤𑁂𑀦 𑀉𑀢𑁆𑀢𑀭𑀺𑀙𑀧𑀜𑁆𑀘𑀯𑀸𑀘𑀸 𑀲𑀗𑁆𑀕𑀳𑀺𑀢𑀸. 𑀫𑀜𑁆𑀘𑀧𑀻𑀞𑀸𑀤𑀻𑀦𑀦𑁆𑀢𑀺𑀆𑀤𑀺𑀲𑀤𑁆𑀤𑁂𑀦 𑀪𑀺𑀲𑀺𑀆𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑀸𑀧𑀼𑀘𑁆𑀙𑀸𑀕𑀫𑀦𑀸𑀤𑀻𑀲𑀽𑀢𑀺 𑀆𑀤𑀺𑀲𑀤𑁆𑀤𑁂𑀦 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀕𑀫𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀧𑀼𑀕𑁆𑀕𑀮𑁄𑀢𑀺 𑀲𑁄 𑀅𑀢𑁆𑀢𑀲𑀗𑁆𑀔𑀸𑀢𑁄 𑀧𑀼𑀕𑁆𑀕𑀮𑁄 𑀲𑀧𑀼𑀕𑁆𑀕𑀮𑁄. 𑀧𑀭𑀧𑀼𑀕𑁆𑀕𑀮𑁄𑀢𑀺 𑀧𑀭𑁄 𑀧𑀼𑀕𑁆𑀕𑀮𑁄 𑀧𑀭𑀧𑀼𑀕𑁆𑀕𑀮𑁄. 𑀕𑀭𑀼𑀓𑀦𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀁. 𑀮𑀳𑀼𑀓𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀁. 𑀧𑀼𑀦 𑀕𑀭𑀼𑀓𑀦𑁆𑀢𑀺 𑀧𑀸𑀭𑀸𑀚𑀺𑀓𑀁. 𑀧𑀼𑀦 𑀮𑀳𑀼𑀓𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀫𑁂𑀯.

𑀅𑀗𑁆𑀕𑀼𑀮𑀺𑀫𑀢𑁆𑀢𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁂𑀦 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀻𑀢𑀺 𑀅𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀢𑀦𑁆𑀢𑀺 𑀫𑀜𑁆𑀘𑀧𑀻𑀞𑀁. 𑀕𑀫𑀺𑀬𑁄 𑀆𑀧𑀚𑁆𑀚𑀢𑀺 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄.

‘‘𑀆𑀤𑀺𑀬𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀣𑀸𑀧𑀢𑁆𑀢𑀺 𑀆𑀤𑀺𑀬𑀦𑁆𑀢𑁄 𑀆𑀧𑀚𑁆𑀚𑀢𑀻𑀢𑀺 𑀧𑀸𑀴𑀺𑀬𑀁 𑀆𑀤𑀺𑀬𑀦𑁆𑀢𑁄 𑀳𑀼𑀢𑁆𑀯𑀸 𑀆𑀧𑀚𑁆𑀚𑀢𑀺 𑀆𑀧𑀢𑁆𑀢𑀺 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸𑀦𑀬𑀁 𑀤𑀲𑁆𑀲𑁂𑀢𑀺. 𑀏𑀯𑀜𑁆𑀳𑀺 𑀲𑀢𑀺 ‘‘𑀆𑀧𑀚𑁆𑀚𑀢𑀻’’𑀢𑀺 𑀆𑀔𑁆𑀬𑀸𑀢𑀧𑀤𑀁 ‘‘𑀅𑀢𑁆𑀣𑀻’’𑀢𑀺 𑀓𑀺𑀭𑀺𑀬𑀦𑁆𑀢𑀭𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀓𑀢𑁆𑀢𑀸 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀆𑀤𑀺𑀬𑀦𑁆𑀢𑁄 𑀧𑀼𑀕𑁆𑀕𑀮𑁄 𑀬𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀲𑀸 𑀆𑀧𑀢𑁆𑀢𑀺 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀏𑀲𑁂𑀯 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺. 𑀫𑀽𑀕𑀩𑁆𑀩𑀢𑀸𑀤𑀻𑀦𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀕𑁄𑀯𑀢𑀓𑀼𑀓𑁆𑀓𑀼𑀭𑀯𑀢𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀸𑀭𑀺𑀯𑀸𑀲𑀺𑀓𑀸𑀤𑀬𑁄 𑀆𑀧𑀚𑁆𑀚𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀓𑀢𑀸 𑀯𑀸 𑀧𑀼𑀕𑁆𑀕𑀮𑀸𑀢𑀺 𑀬𑁄𑀚𑀦𑀸. 𑀅𑀲𑀫𑀸𑀤𑀺𑀬𑀦𑁆𑀢𑀸 𑀆𑀧𑀚𑁆𑀚𑀦𑁆𑀢𑀻𑀢𑀺 𑀅𑀲𑀫𑀸𑀤𑀺𑀬𑀦𑁆𑀢𑀸 𑀳𑀼𑀢𑁆𑀯𑀸 𑀆𑀧𑀚𑁆𑀚𑀦𑁆𑀢𑀺. 𑀢𑁂𑀢𑀺 𑀧𑀼𑀕𑁆𑀕𑀮𑁂. 𑀓𑀭𑁄𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫𑀸𑀢𑀺 𑀓𑀭𑁄𑀦𑁆𑀢𑁄 𑀳𑀼𑀢𑁆𑀯𑀸 𑀆𑀧𑀚𑁆𑀚𑀢𑀺 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀏𑀯𑀁 𑀤𑁂𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫𑀸𑀢𑀺𑀆𑀤𑀻𑀲𑀼𑀧𑀺.

𑀏𑀓𑀭𑀢𑁆𑀢𑀙𑀸𑀭𑀢𑁆𑀢𑀲𑀢𑁆𑀢𑀸𑀳𑀤𑀲𑀸𑀳𑀫𑀸𑀲𑀸𑀢𑀺𑀓𑁆𑀓𑀫𑁂𑀲𑀽𑀢𑀺 ‘‘𑀏𑀓𑀭𑀢𑁆𑀢𑀫𑁆𑀧𑀺 𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁪𑁭𑁫-𑁪𑁭𑁬) 𑀘 ‘‘𑀙𑀸𑀭𑀢𑁆𑀢𑀧𑀭𑀫𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑁂𑀦 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁬𑁫𑁩) 𑀘 ‘‘𑀲𑀢𑁆𑀢𑀸𑀳𑀧𑀭𑀫𑀁 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁬𑁨𑁨-𑁬𑁨𑁩) 𑀘 ‘‘𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁪𑁬𑁨-𑁪𑁬𑁩) 𑀘 ‘‘𑀫𑀸𑀲𑀧𑀭𑀫𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁪𑁯𑁯-𑁫𑁦𑁦) 𑀘 𑀯𑀼𑀢𑁆𑀢𑀓𑀸𑀮𑀸𑀢𑀺𑀓𑁆𑀓𑀫𑁂𑀲𑀼.

𑀇𑀫𑀁 𑀧𑀦 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀬𑀲𑁆𑀫𑀺𑀁 𑀧𑀓𑁆𑀔𑁂 𑀦𑀺𑀲𑀺𑀦𑁆𑀦𑁄𑀢𑀺 𑀬𑀲𑁆𑀫𑀺𑀁 𑀧𑀓𑁆𑀔𑁂 𑀲𑀬𑀁 𑀦𑀺𑀲𑀺𑀦𑁆𑀦𑁄. 𑀢𑁂𑀲𑀦𑁆𑀢𑀺 𑀅𑀢𑁆𑀢𑀦𑁄 𑀧𑀓𑁆𑀔𑁂 𑀦𑀺𑀲𑀺𑀦𑁆𑀦𑀸𑀦𑀁, 𑀦𑀸𑀦𑀸𑀲𑀁𑀯𑀸𑀲𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂𑀲𑀦𑁆𑀢𑀺 𑀲𑀓𑀧𑀓𑁆𑀔𑁂 𑀦𑀺𑀲𑀺𑀦𑁆𑀦𑀸𑀦𑀁. 𑀓𑀫𑁆𑀫𑀁 𑀓𑁄𑀧𑁂𑀢𑀻𑀢𑀺 𑀦𑀸𑀦𑀸𑀲𑀁𑀯𑀸𑀲𑀓𑀢𑁆𑀢𑀸 𑀓𑀫𑁆𑀫𑀁 𑀓𑁄𑀧𑁂𑀢𑀺. 𑀇𑀢𑀭𑁂𑀲𑀦𑁆𑀢𑀺 𑀧𑀭𑀧𑀓𑁆𑀔𑁂 𑀦𑀺𑀲𑀺𑀦𑁆𑀦𑀸𑀦𑀁. 𑀳𑀢𑁆𑀣𑀧𑀸𑀲𑀁 𑀅𑀦𑀸𑀕𑀢𑀢𑁆𑀢𑀸 𑀓𑀫𑁆𑀫𑀁 𑀓𑁄𑀧𑁂𑀢𑀻𑀢𑀺 𑀬𑁄𑀚𑀦𑀸. ‘‘𑀏𑀲𑁂𑀯 𑀦𑀬𑁄’’𑀢𑀺 𑀯𑀼𑀢𑁆𑀢𑀯𑀘𑀦𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀬𑁂𑀲𑀁 𑀳𑀻’’𑀢𑀺𑀆𑀤𑀺. 𑀬𑁂𑀲𑀦𑁆𑀢𑀺 𑀲𑀓𑀧𑀓𑁆𑀔𑁂 𑀯𑀸 𑀧𑀭𑀧𑀓𑁆𑀔𑁂 𑀯𑀸 𑀦𑀺𑀲𑀺𑀦𑁆𑀦𑀸𑀦𑀁 𑀬𑁂𑀲𑀁 𑀪𑀺𑀓𑁆𑀔𑀽𑀦𑀁. 𑀲𑁄𑀢𑀺 𑀪𑀺𑀓𑁆𑀔𑀼. 𑀆𑀧𑀚𑁆𑀚𑀺𑀢𑀩𑁆𑀩𑀢𑁄𑀢𑀺 𑀆𑀧𑀚𑁆𑀚𑀺𑀢𑀩𑁆𑀩𑀪𑀸𑀯𑀢𑁄. 𑀇𑀫𑀺𑀦𑀸 𑀧𑀼𑀕𑁆𑀕𑀮𑁂𑀦 𑀙𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀆𑀧𑀚𑁆𑀚𑀺𑀢𑀩𑁆𑀩𑀸𑀢𑀺 𑀆𑀧𑀢𑁆𑀢𑀺𑀬𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀓𑀫𑁆𑀫𑁂𑀦 𑀯𑀸 𑀲𑀮𑀸𑀓𑀕𑁆𑀕𑀸𑀳𑁂𑀦 𑀯𑀸𑀢𑀺 𑀏𑀢𑁆𑀣 𑀉𑀤𑁆𑀤𑁂𑀲𑁄 𑀓𑀫𑁆𑀫𑁂 𑀮𑀓𑁆𑀔𑀡𑀳𑀸𑀭𑀦𑀬𑁂𑀦 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀯𑁄𑀳𑀸𑀭𑀸𑀦𑀼𑀲𑁆𑀲𑀸𑀯𑀦𑀸 𑀲𑀮𑀸𑀓𑀕𑁆𑀕𑀸𑀳𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀤𑁆𑀤𑁂𑀲𑁄 𑀘𑁂𑀯…𑀧𑁂… 𑀏𑀓’’𑀦𑁆𑀢𑀺. 𑀧𑀼𑀩𑁆𑀩𑀪𑀸𑀕𑀸𑀢𑀺 𑀲𑀗𑁆𑀖𑀪𑁂𑀤𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑀸. 𑀧𑀫𑀸𑀡𑀦𑁆𑀢𑀺 𑀲𑀗𑁆𑀖𑀪𑁂𑀤𑀲𑁆𑀲 𑀓𑀸𑀭𑀡𑀁.

𑀅𑀤𑁆𑀥𑀸𑀦𑀳𑀻𑀦𑁄 𑀦𑀸𑀫𑀸𑀢𑀺 𑀏𑀢𑁆𑀣 𑀅𑀤𑁆𑀥𑀸𑀦𑀲𑀤𑁆𑀤𑁄 𑀓𑀸𑀮𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀊𑀦𑀯𑀻𑀲𑀢𑀺𑀯𑀲𑁆𑀲𑁄’’𑀢𑀺. 𑀣𑁂𑀬𑁆𑀬𑀲𑀁𑀯𑀸𑀲𑀓𑀸𑀤𑀬𑁄𑀢𑀺𑀆𑀤𑀺𑀲𑀤𑁆𑀤𑁂𑀦 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀸 𑀲𑀗𑁆𑀕𑀳𑁂𑀢𑀩𑁆𑀩𑀸. 𑀅𑀝𑁆𑀞 𑀅𑀪𑀩𑁆𑀩𑀧𑀼𑀕𑁆𑀕𑀮𑀸 𑀓𑀭𑀡𑀤𑀼𑀓𑁆𑀓𑀝𑀓𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀓𑀢𑁆𑀢𑀩𑁆𑀩𑀦𑁆𑀢𑀺 𑀓𑀭𑀡𑀁, 𑀓𑀫𑁆𑀫𑀁, 𑀤𑀼𑀝𑁆𑀞𑀼 𑀓𑀢𑁆𑀢𑀩𑁆𑀩𑀦𑁆𑀢𑀺 𑀤𑀼𑀓𑁆𑀓𑀝𑀁, 𑀓𑀫𑁆𑀫𑀫𑁂𑀯. 𑀓𑀭𑀡𑀁 𑀤𑀼𑀓𑁆𑀓𑀝𑀫𑁂𑀢𑀲𑁆𑀲𑀸𑀢𑀺 𑀓𑀭𑀡𑀤𑀼𑀓𑁆𑀓𑀝𑀓𑁄. 𑀯𑀺𑀲𑁂𑀲𑀦𑀧𑀭𑀦𑀺𑀧𑀸𑀢𑁄 ‘‘𑀅𑀕𑁆𑀬𑀸𑀳𑀺𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑀤𑁂𑀯𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀼𑀓𑁆𑀓𑀝𑀓𑀺𑀭𑀺𑀬𑀸’’𑀢𑀺𑀆𑀤𑀺. 𑀦𑁄 𑀘 𑀬𑀸𑀘𑀢𑀻𑀢𑀺 𑀏𑀢𑁆𑀣 𑀬𑀸𑀘𑀥𑀸𑀢𑀼𑀬𑀸 𑀧𑀥𑀸𑀦𑀓𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑀲𑀫𑁆𑀧𑀤’’𑀦𑁆𑀢𑀺, ‘‘𑀲𑀗𑁆𑀖’’𑀦𑁆𑀢𑀺 𑀅𑀧𑀥𑀸𑀦𑀓𑀫𑁆𑀫𑀫𑀸𑀦𑁂𑀢𑀩𑁆𑀩𑀁. 𑀢𑁂𑀧𑀺𑀝𑀓𑁄𑀢𑀺 𑀢𑀺𑀧𑀺𑀝𑀓𑀁 𑀯𑀸𑀘𑀼𑀕𑁆𑀕𑀢𑀯𑀲𑁂𑀦 𑀥𑀸𑀭𑀓𑁄. 𑀆𑀡𑀸𑀬𑀧𑀻𑀢𑀺 𑀧𑀺𑀲𑀤𑁆𑀤𑁄 ‘‘𑀫𑀢𑁂𑀦𑀧𑀻’’𑀢𑀺 𑀅𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀬𑀸𑀘𑀦𑁆𑀢𑀲𑁆𑀲𑁂𑀯𑀸𑀢𑀺 𑀦𑀺𑀲𑁆𑀲𑀬𑀁 𑀆𑀘𑀭𑀺𑀬𑀁 𑀬𑀸𑀘𑀦𑁆𑀢𑀲𑁆𑀲𑁂𑀯. 𑀬𑀁 𑀯𑀢𑁆𑀣𑀼𑀁 𑀅𑀚𑁆𑀛𑀸𑀘𑀭𑀦𑁆𑀢𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀢𑀁 𑀯𑀢𑁆𑀣𑀼 𑀲𑀸𑀢𑀺𑀲𑀸𑀭𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸.

𑀉𑀧𑀖𑀸𑀢𑀺𑀓𑀸𑀢𑀺 𑀏𑀢𑁆𑀣 𑀉𑀧𑀳𑀦𑀦𑁆𑀢𑀻𑀢𑀺 𑀉𑀧𑀖𑀸𑀢𑀸, 𑀢𑁂𑀬𑁂𑀯 𑀉𑀧𑀖𑀸𑀢𑀺𑀓𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑀖𑀸𑀢𑀸’’𑀢𑀺. 𑀢𑀢𑁆𑀣𑀸𑀢𑀺 𑀤𑁆𑀯𑀻𑀲𑀼 𑀉𑀧𑀖𑀸𑀢𑀺𑀓𑁂𑀲𑀼. 𑀤𑁆𑀯𑁂 𑀯𑁂𑀦𑀬𑀺𑀓𑀸𑀢𑀺 𑀏𑀢𑁆𑀣 𑀯𑀺𑀦𑀬𑁂𑀦 𑀲𑀺𑀤𑁆𑀥𑀸 𑀯𑁂𑀦𑀬𑀺𑀓𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀦𑀬𑀲𑀺𑀤𑁆𑀥𑀸’’𑀢𑀺. ‘‘𑀤𑁆𑀯𑁂 𑀅𑀢𑁆𑀣𑀸’’𑀢𑀺 𑀇𑀫𑀺𑀦𑀸 𑀡𑀺𑀓𑀲𑀤𑁆𑀤𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀧𑀜𑁆𑀜𑀢𑁆𑀢𑀸𑀦𑀼𑀮𑁄𑀫𑀁 𑀦𑀸𑀫 𑀤𑀝𑁆𑀞𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀘𑁆𑀘𑀬𑀖𑀸𑀢𑁄𑀢𑀺 𑀧𑀘𑁆𑀘𑀬𑀲𑁆𑀲 𑀖𑀸𑀢𑁄. 𑀇𑀫𑀺𑀦𑀸 𑀲𑁂𑀢𑀼𑀖𑀸𑀢𑁄𑀢𑀺 𑀏𑀢𑁆𑀣 𑀲𑁂𑀢𑀼𑀲𑀤𑁆𑀤𑁄 𑀧𑀘𑁆𑀘𑀬𑀯𑀸𑀘𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀘𑀺𑀢𑁆𑀢𑀲𑁆𑀲𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀕𑁂𑀯 𑀓𑀸𑀬𑀯𑀸𑀘𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀇𑀢𑀺𑀧𑀻𑀢𑀺 𑀧𑀺𑀲𑀤𑁆𑀤𑁄 𑀤𑀼𑀢𑀺𑀬𑀢𑁆𑀣𑀲𑀫𑁆𑀧𑀺𑀡𑁆𑀟𑀦𑁄. ‘‘𑀧𑀫𑀸𑀡𑁂𑀦𑀸’’𑀢𑀺 𑀇𑀫𑀺𑀦𑀸 𑀫𑀢𑁆𑀢𑀓𑀸𑀭𑀺𑀢𑀸𑀢𑀺 𑀏𑀢𑁆𑀣 𑀫𑀢𑁆𑀢𑀲𑀤𑁆𑀤𑁄 𑀧𑀫𑀸𑀡𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀓𑀭𑀡’’𑀦𑁆𑀢𑀺 𑀇𑀫𑀺𑀦𑀸 𑀓𑀸𑀭𑀺𑀢𑀸𑀢𑀺 𑀢𑀤𑁆𑀥𑀺𑀢𑀪𑀸𑀯𑀁 𑀓𑀺𑀢𑀪𑀸𑀯𑁂𑀦 𑀤𑀲𑁆𑀲𑁂𑀢𑀺 𑀲𑀪𑀸𑀕𑀢𑁆𑀢𑀸. 𑀓𑀸𑀬𑀤𑁆𑀯𑀸𑀭𑀺𑀓𑀦𑁆𑀢𑀺 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀁 𑀆𑀧𑀢𑁆𑀢𑀺𑀁. 𑀇𑀫𑀺𑀦𑀸 𑀆𑀧𑀚𑁆𑀚𑀢𑀻𑀢𑀺 𑀧𑀤𑀲𑁆𑀲 𑀓𑀫𑁆𑀫𑀁 𑀤𑀲𑁆𑀲𑁂𑀢𑀺. 𑀓𑀸𑀬𑁂𑀦𑁂𑀯 𑀯𑀼𑀝𑁆𑀞𑀸𑀢𑀻𑀢𑀺 𑀓𑀸𑀬𑀲𑀸𑀫𑀕𑁆𑀕𑀺𑀬𑀸 𑀤𑀸𑀦𑀢𑁆𑀢𑀸 𑀓𑀸𑀬𑁂𑀦𑁂𑀯 𑀯𑀼𑀝𑁆𑀞𑀸𑀢𑀺. 𑀲𑀻𑀲𑀫𑀓𑁆𑀔𑀦𑀸𑀤𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀧𑀸𑀤𑀫𑀓𑁆𑀔𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀢𑀦𑁆𑀢𑀺 𑀪𑀸𑀭𑀁. ‘‘𑀦𑀺𑀢𑁆𑀣𑀭𑀺𑀢𑀼𑀁 𑀯𑀻𑀭𑀺𑀬𑀁 𑀆𑀭𑀪𑀢𑀻’’𑀢𑀺 𑀇𑀫𑀺𑀦𑀸 𑀯𑀳𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀣𑁂𑀭𑁄 𑀲𑀫𑀸𑀦𑁄𑀢𑀺 𑀬𑁄𑀚𑀦𑀸. 𑀦𑀯𑀳𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑀼𑀚𑀸𑀦𑀸𑀫𑀻’’𑀢𑀺𑀆𑀤𑀺. ‘‘𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑁆𑀯𑀸 𑀓𑀭𑁄𑀢𑀻’’𑀢𑀺 𑀇𑀫𑀺𑀦𑀸 𑀓𑀼𑀓𑁆𑀓𑀼𑀘𑁆𑀘𑀲𑀤𑁆𑀤𑀲𑁆𑀲 𑀦𑀸𑀫𑀥𑀸𑀢𑀼𑀁 𑀤𑀲𑁆𑀲𑁂𑀢𑀺. ‘‘𑀤𑀺𑀯𑀸 𑀘 𑀭𑀢𑁆𑀢𑁄 𑀘𑀸’’𑀢𑀺 𑀇𑀫𑀺𑀦𑀸 𑀅𑀪𑀺𑀡𑁆𑀳𑀁 𑀆𑀲𑀯𑀯𑀟𑁆𑀠𑀦𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀢𑁂𑀲𑀼 𑀯𑀺𑀪𑀗𑁆𑀕𑀓𑁆𑀔𑀦𑁆𑀥𑀓𑁂𑀲𑀼.

