𑀧𑀜𑁆𑀘𑀯𑀕𑁆𑀕𑁄

𑀓𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸

𑁪𑁮𑁨. 𑀓𑀫𑁆𑀫𑀯𑀕𑁆𑀕𑁂 ‘‘𑀕𑀡𑀦𑀧𑀭𑀺𑀘𑁆𑀙𑁂𑀤𑀯𑀘𑀦’’𑀦𑁆𑀢𑀺 𑀇𑀫𑀺𑀦𑀸 𑀦 𑀧𑀫𑀸𑀡𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸 𑀓𑀫𑁆𑀫𑀸𑀦𑀁 𑀢𑀢𑁄 𑀊𑀦𑀸𑀢𑀺𑀭𑁂𑀓𑀪𑀸𑀯𑀁 𑀦𑀺𑀯𑀸𑀭𑁂𑀢𑀺. 𑀕𑀡𑀺𑀬𑀢𑁂 𑀕𑀡𑀦𑀁, 𑀧𑀭𑀺𑀘𑁆𑀙𑀺𑀚𑁆𑀚𑀢𑀺 𑀅𑀦𑁂𑀦𑀸𑀢𑀺 𑀧𑀭𑀺𑀘𑁆𑀙𑁂𑀤𑁄, 𑀕𑀡𑀦𑀲𑁆𑀲 𑀧𑀭𑀺𑀘𑁆𑀙𑁂𑀤𑁄 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀅𑀣 𑀯𑀸 𑀕𑀡𑀺𑀬𑀢𑀺 𑀅𑀦𑁂𑀦𑀸𑀢𑀺 𑀕𑀡𑀦𑀁, 𑀢𑀫𑁂𑀯 𑀧𑀭𑀺𑀘𑁆𑀙𑁂𑀤𑁄 𑀕𑀡𑀦𑀧𑀭𑀺𑀘𑁆𑀙𑁂𑀤𑁄, 𑀲𑁄𑀬𑁂𑀯 𑀯𑀘𑀦𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑀯𑀘𑀦𑀁. 𑀅𑀧𑀮𑁄𑀓𑀦𑀓𑀫𑁆𑀫𑀁 𑀦𑀸𑀫𑀸𑀢𑀺 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀲𑀻𑀫𑀝𑁆𑀞𑀓𑀲𑀗𑁆𑀖𑀁 𑀲𑁄𑀥𑁂𑀢𑁆𑀯𑀸 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀁 𑀆𑀳𑀭𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑁂𑀦 𑀏𑀯 𑀦𑀬𑁂𑀦.

𑀢𑀢𑁆𑀣𑀸𑀢𑀺 𑀘𑀢𑀽𑀲𑀼 𑀓𑀫𑁆𑀫𑁂𑀲𑀼, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀧𑀦 𑀅𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀣𑀸𑀢𑀺 𑀤𑁆𑀯𑀻𑀲𑀼 𑀓𑀫𑁆𑀫𑁂𑀲𑀼. 𑀅𑀯𑀲𑁂𑀲𑀸𑀢𑀺 𑀙𑀳𑀺 𑀓𑀫𑁆𑀫𑁂𑀳𑀺 𑀅𑀯𑀲𑁂𑀲𑀸. 𑀬𑀤𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀓𑀢𑀁 𑀤𑀴𑁆𑀳𑀻𑀓𑀫𑁆𑀫𑀁 𑀦 𑀳𑁄𑀢𑀺, 𑀏𑀯𑀁 𑀲𑀢𑀺 𑀤𑀴𑁆𑀳𑀻𑀓𑀫𑁆𑀫𑀢𑁆𑀣𑀸𑀬 𑀓𑀺𑀦𑁆𑀢𑀺 𑀓𑀸𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀅𑀓𑁆𑀔𑀭𑀧𑀭𑀺𑀳𑀻𑀦𑀁 𑀯𑀸 𑀧𑀤𑀧𑀭𑀺𑀳𑀻𑀦𑀁 𑀯𑀸’’𑀢𑀺 𑀇𑀤𑀁 𑀅𑀓𑁆𑀔𑀭𑀧𑀤𑀸𑀦𑀁 𑀕𑀴𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀤𑀼𑀭𑀼𑀢𑁆𑀢𑀧𑀤𑀁 𑀯𑀸’’𑀢𑀺 𑀇𑀤𑀁 𑀲𑀺𑀣𑀺𑀮𑀥𑀦𑀺𑀢𑀸𑀤𑀺𑀅𑀧𑀭𑀺𑀧𑀼𑀡𑁆𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀢𑁆𑀣 ‘‘𑀤𑀼𑀭𑀼𑀢𑁆𑀢𑀓𑁆𑀔𑀭𑀁 𑀯𑀸’’𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀇𑀤𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀯𑀘𑀦𑀁. 𑀓𑀫𑁆𑀫𑀁 𑀳𑀼𑀢𑁆𑀯𑀸𑀢𑀺 𑀲𑀼𑀓𑀫𑁆𑀫𑀁 𑀳𑀼𑀢𑁆𑀯𑀸.

𑁪𑁮𑁩. 𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀅𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑁂𑀲𑀼 𑀅𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀸𑀦𑀺 𑀅𑀧𑁆𑀧𑀓𑀢𑁆𑀢𑀸 𑀧𑀞𑀫𑀁 𑀤𑀲𑁆𑀲𑁂𑀢𑁆𑀯𑀸 𑀲𑁂𑀲𑀸𑀦𑀁 𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀤𑁆𑀯𑀻𑀲𑀼, 𑀅𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀁 𑀦𑀸𑀫 𑀅𑀝𑁆𑀞𑀯𑀺𑀥𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀢𑁂𑀲𑀼 𑀔𑀦𑁆𑀥𑀓𑁂𑀲𑀼. ‘‘𑀲𑀼𑀓𑀢𑀁 𑀳𑁄𑀢𑀻’’𑀢𑀺 𑀯𑀘𑀦𑀲𑀸𑀫𑀢𑁆𑀣𑀺𑀬𑀢𑁄 𑀲𑀫𑁆𑀫𑀼𑀔𑀸𑀓𑀢𑀫𑁆𑀧𑀺 𑀲𑀼𑀓𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄𑀧𑀺 𑀕𑀳𑁂𑀢𑀩𑁆𑀩𑁄.

𑀲𑁂𑀲𑀸𑀦𑀻𑀢𑀺 𑀅𑀝𑁆𑀞𑀓𑀫𑁆𑀫𑁂𑀳𑀺 𑀲𑁂𑀲𑀸𑀦𑀺. 𑀏𑀢𑀸𑀦𑀻𑀢𑀺 𑀓𑀫𑁆𑀫𑀸𑀦𑀺. 𑀯𑀢𑁆𑀣𑀼𑀯𑀺𑀧𑀦𑁆𑀦𑀸𑀦𑀻𑀢𑀺 𑀯𑀢𑁆𑀣𑀼𑀦𑀸 𑀯𑀺𑀧𑀦𑁆𑀦𑀸𑀦𑀺.

𑀢𑁂𑀲𑀫𑁆𑀧𑀻𑀢𑀺 𑀧𑀝𑀺𑀧𑀼𑀘𑁆𑀙𑀸𑀓𑀭𑀡𑀻𑀬𑀸𑀦𑀫𑁆𑀧𑀺. 𑀏𑀢𑁆𑀣𑀸𑀢𑀺 ‘‘𑀧𑀝𑀺𑀧𑀼𑀘𑁆𑀙𑀸𑀓𑀭𑀡𑀻𑀬’’𑀦𑁆𑀢𑀺 𑀧𑀤𑁂. ‘‘𑀧𑀼𑀘𑁆𑀙𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀧𑀝𑀺𑀧𑀼𑀘𑁆𑀙𑀸𑀢𑀺 𑀧𑀤𑀲𑁆𑀲 𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀓𑀸𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀓𑀭𑀡𑀻𑀬𑀦𑁆𑀢𑀺 𑀏𑀢𑁆𑀣 𑀅𑀦𑀻𑀬𑀲𑀤𑁆𑀤𑀲𑁆𑀲 𑀓𑀫𑁆𑀫𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀬𑀣𑀸𑀤𑀺𑀦𑁆𑀦𑀸𑀬𑀸𑀳𑀺 𑀘𑀼𑀤𑀺𑀢𑀓𑁂𑀦 𑀬𑀣𑀸𑀤𑀺𑀦𑁆𑀦𑀸𑀬. 𑀯𑀺𑀧𑁆𑀧𑀮𑀧𑀦𑁆𑀢𑀲𑁆𑀲𑀸𑀢𑀺 𑀯𑀺𑀓𑀸𑀭𑁂𑀦 𑀬𑀁 𑀯𑀸 𑀢𑀁 𑀯𑀸 𑀯𑀘𑀦𑀁 𑀧𑀮𑀧𑀦𑁆𑀢𑀲𑁆𑀲 𑀘𑀼𑀤𑀺𑀢𑀓𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 ‘‘𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲𑀸’’𑀢𑀺𑀆𑀤𑀻𑀲𑀼.

𑀅𑀦𑀼𑀧𑁄𑀲𑀣𑀤𑀺𑀯𑀲𑁂𑀢𑀺 𑀉𑀧𑁄𑀲𑀣𑀤𑀺𑀯𑀲𑀢𑁄 𑀅𑀜𑁆𑀜𑀲𑁆𑀫𑀺𑀁 𑀤𑀺𑀯𑀲𑁂. 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑁄𑀲𑀣𑀤𑀺𑀯𑀲𑁄 𑀦𑀸𑀫𑀸’’𑀢𑀺𑀆𑀤𑀺. 𑀓𑀢𑁆𑀢𑀺𑀓𑀫𑀸𑀲𑀦𑁆𑀢𑀺 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀫𑀸𑀲𑀁. 𑀢𑀲𑁆𑀲 𑀧𑀯𑀸𑀭𑀡𑀫𑀸𑀲𑀢𑁆𑀢𑀸 ‘‘𑀞𑀧𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀲𑀸𑀫𑀕𑁆𑀕𑀺𑀤𑀺𑀯𑀲𑁄 𑀘 𑀬𑀣𑀸𑀯𑀼𑀢𑁆𑀢𑀸 𑀘𑀸𑀢𑀼𑀤𑁆𑀤𑀲𑀧𑀦𑁆𑀦𑀭𑀲𑀸 𑀘 𑀉𑀧𑁄𑀲𑀣𑀤𑀺𑀯𑀲𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀬𑀢𑁆𑀭𑀳𑀻𑀢𑀺 𑀬𑀲𑁆𑀫𑀺𑀁 𑀧𑀦 𑀯𑀺𑀳𑀸𑀭𑁂, 𑀞𑀧𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑁆𑀢𑀭𑀸𑀢𑀺 𑀘𑀸𑀢𑀼𑀤𑁆𑀤𑀲𑀻𑀧𑀦𑁆𑀦𑀭𑀲𑀻𑀦𑀁 𑀫𑀚𑁆𑀛𑁂.

𑀧𑀘𑁆𑀘𑀼𑀓𑁆𑀓𑀟𑁆𑀠𑀺𑀢𑁆𑀯𑀸 𑀞𑀧𑀺𑀢𑀤𑀺𑀯𑀲𑁄𑀢𑀺 𑀧𑀘𑁆𑀙𑀸 𑀉𑀧𑀭𑀺 𑀓𑀟𑁆𑀠𑀺𑀢𑁆𑀯𑀸 𑀞𑀧𑀺𑀢𑀁 𑀓𑀢𑁆𑀢𑀺𑀓𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀺𑀁 𑀯𑀸 𑀧𑀜𑁆𑀘𑀤𑀲𑀺𑀁 𑀯𑀸 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀥𑀸𑀧𑀻𑀢𑀺 𑀅𑀧𑀯𑀸𑀭𑀡𑀸𑀬 𑀧𑀯𑀸𑀭𑀡𑀝𑁆𑀞𑀸𑀦𑁂𑀧𑀺. 𑀧𑀸𑀴𑀺𑀬𑀫𑀸𑀕𑀢𑀦𑀬𑀢𑁄 𑀅𑀜𑁆𑀜𑀫𑁆𑀧𑀺 𑀦𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀺𑀘𑀸’’𑀢𑀺𑀆𑀤𑀺. 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑁆𑀢𑀺 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀁. 𑀬𑀲𑁆𑀲𑀸𑀢𑀺 𑀧𑀼𑀕𑁆𑀕𑀮𑀲𑁆𑀲. 𑀇𑀫𑀺𑀦𑀸 𑀓𑀫𑁆𑀫𑀸𑀭𑀳𑁄 𑀧𑀼𑀕𑁆𑀕𑀮𑁄 𑀯𑀢𑁆𑀣𑀼 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺.

𑁪𑁮𑁪. 𑀤𑀩𑁆𑀩𑀲𑁆𑀲 𑀅𑀕𑁆𑀕𑀡𑁆𑀳𑀦𑀁 𑀯𑀢𑁆𑀣𑀼𑀅𑀧𑀭𑀸𑀫𑀲𑀦𑀁 𑀦𑀸𑀫 𑀦 𑀳𑁄𑀢𑀺, 𑀅𑀣 𑀔𑁄 𑀦𑀸𑀫𑀲𑁆𑀲 𑀅𑀕𑁆𑀕𑀡𑁆𑀳𑀦𑀫𑁂𑀯𑀸𑀢𑀺 𑀆𑀳 ‘‘𑀢𑀲𑁆𑀲 𑀦𑀸𑀫𑀁 𑀦 𑀕𑀡𑁆𑀳𑀸𑀢𑀻’’𑀢𑀺. 𑀅𑀧𑀭𑀸𑀫𑀲𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀼𑀡𑀸𑀢𑀼 𑀫𑁂’’𑀢𑀺𑀆𑀤𑀺.

𑀧𑀼𑀕𑁆𑀕𑀮𑀁 𑀦 𑀧𑀭𑀸𑀫𑀲𑀢𑀻𑀢𑀺 𑀏𑀢𑁆𑀣 𑀧𑀼𑀕𑁆𑀕𑀮𑁄 𑀦𑀸𑀫 𑀉𑀧𑀚𑁆𑀛𑀸𑀬𑁄𑀢𑀺 𑀆𑀳 ‘‘𑀬𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲 𑀉𑀧𑀚𑁆𑀛𑀸𑀬𑁄’’𑀢𑀺. 𑀢𑀦𑁆𑀢𑀺 𑀉𑀧𑀚𑁆𑀛𑀸𑀬𑀁.

𑀲𑀩𑁆𑀩𑁂𑀦 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑀣𑀸 𑀲𑀩𑁆𑀩𑀁, 𑀦𑀺𑀧𑀸𑀢𑀲𑀫𑀼𑀤𑀸𑀬𑁄𑀬𑀁, 𑀲𑀩𑁆𑀩𑁂𑀦 𑀯𑀸 𑀆𑀓𑀸𑀭𑁂𑀦 𑀲𑀩𑁆𑀩𑀁 𑀜𑀢𑁆𑀢𑀺𑀦𑁆𑀢𑀺 𑀬𑁄𑀚𑀦𑀸.

𑀜𑀢𑁆𑀢𑀺𑀓𑀫𑁆𑀫𑁂 𑀧𑀞𑀫𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀜𑀢𑁆𑀢𑀺𑀝𑁆𑀞𑀧𑀦𑀫𑁆𑀧𑀺 𑀧𑀘𑁆𑀙𑀸 𑀜𑀢𑁆𑀢𑀺𑀁 𑀞𑀧𑁂𑀢𑀺𑀬𑁂𑀯 𑀦𑀸𑀫. 𑀇𑀢𑀺 𑀇𑀫𑁂𑀳𑀻𑀢𑀺𑀆𑀤𑀺 𑀦𑀺𑀕𑀫𑀦𑀁.

𑁪𑁮𑁫. ‘‘𑀯𑀼𑀢𑁆𑀢𑀦𑀬𑁂𑀦𑁂𑀯𑀸’’𑀢𑀺 𑀅𑀢𑀺𑀤𑀺𑀲𑀺𑀢𑁆𑀯𑀸𑀧𑀺 𑀜𑀢𑁆𑀢𑀺𑀓𑀫𑁆𑀫𑀯𑀸𑀘𑀸𑀦𑀁 𑀅𑀲𑀤𑀺𑀲𑀢𑁆𑀢𑀸 𑀅𑀧𑀭𑀸𑀫𑀲𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀯𑀁 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀦𑁂𑀲𑀦𑁆𑀢𑀺 𑀯𑀢𑁆𑀣𑀼𑀲𑀗𑁆𑀖𑀧𑀼𑀕𑁆𑀕𑀮𑀸𑀦𑀁, 𑀧𑀞𑀫𑀸𑀦𑀼𑀲𑁆𑀲𑀸𑀯𑀦𑁂 𑀯𑀸 𑀤𑀼𑀢𑀺𑀬𑀢𑀢𑀺𑀬𑀸𑀦𑀼𑀲𑁆𑀲𑀸𑀯𑀦𑀸𑀲𑀼 𑀯𑀸 𑀯𑀢𑁆𑀢𑀩𑁆𑀩𑁂 𑀯𑀤𑀦𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀸𑀯𑀦𑀁 𑀳𑀸𑀧𑁂𑀢𑀻𑀢𑀺 𑀏𑀢𑁆𑀣 𑀅𑀦𑀼𑀲𑀤𑁆𑀤𑁄 𑀮𑁄𑀧𑁄𑀢𑀺 𑀆𑀳 ‘‘𑀅𑀦𑀼𑀲𑁆𑀲𑀸𑀯𑀦𑀁 𑀦 𑀓𑀭𑁄𑀢𑀻’’𑀢𑀺. ‘‘𑀲𑀸𑀯𑀦𑀁 𑀳𑀸𑀧𑁂𑀢𑀻’’𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀦𑀼𑀲𑁆𑀲𑀸𑀯𑀦𑀁 𑀅𑀓𑀭𑁄𑀦𑁆𑀢𑁄𑀬𑁂𑀯 𑀲𑀸𑀯𑀦𑀁 𑀳𑀸𑀧𑁂𑀢𑀺 𑀦𑀸𑀫, 𑀅𑀣 𑀔𑁄 𑀅𑀦𑀼𑀲𑁆𑀲𑀸𑀯𑀦𑀸𑀬 𑀤𑀼𑀭𑀼𑀢𑁆𑀢𑀙𑀟𑁆𑀟𑀦𑀫𑁆𑀧𑀺 𑀳𑀸𑀧𑁂𑀢𑀺𑀬𑁂𑀯 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁄𑀧𑀻’’𑀢𑀺𑀆𑀤𑀺. ‘‘𑀲𑀓𑀺𑀫𑁂𑀯 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸’’𑀢𑀺 𑀇𑀫𑀺𑀦𑀸 𑀢𑀺𑀓𑁆𑀔𑀢𑁆𑀢𑀼𑀁 𑀅𑀧𑀭𑀺𑀧𑀽𑀭𑁂𑀦𑁆𑀢𑁄𑀬𑁂𑀯 𑀲𑀸𑀯𑀦𑀁 𑀳𑀸𑀧𑁂𑀢𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀲𑁆𑀲 𑀯𑀘𑀦𑀲𑁆𑀲 𑀲𑀸𑀫𑀢𑁆𑀣𑀺𑀬𑀢𑁄 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂 𑀏𑀓𑀓𑁆𑀔𑀢𑁆𑀢𑀼𑀢𑁄, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑁂 𑀢𑀺𑀓𑁆𑀔𑀢𑁆𑀢𑀼𑀢𑁄 𑀅𑀢𑀺𑀭𑁂𑀓𑀁 𑀓𑀫𑁆𑀫𑀯𑀸𑀘𑀁 𑀓𑀭𑁄𑀦𑁆𑀢𑁄 𑀦 𑀳𑀸𑀧𑁂𑀢𑀻𑀢𑀺 𑀜𑀸𑀬𑀢𑀺.

‘‘𑀙𑀟𑁆𑀟𑁂𑀢𑀻’’𑀢𑀺 𑀏𑀢𑁆𑀣 𑀙𑀟𑁆𑀟𑀦𑀲𑁆𑀲 𑀧𑀤𑀓𑁆𑀔𑀭𑀸𑀦𑀁 𑀕𑀴𑀺𑀢𑀪𑀸𑀯𑁂𑀦 𑀧𑀸𑀓𑀝𑀢𑁆𑀢𑀸 𑀢𑀁 𑀅𑀤𑀲𑁆𑀲𑁂𑀢𑁆𑀯𑀸 ‘‘𑀤𑀼𑀭𑀼𑀢𑁆𑀢𑀁 𑀓𑀭𑁄𑀢𑀻’’𑀢𑀺 𑀏𑀢𑁆𑀣 𑀤𑀼𑀭𑀼𑀢𑁆𑀢𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀼𑀭𑀼𑀢𑁆𑀢𑀁 𑀓𑀭𑁄𑀢𑀻𑀢𑀺 𑀏𑀢𑁆𑀣 𑀧𑀦𑀸’’𑀢𑀺𑀆𑀤𑀺. 𑀓𑀭𑁄𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀮𑀓𑁆𑀔𑁂𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄.

