𑀲𑁂𑀤𑀫𑁄𑀘𑀺𑀓𑀕𑀸𑀣𑀸

(𑁧) 𑀅𑀯𑀺𑀧𑁆𑀧𑀯𑀸𑀲𑀧𑀜𑁆𑀳𑀸𑀯𑀡𑁆𑀡𑀦𑀸

𑁪𑁭𑁯. 𑀲𑁂𑀤𑀫𑁄𑀘𑀺𑀓𑀕𑀸𑀣𑀸𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑀢𑁆𑀣𑀲𑁆𑀲 𑀕𑀫𑁆𑀪𑀻𑀭𑀢𑁆𑀢𑀸 𑀢𑀁 𑀘𑀺𑀦𑁆𑀢𑁂𑀦𑁆𑀢𑀸𑀦𑀁 𑀯𑀺𑀦𑀬𑀥𑀭𑀸𑀦𑀁 𑀓𑀸𑀬𑁂 𑀲𑁂𑀤𑀁 𑀫𑁄𑀘𑁂𑀢𑀻𑀢𑀺 𑀲𑁂𑀤𑀫𑁄𑀘𑀺𑀓𑀸, 𑀲𑀸𑀬𑁂𑀯 𑀕𑀸𑀣𑀸 𑀲𑁂𑀤𑀫𑁄𑀘𑀺𑀓𑀕𑀸𑀣𑀸, 𑀢𑀸𑀲𑀼. ‘‘𑀅𑀓𑀧𑁆𑀧𑀺𑀬𑀲𑀫𑁆𑀪𑁄𑀕𑁄 𑀦 𑀮𑀩𑁆𑀪𑀢𑀻’’𑀢𑀺 𑀇𑀫𑀺𑀦𑀸 𑀓𑀧𑁆𑀧𑀺𑀬𑀲𑀫𑁆𑀪𑁄𑀕𑁄 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀧𑁆𑀧𑀺𑀬𑀲𑀫𑁆𑀪𑁄𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀳𑀸𑀧𑀦𑀪𑁄𑀚𑀦𑀸𑀤𑀻’’𑀢𑀺 𑀯𑀼𑀢𑁆𑀢𑀁. 𑀅𑀦𑀸𑀧𑀢𑁆𑀢𑀻𑀢𑀺 𑀫𑀸𑀢𑀼𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀏𑀲𑀸 𑀧𑀜𑁆𑀳𑀸𑀢𑀺 𑀏𑀢𑁆𑀣 𑀧𑀜𑁆𑀳𑀲𑀤𑁆𑀤𑁄 𑀲𑀪𑀸𑀯𑀢𑀺𑀮𑀺𑀗𑁆𑀕𑁄𑀢𑀺 𑀲𑀤𑁆𑀤𑀲𑀢𑁆𑀣𑁂𑀲𑀼 (𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀁 𑁧𑁬 𑀳𑀓𑀸𑀭𑀦𑁆𑀢𑀥𑀸𑀢𑀼; 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 𑁧𑁧𑁫 𑀕𑀸𑀣𑀸𑀬𑀁) 𑀯𑀼𑀢𑁆𑀢𑁄, 𑀇𑀥 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑁄. ‘‘𑀧𑀡𑁆𑀟𑀺𑀢𑁂𑀳𑀻’’𑀢𑀺 𑀇𑀫𑀺𑀦𑀸 𑀓𑀼𑀲𑀮𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺, 𑀧𑀡𑁆𑀟𑀺𑀢𑀢𑁆𑀢𑀸 𑀓𑀼𑀲𑀮𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀲𑁆𑀲𑀸𑀢𑀺 𑀧𑀜𑁆𑀳𑀸𑀬. 𑀏𑀢𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀅𑀲𑁆𑀲𑀸𑀢𑀺 𑀕𑀸𑀣𑀸𑀬.

