𑀓𑀣𑀺𑀦𑀪𑁂𑀤𑀁

𑀓𑀣𑀺𑀦𑀅𑀢𑁆𑀣𑀢𑀸𑀤𑀺𑀯𑀡𑁆𑀡𑀦𑀸

𑁪𑁦𑁩. 𑀓𑀣𑀺𑀦𑁂 𑀔𑀦𑁆𑀥𑀓𑁂𑀢𑀺 𑀓𑀣𑀺𑀦𑀓𑁆𑀔𑀦𑁆𑀥𑀓𑁂. 𑀧𑀼𑀩𑁆𑀩𑁂𑀢𑀺 𑀓𑀣𑀺𑀦𑀓𑁆𑀔𑀦𑁆𑀥𑀓𑁂.

𑁪𑁦𑁪. 𑀧𑀬𑁄𑀕𑀲𑁆𑀲𑀸𑀢𑀺 𑀏𑀢𑁆𑀣 𑀧𑀬𑁄𑀕𑁄 𑀦𑀸𑀫 𑀓𑁄𑀢𑀺 𑀆𑀳 ‘‘𑀘𑀻𑀯𑀭𑀥𑁄𑀯𑀦𑀸𑀤𑀺𑀦𑁄’’𑀢𑀺𑀆𑀤𑀺. 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀯𑀺𑀘𑀸𑀭𑀡𑀙𑁂𑀤𑀦𑀩𑀤𑁆𑀥𑀦𑀲𑀺𑀩𑁆𑀩𑀦𑀭𑀚𑀦𑀓𑀧𑁆𑀧𑀩𑀺𑀦𑁆𑀤𑀼𑀆𑀤𑀺𑀬𑀦𑀸𑀦𑀺 𑀙 𑀧𑀼𑀩𑁆𑀩𑀓𑀭𑀡𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀉𑀤𑀓𑀸𑀳𑀭𑀡𑀸𑀤𑀺𑀓𑁄 𑀬𑁄 𑀧𑀬𑁄𑀕𑁄 𑀓𑀭𑀻𑀬𑀢𑀻𑀢𑀺 𑀬𑁄𑀚𑀦𑀸. 𑀅𑀦𑀦𑁆𑀢𑀭𑁄 𑀦𑀸𑀫 𑀅𑀢𑀻𑀢𑀸𑀦𑀦𑁆𑀢𑀭𑀅𑀦𑀸𑀕𑀢𑀸𑀦𑀦𑁆𑀢𑀭𑀯𑀲𑁂𑀦 𑀤𑀼𑀯𑀺𑀥𑁄, 𑀇𑀥 𑀅𑀦𑀸𑀕𑀢𑀸𑀦𑀦𑁆𑀢𑀭𑁄𑀬𑁂𑀯 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀅𑀦𑀸𑀕𑀢𑀯𑀲𑁂𑀦𑀸’’𑀢𑀺. 𑀉𑀤𑀓𑀸𑀳𑀭𑀡𑀸𑀤𑀺𑀧𑀬𑁄𑀕𑁂 𑀳𑀺 𑀉𑀧𑁆𑀧𑀦𑁆𑀦𑁂 𑀧𑀘𑁆𑀙𑀸 𑀥𑁄𑀯𑀦𑀸𑀤𑀺𑀧𑀼𑀩𑁆𑀩𑀓𑀭𑀡𑀲𑁆𑀲 𑀉𑀧𑁆𑀧𑀢𑁆𑀢𑀺𑀢𑁄 𑀢𑀧𑁆𑀧𑀬𑁄𑀕𑀲𑁆𑀲 𑀅𑀦𑀸𑀕𑀢𑀯𑀲𑁂𑀦𑁂𑀯 𑀧𑀘𑁆𑀘𑀬𑁄. 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁂𑀦𑀸𑀢𑀺 𑀏𑀢𑁆𑀣 𑀲𑀁𑀲𑀤𑁆𑀤𑁄 𑀲𑀼𑀝𑁆𑀞𑀼𑀅𑀢𑁆𑀣𑁄𑀢𑀺 𑀆𑀳 ‘‘𑀲𑀼𑀝𑁆𑀞𑀼 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦𑀸’’𑀢𑀺. ‘‘𑀆𑀲𑀦𑁆𑀦𑀢𑀭’’𑀦𑁆𑀢𑀺 𑀇𑀫𑀺𑀦𑀸 𑀲𑀼𑀝𑁆𑀞𑀼𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀧𑀬𑁄𑀕𑀲𑁆𑀲𑀸’’𑀢𑀺 𑀧𑀤𑀁 ‘‘𑀆𑀥𑀸𑀭𑀪𑀸𑀯’’𑀦𑁆𑀢𑀺 𑀧𑀤𑁂 𑀲𑀸𑀫𑀻, ‘‘𑀧𑀘𑁆𑀘𑀬𑀸 𑀳𑁄𑀦𑁆𑀢𑀻’’𑀢𑀺 𑀧𑀤𑁂 𑀲𑀫𑁆𑀧𑀤𑀸𑀦𑀁. ‘‘𑀦𑀺𑀲𑁆𑀲𑀬’’𑀦𑁆𑀢𑀺 𑀧𑀤𑀁 ‘‘𑀆𑀥𑀸𑀭𑀪𑀸𑀯’’𑀦𑁆𑀢𑀺 𑀧𑀤𑁂𑀦 𑀲𑀁𑀯𑀡𑁆𑀡𑁂𑀢𑀺. ‘‘𑀉𑀧𑁂𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀉𑀧𑀲𑀤𑁆𑀤𑀲𑁆𑀲 𑀉𑀧𑀕𑀫𑀦𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀩𑀮𑀯𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀞𑀫𑀦𑁆𑀢𑀺 𑀧𑀬𑁄𑀕𑀢𑁄, 𑀧𑀬𑁄𑀕𑀲𑁆𑀲 𑀯𑀸 𑀢𑀸𑀯. 