‘‘𑀲𑀺𑀣𑀺𑀮…𑀧𑁂… 𑀧𑀪𑁂𑀤𑁄’’𑀢𑀺 𑀬𑁆𑀯𑀸𑀬𑀁 𑀩𑁆𑀬𑀜𑁆𑀚𑀦𑀧𑁆𑀧𑀪𑁂𑀤𑁄 𑀯𑀼𑀢𑁆𑀢𑁄, 𑀅𑀬𑀁 𑀩𑁆𑀬𑀜𑁆𑀚𑀦𑀧𑁆𑀧𑀪𑁂𑀤𑁄𑀢𑀺 𑀬𑁄𑀚𑀦𑀸. 𑀕𑀸𑀣𑀸𑀬𑀁 𑀤𑀲𑀥𑀸𑀢𑀺 𑀤𑀲𑀧𑁆𑀧𑀓𑀸𑀭𑁂𑀦. 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸𑀢𑀺 𑀯𑀤𑁆𑀥𑁂𑀢𑀻𑀢𑀺 𑀩𑀼𑀤𑁆𑀥𑀺, 𑀩𑁆𑀬𑀜𑁆𑀚𑀦𑀫𑁂𑀯 𑀅𑀓𑁆𑀔𑀭𑀫𑁂𑀯 𑀲𑀺𑀣𑀺𑀮𑀸𑀤𑀺𑀯𑀲𑁂𑀦 𑀤𑀲𑀥𑀸 𑀩𑀼𑀤𑁆𑀥𑀺 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺, 𑀢𑀸𑀬. 𑀏𑀢𑁆𑀣 ‘‘𑀤𑀲𑀥𑀸’’𑀢𑀺 𑀧𑀤𑁂𑀦 ‘‘𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀻’’𑀢𑀺 𑀲𑀫𑀸𑀲𑀧𑀤𑀲𑁆𑀲 𑀅𑀦𑁆𑀢𑀭𑁂 𑀤𑀲𑀥𑀸𑀲𑀤𑁆𑀤𑀲𑁆𑀲 𑀮𑁄𑀧𑀁 𑀤𑀲𑁆𑀲𑁂𑀢𑀺 ‘‘𑀓𑀫𑁆𑀫𑀚𑀁 𑀏𑀯𑀸’’𑀢𑀺𑀆𑀤𑀻𑀲𑀼 (𑀯𑀺𑀲𑀼𑀤𑁆𑀥𑀺. 𑁨.𑁪𑁫𑁦; 𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀺. 𑁨.𑁪𑁫𑁦) 𑀯𑀺𑀬. 𑀏𑀢𑁆𑀣 𑀳𑀺 𑀏𑀯𑀲𑀤𑁆𑀤𑁂𑀦 𑀓𑀫𑁆𑀫𑁂𑀦 𑀏𑀯 𑀚𑀸𑀢𑀁 𑀓𑀫𑁆𑀫𑀚𑀦𑁆𑀢𑀺 𑀲𑀫𑀸𑀲𑀁 𑀓𑀢𑁆𑀯𑀸 𑀲𑀫𑀸𑀲𑀫𑀚𑁆𑀛𑁂 𑀏𑀯𑀲𑀤𑁆𑀤𑀮𑁄𑀧𑀁 𑀤𑀲𑁆𑀲𑁂𑀢𑀺. 𑀧𑀪𑁂𑀤𑁄𑀢𑀺 𑀯𑀺𑀲𑁂𑀲𑁄. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀲𑀺𑀣𑀺𑀮𑀜𑁆𑀘 𑀥𑀦𑀺𑀢𑀜𑁆𑀘 𑀤𑀻𑀖𑀜𑁆𑀘 𑀭𑀲𑁆𑀲𑀜𑁆𑀘 𑀕𑀭𑀼𑀓𑀜𑁆𑀘 𑀮𑀳𑀼𑀓𑀜𑁆𑀘 𑀦𑀺𑀕𑁆𑀕𑀳𑀺𑀢𑀜𑁆𑀘 𑀲𑀫𑁆𑀩𑀦𑁆𑀥𑀜𑁆𑀘 𑀯𑀯𑀢𑁆𑀣𑀺𑀢𑀜𑁆𑀘 𑀯𑀺𑀫𑀼𑀢𑁆𑀢𑀜𑁆𑀘𑀸𑀢𑀺 𑀤𑀲𑀥𑀸 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸𑀯 𑀧𑀪𑁂𑀤𑁄 𑀯𑀺𑀲𑁂𑀲𑁄 𑀜𑀸𑀢𑀩𑁆𑀩𑁄𑀢𑀺. ‘‘𑀲𑀺𑀣𑀺𑀮’’𑀦𑁆𑀢𑀺 𑀆𑀤𑀻𑀦𑀺 𑀤𑀲 𑀧𑀤𑀸𑀦𑀺 ‘‘𑀅𑀓𑁆𑀔𑀭𑀁 𑀧𑀤𑀁 𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀧𑀸𑀞𑀁𑀦𑀺𑀲𑁆𑀲𑀸𑀬 𑀯𑀼𑀢𑁆𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀕𑀸𑀣𑀸𑀬 𑀯𑀺𑀢𑁆𑀣𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀢𑁆𑀣 𑀳𑀻’’𑀢𑀺𑀆𑀤𑀺. 𑀅𑀕𑀸𑀴𑁆𑀳𑁂𑀦 𑀯𑀘𑀻𑀧𑀬𑁄𑀕𑁂𑀦 𑀯𑀢𑁆𑀢𑀩𑁆𑀩𑀁 𑀅𑀓𑁆𑀔𑀭𑀁 𑀲𑀺𑀣𑀺𑀮𑀁. 𑀕𑀸𑀴𑁆𑀳𑁂𑀦 𑀯𑀘𑀻𑀧𑀬𑁄𑀕𑁂𑀦 𑀯𑀢𑁆𑀢𑀩𑁆𑀩𑀁 𑀅𑀓𑁆𑀔𑀭𑀁 𑀥𑀦𑀺𑀢𑀁. 𑀢𑁂𑀲𑁆𑀯𑁂𑀯𑀸𑀢𑀺 𑀧𑀜𑁆𑀘𑀲𑀼 𑀏𑀯 𑀯𑀕𑁆𑀕𑁂𑀲𑀼. 𑀦 𑀓𑁂𑀯𑀮𑀁 𑀤𑀻𑀖𑀫𑁂𑀯 𑀕𑀭𑀼𑀓𑀁 𑀦𑀸𑀫, 𑀅𑀣 𑀔𑁄 𑀲𑀁𑀬𑁄𑀕𑀧𑀭𑀫𑁆𑀧𑀻𑀢𑀺 𑀆𑀳 ‘‘𑀬𑀁 𑀯𑀸’’𑀢𑀺𑀆𑀤𑀺. 𑀬𑀁 𑀅𑀓𑁆𑀔𑀭𑀁 𑀲𑀁𑀬𑁄𑀕𑀧𑀭𑀁 𑀓𑀢𑁆𑀯𑀸 𑀯𑀼𑀘𑁆𑀘𑀢𑀺, 𑀢𑀫𑁆𑀧𑀺 𑀕𑀭𑀼𑀓𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀲𑀁𑀬𑁄𑀕𑁄 𑀧𑀭𑁄 𑀬𑀲𑁆𑀲 𑀅𑀓𑁆𑀔𑀭𑀲𑁆𑀲𑀸𑀢𑀺 𑀲𑀁𑀬𑁄𑀕𑀧𑀭𑀁. ‘‘𑀲𑀁𑀬𑁄𑀕𑀧𑀤’’𑀦𑁆𑀢𑀺𑀧𑀺 𑀧𑀸𑀞𑁄. 𑀬𑀁 𑀅𑀲𑀁𑀬𑁄𑀕𑀧𑀭𑀁 𑀓𑀢𑁆𑀯𑀸 𑀯𑀼𑀘𑁆𑀘𑀢𑀺, 𑀢𑀫𑁆𑀧𑀺 𑀮𑀳𑀼𑀓𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀬𑀁 𑀲𑀸𑀦𑀼𑀦𑀸𑀲𑀺𑀓𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀁, 𑀢𑀁 𑀦𑀺𑀕𑁆𑀕𑀳𑀺𑀢𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀦𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀦𑀺𑀕𑁆𑀕𑀳𑀺𑀢𑀁 𑀦𑀸𑀫 𑀅𑀢𑁆𑀣𑀢𑁄 𑀞𑀸𑀦𑀓𑀭𑀡𑀸𑀦𑀁 𑀅𑀯𑀺𑀲𑁆𑀲𑀚𑁆𑀚𑀦𑀁 𑀅𑀫𑀼𑀜𑁆𑀘𑀦𑀦𑁆𑀢𑀺 𑀆𑀳 ‘‘𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸’’𑀢𑀺. 𑀬𑀁 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀯𑀼𑀘𑁆𑀘𑀢𑀺, 𑀢𑀁 𑀲𑀫𑁆𑀩𑀦𑁆𑀥𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀬𑀁 𑀅𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀯𑀼𑀘𑁆𑀘𑀢𑀺, 𑀢𑀁 𑀯𑀯𑀢𑁆𑀣𑀺𑀢𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀬𑀁 𑀅𑀦𑀺𑀕𑁆𑀕𑀳𑁂𑀢𑁆𑀯𑀸 𑀯𑀼𑀘𑁆𑀘𑀢𑀺, 𑀢𑀁 𑀯𑀺𑀫𑀼𑀢𑁆𑀢𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀅𑀦𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀅𑀦𑀺𑀕𑁆𑀕𑀳𑀁 𑀦𑀸𑀫 𑀅𑀢𑁆𑀣𑀢𑁄 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀆𑀳 ‘‘𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸’’𑀢𑀺.

𑀏𑀯𑀁 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀫𑁆𑀫𑀯𑀸𑀘𑀸𑀬 𑀉𑀘𑁆𑀘𑀸𑀭𑀡𑀯𑀺𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀤𑀲𑀲𑀼 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀻𑀲𑀼. 𑀢𑀣𑀸𑀲𑀤𑁆𑀤𑁂𑀦 𑀢𑀓𑀸𑀭𑀲𑁆𑀲 𑀣𑀓𑀸𑀭𑀓𑀭𑀡𑀜𑁆𑀘 𑀲𑀺𑀣𑀺𑀮𑀲𑁆𑀲 𑀥𑀦𑀺𑀢𑀓𑀭𑀡𑀜𑁆𑀘 𑀅𑀢𑀺𑀤𑀺𑀲𑀢𑀺, 𑀢𑀣𑀸 ‘‘𑀧𑀢𑁆𑀢𑀓𑀮𑁆𑀮𑀁 𑀏𑀲𑀸 𑀜𑀢𑁆𑀢𑀻’’𑀢𑀺𑀆𑀤𑀺𑀯𑀘𑀦𑀜𑁆𑀘 𑀲𑀺𑀣𑀺𑀮𑀲𑁆𑀲 𑀥𑀦𑀺𑀢𑀓𑀭𑀡𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸.

𑀇𑀢𑀻𑀢𑀺 𑀏𑀯𑀁. 𑀲𑀺𑀣𑀺𑀮𑁂 𑀓𑀢𑁆𑀢𑀩𑁆𑀩𑁂 𑀥𑀦𑀺𑀢𑀁 𑀓𑀭𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀢𑁆𑀢𑀸𑀭𑀺 𑀩𑁆𑀬𑀜𑁆𑀚𑀦𑀸𑀦𑀻𑀢𑀺 𑀘𑀢𑁆𑀢𑀸𑀭𑀺 𑀅𑀓𑁆𑀔𑀭𑀸𑀦𑀺. 𑀩𑁆𑀬𑀜𑁆𑀚𑀦𑀲𑀤𑁆𑀤𑁄 𑀳𑀺 𑀇𑀥 𑀅𑀓𑁆𑀔𑀭𑀯𑀸𑀘𑀓𑁄. 𑀘𑀢𑀲𑁆𑀲𑀦𑁆𑀦𑀁 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀻𑀦𑀁 𑀓𑀫𑁆𑀫𑀤𑀽𑀲𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀢𑀭𑀸𑀲𑀁 𑀅𑀤𑀽𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀢𑀭𑁂𑀲𑀼 𑀧𑀦𑀸’’𑀢𑀺𑀆𑀤𑀺. 𑀅𑀦𑀼𑀓𑁆𑀓𑀫𑀸𑀕𑀢𑀦𑁆𑀢𑀺 𑀅𑀭𑀺𑀬𑁂𑀳𑀺 𑀑𑀢𑀭𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀆𑀕𑀢𑀁. 𑀧𑀯𑁂𑀡𑀺𑀦𑁆𑀢𑀺 𑀲𑀦𑁆𑀢𑀢𑀺𑀁. 𑀯𑀺𑀦𑀸𑀲𑁂𑀢𑁆𑀯𑀸 𑀯𑀼𑀢𑁆𑀢𑁂 𑀓𑀺𑀁 𑀓𑀫𑁆𑀫𑀯𑀸𑀘𑀸𑀓𑁄𑀧𑁄 𑀳𑁄𑀢𑀻𑀢𑀺 𑀆𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺. 𑀦 𑀓𑀼𑀧𑁆𑀧𑀢𑀻𑀢𑀺 𑀦 𑀦𑀲𑁆𑀲𑀢𑀺. 𑀓𑀲𑁆𑀫𑀸 𑀧𑀦 𑀓𑀫𑁆𑀫𑀯𑀸𑀘𑀸 𑀦 𑀓𑀼𑀧𑁆𑀧𑀢𑀺, 𑀦𑀦𑀼 𑀓𑀫𑁆𑀫𑀁 𑀓𑁄𑀧𑁂𑀦𑁆𑀢𑀻 𑀓𑀫𑁆𑀫𑀯𑀸𑀘𑀸 𑀓𑀼𑀧𑁆𑀧𑀢𑀻𑀢𑀺 𑀆𑀳 ‘‘𑀇𑀫𑀸𑀦𑀺 𑀳𑀻’’𑀢𑀺𑀆𑀤𑀺. 𑀳𑀺 𑀬𑀲𑁆𑀫𑀸 𑀦 𑀓𑁄𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀓𑀫𑁆𑀫𑀯𑀸𑀘𑀸 𑀦 𑀓𑀼𑀧𑁆𑀧𑀢𑀻𑀢𑀺 𑀬𑁄𑀚𑀦𑀸.

𑀬𑀁 𑀧𑀦 𑀯𑀘𑀦𑀁 𑀲𑀼𑀢𑁆𑀢𑀦𑁆𑀢𑀺𑀓𑀢𑁆𑀣𑁂𑀭𑀸 𑀯𑀤𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀘𑁆𑀘𑀸𑀬𑀦𑀸𑀤𑀺𑀲𑀼𑀢𑁆𑀢𑀦𑁆𑀢𑀁 𑀓𑀭𑁄𑀦𑁆𑀢𑀻𑀢𑀺 𑀲𑀼𑀢𑁆𑀢𑀦𑁆𑀢𑀺𑀓𑀸, 𑀓𑀘𑁆𑀘𑀸𑀬𑀦𑀸𑀤𑀬𑁄, 𑀲𑀼𑀢𑁆𑀢𑀦𑁆𑀢𑀺𑀓𑀸 𑀘 𑀢𑁂 𑀣𑁂𑀭𑀸 𑀘𑁂𑀢𑀺 𑀲𑀼𑀢𑁆𑀢𑀦𑁆𑀢𑀺𑀓𑀢𑁆𑀣𑁂𑀭𑀸. 𑀦 𑀯𑀝𑁆𑀝𑀢𑀻𑀢𑀺 𑀅𑀓𑁆𑀔𑀭𑀯𑀺𑀓𑀸𑀭𑁄 𑀦 𑀯𑀝𑁆𑀝𑀢𑀺. 𑀯𑀺𑀦𑀬𑀥𑀭𑁂𑀦 𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀣𑀸𑀧𑀸𑀴𑀺𑀬𑀸𑀢𑀺 𑀪𑀕𑀯𑀢𑀸 𑀬𑀣𑀸𑀯𑀼𑀢𑁆𑀢𑀸𑀬 𑀧𑀸𑀴𑀺𑀬𑀸. 𑀩𑁆𑀬𑀜𑁆𑀚𑀦𑀦𑀺𑀭𑀼𑀢𑁆𑀢𑀺𑀬𑀸𑀢𑀺 𑀩𑁆𑀬𑀜𑁆𑀚𑀦𑀦𑀺𑀭𑀼𑀢𑁆𑀢𑀺𑀬𑀁. 𑀇𑀢𑀭𑀣𑀸𑀢𑀺 𑀯𑀼𑀢𑁆𑀢𑀤𑁄𑀲𑀧𑀭𑀺𑀳𑀭𑀡𑀢𑁄 𑀅𑀜𑁆𑀜𑁂𑀦 𑀧𑀓𑀸𑀭𑁂𑀦.

𑀅𑀓𑀸𑀮𑁂 𑀯𑀸 𑀲𑀸𑀯𑁂𑀢𑀻𑀢𑀺 𑀏𑀢𑁆𑀣 𑀅𑀓𑀸𑀮𑁄 𑀦𑀸𑀫 𑀅𑀦𑁄𑀓𑀸𑀲𑁄𑀢𑀺 𑀆𑀳 ‘‘𑀅𑀦𑁄𑀓𑀸𑀲𑁂’’𑀢𑀺. 𑀅𑀦𑁄𑀓𑀸𑀲𑁄 𑀦𑀸𑀫 𑀜𑀢𑁆𑀢𑀺𑀅𑀦𑀼𑀲𑁆𑀲𑀸𑀯𑀦𑀸𑀦𑀁 𑀧𑀼𑀩𑁆𑀩𑀸𑀧𑀭𑀯𑀺𑀢𑀣𑀦𑁆𑀢𑀺 𑀆𑀳 ‘‘𑀜𑀢𑁆𑀢𑀺𑀁 𑀅𑀝𑁆𑀞𑀧𑁂𑀢𑁆𑀯𑀸’’𑀢𑀺𑀆𑀤𑀺. 𑀧𑀞𑀫𑀁𑀬𑁂𑀯 𑀜𑀢𑁆𑀢𑀺𑀁 𑀅𑀝𑁆𑀞𑀧𑁂𑀢𑁆𑀯𑀸 𑀧𑀞𑀫𑀁𑀬𑁂𑀯 𑀅𑀦𑀼𑀲𑁆𑀲𑀸𑀯𑀦𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 𑀬𑁄𑀚𑀦𑀸. ‘‘𑀧𑀞𑀫𑀁𑀬𑁂𑀯𑀸’’𑀢𑀺 𑀳𑀺 𑀧𑀤𑀁 𑀧𑀼𑀩𑁆𑀩𑀸𑀧𑀭𑀸𑀧𑁂𑀓𑁆𑀔𑀁. 𑀇𑀢𑀻𑀢𑀺𑀆𑀤𑀺 𑀦𑀺𑀕𑀫𑀦𑀁.

𑁪𑁮𑁬. 𑀬𑀸 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽 𑀦 𑀕𑀡𑁆𑀳𑀸𑀢𑀺, 𑀅𑀬𑀁 𑀅𑀢𑀺𑀔𑀼𑀤𑁆𑀤𑀓𑀲𑀻𑀫𑀸 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽𑀢𑀺 𑀅𑀩𑁆𑀪𑀸𑀦𑀓𑀫𑁆𑀫𑁂 𑀓𑀫𑁆𑀫𑀸𑀭𑀳𑁂𑀦 𑀲𑀤𑁆𑀥𑀺𑀁 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽. 𑀬𑀢𑁆𑀣 𑀲𑀻𑀫𑀸𑀬𑀁 𑀦𑀺𑀲𑀻𑀤𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀬𑀁 𑀅𑀢𑀺𑀔𑀼𑀤𑁆𑀤𑀓𑀲𑀻𑀫𑀸 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀦𑀺𑀲𑀻𑀤𑀺𑀢𑀼𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀧𑀭𑀺𑀫𑀡𑁆𑀟𑀮𑀸𑀓𑀸𑀭𑁂𑀦 𑀦𑀺𑀲𑀻𑀤𑀺𑀢𑀼𑀁. 𑀢𑀢𑁆𑀣𑀸𑀢𑀺 𑀅𑀢𑀺𑀔𑀼𑀤𑁆𑀤𑀓𑁂. 𑀏𑀢𑁆𑀣𑀸𑀢𑀺 𑀲𑁂𑀲𑀲𑀻𑀫𑀸𑀲𑀼. 𑀬𑀸 𑀲𑀫𑁆𑀫𑀢𑀸 𑀳𑁄𑀢𑀺, 𑀅𑀬𑀁 𑀅𑀢𑀺𑀫𑀳𑀢𑀻 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀓𑁂𑀲𑀕𑁆𑀕𑀫𑀢𑁆𑀢𑁂𑀦𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀢𑀢𑁄 𑀅𑀢𑀺𑀭𑁂𑀓𑁂𑀦 𑀧𑀦 𑀧𑀕𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀖𑀝𑀺𑀢𑀁 𑀅𑀲𑀫𑁆𑀩𑀦𑁆𑀥𑀁 𑀦𑀺𑀫𑀺𑀢𑁆𑀢𑀁 𑀇𑀫𑀺𑀲𑁆𑀲𑀸𑀢𑀺 𑀅𑀖𑀝𑀺𑀢𑀦𑀺𑀫𑀺𑀢𑁆𑀢𑀸. 𑀔𑀡𑁆𑀟𑀦𑀺𑀫𑀺𑀢𑁆𑀢𑀪𑀸𑀯𑀁 𑀅𑀔𑀡𑁆𑀟𑀦𑀺𑀫𑀺𑀢𑁆𑀢𑀤𑀲𑁆𑀲𑀦𑁂𑀦 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀆𑀳 ‘‘𑀧𑀼𑀭𑀢𑁆𑀣𑀺𑀫𑀸𑀬𑀸’’𑀢𑀺𑀆𑀤𑀺. 𑀧𑀼𑀩𑁆𑀩𑀓𑀺𑀢𑁆𑀢𑀺𑀢𑀦𑁆𑀢𑀺 𑀧𑀞𑀫𑀓𑀺𑀢𑁆𑀢𑀺𑀢𑀁. 𑀢𑀢𑁆𑀣𑁂𑀯𑀸𑀢𑀺 𑀉𑀢𑁆𑀢𑀭𑀸𑀬 𑀏𑀯 𑀤𑀺𑀲𑀸𑀬. 𑀅𑀧𑀭𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀤𑀼𑀢𑀺𑀬𑀢𑁆𑀣𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀬𑀸 𑀲𑀫𑁆𑀫𑀢𑀸 𑀳𑁄𑀢𑀺, 𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀅𑀦𑀺𑀫𑀺𑀢𑁆𑀢𑀼𑀧𑀕𑀦𑁆𑀢𑀺 𑀬𑀣𑀸𑀪𑀽𑀢𑀓𑀣𑀦𑀯𑀺𑀲𑁂𑀲𑀦𑀫𑁂𑀯, 𑀦 𑀩𑁆𑀬𑀯𑀘𑁆𑀙𑁂𑀤𑀯𑀺𑀲𑁂𑀲𑀦𑀁 𑀢𑀘𑀲𑀸𑀭𑀸𑀤𑀺𑀕𑁆𑀕𑀳𑀡𑁂𑀦 𑀅𑀦𑀺𑀫𑀺𑀢𑁆𑀢𑀼𑀧𑀕𑀪𑀸𑀯𑀲𑁆𑀲 𑀧𑀸𑀓𑀝𑀢𑁆𑀢𑀸. 𑀅𑀦𑁆𑀢𑀭𑀸𑀢𑀺 𑀫𑀚𑁆𑀛𑁂. 𑀬𑀸 𑀲𑀫𑁆𑀫𑀢𑀸 𑀳𑁄𑀢𑀺, 𑀲𑀸 𑀙𑀸𑀬𑀸𑀦𑀺𑀫𑀺𑀢𑁆𑀢𑀸 𑀦𑀸𑀫, 𑀅𑀦𑀺𑀫𑀺𑀢𑁆𑀢𑀸 𑀦𑀸𑀫𑀸𑀢𑀺 𑀬𑁄𑀚𑀦𑀸.

