𑀅𑀧𑀭𑀤𑀼𑀢𑀺𑀬𑀕𑀸𑀣𑀸𑀲𑀗𑁆𑀕𑀡𑀺𑀓𑀁

(𑁧) 𑀓𑀸𑀬𑀺𑀓𑀸𑀤𑀺𑀆𑀧𑀢𑁆𑀢𑀺𑀯𑀡𑁆𑀡𑀦𑀸

𑁪𑁭𑁪. 𑀙 𑀆𑀧𑀢𑁆𑀢𑀺𑀬𑁄 𑀓𑀸𑀬𑀺𑀓𑀸𑀢𑀺 𑀏𑀢𑁆𑀣 𑀙 𑀆𑀧𑀢𑁆𑀢𑀺𑀬𑁄 𑀦𑀸𑀫 𑀓𑀸𑀢𑀺 𑀆𑀳 ‘‘𑀅𑀦𑁆𑀢𑀭𑀧𑁂𑀬𑁆𑀬𑀸𑀮𑁂’’𑀢𑀺𑀆𑀤𑀺. 𑀅𑀦𑁆𑀢𑀭𑀧𑁂𑀬𑁆𑀬𑀸𑀮𑁂 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀓𑀸𑀬𑀤𑁆𑀯𑀸𑀭𑁂 𑀲𑀫𑀼𑀝𑁆𑀞𑀺𑀢𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀓𑀸𑀬𑁂 𑀲𑀫𑀼𑀝𑁆𑀞𑀦𑁆𑀢𑀻𑀢𑀺 𑀓𑀸𑀬𑀺𑀓𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀺𑀁𑀬𑁂𑀯 𑀅𑀦𑁆𑀢𑀭𑀧𑁂𑀬𑁆𑀬𑀸𑀮𑁂 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺𑀓𑀸𑀬𑀸’’𑀢𑀺𑀆𑀤𑀺𑀦𑀸 𑀙𑀸𑀤𑁂𑀦𑁆𑀢𑀲𑁆𑀲 𑀢𑀺𑀲𑁆𑀲𑁄𑀢𑀺 𑀏𑀢𑁆𑀣 𑀢𑀺𑀡𑁆𑀡𑀁 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. ‘‘𑀪𑀺𑀓𑁆𑀔𑀼𑀦𑀺𑀬𑀸’’𑀢𑀺𑀆𑀤𑀺𑀦𑀸 𑀧𑀜𑁆𑀘 𑀲𑀁𑀲𑀕𑁆𑀕𑀧𑀘𑁆𑀘𑀬𑀸𑀢𑀺 𑀏𑀢𑁆𑀣 𑀧𑀜𑁆𑀘𑀦𑁆𑀦𑀁 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺.

‘‘𑀏𑀓𑀭𑀢𑁆𑀢’’𑀇𑀢𑀺𑀆𑀤𑀺𑀦𑀸 𑀅𑀭𑀼𑀡𑀼𑀕𑁆𑀕𑁂 𑀢𑀺𑀲𑁆𑀲𑁄𑀢𑀺 𑀏𑀢𑁆𑀣 𑀢𑀺𑀡𑁆𑀡𑀁 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀤𑁆𑀯𑁂 𑀬𑀸𑀯𑀢𑀢𑀺𑀬𑀓𑀸𑀢𑀺 𑀲𑀁𑀯𑀡𑁆𑀡𑁂𑀢𑀩𑁆𑀩𑁂𑀦 ‘‘𑀏𑀓𑀸𑀤𑀲 𑀬𑀸𑀯𑀢𑀢𑀺𑀬𑀓𑀸 𑀦𑀸𑀫𑀸’’𑀢𑀺 𑀲𑀁𑀯𑀡𑁆𑀡𑀦𑀸𑀬 𑀯𑀺𑀭𑀼𑀤𑁆𑀥𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀧𑀦𑀸’’𑀢𑀺𑀆𑀤𑀺. ‘‘𑀇𑀫𑀲𑁆𑀫𑀺𑀁 𑀲𑀸𑀲𑀦𑁂’’𑀢𑀺 𑀇𑀫𑀺𑀦𑀸 𑀏𑀢𑁆𑀣𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺. 𑀏𑀓𑁂𑀦 𑀲𑀩𑁆𑀩𑀲𑀗𑁆𑀕𑀳𑁄𑀢𑀺 𑀏𑀢𑁆𑀣 𑀏𑀓𑁄 𑀦𑀸𑀫 𑀓𑁄, 𑀲𑀩𑁆𑀩𑀸𑀦𑀺 𑀦𑀸𑀫 𑀓𑀸𑀦𑀻𑀢𑀺 𑀆𑀳 ‘‘𑀬𑀲𑁆𑀲 𑀲𑀺𑀬𑀸’’𑀢𑀺𑀆𑀤𑀺. ‘‘𑀦𑀺𑀤𑀸𑀦𑀼𑀤𑁆𑀤𑁂𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀏𑀓𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. ‘‘𑀲𑀺𑀓𑁆𑀔𑀸𑀧𑀤𑀸𑀦𑀜𑁆𑀘 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀦𑀜𑁆𑀘𑀸’’𑀢𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀲𑀩𑁆𑀩𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀲𑀗𑁆𑀕𑀳 𑀲𑀤𑁆𑀤𑁂𑀦 𑀓𑀫𑁆𑀫𑀙𑀝𑁆𑀞𑀻𑀲𑀫𑀸𑀲𑁄.

‘‘𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺𑀓𑀸𑀬𑀸’’𑀢𑀺𑀆𑀤𑀺𑀦𑀸 𑀤𑁆𑀯𑁂 𑀤𑀼𑀝𑁆𑀞𑀼𑀮𑁆𑀮𑀘𑁆𑀙𑀸𑀤𑀦𑀸𑀢𑀺 𑀏𑀢𑁆𑀣 𑀤𑁆𑀯𑀺𑀦𑁆𑀦𑀁 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺.