𑀇𑀢𑀺 𑀤𑀼𑀓𑀯𑀸𑀭𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀏𑀓𑀼𑀢𑁆𑀢𑀭𑀺𑀓𑀦𑀬𑁄 𑀢𑀺𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁩. 𑀢𑀺𑀓𑁂𑀲𑀼 𑀪𑀕𑀯𑀢𑀺 𑀢𑀺𑀝𑁆𑀞𑀦𑁆𑀢𑁂 𑀬𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀲𑀸 𑀆𑀧𑀢𑁆𑀢𑀺 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀧𑀤𑁂𑀲𑀼. 𑀯𑀺𑀢𑁆𑀣𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀺𑀓𑁂𑀲𑀼, 𑀯𑀺𑀢𑁆𑀣𑀸𑀭𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀮𑁄𑀳𑀺𑀢𑀼𑀧𑁆𑀧𑀸𑀤𑀸𑀧𑀢𑁆𑀢𑀻𑀢𑀺 𑀅𑀦𑀼𑀮𑁄𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺. ‘‘𑀆𑀯𑀼𑀲𑁄𑀯𑀸𑀤𑁂𑀦𑀸’’𑀢𑀺 ‘‘𑀆𑀯𑀼𑀲𑁄’’𑀢𑀺 𑀯𑁄𑀳𑀸𑀭𑁂𑀦. 𑀯𑁄𑀢𑀺 𑀢𑀼𑀫𑁆𑀳𑁂𑀳𑀺.

𑀓𑀸𑀮𑁂𑀢𑀺 𑀧𑀼𑀭𑁂𑀪𑀢𑁆𑀢𑀓𑀸𑀮𑁂. 𑀯𑀺𑀓𑀸𑀮𑁂𑀢𑀺 𑀧𑀘𑁆𑀙𑀸𑀪𑀢𑁆𑀢𑀓𑀸𑀮𑁂. 𑀅𑀯𑀲𑁂𑀲𑀁 𑀆𑀧𑀢𑁆𑀢𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀲𑀯𑀲𑁆𑀲𑁄𑀫𑁆𑀳𑀻𑀢𑀺 𑀅𑀳𑀁 𑀤𑀲𑀯𑀲𑁆𑀲𑁄 𑀅𑀫𑁆𑀳𑀺. 𑀦𑀯𑁄𑀢𑀺 𑀧𑀜𑁆𑀘𑀯𑀲𑁆𑀲𑀅𑀧𑀭𑀺𑀧𑀼𑀡𑁆𑀡𑁄. 𑀫𑀚𑁆𑀛𑀺𑀫𑁄𑀢𑀺 𑀧𑀜𑁆𑀘𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑀲𑀯𑀲𑁆𑀲𑀅𑀧𑀭𑀺𑀧𑀼𑀡𑁆𑀡𑁄. 𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀻𑀢𑀺 𑀓𑀼𑀲𑀮𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀆𑀧𑀚𑁆𑀚𑀢𑀺. 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑁄𑀢𑀺 𑀲𑀼𑀧𑀦𑁆𑀢𑀲𑁆𑀲 𑀪𑀯𑀗𑁆𑀕𑀘𑀺𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀦𑁆𑀢𑀺 𑀆𑀧𑀢𑁆𑀢𑀺𑀁. 𑀲𑀩𑁆𑀩𑀦𑁆𑀢𑀺 𑀆𑀧𑀢𑁆𑀢𑀺𑀁, 𑀆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀼𑀓𑁆𑀔𑀯𑁂𑀤𑀦𑀸𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀬𑀦𑁆𑀢𑀺 𑀆𑀧𑀢𑁆𑀢𑀺𑀁.

𑀢𑀬𑁄 𑀧𑀝𑀺𑀓𑁆𑀔𑁂𑀧𑀸𑀢𑀺 𑀏𑀢𑁆𑀣 𑀧𑀝𑀺𑀓𑁆𑀔𑁂𑀧𑀲𑁆𑀲 𑀲𑀸𑀫𑀺𑀓𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄’’𑀢𑀺. 𑀓𑀺𑀮𑁂𑀲𑀲𑀮𑁆𑀮𑁂𑀔𑀦𑀓𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀓𑀺𑀮𑁂𑀲𑀁 𑀲𑀮𑁆𑀮𑀺𑀔𑀢𑀺 𑀢𑀦𑀼𑀁 𑀓𑀭𑁄𑀢𑀻𑀢𑀺 𑀓𑀺𑀮𑁂𑀲𑀲𑀮𑁆𑀮𑁂𑀔𑀦𑀓𑀸, 𑀲𑀸𑀬𑁂𑀯 𑀧𑀝𑀺𑀧𑀢𑁆𑀢𑀺 𑀓𑀺𑀮𑁂𑀲𑀲𑀮𑁆𑀮𑁂𑀔𑀦𑀓𑀧𑀝𑀺𑀧𑀢𑁆𑀢𑀺, 𑀢𑀸𑀬.

𑀧𑀭𑀺𑀲𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑁄 𑀩𑀸𑀮𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀺𑀲𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑁄 𑀧𑀡𑁆𑀟𑀺𑀢𑁄 𑀘𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀯𑀲𑁂𑀲𑀁 𑀆𑀧𑀢𑁆𑀢𑀺𑀦𑁆𑀢𑀺 𑀬𑁄𑀚𑀦𑀸. 𑀓𑀸𑀴𑁂𑀢𑀺 𑀓𑀸𑀴𑀧𑀓𑁆𑀔𑁂. 𑀚𑀼𑀡𑁆𑀳𑁂𑀢𑀺 𑀚𑀼𑀡𑁆𑀳𑀧𑀓𑁆𑀔𑁂.

𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀲𑀺𑀬𑀸𑀢𑀺 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀲𑀺𑀬𑀸. 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀼𑀯𑀼𑀢𑁆𑀢𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀸𑀢𑀼𑀫𑀸𑀲’’𑀦𑁆𑀢𑀺𑀆𑀤𑀺. 𑀳𑀻𑀢𑀺 𑀬𑀲𑁆𑀫𑀸, 𑀧𑀭𑀺𑀬𑁂𑀲𑀦𑁆𑀢𑁄 𑀘 𑀦𑀺𑀯𑀸𑀲𑁂𑀦𑁆𑀢𑁄 𑀘 𑀪𑀺𑀓𑁆𑀔𑀽𑀢𑀺 𑀬𑁄𑀚𑀦𑀸.

𑀯𑀢𑁆𑀣𑀼𑀦𑁆𑀢𑀺 𑀫𑁂𑀣𑀼𑀦𑀥𑀫𑁆𑀫𑀸𑀤𑀺𑀯𑀢𑁆𑀣𑀼𑀁.

𑀧𑀝𑀺𑀘𑁆𑀙𑀸𑀤𑁂𑀢𑀺 𑀏𑀢𑀸𑀬𑀸𑀢𑀺 𑀧𑀝𑀺𑀘𑁆𑀙𑀸𑀤𑀻𑀢𑀺 𑀓𑀭𑀡𑀢𑁆𑀣𑁄𑀧𑀺 𑀬𑀼𑀚𑁆𑀚𑀢𑀺. 𑀯𑀺𑀢𑁆𑀣𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸’’𑀢𑀺𑀆𑀤𑀺. 𑀏𑀢𑀤𑁂𑀯𑀸𑀢𑀺 𑀧𑀭𑀺𑀓𑀫𑁆𑀫𑀫𑁂𑀯. 𑀉𑀪𑀬𑀢𑁆𑀣𑀸𑀢𑀺 𑀉𑀪𑀬𑁂𑀲𑀼 𑀚𑀦𑁆𑀢𑀸𑀖𑀭𑀧𑀝𑀺𑀘𑁆𑀙𑀸𑀤𑀺𑀉𑀤𑀓𑀧𑀝𑀺𑀘𑁆𑀙𑀸𑀤𑀻𑀲𑀼. 𑀲𑀩𑁆𑀩𑀦𑁆𑀢𑀺 𑀅𑀔𑀺𑀮𑀁 𑀧𑀭𑀺𑀓𑀫𑁆𑀫𑀸𑀤𑀺𑀁. 𑀦𑀺𑀬𑁆𑀬𑀦𑁆𑀢𑀻𑀢𑀺 𑀦𑀺𑀮𑀻𑀬𑀺𑀢𑁆𑀯𑀸 𑀬𑀦𑁆𑀢𑀺. 𑀇𑀫𑀺𑀦𑀸 𑀯𑀳𑀦𑁆𑀢𑀻𑀢𑀺 𑀏𑀢𑁆𑀣 𑀯𑀳𑀥𑀸𑀢𑀼 𑀕𑀢𑁆𑀬𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀩𑁆𑀪𑀫𑀳𑀺𑀓𑀸𑀥𑀽𑀫𑀭𑀚𑀭𑀸𑀳𑀼𑀯𑀺𑀫𑀼𑀢𑁆𑀢𑀦𑁆𑀢𑀺 𑀅𑀩𑁆𑀪𑁂𑀦 𑀘 𑀫𑀳𑀺𑀓𑀸𑀬 𑀘 𑀥𑀽𑀫𑁂𑀦 𑀘 𑀭𑀚𑁂𑀦 𑀘 𑀭𑀸𑀳𑀼𑀦𑀸 𑀘 𑀯𑀺𑀫𑀼𑀢𑁆𑀢𑀁. 𑀢𑁂𑀲𑀽𑀢𑀺 𑀅𑀩𑁆𑀪𑀸𑀤𑀻𑀲𑀼. 𑀢𑀣𑀸𑀢𑀺 𑀬𑀣𑀸 𑀘𑀦𑁆𑀤𑀫𑀡𑁆𑀟𑀮𑀁 𑀯𑀺𑀭𑁄𑀘𑀢𑀺, 𑀢𑀣𑀸 𑀲𑀽𑀭𑀺𑀬𑀫𑀡𑁆𑀟𑀮𑀁.

𑀓𑀭𑀡𑀻𑀬𑁂𑀦 𑀳𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀓𑀧𑁆𑀧𑁂𑀦𑁆𑀢𑁄𑀢𑀺 𑀓𑀭𑁄𑀦𑁆𑀢𑁄. 𑀆𑀕𑀦𑁆𑀢𑀼𑀓𑁄 𑀆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀚𑁆𑀛𑀺𑀝𑁆𑀞𑁄𑀢𑀺 𑀅𑀦𑀚𑁆𑀛𑁂𑀲𑀺𑀢𑁄 𑀳𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑁂 𑀓𑀸𑀬𑁂𑀦 𑀯𑀼𑀝𑁆𑀞𑀸𑀢𑀺 𑀓𑀸𑀬𑀲𑀸𑀫𑀕𑁆𑀕𑀺𑀬𑀸 𑀤𑀸𑀦𑀢𑁆𑀢𑀸.

𑀆𑀕𑀸𑀴𑁆𑀳𑀸𑀬 𑀘𑁂𑀢𑁂𑀬𑁆𑀬𑀸𑀢𑀺 𑀆𑀕𑀸𑀴𑁆𑀳𑀲𑀤𑁆𑀤𑁄 𑀤𑀴𑁆𑀳𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀤𑀴𑁆𑀳𑀪𑀸𑀯𑀸𑀬𑀸’’𑀢𑀺. 𑀆 𑀪𑀼𑀲𑁄 𑀕𑀸𑀳𑀺𑀬𑀢𑁂 𑀆𑀕𑀸𑀴𑁆𑀳𑁄, 𑀕𑀸𑀴𑁆𑀳𑁄 𑀩𑀸𑀴𑁆𑀳𑁄 𑀤𑀴𑁆𑀳𑁄𑀢𑀺 𑀅𑀢𑁆𑀣𑀢𑁄 𑀏𑀓𑀁. 𑀘𑁂𑀢𑁂𑀬𑁆𑀬𑀸𑀢𑀺 𑀧𑀓𑀧𑁆𑀧𑁂𑀬𑁆𑀬. 𑀦 𑀧𑀽𑀭𑀬𑀢𑁄𑀢𑀺 𑀦 𑀧𑀽𑀭𑀬𑀦𑁆𑀢𑀲𑁆𑀲. 𑀅𑀮𑀚𑁆𑀚𑀻 𑀘 𑀳𑁄𑀢𑀺 𑀩𑀸𑀮𑁄 𑀘 𑀅𑀧𑀓𑀢𑀢𑁆𑀢𑁄 𑀘𑀸𑀢𑀺 𑀏𑀢𑁆𑀣 𑀩𑀸𑀮𑀫𑀢𑁆𑀢𑀅𑀧𑀓𑀢𑀢𑁆𑀢𑀫𑀢𑁆𑀢𑁂𑀦 𑀓𑀫𑁆𑀫𑀁 𑀦 𑀓𑀸𑀢𑀩𑁆𑀩𑀁, 𑀆𑀧𑀢𑁆𑀢𑀺𑀯𑀲𑁂𑀦𑁂𑀯 𑀧𑀦 𑀓𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀩𑀸𑀮𑁄’’𑀢𑀺𑀆𑀤𑀺. 𑀢𑀢𑁆𑀣 𑀩𑀸𑀮𑁄 𑀦 𑀚𑀸𑀦𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀦𑁆𑀢𑀺 𑀩𑀸𑀮𑁄. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁂𑀦 𑀅𑀚𑀸𑀦𑀦𑀫𑀢𑁆𑀢𑁂𑀦. 𑀩𑀸𑀮𑀪𑀸𑀯𑀫𑀽𑀮𑀓𑀁 𑀆𑀧𑀢𑁆𑀢𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀤𑁆𑀯𑁂 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀢𑀺 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀯𑀲𑁂𑀦 𑀤𑁆𑀯𑁂 𑀆𑀧𑀢𑁆𑀢𑀺𑀭𑀸𑀲𑀬𑁄. 𑀢𑁂𑀲𑀦𑁆𑀢𑀺 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁, 𑀓𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀓𑀸𑀬𑀺𑀓𑁄 𑀤𑀯𑁄 𑀦𑀸𑀫𑀸𑀢𑀺 𑀓𑀸𑀬𑀺𑀓𑁄 𑀧𑀭𑀺𑀳𑀸𑀲𑁄 𑀦𑀸𑀫. 𑀫𑀼𑀔𑀸𑀮𑀫𑁆𑀩𑀭𑀓𑀭𑀡𑀸𑀤𑀺𑀪𑁂𑀤𑁄𑀢𑀺 𑀫𑀼𑀔𑁂𑀦 𑀆𑀮𑀫𑁆𑀩𑀭𑀦𑀸𑀫𑀓𑀢𑀽𑀭𑀺𑀬𑀓𑀺𑀘𑁆𑀘𑀲𑁆𑀲 𑀓𑀭𑀡𑀸𑀤𑀺𑀪𑁂𑀤𑁄. 𑀤𑁆𑀯𑀻𑀳𑀺𑀧𑀺 𑀤𑁆𑀯𑀸𑀭𑁂𑀳𑀻𑀢𑀺 𑀓𑀸𑀬𑀯𑀘𑀻𑀯𑀲𑁂𑀦 𑀤𑁆𑀯𑀻𑀳𑀺𑀧𑀺 𑀤𑁆𑀯𑀸𑀭𑁂𑀳𑀺. 𑀓𑀸𑀬𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑁄𑀢𑀺 𑀓𑀸𑀬𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑁆𑀲 𑀓𑀸𑀬𑀲𑀁𑀲𑀕𑁆𑀕𑀸𑀤𑀺𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀻𑀢𑀺𑀓𑁆𑀓𑀫𑁄. 𑀯𑀘𑀻𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑁄𑀢𑀺 𑀯𑀘𑀻𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑁆𑀲 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀤𑀺𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀻𑀢𑀺𑀓𑁆𑀓𑀫𑁄. 𑀓𑀸𑀬𑀺𑀓𑁂𑀦 𑀉𑀧𑀖𑀸𑀢𑀺𑀓𑁂𑀦𑀸𑀢𑀺 𑀏𑀢𑁆𑀣 𑀉𑀧𑀖𑀸𑀢𑀺𑀓𑀁 𑀦𑀸𑀫 𑀅𑀲𑀺𑀓𑁆𑀔𑀦𑀦𑁆𑀢𑀺 𑀆𑀳 ‘‘𑀅𑀲𑀺𑀓𑁆𑀔𑀦𑁂𑀦𑀸’’𑀢𑀺. 𑀓𑀲𑁆𑀫𑀸 𑀅𑀲𑀺𑀓𑁆𑀔𑀦𑀁 𑀉𑀧𑀖𑀸𑀢𑀁 𑀦𑀸𑀫𑀸𑀢𑀺 𑀆𑀳 ‘‘𑀬𑁄 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀬𑁄𑀢𑀺 𑀧𑀼𑀕𑁆𑀕𑀮𑁄. 𑀢𑀦𑁆𑀢𑀺 𑀓𑀸𑀬𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀁. 𑀦𑀦𑁆𑀢𑀺 𑀏𑀯𑀫𑁂𑀯. 𑀳𑀺 𑀬𑀲𑁆𑀫𑀸 𑀉𑀧𑀖𑀸𑀢𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑁂𑀚𑁆𑀚𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀸𑀲𑀦𑀉𑀕𑁆𑀕𑀳𑀡𑀆𑀭𑁄𑀘𑀦𑀸𑀤𑀺𑀦𑀸 𑀯𑀸𑀘𑀲𑀺𑀓𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦𑀸𑀢𑀺 𑀬𑁄𑀚𑀦𑀸.

‘‘𑀫𑀸 𑀪𑀡𑁆𑀟𑀦𑀁 𑀓𑀭𑀻’’𑀢𑀺 𑀇𑀫𑀺𑀦𑀸 ‘‘𑀫𑀸’’𑀢𑀺 𑀧𑀝𑀺𑀲𑁂𑀥𑀲𑁆𑀲 ‘‘𑀓𑀭𑀻’’𑀢𑀺 𑀧𑀸𑀞𑀲𑁂𑀲𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀦 𑀯𑁄𑀳𑀭𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀯𑀺𑀧𑀼𑀩𑁆𑀩𑀅𑀯𑀧𑀼𑀩𑁆𑀩-𑀳𑀭𑀥𑀸𑀢𑀼 𑀓𑀣𑀦𑀢𑁆𑀣𑁄𑀢𑀺 𑀆𑀳 ‘‘𑀦 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺. 𑀳𑀻𑀢𑀺 𑀲𑀘𑁆𑀘𑀁. 𑀩𑀻𑀚𑀦𑀕𑁆𑀕𑀸𑀳𑀸𑀤𑀺𑀓𑁂𑀢𑀺 𑀆𑀤𑀺𑀲𑀤𑁆𑀤𑁂𑀦 𑀥𑀫𑁆𑀫𑀚𑁆𑀛𑁂𑀲𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀑𑀓𑀸𑀲𑀓𑀫𑁆𑀫𑀁 𑀓𑀸𑀭𑁂𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀑𑀓𑀸𑀲’’𑀦𑁆𑀢𑀺 𑀘 ‘‘𑀑𑀓𑀸𑀲𑀓𑀫𑁆𑀫’’𑀦𑁆𑀢𑀺 𑀘 𑀲𑀤𑀺𑀲𑀦𑁆𑀢𑀺 𑀆𑀳 ‘‘𑀑𑀓𑀸𑀲𑀁 𑀓𑀸𑀭𑁂𑀦𑁆𑀢𑀲𑁆𑀲𑀸’’𑀢𑀺. 𑀦 𑀆𑀤𑀸𑀢𑀩𑁆𑀩𑀦𑁆𑀢𑀺 𑀦 𑀕𑀡𑁆𑀳𑀺𑀢𑀩𑁆𑀩𑀁. 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀢𑁆𑀣 𑀕𑀳𑁂𑀢𑁆𑀯𑀸’’𑀢𑀺𑀆𑀤𑀺.