𑀩𑀳𑀺 𑀞𑀺𑀢𑁄 𑀳𑀼𑀢𑁆𑀯𑀸 𑀲𑀫𑁆𑀫𑀦𑁆𑀦𑀢𑀻𑀢𑀺 𑀬𑁄𑀚𑀦𑀸. 𑀦𑀺𑀫𑀺𑀢𑁆𑀢𑀸𑀦𑀺 𑀧𑀦 𑀩𑀳𑀺 𑀞𑀢𑁆𑀯𑀸𑀧𑀺 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀲𑀫𑁆𑀫𑀢𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀅𑀲𑀫𑁆𑀫𑀢𑀸 𑀧𑀦 𑀧𑀕𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀻𑀫𑀸𑀬 𑀲𑀻𑀫𑀦𑁆𑀢𑀺 𑀧𑀤𑀸𑀦𑀁 𑀲𑀫𑁆𑀩𑀦𑁆𑀥𑀸𑀧𑁂𑀓𑁆𑀔𑀢𑁆𑀢𑀸, 𑀢𑀲𑁆𑀲 𑀘 𑀅𑀲𑀫𑀸𑀦𑀪𑀸𑀯𑀢𑁄 𑀢𑁂𑀲𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑁆𑀢𑀦𑁄 𑀲𑀻𑀫𑀸𑀬 𑀧𑀭𑁂𑀲𑀁 𑀲𑀻𑀫’’𑀦𑁆𑀢𑀺. 𑀲𑀫𑁆𑀪𑀺𑀦𑁆𑀤𑀢𑀻𑀢𑀺 𑀲𑀫𑁆𑀩𑀦𑁆𑀥𑀁 𑀓𑀭𑁄𑀢𑀺. 𑀏𑀢𑁆𑀣 𑀳𑀺 𑀪𑀺𑀤𑀺𑀥𑀸𑀢𑀼 𑀤𑁆𑀯𑀺𑀥𑀸𑀓𑀭𑀡𑀢𑁆𑀣𑀯𑀸𑀘𑀓𑁄, 𑀥𑀸𑀢𑁆𑀯𑀢𑁆𑀣𑀩𑀸𑀥𑀓𑁂𑀦 𑀲𑀁𑀢𑁆𑀬𑀽𑀧𑀲𑀕𑁆𑀕𑁂𑀦 𑀲𑀫𑁆𑀩𑀦𑁆𑀥𑀯𑀸𑀘𑀓𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀤𑁆𑀯𑀻𑀲𑀼 𑀲𑀻𑀫𑀸𑀲𑀼. 𑀇𑀢𑀻𑀢𑀺 𑀏𑀯𑀁. 𑀢𑀸𑀲𑀽𑀢𑀺 𑀲𑀻𑀫𑀸𑀲𑀼.

𑁪𑁮𑁭-𑁮. 𑀬𑀫𑁆𑀧𑀺 𑀓𑀫𑁆𑀫𑀧𑁆𑀧𑀢𑁆𑀢𑀙𑀦𑁆𑀤𑀸𑀭𑀳𑀮𑀓𑁆𑀔𑀡𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀧𑀭𑀺𑀲𑀢𑁄 𑀓𑀫𑁆𑀫𑀯𑀺𑀧𑀢𑁆𑀢𑀺𑀬𑀁. 𑀢𑀫𑁆𑀧𑀻𑀢𑀺 𑀓𑀫𑁆𑀫𑀧𑁆𑀧𑀢𑁆𑀢𑀙𑀦𑁆𑀤𑀸𑀭𑀳𑀮𑀓𑁆𑀔𑀡𑀫𑁆𑀧𑀺, 𑀯𑀼𑀢𑁆𑀢𑀫𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 ‘‘𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀧𑀓𑀢𑀢𑁆𑀢𑀸 𑀓𑀫𑁆𑀫𑀧𑁆𑀧𑀢𑁆𑀢𑀸’’𑀢𑀺 𑀧𑀸𑀞𑁂. 𑀅𑀦𑀼𑀓𑁆𑀔𑀺𑀢𑁆𑀢𑀸𑀢𑀺 𑀲𑀗𑁆𑀖𑁂𑀦 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀲𑁆𑀲 𑀅𑀓𑀢𑀢𑁆𑀢𑀸 𑀅𑀦𑀼𑀓𑁆𑀔𑀺𑀢𑁆𑀢𑀸. 𑀧𑀭𑀺𑀲𑀼𑀤𑁆𑀥𑀲𑀻𑀮𑀸𑀢𑀺 𑀧𑀸𑀭𑀸𑀚𑀺𑀓𑀁 𑀅𑀦𑀚𑁆𑀛𑀸𑀧𑀦𑁆𑀦𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀲𑀻𑀮𑀸. 𑀇𑀫𑁂𑀳𑀺 𑀧𑀤𑁂𑀳𑀺 𑀧𑀓𑀢𑀺 𑀅𑀢𑁆𑀢𑀸 𑀲𑀪𑀸𑀯𑁄 𑀏𑀢𑁂𑀲𑀦𑁆𑀢𑀺 𑀧𑀓𑀢𑀢𑁆𑀢𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀓𑀫𑁆𑀫𑀲𑁆𑀲 𑀅𑀭𑀳𑀸’’𑀢𑀺 𑀇𑀫𑀺𑀦𑀸 ‘‘𑀓𑀫𑁆𑀫𑀧𑁆𑀧𑀢𑁆𑀢𑀸’’𑀢𑀺 𑀧𑀤𑀲𑁆𑀲 𑀙𑀝𑁆𑀞𑀻𑀲𑀫𑀸𑀲𑀜𑁆𑀘 𑀧𑀢𑁆𑀢𑀲𑀤𑁆𑀤𑀲𑁆𑀲 𑀅𑀭𑀳𑀅𑀦𑀼𑀘𑁆𑀙𑀯𑀺𑀓𑀢𑁆𑀣𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀺. 𑀢𑁂𑀳𑀻𑀢𑀺 𑀘𑀢𑀽𑀳𑀺 𑀧𑀓𑀢𑀢𑁆𑀢𑁂𑀳𑀺. 𑀏𑀢𑀻𑀢𑀺 𑀆𑀕𑀘𑁆𑀙𑀢𑀺. 𑀅𑀯𑀲𑁂𑀲𑀸𑀢𑀺 𑀘𑀢𑀽𑀳𑀺 𑀧𑀓𑀢𑀢𑁆𑀢𑁂𑀳𑀺 𑀅𑀯𑀲𑁂𑀲𑀸. 𑀬𑀲𑁆𑀲 𑀧𑀦𑀸𑀢𑀺 𑀧𑀼𑀕𑁆𑀕𑀮𑀲𑁆𑀲 𑀧𑀦. 𑀓𑀫𑁆𑀫𑀸𑀭𑀳𑁄𑀢𑀺 𑀓𑀫𑁆𑀫𑀲𑁆𑀲 𑀅𑀭𑀳𑁄.

𑁪𑁮𑁯. 𑀏𑀢𑁆𑀣𑀸𑀢𑀺 𑀧𑀡𑁆𑀟𑀓𑀸𑀤𑀻𑀦𑀁 𑀅𑀯𑀢𑁆𑀣𑀼𑀪𑀸𑀯𑀤𑀲𑁆𑀲𑀦𑀝𑁆𑀞𑀸𑀦𑁂.

𑀅𑀧𑀮𑁄𑀓𑀦𑀓𑀫𑁆𑀫𑀓𑀣𑀸

𑁪𑁯𑁫-𑁬. 𑀢𑀢𑁆𑀣𑀸𑀢𑀺 𑀘𑀢𑀽𑀲𑀼 𑀓𑀫𑁆𑀫𑁂𑀲𑀼. 𑀏𑀢𑁆𑀣𑀸𑀢𑀺 𑀑𑀲𑀸𑀭𑀡𑀸𑀤𑀺𑀧𑀸𑀞𑁂. 𑀧𑀤𑀲𑀺𑀮𑀺𑀝𑁆𑀞𑀢𑀸𑀬𑀸𑀢𑀺 𑀮𑁄𑀓𑁂 𑀧𑀤𑀸𑀦𑀁 𑀲𑀺𑀮𑀺𑀝𑁆𑀞𑀪𑀸𑀯𑀢𑁄. 𑀢𑀢𑁆𑀣𑀸𑀢𑀺 𑀑𑀲𑀸𑀭𑀡𑀸𑀤𑀻𑀲𑀼 𑀧𑀜𑁆𑀘𑀲𑀼. 𑀓𑀡𑁆𑀝𑀓𑀲𑀸𑀫𑀡𑁂𑀭𑀲𑁆𑀲 𑀬𑀸 𑀲𑀸 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀸 𑀅𑀢𑁆𑀣𑀺, 𑀲𑀸 𑀦𑀺𑀲𑁆𑀲𑀸𑀭𑀡𑀸𑀢𑀺 𑀬𑁄𑀚𑀦𑀸. ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀼𑀢𑁆𑀢𑀁. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀳𑀺 𑀮𑀺𑀗𑁆𑀕𑀦𑀸𑀲𑀦𑀸𑀬 𑀓𑀸𑀭𑀡𑀁 𑀳𑁄𑀢𑀺. 𑀲𑁄𑀢𑀺 𑀲𑀸𑀫𑀡𑁂𑀭𑁄, ‘‘𑀦𑀺𑀲𑁆𑀲𑀚𑁆𑀚𑀸𑀧𑁂𑀢𑀩𑁆𑀩𑁄’’𑀢𑀺 𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀁, 𑀯𑀼𑀢𑁆𑀢𑀓𑀫𑁆𑀫𑀁 𑀯𑀸. 𑀢𑀁 𑀮𑀤𑁆𑀥𑀺𑀦𑁆𑀢𑀺 𑀥𑀸𑀢𑀼𑀓𑀫𑁆𑀫𑀁, 𑀅𑀯𑀼𑀢𑁆𑀢𑀓𑀫𑁆𑀫𑀁 𑀯𑀸. 𑀓𑀺𑀦𑁆𑀢𑀺 𑀓𑀸𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀏𑀯𑀜𑁆𑀘 𑀧𑀦 𑀓𑀫𑁆𑀫𑀁 𑀓𑀸𑀢𑀩𑁆𑀩’’𑀦𑁆𑀢𑀺.

𑀓𑀸𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀗𑁆𑀖𑀁 𑀪𑀦𑁆𑀢𑁂’’𑀢𑀺𑀆𑀤𑀺. 𑀬𑀁 𑀲𑀳𑀲𑁂𑀬𑁆𑀬𑀁 𑀮𑀪𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀲𑀳𑀲𑁂𑀬𑁆𑀬𑀲𑁆𑀲. 𑀅𑀮𑀸𑀪𑀸𑀬𑀸𑀢𑀺 𑀅𑀮𑀸𑀪𑀢𑁆𑀣𑀸𑀬. ‘‘𑀘𑀭 𑀧𑀺𑀭𑁂 𑀯𑀺𑀦𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀦𑀺𑀲𑁆𑀲𑀸𑀭𑀡𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀅𑀢𑁆𑀣𑁄 𑀧𑀦𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯.

𑀲𑁄𑀢𑀺 𑀲𑀫𑀡𑁂𑀭𑁄, 𑀑𑀲𑀸𑀭𑁂𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀲𑁆𑀯𑀸𑀬𑀦𑁆𑀢𑀺 𑀲𑁄 𑀅𑀬𑀁 𑀲𑀸𑀫𑀡𑁂𑀭𑁄, 𑀅𑀘𑁆𑀘𑀬𑀁 𑀤𑁂𑀲𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀭𑀢𑁄𑀢𑀺 𑀲𑀼𑀦𑁆𑀤𑀭𑀮𑀤𑁆𑀥𑀺𑀬𑀁 𑀭𑀢𑁄, 𑀤𑀼𑀮𑀤𑁆𑀥𑀺𑀢𑁄 𑀯𑀸 𑀲𑀼𑀝𑁆𑀞𑀼 𑀑𑀭𑀢𑁄. 𑀬𑀣𑀸 𑀧𑀼𑀭𑁂𑀢𑀺 𑀬𑀣𑀸 𑀧𑀼𑀩𑁆𑀩𑁂 𑀭𑀼𑀘𑁆𑀘𑀢𑀺, 𑀢𑀣𑀸𑀢𑀺 𑀬𑁄𑀚𑀦𑀸. 𑀓𑀸𑀬𑀲𑀫𑁆𑀪𑁄𑀕𑀲𑀸𑀫𑀕𑁆𑀕𑀺𑀤𑀸𑀦𑀦𑁆𑀢𑀺 𑀓𑀸𑀬𑁂𑀦 𑀘 𑀲𑀫𑁆𑀪𑁄𑀕𑁂𑀦 𑀘 𑀲𑀸𑀫𑀕𑁆𑀕𑀺𑀬𑀸 𑀤𑀸𑀦𑀁.

𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀬𑀲𑁆𑀫𑀸 𑀧𑀦 𑀩𑁆𑀭𑀳𑁆𑀫𑀤𑀡𑁆𑀟𑁄 𑀧𑀜𑁆𑀘𑀲𑀢𑀺𑀓𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁪𑁪𑁫) 𑀙𑀦𑁆𑀦𑀲𑁆𑀲𑁂𑀯 𑀧𑀜𑁆𑀜𑀢𑁆𑀢𑁄, 𑀢𑀲𑁆𑀫𑀸 𑀢𑀲𑁆𑀲𑁂𑀯 𑀤𑀸𑀢𑀩𑁆𑀩𑁄𑀢𑀺 𑀆𑀳 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺. 𑀏𑀲𑀸𑀢𑀺 𑀩𑁆𑀭𑀳𑁆𑀫𑀤𑀡𑁆𑀟𑁄, 𑀅𑀜𑁆𑀜𑁄𑀧𑀺 𑀬𑁄 𑀪𑀺𑀓𑁆𑀔𑀼 𑀯𑀺𑀳𑀭𑀢𑀺, 𑀢𑀲𑁆𑀲𑀧𑀺 𑀤𑀸𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀦𑁆𑀢𑀺 𑀤𑀸𑀢𑀩𑁆𑀩𑁄𑀢𑀺 𑀆𑀳 ‘‘𑀏𑀯𑀜𑁆𑀘 𑀧𑀦 𑀤𑀸𑀢𑀩𑁆𑀩𑁄’’𑀢𑀺. 𑀤𑀸𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀗𑁆𑀖𑀫𑀚𑁆𑀛𑁂’’𑀢𑀺𑀆𑀤𑀺.

𑀬𑀁 𑀯𑀘𑀦𑀁 𑀇𑀘𑁆𑀙𑁂𑀬𑁆𑀬, 𑀢𑀁 𑀯𑀘𑀦𑀦𑁆𑀢𑀺 𑀬𑁄𑀚𑀦𑀸. 𑀔𑀫𑀸𑀧𑁂𑀦𑁆𑀢𑀲𑁆𑀲𑀸𑀢𑀺 𑀲𑀗𑁆𑀖𑀁 𑀔𑀫𑀸𑀧𑁂𑀦𑁆𑀢𑀲𑁆𑀲 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲𑀸𑀢𑀺 𑀬𑁄𑀚𑀦𑀸.

𑀧𑀝𑀺𑀲𑀗𑁆𑀔𑀸𑀢𑀺 𑀧𑀝𑀺𑀲𑀗𑁆𑀔𑀸𑀬, 𑀜𑀸𑀡𑁂𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀬𑀦𑁆𑀢𑀺 𑀅𑀯𑀦𑁆𑀤𑀺𑀬𑀓𑀫𑁆𑀫𑀁, 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁂𑀦 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀆𑀳 ‘‘𑀪𑀕𑀯𑀢𑀸’’𑀢𑀺. 𑀓𑀺𑀲𑁆𑀫𑀺𑀁 𑀔𑀦𑁆𑀥𑀓𑁂 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀆𑀳 ‘‘𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑁂’’𑀢𑀺. 𑀓𑁂𑀲𑀼 𑀯𑀢𑁆𑀣𑀽𑀲𑀼 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀆𑀳 ‘‘𑀢𑁂𑀦 𑀔𑁄 𑀧𑀦…𑀧𑁂… 𑀇𑀫𑁂𑀲𑀼 𑀯𑀢𑁆𑀣𑀽𑀲𑀽’’𑀢𑀺 (𑀘𑀽𑀴𑀯. 𑁪𑁧𑁧). 𑀓𑀺𑀁 𑀓𑀢𑁆𑀯𑀸 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀆𑀳 ‘‘𑀤𑀼𑀓𑁆𑀓𑀝𑀁 𑀧𑀜𑁆𑀜𑀧𑁂𑀢𑁆𑀯𑀸’’𑀢𑀺. 𑀓𑀺𑀦𑁆𑀢𑀺 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀆𑀳 ‘‘𑀅𑀦𑀼𑀚𑀸𑀦𑀸𑀫𑀺…𑀧𑁂… 𑀓𑀸𑀢𑀩𑁆𑀩𑁄’’𑀢𑀺. 𑀢𑀲𑁆𑀲𑀸𑀢𑀺 𑀅𑀯𑀦𑁆𑀤𑀺𑀬𑀲𑁆𑀲. ‘‘𑀦 𑀑𑀲𑀸𑀭𑀡𑀸𑀤𑀻𑀦𑀻’’𑀢𑀺 𑀇𑀫𑀺𑀦𑀸 𑀏𑀯𑀲𑀤𑁆𑀤𑀲𑁆𑀲 𑀙𑀟𑁆𑀟𑁂𑀢𑀩𑁆𑀩𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀲𑀸𑀢𑀺 𑀓𑀫𑁆𑀫𑀮𑀓𑁆𑀔𑀡𑀪𑀽𑀢𑀲𑁆𑀲 𑀅𑀯𑀦𑁆𑀤𑀺𑀬𑀲𑁆𑀲. 𑀢𑀢𑁆𑀣𑁂𑀯𑀸𑀢𑀺 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑁂𑀬𑁂𑀯. 𑀦𑀦𑁆𑀢𑀺 𑀓𑀫𑁆𑀫𑀮𑀓𑁆𑀔𑀡𑀁. 𑀇𑀥𑀸𑀧𑀻𑀢𑀺 𑀧𑀭𑀺𑀯𑀸𑀭𑁂 𑀓𑀫𑁆𑀫𑀯𑀕𑁆𑀕𑁂𑀧𑀺.

𑀅𑀧𑀸𑀲𑀸𑀤𑀺𑀓𑀦𑁆𑀢𑀺 𑀅𑀧𑀲𑀸𑀤𑀸𑀯𑀳𑀁, 𑀅𑀧𑀲𑀸𑀤𑀚𑀦𑀓𑀁 𑀯𑀸.

𑀢𑀢𑁄𑀢𑀺 𑀅𑀯𑀦𑁆𑀤𑀺𑀬𑀓𑀭𑀡𑀢𑁄. 𑀇𑀫𑀦𑁆𑀢𑀺 𑀪𑀺𑀓𑁆𑀔𑀼𑀁. 𑀯𑀦𑁆𑀤𑀺𑀬𑀦𑁆𑀢𑀺 𑀯𑀦𑁆𑀤𑀺𑀢𑀩𑁆𑀩𑀁, 𑀯𑀦𑁆𑀤𑀦𑀁 𑀯𑀸.

𑀏𑀢𑁆𑀣𑀸𑀢𑀺 𑀅𑀧𑀮𑁄𑀓𑀦𑀓𑀫𑁆𑀫𑁂, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀫𑀽𑀮𑀓𑀁 𑀓𑀢𑁆𑀯𑀸 𑀧𑀜𑁆𑀜𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀦 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀦𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑀢𑁆𑀣𑁄, 𑀢𑀣𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀫𑀽𑀮𑀓𑀁 𑀧𑀜𑁆𑀜𑀢𑁆𑀢𑀫𑁆𑀧𑀻𑀢𑀺 𑀅𑀢𑁆𑀣𑁄, 𑀮𑀪𑀺𑀢𑀩𑁆𑀩𑀪𑀸𑀯𑀁 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀁 𑀳𑀻’’𑀢𑀺𑀆𑀤𑀺. 𑀬𑀁 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀬𑁄𑀚𑀦𑀸. 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑁂𑀦 𑀧𑀦 𑀤𑀸𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀦𑁆𑀢𑀺 𑀲𑀽𑀘𑀺𑀆𑀤𑀻𑀦𑀁. 𑀲𑁄𑀬𑁂𑀯𑀸𑀢𑀺 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑁄𑀬𑁂𑀯. 𑀢𑀢𑁄𑀢𑀺 𑀅𑀧𑁆𑀧𑀫𑀢𑁆𑀢𑀓𑀢𑁄. 𑀢𑀢𑁆𑀣𑀸𑀢𑀺 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧). 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀕𑀺𑀮𑀸𑀦𑀪𑁂𑀲𑀚𑁆𑀚𑀫𑁆𑀧𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁄𑀧𑀺 𑀘𑀸𑀢𑀺 𑀪𑀺𑀓𑁆𑀔𑀼𑀧𑀺 𑀘 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲 𑀤𑀸𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀭𑀼𑀧𑁆𑀧𑀸𑀤𑀢𑁄𑀢𑀺 𑀢𑀲𑁆𑀫𑀺𑀁 𑀫𑀳𑀸𑀯𑀸𑀲𑁂 𑀉𑀧𑁆𑀧𑀸𑀤𑀧𑀘𑁆𑀘𑀬𑀢𑁄, 𑀕𑀳𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑁂𑀲𑀮𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀤𑀼𑀲𑁆𑀲𑀻𑀮𑀸𑀤𑀻𑀦𑀁 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀚𑀕𑁆𑀕𑀸𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀅𑀧𑀼𑀘𑁆𑀙𑀺𑀢𑁆𑀯𑀸 𑀚𑀕𑁆𑀕𑀸𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀅𑀬𑀁 𑀪𑀺𑀓𑁆𑀔𑀽’’𑀢𑀺𑀆𑀤𑀺. 𑀑𑀤𑀺𑀲𑁆𑀲𑀸𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸.