‘‘𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀺𑀬𑀸’’𑀢𑀺𑀆𑀤𑀺𑀦𑀸 𑀕𑀸𑀫𑀦𑁆𑀢𑀭𑁂 𑀘𑀢𑀲𑁆𑀲𑁄𑀢𑀺 𑀏𑀢𑁆𑀣 𑀘𑀢𑀲𑁆𑀲𑀦𑁆𑀦𑀁 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀧𑀼𑀦 ‘‘𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀺𑀬𑀸’’𑀢𑀺𑀆𑀤𑀺𑀦𑀸 𑀘𑁂𑀢𑀲𑁆𑀲𑀸 𑀦𑀤𑀺𑀧𑀸𑀭𑀧𑀘𑁆𑀘𑀬𑀸𑀢𑀺 𑀏𑀢𑁆𑀣 𑀘𑀢𑀲𑁆𑀲𑀦𑁆𑀦𑀫𑁂𑀯 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. ‘‘𑀘𑀻𑀯𑀭𑀤𑀸𑀦𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀇𑀫𑀺𑀦𑀸 𑀧𑀸𑀘𑀺𑀢𑁆𑀢𑀺𑀬𑀪𑀸𑀯𑁂𑀦 𑀲𑀤𑀺𑀲𑀢𑁆𑀢𑀸 𑀲𑀗𑁆𑀔𑁆𑀬𑀸𑀯𑀺𑀲𑁂𑀲𑁄 𑀦 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺.

(𑁨) 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸𑀤𑀺𑀯𑀡𑁆𑀡𑀦𑀸

𑁪𑁭𑁫. 𑀏𑀓𑁂𑀢𑁆𑀣𑀸𑀢𑀺 𑀏𑀢𑁆𑀣𑀲𑀤𑁆𑀤𑁄 𑀲𑀸𑀲𑀦𑀯𑀺𑀲𑀬𑁄.

𑀏𑀓𑀲𑀺𑀓𑁆𑀔𑀸𑀧𑀤𑀫𑁆𑀧𑀺 𑀦𑀢𑁆𑀣𑀻𑀢𑀺 𑀧𑀺𑀲𑀤𑁆𑀤𑁄 𑀩𑀳𑀼𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀦 𑀧𑀕𑁂𑀯𑀸𑀢𑀺 𑀘 𑀆𑀧𑀢𑁆𑀢𑀺 𑀧𑀦 𑀧𑀕𑁂𑀯𑀸𑀢𑀺 𑀘 𑀆𑀧𑀢𑁆𑀢𑀻𑀧𑀺 𑀦𑀢𑁆𑀣𑀻𑀢𑀺 𑀘 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺.

‘‘𑀲𑀓𑀮𑁂𑀧𑀺 𑀯𑀺𑀦𑀬𑁂’’𑀢𑀺 𑀇𑀫𑀺𑀦𑀸 𑀤𑁆𑀯𑁂𑀢𑁆𑀣𑀸𑀢𑀺 𑀧𑀸𑀞𑁂 𑀏𑀢𑁆𑀣𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺. 𑀉𑀪𑀺𑀦𑁆𑀦𑀦𑁆𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁. 𑀅𑀜𑁆𑀜𑀣𑀸 𑀧𑀦 𑀓𑀺𑀢𑁆𑀢𑀓𑀸 𑀧𑀞𑀫𑀸𑀧𑀢𑁆𑀢𑀺𑀓𑀸𑀢𑀺 𑀆𑀳 ‘‘𑀇𑀢𑀭𑀣𑀸 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀇𑀢𑀭𑀣𑀸𑀢𑀺 𑀧𑀜𑁆𑀜𑀢𑁆𑀢𑀺𑀢𑁄 𑀅𑀜𑁆𑀜𑁂𑀦 𑀧𑀓𑀸𑀭𑁂𑀦. 𑀓𑀫𑁆𑀫𑀜𑁆𑀘𑀸𑀢𑀺 𑀓𑀫𑁆𑀫𑀜𑀢𑁆𑀢𑀺 𑀘. 𑀓𑀫𑁆𑀫𑀧𑀸𑀤𑀺𑀓𑀸 𑀘𑀸𑀢𑀺 𑀓𑀫𑁆𑀫𑀧𑀸𑀤𑀜𑀢𑁆𑀢𑀺 𑀘. 𑀦𑀯𑀲𑀼 𑀞𑀸𑀦𑁂𑀲𑀽𑀢𑀺 𑀑𑀲𑀸𑀭𑀡𑀸𑀤𑀻𑀲𑀼 𑀦𑀯𑀲𑀼 𑀞𑀸𑀦𑁂𑀲𑀼. 𑀤𑁆𑀯𑀻𑀲𑀽𑀢𑀺 𑀜𑀢𑁆𑀢𑀺𑀤𑀼𑀢𑀺𑀬, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑁂𑀲𑀼.

𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺𑀓𑀸𑀬 𑀧𑀸𑀭𑀸𑀚𑀺𑀓𑀁, 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸𑀬 𑀧𑀸𑀭𑀸𑀚𑀺𑀓𑀁, 𑀅𑀝𑁆𑀞𑀯𑀢𑁆𑀣𑀼𑀓𑀸𑀬 𑀧𑀸𑀭𑀸𑀚𑀺𑀓𑀦𑁆𑀢𑀺 𑀇𑀢𑀺 𑀇𑀫𑁂 𑀢𑀬𑁄𑀢𑀺 𑀬𑁄𑀚𑀦𑀸. 𑀓𑀸𑀭𑀡𑀪𑀽𑀢𑁂𑀦𑀸𑀢𑀺 𑀳𑁂𑀢𑀼𑀪𑀽𑀢𑁂𑀦, ‘‘𑀓𑀭𑀡𑀪𑀽𑀢𑁂𑀦𑀸’’𑀢𑀺𑀧𑀺 𑀧𑀸𑀞𑁄, 𑀲𑀸𑀥𑀓𑀢𑀫𑀲𑀢𑁆𑀢𑀺𑀪𑀽𑀢𑁂𑀦𑀸𑀢𑀺 𑀅𑀢𑁆𑀣𑁄.

