𑁧. 𑀩𑁄𑀥𑀺𑀓𑀣𑀸

𑀏𑀯𑀽𑀪𑀢𑁄𑀯𑀺𑀪𑀗𑁆𑀕𑀲𑁆𑀲, 𑀓𑀢𑁆𑀯𑀸𑀦 𑀬𑁄𑀚𑀦𑀸𑀦𑀬𑀁;

𑀫𑀳𑀸𑀯𑀕𑁆𑀕𑀔𑀦𑁆𑀥𑀓𑀲𑁆𑀲, 𑀓𑀭𑀺𑀲𑁆𑀲𑀁 𑀬𑁄𑀚𑀦𑀸𑀦𑀬𑀁.

𑀉𑀪𑀺𑀦𑁆𑀦𑀦𑁆𑀢𑀺 𑀉𑀪𑀬𑁂𑀲𑀁. 𑀧𑀸𑀢𑀺𑀫𑁄𑀓𑁆𑀔𑀸𑀦𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀯𑀺𑀪𑀗𑁆𑀕𑀸𑀦𑀁. 𑀧𑀸𑀢𑀺𑀫𑁄𑀓𑁆𑀔𑀕𑀳𑀡𑁂𑀦 𑀳𑁂𑀢𑁆𑀣 𑀢𑁂𑀲𑀁 𑀯𑀺𑀪𑀗𑁆𑀕𑁄𑀧𑀺 𑀕𑀳𑀺𑀢𑁄 𑀅𑀪𑁂𑀤𑁂𑀦 𑀯𑀸 𑀉𑀢𑁆𑀢𑀭𑀧𑀤𑀮𑁄𑀧𑀯𑀲𑁂𑀦 𑀯𑀸. 𑀔𑀦𑁆𑀥𑀓𑀦𑁆𑀢𑀺 𑀧𑀜𑁆𑀜𑀢𑁆𑀢𑀺𑀲𑀫𑀽𑀳𑀁. 𑀔𑀦𑁆𑀥𑀲𑀤𑁆𑀤𑁄 𑀳𑁂𑀢𑁆𑀣 𑀧𑀜𑁆𑀜𑀢𑁆𑀢𑀺𑀯𑀸𑀘𑀓𑁄. 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑁄 𑀯𑀼𑀘𑁆𑀘𑀦𑁆𑀢𑀺 ‘‘𑀔𑀦𑁆𑀥𑁄’’𑀢𑀺. 𑀢𑁂𑀲𑀁 𑀲𑀫𑀽𑀳𑁄 𑀔𑀦𑁆𑀥𑀓𑁄. 𑀅𑀣𑀯𑀸 𑀔𑀦𑁆𑀥𑁄𑀢𑀺 𑀭𑀸𑀲𑀺. 𑀔𑀦𑁆𑀥𑀲𑀤𑁆𑀤𑁄 𑀳𑀺 𑀭𑀸𑀲𑀢𑁆𑀣𑀯𑀸𑀘𑀓𑁄. 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀭𑀸𑀲𑀺 𑀯𑀼𑀘𑁆𑀘𑀢𑀺 ‘‘𑀔𑀦𑁆𑀥𑁄’’𑀢𑀺. 𑀓𑀓𑀸𑀭𑁄 𑀧𑀓𑀸𑀲𑀓𑀯𑀸𑀘𑀓𑁄. 𑀔𑀦𑁆𑀥𑀸𑀦𑀁 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀭𑀸𑀲𑀻𑀦𑀁 𑀓𑁄 𑀧𑀓𑀸𑀲𑀓𑁄𑀢𑀺 𑀔𑀦𑁆𑀥𑀓𑁄, 𑀢𑀁 𑀔𑀦𑁆𑀥𑀓𑀁. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀉𑀪𑀺𑀦𑁆𑀦𑀁 𑀧𑀸𑀢𑀺𑀫𑁄𑀓𑁆𑀔𑀸𑀦𑀁 𑀲𑀗𑁆𑀕𑀻𑀢𑀺𑀲𑀫𑀦𑀦𑁆𑀢𑀭𑀁 𑀔𑀦𑁆𑀥𑀓𑁄𑀯𑀺𑀤𑀸 𑀔𑀦𑁆𑀥𑀓𑁂𑀲𑀼 𑀓𑀼𑀲𑀮𑀸 𑀫𑀳𑀸𑀣𑁂𑀭𑀸 𑀬𑀁 𑀔𑀦𑁆𑀥𑀓𑀁 𑀲𑀗𑁆𑀕𑀸𑀬𑀺𑀁𑀲𑀼, 𑀢𑀲𑁆𑀲 𑀔𑀦𑁆𑀥𑀓𑀲𑁆𑀲 𑀤𑀸𑀦𑀺 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄 𑀬𑀲𑁆𑀫𑀸 𑀲𑀫𑁆𑀧𑀢𑁆𑀢𑁄, 𑀢𑀲𑁆𑀫𑀸 𑀢𑀲𑁆𑀲 𑀔𑀦𑁆𑀥𑀓𑀲𑁆𑀲 𑀅𑀬𑀁 𑀅𑀦𑀼𑀢𑁆𑀢𑀸𑀦𑀢𑁆𑀣𑀯𑀡𑁆𑀡𑀦𑀸 𑀳𑁄𑀢𑀻𑀢𑀺.

𑀬𑁂 𑀅𑀢𑁆𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀺𑀲𑀤𑁆𑀤𑁄 𑀧𑀤𑀸𑀮𑀗𑁆𑀓𑀸𑀭𑁄. 𑀬𑁂𑀲𑀦𑁆𑀢𑀺 𑀧𑀤𑀸𑀦𑀁. 𑀢𑁂𑀢𑀺 𑀢𑁂 𑀅𑀢𑁆𑀣𑁂. 𑀪𑀯𑁂𑀢𑀺 𑀪𑀯𑁂𑀬𑁆𑀬, 𑀪𑀯𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀦𑁆𑀢𑀺 𑀅𑀢𑁆𑀣𑀸𑀦𑀁. 𑀓𑀺𑀦𑁆𑀢𑀺 𑀓𑀺𑀁 𑀧𑀬𑁄𑀚𑀦𑀁. 𑀢𑁂𑀢𑀺 𑀅𑀢𑁆𑀣𑁂, 𑀜𑀸𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀣𑀯𑀸 𑀢𑁂𑀢𑀺 𑀅𑀢𑁆𑀣𑀸, 𑀅𑀯𑀡𑁆𑀡𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀁𑀬𑁂𑀯𑀸𑀢𑀺 𑀅𑀢𑁆𑀣𑀸𑀦𑀫𑁂𑀯. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀧𑀤𑀪𑀸𑀚𑀦𑀻𑀬𑁂 𑀬𑁂𑀲𑀁 𑀧𑀤𑀸𑀦𑀁 𑀬𑁂 𑀅𑀢𑁆𑀣𑀸 𑀪𑀕𑀯𑀢𑀸 𑀧𑀓𑀸𑀲𑀺𑀢𑀸, 𑀢𑁂𑀲𑀁 𑀧𑀤𑀸𑀦𑀦𑁆𑀢𑀺 𑀧𑀸𑀞𑀲𑁂𑀲𑁄, 𑀢𑁂 𑀅𑀢𑁆𑀣𑁂 𑀧𑀼𑀦 𑀯𑀤𑁂𑀬𑁆𑀬𑀸𑀫 𑀘𑁂, 𑀓𑀤𑀸 𑀧𑀭𑀺𑀬𑁄𑀲𑀸𑀦𑀁 𑀲𑀁𑀯𑀡𑁆𑀡𑀦𑀸𑀬 𑀧𑀭𑀺𑀦𑀺𑀝𑁆𑀞𑀸𑀦𑀁 𑀪𑀯𑁂, 𑀦 𑀪𑀯𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑁂 𑀘𑁂𑀯 𑀅𑀢𑁆𑀣𑀸 𑀉𑀢𑁆𑀢𑀸𑀦𑀸, 𑀢𑁂𑀲𑀁 𑀲𑀁𑀯𑀡𑁆𑀡𑀦𑀸𑀬 𑀓𑀺𑀁 𑀧𑀬𑁄𑀚𑀦𑀁, 𑀦 𑀧𑀬𑁄𑀚𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀥𑀺𑀧𑁆𑀧𑀸𑀬𑀸𑀦𑀼𑀲𑀦𑁆𑀥𑀻𑀳𑀺 𑀘 𑀅𑀥𑀺𑀧𑁆𑀧𑀸𑀬𑁂𑀦 𑀘 𑀅𑀦𑀼𑀲𑀦𑁆𑀥𑀺𑀦𑀸 𑀘 𑀩𑁆𑀬𑀜𑁆𑀚𑀦𑁂𑀦 𑀘 𑀬𑁂 𑀧𑀦 𑀅𑀢𑁆𑀣𑀸 𑀅𑀦𑀼𑀢𑁆𑀢𑀸𑀦𑀸, 𑀢𑁂 𑀅𑀢𑁆𑀣𑁂, 𑀅𑀢𑁆𑀣𑀸 𑀯𑀸 𑀅𑀯𑀡𑁆𑀡𑀺𑀢𑀸 𑀬𑀲𑁆𑀫𑀸 𑀜𑀸𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀢𑁂𑀲𑀁𑀬𑁂𑀯 𑀅𑀢𑁆𑀣𑀸𑀦𑀁 𑀅𑀬𑀁 𑀲𑀁𑀯𑀡𑁆𑀡𑀦𑀸𑀦𑀬𑁄 𑀳𑁄𑀢𑀻𑀢𑀺. 𑀇𑀢𑀺𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑀢𑁆𑀣𑁄.