𑀏𑀓𑀸𑀤𑀲 𑀯𑀺𑀯𑀚𑁆𑀚𑀺𑀬𑀸𑀢𑀺 𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄, 𑀏𑀓𑀸𑀤𑀲 𑀯𑀺𑀯𑀚𑁆𑀚𑀺𑀬𑁂𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑁂’’𑀢𑀺𑀆𑀤𑀺. 𑀢𑁂𑀧𑀻𑀢𑀺 𑀧𑀺𑀲𑀤𑁆𑀤𑁄 𑀕𑀸𑀣𑀸𑀬𑀁 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑀕𑀫𑁆𑀬𑀫𑀸𑀦𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀅𑀬𑀦𑁆𑀢𑀺 𑀦𑁆𑀳𑀸𑀧𑀺𑀢𑀧𑀼𑀩𑁆𑀩𑀓𑁄 𑀪𑀺𑀓𑁆𑀔𑀼. 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑀦𑁆𑀢𑀺 𑀩𑀼𑀤𑁆𑀥𑁂𑀦 𑀦𑀺𑀫𑁆𑀫𑀺𑀢𑀁 𑀩𑀼𑀤𑁆𑀥𑀭𑀽𑀧𑀁.

𑀯𑀺𑀯𑀚𑁆𑀚𑀺𑀬𑀸𑀢𑀺 𑀏𑀢𑁆𑀣 𑀬𑀓𑀸𑀭𑁄 𑀢𑁆𑀯𑀸𑀧𑀘𑁆𑀘𑀬𑀲𑁆𑀲 𑀓𑀸𑀭𑀺𑀬𑁄𑀢𑀺 𑀆𑀳 ‘‘𑀯𑀺𑀯𑀚𑁆𑀚𑁂𑀢𑁆𑀯𑀸’’𑀢𑀺. 𑀅𑀲𑀻𑀲𑀓𑀁 𑀬𑀁 𑀢𑀁 𑀓𑀩𑀦𑁆𑀥𑀁 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀅𑀲𑀻𑀲𑀓𑀢𑁆𑀢𑀸 𑀓𑁂𑀦 𑀲𑀭𑀻𑀭𑁂𑀦 𑀚𑀻𑀯𑀺𑀢𑀁 𑀩𑀦𑁆𑀥𑀢𑀻𑀢𑀺 𑀓𑀩𑀦𑁆𑀥𑁄. 𑀬𑀲𑁆𑀲𑀸𑀢𑀺 𑀓𑀩𑀦𑁆𑀥𑀲𑁆𑀲.

𑀳𑀻𑀢𑀺 𑀲𑀘𑁆𑀘𑀁. 𑀢𑁂𑀢𑀺 𑀅𑀪𑀩𑁆𑀩𑀧𑀼𑀕𑁆𑀕𑀮𑀸.

𑀯𑀸𑀘𑀸𑀢𑀺 𑀏𑀢𑁆𑀣 𑀬𑀓𑀸𑀭𑀮𑁄𑀧𑁄𑀢𑀺 𑀆𑀳 ‘‘𑀯𑀸𑀘𑀸𑀬𑀸’’𑀢𑀺. 𑀇𑀢𑀺 𑀫𑁂𑀢𑀺 𑀏𑀯𑀁 𑀫𑀫. 𑀏𑀯𑀁 𑀯𑀤𑀫𑀸𑀦𑁂 𑀫𑀫 𑀯𑀘𑀦𑀦𑁆𑀢𑀺 𑀬𑁄𑀚𑀦𑀸. 𑀅𑀣𑀯𑀸 𑀇𑀢𑀺𑀫𑁂𑀢𑀺 𑀏𑀯𑀁 𑀇𑀫𑁂, 𑀏𑀯𑀁 𑀯𑀤𑀫𑀸𑀦𑁂 𑀇𑀫𑁂 𑀚𑀦𑀸𑀢𑀺 𑀬𑁄𑀚𑀦𑀸. 𑀲𑀤𑁆𑀤𑀫𑁆𑀧𑀻𑀢𑀺 𑀇𑀫𑀺𑀦𑀸 𑀕𑀺𑀭𑀲𑀤𑁆𑀤𑁄 𑀲𑀤𑁆𑀤𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀳𑀻𑀢𑀺 𑀲𑀘𑁆𑀘𑀁. 𑀢𑀼𑀡𑁆𑀳𑀻𑀪𑀽𑀢𑀲𑁆𑀲 𑀦𑀺𑀲𑀺𑀦𑁆𑀦𑀲𑁆𑀲 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀬𑁄𑀚𑀦𑀸. 𑀬𑀤𑀺 𑀫𑀦𑁄𑀤𑁆𑀯𑀸𑀭𑁂 𑀆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺, 𑀏𑀯𑀁 𑀲𑀢𑀺 𑀓𑀲𑁆𑀫𑀸 𑀆𑀧𑀚𑁆𑀚𑁂𑀬𑁆𑀬 𑀯𑀸𑀘𑀲𑀺𑀓𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀢𑁂𑀦𑀸𑀢𑀺 𑀢𑀲𑁆𑀫𑀸. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲.