𑀢𑁂𑀲𑀦𑁆𑀢𑀺 𑀅𑀤𑁆𑀥𑀸𑀦𑀳𑀻𑀦𑀸𑀤𑀻𑀦𑀁. 𑀏𑀢𑁆𑀣𑀸𑀢𑀺 ‘‘𑀢𑀬𑁄 𑀧𑀼𑀕𑁆𑀕𑀮𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸’’𑀢𑀺 𑀧𑀸𑀞𑁂, 𑀏𑀢𑁂𑀲𑀼 𑀅𑀗𑁆𑀕𑀳𑀻𑀦𑀸𑀤𑀻𑀲𑀼 𑀯𑀸. 𑀬𑁄𑀢𑀺 𑀧𑀼𑀕𑁆𑀕𑀮𑁄. 𑀅𑀧𑀭𑀺𑀧𑀽𑀭𑁄 𑀦 𑀬𑀸𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀸𑀢𑀼𑀖𑀸𑀢𑀓𑀸𑀤𑀬𑁄 𑀓𑀭𑀡𑀤𑀼𑀓𑁆𑀓𑀝𑀓𑀸 𑀘𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀜𑀢𑁆𑀢𑀺𑀓𑀧𑁆𑀧𑀦𑀸𑀤𑀻𑀲𑀼. 𑀜𑀢𑁆𑀢𑀺𑀓𑀧𑁆𑀧𑀦𑀸𑀢𑀺 𑀜𑀢𑁆𑀢𑀺𑀯𑀺𑀥𑀺. 𑀯𑀺𑀧𑁆𑀧𑀓𑀢𑀧𑀘𑁆𑀘𑀢𑁆𑀢𑀦𑁆𑀢𑀺 𑀯𑀺𑀧𑁆𑀧𑀓𑀢𑀁 𑀧𑀘𑁆𑀘𑀢𑁆𑀢𑀁. 𑀅𑀢𑀻𑀢𑀓𑀭𑀡𑀦𑁆𑀢𑀺 𑀅𑀢𑀻𑀢𑀲𑁆𑀲 𑀓𑀭𑀡𑀁. 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀯𑀢𑁆𑀣𑀼𑀲𑀫𑁆𑀧𑀦𑁆𑀦𑀁 𑀳𑀻’’𑀢𑀺𑀆𑀤𑀺. 𑀢𑀬𑁄 𑀓𑀫𑁆𑀫𑀸𑀦 𑀲𑀗𑁆𑀕𑀳𑀸𑀢𑀺 𑀏𑀢𑁆𑀣 𑀙𑀦𑁆𑀤𑀪𑁂𑀤𑀭𑀓𑁆𑀔𑀦𑀢𑁆𑀣𑀸𑀬 𑀦𑀓𑀸𑀭𑁂 𑀦𑀺𑀕𑁆𑀕𑀳𑀺𑀢𑀮𑁄𑀧𑁄. 𑀦𑀸𑀲𑀺𑀢𑀓𑀸𑀢𑀺 𑀦𑀸𑀲𑁂𑀢𑀩𑁆𑀩𑀸 𑀧𑀼𑀕𑁆𑀕𑀮𑀸, 𑀦𑀸𑀲𑀺𑀢𑀩𑁆𑀩𑀸𑀢𑀺 𑀦𑀸𑀲𑀺𑀢𑀸, 𑀦𑀸𑀲𑀺𑀢𑀸 𑀏𑀯 𑀦𑀸𑀲𑀺𑀢𑀓𑀸. 𑀢𑀺𑀡𑁆𑀡𑀁 𑀚𑀦𑀸𑀦𑀦𑁆𑀢𑀺 𑀢𑀺𑀡𑁆𑀡𑀁 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀚𑀦𑀸𑀦𑀁 𑀏𑀓𑀽𑀧𑀚𑁆𑀛𑀸𑀬𑁂𑀦 𑀦𑀸𑀦𑀸𑀘𑀭𑀺𑀬𑁂𑀦 𑀳𑀼𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀏𑀓𑀸𑀦𑀼𑀲𑁆𑀲𑀸𑀯𑀦𑀸𑀢𑀺 𑀏𑀓𑀢𑁄 𑀅𑀦𑀼𑀲𑁆𑀲𑀸𑀯𑀦𑀸.

𑀧𑀸𑀤𑁄 𑀦𑀸𑀫 𑀓𑀳𑀸𑀧𑀡𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑁄. 𑀫𑀸𑀲𑀓𑁄 𑀦𑀸𑀫 𑀧𑀸𑀤𑀲𑁆𑀲 𑀧𑀜𑁆𑀘𑀫𑀪𑀸𑀕𑁄. 𑀧𑀸𑀭𑀸𑀚𑀺𑀓𑀦𑁆𑀢𑀺 𑀯𑀦𑀧𑁆𑀧𑀢𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀁 (𑀧𑀸𑀭𑀸. 𑁧𑁧𑁦). 𑀅𑀦𑁄𑀤𑀺𑀲𑁆𑀲𑀸𑀢𑀺 ‘‘𑀫𑀦𑀼𑀲𑁆𑀲𑁄 𑀫𑀭𑀢𑀽’’𑀢𑀺𑀆𑀤𑀺𑀦𑀸 𑀦 𑀉𑀤𑁆𑀤𑀺𑀲𑀺𑀢𑁆𑀯𑀸. 𑀢𑁂𑀦𑀸𑀢𑀺 𑀯𑀺𑀲𑁂𑀦.

𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀯𑀕𑁆𑀕𑀲𑁆𑀫𑀺𑀦𑁆𑀢𑀺 𑀲𑀸𑀫𑀜𑁆𑀜𑀸𑀥𑀸𑀭𑁄. 𑀤𑀲𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀯𑀺𑀲𑁂𑀲𑀸𑀥𑀸𑀭𑁄. 𑀧𑀞𑀫𑀲𑀺𑀓𑁆𑀔𑀸𑀧𑀤𑀫𑁆𑀳𑀺𑀬𑁂𑀯𑀸𑀢𑀺 𑀤𑀲𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀧𑀞𑀫𑀲𑀺𑀓𑁆𑀔𑀸𑀧𑀤𑀫𑁆𑀳𑀺𑀬𑁂𑀯. 𑀉𑀧𑀲𑀫𑁆𑀧𑀦𑁆𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀆𑀧𑀢𑁆𑀢𑀺 𑀳𑁄𑀢𑀻’’𑀢𑀺 𑀇𑀫𑀺𑀦𑀸 ‘‘𑀘𑀻𑀯𑀭𑁂𑀦𑀸’’𑀢𑀺 𑀧𑀤𑀲𑁆𑀲 𑀲𑀫𑁆𑀩𑀦𑁆𑀥𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀺.

‘‘𑀘𑀢𑀲𑁆𑀲𑁄 𑀏𑀯𑀸’’𑀢𑀺 𑀇𑀫𑀺𑀦𑀸 𑀢𑀢𑁆𑀢𑀺𑀓𑀸𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺. 𑀢𑀸 𑀘𑀢𑀲𑁆𑀲𑁄 𑀧𑀭𑀺𑀫𑀸𑀡𑀸 𑀬𑀸𑀲𑀁 𑀆𑀧𑀢𑁆𑀢𑀻𑀦𑀦𑁆𑀢𑀺 𑀢𑀢𑁆𑀢𑀺𑀓𑀸. 𑀦𑀺𑀧𑀦𑁆𑀦𑀲𑁆𑀲𑀸𑀧𑀺 𑀢𑀢𑁆𑀢𑀺𑀓𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀸𑀢𑀺 𑀪𑀺𑀓𑁆𑀔𑀼𑀦𑀻.

(𑁩) 𑀧𑀸𑀘𑀺𑀢𑁆𑀢𑀺𑀬𑀯𑀡𑁆𑀡𑀦𑀸

𑁪𑁭𑁬. 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀻𑀢𑀺 𑀲𑀩𑁆𑀩𑀺𑀆𑀤𑀻𑀦𑀺 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀺. 𑀇𑀫𑀁 𑀆𑀧𑀢𑁆𑀢𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀘𑁆𑀙𑀸 𑀆𑀧𑀦𑁆𑀦𑁄𑀢𑀺 𑀬𑁄𑀚𑀦𑀸.

𑀏𑀓𑀁 𑀓𑀩𑀴𑀦𑁆𑀢𑀺 𑀏𑀓𑀁 𑀆𑀮𑁄𑀧𑀁, 𑀢𑀼𑀫𑁆𑀳𑀫𑀽𑀮𑁂𑀢𑀺 𑀢𑀼𑀫𑁆𑀳𑀁 𑀲𑀦𑁆𑀢𑀺𑀓𑁂.

𑀬𑀣𑀸𑀯𑀢𑁆𑀣𑀼𑀓𑀦𑁆𑀢𑀺 𑀯𑀢𑁆𑀣𑀼𑀅𑀦𑀼𑀮𑁄𑀫𑀁, 𑀆𑀧𑀢𑁆𑀢𑀺𑀬𑁄 𑀤𑁂𑀲𑀺𑀢𑀸𑀯 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸.

𑀓𑁄𑀓𑀸𑀮𑀺𑀓𑀸𑀤𑀻𑀦𑀦𑁆𑀢𑀺𑀆𑀤𑀺𑀲𑀤𑁆𑀤𑁂𑀦 𑀓𑀝𑀫𑁄𑀤𑀓𑀢𑀺𑀲𑁆𑀲𑀓𑀸𑀤𑀬𑁄 (𑀧𑀸𑀭𑀸. 𑁪𑁧𑁭) 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀘𑀡𑁆𑀟𑀓𑀸𑀴𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀜𑁆𑀘𑀸𑀢𑀺 𑀬𑁄𑀚𑀦𑀸. 𑀧𑀬𑀼𑀢𑁆𑀢𑀯𑀸𑀘𑀸𑀧𑀘𑁆𑀘𑀬𑀸𑀢𑀺 𑀯𑀺𑀜𑁆𑀜𑀢𑁆𑀢𑀺𑀦𑀺𑀫𑀺𑀢𑁆𑀢𑀸𑀤𑀻𑀳𑀺 𑀧𑀓𑀸𑀭𑁂𑀦 𑀬𑀼𑀢𑁆𑀢𑀸𑀬 𑀯𑀸𑀘𑀸𑀬 𑀧𑀘𑁆𑀘𑀬𑀸. 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑀆𑀧𑀚𑁆𑀚𑀦𑀁. 𑀅𑀣𑀯𑀸 𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺 𑀅𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀧𑀸𑀭𑀸𑀚𑀺𑀓𑀸 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀯𑀸 𑀧𑀸𑀭𑀸𑀚𑀺𑀓𑀸 𑀆𑀧𑀢𑁆𑀢𑀺 𑀅𑀲𑁆𑀲 𑀪𑀯𑀢𑀻𑀢𑀺 𑀯𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀇𑀢𑀻𑀢𑀺 𑀇𑀫𑀸 𑀙 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸.