𑁧. ‘‘𑀢𑁂𑀦…𑀧𑁂… 𑀯𑁂𑀭𑀜𑁆𑀚𑀸𑀬’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧) 𑀓𑀭𑀡𑀯𑀘𑀦𑁂 𑀯𑀺𑀲𑁂𑀲𑀓𑀸𑀭𑀡𑀫𑀢𑁆𑀣𑀺 𑀯𑀺𑀬, ‘‘𑀢𑁂𑀦…𑀧𑁂… 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀅𑀲𑀤𑀺𑀲𑁄𑀧𑀫𑀸𑀬𑀁. 𑀓𑀺𑀜𑁆𑀘𑀸𑀧𑀺𑀲𑀤𑁆𑀤𑁄 𑀕𑀭𑀳𑀢𑁆𑀣𑀚𑁄𑀢𑀓𑁄, 𑀧𑀦-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑀢𑁆𑀣𑀚𑁄𑀢𑀓𑁄. ‘‘𑀓𑀭𑀡𑀯𑀘𑀦𑁂𑀦𑁂𑀯𑀸’’𑀢𑀺 𑀏𑀢𑁆𑀣 𑀏𑀯𑀓𑀸𑀭𑁂𑀦 𑀉𑀧𑀬𑁄𑀕𑀯𑀘𑀦𑀁 𑀯𑀸 𑀪𑀼𑀫𑁆𑀫𑀯𑀘𑀦𑀁 𑀯𑀸 𑀦𑀺𑀯𑀸𑀭𑁂𑀢𑀺. 𑀅𑀪𑀺𑀮𑀸𑀧𑁄𑀢𑀺 𑀅𑀪𑀺𑀫𑀼𑀔𑀁 𑀅𑀢𑁆𑀣𑀁 𑀮𑀧𑀢𑀻𑀢𑀺 𑀅𑀪𑀺𑀮𑀸𑀧𑁄, 𑀲𑀤𑁆𑀤𑁄. 𑀆𑀤𑀺𑀢𑁄𑀢𑀺 𑀯𑁂𑀭𑀜𑁆𑀚𑀓𑀡𑁆𑀟𑀢𑁄. 𑀏𑀢𑀦𑁆𑀢𑀺 ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬’’𑀦𑁆𑀢𑀺𑀆𑀤𑀺𑀯𑀘𑀦𑀁. ‘‘𑀅𑀜𑁆𑀜𑁂𑀲𑀼𑀧𑀻’’𑀢𑀺 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀇𑀢𑁄 𑀧𑀭𑁂𑀲𑀽’’𑀢𑀺.

𑀬𑀤𑀺 𑀯𑀺𑀲𑁂𑀲𑀓𑀸𑀭𑀡𑀁 𑀦𑀢𑁆𑀣𑀺, 𑀓𑀺𑀁 𑀧𑀦𑁂𑀢𑀲𑁆𑀲 𑀯𑀘𑀦𑁂 𑀧𑀬𑁄𑀚𑀦𑀦𑁆𑀢𑀺 𑀘𑁄𑀤𑁂𑀦𑁆𑀢𑁄 𑀆𑀳 ‘‘𑀓𑀺𑀁 𑀧𑀦𑁂𑀢𑀲𑁆𑀲𑀸’’𑀢𑀺𑀆𑀤𑀺. 𑀏𑀢𑀲𑁆𑀲𑀸𑀢𑀺 ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬’’𑀦𑁆𑀢𑀺𑀆𑀤𑀺𑀯𑀘𑀦𑀲𑁆𑀲. 𑀦𑀺𑀤𑀸𑀦𑀤𑀲𑁆𑀲𑀦𑀁 𑀧𑀬𑁄𑀚𑀦𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀫𑀸𑀳 ‘‘𑀬𑀸 𑀳𑀻’’𑀢𑀺𑀆𑀤𑀺. 𑀬𑀸 𑀧𑀩𑁆𑀩𑀚𑁆𑀚𑀸 𑀘𑁂𑀯 𑀬𑀸 𑀉𑀧𑀲𑀫𑁆𑀧𑀤𑀸 𑀘 𑀪𑀕𑀯𑀢𑁄 𑀅𑀦𑀼𑀜𑁆𑀜𑀸𑀢𑀸𑀢𑀺 𑀬𑁄𑀚𑀦𑀸. 𑀬𑀸𑀦𑀺 𑀘 𑀅𑀦𑀼𑀜𑁆𑀜𑀸𑀢𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀸𑀦𑀻𑀢𑀺 𑀧𑀩𑁆𑀩𑀚𑁆𑀚𑀸𑀤𑀻𑀦𑀺. 𑀅𑀪𑀺𑀲𑀫𑁆𑀩𑁄𑀥𑀺𑀦𑁆𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀜𑁆𑀘. 𑀩𑁄𑀥𑀺𑀫𑀳𑀸𑀫𑀡𑁆𑀟𑁂𑀢𑀺 𑀫𑀳𑀦𑁆𑀢𑀸𑀦𑀁 𑀫𑀕𑁆𑀕𑀜𑀸𑀡𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀦𑀁 𑀧𑀲𑀦𑁆𑀦𑀝𑁆𑀞𑀸𑀦𑁂 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂𑀢𑀺 𑀅𑀢𑁆𑀣𑁄. 𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁.

𑀢𑀢𑁆𑀣𑀸𑀢𑀺 𑀬𑀁 ‘‘𑀢𑁂𑀦 𑀲𑀫𑀬𑁂𑀦 𑀉𑀭𑀼𑀯𑁂𑀮𑀸𑀬’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀢𑁆𑀣. 𑀉𑀭𑀼𑀯𑁂𑀮𑀸𑀬𑀦𑁆𑀢𑀺 𑀏𑀢𑁆𑀣 𑀉𑀭𑀼𑀲𑀤𑁆𑀤𑁄 𑀫𑀳𑀦𑁆𑀢𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀫𑀳𑀸𑀯𑁂𑀮𑀸𑀬’’𑀦𑁆𑀢𑀺. ‘‘𑀯𑀸𑀮𑀺𑀓𑀭𑀸𑀲𑀺𑀫𑁆𑀳𑀻’’𑀢𑀺 𑀇𑀫𑀺𑀦𑀸 𑀯𑁂𑀮𑀸𑀲𑀤𑁆𑀤𑀲𑁆𑀲 𑀭𑀸𑀲𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀓𑀸𑀮𑀲𑀻𑀫𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀺. 𑀬𑀤𑀺 𑀧𑀦 ‘‘𑀉𑀭𑀽’’𑀢𑀺 𑀯𑀸𑀮𑀺𑀓𑀸𑀬 𑀦𑀸𑀫𑀁, ‘‘𑀯𑁂𑀮𑀸’’𑀢𑀺 𑀫𑀭𑀺𑀬𑀸𑀤𑀸𑀬, 𑀏𑀯𑀜𑁆𑀳𑀺 𑀲𑀢𑀺 𑀦𑀦𑀼 𑀉𑀭𑀼𑀬𑀸 𑀯𑁂𑀮𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺 𑀆𑀳 ‘‘𑀯𑁂𑀮𑀸𑀢𑀺𑀓𑁆𑀓𑀫𑀦𑀳𑁂𑀢𑀼 𑀆𑀳𑀝𑀸 𑀉𑀭𑀼 𑀉𑀭𑀼𑀯𑁂𑀮𑀸’’𑀢𑀺. 𑀇𑀫𑀺𑀦𑀸 𑀯𑁂𑀮𑀸𑀬 𑀅𑀢𑀺𑀓𑁆𑀓𑀫𑁄 𑀯𑁂𑀮𑀸 𑀉𑀢𑁆𑀢𑀭𑀧𑀤𑀮𑁄𑀧𑀯𑀲𑁂𑀦, 𑀯𑁂𑀮𑀸𑀬 𑀆𑀳𑀝𑀸 𑀉𑀭𑀼 𑀉𑀭𑀼𑀯𑁂𑀮𑀸 𑀧𑀤𑀯𑀺𑀧𑀭𑀺𑀬𑀸𑀬𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣𑀸𑀢𑀺 ‘‘𑀉𑀭𑀼𑀯𑁂𑀮𑀸𑀬’’𑀦𑁆𑀢𑀺𑀧𑀤𑁂. 𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀅𑀢𑀻𑀢𑁂 𑀓𑀺𑀭𑀸’’𑀢𑀺𑀆𑀤𑀺. 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀧𑀩𑁆𑀩𑀚𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀸𑀧𑀲𑀧𑀩𑁆𑀩𑀚𑁆𑀚𑀦𑁆𑀢𑀺 𑀇𑀲𑀺𑀧𑀩𑁆𑀩𑀚𑁆𑀚𑀁, 𑀦 𑀲𑀫𑀡𑀧𑀩𑁆𑀩𑀚𑁆𑀚𑀁. 𑀓𑀢𑀺𑀓𑀯𑀢𑁆𑀢𑀦𑁆𑀢𑀺 𑀓𑀭𑀡𑀁 𑀓𑀢𑀁, 𑀓𑀢𑁂𑀦 𑀧𑀯𑀢𑁆𑀢𑀁 𑀓𑀢𑀺𑀓𑀁, 𑀢𑀫𑁂𑀯 𑀯𑀢𑁆𑀢𑀁 𑀓𑀢𑀺𑀓𑀯𑀢𑁆𑀢𑀁. 𑀅𑀓𑀁𑀲𑀼 𑀓𑀺𑀭𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁄𑀢𑀺 𑀬𑁄 𑀓𑁄𑀘𑀺. 𑀅𑀜𑁆𑀜𑁄𑀢𑀺 𑀅𑀢𑁆𑀢𑀦𑀸 𑀅𑀧𑀭𑁄. 𑀲𑁄 𑀆𑀓𑀺𑀭𑀢𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀢𑁆𑀢𑀧𑀼𑀝𑁂𑀦𑀸𑀢𑀺 𑀧𑀡𑁆𑀡𑁂𑀦 𑀓𑀢𑁂𑀦 𑀧𑀼𑀝𑁂𑀦. 𑀢𑀢𑁄𑀢𑀺 𑀓𑀢𑀺𑀓𑀯𑀢𑁆𑀢𑀓𑀭𑀡𑀢𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀤𑁂𑀲𑁂. 𑀢𑀢𑁄𑀢𑀺 𑀫𑀳𑀸𑀯𑀸𑀮𑀺𑀓𑀭𑀸𑀲𑀺𑀚𑀦𑀦𑀢𑁄, 𑀧𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀦𑁆𑀢𑀺 𑀢𑀁 𑀧𑀤𑁂𑀲𑀁. 𑀢𑀦𑁆𑀢𑀺 𑀫𑀳𑀸𑀯𑀸𑀮𑀺𑀓𑀭𑀸𑀲𑀺𑀁.