𑀆𑀲𑀦𑀖𑀭𑀁 𑀯𑀸𑀢𑀺 𑀧𑀝𑀺𑀫𑀸𑀖𑀭𑀁 𑀯𑀸, 𑀓𑀸𑀭𑀓𑁄 𑀫𑀦𑀼𑀲𑁆𑀲𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀦𑀺𑀓𑁆𑀔𑁂𑀧𑀢𑁄 𑀕𑀳𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀖𑀺𑀓𑁂𑀦𑀧𑀻𑀢𑀺 𑀧𑀺𑀲𑀤𑁆𑀤𑁄 𑀦 𑀓𑁂𑀯𑀮𑀁 𑀘𑁂𑀢𑀺𑀬𑀲𑁆𑀲 𑀉𑀧𑀦𑀺𑀓𑁆𑀔𑁂𑀧𑁂𑀦𑁂𑀯, 𑀅𑀣 𑀔𑁄 𑀲𑀗𑁆𑀖𑀺𑀓𑁂𑀦𑀧𑀻𑀢𑀺 𑀤𑀲𑁆𑀲𑁂𑀢𑀺.

𑀬𑀸𑀧𑀦𑀫𑀢𑁆𑀢𑀁 𑀅𑀮𑀪𑀦𑁆𑀢𑁂𑀳𑀺 𑀓𑀭𑁄𑀦𑁆𑀢𑁂𑀳𑀻𑀢𑀺 𑀬𑁄𑀚𑀦𑀸, 𑀧𑀭𑀺𑀪𑀼𑀜𑁆𑀚𑀦𑁆𑀢𑁂𑀳𑀺 𑀳𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀯𑀢𑁆𑀢𑀁 𑀓𑀭𑁄𑀫𑀸’’𑀢𑀺𑀆𑀤𑀺𑀦𑀸 ‘‘𑀬𑀸𑀧𑀦𑀫𑀢𑁆𑀢’’𑀦𑁆𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀯𑀺𑀳𑀸𑀭𑁂 𑀭𑁄𑀧𑀺𑀢𑀸 𑀬𑁂 𑀨𑀮𑀭𑀼𑀓𑁆𑀔𑀸𑀢𑀺 𑀬𑁄𑀚𑀦𑀸. 𑀬𑁂𑀲𑀦𑁆𑀢𑀺 𑀭𑀼𑀓𑁆𑀔𑀸𑀦𑀁. 𑀢𑁂𑀲𑀽𑀢𑀺 𑀭𑀼𑀓𑁆𑀔𑁂𑀲𑀼. 𑀬𑁂 𑀧𑀦𑀸𑀢𑀺 𑀭𑀼𑀓𑁆𑀔𑀸 𑀧𑀦, 𑀅𑀧𑀭𑀺𑀕𑁆𑀕𑀳𑀺𑀢𑀸 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀁 𑀧𑀦𑀸𑀢𑀺 𑀅𑀧𑀮𑁄𑀓𑀦𑀓𑀫𑁆𑀫𑀁 𑀧𑀦. 𑀲𑀮𑀸𑀓𑀁 𑀕𑀡𑁆𑀳𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀮𑀸𑀓𑀕𑁆𑀕𑀁, 𑀞𑀸𑀦𑀁. ‘‘𑀬𑀸𑀕𑀕𑁆𑀕𑀪𑀢𑁆𑀢𑀕𑁆𑀕’’𑀇𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀉𑀧𑁄𑀲𑀣𑀕𑁆𑀕𑁂𑀢𑀺 𑀉𑀧𑁄𑀲𑀣𑀲𑁆𑀲 𑀕𑀳𑀡𑀝𑁆𑀞𑀸𑀦𑁂, 𑀉𑀧𑁄𑀲𑀣𑀕𑁂𑀳𑁂𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀉𑀧𑁄𑀲𑀣𑀕𑁆𑀕𑁂. 𑀢𑀦𑁆𑀢𑀺 𑀅𑀧𑀮𑁄𑀓𑀦𑀓𑀫𑁆𑀫𑀁.

𑀬𑀁 𑀫𑀽𑀮𑀢𑀘𑀧𑀢𑁆𑀢𑀅𑀗𑁆𑀓𑀼𑀭𑀧𑀼𑀧𑁆𑀨𑀨𑀮𑀔𑀸𑀤𑀦𑀻𑀬𑀸𑀤𑀻𑀢𑀺 𑀬𑁄𑀚𑀦𑀸. 𑀅𑀦𑁆𑀢𑁄𑀲𑀻𑀫𑀸𑀬𑀸𑀢𑀺 𑀅𑀦𑁆𑀢𑁄 𑀉𑀧𑀘𑀸𑀭𑀲𑀻𑀫𑀸𑀬.

𑀲𑀼𑀓𑀢𑀫𑁂𑀯𑀸𑀢𑀺 𑀲𑀗𑁆𑀖𑁂𑀦 𑀓𑀢𑀫𑁂𑀯. 𑀉𑀧𑁄𑀲𑀣𑀤𑀺𑀯𑀲𑁂𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀬𑀲𑁆𑀫𑀺𑀁 𑀓𑀲𑁆𑀫𑀺𑀁𑀘𑀺 𑀤𑀺𑀯𑀲𑁂𑀧𑀺 𑀓𑀢𑀢𑁆𑀢𑀸.

𑀨𑀮𑀯𑀸𑀭𑁂𑀦𑀸𑀢𑀺 𑀭𑀼𑀓𑁆𑀔𑀸𑀦𑀁 𑀨𑀮𑀕𑀳𑀡𑀯𑀸𑀭𑁂𑀦. 𑀭𑀼𑀓𑁆𑀔𑀸 𑀥𑀭𑀦𑁆𑀢𑀻𑀢𑀺 𑀭𑀼𑀓𑁆𑀔𑀸 𑀢𑀺𑀝𑁆𑀞𑀦𑁆𑀢𑀺, 𑀲𑀁𑀯𑀺𑀚𑁆𑀚𑀦𑁆𑀢𑀺 𑀯𑀸. 𑀬𑁂𑀳𑀻𑀢𑀺 𑀪𑀺𑀓𑁆𑀔𑀽𑀳𑀺 𑀭𑁄𑀧𑀺𑀢𑀸, 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀸 𑀏𑀯 𑀓𑀢𑀺𑀓𑀸𑀢𑀺 𑀧𑀼𑀩𑁆𑀩𑁂 𑀓𑀢𑀸 𑀲𑀸 𑀏𑀯 𑀓𑀢𑀺𑀓𑀸, 𑀅𑀜𑁆𑀜𑀸 𑀓𑀢𑀺𑀓𑀸 𑀦 𑀓𑀸𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂𑀢𑀺 𑀭𑀼𑀓𑁆𑀔𑀸𑀦𑀁 𑀞𑀺𑀢𑀯𑀺𑀳𑀸𑀭𑀢𑁄 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂. 𑀢𑁂𑀲𑀦𑁆𑀢𑀺 𑀭𑀼𑀓𑁆𑀔𑀸𑀦𑀁, 𑀲𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂𑀧𑀻𑀢𑀺 𑀭𑀼𑀓𑁆𑀔𑀸𑀧𑀺, 𑀭𑁄𑀧𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀢𑁄 𑀞𑀸𑀦𑀢𑁄𑀢𑀺 𑀬𑁄𑀚𑀦𑀸. 𑀢𑁂𑀲𑀽𑀢𑀺 𑀭𑀼𑀓𑁆𑀔𑁂𑀲𑀼. 𑀏𑀢𑁆𑀣𑀸𑀢𑀺 𑀯𑀺𑀳𑀸𑀭𑁂. 𑀢𑁂𑀳𑀺 𑀧𑀦𑀸𑀢𑀺 𑀧𑀭𑀺𑀯𑁂𑀡𑀲𑀸𑀫𑀺𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀦. 𑀤𑀲𑀪𑀸𑀕𑀦𑁆𑀢𑀺 𑀤𑀲𑀫𑀪𑀸𑀕𑀁. ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀤𑀲𑀪𑀸𑀕𑀁 𑀤𑀢𑁆𑀯𑀸𑀢𑀺 𑀅𑀢𑁆𑀣𑀁 𑀅𑀢𑀺𑀤𑀺𑀲𑀢𑀺.

𑀲𑀫𑁆𑀪𑀸𑀯𑀦𑀻𑀬𑀪𑀺𑀓𑁆𑀔𑀼𑀦𑁄𑀢𑀺 𑀲𑀻𑀮𑀲𑀼𑀢𑀸𑀤𑀻𑀳𑀺 𑀲𑀫𑁆𑀪𑀸𑀯𑀦𑀻𑀬𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀢𑀢𑁆𑀣𑀸𑀢𑀺 𑀧𑁄𑀭𑀸𑀡𑀯𑀺𑀳𑀸𑀭𑁂. 𑀫𑀽𑀮𑁂𑀢𑀺 𑀧𑀼𑀩𑁆𑀩𑁂, 𑀆𑀤𑀺𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀦𑀺𑀓𑁆𑀓𑀼𑀓𑁆𑀓𑀼𑀘𑁆𑀘𑁂𑀦𑀸𑀢𑀺 ‘‘𑀅𑀪𑀸𑀚𑀺𑀢𑀫𑀺𑀤’’𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀯𑀺𑀭𑀳𑁂𑀦. 𑀔𑀺𑀬𑁆𑀬𑀦𑀫𑀢𑁆𑀢𑀫𑁂𑀯 𑀢𑀦𑁆𑀢𑀺 𑀢𑀁 𑀔𑀺𑀬𑁆𑀬𑀦𑀁 𑀔𑀺𑀬𑁆𑀬𑀦𑀫𑀢𑁆𑀢𑀫𑁂𑀯, 𑀦 𑀲𑀸𑀫𑀡𑁂𑀭𑀸𑀦𑀁 𑀔𑀺𑀬𑁆𑀬𑀦𑀁 𑀭𑀼𑀳𑀢𑀻𑀢𑀺 𑀅𑀢𑁆𑀣𑁄.

𑀧𑀦𑀲𑀭𑀼𑀓𑁆𑀔𑀦𑁆𑀢𑀺 𑀓𑀡𑁆𑀝𑀓𑀻𑀨𑀮𑀭𑀼𑀓𑁆𑀔𑀁. 𑀅𑀬𑀁 𑀲𑀸𑀫𑀻𑀘𑀻𑀢𑀺 𑀅𑀬𑀁 𑀪𑀸𑀚𑁂𑀢𑁆𑀯𑀸 𑀔𑀸𑀤𑀦𑀁 𑀅𑀦𑀼𑀥𑀫𑁆𑀫𑀢𑀸. 𑀔𑀸𑀬𑀺𑀢𑀦𑁆𑀢𑀺 𑀔𑀸𑀤𑀺𑀢𑀁. 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀓𑀢𑀺𑀓𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀁 𑀦𑀬𑁂𑀦 𑀜𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀢𑀁 𑀅𑀤𑀲𑁆𑀲𑁂𑀢𑁆𑀯𑀸 𑀏𑀓𑀲𑁆𑀲𑁂𑀯 𑀓𑀢𑀺𑀓𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑀪𑀺𑀓𑁆𑀔𑀼𑀓𑁂 𑀧𑀦𑀸’’𑀢𑀺𑀆𑀤𑀺. 𑀧𑀼𑀭𑀺𑀫𑀓𑀢𑀺𑀓𑀸𑀢𑀺 ‘‘𑀬𑀣𑀸𑀲𑀼𑀔𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀭𑀼𑀘𑁆𑀘𑀢𑀻’’𑀢𑀺 (𑀧𑀭𑀺. 𑀅𑀝𑁆𑀞. 𑁪𑁯𑁫-𑁪𑁯𑁬) 𑀧𑀼𑀭𑁂 𑀓𑀢𑀸 𑀓𑀢𑀺𑀓𑀸. 𑀢𑁂𑀲𑀦𑁆𑀢𑀺 𑀲𑀸𑀫𑀡𑁂𑀭𑀸𑀦𑀁, 𑀨𑀸𑀢𑀺𑀓𑀫𑁆𑀫𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀸𑀚𑁂𑀢𑁆𑀯𑀸𑀢𑀺 𑀲𑀸𑀫𑀡𑁂𑀭𑀸𑀦𑀁 𑀪𑀸𑀚𑁂𑀢𑁆𑀯𑀸. 𑀇𑀫𑀺𑀦𑀸 𑀲𑀸𑀫𑀡𑁂𑀭𑀸𑀦𑀁 𑀨𑀸𑀢𑀺𑀓𑀫𑁆𑀫𑀁 𑀦 𑀤𑀸𑀢𑀩𑁆𑀩𑀫𑁆𑀧𑀺 𑀪𑀸𑀕𑀁 𑀪𑀸𑀚𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀲𑀸𑀫𑀦𑁆𑀢𑀕𑀸𑀫𑁂𑀳𑀻𑀢𑀺 𑀆𑀲𑀦𑁆𑀦𑀕𑀸𑀫𑁂𑀳𑀺, 𑀆𑀕𑀦𑁆𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀁 𑀅𑀫𑁆𑀩𑀁 𑀏𑀓𑀁 𑀮𑀩𑀼𑀚𑀦𑁆𑀢𑀺 𑀬𑁄𑀚𑀦𑀸. 𑀅𑀤𑀺𑀬𑁆𑀬𑀫𑀸𑀦𑁂 𑀤𑁄𑀲𑁂 𑀤𑀲𑁆𑀲𑀺𑀢𑁂 𑀤𑀺𑀬𑁆𑀬𑀫𑀸𑀦𑁂 𑀆𑀦𑀺𑀲𑀁𑀲𑀫𑁆𑀧𑀺 𑀅𑀢𑁆𑀣𑀢𑁄 𑀜𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀤𑀺𑀬𑁆𑀬𑀫𑀸𑀦𑁂 𑀳𑀻’’𑀢𑀺𑀆𑀤𑀺.

𑀕𑀡𑁆𑀳𑀦𑁆𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀓𑀢𑀺𑀓𑀯𑀢𑁆𑀢𑀝𑁆𑀞𑀧𑀦𑀢𑁄. 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀨𑀮𑀤𑀸𑀦𑀓𑀼𑀮𑀤𑀽𑀲𑀓𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀸. 𑀓𑀺𑀦𑁆𑀢𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀦𑀸𑀴𑀺𑀓𑁂𑀭𑀸𑀤𑀻𑀦𑀻’’𑀢𑀺𑀆𑀤𑀺. 𑀅𑀦𑀼𑀯𑀺𑀘𑀭𑀺𑀢𑁆𑀯𑀸𑀢𑀺 𑀧𑀤𑀸𑀦𑀫𑀦𑀼𑀓𑁆𑀓𑀫𑁂𑀦 𑀯𑀺𑀘𑀭𑀺𑀢𑁆𑀯𑀸. 𑀉𑀧𑀟𑁆𑀠𑀪𑀸𑀕𑁄𑀢𑀺 𑀪𑀺𑀓𑁆𑀔𑀽𑀦𑀁 𑀮𑀤𑁆𑀥𑀪𑀸𑀕𑀢𑁄 𑀉𑀧𑀟𑁆𑀠𑁄 𑀪𑀸𑀕𑁄. 𑀅𑀧𑀮𑁄𑀓𑁂𑀢𑁆𑀯𑀸𑀢𑀺 𑀲𑀗𑁆𑀖𑀁 𑀆𑀧𑀼𑀘𑁆𑀙𑀺𑀢𑁆𑀯𑀸.

𑀫𑀕𑁆𑀕𑀕𑀫𑀺𑀬𑀲𑀢𑁆𑀣𑀯𑀸𑀳𑁄𑀢𑀺 𑀫𑀕𑁆𑀕𑀁 𑀕𑀫𑀺𑀓𑁄 𑀲𑀢𑁆𑀣𑀯𑀸𑀳𑁄. 𑀲𑁄𑀢𑀺 𑀩𑀮𑀓𑁆𑀓𑀸𑀭𑁂𑀦 𑀕𑀳𑁂𑀢𑁆𑀯𑀸 𑀔𑀸𑀤𑀦𑁆𑀢𑁄. 𑀙𑀸𑀬𑀸𑀤𑀻𑀦𑀦𑁆𑀢𑀺𑀆𑀤𑀺𑀲𑀤𑁆𑀤𑁂𑀦 𑀆𑀭𑀸𑀫𑀯𑀦𑀸𑀦𑀺 𑀲𑀗𑁆𑀕𑀳𑁂𑀢𑀩𑁆𑀩𑀸𑀦𑀺. 𑀲𑀘𑁂 𑀅𑀢𑁆𑀣𑀻𑀢𑀺 𑀲𑀘𑁂 𑀅𑀢𑁆𑀣𑁄 𑀅𑀢𑁆𑀣𑀺. 𑀨𑀮𑀪𑀭𑀺𑀢𑀸𑀢𑀺 𑀨𑀮𑁂𑀦 𑀧𑀭𑀺𑀧𑀼𑀡𑁆𑀡𑀸. ‘‘𑀨𑀮𑀪𑀸𑀭𑀺𑀢𑀸’’𑀢𑀺𑀧𑀺 𑀧𑀸𑀞𑁄. 𑀨𑀮𑀲𑀗𑁆𑀔𑀸𑀢𑁂𑀦 𑀪𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦𑀸𑀢𑀺 𑀢𑁂𑀲𑀁 𑀲𑀦𑁆𑀢𑀺𑀓𑀸 𑀤𑀸𑀦𑀧𑀝𑀺𑀤𑀸𑀦𑀁 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁂𑀯𑀸𑀢𑀺 𑀧𑀼𑀩𑁆𑀩𑁂 𑀲𑀗𑁆𑀖𑀺𑀓𑀝𑁆𑀞𑀸𑀦𑁂 ‘‘𑀓𑀼𑀤𑁆𑀥𑁄 𑀳𑀺 𑀲𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯. 𑀏𑀢𑁆𑀣𑀸𑀢𑀺 𑀧𑀼𑀕𑁆𑀕𑀮𑀺𑀓𑀝𑁆𑀞𑀸𑀦𑁂.

𑀢𑀦𑁆𑀢𑀺 𑀨𑀮𑀸𑀭𑀸𑀫𑀁. 𑀲𑁄𑀢𑀺 𑀧𑀝𑀺𑀩𑀮𑁄 𑀪𑀺𑀓𑁆𑀔𑀼. 𑀪𑀸𑀭𑀺𑀬𑀁 𑀓𑀫𑁆𑀫𑀦𑁆𑀢𑀺 𑀚𑀕𑁆𑀕𑀦𑀓𑀫𑁆𑀫𑀁 𑀪𑀸𑀭𑀺𑀬𑀁. 𑀏𑀢𑁆𑀢𑀓𑁂𑀦𑀸𑀢𑀺 𑀢𑀢𑀺𑀬𑀪𑀸𑀕𑀉𑀧𑀟𑁆𑀠𑀪𑀸𑀕𑀫𑀢𑁆𑀢𑁂𑀦. 𑀲𑀩𑁆𑀩𑀁 𑀨𑀮𑀸𑀭𑀸𑀫𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀽𑀮𑀪𑀸𑀕𑀦𑁆𑀢𑀺 𑀧𑀞𑀫𑀪𑀸𑀕𑀁. ‘‘𑀤𑀲𑀪𑀸𑀕𑀫𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀢𑀤𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀤𑀢𑁆𑀯𑀸𑀢𑀺 𑀲𑀗𑁆𑀖𑀲𑁆𑀲 𑀤𑀢𑁆𑀯𑀸. 𑀲𑁄𑀢𑀺 𑀪𑀺𑀓𑁆𑀔𑀼. 𑀅𑀓𑀢𑀸𑀯𑀸𑀲𑀦𑁆𑀢𑀺 𑀧𑀼𑀩𑁆𑀩𑁂 𑀅𑀓𑀢𑀁 𑀦𑀯𑀁 𑀲𑁂𑀦𑀸𑀲𑀦𑀁. 𑀆𑀭𑀸𑀫𑀦𑁆𑀢𑀺 𑀲𑀗𑁆𑀖𑀲𑁆𑀲 𑀆𑀭𑀸𑀫𑀁. 𑀢𑁂𑀳𑀺𑀧𑀻𑀢𑀺 𑀦𑀺𑀲𑁆𑀲𑀺𑀢𑀓𑁂𑀳𑀺𑀧𑀺. 𑀧𑀺𑀲𑀤𑁆𑀤𑁄 𑀆𑀘𑀭𑀺𑀬𑀁 𑀅𑀧𑁂𑀓𑁆𑀔𑀢𑀺. 𑀢𑁂𑀲𑀦𑁆𑀢𑀺 𑀦𑀺𑀲𑁆𑀲𑀺𑀢𑀓𑀸𑀦𑀁. 𑀚𑀕𑁆𑀕𑀺𑀢𑀓𑀸𑀮𑁂𑀢𑀺 𑀚𑀕𑁆𑀕𑀺𑀢𑀸𑀦𑀁 𑀭𑀼𑀓𑁆𑀔𑀸𑀦𑀁 𑀧𑀼𑀧𑁆𑀨𑀨𑀮𑀪𑀭𑀺𑀢𑀓𑀸𑀮𑁂. 𑀚𑀕𑁆𑀕𑀦𑀓𑀸𑀮𑁂𑀢𑀺 𑀚𑀕𑁆𑀕𑀦𑀫𑀢𑁆𑀢𑀓𑀸𑀮𑁂, 𑀚𑀕𑁆𑀕𑀦𑀫𑀢𑁆𑀢𑀫𑁂𑀯, 𑀦 𑀚𑀕𑁆𑀕𑀦𑀓𑀸𑀭𑀡𑀸 𑀓𑀺𑀜𑁆𑀘𑀺 𑀧𑀼𑀧𑁆𑀨𑀁 𑀯𑀸 𑀨𑀮𑀁 𑀯𑀸 𑀳𑁄𑀢𑀺, 𑀢𑀲𑁆𑀫𑀺𑀁 𑀓𑀸𑀮𑁂𑀢𑀺 𑀅𑀢𑁆𑀣𑁄. ‘‘𑀩𑀳𑀼’’𑀦𑁆𑀢𑀺𑀆𑀤𑀺𑀦𑀸 𑀯𑀸𑀭𑁂𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀢𑀺.