𑀲𑀸𑀢𑀺 𑀪𑀺𑀓𑁆𑀔𑀼𑀦𑀻, 𑀆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑀦𑁆𑀢𑀺 ‘‘𑀕𑀸𑀫𑀦𑁆𑀢𑀭𑀧𑀭𑀺𑀬𑀸𑀧𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀁.

𑀢𑀸𑀲𑀽𑀢𑀺 𑀤𑁆𑀯𑀻𑀲𑀼 𑀪𑀺𑀓𑁆𑀔𑀼𑀦𑀻𑀲𑀼.

𑀘𑀢𑀼𑀭𑁄 𑀚𑀦𑀸𑀢𑀺 𑀏𑀢𑁆𑀣 𑀘𑀢𑀼𑀦𑁆𑀦𑀁 𑀚𑀦𑀸𑀦𑀁 𑀲𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀘𑀭𑀺𑀬𑁄 𑀘 𑀢𑀬𑁄 𑀘 𑀅𑀦𑁆𑀢𑁂𑀯𑀸𑀲𑀺𑀓𑀸’’𑀢𑀺. 𑀲𑀸𑀳𑀢𑁆𑀣𑀺𑀓𑀸𑀢𑀺 𑀲𑀳𑀢𑁆𑀣𑀸 𑀅𑀯𑀳𑀭𑀺𑀢𑀸. 𑀆𑀡𑀢𑁆𑀢𑀺𑀬𑀸𑀧𑀻𑀢𑀺 𑀆𑀡𑀢𑁆𑀢𑁂𑀦 𑀅𑀯𑀳𑀭𑀺𑀢𑀸𑀧𑀺. 𑀇𑀢𑀭𑁂𑀲𑀦𑁆𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁, 𑀏𑀓𑁂𑀓𑁄 𑀫𑀸𑀲𑀓𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀧𑀭𑀺𑀯𑀸𑀭𑁂 𑀲𑁂𑀤𑀫𑁄𑀘𑀺𑀓𑀕𑀸𑀣𑀸𑀬𑀁.

(𑁨) 𑀧𑀸𑀭𑀸𑀚𑀺𑀓𑀸𑀤𑀺𑀧𑀜𑁆𑀳𑀸𑀯𑀡𑁆𑀡𑀦𑀸

𑁪𑁮𑁦. 𑀲𑀦𑁆𑀣𑀢𑀧𑁂𑀬𑁆𑀬𑀸𑀮𑀜𑁆𑀘𑀸𑀢𑀺 𑀧𑀞𑀫𑀧𑀸𑀭𑀸𑀚𑀺𑀓𑀯𑀺𑀪𑀗𑁆𑀕𑁂 (𑀧𑀸𑀭𑀸. 𑁬𑁫) 𑀯𑀼𑀢𑁆𑀢𑀁 𑀲𑀦𑁆𑀣𑀢𑀧𑁂𑀬𑁆𑀬𑀸𑀮𑀜𑁆𑀘.

𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀁 𑀲𑀦𑁆𑀥𑀸𑀬𑀸𑀢𑀺 𑀲𑀢𑀺 𑀮𑀺𑀗𑁆𑀕𑁂 𑀧𑀭𑀺𑀯𑀢𑁆𑀢𑁂 𑀧𑀝𑀺𑀕𑁆𑀕𑀳𑀡𑀲𑁆𑀲 𑀯𑀺𑀚𑀳𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀬𑁄𑀢𑀺 𑀪𑀺𑀓𑁆𑀔𑀼, 𑀧𑀭𑀺𑀡𑀸𑀫𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬𑀸𑀢𑀺 𑀬𑁄𑀚𑀦𑀸.