‘‘𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂’’𑀢𑀺 𑀏𑀢𑁆𑀣 𑀅𑀲𑁆𑀲𑀢𑁆𑀣𑀭𑀼𑀓𑁆𑀔𑀲𑁆𑀲 𑀉𑀧𑀘𑀸𑀭𑀯𑀲𑁂𑀦 𑀩𑁄𑀥𑀻𑀢𑀺 𑀦𑀸𑀫𑀮𑀪𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡’’𑀦𑁆𑀢𑀺𑀆𑀤𑀺. 𑀇𑀫𑀺𑀦𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀢𑀻𑀢𑀺 𑀩𑁄𑀥𑀻𑀢𑀺 𑀯𑀘𑀦𑀢𑁆𑀣𑁂𑀦 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁 𑀩𑁄𑀥𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣𑀸𑀢𑀺 𑀩𑁄𑀥𑀺𑀫𑁆𑀳𑀺, 𑀩𑁄𑀥𑀺𑀬𑀁 𑀯𑀸. 𑀲𑀫𑀻𑀧𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀭𑀼𑀓𑁆𑀔𑁄𑀧𑀻𑀢𑀺 𑀧𑀺𑀲𑀤𑁆𑀤𑁂𑀦 𑀦 𑀫𑀕𑁆𑀕𑀜𑀸𑀡𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀫𑀽𑀮𑁂𑀢𑀺 𑀆𑀲𑀦𑁆𑀦𑁂. 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀅𑀦𑀼𑀦𑀸𑀲𑀺𑀓𑀮𑁄𑀧𑀯𑀲𑁂𑀦 𑀲𑀦𑁆𑀥𑀻𑀢𑀺 𑀆𑀳 ‘‘𑀧𑀞𑀫𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺. ‘‘𑀳𑀼𑀢𑁆𑀯𑀸’’𑀢𑀺 𑀇𑀫𑀺𑀦𑀸 ‘‘𑀧𑀞𑀫’’𑀦𑁆𑀢𑀺𑀧𑀤𑀲𑁆𑀲 𑀪𑀸𑀯𑀦𑀧𑀼𑀁𑀲𑀓𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀧𑀞𑀫𑀁𑀬𑁂𑀯𑀸𑀢𑀺 𑀲𑀩𑁆𑀩𑁂𑀲𑀁 𑀚𑀦𑀸𑀦𑀁 𑀧𑀞𑀫𑀫𑁂𑀯 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑁄 𑀏𑀯 𑀧𑀮𑁆𑀮𑀗𑁆𑀓𑁄 𑀏𑀓𑀧𑀮𑁆𑀮𑀗𑁆𑀓𑁄𑀢𑀺 𑀅𑀯𑀥𑀸𑀭𑀡𑀲𑀫𑀸𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑁂𑀦𑁂𑀯 𑀧𑀮𑁆𑀮𑀗𑁆𑀓𑁂𑀦𑀸’’𑀢𑀺. ‘‘𑀲𑀓𑀺𑀁…𑀧𑁂… 𑀆𑀪𑀼𑀚𑀺𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀅𑀯𑀥𑀸𑀭𑀡𑀨𑀮𑀁 𑀤𑀲𑁆𑀲𑁂𑀢𑀺. 𑀧𑀮𑁆𑀮𑀗𑁆𑀓𑁄𑀢𑀺 𑀘 𑀊𑀭𑀼𑀩𑀤𑁆𑀥𑀸𑀲𑀦𑀁. 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑀻𑀢𑀺 𑀏𑀢𑁆𑀣 𑀢𑀤𑀗𑁆𑀕𑀸𑀤𑀻𑀲𑀼 (𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁧𑁦𑁪) 𑀧𑀜𑁆𑀘𑀲𑀼 𑀯𑀺𑀫𑀼𑀢𑁆𑀢𑀻𑀲𑀼 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀲𑀗𑁆𑀔𑀸𑀢𑀸 𑀨𑀮𑀲𑀫𑀸𑀧𑀢𑁆𑀢𑀺 𑀏𑀯𑀸𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔’’𑀦𑁆𑀢𑀺. 𑀨𑀮𑀲𑀫𑀸𑀧𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺. 𑀲𑀸 𑀳𑀺 𑀯𑀺𑀭𑀼𑀤𑁆𑀥𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀫𑀼𑀘𑁆𑀘𑀺𑀢𑀝𑁆𑀞𑁂𑀦 𑀯𑀺𑀫𑀼𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀁 𑀯𑀺𑀫𑀼𑀢𑁆𑀢𑀺𑀲𑀼𑀔𑀁, 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀁 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁. 𑀅𑀣𑀯𑀸 𑀢𑀸𑀬 𑀚𑀸𑀢𑀁 𑀲𑀼𑀔𑀁 𑀯𑀺𑀫𑀼𑀢𑁆𑀢𑀺𑀲𑀼𑀔𑀁, 𑀲𑀓𑀮𑀓𑀺𑀮𑁂𑀲𑀤𑀼𑀓𑁆𑀔𑀽𑀧𑀲𑀫𑀲𑀼𑀔𑀁. ‘‘𑀧𑀝𑀺𑀲𑀁𑀯𑁂𑀤𑀬𑀫𑀸𑀦𑁄’’𑀢𑀺𑀇𑀫𑀺𑀦𑀸 ‘‘𑀧𑀝𑀺𑀲𑀁𑀯𑁂𑀤𑀻’’𑀢𑀺 𑀏𑀢𑁆𑀣 𑀡𑀻𑀧𑀘𑁆𑀘𑀬𑀲𑁆𑀲 𑀓𑀢𑁆𑀢𑀼𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀼𑀦𑀧𑁆𑀧𑀼𑀦𑀁 𑀲𑀼𑀝𑁆𑀞𑀼 𑀯𑀤𑀢𑀺 𑀅𑀦𑀼𑀪𑀯𑀢𑀻𑀢𑀺 𑀧𑀝𑀺𑀲𑀁𑀯𑁂𑀤𑀻. 𑀧𑀝𑀺𑀲𑀁𑀯𑁂𑀤𑀻 𑀳𑀼𑀢𑁆𑀯𑀸 𑀦𑀺𑀲𑀻𑀤𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀘𑁆𑀘𑀬𑀸𑀓𑀸𑀭𑀦𑁆𑀢𑀺 𑀅𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑀸𑀦𑀁 𑀉𑀧𑁆𑀧𑀸𑀤𑀸𑀓𑀸𑀭𑀁. 𑀓𑀲𑁆𑀫𑀸 𑀧𑀘𑁆𑀘𑀬𑀸𑀓𑀸𑀭𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀦𑀸𑀫𑀸𑀢𑀺 𑀆𑀳 ‘‘𑀧𑀘𑁆𑀘𑀬𑀸𑀓𑀸𑀭𑁄 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. ‘‘𑀅𑀜𑁆𑀜𑀫𑀜𑁆𑀜’’𑀦𑁆𑀢𑀺𑀇𑀫𑀺𑀦𑀸 ‘‘𑀧𑀝𑀺𑀘𑁆𑀘𑀸’’𑀢𑀺𑀧𑀤𑀲𑁆𑀲 𑀓𑀫𑁆𑀫𑀁 𑀤𑀲𑁆𑀲𑁂𑀢𑀺, ‘‘𑀲𑀳𑀺𑀢𑁂’’𑀢𑀺𑀇𑀫𑀺𑀦𑀸 𑀲𑀁𑀲𑀤𑁆𑀤𑀲𑁆𑀲𑀢𑁆𑀣𑀁. ‘‘𑀥𑀫𑁆𑀫𑁂’’𑀢𑀺𑀇𑀫𑀺𑀦𑀸 𑀢𑀲𑁆𑀲 𑀲𑀭𑀽𑀧𑀁. 