𑁨𑁩. 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀧𑀜𑁆𑀘𑀓𑀓𑀣𑀸

𑁮𑁪. 𑀇𑀤𑀸𑀦𑀺 =𑁦𑁧 𑀬𑀁 𑀮𑀓𑁆𑀔𑀡𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀔𑁂𑀧𑀢𑁄𑀢𑀺 𑀅𑀗𑁆𑀕𑀸𑀦𑀺 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀲𑀫𑀸𑀲𑀢𑁄. 𑀢𑀢𑁆𑀣𑀸𑀢𑀺 𑀬𑀁 ‘‘𑀧𑀜𑁆𑀘𑀳𑀺 𑀪𑀺𑀓𑁆𑀔𑀯𑁂 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸’’𑀢𑀺𑀆𑀤𑀺𑀫𑀸𑀳, 𑀢𑀢𑁆𑀣. 𑀅𑀕𑀼𑀡𑀗𑁆𑀕𑁂𑀳𑀻𑀢𑀺 𑀕𑀼𑀡𑀯𑀺𑀭𑀳𑀺𑀢𑁂𑀳𑀺 𑀅𑀗𑁆𑀕𑁂𑀳𑀺. 𑀲𑁄𑀢𑀺 𑀪𑀺𑀓𑁆𑀔𑀼. 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀓𑀫𑁆𑀫𑀯𑀸𑀘𑀸𑀘𑀭𑀺𑀬𑁂𑀦 𑀳𑀼𑀢𑁆𑀯𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺 𑀆𑀲𑀗𑁆𑀓𑀸 𑀪𑀯𑁂𑀬𑁆𑀬𑀸𑀢𑀺 𑀆𑀳 ‘‘𑀉𑀧𑀚𑁆𑀛𑀸𑀬𑁂𑀦 𑀳𑀼𑀢𑁆𑀯𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩’’𑀦𑁆𑀢𑀺. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀧𑀜𑁆𑀘𑀓𑁂𑀲𑀼. 𑀆𑀤𑀻𑀲𑀽𑀢𑀺 𑀏𑀢𑁆𑀣 𑀧𑀼𑀩𑁆𑀩𑁄 𑀦𑀺𑀤𑀲𑁆𑀲𑀦𑀢𑁆𑀣𑁄 𑀇𑀢𑀺𑀲𑀤𑁆𑀤𑁄 𑀮𑁄𑀧𑁄 𑀳𑁄𑀢𑀺. 𑀇𑀢𑀺𑀆𑀤𑀻𑀲𑀽𑀢𑀺 𑀳𑀺 𑀅𑀢𑁆𑀣𑁄. 𑀅𑀬𑀼𑀢𑁆𑀢𑀯𑀲𑁂𑀦𑀸𑀢𑀺 𑀅𑀦𑀦𑀼𑀭𑀽𑀧𑀯𑀲𑁂𑀦. 𑀬𑁄𑀢𑀺 𑀪𑀺𑀓𑁆𑀔𑀼. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀧𑀭𑁂 𑀘 𑀲𑀫𑀸𑀤𑀧𑁂𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀓𑁂. 𑀧𑀭𑀺𑀳𑀭𑀢𑀻𑀢𑀺 𑀧𑀭𑀺𑀲𑀁 𑀧𑀭𑀺𑀲𑁆𑀲𑀬𑀢𑁄 𑀳𑀭𑀢𑀺 𑀅𑀧𑀦𑁂𑀢𑀺. 