𑀨𑀸𑀢𑀺𑀓𑀫𑁆𑀫𑁂𑀦 𑀚𑀕𑁆𑀕𑀦𑁆𑀢𑁄 𑀦 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀯𑀸𑀢𑀺 𑀲𑀗𑁆𑀖𑀁 𑀅𑀦𑀧𑀮𑁄𑀓𑁂𑀢𑁆𑀯𑀸𑀯. 𑀇𑀢𑀻𑀢𑀺 𑀏𑀯𑀁.

𑀜𑀢𑁆𑀢𑀺𑀓𑀫𑁆𑀫𑀝𑁆𑀞𑀸𑀦𑀪𑁂𑀤𑁂 𑀧𑀦 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀑𑀲𑀸𑀭𑁂𑀢𑀺 𑀲𑀗𑁆𑀖𑀫𑀚𑁆𑀛𑀁 𑀧𑀯𑁂𑀲𑁂𑀢𑀺 𑀇𑀫𑀸𑀬 𑀜𑀢𑁆𑀢𑀺𑀬𑀸𑀢𑀺 𑀑𑀲𑀸𑀭𑀡𑀸.

𑀦𑀺𑀲𑁆𑀲𑀸𑀭𑀺𑀬𑀢𑀺 𑀲𑀗𑁆𑀖𑀢𑁄 𑀩𑀳𑀺 𑀓𑀭𑀺𑀬𑀢𑀺 𑀇𑀫𑀸𑀬𑀸𑀢𑀺 𑀦𑀺𑀲𑁆𑀲𑀸𑀭𑀡𑀸. 𑀜𑀢𑁆𑀢𑀺 𑀉𑀧𑁄𑀲𑀣𑁄 𑀦𑀸𑀫𑀸𑀢𑀺 𑀇𑀤𑀁 𑀓𑀸𑀭𑀡𑀽𑀧𑀘𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀉𑀧𑁄𑀲𑀣𑀓𑀫𑁆𑀫𑀯𑀲𑁂𑀦 𑀞𑀧𑀺𑀢𑀸’’𑀢𑀺. 𑀏𑀲𑁂𑀯 𑀦𑀬𑁄 𑀜𑀢𑁆𑀢𑀺𑀧𑀯𑀸𑀭𑀡𑀸 𑀦𑀸𑀫𑀸𑀢𑀺 𑀏𑀢𑁆𑀣𑀸𑀧𑀺.

𑀅𑀦𑀼𑀲𑀸𑀲𑁂𑀬𑁆𑀬𑀸𑀢𑀺𑀆𑀤𑀺𑀦𑀸 𑀧𑀞𑀫𑀧𑀼𑀭𑀺𑀲𑀏𑀬𑁆𑀬𑀯𑀺𑀪𑀢𑁆𑀢𑀺𑀯𑀲𑁂𑀦 𑀞𑀧𑀺𑀢𑀸 𑀜𑀢𑁆𑀢𑀺 𑀅𑀢𑁆𑀢𑀦𑀸 𑀧𑀭𑀁 𑀲𑀫𑁆𑀫𑀦𑀺𑀢𑀼𑀁 𑀞𑀧𑀺𑀢𑀸 𑀜𑀢𑁆𑀢𑀺 𑀦𑀸𑀫. 𑀅𑀦𑀼𑀲𑀸𑀲𑁂𑀬𑁆𑀬𑀦𑁆𑀢𑀺𑀆𑀤𑀺𑀦𑀸 𑀉𑀢𑁆𑀢𑀫𑀧𑀼𑀭𑀺𑀲𑀏𑀬𑁆𑀬𑀁𑀯𑀺𑀪𑀢𑁆𑀢𑀺𑀯𑀲𑁂𑀦 𑀞𑀧𑀺𑀢𑀸 𑀜𑀢𑁆𑀢𑀺 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑀺𑀢𑀼𑀁 𑀞𑀧𑀺𑀢𑀸 𑀜𑀢𑁆𑀢𑀺 𑀦𑀸𑀫. 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸 𑀯𑀸 𑀧𑀭𑁄 𑀯𑀸 𑀲𑀫𑁆𑀫𑀦𑀺𑀬𑀢𑀺 𑀇𑀫𑀸𑀬 𑀜𑀢𑁆𑀢𑀺𑀬𑀸𑀢𑀺 𑀲𑀫𑁆𑀫𑀼𑀢𑀺. 𑀦𑀺𑀲𑁆𑀲𑀝𑁆𑀞𑀧𑀢𑁆𑀢𑀘𑀻𑀯𑀭𑀸𑀤𑀻𑀦𑀺 𑀤𑀻𑀬𑀦𑁆𑀢𑀺 𑀅𑀦𑁂𑀦𑀸𑀢𑀺 𑀤𑀸𑀦𑀁, 𑀜𑀢𑁆𑀢𑀺. 𑀯𑀘𑁆𑀘𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀯𑀸𑀘𑀓𑀲𑁆𑀲 𑀦𑀺𑀬𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀁.

𑀆𑀧𑀢𑁆𑀢𑀺 𑀧𑀝𑀺𑀕𑁆𑀕𑀡𑁆𑀳𑀺𑀬𑀢𑀺 𑀅𑀦𑁂𑀦𑀸𑀢𑀺 𑀧𑀝𑀺𑀕𑁆𑀕𑀳𑁄.

𑀧𑀝𑀺𑀫𑀼𑀔𑀁 𑀉𑀧𑀭𑀺 𑀓𑀟𑁆𑀠𑀺𑀬𑀢𑀺 𑀇𑀫𑀸𑀬𑀸𑀢𑀺 𑀧𑀘𑁆𑀘𑀼𑀓𑁆𑀓𑀟𑁆𑀠𑀦𑀸.

𑀓𑀫𑁆𑀫𑀫𑁂𑀯𑀸𑀢𑀺 𑀮𑀓𑁆𑀔𑀺𑀬𑀢𑀺 𑀅𑀦𑁂𑀦𑀸𑀢𑀺 𑀓𑀫𑁆𑀫𑀮𑀓𑁆𑀔𑀡𑀁.

‘‘𑀢𑀣𑀸’’𑀢𑀺 𑀧𑀤𑁂𑀦 ‘‘𑀓𑀫𑁆𑀫𑀮𑀓𑁆𑀔𑀡𑀁 𑀦𑀸𑀫𑀸’’𑀢𑀺 𑀧𑀤𑀁 𑀅𑀢𑀺𑀤𑀺𑀲𑀢𑀺. 𑀢𑀢𑁄𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀜𑀢𑁆𑀢𑀺𑀢𑁄. 𑀧𑀭𑀸 𑀤𑁆𑀯𑁂 𑀜𑀢𑁆𑀢𑀺𑀬𑁄 𑀓𑀫𑁆𑀫𑀮𑀓𑁆𑀔𑀡𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀇𑀢𑀻𑀢𑀺𑀆𑀤𑀺 𑀦𑀺𑀕𑀫𑀦𑀁.

𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀝𑁆𑀞𑀸𑀦𑀪𑁂𑀤𑁂 𑀑𑀲𑀸𑀭𑀡𑀸𑀤𑀻𑀦𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀟𑁆𑀠𑀲𑁆𑀲 𑀮𑀺𑀘𑁆𑀙𑀯𑀺𑀦𑁄’’𑀢𑀺𑀆𑀤𑀺. 𑀲𑀻𑀫𑀸𑀲𑀫𑁆𑀫𑀼𑀢𑀺 𑀘𑀸𑀢𑀺𑀆𑀤𑀺𑀦𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀬𑀸 𑀧𑀦 𑀤𑁆𑀯𑁂 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀇𑀢𑀻𑀢𑀺𑀆𑀤𑀺 𑀦𑀺𑀕𑀫𑀦𑀁.

𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀝𑁆𑀞𑀸𑀦𑀪𑁂𑀤𑁂 𑀬𑁄𑀚𑀦𑀸𑀦𑀬𑁄 𑀧𑀸𑀓𑀝𑁄𑀬𑁂𑀯.

𑁪𑁯𑁭. 𑀘𑀢𑀼𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂𑀢𑀺𑀆𑀤𑀺𑀓𑀸𑀬 𑀤𑁂𑀲𑀦𑀸𑀬 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀢𑀺 𑀓𑀫𑁆𑀫𑀸𑀦𑀺 𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀇𑀢𑀻𑀢𑀺 𑀏𑀯𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀢𑁆𑀣𑁄𑀢𑀺 𑀢𑀲𑁆𑀲 ‘‘𑀘𑀢𑀼𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂’’𑀢𑀺𑀆𑀤𑀺𑀯𑀘𑀦𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀇𑀢𑀺 𑀓𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀅𑀢𑁆𑀣𑀯𑀲𑀯𑀕𑁆𑀕𑀸𑀤𑀺𑀯𑀡𑁆𑀡𑀦𑀸

𑁪𑁯𑁮. 𑀏𑀯𑀁 𑀓𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲𑀸𑀦𑀦𑁆𑀢𑀭𑁂 𑀯𑀼𑀢𑁆𑀢𑀸𑀬 ‘‘𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺𑀓𑀸𑀬 𑀤𑁂𑀲𑀦𑀸𑀬 𑀅𑀦𑀼𑀲𑀦𑁆𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀤𑀸𑀦𑀻’’𑀢𑀺𑀆𑀤𑀺, 𑀇𑀤𑀸𑀦𑀺 𑀆𑀭𑀤𑁆𑀥𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀸𑀦𑀺 𑀢𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀬𑁄𑀚𑀦𑀸. 𑀤𑀺𑀝𑁆𑀞𑀥𑀫𑁆𑀫𑀺𑀓𑀯𑁂𑀭𑀸𑀦𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑁂 𑀧𑀯𑀢𑁆𑀢𑀢𑁆𑀢𑀸 𑀘 𑀯𑀺𑀭𑀫𑀺𑀢𑀩𑁆𑀩𑀢𑁆𑀢𑀸 𑀘 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀯𑁂𑀭𑀸𑀦𑀁. 𑀲𑀁𑀯𑀭𑀸𑀬𑀸𑀢𑀺 𑀏𑀢𑁆𑀣 𑀲𑀁𑀧𑀼𑀩𑁆𑀩𑁄 𑀯𑀭𑀥𑀸𑀢𑀼 𑀧𑀺𑀤𑀳𑀦𑀢𑁆𑀣𑁄, 𑀆𑀬𑀲𑀤𑁆𑀤𑁄 𑀘 𑀢𑀤𑀢𑁆𑀣𑁄𑀢𑀺 𑀆𑀳 ‘‘𑀧𑀺𑀤𑀳𑀦𑀢𑁆𑀣𑀸𑀬𑀸’’𑀢𑀺. 𑀯𑀺𑀧𑀸𑀓𑀤𑀼𑀓𑁆𑀔𑀲𑀗𑁆𑀔𑀸𑀢𑀸𑀦𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀯𑀺𑀧𑀸𑀓𑀪𑀽𑀢𑀸𑀦𑀁 𑀤𑀼𑀓𑁆𑀔𑀲𑀗𑁆𑀔𑀸𑀢𑀸𑀦𑀁. 𑀲𑀫𑁆𑀧𑀭𑀸𑀬𑀺𑀓𑀸𑀦𑀦𑁆𑀢𑀺 𑀲𑀫𑁆𑀧𑀭𑀸𑀬𑁂 𑀧𑀯𑀢𑁆𑀢𑀸𑀦𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀸𑀦𑀺𑀲𑀁𑀲𑀝𑁆𑀞𑀸𑀦𑁂. ‘‘𑀯𑀚𑁆𑀚𑀦𑀻𑀬𑀪𑀸𑀯𑀢𑁄’’𑀢𑀺 𑀇𑀫𑀺𑀦𑀸 𑀯𑀚𑁆𑀚𑁂𑀢𑀩𑁆𑀩𑀸𑀦𑀻𑀢𑀺 𑀯𑀚𑁆𑀚𑀸𑀦𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀪𑀸𑀬𑀦𑁆𑀢𑀺 𑀏𑀢𑁂𑀳𑀻𑀢𑀺 𑀪𑀬𑀸𑀦𑀺. 𑀅𑀓𑁆𑀔𑀫𑀝𑁆𑀞𑁂𑀦𑀸𑀢𑀺 𑀅𑀲𑀳𑀡𑀻𑀬𑀝𑁆𑀞𑁂𑀦. ‘‘𑀅𑀓𑀼𑀲𑀮𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀯𑀺𑀧𑀸𑀓𑀤𑀼𑀓𑁆𑀔𑀸𑀦𑀺 𑀨𑀮𑀽𑀧𑀘𑀸𑀭𑁂𑀦 𑀅𑀓𑀼𑀲𑀮𑀸𑀦𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀕𑀡𑀩𑀦𑁆𑀥𑀪𑁂𑀤𑀦𑀢𑁆𑀣𑀸𑀬 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀏𑀯𑀫𑁂𑀯 𑀧𑀸𑀞𑁄. 𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀧𑀸𑀞𑁄 𑀮𑀺𑀔𑀺𑀢𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀅𑀢𑁆𑀣𑀯𑀲𑀯𑀕𑁆𑀕𑁂. 𑀬𑀦𑁆𑀢𑀺 𑀯𑀘𑀦𑀁. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀯𑀕𑁆𑀕𑁂.

𑀇𑀢𑀺 𑀅𑀢𑁆𑀣𑀯𑀲𑀯𑀕𑁆𑀕𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑁪𑁯𑁯. 𑀯𑀢𑁆𑀢𑁂𑀲𑀼 𑀯𑀢𑁆𑀢𑀫𑀸𑀦𑁄 𑀧𑀼𑀕𑁆𑀕𑀮𑁄 𑀑𑀲𑀸𑀭𑀻𑀬𑀢𑀺 𑀅𑀦𑁂𑀦𑀸𑀢𑀺 𑀑𑀲𑀸𑀭𑀡𑀻𑀬𑀁, 𑀓𑀫𑁆𑀫𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑁂𑀦 𑀓𑀫𑁆𑀫𑁂𑀦 𑀑𑀲𑀸𑀭𑀻𑀬𑀢𑀺, 𑀢𑀁 𑀓𑀫𑁆𑀫𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺. ‘‘𑀬𑁂𑀦 𑀓𑀫𑁆𑀫𑁂𑀦𑀸’’𑀢𑀺𑀆𑀤𑀺𑀦𑀸 𑀪𑀡𑁆𑀟𑀦𑀓𑀸𑀭𑀓𑀸𑀤𑀬𑁄 𑀦𑀺𑀲𑁆𑀲𑀸𑀭𑀻𑀬𑀦𑁆𑀢𑀺 𑀅𑀦𑁂𑀦 𑀓𑀫𑁆𑀫𑁂𑀦𑀸𑀢𑀺 𑀦𑀺𑀲𑁆𑀲𑀸𑀭𑀡𑀻𑀬𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁫𑁦𑁦. 𑀲𑀢𑁆𑀢𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀧𑀜𑁆𑀜𑀢𑁆𑀢𑀁 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑁆𑀢𑀭𑀸𑀢𑀺 𑀓𑀓𑀼𑀲𑀦𑁆𑀥𑀸𑀤𑀻𑀦𑀁 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀜𑁆𑀘 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀘 𑀅𑀦𑁆𑀢𑀭𑁂. ‘‘𑀲𑀺𑀓𑁆𑀔𑀸𑀧𑀤𑁂’’𑀢𑀺 𑀇𑀫𑀺𑀦𑀸 ‘‘𑀅𑀧𑀜𑁆𑀜𑀢𑁆𑀢𑁂’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀫𑀓𑁆𑀓𑀝𑀻𑀯𑀢𑁆𑀣𑀼𑀆𑀤𑀺𑀯𑀺𑀦𑀻𑀢𑀓𑀣𑀸 𑀅𑀦𑀼𑀧𑀜𑁆𑀜𑀢𑁆𑀢𑀁 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀺𑀓𑁆𑀔𑀸𑀧𑀤𑁂’’𑀢𑀺 𑀇𑀫𑀺𑀦𑀸 ‘‘𑀧𑀜𑁆𑀜𑀢𑁆𑀢𑁂’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀆𑀦𑀺𑀲𑀁𑀲𑀯𑀕𑁆𑀕𑁂.

𑀇𑀢𑀺 𑀆𑀦𑀺𑀲𑀁𑀲𑀯𑀕𑁆𑀕𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑁫𑁦𑁧. 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀁 𑀲𑀗𑁆𑀕𑀳𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 ‘‘𑀦𑀯 𑀲𑀗𑁆𑀕𑀳𑀸’’𑀢𑀺𑀆𑀤𑀺𑀧𑀸𑀞𑁂 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. ‘‘𑀯𑀢𑁆𑀣𑀼𑀦𑀸 𑀲𑀗𑁆𑀕𑀳𑁄’’𑀢𑀺 𑀇𑀫𑀺𑀦𑀸 ‘‘𑀯𑀢𑁆𑀣𑀼𑀲𑁆𑀫𑀺𑀁, 𑀯𑀢𑁆𑀣𑀽𑀦𑀁 𑀲𑀗𑁆𑀕𑀳𑁄’’𑀢𑀺 𑀅𑀢𑁆𑀣𑀁 𑀦𑀺𑀯𑀸𑀭𑁂𑀢𑀺. 𑀏𑀢𑁆𑀣𑀸𑀢𑀺 ‘‘𑀯𑀢𑁆𑀣𑀼𑀲𑀗𑁆𑀕𑀳𑁄’’𑀢𑀺𑀆𑀤𑀺𑀧𑀸𑀞𑁂. 𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀬𑀲𑁆𑀫𑀸 𑀦𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀸𑀦𑀻𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀺. ‘‘𑀲𑀗𑁆𑀕𑀳𑀺𑀢𑀸𑀦𑀻’’𑀢𑀺 𑀇𑀫𑀺𑀦𑀸 𑀲𑀗𑁆𑀕𑀳𑀺𑀢𑀩𑁆𑀩𑁄𑀢𑀺 𑀲𑀗𑁆𑀕𑀳𑁄𑀢𑀺 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑀺. 𑀏𑀯𑀁 𑀢𑀸𑀯𑀸𑀢𑀺𑀆𑀤𑀺 𑀦𑀺𑀕𑀫𑀦𑀁.

𑀬𑀲𑁆𑀫𑀸 𑀧𑀦 𑀲𑀗𑁆𑀕𑀳𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀯𑀫𑁂𑀢𑁆𑀣𑀸𑀢𑀺𑀆𑀤𑀺𑀦𑀸 𑀔𑀦𑁆𑀥𑀲𑀫𑀼𑀝𑁆𑀞𑀸𑀦𑀅𑀥𑀺𑀓𑀭𑀡𑀲𑀫𑀣𑁂 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀦𑀺𑀕𑀫𑀦𑀁 𑀤𑀲𑁆𑀲𑁂𑀢𑀺. 𑀏𑀢𑁆𑀣𑀸𑀢𑀺 𑀲𑀗𑁆𑀕𑀳𑀯𑀕𑁆𑀕𑁂.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀦𑀯𑀲𑀗𑁆𑀕𑀳𑀺𑀢𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀦𑀺𑀝𑁆𑀞𑀺𑀢𑀸𑀢𑀺 𑀦𑀺𑀝𑁆𑀞𑀁 𑀦𑀺𑀧𑁆𑀨𑀢𑁆𑀢𑀺𑀁 𑀇𑀢𑀸 𑀕𑀢𑀸𑀢𑀺 𑀦𑀺𑀝𑁆𑀞𑀺𑀢𑀸, 𑀅𑀣 𑀯𑀸 𑀦𑀺𑀝𑁆𑀞𑁂 𑀦𑀺𑀧𑁆𑀨𑀢𑁆𑀢𑀺𑀬𑀁 𑀇𑀢𑀸 𑀞𑀺𑀢𑀸𑀢𑀺 𑀦𑀺𑀝𑁆𑀞𑀺𑀢𑀸. 𑀘𑀲𑀤𑁆𑀤𑁄 𑀅𑀯𑀥𑀸𑀭𑀡𑀢𑁆𑀣𑁄, 𑀦𑀺𑀝𑁆𑀞𑀺𑀢𑀸 𑀏𑀯𑀸𑀢𑀺 𑀳𑀺 𑀅𑀢𑁆𑀣𑁄. 𑀅𑀦𑀼𑀢𑁆𑀢𑀸𑀦𑀢𑁆𑀣𑀧𑀤𑀯𑀡𑁆𑀡𑀦𑀸𑀢𑀺 𑀅𑀦𑀼𑀢𑁆𑀢𑀸𑀦𑀸𑀦𑀁 𑀅𑀢𑁆𑀣𑀯𑀦𑁆𑀢𑀧𑀤𑀸𑀦𑀁, 𑀅𑀢𑁆𑀣𑀸𑀦𑀜𑁆𑀘 𑀧𑀤𑀸𑀦𑀜𑁆𑀘 𑀯𑀡𑁆𑀡𑀦𑀸.

𑀇𑀢𑀺 𑀧𑀭𑀺𑀯𑀸𑀭𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀧𑀸𑀘𑀺𑀢𑁆𑀬𑀸𑀤𑀺𑀯𑀡𑁆𑀡𑀦𑀸𑀬 𑀬𑁄𑀚𑀦𑀸𑀢𑀺.