𑀏𑀢𑁆𑀣𑀸𑀢𑀺 𑀇𑀫𑀺𑀲𑁆𑀲𑀁 𑀯𑀺𑀦𑀬𑀝𑁆𑀞𑀓𑀣𑀸𑀬𑀁. 𑀢𑀢𑁆𑀣𑀸𑀢𑀺 ‘‘𑀅𑀦𑀼𑀮𑁄𑀫𑀧𑀝𑀺𑀮𑁄𑀫’’𑀦𑁆𑀢𑀺𑀧𑀤𑁂, 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑁂𑀲𑀼 𑀯𑀸. 𑀲𑁆𑀯𑁂𑀯 𑀧𑀘𑁆𑀘𑀬𑀸𑀓𑀸𑀭𑁄 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. ‘‘𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀓𑀭𑀡𑀢𑁄’’𑀢𑀺𑀇𑀫𑀺𑀦𑀸 𑀅𑀦𑀼𑀮𑁄𑀫𑀲𑀤𑁆𑀤𑀲𑁆𑀲 𑀲𑀪𑀸𑀯𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑁆𑀯𑁂𑀯𑀸𑀢𑀺 𑀧𑀘𑁆𑀘𑀬𑀸𑀓𑀸𑀭𑁄 𑀏𑀯. 𑀢𑀁 𑀓𑀺𑀘𑁆𑀘𑀦𑁆𑀢𑀺 𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀁 𑀢𑀁 𑀓𑀺𑀘𑁆𑀘𑀁. 𑀢𑀲𑁆𑀲 𑀅𑀓𑀭𑀡𑀢𑁄𑀢𑀺 𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀅𑀓𑀭𑀡𑀢𑁄. 𑀇𑀫𑀺𑀦𑀸 𑀧𑀝𑀺𑀮𑁄𑀫𑀲𑀤𑁆𑀤𑀲𑁆𑀲 𑀲𑀪𑀸𑀯𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀦𑀸 𑀧𑀼𑀭𑀺𑀫𑀦𑀬𑁂𑀦𑁂𑀯. 𑀯𑀸𑀢𑀺 𑀅𑀣𑀯𑀸. 𑀧𑀯𑀢𑁆𑀢𑀺𑀬𑀸𑀢𑀺 𑀲𑀁𑀲𑀸𑀭𑀧𑀯𑀢𑁆𑀢𑀺𑀬𑀸. 𑀅𑀦𑀼𑀮𑁄𑀫𑁄𑀢𑀺 𑀅𑀦𑀼𑀓𑀽𑀮𑁄, 𑀅𑀦𑀼𑀭𑀽𑀧𑁄 𑀯𑀸. 𑀇𑀢𑀭𑁄𑀢𑀺 ‘‘𑀅𑀯𑀺𑀚𑁆𑀚𑀸𑀬𑀢𑁆𑀯𑁂𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀧𑀘𑁆𑀘𑀬𑀸𑀓𑀸𑀭𑁄. 𑀢𑀲𑁆𑀲𑀸𑀢𑀺 𑀧𑀯𑀢𑁆𑀢𑀺𑀬𑀸. 𑀧𑀝𑀺𑀮𑁄𑀫𑁄𑀢𑀺 𑀧𑀝𑀺𑀯𑀺𑀭𑀼𑀤𑁆𑀥𑁄, 𑀏𑀢𑁆𑀣𑀸𑀢𑀺 ‘‘𑀅𑀦𑀼𑀮𑁄𑀫𑀧𑀝𑀺𑀮𑁄𑀫’’𑀦𑁆𑀢𑀺𑀧𑀤𑁂. 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺 𑀏𑀢𑁆𑀣 𑀅𑀢𑁆𑀣𑁄 𑀏𑀯𑀸𑀢𑀺 𑀲𑀫𑁆𑀪𑀯𑀢𑁄 𑀢𑀲𑁆𑀲 𑀨𑀮𑀁 𑀯𑀸 ‘‘𑀲𑀤𑁆𑀤𑀦𑁆𑀢𑀭𑀢𑁆𑀣𑀸𑀧𑁄𑀳𑀦𑁂𑀦 𑀲𑀤𑁆𑀤𑁄 𑀅𑀢𑁆𑀣𑀁 𑀯𑀤𑀢𑀻’’𑀢𑀺 𑀯𑀘𑀦𑀢𑁄 (𑀉𑀤𑀸. 𑀅𑀝𑁆𑀞. 𑁧; 𑀤𑀻. 𑀦𑀺. 𑀝𑀻. 𑁧.𑁧; 𑀫. 𑀦𑀺. 𑀝𑀻. 𑁧.𑀫𑀼𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸; 𑀲𑀁. 𑀦𑀺. 𑀝𑀻. 𑁧.𑁧.𑀑𑀖𑀢𑀭𑀬𑀲𑀼𑀢𑁆𑀢𑀯𑀡𑁆𑀡𑀦𑀸; 𑀅. 𑀦𑀺. 𑀝𑀻. 𑁧.𑁧.𑀭𑀼𑀧𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸) 𑀲𑀤𑁆𑀤𑀦𑁆𑀢𑀭𑀢𑁆𑀣𑀸𑀧𑁄𑀳𑀦𑀁 𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀤𑀺𑀢𑁄 𑀧𑀦𑀸’’𑀢𑀺𑀆𑀤𑀺. 𑀬𑀸𑀯𑀲𑀤𑁆𑀤𑁄 𑀅𑀯𑀥𑀺𑀯𑀘𑀦𑁄. 𑀬𑀸𑀯 𑀅𑀦𑁆𑀢𑀁 𑀧𑀸𑀧𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑁄𑀢𑀺 𑀇𑀫𑁂𑀳𑀺 𑀯𑀼𑀢𑁆𑀢𑁂𑀳𑀺 𑀤𑁆𑀯𑀻𑀳𑀺 𑀅𑀢𑁆𑀣𑁂𑀳𑀺. ‘‘𑀫𑀦𑀲𑀸𑀓𑀸𑀲𑀻’’𑀢𑀺 𑀏𑀢𑁆𑀣 𑀇𑀓𑀸𑀭𑀮𑁄𑀧𑀯𑀲𑁂𑀦 𑀲𑀦𑁆𑀥𑀻𑀢𑀺 𑀆𑀳 ‘‘𑀫𑀦𑀲𑀺 𑀅𑀓𑀸𑀲𑀻’’𑀢𑀺. 𑀢𑀢𑁆𑀣𑀸𑀢𑀺 ‘‘𑀫𑀦𑀲𑀸𑀓𑀸𑀲𑀻’’𑀢𑀺𑀧𑀤𑁂. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦. 𑀇𑀤𑀦𑁆𑀢𑀺 𑀇𑀫𑀁 𑀆𑀓𑀸𑀭𑀁. 𑀢𑀢𑁆𑀣𑀸𑀢𑀺 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀧𑀸𑀞𑁂 𑀅𑀯𑀬𑀯𑀢𑁆𑀣𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀲𑀫𑀸𑀲𑀫𑀚𑁆𑀛𑁂 𑀢𑀲𑀤𑁆𑀤𑁂𑀦 𑀧𑀼𑀩𑁆𑀩𑀧𑀤𑀲𑁆𑀲𑁂𑀯 𑀮𑀺𑀗𑁆𑀕𑀯𑀘𑀦𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻𑀢𑀺 𑀆𑀳 ‘‘𑀅𑀯𑀺𑀚𑁆𑀚𑀸 𑀘 𑀲𑀸 𑀧𑀘𑁆𑀘𑀬𑁄 𑀘𑀸’’𑀢𑀺. 𑀯𑀸𑀓𑁆𑀬𑁂 𑀧𑀦 𑀢𑀲𑀤𑁆𑀤𑁂𑀦 𑀧𑀭𑀧𑀤𑀲𑁆𑀲𑁂𑀯 𑀮𑀺𑀗𑁆𑀕𑀯𑀘𑀦𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺. ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸’’𑀢𑀺𑀧𑀤𑀁 ‘‘𑀲𑀫𑁆𑀪𑀯𑀦𑁆𑀢𑀻’’𑀢𑀺𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀢𑀲𑁆𑀫𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀲𑀫𑁆𑀪𑀯𑀦𑁆𑀢𑀻’’𑀢𑀺. 𑀲𑀩𑁆𑀩𑀧𑀤𑁂𑀲𑀽𑀢𑀺 ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 𑀲𑀩𑁆𑀩𑁂𑀲𑀼 𑀧𑀤𑁂𑀲𑀼.

