𑀉𑀧𑀸𑀮𑀺𑀧𑀜𑁆𑀘𑀓𑀁

𑀅𑀦𑀺𑀲𑁆𑀲𑀺𑀢𑀯𑀕𑁆𑀕𑀯𑀡𑁆𑀡𑀦𑀸

𑁪𑁧𑁭. 𑀉𑀧𑀸𑀮𑀺𑀧𑀜𑁆𑀳𑁂𑀲𑀼 ‘‘𑀓𑀢𑀺 𑀳𑀺 𑀦𑀼 𑀔𑁄 𑀪𑀦𑁆𑀢𑁂’’𑀢𑀺 𑀧𑀼𑀘𑁆𑀙𑀸𑀬 𑀲𑀫𑁆𑀩𑀦𑁆𑀥𑁄 𑀦𑀢𑁆𑀣𑀻𑀢𑀺 𑀓𑀲𑁆𑀲𑀘𑀺 𑀫𑀜𑁆𑀜𑀦𑀁 𑀦𑀺𑀯𑀸𑀭𑁂𑀦𑁆𑀢𑁄 𑀆𑀳 ‘‘𑀅𑀬 𑀲𑀫𑁆𑀩𑀦𑁆𑀥𑁄’’𑀢𑀺. 𑀣𑁂𑀭𑁄𑀢𑀺 𑀉𑀧𑀸𑀮𑀺𑀢𑁆𑀣𑁂𑀭𑁄, 𑀧𑀼𑀘𑁆𑀙𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑁂𑀲𑀦𑁆𑀢𑀺 𑀧𑀜𑁆𑀘𑀓𑀸𑀦𑀁 𑀢𑀦𑁆𑀢𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁂𑀲𑀁 𑀅𑀢𑁆𑀣𑀸𑀬 𑀢𑀦𑁆𑀢𑀺𑀁 𑀞𑀧𑁂𑀲𑁆𑀲𑀸𑀫𑀻𑀢𑀺 𑀆𑀳 ‘‘𑀦𑀺𑀲𑁆𑀲𑀸𑀬 𑀯𑀲𑀦𑀓𑀸𑀭𑀻𑀦𑀁 𑀅𑀢𑁆𑀣𑀸𑀬𑀸’’𑀢𑀺. 𑀯𑀲𑀦𑀓𑀸𑀭𑀻𑀦𑀁 𑀪𑀺𑀓𑁆𑀔𑀽𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀦𑁆𑀢𑀺 𑀧𑀜𑁆𑀳𑀸𑀦𑀁.

𑀆𑀧𑀦𑁆𑀦𑁄 𑀓𑀫𑁆𑀫𑀓𑀢𑁄𑀢𑀺 𑀏𑀢𑁆𑀣 ‘‘𑀆𑀧𑀦𑁆𑀦𑁄’’𑀢𑀺 𑀧𑀤𑀁 ‘‘𑀓𑀫𑁆𑀫𑀓𑀢𑁄’’𑀢𑀺 𑀧𑀤𑀲𑁆𑀲 𑀓𑀸𑀭𑀡𑀤𑀲𑁆𑀲𑀦𑀦𑁆𑀢𑀺 𑀆𑀳 ‘‘𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀢𑀧𑁆𑀧𑀘𑁆𑀘𑀬𑀸𑀯 𑀲𑀗𑁆𑀖𑁂𑀦 𑀓𑀫𑁆𑀫𑀁 𑀓𑀢𑀁 𑀳𑁄𑀢𑀻’’𑀢𑀺. 𑀢𑀧𑁆𑀧𑀘𑁆𑀘𑀬𑀸𑀯𑀸𑀢𑀺 𑀢𑀁𑀆𑀧𑀢𑁆𑀢𑀺𑀆𑀧𑀦𑁆𑀦𑀲𑀗𑁆𑀔𑀸𑀢𑀸 𑀓𑀸𑀭𑀡𑀸 𑀏𑀯.

𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀯𑀕𑁆𑀕𑀯𑀡𑁆𑀡𑀦𑀸

𑁪𑁨𑁦. 𑀅𑀬𑀦𑁆𑀢𑀺 𑀓𑀫𑁆𑀫𑀓𑀢𑁄 𑀪𑀺𑀓𑁆𑀔𑀼, 𑀦 𑀯𑀢𑁆𑀢𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀼𑀮𑁄𑀫𑀯𑀢𑁆𑀢𑁂𑀢𑀺 𑀓𑀢𑀓𑀫𑁆𑀫𑀲𑁆𑀲 𑀅𑀦𑀼𑀮𑁄𑀫𑁂 𑀯𑀢𑁆𑀢𑁂. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀲𑀭𑀚𑁆𑀚𑀼𑀓𑁄𑀢𑀺 𑀲𑀳 𑀓𑀫𑁆𑀫𑀲𑀗𑁆𑀔𑀸𑀢𑀸𑀬 𑀭𑀚𑁆𑀚𑀼𑀬𑀸𑀢𑀺 𑀲𑀭𑀚𑁆𑀚𑀼𑀓𑁄.

𑁪𑁨𑁧. 𑀲𑀫𑀕𑁆𑀕𑁂𑀳𑀺 𑀪𑀺𑀓𑁆𑀔𑀽𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀲𑀘𑁆𑀘𑀁. 𑀅𑀘𑁆𑀘𑀬𑀁 𑀤𑁂𑀲𑀸𑀧𑁂𑀢𑁆𑀯𑀸𑀢𑀺 𑀅𑀜𑁆𑀜𑀫𑀜𑁆𑀜𑀁 𑀤𑁄𑀲𑀁 𑀤𑁂𑀲𑀸𑀧𑁂𑀢𑁆𑀯𑀸. 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑀁 𑀯𑀸𑀢𑀺 𑀯𑀸𑀲𑀤𑁆𑀤𑁄 𑀅𑀢𑁆𑀣𑀦𑁆𑀢𑀭𑀯𑀺𑀓𑀧𑁆𑀧𑁄. 𑀢𑀢𑁆𑀭 𑀘𑁂𑀢𑀺 𑀏𑀢𑁆𑀣 𑀢𑀲𑀤𑁆𑀤𑁄 𑀓𑀫𑁆𑀫𑀯𑀺𑀲𑀬𑁄, 𑀘𑁂𑀲𑀤𑁆𑀤𑁄 𑀲𑀘𑁂𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀲𑀘𑁂 𑀢𑀸𑀤𑀺𑀲𑁂 𑀓𑀫𑁆𑀫𑁂’’𑀢𑀺. 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀫𑁆𑀧𑀺 𑀓𑀢𑁆𑀯𑀸𑀢𑀺 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀁 𑀓𑀢𑁆𑀯𑀸𑀧𑀻𑀢𑀺 𑀬𑁄𑀚𑀦𑀸. 𑀧𑀺𑀲𑀤𑁆𑀤𑁂𑀦 𑀅𑀓𑀢𑁆𑀯𑀸𑀧𑀻𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀬𑀢𑁆𑀭 𑀧𑀦𑀸𑀢𑀺 𑀓𑀫𑁆𑀫𑁂 𑀧𑀦. 𑀢𑀢𑁆𑀣𑀸𑀢𑀺 𑀓𑀫𑁆𑀫𑁂. 𑀧𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀲𑀗𑁆𑀕𑀸𑀫𑀸𑀯𑀘𑀭𑁂𑀦 𑀧𑀓𑁆𑀓𑀫𑀺𑀢𑀩𑁆𑀩𑀁.

𑁪𑁨𑁨. 𑀉𑀲𑁆𑀲𑀺𑀢𑀫𑀦𑁆𑀢𑀻𑀢𑀺 𑀏𑀢𑁆𑀣 𑀉𑀲𑁆𑀲𑀺𑀢𑀁 𑀫𑀦𑁆𑀢𑀻 𑀉𑀲𑁆𑀲𑀺𑀢𑀫𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀮𑁄𑀪…𑀧𑁂… 𑀪𑀸𑀲𑀺𑀢𑀸’’𑀢𑀺. 𑀢𑀢𑁆𑀣 ‘‘𑀮𑁄𑀪𑀤𑁄𑀲 𑀫𑁄𑀳𑀫𑀸𑀦𑀼𑀲𑁆𑀲𑀦𑁆𑀦𑀁 𑀯𑀸𑀘’’𑀦𑁆𑀢𑀺 𑀇𑀫𑀺𑀦𑀸 𑀉𑀲𑁆𑀲𑀺𑀢𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀪𑀸𑀲𑀺𑀢𑀸’’𑀢𑀺 𑀇𑀫𑀺𑀦𑀸 ‘‘𑀫𑀦𑁆𑀢𑀻’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀦𑀺𑀲𑁆𑀲𑀺𑀢𑀚𑀧𑁆𑀧𑀻𑀢𑀺 𑀏𑀢𑁆𑀣 𑀅𑀜𑁆𑀜𑀦𑀺𑀲𑁆𑀲𑀺𑀢𑀁 𑀚𑀧𑁆𑀧𑀫𑁂𑀢𑀲𑁆𑀲𑀸𑀢𑀺 𑀦𑀺𑀲𑁆𑀲𑀺𑀢𑀚𑀧𑁆𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑁆𑀢𑀦𑁄’’𑀢𑀺𑀆𑀤𑀺. 𑀏𑀢𑁆𑀣 𑀚𑀧𑁆𑀧𑀦𑁆𑀢𑀺 𑀯𑀘𑀦𑀁. 𑀚𑀧𑁆𑀧 𑀯𑀘𑀦𑁂𑀢𑀺 𑀳𑀺 𑀥𑀸𑀢𑀼𑀧𑀸𑀞𑁂𑀲𑀼 𑀯𑀼𑀢𑁆𑀢𑀁. 𑀉𑀲𑁆𑀲𑀤𑀬𑀼𑀢𑁆𑀢𑀦𑁆𑀢𑀺 𑀮𑁄𑀪𑀸𑀤𑀺𑀉𑀲𑁆𑀲𑀤𑀬𑀼𑀢𑁆𑀢𑀁, 𑀯𑀘𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀫𑀜𑁆𑀜𑀦𑁆𑀢𑀺 𑀏𑀯𑀁 𑀅𑀢𑁆𑀢𑀦𑀸 𑀅𑀜𑁆𑀜𑀁. 𑀓𑀣𑀸𑀦𑀼𑀲𑀦𑁆𑀥𑀺𑀯𑀘𑀦𑁂𑀢𑀺 𑀘𑁄𑀤𑀓𑀘𑀼𑀤𑀺𑀢𑀓𑀸𑀦𑀁 𑀓𑀣𑀸𑀬 𑀅𑀦𑀼𑀲𑀦𑁆𑀥𑀺𑀯𑀘𑀦𑁂. 𑀏𑀢𑁆𑀣 ‘‘𑀯𑀘𑀦𑁂’’𑀢𑀺 𑀇𑀫𑀺𑀦𑀸 ‘‘𑀪𑀸𑀲𑀸𑀦𑀼𑀲𑀦𑁆𑀥𑀻’’𑀢𑀺 𑀏𑀢𑁆𑀣 𑀪𑀸𑀲𑀲𑀤𑁆𑀤𑁄 𑀯𑀘𑀦𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺.