𑀪𑁄𑀚𑀦𑀁 𑀕𑀳𑁂𑀢𑁆𑀯𑀸 𑀅𑀚𑁆𑀛𑁄𑀳𑀭𑀫𑀸𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀣𑁂𑀯𑀸𑀢𑀺 𑀬𑀣𑀸 𑀔𑀸𑀤𑀦𑁂, 𑀢𑀣𑁂𑀯 𑀫𑀁𑀲𑀁 𑀮𑀲𑀼𑀡𑀁 𑀅𑀚𑁆𑀛𑁄𑀳𑀭𑀫𑀸𑀦𑀸𑀢𑀺 𑀬𑁄𑀚𑀦𑀸. ‘‘𑀧𑀡𑀻𑀢𑀪𑁄𑀚𑀦𑀸𑀦𑀻’’𑀢𑀺 𑀘 ‘‘𑀅𑀓𑀧𑁆𑀧𑀺𑀬𑀫𑀁𑀲’’𑀦𑁆𑀢𑀺 𑀘 𑀧𑀤𑀸𑀦𑀺 ‘‘𑀅𑀚𑁆𑀛𑁄𑀳𑀭𑀫𑀸𑀦𑀸’’𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀸𑀦𑀺.

𑀧𑀜𑁆𑀘 𑀞𑀸𑀦𑀸𑀦𑀻𑀢𑀺 𑀧𑀜𑁆𑀘 𑀆𑀧𑀢𑁆𑀢𑀺𑀲𑀗𑁆𑀔𑀸𑀢𑀸𑀦𑀺 𑀞𑀸𑀦𑀸𑀦𑀺. 𑀢𑀢𑁆𑀣𑀸𑀢𑀺 𑀧𑀜𑁆𑀘𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀼. 𑀤𑁆𑀯𑀺𑀦𑁆𑀦𑀦𑁆𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁. 𑀢𑁂𑀲𑀦𑁆𑀢𑀺 𑀲𑀺𑀓𑁆𑀔𑀫𑀸𑀦𑀸𑀤𑀻𑀦𑀁. 𑀧𑀜𑁆𑀘𑀦𑁆𑀦𑀫𑁂𑀯𑀸𑀢𑀺 𑀲𑀳𑀥𑀫𑁆𑀫𑀺𑀓𑀸𑀦𑀁𑀬𑁂𑀯. 𑀯𑀺𑀦𑀺𑀘𑁆𑀙𑀬𑀯𑁄𑀳𑀸𑀭𑁄𑀢𑀺 𑀯𑀺𑀦𑀺𑀘𑁆𑀙𑀬𑀯𑀘𑀦𑀁. 𑀇𑀫𑀺𑀦𑀸 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀟𑁆𑀟𑀓𑀫𑁆𑀫𑀁 𑀦𑀸𑀫𑀸𑀢𑀺 𑀅𑀪𑀺𑀬𑀼𑀜𑁆𑀚𑀦𑁆𑀢𑀸𑀦𑀁 𑀓𑀫𑁆𑀫𑀁 𑀦𑀸𑀫.

‘‘𑀲𑀳𑀥𑀫𑁆𑀫𑀺𑀓𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀧𑀜𑁆𑀚𑀦𑁆𑀦𑀁 𑀯𑀺𑀦𑀺𑀘𑁆𑀙𑀬𑁄𑀢𑀺 𑀏𑀢𑁆𑀣 𑀧𑀜𑁆𑀘𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀲𑁄𑀪𑀡𑀪𑀸𑀯𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀓𑀢𑀯𑀻𑀢𑀺𑀓𑁆𑀓𑀫𑁄 𑀳𑀻’’𑀢𑀺𑀆𑀤𑀺. 𑀅𑀩𑁆𑀪𑀼𑀡𑁆𑀳𑀲𑀻𑀮𑁄𑀢𑀺 𑀅𑀪𑀺𑀦𑀯𑀼𑀧𑁆𑀧𑀦𑁆𑀦𑀲𑀻𑀮𑁄. 𑀅𑀩𑁆𑀪𑀼𑀡𑁆𑀳𑀲𑀻𑀮𑁄 𑀦𑀸𑀫 𑀅𑀢𑁆𑀣𑀢𑁄 𑀧𑀸𑀓𑀢𑀺𑀓𑀲𑀻𑀮𑁄𑀢𑀺 𑀆𑀳 ‘‘𑀧𑀸𑀓𑀢𑀺𑀓𑁄’’𑀢𑀺, 𑀧𑀓𑀢𑀺𑀲𑀻𑀮𑁂𑀦 𑀦𑀺𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄.

‘‘𑀓𑀸𑀬𑀤𑁆𑀯𑀸𑀭𑀲𑀫𑁆𑀪𑀯𑀸’’𑀢𑀺 𑀇𑀫𑀺𑀦𑀸 𑀓𑀸𑀬𑀺𑀓𑀸𑀢𑀺 𑀧𑀤𑀲𑁆𑀲 𑀢𑀤𑁆𑀥𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀫𑀼𑀔𑀁 𑀑𑀮𑁄𑀓𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀘𑀢𑀼𑀦𑁆𑀦𑀁 𑀤𑁂𑀲𑀦𑀸𑀬 𑀘𑀸𑀢𑀺 𑀏𑀢𑁆𑀣 ‘‘𑀤𑁂𑀲𑀦𑀸𑀬𑀸’’𑀢𑀺 𑀧𑀤𑀁 𑀆𑀤𑀺𑀧𑀤𑀮𑁄𑀧𑀦𑁆𑀢𑀺 𑀆𑀳 ‘‘𑀅𑀘𑁆𑀘𑀬𑀤𑁂𑀲𑀦𑀸𑀬𑀸’’𑀢𑀺. 𑀲𑀸𑀢𑀺 𑀅𑀘𑁆𑀘𑀬𑀤𑁂𑀲𑀦𑀸. 𑀅𑀪𑀺𑀦𑀺𑀮𑀻𑀬𑀺𑀢𑁆𑀯𑀸 𑀥𑀦𑀼𑀦𑀸 𑀫𑀸𑀭𑁂𑀦𑁆𑀢𑀻𑀢𑀺 𑀅𑀪𑀺𑀫𑀸𑀭𑀸.