𑀬𑀣𑀸 𑀧𑀦𑀸𑀢𑀺 𑀬𑁂𑀦𑀸𑀓𑀸𑀭𑁂𑀦 𑀧𑀦. 𑀇𑀤𑀦𑁆𑀢𑀺 𑀇𑀫𑀁 𑀆𑀓𑀸𑀭𑀁. 𑀢𑀢𑁆𑀣𑀸𑀢𑀺 ‘‘𑀅𑀯𑀺𑀚𑁆𑀚𑀸𑀬…𑀧𑁂… 𑀦𑀺𑀭𑁄𑀥𑁄’’𑀢𑀺𑀆𑀤𑀺𑀯𑀸𑀓𑁆𑀬𑁂. 𑀅𑀯𑀺𑀚𑁆𑀚𑀸𑀬𑀢𑁆𑀯𑁂𑀯𑀸𑀢𑀺 𑀏𑀢𑁆𑀣 ‘‘𑀪𑀤𑁆𑀤𑀺𑀬𑁄𑀢𑁆𑀯𑁂𑀯𑀸’’𑀢𑀺𑀆𑀤𑀻𑀲𑀼 𑀯𑀺𑀬 ‘‘𑀪𑀤𑁆𑀤𑀺𑀬𑁄 𑀇𑀢𑀺 𑀏𑀯𑀸’’𑀢𑀺 𑀧𑀤𑀘𑁆𑀙𑁂𑀤𑁄 𑀓𑀢𑁆𑀢𑀩𑁆𑀩𑁄, 𑀦 𑀏𑀯𑀁 ‘‘𑀅𑀯𑀺𑀚𑁆𑀚𑀸𑀬 𑀇𑀢𑀺 𑀏𑀯𑀸’’𑀢𑀺, 𑀅𑀣 𑀔𑁄 ‘‘𑀅𑀯𑀺𑀚𑁆𑀚𑀸𑀬 𑀢𑀼 𑀏𑀯𑀸’’𑀢𑀺 𑀓𑀸𑀢𑀩𑁆𑀩𑁄𑀢𑀺 𑀆𑀳 ‘‘𑀅𑀯𑀺𑀚𑁆𑀚𑀸𑀬 𑀢𑀼 𑀏𑀯𑀸’’𑀢𑀺. ‘‘𑀧 𑀅𑀢𑀺𑀫𑁄𑀓𑁆𑀔𑀁 𑀅𑀢𑀺𑀧𑀫𑁄𑀓𑁆𑀔’’𑀦𑁆𑀢𑀺𑀆𑀤𑀻𑀲𑀼 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀯𑀺𑀬 𑀉𑀧𑀲𑀕𑁆𑀕𑀩𑁆𑀬𑀢𑁆𑀢𑀬𑁂𑀦 𑀯𑀼𑀢𑁆𑀢𑀁, 𑀏𑀯𑀫𑀺𑀥 𑀦𑀺𑀧𑀸𑀢𑀩𑁆𑀬𑀢𑁆𑀢𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀏𑀯𑀲𑀤𑁆𑀤𑁂𑀦 𑀲𑀢𑁆𑀢𑀚𑀻𑀯𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀺. 𑀢𑀼𑀲𑀤𑁆𑀤𑁄 𑀧𑀓𑁆𑀔𑀦𑁆𑀢𑀭𑀢𑁆𑀣𑀚𑁄𑀢𑀓𑁄. 𑀅𑀦𑀼𑀮𑁄𑀫𑀧𑀓𑁆𑀔𑀢𑁄 𑀧𑀝𑀺𑀮𑁄𑀫𑀲𑀗𑁆𑀔𑀸𑀢𑀁 𑀧𑀓𑁆𑀔𑀦𑁆𑀢𑀭𑀁 𑀫𑀦𑀲𑀸𑀓𑀸𑀲𑀻𑀢𑀺 𑀅𑀢𑁆𑀣𑁄. 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀲𑀤𑁆𑀤𑁄 𑀅𑀬𑀼𑀢𑁆𑀢𑀲𑀫𑀸𑀲𑁄, 𑀉𑀢𑁆𑀢𑀭𑀧𑀤𑁂𑀦 𑀘 𑀢𑀢𑀺𑀬𑀸𑀲𑀫𑀸𑀲𑁄𑀢𑀺 𑀆𑀳 ‘‘𑀯𑀺𑀭𑀸𑀕𑀲𑀗𑁆𑀔𑀸𑀢𑁂𑀦 𑀫𑀕𑁆𑀕𑁂𑀦 𑀅𑀲𑁂𑀲𑀦𑀺𑀭𑁄𑀥𑀸’’𑀢𑀺. 𑀢𑀢𑁆𑀣 𑀅𑀲𑁂𑀲𑀲𑀤𑁆𑀤𑀁 𑀯𑀺𑀭𑀸𑀕𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑀫𑀓𑀢𑁆𑀯𑀸 𑀦𑀺𑀭𑁄𑀥𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀅𑀢𑁆𑀣𑀲𑁆𑀲 𑀕𑀳𑀡𑀁 𑀅𑀬𑀼𑀢𑁆𑀢𑀲𑀫𑀸𑀲𑁄 𑀦𑀸𑀫. ‘‘𑀫𑀕𑁆𑀕𑁂𑀦𑀸’’𑀢𑀺𑀇𑀫𑀺𑀦𑀸 𑀯𑀺𑀭𑀸𑀕𑀲𑀤𑁆𑀤𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀫𑀕𑁆𑀕𑁄 𑀳𑀺 𑀯𑀺𑀭𑀚𑁆𑀚𑀦𑀝𑁆𑀞𑁂𑀦 𑀯𑀺𑀭𑀸𑀕𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀗𑁆𑀔𑀸𑀭𑀦𑀺𑀭𑁄𑀥𑁄𑀢𑀺 𑀏𑀢𑁆𑀣 𑀫𑀕𑁆𑀕𑁂𑀦 𑀦𑀺𑀭𑁄𑀥𑀢𑁆𑀢𑀸 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀳𑁄𑀢𑀻𑀢𑀺 𑀆𑀳 ‘‘𑀲𑀗𑁆𑀔𑀸𑀭𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺. 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄𑀢𑀺 𑀘 𑀅𑀦𑀼𑀧𑁆𑀧𑀸𑀤𑁂𑀦 𑀦𑀺𑀭𑁄𑀥𑁄 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀦𑀺𑀭𑀼𑀤𑁆𑀥𑀢𑁆𑀢𑀸. 𑀏𑀯𑀦𑁆𑀢𑀺 𑀬𑀣𑀸 𑀅𑀯𑀺𑀚𑁆𑀚𑀸𑀬𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀏𑀯𑀁 𑀢𑀣𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 ‘‘𑀏𑀯𑀫𑁂𑀢𑀲𑁆𑀲𑀸’’𑀢𑀺𑀆𑀤𑀺𑀯𑀘𑀦𑁂. 𑀓𑁂𑀯𑀮𑀲𑀤𑁆𑀤𑁄 𑀲𑀓𑀮𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀲𑀓𑀮𑀲𑁆𑀲𑀸’’𑀢𑀺, 𑀅𑀦𑀯𑀲𑁂𑀲𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀣𑀯𑀸 𑀲𑀢𑁆𑀢𑀚𑀻𑀯𑀸𑀤𑀻𑀳𑀺 𑀅𑀫𑀺𑀲𑁆𑀲𑀺𑀢𑀢𑁆𑀢𑀸 𑀅𑀫𑀺𑀲𑁆𑀲𑀢𑁆𑀣𑁄𑀢𑀺 𑀆𑀳 ‘‘𑀲𑀼𑀤𑁆𑀥𑀲𑁆𑀲 𑀯𑀸’’𑀢𑀺. ‘‘𑀲𑀢𑁆𑀢𑀯𑀺𑀭𑀳𑀺𑀢𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀲𑀼𑀤𑁆𑀥𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲𑀸𑀢𑀺 𑀏𑀢𑁆𑀣 𑀔𑀦𑁆𑀥𑀲𑀤𑁆𑀤𑁄 𑀭𑀸𑀲𑀢𑁆𑀣𑀯𑀸𑀘𑀓𑁄𑀢𑀺 𑀆𑀳 ‘‘𑀤𑀼𑀓𑁆𑀔𑀭𑀸𑀲𑀺𑀲𑁆𑀲𑀸’’𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑁆𑀣 𑀏𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀬𑁆𑀯𑀸𑀬’’𑀦𑁆𑀢𑀺𑀆𑀤𑀺. 𑀢𑀢𑁆𑀣 ‘‘𑀅𑀯𑀺𑀚𑁆𑀚𑀸𑀤𑀺𑀯𑀲𑁂𑀦…𑀧𑁂… 𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺 𑀬𑁆𑀯𑀸𑀬𑀁 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀲𑀫𑀼𑀤𑀬𑁄 𑀘 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀤𑀺𑀢𑀯𑁂𑀮𑀸𑀬𑀦𑁆𑀢𑀺 𑀧𑀸𑀓𑀝𑀯𑁂𑀮𑀸𑀬𑀁 𑀧𑀲𑀺𑀤𑁆𑀥𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀏𑀢𑁆𑀣 𑀇𑀫𑀲𑀤𑁆𑀤𑁄 𑀯𑀼𑀘𑁆𑀘𑀫𑀸𑀦𑀸𑀧𑁂𑀓𑁆𑀔𑁄. 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀯𑀺𑀤𑀺𑀢𑁂 𑀲𑀢𑀻𑀢𑀺 𑀬𑁄𑀚𑀦𑀸. 𑀧𑀚𑀸𑀦𑀦𑀢𑀸𑀬𑀸𑀢𑀺 𑀧𑀓𑀸𑀭𑁂𑀦 𑀚𑀸𑀦𑀦𑀪𑀸𑀯𑀲𑁆𑀲. 