𑀇𑀫𑀺𑀦𑀸 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦𑀸𑀢𑀺 𑀏𑀢𑁆𑀣 𑀧𑀼𑀭𑁂𑀲𑀤𑁆𑀤𑁄 𑀧𑀞𑀫𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀘𑁆𑀙𑀸𑀢𑀺 𑀧𑀬𑁄𑀕𑀢𑁄, 𑀧𑀬𑁄𑀕𑀲𑁆𑀲 𑀯𑀸 𑀧𑀭𑀁. 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀦𑁆𑀢𑀺 𑀏𑀓𑀧𑀳𑀸𑀭𑁂𑀦. 𑀇𑀫𑀺𑀦𑀸 𑀲𑀳𑀚𑀸𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀏𑀯𑀁 𑀧𑀼𑀘𑁆𑀙𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀦𑁆𑀢𑀺 𑀥𑀫𑁆𑀫𑀚𑀸𑀢𑀁. 𑀇𑀤𑀸𑀦𑀺 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀲𑀸𑀢𑀺 𑀧𑀬𑁄𑀕𑀸𑀤𑀺𑀓𑀲𑁆𑀲. 𑀢𑀤𑁂𑀯𑀸𑀢𑀺 𑀥𑀫𑁆𑀫𑀚𑀸𑀢𑀫𑁂𑀯. 𑀢𑀲𑁆𑀲𑀸𑀢𑀺 ‘‘𑀧𑀼𑀩𑁆𑀩𑀓𑀭𑀡𑀁 𑀧𑀬𑁄𑀕𑀲𑁆𑀲𑀸’’𑀢𑀺𑀆𑀤𑀺𑀯𑀘𑀦𑀲𑁆𑀲 𑀅𑀢𑁆𑀣𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. ‘‘𑀧𑀬𑁄𑀕𑀲𑁆𑀲 𑀓𑀢𑀫𑁂 𑀥𑀫𑁆𑀫𑀸’’𑀢𑀺𑀆𑀤𑀺 𑀬𑀁 𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀢𑁆𑀣 𑀯𑀺𑀲𑁆𑀲𑀚𑁆𑀚𑀦𑀁 𑀫𑀬𑀸 𑀯𑀼𑀘𑁆𑀘𑀢𑁂𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 𑀧𑀸𑀴𑀺𑀬𑀁 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑀸𑀓𑀸𑀭𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀧𑀬𑁄𑀕𑀲𑁆𑀲 𑀳𑀻’’𑀢𑀺𑀆𑀤𑀺. 