𑁩. 𑀫𑀼𑀘𑀮𑀺𑀦𑁆𑀤𑀓𑀣𑀸

𑁫. 𑀅𑀓𑀸𑀮𑀫𑁂𑀖𑁄𑀢𑀺 𑀏𑀢𑁆𑀣 𑀯𑀧𑁆𑀧𑀸𑀤𑀺𑀓𑀸𑀮𑀲𑁆𑀲 𑀅𑀪𑀸𑀯𑀸 𑀦 𑀅𑀓𑀸𑀮𑁄 𑀳𑁄𑀢𑀺, 𑀅𑀣 𑀔𑁄 𑀯𑀲𑁆𑀲𑀓𑀸𑀮𑁂 𑀅𑀲𑀫𑁆𑀧𑀢𑁆𑀢𑀢𑁆𑀢𑀸 𑀅𑀓𑀸𑀮𑁄𑀢𑀺 𑀆𑀳 ‘‘𑀅𑀲𑀫𑁆𑀧𑀢𑁆𑀢𑁂 𑀯𑀲𑁆𑀲𑀓𑀸𑀮𑁂’’𑀢𑀺. ‘‘𑀉𑀧𑁆𑀧𑀦𑁆𑀦𑀫𑁂𑀖𑁄’’𑀢𑀺 𑀇𑀫𑀺𑀦𑀸 𑀅𑀓𑀸𑀮𑁂 𑀉𑀧𑁆𑀧𑀦𑁆𑀦𑁄 𑀫𑁂𑀖𑁄 𑀅𑀓𑀸𑀮𑀫𑁂𑀖𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂𑀢𑀺 𑀚𑁂𑀝𑁆𑀞𑀫𑀽𑀮𑀫𑀸𑀲𑁂. 𑀢𑀲𑁆𑀫𑀺𑀦𑁆𑀢𑀺 𑀫𑁂𑀖𑁂. 𑀲𑀻𑀢𑀯𑀸𑀢𑀤𑀼𑀤𑁆𑀤𑀺𑀦𑀻𑀢𑀺 𑀏𑀢𑁆𑀣 𑀲𑀻𑀢𑁂𑀦 𑀯𑀸𑀢𑁂𑀦 𑀤𑀽𑀲𑀺𑀢𑀁 𑀤𑀺𑀦𑀁 𑀇𑀫𑀺𑀲𑁆𑀲𑀸 𑀯𑀝𑁆𑀝𑀮𑀺𑀓𑀸𑀬𑀸𑀢𑀺 𑀲𑀻𑀢𑀯𑀸𑀢𑀤𑀼𑀤𑁆𑀤𑀺𑀦𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀸 𑀘 𑀧𑀦𑀸’’𑀢𑀺𑀆𑀤𑀺. 𑀲𑀸 𑀘 𑀧𑀦 𑀲𑀢𑁆𑀢𑀸𑀳𑀯𑀝𑁆𑀝𑀮𑀺𑀓𑀸 𑀲𑀻𑀢𑀯𑀸𑀢𑀤𑀼𑀤𑁆𑀤𑀺𑀦𑀻 𑀦𑀸𑀫 𑀅𑀳𑁄𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀫𑀻𑀧𑁂 𑀧𑁄𑀓𑁆𑀔𑀭𑀡𑀺𑀬𑀸 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀫𑀼𑀘𑀮𑀺𑀦𑁆𑀤𑀲𑁆𑀲 𑀲𑀫𑀻𑀧𑁂 𑀦𑀺𑀩𑁆𑀩𑀢𑁆𑀢𑁄 𑀫𑀼𑀘𑀮𑀺𑀦𑁆𑀤𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀫𑀼𑀘𑀮𑀺𑀦𑁆𑀤𑁄𑀢𑀺 𑀘 𑀦𑀺𑀘𑀼𑀮𑁄. 𑀲𑁄 𑀦𑀻𑀧𑁄𑀢𑀺 𑀘 𑀧𑀺𑀬𑀓𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀦𑀸𑀕𑀲𑁆𑀲 𑀪𑁄𑀕𑁄 𑀏𑀓𑁄𑀧𑀺 𑀲𑀢𑁆𑀢𑀸𑀪𑀼𑀚𑀢𑁆𑀢𑀸 ‘‘𑀪𑁄𑀕𑁂𑀳𑀻’’𑀢𑀺 𑀩𑀳𑀼𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀦𑁆𑀢𑀺 𑀦𑀸𑀕𑀭𑀸𑀚𑁂 𑀞𑀺𑀢𑁂 𑀲𑀢𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀦𑀸𑀕𑀭𑀸𑀚𑀲𑁆𑀲. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀪𑀡𑁆𑀟𑀸𑀕𑀸𑀭𑀕𑀩𑁆𑀪𑀧𑀫𑀸𑀡𑀁 𑀅𑀳𑁄𑀲𑀺, 𑀢𑀲𑁆𑀫𑀸. 𑀞𑀸𑀦𑀲𑁆𑀲 𑀓𑀸𑀭𑀡𑀁 𑀧𑀭𑀺𑀤𑀻𑀧𑁂𑀢𑀺 𑀅𑀦𑁂𑀦𑀸𑀢𑀺 𑀞𑀸𑀦𑀓𑀸𑀭𑀡𑀧𑀭𑀺𑀤𑀻𑀧𑀦𑀁 ‘‘𑀫𑀸 𑀪𑀕𑀯𑀦𑁆𑀢𑀁 𑀲𑀻𑀢’’𑀦𑁆𑀢𑀺𑀆𑀤𑀺𑀯𑀘𑀦𑀁. 𑀲𑁄𑀢𑀺 𑀦𑀸𑀕𑀭𑀸𑀚𑀸. 𑀳𑀻𑀢𑀺 𑀲𑀘𑁆𑀘𑀁. 𑀧𑀸𑀴𑀺𑀬𑀁 ‘‘𑀩𑀸𑀥𑀬𑀺𑀢𑁆𑀣𑀸’’𑀢𑀺 𑀓𑀺𑀭𑀺𑀬𑀸𑀧𑀤𑀁 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀫𑀸 𑀲𑀻𑀢𑀁 𑀪𑀕𑀯𑀦𑁆𑀢𑀁 𑀩𑀸𑀥𑀬𑀺𑀢𑁆𑀣𑀸’’𑀢𑀺. 𑀢𑀢𑁆𑀣𑀸𑀢𑀺 ‘‘𑀫𑀸 𑀪𑀕𑀯𑀦𑁆𑀢𑀁 𑀲𑀻𑀢’’𑀦𑁆𑀢𑀺𑀆𑀤𑀺𑀯𑀘𑀦𑁂. 𑀲𑀢𑁆𑀢𑀸𑀳𑀯𑀝𑁆𑀝𑀮𑀺𑀓𑀸𑀬 𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀫𑁆𑀧𑀻𑀢𑀺 𑀉𑀡𑁆𑀳𑀫𑁆𑀧𑀺. 𑀦𑀦𑁆𑀢𑀺 𑀪𑀕𑀯𑀦𑁆𑀢𑀁. 𑀢𑀲𑁆𑀲𑀸𑀢𑀺 𑀦𑀸𑀕𑀭𑀸𑀚𑀲𑁆𑀲. 𑀉𑀩𑁆𑀩𑀺𑀤𑁆𑀥𑀦𑁆𑀢𑀺 𑀉𑀤𑁆𑀥𑀁 𑀙𑀺𑀤𑁆𑀤𑀁. 𑀯𑀺𑀤𑁆𑀥𑀙𑀺𑀤𑁆𑀤𑀲𑀤𑁆𑀤𑀸 𑀳𑀺 𑀧𑀭𑀺𑀬𑀸𑀬𑀸. 𑀆𑀓𑀸𑀲𑀁 𑀫𑁂𑀖𑀧𑀝𑀮𑀧𑀝𑀺𑀘𑁆𑀙𑀦𑁆𑀦𑀁 𑀆𑀲𑀦𑁆𑀦𑀁 𑀯𑀺𑀬 𑀳𑁄𑀢𑀺, 𑀫𑁂𑀖𑀧𑀝𑀮𑀯𑀺𑀕𑀫𑁂 𑀤𑀽𑀭𑀁 𑀯𑀺𑀬 𑀉𑀧𑀝𑁆𑀞𑀸𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑁂𑀖𑀯𑀺𑀕𑀫𑁂𑀦 𑀤𑀽𑀭𑀻𑀪𑀽𑀢’’𑀦𑁆𑀢𑀺. 𑀯𑀺𑀕𑀢𑀯𑀮𑀸𑀳𑀓𑀦𑁆𑀢𑀺 𑀏𑀢𑁆𑀣 𑀯𑀺𑀕𑀢𑀲𑀤𑁆𑀤𑁄 𑀅𑀧𑀕𑀢𑀢𑁆𑀣𑀯𑀸𑀘𑀓𑁄, 𑀯𑀮𑀸𑀳𑀓𑀲𑀤𑁆𑀤𑁄 𑀫𑁂𑀖𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀅𑀧𑀕𑀢𑀫𑁂𑀖’’𑀦𑁆𑀢𑀺. 