𑀅𑀲𑁆𑀲𑀸𑀢𑀺 𑀕𑀸𑀣𑀸𑀬. 𑀓𑀸𑀓𑀉𑀳𑀤𑀦𑁆𑀢𑀺 𑀓𑀸𑀓𑁂𑀳𑀺 𑀓𑀭𑀻𑀲𑀼𑀲𑁆𑀲𑀕𑁆𑀕𑀁. 𑀓𑀤𑁆𑀤𑀫𑀫𑀓𑁆𑀔𑀺𑀢𑀦𑁆𑀢𑀺 𑀓𑀤𑁆𑀤𑀫𑁂𑀦 𑀫𑀓𑁆𑀔𑀺𑀢𑀁. 𑀓𑀸𑀬𑀕𑀢𑀸𑀦𑁂𑀯 𑀳𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀅𑀦𑀭𑀺𑀬𑀁 𑀢𑀁 𑀇𑀢𑁆𑀣𑀺𑀁 𑀯𑀸 𑀢𑀁 𑀧𑀼𑀭𑀺𑀲𑀁 𑀯𑀸 𑀳𑀦𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂𑀦 𑀳𑁂𑀢𑀼𑀪𑀽𑀢𑁂𑀦 𑀇𑀢𑁆𑀣𑀺𑀪𑀽𑀢𑀁, 𑀧𑀼𑀭𑀺𑀲𑀪𑀽𑀢𑀜𑁆𑀘𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑁆𑀣𑀺𑀪𑀽𑀢𑀦𑁆𑀢𑀺 𑀘 𑀇𑀢𑁆𑀣𑀻 𑀳𑀼𑀢𑁆𑀯𑀸 𑀪𑀽𑀢𑀁, 𑀇𑀢𑁆𑀣𑀺𑀪𑀸𑀯𑀁 𑀯𑀸 𑀧𑀢𑁆𑀢𑀁.

𑀫𑀺𑀕𑀲𑀺𑀗𑁆𑀕𑀢𑀸𑀧𑀲𑀲𑀻𑀳𑀓𑀼𑀫𑀸𑀭𑀸𑀤𑀻𑀦𑀁 𑀢𑀺𑀭𑀘𑁆𑀙𑀸𑀦𑀕𑀢𑀫𑀸𑀢𑀸𑀧𑀺𑀢𑀭𑁄 𑀯𑀺𑀬𑀸𑀢𑀺 𑀬𑁄𑀚𑀦𑀸. 𑀫𑀺𑀕𑀲𑀺𑀗𑁆𑀕𑀢𑀸𑀧𑀲𑁄𑀢𑀺 𑀫𑀺𑀕𑀲𑀺𑀗𑁆𑀕𑀦𑀸𑀫𑀓𑁄 (𑀚𑀸. 𑀅𑀝𑁆𑀞. 𑁫.𑁧𑁭.𑁯𑁬 𑀆𑀤𑀬𑁄) 𑀢𑀸𑀧𑀲𑁄. 𑀲𑀻𑀳𑀓𑀼𑀫𑀸𑀭𑁄𑀢𑀺 𑀲𑀻𑀳𑀩𑀸𑀳𑀼𑀓𑀼𑀫𑀸𑀭𑁄. 𑀆𑀤𑀺𑀲𑀤𑁆𑀤𑁂𑀦 𑀪𑀽𑀭𑀺𑀤𑀢𑁆𑀢𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺.

𑀓𑀼𑀭𑀼𑀦𑁆𑀤𑀺𑀬𑀁 𑀆𑀕𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

‘‘𑀲𑀘𑁆𑀘𑀁 𑀪𑀡𑀦𑁆𑀢𑁄𑀢𑀺 𑀕𑀸𑀣𑀸𑀬𑀸’’𑀢𑀺 𑀧𑀤𑀁 ‘‘𑀲𑀘𑁆𑀘𑀁 𑀪𑀸𑀲𑀢𑁄 𑀮𑀳𑀼𑀓𑀸𑀧𑀢𑁆𑀢𑀺 𑀳𑁄𑀢𑀻’’𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. ‘‘𑀲𑀘𑁆𑀘𑀁 𑀪𑀡𑀦𑁆𑀢𑁄’’𑀢𑀺 𑀕𑀸𑀣𑀸𑀬 𑀇𑀢𑀺 𑀅𑀢𑁆𑀣𑁄𑀢𑀺 𑀬𑁄𑀚𑀦𑀸.