𑀉𑀲𑁆𑀲𑀸𑀭𑁂𑀢𑀻𑀢𑀺 𑀉𑀤𑁆𑀥𑀁 𑀕𑀫𑀸𑀧𑁂𑀢𑀺. 𑀇𑀫𑀺𑀦𑀸 𑀉𑀲𑁆𑀲𑀸𑀤𑁂𑀢𑀺 𑀉𑀧𑀭𑀺 𑀕𑀫𑀸𑀧𑁂𑀢𑀻𑀢𑀺 𑀉𑀲𑁆𑀲𑀸𑀤𑁂𑀢𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀳𑀺 𑀤𑀓𑀸𑀭𑀭𑀓𑀸𑀭𑀸 𑀲𑀤𑀺𑀲𑀢𑁆𑀣𑀸. 𑀢𑁂 𑀳𑀺 𑀤𑁆𑀯𑁂 𑀅𑀓𑁆𑀔𑀭𑀸 𑀓𑀤𑀸𑀘𑀺 𑀓𑀢𑁆𑀣𑀘𑀺 𑀲𑀤𑀺𑀲𑀢𑁆𑀣𑀸 𑀳𑁄𑀦𑁆𑀢𑀺. 𑀅𑀯𑀲𑀸𑀭𑁂𑀢𑀻𑀢𑀺 𑀳𑀻𑀦𑀪𑀸𑀯𑀁 𑀕𑀫𑀸𑀧𑁂𑀢𑀺. 𑀇𑀫𑀺𑀦𑀸 𑀅𑀯𑀲𑀸𑀤𑁂𑀢𑀺 𑀅𑀥𑁄𑀪𑀸𑀯𑀁 𑀕𑀫𑀸𑀧𑁂𑀢𑀻𑀢𑀺 𑀅𑀯𑀲𑀸𑀤𑁂𑀢𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀅𑀧𑀲𑀸𑀤𑁂𑀢𑀸’’𑀢𑀺𑀧𑀺 𑀧𑀸𑀞𑁄, 𑀉𑀧𑀲𑀕𑁆𑀕𑀫𑀢𑁆𑀢𑀫𑁂𑀯 𑀦𑀸𑀦𑀁. 𑀲𑀫𑁆𑀨𑀜𑁆𑀘 𑀩𑀳𑀼𑀁 𑀪𑀸𑀲𑀢𑀻𑀢𑀺 𑀏𑀢𑁆𑀣 𑀲𑀫𑁆𑀨𑀲𑀤𑁆𑀤𑁄 𑀦𑀺𑀭𑀢𑁆𑀣𑀓𑀓𑀣𑀸𑀯𑀘𑀦𑁄𑀢𑀺 𑀆𑀳 ‘‘𑀦𑀺𑀭𑀢𑁆𑀣𑀓𑀓𑀣’’𑀦𑁆𑀢𑀺. 𑀦𑀺𑀭𑀢𑁆𑀣𑀓𑀓𑀣𑀸 𑀳𑀺 𑀬𑀲𑁆𑀫𑀸 𑀲𑀁 𑀳𑀺𑀢𑀲𑀼𑀔𑀁 𑀨𑀮𑀢𑀺 𑀯𑀺𑀦𑀸𑀲𑁂𑀢𑀺, 𑀢𑀲𑁆𑀫𑀸 𑀲𑀫𑁆𑀨𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀨𑀸 𑀥𑀸𑀢𑀽𑀢𑀺 𑀘 𑀨𑀮𑀥𑀸𑀢𑀽𑀢𑀺 𑀘 𑀥𑀸𑀢𑀼𑀧𑀸𑀞𑁂𑀲𑀼 (𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀁 𑁧𑁬 𑀮𑀓𑀸𑀭𑀦𑁆𑀢𑀥𑀸𑀢𑀼) 𑀯𑀼𑀢𑁆𑀢𑀁.

𑀪𑀸𑀭𑁂 𑀅𑀦𑀸𑀭𑁄𑀧𑀺𑀢𑁂𑀢𑀺 ‘‘𑀢𑀯 𑀪𑀸𑀭𑁄’’𑀢𑀺 𑀲𑀗𑁆𑀖𑁂𑀦 𑀪𑀸𑀭𑁂 𑀅𑀦𑀸𑀭𑁄𑀧𑀺𑀢𑁂. 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸𑀢𑀺 𑀅𑀪𑀺𑀪𑀯𑀺𑀢𑁆𑀯𑀸. 𑀇𑀫𑀺𑀦𑀸 𑀧𑀲𑀬𑁆𑀳 𑀧𑀯𑀢𑁆𑀢𑀸𑀢𑀺 𑀏𑀢𑁆𑀣 𑀧𑀲𑀬𑁆𑀳𑀲𑀤𑁆𑀤𑀲𑁆𑀲 𑀅𑀪𑀺𑀪𑀯𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀦𑀥𑀺𑀓𑀸𑀭𑁂𑀢𑀺 𑀅𑀦𑀥𑀺𑀧𑀘𑁆𑀘𑀝𑁆𑀞𑀸𑀦𑁂. ‘‘𑀓𑀣𑁂𑀢𑀸’’𑀢𑀺 𑀇𑀫𑀺𑀦𑀸 𑀯𑀢𑀼𑀥𑀸𑀢𑀼𑀬𑀸 𑀓𑀣𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀦𑁄𑀓𑀸𑀲𑀓𑀫𑁆𑀫𑀁 𑀓𑀸𑀭𑁂𑀢𑁆𑀯𑀸𑀢𑀺 𑀏𑀢𑁆𑀣 𑀦𑀓𑀸𑀭𑀲𑁆𑀲 𑀅𑀬𑀼𑀢𑁆𑀢𑀬𑁄𑀕𑀪𑀸𑀯𑀢𑁄 𑀬𑀼𑀢𑁆𑀢𑀝𑁆𑀞𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀑𑀓𑀸𑀲𑀓𑀫𑁆𑀫𑀁 𑀅𑀓𑀸𑀭𑁂𑀢𑁆𑀯𑀸’’𑀢𑀺. 𑀬𑀲𑁆𑀲𑀸𑀢𑀺 𑀬𑀸 𑀅𑀲𑁆𑀲. 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀢𑁆𑀢𑀦𑁄 𑀬𑀸 𑀤𑀺𑀝𑁆𑀞𑀺 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸, 𑀅𑀣𑀯𑀸 𑀅𑀢𑁆𑀢𑀦𑁄 𑀬𑀸 𑀤𑀺𑀝𑁆𑀞𑀺 𑀪𑀯𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀤𑀺𑀝𑁆𑀞𑀺𑀁. ‘‘𑀓𑀣𑁂𑀢𑀸’’𑀢𑀺 𑀇𑀫𑀺𑀦𑀸 𑀩𑁆𑀬𑀸𑀓𑀢𑀸𑀢𑀺 𑀏𑀢𑁆𑀣 𑀯𑀺 𑀆 𑀧𑀼𑀩𑁆𑀩𑀓𑀭𑀥𑀸𑀢𑀼𑀬𑀸 𑀓𑀣𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀯𑁄𑀳𑀸𑀭𑀯𑀕𑁆𑀕𑀯𑀡𑁆𑀡𑀦𑀸

𑁪𑁨𑁪. ‘‘𑀦𑁂𑀯 𑀤𑁂𑀲𑀦𑀸𑀬 𑀦 𑀯𑀼𑀝𑁆𑀞𑀸𑀦𑁂𑀦𑀸’’𑀢𑀺 𑀇𑀤𑀁 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑁄𑀲𑀸𑀦𑀼𑀭𑀽𑀧𑀦𑁆𑀢𑀺 𑀯𑀢𑁆𑀣𑀼𑀲𑀗𑁆𑀔𑀸𑀢𑀲𑁆𑀲 𑀤𑁄𑀲𑀲𑁆𑀲 𑀅𑀦𑀼𑀭𑀽𑀧𑀁.

𑀧𑀬𑁄𑀕𑀁 𑀦 𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀲𑀘𑁂 𑀧𑀬𑁄𑀕𑁄 𑀫𑀽𑀮𑁂𑀦 𑀯𑀺𑀲𑀤𑀺𑀲𑁄 𑀳𑀼𑀢𑁆𑀯𑀸 𑀪𑀺𑀦𑁆𑀦𑁄 𑀳𑁄𑀢𑀺, 𑀏𑀯𑀁 𑀲𑀢𑀺 𑀫𑀽𑀮𑀧𑀬𑁄𑀕𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀅𑀥𑀺𑀓𑀭𑀡𑀸𑀦𑀁 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀫𑀽𑀮𑀫𑁂𑀯 𑀧𑀬𑁄𑀕𑀸 𑀦𑀸𑀫 𑀳𑁄𑀦𑁆𑀢𑀺, 𑀦 𑀅𑀜𑁆𑀜𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑀸𑀢𑀩𑁆𑀩𑀦𑁆𑀢𑀺 𑀦 𑀚𑀸𑀦𑀸𑀢𑀻𑀢𑀺 𑀓𑀸𑀢𑀩𑁆𑀩𑀁 𑀇𑀢𑀺 𑀓𑀫𑁆𑀫𑀲𑁆𑀲 𑀓𑀭𑀡𑀁 𑀦 𑀚𑀸𑀦𑀸𑀢𑀻𑀢𑀺 𑀬𑁄𑀚𑀦𑀸. 𑀯𑀢𑁆𑀣𑀽𑀢𑀺 𑀪𑀡𑁆𑀟𑀦𑀓𑀮𑀳𑀸𑀤𑀺𑀯𑀢𑁆𑀣𑀼, 𑀦𑀺𑀬𑀲𑁆𑀲𑀸𑀤𑀻𑀦𑀁 𑀯𑀢𑁆𑀣𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀢𑀼𑀦𑁆𑀦𑀦𑁆𑀢𑀺 𑀢𑀚𑁆𑀚𑀦𑀻𑀬𑀦𑀺𑀬𑀲𑁆𑀲𑀧𑀩𑁆𑀩𑀸𑀚𑀦𑀻𑀬𑀧𑀝𑀺𑀲𑀸𑀭𑀡𑀻𑀬𑀯𑀲𑁂𑀦 𑀘𑀢𑀼𑀦𑁆𑀦𑀁. 𑀬𑀸𑀘𑀢𑀻𑀢𑀺 𑀲𑀗𑁆𑀖𑀁 𑀓𑀫𑁆𑀫𑀲𑁆𑀲 𑀯𑀽𑀧𑀲𑀫𑀁 𑀬𑀸𑀘𑀢𑀺.