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀜𑀸𑀡𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀲𑁄𑀫𑀦𑀲𑁆𑀲𑁂𑀦 𑀏𑀓𑀼𑀧𑁆𑀧𑀸𑀤𑀸𑀤𑀺𑀯𑀲𑁂𑀦 𑀬𑀼𑀢𑁆𑀢𑁂𑀦 𑀜𑀸𑀡𑁂𑀦 𑀲𑀫𑀼𑀝𑁆𑀞𑀸𑀦𑀁, 𑀬𑀼𑀢𑁆𑀢𑀁 𑀯𑀸 𑀜𑀸𑀡𑀲𑀗𑁆𑀔𑀸𑀢𑀁 𑀲𑀫𑀼𑀝𑁆𑀞𑀸𑀦𑀁 𑀉𑀤𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀉𑀤𑀸𑀦𑀦𑁆𑀢𑀺 𑀓𑁂𑀦𑀝𑁆𑀞𑁂𑀦 𑀉𑀤𑀸𑀦𑀁? 𑀉𑀤𑀸𑀦𑀝𑁆𑀞𑁂𑀦, 𑀫𑁄𑀤𑀦𑀝𑁆𑀞𑁂𑀦, 𑀓𑀻𑀴𑀦𑀝𑁆𑀞𑁂𑀦 𑀘𑀸𑀢𑀺 𑀅𑀢𑁆𑀣𑁄. 𑀓𑀺𑀫𑀺𑀤𑀁 𑀉𑀤𑀸𑀦𑀁 𑀦𑀸𑀫? 𑀧𑀻𑀢𑀺𑀯𑁂𑀕𑀲𑀫𑀼𑀝𑁆𑀞𑀸𑀧𑀺𑀢𑁄 𑀉𑀤𑀸𑀳𑀸𑀭𑁄. 𑀬𑀣𑀸 (𑀉𑀤𑀸. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀳𑀺 𑀬𑀁 𑀢𑁂𑀮𑀸𑀤𑀺𑀫𑀺𑀦𑀺𑀢𑀩𑁆𑀩𑀯𑀢𑁆𑀣𑀼 𑀫𑀸𑀦𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀯𑀺𑀲𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 ‘‘𑀅𑀯𑀲𑁂𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀜𑁆𑀘 𑀚𑀮𑀁 𑀢𑀴𑀸𑀓𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 ‘‘𑀑𑀖𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀫𑁂𑀯𑀁 𑀬𑀁 𑀧𑀻𑀢𑀺𑀯𑁂𑀕𑀲𑀫𑀼𑀝𑁆𑀞𑀸𑀧𑀺𑀢𑀁 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀁 𑀳𑀤𑀬𑀁 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑁄 𑀅𑀥𑀺𑀓𑁄 𑀳𑀼𑀢𑁆𑀯𑀸 𑀅𑀦𑁆𑀢𑁄 𑀅𑀲𑀡𑁆𑀞𑀳𑀺𑀢𑁆𑀯𑀸 𑀯𑀘𑀻𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀦𑁆𑀢𑁄 𑀧𑀝𑀺𑀕𑁆𑀕𑀸𑀳𑀓𑀦𑀺𑀭𑀧𑁂𑀓𑁆𑀔𑁄 𑀉𑀤𑀸𑀳𑀸𑀭𑀯𑀺𑀲𑁂𑀲𑁄 ‘‘𑀉𑀤𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀅𑀢𑁆𑀢𑀫𑀦𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀻’’𑀢𑀺 𑀇𑀫𑀺𑀦𑀸 𑀉𑀤𑀥𑀸𑀢𑀼𑀲𑁆𑀲 𑀉𑀤𑀸𑀳𑀸𑀭𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀢𑀲𑁆𑀲𑀸𑀢𑀺 𑀉𑀤𑀸𑀦𑀲𑁆𑀲 𑀅𑀢𑁆𑀣𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀬𑀤𑀸𑀢𑀺 𑀏𑀢𑁆𑀣 𑀤𑀸𑀧𑀘𑁆𑀘𑀬𑀲𑁆𑀲 𑀅𑀢𑁆𑀣𑀯𑀸𑀓𑁆𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀫𑀺𑀁 𑀓𑀸𑀮𑁂’’𑀢𑀺. 𑀳𑀯𑁂𑀢𑀺 ‘‘𑀩𑁆𑀬𑀢𑁆𑀢’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀦𑀺𑀧𑀸𑀢𑁄. 𑀩𑁆𑀬𑀢𑁆𑀢𑀁 𑀧𑀸𑀓𑀝𑀦𑁆𑀢𑀺 𑀳𑀺 𑀅𑀢𑁆𑀣𑁄. 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀏𑀢𑁆𑀣 𑀧𑀸𑀢𑀼𑀦𑀺𑀧𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 ‘‘𑀳𑀯𑁂’’𑀢𑀺 𑀦𑀺𑀧𑀸𑀢𑁂𑀦 𑀯𑀼𑀢𑁆𑀢𑀢𑁆𑀢𑀸 𑀪𑀽𑀥𑀸𑀢𑀼𑀲𑁆𑀲𑁂𑀯 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺. 𑀅𑀦𑀼𑀮𑁄𑀫 𑀧𑀝𑀺𑀮𑁄𑀫 𑀧𑀘𑁆𑀘𑀬𑀸𑀓𑀸𑀭 𑀧𑀝𑀺𑀯𑁂𑀥𑀲𑀸𑀥𑀓𑀸𑀢𑀺 𑀅𑀦𑀼𑀮𑁄𑀫𑀢𑁄 𑀘 𑀧𑀝𑀺𑀮𑁄𑀫𑀢𑁄 𑀘 𑀧𑀘𑁆𑀘𑀬𑀸𑀓𑀸𑀭𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀲𑁆𑀲 𑀲𑀸𑀥𑀓𑀸. 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀢𑀺 𑀩𑁄𑀥𑀺𑀬𑀸 𑀫𑀕𑁆𑀕𑀜𑀸𑀡𑀲𑁆𑀲 𑀧𑀓𑁆𑀔𑁂 𑀪𑀯𑀸 𑀲𑀢𑁆𑀢𑀢𑀺𑀁𑀲 𑀥𑀫𑁆𑀫𑀸. 𑀅𑀣𑀯𑀸 𑀧𑀸𑀢𑀼𑀦𑀺𑀧𑀸𑀢𑁂𑀦 𑀲𑀳 ‘‘𑀪𑀯𑀦𑁆𑀢𑀻’’𑀢𑀺𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀓𑀸𑀲𑀦𑁆𑀢𑀻’’𑀢𑀺. 𑀇𑀫𑀲𑁆𑀫𑀺𑀁 𑀦𑀬𑁂 𑀳𑀯𑁂𑀲𑀤𑁆𑀤𑁄 𑀏𑀓𑀁𑀲𑀢𑁆𑀣𑀯𑀸𑀘𑀓𑁄. 𑀳𑀯𑁂 𑀏𑀓𑀁𑀲𑁂𑀦𑀸𑀢𑀺 𑀳𑀺 𑀅𑀢𑁆𑀣𑁄. 𑀅𑀪𑀺𑀲𑀫𑀬𑀯𑀲𑁂𑀦𑀸𑀢𑀺 𑀫𑀕𑁆𑀕𑀜𑀸𑀡𑀯𑀲𑁂𑀦. 𑀫𑀕𑁆𑀕𑀜𑀸𑀡𑀜𑁆𑀳𑀺 𑀬𑀲𑁆𑀫𑀸 𑀅𑀪𑀺𑀫𑀼𑀔𑀁 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑀫𑁂𑀘𑁆𑀘 𑀅𑀬𑀢𑀺 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀅𑀪𑀺𑀲𑀫𑀬𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀓𑀺𑀮𑁂𑀲𑀲𑀦𑁆𑀢𑀸𑀧𑀦𑀝𑁆𑀞𑁂𑀦𑀸’’𑀢𑀺 𑀇𑀫𑀺𑀦𑀸 𑀆𑀪𑀼𑀲𑁄 𑀓𑀺𑀮𑁂𑀲𑁂 𑀢𑀸𑀧𑁂𑀢𑀻𑀢𑀺 𑀆𑀢𑀸𑀧𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀦 𑀯𑀻𑀭𑀺𑀬𑀲𑀸𑀫𑀜𑁆𑀜𑀁 𑀳𑁄𑀢𑀺, 𑀅𑀣 𑀔𑁄 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀫𑁂𑀯𑀸𑀢𑀺 𑀆𑀳 ‘‘𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀯𑀢𑁄’’𑀢𑀺. 𑀇𑀫𑀺𑀦𑀸 𑀆𑀢𑀸𑀧𑀻𑀢𑀺 𑀏𑀢𑁆𑀣 𑀈𑀧𑀘𑁆𑀘𑀬𑀲𑁆𑀲 𑀯𑀦𑁆𑀢𑀼𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑁂𑀦 𑀘𑀸𑀢𑀺 𑀓𑀲𑀺𑀡𑀸𑀤𑀺𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀚𑁆𑀛𑀸𑀦𑀲𑀪𑀸𑀯𑁂𑀦 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀛𑀸𑀦𑁂𑀦 𑀘. 