𑀧𑀬𑁄𑀕𑀲𑁆𑀲 𑀧𑀼𑀩𑁆𑀩𑀓𑀭𑀡𑀁 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀤𑁆𑀤𑀺𑀝𑁆𑀞𑀥𑀫𑁆𑀫𑁂𑀲𑀽𑀢𑀺 ‘‘𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀉𑀤𑁆𑀤𑀺𑀝𑁆𑀞𑁂𑀲𑀼 𑀥𑀫𑁆𑀫𑁂𑀲𑀼 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀧𑀦𑁂𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀣 𑀯𑀸 𑀉𑀤𑁆𑀤𑀺𑀝𑁆𑀞𑀥𑀫𑁆𑀫𑁂𑀲𑀽𑀢𑀺 𑀧𑀼𑀩𑁆𑀩𑀓𑀭𑀡𑀯𑀲𑁂𑀦 𑀉𑀤𑁆𑀤𑀺𑀝𑁆𑀞𑁂𑀲𑀼 𑀥𑁄𑀯𑀦𑀸𑀤𑀺𑀥𑀫𑁆𑀫𑁂𑀲𑀼 𑀏𑀓𑀥𑀫𑁆𑀫𑀫𑁆𑀧𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀮𑀪𑀢𑀻𑀢𑀺 𑀉𑀤𑀓𑀸𑀳𑀭𑀡𑀸𑀤𑀺𑀧𑀬𑁄𑀕𑀲𑁆𑀲 𑀧𑀼𑀩𑁆𑀩𑁂 𑀦 𑀮𑀪𑀢𑀺. 𑀅𑀬𑀦𑁆𑀢𑀺 𑀉𑀤𑀓𑀸𑀳𑀭𑀡𑀸𑀤𑀺𑀧𑀬𑁄𑀕𑁄. 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀁 𑀧𑀦 𑀮𑀪𑀢𑀻𑀢𑀺 𑀉𑀤𑀓𑀸𑀳𑀭𑀡𑀸𑀤𑀺𑀧𑀬𑁄𑀕𑁄 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀁 𑀮𑀪𑀢𑀺. 𑀓𑀲𑁆𑀫𑀸 𑀮𑀪𑀢𑀻𑀢𑀺 𑀆𑀳 ‘‘𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀳𑀻’’𑀢𑀺𑀆𑀤𑀺. 𑀧𑀘𑁆𑀙𑀸𑀢𑀺 𑀧𑀬𑁄𑀕𑀲𑁆𑀲, 𑀧𑀬𑁄𑀕𑀢𑁄 𑀯𑀸 𑀧𑀭𑀁. 𑀳𑀺 𑀬𑀲𑁆𑀫𑀸 𑀓𑀬𑀺𑀭𑀢𑀺, 𑀢𑀲𑁆𑀫𑀸 𑀮𑀪𑀢𑀻𑀢𑀺 𑀬𑁄𑀚𑀦𑀸. 𑀲𑀳𑀚𑀸𑀢𑀧𑀘𑁆𑀘𑀬𑀁 𑀧𑀦 𑀦 𑀮𑀪𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀸𑀢𑀺𑀓𑀸𑀧𑀮𑀺𑀩𑁄𑀥𑀸𑀦𑀺𑀲𑀁𑀲𑀲𑀗𑁆𑀔𑀸𑀢𑁂𑀢𑀺 𑀅𑀝𑁆𑀞𑀫𑀸𑀢𑀺𑀓𑀸𑀤𑁆𑀯𑁂𑀧𑀮𑀺𑀩𑁄𑀥𑀧𑀜𑁆𑀘𑀸𑀦𑀺𑀲𑀁𑀲𑀲𑀗𑁆𑀔𑀸𑀢𑁂. 𑀅𑀜𑁆𑀜𑁄𑀢𑀺 𑀧𑀦𑁆𑀦𑀭𑀲𑀳𑀺 𑀥𑀫𑁆𑀫𑁂𑀳𑀺 𑀅𑀜𑁆𑀜𑁄. 𑀧𑀬𑁄𑀕𑀸𑀤𑀻𑀲𑀽𑀢𑀺𑀆𑀤𑀺𑀲𑀤𑁆𑀤𑁂𑀦 𑀧𑀼𑀩𑁆𑀩𑀓𑀭𑀡𑀧𑀘𑁆𑀘𑀼𑀤𑁆𑀥𑀸𑀭𑀅𑀥𑀺𑀝𑁆𑀞𑀸𑀦𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦𑀸𑀢𑀺 𑀏𑀢𑁂𑀦 𑀬𑀣𑀸𑀯𑀼𑀢𑁆𑀢𑀉𑀧𑀸𑀬𑁂𑀦.