𑀯𑀢𑁆𑀣𑀼𑀦𑁆𑀢𑀺 𑀏𑀢𑁆𑀣 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀫𑁂𑀯 𑀯𑀢𑁆𑀣𑀼𑀦𑁆𑀢𑀺 𑀆𑀳 ‘‘𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦’’𑀦𑁆𑀢𑀺. 𑀧𑀤𑁂𑀲𑀧𑀜𑁆𑀜𑀢𑁆𑀢𑀺𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀺𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺𑀏𑀓𑀢𑁄𑀧𑀜𑁆𑀜- 𑀢𑁆𑀢𑀺𑀉𑀪𑀢𑁄𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀙𑀦𑁆𑀦𑀁 𑀧𑀜𑁆𑀜𑀢𑁆𑀢𑀻𑀦𑀁 𑀧𑀜𑁆𑀜𑀢𑁆𑀢𑀺𑀬𑀁 𑀧𑀯𑀺𑀝𑁆𑀞𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀢𑀺𑀯𑀺𑀥𑀁 𑀧𑀜𑁆𑀜𑀢𑁆𑀢𑀺’’𑀦𑁆𑀢𑀺. ‘‘𑀳𑁂𑀝𑁆𑀞𑀼𑀧𑀭𑀺𑀬𑀁 𑀓𑀢𑁆𑀯𑀸 𑀧𑀤𑀁 𑀬𑁄𑀚𑁂𑀢𑀻’’𑀢𑀺 𑀇𑀫𑀺𑀦𑀸 𑀧𑀤𑀧𑀘𑁆𑀘𑀸𑀪𑀝𑁆𑀞𑀦𑁆𑀢𑀺 𑀏𑀢𑁆𑀣 𑀧𑀤𑀸𑀦𑀁 𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀪𑀲𑁆𑀲𑀦𑀁 𑀕𑀴𑀦𑀁 𑀘𑀼𑀢𑀁 𑀧𑀤𑀧𑀘𑁆𑀘𑀸𑀪𑀝𑁆𑀞𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀯𑀺𑀦𑀬𑁂𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 𑀧𑀸𑀴𑀺𑀬𑀁𑀬𑁂𑀯, 𑀅𑀣 𑀔𑁄 𑀅𑀝𑁆𑀞𑀓𑀣𑀸𑀬𑀫𑁆𑀧𑀻𑀢𑀺 𑀆𑀳 ‘‘𑀯𑀺𑀦𑀬𑀧𑀸𑀴𑀺𑀬𑀜𑁆𑀘𑁂𑀯 𑀅𑀝𑁆𑀞𑀓𑀣𑀸𑀬𑀜𑁆𑀘𑀸’’𑀢𑀺.

𑀜𑀢𑁆𑀢𑀺𑀁 𑀦 𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀜𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀗𑁆𑀔𑁂𑀧𑀢𑁄’’𑀢𑀺𑀆𑀤𑀺. 𑀢𑀢𑁆𑀣𑀸𑀢𑀺 𑀤𑀼𑀯𑀺𑀥𑀸𑀲𑀼 𑀜𑀢𑁆𑀢𑀻𑀲𑀼. 𑀓𑀫𑁆𑀫𑀜𑀢𑁆𑀢𑀻𑀢𑀺 𑀅𑀦𑀼𑀲𑁆𑀲𑀸𑀯𑀦𑀓𑀫𑁆𑀫𑀲𑁆𑀲 𑀞𑀸𑀦𑁂 𑀞𑀺𑀢𑀸 𑀜𑀢𑁆𑀢𑀺. 𑀅𑀦𑀼𑀲𑁆𑀲𑀸𑀯𑀦𑀓𑀫𑁆𑀫𑀁 𑀦𑀢𑁆𑀣𑀺, 𑀲𑀬𑀫𑁂𑀯 𑀅𑀦𑀼𑀲𑁆𑀲𑀸𑀯𑀦𑀓𑀫𑁆𑀫𑀝𑁆𑀞𑀸𑀦𑁂 𑀞𑀺𑀢𑀸𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀧𑀸𑀤𑀜𑀢𑁆𑀢𑀻𑀢𑀺 𑀅𑀦𑀼𑀲𑁆𑀲𑀸𑀯𑀦𑀓𑀫𑁆𑀫𑀲𑁆𑀲 𑀧𑀸𑀤𑀪𑀽𑀢𑀸 𑀫𑀽𑀮𑀪𑀽𑀢𑀸 𑀜𑀢𑁆𑀢𑀺. 𑀦𑀯𑀲𑀼 𑀞𑀸𑀦𑁂𑀲𑀽𑀢𑀺 𑀑𑀲𑀸𑀭𑀡𑀸𑀤𑀻𑀲𑀼 𑀦𑀯𑀲𑀼 𑀞𑀸𑀦𑁂𑀲𑀽. 𑀤𑁆𑀯𑀻𑀲𑀼 𑀞𑀸𑀦𑁂𑀲𑀽𑀢𑀺 𑀜𑀢𑁆𑀢𑀺𑀤𑀼𑀢𑀺𑀬𑀜𑀢𑁆𑀢𑀺𑀘𑀢𑀼𑀢𑁆𑀣𑀯𑀲𑁂𑀦 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼, 𑀓𑀫𑁆𑀫𑀧𑀸𑀤𑀜𑀢𑁆𑀢𑀺𑀬𑀸 𑀓𑀭𑀡𑀁 𑀦 𑀚𑀸𑀦𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁆𑀯𑀸𑀬𑀁 𑀘𑀢𑀼𑀩𑁆𑀩𑀺𑀥𑁄 𑀲𑀫𑀣𑁄𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀲𑀫𑀣𑀁. 𑀜𑀢𑁆𑀢𑀺𑀬𑀸𑀢𑀺 𑀲𑀸𑀫𑁆𑀬𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀬𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀅𑀥𑀺𑀓𑀭𑀡𑀲𑁆𑀲. 𑀢𑀁 𑀯𑀽𑀧𑀲𑀫𑀁 𑀦 𑀚𑀸𑀦𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀼𑀢𑁆𑀢𑀁 𑀦 𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀲𑀼𑀢𑁆𑀢𑀲𑀤𑁆𑀤𑀲𑁆𑀲 𑀓𑀤𑀸𑀘𑀺 𑀓𑀢𑁆𑀣𑀘𑀺 𑀫𑀸𑀢𑀺𑀓𑀸𑀬𑀜𑁆𑀘 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀘 𑀧𑀯𑀢𑁆𑀢𑀦𑀢𑁄 𑀇𑀥 𑀉𑀪𑀢𑁄𑀯𑀺𑀪𑀗𑁆𑀕𑁂𑀢𑀺 𑀆𑀳 ‘‘𑀉𑀪𑀢𑁄𑀯𑀺𑀪𑀗𑁆𑀕’’𑀦𑁆𑀢𑀺. 𑀯𑀺𑀦𑀬𑀁 𑀦 𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀯𑀺𑀦𑀬𑀲𑀤𑁆𑀤𑀲𑁆𑀲 𑀲𑀓𑀮𑁂 𑀯𑀺𑀦𑀬𑀧𑀺𑀝𑀓𑁂 𑀯𑀢𑁆𑀢𑀫𑀸𑀦𑀲𑁆𑀲𑀸𑀧𑀺 𑀲𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀉𑀪𑀢𑁄𑀯𑀺𑀪𑀗𑁆𑀕𑀲𑁆𑀲 𑀕𑀳𑀺𑀢𑀢𑁆𑀢𑀸 𑀇𑀥 𑀔𑀦𑁆𑀥𑀓𑀧𑀭𑀺𑀯𑀸𑀭𑀸𑀯 𑀕𑀳𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀔𑀦𑁆𑀥𑀓𑀧𑀭𑀺𑀯𑀸𑀭𑀁 𑀦 𑀚𑀸𑀦𑀸𑀢𑀻’’𑀢𑀺.

𑀯𑀺𑀦𑀬𑀁 𑀦 𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀯𑀺𑀦𑀬𑀧𑀺𑀝𑀓𑀲𑁆𑀲 𑀕𑀳𑁂𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀞𑀧𑁂𑀢𑁆𑀯𑀸 𑀯𑀺𑀦𑀬𑀧𑀺𑀝𑀓’’𑀦𑁆𑀢𑀺. 𑀲𑀼𑀢𑁆𑀢𑀦𑁆𑀢𑀺𑀓𑁂 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑁂𑀢𑀺 (𑀤𑀻. 𑀦𑀺. 𑁨.𑁧𑁮𑁭 𑀆𑀤𑀬𑁄; 𑀅. 𑀦𑀺. 𑁪.𑁧𑁮𑁦) 𑀩𑀼𑀤𑁆𑀥𑀸𑀧𑀤𑁂𑀲𑀲𑀗𑁆𑀖𑀸𑀧𑀤𑁂𑀲𑀲𑀫𑁆𑀩𑀳𑀼𑀮𑀢𑁆𑀣𑁂𑀭𑀸𑀧𑀤𑁂𑀲𑀏𑀓𑀢𑁆𑀣𑁂𑀭𑀸 𑀧𑀤𑁂𑀲𑀯𑀲𑁂𑀦 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑁂. 𑀏𑀢𑁆𑀣𑀸𑀢𑀺 𑀧𑀜𑁆𑀘𑀓𑁂. 𑀬𑀦𑁆𑀢𑀺 𑀯𑀘𑀦𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀧𑀜𑁆𑀘𑀓𑁂𑀲𑀼.

𑀇𑀢𑀺

𑀅𑀦𑀺𑀲𑁆𑀲𑀺𑀢𑀯𑀕𑁆𑀕-𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀯𑀕𑁆𑀕-𑀯𑁄𑀳𑀸𑀭𑀯𑀕𑁆𑀕𑀯𑀡𑁆𑀡𑀦𑀸𑀬

𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸

𑁪𑁨𑁫. 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀯𑀕𑁆𑀕𑁂 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀸𑀢𑀺 𑀏𑀢𑁆𑀣 𑀆𑀯𑀺 𑀓𑀭𑀻𑀬𑀢𑁂 𑀆𑀯𑀺𑀓𑀫𑁆𑀫𑀁, 𑀤𑀺𑀝𑁆𑀞𑀻𑀦𑀁 𑀆𑀯𑀺𑀓𑀫𑁆𑀫𑀁 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀺𑀝𑁆𑀞𑀻𑀦𑀁 𑀆𑀯𑀺𑀓𑀫𑁆𑀫𑀸𑀦𑀻’’𑀢𑀺. ‘‘𑀮𑀤𑁆𑀥𑀺𑀧𑀓𑀸𑀲𑀦𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀤𑀺𑀝𑁆𑀞𑀺𑀲𑀤𑁆𑀤𑁄 𑀮𑀤𑁆𑀥𑀺𑀧𑀭𑀺𑀬𑀸𑀬𑁄, 𑀆𑀯𑀺𑀓𑀫𑁆𑀫𑀲𑀤𑁆𑀤𑁄 𑀧𑀓𑀸𑀲𑀦𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀏𑀢𑀦𑁆𑀢𑀺 ‘‘𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀸’’𑀢𑀺 𑀦𑀸𑀫𑀁. 𑀅𑀤𑁂𑀲𑀦𑀸𑀕𑀸𑀫𑀺𑀦𑀻 𑀦𑀸𑀫 𑀅𑀢𑁆𑀣𑀢𑁄 𑀕𑀭𑀼𑀓𑀦𑁆𑀢𑀺 𑀆𑀳 ‘‘𑀕𑀭𑀼𑀓𑀸𑀧𑀢𑁆𑀢𑀺𑀬𑀸’’𑀢𑀺. 𑀮𑀳𑀼𑀓𑀸𑀬𑀧𑀻𑀢𑀺 𑀧𑀺𑀲𑀤𑁆𑀤𑁄 𑀕𑀭𑀳𑀢𑁆𑀣𑁄. 𑀮𑀳𑀼𑀓𑀸𑀬𑀧𑀺 𑀤𑁂𑀲𑀺𑀢𑀸𑀬 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀁 𑀅𑀥𑀫𑁆𑀫𑀺𑀓𑀁 𑀳𑁄𑀢𑀺, 𑀧𑀕𑁂𑀯 𑀕𑀭𑀼𑀓𑀸𑀬𑀸𑀢𑀺 𑀅𑀢𑁆𑀣𑁄.