𑀢𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄. ‘‘𑀲𑀻𑀮𑀸𑀤𑀻𑀳𑀻’’𑀢𑀺𑀧𑀤𑀁 ‘‘𑀧𑀭𑀺𑀳𑀸𑀬𑀢𑀺𑀬𑁂𑀯𑀸’’𑀢𑀺𑀧𑀤𑁂 𑀅𑀧𑀸𑀤𑀸𑀦𑀁, ‘‘𑀦 𑀯𑀟𑁆𑀠𑀢𑀻’’𑀢𑀺𑀧𑀤𑁂 𑀓𑀭𑀡𑀁. 𑀢𑀲𑁆𑀫𑀸𑀢𑀺𑀆𑀤𑀺 𑀮𑀤𑁆𑀥𑀕𑀼𑀡𑀁. 𑀢𑁂𑀦𑀸𑀢𑀺 𑀪𑀺𑀓𑁆𑀔𑀼𑀦𑀸. 𑀓𑀲𑁆𑀫𑀸 𑀆𑀧𑀢𑁆𑀢𑀺𑀅𑀗𑁆𑀕𑀯𑀲𑁂𑀦 𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀬𑀲𑁆𑀫𑀸. 𑀢𑀲𑁆𑀲𑁂𑀯𑀸𑀢𑀺 𑀔𑀻𑀡𑀸𑀲𑀯𑀲𑁆𑀲𑁂𑀯. 𑀦 𑀯𑀤𑁂𑀬𑁆𑀬𑀸𑀢𑀺 𑀔𑀻𑀡𑀸𑀲𑀯𑀸𑀦𑀁 𑀅𑀦𑀪𑀺𑀭𑀢𑀺𑀬𑀸 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸 𑀦 𑀯𑀤𑁂𑀬𑁆𑀬. 𑀬𑀤𑀺 𑀦 𑀔𑀻𑀡𑀸𑀲𑀯𑀲𑁆𑀲𑁂𑀯 𑀉𑀧𑀚𑁆𑀛𑀸𑀬𑀸𑀘𑀭𑀺𑀬𑀪𑀸𑀯𑁄 𑀅𑀦𑀼𑀜𑁆𑀜𑀸𑀢𑁄, 𑀅𑀣 𑀓𑀲𑁆𑀫𑀸 𑀔𑀻𑀡𑀸𑀲𑀯𑀧𑀜𑁆𑀘𑀓𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀬𑀲𑁆𑀫𑀸 𑀦 𑀧𑀭𑀺𑀳𑀸𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬𑀸𑀢𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀲𑀗𑁆𑀔𑀸𑀢𑀁 𑀅𑀦𑁆𑀢𑀁 𑀮𑀸𑀫𑀓𑀁 𑀕𑀡𑁆𑀳𑀸𑀢𑀺, 𑀕𑀡𑁆𑀳𑀸𑀧𑁂𑀢𑀻𑀢𑀺 𑀯𑀸 𑀅𑀦𑁆𑀢𑀕𑁆𑀕𑀸𑀳𑀺𑀓𑀸, 𑀢𑀸𑀬. 𑀤𑀺𑀝𑁆𑀞𑀺𑀬𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸. 𑀬𑀢𑁆𑀢𑀓𑀁 𑀲𑀼𑀢𑀦𑁆𑀢𑀺 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀺𑀓𑁆𑀔𑀸𑀧𑀤𑁂 (𑀧𑀸𑀘𑀺. 𑀅𑀝𑁆𑀞. 𑁧𑁪𑁫-𑁧𑁪𑁭) 𑀯𑀼𑀢𑁆𑀢𑀁 𑀬𑀢𑁆𑀢𑀓𑀁 𑀲𑀼𑀢𑀁. 𑀢𑁂𑀦𑀸𑀢𑀺 𑀲𑀼𑀢𑁂𑀦 ऋ. 𑀬𑀁 𑀆𑀧𑀢𑁆𑀢𑀸𑀤𑀺 𑀢𑁂𑀦 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀢𑀺 𑀦 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀤𑀁 𑀦𑀸𑀫𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀆𑀧𑀦𑁆𑀦𑁄’’𑀢𑀺 