𑁪. 𑀘𑀢𑀼𑀢𑁆𑀣𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁭𑁪𑁮. 𑀘𑀢𑀼𑀢𑁆𑀣𑁂 𑀓𑀺𑀡𑀸𑀢𑀺 𑀅𑀦𑁂𑀦𑀸𑀢𑀺 𑀓𑀬𑀦𑁆𑀢𑀺 𑀯𑀘𑀦𑀢𑁆𑀣𑁂𑀦 𑀫𑀽𑀮𑀁 𑀓𑀬𑀁 𑀦𑀸𑀫𑀸𑀢𑀺 𑀆𑀳 ‘‘𑀫𑀽𑀮𑁂𑀦𑀸’’𑀢𑀺. 𑀲𑀸𑀢𑀺 𑀣𑀼𑀮𑁆𑀮𑀦𑀦𑁆𑀤𑀸, 𑀆𑀳 𑀓𑀺𑀭𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀜𑀸𑀥𑀸𑀢𑀼𑀬𑀸 𑀅𑀯𑀩𑁄𑀥𑀦𑀢𑁆𑀣𑀢𑁄 𑀅𑀜𑁆𑀜𑀫𑁆𑀧𑀺 𑀜𑀸𑀥𑀸𑀢𑀼𑀬𑀸 𑀬𑀸𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀸𑀘𑀺𑀢𑁆𑀯𑀸 𑀯𑀸’’𑀢𑀺.

𑁭𑁫𑁨. 𑀬𑀦𑁆𑀢𑀺 𑀲𑀩𑁆𑀩𑀺𑀢𑁂𑀮𑀸𑀤𑀺. 𑀢𑀜𑁆𑀜𑁂𑀯𑀸𑀢𑀺 𑀲𑀩𑁆𑀩𑀺𑀢𑁂𑀮𑀸𑀤𑀺𑀫𑁂𑀯. 𑀬𑀫𑀓𑀦𑁆𑀢𑀺 𑀲𑀩𑁆𑀩𑀺𑀁 𑀲𑀳 𑀢𑁂𑀮𑁂𑀦 𑀬𑀼𑀕𑀴𑀁 𑀓𑀢𑁆𑀯𑀸. 𑀯𑁂𑀚𑁆𑀚𑁂𑀦𑀸𑀢𑀺 𑀪𑀺𑀲𑀓𑁆𑀓𑁂𑀦. 𑀲𑁄 𑀳𑀺 𑀆𑀬𑀼𑀩𑁆𑀩𑁂𑀤𑀲𑀗𑁆𑀔𑀸𑀢𑀁 𑀯𑀺𑀚𑁆𑀚𑀁 𑀚𑀸𑀦𑀸𑀢𑀻𑀢𑀺 𑀯𑁂𑀚𑁆𑀚𑁄𑀢𑀺 𑀘 𑀭𑁄𑀕𑀜𑁆𑀘 𑀢𑀲𑁆𑀲 𑀦𑀺𑀤𑀸𑀦𑀜𑁆𑀘 𑀪𑁂𑀲𑀚𑁆𑀚𑀜𑁆𑀘 𑀯𑀺𑀤𑀢𑀺 𑀚𑀸𑀦𑀸𑀢𑀻𑀢𑀺𑀧𑀺 𑀯𑁂𑀚𑁆𑀚𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑀢𑁄𑀢𑀺 𑀯𑁂𑀚𑁆𑀚𑁂𑀦 𑀯𑀼𑀢𑁆𑀢𑀓𑀸𑀭𑀡𑀸. 𑀓𑀳𑀸𑀧𑀡𑀲𑁆𑀲𑀸𑀢𑀺 𑀓𑀳𑀸𑀧𑀡𑁂𑀦, 𑀆𑀪𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄𑀢𑀺. 𑀘𑀢𑀼𑀢𑁆𑀣𑀁.