𑀬𑀣𑀸 …𑀧𑁂… 𑀳𑁄𑀢𑀻𑀢𑀺 𑀬𑀣𑀸 𑀆𑀯𑀺𑀓𑀢𑁂 𑀘𑀢𑀽𑀳𑀺 𑀧𑀜𑁆𑀘𑀳𑀺 𑀏𑀓𑀻𑀪𑀽𑀢𑁂𑀳𑀺 𑀆𑀯𑀺𑀓𑀢𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀘𑀢𑀽𑀳𑀺 𑀧𑀜𑁆𑀘𑀳𑀻𑀢𑀺 𑀅𑀦𑁆𑀢𑀺𑀫𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀁. 𑀢𑀢𑁄 𑀅𑀢𑀺𑀭𑁂𑀓𑁂𑀳𑀺𑀧𑀺 𑀏𑀓𑀢𑁄 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀤𑁂𑀲𑀺𑀢𑀸 𑀘 𑀆𑀧𑀢𑁆𑀢𑀺 𑀦 𑀯𑀼𑀝𑁆𑀞𑀸𑀢𑀺, 𑀤𑁂𑀲𑀦𑀸𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀜𑁆𑀘 𑀳𑁄𑀢𑀺. ‘‘𑀘𑀢𑀽𑀳𑀺 𑀧𑀜𑁆𑀘𑀳𑀻’’𑀢𑀺 𑀅𑀦𑁆𑀢𑀺𑀫𑀧𑀭𑀺𑀘𑁆𑀙𑁂𑀤𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀤𑁆𑀯𑀻𑀳𑀺 𑀢𑀻𑀳𑀺 𑀧𑀦 𑀏𑀓𑀢𑁄 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀫𑀦𑁄𑀫𑀸𑀦𑀲𑁂𑀦𑀸𑀢𑀺 𑀏𑀢𑁆𑀣 𑀫𑀦𑁄𑀲𑀤𑁆𑀤𑁂𑀦 𑀫𑀸𑀦𑀲𑀲𑀤𑁆𑀤𑀲𑁆𑀲 𑀭𑀸𑀕𑀅𑀭𑀳𑀢𑁆𑀢𑁂𑀲𑀼𑀧𑀺 𑀧𑀯𑀢𑁆𑀢𑀦𑀢𑁄 𑀢𑀤𑀢𑁆𑀣𑁂 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑀺𑀢𑁆𑀢𑁂 𑀏𑀯 𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀦𑀲𑀗𑁆𑀔𑀸𑀢𑁂𑀦 𑀫𑀸𑀦𑀲𑁂𑀦𑀸’’𑀢𑀺. 𑀇𑀫𑀺𑀦𑀸 𑀫𑀦𑀪𑀽𑀢𑀁 𑀫𑀸𑀦𑀲𑀁 𑀫𑀦𑁄𑀫𑀸𑀦𑀲𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀲𑀫𑀸𑀦𑀲𑀁𑀯𑀸𑀲𑀓𑀲𑁆𑀲𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀲𑀫𑀸𑀦𑀲𑀁𑀯𑀸𑀲𑀓𑀲𑁆𑀲𑀧𑀺 𑀦𑀸𑀦𑀸𑀲𑀻𑀫𑀸𑀬 𑀞𑀺𑀢𑀲𑁆𑀲 𑀲𑀦𑁆𑀢𑀺𑀓𑁂 𑀆𑀯𑀺𑀓𑀫𑁆𑀫𑀁 𑀅𑀥𑀫𑁆𑀫𑀺𑀓𑀁 𑀳𑁄𑀢𑀺, 𑀧𑀕𑁂𑀯 𑀦𑀸𑀦𑀸𑀲𑀁𑀯𑀸𑀲𑀓𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀺. 𑀫𑀸𑀴𑀓𑀲𑀻𑀫𑀸𑀬𑀸𑀢𑀺 𑀔𑀡𑁆𑀟𑀲𑀻𑀫𑀸𑀬 𑀅𑀗𑁆𑀕𑀡𑁂. 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬𑀸𑀢𑀺 𑀫𑀳𑀸𑀲𑀻𑀫𑀸𑀬, 𑀞𑀺𑀢𑀲𑁆𑀲𑀸𑀧𑀺 𑀲𑀦𑁆𑀢𑀺𑀓𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀺𑀲𑀤𑁆𑀤𑁂𑀦 ‘‘𑀔𑀡𑁆𑀟𑀲𑀻𑀫𑀸𑀬 𑀞𑀺𑀢𑀲𑁆𑀲𑀧𑀻’’𑀢𑀺 𑀅𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀺.

𑁪𑁩𑁦. 𑀦 𑀧𑀭𑀺𑀬𑀢𑁆𑀢𑀦𑁆𑀢𑀺 𑀦 𑀲𑀫𑀢𑁆𑀣𑀁. 𑀇𑀫𑀺𑀦𑀸 𑀦𑀸𑀮𑀦𑁆𑀢𑀺 𑀏𑀢𑁆𑀣 𑀅𑀮𑀁𑀲𑀤𑁆𑀤𑁄 𑀧𑀭𑀺𑀬𑀢𑁆𑀢𑀢𑁆𑀣𑁄𑀯, 𑀦𑀸𑀭𑀳𑀪𑀽𑀲𑀦𑀯𑀸𑀭𑀡𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀇𑀥𑀸𑀧𑀻𑀢𑀺 𑀧𑀜𑁆𑀘𑀓𑁂𑀧𑀺. 𑀧𑀺𑀲𑀤𑁆𑀤𑁂𑀦 𑀧𑀼𑀭𑀺𑀫𑀧𑀜𑁆𑀘𑀓𑀁 𑀅𑀧𑁂𑀓𑁆𑀔𑀢𑀺. ‘‘𑀲𑀸𑀲𑀦𑀢𑁄’’𑀢𑀺 𑀇𑀫𑀺𑀦𑀸 𑀘𑀼𑀥𑀸𑀢𑀼𑀬𑀸 𑀅𑀧𑀸𑀤𑀸𑀦𑀁 𑀤𑀲𑁆𑀲𑁂𑀢𑀺. ‘‘𑀓𑀸𑀫𑁄’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑀲𑀤𑁆𑀤𑁄 𑀓𑀸𑀫𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺.

𑁪𑁩𑁨. 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸𑀢𑀺 𑀏𑀢𑁆𑀣 𑀢𑁆𑀢𑀧𑀘𑁆𑀘𑀬𑀲𑁆𑀲 𑀪𑀸𑀯𑀢𑁆𑀣𑁂, 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺𑀬𑀸 𑀘 𑀓𑀸𑀭𑀡𑀢𑁆𑀣𑁂 𑀧𑀯𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀦𑁆𑀤𑀪𑀸𑀯𑁂𑀦 𑀫𑁄𑀫𑀽𑀳𑀪𑀸𑀯𑁂𑀦𑀸’’𑀢𑀺. 𑀧𑀭𑀺𑀪𑀯𑀸𑀢𑀺 𑀏𑀢𑁆𑀣 𑀧𑀭𑀺𑀪𑀯𑀓𑀸𑀫𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀭𑀺𑀪𑀯𑀁 𑀆𑀭𑁄𑀧𑁂𑀢𑀼𑀓𑀸𑀫𑁄 𑀳𑀼𑀢𑁆𑀯𑀸’’𑀢𑀺. 𑀅𑀜𑁆𑀜𑀩𑁆𑀬𑀸𑀓𑀭𑀡𑁂𑀲𑀼𑀧𑀻𑀢𑀺 𑀅𑀭𑀳𑀢𑁆𑀢𑀩𑁆𑀬𑀸𑀓𑀭𑀡𑁂𑀲𑀼𑀧𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀯𑀕𑁆𑀕𑁂. 𑀬𑀦𑁆𑀢𑀺 𑀯𑀘𑀦𑀁.

𑀇𑀢𑀺 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀫𑀼𑀲𑀸𑀯𑀸𑀤𑀯𑀕𑁆𑀕𑀯𑀡𑁆𑀡𑀦𑀸

𑁪𑁪𑁪. 𑀥𑀫𑁆𑀫𑀧𑀥𑀸𑀦𑀁 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 ‘‘𑀧𑀸𑀭𑀸𑀚𑀺𑀓𑀁 𑀕𑀘𑁆𑀙𑀢𑀻𑀢𑀺 𑀧𑀸𑀭𑀸𑀚𑀺𑀓𑀕𑀸𑀫𑀻’’𑀢𑀺 𑀲𑀼𑀤𑁆𑀥𑀓𑀢𑁆𑀢𑀼𑀯𑀲𑁂𑀦 𑀯𑀼𑀢𑁆𑀢𑀁, 𑀧𑀼𑀕𑁆𑀕𑀮𑀧𑀥𑀸𑀦𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 ‘‘𑀧𑀸𑀭𑀸𑀚𑀺𑀓𑀁 𑀕𑀘𑁆𑀙𑀢𑀺 𑀅𑀦𑁂𑀦, 𑀕𑀫𑀸𑀧𑁂𑀢𑀻𑀢𑀺 𑀯𑀸 𑀧𑀸𑀭𑀸𑀚𑀺𑀓𑀕𑀸𑀫𑀻’’𑀢𑀺 𑀓𑀭𑀡𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦𑀧𑀺 𑀯𑀢𑁆𑀢𑀩𑁆𑀩𑀁. 𑀯𑀺𑀢𑁆𑀣𑀸𑀭𑀁 𑀤𑀲𑁆𑀲𑀦𑁆𑀢𑁄 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 ‘‘𑀫𑀼𑀲𑀸𑀯𑀸𑀤𑁄 𑀧𑀸𑀭𑀸𑀚𑀺𑀓𑀕𑀸𑀫𑀻’’𑀢𑀺𑀆𑀤𑀺𑀧𑀸𑀞𑁂, 𑀏𑀯𑀁 𑀯𑀺𑀢𑁆𑀣𑀸𑀭𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀼 ‘‘𑀫𑀼𑀲𑀸𑀯𑀸𑀤𑁄 𑀧𑀸𑀭𑀸𑀚𑀺𑀓𑀕𑀸𑀫𑀻’’𑀢𑀺𑀆𑀤𑀻𑀲𑀼 𑀯𑀸, 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁.