𑀬𑀦𑁆𑀢𑀺 𑀯𑀺𑀦𑀬𑀁. 𑀲𑁄𑀢𑀺 𑀪𑀺𑀓𑁆𑀔𑀼. 𑀲𑁄𑀢𑀺 𑀯𑀺𑀦𑀬𑁄. 𑀢𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀇𑀤𑀦𑁆𑀢𑀺 𑀓𑀫𑁆𑀫𑀁. 𑀅𑀜𑁆𑀜𑀁 𑀧𑀼𑀘𑁆𑀙𑀸𑀢𑀺 𑀫𑀬𑀸 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀧𑀼𑀘𑁆𑀙𑀸𑀳𑀻𑀢𑀺 𑀬𑁄𑀚𑀦𑀸. 𑀇𑀢𑀻𑀢𑀺 𑀏𑀯𑀁. 𑀲𑁄𑀢𑀺 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼. 𑀅𑀲𑁆𑀲𑀸𑀢𑀺 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀦 𑀲𑀸𑀓𑀘𑁆𑀙𑀺𑀢𑀩𑁆𑀩𑁄𑀢𑀺 𑀦 𑀲𑀳 𑀓𑀣𑁂𑀢𑀩𑁆𑀩𑁄.

‘‘𑀮𑀤𑁆𑀥𑀺’’𑀦𑁆𑀢𑀺 𑀇𑀫𑀺𑀦𑀸 𑀇𑀤𑀫𑀧𑁆𑀧𑀳𑀸𑀬𑀸𑀢𑀺 𑀏𑀢𑁆𑀣 𑀇𑀤𑀁𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺. ‘‘𑀅𑀯𑀺𑀚𑀳𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀳𑀸𑀥𑀸𑀢𑀼 𑀢𑁆𑀯𑀸𑀧𑀘𑁆𑀘𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑀣𑀸 𑀓𑀺𑀮𑁂𑀲𑀲𑀼𑀤𑁆𑀥𑁄 𑀔𑀻𑀡𑀸𑀲𑀯𑁄𑀯 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀔𑀻𑀡𑀸𑀲𑀯𑀁 𑀪𑀺𑀓𑁆𑀔𑀼’’𑀦𑁆𑀢𑀺. ‘‘𑀧𑀸𑀢𑀩𑁆𑀬𑀪𑀸𑀯’’𑀦𑁆𑀢𑀺 𑀇𑀫𑀺𑀦𑀸 𑀧𑀸𑀢𑀩𑁆𑀬𑀢𑀦𑁆𑀢𑀺 𑀏𑀢𑁆𑀣 𑀢𑀸𑀧𑀘𑁆𑀘𑀬𑁄 𑀪𑀸𑀯𑀢𑁆𑀣𑁂 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀧𑀝𑀺𑀲𑁂𑀯𑀦’’𑀦𑁆𑀢𑀺 𑀇𑀫𑀺𑀦𑀸 𑀧𑀸𑀢𑀩𑁆𑀬𑀲𑀤𑁆𑀤𑁄 𑀬𑀣𑀸𑀓𑀸𑀫𑀧𑀭𑀺𑀪𑀼𑀜𑁆𑀚𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀕𑀢𑀺𑀯𑀺𑀲𑁄𑀥𑀦𑀦𑁆𑀢𑀺 𑀤𑀼𑀕𑁆𑀕𑀢𑀺𑀢𑁄 𑀲𑀼𑀕𑀢𑀺𑀬𑀸 𑀯𑀺𑀲𑀼𑀚𑁆𑀛𑀦𑀁. ‘‘𑀅𑀓𑀼𑀲𑀮𑀸𑀦𑀺 𑀘𑁂𑀯 𑀫𑀽𑀮𑀸𑀦𑀺 𑀘𑀸’’𑀢𑀺 𑀇𑀫𑀺𑀦𑀸 𑀅𑀓𑀼𑀲𑀮𑀲𑀤𑁆𑀤𑀲𑁆𑀲 𑀘 𑀫𑀽𑀮𑀲𑀤𑁆𑀤𑀲𑁆𑀲 𑀘 𑀢𑀼𑀮𑁆𑀬𑀸𑀥𑀺𑀓𑀭𑀡𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸 𑀅𑀓𑀼𑀲𑀮𑀲𑀗𑁆𑀔𑀸𑀢𑀸𑀦𑀺 𑀫𑀽𑀮𑀸𑀦𑀺 𑀅𑀓𑀼𑀲𑀮𑀫𑀽𑀮𑀸𑀦𑀻𑀢𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑀲𑀫𑀸𑀲𑁄 𑀓𑀸𑀢𑀩𑁆𑀩𑁄. 𑀤𑀼𑀘𑁆𑀘𑀭𑀺𑀢𑀸𑀦𑀻𑀢𑀺 𑀏𑀢𑁆𑀣 𑀤𑀼𑀲𑀤𑁆𑀤𑀲𑁆𑀲 𑀤𑀼𑀝𑁆𑀞𑀼𑀯𑀺𑀭𑀽𑀧𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀼𑀝𑁆𑀞𑀼 𑀘𑀭𑀺𑀢𑀸𑀦𑀺, 𑀯𑀺𑀭𑀽𑀧𑀸𑀦𑀺 𑀯𑀸 𑀘𑀭𑀺𑀢𑀸𑀦𑀻’’𑀢𑀺. 𑀯𑀺𑀭𑀽𑀧𑀸𑀦𑀻𑀢𑀺 𑀯𑀺𑀓𑀸𑀭𑀲𑀪𑀸𑀯𑀸𑀦𑀺. ‘‘𑀓𑀭𑀡𑀪𑀽𑀢𑁂𑀦𑀸’’𑀢𑀺 𑀇𑀫𑀺𑀦𑀸 ‘‘𑀓𑀢𑁆𑀢𑀼𑀪𑀽𑀢𑁂𑀦𑀸’’𑀢𑀺 𑀅𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀔𑀦𑁆𑀥𑀓𑁂.

𑀇𑀢𑀺 𑀢𑀺𑀓𑀯𑀸𑀭𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀏𑀓𑀼𑀢𑁆𑀢𑀭𑀺𑀓𑀦𑀬𑁄 𑀘𑀢𑀼𑀓𑁆𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁪. 𑀘𑀢𑀼𑀓𑁆𑀓𑁂𑀲𑀼 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑀝𑁆𑀞𑀸𑀦𑀦𑁆𑀢𑀺 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑁂𑀦 𑀅𑀥𑀺𑀓𑀭𑀡𑀯𑀽𑀧𑀲𑀫𑀺𑀢𑀝𑁆𑀞𑀸𑀦𑀁. 𑀧𑀭𑀲𑁆𑀲 𑀓𑀫𑁆𑀫𑀯𑀸𑀘𑀸𑀬𑀸𑀢𑀺 𑀧𑀭𑀲𑁆𑀲 𑀓𑀭𑀡𑀪𑀽𑀢𑀸𑀬 𑀓𑀫𑁆𑀫𑀯𑀸𑀘𑀸𑀬. 𑀢𑀢𑁄𑀢𑀺 𑀘𑀢𑀼𑀓𑁆𑀓𑀢𑁄. 𑀧𑀭𑁂𑀲𑀽𑀢𑀺 𑀅𑀜𑁆𑀜𑁂𑀲𑀼 𑀘𑀢𑀼𑀓𑁆𑀓𑁂𑀲𑀼 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀢𑀫𑁂𑀯𑀸𑀢𑀺 𑀓𑀸𑀬𑀤𑁆𑀯𑀸𑀭𑀺𑀓𑀫𑁂𑀯. 𑀧𑀼𑀦 𑀢𑀫𑁂𑀯𑀸𑀢𑀺 𑀯𑀘𑀻𑀤𑁆𑀯𑀸𑀭𑀺𑀓𑀫𑁂𑀯. 𑀆𑀧𑀚𑁆𑀚𑀺𑀢𑀩𑁆𑀩𑀸𑀧𑀢𑁆𑀢𑀺𑀜𑁆𑀘 𑀲𑀳𑀸𑀕𑀸𑀭𑀲𑁂𑀬𑁆𑀬𑀸𑀧𑀢𑁆𑀢𑀺𑀜𑁆𑀘𑀸𑀢𑀺 𑀬𑁄𑀚𑀦𑀸. 𑀚𑀕𑁆𑀕𑀦𑁆𑀢𑁄𑀢𑀺 𑀚𑀸𑀕𑀭𑀦𑁆𑀢𑁄.

𑀅𑀘𑀺𑀢𑁆𑀢𑀓𑁄 𑀆𑀧𑀚𑁆𑀚𑀢𑀺 𑀦𑀸𑀫𑀸𑀢𑀺 ‘‘𑀅𑀘𑀺𑀢𑁆𑀢𑀓𑁄 𑀪𑀺𑀓𑁆𑀔𑀼 𑀆𑀧𑀚𑁆𑀚𑀢𑀺 𑀦𑀸𑀫𑀸’’𑀢𑀺 𑀯𑀸 ‘‘𑀅𑀘𑀺𑀢𑁆𑀢𑀓𑁄 𑀳𑀼𑀢𑁆𑀯𑀸 𑀆𑀧𑀚𑁆𑀚𑀢𑀺 𑀦𑀸𑀫𑀸’’𑀢𑀺 𑀯𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀲𑀪𑀸𑀕𑀦𑁆𑀢𑀺 𑀯𑀢𑁆𑀣𑀼𑀲𑀪𑀸𑀕𑀁. 𑀢𑀜𑁆𑀘𑀸𑀢𑀺 𑀅𑀜𑁆𑀜𑀢𑀭𑀁 𑀢𑀜𑁆𑀘 𑀆𑀧𑀢𑁆𑀢𑀺𑀁. 𑀇𑀢𑀻𑀢𑀺 𑀏𑀯𑀁.

𑀓𑀫𑁆𑀫𑁂𑀦𑀸𑀢𑀺 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑁂𑀦. 𑀓𑀫𑁆𑀫𑁂𑀦 𑀯𑀼𑀝𑁆𑀞𑀸𑀢𑀻𑀢𑀺 𑀓𑀫𑁆𑀫𑁂𑀦 𑀏𑀯 𑀯𑀼𑀝𑁆𑀞𑀸𑀢𑀺.

𑀲𑁄𑀢𑀺 𑀕𑀺𑀳𑀺𑀧𑀭𑀺𑀓𑁆𑀔𑀸𑀭𑁄, 𑀆𑀳𑀝𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀯𑀸𑀧𑀼𑀭𑀡𑀦𑁆𑀢𑀺 𑀓𑀼𑀜𑁆𑀘𑀺𑀓𑀁. 𑀅𑀦𑁆𑀢𑁄𑀢𑀺 𑀪𑀡𑁆𑀟𑀸𑀕𑀸𑀭𑀲𑁆𑀲 𑀅𑀦𑁆𑀢𑁄.

𑀲𑀫𑁆𑀫𑀼𑀔𑀸 𑀯𑀼𑀝𑁆𑀞𑀸𑀢𑀻𑀢𑀺 𑀲𑀫𑁆𑀫𑀼𑀔𑀸 𑀏𑀯 𑀯𑀼𑀝𑁆𑀞𑀸𑀢𑀺.

𑀲𑀬𑀺𑀢𑀸𑀬 𑀏𑀯 𑀪𑀺𑀓𑁆𑀔𑀼𑀦𑀺𑀬𑀸𑀢𑀺 𑀬𑁄𑀚𑀦𑀸. 𑀇𑀤𑀦𑁆𑀢𑀺 𑀲𑀳𑀸𑀕𑀸𑀭𑀲𑁂𑀬𑁆𑀬𑀸𑀧𑀢𑁆𑀢𑀺𑀁, 𑀧𑀝𑀺𑀘𑁆𑀘𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀦𑁆𑀢𑀺 ‘‘𑀮𑀺𑀗𑁆𑀕𑀧𑀸𑀢𑀼𑀪𑀸𑀯𑁂𑀦𑀸’’𑀢𑀺 𑀯𑀘𑀦𑀁, 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀪𑀺𑀦𑁆𑀦𑀫𑁆𑀧𑀻𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀫𑁆𑀧𑀺. 𑀮𑀺𑀗𑁆𑀕𑀧𑀝𑀺𑀮𑀸𑀪𑁂𑀦𑀸𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀧𑀝𑀺𑀮𑀸𑀪𑁂𑀦. 𑀧𑀞𑀫𑀦𑁆𑀢𑀺 𑀆𑀤𑀺𑀓𑀧𑁆𑀧𑀓𑀸𑀮𑁂. ‘‘𑀧𑀞𑀫𑀁 𑀉𑀧𑁆𑀧𑀦𑁆𑀦𑀯𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀧𑀼𑀭𑁂 𑀉𑀧𑁆𑀧𑀦𑁆𑀦𑀁 𑀧𑀼𑀭𑀺𑀫𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀲𑁂𑀝𑁆𑀞𑀪𑀸𑀯𑁂𑀦𑀸’’𑀢𑀺 𑀇𑀫𑀺𑀦𑀸 𑀧𑀼𑀭𑀪𑀸𑀯𑁂𑀦 𑀲𑁂𑀝𑁆𑀞𑀪𑀸𑀯𑁂𑀦 𑀉𑀧𑁆𑀧𑀦𑁆𑀦𑀁 𑀧𑀼𑀭𑀺𑀫𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀧𑀼𑀭𑀺𑀲𑀮𑀺𑀗𑁆𑀕’’𑀦𑁆𑀢𑀺 𑀇𑀫𑀺𑀦𑀸 𑀇𑀫𑀧𑀘𑁆𑀘𑀬𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀧𑀼𑀭𑀺𑀲𑀓𑀼𑀢𑁆𑀢𑀧𑀼𑀭𑀺𑀲𑀸𑀓𑀸𑀭𑀸𑀤𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀸𑀦𑀺 𑀙𑀘𑀢𑁆𑀢𑀸𑀮𑀻𑀲 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀤𑀼𑀢𑀺𑀬𑀘𑀢𑀼𑀓𑁆𑀓𑁂𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀳𑀻𑀢𑀺 𑀢𑀺𑀁𑀲𑀸𑀥𑀺𑀓𑁂𑀳𑀺 𑀲𑀢𑀲𑀺𑀓𑁆𑀔𑀸𑀧𑀤𑁂𑀳𑀺.

𑀫𑀳𑀸𑀧𑀤𑁂𑀲𑀸𑀢𑀺 𑀯𑀺𑀦𑀬𑁂 (𑀫𑀳𑀸𑀯. 𑁩𑁦𑁫) 𑀆𑀕𑀢𑀸 𑀫𑀳𑀸𑀧𑀤𑁂𑀲𑀸. 𑀓𑀲𑁆𑀫𑀸 𑀫𑀳𑀸𑀧𑀤𑁂𑀲𑀸 ‘‘𑀲𑀸𑀫𑀼𑀓𑁆𑀓𑀁𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 ‘‘𑀢𑁂 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀢𑁂𑀢𑀺 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸, 𑀯𑀼𑀘𑁆𑀘𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀬’’𑀦𑁆𑀢𑀺 𑀇𑀫𑀺𑀦𑀸 𑀲𑀸𑀫𑀼𑀓𑁆𑀓𑀁𑀲𑀸𑀢𑀺 𑀏𑀢𑁆𑀣 𑀲𑀁𑀲𑀤𑁆𑀤𑀲𑁆𑀲 𑀲𑀬𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀉𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀉𑀓𑁆𑀓𑀁𑀲𑀲𑀤𑁆𑀤𑁄 𑀉𑀓𑁆𑀔𑀺𑀧𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀞𑀧𑀺𑀢𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀲𑀬𑀁 𑀉𑀓𑁆𑀓𑀁𑀲𑀺𑀢𑁆𑀯𑀸 𑀞𑀧𑀺𑀢𑀸 𑀲𑀸𑀫𑀼𑀓𑁆𑀓𑀁𑀲𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀅𑀚𑁆𑀛𑁄𑀳𑀭𑀡𑀻𑀬𑀧𑀭𑀺𑀪𑁄𑀕𑀸’’𑀢𑀺 𑀇𑀫𑀺𑀦𑀸 𑀩𑀸𑀳𑀺𑀭𑀧𑀭𑀺𑀪𑁄𑀕𑀁 𑀦𑀺𑀯𑀢𑁆𑀢𑁂𑀢𑀺. 𑀉𑀤𑀓𑀁 𑀧𑀦𑀸𑀢𑀺 𑀓𑁂𑀦𑀘𑀺 𑀅𑀲𑀁𑀲𑀕𑁆𑀕𑀁 𑀧𑀲𑀦𑁆𑀦𑁄𑀤𑀓𑀁 𑀧𑀦. 𑀓𑀸𑀮𑁂𑀢𑀺 𑀲𑀧𑁆𑀧𑀤𑀝𑁆𑀞𑀓𑀸𑀮𑁂. ‘‘𑀧𑀜𑁆𑀘 𑀯𑀸 𑀤𑀲 𑀯𑀸 𑀲𑀻𑀮𑀸𑀦𑀻’’𑀢𑀺 𑀇𑀫𑀺𑀦𑀸 𑀧𑀜𑁆𑀘 𑀯𑀸 𑀤𑀲 𑀯𑀸 𑀲𑀻𑀮𑀸𑀦𑀺 𑀉𑀧𑀸𑀲𑀓𑀲𑀻𑀮𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀢𑀢𑁆𑀣 𑀘𑀸𑀢𑀺 𑀯𑀺𑀳𑀸𑀭𑁂 𑀘. 𑀉𑀪𑁄𑀧𑀻𑀢𑀺 𑀆𑀕𑀦𑁆𑀢𑀼𑀓𑀸𑀯𑀸𑀲𑀺𑀓𑀯𑀲𑁂𑀦 𑀉𑀪𑁄𑀧𑀺. 𑀅𑀲𑀸𑀥𑀸𑀭𑀡𑀦𑁆𑀢𑀺 𑀤𑁆𑀯𑀻𑀳𑀺 𑀅𑀲𑀸𑀥𑀸𑀭𑀡𑀁. 𑀆𑀧𑀢𑁆𑀢𑀺𑀦𑁆𑀢𑀺 𑀪𑀺𑀓𑁆𑀔𑀼𑀦𑀻𑀳𑀺𑀬𑁂𑀯 𑀲𑀸𑀥𑀸𑀭𑀡𑀁 𑀆𑀧𑀢𑁆𑀢𑀺𑀁. 𑀕𑀫𑀺𑀬𑀘𑀢𑀼𑀓𑁆𑀓𑁂𑀧𑀻𑀢𑀺 𑀧𑀺𑀲𑀤𑁆𑀤𑁄 𑀆𑀕𑀦𑁆𑀢𑀼𑀓𑀘𑀢𑀼𑀓𑁆𑀓𑀁 𑀅𑀧𑁂𑀓𑁆𑀔𑀢𑀺. 𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸𑀯𑀸𑀢𑀺 𑀫𑁂𑀣𑀼𑀦𑀸𑀤𑀺𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸 𑀏𑀯. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀲𑀸𑀢𑀺 𑀆𑀧𑀢𑁆𑀢𑀺. 𑀢𑀣𑀸𑀢𑀺 𑀬𑀣𑀸 𑀓𑀸𑀬𑀲𑀁𑀲𑀕𑁆𑀕𑁂, 𑀢𑀣𑀸 𑀮𑀲𑀼𑀡𑀔𑀸𑀤𑀦𑁂𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀢𑀺 𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸𑀤𑀺𑀘𑀢𑀼𑀓𑁆𑀓𑁂. 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀻𑀢𑀺 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑁂 𑀆𑀕𑀢𑀸𑀦𑀺. 𑀯𑀺𑀲𑀼𑀁 𑀆𑀧𑀚𑁆𑀚𑀦𑁆𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀼𑀭𑀺𑀫𑀘𑀢𑀼𑀓𑁆𑀓𑁂𑀢𑀺 𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸𑀤𑀺𑀘𑀢𑀼𑀓𑁆𑀓𑁂. 𑀬𑁄 𑀧𑀞𑀫𑁄 𑀧𑀜𑁆𑀳𑁄𑀢𑀺 𑀬𑁄𑀚𑀦𑀸. 𑀇𑀥𑀸𑀢𑀺 𑀯𑀢𑁆𑀣𑀼𑀲𑀪𑀸𑀕𑀢𑀸𑀤𑀺𑀘𑀢𑀼𑀓𑁆𑀓𑁂. 𑀬𑁄 𑀘𑀸𑀢𑀺 𑀬𑁄 𑀘 𑀧𑀜𑁆𑀳𑁄. 𑀢𑀢𑁆𑀣𑀸𑀢𑀺 𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸𑀤𑀺𑀘𑀢𑀼𑀓𑁆𑀓𑁂. 𑀢𑀢𑀺𑀬𑀘𑀢𑀼𑀢𑁆𑀣𑁂𑀲𑀼 𑀧𑀜𑁆𑀳𑁂𑀲𑀽𑀢𑀺 𑀲𑀫𑁆𑀩𑀦𑁆𑀥𑁄.