𑀇𑀦𑁆𑀤𑀦𑀻𑀮𑀫𑀡𑀺 𑀯𑀺𑀬 𑀤𑀺𑀩𑁆𑀩𑀢𑀻𑀢𑀺 𑀤𑁂𑀯𑁄𑀢𑀺 𑀯𑀘𑀦𑀢𑁆𑀣𑁂𑀦 𑀆𑀓𑀸𑀲𑁄 𑀤𑁂𑀯𑁄 𑀦𑀸𑀫𑀸𑀢𑀺 𑀆𑀳 ‘‘𑀤𑁂𑀯𑀦𑁆𑀢𑀺 𑀆𑀓𑀸𑀲’’𑀦𑁆𑀢𑀺. 𑀅𑀢𑁆𑀢𑀦𑁄 𑀭𑀽𑀧𑀦𑁆𑀢𑀺 𑀅𑀢𑁆𑀢𑀦𑁄 𑀦𑀸𑀕𑀲𑀡𑁆𑀞𑀸𑀦𑀁. 𑀇𑀫𑀺𑀦𑀸 𑀲𑀓𑀯𑀡𑁆𑀡𑀦𑁆𑀢𑀺 𑀏𑀢𑁆𑀣 𑀲𑀓𑀲𑀤𑁆𑀤𑁄 𑀅𑀢𑁆𑀢𑀯𑀸𑀘𑀓𑁄, 𑀯𑀡𑁆𑀡𑀲𑀤𑁆𑀤𑁄 𑀲𑀡𑁆𑀞𑀸𑀦𑀯𑁂𑀯𑀘𑀦𑁄𑀢𑀺 𑀤𑀲𑁆𑀲𑁂𑀢𑀺.

𑀲𑀼𑀔𑁄 𑀯𑀺𑀯𑁂𑀓𑁄𑀢𑀺 𑀏𑀢𑁆𑀣 𑀢𑀤𑀗𑁆𑀕 𑀯𑀺𑀓𑁆𑀔𑀫𑁆𑀪𑀦 𑀲𑀫𑀼𑀘𑁆𑀙𑁂𑀤 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀲𑀗𑁆𑀔𑀸𑀢𑁂𑀲𑀼 𑀧𑀜𑁆𑀘𑀲𑀼 𑀯𑀺𑀯𑁂𑀓𑁂𑀲𑀼 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑁄 𑀘 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑀲𑀗𑁆𑀔𑀸𑀢𑁂𑀲𑀼 𑀢𑀻𑀲𑀼 𑀯𑀺𑀯𑁂𑀓𑁂𑀲𑀼 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑁄 𑀉𑀧𑀥𑀺𑀯𑀺𑀯𑁂𑀓𑁄 𑀘 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑁄 𑀉𑀧𑀥𑀺𑀯𑀺𑀯𑁂𑀓𑁄’’𑀢𑀺. ‘‘𑀘𑀢𑀼𑀫𑀕𑁆𑀕𑀜𑀸𑀡𑀲𑀦𑁆𑀢𑁄𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀢𑀼𑀝𑁆𑀞𑀲𑁆𑀲𑀸𑀢𑀺 𑀏𑀢𑁆𑀣 𑀧𑀺𑀡𑁆𑀟𑀧𑀸𑀢𑀲𑀦𑁆𑀢𑁄𑀲𑀸𑀤𑀺𑀓𑁂 𑀦𑀺𑀯𑀢𑁆𑀢𑁂𑀢𑀺. 𑀲𑀼𑀢𑀥𑀫𑁆𑀫𑀲𑁆𑀲𑀸𑀢𑀺 𑀏𑀢𑁆𑀣 𑀲𑀼𑀢𑀲𑀤𑁆𑀤𑁄 𑀯𑀺𑀲𑁆𑀲𑀼𑀢𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀧𑀓𑀸𑀲𑀺𑀢𑀥𑀫𑁆𑀫𑀲𑁆𑀲𑀸’’𑀢𑀺, 𑀧𑀸𑀓𑀝𑀲𑀘𑁆𑀘𑀥𑀫𑁆𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀲𑁆𑀲𑀢𑁄𑀢𑀺 𑀏𑀢𑁆𑀣 𑀫𑀁𑀲𑀘𑀓𑁆𑀔𑀼𑀲𑁆𑀲 𑀓𑀭𑀡𑀪𑀸𑀯𑁂𑀦 𑀆𑀲𑀗𑁆𑀓𑀸 𑀪𑀯𑁂𑀬𑁆𑀬𑀸𑀢𑀺 𑀆𑀳 ‘‘𑀜𑀸𑀡𑀘𑀓𑁆𑀔𑀼𑀦𑀸’’𑀢𑀺. ‘‘𑀅𑀓𑀼𑀧𑁆𑀧𑀦𑀪𑀸𑀯𑁄’’𑀢𑀺 𑀇𑀫𑀺𑀦𑀸 𑀅𑀩𑁆𑀬𑀸𑀧𑀚𑁆𑀚𑀦𑁆𑀢𑀺 𑀏𑀢𑁆𑀣 𑀩𑁆𑀬𑀸𑀧𑀸𑀤𑀲𑀤𑁆𑀤𑀲𑁆𑀲 𑀤𑁄𑀲𑀯𑀸𑀘𑀓𑀪𑀸𑀯𑁄 𑀘 𑀡𑁆𑀬𑀧𑀘𑁆𑀘𑀬𑀲𑁆𑀲 𑀪𑀸𑀯𑀢𑁆𑀣𑁄 𑀘 𑀤𑀲𑁆𑀲𑀺𑀢𑁄. 