𑀧𑀼𑀩𑁆𑀩𑀓𑀭𑀡𑀦𑀺𑀤𑀸𑀦𑀸𑀤𑀺𑀯𑀺𑀪𑀸𑀕𑀯𑀡𑁆𑀡𑀦𑀸

𑁪𑁦𑁬-𑁭. 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀼𑀘𑁆𑀙𑀺𑀢𑀢𑁆𑀢𑀸 ‘‘𑀧𑀼𑀘𑁆𑀙𑀸𑀤𑁆𑀯𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀳𑁂𑀢𑀼𑀧𑀘𑁆𑀘𑀬𑀸𑀦𑀁 𑀲𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀙 𑀘𑀻𑀯𑀭𑀸𑀦𑀻’’𑀢𑀺. 𑀓𑀲𑁆𑀫𑀸 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀆𑀳 ‘‘𑀧𑀼𑀩𑁆𑀩𑀧𑀬𑁄𑀕𑀸𑀤𑀻𑀦𑀜𑁆𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀬𑀲𑁆𑀫𑀸. 𑀢𑀸𑀦𑀺𑀬𑁂𑀯𑀸𑀢𑀺 𑀙 𑀘𑀻𑀯𑀭𑀸𑀦𑀺 𑀏𑀯. 𑀏𑀯𑀲𑀤𑁆𑀤𑁄 𑀧𑀘𑁆𑀙𑀸𑀧𑀺 𑀬𑁄𑀚𑁂𑀢𑀩𑁆𑀩𑁄, 𑀢𑀸𑀦𑀺 𑀏𑀯𑀸𑀢𑀺 𑀅𑀢𑁆𑀣𑁄. 𑀳𑀻𑀢𑀺 𑀲𑀘𑁆𑀘𑀁, 𑀧𑀼𑀩𑁆𑀩𑀓𑀭𑀡𑀸𑀤𑀻𑀦𑀺 𑀦 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸.