‘‘𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲𑀸’’𑀢𑀺 𑀧𑀤𑀁 ‘‘𑀓𑀢𑁆𑀢𑀩𑁆𑀩’’𑀇𑀢𑀺 𑀧𑀤𑁂 𑀲𑀫𑁆𑀧𑀤𑀸𑀦𑀁.

𑀕𑀭𑀼𑀓𑀦𑁆𑀢𑀺 𑀧𑀸𑀭𑀸𑀚𑀺𑀓𑀁. 𑀮𑀳𑀼𑀓𑀦𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀁 𑀯𑀸 𑀤𑀼𑀓𑁆𑀓𑀝𑀁 𑀯𑀸.

𑀅𑀝𑁆𑀞𑀦𑁆𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀧𑀝𑀺𑀧𑀸𑀝𑀺𑀬𑀸 𑀦𑀺𑀲𑀻𑀤𑀺𑀢𑀩𑁆𑀩𑀢𑁄 𑀯𑀼𑀢𑁆𑀢𑀁 ‘‘𑀦𑀯𑀫𑀪𑀺𑀓𑁆𑀔𑀼𑀦𑀺𑀢𑁄’’𑀢𑀺. 𑀧𑀘𑁆𑀘𑀼𑀝𑁆𑀞𑀸𑀦𑀸𑀭𑀳𑀸𑀢𑀺 𑀧𑀝𑀺𑀫𑀼𑀔𑀁 𑀉𑀧𑀝𑁆𑀞𑀸𑀢𑀼𑀁 𑀅𑀭𑀳𑀸. 𑀅𑀯𑀺𑀲𑁂𑀲𑁂𑀦 𑀘𑀸𑀢𑀺 ‘‘𑀪𑀺𑀓𑁆𑀔𑀽’’𑀢𑀺 𑀯𑀸 ‘‘𑀪𑀺𑀓𑁆𑀔𑀼𑀦𑀻’’𑀢𑀺 𑀯𑀸 𑀯𑀺𑀲𑁂𑀲, 𑀫𑀓𑀢𑁆𑀯𑀸 𑀲𑀸𑀫𑀜𑁆𑀜𑁂𑀦 𑀘. ‘‘𑀆𑀲𑀦𑀸𑀭𑀳𑀘𑀢𑀼𑀓𑁆𑀓𑀲𑁆𑀲𑀸’’𑀢𑀺 𑀧𑀤𑀁 ‘‘𑀧𑀞𑀫𑀧𑀤’’𑀦𑁆𑀢𑀺 𑀧𑀤𑁂 𑀅𑀯𑀬𑀯𑀺𑀲𑀫𑁆𑀩𑀦𑁆𑀥𑁄.

𑀅𑀲𑀸𑀥𑀸𑀭𑀡𑀦𑁆𑀢𑀺 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀁. 𑀯𑀺𑀓𑀸𑀮𑁂 𑀓𑀧𑁆𑀧𑀢𑀻𑀢𑀺 𑀢𑀤𑀳𑀼𑀯𑀺𑀓𑀸𑀮𑁂 𑀓𑀧𑁆𑀧𑀢𑀺. 𑀓𑀸𑀮𑀸𑀢𑀻𑀢𑀦𑁆𑀢𑀺 𑀓𑀸𑀮𑀬𑀸𑀫𑀲𑀢𑁆𑀢𑀳𑀸𑀢𑀻𑀢𑀁. 𑀬𑀸𑀯𑀓𑀸𑀮𑀺𑀓𑀸𑀤𑀺𑀢𑁆𑀢𑀬𑀜𑁆𑀘 𑀅𑀓𑀧𑁆𑀧𑀺𑀬𑀫𑀁𑀲𑀜𑁆𑀘 𑀉𑀕𑁆𑀕𑀳𑀺𑀢𑀓𑀜𑁆𑀘 𑀅𑀧𑀝𑀺𑀕𑁆𑀕𑀳𑀺𑀢𑀓𑀜𑁆𑀘𑀸𑀢𑀺 𑀬𑁄𑀚𑀦𑀸.

𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀜𑁆𑀘 𑀥𑀼𑀯𑀦𑁆𑀳𑀸𑀦𑀜𑁆𑀘 𑀘𑀫𑁆𑀫𑀢𑁆𑀣𑀭𑀡𑀜𑁆𑀘 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀥𑀼𑀯𑀦𑁆𑀳𑀸𑀦𑀘𑀫𑁆𑀫𑀢𑁆𑀣𑀭𑀡𑀸𑀦𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀻𑀢𑀺 𑀧𑀜𑁆𑀘𑀯𑀕𑁆𑀕𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀤𑀤𑀸𑀦𑀸𑀤𑀻𑀦𑀺. 𑀇𑀥𑀸𑀢𑀺 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼. 𑀇𑀥𑀸𑀢𑀺 𑀫𑀚𑁆𑀛𑀺𑀫𑁂𑀲𑀼. 𑀇𑀤𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀯𑀢𑁆𑀣𑀼. 𑀤𑀻𑀧𑁂𑀢𑀼𑀫𑁆𑀧𑀻𑀢𑀺 𑀤𑀻𑀧𑀦𑀫𑁆𑀧𑀺. 𑀢𑀼𑀁𑀧𑀘𑁆𑀘𑀬𑁄 𑀳𑀺 𑀓𑀢𑁆𑀯𑀢𑁆𑀣𑀚𑁄𑀢𑀓𑁄. 𑀏𑀲𑁂𑀯 𑀦𑀬𑁄 𑀤𑀻𑀧𑁂𑀢𑀼𑀁 𑀧𑀦𑀸𑀢𑀺 𑀏𑀢𑁆𑀣𑀸𑀧𑀺. 𑀲𑁂𑀲𑀁 𑀅𑀦𑀼𑀜𑁆𑀜𑀸𑀢𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀪𑀬𑀢𑁆𑀣𑀧𑀻𑀢𑀺 𑀧𑀘𑁆𑀘𑀦𑁆𑀢𑀺𑀫𑀫𑀚𑁆𑀛𑀺𑀫𑀯𑀲𑁂𑀦 𑀉𑀪𑀬𑀢𑁆𑀣𑀸𑀧𑀺.

𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀅𑀓𑁆𑀔𑀸𑀦𑀁 𑀏𑀓𑀁 𑀓𑀢𑁆𑀯𑀸 ‘‘𑀘𑀢𑁆𑀢𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀘𑀢𑁆𑀢𑀸𑀭𑁄 𑀧𑀼𑀩𑁆𑀩𑀓𑀺𑀘𑁆𑀘𑀸𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄, ‘‘𑀘𑀢𑁆𑀢𑀸𑀭𑀺 𑀧𑀼𑀩𑁆𑀩𑀓𑀺𑀘𑁆𑀘𑀸𑀦𑀻’’𑀢𑀺 𑀳𑀺 𑀅𑀢𑁆𑀣𑁄. 𑀏𑀯𑀁 𑀯𑀼𑀢𑁆𑀢𑀸𑀦𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀆𑀕𑀢𑀸 𑀲𑀫𑁆𑀫𑀼𑀢𑀺𑀬𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀘𑀢𑀼𑀓𑁆𑀓𑁂𑀲𑀼.

𑀇𑀢𑀺 𑀘𑀢𑀼𑀓𑁆𑀓𑀯𑀸𑀭𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀏𑀓𑀼𑀢𑁆𑀢𑀭𑀺𑀓𑀦𑀬𑁄 𑀧𑀜𑁆𑀘𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁫. 𑀧𑀜𑁆𑀘𑀓𑁂𑀲𑀼 ‘‘𑀧𑀜𑁆𑀘 𑀧𑀼𑀕𑁆𑀕𑀮𑀸 𑀦𑀺𑀬𑀢𑀸’’𑀢𑀺 𑀏𑀢𑀁 𑀆𑀦𑀦𑁆𑀢𑀭𑀺𑀬𑀸𑀦𑀫𑁂𑀯 𑀕𑀳𑀡𑀦𑁆𑀢𑀺 𑀬𑁄𑀚𑀦𑀸. 𑀧𑀜𑁆𑀘 𑀙𑁂𑀤𑀦 𑀓𑀸 𑀆𑀧𑀢𑁆𑀢𑀺𑀬𑁄 𑀦𑀸𑀫 𑀯𑁂𑀤𑀺𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀸 𑀯𑀺𑀓𑀧𑁆𑀧𑀦𑀸 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀉𑀲𑁆𑀲𑀗𑁆𑀓𑀺𑀢𑁄𑀢𑀺 𑀉𑀝𑁆𑀞𑀳𑀺𑀢𑁆𑀯𑀸 𑀲𑀗𑁆𑀓𑀺𑀢𑁄. 𑀧𑀭𑀺𑀲𑀗𑁆𑀓𑀺𑀢𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀲𑀗𑁆𑀓𑀺𑀢𑁄. 𑀅𑀓𑀼𑀧𑁆𑀧𑁄 𑀅𑀭𑀳𑀢𑁆𑀢𑀨𑀮𑀲𑀗𑁆𑀔𑀸𑀢𑁄 𑀥𑀫𑁆𑀫𑁄 𑀇𑀫𑀲𑁆𑀲𑀸𑀢𑀺 𑀅𑀓𑀼𑀧𑁆𑀧𑀥𑀫𑁆𑀫𑁄, 𑀔𑀻𑀡𑀸𑀲𑀯𑁄. 𑀔𑀻𑀡𑀸𑀲𑀯𑁄 𑀲𑀫𑀸𑀦𑁄𑀧𑀺 𑀉𑀲𑁆𑀲𑀗𑁆𑀓𑀺𑀢𑁄 𑀘𑁂𑀯 𑀧𑀭𑀺𑀲𑀗𑁆𑀓𑀺𑀢𑁄 𑀘𑀸𑀢𑀺 𑀬𑁄𑀚𑀦𑀸. 𑀧𑀭𑀺𑀳𑀭𑀺𑀢𑀩𑁆𑀩𑀸𑀢𑀺 𑀅𑀧𑀦𑁂𑀢𑀩𑁆𑀩𑀸. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀏𑀢𑁂𑀲𑀽𑀢𑀺 𑀅𑀕𑁄𑀘𑀭𑁂𑀲𑀼. 𑀣𑀽𑀧𑀘𑀻𑀯𑀭𑀦𑁆𑀢𑀺 𑀏𑀢𑁆𑀣 𑀣𑀽𑀧𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀁 𑀘𑀻𑀯𑀭𑀁 𑀣𑀽𑀧𑀘𑀻𑀯𑀭𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀫𑁆𑀫𑀺𑀓’’𑀦𑁆𑀢𑀺𑀆𑀤𑀺. 𑀯𑀫𑁆𑀫𑀺𑀓𑁄 𑀳𑀺 𑀣𑀽𑀧𑀬𑀢𑀺 𑀉𑀤𑁆𑀥𑀁 𑀆𑀭𑁄𑀳𑀢𑀻𑀢𑀺 𑀣𑀽𑀧𑁄𑀢𑀺 𑀯𑀼𑀘𑁆𑀘𑀢𑀺. 𑀦𑁆𑀳𑀸𑀦𑀝𑁆𑀞𑀸𑀦𑁂𑀢𑀺 𑀲𑀩𑁆𑀩𑁂𑀲𑀁 𑀦𑁆𑀳𑀸𑀦𑀝𑁆𑀞𑀸𑀦𑁂. 𑀢𑀜𑁆𑀳𑀺 𑀉𑀤𑀓𑁂𑀦 𑀓𑀸𑀬𑀁 𑀅𑀪𑀺𑀲𑀺𑀜𑁆𑀘𑀢𑀺 𑀏𑀢𑁆𑀣𑀸𑀢𑀺 𑀅𑀪𑀺𑀲𑁂𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀪𑀺𑀲𑁂𑀓𑁂 𑀙𑀟𑁆𑀟𑀺𑀢𑀁 𑀆𑀪𑀺𑀲𑁂𑀓𑀺𑀓𑀁, 𑀘𑀻𑀯𑀭𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀙𑀟𑁆𑀟𑀺𑀢𑀘𑀻𑀯𑀭’’𑀦𑁆𑀢𑀺. 𑀪𑀢𑀧𑀝𑀺𑀬𑀸𑀪𑀢𑀦𑁆𑀢𑀺 𑀏𑀢𑁆𑀣 𑀪𑀭𑀥𑀸𑀢𑀼𑀬𑀸 𑀧𑁄𑀲𑀦𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀥𑀸𑀭𑀡𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀼𑀲𑀸𑀦𑀁 𑀦𑁂𑀢𑁆𑀯𑀸 𑀧𑀼𑀦 𑀆𑀦𑀻𑀢𑀓’’𑀦𑁆𑀢𑀺. 𑀢𑀢𑁆𑀣 ‘‘𑀲𑀼𑀲𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀓𑀫𑁆𑀫𑀁 𑀤𑀲𑁆𑀲𑁂𑀢𑀺, ‘‘𑀧𑀼𑀦𑀸’’𑀢𑀺 𑀇𑀫𑀺𑀦𑀸 𑀧𑀝𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀇𑀫𑁂𑀳𑀺 𑀧𑀤𑁂𑀳𑀺 𑀲𑀼𑀲𑀸𑀦𑀁 𑀪𑀢𑀁 𑀳𑀼𑀢𑁆𑀯𑀸 𑀕𑁂𑀳𑀁 𑀧𑀝𑀺𑀆𑀪𑀭𑀺𑀢𑀩𑁆𑀩𑀦𑁆𑀢𑀺 𑀪𑀢𑀧𑀝𑀺𑀬𑀸𑀪𑀢𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀬𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀧𑀸𑀴𑀺𑀬𑀁, 𑀅𑀝𑁆𑀞𑀓𑀣𑀸𑀬𑀜𑁆𑀘 𑀧𑁄𑀢𑁆𑀣𑀓𑁂𑀲𑀼 ‘‘𑀕𑀢𑀧𑀝𑀺𑀬𑀸𑀕𑀢’’𑀦𑁆𑀢𑀺 𑀓𑀡𑁆𑀞𑀚𑀢𑀢𑀺𑀬𑀓𑁆𑀔𑀭𑁂𑀦 𑀧𑀸𑀞𑁄 𑀅𑀢𑁆𑀣𑀺, 𑀲𑁄 𑀅𑀲𑀼𑀦𑁆𑀤𑀭𑁄.

𑀓𑀸𑀬𑁄 𑀧𑀞𑀫𑀁, 𑀯𑀸𑀘𑀸 𑀤𑀼𑀢𑀺𑀬𑀁, 𑀓𑀸𑀬𑀯𑀸𑀘𑀸 𑀢𑀢𑀺𑀬𑀁, 𑀇𑀤𑀁 𑀲𑀦𑁆𑀥𑀸𑀬 ‘‘𑀢𑀢𑀺𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣𑁂𑀯𑀸𑀢𑀺 𑀅𑀦𑁆𑀢𑀭𑀧𑁂𑀬𑁆𑀬𑀸𑀮𑁂 𑀏𑀯.

𑀅𑀤𑀺𑀦𑁆𑀦𑀦𑁆𑀢𑀺 𑀏𑀢𑁆𑀣 𑀅𑀓𑀸𑀭𑀲𑁆𑀲 𑀦𑀓𑀸𑀭𑀺𑀬𑀪𑀸𑀯𑀜𑁆𑀘 𑀢𑀧𑀘𑁆𑀘𑀬𑀲𑁆𑀲 𑀓𑀫𑁆𑀫𑀯𑀸𑀘𑀓𑀪𑀸𑀯𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀜𑁆𑀜𑁂𑀦 𑀦 𑀤𑀺𑀦𑁆𑀦’’𑀦𑁆𑀢𑀺. 𑀢𑀢𑁆𑀣 ‘‘𑀅𑀜𑁆𑀜𑁂𑀦𑀸’’𑀢𑀺 𑀇𑀫𑀺𑀦𑀸 𑀢𑀧𑀘𑁆𑀘𑀬𑀲𑁆𑀲 𑀓𑀫𑁆𑀫𑀯𑀸𑀘𑀓𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀦𑀓𑀸𑀭𑁂𑀦 𑀅𑀓𑀸𑀭𑀲𑁆𑀲 𑀓𑀸𑀭𑀺𑀬𑀁 𑀤𑀲𑁆𑀲𑁂𑀢𑀺. 𑀓𑁂𑀦 𑀓𑀸𑀭𑀡𑁂𑀦 𑀅𑀯𑀺𑀤𑀺𑀢𑀦𑁆𑀢𑀺 𑀆𑀳 ‘‘𑀧𑀝𑀺𑀕𑁆𑀕𑀡𑁆𑀳𑀸𑀫𑀻𑀢𑀺 𑀘𑁂𑀢𑀦𑀸𑀬 𑀅𑀪𑀸𑀯𑁂𑀦𑀸’’𑀢𑀺. 𑀅𑀯𑀺𑀤𑀺𑀢𑀦𑁆𑀢𑀺 𑀅𑀧𑀸𑀓𑀝𑀁. 𑀦𑀝𑀲𑀫𑀚𑁆𑀚𑀸𑀤𑀺𑀤𑀸𑀦𑀦𑁆𑀢𑀺 𑀦𑀝𑀲𑀫𑀚𑁆𑀚𑀸𑀤𑀻𑀦𑀁 𑀲𑀩𑁆𑀩𑁂𑀲𑀁 𑀤𑀸𑀦𑀁. 𑀉𑀲𑀪𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀉𑀲𑀪𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀁. 𑀇𑀤𑀁 𑀉𑀧𑀮𑀓𑁆𑀔𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀩𑁆𑀩𑀸𑀲𑀫𑁆𑀧𑀺 𑀧𑀦 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀸𑀦𑀁 𑀇𑀢𑁆𑀣𑀻𑀦𑀁 𑀫𑁂𑀣𑀼𑀦𑀭𑀢𑀺𑀯𑀲𑁂𑀦 𑀧𑀼𑀭𑀺𑀲𑀸𑀦𑀁 𑀤𑀸𑀦𑀫𑁆𑀧𑀺 𑀕𑀳𑁂𑀢𑀩𑁆𑀩𑀁. 𑀇𑀢𑁆𑀣𑀺𑀤𑀸𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀬𑀸𑀲𑀁 𑀓𑀸𑀲𑀜𑁆𑀘𑀺 𑀇𑀢𑁆𑀣𑀻𑀦𑀁 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀧𑀼𑀭𑀺𑀲𑀸𑀦𑀁 𑀤𑀸𑀦𑀁 𑀕𑀳𑁂𑀢𑀩𑁆𑀩𑀁. 𑀧𑀝𑀺𑀪𑀸𑀦𑀘𑀺𑀢𑁆𑀢𑀓𑀫𑁆𑀫𑀤𑀸𑀦𑀦𑁆𑀢𑀺 𑀫𑁂𑀣𑀼𑀦𑀲𑁂𑀯𑀦𑀧𑀝𑀺𑀪𑀸𑀦𑀘𑀺𑀢𑁆𑀢𑀓𑀫𑁆𑀫𑀤𑀸𑀦𑀁. 𑀮𑁄𑀓𑀲𑁆𑀲𑀸𑀢𑀺 𑀮𑁄𑀓𑁂𑀦. 𑀓𑀣𑁂𑀢𑀼𑀓𑀫𑁆𑀬𑀢𑀸𑀢𑀺 𑀓𑀣𑁂𑀢𑀼𑀓𑀸𑀫𑀢𑀸. ‘‘𑀦 𑀲𑀼𑀧𑁆𑀧𑀝𑀺𑀯𑀺𑀦𑁄𑀤𑀬𑀸’’𑀢𑀺 𑀇𑀫𑀺𑀦𑀸 𑀤𑀼𑀓𑁆𑀔𑁂𑀦 𑀧𑀝𑀺𑀯𑀺𑀦𑁄𑀤𑁂𑀢𑀩𑁆𑀩𑀸𑀢𑀺 𑀤𑀼𑀧𑁆𑀧𑀝𑀺𑀯𑀺𑀦𑁄𑀤𑀬𑀸, 𑀧𑀝𑀺𑀯𑀺𑀦𑁄𑀤𑁂𑀢𑀼𑀁 𑀦 𑀲𑀼𑀓𑀭𑀸𑀢𑀺 𑀤𑀲𑁆𑀲𑁂𑀢𑀺. 𑀉𑀧𑀸𑀬𑁂𑀦𑀸𑀢𑀺 𑀬𑀼𑀢𑁆𑀢𑀺𑀬𑀸.

𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑁄 𑀅𑀝𑁆𑀞𑀸𑀲𑀺 𑀓𑀺𑀭𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀁𑀲𑀦𑁆𑀢𑀺 𑀪𑀼𑀫𑁆𑀫𑀢𑁆𑀣𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀏𑀓𑀲𑁆𑀫𑀺𑀁 𑀅𑀁𑀲𑁂𑀢𑀺 𑀳𑀺 𑀅𑀢𑁆𑀣𑁄. 𑀩𑀼𑀤𑁆𑀥𑀸𑀭𑀫𑁆𑀫𑀡𑀦𑁆𑀢𑀺 𑀩𑀼𑀤𑁆𑀥𑀕𑀼𑀡𑀸𑀭𑀫𑁆𑀫𑀡𑀁. 𑀫𑀸𑀭𑁄𑀢𑀺 𑀤𑁂𑀯𑀧𑀼𑀢𑁆𑀢𑀫𑀸𑀭𑁄, 𑀕𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀕𑁄𑀫𑀬𑀦𑁆𑀢𑀺 𑀕𑁄𑀫𑀻𑀴𑁆𑀳𑀁. 𑀚𑀭𑀕𑁆𑀕𑀯𑁄𑀢𑀺 𑀚𑀭𑀕𑁄𑀡𑁄. 𑀢𑀸𑀤𑀺𑀲𑀫𑁂𑀯𑀸𑀢𑀺 𑀕𑁄𑀫𑀬𑀯𑀺𑀧𑁆𑀧𑀓𑀺𑀭𑀡𑀲𑀪𑀸𑀯𑀫𑁂𑀯. 𑀯𑀺𑀧𑁆𑀧𑀓𑀸𑀭𑀦𑁆𑀢𑀺 𑀯𑀺𑀲𑁂𑀲𑀧𑀓𑀸𑀭𑁂𑀦 𑀓𑀭𑀡𑀁. 𑀯𑀗𑁆𑀓𑀧𑀸𑀤𑀦𑁆𑀢𑀺 𑀓𑀼𑀝𑀺𑀮𑀧𑀸𑀤𑀁. 𑀧𑀭𑀺𑀓𑀲𑀦𑁆𑀢𑁄𑀢𑀺 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀯𑀺𑀮𑁂𑀔𑀦𑁆𑀢𑁄. 𑀯𑀺𑀕𑀘𑁆𑀙𑀧𑀼𑀭𑀺𑀲𑁄𑀢𑀺 𑀯𑀺𑀓𑀸𑀭𑀁, 𑀯𑀺𑀭𑀽𑀧𑀁 𑀯𑀸 𑀕𑀢𑀧𑀼𑀭𑀺𑀲𑁄. ‘‘𑀯𑀺𑀪𑀘𑁆𑀙𑀧𑀼𑀭𑀺𑀲𑁄’’𑀢𑀺𑀧𑀺 𑀧𑀸𑀞𑁄, 𑀯𑀺𑀲𑁂𑀲𑁂𑀦 𑀲𑁄𑀪𑀡𑀁 𑀪𑀓𑁆𑀔𑀧𑀼𑀭𑀺𑀲𑁄𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀯 𑀧𑀸𑀞𑁄 𑀅𑀪𑀺𑀥𑀸𑀦𑀸𑀤𑀻𑀲𑀼 (𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 𑁧𑁦𑁨 𑀕𑀸𑀣𑀸𑀬𑀁) 𑀤𑀺𑀲𑁆𑀲𑀢𑀺. 𑀲𑀫𑀦𑁆𑀢𑀸𑀢𑀺 𑀓𑀝𑀅𑀦𑁆𑀥𑀓𑀸𑀭𑀯𑀺𑀳𑀸𑀭𑀲𑁆𑀲 𑀲𑀫𑀦𑁆𑀢𑀢𑁄. 𑀫𑀸𑀭𑁄 𑀲𑀺𑀬𑀸 𑀦𑀼 𑀔𑁄𑀢𑀺 𑀬𑁄𑀚𑀦𑀸. 𑀦 𑀅𑀲𑀓𑁆𑀔𑀺𑀁 𑀇𑀢𑀺 𑀆𑀳𑀸𑀢𑀺 𑀬𑁄𑀚𑀦𑀸. 𑀤𑀺𑀝𑁆𑀞𑀧𑀼𑀩𑁆𑀩𑁄𑀢𑀺 𑀧𑀼𑀩𑁆𑀩𑁂 𑀤𑀺𑀝𑁆𑀞𑁄. 𑀫𑀳𑀸𑀦𑀼𑀪𑀸𑀯𑁄𑀢𑀺 𑀤𑁂𑀯𑀺𑀤𑁆𑀥𑀺𑀬𑀸 𑀫𑀳𑀸𑀦𑀼𑀪𑀸𑀯𑁄. 𑀇𑀗𑁆𑀖𑀸𑀢𑀺 𑀉𑀬𑁆𑀬𑁄𑀚𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀉𑀬𑁆𑀬𑁄𑀚𑁂𑀫𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀪𑀸𑀯𑀦𑁆𑀢𑀺 𑀢𑀯 𑀅𑀢𑁆𑀢𑀪𑀸𑀯𑀁. 𑀢𑀸𑀤𑀺𑀲𑀁 𑀭𑀽𑀧𑀦𑁆𑀢𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀢𑁆𑀢𑀪𑀸𑀯𑀲𑀤𑀺𑀲𑀁 𑀭𑀽𑀧𑀁. 𑀢𑀁𑀲𑀭𑀺𑀓𑁆𑀔𑀓𑀦𑁆𑀢𑀺 𑀢𑁂𑀦 𑀭𑀽𑀧𑁂𑀦 𑀲𑀤𑀺𑀲𑀁. 𑀧𑀢𑀺𑀭𑀽𑀧𑀫𑁂𑀯 𑀲𑀤𑀺𑀲𑀝𑁆𑀞𑁂𑀦 𑀧𑀢𑀺𑀭𑀽𑀧𑀓𑀁, 𑀦 𑀏𑀓𑀁𑀲𑀲𑀤𑀺𑀲𑀁 𑀭𑀽𑀧𑀁 𑀓𑀺𑀜𑁆𑀘𑀺 𑀲𑀤𑀺𑀲𑀭𑀽𑀧𑀦𑁆𑀢𑀺 𑀅𑀢𑁆𑀣𑁄. 𑀲𑀓𑀢𑁆𑀢𑀪𑀸𑀯𑀦𑁆𑀢𑀺 𑀲𑀲𑁆𑀲 𑀏𑀲𑁄 𑀲𑀓𑁄, 𑀲𑁄𑀬𑁂𑀯 𑀅𑀢𑁆𑀢𑀪𑀸𑀯𑁄 𑀲𑀓𑀢𑁆𑀢𑀪𑀸𑀯𑁄, 𑀢𑀁. 𑀅𑀬𑀦𑁆𑀢𑀺 𑀫𑀸𑀭𑁄. 𑀓𑀣𑀦𑁆𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀪𑀕𑀯𑀸 𑀦 𑀲𑁄𑀪𑀢𑀺 𑀦𑀼 𑀔𑁄, 𑀲𑁄𑀪𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀢𑀤𑁂𑀯 𑀲𑀫𑀢𑁆𑀣𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀲𑁄 𑀯𑀻𑀢𑀭𑀸𑀕𑀤𑁄𑀲𑀫𑁄𑀳𑁄’’𑀢𑀺. 𑀯𑀜𑁆𑀘𑀺𑀢𑁄𑀫𑁆𑀳𑀻𑀢𑀺 𑀅𑀳𑀁 𑀯𑀜𑁆𑀘𑀺𑀢𑁄 𑀅𑀫𑁆𑀳𑀺. 𑀓𑀺𑀁 𑀅𑀢𑁆𑀣𑀻𑀢𑀺 𑀓𑀺𑀁 𑀦𑀸𑀫 𑀅𑀢𑁆𑀣𑀺, 𑀫𑀫 𑀯𑀜𑁆𑀘𑀦𑀘𑀺𑀢𑁆𑀢𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀳𑀭𑀪𑀺𑀓𑁆𑀔𑀼 𑀧𑀝𑀺𑀮𑀪𑀢𑀻𑀢𑀺𑀆𑀤𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑀤𑀳𑀭𑀪𑀺𑀓𑁆𑀔𑀼 𑀅𑀝𑁆𑀞𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀓𑀸𑀭𑀙𑀟𑁆𑀟𑀦𑀺𑀁 𑀧𑀘𑁆𑀙𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀓𑀸𑀭𑀁 𑀙𑀟𑁆𑀟𑁂𑀢𑀺 𑀇𑀫𑀸𑀬𑀸𑀢𑀺 𑀲𑀗𑁆𑀓𑀸𑀭𑀙𑀟𑁆𑀟𑀦𑀻. 𑀢𑀺𑀲𑁆𑀲𑀤𑀢𑁆𑀢𑀢𑁆𑀣𑁂𑀭𑁄 𑀦𑀸𑀫 𑀧𑀼𑀘𑁆𑀙𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀸𑀯𑀸𑀢𑁄𑀢𑀺 𑀧𑁄𑀢𑀢𑁄. 𑀧𑀜𑁆𑀳𑀸𑀲𑀳𑀲𑁆𑀲𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀧𑀼𑀘𑁆𑀙𑀸𑀲𑀳𑀲𑁆𑀲𑀁. 𑀧𑀼𑀘𑁆𑀙𑀻𑀢𑀺 𑀤𑀳𑀭𑀁 𑀧𑀼𑀘𑁆𑀙𑀺. 𑀧𑀭𑀺𑀘𑁆𑀙𑀺𑀦𑁆𑀤𑀻𑀢𑀺 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀓𑀸𑀢𑀩𑁆𑀩𑀯𑀢𑁆𑀢𑀁 𑀦𑀺𑀝𑁆𑀞𑀧𑁂𑀲𑀻𑀢𑀺 𑀅𑀢𑁆𑀣𑁄. 𑀬𑁄𑀦𑀓𑀯𑀺𑀲𑀬𑀢𑁄𑀢𑀺 𑀬𑁄𑀦𑀓𑀮𑁄𑀓𑀢𑁄. 𑀅𑀝𑁆𑀞 𑀓𑀧𑁆𑀧𑁂 𑀅𑀦𑀼𑀲𑁆𑀲𑀭𑀻𑀢𑀺 𑀘𑁂𑀢𑀺𑀬𑀗𑁆𑀕𑀡𑀁 𑀤𑀺𑀲𑁆𑀯𑀸 𑀘𑀺𑀢𑁆𑀢𑀲𑁆𑀲 𑀧𑀲𑀻𑀤𑀦𑀢𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀅𑀝𑁆𑀞 𑀓𑀧𑁆𑀧𑁂 𑀅𑀦𑀼𑀲𑁆𑀲𑀭𑀺.

𑀏𑀓𑁄 𑀪𑀺𑀓𑁆𑀔𑀼 𑀕𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀤𑁂𑀯𑀢𑀸 𑀧𑀼𑀧𑁆𑀨𑀳𑀢𑁆𑀣𑀸 𑀅𑀝𑁆𑀞𑀁𑀲𑀽𑀢𑀺 𑀫𑀦𑀼𑀲𑁆𑀲𑀯𑁂𑀲𑀁 𑀕𑀳𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀢𑀭𑀕𑀸𑀫𑀯𑀸𑀲𑀺𑀓𑀸𑀢𑁆𑀣𑀸’’𑀢𑀺. 𑀢𑀼𑀫𑁆𑀳𑁂 𑀓𑀢𑀭𑀲𑁆𑀫𑀺𑀁 𑀕𑀸𑀫𑁂 𑀯𑀲𑀦𑀲𑀻𑀮𑀸 𑀅𑀢𑁆𑀣 𑀪𑀯𑀣𑀸𑀢𑀺 𑀬𑁄𑀚𑀦𑀸. 𑀇𑀥𑁂𑀯𑀸𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂. 𑀞𑀺𑀢𑀸𑀫𑁆𑀳𑀸𑀢𑀺 𑀫𑀬𑀁 𑀞𑀺𑀢𑀸 𑀅𑀫𑁆𑀳𑀸𑀢𑀺 𑀬𑁄𑀚𑀦𑀸.

𑀅𑀬𑀁 𑀓𑀣𑀸𑀢𑀺 𑀅𑀬𑀁 𑀯𑀓𑁆𑀔𑀫𑀸𑀦𑀓𑀣𑀸. 𑀓𑀺𑀁 𑀅𑀫𑀘𑁆𑀘𑀧𑀼𑀢𑁆𑀢𑁄 𑀧𑀸𑀲𑀸𑀤𑀺𑀓𑁄 𑀦𑀼 𑀔𑁄𑀢𑀺 𑀬𑁄𑀚𑀦𑀸. 𑀦𑁂𑀢𑀺 𑀅𑀫𑀘𑁆𑀘𑀧𑀼𑀢𑁆𑀢𑀅𑀪𑀬𑀢𑁆𑀣𑁂𑀭𑁂. 𑀜𑀸𑀢𑀓𑀸 𑀅𑀕𑀫𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀣𑁂𑀭𑀫𑀸𑀢𑀸𑀧𑀺 𑀧𑀳𑀺𑀡𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀺𑀲𑀤𑁆𑀤𑁂𑀦 𑀜𑀸𑀢𑀓𑁂 𑀅𑀧𑁂𑀓𑁆𑀔𑀢𑀺. 𑀧𑀳𑀺𑀡𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀼𑀢𑁆𑀢𑁄 𑀫𑁂’’𑀢𑀺𑀆𑀤𑀺. 𑀅𑀫𑀘𑁆𑀘𑀧𑀼𑀢𑁆𑀢𑁄 𑀆𑀭𑀽𑀴𑁆𑀳𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀪𑀬𑀢𑁆𑀣𑁂𑀭𑁄 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦𑀸𑀢𑀺 𑀅𑀫𑀘𑁆𑀘𑀧𑀼𑀢𑁆𑀢𑁂𑀦. 𑀬𑀼𑀕𑀕𑁆𑀕𑀸𑀳𑀦𑁆𑀢𑀺 𑀬𑀼𑀕𑀲𑁆𑀲 𑀕𑀸𑀳𑀁. ‘‘𑀫𑀳𑀮𑁆𑀮𑀓𑀢𑁆𑀣𑁂𑀭𑀲𑁆𑀲 𑀲𑀫𑁆𑀫𑀝𑁆𑀞𑀝𑁆𑀞𑀸𑀦𑁂 𑀓𑀘𑀯𑀭𑀁 𑀙𑀟𑁆𑀟𑁂𑀢𑁆𑀯𑀸’’𑀢𑀺 𑀯𑀘𑀦𑀁 𑀆𑀯𑀺 𑀓𑀭𑁄𑀦𑁆𑀢𑁄 𑀆𑀳 ‘‘𑀅𑀢𑀻𑀢𑀢𑁆𑀢𑀪𑀸𑀯𑁂 𑀓𑀺𑀭𑀸’’𑀢𑀺𑀆𑀤𑀺. 𑀅𑀫𑀘𑁆𑀘𑀧𑀼𑀢𑁆𑀢𑁄 𑀙𑀟𑁆𑀟𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀦𑁆𑀢𑀺 𑀲𑀫𑁆𑀫𑀚𑁆𑀚𑀦𑀯𑀢𑁆𑀢𑀁. 𑀢𑀢𑁆𑀭𑀸𑀢𑀺 ‘‘𑀲𑀢𑁆𑀣𑀼𑀲𑀸𑀲𑀦𑀁 𑀓𑀢𑀁 𑀳𑁄𑀢𑀻’’𑀢𑀺𑀯𑀘𑀦𑁂. 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀦𑀺𑀲𑀻𑀤𑀺 𑀓𑀺𑀭𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀕𑀯𑀸 𑀧𑀘𑁆𑀘𑀸𑀕𑀜𑁆𑀙𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀸𑀤𑀸𑀦𑀻𑀢𑀺 𑀧𑀸𑀤𑀲𑁆𑀲 𑀅𑀓𑁆𑀓𑀫𑀦𑀝𑁆𑀞𑀸𑀦𑀸𑀦𑀺, 𑀧𑀸𑀤𑀘𑁂𑀢𑀺𑀬𑀸𑀦𑀻𑀢𑀺 𑀅𑀢𑁆𑀣𑁄. 𑀣𑁂𑀭𑁄 𑀦𑀺𑀲𑀻𑀤𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀚𑀡𑁆𑀡𑀼𑀓𑁂𑀳𑀺 𑀧𑀢𑀺𑀝𑁆𑀞𑀸𑀬 ‘‘𑀧𑀸𑀤𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸’’𑀢𑀺 𑀧𑀸𑀞𑀲𑁂𑀲𑁄 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑁄. 𑀫𑁂 𑀦𑀺𑀲𑀺𑀦𑁆𑀦𑀪𑀸𑀯𑀁 𑀫𑁂 𑀲𑀢𑁆𑀣𑀸 𑀅𑀜𑁆𑀜𑀸𑀲𑀺 𑀯𑀢𑀸𑀢𑀺 𑀬𑁄𑀚𑀦𑀸. 𑀫𑁂𑀲𑀤𑁆𑀤𑁄 𑀳𑀺 𑀧𑀼𑀩𑁆𑀩𑀧𑀭𑀸𑀧𑁂𑀓𑁆𑀔𑁄. 𑀘𑁄𑀤𑀦𑀦𑁆𑀢𑀺 𑀤𑁄𑀲𑀸𑀭𑁄𑀧𑀦𑀁. 𑀓𑀸𑀭𑁂𑀲𑁆𑀲𑀸𑀫𑀻𑀢𑀺 𑀤𑀲𑀩𑀮𑀁 𑀓𑀸𑀭𑁂𑀲𑁆𑀲𑀸𑀫𑀺. 𑀪𑀕𑀯𑀸 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀢𑁄𑀲𑀻𑀢𑀺 𑀢𑁆𑀯𑀁 𑀕𑀢𑁄 𑀅𑀲𑀺, 𑀯𑀺𑀘𑀭𑀦𑁆𑀢𑀲𑁆𑀲 𑀢𑀼𑀬𑁆𑀳𑀁 𑀦 𑀧𑀢𑀺𑀭𑀽𑀧𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁄𑀢𑀺 𑀘𑁄𑀤𑀦𑀓𑀸𑀮𑀢𑁄.

𑀏𑀢𑁆𑀢𑀓𑁄 𑀯𑀺𑀦𑀺𑀘𑁆𑀙𑀬𑁄 𑀉𑀧𑀮𑀩𑁆𑀪𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀸𑀲𑀧𑀭𑀺𑀬𑀦𑁆𑀢𑀦𑁆𑀢𑀺 𑀯𑀘𑀦𑀧𑀭𑀺𑀘𑁆𑀙𑁂𑀤𑀁. 𑀅𑀬𑀦𑁆𑀢𑀺 𑀓𑀣𑀸. 𑀏𑀢𑁆𑀢𑀓𑀁 𑀯𑀘𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀬𑁆𑀳𑀽𑀧𑀕𑀦𑁆𑀢𑀺 𑀕𑀳𑁂𑀢𑀩𑁆𑀩𑀪𑀸𑀯𑀁 𑀉𑀧𑀕𑀫𑀦𑀁, 𑀕𑀡𑁆𑀳𑀺𑀢𑀼𑀁 𑀔𑀫𑀦𑀻𑀬𑀦𑁆𑀢𑀺 𑀅𑀢𑁆𑀣𑁄. 𑀢𑀸𑀦𑀻𑀢𑀺 𑀤𑁆𑀯𑁂 𑀫𑀽𑀮𑀸𑀦𑀺. 𑀧𑀼𑀦 𑀢𑀸𑀦𑀻𑀢𑀺 𑀲𑀫𑀼𑀤𑀬𑀪𑀽𑀢𑀸𑀦𑀺 𑀙 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀺. 𑀯𑀢𑁆𑀣𑀼𑀦𑁆𑀢𑀺 𑀫𑁂𑀣𑀼𑀦𑀸𑀤𑀺𑀯𑀢𑁆𑀣𑀼𑀁. 𑀇𑀢𑀺𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀞𑀫𑀦𑀬𑀁 𑀅𑀧𑁂𑀓𑁆𑀔𑀢𑀺. 𑀏𑀢𑁆𑀣 𑀧𑀞𑀫𑀦𑀬𑁂 𑀫𑀽𑀮𑁂𑀦 𑀲𑀫𑀼𑀤𑀬𑀲𑁆𑀲 𑀧𑀸𑀬𑀢𑁄 𑀅𑀪𑁂𑀤𑁄 𑀳𑁄𑀢𑀺, 𑀧𑀘𑁆𑀙𑀺𑀫𑀦𑀬𑁂 𑀧𑀦 𑀲𑀩𑁆𑀩𑀣𑀸 𑀪𑁂𑀤𑁄 𑀳𑁄𑀢𑀺. 𑀢𑀲𑁆𑀫𑀸 𑀧𑀘𑁆𑀙𑀺𑀫𑀦𑀬𑁄𑀬𑁂𑀯 𑀬𑀼𑀢𑁆𑀢𑀢𑀭𑁄𑀢𑀺 𑀤𑀝𑁆𑀞𑀩𑁆𑀩𑁄. ‘‘𑀯𑀽𑀧𑀲𑀫𑁆𑀫𑀢𑀻’’𑀢𑀺 𑀇𑀫𑀺𑀦𑀸 ‘‘𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀧𑀤𑀲𑁆𑀲 𑀲𑀫𑀼𑀘𑁆𑀙𑁂𑀤𑀦𑀺𑀭𑁄𑀥𑀁 𑀤𑀲𑁆𑀲𑁂𑀢𑀺. 𑀯𑀼𑀝𑁆𑀞𑀸𑀦𑁂𑀦𑀸𑀢𑀺 𑀧𑀭𑀺𑀯𑀸𑀲𑀸𑀤𑀺𑀯𑀺𑀦𑀬𑀓𑀫𑁆𑀫𑁂𑀦.