(𑁩) 𑀧𑀸𑀘𑀺𑀢𑁆𑀢𑀺𑀬𑀸𑀤𑀺𑀧𑀜𑁆𑀳𑀸𑀯𑀡𑁆𑀡𑀦𑀸

𑁪𑁮𑁧. 𑀲𑀮𑀸𑀓𑀁 𑀤𑁂𑀦𑁆𑀢𑀲𑁆𑀲 𑀅𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀙𑁂𑀚𑁆𑀚𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀧𑀸𑀭𑀸𑀚𑀺𑀓𑀁 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀳𑁄𑀢𑀺𑀙𑁂𑀚𑁆𑀚𑀦𑁆𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀦𑀺𑀕𑁆𑀭𑁄𑀥𑀲𑀤𑀺𑀲𑀁 𑀭𑀼𑀓𑁆𑀔𑀫𑀽𑀮𑀁, 𑀢𑀫𑁂𑀯 𑀯𑀸 𑀕𑀳𑁂𑀢𑀩𑁆𑀩𑀁.

𑀢𑀺𑀲𑁆𑀲𑀺𑀢𑁆𑀣𑀺𑀬𑁄𑀢𑀺 𑀏𑀢𑁆𑀣 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀧𑀘𑁆𑀘𑀢𑁆𑀢𑀯𑀘𑀦𑀁 𑀯𑀸𑀢𑀺 𑀆𑀳 ‘‘𑀢𑀸𑀲𑀼𑀧𑀻’’𑀢𑀺. ‘‘𑀬𑀁 𑀢𑀁 𑀫𑁂𑀣𑀼𑀦𑀁 𑀦𑀸𑀫 𑀢’’𑀦𑁆𑀢𑀺 𑀇𑀫𑀺𑀦𑀸 ‘‘𑀫𑁂𑀣𑀼𑀦𑀁 𑀬𑀁 𑀢’’𑀦𑁆𑀢𑀺 𑀧𑀤𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀦 𑀲𑁂𑀯𑀢𑀻’’𑀢𑀺 𑀇𑀫𑀺𑀦𑀸 𑀦 𑀲𑁂𑀯𑁂𑀢𑀺 𑀏𑀢𑁆𑀣 𑀢𑀺𑀓𑀸𑀭𑀲𑁆𑀲 𑀏𑀓𑀸𑀭𑀸𑀤𑁂𑀲𑀪𑀸𑀯𑀁 (𑀚𑀸. 𑀅𑀝𑁆𑀞. 𑁪.𑁧𑁧.𑁭𑁬 𑀧𑀼𑀢𑁆𑀢𑁄 𑀯𑀸 𑀧𑀺𑀢𑀭𑀁 𑀬𑀸𑀘𑁂 𑀯𑀺𑀬) 𑀤𑀲𑁆𑀲𑁂𑀢𑀺. 𑀢𑀬𑁄 𑀧𑀼𑀭𑀺𑀲𑁂𑀢𑀺 𑀏𑀢𑁆𑀣 ‘‘𑀉𑀧𑀕𑀦𑁆𑀢𑁆𑀯𑀸’’𑀢𑀺 𑀧𑀤𑀁 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳‘‘𑀢𑀬𑁄 𑀧𑀼𑀭𑀺𑀲𑁂𑀧𑀺 𑀉𑀧𑀕𑀦𑁆𑀢𑁆𑀯𑀸’’𑀢𑀺. 𑀇𑀫𑀺𑀦𑀸 𑀢𑀬𑁄 𑀧𑀼𑀭𑀺𑀲𑁂𑀢𑀺 𑀏𑀢𑁆𑀣 𑀉𑀧𑀬𑁄𑀕𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀭𑀺𑀫𑀦𑀬𑀁 𑀕𑀳𑁂𑀢𑁆𑀯𑀸 𑀏𑀢𑁆𑀣𑀸𑀧𑀺 ‘‘𑀢𑀻𑀲𑀼 𑀧𑀼𑀭𑀺𑀲𑁂𑀲𑀽’’𑀢𑀺 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀅𑀢𑁆𑀣𑁄𑀧𑀺 𑀬𑀼𑀚𑁆𑀚𑀢𑁂𑀯. 