𑀅𑀤𑀲𑁆𑀲𑀦𑁂𑀦𑀸𑀢𑀺 𑀏𑀢𑁆𑀣 𑀓𑀲𑁆𑀲 𑀅𑀤𑀲𑁆𑀲𑀦𑁂𑀦𑀸𑀢𑀺 𑀆𑀳 ‘‘𑀯𑀺𑀦𑀬𑀥𑀭𑀲𑁆𑀲𑀸’’𑀢𑀺. 𑀯𑀺𑀢𑁆𑀣𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑁂𑀲𑀼 𑀳𑀻’’𑀢𑀺𑀆𑀤𑀺. 𑀢𑀦𑁆𑀢𑀺 𑀯𑀺𑀦𑀬𑀥𑀭𑀁. 𑀅𑀲𑁆𑀲𑀯𑀦𑁂𑀦𑀸𑀢𑀺 𑀏𑀢𑁆𑀣 𑀓𑁂𑀲𑀁 𑀯𑀘𑀦𑀁 𑀅𑀲𑁆𑀲𑀯𑀦𑁂𑀦𑀸𑀢𑀺 𑀆𑀳 ‘‘𑀏𑀓𑀯𑀺𑀳𑀸𑀭𑁂𑀧𑀻’’𑀢𑀺𑀆𑀤𑀺. 𑀏𑀓𑀯𑀺𑀳𑀸𑀭𑁂𑀧𑀻𑀢𑀺 𑀯𑀺𑀦𑀬𑀥𑀭𑁂𑀦 𑀏𑀓𑀯𑀺𑀳𑀸𑀭𑁂𑀧𑀺. 𑀧𑀺𑀲𑀤𑁆𑀤𑁂𑀦 𑀦𑀸𑀦𑀸𑀯𑀺𑀳𑀸𑀭𑁂 𑀧𑀦 𑀧𑀕𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀉𑀧𑀝𑁆𑀞𑀸𑀦𑀦𑁆𑀢𑀺 𑀉𑀧𑀝𑁆𑀞𑀸𑀦𑀢𑁆𑀣𑀁, 𑀉𑀧𑀝𑁆𑀞𑀸𑀦𑀝𑁆𑀞𑀸𑀦𑀁 𑀯𑀸. 𑀯𑀼𑀘𑁆𑀘𑀫𑀸𑀦𑀁 𑀅𑀜𑁆𑀜𑁂𑀲𑀁 𑀯𑀘𑀦𑀁 𑀅𑀲𑀼𑀡𑀦𑁆𑀢𑁄 𑀳𑀼𑀢𑁆𑀯𑀸 𑀯𑀸𑀢𑀺 𑀬𑁄𑀚𑀦𑀸. 𑀧𑀲𑀼𑀢𑁆𑀢𑀓𑀢𑀸𑀢𑀺 𑀏𑀢𑁆𑀣 𑀬𑀓𑀸𑀭𑀮𑁄𑀧𑁄𑀢𑀺 𑀆𑀳 ‘‘𑀧𑀲𑀼𑀢𑁆𑀢𑀓𑀢𑀸𑀬𑀸’’𑀢𑀺. 𑀧𑀲𑀼𑀢𑁆𑀢𑀓𑀪𑀸𑀯𑁂𑀦𑀧𑀻𑀢𑀺 𑀧𑀺𑀲𑀤𑁆𑀤𑁄 𑀅𑀜𑁆𑀜𑀫𑁆𑀧𑀺 𑀅𑀤𑀲𑁆𑀲𑀦𑀸𑀤𑀺𑀓𑀸𑀭𑀡𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀢𑀣𑀸𑀲𑀜𑁆𑀜𑀻𑀢𑀺 𑀏𑀢𑁆𑀣 𑀢𑀣𑀸𑀲𑀤𑁆𑀤𑁄 𑀓𑁄𑀯𑀺𑀲𑀬𑁄𑀢𑀺 𑀆𑀳 ‘‘𑀅𑀓𑀧𑁆𑀧𑀺𑀬𑁂…𑀧𑁂… 𑀆𑀧𑀚𑁆𑀚𑀦𑁆𑀢𑁄’’𑀢𑀺. 𑀏𑀓𑀭𑀢𑁆𑀢𑀸𑀢𑀺𑀓𑁆𑀓𑀫𑀸𑀤𑀺𑀯𑀲𑁂𑀦𑀸𑀢𑀺 𑀆𑀤𑀺𑀲𑀤𑁆𑀤𑁂𑀦 𑀙𑀸𑀭𑀢𑁆𑀢𑀸𑀢𑀺𑀓𑁆𑀓𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀫𑀼𑀲𑀸𑀯𑀸𑀤𑀯𑀕𑁆𑀕𑁂.

𑀇𑀢𑀺 𑀫𑀼𑀲𑀸𑀯𑀸𑀤𑀯𑀕𑁆𑀕𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀪𑀺𑀓𑁆𑀔𑀼𑀦𑁄𑀯𑀸𑀤𑀯𑀕𑁆𑀕𑀯𑀡𑁆𑀡𑀦𑀸

𑁪𑁫𑁦. 𑀪𑀺𑀓𑁆𑀔𑀼𑀦𑀺𑀯𑀕𑁆𑀕𑁂 𑀅𑀮𑀸𑀪𑀸𑀬𑀸𑀢𑀺 𑀏𑀢𑁆𑀣 𑀮𑀪𑀥𑀸𑀢𑀼𑀬𑀸 𑀓𑀫𑁆𑀫𑀁, 𑀲𑀫𑁆𑀧𑀤𑀸𑀦𑀯𑀘𑀦𑀲𑁆𑀲 𑀘 𑀢𑀤𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀅𑀮𑀸𑀪𑀢𑁆𑀣𑀸𑀬𑀸’’𑀢𑀺. ‘‘𑀯𑀸𑀬𑀫𑀢𑀻’’𑀢𑀺 𑀇𑀫𑀺𑀦𑀸 𑀧𑀭𑀺𑀲𑀓𑁆𑀓𑀢𑀻𑀢𑀺 𑀏𑀢𑁆𑀣 𑀲𑀓𑁆𑀓𑀥𑀸𑀢𑀼𑀬𑀸 𑀲𑀫𑀢𑁆𑀣𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀸𑀬𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀓𑀮𑀺𑀲𑀸𑀲𑀦𑀦𑁆𑀢𑀺 𑀧𑀸𑀧𑀧𑀭𑀸𑀚𑀬𑀆𑀡𑀁. 𑀦𑀻𑀳𑀭𑀡𑀢𑁆𑀣𑀸𑀬𑀸𑀢𑀺 𑀦𑀺𑀤𑁆𑀥𑀭𑀺𑀢𑁆𑀯𑀸 𑀅𑀧𑀦𑀬𑀦𑀢𑁆𑀣𑀸𑀬.

𑁪𑁫𑁧. ‘‘𑀓𑀫𑁆𑀫’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀢𑁆𑀢𑀦𑁆𑀦𑀁 𑀓𑀫𑁆𑀫𑀸𑀦𑀁 𑀅𑀜𑁆𑀜𑀢𑀭’’𑀦𑁆𑀢𑀺.

𑁪𑁫𑁪. 𑀦 𑀲𑀸𑀓𑀘𑁆𑀙𑀸𑀢𑀩𑁆𑀩𑁄𑀢𑀺 𑀏𑀢𑁆𑀣 𑀓𑁄 𑀦𑀸𑀫 𑀓𑀣𑀸𑀫𑀕𑁆𑀕𑁄 𑀦 𑀲𑀸𑀓𑀘𑁆𑀙𑀸𑀢𑀩𑁆𑀩𑁄, 𑀦𑀦𑀼 𑀯𑀺𑀦𑀬𑁄𑀬𑁂𑀯𑀸𑀢𑀺 𑀆𑀳 ‘‘𑀓𑀧𑁆𑀧𑀺𑀬𑀸…𑀧𑁂… 𑀓𑀣𑀸𑀫𑀕𑁆𑀕𑁄’’𑀢𑀺. ‘‘𑀦 𑀓𑀣𑁂𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀓𑀘𑁆𑀙𑀲𑀤𑁆𑀤𑀲𑁆𑀲 𑀓𑀣𑀥𑀸𑀢𑀼𑀬𑀸 𑀦𑀺𑀧𑁆𑀨𑀦𑁆𑀦𑀪𑀸𑀯𑀁 𑀤𑀻𑀧𑁂𑀢𑀺. 𑀓𑀲𑁆𑀫𑀸 𑀧𑀦 𑀧𑀞𑀫𑀧𑀜𑁆𑀘𑀓𑁂 ‘‘𑀦 𑀅𑀲𑁂𑀓𑁆𑀔𑁂𑀦𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑀼𑀢𑀺𑀬𑀧𑀜𑁆𑀘𑀓𑁂 ‘‘𑀅𑀲𑁂𑀓𑁆𑀔𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀇𑀢𑀭𑁄 𑀧𑀼𑀣𑀼𑀚𑁆𑀚𑀦𑁄 𑀦 𑀓𑀣𑁂𑀢𑀻𑀢𑀺 𑀬𑁄𑀚𑀦𑀸.

𑀦 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄𑀢𑀺 𑀏𑀢𑁆𑀣 𑀅𑀢𑁆𑀣𑁄 𑀦𑀸𑀫 𑀅𑀝𑁆𑀞𑀓𑀣𑀸𑀬𑁂𑀯𑀸𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀅𑀝𑁆𑀞𑀓𑀣𑀸𑀬𑀸’’𑀢𑀺. ‘‘𑀧𑀪𑁂𑀤𑀕𑀢𑀜𑀸𑀡𑀧𑁆𑀧𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀅𑀢𑁆𑀣𑀸𑀤𑀻𑀲𑀼 𑀧𑀢𑀺 𑀯𑀺𑀲𑀼𑀁 𑀲𑀫𑁆𑀪𑀺𑀚𑁆𑀚𑀢𑀻𑀢𑀺 𑀧𑀝𑀺𑀲𑀫𑁆𑀪𑀺𑀤𑀸, 𑀧𑀜𑁆𑀜𑀸, 𑀢𑀁 𑀧𑀢𑁆𑀢𑁄𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄. 𑀅𑀢𑁆𑀣𑁂 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀧𑀸𑀴𑀺𑀥𑀫𑁆𑀫𑁂’’𑀢𑀺 𑀇𑀫𑀺𑀦𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄𑀢𑀺 𑀏𑀢𑁆𑀣 𑀥𑀫𑁆𑀫𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀯𑁄𑀳𑀸𑀭𑀦𑀺𑀭𑀼𑀢𑁆𑀢𑀺𑀬𑀦𑁆𑀢𑀺 𑀧𑀜𑁆𑀜𑀢𑁆𑀢𑀺𑀦𑀺𑀭𑀼𑀢𑁆𑀢𑀺𑀬𑀁. 𑀇𑀫𑀺𑀦𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄𑀢𑀺 𑀏𑀢𑁆𑀣 𑀦𑀺𑀭𑀼𑀢𑁆𑀢𑀺𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄𑀢𑀺 𑀏𑀢𑁆𑀣 𑀧𑀝𑀺𑀪𑀸𑀦𑀁 𑀦𑀸𑀫 𑀳𑁂𑀝𑁆𑀞𑀺𑀫𑀜𑀸𑀡𑀢𑁆𑀢𑀬𑀫𑁂𑀯𑀸𑀢𑀺 𑀆𑀳 ‘‘𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀤𑀻𑀦𑀺 𑀜𑀸𑀡𑀸𑀦𑀻’’𑀢𑀺, 𑀢𑁂𑀲𑀽𑀢𑀺 𑀜𑀸𑀡𑁂𑀲𑀼, 𑀬𑀁 𑀬𑀁 𑀯𑀺𑀫𑀼𑀢𑁆𑀢𑀁 𑀬𑀣𑀸𑀯𑀺𑀫𑀼𑀢𑁆𑀢𑀁, 𑀘𑀺𑀢𑁆𑀢𑀁. 𑀧𑀘𑁆𑀘𑀯𑁂𑀓𑁆𑀔𑀺𑀢𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀑𑀮𑁄𑀓𑀺𑀢𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀪𑀺𑀓𑁆𑀔𑀼𑀦𑀺𑀯𑀕𑁆𑀕𑁂.