𑀏𑀢𑁂𑀦𑀸𑀢𑀺 ‘‘𑀅𑀩𑁆𑀬𑀸𑀧𑀚𑁆𑀚’’𑀦𑁆𑀢𑀺𑀧𑀤𑁂𑀦. 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑁄𑀢𑀺 𑀅𑀩𑁆𑀬𑀸𑀧𑀚𑁆𑀚𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀫𑁂𑀢𑁆𑀢𑀸𑀬 𑀉𑀧𑁆𑀧𑀦𑁆𑀦𑀪𑀸𑀯𑁄. 𑀧𑀸𑀡𑀪𑀽𑀢𑁂𑀲𑀼 𑀲𑀁𑀬𑀫𑁄𑀢𑀺 𑀏𑀢𑁆𑀣 𑀧𑀸𑀡𑀪𑀽𑀢𑀲𑀤𑁆𑀤𑀸 𑀯𑁂𑀯𑀘𑀦𑀪𑀸𑀯𑁂𑀦 𑀲𑀢𑁆𑀢𑁂𑀲𑀼 𑀏𑀯 𑀯𑀢𑁆𑀢𑀦𑁆𑀢𑀻𑀢𑀺 𑀆𑀳 ‘‘𑀲𑀢𑁆𑀢𑁂𑀲𑀼 𑀘𑀸’’𑀢𑀺. 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄𑀢𑀺 𑀲𑀁𑀬𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀓𑀭𑀼𑀡𑀸𑀬 𑀉𑀧𑁆𑀧𑀦𑁆𑀦𑀪𑀸𑀯𑁄. 𑀬𑀸𑀢𑀺 𑀬𑀸 𑀯𑀺𑀭𑀸𑀕𑀢𑀸. 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀓𑀸𑀫𑀭𑀸𑀕𑀲𑁆𑀲 𑀅𑀦𑀯𑀲𑁂𑀲𑀧𑀳𑀸𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀏𑀢𑁂𑀦 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀓𑀣𑀺𑀢𑁄’’𑀢𑀺. 𑀬𑀸𑀣𑀸𑀯𑀫𑀸𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀦𑀺𑀭𑀼𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀲𑁆𑀫𑀺…𑀧𑁂… 𑀓𑀣𑀺𑀢’’𑀦𑁆𑀢𑀺. 𑀇𑀢𑁄𑀢𑀺 𑀅𑀭𑀳𑀢𑁆𑀢𑀢𑁄.