𑀇𑀫𑀁 𑀦𑀬𑀁 𑀕𑀳𑁂𑀢𑁆𑀯𑀸 𑀧𑀼𑀭𑀺𑀫𑀧𑀤𑁂𑀧𑀺 𑀢𑀺𑀲𑁆𑀲𑀺𑀢𑁆𑀣𑀺𑀬𑁄 𑀉𑀧𑀕𑀦𑁆𑀢𑁆𑀯𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀅𑀢𑁆𑀣𑁄𑀧𑀺 𑀬𑀼𑀚𑁆𑀚𑀢𑁂𑀯. 𑀢𑀲𑁆𑀫𑀸 𑀢𑁂 𑀤𑁆𑀯𑁂 𑀦𑀬𑀸 𑀅𑀜𑁆𑀜𑀫𑀜𑁆𑀜𑁄𑀧𑀤𑁂𑀲𑀤𑀸𑀬𑀓𑀦𑀬𑀸 𑀦𑀸𑀫𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀉𑀪𑀢𑁄𑀩𑁆𑀬𑀜𑁆𑀚𑀦𑀲𑀗𑁆𑀔𑀸𑀢𑁂’’𑀢𑀺 𑀇𑀫𑀺𑀦𑀸 𑀅𑀦𑀭𑀺𑀬𑀲𑀤𑁆𑀤𑁂𑀦 𑀉𑀪𑀢𑁄𑀩𑁆𑀬𑀜𑁆𑀚𑀦𑁄𑀯 𑀇𑀥 𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀦𑀸𑀘𑀭𑀢𑀻’’𑀢𑀺 𑀇𑀫𑀺𑀦𑀸 𑀦 𑀘𑀸𑀘𑀭𑁂𑀢𑀺 𑀏𑀢𑁆𑀣𑀸𑀧𑀺 𑀢𑀺𑀲𑀤𑁆𑀤𑀲𑁆𑀲 𑀏𑀓𑀸𑀭𑀸𑀤𑁂𑀲𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀺. 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑀁 𑀓𑀸𑀬𑀲𑀁𑀲𑀕𑁆𑀕𑀁 𑀆𑀧𑀚𑁆𑀚𑀺𑀢𑀼𑀁 𑀯𑀸𑀬𑀫𑀦𑁆𑀢𑀺𑀬𑀸 𑀢𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸𑀢𑀺 𑀬𑁄𑀚𑀦𑀸.

𑀅𑀲𑁆𑀲𑀸𑀢𑀺 𑀕𑀸𑀣𑀸𑀬, 𑀢𑀺𑀢𑁆𑀣𑀺𑀬𑁄 𑀆𑀭𑀸𑀥𑀓𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣𑁂𑀯𑀸𑀢𑀺 𑀢𑀺𑀢𑁆𑀣𑀺𑀬𑀯𑀢𑁆𑀢𑁂 𑀏𑀯. 𑀅𑀲𑁆𑀲𑀸𑀢𑀺 𑀢𑀺𑀢𑁆𑀣𑀺𑀬𑀲𑁆𑀲. 𑀢𑀫𑁂𑀯𑀸𑀢𑀺 𑀢𑀺𑀢𑁆𑀣𑀺𑀬𑀯𑀢𑁆𑀢𑀫𑁂𑀯.

𑀲𑀗𑁆𑀖𑀸𑀤𑀺𑀲𑁂𑀲𑀦𑁆𑀢𑀺𑀆𑀤𑀺𑀕𑀸𑀣𑀸 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀅𑀚𑁆𑀛𑁄𑀳𑀭𑀡𑀁.