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑁂𑀦 𑀘𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀚𑁆𑀛𑀸𑀦𑀲𑀪𑀸𑀯𑁂𑀦 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀲𑀗𑁆𑀔𑀸𑀢𑁂𑀦 𑀛𑀸𑀦𑁂𑀦 𑀘. ‘‘𑀩𑀸𑀳𑀺𑀢𑀧𑀸𑀧𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀩𑀸𑀳𑀺𑀢𑁄 𑀅𑀡𑁄 𑀧𑀸𑀧𑁄 𑀅𑀦𑁂𑀦𑀸𑀢𑀺 𑀩𑁆𑀭𑀸𑀳𑁆𑀫𑀡𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀡𑀲𑀤𑁆𑀤𑁄 𑀳𑀺 𑀧𑀸𑀧𑀧𑀭𑀺𑀬𑀸𑀬𑁄. ‘‘𑀔𑀻𑀡𑀸𑀲𑀯𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀅𑀣𑀲𑁆𑀲𑀸𑀢𑀺 𑀅𑀣 𑀅𑀲𑁆𑀲, 𑀢𑀲𑁆𑀫𑀺𑀁 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀬𑀸 𑀏𑀢𑀸 𑀓𑀗𑁆𑀔𑀸 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀓𑁄 𑀦𑀼 𑀔𑁄…𑀧𑁂… 𑀅𑀯𑁄𑀘𑀸’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁧𑁨) 𑀦𑀬𑁂𑀦 𑀘 𑀢𑀣𑀸 ‘‘𑀓𑀢𑀫𑀁 𑀦𑀼 𑀔𑁄…𑀧𑁂… 𑀅𑀯𑁄𑀘𑀸’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁩𑁫) 𑀦𑀬𑁂𑀦 𑀘 𑀧𑀘𑁆𑀘𑀬𑀸𑀓𑀸𑀭𑁂 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀦𑁄 𑀓𑀮𑁆𑀮𑁄 𑀧𑀜𑁆𑀳𑁄𑀢𑀺 𑀅𑀬𑀼𑀢𑁆𑀢𑁄 𑀧𑀜𑁆𑀳𑁄, 𑀤𑀼𑀧𑁆𑀧𑀜𑁆𑀳𑁄 𑀏𑀲𑁄𑀢𑀺 𑀅𑀢𑁆𑀣𑁄. 𑀢𑀣𑀸𑀢𑀺 𑀏𑀯𑀁, 𑀢𑀢𑁄 𑀅𑀜𑁆𑀜𑀣𑀸 𑀯𑀸. 𑀬𑀸 𑀘 𑀲𑁄𑀴𑀲 𑀓𑀗𑁆𑀔𑀸 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀆𑀕𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀓𑀗𑁆𑀔𑀸𑀢𑀺 𑀬𑁄𑀚𑀦𑀸. 𑀲𑁄𑀴𑀲 𑀓𑀗𑁆𑀔𑀸𑀢𑀺 𑀅𑀢𑀻𑀢𑀯𑀺𑀲𑀬𑀸 𑀧𑀜𑁆𑀘, 𑀅𑀦𑀸𑀕𑀢𑀯𑀺𑀲𑀬𑀸 𑀧𑀜𑁆𑀘, 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀺𑀲𑀬𑀸 𑀙𑀸𑀢𑀺 𑀲𑁄𑀴𑀲𑀯𑀺𑀥𑀸 𑀓𑀗𑁆𑀔𑀸. 𑀯𑀧𑀬𑀦𑁆𑀢𑀻𑀢𑀺 𑀯𑀺 𑀅𑀧𑀬𑀦𑁆𑀢𑀺, 𑀇𑀓𑀸𑀭𑀮𑁄𑀧𑁂𑀦𑀸𑀬𑀁 𑀲𑀦𑁆𑀥𑀺. 𑀯𑀺𑀢𑁆𑀬𑀽𑀧𑀲𑀕𑁆𑀕𑁄 𑀥𑀸𑀢𑁆𑀯𑀢𑁆𑀣𑀸𑀦𑀼𑀯𑀢𑁆𑀢𑀓𑁄, 𑀅𑀧𑀬𑀦𑁆𑀢𑀺 𑁋 𑀲𑀤𑁆𑀤𑁄 𑀅𑀧𑀕𑀫𑀦𑀢𑁆𑀣𑁄𑀢𑀺 𑀆𑀳 ‘‘𑀅𑀧𑀕𑀘𑁆𑀙𑀦𑁆𑀢𑀻’’𑀢𑀺. ‘‘𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺𑀇𑀫𑀺𑀦𑀸 𑀅𑀧𑀕𑀫𑀦𑀢𑁆𑀣𑀫𑁂𑀯 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀤𑀻𑀧𑁂𑀢𑀺. ‘‘𑀓𑀲𑁆𑀫𑀸’’𑀢𑀺 𑀇𑀫𑀺𑀦𑀸 ‘‘𑀬𑀢𑁄 𑀧𑀚𑀸𑀦𑀸𑀢𑀺 𑀲𑀳𑁂𑀢𑀼𑀥𑀫𑁆𑀫’’𑀦𑁆𑀢𑀺 𑀯𑀸𑀓𑁆𑀬𑀲𑁆𑀲 𑀧𑀼𑀩𑁆𑀩𑀯𑀸𑀓𑁆𑀬𑀓𑀸𑀭𑀡𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀳𑁂𑀢𑀼𑀥𑀫𑁆𑀫𑀦𑁆𑀢𑀺 𑀏𑀢𑁆𑀣 𑀲𑀳 𑀅𑀯𑀺𑀚𑁆𑀚𑀸𑀤𑀺𑀳𑁂𑀢𑀼𑀦𑀸𑀢𑀺 𑀲𑀳𑁂𑀢𑀼, 𑀲𑀗𑁆𑀔𑀸𑀭𑀸𑀤𑀺𑀓𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁄. 𑀲𑀳𑁂𑀢𑀼 𑀘 𑀲𑁄 𑀥𑀫𑁆𑀫𑁄 𑀘𑀸𑀢𑀺 𑀲𑀳𑁂𑀢𑀼𑀥𑀫𑁆𑀫𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀯𑀺𑀚𑁆𑀚𑀸𑀤𑀺𑀓𑁂𑀦𑀸’’𑀢𑀺𑀆𑀤𑀺. ‘‘𑀧𑀝𑀺𑀯𑀺𑀚𑁆𑀛𑀢𑀻’’𑀢𑀺 𑀇𑀫𑀺𑀦𑀸 𑀧𑀚𑀸𑀦𑀸 𑀢𑀻𑀢𑀺 𑀏𑀢𑁆𑀣 𑀜𑀸𑀥𑀸𑀢𑀼𑀬𑀸 𑀅𑀯𑀩𑁄𑀥𑀦𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀫𑀸𑀭𑀡𑀢𑁄𑀲𑀦𑀸𑀤𑀺𑀓𑁂 𑀅𑀢𑁆𑀣𑁂 𑀦𑀺𑀯𑀢𑁆𑀢𑁂𑀢𑀺. 𑀇𑀢𑀻𑀢𑀺 𑀢𑀲𑁆𑀫𑀸, 𑀯𑀧𑀬𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁨. 𑀧𑀘𑁆𑀘𑀬𑀓𑁆𑀔𑀬𑀲𑁆𑀲𑀸𑀢𑀺 𑀧𑀘𑁆𑀘𑀬𑀸𑀦𑀁 𑀔𑀬𑀝𑁆𑀞𑀸𑀦𑀲𑁆𑀲 𑀅𑀲𑀗𑁆𑀔𑀢𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀭𑀸𑀢𑀺 𑀤𑀼𑀢𑀺𑀬𑀉𑀤𑀸𑀦𑁂. 𑀔𑀻𑀬𑀦𑁆𑀢𑀺 𑀧𑀘𑁆𑀘𑀬𑀸 𑀏𑀢𑁆𑀣𑀸𑀢𑀺 𑀔𑀬𑀁, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀆𑀳 ‘‘𑀧𑀘𑁆𑀘𑀬𑀸𑀦𑀁 𑀔𑀬𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺. ‘‘𑀅𑀜𑁆𑀜𑀸𑀲𑀻’’𑀢𑀺 𑀇𑀫𑀺𑀦𑀸 𑀅𑀯𑁂𑀤𑀻𑀢𑀺 𑀏𑀢𑁆𑀣 𑀯𑀺𑀤𑀥𑀸𑀢𑀼𑀬𑀸 𑀜𑀸𑀡𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀅𑀦𑀼𑀪𑀯𑀦𑀮𑀸𑀪𑀸𑀤𑀺𑀓𑁂 𑀦𑀺𑀯𑀢𑁆𑀢𑁂𑀢𑀺. 𑀢𑀲𑁆𑀫𑀸 𑀯𑀧𑀬𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀢𑀺 𑀧𑀞𑀫𑀉𑀤𑀸𑀦𑁂 𑀯𑀼𑀢𑁆𑀢𑀲𑀤𑀺𑀲𑀸. 𑀥𑀫𑁆𑀫𑀸𑀢𑀺 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸, 𑀘𑀢𑀼𑀅𑀭𑀺𑀬𑀲𑀘𑁆𑀘𑀥𑀫𑁆𑀫𑀸 𑀯𑀸.