𑀚𑀸𑀤𑀺𑀮𑀜𑁆𑀙𑀺𑀢𑀦𑀸𑀫𑁂𑀦𑀦𑁂𑀓𑀸𑀦𑀁 𑀯𑀸𑀘𑀺𑀢𑁄 𑀫𑀬𑀸;

𑀧𑀭𑀺𑀯𑀸𑀭𑀯𑀺𑀦𑀬𑀲𑁆𑀲, 𑀲𑀫𑀢𑁆𑀢𑁄 𑀬𑁄𑀚𑀦𑀸𑀦𑀬𑁄.

𑀦𑀺𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑀏𑀯𑀁 𑀯𑀺𑀦𑀬𑀲𑀁𑀯𑀡𑁆𑀡𑀦𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀦𑀺𑀕𑀫𑁂𑀦𑁆𑀢𑁄 𑀆𑀳 ‘‘𑀏𑀢𑁆𑀢𑀸𑀯𑀢𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁂𑀦 ‘‘𑀬𑁄 𑀓𑀧𑁆𑀧𑀓𑁄𑀝𑀻𑀳𑀺𑀧𑀺 𑀅𑀧𑁆𑀧𑀫𑁂𑀬𑁆𑀬’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀧𑀸𑀭𑀸. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀧𑀝𑁆𑀞𑀸𑀬 ‘‘𑀦𑀯𑀲𑀗𑁆𑀕𑀳𑀺𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸’’𑀢𑀺 𑀯𑀘𑀦𑀧𑀭𑀺𑀬𑁄𑀲𑀸𑀦𑀸𑀦𑀁 𑀅𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑀸𑀦𑀁 𑀲𑀫𑀼𑀤𑀸𑀬𑀪𑀽𑀢𑁂𑀦 𑀯𑀘𑀦𑀓𑁆𑀓𑀫𑁂𑀦, 𑀲𑀫𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀉𑀪𑀢𑁄𑀯𑀺𑀪𑀗𑁆𑀕𑀔𑀦𑁆𑀥𑀓𑀧𑀭𑀺𑀯𑀸𑀭𑀯𑀺𑀪𑀢𑁆𑀢𑀺𑀤𑁂𑀲𑀦𑀦𑁆𑀢𑀺 𑀉𑀪𑀢𑁄𑀯𑀺𑀪𑀗𑁆𑀕𑁂𑀦 𑀘 𑀔𑀦𑁆𑀥𑀓𑁂𑀦 𑀘 𑀧𑀭𑀺𑀯𑀸𑀭𑁂𑀦 𑀘 𑀯𑀺𑀪𑀚𑀺𑀢𑀩𑁆𑀩𑀤𑁂𑀲𑀦𑀁 𑀯𑀺𑀦𑀬𑀧𑀺𑀝𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀸𑀣𑁄𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁 𑀳𑀺𑀢𑀧𑀝𑀺𑀧𑀢𑁆𑀢𑀺𑀁 𑀬𑀸𑀘𑀦𑀝𑁆𑀞𑁂𑀦 𑀘 𑀓𑀺𑀮𑁂𑀲𑀸𑀦𑀁 𑀉𑀧𑀢𑀸𑀧𑀦𑀝𑁆𑀞𑁂𑀦 𑀘 𑀯𑁂𑀦𑁂𑀬𑁆𑀬𑀸𑀦𑀁 𑀳𑀺𑀢𑀲𑀼𑀔𑀁 𑀆𑀲𑀻𑀲𑀦𑀝𑁆𑀞𑁂𑀦 𑀘 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑀝𑁆𑀞𑁂𑀦 𑀘 𑀦𑀸𑀣𑁄. 𑀯𑁂𑀦𑁂𑀬𑁆𑀬𑀦𑁆𑀢𑀺 𑀯𑀺𑀦𑁂𑀢𑀩𑁆𑀩𑀝𑁆𑀞𑁂𑀦 𑀯𑁂𑀦𑁂𑀬𑁆𑀬𑀁. 𑀚𑀺𑀦𑁄𑀢𑀺 𑀧𑀜𑁆𑀘𑀫𑀸𑀭𑀸𑀦𑀁 𑀚𑀺𑀢𑀝𑁆𑀞𑁂𑀦 𑀚𑀺𑀦𑁄. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀦𑀸𑀣𑁄 𑀯𑁂𑀦𑁂𑀬𑁆𑀬𑀁 𑀯𑀺𑀦𑁂𑀦𑁆𑀢𑁄 𑀚𑀺𑀦𑁄 𑀉𑀪𑀢𑁄𑀯𑀺𑀪𑀗𑁆𑀕𑀔𑀦𑁆𑀥𑀓𑀧𑀭𑀺𑀯𑀸𑀭𑀯𑀺𑀪𑀢𑁆𑀢𑀺𑀤𑁂𑀲𑀦𑀁 𑀬𑀁 𑀯𑀺𑀦𑀬𑀧𑀺𑀝𑀓𑀁 𑀆𑀳𑀸𑀢𑀺.

𑀲𑀫𑀥𑀺𑀓𑀲𑀢𑁆𑀢𑀯𑀻𑀲𑀢𑀺𑀲𑀳𑀲𑁆𑀲𑀫𑀢𑁆𑀢𑁂𑀦𑀸𑀢𑀺 𑀲𑀳 𑀅𑀥𑀺𑀓𑁂𑀦 𑀲𑀢𑁆𑀢𑀲𑀳𑀲𑁆𑀲𑀧𑁆𑀧𑀫𑀸𑀡𑁂𑀦 𑀘 𑀯𑀻𑀲𑀢𑀺𑀲𑀳𑀲𑁆𑀲𑀧𑁆𑀧𑀫𑀸𑀡𑁂𑀦 𑀘 𑀕𑀦𑁆𑀣𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀯𑀺𑀦𑀬𑀧𑀺𑀝𑀓𑀲𑁆𑀲. 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀢𑀺 𑀲𑀫𑀦𑁆𑀢𑀢𑁄 𑀧𑀲𑀸𑀤𑀁 𑀯𑀳𑀺𑀓𑀸, 𑀚𑀦𑀺𑀓𑀸 𑀯𑀸. 𑀢𑀢𑁆𑀭𑀸𑀬𑀁 𑀬𑁄𑀚𑀦𑀸 𑁋 𑀢𑀲𑁆𑀲 𑀲𑀫𑀥𑀺𑀓𑀲𑀢𑁆𑀢𑀯𑀻𑀲𑀢𑀺𑀲𑀳𑀲𑁆𑀲𑀫𑀢𑁆𑀢𑁂𑀦 𑀕𑀦𑁆𑀣𑁂𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸 𑀦𑀸𑀫 𑀲𑀁𑀯𑀡𑁆𑀡𑀦𑀸 𑀲𑀫𑀢𑁆𑀢𑀸𑀢𑀺.

𑀢𑀢𑁆𑀭𑀺𑀤𑀦𑁆𑀢𑀺 𑀢𑀢𑁆𑀭 𑀇𑀤𑀁. ‘‘𑀢𑀢𑁆𑀭𑀸’’𑀢𑀺 𑀧𑀤𑀁 𑀧𑀼𑀭𑀺𑀫𑀯𑀘𑀦𑀸𑀧𑁂𑀓𑁆𑀔𑀁. 𑀢𑀢𑁆𑀭 ‘‘𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸 𑀦𑀸𑀫𑀸’’𑀢𑀺 𑀯𑀘𑀦𑁂𑀢𑀺 𑀳𑀺 𑀅𑀢𑁆𑀣𑁄. 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁆𑀢𑀲𑁆𑀫𑀺𑀦𑁆𑀢𑀺 𑀧𑀘𑁆𑀘𑀢𑁆𑀢𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁 𑀳𑁄𑀢𑀺 ‘‘𑀇𑀤𑀫𑁆𑀧𑀺 𑀲𑀻𑀮𑀲𑁆𑀫𑀺’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁯𑁪 𑀆𑀤𑀬𑁄) 𑀯𑀺𑀬, 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸𑀢𑀢𑁆𑀭 ‘‘𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸 𑀦𑀸𑀫𑀸’’𑀢𑀺 𑀯𑀘𑀦𑁂 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀇𑀤𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁆𑀢𑀁 𑀳𑁄𑀢𑀻𑀢𑀺 𑀅𑀬𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀪𑀸𑀯𑁄𑀢𑀺 𑀅𑀢𑁆𑀣𑁄.

𑀆𑀘𑀭𑀺𑀬𑀧𑀭𑀁𑀧𑀭𑀢𑁄𑀢𑀺𑀆𑀤𑀻𑀲𑀼 𑀕𑀸𑀣𑀸𑀲𑀼 𑀯𑀼𑀢𑁆𑀢𑀁 𑀦𑀯𑀯𑀺𑀥𑀁 𑀯𑀺𑀲𑁂𑀲𑀦𑀧𑀤𑀁 ‘‘𑀦 𑀤𑀺𑀲𑁆𑀲𑀢𑀻’’𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀲𑀫𑁆𑀧𑀲𑁆𑀲𑀢𑀦𑁆𑀢𑀺 𑀲𑀫𑁆𑀫𑀸 𑀧𑀲𑁆𑀲𑀦𑁆𑀢𑀸𑀦𑀁 𑀯𑀺𑀜𑁆𑀜𑀽𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀢𑁄𑀢𑀺 𑀬𑀲𑁆𑀫𑀸, 𑀦 𑀤𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀲𑀁𑀯𑀡𑁆𑀡𑀦𑀸𑀬𑀁. 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀢𑁆𑀯𑁂𑀯𑀸𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸 𑀇𑀢𑀺 𑀏𑀯 𑀦𑀸𑀫. 𑀯𑀺𑀦𑀬𑀲𑁆𑀲𑀸𑀢𑀺 𑀯𑀺𑀦𑀬𑀧𑀺𑀝𑀓𑀲𑁆𑀲. 𑀯𑀺𑀦𑁂𑀬𑁆𑀬𑀤𑀫𑀦𑀓𑀼𑀲𑀮𑁂𑀦𑀸𑀢𑀺 𑀯𑀺𑀦𑁂𑀬𑁆𑀬𑀸𑀦𑀁 𑀤𑀫𑀦𑁂 𑀙𑁂𑀓𑁂𑀦. 𑀮𑁄𑀓𑀦𑀸𑀣𑁂𑀦𑀸𑀢𑀺 𑀮𑁄𑀓𑀸𑀦𑀁 𑀦𑀸𑀣𑁂𑀦. 𑀮𑁄𑀓𑀫𑀦𑀼𑀓𑀫𑁆𑀧𑀫𑀸𑀦𑁂𑀦𑀸𑀢𑀺 𑀮𑁄𑀓𑀁 𑀅𑀦𑀼𑀓𑀫𑁆𑀧𑀫𑀸𑀦𑁂𑀦. 𑀅𑀬𑀜𑁆𑀳𑁂𑀢𑁆𑀣 𑀬𑁄𑀚𑀦𑀸 𑁋 𑀆𑀘𑀭𑀺𑀬𑀧𑀭𑀁𑀧𑀭𑀢𑁄…𑀧𑁂… 𑀯𑀺𑀪𑀗𑁆𑀕𑀦𑀬𑀪𑁂𑀤𑀤𑀲𑁆𑀲𑀦𑀢𑁄 𑀲𑀫𑁆𑀧𑀲𑁆𑀲𑀢𑀁 𑀯𑀺𑀜𑁆𑀜𑀽𑀦𑀁 𑀏𑀢𑁆𑀣 𑀓𑀺𑀜𑁆𑀘𑀺 𑀅𑀧𑀸𑀲𑀸𑀤𑀺𑀓𑀁 𑀬𑀢𑁄 𑀦 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀯𑀺𑀦𑁂𑀬𑁆𑀬𑀤𑀫𑀦𑀓𑀼𑀲𑀮𑁂𑀦 𑀮𑁄𑀓𑀦𑀸𑀣𑁂𑀦 𑀮𑁄𑀓𑀫𑀦𑀼𑀓𑀫𑁆𑀧𑀫𑀸𑀦𑁂𑀦 𑀪𑀕𑀯𑀢𑀸 𑀯𑀼𑀢𑁆𑀢𑀲𑁆𑀲 𑀯𑀺𑀦𑀬𑀲𑁆𑀲 𑀅𑀬𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀢𑁆𑀯𑁂𑀯 𑀲𑀁𑀯𑀡𑁆𑀡𑀦𑀸 𑀧𑀯𑀢𑁆𑀢𑀸𑀢𑀺.

𑀢𑀺𑀲𑁆𑀲𑁄𑀧𑀺 𑀇𑀫𑀸 𑀲𑀻𑀳𑀴𑀝𑁆𑀞𑀓𑀣𑀸𑀬𑁄 𑀲𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀲 𑀲𑀦𑁆𑀢𑀺𑀓𑁂 𑀲𑀼𑀢𑀦𑁆𑀢𑀺 𑀆𑀳 ‘‘𑀩𑀼𑀤𑁆𑀥𑀫𑀺𑀢𑁆𑀢𑁄…𑀧𑁂… 𑀲𑀦𑁆𑀢𑀺𑀓𑁂’’𑀢𑀺. ‘‘𑀩𑀼𑀤𑁆𑀥𑀫𑀺𑀢𑁆𑀢𑁄’’𑀢𑀺 𑀦𑀸𑀫𑁂𑀦 𑀯𑀺𑀲𑁆𑀲𑀼𑀢𑀲𑁆𑀲 𑀬𑀲𑀲𑁆𑀲𑀺𑀦𑁄 𑀯𑀺𑀦𑀬𑀜𑁆𑀜𑀼𑀲𑁆𑀲 𑀥𑀻𑀭𑀲𑁆𑀲 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀲𑀼𑀢𑁆𑀯𑀸𑀢𑀺 𑀬𑁄𑀚𑀦𑀸. ‘‘𑀲𑀼𑀢𑁆𑀯𑀸’’𑀢𑀺 𑀧𑀤𑀁 ‘‘𑀆𑀭𑀤𑁆𑀥𑀸’’𑀢𑀺 𑀧𑀤𑁂 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁.

𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑁂 𑀪𑀽𑀫𑀺𑀪𑀸𑀕𑁂 𑀧𑀢𑀺𑀝𑁆𑀞𑀺𑀢𑁄 𑀲𑀢𑁆𑀣𑀼 𑀫𑀳𑀸𑀩𑁄𑀥𑀺𑀯𑀺𑀪𑀽𑀲𑀺𑀢𑁄 𑀬𑁄 𑀫𑀳𑀸𑀯𑀺𑀳𑀸𑀭𑁄 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸.

𑀢𑀲𑁆𑀲 𑀫𑀳𑀸𑀯𑀺𑀳𑀸𑀭𑀲𑁆𑀲 𑀤𑀓𑁆𑀔𑀺𑀡𑁂 𑀤𑀺𑀲𑀸𑀪𑀸𑀕𑁂 𑀧𑀥𑀸𑀦𑀖𑀭𑀁 𑀧𑀥𑀸𑀦𑀖𑀭𑀦𑀸𑀫𑀓𑀁 𑀉𑀢𑁆𑀢𑀫𑀁 𑀲𑀼𑀘𑀺𑀘𑀸𑀭𑀺𑀢𑁆𑀢𑀲𑀻𑀮𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑁂𑀯𑀺𑀢𑀁 𑀬𑀁 𑀧𑀭𑀺𑀯𑁂𑀡𑀁 𑀅𑀢𑁆𑀣𑀺, 𑀢𑀢𑁆𑀣 𑀓𑀸𑀭𑀬𑀻𑀢𑀺 𑀬𑁄𑀚𑀦𑀸.

𑀓𑁄𑀦𑀸𑀫𑁄 𑀓𑀸𑀭𑀬𑀻𑀢𑀺 𑀆𑀳 ‘‘𑀉𑀴𑀸𑀭𑀓𑀼𑀮𑀲𑀫𑁆𑀪𑀽𑀢𑁄…𑀧𑁂… 𑀯𑀺𑀲𑁆𑀲𑀼𑀢𑁄’’𑀢𑀺. 𑀢𑀢𑁆𑀣 𑀉𑀴𑀸𑀭𑀓𑀼𑀮𑀲𑀫𑁆𑀪𑀽𑀢𑁄 𑀲𑀗𑁆𑀖𑀼𑀧𑀝𑁆𑀞𑀸𑀬𑀓𑁄 𑀲𑀤𑀸 𑀅𑀦𑀸𑀓𑀼𑀮𑀸𑀬 𑀲𑀤𑁆𑀥𑀸𑀬 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑁄 ‘‘𑀫𑀳𑀸𑀦𑀺𑀕𑀫𑀲𑀸𑀫𑀻’’𑀢𑀺 𑀯𑀺𑀲𑁆𑀲𑀼𑀢𑁄 𑀉𑀧𑀸𑀲𑀓𑁄 𑀓𑀸𑀭𑀬𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀓𑀁 𑀓𑀸𑀭𑀬𑀻𑀢𑀺 𑀆𑀳 ‘‘𑀘𑀸𑀭𑀼…𑀧𑁂… 𑀲𑀫𑁆𑀧𑀦𑁆𑀦𑀲𑀮𑀺𑀮𑀸𑀲𑀬’’𑀦𑁆𑀢𑀺. 𑀢𑀢𑁆𑀣 𑀘𑀸𑀭𑀼𑀧𑀸𑀓𑀸𑀭𑀲𑀁𑀘𑀺𑀢𑀁 𑀲𑁄𑀪𑁂𑀦 𑀧𑀸𑀓𑀸𑀭𑁂𑀦 𑀲𑀼𑀝𑁆𑀞𑀼 𑀘𑀺𑀢𑀁 𑀘𑀺𑀦𑀺𑀢𑀁 𑀫𑀦𑁄𑀭𑀫𑀁 𑀲𑀻𑀢𑀘𑁆𑀙𑀸𑀬𑀢𑀭𑀽𑀧𑁂𑀢𑀁 𑀲𑀻𑀢𑀘𑁆𑀙𑀸𑀬𑁂𑀦 𑀭𑀼𑀓𑁆𑀔𑁂𑀦 𑀉𑀧𑁂𑀢𑀁 𑀲𑀫𑁆𑀧𑀦𑁆𑀦𑀲𑀮𑀺𑀮𑀸𑀲𑀬𑀁 𑀫𑀥𑀼𑀭𑀚𑀮𑀸𑀥𑀸𑀭𑀁 𑀬𑀁 𑀧𑀸𑀲𑀸𑀤𑀁 𑀓𑀸𑀭𑀬𑀻𑀢𑀺 𑀬𑁄𑀚𑀦𑀸. 𑀫𑀳𑀸𑀦𑀺𑀕𑀫𑀲𑀸𑀫𑀺𑀦𑁄 𑀢𑀢𑁆𑀭 𑀧𑀸𑀲𑀸𑀤𑁂 𑀯𑀲𑀢𑀸𑀫𑀬𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀓𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀓𑀻𑀤𑀺𑀲𑀸 𑀓𑀸 𑀆𑀭𑀤𑁆𑀥𑀸𑀢𑀺 𑀆𑀳 ‘‘𑀲𑀼𑀘𑀺𑀲𑀻𑀮𑀲𑀫𑀸𑀘𑀸𑀭𑀁…𑀧𑁂… 𑀯𑀺𑀦𑀬𑀯𑀡𑁆𑀡𑀦𑀸’’𑀢𑀺. 𑀢𑀢𑁆𑀣 𑀲𑀼𑀘𑀺𑀲𑀻𑀮𑀲𑀫𑀸𑀘𑀸𑀭𑀁 𑀩𑀼𑀤𑁆𑀥𑀲𑀺𑀭𑀺𑀯𑁆𑀳𑀬𑀁 𑀣𑁂𑀭𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑁆𑀥𑀸 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀸𑀤𑀻𑀳𑀺 𑀧𑀭𑀺𑀧𑀼𑀡𑁆𑀡𑀸 𑀬𑀸 𑀯𑀺𑀦𑀬𑀯𑀡𑁆𑀡𑀦𑀸 𑀆𑀭𑀤𑁆𑀥𑀸𑀢𑀺 𑀬𑁄𑀚𑀦𑀸.

𑀓𑀺𑀁𑀦𑀸𑀫𑀲𑁆𑀲 𑀭𑀜𑁆𑀜𑁄 𑀓𑀢𑀫𑁂 𑀲𑀁𑀯𑀘𑁆𑀙𑀭𑁂 𑀆𑀭𑀤𑁆𑀥𑀸, 𑀓𑀺𑀲𑁆𑀫𑀺𑀁 𑀓𑀸𑀮𑁂 𑀧𑀭𑀺𑀦𑀺𑀝𑁆𑀞𑀺𑀢𑀸𑀢𑀺 𑀆𑀳 ‘‘𑀧𑀸𑀮𑀬𑀦𑁆𑀢𑀲𑁆𑀲…𑀧𑁂… 𑀧𑀭𑀺𑀦𑀺𑀝𑁆𑀞𑀺𑀢𑀸’’𑀢𑀺. 𑀢𑀢𑁆𑀣 𑀲𑀓𑀮𑀁 𑀮𑀗𑁆𑀓𑀸𑀤𑀻𑀧𑀁 𑀦𑀺𑀭𑀩𑁆𑀩𑀼𑀤𑀁 𑀓𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀸𑀮𑀬𑀦𑁆𑀢𑀲𑁆𑀲 𑀲𑀺𑀭𑀺𑀦𑀺𑀯𑀸𑀲𑀲𑁆𑀲 𑀲𑀺𑀭𑀺𑀧𑀸𑀮𑀬𑀲𑀲𑁆𑀲𑀺𑀦𑁄 𑀭𑀜𑁆𑀜𑁄 𑀚𑀬𑀲𑀁𑀯𑀘𑁆𑀙𑀭𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑀯𑀻𑀲𑀢𑀺𑀫𑁂 𑀔𑁂𑀫𑁂 𑀚𑀬𑀲𑀁𑀯𑀘𑁆𑀙𑀭𑁂 𑀅𑀬𑀁 𑀯𑀺𑀦𑀬𑀲𑀁𑀯𑀡𑁆𑀡𑀦𑀸 𑀆𑀭𑀤𑁆𑀥𑀸, 𑀏𑀓𑀯𑀻𑀲𑀫𑁆𑀳𑀺 𑀭𑀜𑁆𑀜𑁄 𑀏𑀓𑀯𑀻𑀲𑀢𑀺𑀫𑁂 𑀲𑀁𑀯𑀘𑁆𑀙𑀭𑁂 𑀲𑀫𑁆𑀧𑀢𑁆𑀢𑁂 𑀲𑀢𑀺 𑀧𑀭𑀺𑀦𑀺𑀝𑁆𑀞𑀺𑀢𑀸𑀢𑀺 𑀬𑁄𑀚𑀦𑀸.