𑁪𑁦𑁮. ‘‘𑀇𑀫𑀸𑀬 𑀲𑀗𑁆𑀖𑀸𑀝𑀺𑀬𑀸’’𑀢𑀺𑀆𑀤𑀺𑀦𑀸 𑀯𑀘𑀻𑀪𑁂𑀤𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀓𑀣𑀺𑀦𑀢𑁆𑀣𑀸𑀭𑀓𑁂𑀦 𑀬𑀲𑁆𑀫𑀸 𑀧𑀘𑁆𑀘𑀼𑀤𑁆𑀥𑀸𑀭𑁄 𑀘 𑀅𑀥𑀺𑀝𑁆𑀞𑀸𑀦𑀜𑁆𑀘 𑀓𑀭𑀻𑀬𑀢𑀺, 𑀢𑀲𑁆𑀫𑀸 𑀓𑀺𑀭𑀺𑀬𑀸𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀘𑁆𑀘𑀼𑀤𑁆𑀥𑀸𑀭𑁄 𑀘𑁂𑀯 𑀅𑀥𑀺𑀝𑁆𑀞𑀸𑀦𑀜𑁆𑀘𑀸’’𑀢𑀺.

𑁪𑁧𑁧. 𑀯𑀢𑁆𑀣𑀼𑀯𑀺𑀧𑀦𑁆𑀦𑀸𑀤𑀻𑀦𑀁 𑀲𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀓𑀧𑁆𑀧𑀺𑀬𑀤𑀼𑀲𑁆𑀲𑀁 𑀳𑁄𑀢𑀻’’𑀢𑀺𑀆𑀤𑀺. 𑀯𑀺𑀦𑀸𑀲𑀁, 𑀯𑀺𑀓𑀸𑀭𑀁 𑀯𑀸 𑀧𑀚𑁆𑀚𑀢𑀻𑀢𑀺 𑀯𑀺𑀧𑀦𑁆𑀦𑀁, 𑀯𑀢𑁆𑀣𑀼𑀫𑁂𑀯 𑀯𑀺𑀧𑀦𑁆𑀦𑀁 𑀯𑀢𑁆𑀣𑀼𑀯𑀺𑀧𑀦𑁆𑀦𑀁.

𑀓𑀣𑀺𑀦𑀸𑀤𑀺𑀚𑀸𑀦𑀺𑀢𑀩𑁆𑀩𑀯𑀺𑀪𑀸𑀕𑀯𑀡𑁆𑀡𑀦𑀸

𑁪𑁧𑁨. 𑀢𑁂𑀲𑀜𑁆𑀜𑁂𑀯 𑀥𑀫𑁆𑀫𑀸𑀦𑀦𑁆𑀢𑀺 𑀏𑀢𑁆𑀣 𑀥𑀫𑁆𑀫𑀸𑀦𑀁 𑀲𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁂𑀲𑀼 𑀭𑀽𑀧𑀸𑀤𑀺𑀥𑀫𑁆𑀫𑁂𑀲𑀽’’𑀢𑀺. 𑀢𑀢𑁆𑀣 𑀭𑀽𑀧𑀸𑀤𑀺𑀥𑀫𑁆𑀫𑁂𑀲𑀽𑀢𑀺 𑀯𑀡𑁆𑀡𑀕𑀦𑁆𑀥𑀸𑀤𑀻𑀲𑀼 𑀲𑀼𑀤𑁆𑀥𑀝𑁆𑀞𑀓𑀭𑀽𑀧𑀓𑀮𑀸𑀧𑀥𑀫𑁆𑀫𑁂𑀲𑀼. 𑀲𑀢𑀻𑀢𑀺 𑀲𑀦𑁆𑀢𑁂𑀲𑀼. 𑀢𑁂𑀲𑀦𑁆𑀢𑀺 𑀭𑀽𑀧𑀸𑀤𑀻𑀦𑀁 𑀥𑀫𑁆𑀫𑀸𑀦𑀁. ‘‘𑀲𑀫𑁄𑀥𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀲𑀗𑁆𑀕𑀳𑁄𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀫𑀺𑀲𑁆𑀲𑀻𑀪𑀸𑀯𑁄’’𑀢𑀺 𑀇𑀫𑀺𑀦𑀸 𑀲𑀫𑀯𑀸𑀬𑁄𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀯𑀬𑀯𑀥𑀫𑁆𑀫𑀸𑀦𑀁 𑀲𑀁 𑀏𑀓𑀪𑀸𑀯𑀲𑁆𑀲 𑀕𑀳𑀡𑀁 𑀲𑀗𑁆𑀕𑀳𑁄. 𑀅𑀯𑀬𑀯𑀥𑀫𑁆𑀫𑀸𑀦𑀁 𑀲𑀫𑀁 𑀅𑀬𑀦𑀁 𑀧𑀯𑀢𑁆𑀢𑀦𑀁 𑀲𑀫𑀯𑀸𑀬𑁄. 𑀩𑀳𑀽𑀲𑀼 𑀥𑀫𑁆𑀫𑁂𑀲𑀽𑀢𑀺 𑀩𑀳𑀽𑀲𑀼 𑀧𑀭𑀫𑀢𑁆𑀣𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑁂𑀲𑀼. 𑀦𑀸𑀫𑀫𑀢𑁆𑀢𑀦𑁆𑀢𑀺 𑀦𑀸𑀫𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁. 𑀧𑀼𑀩𑁆𑀩𑁂𑀢𑀺 𑀓𑀣𑀺𑀦𑀓𑁆𑀔𑀦𑁆𑀥𑀓𑁂.