𑀇𑀢𑀺 𑀪𑀺𑀓𑁆𑀔𑀼𑀦𑁄𑀯𑀸𑀤𑀯𑀕𑁆𑀕𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀉𑀩𑁆𑀩𑀸𑀳𑀺𑀓𑀯𑀕𑁆𑀕𑀯𑀡𑁆𑀡𑀦𑀸

𑁪𑁫𑁫. 𑀉𑀩𑁆𑀩𑀸𑀳𑀺𑀓𑀯𑀕𑁆𑀕𑁂 𑀅𑀢𑁆𑀣𑀓𑀼𑀲𑀮𑁄𑀢𑀺𑀆𑀤𑀺𑀧𑀤𑀸𑀦𑀁 𑀪𑁂𑀤𑀦𑀺𑀲𑁆𑀲𑀺𑀢𑀲𑀫𑀸𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀝𑁆𑀞𑀓𑀣𑀸𑀓𑀼𑀲𑀮𑁄’’𑀢𑀺𑀆𑀤𑀺. 𑀆𑀘𑀭𑀺𑀬𑀫𑀼𑀔𑀢𑁄𑀢𑀺 𑀆𑀘𑀭𑀺𑀬𑀯𑀤𑀦𑀢𑁄, 𑀆𑀘𑀭𑀺𑀬𑀲𑀫𑁆𑀫𑀼𑀔𑁂 𑀯𑀸, 𑀲𑀺𑀣𑀺𑀮𑀥𑀦𑀺𑀢𑀸𑀤𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀤𑀻𑀖𑀭𑀲𑁆𑀲𑀸𑀤𑀻𑀦𑀺 (𑀧𑀭𑀺. 𑀅𑀝𑁆𑀞. 𑁪𑁮𑁫; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁨𑁫𑁨) 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀓𑁆𑀔𑀭𑀧𑀭𑀺𑀘𑁆𑀙𑁂𑀤𑁂𑀢𑀺 𑀏𑀢𑁆𑀢𑀓𑁄 𑀲𑀺𑀣𑀺𑀮𑁄, 𑀏𑀢𑁆𑀢𑀓𑁄 𑀥𑀦𑀺𑀢𑁄𑀢𑀺𑀆𑀤𑀺𑀦𑀸 𑀅𑀓𑁆𑀔𑀭𑀧𑀭𑀺𑀘𑁆𑀙𑁂𑀤𑁂. 𑀇𑀫𑀺𑀦𑀸 𑀩𑁆𑀬𑀜𑁆𑀚𑀦𑀓𑀼𑀲𑀮𑁄𑀢𑀺 𑀏𑀢𑁆𑀣 𑀩𑁆𑀬𑀜𑁆𑀚𑀦𑀲𑀤𑁆𑀤𑁄 𑀅𑀓𑁆𑀔𑀭𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀦 𑀧𑀼𑀩𑁆𑀩𑀸𑀧𑀭𑀓𑀼𑀲𑀮𑁄𑀢𑀺 𑀏𑀢𑁆𑀣 𑀧𑀼𑀩𑁆𑀩𑀸𑀧𑀭𑁄 𑀦𑀸𑀫 𑀧𑀼𑀭𑀺𑀫𑀸𑀦𑀁 𑀘𑀢𑀼𑀦𑁆𑀦𑀜𑁆𑀘𑁂𑀯 𑀓𑀣𑀸𑀬 𑀘 𑀧𑀼𑀩𑁆𑀩𑀸𑀧𑀭𑁄𑀢𑀺 𑀆𑀳 ‘‘𑀅𑀢𑁆𑀣𑀧𑀼𑀩𑁆𑀩𑀸𑀧𑀭𑁂’’𑀢𑀺𑀆𑀤𑀺.

𑀓𑁄𑀥𑀦𑁄𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀫𑀸 𑀦 𑀲𑀓𑁆𑀓𑁄𑀢𑀻𑀢𑀺 𑀬𑁄𑀚𑀦𑀸. 𑀧𑀲𑀸𑀭𑁂𑀢𑀸𑀢𑀺 𑀏𑀢𑁆𑀣 𑀲𑀭𑀥𑀸𑀢𑀼 𑀉𑀧𑀲𑀕𑁆𑀕𑀯𑀲𑁂𑀦 𑀯𑁂𑀘𑀺𑀢𑁆𑀢𑀯𑀸𑀘𑀓𑁄𑀢𑀺 𑀆𑀳 ‘‘𑀫𑁄𑀳𑁂𑀢𑀸’’𑀢𑀺.

𑀇𑀢𑀺 𑀉𑀩𑁆𑀩𑀸𑀳𑀺𑀓𑀯𑀕𑁆𑀕𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀅𑀥𑀺𑀓𑀭𑀡𑀯𑀽𑀧𑀲𑀫𑀯𑀕𑁆𑀕𑀯𑀡𑁆𑀡𑀦𑀸

𑁪𑁫𑁭. 𑀅𑀥𑀺𑀓𑀭𑀡𑀯𑀽𑀧𑀲𑀫𑀯𑀕𑁆𑀕𑁂 𑀲𑀗𑁆𑀖𑀕𑀭𑀼 𑀦𑀸𑀫 𑀓𑁄𑀢𑀺 𑀆𑀳 ‘‘𑀥𑀫𑁆𑀫𑀜𑁆𑀘…𑀧𑁂… 𑀲𑀗𑁆𑀖𑀕𑀭𑀼 𑀦𑀸𑀫 𑀳𑁄𑀢𑀻’’𑀢𑀺. 𑀢𑀸𑀦𑀻𑀢𑀺 𑀘𑀻𑀯𑀭𑀸𑀤𑀻𑀦𑀺.

𑁪𑁫𑁮. 𑀧𑀜𑁆𑀘𑀳𑀼𑀧𑀸𑀮𑀺 𑀆𑀓𑀸𑀭𑁂𑀳𑀻𑀢𑀺 𑀏𑀢𑁆𑀣 𑀆𑀓𑀸𑀭𑀲𑀤𑁆𑀤𑁄 𑀓𑀸𑀭𑀡𑀢𑁆𑀣𑁄𑀢𑀺 𑀆𑀳 ‘‘𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀻’’𑀢𑀺. 𑀓𑀫𑁆𑀫𑁂𑀦𑀸𑀢𑀺𑀆𑀤𑀻𑀲𑀼 𑀓𑀫𑁆𑀫𑀸𑀤𑀻𑀦𑀁 𑀲𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀮𑁄𑀓𑀦𑀸𑀤𑀻𑀲𑀽’’𑀢𑀺𑀆𑀤𑀺. 𑀉𑀧𑀧𑀢𑁆𑀢𑀻𑀳𑀻𑀢𑀺 𑀬𑀼𑀢𑁆𑀢𑀻𑀳𑀺. 𑀫𑀬𑁆𑀳𑀁 𑀉𑀘𑁆𑀘𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑀪𑀸𑀯𑀜𑁆𑀘 𑀩𑀳𑀼𑀲𑁆𑀲𑀼𑀢𑀪𑀸𑀯𑀜𑁆𑀘 𑀢𑀼𑀫𑁆𑀳𑁂 𑀚𑀸𑀦𑀸𑀣𑀸𑀢𑀺 𑀬𑁄𑀚𑀦𑀸. 𑀫𑀸𑀤𑀺𑀲𑁄 𑀦𑀸𑀫…𑀧𑁂… 𑀢𑀼𑀫𑁆𑀳𑀸𑀓𑀁 𑀬𑀼𑀢𑁆𑀢𑀁 𑀦𑀦𑀽𑀢𑀺 𑀬𑁄𑀚𑀦𑀸. 𑀓𑀡𑁆𑀡𑀫𑀽𑀮𑁂𑀢𑀺 𑀓𑀡𑁆𑀡𑀲𑀫𑀻𑀧𑁂. 𑀅𑀦𑀼𑀲𑁆𑀲𑀸𑀯𑀦𑁂𑀦𑀸𑀢𑀺 𑀅𑀦𑀼𑀲𑀫𑀻𑀧𑁂 𑀲𑀸𑀯𑀸𑀧𑀦𑁂𑀦. 𑀢𑁂𑀲𑀦𑁆𑀢𑀺 𑀪𑀺𑀓𑁆𑀔𑀽𑀦𑀁. 𑀅𑀦𑀺𑀯𑀢𑁆𑀢𑀺𑀥𑀫𑁆𑀫𑁂𑀢𑀺 𑀅𑀦𑀺𑀯𑀢𑁆𑀢𑀦𑀲𑀪𑀸𑀯𑁂. 𑀲𑀮𑀸𑀓𑀕𑁆𑀕𑀸𑀳𑁂𑀦𑀸𑀢𑀺 𑀅𑀢𑁆𑀢𑀦𑁄 𑀲𑀮𑀸𑀓𑀸𑀬 𑀕𑀸𑀳𑀸𑀧𑀦𑁂𑀦.

𑀏𑀢𑁆𑀣𑀸𑀢𑀺 𑀓𑀫𑁆𑀫𑀸𑀤𑀻𑀲𑀼. 𑀧𑀫𑀸𑀡𑀦𑁆𑀢𑀺 𑀲𑀗𑁆𑀖𑀪𑁂𑀤𑀲𑁆𑀲 𑀓𑀸𑀭𑀡𑀁. 𑀧𑀼𑀩𑁆𑀩𑀪𑀸𑀕𑀸𑀢𑀺 𑀲𑀗𑁆𑀖𑀪𑁂𑀤𑀢𑁄 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑀸. 𑀧𑀼𑀩𑁆𑀩𑀪𑀸𑀕𑀪𑀸𑀯𑀁 𑀆𑀯𑀺𑀓𑀭𑁄𑀦𑁆𑀢𑁄 𑀆𑀳 ‘‘𑀅𑀝𑁆𑀞𑀸𑀭𑀲𑀯𑀢𑁆𑀣𑀼𑀤𑀻𑀧𑀦𑀯𑀲𑁂𑀦 𑀳𑀻’’𑀢𑀺𑀆𑀤𑀺. 𑀯𑁄𑀳𑀭𑀦𑁆𑀢𑁂𑀧𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀯𑁄𑀳𑀸𑀭𑁂. 𑀓𑀤𑀸 𑀧𑀦 𑀲𑀗𑁆𑀖𑁄 𑀪𑀺𑀦𑁆𑀦𑁄𑀢𑀺 𑀆𑀳 ‘‘𑀬𑀤𑀸 𑀧𑀦𑀸’’𑀢𑀺𑀆𑀤𑀺. 𑀬𑀤𑀸 𑀧𑀦 𑀓𑀭𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀫𑁆𑀫𑀦𑁆𑀢𑀺 𑀉𑀧𑁄𑀲𑀣𑀓𑀫𑁆𑀫𑀢𑁄 𑀅𑀜𑁆𑀜𑀁 𑀓𑀫𑁆𑀫𑀁 𑀕𑀳𑁂𑀢𑀩𑁆𑀩𑀁. 𑀉𑀤𑁆𑀤𑁂𑀲𑀦𑁆𑀢𑀺 𑀉𑀧𑁄𑀲𑀣𑀓𑀫𑁆𑀫𑀁. 𑀇𑀢𑀻𑀢𑀺 𑀏𑀯𑀁. 𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬𑀁 ‘‘𑀏𑀯𑀁…𑀧𑁂… 𑀧𑀓𑀸𑀲𑀬𑀺𑀲𑁆𑀲𑀸𑀫𑀸’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁫𑁧) 𑀬𑀁 𑀯𑀘𑀦𑀁 𑀅𑀯𑁄𑀘𑀼𑀫𑁆𑀳𑀸𑀢𑀺 𑀬𑁄𑀚𑀦𑀸. 𑀢𑀲𑁆𑀲 𑀯𑀘𑀦𑀲𑁆𑀲𑀸𑀢𑀺 𑀧𑀸𑀞𑀁 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 ‘‘𑀲𑁆𑀯𑀸𑀬𑀁 𑀅𑀢𑁆𑀣𑁄’’𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄.