𑀙𑁂𑀚𑁆𑀚𑀁 𑀳𑁄𑀢𑀻𑀢𑀺 𑀏𑀢𑁆𑀣 𑀙𑁂𑀚𑁆𑀚𑀁 𑀦𑀸𑀫 𑀧𑀸𑀭𑀸𑀚𑀺𑀓𑀸𑀧𑀚𑁆𑀚𑀦𑀫𑁂𑀯𑀸𑀢𑀺 𑀆𑀳 ‘‘𑀤𑁂𑀯𑀤𑀢𑁆𑀢𑁄 𑀯𑀺𑀬 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀢𑀻’’𑀢𑀺. 𑀇𑀫𑀸 𑀧𑀦 𑀆𑀧𑀢𑁆𑀢𑀺𑀬𑁄𑀢𑀺 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀬𑁄.

(𑁪) 𑀅𑀯𑀦𑁆𑀤𑀦𑀻𑀬𑀧𑀼𑀕𑁆𑀕𑀮𑀸𑀤𑀺𑀯𑀡𑁆𑀡𑀦𑀸

𑁪𑁭𑁭. 𑀢𑁂𑀲𑀦𑁆𑀢𑀺 𑀤𑀲𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁. ‘‘𑀲𑀤𑁆𑀥𑀺’’𑀦𑁆𑀢𑀺 𑀇𑀫𑀺𑀦𑀸 𑀲𑀸𑀫𑀻𑀘𑁂𑀦𑀸𑀢𑀺 𑀏𑀢𑁆𑀣 𑀲𑀳𑀢𑁆𑀣𑁂 𑀓𑀭𑀡𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀸𑀫𑀻𑀘𑁂𑀦𑀸𑀢𑀺 𑀘 𑀲𑀸𑀫𑀻𑀘𑀺𑀦𑀸 𑀓𑀢𑁆𑀢𑀩𑁆𑀩𑀁 𑀲𑀸𑀫𑀻𑀘𑀁 𑀓𑀫𑁆𑀫𑀁, 𑀢𑁂𑀦 𑀲𑀸𑀫𑀻𑀘𑁂𑀦. 𑀤𑀲 𑀘𑀻𑀯𑀭𑀥𑀸𑀭𑀡𑀸𑀢𑀺 𑀧𑀤𑀲𑁆𑀲 𑀲𑀫𑀸𑀲𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀤𑀲 𑀤𑀺𑀯𑀲𑀸𑀦𑀺 𑀅𑀢𑀺𑀭𑁂𑀓𑀘𑀻𑀯𑀭𑀲𑁆𑀲 𑀥𑀸𑀭𑀡𑀸’’𑀢𑀺.

𑀓𑀢𑀺𑀲𑀢𑀦𑁆𑀢𑀺𑀆𑀤𑀻𑀲𑀼 𑀤𑁆𑀯𑀻𑀲𑀼 𑀕𑀸𑀣𑀸𑀧𑀸𑀤𑁂𑀲𑀼 𑀘𑀢𑀽𑀲𑀼 𑀯𑀺𑀪𑀢𑁆𑀬𑀦𑁆𑀢𑀧𑀤𑁂𑀲𑀼 𑀧𑀼𑀭𑀺𑀫𑀁 𑀧𑀼𑀭𑀺𑀫𑁂𑀦, 𑀧𑀘𑁆𑀙𑀺𑀫𑀜𑁆𑀘 𑀧𑀘𑁆𑀙𑀺𑀫𑁂𑀦 𑀬𑀣𑀸𑀓𑁆𑀓𑀫𑀁 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀢𑀺𑀲𑀢𑀁 𑀆𑀧𑀢𑁆𑀢𑀺𑀬𑁄 𑀭𑀢𑁆𑀢𑀺𑀲𑀢𑀁 𑀙𑀸𑀤𑀬𑀺𑀢𑁆𑀯𑀸𑀦𑀸’’𑀢𑀺. 𑀧𑀘𑁆𑀙𑀺𑀫𑀕𑀸𑀣𑀸𑀬 𑀧𑀼𑀩𑁆𑀩𑀟𑁆𑀠𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀳𑀻𑀢𑀺 𑀅𑀬𑀁 𑀏𑀯 𑀯𑀓𑁆𑀔𑀫𑀸𑀦𑁄. 𑀏𑀢𑁆𑀣𑀸𑀢𑀺 𑀕𑀸𑀣𑀸𑀬𑀁. 𑀬𑁄𑀢𑀺 𑀪𑀺𑀓𑁆𑀔𑀼, 𑀧𑀝𑀺𑀘𑁆𑀙𑀸𑀤𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑀻𑀢𑀺 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄.

𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀘𑀢𑀼𑀓𑁆𑀓𑁂𑀲𑀼 𑀥𑀫𑁆𑀫𑁂𑀦 𑀲𑀫𑀕𑁆𑀕𑀁 𑀅𑀧𑀦𑁂𑀢𑁆𑀯𑀸 𑀤𑁆𑀯𑀸𑀤𑀲 𑀓𑀫𑁆𑀫𑀤𑁄𑀲𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀏𑀢𑁆𑀣𑀸𑀢𑀺 𑀙𑀲𑀼 𑀓𑀫𑁆𑀫𑁂𑀲𑀼. 𑀏𑀢𑀤𑁂𑀯𑀸𑀢𑀺 𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀫𑁂𑀯.