‘‘𑀓𑀸𑀭𑀡𑁂𑀳𑀻’’𑀢𑀺 𑀇𑀫𑀺𑀦𑀸 𑀆𑀓𑀸𑀭𑀲𑀤𑁆𑀤𑁄 𑀓𑀸𑀭𑀡𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀬𑀦𑁆𑀢𑀺 𑀯𑀘𑀦𑀁.

𑁪𑁧𑁬. 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀓𑀺𑀦𑁆𑀢𑀺 𑀓𑀺𑀁 𑀅𑀢𑁆𑀣𑀚𑀸𑀢𑀁. 𑀲𑀩𑁆𑀩𑁂𑀧𑀺 𑀓𑀣𑀺𑀦𑀼𑀤𑁆𑀥𑀸𑀭𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀏𑀢𑁆𑀣𑀸𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑁂𑀲𑀼. 𑀧𑀼𑀭𑀺𑀫𑀸 𑀤𑁆𑀯𑁂𑀢𑀺 𑀅𑀦𑁆𑀢𑀭𑀼𑀩𑁆𑀪𑀸𑀭𑀲𑀳𑀼𑀩𑁆𑀪𑀸𑀭𑀯𑀲𑁂𑀦 𑀧𑀼𑀭𑀺𑀫𑀸 𑀤𑁆𑀯𑁂. 𑀏𑀢𑁂𑀲𑀜𑁆𑀘𑀸𑀢𑀺 𑀧𑀼𑀭𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀜𑁆𑀘. 𑀇𑀢𑀭𑁂𑀢𑀺 𑀅𑀯𑀲𑁂𑀲𑀸 𑀓𑀣𑀺𑀦𑀼𑀤𑁆𑀥𑀸𑀭𑀸. 𑀢𑁂𑀲𑀼𑀧𑀻𑀢𑀺 𑀇𑀢𑀭𑁂𑀲𑀼 𑀓𑀣𑀺𑀦𑀼𑀤𑁆𑀥𑀸𑀭𑁂𑀲𑀼. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀓𑀣𑀺𑀦𑀯𑀺𑀦𑀺𑀘𑁆𑀙𑀬𑁂.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀧𑀜𑁆𑀜𑀢𑁆𑀢𑀺𑀯𑀕𑁆𑀕𑀯𑀡𑁆𑀡𑀦𑀸𑀬

𑀬𑁄𑀚𑀦𑀸 𑀲𑀫𑀢𑁆𑀢𑀸.