𑀧𑀜𑁆𑀜𑀢𑁆𑀢𑁂𑀢𑀦𑁆𑀢𑀺 𑀏𑀢𑁆𑀣 𑀦𑀺𑀕𑁆𑀕𑀳𑀺𑀢𑀮𑁄𑀧𑀲𑀦𑁆𑀥𑀻𑀢𑀺 𑀆𑀳 ‘‘𑀧𑀜𑁆𑀜𑀢𑁆𑀢𑀁 𑀏𑀢’’𑀦𑁆𑀢𑀺. 𑀓𑁆𑀯𑀸𑀢𑀺 𑀓𑀺𑀲𑁆𑀫𑀺𑀁 𑀔𑀦𑁆𑀥𑀓𑁂. 𑀢𑀢𑁆𑀭𑀸𑀢𑀺 𑀯𑀢𑁆𑀢𑀓𑁆𑀔𑀦𑁆𑀥𑀓𑁂. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁂𑀦 𑀆𑀕𑀦𑁆𑀢𑀼𑀓𑀯𑀢𑁆𑀢𑀸𑀤𑀺𑀅𑀓𑀭𑀡𑀫𑀢𑁆𑀢𑁂𑀦. 𑀅𑀦𑀼𑀧𑀼𑀩𑁆𑀩𑁂𑀦𑀸𑀢𑀺 𑀅𑀦𑀼𑀓𑁆𑀓𑀫𑁂𑀦. 𑀬𑀣𑀸𑀭𑀢𑁆𑀢𑀦𑁆𑀢𑀺 𑀏𑀢𑁆𑀣 𑀬𑀣𑀸𑀲𑀤𑁆𑀤𑁄 𑀅𑀦𑀼𑀭𑀽𑀧𑀢𑁆𑀣𑀯𑀸𑀘𑀓𑁄, 𑀭𑀢𑁆𑀢𑀺𑀲𑀤𑁆𑀤𑁂𑀦 𑀭𑀢𑁆𑀢𑀺𑀧𑁆𑀧𑀫𑀸𑀡𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀭𑀢𑁆𑀢𑀺𑀧𑀭𑀺𑀫𑀸𑀡𑀸𑀦𑀼𑀭𑀽𑀧’’𑀦𑁆𑀢𑀺. 𑀇𑀫𑀺𑀦𑀸 𑀭𑀢𑁆𑀢𑀺𑀬𑀸 𑀅𑀦𑀼𑀭𑀽𑀧𑀁 𑀬𑀣𑀸𑀭𑀢𑁆𑀢𑀦𑁆𑀢𑀺 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑀺. ‘‘𑀭𑀢𑁆𑀢𑀺𑀧𑀭𑀺𑀫𑀸𑀡𑀸𑀦𑀼𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑁂 𑀭𑀢𑁆𑀢𑀺𑀧𑀭𑀺𑀫𑀸𑀡𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀅𑀢𑁆𑀣𑀢𑁄 𑀣𑁂𑀭𑁄𑀢𑀺 𑀆𑀳 ‘‘𑀬𑀣𑀸𑀣𑁂𑀭𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀯𑀯𑀢𑁆𑀣𑀸𑀦𑀦𑁆𑀢𑀺 𑀧𑀭𑀺𑀘𑁆𑀙𑁂𑀤𑁄. 𑀲𑁄 𑀳𑀺 𑀯𑀺𑀲𑀼𑀁 𑀅𑀯𑀳𑀺𑀢𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀯𑀯𑀢𑁆𑀣𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀫𑁆𑀫𑀸𑀓𑀫𑁆𑀫𑀸𑀦𑀻𑀢𑀺 𑀏𑀢𑁆𑀣 𑀓𑀫𑁆𑀫𑀁 𑀅𑀓𑀫𑁆𑀫𑀸𑀦𑀻𑀢𑀺 𑀧𑀤𑀯𑀺𑀪𑀸𑀕𑀁 𑀓𑀢𑁆𑀯𑀸 𑀅𑀓𑀸𑀭𑁄 𑀯𑀼𑀤𑁆𑀥𑀢𑁆𑀣𑁄𑀢𑀺 𑀆𑀳 ‘‘𑀔𑀼𑀤𑁆𑀤𑀓𑀸𑀦𑀺 𑀘𑁂𑀯 𑀫𑀳𑀦𑁆𑀢𑀸𑀦𑀺 𑀘 𑀓𑀫𑁆𑀫𑀸𑀦𑀻’’𑀢𑀺. 𑀲𑀢𑀺 𑀘 𑀅𑀓𑀫𑁆𑀫𑀲𑁆𑀲 𑀫𑀳𑀦𑁆𑀢𑀪𑀸𑀯𑁂 𑀓𑀫𑁆𑀫𑀁 𑀦𑀸𑀫 𑀔𑀼𑀤𑁆𑀤𑀓𑀦𑁆𑀢𑀺 𑀅𑀢𑁆𑀣𑀢𑁄 𑀲𑀺𑀤𑁆𑀥𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀔𑀼𑀤𑁆𑀤𑀓𑀸𑀦𑀺 𑀘𑁂𑀯𑀸’’𑀢𑀺. 𑀅𑀓𑀸𑀭𑀲𑁆𑀲 𑀅𑀧𑁆𑀧𑀢𑁆𑀣𑀁 𑀕𑀳𑁂𑀢𑁆𑀯𑀸 ‘‘𑀫𑀳𑀦𑁆𑀢𑀸𑀦𑀺 𑀘𑁂𑀯 𑀔𑀼𑀤𑁆𑀤𑀓𑀸𑀦𑀺 𑀘 𑀓𑀫𑁆𑀫𑀸𑀦𑀻’’𑀢𑀺 𑀅𑀢𑁆𑀣𑁄𑀧𑀺 𑀬𑀼𑀚𑁆𑀚𑀢𑁂𑀯. 𑀲𑁄 𑀧𑀦 𑀇𑀥 𑀦 𑀕𑀳𑀺𑀢𑁄, 𑀅𑀜𑁆𑀜𑀢𑁆𑀣 𑀧𑀦 𑀤𑀺𑀲𑁆𑀲𑀢𑀺. ‘‘𑀉𑀘𑁆𑀘𑀸𑀯𑀘𑀸𑀦𑀺 𑀓𑀫𑁆𑀫𑀸𑀦𑀻’’𑀢𑀺 𑀳𑀺 𑀯𑀸𑀓𑁆𑀬𑀯𑀲𑁂𑀦 𑀯𑀼𑀢𑁆𑀢𑀝𑁆𑀞𑀸𑀦𑁂 𑀉𑀘𑁆𑀘𑀲𑀤𑁆𑀤𑁂𑀦 𑀫𑀳𑀦𑁆𑀢𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀅𑀯𑀘𑀲𑀤𑁆𑀤𑁂𑀦 𑀔𑀼𑀤𑁆𑀤𑀓𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸 𑀫𑀳𑀦𑁆𑀢𑀔𑀼𑀤𑁆𑀤𑀓𑀸𑀦𑀺 𑀓𑀫𑁆𑀫𑀸𑀦𑀻𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀢𑀺 𑀘 𑀅𑀓𑀫𑁆𑀫𑀲𑁆𑀲 𑀔𑀼𑀤𑁆𑀤𑀓𑀪𑀸𑀯𑁂 𑀓𑀫𑁆𑀫𑀁 𑀦𑀸𑀫 𑀫𑀳𑀦𑁆𑀢𑀦𑁆𑀢𑀺 𑀅𑀢𑁆𑀣𑀢𑁄𑀧𑀺 𑀲𑀺𑀤𑁆𑀥𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀗𑁆𑀖𑀪𑁂𑀤𑀯𑀕𑁆𑀕𑀤𑁆𑀯𑀬𑀯𑀡𑁆𑀡𑀦𑀸

𑁪𑁫𑁯. 𑀲𑀗𑁆𑀖𑀪𑁂𑀤𑀯𑀕𑁆𑀕𑀤𑁆𑀯𑀬𑁂 𑀏𑀢𑁂𑀢𑀺 𑀲𑀪𑀸𑀯𑀸. 𑀢𑁂𑀢𑀺 𑀅𑀥𑀫𑁆𑀫𑀸𑀤𑀬𑁄. 𑀇𑀢𑀻𑀢𑀺 𑀏𑀯𑀁. 𑀬𑀁 𑀓𑀫𑁆𑀫𑀦𑁆𑀢𑀺 𑀬𑁄𑀚𑀦𑀸. 𑀤𑀺𑀝𑁆𑀞𑀺𑀁 𑀯𑀺𑀦𑀺𑀥𑀸𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀲𑁆𑀫𑀺𑀁 𑀧𑀜𑁆𑀘𑀓𑁂 𑀅𑀬𑀁 𑀅𑀢𑁆𑀣𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀧𑀻𑀢𑀺 𑀇𑀫𑀲𑁆𑀫𑀺𑀁 𑀧𑀜𑁆𑀘𑀓𑁂𑀧𑀺. 𑀧𑀺𑀲𑀤𑁆𑀤𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀧𑀜𑁆𑀘𑀓𑀁 𑀅𑀧𑁂𑀓𑁆𑀔𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀧𑀜𑁆𑀘𑀓𑁂𑀲𑀼. 𑀳𑀻𑀢𑀺 𑀲𑀘𑁆𑀘𑀁. 𑀧𑀼𑀩𑁆𑀩𑁂 𑀅𑀯𑀼𑀢𑁆𑀢𑀦𑀬𑀁 𑀬𑀁 𑀯𑀘𑀦𑀫𑀢𑁆𑀣𑀺, 𑀢𑀁 𑀯𑀘𑀦𑀁 𑀏𑀢𑁆𑀣 𑀧𑀜𑁆𑀘𑀓𑁂𑀲𑀼 𑀦 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸.