𑀇𑀫𑀺𑀦𑀸 ‘‘𑀆𑀧𑀢𑁆𑀢𑀺’’𑀦𑁆𑀢𑀺𑀧𑀤𑀁 ‘‘𑀆𑀧𑀦𑁆𑀦𑁄’’𑀢𑀺𑀧𑀸𑀞𑀲𑁂𑀲𑁂𑀦 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀆𑀪𑀺𑀲𑀫𑀸𑀘𑀸𑀭𑀺𑀓𑀸𑀬𑀸𑀢𑀺 𑀏𑀢𑁆𑀣 𑀉𑀪𑀢𑁄𑀯𑀺𑀪𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀲𑀻𑀮𑀢𑁄 𑀅𑀪𑀺𑀯𑀺𑀲𑁂𑀲𑁂𑀦 𑀲𑀫𑁆𑀫𑀸 𑀘𑀭𑀺𑀢𑀩𑁆𑀩𑀦𑁆𑀢𑀺 𑀆𑀪𑀺𑀲𑀫𑀸𑀘𑀸𑀭𑀁, 𑀔𑀦𑁆𑀥𑀓𑀧𑀭𑀺𑀬𑀸𑀧𑀦𑁆𑀦𑀁 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀲𑀻𑀮𑀁, 𑀢𑀁 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀸 𑀆𑀪𑀺𑀲𑀫𑀸𑀘𑀸𑀭𑀺𑀓𑀸, 𑀔𑀦𑁆𑀥𑀓𑀧𑀭𑀺𑀬𑀸𑀧𑀦𑁆𑀦𑀸 𑀲𑀺𑀓𑁆𑀔𑀸, 𑀢𑀸𑀬. 𑀆𑀤𑀺𑀩𑁆𑀭𑀳𑁆𑀫𑀘𑀸𑀭𑀺𑀬𑀓𑀸𑀬𑀸𑀢𑀺 𑀏𑀢𑁆𑀣 𑀫𑀕𑁆𑀕𑀲𑀗𑁆𑀔𑀸𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺 𑀫𑀭𑀺𑀬𑀸𑀤𑁄 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑁄, 𑀢𑀲𑁆𑀫𑀺𑀁 𑀧𑀯𑀢𑁆𑀢𑀸 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀸 =𑁦𑁨, 𑀉𑀪𑀢𑁄𑀯𑀺𑀪𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀸 𑀲𑀺𑀓𑁆𑀔𑀸, 𑀢𑀸𑀬. 𑀲𑁂𑀓𑁆𑀔𑀧𑀡𑁆𑀡𑀢𑁆𑀢𑀺𑀬𑀦𑁆𑀢𑀺 𑀲𑀺𑀓𑁆𑀔𑀺𑀢𑀩𑁆𑀩𑀝𑁆𑀞𑁂𑀦 𑀲𑀺𑀓𑁆𑀔𑀸, 𑀲𑀸 𑀏𑀯 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀢𑁆𑀢𑀸 𑀲𑁂𑀓𑁆𑀔𑀧𑀡𑁆𑀡𑀢𑁆𑀢𑀺. 𑀅𑀣 𑀯𑀸 𑀲𑀺𑀓𑁆𑀔𑀦𑀁 𑀲𑀺𑀓𑁆𑀔𑀸, 𑀢𑀸𑀬 𑀲𑀺𑀓𑁆𑀔𑀦𑀢𑁆𑀣𑀸𑀬 𑀪𑀕𑀯𑀢𑀸 𑀧𑀜𑁆𑀜𑀧𑀻𑀬𑀢𑀻𑀢𑀺 𑀲𑁂𑀓𑁆𑀔𑀧𑀡𑁆𑀡𑀢𑁆𑀢𑀺 𑀉𑀪𑀢𑁄𑀯𑀺𑀪𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀲𑀺𑀓𑁆𑀔𑀸𑀬𑁂𑀯, 𑀢𑀲𑁆𑀲𑀁. 