𑀆𑀓𑀸𑀲𑀕𑀢𑀁 𑀲𑀸𑀫𑀡𑁂𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀖𑁂𑀦𑀧𑀻𑀢𑀺 𑀧𑀺𑀲𑀤𑁆𑀤𑁄 𑀦 𑀓𑀫𑁆𑀫𑀸𑀭𑀳𑁂𑀦𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀦 𑀓𑀸𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀲𑀗𑁆𑀖𑁄𑀧𑀺 𑀓𑀫𑁆𑀫𑀸𑀭𑀳𑁄𑀧𑀺 𑀪𑀽𑀫𑀺𑀕𑀢𑁄𑀯 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀅𑀲𑁆𑀲𑀸𑀢𑀺 𑀕𑀸𑀣𑀸𑀬 𑀯𑀺𑀦𑀺𑀘𑁆𑀙𑀬𑁄𑀢𑀺 𑀲𑀫𑁆𑀩𑀦𑁆𑀥𑁄.

‘‘𑀦 𑀤𑁂𑀢𑀺, 𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀓𑀺𑀭𑀺𑀬𑀸𑀧𑀤𑀸𑀦𑀁 𑀓𑀢𑁆𑀢𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀸𑀧𑀺 𑀉𑀬𑁆𑀬𑁄𑀚𑀺𑀓𑀸’’𑀢𑀺𑀆𑀤𑀺. 𑀢𑀲𑁆𑀲𑀸𑀢𑀺 𑀅𑀯𑀲𑁆𑀲𑀼𑀢𑀧𑀼𑀭𑀺𑀲𑀲𑁆𑀲. ‘‘𑀓𑀸𑀭𑀡𑁂𑀦𑀸’’𑀢𑀺 𑀇𑀫𑀺𑀦𑀸 𑀢𑁂𑀦𑀸𑀢𑀺 𑀧𑀤𑀲𑁆𑀲 𑀓𑀸𑀭𑀡𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀏𑀯𑀲𑀤𑁆𑀤𑁄 𑀧𑀦 𑀲𑀫𑁆𑀪𑀯𑀯𑀲𑁂𑀦 𑀬𑁄𑀚𑀺𑀢𑁄, 𑀦 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦𑀸𑀢𑀺 𑀅𑀢𑁆𑀣𑁄, 𑀅𑀯𑀲𑁆𑀲𑀼𑀢𑀲𑁆𑀲 𑀧𑀼𑀭𑀺𑀲𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀳𑀡𑁂𑀢𑀺 𑀉𑀬𑁆𑀬𑁄𑀚𑀺𑀢𑀸𑀬 𑀕𑀳𑀡𑁂. 𑀢𑀜𑁆𑀘 𑀧𑀭𑀺𑀪𑁄𑀕𑀧𑀘𑁆𑀘𑀬𑀸𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁, 𑀧𑀭𑀺𑀪𑁄𑀕𑀲𑁆𑀲 𑀘 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀜𑁆𑀘 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀆𑀧𑀢𑁆𑀢𑀺’’𑀦𑁆𑀢𑀺 𑀇𑀫𑀺𑀦𑀸 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺. ‘‘𑀢𑀲𑁆𑀲𑀸 𑀉𑀬𑁆𑀬𑁄𑀚𑀺𑀢𑀸𑀬𑀸’’𑀢𑀺 𑀇𑀫𑀺𑀦𑀸 𑀧𑀭𑀺𑀪𑁄𑀕𑀲𑁆𑀲 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀲𑀸𑀢𑀺 𑀉𑀬𑁆𑀬𑁄𑀚𑀺𑀢𑀸𑀬.

𑀲𑀢𑁆𑀢𑀭𑀲𑀓𑁂𑀲𑀼 𑀲𑀗𑁆𑀖𑀸𑀤𑀺𑀲𑁂𑀲𑁂𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀚𑁆𑀚𑀁 𑀦 𑀨𑀼𑀲𑀢𑀻𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀜𑁆𑀜𑀁 𑀦𑀯𑀁 𑀆𑀧𑀢𑁆𑀢𑀺’’𑀦𑁆𑀢𑀺.

𑀇𑀢𑀺 𑀲𑁂𑀤𑀫𑁄𑀘𑀺𑀓𑀕𑀸𑀣𑀸𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.