𑁩. 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂𑀦 𑀫𑀕𑁆𑀕𑁂𑀦 𑀯𑀺𑀤𑀺𑀢𑁄𑀢𑀺 𑀬𑁄𑀚𑀦𑀸. 𑀢𑀢𑁆𑀭𑀸𑀢𑀺 𑀢𑀢𑀺𑀬𑀉𑀤𑀸𑀦𑁂. 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀢𑀺𑀝𑁆𑀞𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀳𑀺 𑀉𑀧𑁆𑀧𑀦𑁆𑀦𑁂𑀳𑀺 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀳𑀺 𑀯𑀸 𑀬𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀘𑀢𑀼𑀲𑀘𑁆𑀘𑀥𑀫𑁆𑀫𑀸 𑀧𑀸𑀢𑀼𑀪𑀽𑀢𑀸, 𑀢𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀯𑀸 𑀯𑀺𑀥𑀽𑀧𑀬𑀦𑁆𑀢𑀺 𑀬𑁄𑀚𑀦𑀸. 𑀯𑀼𑀢𑁆𑀢𑀧𑁆𑀧𑀓𑀸𑀭𑀦𑁆𑀢𑀺 𑀲𑀼𑀢𑁆𑀢𑀦𑀺𑀧𑀸𑀢𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁. 𑀫𑀸𑀭𑀲𑁂𑀦𑀦𑁆𑀢𑀺 𑀓𑀸𑀫𑀸𑀤𑀺𑀓𑀁 𑀤𑀲𑀯𑀺𑀥𑀁 𑀫𑀸𑀭𑀲𑁂𑀦𑀁. ‘‘𑀯𑀺𑀥𑀫𑁂𑀦𑁆𑀢𑁄’’𑀢𑀺𑀇𑀫𑀺𑀦𑀸 𑀯𑀺𑀥𑀽𑀧𑀬𑀦𑁆𑀢𑀺 𑀏𑀢𑁆𑀣 𑀥𑀽𑀧𑀥𑀸𑀢𑀼𑀬𑀸 𑀯𑀺𑀥𑀫𑀦𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀮𑀺𑀫𑁆𑀧𑀦𑀢𑁆𑀣𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀺. ‘‘𑀯𑀺𑀤𑁆𑀥𑀁 𑀲𑁂𑀦𑁆𑀢𑁄’’𑀢𑀺𑀇𑀫𑀺𑀦𑀸 𑀯𑀺𑀥𑀫𑁂𑀦𑁆𑀢𑁄𑀢𑀺 𑀏𑀢𑁆𑀣 𑀥𑀫𑀼𑀥𑀸𑀢𑀼𑀬𑀸 𑀥𑀁𑀲𑀦𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀲𑀤𑁆𑀤𑀢𑁆𑀣𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀺. ‘‘𑀲𑀽𑀭𑀺𑀬𑁄𑀯 𑀑𑀪𑀸𑀲𑀬’’𑀦𑁆𑀢𑀺𑀧𑀤𑀲𑁆𑀲 ‘‘𑀲𑀽𑀭𑀺𑀬𑁄 𑀇𑀯𑀸’’𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸’’𑀢𑀺𑀆𑀤𑀺. 𑀲𑀽𑀭𑀺𑀬𑁄𑀢𑀺 𑀆𑀤𑀺𑀘𑁆𑀘𑁄. 𑀲𑁄 𑀳𑀺 𑀬𑀲𑁆𑀫𑀸 𑀧𑀞𑀫𑀓𑀧𑁆𑀧𑀺𑀓𑀸𑀦𑀁 𑀲𑀽𑀭𑀁 𑀚𑀦𑁂𑀢𑀺, 𑀢𑀲𑁆𑀫𑀸 𑀲𑀽𑀭𑀺𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀩𑁆𑀪𑀼𑀕𑁆𑀕𑀢𑁄𑀢𑀺 𑀅𑀪𑀺𑀫𑀼𑀔𑀁 𑀉𑀤𑁆𑀥𑀁 𑀆𑀓𑀸𑀲𑀁 𑀕𑀢𑁄, 𑀅𑀩𑁆𑀪𑀁 𑀯𑀸 𑀆𑀓𑀸𑀲𑀁 𑀉𑀕𑁆𑀕𑀢𑁄. 𑀅𑀩𑁆𑀪𑀲𑀤𑁆𑀤𑁄 𑀳𑀺 𑀆𑀓𑀸𑀲𑀧𑀭𑀺𑀬𑀸𑀬𑁄. 𑀆𑀓𑀸𑀲𑁄 𑀳𑀺 𑀬𑀲𑁆𑀫𑀸 𑀆𑀪𑀼𑀲𑁄 𑀪𑀸𑀢𑀺 𑀤𑀺𑀧𑁆𑀧𑀢𑀺, 𑀢𑀲𑁆𑀫𑀸 ‘‘𑀅𑀩𑁆𑀪’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀬𑀣𑀸 𑀲𑀽𑀭𑀺𑀬𑁄 𑀑𑀪𑀸𑀲𑀬𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀏𑀯𑀁 𑀩𑁆𑀭𑀸𑀳𑁆𑀫𑀡𑁄 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑁄. 𑀬𑀣𑀸 𑀲𑀽𑀭𑀺𑀬𑁄 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀏𑀯𑀁 𑀩𑁆𑀭𑀸𑀳𑁆𑀫𑀡𑁄 𑀫𑀸𑀭𑀲𑁂𑀦𑀫𑁆𑀧𑀺 𑀯𑀺𑀥𑀽𑀧𑀬𑀦𑁆𑀢𑁄𑀢𑀺.

𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀢𑀻𑀲𑀼 𑀉𑀤𑀸𑀦𑁂𑀲𑀼. 𑀧𑀞𑀫𑀁 𑀉𑀤𑀸𑀦𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀲𑁆𑀲𑀸 𑀔𑀦𑁆𑀥𑀓𑀧𑀸𑀴𑀺𑀬𑀸 𑀉𑀤𑀸𑀦𑀧𑀸𑀴𑀺𑀁 𑀲𑀁𑀲𑀦𑁆𑀤𑀦𑁆𑀢𑁄 𑀆𑀳 ‘‘𑀉𑀤𑀸𑀦𑁂 𑀧𑀦𑀸’’𑀢𑀺𑀆𑀤𑀺. 𑀉𑀤𑀸𑀦𑁂 𑀧𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀉𑀤𑀸𑀦𑁂 𑀯𑀼𑀢𑁆𑀢𑀯𑀘𑀦𑀁, 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀘𑁆𑀘𑀬𑁂𑀦𑀸𑀢𑀺 𑀅𑀢𑀺𑀓𑁆𑀓𑀫𑁂𑀦, 𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀢𑀤𑀸 𑀳𑀻’’𑀢𑀺𑀆𑀤𑀺. 𑀢𑀤𑀸𑀢𑀺 ‘‘𑀲𑁆𑀯𑁂 𑀆𑀲𑀦𑀸 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀭𑀢𑁆𑀢𑀺𑀁 𑀉𑀧𑁆𑀧𑀸𑀤𑀺𑀢𑀫𑀦𑀲𑀺𑀓𑀸𑀭𑀓𑀸𑀮𑁂. 𑀪𑀕𑀯𑀸 𑀫𑀦𑀲𑀸𑀓𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀭𑀺𑀫𑀸 𑀤𑁆𑀯𑁂 𑀉𑀤𑀸𑀦𑀕𑀸𑀣𑀸 𑀆𑀦𑀼𑀪𑀸𑀯𑀤𑀻𑀧𑀺𑀓𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀧𑀘𑁆𑀘𑀬𑀸𑀓𑀸𑀭𑀧𑀚𑀸𑀦𑀦𑀧𑀘𑁆𑀘𑀬𑀓𑁆𑀔𑀬𑀸𑀥𑀺𑀕𑀫𑀲𑁆𑀲. 𑀏𑀓𑁂𑀓𑀫𑁂𑀯𑀸𑀢𑀺 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑁂𑀲𑀼 𑀏𑀓𑁂𑀓𑀫𑁂𑀯. 𑀧𑀞𑀫𑀬𑀸𑀫𑀜𑁆𑀘𑀸𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁, 𑀦𑀺𑀭𑀦𑁆𑀢𑀭𑀁 𑀧𑀞𑀫𑀬𑀸𑀫𑀓𑀸𑀮𑀦𑁆𑀢𑀺 𑀅𑀢𑁆𑀣𑁄. 𑀇𑀥 𑀧𑀦𑀸𑀢𑀺 𑀇𑀫𑀲𑁆𑀫𑀺𑀁 𑀔𑀦𑁆𑀥𑀓𑁂 𑀧𑀦. 𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀪𑀕𑀯𑀸 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀪𑀕𑀯𑀸 𑀉𑀤𑀸𑀦𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀸𑀢𑀺 𑀯𑀺𑀲𑀸𑀔𑀸𑀬 𑀬𑀼𑀢𑁆𑀢𑀸𑀬 𑀧𑀼𑀡𑁆𑀡𑀫𑀸𑀬. ‘‘𑀅𑀭𑀼𑀡𑁄 𑀉𑀕𑁆𑀕𑀫𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀲𑀫𑀬𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀜𑁆𑀜𑀼𑀢𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀪𑀸𑀯𑀁, 𑀅𑀦𑀸𑀯𑀭𑀡𑀜𑀸𑀡𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁄𑀢𑀺 𑀅𑀭𑀼𑀡𑀼𑀕𑁆𑀕𑀫𑀦𑀢𑁄. 𑀢𑀁 𑀤𑀺𑀯𑀲𑀦𑁆𑀢𑀺 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀢𑀲𑁆𑀫𑀺𑀁 𑀤𑀺𑀯𑀲𑁂𑀢𑀺 𑀳𑀺 𑀅𑀢𑁆𑀣𑁄. 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀯𑀸, 𑀢𑀁 𑀤𑀺𑀯𑀲𑀁 𑀓𑀸𑀮𑀦𑁆𑀢𑀺 𑀳𑀺 𑀅𑀢𑁆𑀣𑁄. 𑀏𑀯𑀁 𑀫𑀦𑀲𑀺 𑀓𑀢𑁆𑀯𑀸𑀢𑀺 𑀬𑀣𑀸 𑀢𑀁 𑀤𑀺𑀯𑀲𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀫𑀦𑀲𑀸𑀓𑀸𑀲𑀺, 𑀏𑀯𑀁 𑀫𑀦𑀲𑀺 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀢𑀻𑀢𑀺 𑀏𑀯𑀁. ‘‘𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂…𑀧𑁂… 𑀦𑀺𑀲𑀻𑀤𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀢𑀁 𑀲𑀢𑁆𑀢𑀸𑀳𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀣𑁂𑀯𑀸𑀢𑀺 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂𑀬𑁂𑀯.