𑀢𑁂𑀢𑁆𑀢𑀺𑀁𑀲𑀫𑀽𑀮𑀸𑀦𑀁 𑀲𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀤𑁆𑀯𑀸𑀤𑀲 𑀫𑀽𑀮𑀸𑀦𑀻’’𑀢𑀺𑀆𑀤𑀺. 𑀏𑀓𑀁 𑀫𑀽𑀮𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀸𑀦𑀻𑀢𑀺 𑀢𑁂𑀢𑁆𑀢𑀺𑀁𑀲 𑀫𑀽𑀮𑀸𑀦𑀺. 𑀧𑀭𑀢𑁄𑀢𑀺 𑀧𑀭𑀲𑁆𑀫𑀺𑀁. ‘‘𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀻’’𑀢𑀺𑀆𑀤𑀺𑀦𑀸 𑀅𑀥𑀺𑀓𑀭𑀡𑀸𑀦𑀁 𑀲𑀫𑀼𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀺. 𑀘𑀢𑁆𑀢𑀸𑀭𑀺 𑀲𑀗𑁆𑀖𑀓𑀺𑀘𑁆𑀘𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀇𑀤𑀦𑁆𑀢𑀺 𑀯𑀢𑁆𑀣𑀼. 𑀲𑀢𑁆𑀢𑀦𑁆𑀦𑀁 𑀦𑀺𑀤𑀸𑀦𑀦𑁆𑀢𑀺 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀧𑀜𑁆𑀜𑀢𑁆𑀢𑀺𑀝𑁆𑀞𑀸𑀦𑀲𑀗𑁆𑀔𑀸𑀢𑀁 𑀦𑀺𑀤𑀸𑀦𑀁. 𑀏𑀢𑁆𑀣𑀸𑀢𑀺 𑀞𑀸𑀦𑁂. 𑀧𑀜𑁆𑀜𑀢𑁆𑀢𑀺𑀁 𑀦 𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 ‘‘𑀅𑀦𑀼𑀧𑀜𑁆𑀜𑀢𑁆𑀢𑀺𑀁 𑀦 𑀚𑀸𑀦𑀸𑀢𑀻’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀧𑀞𑀫𑀧𑀜𑁆𑀜𑀢𑁆𑀢𑀺 𑀕𑀳𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀧𑀞𑀫𑀧𑀜𑁆𑀜𑀢𑁆𑀢𑀺𑀁 𑀦 𑀚𑀸𑀦𑀸𑀢𑀻’’𑀢𑀺. 𑀅𑀦𑀼𑀧𑀜𑁆𑀜𑀢𑁆𑀢𑀻𑀢𑀺 𑀏𑀢𑁆𑀣 𑀅𑀦𑀼𑀲𑀤𑁆𑀤𑁄 𑀦𑀉𑀧𑀘𑁆𑀙𑀺𑀦𑁆𑀦𑀢𑁆𑀣𑁄𑀢𑀺 𑀆𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀧𑀜𑁆𑀜𑀢𑁆𑀢𑀺𑀁 𑀦 𑀚𑀸𑀦𑀸𑀢𑀻’’𑀢𑀺. 𑀧𑀘𑁆𑀙𑀸𑀢𑁆𑀣𑁄𑀧𑀺 𑀬𑀼𑀚𑁆𑀚𑀢𑁂𑀯 𑀧𑀞𑀫𑀧𑀜𑁆𑀜𑀢𑁆𑀢𑀺𑀢𑁄 𑀧𑀘𑁆𑀙𑀸 𑀧𑀜𑁆𑀜𑀢𑁆𑀢𑀢𑁆𑀢𑀸. 𑀅𑀦𑀼𑀲𑀦𑁆𑀥𑀺𑀯𑀘𑀦𑀧𑀣𑀦𑁆𑀢𑀺 𑀏𑀢𑁆𑀣 𑀅𑀦𑀼𑀲𑀦𑁆𑀥𑀻𑀦𑀁 𑀯𑀲𑁂𑀦 𑀯𑀘𑀦𑀧𑀣𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀣𑀸𑀦𑀼𑀲𑀦𑁆𑀥𑀺𑀯𑀺𑀦𑀺𑀘𑁆𑀙𑀬𑀸𑀦𑀼𑀲𑀦𑁆𑀥𑀺𑀯𑀲𑁂𑀦 𑀯𑀢𑁆𑀣𑀼’’𑀦𑁆𑀢𑀺. 𑀜𑀢𑁆𑀢𑀺𑀓𑀺𑀘𑁆𑀘𑀦𑁆𑀢𑀺 𑀜𑀢𑁆𑀢𑀺𑀬𑀸 𑀓𑀺𑀘𑁆𑀘𑀁. 𑀇𑀫𑀺𑀦𑀸 𑀜𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀲𑀸𑀫𑁆𑀬𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀓𑀭𑀥𑀸𑀢𑀼𑀲𑀫𑁆𑀩𑀦𑁆𑀥𑁂 𑀓𑀭𑀡𑀯𑀘𑀦𑀫𑁆𑀧𑀺 𑀬𑀼𑀚𑁆𑀚𑀢𑁂𑀯. 𑀓𑀭𑀡𑀦𑁆𑀢𑀺 𑀏𑀢𑁆𑀣 𑀘 𑀬𑀼𑀧𑀘𑁆𑀘𑀬𑀲𑁆𑀲 𑀓𑀫𑁆𑀫𑀢𑁆𑀣𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀺. 𑀦 𑀓𑁂𑀯𑀮𑀁 𑀜𑀢𑁆𑀢𑀺𑀓𑀫𑁆𑀫𑁂 𑀏𑀯 𑀜𑀢𑁆𑀢𑀺𑀓𑀺𑀘𑁆𑀘𑀁 𑀦 𑀚𑀸𑀦𑀸𑀢𑀺, 𑀅𑀣 𑀔𑁄 𑀜𑀢𑁆𑀢𑀺𑀤𑀼𑀢𑀺𑀬𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑁂𑀲𑀼𑀧𑀺 𑀦 𑀚𑀸𑀦𑀸𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀜𑀢𑁆𑀢𑀺𑀤𑀼𑀢𑀺𑀬𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑁂𑀲𑀽’’𑀢𑀺𑀆𑀤𑀺. 𑀧𑀼𑀩𑁆𑀩𑁂 𑀞𑀧𑁂𑀢𑀩𑁆𑀩𑀸𑀢𑀺 𑀜𑀢𑁆𑀢𑀺 𑀦𑀸𑀫 𑀓𑀫𑁆𑀫𑀯𑀸𑀘𑀸𑀬 𑀧𑀼𑀩𑁆𑀩𑁂 𑀞𑀧𑁂𑀢𑀩𑁆𑀩𑀸𑀢𑀺 𑀦 𑀚𑀸𑀦𑀸𑀢𑀺. 𑀇𑀫𑀺𑀦𑀸 𑀦𑀧𑀼𑀩𑁆𑀩𑀓𑀼𑀲𑀮𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀧𑀘𑁆𑀙𑀸’’𑀢𑀺 𑀇𑀫𑀺𑀦𑀸 𑀦𑀅𑀧𑀭𑀓𑀼𑀲𑀮𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀧𑀺𑀲𑀤𑁆𑀤𑁂𑀦 𑀧𑀞𑀫𑀦𑀬𑀁 𑀅𑀧𑁂𑀓𑁆𑀔𑀢𑀺. ‘‘𑀓𑀸𑀮𑀁 𑀦 𑀚𑀸𑀦𑀸𑀢𑀻’’𑀢𑀺 𑀇𑀫𑀺𑀦𑀸 𑀅𑀓𑀸𑀮𑀜𑁆𑀜𑀽𑀢𑀺 𑀧𑀤𑀲𑁆𑀲 𑀯𑀺𑀕𑁆𑀕𑀳𑀯𑀸𑀓𑁆𑀬𑀁 𑀤𑀲𑁆𑀲𑁂𑀢𑀺. 𑀓𑀸𑀮𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑀚𑁆𑀛𑀺𑀝𑁆𑀞𑁄’’𑀢𑀺𑀆𑀤𑀺.

‘‘𑀥𑀼𑀢𑀗𑁆𑀕𑁂 𑀆𑀦𑀺𑀲𑀁𑀲𑀁 𑀅𑀚𑀸𑀦𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀫𑀦𑁆𑀤𑀫𑁄𑀫𑀽𑀳𑀸𑀦𑀁 𑀨𑀮𑀁 𑀤𑀲𑁆𑀲𑁂𑀢𑀺. 𑀧𑀸𑀧𑀺𑀘𑁆𑀙𑁄𑀢𑀺 𑀏𑀢𑁆𑀣 𑀧𑀸𑀧𑀺𑀘𑁆𑀙𑁄 𑀦𑀸𑀫 𑀧𑀘𑁆𑀘𑀬𑀮𑀸𑀪𑀲𑁆𑀲 𑀧𑀢𑁆𑀣𑀦𑀸𑀢𑀺 𑀆𑀳 ‘‘𑀧𑀘𑁆𑀘𑀬𑀮𑀸𑀪𑀁 𑀧𑀢𑁆𑀣𑀬𑀫𑀸𑀦𑁄’’𑀢𑀺. 𑀓𑀸𑀬𑀯𑀺𑀯𑁂𑀓𑁄 𑀘 𑀘𑀺𑀢𑁆𑀢𑀯𑀺𑀯𑁂𑀓𑁄 𑀘 𑀉𑀧𑀥𑀺𑀯𑀺𑀯𑁂𑀓𑁄 𑀘 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑀁, 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑁄, 𑀧𑀼𑀩𑁆𑀩𑀧𑀤𑁂𑀲𑀼 𑀉𑀢𑁆𑀢𑀭𑀧𑀤𑀮𑁄𑀧𑁄. 𑀏𑀢𑀲𑁆𑀲𑀸𑀢𑀺 𑀆𑀭𑀜𑁆𑀜𑀺𑀓𑀲𑁆𑀲. 𑀇𑀫𑀺𑀦𑀸 𑀇𑀫𑀸𑀬 𑀅𑀢𑁆𑀣𑁄 𑀇𑀤𑀫𑀢𑁆𑀣𑁄, 𑀲𑁄 𑀏𑀢𑀲𑁆𑀲𑀢𑁆𑀣𑀻𑀢𑀺 𑀇𑀤𑀫𑀢𑁆𑀣𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀧𑁆𑀧𑀺𑀘𑁆𑀙𑀜𑁆𑀜𑁂𑀯𑀸𑀢𑀺𑀆𑀤𑀻𑀲𑀼 𑀏𑀯𑀲𑀤𑁆𑀤𑀸𑀦𑀁 𑀙𑀟𑁆𑀟𑁂𑀢𑀩𑁆𑀩𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀮𑁄𑀓𑀸𑀫𑀺𑀲’’𑀦𑁆𑀢𑀺.

𑀦𑀯𑀯𑀺𑀥𑀦𑁆𑀢𑀺 𑀤𑀺𑀯𑀲𑀯𑀲𑁂𑀦 𑀢𑀺𑀯𑀺𑀥𑀁, 𑀢𑀣𑀸 𑀓𑀢𑁆𑀢𑀩𑁆𑀩𑀸𑀓𑀸𑀭𑀯𑀲𑁂𑀦, 𑀢𑀣𑀸 𑀓𑀸𑀭𑀓𑀯𑀲𑁂𑀦𑀸𑀢𑀺 𑀦𑀯𑀯𑀺𑀥𑀁 𑀉𑀧𑁄𑀲𑀣𑀁.

𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺 𑀬𑀲𑁆𑀫𑀸 𑀦 𑀧𑀲𑀸𑀤𑀁 𑀲𑀁𑀯𑀢𑁆𑀢𑁂𑀢𑀺, 𑀦 𑀧𑀲𑀸𑀤𑀸𑀬 𑀯𑀸 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀅𑀧𑀸𑀲𑀸𑀤𑀺𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀧𑀸𑀲𑀸𑀤𑀺𑀓𑀦𑁆𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺 𑀅𑀓𑀼𑀲𑀮’’𑀦𑁆𑀢𑀺. 𑀯𑁂𑀮𑀁 𑀅𑀢𑀺𑀓𑁆𑀓𑀫𑁆𑀫𑀸𑀢𑀺 𑀪𑁄𑀚𑀦𑀸𑀤𑀺𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀇𑀫𑀺𑀦𑀸 𑀅𑀢𑀺𑀯𑁂𑀮𑀦𑁆𑀢𑀺 𑀏𑀢𑁆𑀣 𑀅𑀢𑀺𑀲𑀤𑁆𑀤𑀲𑁆𑀲 𑀅𑀢𑀺𑀓𑁆𑀓𑀫𑀦𑀢𑁆𑀣𑀜𑁆𑀘 ‘‘𑀅𑀢𑀺𑀯𑁂𑀮’’𑀦𑁆𑀢𑀺 𑀧𑀤𑀲𑁆𑀲 ‘‘𑀯𑀺𑀳𑀭𑀢𑁄’’𑀢𑀺 𑀧𑀤𑁂 𑀓𑀺𑀭𑀺𑀬𑀯𑀺𑀲𑁂𑀲𑀦𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀺. 𑀅𑀧𑁆𑀧𑀁 𑀓𑀸𑀮𑀦𑁆𑀢𑀺 𑀬𑁄𑀚𑀦𑀸. 𑀅𑀯𑀢𑀭𑀡𑀁 𑀑𑀢𑀸𑀭𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀑𑀢𑀭𑀡’’𑀦𑁆𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀧𑀜𑁆𑀘𑀓𑁂𑀲𑀼.

𑀇𑀢𑀺 𑀧𑀜𑁆𑀘𑀓𑀯𑀸𑀭𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀏𑀓𑀼𑀢𑁆𑀢𑀭𑀺𑀓𑀦𑀬𑁄 𑀙𑀓𑁆𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁬. 𑀙𑀓𑁆𑀓𑁂𑀲𑀼 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀇𑀢𑀻𑀢𑀺 𑀏𑀯𑀁. 𑀇𑀫𑀸 𑀙 𑀲𑀸𑀫𑀻𑀘𑀺𑀬𑁄𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀙𑀲𑀼 𑀆𑀓𑀸𑀭𑁂𑀲𑀼. 𑀲𑀢𑀺𑀲𑀫𑁆𑀫𑁄𑀲𑁂𑀦𑀸𑀢𑀺 𑀲𑀢𑀺𑀬𑀸 𑀯𑀺𑀧𑁆𑀧𑀯𑀸𑀲𑁂𑀦.

𑀢𑀢𑁆𑀣𑀸𑀢𑀺 𑀘𑀼𑀤𑁆𑀤𑀲𑀲𑀼 𑀧𑀭𑀫𑁂𑀲𑀼. 𑀢𑀢𑁄𑀢𑀺 𑀙𑀓𑁆𑀓𑀢𑁄. 𑀏𑀓𑀁 𑀅𑀧𑀦𑁂𑀢𑁆𑀯𑀸𑀢𑀺 𑀬𑀁𑀓𑀺𑀜𑁆𑀘𑀺 𑀏𑀓𑀁 𑀅𑀧𑀦𑁂𑀢𑁆𑀯𑀸. 𑀲𑁂𑀲𑁂𑀲𑀽𑀢𑀺 𑀙𑀳𑀺 𑀧𑀭𑀫𑁂𑀳𑀺 𑀲𑁂𑀲𑁂𑀲𑀼 𑀅𑀝𑁆𑀞𑀲𑀼 𑀧𑀭𑀫𑁂𑀲𑀼. 𑀅𑀜𑁆𑀜𑀸𑀦𑀺𑀧𑀺 𑀙𑀓𑁆𑀓𑀸𑀦𑀻𑀢𑀺 𑀧𑀞𑀫𑀙𑀓𑁆𑀓𑀢𑁄 𑀅𑀜𑁆𑀜𑀸𑀦𑀺𑀧𑀺 𑀅𑀝𑁆𑀞 𑀙𑀓𑁆𑀓𑀸𑀦𑀺.

𑀙 𑀆𑀧𑀢𑁆𑀢𑀺𑀬𑁄𑀢𑀺 𑀢𑀻𑀡𑀺 𑀙𑀓𑁆𑀓𑀸𑀦𑀻𑀢𑀺 ‘‘𑀙 𑀆𑀧𑀢𑁆𑀢𑀺𑀬𑁄’’𑀢𑀺 𑀯𑀼𑀢𑁆𑀢𑀸𑀦𑀺 𑀢𑀻𑀡𑀺 𑀙𑀓𑁆𑀓𑀸𑀦𑀻𑀢𑀺 𑀬𑁄𑀚𑀦𑀸. 𑀯𑀼𑀢𑁆𑀢𑀤𑁆𑀯𑀬𑀁 𑀏𑀓𑀁 𑀓𑀢𑁆𑀯𑀸. 𑀦𑁆𑀳𑀸𑀦𑁂𑀢𑀺 𑀦𑁆𑀳𑀸𑀦𑀲𑀺𑀓𑁆𑀔𑀸𑀧𑀤𑁂. 𑀙𑀓𑁆𑀓𑀤𑁆𑀯𑀬𑀦𑁆𑀢𑀺 𑀆𑀤𑀸𑀬𑀲𑀫𑀸𑀤𑀸𑀬𑀯𑀲𑁂𑀦 𑀙𑀓𑁆𑀓𑀤𑁆𑀯𑀬𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀙𑀓𑁆𑀓𑁂𑀲𑀼.

𑀇𑀢𑀺 𑀙𑀓𑁆𑀓𑀯𑀸𑀭𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀏𑀓𑀼𑀢𑁆𑀢𑀭𑀺𑀓𑀦𑀬𑁄 𑀲𑀢𑁆𑀢𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁭. 𑀲𑀢𑁆𑀢𑀓𑁂𑀲𑀼 𑀙𑀲𑀼 𑀲𑀸𑀫𑀻𑀘𑀻𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑁂𑀯𑀸𑀢𑀺 𑀲𑀫𑀣𑀓𑁆𑀔𑀦𑁆𑀥𑀓𑁂 𑀏𑀯.

𑀘𑀫𑁆𑀧𑁂𑀬𑁆𑀬𑀓𑁂𑀢𑀺 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁂. ‘‘𑀅𑀲𑀤𑁆𑀥𑀫𑁆𑀫𑀸’’𑀢𑀺 𑀧𑀤𑀲𑁆𑀲 𑀪𑁂𑀤𑀦𑀺𑀲𑁆𑀲𑀺𑀢𑀢𑀼𑀮𑁆𑀬𑀦𑀺𑀲𑁆𑀲𑀺𑀢𑀲𑀫𑀸𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀲𑀢𑀁 𑀥𑀫𑁆𑀫𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀅𑀲𑀢𑀁 𑀥𑀫𑁆𑀫𑀸’’𑀢𑀺 𑀇𑀫𑀺𑀦𑀸 𑀪𑁂𑀤𑀦𑀺𑀲𑁆𑀲𑀺𑀢𑀲𑀫𑀸𑀲𑀁 𑀤𑀲𑁆𑀲𑁂𑀢𑀺, ‘‘𑀅𑀲𑀦𑁆𑀢𑁄 𑀯𑀸 𑀥𑀫𑁆𑀫𑀸’’𑀢𑀺 𑀇𑀫𑀺𑀦𑀸 𑀢𑀼𑀮𑁆𑀬𑀦𑀺𑀲𑁆𑀲𑀺𑀢𑀲𑀫𑀸𑀲𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀲𑀢𑁆𑀢𑀓𑁂𑀲𑀼. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀇𑀢𑀺 𑀲𑀢𑁆𑀢𑀓𑀯𑀸𑀭𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀏𑀓𑀼𑀢𑁆𑀢𑀭𑀺𑀓𑀦𑀬𑁄 𑀅𑀝𑁆𑀞𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁮. 𑀅𑀝𑁆𑀞𑀓𑁂𑀲𑀼 𑀅𑀝𑁆𑀞𑀸𑀦𑀺𑀲𑀁𑀲𑀸𑀤𑀻𑀦𑀁 𑀤𑁂𑀲𑀦𑀸𑀓𑀸𑀭𑀤𑁂𑀲𑀦𑀝𑁆𑀞𑀸𑀦𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀫𑀬’’𑀦𑁆𑀢𑀺𑀆𑀤𑀺. 𑀢𑀢𑁆𑀣 ‘‘𑀦 𑀫𑀬𑀁…𑀧𑁂… 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀇𑀫𑀺𑀦𑀸 𑀤𑁂𑀲𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀺, ‘‘𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁂’’𑀢𑀺 𑀇𑀫𑀺𑀦𑀸 𑀤𑁂𑀲𑀦𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀺. 𑀢𑀫𑁆𑀧𑀻𑀢𑀺 𑀤𑀼𑀢𑀺𑀬𑀅𑀝𑁆𑀞𑀓𑀫𑁆𑀧𑀺.