𑀅𑀪𑀺𑀥𑀫𑁆𑀫𑁂𑀢𑀺 𑀏𑀢𑁆𑀣 𑀲𑀼𑀢𑁆𑀢𑀦𑁆𑀢𑀧𑀸𑀴𑀺𑀢𑁄 𑀅𑀪𑀺 𑀅𑀢𑀺𑀭𑁂𑀓𑁄, 𑀅𑀪𑀺𑀯𑀺𑀲𑀺𑀝𑁆𑀞𑁄 𑀯𑀸 𑀥𑀫𑁆𑀫𑁄 𑀅𑀪𑀺𑀥𑀫𑁆𑀫𑁄𑀢𑀺 𑀯𑀼𑀢𑁆𑀢𑁂 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀓𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀦𑁆𑀢𑀺 𑀆𑀳 ‘‘𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂’’𑀢𑀺. 𑀅𑀪𑀺𑀯𑀺𑀦𑀬𑁂𑀢𑀺 𑀏𑀢𑁆𑀣 𑀅𑀪𑀺𑀪𑀯𑀺𑀢𑁆𑀯𑀸 𑀓𑀸𑀬𑀯𑀸𑀘𑀁 𑀯𑀺𑀦𑁂𑀢𑀻𑀢𑀺 𑀅𑀪𑀺𑀯𑀺𑀦𑀬𑁄, 𑀅𑀪𑀺𑀪𑀯𑀺𑀢𑁆𑀯𑀸 𑀓𑀸𑀬𑀯𑀸𑀘𑀁 𑀯𑀺𑀦𑁂𑀢𑀺 𑀏𑀢𑁆𑀣, 𑀏𑀢𑁂𑀦𑀸𑀢𑀺 𑀯𑀸 𑀅𑀪𑀺𑀯𑀺𑀦𑀬𑁄𑀢𑀺 𑀯𑀼𑀢𑁆𑀢𑁂 𑀯𑀺𑀦𑀬𑀧𑀺𑀝𑀓𑀦𑁆𑀢𑀺 𑀆𑀳 ‘‘𑀲𑀓𑀮𑁂 𑀯𑀺𑀦𑀬𑀧𑀺𑀝𑀓𑁂’’𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀧𑀤𑁂𑀲𑀼, 𑀲𑀩𑁆𑀩𑁂𑀲𑀁 𑀯𑀸 𑀧𑀤𑀸𑀦𑀁. 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺 𑀬𑁄𑀚𑀦𑀸. ‘‘𑀓𑀸𑀭𑀡𑁂𑀦𑀸’’𑀢𑀺 𑀏𑀢𑁆𑀣 𑀓𑀸𑀭𑀡𑀲𑀤𑁆𑀤𑁂𑀦 ‘‘𑀥𑀫𑁆𑀫𑀢𑁄’’𑀢𑀺 𑀏𑀢𑁆𑀣 𑀥𑀫𑁆𑀫𑀲𑀤𑁆𑀤𑀲𑁆𑀲 𑀲𑀪𑀸𑀯𑀢𑁆𑀣𑀸𑀤𑀬𑁄 𑀦𑀺𑀯𑀸𑀭𑁂𑀢𑁆𑀯𑀸 𑀓𑀸𑀭𑀡𑀢𑁆𑀣𑀢𑀁 𑀤𑀻𑀧𑁂𑀢𑀺, 𑀏𑀦𑀲𑀤𑁆𑀤𑁂𑀦 𑀢𑁄𑀧𑀘𑁆𑀘𑀬𑀲𑁆𑀲 𑀯𑀺𑀲𑁂𑀲𑀦𑀢𑁆𑀣𑀁. 𑀇𑀢𑀻𑀢𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀘𑀢𑀼𑀢𑁆𑀣𑁂𑀢𑀺 𑀘𑀢𑀼𑀢𑁆𑀣𑀧𑀜𑁆𑀘𑀓𑁂. 𑀘𑀢𑀼𑀢𑁆𑀣𑀧𑀜𑁆𑀘𑀓𑀢𑁄 𑀢𑀻𑀡𑀺 𑀧𑀤𑀸𑀦𑀺, 𑀧𑀜𑁆𑀘𑀫𑀧𑀜𑁆𑀘𑀓𑀢𑁄 𑀤𑁆𑀯𑁂 𑀧𑀤𑀸𑀦𑀺 𑀕𑀳𑁂𑀢𑁆𑀯𑀸 𑀧𑀜𑁆𑀘𑀓𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀘𑀢𑁆𑀢𑀸𑀭𑁄 𑀧𑀜𑁆𑀘𑀓𑀸’’𑀢𑀺. 𑀅𑀝𑁆𑀞𑀲𑀼 𑀧𑀜𑁆𑀘𑀓𑁂𑀲𑀽𑀢𑀺 𑀲𑀫𑁆𑀩𑀦𑁆𑀥𑁄.

𑀇𑀢𑀺 𑀲𑁄𑀴𑀲𑀧𑀜𑁆𑀘𑀓𑀯𑀺𑀦𑀺𑀘𑁆𑀙𑀬𑁂 𑀬𑁄𑀚𑀦𑀸 𑀲𑀫𑀢𑁆𑀢𑀸.