𑁧𑁧. 𑀏𑀓𑀸𑀤𑀲𑀫𑀲𑀺𑀓𑁆𑀔𑀸𑀧𑀤𑀁

𑁧𑁧𑁬𑁭. 𑀏𑀓𑀸𑀤𑀲𑀫𑁂 𑀢𑀢𑁆𑀣𑀸𑀢𑀺 ‘‘𑀧𑀸𑀭𑀺𑀯𑀸𑀲𑀺𑀬𑀙𑀦𑁆𑀤𑀤𑀸𑀦𑁂𑀦𑀸’’𑀢𑀺 𑀯𑀘𑀦𑁂. 𑀅𑀜𑁆𑀜𑀢𑁆𑀭𑀸𑀢𑀺 𑀅𑀜𑁆𑀜𑀁 𑀞𑀸𑀦𑀁.

𑀏𑀓𑀁 𑀅𑀚𑁆𑀛𑁂𑀲𑀦𑁆𑀢𑀻𑀢𑀺 𑀏𑀓𑀁 𑀪𑀺𑀓𑁆𑀔𑀼𑀁 𑀥𑀫𑁆𑀫𑀓𑀣𑀦𑀢𑁆𑀣𑀸𑀬 𑀦𑀺𑀬𑁆𑀬𑁄𑀚𑁂𑀦𑁆𑀢𑀺. 𑀅𑀜𑁆𑀜𑀁 𑀧𑀦𑀸𑀢𑀺 𑀉𑀧𑁄𑀲𑀣𑀺𑀓𑀢𑁄 𑀅𑀜𑁆𑀜𑀁 𑀧𑀦.

𑀢𑀢𑁆𑀭𑀸𑀢𑀺 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼. 𑀲𑀼𑀪𑀸𑀲𑀼𑀪𑀁 𑀦𑀓𑁆𑀔𑀢𑁆𑀢𑀁 𑀧𑀞𑀢𑀻𑀢𑀺 𑀦𑀓𑁆𑀔𑀢𑁆𑀢𑀧𑀸𑀞𑀓𑁄. 𑀤𑀸𑀭𑀼𑀡𑀦𑁆𑀢𑀺 𑀓𑀓𑁆𑀔𑀴𑀁. 𑀢𑁂𑀢𑀺 𑀪𑀺𑀓𑁆𑀔𑀽. 𑀢𑀲𑁆𑀲𑀸𑀢𑀺 𑀦𑀓𑁆𑀔𑀢𑁆𑀢𑀧𑀸𑀞𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲. ‘‘𑀦𑀓𑁆𑀔𑀢𑁆𑀢𑀁 𑀧𑀝𑀺𑀫𑀸𑀦𑁂𑀦𑁆𑀢𑀁, 𑀅𑀢𑁆𑀣𑁄 𑀩𑀸𑀮𑀁 𑀉𑀧𑀘𑁆𑀘𑀕𑀸’’𑀢𑀺𑀚𑀸𑀢𑀓𑀧𑀸𑀴𑀺 (𑀚𑀸. 𑁧.𑁧.𑁪𑁯). 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀦𑀓𑁆𑀔𑀢𑁆𑀢𑀁 𑀧𑀝𑀺𑀫𑀸𑀦𑁂𑀦𑁆𑀢𑀁 𑀩𑀸𑀮𑀁 𑀅𑀢𑁆𑀣𑁄 𑀳𑀺𑀢𑀁 𑀉𑀧𑀘𑁆𑀘𑀕𑀸 𑀉𑀧𑀲𑀫𑀻𑀧𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀕𑀸𑀢𑀺. 𑀏𑀓𑀸𑀤𑀲𑀫𑀁.