𑀢𑁂𑀭𑀲𑀓𑁂 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀼𑀮𑀸𑀦𑀺 𑀤𑀽𑀲𑁂𑀢𑀻𑀢𑀺 𑀏𑀢𑁆𑀣 ‘‘𑀤𑀽𑀲𑁂𑀢𑀻’’𑀢𑀺 𑀓𑀺𑀭𑀺𑀬𑀸𑀧𑀤𑀲𑁆𑀲 𑀓𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀼𑀧𑁆𑀨𑁂𑀦 𑀯𑀸’’𑀢𑀺𑀆𑀤𑀺. 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀤𑀽𑀲𑁂𑀢𑀻𑀢𑀺 𑀬𑁄𑀚𑀦𑀸. ‘‘𑀮𑀸𑀪𑁂𑀦𑀸’’𑀢𑀺𑀆𑀤𑀺𑀦𑀸 ‘‘𑀅𑀝𑁆𑀞𑀳𑀺 𑀅𑀲𑀤𑁆𑀥𑀫𑁆𑀫𑁂𑀳𑀻’’𑀢𑀺 𑀏𑀢𑁆𑀣 𑀅𑀲𑀤𑁆𑀥𑀫𑁆𑀫𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀲𑀸𑀭𑀸𑀕𑁄𑀢𑀺 𑀲𑀁𑀭𑀸𑀕𑁄, 𑀪𑀼𑀲𑀁 𑀭𑀚𑁆𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀯𑀺𑀭𑁄𑀥𑁄𑀢𑀺 𑀤𑁄𑀲𑁄. 𑀲𑁄 𑀳𑀺 𑀬𑀲𑁆𑀫𑀸 𑀅𑀮𑀸𑀪𑀸𑀤𑀻𑀲𑀼 𑀧𑀝𑀺𑀯𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀧𑀝𑀺𑀯𑀺𑀭𑁄𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀸𑀴𑀺𑀬𑀦𑁆𑀢𑀺 𑀯𑀺𑀦𑀬𑀧𑀸𑀴𑀺𑀬𑀁.

𑀧𑀸𑀡𑀦𑁆𑀢𑀺𑀆𑀤𑀺𑀓𑀸 𑀤𑁆𑀯𑁂 𑀕𑀸𑀣𑀸𑀬𑁄 𑀤𑁆𑀯𑀸𑀤𑀲𑀓𑁆𑀔𑀭𑁂𑀦 𑀩𑀦𑁆𑀥𑀺𑀢𑀸. 𑀧𑀞𑀫𑀕𑀸𑀣𑀸𑀬 𑀢𑀢𑀺𑀬𑀧𑀸𑀤𑁂 𑀘𑀭𑀺𑀬𑀲𑀤𑁆𑀤𑁂𑀦 𑀬𑀼𑀢𑁆𑀢𑀢𑁆𑀢𑀸 𑀏𑀓𑀓𑁆𑀔𑀭𑁄 𑀅𑀥𑀺𑀓𑁄. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀧𑀸𑀡𑀁 𑀦 𑀳𑀦𑁂 𑀦 𑀖𑀸𑀢𑁂𑀬𑁆𑀬, 𑀆𑀤𑀺𑀦𑁆𑀦𑀜𑁆𑀘 𑀦 𑀆𑀤𑀺𑀬𑁂 𑀦 𑀕𑀡𑁆𑀳𑁂𑀬𑁆𑀬, 𑀫𑀼𑀲𑀸 𑀯𑀺𑀢𑀣𑀯𑀘𑀦𑀁 𑀦 𑀪𑀸𑀲𑁂 𑀦 𑀓𑀣𑁂𑀬𑁆𑀬, 𑀫𑀚𑁆𑀚𑀧𑁄 𑀫𑀚𑁆𑀚𑀧𑀸𑀦𑀁 𑀦 𑀘 𑀲𑀺𑀬𑀸, 𑀅𑀩𑁆𑀭𑀳𑁆𑀫𑀘𑀭𑀺𑀬𑀸 𑀫𑁂𑀣𑀼𑀦𑀸 𑀯𑀺𑀭𑀫𑁂𑀬𑁆𑀬, 𑀭𑀢𑁆𑀢𑀺𑀁 𑀯𑀺𑀓𑀸𑀮𑀪𑁄𑀚𑀦𑀁 𑀦 𑀪𑀼𑀜𑁆𑀚𑁂𑀬𑁆𑀬.

𑀫𑀸𑀮𑀁 𑀦 𑀥𑀸𑀭𑁂 𑀦 𑀥𑀸𑀭𑁂𑀬𑁆𑀬, 𑀕𑀦𑁆𑀥𑀜𑁆𑀘 𑀦 𑀆𑀘𑀭𑁂, 𑀲𑀦𑁆𑀣𑀢𑁂 𑀫𑀜𑁆𑀘𑁂 𑀘 𑀙𑀫𑀸𑀬𑀜𑁆𑀘 𑀲𑀬𑁂𑀣. 𑀏𑀢𑀜𑁆𑀳𑀺 𑀉𑀧𑁄𑀲𑀣𑀁 𑀅𑀝𑁆𑀞𑀗𑁆𑀕𑀺𑀓𑀁 𑀉𑀧𑁄𑀲𑀣𑀁 𑀇𑀢𑀺 𑀤𑀼𑀓𑁆𑀔𑀦𑁆𑀢𑀕𑀼𑀦𑀸 𑀩𑀼𑀤𑁆𑀥𑁂𑀦 𑀧𑀓𑀸𑀲𑀺𑀢𑀦𑁆𑀢𑀺 𑀆𑀳𑀼 𑀧𑀡𑁆𑀟𑀺𑀢𑀸𑀢𑀺.

𑀲𑀗𑁆𑀖𑀪𑁂𑀤𑀓𑁂𑀢𑀺 𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑁂. 𑀢𑀸𑀲𑀁𑀬𑁂𑀯𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀫𑁂𑀯. ‘‘𑀉𑀧𑀸𑀲𑀺𑀓𑀸 𑀅𑀝𑁆𑀞 𑀯𑀭𑀸𑀦𑀺 𑀬𑀸𑀘𑀢𑀻’’𑀢𑀺 𑀏𑀯𑀁 𑀲𑀸𑀫𑀜𑁆𑀜𑀯𑀘𑀦𑀲𑁆𑀲𑀸𑀧𑀺 𑀅𑀢𑁆𑀣𑀧𑀓𑀭𑀡𑀸𑀤𑀺𑀦𑀸 𑀯𑀺𑀲𑁂𑀲𑀯𑀺𑀲𑀬𑁄 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀲𑀸𑀔𑀸’’𑀢𑀺. 𑀲𑀸 𑀳𑀺 𑀯𑀺𑀯𑀺𑀥𑀸 𑀧𑀼𑀢𑁆𑀢𑀦𑀢𑁆𑀢𑀼𑀲𑀗𑁆𑀔𑀸𑀢𑀸 𑀲𑀸𑀔𑀸 𑀏𑀢𑀺𑀲𑁆𑀲𑀸𑀢𑁆𑀣𑀻𑀢𑀺 𑀯𑀺𑀲𑀸𑀔𑀸𑀢𑀺 𑀯𑀼𑀘𑁆𑀘𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀅𑀝𑁆𑀞𑀓𑁂𑀲𑀼. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀇𑀢𑀺 𑀅𑀝𑁆𑀞𑀓𑀯𑀸𑀭𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀏𑀓𑀼𑀢𑁆𑀢𑀭𑀺𑀓𑀦𑀬𑁄 𑀦𑀯𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁯. 𑀦𑀯𑀓𑁂𑀲𑀼 𑀅𑀘𑀭𑀻𑀢𑀺𑀆𑀤𑀻𑀦𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 ‘‘𑀘𑀭𑀢𑀺, 𑀘𑀭𑀺𑀲𑁆𑀲𑀢𑀻’’𑀢𑀺𑀆𑀤𑀻𑀦𑀺 (𑀤𑀻. 𑀦𑀺. 𑁩.𑁩𑁪𑁦; 𑀅𑀝𑁆𑀞. 𑀦𑀺. 𑁯.𑁨𑁯-𑁩𑁦) 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀅𑀦𑀢𑁆𑀣𑀘𑀭𑀡𑀁, 𑀓𑁄𑀧𑀓𑀭𑀡𑀁 𑀯𑀸. 𑀓𑀼𑀢𑁄𑀢𑀺 𑀓𑁂𑀦 𑀓𑀸𑀭𑀡𑁂𑀦. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀅𑀦𑀢𑁆𑀣𑀘𑀭𑀓𑀧𑀼𑀕𑁆𑀕𑀮𑁂. 𑀮𑀩𑁆𑀪𑀸𑀢𑀺 𑀮𑀤𑁆𑀥𑀸, 𑀲𑀓𑁆𑀓𑀸 𑀮𑀤𑁆𑀥𑀼𑀁 𑀦 𑀮𑀩𑁆𑀪𑀸 𑀏𑀯𑀸𑀢𑀺 𑀅𑀢𑁆𑀣𑁄. 𑀦𑀯𑀦𑁆𑀦𑀁 𑀯𑀸 𑀪𑀺𑀓𑁆𑀔𑀽𑀦𑀁 𑀓𑀸𑀭𑀡𑀸𑀢𑀺 𑀬𑁄𑀚𑀦𑀸. 𑀢𑀡𑁆𑀳𑀦𑁆𑀢𑀺 𑀤𑁆𑀯𑀻𑀲𑀼 𑀏𑀲𑀦𑀢𑀡𑁆𑀳𑀸𑀏𑀲𑀺𑀢𑀢𑀡𑁆𑀳𑀸𑀲𑀼 𑀏𑀲𑀦𑀢𑀡𑁆𑀳𑀁. 𑀧𑀝𑀺𑀘𑁆𑀘𑀸𑀢𑀺 𑀆𑀭𑀩𑁆𑀪. 𑀧𑀭𑀺𑀬𑁂𑀲𑀦𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀏𑀲𑀦𑀸. 𑀮𑀸𑀪𑁄𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀮𑀸𑀪𑁄. 𑀯𑀺𑀦𑀺𑀘𑁆𑀙𑀬𑁄𑀢𑀺 𑀜𑀸𑀡𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀺𑀢𑀓𑁆𑀓𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄 𑀯𑀺𑀦𑀺𑀘𑁆𑀙𑀬𑁄. 𑀘𑀢𑀼𑀩𑁆𑀩𑀺𑀥𑁄 𑀳𑀺 𑀥𑀫𑁆𑀫𑁄 ‘‘𑀏𑀢𑁆𑀢𑀓𑀁 𑀫𑀬𑁆𑀳𑀁 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀯𑀺𑀦𑀺𑀘𑁆𑀙𑀺𑀦𑀢𑀺 𑀅𑀦𑁂𑀦𑀸𑀢𑀺 𑀯𑀺𑀦𑀺𑀘𑁆𑀙𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀙𑀦𑁆𑀤𑀭𑀸𑀕𑁄𑀢𑀺 𑀩𑀮𑀯𑀭𑀸𑀕𑁄. 𑀅𑀚𑁆𑀛𑁄𑀲𑀸𑀦𑀦𑁆𑀢𑀺 ‘‘𑀅𑀳𑀁 𑀫𑀫’’𑀦𑁆𑀢𑀺 𑀩𑀮𑀯𑀲𑀦𑁆𑀦𑀺𑀝𑁆𑀞𑀸𑀦𑀁, 𑀧𑀭𑀺𑀕𑁆𑀕𑀳𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑀁. 𑀫𑀘𑁆𑀙𑀭𑀺𑀬𑀦𑁆𑀢𑀺 𑀧𑀭𑁂𑀲𑀁 𑀲𑀸𑀥𑀸𑀭𑀡𑀪𑀸𑀯𑀲𑁆𑀲 𑀅𑀲𑀳𑀦𑀢𑀸. 𑀆𑀭𑀓𑁆𑀔𑀸𑀢𑀺 𑀤𑁆𑀯𑀸𑀭𑀧𑀺𑀤𑀳𑀦𑀫𑀜𑁆𑀚𑀽𑀲𑀕𑁄𑀧𑀦𑀸𑀤𑀺𑀯𑀲𑁂𑀦 𑀆𑀪𑀼𑀲𑁄 𑀭𑀓𑁆𑀔𑀦𑀁. 𑀆𑀭𑀓𑁆𑀔𑀸𑀥𑀺𑀓𑀭𑀡𑀦𑁆𑀢𑀺 𑀆𑀭𑀓𑁆𑀔𑀓𑀸𑀭𑀡𑀸, 𑀳𑁂𑀢𑁆𑀯𑀢𑁆𑀣𑁂 𑀘𑁂𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀤𑀡𑁆𑀟𑀸𑀤𑀸𑀦𑀸𑀤𑀻𑀲𑀼 𑀧𑀭𑀦𑀺𑀲𑁂𑀥𑀦𑀢𑁆𑀣𑀁 𑀤𑀡𑁆𑀟𑀲𑁆𑀲 𑀆𑀤𑀸𑀦𑀁 𑀤𑀡𑁆𑀟𑀸𑀤𑀸𑀦𑀁. 𑀢𑀣𑀸 𑀏𑀓𑀢𑁄𑀥𑀸𑀭𑀸𑀤𑀺𑀦𑁄 𑀲𑀢𑁆𑀣𑀲𑁆𑀲 𑀆𑀤𑀸𑀦𑀁 𑀲𑀢𑁆𑀣𑀸𑀤𑀸𑀦𑀁. 𑀓𑀮𑀳𑁄𑀢𑀺 𑀓𑀸𑀬𑀓𑀮𑀳𑁄𑀧𑀺 𑀯𑀸𑀘𑀸𑀓𑀮𑀳𑁄𑀧𑀺. 𑀯𑀺𑀕𑁆𑀕𑀳𑁄𑀢𑀺 𑀯𑀺𑀭𑀼𑀤𑁆𑀥𑀯𑀲𑁂𑀦 𑀕𑀳𑀡𑀁. 𑀯𑀺𑀯𑀸𑀤𑁄𑀢𑀺 𑀯𑀺𑀭𑀼𑀤𑁆𑀥𑀯𑀲𑁂𑀦 𑀯𑀤𑀦𑀁. ‘‘𑀢𑀼𑀯𑀁 𑀢𑀼𑀯’’𑀦𑁆𑀢𑀺 𑀅𑀦𑀸𑀤𑀭𑀯𑀲𑁂𑀦 𑀯𑀤𑀦𑀁 𑀢𑀼𑀯𑀁𑀢𑀼𑀯𑀁 𑀯𑀸𑀤𑁄, 𑀧𑁂𑀲𑀼𑀜𑁆𑀜𑀯𑀲𑁂𑀦 𑀯𑀤𑀦𑀁 𑀧𑁂𑀲𑀼𑀜𑁆𑀜𑀯𑀸𑀤𑁄, 𑀫𑀼𑀲𑀸𑀯𑀲𑁂𑀦 𑀯𑀤𑀦𑀁 𑀫𑀼𑀲𑀸𑀯𑀸𑀤𑁄, 𑀤𑀡𑁆𑀟𑀸𑀤𑀸𑀦𑀜𑁆𑀘 𑀲𑀢𑁆𑀣𑀸𑀤𑀸𑀦𑀜𑁆𑀘 𑀓𑀮𑀳𑁄 𑀘 𑀯𑀺𑀕𑁆𑀕𑀳𑁄 𑀘 𑀯𑀺𑀯𑀸𑀤𑁄 𑀘 𑀢𑀼𑀯𑀁𑀢𑀼𑀯𑀁𑀯𑀸𑀤𑁄 𑀘 𑀧𑁂𑀲𑀼𑀜𑁆𑀜𑀯𑀸𑀤𑁄 𑀘 𑀫𑀼𑀲𑀸𑀯𑀸𑀤𑁄 𑀘 𑀤𑀡𑁆𑀟𑀸𑀤𑀸𑀦…𑀧𑁂… 𑀫𑀼𑀲𑀸𑀯𑀸𑀤𑀸. 𑀫𑀼𑀲𑀸𑀯𑀸𑀤𑀸𑀢𑀺 𑀏𑀢𑁆𑀣 𑀯𑀸𑀤𑀲𑀤𑁆𑀤𑁄 ‘‘𑀢𑀼𑀯𑀁 𑀢𑀼𑀯’’𑀦𑁆𑀢𑀺 𑀘 ‘‘𑀧𑁂𑀲𑀼𑀜𑁆𑀜’’𑀦𑁆𑀢𑀺 𑀘 𑀏𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑁄. ‘‘𑀅𑀳𑀁 𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀧𑀯𑀢𑁆𑀢𑀫𑀸𑀦𑀸𑀤𑀬𑁄𑀢𑀺 𑀬𑁄𑀚𑀦𑀸. 𑀅𑀥𑀺𑀝𑁆𑀞𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀦𑀻𑀢𑀺 𑀅𑀥𑀺𑀝𑁆𑀞𑀸𑀦𑀯𑀺𑀓𑀧𑁆𑀧𑀦𑀁 𑀏𑀓𑀢𑁄 𑀦 𑀓𑀸𑀢𑀩𑁆𑀩𑀁, 𑀅𑀥𑀺𑀝𑁆𑀞𑀺𑀢𑁂 𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀡𑀢𑀁 𑀮𑀸𑀪𑀁 𑀧𑀭𑀺𑀡𑀸𑀫𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀢𑁂𑀲𑀁𑀬𑁂𑀯 𑀤𑀸𑀦𑀸𑀦𑀦𑁆𑀢𑀺 𑀏𑀢𑁂𑀲𑀁𑀬𑁂𑀯 𑀅𑀥𑀫𑁆𑀫𑀺𑀓𑀸𑀦𑀁 𑀤𑀸𑀦𑀸𑀦𑀁. 𑀲𑀗𑁆𑀖𑀲𑁆𑀲 𑀦𑀺𑀦𑁆𑀦𑀦𑁆𑀢𑀺 𑀲𑀗𑁆𑀖𑀲𑁆𑀲 𑀦𑀢𑀁, 𑀦𑀸𑀫𑀺𑀢𑀁 𑀯𑀸 𑀮𑀸𑀪𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀖𑀲𑁆𑀲 𑀦𑀫𑀢𑀺, 𑀦𑀸𑀫𑀺𑀬𑀢𑀻𑀢𑀺 𑀯𑀸 𑀦𑀺𑀦𑁆𑀦𑀁. 𑀢𑁂𑀲𑀁𑀬𑁂𑀯𑀸𑀢𑀺 𑀢𑁂𑀲𑀁𑀬𑁂𑀯 𑀢𑀺𑀡𑁆𑀡𑀁 𑀥𑀫𑁆𑀫𑀺𑀓𑀤𑀸𑀦𑀸𑀦𑀁. 𑀢𑀬𑁄 𑀢𑀬𑁄 𑀤𑀸𑀦𑀧𑀝𑀺𑀕𑁆𑀕𑀳𑀧𑀭𑀺𑀪𑁄𑀕𑁂 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀦𑀯𑀓𑁄 𑀕𑀳𑁂𑀢𑀩𑁆𑀩𑁄. 𑀢𑀢𑁆𑀣𑁂𑀯𑀸𑀢𑀺 𑀲𑀫𑀣𑀓𑁆𑀔𑀦𑁆𑀥𑀓𑁂 𑀏𑀯. 𑀑𑀯𑀸𑀤𑀯𑀕𑁆𑀕𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄𑀯𑀸𑀤𑀯𑀕𑁆𑀕𑀲𑁆𑀲. 𑀢𑀢𑁆𑀣𑁂𑀯𑀸𑀢𑀺 𑀑𑀯𑀸𑀤𑀯𑀕𑁆𑀕𑀲𑁆𑀲 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀏𑀯. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀦𑀯𑀓𑁂𑀲𑀼.

𑀇𑀢𑀺 𑀦𑀯𑀓𑀯𑀸𑀭𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀏𑀓𑀼𑀢𑁆𑀢𑀭𑀺𑀓𑀦𑀬𑁄 𑀤𑀲𑀓𑀯𑀸𑀭𑀯𑀡𑁆𑀡𑀦𑀸

𑁩𑁩𑁦. 𑀤𑀲𑀓𑁂𑀲𑀼 𑀅𑀝𑁆𑀞𑀸𑀦𑁂 𑀯𑀸 𑀧𑀦𑀸𑀢𑀺 𑀅𑀓𑀸𑀭𑀡𑁂 𑀯𑀸 𑀧𑀦. 𑀢𑀢𑁆𑀣𑀸𑀢𑀺 𑀦𑀯𑀓𑁂𑀲𑀼. ‘‘𑀦𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺𑀆𑀤𑀺𑀯𑀲𑁂𑀦𑀸’’𑀢𑀺 𑀆𑀤𑀺𑀲𑀤𑁆𑀤𑁂𑀦 ‘‘𑀦𑀢𑁆𑀣𑀺 𑀬𑀺𑀝𑁆𑀞𑀁 𑀦𑀢𑁆𑀣𑀺 𑀳𑀼𑀢’’𑀦𑁆𑀢𑀺𑀆𑀤𑀬𑁄 (𑀥. 𑀲. 𑁧𑁨𑁨𑁧; 𑀫. 𑀦𑀺. 𑁯𑁪.𑁨𑁨𑁫; 𑁩.𑁯𑁧, 𑁧𑁧𑁬; 𑀲𑀁. 𑀦𑀺. 𑁩.𑁨𑁧𑁦; 𑀅. 𑀦𑀺. 𑁧𑁦.𑁧𑁭𑁬) 𑀦𑀯 𑀦𑀢𑁆𑀣𑀺𑀓𑀸 𑀲𑀗𑁆𑀕𑀳𑁂𑀢𑀩𑁆𑀩𑀸. ‘‘𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀆𑀤𑀺𑀯𑀲𑁂𑀦𑀸’’𑀢𑀺𑀆𑀤𑀺𑀲𑀤𑁆𑀤𑁂𑀦 (𑀤𑀻. 𑀦𑀺. 𑁧.𑁩𑁧; 𑀫. 𑀦𑀺. 𑁧.𑁨𑁬𑁯) ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺𑀆𑀤𑀬𑁄 (𑀫. 𑀦𑀺. 𑁧.𑁨𑁬𑁯) 𑀦𑀯 𑀅𑀦𑁆𑀢𑀕𑁆𑀕𑀸𑀳𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀺𑀧𑀭𑀻𑀢𑀸 𑀲𑀫𑁆𑀫𑀢𑁆𑀢𑀸𑀢𑀺 𑀤𑀲𑀳𑀺 𑀫𑀺𑀘𑁆𑀙𑀢𑁆𑀢𑁂𑀳𑀺 𑀯𑀺𑀧𑀭𑀻𑀢𑀸 𑀤𑀲 𑀲𑀫𑁆𑀫𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺 𑀲𑀫𑁆𑀫𑀸𑀜𑀸𑀡𑀁 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀻𑀢𑀺.