𑀬𑀁 𑀤𑁂𑀲𑀺𑀢𑀸𑀢𑀺 𑀏𑀢𑁆𑀣 𑀬𑀁𑀲𑀤𑁆𑀤𑁄 𑀯𑀘𑀦𑀯𑀺𑀧𑀮𑁆𑀮𑀸𑀲𑁄𑀢𑀺 𑀆𑀳 ‘‘𑀬𑀸𑀦𑀺 𑀤𑁂𑀲𑀺𑀢𑀸𑀦𑀻’’𑀢𑀺. ‘‘𑀤𑁂𑀲𑀺𑀢𑀸𑀦𑀻’’𑀢𑀺 𑀇𑀫𑀺𑀦𑀸 𑀤𑁂𑀲𑀺𑀢𑀸𑀢𑀺 𑀏𑀢𑁆𑀣 𑀦𑀺𑀓𑀸𑀭𑀲𑁆𑀲 𑀆𑀓𑀸𑀭𑀸𑀤𑁂𑀲𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀧𑀭𑀺𑀬𑀦𑁆𑀢𑀧𑀭𑀺𑀘𑁆𑀙𑁂𑀤𑀪𑀸𑀯𑀭𑀳𑀺𑀢𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀦𑀢𑁆𑀣𑀺 𑀅𑀦𑁆𑀢𑀁 𑀧𑀭𑀺𑀬𑀦𑁆𑀢𑀫𑁂𑀢𑀲𑁆𑀲𑀸𑀢𑀺 𑀅𑀦𑀦𑁆𑀢𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀁, 𑀚𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁂𑀦 𑀓𑀁 𑀓𑀺𑀦𑁆𑀢𑀺 𑀓𑀢𑁆𑀯𑀸 𑀚𑀺𑀢𑀦𑁆𑀢𑀺 𑀆𑀳 ‘‘𑀪𑀕𑀯𑀢𑀸 𑀓𑀺𑀮𑁂𑀲𑀕𑀡𑀁 𑀅𑀪𑀺𑀫𑀤𑁆𑀤𑀺𑀢𑁆𑀯𑀸’’𑀢𑀺. 𑀓𑁂𑀦 𑀓𑀁 𑀓𑀺𑀦𑁆𑀢𑀺 𑀓𑀢𑁆𑀯𑀸 𑀓𑀺𑀁 𑀚𑀺𑀢𑀁 𑀯𑀺𑀬𑀸𑀢𑀺 𑀆𑀳 ‘‘𑀭𑀜𑁆𑀜𑀸 𑀲𑀧𑀢𑁆𑀢𑀕𑀡𑀁 𑀅𑀪𑀺𑀫𑀤𑁆𑀤𑀺𑀢𑁆𑀯𑀸 𑀭𑀚𑁆𑀚𑀁 𑀯𑀺𑀬𑀸’’𑀢𑀺. 𑀢𑀢𑁆𑀣 ‘‘𑀭𑀜𑁆𑀜𑀸’’𑀢𑀺 𑀇𑀫𑀺𑀦𑀸 ‘‘𑀓𑁂𑀦𑀸’’𑀢𑀺 𑀧𑀼𑀘𑁆𑀙𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. ‘‘𑀲𑀧𑀢𑁆𑀢𑀕𑀡’’𑀦𑁆𑀢𑀺 𑀇𑀫𑀺𑀦𑀸 ‘‘𑀓’’𑀦𑁆𑀢𑀺 𑀧𑀼𑀘𑁆𑀙𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. ‘‘𑀅𑀪𑀺𑀫𑀤𑁆𑀤𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 ‘‘𑀓𑀺𑀦𑁆𑀢𑀺 𑀓𑀢𑁆𑀯𑀸’’𑀢𑀺 𑀧𑀼𑀘𑁆𑀙𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. ‘‘𑀭𑀚𑁆𑀚’’𑀦𑁆𑀢𑀺 𑀇𑀫𑀺𑀦𑀸 ‘‘𑀓𑀺’’𑀦𑁆𑀢𑀺 𑀧𑀼𑀘𑁆𑀙𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑀧𑀢𑁆𑀢𑀕𑀡𑀦𑁆𑀢𑀺 𑀯𑁂𑀭𑀺𑀕𑀡𑀁. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀭𑀜𑁆𑀜𑀸 𑀲𑀧𑀢𑁆𑀢𑀕𑀡𑀁 𑀅𑀪𑀺𑀫𑀤𑁆𑀤𑀺𑀢𑁆𑀯𑀸 𑀭𑀚𑁆𑀚𑀁 𑀭𑀸𑀚𑀪𑀸𑀯𑀁 𑀚𑀺𑀢𑀁 𑀯𑀺𑀬, 𑀪𑀕𑀯𑀢𑀸 𑀓𑀺𑀮𑁂𑀲𑀕𑀡𑀁 𑀅𑀪𑀺𑀫𑀤𑁆𑀤𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀚𑀺𑀢𑀦𑁆𑀢𑀺. 𑀲𑁆𑀯𑁂𑀯𑀸𑀢𑀺 𑀪𑀕𑀯𑀸 𑀏𑀯. ‘‘𑀦𑀺𑀩𑁆𑀩𑀺𑀓𑀸𑀭𑀢𑀸𑀬𑀸’’𑀢𑀺 𑀇𑀫𑀺𑀦𑀸 𑀢𑀸𑀤𑀺𑀲𑀤𑁆𑀤𑁄 𑀦𑀺𑀩𑁆𑀩𑀺𑀓𑀸𑀭𑀢𑁆𑀣𑀯𑀸𑀘𑀓𑁄 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀯𑀺𑀯𑁂𑀓𑀧𑀜𑁆𑀘𑀓’’𑀦𑁆𑀢𑀺 𑀇𑀫𑀺𑀦𑀸 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀲𑁂𑀦 𑀯𑀺𑀯𑁂𑀓𑀢𑁆𑀢𑀬𑀫𑁆𑀧𑀺 𑀕𑀳𑁂𑀢𑀩𑁆𑀩𑀁 𑀯𑀺𑀯𑁂𑀓𑀪𑀸𑀯𑁂𑀦 𑀲𑀫𑀸𑀦𑀢𑁆𑀢𑀸. 𑀢𑁂𑀦 𑀪𑀕𑀯𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑀸𑀦𑀺 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀻’’𑀢𑀺 𑀇𑀫𑀺𑀦𑀸 𑀏𑀓𑁂𑀢𑁆𑀣𑀸𑀢𑀺 𑀏𑀢𑁆𑀣 𑀏𑀓𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣𑀸𑀢𑀺 𑀲𑀢𑁆𑀢𑀲𑀼 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀲𑀼. 𑀏𑀢𑁆𑀣 𑀧𑀦𑀸𑀢𑀺 𑀲𑀫𑀣𑁂𑀲𑀼 𑀧𑀦. 𑀳𑀻𑀢𑀺 𑀲𑀘𑁆𑀘𑀁. 𑀢𑀲𑁆𑀲𑀸𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀲. 𑀅𑀝𑁆𑀞𑀓𑀣𑀸𑀲𑀽𑀢𑀺 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼. 𑀫𑀬𑀁 𑀧𑀦𑀸𑀢𑀺 𑀲𑀗𑁆𑀕𑀳𑀓𑀸𑀭𑀓𑀸 𑀅𑀫𑁆𑀳𑁂 𑀧𑀦, 𑀩𑀼𑀤𑁆𑀥𑀖𑁄𑀲𑀦𑀸𑀫𑀓𑀸 𑀫𑀬𑀁 𑀧𑀦𑀸𑀢𑀺 𑀅𑀢𑁆𑀣𑁄, 𑀭𑁄𑀘𑀬𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀲 𑀓𑀺𑀫𑀢𑁆𑀣𑀁 𑀕𑀳𑁂𑀢𑁆𑀯𑀸 𑀭𑁄𑀘𑁂𑀲𑀻𑀢𑀺 𑀆𑀳 ‘‘𑀯𑀺𑀦𑀸𑀢𑀺 𑀦𑀺𑀧𑀸𑀢𑀲𑁆𑀲 𑀧𑀝𑀺𑀲𑁂𑀥𑀦𑀫𑀢𑁆𑀣𑀫𑀢𑁆𑀢’’𑀦𑁆𑀢𑀺. ‘‘𑀯𑀺𑀦𑀸𑀢𑀺 𑀦𑀺𑀧𑀸𑀢𑀲𑁆𑀲𑀸’’𑀢𑀺 𑀧𑀤𑀁 ‘‘𑀅𑀢𑁆𑀣𑀫𑀢𑁆𑀢’’𑀦𑁆𑀢𑀺 𑀧𑀤𑁂 𑀯𑀸𑀘𑀓𑀲𑀫𑁆𑀩𑀦𑁆𑀥𑁄. 𑀅𑀢𑁆𑀢𑀦𑁄 𑀲𑀸𑀥𑁆𑀬𑀯𑀘𑀦𑀁 𑀩𑀼𑀤𑁆𑀥𑀯𑀘𑀦𑀲𑀗𑁆𑀔𑀸𑀢𑁂𑀦 𑀲𑀸𑀥𑀓𑀯𑀘𑀦𑁂𑀦 𑀲𑀸𑀥𑁂𑀦𑁆𑀢𑁄 𑀆𑀳 ‘‘𑀯𑀼𑀢𑁆𑀢𑀫𑁆𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺.