𑀬𑀣𑀸 𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸 𑀦𑀺𑀭𑀼𑀧𑀤𑁆𑀤𑀯𑀸 𑀲𑀻𑀖𑀁 𑀦𑀺𑀝𑁆𑀞𑀁 𑀉𑀧𑀕𑀢𑀸, 𑀏𑀯𑀁 𑀮𑁄𑀓𑀲𑁆𑀲 𑀥𑀫𑁆𑀫𑀽𑀧𑀲𑀁𑀳𑀺𑀢𑀸 𑀲𑀻𑀖𑀁 𑀕𑀘𑁆𑀙𑀦𑁆𑀢𑀽𑀢𑀺 𑀆𑀲𑀻𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑀤𑁆𑀤𑀯𑀸𑀓𑀼𑀮𑁂’’𑀢𑀺𑀆𑀤𑀺. 𑀢𑀢𑁆𑀣 𑀉𑀧𑀤𑁆𑀤𑀯𑀸𑀓𑀼𑀮𑁂 𑀉𑀧𑀤𑁆𑀤𑀯𑁂𑀳𑀺 𑀆𑀓𑀼𑀮𑁂 𑀮𑁄𑀓𑁂 𑀲𑀢𑁆𑀢𑀮𑁄𑀓𑁂 𑀦𑀺𑀭𑀼𑀧𑀤𑁆𑀤𑀯𑀢𑁄 𑀉𑀧𑀤𑁆𑀤𑀯𑀯𑀺𑀭𑀳𑀢𑁄 𑀬𑀣𑀸 𑀅𑀬𑀁 𑀯𑀺𑀦𑀬𑀲𑀁𑀯𑀡𑁆𑀡𑀦𑀸 𑀏𑀓𑀲𑀁𑀯𑀘𑁆𑀙𑀭𑁂𑀦𑁂𑀯 𑀦𑀺𑀝𑁆𑀞𑀁 𑀉𑀧𑀸𑀕𑀢𑀸, 𑀏𑀯𑀁 𑀲𑀩𑁆𑀩𑀲𑁆𑀲 𑀮𑁄𑀓𑀲𑁆𑀲 𑀆𑀭𑀤𑁆𑀥𑀸 𑀲𑀩𑁆𑀩𑁂𑀧𑀺 𑀥𑀫𑁆𑀫𑀽𑀧𑀲𑀁𑀳𑀺𑀢𑀸 𑀅𑀢𑁆𑀣𑀸 𑀦𑀺𑀭𑀼𑀧𑀤𑁆𑀤𑀯𑀸 𑀲𑀻𑀖𑀁 𑀦𑀺𑀝𑁆𑀞𑀁 𑀕𑀘𑁆𑀙𑀦𑁆𑀢𑀽𑀢𑀺 𑀬𑁄𑀚𑀦𑀸.

𑀅𑀢𑁆𑀢𑀦𑀸 𑀲𑀫𑀸𑀘𑀺𑀢𑀲𑁆𑀲 𑀧𑀼𑀜𑁆𑀜𑀲𑁆𑀲 𑀇𑀘𑁆𑀙𑀺𑀢𑀢𑁆𑀣𑁂 𑀧𑀭𑀺𑀡𑀸𑀫𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀺𑀭𑀝𑁆𑀞𑀺𑀢𑀢𑁆𑀣𑀁 𑀥𑀫𑁆𑀫𑀲𑁆𑀲𑀸’’𑀢𑀺𑀆𑀤𑀺. 𑀢𑀢𑁆𑀣 𑀥𑀫𑁆𑀫𑀲𑁆𑀲 𑀘𑀺𑀭𑀝𑁆𑀞𑀺𑀢𑀢𑁆𑀣𑀁 𑀇𑀫𑀁 𑀯𑀺𑀦𑀬𑀲𑀁𑀯𑀡𑁆𑀡𑀦𑀁 𑀓𑀭𑁄𑀦𑁆𑀢𑁂𑀦 𑀲𑀤𑁆𑀥𑀫𑁆𑀫𑀩𑀳𑀼𑀫𑀸𑀦𑁂𑀦 𑀫𑀬𑀸 𑀬𑀜𑁆𑀘 𑀧𑀼𑀜𑁆𑀜𑀁 𑀲𑀫𑀸𑀘𑀺𑀢𑀁, 𑀲𑀩𑁆𑀩𑀲𑁆𑀲 𑀢𑀲𑁆𑀲 𑀧𑀼𑀜𑁆𑀜𑀲𑁆𑀲 𑀆𑀦𑀼𑀪𑀸𑀯𑁂𑀦 𑀲𑀩𑁆𑀩𑁂𑀧𑀺 𑀧𑀸𑀡𑀺𑀦𑁄 𑀥𑀫𑁆𑀫𑀭𑀸𑀚𑀲𑁆𑀲 𑀪𑀕𑀯𑀢𑁄 𑀲𑀤𑁆𑀥𑀫𑁆𑀫𑀭𑀲𑀲𑁂𑀯𑀺𑀦𑁄 𑀪𑀯𑀦𑁆𑀢𑀼.

𑀲𑀤𑁆𑀥𑀫𑁆𑀫𑁄 𑀘𑀺𑀭𑀁 𑀢𑀺𑀝𑁆𑀞𑀢𑀼, 𑀤𑁂𑀯𑁄 𑀓𑀸𑀮𑁂 𑀯𑀲𑁆𑀲𑀁 𑀯𑀲𑁆𑀲𑀦𑁆𑀢𑁄 𑀘𑀺𑀭𑀁 𑀧𑀚𑀁 𑀲𑀢𑁆𑀢𑀲𑀫𑀽𑀳𑀁 𑀢𑀧𑁆𑀧𑁂𑀢𑀼. 𑀭𑀸𑀚𑀸 𑀥𑀫𑁆𑀫𑁂𑀦 𑀫𑁂𑀤𑀦𑀺𑀁 𑀭𑀓𑁆𑀔𑀢𑀽𑀢𑀺 𑀬𑁄𑀚𑀦𑀸. 𑀇𑀢𑀺𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑀢𑁆𑀣𑁄. 𑀇𑀢𑀺 𑀧𑀭𑀺𑀦𑀺𑀝𑁆𑀞𑀁 𑀲𑀼𑀝𑁆𑀞𑀼 𑀆𑀧𑀦𑀁 𑀤𑀝𑁆𑀞𑀩𑁆𑀩𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀲𑀤𑁆𑀥𑀸 𑀘 𑀩𑀼𑀤𑁆𑀥𑀺 𑀘 𑀯𑀻𑀭𑀺𑀬𑀜𑁆𑀘 𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀻𑀭𑀺𑀬𑀸𑀦𑀺, 𑀯𑀺𑀲𑀼𑀤𑁆𑀥𑀸𑀦𑀺 𑀘 𑀢𑀸𑀦𑀺 𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀻𑀭𑀺𑀬𑀸𑀦𑀺 𑀘𑁂𑀢𑀺 𑀯𑀺𑀲𑀼𑀤𑁆𑀥𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀻𑀭𑀺𑀬𑀸𑀦𑀺, 𑀧𑀭𑀫𑀸𑀦𑀺 𑀘 𑀢𑀸𑀦𑀺 𑀯𑀺𑀲𑀼𑀤𑁆𑀥𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀻𑀭𑀺𑀬𑀸𑀦𑀺 𑀘𑁂𑀢𑀺 𑀧𑀭𑀫𑀯𑀺𑀲𑀼𑀤𑁆𑀥𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀻𑀭𑀺𑀬𑀸𑀦𑀺, 𑀢𑁂𑀳𑀺 𑀧𑀭𑀺𑀫𑀡𑁆𑀟𑀺𑀢𑁄 𑀧𑀭𑀫𑀯𑀺𑀲𑀼𑀤𑁆𑀥𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀻𑀭𑀺𑀬𑀧𑀝𑀺𑀫𑀡𑁆𑀟𑀺𑀢𑁄, 𑀢𑁂𑀦, 𑀣𑁂𑀭𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀻𑀮𑀜𑁆𑀘 𑀆𑀘𑀸𑀭𑁄 𑀘 𑀅𑀚𑁆𑀚𑀯𑀜𑁆𑀘 𑀫𑀤𑁆𑀤𑀯𑀜𑁆𑀘 𑀲𑀻𑀮𑀸𑀘𑀸𑀭𑀚𑁆𑀚𑀯𑀫𑀤𑁆𑀤𑀯𑀸𑀦𑀺, 𑀢𑀸𑀦𑀺 𑀆𑀤𑀻𑀦𑀺 𑀬𑁂𑀲𑀁 𑀢𑁂𑀢𑀺 𑀲𑀻𑀮𑀸𑀘𑀸𑀭𑀚𑁆𑀚𑀯𑀫𑀤𑁆𑀤𑀯𑀸𑀤𑀬𑁄, 𑀆𑀤𑀺𑀲𑀤𑁆𑀤𑁂𑀦 𑀔𑀦𑁆𑀢𑀺𑀲𑁄𑀭𑀘𑁆𑀘𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺, 𑀢𑁂𑀬𑁂𑀯 𑀕𑀼𑀡𑀸𑀢𑀺 𑀲𑀻𑀮𑀸𑀘𑀸𑀭𑀚𑁆𑀚𑀯𑀫𑀤𑁆𑀤𑀯𑀸𑀤𑀺𑀕𑀼𑀡𑀸, 𑀢𑁂𑀲𑀁 𑀲𑀫𑀼𑀤𑀬𑁄𑀢𑀺 𑀲𑀻𑀮𑀸𑀘𑀸𑀭𑀚𑁆𑀚𑀯𑀫𑀤𑁆𑀤𑀯𑀸𑀤𑀺𑀕𑀼𑀡𑀲𑀫𑀼𑀤𑀬𑁄, 𑀢𑁂𑀦 𑀲𑀫𑀼𑀤𑀺𑀢𑁄 𑀲𑀼𑀝𑁆𑀞𑀼 𑀧𑀸𑀓𑀝𑁄𑀢𑀺 𑀲𑀻𑀮𑀸𑀘𑀸𑀭𑀚𑁆𑀚𑀯𑀫𑀤𑁆𑀤𑀯𑀸𑀤𑀺𑀕𑀼𑀡𑀲𑀫𑀼𑀤𑀬𑀲𑀫𑀼𑀤𑀺𑀢𑁄, 𑀢𑁂𑀦 𑀣𑁂𑀭𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀓𑀲𑀫𑀬𑁄 𑀘 𑀲𑀫𑀬𑀦𑁆𑀢𑀭𑁄 𑀘 𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀸, 𑀢𑁂𑀬𑁂𑀯 𑀧𑀦 𑀕𑀳𑀦𑀲𑀤𑀺𑀲𑀢𑁆𑀢𑀸 𑀕𑀳𑀦𑀦𑁆𑀢𑀺 𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀕𑀳𑀦𑀁, 𑀢𑀲𑁆𑀲 𑀅𑀚𑁆𑀛𑁄𑀕𑀸𑀳𑀡𑀁 𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀕𑀳𑀦𑀚𑁆𑀛𑁄𑀕𑀸𑀳𑀡𑀁, 𑀢𑀲𑁆𑀫𑀺𑀁 𑀲𑀫𑀢𑁆𑀣𑁄 𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀕𑀳𑀦𑀚𑁆𑀛𑁄𑀕𑀸𑀳𑀡𑀲𑀫𑀢𑁆𑀣𑁄. 𑀢𑁂𑀦 𑀣𑁂𑀭𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀲𑁂𑀲𑁂𑀦 𑀅𑀜𑁆𑀚𑀢𑀺 𑀧𑀸𑀓𑀝𑀁 𑀓𑀭𑁄𑀢𑀻𑀢𑀺 𑀯𑀺𑀬𑀢𑁆𑀢𑁄, 𑀧𑀼𑀕𑁆𑀕𑀮𑁄, 𑀯𑀺𑀬𑀢𑁆𑀢𑀲𑁆𑀲 𑀇𑀤𑀁 𑀯𑁂𑀬𑁆𑀬𑀢𑁆𑀢𑀺𑀬𑀁, 𑀲𑀢𑀺. 𑀧𑀜𑁆𑀜𑀸 𑀘 𑀯𑁂𑀬𑁆𑀬𑀢𑁆𑀢𑀺𑀬𑀜𑁆𑀘 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀁, 𑀢𑁂𑀦 𑀲𑀫𑀦𑁆𑀦𑀸𑀕𑀢𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑀦𑁆𑀦𑀸𑀕𑀢𑁂𑀦 𑀣𑁂𑀭𑁂𑀦𑀸𑀢𑀺 𑀬𑁄𑀚𑀦𑀸.