𑀤𑀲 𑀆𑀤𑀻𑀦𑀯𑀸 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀦𑁆𑀤𑀽𑀭𑀓𑁆𑀔𑀸𑀬𑀺𑀢𑀦𑁆𑀢𑀺 𑀫𑀽𑀲𑀺𑀓𑁂𑀦 𑀔𑀸𑀤𑀺𑀢𑀁. 𑀏𑀢𑁆𑀣 𑀳𑀺 𑀔𑁂𑀥𑀸𑀢𑀼 𑀔𑀸𑀤𑀦𑀢𑁆𑀣𑁄 𑀳𑁄𑀢𑀺. 𑀅𑀕𑁆𑀕𑀺𑀤𑀟𑁆𑀠𑀦𑁆𑀢𑀺 𑀅𑀕𑁆𑀕𑀺𑀦𑀸 𑀤𑀟𑁆𑀠𑀁. 𑀏𑀢𑁂𑀲𑀽𑀢𑀺 𑀏𑀢𑁂𑀲𑀼 𑀤𑀲𑀲𑀼 𑀧𑀁𑀲𑀼𑀓𑀽𑀮𑁂𑀲𑀼. 𑀉𑀤𑀓𑀲𑀸𑀝𑀺𑀓𑀁 𑀯𑀸 𑀲𑀁𑀓𑀘𑁆𑀘𑀺𑀓𑀁 𑀯𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀉𑀤𑀓𑀲𑀸𑀝𑀺𑀓𑀁 𑀯𑀸 𑀲𑀁𑀓𑀘𑁆𑀘𑀺𑀓𑀁 𑀯𑀸. 𑀏𑀢𑁆𑀣 𑀯𑀸𑀲𑀤𑁆𑀤𑁄 𑀅𑀦𑀺𑀬𑀫𑀯𑀺𑀓𑀧𑁆𑀧𑀢𑁆𑀣𑁄.

𑀧𑀡𑁆𑀡𑀲𑀦𑁆𑀣𑀸𑀭𑁄 𑀢𑀺𑀡𑀲𑀦𑁆𑀣𑀸𑀭𑁂𑀦 𑀲𑀗𑁆𑀕𑀳𑀺𑀢𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀤𑀲𑀓𑁂𑀲𑀼.

𑀇𑀢𑀺 𑀤𑀲𑀓𑀯𑀸𑀭𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀏𑀓𑀼𑀢𑁆𑀢𑀭𑀺𑀓𑀦𑀬𑁄 𑀏𑀓𑀸𑀤𑀲𑀓𑀯𑀸𑀭𑀯𑀡𑁆𑀡𑀦𑀸

𑁩𑁩𑁧. 𑀏𑀓𑀸𑀤𑀲𑀓𑁂𑀲𑀼 𑀢𑀺𑀡𑀧𑀸𑀤𑀼𑀓𑀸𑀢𑀺 𑀫𑀼𑀜𑁆𑀚𑀧𑀩𑁆𑀩𑀚𑁂𑀳𑀺 𑀅𑀯𑀲𑁂𑀲𑀸 𑀢𑀺𑀡𑀫𑀬𑀧𑀸𑀤𑀼𑀓𑀸. 𑀓𑀝𑁆𑀞𑀧𑀸𑀤𑀼𑀓𑀲𑀗𑁆𑀕𑀳𑀫𑁂𑀯𑀸𑀢𑀺 𑀓𑀝𑁆𑀞𑀧𑀸𑀤𑀼𑀓𑁂 𑀲𑀗𑁆𑀕𑀳𑀁 𑀏𑀯. 𑀢𑀫𑁆𑀩𑀮𑁄𑀳𑀫𑀬𑁂𑀦 𑀯𑀸 𑀤𑀸𑀭𑀼𑀫𑀬𑁂𑀦 𑀯𑀸𑀢𑀺 𑀯𑀸𑀲𑀤𑁆𑀤𑁄 𑀅𑀦𑀺𑀬𑀫𑀯𑀺𑀓𑀧𑁆𑀧𑀢𑁆𑀣𑁄. ‘‘𑀦𑀲𑀺 𑀅𑀦𑀺𑀫𑀺𑀢𑁆𑀢𑀸’’𑀢𑀺𑀆𑀤𑀬𑁄 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁪𑁨𑁩) 𑀦𑀺𑀤𑁆𑀤𑀺𑀝𑁆𑀞𑀸. 𑀢𑁂 𑀲𑀩𑁆𑀩𑁂𑀢𑀺 𑀲𑀩𑁆𑀩𑁂 𑀢𑁂 𑀕𑀡𑁆𑀞𑀺𑀓𑀯𑀺𑀥𑀸. 𑀦𑀕𑁆𑀕𑁂𑀦𑀸𑀢𑀺 𑀅𑀘𑁂𑀮𑀓𑁂𑀦. 𑀢𑁂 𑀲𑀩𑁆𑀩𑁂𑀢𑀺 𑀲𑀩𑁆𑀩𑁂 𑀢𑁂 𑀅𑀯𑀦𑁆𑀤𑀺𑀬𑀧𑀼𑀕𑁆𑀕𑀮𑀸. 𑀧𑀼𑀩𑁆𑀩𑁂𑀢𑀺 𑀤𑀲𑀓𑁂. 𑀓𑀫𑁆𑀫𑀯𑀕𑁆𑀕𑁂𑀢𑀺 𑀅𑀯𑀲𑀸𑀦𑁂 𑀓𑀫𑁆𑀫𑀯𑀕𑁆𑀕𑁂.

𑀲𑁄 𑀪𑀺𑀓𑁆𑀔𑀼 𑀬𑀁 𑀦 𑀦𑀺𑀕𑀘𑁆𑀙𑁂𑀬𑁆𑀬, 𑀏𑀢𑀁 𑀦 𑀦𑀺𑀕𑀢𑀁 𑀅𑀝𑁆𑀞𑀸𑀦𑀁 𑀅𑀦𑀯𑀓𑀸𑀲𑁄𑀢𑀺 𑀬𑁄𑀚𑀦𑀸. 𑀏𑀯𑀜𑁆𑀳𑀺 𑀲𑀢𑀺 𑀬𑀁𑀲𑀤𑁆𑀤𑁄 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑁄 𑀳𑁄𑀢𑀺, 𑀅𑀣 𑀯𑀸 𑀬𑀁 𑀬𑁂𑀦 𑀓𑀸𑀭𑀡𑁂𑀦 𑀦 𑀦𑀺𑀕𑀘𑁆𑀙𑁂𑀬𑁆𑀬, 𑀏𑀢𑀁 𑀓𑀸𑀭𑀡𑀁 𑀅𑀝𑁆𑀞𑀸𑀦𑀦𑁆𑀢𑀺 𑀬𑁄𑀚𑀦𑀸. 𑀅𑀦𑀥𑀺𑀕𑀢𑀁 𑀲𑀫𑀸𑀥𑀺𑀦𑁆𑀢𑀺 𑀬𑁄𑀚𑀦𑀸. 𑀲𑀤𑁆𑀥𑀫𑁆𑀫𑀸𑀲𑁆𑀲𑀸𑀢𑀺 𑀲𑀤𑁆𑀥𑀫𑁆𑀫𑀸 𑀅𑀲𑁆𑀲. 𑀅𑀲𑁆𑀲 𑀅𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀲𑀤𑁆𑀥𑀫𑁆𑀫𑀸 𑀦 𑀯𑁄𑀤𑀸𑀬𑀦𑁆𑀢𑀺 𑀦 𑀧𑀭𑀺𑀬𑁄𑀤𑀧𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀭𑁄𑀕𑀸𑀢𑀗𑁆𑀓𑀦𑁆𑀢𑀺 𑀭𑁄𑀕𑀲𑀗𑁆𑀔𑀸𑀢𑀁 𑀆𑀢𑀗𑁆𑀓𑀁. 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻𑀢𑀺 𑀦𑀺𑀭𑀬𑀫𑁆𑀳𑀺 𑀉𑀧𑀧𑀚𑁆𑀚𑀢𑀺. ‘‘𑀉𑀧𑀧𑀚𑁆𑀚𑀢𑀻’’𑀢𑀺 𑀏𑀢𑁆𑀣 𑀉𑀧𑀇𑀢𑀺 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑀉𑀧𑀲𑀕𑁆𑀕𑁂𑀦 𑀬𑀼𑀢𑁆𑀢𑀢𑁆𑀢𑀸 ‘‘𑀦𑀺𑀭𑀬’’𑀦𑁆𑀢𑀺 𑀏𑀢𑁆𑀣 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀅𑀗𑁆𑀕𑀼𑀢𑁆𑀢𑀭𑀧𑀸𑀴𑀺𑀬𑀁 (𑀅. 𑀦𑀺. 𑁧𑁧.𑁬).

𑀆𑀲𑁂𑀯𑀺𑀢𑀸𑀬𑀸𑀢𑀺 𑀏𑀢𑁆𑀣 𑀆𑀢𑁆𑀬𑀽𑀧𑀲𑀕𑁆𑀕𑁄 𑀆𑀤𑀺𑀓𑀫𑁆𑀫𑀢𑁆𑀣𑁄𑀢𑀺 𑀆𑀳 ‘‘𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑁂𑀯𑀺𑀢𑀸𑀬𑀸’’𑀢𑀺. ‘‘𑀦𑀺𑀧𑁆𑀨𑀸𑀤𑀺𑀢𑀸𑀬𑀸’’𑀢𑀺𑀇𑀫𑀺𑀦𑀸 𑀪𑀸𑀯𑀺𑀢𑀸𑀬𑀸𑀢𑀺 𑀏𑀢𑁆𑀣 𑀪𑀽𑀲𑀤𑁆𑀤𑁄 𑀲𑀢𑁆𑀢𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺, ‘‘𑀯𑀟𑁆𑀠𑀺𑀢𑀸𑀬𑀸’’𑀢𑀺 𑀇𑀫𑀺𑀦𑀸 𑀯𑀟𑁆𑀠𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀩𑀳𑀼𑀮𑀻𑀓𑀢𑀸𑀬𑀸𑀢𑀺 𑀏𑀢𑁆𑀣 𑀩𑀳𑀼𑀮𑀁 𑀦𑀸𑀫 𑀅𑀢𑁆𑀣𑀢𑁄 𑀧𑀼𑀦𑀧𑁆𑀧𑀼𑀦𑀦𑁆𑀢𑀺 𑀆𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀓𑀢𑀸𑀬𑀸’’𑀢𑀺. 𑀲𑀼𑀬𑀼𑀢𑁆𑀢𑀬𑀸𑀦𑀲𑀤𑀺𑀲𑀸𑀬𑀸𑀢𑀺 𑀲𑀼𑀝𑁆𑀞𑀼 𑀬𑀼𑀢𑁆𑀢𑁂𑀦 𑀬𑀸𑀦𑁂𑀦 𑀲𑀤𑀺𑀲𑀸𑀬. 𑀇𑀫𑀺𑀦𑀸 𑀬𑀸𑀦𑀻𑀓𑀢𑀸𑀬𑀸𑀢𑀺 𑀏𑀢𑁆𑀣 𑀦 𑀬𑀁𑀓𑀺𑀜𑁆𑀘𑀺 𑀬𑀸𑀦𑀁 𑀯𑀺𑀬 𑀓𑀢𑀁 𑀳𑁄𑀢𑀺, 𑀅𑀣 𑀔𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀆𑀭𑁄𑀳𑀦𑀻𑀬𑀢𑁆𑀢𑀸 𑀲𑀼𑀬𑀼𑀢𑁆𑀢𑀬𑀸𑀦𑀁 𑀯𑀺𑀬 𑀓𑀢𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀬𑀣𑀸 𑀓𑀭𑀺𑀬𑀫𑀸𑀦𑁂 𑀧𑀢𑀺𑀝𑁆𑀞𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀯𑀢𑁆𑀣𑀼𑀓𑀢𑀸𑀬𑀸𑀢𑀺 𑀏𑀢𑁆𑀣 𑀯𑀢𑁆𑀣𑀼𑀲𑀤𑁆𑀤𑁄 𑀧𑀢𑀺𑀝𑁆𑀞𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀯𑀲𑀢𑀺 𑀧𑀢𑀺𑀝𑁆𑀞𑀳𑀢𑀺 𑀏𑀢𑁆𑀣𑀸𑀢𑀺 𑀯𑀢𑁆𑀣𑀽𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. 𑀅𑀦𑀼𑀝𑁆𑀞𑀺𑀢𑀸𑀬𑀸𑀢𑀺 𑀏𑀢𑁆𑀣 𑀅𑀦𑀼𑀲𑀤𑁆𑀤𑁄 𑀦𑀉𑀧𑀘𑁆𑀙𑀺𑀦𑁆𑀦𑀢𑁆𑀣𑁄, 𑀞𑀸𑀥𑀸𑀢𑀼 𑀉𑀧𑁆𑀧𑀚𑁆𑀚𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑀼 𑀅𑀦𑀼 𑀧𑀯𑀢𑁆𑀢𑀺𑀢𑀸𑀬𑀸’’𑀢𑀺. ‘‘𑀲𑀫𑀦𑁆𑀢𑀢𑁄’’𑀢𑀺 𑀇𑀫𑀺𑀦𑀸 𑀧𑀭𑀺𑀘𑀺𑀢𑀸𑀬𑀸𑀢𑀺 𑀏𑀢𑁆𑀣 𑀧𑀭𑀺𑀲𑀤𑁆𑀤𑁄 𑀲𑀫𑀦𑁆𑀢𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀅𑀪𑀺𑀯𑀟𑁆𑀠𑀺𑀢𑀸𑀬𑀸’’𑀢𑀺 𑀇𑀫𑀺𑀦𑀸 𑀘𑀺𑀥𑀸𑀢𑀼 𑀯𑀟𑁆𑀠𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀫𑀸𑀭𑀤𑁆𑀥𑀸𑀬𑀸𑀢𑀺 𑀧𑀭𑀺𑀧𑀼𑀡𑁆𑀡𑀁 𑀆𑀭𑀸𑀥𑀺𑀢𑀸𑀬. 𑀭𑀸𑀥𑀥𑀸𑀢𑀼 𑀳𑀺 𑀲𑀸𑀥𑀦𑀢𑁆𑀣𑁄 𑀳𑁄𑀢𑀺. ‘‘𑀯𑀲𑀻𑀪𑀸𑀯𑀁 𑀉𑀧𑀦𑀻𑀢𑀸𑀬𑀸’’𑀢𑀺 𑀇𑀫𑀺𑀦𑀸 𑀢𑀤𑀢𑁆𑀣𑀁 𑀅𑀥𑀺𑀧𑁆𑀧𑀸𑀬𑁂𑀦 𑀤𑀲𑁆𑀲𑁂𑀢𑀺. ‘‘𑀦 𑀧𑀸𑀧𑀓𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀻’’𑀢𑀺 𑀯𑀘𑀦𑀲𑁆𑀲 𑀅𑀢𑁆𑀣𑀸𑀧𑀢𑁆𑀢𑀺𑀦𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀤𑁆𑀭𑀓𑀁 𑀧𑀦𑀸’’𑀢𑀺𑀆𑀤𑀺. 𑀯𑀼𑀤𑁆𑀥𑀺𑀓𑀸𑀭𑀡𑀪𑀽𑀢𑀦𑁆𑀢𑀺 𑀯𑀼𑀤𑁆𑀥𑀺𑀬𑀸 𑀓𑀸𑀭𑀡𑀪𑀽𑀢𑀁 𑀲𑀼𑀧𑀺𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀤𑁂𑀯𑀢𑀸 𑀭𑀓𑁆𑀔𑀦𑁆𑀢𑀻𑀢𑀺 𑀏𑀢𑁆𑀣 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂𑀧𑀺 𑀆𑀭𑀓𑁆𑀔𑀤𑁂𑀯𑀢𑀸𑀬𑁂𑀯 𑀕𑀳𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀆𑀭𑀓𑁆𑀔𑀤𑁂𑀯𑀢𑀸’’𑀢𑀺. 𑀆𑀭𑀓𑁆𑀔𑀤𑁂𑀯𑀢𑀸 𑀦𑀸𑀫 𑀪𑀼𑀫𑁆𑀫𑀤𑁂𑀯𑀸𑀤𑀬𑁄. 𑀔𑀺𑀧𑁆𑀧𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁. 𑀇𑀫𑀺𑀦𑀸 𑀢𑀼𑀯𑀝𑀁 𑀘𑀺𑀢𑁆𑀢𑀦𑁆𑀢𑀺 𑀏𑀢𑁆𑀣 𑀢𑀼𑀯𑀝𑀲𑀤𑁆𑀤𑁄 𑀔𑀺𑀧𑁆𑀧𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀉𑀢𑁆𑀢𑀭𑀺𑀫𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀢𑀺 𑀏𑀢𑁆𑀣 ‘‘𑀉𑀢𑁆𑀢𑀭𑀺’’𑀦𑁆𑀢𑀺 𑀧𑀤𑀲𑁆𑀲 𑀅𑀯𑀥𑀺𑀧𑁂𑀓𑁆𑀔𑀢𑁆𑀢𑀸 𑀢𑀲𑁆𑀲 𑀅𑀯𑀥𑀺 𑀘 𑀉𑀢𑁆𑀢𑀭𑀺𑀲𑀤𑁆𑀤𑀲𑁆𑀲 𑀇𑀥 𑀅𑀭𑀳𑀢𑁆𑀢𑀯𑀸𑀘𑀓𑀪𑀸𑀯𑀜𑁆𑀘 𑀯𑀺𑀥𑀥𑀸𑀢𑀼𑀬𑀸 𑀲𑀘𑁆𑀙𑀺𑀓𑀭𑀡𑀢𑁆𑀣𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑁂𑀢𑁆𑀢𑀸𑀛𑀸𑀦𑀢𑁄’’𑀢𑀺𑀆𑀤𑀺. 𑀢𑀢𑁆𑀣 ‘‘𑀫𑁂𑀢𑁆𑀢𑀸𑀛𑀸𑀦𑀢𑁄’’𑀢𑀺 𑀇𑀫𑀺𑀦𑀸 𑀅𑀯𑀥𑀺𑀁 𑀤𑀲𑁆𑀲𑁂𑀢𑀺, ‘‘𑀅𑀭𑀳𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 ‘‘𑀉𑀢𑁆𑀢𑀭𑀺’’𑀦𑁆𑀢𑀺 𑀧𑀤𑀲𑁆𑀲 𑀲𑀭𑀽𑀧𑀢𑁆𑀣𑀁 𑀤𑀲𑁆𑀲𑁂𑀢𑀺, ‘‘𑀅𑀲𑀘𑁆𑀙𑀺𑀓𑀭𑁄𑀦𑁆𑀢𑁄’’𑀢𑀺 𑀇𑀫𑀺𑀦𑀸 𑀯𑀺𑀥𑀥𑀸𑀢𑀼𑀬𑀸 𑀲𑀘𑁆𑀙𑀺𑀓𑀭𑀡𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀏𑀓𑀸𑀤𑀲𑀓𑁂𑀲𑀼.

𑀇𑀢𑀺 𑀏𑀓𑀸𑀤𑀲𑀓𑀯𑀸𑀭𑀯𑀡𑁆𑀡𑀦𑀸𑀧𑀭𑀺𑀬𑁄𑀲𑀸𑀦𑀸𑀬

𑀏𑀓𑀼𑀢𑁆𑀢𑀭𑀺𑀓𑀯𑀡𑁆𑀡𑀦𑀸𑀬

𑀬𑁄𑀚𑀦𑀸 𑀲𑀫𑀢𑁆𑀢𑀸.