𑀆𑀯𑀸𑀲𑀺𑀓𑀯𑀕𑁆𑀕𑀯𑀡𑁆𑀡𑀦𑀸

𑁪𑁬𑁧. 𑀆𑀯𑀸𑀲𑀺𑀓𑀯𑀕𑁆𑀕𑁂 ‘‘𑀳𑀭𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀬𑀣𑀸𑀪𑀢𑀦𑁆𑀢𑀺 𑀏𑀢𑁆𑀣 𑀪𑀭𑀥𑀸𑀢𑀼𑀬𑀸 𑀳𑀭𑀡𑀢𑁆𑀣𑀜𑁆𑀘 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀺. ‘‘𑀞𑀧𑀺𑀢𑁄’’𑀢𑀺 𑀇𑀫𑀺𑀦𑀸 𑀦𑀺𑀓𑁆𑀔𑀺𑀢𑁆𑀢𑁄𑀢𑀺 𑀏𑀢𑁆𑀣 𑀔𑀺𑀧𑀥𑀸𑀢𑀼𑀬𑀸 𑀞𑀧𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁪𑁬𑁨. 𑀧𑀭𑀺𑀡𑀸𑀫𑁂𑀢𑀻𑀢𑀺 𑀧𑀭𑀺𑀡𑀢𑀁𑀧𑀸𑀧𑁂𑀢𑀺. ‘‘𑀦𑀺𑀬𑀸𑀫𑁂𑀢𑀺 𑀓𑀣𑁂𑀢𑀻’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀏𑀢𑁆𑀣𑀸𑀢𑀺 𑀆𑀯𑀸𑀲𑀺𑀓𑀯𑀕𑁆𑀕𑁂.

𑀓𑀣𑀺𑀦𑀢𑁆𑀣𑀸𑀭𑀯𑀕𑁆𑀕𑀯𑀡𑁆𑀡𑀦𑀸

𑁪𑁬𑁭. 𑀓𑀣𑀺𑀦𑀢𑁆𑀣𑀸𑀭𑀯𑀕𑁆𑀕𑁂 𑀑𑀢𑀫𑀲𑀺𑀓𑁄𑀢𑀺 𑀏𑀢𑁆𑀣 𑀅𑀯𑀢𑀫𑀁 𑀕𑀢𑁄 𑀑𑀢𑀫𑀲𑀺𑀓𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑁆𑀥𑀓𑀸𑀭𑀕𑀢𑁄’’𑀢𑀺. 𑀅𑀦𑁆𑀥𑀓𑀸𑀭𑀲𑀤𑁆𑀤𑁂𑀦 𑀢𑀫𑀲𑀤𑁆𑀤𑁄 𑀅𑀦𑁆𑀥𑀓𑀸𑀭𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀦𑁆𑀢𑀺 𑀑𑀢𑀫𑀲𑀺𑀓𑀁. 𑀅𑀲𑀫𑀦𑁆𑀦𑀸𑀳𑀭𑀦𑁆𑀢𑁄𑀢𑀺 𑀢𑀁 𑀅𑀲𑀫𑀦𑁆𑀦𑀸𑀳𑀭𑀦𑁆𑀢𑁄, 𑀓𑀲𑁆𑀫𑀸 𑀅𑀲𑀫𑀦𑁆𑀦𑀸𑀳𑀭𑀦𑁆𑀢𑁄𑀢𑀺 𑀆𑀳 ‘‘𑀓𑀺𑀘𑁆𑀘𑀬𑀧𑀲𑀼𑀢𑀢𑁆𑀢𑀸 𑀯𑀦𑁆𑀤𑀦’’𑀦𑁆𑀢𑀺. 𑀏𑀓𑀢𑁄𑀢𑀺 𑀓𑁄𑀧𑁂𑀦 𑀲𑀤𑁆𑀥𑀺𑀁. 𑀯𑁂𑀭𑀻 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑁄 𑀏𑀓𑀢𑁄 𑀆𑀓𑁄𑀥𑁂𑀦 𑀯𑀢𑁆𑀢𑀦𑀝𑁆𑀞𑁂𑀦 𑀏𑀓𑀸𑀯𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀳𑀭𑁂𑀬𑁆𑀬𑀸𑀢𑀺 𑀯𑀦𑁆𑀤𑀦𑁆𑀢𑀁 𑀧𑀳𑀭𑁂𑀬𑁆𑀬. ‘‘𑀅𑀜𑁆𑀜𑀁 𑀘𑀺𑀦𑁆𑀢𑀬𑀫𑀸𑀦𑁄’’𑀢𑀺 𑀇𑀫𑀺𑀦𑀸 𑀅𑀜𑁆𑀜𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀯𑀺𑀤𑀳𑀢𑀺 𑀞𑀧𑁂𑀢𑀻𑀢𑀺 𑀅𑀜𑁆𑀜𑀯𑀺𑀳𑀺𑀢𑁄𑀢𑀺 𑀤𑀲𑁆𑀲𑁂𑀢𑀺.

𑀲𑀗𑁆𑀖𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀔𑀺𑀧𑀺𑀢𑀩𑁆𑀩𑁄 𑀅𑀧𑀦𑁂𑀢𑀩𑁆𑀩𑁄𑀢𑀺 𑀉𑀓𑁆𑀔𑀺𑀢𑁆𑀢𑁄, 𑀲𑁄𑀬𑁂𑀯 𑀉𑀓𑁆𑀔𑀺𑀢𑁆𑀢𑀓𑁄. 𑀢𑁂𑀳𑀻𑀢𑀺 𑀘𑀢𑀽𑀳𑀺. 𑀅𑀯𑀦𑁆𑀤𑀺𑀬𑁂𑀲𑀼 𑀧𑀦𑁆𑀦𑀭𑀲𑀧𑀼𑀕𑁆𑀕𑀮𑁂𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑁆𑀢𑀭𑀸 𑀯𑀼𑀢𑁆𑀢𑀓𑀸𑀭𑀡𑁂𑀦 𑀘𑀸𑀢𑀺 𑀅𑀦𑁆𑀢𑀭𑁂 𑀯𑀼𑀢𑁆𑀢𑁂𑀦 ‘‘𑀢𑀜𑁆𑀳𑀺 𑀯𑀦𑁆𑀤𑀦𑁆𑀢𑀲𑁆𑀲 𑀫𑀜𑁆𑀘𑀧𑀸𑀤𑀸𑀤𑀻𑀲𑀼𑀧𑀺 𑀦𑀮𑀸𑀝𑀁 𑀧𑀝𑀺𑀳𑀜𑁆𑀜𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 𑀓𑀸𑀭𑀡𑁂𑀦 𑀘. 𑀇𑀢𑁄𑀢𑀺 𑀧𑀦𑁆𑀦𑀭𑀲𑀧𑀼𑀕𑁆𑀕𑀮𑀫𑁆𑀳𑀸. 𑀇𑀢𑀻𑀢𑀺 𑀏𑀯𑀁. 𑀲𑀘𑁂 𑀉𑀤𑁆𑀤𑁂𑀲𑀸𑀘𑀭𑀺𑀬𑁄 𑀘 𑀑𑀯𑀸𑀤𑀸𑀘𑀭𑀺𑀬𑁄 𑀘 𑀦𑀯𑀓𑁄 𑀳𑁄𑀢𑀺, 𑀦 𑀯𑀦𑁆𑀤𑀦𑀻𑀬𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀓𑀣𑀺𑀦𑀢𑁆𑀣𑀸𑀭𑀯𑀕𑁆𑀕𑁂.

𑀇𑀢𑀺 𑀓𑀣𑀺𑀦𑀢𑁆𑀣𑀸𑀭𑀯𑀕𑁆𑀕𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀉𑀧𑀸𑀮𑀺𑀧𑀜𑁆𑀘𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸.

𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸

𑁪𑁭𑁦. ‘‘𑀅𑀘𑀺𑀢𑁆𑀢𑀓𑁄 𑀆𑀧𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀅𑀘𑀺𑀢𑁆𑀢𑀓𑁄 𑀆𑀧𑀚𑁆𑀚𑀢𑀻𑀢𑀺 𑀅𑀘𑀺𑀢𑁆𑀢𑀓𑁄 𑀳𑀼𑀢𑁆𑀯𑀸 𑀆𑀧𑀚𑁆𑀚𑀢𑀺. 𑀏𑀲𑁂𑀯 𑀦𑀬𑁄 𑀅𑀘𑀺𑀢𑁆𑀢𑀓𑁄 𑀯𑀼𑀝𑁆𑀞𑀸𑀢𑀻𑀢𑀺 𑀏𑀢𑁆𑀣𑀸𑀧𑀺. 𑀬𑀁𑀓𑀺𑀜𑁆𑀘𑀺 𑀆𑀧𑀢𑁆𑀢𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑀭𑀁 𑀆𑀧𑀢𑁆𑀢𑀺𑀦𑁆𑀢𑀺 𑀬𑁄𑀚𑀦𑀸. 𑀥𑀫𑁆𑀫𑀤𑀸𑀦𑀁 𑀓𑀭𑁄𑀫𑀻𑀢𑀺 ‘‘𑀲𑀩𑁆𑀩𑀤𑀸𑀦𑀁 𑀥𑀫𑁆𑀫𑀤𑀸𑀦𑀁 𑀚𑀺𑀦𑀸𑀢𑀻’’𑀢𑀺 (𑀥. 𑀧. 𑁩𑁫𑁪) 𑀘 ‘‘𑀅𑀫𑀢𑀁𑀤𑀤𑁄 𑀘 𑀲𑁄 𑀳𑁄𑀢𑀺, 𑀬𑁄 𑀥𑀫𑁆𑀫𑀫𑀦𑀼𑀲𑀸𑀲𑀢𑀻’’𑀢𑀺 (𑀲𑀁. 𑀦𑀺. 𑁧.𑁪𑁨) 𑀘 𑀪𑀕𑀯𑀢𑀸 𑀯𑀼𑀢𑁆𑀢𑀯𑀘𑀦𑀁 𑀲𑀼𑀢𑁆𑀯𑀸 𑀥𑀫𑁆𑀫𑀤𑀸𑀦𑀁 𑀓𑀭𑁄𑀫𑀺. 𑀤𑁄𑀫𑀦𑀲𑁆𑀲𑀺𑀓𑁄𑀢𑀺 𑀤𑁄𑀫𑀦𑀲𑁆𑀲𑁂𑀦 𑀬𑀼𑀢𑁆𑀢𑁄, 𑀤𑁄𑀫𑀦𑀲𑁆𑀲𑀯𑀦𑁆𑀢𑁄 𑀯𑀸. 𑀏𑀢𑁆𑀣𑀸𑀢𑀺 𑀅𑀩𑁆𑀬𑀸𑀓𑀢𑀫𑀽𑀮𑁂.

𑁪𑁭𑁩. 𑀬𑀲𑁆𑀲 𑀬𑀲𑁆𑀲𑀸𑀢𑀺 𑀲𑀺𑀓𑁆𑀔𑀸𑀧𑀤𑀲𑁆𑀲. 𑀢𑀁 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑀁 𑀢𑀁𑀢𑀁𑀲𑀫𑀼𑀝𑁆𑀞𑀸𑀦𑀲𑀺𑀓𑁆𑀔𑀸𑀧𑀤𑀁.