𑀢𑀻𑀡𑀺 𑀧𑀺𑀝𑀓𑀸𑀦𑀻𑀢𑀺 𑀢𑀺𑀧𑀺𑀝𑀓𑀁, 𑀢𑀫𑁂𑀯 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀢𑁆𑀢𑀸 𑀧𑀭𑀺𑀬𑀢𑁆𑀢𑀻𑀢𑀺 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺, 𑀢𑀲𑁆𑀲 𑀧𑀪𑁂𑀤𑁄 𑀏𑀢𑁆𑀣 𑀲𑀢𑁆𑀣𑀼𑀲𑀸𑀲𑀦𑁂𑀢𑀺 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀧𑀪𑁂𑀤𑀁, 𑀢𑀲𑁆𑀫𑀺𑀁. 𑀲𑀳 𑀅𑀝𑁆𑀞𑀓𑀣𑀸𑀬𑀸𑀢𑀺 𑀲𑀸𑀝𑁆𑀞𑀓𑀣𑀁, 𑀲𑀢𑁆𑀣𑀼 𑀲𑀸𑀲𑀦𑀁, 𑀢𑀲𑁆𑀫𑀺𑀁 𑀲𑀢𑁆𑀣𑀼𑀲𑀸𑀲𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀢𑁆𑀣𑀼𑀦𑁄 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀯𑀲𑁂𑀦 𑀢𑀺𑀯𑀺𑀥𑀁 𑀲𑀸𑀲𑀦𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀩𑁆𑀬𑀸𑀲𑁄𑀧𑀺 𑀬𑀼𑀚𑁆𑀚𑀢𑁂𑀯, 𑀢𑀲𑁆𑀫𑀺𑀁 𑀲𑀢𑁆𑀣𑀼𑀲𑀸𑀲𑀦𑁂 ‘‘𑀅𑀧𑁆𑀧𑀝𑀺𑀳𑀢’’𑀇𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁 𑀅𑀧𑁆𑀧𑀝𑀺𑀳𑀢𑀜𑀸𑀡𑀁, 𑀇𑀤𑀁 𑀢𑀲𑁆𑀫𑀺𑀁 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀓𑀸𑀮𑁂 𑀣𑁂𑀭𑀲𑁆𑀲 𑀧𑀝𑀺𑀯𑁂𑀥𑀜𑀸𑀡𑀸𑀪𑀸𑀯𑀢𑁄 𑀲𑀼𑀢𑀫𑀬𑀘𑀺𑀦𑁆𑀢𑀸𑀫𑀬𑀜𑀸𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀧𑁆𑀧𑀝𑀺𑀳𑀢𑀜𑀸𑀡𑀲𑁆𑀲 𑀧𑀪𑀸𑀯𑁄 𑀏𑀢𑀲𑁆𑀲𑀸𑀢𑀺 𑀅𑀧𑁆𑀧𑀝𑀺𑀳𑀢𑀜𑀸𑀡𑀧𑀪𑀸𑀯𑁄, 𑀢𑁂𑀦 𑀣𑁂𑀭𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀳𑀦𑁆𑀢𑀁 𑀯𑁂𑀬𑁆𑀬𑀸𑀓𑀭𑀡𑀫𑁂𑀢𑀲𑁆𑀲𑀸𑀢𑀺 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁄, 𑀇𑀫𑀺𑀦𑀸 𑀲𑀺𑀓𑁆𑀔𑀸𑀦𑀺𑀭𑀼𑀢𑁆𑀢𑀺𑀆𑀤𑀻𑀳𑀺 𑀙𑀴𑀗𑁆𑀕𑁂 𑀫𑀳𑀦𑁆𑀢𑀯𑁂𑀬𑁆𑀬𑀸𑀓𑀭𑀡𑁂 𑀣𑁂𑀭𑀲𑁆𑀲 𑀅𑀧𑁆𑀧𑀝𑀺𑀳𑀢𑀜𑀸𑀡𑀧𑀪𑀸𑀯𑀢𑀁 𑀤𑀲𑁆𑀲𑁂𑀢𑀺, 𑀢𑁂𑀦 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦 𑀣𑁂𑀭𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀓𑀭𑀡𑀁 𑀯𑀼𑀘𑁆𑀘𑀢𑀺 𑀞𑀸𑀦𑀁 𑀓𑀭𑀺𑀬𑀢𑀺 𑀉𑀘𑁆𑀘𑀸𑀭𑀺𑀬𑀢𑀺 𑀏𑀢𑁆𑀣, 𑀏𑀢𑁂𑀦𑀸𑀢𑀺 𑀯𑀸 𑀯𑀘𑀦𑀢𑁆𑀣𑁂𑀦, 𑀓𑀭𑀡𑀲𑁆𑀲 𑀲𑀫𑁆𑀧𑀢𑁆𑀢𑀺 𑀓𑀭𑀡𑀲𑀫𑁆𑀧𑀢𑁆𑀢𑀺, 𑀢𑀸𑀬 𑀚𑀦𑀺𑀢𑀁 𑀓𑀭𑀡𑀲𑀫𑁆𑀧𑀢𑁆𑀢𑀺𑀚𑀦𑀺𑀢𑀁. 𑀲𑀼𑀔𑁂𑀦 𑀣𑁂𑀭𑀫𑀼𑀔𑀢𑁄 𑀯𑀺𑀦𑀺𑀕𑁆𑀕𑀢𑀁 𑀲𑀼𑀔𑀯𑀺𑀦𑀺𑀕𑁆𑀕𑀢𑀁, 𑀓𑀭𑀡𑀲𑀫𑁆𑀧𑀢𑁆𑀢𑀺𑀚𑀦𑀺𑀢𑁂𑀦 𑀳𑁂𑀢𑀼𑀪𑀽𑀢𑁂𑀦 𑀲𑀼𑀔𑀯𑀺𑀦𑀺𑀕𑁆𑀕𑀢𑀁 𑀓𑀭𑀡𑀲𑀫𑁆𑀧𑀢𑁆𑀢𑀺𑀚𑀦𑀺𑀢𑀲𑀼𑀔𑀯𑀺𑀦𑀺𑀕𑁆𑀕𑀢𑀁. 𑀫𑀥𑀼𑀭𑀯𑀘𑀦𑀜𑁆𑀘 𑀉𑀤𑀸𑀭𑀯𑀘𑀦𑀜𑁆𑀘 𑀫𑀥𑀼𑀭𑁄𑀤𑀸𑀭𑀯𑀘𑀦𑀁, 𑀧𑀼𑀩𑁆𑀩𑀧𑀤𑁂 𑀉𑀢𑁆𑀢𑀭𑀧𑀤𑀮𑁄𑀧𑁄, 𑀇𑀫𑀺𑀦𑀸 𑀓𑁂𑀝𑀼𑀪𑀧𑀓𑀭𑀡𑁂 (𑀲𑀼𑀩𑁄𑀥𑀸𑀮𑀁𑀓𑀸𑀭𑁂 𑁧𑁨𑁭-𑁧𑁪𑁨 𑀕𑀸𑀣𑀸𑀲𑀼) 𑀯𑀼𑀢𑁆𑀢𑁂𑀲𑀼 𑀤𑀲𑀲𑀼 𑀲𑀤𑁆𑀤𑀕𑀼𑀡𑁂𑀲𑀼 𑀫𑀥𑀼𑀭𑀢𑀸𑀕𑀼𑀡𑁂𑀦 𑀘 𑀉𑀤𑀸𑀭𑀢𑀸𑀕𑀼𑀡𑁂𑀦 𑀘 𑀲𑀫𑀦𑁆𑀦𑀸𑀕𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀓𑀭𑀡𑀲𑀫𑁆𑀧𑀢𑁆𑀢𑀺𑀚𑀦𑀺𑀢𑀲𑀼𑀔𑀯𑀺𑀦𑀺𑀕𑁆𑀕𑀢𑀜𑁆𑀘 𑀢𑀁 𑀫𑀥𑀼𑀭𑁄𑀤𑀸𑀭𑀯𑀘𑀦𑀜𑁆𑀘𑁂𑀢𑀺 𑀓𑀭𑀡𑀲𑀫𑁆𑀧𑀢𑁆𑀢𑀺𑀚𑀦𑀺𑀢𑀲𑀼𑀔𑀯𑀺𑀦𑀺𑀕𑁆𑀕𑀢𑀫𑀥𑀼𑀭𑁄𑀤𑀸𑀭𑀯𑀘𑀦𑀁. 𑀅𑀣 𑀯𑀸 𑀓𑀭𑀡𑀲𑀫𑁆𑀧𑀢𑁆𑀢𑀺𑀚𑀦𑀺𑀢𑀜𑁆𑀘 𑀢𑀁 𑀲𑀼𑀔𑀯𑀺𑀦𑀺𑀕𑁆𑀕𑀢𑀫𑀥𑀼𑀭𑁄𑀤𑀸𑀭𑀯𑀘𑀦𑀜𑁆𑀘𑁂𑀢𑀺 𑀓𑀭𑀡𑀲𑀫𑁆𑀧𑀢𑁆𑀢𑀺𑀚𑀦𑀺𑀢𑀲𑀼𑀔𑀯𑀺𑀦𑀺𑀕𑁆𑀕𑀢𑀫𑀥𑀼𑀭𑁄𑀤𑀸𑀭𑀯𑀘𑀦𑀁. 𑀏𑀮𑀁 𑀯𑀼𑀘𑁆𑀘𑀢𑀺 𑀤𑀼𑀭𑀼𑀢𑁆𑀢𑀤𑁄𑀲𑁄, 𑀦𑀢𑁆𑀣𑀺 𑀏𑀮𑀫𑁂𑀢𑀲𑁆𑀲𑀸𑀢𑀺 𑀦𑁂𑀮𑀸, 𑀲𑁄𑀬𑁂𑀯 𑀯𑀡𑁆𑀡𑁄 𑀦𑁂𑀮𑀯𑀡𑁆𑀡𑁄, 𑀢𑁂𑀦 𑀬𑀼𑀢𑁆𑀢𑀁 𑀦𑁂𑀮𑀯𑀡𑁆𑀡𑀬𑀼𑀢𑁆𑀢𑀁, 𑀓𑀭𑀡𑀲𑀫𑁆𑀧𑀢𑁆𑀢𑀺𑀚𑀦𑀺𑀢𑀲𑀼𑀔𑀯𑀺𑀦𑀺𑀕𑁆𑀕𑀢𑀫𑀥𑀼𑀭𑁄𑀤𑀸𑀭𑀯𑀘𑀦𑀁 𑀦𑁂𑀮𑀯𑀡𑁆𑀡𑀬𑀼𑀢𑁆𑀢𑀫𑁂𑀢𑀲𑁆𑀲𑀸𑀢𑀺 𑀓𑀭𑀡𑀲𑀫𑁆𑀧𑀢𑁆𑀢𑀺𑀚𑀦𑀺𑀢𑀲𑀼𑀔𑀯𑀺𑀦𑀺𑀕𑁆𑀕𑀢𑀫𑀥𑀼𑀭𑁄𑀤𑀸𑀭𑀯𑀘𑀦𑀦𑁂𑀮𑀯𑀡𑁆𑀡𑀬𑀼𑀢𑁆𑀢𑁄, 𑀣𑁂𑀭𑁄. 𑀯𑀺𑀲𑁂𑀲𑀦𑀧𑀭𑀧𑀤𑀲𑀫𑀸𑀲𑁄, 𑀦𑁂𑀮𑀯𑀡𑁆𑀡𑀬𑀼𑀢𑁆𑀢𑀓𑀭𑀡𑀲𑀫𑁆𑀧𑀢𑁆𑀢𑀺 𑀚𑀦𑀺𑀢𑀲𑀼𑀔𑀯𑀺𑀦𑀺𑀕𑁆𑀕𑀢𑀫𑀥𑀼𑀭𑁄𑀤𑀸𑀭𑀯𑀘𑀦𑁄𑀢𑀺 𑀳𑀺 𑀅𑀢𑁆𑀣𑁄, 𑀢𑁂𑀦 𑀣𑁂𑀭𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀼𑀢𑁆𑀢𑀜𑁆𑀘 𑀧𑀭𑀺𑀲𑀸𑀬 𑀲𑁄𑀢𑁂𑀦 𑀅𑀦𑀼𑀭𑀽𑀧𑀢𑁆𑀢𑀸, 𑀫𑀼𑀢𑁆𑀢𑀜𑁆𑀘 𑀧𑀭𑀺𑀲𑀸𑀬 𑀯𑀺𑀲𑀸𑀭𑀤𑀢𑁆𑀢𑀸𑀢𑀺 𑀬𑀼𑀢𑁆𑀢𑀫𑀼𑀢𑁆𑀢𑀁, 𑀯𑀘𑀦𑀁, 𑀢𑀁 𑀯𑀤𑀢𑀺 𑀲𑀻𑀮𑁂𑀦𑀸𑀢𑀺 𑀬𑀼𑀢𑁆𑀢𑀫𑀼𑀢𑁆𑀢𑀯𑀸𑀤𑀻, 𑀢𑁂𑀦 𑀣𑁂𑀭𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀓𑀫𑁆𑀫𑀲𑀲𑁆𑀲𑀢𑀉𑀘𑁆𑀙𑁂𑀤𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀸𑀤𑀺𑀯𑀲𑁂𑀦 𑀦𑀸𑀦𑀸 𑀯𑀸𑀤𑀸 𑀏𑀢𑁂𑀲𑀦𑁆𑀢𑀺 𑀯𑀸𑀤𑀺𑀦𑁄, 𑀦𑀸𑀦𑀸𑀯𑀸𑀤𑀸 𑀚𑀦𑀸, 𑀯𑀸𑀤𑀻𑀦𑀁, 𑀯𑀸𑀤𑀻𑀲𑀼 𑀯𑀸 𑀯𑀭𑁄 𑀓𑀫𑁆𑀫𑀓𑀺𑀭𑀺𑀬𑀯𑀸𑀤𑀢𑁆𑀢𑀸𑀢𑀺 𑀯𑀸𑀤𑀺𑀯𑀭𑁄, 𑀢𑁂𑀦 𑀣𑁂𑀭𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀯𑀡𑁆𑀡𑁂𑀢𑀼𑀁 𑀲𑀫𑀢𑁆𑀣𑀢𑁆𑀢𑀸 𑀫𑀳𑀦𑁆𑀢𑁄 𑀓𑀯𑀺 𑀫𑀳𑀸𑀓𑀯𑀺, 𑀢𑁂𑀦 𑀣𑁂𑀭𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀪𑀸𑀦𑀯𑀲𑁂𑀦 𑀧𑀪𑀺𑀦𑁆𑀦𑀸𑀬 𑀧𑀝𑀺𑀲𑀫𑁆𑀪𑀺𑀤𑀸𑀬 𑀧𑀭𑀺𑀯𑀸𑀭𑀺𑀢𑁄𑀢𑀺 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑀸𑀧𑀭𑀺𑀯𑀸𑀭𑁄, 𑀢𑀲𑁆𑀫𑀺𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀙 𑀅𑀪𑀺𑀜𑁆𑀜𑀸 𑀘 𑀧𑀝𑀺𑀲𑀫𑁆𑀪𑀺𑀤𑀸 𑀘 𑀙𑀴𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸, 𑀢𑀸 𑀆𑀤𑀬𑁄 𑀬𑁂𑀲𑀁 𑀢𑁂𑀢𑀺 𑀙𑀴𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀤𑀬𑁄, 𑀆𑀤𑀺𑀲𑀤𑁆𑀤𑁂𑀦 𑀢𑁂𑀯𑀺𑀚𑁆𑀚𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀙𑀴𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀤𑀬𑁄 𑀧𑀪𑁂𑀤𑀸 𑀏𑀢𑀲𑁆𑀲𑀸𑀢𑀺 𑀙𑀴𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀧𑁆𑀧𑀪𑁂𑀤𑁄, 𑀲𑁄𑀬𑁂𑀯 𑀕𑀼𑀡𑁄 𑀙𑀴𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀧𑁆𑀧𑀪𑁂𑀤𑀕𑀼𑀡𑁄, 𑀢𑁂𑀦 𑀧𑀝𑀺𑀫𑀡𑁆𑀟𑀺𑀢𑁄 𑀙𑀴𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀧𑁆𑀧𑀪𑁂𑀤𑀕𑀼𑀡𑀧𑀝𑀺𑀫𑀡𑁆𑀟𑀺𑀢𑁄, 𑀢𑀲𑁆𑀫𑀺𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀸𑀦𑀁 𑀛𑀸𑀦𑀮𑀸𑀪𑀺𑀆𑀤𑀻𑀦𑀁 𑀥𑀫𑁆𑀫𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄, 𑀅𑀣 𑀯𑀸 𑀫𑀦𑀼𑀲𑁆𑀲𑀸𑀦𑀁 𑀓𑀼𑀲𑀮𑀓𑀫𑁆𑀫𑀧𑀣𑀲𑀗𑁆𑀔𑀸𑀢𑀥𑀫𑁆𑀫𑀢𑁄 𑀉𑀢𑁆𑀢𑀭𑀻𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄, 𑀛𑀸𑀦𑀸𑀤𑀺𑀥𑀫𑁆𑀫𑁄, 𑀢𑀲𑁆𑀫𑀺𑀁, ‘‘𑀲𑀼𑀧𑁆𑀧𑀢𑀺𑀝𑁆𑀞𑀺𑀢’’ 𑀇𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸 𑀩𑀼𑀤𑁆𑀥𑀺 𑀏𑀢𑁂𑀲𑀦𑁆𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀩𑀼𑀤𑁆𑀥𑀺𑀦𑁄, 𑀢𑁂𑀲𑀁 𑀣𑁂𑀭𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀣𑁂𑀭𑀸𑀦𑀁 𑀯𑀁𑀲𑁂 𑀧𑀓𑀸𑀭𑁂𑀦 𑀤𑀺𑀧𑁆𑀧𑀦𑁆𑀢𑀺, 𑀧𑀤𑀻𑀧𑁄 𑀯𑀺𑀬𑀸𑀢𑀺 𑀯𑀸 𑀣𑁂𑀭𑀯𑀁𑀲𑀧𑁆𑀧𑀤𑀻𑀧𑀸, 𑀢𑁂𑀲𑀁. 𑀣𑀺𑀭𑁄 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑁄 𑀕𑀼𑀡𑁄 𑀏𑀢𑁂𑀲𑀫𑀢𑁆𑀣𑀻𑀢𑀺 𑀣𑁂𑀭𑀸, 𑀢𑁂𑀲𑀁, 𑀯𑀁𑀲𑀸𑀮𑀗𑁆𑀓𑀸𑀭𑀪𑀽𑀢𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀳𑀸𑀯𑀺𑀳𑀸𑀭𑁂 𑀯𑀲𑀦𑀲𑀻𑀮𑀸 𑀯𑀲𑀦𑀥𑀫𑁆𑀫𑀸, 𑀯𑀲𑀦𑁂 𑀲𑀸𑀥𑀼𑀓𑀸𑀭𑀻𑀢𑀺 𑀯𑀸 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄, 𑀢𑁂𑀲𑀁, 𑀣𑁂𑀭𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀁𑀲𑁂 𑀅𑀮𑀗𑁆𑀓𑀸𑀭𑁄, 𑀯𑀁𑀲𑀲𑁆𑀲 𑀯𑀸𑀢𑀺 𑀯𑀁𑀲𑀸𑀮𑀗𑁆𑀓𑀸𑀭𑁄, 𑀲𑁄 𑀳𑀼𑀢𑁆𑀯𑀸 𑀪𑀽𑀢𑁄, 𑀯𑀁𑀲𑀸𑀮𑀗𑁆𑀓𑀸𑀭𑀪𑀸𑀯𑀁 𑀯𑀸 𑀧𑀢𑁆𑀢𑁄𑀢𑀺 𑀯𑀁𑀲𑀸𑀮𑀗𑁆𑀓𑀸𑀭𑀪𑀽𑀢𑁄, 𑀢𑁂𑀦 𑀣𑁂𑀭𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀯𑀺𑀧𑀼𑀮𑀸 𑀘 𑀲𑀸 𑀯𑀺𑀲𑀼𑀤𑁆𑀥𑀸 𑀘𑁂𑀢𑀺 𑀯𑀺𑀧𑀼𑀮𑀯𑀺𑀲𑀼𑀤𑁆𑀥𑀸, 𑀯𑀺𑀲𑁂𑀲𑀦𑁄𑀪𑀬𑀧𑀤𑁄, 𑀯𑀺𑀧𑀼𑀮𑀯𑀺𑀲𑀼𑀤𑁆𑀥𑀸 𑀩𑀼𑀤𑁆𑀥𑀺 𑀏𑀢𑀲𑁆𑀲𑀸𑀢𑀺 𑀯𑀺𑀧𑀼𑀮𑀯𑀺𑀲𑀼𑀤𑁆𑀥𑀩𑀼𑀤𑁆𑀥𑀺, 𑀢𑁂𑀦 𑀣𑁂𑀭𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀸𑀫𑀫𑁂𑀯 𑀦𑀸𑀫𑀥𑁂𑀬𑁆𑀬𑀁, 𑀕𑀳𑀺𑀢𑀁 𑀦𑀸𑀫𑀥𑁂𑀬𑁆𑀬𑀫𑁂𑀢𑀲𑁆𑀲𑀸𑀢𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁄, 𑀢𑁂𑀦 𑀣𑁂𑀭𑁂𑀦 𑀓𑀢𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸 𑀦𑀸𑀫 𑀅𑀬𑀁 𑀯𑀺𑀦𑀬𑀲𑀁𑀯𑀡𑁆𑀡𑀦𑀸 𑀢𑀺𑀝𑁆𑀞𑀢𑀽𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄 𑀮𑁄𑀓𑀚𑁂𑀝𑁆𑀞𑀲𑁆𑀲 𑀫𑀳𑁂𑀲𑀺𑀦𑁄 ‘‘𑀩𑀼𑀤𑁆𑀥𑁄’’𑀢𑀺 𑀦𑀸𑀫𑀫𑁆𑀧𑀺 𑀬𑀸𑀯 𑀮𑁄𑀓𑀫𑁆𑀳𑀺 𑀧𑀯𑀢𑁆𑀢𑀢𑀺, 𑀢𑀸𑀯 𑀮𑁄𑀓𑀦𑀺𑀢𑁆𑀣𑀭𑀡𑁂𑀲𑀻𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀲𑀻𑀮𑀯𑀺𑀲𑀼𑀤𑁆𑀥𑀸𑀬 𑀦𑀬𑀁 𑀤𑀲𑁆𑀲𑁂𑀦𑁆𑀢𑀻 𑀮𑁄𑀓𑀲𑁆𑀫𑀺𑀁 𑀢𑀺𑀝𑁆𑀞𑀢𑀽𑀢𑀺 𑀬𑁄𑀚𑀦𑀸.

𑀇𑀢𑀺 𑀦𑀺𑀕𑀫𑀦𑀲𑁆𑀲 𑀅𑀢𑁆𑀣𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 𑀘 𑁋

𑀭𑀢𑀦𑀧𑀼𑀡𑁆𑀡𑀦𑀸𑀫𑀲𑁆𑀲, 𑀧𑀼𑀭𑀲𑁆𑀲 𑀭𑀸𑀚𑀥𑀸𑀦𑀺𑀬𑀸;

𑀤𑀓𑁆𑀔𑀺𑀡𑁂 𑀫𑀼𑀦𑀺𑀭𑀽𑀧𑀲𑁆𑀲, 𑀈𑀲𑀁𑀧𑀸𑀘𑀻𑀦𑀦𑀺𑀲𑁆𑀲𑀺𑀢𑁂.

𑀬𑁄 𑀯𑀺𑀳𑀸𑀭𑁄 𑀲𑀧𑀸𑀲𑀸𑀤𑁄, 𑀓𑀸𑀭𑀺𑀢𑁄 𑀭𑀸𑀚𑀤𑁂𑀯𑀺𑀬𑀸;

𑀬𑀸 𑀯𑀲𑀢𑀸 𑀫𑀬𑀸 𑀢𑀢𑁆𑀭, 𑀓𑀢𑀸 𑀧𑀸𑀘𑀺𑀢𑁆𑀬𑀸𑀤𑀺𑀬𑁄𑀚𑀦𑀸.

𑀫𑀸𑀧𑀺𑀢𑀭𑀢𑁆𑀦𑀧𑀼𑀡𑁆𑀡𑀲𑁆𑀲, 𑀲𑀢𑁆𑀢𑀭𑀲𑁂𑀯 𑀭𑀸𑀚𑀺𑀦𑁄;

𑀚𑀬𑀯𑀲𑁆𑀲𑁂𑀝𑁆𑀞𑀸𑀭𑀲𑀫𑁆𑀳𑀺, 𑀲𑀫𑁆𑀧𑀢𑁆𑀢𑁂𑀬𑀁 𑀲𑀼𑀦𑀺𑀝𑁆𑀞𑀺𑀢𑀸.

‘‘𑀭𑀢𑀦𑀧𑀼𑀡𑁆𑀡𑀸’’𑀢𑀺𑀯𑁆𑀳𑀬𑀲𑁆𑀲 𑀭𑀸𑀚𑀥𑀸𑀦𑀻𑀦𑀕𑀭𑀲𑁆𑀲 𑀤𑀓𑁆𑀔𑀺𑀡𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂 𑀧𑀜𑁆𑀘𑀬𑁄𑀚𑀦𑀧𑁆𑀧𑀫𑀸𑀡𑁂 𑀞𑀸𑀦𑁂 𑀤𑁆𑀯𑀻𑀳𑀺 𑀫𑀳𑀸𑀢𑀴𑀸𑀓𑁂𑀳𑀺 𑀲𑀼𑀲𑁄𑀪𑀺𑀢𑀲𑁆𑀲 𑀫𑀺𑀥𑀺𑀮𑀦𑀸𑀫𑀦𑀕𑀭𑀲𑁆𑀲 𑀧𑀼𑀭𑀢𑁆𑀣𑀺𑀫𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂 𑀤𑀺𑀬𑀟𑁆𑀠𑀕𑀸𑀯𑀼𑀢𑀧𑁆𑀧𑀫𑀸𑀡𑁂 𑀞𑀸𑀦𑁂 𑀅𑀦𑁂𑀓𑀢𑀸𑀮𑀧𑀦𑁆𑀢𑀻𑀳𑀺 𑀲𑀼𑀲𑁄𑀪𑀺𑀢𑁄 𑀘𑀢𑀼𑀦𑁆𑀦𑀁 𑀓𑀼𑀮𑀸𑀦𑀁 𑀭𑀫𑀡𑀻𑀬𑀪𑀽𑀢𑁄 ‘‘𑀓𑀨𑁆𑀭𑀽’’ 𑀇𑀢𑀺 𑀯𑁄𑀳𑀭𑀺𑀢𑁄 𑀬𑁄 𑀲𑁄 𑀫𑀳𑀸𑀕𑀸𑀫𑁄 𑀧𑀢𑀺𑀝𑁆𑀞𑀺𑀢𑁄, 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀬𑀸 𑀚𑀸𑀢𑁂𑀦 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀧𑀲𑀁𑀲𑀺𑀢𑁂𑀦 ‘‘𑀚𑀸𑀕𑀭𑁄’’𑀢𑀺 𑀕𑀭𑀽𑀳𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀭𑀸𑀚𑀽𑀳𑀺 𑀭𑀸𑀚𑀫𑀼𑀤𑁆𑀤𑀺𑀦𑀸 𑀮𑀜𑁆𑀙𑀺𑀢𑁂𑀦 𑀫𑁂 𑀓𑀢𑀸𑀬𑀁 𑀧𑀸𑀘𑀺𑀢𑁆𑀬𑀸𑀤𑀺𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑁆𑀧𑀢𑁆𑀢𑁂 𑀚𑀺𑀦𑀘𑀓𑁆𑀓𑁂 𑀢𑁂𑀭𑀲𑀸𑀥𑀺𑀓𑀘𑀢𑀼𑀯𑀲𑁆𑀲𑀲𑀢𑀸𑀥𑀺𑀓𑀁 𑀤𑁆𑀯𑀺𑀲𑀳𑀲𑁆𑀲𑀁, 𑀲𑀓𑁆𑀓𑀭𑀸𑀚𑁂 𑀧𑀦 𑀏𑀓𑀢𑀺𑀁𑀲𑀸𑀥𑀺𑀓𑀤𑁆𑀯𑀺𑀯𑀲𑁆𑀲𑀲𑀢𑀸𑀥𑀺𑀓𑀁 𑀲𑀳𑀲𑁆𑀲𑀁 𑀕𑀺𑀫𑁆𑀳𑀸𑀦𑁂 𑀚𑁂𑀝𑁆𑀞𑀫𑀸𑀲𑁂 𑀚𑀼𑀡𑁆𑀳𑀧𑀓𑁆𑀔𑀲𑁆𑀲 𑀧𑀜𑁆𑀘𑀫𑁂 𑀲𑀼𑀓𑁆𑀓𑀯𑀸𑀭𑁂 𑀦𑀺𑀝𑁆𑀞𑀁 𑀧𑀢𑁆𑀢𑀸 𑀅𑀦𑀸𑀬𑀸𑀲𑁂𑀦𑀸𑀢𑀺.

𑀬𑁄𑀚𑀦𑀸𑀬 𑀇𑀫𑀺𑀲𑁆𑀲𑀸𑀳𑀁, 𑀭𑀘𑀦𑀲𑁆𑀲𑀸𑀦𑀼𑀪𑀸𑀯𑀢𑁄;

𑀪𑀯𑁂𑀬𑁆𑀬𑀸𑀦𑁂𑀓𑀚𑀸𑀢𑀻𑀲𑀼, 𑀧𑀺𑀝𑀓𑀢𑁆𑀢𑀬𑀥𑀸𑀭𑀓𑁄.

𑀓𑀼𑀲𑀮𑁄 𑀘𑀼𑀪𑀬𑀢𑁆𑀣𑁂𑀲𑀼, 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑁄;

𑀲𑀫𑀺𑀚𑁆𑀛𑀦𑁆𑀢𑀼 𑀲𑀼𑀲𑀗𑁆𑀓𑀧𑁆𑀧𑀸, 𑀫𑀬𑁆𑀳𑀜𑁆𑀘 𑀲𑀩𑁆𑀩𑀧𑀸𑀡𑀺𑀦𑀁.

𑀯𑀧𑁆𑀧𑀸𑀤𑀺𑀫𑀦𑀢𑀺𑀓𑁆𑀓𑀫𑁆𑀫, 𑀲𑀫𑁆𑀫𑀸 𑀤𑁂𑀯𑁄 𑀧𑀯𑀲𑁆𑀲𑀢𑀼;

𑀅𑀢𑁆𑀢𑀚𑀫𑀺𑀯 𑀭𑀓𑁆𑀔𑀦𑁆𑀢𑀼, 𑀭𑀸𑀚𑀸𑀦𑁄 𑀘𑀸𑀧𑀺 𑀫𑁂𑀤𑀺𑀦𑀺𑀦𑁆𑀢𑀺.

𑀇𑀢𑀺 𑀪𑀤𑀦𑁆𑀢𑀚𑀸𑀕𑀭𑀢𑁆𑀣𑁂𑀭𑁂𑀦 𑀓𑀢𑀸

𑀧𑀸𑀘𑀺𑀢𑁆𑀬𑀸𑀤𑀺𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.