𑀅𑀝𑁆𑀞𑀸𑀭𑀲 𑀅𑀝𑁆𑀞𑀓𑀸𑀦𑀻𑀢𑀺 𑀅𑀥𑀫𑁆𑀫𑀤𑀺𑀝𑁆𑀞𑀺𑀪𑁂𑀤, 𑀥𑀫𑁆𑀫𑀤𑀺𑀝𑁆𑀞𑀺𑀪𑁂𑀤, 𑀯𑁂𑀫𑀢𑀺𑀓𑀪𑁂𑀤𑁂𑀲𑀼 𑀢𑀻𑀲𑀼 𑀏𑀓𑀫𑁂𑀓𑀁 𑀫𑀽𑀮𑀁 𑀓𑀢𑁆𑀯𑀸 𑀢𑀬𑁄 𑀢𑀬𑁄 𑀫𑀽𑀮𑀺𑀁 𑀓𑀢𑁆𑀯𑀸 𑀦𑀯 𑀳𑁄𑀦𑁆𑀢𑀺, 𑀢𑁂𑀲𑀼 𑀥𑀫𑁆𑀫𑀤𑀺𑀝𑁆𑀞𑀺𑀪𑁂𑀤𑁂𑀲𑀼 𑀥𑀫𑁆𑀫𑀤𑀺𑀝𑁆𑀞𑀺𑀪𑁂𑀤𑀁 𑀅𑀧𑀦𑁂𑀢𑁆𑀯𑀸 𑀅𑀝𑁆𑀞 𑀳𑁄𑀦𑁆𑀢𑀺, 𑀢𑀸𑀦𑀺 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀲𑀼 𑀬𑁄𑀚𑁂𑀢𑁆𑀯𑀸 𑀅𑀝𑁆𑀞𑀸𑀭𑀲 𑀅𑀝𑁆𑀞𑀓𑀸𑀦𑀺 𑀳𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀙𑀊𑀦𑀤𑀺𑀬𑀟𑁆𑀠𑀲𑀢𑀦𑁆𑀢𑀺 𑀘𑀢𑀼𑀘𑀢𑁆𑀢𑀸𑀮𑀻𑀲𑀸𑀥𑀺𑀓𑀁 𑀲𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀓𑁂𑀓𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀅𑀝𑁆𑀞𑀸𑀭𑀲𑀲𑀼 𑀪𑁂𑀤𑀓𑀭𑀯𑀢𑁆𑀣𑀽𑀲𑀼 𑀏𑀓𑁂𑀓𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁.

𑀇𑀢𑀺 𑀕𑀸𑀣𑀸𑀲𑀗𑁆𑀕𑀡𑀺𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.